ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ < ᠭᠤᠷᠪᠠ > Хойд мэргэн төмнө – Гурав
283ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ < ᠭᠤᠷᠪᠠ >
ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠲᠠᠩᠭᠤᠳ ᠲᠤ᠌ ᠬᠠᠷᠢᠭᠠᠳ ᠢᠷᠡᠭᠰᠡᠨ ᠵᠠᠩᠭᠢ (ᠰᠤᠷᠠᠭ ᠴᠢᠮᠡᠭᠡ ) ᠶ᠋ᠢ ᠪᠡᠷᠢ ᠨᠢ ᠳᠣᠣᠷᠠ ᠪᠠᠨ ᠣᠯᠤᠭᠠᠳ ᠰᠣᠨᠣᠰᠴᠤ ᠭᠡᠨᠡ ᠃ ᠭᠡᠪᠡᠴᠦ ᠬᠦᠯᠢᠶᠡᠭᠡᠳ ᠬᠠᠯᠢᠶᠠᠭᠠᠳ ᠭᠤᠷᠪᠠᠨ ᠵᠢᠯ ᠪᠣᠯᠲᠠᠯᠠ ᠪᠠᠷᠠ ᠴᠢᠮᠡᠭᠡ ᠦᠭᠡᠢ ᠳ᠋ᠦ᠍ ᠨᠢᠭᠡ ᠬᠡᠷᠡᠭ ᠭᠠᠷᠤᠭᠰᠠᠨ ᠢ᠋ ᠨᠢ ᠮᠡᠳᠡᠵᠦ ᠂ ᠶᠠᠭᠠᠬᠢᠵᠤ ᠠᠪᠤᠷᠠᠵᠤ ᠠᠪᠬᠤ ᠠᠷᠭᠠ ᠪᠠᠨ ᠪᠣᠳᠣᠵᠤ ᠪᠠᠢᠲᠠᠯᠠ ᠨᠢᠭᠡᠨ ᠡᠳᠦᠷ ᠲᠠᠩᠭᠤᠳ ᠤ᠋ᠨ ᠣᠷᠣᠨ ᠠ᠋ᠴᠠ ᠬᠡᠳᠦᠨ ᠬᠥᠮᠦᠨ ᠢᠷᠡᠵᠦ ᠂ ᠬᠠᠭᠠᠨ ᠤ᠋ ᠣᠷᠳᠣᠨ ᠤ᠋ ᠠᠴᠢᠶᠠ ᠠᠶᠠᠨ ᠳ᠋ᠤ᠌ ᠬᠠᠮᠤᠭ ᠰᠠᠢᠨ ᠱᠠᠷ ᠠᠪᠤᠨᠠ ᠭᠡᠳ ᠶᠠᠪᠤᠵᠤ ᠪᠠᠢᠭᠰᠠᠨ ᠳ᠋ᠤᠨᠢ ᠰᠠᠢᠬᠢ ᠬᠤᠷᠳᠤᠨ ᠱᠠᠷ 《ᠬᠠᠷᠠ ᠬᠡᠯᠡᠨ ᠰᠣᠭᠰᠣᠷ》 ᠢ᠋ᠶ᠋ᠠᠨ ᠬᠤᠳᠠᠯᠳᠤᠭᠠᠳ ᠶᠠᠪᠤᠭᠤᠯᠵᠤ ᠭᠡᠨᠡ᠃ ᠲᠡᠭᠡᠭᠡᠳ ᠄ ᠠᠪᠤ ᠮᠢᠨᠢ 《ᠬᠠᠷᠠ ᠬᠡᠯᠡᠨ ᠰᠣᠭᠰᠣᠷ》 ᠢ᠋ᠶ᠋ᠠᠨ ᠲᠠᠨᠢᠵᠤ ᠠᠪᠤᠭᠠᠳ ᠤᠨᠤᠵᠤ ᠵᠤᠯᠠᠪᠠᠯ ( ᠳᠤᠲᠠᠭᠠᠪᠠᠯ )ᠯᠠᠪ ᠭᠠᠷᠴᠤ ᠢᠷᠡᠵᠦ ᠴᠢᠳᠠᠨᠠ ᠭᠡᠵᠦ ᠪᠣᠳᠣᠵᠠᠢ᠃ ᠡᠨᠡ ᠪᠦᠬᠦᠨ ᠢ᠋ ᠨᠢ ᠠᠷᠠᠪᠰᠠᠷ ᠮᠡᠳᠡᠭᠰᠡᠨ ᠴᠦ᠍ ᠦᠭᠡᠢ ᠭᠡᠨᠡ᠃ ᠪᠦᠰᠡᠭᠦᠢ ᠨᠢ ᠬᠠᠷᠢᠨ ᠄《 ᠠᠯᠢ ᠡᠳᠦᠷ ᠠᠪᠤ ᠮᠢᠨᠢ < ᠬᠠᠷᠠ ᠬᠡᠯᠡᠨ ᠰᠣᠭᠰᠣᠷ > ᠢ᠋ᠶ᠋ᠠᠨ ᠤᠨᠤᠭᠠᠳ ᠭᠡᠨᠡᠳᠲᠡ ᠬᠦᠷᠦᠭᠡᠳ ᠢᠷᠡᠬᠦ ᠪᠠᠢᠬᠠ 》ᠭᠡᠵᠦ ᠪᠠᠶᠠᠷᠯᠠᠨ ᠬᠤᠷᠤᠭᠤ ᠳᠠᠷᠤᠵᠤ ᠬᠣᠨᠣᠭ ᠲᠣᠭᠠᠯᠠᠭᠰᠠᠭᠠᠷ ᠪᠠᠢᠪᠠ ᠭᠡᠨᠡ᠃ ᠭᠡᠲᠡᠯᠡ ᠠᠪᠤ ᠨᠢ ᠢᠷᠡᠭᠰᠡᠨ ᠦᠭᠡᠢ᠂ ᠬᠠᠷᠢᠨ ᠲᠠᠩᠭᠤᠳ ᠤ᠋ᠨ ᠬᠠᠭᠠᠨ ᠤ᠋ ᠣᠷᠳᠣᠨ ᠠ᠋ᠴᠠ ᠭᠤᠷᠪᠠᠨ ᠬᠤ᠌ ᠬᠤ᠌ (ᠬᠣᠲᠣᠩ) ᠡᠯᠴᠢ ᠬᠦᠷᠦᠭᠡᠳ ᠢᠷᠡᠵᠦ ᠭᠡᠨᠡ᠃ ᠲᠡᠳᠡ ᠬᠠᠭᠠᠨ ᠤ᠋ ᠵᠥᠪᠰᠢᠶᠡᠷᠡᠯ ᠢ᠋ᠶ᠋ᠡᠷ ᠮᠡᠷᠭᠡᠨ ᠲᠡᠮᠦᠨᠡ ᠶ᠋ᠢᠨ ᠭᠡᠷ ᠲᠡᠭᠡᠨ ᠬᠡᠯᠡᠭᠦᠯᠦᠭᠰᠡᠨ ᠦᠭᠡ ᠶ᠋ᠢ ᠠᠪᠴᠢᠷᠠᠭᠰᠠᠨ ᠪᠠᠢᠵᠠᠢ᠃ ᠮᠡᠷᠭᠡᠨ ᠲᠡᠮᠦᠨᠡ ᠡᠨᠡ ᠭᠤᠷᠪᠠᠨ ᠡᠯᠴᠢ ᠪᠡᠷ ᠶᠠᠮᠠᠷ ᠦᠭᠡ ᠬᠡᠯᠡᠭᠦᠯᠦᠭᠰᠡᠨ ᠪᠣᠢ? ᠭᠡᠬᠦᠯᠡ ᠄
- ᠲᠠᠨᠠᠷ ᠣᠴᠢᠭᠠᠳ ᠨᠠᠮᠠᠶ᠋ᠢ ᠶᠣᠰᠣᠲᠠᠢ ᠰᠠᠢᠨ ᠰᠠᠢᠬᠠᠨ ᠠᠮᠢᠳᠤᠷᠠᠵᠤ ᠪᠠᠢᠨᠠ ᠭᠡᠵᠦ ᠬᠡᠯᠡ! ᠣᠭᠣᠰᠣᠷ ᠪᠦᠴᠡ ᠦᠭᠡᠢ ᠥᠨᠳᠥᠷ ᠴᠠᠭᠠᠨ ᠥᠷᠭᠥᠭᠡ ᠳ᠋ᠦ᠍ ᠰᠠᠭᠤᠵᠤ ᠂ ᠴᠡᠩᠬᠡᠷ ᠲᠣᠷᠭᠠ ᠪᠠᠷ ᠬᠤᠴᠢᠵᠤ᠂ ᠬᠥᠬᠡ ᠬᠡᠪᠢᠰ ᠳᠡᠭᠡᠷᠡ ᠬᠥᠯᠪᠡᠷᠢᠵᠦ ᠪᠠᠢᠨᠠ ᠭᠡᠵᠦ ᠬᠡᠯᠡ ᠃ ᠶᠠᠰᠤ ᠦᠭᠡᠢ ᠮᠢᠬᠠ ᠢᠳᠡᠵᠦ ᠂ ᠰᠢᠭᠠᠷᠤ ᠦᠭᠡᠢ ᠴᠠᠢ ᠤᠤᠭᠤᠵᠤ ᠪᠠᠢᠨᠠ ᠬᠡ᠃ ᠡᠳᠦᠷ ᠢ᠋ᠶ᠋ᠡᠷ ᠬᠣᠶᠠᠷ ᠵᠤᠯᠠ ᠪᠠᠷᠢᠵᠤ ᠂ ᠡᠪᠦᠷ ᠳᠣᠲᠣᠷᠠ ᠪᠠᠨ ᠵᠡᠭᠦᠦ ᠰᠤᠪᠢᠯᠠᠵᠤ ᠪᠠᠢᠨᠠ ᠬᠡ ᠁ ᠮᠠᠨ ᠤ᠋ ᠳ᠋ᠤ᠌ ᠪᠠᠰᠠ ᠭᠤᠷᠪᠠᠨ ᠮᠤᠬᠤᠷ ᠬᠠᠯᠲᠠᠷ ᠢᠷᠭᠡ ᠪᠣᠢ ᠂ ᠨᠢᠭᠡ ᠶ᠋ᠢ ᠨᠢ ᠭᠡᠢᠴᠢᠨ ᠳ᠋ᠦ᠍ ᠰᠢᠭᠦᠰᠦ ᠭᠠᠷᠭᠠ ᠬᠡ ᠂ ᠨᠢᠭᠡ ᠶ᠋ᠢ ᠨᠢ ᠵᠠᠮ ᠳᠤᠮᠳᠠ ᠰᠢᠭᠦᠰᠦ ᠪᠡᠷᠢ ᠬᠡ ᠂ ᠪᠠᠰᠠ ᠨᠢᠭᠡ ᠶ᠋ᠢ ᠨᠢ ᠡᠭᠦᠳᠡ ᠲᠠᠨᠢᠭᠤᠯᠵᠤ ᠠᠪᠤᠭᠠᠳ ᠰᠢᠭᠦᠰᠦ ᠪᠡᠷᠢ ᠬᠡ᠃ ᠢᠷᠡᠬᠦ ᠳ᠋ᠡᠭᠡᠨ ᠨᠠᠳᠠᠳᠤ ᠪᠡᠯᠡᠭ ᠰᠡᠯᠲᠡ ᠬᠡᠷᠡᠭ ᠦᠭᠡᠢ ᠵᠥᠪᠬᠡᠨ ᠵᠠᠭᠤᠨ ᠬᠡᠷᠢᠶᠡᠨ ᠦ᠌ ᠤᠷᠠᠨ ᠬᠣᠩᠰᠢᠶᠠᠷ ᠲᠠᠭᠠᠷᠠᠭᠤᠯᠵᠤ ᠢᠷᠡ ᠭᠡᠵᠦ ᠬᠡᠯᠡ᠃ ᠪᠠᠷᠠᠭᠤᠨ ᠪᠡᠶᠡ ᠶ᠋ᠢᠨ ᠪᠠᠬᠢᠷ ᠬᠠᠷᠠ ᠲᠣᠩᠭᠣᠷᠠᠭ ᠢ᠋ ᠵᠡᠭᠦᠨ ᠪᠡᠶᠡ ᠶ᠋ᠢᠨ ᠵᠦᠨᠡᠷ ᠤᠯᠠᠭᠠᠨ ᠪᠢᠯᠡᠭᠦᠦ ᠳ᠋ᠦ᠍ ᠰᠠᠢᠨ ᠪᠢᠯᠡᠭᠦᠳᠡ᠂ ᠬᠠᠳᠤᠭᠤᠷ ᠢ᠋ᠶ᠋ᠠᠨ ᠪᠠᠲᠤ ᠬᠠᠪᠴᠢᠭᠤᠯ ᠂ ᠬᠠᠢᠰᠤᠨ ᠤ᠋ ᠬᠠᠯᠢᠪ ( ᠬᠠᠪᠬᠠᠭᠠᠰᠤ ) ᠪᠠᠨ ᠪᠠᠲᠤ ᠳᠠᠷᠤ ᠬᠡ ᠁ ᠭᠡᠵᠦ ᠬᠡᠯᠡᠭᠦᠯᠦᠭᠰᠡᠨ ᠪᠠᠢᠵᠤ ᠭᠡᠨᠡ᠃ ᠠᠷᠠᠪᠰᠠᠷ ᠂ ᠠᠪᠤ ᠨᠢ ᠰᠠᠢᠨ ᠪᠠᠢᠨᠠ ᠭᠡᠬᠦ ᠶ᠋ᠢ ᠰᠣᠨᠣᠰᠤᠭᠠᠳ ᠠᠷᠭᠠ ᠦᠭᠡᠢ ᠶᠡᠬᠡ ᠪᠠᠶᠠᠷᠯᠠᠬᠤ ᠳ᠋ᠤ᠌᠂ ᠪᠡᠷᠢ ᠨᠢ ᠰᠣᠨᠣᠰᠤᠭᠠᠳ ᠪᠡᠷᠬᠡ ᠵᠣᠪᠠᠵᠤ ᠭᠡᠨᠡ ᠃ ᠲᠡᠭᠡᠭᠡᠳ ᠠᠷᠠᠪᠰᠠᠷ ᠢ᠋ᠶ᠋ᠠᠨ ᠭᠠᠳᠠᠨᠠ ᠳᠠᠭᠤᠳᠠᠵᠤ ᠭᠠᠷᠤᠭᠠᠳ ᠄
- ᠠᠪᠤ ᠮᠢᠨᠢ ᠶᠠᠭᠤᠨᠠᠢ ᠰᠠᠢᠨ ᠰᠠᠢᠬᠠᠨ ᠵᠢᠷᠭᠠᠵᠤ ᠪᠠᠢᠬᠤ ᠪᠢᠯᠡ᠂ ᠬᠠᠷᠢᠨ ᠬᠣᠶᠠᠷ ᠨᠢᠳᠦ ᠨᠢ ᠰᠣᠬᠣᠷᠠᠭᠠᠳ ᠂ ᠥᠨᠳᠥᠷ ᠬᠦᠷᠢᠶᠡ ᠳᠣᠲᠣᠷᠠ ᠦᠬᠡᠷ ᠮᠠᠯ ᠰᠢᠩᠭᠢ (ᠮᠡᠲᠦ) ᠬᠣᠷᠢᠭᠳᠠᠵᠤ ᠪᠠᠢᠭᠠ ᠶᠤᠮ ᠪᠠᠢᠨᠠ ᠰᠢᠦ !《ᠣᠭᠣᠰᠣᠷ ᠪᠦᠴᠡ ᠦᠭᠡᠢ ᠥᠷᠭᠥᠭᠡ ᠴᠠᠭᠠᠨ ᠭᠡᠷ》ᠭᠡᠳᠡᠭ ᠨᠢ ᠬᠡᠷᠡᠮ ᠢ᠋ᠶ᠋ᠡᠨ ᠬᠡᠯᠡᠵᠡᠢ᠃《 ᠴᠡᠩᠬᠡᠷ ᠲᠣᠷᠭᠠ ᠪᠠᠷ ᠬᠤᠴᠢᠵᠤ ᠂ ᠬᠥᠬᠡ ᠬᠡᠪᠢᠰᠦᠨ ᠳᠡᠭᠡᠷᠡ ᠬᠥᠯᠪᠡᠷᠢᠵᠦ ᠪᠠᠢᠨᠠ》ᠭᠡᠳᠡᠭ ᠨᠢ ᠲᠡᠭᠷᠢ ᠪᠡᠷ ᠬᠤᠴᠢᠯᠭᠠ ᠪᠣᠯᠭᠠᠭᠠᠳ᠂ ᠦᠨᠡᠰᠦᠨ ᠳᠡᠭᠡᠷᠡ ᠬᠡᠪᠲᠡᠵᠦ ᠪᠠᠢᠨᠠ ᠭᠡᠰᠡᠨ ᠦᠭᠡ ᠲᠡᠷᠡ᠃《ᠶᠠᠰᠤ ᠦᠭᠡᠢ ᠮᠢᠬᠠ ᠢᠳᠡᠵᠦ᠂ᠰᠢᠭᠠᠷᠤ ᠦᠭᠡᠢ ᠴᠠᠢ ᠤᠤᠭᠤᠵᠤ ᠪᠠᠢᠨᠠ》ᠭᠡᠰᠡᠨ ᠨᠢ ᠪᠠᠭᠠᠰᠤ ᠪᠠᠨ ᠢᠳᠡᠵᠦ ᠂ ᠰᠢᠭᠡᠰᠦ ᠪᠡᠨ ᠤᠤᠭᠤᠵᠤ ᠪᠠᠢᠨᠠ ᠭᠡᠰᠡᠨ ᠦᠭᠡ ᠂ ᠬᠠᠷᠢᠨ《ᠡᠳᠦᠷ ᠢ᠋ᠶ᠋ᠡᠷ ᠬᠣᠶᠠᠷ ᠵᠤᠯᠠ ᠪᠠᠷᠢᠵᠤ᠂ ᠡᠪᠦᠷ ᠳᠣᠲᠣᠷᠠ ᠪᠠᠨ ᠵᠡᠭᠦᠦ ᠰᠦᠪᠡᠯᠡᠵᠦ ᠪᠠᠢᠨᠠ 》ᠭᠡᠰᠡᠨ ᠨᠢ ᠬᠣᠶᠠᠷ ᠨᠢᠳᠦ ᠰᠣᠬᠣᠷᠠᠭᠰᠠᠨ ᠪᠣᠯᠪᠠᠴᠤ ᠰᠠᠨᠠᠭᠠ ᠤᠬᠠᠭᠠ ᠰᠠᠷᠠᠭᠤᠯ ᠡᠷᠡᠭᠦᠯ ᠪᠠᠢᠭᠰᠠᠭᠠᠷ᠂ ᠴᠡᠭᠡᠵᠢᠨ ᠳᠣᠲᠣᠷᠠ ᠪᠠᠨ ᠨᠠᠷᠢᠨ ᠤᠬᠠᠭᠠ ᠪᠢᠰᠢᠯᠭᠠᠨ ᠰᠠᠭᠤᠵᠤ ᠪᠠᠢᠨᠠ ᠭᠡᠳᠡᠭ ᠢ᠋ᠶ᠋ᠡᠨ ᠬᠡᠯᠡᠵᠡᠢ᠃ᠲᠡᠭᠡᠪᠡᠯ ᠲᠡᠷᠡ《ᠭᠤᠷᠪᠠᠨ ᠮᠤᠬᠤᠷ ᠬᠠᠯᠲᠠᠷ ᠢᠷᠭᠡ 》ᠭᠡᠳᠡᠭ ᠨᠢ ᠮᠥᠨ ᠭᠤᠷᠪᠠᠨ ᠡᠯᠴᠢ ᠶ᠋ᠢ ᠬᠡᠯᠡᠵᠦ ᠪᠠᠢᠨᠠ᠃ ᠨᠢᠭᠡ ᠶ᠋ᠢ ᠨᠢ ᠭᠡᠷ ᠲᠡᠭᠡᠨ ᠠᠯᠠ ᠂ ᠨᠢᠭᠡ ᠶ᠋ᠢ ᠨᠢ ᠵᠠᠮ ᠳ᠋ᠠᠭᠠᠨ ᠠᠯᠠ ᠂ ᠪᠠᠰᠠ ᠨᠢᠭᠡ ᠶ᠋ᠢ ᠨᠢ ᠠᠪᠤ ᠶ᠋ᠢᠨ ᠬᠣᠷᠢᠭᠳᠠᠵᠤ ᠪᠠᠢᠭᠠ ᠬᠦᠷᠢᠶᠡᠨ ᠦ᠌ ᠡᠭᠦᠳᠡ ᠶ᠋ᠢ ᠬᠡᠯᠡᠭᠦᠯᠵᠦ ᠠᠪᠤᠭᠠᠳ ᠠᠯᠠ ᠭᠡᠰᠡᠨ ᠶᠦᠮ ᠪᠠᠢᠨᠠ ;《ᠵᠠᠭᠤᠨ ᠬᠡᠷᠢᠶᠡᠨ ᠦ᠌ ᠤᠷᠠᠨ ᠬᠣᠩᠰᠢᠶᠠᠷ ᠲᠠᠭᠠᠷᠠᠭᠤᠯᠵᠤ ᠢᠷᠡ》ᠭᠡᠰᠡᠨ ᠨᠢ ᠵᠠᠭᠤᠨ ᠶᠠᠩᠵᠤ ᠶ᠋ᠢᠨ ᠣᠨᠢᠰᠣ ᠳ᠋ᠤ᠌ ᠲᠠᠭᠠᠷᠠᠬᠤ ᠲᠦᠯᠬᠢᠭᠦᠷ ᠣᠯᠵᠤ ᠢᠷᠡ ᠭᠡᠰᠡᠨ ᠪᠠᠢᠨᠠ ᠃ ᠲᠡᠭᠡᠪᠡᠯ《ᠪᠠᠷᠠᠭᠤᠨ ᠪᠡᠶᠡ ᠶ᠋ᠢᠨ ᠪᠠᠬᠢᠷ ᠬᠠᠷᠠ ᠲᠣᠩᠭᠣᠷᠠᠭ 》ᠭᠡᠳᠡᠭ ᠨᠢ ᠴᠢᠮᠠᠶ᠋ᠢ ᠬᠡᠯᠡᠵᠦ ᠪᠠᠢᠨᠠ᠂ 《ᠵᠡᠭᠦᠨ ᠪᠡᠶᠡ ᠶ᠋ᠢᠨ ᠵᠦᠨᠡᠷ ᠤᠯᠠᠭᠠᠨ ᠪᠢᠯᠡᠭᠦᠦ 》ᠭᠡᠳᠡᠭ ᠨᠢ ᠨᠠᠮᠠᠶ᠋ᠢ ᠬᠡᠯᠡᠵᠦ ᠪᠠᠢᠨᠠ ᠂《ᠰᠠᠢᠨ ᠪᠢᠯᠡᠭᠦᠳᠡ 》ᠭᠡᠳᠡᠭ ᠨᠢ ᠨᠠᠮᠠᠶ᠋ᠢ ᠴᠢᠮᠠᠲᠤ ᠤᠬᠠᠭᠠ ᠪᠠᠨ ᠰᠠᠢᠨ ᠬᠡᠯᠡᠵᠦ ᠥᠭ ᠭᠡᠰᠡᠨ ᠪᠠᠢᠨᠠ᠃《ᠬᠠᠳᠤᠭᠤᠷ ᠢ᠋ᠶ᠋ᠠᠨ ᠪᠠᠲᠤ ᠬᠠᠪᠴᠢᠭᠤᠯ ᠂ ᠬᠠᠢᠰᠤᠨ ᠤ᠋ ᠬᠠᠯᠢᠪ ᠢ᠋ᠶ᠋ᠠᠨ ᠪᠠᠲᠤ ᠳᠠᠷᠤ 》ᠭᠡᠳᠡᠭ ᠨᠢ ᠴᠢᠮᠠᠶ᠋ᠢ ᠭᠤᠨᠠᠨ ( ᠰᠢᠨᠡ ᠶ᠋ᠢᠨ ᠭᠤᠷᠪᠠᠨ ) ᠳ᠋ᠤ᠌ ᠠᠳᠠ ᠠ᠋ᠴᠠ ᠭᠠᠷᠴᠤ ᠠᠷᠪᠠᠨ ᠲᠠᠪᠤᠨ ᠳ᠋ᠤ᠌ ᠲᠡᠨᠳᠡ ᠬᠦᠷᠴᠦ ᠢᠷᠡ ᠭᠡᠰᠡᠨ ᠶᠦᠮ ᠭᠡᠵᠦ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠶᠣᠭᠲᠠ ᠳᠠᠯᠳᠠ ᠦᠭᠡ ᠶ᠋ᠢ ᠪᠦᠭᠦᠳᠡ ᠶ᠋ᠢ ᠵᠥᠪ ᠲᠠᠢᠯᠤᠭᠰᠠᠨ ᠪᠠᠢᠵᠤ ᠭᠡᠨᠡ᠃
ᠲᠡᠭᠡᠭᠡᠳ ᠰᠢᠨᠡ ᠶ᠋ᠢᠨ ᠭᠤᠨᠠᠨ ᠤ᠋ ᠬᠠᠳᠤᠭᠤᠷ ᠰᠠᠷᠠ ᠲᠠᠢ ᠰᠥᠨᠢ ᠠᠷᠠᠪᠰᠠᠷ ᠨᠢᠭᠡ ᠡᠯᠴᠢ ᠶ᠋ᠢ ᠨᠢ ᠠᠯᠠᠵᠤ ᠬᠣᠶᠠᠷ ᠡᠯᠴᠢ ᠶ᠋ᠢ ᠨᠢ ᠪᠠᠭᠯᠠᠵᠤ ᠭᠠᠨᠵᠤᠭᠠᠯᠠᠭᠠᠳ ᠮᠣᠷᠳᠠᠪᠠ ᠭᠡᠨᠡ ᠃ ᠮᠣᠷᠳᠠᠬᠤ ᠶ᠋ᠢᠨ ᠡᠮᠦᠨᠡ ᠪᠦᠰᠡᠭᠦᠢ ᠨᠢ ᠵᠠᠬᠢᠬᠤ ᠵᠦᠢᠯᠡᠰ ᠢ᠋ᠶ᠋ᠡᠨ ᠳᠠᠬᠢᠨ ᠳᠣᠯᠣᠭᠠ ᠰᠠᠢᠨ ᠵᠠᠬᠢᠨ ᠮᠣᠷᠳᠠᠭᠤᠯᠤᠭᠰᠠᠨ ᠪᠣᠯᠪᠠᠴᠤ᠂ ᠶᠠᠮᠠᠷ ᠤᠬᠠᠭᠠᠨᠲᠤ ᠪᠡᠷᠢ ᠴᠦ᠍ ᠭᠡᠳ ᠵᠠᠪᠠᠯ ᠨᠢᠭᠡ ᠡᠨᠳᠡᠳᠡᠭ ᠶᠦᠮ ᠪᠠᠢᠵᠤ ᠭᠡᠨᠡ ᠂ ᠶᠠᠭᠤ ᠠᠲᠠᠪᠠ ? ᠭᠡᠪᠡᠯ ᠂ ᠬᠤᠷᠳᠤᠨ ᠱᠠᠷ《 ᠬᠠᠷᠠ ᠬᠡᠯᠡᠨ ᠰᠤᠭᠰᠤᠷ 》ᠨᠢ ᠣᠳᠣ ᠲᠠᠩᠭᠤᠳ ᠤ᠋ᠨ ᠬᠠᠭᠠᠨ ᠤ᠋ ᠣᠷᠳᠣᠨ ᠤ᠋ ᠰᠦᠷᠦᠭ ᠲᠦ᠍ ᠪᠠᠢᠭᠠ ᠪᠠᠨ ᠠᠷᠠᠪᠰᠠᠷ ᠲᠤ᠌ ᠬᠡᠯᠡᠬᠦ ᠪᠡᠨ ᠮᠠᠷᠲᠠᠴᠢᠬᠠᠵᠤ ᠭᠡᠨᠡ ᠃ ᠠᠷᠠᠪᠰᠠᠷ ᠨᠢᠭᠡ ᠡᠯᠴᠢ ᠶ᠋ᠢ ᠨᠢ ᠵᠠᠮ ᠳ᠋ᠠᠭᠠᠨ ᠠᠯᠠᠵᠤ᠂ ᠪᠠᠰᠠ ᠨᠢᠭᠡ ᠶ᠋ᠢ ᠨᠢ ᠪᠦᠰᠡᠭᠦᠢ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠄
– ᠴᠢ ᠠᠪᠤ ᠶ᠋ᠢᠨ ᠬᠣᠷᠢᠭᠳᠠᠵᠤ ᠪᠠᠢᠭᠠ ᠬᠦᠷᠢᠶᠡᠨ ᠦ᠌ ᠡᠭᠦᠳᠡ ᠶ᠋ᠢ ᠬᠡᠯᠡᠵᠦ ᠥᠭᠪᠡᠯ ᠠᠮᠢ ᠶ᠋ᠢ ᠴᠢᠨᠢ ᠬᠡᠯᠲᠦᠷᠢᠭᠦᠯᠦᠨᠡ ᠂ ᠦᠭᠡᠢ ᠪᠣᠯ ᠠᠯᠠᠨᠠ ᠭᠡᠵᠦ ᠰᠦᠷᠳᠡᠭᠦᠯᠦᠨ ᠪᠠᠢᠵᠤ ᠬᠡᠯᠡᠭᠦᠯᠵᠦ ᠠᠪᠤᠭᠠᠳ ᠰᠠᠶᠢ ᠠᠯᠠᠭᠰᠠᠨ ᠭᠡᠨᠡ᠃ ᠲᠡᠭᠡᠭᠡᠳ ᠠᠪᠤ ᠲᠠᠢ ᠪᠠᠨ ᠳᠤᠲᠠᠭᠠᠨ ᠭᠠᠷᠬᠤ ᠶ᠋ᠢᠨ ᠡᠬᠢᠨ ᠳᠡᠭᠡᠷᠡ ᠬᠠᠷᠠᠭᠤᠯ ᠳ᠋ᠤᠨᠢ ᠮᠡᠳᠡᠭᠳᠡᠴᠢᠬᠡᠵᠡᠢ᠃ ᠡᠭᠦᠨ ᠳ᠋ᠦ᠍ ᠮᠡᠷᠭᠡᠨ ᠲᠡᠮᠦᠨᠡ ᠄
– ᠬᠠᠯᠠᠭ ᠶᠠᠭᠠᠯᠠᠢ !《 ᠬᠠᠷᠠ ᠬᠡᠯᠡᠨ ᠰᠤᠭᠰᠤᠷ 》 ᠮᠢᠨᠢ ᠪᠠᠢᠭᠰᠠᠨ ᠪᠣᠯ ᠬᠠᠮᠢᠭᠠ ᠡᠢᠮᠦ ᠯᠠᠢ (ᠭᠠᠢ) ᠳ᠋ᠤ᠌ ᠬᠠᠷᠭᠤᠬᠤ ᠪᠢᠯᠡ? ᠬᠠᠷᠢᠵᠤ ᠪᠤᠴᠠᠶᠠ ᠬᠦᠦ ᠮᠢᠨᠢ! ᠭᠡᠳ ᠬᠠᠷᠠᠭᠤᠯ ᠢ᠋ ᠨᠢ ᠳ᠋ᠡᠭᠡᠨ《 ᠬᠠᠷᠠ ᠣᠷᠳᠣᠨ 》 ᠳ᠋ᠤ᠌ ᠳᠠᠬᠢᠵᠤ ᠣᠷᠣᠭᠰᠠᠨ ᠭᠡᠨᠡ ᠃
ᠲᠡᠭᠦᠨ ᠡᠴᠡ ᠬᠣᠢᠰᠢ ᠬᠦᠦ ᠲᠡᠢ ᠪᠡᠨ ᠬᠣᠶᠠᠭᠤᠯᠠ ᠠᠷᠭᠠᠰᠤ (ᠠᠷᠭᠠᠯ) ᠬᠠᠲᠠᠭᠠᠬᠤ ᠵᠠᠷᠤᠴᠠ ᠨᠢ ᠪᠣᠯᠤᠭᠰᠠᠨ ᠶᠤᠮ ᠪᠠᠢᠵᠠᠢ ᠃ ᠨᠢᠭᠡᠨ ᠡᠳᠦᠷ ᠬᠣᠶᠠᠭᠤᠯᠠ ᠳᠠᠩᠰᠤ ⑤ ᠳᠡᠯᠭᠡᠵᠦ ᠪᠠᠢᠬᠤ ᠳ᠋ᠠᠭᠠᠨ ᠠᠪᠤ ᠨᠢ ᠭᠡᠨᠡᠳᠲᠡ ᠨᠢᠭᠡ ᠰᠠᠷᠯᠤᠭ ᠤ᠋ᠨ ᠪᠠᠭᠠᠰᠤᠨ ᠳᠡᠭᠡᠷᠡᠬᠢ ᠳᠣᠷᠣᠭᠣ (ᠲᠤᠭᠤᠷᠠᠢ) ᠶ᠋ᠢᠨ ᠮᠥᠷ ᠢ᠋ ᠲᠡᠮᠲᠡᠷᠢᠵᠦ ᠦᠵᠡᠭᠡᠳ ᠂ ᠠᠷᠠᠪᠰᠠᠷ ᠢ᠋ᠶ᠋ᠠᠨ ᠳᠠᠭᠤᠳᠠᠵᠤ ᠢᠷᠡᠨ ᠄
– ᠬᠦᠦ ᠮᠢᠨᠢ ᠂ ᠡᠨᠡ ᠪᠠᠭᠠᠰᠤᠨ ᠳᠡᠭᠡᠷᠡᠬᠢ ᠮᠥᠷ ᠢ᠋ ᠰᠠᠢᠨ ᠦᠵᠡᠵᠦ ᠠᠪ ᠂ ᠲᠡᠭᠡᠭᠡᠳ ᠠᠯᠢ ᠱᠠᠷ ᠨᠢ ᠡᠢᠮᠦ ᠮᠥᠷ ᠲᠡᠢ ᠪᠠᠢᠬᠤ ᠶ᠋ᠢ ᠰᠠᠢᠨ ᠠᠵᠢᠭᠯᠠᠵᠤ ᠪᠠᠢ ᠂ ᠦᠵᠡᠭᠳᠡᠯᠡ ᠯᠡ ᠭᠡᠪᠡᠯ ᠠᠪᠤ ᠳ᠋ᠠᠭᠠᠨ ᠳᠣᠭᠤᠤᠷ ( ᠰᠡᠮᠡᠬᠡᠷ ) ᠬᠡᠯᠡ ᠭᠡᠵᠦ ᠵᠠᠬᠢᠵᠤ ᠭᠡᠨᠡ ᠃ ᠨᠢᠭᠡᠨ ᠠᠰᠬᠠᠨ ( ᠦᠳᠡᠰᠢ ) ᠬᠦᠦ ᠠᠷᠠᠪᠰᠠᠷ ᠨᠢ᠄
– ᠪᠢ ᠲᠡᠷᠡ ᠱᠠᠷ ᠢ᠋ ᠣᠯᠤᠭᠠᠳ ᠠᠪᠤᠯᠠ ! ᠭᠡᠴᠢᠬᠡᠭᠰᠡᠨ ᠪᠠᠶᠠᠷᠲᠠᠢ ᠬᠦᠷᠦᠭᠡᠳ ᠢᠷᠡᠪᠡ ᠭᠡᠨᠡ ᠃
– ᠵᠠ ᠬᠦᠦ ᠮᠢᠨᠢ ᠂ ᠲᠡᠷᠡ ᠱᠠᠷ ᠢ᠋ ᠬᠠᠮᠢᠭᠠ ᠤᠶᠠᠬᠤ ᠶ᠋ᠢ ᠨᠢ ᠰᠠᠢᠨ ᠦᠵᠡᠵᠦ ᠠᠪ ᠂ ᠬᠣᠶᠠᠭᠤᠯᠠ ᠪᠠᠨ ᠡᠨᠡ ᠰᠥᠨᠢ ᠲᠡᠷᠡ ᠱᠠᠷ ᠢ᠋ᠶ᠋ᠠᠷ ᠵᠣᠯᠠᠶᠠ ( ᠳᠤᠲᠠᠭᠠᠶᠠ ) ᠂ ᠲᠡᠷᠡ ᠴᠢᠨᠢ ᠮᠠᠨ ᠤ᠋《ᠬᠠᠷᠠ ᠬᠡᠯᠡᠨ ᠰᠣᠭᠰᠣᠷ 》ᠪᠠᠢᠭᠠ ᠰᠢᠦ ᠭᠡᠵᠦ ᠬᠡᠦᠬᠡᠦᠰ ( ᠬᠡᠦᠬᠡᠳ ) ᠰᠢᠩᠭᠢ ᠪᠠᠶᠠᠷᠯᠠᠪᠠ ᠭᠡᠨᠡ᠃
ᠲᠡᠭᠡᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠮᠥᠨ ᠰᠦ (ᠲᠡᠷᠡ ᠰᠥᠨᠢ) ᠪᠡᠨ《ᠬᠠᠷᠠ ᠬᠡᠯᠡᠨ ᠰᠣᠭᠰᠣᠷ 》 ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠤᠯᠠᠭᠠᠳ (ᠳᠤᠲᠠᠭᠠᠳ) ᠭᠠᠷᠴᠤ ᠭᠡᠨᠡ ᠃ ᠬᠠᠷᠠᠭᠤᠯ ᠮᠡᠳᠡᠭᠰᠡᠨ ᠪᠣᠯᠪᠠᠴᠤ ᠬᠣᠢᠨᠠ ᠠ᠋ᠴᠠ ᠨᠢ ᠬᠥᠭᠡᠭᠡᠭᠡᠳ ᠲᠣᠭᠣᠰᠣ ᠶ᠋ᠢ ᠨᠢ ᠴᠦ᠍ ᠡᠰᠡ ᠦᠵᠡᠵᠡᠢ ᠃
ᠠᠷᠠᠪᠰᠠᠷ《ᠬᠠᠷᠠ ᠬᠡᠯᠡᠨ ᠰᠣᠭᠰᠣᠷ 》 ᠲᠠᠭᠠᠨ ᠠᠪᠤ ᠪᠠᠨ ᠰᠤᠨᠳᠠᠯᠠᠨ ᠵᠣᠯᠠᠭᠠᠳ ᠯᠠ ᠪᠠᠢᠵᠠᠢ ᠂ ᠬᠡᠴᠢᠨᠡᠨ ᠵᠣᠯᠠᠭᠰᠠᠨ ᠢ᠋ᠶ᠋ᠠᠨ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠡᠰᠡ ᠮᠡᠳᠡᠨᠡ ᠃ ᠭᠡᠨᠡᠳᠲᠡ ᠠᠪᠤ ᠨᠢ ᠄
–《ᠬᠠᠷᠠ ᠬᠡᠯᠡᠨ ᠰᠤᠭᠰᠤᠷ 》ᠭᠠᠵᠠᠷ ᠦᠨᠦᠷᠯᠡᠵᠦ ᠪᠠᠢᠨᠠ ᠤᠤ ? ᠭᠡᠵᠦ ᠭᠡᠨᠡ ᠃
– ᠦᠭᠡᠢ ᠪᠠᠢᠨᠠ ᠭᠡᠵᠦ ᠭᠡᠨᠡ ᠃ ᠪᠠᠭᠠ ᠶᠠᠪᠤᠭᠠᠳ ᠄
– ᠡᠦᠲᠦ ? ᠭᠡᠵᠦ ᠭᠡᠨᠡ ᠃
– ᠪᠠᠰᠠ ᠯᠠ ᠦᠭᠡᠢ ᠪᠠᠢᠨᠠ ᠭᠡᠵᠦ ᠭᠡᠨᠡ ᠃
ᠡᠨᠡ ᠮᠡᠲᠦ ᠪᠡᠷ ᠵᠢᠭᠠᠬᠠᠨ ᠶᠠᠪᠤᠭᠠᠳ ᠰᠤᠷᠠᠭᠠᠳ ᠵᠢᠭᠠᠬᠠᠨ ᠶᠠᠪᠤᠭᠠᠳ ᠰᠤᠷᠠᠭᠠᠳ ᠯᠠ ᠪᠠᠢᠵᠤ ᠭᠡᠨᠡ ᠃ ᠲᠡᠭᠡᠵᠦ ᠪᠠᠢᠲᠠᠯᠠ 《ᠬᠠᠷᠠ ᠬᠡᠯᠡᠨ ᠰᠤᠭᠰᠤᠷ 》ᠨᠢ ᠭᠡᠨᠡᠳᠲᠡ ᠭᠠᠵᠠᠷ ᠦᠨᠦᠷᠯᠡᠨ ᠡᠬᠢᠯᠡᠪᠡ ᠭᠡᠨᠡ ᠃
– ᠠᠪᠤ ᠠ᠋ ᠂《ᠬᠠᠷᠠ ᠬᠡᠯᠡᠨ ᠰᠤᠭᠰᠤᠷ 》ᠡᠦᠲᠦ ᠯᠡ ᠭᠠᠵᠠᠷ ᠦᠨᠦᠷᠯᠡᠵᠦ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠠᠪᠤ ᠨᠢ ᠄
– ᠪᠠᠭᠤ ᠪᠠᠭᠤ!ᠦᠨᠦᠷᠯᠡᠭᠰᠡᠨ ᠭᠠᠵᠠᠷ ᠨᠢ ᠮᠠᠯᠲᠠᠭᠠᠳ ᠦᠵᠡ᠂ ᠶᠠᠭᠤ ᠦᠵᠡᠭᠳᠡᠵᠦ ᠪᠠᠢᠨᠠ ? ᠭᠡᠵᠦ ᠬᠦᠦ ᠪᠡᠨ ᠪᠠᠭᠤᠯᠭᠠᠵᠤ ᠭᠡᠨᠡ ᠃
– ᠲᠡᠭᠡᠷᠮᠡ ᠰᠢᠩᠭᠢ ᠬᠥᠬᠡ ᠴᠢᠯᠠᠭᠤ ᠦᠵᠡᠭᠳᠡᠵᠦ ᠪᠠᠢᠨᠠ᠃
– ᠠ ᠮᠥᠨ ᠪᠠᠢᠨᠠ ! ᠲᠣᠭᠣᠷᠢᠭᠤᠯᠤᠨ ᠮᠠᠯᠲᠠᠵᠤ ᠪᠠᠢᠵᠤ ᠠᠪᠤᠭᠠᠳ ᠬᠠᠶᠠᠵᠤ ᠣᠷᠭᠢ᠂ ᠲᠡᠭᠡᠪᠡᠯ ᠶᠠᠭᠤ ᠦᠵᠡᠭᠳᠡᠳᠡᠭ ᠶᠦᠮ ᠪᠠᠢᠨᠠ?
– ᠵᠠ ᠡᠦᠲᠦ ᠠᠪᠤᠭᠠᠳ ᠬᠠᠶᠠᠯᠠ ! ᠳᠣᠣᠷᠠ ᠠ᠋ᠴᠠ ᠨᠢ ᠬᠥᠬᠡ ᠴᠠᠭᠠᠨ ᠬᠣᠶᠠᠷ ᠦᠨᠳᠦᠰᠦ ᠭᠠᠷᠤᠭᠠᠳ ᠢᠷᠡᠪᠡ᠃
– ᠵᠠ ᠲᠠᠭᠠᠷᠠᠯᠠ᠂ ᠲᠡᠷᠡ ᠴᠢᠨᠢ ᠦᠨᠳᠦᠰᠦᠨ ᠪᠢᠰᠢ ᠤᠰᠤᠨ ᠤ᠋ ᠰᠤᠳᠠᠰᠤᠨ ᠪᠠᠢᠨᠠ᠂ ᠲᠡᠷᠡ ᠬᠥᠬᠡ ᠶ᠋ᠢ ᠨᠢ ᠲᠡᠮᠦᠨᠡ ᠪᠡᠷ ᠬᠠᠳᠬᠤᠴᠢᠬᠠᠭᠠᠳ ᠬᠠᠷᠠ ᠬᠠᠢᠰᠤ ᠪᠠᠨ ᠲᠣᠰᠤᠭᠠᠳ (ᠨᠡᠷᠡᠭᠡᠳ) ᠣᠷᠭᠢ ᠂ ᠬᠣᠶᠠᠭᠤᠯᠠ ᠪᠠᠨ ᠨᠢᠭᠡ ᠴᠠᠢ ᠴᠢᠨᠠᠵᠤ ᠤᠤᠭᠤᠶᠠ ᠭᠡᠵᠡᠢ᠃
ᠵᠠ ᠲᠡᠭᠡᠭᠡᠳ ᠬᠣᠶᠠᠭᠤᠯᠠ ᠴᠠᠢ ᠪᠠᠨ ᠴᠢᠨᠠᠵᠤ ᠦᠳᠡᠯᠡᠭᠡᠳ(ᠦᠳᠡ ᠶ᠋ᠢᠨ ᠬᠣᠭᠣᠯᠠ ᠪᠠᠨ ᠢᠳᠡᠭᠡᠳ) ᠮᠣᠷᠳᠠᠵᠠᠢ ᠃ ᠶᠠᠪᠤᠵᠤ ᠪᠠᠢᠭᠠᠳ ᠠᠪᠤ ᠨᠢ ᠭᠡᠨᠡᠳᠲᠡ ᠠᠷᠤ ᠳ᠋ᠠᠭᠠᠨ ᠡᠷᠭᠢᠵᠦ ᠦᠨᠦᠷᠯᠡᠭᠡᠳ ᠄
– ᠬᠥᠪᠡᠭᠦᠨ ᠬᠥᠪᠡᠭᠦᠨ ᠂ ᠠᠷᠤ ᠳ᠋ᠠᠭᠠᠨ ᠬᠠᠯᠢᠶᠠ (ᠬᠠᠷᠠ )ᠤᠰᠤᠨ ᠤ᠋ ᠦᠨᠦᠷ ᠭᠠᠷᠴᠤ ᠪᠠᠢᠳᠠᠭ ᠶᠠᠭᠤ ᠪᠢᠯᠡ ? ᠭᠡᠬᠦ ᠳ᠋ᠦ᠍ ᠠᠷᠠᠪᠰᠠᠷ ᠡᠷᠭᠢᠵᠦ ᠬᠠᠷᠠᠭᠠᠳ ᠄
– ᠠ ᠂ ᠲᠡᠭᠷᠢ ᠭᠠᠵᠠᠷ ᠨᠡᠢᠯᠡᠭᠰᠡᠨ ᠬᠥᠬᠡ ᠤᠰᠤᠨ ᠭᠦᠢᠴᠡᠭᠡᠳ ᠢᠷᠡᠵᠦ ᠪᠠᠢᠨᠠ ᠭᠡᠵᠡᠢ !
– ᠬᠥᠶᠢ ᠂ ᠴᠢ ᠲᠡᠷᠡ ᠲᠥᠭᠥᠷᠢᠭ ᠬᠥᠬᠡ ᠴᠢᠯᠠᠭᠤ ᠶ᠋ᠢ ᠣᠷᠣᠮ ᠳ᠋ᠤᠨᠢ ᠲᠠᠯᠪᠢᠬᠤ ᠪᠠᠨ ᠮᠠᠷᠲᠠᠭᠰᠠᠨ ᠪᠢᠰᠢ ᠪᠢᠵᠡ ⁈
– ᠣᠤ ᠂ ᠲᠠᠯᠪᠢᠭᠰᠠᠨ ᠦᠭᠡᠢ !
– ᠵᠠ ᠠᠪᠤ ᠨᠢ ᠪᠠᠬᠠᠨ ᠲᠡᠨᠡᠭᠳᠡᠯᠡ ᠂ ᠬᠤᠷᠳᠤᠨ ᠵᠤᠯᠠ ( ᠳᠤᠲᠠᠭᠠ )!
ᠢᠩᠭᠢᠭᠡᠳ 《ᠬᠠᠷᠠ ᠬᠡᠯᠡᠨ ᠰᠣᠭᠰᠣᠷ 》 ᠤ᠋ᠨ ᠢ᠋ᠶ᠋ᠠᠨ ᠬᠠᠷᠠ ᠬᠤᠷᠳᠤ ᠪᠠᠷ ᠵᠣᠯᠠᠵᠤ ᠡᠬᠢᠯᠡᠪᠡ ᠭᠡᠨᠡ ᠃
– ᠬᠥᠪᠡᠭᠦᠨ ᠬᠥᠪᠡᠭᠦᠨ ᠂ ᠤᠰᠤᠨ ᠡᠦᠲᠦ ᠬᠠᠮᠢᠭᠠ ᠢᠷᠡᠵᠦ ᠪᠠᠢᠨᠠ ?
– ᠮᠠᠨᠤᠰ ᠢ᠋ ᠬᠡᠳᠦᠢᠨ ᠭᠦᠢᠴᠡᠭᠡᠳ《ᠬᠠᠷᠠ ᠬᠡᠯᠡᠨ ᠰᠤᠭᠰᠤᠷ 》 ᠤ᠋ᠨ ᠲᠤᠭᠤᠷᠠᠢ ᠳᠠᠯᠳᠠᠷᠠᠵᠤ (ᠳᠠᠯᠳᠠ ᠣᠷᠣᠵᠤ ) ᠪᠠᠢᠨᠠ᠃
– ᠲᠦᠷᠭᠡᠨ ᠭᠦᠶᠦᠯᠭᠡ ( ᠳᠠᠪᠬᠢᠭᠤᠯ ) ! ᠡᠦᠲᠦ ᠬᠠᠮᠢᠭᠠ ᠢᠷᠡᠵᠦ ᠪᠠᠢᠨᠠ ?
–《ᠬᠠᠷᠠ ᠬᠡᠯᠡᠨ ᠰᠤᠭᠰᠤᠷ 》 ᠤ᠋ᠨ ᠪᠣᠷᠪᠢ ᠴᠣᠬᠢᠵᠤ ᠪᠠᠢᠨᠠ ᠃
– ᠭᠦᠶᠦᠯᠭᠡ ᠭᠦᠶᠦᠯᠭᠡ ! ᠡᠦᠲᠦ ᠬᠠᠮᠢᠭᠠ ᠪᠠᠢᠨᠠ ?
– ᠡᠦᠲᠦ ᠪᠦᠷ ᠪᠣᠯᠬᠤ ᠪᠠᠨ ᠪᠠᠢᠯᠠ ᠂ ᠭᠡᠳᠡᠰᠦᠨ ᠳ᠋ᠦ᠍ᠨᠢ ᠲᠤᠯᠪᠠ !
– ᠬᠠᠷᠠ ᠬᠤᠷᠳᠤ ᠪᠠᠷ ᠨᠢ ᠂ ᠬᠠᠮᠤᠭ ᠬᠤᠷᠳᠤ ᠪᠠᠷ ᠨᠢ ᠭᠦᠶᠦᠯᠭᠡ ! ᠡᠦᠲᠦ ?
– ᠣᠤ ᠂ ᠨᠠᠮᠳᠠᠭᠠᠳ ᠡᠦᠲᠦᠯᠡ ! ᠳᠠᠬᠢᠨ ᠪᠣᠷᠪᠢᠨ ᠳ᠋ᠤᠨᠢ ᠬᠦᠷᠪᠡ ᠃ ᠵᠠ᠂ ᠤᠯᠠᠮ ᠨᠠᠮᠳᠠᠯᠠ ᠂ ᠡᠦᠲᠦ ᠲᠤᠭᠤᠷᠠᠢ ᠨᠢ ᠦᠵᠡᠭᠳᠡᠪᠡ !
– ᠠ ᠂ ᠲᠡᠭᠡᠪᠡᠯ ᠵᠦᠢ ᠪᠣᠯᠵᠠᠢ ! ᠡᠦᠲᠦ ᠶᠠᠭᠤ ᠦᠵᠡᠭᠳᠡᠵᠦ ᠪᠠᠢᠨᠠ ?
– ᠲᠡᠭᠷᠢ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠬᠣᠶᠠᠷ ᠬᠠᠷᠠ ᠰᠢᠪᠠᠭᠤ ᠨᠢᠰᠴᠦ ᠪᠠᠢᠨᠠ ᠃
ᠡᠨᠡ ᠦᠶᠡ ᠳ᠋ᠦ᠍ ᠣᠷᠴᠢᠯᠠᠩ ᠤ᠋ᠨ ᠥᠷᠥᠴᠡᠨ ᠳ᠋ᠦ᠍ ᠤᠰᠤᠨ ᠭᠠᠮᠰᠢᠭ ᠪᠣᠯᠵᠤ ᠪᠠᠢᠬᠤ ᠶ᠋ᠢ ᠲᠡᠭᠷᠢ ᠶ᠋ᠢᠨ ᠬᠠᠭᠠᠨ ᠦᠵᠡᠭᠡᠳ ᠄ 《 ᠲᠡᠭᠦᠨ ᠢ᠋ ᠳᠠᠷᠤᠭᠠᠳ ᠢᠷᠡ ! 》 ᠭᠡᠵᠦ ᠬᠣᠶᠠᠷ ᠬᠠᠨ ᠭᠠᠷᠤᠳᠢ ᠪᠠᠨ ᠶᠠᠪᠤᠭᠤᠯᠤᠭᠰᠠᠨ ᠨᠢ ᠲᠡᠷᠡ ᠪᠠᠢᠵᠠᠢ ᠃ ᠬᠣᠶᠠᠷ ᠬᠠᠨ ᠭᠠᠷᠤᠳᠢ ᠳ᠋ᠠᠨᠴᠢᠨ ᠠᠭᠤᠯᠠ⑥ ᠶ᠋ᠢᠨ ᠣᠷᠣᠢ ᠶ᠋ᠢ ᠲᠠᠰᠤᠯᠤᠨ ᠴᠢᠯᠠᠭᠤᠳᠠᠭᠠᠳ ᠰᠠᠢᠬᠢ ᠤᠰᠤᠨ ᠰᠤᠳᠠᠰᠤ ᠶ᠋ᠢ ᠪᠥᠭᠯᠡᠵᠡᠢ᠃ ᠡᠨᠡ ᠨᠢ ᠡᠦᠲᠦ ᠶ᠋ᠢᠨ ᠬᠥᠬᠡ ᠨᠠᠭᠤᠷ ᠤ᠋ᠨ ᠬᠦᠢᠰᠦ ᠪᠣᠯᠵᠤ ᠂ ᠭᠠᠷᠤᠭᠰᠠᠨ ᠤᠰᠤ ᠨᠢ ᠬᠥᠬᠡ ᠨᠠᠭᠤᠷ ᠪᠣᠯᠤᠭᠰᠠᠨ ᠲᠡᠷᠡ ᠭᠡᠵᠦ ᠬᠡᠯᠡᠳᠡᠭ ᠂ ᠳ᠋ᠠᠨᠴᠢᠨ ᠠᠭᠤᠯᠠ ᠴᠣ ᠡᠦᠲᠦ ᠪᠣᠯᠲᠠᠯᠠ ᠣᠷᠣᠢ ᠪᠠᠷ ᠢ᠋ᠶ᠋ᠠᠨ ᠲᠠᠰᠤᠷᠬᠠᠢ ᠪᠠᠢᠭᠰᠠᠭᠠᠷ ᠃ ᠪᠠᠰᠠ ᠨᠢᠭᠡᠨ ᠦᠯᠢᠭᠡᠷ ᠪᠣᠯ ᠲᠡᠷᠡ ᠦᠶᠡ ᠳ᠋ᠦ᠍ 《ᠰᠢᠮᠨᠤ ᠰᠥᠨᠥᠭᠡᠮ 》 ᠭᠡᠭᠴᠢ ᠰᠢᠮᠨᠤ᠄
– ᠣᠷᠴᠢᠯᠠᠩ ᠤ᠋ᠨ ᠥᠷᠥᠴᠡᠨ ᠢ᠋ ᠤᠰᠤᠨ ᠠᠪᠬᠤ ( ᠤᠰᠤᠨ ᠳ᠋ᠤ᠌ ᠬᠦᠪᠦᠭᠦᠯᠬᠦ ) ᠭᠡᠵᠦ ᠪᠠᠢᠭᠰᠠᠨ ᠶᠤᠮ ᠂ ᠮᠢᠨᠦ ᠵᠠᠶᠠᠭᠠᠨ ᠪᠣᠯᠳᠠᠭ ᠦᠭᠡᠢ (ᠮᠠᠭᠤ) ᠪᠠᠢᠨᠠ ᠂ ᠲᠡᠭᠦᠨ ᠦ᠌ ᠪᠥᠭᠯᠡᠭᠡ ᠶ᠋ᠢ ᠨᠢ ᠠᠪᠤᠭᠠᠳ ᠬᠠᠶᠠᠬᠤ ᠳ᠋ᠤ᠌ ᠶᠠᠭᠠᠬᠢᠨᠠ ! ᠭᠡᠳ ᠬᠠᠳᠠ ᠶ᠋ᠢᠨ ᠬᠡᠯᠲᠡᠷᠬᠡᠢ ᠪᠡᠷ ᠳᠦᠦᠭᠡᠦᠷᠳᠡᠬᠦ ᠳ᠋ᠦ᠍ ᠴᠢᠯᠠᠭᠤ ᠨᠢ ᠬᠦᠷᠦᠭᠰᠡᠨ ᠦᠭᠡᠢ ᠂ ᠨᠠᠭᠠᠨᠠ ᠨᠢ ᠲᠣᠰᠴᠤ ᠣᠳᠣ ᠶ᠋ᠢᠨ ᠬᠥᠬᠡ ᠨᠠᠭᠤᠷ ᠤ᠋ᠨ ᠬᠦᠢᠰᠦᠨ ᠡᠴᠡ ᠬᠣᠢᠨᠠᠬᠠᠨ ᠴᠤᠪᠤᠷᠠᠨ ᠦᠵᠡᠭᠳᠡᠵᠦ ᠪᠠᠢᠭᠠ ᠴᠠᠭᠠᠨ ᠬᠠᠳᠠ ᠨᠤᠭᠤᠳ ᠪᠣᠯᠤᠭᠰᠠᠨ ᠭᠡᠳᠡᠭ ᠶᠦᠮ ᠃
ᠵᠠ ᠲᠡᠭᠡᠭᠡᠳ ᠠᠪᠤ ᠬᠦᠦ ᠬᠣᠶᠠᠭᠤᠯᠠ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠬᠦᠷᠦᠭᠡᠳ ᠬᠠᠮᠲᠤ ᠪᠠᠷ ᠢ᠋ᠶ᠋ᠠᠨ ᠠᠮᠢᠳᠤᠷᠠᠵᠠᠭᠠᠵᠤ ᠭᠡᠨᠡ᠃ ᠬᠦᠦ ᠨᠢ ᠡᠳᠦᠷ ᠲᠡᠭᠡᠨ ᠠᠩ ᠬᠦᠷᠦᠭᠡ ᠬᠢᠳᠡᠭ᠃ᠨᠢᠭᠡᠨ ᠡᠳᠦᠷ ᠲᠡᠷᠡ ᠨᠢᠭᠡ ᠪᠤᠭᠤ ᠠᠯᠠᠭᠠᠳ ᠥᠪᠴᠢᠵᠦ ᠦᠵᠡᠪᠡᠯ ᠥᠭᠡᠬᠦ ᠨᠢ ᠪᠦᠷ ᠮᠡᠯᠡᠬᠡᠢ ᠪᠠᠢᠵᠤ ᠭᠡᠨᠡ᠃ᠠᠷᠠᠪᠰᠠᠷ ᠲᠡᠭᠦᠨ ᠡᠴᠡ ᠨᠢ ᠵᠢᠭᠰᠢᠬᠦ ᠳ᠋ᠡᠭᠡᠨ ᠪᠤᠭᠤ ᠶ᠋ᠢᠨ ᠢ᠋ᠶ᠋ᠡᠨ ᠮᠢᠬᠠ ᠶ᠋ᠢ ᠬᠡᠭᠡᠷᠡ ᠬᠠᠶᠠᠭᠠᠳ ᠂ ᠢᠷᠡᠵᠦ ᠪᠦᠰᠡᠭᠦᠢ ᠳ᠋ᠡᠭᠡᠨ ᠬᠡᠯᠡᠬᠦ ᠳ᠋ᠦ᠍ ᠪᠦᠰᠡᠭᠦᠢ ᠨᠢ ᠣᠴᠢᠵᠤ ᠥᠭᠡᠬᠦ ᠡᠴᠡ ᠨᠢ ᠵᠢᠭᠠᠬᠠᠨ ᠠᠪᠴᠢᠷᠠᠨ ᠲᠡᠮᠦᠷ ᠰᠢᠨᠠᠭᠠ ᠳ᠋ᠤ᠌ ᠲᠠᠯᠪᠢᠵᠤ ᠂ ᠭᠠᠯ ᠳ᠋ᠤ᠌ ᠤᠩᠭᠤᠳᠬᠠᠭᠠᠳ(ᠤᠩᠭᠤᠰᠬᠠᠭᠠᠳ)ᠤᠲᠤᠭᠠ ᠶ᠋ᠢ ᠨᠢ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠡᠴᠡ ᠡᠪᠲᠡᠢᠬᠡᠨ ᠦᠯᠢᠶᠡᠪᠡ ᠭᠡᠨᠡ᠃ ᠠᠪᠤ ᠨᠢ ᠬᠡᠩᠰᠢᠭᠦᠦ ᠦᠨᠦᠷᠲᠦᠮᠡᠭᠴᠡ ᠥᠨᠳᠡᠢᠵᠦ ᠢᠷᠡᠭᠡᠳ ᠄
– ᠬᠥᠶᠢ ᠬᠥᠶᠢ ᠂《 ᠮᠡᠯᠡᠬᠡᠢᠲᠦ ᠪᠤᠭᠤ 》ᠭᠡᠵᠦ ᠠᠮᠠ ᠠᠯᠳᠠᠭᠠᠳ
– ᠬᠡᠨ ᠠᠯᠠᠪᠠ ? ᠭᠡᠵᠦ ᠰᠤᠷᠠᠵᠠᠢ ᠃ ᠬᠦᠦ ᠪᠡᠷᠢ ᠬᠣᠶᠠᠷ ᠨᠢ《ᠮᠡᠯᠡᠬᠡᠢᠲᠦ ᠪᠤᠭᠤ 》ᠭᠡᠵᠦ ᠴᠣᠬᠣᠮ ᠶᠠᠮᠠᠷ ᠤᠴᠢᠷ ᠲᠠᠢ ᠂ ᠶᠠᠭᠠᠬᠢᠭᠰᠠᠨ ᠪᠤᠭᠤ ᠪᠣᠯᠬᠤ ᠶ᠋ᠢ ᠠᠪᠤ ᠠ᠋ᠴᠠ ᠪᠠᠨ ᠬᠡᠴᠢᠨᠡᠨ ᠰᠤᠷᠠᠭᠠᠳ ᠪᠠᠰᠠ ᠯᠠ ᠡᠰᠡ ᠬᠡᠯᠡᠵᠦ ᠥᠭᠴᠦ ᠭᠡᠨᠡ ᠃