ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠶᠢᠰᠦ ᠂ ᠮᠣᠷᠢ ᠤᠷᠤᠯᠳᠤᠬᠤ ᠵᠢᠷᠤᠮ ᠤᠨ ᠪᠦᠯᠦᠭ 2 > Хөх зул – Боржигон Ванжал –" Ес᠂ Морь уралдах журмын бүлэг 2 "
332ᠶᠢᠰᠦ ᠂ ᠮᠣᠷᠢ ᠤᠷᠤᠯᠳᠤᠬᠤ ᠵᠢᠷᠤᠮ ᠤᠨ ᠪᠦᠯᠦᠭ 2
ᠮᠣᠷᠢᠨ ᠤ᠋ ᠴᠣᠯᠠ ᠳᠠᠭᠤᠳᠠᠬᠤ ( ᠢᠷᠦᠭᠡᠵᠦ ᠬᠡᠯᠡᠬᠦ ) ᠭᠡᠭᠴᠢ ᠠᠷᠠᠳ ᠤ᠋ᠨ ᠠᠮᠠᠨ ᠨᠠᠢᠷᠠᠭ ᠲᠤᠯᠠ ᠣᠯᠠᠨ ᠰᠠᠢᠬᠠᠨ ᠵᠦᠢᠯ ᠪᠠᠢᠳᠠᠭ ᠃ ᠲᠡᠭᠦᠨ ᠡᠴᠡ ᠡᠨᠳᠡ ᠬᠡᠳᠦ ᠶ᠋ᠢ ᠲᠡᠮᠳᠡᠭᠯᠡᠪᠡᠯ ᠄
ᠥᠨᠢᠷ ᠪᠠᠶᠠᠯᠢᠭ ᠥᠪᠥᠷ ᠮᠣᠩᠭᠣᠯ ᠤ᠋ᠨ ×× ᠠᠢᠮᠠᠭ ᠤ᠋ᠨ ×× ᠰᠤᠮᠤᠨ ᠤ᠋ ×× ᠭᠠᠴᠠᠭᠠᠨ ᠤ᠋ ᠠᠷᠠᠳ ×× ᠤ ᠥᠨᠢᠷ ᠰᠦᠷᠦᠭ ᠦ᠋ᠨ ᠭᠡᠭᠦᠨ ᠤ ᠤᠨᠠᠭᠠ ᠃
ᠬᠠᠨ ᠳᠡᠯᠡᠬᠡᠢ ᠪᠠᠭᠲᠠᠰᠢ ᠦᠭᠡᠢ ᠬᠠᠮᠤᠭ ᠰᠦᠷᠦᠭ ᠦ᠋ᠨ ᠲᠡᠷᠢᠭᠦᠨ᠂
ᠬᠠᠮᠤᠭ ᠠᠮᠢᠲᠠᠨ ᠤ᠋ ᠬᠠᠨᠤᠰᠢ ᠦᠭᠡᠢ ᠪᠠᠶᠠᠷ ᠴᠡᠩᠭᠡᠯ ᠦ᠋ᠨ ᠮᠠᠩᠯᠠᠢ᠂
ᠲᠠᠯᠠ ᠶ᠋ᠢᠨ ᠴᠠᠭᠠᠨᠠ ᠠ᠋ᠴᠠ ᠳᠠᠪᠬᠢᠭᠠᠳ ᠢᠷᠡᠳᠡᠭ᠂
ᠳᠡᠰ ᠪᠦᠷᠭᠦᠳ ᠰᠢᠭ ᠱᠤᠩᠭᠤᠭᠠᠳ ᠢᠷᠡᠳᠡᠭ᠂
ᠲᠠᠪᠤᠨ ᠵᠠᠭᠤ ᠠ᠋ᠴᠠ ᠲᠠᠰᠤᠷᠠᠭᠠᠳ ᠢᠷᠡᠳᠡᠭ᠂
ᠲᠠᠯᠠᠪᠠᠢ ᠶ᠋ᠢᠨ ᠣᠯᠠᠨ ᠢ ᠪᠠᠶᠠᠰᠬᠠᠭᠠᠳ ᠢᠷᠡᠳᠡᠭ᠃
ᠬᠠᠩᠭᠠᠢ ᠶ᠋ᠢᠨ ᠴᠠᠭᠠᠨᠠ ᠠ᠋ᠴᠠ ᠬᠠᠷᠠᠢᠭᠠᠳ ᠢᠷᠡᠳᠡᠭ᠂
ᠬᠠᠷᠪᠤᠭᠰᠠᠨ ᠰᠤᠮᠤ ᠰᠢᠭ᠋ ᠰᠤᠮᠤᠳᠠᠭᠠᠳ ᠢᠷᠡᠳᠡᠭ᠂
ᠬᠠᠮᠤᠭ ᠮᠣᠷᠢᠳ ᠠ᠋ᠴᠠ ᠰᠤᠭᠤᠷᠠᠭᠠᠳ ᠢᠷᠡᠳᠡᠭ᠂
ᠬᠠᠷᠠᠭᠰᠠᠨ ᠪᠦᠬᠦᠨ ᠢ ᠪᠠᠶᠠᠰᠬᠠᠭᠠᠳ ᠢᠷᠡᠳᠡᠭ᠂
ᠲᠦᠮᠡᠨ ᠠᠭᠲᠠ ᠶ᠋ᠢᠨ ᠲᠦᠷᠦᠭᠦᠨ ᠳ᠋ᠦ᠍
ᠲᠦᠳᠡᠯ ᠦᠭᠡᠢ ᠬᠤᠷᠳᠤᠯᠠᠳᠠᠭ ᠃
《ᠲᠦᠮᠡᠨ ᠤ ᠡᠬᠡ 》ᠨᠡᠷᠡ ᠶ᠋ᠢ
ᠤᠳᠠᠯ ᠦᠭᠡᠢ ᠣᠯᠳᠠᠭ ᠃
ᠮᠢᠩᠭᠠᠨ ᠠᠭᠲᠠ ᠶ᠋ᠢᠨ ᠲᠦᠷᠦᠭᠦᠨ ᠳ᠋ᠦ᠍
ᠮᠢᠨᠳᠠᠷᠠᠯ ᠦᠭᠡᠢ ᠬᠤᠷᠳᠤᠯᠠᠳᠠᠭ ᠂
ᠮᠠᠩᠯᠠᠢ ᠠᠭᠲᠠ ᠶ᠋ᠢᠨ ᠴᠣᠯᠠ ᠶ᠋ᠢ
ᠮᠥᠳᠬᠡᠨ ᠳᠠᠷᠤᠢ ᠣᠯᠳᠠᠭ ᠃
ᠵᠠᠭᠠᠨᠠ ᠶ᠋ᠢᠨ ᠳᠥᠷᠪᠡᠨ ᠰᠣᠶᠣᠭᠠᠲᠠᠢ ᠂
ᠵᠠᠭᠠᠮᠠᠯ ᠵᠢᠷᠭᠤᠭᠠᠨ ᠬᠦᠵᠦᠭᠦᠳᠡᠢ ᠂
ᠵᠠᠩᠭᠢᠷᠤᠭᠰᠠᠨ ᠴᠢᠩᠭᠠ ᠪᠤᠯᠴᠢᠩᠲᠠᠢ ᠂
ᠵᠠᠩᠭᠢᠳᠤᠭᠰᠠᠨ ᠡᠷᠴᠢ ᠰᠢᠷᠪᠥᠰᠥᠲᠡᠢ ᠃
ᠲᠥᠭᠡ ᠥᠨᠳᠥᠷ ᠴᠢᠬᠢᠲᠡᠢ ᠂
ᠲᠥᠭᠥᠷᠢᠭ ᠬᠠᠷᠠ ᠨᠢᠳᠦᠲᠡᠢ ᠂
ᠲᠦᠮᠡᠨ ᠥᠯᠵᠡᠢ ᠡᠷᠭᠢᠭᠦᠯᠭᠡᠲᠡᠢ ᠂
ᠲᠦᠷᠦᠭᠦᠯᠡᠵᠦ ᠭᠠᠷᠬᠤ ᠣᠳᠣᠲᠠᠢ ᠃
ᠲᠣᠮᠣ ᠨᠢᠮᠭᠡᠨ ᠬᠠᠮᠠᠷᠳᠠᠢ ᠂
ᠲᠠᠤᠯᠠᠢ ᠰᠠᠢᠬᠠᠨ ᠵᠤ᠋ ᠲᠠᠢ ᠂
ᠲᠤᠷᠤᠭ ᠰᠠᠢᠬᠠᠨ ᠪᠡᠶᠡᠲᠡᠢ ᠂
ᠲᠤᠭ ᠰᠠᠢᠬᠠᠨ ᠳᠡᠯᠳᠡᠢ᠃
ᠰᠢᠪᠠᠭᠤᠨ ᠡᠪᠴᠢᠭᠦᠳᠡᠢ ᠂
ᠰᠦᠪᠡᠭᠴᠢᠨ ᠰᠡᠭᠦᠯᠲᠡᠢ ᠂
ᠨᠥᠭᠳᠦᠭᠡᠷ ᠬᠠᠷᠭᠠᠮᠲᠠᠢ ᠂
ᠨᠣᠬᠠᠢ ᠪᠣᠷᠪᠢᠲᠠᠢ ᠃
ᠢᠳᠡᠲᠦ ᠳᠥᠷᠪᠡᠨ ᠲᠤᠭᠤᠷᠠᠢᠲᠠᠢ ᠂
ᠡᠷᠴᠢᠮᠲᠦ ᠳᠥᠷᠪᠡᠨ ᠭᠦᠯᠳᠡᠢ ᠂
ᠡᠯᠡ ᠰᠢᠨᠵᠢᠯᠡᠭᠡ ᠪᠦᠷᠢᠨ ᠂
ᠡᠷᠬᠡᠪᠰᠢ ᠲᠦᠷᠦᠭᠦᠯᠡᠬᠦ ᠣᠳᠣᠲᠠᠢ᠃
ᠳᠠᠭᠠᠷᠢᠵᠤ ᠢᠷᠡᠭᠰᠡᠨ ᠳᠠᠶᠠᠩ ᠤ᠋ᠨ ᠬᠥᠯᠭᠡ ᠂
ᠳᠠᠪᠬᠢᠵᠤ ᠭᠠᠷᠤᠭᠰᠠᠨ ᠬᠠᠩᠭᠠᠢ ᠶ᠋ᠢᠨ ᠪᠤᠭᠤ ᠂
ᠰᠤᠮᠤᠳᠠᠵᠤ ᠢᠷᠡᠭᠰᠡᠨ ᠣᠳᠣᠨ ᠰᠣᠯᠢᠷ ᠂
ᠰᠤᠭᠤᠷᠠᠵᠤ ᠭᠠᠷᠤᠭᠰᠠᠨ ᠲᠠᠯᠠ ᠶ᠋ᠢᠨ ᠳᠠᠬᠢ ᠃
ᠲᠦᠮᠡᠨ ᠤ ᠳᠤᠷᠠᠳᠬᠠᠯ
ᠳᠠᠶᠠᠩ ᠤ᠋ᠨ ᠭᠠᠢᠬᠠᠮᠰᠢᠭ
ᠪᠤᠮᠠᠨ ᠤ᠋ ᠱᠠᠭᠰᠢᠯ
ᠪᠦᠭᠦᠳᠡ ᠶ᠋ᠢᠨ ᠪᠠᠶᠠᠰᠤᠯ
ᠠᠭᠲᠠ ᠶ᠋ᠢᠨ ᠲᠦᠷᠦᠭᠦᠦ
ᠠᠷᠭᠤᠮᠠᠭ ᠤ᠋ᠨ ᠮᠠᠩᠯᠠᠢ ᠬᠥᠯᠭᠡ ᠂
ᠡᠨᠡ ᠨᠠᠭᠠᠳᠤᠮ ᠤ᠋ᠨ ᠡᠮᠦᠨᠡ ᠡᠷᠬᠢᠮ ᠴᠣᠯᠠ ᠶ᠋ᠢ
ᠳᠠᠶᠠᠭᠠᠷ ᠲᠤ᠌ ᠳᠠᠭᠤᠷᠢᠰᠤᠭᠤᠯᠤᠭᠰᠠᠨ ᠂
ᠢᠷᠡᠬᠦ ᠨᠠᠭᠠᠳᠤᠮ ᠤ᠋ᠨ ᠡᠮᠦᠨᠡ ᠥᠭᠭᠦ ᠴᠣᠯᠠ ᠶ᠋ᠢ
ᠤᠷᠢᠳ ᠠ᠋ᠴᠠ ᠲᠡᠮᠳᠡᠭᠯᠡᠭᠦᠯᠦᠭᠰᠡᠨ ᠃
ᠥᠨᠢᠷ ᠣᠯᠠᠨ ᠢᠵᠢᠯᠢ ᠳ᠋ᠡᠭᠡᠨ
ᠬᠤᠷᠳᠤ ᠪᠠᠨ ᠳᠡᠯᠭᠡᠷᠡᠭᠦᠯᠦᠭᠰᠡᠨ ᠂
ᠥᠪᠡᠷ ᠦ᠋ᠨ ᠲᠤᠰ ᠡᠵᠡᠨ ᠳ᠋ᠡᠭᠡᠨ
ᠪᠠᠶᠠᠰᠤᠯ ᠠᠪᠴᠢᠷᠠᠭᠰᠠᠨ ᠂
ᠥᠨᠢ ᠪᠠᠲᠤ ᠲᠥᠷᠥ ᠳ᠋ᠡᠭᠡᠨ
ᠴᠢᠮᠡᠭ ᠨᠢ ᠪᠣᠯᠤᠭᠰᠠᠨ ᠂
ᠥᠷᠭᠡᠨ ᠣᠯᠠᠨ ᠮᠠᠯᠴᠢᠳ ᠲᠠᠭᠠᠨ
ᠴᠡᠩᠭᠡᠯ ᠠᠪᠴᠢᠷᠠᠭᠰᠠᠨ ᠃
ᠮᠠᠭᠲᠠᠵᠤ ᠪᠠᠷᠠᠰᠢ ᠦᠭᠡᠢ ᠡᠷᠳᠡᠮᠲᠡᠢ
ᠮᠠᠩᠯᠠᠢᠯᠠᠵᠤ ᠪᠠᠷᠠᠰᠢ ᠦᠭᠡᠢ ᠭᠦᠶᠦᠳᠡᠯᠲᠡᠢ
ᠮᠢᠩᠭᠠᠨ ᠰᠢᠨᠵᠢᠯᠡᠭᠡ ᠶ᠋ᠢ ᠲᠡᠭᠦᠰ ᠪᠦᠷᠢᠳᠬᠡᠭᠰᠡᠨ
ᠮᠥᠩᠬᠡ ᠠᠮᠤᠭᠤᠯᠠᠩ
ᠡᠩᠬᠡ ᠵᠢᠷᠭᠠᠯᠠᠩ
ᠲᠦᠮᠡᠨ ᠤ ᠡᠬᠡ ᠂
ᠲᠦᠷᠭᠡᠨ ᠴᠠᠬᠢᠯᠭᠠᠨ
ᠲᠣᠳᠣ ᠮᠠᠩᠨᠠᠢ ᠬᠥᠯᠭᠡ ᠡᠨᠡ ᠪᠢᠯᠡ ! ᠭᠡᠵᠦ ᠴᠣᠯᠠᠯᠠᠨᠠ᠃