ᠠᠷᠴᠠАрц
495
ᠠᠷᠴᠠ( ᠬᠠᠪᠲᠠᠭᠠᠢ ᠠᠷᠴᠠ)
ᠠᠷᠴᠠ ᠶ᠋ᠢᠨ ᠢᠵᠠᠭᠤᠷ
ᠮᠥᠩᠬᠡ ᠨᠣᠭᠣᠭᠠᠨ ᠲᠤᠷᠤᠭ ᠮᠣᠳᠣ᠂ 15—20m ᠥᠨᠳᠥᠷ᠃ ᠣᠯᠠᠪᠲᠤᠷ ᠬᠦᠷᠡᠩ ᠪᠤᠶᠤ ᠬᠠᠷᠠᠪᠲᠤᠷ ᠬᠦᠷᠡᠩ ᠬᠣᠯᠲᠣᠰᠣ ᠲᠠᠢ᠃ ᠵᠢᠵᠢᠭ ᠮᠥᠴᠢᠷ ᠨᠢ ᠬᠠᠪᠲᠠᠭᠠᠢ ᠪᠥᠭᠡᠳ ᠰᠢᠯᠤᠭᠤᠨ ᠤᠷᠭᠤᠬᠤ ᠪᠣᠯᠬᠣᠷ ᠣᠯᠠᠩᠬᠢ ᠳ᠋ᠠᠭᠠᠨ ᠭᠠᠵᠠᠷ ᠲᠠᠢ ᠡᠭᠴᠡ ᠥᠨᠴᠥᠭᠲᠦ ᠪᠡᠷ ᠪᠠᠢᠷᠢᠯᠠᠨᠠ᠃ ᠨᠠᠪᠴᠢ ᠨᠢ ᠬᠠᠢᠷᠰᠤᠨ ᠬᠡᠯᠪᠡᠷᠢ ᠲᠡᠢ᠂1—3mm ᠤᠷᠲᠤ᠂ ᠠᠷᠤ ᠳ᠋ᠠᠭᠠᠨ ᠨᠢᠭᠡᠨ ᠪᠤᠯᠴᠢᠷᠬᠠᠢ ᠶ᠋ᠢᠨ ᠬᠣᠪᠢᠯ ᠲᠠᠢ᠂ ᠦᠵᠦᠭᠦᠷ ᠨᠢ ᠭᠠᠳᠠᠭᠰᠢ ᠰᠡᠷᠪᠡᠢᠨ ᠮᠥᠴᠢᠷ ᠳᠡᠭᠡᠷᠡ ᠪᠡᠨ ᠰᠣᠯᠪᠢᠴᠠᠵᠤ ᠴᠢᠭᠲᠠᠯᠠᠨ ᠤᠷᠭᠤᠨᠠ᠃ ᠴᠡᠴᠡᠭ ᠨᠢ ᠭᠠᠭᠴᠠ ᠪᠡᠯᠭᠡ ᠲᠡᠢ᠂ ᠨᠢᠭᠡ ᠭᠡᠷ ᠲᠡᠢ᠂ ᠪᠦᠷ ᠵᠢᠵᠢᠭ ᠮᠥᠴᠢᠷ ᠦ᠋ᠨ ᠣᠷᠣᠢ ᠳ᠋ᠤ᠌ ᠤᠷᠭᠤᠨᠠ᠃ ᠡᠷᠡ ᠪᠠᠭ ᠴᠡᠴᠡᠭ ᠨᠢ ᠰᠢᠷᠠ ᠪᠥᠭᠡᠳ ᠵᠢᠷᠭᠤᠭᠠᠨ ᠬᠣᠣᠰ ᠡᠷᠡ ᠲᠣᠭᠣᠷᠴᠣᠭ ᠲᠠᠢ; ᠡᠮᠡ ᠪᠠᠭ ᠴᠡᠴᠡᠭ ᠨᠢ ᠪᠥᠮᠪᠦᠭᠡᠨ ᠬᠡᠯᠪᠡᠷᠢ ᠲᠡᠢ᠂ ᠪᠣᠷᠣ ᠥᠩᠭᠡ ᠲᠡᠢ᠃ ᠪᠣᠷᠭᠣᠴᠣᠭ ᠨᠢ ᠥᠨᠳᠡᠭᠡᠯᠵᠢᠨ᠂ 1᠂5—2 cm ᠤᠷᠲᠤ᠂ ᠲᠤᠰ ᠵᠢᠯ ᠳ᠋ᠡᠭᠡᠨ ᠪᠣᠯᠪᠠᠰᠤᠷᠠᠨᠠ᠂6—8 ᠵᠤᠵᠠᠭᠠᠪᠲᠤᠷ ᠮᠢᠬᠠᠯᠢᠭ ᠦᠷᠡ ᠶ᠋ᠢᠨ ᠬᠠᠢᠷᠰᠤ ᠲᠠᠢ᠂ ᠡᠬᠢᠨ ᠳ᠋ᠡᠭᠡᠨ ᠬᠥᠬᠡᠪᠲᠦᠷ ᠨᠣᠭᠣᠭᠠᠨ᠂ ᠴᠠᠭᠠᠨ ᠣ ᠲᠠᠢ᠂ ᠪᠣᠯᠪᠠᠰᠤᠷᠠᠪᠠᠯ ᠮᠣᠳᠣᠵᠢᠨᠠ᠂ ᠤᠯᠠᠭᠠᠨ ᠬᠦᠷᠡᠩ ᠪᠣᠯᠵᠤ ᠬᠤᠪᠢᠷᠠᠬᠤ ᠪᠥᠭᠡᠳ ᠬᠠᠭᠠᠷᠠᠨᠠ᠃ ᠦᠷᠡ ᠨᠢ ᠥᠨᠳᠡᠭᠡᠯᠵᠢᠨ᠂ ᠰᠢᠷᠠᠪᠲᠤᠷ ᠬᠦᠷᠡᠩ᠂ ᠳᠠᠯᠠᠪᠴᠢ ᠦᠭᠡᠢ᠂ ᠢᠷᠮᠡᠭ ᠲᠡᠢ; ᠦᠷᠡ ᠶ᠋ᠢᠨ ᠬᠠᠢᠷᠰᠤ ᠶ᠋ᠢᠨ ᠠᠷᠤ ᠲᠠᠯᠠ ᠶ᠋ᠢᠨ ᠣᠷᠣᠢ ᠣᠷᠴᠢᠮ ᠳ᠋ᠤᠨᠢ ᠭᠠᠳᠠᠭᠰᠢ ᠮᠠᠲᠠᠭᠠᠷ ᠱᠣᠪᠬᠣ ᠦᠵᠦᠭᠦᠷ ᠲᠡᠢ; ᠳᠤᠮᠳᠠᠬᠢ ᠦᠷᠡ ᠶ᠋ᠢᠨ ᠬᠠᠢᠷᠰᠤ ᠨᠢ ᠲᠤᠰ ᠪᠦᠷᠢ1—2 ᠦᠷᠡ ᠲᠡᠢ᠃
ᠴᠢᠭᠢᠭᠯᠢᠭ ᠪᠥᠭᠡᠳ ᠥᠩ ᠰᠢᠮᠡᠯᠢᠭ ᠠᠭᠤᠯᠠ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠰᠠᠢᠨ ᠤᠷᠭᠤᠨᠠ᠂ ᠭᠠᠩ ᠬᠠᠭᠤᠷᠠᠢ ᠠᠭᠤᠯᠠ ᠶ᠋ᠢᠨ ᠬᠠᠵᠠᠭᠤ ᠬᠢᠭᠡᠳ ᠲᠡᠭᠰᠢ ᠲᠠᠯᠠ ᠪᠠᠷ ᠪᠠᠰᠠ ᠤᠷᠭᠤᠳᠠᠭ᠃ ᠬᠡᠷᠪᠡ ᠴᠠᠪᠴᠢᠮᠠ ᠬᠠᠳᠠ ᠴᠢᠯᠠᠭᠤᠨ ᠳᠡᠭᠡᠷᠡ ᠤᠷᠭᠤᠭᠰᠠᠨ ᠪᠣᠯ ᠪᠦᠷ ᠪᠤᠲᠠ ᠮᠣᠳᠣ ᠰᠢᠭ᠋ ᠪᠠᠢᠳᠠᠭ᠃
ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠣᠯᠠᠩᠬᠢ ᠮᠣᠵᠢ ᠣᠷᠣᠨ ᠳ᠋ᠤ᠌ ᠪᠦᠷ ᠤᠷᠭᠤᠳᠠᠭ᠃ ᠭᠠᠵᠠᠷ ᠪᠣᠯᠭᠠᠨ ᠳ᠋ᠤ᠌ ᠵᠠᠢᠯᠠᠵᠤ ᠪᠣᠢ᠃
ᠨᠠᠪᠴᠢ ᠰᠠᠯᠠᠭᠠ ᠠ᠋ᠴᠠ ᠨᠢ ᠠᠩᠬᠢᠯᠤᠮᠠ ᠲᠣᠰᠣ ᠠᠪᠴᠤ ᠪᠣᠯᠤᠨᠠ᠃ ᠮᠣᠳᠣ ᠶ᠋ᠢ ᠨᠢ ᠴᠠᠬᠢᠯᠭᠠᠨ ᠤᠲᠠᠰᠤᠨ ᠤ᠋ ᠪᠠᠭᠠᠨᠠ᠂ ᠠᠭᠤᠷᠬᠠᠢ ᠶ᠋ᠢᠨ ᠲᠤᠯᠭᠠᠭᠤᠷ ᠂ᠳᠡᠷᠡ ᠮᠣᠳᠣ᠂ ᠪᠠᠷᠢᠯᠭᠠ᠂ ᠲᠠᠷᠢᠶᠠᠯᠠᠩ ᠤ᠋ᠨ ᠪᠠᠭᠠᠵᠢ ᠬᠡᠷᠡᠭᠰᠡᠯ ᠵᠡᠷᠭᠡ ᠳ᠋ᠦ᠍ ᠠᠰᠢᠭᠯᠠᠨᠠ᠃ ᠵᠢᠵᠢᠭ ᠮᠥᠴᠢᠷ᠂ ᠨᠠᠪᠴᠢ᠂ ᠦᠷᠡ ᠨᠢ ᠡᠮ ᠳ᠋ᠦ᠍ ᠣᠷᠣᠨᠠ᠃ ᠲᠠᠷᠢᠶᠠᠨ ᠤ᠋ ᠡᠮ ᠨᠠᠢᠷᠠᠵᠤ ᠪᠠᠰᠠ ᠪᠣᠯᠤᠨᠠ᠃ ᠦᠵᠡᠮᠵᠢ ᠶ᠋ᠢᠨ ᠮᠣᠳᠣ᠃ ᠬᠢᠲᠠᠳ ᠨᠡᠷᠡ᠄ 侧柏
ᠠᠩᠭ᠌ᠯᠢ ᠨᠡᠷᠡ᠄Platycladus orientalis(L.)Franco
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣ ᠰᠡᠴᠡᠨᠲᠦ
ᠬᠢᠨᠠᠭᠴᠢ᠄ ᠫᠤ ·ᠴᠠᠭᠠᠨ