ᠬᠠᠨ ᠴᠡᠩᠬᠡᠯ (ᠲᠤᠤᠯᠢ ) - 3 Хан цэнгэл (туули ) - 3
441ᠬᠠᠨ ᠴᠡᠩᠬᠡᠯ (ᠲᠤᠤᠯᠢ ) - 3
ᠲᠡᠭᠡᠬᠦ ᠳ᠋ᠦ᠍ ᠨᠢᠭᠡᠨ ᠡᠳᠦᠷ ᠪᠣᠯᠪᠠ ᠭᠡᠨᠡ
ᠪᠠᠯᠮᠠᠭᠡᠷᠡᠯ ᠬᠠᠭᠠᠨ ᠠᠢᠯᠠᠳᠪᠠ ᠭᠡᠨᠡ
《 ᠨᠠᠳᠠ ᠪᠣᠯᠬᠤᠯᠠ ᠨᠢ
ᠭᠠᠭᠴᠠ ᠪᠠᠭᠠ ( ᠥᠬᠢᠨ ) ᠪᠠᠢᠳᠠᠭ ᠪᠢᠯᠡ
ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠠ᠋ᠴᠠ
ᠪᠢ ᠡᠨᠡ ᠭᠡᠵᠦ ᠵᠢᠰᠦᠯᠡᠬᠦ ᠦᠭᠡᠢ
ᠠᠯᠪᠠᠲᠤ ᠬᠣᠰᠢᠭᠤ ᠠ᠋ᠴᠠ ᠪᠠᠨ
ᠡᠨᠡ ᠭᠡᠵᠦ ᠪᠢ ᠵᠢᠰᠦᠯᠡᠬᠦ ᠦᠭᠡᠢ !
ᠮᠢᠨᠦ ᠪᠠᠭᠠ ( ᠥᠬᠢᠨ )
ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠳᠤᠷᠠ ᠪᠠᠷ ᠠᠪᠤᠨᠠ 》
ᠭᠡᠵᠦ ᠬᠡᠯᠡᠪᠡ ᠭᠡᠨᠡ ᠃
ᠲᠡᠭᠡᠬᠦ ᠳ᠋ᠦ᠍ ᠨᠠᠷᠠᠨᠽᠠᠨᠳᠠᠨ ᠠᠪᠠᠬᠠᠢ
《 ᠪᠢ ᠮᠠᠯ ᠳᠣᠲᠣᠷᠠ ᠠ᠋ᠴᠠ ᠪᠠᠨ
ᠲᠠᠩᠳᠠ ᠦᠷᠡ ᠲᠥᠯ ᠢ᠋ ᠨᠢ ᠠᠪᠤᠨᠠ
ᠠᠯᠪᠠᠲᠤ ᠬᠣᠰᠢᠭᠤ ᠳᠣᠲᠣᠷᠠ ᠠ᠋ᠴᠠ
ᠲᠠᠩᠳᠠ ᠦᠷᠡᠨ ᠬᠡᠦᠬᠡᠦᠰ ( ᠬᠡᠦᠬᠡᠳ ) ᠢ᠋ ᠨᠢ ᠠᠪᠤᠨᠠ ! 》
ᠭᠡᠵᠦ ᠬᠡᠯᠡᠪᠡ ᠭᠡᠨᠡ ᠃
ᠦᠷᠡᠨ ᠬᠡᠦᠬᠡᠦᠰ ᠨᠢ ᠠᠪᠤᠭᠠᠳ ᠶᠠᠪᠤᠬᠤ ᠳ᠋ᠤ᠌
ᠡᠬᠡ ᠠᠪᠤ ᠨᠢ ᠤᠬᠢᠯᠠᠭᠠᠳ ᠴᠤᠤᠭᠢᠭᠠᠳ ( ᠱᠤᠤᠭᠢᠯᠳᠤᠭᠠᠳ )
ᠳᠠᠭᠠᠭᠠᠳ ᠡᠰᠡ ᠪᠣᠯᠪᠠ ᠭᠡᠨᠡ ᠃
ᠦᠷᠡ ᠲᠥᠯ ᠢ᠋ ᠨᠢ ᠠᠪᠤᠭᠠᠳ ᠶᠠᠪᠤᠬᠤ ᠳ᠋ᠤ᠌
ᠡᠬᠡ ᠨᠢ ᠮᠠᠢᠯᠠᠭᠠᠳ ᠴᠤᠤᠭᠢᠭᠠᠳ(ᠱᠤᠤᠭᠢᠯᠳᠤᠭᠠᠳ )
ᠳᠠᠭᠠᠭᠠᠳ ᠡᠰᠡ ᠪᠣᠯᠪᠠ ᠭᠡᠨᠡ ᠃
ᠲᠡᠭᠡᠬᠦ ᠳ᠋ᠦ᠍ ᠪᠠᠯᠮᠠᠭᠡᠷᠡᠯ ᠬᠠᠭᠠᠨ ᠠᠢᠯᠠᠳᠪᠠ ᠭᠡᠨᠡ ᠃
《 ᠮᠠᠨᠠ ᠬᠣᠶᠠᠷ ᠠᠳᠠ
ᠬᠣᠶᠠᠷᠬᠠᠨ ᠬᠥᠮᠦᠨ ᠶᠠᠭᠤ ᠬᠢᠵᠦ ᠰᠠᠭᠤᠬᠤ ᠪᠣᠢ
ᠠᠯᠪᠠᠲᠤ ᠬᠣᠰᠢᠭᠤ ᠪᠣᠯᠤᠭᠠᠳ
ᠠᠬᠠ ᠳᠠᠷᠤᠢ ( ᠳᠡᠭᠦᠦ ) ᠪᠣᠯᠤᠭᠠᠳ
ᠴᠣᠭ ᠶᠠᠪᠤᠵᠢᠨ ( ᠶᠠᠪᠤᠵᠤ ) ᠪᠠᠢᠨᠠ
ᠡᠨᠡ ᠶᠠᠩᠵᠤ ᠪᠠᠷ ᠨᠢ ( ᠪᠦᠭᠦᠳᠡ ᠶ᠋ᠢ ᠨᠢ ) ᠨᠡᠭᠦᠯᠭᠡᠭᠡᠳ ᠶᠠᠪᠤ 》
ᠭᠡᠵᠦ ᠠᠢᠯᠠᠳᠪᠠ ᠭᠡᠨᠡ ᠃
ᠲᠡᠭᠡᠬᠦ ᠳ᠋ᠦ᠍ ᠠᠯᠪᠠᠲᠤ ᠬᠣᠰᠢᠭᠤ ᠪᠠᠷ ᠨᠢ
ᠨᠡᠭᠦᠯᠭᠡᠭᠡᠳ ᠶᠠᠪᠤᠬᠤ ᠪᠣᠯᠪᠠ ᠭᠡᠨᠡ ᠃
ᠲᠡᠭᠡᠭᠡᠳ ᠨᠡᠭᠦᠭᠡᠳ ᠶᠠᠪᠤᠭᠰᠠᠨ ᠪᠠᠢᠪᠠ ᠭᠡᠨᠡ ᠃
ᠲᠡᠭᠡᠬᠦ ᠳ᠋ᠦ᠍ ᠨᠢᠭᠡᠨ ᠡᠳᠦᠷ
ᠬᠠᠨ ᠴᠡᠩᠭᠡᠯ ᠬᠥᠪᠡᠭᠦᠨ ᠬᠡᠯᠡᠪᠡ ᠭᠡᠨᠡ
《ᠠᠬᠠ ᠮᠢᠨᠢ ᠂ ᠠᠬᠠ ᠮᠢᠨᠢ !
ᠮᠠᠨᠠ ᠬᠣᠶᠠᠷ ᠲᠤ᠌ ᠨᠢᠭᠡ
ᠵᠢᠭᠠᠯᠬᠠᠨ ( ᠵᠢᠭᠠᠬᠠᠨ ) ᠵᠥᠪᠴᠢ ( ᠵᠥᠪᠯᠡᠯᠭᠡ ) ᠪᠠᠢᠨᠠ 》
ᠭᠡᠵᠦ ᠬᠡᠯᠡᠪᠡ ᠭᠡᠨᠡ
《 ᠶᠠᠮᠠᠷ ᠵᠥᠪᠴᠢ ( ᠵᠥᠪᠯᠡᠯᠭᠡ ) ᠪᠠᠢᠨᠠ ?》
ᠭᠡᠵᠦ ᠬᠡᠯᠡᠪᠡ ᠭᠡᠨᠡ
《 ᠠ ᠂ ᠪᠢ ᠮᠥᠩᠭᠥᠨ ᠡᠭᠡᠮᠦᠭ ᠢ᠋ᠶ᠋ᠡᠨ ᠰᠢᠪᠰᠢᠵᠦ
ᠲᠠᠨ ᠳ᠋ᠤ᠌ ᠥᠭᠭᠦᠶᠡ ᠲᠠ ᠵᠡᠭᠦ !
ᠲᠠ ᠮᠥᠩᠭᠥᠨ ᠡᠭᠡᠮᠦᠭ ᠢ᠋ᠶ᠋ᠡᠨ ᠰᠢᠪᠰᠢᠵᠦ
ᠨᠠᠳᠠ ᠥᠭ ᠪᠢ ᠵᠡᠭᠦᠶᠡ !
ᠮᠢᠨᠦ ᠡᠭᠡᠮᠦᠭ ᠵᠢᠪᠡᠷᠡᠭᠰᠡᠨ ᠴᠠᠭ ᠲᠤ᠌
ᠨᠠᠳᠠ ᠪᠠᠷᠴᠢᠳ ᠲᠠᠢ ᠪᠠᠢᠬᠤ ᠪᠢᠰᠢᠦ
ᠲᠠᠨ ᠤ᠋ ᠡᠭᠡᠮᠦᠭ ᠵᠢᠪᠡᠷᠡᠭᠰᠡᠨ ᠴᠠᠭ ᠲᠤ᠌
ᠲᠠᠨ ᠳ᠋ᠤ᠌ ᠪᠠᠷᠴᠢᠳ ᠲᠠᠢ ᠪᠠᠢᠬᠤ ᠪᠢᠰᠢᠦ
ᠬᠣᠶᠠᠭᠤᠯᠠ ᠨᠢᠭᠡ ᠨᠢᠭᠡ ᠪᠡᠨ ᠢᠭᠢᠵᠦ (ᠢᠩᠭᠢᠵᠦ )ᠮᠡᠳᠡᠶᠡ
ᠪᠢ ᠲᠦᠷᠦᠭᠦᠯᠡᠨ
ᠨᠤᠲᠤᠭ ᠤᠰᠤᠨ ᠳ᠋ᠤ᠌ ᠪᠠᠨ ᠬᠦᠷᠴᠦ
ᠬᠤᠷᠢᠮ ᠨᠠᠢᠷ ᠢ᠋ᠶ᠋ᠠᠨ ᠲᠠᠯᠪᠢᠵᠢᠨ ( ᠲᠠᠯᠪᠢᠵᠤ ) ᠪᠠᠢᠶᠠ
ᠠᠬᠠ ᠮᠢᠨᠢ ᠠᠷᠤ ( ᠬᠣᠢᠨᠠ ) ᠠ᠋ᠴᠠ
ᠡᠨᠡ ᠡᠵᠢ ᠠᠪᠤ ᠶ᠋ᠢᠨ ᠠᠯᠪᠠᠲᠤ ᠬᠣᠰᠢᠭᠤ ᠶ᠋ᠢ
ᠨᠡᠭᠦᠯᠭᠡᠭᠡᠳ ᠢᠷᠡ 》 ᠭᠡᠵᠦ ᠬᠡᠯᠡᠪᠡ ᠭᠡᠨᠡ
《 ᠠ ᠂ ᠵᠠ 》 ᠭᠡᠰᠡᠨ ᠪᠠᠢᠪᠠ ᠭᠡᠨᠡ
ᠬᠣᠶᠠᠭᠤᠯᠠ ᠪᠠᠨ ᠬᠣᠶᠠᠷ ᠮᠥᠩᠭᠥᠨ ᠡᠭᠡᠮᠦᠭ ᠢ᠋ᠶ᠋ᠡᠨ
ᠰᠢᠪᠰᠢᠵᠦ ᠰᠣᠯᠢᠵᠤ ᠵᠡᠭᠦᠪᠡ ᠭᠡᠨᠡ᠃
ᠲᠡᠭᠡᠵᠢᠨ ( ᠲᠡᠭᠡᠵᠦ ) ᠠᠪᠤᠭᠠᠳ
ᠬᠠᠨ ᠴᠡᠩᠭᠡᠯ ᠬᠥᠪᠡᠭᠦᠨ
ᠲᠦᠷᠦᠭᠦᠯᠡᠭᠡᠳ ᠭᠦᠶᠦᠯᠭᠡᠭᠡᠳ ( ᠳᠠᠪᠬᠢᠯᠤᠭᠠᠳ ) ᠶᠠᠪᠤᠪᠠ ᠭᠡᠨᠡ
ᠵᠢᠯ ᠦ᠋ᠨ ᠭᠠᠵᠠᠷ ᠢ᠋ ᠰᠠᠷᠠ ᠪᠠᠷ ᠠᠪᠤᠪᠠ ᠭᠡᠨᠡ
ᠰᠠᠷᠠ ᠶ᠋ᠢᠨ ᠭᠠᠵᠠᠷ ᠢ᠋ ᠡᠳᠦᠷ ᠢ᠋ᠶ᠋ᠡᠷ ᠠᠪᠤᠪᠠ ᠭᠡᠨᠡ
ᠡᠳᠦᠷ ᠦ᠋ᠨ ᠭᠠᠵᠠᠷ ᠢ᠋ ᠴᠠᠭ ᠢ᠋ᠶ᠋ᠠᠷ ᠠᠪᠤᠪᠠ ᠭᠡᠨᠡ ᠃
ᠲᠡᠭᠡᠭᠡᠳ ᠭᠦᠶᠦᠯᠭᠡᠭᠡᠳ ( ᠳᠠᠪᠬᠢᠯᠤᠭᠠᠳ ) ᠶᠠᠪᠤᠭᠠᠳ
ᠨᠤᠲᠤᠭ ᠲᠤ᠌ ᠪᠠᠨ ᠢᠷᠡᠪᠡ ᠭᠡᠨᠡ
ᠡᠪᠦᠯ ᠦ᠋ᠨ ᠢ᠋ᠶ᠋ᠡᠨ
ᠡᠪᠦᠯᠵᠢᠩ ( ᠡᠪᠦᠯᠵᠢᠶᠡ ) ᠳ᠋ᠦ᠍ ᠢᠷᠡᠪᠡ ᠭᠡᠨᠡ
ᠡᠪᠡᠰᠦᠨ ᠳᠥᠷᠥᠭᠡ ᠰᠢᠭᠦᠷᠡᠭᠡᠳ
ᠪᠠᠢᠪᠠ ᠭᠡᠨᠡ
ᠨᠠᠮᠤᠷ ᠤ᠋ᠨ ᠢ᠋ᠶ᠋ᠠᠨ
ᠨᠠᠮᠤᠷᠵᠢᠩ ( ᠨᠠᠮᠤᠷᠵᠢᠶᠠ ) ᠳ᠋ᠤ᠌ ᠢᠷᠡᠪᠡ ᠭᠡᠨᠡ
ᠡᠪᠡᠰᠦᠨ ᠳᠥᠷᠥᠭᠡ ᠰᠢᠭᠦᠷᠡᠭᠡᠳ
ᠪᠠᠢᠪᠠ ᠭᠡᠨᠡ ᠃
ᠦᠨᠡᠭᠡᠨ ᠦᠨᠦᠷᠬᠡᠬᠦ ᠶᠠᠭᠤᠮᠠ ᠦᠭᠡᠢ
ᠬᠠᠷᠠᠭᠠᠳ ᠬᠠᠷᠠᠬᠤ ᠶᠠᠭᠤᠮᠠ ᠦᠭᠡᠢ
ᠪᠠᠮᠪᠠᠯᠠᠢ ᠴᠠᠭᠠᠨ ᠥᠷᠭᠥᠭᠡ ᠶ᠋ᠢᠨ
ᠡᠷᠦᠬᠡ ( ᠲᠣᠭᠣᠨᠣ ) ᠪᠠᠷ ᠨᠢ
ᠡᠪᠡᠰᠦᠨ ᠴᠤᠬᠤᠢᠭᠰᠠᠨ ᠪᠠᠢᠪᠠ ᠭᠡᠨᠡ
ᠨᠢᠭᠡᠨ ᠲᠠᠨᠢᠳᠠᠭ ᠮᠡᠳᠡᠳᠡᠭ ᠦᠭᠡᠢ
ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ
ᠬᠤᠯᠤᠰᠤᠨ ᠤ᠋ ᠣᠩᠭᠢ (ᠦᠨᠳᠦᠰᠦ ) ᠶ᠋ᠢ ᠮᠠᠯᠲᠠᠵᠤ
ᠢᠳᠡᠵᠢᠨ( ᠢᠳᠡᠵᠦ ) ᠢᠷᠭᠢ ( ᠢᠷᠣᠭᠠᠯ ) ᠳ᠋ᠤᠨᠢ
ᠰᠠᠭᠤᠵᠢᠨ ( ᠰᠠᠭᠤᠵᠤ )ᠪᠠᠢᠪᠠ ᠭᠡᠨᠡ ᠃
《 ᠦ ᠂ ᠡᠨᠡ ᠡᠵᠢ ᠠᠪᠤ
ᠠᠯᠪᠠᠲᠤ ᠬᠤᠰᠢᠭᠤᠨ ᠬᠠᠮᠢᠭᠠ ᠶᠠᠪᠤᠯᠠ ? 》
ᠭᠡᠵᠦ ᠰᠤᠷᠠᠪᠠ ᠭᠡᠨᠡ
《 ᠠ ᠂ ᠮᠠᠭᠤᠰ ᠣᠯᠵᠠᠯᠠᠭᠠᠳ
ᠶᠠᠪᠤᠵᠢᠨ ( ᠶᠠᠪᠤᠵᠤ ) ᠡᠦᠲᠦᠯᠡ
ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠲᠦ᠍
ᠠᠯᠪᠠᠲᠤ ᠳᠣᠲᠣᠷᠠ ᠠ᠋ᠴᠠ
ᠠᠷᠭᠠ ᠪᠠᠨ ᠪᠠᠷᠠᠭᠰᠠᠨ( ᠠᠷᠭᠠ ᠦᠭᠡᠢ )
ᠮᠠᠨᠠ ᠬᠣᠶᠠᠷ ᠢ᠋
ᠬᠠᠶᠠᠵᠢᠨ ( ᠬᠠᠶᠠᠵᠤ ) ᠣᠷᠬᠢᠭᠰᠠᠨ
ᠮᠠᠨᠠ ᠬᠣᠶᠠᠷ ᠪᠣᠯᠬᠤᠯᠠ ᠨᠢ
ᠲᠠᠨᠤᠰ ᠤ᠋ᠨ ᠡᠵᠢ ᠠᠪᠤ ᠶ᠋ᠢᠨ ᠥᠷᠭᠥᠭᠡ ᠳ᠋ᠦ᠍
ᠬᠦᠢᠲᠡᠨ ᠳ᠋ᠦ᠍ ᠨᠢ ᠨᠥᠮᠥᠷᠢᠯᠡᠵᠦ
ᠬᠤᠯᠤᠰᠤᠨ ᠣᠩᠭᠢ ( ᠦᠨᠳᠦᠰᠦ ) ᠶ᠋ᠢ ᠮᠠᠯᠲᠠᠵᠤ
ᠢᠳᠡᠵᠦ ᠰᠠᠭᠤᠵᠢᠨ ( ᠰᠠᠭᠤᠵᠤ ) ᠪᠠᠢᠨᠠ 》
ᠭᠡᠵᠦ ᠬᠡᠯᠡᠪᠡ ᠭᠡᠨᠡ ᠃
ᠴᠠᠭᠠᠷᠠ ( ᠴᠠᠰᠢ ᠪᠠᠨ ) ᠭᠦᠶᠦᠯᠭᠡᠳ
ᠶᠠᠪᠤᠭᠰᠠᠨ ᠪᠠᠢᠪᠠ ᠭᠡᠨᠡ ᠃
ᠨᠢᠭᠡ ᠪᠤᠬᠠ
ᠬᠠᠷᠪᠤᠵᠤ ᠠᠪᠴᠢᠨ( ᠠᠪᠴᠤ ) ᠢᠷᠡᠵᠦ
ᠥᠭᠪᠡ ᠭᠡᠨᠡ
《 ᠵᠠ᠂ ᠠᠪᠤᠭᠠᠢ ᠮᠢᠨᠢ ᠂ ᠡᠵᠢ ᠮᠢᠨᠢ!
ᠡᠨᠡ ᠮᠢᠬᠠᠨ ᠠ᠋ᠴᠠ
ᠰᠠᠢᠨ ᠴᠢᠨᠠᠵᠢᠨ( ᠴᠢᠨᠠᠵᠤ ) ᠢᠳᠡᠭᠡᠳ
ᠡᠨᠡ ᠭᠡᠷ ᠥᠷᠭᠥᠭᠡ ᠶ᠋ᠢ ᠴᠡᠪᠡᠭᠦᠯᠵᠢᠨ ( ᠴᠡᠪᠡᠷᠯᠡᠵᠦ ) ᠪᠠᠢ!
ᠲᠡᠭᠡᠬᠦ ᠳ᠋ᠦ᠍ ᠠᠷᠤ ᠠ᠋ᠴᠠ
ᠪᠠᠯᠮᠠᠭᠡᠷᠡᠯ ᠬᠠᠭᠠᠨ ᠤ᠋ ᠭᠢᠰ ( ᠬᠢᠨ ) ᠢ᠋
ᠨᠡᠭᠦᠯᠭᠡᠭᠡᠳ ᠢᠷᠡᠵᠢᠨ ( ᠢᠷᠡᠵᠦ ) ᠪᠣᠢ
ᠲᠠᠨᠤᠰ ( ᠲᠠᠨᠠᠷ )ᠲᠠᠨᠢᠬᠤ ᠦᠭᠡᠢ
ᠮᠢᠨᠦ ᠠᠬᠠ
ᠮᠠᠳ ᠤᠯᠠᠭᠠᠨ ᠬᠥᠪᠡᠭᠦᠨ ᠭᠡᠵᠦ
ᠨᠢᠭᠡ ᠬᠥᠮᠦᠨ ᠢᠷᠡᠬᠦ
ᠨᠠᠮᠠ ᠶ᠋ᠢ ᠰᠤᠷᠠᠬᠤ ᠳ᠋ᠤ᠌ ᠡᠷᠡᠭᠡ ᠦᠭᠡᠢ ( ᠮᠠᠭᠠᠳ ᠦᠭᠡᠢ )
ᠲᠡᠭᠡᠵᠢᠨ ᠭᠡᠯᠡ ᠨᠢ ( ᠲᠡᠭᠡᠪᠡᠯ ) ᠨᠠᠮᠠ ᠶ᠋ᠢ
ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠲᠦ᠍
ᠥᠰᠢᠶᠡ ᠨᠡᠬᠡᠬᠦ ᠪᠡᠷ ᠶᠠᠪᠤᠯᠠ ᠭᠡᠵᠦ ᠬᠡᠯᠡ! 》
ᠭᠡᠵᠦ ᠵᠠᠬᠢᠭᠰᠠᠨ ᠪᠠᠢᠪᠠ ᠭᠡᠨᠡ ᠃
ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠶᠡᠬᠡ ᠪᠠᠶᠠᠷ ᠲᠠᠢ
ᠲᠡᠷᠡ ᠮᠢᠬᠠᠨ ᠠ᠋ᠴᠠ ᠴᠢᠨᠠᠵᠢᠨ ( ᠴᠢᠨᠠᠵᠤ ) ᠢᠳᠡᠵᠦ
ᠭᠡᠷ ᠥᠷᠥᠭᠡ ᠶ᠋ᠢ ᠨᠢ
ᠴᠡᠪᠡᠭᠦᠯᠵᠢᠨ ( ᠴᠡᠪᠡᠷᠯᠡᠨ ) ᠪᠠᠢᠪᠠ ᠭᠡᠨᠡ᠃
ᠬᠠᠨ ᠴᠡᠩᠭᠡᠯ ᠬᠥᠪᠡᠭᠦᠨ
ᠲᠦᠷᠦᠭᠦᠯᠡᠭᠡᠳ ᠭᠦᠶᠦᠯᠭᠡᠭᠡᠳ ( ᠳᠠᠪᠬᠢᠯᠤᠭᠠᠳ ) ᠶᠠᠪᠤᠭᠠᠳ
ᠪᠣᠯᠵᠣᠭᠠᠲᠤ ᠶ᠋ᠢᠨ ᠪᠣᠷᠣ ᠱᠣᠪᠣᠭᠣᠷ ᠭᠡᠳᠡᠭ ᠭᠠᠵᠠᠷ ᠲᠤ᠌ ᠬᠦᠷᠪᠡ ᠭᠡᠨᠡ ᠃
ᠨᠢᠭᠡ ᠳᠣᠯᠣᠭᠠᠨ ᠴᠠᠭᠠᠨ ᠠᠷᠭᠠᠯᠢ
ᠶᠠᠪᠤᠵᠢᠨ ( ᠶᠠᠪᠤᠵᠤ ) ᠪᠠᠢᠪᠠ ᠭᠡᠨᠡ
ᠨᠢᠭᠡ ᠶ᠋ᠢ ᠨᠢ ᠬᠠᠷᠪᠤᠭᠠᠳ ᠣᠷᠬᠢᠪᠠ ᠭᠡᠨᠡ
ᠤᠨᠠᠭᠠᠳ ᠲᠤᠰᠤᠭᠰᠠᠨ ᠪᠠᠢᠪᠠ ᠭᠡᠨᠡ
ᠬᠣᠶᠠᠷ ᠨᠢᠳᠦ ᠶ᠋ᠢ ᠨᠢ
ᠮᠠᠯᠲᠠᠵᠤ ᠠᠪᠤᠪᠠ ᠭᠡᠨᠡ
ᠵᠦ ᠶ᠋ᠢᠨ ᠠᠷᠠᠰᠤ ᠶ᠋ᠢ ᠠᠪᠤᠪᠠ ᠭᠡᠨᠡ
ᠪᠤᠯᠴᠢᠩ ᠤ᠋ᠨ ᠰᠢᠷᠪᠥᠰᠥ ᠶ᠋ᠢ ᠠᠪᠤᠪᠠ ᠭᠡᠨᠡ
ᠲᠡᠨᠳᠡ ᠡᠴᠡ ᠨᠢ
ᠴᠠᠭᠠᠷᠠ ( ᠴᠠᠰᠢ ᠪᠠᠨ ) ᠶᠠᠪᠤᠪᠠ ᠭᠡᠨᠡ ᠃
ᠲᠡᠭᠡᠬᠦ ᠳ᠋ᠦ᠍ ᠬᠣᠶᠠᠷ ᠬᠤᠨ ᠬᠠᠷᠠ ᠬᠡᠷᠢᠶᠡ
ᠬᠦᠷᠦᠭᠡᠳ ᠢᠷᠡᠪᠡ ᠭᠡᠨᠡ
《 ᠪᠡᠶᠡ ᠶ᠋ᠢᠨ ᠴᠢᠨᠢ ᠨᠢᠳᠦ ᠮᠠᠯᠲᠠᠶᠤ ?
ᠮᠣᠷᠢᠨ ᠤ᠋ ᠴᠢᠨᠢ ᠨᠢᠳᠦ ᠮᠠᠯᠲᠠᠶᠤ ?》
ᠭᠡᠳ ᠢᠷᠡᠪᠡ ᠭᠡᠨᠡ
《 ᠬᠥᠮᠦᠨ ᠦ᠌ ᠨᠢᠳᠦᠨ ᠫᠢᠷᠴᠢᠭᠢᠨᠡᠭᠰᠡᠨ ᠮᠠᠭᠤᠬᠠᠢ
ᠮᠣᠷᠢᠨ ᠤ᠋ ᠨᠢᠳᠦᠨ ᠭᠠᠰᠢᠭᠤᠨ ᠮᠠᠭᠤᠬᠠᠢ
ᠠᠷᠭᠠᠯᠢ ᠶ᠋ᠢᠨ ᠨᠢᠳᠦᠨ ᠠᠮᠲᠠᠲᠠᠢ ᠰᠠᠢᠬᠠᠨ! 》 ᠭᠡᠵᠦ
ᠬᠠᠶᠠᠵᠢᠨ ( ᠬᠠᠶᠠᠵᠤ ) ᠥᠭᠪᠡ ᠭᠡᠨᠡ ᠃
ᠲᠡᠨᠳᠡ ᠡᠴᠡ ᠨᠢ
ᠴᠠᠭᠠᠷᠠ ( ᠴᠠᠰᠢ ᠪᠠᠨ ) ᠶᠠᠪᠤᠪᠠ ᠭᠡᠨᠡ᠃
ᠬᠣᠶᠠᠷ ᠭᠤᠷᠠᠩ ( ᠭᠤᠷᠠᠩᠬᠢ ) ᠬᠥᠬᠡ ᠴᠢᠨᠣᠠ
ᠬᠦᠷᠦᠭᠡᠳ ᠢᠷᠡᠪᠡ ᠭᠡᠨᠡ
《 ᠪᠡᠶᠡ ᠶ᠋ᠢᠨ ᠴᠢᠨᠢ ᠪᠤᠯᠴᠢᠩ ᠰᠤᠭᠤᠴᠢᠶᠤ ?
ᠮᠣᠷᠢᠨ ᠤ᠋ ᠴᠢᠨᠢ ᠪᠤᠯᠴᠢᠩ ᠰᠤᠭᠤᠴᠢᠶᠤ ? 》
ᠭᠡᠳ ᠢᠷᠡᠪᠡ ᠭᠡᠨᠡ
《 ᠬᠥᠮᠦᠨ ᠦ᠌ ᠪᠤᠯᠴᠢᠩ ᠬᠥᠭᠵᠢᠷᠬᠡᠢ ᠮᠠᠭᠤᠬᠠᠢ
ᠮᠣᠷᠢᠨ ᠤ᠋ ᠪᠤᠯᠴᠢᠩ ᠲᠦᠭᠵᠢᠷᠬᠡᠢ ᠮᠠᠭᠤᠬᠠᠢ
ᠠᠷᠭᠠᠯᠢ ᠶ᠋ᠢᠨ ᠪᠤᠯᠴᠢᠩ ᠠᠮᠲᠠᠲᠠᠢ ᠰᠠᠢᠬᠠᠨ! 》 ᠭᠡᠵᠦ
ᠬᠠᠶᠠᠵᠢᠨ ( ᠬᠠᠶᠠᠵᠤ ) ᠥᠭᠪᠡ ᠭᠡᠨᠡ
ᠬᠤᠷᠠᠭᠠᠳ ᠰᠠᠭᠤᠭᠠᠳ ᠬᠣᠴᠣᠷᠪᠠ ᠭᠡᠨᠡ ᠃
ᠲᠡᠨᠳᠡ ᠡᠴᠡ ᠨᠢ
ᠴᠠᠭᠠᠷᠠ ( ᠴᠠᠰᠢ ᠪᠠᠨ ) ᠶᠠᠪᠤᠪᠠ ᠭᠡᠨᠡ
ᠲᠡᠭᠡᠬᠦ ᠳ᠋ᠦ᠍ ᠬᠣᠶᠠᠷ ᠲᠡᠮᠦᠷ ᠡᠳᠡᠷᠡᠩ * ᠪᠠᠷᠢᠭᠰᠠᠨ
ᠬᠣᠶᠠᠷ ᠡᠮᠡᠭᠡᠨ ᠢᠷᠡᠪᠡ ᠭᠡᠨᠡ ᠄
《 ᠪᠡᠶᠡ ᠶ᠋ᠢᠨ ᠴᠢᠨᠢ ᠵᠦ ᠶ᠋ᠢᠨ ᠠᠷᠠᠰᠤ ᠡᠳᠡᠷᠡᠩᠳᠡᠶᠦ ?
ᠮᠣᠷᠢᠨ ᠤ᠋ ᠴᠢᠨᠢ ᠵᠦ ᠶ᠋ᠢᠨ ᠠᠷᠠᠰᠤ ᠡᠳᠡᠷᠡᠩᠳᠡᠶᠦ ? 》
ᠭᠡᠳ ᠢᠷᠡᠪᠡ ᠭᠡᠨᠡ
《 ᠬᠥᠮᠦᠨ ᠦ᠌ ᠵᠦ ᠶ᠋ᠢᠨ ᠠᠷᠠᠰᠤᠨ ᠴᠢᠯᠠᠣ ᠮᠠᠭᠤᠬᠠᠢ
ᠮᠣᠷᠢᠨ ᠤ᠋ ᠵᠦ ᠶ᠋ᠢᠨ ᠠᠷᠠᠰᠤᠨ ᠲᠦᠭᠵᠢᠷᠬᠡᠢ ᠮᠠᠭᠤᠬᠠᠢ
ᠠᠷᠭᠠᠯᠢ ᠶ᠋ᠢᠨ ᠵᠦ ᠶ᠋ᠢᠨ ᠠᠷᠠᠰᠤᠨ ᠮᠢᠨᠳᠠᠰᠤᠨ ᠰᠠᠢᠬᠠᠨ!》 ᠭᠡᠵᠦ
ᠬᠠᠶᠠᠵᠢᠨ ( ᠬᠠᠶᠠᠵᠤ ) ᠥᠭᠪᠡ ᠭᠡᠨᠡ
ᠳᠡᠭᠡᠷᠡ ᠨᠢ ᠬᠤᠷᠠᠭᠠᠳ ᠰᠠᠭᠤᠭᠠᠳ ᠬᠣᠴᠣᠷᠪᠠ ᠭᠡᠨᠡ ᠃
ᠲᠡᠨᠳᠡ ᠡᠴᠡ ᠨᠢ ᠴᠠᠭᠠᠷᠠ ( ᠴᠠᠰᠢ ᠪᠠᠨ) ᠶᠠᠪᠤᠭᠠᠳ
ᠮᠠᠭᠤᠰ ᠤ᠋ᠨ ᠨᠤᠲᠤᠭ ᠲᠤ᠌ ᠬᠦᠷᠦᠭᠡᠳ ᠣᠳᠪᠠ ᠭᠡᠨᠡ
ᠠᠪᠤ ᠨᠢ ᠮᠠᠭᠤᠰ ᠤ᠋ᠨ ᠦᠬᠡᠷ ᠬᠠᠷᠢᠭᠤᠯᠤᠭᠠᠳ
ᠶᠠᠪᠤᠵᠢᠨ ( ᠶᠠᠪᠤᠵᠤ ) ᠪᠠᠢᠪᠠ ᠭᠡᠨᠡ
《 ᠠᠪᠤᠭᠠᠢ᠂ ᠠᠪᠤᠭᠠᠢ !
ᠡᠨᠡ ᠶᠡᠬᠡ ᠦᠬᠡᠷ ᠡᠴᠡ ᠲᠠᠨᠢ
ᠨᠢᠭᠡ ᠶ᠋ᠢ ᠨᠢ ᠦᠬᠦᠭᠦᠯᠦᠭᠡᠳ
ᠢᠳᠡᠭᠡᠳ ᠣᠷᠬᠢᠶᠤ ?》 ᠭᠡᠵᠦ ᠬᠡᠯᠡᠪᠡ ᠭᠡᠨᠡ
《 ᠦ ᠂ ᠪᠣᠯᠳᠠᠭ ᠦᠭᠡᠢ ᠬᠥᠪᠡᠭᠦᠨ ᠮᠢᠨᠢ !
ᠪᠤᠷᠠᠭᠠ ( ᠪᠤᠷᠭᠠᠰᠤᠨ ) ᠮᠣᠳᠣᠨ ᠪᠤᠲᠠᠷᠠᠲᠠᠯᠠ
ᠰᠤᠬᠠᠢ ᠮᠣᠳᠣᠨ ᠰᠤᠨᠲᠠᠯᠠ
ᠴᠣᠬᠢᠳᠠᠭ ᠪᠢᠯᠡ! 》 ᠭᠡᠵᠦ ᠬᠡᠯᠡᠪᠡ ᠭᠡᠨᠡ ᠃
《 ᠠ ᠂ ᠭᠡᠮ ᠦᠭᠡᠢ! 》 ᠭᠡᠳ
ᠠᠷᠢᠭᠤᠨ ( ᠣᠩᠭᠣᠨ ) ᠬᠠᠷᠠ ᠱᠠᠷ ᠢ᠋ ᠨᠢ
ᠦᠬᠦᠭᠦᠯᠦᠭᠡᠳ ᠢᠳᠡᠭᠡᠳ ᠣᠷᠬᠢᠪᠠ ᠭᠡᠨᠡ
ᠠᠷᠠᠰᠤᠨ ᠳ᠋ᠤᠨᠢ ᠡᠪᠡᠰᠦ ᠴᠢᠬᠢᠵᠢᠨ ( ᠴᠢᠬᠢᠵᠦ ) ᠰᠢᠷᠪᠡᠭᠡᠳ
ᠳᠠᠭᠤᠵᠢᠨ ( ᠲᠠᠭᠤᠵᠤ ) ᠣᠷᠬᠢᠪᠠ ᠭᠡᠨᠡ ᠃
《 ᠠᠪᠤᠭᠠᠢ ᠂ ᠠᠪᠤᠭᠠᠢ ᠮᠢᠬᠠ ᠢᠳᠡ! 》 ᠭᠡᠵᠦ
ᠮᠢᠬᠠᠨ ᠠ᠋ᠴᠠ ᠨᠢ ᠥᠭᠪᠡ ᠭᠡᠨᠡ
《 ᠠᠪᠤᠭᠠᠢ ᠂ ᠠᠪᠤᠭᠠᠢ ᠱᠥᠯᠥ ᠤᠤᠭᠤ !》 ᠭᠡᠵᠦ
ᠮᠥᠩᠭᠥ ᠲᠡᠢ ᠴᠦᠴᠡᠭᠡ ( ᠠᠶᠠᠭᠠ ) ᠳ᠋ᠤ᠌ ᠪᠠᠨ
ᠱᠥᠯᠦᠨ ᠡᠴᠡ ᠨᠢ ᠬᠢᠵᠦ ᠥᠭᠪᠡ ᠭᠡᠨᠡ
ᠮᠢᠬᠠ ᠶ᠋ᠢ ᠨᠢ ᠢᠳᠡᠵᠢᠨ( ᠢᠳᠡᠵᠦ ) ᠣᠷᠬᠢᠭᠠᠳ
ᠴᠦᠴᠡᠭᠡ ( ᠠᠶᠠᠭᠠ ) ᠲᠠᠢ ᠱᠥᠯᠥ ᠶ᠋ᠢ ᠨᠢ
ᠨᠢᠭᠡ ᠪᠠᠯᠭᠤᠭᠠᠳ ᠡᠷᠭᠢᠭᠦᠯᠦᠭᠡᠳ
ᠬᠣᠶᠠᠷ ᠪᠠᠯᠭᠤᠭᠠᠳ ᠡᠷᠭᠢᠭᠦᠯᠦᠭᠡᠳ ᠪᠠᠢᠪᠠ ᠭᠡᠨᠡ ᠃
《 ᠦ᠋ ᠂ ᠠᠪᠤᠭᠠᠢ ᠮᠢᠨᠢ
ᠪᠢ ᠠᠶᠠᠨ ᠤ᠋ ᠬᠥᠮᠦᠨ
ᠶᠠᠭᠠᠷᠠᠵᠤ ᠵᠦᠳᠡᠵᠦ ᠶᠠᠪᠤᠨᠠ
ᠴᠦᠴᠡᠭᠡ ( ᠠᠶᠠᠭᠠ ) ᠶ᠋ᠢ ᠮᠢᠨᠢ
ᠨᠢᠭᠡ ᠰᠤᠯᠠᠳᠬᠠᠵᠢᠨ ( ᠬᠣᠭᠣᠰᠣᠯᠠᠵᠤ )ᠥᠭ ᠲᠠ?》
ᠭᠡᠵᠦ ᠬᠡᠯᠡᠪᠡ ᠭᠡᠨᠡ
ᠲᠡᠭᠡᠬᠦ ᠳ᠋ᠦ᠍
《 ᠦ ᠂ ᠬᠥᠪᠡᠭᠦᠨ ᠮᠢᠨᠢ ᠂ ᠬᠥᠪᠡᠭᠦᠨ ᠮᠢᠨᠢ
ᠡᠨᠡ ᠮᠢᠨᠦ ᠬᠥᠪᠡᠭᠦᠨ ᠦ᠌ ᠴᠦᠴᠡᠭᠡ ( ᠠᠶᠠᠭᠠ ) ᠳ᠋ᠤ᠌
ᠶᠠᠮᠠᠷ ᠭᠡᠭᠴᠢ ᠠᠳᠠᠯᠢ ᠴᠦᠴᠡᠭᠡ ( ᠠᠶᠠᠭᠠ ) ᠪᠣᠢ?》
ᠭᠡᠵᠦ ᠬᠡᠯᠡᠪᠡ ᠭᠡᠨᠡ ᠃
《 ᠬᠠᠢ᠂ ᠬᠡᠨ ᠮᠡᠳᠡᠬᠦ ᠤᠤ?
ᠲᠠᠨ ᠤ᠋ ᠬᠥᠪᠡᠭᠦᠨ ᠦ᠌ ᠴᠦᠴᠡᠭᠡ ( ᠠᠶᠠᠭᠠ )
ᠪᠠᠢᠭᠰᠠᠨ ᠴᠤ᠌ ᠪᠢᠵᠡ
ᠪᠣᠯᠵᠣᠭᠠᠲᠤ ᠶᠢᠨ ᠪᠣᠷᠣ ᠱᠣᠪᠣᠭᠣᠷ ᠭᠡᠳᠡᠭ ᠭᠠᠵᠠᠷ ᠲᠤ᠌
ᠮᠣᠷᠢᠨ ᠬᠥᠮᠦᠨ ᠭᠢᠰᠬᠢᠭᠡᠳ ᠬᠠᠶᠠᠭᠰᠠᠨ ᠢ᠋ ᠪᠢ
ᠳᠠᠬᠢᠨ ᠮᠥᠩᠭᠥᠯᠡᠵᠦ ᠠᠪᠤᠭᠰᠠᠨ ᠪᠠᠢᠯᠠ !》
ᠭᠡᠵᠦ ᠬᠡᠯᠡᠪᠡ ᠭᠡᠨᠡ ᠃
《 ᠠ᠂ ᠲᠡᠭᠡᠭᠡᠳ ᠶᠠᠭᠤ ᠪᠠᠢᠬᠤ ᠤᠤ ?
ᠮᠢᠨᠦ ᠲᠡᠷᠡ ᠮᠠᠭᠤ ᠵᠦᠢᠯᠦᠭ ( ᠲᠡᠨᠡᠭ ) ᠬᠥᠪᠡᠭᠦᠨ
ᠴᠦᠴᠡᠭᠡ ( ᠠᠶᠠᠭᠠ ) ᠪᠠᠨ ᠬᠠᠶᠠᠵᠢᠨ ( ᠬᠠᠶᠠᠵᠤ ) ᠣᠷᠬᠢᠭᠠᠳ
ᠲᠡᠨᠦᠭᠡᠳ ᠶᠠᠪᠤᠵᠢᠨ ( ᠶᠠᠪᠤᠵᠤ ) ᠣᠳᠴᠠᠢ ! 》 ᠭᠡᠳ
ᠬᠣᠢᠷᠠ ᠪᠠᠨ ᠤᠨᠠᠭᠠᠳ
ᠳᠤᠬᠤ ᠪᠠᠨ ᠴᠥᠮᠥᠯᠦᠭᠡᠳ
ᠡᠮᠦᠷᠡ ( ᠣᠷᠣᠭᠰᠢ ) ᠪᠠᠨ ᠤᠨᠠᠭᠠᠳ
ᠮᠠᠩᠨᠠᠢ ᠪᠠᠨ ᠴᠥᠮᠥᠯᠵᠢᠨ ᠪᠠᠢᠪᠠ ᠭᠡᠨᠡ ᠃
ᠲᠡᠨᠳᠡ ᠡᠴᠡ ᠨᠢ ᠴᠠᠭᠠᠷᠠ ( ᠴᠠᠰᠢ ᠪᠠᠨ ) ᠶᠠᠪᠤᠪᠠ ᠭᠡᠨᠡ ᠃
ᠡᠬᠡ ᠨᠢ ᠮᠠᠭᠤᠰ ᠤ᠋ᠨ ᠬᠣᠨᠢ ᠬᠠᠷᠢᠭᠤᠯᠤᠭᠠᠳ
ᠶᠠᠪᠤᠵᠢᠨ ( ᠶᠠᠪᠤᠵᠤ ) ᠪᠠᠢᠪᠠ ᠭᠡᠨᠡ
《 ᠡᠵᠢ ᠮᠢᠨᠢ ᠂ ᠡᠵᠢ ᠮᠢᠨᠢ
ᠡᠨᠡ ᠶᠡᠬᠡ ᠬᠣᠨᠢ ᠠ᠋ᠴᠠ ᠲᠠᠨᠢ
ᠨᠢᠭᠡ ᠶ᠋ᠢ ᠨᠢ ᠦᠬᠦᠭᠦᠯᠦᠭᠡᠳ
ᠢᠳᠡᠭᠡᠳ ᠣᠷᠬᠢᠶᠤ? 》 ᠭᠡᠵᠦ ᠬᠡᠯᠡᠪᠡ ᠭᠡᠨᠡ ᠃
《 ᠦ ᠂ ᠬᠥᠪᠡᠭᠦᠨ ᠮᠢᠨᠢ ᠪᠣᠯᠳᠠᠭ ᠦᠭᠡᠢ !
ᠠᠰᠬᠠᠨ ( ᠦᠳᠡᠰᠢ ) ᠳ᠋ᠦ᠍ ᠬᠢᠯᠭᠠᠰᠤᠨ ᠳᠡᠭᠡᠭᠦᠷ
ᠴᠠᠭᠠᠷᠠ ( ᠴᠠᠰᠢ ᠪᠠᠨ ) ᠲᠣᠭᠠᠯᠠᠵᠢᠨ ( ᠲᠣᠭᠠᠯᠠᠵᠤ ) ᠥᠭᠳᠡᠭ ᠪᠢᠯᠡ
ᠦᠷᠦᠭᠦᠨ ( ᠥᠷᠯᠥᠭᠡ ) ᠳ᠋ᠦ᠍ ᠬᠥᠨᠳᠡᠢ ᠮᠣᠳᠣᠨ ᠳᠣᠲᠣᠷᠠ ᠪᠠᠷ
ᠨᠠᠭᠠᠷᠠ ᠲᠣᠭᠠᠯᠠᠵᠢᠨ ( ᠨᠡᠰᠢ ᠲᠣᠭᠠᠯᠠᠵᠤ ) ᠥᠭᠳᠡᠭ ᠪᠢᠯᠡ
ᠪᠤᠷᠠᠭᠠ ( ᠪᠤᠷᠭᠠᠰᠤᠨ ) ᠮᠣᠳᠣᠨ ᠪᠤᠲᠠᠷᠠᠲᠠᠯᠠ
ᠰᠤᠬᠠᠢ ᠮᠣᠳᠣᠨ ᠰᠤᠨᠲᠠᠯᠠ ᠴᠣᠬᠢᠳᠠᠭ ᠪᠢᠯᠡ! 》
ᠭᠡᠵᠦ ᠬᠡᠯᠡᠪᠡ ᠭᠡᠨᠡ᠃
《 ᠠ ᠂ ᠭᠡᠮ ᠦᠭᠡᠢ! 》 ᠭᠡᠳ
ᠠᠷᠢᠭᠤᠨ ( ᠣᠩᠭᠣᠨ ) ᠬᠠᠷᠠ ᠢᠷᠭᠡ ᠶ᠋ᠢ ᠨᠢ
ᠦᠬᠦᠭᠦᠯᠦᠭᠡᠳ ᠢᠳᠡᠭᠡᠳ ᠣᠷᠬᠢᠪᠠ ᠭᠡᠨᠡ
ᠠᠷᠠᠰᠤᠨ ᠳ᠋ᠤᠨᠢ ᠡᠪᠡᠰᠦ ᠴᠢᠬᠢᠭᠡᠳ
ᠰᠢᠷᠪᠡᠭᠡᠳ ᠳᠠᠭᠤᠵᠢᠨ ( ᠲᠠᠭᠤᠵᠤ ) ᠣᠷᠬᠢᠪᠠ ᠭᠡᠨᠡ ᠃
《 ᠡᠵᠢ ᠂ ᠡᠵᠢ ᠮᠢᠬᠠ ᠢᠳᠡ! 》 ᠭᠡᠵᠦ
ᠮᠢᠬᠠᠨ ᠠ᠋ᠴᠠ ᠨᠢ ᠥᠭᠪᠡ ᠭᠡᠨᠡ
《 ᠡᠵᠢ ᠂ ᠡᠵᠢ ᠱᠥᠯᠥ ᠤᠤᠭᠤ! 》 ᠭᠡᠵᠦ
ᠮᠥᠩᠭᠥ ᠲᠡᠢ ᠴᠦᠴᠡᠭᠡ ( ᠠᠶᠠᠭᠠ ) ᠳ᠋ᠤ᠌ ᠪᠠᠨ
ᠱᠥᠯᠦᠨ ᠡᠴᠡ ᠨᠢ ᠬᠢᠵᠦ ᠥᠭᠪᠡ ᠭᠡᠨᠡ ᠃
ᠮᠢᠬᠠ ᠶ᠋ᠢ ᠨᠢ ᠢᠳᠡᠵᠢᠨ ( ᠢᠳᠡᠵᠦ ) ᠣᠷᠬᠢᠭᠠᠳ
ᠴᠦᠴᠡᠭᠡ ( ᠠᠶᠠᠭᠠ ) ᠲᠠᠢ ᠱᠥᠯᠥ ᠶ᠋ᠢ ᠨᠢ
ᠨᠢᠭᠡ ᠪᠠᠯᠭᠤᠭᠠᠳ ᠯᠠ ᠡᠷᠭᠢᠭᠦᠯᠦᠭᠡᠳ
ᠬᠣᠶᠠᠷ ᠪᠠᠯᠭᠤᠭᠠᠳ ᠯᠠ ᠡᠷᠭᠢᠭᠦᠯᠦᠭᠡᠳ ᠪᠠᠢᠪᠠ ᠭᠡᠨᠡ
《 ᠦ᠂ ᠡᠵᠢ ᠮᠢᠨᠢ᠂
ᠪᠢ ᠠᠶᠠᠨ ᠤ᠋ ᠬᠥᠮᠦᠨ
ᠶᠠᠭᠠᠷᠠᠵᠤ ᠵᠦᠳᠡᠵᠦ ᠶᠠᠪᠤᠨᠠ
ᠴᠦᠴᠡᠭᠡ ( ᠠᠶᠠᠭᠠ ) ᠶ᠋ᠢ ᠮᠢᠨᠢ
ᠰᠤᠯᠠᠳᠬᠠᠵᠢᠨ ( ᠬᠣᠭᠣᠰᠣᠯᠠᠵᠤ ) ᠥᠭ ᠲᠠ ! 》
ᠭᠡᠵᠦ ᠬᠡᠯᠡᠪᠡ ᠭᠡᠨᠡ ᠃
《 ᠦ ᠂ ᠬᠥᠪᠡᠭᠦᠨ ᠮᠢᠨᠢ
ᠡᠨᠡ ᠮᠢᠨᠦ ᠬᠥᠪᠡᠭᠦᠨ ᠦ᠌ ᠴᠦᠴᠡᠭᠡ ( ᠠᠶᠠᠭᠠ ) ᠳ᠋ᠤ᠌
ᠶᠠᠮᠠᠷ ᠭᠡᠭᠴᠢ ᠠᠳᠠᠯᠢ ᠴᠦᠴᠡᠭᠡ ( ᠠᠶᠠᠭᠠ ) ᠪᠣᠢ? 》
ᠭᠡᠵᠦ ᠬᠡᠯᠡᠪᠡ ᠭᠡᠨᠡ
ᠲᠡᠭᠡᠬᠦ ᠳ᠋ᠦ᠍ 《 ᠦ ᠂ ᠶᠠᠭᠠᠬᠢᠯᠠ
ᠠᠩᠬᠠᠨ ᠴᠠᠭ ᠲᠤ᠌
ᠪᠢ ᠭᠡᠷ ᠲᠦ᠍ ᠡᠴᠡ ᠪᠡᠨ ᠭᠠᠷᠤᠭᠠᠳ
ᠶᠠᠪᠤᠵᠢᠨ ( ᠶᠠᠪᠤᠵᠤ ) ᠪᠠᠢᠬᠤ ᠴᠠᠭ ᠲᠤ᠌
ᠡᠬᠡ ᠠᠪᠤ ᠬᠣᠶᠠᠷ ᠮᠢᠨᠢ
ᠠᠶᠠᠷ ( ᠬᠣᠵᠢᠮ ) ᠬᠥᠪᠡᠭᠦᠨ ᠮᠢᠨᠢ
ᠪᠠᠭᠤᠬᠤ ( ᠢᠷᠡᠬᠦ ) ᠴᠠᠭ ᠲᠤ᠌
ᠡᠬᠡ ᠠᠪᠤ ᠬᠣᠶᠠᠷ ᠴᠢᠨᠢ
ᠠᠮᠢᠳᠤ ᠪᠠᠢᠬᠤ ᠶᠤᠮ ᠪᠢᠯᠡ ᠤᠤ
ᠦᠭᠡᠢ ᠪᠢᠯᠡ ᠤᠤ ? ᠭᠡᠵᠦ
ᠬᠤᠨᠴᠢᠨ ᠰᠢᠩᠭᠢ ( ᠰᠢᠭ )
ᠳᠠᠭᠤ ᠳᠠᠭᠤ ᠪᠠᠨ ᠨᠡᠢᠯᠡᠭᠦᠯᠦᠭᠡᠳ
ᠬᠤᠯᠠᠨ ᠵᠢᠩᠬᠢᠯᠲᠡᠢ ᠰᠢᠩᠭᠢ ( ᠰᠢᠭ )
ᠵᠢᠰᠦ ᠵᠢᠰᠦ ᠪᠡᠨ ᠨᠡᠢᠯᠡᠭᠦᠯᠦᠭᠡᠳ
ᠮᠥᠷᠰᠦᠨ ᠬᠠᠷᠠ ᠴᠡᠴᠡᠭᠡᠢ ᠡᠴᠡ ᠨᠢ
ᠮᠥᠨᠳᠥᠷ ᠰᠢᠩᠭᠢ ( ᠰᠢᠭ ) ᠨᠢᠯᠪᠤᠰᠤᠨ
ᠠᠰᠬᠠᠷᠴᠢᠨ ( ᠠᠰᠬᠠᠷᠴᠤ ) ᠪᠠᠢᠯᠠ ᠃
ᠡᠦᠲᠦ ᠡᠨᠡ ᠮᠠᠭᠤ ᠠᠮᠢᠲᠠᠨ ᠤ᠋ ᠭᠠᠷ ᠲᠤ᠌
ᠢᠩᠭᠢᠭᠡᠳ ᠲᠡᠨᠦᠵᠦ ᠪᠠᠢᠬᠤ ᠴᠠᠭ ᠲᠤ᠌
ᠪᠢ ᠰᠠᠢᠨ ᠨᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ
ᠰᠡᠳᠬᠢᠯ ᠢ᠋ ᠨᠢᠭᠡ ᠶᠡᠬᠡ ᠴᠢᠯᠡᠭᠡᠭᠰᠡᠨ ( ᠰᠢᠨᠠᠯᠭᠠᠭᠠᠳ )
ᠶᠠᠭᠤ ᠪᠠᠢᠨᠠ ?
ᠨᠠᠳᠠ ᠨᠢᠭᠡ ᠦᠬᠦᠬᠦ ᠶ᠋ᠢᠨ
ᠪᠠᠷᠴᠢᠳ ᠪᠠᠢᠭᠰᠠᠨ ᠪᠣᠯᠲᠤᠭᠠᠢ
ᠪᠢ ᠠᠴᠢᠲᠤ ᠴᠠᠭᠠᠨ ᠡᠬᠡ ᠪᠡᠨ
ᠲᠡᠭᠡᠬᠦ ᠦᠭᠡᠢ! 》 ᠭᠡᠵᠦ ᠬᠡᠯᠡᠭᠡᠳ
ᠤᠷᠢᠳᠤ ᠬᠠᠨ ᠴᠡᠩᠭᠡᠯ ᠬᠥᠪᠡᠭᠦᠨ
ᠶᠠᠩᠵᠤ ᠪᠠᠷ ᠢ᠋ᠶ᠋ᠠᠨ ᠦᠵᠡᠭᠳᠡᠭᠡᠳ ᠣᠷᠬᠢᠪᠠ ᠭᠡᠨᠡ᠃
ᠲᠡᠭᠡᠬᠦ ᠳ᠋ᠦ᠍ ᠶᠠᠭᠤ ᠪᠠᠢᠬᠤ ᠂ ᠡᠬᠡ ᠨᠢ ᠄
《 ᠮᠢᠨᠦ ᠨᠠᠷᠠᠨ ᠭᠠᠷᠤᠯᠠ ᠠᠪᠠᠢ *
ᠴᠢᠨᠦ ᠨᠠᠷᠠᠨ ᠨᠢᠭᠤᠯᠠ ᠠᠪᠠᠢ * ! 》 ᠭᠡᠵᠦ ᠬᠡᠯᠡᠭᠡᠳ
ᠬᠤᠷᠠᠭᠠ ᠬᠤᠷᠠᠭᠠ ᠪᠠᠨ
ᠲᠥᠯᠥᠭᠡ ᠲᠥᠯᠥᠭᠡ ᠶ᠋ᠢ ᠴᠣᠬᠢᠭᠠᠳ
ᠲᠥᠯᠥᠭᠡ ᠲᠥᠯᠥᠭᠡ ᠪᠡᠨ
ᠬᠤᠷᠠᠭᠠ ᠬᠤᠷᠠᠭᠠ ᠶ᠋ᠢ ᠴᠣᠬᠢᠭᠠᠳ
ᠮᠠᠭᠤᠰ ᠤ᠋ᠨ ᠬᠣᠨᠢ ᠶ᠋ᠢ
ᠦᠳᠡ ᠨᠠᠷᠠ ᠪᠠᠷ * ᠬᠥᠭᠡᠭᠡᠳ
ᠶᠠᠪᠤᠵᠢᠨ ( ᠶᠠᠪᠤᠵᠤ ) ᠣᠳᠪᠠ ᠭᠡᠨᠡ᠃
ᠲᠡᠭᠡᠬᠦ ᠳ᠋ᠦ᠍ ᠮᠠᠭᠤᠰ ᠤ᠋ᠨ ᠬᠠᠲᠤᠨ ᠭᠠᠷᠴᠤ
ᠬᠠᠯᠢᠶᠠᠵᠢᠨ ( ᠬᠠᠷᠠᠵᠤ ) ᠣᠷᠬᠢᠭᠠᠳ ᠄
《 ᠡᠨᠡ ᠮᠠᠭᠤ ᠰᠢᠷᠠ ᠭᠣᠩᠮᠤ *
ᠮᠢᠨᠦ ᠨᠠᠷᠠᠨ ᠭᠠᠷᠤᠯᠠ ᠠᠪᠠᠢ *
ᠴᠢᠨᠦ ᠨᠠᠷᠠᠨ ᠨᠢᠭᠤᠯᠠ ᠠᠪᠠᠢ * ! 》 ᠭᠡᠵᠦ ᠬᠡᠯᠡᠭᠡᠳ
ᠬᠤᠷᠠᠭᠠ ᠬᠤᠷᠠᠭᠠ ᠪᠠᠨ
ᠲᠥᠯᠥᠭᠡ ᠲᠥᠯᠥᠭᠡ ᠶ᠋ᠢ ᠨᠢ ᠴᠣᠬᠢᠭᠠᠳ
ᠲᠥᠯᠥᠭᠡ ᠲᠥᠯᠥᠭᠡ ᠪᠡᠨ
ᠬᠤᠷᠠᠭᠠ ᠬᠤᠷᠠᠭᠠ ᠶ᠋ᠢ ᠨᠢ ᠴᠣᠬᠢᠭᠠᠳ
ᠦᠳᠡ ᠨᠠᠷᠠ ᠪᠠᠷ ᠬᠣᠨᠢ ᠬᠥᠭᠡᠭᠡᠳ
ᠢᠷᠡᠵᠢᠨ( ᠢᠷᠡᠵᠦ ) ᠪᠠᠢᠨᠠ 》
ᠭᠡᠵᠦ ᠬᠡᠯᠡᠪᠡ ᠭᠡᠨᠡ ᠃
ᠲᠡᠭᠡᠬᠦ ᠳ᠋ᠦ᠍ ᠮᠠᠭᠤᠰ ᠬᠡᠯᠡᠪᠡ ᠭᠡᠨᠡ
《 ᠠ ᠂ ᠲᠡᠭᠡᠭᠡᠳ ᠶᠠᠭᠤᠨ ᠪᠠᠢᠬᠤ ᠤᠤ
ᠬᠠᠷᠠ ᠭᠢᠨᠠᠷᠢ ᠬᠦᠷᠦᠭᠡᠳ ᠢᠷᠡᠭᠰᠡᠨ ᠪᠠᠢᠯᠭᠦᠢ
ᠮᠢᠨᠦ ᠬᠣᠪᠴᠢ ᠰᠢᠷᠠ ᠪᠢᠴᠢᠭ ᠢ᠋ ᠠᠪᠤᠭᠠᠳ ᠥᠭ ! 》
ᠭᠡᠵᠦ ᠬᠡᠯᠡᠪᠡ ᠭᠡᠨᠡ
ᠬᠣᠪᠴᠢ ᠰᠢᠷᠠ ᠪᠢᠴᠢᠭ ᠢ᠋ ᠨᠢ
ᠠᠪᠤᠭᠠᠳ ᠥᠭᠬᠦ ᠳ᠋ᠦ᠍
ᠬᠠᠯᠢᠶᠠᠬᠤ ( ᠦᠵᠡᠬᠦ ) ᠵᠠᠭᠤᠷᠠ ᠨᠢ
ᠵᠠᠯᠠᠭᠠ ᠨᠢ ᠬᠦᠷᠡᠯ ᠬᠠᠷᠴᠠᠭᠠᠢ ᠳ᠋ᠤ᠌
ᠬᠤᠪᠢᠯᠵᠢᠨ( ᠬᠤᠪᠢᠯᠵᠤ ) ᠢᠷᠡᠭᠡᠳ
ᠠᠮᠠᠨ ᠡᠭᠦᠳᠡᠨ ᠭᠣᠣᠯ ᠤᠷᠤᠭᠤ ᠨᠢ
ᠴᠢᠯᠠᠭᠤᠳᠠᠭᠠᠳ ᠣᠷᠬᠢᠪᠠ ᠭᠡᠨᠡ ᠃
ᠠ ᠂ ᠶᠠᠭᠤᠨ ᠪᠠᠢᠬᠤ ᠤᠤ
ᠬᠠᠷᠠ ᠭᠢᠨᠠᠷᠢ ᠬᠦᠷᠦᠭᠡᠳ ᠢᠷᠡᠵᠡᠢ ᠡᠰᠡ ᠦᠵᠡᠪᠡ ! 》
ᠭᠡᠵᠦ ᠬᠡᠯᠡᠪᠡ ᠭᠡᠨᠡ ᠃
ᠲᠡᠭᠡᠭᠡᠳ ᠭᠠᠵᠠᠭᠠ ( ᠭᠠᠳᠠᠨᠠ ) ᠠ᠋ᠴᠠ
ᠬᠠᠬᠢᠷᠤᠭᠠᠳ ( ᠬᠠᠰᠬᠢᠷᠤᠭᠠᠳ ) ᠪᠠᠢᠬᠤ ᠨᠢ
ᠠᠷᠭᠠ ᠦᠭᠡᠢ ᠶᠦᠮ ᠪᠠᠢᠪᠠ ᠭᠡᠨᠡ
《 ᠴᠢ ᠮᠠᠨᠠ ᠬᠣᠶᠠᠷ ᠮᠢᠬᠠ ᠴᠢᠰᠤ ᠪᠠᠨ
ᠬᠡᠵᠢᠶᠡ ᠤᠤᠭᠤᠬᠤ ᠶᠤᠮ ᠪᠠᠢᠨᠠ ? 》 ᠭᠡᠵᠦ
ᠬᠠᠬᠢᠷᠤᠭᠠᠳ ( ᠬᠠᠰᠬᠢᠷᠤᠭᠠᠳ ) ᠪᠠᠢᠬᠤ ᠨᠢ
ᠠᠷᠭᠠ ᠦᠭᠡᠢ ᠶᠦᠮ ᠪᠠᠢᠪᠠ ᠭᠡᠨᠡ
《 ᠴᠢ ᠮᠠᠨᠠ ᠬᠣᠶᠠᠷ
ᠮᠠᠩᠭᠠᠷ ᠦᠷᠦᠭᠦᠨ ( ᠮᠠᠷᠭᠠᠰᠢ ᠥᠷᠯᠥᠭᠡ )
ᠭᠠᠵᠠᠷ ᠲᠡᠭᠷᠢ ᠶ᠋ᠢᠨ ᠥᠩᠭᠡ ᠲᠠᠨᠢᠭᠳᠠᠬᠤ ᠴᠠᠭ ᠲᠤ᠌
ᠮᠢᠬᠠ ᠴᠢᠰᠤ ᠪᠠᠨ ᠤᠤᠭᠤᠶᠠ ! 》 ᠭᠡᠵᠦ
ᠮᠠᠭᠤᠰ ᠭᠡᠷ ᠲᠦ᠍ ᠡᠴᠡ ᠪᠡᠨ
ᠬᠠᠬᠢᠷᠤᠭᠰᠠᠨ ( ᠬᠠᠰᠬᠢᠷᠤᠭᠰᠠᠨ ) ᠪᠠᠢᠪᠠ ᠭᠡᠨᠡ
《 ᠪᠠᠢᠭᠰᠠᠨ ᠢ᠋ ᠮᠢᠨᠢ ᠣᠯᠵᠠᠯᠠᠭᠰᠠᠨ ᠴᠢ ᠲᠥᠷᠥᠭᠦᠯᠬᠦ ᠤᠤ ?
ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠣᠯᠵᠠᠯᠠᠭᠤᠯᠤᠭᠰᠠᠨ ᠪᠢ ᠲᠥᠷᠥᠭᠦᠯᠬᠦ ᠤᠤ ? 》 ᠭᠡᠳ
ᠬᠠᠬᠢᠷᠤᠭᠠᠳ ( ᠬᠠᠰᠬᠢᠷᠤᠭᠠᠳ ) ᠪᠠᠢᠬᠤ ᠨᠢ
ᠠᠷᠭᠠ ᠦᠭᠡᠢ ᠶᠦᠮ ᠪᠠᠢᠪᠠ ᠭᠡᠨᠡ
《 ᠪᠠᠢᠭᠰᠠᠨ ᠢ᠋ ᠴᠢᠨᠢ ᠣᠯᠵᠠᠯᠠᠭᠰᠠᠨ ᠪᠢ ᠲᠦᠷᠦᠭᠦᠯᠡᠨᠡ 》 ᠭᠡᠵᠦ
ᠭᠡᠷ ᠲᠦ᠍ ᠡᠴᠡ ᠪᠡᠨ ᠬᠠᠬᠢᠷᠪᠠ ( ᠬᠠᠰᠬᠢᠷᠪᠠ ) ᠭᠡᠨᠡ᠃
ᠲᠡᠭᠡᠭᠡᠳ ᠮᠠᠩᠭᠠᠷ ᠦᠷᠦᠭᠦᠨ( ᠮᠠᠷᠭᠠᠰᠢ ᠥᠷᠯᠥᠭᠡ ) ᠨᠢ
ᠭᠠᠵᠠᠷ ᠲᠡᠭᠷᠢ ᠶ᠋ᠢᠨ ᠥᠩᠭᠡ ᠲᠠᠨᠢᠭᠳᠠᠬᠤ ᠴᠠᠭ ᠲᠤ᠌
ᠬᠠᠨ ᠴᠡᠩᠭᠡᠯ ᠬᠥᠪᠡᠭᠦᠨ
ᠡᠭᠦᠳᠡᠨ ᠴᠣᠨᠳᠣᠭ ᠳᠡᠭᠡᠷᠡ ᠨᠢ
ᠬᠦᠷᠡᠯ ᠬᠠᠷᠴᠠᠭᠠᠢ ᠳ᠋ᠤ᠌ ᠬᠤᠪᠢᠯᠤᠭᠠᠳ
ᠰᠠᠭᠤᠵᠢᠨ ( ᠰᠠᠭᠤᠵᠤ ) ᠪᠠᠢᠪᠠ ᠭᠡᠨᠡ᠃
ᠮᠠᠭᠤᠰ ᠣᠷᠣᠨ ( ᠬᠠᠨᠵᠤᠨ ) ᠤ᠋ ᠰᠢᠷᠡᠭᠡ ᠳᠡᠭᠡᠷᠡ ᠡᠴᠡ
ᠰᠠᠭᠠᠳᠠᠭ ᠨᠤᠮᠤ ᠪᠠᠨ ᠲᠠᠲᠠᠵᠢᠨ ᠲᠠᠲᠠᠵᠢᠨ ( ᠲᠠᠲᠠᠵᠤ ) ᠢᠷᠡᠭᠡᠳ
ᠨᠢᠭᠡ ᠲᠠᠯᠪᠢᠭᠠᠳ ᠣᠷᠬᠢᠪᠠ ᠭᠡᠨᠡ
ᠬᠠᠮᠢᠭᠠ ᠶᠠᠪᠤᠭᠰᠠᠨ? ᠦᠭᠡᠢ ᠪᠣᠯᠪᠠ ᠭᠡᠨᠡ᠃
ᠠᠷᠤ ᠳ᠋ᠤᠨᠢ ( ᠳᠠᠷᠠᠭᠠ ᠨᠢ )
ᠬᠠᠨ ᠴᠡᠩᠭᠡᠯ ᠬᠥᠪᠡᠭᠦᠨ
ᠰᠠᠭᠠᠳᠠᠭ ᠨᠤᠮᠤ ᠪᠠᠨ ᠲᠠᠲᠠᠭᠠᠳ ᠢᠷᠡᠪᠡ ᠭᠡᠨᠡ
ᠮᠠᠭᠤᠰ ᠣᠷᠣᠨ ( ᠬᠠᠨᠵᠤᠨ ) ᠤ᠋ ᠪᠠᠨ ᠰᠢᠷᠡᠭᠡ ᠳᠡᠭᠡᠷᠡ
ᠬᠠᠷᠠ ᠰᠢᠮᠢ ( ᠮᠤᠤᠷ ) ᠲᠤ᠌ ᠬᠤᠪᠢᠯᠤᠨ
ᠰᠠᠭᠤᠵᠢᠨ ( ᠰᠠᠭᠤᠵᠤ ) ᠪᠠᠢᠪᠠ ᠭᠡᠨᠡ
ᠲᠠᠲᠠᠵᠢᠨ ᠲᠠᠲᠠᠵᠢᠨ ( ᠲᠠᠲᠠᠵᠤ ) ᠢᠷᠡᠭᠡᠳ
ᠲᠠᠯᠪᠢᠭᠠᠳ ᠣᠷᠬᠢᠬᠤ ᠳ᠋ᠤ᠌
ᠮᠠᠭᠤᠰ ᠤ᠋ᠨ ᠴᠠᠭᠠᠨ ᠭᠣᠣᠯ ᠢ᠋
ᠲᠠᠰᠤ ᠲᠠᠯᠪᠢᠭᠠᠳ ᠣᠷᠬᠢᠭᠰᠠᠨ ᠪᠠᠢᠪᠠ ᠭᠡᠨᠡ᠃
ᠲᠡᠭᠡᠵᠢᠨ ( ᠲᠡᠭᠡᠵᠦ ) ᠣᠷᠬᠢᠭᠠᠳ
ᠡᠦᠲᠦ ᠰᠠᠢᠬᠢ ( ᠰᠠᠶᠢᠬᠢ ) ᠮᠠᠭᠤᠰ ᠤ᠋ᠨ ᠬᠠᠲᠤᠨ
ᠬᠠᠳᠴᠡᠢ( ᠬᠠᠮᠢᠭᠠ ᠪᠠᠢᠨᠠ )? ᠭᠡᠳ
ᠭᠠᠷᠤᠭᠠᠳ ᠢᠷᠡᠭᠰᠡᠨ ᠪᠠᠢᠪᠠ ᠭᠡᠨᠡ
ᠲᠡᠭᠡᠬᠦ ᠳ᠋ᠦ᠍ ᠭᠠᠵᠠᠭᠠ ( ᠭᠠᠳᠠᠨᠠ )
ᠡᠬᠡ ᠠᠪᠤ ᠬᠣᠶᠠᠷ ᠨᠢ
ᠮᠠᠭᠤᠰ ᠤ᠋ᠨ ᠬᠠᠲᠤᠨ ᠢ᠋
ᠳᠡᠮᠨᠡᠭᠡᠳ ( ᠬᠠᠮᠵᠢᠯᠴᠠᠨ ) ᠴᠣᠬᠢᠭᠠᠳ ᠦᠬᠦᠭᠦᠯᠦᠭᠡᠳ
ᠣᠷᠬᠢᠭᠰᠠᠨ ᠪᠠᠢᠪᠠ ᠭᠡᠨᠡ
ᠲᠡᠭᠡᠭᠡᠳ ᠮᠠᠭᠤᠰ ᠢ᠋ ᠳᠠᠷᠤᠵᠢᠨ ( ᠳᠠᠷᠤᠵᠤ ) ᠣᠷᠬᠢᠭᠠᠳ
ᠡᠵᠢ ᠠᠪᠤ ᠠᠯᠪᠠᠲᠤ ᠬᠣᠰᠢᠭᠤ ᠪᠠᠨ ᠳᠠᠭᠠᠭᠤᠯᠤᠭᠠᠳ
ᠮᠠᠭᠤᠰ ᠤ᠋ᠨ ᠠᠯᠪᠠᠲᠤ ᠪᠠᠷ
ᠪᠦᠯᠢ ᠶᠣᠭᠪᠠ ( ᠵᠠᠷᠤᠴᠠ ) ᠪᠠᠨ ᠬᠢᠵᠢᠨ ( ᠬᠢᠵᠦ )
ᠨᠡᠭᠦᠯᠭᠡᠨ ᠶᠠᠪᠤᠭᠰᠠᠨ ᠪᠠᠢᠪᠠ ᠭᠡᠨᠡ ᠃
ᠲᠡᠭᠡᠬᠦ ᠳ᠋ᠦ᠍ ᠮᠠᠳ ᠤᠯᠠᠭᠠᠨ ᠬᠥᠪᠡᠭᠦᠨ
ᠪᠠᠯᠮᠠᠭᠡᠷᠡᠯ ᠬᠠᠭᠠᠨ ᠤ᠋ ᠭᠢᠰ ( ᠬᠢᠨ ) ᠢ᠋
ᠨᠡᠭᠦᠯᠭᠡᠭᠡᠳ ᠶᠠᠪᠤᠭᠠᠳ
ᠪᠠᠶᠠᠨ ᠬᠦᠳᠡᠷ ᠠᠯᠲᠠᠢ ᠬᠠᠭᠠᠨ ᠤ᠋
ᠨᠤᠲᠤᠭ ᠲᠤᠨᠢ ᠢᠷᠡᠪᠡ ᠭᠡᠨᠡ
《 ᠮᠢᠨᠦ ᠳᠡᠭᠦᠦ ᠬᠠᠨ ᠴᠡᠩᠭᠡᠯ ᠭᠡᠳᠡᠭ
ᠬᠥᠪᠡᠭᠦᠨ ᠢ᠋ ᠮᠡᠳᠡᠪᠡ ᠤᠤ? ᠦᠵᠡᠪᠡ ᠤᠤ?》 ᠭᠡᠵᠦ
ᠬᠣᠶᠠᠷ ᠬᠥᠭᠰᠢᠨ ᠡᠴᠡ ᠰᠤᠷᠠᠪᠠ ᠭᠡᠨᠡ ᠃
《 ᠡᠨᠡ ᠠᠯᠪᠠᠲᠤ ᠬᠤᠰᠢᠭᠤᠨ ᠠᠮᠢᠲᠠᠨ
ᠬᠠᠮᠢᠭᠠ ᠶᠠᠪᠤᠯᠠ ? 》 ᠭᠡᠵᠦ ᠰᠤᠷᠠᠪᠠ ᠭᠡᠨᠡ
《 ᠮᠠᠭᠤᠰ ᠣᠯᠵᠠᠯᠠᠭᠠᠳ ᠶᠠᠪᠤᠵᠢᠨ ( ᠶᠠᠪᠤᠵᠤ ) ᠡᠦᠲᠦᠯᠡ ᠠ ᠂
ᠬᠠᠨ ᠴᠡᠩᠭᠡᠯ ᠬᠥᠪᠡᠭᠦᠨ
ᠥᠰᠢᠶᠡ ᠨᠡᠬᠡᠬᠦ ᠭᠡᠵᠦ ᠬᠡᠯᠡᠭᠡᠳ
ᠠᠷᠤ ᠠ᠋ᠴᠠ ᠨᠢ
ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠲᠦ᠍
ᠭᠠᠷᠤᠭᠠᠳ ᠭᠦᠶᠦᠯᠭᠡᠭᠡᠳ ( ᠳᠠᠪᠬᠢᠭᠤᠯᠤᠭᠠᠳ )
ᠶᠠᠪᠤᠵᠢᠨ ( ᠶᠠᠪᠤᠵᠤ ) ᠡᠦᠲᠦᠯᠡ 》 ᠭᠡᠵᠦ ᠬᠡᠯᠡᠪᠡ ᠭᠡᠨᠡ᠃
ᠠᠷᠤ ᠠ᠋ᠴᠠ ᠨᠢ
ᠮᠠᠳ ᠤᠯᠠᠭᠠᠨ ᠬᠥᠪᠡᠭᠦᠨ ᠢᠷᠡᠭᠡᠳ
ᠪᠣᠯᠵᠣᠭᠠᠲᠤ ᠶ᠋ᠢᠨ ᠪᠣᠷᠣ ᠱᠣᠪᠣᠭᠣᠷ ᠭᠡᠳᠡᠭ ᠭᠠᠵᠠᠷ ᠲᠤ᠌
ᠲᠣᠰᠴᠢᠨ ( ᠲᠤᠰᠴᠢᠨ ) ᠢᠷᠡᠭᠡᠳ
ᠰᠠᠭᠤᠵᠢᠨ ( ᠰᠠᠭᠤᠵᠤ ) ᠪᠠᠢᠪᠠ ᠭᠡᠨᠡ ᠃
ᠲᠡᠭᠡᠬᠦ ᠳ᠋ᠦ᠍ ᠨᠠᠭᠠᠨᠠ ( ᠤᠷᠢᠲᠠᠢ ) ᠠ᠋ᠴᠠ ᠨᠢ
ᠨᠡᠭᠦᠯᠭᠡᠭᠡᠳ ᠬᠦᠷᠦᠭᠡᠳ ᠣᠳᠪᠠ ᠭᠡᠨᠡ ᠃
ᠲᠡᠭᠡᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠪᠣᠯᠵᠣᠨ ᠠᠪᠤᠭᠠᠳ
ᠠᠯᠪᠠᠲᠤ ᠬᠣᠰᠢᠭᠤ ᠪᠠᠨ ᠨᠡᠭᠦᠯᠭᠡᠭᠡᠳ ᠶᠠᠪᠤᠭᠠᠳ
ᠬᠣᠶᠠᠷ ᠪᠡᠶᠡ (ᠲᠠᠯᠠ ) ᠠ᠋ᠴᠠ
ᠬᠣᠶᠠᠷ ᠶᠡᠬᠡ ᠥᠩ ᠥᠷᠭᠡᠨ
ᠠᠯᠪᠠᠲᠤ ᠪᠠᠨ ᠨᠡᠢᠯᠡᠭᠦᠯᠦᠭᠡᠳ ᠣᠷᠬᠢᠪᠠ ᠭᠡᠨᠡ
ᠬᠣᠶᠠᠷ ᠪᠠᠶᠠᠨ ᠬᠠᠭᠠᠨ
ᠠᠢᠯᠯᠠᠭᠠᠳ ᠪᠠᠭᠤᠭᠠᠳ ᠣᠷᠬᠢᠪᠠ ᠭᠡᠨᠡ᠃
ᠲᠡᠭᠡᠭᠡᠳ ᠠᠷᠪᠠᠨ ᠬᠣᠨᠣᠭ ᠠᠷᠠᠵᠠ ᠪᠠᠷ
ᠬᠣᠷᠢᠨ ᠬᠣᠨᠣᠭ ᠬᠣᠣᠷᠠᠵᠠ ᠪᠠᠷ ᠨᠠᠢᠷᠯᠠᠵᠤ
ᠠᠮ ᠠᠭᠰᠠᠨ ᠠᠮᠤᠷ ᠰᠠᠢᠬᠠᠨ ᠵᠢᠷᠭᠠᠵᠤ ᠭᠡᠨᠡ᠃
– – – –
ᠦᠭᠡᠰ ᠦ᠋ᠨ ᠲᠠᠢᠯᠪᠤᠷᠢ
ᠳᠡᠭᠡᠳᠦ ᠮᠣᠩᠭᠣᠯᠴᠤᠳ ᠤ᠋ᠨ ᠠᠮᠠᠨ ᠶᠠᠷᠢᠶᠠᠨ ᠤ᠋ ᠣᠨᠴᠠᠭᠠᠢ ᠦᠭᠡᠰ ᠢ᠋ ᠵᠠᠷᠢᠮ ᠢ᠋ ᠨᠢ ᠬᠠᠭᠠᠯᠲᠠ ᠳ᠋ᠤ᠌ ᠪᠢᠴᠢᠵᠦ᠂ ᠵᠠᠷᠢᠮ ᠢ᠋ ᠨᠢ ᠳᠣᠣᠷᠠ ᠨᠢ 《 * 》ᠲᠡᠮᠳᠡᠭ ᠲᠠᠯᠪᠢᠵᠤ ᠲᠠᠢᠯᠪᠤᠷᠢ ᠳ᠋ᠤ᠌ ᠣᠷᠣᠭᠰᠠᠨ ᠢ᠋ ᠢᠯᠡᠳᠬᠡᠪᠡ᠃
ᠵᠠᠭᠤᠷᠠ ᠬᠣᠨᠣᠮᠠ ᠄ ᠬᠣᠨᠣᠭᠠᠳ ᠬᠦᠷᠬᠦ ᠤᠷᠲᠤ ᠪᠡᠶᠡ ᠲᠡᠢ᠃
ᠰᠣᠢᠭᠠᠳ ᠄ ᠮᠣᠷᠢᠨ ᠠᠮᠠᠷᠠᠵᠤ ᠵᠣᠭᠰᠣᠬᠤ ᠳ᠋ᠠᠭᠠᠨ ᠬᠣᠢᠲᠤ ᠨᠢᠭᠡ ᠬᠥᠯ ᠢ᠋ᠶ᠋ᠡᠨ ᠰᠤᠯᠠ ᠭᠢᠰᠬᠢᠵᠦ ᠵᠣᠭᠰᠣᠬᠤ᠃
ᠴᠠᠯᠮᠠᠳᠠᠭᠠᠳ ᠄ ᠮᠠᠯ ᠢ᠋ ᠴᠠᠯᠮᠠ ᠣᠷᠬᠢᠨ ᠪᠠᠷᠢᠬᠤ᠃
ᠪᠠᠷᠠᠭᠠ ᠄ ᠮᠣᠩᠭᠣᠯ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠥᠭᠡᠳᠡ ᠂ ᠵᠡᠭᠦᠨ ᠥᠭᠡᠳᠡ ᠲᠠᠯᠠ ᠶ᠋ᠢᠨ ᠬᠠᠨᠠ ᠶ᠋ᠢ ᠲᠦᠰᠢᠭᠦᠯᠦᠨ ᠬᠤᠷᠢᠶᠠᠵᠤ ᠲᠠᠯᠪᠢᠭᠰᠠᠨ ᠬᠥᠨᠵᠢᠯᠡ ᠳᠡᠪᠢᠰᠬᠡᠷ ᠂ ᠬᠤᠪᠴᠠᠰᠤ ᠬᠤᠨᠠᠷ ᠤ᠋ᠨ ᠵᠦᠢᠯ᠃
ᠠᠭᠤᠳᠠᠯᠪᠠ ᠄ ᠶᠠᠭᠤᠮᠠᠨ ᠳᠣᠲᠣᠷᠠ ᠠ᠋ᠴᠠ ᠠᠪᠬᠤ ᠵᠦᠢᠯ ᠢ᠋ᠶ᠋ᠡᠨ ᠡᠷᠢᠬᠦ᠃
ᠲᠠᠪᠠᠯᠭᠠᠭᠠᠳ ᠄ ᠮᠣᠷᠢᠨ ᠤ᠋ ᠪᠠᠨ ᠳᠤᠮᠳᠠ ᠬᠤᠷᠳᠤᠴᠠ ᠪᠠᠷ ᠲᠡᠰᠢᠭᠦᠯᠬᠦ ᠃
ᠶᠠᠮᠠᠷ ᠶᠤᠮ ᠪᠠᠢᠯᠲᠠᠢ ᠄ ᠶᠠᠮᠠᠷ ᠭᠡᠭᠴᠢ ᠶᠡᠬᠡ ᠬᠦᠴᠦᠨ ᠴᠢᠳᠠᠯ ᠲᠠᠢ ᠪᠠᠢᠳᠠᠭ ᠶᠤᠮ ᠪᠣᠯ?
ᠬᠠᠷᠠ ᠪᠠᠲᠠᠭᠠᠨᠠ ᠶ᠋ᠢᠨ ᠴᠠᠭ ᠪᠣᠳᠣᠯ ᠦᠭᠡᠢ ᠪᠡᠷ ᠄ ᠬᠠᠨ ᠴᠡᠩᠭᠡᠯ ᠢ᠋ ᠦᠯᠦ ᠲᠣᠭᠣᠮᠰᠠᠷᠯᠠᠨ᠂ ᠨᠢᠳᠦᠨ ᠳ᠋ᠡᠭᠡᠨ ᠬᠠᠪᠴᠢᠬᠤ ᠦᠭᠡᠢ᠃
ᠲᠡᠭᠡᠬᠦ ᠶ᠋ᠢᠨ ᠴᠢᠨᠢ ᠲᠡᠭᠡᠨᠡ ᠪᠢᠵᠡ ᠄ ᠲᠡᠭᠡᠪᠡᠯ ᠲᠡᠭᠡᠶᠡ᠃
ᠶᠣᠭ ᠶᠤᠮ ᠪᠣᠯᠣᠰᠢ ᠦᠭᠡᠢ ᠄ ᠢᠳᠡ ᠠᠪᠬᠤ ᠦᠭᠡᠢ ᠂ ᠶᠠᠭᠤ ᠴᠤ᠌ ᠪᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ ᠭᠡᠰᠡᠨ ᠤᠳᠬᠠ ᠲᠠᠢ᠃
ᠠᠪᠳᠠᠷᠠ ᠶ᠋ᠢᠨ ᠴᠡᠭᠡᠵᠢᠨ ᠳᠤᠮᠳᠠ ᠄ ᠥᠷᠭᠡᠨ ᠬᠠᠨᠠᠭᠠᠷ ᠴᠡᠭᠡᠵᠢ ᠶ᠋ᠢᠨ ᠬᠢᠨᠢ ᠳᠤᠮᠳᠠ᠃
ᠭᠤᠷᠪᠠᠨ ᠵᠢᠯ ᠦ᠋ᠨ ᠨᠢᠭᠤᠷ ᠪᠣᠯᠵᠣᠨ ᠄ ᠭᠤᠷᠪᠠᠨ ᠵᠢᠯ ᠦ᠋ᠨ ᠤᠷᠲᠤ ᠤᠳᠠᠭᠠᠨ ᠴᠠᠭ ᠬᠤᠭᠤᠴᠠᠭᠠ᠃
ᠠᠳᠢᠰ ᠲᠤ᠌ ᠬᠦᠷᠲᠡᠯᠡ ᠄ ᠪᠣᠭᠳᠠ᠂ ᠬᠤᠪᠢᠯᠭᠠᠨ ᠨᠠᠷ ᠤ᠋ᠨ ᠷᠢᠳᠢ ᠰᠢᠳᠢ ᠶ᠋ᠢᠨ ᠬᠦᠷᠲᠡᠭᠡᠯ ᠬᠦᠷᠲᠡᠬᠦ ᠃
ᠺᠠᠯᠢ ᠯᠤᠩᠳᠠ ᠄ ᠬᠡᠢ ᠮᠣᠷᠢ᠃
ᠠᠮᠠᠨ ᠬᠦᠵᠦᠭᠦᠦ ᠄ ᠲᠣᠯᠣᠭᠠᠢ ᠲᠠᠢ ᠬᠣᠯᠪᠣᠯᠳᠤᠭᠰᠠᠨ ᠲᠡᠷᠡ ᠬᠡᠰᠡᠭ ᠬᠦᠵᠦᠭᠦᠨ ᠶᠠᠰᠤ ᠮᠣᠩᠭᠣᠯᠴᠤᠳ ᠤ᠋ᠨ ᠡᠷᠲᠡᠨ ᠦ᠌ ᠦᠵᠡᠯ ᠤᠬᠠᠮᠰᠠᠷ ᠲᠤ᠌ ᠠᠮᠠᠨ ᠬᠦᠵᠦᠭᠦᠨ ᠳ᠋ᠦ᠍ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠰᠦᠨᠡᠰᠦ ᠣᠷᠣᠰᠢᠳᠠᠭ ᠭᠡᠵᠦ ᠦᠵᠡᠳᠡᠭ ᠪᠣᠯᠬᠣᠷ ᠳᠠᠢᠰᠤᠨ᠂ ᠬᠥᠮᠦᠨ ᠦ᠌ ᠠᠮᠠᠨ ᠬᠦᠵᠦᠭᠦᠦ ᠶ᠋ᠢ ᠲᠠᠰᠤᠯᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠦᠵᠡᠳᠡᠭ ᠠᠵᠠᠢ᠃
ᠡᠳᠡᠷᠡᠩ᠄ ᠪᠢᠴᠢᠭ ᠦ᠋ᠨ ᠬᠡᠯᠡᠨ ᠦ᠌ ᠬᠡᠳᠡᠷᠭᠡ ᠃ ᠠᠷᠠᠰᠤ ᠰᠢᠷᠢ ᠶ᠋ᠢ ᠡᠯᠳᠡᠵᠦ ᠵᠥᠭᠡᠯᠡᠷᠡᠭᠦᠯᠬᠦ ᠪᠡᠷ ᠵᠣᠬᠢᠶᠠᠭᠰᠠᠨ ᠮᠣᠳᠣᠨ ᠪᠠᠭᠠᠵᠢ᠃
ᠳᠠᠪᠠᠴᠠᠭᠠᠨ ᠄ ᠳᠠᠪᠠᠵᠤ ᠭᠠᠷᠬᠤ ᠭᠠᠵᠠᠷ ᠃
ᠲᠣᠭᠣᠷᠢᠴᠠᠭᠠᠨ ᠄ ᠲᠣᠭᠣᠷᠢᠵᠤ ᠭᠠᠷᠬᠤ ᠭᠠᠵᠠᠷ ᠃
ᠭᠠᠲᠤᠯᠭᠠᠨ ᠄ ᠭᠠᠲᠤᠯᠵᠤ ᠪᠣᠯᠤᠮᠠᠷ ᠭᠠᠵᠠᠷ ᠃
ᠱᠠᠯᠠ ᠄ ᠴᠢᠯᠠᠭᠤ ᠰᠠᠢᠷᠭᠠᠯ ᠶᠡᠬᠡᠲᠡᠢ ᠂ ᠡᠪᠡᠰᠦ ᠤᠷᠭᠤᠮᠠᠯ ᠰᠡᠢᠷᠡᠭ ᠲᠠᠯᠠ ᠭᠠᠵᠠᠷ ᠃
ᠠᠪᠠᠢ᠄ ᠪᠠᠰᠤᠮᠵᠢᠯᠠᠭᠰᠠᠨ ᠤᠳᠬᠠ ᠲᠠᠢ ᠠᠶᠠᠯᠭᠤ ᠦᠭᠡ᠃
ᠦᠳᠡ ᠨᠠᠷᠠ ᠪᠠᠷ ᠄ ᠮᠠᠯ ᠢ᠋ᠶ᠋ᠠᠨ ᠬᠣᠲᠠᠯᠠᠬᠤ ᠴᠠᠭ ᠪᠣᠯᠤᠭᠠᠳᠤᠢ ᠪᠠᠢᠬᠤ ᠳ᠋ᠤ᠌ ᠂ ᠨᠠᠷᠠᠨ ᠤ᠋ ᠡᠷᠲᠡ ᠳ᠋ᠦ᠍ ᠮᠠᠯ ᠢ᠋ᠶ᠋ᠠᠨ ᠡᠪᠡᠰᠦ ᠢᠳᠡᠭᠦᠯᠬᠦ ᠦᠭᠡᠢ ᠬᠠᠰᠢᠶᠠᠯᠠᠵᠤ ᠣᠷᠬᠢᠬᠤ᠃
ᠭᠣᠩᠮᠤ ᠄ ᠢᠳᠡᠵᠦ ᠴᠠᠳᠳᠠᠭ ᠦᠭᠡᠢ ᠂ ᠤᠤᠭᠤᠵᠤ ᠬᠠᠨᠤᠳᠠᠭ ᠦᠭᠡᠢ᠃
ᠬᠠᠢᠯᠠᠭᠰᠠᠨ ᠨᠢ᠄ ᠭᠥᠷᠯᠦᠭ ᠬᠤᠰᠢᠭᠤᠨ ᠤ᠋ ᠬᠣᠢᠲᠤᠲᠠᠷᠢᠶᠠᠨ ᠨᠢᠭᠡᠳᠦᠯ ᠦ᠋ᠨ 73 ᠨᠠᠰᠤᠲᠠᠢ ᠤᠤᠽᠠᠷ ᠨᠠᠰᠤᠲᠠᠨ
ᠰᠢᠩᠭᠡᠭᠡᠭᠰᠡᠨ ᠨᠢ᠄ ᠣ · ᠰᠢᠯᠢ ᠭᠤ · ᠴᠡᠷᠡᠩᠳᠣᠷᠵᠢ
ᠪᠠᠭᠤᠯᠭᠠᠭᠰᠠᠨ ᠨᠢ᠄ ᠴ · ᠰᠠᠷᠠᠨᠲᠤᠶᠠᠭᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠰᠡᠷᠭᠦᠯᠡᠩ