ᠨᠠᠷᠠᠰᠤНарс
319
ᠨᠠᠷᠠᠰᠤ ( ᠬᠠᠷᠠ ᠨᠠᠷᠠᠰᠤ)
ᠨᠠᠷᠠᠰᠤ ᠶ᠋ᠢᠨ ᠢᠵᠠᠭᠤᠷ
ᠮᠥᠩᠬᠡ ᠨᠣᠭᠣᠭᠠᠨ ᠲᠤᠷᠤᠭ ᠮᠣᠳᠣ᠂ 10—25m ᠥᠨᠳᠥᠷ᠃ ᠤᠤᠯ ᠵᠢᠯ ᠦ᠋ᠨ ᠮᠥᠴᠢᠷ ᠨᠢ ᠭᠦᠢᠬᠡᠨ ᠤᠯᠠᠭᠠᠨ ᠬᠦᠷᠡᠩ ᠪᠤᠶᠤ ᠴᠠᠢᠪᠤᠷ ᠰᠢᠷᠠ᠂ ᠦᠰᠦ ᠦᠭᠡᠢ᠃ ᠡᠪᠦᠯ ᠦ᠋ᠨ ᠨᠠᠬᠢᠶᠠ ᠨᠢ ᠤᠯᠠᠭᠠᠨ ᠬᠦᠷᠡᠩ᠃ ᠰᠢᠯᠮᠦᠦᠰᠦ ᠨᠢ ᠬᠣᠶᠠᠷ ᠢ᠋ᠶ᠋ᠠᠷ ᠨᠢᠭᠡ ᠪᠠᠭᠴᠠ ᠪᠤᠶᠤ ᠬᠠᠶᠠ ᠭᠤᠷᠪᠠ ᠭᠤᠷᠪᠠ ᠪᠠᠷ ᠨᠢᠭᠡ ᠪᠠᠭᠴᠠ ᠪᠣᠯᠵᠤ ᠤᠷᠭᠤᠨᠠ᠂ 8—15cm ᠤᠷᠲᠤ᠂ ᠬᠣᠶᠠᠷ ᠲᠠᠯᠠ ᠳ᠋ᠠᠭᠠᠨ ᠪᠦᠷ ᠬᠡᠢ ᠶ᠋ᠢᠨ ᠠᠮᠠᠰᠠᠷ ᠤ᠋ᠨ ᠴᠤᠪᠤᠭᠠ ᠲᠠᠢ ᠪᠥᠭᠡᠳ ᠬᠥᠪᠡᠭᠡ ᠳᠠᠭᠠᠤ ᠳ᠋ᠠᠭᠠᠨ ᠪᠠᠷᠤᠭ ᠠᠷᠪᠠᠨ ᠪᠣᠬᠢ ᠶ᠋ᠢᠨ ᠬᠣᠭᠣᠯᠠᠢ ᠲᠠᠢ᠃ ᠨᠠᠪᠴᠢᠨ ᠤ᠋ ᠲᠣᠭᠳᠣᠢ ᠨᠢ ᠥᠨᠢᠳᠡ ᠦᠯᠡᠳᠡᠨᠡ᠃ ᠴᠡᠴᠡᠭ ᠨᠢ ᠭᠠᠭᠴᠠ ᠪᠡᠯᠭᠡ ᠲᠡᠢ᠂ ᠨᠢᠭᠡ ᠭᠡᠷ ᠲᠡᠢ᠃ ᠡᠷᠡ ᠪᠠᠭ ᠴᠡᠴᠡᠭ ᠨᠢ ᠪᠥᠭᠡᠷᠡᠩᠬᠡᠢ ᠪᠠᠭᠠᠨᠠ ᠬᠡᠯᠪᠡᠷᠢ ᠲᠡᠢ ᠮᠥᠷᠲᠡᠭᠡᠨ ᠨᠢᠯᠬᠠ ᠮᠥᠴᠢᠷ ᠦ᠋ᠨ ᠤᠭ ᠲᠤ ᠪᠠᠭᠯᠠᠷᠠᠨ ᠤᠷᠭᠤᠨᠠ᠂ ᠤᠯᠠᠪᠤᠷ ᠰᠢᠷᠠ ᠪᠤᠶᠤ ᠭᠦᠢᠬᠡᠨ ᠰᠢᠷᠠ ᠬᠦᠷᠡᠩ᠃ ᠡᠮᠡ ᠪᠠᠭ ᠴᠡᠴᠡᠭ ᠨᠢ ᠪᠥᠮᠪᠥᠭᠡᠯᠢᠭ ᠪᠤᠶᠤ ᠥᠨᠳᠡᠭᠡᠯᠵᠢᠨ᠂ ᠰᠢᠨᠡᠬᠡᠨ ᠮᠥᠴᠢᠷ ᠦ᠋ᠨ ᠣᠷᠣᠢ ᠳ᠋ᠤ᠌ ᠭᠠᠭᠴᠠᠭᠠᠷ ᠪᠤᠶᠤ ᠬᠡᠳᠦ ᠬᠡᠳᠦ ᠪᠡᠷ ᠪᠠᠭᠯᠠᠷᠠᠨ ᠤᠷᠭᠤᠨᠠ᠃ ᠪᠣᠷᠭᠣᠴᠣᠭ ᠨᠢ ᠥᠨᠳᠡᠭᠡᠯᠵᠢᠨ ᠪᠥᠭᠡᠷᠡᠩᠬᠡᠢ᠂ 4—10cm ᠤᠷᠲᠤ᠂ ᠬᠠᠷᠠᠪᠲᠤᠷ ᠬᠦᠷᠡᠩ᠂ ᠮᠥᠩᠬᠡ ᠣᠷᠣᠰᠢᠨᠠ᠃ ᠦᠷᠡ ᠶ᠋ᠢᠨ ᠬᠠᠢᠷᠰᠤ ᠨᠢ ᠵᠢᠰᠢᠭᠦᠦ ᠳᠥᠷᠪᠡᠯᠵᠢᠨ ᠪᠤᠶᠤ ᠲᠡᠭᠰᠢ ᠪᠤᠰᠤ ᠲᠠᠪᠤᠨ ᠲᠠᠯᠠ ᠲᠠᠢ ᠪᠠ ᠲᠡᠭᠦᠨ ᠦ᠌ ᠬᠠᠢᠷᠰᠤᠨ ᠪᠠᠮᠪᠠᠢ ᠨᠢ ᠮᠢᠬᠠᠯᠢᠭ ᠵᠤᠵᠠᠭᠠᠨ ᠮᠥᠷᠲᠡᠭᠡᠨ ᠢᠯᠡᠬᠡᠨ ᠬᠥᠨᠳᠡᠯᠡᠨ ᠭᠦᠳᠦᠭᠦᠷ ᠲᠡᠢ᠃ ᠬᠠᠢᠷᠰᠤᠨ ᠤ᠋ ᠬᠦᠢᠰᠦ ᠨᠢ ᠳᠣᠪᠣᠢᠭᠰᠠᠨ ᠮᠥᠷᠲᠡᠭᠡᠨ ᠥᠷᠭᠡᠰᠦ ᠰᠢᠭ ᠦᠵᠦᠭᠦᠷ ᠲᠡᠢ᠃ ᠦᠷᠡ ᠨᠢ ᠥᠨᠳᠡᠭᠡᠯᠵᠢᠨ᠂ 6—8cm ᠤᠷᠲᠤ᠂ ᠬᠦᠷᠡᠩ ᠪᠣᠯᠪᠠᠴᠤ ᠠᠯᠠᠭ ᠠᠷ ᠲᠠᠢ᠃ ᠦᠷᠡ ᠶ᠋ᠢᠨ ᠳᠠᠯᠠᠪᠴᠢ ᠨᠢ ᠲᠠᠯᠠ ᠰᠠᠷᠠ ᠮᠡᠲᠦ᠂ 10—15mm ᠤᠷᠲᠤ ᠪᠥᠭᠡᠳ ᠪᠣᠷᠣ ᠬᠦᠷᠡᠩ ᠪᠤᠶᠤ ᠬᠦᠷᠡᠩ ᠥᠩᠭᠡᠲᠡᠢ ᠭᠠᠩ ᠬᠠᠭᠤᠷᠠᠢ ᠮᠥᠷᠲᠡᠭᠡᠨ ᠬᠠᠢᠷ ᠴᠢᠯᠠᠭᠤᠲᠤ ᠠᠭᠤᠯᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠢᠨ ᠤᠷᠭᠤᠨᠠ᠃
ᠬᠤᠵᠢᠷᠯᠢᠭ ᠬᠥᠷᠥᠰᠥᠨ ᠳ᠋ᠦ᠍ ᠬᠠᠮᠤᠭ ᠤ᠋ᠨ ᠮᠠᠭᠤ ᠶᠤᠮ᠃
ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠥᠪᠥᠷ ᠮᠣᠩᠭᠣᠯ᠂ ᠯᠢᠶᠣᠤᠨᠢᠩ᠂ ᠾᠧᠪᠧᠢ᠂ ᠾᠧᠨᠠᠨ᠂ ᠱᠠᠨᠳᠦ᠋ᠩ᠂ ᠱᠠᠨ ᠰᠢ᠂ ᠱᠠᠨᠰᠢ᠂ ᠭᠠᠨᠰᠦ᠂ ᠬᠥᠬᠡᠨᠠᠭᠤᠷ᠂ ᠰᠧᠴᠤᠸᠠᠨ ᠵᠡᠷᠭᠡ ᠮᠣᠵᠢ ᠣᠷᠣᠨ ᠳ᠋ᠤ᠌ ᠤᠷᠭᠤᠳᠠᠭ᠃
ᠮᠣᠳᠣ ᠶ᠋ᠢ ᠪᠠᠷᠢᠯᠭᠠ᠂ ᠴᠠᠬᠢᠯᠭᠠᠨ ᠤᠲᠠᠰᠤᠨ ᠤ᠋ ᠪᠠᠭᠠᠨᠠ᠂ ᠳᠡᠷᠡ ᠮᠣᠳᠣ ᠵᠡᠷᠭᠡ ᠳ᠋ᠦ᠍ ᠬᠡᠷᠡᠭᠯᠡᠨᠡ᠃ ᠴᠡᠴᠡᠭ ᠦ᠋ᠨ ᠲᠣᠭᠣᠰᠣ᠂ ᠳᠠᠪᠠᠷᠬᠠᠢ᠂ ᠨᠠᠷᠠᠰᠤᠨ ᠪᠣᠬᠢ ᠵᠡᠷᠭᠡ ᠨᠢ ᠳ᠋ᠦ᠍ ᠣᠷᠣᠨᠠ ᠃
ᠦᠷᠡ ᠳ᠋ᠦ᠍ᠨᠢ30—40% ᠤ᠋ ᠲᠣᠰᠣ ᠲᠠᠢ᠂ ᠰᠢᠬᠠᠵᠤ ᠠᠪᠤᠭᠠᠳ ᠢᠳᠡᠵᠦ ᠪᠣᠯᠤᠨᠠ᠃ ᠪᠠᠰᠠ ᠠᠵᠤ ᠦᠢᠯᠡᠳᠪᠦᠷᠢ ᠳ᠋ᠦ᠍ ᠠᠰᠢᠭᠯᠠᠨᠠ᠃
ᠬᠢᠲᠠᠳ ᠨᠡᠷᠡ᠄ 油松
ᠠᠩᠭ᠌ᠯᠢ ᠨᠡᠷᠡ᠄ Pinus tabuliformis Carr.
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠳ᠂ ᠡᠷᠬᠢᠮᠪᠠᠭᠠᠲᠤᠷ
ᠬᠢᠨᠠᠭᠴᠢ᠄ ᠴᠠᠭᠠᠨ ᠲᠤᠶᠠᠭᠠ