ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ < ᠬᠣᠶᠠᠷ > Хойд мэргэн төмнө – Ноёр
405 ᠵᠠ ᠂ ᠲᠡᠷᠡ ᠦᠶᠡ ᠳ᠋ᠦ᠍ ᠡᠨᠡ ᠮᠣᠩᠭᠣᠯ ᠭᠠᠵᠠᠷ ᠲᠠᠩᠭᠤᠳ ᠭᠠᠵᠠᠷ ᠲᠠᠢ ᠵᠠᠬᠠ ᠨᠡᠢᠯᠡᠵᠦ ᠪᠠᠢᠵᠤ ᠭᠡᠨᠡ ᠃ ᠲᠠᠩᠭᠤᠳ ᠭᠠᠵᠠᠷ ᠰᠣᠷᠢᠨᠵᠢᠨ ᠭᠣᠮᠪᠣ ᠭᠡᠭᠴᠢ ᠨᠢᠭᠡ ᠶᠡᠬᠡ ᠬᠠᠭᠠᠨ ᠲᠠᠢ ᠭᠡᠨᠡ ᠃ ᠡᠨᠡ ᠰᠣᠷᠢᠨᠵᠢᠨ ᠭᠣᠮᠪᠣ ᠬᠠᠭᠠᠨ ᠢ᠋ ᠴᠠᠭᠠᠨ ᠳᠠᠷᠢ ᠡᠬᠡ ᠭᠡᠳᠡᠭ ᠂ ᠡᠨᠡ ᠴᠠᠭᠠᠨ ᠳᠠᠷᠢ (ᠳ᠋ᡁᠷᠢ ᠂ ᠳᠠᠷᠠ) ᠡᠬᠡ ᠢᠯᠡᠷᠡᠬᠦ ᠳ᠋ᠦ᠍ ᠨᠣᠭᠣᠭᠠᠨ ᠳᠠᠷᠢ ᠡᠬᠡ ᠴᠦ᠍ ᠵᠠᠪᠠᠯ ᠢᠯᠡᠷᠡᠬᠦ ᠶᠣᠰᠣᠲᠠᠢ ᠭᠡᠨᠡ ᠃ ᠲᠡᠭᠡᠭᠡᠳ ᠴᠠᠭᠠᠨ ᠳᠠᠷᠢ ᠡᠬᠡ ᠪᠠ ᠨᠣᠭᠣᠭᠠᠨ ᠳᠠᠷᠢ ᠡᠬᠡ ᠡᠷᠬᠡᠪᠰᠢ ᠳᠡᠷᠡ ᠨᠡᠢᠯᠡᠭᠦᠯᠵᠦ ᠭᠡᠵᠢᠭᠡ ᠬᠣᠯᠪᠣᠬᠤ ᠶᠣᠰᠣᠲᠠᠢ ᠶᠤᠮᠰᠠᠨᠵᠠᠢ ᠃ ᠡᠨᠡ ᠦᠶᠡ ᠳ᠋ᠦ᠍ ᠨᠣᠭᠣᠭᠠᠨ ᠳᠠᠷᠢ ᠡᠬᠡ ᠬᠢᠲᠠᠳ ᠤ᠋ᠨ ᠬᠠᠭᠠᠨ ᠤ᠋ ᠭᠡᠷ ᠲᠦ᠍ ᠢᠯᠡᠷᠡᠵᠦ ᠂ ᠨᠡᠷᠡ ᠶ᠋ᠢ ᠨᠢ ᠥᠨᠥᠴᠢᠨ ᠭᠦᠨᠴᠦ ( ᠸᠸᠨ ᠴᠧᠩ ᠭᠦᠩᠵᠦ) ᠭᠡᠳᠡᠭ ᠪᠠᠢᠵᠠᠢ᠃ᠲᠡᠭᠦᠨ ᠢ᠋ ᠰᠣᠷᠢᠨᠵᠢᠨ ᠭᠣᠮᠪᠣ ᠬᠠᠭᠠᠨ ᠳ᠋ᠤ᠌ ᠠᠪᠴᠢᠷᠠᠬᠤ ᠴᠢᠳᠠᠪᠤᠷᠢ ᠲᠠᠢ ᠬᠥᠮᠦᠨ ᠢ᠋ ᠪᠦᠬᠦ ᠲᠠᠩᠭᠤᠳ ᠣᠷᠣᠨ ᠠ᠋ᠴᠠ ᠬᠠᠢᠭᠠᠳ ᠣᠯᠤᠭᠰᠠᠨ ᠦᠭᠡᠢ ᠲᠤᠯᠠ ᠬᠠᠮᠤᠭ ᠰᠡᠭᠦᠯ ᠳ᠋ᠦ᠍ ᠬᠡᠨ ᠡᠴᠡ ᠴᠦ᠍ ᠮᠡᠷᠭᠡᠨ᠂ ᠬᠡᠯᠡ ᠲᠡᠢ ᠠᠮᠠ ᠲᠠᠢ ᠂ ᠬᠡᠴᠡᠭᠦᠦ ᠬᠡᠷᠰᠡᠦ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠶ᠋ᠢ ᠶᠠᠪᠤᠭᠤᠯᠬᠤ ᠪᠠᠷ ᠪᠣᠯᠤᠭᠰᠠᠨ ᠭᠡᠨᠡ ᠃ ᠡᠨᠡ ᠬᠢᠲᠠᠳ ᠤ᠋ᠨ ᠭᠠᠵᠠᠷ ᠪᠣᠯᠪᠠᠯ ᠬᠠᠮᠤᠭ ᠤ᠋ᠨ ᠰᠦᠷᠡᠬᠡᠢ ᠬᠥᠭᠵᠢᠭᠰᠡᠨ ᠭᠠᠵᠠᠷ ᠃ ᠳᠡᠯᠡᠬᠡᠢ ᠳ᠋ᠦ᠍ ᠦᠭᠡᠢ ᠬᠬᠢᠪ ᠲᠣᠷᠭᠠ ᠲᠠᠢ ᠭᠡᠨᠡ᠂ᠬᠣᠷᠸᠠ ᠳ᠋ᠤ᠌ ᠬᠣᠪᠣᠷ ᠬᠣᠪᠴᠢ ᠰᠢᠷᠠ ᠵᠢᠷᠤᠬᠠᠢ ᠲᠠᠢ ᠭᠡᠨᠡ᠂ ᠡᠨᠡ ᠬᠣᠪᠴᠢ ᠰᠢᠷᠠ ᠵᠢᠷᠤᠬᠠᠢ ᠨᠢ ᠬᠥᠮᠦᠨ ᠦ᠌ ᠶᠠᠭᠤ ᠬᠡᠯᠡᠵᠦ ᠶᠠᠭᠤ ᠬᠢᠵᠦ ᠪᠠᠢᠬᠤ ᠶ᠋ᠢ ᠪᠦᠷ ᠮᠡᠳᠡᠴᠢᠬᠡᠳᠡᠭ ᠭᠡᠨᠡ ᠪᠢᠯᠡ ᠃ ᠳᠠᠬᠢᠵᠤ ᠬᠡᠯᠡᠪᠡᠯ ᠠᠳᠤᠭᠤᠨ ᠳ᠋ᠤᠨᠢ ᠠᠷᠠᠨᠵᠠᠯ ᠠᠭᠲᠠ (ᠠᠵᠢᠨᠠᠢ ᠬᠦᠯᠦᠭ ) ᠵᠠᠶᠠᠭᠠᠭᠰᠠᠨ᠂ ᠡᠮᠡᠰ ᠦ᠋ᠨ ᠳᠤᠮᠳᠠ ᠨᠢ ᠨᠣᠭᠣᠭᠠᠨ ᠳᠠᠷᠢ ᠡᠬᠡ ᠵᠠᠶᠠᠭᠠᠭᠰᠠᠨ᠂ᠡᠷᠡᠰ ᠦ᠋ᠨ ᠳᠤᠮᠳᠠ ᠨᠢ ᠭᠠᠢᠬᠠᠰᠢ ᠲᠠᠢ ᠳᠣᠯᠣᠭᠠᠨ ᠡᠮᠴᠢ ᠵᠠᠶᠠᠭᠠᠭᠰᠠᠨ ᠂ ᠡᠨᠡ ᠳᠣᠯᠣᠭᠠᠨ ᠡᠮᠴᠢ ᠶ᠋ᠢᠨ ᠮᠡᠷᠭᠡᠵᠢᠯ ᠭᠡᠪᠡᠯ ᠦᠬᠦᠭᠰᠡᠨ ᠬᠥᠮᠦᠨ ᠢ᠋ ᠠᠮᠢᠯᠠᠭᠤᠯᠤᠨ ᠴᠢᠳᠠᠳᠠᠭ ᠭᠡᠨᠡ ᠃ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠂ ᠰᠣᠷᠢᠨᠵᠢᠨ ᠭᠣᠮᠪᠣ ᠬᠠᠭᠠᠨ ᠳ᠋ᠤ᠌ ᠥᠨᠥᠴᠢᠨ ᠭᠦᠨᠴᠦ ᠶ᠋ᠢ ᠵᠠᠯᠠᠵᠤ ᠠᠪᠴᠢᠷᠠᠬᠤ ᠪᠠᠷ ᠬᠢᠲᠠᠳ ᠤ᠋ᠨ ᠣᠷᠣᠨ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍ ᠂ ᠡᠨᠡ ᠬᠢᠲᠠᠳ ᠤ᠋ᠨ ᠣᠷᠣᠨ ᠠ᠋ᠴᠠ ᠬᠠᠲᠤᠨ ᠵᠠᠯᠠᠵᠤ ᠢᠷᠡᠬᠦ ᠭᠡᠳᠡᠭ ᠬᠡᠴᠡᠭᠦᠦ ᠪᠠᠢᠪᠠ ᠭᠡᠨᠡ ᠃ ᠡᠬᠢᠯᠡᠭᠰᠡᠭᠡᠷ ᠬᠢᠲᠠᠳ ᠤ᠋ᠨ ᠬᠠᠭᠠᠨ ᠲᠠᠩᠭᠤᠳ ᠤ᠋ᠨ ᠬᠠᠭᠠᠨ ᠳ᠋ᠤ᠌ ᠬᠡᠦᠬᠡᠨ ᠢ᠋ᠶ᠋ᠡᠨ ᠥᠭᠬᠦ ᠦᠭᠡᠢ ᠭᠡᠵᠦ ᠮᠠᠷᠭᠤᠯᠳᠤᠭᠰᠠᠨ ᠭᠡᠨᠡ ᠂ ᠭᠡᠪᠡᠴᠦ ᠡᠴᠦᠰ ᠲᠡᠭᠡᠨ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠶ᠋ᠢᠨ ᠬᠡᠯᠡ ᠠᠮᠠᠨ ᠤ᠋ ᠬᠤᠷᠴᠠ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠭᠡᠨᠡ ᠂ ᠲᠡᠭᠡᠭᠡᠳ ᠠᠷᠭᠠ ᠶᠠᠳᠠᠬᠤ ᠳ᠋ᠠᠭᠠᠨ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠲᠡᠢ ᠭᠤᠷᠪᠠᠨ ᠵᠦᠢᠯ ᠦ᠋ᠨ ᠮᠠᠷᠭᠤᠭᠠ ᠲᠠᠯᠪᠢᠵᠠᠢ ᠃
ᠨᠢᠭᠡᠳᠦᠭᠡᠷ ᠮᠠᠷᠭᠤᠭᠠ ᠨᠢ ᠶᠠᠭᠤ ᠶᠤᠮ? ᠭᠡᠬᠦᠯᠡ ᠂ ᠳᠣᠲᠣᠷᠠ ᠪᠠᠨ ᠮᠠᠲᠠᠭᠠᠷ ᠳᠠᠳᠠᠭᠠᠷ ᠨᠦᠬᠡ ᠲᠡᠢ ᠠᠯᠠᠭᠠᠨ ᠴᠢᠨᠡᠭᠡᠨ ᠬᠠᠰ ᠴᠢᠯᠠᠭᠤ ᠠᠪᠴᠢᠷᠠᠭᠠᠳ ᠤᠲᠠᠰᠤ ᠪᠠᠷ ᠰᠦᠪᠡᠯᠡᠨ ᠭᠠᠷᠭᠠ ᠭᠡᠵᠦ ᠭᠡᠨᠡ ᠃ ᠨᠠᠰᠢ ᠴᠠᠰᠢ ᠬᠤᠭᠤᠰ ᠨᠤᠭᠤᠰ ᠨᠦᠬᠡ ᠭᠠᠷᠤᠭᠰᠠᠨ ᠴᠢᠯᠠᠭᠤ ᠶ᠋ᠢ ᠰᠦᠪᠡᠯᠡᠨᠡ ᠭᠡᠳᠡᠭ ᠴᠦ᠍ ᠦᠬᠡᠷ ᠮᠠᠯ ᠤ᠋ᠨ ᠳᠣᠲᠣᠷ ᠢ᠋ ᠰᠦᠪᠡᠯᠡᠵᠦ ᠭᠠᠷᠭᠠᠬᠤ ᠠ᠋ᠴᠠ ᠬᠡᠴᠡᠭᠦᠦ ᠪᠠᠢᠪᠠ ᠃ ᠭᠡᠪᠡᠴᠦ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠰᠠᠨᠳᠤᠷᠤᠭᠰᠠᠨ ᠦᠭᠡᠢ᠂ᠬᠠᠵᠠᠭᠤ ᠠ᠋ᠴᠠ ᠪᠠᠨ ᠨᠢᠭᠡ ᠰᠢᠷᠭᠤᠯᠵᠢ ᠪᠠᠷᠢᠵᠤ ᠤᠭᠤᠴᠠ ᠠ᠋ᠴᠠ ᠨᠢ ᠤᠲᠠᠰᠤ ᠪᠠᠷ ᠣᠭᠣᠰᠣᠷᠯᠠᠭᠠᠳ ᠂ ᠬᠠᠰ ᠤ᠋ᠨ ᠨᠦᠬᠡ ᠤᠷᠤᠭᠤ ᠲᠠᠯᠪᠢᠵᠤ ᠣᠷᠣᠭᠤᠯᠬᠤ ᠳ᠋ᠤ᠌ ᠤᠳᠠᠵᠤ ᠤᠳᠠᠭᠠᠳ ᠴᠠᠭᠠᠳᠤ ᠲᠠᠯᠠ ᠪᠠᠷ ᠨᠢ ᠭᠠᠷᠤᠭᠠᠳ ᠢᠷᠡᠵᠦ ᠭᠡᠨᠡ ᠃ ᠰᠢᠷᠭᠤᠯᠵᠢ ᠤᠭᠤᠴᠠ ᠪᠠᠷ ᠢ᠋ᠶ᠋ᠠᠨ ᠲᠠᠰᠤᠷᠬᠠᠢ ᠲᠠᠢ ᠪᠠᠢᠳᠠᠭ ᠨᠢ ᠡᠭᠦᠨ ᠡᠴᠡ ᠪᠣᠯᠤᠭᠰᠠᠨ ᠶᠤᠮ ᠭᠡᠨᠡ ᠃ ᠮᠡᠷᠭᠡᠨ ᠲᠡᠮᠦᠨᠡ ᠢᠩᠭᠢᠵᠦ ᠰᠦᠪᠡᠯᠡᠭᠰᠡᠨ ᠬᠠᠰ ᠢ᠋ᠶ᠋ᠠᠨ ᠬᠢᠲᠠᠳ ᠤ᠋ᠨ ᠬᠠᠭᠠᠨ ᠳ᠋ᠤ᠌ ᠠᠪᠠᠴᠢᠭᠠᠳ ᠥᠭᠬᠦ ᠳ᠋ᠦ᠍ ᠂ ᠬᠠᠭᠠᠨ ᠬᠣᠶᠠᠳᠤᠭᠠᠷ ᠮᠠᠷᠭᠤᠭᠠ ᠪᠠᠨ ᠲᠠᠯᠪᠢᠵᠤ ᠭᠡᠨᠡ ᠃ ᠬᠣᠶᠠᠳᠤᠭᠠᠷ ᠮᠠᠷᠭᠤᠭᠠ ᠨᠢ ᠶᠠᠭᠤ ᠶᠤᠮ ᠭᠡᠬᠦᠯᠡ ? ᠬᠠᠭᠠᠨ ᠄
- ᠡᠨᠡ ᠣᠷᠣᠢ ᠶᠡᠬᠡ ᠣᠷᠳᠣᠨ ᠤ᠋ ᠨᠠᠢᠷ ᠬᠢᠨᠡ ᠂ ᠴᠢ ᠣᠷᠳᠣᠨ ᠳ᠋ᠤ᠌ ᠣᠷᠣᠬᠤ ᠳ᠋ᠤ᠌ ᠳᠠᠭᠠᠭᠤᠯᠬᠤ ᠬᠥᠮᠦᠨ ᠪᠠᠢᠬᠤ ᠠ᠋ᠴᠠ ᠪᠢᠰᠢ ᠭᠠᠷᠬᠤ ᠳ᠋ᠤ᠌ ᠳᠠᠭᠠᠭᠤᠯᠬᠤ ᠬᠥᠮᠦᠨ ᠪᠠᠢᠬᠤ ᠦᠭᠡᠢ᠃ ᠣᠷᠳᠣᠨ ᠠ᠋ᠴᠠ ᠭᠠᠷᠤᠭᠠᠳ ᠰᠠᠭᠤᠵᠤ ᠪᠠᠢᠭᠠ ᠭᠡᠷᠡ ᠪᠡᠨ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠣᠯᠵᠤ ᠴᠢᠳᠠᠪᠠᠯ ᠬᠡᠦᠬᠡᠨ ᠢ᠋ ᠠᠪᠤᠭᠠᠳ ᠶᠠᠪᠤ ᠭᠡᠵᠦ ᠬᠡᠯᠡᠵᠦ ᠭᠡᠨᠡ ᠃ ᠮᠡᠷᠭᠡᠨ ᠲᠡᠮᠦᠨᠡ ᠮᠢᠩᠭᠠᠨ ᠠᠯᠲᠠ ᠮᠢᠨᠳᠠᠰᠤᠨ ᠤᠲᠠᠰᠤ ᠶ᠋ᠢ ᠨᠢᠳᠤᠷᠮᠠ ( ᠨᠢᠳᠤᠷᠭᠠ ) ᠶ᠋ᠢᠨ ᠴᠢᠨᠡᠭᠡᠨ ᠪᠣᠯᠲᠠᠯᠠ ᠪᠥᠮᠪᠥᠭᠡᠯᠡᠵᠦ ᠬᠠᠨᠴᠤᠢᠯᠠᠭᠠᠳ᠂ ᠢᠷᠡᠭᠰᠡᠨ ᠬᠥᠮᠦᠨ ᠢ᠋ ᠨᠢ ᠳᠠᠭᠠᠵᠤ ᠣᠷᠳᠣᠨ ᠳ᠋ᠤ᠌ ᠣᠷᠣᠬᠤ ᠳ᠋ᠠᠭᠠᠨ ᠤᠲᠠᠰᠤᠨ ᠤ᠋ ᠪᠠᠨ ᠨᠢᠭᠡ ᠦᠵᠦᠭᠦᠷ ᠢ᠋ ᠡᠭᠦᠳᠡᠨ ᠡᠴᠡ ᠪᠡᠨ ᠤᠶᠠᠵᠤ ᠂ ᠬᠠᠨᠴᠤᠢ ᠠ᠋ᠴᠠ ᠪᠠᠨ ᠴᠤᠪᠤᠭᠤᠯᠤᠨ ᠶᠠᠪᠤᠭᠠᠳ ᠪᠠᠢᠪᠠ ᠭᠡᠨᠡ ᠃ ᠮᠢᠩᠭᠠᠨ ᠥᠷᠥᠭᠡ ᠲᠦᠮᠡᠨ ᠲᠠᠰᠤᠯᠭᠠ ᠶ᠋ᠢ ᠳᠡᠮᠵᠢᠵᠦ᠂ᠭᠤᠷᠪᠠᠯᠵᠢᠨ ᠳᠥᠷᠪᠡᠯᠵᠢᠨ ᠤᠭᠠᠯᠵᠠᠨ ᠲᠦᠭᠡᠯᠵᠡᠨ ᠬᠡᠯᠪᠡᠷᠢᠲᠦ ᠤᠷᠲᠤ ᠰᠠᠷᠠᠪᠴᠢ ᠶ᠋ᠢ ᠳ᠋ᠡᠭᠡᠨ ᠭᠤᠯᠵᠢᠩ ᠮᠠᠯᠵᠢᠩ ᠶᠠᠪᠤᠭᠰᠠᠭᠠᠷ ᠶᠠᠪᠤᠭᠰᠠᠭᠠᠷ ᠪᠠᠢᠲᠠᠯᠠ ᠲᠣᠯᠣᠭᠠᠢ ᠡᠬᠢ ᠡᠷᠭᠢᠵᠦ᠂ ᠬᠠᠮᠢᠭᠠ ᠠ᠋ᠴᠠ ᠢᠷᠡᠵᠦ ᠬᠠᠮᠢᠭᠠᠰᠢ ᠬᠠᠨᠳᠤᠨ ᠶᠠᠪᠤᠭᠠ ᠪᠠᠨ ᠴᠣ ᠮᠡᠳᠡᠬᠦ ᠦᠭᠡᠢ ᠪᠠᠢᠲᠠᠯᠠ ᠬᠡᠵᠢᠶᠡᠨᠡᠢ ᠭᠣᠣᠯ ᠣᠷᠳᠣᠨ ᠳ᠋ᠤ᠌ ᠣᠷᠣᠭᠠᠳ ᠢᠷᠡᠴᠢᠬᠡᠭᠰᠡᠨ ᠪᠠᠢᠪᠠ ᠭᠡᠨᠡ ᠃ ᠰᠥᠨᠢ ᠬᠤᠭᠤᠰᠯᠠᠲᠠᠯᠠ ᠨᠠᠢᠷ ᠪᠣᠯᠤᠭᠠᠳ᠂ᠪᠤᠴᠠᠬᠤ ᠦᠶᠡ ᠳ᠋ᠦ᠍ ᠲᠡᠭᠦᠨ ᠢ᠋ ᠭᠠᠭᠴᠠᠭᠠᠷ ᠣᠷᠬᠢᠭᠠᠳ ᠶᠠᠪᠤᠵᠠᠭᠠᠵᠠᠢ ᠃ ᠲᠡᠭᠡᠬᠦ ᠳ᠋ᠦ᠍ᠨᠢ ᠮᠡᠷᠭᠡᠨ ᠲᠡᠮᠦᠨᠡ ᠰᠠᠢᠬᠢ ᠴᠤᠪᠤᠭᠤᠯᠵᠤ ᠢᠷᠡᠭᠰᠡᠨ ᠤᠲᠠᠰᠤ ᠪᠠᠨ ᠳᠠᠭᠠᠭᠠᠳ ᠬᠠᠷᠢᠵᠤ ᠭᠡᠨᠡ ᠃ ᠮᠠᠩᠭᠠᠳᠤᠷ ᠦᠷᠦᠭᠦᠨ ( ᠥᠷᠯᠥᠭᠡ ) ᠨᠢ ᠬᠠᠭᠠᠨ ᠄ᠡᠦᠲᠦ ᠯᠡ ᠨᠢᠭᠡ ᠲᠥᠭᠡᠷᠢᠵᠦ ᠲᠡᠨᠦᠨ ᠬᠡᠷᠡᠮ ᠦ᠋ᠨ ᠢᠷᠣᠭᠠᠯ ( ᠢᠷᠣᠭᠠᠷ ) ᠲᠤ᠌ ᠬᠡᠪᠲᠡᠵᠦ ᠬᠣᠨᠣᠭᠠᠳ ᠮᠠᠷᠭᠤᠭᠠᠨ ᠳ᠋ᠤ᠌ ᠤᠨᠠᠭᠰᠠᠨ ᠪᠣᠢ ᠭᠡᠵᠦ ᠪᠣᠳᠣᠨ ᠢᠷᠡᠵᠦ ᠦᠵᠡᠬᠦ ᠳ᠋ᠦ᠍ ᠮᠡᠷᠭᠡᠨ ᠲᠡᠮᠦᠨᠡ ᠬᠠᠷᠢᠨ ᠣᠷᠣ ᠳᠡᠭᠡᠷᠡ ᠪᠡᠨ ᠠᠮᠤᠷᠯᠢᠩᠭᠤᠢ ᠨᠣᠢᠷᠰᠤᠨ ᠪᠠᠢᠪᠠ ᠭᠡᠨᠡ ᠃ ᠬᠠᠭᠠᠨ ᠬᠡᠦᠬᠡᠨ ᠢ᠋ᠶ᠋ᠡᠨ ᠲᠥᠪᠡᠳ ᠲᠦ᠍ ᠥᠭᠬᠦ ᠳᠤᠷᠠ ᠨᠢ ᠡᠰᠡ ᠬᠦᠷᠬᠦ ᠳ᠋ᠡᠭᠡᠨ ᠬᠣᠶᠠᠳᠠᠭᠴᠢ ᠤᠳᠠᠭᠠ ᠦᠭᠡ ᠪᠡᠨ ᠢᠳᠡᠵᠦ ᠂ ᠭᠤᠷᠪᠠᠳᠤᠭᠠᠷ ᠮᠠᠷᠭᠤᠭᠠ ᠪᠠᠨ ᠲᠠᠯᠪᠢᠵᠠᠢ ᠃ ᠭᠤᠷᠪᠠᠳᠤᠭᠠᠷ ᠮᠠᠷᠭᠤᠭᠠ ᠨᠢ ᠶᠠᠭᠤ ᠪᠣᠯᠳᠠᠭ? ᠭᠡᠬᠦᠯᠡ ᠂ ᠬᠠᠭᠠᠨ ᠄
- ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠴᠢᠨᠦ ᠡᠮᠦᠨᠡ ᠭᠤᠷᠪᠠᠨ ᠵᠠᠭᠤᠨ ᠠᠨᠠ ᠮᠠᠨᠠ ᠬᠤᠪᠴᠠᠰᠤ ᠲᠠᠢ ᠂ ᠠᠪ ᠠᠳᠠᠯᠢ ᠵᠢᠰᠦ ᠲᠡᠢ ᠬᠡᠦᠬᠡᠨ ᠢ᠋ ᠠᠪᠴᠢᠷᠠᠨᠠ ᠂ ᠲᠡᠳᠡᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠥᠨᠥᠴᠢᠨ ᠭᠦᠨᠴᠦ ᠶ᠋ᠢ ᠲᠠᠨᠢᠵᠤ ᠴᠢᠳᠠᠪᠠᠯ ᠠᠪᠤᠭᠠᠳ ᠶᠠᠪᠤ ᠭᠡᠵᠦ ᠬᠡᠯᠡᠵᠡᠢ ᠃ ᠡᠨᠡ ᠮᠠᠷᠭᠤᠭᠠᠨ ᠠ᠋ᠴᠠ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠴᠦ᠍ ᠠᠶᠤᠵᠤ ᠡᠬᠢᠯᠡᠵᠦ ᠭᠡᠨᠡ ᠄ ᠨᠣᠭᠣᠭᠠᠨ ᠳᠠᠷᠢ ᠡᠬᠡ
- ᠥᠨᠥᠴᠢᠨ ᠭᠦᠨᠴᠦ ᠶ᠋ᠢ ᠲᠠᠨᠢᠬᠤ ᠬᠥᠮᠦᠨ ᠪᠠᠷᠤᠭ ᠪᠠᠢᠬᠤ ᠦᠭᠡᠢ ᠮᠥᠷᠲᠡᠭᠡᠨ ᠂ ᠲᠠᠨᠢᠬᠤ ᠬᠥᠮᠦᠨ ᠪᠠᠢᠬᠤ ᠪᠠᠷ ᠪᠣᠳᠣᠭᠰᠠᠨ ᠴᠣ ᠬᠣᠪᠴᠢ ᠰᠢᠷᠠ ᠵᠢᠷᠤᠬᠠᠢ ᠠ᠋ᠴᠠ ᠠᠶᠤᠭᠠᠳ ᠬᠡᠯᠡᠳᠡᠭ ᠦᠭᠡᠢ ᠶᠤᠮᠰᠠᠨᠵᠠᠢ ᠃ ᠮᠡᠷᠭᠡᠨ ᠲᠡᠮᠦᠨᠡ ᠠᠷᠭᠠ ᠶᠠᠳᠠᠬᠤ ᠳ᠋ᠠᠭᠠᠨ ᠬᠠᠭᠠᠨ ᠤ᠋ ᠡᠭᠦᠳᠡᠨ ᠳ᠋ᠡᠬᠢ ᠨᠢᠭᠡᠨ ᠵᠠᠷᠤᠴᠠ ᠡᠮᠡᠭᠡᠨ ᠡᠴᠡ ᠰᠤᠷᠠᠵᠠᠢ ᠃ ᠡᠮᠡᠭᠡᠨ ᠶᠠᠮᠠᠷ ᠴᠣ ᠬᠠᠷᠢᠭᠤ ᠦᠭᠭᠦᠭᠰᠡᠨ ᠦᠭᠡᠢ ᠬᠣᠶᠠᠷ ᠬᠣᠨᠣᠵᠤ ᠂ ᠭᠤᠷᠪᠠᠳᠤᠭᠠᠷ ᠡᠳᠦᠢ ᠪᠡᠨ ᠮᠡᠷᠭᠡᠨ ᠲᠡᠮᠦᠨᠡ ᠳ᠋ᠦ᠍ ᠢᠷᠡᠭᠡᠳ ᠄
- ᠥᠨᠥᠴᠢᠨ ᠭᠦᠨᠴᠦ ᠶ᠋ᠢ ᠲᠠᠨᠢᠵᠤ ᠠᠪᠬᠤ ᠠᠷᠭᠠ ᠶ᠋ᠢ ᠮᠢᠨᠦ ᠬᠡᠦᠬᠡᠨ ᠡᠴᠡ ᠠᠰᠠᠭᠤ ᠭᠡᠵᠦ ᠬᠡᠯᠡᠮᠡᠭᠴᠡ ᠭᠠᠷᠤᠭᠠᠳ ᠶᠠᠪᠤᠴᠢᠬᠠᠵᠤ ᠭᠡᠨᠡ ᠃ ᠮᠡᠷᠭᠡᠨ ᠲᠡᠮᠦᠨᠡ ᠠᠷᠤ ᠠ᠋ᠴᠠ ᠨᠢ ᠬᠥᠭᠡᠭᠡᠵᠦ ᠭᠠᠷᠤᠭᠠᠳ᠄
- ᠲᠠᠨ ᠤ᠋ ᠬᠡᠦᠬᠡᠨ ᠬᠠᠮᠢᠭᠠ ᠪᠣᠢ? ᠭᠡᠪᠡᠯ᠄
- ᠡᠨᠡ ᠡᠮᠦᠨᠡ ᠬᠠᠷᠠᠯᠠᠨ ᠦᠵᠡᠭᠳᠡᠵᠦ ᠪᠠᠢᠭᠠ ᠡᠵᠡᠭᠦᠢ ᠠᠭᠤᠯᠠᠨ ᠳ᠋ᠤ᠌ ᠵᠣᠯᠢᠭ ᠲᠤ᠌ ᠭᠠᠷᠭᠠᠭᠰᠠᠨ ( ᠴᠥᠯᠡᠭᠳᠡᠭᠰᠡᠨ ) ᠶᠦᠮ ᠭᠡᠵᠦ ᠭᠡᠨᠡ᠃
- ᠵᠠᠮ ᠦᠭᠡᠢ ᠠᠭᠤᠯᠠᠨ ᠳ᠋ᠤ᠌ ᠪᠢ ᠶᠠᠭᠠᠬᠢᠵᠤ ᠬᠦᠷᠴᠦ ᠰᠤᠷᠠᠬᠤ ᠪᠣᠢ ? ᠭᠡᠬᠦ ᠳ᠋ᠦ᠍ ᠡᠮᠡᠭᠡᠨ ᠄
- ᠨᠠᠶᠠᠨ ᠦᠶᠡᠲᠦ ᠨᠠᠷᠢᠨ ᠴᠠᠭᠠᠨ ᠬᠤᠯᠤᠰᠤ ᠶ᠋ᠢ ᠨᠠᠢ᠍ᠮᠠᠨ ᠲᠡᠪᠡᠷᠢ ᠠᠪᠴᠢᠷᠠᠭᠠᠳ ᠦᠶᠡ ᠦᠶᠡ ᠪᠡᠷ ᠨᠢ ᠬᠢᠷᠥᠭᠡᠳᠡᠨ ᠳᠠᠭᠠᠷᠢᠵᠤ ᠂ ᠳᠠᠬᠢᠨ ᠭᠤᠤᠷᠰᠤ ᠶ᠋ᠢ ᠨᠢ ᠠᠭᠤᠯᠠᠨ ᠳᠡᠭᠡᠭᠦᠷ ᠤᠭᠰᠠᠷᠠᠭᠤᠯᠤᠨ ᠲᠠᠯᠪᠢᠭᠠᠳ ᠰᠤᠷᠠᠵᠤ ᠠᠪᠬᠤ ᠭᠠᠭᠴᠠ ᠠᠷᠭᠠ ᠪᠠᠢᠳᠠᠭ ᠪᠢᠯᠡ ᠭᠡᠵᠦ ᠭᠡᠨᠡ ᠃
ᠵᠠ ᠲᠡᠭᠡᠭᠡᠳ ᠡᠨᠡ ᠡᠮᠡᠭᠡᠨ ᠦ᠌ ᠬᠡᠦᠬᠡᠨ ᠨᠢ ᠶᠠᠭᠠᠬᠢᠭᠠᠳ ᠵᠣᠯᠢᠭ ᠲᠤ᠌ ᠭᠠᠷᠤᠭᠰᠠᠨ ᠪᠣᠢ? ᠭᠡᠪᠡᠯ᠂ ᠪᠠᠰᠠ ᠶᠡᠬᠡ ᠦᠯᠢᠭᠡᠷ ᠲᠡᠢ ᠶᠦᠮ ᠪᠠᠢᠵᠤ ᠭᠡᠨᠡ᠃
ᠬᠠᠭᠠᠨ ᠤ᠋ ᠣᠷᠳᠣᠨ ᠤ᠋ ᠵᠠᠭᠤ ᠮᠢᠩᠭᠠᠨ ᠰᠢᠪᠡᠭᠴᠢᠨ ᠳᠣᠲᠣᠷᠠ ᠲᠡᠷᠡ ᠬᠡᠦᠬᠡᠨ ᠬᠠᠮᠤᠭ ᠮᠠᠷᠮᠠᠬᠠᠨ ( ᠭᠣᠶᠣ ᠂ ᠬᠥᠭᠡᠷᠦᠬᠦᠨ ) ᠵᠢᠰᠦ ᠲᠡᠢ ᠪᠠᠢᠭᠰᠠᠨ ᠢ᠋ ᠬᠠᠭᠠᠨ ᠮᠡᠳᠡᠭᠡᠳ ᠭᠣᠣᠯ ᠣᠷᠳᠣᠨ ᠤ᠋ ᠰᠢᠪᠡᠭᠴᠢᠨ ᠪᠣᠯᠭᠠᠭᠰᠠᠨ ᠭᠡᠨᠡ ᠃ ᠬᠡᠦᠬᠡᠨ ᠢ᠋ ᠭᠣᠣᠯ ᠣᠷᠳᠣᠨ ᠳ᠋ᠤ᠌ ᠠᠪᠴᠢᠷᠠᠬᠤ ᠦᠶᠡ ᠳ᠋ᠦ᠍ ᠬᠠᠷᠠ ᠪᠠᠭᠠ ᠠ᠋ᠴᠠ ᠪᠠᠨ ᠬᠠᠮᠲᠤ ᠥᠰᠦᠭᠰᠡᠨ ᠯᠢᠮᠪᠤᠴᠢᠨ ᠬᠦᠦ ᠨᠢ ᠄
- ᠴᠢ ᠶᠠᠪᠤᠭᠰᠠᠨ ᠠᠷᠤ ᠳ᠋ᠤ᠌ ( ᠬᠣᠢᠨᠠ ) ᠪᠢ ᠶᠠᠭᠠᠬᠢᠬᠤ ᠪᠣᠢ ? ᠭᠡᠵᠦ ᠭᠡᠨᠡ᠃ ᠬᠡᠦᠬᠡᠨ᠄
- ᠨᠠᠶᠠᠨ ᠦᠶᠡᠲᠦ ᠨᠠᠷᠢᠨ ᠴᠠᠭᠠᠨ ᠬᠤᠯᠤᠰᠤᠨ ᠯᠢᠮᠪᠦ ᠳ᠋ᠡᠭᠡᠨ ᠮᠢᠨᠦ ᠳᠠᠭᠤ ᠶ᠋ᠢ ᠰᠢᠩᠭᠡᠭᠡᠳ ᠰᠣᠨᠣᠰᠤᠨ ᠰᠠᠭᠤ ᠂ ᠲᠡᠭᠡᠪᠡᠯ ᠨᠠᠮᠠᠢ ᠪᠠᠨ ᠰᠠᠨᠠᠬᠤ ᠦᠭᠡᠢ ᠶᠦᠮ ᠭᠡᠵᠦ ᠬᠡᠯᠡᠭᠡᠳ ᠯᠢᠮᠪᠦ ᠳ᠋ᠦ᠍ᠨᠢ ᠳᠠᠭᠤ ᠂ ᠦᠭᠡ ᠪᠡᠨ ᠰᠢᠩᠭᠡᠭᠡᠵᠦ ᠥᠭᠭᠦᠭᠰᠡᠨ ᠶᠦᠮ ᠭᠡᠨᠡ ᠃ ᠡᠨᠡ ᠬᠦᠦ ᠶ᠋ᠢᠨ ᠯᠢᠮᠪᠦ ᠪᠣᠯ ᠥᠪᠡᠷ ᠢ᠋ᠶ᠋ᠡᠨ ᠳᠠᠭᠤ ᠭᠠᠷᠬᠤ ᠪᠢᠰᠢ ᠂ ᠬᠠᠷᠢᠨ ᠰᠢᠩᠭᠡᠭᠡᠵᠦ ᠠᠪᠤᠭᠰᠠᠨ ᠳᠠᠭᠤ ᠪᠠᠨ ᠭᠠᠷᠭᠠᠳᠠᠭ ᠶᠤᠮ ᠪᠠᠢᠵᠠᠢ᠃
ᠭᠣᠣᠯ ᠣᠷᠳᠣᠨ ᠳ᠋ᠤ᠌ ᠣᠷᠣᠭᠰᠠᠨ ᠰᠢᠪᠡᠭᠴᠢᠳ ᠲᠦ᠍ ᠡᠳᠦᠷ ᠲᠡᠭᠡᠨ ᠬᠢᠵᠦ ᠪᠠᠷᠠᠭᠳᠠᠰᠢ ᠦᠭᠡᠢ ᠬᠠᠷᠠ ᠬᠠᠲᠠᠭᠤ ᠠᠵᠢᠯ ᠬᠡᠴᠡᠭᠦᠦ ᠪᠣᠯᠪᠠᠴᠤ ᠬᠠᠮᠤᠭ ᠬᠡᠴᠡᠭᠦᠦ ᠨᠢ ᠬᠠᠭᠠᠨ ᠤ᠋ ᠳ᠋ᠤ᠌ ᠬᠣᠨᠣᠬᠤ ᠠᠵᠢᠯ ᠪᠠᠢᠯᠠ ᠭᠡᠨᠡ ᠂ ᠤᠴᠢᠷ ᠨᠢ ᠬᠠᠭᠠᠨ ᠣᠷᠣᠢ ᠪᠣᠯᠭᠠᠨ ᠨᠢᠭᠡ ᠰᠢᠪᠡᠭᠴᠢᠨ ᠢ᠋ ᠠᠪᠠᠴᠢᠭᠠᠳ ᠦᠷᠦᠭᠦᠨ ᠪᠣᠯᠬᠤ ᠪᠦᠷᠢ ᠠᠯᠠᠭᠠᠳ ᠬᠠᠶᠠᠴᠢᠬᠠᠳᠠᠭ ᠭᠡᠨᠡ ᠂ ᠭᠡᠲᠡᠯᠡ ᠬᠥᠮᠦᠰ ᠶᠠᠭᠤ ᠪᠣᠯᠤᠭᠰᠠᠨ ᠂ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠢ᠋ ᠨᠢ ᠴᠣ ᠮᠡᠳᠡᠳᠡᠭ ᠦᠭᠡᠢ ᠪᠠᠢᠵᠠᠢ᠃ᠣᠯᠠᠨ ᠰᠢᠪᠡᠭᠴᠢᠳ ᠴᠥᠭᠡᠷᠡᠭᠰᠡᠭᠡᠷ ᠪᠠᠢᠵᠤ ᠨᠢᠭᠡᠨ ᠡᠳᠦᠷ ᠲᠡᠷᠡ ᠬᠡᠦᠬᠡᠨ ᠦ᠌ ᠡᠭᠡᠯᠵᠢ ᠪᠣᠯᠪᠠ ᠭᠡᠨᠡ᠃ᠰᠢᠪᠡᠭᠴᠢᠳ ᠤᠷᠢᠳᠤᠬᠢ ᠲᠠᠢ ᠪᠠᠨ ᠠᠳᠠᠯᠢ ᠣᠢᠯᠠᠵᠤ (ᠤᠬᠢᠯᠠᠵᠤ) ᠤᠨᠵᠢᠨ ᠦᠬᠦᠵᠦ ᠰᠠᠯᠬᠤ ᠶ᠋ᠢᠨ ᠶᠣᠰᠣ ᠪᠠᠨ ᠬᠢᠵᠡᠭᠡᠵᠡᠢ᠃
ᠲᠡᠷᠡ ᠬᠡᠦᠬᠡᠨ ᠬᠠᠭᠠᠨ ᠤ᠋ ᠤᠨᠲᠠᠬᠤ ᠥᠷᠥᠭᠡ ᠳ᠋ᠦ᠍ ᠬᠦᠷᠦᠭᠡᠳ ᠪᠠᠢᠳᠠᠭ ᠤᠴᠢᠷ ᠢ᠋ ᠨᠢ ᠰᠢᠨᠡ (ᠰᠠᠶᠢ) ᠨᠢᠭᠡ ᠮᠡᠳᠡᠵᠦ ᠭᠡᠨᠡ᠄ ᠬᠠᠭᠠᠨ ᠴᠣ ᠭᠡᠵᠦ ᠰᠢᠩᠭᠡᠨ ᠳᠡᠯ ᠲᠡᠢ ᠂ ᠰᠢᠯ ᠡᠪᠡᠷ ᠲᠡᠢ ᠶᠣᠰᠣᠲᠠᠢ ᠨᠢᠭᠡ ᠵᠡᠳᠬᠡᠷ ᠦ᠋ᠨ ᠠᠮᠢᠲᠠᠨ ᠪᠠᠢᠵᠠᠢ ᠃ ᠭᠡᠲᠡᠯᠡ ᠬᠡᠦᠬᠡᠨ ᠶᠠᠭᠤ ᠴᠣ ᠦᠵᠡᠭᠰᠡᠨ ᠮᠡᠳᠡᠭᠰᠡᠨ ᠦᠭᠡᠢ ᠰᠢᠭ ᠵᠦᠭᠡᠷ ᠤᠢᠯᠠᠭᠠᠳ ( ᠤᠬᠢᠯᠠᠭᠠᠳ ) ᠯᠠ ᠪᠠᠢᠵᠤ ᠭᠡᠨᠡ ᠃ ᠬᠠᠭᠠᠨ ᠬᠡᠦᠬᠡᠨ ᠦ᠌ ᠣᠪᠯᠠᠨ ᠣᠢᠯᠠᠵᠤ ( ᠤᠬᠢᠯᠠᠵᠤ ) ᠪᠠᠢᠭᠠ ᠶ᠋ᠢ ᠨᠢ ᠮᠡᠳᠡᠴᠢᠭᠡᠳ ᠵᠥᠷᠢᠴᠡ ( ᠵᠣᠷᠢᠭᠤᠳᠠ ) ᠪᠠᠷ ᠄
- ᠴᠢ ᠶᠠᠭᠤᠨ ᠳ᠋ᠤ᠌ ᠤᠢᠯᠠᠵᠤ ( ᠤᠬᠢᠯᠠᠵᠤ ) ᠪᠠᠢᠬᠤ ᠪᠣᠢ ? ᠭᠡᠰᠡᠨ ᠳ᠋ᠦ᠍ ᠬᠡᠦᠬᠡᠨ ᠄
- ᠲᠠ ᠮᠠᠩᠭᠠᠳᠤᠷ ᠨᠠᠮᠠᠢ ᠠᠯᠠᠬᠤ ᠪᠠᠢᠬᠠ ᠭᠡᠪᠡᠯ ᠂ ᠬᠠᠭᠠᠨ ᠄
- ᠪᠢ ᠴᠢᠮᠠᠢ ᠠᠯᠠᠬᠤ ᠦᠭᠡᠢ ᠪᠠᠢᠵᠤ ᠪᠣᠯᠤᠨᠠ ᠤᠤ ? ᠬᠡᠮᠡᠷᠭᠡᠨ ( ᠬᠡᠷᠪᠡ ) ᠴᠢ ᠬᠥᠮᠦᠰ ᠦ᠋ᠨ ᠳᠤᠮᠳᠠ ᠣᠴᠢᠭᠠᠳ《ᠮᠠᠨ ᠤ᠋ ᠬᠠᠭᠠᠨ ᠰᠢᠩᠭᠡᠨ ᠳᠡᠯ ᠲᠡᠢ ᠂ ᠰᠢᠯ ᠡᠪᠡᠷ ᠲᠡᠢ ᠂ ᠵᠡᠳᠬᠡᠷ ᠰᠢᠭ ᠠᠮᠢᠲᠠᠨ ᠪᠠᠢᠨᠠ 》ᠭᠡᠵᠦ ᠬᠡᠯᠡᠪᠡᠯ ᠂ ᠠᠷᠠᠳ ᠠᠯᠪᠠᠲᠤ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠢᠷᠡᠵᠦ ᠨᠠᠮᠠᠢ ᠴᠣᠬᠢᠭᠠᠳ ᠠᠯᠠᠴᠢᠬᠠᠬᠤ ᠦᠭᠡᠢ ᠤᠤ ? ᠭᠡᠵᠦ ᠭᠡᠨᠡ ᠃ ᠡᠭᠦᠨ ᠳ᠋ᠦ᠍ ᠬᠡᠦᠬᠡᠨ᠂ ᠬᠠᠭᠠᠨ ᠤ᠋ ᠡᠮᠦᠨᠡ ᠰᠥᠭᠥᠳᠦᠭᠡᠳ᠄
- ᠬᠠᠭᠠᠨᠲᠠᠨ ᠮᠢᠨᠢ᠂ ᠪᠢ ᠨᠢᠭᠡ ᠴᠦ᠍ ᠬᠥᠮᠦᠨ ᠳ᠋ᠦ᠍ ᠬᠡᠯᠡᠬᠦ ᠦᠭᠡᠢ ᠭᠡᠵᠦ ᠲᠠᠨ ᠤ᠋ ᠡᠮᠦᠨᠡ ᠠᠨᠳᠠᠭᠠᠢᠯᠠᠶᠠ ᠂ ᠲᠠ ᠡᠦᠲᠦ ᠡᠴᠡ ᠬᠣᠢᠰᠢ ᠲᠤᠰᠠᠭᠠᠷ ( ᠣᠨᠳᠣᠣ ᠂ ᠥᠭᠡᠷᠡ ) ᠬᠥᠮᠦᠨ ᠢ᠋ ᠬᠠᠵᠠᠭᠤ ᠳ᠋ᠠᠭᠠᠨ ᠪᠢᠲᠡᠭᠡᠢ ᠪᠠᠢᠯᠭᠠ ! ᠪᠢ ᠬᠠᠭᠠᠨ ᠳ᠋ᠠᠭᠠᠨ ᠠᠨᠳᠠᠭᠠᠢ ᠲᠠᠯᠪᠢᠭᠰᠠᠨ ᠬᠣᠢᠨᠠ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠲᠠᠨ ᠤ᠋ ᠳᠡᠷᠭᠡᠳᠡ ᠪᠠᠢᠶᠠ ᠂ ᠲᠡᠭᠡᠪᠡᠯ ᠨᠠᠳᠠ ᠠ᠋ᠴᠠ ᠲᠤᠰᠠᠭᠠᠷ ᠨᠢᠭᠡ ᠴᠦ᠍ ᠬᠥᠮᠦᠨ ᠮᠡᠳᠡᠬᠦ ᠦᠭᠡᠢ ᠪᠢᠰᠢᠦ ? ᠭᠡᠵᠡᠢ᠃
ᠬᠡᠦᠬᠡᠨ ᠠᠨᠳᠠᠭᠠᠢ ᠲᠠᠯᠪᠢᠭᠠᠳ ᠪᠠᠢᠬᠤ ᠪᠠᠷ ᠨᠢ ᠬᠠᠭᠠᠨ ᠪᠠᠬᠠᠨ ᠢᠲᠡᠭᠡᠯ ᠲᠡᠢ ᠪᠣᠯᠤᠭᠰᠠᠨ ᠭᠡᠨᠡ᠃ ᠦᠨᠡᠨᠳᠡᠭᠡᠨ ᠴᠦ᠍ ᠲᠡᠷᠡ ᠡᠢᠮᠦ ᠰᠠᠢᠬᠠᠨ ᠵᠢᠰᠦ ᠲᠡᠢ ᠬᠥᠮᠦᠨ ᠢ᠋ ᠠᠯᠠᠬᠤ ᠵᠣᠷᠢᠭ ᠦᠭᠡᠢ ᠪᠠᠢᠵᠠᠢ ᠃ ᠢᠩᠭᠢᠭᠡᠳ ᠤᠷᠢᠳᠤ ᠤᠷᠢᠳᠤ ᠠ᠋ᠴᠠ ᠪᠠᠨ ᠠᠪᠤᠭᠠᠳ ᠡᠦᠲᠦ ᠪᠣᠯᠲᠠᠯᠠ ᠰᠢᠪᠡᠭᠴᠢᠳ ᠲᠡᠢ ᠪᠡᠨ ᠠᠮᠢᠳᠤ ᠮᠡᠨᠳᠦ ᠪᠡᠷ ᠠᠭᠤᠯᠵᠠᠵᠤ ᠴᠢᠳᠠᠭᠰᠠᠨ ᠨᠢ ᠡᠨᠡ ᠬᠡᠦᠬᠡᠨ ᠪᠣᠯᠵᠤ ᠭᠡᠨᠡ ᠃ ᠭᠡᠲᠡᠯᠡ ᠬᠠᠭᠠᠨ ᠨᠢ ᠰᠢᠯ ᠡᠪᠡᠷ ᠲᠡᠢ ᠂ ᠰᠢᠩᠭᠡᠨ ᠳᠡᠯ ᠲᠡᠢ ᠶ᠋ᠢ ᠬᠥᠮᠦᠨ ᠳ᠋ᠦ᠍ ᠬᠡᠯᠡᠬᠦ ᠦᠭᠡᠢ ᠪᠡᠷ ᠨᠢᠭᠤᠭᠠᠳ ᠪᠠᠢᠨᠠ ᠭᠡᠭᠴᠢ ᠮᠥᠨ ᠨᠢᠭᠡ ᠲᠡᠰᠴᠦ ᠴᠢᠳᠠᠮᠠᠷ ᠶᠠᠪᠤᠳᠠᠯ ᠪᠢᠰᠢ ᠪᠠᠢᠵᠠᠢ ᠃ ᠬᠡᠦᠬᠡᠨ ᠦᠭᠡ ᠪᠡᠨ ᠶᠠᠭᠠᠬᠢᠵᠤ ᠳᠠᠷᠤᠪᠠᠴᠤ ᠠᠮᠠ ᠪᠠᠷ ᠭᠠᠷᠴᠢᠬᠤ ᠭᠡᠳ ᠪᠣᠯᠬᠤ ᠦᠭᠡᠢ ᠲᠤᠯᠠ ᠂ ᠨᠢᠭᠡ ᠡᠳᠦᠷ ᠭᠣᠣᠯ ᠤ᠋ᠨ ᠬᠥᠪᠡᠭᠡ ᠳ᠋ᠦ᠍ ᠬᠤᠪᠴᠠᠰᠤ ᠤᠭᠠᠵᠤ (ᠤᠬᠢᠶᠠᠵᠤ) ᠪᠠᠢᠬᠤ ᠳ᠋ᠠᠭᠠᠨ᠂ ᠬᠠᠵᠠᠭᠤ ᠳ᠋ᠤᠨᠢ ᠪᠠᠢᠭᠰᠠᠨ ᠨᠢᠭᠡ ᠣᠭᠣᠲᠣᠨᠠ ᠶ᠋ᠢᠨ ᠨᠦᠬᠡ ᠤᠷᠤᠭᠤ᠄
- ᠬᠥᠶᠢ ᠬᠥᠶᠢ᠂ᠲᠠᠨᠤᠰ ᠮᠡᠳᠡᠨᠡ ᠤᠤ? ᠦᠭᠡᠢ ᠤᠤ?ᠮᠠᠨ ᠤ᠋ ᠬᠠᠭᠠᠨ ᠭᠡᠵᠦ ᠨᠢᠭᠡ ᠰᠢᠯ ᠡᠪᠡᠷ ᠲᠡᠢ᠂ᠰᠢᠩᠭᠡᠨ ᠳᠡᠯ ᠲᠡᠢ ᠴᠢᠳᠬᠥᠷ ᠰᠢᠭ ᠠᠮᠢᠲᠠᠨ ᠪᠠᠢᠨᠠ ᠭᠡᠵᠦ ᠬᠡᠯᠡᠭᠡᠳ ᠣᠷᠬᠢᠭᠰᠠᠨ ᠴᠢᠨᠢ ᠴᠡᠭᠡᠵᠢ ᠨᠢ ᠨᠢᠭᠡ ᠣᠩᠭᠣᠢᠬᠤ ᠰᠢᠭ᠋ ᠪᠣᠯᠪᠠ ᠭᠡᠨᠡ ᠃ ᠲᠡᠭᠡᠭᠡᠳ ᠣᠢᠷᠠ ᠬᠣᠯᠠ ᠪᠠᠨ ᠠᠵᠢᠪᠠᠯ ᠬᠥᠮᠦᠨ ᠠᠮᠢᠲᠠᠨ ᠦᠭᠡᠢ ᠲᠤᠯᠠ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠲᠠᠢ ᠪᠠᠷ ᠣᠷᠳᠣᠨ ᠳ᠋ᠠᠭᠠᠨ ᠪᠤᠴᠠᠵᠤ ᠢᠷᠡᠵᠡᠢ ᠃ ᠭᠡᠲᠡᠯᠡ ᠡᠨᠡ ᠦᠭᠡ ᠨᠢ ᠮᠥᠨ ᠲᠡᠷᠡ ᠣᠷᠣᠢ ᠪᠠᠨ (ᠦᠳᠡᠰᠢ) ᠠᠷᠠᠳ ᠠᠯᠪᠠᠲᠤ ᠶ᠋ᠢᠨ ᠳᠤᠮᠳᠠ ᠲᠦᠭᠡᠵᠦ ᠭᠡᠨᠡ᠃
ᠤᠴᠢᠷ ᠶᠠᠭᠤ ᠪᠣᠯᠪᠠ ? ᠭᠡᠪᠡᠯ ᠂ ᠲᠡᠷᠡ ᠣᠭᠣᠲᠣᠨᠠ ᠶ᠋ᠢᠨ ᠨᠦᠬᠡ ᠪᠣᠯ ᠰᠠᠢᠬᠢ ᠯᠢᠮᠪᠤᠴᠢᠨ ᠵᠠᠯᠠᠭᠤ ᠣᠷᠣᠢ ᠣᠷᠣᠢ (ᠦᠳᠡᠰᠢ ᠪᠦᠷᠢ) ᠢᠷᠡᠵᠦ ᠬᠡᠦᠬᠡᠨ ᠦ᠌ ᠳᠠᠭᠤ ᠶ᠋ᠢ ᠰᠣᠨᠣᠰᠤᠭᠠᠳ ᠯᠢᠮᠪᠦ ᠪᠡᠨ ᠨᠢᠭᠤᠵᠤ ᠲᠠᠯᠪᠢᠳᠠᠭ ᠨᠦᠬᠡ ᠨᠢ ᠪᠠᠢᠵᠠᠢ ᠃ ᠲᠡᠭᠡᠭᠡᠳ ᠯᠡ ᠬᠡᠦᠬᠡᠨ ᠦ᠌ ᠦᠭᠡ ᠯᠢᠮᠪᠦ ᠳ᠋ᠦ᠍ ᠰᠢᠩᠭᠡᠵᠦ ᠂ ᠣᠷᠣᠢ ᠨᠢ ᠵᠠᠯᠠᠭᠤ ᠢᠷᠡᠵᠦ ᠯᠢᠮᠪᠦ ᠪᠡᠨ ᠳᠤᠤᠭᠠᠷᠭᠠᠬᠤ ᠳ᠋ᠤ᠌ ᠬᠠᠭᠠᠨ ᠤ᠋ ᠨᠢᠭᠤᠴᠠ ᠢᠷᠣᠭᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠠᠳᠠᠷᠠᠭᠰᠠᠨ ᠬᠡᠷᠡᠭ ᠪᠣᠯᠵᠠᠢ᠃
ᠬᠠᠭᠠᠨ ᠨᠢᠭᠤᠴᠠ ᠵᠠᠳᠠᠷᠠᠭᠰᠠᠨ ᠢ᠋ ᠰᠣᠨᠣᠰᠤᠮᠠᠭᠴᠠ ᠬᠡᠨ ᠵᠠᠳᠠᠷᠠᠭᠤᠯᠪᠠ ? ᠭᠡᠵᠦ ᠬᠣᠪᠴᠢ ᠰᠢᠷᠠ ᠵᠢᠷᠤᠬᠠᠢ ᠪᠠᠨ ᠠᠪᠤᠭᠠᠳ ᠦᠵᠡᠪᠡᠯ ᠄ ᠬᠣᠶᠠᠷ ᠠᠮᠠ ᠲᠠᠢ ᠬᠤᠯᠤᠰᠤᠨ ᠴᠢᠳᠬᠥᠷ ᠵᠠᠳᠠᠷᠠᠭᠤᠯᠪᠠ ᠭᠡᠵᠦ ᠢᠯᠡᠷᠡᠭᠰᠡᠨ ᠨᠢ ᠶᠠᠭᠤ ᠪᠣᠯᠬᠤ ᠶ᠋ᠢ ᠮᠡᠳᠡᠭᠰᠡᠨ ᠦᠭᠡᠢ ᠲᠤᠯᠠ ᠬᠡᠦᠬᠡᠨ ᠢ᠋ ᠰᠡᠵᠢᠭᠯᠡᠵᠡᠢ᠃ ᠰᠡᠵᠢᠭᠯᠡᠭᠡᠳ ᠰᠢᠯᠲᠠᠭ ᠣᠯᠳᠠᠬᠤ ᠦᠭᠡᠢ ᠲᠤᠯᠠ ᠠᠯᠠᠬᠤ ᠶᠠᠯᠠ ᠲᠤᠯᠭᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠂ᠠᠪᠠᠴᠢᠭᠠᠳ ᠵᠠᠮ ᠦᠭᠡᠢ ᠡᠵᠡᠭᠦᠢ ᠠᠭᠤᠯᠠᠨ ᠳ᠋ᠤ᠌ ᠵᠣᠯᠢᠭ ᠲᠤ᠌ ᠭᠠᠷᠭᠠᠭᠰᠠᠨ ᠨᠢ ᠲᠡᠷᠡ ᠪᠠᠢᠵᠤ ᠭᠡᠨᠡ᠃
ᠮᠡᠷᠭᠡᠨ ᠲᠡᠮᠦᠨᠡ ᠲᠡᠷᠡ ᠡᠵᠡᠭᠦᠢ ᠠᠭᠤᠯᠠᠨ ᠳ᠋ᠤ᠌ ᠬᠦᠷᠦᠭᠡᠳ ᠡᠬᠡ ᠶ᠋ᠢᠨ ᠬᠢᠨᠢ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠨᠠᠶᠠᠨ ᠦᠶᠡᠲᠦ ᠨᠠᠷᠢᠨ ᠴᠠᠭᠠᠨ ᠬᠤᠯᠤᠰᠤ ᠶ᠋ᠢ ᠨᠠᠢ᠍ᠮᠠᠨ ᠲᠡᠪᠡᠷᠢ ᠠᠪᠴᠢᠷᠠᠵᠤ ᠦᠶᠡ ᠦᠶᠡ ᠪᠡᠷ ᠨᠢ ᠬᠢᠷᠥᠭᠡᠳᠡᠨ ᠳᠠᠭᠠᠷᠢᠵᠤ᠂ᠳᠠᠬᠢᠨ ᠭᠤᠤᠷᠰᠤ ᠭᠤᠤᠷᠰᠤ ᠪᠠᠷ ᠨᠢ ᠠᠭᠤᠯᠠᠨ ᠳᠡᠭᠡᠭᠦᠷ ᠤᠭᠰᠠᠷᠠᠭᠤᠯᠤᠨ ᠲᠠᠯᠪᠢᠵᠤ ᠪᠠᠢᠭᠠᠳ ᠥᠨᠥᠴᠢᠨ ᠭᠦᠨᠴᠦ ᠶ᠋ᠢ ᠶᠠᠭᠠᠬᠢᠵᠤ ᠲᠠᠨᠢᠵᠤ ᠠᠪᠬᠤ ᠠᠷᠭᠠ ᠶ᠋ᠢ ᠲᠡᠷᠡ ᠬᠡᠦᠬᠡᠨ ᠡᠴᠡ ᠰᠤᠷᠠᠵᠤ ᠭᠡᠨᠡ᠃ ᠲᠡᠭᠡᠬᠦ ᠳ᠋ᠦ᠍ ᠲᠡᠷᠡ ᠬᠡᠦᠬᠡᠨ ᠨᠠᠷᠢᠨ ᠭᠤᠤᠷᠰᠤ ᠪᠠᠷ ᠄
ᠲᠠ ᠤᠷᠢᠳᠠᠪᠡᠷ ᠮᠠᠨ ᠤ᠋ ᠭᠡᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠨᠢᠭᠡ ᠵᠤᠤᠬᠠ ᠮᠠᠯᠲᠠᠭᠠᠳ ᠳᠣᠲᠣᠷᠠ ᠨᠢ ᠡᠬᠡ ᠶ᠋ᠢ ᠰᠠᠭᠤᠯᠭᠠ᠃ ᠲᠡᠭᠡᠭᠡᠳ ᠳᠡᠭᠡᠷᠡ ᠨᠢ ᠲᠣᠮᠣ ᠰᠢᠭ᠋ ᠬᠠᠢᠰᠤ(ᠲᠡᠮᠦᠷ ᠲᠣᠭᠣᠭᠠ) ᠲᠠᠯᠪᠢᠵᠤ ᠳᠣᠲᠣᠷᠠ ᠨᠢ ᠲᠠᠬᠢᠶᠠᠨ ᠥᠳᠥ᠂ᠨᠣᠬᠠᠢ ᠶ᠋ᠢᠨ ᠨᠣᠣᠰᠣ᠂ᠡᠯᠳᠡᠪ ᠠᠮᠢᠲᠠᠨ ᠤ᠋ ᠪᠠᠭᠠᠰᠤ ᠶ᠋ᠢ ᠬᠣᠯᠢᠵᠤ ᠬᠢᠭᠡᠳ ᠳᠡᠭᠡᠷᠡ ᠡᠴᠡ ᠨᠢ ᠪᠠᠰᠠ ᠬᠠᠶᠢᠩ ᠬᠠᠯᠢᠪ ( ᠬᠥᠩᠭᠡᠨ ᠴᠠᠭᠠᠨ ᠬᠠᠪᠬᠠᠭᠠᠰᠤ ) ᠪᠠᠷ ᠳᠠᠷᠤ ᠃ ᠬᠠᠮᠤᠭ ᠰᠡᠭᠦᠯ ᠳ᠋ᠦ᠍ ᠲᠡᠮᠦᠷ ᠭᠤᠤᠷᠰᠤ ᠪᠠᠷ ᠡᠨᠡ ᠪᠦᠬᠦᠨ ᠢ᠋ ᠰᠢᠪᠲᠤᠯᠤᠭᠠᠳ ᠨᠢᠭᠡ ᠦᠵᠦᠭᠦᠷ ᠢ᠋ ᠨᠢ ᠡᠬᠡ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠬᠦᠷᠭᠡᠵᠦ ᠂ ᠪᠠᠰᠠ ᠨᠢᠭᠡ ᠦᠵᠦᠭᠦᠷ ᠢ᠋ ᠨᠢ ᠲᠠ ᠴᠢᠬᠢᠨ ᠳ᠋ᠡᠭᠡᠨ ᠲᠤᠯᠭᠠᠭᠠᠳ ᠰᠣᠨᠣᠰ᠃ᠥᠨᠥᠴᠢᠨ ᠬᠦᠨᠴᠦ ᠶᠠᠮᠠᠷ ᠶᠠᠩᠵᠤ ᠲᠠᠢ ᠪᠠᠢᠳᠠᠭ ᠢ᠋ ᠮᠢᠨᠦ ᠡᠬᠡ ᠲᠡᠷᠡ ᠭᠤᠤᠷᠰᠤ ᠪᠠᠷ ᠲᠠᠨ ᠳ᠋ᠤ᠌ ᠬᠡᠯᠡᠵᠦ ᠥᠭᠬᠦ ᠶᠦᠮ ᠃ ᠭᠠᠭᠴᠠ ᠡᠨᠡ ᠠᠷᠭᠠ ᠪᠠᠷ ᠶᠠᠪᠤᠪᠠᠯ ᠬᠣᠪᠴᠢ ᠰᠢᠷᠠ ᠵᠢᠷᠤᠬᠠᠢ ᠮᠠᠨᠤᠰ ᠢ᠋ ᠢᠯᠡᠷᠡᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ ᠶᠦᠮ ᠭᠡᠵᠦ ᠬᠡᠯᠡᠵᠦ ᠦᠭᠭᠦᠭᠰᠡᠨ ᠭᠡᠨᠡ᠃
ᠮᠡᠷᠭᠡᠨ ᠲᠡᠮᠦᠨᠡ ᠲᠡᠨᠳᠡ ᠡᠴᠡ ᠪᠡᠨ ᠬᠠᠷᠢᠵᠤ ᠢᠷᠡᠭᠡᠳ ᠬᠡᠦᠬᠡᠨ ᠦ᠌ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠬᠢᠵᠦ ᠭᠦᠢᠴᠡᠳᠬᠡᠵᠡᠢ᠂ᠲᠡᠭᠡᠭᠡᠳ ᠭᠤᠤᠷᠰᠤᠨ ᠤ᠋ ᠦᠵᠦᠭᠦᠷ ᠳᠡᠭᠡᠷᠡ ᠴᠢᠬᠢ ᠪᠡᠨ ᠲᠠᠯᠪᠢᠨ ᠴᠢᠩᠨᠠᠪᠠᠯ ᠡᠬᠡ ᠨᠢ ᠄
- ᠠᠨᠠ ᠮᠠᠨᠠ ᠬᠤᠪᠴᠠᠰᠤ ᠲᠠᠢ ᠠᠪ ᠠᠳᠠᠯᠢ ᠭᠤᠷᠪᠠᠨ ᠵᠠᠭᠤᠨ ᠬᠡᠦᠬᠡᠨ ᠴᠢᠨᠦ ᠡᠮᠦᠨᠡ ᠡᠩᠨᠡᠬᠦ ᠳ᠋ᠦ᠍ ᠂ ᠴᠢ ᠠᠷᠭᠠᠯᠠᠵᠤ ᠪᠠᠢᠭᠠᠳ ᠲᠡᠳᠡᠨ ᠢ᠋ ᠢᠨᠢᠶᠡᠯᠭᠡᠬᠦ ᠬᠡᠷᠡᠭᠲᠡᠢ ᠃ ᠭᠡᠲᠡᠯᠡ ᠲᠡᠳᠡ ᠠᠮᠠᠷᠬᠠᠨ ᠢᠨᠢᠶᠡᠳᠡᠭ ᠦᠭᠡᠢ ᠶᠦ᠍ᠮ ᠃ ᠬᠡᠮᠡᠷᠭᠡᠨ ( ᠬᠡᠷᠪᠡ ) ᠢᠨᠢᠶᠡᠯᠭᠡᠵᠦ ᠴᠢᠳᠠᠪᠠᠯ ᠂ ᠲᠡᠳᠡᠨ ᠦ᠌ ᠳᠣᠲᠣᠷᠠᠬᠢ ᠨᠢᠭᠡ ᠯᠡ ᠬᠡᠦᠬᠡᠨ ᠦ᠌ ᠡᠭᠦᠳᠡᠨ ᠴᠠᠭᠠᠨ ᠰᠢᠲᠦᠨ ᠳᠡᠭᠡᠷᠡ ᠨᠢ《 ᠭᠠ》④ ᠭᠡᠰᠡᠨ ᠠᠯᠲᠠᠨ ᠦᠰᠦᠭ ᠪᠣᠢ ᠂ ᠲᠡᠷᠡ ᠪᠣᠯ ᠳᠠᠷᠤᠢ ᠥᠨᠥᠴᠢᠨ ᠭᠦᠨᠴᠦ ᠠᠪᠠᠬᠠᠢ ᠮᠥᠨ᠃ ᠢᠨᠢᠶᠡᠬᠦ ᠲᠡᠢ ᠨᠢ ᠵᠡᠷᠭᠡ ᠪᠠᠰᠠ ᠬᠠᠮᠠᠷ ᠤ᠋ᠨ ᠬᠣᠶᠠᠷ ᠨᠦᠬᠡ ᠪᠡᠷ ᠨᠢ ᠬᠣᠶᠠᠷ ᠠᠯᠲᠠᠨ ᠵᠥᠭᠡᠢ ᠨᠢᠰᠦᠨ ᠭᠠᠷᠤᠭᠠᠳ ᠡᠭᠡᠮ ᠳᠡᠭᠡᠷᠡ ᠨᠢ ᠬᠦᠷᠬᠦ ᠳ᠋ᠡᠭᠡᠨ ᠡᠷᠢᠶᠡᠨ ᠴᠣᠬᠣᠷ ᠡᠷᠪᠡᠬᠡᠢ ᠬᠤᠪᠢᠯᠬᠤ ᠪᠠᠢᠬᠠ ᠃ ᠴᠢ ᠲᠡᠳᠡᠨ ᠢ᠋ ᠵᠠᠪᠠᠯ ᠢᠨᠢᠶᠡᠯᠭᠡᠬᠦ ᠬᠡᠷᠡᠭᠲᠡᠢ ᠮᠥᠷᠲᠡᠭᠡᠨ ᠡᠷᠬᠡᠪᠰᠢ ᠨᠢᠭᠡ ᠯᠡ ᠤᠳᠠᠭᠠ ᠳᠡᠭᠡᠷᠡ ᠪᠡᠨ ᠢᠨᠢᠶᠡᠯᠭᠡᠬᠦ ᠬᠡᠷᠡᠭᠲᠡᠢ ᠂ ᠨᠢᠭᠡᠳᠦᠭᠡᠷ ᠤᠳᠠᠭᠠ ᠳᠡᠭᠡᠷᠡ ᠪᠡᠨ ᠢᠨᠢᠶᠡᠯᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯ ᠬᠡᠷᠡᠭ ᠪᠦᠲᠦᠭᠰᠡᠨ ᠦᠭᠡᠢ ᠨᠢ ᠲᠡᠷᠡ ᠭᠡᠵᠦ ᠮᠡᠳᠡ ᠭᠡᠵᠦ ᠬᠡᠯᠡᠵᠦ ᠥᠭᠴᠡᠢ᠃
ᠵᠠ ᠲᠡᠭᠡᠭᠡᠳ ᠭᠦᠨᠴᠦ ᠠᠪᠠᠬᠠᠢ ᠶ᠋ᠢ ᠲᠠᠨᠢᠵᠤ ᠠᠪᠬᠤ ᠡᠳᠦᠷ ᠨᠢ ᠪᠣᠯᠪᠠ ᠭᠡᠨᠡ ᠃ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠬᠡᠦᠬᠡᠨᠴᠦᠳ ᠦ᠋ᠨ ᠡᠮᠦᠨᠡ ᠬᠦᠷᠦᠭᠡᠳ ᠲᠡᠳᠡᠨ ᠢ᠋ ᠬᠠᠯᠢᠶᠠᠭᠰᠠᠨ ( ᠬᠠᠷᠠᠭᠰᠠᠨ )ᠴᠣ ᠦᠭᠡᠢ ᠂ ᠬᠠᠷᠢᠨ ᠲᠡᠨᠳᠡ ᠪᠡᠨ ᠪᠣᠳᠣᠯᠭᠠ ᠪᠣᠯᠤᠨ ᠭᠠᠩᠰᠠ ᠪᠠᠨ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠨᠢ ᠨᠡᠷᠡᠵᠦ ᠂ ᠪᠠᠢᠨ ᠪᠠᠢᠨ ᠠᠷᠢᠬᠢ ᠬᠥᠨᠳᠡᠷᠦᠨ ᠨᠡᠰᠢ ᠴᠠᠰᠢ ᠠᠯᠬᠤᠭᠠᠳ ᠪᠠᠢᠪᠠ ᠭᠡᠨᠡ ᠃ ᠲᠡᠭᠡᠭᠰᠡᠭᠡᠷ ᠪᠠᠢᠭᠠᠳ ᠰᠣᠭᠲᠣᠵᠤ ᠢᠷᠡᠵᠡᠢ ᠂ ᠡᠪᠦᠷ ᠡᠴᠡ ᠪᠡᠨ ᠭᠠᠩᠰᠠ ᠶ᠋ᠢᠨ ᠳᠠᠩᠬᠠᠭ (ᠲᠠᠮᠠᠬᠢᠨ ᠤ᠋ ᠤᠭᠤᠲᠠ) ᠪᠠᠨ ᠭᠠᠷᠭᠠᠬᠤ ᠭᠡᠳ ᠬᠠᠷᠢᠨ ᠨᠢᠭᠡ ᠬᠡᠦᠬᠡᠳ ᠦ᠋ᠨ ᠢᠰᠡᠭᠡᠢ ᠪᠣᠢᠲᠣᠭ ᠭᠠᠷᠭᠠᠴᠤ ᠢᠷᠡᠨ ᠭᠠᠩᠰᠠ ᠪᠠᠨ ᠠᠯᠭᠤᠷ ᠠᠭᠠᠵᠢᠮ ᠣᠷᠣᠭᠤᠯᠤᠭᠠᠳ 《 ᠲᠠᠮᠠᠬᠢ 》 ᠪᠠᠨ ᠮᠠᠯᠲᠠᠵᠤ ᠡᠬᠢᠯᠡᠪᠡ ᠭᠡᠨᠡ ᠃ ᠬᠡᠦᠬᠡᠨᠴᠦᠳ ᠡᠭᠦᠨ ᠢ᠋ ᠦᠵᠡᠭᠡᠳ ᠲᠡᠰᠬᠦ ᠠᠯᠲᠠᠨ ᠤᠨᠠᠵᠤ ᠪᠣᠰᠲᠠᠯᠠ ᠪᠠᠨ ᠢᠨᠢᠶᠡᠯᠴᠡᠵᠡᠢ ᠂ ᠢᠨᠢᠶᠡᠯᠳᠦᠵᠦ ᠪᠠᠢᠬᠤ ᠵᠠᠭᠤᠷᠠ ᠨᠢ ᠮᠡᠷᠭᠡᠨ ᠲᠡᠮᠦᠨᠡ ᠨᠢᠭᠡ ᠯᠡ ᠰᠢᠷᠪᠢᠮᠡᠭᠴᠡ ᠪᠡᠨ ᠡᠭᠦᠳᠡᠨ ᠴᠠᠭᠠᠨ ᠰᠢᠲᠦᠨ ᠳᠡᠭᠡᠷᠡ ᠪᠡᠨ《ᠭᠠ》ᠭᠡᠰᠡᠨ ᠠᠯᠲᠠᠨ ᠦᠰᠦᠭ ᠲᠡᠢ ᠨᠢᠭᠡᠨ ᠬᠡᠦᠬᠡᠨ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ ᠠᠮᠵᠢᠭᠰᠠᠨ ᠮᠥᠷᠲᠡᠭᠡᠨ ᠬᠠᠮᠠᠷ ᠠ᠋ᠴᠠ ᠨᠢ ᠬᠣᠶᠠᠷ ᠠᠯᠲᠠᠨ ᠵᠥᠭᠡᠢ ᠭᠠᠷᠴᠤ ᠨᠢᠰᠦᠭᠡᠳ ᠡᠭᠡᠮ ᠳᠡᠭᠡᠷᠡ ᠨᠢ ᠬᠦᠷᠦᠮᠡᠭᠴᠡ ᠡᠷᠢᠶᠡᠨ ᠴᠣᠬᠣᠷ ᠡᠷᠪᠡᠬᠡᠢ ᠪᠣᠯᠤᠨ ᠬᠤᠪᠢᠯᠵᠤ ᠣᠳᠤᠭᠰᠠᠨ ᠢ᠋ ᠴᠦ᠍ ᠣᠯᠤᠭᠠᠳ ᠦᠵᠡᠵᠦ ᠭᠡᠨᠡ ᠃ ᠮᠡᠷᠭᠡᠨ ᠲᠡᠮᠦᠨᠡ ᠲᠡᠭᠦᠨ ᠢ᠋ ᠣᠯᠠᠨ ᠤ᠋ ᠳᠤᠮᠳᠠ ᠠ᠋ᠴᠠ ᠬᠥᠲᠥᠯᠦᠨ ᠭᠠᠷᠬᠤ ᠳ᠋ᠤ᠌ ᠬᠠᠭᠠᠨ ᠄ ᠮᠢᠨᠦ ᠬᠡᠦᠬᠡᠨ ᠡᠢᠮᠦ ᠡᠢᠮᠦ ᠲᠡᠮᠳᠡᠭ ᠲᠡᠢ ᠭᠡᠳᠡᠭ ᠢ᠋ ᠯᠠᠪ ᠨᠢᠭᠡ ᠬᠥᠮᠦᠨ ᠬᠡᠯᠡᠵᠦ ᠦᠭᠭᠦᠭᠰᠡᠨ ᠪᠠᠢᠬᠤ ᠭᠡᠵᠦ ᠪᠣᠳᠣᠭᠠᠳ ᠄
ᠬᠣᠪᠴᠢ ᠰᠢᠷᠠ ᠵᠢᠷᠤᠬᠠᠢ ᠶ᠋ᠢ ᠠᠪᠤᠭᠠᠳ ᠢᠷᠡ ᠭᠡᠵᠦ ᠬᠠᠰᠬᠢᠷᠴᠠᠢ ᠃ ᠠᠪᠴᠢᠷᠠᠬᠤ ᠳ᠋ᠤᠨᠢ ᠦᠵᠡᠭᠰᠡᠨ ᠳ᠋ᠦ᠍《ᠲᠠᠬᠢᠶᠠᠨ ᠥᠳᠥ ᠬᠡᠯᠡᠪᠡ ᠂ ᠨᠣᠬᠠᠢ ᠶ᠋ᠢᠨ ᠨᠣᠣᠰᠣ ᠬᠡᠯᠡᠪᠡ ᠂ ᠡᠯᠳᠡᠪ ᠠᠮᠢᠲᠠᠨ ᠤ᠋ ᠪᠠᠭᠠᠰᠤ ᠬᠡᠯᠡᠪᠡ ᠂ ᠵᠡᠭᠡᠷᠡᠨ ᠰᠢᠯᠪᠢ ᠲᠡᠢ ᠵᠡᠰ ᠬᠣᠩᠰᠢᠶᠠᠷ ᠲᠠᠢ ᠡᠮᠡ ᠴᠢᠳᠬᠥᠷ ᠬᠡᠯᠡᠪᠡ ᠁ 》 ᠭᠡᠬᠦ ᠵᠡᠷᠭᠡ ᠪᠡᠷ ᠢᠯᠡᠷᠡᠭᠡᠳ ᠪᠠᠢᠭᠰᠠᠨ ᠳ᠋ᠤ᠌ ᠬᠠᠭᠠᠨ ᠄《ᠡᠢᠮᠦ ᠠᠮᠢᠲᠠᠨ ᠬᠠᠮᠢᠭᠠ ᠪᠠᠢᠬᠤ ᠪᠣᠢ ? ᠴᠠᠭ ᠤ᠋ᠨ ᠮᠠᠭᠤ ᠢᠷᠡᠬᠦ ᠳ᠋ᠦ᠍ ᠡᠨᠡ ᠪᠠᠰᠠ ᠬᠡᠷᠡᠭ ᠢ᠋ᠶ᠋ᠡᠨ ᠪᠠᠷᠠᠬᠤ ᠶᠤᠮ ᠪᠠᠢᠨᠠ 》ᠭᠡᠵᠦ ᠠᠭᠤᠷᠯᠠᠭᠠᠳ ᠬᠣᠪᠴᠢ ᠰᠢᠷᠠ ᠵᠢᠷᠤᠬᠠᠢ ᠪᠠᠨ ᠭᠠᠯ ᠳ᠋ᠤ᠌ ᠬᠠᠶᠠᠵᠠᠢ ᠃ ᠲᠡᠷᠡ ᠨᠢ ᠰᠢᠲᠠᠵᠤ ᠪᠠᠷᠠᠬᠤ ᠠ᠋ᠴᠠ ᠪᠠᠨ ᠡᠮᠦᠨᠡ ᠰᠠᠯᠬᠢᠨ ᠳ᠋ᠤ᠌ ᠬᠡᠢᠰᠭᠡᠭᠳᠡᠭᠡᠳ ᠠᠭᠤᠯᠠ ᠶ᠋ᠢᠨ ᠪᠠᠯ ᠢ᠋ᠶ᠋ᠠᠷ ᠪᠡᠯᠴᠢᠵᠦ ᠪᠠᠢᠭᠰᠠᠨ ᠬᠣᠨᠢᠳ ᠤ᠋ᠨ ᠳᠠᠯᠤ ᠳᠡᠭᠡᠷᠡ ᠬᠦᠷᠴᠦ ᠨᠠᠭᠠᠯᠳᠤᠵᠤ ᠭᠡᠨᠡ ᠃ ᠵᠠ ᠲᠡᠭᠡᠭᠡᠳ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠲᠣᠳᠣᠯᠠᠨ ᠲᠣᠯᠢᠳᠠᠳᠠᠭ ᠬᠣᠪᠴᠢ ᠰᠢᠷᠠ ᠵᠢᠷᠤᠬᠠᠢ ᠨᠢ ᠬᠣᠨᠢᠨ ᠤ᠋ ᠳᠠᠯᠤ ᠳ᠋ᠤ᠌ ᠨᠠᠭᠠᠯᠳᠤᠵᠤ ᠰᠢᠩᠭᠡᠭᠰᠡᠨ ᠢ᠋ ᠮᠡᠷᠭᠡᠨ ᠲᠡᠮᠦᠨᠡ ᠦᠵᠡᠭᠡᠳ ᠨᠤᠲᠤᠭ ᠲᠠᠭᠠᠨ ᠢᠷᠡᠵᠦ ᠵᠠᠳᠠᠷᠠᠭᠤᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠮᠣᠩᠭᠣᠯ ᠬᠥᠮᠦᠨ ᠬᠣᠨᠢᠨ ᠤ᠋ ᠳᠠᠯᠤ ᠲᠦᠯᠡᠵᠦ ᠪᠡᠯᠭᠡ ᠲᠥᠯᠭᠡ ᠦᠵᠡᠳᠡᠭ ᠪᠣᠯᠤᠭᠰᠠᠨ ᠭᠡᠨᠡ ᠃ ᠮᠡᠷᠭᠡᠨ ᠲᠡᠮᠦᠨᠡ ᠬᠡᠦᠬᠡᠨ ᠢ᠋ ᠳᠠᠭᠠᠭᠤᠯᠤᠭᠠᠳ ᠮᠣᠷᠳᠠᠬᠤ ᠪᠣᠯᠵᠠᠢ᠃ ᠭᠡᠲᠡᠯᠡ ᠬᠡᠦᠬᠡᠨ ᠶᠠᠪᠤᠬᠤ ᠳᠤᠷᠠ ᠦᠭᠡᠢ ᠭᠡᠨᠡ ᠂ ᠡᠭᠦᠨ ᠳ᠋ᠦ᠍ ᠬᠠᠭᠠᠨ ᠬᠠᠲᠤᠨ ᠬᠣᠶᠠᠷ ᠠᠮᠠᠨ ᠳᠡᠭᠡᠷᠡ ᠪᠡᠨ ᠬᠡᠦᠬᠡᠨ ᠢ᠋ᠶ᠋ᠡᠨ ᠶᠠᠪᠤ ᠭᠡᠵᠦ ᠱᠠᠭᠠᠷᠳᠠᠵᠤ ᠪᠠᠢᠪᠠᠴᠤ ᠠᠷᠤ ᠳ᠋ᠠᠭᠠᠨ ᠬᠣᠶᠠᠭᠤᠯᠠ ᠦᠬᠦᠲᠡᠯᠡ ᠪᠠᠶᠠᠷᠯᠠᠵᠤ ᠂ ᠵᠥᠷᠢᠴᠡ ( ᠵᠣᠷᠢᠭᠤᠳᠠ ) ᠪᠠᠷ ᠮᠡᠷᠭᠡᠨ ᠲᠡᠮᠦᠨᠡ ᠶ᠋ᠢ ᠬᠠᠢᠵᠤ ᠢᠷᠡᠭᠡᠳ ᠄
- ᠬᠡᠦᠬᠡᠨ ᠥᠪᠡᠷ ᠢ᠋ᠶ᠋ᠡᠨ ᠶᠠᠪᠤᠬᠤ ᠳᠤᠷᠠ ᠦᠭᠡᠢ ᠭᠡᠨᠡ ᠂ ᠣᠳᠣ ᠶᠠᠭᠠᠬᠢᠳᠠᠭ ᠪᠢᠯᠡ? ᠭᠡᠬᠦ ᠳ᠋ᠦ᠍ ᠮᠡᠷᠭᠡᠨ ᠲᠡᠮᠦᠨᠡ ᠄
- ᠠ ᠭᠡᠮ ᠦᠭᠡᠢ ᠂ ᠬᠡᠦᠬᠡᠨ ᠳ᠋ᠡᠭᠡᠨ ᠬᠠᠮᠤᠭ ᠤ᠋ᠨ ᠳᠤᠷᠠᠲᠠᠢ ᠶᠠᠭᠤᠮᠠ ᠶ᠋ᠢ ᠨᠢ ᠥᠭ ᠂ ᠲᠡᠭᠡᠪᠡᠯ ᠶᠠᠪᠤᠬᠤ ᠪᠠᠢᠬᠠ ᠭᠡᠵᠦ ᠬᠡᠯᠡᠭᠡᠳ ᠠᠵᠢᠭ ᠴᠤ᠌ ᠦᠭᠡᠢ ᠪᠡᠷ ᠠᠩᠭᠢᠷ ᠬᠣᠩᠭᠣᠷ ᠴᠠᠢ ᠪᠠᠨ ᠠᠯᠭᠤᠷ ᠠᠭᠠᠵᠢᠮ ᠪᠠᠯᠭᠤᠨ ᠰᠠᠭᠤᠵᠤ ᠭᠡᠨᠡ ᠃ ᠲᠡᠳᠡ ᠭᠠᠷᠴᠤ ᠶᠠᠪᠤᠮᠠᠭᠴᠠ ᠮᠡᠷᠭᠡᠨ ᠲᠡᠮᠦᠨᠡ ᠂ ᠠᠪᠬᠠᠢ ᠶ᠋ᠢᠨ ᠥᠷᠥᠭᠡ ᠳ᠋ᠦ᠍ ᠬᠦᠷᠪᠡᠯ ᠮᠥᠨ ᠯᠡ ᠶᠠᠪᠤᠬᠤ ᠦᠭᠡᠢ ᠭᠡᠳ ᠤᠢᠯᠠᠵᠤ ( ᠤᠬᠢᠯᠠᠵᠤ ) ᠤᠨᠵᠢᠨ ᠰᠠᠭᠤᠵᠤ ᠪᠠᠢᠨᠠ ᠭᠡᠨᠡ ᠃ ᠭᠦᠨᠴᠦ ᠄
- ᠪᠢ ᠶᠠᠪᠤᠬᠤ ᠳᠤᠷᠠ ᠦᠭᠡᠢ ᠂ ᠶᠠᠭᠠᠬᠢᠪᠠᠯ ᠬᠡᠯᠲᠦᠷᠢᠵᠦ ᠴᠢᠳᠠᠬᠤ ᠪᠣᠢ ? ᠭᠡᠵᠦ ᠤᠢᠯᠠᠵᠤ ( ᠤᠬᠢᠯᠠᠵᠤ ) ᠡᠩᠰᠡᠪᠡ ( ᠭᠤᠶᠤᠵᠤ ᠭᠣᠩᠰᠢᠪᠠ ) ᠭᠡᠨᠡ ᠃ ᠲᠡᠭᠡᠬᠦ ᠳ᠋ᠦ᠍ ᠮᠡᠷᠭᠡᠨ ᠲᠡᠮᠦᠨᠡ ᠄
- ᠠ ᠂ ᠠᠪᠤ ᠡᠬᠡ ᠴᠢᠨᠢ ᠴᠢᠮᠠ ᠶ᠋ᠢ ᠠᠯᠢ ᠳᠤᠷᠠ ᠲᠠᠢ ᠶᠠᠭᠤᠮᠠ ᠪᠠᠨ ᠠᠪ ᠭᠡᠬᠦ ᠪᠠᠢᠬᠤ ᠂ ᠲᠡᠭᠡᠬᠦ ᠳ᠋ᠦ᠍ᠨᠢ ᠴᠢ᠄ 《ᠪᠢ ᠶᠠᠪᠤᠬᠤ ᠦᠭᠡᠢ ᠭᠡᠳᠡᠭ ᠦ᠋ᠨ ᠤᠴᠢᠷ ᠨᠢ ᠨᠠᠷᠠ ᠰᠠᠷᠠ ᠰᠢᠭ᠋ ᠠᠪᠤ ᠡᠬᠡ ᠬᠣᠶᠠᠷ ᠠ᠋ᠴᠠ ᠪᠠᠨ ᠰᠠᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ ᠂ ᠬᠡᠷᠪᠡ ᠠᠪᠤ ᠡᠬᠡ ᠬᠣᠶᠠᠷ ᠮᠢᠨᠢ ᠨᠠᠳᠠᠳᠤ ᠣᠭᠲᠠᠷᠭᠤᠢ ᠶ᠋ᠢᠨ ᠨᠠᠷᠠ ᠰᠠᠷᠠ ᠶ᠋ᠢ ᠪᠠᠷᠢᠵᠤ ᠥᠭᠪᠡᠯ ᠪᠢ ᠶᠠᠪᠤᠨᠠ 》ᠭᠡᠵᠦ ᠬᠡᠯᠡ ᠂ ᠲᠡᠭᠡᠬᠦ ᠳ᠋ᠦ᠍ ᠠᠪᠤ ᠡᠬᠡ ᠬᠣᠶᠠᠷ ᠴᠢᠨᠢ ᠣᠭᠲᠠᠷᠭᠤᠢ ᠶ᠋ᠢᠨ ᠨᠠᠷᠠ ᠰᠠᠷᠠ ᠶ᠋ᠢ ᠪᠠᠷᠢᠵᠤ ᠴᠢᠳᠠᠬᠤ ᠦᠭᠡᠢ ᠶ᠋ᠢᠨ ᠤᠯᠠᠮ ᠢ᠋ᠶ᠋ᠠᠷ ᠴᠢ ᠲᠠᠩᠭᠤᠳ ᠲᠤ᠌ ᠶᠠᠪᠤᠬᠤ ᠠ᠋ᠴᠠ ᠬᠡᠯᠲᠦᠷᠢᠵᠦ ᠴᠢᠳᠠᠨᠠ ᠭᠡᠵᠦ ᠭᠡᠨᠡ ᠃ ᠲᠡᠭᠡᠭᠡᠳ ᠬᠠᠭᠠᠨ ᠬᠠᠲᠤᠨ ᠬᠣᠶᠠᠷ ᠮᠡᠷᠭᠡᠨ ᠲᠡᠮᠦᠨᠡ ᠶ᠋ᠢᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠠᠯᠢ ᠳᠤᠷᠠ ᠲᠠᠢ ᠶᠠᠭᠤᠮᠠ ᠪᠠᠨ ᠠᠪ ᠭᠡᠬᠦ ᠳ᠋ᠦ᠍ᠨᠢ ᠂ ᠬᠡᠦᠬᠡᠨ ᠮᠥᠨ ᠮᠡᠷᠭᠡᠨ ᠲᠡᠮᠦᠨᠡ ᠶ᠋ᠢᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠨᠠᠷᠠ ᠰᠠᠷᠠ ᠶ᠋ᠢ ᠪᠠᠷᠢᠵᠤ ᠥᠭ ᠭᠡᠵᠦ ᠭᠡᠨᠡ ᠃ ᠲᠡᠭᠡᠬᠦ ᠳ᠋ᠦ᠍ ᠠᠪᠤ ᠡᠬᠡ ᠨᠢ ᠰᠠᠨᠳᠤᠷᠴᠤ ᠢᠷᠡᠭᠡᠳ ᠄
- ᠡᠦᠲᠦ ᠶᠠᠭᠠᠬᠢᠵᠤ ᠨᠠᠷᠠ ᠰᠠᠷᠠ ᠶ᠋ᠢ ᠨᠢ ᠪᠠᠷᠢᠵᠤ ᠥᠭᠳᠡᠭ ᠪᠢᠯᠡ? ᠭᠡᠵᠦ ᠮᠡᠷᠭᠡᠨ ᠲᠡᠮᠦᠨᠡ ᠡᠴᠡ ᠠᠰᠠᠭᠤᠬᠤ ᠳ᠋ᠤ᠌᠄
- ᠠ᠂ᠲᠡᠭᠦᠨ ᠳ᠋ᠦ᠍ ᠶᠠᠳᠠᠬᠤ ᠶᠠᠭᠤ ᠪᠠᠢᠬᠤ ᠪᠣᠢ! ᠪᠦᠲᠦᠨ ᠲᠡᠭᠡᠷᠮᠡ ᠶ᠋ᠢ ᠠᠯᠲᠠ ᠪᠠᠷ ᠰᠢᠷᠳᠡᠵᠦ ᠂ ᠲᠠᠯᠠ ᠲᠡᠭᠡᠷᠮᠡ ᠶ᠋ᠢ ᠮᠥᠩᠭᠥ ᠪᠡᠷ ᠰᠢᠷᠲᠡᠵᠦ ᠬᠤᠷᠴᠠ ᠨᠠᠷᠠ ᠲᠠᠢ ᠡᠳᠦᠷ ᠭᠠᠷᠭᠠᠭᠠᠳ ᠦᠵᠡᠭᠦᠯᠵᠦ ᠥᠭ ᠭᠡᠵᠡᠢ᠃ ᠲᠡᠭᠡᠭᠡᠳ ᠮᠥᠨ ᠠᠷᠭᠠ ᠪᠠᠷ ᠨᠢ ᠬᠤᠷᠴᠠ ᠨᠠᠷᠠ ᠲᠠᠢ ᠦᠳᠡ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠬᠡᠦᠬᠡᠨ ᠢ᠋ᠶ᠋ᠡᠨ ᠳᠠᠭᠤᠳᠠᠵᠤ ᠢᠷᠡᠭᠡᠳ ᠄
- ᠨᠠᠷᠠ ᠰᠠᠷᠠ ᠶ᠋ᠢ ᠪᠠᠷᠢᠭᠠᠳ ᠢᠷᠡᠯᠡ ᠭᠡᠵᠦ ᠭᠠᠷᠭᠠᠨ ᠦᠵᠡᠭᠦᠯᠬᠦ ᠳ᠋ᠦ᠍ ᠠᠯᠲᠠ ᠮᠥᠩᠭᠥ ᠪᠡᠷ ᠰᠢᠷᠳᠡᠭᠰᠡᠨ ᠪᠦᠲᠦᠨ᠂ᠲᠠᠯᠠ ᠲᠡᠭᠡᠷᠮᠡ ᠨᠢ ᠬᠤᠷᠴᠠ ᠭᠡᠷᠡᠯ ᠳ᠋ᠦ᠍ ᠭᠢᠯᠪᠠᠭᠠᠳ ᠦᠨᠡᠬᠡᠷ ᠨᠠᠷᠠ ᠰᠠᠷᠠ ᠰᠢᠭ᠋ ᠬᠠᠷᠠᠭᠳᠠᠵᠤ ᠭᠡᠨᠡ ᠃ ᠬᠠᠭᠠᠨ ᠤ᠋ ᠠᠷᠭᠠ ᠪᠦᠬᠦᠨ ᠢᠩᠭᠢᠭᠡᠳ ᠯᠡ ᠡᠴᠦᠰᠯᠡᠵᠦ ᠨᠣᠭᠣᠭᠠᠨ ᠳᠠᠷᠢ ᠡᠬᠡ
- ᠥᠨᠥᠴᠢᠨ ᠭᠦᠨᠴᠦ ᠶᠠᠪᠤᠬᠤ ᠪᠠᠷ ᠪᠣᠯᠤᠭᠰᠠᠨ ᠶᠤᠮ ᠭᠡᠨᠡ ᠃ ᠬᠠᠭᠠᠨ ᠬᠠᠲᠤᠨ ᠬᠣᠶᠠᠷ ᠮᠡᠷᠭᠡᠨ ᠲᠡᠮᠦᠨᠡ ᠡᠴᠡ ᠄
- ᠡᠦᠲᠦ ᠡᠨᠡ ᠨᠠᠷᠠ ᠰᠠᠷᠠ ᠬᠣᠶᠠᠷ ᠢ᠋ᠶ᠋ᠠᠨ ᠶᠠᠭᠤᠨ ᠳ᠋ᠤ᠌ ᠪᠣᠭᠣᠭᠠᠳ ᠠᠪᠴᠤ ᠶᠠᠪᠤᠬᠤ ᠪᠣᠢ ? ᠭᠡᠬᠦ ᠳ᠋ᠦ᠍ᠨᠢ ᠄
- ᠢᠯᠴᠠᠭᠠᠢ ( ᠨᠣᠢᠲᠠᠨ ) ᠨᠡᠬᠡᠢ ᠳ᠋ᠦ᠍ ᠪᠣᠭᠣᠭᠠᠳ ᠠᠴᠢᠵᠤ ᠣᠷᠭᠢ ᠭᠡᠵᠦ ᠬᠡᠯᠡᠵᠡᠢ ᠃ ᠮᠡᠷᠭᠡᠨ ᠲᠡᠮᠦᠨᠡ ᠮᠣᠷᠳᠠᠬᠤ ᠳ᠋ᠠᠭᠠᠨ ᠬᠢᠲᠠᠳ ᠠ᠋ᠴᠠ ᠲᠠᠩᠭᠤᠳ ᠲᠤ᠌ ᠨᠢᠭᠡ ᠬᠡᠰᠡᠭ ᠮᠣᠳᠣᠴᠢᠨ ᠂ ᠲᠡᠮᠦᠷᠴᠢᠨ ᠂ ᠨᠡᠬᠡᠮᠡᠯᠴᠢᠨ ᠂ ᠲᠠᠷᠢᠶᠠᠴᠢᠨ ᠁ ᠢ᠋ ᠠᠪᠤᠭᠠᠳ ᠶᠠᠪᠤᠬᠤ ᠭᠡᠰᠡᠨ ᠳ᠋ᠦ᠍ ᠬᠠᠭᠠᠨ ᠳᠣᠲᠣᠷᠠ ᠪᠠᠨ ᠄ ᠡᠨᠡ ᠤᠳᠠᠭᠠ ᠠᠷᠭᠠᠯᠠᠵᠤ ( ᠠᠷᠭᠠ ᠪᠣᠳᠣᠵᠤ ) ᠪᠠᠢᠭᠠᠳ ᠡᠭᠦᠨ ᠢ᠋ ᠠᠪᠴᠤ ᠰᠠᠭᠤᠭᠠᠳ ᠠᠯᠠᠵᠤ ᠣᠷᠬᠢᠬᠤ ᠦᠭᠡᠢ ᠪᠣᠯ ᠬᠣᠵᠢᠮ ᠬᠣᠢᠰᠢᠳᠠ ᠭᠠᠵᠠᠷ ᠳᠣᠣᠷᠠ ᠠ᠋ᠴᠠ ᠭᠠᠷᠴᠤ ᠮᠡᠳᠡᠬᠦ ᠭᠠᠢ ᠶ᠋ᠢᠨ ᠦᠨᠳᠦᠰᠦ ᠲᠡᠷᠡ! ᠭᠡᠵᠦ ᠪᠣᠳᠣᠭᠠᠳ
- ᠴᠢᠨᠦ ᠰᠡᠴᠡᠨ ᠮᠡᠷᠭᠡᠨ ᠤᠬᠠᠭᠠᠨ ᠢ᠋ ᠪᠢ ᠠᠷᠭᠠ ᠦᠭᠡᠢ ᠪᠢᠰᠢᠷᠡᠵᠦ ᠪᠠᠢᠬᠤ ᠲᠤᠯᠠ ᠲᠡᠳᠡᠭᠡᠷ ᠤᠷᠠᠴᠤᠳ᠂ᠳᠠᠷᠬᠠᠳ ᠢ᠋ ᠶᠠᠪᠤᠭᠤᠯᠤᠭᠠᠳ ᠣᠷᠣᠨ ᠳ᠋ᠤᠨᠢ ᠴᠢᠮᠠᠢ ᠦᠯᠡᠳᠡᠭᠡᠵᠦ ᠣᠷᠳᠣᠨ ᠳ᠋ᠠᠭᠠᠨ ᠰᠠᠭᠤᠯᠭᠠᠬᠤ ᠪᠠᠷ ᠲᠣᠭᠲᠠᠯᠠ ᠭᠡᠵᠦ ᠲᠠᠰᠤ ᠬᠡᠯᠡᠵᠦ ᠲᠠᠯᠪᠢᠪᠠ ᠭᠡᠨᠡ᠃ ᠲᠡᠭᠡᠭᠡᠳ ᠮᠡᠷᠭᠡᠨ ᠲᠡᠮᠦᠨᠡ ᠲᠡᠳᠡᠭᠡᠷ ᠬᠥᠮᠦᠰ ᠲᠡᠭᠡᠨ ᠬᠦᠷᠦᠭᠡᠳ ᠄
- ᠡᠵᠡᠨ ᠦ᠌ ᠵᠠᠷᠯᠢᠭ ᠡᠷᠭᠢᠯᠲᠡ ᠦᠭᠡᠢ ᠬᠣᠢᠨᠠ ᠶᠠᠮᠠᠷ ᠠᠷᠭᠠ ᠪᠠᠢᠨᠠ ᠂ ᠲᠠᠨᠠᠷ ᠠᠪᠠᠬᠠᠢ ᠶ᠋ᠢ ᠠᠪᠤᠭᠠᠳ ᠤᠷᠢᠳᠠᠪᠡᠷ ᠶᠠᠪᠤᠵᠤ ᠪᠠᠢᠭᠠᠷᠠᠢ ᠂ ᠪᠢ ᠠᠷᠤ ᠠ᠋ᠴᠠ ᠲᠠᠨᠢ ᠭᠦᠢᠴᠡᠵᠦ ᠬᠦᠷᠦᠶᠡ ᠭᠡᠳ ᠬᠢᠲᠠᠳ ᠤ᠋ᠨ ᠬᠠᠭᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠰᠠᠭᠤᠵᠤ ᠬᠣᠴᠣᠷᠤᠭᠰᠠᠨ ᠭᠡᠨᠡ ᠃ ᠲᠡᠭᠡᠭᠡᠳ ᠨᠢᠭᠡ ᠨᠢᠭᠤᠴᠠ ᠣᠷᠳᠣᠨ ᠳ᠋ᠤᠨᠢ ᠪᠠᠢᠷᠢᠯᠠᠵᠤ ᠂ ᠳᠣᠲᠣᠷᠠ ᠨᠢ ᠨᠣᠬᠠᠢ ᠂ ᠭᠠᠬᠠᠢ ᠂ ᠲᠠᠬᠢᠶᠠ ᠭᠡᠬᠦ ᠶᠠᠩᠵᠤ ᠶ᠋ᠢᠨ ᠡᠯᠳᠡᠪ ᠠᠮᠢᠲᠠᠨ ᠤ᠋ ᠰᠡᠭ ᠢ᠋ ᠬᠤᠷᠢᠶᠠᠵᠤ ᠂ ᠳᠡᠭᠡᠷᠡ ᠨᠢ ᠳᠡᠪᠢᠰᠬᠡᠷ ᠢ᠋ᠶ᠋ᠡᠨ ᠳᠡᠯᠭᠡᠨ ᠬᠡᠪᠲᠡᠭᠡᠳ :
- ᠨᠠᠳᠠᠳᠤ ᠡᠪᠡᠳᠴᠢᠨ ᠲᠤᠰᠪᠠ ᠭᠡᠵᠦ ᠣᠪᠯᠠᠵᠤ ᠭᠡᠨᠡ ᠃ ᠬᠢᠲᠠᠳ ᠤ᠋ᠨ ᠬᠠᠭᠠᠨ ᠨᠡᠷᠡᠲᠡᠢ ᠳᠣᠯᠣᠭᠠᠨ ᠡᠮᠴᠢ ᠪᠡᠨ ᠵᠠᠯᠠᠵᠤ ᠦᠵᠡᠭᠦᠯᠬᠦ ᠳ᠋ᠦ᠍ ᠡᠮᠴᠢ ᠨᠠᠷ ᠦᠮᠡᠬᠡᠢ ᠦᠨᠦᠷ ᠲᠤᠨᠢ ᠣᠢᠷᠠᠲᠤᠬᠤ ᠠᠷᠭᠠ ᠦᠭᠡᠢ ᠲᠤᠯᠠ ᠠᠷᠠᠪᠰᠠ (ᠴᠣᠩᠬᠣ) ᠪᠠᠷ ᠨᠢ ᠤᠯᠠᠭᠠᠨ ᠥᠩᠭᠡᠲᠡᠢ ᠶᠣᠩᠬᠣᠷ ᠲᠣᠷᠭᠠᠨ ᠤᠲᠠᠰᠤ ᠬᠠᠶᠠᠵᠤ ᠥᠭᠭᠦᠭᠡᠳ ᠄
- ᠪᠠᠭᠤᠤ ᠠ᠋ᠴᠠ ᠪᠠᠨ ᠣᠷᠢᠶᠠᠵᠤ ᠤᠶᠠᠭᠠᠷᠠᠢ ᠭᠡᠵᠦ ᠭᠡᠨᠡ ᠃ ᠲᠡᠭᠡᠬᠦ ᠳ᠋ᠦ᠍ᠨᠢ ᠮᠡᠷᠭᠡᠨ ᠲᠡᠮᠦᠨᠡ ᠪᠠᠭᠤᠤ ᠠ᠋ᠴᠠ ᠪᠠᠨ ᠤᠶᠠᠭᠰᠠᠨ ᠦᠭᠡᠢ ᠬᠠᠷᠢᠨ ᠭᠠᠬᠠᠢ ᠶ᠋ᠢᠨ ᠰᠢᠭᠢᠷᠡ ᠡᠴᠡ ᠤᠶᠠᠵᠤ ᠥᠭᠴᠡᠢ ᠃ ᠡᠮᠴᠢ ᠤᠲᠠᠰᠤᠨ ᠤ᠋ ᠪᠠᠨ ᠨᠢᠭᠡ ᠦᠵᠦᠭᠦᠷ ᠢ᠋ ᠪᠠᠷᠢᠵᠤ ᠦᠵᠡᠭᠡᠳ ᠬᠠᠭᠠᠨ ᠳ᠋ᠤ᠌ ᠄
- ᠦᠬᠦᠭᠰᠡᠨ ᠲᠤᠭᠤᠷᠠᠢᠲᠠᠨ ᠤ᠋ ᠰᠤᠳᠠᠰᠤ ᠢᠯᠡᠷᠡᠵᠦ ᠪᠠᠢᠨᠠ ᠭᠡᠵᠡᠢ ᠃ ᠲᠡᠭᠡᠭᠡᠳ ᠮᠡᠷᠭᠡᠨ ᠲᠡᠮᠦᠨᠡ ᠶ᠋ᠢ ᠳᠠᠬᠢᠨ ᠄
- ᠭᠠᠷ ᠢ᠋ᠶ᠋ᠠᠨ ᠰᠣᠯᠢᠵᠤ ᠤᠶᠠᠭᠠᠷᠠᠢ ᠭᠡᠬᠦ ᠳ᠋ᠦ᠍ᠨᠢ ᠲᠠᠬᠢᠶᠠᠨ ᠤ᠋ ᠰᠢᠯᠪᠢ ᠡᠴᠡ ᠣᠷᠢᠶᠠᠭᠠᠳ ᠣᠷᠬᠢᠵᠤ ᠭᠡᠨᠡ᠃ ᠡᠮᠴᠢ ᠪᠠᠷᠢᠵᠤ ᠦᠵᠡᠭᠡᠳ ᠄
- ᠦᠬᠦᠭᠰᠡᠨ ᠵᠢᠭᠦᠷᠲᠡᠨ ᠦ᠌ ᠰᠤᠳᠠᠰᠤ ᠢᠯᠡᠷᠡᠵᠦ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠂ ᠬᠠᠭᠠᠨ ᠳᠡᠯᠪᠡᠷᠡᠲᠡᠯᠡ ᠪᠡᠨ ᠠᠭᠤᠷᠯᠠᠵᠤ ᠄
- ᠴᠠᠭ ᠤ᠋ᠨ ᠮᠠᠭᠤ ᠢᠷᠡᠬᠦ ᠳ᠋ᠦ᠍ ᠴᠢᠨᠦᠰ (ᠲᠠᠨᠤᠰ) ᠴᠤ᠌ ᠶᠠᠭᠤᠮᠠ ᠮᠡᠳᠡᠬᠦ ᠪᠡᠨ ᠪᠠᠢᠬᠤ ᠨᠢ ᠠ᠋ ᠭᠡᠳ ᠪᠠᠢᠳᠠᠭ ᠨᠡᠷᠡᠲᠡᠢ ᠡᠮᠴᠢ ᠪᠡᠨ ᠪᠦᠭᠦᠳᠡ ᠶ᠋ᠢ ᠴᠠᠪᠴᠢᠭᠠᠳ ᠠᠯᠠᠵᠤ ᠭᠡᠨᠡ ᠃ ᠲᠡᠭᠡᠭᠡᠳ ᠮᠡᠷᠭᠡᠨ ᠲᠡᠮᠦᠨᠡ ᠡᠴᠡ᠄
- ᠡᠦᠲᠦ ᠶᠠᠭᠠᠬᠢᠪᠠᠯ ᠲᠠᠨ ᠤ᠋ ᠡᠪᠡᠳᠴᠢᠨ ᠠᠶᠠᠳᠠᠳᠠᠭ(ᠡᠳᠡᠭᠡᠷᠡᠳᠡᠭ) ᠪᠢᠯᠡ? ᠭᠡᠬᠦ ᠳ᠋ᠦ᠍
- ᠬᠬᠢᠪ ᠲᠣᠷᠭᠠᠨ ᠤ᠋ ᠦᠨᠡᠰᠦ ᠨᠢᠭᠡ ᠠᠳᠬᠤ ᠢᠳᠡᠪᠡᠯ ᠮᠠᠭᠠᠳ ᠦᠭᠡᠢ ᠭᠡᠵᠦ ᠮᠡᠷᠭᠡᠨ ᠲᠡᠮᠦᠨᠡ ᠬᠡᠯᠡᠵᠦ ᠭᠡᠨᠡ ᠃ ᠬᠠᠭᠠᠨ ᠪᠦᠬᠦ ᠤᠯᠤᠰ ᠤ᠋ᠨ ᠢ᠋ᠶ᠋ᠠᠨ ᠲᠣᠷᠭᠠ ᠬᠬᠢᠪ ᠢ᠋ ᠲᠦᠯᠡᠨ ᠪᠠᠷᠠᠵᠤ ᠪᠠᠢᠵᠤ ᠰᠠᠶᠢ ᠨᠢᠭᠡ ᠠᠳᠬᠤ ᠦᠨᠡᠰᠦ ᠣᠯᠵᠤ ᠥᠭᠴᠡᠢ᠃ᠮᠡᠷᠭᠡᠨ ᠲᠡᠮᠦᠨᠡ ᠦᠨᠡᠰᠦ ᠶ᠋ᠢ ᠢᠳᠡᠴᠢᠭᠡᠳ ᠄
- ᠪᠠᠰᠠ ᠯᠠ ᠠᠶᠠᠳᠠᠭᠰᠠᠨ( ᠡᠳᠡᠭᠡᠷᠡᠭᠰᠡᠨ ) ᠦᠭᠡᠢ᠃ᠡᠦᠲᠦ ᠮᠠᠨ ᠤ᠋ ᠪᠤᠷᠬᠠᠨ ᠱᠠᠰᠢᠨ ᠨᠠᠮᠠᠢ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠭᠰᠠᠨ ᠦᠭᠡᠢ ᠮᠥᠷᠲᠡᠭᠡᠨ ᠰᠢᠲᠦᠭᠡᠨ ᠢ᠋ᠶ᠋ᠡᠨ ᠰᠢᠲᠦᠭᠰᠡᠨ ᠦᠭᠡᠢ ᠭᠡᠵᠦ ᠠᠭᠤᠷᠯᠠᠵᠤ ᠪᠠᠢᠨᠠ ᠂ ᠪᠢ ᠪᠠᠰᠠ ᠨᠢᠭᠡ ᠣᠪᠣᠭᠠ ᠳᠠᠬᠢᠭᠠᠳ ᠢᠷᠡᠶᠡ ᠭᠡᠰᠡᠨ ᠳ᠋ᠦ᠍ ᠬᠠᠭᠠᠨ ᠵᠥᠪᠰᠢᠶᠡᠷᠡᠵᠦ ᠂ ᠳᠣᠯᠣᠭᠠᠨ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠥᠭᠭᠦᠭᠡᠳ ᠄
- ᠣᠪᠣᠭᠠ ᠲᠠᠬᠢᠬᠤ ᠳ᠋ᠤ᠌ ᠪᠠᠰᠠ ᠶᠠᠭᠤ ᠬᠡᠷᠡᠭᠲᠡᠢ ᠪᠢᠯᠡ ? ᠭᠡᠬᠦ ᠳ᠋ᠦ᠍ᠨᠢ
- ᠠ ᠂ ᠳᠣᠯᠣᠭᠠᠨ ᠮᠠᠨᠲᠠᠤ ᠂ ᠳᠣᠯᠣᠭᠠᠨ ᠰᠢᠯ ( ᠯᠣᠩᠬᠣ ) ᠠᠷᠢᠬᠢ ᠥᠭᠪᠡᠯ ᠪᠣᠯᠴᠢᠬᠠᠨᠠ ᠭᠡᠵᠦ ᠭᠡᠨᠡ ᠃ ᠬᠠᠭᠠᠨ ᠥᠭᠴᠡᠢ ᠃ ᠮᠡᠷᠭᠡᠨ ᠲᠡᠮᠦᠨᠡ ᠠᠳᠤᠭᠤᠨ ᠳᠤᠮᠳᠠᠬᠢ ᠭᠠᠭᠴᠠ ᠠᠷᠠᠨᠵᠠᠯ ᠢ᠋ ᠨᠢ ᠤᠨᠤᠭᠠᠳ ᠳᠣᠯᠣᠭᠠᠨ ᠲᠦᠰᠢᠮᠡᠯ ᠢ᠋ ᠨᠢ ᠳᠠᠭᠠᠭᠤᠯᠤᠨ ᠮᠣᠷᠳᠠᠵᠤ ᠭᠡᠨᠡ ᠃ ᠲᠡᠭᠡᠭᠡᠳ ᠨᠢᠭᠡ ᠠᠭᠤᠯᠠ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠭᠠᠷᠤᠭᠠᠳ ᠶᠡᠬᠡᠯᠡ ᠨᠣᠮ ᠭᠦᠷᠢᠮ ᠬᠢᠵᠦ ᠪᠠᠢᠬᠤ ᠮᠠᠶᠢᠭᠯᠠᠨ ᠰᠠᠭᠤᠭᠰᠠᠭᠠᠷ ᠪᠠᠢᠭᠠᠳ ᠠᠰᠬᠠᠨ ᠣᠷᠣᠢ (ᠦᠳᠡᠰᠢ) ᠪᠣᠯᠭᠠᠵᠠᠢ ᠃ ᠳᠣᠯᠣᠭᠠᠨ ᠲᠦᠰᠢᠮᠡᠯ ᠬᠠᠵᠠᠭᠤ ᠠ᠋ᠴᠠ ᠨᠢ ᠬᠠᠯᠢᠶᠠᠨ (ᠬᠠᠷᠠᠨ) ᠰᠠᠭᠤᠭᠰᠠᠭᠠᠷ ᠪᠠᠢᠭᠠᠳ ᠬᠠᠷᠠᠩᠭᠠᠯᠠᠵᠤ (ᠥᠯᠥᠰᠴᠦ)ᠤᠮᠳᠠᠭᠠᠰᠤᠨ ᠬᠠᠷᠠᠩᠭᠤᠰᠴᠤ ᠤᠨᠠᠬᠤ ᠬᠦᠷᠬᠦ ᠳ᠋ᠦ᠍ᠨᠢ ᠰᠠᠢᠬᠢ (ᠥᠨᠥᠬᠢ) ᠳᠣᠯᠣᠭᠠᠨ ᠮᠠᠨᠲᠠᠤ ᠳ᠋ᠠᠭᠠᠨ ᠠᠷᠢᠬᠢ ᠪᠠᠨ ᠰᠢᠩᠭᠡᠭᠡᠭᠡᠳ ᠄
- ᠪᠤᠷᠬᠠᠨ ᠤ᠋ ᠱᠠᠩ ᠬᠦᠷᠲᠡᠮᠦ ! ᠭᠡᠵᠦ ᠳᠣᠯᠣᠭᠠᠨ ᠲᠦᠰᠢᠮᠡᠯ ᠳ᠋ᠦ᠍ ᠨᠢᠭᠡ ᠨᠢᠭᠡ ᠥᠭᠴᠦ ᠭᠡᠨᠡ ᠃ ᠳᠣᠯᠣᠭᠠᠨ ᠲᠦᠰᠢᠮᠡᠯ ᠲᠡᠭᠦᠨ ᠢ᠋ ᠨᠢ ᠢᠳᠡᠭᠡᠳ ᠳᠣᠣᠷᠠ ᠪᠠᠨ ᠰᠣᠭᠲᠣᠨ ᠤᠨᠠᠵᠤ ᠭᠡᠨᠡ ᠃ ᠲᠡᠭᠡᠬᠦ ᠳ᠋ᠦ᠍ ᠮᠡᠷᠭᠡᠨ ᠲᠡᠮᠦᠨᠡ ᠳᠣᠯᠣᠭᠠᠨ ᠮᠣᠷᠢᠨ ᠤ᠋ ᠬᠢᠨᠢ ᠰᠠᠭᠯᠠᠭᠠ ( ᠪᠡᠯᠪᠡᠷᠡᠬᠡᠢ ᠶ᠋ᠢᠨ ᠠᠷᠤ) ᠪᠠᠷ ᠨᠢ ᠴᠠᠪᠴᠢᠵᠤ ᠬᠠᠶᠠᠭᠠᠳ ᠭᠠᠭᠴᠠ ᠠᠷᠠᠨᠵᠠᠯ ᠢ᠋ ᠨᠢ ᠤᠨᠤᠭᠠᠳ ᠳᠤᠲᠠᠭᠠᠵᠠᠢ᠃ ᠳᠣᠯᠣᠭᠠᠨ ᠲᠦᠰᠢᠮᠡᠯ ᠮᠠᠷᠭᠠᠰᠢ ᠨᠢ ᠰᠠᠶᠢ ᠰᠡᠷᠭᠦᠵᠦ ᠮᠡᠷᠭᠡᠨ ᠲᠡᠮᠦᠨᠡ ᠳᠤᠲᠠᠭᠠᠭᠰᠠᠨ ᠢ᠋ ᠮᠡᠳᠡᠵᠦ ᠬᠥᠭᠡᠭᠡᠬᠦ ᠭᠡᠬᠦ ᠳ᠋ᠦ᠍ ᠮᠣᠷᠢᠳ ᠨᠢ ᠰᠠᠭᠯᠠᠭᠠ ᠦᠭᠡᠢ ᠲᠤᠯᠠ ᠶᠠᠪᠠᠭᠠᠨ ᠢ᠋ᠶ᠋ᠠᠷ ᠣᠷᠳᠣᠨ ᠳ᠋ᠠᠭᠠᠨ ᠪᠤᠴᠠᠵᠤ ᠢᠷᠡᠭᠰᠡᠨ ᠭᠡᠨᠡ ᠃ ᠬᠠᠭᠠᠨ ᠠᠭᠤᠷᠯᠠᠬᠤ ᠳ᠋ᠠᠭᠠᠨ ᠪᠦᠭᠦᠳᠡ ᠶ᠋ᠢ ᠶᠠᠯᠠᠲᠠᠨ ᠴᠠᠪᠴᠢᠵᠠᠢ᠃ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠲᠡᠳᠡᠨ ᠦ᠌ ᠪᠡᠨ ᠠᠷᠤ ( ᠬᠣᠢᠨᠠ ) ᠠ᠋ᠴᠠ ᠬᠥᠭᠡᠭᠡᠭᠰᠡᠭᠡᠷ ᠬᠥᠭᠡᠭᠡᠭᠰᠡᠭᠡᠷ ᠳᠤᠮᠳᠠ ᠪᠠᠨ ᠨᠠᠷᠢᠨ ᠤᠷᠤᠰᠬᠠᠯ ᠲᠠᠢ᠂ ᠳᠡᠭᠡᠷᠡ ᠪᠡᠨ ᠨᠢᠭᠲᠠ ᠤᠷᠭᠤᠮᠠᠯ ᠲᠠᠢ ᠨᠢᠭᠡᠨ ᠠᠭᠤᠯᠠᠨ ᠳ᠋ᠤ᠌ ᠭᠦᠢᠴᠡᠭᠡᠳ ᠬᠦᠷᠴᠡᠢ ᠃ ᠲᠡᠭᠡᠬᠦ ᠳ᠋ᠦ᠍ ᠥᠨᠥᠴᠢᠨ ᠭᠦᠨᠴᠦ ᠤᠨᠤᠭᠠ ᠠ᠋ᠴᠠ ᠪᠠᠨ ᠪᠠᠭᠤᠴᠢᠬᠠᠭᠠᠳ᠄
- ᠭᠡᠷ ᠨᠤᠲᠤᠭ ᠠᠪᠤ ᠡᠬᠡ ᠪᠡᠨ ᠰᠠᠨᠠᠵᠤ ᠪᠠᠢᠨᠠ ᠂ ᠣᠳᠣ ᠪᠢ ᠶᠠᠪᠤᠬᠤ ᠦᠭᠡᠢ ᠪᠤᠴᠠᠨᠠ ᠭᠡᠳ ᠤᠢᠯᠠᠨ (ᠤᠬᠢᠯᠠᠨ) ᠰᠠᠭᠤᠵᠤ ᠪᠠᠢᠵᠤ ᠭᠡᠨᠡ᠃ ᠮᠡᠷᠭᠡᠨ ᠲᠡᠮᠦᠨᠡ ᠄
- ᠲᠡᠭᠡᠪᠡᠯ ᠴᠢ ᠰᠠᠢᠬᠢ ᠠᠪᠤ ᠡᠬᠡ ᠴᠢᠨᠢ ᠪᠠᠷᠢᠵᠤ ᠦᠭᠭᠦᠭᠰᠡᠨ ᠨᠠᠷᠠ ᠰᠠᠷᠠ ᠬᠣᠶᠠᠷ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠦᠵᠡ ᠯᠡ ᠳᠡ ᠂ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠭᠡᠷ ᠨᠤᠲᠤᠭ ᠂ ᠠᠪᠤ ᠡᠬᠡ ᠴᠢᠨᠢ ᠢᠯᠡᠷᠡᠨ ᠲᠣᠳᠣᠷᠠᠨᠠ ᠭᠡᠵᠦ ᠬᠡᠯᠡᠵᠡᠢ ᠃ ᠥᠨᠥᠴᠢᠨ ᠭᠦᠨᠴᠦ ᠄ ᠦᠨᠡᠬᠡᠷ ᠴᠦ᠍ ᠲᠡᠢᠮᠦ ᠭᠡᠵᠦ ᠪᠣᠳᠣᠭᠠᠳ ᠂ ᠠᠴᠢᠶᠠ ᠬᠥᠰᠬᠡ ᠪᠡᠨ ᠪᠠᠭᠤᠯᠭᠠᠵᠤ ᠰᠠᠢᠬᠢ 《ᠨᠠᠷᠠ ᠰᠠᠷᠠ 》 ᠪᠠᠨ ᠭᠠᠷᠭᠠᠬᠤ ᠳ᠋ᠤ᠌ ᠠᠯᠲᠠ ᠂ ᠮᠥᠩᠭᠥ ᠨᠢ ᠢᠯᠴᠠᠭᠠᠢ ᠨᠡᠬᠡᠢ ᠳ᠋ᠦ᠍ ᠨᠠᠭᠠᠯᠳᠤᠵᠤ ᠬᠠᠭᠤᠷᠠᠭᠠᠳ ᠂ ᠨᠤᠲᠤᠭ ᠤᠰᠤ ᠠᠪᠤ ᠡᠬᠡ ᠨᠢ ᠢᠯᠡᠷᠡᠭᠰᠡᠨ ᠦᠭᠡᠢ ᠂ ᠬᠠᠷᠢᠨ ᠪᠦᠲᠦᠨ᠂ ᠲᠠᠯᠠ ᠬᠣᠶᠠᠷ ᠬᠥᠬᠡ ᠴᠢᠯᠠᠭᠤᠨ ᠲᠡᠭᠡᠷᠮᠡ ᠨᠢ ᠢᠯᠡᠷᠡᠵᠦ ᠭᠡᠨᠡ ᠃ ᠲᠡᠭᠡᠬᠦ ᠳ᠋ᠦ᠍ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ᠄
- ᠢᠰᠢ᠂ ᠬᠡᠦᠬᠡ ᠠ᠋ ᠂ ᠠᠪᠤ ᠡᠬᠡ ᠴᠢᠨᠢ ᠴᠢᠮᠠᠢ ᠳᠠᠯᠳᠠᠷᠠᠭᠤᠯᠤᠨ ᠵᠠᠢᠯᠠᠭᠤᠯᠵᠤ ᠶᠠᠳᠠᠵᠤ ᠪᠠᠢᠵᠤ ᠰᠢᠦ ! ᠦᠵᠡᠭᠡᠴᠢ ᠂ ᠴᠢᠮᠠᠢ ᠬᠣᠶᠠᠷ ᠬᠥᠬᠡ ᠴᠢᠯᠠᠭᠤ ᠪᠠᠷ ᠮᠡᠬᠡᠯᠡᠭᠡᠳ ᠶᠠᠪᠤᠭᠤᠯᠤᠭᠰᠠᠨ ᠪᠠᠢᠬᠤ ᠶ᠋ᠢ᠂ ᠡᠢᠮᠦ ᠴᠢᠯᠠᠭᠤ ᠰᠢᠭ᠋ ᠵᠢᠷᠦᠬᠡ ᠲᠡᠢ ᠠᠪᠤ ᠡᠬᠡ ᠶ᠋ᠢ ᠰᠠᠨᠠᠭᠠᠳ ᠶᠠᠮᠠᠷ ᠬᠡᠷᠡᠭ ᠪᠠᠢᠬᠤ ᠪᠣᠢ ? ᠭᠡᠬᠦ ᠳ᠋ᠦ᠍ ᠂ ᠥᠨᠥᠴᠢᠨ ᠭᠦᠨᠴᠦ《ᠦᠨᠡᠬᠡᠷ ᠴᠦ᠍ ᠲᠡᠢᠮᠦ ᠯᠡ ᠪᠠᠢᠨᠠ 》ᠭᠡᠵᠦ ᠪᠣᠳᠣᠭᠠᠳ ᠰᠠᠢᠬᠢ 《ᠨᠠᠷᠠ ᠰᠠᠷᠠ》ᠭᠡᠵᠦ ᠦᠭᠭᠦᠭᠰᠡᠨ ᠬᠣᠶᠠᠷ ᠴᠢᠯᠠᠭᠤ ᠪᠠᠨ ᠲᠡᠷᠡ ᠬᠥᠲᠥᠯ ᠳᠡᠭᠡᠷᠡ ᠬᠠᠶᠠᠵᠤ ᠣᠷᠬᠢᠭᠠᠳ ᠵᠣᠷᠢᠭ ᠰᠢᠭᠤᠳᠤᠨ ᠴᠠᠰᠢ ᠪᠠᠨ ᠶᠠᠪᠤᠵᠤ ᠭᠡᠨᠡ ᠃ ᠢᠩᠭᠢᠭᠡᠳ ᠲᠡᠷᠡ ᠬᠥᠲᠥᠯ ᠨᠢ 《 ᠨᠠᠷᠠ ᠰᠠᠷᠠ ᠶ᠋ᠢᠨ ᠬᠥᠲᠥᠯ 》ᠭᠡᠳᠡᠭ ᠨᠡᠷᠡ ᠲᠡᠢ ᠪᠣᠯᠵᠤ ᠂ ᠡᠦᠲᠦ ᠪᠣᠯᠲᠠᠯᠠ ᠮᠥᠨ ᠨᠡᠷᠡ ᠪᠡᠷ ᠳᠠᠭᠤᠳᠠᠭᠳᠠᠭᠰᠠᠭᠠᠷ ᠢᠷᠡᠵᠡᠢ᠃
ᠲᠠᠩᠭᠤᠳ ᠲᠤ᠌ ᠬᠦᠷᠦᠭᠰᠡᠨ ᠰᠥᠨᠢ ᠬᠢᠲᠠᠳ ᠠ᠋ᠴᠠ ᠰᠣᠷᠢᠨᠵᠢᠨ ᠭᠣᠮᠪᠣ ᠬᠠᠭᠠᠨ ᠪᠠ ᠥᠨᠥᠴᠢᠨ ᠭᠦᠨᠴᠦ ᠬᠠᠲᠤᠨ ᠳ᠋ᠤ᠌ ᠬᠣᠣᠷᠲᠤ ᠮᠣᠭᠠᠢ ᠲᠠᠯᠪᠢᠵᠤ ᠭᠡᠨᠡ ᠃ ᠬᠠᠭᠠᠨ ᠤ᠋ ᠤᠨᠲᠠᠬᠤ ᠥᠷᠥᠭᠡ ᠳ᠋ᠦ᠍ ᠬᠠᠷᠠᠭᠤᠯ ᠰᠠᠭᠤᠵᠤ ᠪᠠᠢᠭᠰᠠᠨ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠮᠣᠭᠠᠢ ᠶ᠋ᠢ ᠨᠢ ᠴᠠᠪᠴᠢᠵᠤ ᠠᠯᠠᠬᠤ ᠳ᠋ᠤ᠌ ᠨᠢᠭᠡ ᠳᠤᠰᠤᠯ ᠴᠢᠰᠤ ᠨᠢ ᠦᠰᠦᠷᠦᠭᠡᠳ ᠤᠨᠲᠠᠵᠤ ᠪᠠᠢᠭᠰᠠᠨ ᠬᠠᠲᠤᠨ ᠤ᠋ ᠬᠠᠴᠠᠷ ᠳᠡᠭᠡᠷᠡ ᠲᠤᠰᠴᠢᠬᠠᠵᠠᠢ ᠃ ᠲᠡᠭᠡᠭᠡᠳ ᠮᠡᠷᠭᠡᠨ ᠲᠡᠮᠦᠨᠡ ᠲᠡᠷᠡ ᠴᠢᠰᠤ ᠶ᠋ᠢ ᠨᠢ ᠰᠡᠯᠡᠮᠡ ᠪᠡᠷ ᠢ᠋ᠶ᠋ᠡᠨ ᠬᠤᠰᠤᠭᠠᠳ ᠠᠪᠤᠶᠠ ᠭᠡᠬᠦ ᠳ᠋ᠦ᠍ ᠰᠢᠨᠡ ᠬᠠᠲᠤᠨ ᠤ᠋ ᠬᠠᠴᠠᠷ ᠳᠡᠭᠡᠷᠡ ᠰᠣᠷᠪᠢ ᠰᠠᠭᠤᠯᠭᠠᠬᠤ ᠠ᠋ᠴᠠ ᠠᠶᠤᠭᠠᠳ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠳᠣᠯᠢᠶᠠᠵᠤ ᠠᠪᠤᠭᠰᠠᠨ ᠭᠡᠨᠡ ᠃ ᠮᠠᠷᠭᠠᠰᠢ ᠨᠢ ᠬᠠᠲᠤᠨ ᠪᠣᠰᠤᠭᠠᠳ ᠬᠠᠭᠠᠨ ᠳ᠋ᠠᠭᠠᠨ᠄
- ᠲᠡᠷᠡ ᠴᠢᠨᠢ ᠰᠥᠨᠢ ᠢᠷᠡᠵᠦ ᠨᠠᠮᠠᠢ ᠨᠢᠭᠡ ᠦᠨᠦᠰᠬᠦ ᠰᠢᠭ ᠪᠣᠯᠪᠠ ᠭᠡᠬᠦ ᠳ᠋ᠦ᠍ ᠂ ᠬᠠᠭᠠᠨ ᠮᠡᠷᠭᠡᠨ ᠲᠡᠮᠦᠨᠡ ᠳ᠋ᠦ᠍ ᠬᠢᠯᠢᠩᠨᠡᠵᠦ ᠂ ᠬᠣᠶᠠᠷ ᠨᠢᠳᠦ ᠶ᠋ᠢ ᠨᠢ ᠮᠠᠯᠲᠠᠵᠤ ᠠᠪᠤᠭᠠᠳ ᠤᠬᠤᠷᠬᠠᠢ ᠳ᠋ᠤᠨᠢ ᠮᠠᠭᠠᠵᠢᠨ (ᠬᠠᠷᠠ ᠲᠣᠰᠣ) ᠪᠤᠴᠠᠯᠭᠠᠨ ᠬᠢᠵᠦ ᠂ ᠭᠠᠷ ᠬᠥᠯ ᠳ᠋ᠦ᠍ᠨᠢ ᠭᠠᠪᠠ ᠳᠥᠩᠭᠡ ᠵᠡᠭᠦᠯᠭᠡᠭᠡᠳ ᠬᠠᠷᠠ ᠭᠡᠷ ( ᠭᠢᠨᠳᠠᠨ) ᠳ᠋ᠤ᠌ ᠬᠠᠶᠠᠴᠢᠬᠠᠵᠤ ᠭᠡᠨᠡ ᠃