ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ < ᠨᠢᠭᠡ > Хойд мэргэн төмнө – Нэг
535ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ < ᠨᠢᠭᠡ >
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠭᠡᠨᠡ
ᠡᠯᠦᠨᠴᠡ ᠬᠤᠯᠤᠨᠴᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠭᠡᠨᠡ
ᠡᠨᠡ ᠭᠠᠵᠠᠷ ᠠ᠋ᠴᠠ ᠬᠣᠯᠠ ᠭᠡᠨᠡ
ᠡᠭᠴᠡ ᠬᠣᠢᠲᠤ ᠵᠦᠭ ᠲᠦ᠍ ᠭᠡᠨᠡ!
ᠨᠡᠷᠡ ᠤᠰᠤ ᠦᠭᠡᠢ ᠨᠢᠭᠡᠨ ᠡᠪᠦᠭᠡᠨ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠭᠡᠨᠡ᠃ ᠬᠥᠮᠦᠨ ᠠᠮᠢᠲᠠᠨ ᠠ᠋ᠴᠠ ᠬᠡᠲᠦᠷᠡᠭᠰᠡᠨ ᠰᠡᠴᠡᠨ ᠮᠡᠷᠭᠡᠨ ᠤᠬᠠᠭᠠᠨ ᠲᠠᠢ᠂ ᠦᠳᠡ ᠶ᠋ᠢᠨ ᠵᠠᠮ ᠳ᠋ᠤ᠌ ᠪᠣᠰᠬᠠᠭᠰᠠᠨ ᠲᠡᠮᠦᠨᠡ(ᠲᠡᠪᠡᠨᠡ) ᠶ᠋ᠢᠨ ᠰᠦᠪᠡ ᠶ᠋ᠢ ᠰᠡᠳᠡ ᠬᠠᠷᠪᠤᠳᠠᠭ ᠠᠶᠤᠮᠠᠷ ᠴᠡᠴᠡᠨ ᠬᠠᠷᠪᠤᠭᠠᠴᠢᠨ ᠪᠠᠢᠭᠰᠠᠨ ᠪᠣᠯᠬᠣᠷ 《 ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ》 ᠭᠡᠵᠦ ᠠᠯᠳᠠᠷᠰᠢᠵᠠᠢ᠃ ᠲᠡᠭᠦᠨ ᠳ᠋ᠦ᠍ ᠣᠯᠠᠨ ᠤ᠋ ᠳᠤᠮᠳᠠ ᠲᠡᠨᠡᠭ ᠲᠥᠷᠥᠭᠰᠡᠨ ᠠᠷᠠᠪᠰᠠᠷ ᠭᠡᠳᠡᠭ ᠭᠠᠭᠴᠠ ᠬᠦᠦ ᠲᠡᠢ᠂ ᠣᠷᠴᠢᠯᠠᠩ ᠳᠡᠭᠡᠷᠡ ᠡᠴᠡ ᠣᠯᠳᠠᠰᠢ ᠦᠭᠡᠢ《ᠬᠠᠷᠠ ᠬᠡᠯᠡᠨ ᠰᠣᠭᠰᠣᠷ》ᠭᠡᠭᠴᠢ ᠬᠤᠷᠳᠤᠨ ᠱᠠᠷ ᠲᠠᠢ ᠶᠤᠮ ᠪᠠᠢᠵᠤ ᠭᠡᠨᠡ᠃ ᠬᠦᠦ ᠨᠢ ᠳᠠᠩᠴᠢ ᠲᠡᠨᠡᠭ ᠪᠣᠯᠬᠣᠷ ᠶᠠᠭᠠᠬᠢᠵᠤ ᠬᠥᠮᠦᠨ ᠪᠣᠯᠭᠠᠬᠤ ᠂ ᠶᠠᠭᠠᠬᠢᠵᠤ ᠪᠡᠷᠢ ᠣᠯᠭᠣᠬᠤ ᠭᠡᠵᠦ ᠯᠡ ᠰᠠᠨᠠᠭᠠ ᠵᠣᠪᠠᠨ ᠰᠠᠭᠤᠳᠠᠭ ᠪᠠᠢᠵᠠᠢ᠃ ᠨᠢᠭᠡᠨ ᠡᠳᠦᠷ ᠬᠦᠦ ᠠᠷᠠᠪᠰᠠᠷ ᠢ᠋ᠶ᠋ᠠᠨ ᠳᠠᠭᠤᠳᠠᠵᠤ ᠢᠷᠡᠭᠡᠳ ᠄
- 《ᠠᠪᠤ ᠶ᠋ᠢᠨ ᠪᠣᠢ ᠳ᠋ᠤ᠌ ᠡᠯᠢᠭᠡᠨ ᠰᠠᠳᠤᠨ ᠢ᠋ᠶ᠋ᠠᠨ ᠲᠠᠨᠢᠳᠠᠭ ᠂ ᠠᠭᠲᠠ ᠶ᠋ᠢᠨ ᠪᠣᠢ ᠳ᠋ᠤ᠌ ᠭᠠᠵᠠᠷ ᠤᠰᠤ ᠪᠠᠨ ᠦᠵᠡᠳᠡᠭ 》ᠡᠦᠲᠦ ᠬᠦᠦ ᠮᠢᠨᠢ
ᠭᠠᠳᠠᠨᠠ ᠳᠣᠲᠣᠨᠠ ᠶᠠᠪᠤᠬᠤ ᠪᠣᠯᠵᠠᠢ
ᠭᠠᠵᠠᠷ ᠤᠰᠤ ᠦᠵᠡᠬᠦ ᠪᠣᠯᠵᠠᠢ
ᠭᠠᠯ ᠭᠣᠯᠣᠮᠲᠠ ᠮᠠᠨᠠᠬᠤ ᠪᠣᠯᠵᠠᠢ
ᠭᠠᠭᠴᠠ ᠠᠪᠤ ᠪᠠᠨ ᠲᠡᠵᠢᠭᠡᠬᠦ ᠪᠣᠯᠵᠠᠢ᠃
ᠠᠪᠤ ᠨᠢ ᠴᠢᠮᠠᠲᠤ ᠵᠠᠭᠤᠨ ᠬᠤᠴᠠ ᠥᠭᠭᠦᠶᠡ ᠂ ᠴᠢ ᠵᠦᠭᠯᠡᠭᠰᠡᠨ ᠵᠦᠭ ᠲᠡᠭᠡᠨ ᠵᠠᠭᠤᠨ ᠬᠣᠨᠣᠭ ᠶᠠᠪᠤᠵᠤ ᠬᠤᠳᠠᠯᠳᠤᠭᠠ ᠬᠢᠭᠡᠳ ᠢᠷᠡ ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠵᠠᠪᠠᠯ ᠵᠠᠭᠤᠨ ᠵᠦᠢᠯ ᠦ᠋ᠨ ᠪᠠᠷᠠᠭᠠ (ᠡᠳ᠋) ᠲᠡᠢ ᠬᠠᠷᠢᠵᠤ ᠢᠷᠡᠬᠦ ᠬᠡᠷᠡᠭᠲᠡᠢ᠃ ᠣᠯᠵᠠ ᠣᠮᠣᠭ ᠲᠠᠢ ᠶᠠᠪᠤᠭᠠᠳ ᠢᠷᠡᠳᠡᠭ ᠪᠣᠯ ᠱᠣᠷᠣᠯᠭᠠ ( ᠴᠢᠳᠠᠪᠤᠷᠢ ᠴᠢᠷᠮᠠᠢᠯᠭᠠ ) ᠴᠢᠨᠢ ᠲᠡᠷᠡ ᠂ ᠴᠢᠳᠠᠬᠤ ᠦᠭᠡᠢ ᠪᠡᠷ ᠲᠤᠷᠠᠵᠤ ᠥᠯᠪᠡᠷᠳᠡᠭ ᠪᠣᠯ ᠲᠦᠭᠵᠢᠭ (ᠬᠣᠬᠢ) ᠴᠢᠨᠢ ᠲᠡᠷᠡ!ᠭᠡᠵᠦ ᠬᠡᠯᠡᠭᠡᠳ᠂ ᠣᠨᠳᠣᠣ ᠶᠠᠭᠤ ᠴᠦ᠍ ᠦᠭᠭᠦᠭᠰᠡᠨ ᠦᠭᠡᠢ ᠪᠡᠷ ᠵᠠᠭᠤᠨ ᠬᠤᠴᠠ ᠲᠠᠭᠤᠯᠭᠠᠨ ᠶᠠᠪᠤᠭᠤᠯᠵᠠᠢ᠃
ᠲᠡᠨᠡᠭ ᠬᠦᠦ ᠤᠷᠤᠭᠤ ᠴᠢᠷᠠᠢᠯᠠᠨ ᠤᠰᠤᠨ ᠨᠢᠳᠦᠯᠡᠵᠦ᠂ ᠵᠠᠭᠤᠨ ᠬᠤᠴᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠳᠠᠭᠠᠭᠠᠳ ᠵᠦᠭ ᠴᠢᠭ ᠦᠭᠡᠢ ᠵᠠᠮ ᠳ᠋ᠤ᠌ ᠵᠥᠪ ᠵᠦᠭᠡᠷ ᠭᠠᠷᠴᠤ ᠭᠡᠨᠡ᠃ ᠵᠠᠭᠤᠨ ᠬᠣᠨᠣᠭ ᠤ᠋ᠨ ᠵᠦᠭ ᠴᠢᠭ ᠦᠭᠡᠢ ᠠᠶᠠᠨ ᠰᠢᠦ᠂ ᠵᠠᠭᠤᠷᠠ ᠬᠣᠨᠣᠭ ᠤ᠋ᠨ ᠠᠢᠯᠴᠢᠨ ᠤ᠋ ᠵᠠᠮ ᠪᠢᠰᠢ! ᠵᠢᠷᠭᠤᠭᠠᠨ ᠠᠯᠬᠤᠮ ᠳ᠋ᠠᠬᠢ ᠬᠡᠦᠬᠡᠦᠰ ( ᠬᠡᠦᠬᠡᠳ ) ᠦ᠋ᠨ ᠲᠣᠭᠯᠠᠭᠠᠮ ᠴᠤ᠌ ᠪᠢᠰᠢ ! ᠶᠠᠪᠠᠭᠠᠨ ᠬᠣᠭᠣᠰᠣᠨ ᠢ᠋ᠶ᠋ᠠᠷ ᠪᠢ ᠶᠠᠭᠠᠬᠢᠵᠤ ᠶᠠᠪᠤᠵᠤ ᠢᠷᠡᠳᠡᠭ ᠪᠢᠯᠡ? ᠭᠡᠵᠦ ᠪᠣᠳᠣᠨ ᠪᠣᠳᠣᠨ ᠭᠣᠮᠣᠳᠠᠵᠤ ᠣᠢᠯᠠᠭᠠᠳ (ᠤᠬᠢᠯᠠᠭᠠᠳ) ᠶᠠᠪᠤᠵᠤ ᠭᠡᠨᠡ᠃ ᠲᠡᠭᠡᠵᠦ ᠪᠠᠢᠲᠠᠯᠠ ᠵᠠᠮ ᠳ᠋ᠤᠨᠢ ᠨᠠᠷᠠ ᠰᠠᠷᠠ ᠰᠢᠩᠭᠢ (ᠮᠡᠲᠦ) ᠰᠠᠢᠬᠠᠨ ᠵᠢᠰᠦ ᠲᠡᠢ᠂ ᠨᠠᠪᠴᠢ ᠴᠡᠴᠡᠭ ᠰᠢᠩᠭᠢ (ᠮᠡᠲᠦ) ᠬᠡᠭᠡᠮᠰᠦᠭ ᠬᠤᠪᠴᠠᠰᠤ ᠲᠠᠢ᠂ ᠲᠣᠭᠠᠯᠠᠪᠠᠯ ᠨᠠᠰᠤ ᠰᠠᠴᠠᠭᠤ᠂ ᠲᠥᠭᠡᠯᠡᠪᠡᠯ ᠨᠢᠷᠤᠭᠤ ᠰᠠᠴᠠᠭᠤ ᠬᠥᠭᠡᠷᠦᠬᠦᠨ ᠪᠣᠷᠣ ᠬᠡᠦᠬᠡᠨ ᠬᠠᠷᠭᠤᠵᠤ ᠭᠡᠨᠡ᠃ ᠲᠡᠭᠦᠨ ᠦ᠌ ᠤᠢᠯᠠᠨ (ᠤᠬᠢᠯᠠᠨ) ᠶᠠᠪᠤᠬᠤ ᠶ᠋ᠢ ᠨᠢ ᠬᠡᠦᠬᠡᠨ ᠦᠵᠡᠭᠡᠳ ᠶᠡᠬᠡ ᠭᠠᠢᠬᠠᠵᠤ᠄
– ᠴᠢ ᠶᠠᠭᠤᠨ ᠳ᠋ᠤ᠌ ᠤᠢᠯᠠᠪᠠ (ᠤᠬᠢᠯᠠᠪᠠ )? ᠭᠡᠵᠦ ᠰᠤᠷᠠᠵᠤ ᠭᠡᠨᠡ ᠃ ᠠᠷᠠᠪᠰᠠᠷ ᠤᠴᠢᠷ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠬᠡᠯᠡᠵᠦ ᠥᠭᠬᠦ ᠳ᠋ᠦ᠍ ᠬᠡᠦᠬᠡᠨ ᠡᠯᠡᠭᠯᠡᠨ ᠢᠨᠢᠶᠡᠵᠦ᠄
– ᠡᠷᠡ ᠬᠥᠮᠦᠨ ᠪᠢᠵᠡ ᠴᠢ᠂ ᠡᠷᠢᠶᠡᠨ ᠨᠢᠳᠦᠨ ᠦ᠌ ᠨᠢᠯᠪᠤᠰᠤ ᠴᠢᠨᠢ ᠶᠠᠮᠠᠷ ᠬᠡᠷᠡᠭ ᠦᠭᠡᠢ ᠶᠠᠭᠤᠮᠠᠨ ᠳ᠋ᠤ᠌ ᠭᠣᠭᠣᠵᠢᠳᠠᠭ ᠪᠣᠢ ? ᠭᠡᠵᠦ ᠬᠡᠯᠡᠵᠦ ᠭᠡᠨᠡ ᠃ ᠠᠷᠠᠪᠰᠠᠷ ᠤᠯᠠᠮ ᠤᠢᠯᠠᠵᠤ ( ᠤᠬᠢᠯᠠᠵᠤ ) ᠄
– 《 ᠶᠠᠪᠠᠭᠠᠨ ᠬᠥᠮᠦᠨ ᠦ᠌ ᠵᠣᠪᠠᠯᠠᠩ ᠢ᠋ ᠮᠣᠷᠢᠲᠠᠢ ᠬᠥᠮᠦᠨ ᠮᠡᠳᠡᠬᠦ ᠦᠭᠡᠢ 》ᠨᠢ ᠵᠥᠪ ᠂ 《ᠣᠭᠣᠲᠣᠨᠠ ᠶ᠋ᠢᠨ ᠦᠬᠦᠯ ᠮᠢᠯ (ᠮᠤᠤᠷ) ᠤ᠋ᠨ ᠨᠠᠭᠠᠳᠤᠮ ᠪᠣᠯᠳᠠᠭ》ᠨᠢ ᠴᠦ᠍ ᠦᠨᠡᠨ᠃ ᠪᠢ ᠵᠠᠭᠤᠨ ᠵᠦᠢᠯ ᠦ᠋ᠨ ᠬᠤᠳᠠᠯᠳᠤᠭᠠ ᠬᠢᠭᠡᠳ ᠪᠤᠴᠠᠬᠤ ᠶ᠋ᠢ ᠪᠠᠢᠲᠤᠭᠠᠢ ᠵᠢᠷᠭᠤᠭᠠᠨ ᠡᠳᠦᠷ ᠦ᠋ᠨ ᠨᠠᠷᠠ ᠶ᠋ᠢ ᠴᠦ᠍ ᠦᠵᠡᠵᠦ ᠴᠢᠳᠠᠯ ᠦᠭᠡᠢ ᠪᠡᠷ ᠵᠠᠭᠤᠷᠠ ᠵᠠᠮ ᠳ᠋ᠠᠭᠠᠨ ᠦᠬᠦᠵᠦ ᠵᠢᠯᠢᠢᠬᠦ (ᠲᠣᠨᠢᠯᠬᠤ) ᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠴᠢ ᠡᠯᠡᠭᠯᠡᠳᠡᠭ ᠨᠢ ᠶᠠᠭᠤ ᠪᠣᠢ ? ᠭᠡᠵᠦ ᠭᠡᠨᠡ᠃ ᠬᠡᠦᠬᠡᠨ ᠴᠦ᠍ ᠤᠯᠠᠮ ᠢᠨᠢᠶᠡᠵᠦ᠄
– ᠴᠢ ᠶᠠᠮᠠᠷ ᠬᠡᠷᠡᠭ ᠦᠭᠡᠢ ᠶᠠᠭᠤᠮᠠᠨ ᠳ᠋ᠤ᠌ ᠣᠢᠯᠠᠳᠠᠭ ( ᠤᠬᠢᠯᠠᠳᠠᠭ) ᠬᠥᠮᠦᠨ ᠪᠣᠢ ? ᠴᠠᠰᠢ ᠪᠠᠨ ᠤᠬᠤᠴᠢᠯᠠᠵᠤ ᠪᠣᠳᠣᠳᠠᠭ ᠦᠭᠡᠢ ᠂ ᠤᠬᠠᠭᠠᠨ ᠴᠢᠨᠢ ᠤᠭᠤᠴᠠᠨ ᠳ᠋ᠠᠭᠠᠨ ᠣᠷᠣᠪᠠᠤ ? ᠰᠦᠨᠡᠰᠦ ᠴᠢᠨᠢ ᠰᠡᠭᠦᠵᠢ ᠳ᠋ᠡᠭᠡᠨ ᠰᠢᠩᠭᠡᠪᠡᠦ ? ᠵᠠᠭᠤᠨ ᠬᠤᠴᠠ ᠪᠠᠢᠬᠤ ᠴᠢᠨᠢ ᠴᠢᠮᠠᠲᠤ ᠶᠠᠭᠤ ᠪᠣᠯᠭᠠᠨ ᠪᠦᠷ ᠪᠠᠢᠨᠠ ᠭᠡᠰᠡᠨ ᠦᠭᠡ ᠄ ᠡᠳᠦᠷ ᠪᠦᠷᠢ ᠨᠢᠭᠡ ᠬᠤᠴᠠ ᠪᠠᠨ ᠬᠢᠷᠯᠠᠭᠠᠳ ( ᠬᠥᠩᠭᠡᠯᠡᠭᠡᠳ ) ᠪᠥᠭᠡᠰᠡᠭ ( ᠪᠥᠭᠡᠷᠡ ) ᠶ᠋ᠢ ᠨᠢ ᠢᠳᠡᠵᠦ ᠶᠠᠪᠤᠪᠠᠯ ᠵᠠᠭᠤᠨ ᠬᠣᠨᠣᠭ ᠤ᠋ᠨ ᠬᠦᠨᠡᠰᠦ ᠴᠢᠨᠢ ᠪᠢᠰᠢᠦ?ᠠᠶᠠᠭᠠ ᠰᠠᠪᠠ ᠴᠦ᠍ ᠬᠡᠷᠡᠭ ᠦᠭᠡᠢ ᠶᠠᠮᠠᠷ ᠠᠮᠠᠷᠬᠠᠨ ᠪᠠᠢᠨᠠ!ᠡᠳᠦᠷ ᠪᠦᠷᠢ ᠨᠢᠭᠡ ᠬᠤᠴᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠶᠠᠷ ᠭᠤᠶᠠ ᠶ᠋ᠢ ᠬᠢᠷᠭᠠᠭᠠᠳ ᠨᠣᠣᠰᠣ ᠪᠠᠷ ᠨᠢ ᠲᠡᠯᠢᠩ (ᠲᠡᠩᠨᠡᠳᠡᠭ ᠤᠭᠤᠲᠠ) ᠨᠡᠬᠡᠭᠡᠳ ᠲᠣᠬᠣᠴᠢᠬᠠᠪᠠᠯ ᠵᠠᠭᠤᠨ ᠶᠠᠩᠵᠤ ᠶ᠋ᠢᠨ ᠪᠠᠷᠠᠭᠠᠨ(ᠡᠳ᠋) ᠦ᠋ᠨ ᠤᠭᠤᠲᠠ ᠴᠢᠨᠢ ᠪᠢᠰᠢᠦ ? ᠳᠡᠭᠡᠰᠦ ᠴᠦ᠍ ᠬᠡᠷᠡᠭ ᠦᠭᠡᠢ ᠶᠠᠮᠠᠷ ᠡᠪᠲᠡᠢᠬᠡᠨ ᠪᠠᠢᠨᠠ ! ᠪᠠᠰᠠ ᠨᠢᠭᠡ ᠬᠤᠴᠠ ᠪᠠᠨ ᠪᠦᠲᠦᠨ ᠬᠢᠷᠭᠠᠭᠠᠳ ᠨᠣᠣᠰᠣ ᠶ᠋ᠢ ᠨᠢ ᠰᠥᠨᠢ ᠳ᠋ᠡᠭᠡᠨ ᠬᠥᠳᠦᠷᠴᠦ (ᠨᠥᠮᠥᠷᠴᠦ)᠂ ᠡᠳᠦᠷ ᠲᠡᠭᠡᠨ ᠮᠥᠨ ᠬᠤᠴᠠ ᠳᠡᠭᠡᠷᠡ ᠪᠡᠨ ᠠᠴᠢᠭᠠᠳ ᠶᠠᠪᠤᠪᠠᠯ᠂ ᠴᠠᠰᠢ ᠨᠡᠰᠢ ᠶᠠᠪᠤᠵᠤ ᠢᠷᠡᠬᠦ ᠵᠠᠭᠤᠨ ᠬᠣᠨᠣᠭ ᠤ᠋ᠨ ᠬᠤᠴᠢᠯᠭᠠ ᠴᠢᠨᠢ ᠪᠢᠰᠢᠦ ? ᠳᠡᠯᠡᠬᠡᠢ ᠶᠡᠬᠡ (ᠳᠠᠯᠠᠢ ᠶᠡᠬᠡ) ᠬᠤᠳᠠᠯᠳᠤᠭᠠ ᠠᠷᠠᠯᠵᠢᠶᠠ ᠲᠠᠢ ᠭᠠᠵᠠᠷ ᠬᠦᠷᠦᠭᠡᠳ ᠶᠡᠷᠡᠨ ᠶᠢᠰᠦᠨ ᠬᠤᠴᠠ ᠪᠠᠨ ᠪᠦᠭᠦᠳᠡ ᠶ᠋ᠢ ᠬᠢᠷᠭᠠᠵᠤ ᠂ ᠨᠣᠣᠰᠣ ᠦᠰᠦ ᠶ᠋ᠢ ᠨᠢ ᠬᠤᠳᠠᠯᠳᠤᠪᠠᠯ ᠵᠠᠭᠤᠨ ᠵᠦᠢᠯ ᠦ᠋ᠨ ᠪᠠᠷᠠᠭᠠᠨ ᠤ᠋ ᠵᠣᠭᠣᠰ ᠪᠢᠰᠢᠦ ? ᠲᠡᠭᠡᠪᠡᠯ ᠬᠤᠴᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠶᠠᠷ ᠡᠪᠡᠷ ᠢ᠋ ᠬᠢᠷᠥᠭᠡᠳᠡᠵᠦ ᠳᠠᠭᠠᠷᠢᠭᠠᠳ ᠬᠡᠯᠬᠢᠵᠦ ᠲᠣᠬᠣᠪᠠᠯ ᠡᠪᠲᠡᠢ ᠰᠠᠢᠬᠠᠨ ᠶᠠᠩᠭᠢᠷᠴᠠᠭ ( ᠠᠴᠢᠶᠠᠨ ᠤ᠋ ᠡᠮᠡᠭᠡᠯ ) ᠪᠢᠰᠢᠦ?
ᠲᠡᠭᠡᠭᠡᠳ ᠨᠠᠰᠢ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠬᠣᠨᠣᠬᠤ ᠭᠠᠵᠠᠷ ᠢ᠋ᠶ᠋ᠠᠨ ᠰᠠᠢᠨ ᠠᠵᠢᠵᠤ (ᠠᠵᠢᠭᠯᠠᠵᠤ) ᠶᠠᠪᠤ ᠂ ᠬᠡᠴᠡ(ᠨᠠᠯᠠᠤ) ᠭᠠᠵᠠᠷ ᠬᠦᠷᠦᠭᠡᠳ ᠬᠡᠪᠲᠡᠭᠦᠯᠵᠦ ᠬᠣᠨᠣᠬᠤ ᠬᠡᠷᠡᠭᠲᠡᠢ᠃ ᠬᠤᠴᠠ ᠪᠠᠨ ᠬᠡᠴᠡ ᠭᠠᠵᠠᠷ ᠬᠡᠪᠲᠡᠭᠦᠯᠪᠡᠯ ᠠᠴᠢᠶᠠ ᠨᠢ ᠭᠠᠵᠠᠷ ᠲᠤ᠌ ᠲᠤᠯᠬᠤ ᠲᠤᠯᠠ ᠬᠤᠴᠠ ᠶ᠋ᠢᠨ ᠲᠡᠷᠡ ᠪᠡᠶᠡ ᠨᠢ ᠠᠮᠠᠷᠠᠭᠠᠳ ᠠᠮᠵᠢᠨᠠ ᠂ ᠨᠥᠭᠦᠭᠡ ᠪᠡᠶᠡ ᠪᠡᠨ ᠬᠤᠴᠠ ᠥᠪᠡᠷ ᠢ᠋ᠶ᠋ᠡᠨ ᠤᠯᠠᠷᠢᠵᠤ ᠬᠡᠪᠲᠡᠭᠡᠳ ᠠᠮᠠᠷᠠᠭᠤᠯᠳᠠᠭ ᠶᠤᠮ ᠃ ᠵᠠ ᠦᠵᠡ ᠂ ᠠᠴᠢᠬᠤ ᠴᠦ᠍ ᠬᠡᠷᠡᠭ ᠦᠭᠡᠢ ᠂ ᠪᠠᠭᠤᠯᠭᠠᠬᠤ ᠴᠦ᠍ ᠬᠡᠷᠡᠭ ᠦᠭᠡᠢ ᠂ ᠶᠠᠭᠠᠬᠢᠭᠰᠠᠨ ᠰᠠᠢᠬᠠᠨ ᠠᠷᠭᠠ ᠪᠠᠢᠨᠠ ! ᠴᠢ ᠭᠡᠰᠡᠨ ᠬᠥᠮᠦᠨ ᠶᠠᠭᠠᠬᠢᠭᠰᠠᠨ ᠴᠦ᠍ ᠲᠡᠨᠡᠭ ᠶᠦᠮ ᠪᠣᠢ ? ᠭᠡᠵᠦ ᠵᠥᠪ ᠰᠠᠢᠬᠠᠨ ᠠᠷᠭᠠ ᠨᠤᠭᠤᠳ ᠢ᠋ᠶ᠋ᠠᠨ ᠬᠡᠯᠡᠵᠦ ᠥᠭᠭᠦᠭᠡᠳ ᠪᠠᠰᠠ᠄
– ᠡᠨᠡ ᠠᠷᠭᠠ ᠶ᠋ᠢ ᠨᠠᠮᠠ ᠬᠡᠯᠡᠯᠡ ᠭᠡᠵᠦ ᠬᠡᠨ ᠳ᠋ᠦ᠍ ᠴᠦ᠍ ᠪᠢᠲᠡᠭᠡᠢ ᠬᠡᠯᠡ ! ᠭᠡᠵᠦ ᠵᠠᠬᠢᠭᠠᠳ ᠶᠠᠪᠤᠵᠠᠢ᠃
ᠵᠠ ᠲᠡᠭᠡᠭᠡᠳ ᠠᠷᠪᠰᠠᠷ ᠬᠦᠦ ᠂ ᠬᠡᠦᠬᠡᠨ ᠦ᠌ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠶᠠᠪᠤᠭᠠᠳ ᠣᠯᠵᠠ ᠣᠮᠣᠭ ᠲᠠᠢ ᠬᠠᠷᠢᠭᠠᠳ ᠢᠷᠡᠵᠡᠢ᠃ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠡᠭᠦᠨ ᠢ᠋ ᠦᠵᠡᠮᠡᠭᠴᠡ᠄ ᠬᠦᠦ ᠶ᠋ᠢᠨ ᠤᠬᠠᠭᠠᠨ ᠪᠢᠰᠢ ᠂ ᠬᠥᠮᠦᠨ ᠦ᠌ ᠤᠬᠠᠭᠠᠨ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠᠳ᠂ ᠬᠦᠦ ᠳ᠋ᠡᠭᠡᠨ ᠪᠠᠰᠠ ᠨᠢᠭᠡ ᠰᠠᠢᠨ ᠮᠣᠷᠢ ᠠᠪᠴᠢᠷᠠᠵᠤ ᠄
– ᠵᠠ ᠂ ᠴᠢ ᠡᠨᠡ ᠮᠣᠷᠢ ᠶ᠋ᠢ ᠤᠨᠤᠭᠠᠳ ᠪᠣᠷᠣ ᠮᠥᠷ (ᠢᠷᠡᠭᠰᠡᠨ ᠵᠠᠮ) ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠤᠴᠠ ᠃ ᠲᠡᠭᠡᠭᠡᠳ ᠬᠠᠷᠢᠵᠤ ᠢᠷᠡᠬᠦ ᠳ᠋ᠡᠭᠡᠨ ᠡᠭᠦᠨ ᠢ᠋ ᠬᠣᠶᠠᠷ ᠮᠣᠷᠢ ᠪᠣᠯᠭᠠᠴᠢᠬᠠᠭᠠᠳ᠂ ᠨᠢᠭᠡ ᠶ᠋ᠢ ᠨᠢ ᠤᠷᠤᠭᠰᠢ ᠬᠠᠷᠠᠭᠤᠯᠵᠤ ᠨᠥᠭᠦᠭᠡ ᠶ᠋ᠢ ᠨᠢ ᠬᠣᠢᠰᠢ ᠬᠠᠷᠠᠭᠤᠯᠵᠤ ᠤᠨᠤᠭᠠᠳ ᠢᠷᠡ! ᠭᠡᠵᠡᠢ᠃
ᠨᠢᠭᠡ ᠮᠣᠷᠢ ᠶ᠋ᠢ ᠬᠣᠶᠠᠷ ᠪᠣᠯᠭᠠᠵᠤ ᠲᠣᠯᠣᠭᠠᠢ ᠶ᠋ᠢ ᠨᠢ ᠤᠷᠤᠭᠰᠢ ᠬᠣᠢᠰᠢ ᠬᠠᠷᠠᠭᠤᠯᠤᠨ ᠤᠨᠤᠭᠠᠳ ᠢᠷᠡᠨᠡ ᠭᠡᠳᠡᠭ ᠨᠢ ᠲᠡᠨᠡᠭ ᠬᠦᠦ ᠳ᠋ᠦ᠍ ᠪᠠᠢᠲᠤᠭᠠᠢ ᠮᠡᠷᠭᠡᠨ ᠬᠥᠮᠦᠨ ᠳ᠋ᠦ᠍ ᠴᠦ᠍ ᠬᠡᠴᠡᠭᠦᠦ ᠬᠡᠷᠡᠭ ᠪᠠᠢᠯᠠ ᠭᠡᠨᠡ ᠃ ᠠᠷᠠᠪᠰᠠᠷ ᠪᠠᠰᠠ ᠯᠠ ᠤᠢᠯᠠᠨ (ᠤᠬᠢᠯᠠᠨ)ᠤᠨᠵᠢᠨ ᠶᠠᠪᠤᠵᠤ ᠪᠠᠢᠭᠠᠳ ᠰᠠᠢᠬᠢ(ᠥᠨᠥᠬᠢ) ᠬᠡᠦᠬᠡᠨ ᠲᠡᠢ ᠬᠠᠷᠭᠤᠵᠠᠢ ᠃ ᠬᠡᠦᠬᠡᠨ ᠤᠴᠢᠷ ᠢ᠋ ᠮᠡᠳᠡᠭᠡᠳ ᠪᠠᠰᠠᠯᠠ ᠡᠯᠡᠭᠯᠡᠨ ᠢᠨᠢᠶᠡᠵᠦ᠄
– ᠴᠢ ᠡᠨᠡ ᠮᠣᠷᠢ ᠪᠠᠨ ᠬᠡᠭᠡᠯ ᠲᠡᠢ ᠭᠡᠭᠦᠦ ᠪᠡᠷ ᠰᠣᠯᠢᠴᠢᠬᠠᠪᠠᠯ ᠬᠣᠶᠠᠷ ᠪᠣᠯᠴᠢᠬᠤ ᠪᠢᠰᠢᠦ! ᠲᠡᠭᠡᠭᠡᠳ ᠲᠡᠷᠡ ᠭᠡᠭᠦᠦ ᠪᠡᠨ ᠤᠨᠤᠵᠤ ᠬᠠᠷᠢᠪᠠᠯ ᠡᠬᠡ ᠶ᠋ᠢᠨ ᠲᠣᠯᠣᠭᠠᠢ ᠨᠢ ᠤᠷᠤᠭᠰᠢ ᠬᠠᠷᠠᠵᠤ᠂ ᠤᠨᠠᠭᠠ ᠶ᠋ᠢᠨ ᠲᠣᠯᠣᠭᠠᠢ ᠨᠢ ᠬᠣᠢᠰᠢ ᠬᠠᠷᠠᠵᠤ ᠪᠠᠢᠳᠠᠭ ᠶᠤᠮ ᠭᠡᠵᠡᠢ᠃
ᠲᠡᠨᠡᠭ ᠬᠦᠦ ᠬᠡᠭᠡᠯ ᠲᠡᠢ ᠭᠡᠭᠦᠦ ᠤᠨᠤᠭᠠᠳ ᠪᠠᠶᠠᠷ ᠬᠥᠷ ᠲᠡᠢ ᠪᠡᠷ ᠭᠡᠷ ᠲᠡᠭᠡᠨ ᠪᠤᠴᠠᠵᠤ ᠬᠦᠷᠬᠦ ᠳ᠋ᠦ᠍ ᠮᠡᠷᠭᠡᠨ ᠳᠡᠮᠨᠡ ᠪᠠᠰᠠᠯᠠ᠄ ᠬᠦᠦ ᠶ᠋ᠢᠨ ᠤᠬᠠᠭᠠᠨ ᠪᠢᠰᠢ ᠂ ᠬᠥᠮᠦᠨ ᠦ᠌ ᠤᠬᠠᠭᠠᠨ ᠪᠢᠵᠡ ᠭᠡᠵᠦ ᠪᠣᠳᠣᠭᠠᠳ᠂ ᠠᠷᠠᠪᠰᠠᠷ ᠠ᠋ᠴᠠ ᠭᠡᠨᠡᠳᠲᠡ ᠄
– ᠲᠡᠷᠡ ᠬᠡᠦᠬᠡᠨ ᠦ᠌ ᠨᠡᠷᠡ ᠬᠡᠨ ? ᠬᠠᠮᠢᠭᠠ ᠪᠣᠢ ? ᠭᠡᠬᠦ ᠳ᠋ᠦ᠍ ᠠᠷᠠᠪᠰᠠᠷ ᠄
– ᠨᠡᠷᠡ ᠶ᠋ᠢ ᠨᠢ ᠰᠤᠷᠠᠭᠰᠠᠨ ᠦᠭᠡᠢ ᠂ ᠪᠠᠢᠭᠰᠠᠨ ᠭᠠᠵᠠᠷ ᠢ᠋ ᠨᠢ ᠮᠠᠷᠲᠠᠴᠢᠬᠠᠵᠠᠢ ᠭᠡᠵᠦ ᠨᠠᠭᠠᠳᠤᠬᠢ ᠨᠢ ᠰᠠᠢᠬᠢ ᠬᠡᠦᠬᠡᠨ ᠢ᠋ ᠰᠠᠨᠠᠮᠰᠠᠷ ᠦᠭᠡᠢ ᠪᠡᠷ ᠬᠡᠯᠡᠭᠡᠳ ᠥᠭᠴᠢᠬᠡᠵᠡᠢ᠃
ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠪᠤᠭᠰᠠᠨ ᠵᠦᠭ ᠢ᠋ ᠵᠦᠭᠯᠡᠵᠦ ᠂ ᠲᠡᠢᠮᠦ ᠨᠢᠭᠡᠨ ᠬᠡᠦᠬᠡᠨ ᠪᠠᠢᠬᠤ ᠡᠰᠡᠬᠦ ᠶ᠋ᠢ ᠰᠤᠷᠠᠭᠯᠠᠨ ᠶᠠᠪᠤᠵᠤ ᠭᠡᠨᠡ ᠃ ᠶᠠᠪᠤᠵᠤ ᠪᠠᠢᠲᠠᠯᠠ ᠵᠠᠮ ᠳᠡᠭᠡᠷᠡ ᠨᠢ ᠨᠢᠭᠡ ᠬᠡᠦᠬᠡᠨ ᠴᠢᠯᠠᠭᠤᠨ ᠭᠡᠷ ᠪᠠᠷᠢᠨ ᠨᠠᠭᠠᠳᠴᠤ ᠪᠠᠢᠨᠠ ᠭᠡᠨᠡ᠃ ᠮᠡᠷᠭᠡᠨ ᠲᠡᠮᠦᠨᠡ ᠄
– ᠬᠡᠦᠬᠡ ᠠ᠋᠂ ᠭᠡᠷ ᠢ᠋ᠶ᠋ᠡᠨ ᠵᠠᠮ ᠠ᠋ᠴᠠ ᠵᠠᠢᠯᠠᠭᠤᠯᠵᠤ ᠪᠡᠷᠢ ! ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠬᠡᠦᠬᠡᠨ ᠄
– ᠠᠬᠠ ᠠ᠋ ᠂ ᠮᠣᠷᠢ ᠭᠡᠷ ᠡᠴᠡ ᠵᠠᠢᠯᠠᠳᠠᠭ ᠤᠤ? ᠭᠡᠷ ᠮᠣᠷᠢ ᠠ᠋ᠴᠠ ᠵᠠᠢᠯᠠᠳᠠᠭ ᠤᠤ? ᠭᠡᠵᠦ ᠭᠡᠳᠡᠷᠭᠦ ᠠᠰᠠᠭᠤᠴᠢᠬᠠᠭᠠᠳ ᠠᠵᠢᠭ ᠴᠦ᠍ ᠦᠭᠡᠢ ᠨᠠᠭᠠᠳᠤᠨ ᠰᠠᠭᠤᠵᠤ ᠭᠡᠨᠡ᠃ ᠬᠡᠯᠡ ᠠᠮᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠠ᠋ᠴᠠ ᠪᠠᠨ ᠬᠡᠨ ᠳ᠋ᠦ᠍ ᠴᠦ᠍ ᠭᠡᠳ ᠭᠠᠷᠳᠠᠭᠳᠠᠵᠤ ᠦᠵᠡᠭᠡ ᠦᠭᠡᠢ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠂ ᠥᠨᠥᠳᠥᠷ ᠬᠠᠷᠢᠨ ᠰᠠᠨᠠᠮᠰᠠᠷ ᠦᠭᠡᠢ ᠪᠡᠷ ᠡᠢᠮᠦ ᠨᠢᠭᠡᠨ ᠵᠢᠭᠠᠬᠠᠨ ᠬᠡᠦᠬᠡᠨ ᠳ᠋ᠦ᠍ ᠠᠪᠤᠨ ᠳᠣᠣᠷᠠ ᠪᠠᠨ ᠲᠠᠭᠯᠠᠭᠳᠠᠭᠠᠳ᠂ ᠠᠷᠭᠠ ᠬᠤᠷᠭᠠ ᠪᠠᠨ ᠪᠠᠷᠠᠭᠰᠠᠨ ᠪᠣᠯᠪᠠᠴᠤ ᠳᠠᠬᠢᠵᠤ ᠢᠷᠡᠬᠦ ᠳ᠋ᠡᠭᠡᠨ ᠮᠤᠬᠤᠯᠠᠭᠠᠳ ᠤᠷᠭᠢᠶᠠ ᠭᠡᠵᠦ ᠪᠣᠳᠣᠵᠠᠢ᠃ ᠳᠠᠷᠠᠭᠠ ᠵᠢᠯ ᠦ᠋ᠨ ᠬᠢᠨᠢ ᠨᠢᠭᠡᠨ ᠰᠢᠷ ᠰᠢᠷ ᠭᠡᠰᠡᠨ ᠨᠢᠮᠲᠠᠷ (ᠵᠥᠭᠡᠯᠡᠨ) ᠪᠣᠷᠣᠭᠠᠨ ᠲᠠᠢ ᠡᠳᠦᠷ ᠮᠡᠷᠭᠡᠨ ᠲᠡᠮᠦᠨᠡ ᠰᠠᠢᠬᠢ ᠬᠡᠦᠬᠡᠨ ᠢ᠋ ᠬᠠᠢᠵᠤ ᠬᠦᠷᠬᠦ ᠳ᠋ᠦ᠍᠂ ᠬᠡᠦᠬᠡᠨ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠵᠠᠬᠠ ᠳ᠋ᠤ᠌ ᠲᠡᠭᠦᠭᠰᠡᠨ ᠠᠷᠭᠠᠰᠤ (ᠠᠷᠭᠠᠯ) ᠢ᠋ᠶ᠋ᠠᠨ ᠬᠣᠷᠮᠣᠢ ᠪᠠᠷ ᠢ᠋ᠶ᠋ᠠᠨ ᠬᠤᠴᠢᠭᠠᠳ ᠥᠷᠮᠥᠭ ( ᠪᠦᠳᠦᠭᠦᠯᠢᠭ ᠨᠡᠬᠡᠮᠡᠯ ) ᠣᠢᠮᠣᠰᠤ ᠨᠡᠬᠡᠨ ᠰᠠᠭᠤᠵᠤ ᠪᠠᠢᠪᠠ ᠭᠡᠨᠡ᠃ ᠮᠡᠷᠭᠡᠨ ᠲᠡᠮᠦᠨᠡ ᠄
– ᠬᠥᠶᠢ ᠂ ᠬᠡᠦᠬᠡ ᠠ᠋ ᠂ ᠬᠣᠷᠮᠣᠢ ᠴᠢᠨᠢ ᠬᠤᠷᠠ ᠳ᠋ᠤ᠌ ᠳᠡᠪᠲᠦᠪᠡ ! ᠭᠡᠬᠦ ᠳ᠋ᠦ᠍ ᠬᠡᠦᠬᠡᠨ ᠄
– ᠬᠣᠷᠮᠣᠢ ᠳᠡᠪᠲᠦᠪᠡᠴᠦ ᠠᠷᠭᠠᠰᠤ ᠬᠠᠭᠤᠷᠠᠢ ᠪᠠᠢᠪᠠᠯ ᠂ ᠬᠠᠷᠢᠵᠤ ᠬᠦᠷᠦᠭᠡᠳ ᠭᠠᠯ ᠢ᠋ᠶ᠋ᠠᠨ ᠲᠦᠯᠡᠵᠦ ᠴᠠᠢ ᠪᠠᠨ ᠴᠢᠨᠠᠬᠤ ᠵᠠᠪᠰᠠᠷ ᠬᠣᠷᠮᠣᠢ ᠴᠤ᠌ ᠬᠠᠲᠠᠴᠢᠬᠤ ᠪᠢᠰᠢᠦ ! ᠭᠡᠵᠦ ᠬᠠᠷᠢᠭᠤᠯᠵᠤ ᠭᠡᠨᠡ᠃ ᠮᠡᠷᠭᠡᠨ ᠲᠡᠮᠦᠨᠡ ᠄
– ᠬᠡᠦᠬᠡ ᠠ᠋ ᠂ ᠴᠢ ᠡᠨᠡ ᠣᠢᠮᠣᠰᠤ ᠪᠠᠨ ᠡᠬᠢᠯᠡᠵᠦ ᠨᠡᠬᠡᠭᠡᠳ ᠣᠳᠣ ᠪᠣᠯᠲᠠᠯᠠ ᠬᠡᠳᠦᠨ ᠠᠷᠬᠠᠭ( ᠭᠣᠭᠴᠣᠭᠠ ) ᠭᠣᠭᠴᠣᠭᠠᠯᠠᠪᠠ? ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠬᠡᠦᠬᠡᠨ ᠄
– ᠠᠬᠠ ᠠ᠋ ᠂ ᠲᠠᠨ ᠤ᠋ ᠮᠣᠷᠢ ᠭᠡᠷ ᠡᠴᠡ ᠪᠡᠨ ᠭᠠᠷᠤᠭᠠᠳ ᠡᠨᠳᠡ ᠢᠷᠡᠲᠡᠯᠡ ᠬᠡᠳᠦ ᠠᠯᠬᠤᠪᠠ ? ᠭᠡᠵᠦ ᠭᠡᠳᠡᠷᠭᠦ ᠠᠰᠠᠭᠤᠭᠰᠠᠨ ᠭᠡᠨᠡ ᠃ ᠮᠡᠷᠭᠡᠨ ᠲᠡᠮᠦᠨᠡ ᠄ ᠵᠠ ᠂ ᠡᠨᠡ ᠴᠦ᠍ ᠨᠢᠭᠡ ᠵᠦᠭᠡᠷ ᠬᠡᠦᠬᠡᠳ ᠪᠢᠰᠢ ᠪᠠᠢᠨᠠ᠂ ᠲᠡᠨᠡᠭ ᠬᠦᠦ ᠳ᠋ᠦ᠍ ᠮᠢᠨᠢ ᠡᠢᠮᠦ ᠨᠢᠭᠡ ᠪᠡᠷᠢ ᠣᠯᠳᠠᠪᠠᠯ ᠰᠠᠶᠢ ᠭᠠᠯ ᠭᠣᠯᠣᠮᠲᠠ ᠮᠢᠨᠢ ᠲᠠᠰᠤᠷᠠᠬᠤ ᠦᠭᠡᠢ ᠪᠠᠢᠬᠠ ᠭᠡᠵᠦ ᠪᠣᠳᠣᠵᠠᠢ ᠃ ᠡᠨᠡ ᠬᠡᠦᠬᠡᠨ ᠪᠣᠯ ᠶᠠᠭ ᠠᠷᠠᠪᠰᠠᠷ ᠲᠤ᠌ ᠠᠷᠭᠠ ᠤᠬᠠᠭᠠ ᠬᠡᠯᠡᠵᠦ ᠥᠭᠳᠡᠭ ᠲᠡᠷᠡ ᠬᠡᠦᠬᠡᠨ ᠮᠥᠨ ᠪᠠᠢᠵᠠᠢ ᠃ ᠤᠷᠠᠨ ᠰᠠᠨᠠᠭᠠ ᠲᠠᠢ ᠂ ᠨᠠᠷᠢᠨ ᠤᠬᠠᠭᠠᠨ ᠲᠠᠢ ᠮᠡᠷᠭᠡᠨ ᠲᠡᠮᠦᠨᠡ ᠦᠷᠭᠦᠯᠵᠢᠯᠡᠨ ᠡᠨᠡ ᠬᠡᠦᠬᠡᠨ ᠢ᠋ ᠲᠡᠩᠰᠡᠵᠦ ᠄
– ᠵᠠ᠂ ᠪᠢ ᠮᠠᠩᠭᠠᠳᠤᠷ (ᠮᠠᠷᠭᠠᠰᠢ) ᠳᠠᠬᠢᠨ ᠢᠷᠡᠬᠦ ᠳ᠋ᠦ᠍ ᠴᠢ ᠦᠨᠡᠰᠦ ᠪᠡᠷ ᠳᠡᠭᠡᠰᠦ ᠲᠠᠮᠤᠭᠠᠳ ᠲᠠᠯᠪᠢᠵᠤ ᠪᠠᠢ ᠭᠡᠵᠦ ᠬᠡᠯᠡᠵᠡᠢ᠃ ᠬᠡᠦᠬᠡᠨ ᠄
– ᠵᠠ ᠵᠠ᠂ ᠲᠠᠮᠤᠵᠤ ᠳᠠᠪᠢᠬᠤ (ᠲᠠᠯᠪᠢᠬᠤ) ᠶ᠋ᠢ ᠪᠢ ᠮᠡᠳᠡᠶᠡ᠂ᠡᠪᠬᠡᠵᠦ ᠠᠪᠬᠤ ᠶ᠋ᠢ ᠨᠢ ᠲᠠ ᠮᠡᠳᠡ᠂ ᠪᠣᠯᠤᠨᠠ ᠤᠤ? ᠭᠡᠬᠦ ᠳ᠋ᠦ᠍᠂ ᠮᠡᠷᠭᠡᠨ ᠲᠡᠮᠦᠨᠡ᠄ ᠪᠣᠯᠤᠨᠠ ᠭᠡᠳ ᠶᠠᠪᠤᠵᠠᠢ᠃ ᠲᠡᠭᠦᠨ ᠢ᠋ ᠶᠠᠪᠤᠮᠠᠭᠴᠠ ᠬᠡᠦᠬᠡᠨ ᠡᠪᠡᠰᠦ ᠪᠡᠷ ᠨᠢᠭᠡ ᠳᠡᠭᠡᠰᠦ ᠲᠠᠮᠤᠭᠠᠳ᠂ ᠮᠠᠩᠭᠠᠳᠤᠷ (ᠮᠠᠷᠭᠠᠰᠢ) ᠨᠢ ᠨᠢᠭᠡᠨ ᠦᠵᠦᠭᠦᠷ ᠡᠴᠡ ᠨᠢ ᠭᠠᠯᠳᠠᠵᠤ ᠣᠷᠬᠢᠴᠢᠬᠠᠭᠠᠳ ᠰᠠᠭᠤᠵᠤ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍ ᠬᠡᠦᠬᠡᠨ ᠦᠨᠡᠰᠦᠨ ᠳᠡᠭᠡᠰᠦ ᠪᠡᠨ ᠵᠠᠩᠭᠠᠭᠠᠳ (ᠵᠢᠭᠠᠭᠠᠳ) ᠄
– ᠳᠡᠭᠡᠰᠦ ᠲᠡᠷᠡ ᠪᠠᠢᠨᠠ ᠂ ᠡᠦᠲᠦ ᠲᠠ ᠡᠪᠬᠡᠵᠦ ᠠᠪ ᠳᠠ ᠭᠡᠵᠦ ᠭᠡᠨᠡ ᠃ ᠮᠡᠷᠭᠡᠨ ᠲᠡᠮᠦᠨᠡ ᠠᠷᠭᠠ ᠦᠭᠡᠢ ᠪᠣᠯᠬᠤ ᠳ᠋ᠠᠭᠠᠨ ᠄
– ᠦᠨᠡᠬᠡᠷ ᠲᠡᠢᠮᠦ ᠰᠦᠷᠡᠬᠡᠢ ᠪᠣᠯ ᠮᠠᠩᠭᠠᠳᠤᠷ ᠨᠠᠳᠠᠳᠤ ᠡᠷᠡ ᠦᠬᠡᠷ ᠦ᠋ᠨ ᠦᠰᠥ᠋ (ᠰᠦ ) ᠪᠡᠷ ᠲᠠᠷᠠᠭ ᠪᠦᠷᠢᠭᠡᠳ ᠲᠠᠯᠪᠢᠵᠤ ᠪᠠᠢ ᠭᠡᠬᠦ ᠳ᠋ᠦ᠍᠂ ᠬᠡᠦᠬᠡᠨ ᠪᠠᠰᠠ᠄
– ᠵᠠ᠃ ᠭᠡᠵᠦ ᠠᠵᠢᠭ ᠴᠤ᠌ ᠦᠭᠡᠢ ᠬᠡᠯᠡᠵᠦ ᠭᠡᠨᠡ᠃ ᠮᠠᠩᠭᠠᠳᠤᠷ ᠨᠢ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍ ᠬᠡᠦᠬᠡᠨ ᠭᠡᠷ ᠦ᠋ᠨ ᠢᠷᠬᠢ ᠪᠠᠬᠢᠰ (ᠬᠠᠶᠠᠭᠠ ) ᠪᠠᠨ ᠳᠠᠷᠤᠨ ᠪᠢᠲᠡᠭᠦᠯᠡᠵᠦ᠂ ᠭᠡᠷ ᠡᠴᠡ ᠪᠡᠨ ᠴᠢᠯᠠᠭᠤᠨ ᠲᠡᠭᠡᠷᠮᠡ ᠮᠡᠲᠦ ᠶ᠋ᠢᠨ ᠬᠦᠨᠳᠦ ᠶᠠᠭᠤᠮᠠ ᠭᠠᠳᠠᠭᠰᠢ ᠵᠥᠭᠡᠭᠡᠭᠡᠳ ᠶᠡᠬᠡ ᠶᠠᠭᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂ ᠮᠡᠷᠭᠡᠨ ᠲᠡᠮᠦᠨᠡ ᠶ᠋ᠢ ᠦᠵᠡᠭᠡᠳ ᠡᠮᠦᠨᠡ ᠡᠴᠡ ᠨᠢ ᠲᠣᠰᠣᠨ ᠬᠦᠷᠴᠦ᠄
– ᠥᠨᠥᠳᠥᠷ ᠮᠠᠨ ᠤ᠋ ᠳ᠋ᠤ᠌ ᠬᠥᠯ ᠴᠡᠭᠡᠷ ᠲᠡᠢ᠂ ᠲᠠ ᠪᠢᠲᠡᠭᠡᠢ ᠢᠷᠡ ᠭᠡᠵᠦ ᠭᠡᠨᠡ᠃
– ᠡᠬᠡ ᠴᠢᠨᠢ ᠬᠥᠩᠭᠡᠵᠢᠪᠡ ᠤᠤ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠄
– ᠠᠪᠤ ᠬᠥᠩᠭᠡᠵᠢᠵᠦ ᠪᠠᠢᠨᠠ ᠭᠡᠵᠦ ᠭᠡᠨᠡ᠃
– ᠡᠷᠡ ᠬᠥᠮᠦᠨ ᠡᠴᠡ ᠬᠡᠦᠬᠡᠦᠰ ᠭᠠᠷᠤᠨᠠ ᠭᠡᠵᠦ ᠪᠠᠢᠳᠠᠭ ᠤᠤ ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤᠨᠢ ᠄
– ᠲᠡᠭᠡᠪᠡᠯ ᠡᠷᠡ ᠦᠬᠡᠷ ᠡᠴᠡ ᠦᠰᠥ᠋ (ᠰᠦ)ᠭᠠᠷᠤᠨᠠ ᠭᠡᠵᠦ ᠪᠠᠢᠳᠠᠭ ᠤᠤ? ᠭᠡᠵᠦ ᠭᠡᠳᠡᠷᠭᠦ ᠠᠰᠠᠭᠤᠵᠤ ᠭᠡᠨᠡ᠃ ᠮᠡᠷᠭᠡᠨ ᠲᠡᠮᠦᠨᠡ᠄ ᠡᠨᠡ ᠬᠡᠦᠬᠡᠨ ᠢ ᠪᠠᠴᠢᠮ ᠰᠣᠴᠢᠮ ᠦᠭᠡ ᠪᠡᠷ ᠨᠢᠭᠡ ᠴᠢᠳᠠᠬᠤ ᠦᠭᠡᠢ ᠪᠣᠯ ᠪᠣᠯᠳᠠᠭ ᠨᠢ ᠪᠢᠰᠢ ᠶᠦ᠍ᠮ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠᠳ᠄
– ᠦᠭᠡᠢ᠂ ᠴᠢ ᠶᠠᠭᠠᠬᠢᠭᠠᠳ ᠠᠰᠠᠭᠤᠭᠰᠠᠨ ᠢ᠋ ᠠᠰᠠᠭᠤᠬᠤ ᠪᠠᠷ ᠬᠠᠷᠢᠭᠤᠯᠳᠠᠭ ᠪᠣᠢ? ᠭᠡᠬᠦ ᠳ᠋ᠦ᠍᠄
– ᠶᠠᠭᠠᠬᠢᠭᠠᠳ ᠪᠣᠯᠳᠠᠭ ᠦᠭᠡᠢ ᠪᠣᠢ? ᠭᠡᠵᠦ ᠬᠠᠷᠢᠭᠤᠯᠤᠭᠰᠠᠨ ᠭᠡᠨᠡ ᠃ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠡᠨᠡ ᠬᠡᠦᠬᠡᠨ ᠢ᠋ ᠲᠡᠩᠰᠡᠵᠦ ᠳᠠᠭᠤᠰᠤᠭᠠᠳ ᠶᠡᠬᠡᠪᠡᠷ ᠲᠣᠭᠣᠵᠤ᠂ ᠭᠡᠷ ᠲᠡᠭᠡᠨ ᠳᠠᠭᠠᠭᠤᠯᠵᠤ ᠬᠦᠷᠦᠭᠡᠳ ᠬᠦᠦ ᠡᠴᠡ ᠪᠡᠨ᠄
– ᠴᠢᠮᠠᠲᠤ ᠠᠷᠭᠠ ᠤᠬᠠᠭᠠ ᠬᠡᠯᠡᠵᠦ ᠦᠭᠭᠦᠭᠰᠡᠨ ᠬᠡᠦᠬᠡᠨ ᠡᠨᠡ ᠮᠥᠨ ᠤᠤ? ᠭᠡᠬᠦ ᠳ᠋ᠦ᠍ ᠠᠷᠠᠪᠰᠠᠷ ᠲᠠᠨᠢᠭᠰᠠᠨ ᠦᠭᠡᠢ ᠭᠡᠨᠡ᠃ ᠲᠡᠭᠡᠭᠡᠳ ᠬᠡᠦᠬᠡᠨ ᠦ᠌ ᠨᠤᠲᠤᠭ ᠤᠰᠤ᠂ ᠨᠡᠷᠡ ᠨᠠᠰᠤ ᠶ᠋ᠢ ᠨᠢ ᠰᠤᠷᠠᠵᠤ ᠠᠪᠤᠭᠠᠳ ᠪᠤᠴᠠᠭᠠᠵᠤ ᠭᠡᠨᠡ᠃ ᠡᠨᠡ ᠬᠡᠦᠬᠡᠨ ᠦ᠌ ᠠᠪᠤ ᠨᠢ ᠶᠠᠭ ᠲᠡᠷᠡ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠨᠣᠶᠠᠨ ᠨᠢ ᠪᠠᠢᠭᠰᠠᠨ ᠶᠤᠮ ᠪᠠᠢᠵᠠᠢ ᠃ ᠳᠣᠯᠣᠭᠠᠨ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠮᠡᠷᠭᠡᠨ ᠲᠡᠮᠦᠨᠡ ᠲᠡᠷᠡ ᠨᠣᠶᠠᠨ ᠤ᠋ ᠭᠡᠷ ᠲᠦ᠍ ᠬᠦᠷᠦᠭᠡᠳ᠄
ᠮᠣᠯᠴᠣᠭ ᠴᠠᠭᠠᠨ ᠪᠤᠢᠯᠠ ᠲᠠᠢ ᠪᠤᠤᠷᠠ ᠶ᠋ᠢᠨ
ᠮᠣᠨᠴᠣᠭ ᠬᠣᠶᠠᠷ ᠪᠦᠬᠦ ᠲᠡᠢ ᠢᠩᠭᠡ ᠶ᠋ᠢᠨ
ᠮᠤᠤᠰᠢ (ᠮᠠᠭᠤ ᠪᠢᠰᠢ) ᠣᠯᠠᠨ ᠲᠣᠷᠣᠮ ᠤ᠋ᠨ ᠤᠤᠭᠠᠨ
ᠬᠠᠵᠠᠭᠤ ᠳ᠋ᠤᠨᠢ ᠲᠡᠷᠡᠮ( ᠬᠠᠨᠠ ) ᠬᠦᠷᠭᠡᠵᠦ ᠦᠵᠡᠭᠡ ᠦᠭᠡᠢ
ᠬᠠᠮᠠᠷ ᠲᠤᠨᠢ ᠪᠤᠢᠯᠠ ᠬᠦᠷᠭᠡᠵᠦ ᠦᠵᠡᠭᠡ ᠦᠭᠡᠢ
ᠬᠠᠵᠢᠭ ᠤᠯᠠᠭᠠᠨ ᠢᠩᠭᠡᠨ ᠢ᠋ ᠰᠤᠷᠠᠵᠤ ᠶᠠᠪᠤᠨᠠ ᠦᠵᠡᠪᠡᠦ? ᠭᠡᠬᠦ ᠳ᠋ᠦ᠍ ᠂ ᠨᠣᠶᠠᠨ ᠤ᠋ ᠭᠢᠰ (ᠬᠢᠨ) ᠤᠴᠢᠷ ᠤᠬᠠᠭᠠᠨ ᠢ᠋ ᠣᠯᠵᠤ ᠲᠠᠢᠯᠵᠤ ᠶᠠᠳᠠᠭᠠᠳ ᠳᠣᠯᠣᠭᠠ ᠬᠣᠨᠣᠪᠠ ᠭᠡᠨᠡ᠃ ᠳᠠᠬᠢᠭᠠᠳ᠄
ᠲᠡᠮᠡᠭᠡ ᠬᠥᠲᠥᠯᠳᠡᠭ ᠨᠢ ᠲᠠᠨ ᠤ᠋ ᠳ᠋ᠤ᠌ ᠪᠠᠢᠨᠠ
ᠳᠠᠩ ᠡᠷᠭᠦᠳᠡᠭ ᠨᠢ ᠮᠠᠨ ᠤ᠋ ᠳ᠋ᠤ᠌ ᠪᠠᠢᠨᠠ ①
ᠴᠠᠯᠮᠠ ᠶ᠋ᠢᠨ ᠰᠠᠢᠨ ᠢ᠋ᠶ᠋ᠠᠷ ᠮᠣᠷᠢ ᠲᠣᠭᠲᠠᠭᠠᠳᠠᠭ
ᠰᠡᠯᠡᠮᠡ ᠶ᠋ᠢᠨ ᠰᠠᠢᠨ ᠢ᠋ᠶ᠋ᠠᠷ ᠲᠥᠷᠥ ᠲᠣᠭᠲᠠᠭᠠᠳᠠᠭ
ᠴᠠᠭ ᠢ᠋ᠶ᠋ᠠᠷ ᠨᠡᠢᠯᠡᠵᠦ ᠭᠡᠷ ᠪᠠᠷᠢᠳᠠᠭ
ᠴᠠᠪᠠ ᠪᠠᠷ ᠨᠡᠢᠯᠡᠵᠦ ᠵᠠᠭᠤ ᠬᠦᠷᠳᠡᠭ ② ᠭᠡᠬᠦ ᠳ᠋ᠦ᠍ ᠪᠠᠰᠠ ᠲᠠᠢᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠳᠣᠯᠣᠭᠠ ᠬᠣᠨᠣᠵᠤ ᠭᠡᠨᠡ ᠃ ᠢᠩᠭᠢᠵᠦ ᠶᠠᠳᠠᠷᠠᠵᠤ ᠪᠠᠢᠬᠤ ᠳ᠋ᠤ᠌ ᠬᠡᠦᠬᠡᠨ ᠨᠢ ᠭᠠᠷᠴᠤ ᠢᠷᠡᠭᠡᠳ ᠄
–《 ᠮᠣᠯᠴᠣᠭ ᠴᠠᠭᠠᠨ ᠪᠤᠢᠯᠠ ᠲᠠᠢ ᠪᠤᠤᠷᠠ 》ᠭᠡᠵᠦ ᠮᠥᠩᠭᠥᠨ ᠭᠠᠩᠰᠠ ᠲᠠᠢ ᠠᠪᠤ ᠶ᠋ᠢ ᠬᠡᠯᠡᠵᠦ ᠪᠠᠢᠨᠠ ᠂《ᠮᠣᠨᠴᠣᠭ ᠬᠣᠶᠠᠷ ᠪᠦᠬᠦ ᠲᠡᠢ ᠢᠩᠭᠡ 》ᠭᠡᠵᠦ ᠡᠬᠡ ᠶ᠋ᠢ ᠬᠡᠯᠡᠵᠦ ᠪᠠᠢᠨᠠ ᠂《ᠮᠤᠤᠰᠢ ᠣᠯᠠᠨ ᠲᠣᠷᠣᠮ 》ᠭᠡᠳᠡᠭ ᠨᠢ ᠳᠡᠭᠦᠦ ᠨᠠᠷ ᠢ᠋ ᠬᠡᠯᠡᠵᠦ ᠪᠠᠢᠨᠠ ᠂《ᠬᠠᠵᠠᠭᠤ ᠳ᠋ᠤᠨᠢ ᠲᠠᠷᠠᠮ (ᠬᠠᠨᠠ) ᠭᠥᠷᠬᠡᠭᠡ ᠦᠭᠡᠢ ᠂ ᠬᠠᠮᠠᠷ ᠲᠤᠨᠢ ᠪᠤᠢᠯᠠ ᠬᠦᠷᠭᠡᠭᠡ ᠦᠭᠡᠢ ᠬᠠᠵᠢᠭ ᠤᠯᠠᠭᠠᠨ ᠢᠩᠭᠡᠨ 》ᠭᠡᠵᠦ ᠨᠠᠮᠠᠶ᠋ᠢ ᠬᠡᠯᠡᠵᠦ ᠪᠠᠢᠨᠠ᠃ ᠡᠨᠡ ᠬᠥᠮᠦᠨ ᠬᠣᠲᠠ ᠤᠷᠤᠭ ᠪᠣᠯᠤᠶᠠ ᠭᠡᠵᠦ ᠨᠠᠮᠠᠶ᠋ᠢ ᠠᠪᠬᠤ ᠪᠠᠷ ᠢᠷᠡᠭᠰᠡᠨ ᠶᠦᠮ ᠪᠠᠢᠨᠠ ᠭᠡᠵᠦ ᠲᠠᠢᠯᠪᠠ ᠭᠡᠨᠡ ᠃ ᠵᠠ ᠲᠡᠭᠡᠭᠡᠳ
ᠳᠠᠯᠠᠢ ᠶᠡᠬᠡ ᠪᠠᠶᠠᠷ ᠪᠣᠯᠪᠠ ᠭᠡᠨᠡ
ᠳᠠᠯᠠᠨ ᠡᠳᠦᠷ ᠦ᠋ᠨ ᠨᠠᠢᠷ ᠪᠣᠯᠪᠠ ᠭᠡᠨᠡ
ᠳᠡᠯᠭᠡᠷ ᠪᠠᠶᠠᠨ ᠬᠤᠷᠢᠮ ᠪᠣᠯᠪᠠ ᠭᠡᠨᠡ
ᠳᠡᠯᠡᠬᠡᠢ ᠶᠡᠬᠡ ᠬᠥᠯ ᠪᠣᠯᠪᠠ ᠭᠡᠨᠡ ᠃
ᠲᠡᠨᠳᠡ ᠡᠴᠡ ᠪᠡᠨ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠪᠡᠷᠢ ᠪᠡᠨ ᠠᠪᠤᠭᠠᠳ ᠭᠡᠷ ᠲᠡᠭᠡᠨ ᠪᠤᠴᠠᠵᠤ ᠢᠷᠡᠪᠡ ᠭᠡᠨᠡ᠃
ᠪᠡᠷᠢ ᠪᠡᠨ ᠠᠪᠴᠢᠷᠠᠭᠠᠳ ᠬᠠᠳᠠᠮ ᠲᠠᠯᠠ ᠶ᠋ᠢᠨ ᠰᠠᠬᠢᠯ ᠭᠣᠷᠢᠮ (ᠴᠡᠭᠡᠷ) ᠢ᠋ ᠶᠠᠮᠠᠷ ᠵᠡᠷᠭᠡ ᠰᠠᠬᠢᠵᠤ ᠪᠠᠢᠬᠤ ᠶ᠋ᠢ ᠨᠢ ᠰᠢᠯᠭᠠᠬᠤ ᠶ᠋ᠢᠨ ᠲᠥᠯᠥᠭᠡ ᠮᠡᠷᠭᠡᠨ ᠲᠡᠮᠦᠨᠡ ᠬᠡᠴᠡᠭᠦᠦ ᠲᠦᠪᠡᠭ ᠲᠡᠢ ᠤᠷᠠᠨ ᠰᠡᠴᠡᠨ ᠠᠷᠭᠠ ᠪᠠᠷ ᠲᠡᠩᠰᠡᠵᠦ ᠭᠡᠨᠡ᠃
– ᠣᠷᠴᠢᠯᠠᠩ ᠤ᠋ᠨ ᠤᠰᠤᠨ ᠂ ᠮᠣᠳᠣᠨ ᠂ ᠮᠠᠯ ᠂ ᠠᠷᠢᠶᠠᠲᠠᠨ ᠤ᠋ ᠨᠡᠷᠡ ᠳ᠋ᠦ᠍ ᠪᠦᠷ ᠴᠢᠨᠦ ᠬᠠᠳᠠᠮ ᠳᠡᠭᠡᠳᠦ ᠶ᠋ᠢᠨ ᠨᠡᠷᠡ ᠪᠠᠢᠨᠠ ᠂ ᠴᠢ ᠲᠡᠷᠡ ᠪᠦᠬᠦᠨ ᠦ᠌ ᠨᠡᠷᠡ ᠶ᠋ᠢ ᠬᠡᠯᠡᠬᠦ ᠡᠴᠡ ᠴᠡᠭᠡᠷᠯᠡᠬᠦ ᠬᠡᠷᠡᠭᠲᠡᠢ ᠭᠡᠵᠦ ᠲᠤᠰᠢᠶᠠᠵᠠᠢ᠃ ᠲᠡᠭᠡᠭᠡᠳ ᠨᠢᠭᠡ ᠡᠳᠦᠷ ᠨᠢᠭᠡ ᠮᠠᠭᠤ ᠳᠠᠷᠳᠠᠭᠠᠷ ᠡᠪᠡᠷ ᠲᠡᠢ ᠬᠥᠭᠰᠢᠨ ᠬᠠᠯᠵᠠᠨ ᠬᠤᠴᠠ ᠪᠠᠨ ᠬᠡᠷᠡᠭ ᠢ᠋ᠶ᠋ᠡᠷ (ᠵᠣᠷᠢᠭᠤᠳᠠ) ᠬᠡᠭᠡᠷᠡ ᠣᠷᠬᠢᠵᠤ ᠢᠷᠡᠭᠡᠳ᠂ ᠮᠠᠩᠭᠠᠳᠤᠷ ᠦᠷᠦᠭᠦᠨ (ᠥᠷᠯᠥᠭᠡ) ᠨᠢ ᠪᠡᠷᠢ ᠪᠡᠨ ᠦᠵᠡᠭᠡᠳ ᠢᠷᠡ ᠭᠡᠵᠦ ᠶᠠᠪᠤᠭᠤᠯᠵᠤ ᠭᠡᠨᠡ᠃ ᠪᠡᠷᠢ ᠨᠢ ᠶᠠᠪᠤᠭᠠᠳ ᠬᠦᠷᠬᠦ ᠳ᠋ᠦ᠍ ᠬᠤᠴᠠ ᠶ᠋ᠢ ᠨᠢ ᠭᠣᠣᠯ ᠤ᠋ᠨ ᠡᠬᠢᠨ ᠳ᠋ᠦ᠍ ᠨᠢᠭᠡᠨ ᠰᠠᠭᠯᠠᠭᠠᠷ ᠮᠣᠳᠣᠨ ᠤ᠋ ᠢᠷᠣᠭᠠᠯ ᠳ᠋ᠤ᠌ ( ᠳᠣᠣᠷᠠ ) ᠴᠢᠨᠣᠠ ᠢᠳᠡᠴᠢᠬᠡᠭᠰᠡᠨ ᠪᠠᠢᠵᠤ ᠭᠡᠨᠡ ᠃ ᠪᠡᠷᠢ ᠡᠷᠭᠢᠵᠦ ᠢᠷᠡᠬᠦ ᠳ᠋ᠦ᠍ ᠠᠪᠤ ᠨᠢ ᠄
– ᠪᠠᠢᠨᠠ ᠤᠤ? ᠭᠡᠵᠦ ᠠᠰᠠᠭᠤᠵᠠᠢ᠃ ᠪᠡᠷᠢ᠄ ᠭᠣᠣᠯ ᠂ ᠮᠣᠳᠣ ᠂ ᠴᠢᠨᠣᠠ ᠂ ᠬᠤᠴᠠ᠂ ᠯᠤᠭᠭᠠᠷ ( ᠪᠦᠭᠦᠳᠡᠭᠡᠷ ) ᠮᠢᠨᠦ ᠬᠠᠳᠠᠮ ᠳᠡᠭᠡᠳᠦ ᠶ᠋ᠢᠨ ᠨᠡᠷᠡ ᠭᠡᠳᠡᠭ ᠂ ᠬᠡᠯᠡᠬᠦ ᠡᠴᠡ ᠴᠡᠭᠡᠷᠯᠡᠬᠦ ᠬᠡᠷᠡᠭᠲᠡᠢ ᠭᠡᠵᠦ ᠪᠣᠳᠣᠭᠠᠳ᠄
– ᠶᠠᠭᠤᠨ ᠤ᠋ ᠲᠠᠨᠢ ③ ᠪᠠᠢᠬᠤ ᠪᠢᠯᠡ ᠂
ᠤᠷᠭᠤᠮᠠᠯ ᠤ᠋ᠨ ᠢᠷᠣᠭᠠᠯ ᠳ᠋ᠤ᠌
ᠤᠷᠤᠰᠬᠠᠯ ᠤ᠋ᠨ ᠡᠬᠢᠨ ᠳ᠋ᠦ᠍
ᠮᠠᠢᠯᠠᠮᠠᠯ ᠤ᠋ᠨ ᠳᠠᠷᠳᠠᠩ ᠵᠠᠮᠰᠤ ᠠᠬᠠ ᠶ᠋ᠢ
ᠤᠯᠢᠮᠠᠯ ᠨᠢ ᠢᠷᠡᠭᠡᠳ ᠱᠠᠮᠰᠢᠴᠢᠬᠠᠵᠠᠢ᠂ ᠲᠠ
ᠳᠡᠷᠡᠭᠡᠷ ᠡᠪᠡᠷᠲᠦ (ᠰᠠᠷᠯᠤᠭ ᠱᠠᠷ ) ᠢ᠋ᠶ᠋ᠠᠨ ᠤᠨᠤᠭᠠᠳ
ᠰᠡᠷᠡᠭᠡᠷ ᠰᠢᠭᠢᠷᠠᠲᠤ(ᠰᠢᠭᠢᠷᠡ ᠲᠡᠢ ᠫᠤᠤ) ᠪᠠᠨ ᠡᠭᠦᠷᠦᠭᠡᠳ ᠶᠠᠪᠤᠬᠤ ᠶᠤᠮ ᠪᠢᠰᠢᠦ? ᠭᠡᠵᠦ ᠬᠠᠷᠢᠭᠤᠯᠪᠠ ᠭᠡᠨᠡ᠃
ᠪᠠᠰᠠ ᠨᠢᠭᠡ ᠤᠳᠠᠭᠠ ᠪᠡᠷᠢ ᠨᠢ ᠨᠦᠳᠦᠭᠦᠷ(ᠣᠭᠣᠷ) ᠤ᠋ᠨ ᠴᠢᠯᠠᠭᠤ (ᠮᠠᠨᠴᠤ) ᠪᠠᠨ ᠬᠠᠯᠠᠭᠤᠯᠤᠭᠠᠳ ᠰᠢᠨᠡ ᠣᠶᠣᠭᠰᠠᠨ ᠬᠤᠪᠴᠠᠰᠤ ᠪᠠᠨ ᠴᠢᠪᠠᠲᠠᠨ(ᠢᠯᠡᠦᠷᠳᠡᠨ) ᠰᠠᠭᠤᠵᠤ ᠪᠠᠢᠬᠤ ᠳ᠋ᠤᠨᠢ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠄
– ᠨᠦᠳᠦᠭᠦᠷ ᠦ᠋ᠨ ᠴᠢᠯᠠᠭᠤ ᠪᠠᠨ ᠭᠠᠯ ᠢ᠋ᠶ᠋ᠠᠷ ᠬᠠᠯᠠᠭᠤᠯᠪᠠ ᠤᠤ? ᠤᠰᠤ ᠪᠠᠷ ᠬᠠᠯᠠᠭᠤᠯᠪᠠ ᠤᠤ? ᠭᠡᠵᠦ ᠰᠤᠷᠠᠵᠠᠢ᠃ ᠪᠡᠷᠢ ᠨᠢ ᠄
– ᠮᠣᠭᠠᠢ ᠬᠡᠯᠡᠲᠦ
ᠮᠣᠷᠢᠨ ᠳᠡᠯᠲᠦ
ᠴᠢᠰᠤᠨ ᠥᠩᠭᠡᠲᠦ
ᠴᠢᠪᠠᠭᠠᠨ ᠵᠢᠰᠦᠲᠦ ᠪᠡᠷ ᠬᠠᠯᠠᠭᠤᠯᠪᠠ ᠭᠡᠵᠦ᠂ ᠬᠠᠳᠠᠮ ᠤ᠋ᠨ ᠬᠢᠨᠢ ᠳᠣᠯᠣᠳᠤᠭᠠᠷ ᠦᠶᠡ ᠳ᠋ᠦ᠍ ᠦᠨᠡᠬᠡᠷ ᠨᠢᠭᠡ《ᠭᠠᠯᠴᠢ》ᠭᠡᠰᠡᠨ ᠨᠡᠷᠡᠲᠡᠢ ᠬᠥᠮᠦᠨ ᠪᠠᠢᠭᠰᠠᠨ ᠢ᠋ ᠨᠢ ᠤᠷᠠᠨ ᠰᠡᠴᠡᠨ ᠢ᠋ᠶ᠋ᠡᠷ ᠴᠡᠭᠡᠷᠯᠡᠨ ᠬᠠᠷᠢᠭᠤᠯᠤᠭᠰᠠᠨ ᠶᠤᠮ ᠭᠡᠨᠡ᠃
ᠵᠠ ᠲᠡᠭᠡᠭᠡᠳ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ
ᠰᠠᠢᠨ ᠴᠦ᠍ ᠪᠡᠷᠢ ᠲᠡᠢ
ᠰᠠᠢᠬᠠᠨ ᠴᠦ᠍ ᠠᠢᠯ ᠪᠣᠯᠵᠠᠢ ᠂
ᠵᠢᠷᠠ ᠴᠦ᠍ ᠨᠠᠰᠤᠯᠠᠵᠤ
ᠵᠢᠷᠭᠠᠯᠲᠠᠢ ᠰᠠᠢᠬᠠᠨ ᠠᠮᠢᠳᠤᠷᠠᠵᠠᠢ᠃
ᠤᠤᠭᠤᠳᠠᠭ ᠨᠢ ᠪᠣᠯᠪᠠᠯ
ᠪᠤᠯᠠᠭ ᠤ᠋ᠨ ᠰᠤᠳᠠᠰᠤᠨ ᠤ᠋ ᠤᠰᠤ ᠭᠡᠨᠡ ᠂
ᠢᠳᠡᠳᠡᠭ ᠨᠢ ᠪᠣᠯᠪᠠᠯ
ᠪᠤᠭᠤ ᠶ᠋ᠢᠨ ᠰᠢᠨᠳᠠᠰᠤᠨ ᠤ᠋ ᠮᠢᠬᠠ ᠭᠡᠨᠡ ᠃
ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠪᠤᠭᠤ ᠠᠯᠠᠬᠤ ᠳ᠋ᠠᠭᠠᠨ ᠪᠦᠷ ᠯᠡ ᠠᠮᠠᠨ ᠬᠦᠵᠦᠭᠦᠦ ᠶ᠋ᠢ ᠨᠢ ᠬᠠᠷᠪᠤᠵᠤ ᠠᠯᠠᠳᠠᠭ ᠪᠠᠢᠵᠠᠢ᠂ ᠬᠦᠦ ᠨᠢ ᠬᠠᠷᠪᠤᠬᠤ ᠪᠦᠷᠢ ᠨᠢᠭᠡ ᠶ᠋ᠢ ᠤᠨᠠᠭᠠᠳᠠᠭ ᠪᠣᠯᠪᠠᠴᠤ ᠠᠮᠠᠨ ᠬᠦᠵᠦᠭᠦᠦ ᠶ᠋ᠢ ᠨᠢ ᠠᠪᠴᠤ ᠶᠠᠭᠠᠬᠢᠭᠰᠠᠨ ᠴᠦ᠍ ᠴᠢᠳᠠᠳᠠᠭ ᠦᠭᠡᠢ᠂ ᠠᠪᠤ ᠠ᠋ᠴᠠ ᠪᠠᠨ ᠠᠰᠠᠭᠤᠬᠤ ᠳ᠋ᠤ᠌ ᠠᠷᠭᠠ ᠡᠷᠳᠡᠮ ᠢ᠋ᠶ᠋ᠡᠨ ᠬᠡᠯᠡᠵᠦ ᠥᠭᠳᠡᠭ ᠦᠭᠡᠢ ᠭᠡᠨᠡ᠃ ᠡᠢᠮᠦ ᠳ᠋ᠦ᠍᠂ ᠪᠡᠷᠢ ᠨᠢ ᠠᠷᠭᠠ ᠪᠣᠳᠣᠵᠤ ᠪᠠᠢᠭᠠᠳ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠰᠠᠭᠠᠳᠠᠭ ᠢ᠋ ᠳᠠᠯᠳᠠᠭᠤᠷ ᠠᠪᠤᠨ ᠭᠠᠯ ᠳ᠋ᠤ᠌ ᠡᠭᠡᠭᠡᠳ ᠬᠡᠦᠷᠰᠢᠭᠦᠯᠵᠦ ᠲᠠᠯᠪᠢᠵᠤ ᠭᠡᠨᠡ᠃ ᠲᠡᠭᠡᠭᠡᠳ ᠪᠡᠷᠢ ᠨᠢ ᠠᠷᠠᠪᠰᠠᠷ ᠲᠤ᠌ ᠄
– ᠮᠠᠩᠭᠠᠳᠤᠷ ᠠᠪᠤ ᠴᠢᠮᠠ ᠪᠠᠷ ᠭᠥᠷᠥᠭᠡᠰᠦ ᠬᠠᠷᠪᠤᠭᠤᠯᠪᠠᠯ ᠴᠢ ᠠᠮᠠᠨ ᠬᠦᠵᠦᠭᠦᠦ ᠶ᠋ᠢ ᠨᠢ ᠶᠠᠭᠠᠬᠢᠵᠤ ᠬᠠᠷᠪᠤᠳᠠᠭ ᠢ᠋ ᠨᠢ ᠠᠰᠠᠭᠤᠵᠤ ᠠᠪᠤᠭᠠᠳ ᠬᠠᠷᠪᠤ ! ᠭᠡᠵᠦ ᠵᠠᠬᠢᠵᠠᠢ᠃ ᠮᠠᠩᠭᠠᠳᠤᠷ ᠨᠢ ᠬᠣᠢᠲᠤ ᠮᠡᠷᠭᠡᠨ ᠲᠡᠮᠦᠨᠡ ᠬᠦᠦ ᠪᠡᠨ ᠳᠠᠭᠠᠭᠤᠯᠤᠭᠠᠳ ᠠᠪᠠᠯᠠᠨ ᠶᠠᠪᠤᠵᠤ ᠪᠠᠢᠲᠠᠯᠠ᠂ ᠬᠣᠪᠣᠷ ᠲᠣᠬᠢᠶᠠᠯᠳᠤᠳᠠᠭ《ᠮᠡᠯᠡᠬᠡᠢᠲᠦ》ᠭᠡᠭᠴᠢ ᠪᠤᠭᠤ ᠡᠮᠦᠨᠡ ᠡᠴᠡ ᠨᠢ ᠪᠣᠰᠤᠭᠠᠳ ᠳᠤᠲᠠᠭᠠᠬᠤ ᠳ᠋ᠤ᠌᠂ ᠲᠡᠷᠡ ᠰᠠᠭᠠᠳᠠᠭ ᠢ᠋ᠶ᠋ᠠᠨ ᠠᠪᠤᠮᠠᠭᠴᠠ ᠳᠦᠭᠦᠷᠲᠡᠯᠡ ᠨᠢ ᠡᠪᠰᠢᠶᠡᠯᠭᠡᠭᠡᠳ ᠢᠷᠡᠲᠡᠯᠡ ᠬᠠᠲᠠᠵᠤ ᠬᠡᠦᠷᠰᠢᠭᠰᠡᠨ ᠰᠠᠭᠠᠳᠠᠭ ᠨᠢ《ᠲᠠᠱ》ᠭᠡᠳ ᠬᠤᠭᠤᠷᠠᠴᠢᠬᠠᠵᠠᠢ᠃
– ᠵᠠ ᠪᠣᠯᠤᠭᠰᠠᠨ ᠦᠭᠡᠢ ᠂ ᠬᠦᠦ ᠮᠢᠨᠢ ᠬᠦᠦ ᠮᠢᠨᠢ ᠴᠢ ᠬᠠᠷᠪᠤ ! ᠭᠡᠬᠦ ᠳ᠋ᠦ᠍ ᠠᠷᠠᠪᠰᠠᠷ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠵᠠᠬᠢᠭᠰᠠᠨ ᠢ᠋ ᠪᠣᠳᠣᠭᠠᠳ᠄
– ᠶᠠᠭᠠᠬᠢᠵᠤ ᠬᠠᠷᠪᠤᠪᠠᠯ ᠠᠮᠠᠨ ᠬᠦᠵᠦᠭᠦᠦ ᠶ᠋ᠢ ᠨᠢ ᠠᠪᠳᠠᠭ ᠪᠣᠢ ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌᠂ ᠠᠪᠤ ᠨᠢ ᠠᠷᠭᠠ ᠦᠭᠡᠢ᠄
– ᠠ ᠮᠥᠨ ᠪᠠᠢᠨᠠ᠂ ᠠᠷᠭᠠᠲᠤ ᠪᠡᠷᠢ ᠶ᠋ᠢᠨ ᠮᠢᠨᠢ ᠤᠬᠠᠭᠠᠨ ᠪᠠᠢᠨᠠ᠂ ᠠᠮᠠᠨ ᠠᠭᠤᠷ ᠢ᠋ ᠨᠢ ᠪᠠᠷᠢᠵᠤ ᠬᠠᠷᠪᠤ ! ᠭᠡᠵᠦ ᠬᠡᠯᠡᠵᠦ ᠥᠭᠴᠡᠢ᠃ ᠠᠷᠠᠪᠰᠠᠷ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠠᠮᠠᠨ ᠠᠭᠤᠷ ᠢ᠋ ᠨᠢ ᠬᠠᠷᠪᠤᠬᠤ ᠳ᠋ᠤ᠌ ᠰᠠᠭᠠᠳᠠᠭ ᠤ᠋ᠨ ᠰᠦᠮᠪᠦ (ᠰᠤᠮᠤ) ᠶᠠᠭ ᠬᠦᠵᠦᠭᠦᠦ ᠶ᠋ᠢ ᠨᠢ ᠠᠪᠴᠤ (ᠤᠨᠤᠵᠤ) ᠭᠡᠨᠡ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠠᠷᠠᠪᠰᠠᠷ ᠠᠮᠠᠨ ᠬᠦᠵᠦᠭᠦᠦ ᠬᠠᠷᠪᠤᠬᠤ ᠡᠷᠳᠡᠮ ᠲᠡᠢ ᠪᠣᠯᠵᠠᠢ᠂ ᠭᠡᠲᠡᠯᠡ ᠠᠪᠤ ᠨᠢ ᠡᠢᠮᠦ ᠪᠤᠭᠤ ᠪᠠᠨ ᠭᠠᠭᠴᠠᠭᠠᠷ ᠥᠪᠴᠢᠭᠡᠳ ᠪᠣᠷᠴᠠᠯᠠᠵᠤ᠂ ᠬᠠᠲᠠᠭᠰᠠᠨ ᠬᠣᠢᠨᠠ ᠰᠠᠶᠢ ᠮᠢᠬᠠ ᠶ᠋ᠢ ᠨᠢ ᠭᠡᠷ ᠲᠡᠭᠡᠨ ᠠᠪᠴᠢᠷᠠᠳᠠᠭ ᠪᠠᠢᠵᠠᠢ᠃ ᠬᠦᠦ ᠪᠡᠷᠢ ᠬᠣᠶᠠᠷ ᠨᠢ ᠶᠠᠮᠠᠷ ᠪᠤᠭᠤ ᠪᠣᠢ? ᠭᠡᠬᠦ ᠳ᠋ᠦ᠍ ᠶᠠᠭ ᠬᠡᠯᠡᠵᠦ ᠥᠭᠳᠡᠭ ᠦᠭᠡᠢ ᠪᠠᠢᠵᠤ ᠭᠡᠨᠡ ᠃