ᠣᠷᠣᠢ ᠦᠭᠡᠢ ᠰᠦᠮᠡ ᠪᠤᠶᠤ ᠲᠡᠭᠦᠰᠭᠡᠯ Оройгүй сүм буюу төгсгөл - Oroigui sum END
126ᠣᠷᠣᠢ ᠦᠭᠡᠢ ᠰᠦᠮᠡ ᠪᠤᠶᠤ ᠲᠡᠭᠦᠰᠭᠡᠯ
ᠳᠡᠭᠡᠪᠦᠷ ᠬᠣᠭᠣᠯᠠᠢ ᠪᠠᠷ ᠢᠶᠠᠨ ᠲᠠᠲᠠᠭᠣ
ᠳᠡᠪᠡᠯ ᠵᠠᠬᠠ ᠪᠠᠷ ᠢ᠋ᠶ᠋ᠠᠨ ᠲᠠᠲᠠᠭᠤ
ᠠᠭᠤᠯᠠ ᠣᠷᠣᠢ ᠪᠠᠷ ᠲᠠᠲᠠᠭᠤ
ᠬᠠᠪᠤᠷ ᠤ᠋ᠨ ᠤᠰᠤᠨ ᠴᠡᠩᠬᠡᠷ ᠵᠡᠷᠭᠡᠯᠭᠡ ᠲᠠᠯᠠ ᠳ᠋ᠤ᠌ ᠤᠨᠠᠯᠠ᠃ ᠴᠠᠭ ᠤ᠋ᠨ ᠲᠣᠯᠣᠭᠠᠢ ᠨᠡᠰᠢ ᠪᠡᠨ ᠡᠷᠭᠢᠵᠦ ᠴᠠᠰᠤ ᠬᠠᠢᠯᠠᠨ ᠬᠠᠭᠵᠠᠷᠠᠵᠤ ᠳᠠᠭᠤᠰᠤᠭᠠᠳ ᠠᠭᠢ ᠨᠢᠳᠦᠯᠡᠯᠡ᠃ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠯᠠᠮᠠ ᠨᠠᠷ ᠴᠢᠭᠢᠭᠲᠦᠪᠡ ᠭᠡᠵᠦ ᠡᠳᠦᠷ ᠪᠦᠷᠢ ᠰᠦᠮᠡ ᠡᠴᠡ ᠪᠡᠨ ᠬᠣᠯᠠᠳᠠᠵᠤ ᠡᠷᠡᠭᠦᠯ ᠭᠠᠵᠠᠷ ᠣᠴᠢᠵᠤ ᠰᠠᠭᠤᠵᠠᠭᠠᠵᠤ ᠨᠠᠷᠠᠯᠠᠳᠠᠭ ᠪᠣᠯᠤᠯᠠ᠃ ᠨᠢᠭᠡᠨ ᠤᠳᠠᠭᠠ ᠶ᠋ᠢᠨ ᠨᠡᠷᠡᠯᠡᠯᠲᠡ ᠶ᠋ᠢᠨ ᠦᠶᠡ ᠪᠡᠷ ᠲᠡᠳᠡ ᠳᠠᠭᠤᠰᠤᠭᠠ ᠦᠭᠡᠢ ᠰᠦᠮᠡ ᠶ᠋ᠢᠨ ᠲᠤᠬᠠᠢ ᠶᠠᠷᠢᠪᠠ᠃
- ᠴᠣᠢᠷᠣᠠ ᠶ᠋ᠢᠨ ᠰᠦᠮᠡ ᠶ᠋ᠢ ᠪᠠᠷᠢᠭᠤᠯᠵᠤ ᠳᠠᠭᠤᠰᠬᠠᠬᠤ ᠶᠤᠮᠰᠠᠨ ᠭᠡᠵᠦ ᠰᠢᠷᠡᠭᠡᠲᠦ ᠯᠠᠮᠠ ᠰᠡᠭᠦᠷᠡᠰᠦ ᠠᠯᠳᠠᠵᠠᠢ᠃ ᠦᠨᠡᠬᠡᠷ ᠭᠤᠨᠢᠭᠲᠠᠢ ᠪᠠᠢᠯᠠ᠃
- ᠬᠠᠷᠢᠨ ᠠ᠋᠂ ᠬᠠᠷᠢᠭᠤ ᠦᠭᠡᠢ ᠳᠠᠭᠤᠰᠬᠤ ᠳᠥᠭᠥᠭᠰᠡᠨ ᠶᠠᠭᠤᠮᠠ ᠶ᠋ᠢ ᠭᠦᠢᠴᠡᠭᠡᠴᠢᠬᠡᠪᠡᠯ ᠬᠡᠷᠡᠭ ᠪᠠᠢᠨᠠ ᠰᠠᠨᠵᠠᠢ ᠭᠡᠵᠦ ᠳᠡᠴᠢᠨ ᠤᠮᠵᠠᠳ ᠦᠭᠡ ᠪᠡᠨ ᠵᠥᠭᠡᠭᠡᠵᠦ ᠶᠠᠳᠠᠨ ᠶᠠᠷᠢᠯᠠ᠃
- ᠰᠦᠮᠡ ᠪᠦᠲᠦᠭᠡᠬᠦ ᠶᠣᠰᠣ ᠶ᠋ᠢ ᠮᠡᠳᠡᠳᠡᠭ ᠬᠥᠮᠦᠨ ᠮᠠᠨ ᠤ᠋ ᠬᠡᠢᠳ ᠲᠦ᠍ ᠪᠠᠢᠬᠤ ᠦᠭᠡᠢ ᠯᠡ ᠪᠣᠯᠤᠭᠠᠳ ᠪᠠᠢᠨᠠ ᠳᠠ! ᠭᠡᠵᠦ ᠪᠠᠰᠠ ᠨᠢᠭᠡ ᠨᠢ ᠬᠡᠯᠡᠪᠡ᠃
- ᠳᠡᠮᠴᠦᠭ ᠭᠠᠪᠵᠤ ᠣᠷᠣᠨ ᠬᠡᠢᠳ ᠪᠠᠷᠢᠭᠤᠯᠬᠤ ᠳ᠋ᠤ᠌ ᠣᠭᠲᠣ ᠬᠣᠭᠣᠰᠣᠨ ᠦᠭᠡᠢ ᠪᠢᠰᠢ ᠤᠤ?
- ᠠ ᠳᠡᠮᠴᠦᠭ ᠭᠠᠪᠵᠤ ᠶᠠᠭᠤ ᠱᠠᠯᠢᠬᠤ ᠪᠣᠢ? ᠴᠠᠴᠠᠷ᠂ ᠰᠤᠪᠤᠷᠭᠠ ᠮᠡᠲᠦ ᠶ᠋ᠢᠨ ᠶᠠᠭᠤᠮᠠ ᠶ᠋ᠢ ᠪᠣᠯ ᠳᠥᠩᠭᠡᠬᠦ ᠪᠢᠵᠡ᠃ ᠬᠠᠷᠢᠨ ᠴᠣᠢᠷᠣᠠ ᠶ᠋ᠢᠨ ᠳᠤᠭᠠᠩ ᠳ᠋ᠤ᠌ ᠴᠤ᠌ ᠱᠣᠩ ᠦᠭᠡᠢ ᠪᠠᠢᠬᠠ ᠠ᠋᠃
- ᠣᠳᠣ ᠲᠡᠭᠡᠭᠡᠳ ᠶᠠᠭᠠᠬᠢᠨᠠ! ᠣᠯᠠᠨ ᠤ᠋ ᠪᠤᠶᠠᠨ ᠬᠥᠷᠥᠩᠭᠡ ᠶᠡᠬᠡ ᠣᠷᠣᠭᠰᠠᠨ ᠡᠨᠡ ᠳᠤᠭᠠᠩ ᠢ᠋ ᠳᠠᠭᠤᠰᠬᠠᠬᠤ ᠰᠠᠨ ! ᠨᠢᠳᠦᠨ ᠦ᠌ ᠪᠣᠯᠠᠢ ᠪᠣᠯᠵᠤ ᠵᠣᠪᠠᠭᠠᠭᠠᠳ ᠪᠠᠢᠬᠤ ᠶᠤᠮ᠃
- ᠴᠣᠬᠣᠮ ᠠ᠋᠂ ᠴᠣᠬᠣᠮ! ᠭᠡᠵᠦ ᠲᠡᠳᠡ ᠶᠠᠷᠢᠵᠠᠭᠠᠪᠠ᠃
ᠰᠠᠨᠵᠢ ᠶᠢᠨ ᠵᠢᠷᠤᠭ᠂ ᠰᠠᠨᠠᠭᠠ ᠪᠠᠷ ᠡᠬᠢᠯᠡᠭᠦᠯᠦᠨ ᠪᠠᠷᠢᠭᠤᠯᠵᠤ ᠪᠠᠢᠭᠰᠠᠨ ᠴᠣᠢᠷᠣᠠ ᠶ᠋ᠢᠨ ᠰᠦᠮᠡ ᠣᠷᠣᠢ ᠳ᠋ᠤ᠌ ᠪᠠᠨ ᠬᠦᠷᠦᠯ ᠦᠭᠡᠢ ᠳᠤᠲᠠᠭᠤ ᠬᠡᠪ ᠢ᠋ᠶ᠋ᠡᠷ ᠦᠯᠡᠳᠡᠵᠡᠢ᠃
ᠰᠠᠨᠵᠢ ᠬᠠᠮᠪᠤ ᠶᠢ ᠰᠢᠷᠠ ᠰᠢᠪᠲᠤᠯᠤᠨ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠡᠴᠡ ᠬᠥᠭᠡᠭᠡᠨ ᠴᠦᠯᠡᠭᠰᠡᠨ ᠲᠡᠷᠡ ᠡᠳᠦᠷ ᠡᠴᠡ ᠡᠬᠢᠯᠡᠨ ᠴᠣᠢᠷᠣᠠ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠵᠦᠭ ᠬᠡᠨ ᠴᠤ᠌ ᠣᠴᠢᠭᠰᠠᠨ ᠦᠭᠡᠢ ᠪᠠᠢᠭᠰᠠᠭᠠᠷ ᠨᠠᠮᠤᠷ ᠣᠷᠣᠢ ᠪᠣᠯᠵᠤ ᠤᠳᠠᠯ ᠦᠭᠡᠢ ᠴᠠᠰᠤ ᠳᠠᠷᠤᠵᠤ ᠲᠡᠭᠡᠭᠡᠳ ᠪᠦᠲᠦᠨ ᠡᠪᠦᠯ ᠥᠩᠭᠡᠷᠡᠵᠡᠢ᠃ ᠣᠳᠣ ᠬᠠᠪᠤᠷ ᠪᠣᠯᠵᠤ ᠴᠠᠭ ᠤ᠋ᠨ ᠳᠤᠯᠠᠭᠠᠨ ᠲᠠᠢ ᠵᠣᠯᠭᠠᠬᠤ ᠳ᠋ᠤ᠌ ᠲᠡᠷᠡ ᠰᠦᠮᠡ ᠶ᠋ᠢ ᠪᠠᠷᠢᠵᠤ ᠳᠠᠭᠤᠰᠬᠠᠬᠤ ᠲᠤᠬᠠᠢ ᠪᠤᠳᠤᠵᠠᠭᠠᠵᠤ ᠡᠬᠢᠯᠡᠯᠡ᠃ ᠭᠡᠪᠡᠴᠦ ᠳᠠᠭᠤᠰᠬᠠᠬᠤ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠃ ᠰᠦᠮᠡ ᠪᠠᠷᠢᠬᠤ ᠶᠣᠰᠣ ᠶ᠋ᠢ ᠰᠠᠢᠨ ᠮᠡᠳᠡᠬᠦ ᠯᠠᠮᠠ ᠲᠡᠷᠡ ᠬᠡᠢᠳ ᠲᠦ᠍ ᠪᠠᠢᠲᠤᠭᠠᠢ ᠣᠢᠷᠠ ᠬᠠᠪᠢ ᠳ᠋ᠤ᠌ ᠠᠯᠠᠭᠠ ᠪᠠᠢᠯᠠ᠃ ᠰᠦᠮᠡ ᠶ᠋ᠢ ᠪᠠᠷᠢᠵᠤ ᠳᠠᠭᠤᠰᠬᠠᠬᠤ ᠲᠤᠬᠠᠢ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠪᠣᠡᠭ᠌ᠰᠣᠳᠬᠠᠮᠪᠠ ᠳ᠋ᠤ᠌ ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠶᠠᠷᠢᠶᠠ ᠪᠣᠯᠤᠯᠠ᠃ ᠦᠷᠭᠦᠯᠵᠢᠯᠡᠭᠦᠯᠦᠨ ᠭᠦᠢᠴᠡᠭᠡᠬᠦ ᠬᠥᠮᠦᠨ ᠣᠯᠳᠠᠭᠰᠠᠨ ᠦᠭᠡᠢ᠃ ᠲᠡᠭᠡᠬᠦ ᠪᠡᠷ ᠨᠢ ᠬᠡᠢᠳ ᠦ᠋ᠨ ᠰᠢᠨᠡ ᠬᠠᠮᠪᠤ ᠴᠣᠢᠪᠵᠠᠭ ᠬᠠᠲᠠᠭᠤ ᠭᠠᠷ ᠬᠡᠷᠡᠭᠯᠡᠬᠦ ᠪᠡᠷ ᠰᠢᠢᠳᠴᠦ᠂
- ᠳᠡᠮᠴᠦᠭ ᠭᠠᠪᠵᠤ ᠳᠡᠮᠪᠡᠷᠢᠯ ᠭᠡᠰᠬᠦᠢ ᠲᠠ ᠬᠣᠶᠠᠷ ᠡᠨᠡ ᠰᠦᠮᠡ ᠶ᠋ᠢ ᠪᠠᠷᠢᠭᠤᠯᠵᠤ ᠳᠠᠭᠤᠰᠬᠠᠰᠤᠭᠠᠢ! ᠭᠡᠵᠦ ᠲᠤᠰᠢᠶᠠᠯᠠ᠃
ᠳᠡᠮᠴᠦᠭ ᠭᠠᠪᠵᠤ ᠤᠬᠠᠭᠠᠨ ᠠᠯᠳᠠᠲᠠᠯᠠ ᠪᠠᠨ ᠠᠶᠤᠵᠤ᠂ ᠴᠢᠳᠠᠬᠤ ᠦᠭᠡᠢ ᠭᠡᠵᠦ ᠬᠡᠳᠦᠨᠲᠡ ᠨᠢᠴᠤᠭᠠᠨ ᠲᠣᠩᠭᠣᠴᠢᠭᠰᠠᠨ ᠪᠣᠯᠪᠠᠴᠤ ᠬᠠᠮᠪᠤ ᠬᠠᠯᠢᠷᠠᠭᠰᠠᠨ ᠦᠭᠡᠢ᠃
ᠳᠡᠮᠴᠦᠭ ᠭᠠᠪᠵᠤ ᠲᠡᠢᠨ ᠬᠦ᠌ ᠴᠣᠢᠷᠣᠠ ᠶ᠋ᠢᠨ ᠳᠤᠭᠠᠩ ᠢ᠋ ᠪᠠᠷᠢᠵᠤ ᠳᠠᠭᠤᠰᠬᠠᠬᠤ ᠠᠵᠢᠯ ᠢ᠋ ᠦᠷᠭᠦᠯᠵᠢᠯᠡᠭᠦᠯᠦᠨ ᠣᠷᠣᠯᠳᠣᠬᠤ ᠪᠠᠷ ᠲᠣᠬᠢᠶᠠᠭᠳᠠᠵᠠᠢ᠃ ᠰᠦᠵᠢᠭᠲᠡᠨ ᠨᠦ᠍ᠭᠦᠳ ᠡᠴᠡ ᠬᠦᠴᠦ ᠲᠤᠰᠠᠯᠠᠯᠴᠠᠭᠠ ᠠᠪᠬᠤ ᠭᠡᠲᠡᠯᠡ ᠲᠡᠳᠡ ᠶᠠᠭᠠᠬᠢᠭᠠᠳ ᠴᠤ᠌ ᠶᠤᠮ ᠨᠢᠭᠡ ᠯᠡ ᠢᠳᠡᠪᠬᠢᠲᠡᠢ ᠮᠠᠭᠤ ᠲᠠᠢ ᠪᠣᠯᠴᠢᠬᠠᠵᠠᠢ᠃ ᠭᠡᠪᠡᠴᠦ ᠳᠡᠮᠴᠦᠭ ᠭᠠᠪᠵᠤ ᠡᠯᠳᠡᠪ ᠢ᠋ᠶ᠋ᠡᠷ ᠤᠷᠤᠯᠳᠤᠵᠤ᠂ ᠮᠣᠳᠣ ᠴᠢᠯᠠᠭᠤ᠂ ᠰᠢᠪᠡᠷ ᠲᠣᠭᠣᠰᠬᠠ ᠴᠤᠭᠯᠠᠭᠤᠯᠵᠤ ᠰᠦᠮᠡ ᠶ᠋ᠢ ᠳᠡᠭᠡᠭᠰᠢ ᠨᠢ ᠦᠷᠭᠦᠯᠵᠢᠯᠡᠭᠦᠯᠵᠦ ᠪᠠᠷᠢᠭᠤᠯᠵᠤ ᠡᠬᠢᠯᠡᠪᠡ᠃ ᠳᠣᠯᠣᠭᠠ ᠬᠣᠨᠣᠭ ᠳᠡᠭᠡᠷᠡ ᠪᠡᠨ ᠶᠠᠪᠤᠵᠤ ᠪᠠᠢᠲᠠᠯᠠ ᠳᠡᠮᠴᠦᠭ ᠭᠠᠪᠵᠤ ᠶ᠋ᠢᠨ ᠵᠢᠭᠠᠵᠤ ᠲᠠᠯᠪᠢᠭᠤᠯᠤᠭᠰᠠᠨ ᠳ᠋ᠦᠨᠵᠡ ᠨᠢᠷᠤᠭᠤ ᠮᠤᠯᠲᠤᠷᠠᠨ ᠤᠨᠠᠵᠤ ᠬᠣᠶᠠᠷ ᠯᠠᠮᠠ ᠠᠢᠬᠤᠪᠲᠤᠷ ᠬᠦᠨᠳᠦ ᠪᠡᠷ ᠪᠠᠷᠳᠠᠯᠠ᠃ ᠪᠤᠷᠤᠭᠤ ᠪᠠᠷᠢᠭᠤᠯᠤᠭᠰᠠᠨ ᠠ᠋ᠴᠠ ᠨᠤᠷᠠᠭᠰᠠᠨ ᠨᠢ ᠢᠯᠡᠷᠬᠡᠢ ᠪᠠᠢᠯᠠ᠃ ᠪᠡᠷᠲᠡᠭᠰᠡᠨ ᠬᠣᠶᠠᠷ ᠯᠠᠮᠠ ᠶ᠋ᠢ ᠡᠳᠡᠭᠡᠷᠡᠵᠦ ᠢᠯᠠᠷᠢ ᠪᠣᠯᠲᠠᠯᠠ ᠨᠢ ᠰᠦᠮᠡ ᠶ᠋ᠢᠨ ᠪᠠᠷᠢᠯᠭᠠ ᠳᠡᠭᠡᠷᠡᠬᠢ ᠠᠵᠢᠯ ᠢ᠋ ᠵᠣᠭᠰᠣᠭᠠᠯᠠ᠃
ᠬᠠᠪᠤᠷ ᠤ᠋ᠨ ᠳᠤᠮᠳᠠ ᠰᠠᠷᠠ ᠭᠠᠷᠤᠯᠠ᠃ ᠳᠡᠮᠴᠦᠭ ᠭᠠᠪᠵᠤ ᠰᠦᠮᠡ ᠶ᠋ᠢᠨ ᠪᠠᠷᠢᠯᠭᠠ ᠶ᠋ᠢ ᠴᠠᠰᠢ ᠨᠢ ᠦᠷᠭᠦᠯᠵᠢᠯᠡᠭᠦᠯᠬᠦ ᠪᠡᠷ ᠬᠣᠶᠠᠳᠠᠬᠢ ᠤᠳᠠᠭᠠ ᠪᠠᠨ ᠣᠷᠣᠯᠳᠣᠯᠠ᠃ ᠰᠥᠨᠢ ᠭᠡᠷ ᠲᠦ᠍ ᠪᠡᠨ ᠬᠣᠶᠠᠷ ᠭᠤᠷᠪᠠᠨ ᠵᠤᠯᠠ ᠠᠰᠠᠭᠠᠵᠤ ᠪᠠᠢᠭᠠᠳ ᠯᠠ ᠰᠠᠨᠵᠢ ᠶ᠋ᠢᠨ ᠵᠢᠷᠤᠵᠤ ᠦᠯᠡᠳᠡᠭᠡᠭᠰᠡᠨ ᠵᠢᠷᠤᠭ ᠢ᠋ ᠨᠢᠳᠦ ᠪᠡᠨ ᠬᠥᠬᠡᠷᠡᠲᠡᠯᠡ ᠬᠠᠷᠠᠳᠠᠭ ᠪᠣᠯᠤᠭᠰᠠᠨ ᠴᠤ᠌ ᠭᠡᠰᠡᠨ ᠳᠡᠮᠴᠦᠭ ᠭᠠᠪᠵᠤ ᠲᠡᠭᠦᠨ ᠦ᠌ ᠨᠠᠷᠢᠨ ᠤᠴᠢᠷ ᠢ᠋ ᠣᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠭᠡᠪᠡᠴᠦ ᠨᠡᠷᠡᠯᠬᠡᠦ ᠡᠪᠡᠳᠴᠢᠨ ᠨᠢ ᠲᠡᠭᠦᠨ ᠡᠴᠡ ᠲᠡᠢᠮᠦ ᠴᠤ᠌ ᠠᠮᠠᠷᠬᠠᠨ ᠰᠠᠯᠬᠤ ᠦᠭᠡᠢ ᠪᠠᠢᠯᠠ᠃ ᠬᠢᠴᠢᠶᠡᠵᠦ ᠣᠷᠣᠯᠳᠣᠭᠰᠠᠭᠠᠷ ᠨᠢᠭᠡᠨ ᠲᠤᠯᠭᠠᠭᠤᠷᠢ ᠨᠤᠮᠤ ᠲᠠᠢ ᠪᠠᠭᠠᠨᠠ ᠪᠤᠰᠬᠠᠭᠰᠠᠨ ᠨᠢ ᠠᠴᠢᠶᠠ ᠪᠠᠨ ᠳᠠᠭᠠᠭᠠᠯ ᠦᠭᠡᠢ ᠭᠤᠷᠪᠠᠳᠠᠬᠢ ᠬᠣᠨᠣᠭ ᠳᠡᠭᠡᠷᠡ ᠪᠡᠨ ᠵᠠᠢᠵᠢᠢᠨ ᠬᠠᠵᠠᠢᠵᠤ ᠡᠬᠢᠯᠡᠪᠡ᠃ ᠪᠠᠰᠠ ᠯᠠ ᠨᠤᠷᠠᠬᠤ ᠪᠣᠯᠤᠯᠲᠠᠢ᠃ ᠲᠡᠭᠦᠨ ᠢ᠋ ᠮᠡᠳᠡᠭᠡᠳ ᠳᠡᠮᠴᠦᠭ ᠭᠠᠪᠵᠤ ᠬᠡᠳᠦᠨ ᠬᠣᠨᠣᠭ ᠪᠣᠳᠣᠯ ᠪᠣᠯᠤᠨ ᠭᠡᠶᠦᠷᠡᠵᠦ ᠶᠠᠪᠤᠯᠠ᠃ ᠣᠯᠠᠨ ᠡᠳᠦᠷ ᠦ᠋ᠨ ᠭᠡᠶᠦᠷᠡᠯ ᠨᠢ ᠲᠡᠭᠦᠨ ᠳ᠋ᠦ᠍ ᠨᠢᠭᠡ ᠮᠤᠯᠭᠤᠤ ᠰᠠᠨᠠᠭᠠ ᠲᠥᠷᠥᠭᠦᠯᠵᠡᠢ᠃ ᠲᠡᠢᠮᠦ ᠶᠠᠭᠤᠮᠠ ᠪᠣᠳᠣᠵᠤ ᠣᠯᠬᠤ ᠳ᠋ᠤ᠌ ᠪᠠᠨ ᠲᠡᠷᠡ ᠴᠢᠳᠠᠮᠠᠭ ᠠᠵᠠᠢ᠃
ᠳᠡᠮᠴᠦᠭ ᠭᠠᠪᠵᠤ ᠨᠤᠲᠤᠭ ᠤ᠋ᠨ ᠬᠣᠶᠠᠷ ᠰᠠᠢᠨ ᠪᠢᠴᠢᠭᠡᠴᠢ ᠶ᠋ᠢ ᠳᠠᠭᠤᠳᠠᠭᠤᠯᠵᠠᠢ᠃ ᠲᠡᠳᠡᠨ ᠢ᠋ ᠬᠦᠷᠢᠶᠡᠨ ᠳ᠋ᠦ᠍ ᠬᠦᠷᠦᠯᠴᠡᠨ ᠢᠷᠡᠬᠦ ᠪᠡᠷ ᠨᠢ ᠳᠡᠮᠴᠦᠭ ᠭᠠᠪᠵᠤ ᠭᠡᠷ ᠲᠦ᠍ ᠪᠡᠨ ᠤᠷᠢᠵᠤ ᠠᠪᠠᠴᠢᠭᠠᠳ ᠨᠠᠷᠢᠨ ᠬᠣᠭᠣᠯᠠ ᠬᠢᠵᠦ ᠳᠠᠢᠯᠠᠬᠤ ᠶ᠋ᠢᠨ ᠵᠠᠭᠤᠷᠠ ᠶᠡᠬᠡ ᠯᠡ ᠨᠢᠭᠤᠴᠠ ᠴᠢᠬᠤᠯᠠ ᠶᠠᠭᠤᠮᠠ ᠨᠠᠢᠳᠠᠵᠤ ᠪᠠᠢᠭᠠ ᠪᠠᠨ ᠬᠡᠳᠦᠨᠲᠡ ᠰᠠᠨᠠᠭᠤᠯᠵᠤ ᠲᠡᠳᠡᠨ ᠦ᠌ ᠠᠮᠠᠨ ᠥᠴᠢᠭ ᠢ᠋ ᠠᠪᠤᠯᠠ᠃ ᠲᠡᠭᠡᠭᠡᠳ ᠰᠥᠨᠢ ᠪᠣᠯᠲᠠᠯᠠ ᠳᠡᠪᠡᠩ ᠳᠡᠯᠡᠬᠡᠢ ᠶ᠋ᠢᠨ ᠶᠠᠭᠤᠮᠠ ᠬᠠᠮᠤᠵᠤ ᠶᠠᠷᠢᠨ ᠶᠡᠬᠡ ᠯᠡ ᠳᠣᠲᠣᠨᠣᠴᠢᠯᠠᠵᠤ ᠪᠠᠢᠭᠠ ᠮᠡᠲᠦ ᠪᠡᠷ ᠣᠢᠯᠠᠭᠠᠭᠤᠯᠵᠠᠢ᠃ ᠬᠣᠶᠠᠷ ᠪᠢᠴᠢᠭᠡᠴᠢ ᠶ᠋ᠢ ᠲᠡᠭᠡᠵᠦ ᠢᠳᠬᠠᠨ ᠤᠶᠠᠷᠠᠭᠤᠯᠵᠤ ᠲᠠᠯᠠ ᠳ᠋ᠤ᠌ ᠪᠠᠨ ᠲᠠᠲᠠᠭᠰᠠᠨ ᠤ᠋ ᠳᠠᠷᠠᠭᠠ᠂
- ᠵᠠ ᠲᠠ ᠬᠣᠶᠠᠷ ᠲᠤ᠌ ᠮᠠᠨ ᠤ᠋ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠬᠠᠮᠪᠤ ᠯᠠᠮᠠ ᠪᠢᠳᠡ ᠪᠦᠭᠦᠳᠡᠭᠡᠷ ᠨᠢᠭᠡ ᠶᠡᠬᠡ ᠨᠢᠭᠤᠴᠠ ᠴᠢᠬᠤᠯᠠ ᠶᠠᠭᠤᠮᠠ ᠨᠠᠢᠳᠠᠵᠤ ᠳᠠᠭᠠᠭᠠᠯᠭᠠᠨᠠ᠃ ᠡᠭᠦᠨ ᠦ᠌ ᠤᠳᠬᠠ ᠶ᠋ᠢ ᠬᠡᠨ ᠳ᠋ᠦ᠍ ᠴᠤ᠌ ᠵᠠᠳᠠᠷᠠᠭᠤᠯᠤᠨ ᠠᠯᠳᠠᠰ ᠬᠢᠵᠦ ᠦᠯᠦ ᠪᠣᠯᠤᠨᠠ᠃ ᠬᠡᠯᠡ ᠪᠡᠨ ᠰᠢᠲᠦ ᠪᠡᠷ ᠢ᠋ᠶ᠋ᠡᠨ ᠬᠠᠰᠢᠵᠤ ᠪᠠᠢᠵᠤ ᠲᠠ ᠬᠣᠶᠠᠷ ᠴᠢᠳᠠᠬᠤ ᠶᠤᠮ ᠪᠠᠢᠭᠠ ᠪᠢᠵᠡ ᠳᠡ? ᠭᠡᠵᠦ ᠠᠰᠠᠭᠤᠪᠠ᠃
- ᠴᠢᠳᠠᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠭᠡᠵᠡᠭᠡᠪᠡ᠃
- ᠵᠠ ᠲᠡᠭᠡᠪᠡᠯ ᠰᠠᠢᠨ ᠰᠣᠨᠣᠰᠴᠠᠭᠠ! ᠨᠢᠳᠤᠨᠤᠨ ᠤ᠋ ᠪᠤᠷᠤᠭᠤ ᠳᠠᠪᠠᠭᠠ ᠪᠠᠷ ᠣᠷᠣᠭᠠᠳ ᠮᠠᠨ ᠤ᠋ ᠬᠡᠢᠳ ᠡᠴᠡ ᠴᠥᠯᠡᠭᠳᠡᠭᠰᠡᠨ ᠰᠠᠨᠵᠢ ᠭᠡᠭᠴᠢ ᠶ᠋ᠢ ᠲᠠ ᠨᠠᠷ ᠮᠡᠳᠡᠳᠡᠭ ᠪᠢᠵᠡ? ᠵᠠ ᠲᠡᠭᠡᠪᠡᠯ ᠲᠡᠷᠡ ᠰᠠᠨᠵᠢ ᠣᠳᠣ ᠮᠠᠨ ᠤ᠋ ᠬᠡᠢᠳ ᠡᠴᠡ ᠬᠠᠭᠠᠰ ᠰᠠᠷᠠ ᠶ᠋ᠢᠨ ᠠᠶᠠᠨ ᠤ᠋ ᠬᠣᠯᠠ ᠭᠠᠵᠠᠷ ᠢᠩᠭᠢᠨᠡ ᠤᠰᠤᠨ ᠤ᠋ ᠭᠣᠪᠢ ᠳ᠋ᠤ᠌ ᠪᠠᠢᠭᠠ! ᠭᠡᠵᠦ ᠳᠡᠮᠴᠦᠭ ᠭᠠᠪᠵᠤ ᠶᠠᠷᠢᠬᠤ ᠳ᠋ᠤ᠌᠂
- ᠵᠠᠢᠯᠠᠭᠤᠯ᠂ ᠠᠮᠢᠳᠤ ᠪᠠᠢᠭᠠ ᠶᠤᠮ ᠤᠤ? ᠭᠡᠵᠦ ᠪᠢᠴᠢᠭᠡᠴᠢ ᠨᠠᠷ ᠰᠣᠨᠢᠭᠤᠴᠢᠯᠠᠪᠠ᠃ ᠳᠡᠮᠴᠦᠭ ᠭᠠᠪᠵᠤ ᠲᠡᠭᠦᠨ ᠳ᠋ᠦ᠍ ᠨᠢ ᠳᠤᠷᠠ ᠦᠭᠡᠢ ᠨᠢ ᠬᠦᠷᠪᠡᠴᠦ ᠪᠡᠶᠡ ᠪᠡᠨ ᠪᠠᠷᠢᠵᠤ᠂
- ᠲᠠᠩᠭᠠᠷᠢᠭ ᠪᠠᠭᠤᠷᠠᠭᠰᠠᠨ᠂ ᠲᠡᠭᠦᠨ ᠦ᠌ ᠪᠡᠨ ᠨᠢᠭᠦᠯ ᠢ᠋ ᠡᠳ᠋ᠯᠡᠵᠦ ᠳᠠᠭᠤᠰᠬᠤ ᠠ᠋ᠴᠠ ᠨᠠᠰᠢ ᠲᠡᠢᠮᠦ ᠴᠤ᠌ ᠠᠮᠠᠷᠬᠠᠨ ᠲᠥᠷᠥᠯ ᠠᠷᠠᠯᠵᠢᠴᠢᠬᠠᠳᠠᠭ ᠦᠭᠡᠢ ᠶᠦᠮ᠃ ᠵᠠ ᠲᠡᠷᠡ ᠴᠤ᠌ ᠶᠠᠭᠠᠬᠢᠬᠤ ᠪᠣᠢ᠃ ᠲᠠ ᠬᠣᠶᠠᠷ ᠰᠠᠩ ᠠ᠋ᠴᠠ ᠤᠨᠤᠭᠠ᠂ ᠵᠠᠷᠤᠳᠠᠯ ᠠᠪᠤᠭᠠᠳ ᠲᠡᠷᠡ ᠰᠠᠨᠵᠢ ᠲᠠᠢ ᠣᠴᠢᠵᠤ ᠠᠭᠤᠯᠵᠠᠵᠤ ᠢᠷᠡᠪᠡᠯ ᠵᠣᠬᠢᠨᠠ᠃ ᠲᠠ ᠨᠠᠷ ᠲᠤ᠌ ᠨᠢᠭᠡ ᠢᠲᠡᠭᠡᠯ ᠲᠡᠢ ᠬᠥᠮᠦᠨ ᠭᠠᠵᠠᠷᠴᠢᠯᠠᠨᠠ᠃ ᠡᠭᠦᠨ ᠢ᠋ ᠪᠡᠶᠡᠯᠡᠭᠦᠯᠪᠡᠯ ᠲᠠ ᠨᠠᠷ ᠢ᠋ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠭᠣᠮᠣᠳᠠᠭᠠᠬᠤ ᠦᠭᠡᠢ ᠱᠠᠩ ᠬᠦᠷᠲᠡᠭᠡᠨᠡ! ᠭᠡᠪᠡ᠃ ᠬᠣᠶᠠᠷ ᠪᠢᠴᠢᠭᠡᠴᠢ ᠲᠠᠲᠠᠭᠠᠯᠵᠠᠭᠰᠠᠨ ᠦᠭᠡᠢ᠃ ᠨᠠᠢᠳᠠᠵᠤ ᠪᠠᠢᠭᠠ ᠶᠤᠮ ᠪᠣᠯ ᠪᠦᠲᠦᠭᠡᠬᠦ ᠪᠣᠯᠪᠠ᠃
- ᠵᠠ ᠲᠡᠭᠡᠪᠡᠯ ᠰᠠᠢᠨ ᠰᠣᠨᠣᠰ! ᠲᠡᠷᠡ ᠰᠠᠨᠵᠢ ᠲᠠᠢ ᠡᠪᠲᠡᠢᠬᠡᠨ ᠨᠠᠢᠷᠰᠠᠭ ᠢ᠋ᠶ᠋ᠠᠷ ᠠᠭᠤᠯᠵᠠᠭᠠᠳ ᠪᠡᠶᠡ ᠲᠡᠩᠬᠡᠭᠡ ᠶ᠋ᠢ ᠨᠢ ᠠᠰᠠᠭᠤᠵᠤ᠂ ᠶᠠᠳᠠᠷᠠᠵᠤ ᠵᠣᠪᠠᠵᠤ ᠪᠠᠢᠭᠠ ᠡᠰᠡᠬᠦ ᠶ᠋ᠢ ᠨᠢ ᠮᠡᠳᠡᠬᠦ ᠵᠡᠷᠭᠡ ᠪᠡᠷ ᠰᠡᠳᠬᠢᠯ ᠳ᠋ᠦ᠍ ᠨᠢ ᠨᠡᠢᠴᠡᠲᠡᠢ ᠦᠭᠡ ᠪᠡᠷ ᠶᠠᠷᠢᠯᠴᠠᠪᠠᠯ ᠲᠠᠭᠠᠷᠠᠨᠠ᠃ ᠲᠡᠭᠡᠬᠦ ᠪᠡᠷ ᠲᠡᠷᠡ ᠨᠤᠲᠤᠭ ᠣᠷᠣᠨ ᠤ᠋ ᠰᠣᠨᠢᠨ ᠢ᠋ ᠠᠰᠠᠭᠤᠵᠤ ᠡᠬᠢᠯᠡᠨᠡ᠃ ᠲᠠ ᠬᠣᠶᠠᠷ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠲᠦ᠍ ᠰᠢᠨᠡ ᠴᠣᠢᠷᠣᠠ ᠶ᠋ᠢᠨ ᠳᠤᠭᠠᠩ ᠪᠣᠰᠬᠠᠭᠰᠠᠨ ᠲᠤᠬᠠᠢ ᠶᠠᠷᠢᠭᠠᠷᠠᠢ᠃
- ᠪᠣᠰᠤᠭᠠ ᠦᠭᠡᠢ ᠪᠠᠢᠭᠠ ᠪᠢᠵᠡ ᠳᠡ?
- ᠵᠠ ᠶᠠᠭᠤᠨ ᠲᠦᠷᠦᠭᠦᠨ ᠦᠭᠡ ᠲᠡᠢ ᠶᠦᠮ ᠪᠣᠢ? ᠲᠠ ᠨᠠᠷ ᠢ᠋ ᠲᠡᠨᠳᠡ ᠬᠦᠷᠬᠦ ᠭᠡᠭᠰᠡᠭᠡᠷ ᠪᠠᠢᠲᠠᠯᠠ ᠴᠢᠨᠢ ᠪᠢᠳᠡ ᠲᠡᠷᠡ ᠰᠦᠮᠡ ᠶ᠋ᠢ ᠳᠠᠭᠤᠰᠬᠠᠵᠤ ᠣᠷᠬᠢᠨᠠ᠃ ᠲᠡᠭᠡᠭᠡᠳ ᠰᠦᠮᠡ ᠪᠠᠷᠢᠭᠤᠯᠵᠤ ᠳᠠᠭᠤᠰᠤᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ ᠲᠡᠷᠡ ᠰᠠᠨᠵᠢ ᠭᠠᠢᠬᠠᠬᠤ ᠪᠢᠵᠡ᠃ ᠲᠡᠷᠡ ᠦᠨᠡᠮᠰᠢᠬᠦ ᠦᠭᠡᠢ ᠪᠠᠢᠵᠤ ᠮᠡᠳᠡᠨᠡ᠃ ᠲᠡᠭᠡᠭᠡᠳ ᠯᠡ ᠲᠡᠷᠡ ᠶ᠋ᠢ ᠲᠡᠭᠡᠵᠦ ᠪᠠᠷᠢᠵᠤ ᠤᠤ᠂ ᠡᠨᠡ ᠶ᠋ᠢ ᠢᠩᠭᠢᠵᠦ ᠬᠢᠵᠦ ᠤᠤ? ᠭᠡᠵᠦ ᠠᠰᠠᠭᠤᠬᠤ ᠪᠣᠢ᠃ ᠲᠡᠷᠡ ᠯᠠ ᠬᠡᠯᠡᠬᠦ ᠦᠭᠡ ᠪᠣᠯᠭᠠᠨ ᠢ᠋ ᠨᠢ ᠪᠢᠴᠢᠵᠦ ᠠᠪᠤᠭᠠᠳ ᠢᠷᠡ! ᠣᠷᠣᠢ ᠶ᠋ᠢ ᠨᠢ ᠲᠡᠭᠡᠵᠦ ᠢᠩᠭᠢᠵᠦ ᠪᠠᠷᠢᠵᠤ ᠤᠤ ᠭᠡᠵᠦ ᠠᠰᠠᠭᠤᠪᠠᠯ ᠨᠢᠭᠡ ᠳ᠋ᠦ᠍ ᠨᠢᠭᠡᠨ ᠦᠭᠡᠢ ᠪᠢᠴᠢᠵᠦ ᠠᠪᠤᠨᠠ ᠪᠢᠵᠡ᠃
- ᠠᠰᠠᠭᠤᠬᠤ ᠪᠠᠷ ᠨᠢ ᠶᠠᠭᠤ ᠭᠡᠵᠦ ᠬᠠᠷᠢᠭᠤᠯᠬᠤ ᠪᠣᠢ?
- ᠲᠡᠢᠮᠦ ᠲᠡᠢᠮᠦ ᠯᠡ ᠭᠡᠳ ᠪᠠᠢᠪᠠᠯ ᠲᠠᠭᠠᠷᠠᠨᠠ᠃ ᠲᠠ ᠨᠠᠷ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠪᠢᠰᠢ᠃ ᠲᠡᠷᠡ ᠯᠠ ᠶᠠᠭᠠᠬᠢᠵᠤ ᠪᠠᠷᠢᠭᠰᠠᠨ ᠢ᠋ ᠨᠢ ᠶᠠᠷᠢᠬᠤ ᠶᠣᠰᠣᠲᠠᠢ᠃ ᠶᠠᠷᠢᠬᠤ ᠦᠭᠡᠢ ᠪᠣᠯ ᠶᠠᠭᠠᠬᠢᠵᠤ ᠪᠠᠷᠢᠪᠠᠯ ᠵᠣᠬᠢᠬᠤ ᠪᠠᠢᠭᠰᠠᠨ ᠢ᠋ ᠯᠠᠪᠯᠠᠨ ᠠᠰᠠᠭᠤᠪᠠᠯ ᠵᠥᠪ᠃
- ᠪᠢᠳᠡ ᠲᠡᠷᠡ ᠰᠦᠮᠡ ᠶ᠋ᠢ ᠶᠠᠭᠠᠬᠢᠵᠤ ᠪᠠᠷᠢᠭᠰᠠᠨ ᠢ᠋ ᠨᠢ ᠮᠡᠳᠡᠬᠦ ᠦᠭᠡᠢ ᠶᠦᠮ ᠴᠢᠨᠢ ᠶᠠᠭᠤ ᠶᠠᠷᠢᠬᠤ ᠪᠣᠢ ᠳᠠ᠃ ᠲᠡᠷᠡ ᠳᠣᠣᠷᠠ ᠪᠠᠨ ᠯᠠ ᠵᠡᠰ ᠮᠠᠨᠢ ᠴᠤᠬᠤᠢᠨᠠ ᠳᠠ᠃
- ᠬᠠᠷᠢᠨ ᠲᠡᠢᠮᠦ ᠠ᠋! ᠲᠠ ᠨᠠᠷ ᠶᠠᠭᠤ ᠶᠠᠷᠢᠬᠤ ᠪᠣᠢ᠃ ᠲᠡᠭᠦᠪᠡᠷ ᠯᠡ ᠶᠠᠷᠢᠭᠤᠯᠵᠤ ᠠᠪᠤᠪᠠᠯ ᠲᠠᠭᠠᠷᠠᠨᠠ᠃ ᠶᠠᠷᠢᠭᠰᠠᠨ ᠪᠣᠯᠭᠠᠨ ᠢ᠋ ᠪᠢᠴᠢᠵᠦ ᠠᠪᠴᠤ ᠢᠷᠡ!
- ᠪᠢᠴᠢᠭᠦᠯᠬᠦ ᠦᠭᠡᠢ ᠪᠣᠯ ᠶᠠᠭᠠᠬᠢᠬᠤ ᠪᠣᠢ? ᠶᠠᠭᠤᠮᠠ ᠶ᠋ᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ?
- ᠲᠡᠷᠡ ᠶᠠᠭᠤᠮᠠ ᠬᠠᠷᠠᠬᠤ ᠪᠠᠨ ᠪᠠᠢᠭᠰᠠᠨ᠃ ᠲᠡᠭᠡᠬᠦ ᠪᠡᠷ ᠲᠠ ᠨᠠᠷ ᠢ᠋ ᠪᠢᠴᠢᠵᠦ ᠠᠪᠴᠤ ᠪᠠᠢᠭᠠ ᠶ᠋ᠢ ᠦᠵᠡᠬᠦ ᠴᠤ᠌ ᠦᠭᠡᠢ ᠯᠡ ᠳᠡ᠃ ᠮᠡᠳᠡᠭᠳᠡᠬᠦ ᠦᠭᠡᠢ ᠯᠡ ᠪᠢᠴᠢᠪᠡᠯ ᠲᠠᠭᠠᠷᠠᠨᠠ᠃
- ᠥᠭᠡᠷᠡ ᠶᠠᠭᠠᠬᠢᠬᠤ ᠶᠤᠮ ᠪᠣᠢ? ᠬᠠᠴᠢᠨ ᠯᠠ ᠠᠵᠢᠯ ᠪᠠᠢᠨᠠ᠃
- ᠥᠭᠡᠷᠡ ᠶᠠᠭᠤᠮᠠ ᠬᠡᠷᠡᠭ ᠦᠭᠡᠢ᠃ ᠢᠩᠭᠢᠵᠦ᠂ ᠲᠡᠭᠡᠵᠦ ᠪᠠᠷᠢᠵᠤ ᠤᠤ? ᠭᠡᠳᠡᠭ ᠯᠡ ᠦᠭᠡ ᠶ᠋ᠢ ᠨᠢ ᠰᠣᠨᠣᠰᠤᠭᠠᠳ ᠢᠷᠡ᠃ ᠪᠢᠴᠢᠵᠦ ᠠᠪᠬᠤ ᠳ᠋ᠤ᠌ ᠪᠠᠨ ᠶᠠᠭᠤᠮᠠ ᠣᠷᠬᠢᠪᠠᠵᠠᠢ!
ᠡᠢᠮᠦ ᠳᠠᠭᠠᠭᠠᠯᠭᠠᠪᠤᠷᠢ ᠶ᠋ᠢ ᠳᠡᠮᠴᠦᠭ ᠭᠠᠪᠵᠢ ᠠ᠋ᠴᠠ ᠠᠪᠤᠭᠠᠳ ᠬᠣᠶᠠᠷ ᠪᠢᠴᠢᠭᠡᠴᠢ ᠠᠶᠠᠨ ᠳ᠋ᠤ᠌ ᠭᠠᠷᠴᠠᠢ᠃ ᠲᠡᠳᠡᠨ ᠳ᠋ᠦ᠍ ᠰᠠᠨᠵᠢ ᠶ᠋ᠢ ᠠᠩᠬᠠ ᠴᠥᠯᠡᠬᠦ ᠪᠡᠷ ᠠᠪᠴᠤ ᠶᠠᠪᠤᠭᠰᠠᠨ ᠬᠣᠶᠠᠷ ᠶᠠᠷᠭᠠᠴᠢᠨ ᠤ᠋ ᠨᠢᠭᠡ ᠨᠢ ᠭᠠᠵᠠᠷᠴᠢᠯᠠᠵᠠᠢ᠃ ᠬᠥᠮᠦᠨ ᠦ᠌ ᠪᠠᠷᠠ ᠦᠭᠡᠢ ᠵᠡᠯᠢᠭᠦᠳ ᠬᠣᠯᠠ ᠶ᠋ᠢᠨ ᠭᠠᠵᠠᠷ ᠬᠦᠷᠪᠡ᠃
᠁
ᠠᠭᠠᠭᠢᠮᠠ ᠬᠠᠯᠠᠭᠤᠨ ᠨᠢᠭᠡ ᠡᠳᠦᠷ ᠭᠤᠷᠪᠠᠨ ᠮᠣᠷᠢ ᠲᠠᠢ ᠬᠥᠮᠦᠨ ᠢᠩᠭᠢᠨᠡ ᠤᠰᠤᠨ ᠤ᠋ ᠭᠣᠪᠢ ᠳ᠋ᠤ᠌ ᠣᠷᠣᠵᠤ ᠢᠷᠡᠯᠡ᠃《ᠲᠡᠷᠡ ᠬᠡᠷᠪᠡ ᠠᠮᠢᠳᠤ ᠪᠠᠢᠳᠠᠭ ᠪᠣᠯ ᠯᠠᠪ ᠯᠠ ᠤᠰᠤ ᠪᠠᠷᠠᠭᠠᠳᠠᠬᠤ ᠶᠣᠰᠣᠲᠠᠢ᠃ ᠢᠩᠭᠢᠨᠡ ᠤᠰᠤᠨ ᠤ᠋ ᠪᠤᠯᠠᠭ ᠤ᠋ᠨ ᠳᠡᠷᠭᠡᠳᠡ ᠰᠢᠬᠠᠮ ᠪᠢᠳᠡ ᠣᠷᠬᠢᠭᠠᠳ ᠶᠠᠪᠤᠭᠰᠠᠨ ᠶᠤᠮ ᠳᠠ》 ᠭᠡᠵᠦ ᠵᠠᠮᠴᠢᠯᠠᠭᠴᠢ ᠰᠥᠭᠡᠩᠭᠢ ᠬᠣᠭᠣᠯᠠᠢ ᠪᠠᠷ ᠬᠡᠯᠡᠬᠦ ᠳ᠋ᠦ᠍ 《ᠡᠢᠮᠦ ᠡᠵᠡᠭᠦᠢ ᠴᠦᠯ ᠳ᠋ᠦ᠍ ᠬᠥᠮᠦᠨ ᠢ᠋ ᠭᠠᠭᠴᠠ ᠪᠡᠶᠡ ᠪᠡᠷ ᠨᠢ ᠣᠷᠬᠢᠭᠠᠳ ᠶᠠᠪᠤᠬᠤ ᠭᠡᠭᠴᠢ ᠮᠥᠨ ᠪᠥᠬᠡ ᠵᠢᠷᠦᠬᠡ ᠠ᠋᠃ ᠶᠠᠭᠠᠬᠢᠵᠤ ᠡᠪᠦᠯ ᠢ᠋ ᠲᠡᠰᠴᠦ ᠥᠩᠭᠡᠷᠡᠭᠡᠨᠡ᠂ ᠶᠠᠭᠤ ᠪᠠᠨ ᠢᠳᠡᠵᠦ ᠤᠤᠭᠤᠨᠠ ᠭᠡᠵᠦ ᠪᠣᠳᠣᠭᠠ ᠶᠤᠮ ᠪᠣᠯ?》 ᠭᠡᠵᠦ ᠬᠣᠶᠠᠷ ᠪᠢᠴᠢᠭᠡᠴᠢ ᠶ᠋ᠢᠨ ᠨᠢᠭᠡ ᠨᠢ ᠭᠠᠢᠬᠠᠯᠠ᠃
- ᠦᠷᠦ ᠡᠪᠡᠳᠦᠭᠡᠳ ᠦᠰᠦᠲᠡᠢ ᠳᠡᠪᠡᠯ᠂ ᠲᠤᠯᠤᠮ ᠲᠠᠢ ᠠᠭᠠᠷᠤᠤᠯ᠂ ᠳᠤᠯᠠᠭᠠᠨ ᠮᠠᠯᠠᠭᠠᠢ᠂ ᠭᠤᠲᠤᠯ ᠥᠭᠬᠦ ᠨᠢ ᠥᠭᠭᠦᠭᠰᠡᠨ᠃ ᠬᠠᠤᠯᠢ ᠬᠠᠲᠠᠭᠤ ᠪᠣᠯᠬᠣᠷ ᠶᠠᠭᠠᠬᠢᠬᠤ ᠪᠢᠯᠡ ᠳᠠ ᠪᠢᠳᠡ᠃ ᠴᠦᠯᠡᠬᠦ ᠪᠢᠰᠢ ᠪᠠᠷᠤᠭ ᠯᠠ ᠠᠮᠢᠳᠤ ᠪᠠᠷ ᠨᠢ ᠬᠡᠭᠡᠷᠡ ᠬᠠᠶᠠᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠦᠬᠦᠵᠦ ᠳᠠᠯᠳᠠ ᠤᠷᠤᠭ ᠭᠡᠰᠡᠨ ᠰᠠᠨᠠᠭᠠ ᠪᠠᠷ ᠯᠠ ᠴᠦᠯᠡᠳᠡᠭ ᠰᠢᠦ ᠭᠡᠵᠦ ᠨᠥᠭᠥᠭᠡᠬᠢ ᠭᠠᠵᠠᠷᠴᠢ ᠬᠡᠨᠡᠭ ᠦᠭᠡᠢ ᠶᠠᠷᠢᠯᠠ᠃
- ᠲᠡᠷᠡᠦᠬᠡᠨ ᠪᠤᠲᠠᠨ ᠳᠣᠲᠣᠷᠠ ᠨᠢᠭᠡ ᠶᠠᠭᠤᠮᠠ ᠱᠣᠪᠣᠯᠵᠠᠭᠠᠳ ᠪᠠᠢᠨᠠ᠃ ᠲᠡᠷᠡ ᠮᠥᠨ ᠰᠢᠭ ᠪᠣᠢ ᠳᠠ᠃ ᠠᠯᠢ ᠪᠣᠢ᠂ ᠳᠤᠷᠠᠨ ᠢ᠋ᠶ᠋ᠠᠨ! ᠭᠡᠵᠦ ᠨᠢᠭᠡ ᠪᠢᠴᠢᠭᠡᠴᠢ ᠬᠡᠯᠡᠭᠡᠳ ᠨᠥᠭᠦᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠤᠷᠠᠨ ᠢ᠋ ᠠᠪᠴᠤ ᠶᠡᠬᠡ ᠭᠣᠪᠢ ᠤᠷᠤᠭᠤ ᠬᠠᠷᠠᠭᠠ ᠶ᠋ᠢ ᠨᠢ ᠰᠤᠩᠭᠠᠨ ᠠᠵᠢᠭᠯᠠᠪᠠ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ᠂
- ᠬᠥᠮᠦᠨ ᠪᠠᠢᠨᠠ᠃ ᠵᠠᠢᠯᠠᠭᠤᠯ᠂ ᠠᠮᠢᠳᠤ ᠯᠠ ᠪᠠᠢᠭᠠ ᠶᠤᠮ ᠪᠠᠢᠨᠠ᠃ ᠵᠠ ᠲᠠᠰᠢ ᠪᠠᠨ ᠣᠴᠢᠬᠤ ᠠ᠋ᠴᠠ ᠳᠠ! ᠭᠡᠪᠡ᠃
ᠲᠡᠳᠡ ᠥᠷᠥᠪᠳᠦᠨ ᠭᠤᠲᠤᠭᠰᠠᠨ ᠪᠠᠢᠳᠠᠯ ᠲᠠᠢ ᠪᠣᠯᠵᠠᠢ᠃
- ᠪᠢ ᠣᠴᠢᠭᠠᠳ ᠶᠠᠭᠠᠬᠢᠬᠤ ᠪᠣᠢ? ᠣᠢᠷᠠᠯᠴᠠᠭᠠ ᠭᠠᠵᠠᠷ ᠲᠠ ᠨᠠᠷ ᠤ᠋ᠨ ᠮᠣᠷᠢ ᠶ᠋ᠢ ᠪᠠᠷᠢᠭᠠᠳ ᠰᠠᠭᠤᠵᠤ ᠪᠠᠢᠶᠠ᠃ ᠳᠠᠭᠤ ᠬᠣᠭᠣᠯᠠᠢ ᠪᠠᠷ ᠮᠢᠨᠢ ᠨᠠᠮᠠ ᠶᠢ ᠲᠠᠨᠢᠴᠢᠬᠠᠭᠠᠳ ᠰᠡᠳᠬᠢᠯ ᠨᠢ ᠪᠤᠬᠢᠨᠢᠳᠤᠵᠤ ᠮᠡᠳᠡᠨᠡ! ᠭᠡᠵᠦ ᠭᠠᠵᠠᠷᠴᠢ ᠪᠣᠯᠭᠣᠮᠵᠢᠯᠠᠪᠠ᠃ ᠲᠡᠷᠡ ᠨᠢ ᠴᠤ᠌ ᠲᠡᠢᠮᠦ ᠪᠠᠢᠵᠤ ᠮᠡᠳᠡᠬᠦ ᠲᠤᠯᠠ ᠬᠣᠶᠠᠷ ᠪᠢᠴᠢᠭᠡᠴᠢ ᠵᠥᠪᠰᠢᠶᠡᠷᠡᠵᠡᠢ᠃
ᠰᠠᠨᠵᠢ ᠴᠤ᠌ ᠲᠡᠳᠡᠨ ᠦ᠌ ᠠᠢᠰᠤᠢ ᠶᠠᠪᠤᠭᠠ ᠶ᠋ᠢ ᠤᠳᠠᠯ ᠦᠭᠡᠢ ᠲᠠᠭᠠᠮᠠᠭᠯᠠᠭᠠᠳ ᠬᠠᠷᠮᠠᠭ ᠤ᠋ᠨ ᠪᠤᠲᠠ ᠰᠠᠨᠳᠠᠢᠯᠠᠨ ᠰᠠᠭᠤᠭᠠᠳ ᠬᠦᠯᠢᠶᠡᠵᠦ ᠪᠠᠢᠯᠠ᠃
- ᠠᠮᠤᠷ ᠠᠮᠤᠭᠤᠯᠠᠩ ᠢ᠋ ᠠᠢᠯᠠᠳᠬᠠᠶᠠ! ᠭᠡᠵᠦ ᠬᠣᠶᠠᠷ ᠪᠢᠴᠢᠭᠡᠴᠢ ᠰᠠᠨᠵᠢ ᠶ᠋ᠢᠨ ᠡᠮᠦᠨᠡ ᠣᠴᠢᠵᠤ ᠮᠡᠨᠳᠦᠯᠡᠯᠡ᠃ ᠴᠣᠴᠢᠨ ᠪᠡᠯᠪᠢᠭᠦᠷᠳᠡᠵᠡᠭᠡᠵᠦ ᠪᠠᠢᠯᠠ᠃
- ᠠᠮᠤᠷᠬᠠᠨ᠃ ᠲᠠ ᠨᠠᠷ ᠠᠮᠤᠷ ᠰᠠᠢᠨ ᠪᠠᠢᠨᠠ ᠤᠤ? ᠬᠠᠮᠢᠭᠠ ᠠ᠋ᠴᠠ ᠬᠠᠮᠢᠭᠠ ᠬᠦᠷᠴᠦ ᠶᠠᠪᠤᠨᠠ? ᠭᠡᠵᠦ ᠰᠠᠨᠵᠢ ᠠᠰᠠᠭᠤᠯᠠ᠃ ᠲᠡᠭᠦᠨ ᠦ᠌ ᠨᠢᠳᠦ ᠠᠯᠢ ᠬᠡᠳᠦᠢᠨᠢ ᠬᠠᠷᠠᠭᠠ ᠦᠭᠡᠢ ᠫᠠᠯᠲᠠᠡᠭ ᠰᠢᠷᠠ ᠶᠠᠭᠤᠮᠠ ᠪᠣᠯᠴᠢᠬᠠᠭᠰᠠᠨ ᠨᠢ ᠠᠶᠤᠮᠠᠷ ᠳᠦᠷᠯᠡᠢᠨ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃
- ᠠ ᠪᠢᠳᠡ ᠨᠠᠷ ᠵᠠᠰᠠᠭᠲᠤ ᠬᠠᠨ ᠤ᠋ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠬᠠᠪᠢ ᠪᠠᠷ ᠨᠤᠲᠤᠭᠯᠠᠳᠠᠭ ᠤᠯᠤᠰ ᠪᠠᠢᠨᠠ᠃ ᠨᠤᠲᠤᠭ ᠲᠤ᠌ ᠪᠠᠨ ᠪᠤᠴᠠᠵᠤ ᠶᠠᠪᠤᠨᠠ ᠭᠡᠵᠦ ᠪᠢᠴᠢᠭᠡᠴᠢ ᠶ᠋ᠢᠨ ᠨᠢᠭᠡ ᠨᠢ ᠬᠡᠯᠡᠮᠡᠭᠴᠡ ᠪᠠᠷᠠᠭᠤᠨ ᠡᠪᠦᠳᠦᠭ ᠢ᠋ᠶ᠋ᠡᠨ ᠪᠣᠰᠬᠠᠨ ᠰᠠᠭᠤᠭᠠᠳ ᠬᠤᠯᠤᠰᠤᠨ ᠦᠵᠦᠭ ᠢ᠋ᠶ᠋ᠡᠨ᠂ ᠴᠠᠭᠠᠰᠤ ᠶᠠᠩᠲᠠᠢ ᠲᠠᠢ ᠭᠠᠷᠭᠠᠵᠤ᠂ ᠰᠠᠨᠵᠢ ᠶ᠋ᠢᠨ ᠬᠡᠯᠡᠬᠦ ᠦᠭᠡ ᠶ᠋ᠢ ᠪᠢᠴᠢᠬᠦ ᠳ᠋ᠦ᠍ ᠪᠡᠯᠡᠳᠬᠡᠯᠡ᠃ ᠰᠠᠨᠵᠢ ᠲᠡᠭᠦᠨ ᠢ᠋ ᠦᠵᠡᠭᠡ ᠦᠭᠡᠢ ᠪᠣᠯᠪᠠᠴᠤ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠪᠡᠯᠡᠳᠬᠡᠵᠦ ᠪᠠᠢᠬᠤ ᠶ᠋ᠢ ᠨᠢ ᠮᠡᠳᠡᠷᠡᠪᠡ᠃
- ᠶᠠᠭᠤᠨ ᠰᠠᠢᠨ ᠶᠤᠮ ᠪᠣᠢ? ᠮᠠᠨ ᠤ᠋ ᠨᠤᠲᠤᠭ ᠤ᠋ᠨ ᠬᠢᠨ ᠰᠢᠭ᠋ ᠪᠣᠢ ᠳᠠ? ᠵᠠ ᠲᠡᠭᠡᠭᠡᠳ ᠨᠤᠲᠤᠭ ᠢ᠋ᠶ᠋ᠠᠷ ᠰᠣᠨᠢᠨ ᠶᠠᠭᠤᠲᠠᠢ ᠪᠣᠢ? ᠭᠡᠵᠦ ᠰᠠᠨᠵᠢ ᠠᠰᠠᠭᠤᠯᠠ᠃ ᠵᠥᠪᠬᠡᠨ ᠡᠢᠮᠦ ᠠᠰᠠᠭᠤᠯᠲᠠ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠬᠣᠶᠠᠷ ᠪᠢᠴᠢᠭᠡᠴᠢ᠂
- ᠰᠣᠨᠢᠨ ᠶᠠᠭᠤᠮᠠ ᠶᠡᠬᠡ᠃ ᠶᠠᠭᠤᠨ ᠤ᠋ ᠤᠷᠢᠳ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠰᠢᠨᠡ ᠴᠣᠢᠷᠣᠠ ᠶ᠋ᠢᠨ ᠳᠤᠭᠠᠩ ᠳᠠᠭᠤᠰᠴᠤ ᠠᠷᠠᠪᠨᠠᠢᠯᠠᠭᠠᠳ ᠬᠤᠷᠠᠯ ᠬᠤᠷᠠᠵᠤ ᠡᠬᠢᠯᠡᠭᠰᠡᠨ ᠨᠢᠭᠡ ᠰᠣᠨᠢᠨ ᠲᠠᠢ ᠭᠡᠵᠦ ᠬᠣᠶᠠᠷ ᠪᠢᠴᠢᠭᠡᠴᠢ ᠠᠮᠠ ᠪᠤᠯᠢᠶᠠᠯᠳᠤᠨ ᠶᠠᠷᠢᠯᠠ᠃
- ᠦ ᠲᠡᠢᠮᠦ ᠤᠤ? ᠶᠠᠭᠠᠬᠢᠭᠰᠠᠨ ᠲᠦᠷᠭᠡᠨ ᠪᠠᠷᠢᠶᠠ ᠪᠣᠢ? ᠣᠷᠣᠢ ᠶ᠋ᠢ ᠨᠢ ᠶᠠᠭᠠᠬᠢᠵᠤ ᠪᠠᠷᠢᠵᠤ ᠪᠣᠢ? ᠭᠡᠵᠦ ᠰᠠᠨᠵᠢ ᠰᠡᠳᠬᠢᠯ ᠳᠣᠭᠳᠣᠯᠤᠨ ᠠᠰᠠᠭᠤᠯᠠ᠃
- ᠨᠢᠳᠤᠨᠤᠨ ᠴᠤ᠌ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠬᠥᠳᠡᠯᠦᠭᠰᠡᠨ᠃ ᠡᠨᠡ ᠵᠢᠯ ᠴᠤ᠌ ᠮᠥᠨ ᠠᠳᠠᠯᠢ᠃ ᠣᠯᠠᠨ ᠬᠥᠮᠦᠨ ᠦ᠌ ᠬᠦᠴᠦ ᠪᠡᠷ ᠳᠣᠣᠷᠠ ᠨᠢ ᠳᠠᠭᠤᠰᠬᠠᠯᠠ ᠯᠠ ᠳᠠ᠃ ᠣᠷᠣᠢ ᠶ᠋ᠢ ᠨᠢ ᠶᠠᠭᠠᠬᠢᠵᠤ ᠪᠠᠷᠢᠭᠰᠠᠨ ᠶᠤᠮ ᠪᠤᠤ ᠮᠡᠳᠡ! ᠣᠰᠣᠯᠳᠠᠬᠤ ᠦᠭᠡᠢ ᠯᠡ ᠳᠠᠭᠤᠰᠬᠠᠭᠰᠠᠨ ᠪᠠᠢᠭᠰᠠᠨ ᠭᠡᠵᠦ ᠨᠢᠭᠡ ᠪᠢᠴᠢᠭᠡᠴᠢ ᠬᠡᠯᠡᠬᠦ ᠳ᠋ᠦ᠍᠂
- ᠲᠠ ᠨᠠᠷ ᠲᠡᠷᠡ ᠳᠤᠭᠠᠩ ᠳ᠋ᠤ᠌ ᠣᠷᠣᠵᠤ ᠦᠵᠡᠭᠰᠡᠨ ᠤᠤ? ᠭᠡᠵᠦ ᠰᠠᠨᠵᠢ ᠪᠠᠶᠠᠷᠯᠠᠬᠤ ᠳᠠᠭᠤᠨ ᠢ᠋ᠶ᠋ᠠᠷ ᠠᠰᠠᠭᠤᠯᠠ᠃ ᠡᠨᠡ ᠠᠰᠠᠭᠤᠯᠲᠠ ᠲᠡᠷᠡ ᠬᠣᠶᠠᠷ ᠲᠤ᠌ ᠲᠤᠰᠠ ᠪᠣᠯᠤᠯᠠ᠃
- ᠣᠷᠣᠬᠤ ᠨᠢ ᠣᠷᠣᠭᠰᠠᠨ ᠯᠠ ᠳᠠ᠃ ᠰᠠᠢᠬᠠᠨ ᠯᠠ ᠡᠳ᠋ ᠪᠢᠯᠡ᠃
- ᠶᠠᠭᠠᠬᠢᠵᠤ ᠪᠠᠷᠢᠵᠤ ᠤᠤ? ᠶᠠᠮᠠᠷᠬᠠᠤ ᠪᠣᠳᠣᠭ ᠲᠦᠷᠬᠢᠴᠡ ᠲᠡᠢ ᠪᠠᠢᠨᠠ?
- ᠰᠠᠢᠬᠠᠨ ᠭᠡᠵᠦ ᠶᠠᠷᠢᠬᠤ ᠦᠭᠡᠢ᠃ ᠪᠣᠳᠣᠭ ᠲᠦᠷᠬᠢᠴᠡ ᠴᠤ᠌ ᠨᠢᠳᠦ ᠭᠢᠯᠪᠠᠮᠠ ᠰᠠᠢᠬᠠᠨ᠃ ᠵᠦᠭᠡᠷ ᠪᠢᠳᠡ ᠬᠣᠶᠠᠷ ᠢᠩᠭᠢᠵᠦ ᠲᠡᠭᠡᠵᠦ ᠪᠠᠷᠢᠵᠠᠢ ᠭᠡᠵᠦ ᠶᠠᠭᠠᠬᠢᠵᠤ ᠬᠡᠯᠡᠵᠦ ᠮᠡᠳᠡᠬᠦ ᠪᠣᠢ? ᠣᠷᠣᠨ ᠰᠦᠮᠡ ᠪᠠᠷᠢᠭᠤᠯᠬᠤ ᠡᠷᠳᠡᠮ ᠪᠠᠢᠬᠤ ᠪᠢᠰᠢ ᠳᠡ᠃
- ᠨᠡᠭᠡᠷᠡᠨ ᠴᠤ᠌ ᠠᠷᠭᠠ ᠦᠭᠡᠢ᠃ ᠳᠣᠲᠣᠷᠠ ᠨᠢ ᠨᠣᠮ ᠥᠭᠦᠯᠡᠭᠴᠢ ᠶ᠋ᠢ ᠪᠠᠢᠯᠭᠠᠬᠤ ᠠᠷᠰᠯᠠᠨᠲᠤ ᠳᠥᠷᠪᠡᠯᠵᠢᠨ ᠰᠢᠷᠡᠭᠡ ᠶ᠋ᠢ ᠵᠠᠰᠠᠵᠤ ᠤᠤ?
- ᠵᠠᠰᠠᠵᠠᠢ᠂ ᠵᠠᠰᠠᠵᠠᠢ᠃ ᠬᠣᠢᠮᠣᠷ ᠲᠠᠯᠠ ᠳ᠋ᠤ᠌ ᠨᠢ ᠪᠠᠢᠨᠠ ᠪᠢᠯᠡ᠃
ᠲᠡᠭᠦᠨ ᠦ᠌ ᠳᠥᠷᠪᠡᠨ ᠬᠥᠯ ᠳ᠋ᠦ᠍ ᠨᠢ ᠠᠷᠰᠯᠠᠨ ᠤ᠋ ᠬᠣᠩᠰᠢᠶᠠᠷ ᠮᠡᠲᠦ ᠶ᠋ᠢ ᠦᠢᠯᠡᠳᠴᠦ ᠳᠥᠷᠪᠡᠨ ᠲᠡᠮᠦᠷ ᠭᠠᠷᠠᠬᠠ ᠵᠡᠭᠦᠵᠦ ᠤᠤ? ᠳᠡᠭᠡᠳᠦ ᠰᠠᠭᠤᠷᠢᠨ ᠳ᠋ᠤ᠌ ᠣᠯᠠᠨ ᠨᠡᠬᠡᠮᠡᠯ ᠲᠠᠲᠠᠭᠠᠰᠤ ᠪᠠᠷ ᠨᠢᠳᠦ ᠭᠠᠷᠭᠠᠨ ᠰᠦᠯᠵᠢᠨ ᠵᠡᠭᠦᠬᠦ ᠶᠣᠰᠣᠲᠠᠢ᠃ ᠳᠡᠭᠡᠷᠡ ᠨᠢ ᠯᠠᠪᠷᠢ ᠲᠠᠲᠠᠵᠤ᠂ ᠲᠣᠷᠭᠠᠨ ᠤᠨᠵᠢᠯᠭᠠ ᠬᠢᠭᠡᠳ ᠰᠠᠭᠤᠬᠤ ᠳ᠋ᠤ᠌ ᠬᠥᠯ ᠤᠨᠵᠢᠬᠤ ᠪᠠᠷ ᠦᠭᠡᠢ ᠴᠢᠯᠠᠭᠤᠨ ᠲᠦᠰᠢᠭᠦᠷᠢ ᠬᠥᠯ ᠳ᠋ᠦ᠍ ᠬᠢᠵᠦ ᠥᠭᠬᠦ ᠤᠴᠢᠷᠲᠠᠢ᠃ ᠲᠡᠷᠡ ᠮᠡᠲᠦ ᠬᠢᠵᠦ ᠤᠤ? ᠭᠡᠵᠦ ᠰᠠᠨᠵᠢ ᠠᠰᠠᠭᠤᠬᠤ ᠳ᠋ᠤ᠌ ᠨᠥᠭᠦᠭᠡ ᠬᠣᠶᠠᠷ ᠠᠮᠠ ᠪᠤᠯᠢᠶᠠᠯᠳᠤᠨ᠂
- ᠶᠠᠭ ᠲᠡᠢᠮᠦ ᠪᠡᠷ ᠬᠢᠭᠰᠡᠨ ᠪᠠᠢᠭᠰᠠᠨ᠃ ᠣᠳᠣ ᠯᠠ ᠰᠠᠨᠠᠵᠤ᠂ ᠨᠢᠳᠦᠨ ᠳ᠋ᠦ᠍ ᠬᠠᠷᠠᠭᠳᠠᠬᠤ ᠰᠢᠭ᠋ ᠪᠣᠯᠵᠤ ᠪᠠᠢᠨᠠ ᠭᠡᠵᠡᠭᠡᠬᠦ ᠶ᠋ᠢᠨ ᠬᠠᠮᠲᠤ ᠲᠡᠭᠦᠨ ᠦ᠌ ᠬᠡᠯᠡᠭᠰᠡᠨ ᠢ᠋ ᠴᠠᠭᠠᠰᠤᠨ ᠳ᠋ᠤ᠌ ᠲᠠᠲᠠᠯᠠᠨ ᠪᠢᠴᠢᠵᠦ ᠠᠪᠴᠤ ᠪᠠᠢᠯᠠ᠃ ᠦᠭᠡ ᠦᠰᠦᠭ ᠭᠡᠭᠡᠬᠦ ᠦᠭᠡᠢ ᠶ᠋ᠢ ᠬᠢᠴᠢᠶᠡᠵᠡᠢ᠃
- ᠲᠡᠭᠦᠨ ᠡᠴᠡ ᠴᠠᠰᠢ ᠬᠣᠢᠮᠣᠷ ᠲᠠᠯᠠ ᠳ᠋ᠤ᠌ ᠰᠢᠲᠦᠭᠡᠨ ᠦ᠌ ᠵᠠᠷᠯᠢᠭ ᠤ᠋ᠨ᠂ ᠲᠠᠢᠯᠭᠠ ᠶ᠋ᠢᠨ ᠭᠤᠷᠪᠠᠨ ᠵᠠᠩᠬᠠᠨ ᠢ᠋ ᠪᠠᠢᠷᠢᠯᠠᠭᠤᠯᠵᠤ ᠤᠤ? ᠪᠠᠭᠠᠨᠠ ᠶ᠋ᠢᠨ ᠰᠠᠭᠤᠷᠢ᠂ ᠪᠠᠭᠠᠨᠠ᠂ ᠰᠢᠩ ᠦ᠋ᠨ ᠳᠡᠪᠢᠰᠬᠡᠷ ᠢ᠋ ᠶᠠᠭᠠᠬᠢᠵᠤ ᠬᠢᠭᠡ ᠪᠣᠯ ᠳᠠ? ᠰᠢᠩ᠂ ᠨᠤᠮᠤ᠂ ᠨᠢᠷᠤᠭᠤᠨ ᠤ᠋ ᠰᠠᠭᠤᠷᠢ ᠨᠢᠷᠤᠭᠤ᠂ ᠨᠢᠷᠤᠭᠤᠨ ᠤ᠋ ᠪᠦᠷᠬᠦᠪᠴᠢ ᠶ᠋ᠢ ᠲᠠᠬᠢᠯ ᠳᠠᠪᠬᠤᠷᠭᠠ᠂ ᠪᠦᠷᠬᠦᠪᠴᠢ ᠸᠠᠳ᠋ᠴᠢᠳ ᠲᠡᠷᠢᠭᠦᠲᠡᠨ ᠢ᠋ ᠨᠣᠮ ᠤ᠋ᠨ ᠶᠣᠰᠣᠭᠠᠷ ᠲᠠᠯᠪᠢᠭᠠ ᠪᠣᠯᠪᠠ ᠤᠤ? ᠶᠠᠭᠠᠬᠢᠭᠠ ᠪᠣᠯ?
- ᠮᠡᠳᠡᠬᠦ ᠶᠠᠭᠤᠮᠠ ᠠᠯᠠᠭᠠ! ᠶᠠᠭᠠᠬᠢᠵᠤ ᠲᠡᠳᠡᠨ ᠢ᠋ ᠲᠠᠯᠪᠢᠬᠤ ᠶᠣᠰᠣᠲᠠᠢ ᠶᠤᠮ ᠪᠣᠯ?
- ᠳᠠᠰᡀᠦᠮᠪᠦ ᠶᠢᠨ ᠳ᠋ᠠᠴᠠᠩ ᠪᠦᠲᠦᠭᠡᠭᠰᠡᠨ ᠦ᠌ ᠬᠡᠪ ᠮᠠᠢᠭ ᠢ᠋ᠶ᠋ᠠᠷ ᠬᠣᠶᠠᠷ ᠭᠤᠷᠪᠠ ᠳᠠᠬᠢᠨ ᠪᠠᠭᠠᠰᠬᠠᠵᠤ ᠦᠢᠯᠡᠳᠬᠦ ᠶᠣᠰᠣᠲᠠᠢ᠃ ᠲᠡᠷᠡ ᠶ᠋ᠢ ᠴᠤ᠌ ᠪᠠᠷᠤᠭ ᠬᠢᠴᠢᠬᠡᠭᠰᠡᠨ ᠪᠠᠢᠯᠭᠦᠢ ᠳᠡ᠃ ᠪᠢ ᠡᠬᠢᠯᠡᠭᠡᠳ ᠣᠪᠣᠭᠠ ᠶᠠᠪᠤᠭᠤᠯᠴᠢᠬᠠᠭᠰᠠᠨ ᠪᠠᠢᠭᠰᠠᠨ ᠶᠤᠮ ᠳᠠ᠃
- ᠲᠡᠷᠡ ᠶᠣᠰᠣᠭᠠᠷ ᠪᠠᠷᠢᠭᠰᠠᠨ ᠰᠢᠭ᠋ ᠪᠠᠢᠨᠠ ᠯᠠᠢ!
- ᠵᠠ ᠲᠡᠭᠡᠵᠦ ᠤᠤ? ᠲᠠ ᠨᠠᠷ ᠪᠣᠳᠣᠭ ᠲᠦᠷᠬᠢᠴᠡ ᠨᠢᠳᠦ ᠭᠢᠯᠪᠠᠮᠠ ᠭᠡᠵᠦ ᠶᠠᠷᠢᠪᠠ ᠤᠤ? ᠤᠤᠯ ᠨᠢ ᠲᠡᠢᠮᠦ ᠨᠢᠳᠦ ᠭᠢᠯᠪᠠᠮᠠ ᠪᠠᠢᠮᠠᠷ ᠦᠭᠡᠢ ᠳᠡ᠃ ᠬᠥᠬᠡ᠂ ᠰᠢᠷᠠ᠂ ᠤᠯᠠᠭᠠᠨ ᠳᠥᠷᠪᠡᠨ ᠵᠦᠢᠯ ᠥᠩᠭᠡᠨ ᠡᠴᠡ ᠭᠠᠵᠢᠬᠤ ᠤᠴᠢᠷ ᠦᠭᠡᠢ ᠶᠦᠮ᠃ ᠠᠯᠠᠭ ᠡᠷᠢᠶᠡᠨ ᠶᠦᠮ ᠤᠤ ᠭᠦᠨ ᠥᠩᠭᠡ ᠪᠡᠷ ᠦᠢᠯᠡᠳᠬᠦ ᠶᠣᠮᠰᠠᠨ ᠦᠭᠡᠢ᠃ ᠲᠡᠢᠮᠦ ᠠᠯᠠᠭ ᠡᠷᠢᠶᠡᠨ ᠪᠣᠯᠭᠠᠴᠢᠬᠠᠵᠤ ᠤᠤ?
- ᠦᠭᠡᠢ ᠶᠡᠷᠦ ᠨᠢ ᠠᠩᠬᠠ ᠣᠷᠣᠭᠰᠠᠨ ᠪᠣᠯᠤᠭᠠᠳ ᠯᠠ ᠨᠢᠳᠦ ᠭᠢᠯᠪᠠᠭᠠᠳ ᠪᠠᠢᠭᠰᠠᠨ ᠪᠠᠢᠬᠤ᠃ ᠲᠡᠭᠦᠨ ᠡᠴᠡ ᠪᠢᠰᠢ ᠲᠡᠢᠮᠦ ᠴᠤ᠌ ᠶᠡᠬᠡ ᠠᠯᠠᠭ ᠡᠷᠢᠶᠡᠨ ᠪᠣᠯᠤᠭᠰᠠᠨ ᠢ᠋ ᠬᠠᠷᠠᠭᠰᠠᠨ ᠦᠭᠡᠢ ᠯᠡ ᠳᠡ᠃ ᠬᠠᠷᠢᠨ ᠬᠠᠭᠠᠯᠭᠠ ᠨᠢ ᠯᠡ ᠶᠡᠬᠡ ᠡᠷᠢᠶᠡᠨ ᠬᠠᠷᠠᠭᠳᠠᠪᠠ ᠤᠤ ᠳᠠ?
- ᠠ ᠲᠡᠭᠡᠵᠦ ᠤᠤ? ᠲᠡᠳᠡ ᠨᠠᠷ ᠬᠠᠭᠠᠯᠭᠠᠨ ᠳ᠋ᠤ᠌ ᠢᠭᠴᠢᠰ᠂ ᠯᠠᠩᠨᠠᠳᠣᠷᠵᠢ ᠲᠡᠷᠢᠭᠦᠲᠡᠨ ᠦ᠌ ᠪᠡᠶᠡ ᠶ᠋ᠢᠨ ᠵᠢᠷᠤᠭ ᠪᠦᠲᠦᠭᠡᠬᠦ ᠭᠡᠳ ᠵᠢᠳᠬᠦᠭᠡᠳ ᠪᠠᠢᠭᠰᠠᠨ ᠶᠤᠮ ᠳ᠋ᠠᠭ᠃ ᠶᠡᠷᠦ ᠨᠢ ᠬᠠᠭᠠᠯᠭᠠ ᠶ᠋ᠢ ᠶᠠᠭᠠᠬᠢᠵᠤ ᠬᠢᠵᠦ ᠪᠣᠢ? ᠤᠤᠯ ᠮᠣᠳᠣᠨ ᠪᠠᠷᠢᠶᠠ ᠬᠥᠨᠳᠡᠯᠡᠨ ᠲᠠᠯᠪᠢᠵᠤ᠂ ᠬᠠᠴᠠᠷ ᠮᠣᠳᠣ ᠵᠠᠩᠭᠢᠳᠤᠨ ᠪᠦᠰᠡᠯᠡᠭᠦᠷ ᠬᠢᠵᠦ ᠶᠡᠬᠡ ᠵᠠᠮ ᠤ᠋ᠨ ᠬᠠᠭᠠᠯᠭᠠ ᠶ᠋ᠢᠨ ᠳᠡᠭᠡᠳᠦ ᠳᠠᠪᠬᠤᠷᠯᠢᠭ ᠢ᠋ ᠲᠣᠭᠲᠠᠭᠠᠭᠰᠠᠨ ᠪᠠᠢᠭᠠ ᠪᠢᠵᠡ? ᠡᠰᠡᠪᠡᠯ ᠳᠠᠪᠬᠤᠷ ᠬᠠᠭᠠᠯᠭᠠ ᠶ᠋ᠢ ᠬᠣᠢᠰᠢ ᠨᠢ ᠨᠠᠯᠠᠭᠤᠯᠴᠢᠬᠠᠭᠰᠠᠨ ᠶᠤᠮ ᠪᠣᠯᠪᠠ ᠤᠤ?
- ᠮᠡᠳᠡᠬᠦ ᠦᠭᠡᠢ ᠶᠦᠮ ᠳᠡ᠃ ᠶᠠᠮᠠᠷ ᠴᠤ᠌ ᠭᠡᠰᠡᠨ ᠶᠡᠬᠡ ᠯᠡ ᠰᠦᠷ ᠲᠡᠢ ᠰᠡᠷᠡᠭᠡᠷ ᠰᠠᠢᠬᠠᠨ ᠬᠠᠭᠠᠯᠭᠠ ᠲᠠᠢ ᠪᠠᠢᠭᠰᠠᠨ᠃ ᠶᠡᠬᠡ ᠴᠤ᠌ ᠥᠨᠳᠥᠷ ᠰᠦᠮᠡ ᠪᠣᠯᠵᠤ ᠪᠢᠯᠡ!
- ᠥᠨᠳᠥᠷ ᠥᠷᠭᠡᠨ ᠦ᠌ ᠢᠯᠭᠠᠮᠵᠢ ᠨᠢ ᠶᠠᠮᠠᠷ ᠪᠣᠯᠤᠭᠠ ᠪᠣᠯ ᠳᠠ! ᠲᠠᠪᠤᠨ ᠳᠠᠪᠬᠤᠷᠯᠢᠭ ᠪᠣᠯᠭᠠᠵᠤ ᠴᠢᠳᠠᠭᠰᠠᠨ ᠪᠣᠯᠪᠠ ᠤᠤ᠂ ᠦᠭᠡᠢ ᠪᠣᠯᠪᠠ ᠤᠤ? ᠰᠡᠷᠢᠭᠦᠨ ᠪᠠᠢᠰᠢᠩ ᠢ᠋ ᠰᠦᠮᠡ ᠡᠴᠡ ᠬᠣᠶᠠᠷ ᠢ᠋ᠶ᠋ᠠᠷ ᠥᠨᠳᠥᠷ ᠦᠢᠯᠡᠳᠴᠦ ᠤᠤ᠂ ᠦᠭᠡᠢ ᠤᠤ?
- ᠮᠡᠳᠡᠬᠦ ᠦᠭᠡᠢ ᠶᠦᠮ ᠳᠡ᠃ ᠶᠡᠬᠡ ᠯᠡ ᠥᠨᠳᠥᠷ ᠪᠠᠢᠭᠰᠠᠨ᠃ ᠨᠡᠭᠡᠷᠡᠨ ᠨᠢᠭᠡ ᠭᠣᠩᠬᠣᠨ ᠨᠢ ᠶᠡᠬᠡ ᠯᠡ ᠢᠯᠭᠠᠷᠠᠨ ᠳᠡᠭᠡᠭᠰᠢ ᠪᠡᠨ ᠴᠣᠷᠣᠢᠭᠰᠠᠨ ᠮᠡᠲᠦ ᠪᠠᠢᠯᠠ ᠤᠤ ᠳᠠ?
- ᠲᠡᠭᠡᠵᠦ ᠲᠠᠭᠠᠷᠠᠨᠠ᠃ ᠲᠡᠭᠦᠨ ᠢ᠋ ᠤᠤᠯ ᠨᠢ ᠪᠣᠰᠬᠠᠬᠤ ᠳ᠋ᠤ᠌ ᠶᠡᠬᠡ ᠲᠦᠪᠡᠭ ᠲᠠᠢ ᠯᠠ ᠶᠤᠮᠰᠠᠨ᠃ ᠵᠠᠮᠢᠶᠠᠨᠰᠢᠳᠠᠪ ᠤ᠋ᠨ ᠬᠢ ᠪᠡᠷ ᠦᠢᠯᠡᠳᠪᠡᠯ ᠴᠤ᠌ ᠠᠮᠠᠷᠬᠠᠨ ᠪᠤᠰᠬᠠᠵᠤ ᠪᠣᠯᠤᠨᠠ ᠯᠠ ᠳᠠ᠃ ᠵᠠ ᠲᠡᠢᠮᠦ ᠪᠠᠢᠵᠤ! ᠭᠡᠳ ᠰᠠᠨᠵᠢ ᠶ᠋ᠢ ᠴᠠᠰᠢ ᠶᠠᠭᠤᠮᠠ ᠠᠰᠠᠭᠤᠬᠤ ᠪᠠᠨ ᠪᠣᠯᠢᠬᠤ ᠰᠢᠨᠵᠢ ᠲᠡᠢ ᠪᠣᠯᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠨᠢ ᠬᠣᠶᠠᠷ ᠪᠢᠴᠢᠭᠡᠴᠢ ᠶᠡᠬᠡ ᠰᠠᠨᠳᠤᠷᠴᠤ᠂ ᠠᠮᠠ ᠪᠤᠯᠢᠶᠠᠯᠳᠤᠨ᠂
- ᠣᠷᠣᠢ ᠨᠢ ᠮᠥᠨ ᠰᠠᠢᠬᠠᠨ ᠪᠣᠯᠵᠠᠢ᠃ ᠭᠠᠭᠴᠠᠬᠠᠨ ᠵᠣᠪᠠᠬᠤ ᠶᠠᠭᠤᠮᠠ ᠪᠣᠢ᠃ 《ᠰᠠᠢᠨ ᠬᠥᠮᠦᠨ ᠦ᠌ ᠨᠡᠷᠡ ᠶ᠋ᠢ ᠮᠠᠭᠤ ᠬᠥᠮᠦᠨ᠂ ᠰᠠᠢᠬᠠᠨ ᠰᠦᠮᠡ ᠶ᠋ᠢᠨ ᠨᠢᠷᠤᠭᠤ ᠶ᠋ᠢ ᠱᠠᠭᠠᠵᠠᠭᠠᠢ ᠰᠢᠪᠠᠭᠤ ᠪᠠᠭᠠᠰᠤᠳᠠᠨᠠ》ᠭᠡᠬᠦ ᠰᠢᠭ ᠲᠡᠷᠡ ᠰᠠᠢᠬᠠᠨ ᠣᠷᠣᠢ ᠳ᠋ᠤ᠌ ᠨᠢ ᠰᠢᠪᠠᠭᠤ ᠨᠡᠯᠢᠶᠡᠳ ᠡᠭᠦᠷᠯᠡᠳᠡᠭ ᠪᠣᠯᠤᠯᠲᠠᠢ ᠭᠡᠪᠡ᠃
- ᠥ ᠲᠡᠷᠡ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ? ᠬᠡᠷᠢᠶᠡ᠂ ᠪᠢᠯᠵᠤᠤᠬᠠᠢ᠂ ᠬᠡᠭᠦᠷᠵᠡᠭᠡᠨᠡ ᠰᠢᠪᠠᠭᠤᠨ ᠳ᠋ᠤ᠌ ᠦᠯᠦ ᠬᠥᠨᠥᠭᠡᠭᠳᠡᠬᠦ ᠶ᠋ᠢᠨ ᠲᠤᠯᠠᠳᠠ ᠰᠢᠪᠠᠭᠤᠨ ᠤ᠋ ᠲᠣᠣᠷ ᠬᠢᠬᠦ ᠤᠴᠢᠷᠲᠠᠢ᠃ ᠴᠠᠬᠢᠯᠳᠠᠭ᠂ ᠬᠥᠪᠥᠩ᠂ ᠡᠪᠡᠰᠦ ᠳᠠᠷᠠᠰᠤ᠂ ᠨᠣᠣᠰᠣ᠂ ᠳᠠᠪᠤᠤ ᠪᠠᠷ ᠰᠠᠢᠬᠠᠨ ᠲᠣᠣᠷ ᠦᠢᠯᠡᠳᠴᠦ᠂ ᠨᠡᠬᠡᠵᠦ ᠪᠣᠯᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠃ ᠲᠡᠮᠦᠷ ᠤᠲᠠᠰᠤ ᠪᠠᠷ ᠦᠢᠯᠡᠳᠬᠦ ᠪᠣᠯᠪᠠᠴᠤ ᠵᠢᠪᠡᠷᠡᠵᠦ ᠮᠠᠭᠤᠳᠠᠬᠤ ᠶᠣᠰᠣᠨ ᠪᠣᠢ ᠭᠡᠵᠦ ᠰᠠᠨᠵᠢ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠶᠠᠷᠢᠪᠠ᠃
ᠬᠣᠶᠠᠷ ᠪᠢᠴᠢᠭᠡᠴᠢ ᠦᠭᠡ ᠦᠰᠦᠭ ᠠᠯᠠᠳᠠᠬᠤ ᠦᠭᠡᠢ ᠪᠢᠴᠢᠵᠦ ᠪᠠᠢᠯᠠ᠃ ᠨᠢᠭᠡ ᠨᠢ ᠪᠢᠷ ᠢ᠋ᠶ᠋ᠡᠷ᠂ ᠨᠥᠭᠦᠭᠡ ᠨᠢ ᠬᠤᠯᠤᠰᠤᠨ ᠦᠵᠦᠭ ᠢ᠋ᠶ᠋ᠡᠷ ᠪᠢᠴᠢᠵᠦ ᠰᠠᠭᠤᠯᠠ᠃
- ᠣᠷᠣᠢ ᠨᠢ ᠰᠠᠢᠬᠠᠨ ᠪᠣᠯᠵᠤ ᠭᠡᠵᠦ ᠲᠠ ᠨᠠᠷ ᠶᠠᠷᠢᠪᠠ ᠤᠤ? ᠶᠠᠭᠤ ᠨᠢ ᠲᠡᠢᠮᠦ ᠰᠠᠨᠠᠭᠳᠠᠪᠠ? ᠭᠡᠵᠦ ᠰᠠᠨᠵᠢ ᠲᠡᠰᠴᠦ ᠴᠢᠳᠠᠯ ᠦᠭᠡᠢ ᠠᠰᠠᠭᠤᠯᠠ᠃ ᠣᠷᠣᠢ ᠶ᠋ᠢ ᠨᠢ ᠳᠠᠭᠤᠰᠬᠠᠨ ᠪᠠᠷᠢᠭᠰᠠᠨ ᠭᠡᠬᠦ ᠳ᠋ᠦ᠍ ᠲᠡᠷᠡ ᠰᠡᠵᠢᠭᠯᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠡᠢᠨ ᠬᠦ᠌ ᠲᠣᠳᠣᠳᠬᠠᠨ ᠠᠰᠠᠭᠤᠵᠠᠢ᠃ ᠪᠢᠴᠢᠭᠡᠴᠢ ᠬᠣᠶᠠᠷ ᠴᠤ᠌ ᠡᠭᠦᠨ ᠢ᠋ ᠪᠠᠰᠠ ᠣᠢᠯᠠᠭᠠᠭᠠᠳ ᠠᠪᠴᠠᠢ᠃ 《ᠣᠷᠣᠢ ᠶ᠋ᠢ ᠨᠢ ᠪᠠᠷᠢᠬᠤ ᠠᠷᠭᠠ ᠶ᠋ᠢ ᠶᠠᠭᠠᠬᠢᠵᠤ ᠬᠡᠯᠡᠭᠦᠯᠵᠦ ᠠᠪᠬᠤ ᠪᠢᠯᠡ? ᠭᠣᠣᠯ ᠨᠢ ᠣᠷᠣᠢ ᠶ᠋ᠢ ᠨᠢ ᠬᠡᠷᠬᠢᠨ ᠪᠦᠲᠦᠭᠡᠬᠦ ᠲᠤᠬᠠᠢ ᠮᠡᠳᠡᠵᠦ ᠢᠷᠡᠬᠦ ᠶ᠋ᠢ ᠳᠠᠭᠠᠭᠠᠯᠭᠠᠭᠰᠠᠨ ᠪᠢᠵᠡ ᠳᠡ? ᠣᠳᠣ ᠪᠣᠯᠲᠠᠯᠠ ᠬᠡᠯᠡᠭᠦᠯᠵᠦ ᠠᠪᠤᠭᠰᠠᠨ ᠶᠠᠭᠤᠮᠠ ᠮᠠᠨᠢ ᠦᠨᠡᠨ ᠳ᠋ᠦ᠍ ᠪᠡᠨ ᠪᠠᠷᠤᠭ ᠬᠢᠭᠳᠡᠭᠡᠳ ᠪᠦᠲᠦᠴᠢᠬᠡᠭᠰᠡᠨ ᠯᠡ ᠵᠦᠢᠯ ᠪᠣᠯᠤᠨᠠ᠃ ᠬᠡᠯᠡᠭᠦᠯᠵᠦ ᠠᠪᠤᠭᠰᠠᠨ ᠵᠦᠢᠯ ᠲᠡᠭᠡᠭᠡᠳ ᠬᠠᠩᠭᠠᠯᠲᠠᠲᠠᠢ ᠴᠤ᠌ ᠶᠤᠮ ᠤᠤ᠂ ᠦᠭᠡᠢ ᠴᠤ᠌ ᠶᠤᠮ ᠤᠤ᠂ ᠪᠠᠰᠠ ᠮᠡᠳᠡᠬᠦ ᠳ᠋ᠦ᠍ ᠪᠡᠷᠬᠡ᠃ ᠪᠤᠴᠠᠭᠠᠳ ᠣᠴᠢᠭᠰᠠᠨ ᠴᠢᠨᠢ ᠬᠡᠷᠡᠭ ᠲᠡᠢ ᠶᠠᠭᠤᠮᠠ ᠣᠯᠵᠤ ᠢᠷᠡᠭᠡ ᠦᠭᠡᠢ ᠪᠠᠢᠨᠠ ᠭᠡᠳ ᠡᠷᠭᠢᠭᠦᠯᠦᠭᠡᠳ ᠬᠥᠭᠡᠭᠡᠪᠡᠯ ᠶᠠᠭᠠᠬᠢᠨᠠ᠃ ᠲᠡᠭᠡᠪᠡᠯ ᠴᠤ᠌ ᠡᠨᠡ ᠬᠣᠯᠠ ᠭᠠᠵᠠᠷ ᠳᠠᠬᠢᠨ ᠡᠷᠭᠢᠵᠦ ᠢᠷᠡᠬᠦ ᠭᠡᠵᠦ ᠲᠤᠷᠠᠵᠤ ᠦᠬᠦᠬᠦ ᠬᠡᠷᠡᠭ ᠭᠠᠷᠤᠨᠠ ᠪᠠᠢᠬᠠ ᠳᠠ᠃ ᠬᠦᠷᠦᠭᠡᠳ ᠢᠷᠡᠭᠰᠡᠨ ᠴᠢᠨᠢ ᠡᠨᠡ ᠬᠥᠮᠦᠨ ᠥᠭᠡᠳᠡ ᠪᠣᠯᠴᠢᠬᠠᠭᠰᠠᠨ ᠪᠠᠢᠬᠤ ᠶ᠋ᠢ ᠦᠭᠡᠢ ᠭᠡᠬᠦ ᠴᠤ᠌ ᠠᠷᠭᠠ ᠦᠭᠡᠢ᠃ ᠲᠡᠭᠡᠪᠡᠯ ᠴᠤ᠌ ᠳᠡᠮᠴᠦᠭ ᠭᠠᠪᠵᠤ᠂ ᠳᠡᠮᠪᠡᠷᠢᠯ ᠭᠡᠰᠬᠦᠢ ᠶ᠋ᠢᠨ ᠭᠠᠷ ᠠ᠋ᠴᠠ ᠠᠮᠢᠳᠤ ᠭᠠᠷᠬᠤ ᠦᠭᠡᠢ ᠳᠡ》 ᠭᠡᠵᠦ ᠪᠢᠴᠢᠭᠡᠴᠢ ᠶ᠋ᠢᠨ ᠠᠬᠢᠮᠠᠭ ᠨᠠᠰᠤᠲᠠᠢ ᠨᠢ ᠲᠡᠷᠡ ᠬᠣᠭᠣᠷᠣᠨᠳᠣ ᠪᠣᠳᠣᠭᠠᠳ ᠠᠢᠳᠠᠰ ᠨᠢ ᠬᠦᠷᠦᠯᠡ᠃ ᠲᠡᠭᠡᠲᠡᠯᠡ ᠰᠠᠨᠵᠢ ᠥᠪᠡᠷ ᠢ᠋ᠶ᠋ᠡᠨ ᠠᠮᠠ ᠥᠷᠢᠰᠴᠦ ᠱᠠᠯ ᠥᠭᠡᠷᠡ ᠶᠠᠭᠤᠮᠠ ᠠᠰᠠᠭᠤᠪᠠ᠃
- ᠬᠤᠳᠳᠤᠭ ᠭᠠᠷᠭᠠᠬᠤ ᠶᠣᠰᠣᠲᠠᠢ ᠪᠠᠢᠭᠰᠠᠨ᠃ ᠲᠡᠷᠡ ᠶ᠋ᠢ ᠭᠠᠷᠭᠠᠭᠠ ᠪᠣᠯᠪᠠ ᠤᠤ? ᠭᠡᠵᠦ ᠰᠠᠨᠵᠢ ᠰᠣᠨᠢᠷᠬᠠᠯᠠ᠃ ᠰᠦᠮᠡ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠬᠤᠳᠳᠤᠭ ᠭᠠᠷᠭᠠᠬᠤ ᠠ᠋ᠴᠠ ᠪᠣᠯᠵᠤ ᠪᠠᠰᠠ ᠯᠠ ᠠᠨᠠᠢᠬᠠᠨ ᠳᠡᠮᠴᠦᠭ ᠭᠠᠪᠵᠢ ᠲᠠᠢ ᠠᠮᠠ ᠮᠤᠷᠤᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠵᠢ ᠡᠷᠭᠢᠨ ᠪᠣᠳᠣᠵᠠᠢ᠃
《ᠬᠤᠳᠳᠤᠭ ᠠ᠋ᠴᠠ ᠤᠰᠤ ᠠᠪᠬᠤ ᠴᠠᠭ ᠲᠤ᠌ ᠡᠬᠡᠨᠡᠷ ᠬᠥᠮᠦᠨ ᠤᠰᠤ ᠠᠪᠬᠤ ᠪᠠᠷ ᠢᠷᠡᠬᠦ ᠦᠶᠡ ᠲᠡᠭᠦᠨ ᠳ᠋ᠦ᠍ ᠲᠠᠴᠢᠶᠠᠬᠤ ᠰᠡᠳᠬᠢᠯ ᠲᠥᠷᠥᠬᠦ ᠠᠪᠠᠰᠤ ᠪᠡᠶᠡ ᠪᠡᠶᠡ ᠶ᠋ᠢ ᠬᠠᠷᠠᠭᠳᠠᠭᠤᠯᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠬᠠᠯᠬᠠᠪᠴᠢ ᠬᠡᠢ᠃ ᠭᠠᠷ ᠤ᠋ᠨ ᠨᠢ ᠠᠯᠭᠠᠨ ᠳᠣᠲᠣᠷᠠ ᠤᠰᠤ ᠴᠢᠳᠬᠤᠨ ᠳᠦᠭᠦᠷᠭᠡᠵᠦ ᠡᠬᠡᠨᠡᠷ ᠢ᠋ ᠳᠠᠭᠠᠨ ᠳᠡᠭᠳᠡᠷᠡᠭᠡᠳ ᠤᠰᠤ ᠶ᠋ᠢ ᠦᠷᠭᠦᠯᠵᠢᠯᠡᠭᠦᠯᠦᠨ ᠴᠢᠳᠬᠤᠵᠤ ᠮᠠᠭᠠᠳ᠃ ᠲᠡᠢᠨ ᠪᠤᠤ ᠦᠢᠯᠡᠳ》 ᠭᠡᠵᠦ ᠪᠤᠳᠢᠭ ᠭᠡᠳᠡᠭ ᠰᠤᠳᠤᠷ ᠲᠤ᠌ ᠪᠢᠴᠢᠭᠡᠰᠦᠲᠡᠢ ᠪᠠᠢᠳᠠᠭ ᠢ᠋ ᠶᠠᠭᠠᠬᠢᠭᠠᠳ ᠴᠤ᠌ ᠣᠯᠵᠤ ᠴᠡᠭᠡᠵᠢᠯᠡᠭᠰᠡᠨ ᠶᠦᠮ ᠪᠤᠤ ᠮᠡᠳᠡ᠃ ᠳᠡᠮᠴᠦᠭ ᠭᠠᠪᠵᠤ ᠮᠡᠳᠡᠳᠡᠭ ᠪᠠᠢᠯᠠ᠃ ᠰᠠᠨᠵᠢ ᠶ᠋ᠢᠨ ᠲᠥᠰᠦᠯ ᠢ᠋ᠶ᠋ᠡᠷ ᠬᠤᠳᠳᠤᠭ ᠢ᠋ ᠬᠠᠭᠠᠯᠲᠠ ᠦᠭᠡᠢ ᠬᠢᠭᠰᠡᠨ ᠳ᠋ᠦ᠍ ᠲᠡᠷᠡ ᠭᠠᠪᠵᠤ ᠶᠡᠬᠡᠳᠡ ᠬᠢᠯᠢᠩᠨᠡᠨ ᠠᠭᠤᠷᠯᠠᠵᠤ᠂ ᠵᠠᠪᠬᠠᠢ ᠰᠡᠳᠬᠢᠯ ᠦ᠋ᠨ ᠦᠷᠡ ᠪᠡᠷ ᠡᠢᠮᠦ ᠶᠠᠭᠤᠮᠠ ᠪᠣᠯᠤᠯᠠ ᠭᠡᠵᠦ ᠵᠢᠮᠡᠯᠡᠨ ᠬᠠᠭᠠᠯᠲᠠ ᠭᠠᠷᠭᠠᠬᠤ ᠶ᠋ᠢ ᠱᠠᠭᠠᠷᠳᠠᠭᠰᠠᠨ ᠪᠢᠯᠡ᠃ ᠭᠡᠪᠡᠴᠦ ᠬᠠᠭᠠᠯᠲᠠ ᠶ᠋ᠢ ᠰᠠᠨᠵᠢ ᠬᠢᠯᠭᠡᠭᠰᠡᠨ ᠦᠭᠡᠢ᠃ ᠡᠭᠦᠨ ᠳ᠋ᠦ᠍ ᠭᠠᠪᠵᠤ ᠠᠢᠬᠤᠪᠲᠤᠷ ᠬᠣᠷᠣᠰᠤᠨ ᠠᠭᠤᠷᠯᠠᠵᠤ ᠪᠠᠢᠯᠠ᠃
- ᠬᠤᠳᠳᠤᠭ ᠤ᠋ᠨ ᠲᠤᠬᠠᠢ ᠶᠠᠭᠤ ᠴᠤ᠌ ᠮᠡᠳᠡᠭᠰᠡᠨ ᠦᠭᠡᠢ ᠳᠡ! ᠭᠡᠵᠦ ᠪᠢᠴᠢᠭᠡᠴᠢ ᠶ᠋ᠢᠨ ᠨᠢᠭᠡ ᠨᠢ ᠬᠠᠷᠠᠮᠰᠠᠭᠰᠠᠨ ᠮᠠᠶᠢᠭᠲᠠᠢ ᠬᠠᠷᠢᠭᠤᠯᠵᠠᠢ᠃ 《ᠶᠠᠭᠠᠬᠢᠭᠠᠳ ᠬᠤᠳᠳᠤᠭ ᠤ᠋ᠨ ᠲᠤᠬᠠᠢ ᠠᠰᠠᠭᠤᠵᠤ ᠪᠠᠢᠭᠠ ᠶᠤᠮ ᠪᠣᠯ ᠳᠠ ᠵᠠᠢᠯᠠᠭᠤᠯ! ᠡᠨᠳᠡ ᠤᠰᠤ ᠦᠭᠡᠢ ᠴᠦᠯ ᠳ᠋ᠦ᠍ ᠴᠠᠩᠭᠠᠵᠤ ᠵᠣᠪᠠᠵᠤ ᠪᠠᠢᠳᠠᠭ ᠶᠤᠮ ᠪᠠᠢᠬᠠ ᠳᠠ᠃ ᠡᠷᠳᠡᠮ ᠲᠡᠭᠦᠰᠦᠭᠰᠡᠨ ᠰᠠᠢᠬᠠᠨ ᠯᠠᠮᠠ ᠢᠷᠡᠵᠦ ᠪᠢᠯᠡ᠃ ᠲᠡᠭᠡᠭᠡᠳ ᠬᠠᠷᠠᠭᠠ ᠮᠡᠯᠮᠡᠢ ᠶ᠋ᠢ ᠨᠢ ᠬᠥᠨᠥᠭᠡᠭᠡᠳ ᠡᠨᠡ ᠬᠣᠯᠠ ᠭᠠᠵᠠᠷ ᠶᠠᠭᠤᠨ ᠤ᠋ ᠤᠴᠢᠷ ᠴᠥᠯᠡᠴᠢᠬᠡᠳᠡᠭ ᠪᠠᠢᠨᠠ ? ᠬᠥᠮᠦᠨ ᠭᠡᠳᠡᠭ ᠬᠡᠴᠡᠭᠦᠦ ᠠᠮᠢᠲᠠᠨ ᠶᠤᠮ ᠳᠠ᠃ ᠨᠢᠭᠡ ᠨᠢᠭᠡᠨ ᠳ᠋ᠦ᠍ ᠪᠡᠨ ᠢᠩᠭᠢᠵᠦ ᠳᠠᠢᠰᠤᠩᠨᠠᠭᠠᠳ ᠶᠠᠭᠤ ᠬᠢᠨᠡ?》 ᠭᠡᠵᠦ ᠪᠢᠴᠢᠭᠡᠴᠢ ᠶ᠋ᠢᠨ ᠠᠬᠢᠮᠠᠭ ᠨᠠᠰᠤᠨ ᠤ᠋ ᠨᠢᠭᠡ ᠨᠢ ᠭᠠᠩᠰᠠᠷᠠᠨ ᠪᠣᠳᠣᠵᠤ ᠳᠠᠭᠤ ᠦᠭᠡᠢ ᠰᠠᠭᠤᠲᠠᠯᠠ ᠵᠠᠯᠠᠭᠤ ᠪᠢᠴᠢᠭᠡᠴᠢ ᠲᠡᠭᠦᠨ ᠳ᠋ᠦ᠍ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠳᠣᠬᠢᠶᠠ ᠥᠭᠴᠦ 《ᠠᠰᠠᠭᠤᠭᠠᠴᠢ!》 ᠭᠡᠵᠦ ᠱᠠᠭᠠᠷᠳᠠᠯᠠ᠃
- ᠰᠦᠮᠡ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠨᠢᠭᠡ ᠬᠠᠴᠢᠨ ᠤᠷᠲᠤ ᠨᠠᠷᠢᠬᠠᠨ ᠵᠠᠨᠴᠢᠡᠭ ᠰᠢᠭ ᠶᠠᠭᠤᠮᠠ ᠪᠣᠰᠬᠠᠴᠢᠬᠠᠭᠰᠠᠨ ᠬᠠᠷᠠᠭᠳᠠᠨᠠ ᠪᠢᠯᠡ᠃ ᠲᠡᠷᠡ ᠶᠠᠭᠤᠨ ᠤᠴᠢᠷ ᠲᠠᠢ ᠶᠤᠮ ᠪᠣᠯ ᠠ᠋? ᠭᠡᠵᠦ ᠡᠪᠦᠭᠡᠨ ᠪᠢᠴᠢᠭᠡᠴᠢ ᠬᠠᠰᠢᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠤᠳᠠᠯ ᠶᠠᠭᠤᠮᠠ ᠵᠣᠬᠢᠶᠠᠨ ᠶᠠᠷᠢᠯᠠ᠃ ᠲᠡᠭᠡᠭᠡᠳ ᠲᠡᠷᠡ ᠦᠭᠡ ᠨᠢ ᠤᠨᠤᠭᠰᠠᠨ ᠪᠣᠯᠤᠯᠲᠠᠢ᠃ ᠰᠠᠨᠵᠢ ᠢᠷᠪᠠᠢᠨ ᠳᠤᠷᠠ ᠦᠭᠡᠢᠴᠡᠵᠦ᠂
- ᠶᠠᠭᠤᠨ ᠵᠠᠨᠴᠠᠡᠭ ᠪᠣᠢ? ᠰᠦᠮᠡ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠤᠤ ᠳᠠ ᠣᠳᠣ! ᠲᠡᠢᠮᠦ ᠶᠠᠭᠤᠮᠠ ᠬᠢᠬᠦ ᠤᠴᠢᠷ ᠦᠭᠡᠢ᠃ ᠠᠶᠠ ᠦᠭᠡᠢ ᠪᠣᠯ ᠳᠡᠮᠴᠦᠭ ᠭᠠᠪᠵᠤ ᠰᠡᠴᠡᠷᠬᠡᠭᠡᠳ ᠯᠡ ᠬᠠᠴᠢᠨ ᠶᠠᠭᠤᠮᠠ ᠬᠢᠯᠭᠡᠭᠰᠡᠨ ᠪᠠᠢᠵᠤ ᠲᠠᠭᠠᠷᠠᠨᠠ᠃ ᠬᠠᠢᠷᠠᠨ ᠰᠦᠮᠡ ᠶ᠋ᠢ ᠭᠤᠲᠤᠭᠠᠭᠰᠠᠨ ᠪᠠᠢᠬᠠ ᠠ᠋ ᠳᠠ? ᠭᠡᠵᠦ ᠠᠰᠠᠭᠤᠯᠠ᠃
- ᠮᠡᠳᠡᠬᠦ ᠦᠭᠡᠢ ᠶᠦᠮ ᠳᠡ! ᠣᠰᠣᠯᠳᠠᠬᠤ ᠦᠭᠡᠢ ᠯᠡ ᠲᠡᠢᠮᠦᠷᠬᠦ ᠶᠠᠭᠤᠮᠠ ᠦᠵᠡᠭᠰᠡᠨ ᠭᠡᠵᠦ ᠪᠢᠴᠢᠭᠡᠴᠢ ᠬᠡᠯᠡᠪᠡ᠃
- ᠲᠤᠯᠭᠠᠭᠤᠷᠢ ᠶ᠋ᠢᠨ ᠨᠤᠮᠤ ᠨᠤᠭᠤᠳ ᠤ᠋ᠨ ᠳᠡᠭᠡᠭᠦᠷ ᠭᠣᠣᠯ ᠳᠤᠮᠳᠠᠬᠢ ᠵᠠᠩᠬᠠᠨ ᠲᠡᠷᠢᠭᠦᠲᠡᠨ ᠦ᠌ ᠨᠢᠷᠤᠭᠤ ᠶ᠋ᠢ ᠣᠯᠠᠨ ᠨᠢᠳᠦ ᠭᠠᠷᠭᠠᠨ ᠲᠠᠯᠪᠢᠵᠤ᠂ ᠠᠰᠠᠷ ᠲᠡᠷᠢᠭᠦᠲᠡᠨ ᠳ᠋ᠦ᠍ ᠵᠦᠭ ᠲᠣᠰᠪᠣᠷᠢ ᠳ᠋ᠤ᠌ ᠨᠢᠷᠤᠭᠤ ᠵᠣᠬᠢᠴᠠᠭᠤᠯᠤᠨ ᠲᠠᠯᠪᠢᠬᠤ ᠤᠴᠢᠷᠲᠠᠢ᠃ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠣᠨᠢ ᠶ᠋ᠢᠨ ᠲᠣᠯᠣᠭᠠᠢ ᠪᠥᠭᠰᠡ ᠶ᠋ᠢ ᠰᠣᠯᠢᠨ ᠲᠠᠯᠪᠢᠵᠤ ᠣᠨᠢᠨ ᠤ᠋ ᠪᠦᠷᠬᠦᠭᠦᠯ ᠰᠡᠯᠲᠡ ᠶ᠋ᠢ ᠲᠣᠬᠣᠭᠠᠳ ᠳᠡᠭᠡᠷᠡ ᠨᠢ ᠰᠢᠷᠠᠮᠳᠠᠭ ᠮᠣᠳᠣ ᠲᠠᠯᠪᠢᠬᠤ ᠶᠣᠰᠣᠲᠠᠢ᠃ ᠲᠡᠢᠮᠦ ᠮᠠᠶᠢᠭ ᠢ᠋ᠶ᠋ᠠᠷ ᠬᠢᠵᠦ ᠤᠤ᠂ ᠦᠭᠡᠢ ᠤᠤ? ᠭᠡᠵᠦ ᠰᠠᠨᠵᠢ ᠠᠰᠠᠭᠤᠯᠠ᠃
- ᠮᠡᠳᠡᠬᠦ ᠦᠭᠡᠢ ᠶᠦᠮ ᠳᠡ᠃ ᠲᠡᠢᠮᠦᠷᠬᠦ ᠪᠠᠢᠭᠰᠠᠨ ᠯᠠ ᠪᠠᠢᠬᠠ ᠳᠠ! ᠭᠡᠵᠦ ᠪᠢᠴᠢᠭᠡᠴᠢ ᠬᠡᠯᠡᠬᠦ ᠳ᠋ᠦ᠍ ᠰᠠᠨᠵᠢ ᠡᠷᠡᠭᠡᠯᠵᠡᠨ ᠭᠠᠢᠬᠠᠵᠤ᠂
- ᠰᠢᠷᠠᠮᠳᠠᠭ ᠮᠣᠳᠣᠨ ᠤ᠋ ᠳᠡᠭᠡᠷᠡ ᠁ ᠭᠡᠵᠦ ᠬᠡᠯᠡᠲᠡᠯᠡ ᠲᠡᠷᠡ ᠦᠭᠡ ᠶ᠋ᠢ ᠪᠢᠴᠢᠵᠦ ᠪᠠᠢᠭᠰᠠᠨ ᠵᠠᠯᠠᠭᠤ ᠪᠢᠴᠢᠭᠡᠴᠢ ᠶ᠋ᠢᠨ ᠬᠤᠯᠤᠰᠤᠨ ᠦᠵᠦᠭ ᠴᠠᠭᠠᠰᠤᠨ ᠳᠡᠭᠡᠷᠡ ᠭᠡᠨᠡᠳᠲᠡ ᠴᠢᠬᠢᠷᠡᠨ ᠳᠤᠤᠭᠠᠷᠤᠯᠠ᠃ ᠦᠭᠡ ᠶ᠋ᠢ ᠨᠢ ᠪᠢᠴᠢᠵᠦ ᠠᠪᠴᠤ ᠪᠠᠢᠭᠰᠠᠨ ᠢ᠋ ᠲᠡᠷᠡ ᠳᠣᠣᠷᠠ ᠪᠠᠨ ᠣᠢᠯᠠᠭᠠᠭᠰᠠᠨ ᠰᠠᠨᠵᠢ ᠶ᠋ᠢᠨ ᠴᠢᠷᠠᠢ ᠪᠠᠷᠤᠰᠬᠢᠨ ᠬᠤᠪᠢᠷᠠᠵᠤ ᠣᠭᠴᠣᠮ ᠪᠣᠰᠤᠭᠠᠳ᠂
- ᠠ ᠲᠠᠨᠤᠰ ᠲᠡᠭᠡᠨᠡ ᠪᠣᠢ! ᠭᠡᠵᠦ ᠬᠠᠰᠬᠢᠷᠤᠭᠠᠳ ᠲᠠᠶᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠢᠴᠢᠭᠡᠴᠢ ᠨᠠᠷ ᠢ᠋ ᠴᠣᠬᠢᠵᠤ ᠬᠥᠭᠡᠭᠡᠬᠦ ᠪᠡᠷ ᠤᠷᠤᠯᠳᠤᠨ ᠤᠬᠤᠰᠬᠢᠲᠡᠯᠡ ᠬᠠᠷᠮᠠᠭ ᠤ᠋ᠨ ᠪᠤᠲᠠᠨ ᠳ᠋ᠤ᠌ ᠲᠡᠭᠡᠭᠯᠡᠵᠦ ᠣᠢᠴᠢᠯᠠ ᠁
ᠬᠢᠨᠠᠭᠴᠢ᠄ ᠲᠦᠮᠡᠨᠴᠡᠴᠡᠭ