ᠰᠢᠨᠡ ᠳᠤᠮᠳᠠᠳᠤ ᠤᠯᠤᠰ ᠤᠨ ᠤᠷᠠᠨ ᠪᠢᠴᠢᠯᠭᠡᠳᠡᠳ - <ᠨᠢᠭᠡ>1949 ᠣᠨ ᠠᠴᠠ ᠡᠮᠦᠨᠡ ᠮᠡᠨᠳᠦᠯᠡᠭᠰᠡᠳ - ᠠᠳᠠᠯᠢᠪᠢᠱᠢ Шинэ дундад улсын уран бичлэгдэд – <1>1949 оноос өмнө мэндэлсэд – Адилбиш
703<ᠨᠢᠭᠡ> 1949 ᠣᠨ ᠠᠴᠠ ᠡᠮᠦᠨᠡ ᠮᠡᠨᠳᠦᠯᠡᠭᠰᠡᠨ ᠤᠷᠠᠨ ᠪᠢᠴᠢᠯᠭᠡᠲᠡᠳ
—— ᠠᠳᠠᠯᠢᠪᠢᠱᠢ Адилбиш
ᠨᠢᠭᠡ ᠠᠳᠠᠯᠢᠪᠢᠰᠢ ᠶ᠋ᠢᠨ ᠲᠣᠪᠴᠢ ᠨᠠᠮᠲᠠᠷ
ᠠᠳᠠᠯᠢᠪᠢᠰᠢ ( 1890᠊᠊᠊᠊᠊᠊᠊1958 ）ᠪᠣᠯ ᠬᠠᠪᠤᠲᠤ ᠬᠠᠰᠠᠷ ᠤ᠋ᠨ ᠭᠤᠴᠢᠨ ᠵᠢᠷᠭᠤᠳᠤᠭᠠᠷ ᠦᠶᠡ ᠪᠣᠯᠤᠨᠠ᠃ ᠠᠳᠠᠯᠢᠪᠢᠰᠢ ᠶ᠋ᠢᠨ ᠡᠪᠦᠭᠡ ᠳᠡᠭᠡᠳᠦᠰ ᠨᠢ ᠲᠡᠷᠡ ᠦᠶᠡ ᠶ᠋ᠢᠨ ᠵᠢᠷᠢᠮ ᠠᠢᠮᠠᠭ ᠤ᠋ᠨ ᠬᠣᠷᠴᠢᠨ ᠵᠡᠭᠦᠨ ᠭᠠᠷᠤᠨ ᠬᠣᠢᠲᠤ ᠬᠤᠰᠢᠭᠤᠨ ᠤ᠋ ᠠᠭᠠᠵᠣᠳ ᠨᠤᠲᠤᠭ ᠤ᠋ᠨ ᠲᠠᠢᠵᠢ ᠢᠵᠠᠭᠤᠷᠲᠠᠨ ᠪᠠᠢᠵᠠᠢ᠃
ᠠᠳᠠᠯᠢᠪᠢᠰᠢ ᠶ᠋ᠢᠨ ᠲᠥᠷᠥᠭᠰᠡᠨ ᠨᠤᠲᠤᠭ ᠪᠣᠯ ᠣᠳᠣ ᠶ᠋ᠢᠨ ᠲᠦᠩᠯᠢᠶᠣᠣ ᠬᠣᠲᠠ ᠶ᠋ᠢᠨ ᠬᠣᠷᠴᠢᠨ ᠵᠡᠭᠦᠨ ᠭᠠᠷᠤᠨ ᠬᠣᠢᠲᠤ ᠬᠤᠰᠢᠭᠤᠨ ᠤ᠋ ᠵᠢᠷᠭᠠᠯᠠᠩ ᠪᠠᠯᠭᠠᠰᠤ ᠶ᠋ᠢᠨ ᠲᠡᠷᠢᠭᠦᠨ ᠠᠢᠯ ᠭᠠᠴᠠᠭᠠ ᠪᠣᠯᠤᠨᠠ᠃ ᠠᠳᠠᠯᠢᠪᠢᠰᠢ ᠲᠡᠷᠡ ᠦᠶᠡ ᠶ᠋ᠢᠨ ᠬᠣᠷᠴᠢᠨ ᠵᠡᠭᠦᠨ ᠭᠠᠷᠤᠨ ᠬᠣᠢᠲᠤ ᠬᠤᠰᠢᠭᠤᠨ ᠤ᠋ ᠲᠠᠢᠵᠢ ᠢᠵᠠᠭᠤᠷᠲᠠᠨ ᠤ᠋ ᠭᠡᠷ ᠪᠦᠯᠢ ᠶ᠋ᠢᠨ ᠬᠥᠮᠦᠨ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠦᠵᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠣᠪᠣᠭ ᠢ᠋ ᠪᠤᠰᠤᠳ ᠬᠥᠮᠦᠨ ᠡᠴᠡ ᠠᠰᠠᠭᠤᠵᠤ ᠰᠤᠷᠠᠭᠯᠠᠬᠤ ᠦᠭᠡᠢ ᠪᠡᠷ 《ᠪᠦᠦ 》ᠣᠪᠣᠭ ᠲᠠᠢ ᠭᠡᠰᠡᠨ ᠢ᠋ ᠮᠡᠳᠡᠭᠰᠡᠨ ᠪᠢᠯᠡ᠃
ᠠᠳᠠᠯᠢᠪᠢᠰᠢ ᠬᠡᠳᠦᠢᠪᠡᠷ ᠢᠵᠠᠭᠤᠷᠲᠠᠨ ᠤ᠋ ᠭᠡᠷ ᠪᠦᠯᠢ ᠳ᠋ᠦ᠍ ᠲᠥᠷᠥᠭᠰᠡᠨ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠦᠶᠡ ᠳ᠋ᠦ᠍ ᠬᠦᠷᠴᠦ ᠢᠷᠡᠭᠡᠳ ᠠᠮᠢᠳᠤᠷᠠᠯ ᠨᠢ ᠳᠣᠣᠷᠠᠳᠠᠵᠤ᠂ ᠶᠡᠷᠦ ᠶ᠋ᠢᠨ ᠬᠠᠷᠠᠴᠤ ᠠᠷᠠᠳ ᠤ᠋ᠨ ᠠᠵᠤ ᠠᠮᠢᠳᠤᠷᠠᠯ ᠤ᠋ᠨ ᠬᠢᠷᠢ ᠲᠦᠪᠰᠢᠨ ᠲᠡᠢ ᠪᠣᠯᠵᠠᠢ᠃
ᠠᠳᠠᠯᠢᠪᠢᠰᠢ ᠠᠮᠢᠳᠤ ᠰᠡᠷᠡᠭᠦᠨ ᠪᠠᠢᠬᠤ ᠳ᠋ᠤ᠌ ᠪᠠᠨ ᠵᠢᠷᠢᠮ ᠠᠢᠮᠠᠭ ᠤ᠋ᠨ ᠭᠠᠨᠵᠤᠭᠠ᠂ ᠵᠢᠷᠭᠠᠯᠠᠩ᠂ ᠤᠰᠤᠨ ᠠᠢᠯ᠂ ᠠᠭᠠᠵᠣᠳ᠂ ᠲᠡᠷᠢᠭᠦᠨ ᠠᠢᠯ ᠵᠡᠷᠭᠡ ᠠᠢᠯ ᠲᠣᠰᠬᠣᠨ ᠤ᠋ ᠪᠠᠨ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠬᠥᠮᠦᠰ ᠦ᠋ᠨ ᠭᠡᠷ ᠦ᠋ᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠠᠭᠰᠢᠯᠠᠵᠤ᠂ ᠮᠣᠩᠭᠣᠯ ᠬᠡᠦᠬᠡᠳ ᠲᠦ᠍ ᠪᠢᠴᠢᠭ ᠰᠣᠶᠣᠯ ᠵᠢᠭᠠᠵᠤ ᠪᠠᠢᠵᠠᠢ᠃ ᠬᠠᠶᠠ ᠵᠠᠷᠢᠮ ᠳ᠋ᠤ᠌ ᠪᠠᠨ ᠬᠤᠰᠢᠭᠤᠨ ᠤ᠋ ᠨᠠᠢᠷ ᠨᠠᠭᠠᠳᠤᠮ ᠳ᠋ᠤ᠌ ᠣᠷᠣᠯᠴᠠᠵᠤ᠂ ᠰᠡᠩᠭᠡᠷᠢᠨᠴᠢᠨ ᠦ᠌ ᠮᠠᠭᠲᠠᠭᠠᠯ ᠰᠢᠯᠦᠭ ᠢ᠋ ᠭᠣᠶᠣ ᠰᠠᠢᠬᠠᠨ ᠤᠩᠰᠢᠨ ᠤᠶᠠᠩᠭᠠᠯᠠᠳᠠᠭ ᠭᠡᠨᠡ᠃
ᠠᠳᠠᠯᠢᠪᠢᠰᠢ ᠪᠣᠯ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠪᠡᠨ ᠬᠣᠰᠢᠭᠤ ᠨᠤᠲᠤᠭ ᠲᠤ᠌ ᠪᠠᠨ ᠲᠣᠭᠠ ᠲᠠᠢ ᠬᠡᠳᠦᠨ ᠪᠢᠴᠢᠭ ᠦ᠋ᠨ ᠬᠥᠮᠦᠨ ᠦ᠌ ᠨᠢᠭᠡ ᠨᠢ ᠪᠣᠯᠤᠨᠠ᠃ ᠠᠳᠠᠯᠢᠪᠢᠰᠢ ᠨᠢᠭᠡ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠪᠠᠭᠰᠢ ᠶ᠋ᠢᠨ ᠠᠵᠢᠯ ᠬᠢᠵᠦ᠂ ᠦᠰᠦᠨ ᠪᠢᠷ ᠢ᠋ᠶ᠋ᠡᠷ ᠪᠢᠴᠢᠭᠰᠡᠨ ᠵᠢᠭᠠᠬᠤ ᠪᠢᠴᠢᠭ ᠨᠠᠢᠷᠠᠭᠤᠯᠵᠤ᠂ ᠪᠢᠳᠡ ᠪᠦᠬᠦᠨ ᠳ᠋ᠦ᠍ ᠢᠳᠡᠷᠡᠭᠦᠨ ᠴᠢᠭᠢᠷᠠᠭ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢ ᠦᠯᠡᠳᠡᠭᠡᠵᠦ ᠥᠭᠭᠦᠭᠰᠡᠨ ᠪᠠᠢᠨᠠ᠃ ᠲᠡᠭᠦᠨ ᠦ᠌ ᠪᠢᠴᠢᠭᠰᠡᠨ ᠵᠢᠭᠠᠬᠤ ᠪᠢᠴᠢᠭ ᠡᠴᠡ ᠬᠡᠳᠦᠨ ᠳᠡᠪᠲᠡᠷ ᠢ᠋ ᠨᠢ ᠨᠠᠷᠢᠨ ᠰᠢᠭ᠋ ᠲᠠᠨᠢᠯᠴᠠᠭᠤᠯᠤᠶᠠ᠃
ᠬᠣᠶᠠᠷ ᠠᠳᠠᠯᠢᠪᠢᠰᠢ ᠶ᠋ᠢᠨ ᠵᠢᠭᠠᠬᠤ ᠪᠢᠴᠢᠭ
ᠨᠢᠭᠡᠳᠦᠭᠡᠷ ᠳᠡᠪᠲᠡᠷ ᠨᠢ （15×25 ） ᠮᠣᠩᠭᠣᠯ ᠦᠰᠦᠭ ᠦ᠋ᠨ ᠴᠠᠭᠠᠨ ᠲᠣᠯᠣᠭᠠᠢ ᠶ᠋ᠢ ᠬᠠᠭᠤᠯᠵᠤ ᠪᠢᠴᠢᠭᠰᠡᠨ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠨᠢᠭᠡᠳᠦᠭᠡᠷ ᠣᠨ ᠤ᠋ ᠰᠤᠷᠤᠭᠴᠢᠳ ᠤ᠋ᠨ ᠬᠢᠴᠢᠶᠡᠯ ᠦ᠋ᠨ ᠪᠢᠴᠢᠭ ᠪᠣᠯᠤᠨᠠ᠃
ᠪᠢᠳᠡᠨ ᠳ᠋ᠦ᠍ ᠣᠯᠳᠠᠭᠰᠠᠨ ᠡᠨᠡ ᠳᠡᠪᠲᠡᠷ ᠲᠦ᠍ ᠨᠣᠮ ᠤ᠋ᠨ ᠭᠠᠳᠠᠷ ᠭᠡᠵᠦ ᠪᠠᠢᠬᠤ ᠦᠭᠡᠢ᠂ ᠪᠠᠷᠤᠭ ᠤᠷᠠᠭᠳᠠᠵᠤ ᠭᠡᠭᠡᠭᠳᠡᠭᠰᠡᠨ ᠪᠠᠢᠬᠠ᠂ ᠬᠠᠭᠤᠴᠢᠷᠠᠵᠤ ᠬᠣᠭᠵᠢᠷᠠᠭᠰᠠᠨ ᠰᠢᠷᠠᠩᠭᠤᠢ ᠴᠠᠭᠠᠰᠤ ᠶ᠋ᠢ ᠴᠠᠭᠠᠰᠤᠨ ᠳᠡᠭᠡᠰᠦ ᠪᠡᠷ ᠭᠤᠷᠪᠠᠨ ᠭᠠᠵᠠᠷ ᠦᠳᠡᠨ ᠣᠶᠣᠵᠤ ᠳᠡᠭᠡᠷᠡ ᠳᠤᠮᠳᠠ ᠳᠣᠣᠷᠠ ᠭᠤᠷᠪᠠᠨ ᠨᠣᠮ ᠪᠣᠯᠭᠠᠨ ᠳᠡᠪᠲᠡᠷᠯᠡᠵᠡᠢ᠃ ᠨᠡᠢᠲᠡ ᠬᠣᠷᠢᠨ ᠨᠢᠭᠤᠷ᠃ ᠨᠢᠭᠡᠳᠦᠭᠡᠷ ᠳᠡᠪᠲᠡᠷ ᠲᠦ᠍ ᠮᠣᠩᠭᠣᠯ ᠦᠰᠦᠭ ᠦ᠋ᠨ ᠴᠠᠭᠠᠨ ᠲᠣᠯᠣᠭᠠᠢ ᠶ᠋ᠢᠨ ᠭᠤᠷᠪᠠᠨ ᠬᠤᠪᠢᠷᠠᠯ ᠪᠣᠯᠤᠨ ᠴᠠᠭᠠᠨ ᠲᠣᠯᠣᠭᠠᠢ ᠶ᠋ᠢᠨ ᠬᠤᠪᠢᠷᠠᠯᠲᠠ ᠲᠠᠢ ᠳᠠᠩ ᠦᠭᠡ ᠵᠡᠷᠭᠡ ᠶ᠋ᠢ ᠦᠰᠦᠨ ᠪᠢᠷ ᠢ᠋ᠶ᠋ᠡᠷ ᠭᠣᠶᠣ ᠰᠠᠢᠬᠠᠨ ᠬᠠᠭᠤᠯᠵᠤ ᠪᠢᠴᠢᠭᠰᠡᠨ ᠨᠢ ᠣᠳᠣ ᠶ᠋ᠢᠨ ᠶᠡᠬᠡ ᠤᠷᠠᠨ ᠪᠢᠴᠢᠯᠭᠡᠲᠡᠨ ᠪᠣᠣᠱᠠᠨ ᠤ᠋ ᠬᠠᠭᠤᠯᠤᠭᠰᠠᠨ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠢᠴᠢᠶᠡᠯ ᠦ᠋ᠨ ᠪᠢᠴᠢᠭ ᠲᠡᠢ ᠠᠭᠤᠯᠭᠠ ᠬᠡᠯᠪᠡᠷᠢ ᠶ᠋ᠢᠨ ᠲᠠᠯᠠ ᠪᠠᠷ ᠪᠠᠷᠤᠭ ᠣᠴᠢᠨᠠ᠃
ᠠᠳᠠᠯᠢᠪᠢᠰᠢ ᠶ᠋ᠢᠨ ᠨᠠᠢᠷᠠᠭᠤᠯᠤᠨ ᠪᠢᠴᠢᠭᠰᠡᠨ ᠨᠢᠭᠡᠳᠦᠭᠡᠷ ᠳᠡᠪᠲᠡᠷ ᠢ᠋ ᠨᠢ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠡᠯᠡ ᠵᠦᠢ ᠶ᠋ᠢᠨ ᠵᠢᠭᠠᠬᠤ ᠪᠢᠴᠢᠭ ᠭᠡᠵᠦ ᠬᠡᠯᠡᠵᠦ ᠪᠣᠯᠤᠨᠠ᠃
ᠬᠣᠶᠠᠳᠤᠭᠠᠷ ᠳᠡᠪᠲᠡᠷ ᠨᠢ （12×24 ） ᠨᠢᠭᠡᠳᠦᠭᠡᠷ ᠳᠡᠪᠲᠡᠷ ᠦ᠋ᠨ ᠴᠠᠭᠠᠨ ᠲᠣᠯᠣᠭᠠᠢ ᠶ᠋ᠢᠨ ᠰᠠᠭᠤᠷᠢ ᠳᠡᠭᠡᠷᠡ ᠬᠡᠯᠡ ᠵᠦᠢ ᠶ᠋ᠢᠨ ᠬᠤᠪᠢᠷᠠᠯ᠂ ᠦᠭᠡ ᠬᠣᠯᠪᠣᠵᠤ ᠪᠢᠴᠢᠬᠦ ᠪᠠ ᠥᠭᠦᠯᠡᠪᠦᠷᠢ ᠵᠣᠬᠢᠶᠠᠵᠤ ᠪᠣᠯᠪᠠᠰᠤᠷᠠᠬᠤ ᠵᠢᠱ᠌ᠢᠶᠡ ᠨᠦ᠍ᠭᠦᠳ ᠢ᠋ ᠦᠰᠦᠨ ᠪᠢᠷ ᠢ᠋ᠶ᠋ᠡᠷ ᠬᠠᠭᠤᠯᠵᠤ ᠪᠢᠴᠢᠭᠰᠡᠨ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠣᠶᠠᠷ ᠭᠤᠷᠪᠠᠳᠤᠭᠠᠷ ᠣᠨ ᠤ᠋ ᠰᠤᠷᠤᠭᠴᠢᠳ ᠤ᠋ᠨ ᠬᠢᠴᠢᠶᠡᠯ ᠦ᠋ᠨ ᠪᠢᠴᠢᠭ ᠪᠣᠯᠤᠨᠠ᠃
ᠨᠣᠮ ᠤ᠋ᠨ ᠭᠠᠳᠠᠷ ᠲᠠᠯᠠ ᠳ᠋ᠤᠨᠢ ᠨᠢᠭᠡ ᠨᠢᠭᠤᠷ ᠬᠣᠭᠣᠰᠣᠨ ᠴᠠᠭᠠᠰᠤ ᠶ᠋ᠢ ᠦᠳᠡᠵᠦ᠂ ᠨᠣᠮ ᠤ᠋ᠨ ᠬᠠᠪᠢᠰᠤ ᠪᠣᠯᠵᠠᠢ᠃ ᠨᠡᠢᠲᠡ ᠭᠤᠴᠢᠨ ᠨᠢᠭᠤᠷ᠃ ᠨᠣᠮ ᠤ᠋ᠨ ᠬᠣᠶᠠᠳᠤᠭᠠᠷ ᠬᠠᠭᠤᠳᠠᠰᠤ ᠠ᠋ᠴᠠ ᠡᠬᠢᠯᠡᠵᠦ《 ᠨᠢᠭᠡᠳᠦᠭᠡᠷ ᠬᠢᠴᠢᠶᠡᠯ᠂ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠷᠣᠭᠰᠠᠨ ᠠᠨᠤ 》᠂ 《 ᠬᠣᠶᠠᠳᠤᠭᠠᠷ ᠬᠢᠴᠢᠶᠡᠯ᠂ ᠭᠡᠷ ᠪᠠ ᠰᠤᠷᠭᠠᠭᠤᠯᠢ 》᠂ 《 ᠭᠤᠷᠪᠠᠳᠤᠭᠠᠷ ᠬᠢᠴᠢᠶᠡᠯ᠂ ᠡᠴᠢᠭᠡ ᠶ᠋ᠢᠨ ᠬᠡᠰᠢᠭ 》᠂ 《ᠳᠥᠷᠪᠡᠳᠦᠭᠡᠷ ᠬᠢᠴᠢᠶᠡᠯ᠂ ᠡᠬᠡ ᠶ᠋ᠢᠨ ᠬᠠᠢᠷᠠ 》 ᠭᠡᠬᠦ ᠮᠡᠲᠦ ᠪᠡᠷ ᠨᠡᠢᠲᠡ ᠲᠠᠪᠢᠳᠤᠭᠠᠷ ᠬᠢᠴᠢᠶᠡᠯ ᠬᠦᠷᠲᠡᠯᠡ ᠪᠦᠬᠦᠨ ᠢ᠋ ᠦᠰᠦᠨ ᠪᠢᠷ ᠦ᠋ᠨ ᠪᠠᠭᠠ ᠬᠡᠪ ᠦ᠋ᠨ ᠦᠰᠦᠭ ᠢ᠋ᠶ᠋ᠡᠷ ᠬᠠᠭᠤᠯᠤᠨ ᠪᠢᠴᠢᠵᠡᠢ᠃
ᠬᠣᠶᠠᠳᠤᠭᠠᠷ ᠳᠡᠪᠲᠡᠷ ᠦ᠋ᠨ ᠬᠣᠷᠢᠨ ᠲᠠᠪᠤᠳᠤᠭᠠᠷ ᠬᠢᠴᠢᠶᠡᠯ ᠪᠣᠯᠤᠨ ᠬᠣᠷᠢᠨ ᠵᠢᠷᠭᠤᠳᠤᠭᠠᠷ ᠬᠢᠴᠢᠶᠡᠯ ᠦ᠋ᠨ ᠠᠭᠤᠯᠭᠠ ᠶ᠋ᠢ ᠨᠢ ᠦᠵᠡᠭᠦᠯᠪᠡᠯ᠄
《 ᠬᠣᠷᠢᠨ ᠲᠠᠪᠤᠳᠤᠭᠠᠷ ᠬᠢᠴᠢᠶᠡᠯ᠂ ＜ ᠬᠣᠶᠠᠷ ᠮᠡᠯᠡᠬᠡᠢ ＞᠂ ᠬᠣᠶᠠᠷ ᠮᠡᠯᠡᠬᠡᠢ ᠪᠠᠭᠠ ᠨᠠᠭᠤᠷ ᠲᠤ᠌ ᠣᠷᠣᠰᠢᠵᠤ ᠪᠠᠢᠲᠠᠯᠠ ᠭᠠᠩ ᠪᠣᠯᠵᠤ ᠤᠰᠤ ᠰᠢᠷᠭᠢᠪᠡᠢ᠂ ᠬᠣᠶᠠᠭᠤᠯᠠ ᠪᠤᠰᠤᠳ ᠲᠡᠰᠢ ᠶᠠᠪᠤᠬᠤ ᠵᠠᠮ ᠳ᠋ᠤᠷ ᠨᠢᠭᠡᠨ ᠬᠤᠳᠳᠤᠭ ᠲᠣᠬᠢᠶᠠᠯᠳᠤᠭᠠᠳ᠂ ᠨᠢᠭᠡᠨ ᠢᠨᠤ ᠣᠷᠣᠰᠤᠭᠠᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠨᠥᠭᠦᠭᠡ ᠢᠨᠤ ᠥᠭᠦᠯᠡᠷᠦᠨ᠂ ᠬᠤᠳᠳᠤᠭ ᠤ᠋ᠨ ᠤᠰᠤ ᠬᠡᠳᠦᠢ ᠰᠠᠢᠨ ᠪᠣᠯᠪᠠᠴᠤ ᠬᠣᠵᠢᠮ ᠬᠡᠷᠪᠡ ᠶᠠᠪᠤᠰᠤᠭᠠᠢ ᠬᠡᠮᠡᠪᠡᠰᠦ ᠬᠡᠷᠬᠢᠨ ᠭᠠᠷᠴᠤ ᠴᠢᠳᠠᠮᠤᠢ ᠬᠡᠮᠡᠪᠡᠢ 》ᠭᠡᠵᠦ ᠪᠢᠴᠢᠭᠡᠳ ᠳᠣᠣᠷᠠ ᠲᠠᠯᠠ ᠳ᠋ᠤᠨᠢ ᠡᠨᠡ ᠬᠢᠴᠢᠶᠡᠯ ᠢ᠋ᠶ᠋ᠡᠨ ᠳ᠋ᠦᠩᠨᠡᠭᠰᠡᠨ ᠦᠭᠡ 《 ᠭᠠᠩ ᠪᠣᠯᠵᠤ ᠤᠰᠤ ᠰᠢᠷᠭᠢᠪᠡᠢ 》 ᠭᠡᠵᠦ ᠪᠢᠴᠢᠵᠡᠢ᠃ ᠬᠣᠷᠢᠨ ᠵᠢᠷᠭᠤᠳᠤᠭᠠᠷ ᠬᠢᠴᠢᠶᠡᠯ ᠨᠢ ᠪᠢᠷ ᠦ᠋ᠨ ᠲᠤᠬᠠᠢ ᠪᠢᠴᠢᠭᠰᠡᠨ ᠪᠠᠢᠨᠠ᠃ 》
《 ᠬᠣᠷᠢᠨ ᠵᠢᠷᠭᠤᠳᠤᠭᠠᠷ ᠬᠢᠴᠢᠶᠡᠯ᠂ ＜ ᠪᠢᠷ ＞᠂ ᠪᠢᠷ ᠦ᠋ᠨ ᠵᠦᠢᠯ ᠠᠳᠠᠯᠢ ᠦᠭᠡᠢ᠂ ᠮᠠᠨᠵᠤ ᠬᠢᠲᠠᠳ ᠤᠯᠤᠰ ᠲᠤᠷ ᠦᠰᠦ ᠪᠡᠷ ᠬᠢᠮᠦᠢ᠂ ᠬᠠᠷᠢ ᠤᠯᠤᠰ ᠲᠤᠷ ᠪᠣᠯᠣᠳ ᠪᠠ ᠬᠣᠷᠭᠣᠯᠵᠢ ᠪᠠᠷ ᠬᠢᠮᠦᠢ᠂ ᠪᠠᠰᠠ ᠣᠤ ᠶ᠋ᠢᠨ ᠪᠢᠷ᠂ ᠴᠢᠯᠠᠭᠤᠨ ᠪᠢᠷ ᠪᠣᠢ᠂ ᠮᠠᠨ ᠤ᠋ ᠮᠣᠩᠭᠣᠯ ᠠᠩᠬᠠᠨ ᠳ᠋ᠤ᠌ ᠪᠠᠨ ᠬᠤᠯᠤᠰᠤᠨ ᠦᠵᠦᠭ ᠬᠡᠷᠡᠭᠯᠡᠵᠦ ᠪᠥᠯᠥᠭᠡ᠂ ᠬᠣᠵᠢᠮ ᠦᠰᠦ ᠶ᠋ᠢᠨ ᠪᠢᠷ ᠬᠡᠷᠡᠭᠯᠡᠵᠦᠬᠦᠢ 》 ᠭᠡᠵᠦ ᠡᠨᠡ ᠬᠢᠴᠢᠶᠡᠯ ᠦ᠋ᠨ ᠠᠭᠤᠯᠭᠠ ᠪᠠᠨ ᠲᠡᠭᠦᠰᠬᠡᠵᠦ᠂ ᠳᠣᠣᠷᠠ ᠲᠠᠯᠠ ᠳ᠋ᠤᠨᠢ 《 ᠪᠢᠷ᠂ ᠦᠰᠦᠨ ᠪᠢᠷ᠂ ᠬᠤᠯᠤᠰᠤᠨ ᠪᠢᠷ》 ᠭᠡᠵᠦ ᠳ᠋ᠦᠩᠨᠡᠨ ᠪᠢᠴᠢᠵᠡᠢ᠃
ᠭᠤᠷᠪᠠᠳᠤᠭᠠᠷ ᠳᠡᠪᠲᠡᠷ ᠪᠣᠯᠤᠨ ᠳᠥᠷᠪᠡᠳᠦᠭᠡᠷ ᠳᠡᠪᠲᠡᠷ ᠨᠢ (12×24 ) ᠬᠣᠶᠠᠳᠤᠭᠠᠷ ᠳᠡᠪᠲᠡᠷ ᠦ᠋ᠨ ᠤᠳᠬᠠ ᠠᠭᠤᠯᠭᠠ ᠶ᠋ᠢᠨ ᠰᠠᠭᠤᠷᠢ ᠳᠡᠭᠡᠷᠡ ᠭᠦᠨ ᠪᠣᠯᠤᠭᠰᠠᠨ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠳᠥᠷᠪᠡ᠂ ᠲᠠᠪᠤ᠂ ᠵᠢᠷᠭᠤᠳᠤᠭᠠᠷ ᠣᠨ ᠤ᠋ ᠰᠤᠷᠤᠭᠴᠢᠳ ᠤ᠋ᠨ ᠬᠢᠴᠢᠶᠡᠯ ᠦ᠋ᠨ ᠪᠢᠴᠢᠭ ᠪᠣᠯᠤᠨᠠ᠃
ᠨᠣᠮ ᠤ᠋ᠨ ᠬᠠᠪᠢᠰᠤ ᠨᠢ ᠤᠷᠠᠭᠳᠠᠵᠤ ᠬᠠᠶᠠᠭᠳᠠᠭᠰᠠᠨ ᠪᠣᠯᠬᠣᠷ ᠨᠢᠭᠡᠳᠦᠭᠡᠷ ᠬᠢᠴᠢᠶᠡᠯ ᠦ᠋ᠨ ᠨᠢᠭᠤᠷ ᠠ᠋ᠴᠠ ᠬᠢᠴᠢᠶᠡᠯ ᠦ᠋ᠨ ᠭᠠᠷᠴᠠᠭ ᠨᠢ ᠬᠠᠷᠠᠭᠳᠠᠨᠠ᠃ ᠰᠢᠷᠠᠩᠭᠤᠢ ᠲᠣᠷᠭᠠᠨ ᠴᠠᠭᠠᠰᠤ ᠪᠠᠷ ᠬᠢᠭᠰᠡᠨ ᠳᠡᠪᠲᠡᠷ ᠤᠴᠢᠷ ᠠ᠋ᠴᠠ ᠦᠰᠦᠨ ᠪᠢᠷ ᠢ᠋ᠶ᠋ᠡᠷ ᠪᠢᠴᠢᠬᠦ ᠳ᠋ᠦ᠍ ᠡᠪ ᠲᠡᠢ ᠰᠠᠢᠬᠠᠨ ᠪᠣᠯᠵᠠᠢ᠃ ᠡᠨᠡ ᠬᠣᠶᠠᠷ ᠳᠡᠪᠲᠡᠷ ᠢ᠋ ᠪᠦᠷ ᠳᠡᠭᠡᠷᠡ ᠳᠤᠮᠳᠠ ᠳᠣᠣᠷᠠ ᠭᠤᠷᠪᠠᠨ ᠭᠠᠵᠠᠷ ᠴᠠᠭᠠᠰᠤᠨ ᠳᠡᠭᠡᠰᠦ ᠪᠡᠷ ᠦᠳᠡᠨ ᠣᠶᠣᠭᠰᠠᠨ ᠪᠣᠯᠬᠣᠷ ᠡᠷᠲᠡ ᠡᠴᠡ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠨᠢ ᠲᠣᠳᠣᠷᠬᠠᠢ ᠮᠡᠳᠡᠭᠳᠡᠨᠡ᠃ ᠲᠤᠰ ᠪᠦᠷᠢ ᠬᠣᠷᠢᠨ ᠨᠢᠭᠤᠷ ᠲᠠᠢ᠃ ᠡᠨᠡ ᠬᠣᠶᠠᠷ ᠳᠡᠪᠲᠡᠷ ᠦ᠋ᠨ ᠵᠠᠷᠢᠮ ᠬᠢᠴᠢᠶᠡᠯ ᠢ᠋ ᠨᠢ ᠪᠢᠴᠢᠵᠦ ᠦᠵᠡᠭᠦᠯᠪᠡᠯ᠄
《ᠠᠷᠪᠠᠨ ᠨᠢᠭᠡᠳᠦᠭᠡᠷ ᠬᠢᠴᠢᠶᠡᠯ᠂ ＜ᠴᠢᠩ ᠦᠨᠡᠨ ᠠᠨᠤ＞᠂ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠭᠰᠠᠨ ᠴᠠᠢ ᠶ᠋ᠢᠨ ᠬᠤᠪᠢᠩ ᠬᠠᠭᠠᠷᠠᠵᠤ ᠴᠠᠢ ᠠᠰᠬᠠᠭᠰᠠᠨ ᠳ᠋ᠤᠷ ᠪᠠᠲᠤ ᠬᠥᠪᠡᠭᠦᠨ ᠶᠡᠬᠡᠯᠡ ᠭᠡᠯᠮᠡᠪᠡᠢ᠂ ᠤᠳᠠᠭᠰᠠᠨ ᠦᠭᠡᠢ ᠡᠴᠢᠭᠡ ᠠᠨᠤ ᠢᠷᠡᠭᠡᠳ ᠬᠡᠨ ᠤᠨᠠᠭᠠᠪᠠᠢ ᠭᠡᠮᠡᠨ ᠠᠰᠠᠭᠤᠭᠰᠠᠨ ᠳ᠋ᠤᠷ ᠪᠠᠲᠤ ᠬᠥᠪᠡᠭᠦᠨ ᠪᠢ ᠭᠡᠮᠡᠨ ᠬᠦᠯᠢᠶᠡᠨ ᠠᠪᠤᠭᠰᠠᠨᠠ ᠡᠴᠢᠭᠡ ᠠᠨᠤ ᠲᠡᠭᠦᠨ ᠦ᠌ ᠴᠢᠩ ᠦᠨᠡᠨ ᠳ᠋ᠦ᠍ᠷ ᠪᠡᠶᠡᠰᠦᠨ ᠡᠨᠳᠡᠭᠦᠷᠡᠯ ᠢ᠋ ᠠᠨᠤ ᠰᠢᠭᠤᠳ ᠠᠭᠤᠴᠢᠯᠠᠵᠤᠬᠤᠢ 》ᠭᠡᠵᠡᠢ᠃ ᠳᠥᠷᠪᠡᠳᠦᠭᠡᠷ ᠳᠡᠪᠲᠡᠷ ᠦ᠋ᠨ ᠠᠷᠪᠠᠨ ᠭᠤᠷᠪᠠᠳᠤᠭᠠᠷ ᠬᠢᠴᠢᠶᠡᠯ ᠢ᠋ ᠨᠢ ᠦᠵᠡᠭᠦᠯᠪᠡᠯ᠄
ᠭᠤᠷᠪᠠ ᠠᠳᠠᠯᠢᠪᠢᠰᠢ ᠶ᠋ᠢᠨ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ ᠲᠢᠭ ᠬᠡᠯᠪᠡᠷᠢ
ᠠᠳᠠᠯᠢᠪᠢᠰᠢ ᠶ᠋ᠢᠨ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ ᠪᠣᠯ ᠢᠳᠡᠷᠡᠭᠦᠨ ᠴᠢᠭᠢᠷᠠᠭ ᠲᠥᠪ ᠪᠢᠴᠢᠯᠭᠡ ᠪᠣᠯᠤᠨᠠ᠃
ᠦᠰᠦᠭ ᠦ᠋ᠨ ᠡᠬᠢᠨ ᠳ᠋ᠦ᠍ ᠪᠢᠴᠢᠬᠦ 《 ᠠ 》 ᠲᠣᠯᠣᠭᠠᠢ ᠶ᠋ᠢᠨ ᠲᠢᠲᠢᠮ᠂ 《 ᠪᠠ》 ᠲᠣᠯᠣᠭᠠᠢ ᠶ᠋ᠢᠨ ᠲᠣᠭᠣᠷᠢᠭ ᠨᠤᠮᠤ᠂ 《ᠬᠠ 》ᠲᠣᠯᠣᠭᠠᠢ ᠶ᠋ᠢᠨ ᠠᠩᠭᠠᠷᠬᠠᠢ ᠨᠤᠮᠤ᠂ 《 ᠮᠠ 》 ᠲᠣᠯᠣᠭᠠᠢ ᠶ᠋ᠢᠨ ᠭᠡᠵᠢᠭᠡ᠂ 《 ᠯᠠ 》 ᠲᠣᠯᠣᠭᠠᠢ ᠶ᠋ᠢᠨ ᠡᠪᠡᠷ᠂《 ᠲᠠ》 ᠲᠣᠯᠣᠭᠠᠢ ᠶ᠋ᠢᠨ ᠪᠢᠲᠡᠭᠦᠦ ᠲᠣᠯᠣᠭᠠᠢ ᠁ ᠶ᠋ᠢᠨ ᠵᠢᠷᠤᠯᠭᠠ ᠶ᠋ᠢ ᠢᠳᠡ ᠬᠦᠴᠦᠨ ᠲᠡᠢ ᠡᠬᠢᠯᠡᠵᠦ᠂ ᠳᠠᠷᠠᠭᠠ ᠨᠢ ᠵᠠᠯᠭᠠᠨ ᠪᠢᠴᠢᠬᠦ ᠠᠴᠤᠭ ᠰᠢᠯᠪᠢ᠂ ᠭᠡᠳᠡᠰᠦ ᠬᠥᠩᠬᠥᠷ ᠵᠡᠷᠭᠡ ᠳᠤᠮᠳᠠ ᠣᠷᠣᠬᠤ ᠵᠢᠷᠤᠯᠭᠠ ᠨᠤᠭᠤᠳ ᠨᠢ ᠴᠦ᠍ ᠡᠷᠴᠢᠮ ᠲᠡᠢ ᠡᠬᠢᠯᠡᠭᠰᠡᠨ᠃ ᠴᠠᠭᠠᠨ ᠲᠣᠯᠣᠭᠠᠢ ᠶ᠋ᠢᠨ ᠪᠢᠴᠢᠯᠭᠡ ᠶ᠋ᠢ ᠵᠠᠯᠭᠠᠯᠳᠤᠭᠤᠯᠤᠨ ᠨᠢᠭᠲᠠᠷᠠᠭᠤᠯᠵᠤ᠂ ᠦᠰᠦᠭ ᠦ᠋ᠨ ᠰᠡᠭᠦᠯ ᠳ᠋ᠦ᠍ ᠪᠢᠴᠢᠬᠦ ᠤᠷᠤᠭᠰᠢᠯᠠᠭᠠ᠂ ᠣᠷᠬᠢᠴᠠ᠂ ᠴᠠᠴᠤᠯᠭᠠ ᠶ᠋ᠢ ᠴᠦ᠍ ᠡᠪ ᠵᠦᠢ ᠲᠡᠢ ᠲᠣᠬᠢᠷᠠᠭᠤᠯᠤᠨ ᠵᠣᠬᠢᠴᠠᠭᠤᠯᠵᠠᠢ᠃
ᠦᠰᠦᠭ ᠦ᠋ᠨ ᠶᠡᠬᠡ ᠪᠠᠭᠠ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠪᠠᠭᠠ ᠬᠡᠪ ᠦ᠋ᠨ ᠦᠰᠦᠭ ᠪᠣᠯᠤᠨᠠ᠃ ᠣᠳᠣ ᠶ᠋ᠢᠨ ᠪᠣᠣᠱᠠᠨ ᠤ᠋ ᠬᠠᠭᠤᠯᠤᠨ ᠪᠢᠴᠢᠭᠰᠡᠨ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠢᠴᠢᠶᠡᠯ ᠦ᠋ᠨ ᠪᠢᠴᠢᠭ ᠦ᠋ᠨ ᠦᠰᠦᠭ ᠦ᠋ᠨ ᠶᠡᠬᠡ ᠪᠠᠭᠠ ᠲᠠᠢ ᠦᠨᠳᠦᠰᠦᠨ ᠳ᠋ᠦ᠍ ᠪᠡᠨ ᠠᠳᠠᠯᠢᠪᠲᠤᠷ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠪᠠᠭᠠᠰᠬᠠᠵᠤ ᠲᠣᠮᠣᠷᠠᠭᠤᠯᠬᠤ ᠮᠠᠰᠢᠨ ᠦᠭᠡᠢ ᠪᠠᠢᠳᠠᠯ ᠳᠣᠣᠷᠠ ᠲᠡᠢᠮᠦ ᠣᠯᠠᠨ ᠬᠢᠴᠢᠶᠡᠯ ᠦ᠋ᠨ ᠪᠢᠴᠢᠭ ᠢ᠋ ᠲᠡᠢᠮᠦ ᠪᠠᠭᠠ ᠬᠡᠯᠪᠡᠷᠢ ᠲᠡᠢ ᠪᠡᠷ ᠳᠠᠷᠢ ᠲᠡᠭᠰᠢ ᠭᠣᠶᠣ ᠰᠠᠢᠬᠠᠨ ᠪᠢᠴᠢᠨᠡ ᠭᠡᠳᠡᠭ ᠴᠢᠨᠢ ᠪᠠᠰᠠ ᠬᠢᠯᠪᠠᠷ ᠪᠤᠰᠤ ᠶᠠᠪᠤᠳᠠᠯ ᠪᠢᠯᠡ᠃
ᠬᠡᠳᠦᠨ ᠳᠡᠪᠲᠡᠷ ᠵᠢᠭᠠᠬᠤ ᠪᠢᠴᠢᠭ ᠦ᠋ᠨ ᠦᠭᠡ ᠥᠭᠦᠯᠡᠪᠦᠷᠢ ᠶ᠋ᠢᠨ ᠳᠤᠮᠳᠠ ᠪᠠ ᠰᠡᠭᠦᠯ ᠳ᠋ᠦ᠍ᠨᠢ ᠪᠦᠷ ᠳᠠᠩ ᠴᠡᠭ ᠢ᠋ ᠬᠡᠷᠡᠭᠯᠡᠵᠡᠢ᠃ ᠥᠭᠦᠯᠡᠪᠦᠷᠢ ᠶ᠋ᠢᠨ ᠲᠡᠭᠦᠰᠬᠡᠯ ᠳ᠋ᠦ᠍ ᠳᠠᠪᠬᠤᠷ ᠴᠡᠭ ᠢ᠋ ᠬᠡᠷᠡᠭᠯᠡᠭᠰᠡᠨ ᠦᠭᠡᠢ᠃ ᠥᠭᠡᠷᠡ ᠵᠦᠢᠯ ᠦ᠋ᠨ ᠴᠡᠭ ᠲᠡᠮᠳᠡᠭ ᠢ᠋ ᠴᠦ᠍ ᠬᠡᠳᠦᠨ ᠳᠡᠪᠲᠡᠷ ᠵᠢᠭᠠᠬᠤ ᠪᠢᠴᠢᠭ ᠦ᠋ᠨ ᠳᠣᠲᠣᠷᠠ ᠪᠠᠨ ᠡᠰᠡ ᠬᠡᠷᠡᠭᠯᠡᠵᠡᠢ᠃ ᠪᠦᠬᠦ ᠪᠢᠴᠢᠭ ᠦ᠋ᠨ ᠦᠰᠦᠭ ᠪᠦᠷᠢ ᠶ᠋ᠢᠨ ᠶᠡᠬᠡ ᠪᠠᠭᠠ ᠨᠢ ᠠᠳᠠᠯᠢᠪᠲᠤᠷ᠂ ᠮᠥᠷ᠂ ᠮᠥᠷ ᠦ᠋ᠨ ᠬᠣᠭᠣᠷᠣᠨᠳᠣᠬᠢ ᠵᠠᠢ ᠵᠠᠪᠰᠠᠷ ᠨᠢ ᠠᠳᠠᠯᠢ ᠲᠡᠭᠰᠢ᠂ ᠬᠡᠳᠦᠨ ᠳᠡᠪᠲᠡᠷ ᠵᠢᠭᠠᠬᠤ ᠪᠢᠴᠢᠭ ᠦ᠋ᠨ ᠦᠰᠦᠭ ᠦ᠋ᠨ ᠶᠡᠬᠡ ᠪᠠᠭᠠ ᠨᠢ ᠠᠳᠠᠯᠢ ᠲᠡᠭᠰᠢ᠂ ᠶᠣᠰᠣᠲᠠᠢ ᠨᠢᠭᠡᠨ ᠪᠢᠴᠢᠯᠭᠡ ᠶ᠋ᠢᠨ ᠲᠠᠯᠠ ᠪᠠᠷ ᠢᠳᠡᠷᠡᠭᠦᠨ ᠴᠢᠭᠢᠷᠠᠭ᠂ ᠬᠡᠯᠪᠡᠷᠢ ᠶ᠋ᠢᠨ ᠲᠠᠯᠠ ᠪᠠᠷ ᠡᠪ ᠵᠣᠬᠢᠰ ᠲᠠᠢ᠂ ᠤᠷᠠᠯᠢᠭ ᠤ᠋ᠨ ᠲᠠᠯᠠ ᠪᠠᠷ ᠰᠢᠨᠵᠢᠯᠡᠨ ᠰᠤᠳᠤᠯᠤᠭᠤᠰᠢᠲᠠᠢ ᠤᠷᠠᠨ ᠪᠦᠲᠦᠭᠡᠯ ᠪᠣᠯᠤᠭᠰᠠᠨ ᠪᠠᠢᠨᠠ᠃ ᠪᠦᠬᠦᠢᠯᠡ ᠵᠢᠭᠠᠬᠤ ᠪᠢᠴᠢᠭ ᠦ᠋ᠨ ᠬᠡᠯᠡ ᠬᠡᠯᠡᠯᠭᠡ ᠨᠢ ᠬᠠᠭᠤᠴᠢᠨ ᠪᠢᠴᠢᠭ ᠦ᠋ᠨ ᠳᠡᠪᠲᠡᠷ ᠲᠦ᠍ ᠣᠯᠠᠨ ᠬᠡᠷᠡᠭᠯᠡᠳᠡᠭ 《 ᠣᠳᠬᠤᠢ ᠳ᠋ᠤᠷ᠂ ᠶᠠᠪᠤᠪᠠᠰᠤ ᠶᠠᠪᠤᠪᠠᠢ ᠁ ᠲᠡᠢᠮᠦ ᠪᠣᠯᠪᠠᠰᠤ ᠡᠢᠮᠦ ᠪᠣᠯᠪᠠᠢ᠂ ᠶᠠᠭᠠᠬᠢᠪᠠᠰᠤ ᠵᠣᠬᠢᠮᠤᠢ᠂ ᠴᠢᠬᠤᠯᠠ ᠶᠣᠰᠣᠨ ᠪᠣᠯᠠᠢ ᠬᠡᠮᠡᠵᠦᠬᠦᠢ᠂ ᠠᠰᠠᠭᠤᠬᠤᠢ ᠳ᠋ᠤᠷ ᠳᠤᠷᠠᠲᠠᠢ ᠠᠨᠤ᠂ ᠡᠴᠢᠭᠡ ᠡᠬᠡ ᠪᠡᠨ ᠬᠦᠨᠳᠦᠯᠡᠬᠦᠢ ᠢᠨᠦ ᠁ 》ᠭᠡᠬᠦ ᠮᠡᠲᠦ ᠶ᠋ᠢᠨ ᠡᠷᠲᠡᠨ ᠦ᠌ ᠤᠷᠠᠨ ᠵᠣᠬᠢᠶᠠᠯ ᠤ᠋ᠨ ᠬᠡᠯᠡ ᠬᠡᠯᠡᠯᠭᠡ ᠶ᠋ᠢ ᠨᠡᠢᠳᠡᠮ ᠬᠡᠷᠡᠭᠯᠡᠵᠡᠢ᠃
ᠳᠥᠷᠪᠡ ᠠᠳᠠᠯᠢᠪᠢᠰᠢ ᠶ᠋ᠢᠨ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ ᠨᠥᠯᠥᠭᠡ ᠲᠤᠰᠬᠠᠯ
ᠠᠳᠠᠯᠢᠪᠢᠰᠢ ᠶ᠋ᠢᠨ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ ᠂ ᠲᠡᠭᠦᠨ ᠦ᠌ ᠳᠠᠷᠠᠭᠠᠬᠢ ᠨᠡᠯᠢᠶᠡᠳ ᠣᠯᠠᠨ ᠠᠯᠳᠠᠷᠲᠤ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡᠳᠡᠳ ᠲᠦ᠍ ᠦᠯᠢᠭᠡᠷ ᠳᠠᠭᠤᠷᠢᠶᠠᠯ ᠪᠣᠯᠵᠤ᠂ ᠪᠠᠭᠠ ᠪᠤᠰᠤ ᠶ᠋ᠢᠨ ᠬᠥᠮᠦᠰ ᠦ᠋ᠨ ᠭᠠᠷ ᠤ᠋ᠨ ᠲᠢᠭ ᠢ᠋ ᠨᠥᠯᠥᠭᠡᠯᠡᠭᠰᠡᠨ ᠪᠠᠢᠨᠠ᠃
ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ ᠳᠠᠷᠬᠠᠨ ᠴᠣᠯᠠ ᠲᠠᠢ ᠠᠯᠳᠠᠷᠲᠤ ᠤᠷᠠᠨ ᠪᠢᠴᠢᠯᠭᠡᠲᠡᠨ ᠨᠠᠢᠷᠠᠯᠲᠤ ᠶ᠋ᠢᠨ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ ᠤᠷᠤᠭᠰᠢᠯᠠᠭᠠ᠂ ᠴᠠᠴᠤᠯᠭᠠ ᠨᠢ ᠲᠡᠷᠡ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠳᠠᠯᠢᠪᠢᠰᠢ ᠶ᠋ᠢᠨ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ ᠤᠷᠤᠭᠰᠢᠯᠠᠭᠠ ᠴᠠᠴᠤᠯᠭᠠ ᠠ᠋ᠴᠠ ᠢᠷᠡᠯᠲᠡ ᠲᠡᠢ᠃ ᠤᠰᠤᠨ ᠳ᠋ᠤ᠌ ᠰᠤᠷᠪᠤᠯᠵᠢ ᠭᠡᠵᠦ ᠪᠠᠢᠳᠠᠭ᠂ ᠰᠣᠶᠣᠯ ᠳ᠋ᠤ᠌ ᠡᠬᠢ ᠦᠨᠳᠦᠰᠦ ᠭᠡᠵᠦ ᠪᠠᠢᠳᠠᠭ᠂ ᠳᠡᠭᠡᠳᠦ ᠲᠡᠭᠷᠢ ᠡᠴᠡ ᠭᠡᠨᠡᠳᠲᠡ ᠪᠠᠭᠤᠵᠤ ᠢᠷᠡᠭᠰᠡᠨ ᠰᠣᠶᠣᠯ ᠭᠡᠵᠦ ᠬᠠᠮᠢᠭᠠ ᠪᠠᠢᠬᠤ ᠪᠢᠯᠡ ? ᠪᠦᠷ ᠳᠡᠭᠡᠷᠡ ᠦᠶᠡ ᠶ᠋ᠢᠨ ᠶᠠᠮᠠᠷ ᠨᠢᠭᠡ ᠬᠥᠮᠦᠨ ᠡᠴᠡ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠨᠢ ᠦᠨᠡᠨ ᠲᠡᠢ᠃
ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ ᠵᠡᠭᠦᠨ ᠣᠷᠣᠨ ᠲᠥᠪ ᠪᠢᠴᠢᠯᠭᠡ ᠶ᠋ᠢᠨ ᠠᠪᠤᠷᠭᠤ ᠭᠡᠮᠡᠨ ᠠᠯᠳᠠᠷᠰᠢᠭᠰᠠᠨ ᠡᠷᠳᠡᠨᠢᠪᠥ᠋ᠬᠡ ᠶ᠋ᠢᠨ ᠲᠢᠭ ᠬᠡᠯᠪᠡᠷᠢ ᠪᠣᠯ ᠠᠳᠠᠯᠢᠪᠢᠰᠢ ᠶ᠋ᠢᠨ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ ᠲᠢᠭ ᠬᠡᠯᠪᠡᠷᠢ ᠶ᠋ᠢᠨ ᠰᠠᠭᠤᠷᠢ ᠳᠡᠭᠡᠷᠡ ᠪᠣᠢ ᠪᠣᠯᠤᠭᠰᠠᠨ ᠯᠠᠭᠱᠠᠨ ᠪᠠᠳᠠᠷᠠᠭᠤᠨ ᠪᠢᠴᠢᠯᠭᠡ ᠪᠣᠯᠤᠨᠠ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡᠲᠡᠨ ᠮᠥᠷᠲᠡᠭᠡᠨ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ ᠣᠨᠣᠯ ᠤ᠋ᠨ ᠰᠤᠳᠤᠯᠭᠠᠲᠠᠨ ᠰᠣᠳᠣ᠂ ᠰ ᠣᠳᠬᠣᠨᠪᠠᠶᠠᠷ ᠤ᠋ᠨ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ 《 ᠠ 》ᠲᠣᠯᠣᠭᠠᠢ ᠶ᠋ᠢᠨ ᠲᠢᠲᠢᠮ ᠦ᠋ᠨ ᠵᠢᠷᠤᠯᠭᠠ ᠪᠣᠯᠤᠨ ᠦᠰᠦᠭ ᠦ᠋ᠨ ᠪᠦᠬᠦ ᠶᠠᠩᠵᠤ ᠬᠡᠯᠪᠡᠷᠢ ᠨᠢ ᠠᠳᠠᠯᠢᠪᠢᠰᠢ ᠶ᠋ᠢᠨ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ ᠶᠠᠩᠵᠤ ᠬᠡᠯᠪᠡᠷᠢ ᠲᠡᠢ ᠦᠨᠳᠦᠰᠦᠨ ᠳ᠋ᠦ᠍ ᠪᠡᠨ ᠠᠳᠠᠯᠢᠬᠠᠨ ᠤᠴᠢᠷ ᠰᠤᠷᠪᠤᠯᠵᠢ ᠨᠢᠭᠡ ᠲᠡᠢ ᠪᠢᠴᠢᠯᠭᠡ ᠶ᠋ᠢᠨ ᠤᠷᠤᠰᠬᠠᠯ ᠳ᠋ᠤ᠌ ᠪᠠᠭᠲᠠᠭᠠᠨ ᠦᠵᠡᠵᠦ ᠪᠣᠯᠤᠨᠠ᠃
ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡᠲᠡᠨ ᠠᠶᠤᠰᠢᠵᠠᠪ᠂ ᠵᠣᠷᠢᠭᠲᠤ᠂ ᠴᠡᠭᠡᠯᠬᠡᠨ᠂ ᠲᠤᠶᠠᠭᠠ ᠵᠡᠷᠭᠡ ᠬᠥᠮᠦᠰ ᠦ᠋ᠨ ᠭᠠᠷ ᠤ᠋ᠨ ᠲᠢᠭ ᠨᠢ ᠴᠦ᠍ ᠡᠨᠡ ᠬᠦ᠌ ᠪᠢᠴᠢᠯᠭᠡ ᠶ᠋ᠢᠨ ᠤᠷᠤᠰᠬᠠᠯ ᠳ᠋ᠤ᠌ ᠪᠠᠭᠲᠠᠨᠠ᠃ ᠠᠳᠠᠯᠢᠪᠢᠰᠢ ᠵᠢᠨ ᠤᠷᠠᠨ ᠪᠢᠴᠢᠯᠭᠡ ᠵᠢᠷᠢᠮ ᠠᠢᠮᠠᠭ ᠤ᠋ᠨ ᠨᠡᠯᠢᠶᠡᠳ ᠣᠯᠠᠨ ᠤᠷᠠᠨ ᠪᠢᠴᠢᠯᠭᠡᠳᠡᠳ ᠪᠣᠯᠤᠨ ᠵᠢᠷᠢᠮ ᠠᠢᠮᠠᠭ ᠠ᠋ᠴᠠ ᠪᠠᠭᠠ ᠪᠤᠰᠤ ᠭᠠᠳᠠᠨᠠ ᠭᠠᠵᠠᠷ ᠤ᠋ᠨ ᠬᠥᠮᠦᠰ ᠦ᠋ᠨ ᠪᠢᠴᠢᠯᠭᠡ ᠶ᠋ᠢᠨ ᠬᠡᠪ ᠨᠠᠮᠪᠠ ᠶ᠋ᠢ ᠨᠥᠯᠥᠭᠡᠯᠡᠵᠦ᠂ ᠲᠡᠳᠡᠨ ᠦ᠌ ᠳᠠᠭᠤᠷᠢᠶᠠᠨ ᠪᠢᠴᠢᠬᠦ ᠦᠯᠢᠭᠡᠷ ᠦᠰᠦᠭ ᠪᠣᠯᠤᠭᠰᠠᠨ ᠨᠢ ᠮᠡᠳᠡᠭᠡᠵᠢ᠃ ᠡᠷᠲᠡ ᠳᠡᠭᠡᠳᠦ ᠦᠶᠡ ᠡᠴᠡ ᠮᠠᠨ ᠤ᠋ ᠥᠪᠥᠷ ᠮᠣᠩᠭᠣᠯ ᠣᠷᠣᠨ ᠤ᠋ ᠡᠯᠡ ᠠᠢᠮᠠᠭ ᠬᠣᠰᠢᠭᠤ ᠰᠢᠶᠠᠨ ᠢ᠋ᠶ᠋ᠠᠷ ᠪᠦᠷ ᠡᠳᠦᠢ ᠲᠡᠳᠦᠢ ᠨᠡᠷᠡ ᠲᠥᠷᠥ ᠲᠡᠢ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡᠲᠡᠨ ᠪᠠᠢᠭᠰᠠᠨ ᠶᠤᠮ᠂ ᠠᠳᠠᠯᠢᠪᠢᠰᠢ ᠶ᠋ᠢᠨ ᠲᠡᠷᠡ ᠦᠶᠡ᠂ ᠨᠡᠩ ᠪᠣᠳᠠᠲᠠᠢ ᠪᠠᠷ ᠬᠡᠯᠡᠪᠡᠯ᠂ ᠴᠢᠩ ᠤᠯᠤᠰ ᠤ᠋ᠨ ᠰᠡᠭᠦᠯᠴᠢ᠂ ᠳᠤᠮᠳᠠᠳᠤ ᠢᠷᠭᠡᠨ ᠤᠯᠤᠰ ᠤ᠋ᠨ ᠪᠦᠬᠦᠢ ᠯᠡ ᠴᠠᠭ ᠦᠶᠡ ᠪᠣᠯᠤᠨ ᠪᠦᠭᠦᠳᠡ ᠨᠠᠢᠷᠠᠮᠳᠠᠬᠤ ᠳᠤᠮᠳᠠᠳᠤ ᠠᠷᠠᠳ ᠤᠯᠤᠰ ᠤ᠋ᠨ ᠡᠬᠢᠨ ᠦ᠌ ᠦᠶᠡ ᠶ᠋ᠢᠨ ᠵᠢᠷᠢᠮ ᠠᠢᠮᠠᠭ ᠤ᠋ᠨ ᠳᠣᠲᠣᠷᠠ ᠬᠠᠮᠤᠭ ᠠᠯᠳᠠᠷ ᠨᠡᠷᠡ ᠲᠡᠢ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡᠲᠡᠨ ᠪᠠᠢᠭᠰᠠᠨ ᠭᠡᠳᠡᠭ ᠢ᠋ ᠲᠡᠦᠬᠡ ᠭᠡᠷᠡᠴᠢᠯᠡᠵᠦ ᠪᠠᠢᠨᠠ᠃ ᠣᠳᠣ ᠶ᠋ᠢᠨ ᠵᠢᠷᠢᠮ ᠠᠢᠮᠠᠭ ᠤ᠋ᠨ ᠨᠡᠯᠢᠶᠡᠳ ᠬᠡᠳᠦᠨ ᠰᠠᠢᠬᠠᠨ ᠪᠢᠴᠢᠳᠡᠭ ᠤᠷᠠᠨ ᠪᠢᠴᠢᠯᠭᠡᠲᠡᠳ ᠦ᠋ᠨ ᠲᠥᠪ ᠪᠢᠴᠢᠯᠭᠡ ᠨᠢ ᠪᠦᠷ ᠠᠳᠠᠯᠢᠪᠢᠰᠢ ᠶ᠋ᠢᠨ ᠭᠠᠷ ᠤ᠋ᠨ ᠲᠢᠭ ᠡᠴᠡ ᠡᠬᠢ ᠨᠢᠭᠡ ᠲᠤᠯᠠ ᠬᠠᠷᠢᠯᠴᠠᠨ ᠳᠠᠭᠤᠷᠢᠶᠠᠵᠤ ᠨᠢᠭᠡ ᠯᠡ ᠰᠤᠷᠪᠤᠯᠵᠢ ᠳ᠋ᠤ᠌ ᠣᠷᠣᠭᠤᠯᠤᠨ ᠦᠵᠡᠵᠦ ᠪᠣᠯᠤᠨᠠ᠃ ᠡᠢᠮᠦ ᠡᠴᠡ ᠲᠡᠷᠡ ᠦᠶᠡ ᠡᠴᠡ ᠣᠳᠣ ᠪᠣᠯᠲᠠᠯᠠ ᠠᠳᠠᠯᠢᠪᠢᠰᠢ ᠪᠣᠯ ᠵᠢᠷᠢᠮ ᠠᠢᠮᠠᠭ ᠤ᠋ᠨ ᠲᠦᠷᠦᠭᠦᠦ ᠤᠷᠠᠨ ᠪᠢᠴᠢᠯᠭᠡᠲᠡᠨ ᠪᠠᠢᠵᠠᠢ ᠭᠡᠰᠡᠨ ᠢ᠋ ᠮᠡᠳᠡᠵᠦ ᠪᠣᠯᠤᠨᠠ ᠃ ᠲᠡᠭᠦᠨ ᠦ᠌ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ ᠨᠥᠯᠥᠭᠡ ᠡᠴᠡ ᠣᠳᠣ ᠴᠤ᠌ ᠰᠠᠯᠵᠤ ᠭᠠᠷᠤᠭᠠᠳᠤᠢ ᠰᠢᠭ᠋ ᠪᠠᠢᠨᠠ᠃
1980 ᠣᠨ ᠳ᠋ᠤ᠌ ᠤᠷᠠᠨ ᠪᠢᠴᠢᠯᠭᠡᠲᠡᠨ ᠪᠠᠢ ᠪᠥᠬᠡ ᠫᠷᠣᠹᠧᠰᠰᠣᠷ ᠡᠷᠳᠡᠨᠢᠪᠥ᠋ᠬᠡ ᠶ᠋ᠢ ᠰᠤᠷᠪᠤᠯᠵᠢᠯᠠᠬᠤ ᠶ᠋ᠢᠨ ᠶᠠᠪᠤᠴᠠ ᠳ᠋ᠤ᠌ ᠪᠠᠨ ᠡᠷᠳᠡᠨᠢᠪᠥ᠋ᠬᠡ ᠡᠴᠡ ᠠᠳᠠᠯᠢᠪᠢᠰᠢ ᠭᠡᠳᠡᠭ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ ᠠᠪᠤᠷᠭᠤ ᠬᠥᠮᠦᠨ ᠪᠠᠢᠬᠤ ᠶ᠋ᠢ ᠣᠯᠵᠤ ᠮᠡᠳᠡᠵᠦ ᠲᠤᠰᠬᠠᠢ ᠰᠤᠷᠪᠤᠯᠵᠢᠯᠠᠭᠠ ᠰᠤᠳᠤᠯᠭᠠ ᠬᠢᠭᠰᠡᠨ ᠪᠠᠢᠨᠠ᠃
ᠲᠠᠪᠤ ᠠᠳᠠᠯᠢᠪᠢᠰᠢ ᠶᠢᠨ ᠭᠠᠪᠢᠶᠠ ᠵᠢᠳᠬᠦᠯ
ᠠᠳᠠᠯᠢᠪᠢᠰᠢ ᠴᠢᠩ ᠤᠯᠤᠰ ᠤᠨ ᠰᠡᠭᠦᠯᠴᠢ ᠶᠢᠨ ᠦᠶᠡ᠂ ᠳᠤᠮᠳᠠᠳᠤ ᠢᠷᠭᠡᠨ ᠤᠯᠤᠰ ᠤᠨ ᠪᠦᠬᠦᠢ ᠯᠠ ᠴᠠᠭ ᠦᠶᠡ ᠪᠣᠯᠣᠨ ᠪᠥᠬᠥᠳᠡ ᠨᠠᠢᠷᠠᠮᠳᠠᠬᠤ ᠳᠤᠮᠳᠠᠳᠤ ᠠᠷᠠᠳ ᠤᠯᠤᠰ ᠤᠨ ᠡᠬᠢᠨ ᠦ ᠦᠶᠡ ᠪᠡᠷ ᠵᠢᠷᠢᠮ ᠠᠢᠮᠠᠭ ᠤᠨ ᠬᠣᠷᠴᠢᠨ ᠵᠡᠭᠦᠨ ᠭᠠᠷᠤᠨ ᠬᠤᠢᠳᠤ ᠬᠣᠰᠢᠭᠤᠨ ᠳᠤ ᠪᠠᠭᠰᠢᠯᠠᠵᠤ ᠪᠠᠢᠭᠰᠠᠨ ᠪᠣᠯᠬᠣᠷ ᠲᠡᠷᠡ ᠭᠠᠵᠠᠷ ᠣᠷᠣᠨ ᠤ ᠪᠠᠨ ᠦᠨᠳᠦᠰᠦᠲᠡᠨ ᠦ ᠰᠤᠷᠭᠠᠨ ᠬᠥᠮᠥᠵᠢᠯ ᠪᠣᠯᠣᠨ ᠰᠣᠶᠣᠯ ᠤᠷᠠᠯᠢᠭ ᠲᠤ ᠪᠠᠯᠠᠷᠠᠰᠢ ᠦᠭᠡᠢ ᠭᠠᠪᠢᠶᠠ ᠵᠢᠳᠬᠦᠯ ᠦᠵᠡᠭᠦᠯᠦᠭᠰᠡᠨ ᠶᠤᠮ᠃
ᠨᠢᠭᠡᠳᠦᠭᠡᠷ ᠲᠦ ᠲᠡᠭᠦᠨ ᠦ ᠨᠠᠢᠷᠠᠭᠤᠯᠤᠨ ᠪᠢᠴᠢᠭᠰᠡᠨ ᠪᠠᠭᠠ ᠰᠤᠷᠭᠠᠭᠤᠯᠢ ᠶᠢᠨ ᠬᠢᠴᠢᠶᠡᠯ ᠦᠨ ᠪᠢᠴᠢᠭ ᠲᠦ ᠲᠡᠷᠡ ᠭᠠᠵᠠᠷ ᠣᠷᠣᠨ ᠤ ᠪᠠᠨ ᠮᠣᠩᠭᠣᠯ ᠪᠠᠭᠠᠴᠤᠳ ᠬᠡᠦᠬᠡᠳ ᠢ ᠶᠣᠰᠣ ᠮᠣᠷᠠᠯ᠂ ᠰᠠᠬᠢᠯᠭᠠ ᠪᠠᠲᠤ᠂ ᠪᠣᠯᠪᠠᠰᠤᠨ ᠰᠠᠢᠬᠠᠨ ᠵᠠᠩ ᠰᠤᠷᠲᠠᠯ ᠪᠣᠯᠣᠨ ᠠᠴᠢ ᠳᠤᠰᠠ ᠲᠠᠢ ᠬᠥᠮᠥᠨ ᠪᠣᠯᠵᠤ ᠬᠥᠮᠥᠵᠢᠭᠳᠡᠬᠦ ᠳᠤᠬᠠᠢ ᠰᠤᠷᠭᠠᠨ ᠬᠥᠮᠥᠵᠢᠯ ᠬᠢᠵᠦ ᠪᠠᠢᠭᠰᠠᠨ ᠨᠢ ᠲᠣᠲᠣᠷᠬᠠᠢ ᠮᠡᠳᠡᠭᠳᠡᠵᠦ ᠪᠠᠢᠨᠠ᠃ ᠠᠳᠠᠯᠢᠪᠢᠰᠢ ᠪᠣᠯ ᠤᠷᠠᠨ ᠪᠢᠴᠢᠯᠭᠡ ᠶᠢ ᠬᠢᠴᠢᠶᠡᠯ ᠬᠥᠮᠥᠵᠢᠯ ᠳᠡᠭᠡᠷᠡ ᠦᠢᠯᠡᠴᠢᠯᠡᠭᠦᠯᠦᠭᠰᠡᠨ ᠬᠠᠮᠤᠭ ᠠᠩᠬᠠᠨ ᠤ ᠬᠥᠮᠥᠨ ᠦ ᠨᠢᠭᠡ᠃ ᠲᠡᠭᠦᠨ ᠦ ᠨᠠᠢᠢᠷᠠᠭᠤᠯᠤᠨ ᠪᠢᠴᠢᠭᠰᠡᠨ ᠬᠢᠴᠢᠶᠡᠯ ᠦᠨ ᠪᠢᠴᠢᠭ ᠦᠨ ᠠᠭᠤᠯᠭᠠ ᠨᠢ ᠡᠷᠡᠭᠦᠯ ᠴᠢᠭᠢᠷᠠᠭ ᠮᠥᠷᠲᠡᠭᠡᠨ ᠦᠰᠦᠨ ᠪᠢᠷ ᠢᠶᠡᠷ ᠪᠢᠴᠢᠭᠰᠡᠨ ᠤᠴᠢᠷ ᠭᠤᠸᠠ ᠰᠠᠢᠬᠠᠨ ᠤᠷᠠᠯᠢᠭ ᠢᠶᠠᠷ ᠪᠠᠭᠠᠴᠤᠤᠯ ᠬᠡᠦᠬᠡᠳ ᠢ ᠬᠥᠮᠥᠵᠢᠭᠦᠯᠵᠦ ᠪᠠᠢᠭᠰᠠᠨ ᠨᠢ ᠮᠠᠰᠢ ᠡᠷᠬᠢᠮ᠃
ᠬᠣᠶᠠᠳᠤᠭᠠᠷ ᠲᠤ ᠣᠬᠣᠷ ᠠᠪᠰᠠᠷᠬᠠᠨ ᠶᠣᠭᠲᠠ ᠦᠯᠢᠭᠡᠷ ᠦᠳ ᠢ ᠪᠢᠴᠢᠭᠡᠳ ᠲᠡᠭᠦᠨ ᠢᠶᠡᠨ ᠲᠠᠢᠯᠪᠤᠷᠢᠯᠠᠵᠤ ᠥᠭᠬᠦ ᠪᠡᠷ ᠳᠠᠮᠵᠢᠨ ᠪᠠᠭᠠ ᠰᠤᠷᠭᠠᠭᠤᠯᠢ ᠶᠢᠨ ᠬᠡᠦᠬᠡᠳ ᠲᠦ ᠮᠣᠷᠠᠯ ᠰᠤᠷᠲᠠᠯ ᠤᠨ ᠬᠥᠮᠥᠵᠢᠯ ᠬᠢᠵᠦ᠂ ᠵᠥᠪ ᠪᠢᠴᠢᠯᠭᠡ ᠶᠢᠨ ᠲᠠᠯᠠ ᠪᠠᠷ ᠠᠩᠬᠠᠷᠤᠭᠤᠯᠵᠤ᠂ ᠥᠭᠦᠯᠡᠪᠦᠷᠢ ᠵᠣᠬᠢᠶᠠᠬᠤ ᠴᠢᠳᠠᠪᠤᠷᠢ ᠶᠢ ᠨᠢ ᠳᠡᠭᠡᠭᠰᠢᠯᠡᠭᠦᠯᠵᠦ᠂ ᠣᠬᠣᠷ ᠦᠯᠢᠭᠡᠷ ᠦᠨ ᠡᠷᠡᠭᠦᠯ ᠴᠢᠭᠢᠷᠠᠭ ᠤᠳᠬᠠ ᠠᠭᠤᠯᠭᠠ ᠪᠠᠷ ᠰᠣᠷᠤᠭᠴᠢᠳ ᠤᠨ ᠰᠡᠳᠬᠢᠬᠦᠢ ᠶᠢ ᠵᠥᠪ ᠬᠥᠲᠥᠯᠵᠦ᠂ ᠤᠬᠠᠭᠠᠨ ᠰᠠᠨᠠᠭᠠ ᠶᠢ ᠨᠢ ᠰᠠᠢᠵᠢᠷᠠᠭᠤᠯᠬᠤ ᠬᠥᠮᠥᠵᠢᠯ ᠢ ᠬᠢᠵᠦ ᠪᠠᠢᠭᠰᠠᠨ ᠨᠢ ᠮᠡᠳᠡᠭᠳᠡᠵᠦ ᠪᠠᠢᠨᠠ᠃
ᠭᠤᠷᠪᠠᠳᠤᠭᠠᠷ ᠲᠤ᠌ ᠲᠡᠭᠦᠨ ᠦ᠌ ᠦᠰᠦᠨ ᠪᠢᠷ ᠦ᠋ᠨ ᠦᠰᠦᠭ ᠨᠢ ᠰᠠᠢᠬᠠᠨ ᠪᠣᠯᠬᠣᠷ ᠪᠢᠳᠡ ᠪᠦᠬᠦᠨ ᠳ᠋ᠦ᠍ ᠰᠤᠳᠤᠯᠵᠤ ᠰᠢᠨᠵᠢᠬᠦ ᠵᠢᠷᠤᠭᠠᠰᠤᠨ ᠤ᠋ ᠤᠷᠠᠯᠢᠭ ᠤ᠋ᠨ ᠥᠪ ᠢ᠋ ᠦᠯᠡᠳᠡᠭᠡᠵᠦ ᠥᠭᠭᠦᠭᠰᠡᠨ ᠪᠠᠢᠨᠠ᠃ ᠵᠢᠷᠢᠮ ᠠᠢᠮᠠᠭ ᠤ᠋ᠨ ᠪᠠᠭᠠ ᠪᠤᠰᠤ ᠶ᠋ᠢᠨ ᠬᠥᠮᠦᠰ ᠪᠦᠷ ᠡᠨᠡ ᠬᠥᠮᠦᠨ ᠦ᠌ ᠭᠠᠷ ᠤ᠋ᠨ ᠲᠢᠭ ᠡᠴᠡ ᠳᠠᠭᠠᠨ ᠰᠤᠷᠤᠯᠴᠠᠵᠤ᠂ ᠳᠠᠭᠤᠷᠢᠶᠠᠨ ᠪᠢᠴᠢᠭᠰᠡᠨ ᠢ᠋ᠶ᠋ᠡᠷ ᠦᠵᠡᠬᠦ ᠳ᠋ᠦ᠍ ᠠᠳᠠᠯᠢᠪᠢᠰᠢ ᠶ᠋ᠢᠨ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ ᠡᠳᠡᠭᠡᠷ ᠬᠡᠳᠦᠨ ᠵᠢᠭᠠᠬᠤ ᠪᠢᠴᠢᠭ ᠢ᠋ᠶ᠋ᠡᠷ ᠵᠣᠭᠰᠣᠬᠤ ᠪᠢᠰᠢ ᠂ ᠥᠭᠡᠷᠡ ᠵᠦᠢᠯ ᠦ᠋ᠨ ᠪᠢᠴᠢᠯᠭᠡ ᠪᠠᠰᠠ ᠪᠢᠰᠢᠭᠦᠢ ᠪᠠᠢᠬᠤ ᠮᠠᠭᠠᠳ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃
ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ ᠡᠷᠳᠡᠮᠲᠡᠨ ᠪᠠᠢ ᠪᠥᠬᠡ ᠶ᠋ᠢᠨ ᠰᠤᠳᠤᠯᠵᠤ ᠣᠢᠯᠠᠭᠠᠭᠰᠠᠨ ᠢ᠋ᠶ᠋ᠠᠷ ᠠᠳᠠᠯᠢᠪᠢᠰᠢ ᠶ᠋ᠢᠨ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ ᠪᠣᠯ ᠵᠢᠷᠢᠮ ᠦ᠋ᠨ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ᠂ ᠵᠢᠷᠢᠮ ᠦ᠋ᠨ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ ᠪᠣᠯ ᠳᠠᠷᠤᠢ ᠠᠳᠠᠯᠢᠪᠢᠰᠢ ᠶ᠋ᠢᠨ ᠤᠷᠠᠨ ᠪᠢᠴᠢᠯᠭᠡ ᠭᠡᠰᠡᠨ ᠳ᠋ᠦᠩᠨᠡᠯᠲᠡ ᠶ᠋ᠢ ᠣᠯᠵᠠᠢ᠃ ᠠᠳᠠᠯᠢᠪᠢᠰᠢ ᠪᠣᠯ ᠵᠢᠷᠢᠮ ᠦ᠋ᠨ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡᠳᠡᠳ ᠦ᠋ᠨ ᠲᠥᠯᠥᠭᠡᠯᠡᠭᠴᠢ ᠮᠥᠨ᠃ ᠳᠡᠭᠡᠷᠡ ᠵᠠᠭᠤᠨ ᠤ᠋ ᠨᠠᠶᠠᠭᠠᠳ ᠣᠨ ᠤ᠋ ᠦᠶᠡ ᠶ᠋ᠢᠨ 《 ᠨᠠᠬᠢᠶᠠ 》 ᠰᠡᠳᠬᠦᠯ ᠢ᠋ ᠦᠰᠦᠨ ᠪᠢᠷ ᠢ᠋ᠶ᠋ᠡᠷ ᠰᠡᠢᠷᠡᠭᠦᠯᠦᠨ ᠪᠢᠴᠢᠵᠦ ᠠᠯᠳᠠᠷ ᠨᠡᠷᠡ ᠮᠠᠨᠳᠤᠵᠤ ᠪᠠᠢᠭᠰᠠᠨ ᠲᠣᠮᠣ ᠤᠷᠠᠨ ᠪᠢᠴᠢᠯᠭᠡᠲᠡᠨ ᠡᠷᠳᠡᠨᠢᠪᠥ᠋ᠬᠡ ᠪᠠᠭᠰᠢ ᠶ᠋ᠢᠨ ᠪᠢᠰᠢᠷᠡᠨ ᠬᠦᠨᠳᠦᠳᠬᠡᠳᠡᠭ ᠮᠥᠷᠲᠡᠭᠡᠨ ᠳᠠᠭᠠᠨ ᠰᠤᠷᠤᠯᠴᠠᠵᠤ ᠪᠠᠢᠭᠰᠠᠨ ᠬᠥᠮᠦᠨ ᠪᠣᠯ ᠠᠳᠠᠯᠢᠪᠢᠰᠢ ᠪᠠᠢᠭᠰᠠᠨ ᠭᠡᠵᠦ ᠡᠷᠳᠡᠨᠢᠪᠥ᠋ᠬᠡ ᠪᠠᠭᠰᠢ ᠥᠪᠡᠷ ᠢ᠋ᠶ᠋ᠡᠨ ᠶᠠᠷᠢᠵᠤ ᠪᠠᠢᠯᠠ᠃ ᠠᠳᠠᠯᠢᠪᠢᠰᠢ ᠵᠥᠪᠬᠡᠨ ᠵᠡᠭᠦᠨ ᠣᠷᠣᠨ ᠤ᠋ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ ᠯᠡ ᠪᠢᠰᠢ ᠪᠦᠬᠦᠢᠯᠡ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ ᠬᠥᠭᠵᠢᠯ ᠦ᠋ᠨ ᠲᠡᠦᠬᠡᠨ ᠳ᠋ᠦ᠍ ᠠᠯᠳᠠᠷ ᠨᠡᠷᠡ ᠪᠡᠨ ᠦᠯᠡᠳᠡᠭᠡᠵᠦ᠂ ᠠᠯᠲᠠᠨ ᠦᠰᠦᠭ ᠢ᠋ᠶ᠋ᠡᠨ ᠦᠯᠡᠳᠡᠭᠡᠵᠦ᠂ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ ᠭᠤᠸᠠ ᠰᠠᠢᠬᠠᠨ ᠢ᠋ ᠭᠠᠢᠬᠠᠭᠤᠯᠤᠭᠰᠠᠨ ᠠᠯᠳᠠᠷᠲᠤ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡᠲᠡᠨ ᠮᠥᠨ᠃ ᠲᠡᠭᠦᠨ ᠦ᠌ ᠮᠣᠩᠭᠣᠯ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ ᠦᠢᠯᠡᠰ ᠲᠦ᠍ ᠦᠵᠡᠭᠦᠯᠦᠭᠰᠡᠨ ᠭᠠᠪᠢᠶᠠ ᠵᠢᠳᠬᠦᠯ ᠢ᠋ ᠨᠢ ᠬᠣᠢᠴᠢ ᠪᠣᠯᠤᠭᠰᠠᠨ ᠪᠢᠳᠡ ᠨᠠᠷ ᠤᠷᠠᠨ ᠪᠢᠴᠢᠯᠭᠡ ᠶ᠋ᠢᠨ ᠱᠠᠰᠲᠢᠷ ᠲᠡᠦᠬᠡᠨ ᠳ᠋ᠦ᠍ ᠲᠡᠮᠳᠡᠭᠯᠡᠨ ᠦᠯᠡᠳᠡᠭᠡᠵᠦ ᠤᠬᠠᠭᠤᠯᠤᠨ ᠳᠡᠯᠭᠡᠷᠡᠭᠦᠯᠬᠦ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭᠠ ᠲᠠᠢ᠃