ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠠᠷᠪᠠᠨ ᠨᠢᠭᠡ ᠂ ᠤᠯᠠᠭᠠᠨ ᠢᠳᠡᠭᠡᠨ ᠦ ᠪᠦᠯᠦᠭ 2 > Хөх зул – Боржигон Ванжал –" Арван нэг ᠂ Улаан идээний бүлэг 2 "
340ᠠᠷᠪᠠᠨ ᠨᠢᠭᠡ ᠂ ᠤᠯᠠᠭᠠᠨ ᠢᠳᠡᠭᠡᠨ ᠦ ᠪᠦᠯᠦᠭ - 2
ᠬᠣᠷᠢᠨ ᠨᠢᠭᠡᠨ ᠵᠦᠢᠯ ᠦ᠋ᠨ ᠮᠢᠬᠠ ᠶ᠋ᠢ ᠴᠡᠭᠡᠷᠯᠡᠬᠦ ᠶᠣᠰᠣᠨ ᠢ᠋ ᠬᠣᠷᠢᠨ ᠨᠢᠭᠡᠨ ᠤᠪ ᠭᠡᠳᠡᠭ ᠃ ᠮᠣᠩᠭᠣᠯᠴᠤᠳ ᠡᠷᠲᠡ ᠢᠵᠠᠭᠤᠷ ᠡᠴᠡ ᠪᠡᠨ ᠰᠢᠭᠦᠰᠦ ᠳᠠᠪᠠᠠᠯᠠᠬᠤ ᠳ᠋ᠤ᠌ ᠠᠮᠢᠳᠤᠷᠠᠯ ᠳ᠋ᠤ᠌ ᠲᠣᠬᠢᠶᠠᠯᠳᠤᠭᠰᠠᠨ ᠪᠡᠯᠭᠡ ᠳᠡᠮᠪᠡᠷᠡᠯ ᠢ᠋ ᠦᠨᠳᠦᠰᠦᠯᠡᠨ ᠬᠣᠷᠢᠨ ᠨᠢᠭᠡᠨ ᠤᠪ ᠢ ᠲᠠᠪᠠᠭ ᠲᠠᠪᠰᠢ ᠳ᠋ᠤ᠌ ᠣᠷᠣᠭᠤᠯᠳᠠᠭ ᠦᠭᠡᠢ ᠪᠢᠯᠡ᠃
ᠲᠦᠭᠰᠢᠭᠦᠷᠢ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠮᠣᠷᠢ ᠲᠦᠭᠰᠢᠨᠡ ᠭᠡᠳᠡᠭ᠃
ᠪᠦᠳᠦᠷᠬᠡᠢ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠮᠣᠷᠢ ᠪᠦᠳᠦᠷᠢᠨᠡ ᠭᠡᠳᠡᠭ᠃
ᠭᠡᠳᠡᠰᠦᠨ ᠵᠠᠩᠭᠢᠯᠠᠭᠠ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠮᠣᠷᠢ ᠵᠠᠩᠭᠢᠷᠠᠨᠠ ᠭᠡᠳᠡᠭ᠃
ᠰᠠᠮᠠᠯᠳᠠᠭ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠮᠣᠷᠢ ᠳᠣᠷᠭᠢᠨᠠ ᠭᠡᠳᠡᠭ᠃
ᠭᠣᠳᠣᠩ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠮᠣᠷᠢ ᠪᠤᠯᠭᠢᠨᠠ ᠭᠡᠳᠡᠭ᠃
ᠣᠯᠣᠭᠠᠢ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠣᠯᠳᠣᠢ ᠪᠣᠯᠤᠨᠠ ᠭᠡᠳᠡᠭ᠃
ᠠᠮᠠᠰᠠᠷ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠠᠮᠠᠨᠴᠢᠷ ᠪᠣᠯᠤᠨᠠ ᠭᠡᠳᠡᠭ᠃
ᠨᠣᠢᠷ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠤᠨᠲᠠᠩᠬᠠᠢ ᠪᠣᠯᠤᠨᠠ ᠭᠡᠳᠡᠭ᠃
ᠰᠢᠯᠢ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠬᠤᠯᠠᠭᠠᠢᠴᠢ ᠪᠣᠯᠤᠨᠠ ᠭᠡᠳᠡᠭ᠃
ᠨᠤᠭᠤᠰᠤ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠵᠣᠷᠢᠭ ᠦᠭᠡᠢ ᠪᠣᠯᠤᠨᠠ ᠭᠡᠳᠡᠭ᠃
ᠲᠡᠨᠡᠭ ᠲᠦᠷᠦᠭᠦᠦ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠡᠷᠭᠢᠭᠦᠦ ᠲᠡᠨᠡᠭ ᠪᠣᠯᠤᠨᠠ ᠭᠡᠳᠡᠭ᠃
ᠲᠠᠷᠢᠬᠢ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠨᠢᠰᠤᠬᠠᠢ ᠪᠣᠯᠤᠨᠠ ᠭᠡᠳᠡᠭ᠃
ᠳᠡᠯᠢᠭᠦᠦ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠬᠥᠬᠡ ᠴᠢᠷᠠᠢᠲᠠᠢ ᠪᠣᠯᠤᠨᠠ ᠭᠡᠳᠡᠭ᠃
ᠪᠤᠯᠴᠢᠷᠬᠠᠢ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠪᠤᠵᠠᠷ ᠪᠣᠯᠤᠨᠠ ᠭᠡᠳᠡᠭ᠃
ᠥᠨᠥᠴᠢᠨ ᠡᠯᠢᠭᠡ ᠢᠳᠡᠵᠦ ᠪᠣᠯᠬᠤ ᠦᠭᠡᠢ
ᠥᠨᠥᠴᠢᠨ ᠥᠷᠥᠭᠡᠰᠦᠨ ᠢ᠋ ᠳᠣᠷᠣᠮᠵᠢᠯᠠᠭᠰᠠᠨ ᠪᠣᠯᠤᠨᠠ ᠭᠡᠳᠡᠭ᠃ ᠮᠥᠨ ᠥᠨᠥᠴᠢᠨ ᠬᠥᠮᠦᠨ ᠢᠳᠡᠪᠡᠯ ᠥᠪᠡᠷ ᠢ᠋ ᠪᠡᠨ ᠬᠥᠨᠥᠭᠡᠭᠰᠡᠨ ᠪᠣᠯᠤᠨᠠ ᠭᠡᠳᠡᠭ᠃
ᠪᠣᠭᠣᠨᠢ ᠬᠠᠪᠢᠷᠭᠠ ᠢᠳᠡᠵᠦ ᠪᠣᠯᠬᠤ ᠦᠭᠡᠢ
ᠬᠥᠮᠦᠨ ᠦ᠌ ᠭᠠᠭᠴᠠ ᠬᠦᠦ ᠶ᠋ᠢ ᠬᠥᠨᠥᠭᠡᠭᠰᠡᠨ ᠳ᠋ᠦ᠍ ᠣᠷᠣᠨᠠ᠃ ᠬᠥᠮᠦᠨ ᠦ᠌ ᠭᠠᠭᠴᠠ ᠬᠦᠦ ᠢᠳᠡᠪᠡᠯ ᠭᠠᠢ ᠭᠠᠮᠰᠢᠭ ᠲᠤ᠌ ᠲᠣᠬᠢᠶᠠᠯᠳᠤᠨᠠ ᠭᠡᠳᠡᠭ ᠃ ᠡᠢᠨ ᠬᠦ᠌ ᠭᠠᠯ ᠳ᠋ᠤ᠌ ᠡᠷᠭᠦᠪᠡᠯ ᠰᠠᠢᠨ ᠭᠡᠳᠡᠭ᠃
ᠬᠠᠷᠢᠲᠤ ᠴᠢᠮᠥᠭᠡ ᠶ᠋ᠢ ᠳᠠᠩ ᠢ᠋ᠶ᠋ᠠᠷ ᠵᠣᠴᠢᠨ ᠳ᠋ᠤ᠌ ᠢᠳᠡᠭᠦᠯᠵᠦ ᠪᠣᠯᠬᠤ ᠦᠭᠡᠢ
ᠬᠠᠷᠢᠶᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠭᠳᠠᠨᠠ᠃ 《ᠬᠠᠷᠢᠭᠤ ᠦᠭᠡᠢ ᠬᠥᠮᠦᠨ ᠳ᠋ᠦ᠍ ᠬᠠᠷᠢᠲᠤ ᠴᠢᠮᠥᠭᠡ 》ᠭᠡᠳᠡᠭ᠃ ᠬᠠᠭᠠᠨ ᠤ᠋ ᠬᠤᠶᠠᠭ ᠢᠳᠡᠵᠦ ᠪᠣᠯᠬᠤ ᠦᠭᠡᠢ᠂ ᠬᠠᠷᠢᠲᠠᠨ ᠳᠠᠢᠰᠤᠨ ᠳ᠋ᠤ᠌ ᠬᠣᠣᠷᠯᠠᠭᠳᠠᠨᠠ ᠭᠡᠳᠡᠭ᠃
ᠪᠣᠭᠲᠣᠭᠣᠰᠣ ᠴᠢᠮᠥᠭᠡ ᠶ᠋ᠢ ᠳᠠᠩ ᠢ᠋ᠶ᠋ᠠᠷ ᠥᠭᠴᠦ ᠪᠣᠯᠬᠤ ᠦᠭᠡᠢ ᠵᠣᠴᠢᠨ ᠢ ᠳᠣᠷᠣᠮᠵᠢᠯᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠭᠳᠠᠨᠠ᠃
ᠳᠠᠯᠤ ᠶ᠋ᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠳᠠᠢᠰᠤᠨ ᠳ᠋ᠤ᠌ ᠳᠠᠷᠤᠯᠠᠭᠳᠠᠨᠠ ᠭᠡᠳᠡᠭ᠃
ᠳᠠᠯᠤ ᠶ᠋ᠢ ᠨᠠᠭᠠᠴᠤ ᠵᠢᠭᠡ ᠳ᠋ᠦ᠍ ᠲᠠᠯᠪᠢᠵᠤ ᠪᠣᠯᠬᠤ ᠦᠭᠡᠢ ᠶᠣᠰᠣ ᠠᠯᠳᠠᠵᠤ ᠨᠠᠭᠠᠴᠤ ᠨᠢ ᠦᠭᠡᠢᠷᠡᠨᠡ ᠭᠡᠳᠡᠭ᠃
ᠱᠠᠭᠠ ᠶ᠋ᠢᠨ ᠮᠢᠬᠠ ᠶ᠋ᠢ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠶᠠᠳᠠᠭᠤᠷᠠᠵᠤ ᠱᠠᠯᠳᠠᠩ ᠪᠣᠯᠤᠨᠠ ᠭᠡᠳᠡᠭ᠃
ᠡᠷᠡᠦ ᠬᠡᠯᠡ ᠶ᠋ᠢ ᠲᠠᠯᠪᠢᠵᠤ ᠥᠭᠴᠦ ᠪᠣᠯᠬᠤ ᠦᠭᠡᠢ ᠬᠡᠯᠡ ᠠᠮᠠ ᠲᠠᠲᠠᠨᠠ ᠭᠡᠳᠡᠭ᠃
ᠡᠳᠡᠭᠡᠷ ᠬᠣᠷᠢᠨ ᠨᠢᠭᠡ ᠶ᠋ᠢ ᠡᠩᠬᠦᠷᠡᠢ ᠣᠷᠣᠭᠠ ᠬᠡᠦᠬᠡᠳ ᠲᠦ᠍ ᠢᠳᠡᠭᠦᠯᠳᠡᠭ ᠦᠭᠡᠢ ᠪᠥᠭᠡᠳ ᠲᠠᠪᠠᠭ ᠳᠠᠪᠰᠢ ᠳ᠋ᠤ᠌ ᠣᠷᠣᠭᠤᠯᠳᠠᠭ ᠦᠭᠡᠢ᠃ ᠡᠳᠡᠭᠡᠷ ᠢ ᠭᠣᠣᠯᠳᠠᠭᠤ ᠨᠠᠰᠤᠲᠠᠢᠴᠤᠳ ᠢᠳᠡᠨᠡ᠃
ᠬᠠᠪᠰᠤᠷᠤᠭᠠ ᠬᠣᠨᠢ
ᠬᠣᠨᠢ ᠶ᠋ᠢ ᠠᠯᠠᠵᠤ ᠡᠪᠴᠢᠭᠦᠦ ᠶ᠋ᠢ ᠬᠠᠲᠠᠵᠤ ᠠᠪᠤᠭᠠᠳ ᠬᠠᠪᠢᠷᠭᠠ ᠶ᠋ᠢᠨ ᠪᠤᠷᠠ ᠶ᠋ᠢ ᠬᠥᠨᠳᠡᠨ ᠳᠡᠯᠭᠡᠭᠡᠳ᠂ ᠤᠭᠤᠴᠠ ᠶ᠋ᠢᠨ ᠡᠬᠢᠨ ᠦ᠌ ᠨᠢᠷᠤᠭᠤᠨ ᠦᠶᠡ ᠶ᠋ᠢ ᠦᠶᠡᠯᠡᠵᠦ ᠨᠤᠭᠤᠯᠤᠨ᠂ ᠴᠡᠭᠡᠵᠢ᠂ ᠤᠭᠤᠴᠠᠨ ᠪᠡᠶᠡ ᠶ᠋ᠢ ᠬᠠᠪᠰᠤᠷᠤᠨ ᠲᠠᠯᠪᠢᠬᠤ ᠶ᠋ᠢ ᠬᠠᠪᠰᠤᠷᠤᠭᠠ ᠬᠣᠨᠢ ᠭᠡᠨᠡ᠃
ᠵᠤᠮᠠ ᠶ᠋ᠢᠨ ᠵᠦᠢᠯ
ᠬᠣᠨᠢ ᠶ᠋ᠢ ᠥᠷᠥᠴᠡᠯᠡᠨ ᠠᠯᠠᠭᠰᠠᠨ ᠤ᠋ ᠳᠠᠷᠠᠭᠠ᠂ ᠪᠦᠬᠦ ᠦᠰᠦ ᠨᠣᠣᠰᠣ ᠶ᠋ᠢ ᠨᠢ ᠵᠤᠮᠠᠯᠠᠨ ᠬᠤᠰᠤᠵᠤ ᠬᠠᠶᠠᠭᠠᠳ᠂ ᠭᠡᠳᠡᠰᠦ ᠳᠣᠲᠣᠷ ᠢ᠋ ᠠᠭᠤᠳᠠᠯᠤᠨ ᠭᠠᠷᠭᠠᠵᠤ ᠥᠪᠴᠢ ᠪᠡᠶᠡ ᠶ᠋ᠢ ᠡᠪᠳᠡᠬᠦ ᠦᠭᠡᠢ ᠪᠡᠷ ᠴᠡᠪᠡᠷᠯᠡᠨ ᠠᠷᠢᠯᠭᠠᠭᠰᠠᠨ ᠴᠡᠭᠡᠵᠢ ᠬᠡᠪᠡᠯᠢ ᠳ᠋ᠦ᠍ ᠳᠠᠪᠤᠰᠤ ᠲᠡᠷᠢᠭᠦᠲᠡᠨ ᠲᠠᠪᠤᠨ ᠠᠮᠲᠠᠲᠠᠨ ᠢ᠋ ᠭᠡᠮ ᠲᠠᠭᠠᠷᠠᠭᠤᠯᠤᠨ ᠬᠠᠴᠢᠷᠯᠠᠵᠤ ᠥᠷᠥᠴᠡ ᠶ᠋ᠢ ᠪᠢᠲᠡᠭᠦᠮᠵᠢᠯᠡᠨ ᠣᠶᠣᠭᠠᠳ ᠪᠥᠭᠡᠷᠡᠲᠦ ᠳᠠᠯᠠᠢ ( ᠲᠣᠭᠣᠭᠠ ) ᠪᠤᠶᠤ ᠲᠤᠰᠬᠠᠢᠯᠠᠨ ᠪᠤᠷᠭᠠᠰᠤ ᠪᠤᠶᠤ ᠴᠢᠯᠠᠭᠤᠨ ᠢ᠋ᠶ᠋ᠠᠷ ᠪᠢᠲᠡᠭᠦᠮᠵᠢᠯᠡᠨ ᠪᠡᠯᠡᠳᠬᠡᠭᠰᠡᠨ ᠵᠢᠩᠨᠡᠭᠦᠷ ᠲᠦ᠍ ᠪᠦᠬᠦᠯᠢ ᠪᠡᠷ ᠨᠢ ᠰᠢᠷᠠᠵᠤ ᠬᠠᠭᠰᠠᠭᠠᠨ ᠪᠣᠯᠭᠣᠭᠠᠳ ᠡᠪᠡᠷ᠂ ᠬᠣᠭᠢᠰᠣ᠂ ᠪᠣᠷᠪᠢ ᠶ᠋ᠢ ᠨᠢ ᠴᠥᠮ ᠠᠪᠤᠯ ᠦᠭᠡᠢ ᠪᠡᠷ ( ᠬᠡᠰᠢᠭᠲᠡᠨ ᠳ᠋ᠦ᠍ ᠳᠥᠷᠪᠡᠨ ᠬᠥᠯ ᠳ᠋ᠦ᠍ᠨᠢ ᠮᠥᠩᠭᠥᠨ ᠬᠣᠭᠢᠰᠣ ᠤᠭᠯᠠᠳᠠᠭ ᠶᠣᠰᠣ ᠪᠣᠢ ) ᠶᠡᠬᠡ ᠲᠠᠪᠠᠭ ᠪᠤᠶᠤ ᠡᠰᠡᠬᠦᠯᠡ ᠴᠠᠷᠠ ᠳ᠋ᠤ᠌ ᠵᠣᠭᠰᠣᠭᠠ ᠪᠤᠶᠤ ᠬᠡᠪᠲᠡᠭᠡ ᠬᠡᠯᠪᠡᠷᠢ ᠪᠡᠷ ᠲᠡᠪᠰᠢᠯᠡᠳᠡᠭ ᠃ ᠲᠣᠯᠣᠭᠠᠢ ( 《ᠪᠠᠶᠠᠷ ᠤ᠋ᠨ ᠮᠠᠩᠨᠠᠢ 》ᠭᠠᠷᠭᠠᠨᠠ᠃ ᠬᠡᠰᠢᠭᠲᠡᠨ ᠳ᠋ᠦ᠍ ᠲᠣᠯᠣᠭᠠᠢ ᠳ᠋ᠤᠨᠢ ᠮᠥᠩᠭᠥ ᠂ ᠬᠠᠰ ᠤ᠋ᠨ ᠲᠠᠮᠠᠭᠠ ＜ 卐＞ ᠡᠯᠭᠦᠳᠡᠭ ᠴᠦ᠍ ᠪᠣᠢ ) ᠶ᠋ᠢ ᠨᠢ ᠭᠣᠣᠯ ᠵᠣᠴᠢᠨ ᠤ᠋ ᠥᠭᠡᠳᠡ ᠬᠠᠷᠠᠭᠤᠯᠤᠨᠠ᠃
ᠮᠣᠩᠭᠣᠯᠴᠤᠳ ᠤ᠋ᠨ ᠲᠡᠦᠬᠡᠨᠡ ᠶᠡᠬᠡ ᠲᠠᠬᠢᠯᠭᠠ ᠪᠤᠶᠤ ᠶᠡᠬᠡ ᠳᠠᠢᠯᠠᠯᠭᠠ ᠳ᠋ᠤ᠌ ᠵᠤᠮᠠ ᠬᠣᠨᠢᠨ ᠳᠠᠢᠯᠠᠯᠭᠠ ᠲᠠᠯᠪᠢᠳᠠᠭ᠃ ᠡᠨᠡ ᠨᠢ ᠢᠷᠭᠡ ᠶ᠋ᠢᠨ ᠰᠢᠭᠦᠰᠦᠨ ᠦ᠌ ᠨᠥᠭᠦᠭᠡ ᠨᠢᠭᠡᠨ ᠬᠡᠯᠪᠡᠷᠢ᠃
ᠪᠦᠬᠦᠯᠢ ᠵᠤᠮᠠ ᠵᠤᠮᠠ ᠬᠣᠨᠢ᠃
ᠵᠤᠮᠠ ᠬᠥᠨᠳᠡᠬᠦ ᠶᠣᠰᠣ ᠪᠦᠬᠦᠯᠢ ᠬᠣᠨᠢ ᠡᠪᠳᠡᠬᠦ ᠲᠡᠢ ᠶᠡᠷᠦᠩᠬᠡᠢ ᠳ᠋ᠡᠭᠡᠨ ᠠᠳᠠᠯᠢ᠃ ᠤᠷᠢᠳ ᠢ᠋ᠶ᠋ᠠᠷ ᠬᠣᠨᠢᠨ ᠲᠣᠯᠣᠭᠠᠢ᠂ ᠤᠭᠤᠷᠠᠭ ᠰᠡᠭᠦᠯ ᠢ᠋ ᠬᠥᠨᠳᠡᠭᠰᠡᠨ ᠦ᠌ ᠳᠠᠷᠠᠭᠠ᠂ ᠠᠪᠴᠤ ᠭᠠᠷᠤᠭᠠᠳ ᠡᠪᠳᠡᠵᠦ ᠳᠠᠬᠢᠨ ᠣᠷᠣᠭᠤᠯᠬᠤ ᠶᠤᠮ ᠤᠤ᠂ ᠡᠰᠡᠬᠦᠯᠡ ᠰᠢᠷᠡᠭᠡᠨ ᠳᠡᠭᠡᠷᠡ ᠨᠢ ᠡᠪᠳᠡᠳᠡᠭ ᠭᠠᠵᠠᠷ ᠴᠤ᠌ ᠪᠣᠢ᠃
ᠵᠤᠮᠠ ᠬᠢᠬᠦ ᠠᠷᠭᠠ ᠭᠤᠷᠪᠠᠨ ᠵᠦᠢᠯ ᠪᠠᠢᠳᠠᠭ ᠃
① ᠪᠤᠷᠭᠠᠰᠤᠨ ᠪᠥᠬᠥᠭᠡᠭ ᠵᠣᠬᠢᠶᠠᠵᠤ ᠬᠠᠭᠰᠠᠭᠠᠬᠤ ᠠᠷᠭᠠ᠃ ᠡᠨᠡ ᠨᠢ ᠱᠡᠵᠢᠭᠡᠢ ᠠᠷᠤᠭ ᠤ᠋ᠨ ᠬᠡᠯᠪᠡᠷᠢᠲᠡᠢ ᠪᠤᠷᠭᠠᠰᠤᠨ ᠭᠦᠷᠦᠮᠡᠯ ᠪᠥᠬᠥᠭᠡᠭ ᠦ᠋ᠨ ᠭᠠᠳᠠᠷ ᠳᠣᠲᠣᠷ ᠲᠠᠯᠠ ᠶ᠋ᠢ ᠰᠢᠪᠠᠷ ᠢ᠋ᠶ᠋ᠠᠷ ᠳᠥᠷᠪᠡᠨ ᠬᠤᠷᠤᠭᠤ ᠵᠤᠵᠠᠭᠠᠨ ᠰᠢᠪᠠᠵᠤ᠂ ᠪᠡᠯᠡᠳᠬᠡᠭᠰᠡᠨ ᠵᠤᠮᠠ ᠪᠠᠨ ᠰᠢᠪᠠᠷ ᠢ᠋ᠶ᠋ᠠᠷ ᠮᠢᠯᠢᠶᠠᠭᠰᠠᠨ ᠲᠡᠩᠨᠡᠭᠦᠷ ᠠᠲᠠᠷ ᠳᠡᠭᠡᠷᠡ ᠬᠡᠪᠲᠡᠭᠦᠯᠦᠨ ᠲᠠᠯᠪᠢᠵᠤ᠂ ᠳᠡᠭᠡᠷᠡ ᠨᠢ ᠪᠥᠬᠥᠭᠡᠭ ᠢ᠋ᠶ᠋ᠡᠨ ᠬᠥᠮᠥᠷᠢᠨ ᠵᠠᠭᠠᠭ ᠵᠠᠪᠰᠠᠷ ᠢ᠋ ᠨᠢ ᠪᠡᠬᠢᠯᠡᠨ ᠤᠶᠠᠵᠤ ᠰᠢᠪᠠᠷ ᠢ᠋ᠶ᠋ᠠᠷ ᠴᠢᠭᠵᠢᠵᠦ ᠰᠢᠪᠠᠭᠰᠠᠨ ᠤ᠋ ᠳᠠᠷᠠᠭᠠ᠂ ᠵᠤᠤᠬᠠ ᠳᠣᠲᠣᠷᠠ ᠪᠠᠨ ᠰᠠᠭᠤᠯᠭᠠᠨ ᠠᠷᠭᠠᠯ ᠢ᠋ᠶ᠋ᠠᠷ ᠬᠤᠴᠢᠵᠤ ᠵᠦᠭ ᠪᠦᠬᠦᠨ ᠡᠴᠡ ᠨᠢ ᠭᠠᠯᠯᠠᠨᠠ᠃ ᠪᠥᠬᠥᠭᠡᠭ ᠦ᠋ᠨ ᠳᠣᠲᠣᠷᠠ ᠲᠠᠯᠠ ᠪᠠᠷ ᠲᠣᠰᠣ ᠨᠡᠪᠴᠢᠵᠦ ᠂ ᠳᠡᠭᠡᠷᠡ ᠲᠠᠯᠠ ᠪᠠᠷ ᠨᠢ ᠴᠢᠭᠢᠭ ᠲᠠᠲᠠᠪᠠᠯ ᠰᠢᠭᠦᠰᠦ ᠪᠣᠯᠤᠭᠰᠠᠨ ᠤ᠋ ᠢᠯᠡᠷᠡᠯ᠃ ᠲᠡᠭᠡᠭᠡᠳ ᠪᠥᠬᠥᠭᠡᠭ ᠢ᠋ᠶ᠋ᠡᠨ ᠬᠠᠭᠤᠯᠤᠨ ᠠᠪᠴᠤ ᠬᠢᠷᠪᠤᠰᠤ ᠶ᠋ᠢ ᠨᠢ ᠲᠡᠮᠦᠷ ᠰᠢᠨᠠᠬᠠ ᠪᠠᠷ ᠬᠤᠰᠤᠵᠤ ᠬᠠᠶᠠᠪᠠᠯ ᠵᠤᠮᠠ ᠨᠢ ᠰᠢᠷᠭᠠᠯ ᠴᠠᠭᠠᠨ ᠥᠩᠭᠡᠲᠡᠢ ᠪᠣᠯᠤᠨᠠ᠃
② ᠡᠯᠡᠰᠦ ᠪᠡᠷ ᠪᠤᠯᠠᠵᠤ ᠬᠠᠭᠰᠠᠭᠠᠬᠤ ᠠᠷᠭᠠ᠂ ᠪᠡᠯᠡᠳᠬᠡᠭᠰᠡᠨ ᠵᠤᠮᠠ ᠪᠠᠨ ᠵᠣᠭᠰᠣᠭᠠ ᠪᠠᠷ ᠡᠯᠡᠰᠦ ᠪᠡᠷ ᠪᠤᠯᠠᠵᠤ᠂ ᠠᠷᠭᠠᠯ ᠢ᠋ᠶ᠋ᠠᠷ ᠬᠤᠴᠢᠭᠠᠳ ᠭᠠᠯ ᠣᠷᠣᠭᠤᠯᠤᠨᠠ᠃ ᠭᠡᠳᠡᠰᠦᠨ ᠲᠠᠯᠠ ᠪᠠᠷ ᠨᠢ ᠰᠢᠭᠦᠰᠦ ᠲᠣᠰᠣ ᠨᠢ ᠨᠡᠪᠲᠡᠷᠡᠨ ᠦᠨᠦᠷ ᠬᠠᠩᠬᠤᠯᠤᠨᠠ᠃ ᠡᠨᠡ ᠦᠶᠡ ᠭᠠᠷᠭᠠᠨ ᠠᠪᠴᠤ ᠬᠢᠷᠪᠤᠰᠤ ᠶ᠋ᠢ ᠬᠤᠰᠤᠵᠤ ᠳᠠᠪᠰᠢᠯᠠᠨᠠ᠃
③ ᠭᠠᠵᠠᠷ ᠳᠡᠭᠡᠷᠡ ᠭᠤᠷᠪᠠᠨ ᠲᠣᠬᠣᠢ ᠥᠨᠳᠥᠷ ᠴᠢᠯᠠᠭᠤᠨ ᠵᠤᠤᠬᠠ ᠪᠠᠷᠢᠭᠠᠳ᠂ ᠤᠷᠢᠳ ᠢ᠋ᠶ᠋ᠠᠷ ᠴᠢᠯᠠᠭᠤᠨ ᠵᠤᠤᠬᠠ ᠶᠤᠭᠠᠨ ᠤᠯᠠᠢᠰᠲᠠᠯᠠ ᠲᠦᠯᠡᠭᠡᠳ᠂ ᠲᠡᠮᠦᠷ ᠤᠲᠠᠰᠤᠨ ᠭᠦᠷᠦᠮᠡᠯ ᠰᠠᠪᠠ ᠳ᠋ᠤ᠌ ᠵᠤᠮᠠ ᠪᠠᠨ ᠬᠢᠵᠦ ᠳᠣᠲᠣᠷᠠ ᠨᠢ ᠲᠠᠯᠪᠢᠵᠤ᠂ ᠳᠡᠭᠡᠭᠦᠷ ᠨᠢ ᠪᠤᠷᠭᠠᠰᠤ ᠪᠠᠷ ᠢᠭᠴᠤ ᠪᠦᠲᠡᠭᠡᠵᠦ᠂ ᠰᠢᠷᠣᠢ ᠪᠠᠷ ᠪᠢᠲᠡᠭᠦᠮᠵᠢᠯᠡᠭᠡᠳ ᠪᠣᠯᠭᠣᠭᠰᠠᠨ ᠤ᠋ ᠳᠠᠷᠠᠭᠠ ᠭᠠᠷᠭᠠᠵᠤ ᠠᠪᠤᠭᠠᠳ᠂ ᠬᠢᠷᠪᠤᠰᠤ ᠶ᠋ᠢ ᠬᠤᠰᠤᠨ ᠳᠠᠪᠰᠢᠯᠠᠨᠠ᠃ ᠡᠭᠦᠨ ᠢ᠋ 《ᠮᠣᠩᠭᠣᠯ ᠤ᠋ᠨ ᠢᠳᠡᠭᠡᠨ ᠤᠮᠳᠠᠭᠠᠨ ᠤ᠋ ᠵᠢᠩᠬᠢᠨᠢ ᠲᠣᠪᠴᠢ 》 ᠳ᠋ᠤ᠌ 《ᠪᠤᠷᠭᠠᠰᠤᠨ ᠵᠢᠩᠨᠡᠮᠡᠯ ᠬᠣᠨᠢᠨ ᠮᠢᠬᠠ 》ᠭᠡᠵᠦ ᠨᠡᠷᠡᠢᠳᠦᠭᠰᠡᠨ ᠪᠢᠯᠡ᠃
ᠰᠢᠷᠠᠭᠰᠠᠨ ᠬᠣᠨᠢᠨ ᠰᠢᠭᠦᠰᠦ
ᠰᠢᠷᠠᠭᠰᠠᠨ ᠬᠣᠨᠢᠨ ᠰᠢᠭᠦᠰᠦ ᠨᠢ ᠬᠦᠨᠳᠦᠲᠦ ᠢᠳᠡᠭᠡᠨ ᠪᠣᠯᠤᠨᠠ᠃ ᠵᠤᠮᠠ ᠲᠠᠢ ᠨᠡᠯᠢᠶᠡᠳ ᠲᠥᠰᠦᠭᠡᠲᠡᠢ ᠴᠦ᠍ ᠲᠡᠭᠦᠨ ᠡᠴᠡ ᠨᠠᠷᠢᠯᠢᠭ᠃
ᠰᠢᠷᠠᠭᠰᠠᠨ ᠬᠣᠨᠢ ᠲᠡᠪᠰᠢᠯᠡᠬᠦ ᠶᠣᠰᠣᠨ
ᠰᠢᠷᠠᠭᠰᠠᠨ ᠬᠣᠨᠢ ᠪᠠᠨ ᠲᠣᠮᠣ ᠲᠠᠪᠠᠭ ᠲᠤ᠌ ᠵᠣᠭᠰᠣᠭᠠᠨ ᠵᠣᠴᠢᠳ ᠲᠠᠭᠠᠨ ᠦᠵᠡᠭᠦᠯᠵᠦ᠂ ᠳᠠᠬᠢᠨ ᠭᠠᠷᠭᠠᠵᠤ ᠠᠪᠴᠢᠷᠠᠨ ᠠᠷᠠᠰᠤ ᠶ᠋ᠢ ᠨᠢ ᠬᠡᠷᠴᠢᠨ ᠲᠠᠪᠠᠭᠯᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠭᠠᠷᠭᠠᠨᠠ᠃ ᠳᠠᠷᠠᠭᠠ ᠨᠢ ᠬᠠᠷᠠ ᠮᠢᠬᠠ ᠶ᠋ᠢ ᠨᠢ ᠬᠡᠷᠴᠢᠵᠦ ᠲᠠᠪᠠᠭᠯᠠᠭᠠᠳ ᠭᠠᠷᠭᠠᠨᠠ᠃ ᠬᠠᠮᠤᠭ ᠰᠡᠭᠦᠯ ᠳ᠋ᠦ᠍ᠨᠢ ᠶᠠᠰᠤ ᠲᠠᠢ ᠮᠢᠬᠠ ᠶ᠋ᠢ ᠨᠢ ᠳᠠᠪᠬᠠᠯᠠᠵᠤ ᠵᠢᠶᠠᠩᠶᠢᠦ᠂ ᠢᠰᠬᠦᠯᠡᠩ ᠰᠢᠭᠦᠰᠦ᠂ ᠰᠣᠩᠭᠢᠨᠠ᠂ ᠰᠠᠷᠢᠮᠰᠠᠭ ᠵᠡᠷᠭᠡ ᠶ᠋ᠢ ᠬᠠᠮᠲᠤ ᠳ᠋ᠤᠨᠢ ᠪᠡᠯᠡᠳᠬᠡᠨ ᠬᠣᠭᠣᠯᠠ ᠶ᠋ᠢᠨ ᠬᠠᠮᠲᠤ ᠭᠠᠷᠭᠠᠨᠠ᠃ ᠡᠨᠡ ᠪᠣᠯ ᠰᠢᠷᠠᠭᠰᠠᠨ ᠬᠣᠨᠢ ᠲᠡᠪᠰᠢᠯᠡᠬᠦ ᠪᠠ ᠢᠳᠡᠬᠦ ᠶᠣᠰᠣ᠃
ᠬᠣᠨᠢ ᠰᠢᠷᠠᠬᠤ
ᠳᠡᠭᠡᠷᠡ ᠠᠮᠠᠰᠠᠷ ᠤ᠋ᠨ ᠳ᠋ᠢᠶᠠᠮᠧᠲ᠋ᠷ ᠨᠢ 90 ᠰᠡᠨᠲ᠋ᠢᠮᠧᠲ᠋ᠷ ᠂ ᠳᠣᠣᠷᠠ ᠢᠷᠣᠭᠠᠷ ᠤ᠋ᠨ ᠳ᠋ᠢᠶᠠᠮᠧᠲ᠋ᠷ ᠨᠢ 150 ᠰᠡᠨᠲ᠋ᠢᠮᠧᠲ᠋ᠷ᠃ 180 ᠰᠡᠨᠲ᠋ᠢᠮᠧᠲ᠋ᠷ ᠥᠨᠳᠥᠷ ᠪᠣᠰᠤᠭᠠ ᠬᠡᠯᠪᠡᠷᠢᠲᠡᠢ ᠵᠤᠤᠬᠠ ᠶ᠋ᠢ ᠲᠣᠭᠣᠰᠬᠠ ᠪᠤᠶᠤ ᠰᠢᠷᠢᠭ ᠵᠦᠯᠭᠡ ᠪᠡᠷ ᠪᠠᠷᠢᠵᠤ ᠂ ᠳᠣᠲᠣᠷᠠ ᠲᠠᠯᠠ ᠶ᠋ᠢ ᠨᠢ ᠡᠯᠡᠰᠦ ᠲᠡᠢ ᠬᠣᠯᠢᠭᠰᠠᠨ ᠤᠯᠠᠭᠠᠨ ᠰᠢᠪᠠᠷ ᠢ᠋ ᠤᠩᠭᠠᠰᠤ ᠬᠢᠯᠭᠠᠰᠤ ᠪᠤᠶᠤ ᠵᠡᠭᠡᠰᠦᠨ ᠨᠣᠣᠯᠣᠭᠤᠷ ᠬᠢᠵᠦ ᠰᠠᠢᠲᠤᠷ ᠨᠠᠢᠷᠠᠭᠤᠯᠤᠨ ᠢᠯᠢᠵᠦ ᠂ ᠭᠠᠳᠠᠷ ᠲᠠᠯᠠ ᠳ᠋ᠤᠨᠢ ᠵᠢᠷᠭᠤᠭᠠᠨ ᠪᠣᠯᠣᠳ ᠰᠢᠳᠡᠮ ᠢ ᠰᠢᠬᠠᠭᠤᠯᠤᠨ ᠪᠤᠯᠠᠵᠤ ᠂ ᠲᠡᠮᠦᠷ ᠤᠲᠠᠰᠤ ᠪᠠᠷ ᠭᠤᠷᠪᠠ ᠳᠥᠷᠪᠡᠨ ᠤᠳᠠᠭᠠ ᠪᠦᠰᠡᠯᠡᠨ ᠤᠶᠠᠵᠤ ᠨᠢᠯᠲᠠᠭ ᠰᠠᠢᠲᠠᠢ ᠰᠢᠪᠡᠷ ᠢ᠋ᠶ᠋ᠡᠷ ᠰᠠᠢᠲᠤᠷ ᠰᠢᠪᠡᠵᠦ ᠢᠯᠢᠵᠦ ᠬᠠᠲᠠᠭᠠᠨᠠ ᠃ ᠰᠢᠷᠠᠬᠤ ᠬᠣᠨᠢ ᠶ᠋ᠢ ᠠᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠭᠠᠬᠠᠢ ᠵᠤᠮᠠᠯᠠᠬᠤ ᠲᠠᠢ ᠠᠳᠠᠯᠢ ᠂ ᠠᠷᠠᠰᠤᠨ ᠵᠠᠪᠰᠠᠷ ᠲᠤᠨᠢ ᠬᠡᠢ ᠳᠦᠭᠦᠷᠭᠡᠵᠦ ᠂ ᠬᠠᠯᠠᠭᠤᠨ ᠤᠰᠤᠨ ᠳ᠋ᠤ᠌ ᠨᠣᠣᠰᠣ ᠶ᠋ᠢ ᠨᠢ ᠵᠤᠮᠠᠯᠠᠵᠤ ᠠᠪᠤᠭᠠᠳ ᠲᠣᠯᠣᠭᠠᠢ ᠰᠢᠭᠢᠷᠡ ᠶ᠋ᠢ ᠨᠢ ᠣᠭᠲᠣᠯᠤᠨ ᠠᠪᠴᠤ ᠂ ᠥᠷᠥᠴᠡ ᠳᠡᠭᠡᠷᠡ ᠨᠢ ᠨᠠᠢ᠍ᠮᠠᠨ ᠢᠮᠠᠬᠤ ᠬᠢᠷᠢᠲᠡᠢ ᠣᠭᠲᠣᠯᠤᠨ ᠬᠠᠭᠠᠯᠵᠤ ᠭᠡᠳᠡᠰᠦ ᠳᠣᠲᠣᠷ ᠢ᠋ ᠨᠢ ᠭᠠᠷᠭᠠᠨᠠ ᠃ ᠲᠡᠭᠡᠭᠡᠳ ᠬᠣᠶᠠᠷ ᠯᠠᠩ ᠴᠠᠭᠠᠨ ᠰᠢᠬᠢᠷ ᠢ᠋ ᠨᠠᠢ᠍ᠮᠠᠨ ᠯᠠᠩ ᠵᠢᠶᠠᠩᠶᠢᠦ ᠲᠡᠢ ᠬᠤᠳᠬᠤᠵᠤ ᠨᠠᠢᠷᠠᠭᠤᠯᠤᠨ ᠭᠠᠯ ᠳᠡᠭᠡᠷᠡ ᠪᠤᠴᠠᠯᠭᠠᠭᠠᠳ ᠵᠤᠮᠠᠯᠠᠭᠰᠠᠨ ᠬᠣᠨᠢᠨ ᠤ᠋ ᠠᠷᠠᠰᠤᠨ ᠳ᠋ᠤ᠌ ᠰᠠᠢᠲᠤᠷ ᠲᠦᠷᠬᠢᠨᠡ ᠃ ᠳᠠᠷᠠᠭᠠ ᠨᠢ ᠬᠡᠪᠡᠯᠢ ᠴᠡᠭᠡᠵᠢᠨ ᠬᠥᠨᠳᠡᠢ ᠳ᠋ᠦ᠍ ᠬᠣᠶᠠᠷ ᠵᠢᠩ ᠣᠷᠴᠢᠮ ᠰᠣᠩᠭᠢᠨᠠ ᠶ᠋ᠢ ᠲᠠᠪᠤᠨ ᠰᠢᠳᠦ ᠰᠠᠷᠢᠮᠰᠠᠭ ᠤ᠋ᠨ ᠬᠠᠮᠲᠤ ᠬᠡᠷᠴᠢᠨ ᠨᠦᠳᠦᠵᠦ ᠨᠡᠢᠳᠡᠮ ᠬᠢᠨᠡ ᠃ ᠭᠡᠳᠡᠰᠦᠨ ᠳ᠋ᠦ᠍ᠨᠢ ᠴᠠᠭᠠᠨ ᠭ᠍ᠨ ᠬᠣᠶᠠᠷ ᠯᠠᠩ ᠂ ᠪᠠᠳᠮᠠᠭᠡᠰᠡᠷ ᠨᠢᠭᠡ ᠯᠠᠩ ᠬᠠᠭᠠᠰ ᠂ ᠬᠤᠸᠠᠵᠤᠤ ᠲᠠᠪᠤᠨ ᠴᠢᠨ ᠢ᠋ ᠬᠣᠶᠠᠷ ᠵᠢᠩ ᠬᠢᠷᠢᠲᠡᠢ ᠳᠠᠪᠤᠰᠤᠨ ᠳ᠋ᠤ᠌ ᠨᠤᠨᠲᠠᠭᠯᠠᠨ ᠨᠦᠳᠦᠭᠡᠳ ᠰᠠᠢᠲᠤᠷ ᠨᠠᠢᠷᠠᠭᠤᠯᠵᠤ ᠬᠢᠬᠦ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠴᠠᠪᠢ ᠂ ᠰᠤᠭᠤ ᠳ᠋ᠤᠨᠢ ᠢᠮᠠᠬᠤ ᠬᠢᠷᠢᠲᠡᠢ ᠨᠦᠬᠡᠯᠡᠵᠦ ᠬᠠ ᠭᠤᠶᠠ ᠂ ᠬᠦᠵᠦᠭᠦᠨ ᠦ᠌ ᠵᠤᠵᠠᠭᠠᠨ ᠮᠢᠬᠠᠨ ᠳ᠋ᠤ᠌ ᠮᠥᠨ ᠨᠦᠬᠡᠯᠡᠵᠦ ᠰᠡᠨᠳᠡᠯᠡᠭᠡᠳ ᠂ ᠥᠨᠥᠬᠢ ᠪᠠᠭᠰᠤᠷᠤᠭᠰᠠᠨ ᠨᠠᠢᠷᠠᠭᠤᠯᠭᠠ ᠪᠠᠨ ᠲᠣᠬᠢᠷᠠᠮᠵᠢᠲᠠᠢᠬᠠᠨ ᠬᠢᠨᠡ ᠃ ᠡᠴᠦᠰ ᠲᠦ᠍ ᠠᠷᠠᠰᠤᠨ ᠤ᠋ ᠳᠡᠭᠡᠷᠡ ᠦᠷᠡ ᠶ᠋ᠢᠨ ᠲᠣᠰᠣ ᠳᠦᠷᠭᠢᠭᠡᠳ ᠬᠡᠯᠬᠢᠬᠦ ᠭᠢᠨᠵᠢᠨ ᠦ᠌ ᠪᠡᠨ ᠬᠣᠶᠠᠷ ᠦᠵᠦᠭᠦᠷ ᠢ᠋ ᠭᠡᠳᠡᠰᠦᠨ ᠦ᠌ ᠬᠠᠭᠠᠯᠤᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠷ ᠣᠷᠣᠭᠤᠯᠵᠤ ᠂ ᠬᠣᠰᠬᠢᠨᠠᠭ ᠤ᠋ᠨ ᠰᠦᠪᠡ᠂ ᠤᠯᠠᠭᠠᠨ ᠬᠣᠭᠣᠯᠠᠢ ᠶ᠋ᠢᠨ ᠨᠦᠬᠡ ᠪᠡᠷ ᠬᠣᠶᠠᠷ ᠲᠡᠢᠰᠢ ᠰᠦᠪᠡᠯᠡᠨ ᠭᠠᠷᠭᠠᠵᠤ ᠂ ᠬᠣᠶᠠᠷ ᠦᠵᠦᠭᠦᠷ ᠦ᠋ᠨ ᠭᠣᠬᠠ ᠶ᠋ᠢ ᠪᠤᠴᠠᠭᠠᠨ ᠭᠢᠨᠵᠢ ᠶ᠋ᠢᠨ ᠳᠤᠮᠳᠠ ᠠ᠋ᠴᠠ ᠭᠣᠬᠠᠳᠠᠵᠤ᠂ ᠲᠡᠮᠦᠷ ᠰᠢᠳᠠᠮ ᠳ᠋ᠠᠭᠠᠨ ᠰᠦᠪᠡᠯᠡᠵᠦ ᠂ 120 ᠭᠷᠠᠳᠦ᠋ᠰ ᠬᠠᠯᠠᠭᠤᠯᠤᠭᠰᠠᠨ ᠵᠤᠤᠬᠠ ᠪᠠᠨ 80 ᠭᠷᠠᠳᠦ᠋ᠰ ᠣᠷᠴᠢᠮ ᠪᠣᠯᠲᠠᠯᠠ ᠬᠦᠷᠦᠬᠦ ᠳ᠋ᠦ᠍ ᠬᠣᠨᠢ ᠪᠠᠨ ᠳᠡᠭᠦᠵᠢᠯᠡᠵᠦ᠂ ᠳᠡᠭᠡᠷᠡ ᠨᠢ ᠲᠣᠮᠣ ᠲᠣᠭᠣᠭᠠ ᠬᠥᠮᠥᠷᠢᠵᠦ ᠵᠠᠭᠠᠭ ᠵᠠᠪᠰᠠᠷ ᠢ᠋ ᠨᠢ ᠰᠠᠢᠲᠤᠷ ᠰᠢᠪᠠᠨ ᠵᠤᠤᠬᠠ ᠶ᠋ᠢᠨ ᠳᠣᠲᠣᠷᠠ ᠬᠣᠨᠢᠨ ᠤ᠋ ᠡᠭᠴᠡᠯᠡᠭᠰᠡᠨ ᠬᠦᠵᠦᠭᠦᠦ ᠶ᠋ᠢᠨ ᠳᠣᠣᠷᠠ ᠲᠣᠰᠣ ᠤᠲᠤᠭᠠ ᠭᠠᠷᠬᠤ ᠶ᠋ᠢ ᠰᠡᠷᠭᠡᠢᠯᠡᠬᠦ ᠶ᠋ᠢᠨ ᠲᠥᠯᠥᠭᠡ ᠳᠤᠮᠳᠠᠭᠤᠷ ᠤᠰᠤ ᠲᠠᠢ ᠭᠠᠳᠤᠷᠠ ᠶ᠋ᠢ ᠲᠣᠰᠴᠤ ᠲᠠᠯᠪᠢᠳᠠᠭ᠃ ᠬᠣᠨᠢ ᠪᠠᠨ ᠰᠢᠷᠠᠭᠠᠳ ᠬᠠᠭᠠᠰ ᠴᠠᠭ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ᠂ ᠪᠠᠢᠳᠠᠯ ᠢ᠋ ᠦᠵᠡᠵᠦ ᠪᠠᠢᠭᠠᠳ ᠮᠣᠳᠣᠨ ᠨᠡᠭᠦᠷᠡᠰᠦ ᠨᠡᠮᠡᠬᠦ ᠡᠰᠡᠬᠦ ᠪᠡᠨ ᠲᠣᠭᠲᠠᠭᠠᠨᠠ᠃ ᠡᠨᠡ ᠮᠡᠲᠦ ᠪᠡᠷ ᠳᠥᠷᠪᠡᠨ ᠴᠠᠭ ᠰᠢᠷᠠᠪᠠᠯ ᠪᠠᠷᠤᠭ ᠪᠣᠯᠴᠢᠬᠠᠨᠠ ᠃ ᠮᠣᠳᠣᠨ ᠨᠡᠭᠦᠷᠡᠰᠦ ᠪᠤᠶᠤ ᠵᠠᠭ ᠢ᠋ᠶ᠋ᠠᠷ ᠲᠦᠯᠡᠨᠡ᠃ ᠡᠨᠡ ᠪᠣᠯ ᠠᠯᠠᠱᠠ ᠰᠢᠷᠠᠭᠰᠠᠨ ᠬᠣᠨᠢ ᠪᠣᠯᠠᠢ᠃
ᠰᠢᠷᠠᠭᠰᠠᠨ ᠰᠢᠭᠦᠰᠦ
ᠬᠣᠨᠢ ᠪᠠᠨ ᠠᠯᠠᠮᠠᠭᠴᠠ ᠡᠪᠴᠢᠭᠦᠦ ᠶ᠋ᠢ ᠨᠢ ᠠᠪᠴᠤ ᠂ ᠳᠥᠷᠪᠡᠨ ᠮᠥᠴᠢ 36 ᠦᠶᠡ ᠶ᠋ᠢ ᠳᠣᠲᠣᠷ ᠲᠠᠯᠠ ᠠ᠋ᠴᠠ ᠨᠢ ᠮᠢᠬᠠ ᠶ᠋ᠢ ᠨᠢ ᠰᠠᠯᠭᠠᠬᠤ ᠦᠭᠡᠢ ᠪᠡᠷ ᠪᠦᠬᠦᠨ ᠢ᠋ ᠬᠥᠨᠳᠡᠨ ᠦᠶᠡᠯᠡᠵᠦ ᠳᠡᠯᠭᠡᠭᠦᠦ ᠬᠡᠯᠪᠡᠷᠢᠲᠡᠢ ᠪᠣᠯᠭᠠᠭᠰᠠᠨ ᠤ᠋ ᠳᠠᠷᠠᠭᠠ ᠬᠢᠲᠤᠭᠠ ᠪᠠᠷ ᠭᠠᠳᠠᠭᠰᠢ ᠨᠡᠪᠲᠡᠯᠬᠦ ᠦᠭᠡᠢ ᠪᠡᠷ ᠰᠡᠭᠡᠷ ᠨᠢᠷᠤᠭᠤᠨ ᠤ᠋ ᠦᠶᠡ ᠪᠦᠬᠦᠨ ᠢ᠋ ᠬᠡᠷᠴᠢᠶᠡᠰᠦᠯᠡᠨ 50 - 60 ᠵᠢᠩ ᠦ᠋ᠨ ᠬᠣᠨᠢ ᠪᠣᠯ 3 ᠯᠠᠩ ᠳᠠᠪᠤᠰᠤ ᠂ 1 ᠯᠠᠩ ᠬᠤᠸᠠᠵᠤᠤ ᠂ 2 ᠯᠠᠩ ᠤ᠋ᠨ ᠭᠠ ᠶ᠋ᠢ ᠲᠤᠰ ᠲᠤᠰ ᠨᠤᠨᠲᠠᠭᠯᠠᠵᠤ ᠂ ᠳᠥᠷᠪᠡ ᠳᠥᠷᠪᠡᠨ ᠯᠠᠩ ᠰᠣᠩᠭᠢᠨᠠ ᠰᠠᠷᠢᠮᠰᠠᠭ ᠢ᠋ ᠬᠠᠮᠲᠤ ᠳ᠋ᠤᠨᠢ ᠨᠦᠳᠦᠵᠦ ᠨᠢᠴᠠᠯᠠᠭᠠᠳ ᠰᠢᠭᠦᠰᠦᠨ ᠣ ᠳᠣᠲᠣᠷᠠ ᠲᠠᠯᠠ ᠳ᠋ᠤᠨᠢ ᠰᠠᠴᠤᠵᠤ ᠂ ᠰᠢᠭᠦᠰᠦ ᠪᠡᠨ ᠳᠣᠲᠣᠷ ᠲᠠᠯᠠ ᠪᠠᠷ ᠨᠢ ᠬᠠᠪᠰᠤᠷᠴᠤ ᠂ ᠦᠨᠦᠷ ᠠᠮᠲᠠᠲᠠᠨ ᠢ᠋ 12 ᠴᠠᠭ ᠰᠢᠩᠭᠡᠭᠡᠳ ( ᠵᠤᠨ ᠢᠯᠵᠢᠷᠡᠬᠦ ᠂ ᠡᠪᠦᠯ ᠬᠥᠯᠳᠡᠬᠦ ᠶ᠋ᠢ ᠣᠨᠴᠠ ᠠᠩᠬᠠᠷᠬᠤ ᠬᠡᠷᠡᠭᠲᠡᠢ ) ᠰᠢᠷᠠᠵᠤ ᠪᠣᠯᠭᠣᠭᠰᠠᠨ ᠢ᠋ ᠰᠢᠷᠠᠭᠰᠠᠨ ᠰᠢᠭᠦᠰᠦ ᠭᠡᠨᠡ ᠃ ᠡᠨᠡ ᠪᠣᠯ ᠣᠷᠳᠣᠰ ᠨᠤᠲᠤᠭ ᠤ᠋ᠨ ᠡᠷᠲᠡᠨ ᠡᠴᠡ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠬᠠᠮᠤᠭ ᠤ᠋ᠨ ᠬᠦᠨᠳᠦᠲᠦ ᠵᠣᠴᠢᠯᠠᠭᠠ ᠶ᠋ᠢᠨ ᠰᠢᠭᠦᠰᠦ ᠪᠣᠯᠤᠨᠠ᠃
ᠰᠢᠷᠠᠬᠤ ᠠᠷᠭᠠ ᠭᠣᠣᠯᠳᠠᠭᠤ ᠭᠠᠯ ᠳᠡᠭᠡᠷᠡ ᠪᠤᠶᠤ ᠲᠣᠭᠣᠭᠠᠨ ᠳ᠋ᠤ᠌ ᠰᠢᠷᠠᠬᠤ ᠬᠣᠶᠠᠷ ᠠᠷᠭᠠ ᠪᠣᠢ᠃
① ᠭᠠᠯ ᠳ᠋ᠤ᠌ ᠰᠢᠷᠠᠬᠤ ᠨᠢ ᠄ ᠵᠤᠤᠬᠠᠨ ᠳᠣᠲᠣᠷᠠᠬᠢ ᠲᠡᠮᠦᠷ ᠵᠢᠶᠠᠵᠠᠨ ᠳᠡᠭᠡᠷᠡ ᠰᠢᠭᠦᠰᠦ ᠪᠡᠨ ᠳᠡᠭᠡᠭᠰᠢ ᠬᠠᠨᠳᠤᠭᠤᠯᠤᠨ ᠳᠡᠯᠭᠡᠵᠦ ᠲᠠᠯᠪᠢᠭᠠᠳ ᠵᠤᠤᠬᠠ ᠪᠠᠨ ᠲᠡᠮᠦᠷ ᠬᠠᠪᠬᠠᠭ ᠪᠤᠶᠤ ᠲᠣᠭᠣᠭᠠ ᠪᠠᠷ ᠬᠥᠮᠥᠷᠢᠨ ᠲᠠᠯᠪᠢᠵᠤ ᠤᠲᠤᠭᠠ ᠦᠭᠡᠢ ᠤᠯᠠᠢᠭᠰᠠᠨ ᠮᠣᠳᠣᠨ ᠴᠣᠭ ᠢ᠋ ᠵᠤᠤᠬᠠᠨ ᠠᠮᠠᠨ ᠳᠡᠭᠡᠷᠡ ᠣᠪᠣᠭᠠᠯᠠᠨ ᠰᠢᠷᠠᠨᠠ᠃ ᠰᠢᠷᠠᠬᠤ ᠶᠠᠪᠤᠴᠠ ᠳ᠋ᠤ᠌ 2 - 3 ᠤᠳᠠᠭᠠ ᠡᠷᠭᠢᠭᠦᠯᠦᠨ ᠬᠥᠷᠪᠡᠭᠦᠯᠵᠦ 2 - 3 ᠴᠠᠭ ᠬᠢᠷᠢ ᠰᠢᠷᠠᠪᠠᠯ ᠪᠣᠯᠴᠢᠬᠠᠨᠠ᠃
② ᠲᠣᠭᠣᠭᠠᠨ ᠳ᠋ᠤ᠌ ᠰᠢᠷᠠᠬᠤ ᠨᠢ ᠬᠣᠭᠣᠰᠣᠨ ᠲᠣᠭᠣᠭᠠᠨ ᠳᠣᠲᠣᠷᠠ ᠰᠠᠯ ᠲᠠᠯᠪᠢᠭᠠᠳ ᠳᠡᠭᠡᠷᠡ ᠨᠢ ᠰᠢᠭᠦᠰᠦ ᠪᠡᠨ ᠳᠡᠯᠭᠡᠨ ᠳᠡᠭᠡᠭᠰᠢ ᠬᠠᠨᠳᠤᠭᠤᠯᠤᠨ ᠲᠠᠯᠪᠢᠵᠤ ᠲᠣᠭᠣᠭᠠ ᠪᠠᠨ ᠬᠠᠪᠬᠠᠭᠯᠠᠨ ᠭᠠᠯ ᠲᠦᠯᠡᠵᠦ ᠰᠢᠷᠠᠨᠠ᠃ ᠰᠢᠷᠠᠬᠤ ᠶᠠᠪᠤᠴᠠ ᠳᠡᠭᠡᠷᠡᠬᠢ ᠲᠡᠢ ᠠᠳᠠᠯᠢ᠃ ᠣᠳᠣ ᠪᠣᠯ ᠨᠥᠬᠥᠴᠡᠯ ᠲᠡᠢ ᠭᠠᠵᠠᠷ ᠴᠠᠬᠢᠯᠭᠠᠨ ᠬᠠᠢᠷᠴᠠᠭ ᠲᠤ᠌ ᠰᠢᠷᠠᠪᠠᠯ ᠮᠠᠰᠢ ᠲᠣᠬᠢᠷᠠᠮᠵᠢᠲᠠᠢ ᠪᠤᠰᠤ ᠤᠤ !
ᠴᠢᠨᠠᠭᠠᠳ ᠰᠢᠷᠠᠭᠰᠠᠨ ᠰᠢᠭᠦᠰᠦ
ᠰᠢᠷᠬᠠᠰᠠᠨ ᠬᠣᠨᠢᠨ ᠤ᠋ ᠰᠢᠭᠦᠰᠦ ᠲᠡᠢ ᠠᠳᠠᠯᠢ ᠪᠠᠷ ᠦᠶᠡ ᠭᠡᠰᠢᠭᠦᠦ ᠶ᠋ᠢ ᠨᠢ ᠳᠣᠲᠣᠷ ᠠ᠋ᠴᠠ ᠨᠢ ᠬᠥᠨᠳᠡᠵᠦ ᠳᠡᠯᠭᠡᠭᠦᠦ ᠪᠣᠯᠭᠠᠭᠰᠠᠨ ᠤ᠋ ᠳᠠᠷᠠᠭᠠ ᠂ ᠪᠦᠬᠦᠯᠢ ᠰᠢᠭᠦᠰᠦ ᠲᠡᠢ ᠲᠡᠩᠴᠡᠭᠦᠦ ᠬᠦᠢᠲᠡᠨ ᠤᠰᠤᠨ ᠳ᠋ᠤ᠌ ᠮᠢᠬᠠ ᠪᠠᠨ ᠬᠢᠵᠦ ᠂ ᠳᠡᠭᠡᠷᠡ ᠨᠢ ᠲᠠᠪᠤᠨ ᠠᠮᠲᠠᠲᠠᠨ ᠢ᠋ᠶ᠋ᠠᠨ ᠲᠠᠭᠠᠷᠠᠭᠤᠯᠬᠤ ᠪᠥᠭᠡᠳ ᠨᠢᠭᠡ ᠯᠠᠩ ᠴᠥᠷᠮᠡ ᠶ᠋ᠢ ᠲᠤᠰ ᠲᠤᠰ ᠬᠢᠵᠦ ᠴᠢᠨᠠᠭᠠᠳ ᠪᠤᠴᠠᠯᠤᠭᠰᠠᠨ ᠤ᠋ ᠬᠣᠢᠨᠠ ᠂ ᠬᠠᠪᠬᠠᠭ ᠢ᠋ ᠨᠢ 5 –10 ᠮᠢᠨᠦ᠋ᠲ ᠨᠡᠭᠡᠭᠡᠨᠡ᠃ ᠬᠡᠷᠪᠡ ᠬᠠᠭᠤᠴᠢᠨ ᠮᠢᠬᠠ ᠪᠣᠯ ᠬᠠᠷᠠ ᠠᠷᠢᠬᠢ ᠨᠢᠭᠡ ᠯᠠᠩ ᠬᠢᠵᠦ᠂ ᠪᠠᠭᠠ ᠤᠰᠤ ᠨᠡᠮᠡᠭᠡᠳ ᠳᠠᠬᠢᠨ ᠴᠢᠨᠠᠵᠤ 1 – 2 ᠤᠳᠠᠭᠠ ᠡᠷᠭᠢᠭᠦᠯᠦᠨ᠂ ᠨᠢᠭᠡ ᠴᠠᠭ ᠬᠠᠭᠠᠰ ᠠ᠋ᠴᠠ ᠬᠣᠶᠠᠷ ᠴᠠᠭ ᠴᠢᠨᠠᠭᠠᠳ ᠭᠠᠷᠭᠠᠨᠠ᠃ ᠡᠨᠡᠬᠦ ᠰᠢᠭᠦᠰᠦ ᠪᠡᠨ ᠳᠡᠭᠡᠷᠡ ᠳᠤᠷᠠᠳᠤᠭᠰᠠᠨ ᠰᠢᠷᠠᠬᠤ ᠠᠷᠭᠠ ᠶ᠋ᠢᠨ ᠠᠯᠢ ᠨᠢᠭᠡᠨ ᠢ᠋ᠶ᠋ᠡᠷ ᠨᠢ ᠴᠠᠭ ᠬᠠᠭᠠᠰ ᠰᠢᠷᠠᠭᠠᠳ ᠭᠠᠷᠭᠠᠭᠰᠠᠨ ᠢ᠋ ᠴᠢᠨᠠᠭᠠᠳ ᠰᠢᠷᠠᠭᠰᠠᠨ ᠰᠢᠭᠦᠰᠦ ᠭᠡᠨᠡ ᠃ ᠡᠨᠡ ᠮᠥᠨ ᠣᠷᠳᠣᠰ ᠨᠤᠲᠤᠭ ᠤ᠋ᠨ ᠳᠠᠢᠯᠠᠯᠭᠠ ᠪᠣᠯᠤᠨᠠ᠃
ᠬᠣᠨᠢᠨ ᠮᠢᠬᠠᠨ ᠰᠢᠷᠠᠯᠭᠠ
ᠡᠷᠲᠡᠨ ᠦ᠌ ᠱᠣᠷᠣᠯᠢᠭ᠃ ᠮᠣᠩᠭᠣᠯᠴᠤᠳ ᠬᠣᠨᠢ ᠶ᠋ᠢ ᠪᠦᠬᠦᠯᠢ ᠪᠡᠷ ᠨᠢ ᠰᠢᠷᠠᠵᠤ ᠬᠠᠭᠰᠠᠷᠠᠭᠠᠬᠤ ᠠ᠋ᠴᠠ ᠭᠠᠳᠠᠨᠠ ᠪᠠᠰᠠ ᠮᠥᠴᠢᠯᠡᠨ ᠲᠤᠶᠠᠴᠢᠭᠠᠳ ᠬᠡᠰᠡᠭ ᠬᠡᠰᠡᠭ ᠢ᠋ᠶ᠋ᠡᠷ ᠣᠭᠲᠣᠯᠤᠨ ᠰᠢᠷᠠᠵᠤ ᠢᠳᠡᠳᠡᠭ᠃ ᠡᠭᠦᠨ ᠢ᠋ ᠬᠣᠨᠢᠨ ᠮᠢᠬᠠᠨ ᠰᠢᠷᠠᠮᠠᠯ ᠭᠡᠨᠡ᠃ ᠡᠨᠡ ᠪᠣᠯ ᠮᠠᠨ ᠤ᠋ ᠮᠣᠩᠭᠣᠯᠴᠤᠳ ᠤ᠋ᠨ ᠡᠷᠲᠡᠨ ᠡᠴᠡ ᠮᠠᠯ ᠮᠠᠯᠵᠢᠵᠤ᠂ ᠠᠩ ᠠᠩᠨᠠᠵᠤ ᠠᠶᠠᠨ ᠵᠢᠩ᠂ ᠴᠡᠷᠢᠭ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠬᠤ ᠳ᠋ᠤ᠌ ᠲᠣᠬᠢᠷᠠᠭᠰᠠᠨ ᠳᠥᠭᠥᠮ ᠢᠳᠡᠭᠡᠨ ᠪᠢᠯᠡ᠃ ᠣᠳᠣ ᠤᠢᠭᠤᠷᠴᠤᠳ ᠲᠡᠮᠦᠷ ᠱᠣᠷᠣ ᠪᠠᠷ ᠰᠢᠷᠠᠵᠤ ᠪᠣᠢ ᠨᠢ ᠲᠡᠷᠡ ᠦᠶᠡ ᠶ᠋ᠢᠨ ᠦᠯᠡᠳᠡᠭᠡᠯ ᠪᠣᠯᠠᠢ᠃ ᠭᠣᠣᠯᠳᠠᠭᠤ : ᠭᠠᠯ ᠲᠠᠢ ᠲᠤᠯᠭᠠᠨ ᠬᠠᠰᠠᠭ ᠳᠡᠭᠡᠷᠡ ᠰᠢᠷᠠᠬᠤ᠂ ᠲᠦᠯᠡᠭᠡ ᠬᠣᠵᠤᠤᠯᠠ ᠶ᠋ᠢᠨ ᠲᠣᠷᠭᠠᠨ ᠴᠣᠭ ᠳᠡᠭᠡᠷᠡ ᠱᠣᠷᠣᠨ ᠳ᠋ᠤ᠌ ᠬᠡᠯᠬᠢᠵᠦ ᠰᠢᠷᠠᠬᠤ᠃ ᠠᠪᠠ ᠬᠣᠮᠣᠷᠭᠠᠨ ᠳ᠋ᠤ᠌ ᠶᠠᠪᠤᠪᠠᠯ᠂ ᠣᠴᠣᠭᠯᠠᠭᠰᠠᠨ ᠭᠠᠯ ᠳᠡᠭᠡᠷᠡ ᠨᠢᠮᠭᠡᠨ ᠬᠠᠪᠲᠠᠭᠠᠢ ᠴᠢᠯᠠᠭᠤ ᠶ᠋ᠢ ᠲᠠᠯᠪᠢᠨ ᠤᠯᠠᠢᠰᠲᠠᠯᠠ ᠬᠠᠯᠠᠭᠤᠯᠤᠭᠠᠳ ᠮᠢᠬᠠ ᠪᠠᠨ ᠲᠠᠯᠪᠢᠨ ᠰᠢᠷᠠᠬᠤ ᠵᠡᠷᠭᠡ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠷᠭᠠ ᠶ᠋ᠢ ᠠᠪᠳᠠᠭ ᠪᠠᠢᠯᠠ᠃