ᠬᠥᠬᠡ ᠰᠤᠳᠤᠷ ᠤᠨ ᠵᠠᠯᠭᠠᠮᠵᠢ - ᠢᠨᠵᠠᠨᠨᠠᠰᠢ < ᠳᠠᠯᠠᠨ ᠳᠣᠯᠣᠳᠤᠭᠠᠷ ᠪᠦᠯᠦᠭ > Хөх судрын залгамж - Инжинаш < Далан долдугар бүлэг >
290ᠪᠠᠭᠠᠲᠤᠷ ᠵᠠᠯᠠᠭᠤ ᠬᠠᠳ ᠬᠥᠪᠡᠭᠦᠳ ᠢᠯᠠᠭᠤᠭᠰᠠᠨ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠨ ᠬᠤᠷᠢᠮᠯᠠᠵᠤ ᠰᠠᠯᠤᠯᠴᠠᠪᠠᠢ
ᠪᠠᠷᠠᠭᠤᠨ ᠬᠢᠵᠠᠭᠠᠷ ᠤ᠋ᠨ ᠡᠵᠡᠨ ᠪᠠᠲᠤ ᠬᠠᠨ ᠫᠣᠯᠠᠨᠳ᠋ ᠬᠠᠩᠭᠠᠷᠢ ᠶ᠋ᠢ ᠪᠠᠢᠯᠳᠤᠬᠤ ᠪᠠᠷ ᠲᠣᠭᠲᠠᠪᠠᠢ
ᠳᠠᠯᠠᠨ ᠳᠣᠯᠣᠳᠤᠭᠠᠷ ᠪᠦᠯᠦᠭ
ᠰᠢᠷᠬᠠᠴᠢᠨ ᠭᠠᠬᠠᠢ ᠵᠢᠯ ᠂ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠣᠨ ᠂
ᠥᠭᠡᠳᠡᠢ ᠬᠠᠭᠠᠨ ᠲᠠᠪᠢᠨ ᠳᠥᠷᠪᠡᠨ ᠰᠡᠭᠦᠳᠡᠷ ᠲᠡᠢ
ᠪᠠᠭᠠᠲᠤᠷ ᠵᠠᠯᠠᠭᠤ ᠬᠠᠳ ᠬᠥᠪᠡᠭᠦᠳ ᠢᠯᠠᠭᠤᠭᠰᠠᠨ
ᠳᠠᠭᠤᠤ ᠪᠠᠨ ᠳᠠᠭᠤᠯᠠᠨ ᠬᠤᠷᠢᠮᠯᠠᠵᠤ ᠰᠠᠯᠤᠯᠴᠠᠪᠠᠢ
ᠪᠠᠷᠠᠭᠤᠨ ᠬᠢᠵᠠᠭᠠᠷ ᠤ᠋ᠨ ᠡᠵᠡᠨ ᠪᠠᠲᠤ ᠬᠠᠨ ᠫᠣᠯᠠᠨᠳ᠋
ᠬᠠᠩᠭᠠᠷᠢ ᠶ᠋ᠢ ᠪᠠᠢᠯᠳᠤᠬᠤ ᠪᠠᠷ ᠲᠣᠭᠲᠠᠪᠠᠢ
ᠥᠭᠦᠯᠡᠬᠦ ᠢᠨᠦ ᠥᠩᠭᠡᠷᠡᠭᠰᠡᠨ ᠡᠪᠦᠯ ᠣᠷᠣᠰ ᠨᠤᠲᠤᠭ ᠴᠠᠰᠤ ᠮᠥᠰᠥ ᠶᠡᠬᠡ ᠲᠡᠢ ᠲᠤᠯᠠ ᠬᠠᠢᠯ ᠪᠠᠭᠤᠮᠠᠭᠴᠠ ᠳᠠᠷᠤᠢ ᠨᠣᠭᠣᠭᠠ ᠴᠤᠬᠤᠢᠵᠤ ᠠᠳᠤᠭᠤ ᠡᠷᠲᠡ ᠨᠣᠭᠣᠭᠠᠨ ᠳ᠋ᠤᠷ ᠣᠷᠣᠵᠤᠬᠤᠢ᠃ ᠳᠥᠩᠭᠡᠵᠢ ᠵᠢᠷᠭᠤᠭᠠᠨ ᠰᠠᠷᠠ ᠬᠦᠷᠬᠦ ᠲᠡᠢ ᠵᠡᠷᠭᠡ ᠠᠳᠤᠭᠤ ᠤᠰᠤᠨ ᠲᠠᠷᠭᠤ ᠳᠦᠭᠦᠷᠡᠩ ᠠᠪᠴᠤ ᠮᠣᠷᠢ ᠳᠠᠪᠬᠢᠭᠤᠯᠬᠤ ᠰᠠᠢᠨ ᠴᠠᠭ ᠪᠣᠯᠤᠭᠰᠠᠨ ᠲᠤᠯᠠ ᠵᠡᠭᠦᠨ ᠵᠢᠭᠦᠷ ᠦ᠋ᠨ ᠶᠡᠬᠡ ᠴᠡᠷᠢᠭ ᠮᠥᠩᠬᠡ ᠬᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠣᠷᠣᠰ ᠤ᠋ᠨ ᠡᠮᠦᠨᠡᠲᠦ ᠳ᠋ᠦ᠍ᠷ ᠪᠠᠢᠬᠤ ᠺᠡᠯᠢᠽ ( ᠺᠡᠶᠸᠸ ) ᠤᠯᠤᠰ ᠲᠤᠷ ᠴᠥᠮᠥᠷᠡᠨ ᠣᠷᠣᠪᠠ᠃ ᠡᠨᠡ ᠤᠯᠤᠰ ᠤ᠋ᠨ ᠤᠮᠠᠷᠠᠲᠤ ᠬᠢᠯᠢ ᠢᠨᠤ ᠯᠢᠲ᠋ᠤᠤᠸᠠᠨ᠂ ᠡᠮᠦᠨᠡᠲᠦ ᠬᠢᠯᠢ ᠢᠨᠦ ᠺᠡᠷᠪᠡᠲ ᠠᠭᠤᠯᠠ ᠪᠣᠯᠤᠨ ᠫᠦᠯᠦᠰᠢ᠂ ᠰᠢᠯᠬᠠᠢᠲ ᠭᠣᠣᠯ ᠤ᠋ᠨ ᠣᠯᠣᠮ ᠠᠵᠤᠭᠤ᠃ ᠤᠤᠯ ᠠᠨᠤ ᠳ᠋ᠠᠨᠢᠯ ᠸᠠᠷᠢᠶᠠᠺᠡ ᠶ᠋ᠢᠨ ᠣᠷᠣᠰ ᠮᠥᠨ ᠪᠤᠶᠤ᠃ ᠸᠠᠩ ᠠᠨᠤ ᠮᠣᠩᠭᠣᠯᠴᠤᠳ ᠠᠢᠰᠤᠢ ᠭᠡᠮᠡᠨ ᠬᠠᠩᠭᠠᠷᠢ ᠳ᠋ᠤᠷ ᠳᠤᠲᠠᠭᠠᠪᠠ᠃ ᠨᠡᠢᠰᠯᠡᠯ ᠺᠡᠯᠢᠽ ᠬᠣᠲᠠ ᠳ᠋ᠤᠷ ᠬᠣᠴᠣᠷᠤᠨ ᠰᠠᠬᠢᠭᠰᠠᠨ ᠵᠠᠩᠵᠤᠨ ᠳ᠋ᠸᠮᠢᠲ᠋ᠷᠢ ᠬᠦᠩ ᠬᠣᠲᠠ ᠪᠣᠢ ᠪᠥᠭᠡᠰᠦ ᠠᠮᠢ ᠪᠣᠢ᠂ ᠬᠣᠲᠠ ᠠᠪᠲᠠᠪᠠᠰᠤ ᠠᠮᠢ ᠠᠪᠲᠠᠬᠤ ᠪᠣᠯᠠᠢ ᠭᠡᠮᠡᠨ ᠴᠡᠷᠢᠭ ᠦ᠋ᠨ ᠠᠷᠠᠳ ᠢ᠋ᠶ᠋ᠠᠨ ᠳᠠᠢᠴᠢᠯᠠᠨ ᠳᠥᠷᠪᠡᠨ ᠡᠭᠡᠯᠵᠢ ᠪᠡᠷ ᠬᠣᠲᠠ ᠶ᠋ᠢ ᠰᠠᠬᠢᠵᠤ ᠮᠥᠩᠬᠡ ᠬᠠᠨ ᠲᠠᠢ ᠤᠳᠠᠭᠠᠨ ᠡᠰᠡᠷᠭᠦᠴᠡᠯᠳᠦᠬᠦ ᠪᠡᠷ ᠪᠡᠯᠡᠳᠬᠡᠪᠡ᠃ ᠮᠥᠩᠬᠡ ᠬᠠᠨ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠷ ᠬᠣᠲᠠ ᠶ᠋ᠢ ᠪᠦᠰᠡᠯᠡᠵᠦ ᠲᠠᠯᠪᠢᠭᠠᠳ ᠪᠠᠢᠯᠳᠤᠬᠤ ᠶ᠋ᠢ ᠶᠠᠭᠠᠷᠠᠭᠰᠠᠨ ᠦᠭᠡᠢ ᠬᠣᠶᠠᠷ ᠰᠠᠯᠠᠭᠠ ᠴᠡᠷᠢᠭ ᠶᠠᠪᠤᠭᠤᠯᠵᠤ ᠣᠢᠷᠠ ᠪᠣᠢ ᠬᠣᠲᠠ ᠪᠠᠯᠭᠠᠰᠤᠨ ᠢ᠋ ᠡᠵᠡᠯᠡᠨ ᠠᠪᠴᠤ ᠠᠮᠤ ᠬᠦᠨᠡᠰᠦ ᠪᠡᠨ ᠨᠥᠬᠥᠪᠥᠷᠢᠯᠡᠨ ᠺᠡᠯᠢᠽ ᠬᠣᠲᠠ ᠶ᠋ᠢ ᠥᠨᠦᠴᠢᠷᠡᠭᠦᠯᠦᠨ ᠦᠯᠡᠳᠡᠭᠡᠵᠦ ᠳ᠋ᠸᠮᠢᠲ᠋ᠷᠢ ᠬᠦᠩ ᠦ᠋ᠨ ᠬᠡᠷᠬᠢᠬᠦ ᠶ᠋ᠢ ᠦᠵᠡᠰᠦᠭᠡᠢ ᠭᠡᠮᠡᠨ ᠬᠦᠯᠢᠶᠡᠪᠡ᠃
ᠮᠣᠩᠭᠣᠯᠴᠤᠳ ᠭᠡᠨᠡᠳᠲᠡ ᠣᠯᠠᠰᠢᠷᠠᠵᠤ ᠭᠡᠨᠡᠳᠲᠡ ᠴᠥᠭᠡᠬᠡᠷᠡᠬᠦᠢ ᠳ᠋ᠦ᠍ᠷ ᠳ᠋ᠸᠮᠢᠲ᠋ᠷᠢ ᠬᠦᠩ ᠰᠡᠵᠢᠭᠯᠡᠵᠦ ᠬᠥᠮᠦᠨ ᠭᠠᠷᠭᠠᠨ ᠳᠠᠩᠨᠠᠭᠤᠯᠪᠠᠰᠤ ᠮᠣᠩᠭᠣᠯᠴᠤᠳ ᠤ᠋ᠨ ᠣᠯᠠᠩᠬᠢ ᠴᠡᠷᠢᠭ ᠢᠨᠤ ᠣᠢᠷᠠ ᠬᠠᠪᠢ ᠶ᠋ᠢᠨ ᠬᠣᠲᠠ ᠪᠠᠯᠭᠠᠰᠤᠨ ᠢ᠋ ᠡᠵᠡᠯᠡᠬᠦ ᠪᠡᠷ ᠤᠳᠤᠭᠠᠳ᠂ ᠭᠠᠭᠴᠠ ᠮᠥᠩᠬᠡ ᠬᠠᠨ ᠤ᠋ ᠴᠥᠭᠡᠨ ᠴᠡᠷᠢᠭ ᠬᠦᠷᠢᠶᠡ ᠪᠡᠨ ᠰᠠᠬᠢᠨ ᠬᠣᠴᠣᠷᠪᠠᠢ ᠭᠡᠮᠡᠨ ᠮᠡᠳᠡᠭᠦᠯᠪᠡ᠃ ᠳ᠋ᠸᠮᠢᠲ᠋ᠷᠢ ᠣᠯᠠᠨ ᠵᠠᠩᠵᠤᠨ ᠲᠦᠰᠢᠮᠡᠳ ᠢ᠋ᠶ᠋ᠡᠨ ᠴᠤᠭᠯᠠᠭᠤᠯᠤᠨ ᠵᠥᠪᠳᠡᠪᠡᠰᠦ ᠴᠥᠮ ᠮᠣᠩᠭᠣᠯᠴᠤᠳ ᠤ᠋ᠨ ᠪᠤᠰᠤ ᠲᠡᠰᠢ ᠮᠣᠷᠳᠠᠭᠰᠠᠨ ᠵᠠᠪ ᠢ ᠠᠰᠢᠭᠯᠠᠨ ᠰᠥᠨᠢ ᠪᠡᠷ ᠲᠡᠭᠦᠨ ᠦ᠌ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠳᠠᠷᠤᠷᠠ ᠣᠴᠢᠪᠠᠰᠤ ᠠᠰᠢᠭ ᠣᠯᠵᠤ ᠪᠣᠯᠤᠮᠤᠢ ᠬᠡᠮᠡᠬᠦ ᠲᠤᠯᠠ ᠳ᠋ᠸᠮᠢᠲ᠋ᠷᠢ ᠬᠦᠩ ᠮᠣᠩᠭᠣᠯᠴᠤᠳ ᠤ᠋ᠨ ᠠᠷᠭᠠᠨ ᠳ᠋ᠤᠷ ᠣᠷᠣᠬᠤ ᠡᠴᠡ ᠪᠣᠯᠭᠣᠮᠵᠢᠯᠠᠨ ᠳᠠᠬᠢᠨ ᠲᠤᠷᠰᠢᠭᠤᠯᠪᠠᠰᠤ ᠦᠨᠡᠨ ᠪᠣᠯᠤᠭᠰᠠᠨ ᠳ᠋ᠤᠷ᠂ ᠰᠢᠯᠢᠳᠡᠭ ᠴᠡᠷᠢᠭ ᠲᠦᠮᠡ ᠲᠠᠪᠤᠨ ᠮᠢᠩᠭᠠ ᠠᠪᠴᠤ ᠭᠠᠬᠠᠢ ᠴᠠᠭ ᠲᠤᠷ ᠮᠣᠷᠳᠠᠵᠤ᠂ ᠮᠥᠩᠬᠡ ᠬᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠳᠠᠷᠤᠷᠠ ᠬᠦᠷᠴᠦ ᠢᠷᠡᠬᠦᠢ ᠳ᠋ᠦ᠍ᠷ ᠢᠪ ᠴᠢᠪ ᠴᠢᠮᠡᠭᠡ ᠠᠨᠢᠷ ᠦᠭᠡᠢ᠃ ᠭᠠᠪᠢᠶᠠ ᠪᠦᠲᠦᠪᠡᠢ ᠭᠡᠮᠡᠨ ᠳᠣᠲᠣᠷᠠ ᠪᠠᠨ ᠪᠣᠳᠣᠨ ᠳᠠᠷᠤᠨ ᠣᠷᠣᠰᠤᠭᠠᠢ ᠬᠡᠮᠡᠲᠡᠯᠡ ᠭᠠᠯ ᠭᠡᠭᠡ ᠮᠠᠨᠳᠤᠵᠤ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠬᠠᠭᠠᠯᠭᠠ ᠨᠡᠭᠡᠭᠡᠭᠳᠡᠵᠦ ᠴᠥᠭᠡᠨ ᠴᠡᠷᠢᠭ ᠵᠢᠭᠰᠠᠨ ᠭᠠᠷᠴᠤ ᠢᠷᠡᠪᠡ᠃ ᠮᠣᠩᠭᠣᠯᠴᠤᠳ ᠪᠠᠰᠠ ᠶᠠᠮᠠᠷ ᠠᠷᠭᠠ ᠤᠬᠠᠭᠠᠨ ᠭᠠᠷᠭᠠᠵᠤ ᠪᠠᠢᠬᠤ ᠮᠠᠭᠠᠳ ᠭᠡᠮᠡᠨ ᠣᠷᠣᠬᠤ ᠡᠭᠡᠬᠦ ᠶ᠋ᠢ ᠲᠦᠳᠡᠭᠡᠯᠵᠡᠨ ᠠᠲᠠᠯᠠ᠂ ᠵᠢᠭᠦᠷ ᠦ᠋ᠨ ᠵᠠᠩᠵᠤᠨ ᠪᠡᠹᠥ᠋ᠯᠤᠸᠸ ᠴᠡᠷᠢᠭ ᠢ᠋ᠶ᠋ᠡᠨ ᠳᠣᠬᠢᠨ ᠪᠠᠢᠯᠳᠤᠷᠠ ᠭᠠᠷᠤᠭᠰᠠᠨ ᠳ᠋ᠤᠷ᠂ ᠮᠣᠩᠭᠣᠯᠴᠤᠳ ᠰᠠᠨᠠᠮᠠᠰᠠᠷ ᠦᠭᠡᠢ ᠡᠴᠡ ᠮᠠᠰᠢ ᠠᠶᠤᠨ ᠰᠣᠴᠢᠵᠤ ᠶᠡᠬᠡᠳᠡ ᠦᠢᠮᠡᠯᠳᠦᠨ ᠳᠠᠢᠰᠤᠨ ᠬᠦᠷᠢᠶᠡ ᠳᠠᠷᠤᠷᠠ ᠢᠷᠡᠪᠡ ᠭᠡᠮᠡᠨ ᠪᠠᠷᠬᠢᠷᠠᠯᠳᠤᠨ ᠪᠦᠬᠦᠢ ᠳ᠋ᠦ᠍ᠷ ᠪᠠᠹᠦᠢᠯᠤᠸᠸ ᠦᠭᠡ ᠳᠠᠭᠤᠨ ᠦᠭᠡᠢ ᠮᠣᠷᠢ ᠳᠠᠪᠬᠢᠯᠤᠨ ᠣᠷᠣᠭᠰᠠᠨ ᠳ᠋ᠤᠷ ᠨᠢᠭᠡᠨ ᠵᠠᠯᠠᠭᠤ ᠵᠠᠩᠵᠤᠨ ᠤᠷᠲᠤ ᠵᠢᠳᠠ ᠰᠤᠩᠭᠠᠨ ᠲᠣᠰᠣᠨ ᠠᠪᠬᠤ ᠶ᠋ᠢ ᠭᠠᠯ ᠤ᠋ᠨ ᠭᠡᠷᠡᠯ ᠳᠣᠣᠷᠠ ᠦᠵᠡᠪᠡᠰᠦ ᠨᠠᠰᠤ ᠭᠤᠴᠢ ᠰᠢᠬᠠᠵᠤ᠂ ᠪᠡᠶᠡ ᠥᠨᠳᠥᠷ᠂ ᠮᠥᠷᠥ ᠥᠷᠭᠡᠨ᠂ ᠰᠢᠷᠭᠠ ᠮᠣᠷᠢ ᠤᠨᠤᠵᠤ᠂ ᠰᠦᠷ ᠭᠡᠷᠡᠯ ᠠᠳᠠᠪᠠᠰᠢ ᠭᠠᠢᠬᠠᠮᠠᠰᠢᠭ᠋᠃ ᠪᠠᠹᠦ᠋ᠯᠦᠸ᠋ᠸ ᠯᠤᠭᠠ ᠬᠡᠳᠦᠨ ᠤᠳᠠᠭᠠ ᠵᠦᠷᠢᠯᠳᠤᠭᠰᠠᠨ ᠳ᠋ᠤᠷ ᠵᠢᠳᠠ ᠶ᠋ᠢᠨ ᠤᠯᠠᠷᠢᠨ ᠢᠷᠡᠬᠦ ᠢᠨᠦ ᠴᠠᠰᠤ ᠯᠠᠪᠰᠢᠬᠤᠢ ᠳ᠋ᠤᠷ ᠠᠳᠠᠯᠢ ᠳ᠋ᠤᠷ ᠪᠠᠹᠦ᠋ᠯᠦᠸ᠋ᠸ ᠬᠡᠳᠦᠢ ᠴᠢᠳᠠᠯ ᠶᠡᠬᠡᠲᠡᠢ ᠪᠣᠯᠪᠠᠴᠤ ᠬᠣᠷᠢᠭᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠤ ᠪᠤᠷᠤᠭᠤᠯᠠᠨ ᠶᠠᠪᠤᠬᠤᠢ ᠳ᠋ᠤᠷ ᠳ᠋ᠸᠮᠢᠲ᠋ᠷᠢ ᠬᠦᠩ ᠥᠮᠥᠭᠯᠡᠷᠡ ᠢᠷᠡᠵᠦ : 《ᠮᠣᠩᠭᠣᠯ ᠤ᠋ᠨ ᠵᠠᠩᠵᠤᠨ ᠵᠢᠳᠠᠨ ᠤ᠋ ᠦᠵᠦᠭᠦᠷ ᠨᠡᠷᠡ ᠪᠡᠨ ᠲᠡᠮᠳᠡᠭᠯᠡᠭᠲᠦᠨ ! 》ᠭᠡᠮᠡᠨ ᠳᠠᠭᠤᠳᠠᠬᠤ ᠲᠠᠢ ᠵᠡᠷᠭᠡ ᠨᠢᠭᠡᠨᠲᠡ ᠵᠢᠳᠠᠯᠠᠨ ᠢᠷᠡᠬᠦᠢ ᠳ᠋ᠦ᠍ᠷ ᠮᠣᠩᠭᠣᠯ ᠤ᠋ᠨ ᠵᠠᠩᠵᠤᠨ ᠪᠠᠹᠦ᠋ᠯᠦᠸ᠋ᠸ ᠢ᠋ ᠣᠷᠬᠢᠵᠤ ᠥᠮᠥᠭᠯᠡᠷᠡ ᠢᠷᠡᠬᠦ ᠵᠠᠩᠵᠤᠨ ᠤ᠋ ᠵᠢᠳᠠ ᠶ᠋ᠢ ᠲᠣᠰᠣᠨ ᠠᠪᠴᠤ ᠦᠵᠡᠪᠡᠰᠦ᠂ ᠢᠷᠡᠬᠦ ᠵᠠᠩᠵᠤᠨ ᠨᠠᠰᠤ ᠵᠠᠯᠠᠭᠤ ᠪᠡᠶᠡ ᠥᠨᠳᠥᠷ᠂ ᠭᠡᠵᠢᠭᠡ ᠦᠰᠦ ᠰᠢᠷᠠ ᠪᠣᠯᠪᠠᠴᠤ ᠬᠡᠪ ᠲᠡᠢ᠃ ᠮᠣᠩᠭᠣᠯ ᠤ᠋ᠨ ᠵᠠᠩᠵᠤᠨ ᠦᠭᠡ ᠳᠠᠭᠤᠨ ᠦᠭᠡᠢ ᠲᠣᠰᠣᠨ ᠠᠪᠴᠤ ᠪᠠᠢᠯᠳᠤᠬᠤᠢ ᠳ᠋ᠤᠷ ᠣᠷᠣᠰ ᠵᠠᠩᠵᠤᠨ ᠪᠠᠹᠦ᠋ᠯᠦᠸ᠋ᠸ ᠪᠠᠰᠠ ᠮᠣᠷᠢ ᠪᠤᠴᠠᠭᠠᠨ ᠴᠠᠪᠴᠢᠨ ᠢᠷᠡᠪᠡ᠃ ᠮᠣᠩᠭᠣᠯ ᠵᠠᠩᠵᠤᠨ ᠭᠠᠭᠴᠠᠭᠠᠷ ᠬᠣᠶᠠᠷ ᠡᠷᠡ ᠶ᠋ᠢ ᠣᠭᠲᠣ ᠬᠡᠷᠡᠭᠰᠡᠬᠦ ᠦᠭᠡᠢ ᠪᠠᠢᠯᠳᠤᠵᠤ ᠪᠦᠬᠦᠢ ᠳ᠋ᠦ᠍ᠷ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢᠨ ᠡᠮᠦᠨᠡ ᠭᠠᠯ ᠭᠡᠭᠡ ᠮᠠᠨᠳᠤᠵᠤ ᠪᠠᠮᠪᠠᠷ ᠲᠦᠳᠡᠭ ᠵᠡᠷᠭᠡᠪᠡᠷ ᠬᠡᠷᠡᠯᠳᠦᠬᠦ ᠢᠨᠦ ᠡᠳᠦᠷ ᠮᠡᠲᠦ ᠪᠣᠯᠪᠠᠢ᠃ ᠵᠡᠭᠦᠳᠦᠨ ᠳ᠋ᠦ᠍ᠷ ᠠᠭᠰᠠᠨ ᠮᠣᠩᠭᠣᠯᠴᠤᠳ ᠶᠠᠭᠠᠷᠠᠯᠳᠤᠨ ᠵᠡᠪᠰᠡᠭ ᠢ᠋ᠶ᠋ᠡᠨ ᠠᠪᠤᠯᠴᠠᠨ ᠮᠣᠷᠢ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠠᠳ ᠵᠠᠭᠤ ᠵᠠᠭᠤ᠂ ᠠᠷᠪᠠ ᠠᠷᠪᠠ ᠪᠠᠷ ᠳᠠᠪᠬᠢᠯᠳᠤᠨ ᠭᠠᠷᠴᠤ ᠢᠷᠡᠨ ᠦᠵᠡᠪᠡᠰᠦ᠂ ᠮᠥᠩᠬᠡ ᠬᠠᠨ ᠭᠠᠭᠴᠠᠭᠠᠷ ᠬᠣᠶᠠᠷ ᠶᠡᠬᠡ ᠡᠷᠡ ᠶ᠋ᠢ ᠬᠦᠯᠢᠶᠡᠨ ᠠᠪᠴᠤ ᠪᠠᠢᠯᠳᠤᠬᠤ ᠲᠤᠯᠠ ᠪᠦᠭᠦᠳᠡᠭᠡᠷ ᠠᠶᠤᠯᠳᠤᠵᠤ ᠲᠤᠰᠠᠯᠠᠷᠠ ᠢᠷᠠᠪᠠᠰᠤ ᠬᠦᠷᠢᠶᠡᠨ ᠡᠴᠡ ᠬᠠᠷᠠᠩᠭᠠ ᠴᠣᠬᠢᠵᠤ ᠴᠡᠷᠢᠭ ᠬᠤᠷᠢᠶᠠᠬᠤ ᠳᠣᠬᠢᠶᠠ ᠥᠭᠪᠡ᠃ ᠮᠥᠩᠬᠡ ᠬᠠᠨ ᠮᠣᠷᠢ ᠪᠠᠨ ᠲᠠᠲᠠᠵᠤ ᠄ 《ᠪᠠᠢᠯᠳᠤᠰᠤᠭᠠᠢ ᠬᠡᠮᠡᠪᠡᠰᠦ ᠡᠳᠦᠷ ᠪᠣᠯᠲᠤᠭᠠᠢ ! 》ᠭᠡᠮᠡᠨ ᠴᠡᠷᠢᠭ ᠢ᠋ᠶ᠋ᠡᠨ ᠬᠣᠷᠢᠶᠠᠨ ᠠᠯᠭᠤᠷ ᠢ᠋ᠶ᠋ᠠᠷ ᠬᠦᠷᠢᠶᠡᠨ ᠳ᠋ᠡᠭᠡᠨ ᠣᠷᠣᠪᠠ᠃ ᠳ᠋ᠸᠮᠢᠲ᠋ᠷᠢ ᠶ᠋ᠢᠨ ᠬᠦᠷᠢᠶᠡ ᠳᠠᠷᠤᠬᠤ ᠬᠡᠷᠡᠭ ᠪᠦᠲᠦᠭᠰᠡᠨ ᠦᠭᠡᠢ ᠳ᠋ᠦ᠍ᠷ ᠭᠡᠮᠰᠢᠬᠦ ᠪᠣᠯᠪᠠᠴᠤ᠂ ᠵᠠᠪᠰᠢᠶᠠᠨ ᠢ᠋ᠶ᠋ᠠᠷ ᠴᠡᠷᠢᠭ ᠮᠣᠷᠢ ᠡᠨᠳᠡᠭᠳᠡᠯ ᠦᠭᠡᠢ ᠳ᠋ᠦ᠍ᠷ ᠪᠡᠶᠡᠰᠴᠦ ᠳᠣᠲᠣᠷᠠ ᠪᠠᠨ ᠮᠣᠩᠭᠣᠯ ᠤ᠋ᠨ ᠵᠠᠩᠵᠤᠨ ᠤ᠋ ᠪᠠᠭᠠᠲᠤᠷ ᠢ᠋ ᠭᠠᠢᠬᠠᠨ ᠬᠣᠲᠠᠨ ᠳ᠋ᠠᠭᠠᠨ ᠪᠤᠴᠠᠪᠠ᠃
ᠮᠥᠩᠬᠡ ᠬᠠᠨ ᠴᠠᠴᠠᠷ ᠲᠤᠷ ᠰᠠᠭᠤᠵᠤ ᠴᠡᠷᠢᠭ ᠬᠤᠷᠢᠶᠠᠬᠤ ᠳᠣᠬᠢᠶᠠ ᠲᠠᠯᠪᠢᠭᠰᠠᠨ ᠤᠴᠢᠷ ᠢ᠋ ᠠᠰᠠᠭᠤᠪᠠᠰᠤ ᠶᠡᠬᠡ ᠵᠠᠩᠵᠤᠨ ᠤᠭᠳᠠᠷ ᠬᠠᠨ ᠤ᠋ ᠡᠨᠳᠡᠭᠳᠡᠯ ᠭᠠᠷᠬᠤ ᠶ᠋ᠢ ᠪᠣᠳᠣᠵᠤ ᠬᠠᠷᠠᠩᠭᠠ ᠴᠣᠬᠢᠭᠤᠯᠤᠭᠰᠠᠨ ᠢ᠋ ᠮᠡᠳᠡᠭᠦᠯᠵᠦ᠂ ᠬᠠᠨ ᠤ᠋ ᠬᠢᠨᠠᠮᠠᠭᠠᠢ ᠠ᠋ᠴᠠ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠪᠠᠢᠴᠠᠭᠠᠷᠠ ᠭᠠᠷᠴᠤ ᠳ᠋ᠧᠮᠢᠲ᠋ᠷᠢ ᠬᠦᠩ ᠦ᠋ᠨ ᠬᠦᠷᠢᠶᠡ ᠳᠠᠷᠤᠶᠠ ᠢᠷᠡᠭᠰᠡᠨ ᠴᠡᠷᠢᠭ ᠢ᠋ ᠲᠣᠰᠴᠤ ᠪᠠᠢᠯᠳᠤᠭᠠᠳ ᠬᠦᠷᠢᠶᠡ ᠳᠦᠭᠦᠷᠡᠩ ᠬᠥᠮᠦᠰ ᠦ᠋ᠨ ᠠᠮᠢ ᠶ᠋ᠢ ᠠᠪᠤᠷᠠᠪᠠ ᠭᠡᠮᠡᠨ ᠪᠠᠶᠠᠰᠤᠯᠴᠠᠵᠤ ᠤᠯᠠᠮ ᠴᠢᠩᠳᠠᠯᠠᠨ ᠰᠡᠷᠭᠡᠢᠯᠡᠬᠦ ᠪᠣᠯᠪᠠᠢ᠃
ᠲᠡᠭᠦᠨ ᠡᠴᠡ ᠣᠷᠣᠰ ᠤ᠋ᠳ ᠳᠣᠲᠣᠷᠠ ᠪᠠᠨ ᠮᠣᠩᠭᠣᠯᠴᠤᠳ ᠤ᠋ᠨ ᠴᠡᠷᠢᠭ ᠵᠠᠩᠵᠤᠨ ᠪᠠᠭᠠᠲᠤᠷ ᠴᠢᠭᠢᠷᠠᠭ ᠭᠡᠮᠡᠨ ᠪᠣᠯᠭᠣᠮᠵᠢᠯᠠᠵᠤ ᠭᠠᠷᠴᠤ ᠢᠷᠡᠬᠦ ᠬᠥᠮᠦᠨ ᠦᠭᠡᠢ ᠪᠣᠯᠵᠤ ᠭᠠᠭᠴᠠ ᠬᠣᠲᠠ ᠪᠠᠨ ᠪᠡᠬᠢᠯᠡᠨ ᠰᠠᠬᠢᠬᠤ ᠪᠣᠯᠪᠠᠢ᠃ ᠲᠡᠢᠨ ᠠᠭᠠᠳ ᠨᠢᠭᠡᠨ ᠬᠠᠷᠠᠩᠭᠤᠢ ᠶᠡᠬᠡ ᠪᠣᠷᠣᠭᠠᠨ ᠲᠠᠢ ᠰᠥᠨᠢ ᠶ᠋ᠢ ᠠᠰᠢᠭᠯᠠᠨ ᠮᠥᠩᠬᠡ ᠬᠠᠨ ᠴᠡᠷᠢᠭ ᠭᠠᠷᠭᠠᠨ ᠬᠣᠲᠠ ᠶ᠋ᠢ ᠪᠠᠢᠯᠳᠤᠭᠴᠢ ᠪᠣᠯᠵᠤ ᠳᠥᠷᠪᠡᠨ ᠲᠠᠯᠠ ᠠ᠋ᠴᠠ ᠵᠡᠷᠭᠡᠪᠡᠷ ᠬᠠᠰᠬᠢᠷᠤᠨ ᠦᠢᠮᠡᠯᠳᠦᠬᠦᠢ ᠳ᠋ᠦ᠍ᠷ ᠬᠣᠲᠠ ᠰᠠᠬᠢᠭᠴᠢᠳ ᠮᠣᠩᠭᠣᠯᠴᠤᠳ ᠤ᠋ᠨ ᠣᠢᠷᠠᠲᠤᠭᠰᠠᠨ ᠡᠰᠡᠬᠦ ᠶ᠋ᠢ ᠮᠡᠳᠡᠲᠦᠭᠡᠢ ᠭᠡᠮᠡᠨ ᠲᠠᠰᠤᠷᠠᠰᠢ ᠦᠭᠡᠢ ᠳᠣᠭᠣᠭᠰᠢ ᠭᠠᠯ ᠬᠠᠶᠠᠵᠤ ᠮᠣᠳᠣ ᠲᠦᠯᠡᠭᠡ ᠪᠡᠨ ᠴᠥᠮ ᠭᠦᠢᠴᠡᠭᠡᠵᠦᠬᠦᠢ᠃ ᠲᠡᠳᠦᠢ ᠳ᠋ᠦ᠍ᠷ ᠮᠥᠩᠬᠡ ᠬᠠᠨ ᠰᠠᠶᠢ ᠬᠡᠰᠡᠭ ᠰᠠᠢᠨ ᠡᠷᠡᠰ ᠢ᠋ ᠰᠢᠯᠭᠠᠨ ᠠᠪᠴᠤ ᠬᠣᠲᠠ ᠶ᠋ᠢᠨ ᠶᠡᠬᠡ ᠤᠰᠤᠲᠤ ᠭᠣᠣ ᠶ᠋ᠢ ᠬᠦᠪᠦᠵᠦ ᠭᠡᠲᠦᠯᠦᠭᠡᠳ ᠬᠡᠷᠡᠮ ᠥᠭᠡᠳᠡ ᠮᠠᠴᠤᠭᠤᠯᠬᠤ ᠶ᠋ᠢᠨ ᠬᠠᠮᠲᠤ ᠰᠢᠷᠣᠢ ᠴᠢᠯᠠᠭᠤ ᠪᠠᠷ ᠭᠣᠣ ᠳᠦᠭᠦᠷᠭᠡᠵᠦ ᠬᠣᠲᠠ ᠡᠪᠳᠡᠬᠦ ᠨᠦᠳᠦᠭᠦᠷ ᠰᠢᠳᠦᠭᠦᠷ ᠢ᠋ᠶ᠋ᠡᠨ ᠬᠣᠲᠠ ᠣᠢᠷᠠᠲᠤᠭᠤᠯᠤᠨ ᠲᠠᠯᠪᠢᠵᠤ ᠬᠣᠲᠠ ᠰᠠᠬᠢᠬᠤ ᠬᠥᠮᠦᠰ ᠦ᠋ᠨ ᠠᠩᠯᠬᠠᠷᠤᠯ ᠢ ᠲᠠᠲᠠᠵᠤ ᠪᠦᠬᠦᠢ ᠳ᠋ᠦ᠍ᠷ ᠬᠡᠳᠦᠨ ᠰᠠᠢᠨ ᠡᠷᠡ ᠨᠢᠭᠡᠨᠲᠡ ᠮᠠᠴᠤᠵᠤ ᠭᠠᠷᠤᠭᠠᠳ ᠳᠣᠭᠣᠭᠰᠢ ᠳᠡᠭᠡᠰᠦ ᠲᠠᠯᠪᠢᠭᠰᠠᠨ ᠳ᠋ᠤᠷ ᠬᠥᠮᠦᠰ ᠲᠠᠭᠠᠯᠴᠠᠨ ᠭᠠᠷᠴᠤ ᠢᠷᠡᠭᠡᠳ ᠨᠢᠭᠡᠨᠲᠡ ᠪᠠᠷᠬᠢᠷᠠᠨ ᠴᠠᠪᠴᠢᠬᠤᠢ ᠳ᠋ᠤᠷ ᠬᠣᠲᠠ ᠰᠠᠬᠢᠬᠤ ᠴᠡᠷᠢᠭ ᠦ᠋ᠳ ᠲᠠᠲ᠋ᠠᠷᠴᠤᠳ ᠨᠢᠭᠡᠨᠲᠡ ᠬᠣᠲᠠᠨ ᠳ᠋ᠤᠷ ᠣᠷᠣᠵᠤ ᠢᠷᠡᠪᠡ ᠭᠡᠮᠡᠨ ᠪᠠᠷᠬᠢᠷᠠᠵᠤ ᠰᠠᠮᠠᠭᠤᠷᠠᠨ ᠳᠤᠲᠠᠭᠠᠬᠤᠢ ᠳ᠋ᠤᠷ ᠰᠠᠶᠢ ᠵᠦᠭ ᠵᠦᠭ ᠡᠴᠡ ᠱᠠᠲᠤ ᠲᠠᠯᠪᠢᠵᠤ ᠠᠪᠠᠷᠢᠯᠳᠤᠨ ᠭᠠᠷᠴᠤ ᠂ ᠦᠷ ᠦ᠋ᠨ ᠦᠶᠡ ᠳ᠋ᠦ᠍ᠷ ᠬᠣᠲᠠ ᠶ᠋ᠢ ᠡᠵᠡᠯᠡᠪᠡ᠃
ᠳ᠋ᠸᠮᠢᠲ᠋ᠷᠢ ᠬᠦᠩ ᠬᠡᠳᠦᠢ ᠪᠠᠭᠠᠲᠤᠷ ᠪᠣᠯᠪᠠᠴᠤ ᠠᠯᠢ ᠠᠯᠢᠨ ᠢ᠋ᠶ᠋ᠠᠨ ᠴᠤ᠌ ᠬᠠᠮᠠᠭᠠᠯᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠠᠮᠢᠳᠤ ᠪᠠᠷᠢᠭᠳᠠᠪᠠ᠃ ᠮᠥᠩᠬᠡ ᠬᠠᠨ ᠠᠷᠤᠤᠬᠠᠨ ᠰᠠᠢᠨ ᠡᠷᠡ ᠭᠡᠮᠡᠨ ᠬᠠᠢᠷᠠᠯᠠᠨ ᠠᠮᠢ ᠶ᠋ᠢ ᠠᠨᠤ ᠠᠪᠤᠷᠠᠰᠤᠭᠠᠢ ᠭᠡᠮᠡᠨ ᠪᠣᠳᠣᠵᠤ ᠰᠦᠷᠳᠡᠭᠦᠯᠵᠦ: 《ᠡᠰᠡᠷᠭᠦᠴᠡᠭᠰᠡᠳ ᠢ᠋ ᠬᠢᠳᠤᠮᠤᠢ ᠬᠡᠮᠡᠭᠰᠡᠨ ᠢ᠋ ᠦᠯᠦ ᠮᠡᠳᠡᠮᠦᠢ ᠤᠤ ? ᠡᠳᠦᠭᠡ ᠬᠠᠰ ᠲᠠᠨᠠ ᠶ᠋ᠢ ᠢᠯᠭᠠᠬᠤ ᠦᠭᠡᠢ ᠴᠥᠮ ᠢ᠋ ᠬᠢᠳᠤᠮᠤᠢ᠃ ᠴᠢᠮᠠ ᠳ᠋ᠤᠷ ᠶᠠᠷᠢᠬᠤ ᠦᠭᠡ ᠪᠠᠰᠠ ᠪᠣᠢ ᠪᠤᠶᠤ ? 》ᠬᠡᠮᠡᠬᠦᠢ ᠳ᠋ᠦ᠍ᠷ ᠳ᠋ᠸᠮᠢᠲ᠋ᠷᠢ ᠥᠴᠢᠷᠦᠨ :《ᠴᠡᠷᠢᠭ ᠠᠷᠠᠳ ᠪᠣᠯᠤᠭᠴᠢ ᠡᠵᠡᠨ ᠦ᠌ ᠵᠠᠷᠯᠢᠭ ᠢ᠋ᠶ᠋ᠠᠷ ᠬᠣᠲᠠ ᠶ᠋ᠢ ᠰᠠᠬᠢᠵᠤ ᠰᠢᠳᠤᠷᠭᠤ ᠶ᠋ᠢ ᠭᠦᠢᠴᠡᠳᠬᠡᠬᠦ ᠠᠨᠤ ᠬᠤᠪᠢ ᠪᠣᠯᠠᠢ᠃ ᠡᠳᠦᠭᠡ ᠬᠦᠴᠦᠨ ᠬᠦᠷᠦᠯᠴᠡᠬᠦ ᠦᠭᠡᠢ ᠬᠣᠲᠠ ᠶ᠋ᠢ ᠠᠯᠳᠠᠭᠰᠠᠨ ᠲᠤᠯᠠ ᠮᠢᠨᠦ ᠦᠬᠦᠬᠦ ᠢᠨᠤ ᠵᠦᠢ ᠪᠣᠯᠠᠢ᠃ ᠭᠠᠭᠴᠠᠬᠦ ᠬᠣᠲᠠ ᠶ᠋ᠢᠨ ᠠᠷᠠᠳ ᠶᠠᠯᠠ ᠦᠭᠡᠢ ᠲᠤᠯᠠ ᠦᠯᠦ ᠬᠥᠨᠥᠭᠡᠬᠦ ᠶ᠋ᠢ ᠬᠦᠰᠡᠮᠦᠢ 》 ᠬᠡᠮᠡᠪᠡ᠃ ᠮᠥᠩᠬᠡ ᠬᠠᠨ ᠴᠠᠪᠴᠢᠬᠤ ᠶ᠋ᠢ ᠲᠦᠷ ᠬᠣᠢᠰᠢᠯᠠᠭᠤᠯᠵᠤ ᠬᠣᠲᠠ ᠶ᠋ᠢᠨ ᠴᠡᠷᠢᠭ ᠠᠷᠠᠳ ᠡᠰᠡᠷᠭᠦᠴᠡᠬᠦ ᠪᠡᠨ ᠵᠣᠭᠰᠣᠵᠤ ᠵᠡᠪᠰᠡᠭ ᠲᠠᠯᠪᠢᠭᠰᠠᠨ ᠪᠦᠬᠦᠨ ᠢ᠋ ᠬᠢᠳᠤᠵᠤ ᠪᠣᠯᠬᠤ ᠦᠭᠡᠢ ᠭᠡᠮᠡᠨ ᠬᠠᠲᠠᠭᠤ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠬᠣᠲᠠ ᠶ᠋ᠢ ᠥᠷᠥᠰᠢᠶᠡᠪᠡ᠃
ᠲᠡᠳᠦᠢ ᠳ᠋ᠦ᠍ᠷ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠤᠷᠲᠠ ᠂ ᠱ᠌ᠢᠪᠠᠨ ᠨᠠᠷ ᠤ᠋ᠨ ᠴᠡᠷᠢᠭ ᠮᠥᠩᠬᠡ ᠬᠠᠨ ᠤ᠋ ᠴᠡᠷᠢᠭ ᠺᠠᠯᠢᠽ ᠤᠯᠤᠰ ᠢ᠋ ᠪᠠᠢᠯᠳᠤᠬᠤᠢ ᠳ᠋ᠤᠷ ᠲᠦᠰᠢᠭ ᠪᠣᠯᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠠᠲᠤ ᠬᠠᠨ ᠤ᠋ ᠰᠢᠨᠡ ᠵᠠᠷᠯᠢᠭ ᠢ᠋ᠶ᠋ᠠᠷ ᠺᠠᠯᠢᠽ ᠤᠯᠤᠰ ᠤ᠋ᠨ ᠬᠢᠯᠢ ᠶ᠋ᠢ ᠳᠠᠮᠵᠢᠨ ᠯᠢᠤᠢᠪᠤᠯᠢᠨ ᠠᠢᠮᠠᠭ ᠢ᠋ᠶ᠋ᠠᠷ ᠫᠣᠯᠠᠨᠳ᠋ ᠤᠯᠤᠰ ᠲᠤᠷ ᠣᠷᠣᠬᠤ ᠪᠠᠷ ᠪᠡᠯᠡᠳᠬᠡᠵᠦ ᠬᠦᠯᠢᠶᠡᠪᠡ᠃ ᠬᠥᠶᠦᠭ ᠬᠠᠨ ᠤ᠋ ᠳᠤᠮᠳᠠᠳᠤ ᠵᠠᠮ ᠤ᠋ᠨ ᠴᠡᠷᠢᠭ ᠴᠦ᠍ ᠬᠠᠳᠠᠨ᠂ ᠪᠠᠢᠲᠠᠷ ᠨᠠᠷ ᠢ᠋ᠶ᠋ᠠᠷ ᠮᠠᠩᠯᠠᠢᠯᠠᠭᠤᠯᠤᠨ ᠵᠡᠭᠦᠨ ᠹᠦᠯᠦᠰᠢ ᠯᠢᠲ᠋ᠤᠤᠸᠠ ᠶ᠋ᠢ ᠡᠵᠡᠯᠡᠨ ᠠᠪᠴᠤ ᠫᠣᠯᠠᠨᠳ᠋ ᠲᠤᠷ ᠣᠢᠷᠠᠲᠤᠵᠤ ᠠᠢᠰᠤᠢ᠃
ᠲᠡᠷᠡ ᠦᠶᠡ ᠫᠣᠯᠠᠨᠳ᠋ ᠤ᠋ᠨ ᠤᠮᠠᠷᠠᠲᠤ ᠬᠢᠯᠢ ᠢᠨᠤ ᠹᠦᠯᠦᠰᠢ ᠪᠠ ᠳᠣᠲᠣᠭᠠᠳᠤ ᠫᠸᠮᠢᠨᠢᠶᠠ ᠪᠠᠢᠵᠤ ᠳᠣᠷᠣᠨᠠ ᠬᠢᠯᠢ ᠢᠨᠤ ᠺᠠᠯᠢᠽ ᠤᠯᠤᠰ ᠪᠠ ᠯᠢᠲ᠋ᠣᠣᠸᠠᠨ ᠪᠣᠯᠠᠢ᠃ ᠡᠮᠦᠨᠡᠲᠦ ᠬᠢᠯᠢ ᠢᠨᠤ ᠺᠠᠷᠫᠠᠲ ᠠᠭᠤᠯᠠ ᠶ᠋ᠢ ᠠᠯᠤᠰᠯᠠᠨ ᠬᠠᠩᠭᠠᠷᠢ ᠲᠠᠢ ᠬᠥᠷᠰᠢ ᠪᠣᠯᠤᠮᠤᠢ᠃ ᠥᠷᠥᠨᠡ ᠬᠢᠯᠢ ᠢᠨᠤ ᠫᠤᠯᠠᠨᠳ᠋ᠸᠩᠪᠤᠷ ᠬᠢᠭᠡᠳ ᠰᠢᠯᠶᠸᠰᠢᠶᠠ ᠯᠤᠭᠠ ᠨᠡᠢᠯᠦᠮᠤᠢ᠃ ᠰᠢᠯᠶᠸᠰᠢᠶᠠ ᠫᠣᠯᠠᠨᠳ᠋ ᠯᠤᠭᠠ ᠨᠡᠢᠯᠡᠭᠡᠳᠦᠢ ᠪᠣᠯᠪᠠᠴᠤ ᠬᠠᠷᠢᠶᠠᠲᠤ ᠤᠯᠤᠰ ᠠᠨᠤ ᠪᠣᠯᠤᠮᠤᠢ᠂ ᠮᠢᠩᠭᠠᠨ ᠤ᠋ ᠨᠣᠶᠠᠨ ᠪᠤᠷᠤᠬᠠᠢ ᠲᠤᠷᠰᠢᠭᠤᠯ ᠳ᠋ᠤᠷ ᠭᠠᠷᠴᠤ ᠶᠠᠪᠤᠬᠤ ᠳ᠋ᠠᠭᠠᠨ ᠫᠣᠯᠠᠨᠳ᠋ ᠤ᠋ᠨ ᠯᠢᠤᠢᠪᠤᠯᠢᠨ ᠠᠢᠮᠠᠭ ᠢ᠋ᠶ᠋ᠠᠷ ᠥᠬᠢᠳ ᠡᠮᠡᠰ ᠡᠳ᠋ ᠪᠣᠳᠠᠰ ᠣᠯᠵᠠᠯᠠᠨ ᠺᠠᠯᠢᠽ ᠲᠤᠷ ᠬᠦᠷᠭᠡᠮᠦᠢ᠃ ᠡᠪᠦᠯ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠰᠢᠭᠤᠳ ᠤᠢᠰᠲ᠋ᠤᠯᠠ ᠭᠣᠣᠯ ᠤ᠋ᠨ ᠮᠥᠰᠥᠨ ᠳᠡᠭᠡᠭᠦᠷ ᠭᠡᠲᠦᠯᠵᠦ ᠰᠠᠩᠲ᠋ᠤᠸᠸᠮᠢᠷ ᠬᠣᠲᠠ ᠶ᠋ᠢ ᠡᠪᠳᠡᠨ ᠠᠪᠤᠭᠠᠳ ᠰᠢᠭᠤᠳ ᠫᠣᠯᠠᠨᠳ᠋ ᠤ᠋ᠨ ᠶᠡᠬᠡ ᠬᠣᠲᠠ ᠺᠸᠯᠠᠺᠸᠸᠨ ᠠ᠋ᠴᠠ ᠬᠡᠳᠦᠬᠡᠨ ᠭᠠᠵᠠᠷ ᠬᠣᠯᠠ ᠢᠷᠡᠵᠦ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠣᠯᠠᠨ ᠬᠥᠮᠦᠰ ᠢ᠋ ᠣᠯᠵᠠᠯᠠᠨ ᠡᠵᠡᠨ ᠦᠭᠡᠢ ᠭᠠᠵᠠᠷ ᠮᠡᠲᠦ ᠶᠠᠪᠤᠮᠤᠢ᠃ ᠺᠸᠯᠠᠺᠸᠸᠨ ᠤ᠋ ᠨᠣᠶᠠᠨ ᠸᠯᠠᠲᠢᠮᠢᠷ ᠶᠡᠬᠡᠳᠡ ᠬᠢᠯᠢᠩᠯᠡᠨ ᠮᠠᠴᠠᠭᠯᠠᠯᠤ ᠶ᠋ᠢᠨ ᠴᠡᠭᠡᠷᠯᠡᠯ ᠦ᠋ᠨ ᠣᠢ ᠶ᠋ᠢ ᠲᠣᠬᠢᠶᠠᠯᠳᠤᠭᠤᠯᠤᠨ ᠴᠥᠭᠡᠨ ᠰᠢᠯᠢᠳᠡᠭ ᠴᠡᠷᠢᠭ ᠠᠪᠴᠤ ᠮᠣᠩᠭᠣᠯᠴᠤᠳ ᠤ᠋ᠨ ᠠᠷᠤ ᠠ᠋ᠴᠠ ᠳᠠᠭᠠᠵᠤ ᠶᠠᠪᠤᠭᠠᠳ ᠫᠣᠯᠠᠨ᠋ᠶ᠋ᠾ ᠣᠷᠴᠢᠮ ᠬᠦᠷᠦᠭᠡᠳ ᠭᠡᠨᠡᠳᠡᠭᠦᠯᠦᠨ ᠴᠣᠬᠢᠭᠰᠠᠨ ᠳ᠋ᠤᠷ ᠮᠣᠩᠭᠣᠯᠴᠤᠳ ᠨᠡᠯᠢᠶᠡᠳ ᠬᠣᠣᠷ ᠠᠮᠰᠠᠭᠠᠳ ᠰᠡᠭᠦᠯᠴᠢ ᠪᠡᠷ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠴᠥᠭᠡᠨ ᠢ᠋ ᠮᠡᠳᠡᠭᠡᠳ ᠪᠤᠴᠠᠵᠤ ᠴᠣᠬᠢᠭᠠᠳ ᠸᠯᠠᠲᠢᠮᠢᠷ ᠤ᠋ᠨ ᠴᠡᠷᠢᠭ ᠢ᠋ ᠬᠦᠨᠳᠦ ᠬᠣᠬᠢᠷᠠᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠣᠯᠵᠠᠯᠠᠭᠰᠠᠨ ᠣᠯᠠᠨ ᠬᠥᠮᠦᠨ ᠢ᠋ᠶ᠋ᠡᠨ ᠴᠥᠮ ᠠᠯᠳᠠᠵᠤᠬᠤᠢ᠃
ᠥᠭᠦᠯᠡᠬᠦ ᠢᠨᠤ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠴᠡᠷᠢᠭ ᠴᠥᠮ ᠺᠠᠯᠢᠽ ᠤᠯᠤᠰ ᠤ᠋ᠨ ᠣᠢᠷᠠ ᠴᠤᠭᠯᠠᠷᠠᠨ ᠢᠷᠡᠵᠦ ᠫᠣᠯᠠᠨᠳ᠋᠂ ᠬᠠᠩᠭᠠᠷᠢ ᠳ᠋ᠤᠷ ᠴᠡᠷᠢᠭ ᠣᠷᠣᠬᠤ ᠪᠠᠷ ᠲᠣᠭᠲᠠᠵᠤ ᠵᠠᠷᠯᠢᠭ ᠬᠦᠯᠢᠶᠡᠮᠦᠢ᠃ ᠡᠨᠡ ᠦᠶᠡᠰ ᠮᠣᠩᠭᠣᠯ ᠳ᠋ᠤᠷ ᠳᠠᠭᠠᠬᠤ ᠦᠭᠡᠢ ᠺᠢᠪᠴᠠᠭ ᠤ᠋ᠳ ᠂ ᠺᠣᠮᠠᠸᠠᠴᠤᠳ ᠂ ᠪᠣᠯᠭᠠᠷᠢᠴᠤᠳ ᠂ ᠣᠷᠣᠰᠴᠤᠳ ᠂ ᠺᠠᠯᠢᠴᠤᠳ ᠴᠥᠮ ᠡᠨᠡ ᠬᠣᠶᠠᠷ ᠤᠯᠤᠰ ᠲᠤᠷ ᠬᠠᠮᠠᠭᠠᠯᠠᠭᠳᠠᠪᠠ᠃ ᠮᠣᠩᠭᠣᠯ ᠴᠡᠷᠢᠭ ᠪᠤᠴᠠᠪᠠᠰᠤ ᠳᠠᠷᠤᠢ ᠤᠯᠤᠰ ᠤᠯᠤᠰ ᠲᠠᠭᠠᠨ ᠪᠤᠴᠠᠵᠤ ᠲᠦᠢᠪᠡᠭᠡᠬᠦ ᠪᠡᠯᠡᠳᠬᠡᠯ ᠬᠢᠵᠦ ᠰᠠᠭᠤᠮᠤᠢ᠃ ᠲᠡᠢᠨ ᠬᠦ᠌ ᠪᠠᠲᠤ ᠬᠠᠨ ᠡᠨᠡ ᠬᠣᠶᠠᠷ ᠤᠯᠤᠰ ᠢ᠋ ᠪᠠᠢᠯᠳᠤᠨ ᠠᠪᠬᠤ ᠪᠠᠷ ᠰᠢᠢᠳᠪᠡ᠃
ᠪᠠᠲᠤ ᠬᠠᠨ ᠯᠢᠲ᠋ᠣᠣᠸᠠᠨ ᠠ᠋ᠴᠠ ᠺᠠᠯᠢᠽ ᠬᠣᠲᠠᠨᠠ ᠢᠷᠡᠵᠦ ᠮᠥᠩᠬᠡ ᠬᠠᠨ ᠲᠠᠢ ᠠᠭᠤᠯᠵᠠᠭᠠᠳ ᠲᠡᠢᠨ ᠦ᠌ ᠲᠤᠬᠠᠢ ᠵᠥᠪᠳᠡᠪᠡᠰᠦ ᠮᠥᠩᠬᠡ ᠬᠠᠨ ᠳ᠋ᠸᠮᠢᠲ᠋ᠷᠢ ᠬᠦᠩ ᠢ᠋ ᠪᠠᠷᠢᠪᠴᠢᠯᠠᠭᠰᠠᠨ ᠲᠤᠬᠠᠢ ᠥᠭᠦᠯᠡᠵᠦ ᠬᠣᠷᠢᠭᠤᠯ ᠠ᠋ᠴᠠ ᠭᠠᠷᠭᠠᠨ ᠪᠠᠲᠤ ᠬᠠᠨ ᠳ᠋ᠤᠷ ᠦᠵᠡᠭᠦᠯᠦᠭᠰᠡᠨ ᠳ᠋ᠦ᠍ ᠳ᠋ᠸᠮᠢᠲ᠋ᠷᠢ ᠬᠦᠩ ᠪᠠᠲᠤ ᠬᠠᠨ ᠠ᠋ᠴᠠ ᠲᠦᠷᠭᠡᠨ ᠦᠬᠦᠬᠦ ᠶ᠋ᠢ ᠭᠤᠶᠤᠪᠠ᠃ ᠪᠠᠲᠤ ᠬᠠᠨ ᠦᠵᠡᠪᠡᠰᠦ ᠮᠥᠩᠬᠡ ᠬᠠᠨ ᠲᠡᠭᠦᠨ ᠦ᠌ ᠠᠮᠢ ᠶ᠋ᠢ ᠦᠯᠡᠳᠡᠭᠡᠬᠦ ᠰᠠᠨᠠᠭᠠ ᠲᠠᠢ ᠶ᠋ᠢ ᠮᠡᠳᠡᠵᠦ ᠳᠠᠭᠠᠪᠠᠰᠤ ᠳᠠᠭᠠᠲᠤᠭᠠᠢ᠂ ᠣᠳᠪᠠᠰᠤ ᠣᠳᠲᠤᠭᠠᠢ ᠭᠡᠮᠡᠨ ᠴᠡᠷᠢᠭ ᠦ᠋ᠨ ᠠᠷᠠᠳ ᠢ᠋ᠶ᠋ᠠᠷ ᠰᠤᠯᠠᠯᠠᠭᠤᠯᠤᠭᠰᠠᠨ ᠳ᠋ᠤᠷ ᠳ᠋ᠸᠮᠢᠲ᠋ᠷᠢ ᠬᠦᠩ ᠵᠡᠭᠦᠳᠦᠨ ᠮᠡᠲᠦ ᠢᠲᠡᠭᠡᠵᠦ ᠶᠠᠳᠠᠨ ᠲᠠᠲᠠᠭᠠᠯᠵᠠᠨ ᠵᠣᠭᠰᠣᠭᠠᠳ ᠦᠨᠡᠨ ᠰᠤᠯᠠᠯᠠᠭᠰᠠᠨ ᠢ ᠮᠡᠳᠡᠭᠡᠳ ᠲᠣᠯᠣᠭᠠᠢ ᠳᠣᠬᠢᠨ ᠠᠶᠠᠷᠯᠠᠭᠠᠳ ᠰᠢᠭᠤᠳ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠡᠴᠡ ᠭᠠᠷᠴᠤ ᠣᠳᠪᠠᠢ᠃
ᠡᠪᠦᠯ ᠦ᠋ᠨ ᠬᠦᠢᠲᠡᠨ ᠴᠠᠭ ᠪᠠᠰᠠ ᠬᠦᠷᠴᠦ ᠢᠷᠡᠭᠰᠡᠨ ᠪᠥᠭᠡᠳ ᠵᠢᠯ ᠴᠠᠭᠠᠨ ᠰᠠᠷᠠ ᠣᠢᠷᠠᠲᠤᠭᠰᠠᠨ ᠲᠤᠯᠠ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠪᠦᠬᠦᠨ ᠴᠥᠮ ᠰᠢᠨᠡᠯᠡᠬᠦ ᠬᠡᠷᠡᠭᠴᠡᠭᠡᠨ ᠦ᠌ ᠵᠦᠢᠯ ᠳ᠋ᠦ᠍ᠷ ᠶᠠᠭᠠᠷᠠᠯᠳᠤᠨ ᠪᠡᠯᠡᠳᠬᠡᠯ ᠬᠢᠵᠦ ᠰᠠᠭᠤᠮᠤᠢ᠃ ᠭᠡᠲᠡᠯᠡ ᠰᠠᠨᠠᠮᠰᠠᠷ ᠦᠭᠡᠢ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠪᠠᠲᠤ ᠬᠠᠨ ᠣᠯᠠᠨ ᠤ᠋ ᠰᠡᠳᠬᠢᠯ ᠬᠥᠳᠡᠯᠬᠦ ᠶ᠋ᠢ ᠪᠣᠳᠣᠵᠤ ᠣᠯᠠᠨ ᠬᠠᠳ ᠲᠤᠷ ᠨᠢᠭᠤᠴᠠ ᠪᠠᠷ ᠤᠯᠠᠮᠵᠢᠯᠠᠪᠠ᠃ ᠵᠠᠷᠯᠢᠭ ᠲᠤᠷ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠤ᠋ᠨ ᠬᠡᠷᠡᠭ ᠢ᠋ ᠪᠠᠷᠠᠭᠤᠨ ᠭᠠᠷᠤᠨ ᠪᠠᠲᠤ ᠲᠡᠷᠢᠭᠦᠲᠡᠨ ᠣᠯᠠᠨ ᠬᠥᠪᠡᠭᠦᠳ ᠪᠠ ᠰᠥᠪᠡᠬᠡᠳᠡᠢ ᠪᠠᠭᠠᠲᠤᠷ ᠨᠣᠶᠠᠨ ᠢ᠋ ᠮᠡᠳᠡᠲᠦᠭᠡᠢ ᠭᠡᠮᠡᠨ ᠵᠢᠴᠢ ᠴᠤᠷᠮᠠᠬᠠᠨ ᠬᠣᠷᠴᠢ ᠯᠤᠭᠠ ᠦᠷᠭᠦᠯᠵᠢ ᠡᠯᠴᠢ ᠥᠷᠲᠡᠭᠡ ᠪᠡᠷ ᠬᠠᠷᠢᠯᠴᠠᠵᠤ ᠲᠤᠰᠠᠯᠠᠯᠴᠠᠵᠤ ᠶᠠᠪᠤᠭᠲᠤᠨ ᠬᠡᠮᠡᠭᠡᠳ ᠭᠣᠣᠯ ᠤ᠋ᠨ ᠬᠥᠪᠡᠭᠦᠨ ᠪᠠ ᠵᠡᠭᠦᠨ ᠭᠠᠷᠤᠨ ᠬᠥᠪᠡᠭᠦᠳ ᠢ᠋ ᠳᠠᠷᠤᠢᠬᠠᠨ ᠪᠤᠴᠠᠬᠤ ᠪᠣᠯᠪᠠᠤ ᠬᠡᠮᠡᠪᠡᠢ᠃ ᠲᠡᠢᠨ ᠬᠦ᠌ ᠪᠤᠴᠠᠬᠤ ᠶᠠᠪᠤᠳᠠᠯ ᠢ ᠬᠠᠳ ᠬᠥᠪᠡᠭᠦᠳ ᠵᠥᠪᠳᠡᠯᠴᠢᠭᠡᠳ ᠡᠪᠦᠯ ᠢ᠋ ᠣᠷᠣᠰ ᠨᠤᠲᠤᠭ ᠲᠤᠷ ᠥᠩᠭᠡᠷᠡᠭᠡᠨ ᠢᠷᠡᠬᠦ ᠬᠠᠪᠤᠷ ᠠᠳᠤᠭᠤᠨ ᠤ᠋ ᠬᠥᠯ ᠴᠢᠩᠭᠠᠷᠠᠬᠤ ᠶ᠋ᠢ ᠬᠦᠯᠢᠶᠡᠵᠦ ᠵᠡᠭᠦᠨᠰᠢᠯᠡᠪᠡᠰᠦ ᠲᠠᠯᠠᠭᠠᠷ ᠬᠡᠳᠦᠨ ᠰᠠᠷᠠ ᠶ᠋ᠢ ᠰᠤᠯᠠ ᠰᠠᠭᠤᠵᠤ ᠥᠩᠭᠡᠷᠡᠭᠡᠬᠦ ᠡᠴᠡ ᠴᠠᠰᠤ ᠡᠪᠡᠰᠦ ᠶ᠋ᠢ ᠲᠦᠰᠢᠵᠦ ᠠᠯᠭᠤᠷ ᠢ᠋ᠶ᠋ᠠᠷ ᠣᠢᠷᠠᠲᠤᠵᠤ ᠣᠲᠣᠷᠯᠠᠨ ᠶᠠᠪᠤᠵᠤ ᠢᠵᠢᠯ ᠮᠥᠷᠡᠨ ᠢ᠋ ᠭᠡᠲᠦᠯᠦᠨ ᠺᠢᠪᠴᠠᠭ ᠲᠤᠷ ᠵᠤᠨᠵᠢᠵᠤ ᠨᠠᠮᠤᠷ ᠤ᠋ᠨ ᠰᠡᠭᠦᠯᠴᠢ ᠪᠡᠷ ᠬᠠᠷᠠ ᠬᠣᠷᠢᠨ ᠳ᠋ᠤᠷ ᠣᠢᠷᠠᠲᠤᠵᠤ ᠪᠣᠯᠤᠮᠤᠢ ᠭᠡᠮᠡᠨ ᠲᠣᠭᠲᠠᠭᠠᠳ ᠰᠢᠨᠡᠯᠡᠬᠦ ᠶ᠋ᠢ ᠬᠦᠯᠢᠶᠡᠬᠦ ᠦᠭᠡᠢ ᠳᠠᠷᠤᠢᠬᠠᠨ ᠮᠣᠷᠳᠠᠬᠤ ᠪᠠᠷ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ᠷ ᠵᠠᠷᠯᠢᠭ ᠪᠣᠯᠪᠠ᠃ ᠡᠢᠮᠦ ᠡᠴᠡ ᠢᠷᠡᠭᠰᠡᠨ ᠠᠬᠠᠮᠠᠳ ᠬᠥᠪᠡᠭᠦᠳ ᠴᠥᠮ ᠪᠤᠴᠠᠬᠤ ᠲᠤᠯᠠ ᠡᠷᠡᠭᠦᠯ ᠠᠮᠢᠳᠤ ᠪᠤᠴᠠᠮᠤᠢ ᠭᠡᠮᠡᠨ ᠴᠥᠮ ᠪᠠᠶᠠᠰᠤᠯᠴᠠᠵᠤ ᠲᠤᠰ ᠲᠤᠰ ᠤ᠋ᠨ ᠠᠴᠢᠶᠠ ᠬᠥᠰᠬᠡ ᠪᠡᠨ ᠵᠠᠰᠠᠵᠤ ᠣᠯᠵᠠ ᠣᠮᠣᠭ ᠢ᠋ᠶ᠋ᠠᠨ ᠬᠢᠮᠠᠭᠠᠯᠠᠨ ᠪᠠᠭᠴᠠᠯᠠᠵᠤ ᠶᠠᠪᠤᠬᠤᠢ ᠪᠠᠷ ᠲᠣᠬᠢᠷᠠᠪᠠᠢ᠃ ᠬᠠᠳ ᠬᠥᠪᠡᠭᠦᠳ ᠴᠦ᠍ ᠲᠣᠭᠲᠠᠪᠤᠷᠢ ᠦᠭᠡᠢ ᠪᠣᠯᠵᠤ ᠬᠠᠷᠢᠯᠴᠠᠨ ᠤᠷᠲᠤ ᠣᠷᠳᠣᠨ ᠳ᠋ᠠᠭᠠᠨ ᠵᠠᠯᠠᠯᠴᠠᠵᠤ ᠨᠠᠢᠷᠯᠠᠨ ᠬᠤᠷᠢᠮᠯᠠᠮᠤᠢ᠃
ᠴᠡᠷᠢᠭ ᠲᠡᠢᠨ ᠦ᠌ ᠶᠠᠪᠤᠳᠠᠯ ᠢ ᠥᠴᠦᠬᠡᠨ ᠴᠦ᠍ ᠣᠰᠣᠯᠳᠠᠵᠤ ᠪᠣᠯᠬᠤ ᠦᠭᠡᠢ ᠲᠤᠯᠠ ᠪᠤᠴᠠᠬᠤ ᠴᠡᠷᠢᠭ ᠦ᠋ᠨ ᠶᠠᠪᠤᠳᠠᠯ ᠢ᠋ ᠶᠡᠬᠡ ᠵᠠᠩᠵᠤᠨ ᠪᠦᠵᠥᠭ ᠂ ᠣᠭᠲᠠᠷ ᠂ ᠶᠢᠰᠦᠨᠲᠠᠷ ᠨᠠᠷ ᠮᠡᠳᠡᠵᠦ ᠂ ᠬᠠᠷᠠᠭᠤᠯ ᠲᠤᠷᠰᠢᠭᠤᠯ ᠢ᠋ ᠴᠢᠩᠭᠠᠳᠬᠠᠨ ᠰᠡᠷᠭᠡᠢᠯᠡᠵᠦ ᠂ ᠬᠣᠴᠣᠷᠬᠤ ᠴᠡᠷᠢᠭ ᠢ᠋ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠨᠣᠶᠠᠯᠠᠵᠤ ᠴᠢᠩᠳᠠᠯᠠᠨ ᠬᠣᠯᠠ ᠣᠢᠷᠠ ᠬᠥᠮᠦᠨ ᠭᠠᠷᠭᠠᠨ ᠭᠡᠲᠡᠭᠦᠯᠦᠮᠥᠢ᠃
ᠬᠠᠳ ᠬᠥᠪᠡᠭᠦᠳ ᠦ᠋ᠨ ᠨᠠᠢᠷ ᠬᠥᠷ ᠥᠨᠳᠥᠷ ᠪᠣᠯᠵᠤ ᠪᠦᠬᠦᠢ ᠳ᠋ᠦ᠍ᠷ ᠪᠠᠲᠤ ᠬᠠᠨ ᠢᠯᠠᠭᠤᠭᠰᠠᠨ ᠶᠡᠬᠡ ᠪᠠᠶᠠᠷ ᠭᠡᠮᠡᠨ ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠶᠡᠬᠡ ᠬᠤᠷᠢᠮ ᠵᠠᠷᠯᠠᠭᠰᠠᠨ ᠳ᠋ᠤᠷ ᠨᠠᠢᠷ ᠬᠥᠷ ᠨᠡᠩ ᠴᠠᠭᠯᠠᠰᠢ ᠦᠭᠡᠢ ᠪᠣᠯᠪᠠ ᠃ ᠶᠤᠸᠠᠨᠱᠤᠸᠠᠢ ᠶ᠋ᠢᠨ ᠶᠡᠬᠡ ᠴᠠᠴᠠᠷ ᠲᠤᠷ ᠡᠳᠦᠷ ᠪᠣᠯᠭᠠᠨ ᠰᠢᠷᠡᠭᠡ ᠵᠢᠭᠰᠠᠭᠠᠨ ᠬᠠᠳ ᠬᠥᠪᠡᠭᠦᠳ ᠪᠠ ᠲᠦᠮᠡᠨ ᠦ᠌ ᠨᠣᠶᠠᠨ ᠂ ᠮᠢᠩᠭᠠᠨ ᠤ᠋ ᠨᠣᠶᠠᠳ ᠂ ᠭᠠᠪᠢᠶᠠᠲᠤ ᠵᠠᠩᠵᠤᠨ ᠲᠦᠰᠢᠮᠡᠳ ᠳᠦᠭᠦᠷᠲᠡᠯᠡ ᠰᠠᠭᠤᠯᠴᠠᠨ ᠪᠠᠲᠤ ᠬᠠᠨ ᠲᠡᠷᠢᠭᠦᠯᠡᠨ ᠣᠯᠠᠨ ᠬᠠᠳ ᠪᠡᠶᠡ ᠪᠡᠷ ᠬᠤᠨᠳᠠᠭᠠ ᠪᠠᠷᠢᠵᠤ ᠮᠣᠩᠭᠣᠯ ᠬᠡᠦᠬᠡᠨ ᠂ ᠺᠢᠪᠴᠠᠭ ᠬᠡᠦᠬᠡᠨ ᠂ ᠣᠷᠣᠰ ᠬᠡᠦᠬᠡᠨ ᠂ ᠫᠤᠯᠠᠨᠳ᠋ ᠬᠠᠩᠭᠠᠷᠢ ᠬᠡᠦᠬᠡᠨᠴᠦᠳ ᠦ᠋ᠨ ᠳᠠᠭᠤᠤ ᠪᠥᠵᠢᠭ ᠢ᠋ ᠰᠣᠨᠢᠷᠬᠠᠵᠤ ᠪᠡᠶᠡᠰᠦᠮᠦᠢ᠃ ᠴᠠᠭᠠ ᠂ ᠥᠳᠬᠡ ᠂ ᠦᠵᠦᠮ ᠦ᠋ᠨ ᠠᠷᠢᠬᠢ ᠂ ᠦᠬᠡᠷ ᠬᠣᠨᠢ ᠶ᠋ᠢᠨ ᠮᠢᠬᠠ ᠂ ᠣᠷᠣᠰ ᠂ ᠺᠢᠪᠴᠠᠭ ᠢᠳᠡᠭᠡ ᠶ᠋ᠢ ᠠᠭᠤᠯᠠ ᠳᠠᠯᠠᠢ ᠮᠡᠲᠦ ᠵᠠᠷᠤᠵᠤ ᠪᠠᠶᠠᠰᠤᠯᠴᠠᠨ ᠤᠤᠭᠤᠬᠤᠢ ᠳ᠋ᠤᠷ ᠭᠠᠭᠴᠠ ᠬᠥᠶᠦᠭ ᠬᠠᠨ ᠴᠠᠭᠠ ᠤᠮᠳᠠᠯᠠᠵᠤ ᠰᠠᠭᠤᠬᠤ ᠶ᠋ᠢ ᠣᠯᠠᠨ ᠴᠥᠮ ᠠᠩᠬᠠᠷᠴᠤ ᠲᠡᠭᠦᠨ ᠦ᠌ ᠬᠠᠲᠠᠭᠤ ᠠᠷᠢᠬᠢ ᠥᠳᠬᠡ ᠡᠴᠡ ᠬᠣᠯᠠᠳᠠᠭᠰᠠᠨ ᠳ᠋ᠤᠷ ᠪᠢᠰᠢᠷᠡᠯᠴᠡᠮᠦᠢ᠃ ᠪᠠᠲᠤ ᠬᠠᠨ ᠥᠷᠥᠰᠢᠶᠡᠨ ᠠᠷᠭᠠᠰᠤᠨ ᠢ᠋ ᠭᠦᠶᠦᠭ ᠬᠠᠨ ᠤ᠋ ᠴᠠᠴᠠᠷ ᠲᠤᠷ ᠲᠤᠰᠢᠶᠠᠨ ᠪᠤᠴᠠᠭᠠᠲᠤᠭᠠᠢ ᠭᠡᠮᠡᠨ ᠵᠠᠬᠢᠪᠠ᠃
ᠬᠠᠳ ᠨᠣᠶᠠᠳ ᠤ᠋ᠨ ᠤᠤᠭᠤᠯᠴᠠᠵᠤ ᠢᠳᠡᠬᠦ ᠶ᠋ᠢ ᠥᠭᠦᠯᠡᠬᠦ ᠦᠭᠡᠢ ᠂ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ᠷ ᠴᠦ᠍ ᠴᠠᠭᠠ ᠂ ᠥᠳᠬᠡ ᠂ ᠦᠵᠦᠮ ᠦ᠋ᠨ ᠠᠷᠢᠬᠢ ᠡᠯᠪᠡᠭ ᠱᠠᠩᠨᠠᠭᠰᠠᠨ ᠲᠤᠯᠠ ᠬᠠᠷᠠᠭᠤᠯ ᠲᠤᠷᠰᠢᠭᠤᠯ ᠠ᠋ᠴᠠ ᠪᠤᠰᠤ ᠠᠨᠤ ᠴᠥᠮ ᠬᠠᠨᠤᠲᠠᠯᠠ ᠤᠤᠭᠤᠵᠤ ᠢᠳᠡᠭᠡᠳ ᠤᠬᠢᠯᠠᠬᠤ ᠂ ᠳᠠᠭᠤᠯᠠᠬᠤ ᠂ ᠬᠤᠭᠤᠷᠳᠠᠬᠤ ᠂ ᠦᠯᠢᠶᠡᠬᠦ ᠂ ᠪᠢᠰᠢᠭᠦᠷᠳᠡᠬᠦ ᠂ ᠲᠠᠲᠠᠬᠤ ᠴᠣᠬᠢᠬᠤ ᠂ ᠲᠣᠭᠰᠢᠬᠤ ᠂ ᠴᠤᠭᠤᠷᠳᠠᠬᠤ ᠂ ᠪᠦᠷᠢᠶᠡᠳᠦᠬᠦ ᠂ ᠴᠢᠪᠠᠭᠳᠠᠬᠤ ᠂ ᠪᠥᠵᠢᠭᠯᠡᠬᠦ ᠂ ᠪᠠᠷᠢᠯᠳᠤᠬᠤ ᠂ ᠡᠯᠳᠡᠪ ᠱᠣᠭ ᠨᠠᠭᠠᠳᠤᠮ ᠪᠣᠯᠵᠤ ᠬᠥᠭᠡᠷᠦᠯᠳᠦᠮᠦᠢ ᠃ ᠦᠨᠡᠬᠡᠷ : 《ᠠᠯᠲᠠᠨ ᠳᠥᠷᠥᠭᠡ ᠪᠡᠨ ᠬᠠᠩᠭᠢᠨᠠᠭᠤᠯᠤᠨ ᠠᠶᠠᠨ ᠤ᠋ ᠬᠥᠮᠦᠰ ᠢᠯᠠᠭᠤᠭᠰᠠᠨ ᠳᠠᠭᠤᠨ ᠳ᠋ᠤᠷ ᠪᠤᠴᠠᠮᠤᠢ 》 ᠬᠡᠮᠡᠭᠰᠡᠨ ᠮᠡᠲᠦ ᠪᠣᠯᠪᠠᠢ᠃ ᠬᠥᠮᠦᠨ ᠪᠦᠬᠦᠨ ᠪᠠᠶᠠᠷ ᠤᠶᠠᠷᠠᠯ ᠬᠣᠣᠰᠯᠠᠵᠤ ᠤᠨᠠᠭᠰᠠᠨ ᠰᠢᠷᠣᠢ ᠲᠥᠷᠥᠰᠡᠨ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠵᠤ ᠡᠴᠢᠭᠡ ᠡᠬᠡ ᠠᠬᠠ ᠳᠡᠭᠦᠦ ᠡᠬᠡᠨᠡᠷ ᠬᠡᠦᠬᠡᠳ ᠲᠡᠭᠡᠨ ᠠᠮᠢᠳᠤ ᠵᠢᠷᠭᠠᠯ ᠲᠠᠢ ᠠᠭᠤᠯᠵᠠᠮᠤᠢ ᠭᠡᠮᠡᠨ ᠶᠠᠭᠠᠷᠠᠯᠳᠤᠵᠤ ᠂ ᠨᠠᠢᠷ ᠥᠩᠭᠡᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠮᠣᠷᠳᠠᠬᠤ ᠵᠠᠷᠯᠢᠭ ᠪᠠᠭᠤᠮᠠᠭᠴᠠ ᠴᠠᠰᠤ ᠮᠥᠰᠥᠨ ᠦ᠌ ᠳᠤᠮᠳᠠᠭᠤᠷ ᠲᠤᠭ ᠬᠢᠭᠢᠷᠢ ᠪᠡᠨ ᠬᠡᠢᠰᠬᠡᠨ ᠴᠠᠩᠳᠠᠭᠰᠠᠨ ᠮᠣᠷᠢ ᠪᠠᠨ ᠱᠣᠭᠰᠢᠭᠤᠯᠤᠨ ᠲᠥᠷᠥᠭᠰᠡᠨ ᠨᠤᠲᠤᠭ ᠤᠨᠠᠭᠰᠠᠨ ᠰᠢᠷᠣᠢ ᠪᠠᠨ ᠴᠢᠭᠯᠡᠪᠡ᠃
ᠭᠦᠶᠦᠭ ᠬᠠᠨ ᠰᠢᠳᠠᠷ ᠡᠷᠡᠰ ᠢ᠋ᠶ᠋ᠡᠨ ᠠᠪᠴᠤ ᠶᠤᠸᠠᠨᠱᠤᠸᠠᠢ ᠶ᠋ᠢᠨ ᠴᠠᠴᠠᠷ ᠲᠤᠷ ᠠᠶᠠᠷᠯᠠᠷᠠ ᠡᠴᠢᠰᠦᠭᠡᠢ ᠭᠡᠮᠡᠨ ᠪᠦᠬᠦᠢ ᠳ᠋ᠦ᠍ᠷ ᠪᠠᠲᠤ ᠬᠠᠨ ᠣᠯᠠᠨ ᠳᠡᠭᠦᠦ ᠨᠠᠷ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠡᠪᠦᠭᠡᠨ ᠵᠠᠩᠵᠤᠨ ᠰᠦᠪᠡᠭᠡᠲᠡᠢ ᠪᠠᠭᠠᠲᠤᠷ ᠤ᠋ᠨ ᠬᠠᠮᠲᠤ ᠮᠣᠷᠳᠠᠭᠤᠯᠬᠤ ᠪᠠᠷ ᠬᠦᠷᠴᠦ ᠢᠷᠡᠪᠡ᠃
ᠪᠠᠲᠤ ᠬᠠᠨ ᠵᠠᠮ ᠭᠣᠳᠣᠰ ᠠᠮᠤᠷ ᠲᠤᠩᠭᠠᠯᠠᠭ ᠶᠠᠪᠤᠬᠤ ᠶ᠋ᠢ ᠢᠷᠥᠭᠡᠵᠦ ᠮᠣᠷᠳᠠᠬᠤ ᠠᠷᠢᠬᠢ ᠪᠠᠷᠢᠭᠰᠠᠨ ᠳ᠋ᠤᠷ ᠭᠦᠶᠦᠭ ᠬᠠᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠲᠣᠰᠴᠤ ᠠᠪᠤᠭᠠᠳ ᠲᠡᠭᠷᠢ ᠭᠠᠵᠠᠷ ᠡᠵᠡᠳ ᠰᠠᠬᠢᠭᠤᠯᠰᠤᠨ ᠳ᠋ᠤᠷ ᠴᠡᠴᠦᠯᠢᠯᠡᠨ ᠦᠯᠡᠳᠡᠭᠰᠡᠨ ᠢ ᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠳᠤᠰᠬᠠᠵᠤ ᠥᠴᠦᠬᠡᠨ ᠠᠮᠰᠠᠭᠠᠳ ᠳᠤᠭᠤᠯᠠᠭᠠ ᠪᠠᠨ ᠮᠢᠯᠢᠶᠠᠪᠠ᠃ ᠵᠢᠴᠢ ᠤᠷᠲᠠ ᠂ ᠪᠠᠢᠳᠠᠷ ᠨᠠᠷ ᠴᠥᠮ ᠠᠬᠠᠴᠢᠯᠠᠨ ᠂ ᠳᠡᠭᠦᠦᠴᠢᠯᠡᠨ ᠠᠷᠢᠬᠢ ᠪᠠᠷᠢᠵᠤ ᠠᠶᠠᠷᠯᠠᠭᠰᠠᠨ ᠳ᠋ᠤᠷ ᠬᠥᠶᠦᠭ ᠬᠠᠨ ᠨᠢᠭᠡ ᠨᠢᠭᠡ ᠪᠡᠷ ᠬᠦᠯᠢᠶᠡᠨ ᠠᠪᠴᠤ ᠰᠠᠯᠬᠤ ᠶᠣᠰᠣ ᠭᠦᠢᠴᠡᠳᠬᠡᠨ ᠬᠡᠭᠡᠷ ᠮᠣᠷᠢᠨ ᠳ᠋ᠠᠭᠠᠨ ᠠᠯᠠᠪᠬᠢᠨ ᠮᠣᠷᠳᠠᠭᠠᠳ ᠪᠠᠲᠤ ᠬᠠᠨ ᠳ᠋ᠤᠷ ᠠᠶᠠᠷᠯᠠᠨ ᠥᠭᠦᠯᠡᠷᠦᠨ : 《ᠡᠷᠡ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠮᠡᠳᠡᠵᠦ ᠦᠯᠦ ᠪᠣᠯᠤᠮᠤᠢ᠃ ᠬᠡᠷᠪᠡ ᠠᠮᠤᠷ ᠮᠡᠨᠳᠦ ᠪᠤᠴᠠᠪᠠᠰᠤ ᠠᠬᠠ ᠯᠤᠭᠠ ᠬᠠᠷᠠ ᠬᠣᠷᠢᠨ ᠳ᠋ᠤᠷ ᠠᠭᠤᠯᠵᠠᠰᠤᠭᠠᠢ 》 ᠭᠡᠮᠡᠨ ᠦᠯᠦ ᠮᠡᠳᠡᠭᠳᠡᠮᠡ ᠢᠨᠢᠶᠡᠮᠰᠦᠭᠯᠡᠨ ᠵᠢᠯᠣᠭᠣ ᠪᠠᠨ ᠨᠢᠴᠤᠨ ᠲᠠᠲᠠᠵᠤ ᠠᠶᠠᠨ ᠵᠠᠮ ᠳ᠋ᠠᠭᠠᠨ ᠣᠷᠣᠪᠠ᠃ ᠸᠠᠩ ᠢᠦᠢ ᠵᠸᠨ ᠵᠡᠷᠭᠡ ᠰᠢᠳᠠᠷ ᠳᠠᠭᠠᠭᠰᠠᠳ ᠠᠷᠤ ᠠ᠋ᠴᠠ ᠪᠥᠭᠡᠮᠨᠡᠷᠡᠨ ᠱᠣᠭᠰᠢᠭᠤᠯᠵᠠᠭᠠᠪᠠ᠃ ᠲᠡᠷᠡ ᠬᠦ᠌ ᠬᠣᠭᠣᠷᠣᠨᠳᠣ ᠭᠦᠶᠦᠭ ᠬᠠᠨ ᠤ᠋ ᠣᠷᠳᠣᠨ ᠴᠠᠴᠠᠷ ᠢ᠋ ᠴᠥᠮ ᠪᠠᠭᠤᠯᠭᠠᠨ ᠠᠴᠢᠶᠠᠯᠠᠮᠤᠢ᠃ ᠲᠠᠯᠠ ᠳᠦᠭᠦᠷᠡᠩ ᠬᠣᠲᠠ ᠬᠦᠷᠢᠶᠡ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠵᠡᠭᠦᠳᠦᠨ ᠵᠡᠷᠭᠡᠯᠭᠡᠨ ᠮᠡᠲᠦ ᠠᠯᠠᠭᠠ ᠪᠣᠯᠵᠤ ᠳᠠᠪᠲᠠᠭᠳᠠᠭᠰᠠᠨ ᠬᠡᠭᠡᠷᠡ ᠲᠠᠯᠠ ᠦᠵᠡᠰᠢ ᠦᠭᠡᠢ ᠬᠣᠴᠣᠷᠪᠠᠢ᠃
ᠬᠥᠶᠦᠭ ᠬᠠᠨ ᠤ᠋ ᠦᠭᠡ ᠪᠠᠲᠤ ᠬᠠᠨ ᠳ᠋ᠤᠷ ᠨᠢᠭᠡᠨ ᠬᠡᠰᠡᠭ ᠮᠥᠰᠥ ᠵᠠᠯᠭᠢᠭᠰᠠᠨ ᠮᠡᠲᠦ ᠬᠦᠢᠲᠡᠨ ᠰᠠᠨᠠᠭᠳᠠᠵᠤ ᠠᠶᠠ ᠦᠭᠡᠢ ᠴᠠᠴᠠᠷ ᠵᠦᠭ ᠢ᠋ᠶ᠋ᠡᠨ ᠭᠡᠯᠳᠡᠷᠢᠬᠦᠢ ᠳ᠋ᠦ᠍ᠷ ᠰᠢᠳᠠᠷ ᠴᠡᠷᠢᠭ ᠮᠥᠩᠬᠡ ᠬᠠᠨ ᠠᠶᠠᠷᠯᠠᠷᠠ ᠢᠷᠡᠵᠦ ᠬᠦᠯᠢᠶᠡᠮᠦᠢ ᠭᠡᠮᠡᠨ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠪᠠᠲᠤ ᠬᠠᠨ ᠶᠠᠭᠠᠷᠠᠨ ᠣᠯᠠᠨ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠥᠨᠳᠡᠢᠨ ᠱᠣᠭᠰᠢᠭᠤᠯᠪᠠ᠃
ᠮᠥᠩᠬᠡ ᠬᠠᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠡᠭᠦᠳᠡᠨᠡ ᠮᠣᠷᠢ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠬᠦᠯᠢᠶᠡᠪᠡᠢ᠃ ᠲᠡᠢᠨ ᠬᠦ᠌ ᠪᠠᠲᠤ ᠬᠠᠨ ᠬᠡᠳᠦᠨ ᠠᠯᠬᠤᠮ ᠬᠤᠷᠳᠤᠯᠠᠨ ᠥᠭᠡᠳᠡ ᠡᠴᠡ ᠢᠨᠣ ᠶᠠᠭᠠᠷᠠᠨ ᠢᠷᠡᠬᠦ ᠮᠥᠩᠬᠡ ᠬᠠᠨ ᠤ᠋ ᠭᠠᠷ ᠢ᠋ ᠪᠠᠷᠢᠵᠤ ᠮᠥᠷᠥ ᠵᠡᠷᠭᠡᠴᠡᠨ ᠶᠠᠪᠤᠵᠤ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢᠯᠴᠠᠮᠤᠢ᠃ ᠮᠥᠩᠬᠡ ᠬᠠᠨ ᠤ᠋ ᠪᠡᠶᠡ ᠪᠠᠲᠤ ᠬᠠᠨ ᠠ᠋ᠴᠠ ᠠᠷᠠᠢ ᠥᠨᠳᠥᠷ ᠂ ᠭᠠᠪᠰᠢᠭᠠᠢ ᠨᠠᠷᠢᠨ ᠴᠡᠪᠡᠷᠬᠡᠨ ᠂ ᠠᠳᠠᠯᠢᠳᠬᠠᠪᠠᠰᠤ ᠪᠠᠲᠤ ᠬᠠᠨ ᠮᠢᠬᠠᠯᠢᠭ ᠪᠦᠳᠦᠭᠦᠨ ᠳᠤᠮᠳᠠ ᠨᠠᠰᠤᠨ ᠤ᠋ ᠬᠥᠮᠦᠨ ᠦ᠌ ᠶᠠᠩᠵᠤ ᠨᠡᠯᠢᠶᠡᠳ ᠣᠷᠣᠪᠠ᠃ ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ ᠠᠷᠤ ᠠ᠋ᠴᠠ ᠠᠨᠤ ᠠᠵᠢᠭᠯᠠᠨ ᠶᠠᠪᠤᠬᠤ ᠳ᠋ᠠᠭᠠᠨ : 《ᠪᠣᠭᠳᠠ ᠡᠵᠡᠨ ᠢ᠋ ᠭᠤᠲᠤᠭᠠᠭᠰᠠᠨ ᠦᠭᠡᠢ 》ᠭᠡᠮᠡᠨ ᠪᠠᠶᠠᠰᠪᠠᠢ᠃
ᠥᠩᠭᠡᠷᠡᠭᠰᠡᠨ ᠡᠴᠡ ᠪᠠᠲᠤ ᠬᠠᠨ ᠂ ᠮᠥᠩᠬᠡ ᠬᠠᠨ ᠬᠣᠶᠠᠭᠤᠯᠠ ᠵᠠᠩ ᠰᠠᠨᠠᠭᠠ ᠨᠢᠭᠡᠲᠡᠢ ᠪᠥᠭᠡᠳ ᠳᠤᠷᠠ ᠰᠣᠨᠢᠷᠬᠠᠯ ᠠᠳᠠᠯᠢ ᠂ ᠬᠠᠷᠢᠯᠴᠠᠨ ᠬᠦᠨᠳᠦᠳᠬᠡᠬᠦ ᠠᠵᠢ᠃ ᠢᠯᠠᠩᠭᠤᠶᠠ ᠬᠡᠳᠦᠨ ᠵᠢᠯ ᠦ᠋ᠨ ᠠᠶᠠᠨ ᠲᠡᠢᠨ ᠳ᠋ᠦ᠍ᠷ ᠬᠠᠮᠲᠤ ᠶᠠᠪᠤᠭᠠᠳ ᠬᠠᠷᠢᠯᠴᠠᠨ ᠤᠯᠠᠮ ᠮᠡᠳᠡᠯᠴᠡᠭᠰᠡᠨᠨ ᠡᠴᠡ ᠨᠢᠭᠡᠨ ᠥᠷᠯᠥᠭᠡ ᠰᠠᠯᠤᠨ ᠤᠳᠤᠮᠤᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠬᠡᠷᠬᠢᠨ ᠲᠦᠪᠡᠭᠳᠡᠬᠦ ᠪᠣᠯᠠᠢ᠃ ᠪᠠᠲᠤ ᠬᠠᠨ ᠮᠣᠷᠳᠠᠬᠤ ᠬᠤᠨᠳᠠᠭᠠ ᠪᠠᠷᠢᠵᠤ ᠥᠭᠦᠯᠡᠷᠦᠨ :《ᠡᠨᠡ ᠡᠳᠦᠷ ᠰᠠᠯᠤᠯᠴᠠᠭᠰᠠᠨ ᠤ᠋ ᠬᠣᠢᠨᠠ ᠲᠡᠭᠷᠢ ᠭᠠᠵᠠᠷ ᠨᠢᠭᠡᠨ ᠳᠠᠪᠬᠤᠷ ᠠᠯᠤᠰᠯᠠᠮᠤᠢ᠃ ᠬᠥᠮᠦᠨ ᠦ᠌ ᠨᠠᠰᠤ ᠬᠡᠳᠦᠢᠬᠡᠨ ᠠᠵᠢ᠃ ᠳᠠᠬᠢᠨ ᠬᠡᠵᠢᠶᠡ ᠠᠭᠤᠯᠵᠠᠬᠤ ᠶ᠋ᠢ ᠮᠡᠳᠡᠵᠦ ᠪᠣᠯᠬᠤ ᠦᠭᠡᠢ᠃ ᠪᠡᠶᠡ ᠪᠡᠨ ᠬᠢᠴᠢᠶᠡᠭᠲᠦᠨ᠃ ᠪᠣᠭᠳᠠ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠡᠪᠦᠭᠡ ᠶ᠋ᠢᠨ ᠮᠠᠨ ᠳ᠋ᠤᠷ ᠦᠯᠡᠳᠡᠭᠡᠵᠦ ᠥᠭᠭᠦᠭᠰᠡᠨ ᠡᠭᠦᠷᠭᠡ ᠪᠠᠭᠠ ᠪᠤᠰᠤ ᠲᠤᠯᠠ ᠠᠭᠤᠷ ᠣᠮᠣᠭ ᠢ᠋ᠶ᠋ᠠᠨ ᠳᠠᠷᠤᠵᠤ ᠥᠩᠭᠡ ᠳᠠᠷᠠᠰᠤ ᠠ᠋ᠴᠠ ᠬᠣᠯᠠᠳᠠᠬᠤ ᠬᠡᠷᠡᠭ ᠲᠡᠢ᠃ ᠳᠠᠷᠠᠰᠤ ᠥᠩᠭᠡ ᠬᠣᠶᠠᠷ ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢ ᠬᠣᠣᠷᠯᠠᠵᠤ ᠤᠯᠤᠰ ᠭᠡᠷ ᠢ᠋ ᠮᠥᠬᠥᠭᠡᠮᠦᠢ᠃ ᠴᠠᠭᠠᠲᠠᠢ ᠠᠪᠠᠭᠠ ᠠ᠋ᠴᠠ ᠰᠣᠨᠣᠰᠪᠠᠰᠤ ᠤᠷᠢᠳᠠ ᠴᠠᠭ ᠮᠣᠩᠭᠣᠯ ᠳ᠋ᠤᠷ ᠠᠷᠢᠬᠢ ᠪᠠᠢᠭᠰᠠᠨ ᠦᠭᠡᠢ ᠬᠡᠮᠡᠮᠦ᠃ ᠠᠷᠤ ᠤᠰᠤ ᠳ᠋ᠠᠬᠢ ᠵᠢᠬᠤᠯᠢ ᠬᠡᠮᠡᠭᠴᠢ ᠳᠠᠭᠠᠷᠠ ᠢᠷᠡᠬᠦ ᠳ᠋ᠡᠭᠡᠨ ᠡᠵᠡᠨ ᠡᠪᠦᠭᠡ ᠳ᠋ᠦ᠍ᠷ ᠵᠢᠷᠭᠤᠭᠠᠨ ᠭᠠᠩ ᠠᠷᠢᠬᠢ ᠪᠠᠷᠢᠭᠰᠠᠨ ᠳ᠋ᠤᠷ ᠪᠣᠭᠳᠠ ᠡᠵᠡᠨ ᠨᠢᠭᠡᠨ ᠬᠤᠳᠠᠭᠠ ᠠᠮᠰᠠᠭᠠᠳ ᠵᠠᠷᠯᠢᠭ ᠪᠣᠯᠤᠭᠰᠠᠨ ᠠᠨᠤ : 《ᠡᠭᠦᠨ ᠢ᠋ ᠪᠠᠭᠠ ᠡᠳ᠋ᠯᠡᠪᠡᠰᠦ ᠴᠢᠨᠠᠷ ᠢ᠋ ᠪᠠᠳᠠᠷᠠᠭᠤᠯᠵᠤ᠂ ᠶᠡᠬᠡ ᠡᠳᠡᠯᠡᠪᠡᠰᠤ ᠴᠢᠨᠠᠷ ᠢ᠋ ᠪᠠᠯᠠᠷᠠᠭᠤᠯᠤᠮᠤᠢ᠃ ᠬᠡᠷᠡᠭᠯᠡᠵᠦ ᠪᠣᠯᠬᠤ ᠡᠳ᠋ ᠪᠤᠰᠤ 》ᠭᠡᠮᠡᠨ ᠪᠤᠴᠠᠭᠠᠪᠠ ᠬᠡᠮᠡᠮᠦ᠃ ᠡᠳᠦᠭᠡ ᠮᠠᠨ ᠤ᠋ ᠮᠣᠩᠭᠣᠯᠴᠤᠳ ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠰᠤᠷᠭᠠᠯ ᠢ ᠨᠢᠭᠡᠮᠦᠰᠦᠨ ᠣᠷᠬᠢᠵᠤ ᠬᠠᠳ ᠨᠣᠶᠠᠳ ᠠ᠋ᠴᠠ ᠲᠡᠷᠢᠭᠦᠯᠡᠨ ᠠᠷᠢᠬᠢ ᠥᠩᠭᠡᠨ ᠳ᠋ᠦ᠍ᠷ ᠰᠢᠨᠤᠵᠤ ᠪᠡᠶᠡ ᠪᠡᠨ ᠬᠣᠣᠷᠯᠠᠬᠤ ᠪᠠᠷ ᠦᠯᠦ ᠪᠠᠷᠠᠨ ᠤᠯᠤᠰ ᠢ᠋ ᠡᠪᠳᠡᠬᠦᠢ ᠳ᠋ᠦ᠍ᠷ ᠬᠦᠷᠭᠡᠮᠦᠢ᠃ ᠣᠷᠣᠰ ᠤᠯᠤᠰ ᠴᠢᠳᠠᠯ ᠦᠭᠡᠢ ᠪᠤᠰᠤ ᠂ ᠬᠥᠮᠦᠨ ᠴᠥᠭᠡᠨ ᠪᠤᠰᠤ ᠵᠡᠪᠰᠡᠭ ᠬᠤᠷᠴᠠ ᠂ ᠮᠣᠷᠢ ᠬᠤᠷᠳᠤᠨ ᠠᠭᠠᠳ ᠶᠠᠭᠤᠨ ᠳ᠋ᠤᠷ ᠤᠯᠤᠰ ᠢ᠋ᠶ᠋ᠠᠨ ᠠᠯᠳᠠᠪᠠᠢ ᠬᠡᠮᠡᠪᠡᠰᠦ ᠪᠢᠳᠡᠨ ᠦ᠌ ᠨᠢᠳᠦ ᠪᠡᠷ ᠦᠵᠡᠭᠰᠡᠨ ᠮᠡᠲᠦ ᠥᠩᠭᠡ ᠂ ᠳᠠᠷᠠᠰᠤ ᠂ ᠡᠷᠬᠡ ᠰᠠᠭᠤᠷᠢ ᠪᠤᠯᠢᠶᠠᠯᠳᠤᠨ ᠳᠣᠲᠣᠷᠠ ᠵᠠᠭᠤᠷᠠ ᠪᠠᠨ ᠲᠡᠮᠡᠴᠡᠯᠳᠦᠭᠰᠡᠭᠡᠷ ᠪᠣᠯᠪᠠᠢ᠃ ᠡᠰᠡ ᠬᠢᠴᠢᠶᠡᠪᠡᠰᠦ ᠪᠣᠯᠤᠮᠤᠢ ᠤᠤ ? 》 ᠬᠡᠮᠡᠪᠡ᠃ ᠮᠥᠩᠬᠡ ᠬᠠᠨ ᠬᠢᠴᠢᠶᠡᠩᠭᠦᠢᠯᠡᠨ ᠰᠣᠨᠣᠰᠤᠭᠠᠳ ᠪᠠᠲᠤ ᠬᠠᠨ ᠲᠡᠭᠦᠨ ᠢ ᠬᠦᠨᠳᠦ ᠡᠷᠡᠮᠡᠯᠵᠡᠯᠡᠵᠦ ᠪᠠᠢᠭᠠ ᠶ᠋ᠢ ᠮᠡᠳᠡᠵᠦ ᠭᠦᠨᠡ ᠲᠠᠯᠠᠷᠬᠠᠨ ᠬᠠᠷᠢᠯᠴᠠᠨ ᠭᠠᠷ ᠪᠠᠷᠢᠵᠤ ᠰᠠᠯᠤᠯᠴᠠᠪᠠᠢ᠃
ᠭᠣᠣᠯ ᠤ᠋ᠨ ᠬᠠᠳ ᠬᠥᠪᠡᠭᠦᠳ ᠪᠠ ᠵᠡᠭᠦᠨ ᠭᠠᠷ ᠤ᠋ᠨ ᠬᠠᠳ ᠬᠥᠪᠡᠭᠦᠳ ᠴᠥᠮ ᠮᠣᠷᠳᠠᠭᠰᠠᠨ ᠲᠤᠯᠠ ᠫᠤᠯᠠᠨᠳ᠋ ᠲᠤᠷ ᠴᠡᠷᠢᠭᠯᠡᠬᠦ ᠶᠠᠪᠤᠳᠠᠯ ᠢ ᠲᠦᠷ ᠬᠣᠢᠰᠢᠯᠠᠭᠤᠯᠵᠤ ᠰᠢᠨᠡ ᠥᠩᠭᠡᠷᠡᠭᠰᠡᠨ ᠦ᠌ ᠬᠣᠢᠨᠠ ᠵᠢᠴᠢ ᠮᠡᠳᠡᠰᠦᠭᠡᠢ ᠭᠡᠮᠡᠨ ᠲᠣᠭᠲᠠᠪᠠ᠃ ᠡᠳᠦᠷ ᠰᠠᠷᠠ ᠶ᠋ᠢᠨ ᠥᠩᠭᠡᠷᠡᠬᠦ ᠢᠨᠦ ᠵᠡᠪᠡ ᠮᠡᠲᠦ ᠬᠤᠷᠳᠤᠨ ᠲᠤᠯᠠ ᠤᠳᠠᠬᠤ ᠦᠭᠡᠢ ᠬᠥᠬᠡᠭᠡ ᠰᠠᠷᠠ ᠶ᠋ᠢᠨ ᠰᠡᠭᠦᠯᠴᠢ ᠪᠣᠯᠵᠤ ᠪᠠᠲᠤ ᠬᠠᠨ᠂ ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ ᠲᠡᠷᠢᠭᠦᠯᠡᠨ ᠶᠡᠬᠡ ᠴᠠᠴᠠᠷ ᠲᠤᠷ ᠪᠢᠲᠡᠭᠦᠯᠡᠬᠦ ᠶᠡᠬᠡ ᠬᠤᠷᠢᠮ ᠵᠠᠷᠯᠠᠨ ᠪᠢᠲᠡᠭᠦᠯᠡᠵᠦ ᠪᠦᠬᠦᠢ ᠳ᠋ᠦ᠍ᠷ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ᠷ ᠶᠡᠬᠡᠳᠡ ᠦᠢᠮᠡᠯᠳᠦᠵᠦ ᠡᠭᠦᠰᠬᠡᠪᠡ᠃ ᠴᠠᠴᠠᠷ ᠤ᠋ᠨ ᠬᠤᠷᠢᠮ ᠳ᠋ᠤᠷ ᠪᠠᠢᠭᠰᠠᠨ ᠬᠥᠮᠦᠰ ᠴᠥᠮ ᠰᠣᠴᠢᠵᠤ ᠬᠠᠷᠠᠢᠨ ᠪᠣᠰᠤᠯᠴᠠᠬᠤᠢ ᠳ᠋ᠤᠷ ᠰᠦᠪᠡᠭᠡᠲᠡᠢ ᠪᠠᠭᠠᠲᠤᠷ ᠣᠯᠠᠨ ᠬᠥᠮᠦᠨ ᠢ ᠠᠶᠤᠯᠳᠤᠬᠤ ᠬᠡᠷᠡᠭ ᠦᠭᠡᠢ᠂ ᠪᠢ ᠭᠠᠷᠴᠤ ᠦᠵᠡᠰᠦᠭᠡᠢ ᠭᠡᠮᠡᠨ ᠶᠠᠭᠠᠷᠠᠨ ᠭᠠᠳᠠᠭᠰᠢ ᠭᠠᠷᠴᠤ ᠣᠳᠪᠠ᠃ ᠶᠠᠮᠠᠷ ᠬᠤᠪᠢᠰᠤᠯ ᠭᠠᠷᠤᠭᠰᠠᠨ ᠢ ᠮᠡᠳᠡᠰᠭᠡᠢ ᠬᠡᠮᠡᠪᠡᠰᠦ ᠳᠣᠣᠷᠠᠲᠤ ᠪᠦᠯᠦᠭ ᠲᠣᠷ ᠦᠵᠡᠲᠦᠭᠡᠢ᠃
ᠰᠤᠯᠠ ᠰᠢᠯᠦᠭ
ᠪᠠᠴᠢᠯᠠᠨ ᠭᠡᠨᠡᠳᠡᠭᠦᠯᠵᠦ ᠮᠥᠩᠬᠡ ᠬᠠᠨ ᠺᠠᠯᠢᠽ ᠬᠣᠲᠠ ᠶ᠋ᠢ ᠬᠢᠯᠪᠠᠷᠬᠠᠨ ᠢ᠋ᠶ᠋ᠠᠷ ᠡᠵᠡᠯᠡᠪᠡ
ᠪᠠᠭᠠᠲᠤᠷ ᠪᠠᠭᠠᠲᠤᠷ ᠢ᠋ᠶ᠋ᠠᠨ ᠬᠠᠢᠷᠠᠯᠠᠬᠤᠶᠠ ᠳ᠋ᠧᠮᠢᠲ᠋ᠷᠢ ᠬᠦᠩ ᠬᠣᠲᠠ ᠶ᠋ᠢᠨ ᠣᠯᠠᠨ ᠤ᠋ ᠠᠮᠢ ᠶ᠋ᠢ ᠭᠤᠶᠤᠪᠠ
ᠪᠠᠷᠰ ᠢᠷᠪᠠᠰ ᠮᠡᠲᠦ ᠮᠣᠩᠭᠣᠯᠴᠤᠳ ᠠᠯᠲᠠᠨ ᠳᠥᠷᠥᠭᠡ ᠬᠠᠩᠭᠢᠨᠠᠭᠤᠯᠤᠨ ᠢᠯᠠᠯᠲᠠ ᠶ᠋ᠢᠨ ᠲᠠᠭᠤᠨᠠ ᠪᠤᠴᠠᠬᠤᠢ ᠳ᠋ᠤᠷ ᠂
ᠪᠠᠷᠠᠭᠤᠨ ᠬᠢᠵᠠᠭᠠᠷ ᠢ᠋ ᠰᠠᠬᠢᠬᠤ ᠪᠠᠲᠤ ᠬᠠᠨ ᠦᠳᠡᠯᠭᠡ ᠶ᠋ᠢᠨ ᠬᠤᠨᠳᠠᠭᠠ ᠪᠠᠷᠢᠵᠤ ᠠᠷᠢᠬᠢ ᠥᠩᠭᠡ ᠶ᠋ᠢ ᠰᠢᠭᠦᠮᠵᠢᠯᠡᠪᠡᠢ᠃