ᠮᠠᠯᠴᠢᠨ ᠬᠥᠮᠦᠨ ᠦ ᠳᠠᠭᠤᠤ < ᠳᠦᠷᠪᠡ > – ᠴᠣ ᠂ ᠣᠷᠱᠤᠨ Малчин хүний дуу < дөрөв > – Чо ᠂ Оршин
320ᠮᠠᠯᠴᠢᠨ ᠬᠥᠮᠦᠨ ᠦ ᠳᠠᠭᠤᠤ – ᠳᠦᠷᠪᠡ
ᠳᠥᠷᠪᠡ
ᠮᠢᠨᠦ ᠠᠮᠢ— ᠮᠠᠯ
ᠮᠢᠨᠦ ᠭᠡᠷ— ᠪᠡᠯᠴᠢᠭᠡᠷ
ᠥᠷᠭᠡᠨ ᠴᠡᠯᠡᠭᠡᠷ ᠲᠠᠯᠠ ᠳ᠋ᠤ᠌ ᠮᠢᠨᠢ
ᠦᠯᠢ ᠠᠷᠪᠢᠳᠤᠨ ᠬᠠᠯᠴᠠᠭᠠᠢᠷᠠᠪᠠᠯ
ᠥᠳᠬᠡᠨ ᠲᠡᠨᠢᠭᠡᠷ ᠪᠡᠯᠴᠢᠭᠡᠷ ᠮᠢᠨᠢ
ᠡᠪᠡᠰᠦ ᠤᠷᠭᠤᠮᠠᠯ ᠢ᠋ᠶ᠋ᠠᠷ ᠲᠠᠴᠢᠷᠳᠠᠪᠠᠯ
ᠮᠠᠯ ᠰᠦᠷᠦᠭ ᠮᠢᠨᠢ ᠶᠡᠷᠦ
ᠰᠢᠷᠣᠢ ᠬᠡᠮᠡᠯᠢᠨ ᠣᠨᠳᠣᠷᠣᠨᠠ ᠤᠤ?
ᠮᠠᠯᠴᠢᠨ ᠠᠷᠠᠳ ᠬᠠᠷᠢᠨ
ᠭᠠᠵᠠᠷ ᠲᠡᠪᠡᠷᠢᠨ ᠰᠠᠭᠤᠨᠠ ᠤᠤ?
ᠡᠪᠦᠭᠡ ᠳᠡᠭᠡᠳᠦ ᠶ᠋ᠢᠨ ᠭᠠᠵᠠᠷ
ᠦᠷᠡ ᠠᠴᠢ ᠨᠠᠷ ᠤ᠋ᠨ ᠭᠣᠯᠣᠮᠲᠠ
ᠮᠠᠯ ᠰᠦᠷᠦᠭ ᠦ᠋ᠨ ᠥᠯᠥᠭᠡᠢ
ᠮᠠᠯᠴᠢᠨ ᠬᠥᠮᠦᠨ ᠦ᠌ ᠭᠡᠷ ᠠ᠋᠂
ᠭᠡᠷ ᠢ᠋ᠶ᠋ᠡᠨ ᠬᠠᠶᠠᠳᠠᠭ ᠬᠥᠮᠦᠨ
ᠬᠡᠰᠦᠵᠦ ᠬᠡᠳᠦᠢ ᠶᠠᠪᠤᠨᠠ?
ᠭᠡᠳᠡᠰᠦ ᠳᠤᠮᠳᠠᠬᠠᠨ ᠮᠠᠯ
ᠬᠡᠮᠡᠯᠢᠵᠦ ᠬᠡᠳᠦᠢᠬᠡᠨ ᠲᠡᠰᠦᠨᠡ?
ᠤᠭᠰᠠᠭᠠ ᠶᠠᠰᠤᠲᠠᠨ ᠭᠡᠵᠦ ᠪᠠᠢᠭᠠᠳ
ᠣᠷᠣᠰᠢᠬᠤ ᠭᠠᠵᠠᠷ ᠦᠭᠡᠢ ᠪᠣᠯᠤᠨᠠ ᠭᠡᠵᠢ ᠤᠤ?
ᠥᠨᠢᠷ ᠰᠦᠷᠦᠭ ᠢ᠋ᠶ᠋ᠡᠨ ᠥᠰᠬᠡᠬᠦ ᠳ᠋ᠦ᠍
ᠡᠪᠡᠰᠦ ᠪᠡᠯᠴᠢᠭᠡᠷ ᠦᠭᠡᠢ ᠪᠣᠯᠤᠨᠠ ᠭᠡᠵᠢ ᠤᠤ?
ᠨᠤᠲᠤᠭ ᠢ᠋ᠶ᠋ᠠᠨ ᠬᠠᠢᠷᠠᠯᠠᠬᠤ ᠦᠭᠡᠢ ᠬᠥᠮᠦᠨ ᠪᠣᠯ
ᠨᠣᠮᠣᠬᠠᠨ ᠪᠣᠭᠣᠯ ᠤ᠋ᠨ ᠡᠬᠢᠯᠡᠯᠲᠡ ᠶᠦᠮ᠂
ᠪᠡᠯᠴᠢᠭᠡᠷ ᠢ᠋ᠶ᠋ᠡᠨ ᠬᠠᠮᠠᠭᠠᠯᠠᠬᠤ ᠦᠭᠡᠢ ᠲᠡᠨᠡᠭ ᠪᠣᠯ
ᠪᠡᠨᠡ ᠪᠡᠨ ᠠᠯᠳᠠᠬᠤ ᠶ᠋ᠢᠨ ᠲᠡᠮᠳᠡᠭ ᠶᠦᠮ᠂
ᠮᠠᠯ᠂ ᠪᠡᠯᠴᠢᠭᠡᠷ ᠬᠣᠶᠠᠷ
ᠲᠠᠷᠢᠶᠠ ᠰᠢᠷᠣᠢ ᠶ᠋ᠢᠨ ᠰᠦᠯᠪᠡᠭᠡ ᠲᠡᠢ
ᠮᠠᠯᠴᠢᠨ᠂ ᠨᠤᠲᠤᠭ ᠬᠣᠶᠠᠷ
ᠮᠢᠬᠠ ᠴᠢᠰᠤᠨ ᠤ᠋ ᠬᠣᠯᠪᠣᠭᠠ ᠲᠠᠢ
ᠥᠯᠥᠨ ᠬᠤᠯᠤᠭᠠᠨᠠ ᠶ᠋ᠢᠨ ᠦᠷᠡᠵᠢᠯ ᠢ᠋
ᠦᠨᠳᠦᠰᠦ ᠲᠠᠰᠤᠯᠤᠨ ᠤᠰᠠᠳᠬᠠᠵᠤ
ᠡᠪᠡᠰᠦ ᠪᠡᠯᠴᠢᠭᠡᠷ ᠢ᠋ ᠳᠠᠢᠰᠤᠩᠨᠠᠭᠰᠠᠨ
ᠦᠯᠢ ᠶ᠋ᠢᠨ ᠨᠦᠬᠡ ᠶ᠋ᠢ ᠪᠥᠭᠯᠡᠭᠡᠳ
ᠥᠭᠭᠢᠶᠡᠮᠦᠷ ᠬᠠᠩᠭᠠᠢ ᠪᠡᠯᠴᠢᠭᠡᠷ ᠲᠤ
ᠥᠯᠵᠡᠢ ᠤᠲᠠᠰᠤ ᠬᠠᠳᠬᠤᠵᠤ
ᠥᠭᠡᠳᠡᠷᠬᠡᠭ ᠰᠠᠢᠬᠠᠨ ᠠᠮᠢᠳᠤᠷᠠᠯ ᠳ᠋ᠤ᠌
ᠦᠢᠯᠡᠰ ᠦ᠋ᠨ ᠬᠤᠲᠤᠭ ᠰᠦᠯᠳᠡᠯᠡᠭᠡᠳ
ᠮᠠᠯ ᠢ᠋ᠶ᠋ᠠᠨ ᠦᠷᠡᠵᠢᠭᠦᠯᠵᠦ ᠶᠠᠪᠤᠬᠤ ᠨᠢ
ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ
ᠮᠠᠯᠴᠢᠨ ᠭᠡᠭᠳᠡᠵᠦ ᠪᠠᠢᠬᠤ ᠨᠢ
ᠮᠠᠯ ᠰᠦᠷᠦᠭ ᠦ᠋ᠨ ᠠᠴᠢ
ᠮᠢᠨᠦ ᠨᠡᠷᠡ— ᠮᠠᠯᠴᠢᠨ ᠶᠤᠮ
ᠮᠢᠨᠦ ᠠᠯᠳᠠᠷ— ᠳᠠᠭᠤᠤ ᠶᠤᠮ
ᠮᠢᠨᠦ ᠭᠡᠷ— ᠪᠡᠯᠴᠢᠭᠡᠷ ᠶᠦᠮ
ᠮᠢᠨᠦ ᠠᠮᠢ— ᠮᠠᠯ ᠶᠤᠮ ᠠ᠋᠃
ᠢᠷᠡᠯᠲᠡ᠄ ᠴᠣ ᠂ ᠣᠷᠱᠤᠨ ᠤ᠋《ᠮᠠᠯᠴᠢᠨ ᠬᠥᠮᠦᠨ ᠦ᠌ ᠳᠠᠭᠤᠤ 》 ᠨᠣᠮ ᠠ᠋ᠴᠠ ᠡᠰᠢᠯᠡᠪᠡ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠷᠴᠡᠴᠡᠭ
2024 03 24 ᠠᠮᠤᠭᠤᠯᠠᠩ ᠪᠠᠯᠭᠠᠰᠤᠨ ᠳ᠋ᠤ᠌