ᠰᠥᠮᠪᠥᠷ ᠣᠪᠣᠭᠠ – ᠴᠣ ᠂ ᠣᠷᠱᠤᠨ Сүмбэр овоо – Чо ᠂ Оршин
274ᠰᠥᠮᠪᠥᠷ ᠣᠪᠣᠭᠠ
ᠥᠷᠭᠡᠨ ᠲᠦᠮᠡᠨ ᠦ᠌ ᠲᠠᠬᠢᠯᠭᠠ
ᠥᠨᠳᠥᠷ ᠣᠪᠣᠭᠠ ᠶ᠋ᠢᠨ ᠡᠭᠦᠰᠦᠯ
ᠨᠠᠮᠵᠢᠷ ᠸᠠᠩᠲᠠᠨ ᠲᠤᠶᠠᠭᠠ ᠲᠠᠢ
ᠨᠠᠢ᠍ᠮᠠᠨ ᠵᠣᠪᠬᠢᠰ ᠨᠢ ᠲᠡᠭᠰᠢᠬᠡᠨ᠂
ᠨᠠᠷᠠᠨ ᠰᠠᠷᠠᠨ ᠤ᠋ ᠭᠡᠷᠡᠯ ᠲᠡᠢ
ᠨᠠᠮᠬᠠᠨ ᠳᠡᠨᠵᠢ ᠨᠢ ᠠᠭᠤᠳᠠᠮᠬᠠᠨ᠃
ᠡᠷᠲᠡ ᠳᠡᠭᠡᠳᠦ ᠦᠶᠡ ᠳ᠋ᠦ᠍
ᠰᠤᠮᠤᠨ ᠨᠤᠲᠤᠭ ᠤ᠋ᠨ ᠭᠠᠵᠠᠷ
ᠡᠳᠦᠭᠡ ᠴᠠᠭ ᠤ᠋ᠨ ᠡᠷᠡᠨ ᠳ᠋ᠦ᠍
ᠰᠣᠯᠣᠩᠭᠠ ᠲᠠᠲᠠᠭᠰᠠᠨ ᠣᠷᠣᠨ᠃
ᠴᠣᠬᠣᠯᠠᠭᠰᠠᠨ ᠣᠯᠠᠨ ᠲᠦᠮᠡᠨ ᠲᠡᠢ
ᠴᠣᠯ ᠭᠦᠯᠦ ᠴᠠᠭᠠᠨ ᠬᠣᠰᠢᠭᠤ ① ᠶ᠋ᠢᠨ
ᠰᠤᠮᠤ ᠨᠢᠭᠤᠳ ② ᠡᠬᠢᠯᠡᠬᠦ᠂
ᠰᠤᠳᠤᠷ ᠲᠠᠮᠠᠭᠠ ᠶ᠋ᠢᠨ ᠦᠶᠡᠰ
ᠭᠠᠵᠠᠷ ᠰᠢᠨᠵᠢᠭᠴᠢ ᠪᠡᠨ ᠲᠣᠮᠢᠯᠠᠵᠤ
ᠭᠠᠩᠭᠠᠩ ᠬᠣᠯᠠ ᠪᠠᠨ ᠶᠡᠭᠦᠯᠡᠨ᠂
ᠭᠠᠨᠵᠤᠭᠠ ᠬᠡᠢᠰᠬᠡᠨ ᠮᠣᠷᠳᠠᠵᠤ
ᠭᠠᠯᠪᠠ ᠶ᠋ᠢ ᠬᠡᠭᠡᠷᠡᠯᠡᠨ ᠲᠣᠭᠣᠷᠢᠭᠠᠳ
ᠤᠷᠭᠤᠬᠤ ᠨᠠᠷᠠ ᠶ᠋ᠢ ᠤᠭᠲᠤᠵᠤ
ᠠᠭᠤᠯᠠ ᠤᠰᠤ ᠶ᠋ᠢ ᠬᠠᠢᠵᠤ
ᠤᠳᠤᠮ ᠤᠭᠰᠠᠭᠠ ᠪᠠᠨ ᠵᠠᠯᠭᠠᠬᠤ
ᠤᠤᠭᠠᠨ ᠪᠣᠢᠭᠤᠨ ③ ᠢ᠋ᠶ᠋ᠠᠨ ᠡᠷᠢᠨ᠃
ᠲᠡᠷᠭᠡᠯ ᠰᠠᠷᠠ ᠶ᠋ᠢ ᠤᠭᠲᠤᠵᠤ
ᠲᠠᠯᠠ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠬᠦᠷᠪᠡ᠂
ᠳᠠᠰᠬᠠᠨ④ ᠤ᠋ ᠨᠢᠭᠡᠨ ᠠᠢᠯ ᠳ᠋ᠤ᠌
ᠲᠠᠭᠠᠷᠠᠵᠤ ᠬᠣᠨᠣᠭᠯᠠᠬᠤ ᠪᠣᠯᠪᠠ᠃
ᠦᠷ ᠬᠠᠶᠠᠭᠠᠷᠠᠵᠤ ᠪᠠᠢᠬᠤ ᠳ᠋ᠤ᠌
ᠡᠷᠦᠬᠡ ᠪᠡᠷ ᠰᠢᠪᠡᠷᠡᠵᠦ ᠡᠬᠢᠯᠡᠯᠡ
ᠦᠷᠭᠡᠯᠡᠵᠦ ᠪᠠᠢᠭᠰᠠᠨ ᠭᠠᠵᠠᠷᠴᠢ
ᠥᠨᠳᠡᠢᠨ ᠪᠣᠰᠴᠤ ᠭᠠᠷᠤᠯᠠ᠃
ᠬᠤᠵᠢᠷᠲᠤ ᠬᠣᠭᠣᠯᠠᠢ ᠶ᠋ᠢᠨ ᠳᠤᠮᠳᠠ
ᠬᠣᠶᠠᠷ ᠠᠵᠢᠷᠭᠠ ᠨᠣᠴᠣᠯᠳᠤᠬᠤ ᠰᠢᠭ᠋
ᠬᠣᠯᠠ ᠶ᠋ᠢᠨ ᠲᠡᠷᠲᠡᠭᠡ ᠳᠠᠯᠠᠩ ᠳᠡᠭᠡᠷᠡ
ᠬᠤᠷᠠ ᠴᠢᠳᠬᠤᠯᠠᠨ ᠰᠢᠷᠦᠭᠦᠰᠬᠦ ᠰᠢᠭ
ᠭᠠᠷᠠᠬᠠᠯᠠᠬᠤ ᠨᠠᠷᠠᠨ ᠤ᠋ ᠰᠠᠴᠤᠷᠠᠭ ᠲᠤ
ᠭᠠᠯᠪᠢᠩᠭᠠ ᠲᠡᠪᠡᠷᠢᠭᠰᠡᠨ ᠯᠤᠤ ᠭᠡᠮᠡᠷ
ᠭᠠᠵᠠᠷ ᠤ᠋ᠨ ᠲᠦᠪᠰᠢᠨ ᠡᠴᠡ ᠰᠠᠳᠠᠷᠠᠭᠰᠠᠨ
ᠭᠠᠢᠬᠠᠮᠰᠢᠭᠲᠤ ᠶᠧᠯᠸᠢ ᠶ᠋ᠢᠨ ᠤᠪᠠᠳᠢᠰ
ᠬᠦᠳᠡᠩ ᠮᠠᠨᠠᠨ ᠬᠥᠰᠢᠭᠡᠯᠡᠭᠡᠳ
ᠪᠤᠶᠠᠨᠲᠤ ᠶ᠋ᠢᠨ ᠲᠠᠯᠠ ᠰᠦᠮᠡᠯᠵᠡᠨᠡ
ᠪᠤᠯᠠᠭ ᠣᠨᠴᠠᠷᠠᠨ ᠣᠷᠭᠢᠯᠤᠭᠠᠳ
ᠪᠤᠮᠠᠨ ᠴᠡᠴᠡᠭ ᠨᠠᠢᠭᠤᠨᠠ᠃
ᠮᠠᠭᠠᠳᠯᠠᠵᠤ ᠨᠠᠷᠢᠯᠢᠭ ᠬᠠᠷᠠᠪᠠᠯ
ᠮᠢᠩᠭᠠ ᠬᠣᠷᠢᠨ ᠣᠷᠭᠢᠯᠤᠭᠠ ⑤
ᠮᠢᠷᠠᠯᠵᠠᠨ ᠭᠠᠩᠬᠤᠬᠤ ᠪᠡᠯᠴᠢᠭᠡᠷ ᠲᠤ
ᠮᠢᠩᠭᠠᠨ ᠤᠷᠭᠤᠮᠠᠯ ᠤ᠋ᠨ ᠭᠠᠩᠬᠤᠭᠠ
ᠡᠩ ᠳᠡᠯᠡᠬᠡᠢ ᠶ᠋ᠢᠨ ᠪᠠᠶᠠᠯᠢᠭ ᠲᠤ
ᠢᠩᠭᠢᠵᠦ ᠨᠤᠲᠤᠭ ᠢ᠋ᠶ᠋ᠠᠨ ᠰᠢᠨᠵᠢᠪᠡ
ᠡᠷᠬᠢᠮᠯᠡᠵᠦ ᠪᠡᠯᠭᠡ ᠪᠣᠳᠣᠵᠤ
ᠡᠬᠢ ᠪᠤᠯᠠᠭ ᠢ᠋ ᠨᠢ ᠴᠦᠩᠴᠡᠭᠯᠡᠪᠡ
ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠮᠢᠨᠢ
ᠲᠠᠯᠠ ᠶ᠋ᠢ ᠪᠦᠷᠬᠦᠨ ᠢᠳᠡᠰᠢᠯᠡᠭᠰᠡᠨ
ᠲᠠᠩᠰᠤᠭ ᠪᠠᠶᠠᠨ ᠠᠮᠢᠳᠤᠷᠠᠯ ᠮᠢᠨᠢ
ᠲᠠᠷᠠᠭ ᠠᠢᠷᠠᠭ ᠢ᠋ᠶ᠋ᠠᠷ ᠰᠦᠩᠨᠡᠭᠳᠡᠭᠰᠨ
ᠣᠷᠣᠨ ᠨᠤᠲᠤᠭ ᠤ᠋ᠨ ᠮᠢᠨᠢ ᠴᠢᠮᠬᠢ ᠰᠢᠷᠣᠢ ᠴᠤ᠌
ᠤᠤᠭᠠᠨ ᠲᠩᠷᠢ ᠶ᠋ᠢᠨ ᠪᠤᠶᠠᠨ ᠶᠤᠮ᠂
ᠤᠤᠭᠠᠨ ᠲᠩᠷᠢ ᠶ᠋ᠢᠨ ᠪᠤᠶᠠᠨ ᠴᠤ᠌
ᠤᠭᠤᠷᠠᠭ ᠲᠠᠷᠢᠬᠢᠨ ᠤ᠋ ᠰᠢᠲᠦᠭᠡ ᠶᠦᠮ᠃
- - - -
① ᠭᠦᠯᠦ ᠴᠠᠭᠠᠨ ᠬᠣᠰᠢᠭᠤ— ᠴᠠᠪ ᠴᠠᠭᠠᠨ ᠲᠤᠭ ᠪᠦᠬᠦᠢ ᠬᠣᠰᠢᠭᠤ ᠨᠤᠲᠤᠭ ᠪᠣᠯᠤᠨᠠ᠂ ᠣᠳᠣ ᠶ᠋ᠢᠨ ᠵᠡᠭᠦᠨ ᠬᠤᠰᠢᠭᠤᠨ ᠤ᠋ ᠲᠠᠷᠭᠤᠨᠨᠠᠭᠤᠷ᠂ ᠰᠢᠨᠠᠪᠤᠯᠠᠭ ᠭᠤᠷᠪᠠᠨ ᠰᠤᠮᠤ᠂ ᠠᠮᠤᠭᠤᠯᠠᠩᠪᠤᠯᠠᠭ ᠰᠤᠮᠤ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠪᠠᠭᠲᠠᠨᠠ᠃
② ᠰᠤᠮᠤ ᠨᠢᠭᠤᠳ— ᠰᠤᠮᠤᠨ ᠵᠠᠬᠢᠷᠭᠠ ᠨᠤᠭᠤᠳ᠃
③ ᠪᠣᠢᠭᠤᠨ— ᠡᠷᠦᠬᠡ ᠠᠮᠠ
④ ᠳᠠᠰᠬᠠᠨ— ᠵᠡᠭᠦᠨ ᠬᠣᠰᠢᠭᠤ᠃
⑤ ᠮᠢᠩᠭᠠ ᠬᠣᠷᠢᠨ ᠤᠷᠭᠢᠯᠤᠭᠠ— ᠪᠤᠯᠠᠭ ᠤ᠋ᠨ ᠣᠪᠣᠭᠠᠨ ᠤ᠋ ᠡᠭᠦᠰᠦᠯ ᠳ᠋ᠦ᠍1020 ᠪᠤᠯᠠᠭ ᠣᠷᠭᠢᠯᠵᠤ ᠪᠠᠢᠭᠰᠠᠨ ᠪᠠ ᠡᠬᠢ ᠪᠤᠯᠠᠭ ᠤ᠋ᠨ ᠬᠢᠨᠢ ᠳᠡᠷᠭᠡᠳᠡ ᠰᠤᠮᠤᠨ ᠣᠪᠣᠭᠠ ᠪᠠᠨ ᠪᠤᠰᠬᠠᠵᠤ ᠲᠠᠬᠢᠵᠠᠢ᠃
ᠢᠷᠡᠯᠲᠡ᠄ ᠴᠣ᠂ ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ》 ᠭᠡᠳᠡᠭ ᠰᠢᠯᠦᠭ ᠦ᠋ᠨ ᠲᠡᠭᠦᠪᠦᠷᠢ ᠡᠴᠡ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 03 26