ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠠᠷᠪᠠᠨ ᠨᠢᠭᠡ ᠂ ᠤᠯᠠᠭᠠᠨ ᠢᠳᠡᠭᠡᠨ ᠦ ᠪᠦᠯᠦᠭ 4 > Хөх зул – Боржигон Ванжал –" Арван нэг ᠂ Улаан идээний бүлэг 4 "
440ᠠᠷᠪᠠᠨ ᠨᠢᠭᠡ ᠂ ᠤᠯᠠᠭᠠᠨ ᠢᠳᠡᠭᠡᠨ ᠦ ᠪᠦᠯᠦᠭ – 4
ᠦᠬᠡᠷ ᠦ᠋ᠨ ᠰᠢᠭᠦᠰᠦᠨ ᠳ᠋ᠦ᠍ ᠬᠣᠶᠠᠷ ᠵᠦᠢᠯ ᠪᠣᠢ ᠃ ① ᠪᠦᠬᠦᠯᠢ ᠰᠢᠭᠦᠰᠦ ᠃ ② ᠡᠪᠴᠢᠭᠦᠦ ᠶ᠋ᠢᠨ ᠪᠦᠳᠦᠷᠬᠡᠢ ᠂ ᠲᠤᠤᠬᠠ ᠨᠢᠷᠤᠭᠤ ᠂ ᠬᠡᠯᠡᠨ ᠦ᠌ ᠦᠵᠦᠭᠦᠷ ᠂ ᠵᠢᠷᠦᠬᠡᠨ ᠣᠷᠣᠢ ᠂ ᠰᠡᠭᠡᠷ ᠂ ᠠᠮᠠᠨ ᠬᠦᠵᠦᠭᠦᠦ ᠂ ᠬᠠᠪᠢᠰᠤᠨ ᠲᠣᠯᠣᠭᠠᠢ(ᠪᠤᠷᠠ)ᠵᠡᠷᠭᠡ ᠪᠡᠷ ᠪᠦᠷᠢᠯᠳᠦᠨᠡ ᠃ ᠦᠬᠡᠷ ᠦ᠋ᠨ ᠰᠢᠭᠦᠰᠦ ᠪᠣᠯ ᠮᠠᠨ ᠤ᠋ ᠮᠣᠩᠭᠣᠯᠴᠤᠳ ᠤ᠋ᠨ ᠦᠪᠡᠳᠡᠭᠰᠢ ᠡᠷᠬᠢᠮ ᠢᠳᠡᠭᠡᠨ ᠦ᠌ ᠨᠢᠭᠡ ᠪᠣᠯᠤᠨᠠ ᠃ ᠦᠬᠡᠷ ᠦ᠋ᠨ ᠮᠢᠬᠠ ᠬᠠᠯᠠᠭᠤᠨ ᠶᠡᠬᠡᠲᠡᠢ ᠲᠤᠯᠠ ᠶᠡᠷᠦᠩᠬᠡᠢ ᠳ᠋ᠡᠭᠡᠨ ᠡᠪᠦᠯ ᠴᠠᠭ ᠢᠳᠡᠨᠡ ᠃ ᠦᠬᠡᠷ ᠦ᠋ᠨ ᠮᠢᠬᠠᠨ ᠳ᠋ᠤ᠌ ᠡᠮᠲᠦ ᠵᠦᠢᠯ ᠣᠯᠠᠨ᠃
ᠦᠬᠡᠷ ᠦ᠋ᠨ ᠵᠠᠢᠳᠠᠰᠤ
ᠤᠬᠢᠶᠠᠵᠤ ᠴᠡᠪᠡᠷᠯᠡᠭᠰᠡᠨ ᠭᠦᠵᠡᠭᠡ ᠶ᠋ᠢᠨ ᠪᠤᠯᠤᠩ ᠪᠤᠶᠤ ᠰᠠᠢᠨ ᠰᠠᠷᠬᠢᠨᠠᠭ ᠲᠤ᠌ ᠴᠢᠳᠬᠤᠭᠰᠠᠨ ᠭᠡᠳᠡᠰᠦ ᠨᠢᠭᠡ ᠭᠣᠭᠴᠣᠭᠠᠰᠤ ᠶ᠋ᠢ ᠲᠠᠪᠤᠨ ᠴᠤᠯᠤ ᠶ᠋ᠢᠨ ᠬᠦᠰᠬᠦᠯᠡᠭᠡᠲᠡᠢ ᠬᠢᠵᠦ ᠠᠮᠠ ᠶ᠋ᠢ ᠰᠦᠯᠵᠢᠨ ᠰᠦᠯᠪᠡᠵᠦ ᠠᠪᠤᠭᠠᠳ ᠡᠯᠭᠦᠨ ᠬᠥᠯᠳᠡᠭᠡᠬᠦ ᠶ᠋ᠢ ᠬᠡᠯᠡᠨᠡ ᠃ ᠬᠣᠨᠢ ᠢᠮᠠᠭᠠ ᠶ᠋ᠢᠨ ᠬᠢ ᠶ᠋ᠢ ᠴᠦ᠍ ᠵᠠᠢᠳᠠᠰᠤᠯᠤᠨᠡ ᠃ ᠣᠯᠠᠨ ᠴᠥᠭᠡᠨ ᠬᠢᠬᠦ ᠨᠢ ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠶ᠋ᠢᠨ ᠰᠠᠨᠠᠯ ᠢ᠋ᠶ᠋ᠠᠷ ᠲᠣᠭᠲᠠᠭᠠᠨᠠ᠃
ᠭᠡᠳᠡᠰᠦ ᠴᠢᠳᠬᠤᠬᠤ
ᠴᠢᠰᠤᠨ ᠳ᠋ᠠᠬᠢ ᠡᠯᠢᠭᠡᠰᠢᠭᠰᠡᠨ ᠨᠥᠵᠢ ᠶ᠋ᠢ ᠪᠠᠵᠠᠯᠠᠵᠤ ᠠᠭᠤᠰᠬᠠᠨ ᠨᠥᠵᠢ ᠶ᠋ᠢ ᠨᠢ ᠣᠷᠬᠢᠭᠰᠠᠨ ᠤ᠋ ᠳᠠᠷᠠᠭᠠ ᠂ ᠳᠠᠪᠤᠰᠤ ᠂ ᠰᠣᠩᠭᠢᠨᠠ ᠂ ᠰᠠᠷᠢᠮᠰᠠᠭ ᠂ ᠬᠦᠮᠡᠯᠢ ᠂ ᠰᠣᠷᠢᠰᠤ ᠵᠡᠷᠭᠡ ᠶ᠋ᠢ ᠰᠠᠭᠠᠭ ᠤ᠋ᠨ ᠭᠤᠯᠢᠷ ᠲᠠᠢ ᠬᠣᠯᠢᠨ ᠨᠠᠢᠷᠠᠭᠤᠯᠵᠤ ᠴᠡᠪᠡᠷᠯᠡᠭᠰᠡᠨ ᠭᠡᠳᠡᠰᠦᠨ ᠳ᠋ᠡᠭᠡᠨ ᠴᠢᠳᠬᠤᠨᠠ᠃
ᠬᠥᠷᠪᠡᠭᠦᠯᠵᠦ ᠴᠢᠳᠬᠤᠬᠤ ᠭᠡᠳᠡᠰᠦ ᠶ᠋ᠢ ᠬᠦᠪᠦᠵᠦ ᠬᠥᠷᠪᠡᠭᠦᠯᠵᠦ ᠴᠡᠪᠡᠷᠯᠡᠵᠦ ᠴᠢᠳᠬᠤᠬᠤ᠃
ᠭᠣᠭᠴᠣᠭᠠ ᠴᠢᠳᠬᠤᠬᠤ
ᠭᠡᠳᠡᠰᠦ ᠶ᠋ᠢ ᠬᠦᠪᠦᠬᠦ ᠦᠭᠡᠢ ᠤᠤᠯ ᠭᠣᠭᠴᠣᠭᠠᠷᠠᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠨᠢ ᠴᠡᠪᠡᠷᠯᠡᠭᠰᠡᠨ ᠠᠭᠤᠰᠬᠢ ᠪᠡᠷ ᠬᠥᠭᠡᠭᠡᠨ ᠴᠢᠳᠬᠤᠬᠤ ᠶ᠋ᠢ ᠬᠡᠯᠡᠨᠡ᠃
ᠰᠥᠭᠥᠳᠬᠡᠵᠦ ᠬᠠᠳᠠᠭᠠᠯᠠᠬᠤ
ᠦᠭᠦᠴᠡᠨ ᠦ᠌ ᠦᠬᠡᠷ ᠬᠣᠨᠢ ᠪᠠᠨ ᠭᠡᠳᠡᠰᠦ ᠳᠣᠲᠣᠷ ᠢ᠋ ᠨᠢ ᠭᠠᠷᠭᠠᠭᠰᠠᠨ ᠤ᠋ ᠳᠠᠷᠠᠭᠠ ᠬᠥᠯᠳᠡᠭᠡᠬᠦ ᠭᠠᠵᠠᠷ ᠲᠠᠭᠠᠨ ᠠᠪᠠᠴᠢᠵᠤ ᠬᠡᠪᠲᠡᠭᠡ ᠬᠡᠯᠪᠡᠷᠢ ᠪᠡᠷ ᠲᠠᠯᠪᠢᠵᠤ ᠠᠷᠠᠰᠤ ᠶ᠋ᠢ ᠨᠢ ᠨᠥᠮᠥᠷᠭᠡᠨ ᠬᠥᠯᠳᠡᠭᠡᠬᠦ ᠶ᠋ᠢ ᠰᠥᠭᠥᠳᠬᠡᠨ ᠬᠠᠳᠠᠭᠠᠯᠠᠬᠤ ᠭᠡᠨᠡ᠃
ᠭᠦᠵᠡᠭᠡᠯᠡᠬᠦ
ᠮᠣᠩᠭᠣᠯ ᠤ᠋ᠨ ᠦᠭᠡᠨ ᠳ᠋ᠦ᠍ 《ᠲᠤᠶᠠᠴᠢᠭᠰᠠᠨ ᠮᠢᠬᠠ ᠭᠦᠵᠡᠭᠡᠨ ᠳ᠋ᠡᠭᠡᠨ ᠂ ᠨᠤᠨᠲᠠᠭᠯᠠᠭᠰᠠᠨ ᠮᠢᠬᠠ ᠳᠠᠪᠤᠰᠠᠩ ᠳ᠋ᠠᠭᠠᠨ 》 ᠭᠡᠬᠦ ᠦᠨᠡᠨ ᠃ ᠠᠯᠢᠪᠠ ᠮᠠᠯ ᠢ᠋ ᠠᠯᠠᠭᠠᠳ ᠦᠶᠡᠯᠡᠵᠦ ᠮᠢᠬᠠᠨ ᠤ᠋ ᠤᠤᠯ ᠬᠠᠯᠠᠭᠤᠨ ᠢ᠋ ᠨᠢ ᠰᠡᠪᠡᠷᠡᠭᠡᠮᠡᠭᠴᠡ ᠭᠦᠵᠡᠭᠡᠨ ᠳ᠋ᠦ᠍ᠨᠢ ᠬᠢᠵᠦ ᠰᠠᠪᠠᠯᠠᠬᠤ ᠶ᠋ᠢ ᠭᠦᠵᠡᠭᠡᠯᠡᠬᠦ ᠭᠡᠨᠡ ᠃ ᠰᠢᠭᠢᠷᠡ ᠲᠣᠯᠣᠭᠠᠢ ᠶ᠋ᠢ ᠬᠢᠬᠦ ᠦᠭᠡᠢ ᠪᠣᠯ ᠨᠡᠩ ᠠᠮᠠᠷᠬᠠᠨ ᠪᠠᠭᠲᠠᠭᠠᠨᠠ ᠃
ᠳᠠᠪᠤᠰᠠᠩᠯᠠᠬᠤ
ᠠᠯᠢᠪᠠ ᠮᠠᠯ ᠢ᠋ ᠠᠯᠠᠵᠤ ᠠᠯᠤᠰ ᠬᠣᠯᠠ ᠠᠪᠴᠤ ᠶᠠᠪᠤᠬᠤ ᠭᠡᠪᠡᠯ ᠠᠪᠠᠴᠢᠬᠤ ᠳ᠋ᠤ᠌ ᠬᠥᠩᠭᠡᠨ ᠂ ᠢᠳᠡᠬᠦ ᠳ᠋ᠦ᠍ ᠠᠷᠪᠢᠲᠠᠢ ᠶ᠋ᠢ ᠪᠣᠳᠣᠵᠤ ᠳᠠᠪᠤᠰᠠᠩᠯᠠᠳᠠᠭ ᠃ ᠡᠭᠦᠨ ᠢ᠋ ᠳᠠᠪᠤᠰᠠᠩᠯᠠᠬᠤ ᠭᠡᠨᠡ᠃ ᠮᠢᠬᠠ ᠪᠠᠨ ᠬᠠᠲᠠᠭᠠᠭᠰᠠᠨ ᠤ᠋ ᠳᠠᠷᠠᠭᠠ ᠨᠦᠳᠦᠭᠦᠷ ᠢ᠋ᠶ᠋ᠡᠷ ᠪᠠᠯᠪᠠᠨ ᠨᠤᠨᠲᠠᠭᠯᠠᠭᠰᠠᠭᠠᠷ ᠨᠢᠭᠡ ᠮᠠᠯ ᠤ᠋ᠨ ᠮᠢᠬᠠ ᠨᠢ ᠳᠠᠪᠤᠰᠠᠩ ᠳ᠋ᠠᠭᠠᠨ ᠪᠦᠷ ᠪᠠᠭᠲᠠᠳᠠᠭ᠃ ᠨᠢᠭᠡ ᠯᠡ ᠴᠢᠮᠬᠢ ᠠᠪᠴᠤ ᠤᠰᠤᠨ ᠳ᠋ᠤ᠌ ᠳᠡᠪᠲᠦᠭᠡᠪᠡᠯ ᠨᠢᠭᠡ ᠠᠶᠠᠭᠠ ᠪᠠᠭᠲᠠᠬᠤ ᠦᠭᠡᠢ ᠪᠣᠯᠲᠠᠯᠠ ᠥᠰᠴᠦ ᠠᠷᠪᠢᠵᠢᠳᠠᠭ᠃
ᠪᠣᠷᠴᠠᠯᠠᠬᠤ
ᠦᠬᠦᠴᠡᠨ ᠦ᠌ ᠦᠬᠡᠷ ᠂ ᠢᠠᠮᠭᠠ ᠪᠠᠨ ᠠᠯᠠᠮᠠᠭᠴᠠ ᠭᠤᠶᠠ ᠬᠠ ᠶ᠋ᠢ ᠨᠢ ᠱᠤᠯᠤᠵᠤ ᠳᠠᠷᠤᠢ ᠪᠣᠷᠴᠠᠯᠠᠨᠠ ᠃ ᠪᠠᠷᠤᠭ ᠭᠤᠯᠢᠷ ᠤ᠋ᠨ ᠮᠣᠳᠣᠨ ᠤ᠋ ᠬᠢᠷᠢ ᠪᠦᠳᠦᠭᠦᠨ ᠢ᠋ᠶ᠋ᠡᠷ ᠪᠣᠷᠴᠠᠯᠠᠵᠤ ᠂ ᠪᠡᠯᠡᠳᠬᠡᠭᠰᠡᠨ ᠮᠣᠳᠣᠨ ᠳᠡᠭᠡᠷᠡ ᠲᠣᠬᠣᠵᠤ ᠳᠠᠩ ᠬᠥᠯᠳᠡᠭᠡᠨᠡ ᠃ ᠴᠠᠭᠠᠨ ᠰᠠᠷᠠ ᠭᠠᠷᠤᠭᠠᠳ ᠬᠠᠲᠠᠭᠰᠠᠨ ᠨᠢ ᠭᠣᠣᠯ ᠲᠠᠢ (ᠭᠦᠢᠴᠡᠳ ᠬᠠᠲᠠᠭᠰᠠᠨ ᠦᠭᠡᠢ ) ᠪᠣᠯ ᠰᠡᠢᠮᠡᠬᠡᠢ ᠰᠠᠪᠠ ᠪᠤᠶᠤ ᠡᠰᠡᠬᠦᠯᠡ ᠳᠡᠭᠡᠰᠦ ᠪᠡᠷ ᠪᠣᠭᠣᠵᠤ ᠥᠨᠳᠥᠷ ᠲᠦ᠍ ᠡᠯᠭᠦᠨ ᠰᠠᠯᠬᠢᠨ ᠦᠵᠡᠭᠦᠯᠦᠨ ᠬᠠᠲᠠᠭᠠᠨᠠ ᠃ ᠬᠠᠲᠠᠭᠰᠠᠨ ᠪᠣᠷᠴᠠ ᠶ᠋ᠢ ᠲᠦᠭᠦᠬᠡᠢ ᠪᠡᠷ ᠢᠳᠡᠬᠦ ᠳ᠋ᠦ᠍ ᠠᠮᠲᠠ ᠰᠢᠮᠡ ᠰᠠᠢᠲᠠᠢ᠃
ᠮᠢᠬᠠ ᠪᠠᠨ ᠬᠠᠭᠤᠷᠴᠤ ᠬᠠᠳᠠᠭᠠᠯᠠᠬᠤ
ᠪᠥᠭᠡᠮ ᠮᠢᠬᠠ ᠪᠠᠨ ᠴᠠᠭᠠᠨ ᠰᠠᠷᠠ ᠭᠠᠷᠤᠭᠰᠠᠭᠠᠷ ᠬᠡᠰᠡᠭᠯᠡᠨ ᠬᠥᠰᠬᠥᠯᠡᠵᠦ ᠲᠣᠭᠣᠭᠠᠨ ᠳ᠋ᠤ᠌ ᠬᠢᠵᠦ ᠳᠠᠪᠤᠰᠤ ᠶ᠋ᠢ ᠨᠢ ᠲᠠᠭᠠᠷᠠᠮᠠ ᠬᠢᠵᠦ ᠭᠠᠭᠴᠠ ᠬᠦ᠌ ᠤᠰᠤᠨ ᠨᠢ ᠰᠢᠷᠭᠢᠭᠰᠡᠨ( ᠬᠠᠭᠤᠷᠴᠤ ᠪᠠᠢᠭᠠ ᠮᠢᠬᠠ ᠶ᠋ᠢᠨ ᠲᠣᠰᠣ ᠪᠠᠨ ᠭᠠᠯ ᠳ᠋ᠤ᠌ ᠳᠤᠰᠬᠠᠪᠠᠯ ᠰᠢᠷ ᠬᠢᠵᠦ ᠳᠤᠤᠭᠠᠷᠬᠤ ᠦᠭᠡᠢ ᠫᠦᠷᠳ᠋ ᠭᠡᠵᠦ ᠳᠤᠤᠭᠠᠷᠪᠠᠯ) ᠤ᠋ᠨ ᠬᠣᠢᠨᠠ ᠭᠠᠷᠭᠠᠨ ᠸᠠᠭᠠᠷ ᠤ᠋ᠨ ᠰᠠᠪᠠᠨ ᠳ᠋ᠤ᠌ ᠬᠢᠵᠦ ᠠᠪᠤᠨᠠ ᠃ ᠬᠠᠭᠠᠰ ᠰᠠᠷᠠ ᠪᠦᠷᠢ ᠸᠠᠭᠠᠷ ᠲᠠᠢ ᠮᠢᠬᠠᠨ ᠢᠷᠣᠭᠠᠷ ᠢ᠋ᠶ᠋ᠠᠨ ᠪᠠᠢᠴᠠᠭᠠᠨ ᠦᠵᠡᠨᠡ ᠃ ᠬᠡᠷᠪᠡ ᠤᠰᠤ ᠲᠠᠢ ᠣᠷᠣᠭᠰᠠᠨ ᠪᠣᠯ ᠭᠡᠮᠲᠦᠵᠦ ᠮᠡᠳᠡᠨᠡ᠃ ᠭᠡᠮᠲᠦᠬᠦ ᠮᠠᠢᠭᠲᠠᠢ ᠪᠣᠯ ᠳᠠᠬᠢᠨ ᠨᠢᠭᠡ ᠤᠳᠠᠭᠠ ᠪᠤᠴᠠᠯᠭᠠᠭᠠᠳ ᠭᠠᠷᠭᠠ᠃
ᠮᠢᠬᠠ ᠤᠲᠤᠬᠤ
ᠵᠤᠨ ᠨᠠᠮᠤᠷ ᠤ᠋ᠨ ᠬᠠᠯᠠᠭᠤᠨ ᠴᠠᠭ ᠱᠥᠯᠥ ᠤᠤᠭᠤᠪᠠᠯ᠂ ᠱᠤᠯᠤᠭᠰᠠᠨ ᠮᠢᠬᠠ ᠪᠠᠨ ᠨᠠᠷᠢᠨ ᠪᠣᠷᠴᠠᠯᠠᠭᠠᠳ ᠡᠯᠭᠦᠨ ᠬᠠᠲᠠᠭᠠᠬᠤ ᠳ᠋ᠠᠭᠠᠨ ᠠᠷᠴᠠ ᠪᠤᠶᠤ ᠠᠷᠭᠠᠯ ᠵᠡᠷᠭᠡ ᠶ᠋ᠢ ᠤᠭᠤᠭᠢᠭᠤᠯᠵᠤ ᠤᠲᠤᠵᠤ ᠪᠠᠢᠭᠠᠳ ᠪᠣᠷᠴᠠᠨ ᠤ᠋ ᠭᠠᠳᠠᠷ ᠢ᠋ ᠬᠥᠷᠥᠰᠥᠯᠡᠭᠦᠯᠦᠨᠡ᠃ ᠢᠩᠭᠢᠭᠰᠡᠭᠡᠷ ᠢᠯᠠᠭᠠ ᠪᠠᠲᠠᠭᠠᠨᠠ ᠰᠠᠭᠤᠬᠤ ᠦᠭᠡᠢ ᠡᠭᠰᠢᠴᠢᠬᠡᠨᠡ᠃
ᠴᠠᠭᠠ ᠳ᠋ᠤ᠌ ᠳᠡᠪᠲᠦᠭᠡᠬᠦ
ᠳᠠᠪᠤᠰᠤᠯᠠᠵᠤ ᠪᠣᠷᠴᠠᠯᠠᠭᠰᠠᠨ ᠮᠢᠬᠠ ᠪᠠᠨ ᠡᠪᠡᠷᠡᠭᠦᠯᠦᠭᠰᠡᠨ ᠦ᠌ ᠳᠠᠷᠠᠭᠠ ᠳᠠᠬᠢᠨ ᠴᠠᠭᠠ ᠳ᠋ᠤ᠌ ᠬᠢᠵᠦ ᠬᠡᠳᠦᠨ ᠴᠠᠭ ᠳᠡᠪᠲᠦᠭᠡᠭᠡᠳ ᠲᠣᠬᠢᠷᠠᠮᠵᠢᠲᠠᠢ ᠭᠠᠵᠠᠷ ᠡᠯᠭᠦᠨ ᠬᠠᠲᠠᠭᠠᠬᠤ ᠶ᠋ᠢ ᠬᠡᠯᠡᠨᠡ᠃ ᠡᠢᠮᠦ ᠮᠢᠬᠠ ᠬᠤᠷᠰᠢᠬᠤ ᠦᠭᠡᠢ ᠂ ᠥᠳᠥ ᠬᠦᠷᠢ ᠣᠷᠣᠬᠤ ᠦᠭᠡᠢ ᠂ ᠬᠡᠵᠢᠶᠡᠳᠡ ᠰᠢᠭᠦᠰᠦᠯᠢᠭ ᠪᠠᠢᠵᠤ ᠬᠥᠰᠬᠥᠯᠡᠵᠦ ᠢᠳᠡᠬᠦ ᠳ᠋ᠦ᠍ ᠰᠠᠢᠨ ᠪᠠᠢᠳᠠᠭ᠃
ᠮᠥᠰᠥᠯᠡᠬᠦ ᠡᠪᠦᠯ ᠮᠢᠬᠠ ᠪᠠᠨ ᠮᠥᠰᠥᠨ ᠳᠣᠲᠣᠷᠠ ᠬᠥᠯᠳᠡᠭᠡᠨ ᠬᠠᠳᠠᠭᠠᠯᠠᠬᠤ ᠶ᠋ᠢ ᠬᠡᠯᠡᠨᠡ᠃
ᠦᠭᠦᠴᠡᠯᠡᠨ ᠬᠠᠳᠠᠭᠠᠯᠠᠬᠤ
ᠮᠥᠴᠢᠯᠡᠭᠰᠡᠨ ᠮᠢᠬᠠ ᠪᠠᠨ ᠸᠠᠭᠠᠷ ᠰᠠᠪᠠ ᠳ᠋ᠤ᠌ ᠬᠢᠵᠦ ᠠᠮᠠ ᠶ᠋ᠢ ᠪᠡᠬᠢᠯᠡᠨ ᠬᠥᠯᠳᠡᠭᠡᠬᠦ ᠪᠤᠶᠤ ᠡᠰᠡᠬᠦᠯᠡ ᠪᠢᠲᠡᠭᠦᠦ ᠥᠪᠴᠢᠭᠰᠡᠨ ᠠᠷᠠᠰᠤᠨ ᠳ᠋ᠤ᠌ ᠬᠢᠵᠦ ᠬᠥᠯᠳᠡᠭᠡᠬᠦ ᠶ᠋ᠢ ᠬᠡᠯᠡᠨᠡ᠃
ᠦᠬᠡᠷ ᠦ᠋ᠨ ᠰᠢᠭᠦᠰᠦᠨ ᠦ᠌ ᠪᠤᠰᠤᠳ ᠢᠳᠡᠭᠡᠨ ᠄
ᠲᠠᠬᠢᠯ ᠲᠣᠭᠣᠭᠠᠨ ᠮᠢᠬᠠ
ᠦᠬᠡᠷ ᠢ᠋ᠶ᠋ᠡᠨ ᠠᠯᠠᠮᠠᠭᠴᠠ ᠦᠬᠡᠷ ᠦ᠋ᠨ ᠰᠠᠮᠰᠠ ᠂ ᠨᠢᠷᠤᠭᠤ ᠂ ᠬᠠᠷᠠ ᠰᠡᠭᠡᠷ ᠂ ᠳᠥᠷᠪᠡᠨ ᠪᠣᠭᠣᠨᠢ ᠬᠠᠪᠢᠰᠤ ᠂ ᠠᠮᠠᠨ ᠬᠦᠵᠦᠭᠦᠦ ᠂ ᠤᠭᠤᠴᠠ ᠰᠦᠪᠡᠷᠭᠡ ᠬᠠᠪᠢᠰᠤ ᠂ ᠡᠪᠴᠢᠭᠦᠦ ᠶ᠋ᠢᠨ ᠰᠦᠪᠡᠭᠡ ᠵᠡᠷᠭᠡ ᠮᠢᠬᠠ ᠶ᠋ᠢ ᠬᠦᠢᠲᠡᠨ ᠤᠰᠤᠨ ᠳ᠋ᠤ᠌ ᠬᠢᠵᠦ ᠳᠠᠪᠤᠰᠤ ᠲᠣᠬᠢᠷᠠᠭᠤᠯᠤᠨ 3 – 4 ᠴᠠᠭ ᠴᠢᠨᠠᠪᠠᠯ ᠪᠣᠯᠴᠢᠬᠠᠨᠠ᠃ ᠡᠭᠦᠨ ᠢ᠋ ᠲᠠᠬᠢᠯ ᠲᠣᠭᠣᠭᠠᠨ ᠮᠢᠬᠠ ᠭᠡᠨᠡ᠃
ᠵᠣᠭᠣᠭ ᠤ᠋ᠨ ᠮᠢᠬᠠ
ᠶᠠᠰᠤᠲᠠᠢ ᠮᠢᠬᠠ ᠶ᠋ᠢ ᠬᠦᠢᠲᠡᠨ ᠤᠰᠤᠨ ᠳ᠋ᠤ᠌ ᠬᠢᠵᠦ ᠳᠠᠪᠤᠰᠤᠲᠠᠢ 3 – 4 ᠴᠠᠭ ᠴᠢᠨᠠᠨᠠ ᠃ ᠡᠭᠦᠨ ᠢ᠋ ᠵᠣᠭᠣᠭ ᠤ᠋ᠨ ᠮᠢᠬᠠ ᠭᠡᠨᠡ᠃
ᠪᠤᠳᠤᠨᠴᠢᠷ ᠲᠠᠢ ᠴᠢᠨᠠᠭᠰᠠᠨ ᠦᠬᠡᠷ ᠦ᠋ᠨ ᠮᠢᠬᠠ
ᠬᠥᠷᠥᠰᠥᠯᠡᠭᠰᠡᠨ ᠪᠣᠳᠤᠨᠴᠢᠷ ᠬᠢᠭᠡᠳ ᠮᠢᠬᠠ ᠪᠠᠨ ᠰᠠᠪᠬᠠ ᠰᠢᠭ᠋ ᠨᠠᠷᠢᠨ ᠂ ᠢᠮᠠᠬᠤ ᠢᠯᠡᠭᠦᠦ ᠤᠷᠲᠤ ᠬᠡᠷᠴᠢᠭᠡᠳ ᠂ ᠮᠢᠬᠠ ᠪᠠᠨ ᠤᠷᠢᠳ ᠢ᠋ᠶ᠋ᠠᠷ ᠴᠠᠭ ᠰᠢᠬᠠᠭᠤ ᠴᠢᠨᠠᠭᠠᠳ ᠂ ᠳᠡᠭᠡᠷᠡ ᠨᠢ ᠬᠡᠷᠴᠢᠭᠰᠡᠨ ᠪᠣᠳᠤᠨᠴᠢᠷ ᠢ᠋ᠶ᠋ᠠᠨ ᠳᠠᠪᠤᠰᠤ᠂ ᠰᠣᠩᠭᠢᠨᠠ ᠂ ᠰᠠᠷᠢᠮᠰᠠᠭ ᠂ ᠬᠤᠸᠠᠵᠤᠤ ᠲᠠᠢ ᠬᠠᠮᠲᠤ ᠬᠢᠭᠡᠳ ᠴᠢᠨᠠᠵᠤ ᠂ ᠭᠠᠷᠭᠠᠬᠤ ᠳ᠋ᠠᠭᠠᠨ ᠪᠠᠰᠠ ᠨᠢᠴᠠᠯᠠᠭᠰᠠᠨ ᠰᠣᠩᠭᠢᠨᠠ ᠰᠠᠷᠢᠮᠰᠠᠭ ᠪᠠᠭᠠ ᠬᠢᠵᠦ ᠢᠳᠡᠨᠡ᠃ ᠡᠭᠦᠨ ᠢ᠋ ᠪᠣᠳᠣᠨᠴᠢᠷ ᠲᠠᠢ ᠦᠬᠡᠷ ᠦ᠋ᠨ ᠮᠢᠬᠠ ᠭᠡᠨᠡ ᠃
ᠰᠢᠷᠠᠭᠰᠠᠨ ᠦᠬᠡᠷ ᠦ᠋ᠨ ᠮᠢᠬᠠ
ᠦᠬᠡᠷ ᠦ᠋ᠨ ᠬᠥᠯᠳᠡᠭᠦᠦ ᠮᠢᠬᠠ ᠶ᠋ᠢ ᠢᠮᠠᠬᠤ ᠵᠤᠵᠠᠭᠠᠨ 3 ᠢᠮᠠᠬᠤ ᠤᠷᠲᠤ ᠬᠡᠷᠴᠢᠭᠡᠳ ᠳᠠᠪᠤᠰᠤ ᠂ ᠰᠣᠩᠭᠢᠨᠠ ᠬᠤᠸᠠᠵᠤᠤ ᠲᠠᠭᠠᠷᠠᠭᠤᠯᠵᠤ ᠂ 1 ᠴᠠᠭ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠬᠠᠪᠲᠠᠭᠠᠢ ᠲᠣᠭᠣᠭᠠᠨ ᠳᠡᠭᠡᠷᠡ ᠬᠠᠩᠨᠠᠵᠤ ᠪᠣᠯᠭᠣᠭᠠᠳ ᠰᠢᠷᠠ ᠲᠣᠰᠣ ᠲᠦᠷᠬᠢᠵᠦ ᠢᠳᠡᠨᠡ ᠃ ᠡᠭᠦᠨ ᠢ᠋ ᠰᠢᠷᠠᠭᠰᠠᠨ ᠦᠬᠡᠷ ᠦ᠋ᠨ ᠮᠢᠬᠠ ᠭᠡᠨᠡ᠃
ᠦᠬᠡᠷ ᠦ᠋ᠨ ᠵᠣ᠌ ᠮᠢᠬᠠᠨ ᠤ᠋ ᠪᠣᠭᠣᠷᠰᠣᠭ
ᠦᠬᠡᠷ ᠦ᠋ᠨ ᠨᠢᠷᠤᠭᠤᠨ ᠤ᠋ ᠮᠢᠬᠠ ᠶ᠋ᠢ ᠨᠠᠷᠢᠨ ᠬᠡᠷᠴᠢᠵᠦ ᠂ ᠳᠠᠪᠤᠰᠤ ᠂ ᠰᠣᠩᠭᠢᠨᠠ ᠂ ᠬᠤᠸᠠᠵᠤᠤ ᠂ ᠰᠢᠷᠠ ᠲᠣᠰᠣ ᠬᠢᠵᠦ ᠨᠠᠢᠷᠠᠭᠤᠯᠤᠨ ᠬᠡᠰᠡᠭᠯᠡᠨ ᠬᠠᠪᠲᠠᠭᠠᠢᠯᠠᠵᠤ ᠂ ᠬᠣᠶᠠᠷ ᠲᠠᠯᠠ ᠳ᠋ᠤᠨᠢ ᠲᠠᠬᠢᠶᠠᠨ ᠥᠨᠳᠡᠭᠡ ᠨᠠᠭᠠᠯᠳᠤᠭᠤᠯᠤᠨ ᠂ ᠳᠠᠬᠢᠨ ᠴᠠᠭᠠᠨ ᠭᠤᠯᠢᠷ ᠳᠦᠷᠭᠢᠭᠡᠳ ᠰᠢᠷᠠ ᠲᠣᠰᠣ ᠲᠠᠢ ᠬᠠᠪᠲᠠᠭᠠᠢ ᠲᠣᠭᠣᠭᠠᠨ ᠳ᠋ᠤ᠌ ᠬᠠᠩᠨᠠᠵᠤ ᠪᠣᠯᠭᠣᠭᠠᠨᠠ ᠃ ᠡᠭᠦᠨ ᠢ᠋ ᠦᠬᠡᠷ ᠦ᠋ᠨ ᠵᠣ᠌ ᠮᠢᠬᠠᠨ ᠪᠣᠭᠣᠷᠰᠣᠭ ᠭᠡᠨᠡ ( ᠣᠷᠳᠣᠰ ᠲᠤ᠌ ）᠃
ᠲᠣᠰᠣᠨ ᠳ᠋ᠤ᠌ ᠪᠤᠴᠠᠯᠭᠠᠭᠰᠠᠨ ᠮᠢᠬᠠ
2 ᠢᠮᠠᠬᠤ ᠵᠤᠵᠠᠭᠠᠨ ᠂ 1 ᠢᠮᠠᠬᠤ ᠤᠷᠲᠤ ᠬᠡᠷᠴᠢᠭᠰᠡᠨ ᠦᠬᠡᠷ ᠦ᠋ᠨ ᠮᠢᠬᠠᠨ ᠳᠡᠭᠡᠷᠡ ᠪᠡᠨ ᠳᠠᠪᠤᠰᠤ ᠪᠠ ᠠᠮᠲᠠᠲᠠᠨ ᠢ᠋ ᠲᠠᠭᠠᠷᠠᠭᠤᠯᠵᠤ 70 – 90 ᠭᠷᠠᠳᠦ᠋ᠰ ᠦ᠋ᠨ ᠬᠠᠯᠠᠭᠤᠨ ᠲᠣᠭᠣᠭᠠᠨ ᠳ᠋ᠤ᠌ ᠬᠠᠩᠨᠠᠵᠤ ᠂ ᠳᠠᠬᠢᠨ ᠪᠤᠴᠠᠯᠤᠭᠰᠠᠨ ᠭᠠᠬᠠᠢ ᠶ᠋ᠢᠨ ᠲᠣᠰᠣ ᠪᠤᠶᠤ ᠬᠣ ᠶᠢᠤ ᠳ᠋ᠤ᠌ ᠲᠥᠷᠥᠵᠦ ᠪᠣᠯᠭᠣᠭᠠᠨᠠ ᠃ ᠡᠭᠦᠨ ᠢ᠋ ᠲᠣᠰᠣᠨ ᠳ᠋ᠤ᠌ ᠪᠤᠴᠠᠯᠭᠠᠭᠰᠠᠨ ᠦᠬᠡᠷ ᠦ᠋ᠨ ᠮᠢᠬᠠ ᠭᠡᠨᠡ ( ᠣᠷᠳᠣᠰ ᠲᠤ᠌ ) ᠃
ᠬᠠᠷᠪᠢᠰᠤ ᠢᠳᠡᠬᠦ
ᠭᠡᠭᠡᠰᠢ ᠢᠳᠡᠬᠦ ᠂ ᠦᠬᠡᠷ ᠬᠣᠨᠢᠨ ᠤ᠋ ᠭᠡᠭᠡᠰᠢ ᠶ᠋ᠢ ᠴᠡᠪᠡᠷᠯᠡᠨ ᠠᠪᠤᠭᠠᠳ ᠵᠤᠯᠴᠢ ᠨᠤᠭᠤᠳ ᠢ᠋ ᠨᠢ ᠰᠠᠢᠲᠤᠷ ᠲᠡᠭᠦᠵᠦ ᠠᠪᠤᠨ ᠳᠠᠪᠤᠰᠤ ᠲᠠᠢ ᠬᠠᠯᠠᠭᠤᠨ ᠤᠰᠤ ᠪᠠᠷ ᠰᠠᠢᠲᠤᠷ ᠤᠬᠢᠶᠠᠵᠤ ᠂ ᠦᠨᠢᠶᠡᠨ ᠰᠦ ᠳ᠋ᠦ᠍ ᠴᠢᠨᠠᠨ 《ᠨᠢᠭᠦᠯ ᠦᠭᠡᠢ ᠮᠢᠬᠠ 》ᠭᠡᠵᠦ ᠢᠳᠡᠨᠡ ᠃ ᠡᠭᠦᠨ ᠢ ᠬᠠᠷᠪᠢᠰᠤ ᠢᠳᠡᠨᠡ ᠭᠡᠨᠡ ᠃ ᠢᠳᠡᠭᠰᠡᠳ ᠪᠡᠶᠡ ᠶ᠋ᠢᠨ ᠢᠯᠴᠢ ᠨᠡᠮᠡᠭᠳᠡᠨ ᠲᠠᠮᠢᠷ ᠰᠠᠢᠵᠢᠷᠠᠵᠤ ᠬᠡᠢ ᠳᠠᠷᠤᠭᠳᠠᠨᠠ᠃
ᠲᠡᠮᠡᠭᠡᠨ ᠦ᠌ ᠮᠢᠬᠠ
ᠪᠦᠳᠦᠭᠦᠨ ᠰᠢᠷᠭᠡᠭᠲᠡᠢ ᠬᠠᠷᠠ ᠮᠢᠬᠠ ᠭᠣᠣᠯᠳᠠᠭᠤ ᠭᠠᠷᠤᠨᠠ ᠃ ᠨᠢᠭᠡ ᠲᠡᠮᠡᠭᠡ 500 – 1000 ᠰᠢᠬᠠᠭᠤ ᠵᠢᠩ ᠮᠢᠬᠠ ᠤᠨᠠᠳᠠᠭ ᠂ ᠱᠠᠯᠪᠢᠩ ᠪᠤᠤᠰᠠ ᠵᠡᠷᠭᠡ ᠶ᠋ᠢ ᠬᠢᠵᠦ ᠢᠳᠡᠬᠦ ᠳ᠋ᠦ᠍ ᠤᠴᠢᠷᠲᠠᠢ ᠰᠠᠢᠬᠠᠨ᠃
ᠲᠡᠮᠡᠭᠡᠨ ᠪᠦᠬᠦ
ᠲᠡᠮᠡᠭᠡᠨ ᠪᠦᠬᠦ ᠪᠣᠯ ᠪᠤᠰᠤᠳ ᠮᠠᠯ ᠤ᠋ᠨ ᠬᠡᠷᠰᠡᠩ ᠰᠢᠭ ᠥᠭᠡᠬᠦᠯᠢᠭ ᠢ᠋ᠶ᠋ᠡᠷ ᠪᠦᠷᠢᠯᠳᠦᠭᠰᠡᠨ ᠪᠥᠭᠡᠳ ᠪᠦᠬᠦ ᠨᠢᠭᠡ ᠪᠦᠷᠢ 30 – 50 ᠵᠢᠩ ᠪᠠᠢᠳᠠᠭ᠃ ᠲᠡᠮᠡᠭᠡᠨ ᠪᠦᠬᠦ ᠬᠡᠳᠦᠢ ᠪᠡᠷ ᠥᠭᠡᠬᠦᠯᠢᠭ ᠪᠣᠯᠪᠠᠴᠤ ᠱᠠᠩᠳᠠᠭᠤᠨ ᠦᠭᠡᠢ ᠃ ᠨᠢᠮᠭᠡᠨ ᠬᠠᠪᠢᠰᠤᠯᠠᠨ ᠬᠡᠷᠴᠢᠭᠡᠳ ᠲᠣᠰᠣᠨ ᠳ᠋ᠤ᠌ ᠪᠤᠴᠠᠯᠭᠠᠨ ᠭᠠᠷᠭᠠᠵᠤ ᠳᠡᠭᠡᠷᠡ ᠨᠢ ᠴᠠᠭᠠᠨ ᠰᠢᠬᠢᠷ ᠬᠢᠵᠦ ᠢᠳᠡᠪᠡᠯ ᠦᠨᠡᠬᠡᠷ ᠠᠮᠲᠠᠲᠠᠢ᠃
ᠲᠡᠮᠡᠭᠡᠨ ᠲᠠᠪᠠᠭ
ᠲᠡᠮᠡᠭᠡᠨ ᠲᠠᠪᠠᠬᠠᠢ ᠶ᠋ᠢᠨ ᠥᠭᠡᠬᠦᠯᠢᠭ ᠮᠢᠬᠠ ᠨᠢ ᠢᠮᠠᠬᠤ ᠵᠤᠵᠠᠭᠠᠨ ᠪᠠᠢᠳᠠᠭ ᠪᠥᠭᠡᠳ ᠲᠠᠪᠠᠬᠠᠢ ᠳ᠋ᠤ᠌ ᠪᠠᠷᠤᠭ 15 – 20 ᠺᠦᠪ ᠰᠡᠨᠲ᠋ᠢᠮᠧᠲᠷ ᠮᠢᠬᠠ ᠪᠠᠢᠳᠠᠭ᠃ ᠲᠡᠮᠡᠭᠡᠨ ᠲᠠᠪᠠᠬᠠᠢ ᠶ᠋ᠢᠨ ᠵᠠᠭᠤᠰᠢ ᠨᠢ ᠥᠲᠡᠭᠡ ( ᠪᠠᠭᠠᠪᠠᠭᠠᠢ ) ᠶ᠋ᠢᠨ ᠵᠠᠭᠤᠰᠢ ᠲᠠᠢ ᠲᠡᠩᠴᠡᠭᠦᠦ ᠲᠤᠯᠠ ᠤᠯᠤᠰ ᠤ᠋ᠨ ᠳᠡᠭᠡᠳᠦ ᠵᠡᠷᠭᠡ ᠶ᠋ᠢᠨ ᠳᠠᠢᠯᠠᠯᠭᠠ ᠳ᠋ᠤ᠌ ᠣᠷᠣᠳᠠᠭ᠃
ᠲᠡᠮᠡᠭᠡᠨ ᠰᠢᠯᠢ
ᠲᠡᠮᠡᠭᠡᠨ ᠲᠠᠬᠢᠯ ᠤ᠋ᠨ ᠰᠢᠯᠢ ( ᠰᠢᠷᠪᠥᠰᠥ ) ᠡᠴᠡ ᠵᠣ᠌ ᠶ᠋ᠢᠨ ᠰᠢᠷᠪᠥᠰᠥ ᠬᠦᠷᠲᠡᠯᠡᠬᠢ 6 – 8 ᠲᠣᠬᠣᠢ ᠤᠷᠲᠤ ᠢᠮᠠᠬᠤ ᠵᠤᠵᠠᠭᠠᠨ ᠂ 2 ᠢᠮᠠᠬᠤ ᠥᠷᠭᠡᠨ ᠰᠢᠷᠪᠥᠰᠥ ᠶ᠋ᠢ ᠴᠠᠭᠠᠯᠠᠵᠤ ᠠᠪᠤᠭᠠᠳ ᠨᠢᠯᠳᠦ ᠴᠢᠨᠠᠵᠤ ᠬᠡᠷᠴᠢᠭᠡᠳ ᠦᠨᠦᠷ ᠠᠮᠲᠠᠲᠠᠨ ᠢ᠋ ᠲᠠᠭᠠᠷᠠᠭᠤᠯᠵᠤ ᠬᠠᠭᠤᠷᠪᠠᠯ ᠨᠢᠭᠡ ᠵᠦᠢᠯ ᠦ᠋ᠨ ᠠᠮᠲᠠᠲᠠᠢ ᠵᠠᠭᠤᠰᠢ ᠪᠣᠯᠳᠠᠭ᠃ ᠢᠳᠡᠭᠰᠡᠳ ᠬᠦᠴᠦ ᠲᠠᠮᠢᠷ ᠨᠡᠮᠡᠭᠳᠡᠨ ᠂ ᠦᠰᠦ ᠭᠡᠵᠢᠭᠡ ᠥᠩᠭᠡᠰᠢᠨᠡ᠃
ᠲᠡᠮᠡᠭᠡᠨ ᠰᠡᠭᠦᠯ
ᠨᠢᠭᠡᠨ ᠲᠣᠬᠣᠢ ᠬᠠᠭᠠᠰ ᠤᠷᠲᠤ ᠂ ᠢᠮᠠᠬᠤ ᠵᠤᠵᠠᠭᠠᠨ ᠰᠡᠭᠦᠯ ᠨᠢ ᠬᠣᠨᠢᠨ ᠰᠡᠭᠦᠯ ᠰᠢᠭ ᠥᠭᠡᠬᠦᠯᠢᠭ ᠂ ᠴᠢᠨᠠᠵᠤ ᠢᠳᠡᠬᠦ ᠳ᠋ᠦ᠍ ᠲᠣᠰᠣᠯᠢᠭ ᠠᠲᠠᠯᠠ ᠱᠠᠩᠳᠠᠬᠤ ᠦᠭᠡᠢ ᠂ ᠣᠨᠴᠠ ᠰᠠᠢᠬᠠᠨ ᠠᠮᠲᠠᠲᠠᠢ ᠪᠠᠢᠳᠠᠭ ᠃ ᠲᠡᠭᠦᠨ ᠢ᠋ ᠬᠡᠰᠡᠭᠯᠡᠨ ᠬᠡᠷᠴᠢᠵᠦ ᠂ ᠦᠷᠡ ᠶ᠋ᠢᠨ ᠲᠤᠰᠤᠨᠠ ᠪᠣᠯᠭᠣᠵᠤ ᠰᠢᠬᠢᠷ ᠦ᠋ᠨ ᠵᠦᠢᠯᠡᠰ ᠢ᠋ᠶ᠋ᠡᠷ ᠬᠠᠴᠢᠷᠯᠠᠪᠠᠯ ᠨᠢᠭᠡᠨ ᠣᠨᠴᠠ ᠰᠠᠢᠬᠠᠨ ᠠᠮᠲᠠ ᠪᠦᠬᠦᠢ ᠵᠠᠭᠤᠰᠢ ᠪᠣᠯᠳᠠᠭ᠃
ᠲᠡᠮᠡᠭᠡᠨ ᠭᠦᠵᠡᠭᠡ
ᠲᠡᠮᠡᠭᠡᠨ ᠭᠦᠵᠡᠭᠡ ᠪᠣᠯ ᠨᠢᠭᠡ ᠳᠠᠪᠬᠤᠷᠭᠠ ᠬᠤᠵᠢᠷᠬᠠᠢ ᠂ ᠨᠢᠭᠡ ᠳᠠᠪᠬᠤᠷᠭᠠ ᠥᠭᠡᠬᠦ ᠮᠡᠲᠦ ᠪᠡᠷ 4 – 5 ᠳᠠᠪᠬᠤᠷ ᠠᠯᠠᠭᠯᠠᠨ ᠳᠠᠪᠬᠤᠴᠠᠵᠤ ᠪᠦᠲᠦᠭᠰᠡᠨ ᠪᠠᠢᠳᠠᠭ ᠠᠵᠤᠭᠤ ᠃ ᠡᠭᠦᠨ ᠢ᠋ ᠴᠡᠪᠡᠷᠯᠡᠨ ᠴᠢᠨᠠᠵᠤ ᠪᠣᠯᠭᠣᠭᠠᠳ ᠂ ᠦᠨᠦᠷ ᠠᠮᠲᠠᠲᠠᠨ ᠢ᠋ ᠬᠠᠴᠢᠷᠯᠠᠪᠠᠯ ᠠᠮᠲᠠᠲᠠᠢ ᠵᠠᠭᠤᠰᠢ ᠪᠣᠯᠳᠠᠭ ᠃ ᠢᠳᠡᠭᠰᠡᠳ ᠦ᠋ᠨ ᠬᠣᠳᠣᠭᠣᠳᠤᠨᠠ ᠡᠰᠡ ᠰᠢᠩᠭᠡᠭᠰᠡᠨ ᠬᠣᠣᠷ ᠢ᠋ ᠠᠯᠳᠠᠷᠠᠭᠠᠵᠤ ᠂ ᠰᠢᠩᠭᠡᠭᠡᠯᠲᠡ ᠶ᠋ᠢ ᠰᠠᠢᠵᠢᠷᠠᠭᠤᠯᠳᠠᠭ᠃
ᠲᠡᠮᠡᠭᠡᠨ ᠥᠭᠡᠬᠦ
ᠪᠦᠳᠦᠭᠦᠨ ᠲᠠᠷᠭᠤᠨ ᠲᠡᠮᠡᠭᠡᠨ ᠡᠴᠡ 60 – 70 ᠵᠢᠩ ᠥᠭᠡᠬᠦ ᠠᠪᠳᠠᠭ ᠃ ᠲᠡᠮᠡᠭᠡᠨ ᠥᠭᠡᠬᠦ ᠪᠣᠯ ᠪᠤᠷᠤᠩᠬᠤᠢ ᠰᠡᠭᠦᠳᠡᠷ ᠡᠪᠡᠳᠴᠢᠨ ᠂ ᠮᠠᠭᠤ ᠶᠠᠷᠠ ᠂ ᠬᠣᠣᠷᠲᠤ ᠬᠠᠪᠤᠳᠠᠷ ᠵᠡᠷᠭᠡ ᠶ᠋ᠢ ᠵᠠᠰᠠᠬᠤ ᠳ᠋ᠤ᠌ ᠢᠳᠡᠪᠬᠢ ᠰᠠᠢᠨ ᠂ ᠬᠣᠪᠣᠷ ᠨᠠᠨᠳᠢᠨ ᠡᠮ ᠦ᠋ᠨ ᠮᠠᠲ᠋ᠧᠷᠢᠶᠠᠯ ᠪᠣᠯᠤᠨᠠ᠃
ᠠᠳᠤᠭᠤᠨ ᠤ᠋ ᠮᠢᠬᠠ
ᠠᠳᠤᠭᠤᠨ ᠤ᠋ ᠮᠢᠬᠠ ᠨᠢ ᠣᠨᠴᠠᠭᠠᠢ ᠠᠮᠲᠠᠲᠠᠢ ᠪᠥᠭᠡᠳ ᠬᠠᠯᠠᠭᠤᠨ ᠶᠡᠬᠡᠲᠡᠢ᠃ ᠡᠪᠦᠯ ᠬᠥᠯᠳᠡᠵᠦ ᠥᠭᠬᠦ ᠦᠭᠡᠢ ᠪᠠᠢᠳᠠᠭ᠃ ᠮᠠᠨ ᠤ᠋ ᠬᠦᠢᠲᠡᠨ ᠭᠠᠵᠠᠷ ᠤ᠋ᠨ ᠬᠢᠨ ᠪᠣᠯ ᠡᠪᠦᠯ ᠶᠢᠰᠦ ᠣᠷᠣᠭᠰᠠᠭᠠᠷ ᠠᠳᠤᠭᠤ ᠶ᠋ᠢᠨ ᠮᠢᠬᠠ ᠢᠳᠡᠳᠡᠭ᠃ ᠮᠢᠬᠠ ᠨᠢ ᠰᠢᠮᠡ ᠴᠢᠨᠠᠷ ᠰᠠᠢᠲᠠᠢ ᠪᠥᠭᠡᠳ ᠢᠯᠴᠢᠲᠡᠢ ᠂ ᠥᠯ ᠳᠠᠭᠠᠮᠠᠭᠠᠢ ᠪᠠᠢᠳᠠᠭ᠃ ᠲᠡᠢᠮᠦ ᠡᠴᠡ ᠮᠢᠬᠠ ᠶ᠋ᠢ ᠨᠢ ᠢᠳᠡᠴᠢᠬᠡᠳ ᠱᠥᠯᠥ ᠪᠡᠷ ᠨᠢ ᠬᠠᠴᠠᠷ ᠨᠢᠭᠤᠷ ᠂ ᠴᠢᠬᠢᠨ ᠦ᠌ ᠣᠮᠣᠭ ᠂ ᠳᠡᠪᠢᠰᠬᠡᠷ ᠲᠦ᠍ ᠬᠦᠷᠲᠡᠯᠡ ᠤᠬᠢᠶᠠᠭᠠᠳ ᠭᠤᠷᠪᠠ ᠶᠢᠰᠦ ᠳ᠋ᠦ᠍ ᠴᠦ᠍ ᠮᠠᠯᠠᠭᠠᠢ ᠳᠠᠷᠤᠯ ᠦᠭᠡᠢ ᠶᠠᠪᠤᠳᠠᠭ᠃
ᠢᠮᠠᠭᠠᠨ ᠤ᠋ ᠮᠢᠬᠠ
ᠢᠮᠠᠭᠠᠨ ᠮᠢᠬᠠ ᠨᠢ ᠰᠢᠮᠡ ᠲᠡᠵᠢᠭᠡᠯ ᠰᠠᠢᠲᠠᠢ ᠂ ᠰᠡᠷᠢᠭᠦᠨ ᠴᠢᠨᠠᠷᠲᠠᠢ ᠪᠠᠢᠳᠠᠭ ᠃ ᠡᠢᠮᠦ ᠡᠴᠡ ᠮᠣᠩᠭᠣᠯᠴᠤᠳ ᠡᠳᠦᠷ ᠳᠣᠳᠣᠮ ᠤ᠋ᠨ ᠢᠳᠡᠰᠢᠨ ᠳ᠋ᠦ᠍ ᠬᠡᠷᠡᠭᠯᠡᠳᠡᠭ᠃
ᠢᠮᠠᠭᠠᠨ ᠤ᠋ ᠤᠭᠤᠴᠠ
ᠶᠡᠷᠦ ᠶ᠋ᠢᠨ ᠳᠠᠢᠯᠠᠯᠭᠠ ᠳ᠋ᠤ᠌ ᠲᠠᠯᠪᠢᠳᠠᠭ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠲᠣᠯᠣᠭᠠᠢ ᠣᠷᠣᠭᠤᠯᠳᠠᠭ ᠦᠭᠡᠢ ᠪᠥᠭᠡᠳ ᠬᠠᠰᠢᠶᠠᠰᠤ ᠶ᠋ᠢ ᠨᠢ ᠰᠣᠯᠢᠵᠤ ᠲᠠᠯᠪᠢᠳᠠᠭ ᠦᠭᠡᠢ ᠪᠣᠯᠠᠢ᠃