ᠪᠤᠯᠠᠭ ᠰᠠᠴᠤᠭᠰᠠᠨ ᠰᠢᠵᠢᠷ – ᠴᠣ ᠂ ᠣᠷᠱᠤᠨ Булаг цацсан шижир – Чо ᠂ Оршин
252ᠪᠤᠯᠠᠭ ᠰᠠᠴᠤᠭᠰᠠᠨ ᠰᠢᠵᠢᠷ
ᠨᠤᠲᠤᠭ ᠤ᠋ᠨ ᠰᠡᠳᠬᠢᠯ
ᠲᠥᠷᠥᠯᠬᠢ ᠨᠤᠲᠤᠭ ᠳᠣᠲᠣᠨᠣ
ᠲᠥᠷᠥᠭᠰᠡᠨ ᠪᠡᠶᠡ ᠲᠡᠭᠦᠨ ᠦ᠌
ᠤᠨᠠᠭᠠᠨ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠭᠠᠵᠠᠷ ᠲᠤ
ᠤᠰᠤ ᠶ᠋ᠢ ᠨᠢ ᠠᠮᠰᠠᠭᠠᠳ ᠰᠡᠷᠭᠦᠯᠡ᠂
ᠤᠨᠠᠭᠰᠠᠨ ᠰᠢᠷᠣᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠥᠷᠥᠰᠥᠨ ᠳ᠋ᠦ᠍
ᠣᠶᠤᠨ ᠰᠡᠳᠬᠢᠯ ᠴᠤ᠌ ᠬᠣᠷᠭᠣᠲᠠᠯᠠ᠃
ᠬᠠᠷᠠᠭᠠ ᠴᠡᠯᠡᠭᠡᠷ ᠬᠣᠭᠣᠯᠠᠢ ᠶ᠋ᠢᠨ
ᠬᠠᠨᠠᠭᠠᠷ ᠲᠡᠨᠢᠭᠡᠷ ᠲᠤ ᠠᠭᠤᠵᠢᠷᠠᠯᠠ᠂
ᠬᠠᠮᠢᠭᠠ ᠠ᠋ᠴᠠ ᠴᠤ᠌ ᠰᠦᠷᠲᠡᠢ ᠣᠪᠣᠭᠠ ᠶ᠋ᠢᠨ
ᠬᠠᠳᠠᠭ ᠰᠡᠷᠵᠢᠮ ᠢ᠋ ᠴᠤ᠌ ᠦᠵᠡᠯᠡ᠃
ᠪᠤᠭᠤᠷᠤᠯ ᠨᠠᠰᠤᠲᠠᠢ ᠡᠪᠦᠭᠡᠳ ᠦ᠋ᠨ
ᠨᠠᠢᠷᠠᠭᠯᠠᠭᠰᠠᠨ ᠢᠷᠦᠭᠡᠯ ᠢ᠋ ᠰᠣᠨᠣᠰᠤᠯᠠ᠂
ᠪᠤᠯᠠᠭ ᠠ᠋ᠴᠠ ᠡᠭᠦᠰᠦᠭᠰᠡᠨ ᠴᠠᠳᠢᠭ ᠢ᠋ᠶ᠋ᠠᠨ
ᠨᠠᠢᠷᠠᠭᠯᠠᠭᠰᠠᠨ ᠪᠠᠳᠠᠭ ᠢ᠋ᠶ᠋ᠠᠷ ᠠᠭᠤᠰᠬᠠᠯᠠ᠃
ᠪᠠᠶᠠᠨ ᠪᠠᠷᠭᠤ ᠶ᠋ᠢᠨ ᠰᠦᠯᠳᠡ
ᠪᠣᠭᠳᠠ ᠠᠭᠤᠯᠠ ᠰᠦᠨᠳᠡᠷᠯᠡᠭᠰᠡᠨ
ᠪᠣᠰᠤᠭᠠ ᠬᠠᠶᠠᠯᠭᠠᠨ ᠤ᠋ ᠳᠣᠯᠭᠢᠶᠠᠨ
ᠪᠤᠢᠷ ᠂ ᠬᠥᠯᠥᠨ ᠲᠤᠨᠤᠯᠵᠠᠭᠰᠠᠨ
ᠪᠤᠶᠠᠨᠲᠤ ᠲᠠᠯᠠ ᠶ᠋ᠢᠨ ᠪᠠᠷᠠ ᠳ᠋ᠤ᠌
ᠪᠤᠯᠠᠭ ᠤ᠋ᠨ ᠣᠪᠣᠭᠠ ᠨᠢᠳᠦᠭᠦᠨ!
ᠪᠣᠰᠬᠠᠭᠳᠠᠵᠤ ᠰᠢᠲᠦᠭᠳᠡᠭᠰᠡᠨ ᠲᠡᠦᠬᠡ ᠨᠢ
ᠪᠤᠷᠭᠢᠯᠤᠭᠰᠠᠨ ᠰᠢᠯᠦᠭ ᠦ᠋ᠨ ᠰᠠᠴᠤᠯᠢ
ᠥᠷᠭᠡᠨ ᠵᠠᠢ① ᠰᠤᠮᠤᠨ ᠤ᠋ ᠮᠢᠨᠢ
ᠥᠨᠢᠷ ᠲᠡᠨᠢᠭᠡᠯᠡᠩ ᠴᠤ᠌ ᠡᠨᠡ ᠤᠤ⁈
ᠥᠩ ᠲᠡᠢ ᠶᠡᠬᠡ ᠲᠦᠮᠡᠨ ᠦ᠌ ᠮᠢᠨᠢ
ᠥᠭᠭᠢᠶᠡᠮᠦᠷ ᠲᠡᠨᠢᠭᠦᠨ ᠡᠨᠡ ᠤᠤ⁈
ᠡᠴᠢᠭᠡ᠂ ᠡᠬᠡ᠂ ᠨᠤᠲᠤᠭ ᠮᠢᠨᠢ
ᠡᠷᠢᠭᠡᠳ ᠣᠯᠬᠤ ᠦᠭᠡᠢ ᠡᠷᠳᠡᠨᠢ
ᠡᠨᠡᠬᠡᠨ ᠪᠡᠶᠡ ᠶ᠋ᠢᠨ ᠡᠰᠡᠨᠢᠯ ᠳ᠋ᠦ᠍
ᠡᠯᠡᠭᠳᠡᠵᠦ ᠬᠠᠶᠠᠭᠳᠠᠬᠤ ᠦᠭᠡᠢ ᠪᠤᠷᠬᠠᠨ
ᠨᠤᠭᠤᠰᠤ ᠭᠠᠯᠠᠭᠤ ᠵᠤᠯᠵᠠᠭᠠ
ᠨᠠᠭᠤᠷ ᠢ᠋ᠶ᠋ᠠᠨ ᠵᠠᠪᠠᠯ ᠡᠷᠭᠢᠳᠡᠭ᠂
ᠨᠤᠭᠤᠨ ᠬᠦᠦ ᠶ᠋ᠢᠨ ᠵᠢᠷᠦᠬᠡ ᠴᠤ᠌
ᠨᠤᠲᠤᠭ ᠢ᠋ᠶ᠋ᠠᠨ ᠡᠨᠡᠷᠢᠬᠦ ᠨᠢ ᠵᠦᠢ!
– – – –
① ᠥᠷᠭᠡᠨ ᠵᠠᠢ— ᠰᠢᠨᠡ ᠪᠠᠷᠭᠤ ᠵᠡᠭᠦᠨ ᠬᠤᠰᠢᠭᠤᠨ ᠤ᠋ ᠰᠢᠨᠠᠪᠤᠯᠠᠭ ᠵᠡᠭᠦᠨ᠂ ᠰᠢᠨᠠᠪᠤᠯᠠᠭ ᠪᠠᠷᠠᠭᠤᠨ᠂ ᠰᠢᠨᠠᠪᠤᠯᠠᠭ ᠰᠤᠮᠤ ᠶ᠋ᠢ ᠤᠭ ᠨᠢ ᠥᠷᠭᠡᠨ ᠵᠠᠢ ᠰᠤᠮᠤ ᠭᠡᠵᠦ ᠪᠠᠢᠵᠠᠢ᠃
ᠢᠷᠡᠯᠲᠡ᠄ ᠴᠣ· ᠣᠷᠱᠤᠨ ᠤ᠋《 ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ ᠭᠡᠳᠡᠭ ᠰᠢᠯᠦᠭ ᠦ᠋ᠨ ᠲᠡᠭᠦᠪᠦᠷᠢ ᠡᠴᠡ ᠡᠰᠢᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄
ᠪᠠᠶᠠᠷᠴᠡᠴᠡᠭ 2024 03 26