ᠳᠡᠯᠡᠬᠡᠢ- ᠪ᠂ ᠶᠠᠪᠤᠭᠤᠬᠤᠯᠠᠨ ДЭЛХИЙ- Б.Явуухулан
464ᠳᠡᠯᠡᠬᠡᠢ
ᠪ᠂ ᠶᠠᠪᠤᠭᠤᠬᠤᠯᠠᠨ
ᠶᠡᠬᠡ ᠰᠢᠯᠦᠭᠴᠢ ᠪ᠂ ᠶᠠᠪᠤᠭᠤᠬᠤᠯᠠᠨ ᠲᠤᠰ ᠰᠢᠯᠦᠭ ᠲᠤ ᠪᠡᠨ ᠭᠦᠨ ᠭᠦᠨᠵᠡᠭᠡᠢ ᠥᠪᠡᠷᠮᠢᠴᠡ ᠰᠡᠳᠬᠢᠬᠦᠢ ᠪᠡᠷ ᠳᠡᠯᠡᠬᠡᠢ ᠶ᠋ᠢᠨ ᠪᠥᠮᠪᠥᠷᠴᠡᠭ ᠪᠣᠯ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌《ᠠᠮᠢ ᠠᠮᠢᠳᠤᠷᠠᠯ ᠤ᠋ᠨ ᠠᠯᠲᠠᠨ ᠥᠯᠥᠭᠡᠢ》 ᠪᠣᠯᠬᠤ ᠶ᠋ᠢᠨ ᠤᠴᠢᠷ ᠶᠣᠰᠣ ᠶ᠋ᠢ ᠰᠢᠯᠦᠭᠯᠡᠬᠦ ᠶ᠋ᠢᠨ ᠬᠠᠮᠲᠤ ᠡᠨᠡ ᠬᠦ᠌《ᠲᠤᠵᠢ ᠡᠷᠭᠢᠯᠳᠦᠬᠦ ᠬᠠᠲᠠᠭᠤ ᠪᠥᠮᠪᠥᠯᠢᠭ》 ᠢ᠋ᠶ᠋ᠡᠨ ᠬᠠᠢᠷᠠᠯᠠᠵᠤ ᠬᠠᠮᠠᠭᠠᠯᠠᠵᠤ ᠶᠠᠪᠤᠬᠤ ᠶ᠋ᠢᠨ ᠤᠳᠬᠠ ᠴᠢᠨᠠᠷ ᠢ᠋ ᠤᠶᠠᠩᠭᠠᠯᠠᠵᠤ ᠪᠣᠢ᠃
ᠳᠡᠯᠡᠬᠡᠢ ᠶ᠋ᠢᠨ ᠪᠥᠮᠪᠥᠷᠴᠡᠭ ᠦ᠋ᠨ ᠪᠥᠮᠪᠥᠯᠢᠭ ᠬᠡᠯᠪᠡᠷᠢ ᠲᠡᠢ ᠠᠳᠠᠯᠢ ᠪᠠᠷ ᠰᠢᠯᠦᠭ ᠴᠦ᠍《ᠢᠷᠡᠬᠦ ᠪᠤᠴᠠᠬᠤ ᠶ᠋ᠢᠨ ᠡᠭᠡᠯᠵᠢᠯᠡᠬᠦ ᠴᠠᠭ》 ᠢ᠋ ᠡᠬᠢᠯᠡᠯᠲᠡ ᠲᠡᠭᠦᠰᠬᠡᠯ ᠢ᠋ᠶ᠋ᠡᠨ ᠢᠵᠢᠯ ᠪᠠᠳᠠᠭ ᠢ᠋ᠶ᠋ᠠᠷ ᠤᠳᠬᠠ ᠠᠮᠠᠳᠠᠭᠤᠯᠤᠨ ᠬᠤᠮᠢᠭᠰᠠᠨ ᠪᠥᠭᠡᠳ ᠰᠢᠯᠦᠭ ᠦ᠋ᠨ ᠭᠣᠣᠯ ᠠᠭᠤᠯᠭᠠ ᠶ᠋ᠢᠨ ᠪᠦᠯᠦᠭ ᠪᠣᠯᠭᠠᠨ ᠢ᠋ᠶ᠋ᠠᠨ《ᠠᠢ ᠳᠠ ᠳᠡᠯᠡᠬᠡᠢ᠂ ᠳᠡᠯᠡᠬᠡᠢ᠂ ᠳᠡᠯᠡᠬᠡᠢ/ᠠᠮᠢ᠂ ᠠᠮᠢᠳᠤᠷᠠᠯ ᠤ᠋ᠨ ᠠᠯᠲᠠᠨ ᠥᠯᠥᠭᠡᠢ》 ᠭᠡᠬᠦ ᠤᠳᠬᠠ ᠶ᠋ᠢᠨ ᠳᠠᠪᠲᠠᠯᠲᠠ ᠪᠠᠷ ᠡᠬᠢᠯᠡᠵᠦ᠂ ᠠᠭᠤᠯᠭᠠ ᠶ᠋ᠢᠨ ᠬᠤᠷᠢᠶᠠᠩᠭᠤᠢᠯᠠᠯ ᠪᠣᠯᠬᠤ ᠬᠣᠶᠠᠷ ᠮᠥᠷ ᠢ᠋ᠶ᠋ᠡᠷ ᠳᠠᠷᠠᠭᠠᠴᠢ ᠶ᠋ᠢᠨ ᠠᠭᠤᠯᠭᠠ— ᠥᠩᠭᠡ ᠪᠡᠷ ᠢᠯᠭᠠᠰᠢ ᠦᠭᠡᠢ ᠤᠷᠠᠨ ᠰᠣᠯᠣᠩᠭᠠᠯᠢᠭ/ ᠦᠭᠡ ᠪᠡᠷ ᠥᠭᠦᠯᠡᠰᠢ ᠦᠭᠡᠢ ᠦᠨᠡᠨ ᠭᠠᠢᠬᠠᠮᠰᠢᠭ ᠤ᠋ᠳ ᠢ᠋ ᠤᠶᠠᠩᠭᠠᠯᠠᠵᠤ ᠪᠠᠢᠨᠠ᠃
ᠲᠤᠰ ᠰᠢᠯᠦᠭ ᠦ᠋ᠨ ᠡᠨᠡ ᠣᠨᠴᠠᠯᠢᠭ ᠢ᠋ ᠮᠥᠷᠳᠡᠵᠦ ᠰᠣᠨᠢᠷᠬᠠᠵᠠᠢ᠃ ᠪᠠᠳᠠᠭ ᠪᠣᠯᠭᠠᠨ᠂ ᠮᠥᠷ ᠪᠣᠯᠭᠠᠨ᠂ ᠦᠭᠡ ᠪᠣᠯᠭᠠᠨ ᠳ᠋ᠤ᠌ ᠰᠢᠩᠭᠡᠭᠰᠡᠨ ᠭᠦᠨ ᠤᠳᠬᠠ᠂ ᠪᠢᠯᠬᠠᠮᠠ ᠰᠡᠳᠬᠢᠯᠭᠡ ᠶ᠋ᠢ ᠰᠡᠳᠬᠢᠵᠦ ᠤᠬᠠᠭᠠᠷᠠᠢ!
ᠨᠢᠭᠡ
ᠲᠤᠯᠬᠤ ᠴᠠᠭ ᠦᠭᠡᠢ ᠨᠠᠯᠠᠤ ᠲᠡᠩᠭᠡᠯᠢᠭ
ᠲᠤᠵᠢ ᠡᠷᠭᠢᠯᠳᠦᠬᠦ ᠬᠠᠲᠠᠭᠤ ᠪᠥᠮᠪᠥᠯᠢᠭ
ᠥᠩᠭᠡ ᠪᠡᠷ ᠢᠯᠭᠠᠰᠢ ᠦᠭᠡᠢ ᠤᠷᠠᠨ ᠰᠣᠯᠣᠩᠭᠠᠯᠢᠭ
ᠦᠭᠡ ᠪᠡᠷ ᠥᠭᠦᠯᠡᠰᠢ ᠦᠭᠡᠢ ᠦᠨᠡᠨ ᠭᠠᠢᠬᠠᠮᠰᠢᠭ!
ᠪᠦᠷᠦᠩᠬᠦᠢ ᠰᠠᠨᠰᠠᠷ ᠤ᠋ᠨ ᠴᠡᠩᠬᠡᠷ ᠨᠢᠳᠦ
ᠪᠦᠬᠦᠢ ᠯᠡ ᠠᠮᠢᠲᠠᠨ ᠤ᠋ ᠦᠳᠡᠯᠡᠬᠦ ᠦᠳᠡ
ᠢᠷᠡᠬᠦ ᠪᠤᠴᠠᠬᠤ ᠶ᠋ᠢᠨ ᠡᠭᠡᠯᠵᠢᠯᠡᠬᠦ ᠴᠠᠭ—
ᠡᠨᠡ ᠪᠣᠯ ᠮᠠᠨ ᠤ᠋ ᠳᠡᠯᠡᠬᠡᠢ ᠶ᠋ᠢᠨ ᠪᠥᠮᠪᠥᠷᠴᠡᠭ!
ᠬᠣᠶᠠᠷ
ᠠᠢ ᠳᠠ ᠳᠡᠯᠡᠬᠡᠢ᠂ ᠳᠡᠯᠡᠬᠡᠢ᠂ ᠳᠡᠯᠡᠬᠡᠢ
ᠠᠮᠢ᠂ ᠠᠮᠢᠳᠤᠷᠠᠯ ᠤ᠋ᠨ ᠠᠯᠲᠠᠨ ᠥᠯᠥᠭᠡᠢ!
ᠴᠡᠩᠭᠡᠭ ᠤᠰᠤ᠂ ᠠᠭᠠᠷ᠂ ᠨᠠᠷᠠᠨ ᠤ᠋ ᠣᠷᠣᠨ
ᠴᠣᠭ ᠵᠢᠪᠬᠤᠯᠠᠩᠲᠤ ᠬᠥᠮᠦᠨ᠂ ᠴᠢᠨᠦ ᠡᠵᠡᠨ!
ᠨᠠᠷᠠᠨ ᠭᠡᠢᠭᠰᠡᠨ ᠳᠡᠯᠡᠬᠡᠢ ᠴᠢᠮᠠ ᠳᠡᠭᠡᠷᠡ
ᠨᠠᠰᠤ ᠪᠠᠨ ᠡᠯᠡᠭᠡᠬᠦ ᠪᠢᠳᠡ ᠵᠢᠮᠡ ᠲᠡᠢ᠃
ᠠᠷᠢᠭᠤᠬᠠᠨ ᠴᠢᠮᠠ ᠶ᠋ᠢ ᠪᠡᠨ᠂ ᠦᠶᠡ ᠶ᠋ᠢᠨ ᠦᠶᠡ ᠪᠡᠷ
ᠠᠯᠠᠭ ᠨᠢᠳᠦ ᠰᠢᠭ ᠢ᠋ᠶ᠋ᠡᠨ ᠬᠠᠢᠷᠠᠯᠠᠬᠤ ᠤᠴᠢᠷ ᠲᠠᠢ!
ᠡᠩ ᠦᠭᠡᠢ ᠠᠭᠤᠳᠠᠮ ᠤ᠋ᠨ ᠴᠢᠨᠢ ᠨᠢᠭᠡᠬᠡᠨ ᠵᠠᠢ ᠳ᠋ᠤ᠌
ᠡᠬᠡ ᠣᠷᠣᠨ ᠮᠢᠨᠢ ᠴᠡᠯᠡᠢᠵᠦ ᠪᠠᠢᠨᠠ᠃
ᠬᠥᠷᠥᠰᠥᠲᠦ ᠭᠠᠵᠠᠷ ᠤ᠋ᠨ ᠴᠢᠨᠢ ᠨᠢᠭᠡᠨ ᠨᠤᠭᠤ ᠳ᠋ᠤ᠌
ᠬᠦᠢ ᠳᠠᠷᠤᠭᠰᠠᠨ ᠴᠢᠯᠠᠭᠤ ᠮᠢᠨᠢ ᠪᠣᠢ!
ᠬᠣᠷᠸᠠ ᠳ᠋ᠤ᠌ ᠢᠷᠡᠬᠦ ᠳ᠋ᠦ᠍ ᠮᠢᠨᠢ ᠤᠭᠲᠤᠵᠤ ᠠᠪᠤᠭᠰᠠᠨ
ᠬᠥᠮᠦᠨ ᠦ᠌ ᠰᠠᠢᠬᠠᠨ ᠰᠡᠳᠬᠢᠯ ᠪᠣᠢ᠂
ᠬᠣᠯᠠᠬᠢ ᠳᠡᠭᠡᠳᠦᠰ ᠦ᠋ᠨ ᠮᠢᠨᠢ ᠲᠡᠦᠬᠡ ᠬᠠᠳᠠᠭᠠᠯᠠᠭᠰᠠᠨ
ᠬᠥᠮᠦᠨ ᠠᠷᠠᠳ ᠤ᠋ᠨ ᠮᠢᠨᠢ ᠰᠣᠶᠣᠯ ᠪᠣᠢ!
ᠭᠤᠷᠪᠠ
ᠠᠢ ᠳᠠ᠂ ᠳᠡᠯᠡᠬᠡᠢ᠂ ᠳᠡᠯᠡᠬᠡᠢ᠂ ᠳᠡᠯᠡᠬᠡᠢ
ᠠᠮᠢ᠂ ᠠᠮᠢᠳᠤᠷᠠᠯ ᠤ᠋ᠨ ᠠᠯᠲᠠᠨ ᠥᠯᠥᠭᠡᠢ!
ᠬᠠᠮᠢᠭᠠ ᠴᠤ᠌ ᠪᠠᠢᠬᠤ ᠦᠭᠡᠢ ᠭᠠᠭᠴᠠ ᠳ᠋ᠧᠪᠠᠵᠠᠨ
ᠬᠠᠷᠠᠬᠤ ᠨᠢᠳᠦᠨ ᠳ᠋ᠦ᠍ ᠭᠣᠴᠣ ᠪᠠᠶᠠᠰᠬᠤᠯᠠᠩ!
ᠡᠴᠢᠭᠡ ᠶ᠋ᠢᠨ ᠳᠦᠷᠢ ᠰᠢᠭ ᠪᠤᠭᠤᠷᠤᠯ ᠠᠭᠤᠯᠠᠰ
ᠡᠬᠡ ᠶ᠋ᠢᠨ ᠰᠡᠳᠬᠢᠯ ᠰᠢᠭ ᠠᠭᠤᠳᠠᠮ ᠲᠠᠯᠠ
ᠬᠡᠦᠬᠡᠨ ᠦ᠌ ᠮᠢᠨᠢ ᠭᠡᠵᠢᠭᠡ ᠰᠢᠭ ᠭᠣᠣᠯ ᠮᠥᠷᠡᠨ
ᠬᠦᠦ ᠶ᠋ᠢᠨ ᠮᠢᠨᠢ ᠳᠠᠬᠢ ᠰᠢᠭ᠋ ᠣᠢ ᠰᠢᠭᠤᠢ!
ᠠᠭᠤᠯᠠᠨ ᠳ᠋ᠤ᠌ ᠰᠢᠲᠦᠵᠦ ᠠᠮᠢᠳᠤᠷᠠᠬᠤ ᠠᠷᠢᠶᠠᠲᠠᠨ
ᠤᠰᠤᠨ ᠳ᠋ᠤ᠌ ᠰᠢᠲᠦᠵᠦ ᠦᠷᠡᠵᠢᠬᠦ ᠵᠢᠭᠠᠰᠤ
ᠠᠭᠠᠷ ᠲᠤ᠌ ᠰᠢᠲᠦᠵᠦ ᠨᠢᠰᠬᠦ ᠵᠢᠭᠦᠷᠲᠡᠨ
ᠠᠲᠠᠷ ᠲᠤ᠌ ᠰᠢᠲᠦᠵᠦ ᠠᠷᠪᠢᠵᠢᠬᠤ ᠰᠦᠷᠦᠭ!
ᠨᠠᠮᠤᠷ ᠤ᠋ᠨ ᠲᠠᠷᠢᠶᠠᠨ ᠤ᠋ ᠰᠢᠷᠠ ᠰᠢᠭᠤᠷᠭᠠ
ᠨᠠᠮᠵᠢᠶᠠ ᠳᠡᠯᠡᠬᠡᠢ ᠶ᠋ᠢᠨ ᠤᠶᠠᠩᠭᠠᠲᠤ ᠱᠠᠭᠱᠤᠤᠷᠭᠠ
ᠤᠰᠤᠨ ᠴᠡᠩᠬᠡᠷ ᠳᠥᠷᠪᠡᠨ ᠳᠠᠯᠠᠢ
ᠤᠷᠭᠤᠮᠠᠯ ᠨᠣᠭᠣᠭᠠᠨ ᠲᠠᠪᠤᠨ ᠲᠢᠪ!
ᠳᠥᠷᠪᠡ
ᠠᠢ ᠳᠠ᠂ ᠳᠡᠯᠡᠬᠡᠢ᠂ ᠳᠡᠯᠡᠬᠡᠢ᠂ ᠳᠡᠯᠡᠬᠡᠢ
ᠠᠮᠢ᠂ ᠠᠮᠢᠳᠤᠷᠠᠯ ᠤ᠋ᠨ ᠠᠯᠲᠠᠨ ᠥᠯᠥᠭᠡᠢ!
ᠬᠦᠢ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠡᠷᠳᠡᠨᠢ ᠶ᠋ᠢᠨ ᠬᠦᠳᠡᠷ
ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠲᠡᠦᠬᠡᠨ ᠰᠤᠳᠤᠷ!
ᠦᠶᠡ ᠡᠯᠡᠭᠡᠭᠰᠡᠨ ᠬᠡᠭᠡᠷᠡ ᠶ᠋ᠢᠨ ᠪᠠᠯᠭᠠᠰᠤ
ᠦᠨᠡᠨ ᠢ᠋ᠶ᠋ᠡᠨ ᠨᠢᠭᠤᠭᠰᠠᠨ ᠡᠩᠭᠡᠷ ᠦ᠋ᠨ ᠪᠤᠯᠠᠰᠢ
ᠣᠮᠣᠭ ᠳᠠᠮᠵᠢᠭᠰᠠᠨ ᠬᠠᠭᠤᠴᠢᠨ ᠰᠡᠯᠡᠮᠡ
ᠣᠩᠭᠣᠯᠠᠵᠤ ᠳᠠᠭᠢᠭᠰᠠᠨ ᠥᠨᠥᠴᠢᠨ ᠰᠦᠮᠡ!
ᠬᠣᠷᠸᠠ ᠶ᠋ᠢ ᠬᠡᠷᠦᠭᠰᠡᠨ ᠬᠥᠮᠦᠨ ᠦ᠌ ᠬᠠᠷᠭᠤᠢ
ᠬᠣᠲᠠᠯᠠ ᠬᠤᠷᠠᠭᠰᠠᠨ ᠬᠣᠲᠠ ᠰᠠᠭᠤᠷᠢᠨ
ᠫᠤᠤ ᠪᠠᠷᠢᠭᠰᠠᠨ ᠬᠢᠯᠢ ᠶ᠋ᠢᠨ ᠬᠠᠷᠠᠭᠤᠯ
ᠪᠠᠭᠤᠷᠢ ᠪᠠᠨ ᠳᠠᠷᠤᠭᠰᠠᠨ ᠤᠯᠤᠰ ᠭᠦᠷᠦᠨ!
ᠮᠠᠭᠤ ᠲᠠᠢ ᠰᠠᠢᠨ ᠲᠠᠢ ᠪᠤᠭᠤᠷᠤᠯ ᠥᠩᠭᠡᠷᠡᠭᠰᠡᠨ
ᠮᠥᠩᠬᠡ ᠶ᠋ᠢᠨ ᠢᠷᠦᠭᠡᠯ ᠲᠡᠢ ᠰᠠᠷᠠᠭᠤᠯ ᠢᠷᠡᠭᠡᠳᠦᠢ
ᠠᠳᠠ ᠦᠵᠡᠭᠳᠡᠵᠦ ᠨᠤᠷᠠᠭᠰᠠᠨ ᠺᠠᠫᠢᠲ᠋ᠠᠯᠢᠰᠮ②
ᠠᠮᠢ ᠲᠠᠯᠪᠢᠵᠤ ᠣᠯᠤᠭᠰᠠᠨ ᠰᠣᠼᠢᠶᠠᠯᠢᠰᠮ③᠃
ᠲᠠᠪᠤ
ᠠᠢ ᠳᠠ᠂ ᠳᠡᠯᠡᠬᠡᠢ᠂ ᠳᠡᠯᠡᠬᠡᠢ᠂ ᠳᠡᠯᠡᠬᠡᠢ
ᠠᠮᠢ᠂ ᠠᠮᠢᠳᠤᠷᠠᠯ ᠤ᠋ᠨ ᠠᠯᠲᠠᠨ ᠥᠯᠥᠭᠡᠢ!
ᠭᠡᠷᠡᠯ ᠬᠠᠷᠠᠩᠭᠤᠢ ᠶ᠋ᠢᠨ ᠲᠡᠷᠰᠯᠡᠬᠦ ᠲᠠᠯᠠᠪᠤᠷ
ᠭᠡᠭᠡᠨ ᠤᠬᠠᠭᠠᠨ ᠤ᠋ ᠢᠯᠠᠬᠤ ᠪᠠᠮᠪᠠᠷ!
ᠦᠵᠡᠰᠬᠦᠯᠡᠩᠲᠦ ᠰᠠᠢᠬᠠᠨ ᠮᠠᠨ ᠤ᠋ ᠭᠠᠷᠠᠭ
ᠦᠨᠡᠨ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠶᠠᠨᠳᠠᠰᠢ ᠦᠭᠡᠢ ᠪᠠᠶᠠᠨ!
ᠬᠣᠮᠣᠬᠠᠢ ᠰᠡᠳᠬᠢᠯ᠂ ᠤᠰᠤᠨ ᠲᠡᠨᠡᠭ
ᠬᠣᠷᠸᠠ ᠳ᠋ᠤ᠌ ᠴᠢᠨᠦ ᠭᠠᠭᠴᠠ ᠳᠠᠢᠰᠤᠨ!
ᠥᠮᠴᠢ ᠭᠥᠷᠥᠩᠬᠡᠨ ᠦ᠌ ᠬᠡᠲᠦᠷᠬᠡᠢ ᠰᠢᠨᠤᠯ
ᠡᠭᠦᠳᠡᠨ ᠳ᠋ᠦ᠍ ᠴᠣᠣᠵᠢ ᠵᠡᠭᠦᠬᠦ ᠪᠣᠯᠤᠭᠰᠠᠨ ᠶᠤᠮ
ᠥᠷᠭᠡᠨ ᠳᠡᠯᠡᠬᠡᠢ ᠶ᠋ᠢ ᠴᠣᠣᠵᠢᠯᠠᠭᠰᠠᠨ ᠲᠡᠨᠡᠭᠯᠡᠯ
ᠦᠬᠦᠭᠡᠷ ᠦ᠋ᠨ ᠲᠡᠢᠨ ᠳᠡᠭᠳᠡᠭᠡᠬᠦ ᠪᠣᠯᠤᠭᠰᠠᠨ ᠶᠤᠮ᠃
ᠬᠦᠢᠲᠡᠨ ᠰᠦᠰᠦᠲᠡᠨ ᠦ᠌ ᠠᠲ᠋ᠣᠮ ᠤ᠋ᠨ ᠭᠠᠮᠰᠢᠭ ᠲᠤ᠌
ᠬᠥᠮᠦᠨ ᠲᠡᠢ ᠪᠡᠨ ᠬᠠᠮᠲᠤ ᠳᠡᠯᠡᠬᠡᠢ ᠮᠢᠨᠢ ᠰᠢᠷᠠᠭᠳᠤᠭᠰᠠᠨ ᠶᠤᠮ᠃
ᠦᠬᠦᠯ ᠳᠡᠢᠯᠳᠡᠭ ᠦᠭᠡᠢ ᠦᠯᠢᠭᠡᠷ ᠦ᠋ᠨ ᠪᠠᠭᠠᠲᠤᠷ ᠰᠢᠭ᠋
ᠦᠨᠡᠰᠦᠨ ᠳᠤᠮᠳᠠ ᠠ᠋ᠴᠠ ᠬᠣᠶᠠᠭᠤᠯᠠ ᠪᠠᠨ ᠪᠣᠰᠤᠭᠰᠠᠨ ᠶᠤᠮ!
ᠵᠢᠷᠭᠤᠭᠠ
ᠠᠢ ᠳᠠ ᠳᠡᠯᠡᠬᠡᠢ᠂ ᠳᠡᠯᠡᠬᠡᠢ᠂ ᠳᠡᠯᠡᠬᠡᠢ
ᠠᠮᠢ᠂ ᠠᠮᠢᠳᠤᠷᠠᠯ ᠤ᠋ᠨ ᠠᠯᠲᠠᠨ ᠥᠯᠥᠭᠡᠢ!
ᠰᠠᠨᠰᠠᠷ ᠬᠣᠷᠸᠠ ᠶ᠋ᠢᠨ ᠴᠡᠩᠬᠡᠷ ᠨᠢᠳᠦ
ᠰᠠᠷᠠᠭᠤᠯ ᠤᠬᠠᠭᠠᠨ ᠤ᠋ ᠴᠡᠯᠡᠭᠡᠷ ᠡᠭᠦᠳᠡ!
ᠬᠥᠮᠦᠨ ᠦ᠌ ᠤᠬᠠᠭᠠᠨ ᠰᠠᠷᠠᠭᠤᠯᠰᠢᠭᠠᠳ
ᠬᠦᠵᠢ ᠳᠡᠯᠡᠬᠡᠢ ᠪᠡᠨ ᠰᠣᠶᠣᠯ ᠢ᠋ᠶ᠋ᠠᠷ ᠴᠢᠮᠡᠵᠦ ᠪᠠᠢᠨᠠ!
ᠰᠠᠨᠰᠠᠷ᠂ ᠰᠠᠷᠠᠨ ᠳ᠋ᠤ᠌ ᠬᠡᠳᠦᠬᠡᠨ ᠬᠣᠨᠣᠭᠠᠳ
ᠰᠠᠢᠬᠠᠨ ᠴᠢᠮᠠ ᠶ᠋ᠢ ᠪᠡᠨ ᠰᠠᠨᠠᠴᠢᠬᠠᠭᠠᠳ ᠢᠷᠡᠵᠦ ᠪᠠᠢᠨᠠ!
ᠦᠵᠡᠮᠵᠢ ᠭᠤᠸᠠ ᠶ᠋ᠢᠨ ᠭᠠᠢᠬᠠᠮᠰᠢᠭ ᠴᠢᠮᠠ ᠶ᠋ᠢ ᠪᠡᠨ
ᠦᠯᠢᠭᠡᠷ ᠦ᠋ᠨ ᠬᠣᠯᠠ ᠠ᠋ᠴᠠ ᠭᠠᠭᠠᠷᠢᠨ ᠠᠩᠬᠠ ᠬᠠᠷᠠᠭᠰᠠᠨ ᠶᠤᠮ᠃
ᠬᠡᠵᠢᠶᠡ ᠴᠦ᠍ ᠣᠷᠬᠢᠬᠤ ᠦᠭᠡᠢ ᠳᠡᠯᠡᠬᠡᠢ ᠴᠢᠮᠠ ᠶ᠋ᠢ ᠪᠡᠨ
ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠤᠯᠠᠮ ᠬᠠᠢᠷᠠᠯᠠᠭᠰᠠᠨ ᠶᠤᠮ!
ᠲᠡᠢᠮᠦ ᠴᠦ᠍ ᠤᠴᠢᠷ ᠠ᠋ᠴᠠ ᠦᠨᠳᠦᠰᠦᠲᠡᠨ ᠠᠷᠠᠰᠤᠲᠠᠨ
ᠲᠢᠪ ᠬᠣᠭᠣᠷᠣᠨᠳᠣ ᠪᠠᠨ ᠨᠠᠢᠷᠠᠮᠳᠠᠬᠤ ᠪᠣᠯᠤᠭᠰᠠᠨ ᠶᠤᠮ᠃
ᠳᠠᠶᠠᠩ ᠳᠡᠯᠡᠬᠡᠢ ᠶ᠋ᠢᠨ ᠡᠩᠬᠡ ᠲᠠᠢᠪᠤᠩ
ᠳᠠᠭᠢᠬᠤ ᠰᠦᠯᠳᠡ ᠨᠢ ᠪᠣᠯᠵᠤ ᠮᠠᠨᠳᠤᠭᠰᠠᠨ ᠶᠤᠮ!
ᠳᠣᠯᠣᠭᠠ
ᠠᠢ ᠳᠠ ᠳᠡᠯᠡᠬᠡᠢ᠂ ᠳᠡᠯᠡᠬᠡᠢ᠂ ᠳᠡᠯᠡᠬᠡᠢ
ᠠᠮᠢ᠂ ᠠᠮᠢᠳᠤᠷᠠᠯ ᠤ᠋ᠨ ᠠᠯᠲᠠᠨ ᠥᠯᠥᠭᠡᠢ!
ᠴᠡᠩᠭᠡᠭ ᠤᠰᠤ᠂ ᠠᠭᠠᠷ᠂ ᠨᠠᠷᠠᠨ ᠤ᠋ ᠣᠷᠣᠨ
ᠴᠣᠭ ᠵᠢᠪᠬᠤᠯᠠᠩᠲᠤ ᠬᠥᠮᠦᠨ᠂ ᠴᠢᠨᠦ ᠡᠵᠡᠨ!
ᠰᠠᠷᠠᠭᠤᠯᠬᠠᠨ ᠳᠡᠯᠡᠬᠡᠢ ᠮᠢᠨᠢ ᠴᠢᠨᠦ ᠡᠵᠡᠨ
ᠰᠠᠢᠬᠠᠨ ᠢᠷᠡᠭᠡᠳᠦᠢ ᠪᠡᠨ ᠲᠣᠳᠣ ᠬᠠᠷᠠᠵᠤ ᠪᠠᠢᠨᠠ!
ᠦᠶᠡ ᠶ᠋ᠢᠨ ᠦᠶᠡ ᠳ᠋ᠦ᠍ ᠨᠠᠢᠷᠠᠮᠳᠠᠬᠤ ᠶ᠋ᠢ ᠬᠦᠰᠡᠭᠰᠡᠨ
ᠦᠢ ᠣᠯᠠᠨ ᠤ᠋ ᠲᠡᠮᠡᠴᠡᠯ ᠢᠯᠠᠵᠤ ᠪᠠᠢᠨᠠ!
ᠵᠤᠯᠠᠢ ᠪᠠᠨ ᠭᠢᠰᠬᠢᠭᠰᠡᠨ ᠡᠵᠢ ᠶ᠋ᠢᠨ ᠬᠡᠦᠬᠡᠳ ᠦ᠋ᠳ ᠰᠢᠭ
ᠵᠤᠵᠠᠭᠠᠨ ᠡᠪ ᠢ᠋ᠶ᠋ᠡᠷ ᠪᠢᠳᠡ ᠠᠬᠠ ᠳᠡᠭᠦᠦᠰ ᠪᠤᠯᠵᠠᠭᠠᠨᠠ!
ᠡᠭᠦᠳᠡᠨ ᠦ᠌ ᠪᠡᠨ ᠭᠠᠳᠠᠭᠠ ᠬᠡᠨ ᠨᠢᠭᠡ ᠪᠡᠨ ᠣᠷᠭᠢᠯ ᠦᠭᠡᠢ
ᠦᠨᠳᠦᠰᠦᠲᠡᠨ ᠣᠯᠠᠨ ᠨᠢᠭᠡ ᠭᠡᠷ ᠪᠦᠯᠢ ᠳ᠋ᠦ᠍ ᠠᠮᠢᠳᠤᠷᠠᠨᠠ!
ᠰᠡᠭᠦᠯᠴᠢ ᠶ᠋ᠢᠨ ᠴᠡᠷᠢᠭ ᠲᠡᠭᠡᠬᠦ ᠳ᠋ᠦ᠍ ᠫᠤᠤ ᠪᠠᠨ ᠣᠷᠬᠢᠵᠤ
ᠡᠴᠦᠰ ᠦ᠋ᠨ ᠭᠠᠭᠴᠠ ᠴᠣᠣᠵᠢ ᠶ᠋ᠢ ᠮᠦᠽᠧᠢ ᠳ᠋ᠦ᠍ ᠲᠠᠯᠪᠢᠨᠠ!
ᠬᠥᠮᠦᠨ ᠦ᠌ ᠡᠷᠬᠡ ᠲᠡᠭᠦᠰ ᠢᠯᠠᠭᠰᠠᠨ ᠭᠠᠷᠠᠭ ᠭᠡᠵᠦ
ᠬᠦᠵᠢ ᠳᠡᠯᠡᠬᠡᠢ ᠪᠡᠨ ᠪᠦᠬᠦᠯᠢ ᠪᠡᠷ ᠨᠢ ᠨᠡᠷᠡᠯᠡᠨᠡ᠃
ᠨᠠᠢ᠍ᠮᠠ
ᠲᠤᠯᠬᠤ ᠴᠠᠭ ᠦᠭᠡᠢ ᠨᠡᠯᠦ ᠲᠡᠩᠭᠡᠯᠢᠭ
ᠲᠤᠵᠢ ᠡᠷᠭᠢᠯᠳᠦᠬᠦ ᠬᠠᠲᠠᠭᠤ ᠪᠥᠮᠪᠥᠯᠢᠭ
ᠥᠩᠭᠡ ᠪᠡᠷ ᠢᠯᠭᠠᠰᠢ ᠦᠭᠡᠢ ᠤᠷᠠᠨ ᠰᠣᠯᠣᠩᠭᠠᠯᠢᠭ
ᠦᠭᠡ ᠪᠡᠷ ᠥᠭᠦᠯᠡᠰᠢ ᠦᠭᠡᠢ ᠦᠨᠡᠨ ᠭᠠᠢᠬᠠᠮᠰᠢᠭ!
ᠪᠦᠷᠦᠩᠬᠦᠢ ᠰᠠᠨᠰᠠᠷ ᠤ᠋ᠨ ᠴᠡᠩᠬᠡᠷ ᠨᠢᠳᠦ
ᠪᠦᠬᠦᠢ ᠯᠡ ᠠᠮᠢᠲᠠᠨ ᠤ᠋ ᠦᠳᠡᠯᠡᠬᠦ ᠦᠳᠡ
ᠢᠷᠡᠬᠦ ᠪᠤᠴᠠᠬᠤ ᠶ᠋ᠢᠨ ᠡᠭᠡᠯᠵᠢᠯᠡᠬᠦ ᠴᠠᠭ!
ᠡᠨᠡ ᠪᠣᠯ ᠮᠠᠨ ᠤ᠋ ᠳᠡᠯᠡᠬᠡᠢ ᠶ᠋ᠢᠨ ᠪᠥᠮᠪᠥᠷᠴᠡᠭ!
1977 ᠣᠨ
① ᠲᠤᠰ ᠬᠢᠴᠢᠶᠡᠯ ᠢ᠋《ᠮᠣᠩᠭᠣᠯ ᠤ᠋ᠨ ᠰᠢᠯᠢᠳᠡᠭ ᠢᠷᠠᠭᠤ ᠨᠠᠢᠷᠠᠭ》( ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ᠂1986 ᠣᠨ ᠤ᠋ ᠬᠡᠪᠯᠡᠯ) ᠡᠴᠡ ᠰᠣᠩᠭᠣᠪᠠ᠃
②ᠺᠠᠫᠢᠲ᠋ᠠᠯᠢᠰᠮ— ᠬᠥᠷᠥᠩᠭᠡᠲᠦ ᠶᠣᠰᠣ᠃
③ ᠰᠣᠼᠢᠶᠠᠯᠢᠰᠮ— ᠨᠡᠢᠭᠡᠮ ᠵᠢᠷᠤᠮᠲᠤ ᠶᠣᠰᠣ᠃
ᠢᠷᠡᠯᠲᠡ᠄
ᠪᠦᠬᠦᠯᠢ ᠡᠳᠦᠷ ᠦ᠋ᠨ ᠳᠦᠷᠢᠮᠲᠦ ᠡᠩ ᠦ᠋ᠨ ᠳᠡᠭᠡᠳᠦ ᠵᠡᠷᠭᠡ ᠶ᠋ᠢᠨ
ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠵᠡᠬᠦ ᠬᠡᠯᠡ ᠪᠢᠴᠢᠭ ᠦ᠋ᠨ
ᠤᠩᠰᠢᠬᠤ ᠪᠢᠴᠢᠭ
ᠳᠥᠷᠪᠡᠳᠦᠭᠡᠷ ᠳᠡᠪᠲᠡᠷ
ᠳᠤᠮᠳᠠᠳᠤ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ《ᠬᠡᠯᠡ ᠪᠢᠴᠢᠭ》 ᠨᠠᠢᠷᠠᠭᠤᠯᠬᠤ ᠺᠣᠮᠢᠰ ᠨᠠᠢᠷᠠᠭᠤᠯᠪᠠ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠬᠡᠪᠯᠡᠭᠦᠯᠪᠡ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠢᠨᠬᠤᠸᠠ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠲᠠᠷᠬᠠᠭᠠᠪᠠ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠰᠢᠳᠠ ᠨᠡᠷᠡᠮᠵᠢᠲᠦ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠬᠦ
ᠪᠦᠷᠢᠨ ᠪᠤᠰᠤ ᠬᠠᠷᠢᠭᠤᠴᠠᠯᠭᠠᠲᠤ ᠺᠣᠮᠫᠠᠨᠢ ᠬᠡᠪᠯᠡᠪᠡ
2002 ᠣᠨ ᠤ᠋11 ᠰᠠᠷᠠ ᠳ᠋ᠤ᠌ ᠠᠩᠬᠠᠳᠤᠭᠠᠷ ᠬᠡᠪ ᠢ᠋ ᠬᠢᠪᠡ
2008 ᠣᠨ ᠤ᠋11 ᠰᠠᠷᠠ ᠳ᠋ᠤ᠌ ᠳᠣᠯᠣᠳᠤᠭᠠᠷ ᠤᠳᠠᠭᠠ ᠬᠡᠪᠯᠡᠪᠡ
ᠦᠨᠡ᠄6.88 ᠲᠥᠭᠥᠷᠢᠭ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠳ ·ᠣᠶᠤᠨᠴᠡᠴᠡᠭ
ᠦᠵᠢᠶᠡᠳ᠂ ᠡᠷᠳᠡᠨᠢᠴᠡᠴᠡᠭ ᠨᠠᠷᠠᠨᠰᠤᠶᠤᠯ
ᠬᠢᠨᠠᠭᠴᠢ᠄ ᠠ᠊ · ᠰᠠᠷᠠᠨᠭᠡᠷᠡᠯ· ᠳ ·ᠣᠶᠤᠨᠴᠡᠴᠡᠭ
2024᠂1᠂14