ᠣᠷᠣᠢ ᠦᠭᠡᠢ ᠰᠦᠮᠡ – ᠭᠤᠴᠢᠨ ᠨᠢᠭᠡ ᠂ ᠰᠢᠷᠠ ᠰᠢᠪᠲᠤᠯᠬᠤ ᠪᠠᠷ ᠰᠢᠢᠳᠦᠭᠰᠡᠨ ᠨᠢ Оройгүй сүм – Гучин нэг᠂Шар шувтлахаар шийдсэн нь - Oroigui sum 31
943ᠭᠤᠴᠢᠨ ᠨᠢᠭᠡ ᠂ ᠰᠢᠷᠠ ᠰᠢᠪᠲᠤᠯᠬᠤ ᠪᠠᠷ ᠰᠢᠢᠳᠦᠭᠰᠡᠨ ᠨᠢ
ᠬᠦᠯᠢᠶᠡᠰᠦ ᠴᠢᠩᠭᠠ ᠪᠡᠷ ᠢ᠋ᠶ᠋ᠡᠨ ᠪᠠᠢᠳᠠᠭ ᠦᠭᠡᠢ
ᠬᠥᠪᠳᠥ ᠨᠣᠭᠣᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠳᠠᠭ ᠦᠭᠡᠢ
《ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠤᠨ ᠬᠠᠮᠪᠤ ᠯᠠᠮᠠ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᡀᠠᠷᠠᠮᠪᠠᠲᠠᠨ ᠪᠤᠷᠤᠭᠤ ᠳᠠᠪᠠᠭᠠ ᠪᠠᠷ ᠣᠷᠣᠵᠠᠢ》 ᠭᠡᠰᠡᠨ ᠴᠤᠤ ᠦᠭᠡ ᠲᠦᠭᠡᠨ ᠲᠠᠷᠠᠵᠤ᠂ ᠵᠠᠰᠠᠭᠲᠤ ᠬᠠᠭᠠᠨ ᠤ᠋ ᠬᠦᠷᠢᠶᠡᠨ ᠳ᠋ᠦ᠍ ᠬᠦᠷᠴᠦ ᠲᠤᠩ ᠤᠳᠠᠯ ᠦᠭᠡᠢ ᠪᠣᠭᠳᠠ ᠡᠵᠡᠨ ᠦ᠌ ᠰᠣᠨᠣᠷ ᠲᠤ ᠳᠤᠭᠤᠯᠳᠠᠵᠠᠢ᠃
ᠲᠡᠷᠡ ᠬᠣᠭᠣᠷᠣᠨᠳᠣ ᠰᠢᠷᠡᠭᠡᠲᠦ ᠴᠣᠢᠪᠵᠡᠨ᠂ ᠳᠡᠴᠢᠨ ᠤᠮᠵᠠᠳ᠂ ᠳᠡᠮᠪᠡᠷᠢᠯ ᠭᠡᠰᠬᠦᠢ᠂ ᠳᠡᠮᠴᠦᠭ ᠭᠠᠪᠵᠤ ᠨᠠᠷ ᠠᠴᠠ ᠥᠭᠰᠥᠭᠦᠯᠦᠨ ᠬᠠᠮᠪᠤ ᠯᠠᠮᠠ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠲᠠᠢ ᠲᠠᠭᠠᠷᠠᠬᠤ ᠦᠭᠡᠢ ᠯᠠᠮᠠ ᠨᠠᠷ ᠤᠨ ᠲᠣᠭᠠ ᠡᠳᠦᠷ ᠢᠷᠡᠬᠦ ᠪᠦᠷᠢ ᠨᠡᠮᠡᠭᠳᠡᠭᠰᠡᠭᠡᠷ ᠪᠠᠢᠪᠠ᠃
ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠲᠤ ᠪᠠᠷᠢᠵᠤ ᠪᠠᠢᠭᠠ ᠴᠣᠢᠷᠣᠠ ᠶ᠋ᠢᠨ ᠳᠤᠭᠠᠩ ᠴᠦ᠍ ᠥᠪᠡᠷ ᠢᠶᠠᠨ ᠠᠭᠢᠭᠰᠠᠭᠠᠷ ᠣᠷᠣᠢ ᠳ᠋ᠤ᠌ ᠪᠠᠨ ᠣᠢᠷᠠᠳᠤᠭᠰᠠᠭᠠᠷ ᠪᠥᠯᠥᠭᠡ᠃ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠬᠠᠮᠪᠤ ᠶᠢᠨ ᠬᠢᠳᠡᠭ ᠭᠠᠭᠴᠠ ᠠᠵᠢᠯ ᠨᠢ ᠲᠡᠷᠡ ᠰᠦᠮᠡ ᠶ᠋ᠢᠨ ᠪᠠᠷᠢᠯᠭᠠ ᠪᠣᠯᠵᠠᠢ᠃《ᠡᠨᠡ ᠰᠦᠮᠡ ᠶᠢ ᠯᠡ ᠪᠠᠷᠢᠵᠤ ᠳᠠᠭᠤᠰᠴᠢᠬᠠᠪᠠᠯ ᠬᠡᠢᠳ ᠡᠴᠡ ᠳᠠᠢᠵᠢᠵᠤ ᠨᠢᠭᠡ ᠪᠣᠯ ᠳᠢᠶᠠᠨᠴᠢᠯᠠᠨ ᠰᠠᠭᠤᠬᠤ᠂ ᠡᠰᠡᠪᠡᠯ ᠶᠠᠭᠠᠬᠢᠳᠠᠭ ᠶᠤᠮ ᠪᠣᠢ᠂ ᠣᠳᠬᠣᠨ ᠬᠡᠦᠬᠡᠨ ᠲᠡᠢ ᠠᠢᠯ ᠭᠡᠷ ᠪᠣᠯᠤᠨ ᠠᠮᠢᠳᠤᠷᠠᠬᠤ ᠮᠢᠨᠢ᠃ ᠡᠬᠡ ᠡᠴᠢᠭᠡ ᠶ᠋ᠢᠨ ᠳᠤᠷᠠᠰᠬᠠᠯ ᠪᠤᠶᠠᠨ ᠪᠣᠯᠭᠠᠵᠤ ᠰᠦᠮᠡ ᠶᠢ ᠵᠠᠪᠠᠯ ᠳᠠᠭᠤᠰᠬᠠᠬᠤ ᠶᠣᠰᠣᠲᠠᠢ》 ᠭᠡᠵᠦ ᠲᠡᠷᠡ ᠳᠣᠲᠣᠷᠠ ᠪᠠᠨ ᠪᠠᠲᠤ ᠰᠢᠢᠳᠴᠡᠢ᠃ ᠲᠡᠭᠦᠨ ᠦ᠌ ᠡᠨᠡ ᠰᠠᠨᠠᠭᠠ ᠶᠢ ᠣᠳᠣ ᠪᠡᠷ ᠬᠡᠨ ᠴᠦ᠍ ᠮᠡᠳᠡᠭᠡ ᠦᠭᠡᠢ ᠪᠠᠢᠯᠠ᠃ ᠲᠡᠭᠡᠲᠡᠯᠡ᠂
- ᠣᠳᠬᠣᠨ ᠬᠡᠦᠬᠡᠨ ᠳᠠᠪᠬᠤᠷ ᠪᠡᠶᠡ ᠲᠡᠢ ᠪᠣᠯᠵᠤ ᠭᠡᠨᠡ᠃ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᡀᠠᠷᠠᠮᠪᠠᠲᠠᠨ ᠤ᠋ ᠬᠡᠦᠬᠡᠳ ᠪᠣᠯᠬᠤ ᠠᠴᠠ ᠭᠠᠷᠴᠠᠭᠠ ᠦᠭᠡᠢ᠃ ᠠᠩᠴᠢᠨ ᠳᠣᠪᠳᠣᠨ ᠤ᠋ ᠳᠤᠷᠠᠨᠳᠠᠵᠤ ᠬᠠᠷᠠᠭᠰᠠᠨ ᠴᠠᠭ ᠠ᠋ᠴᠠ ᠬᠣᠢᠰᠢ ᠲᠣᠭᠠᠯᠠᠬᠤ ᠳᠦ ᠬᠤᠭᠤᠴᠠᠭᠠ ᠨᠢ ᠲᠠᠭᠠᠷᠠᠭᠠᠳ ᠪᠠᠢᠨᠠ ᠭᠡᠰᠡᠨ ᠶᠠᠷᠢᠶᠠ ᠲᠦᠭᠡᠨ ᠲᠠᠷᠠᠵᠤ ᠰᠠᠶᠢ ᠯᠠ ᠬᠠᠮᠪᠤ ᠯᠠᠮᠠᠲᠠᠨ ᠤ᠋ ᠥᠪᠡᠷ ᠤᠨ ᠰᠣᠨᠣᠷ ᠲᠤ ᠬᠦᠷᠴᠡᠢ᠃ ᠲᠡᠭᠦᠨ ᠢ᠋ ᠳᠡᠮᠴᠦᠭ ᠭᠠᠪᠵᠤ ᠥᠪᠡᠷ ᠢ᠋ᠶ᠋ᠡᠨ ᠬᠦᠷᠴᠦ ᠢᠷᠡᠵᠦ ᠰᠠᠩᠵᠢ ᠬᠠᠮᠪᠤ ᠳ᠋ᠤ᠌ ᠬᠡᠯᠡᠪᠡ᠃
- ᡀᠠᠷᠠᠮᠪᠠ ᠲᠠᠨ ᠤ᠋ ᠲᠤᠬᠠᠢ ᠨᠢᠭᠦᠯ᠂ ᠴᠢᠪᠢᠯ ᠲᠡᠢ ᠶᠠᠷᠢᠶᠠ ᠬᠠᠶᠠ ᠦᠭᠡᠢ ᠲᠠᠷᠠᠵᠠᠢ᠃ ᠪᠤᠷᠬᠠᠨ ᠤ᠋ ᠨᠣᠮ ᠤᠨ ᠲᠤᠬᠠᠢ ᠳ᠋ᠤ᠌ ᠲᠠᠨ ᠤ᠋ ᠶᠠᠷᠢᠳᠠᠭ ᠲᠠᠩᠭᠠᠷᠢᠭ ᠪᠠᠭᠤᠷᠠᠭᠰᠠᠨ ᠦᠭᠡᠰ ᠢ ᠴᠦ᠍ ᠯᠠᠮᠠ ᠨᠠᠷ ᠪᠢᠳᠡ ᠡᠨᠡᠦᠬᠡᠨ ᠳ᠋ᠦ᠍ ᠪᠡᠨ ᠳᠠᠷᠤᠭᠠᠳ ᠪᠠᠢᠵᠤ ᠪᠣᠯᠬᠤ ᠰᠠᠨ᠃ ᠭᠡᠲᠡᠯᠡ ᠲᠠ ᠬᠠᠮᠪᠤ ᠶᠢᠨ ᠮᠢᠨᠳᠠᠭ᠂ ᡀᠠᠷᠠᠮᠪᠠ ᠶ᠋ᠢᠨ ᠴᠣᠯᠠ ᠪᠠᠨ ᠤᠮᠠᠷᠲᠠᠵᠤ᠂ ᠡᠮᠡᠰ ᠣᠬᠢᠳ ᠲᠠᠢ ᠵᠢᠭᠤᠷᠠᠯᠳᠤᠵᠤ᠂ ᠮᠠᠨ ᠤ᠋ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠢ ᠲᠤᠯᠭᠠ ᠶᠢᠨ ᠴᠢᠯᠠᠭᠤ ᠲᠤᠯᠤᠭᠰᠠᠨ ᠠ᠋ᠴᠠ ᠨᠢ ᠬᠣᠢᠰᠢ ᠥᠨᠥ ᠶ᠋ᠢ ᠬᠦᠷᠲᠡᠯᠡ ᠳᠤᠭᠤᠯᠳᠠᠵᠤ ᠪᠠᠢᠭᠠ ᠦᠭᠡᠢ ᠮᠠᠭᠤ ᠶᠠᠷᠢᠶᠠᠨ ᠳ᠋ᠤ᠌ ᠣᠷᠣᠭᠤᠯᠵᠠᠢ ᠳᠠ ᠭᠡᠵᠦ ᠳᠡᠮᠴᠦᠭ ᠭᠠᠪᠵᠤ ᠴᠠᠮᠬᠠᠩᠪᠠ ᠪᠤᠶᠤ ᠯᠠᠮᠠ ᠨᠠᠷ ᠤᠨ ᠠᠮᠠᠷᠠᠯᠲᠠ ᠶᠢᠨ ᠥᠷᠥᠭᠡᠨ ᠳ᠋ᠦ᠍ ᠰᠠᠭᠤᠵᠤ ᠪᠠᠢᠬᠤ ᠳᠤ ᠪᠠᠨ ᠰᠠᠩᠵᠢ ᠬᠠᠮᠪᠤ ᠳ᠋ᠤ᠌ ᠪᠠᠷᠤᠭ ᠯᠠ ᠲᠤᠯᠭᠠᠬᠤ ᠰᠢᠬᠠᠮ ᠬᠡᠯᠡᠪᠡ᠃ ᠲᠡᠷᠡ ᠡᠨᠡ ᠶᠠᠷᠢᠶᠠᠨ ᠳ᠋ᠤ᠌ ᠤᠷᠢᠳᠤ ᠠᠴᠠ ᠪᠡᠯᠡᠳᠴᠡᠢ᠃
- ᠪᠢᠳᠡᠨ ᠰᠢᠭ᠋ ᠮᠢᠬᠠ ᠴᠢᠰᠤᠨ ᠳ᠋ᠤ᠌ ᠲᠥᠷᠥᠭᠰᠡᠨ ᠵᠢᠵᠢᠭᠬᠡᠨ ᠯᠠᠮᠠ ᠨᠠᠷ ᠪᠠᠢᠲᠤᠭᠠᠢ ᠶᠢᠷᠲᠢᠨᠴᠦ ᠶᠢᠨ ᠡᠪᠦᠭᠡ ᠮᠠᠬᠠᠰᠣᠸᠠᠷ ᠬᠦᠷᠲᠡᠯᠡ ᠪᠡᠶᠡ ᠶ᠋ᠢᠨ ᠥᠩᠭᠡ ᠤᠯᠠᠭᠠᠨ᠂ ᠡᠬᠡ ᠣᠮᠠᠳᠢᠸᠢ ᠲᠠᠢ ᠤᠴᠠᠷᠠᠭᠰᠠᠨ ᠪᠠᠢᠳᠠᠯ ᠢᠶᠠᠷ ᠱᠠᠮᠫᠣᠳᠠᠯ ᠸᠠᠡᠭᠵᠢᠳ ᠪᠤᠶᠤ ᠪᠤᠰᠤᠳ ᠤ᠋ᠨ ᠬᠤᠪᠢᠯᠤᠭᠰᠠᠨ ᠳ᠋ᠤ᠌ ᠪᠡᠶᠡᠰᠤᠭᠴᠢ ᠲᠩᠷᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠣᠷᠣᠰᠢᠳᠠᠭ ᠰᠢᠦ ᠳᠡ! ᠭᠡᠵᠦ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠶᠥᠭᠡᠳᠡᠨ ᠬᠡᠯᠡᠪᠡ᠃ ᠡᠢᠮᠦ ᠬᠠᠷᠢᠭᠤ ᠤᠷᠢᠳᠤ ᠠᠴᠠ ᠪᠣᠳᠣᠵᠤ ᠪᠠᠢᠵᠠᠢ᠃
- ᠴᠢᠪᠢᠯᠲᠦ ᠰᠢᠮᠨᠤ ᠲᠠᠢ ᠤᠴᠠᠷᠠᠨ ᠲᠡᠪᠡᠷᠢᠭᠰᠡᠨ ᠪᠤᠷᠬᠠᠳ ᠳᠣᠭᠰᠢᠳ ᠤ᠋ᠨ ᠳᠦᠷᠢ ᠪᠢᠰᠢᠭᠦᠢ ᠯᠡ ᠪᠣᠢ᠃ ᠲᠡᠷᠡ ᠪᠣᠯ ᠲᠡᠢᠮᠦ ᠪᠠᠢᠬᠤ ᠶ᠋ᠢ ᠴᠡᠭᠡᠷᠯᠡᠭᠦᠯᠦᠭᠰᠡᠨ ᠵᠦᠢᠯ ᠪᠣᠯᠬᠤ ᠶᠢ ᡀᠠᠷᠠᠮᠪᠠ ᠲᠠ ᠨᠠᠳᠠ ᠪᠠᠷ ᠬᠡᠯᠡᠭᠦᠯᠦᠯᠲᠡ ᠦᠭᠡᠢ ᠮᠡᠳᠡᠨᠡ᠃ ᠮᠠᠭᠤ ᠦᠢᠯᠡ ᠶ᠋ᠢᠨ ᠠᠪᠢᠶᠠᠰ ᠢ ᠲᠠᠰᠤᠯᠬᠤ ᠶᠢᠨ ᠲᠤᠯᠠᠳᠠ ᠦᠶᠡ ᠭᠡᠰᠢᠭᠦᠨ ᠢ᠋ ᠬᠡᠷᠴᠢᠨ ᠬᠡᠰᠡᠭᠯᠡᠭᠰᠡᠨ᠂ ᠮᠤᠩᠬᠠᠭ ᠢ᠋ ᠳᠠᠷᠤᠬᠤ ᠪᠠᠷ ᠮᠢᠬᠠ ᠪᠦᠬᠦᠨ ᠢ᠋ ᠢᠳᠡᠵᠦ᠂ ᠬᠦᠰᠡᠯ ᠲᠠᠴᠢᠶᠠᠯ ᠢ᠋ ᠳᠠᠷᠤᠬᠤ ᠪᠠᠷ ᠴᠢᠰᠤ ᠪᠦᠬᠦᠨ ᠢ᠋ ᠤᠤᠭᠤᠵᠤ᠂ ᠠᠭᠤᠷ ᠢ ᠳᠠᠷᠤᠬᠤ ᠪᠠᠷ ᠶᠠᠰᠤ ᠪᠦᠬᠦᠨ ᠢ᠋ ᠲᠠᠰᠤᠯᠵᠤ ᠢᠳᠡᠭᠰᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠪᠤᠷᠬᠠᠳ᠂ ᠳᠣᠭᠰᠢᠳ ᠤ᠋ᠨ ᠳᠦᠷᠢ ᠶ᠋ᠢ ᠪᠦᠲᠦᠭᠡᠳᠡᠭ ᠢ᠋ ᡀᠠᠷᠠᠮᠪᠠ ᠲᠠ ᠠᠨᠳᠠᠬᠤ ᠦᠭᠡᠢ ᠪᠠᠢᠯᠭᠦᠢ ᠳᠡ᠃ ᠲᠡᠷᠡ ᠪᠦᠬᠦᠨ ᠡᠢᠮᠦ ᠨᠢᠭᠦᠯ ᠢ᠋ ᠵᠢᠭᠰᠢᠭᠦᠯᠬᠦ ᠭᠡᠰᠡᠨ ᠬᠡᠷᠡᠭ ᠪᠢᠵᠡ ᠳᠡ ᠭᠡᠵᠦ ᠳᠡᠮᠴᠦᠭ ᠭᠠᠪᠵᠤ ᠨᠤᠬᠤᠴᠠᠲᠠᠶᠠ ᠬᠡᠯᠡᠬᠦ ᠳ᠋ᠦ᠍
- ᠪᠤᠷᠬᠠᠨ ᠤ᠋ ᠰᠤᠷᠭᠠᠯ ᠢ ᠪᠢᠳᠡ ᠦᠯᠢᠭᠡᠷ ᠪᠣᠯᠭᠠᠴᠢᠬᠠᠭᠠᠳ ᠯᠠ ᠪᠠᠢᠭᠠ ᠰᠢᠦ ᠳᠡ᠃ ᠦᠯᠢᠭᠡᠷ ᠢ᠋ ᠮᠠᠨᠢ ᠰᠦᠵᠢᠭᠲᠡᠨ ᠨᠦ᠍ᠭᠦᠳ ᠲᠣᠭᠣᠬᠤ ᠦᠭᠡᠢ ᠣᠯᠢᠭ ᠪᠣᠯᠬᠤ ᠪᠠᠷ ᠨᠢ ᠳᠠᠬᠢᠨ ᠦᠯᠢᠭᠡᠷ ᠵᠣᠬᠢᠶᠠᠵᠤ ᠲᠡᠭᠦᠨ ᠳ᠋ᠦ᠍ ᠪᠡᠨ ᠢᠲᠡᠭᠡᠭᠦᠯᠬᠦ ᠭᠡᠵᠦ ᠲᠠᠢᠯᠪᠤᠷᠢᠯᠠᠳᠠᠭ ᠪᠣᠯᠤᠭᠰᠠᠨ ᠪᠢᠵᠡ ᠳᠡ? 《ᠳᠣᠯᠣᠭᠠᠨ ᠰᠠᠷᠠ ᠣᠳᠬᠤ ᠴᠠᠭ ᠲᠤ᠌ ᠡᠮ ᠯᠤᠤᠰ ᠤ᠋ᠨ ᠤᠮᠠᠢ ᠠᠴᠠ ᠲᠡᠮᠦᠷ ᠥᠨᠳᠡᠭᠡ ᠠᠮᠠ᠂ ᠨᠢᠳᠦ ᠨᠢ ᠶᠢᠰᠦ ᠨᠢᠭᠡᠨ ᠲᠥᠷᠥᠯᠡ᠃ ᠲᠥᠷᠥᠭᠰᠡᠨ ᠳᠠᠷᠤᠢ ᠳ᠋ᠤ᠌ ᠪᠠᠨ ᠣᠭᠲᠠᠷᠭᠤᠢ ᠳ᠋ᠤ᠌ ᠳᠡᠭᠦᠯᠢᠨ ᠬᠠᠷᠠᠢᠯᠠ》 ᠭᠡᠵᠦ ᠨᠣᠮ ᠳ᠋ᠤ᠌ ᠪᠢᠴᠢᠭᠡᠰᠦᠲᠡᠢ ᠪᠠᠢᠳᠠᠭ ᠪᠢᠵᠡ ᠳᠡ? ᠡᠨᠡ ᠦᠯᠢᠭᠡᠷ ᠡᠴᠡ ᠢᠯᠭᠠᠭᠠ ᠶᠠᠭᠤ ᠪᠠᠢᠨᠠ? ᠵᠣᠬᠢᠶᠠᠮᠠᠯ ᠰᠣᠨᠢᠨ ᠦᠯᠢᠭᠡᠷ ᠰᠢᠦ ᠳᠡ ᠭᠡᠵᠦ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠨᠢᠴᠤᠭᠠᠨ ᠶᠠᠷᠢᠪᠠ᠃
- ᠨᠣᠮ ᠤ᠋ᠨ ᠮᠥᠷ ᠢ᠋ ᠨᠣᠮ ᠢ᠋ᠶ᠋ᠠᠷ ᠨᠢ ᠦᠯᠡᠳᠡᠭᠡᠶᠡ᠃ ᠬᠥᠮᠦᠨ ᠦ᠌ ᠮᠥᠷ ᠢ ᠬᠥᠮᠦᠨ ᠳᠡᠭᠡᠷᠡ ᠨᠢ ᠶᠠᠷᠢᠵᠤ ᠪᠠᠢᠨᠠ᠃ ᠬᠡᠷᠪᠡ ᠡᠮᠡᠰ ᠥᠬᠢᠳ ᠢ᠋ᠶ᠋ᠡᠷ ᠬᠥᠭᠡᠭᠡᠴᠡᠯᠳᠦᠵᠦ ᠶᠠᠪᠤᠭᠰᠠᠨ ᠬᠠᠮᠪᠤ ᠲᠠᠨ ᠤ᠋ ᠶᠠᠪᠤᠳᠠᠯ ᠦᠨᠡᠨ ᠪᠣᠯ᠁ ᠲᠠ ᠨᠢᠭᠡ ᠪᠣᠯ ᠰᠢᠷᠠ ᠰᠢᠪᠲᠤᠯᠬᠤ᠂ ᠨᠢᠭᠡ ᠪᠣᠯ ᠵᠠᠩᠴᠢ ᠠᠷᠠᠯᠵᠢᠬᠤ ᠲᠤᠬᠠᠢ ᠯᠠ ᠪᠣᠳᠣᠵᠤ ᠪᠠᠢᠬᠤ ᠪᠣᠯᠵᠤ ᠳᠠ ᠭᠡᠵᠦ ᠳᠡᠮᠴᠦᠭ ᠭᠠᠪᠵᠤ ᠰᠠᠨᠠᠭᠤᠯᠤᠭᠠᠳ ᠴᠠᠰᠢ ᠨᠢ ᠣᠯᠠᠨ ᠶᠠᠭᠤᠮᠠ ᠶᠠᠷᠢᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠵᠤ ᠪᠣᠰᠴᠤ ᠶᠠᠪᠤᠯᠠ᠃
- ᠲᠡᠢᠮᠦ ᠳ᠋ᠦ᠍ ᠪᠡᠨ ᠬᠦᠷᠪᠡᠯ ᠲᠠ ᠴᠦ᠍ ᠭᠡᠰᠡᠨ ᠵᠠᠯᠠᠭᠤ ᠳ᠋ᠤ᠌ ᠪᠠᠨ ᠮᠠᠨ ᠤ᠋ ᠡᠵᠢ ᠶ᠋ᠢ ᠭᠣᠮᠣᠳᠠᠭᠠᠭᠰᠠᠨ ᠭᠡᠳᠡᠭ ᠪᠢᠵᠡ ᠳᠡ? ᠲᠡᠷᠡ ᠶᠠᠪᠤᠳᠠᠯ ᠳ᠋ᠤ᠌ ᠪᠠᠨ ᠬᠣᠷᠣᠰᠴᠤ ᠠᠨᠠᠭᠰᠠᠭᠠᠷ ᠲᠠᠯᠢᠢᠭᠠᠴᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠨᠢ ᠶᠠᠭᠤ ᠭᠡᠰᠡᠨ ᠮᠠᠭᠤᠬᠠᠢ ᠦᠭᠡ ᠪᠡᠷ ᠨᠣᠮ ᠪᠠᠭᠤᠯᠭᠠᠭᠰᠠᠨ ᠪᠠᠢᠯᠠ? ᠡᠨᠡ ᠴᠢᠨᠢ ᠯᠡ ᠶᠣᠰᠣᠲᠠᠢ ᠲᠠ ᠪᠢᠳᠡᠨ ᠦ᠌ ᠦᠨᠡᠨ ᠨᠢᠭᠤᠷ ᠴᠢᠷᠠᠢ ᠪᠣᠯᠵᠤ ᠰᠢᠦ ᠳᠡ᠃ ᠪᠢᠳᠡ ᠴᠠᠭᠠᠨᠠ ᠪᠠᠨ ᠡᠢᠮᠦ᠂ ᠨᠠᠭᠠᠨᠠ ᠪᠠᠨ ᠪᠣᠯ ᠪᠤᠶᠠᠨ ᠤ᠋ ᠨᠣᠮ ᠠᠢᠯᠠᠳᠤᠭᠰᠠᠨ ᠪᠤᠷᠬᠠᠨ ᠤ᠋ ᠦᠨᠡᠨᠴᠢ ᠱᠠᠪᠢ ᠨᠠᠷ ᠳᠠ᠃ ᠲᠡᠢᠮᠦ ᠪᠢᠵᠡ! ᠭᠡᠵᠦ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠲᠡᠷᠡ ᠬᠦ ᠭᠠᠪᠵᠤ ᠳᠡᠮᠴᠦᠭ ᠦ᠋ᠨ ᠬᠣᠣᠷ ᠢ᠋ ᠮᠠᠭᠠᠵᠢᠬᠤ ᠦᠭᠡ ᠶ᠋ᠢ ᠵᠣᠷᠢᠭᠤᠳᠠ ᠬᠡᠯᠡᠵᠦ ᠣᠷᠬᠢᠭᠠᠳ ᠠᠭᠤᠷ ᠬᠢᠯᠢᠩ ᠢ᠋ ᠨᠢ ᠳᠦᠷᠡᠯᠵᠢᠭᠦᠯᠴᠢᠬᠡᠵᠡᠢ᠃
ᠴᠠᠮᠬᠠᠡᠭ᠌ᠪᠠ ᠳ᠋ᠤ᠌ ᠪᠣᠯᠤᠭᠰᠠᠨ ᠡᠨᠡᠬᠦ ᠪᠢᠴᠢᠬᠠᠨ ᠮᠠᠷᠭᠤᠭᠠᠨ ᠨᠢ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠯᠠᠮᠠ ᠨᠠᠷ ᠢ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠬᠠᠮᠪᠤ ᠶᠢᠨ ᠡᠰᠡᠷᠭᠦ ᠬᠠᠨᠳᠤᠭᠤᠯᠬᠤ ᠰᠡᠭᠦᠯᠴᠢ ᠶᠢᠨ ᠰᠢᠯᠲᠠᠭ ᠪᠣᠯᠵᠠᠢ᠃ 《ᠪᠤᠷᠤᠭᠤ ᠳᠠᠪᠠᠭᠠ ᠪᠠᠷ ᠣᠷᠣᠵᠠᠢ!》 ᠭᠡᠵᠦ ᠴᠥᠮ ᠯᠡ ᠠᠮᠠ ᠠᠮᠠᠨ ᠳ᠋ᠤ᠌ ᠪᠠᠨ ᠪᠤᠪᠲᠤᠨᠠᠵᠠᠭᠠᠬᠤ ᠪᠣᠯᠵᠠᠢ᠃ ᠳᠡᠮᠴᠦᠭ ᠭᠠᠪᠵᠤ ᠪᠣᠯ ᠪᠦᠷ ᠬᠣᠯᠠ ᠶ᠋ᠢᠨ ᠪᠣᠳᠣᠯ ᠲᠠᠢ ᠬᠣᠣᠷ ᠲᠠᠢ ᠶᠠᠪᠤᠭᠤᠯᠭᠠ ᠳᠡᠭᠳᠡᠭᠡᠵᠦ ᠪᠠᠢᠯᠠ᠃
《ᠶᠠᠪᠤᠭᠤᠯᠭᠠ᠂ ᠭᠦᠳᠬᠡᠯᠭᠡ ᠡᠯᠳᠡᠪ ᠶᠠᠭᠤᠮᠠᠰ ᠢ᠋ᠶ᠋ᠠᠨ ᠬᠢᠵᠦ ᠯᠡ ᠪᠠᠢᠭ᠃ ᠰᠦᠮᠡ ᠪᠡᠨ ᠪᠠᠷᠢᠭᠤᠯᠵᠤ ᠳᠠᠭᠤᠰᠬᠠᠶᠠ᠃ ᠳᠠᠭᠤᠰᠬᠠᠵᠤ ᠠᠷᠠᠪᠨᠠᠶᠢᠯᠠᠮᠠᠭᠴᠠ ᠪᠢ ᠬᠥᠳᠡᠭᠡ ᠭᠠᠷᠴᠤ ᠦᠰᠦ ᠲᠠᠯᠪᠢᠵᠤ᠂ ᠬᠠᠷᠠ ᠪᠣᠯᠤᠭᠠᠳ ᠤᠳᠬᠤᠨ ᠲᠠᠢ ᠰᠠᠭᠤᠬᠤ ᠮᠢᠨᠢ᠃ ᠬᠠᠢᠷᠠᠨ ᠥᠩᠭᠡᠷᠡᠭᠰᠡᠨ ᠡᠮᠦᠨᠡᠬᠢ ᠨᠠᠰᠤ ᠪᠠᠨ ᠨᠥᠬᠥᠵᠦ ᠴᠢᠳᠠᠬᠤ ᠪᠠᠷ ᠰᠠᠢᠬᠠᠨ ᠠᠮᠢᠳᠤᠷᠠᠬᠤ ᠶᠤᠮᠰᠠᠨ》 ᠭᠡᠵᠦ ᠰᠠᠩᠵᠢ ᠪᠣᠳᠣᠵᠤ ᠪᠠᠶᠢᠯᠠ᠃
ᠲᠡᠭᠦᠨ ᠦ᠌ ᠦᠵᠡᠵᠦ ᠥᠩᠭᠡᠷᠡᠭᠦᠯᠦᠭᠰᠡᠨ ᠠᠮᠢᠳᠤᠷᠠᠯ ᠨᠢ ᠬᠣᠭᠣᠰᠣᠨ ᠳᠡᠮᠡᠢ ᠤᠷᠤᠰᠤᠭᠰᠠᠨ ᠤᠰᠤ ᠰᠢᠭ᠋ ᠰᠠᠨᠠᠭᠳᠠᠵᠤ ᠪᠠᠢᠯᠠ᠃ ᠬᠡᠢᠳ ᠲᠤ ᠨᠢᠯᠬᠠ ᠪᠠᠷ ᠢᠶᠠᠨ ᠱᠠᠪᠢᠯᠠᠨ ᠰᠠᠭᠤᠵᠤ ᠪᠠᠨᠳᠢ ᠡᠴᠡ ᠬᠤᠸᠠᠷᠠᠭ᠂ ᠤᠪᠠᠰᠢ᠂ ᠭᠡᠯᠦᠩ ᠪᠣᠯᠤᠭᠰᠠᠨ᠃ ᠲᠥᠪᠡᠳ ᠭᠠᠵᠠᠷ ᠶᠠᠪᠤᠵᠤ ᡀᠠᠰᠠ ᠬᠣᠲᠠ ᠶ᠋ᠢᠨ ᠪᠠᠷᠡᠪᠠᠡᠭ ᠳᠤᠭᠠᠩ ᠳ᠋ᠤ᠌ ᠠᠷᠤ ᠶᠢᠨ ᠵᠠᠪᠳᠤᠩ ᠠᠴᠠ ᠡᠬᠢᠯᠡᠭᠡᠳ ᠥᠪᠥᠷ ᠣᠨ ᠵᠠᠪᠳᠤᠩ ᠤᠨ ᠡᠬᠢᠨ ᠬᠦᠷᠲᠡᠯᠡ ᠬᠡᠳᠦᠬᠡᠨ ᠠᠯᠬᠤᠮ ᠭᠠᠵᠠᠷ ᠲᠦ᠍ ᠤᠷᠤᠭᠰᠢ ᠠᠬᠢᠬᠤ ᠶ᠋ᠢᠨ ᠲᠤᠯᠠ ᠪᠦᠬᠦᠯᠢ ᠪᠦᠲᠦᠨ ᠦᠶᠡ ᠮᠤᠯᠲᠤᠷᠠᠲᠠᠯᠠ ᠣᠨ ᠢ᠋ ᠡᠯᠡᠭᠡᠭᠰᠡᠨ ᠲᠡᠷᠡ ᠪᠦᠷᠢ ᠳ᠋ᠦ᠍ ᠦᠵᠡᠵᠦ ᠥᠩᠭᠡᠷᠡᠭᠦᠯᠦᠭᠰᠡᠨ ᠵᠦᠢᠯ ᠶᠠᠭᠤᠬᠠᠨ ᠪᠢᠯᠡ? ᠥᠩᠭᠡ ᠪᠡᠷ ᠵᠠᠰᠠᠳᠠᠭ ᠬᠠᠭᠤᠷᠮᠠᠴᠢ ᠪᠣᠯᠭᠠᠨ ᠢ᠋ ᠲᠣᠭᠠᠯᠠᠪᠠᠴᠤ ᠪᠠᠷᠠᠰᠢ ᠦᠭᠡᠢ᠃ ᠰᠢᠲᠦᠭᠡᠨ ᠦ᠌ ᠰᠢᠷᠡᠭᠡᠨ ᠡᠴᠡ ᠯᠡ ᠲᠡᠷᠡ ᠬᠠᠭᠤᠷᠮᠠᠭ ᠶᠠᠭᠤᠮᠠ ᠡᠬᠢᠯᠡᠳᠡᠭ᠃ ᠲᠡᠨᠳᠡ ᠲᠠᠬᠢᠯ ᠪᠣᠯᠭᠠᠨ ᠦᠷᠦᠭᠰᠡᠨ ᠪᠣᠯᠭᠠᠨ ᠴᠥᠮ ᠢᠶᠠᠷ ᠢᠶᠠᠨ ᠪᠡᠯᠭᠡᠳᠡᠯ ᠤᠨ ᠲᠡᠳᠦᠢ ᠰᠢᠨᠵᠢ ᠲᠡᠢ ᠶᠢ ᠰᠠᠩᠵᠢ ᠣᠳᠣ ᠰᠠᠢᠨ ᠮᠡᠳᠡᠵᠦ ᠪᠠᠢᠯᠠ᠃ ᠮᠣᠯᠣᠷ ᠡᠷᠳᠡᠨᠢ ᠭᠡᠳᠡᠭ ᠴᠡᠴᠡ ᠨᠢ ᠰᠦᠮᠪᠦᠷ ᠠᠭᠤᠯᠠ ᠶ᠋ᠢ᠂ ᠠᠯᠲᠠᠨ ᠵᠢᠭᠠᠰᠤ ᠰᠧᠷᠨᠢᠶᠡᠳᠠᠩ ᠭᠡᠳᠡᠭ ᠬᠣᠶᠠᠷ ᠵᠢᠭᠠᠰᠤ ᠳᠡᠯᠡᠬᠡᠢ ᠶ᠋ᠢ ᠬᠠᠰᠢᠵᠤ ᠪᠠᠶᠢᠳᠠᠭ ᠤ᠋ᠨ ᠲᠡᠮᠳᠡᠭ᠂ ᠳᠡᠷᠴᠢᠨ ᠪᠤᠮᠪᠠ ᠭᠡᠳᠡᠭ ᠠᠮᠠ ᠲᠠᠢ ᠤᠰᠤ ᠲᠠᠢ ᠪᠤᠮᠪᠠ ᠨᠢ ᠲᠩᠷᠢ ᠨᠠᠷ ᠤᠨ ᠤᠮᠳᠠᠭᠠ᠂ ᠪᠠᠳᠮᠠᠯᠢᠩᠬᠤᠠ ᠶᠢᠨ ᠴᠡᠴᠡᠭ ᠰᠣᠬᠠᠸᠠᠳᠢ ᠶᠢᠨ ᠣᠷᠣᠨ ᠤ᠋ ᠪᠡᠯᠭᠡᠳᠡᠯ᠂ ᠳᠤᠩᠭᠠᠷᠠᠢᠴᠢᠯ ᠨᠢ ᠪᠤᠷᠬᠠᠳ ᠤᠨ ᠠᠯᠳᠠᠷ ᠲᠦᠭᠡᠭᠡᠭᠴᠢ ᠭᠡᠬᠦᠴᠢᠯᠡᠨ ᠴᠥᠮ ᠢᠶᠠᠷ ᠢᠶᠠᠨ ᠦᠯᠢᠭᠡᠷ ᠳᠣᠮᠣᠭ ᠲᠣᠮᠢᠶᠠᠨ ᠤ᠋ ᠰᠢᠨᠵᠢᠲᠡᠢ ᠪᠢᠯᠡ᠃
ᠰᠠᠩᠵᠢ ᠵᠢ ᠶᠠᠳᠠᠷᠠᠭᠠᠨ ᠳ᠋ᠤ᠌ ᠣᠷᠣᠵᠤ ᠳᠤᠷᠤᠢᠲᠠᠬᠤ ᠦᠶᠡ ᠳᠦ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠶᠠᠭᠠᠬᠢᠵᠤ ᠦᠢᠯᠡ ᠶ᠋ᠢ ᠦᠵᠡᠭᠰᠡᠨ ᠢ᠋ ᠪᠠᠰᠠ ᠮᠠᠷᠲᠠᠭᠠ ᠦᠭᠡᠢ ᠪᠠᠢᠨᠠ᠃ ᠰᠦᠨᠡᠰᠦ ᠳᠠᠭᠤᠳᠠᠬᠤ᠂ ᠮᠡᠩᠭᠡᠨ ᠵᠠᠰᠠᠯ ᠬᠢᠬᠦ᠂ ᠠᠮᠢᠨ ᠵᠣᠯᠢᠭ ᠭᠠᠷᠭᠠᠬᠤ ᠭᠡᠬᠦᠴᠢᠯᠡᠨ ᠣᠳᠣ ᠪᠣᠳᠣᠬᠤ ᠳᠦ ᠢᠨᠢᠶᠡᠳᠦ ᠬᠦᠷᠦᠮᠡᠷ ᠬᠡᠦᠬᠡᠳ ᠦ᠋ᠨ ᠲᠣᠭᠯᠠᠭᠠᠮ ᠰᠢᠭ᠋ ᠵᠠᠩ ᠦᠢᠯᠡ ᠶ᠋ᠢ ᠬᠡᠴᠢᠨᠡᠨ ᠢᠲᠡᠭᠡᠯ ᠲᠡᠢ ᠪᠠᠷ ᠦᠨᠡᠨ ᠰᠡᠳᠬᠢᠯ ᠡᠴᠡ ᠪᠡᠨ ᠬᠢᠵᠦ ᠪᠠᠢᠯᠠ? ᠲᠡᠭᠡᠭᠡᠳ ᠲᠡᠭᠡᠭᠡᠳ ᠲᠤᠰᠠ ᠪᠣᠯᠤᠭᠰᠠᠨ ᠪᠢᠯᠢᠤ? ᠲᠡᠷᠡ ᠪᠦᠬᠦᠨ ᠦᠯᠢᠭᠡᠷ ᠮᠡᠲᠦ ᠬᠣᠭᠣᠰᠣᠨ᠂ ᠦᠷᠭᠦᠢ ᠥᠩᠭᠡᠷᠡᠵᠦ ᠭᠠᠭᠴᠠᠬᠦ ᠪᠡᠷᠢᠮᠦᠭ ᠡᠮᠡᠭᠡᠨ ᠦ᠌ ᠬᠠᠷᠠ ᠤᠬᠠᠭᠠᠨ ᠯᠠ ᠰᠠᠩᠵᠢ ᠶᠢᠨ ᠳᠣᠯᠣᠭᠠᠨ ᠲᠠᠮᠢᠷ ᠢ ᠰᠡᠷᠭᠦᠭᠡᠵᠦ ᠥᠭᠭᠦᠭᠰᠡᠨ ᠪᠢᠯᠡ᠃
ᠤᠳᠬᠤᠨ ᠬᠡᠦᠬᠡᠨ ᠢ᠋ ᠦᠷᠡ ᠶ᠋ᠢᠨ ᠬᠤᠲᠤᠭ ᠲᠠᠢ ᠪᠣᠯᠭᠠᠬᠤ ᠭᠡᠵᠦ ᠬᠡᠴᠢᠨᠡᠨ ᠰᠦᠷ ᠪᠠᠳᠠᠷᠠᠭᠤᠯᠵᠤ᠂ ᠦᠢᠯᠡ ᠶ᠋ᠢ ᠨᠢ ᠦᠵᠡᠯᠡ? ᠲᠡᠭᠡᠭᠡᠳ ᠲᠡᠭᠡᠭᠡᠳ ᠲᠤᠰᠠ ᠪᠣᠯᠤᠭᠰᠠᠨ ᠪᠢᠯᠢᠤ? ᠴᠥᠮ ᠯᠡ ᠲᠠᠯᠠᠭᠠᠷ ᠥᠩᠭᠡᠷᠡᠭᠰᠡᠨ᠃ ᠭᠡᠪᠡᠴᠦ ᠲᠡᠷᠡ ᠦᠷᠡ ᠶ᠋ᠢᠨ ᠵᠠᠶᠠᠭᠠ ᠲᠠᠢ ᠯᠠ ᠪᠠᠢᠵᠤ ᠳᠠ!
ᠪᠠᠭᠰᠢ ᠯᠠᠮᠠ ᠴᠣᠢᠮᠴᠣᠭ ᠭᠡᠯᠦᠩ ᠮᠠᠨᠢ ᠶᠠᠭᠠᠬᠢᠭᠰᠠᠨ ᠪᠢᠯᠡ᠃ ᠥᠪᠡᠷ ᠢ ᠪᠡᠨ ᠨᠢᠭᠦᠯ ᠲᠡᠢ ᠭᠡᠵᠦ ᠪᠣᠳᠣᠭᠰᠠᠭᠠᠷ ᠶᠠᠪᠤᠭᠠᠳ ᠵᠤᠯᠠ ᠶ᠋ᠢᠨ ᠭᠣᠣᠯ ᠪᠣᠯᠵᠤ ᠥᠩᠭᠡᠷᠡᠭᠰᠡᠨ᠃ ᠲᠡᠭᠦᠨ ᠢ᠋ ᠪᠡᠨ ᠨᠢᠭᠦᠯ ᠢ᠋ᠶ᠋ᠡᠨ ᠨᠠᠮᠠᠨᠴᠢᠯᠠᠨ ᠴᠠᠭᠠᠳᠬᠠᠬᠤ ᠳᠡᠭᠡᠳᠦ ᠠᠷᠭᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ᠃ ᠪᠠᠰᠠ ᠯᠠ ᠦᠯᠢᠭᠡᠷ ᠳᠣᠮᠣᠭ ᠰᠢᠭ᠋ ᠪᠡᠯᠭᠡᠳᠡᠯ ᠤᠨ ᠲᠡᠳᠦᠢ ᠵᠠᠩ ᠦᠢᠯᠡ ᠶᠦᠮ᠃
ᠡᠨᠡ ᠪᠦᠬᠦᠨ ᠢ᠋ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠨᠢᠭᠡ ᠪᠢᠰᠢ ᠤᠳᠠᠭᠠ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠭᠰᠠᠨ ᠰᠢᠭ᠋ ᠢ᠋ᠶ᠋ᠡᠨ ᠴᠠᠮᠬᠠᠡᠭ᠌ᠪᠠ ᠳ᠋ᠤ᠌ ᠪᠣᠯᠤᠭᠰᠠᠨ ᠮᠠᠷᠭᠤᠯᠳᠤᠭᠠᠨ ᠤ᠋ ᠳᠠᠷᠠᠭᠠ ᠳᠠᠬᠢᠭᠠᠳ ᠯᠠ ᠰᠡᠷᠭᠦᠭᠡᠨ ᠪᠣᠳᠣᠯᠠ᠃ ᠪᠠᠭᠰᠢ ᠯᠠᠮᠠ ᠴᠣᠢᠮᠴᠣᠭ ᠭᠡᠯᠦᠩ ᠤᠨ ᠵᠠᠬᠢᠵᠤ ᠦᠯᠡᠳᠡᠭᠡᠭᠰᠡᠨ ᠽᠦᠨ ᠠᠯᠲᠠᠨ ᠤ᠋ ᠲᠠᠯᠠ ᠶᠢ ᠰᠤᠷᠠᠭᠯᠠᠬᠤ ᠬᠥᠮᠦᠨ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠶ᠋ᠢ ᠬᠠᠮᠪᠤ ᠶ᠋ᠢᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠭᠰᠠᠨ ᠤ᠋ ᠮᠠᠷᠭᠠᠰᠢ ᠯᠠ ᠭᠠᠷᠤᠭᠠᠳ ᠢᠷᠡᠭᠰᠡᠨ ᠶᠦᠮ᠃ ᠬᠤᠷᠠᠯ ᠤᠨ ᠵᠠᠪᠰᠠᠷᠯᠠᠭᠠ ᠪᠠᠷ ᠰᠠᠯᠬᠢᠨ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠨᠢ ᠥᠨᠳᠥᠷ ᠰᠠᠢᠬᠠᠨ ᠵᠠᠯᠠᠭᠤ ᠬᠦᠷᠴᠦ ᠢᠷᠡᠭᠡᠳ ᠰᠠᠩᠵᠢ ᠳ᠋ᠤ᠌ ᠬᠠᠨᠳᠤᠨ᠂
- ᠠᠮᠤᠷ ᠢ ᠠᠢᠯᠠᠳᠬᠠᠶᠠ! ᠲᠠ ᠴᠣᠢᠮᠴᠣᠭ ᠭᠡᠯᠦᠩ ᠠᠭᠰᠠᠨ ᠤ᠋ ᠱᠠᠪᠢ ᠮᠥᠨ ᠤᠤ? ᠭᠡᠵᠦ ᠠᠰᠠᠭᠤᠵᠤ ᠪᠢᠯᠡ᠃
- ᠲᠡᠢᠮᠦ ᠠ᠋᠃ ᠪᠠᠭᠰᠢ ᠮᠢᠨᠢ ᠪᠠᠢᠭᠰᠠᠨ ᠶᠤᠮ᠃ ᠶᠠᠭᠤ ᠬᠡ ᠪᠣᠢ? ᠭᠡᠵᠦ ᠰᠠᠩᠵᠢ ᠶ᠋ᠢ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠷᠡ ᠵᠠᠯᠠᠭᠤ᠂
- ᠲᠠᠨ ᠢ᠋ ᠨᠤᠲᠤᠭ ᠲᠤ᠌ ᠪᠠᠨ ᠡᠷᠭᠢᠵᠦ ᠢᠷᠡᠬᠦ ᠳ᠋ᠦ᠍ ᠬᠦᠦ ᠪᠡᠨ ᠶᠠᠪᠤᠭᠤᠯᠵᠤ ᠰᠤᠷᠠᠭᠯᠠᠭᠤᠯᠵᠤ ᠠᠭᠤᠯᠵᠠᠭᠠᠷᠠᠢ! ᠭᠡᠵᠦ ᠲᠡᠷᠡ ᠬᠥᠮᠦᠨ ᠡᠵᠢ ᠳ᠋ᠦ᠍ ᠮᠢᠨᠢ ᠵᠠᠬᠢᠭᠰᠠᠨ ᠶᠤᠮ ᠭᠡᠨᠡ ᠯᠠᠢ᠃ ᠲᠡᠷᠡ ᠶᠣᠰᠣᠭᠠᠷ ᠯᠠ ᠪᠢ ᠲᠠᠨ ᠳᠡᠭᠡᠷᠡ ᠢᠷᠡᠯᠡ ᠭᠡᠵᠡᠢ᠃
- ᠡᠵᠢ ᠴᠢᠨᠢ ᠬᠡᠨ ᠶᠦᠮ ᠪᠣᠢ? ᠭᠡᠪᠡᠯ᠂
- ᠡᠵᠢ ᠮᠠᠨᠢ ᠤᠷᠵᠢᠨᠤᠨ ᠥᠭᠡᠳᠡ ᠪᠣᠯᠤᠭᠰᠠᠨ! ᠭᠡᠵᠦ ᠵᠠᠯᠠᠭᠤ ᠬᠠᠷᠢᠭᠤᠯᠤᠭᠰᠠᠨ᠃ ᠲᠡᠷᠡ ᠵᠠᠯᠠᠭᠤ ᠲᠠᠢ ᠰᠠᠩᠵᠢ ᠲᠠᠨᠢᠯᠴᠠᠵᠤ᠂ ᠴᠣᠢᠮᠴᠣᠭ ᠪᠠᠭᠰᠢ ᠭᠡᠯᠦᠩ ᠤᠨ ᠢ᠋ᠶ᠋ᠠᠨ ᠥᠭᠭᠦᠭᠰᠡᠨ ᠠᠯᠲᠠᠨ ᠤ᠋ ᠬᠡᠯᠲᠡᠷᠬᠡᠢ ᠶ᠋ᠢ ᠭᠠᠷᠳᠠᠭᠤᠯᠵᠤ ᠰᠠᠨᠠᠭᠠ ᠠᠮᠠᠷᠠᠵᠤ ᠪᠢᠯᠡ᠃ ᠪᠠᠭᠰᠢ ᠯᠠᠮᠠ ᠨᠢ ᠮᠥᠨ ᠯᠡ ᠰᠠᠩᠵᠢ ᠰᠢᠭ᠋ ᠨᠢᠭᠤᠴᠠᠬᠠᠨ ᠠᠮᠠᠷᠠᠭ ᠲᠠᠢ ᠪᠠᠢᠵᠤ᠂ ᠬᠡᠦᠬᠡᠳ ᠲᠠᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠪᠠᠨ ᠭᠡᠮᠰᠢᠵᠦ᠂ ᠨᠢᠭᠦᠯ ᠠᠯᠳᠠᠰ ᠪᠣᠯᠪᠠ ᠭᠡᠮᠡᠨ ᠰᠢᠨᠠᠯᠵᠤ ᠶᠠᠪᠤᠵᠠᠢ᠃ ᠲᠡᠶᠢᠨᠬᠦ ᠵᠤᠯᠠ ᠶ᠋ᠢᠨ ᠭᠣᠣᠯ ᠪᠣᠯᠤᠨ ᠨᠠᠰᠤᠨ ᠬᠤᠲᠤᠭ ᠪᠣᠯᠵᠠᠢ᠃ ᠭᠡᠪᠡᠴᠦ ᠰᠠᠩᠵᠢ ᠲᠡᠷᠡ ᠵᠠᠮ ᠢᠶᠠᠷ ᠶᠠᠪᠤᠬᠤ ᠦᠭᠡᠢ᠃ ᠰᠠᠩᠵᠢ ᠱᠠᠰᠢᠨ ᠤ᠋ ᠦᠯᠢᠭᠡᠷ ᠤᠨ ᠰᠢᠷᠠ ᠶᠢᠷᠲᠢᠨᠴᠦ ᠡᠴᠡ ᠠᠬᠤᠢ ᠠᠮᠢᠳᠤᠷᠠᠯ ᠤᠨ ᠨᠣᠭᠣᠭᠠᠨ ᠵᠦᠯᠭᠡᠨ ᠳ᠋ᠦ᠍ ᠰᠢᠯᠵᠢᠬᠦ ᠶᠣᠰᠣᠲᠠᠢ᠃ ᠠᠮᠢᠳᠤᠷᠠᠯ ᠳ᠋ᠤ᠌ ᠨᠢ ᠲᠣᠬᠢᠶᠠᠯᠳᠤᠵᠤ ᠪᠠᠢᠭᠰᠠᠨ ᠶᠠᠭᠤᠮᠠ ᠪᠦᠬᠦᠨ ᠡᠨᠡ ᠰᠢᠯᠵᠢᠯᠲᠡ ᠶ᠋ᠢ ᠪᠡᠯᠡᠳᠬᠡᠬᠦ ᠳ᠋ᠦ᠍ ᠲᠤᠰᠠᠯᠠᠭᠰᠠᠨ᠃ ᠫᠠᠭ᠍ᠪᠣᠡᠭ ᠬᠠ ᠶ᠋ᠢ ᠲᠣᠭᠣᠷᠢᠨ ᠭᠣᠷᠣᠭᠠ ᠬᠢᠬᠦ ᠳᠤ ᠪᠠᠨ ᠴᠦ᠍᠂ ᡀᠠᠰᠠ ᠶ᠋ᠢᠨ ᠱᠣᠷᠣᠩ ᠳᠦ ᠰᠠᠭᠤᠵᠤ ᠪᠠᠢᠬᠤ ᠳᠦ ᠪᠡᠨ ᠴᠦ᠍᠂ ᠪᠡᠷᠢᠮᠦᠭ ᠡᠮᠡᠭᠡᠨ ᠦ ᠠᠰᠠᠷᠠᠮᠵᠢ ᠳ᠋ᠤ᠌ ᠠᠮᠢᠳᠤᠷᠠᠬᠤ ᠳᠦ ᠪᠡᠨ ᠴᠦ᠍᠂ ᠥᠯᠵᠡᠶᠢᠲᠦ ᠪᠠᠳᠠᠷᠴᠢᠨ ᠤ᠋ ᠦᠭᠡᠯᠡᠭᠡ ᠶᠠᠷᠢᠭᠠ ᠶ᠋ᠢ ᠰᠣᠨᠣᠰᠬᠤ ᠳ᠋ᠤ᠌ ᠪᠠᠨ ᠴᠦ᠍᠂ ᠨᠣᠮ ᠡᠷᠳᠡᠮ ᠢᠯᠡᠭᠦᠦ ᠰᠤᠷᠴᠢᠬᠠᠯᠠ ᠭᠡᠳ ᠰᠡᠯᠡᠮᠡᠳᠡᠨ ᠬᠣᠷᠣᠭᠠᠬᠤ ᠪᠠᠷ ᠰᠥᠨᠢ ᠳᠥᠯᠥ ᠪᠡᠷ ᠭᠡᠷ ᠳᠤ ᠨᠢ ᠣᠷᠣᠵᠤ ᠢᠷᠡᠭᠰᠡᠨ ᠴᠣᠭᠰᠣᠩ ᠤᠨ ᠵᠠᠨᠤᠯᠲᠤ ᠴᠢᠷᠠᠢ ᠶ᠋ᠢ ᠬᠥᠰᠢᠭᠡᠨ ᠦ ᠴᠣᠭᠣᠷᠠᠬᠠᠢ ᠪᠠᠷ ᠠᠵᠢᠵᠤ ᠰᠠᠭᠤᠬᠤ ᠳᠦ ᠪᠡᠨ ᠴᠦ᠍᠂ ᠠᠨᠢᠭ ᠭᠣᠮᠪᠣ ᠶᠢᠨ ᠭᠡᠯᠦᠩᠮᠡ ᠨᠤᠭᠤᠳ ᠲᠤ᠌ ᠨᠦᠳᠦᠭᠦᠯᠵᠦ ᠠᠮᠢ ᠠᠯᠳᠠᠭᠰᠠᠨ ᠪᠠᠳᠢᠷᠴᠢᠨ ᠨᠥᠬᠥᠷ ᠡᠴᠡ ᠪᠡᠨ ᠬᠠᠭᠠᠴᠠᠬᠤ ᠦᠶᠡ ᠳᠡᠬᠡᠨ ᠴᠦ᠍ ᠨᠢᠭᠦᠯ ᠪᠤᠶᠠᠨ ᠤ᠋ ᠮᠥᠨ ᠴᠢᠨᠠᠷ ᠢ᠋ ᠰᠠᠶᠢᠨ ᠤᠬᠠᠭᠠᠷᠠᠵᠠᠢ᠃ ᠪᠤᠷᠬᠠᠨ ᠱᠠᠵᠢᠨ ᠤ᠋ ᠰᠤᠷᠭᠠᠯ ᠨᠣᠮᠯᠠᠯ᠂ ᠲᠡᠭᠦᠨ ᠦ᠌ ᠵᠠᠩ ᠦᠢᠯᠡ ᠨᠢ ᠦᠨᠡᠨ ᠬᠡᠷᠡᠭ ᠲᠡᠭᠡᠨ ᠰᠣᠨᠢᠷᠬᠠᠯᠲᠠᠢ ᠪᠣᠳᠣᠵᠤ ᠵᠣᠬᠢᠶᠠᠭᠰᠠᠨ ᠦᠯᠢᠭᠡᠷ ᠶᠦᠮ ᠭᠡᠳᠡᠭ ᠢ᠋ ᠰᠠᠨᠵᠢᠳᠠᠯᠪᠢᠴᠣᠶᠢᠵᠠᠮᠰᠤ ᠣᠳᠣ ᠨᠢᠭᠡᠨᠲᠡ ᠤᠬᠠᠭᠠᠷᠠᠵᠠᠢ᠃ ᠲᠡᠷᠡ ᠦᠯᠢᠭᠡᠷ ᠲᠤ ᠦᠨᠡᠮᠰᠢᠯᠲᠡᠢ ᠪᠠᠢᠯᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠬᠡᠳᠦᠨ ᠲᠦᠮᠡᠨ ᠯᠠᠮᠠ ᠨᠠᠷ ᠦᠶᠡ ᠵᠠᠯᠭᠠᠮᠵᠢᠯᠠᠨ ᠡᠳᠦᠢ ᠲᠡᠳᠦᠢ ᠴᠠᠮᠢᠨ ᠰᠣᠨᠢᠨ ᠠᠷᠭᠠ ᠰᠢᠷᠬᠡ ᠶ᠋ᠢ ᠪᠣᠳᠣᠵᠤ ᠣᠯᠤᠭᠠᠳ ᠠᠮᠢᠳᠤᠷᠠᠯ ᠳ᠋ᠤ᠌ ᠨᠡᠪᠲᠡᠷᠡᠭᠦᠯᠵᠡᠢ᠃
ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠣᠳᠣ ᠲᠡᠷᠡ ᠬᠦ ᠣᠯᠢᠭ ᠪᠣᠯᠤᠭᠰᠠᠨ ᠦᠯᠢᠭᠡᠷ ᠤᠨ ᠣᠷᠣᠨ ᠢ᠋ ᠲᠣᠭᠣᠷᠢᠨ ᠭᠠᠷᠴᠤ ᠪᠣᠳᠠᠲᠠᠢ ᠪᠠᠷ ᠣᠷᠣᠰᠢᠨ ᠪᠠᠢᠳᠠᠭ ᠬᠥᠮᠦᠨ ᠶᠣᠰᠣᠨ ᠤ᠋ ᠠᠮᠢᠳᠤᠷᠠᠯ ᠳ᠋ᠤ᠌ ᠨᠡᠪᠲᠡᠷᠡᠨ ᠣᠷᠣᠬᠤ ᠶ᠋ᠢ ᠬᠦᠰᠡᠵᠦ ᠪᠠᠢᠪᠠ᠃
ᠣᠳᠣ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠲᠢᠲᠢᠮᠯᠡᠭᠰᠡᠨ ᠳᠡᠭᠡᠷᠡ ᠦᠭᠡᠢ ᠳᠡᠭᠡᠳᠦ ᠪᠤᠷᠬᠠᠨ ᠬᠠᠮᠤᠭ ᠢ᠋ ᠠᠢᠯᠠᠳᠣᠭᠴᠢ᠂ ᠪᠤᠶᠠᠨ ᠢ᠋ ᠰᠠᠴᠤᠷᠠᠭᠤᠯᠤᠭᠴᠢ᠂ ᠪᠦᠬᠦᠨ ᠢ᠋ ᠡᠷᠬᠡᠨ ᠳ᠋ᠦ᠍ ᠪᠡᠨ ᠬᠤᠷᠢᠶᠠᠭᠴᠢ ᠭᠡᠭᠳᠡᠭᠰᠡᠨ ᠪᠤᠷᠬᠠᠳ ᠤ᠋ᠨ ᠦᠷᠡ ᠪᠢᠰᠢ ᠬᠠᠷᠢᠨ ᠦᠷᠡ ᠲᠠᠢ ᠪᠣᠯᠬᠤ ᠶᠢᠨ ᠮᠥᠷᠥᠭᠡᠳᠦᠯ ᠳᠤ ᠠᠪᠲᠠᠭᠳᠠᠭᠰᠠᠨ ᠶᠠᠳᠠᠭᠤ ᠪᠠᠭᠤᠷᠠᠢ ᠮᠥᠷᠲᠡᠯᠡ ᠵᠥᠭᠡᠯᠡᠨ ᠬᠤᠷᠠ ᠶ᠋ᠢᠨ ᠳᠤᠰᠤᠯ ᠰᠢᠭ᠋ ᠡᠯᠢᠭᠡ ᠳᠡᠪᠲᠦᠭᠡᠮᠡ ᠵᠠᠩ ᠲᠠᠢ ᠣᠳᠬᠣᠨ ᠬᠡᠦᠬᠡᠨ ᠦ᠌ ᠳᠦᠷᠢ ᠡᠳᠦᠷ᠂ ᠴᠠᠭ ᠪᠦᠷᠢ ᠳᠦ ᠨᠢᠳᠦᠨ ᠦ᠌ ᠡᠮᠦᠨᠡ ᠪᠣᠳᠠᠲᠠᠢ ᠲᠣᠳᠣᠷᠬᠠᠢ ᠬᠠᠷᠠᠭᠳᠠᠭᠰᠠᠭᠠᠷ ᠪᠠᠢᠬᠤ ᠪᠣᠯᠵᠠᠢ᠃ ᠲᠡᠷᠡ ᠯᠠ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠦ᠋ᠨ ᠪᠤᠷᠬᠠᠨ ᠪᠣᠯᠵᠠᠢ᠃
ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠲᠤ ᠪᠣᠢ ᠪᠣᠯᠤᠭᠰᠠᠨ ᠲᠦᠩᠰᠦᠭᠡᠷ ᠪᠠᠢᠳᠠᠯ ᠬᠡᠪ ᠭᠡᠨᠡᠳᠲᠡ ᠥᠭᠡᠷᠡᠴᠢᠯᠡᠭᠳᠡᠯᠡ᠃ ᠨᠠᠮᠤᠷ ᠤᠨ ᠳᠤᠯᠠᠭᠠᠬᠠᠨ ᠨᠢᠭᠡ ᠡᠳᠦᠷ ᠪᠣᠭᠳᠠ ᠡᠵᠡᠨ ᠦ᠌ ᠵᠠᠷᠤᠵᠤ ᠢᠯᠡᠭᠡᠭᠰᠡᠨ ᠪᠠᠨᠳᠢᠳᠠ ᠬᠠᠮᠪᠤ ᠪᠠᠷᠠ ᠪᠣᠯᠤᠭᠴᠢᠳ ᠤ᠋ᠨ ᠬᠠᠮᠲᠤ ᠪᠡᠷ ᠵᠠᠰᠠᠭᠲᠤ ᠬᠠᠭᠠᠨ ᠤ᠋ ᠬᠦᠷᠢᠶᠡᠨ ᠦ᠌ ᠵᠠᠰᠠᠭ ᠯᠠᠮᠠ ᠶ᠋ᠢ ᠳᠠᠭᠠᠭᠤᠯᠤᠨ ᠬᠦᠷᠦᠯᠴᠡᠨ ᠢᠷᠡᠯᠡ᠃ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠤᠨ ᠬᠠᠮᠪᠤ ᠯᠠᠮᠠ ᠶᠢᠨ ᠪᠤᠷᠤᠭᠤ ᠳᠠᠪᠠᠭᠠ ᠪᠠᠷ ᠣᠷᠣᠭᠰᠠᠨ ᠬᠡᠷᠡᠭ ᠶᠠᠪᠤᠳᠠᠯ ᠤ᠋ᠨ ᠬᠠᠷᠠ ᠴᠠᠭᠠᠨ ᠢ᠋ ᠢᠯᠭᠠᠷᠠᠭᠤᠯᠬᠤ ᠪᠠᠷ ᠢᠷᠡᠵᠡᠢ᠃
ᠲᠡᠳᠡ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠤᠨ ᠲᠣᠮᠣ ᠯᠠᠮᠠ ᠨᠠᠷ ᠤᠨ ᠴᠤᠭᠯᠠᠷᠠᠨ ᠵᠥᠪᠯᠡᠬᠦ ᠪᠣᠡᠭ᠌ᠰᠣᠤᠬᠠᠮᠪᠠ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠵᠠᠭᠠᠵᠠᠢ᠃ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠶᠢ ᠬᠦᠯᠢᠶᠡᠬᠦ ᠥᠷᠭᠥᠭᠡ ᠪᠤᠶᠤ ᠴᠠᠭᠰᠠᠬᠠᠮᠪᠠ ᠳ᠋ᠤ᠌ ᠭᠠᠭᠴᠠᠭᠠᠷ ᠢ ᠰᠠᠭᠤᠯᠭᠠᠯᠠ᠃ ᠪᠤᠰᠤᠳ ᠪᠠᠭᠲᠠᠭᠠ ᠦᠭᠡᠢ ᠬᠡᠷᠭᠡᠮᠲᠡᠨ ᠨᠦ᠍ᠭᠦᠳ ᠴᠠᠮᠬᠠᠩᠪᠠ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠵᠠᠭᠠᠯᠠ᠃
ᠪᠠᠨᠳᠢᠳᠠ ᠬᠠᠮᠪᠤ ᠳ᠋ᠤ᠌ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦᠨ ᠰᠢᠷᠡᠭᠡᠲᠦ ᠡᠴᠡ ᠡᠬᠢᠯᠡᠭᠡᠳ ᠭᠡᠯᠦᠩ᠂ ᠭᠡᠰᠦᠯ᠂ ᠭᠠᠪᠵᠤ᠂ ᠭᠡᠪᠬᠦᠢ ᠨᠠᠷ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠬᠠᠮᠪᠤ ᠶᠢᠨ ᠲᠠᠩᠭᠠᠷᠢᠭ ᠪᠠᠭᠤᠷᠠᠵᠤ᠂ ᠪᠤᠷᠤᠭᠤ ᠳᠠᠪᠠᠭᠠ ᠪᠠᠷ ᠣᠷᠣᠭᠰᠠᠨ ᠲᠤᠬᠠᠢ ᠶᠢ ᠲᠠᠯᠠ ᠪᠦᠷᠢ ᠪᠡᠷ ᠨᠤᠲᠠᠯᠠᠨ ᠶᠠᠷᠢᠵᠤ ᠤᠳᠠᠭᠠᠨ ᠬᠤᠭᠤᠴᠠᠭᠠ ᠪᠠᠷ ᠰᠠᠭᠤᠵᠠᠭᠠᠯᠠ᠃ ᠲᠡᠳᠡᠨ ᠦ᠌ ᠬᠣᠭᠣᠷᠣᠨᠳᠣ ᠮᠠᠷᠭᠤᠭᠠᠨ ᠡᠭᠦᠰᠴᠡᠢ᠃ ᠵᠠᠷᠢᠮ ᠬᠥᠮᠦᠨ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠶᠢ ᠥᠮᠥᠭᠡᠷᠡᠬᠦ ᠲᠥᠯᠥᠪ ᠭᠠᠷᠤᠭᠰᠠᠨ ᠠ᠋ᠴᠠ ᠮᠠᠷᠭᠤᠭᠠᠨ ᠳᠡᠭᠳᠡᠵᠡᠢ᠃ ᠨᠣᠮ ᠤᠨ ᠴᠢᠨᠠᠳᠤ ᠤᠳᠬᠠ ᠳ᠋ᠤ᠌ ᠨᠡᠪᠲᠡᠷᠡᠭᠰᠡᠨ ᠵᠠᠷᠢᠮ ᠬᠥᠮᠦᠨ ᠦ᠌ ᠬᠡᠯᠡᠳᠡᠭ ᠯᠡ ᠦᠭᠡ ᠶ᠋ᠢ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠬᠡᠯᠡᠵᠡᠢ᠃ ᠭᠡᠬᠦ ᠳᠦ ᠪᠡᠨ ᠰᠦᠵᠢᠭᠲᠡᠨ ᠦ᠌ ᠡᠮᠦᠨᠡ ᠪᠢᠰᠢ ᠭᠠᠪᠵᠢ ᠡᠴᠡ ᠳᠣᠭᠣᠭᠰᠢ ᠥᠬᠡᠢ ᠬᠡᠮᠵᠢᠶᠡᠨ ᠦ᠌ ᠯᠠᠮᠠ ᠨᠠᠷ ᠤᠨ ᠳᠤᠮᠳᠠ ᠶᠠᠷᠢᠵᠠᠢ ᠭᠡᠵᠦ ᠬᠥᠩᠭᠡᠯᠡᠬᠦ ᠲᠠᠯᠠ ᠭᠠᠷᠪᠠ᠃ ᠬᠠᠷᠢᠨ ᠡᠬᠡᠨᠡᠷ ᠲᠤ ᠲᠠᠴᠢᠶᠠᠭᠰᠠᠨ ᠨᠢᠭᠦᠯ ᠢ ᠥᠮᠥᠭᠡᠷᠡᠬᠦ ᠬᠥᠮᠦᠨ ᠭᠠᠷᠤᠭᠰᠠᠠ ᠦᠭᠡᠢ᠃
- ᠬᠠᠷᠠ᠂ ᠴᠠᠭᠠᠨ ᠳ᠋ᠤ᠌ ᠪᠠᠨ ᠬᠦᠷᠪᠡᠯ ᠵᠣᠬᠢᠨᠠ ᠭᠡᠵᠦ ᠪᠠᠨᠳᠢᠳᠠ ᠬᠠᠮᠪᠤ ᠰᠢᠢᠳᠴᠡᠢ᠃ ᠲᠡᠷᠡ ᠳᠠᠷᠤᠢ ᠲᠣᠭᠣᠭᠠ ᠲᠠᠢ ᠪᠤᠴᠠᠯᠤᠮᠠ ᠤᠰᠤ ᠠᠪᠴᠤ ᠢᠷᠡᠵᠡᠭᠡᠯᠡ᠃ ᠳᠣᠲᠣᠷᠠ ᠨᠢ ᠬᠠᠷᠠ ᠴᠠᠭᠠᠨ ᠬᠣᠶᠠᠷ ᠠᠳᠠᠯᠢᠬᠠᠨ ᠴᠢᠯᠠᠭᠤ ᠬᠢᠯᠡ᠃ ᠲᠡᠭᠡᠭᠡᠳ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠬᠠᠮᠪᠤ ᠶᠢ ᠳᠠᠭᠤᠳᠠᠨ ᠣᠷᠣᠭᠤᠯᠤᠭᠠᠳ ᠬᠠᠨᠴᠤᠢ ᠶᠢ ᠨᠢ ᠰᠢᠮᠠᠯᠠᠭᠤᠯᠤᠭᠰᠠ ᠳᠠᠷᠠᠭᠠ᠂
- ᠠᠪ! ᠭᠡᠵᠦ ᠪᠠᠨᠳᠢᠳᠠ ᠬᠠᠮᠪᠤ ᠲᠤᠰᠢᠶᠠᠯᠠ᠃ ᠰᠠᠩᠵᠢ ᠪᠤᠴᠠᠯᠤᠮᠠ ᠬᠠᠯᠠᠭᠤᠨ ᠤᠰᠤ ᠲᠠᠢ ᠲᠣᠭᠣᠭᠠ ᠤᠷᠤᠭᠤ ᠭᠠᠷ ᠢᠶᠠᠨ ᠲᠥᠷᠥᠵᠦ ᠢᠷᠣᠭᠠᠷ ᠲᠤ᠌ ᠨᠢ ᠲᠣᠬᠢᠶᠠᠯᠳᠤᠭᠰᠠᠨ ᠨᠢᠭᠡ ᠴᠢᠯᠠᠭᠤ ᠶ᠋ᠢ ᠠᠳᠬᠤᠨ ᠭᠠᠷᠭᠠᠵᠤ ᠢᠷᠡᠯᠡ᠃ ᠬᠠᠷᠠ ᠴᠢᠯᠠᠭᠤ ᠪᠠᠢᠯᠠ! ᠲᠡᠭᠦᠨ ᠢ᠋ ᠬᠠᠷᠠᠮᠠᠭᠴᠠ ᠪᠠᠨ ᠳᠡᠮᠴᠦᠭ ᠭᠠᠪᠵᠤ ᠳᠡᠴᠢᠨ ᠤᠮᠵᠠᠳ ᠬᠣᠶᠠᠷ ᠪᠠᠶᠠᠷᠯᠠᠨ ᠢᠨᠢᠶᠡᠮᠰᠦᠭᠯᠡᠬᠦ ᠨᠢ ᠢᠯᠡᠳᠲᠡ ᠪᠠᠢᠯᠠ᠃ ᠪᠦᠬᠦ ᠶᠠᠭᠤᠮᠠ ᠡᠭᠦᠪᠡᠷ ᠰᠢᠢᠳᠦᠭᠳᠡᠯᠡ᠃ ᠬᠠᠷᠠ ᠨᠢᠭᠦᠯ ᠢᠶᠠᠨ ᠲᠡᠷᠡ ᠴᠢᠯᠠᠭᠤ ᠪᠡᠷ ᠢᠯᠡᠴᠢᠯᠡᠭᠰᠡᠨ ᠳ᠋ᠦ᠍ ᠲᠣᠭᠠᠴᠠᠪᠠ᠃
- ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠤᠨ ᠬᠠᠮᠪᠤ ᠯᠠᠮᠠ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠲᠠᠨ ᠤ᠋ ᠲᠠᠩᠭᠠᠷᠢᠭ ᠪᠠᠭᠤᠷᠠᠵᠤ ᠪᠤᠷᠤᠭᠤ ᠳᠠᠪᠠᠭᠠ ᠪᠠᠷ ᠣᠷᠣᠭᠰᠠᠨ ᠨᠢ ᠢᠯᠡᠷᠬᠡᠢ ᠪᠣᠯᠤᠭᠠᠳ ᠪᠠᠢᠨᠠ᠃ ᠣᠯᠠᠨ ᠳᠠᠶᠠᠭᠠᠷ ᠶᠠᠷᠢᠭᠳᠠᠬᠤ ᠪᠣᠯᠵᠠᠢ᠃ ᠰᠠᠶᠢ ᠬᠠᠷᠠ ᠴᠠᠭᠠᠨ ᠳ᠋ᠤ᠌ ᠪᠠᠨ ᠬᠦᠷᠴᠦ ᠲᠠ ᠥᠪᠡᠷ ᠤᠨ ᠭᠠᠷ ᠢᠶᠠᠷ ᠬᠠᠷᠠ ᠴᠢᠯᠠᠭᠤ ᠠᠳᠬᠤᠨ ᠭᠠᠷᠭᠠᠯᠠ᠃ ᠣᠳᠣ ᠲᠡᠭᠡᠬᠦ ᠪᠡᠷ ᠬᠣᠶᠠᠷᠬᠠᠨ ᠵᠠᠮ ᠪᠠᠢᠨᠠ! ᠭᠡᠵᠦ ᠪᠠᠨᠳᠢᠳᠠ ᠬᠠᠮᠪᠤ ᠰᠠᠨᠠᠭᠤᠯᠤᠨ ᠬᠡᠯᠡᠭᠰᠡᠨ ᠢᠶᠠᠨ ᠲᠦᠷ ᠳᠤᠭᠤᠢ ᠪᠣᠯᠵᠤ ᠰᠠᠩᠵᠢ ᠶ᠋ᠢᠨ ᠴᠢᠷᠠᠢ ᠶᠢ ᠠᠵᠢᠭᠯᠠᠭᠠᠳ᠂
- ᠨᠢᠭᠡ ᠪᠣᠯ ᠵᠠᠩᠴᠢ ᠠᠷᠠᠯᠵᠢᠬᠤ᠂ ᠨᠥᠭᠦᠭᠡ ᠪᠣᠯ ᠰᠢᠷᠠ ᠰᠢᠪᠲᠤᠯᠬᠤ᠂ ᠡᠨᠡ ᠬᠣᠶᠠᠷ ᠠᠴᠠ ᠥᠭᠡᠷᠡ ᠵᠠᠮ ᠠᠯᠠᠭᠠ᠃ ᠨᠢᠭᠦᠯ ᠢ᠋ᠶ᠋ᠡᠨ ᠰᠠᠢᠲᠤᠷ ᠨᠠᠮᠠᠨᠴᠢᠯᠠᠨ ᠵᠠᠩᠴᠢ ᠠᠷᠠᠯᠵᠢᠪᠠᠰᠤ ᠢᠯᠡᠭᠦᠦ ᠰᠠᠢᠨ ᠲᠥᠷᠥᠯ ᠳ᠋ᠦ᠍ ᠳᠠᠬᠢᠨ ᠲᠥᠷᠥᠵᠦ ᠪᠣᠯᠤᠨᠠ᠃ ᠰᠢᠷᠠ ᠰᠢᠪᠲᠤᠯᠬᠤ ᠪᠣᠯ ᠳᠠᠬᠢᠭᠠᠳ ᠣᠷᠣᠨ ᠬᠡᠢᠳ ᠦ᠋ᠨ ᠪᠠᠷᠠ ᠬᠠᠷᠠᠬᠤ ᠡᠷᠬᠡ ᠦᠭᠡᠢ ᠪᠡᠷ ᠰᠢᠷᠠ ᠰᠢᠪᠲᠤᠯᠤᠨᠠ᠃ ᠠᠯᠢ ᠶ᠋ᠢ ᠨᠢ ᠪᠣᠯᠭᠣᠭᠠᠬᠤ ᠰᠠᠨ ᠪᠣᠯ? ᠭᠡᠪᠡ᠃
ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠡᠨᠡ ᠬᠣᠶᠠᠷ ᠵᠠᠮ ᠤᠨ ᠶᠠᠭᠤᠨ ᠤᠳᠬᠠ ᠲᠠᠢ ᠪᠣᠯᠬᠤ ᠶᠢ ᠰᠠᠢᠨ ᠮᠡᠳᠡᠵᠦ ᠪᠠᠢᠯᠠ᠃ ᠵᠠᠩᠴᠢ ᠠᠷᠠᠯᠵᠢᠨᠠ ᠭᠡᠳᠡᠭ ᠨᠢ ᠲᠥᠷᠥᠯ ᠠᠷᠠᠯᠵᠢᠬᠤ ᠭᠡᠰᠡᠨ ᠲᠡᠢ ᠢᠵᠢᠯ ᠶᠠᠭᠤᠮᠠ᠃ ᠶᠠᠮᠠᠷ ᠨᠢᠭᠡ ᠬᠡᠯᠪᠡᠷᠢ ᠪᠡᠷ ᠠᠮᠢ ᠨᠠᠰᠤ ᠪᠠᠨ ᠬᠣᠷᠣᠭᠠᠬᠤ ᠶ᠋ᠢᠨ ᠨᠡᠷᠡ᠃ ᠬᠠᠮᠤᠭ ᠤ᠋ᠨ ᠬᠦᠨᠳᠦ ᠲᠠᠢ ᠳᠡᠭᠡᠳᠦ ᠬᠡᠯᠪᠡᠷᠢ ᠪᠡᠷ ᠨᠢ ᠰᠠᠩᠵᠢ ᠶ᠋ᠢᠨ ᠪᠠᠭᠰᠢ ᠴᠣᠢᠮᠴᠣᠭ ᠭᠡᠯᠦᠩ ᡀᠠᠰᠠ ᠵᠣᠣ ᠳ᠋ᠤ᠌ ᠣᠴᠢᠵᠤ ᠵᠠᠩᠴᠢ ᠠᠷᠠᠯᠵᠢᠭᠰᠠᠨ ᠪᠢᠯᠡ᠃ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠲᠥᠷᠥᠯ ᠠᠷᠠᠯᠵᠢᠬᠤ ᠶ᠋ᠢ ᠬᠦᠰᠡᠬᠦ ᠦᠭᠡᠢ ᠪᠠᠢᠯᠠ᠃ ᠲᠡᠷᠡ ᠠᠮᠢᠳᠤᠷᠠᠬᠤ ᠶᠢ᠂ ᠬᠥᠮᠦᠨ ᠦ᠌ ᠶᠣᠰᠣᠭᠠᠷ ᠠᠮᠢᠳᠤᠷᠠᠬᠤ ᠶ᠋ᠢ ᠮᠥᠷᠥᠭᠡᠳᠴᠦ ᠪᠠᠢᠯᠠ᠃ ᠭᠡᠲᠡᠯᠡ ᠪᠤᠶᠠᠨᠵᠠᠯᠪᠠᠷᠢᠬᠤ ᠶᠢᠨ ᠭᠢᠷᠭᠠᠴᠤᠳ ᠶᠠᠭ ᠯᠠ ᠵᠠᠩᠴᠢ ᠠᠷᠠᠯᠵᠢᠬᠤ ᠵᠠᠮ ᠢᠶᠠᠷ ᠰᠠᠩᠵᠢ ᠶ᠋ᠢ ᠶᠠᠪᠤᠭᠤᠯᠬᠤ ᠬᠦᠰᠡᠯ ᠲᠡᠢ ᠪᠠᠢᠵᠠᠢ᠃ ᠠᠮᠢᠳᠤ ᠶᠠᠪᠤᠬᠤ ᠡᠴᠡ ᠨᠢ ᠠᠶᠤᠵᠤ ᠪᠠᠢᠵᠠᠢ᠃
- ᠰᠢᠷᠠ ᠰᠢᠪᠲᠤᠯᠬᠤ ᠤᠤ ᠳᠠ? ᠭᠡᠵᠦ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠰᠢᠢᠳᠮᠡᠭᠡᠢᠬᠡᠨ ᠬᠡᠯᠡᠯᠡ᠃
- ᠲᠡᠭᠡᠪᠡᠯ ᠪᠣᠯᠤᠨᠠ᠃ ᠭᠡᠪᠡᠴᠦ ᠣᠷᠣᠨ ᠬᠡᠢᠳ ᠤᠨ ᠪᠠᠷᠠ ᠳᠠᠬᠢᠨ ᠬᠠᠷᠠᠬᠤ ᠦᠭᠡᠢ ᠪᠡᠷ ᠰᠢᠷᠠ ᠰᠢᠪᠲᠤᠯᠬᠤ ᠤᠴᠢᠷ ᠲᠠᠢ ᠰᠢᠦ ᠳᠡ! ᠭᠡᠵᠦ ᠵᠠᠰᠠᠭ ᠯᠠᠮᠠ ᠰᠠᠨᠠᠭᠤᠯᠬᠤ ᠳ᠋ᠤ᠌ ᠰᠠᠩᠵᠢ ᠳᠠᠭᠤ ᠦᠭᠡᠢ ᠪᠠᠢᠯᠠ᠃ ᠲᠡᠷᠡ ᠨᠢ ᠬᠣᠯᠠ ᠭᠠᠵᠠᠷ᠂ ᠯᠠᠮᠠ ᠬᠤᠸᠠᠷᠠᠭ᠂ ᠰᠦᠮᠡ ᠳᠤᠭᠠᠩ ᠦᠭᠡᠢ ᠭᠠᠵᠠᠷ ᠴᠥᠯᠡᠨᠡ ᠭᠡᠰᠡᠨ ᠤᠳᠬᠠ ᠲᠠᠢ ᠶᠢ ᠴᠦ᠍ ᠣᠢᠯᠠᠭᠠᠵᠤ ᠪᠠᠢᠯᠠ᠃ 《ᠶᠠᠭᠠᠬᠢᠬᠤ ᠪᠣᠢ᠃ ᠤᠳᠬᠤᠨ ᠢ᠋ ᠠᠪᠤᠭᠠᠳ ᠶᠠᠪᠤᠨᠠ᠃ ᠤᠳᠬᠤᠨ ᠲᠠᠢ ᠪᠠᠢᠭᠰᠠᠨ ᠴᠠᠭ ᠲᠤ᠌ ᠬᠠᠮᠢᠭᠠ ᠴᠦ᠍ ᠴᠥᠯᠡᠭᠳᠡᠭᠰᠡᠨ ᠬᠠᠮᠢᠶᠠ ᠦᠭᠡᠢ》 ᠭᠡᠵᠦ ᠰᠠᠩᠵᠢ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ ᠪᠠᠢᠯᠠ᠃ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠡᠨᠡ ᠲᠠᠯᠠ ᠪᠠᠷ ᠡᠯᠳᠡᠪ ᠮᠠᠭᠤ ᠰᠠᠨᠠᠭᠠ ᠦᠭᠡᠢ᠂ ᠰᠠᠭᠠᠷᠳᠠᠭᠠᠮ ᠤᠨ ᠶᠣᠰᠣ ᠪᠠᠷᠢᠮᠲᠠᠯᠠᠵᠤ ᠦᠨᠡᠨ ᠦ᠌ ᠮᠥᠷ ᠬᠥᠭᠡᠭᠡᠵᠦ ᠶᠠᠪᠤᠭᠰᠠᠨ ᠤ᠋ ᠤᠯᠠᠮ ᠡᠴᠡ ᠶᠡᠬᠡ ᠯᠡ ᠳᠤᠲᠠᠭᠤ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠬᠣᠵᠢᠮ ᠤᠬᠠᠭᠠᠷᠠᠵᠠᠢ᠃ ᠬᠡᠷᠪᠡ ᠵᠠᠩᠴᠢ ᠠᠷᠠᠯᠵᠢᠪᠠᠯ ᠨᠢᠭᠡᠨᠲᠡ ᠦᠭᠡᠢ ᠪᠣᠯᠬᠤ ᠲᠤᠯᠠ ᠲᠡᠭᠦᠪᠡᠷ ᠨᠢ ᠣᠷᠬᠢᠬᠤ᠂ ᠬᠡᠷᠪᠡ ᠰᠢᠷᠠ ᠰᠢᠪᠲᠤᠯᠪᠠᠯ ᠬᠣᠯᠠ ᠭᠠᠵᠠᠷ ᠴᠥᠯᠡᠭᠡᠳ ᠵᠣᠭᠰᠣᠬᠤ ᠦᠭᠡᠢ ᠪᠤᠷᠬᠠᠨ ᠱᠠᠵᠢᠨ᠂ ᠰᠦᠮᠡ ᠬᠡᠢᠳ ᠢ᠋ ᠳᠠᠬᠢᠨ ᠬᠠᠷᠠᠬᠤ ᠠᠷᠭᠠ ᠦᠭᠡᠢ ᠪᠡᠷ ᠲᠤᠬᠠᠢᠯᠠᠪᠠᠯ ᠬᠣᠶᠠᠷ ᠨᠢᠳᠦ ᠶ᠋ᠢ ᠬᠠᠷᠠᠭᠠ ᠦᠭᠡᠢ ᠪᠣᠯᠭᠠᠨ ᠣᠷᠬᠢᠬᠤ ᠶᠣᠰᠣᠲᠠᠢ ᠪᠠᠢᠵᠠᠢ᠃ ᠲᠡᠭᠦᠪᠡᠷ ᠴᠦ᠍ ᠪᠠᠷᠠᠬᠤ ᠦᠭᠡᠢ ᠬᠠᠷᠠᠵᠤ ᠬᠠᠨᠳᠤᠬᠤ᠂ ᠲᠤᠰᠠᠯᠠᠬᠤ ᠲᠡᠳᠬᠦᠬᠦ ᠪᠦᠬᠦᠢ ᠯᠡ ᠬᠣᠯᠪᠣᠭᠠᠨ ᠠ᠋ᠴᠠ ᠲᠠᠰᠤᠯᠵᠤ᠂ ᠭᠠᠭᠴᠠᠭᠠᠷᠳᠠᠭᠤᠯᠬᠤ ᠶᠣᠰᠣᠲᠠᠢ ᠪᠠᠢᠵᠠᠢ᠃ ᠡᠭᠦᠨ ᠢ᠋ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠭᠰᠠᠨ ᠦᠭᠡᠢ᠃
- ᠮᠠᠷᠭᠠᠰᠢ ᠭᠠᠬᠠᠢ ᠴᠠᠭ ᠲᠤ᠌ ᠰᠢᠷᠠ ᠰᠢᠪᠲᠤᠯᠤᠨᠠ! ᠭᠡᠵᠦ ᠵᠠᠷᠯᠠᠪᠠ᠃
ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠭᠡᠷ ᠲᠤ ᠪᠠᠨ ᠬᠠᠷᠢᠪᠠ᠃ ᠲᠡᠷᠡ ᠣᠷᠣᠢ ᠳ᠋ᠤ᠌ ᠪᠠᠨ ᠶᠠᠪᠤᠵᠤ ᠣᠳᠬᠣᠨ ᠢ᠋ ᠡᠷᠭᠢᠮᠡᠷ ᠰᠠᠨᠠᠭᠳᠠᠵᠠᠢ᠃ ᠭᠡᠪᠡᠴᠦ ᠤᠨᠤᠭᠠ ᠮᠣᠷᠢ ᠪᠡᠯᠡᠨ ᠦᠭᠡᠢ᠃ ᠪᠠᠰᠠ ᠨᠢᠭᠡᠨᠲᠡ ᠰᠢᠷᠠ ᠰᠢᠪᠲᠤᠯᠬᠤ ᠶᠤᠮ ᠪᠣᠯ ᠨᠢᠭᠡᠮᠦᠰᠦᠨ ᠣᠴᠢᠬᠤ ᠪᠠᠷ ᠰᠢᠢᠳᠦᠯᠡ᠃ ᠠᠩᠬᠠ ᠤᠳᠠᠭᠠ ᠰᠠᠩᠵᠢ ᠣᠯᠠᠨ ᠵᠢᠯ ᠬᠢᠵᠦ ᠳᠠᠳᠤᠭᠰᠠᠨ ᠤᠩᠰᠢᠯᠭᠠ᠂ ᠱᠠᠰᠢᠨ ᠤ᠋ ᠡᠯᠳᠡᠪ ᠵᠠᠩ ᠦᠢᠯᠡ ᠪᠡᠨ ᠴᠠᠭ ᠲᠤ᠌ ᠨᠢ ᠬᠢᠯ ᠦᠭᠡᠢ ᠡᠷᠲᠡᠬᠡᠨ ᠤᠨᠲᠠᠵᠤ ᠠᠮᠠᠷᠠᠬᠤ ᠪᠠᠷ ᠬᠡᠪᠲᠡᠵᠡᠢ᠃ ᠨᠣᠢᠷ ᠨᠢ ᠴᠦ᠍ ᠠᠮᠠᠷᠬᠠᠨ ᠬᠦᠷᠦᠯᠡ᠃
ᠭᠡᠪᠡᠴᠦ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠤᠨ ᠲᠣᠮᠣ ᠯᠠᠮᠠ ᠨᠠᠷ᠂ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠳᠡᠮᠪᠡᠷᠢᠯ ᠭᠡᠰᠬᠦᠢ᠂ ᠳᠡᠮᠴᠦᠭ ᠭᠠᠪᠵᠤ ᠬᠣᠶᠠᠷ ᠶᠡᠬᠡ ᠠᠵᠢᠯ ᠲᠠᠢ ᠪᠠᠢᠯᠠ᠃ ᠲᠡᠳᠡ ᠰᠠᠩᠵᠢᠳᠠᠯᠪᠢᠴᠣᠢᠵᠠᠮᠰᠤ ᠶᠢᠨ ᠡᠯᠳᠡᠪ ᠬᠣᠯᠪᠣᠭᠠ ᠶ᠋ᠢ ᠲᠠᠰᠤᠯᠬᠤ ᠬᠤᠤᠪᠢᠯᠳᠤᠭᠠᠨ ᠬᠢᠵᠦ ᠪᠠᠢᠯᠠ᠃ ᠣᠳᠣ ᠰᠠᠩᠵᠢ ᠳ᠋ᠤ᠌ ᠡᠴᠢᠭᠡ᠂ ᠡᠬᠡ᠂ ᠲᠥᠷᠥᠯ ᠲᠥᠷᠥᠭᠰᠡᠳ ᠪᠠᠢᠬᠤ ᠦᠭᠡᠢ᠂ ᠭᠠᠭᠴᠠᠬᠦ ᠣᠳᠬᠣᠨ ᠬᠡᠦᠬᠡᠨ ᠪᠠᠢᠭᠠ ᠶᠢ ᠯᠠᠮᠠ ᠨᠠᠷ ᠮᠡᠳᠡᠬᠦ ᠪᠢᠯᠡ᠃ ᠨᠢᠭᠡ ᠥᠬᠢᠨ ᠡᠭᠡᠴᠢ ᠨᠢ ᠬᠥᠮᠦᠨ ᠲᠡᠢ ᠰᠠᠭᠤᠭᠠᠳ ᠬᠠᠷᠢ ᠭᠠᠵᠠᠷ ᠶᠠᠪᠤᠴᠢᠬᠠᠭᠰᠠᠨ ᠶᠤᠮ᠃ ᠴᠦᠯᠡᠯᠭᠡᠨ ᠳ᠋ᠦ᠍ ᠪᠠᠶᠢᠬᠤ ᠳᠤ ᠨᠢ ᠬᠠᠷᠠᠵᠤ ᠦᠵᠡᠬᠦ ᠡᠷᠭᠢᠵᠦ ᠣᠴᠢᠬᠤ ᠬᠥᠮᠦᠨ ᠦᠭᠡᠢ ᠪᠣᠯᠭᠠᠬᠤ ᠶᠢᠨ ᠲᠤᠯᠠᠳᠠ ᠣᠳᠬᠣᠨ ᠬᠡᠦᠬᠡᠨ ᠦ᠌ ᠤᠴᠢᠷ ᠢ ᠣᠯᠬᠤ ᠪᠠᠷ ᠲᠡᠳᠡ ᠬᠤᠤᠪᠢᠯᠳᠤᠵᠠᠢ᠃
- ᠳᠡᠷᠡᠨ ᠦ᠌ ᠬᠡᠦᠬᠡᠳ ᠨᠠᠢᠮᠠ᠂ ᠶᠢᠰᠦᠨ ᠰᠠᠷᠠ ᠲᠠᠢ ᠪᠣᠯᠪᠠ ᠤᠤ? ᠡᠢᠮᠦ ᠳᠦ ᠲᠡᠭᠦᠨ ᠳ᠋ᠦ᠍ ᠴᠢ ᠣᠴᠢᠵᠤ ᠬᠡᠯᠡ᠃ ᠰᠠᠩᠵᠢ ᠬᠠᠮᠪᠣᠲᠠᠨ ᠰᠢᠷᠠ ᠰᠢᠪᠲᠤᠯᠬᠤ ᠬᠡᠷᠡᠭ ᠲᠦ᠍ ᠬᠣᠯᠪᠣᠭᠳᠠᠭᠠᠳ ᠪᠠᠢᠨᠠ᠃ ᠶᠠᠭᠠᠷᠠᠯᠲᠠᠢ ᠢᠷᠡᠵᠦ ᠠᠭᠤᠯᠵᠠ! ᠭᠡᠵᠦ ᠬᠡᠯᠡᠭᠦᠯᠦᠯᠡ ᠭᠡᠮᠡᠨ ᠢᠳᠬᠠ᠂ ᠲᠡᠭᠡᠬᠦ ᠪᠡᠷ ᠲᠡᠷᠡ ᠬᠣᠶᠠᠷ ᠤ᠋ᠨ ᠶᠠᠪᠤᠳᠠᠯ ᠦᠨᠡᠨ ᠪᠣᠯ ᠣᠳᠬᠣᠨ ᠬᠡᠦᠬᠡᠨ ᠶᠠᠭᠠᠷᠠᠨ ᠨᠠᠰᠢ ᠭᠠᠷᠤᠨᠠ᠃ ᠨᠡᠰᠢ ᠭᠠᠷᠤᠭᠠᠳ ᠵᠠᠮ ᠤᠨ ᠳᠤᠮᠳᠠ ᠣᠷᠣᠵᠤ ᠶᠠᠪᠤᠬᠤ ᠳ᠋ᠤ᠌ ᠨᠢ ᠰᠦᠭ ᠣᠨ ᠬᠤᠪᠴᠠᠰᠤ ᠡᠮᠦᠰᠦᠨ ᠲᠣᠰᠴᠤ ᠨᠢᠭᠤᠭᠳᠠᠵᠤ ᠪᠠᠢᠭᠠᠳ ᠮᠣᠷᠢ ᠶ᠋ᠢ ᠦᠷᠭᠦᠭᠡᠨ ᠲᠤᠢᠯᠠᠭᠤᠯᠬᠤ ᠠᠵᠢᠯ ᠢ᠋ ᠴᠢ ᠬᠢ᠃ ᠮᠣᠷᠢᠨ ᠠ᠋ᠴᠠ ᠣᠢᠴᠢᠭᠠᠳ ᠳᠣᠣᠷᠠ ᠬᠠᠶᠠᠭᠠᠳ ᠯᠠ ᠪᠡᠷᠲᠡᠬᠦ ᠪᠢᠵᠡ᠃ ᠢᠩᠭᠢᠭᠡᠳ ᠬᠡᠨ ᠳ᠋ᠦ᠍ ᠴᠦ᠍ ᠮᠡᠳᠡᠭᠳᠡᠯ ᠦᠭᠡᠢ ᠡᠷᠭᠢᠵᠦ ᠢᠷᠡ! ᠭᠡᠵᠦ ᠳᠡᠮᠴᠦᠭ ᠭᠠᠪᠵᠤ ᠬᠣᠶᠠᠷ ᠬᠥᠮᠦᠨ ᠳ᠋ᠦ᠍ ᠵᠢᠭᠠᠪᠤᠷᠢᠯᠠᠵᠤ ᠲᠡᠷᠡ ᠰᠥᠨᠢ ᠳᠦ ᠪᠡᠨ ᠲᠡᠳᠡᠨ ᠢ᠋ ᠢᠯᠡᠭᠡᠯᠡ᠃ ᠡᠢᠮᠦ ᠶᠠᠭᠤᠮᠠ ᠪᠣᠯᠵᠤ ᠪᠠᠢᠭᠠ ᠶᠢ ᠰᠠᠩᠵᠢ ᠶᠡᠷᠦ ᠳᠡᠬᠡᠨ ᠴᠦ᠍ ᠭᠠᠳᠠᠷᠯᠠᠭᠰᠠᠨ ᠦᠭᠡᠢ᠃
ᠮᠠᠷᠭᠠᠰᠢ ᠨᠢ ᠭᠠᠬᠠᠢ ᠴᠠᠭ ᠪᠣᠯᠤᠯᠠ᠃ ᠰᠠᠩᠵᠢ ᠡᠩ ᠤᠨ ᠬᠤᠪᠴᠠᠰᠤ ᠡᠮᠦᠰᠴᠦ ᠬᠡᠢᠳ ᠲᠤ ᠪᠠᠨ ᠣᠴᠢᠯᠠ᠃ ᠣᠴᠢᠬᠤ ᠵᠠᠮ ᠳ᠋ᠤ᠌ ᠪᠠᠨ ᠰᠢᠨᠡ ᠪᠡᠷ ᠪᠠᠷᠢᠭᠤᠯᠵᠤ ᠪᠣᠢ ᠴᠣᠢᠷᠣᠠ ᠶ᠋ᠢᠨ ᠳᠤᠭᠠᠩ ᠢᠶᠠᠨ ᠨᠠᠷᠠ ᠵᠥᠪ ᠲᠣᠭᠣᠷᠢᠨ ᠭᠠᠷᠪᠠ᠃ ᠣᠷᠣᠢ ᠶ᠋ᠢᠨ ᠭᠣᠩᠬᠣᠨ ᠨᠢ ᠪᠠᠷᠢᠭᠳᠠᠭᠠ ᠦᠭᠡᠢ ᠳᠡᠭᠡᠪᠦᠷ ᠨᠢ ᠳᠤᠲᠠᠭᠤ ᠪᠠᠢᠯᠠ᠃《ᠡᠨᠡ ᠶ᠋ᠢ ᠪᠡᠨ ᠳᠠᠭᠤᠰᠬᠠᠵᠤ ᠴᠢᠳᠠᠳᠠᠭ ᠦᠭᠡᠢ ᠮᠢᠨᠢ ᠯᠡ ᠬᠠᠢᠷᠠᠨ ᠪᠣᠯᠤᠯᠠ》 ᠭᠡᠵᠦ ᠰᠠᠩᠵᠢ ᠬᠠᠷᠠᠮᠰᠠᠨ ᠪᠣᠳᠣᠯᠠ᠃
ᠰᠦᠮᠡ ᠳᠤ ᠪᠦᠬᠦ ᠯᠠᠮᠠ ᠨᠠᠷ ᠲᠣᠯᠣᠭᠠᠢ ᠳᠠᠷᠠᠭᠠᠯᠠᠨ ᠴᠤᠭᠯᠠᠷᠠᠵᠠᠢ᠃ ᠰᠠᠩᠵᠢ ᠶ᠋ᠢᠨ ᠵᠦᠭ ᠬᠥᠮᠦᠨ ᠪᠦᠷᠢ ᠯᠡ ᠦᠵᠡᠭᠡ ᠦᠭᠡᠢ ᠶᠠᠭᠤᠮᠠ ᠪᠠᠨ ᠦᠵᠡᠭᠰᠡᠨ ᠮᠡᠲᠦ ᠬᠠᠷᠠᠴᠠ ᠪᠠᠷ ᠰᠢᠷᠳᠡᠵᠡᠭᠡᠵᠦ ᠪᠠᠢᠯᠠ᠃ ᠬᠣᠢᠮᠣᠷ ᠪᠠᠢᠬᠤ ᠰᠢᠲᠦᠭᠡᠨ ᠲᠡᠢ ᠵᠠᠩᠬᠠᠨ ᠥᠭᠡᠳᠡ ᠬᠠᠷᠠᠭᠤᠯᠵᠤ ᠰᠦᠮᠡ ᠶ᠋ᠢᠨ ᠭᠣᠣᠯ ᠳᠤ ᠰᠠᠩᠵᠢ ᠶ᠋ᠢ ᠵᠣᠭᠰᠣᠭᠠᠯᠠ᠃ ᠲᠦᠳᠡᠬᠡᠨ《ᠪᠢᠯᠢᠭ ᠦ᠋ᠨ ᠵᠢᠷᠦᠬᠡ》 ᠭᠡᠳᠡᠭ ᠤᠩᠰᠢᠯᠭᠠ ᠶᠢ ᠯᠠᠮᠠ ᠨᠠᠷ ᠥᠨᠳᠥᠷ ᠳᠠᠭᠤ ᠪᠠᠷ ᠤᠩᠰᠢᠵᠤ ᠡᠬᠢᠯᠡᠯᠡ᠃ ᠪᠣᠭᠣᠨᠢᠬᠠᠨ ᠤᠩᠰᠢᠯᠭᠠ ᠲᠤᠯᠠ ᠤᠳᠠᠬᠤ ᠦᠭᠡᠢ ᠳᠠᠭᠤᠰᠤᠯᠠ᠃ ᠰᠢᠷᠡᠭᠡᠲᠦ ᠡᠴᠡ ᠡᠬᠢᠯᠡᠭᠡᠳ ᠲᠣᠮᠣ ᠯᠠᠮᠠ ᠨᠠᠷ ᠪᠠᠷᠠᠭᠤᠨ ᠭᠠᠷ ᠢᠶᠠᠷ ᠵᠡᠭᠦᠨ ᠢᠶᠠᠨ ᠲᠠᠰᠢᠯᠠ᠃ 《ᠣᠷᠣᠨ ᠭᠠᠵᠠᠷ ᠪᠦᠷᠢ ᠶ᠋ᠢᠨ ᠬᠡᠷᠡᠭ ᠦᠭᠡᠢ ᠪᠦᠬᠦᠨ ᠢ᠋ ᠲᠣᠨᠢᠯᠭᠠ!》 ᠭᠡᠰᠡᠨ ᠳᠣᠬᠢᠶᠠ ᠭᠡᠳᠡᠭ ᠢ᠋ ᠰᠠᠩᠵᠢ ᠮᠡᠳᠡᠵᠦ ᠪᠠᠢᠪᠠ᠃ ᠳᠠᠷᠠᠭᠠ ᠨᠢ ᠵᠡᠭᠦᠨ ᠭᠠᠷ ᠢᠶᠠᠷ ᠪᠠᠷᠠᠭᠤᠨ ᠢ᠋ ᠲᠠᠰᠢᠵᠠᠭᠠᠪᠠ᠃ 《ᠲᠦᠢᠳᠬᠡᠷ ᠢ ᠪᠦᠷᠢᠮᠦᠰᠦᠨ ᠨᠣᠮᠣᠬᠠᠳᠬᠠᠨ ᠲᠣᠨᠢᠯᠭᠠ!》ᠭᠡᠰᠡᠨ ᠤᠳᠬᠠ ᠲᠠᠢ ᠶᠤᠮ᠃ ᠮᠠᠭᠤ ᠢᠷᠣᠠ ᠶᠢᠨ ᠣᠭᠣᠯᠢ ᠰᠢᠪᠠᠭᠤᠨ ᠤ᠋ ᠳᠠᠭᠤ ᠶᠢ ᠳᠠᠭᠤᠷᠢᠶᠠᠯᠭᠠᠨ ᠪᠦᠷᠢᠶᠡ᠂ ᠲᠣᠡᠭ᠌ᠷᠠᠭᠠ ᠦᠯᠢᠶᠡᠯᠡ᠃ ᠲᠡᠭᠡᠮᠡᠭᠴᠡ ᠳᠡᠮᠪᠡᠷᠡᠯ ᠭᠡᠰᠬᠦᠢ ᠤᠷᠤᠭᠰᠢ ᠭᠠᠷᠴᠤ ᠨᠢᠭᠡ ᠭᠠᠷ ᠲᠦ᠍ ᠪᠡᠨ ᠰᠠᠩ ᠲᠠᠢ ᠪᠣᠢᠫᠣᠷ᠂ ᠨᠥᠭᠦᠭᠡ ᠳᠦ ᠪᠡᠨ ᠬᠦᠷᠡᠩ ᠽᠠᠨᠳᠠᠨ ᠪᠠᠷᠢᠶᠠ ᠪᠠᠷᠢᠵᠤ ᠬᠦᠷᠴᠦ ᠢᠷᠡᠯᠡ᠃ ᠪᠠᠷᠢᠶᠠ ᠪᠡᠷ ᠢᠶᠡᠨ ᠰᠠᠩᠵᠢ ᠶᠢᠨ ᠪᠠᠷᠠᠭᠤᠨ ᠮᠥᠷᠥ ᠤᠷᠤᠭᠤ ᠲᠦᠯᠬᠢᠨ ᠲᠡᠭᠦᠨ ᠦ᠌ ᠪᠡᠶᠡ ᠶ᠋ᠢ ᠨᠠᠷᠠ ᠪᠤᠷᠤᠭᠤ ᠡᠷᠭᠢᠭᠦᠯᠪᠡ᠃ ᠡᠷᠭᠢᠮᠡᠭᠴᠡ ᠠᠷᠤ ᠳᠠᠯᠤ ᠤᠷᠤᠭᠤ ᠨᠢ ᠪᠠᠷᠢᠶᠠ ᠪᠡᠷ ᠢᠶᠠᠨ ᠬᠠᠳᠬᠤᠨ ᠡᠭᠦᠳᠡ ᠤᠷᠤᠭᠤ ᠲᠦᠷᠢᠨ ᠬᠥᠭᠡᠭᠡᠯᠡ᠃ ᠰᠠᠩᠵᠢ ᠬᠣᠷᠭᠣᠳᠠᠭᠰᠠᠨ ᠴᠦ᠍ ᠦᠭᠡᠢ᠂ ᠰᠢᠭᠤᠳ ᠯᠠ ᠡᠭᠦᠳᠡ ᠴᠢᠭᠯᠡᠨ ᠶᠠᠪᠤᠯᠠ᠃ ᠰᠠᠩᠵᠢ ᠶᠢᠨ ᠭᠢᠰᠬᠢᠭᠰᠡᠨ ᠠᠯᠬᠤᠮ ᠳᠣᠳᠣᠮ ᠳᠦ ᠭᠡᠰᠬᠦᠢ ᠯᠠᠮᠠ ᠰᠠᠩ ᠤᠨ ᠪᠣᠢᠫᠣᠷ ᠲᠠᠢ ᠤᠲᠤᠭᠠ ᠪᠠᠷ ᠲᠡᠷᠡ ᠭᠠᠵᠠᠷ ᠢ᠋ ᠨᠢ ᠠᠷᠢᠭᠤᠳᠬᠠᠬᠤ ᠳᠦᠷᠢ ᠦᠵᠡᠭᠦᠯᠦᠭᠰᠡᠭᠡᠷ ᠶᠠᠪᠤᠭᠠᠳ ᠰᠦᠮᠡ ᠶ᠋ᠢᠨ ᠡᠭᠦᠳᠡᠨ ᠳ᠋ᠦ᠍ ᠬᠦᠷᠦᠯᠡ᠃ ᠡᠭᠦᠳᠡ ᠪᠡᠷ ᠳᠥᠩᠭᠡᠵᠢ ᠭᠠᠳᠠᠭᠰᠢ ᠠᠯᠬᠤᠬᠤ ᠳᠦ ᠴᠠᠭᠠᠨᠠ ᠡᠴᠡ ᠨᠢ ᠬᠡᠨ ᠨᠢᠭᠡ ᠬᠥᠮᠦᠨ (ᠰᠦᠭ ᠦ᠋ᠨ ᠬᠤᠪᠴᠠᠰᠤ ᠲᠠᠢ ᠮᠡᠲᠦ ᠬᠠᠷᠠᠭᠳᠠᠵᠠᠢ) ᠰᠠᠩᠵᠢ ᠶ᠋ᠢᠨ ᠨᠢᠳᠦ ᠤᠷᠤᠭᠤ ᠨᠤᠨᠲᠠᠭ ᠰᠢᠷᠠ ᠨᠣᠭᠣᠭᠠᠨ ᠶᠠᠭᠤᠮᠠ ᠴᠠᠴᠤᠪᠠ᠃ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠶᠠᠪᠤᠭᠰᠠᠨ ᠲᠤᠯᠠ ᠲᠩᠷᠢ ᠶᠢᠨ ᠳᠦᠯᠡᠢ ᠶ᠋ᠢᠨ ᠨᠤᠨᠲᠠᠭ ᠰᠢᠭ᠋ ᠲᠡᠷᠡ ᠵᠦᠢᠯ ᠰᠠᠩᠵᠢ ᠶᠢᠨ ᠬᠣᠶᠠᠷ ᠨᠢᠳᠦ ᠤᠷᠤᠭᠤ ᠪᠥᠭᠡᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠫᠦᠷᠬᠢᠨ ᠣᠷᠣᠵᠤ ᠪᠠᠢᠵᠤ ᠶᠠᠳᠠᠮᠠᠷ ᠬᠣᠷᠣᠰᠤᠭᠤᠯᠤᠨ ᠨᠢᠯᠪᠤᠰᠤ ᠨᠢ ᠴᠤᠪᠤᠷᠠᠨ ᠶᠠᠭᠤ ᠴᠦ᠍ ᠬᠠᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠪᠠ᠃ ᠰᠠᠩᠵᠢ ᠨᠢᠳᠦ ᠲᠠᠢ ᠪᠠᠨ ᠨᠣᠴᠣᠯᠳᠤᠨ ᠪᠥᠬᠥᠶᠢᠲᠡᠯᠡ ᠬᠣᠶᠠᠷ ᠬᠠᠵᠠᠭᠤ ᠡᠴᠡ ᠨᠢ ᠪᠠᠬᠢᠮ ᠬᠦᠴᠦᠲᠡᠢ ᠬᠥᠮᠦᠰ ᠪᠠᠷᠢᠨ ᠠᠪᠴᠤ ᠭᠠᠷ ᠢ ᠨᠢ ᠠᠷᠤ ᠳᠦ ᠨᠢ ᠬᠦᠯᠢᠯᠡ᠃
- ᠵᠠ ᠲᠠ ᠬᠣᠶᠠᠷ ᠨᠠᠭᠠᠳᠤ ᠲᠠᠩᠭᠠᠷᠢᠭ ᠪᠠᠭᠤᠷᠠᠭᠴᠢ ᠶ᠋ᠢ ᠪᠠᠨ ᠮᠣᠷᠢᠨ ᠳ᠋ᠤ᠌ ᠰᠠᠭᠤᠯᠭᠠᠭᠠᠳ ᠣᠢᠴᠢᠬᠤ ᠦᠭᠡᠢ ᠪᠡᠷ ᠰᠠᠢᠨ ᠪᠥᠬᠡᠯᠡᠭᠡᠳ ᠴᠤᠯᠪᠤᠭᠤᠷ ᠡᠴᠡ ᠨᠢ ᠬᠥᠲᠥᠯᠦᠭᠡᠳ ᠠᠪᠴᠤ ᠣᠳ᠃ ᠨᠥᠭᠥᠭᠡᠬᠢ ᠵᠢᠭᠠᠭᠰᠠᠨ ᠭᠠᠵᠠᠷ ᠬᠦᠷᠭᠡᠭᠡᠳ ᠡᠷᠭᠢᠵᠦ ᠢᠷᠡ! ᠭᠡᠵᠦ ᠰᠢᠷᠡᠭᠡᠲᠦ ᠯᠠᠮᠠ ᠶ᠋ᠢᠨ ᠬᠡᠯᠡᠬᠦ ᠶ᠋ᠢ ᠰᠠᠩᠵᠢ ᠰᠣᠨᠣᠰᠤᠯᠠ᠃ ᠨᠢᠳᠦ ᠨᠢ ᠬᠣᠷᠣᠰᠴᠤ ᠨᠢᠯᠪᠤᠰᠤ ᠠᠰᠬᠠᠷᠠᠭᠤᠯᠤᠨ ᠶᠠᠭᠤ ᠴᠦ᠍ ᠬᠠᠷᠠᠬᠤ ᠦᠭᠡᠢ ᠪᠠᠢᠯᠠ᠃ ᠨᠢᠳᠦ ᠶᠢ ᠨᠢ ᠬᠠᠷᠠᠭᠠ ᠦᠭᠡᠢ ᠪᠣᠯᠭᠠᠬᠤ ᠪᠣᠳᠠᠰ ᠴᠠᠴᠤᠵᠠᠢ ᠭᠡᠳᠡᠭ ᠢ᠋ ᠰᠠᠩᠵᠢ ᠮᠡᠳᠡᠯᠡ᠃ ᠨᠢᠳᠦᠨ ᠳ᠋ᠦ᠍ ᠣᠷᠣᠭᠰᠠᠨ ᠶᠠᠭᠤᠮᠠ ᠶᠢ ᠬᠤᠷᠤᠭᠤ ᠪᠠᠷ ᠰᠢᠯᠦᠰᠦᠳᠡᠨ ᠠᠷᠴᠢᠵᠤ ᠠᠷᠢᠯᠭᠠᠬᠤ ᠶᠢ ᠬᠦᠰᠡᠪᠡ᠃ ᠭᠡᠪᠡᠴᠦ ᠭᠠᠷ ᠬᠦᠯᠢᠶᠡ ᠲᠡᠢ ᠰᠤᠭᠤᠨ ᠠ᠋ᠴᠠ ᠨᠢ ᠬᠥᠮᠦᠰ ᠡᠷᠭᠦᠵᠦ ᠮᠣᠷᠢᠨ ᠳ᠋ᠤ᠌ ᠮᠣᠷᠳᠠᠭᠤᠯᠤᠭᠠᠳ ᠬᠥᠯ ᠢ᠋ ᠨᠢ ᠮᠣᠷᠢᠨ ᠤ᠋ ᠭᠡᠳᠡᠰᠦᠨ ᠳᠣᠣᠭᠤᠷ ᠬᠣᠯᠪᠣᠨ ᠬᠦᠯᠢᠵᠡᠢ᠃ ᠬᠣᠶᠠᠷ ᠭᠤᠶᠠ ᠶᠢ ᠡᠮᠡᠭᠡᠯ ᠤᠨ ᠪᠦᠭᠦᠷᠭᠡ ᠳᠡᠭᠡᠭᠦᠷ ᠲᠠᠲᠠᠭᠰᠠᠨ ᠣᠯᠣᠰᠣ ᠪᠠᠷ ᠮᠥᠨ ᠳᠠᠷᠤᠭᠤᠯᠤᠨ ᠪᠣᠭᠣᠯᠠ᠃ ᠰᠠᠩᠵᠢ ᠶᠢᠨ ᠨᠢᠳᠦ ᠬᠠᠷᠠᠩᠭᠤᠶᠢᠯᠠᠭᠰᠠᠨ ᠬᠡᠪ ᠢᠶᠠᠷ ᠶᠠᠭᠤ ᠴᠦ᠍ ᠦᠵᠡᠬᠦ ᠦᠭᠡᠢ ᠪᠠᠢᠯᠠ᠃
ᠭᠡᠨᠡᠳᠲᠡ ᠯᠠᠮᠠ ᠨᠠᠷ ᠠᠯᠠᠭᠠ ᠲᠠᠰᠢᠵᠠᠭᠠᠵᠤ᠂ ᠬᠧᠺ ᠬᠧᠺ ᠬᠤᠮᠠ᠂ ᠬᠤᠮᠠ᠂ ᠬᠤᠮᠠ! ᠭᠡᠵᠦ ᠬᠠᠰᠬᠢᠷᠤᠯᠳᠤᠬᠤ ᠰᠣᠨᠣᠰᠳᠠᠪᠠ᠃ ᠲᠡᠭᠦᠨ ᠲᠡᠢ ᠵᠡᠷᠭᠡ ᠮᠣᠷᠢ ᠨᠢ ᠤᠬᠤᠰᠬᠢᠨ ᠤᠷᠤᠭᠰᠢ ᠪᠠᠨ ᠳᠠᠪᠬᠢᠯᠠ᠃ ᠬᠠᠮᠢᠭᠠᠰᠢ ᠪᠠᠨ ᠵᠦᠭᠯᠡᠭᠰᠡᠨ ᠢ᠋ ᠪᠠᠷᠢᠮᠵᠢᠶᠠᠯᠠᠭᠰᠠᠨ ᠦᠭᠡᠢ᠃
- ᠲᠠ ᠨᠠᠷ ᠨᠠᠮᠠᠢᠢ ᠬᠠᠮᠢᠭᠠᠰᠢ ᠨᠢ ᠠᠪᠠᠴᠢᠬᠤ ᠨᠢ ᠪᠣᠢ? ᠭᠡᠵᠦ ᠰᠠᠩᠵᠢ ᠬᠠᠰᠬᠢᠷᠤᠭᠰᠠᠨ ᠴᠢᠨᠢ᠂
- ᠴᠥᠯᠡ ᠭᠡᠰᠡᠨ ᠭᠠᠵᠠᠷ ᠨᠢ ᠴᠥᠯᠡᠬᠦ ᠪᠡᠷ ᠶᠠᠪᠤᠯᠠ! ᠭᠡᠵᠦ ᠬᠠᠷᠢᠭᠤ ᠦᠭᠭᠦᠯᠡ᠃
ᠮᠣᠷᠢᠨ ᠳᠠᠪᠬᠢᠭᠠ ᠪᠠᠷ ᠲᠡᠳᠡ ᠦᠯᠦ ᠮᠡᠳᠡᠬᠦ ᠵᠦᠭ ᠲᠦ᠍ ᠣᠳᠤᠯᠠ᠃ ᠰᠠᠩᠵᠢ ᠶᠢᠨ ᠨᠢᠳᠦ ᠬᠠᠷᠠ ᠣᠷᠣᠬᠤ ᠦᠭᠡᠢ ᠪᠠᠢᠯᠠ᠃ ᠲᠡᠭᠡᠬᠦ ᠪᠡᠷ ᠨᠢ᠂
- ᠤᠰᠤ ᠳᠠᠭᠠᠷᠢᠯᠳᠤᠪᠠᠯ ᠨᠠᠳᠠ ᠨᠢᠭᠡ ᠪᠠᠯᠭᠤ ᠤᠰᠤ ᠦᠭᠭᠦᠭᠡᠲᠡᠭᠡᠭᠡᠴᠢ! ᠪᠢ ᠨᠢᠳᠦ ᠪᠡᠨ ᠤᠬᠢᠶᠠᠮᠠᠷ ᠪᠠᠢᠨᠠ ᠭᠡᠪᠡ᠃
- ᠲᠡᠢᠮᠦ ᠵᠢᠭᠠᠪᠤᠷᠢ ᠪᠠᠢᠬᠤ ᠦᠭᠡᠢ ᠠ᠋! ᠭᠡᠵᠦ ᠰᠥᠭᠡᠩᠭᠢ ᠪᠦᠳᠦᠭᠦᠨ ᠳᠠᠭᠤ ᠲᠠᠢ ᠬᠥᠮᠦᠨ ᠬᠠᠷᠢᠭᠤᠯᠤᠯᠠ᠃
- ᠨᠡᠯᠢᠶᠡᠳ ᠶᠠᠪᠤᠭᠠᠳ ᠪᠠᠢᠲᠠᠯᠠ ᠬᠡᠨ ᠨᠢᠭᠡ ᠬᠥᠮᠦᠨ ᠮᠣᠷᠢᠨ ᠤ᠋ ᠬᠠᠷᠠ ᠬᠤᠷᠳᠤ ᠪᠠᠷ ᠳᠠᠪᠬᠢᠨ ᠢᠷᠡᠬᠦ ᠰᠢᠭ ᠰᠣᠨᠣᠰᠤᠭᠳᠠᠬᠤ ᠳᠦ ᠨᠢ ᠰᠠᠩᠵᠢ ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠪᠠᠯ᠂
- ᠰᠠᠩᠵᠢ ᠠᠬᠠ ᠠ᠋᠂ ᠲᠠᠨ ᠢ᠋ ᠬᠠᠮᠢᠭᠠᠰᠢ ᠨᠢ ᠠᠪᠴᠤ ᠶᠠᠪᠤᠭᠠ ᠶᠤᠮ ᠪᠣᠢ? ᠪᠢ ᠲᠠᠨ ᠳ᠋ᠤ᠌ ᠬᠡᠯᠡ ᠳᠣᠭᠣᠯᠭᠠᠬᠤ ᠪᠠᠷ ᠢᠷᠡᠯᠡ! ᠭᠡᠬᠦ ᠰᠣᠨᠣᠰᠤᠭᠳᠠᠪᠠ᠃ ᠳᠠᠭᠤᠨ ᠤ᠋ ᠨᠢ ᠥᠩᠭᠡ ᠪᠡᠷ ᠳᠠᠭᠠᠪᠠᠯ ᠴᠣᠢᠮᠴᠣᠭ ᠪᠠᠭᠰᠢᠲᠠᠨ ᠤ᠋ ᠨᠥᠭᠥᠭᠡᠬᠢ ᠬᠦᠦ ᠶᠢᠨ ᠳᠠᠭᠤ ᠪᠠᠢᠪᠠ᠃
- ᠶᠠᠭᠤ ᠬᠡ ᠪᠣᠢ᠂ ᠳᠡᠭᠦᠦ ᠮᠢᠨᠢ! ᠭᠡᠵᠦ ᠰᠠᠩᠵᠢ ᠠᠰᠠᠭᠤᠯᠠ᠃
- ᠲᠤᠩ ᠪᠠᠵᠠᠭᠠᠬᠤ ᠦᠭᠡᠢ ᠮᠠᠭᠤ ᠶᠠᠭᠤᠮᠠ ᠪᠣᠯᠤᠯᠠ᠂ ᠠᠬᠠ ᠮᠢᠨᠢ᠃ ᠲᠠᠨ ᠢ ᠡᠷᠭᠢᠬᠦ ᠪᠡᠷ ᠬᠦᠷᠢᠶᠡ ᠣᠷᠣᠬᠤ ᠭᠡᠵᠦ ᠶᠠᠪᠤᠲᠠᠯᠠ ᠨᠢ ᠮᠣᠷᠢ ᠨᠢ ᠦᠷᠭᠦᠵᠦ ᠤᠳᠬᠤᠨ ᠡᠭᠡᠴᠢ ᠮᠣᠷᠢ ᠠ᠋ᠴᠠ ᠪᠠᠨ ᠣᠢᠴᠢᠵᠤ ᠴᠢᠷᠦᠭᠳᠡᠭᠡᠳ ᠨᠠᠰᠤ ᠪᠠᠷᠠᠴᠢᠬᠠᠯᠠ! ᠭᠡᠵᠦ ᠲᠡᠷᠡ ᠵᠠᠯᠠᠭᠤ ᠬᠡᠯᠡᠬᠦ ᠰᠣᠨᠣᠰᠳᠠᠪᠠ᠃
- ᠶᠠᠭᠤ ᠭᠡᠨᠡ ᠠ᠋! ᠶᠠᠭᠤ ᠭᠡᠨᠡ ᠠ᠋! ᠭᠡᠵᠦ ᠰᠠᠩᠵᠢ ᠤᠬᠠᠭᠠᠨ ᠭᠠᠷᠲᠠᠯᠠ ᠠᠶᠤᠵᠤ᠂ ᠤᠴᠢᠷ ᠵᠦᠭ ᠦᠭᠡᠢ ᠬᠠᠰᠬᠢᠷᠤᠨ ᠠᠰᠠᠭᠤᠪᠠ᠃ ᠴᠢᠷᠠᠢ ᠨᠢ ᠫᠠᠳ ᠬᠠᠷᠠ ᠪᠣᠯᠵᠠᠢ᠃
- ᠤᠳᠬᠤᠨ ᠡᠭᠡᠴᠢ ᠲᠠᠨ ᠢ᠋ ᠡᠷᠭᠢᠬᠦ ᠭᠡᠵᠦ ᠬᠦᠷᠢᠶᠡ ᠤᠷᠤᠭᠤ ᠶᠠᠪᠤᠵᠤ ᠪᠠᠢᠭᠠᠳ ᠮᠣᠷᠢ ᠨᠢ ᠲᠤᠢᠯᠠᠵᠤ ᠪᠣᠰᠬᠠᠭᠠᠳ ᠨᠠᠰᠤ ᠪᠠᠷᠠᠴᠢᠬᠠᠵᠠᠢ᠃ ᠬᠡᠦᠬᠡᠳ ᠨᠢ ᠳᠤᠲᠠᠭᠤ ᠭᠠᠷᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠪᠠᠢᠨᠠ ᠭᠡᠵᠦ ᠨᠥᠭᠦᠭᠡ ᠵᠠᠯᠠᠭᠤ ᠯᠠᠪᠯᠠᠨ ᠬᠡᠯᠡᠪᠡ᠃
- ᠠᠢ ᠬᠠᠯᠠᠭ ᠮᠢᠨᠢ! ᠠᠢ ᠬᠠᠯᠠᠭ ᠮᠢᠨᠢ! ᠭᠡᠵᠦ ᠰᠠᠩᠵᠢ ᠪᠣᠭᠣᠵᠤ ᠦᠬᠦᠬᠦ ᠮᠡᠲᠦ ᠳᠠᠪᠴᠢᠳᠠᠨ ᠬᠠᠰᠬᠢᠷᠤᠭᠠᠳ ᠬᠣᠶᠠᠷ ᠭᠠᠷ ᠢᠶᠠᠨ ᠬᠦᠯᠢᠭ ᠡᠴᠡ ᠰᠠᠯᠭᠠᠬᠤ ᠭᠡᠵᠦ ᠲᠡᠯᠴᠢᠯᠡᠪᠡ᠃ ᠳᠠᠭᠠᠭᠤᠯᠢ ᠨᠤᠭᠤᠳ ᠲᠡᠭᠦᠨ ᠦ᠌ ᠬᠣᠶᠠᠷ ᠲᠠᠯᠠ ᠳᠦ ᠣᠢᠷᠠᠳᠴᠤ ᠢᠷᠡᠵᠦ ᠲᠤᠯᠤᠨ ᠶᠠᠪᠤᠵᠠᠭᠠᠪᠠ᠃ ᠰᠠᠩᠵᠢ ᠤᠷᠢ ᠳᠠᠭᠤ ᠲᠠᠯᠪᠢᠵᠤ᠂ ᠶᠠᠩᠭᠢᠨᠠᠨ ᠤᠬᠢᠯᠠᠯᠠ᠃ ᠲᠡᠢᠨ ᠬᠦ᠌ ᠠᠮᠢᠳᠤ᠂ ᠦᠬᠦᠭᠰᠡᠨ ᠦ᠌ ᠬᠣᠭᠣᠷᠣᠨᠳᠣ ᠡᠬᠡᠷ ᠲᠠᠲᠠᠵᠤ ᠬᠡᠰᠡᠭ ᠵᠠᠭᠤᠷᠠ ᠪᠠᠭᠲᠠᠷᠠᠵᠤ ᠶᠠᠪᠤᠯᠠ᠃ ᠲᠡᠭᠡᠭᠡᠳ ᠪᠠᠭᠠᠬᠠᠨ ᠰᠡᠭᠡᠭᠡ ᠣᠷᠣᠵᠤ᠂
- ᠮᠢᠨᠦ ᠳᠡᠭᠦᠦ ᠣᠳᠬᠣᠨ ᠡᠭᠡᠴᠢ ᠶ᠋ᠢ ᠪᠡᠨ ᠰᠢᠷᠠ ᠳᠡᠪᠰᠡᠭ ᠲᠤ ᠣᠷᠣᠰᠢᠭᠤᠯᠤᠭᠠᠷᠠᠢ! ᠭᠡᠵᠦ ᠭᠤᠶᠤᠯᠠ᠃ ᠲᠡᠭᠦᠨ ᠳ᠋ᠦ᠍ ᠥᠭᠡᠷᠡ ᠶᠠᠭᠤ ᠴᠦ᠍ ᠪᠣᠳᠣᠭᠳᠠᠭᠰᠠᠨ ᠦᠭᠡᠢ᠃
- ᠲᠡᠭᠡᠶᠡ᠂ ᠠᠬᠠ ᠮᠢᠨᠢ! ᠭᠡᠵᠦ ᠲᠡᠷᠡ ᠵᠠᠯᠠᠭᠤ ᠬᠣᠭᠣᠯᠠᠢ ᠴᠡᠴᠡᠷᠡᠭᠰᠡᠨ ᠳᠠᠭᠤ ᠪᠠᠷ ᠬᠠᠷᠢᠭᠤᠯᠤᠭᠠᠳ ᠲᠡᠳᠡᠨ ᠡᠴᠡ ᠠᠷᠭᠠ ᠪᠤᠶᠤ ᠬᠣᠴᠣᠷᠤᠨ ᠦᠯᠡᠳᠡᠬᠦ ᠰᠢᠭ ᠪᠣᠯᠤᠯᠠ᠃
《ᠤᠳᠬᠤᠨ ᠮᠢᠨᠢ ᠳᠡ᠂ ᠬᠥᠭᠡᠷᠦᠬᠦᠢ ᠮᠢᠨᠢ! ᠴᠢ ᠪᠡᠶᠡ ᠪᠡᠨ ᠭᠠᠮᠨᠠᠨ ᠬᠠᠢᠷᠠᠯᠠᠵᠤ ᠪᠠᠢᠬᠤ ᠦᠭᠡᠢ ᠶᠠᠭᠤ ᠭᠡᠵᠦ ᠨᠢᠭᠦᠯᠲᠦ ᠲᠣᠯᠣᠭᠠᠢ ᠨᠠᠳᠠ ᠤᠷᠤᠭᠤ ᠶᠠᠪᠤᠭᠰᠠᠨ ᠶᠤᠮ ᠪᠣᠢ᠂ ᠴᠠᠪᠠᠰᠤ ᠮᠢᠨᠢ᠃ ᠶᠠᠳᠠᠵᠤ ᠦᠷᠡ ᠪᠡᠨ ᠠᠪᠤᠷᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠳᠡ᠂ ᠴᠠᠪᠠᠰᠤ!》 ᠭᠡᠵᠦ ᠰᠠᠩᠵᠢ ᠣᠢ ᠭᠠᠰᠢᠭᠤᠨ ᠳ᠋ᠤ᠌ ᠪᠠᠨ ᠪᠠᠭᠲᠠᠷᠠᠨ᠂ ᠠᠮᠠᠨ ᠳᠣᠲᠣᠷᠠ ᠪᠠᠨ ᠦᠭᠡᠯᠡᠵᠦ ᠶᠠᠪᠤᠯᠠ᠃ ᠨᠢᠳᠦ ᠨᠢ ᠬᠠᠷᠠᠭᠠ ᠣᠷᠣᠬᠤ ᠦᠭᠡᠢ ᠪᠠᠢᠯᠠ᠃
ᠰᠡᠳᠬᠢᠯ ᠦ᠋ᠨ ᠲᠦᠮᠡᠨ ᠵᠣᠪᠠᠯᠠᠩ ᠳ᠋ᠤ᠌ ᠣᠷᠣᠭᠰᠠᠨ ᠰᠠᠩᠵᠢ ᠶ᠋ᠢ ᠲᠡᠷᠲᠡᠭᠡ ᠬᠣᠯᠠ ᠭᠠᠵᠠᠷ᠂ ᠡᠵᠡᠭᠦᠢ ᠵᠡᠯᠢᠭᠦᠳ ᠭᠣᠪᠢ ᠳ᠋ᠤ᠌ ᠠᠪᠠᠴᠢᠵᠤ ᠴᠦᠯᠢᠬᠦ ᠪᠡᠷ ᠲᠡᠢᠨ ᠬᠦ᠌ ᠠᠪᠴᠤ ᠶᠠᠪᠤᠭᠠ ᠶ᠋ᠢ ᠴᠦ᠍ ᠲᠡᠷᠡ ᠥᠪᠡᠷ ᠢᠶᠠᠨ ᠮᠡᠳᠡᠪᠡᠴᠦ ᠴᠣᠬᠣᠮ ᠬᠠᠮᠢᠭᠠ ᠬᠦᠷᠭᠡᠬᠦ ᠶ᠋ᠢ ᠲᠥᠰᠦᠭᠡᠯᠡᠬᠦ ᠦᠭᠡᠢ ᠪᠠᠢᠯᠠ᠃
ᠬᠣᠷᠸᠠ ᠳᠡᠯᠡᠬᠡᠢ ᠣᠳᠣ ᠲᠡᠭᠦᠨ ᠳ᠋ᠦ᠍ ᠳᠡᠰ ᠬᠠᠷᠠᠩᠭᠤᠢ ᠭᠦᠨ ᠬᠠᠷᠠ ᠨᠦᠬᠡ ᠰᠢᠭ ᠪᠣᠯᠵᠠᠢ᠃
ᠬᠢᠨᠠᠭᠴᠢ᠄ ᠲᠦᠮᠡᠨᠴᠡᠴᠡᠭ