ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ < ᠳᠦᠷᠪᠡ > Хойд мэргэн төмнө – Дөрөв
384ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ < ᠳᠦᠷᠪᠡ >
ᠡᠨᠡ ᠦᠶᠡ ᠳ᠋ᠦ᠍ ᠶᠠᠭ ᠠᠯᠲᠠᠨ ᠵᠣᠣ (ᡀᠠᠰᠠ) ᠶ᠋ᠢ ᠪᠠᠢᠭᠤᠯᠵᠤ ᠪᠠᠢᠭᠰᠠᠨ ᠴᠠᠭ ᠭᠡᠨᠡ᠃ ᠣᠷᠳᠣᠨ ᠢ᠋ ᠪᠠᠢᠭᠤᠯᠬᠤ ᠳᠡᠭᠡᠷᠡ ᠲᠠᠩᠭᠤᠳ ᠤ᠋ᠨ ᠤᠷᠠᠴᠤᠳ ᠪᠦᠭᠦᠳᠡ ᠴᠤᠭᠯᠠᠭᠰᠠᠨ ᠪᠣᠯᠪᠠᠴᠤ ᠪᠦᠲᠦᠭᠡᠵᠦ ᠴᠢᠳᠠᠬᠤ ᠦᠭᠡᠢ《 ᠦᠢᠯᠡ ᠪᠡᠨ ᠦᠵᠡᠵᠦ ᠦᠰᠦ ᠪᠡᠨ ᠲᠣᠭᠠᠯᠠᠵᠤ 》ᠪᠠᠢᠭᠰᠠᠨ ᠭᠡᠨᠡ᠃ ᠣᠷᠳᠣᠨ ᠢ᠋ ᠡᠳᠦᠷ ᠨᠢ ᠪᠠᠷᠢᠭᠠᠳ ᠲᠠᠯᠪᠢᠬᠤ ᠳ᠋ᠤ᠌ ᠰᠥᠨᠢ ᠨᠢ ᠨᠤᠷᠠᠵᠤ᠂ ᠰᠢᠪᠠᠷ ᠨᠢ ᠰᠢᠪᠡᠷ ᠲᠡᠭᠠᠨ᠂ ᠴᠢᠯᠠᠭᠤ ᠨᠢ ᠴᠢᠯᠠᠭᠤ ᠳ᠋ᠠᠭᠠᠨ ᠢᠯᠭᠠᠷᠠᠭᠠᠳ ᠶᠠᠪᠤᠴᠢᠬᠠᠳᠠᠭ ᠭᠡᠨᠡ᠃ ᠶᠠᠭ ᠠᠷᠭᠠ ᠶᠠᠳᠠᠬᠤ ᠳ᠋ᠠᠭᠠᠨ ᠳᠠᠯᠠᠢ ᠯᠠᠮᠠ ᠂ ᠪᠠᠨᠴᠢᠨ ᠡᠷᠳᠡᠨᠢ ᠬᠣᠶᠠᠭᠤᠯᠠ ᠪᠠᠳᠢᠷᠴᠢᠨ ᠯᠠᠮᠠ ᠶ᠋ᠢᠨ ᠶᠠᠩᠵᠤ ᠪᠠᠷ ᠬᠤᠪᠴᠠᠯᠠᠭᠠᠳ ᠂ ᠮᠡᠷᠭᠡᠨ ᠲᠡᠮᠦᠨᠡ ᠡᠴᠡ ᠠᠷᠭᠠ ᠮᠡᠷᠭᠡᠵᠢᠯ ᠢ᠋ ᠨᠢ ᠬᠤᠯᠠᠭᠠᠢᠯᠠᠬᠤ ᠪᠠᠷ ᠡᠭᠦᠷᠭᠡ ᠲᠡᠭᠦᠷᠭᠡ ᠪᠡᠨ ᠡᠭᠦᠷᠦᠨ ᠴᠢᠷᠦᠨ ᠬᠦᠷᠴᠦ ᠢᠷᠡᠪᠡ ᠭᠡᠨᠡ ᠃ᠮᠡᠷᠭᠡᠨ ᠲᠡᠮᠦᠨᠡ ᠄
– ᠵᠠ᠂ ᠲᠠᠨᠤᠰ ᠬᠠᠮᠢᠭᠠ ᠠ᠋ᠴᠠ ᠢᠷᠡᠪᠡ ? ᠭᠡᠵᠦ ᠰᠤᠷᠠᠬᠤ ᠳ᠋ᠤ᠌ ᠬᠣᠶᠠᠷ ᠯᠠᠮᠠ ᠄
– ᠮᠠᠨᠤᠰ ᠠᠯᠲᠠᠨ ᠵᠣᠣ ᠠ᠋ᠴᠠ ᠢᠷᠡᠯᠡ ᠭᠡᠵᠦ ᠭᠡᠨᠡ ᠃
– ᠠᠯᠲᠠᠨ ᠵᠣᠣ ᠶ᠋ᠢ ᠪᠠᠷᠢᠭᠠᠳ ᠪᠠᠷᠠᠵᠤ ᠤᠤ? ᠭᠡᠵᠦ ᠯᠠᠪᠯᠠᠨ ᠠᠰᠠᠭᠤᠬᠤ ᠳ᠋ᠤ᠌ ᠂
– ᠪᠤᠳᠠᠯᠠᠩ ᠣᠷᠳᠣᠨ ᠢ᠋ ᠨᠢ ᠬᠦᠷᠲᠡᠯᠡ ᠠᠯᠢ ᠬᠡᠵᠢᠶᠡᠨᠡᠢ ᠪᠠᠷᠢᠵᠤ ᠪᠠᠷᠠᠭᠰᠠᠨ ᠭᠡᠵᠦ ᠬᠤᠳᠠᠯ ᠬᠡᠯᠡᠵᠡᠢ ᠃ ᠮᠡᠷᠭᠡᠨ ᠲᠡᠮᠦᠨᠡ ᠄
– ᠶᠠᠮᠠᠷ ᠴᠦ᠍ ᠲᠦᠷᠭᠡᠨ ᠶᠦᠮ ᠳᠡ ! ᠲᠡᠢᠮᠦ ᠠᠮᠠᠷᠬᠠᠨ ᠂ ᠲᠡᠢᠮᠦ ᠲᠦᠷᠭᠡᠨ ᠪᠠᠷᠢᠴᠢᠬᠠᠯᠠ ᠭᠡᠵᠦ ᠤᠤ? ᠭᠡᠵᠦ ᠯᠠᠪᠯᠠᠵᠤ ᠰᠤᠷᠠᠵᠤ ᠭᠡᠨᠡ᠃
ᠠᠯᠲᠠᠨ ᠵᠣᠣ ᠪᠤᠳᠠᠯᠠᠩ ᠣᠷᠳᠣᠨ ᠲᠠᠢ ᠪᠠᠨ ᠠᠯᠢ ᠬᠡᠳᠦᠢᠨᠡᠢ ᠪᠠᠢᠭᠤᠯᠤᠭᠳᠠᠯᠠ ᠭᠡᠬᠦ ᠶ᠋ᠢ ᠮᠡᠷᠭᠡᠨ ᠲᠡᠮᠦᠨᠡ ᠪᠠᠬᠠᠨ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠵᠠᠢ᠃ ᠲᠡᠢᠮᠦ ᠡᠴᠡ ᠳᠠᠯᠠᠢ ᠯᠠᠮᠠ ᠳ᠋ᠤ᠌ ᠬᠤᠷᠴᠠ ᠲᠣᠩᠭᠣᠷᠠᠭ ᠥᠭᠴᠦ ᠦᠰᠦ ᠪᠡᠨ ᠬᠤᠰᠤᠭᠤᠯᠬᠤ ᠶ᠋ᠢᠨ ᠳᠠᠭᠠᠤ ᠪᠠᠨᠴᠢᠨ ᠡᠷᠳᠡᠨᠢ ᠶ᠋ᠢᠨ ᠬᠣᠶᠠᠷ ᠭᠠᠷ ᠤ᠋ᠨ ᠬᠣᠶᠠᠷ ᠬᠣᠶᠠᠷ ᠬᠤᠷᠤᠭᠤ ᠶ᠋ᠢ ᠨᠢ ᠲᠠᠰᠢᠷ ( ᠬᠠᠮᠲᠤ )ᠠᠳᠬᠤᠵᠤ ᠠᠪᠤᠭᠠᠳ ᠄
– ᠲᠠᠨᠤᠰ ᠲᠡᠭᠡᠭᠡᠳ ᠪᠠᠷᠰ ᠵᠢᠯ ᠦ᠋ᠨ ᠪᠠᠷᠰ ᠰᠠᠷᠠ ᠶ᠋ᠢᠨ ᠪᠠᠷᠰ ᠡᠳᠦᠷ ᠦ᠋ᠨ ᠪᠠᠷᠰ ᠴᠠᠭ ᠲᠤ᠌ ᠭᠠᠷᠤᠭᠰᠠᠨ ᠳᠣᠯᠣᠭᠠᠨ ᠨᠠᠰᠤᠲᠠᠢ ᠬᠦᠦ ᠶ᠋ᠢ ᠪᠤᠳᠠᠯᠠᠩ ᠣᠷᠳᠣᠨ ᠤ᠋ ᠭᠣᠣᠯ ᠲᠤᠯᠭᠠᠭᠤᠷ ᠳᠣᠣᠷᠠ ᠪᠤᠯᠠᠪᠠ ᠤᠤ ᠂ ᠦᠭᠡᠢ ᠤᠤ ? ᠭᠡᠬᠦ ᠳ᠋ᠦ᠍ ᠳᠠᠯᠠᠢ ᠯᠠᠮᠠ ᠄
– ᠣᠣ ᠂ ᠲᠡᠭᠡᠯᠡ ᠲᠡᠭᠡᠯᠡ ! ᠭᠡᠬᠦ ᠵᠠᠭᠤᠷᠠ ᠬᠥᠯ ᠦ᠋ᠨ ᠬᠤᠷᠤᠭᠤᠨ ᠳ᠋ᠠᠭᠠᠨ ᠪᠢᠷ ᠬᠠᠪᠴᠢᠭᠤᠯᠵᠤ ᠪᠠᠢᠭᠠᠳ ᠰᠠᠶᠢ ᠶ᠋ᠢᠨ ᠦᠭᠡᠰ ᠢ᠋ ᠲᠡᠮᠳᠡᠭᠯᠡᠵᠦ ᠠᠪᠴᠠᠢ ᠃ ᠡᠨᠡ ᠮᠡᠲᠦ ᠪᠡᠷ ᠮᠡᠷᠭᠡᠨ ᠲᠡᠮᠦᠨᠡ ᠢᠩᠭᠢᠵᠦ ᠬᠢᠪᠡ ᠤᠤ ᠂ ᠦᠭᠡᠢ ᠤᠤ ? ᠴᠢᠩᠭᠢᠵᠦ ᠬᠢᠪᠡ ᠤᠤ ᠂ ᠦᠭᠡᠢ ᠤᠤ ? ᠭᠡᠵᠦ ᠰᠤᠷᠠᠭᠠᠳ ᠪᠠᠢᠬᠤ ᠳ᠋ᠤᠨᠢ ᠳᠠᠯᠠᠢ ᠯᠠᠮᠠ ᠄
– ᠠ ᠂ ᠲᠡᠢᠮᠦ ᠲᠡᠢᠮᠦ ᠂ ᠢᠩᠭᠢᠭᠰᠡᠨ ᠴᠢᠩᠭᠢᠭᠰᠡᠨ ᠭᠡᠵᠦ ᠬᠠᠷᠢᠭᠤᠯᠬᠤ ᠶ᠋ᠢᠨ ᠳᠠᠭᠠᠤ ᠬᠡᠯᠡᠭᠰᠡᠨ ᠪᠦᠭᠦᠳᠡ ᠶ᠋ᠢ ᠨᠢ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠡᠮᠳᠡᠭᠯᠡᠭᠡᠳ ᠪᠠᠢᠵᠤ ᠭᠡᠨᠡ ᠃ ᠲᠡᠭᠡᠭᠡᠳ ᠤᠳᠠᠬᠤ ᠦᠭᠡᠢ ᠪᠠᠷᠠᠬᠤ ᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠳᠠᠯᠠᠢ ᠯᠠᠮᠠ ᠪᠠᠶᠠᠷᠯᠠᠭᠠᠳ ᠲᠡᠰᠬᠦ ᠦᠭᠡᠢ ᠲᠤᠯᠠ ᠰᠠᠨᠠᠮᠰᠠᠷ ᠦᠭᠡᠢ ᠪᠡᠷ ᠬᠥᠯ ᠢ᠋ᠶ᠋ᠡᠨ ᠴᠢᠩᠭᠠ ᠬᠥᠳᠡᠯᠭᠡᠭᠡᠳ ᠴᠠᠭᠠᠰᠤ ᠪᠠᠨ ᠳᠤᠤᠭᠠᠷᠭᠠᠴᠢᠬᠠᠵᠤ ᠭᠡᠨᠡ ᠃ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠢᠴᠢᠵᠦ ᠪᠠᠢᠭᠠ ᠶ᠋ᠢ ᠨᠢ ᠮᠡᠷᠭᠡᠨ ᠲᠡᠮᠦᠨᠡ ᠮᠡᠳᠡᠲᠡᠯᠡ ᠨᠢ ᠂ ᠪᠠᠨᠴᠢᠨ ᠡᠷᠳᠡᠨᠢ ᠬᠤᠷᠤᠭᠤ ᠪᠠᠨ ᠤᠭᠵᠠ (ᠰᠤᠭᠤ )ᠲᠠᠲᠠᠭᠠᠳ ᠴᠠᠭᠠᠰᠤ ᠶ᠋ᠢ ᠰᠢᠭᠦᠷᠴᠦ ᠠᠪᠤᠭᠠᠳ ᠳᠠᠯᠠᠢ ᠯᠠᠮᠠ ᠪᠠᠨ ᠴᠢᠷᠦᠭᠡᠳ ᠵᠣᠯᠠᠨ ᠭᠠᠷᠴᠤ ᠭᠡᠨᠡ ᠃ ᠬᠡᠷᠡᠭ ᠨᠢᠭᠡᠮᠦᠰᠦᠨ ᠬᠠᠵᠠᠢᠭᠰᠠᠨ ᠢ᠋ ᠮᠡᠳᠡᠮᠡᠭᠴᠡ ᠮᠡᠷᠭᠡᠨ ᠲᠡᠮᠦᠨᠡ ᠬᠦᠦ ᠪᠡᠨ ᠳᠠᠭᠤᠳᠠᠨ ᠄
– ᠬᠥᠪᠡᠭᠦᠨ ᠬᠥᠪᠡᠭᠦᠨ ᠂ ᠬᠣᠶᠠᠷ ᠭᠡᠢᠴᠢᠨ ᠠᠪᠤ ᠶ᠋ᠢᠨ ᠴᠢᠨᠢ ᠬᠡᠯᠡ ᠶ᠋ᠢ ᠰᠤᠭᠤᠯᠤᠭᠠᠳ ᠶᠠᠪᠤᠴᠢᠬᠠᠯᠠ ᠂ ᠪᠤᠯᠢᠶᠠᠭᠠᠳ ᠢᠷᠡ ! ᠭᠡᠵᠡᠢ ᠃ ᠠᠷᠠᠪᠰᠠᠷ ᠲᠡᠳᠡ ᠬᠣᠶᠠᠷ ᠢ᠋ ᠭᠦᠢᠴᠡᠵᠦ ᠬᠦᠷᠦᠭᠡᠳ ᠄
– ᠠᠪᠤ ᠶ᠋ᠢᠨ ᠬᠡᠯᠡ ᠶ᠋ᠢ ᠭᠠᠷᠭᠠᠵᠤ ᠥᠭ ! ᠭᠡᠬᠦ ᠳ᠋ᠦ᠍ ᠲᠡᠳᠡ ᠨᠢᠭᠡᠨ ᠭᠣᠷᠭᠢ ᠶ᠋ᠢᠨ ᠬᠡᠯᠡ ᠥᠭᠭᠦᠭᠡᠳ ᠪᠤᠴᠠᠭᠠᠴᠢᠬᠠᠵᠤ ᠭᠡᠨᠡ ᠃ ᠠᠪᠤ ᠨᠢ ᠲᠡᠮᠲᠡᠷᠢᠵᠦ ᠦᠵᠡᠭᠡᠳ ᠄
– ᠢᠰᠢ! ᠬᠦᠦ ᠮᠢᠨᠢ ᠂ ᠲᠡᠳᠡ ᠠᠪᠤ ᠶ᠋ᠢᠨ ᠴᠢᠨᠢ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠪᠢᠴᠢᠭᠡᠳ ᠶᠠᠪᠤᠴᠢᠬᠠᠯᠠ ᠰᠢᠦ ᠂ ᠡᠢᠮᠦ ᠬᠡᠯᠡ ᠭᠡᠰᠡᠨ ᠪᠢᠰᠢ ᠃ ᠵᠠ ᠡᠦᠲᠦ ᠶᠠᠭᠠᠬᠢᠬᠤᠪ ᠂ ᠡᠨᠡ ᠬᠣᠶᠠᠷ ᠠᠮᠢᠲᠠᠨ ᠭᠠᠳᠠᠨᠠ ᠶᠠᠭᠤᠮᠠ ᠣᠷᠬᠢᠵᠤ ᠤᠤ᠂ ᠦᠭᠡᠢ ᠤᠤ ? ᠭᠡᠬᠦ ᠳ᠋ᠦ᠍ ᠂ ᠠᠷᠠᠪᠰᠠᠷ ᠭᠠᠷᠴᠤ ᠣᠴᠢᠭᠠᠳ ᠭᠡᠷ ᠲᠦᠰᠢᠭᠦᠯᠵᠦ ᠣᠷᠬᠢᠭᠰᠠᠨ ᠬᠣᠶᠠᠷ ᠬᠥᠪ ᠬᠦᠨᠳᠦ ᠲᠠᠶᠠᠭ ᠢ᠋ ᠨᠢ ᠠᠪᠴᠢᠷᠠᠨ ᠠᠪᠤ ᠳ᠋ᠠᠭᠠᠨ ᠪᠠᠷᠢᠭᠤᠯᠵᠠᠢ ᠃ ᠠᠪᠤ ᠨᠢ ᠪᠠᠷᠢᠵᠤ ᠦᠵᠡᠭᠡᠳ ᠄
– ᠨᠠᠳᠠᠳᠤ ᠦᠯᠡᠳᠡᠭᠡᠭᠰᠡᠨ ᠱᠠᠩ ᠡᠨᠡ ᠪᠠᠢᠬᠤ ᠂ ᠳᠣᠲᠣᠷᠠ ᠨᠢ ᠲᠠᠭ ᠳᠦᠭᠦᠷᠡᠩ ᠦᠢᠷᠡᠮᠡᠭ ᠠᠯᠲᠠ ᠪᠠᠢᠭᠠ ᠶᠤᠮ ᠰᠢᠦ ᠭᠡᠵᠦ ᠭᠡᠨᠡ ᠃
ᠳᠠᠯᠠᠢ᠂ ᠪᠠᠨᠴᠢᠨ ᠬᠣᠶᠠᠷ ᠬᠠᠷᠢᠵᠤ ᠬᠦᠷᠦᠭᠡᠳ ᠤᠳᠠᠭᠰᠠᠨ ᠲᠦᠳᠡᠭᠰᠡᠨ ᠦᠭᠡᠢ ᠪᠤᠳᠠᠯᠠᠩ ᠣᠷᠳᠣᠨ ᠢ᠋ ᠪᠠᠢᠭᠤᠯᠵᠤ ᠪᠠᠷᠠᠪᠠ ᠭᠡᠨᠡ ᠃ ᠭᠡᠲᠡᠯᠡ ᠬᠠᠮᠤᠭ ᠰᠡᠭᠦᠯ ᠦ᠋ᠨ ᠪᠠᠷᠠᠭᠤᠨ ᠬᠣᠢᠲᠤ ᠥᠨᠴᠥᠭ ᠦ᠋ᠨ ᠪᠠᠷᠢᠯᠭᠠ ᠶ᠋ᠢ ᠨᠢ ᠶᠠᠭᠠᠬᠢᠵᠤ ᠪᠠᠷᠢᠳᠠᠭ ᠢ᠋ ᠮᠡᠷᠭᠡᠨ ᠲᠡᠮᠦᠨᠡ ᠡᠴᠡ ᠲᠡᠮᠳᠡᠭᠯᠡᠵᠦ ᠠᠮᠵᠢᠭᠰᠠᠨ ᠦᠭᠡᠢ ᠲᠤᠯᠠ ᠪᠠᠬᠠᠨ ᠡᠪ ᠬᠠᠪᠤ ᠦᠭᠡᠢ ᠪᠠᠷᠢᠭᠰᠠᠨ ᠪᠥᠭᠡᠳ ᠲᠡᠷᠡ ᠨᠢ ᠡᠦᠲᠦ ᠪᠣᠯᠲᠠᠯᠠ ᠤᠭ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠭᠰᠠᠭᠠᠷ ᠭᠡᠨᠡ ᠃
ᠲᠡᠭᠡᠭᠡᠳ ᠲᠠᠩᠭᠤᠳ ᠤ᠋ᠨ ᠣᠷᠣᠨ ᠳ᠋ᠤ᠌ ᠠᠯᠲᠠᠨ ᠵᠣᠣ ᠲᠣᠭᠲᠠᠭᠰᠠᠨ ᠤ᠋ ᠪᠠᠨ ᠶᠡᠬᠡ ᠪᠠᠶᠠᠷ ᠬᠢᠬᠦ ᠪᠡᠷ ᠪᠣᠯᠵᠤ᠂ᠰᠣᠷᠢᠨᠵᠢᠨ ᠭᠣᠮᠪᠣ ᠬᠠᠭᠠᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠬᠥᠮᠦᠨ ᠲᠣᠮᠢᠯᠠᠨ ᠮᠡᠷᠭᠡᠨ ᠲᠡᠮᠦᠨᠡ ᠶ᠋ᠢ ᠶᠡᠬᠡ ᠪᠠᠶᠠᠷ ᠲᠠᠭᠠᠨ ᠵᠠᠯᠠᠵᠤ ᠭᠡᠨᠡ᠃ᠮᠡᠷᠭᠡᠨ ᠲᠡᠮᠦᠨᠡ ᠲᠡᠨᠳᠡ ᠬᠦᠷᠦᠭᠡᠳ ᠰᠣᠷᠢᠨᠵᠢᠨ ᠭᠣᠮᠪᠣ ᠬᠠᠭᠠᠨ ᠤ᠋ ᠡᠮᠦᠨᠡ ᠣᠴᠢᠵᠤ ᠬᠡᠷᠡᠭ ᠢ᠋ᠶ᠋ᠡᠨ ᠴᠠᠭᠠᠳᠬᠠᠨ ᠬᠡᠯᠡᠭᠰᠡᠨ ᠨᠢ ᠄
– ᠲᠠᠨ ᠤ᠋ ᠬᠠᠲᠤᠨ ᠢ᠋ ᠵᠠᠯᠠᠬᠤ ᠶ᠋ᠢᠨ ᠲᠥᠯᠥᠭᠡ ᠪᠢ ᠲᠠᠮᠤ ᠲᠠᠢ ᠬᠣᠯᠠ ᠭᠠᠵᠠᠷ ᠶᠠᠪᠤᠵᠤ᠂ ᠲᠠᠷᠢᠬᠢ ᠲᠣᠯᠣᠭᠠᠢ ᠲᠠᠮᠢᠷ ᠬᠦᠴᠦ ᠪᠡᠨ ᠰᠢᠪᠬᠠᠭᠰᠠᠨ ᠪᠢᠰᠢᠦ? ᠲᠡᠷᠡ ᠰᠥᠨᠢ ᠬᠢᠲᠠᠳ ᠠ᠋ᠴᠠ ᠬᠣᠣᠷᠲᠤ ᠮᠣᠭᠠᠢ ᠲᠠᠯᠪᠢᠭᠰᠠᠨ ᠳ᠋ᠤ᠌ ᠪᠢ ᠤᠨᠲᠠᠬᠤ ᠨᠣᠢᠷ ᠦᠭᠡᠢ ᠪᠡᠷ ᠲᠠᠨ ᠤ᠋ ᠡᠭᠦᠳᠡᠨ ᠳᠡᠭᠡᠷᠡ ᠰᠠᠬᠢᠵᠤ ᠪᠠᠢᠭᠠᠳ ᠂ ᠢᠷᠡᠬᠦ ᠮᠣᠭᠠᠢ ᠶ᠋ᠢ ᠴᠠᠪᠴᠢᠭᠰᠠᠨ ᠳ᠋ᠤ᠌ ᠴᠢᠰᠤ ᠨᠢ ᠦᠰᠦᠷᠦᠭᠡᠳ ᠨᠣᠭᠣᠭᠠᠨ ᠳᠠᠷᠢ ᠡᠬᠡ ᠶ᠋ᠢᠨ ᠬᠠᠴᠠᠷ ᠳᠡᠭᠡᠷᠡ ᠲᠤᠰᠴᠢᠬᠠᠯᠠ ᠂ ᠪᠢ ᠰᠡᠯᠡᠮᠡ ᠪᠡᠷ ᠴᠢᠰᠤ ᠶ᠋ᠢ ᠬᠤᠰᠤᠵᠤ ᠠᠪᠬᠤ ᠠ᠋ᠴᠠ ᠠᠶᠤᠭᠠᠳ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠳᠣᠯᠢᠶᠠᠵᠤ ᠠᠷᠢᠯᠭᠠᠭᠰᠠᠨ ᠶᠤᠮ ᠂ ᠬᠠᠷᠢᠨ ᠲᠠᠨ ᠤ᠋ ᠬᠠᠲᠤᠨ ᠳ᠋ᠤ᠌ ᠰᠠᠨᠠᠭᠠ ᠲᠠᠢ ᠪᠠᠢᠭᠰᠠᠨ ᠪᠢᠰᠢ ᠠ᠋ ! ᠭᠡᠲᠡᠯᠡ ᠲᠠ ᠨᠠᠮᠠ ᠶ᠋ᠢ ᠬᠠᠲᠤᠨ ᠳ᠋ᠤ᠌ ᠬᠠᠯᠲᠠᠯᠠ ᠭᠡᠵᠦ ᠬᠣᠶᠠᠷ ᠨᠢᠳᠦ ᠶ᠋ᠢ ᠮᠢᠨᠢ ᠰᠣᠬᠣᠯᠵᠤ ᠬᠠᠶᠠᠭᠰᠠᠨ ᠪᠢᠰᠢᠦ ? ᠲᠡᠷᠡ ᠦᠨᠡᠨ ᠢ᠋ ᠪᠢ ᠣᠳᠣ ᠲᠠᠨ ᠳ᠋ᠤ᠌ ᠭᠡᠷᠡᠴᠢᠯᠡᠨᠡ ! ᠭᠡᠳ ᠬᠥᠮᠦᠨ ᠦ᠌ ᠦᠰᠦ᠋ (ᠰᠦ)᠂ ᠰᠠᠷᠯᠤᠭ ᠤ᠋ᠨ ᠦᠰᠦ᠋᠂ ᠬᠣᠨᠢ ᠶ᠋ᠢᠨ ᠦᠰᠦ᠋᠂ᠢᠮᠠᠭᠠᠨ ᠤ᠋ ᠦᠰᠦ᠋ ᠶ᠋ᠢ ᠬᠣᠯᠢᠵᠤ ᠠᠶᠠᠭᠠ ᠳᠦᠭᠦᠷᠭᠡᠭᠡᠳ ᠡᠮᠦᠨᠡ ᠪᠡᠨ ᠲᠠᠯᠪᠢᠴᠢᠬᠠᠭᠠᠳ ᠰᠠᠭᠠᠳᠠᠭ ᠢ᠋ᠶ᠋ᠠᠨ ᠠᠪᠤᠨ ᠲᠩᠷᠢ ᠥᠭᠡᠳᠡ ᠨᠢᠭᠡ ᠬᠠᠷᠪᠤᠭᠠᠳ ᠄
– ᠵᠠ᠂ ᠬᠠᠭᠠᠨ ᠮᠢᠨᠢ ᠦᠵᠡᠵᠦ ᠪᠠᠢ! ᠬᠡᠮᠡᠷᠭᠡᠨ ( ᠬᠡᠷᠪᠡ ) ᠲᠡᠷᠡ ᠦᠶᠡ ᠳ᠋ᠦ᠍ ᠪᠢ ᠬᠠᠲᠤᠨ ᠳ᠋ᠤ᠌ ᠴᠢᠨᠢ ᠰᠠᠨᠠᠭᠠ ᠲᠠᠢ ᠪᠠᠢᠭᠰᠠᠨ ᠪᠣᠯ ᠡᠨᠡ ᠰᠠᠭᠠᠳᠠᠭ ᠤ᠋ᠨ ᠰᠦᠮᠪᠦ ᠨᠢ ᠡᠷᠭᠢᠵᠦ ᠢᠷᠡᠭᠡᠳ ᠮᠢᠨᠦ ᠣᠷᠣᠢ ᠳᠡᠭᠡᠷᠡ ᠲᠣᠰᠴᠤ ᠪᠢ ᠦᠬᠦᠬᠦ ᠶᠦᠮ ᠂ ᠬᠡᠮᠡᠷᠭᠡᠨ ᠪᠢᠰᠢ ᠪᠠᠢᠭᠰᠠᠨ ᠪᠣᠯ ᠡᠨᠡ ᠰᠦᠮᠪᠦ ᠠᠶᠠᠭᠠ ᠲᠠᠢ ᠦᠰᠦᠨ ( ᠰᠦ ) ᠳ᠋ᠦ᠍ ᠲᠣᠰᠴᠤ ᠂ ᠦᠰᠦᠨ ᠨᠢ ᠮᠢᠨᠦ ᠨᠢᠳᠦᠨ ᠥᠭᠡᠳᠡ ᠴᠠᠴᠤᠷᠠᠭᠠᠳ ᠪᠢ ᠳᠠᠬᠢᠨ ᠬᠠᠷᠠᠭᠠ ᠲᠠᠢ ᠪᠣᠯᠬᠤ ᠶᠤᠮ ᠭᠡᠬᠦ ᠳ᠋ᠦ᠍᠂ᠰᠠᠭᠠᠳᠠᠭ ᠤ᠋ᠨ ᠰᠦᠮᠪᠦ ᠨᠢ ᠦᠨᠡᠬᠡᠷ ᠠᠶᠠᠭᠠ ᠲᠠᠢ ᠦᠰᠦᠨ ᠤᠷᠤᠭᠤ ᠨᠢ ᠤᠨᠠᠵᠤ ᠢᠷᠡᠭᠡᠳ᠂ ᠦᠰᠦᠨ ᠨᠢᠳᠦ ᠥᠭᠡᠳᠡ ᠨᠢ ᠴᠠᠴᠤᠷᠠᠵᠤ ᠂ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠳᠠᠬᠢᠨ ᠤᠭ ᠤ᠋ᠨ ᠠᠳᠠᠯᠢ ᠬᠠᠷᠠᠭᠠ ᠲᠠᠢ ᠪᠣᠯᠵᠤ ᠭᠡᠨᠡ᠃ ᠡᠭᠦᠨ ᠳ᠋ᠦ᠍ ᠬᠠᠭᠠᠨ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠢᠲᠡᠭᠡᠵᠦ ᠂ ᠭᠡᠮ ᠬᠣᠣᠷ ᠦᠭᠡᠢ ᠠᠴᠢᠲᠠᠢ ᠬᠥᠮᠦᠨ ᠢ᠋ᠶ᠋ᠡᠨ ᠬᠢᠯᠢᠰᠳᠡᠭᠦᠯᠵᠦ ᠬᠡᠳᠦᠨ ᠵᠢᠯ ᠵᠣᠪᠠᠭᠠᠭᠰᠠᠨ ᠳ᠋ᠠᠭᠠᠨ ᠭᠣᠮᠣᠳᠠᠬᠤ ᠶ᠋ᠢᠨ ᠶᠡᠬᠡ ᠪᠡᠷ ᠭᠣᠮᠣᠳᠠᠵᠤ ᠮᠡᠷᠭᠡᠨ ᠲᠡᠮᠦᠨᠡ ᠶ᠋ᠢᠨ ᠡᠮᠦᠨᠡ ᠪᠤᠷᠤᠭᠤ ᠬᠦᠯᠢᠶᠡᠨ ᠰᠥᠭᠥᠳᠴᠦ ᠭᠡᠨᠡ᠃ ᠲᠡᠭᠡᠴᠢᠭᠡᠳ ᠮᠡᠷᠭᠡᠨ ᠲᠡᠮᠦᠨᠡ ᠶ᠋ᠢᠨ ᠬᠥᠷ (ᠭᠦᠵᠢᠷ) ᠬᠢᠯᠢᠰ ᠢ᠋ ᠴᠠᠭᠠᠳᠬᠠᠨ ᠣᠷᠳᠣᠨ ᠳ᠋ᠠᠭᠠᠨ ᠵᠠᠯᠠᠨ ᠬᠦᠨᠳᠦᠯᠡᠵᠦ᠂ ᠶᠡᠬᠡ ᠪᠡᠯᠡᠭ ᠰᠡᠯᠲᠡ ᠱᠠᠩ ᠬᠦᠷᠲᠡᠭᠡᠮᠵᠢ ᠥᠭᠭᠦᠭᠡᠳ ᠬᠠᠷᠢᠬᠤ ᠦᠶᠡ ᠳ᠋ᠦ᠍ᠨᠢ ᠲᠤᠰᠬᠠᠢ ᠬᠥᠮᠦᠰ ᠲᠣᠮᠢᠯᠠᠨ ᠭᠡᠷ ᠲᠦ᠋ᠨᠢ ᠬᠦᠷᠭᠡᠭᠦᠯᠵᠦ ᠭᠡᠨᠡ ᠃ ᠬᠦᠦ ᠪᠡᠷᠢ ᠬᠣᠶᠠᠷ ᠨᠢ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ《ᠬᠠᠷᠠᠭᠠ ᠨᠢᠳᠦ ᠪᠡᠨ ᠣᠯᠵᠤ ᠂ ᠬᠠᠷᠠ ᠬᠥᠷ ᠡᠴᠡ ᠰᠠᠯᠤᠭᠠᠳ ᠂ ᠪᠠᠶᠠᠨ ᠪᠠᠷᠠᠭᠠ ᠲᠠᠢ ᠂ ᠨᠣᠶᠠᠨ ᠪᠠᠷᠠ ᠲᠠᠢ 》ᠬᠠᠷᠢᠵᠤ ᠢᠷᠡᠬᠦ ᠶ᠋ᠢ ᠦᠵᠡᠭᠡᠳ ᠤᠬᠠᠭᠠᠨ ᠦᠭᠡᠢ ᠪᠠᠶᠠᠷᠯᠠᠵᠤ ᠭᠡᠨᠡ᠃ ᠵᠠ᠂ ᠡᠭᠦᠨ ᠡᠴᠡ ᠬᠣᠢᠰᠢ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠪᠠᠰᠠ ᠯᠠ ᠠᠩ ᠬᠦᠷᠦᠭᠡ ᠬᠢᠵᠦ ᠠᠮᠢᠳᠤᠷᠠᠬᠤ ᠪᠣᠯᠵᠤ ᠭᠡᠨᠡ ᠃ ᠨᠢᠭᠡᠨ ᠡᠳᠦᠷ ᠬᠦᠦ ᠨᠢ ᠭᠠᠷᠤᠭᠠᠳ ᠪᠠᠰᠠ ᠨᠢᠭᠡ《ᠮᠡᠯᠡᠬᠡᠢᠲᠦ ᠪᠤᠭᠤ 》ᠠᠯᠠᠭᠠᠳ ᠢᠷᠡᠵᠡᠢ᠃ ᠠᠪᠤ ᠨᠢ ᠦᠵᠡᠭᠡᠳ ᠮᠥᠨ ᠤᠭ ᠤ᠋ᠨ ᠢ᠋ᠶ᠋ᠠᠨ ᠠᠳᠠᠯᠢ ᠬᠤᠷᠳᠤᠬᠠᠨ ᠣᠴᠢᠵᠤ ᠮᠢᠬᠠ ᠶ᠋ᠢ ᠨᠢ ᠵᠢᠭᠠᠬᠠᠨ ᠴᠦ᠍ ᠦᠯᠡᠳᠡᠭᠡᠯ ᠦᠭᠡᠢ ᠪᠣᠷᠴᠠᠯᠠᠵᠤ ᠭᠡᠨᠡ᠃ ᠴᠣᠬᠣᠮ ᠶᠠᠮᠠᠷ ᠤᠴᠢᠷ ᠠ᠋ᠴᠠ ᠢᠩᠭᠢᠳᠡᠭ ᠢ᠋ ᠬᠡᠴᠢᠨᠡᠨ ᠰᠤᠷᠠᠭᠠᠳ ᠴᠦ᠍ ᠬᠡᠯᠡᠵᠦ ᠥᠭᠳᠡᠭ ᠦᠭᠡᠢ ᠶ᠋ᠢ ᠬᠦᠦ ᠪᠡᠷᠢ ᠬᠣᠶᠠᠷ ᠨᠢ ᠮᠡᠳᠡᠬᠦ ᠪᠣᠯᠬᠣᠷ ᠵᠦᠭᠡᠷ ᠯᠡ ᠤᠬᠠᠭᠠᠨ ᠢ᠋ ᠨᠢ ᠣᠯᠬᠤ ᠦᠭᠡᠢ ᠬᠠᠷᠠᠵᠤ ᠬᠣᠴᠣᠷᠴᠠᠢ᠃
ᠨᠢᠭᠡᠨ ᠡᠳᠦᠷ ᠠᠷᠠᠪᠰᠠᠷ ᠪᠠᠢᠬᠤ ᠦᠭᠡᠢ ᠳ᠋ᠦ᠍ ᠪᠡᠷᠢ ᠨᠢ᠄
–《ᠮᠡᠯᠡᠬᠡᠢᠲᠦ ᠪᠤᠭᠤ》 ᠶ᠋ᠢᠨ ᠮᠢᠬᠠ ᠶ᠋ᠢ ᠵᠠᠪᠠᠯ ᠪᠣᠷᠴᠠᠯᠠᠨ ᠢᠳᠡᠳᠡᠭ ᠨᠢ ᠶᠠᠮᠠᠷ ᠤᠬᠠᠭᠠᠨ ᠲᠠᠢ ᠶᠤᠮ ᠪᠣᠢ? ᠭᠡᠵᠦ ᠠᠪᠤ ᠠ᠋ᠴᠠ ᠪᠠᠨ ᠠᠰᠠᠭᠤᠵᠤ ᠭᠡᠨᠡ ᠃ ᠮᠡᠷᠭᠡᠨ ᠲᠡᠮᠦᠨᠡ ᠬᠡᠰᠡᠭ ᠪᠣᠳᠣᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠄
–《ᠮᠡᠯᠡᠬᠡᠢᠲᠦ ᠪᠤᠭᠤ 》 ᠶ᠋ᠢᠨ ᠮᠢᠬᠠ ᠬᠥᠮᠦᠨ ᠦ᠌ ᠲᠠᠷᠢᠬᠢ ᠳ᠋ᠤ᠌ ᠶᠡᠬᠡ ᠰᠠᠢᠨ ᠪᠠᠢᠳᠠᠭ ᠪᠢᠯᠡ᠃ᠡᠢᠮᠦ ᠡᠴᠡ ᠪᠣᠷᠴᠠᠯᠠᠨ ᠢᠳᠡᠬᠦ ᠦᠭᠡᠢ ᠪᠣᠯ ᠬᠥᠮᠦᠨ ᠪᠦᠷ ᠥᠩᠭᠡᠷᠡᠦ ᠬᠤᠷᠴᠠ ᠤᠬᠠᠭᠠᠨ ᠲᠠᠢ ᠪᠣᠯᠳᠠᠭ ᠭᠡᠵᠦ ᠬᠡᠯᠡᠭᠡᠳ ᠥᠭᠴᠡᠢ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠷᠢ ᠨᠢ ᠄
– ᠬᠥᠶᠢ ᠲᠡᠢᠮᠦ ᠪᠣᠯᠪᠠᠯ ᠪᠣᠷᠴᠠᠯᠠᠭᠰᠠᠨ ᠦᠭᠡᠢ ᠮᠢᠬᠠ ᠠ᠋ᠴᠠ ᠨᠢ ᠡᠭᠦᠨ ᠳ᠋ᠦ᠍ (ᠠᠷᠠᠪᠰᠠᠷ ᠢ᠋ ᠵᠢᠭᠠᠵᠠᠢ) ᠵᠢᠭᠠᠬᠠᠨ ᠢᠳᠡᠭᠦᠯᠴᠢᠬᠡᠪᠡᠯ ᠤᠬᠠᠭᠠ ᠰᠠᠨᠠᠭᠠ ᠵᠢᠭᠠᠬᠠᠨ ᠨᠡᠮᠡᠭᠳᠡᠬᠦ ᠪᠣᠯᠪᠠᠤ? ᠭᠡᠵᠦ ᠰᠤᠷᠠᠬᠤ ᠳ᠋ᠤ᠌ ᠮᠡᠷᠭᠡᠨ ᠲᠡᠮᠦᠨᠡ ᠄
– ᠤᠬᠠᠭᠠ ᠰᠠᠨᠠᠭᠠ ᠨᠡᠮᠡᠭᠳᠡᠬᠦ ᠪᠡᠷ ᠴᠦ᠍ ᠨᠡᠮᠡᠭᠳᠡᠨᠡ ᠂ ᠭᠡᠪᠡᠴᠦ ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠵᠦ ᠲᠣᠯᠣᠭᠠᠢ ᠪᠠᠨ ᠰᠠᠵᠢᠵᠤ ᠭᠡᠨᠡ᠃
– ᠶᠠᠭᠠᠬᠢᠭᠠᠳ ᠲᠡᠷᠡ ᠪᠣᠢ? ᠭᠡᠬᠦ ᠳ᠋ᠦ᠍
– ᠪᠢ ᠥᠪᠡᠷ ᠦ᠋ᠨ ᠦᠷᠡ ᠳ᠋ᠡᠭᠡᠨ ᠬᠠᠷᠠ ᠰᠠᠨᠠᠵᠤ ᠪᠠᠢᠭᠠ ᠪᠢᠰᠢ ᠂ ᠬᠠᠷᠢᠨ ᠴᠠᠭᠠ ᠰᠠᠨᠠᠭᠠ ᠪᠠᠢᠨᠠ ᠃ ᠬᠡᠮᠡᠷᠭᠡᠨ ᠠᠷᠠᠪᠰᠠᠷ ᠪᠠᠰᠠ ᠪᠢᠳᠡ ᠬᠣᠶᠠᠷ ᠲᠠᠢ ᠠᠳᠠᠯᠢ ᠬᠥᠮᠦᠨ ᠡᠴᠡ ᠬᠡᠳᠦ ᠤᠬᠠᠭᠠ ᠲᠠᠢ ᠪᠣᠯᠴᠢᠬᠠᠪᠠᠯ ᠂ ᠡᠨᠡ ᠭᠡᠷ ᠵᠠᠳᠠᠷᠠᠵᠤ ᠰᠠᠷᠨᠢᠬᠤ ᠨᠢ ᠲᠡᠷᠡ᠂ ᠨᠢᠭᠡ ᠭᠡᠷ ᠲᠦ᠍ ᠭᠤᠷᠪᠠᠨ ᠠᠳᠠᠯᠢ ᠤᠬᠠᠭᠠᠨ ᠲᠠᠢ ᠬᠥᠮᠦᠨ ᠬᠠᠮᠲᠤ ᠠᠮᠢᠳᠤᠷᠠᠵᠤ ᠴᠢᠳᠠᠳᠠᠭ ᠶᠣᠰᠣᠨ ᠦᠭᠡᠢ ᠶᠦᠮ ᠭᠡᠵᠦ ᠠᠪᠤ ᠨᠢ ᠬᠡᠯᠡᠵᠦ ᠭᠡᠨᠡ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠪᠡᠷᠢ ᠨᠢ ᠪᠣᠳᠣᠭᠠᠳ ᠪᠣᠳᠣᠭᠠᠳ ᠪᠠᠢᠬᠤ ᠳ᠋ᠤ᠌ ᠡᠷᠡ ᠨᠥᠬᠥᠷ ᠨᠢ ᠠᠷᠠᠢ ᠴᠦ᠍ ᠨᠢᠭᠡ ᠬᠡᠲᠦᠷᠡᠭᠦᠦ ᠲᠡᠨᠡᠭ ᠪᠠᠢᠬᠤ ᠰᠢᠭ᠋ ᠪᠣᠳᠣᠭᠳᠠᠵᠤ ᠄ ᠦᠭᠡᠢ᠂ ᠶᠡᠷᠦ ᠲᠡᠢᠮᠦ ᠴᠦ᠍ ᠶᠡᠬᠡ ᠤᠬᠠᠭᠠ ᠬᠡᠷᠡᠭ ᠦᠭᠡᠢ᠂ ᠵᠢᠭᠠᠬᠠᠨ ᠯᠠ ᠤᠬᠠᠭᠠᠨᠲᠠᠢ ᠪᠣᠯᠪᠠᠯ ᠪᠣᠯᠴᠢᠬᠠᠨᠠ ᠭᠡᠵᠦ ᠬᠦᠰᠡᠭᠡᠳ᠂ ᠠᠪᠤ ᠠ᠋ᠴᠠ ᠪᠠᠨ ᠨᠢᠭᠤᠨ ᠪᠠᠢᠵᠤ ᠪᠣᠷᠴᠠᠯᠠᠭᠠ ᠦᠭᠡᠢ《ᠮᠡᠯᠡᠬᠡᠢᠲᠦ ᠪᠤᠭᠤ》 ᠶ᠋ᠢᠨ ᠮᠢᠬᠠ ᠠ᠋ᠴᠠ ᠨᠢᠭᠡ ᠵᠢᠭᠠᠬᠠᠨ ᠠᠪᠴᠤ ᠴᠢᠨᠠᠭᠠᠳ ᠠᠷᠠᠪᠰᠠᠷ ᠲᠤ᠌ ᠢᠳᠡᠭᠦᠯᠵᠦ ᠭᠡᠨᠡ᠃ ᠡᠭᠦᠨ ᠡᠴᠡ ᠯᠡ ᠡᠬᠢᠯᠡᠭᠡᠳ ᠠᠷᠠᠪᠰᠠᠷ ᠤ᠋ᠨ ᠤᠬᠠᠭᠠ ᠦᠨᠡᠬᠡᠷ ᠡᠳᠦᠷ ᠡᠴᠡ ᠡᠳᠦᠷ ᠰᠠᠷᠠᠭᠤᠯᠲᠠᠵᠤ᠂ ᠶᠠᠭᠤᠮᠠᠨ ᠤ᠋ ᠤᠬᠠᠭᠠᠨ ᠢ᠋ ᠪᠣᠳᠣᠵᠤ ᠰᠡᠳᠬᠢᠵᠦ ᠴᠢᠳᠠᠬᠤ ᠪᠥᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠠᠷᠭᠠ ᠤᠬᠠᠭᠠᠨ ᠭᠠᠷᠭᠠᠵᠤ ᠴᠢᠳᠠᠳᠠᠭ ᠪᠣᠯᠪᠠ ᠭᠡᠨᠡ᠃ ᠨᠢᠭᠡᠨ ᠡᠳᠦᠷ ᠠᠷᠠᠪᠰᠠᠷ ᠪᠠᠰᠠ ᠯᠠ ᠤᠭ ᠤ᠋ᠨ ᠠᠳᠠᠯᠢ ᠭᠠᠳᠠᠭᠰᠢ ᠭᠠᠷᠤᠭᠠᠳ ᠵᠡᠭᠡᠷᠡ ᠬᠠᠷᠪᠤᠨ ᠳᠠᠪᠬᠢᠵᠤ ᠪᠠᠢᠲᠠᠯᠠ ᠰᠠᠭᠠᠳᠠᠭ ᠤ᠋ᠨ ᠰᠦᠮᠪᠦᠨ ᠳ᠋ᠦ᠍ᠨᠢ ᠨᠢᠭᠡ ᠬᠡᠭᠡᠯ ᠲᠡᠢ ᠰᠢᠷᠠᠭᠴᠢᠨ ᠣᠨᠣᠭᠳᠠᠭᠠᠳ ᠬᠡᠪᠡᠯᠢ ᠨᠢ ᠵᠠᠳᠠᠷᠠᠵᠤ ᠳᠣᠲᠣᠷᠠ ᠠ᠋ᠴᠠ ᠨᠢ ᠨᠢᠭᠡ ᠡᠳᠦᠷ ᠰᠠᠷᠠ ᠨᠢ ᠭᠦᠢᠴᠡᠭᠡ ᠦᠭᠡᠢ ᠢᠨᠵᠠᠭᠠ ᠭᠠᠷᠤᠭᠠᠳ ᠤᠨᠠᠴᠢᠬᠠᠪᠠ ᠭᠡᠨᠡ᠃ ᠠᠷᠠᠪᠰᠠᠷ ᠤ᠋ᠨ ᠵᠢᠷᠦᠬᠡ 《ᠬᠥᠪ 》ᠭᠡᠵᠦ ᠳᠣᠯᠭᠢᠰᠤᠨ ᠬᠠᠷᠠᠵᠤ ᠴᠢᠳᠠᠮᠠᠷ ᠦᠭᠡᠢ ᠪᠣᠯᠬᠤ ᠳ᠋ᠠᠭᠠᠨ ᠨᠢᠳᠦ ᠪᠡᠨ ᠠᠨᠢᠵᠤ ᠭᠡᠨᠡ᠃ ᠠᠨᠢᠵᠤ ᠪᠠᠢᠭᠠᠳ ᠳᠠᠬᠢᠨ ᠨᠢᠭᠡ ᠬᠠᠷᠠᠬᠤ ᠳ᠋ᠤ᠌ ᠰᠠᠢᠬᠢ ᠢᠨᠵᠠᠭᠠ ᠮᠣᠷᠢᠨ ᠤ᠋ ᠬᠢᠨᠢ ᠣᠮᠣᠷᠤᠤ ᠳᠣᠣᠷᠠ ᠤᠨᠠᠵᠤ ᠪᠣᠰᠤᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠵᠤᠯᠠᠵᠤ ᠪᠠᠢᠨᠠ ᠭᠡᠨᠡ ᠃ ᠠᠷᠠᠪᠰᠠᠷ ᠤ᠋ᠨ ᠦᠷᠦ ᠵᠢᠷᠦᠬᠡ ᠨᠢ ᠭᠣᠣᠯ ᠠ᠋ᠴᠠ ᠪᠠᠨ ᠤᠶᠠᠷᠠᠵᠤ᠄ ᠡᠪᠡᠢ ᠬᠥᠭᠡᠷᠦᠬᠦᠢ ᠂ ᠡᠢᠮᠦ ᠥᠬᠥᠭᠡᠷᠲᠡᠢ ( ᠬᠥᠭᠡᠷᠦᠬᠦᠨ )ᠠᠮᠢᠲᠠᠨ ᠢ᠋ ᠪᠢ ᠶᠠᠭᠤᠨ ᠳ᠋ᠤ᠌ ᠬᠠᠷᠪᠤᠯᠠ ᠳᠠ?》ᠭᠡᠵᠦ ᠪᠣᠳᠣᠨ ᠪᠣᠳᠣᠨ ᠭᠣᠮᠣᠳᠠᠭᠰᠠᠭᠠᠷ ᠲᠡᠷᠡ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠭᠡᠨᠡ ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠲᠡᠷᠡ᠂ ᠠᠩ ᠬᠢᠵᠦ ᠠᠮᠢᠲᠠᠨ ᠢ᠋ ᠠᠯᠠᠬᠤ ᠵᠣᠷᠢᠭ ᠦᠭᠡᠢ ᠪᠣᠯᠵᠠᠢ᠃《ᠬᠠᠯᠠᠭᠤᠨ ᠬᠣᠰᠢᠭᠤᠲᠤ ᠠᠮᠢᠲᠠᠨ ᠢ᠋ ᠠᠯᠠᠬᠤ ᠮᠢᠨᠢ ᠶᠠᠭᠤᠨ ᠪᠢᠯᠡ᠂ ᠦᠭᠡᠢ ᠪᠢ ᠶᠡᠷᠦ ᠡᠢᠮᠦ ᠨᠢᠭᠦᠯ ᠬᠢᠯᠢᠨᠴᠡ ᠬᠢᠵᠦ ᠠᠮᠢᠳᠤᠷᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠣᠯᠠ ᠭᠠᠵᠠᠷ ᠶᠠᠪᠤᠵᠤ ᠡᠷᠳᠡᠮ ᠨᠣᠮ ᠰᠤᠷᠤᠯᠴᠠᠭᠠᠳ ᠯᠠᠮᠠ ᠪᠣᠯᠵᠤ ᠠᠮᠢᠳᠤᠷᠠᠪᠠᠯ ᠳᠡᠭᠡᠷᠡ ᠦᠭᠡᠢ ᠤᠤ?》ᠭᠡᠵᠦ ᠪᠣᠳᠣᠬᠤ ᠲᠣᠰᠤᠮ ᠲᠡᠰᠬᠡᠯ ᠦᠭᠡᠢ ᠶᠠᠪᠤᠮᠠᠷ ᠰᠠᠨᠠᠭᠳᠠᠵᠤ ᠭᠡᠨᠡ᠃ ᠲᠡᠭᠡᠭᠡᠳ ᠨᠢᠭᠡᠨ ᠡᠳᠦᠷ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠣᠴᠢᠵᠤ ᠄
– ᠡᠦᠲᠦ ᠪᠢ ᠠᠮᠢᠲᠠᠨ ᠠᠯᠠᠵᠤ ᠨᠢᠭᠦᠯ ᠬᠢᠬᠦ ᠦᠭᠡᠢ᠂ ᠬᠣᠯᠠ ᠶᠠᠪᠤᠵᠤ ᠨᠣᠮ ᠬᠠᠷᠠ ᠴᠡᠭᠡᠵᠢᠯᠡᠭᠡᠳ ᠯᠠᠮᠠ ᠪᠣᠯᠤᠨᠠ ᠭᠡᠵᠦ ᠬᠡᠯᠡᠭᠡᠳ ᠠᠯᠲᠠᠨ ᠵᠣᠣ ᠶ᠋ᠢ ᠴᠢᠭᠯᠡᠨ ᠮᠣᠷᠳᠠᠵᠤ ᠭᠡᠨᠡ ᠃ ᠲᠡᠭᠡᠬᠦ ᠳ᠋ᠦ᠍ ᠠᠪᠤ ᠨᠢ ᠄ ᠲᠡᠷᠡ ᠲᠡᠨᠡᠭ ᠠᠮᠢᠲᠠᠨ ᠶᠠᠪᠤᠵᠤ ᠶᠠᠪᠤᠵᠤ ᠡᠰᠡ ᠪᠣᠯᠬᠤ ᠳ᠋ᠠᠭᠠᠨ ᠪᠤᠴᠠᠭᠠᠳ ᠢᠷᠡᠬᠦ ᠪᠠᠢᠯᠭᠦᠢ ᠭᠡᠵᠦ ᠪᠣᠳᠣᠭᠠᠳ ᠰᠠᠨᠠᠭᠠ ᠲᠠᠢᠪᠤᠩ ᠰᠠᠭᠤᠵᠤ ᠪᠠᠢᠵᠤ ᠭᠡᠨᠡ ᠃ ᠭᠡᠲᠡᠯᠡ ᠤᠴᠢᠷ ᠲᠠᠢ ᠪᠡᠷᠢ ᠨᠢ ᠯᠡ ᠰᠠᠨᠠᠭᠠ ᠠᠮᠤᠷ ᠦᠭᠡᠢ ᠪᠠᠢᠵᠤ᠂ ᠪᠠᠢᠨ ᠳᠠᠬᠢᠨ ᠳᠤᠷᠠᠰᠤᠨ ᠡᠳᠦᠷ ᠬᠣᠨᠣᠭ ᠲᠣᠭᠠᠯᠠᠭᠠᠳ ᠪᠠᠢᠳᠠᠭ ᠭᠡᠨᠡ ᠃ ᠬᠦᠯᠢᠶᠡᠭᠡᠳ ᠬᠦᠯᠢᠶᠡᠭᠡᠳ ᠰᠠᠷᠠ ᠵᠢᠯ ᠪᠣᠯᠪᠠ ᠭᠡᠨᠡ ᠂ ᠠᠷᠠᠪᠰᠠᠷ ᠡᠷᠭᠢᠵᠦ ᠢᠷᠡᠭᠰᠡᠨ ᠦᠭᠡᠢ᠂ ᠲᠡᠭᠡᠬᠦ ᠳ᠋ᠦ᠍ ᠪᠡᠷᠢ ᠨᠢ ᠄
– ᠠᠷᠤ ᠠ᠋ᠴᠠ ᠨᠢ ᠶᠠᠪᠤᠯ ᠦᠭᠡᠢ ᠲᠤᠰᠠ ᠦᠭᠡᠢ ᠪᠣᠯᠤᠯᠠ ᠂ ᠪᠢ ᠣᠯᠵᠤ ᠠᠪᠤᠭᠠᠳ ᠳᠠᠭᠠᠭᠤᠯᠤᠭᠠᠳ ᠢᠷᠡᠶᠡ ᠬᠦᠯᠢᠶᠡᠵᠦ ᠪᠠᠢ!ᠭᠡᠵᠦ ᠬᠡᠯᠡᠭᠡᠳ ᠬᠡᠦᠬᠡᠦᠰ ᠢ᠋ᠶ᠋ᠡᠨ ᠡᠭᠦᠷᠦᠨ ᠡᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠪᠤᠭᠰᠠᠨ ᠵᠦᠭ ᠢ᠋ ᠮᠥᠷᠳᠡᠨ ᠮᠣᠷᠳᠠᠵᠤ ᠭᠡᠨᠡ ᠂ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠭᠠᠭᠴᠠᠭᠠᠷ ᠰᠠᠭᠤᠵᠤ ᠬᠣᠴᠣᠷᠤᠨ ᠬᠦᠯᠢᠶᠡᠵᠦ ᠭᠡᠨᠡ ᠃ ᠵᠢᠯ ᠦ᠋ᠨ ᠵᠢᠯ ᠳ᠋ᠦ᠍ ᠴᠢᠮᠡᠭᠡ ᠰᠤᠷᠠᠭ ᠲᠠᠭ ᠶᠠᠭ ᠭᠡᠨᠡ ᠃
ᠬᠡᠳᠦᠨ ᠵᠢᠯ ᠦ᠋ᠨ ᠠᠷᠤ ᠳ᠋ᠤ᠌ (ᠳᠠᠷᠠᠭᠠ) ᠦᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠬᠠᠷᠠᠭᠠ ᠪᠠᠨ ᠰᠢᠪᠬᠠᠨ ᠬᠦᠯᠢᠶᠡᠬᠦ ᠶ᠋ᠢᠨ ᠴᠥᠬᠥᠷᠡᠯ ᠢ᠋ ᠠᠮᠰᠠᠵᠤ ᠰᠠᠭᠤᠭᠰᠠᠨ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠪᠠᠰᠠ ᠨᠡᠭᠦᠭᠡᠳ ᠶᠠᠪᠤᠭᠰᠠᠨ ᠭᠡᠨᠡ᠃ ᠴᠣᠬᠣᠮ ᠬᠠᠭᠠᠷᠠ (ᠬᠠᠮᠢᠭᠠᠰᠢ) ᠪᠠᠨ ᠨᠡᠭᠦᠭᠰᠡᠨ ᠢ᠋ ᠬᠡᠨ ᠴᠦ᠍ ᠮᠡᠳᠡᠳᠡᠭ ᠦᠭᠡᠢ ᠤᠴᠢᠷ ᠠ᠋ᠴᠠ ᠦᠯᠢᠭᠡᠷ ᠢᠭᠢᠵᠦ (ᠢᠩᠭᠢᠵᠦ) ᠬᠠᠷᠠᠮᠰᠠᠯᠲᠠᠢ ᠲᠠᠰᠤᠷᠠᠳᠠᠭ ᠪᠢᠯᠡ᠃
ᠤᠤᠯ ᠤ᠋ᠨ ᠬᠠᠢᠰᠢ ᠵᠧᠦ ᠶ᠋ᠢᠨ ᠤᠯᠤᠰ ᠲᠥᠷᠥ ᠶ᠋ᠢᠨ ᠵᠥᠪᠯᠡᠯᠭᠡᠨ ᠦ᠌ ᠰᠣᠨᠲᠠᠷᠵᠠ ᠨᠠᠰᠤᠲᠠᠨ ( 75 ᠨᠠᠰᠤᠲᠠᠢ )᠂ ᠤᠤᠯ ᠤ᠋ᠨ ᠳᠠᠪᠤᠰᠤᠨᠭᠣᠪᠢ ᠰᠤᠮᠤᠨ ᠤ᠋ ᠮᠠᠯᠴᠢᠨ ᠳᠣᠪᠵᠢ ᠨᠠᠰᠤᠲᠠᠨ ( 65 ᠨᠠᠰᠤᠲᠠᠢ ) ᠨᠠᠷ ᠤ᠋ᠨ ᠬᠡᠯᠡᠭᠰᠡᠨ ᠢ᠋ ᠴᠡᠪᠰᠢᠭ ᠲᠡᠮᠳᠡᠭᠯᠡᠨ ᠡᠮᠬᠢᠯᠡᠪᠡ ( 1978 ᠣᠨ ᠤ᠋ 11 ᠰᠠᠷᠠ )᠃
– – – –
ᠲᠠᠢᠯᠪᠤᠷᠢ
① ᠬᠡᠦᠬᠡᠨ ᠲᠠᠨ ᠤ᠋ ᠳ᠋ᠤ᠌᠂ ᠬᠥᠪᠡᠭᠦᠨ ᠮᠠᠨ ᠤ᠋ ᠳ᠋ᠤ᠌ ᠪᠠᠢᠨᠠ ᠭᠡᠰᠡᠨ ᠶᠣᠭᠲᠠᠯᠠᠯ᠃
② ᠵᠠᠮ ᠵᠠᠶᠠᠭᠠ ᠨᠢ ᠨᠡᠢᠯᠡᠪᠡᠯ ᠤᠳᠠᠭᠠᠨ ᠵᠢᠷᠭᠠᠨᠠ ᠭᠡᠰᠡᠨ ᠤᠳᠬᠠ ᠲᠠᠢ ᠶᠣᠭᠲᠠᠯᠠᠯ ᠦᠭᠡ᠃
③ ᠲᠠᠨᠢ᠄ ᠴᠢᠨᠢ ᠶ᠋ᠢᠨ ᠬᠦᠨᠳᠦᠳᠬᠡᠯ ᠦᠭᠡ᠃
④ ᠭᠠ᠄ ᠲᠥᠪᠡᠳ ᠴᠠᠭᠠᠨ ᠲᠣᠯᠣᠭᠠᠢ ᠶ᠋ᠢᠨ ᠨᠢᠭᠡᠳᠦᠭᠡᠷ ᠡᠬᠡᠰᠢᠭ — ᠭᠠ᠃
⑤ ᠳᠠᠩᠰᠤtangs᠄ ᠲᠦᠯᠡᠬᠦ ᠳ᠋ᠦ᠍ ᠳᠥᠭᠥᠮ ᠪᠣᠯᠭᠠᠵᠤ ᠬᠠᠪᠲᠠᠭᠠᠢᠯᠠᠨ ᠬᠠᠲᠠᠭᠠᠭᠰᠠᠨ ᠠᠷᠭᠠᠯ᠃
⑥ ᠳ᠋ᠠᠨᠴᠢᠨ ᠠᠭᠤᠯᠠ᠄ ᠲᠤᠰ ᠠᠭᠤᠯᠠ ᠬᠥᠬᠡ ᠨᠠᠭᠤᠷ ᠤ᠋ᠨ ᠪᠠᠷᠠᠭᠤᠨ ᠡᠮᠦᠨᠡ ᠵᠦᠭ ᠲᠦ᠍ ᠪᠠᠢᠷᠢᠯᠠᠵᠤ ᠪᠣᠢ ᠂ ᠣᠷᠣᠢ ᠨᠢ ᠴᠠᠪᠴᠢᠷᠬᠠᠢ ᠪᠠᠢᠳᠠᠭ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠰᠡᠷᠭᠦᠯᠡᠩ