ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠨᠠᠢ᠍ᠮᠠ ᠂ ᠤᠷᠤᠯᠳᠤᠭᠠᠨ ᠮᠣᠷᠢ ᠤᠨᠤᠭᠴᠢᠳ ᠪᠠ ᠲᠣᠨᠣᠭ ᠲᠥᠬᠥᠭᠡᠷᠦᠮᠵᠢ ᠶᠢᠨ ᠪᠦᠯᠦᠭ > Хөх зул – Боржигон Ванжал –" Найм ᠂ Уралдаан морь унагчид ба тоног төхөөрөмжийн бүлэг"
288ᠨᠠᠢ᠍ᠮᠠ ᠂ ᠤᠷᠤᠯᠳᠤᠭᠠᠨ ᠮᠣᠷᠢ ᠤᠨᠤᠭᠴᠢᠳ ᠪᠠ ᠲᠣᠨᠣᠭ ᠲᠥᠬᠥᠭᠡᠷᠦᠮᠵᠢ ᠶᠢᠨ ᠪᠦᠯᠦᠭ
1. ᠤᠷᠤᠯᠳᠤᠭᠠᠨ ᠮᠣᠷᠢ ᠤᠨᠤᠭᠴᠢᠳ
ᠤᠷᠤᠯᠳᠤᠭᠠᠨ ᠮᠣᠷᠢ ᠣᠨᠣᠭᠴᠢᠳ
ᠮᠣᠩᠭᠣᠯ ᠤ᠋ᠨ ᠨᠠᠭᠠᠳᠤᠮ ᠳ᠋ᠠᠬᠢ ᠮᠣᠷᠢᠨ ᠤᠷᠤᠯᠳᠤᠭᠠᠨ ᠤ᠋ ᠰᠣᠳᠣᠨ ᠨᠢᠭᠡᠨ ᠣᠨᠴᠠᠯᠢᠭ ᠴᠢᠨᠠᠷ ᠭᠡᠪᠡᠯ ᠂ ᠬᠤᠷᠳᠤᠨ ᠮᠣᠷᠢ ᠶ᠋ᠢ ᠡᠷᠬᠡᠪᠰᠢ ᠪᠠᠭᠠ ᠨᠠᠰᠤᠨ ᠤ᠋ ᠬᠡᠦᠬᠡᠳ ᠤᠨᠤᠨᠠ᠃ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠢᠯᠭᠠᠯ ᠦᠭᠡᠢ 7 - 13 ᠨᠠᠰᠤᠨ ᠤ᠋ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠷ ᠬᠤᠷᠳᠤᠨ ᠮᠣᠷᠢ ᠣᠨᠣᠭᠤᠯᠬᠤ ᠵᠠᠩᠰᠢᠯ ᠨᠡᠢᠳᠡᠮ ᠳᠡᠯᠭᠡᠷᠡᠵᠦ ᠵᠠᠩᠰᠢᠵᠠᠢ᠃ ᠡᠭᠦᠨ ᠳ᠋ᠦ᠍ 7 - 10 ᠨᠠᠰᠤᠨ ᠤ᠋ ᠬᠢᠨ ᠭᠣᠣᠯᠯᠠᠵᠤ ᠂ ᠬᠠᠶᠠ 6 ᠨᠠᠰᠤᠨ ᠤ᠋ ᠬᠡᠦᠬᠡᠳ ᠢ᠋ᠶ᠋ᠡᠷ ᠣᠨᠣᠭᠤᠯᠤᠭᠴᠢᠳ ᠴᠥᠭᠡᠪᠦᠷ ᠦᠵᠡᠭᠳᠡᠳᠡᠭ᠃
ᠬᠡᠲᠦᠷᠬᠡᠢ ᠪᠠᠭᠠ ᠨᠠᠰᠤᠨ ᠤ᠋ ᠬᠡᠦᠬᠡᠳ ᠢ᠋ᠶ᠋ᠡᠷ ᠬᠤᠷᠳᠤᠨ ᠮᠣᠷᠢ ᠣᠨᠣᠭᠤᠯᠬᠤ ᠳ᠋ᠤ᠌ ᠬᠠᠰᠢᠷ ᠰᠠᠭᠤᠭᠠ ᠦᠭᠡᠢ ᠤᠴᠢᠷ ᠮᠣᠷᠢ ᠪᠠᠨ ᠶᠠᠪᠤᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ᠂ ᠲᠠᠲᠠᠵᠤ ᠳᠡᠢᠯᠬᠦ ᠦᠭᠡᠢ᠂ ᠳᠠᠪᠬᠢᠯ ᠬᠠᠳᠠᠭᠠᠯᠠᠵᠤ ᠲᠣᠬᠢᠷᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠵᠡᠷᠭᠡ ᠣᠰᠤᠭᠠ ᠭᠠᠷᠴᠤ ᠮᠡᠳᠡᠬᠦ ᠶᠦ᠍ᠮ᠃ ᠬᠠᠰᠢᠷ ᠰᠠᠢᠲᠠᠢ ᠬᠡᠦᠬᠡᠳ ᠨᠢ ᠬᠤᠷᠳᠤᠨ ᠢ᠋ᠶ᠋ᠠᠷ ᠪᠠᠷᠤᠭᠲᠠᠢ ᠮᠣᠷᠢ ᠶ᠋ᠢ ᠴᠦ᠍ ᠰᠠᠢᠨ ᠠᠬᠢᠭᠤᠯᠵᠤ ᠂ ᠳᠠᠪᠬᠢᠭᠤᠯᠳᠠᠭ ᠤᠳᠠᠭᠠ ᠴᠤ᠌ ᠭᠠᠷᠴᠤ ᠢᠷᠡᠵᠡᠢ᠃
14 ᠨᠠᠰᠤᠲᠠᠢ ᠪᠠ ᠪᠡᠶᠡ ᠪᠦᠳᠦᠭᠦᠨ 13 ᠨᠠᠰᠤᠲᠠᠢ ᠬᠡᠦᠬᠡᠳ ᠢ ᠮᠣᠷᠢᠨ ᠳ᠋ᠤ᠌ ᠬᠦᠨᠳᠦᠳᠡᠯᠡ ᠭᠡᠳᠡᠭ ᠃ ᠭᠡᠪᠡᠴᠦ ᠪᠡᠶᠡ ᠪᠠᠭᠠ ᠲᠠᠢ ᠶᠠᠰᠤ ᠬᠥᠩᠭᠡᠨ ᠠᠪᠬᠠᠯᠵᠢ ᠰᠠᠢᠲᠠᠢ ᠬᠡᠦᠬᠡᠳ ᠪᠣᠯ ᠤᠨᠤᠭᠤᠯᠵᠤ ᠪᠣᠯᠬᠤ ᠶᠤᠮ᠃
ᠬᠡᠦᠬᠡᠳ ᠢ᠋ ᠶᠡᠷᠦ ᠨᠢ ᠪᠠᠭᠠ ᠠ᠋ᠴᠠ ᠡᠬᠢᠯᠡᠵᠦ ᠂ ᠤᠨᠤᠭᠤᠯᠵᠤ ᠂ ᠳᠠᠪᠬᠢᠭᠤᠯᠵᠤ ᠂ ᠡᠮᠨᠢᠭ ᠳᠠᠭᠠ ᠰᠢᠳᠦᠯᠡᠩ ᠪᠤᠯᠭᠢᠭᠤᠯᠵᠤ ᠰᠤᠷᠭᠠᠬᠤ ᠬᠢᠭᠡᠳ ᠬᠤᠷᠳᠤᠨ ᠮᠣᠷᠢ ᠤᠨᠤᠭᠤᠯᠵᠤ ᠲᠠᠲᠠᠭᠤᠯᠬᠤ ᠵᠡᠷᠭᠡ ᠳ᠋ᠦ᠍ ᠰᠢᠮᠳᠠᠪᠠᠯ ᠲᠠᠭᠠᠷᠠᠨᠠ ᠃ ᠬᠡᠦᠬᠡᠳ ᠬᠤᠷᠳᠤᠨ ᠮᠣᠷᠢ ᠤᠨᠤᠵᠤ ᠰᠤᠷᠬᠤ ᠶ᠋ᠢᠨ ᠬᠠᠮᠲᠤ ᠬᠥᠩᠭᠡᠨ ᠰᠢᠩᠭᠡᠨ ᠂ ᠲᠦᠷᠭᠡᠨ ᠱᠠᠯᠠᠮᠠᠭᠠᠢ ᠂ ᠤᠪ ᠮᠡᠬᠡᠲᠡᠢ ᠠᠪᠬᠠᠯᠵᠢ ᠰᠡᠷᠭᠦᠯᠡᠩ ᠂ ᠵᠢᠷᠦᠬᠡ ᠵᠣᠷᠢᠭᠲᠠᠢ ᠪᠣᠯᠵᠤ ᠂ ᠬᠤᠷᠳᠤᠨ ᠮᠣᠷᠢ ᠶ᠋ᠢ ᠶᠠᠪᠤᠭᠤᠯᠵᠤ ᠂ ᠬᠤᠷᠳᠤᠴᠠ ᠶ᠋ᠢ ᠨᠡᠮᠡᠭᠦᠯᠬᠦ ᠂ ᠨᠥᠭᠡᠬᠦ ᠬᠠᠳᠠᠭᠠᠯᠠᠬᠤ ᠂ ᠲᠠᠲᠠᠬᠤ ᠰᠢᠬᠠᠬᠤ ᠴᠠᠭ ᠦᠶᠡ ᠶ᠋ᠢ ᠲᠣᠬᠢᠷᠠᠭᠤᠯᠬᠤ ᠳ᠋ᠤ᠌ ᠨᠡᠪᠲᠡᠷᠬᠡᠢ ᠰᠤᠷᠮᠠᠭᠠᠢ ᠪᠣᠯᠬᠤ ᠴᠢᠬᠤᠯᠠᠲᠠᠢ᠃ ᠡᠨᠡᠴᠢᠯᠡᠨ ᠬᠥᠯ ᠨᠢ ᠳᠥᠷᠦᠭᠡᠨ ᠳ᠋ᠦ᠍ ᠂ ᠭᠠᠷ ᠨᠢ ᠭᠠᠨᠵᠤᠭᠠᠨ ᠳ᠋ᠤ᠌ ᠬᠦᠷᠦᠭᠡ ᠦᠭᠡᠢ ᠪᠢᠴᠢᠬᠠᠨ ᠬᠡᠦᠬᠡᠳ ᠨᠢ ᠮᠣᠷᠢᠨ ᠤ᠋ ᠨᠢᠷᠤᠭᠤᠨ ᠳ᠋ᠤ᠌ ᠬᠦᠷᠬᠦ ᠦᠭᠡᠢ ᠠᠭᠳᠤᠭᠠᠷ ᠪᠠᠢᠲᠠᠯᠠ ᠪᠠᠨ ᠨᠢᠭᠡᠨᠲᠡ ᠮᠣᠷᠳᠠᠪᠠᠯ ᠨᠢᠰᠴᠦ ᠭᠡᠵᠦ ᠮᠡᠳᠡ ᠃ ᠡᠢᠮᠦ ᠡᠷᠪᠡᠬᠡᠢ ᠰᠢᠭ ᠬᠡᠦᠬᠡᠳ ᠣᠯᠠᠨ ᠪᠠᠢᠳᠠᠭ ᠃ ᠡᠢᠨ ᠬᠦ᠌ ᠬᠤᠷᠳᠤᠨ ᠮᠣᠷᠢ ᠶ᠋ᠢ ᠤᠷᠤᠯᠳᠤᠨ ᠶᠠᠪᠤᠭᠠ ᠶᠠᠪᠤᠴᠠ ᠳ᠋ᠠᠭᠠᠨ ᠡᠮᠡᠭᠡᠯ ᠨᠢ ᠲᠣᠯᠣᠭᠠᠢ ᠤᠷᠤᠭᠤ ᠨᠢ ᠣᠷᠣᠭᠰᠠᠨ ᠪᠤᠶᠤ ᠣᠯᠣᠩ ᠵᠢᠷᠢᠮ ᠲᠠᠰᠤᠷᠠᠵᠤ ᠣᠰᠤᠭᠠ ᠭᠠᠷᠬᠤ ᠳ᠋ᠤ᠌ ᠳᠠᠪᠬᠢᠭᠠᠨ ᠳᠡᠭᠡᠷᠡ ᠡᠮᠡᠭᠡᠯ ᠢ᠋ᠶ᠋ᠡᠨ ᠠᠪᠴᠤ ᠬᠠᠶᠠᠭᠠᠳ ᠵᠠᠢᠳᠠᠩ ᠤᠷᠤᠯᠳᠤᠵᠤ ᠲᠡᠷᠢᠭᠦᠯᠡᠭᠰᠡᠨ ᠪᠤᠶᠤ ᠳᠡᠭᠡᠷᠡ ᠳᠠᠪᠬᠢᠭᠤᠯᠵᠤ ᠢᠷᠡᠭᠰᠡᠨ ᠵᠢᠱ᠌ᠢᠶᠡ ᠴᠥᠭᠡᠨ ᠦᠭᠡᠢ ᠪᠠᠢᠵᠤ ᠢᠷᠡᠵᠡᠢ᠃
ᠮᠣᠷᠢᠨ ᠳ᠋ᠤ᠌ ᠬᠡᠳᠦᠢ ᠬᠥᠩᠭᠡᠨ ᠪᠣᠯ ᠲᠡᠳᠦᠢ ᠶᠡᠬᠡ ᠬᠤᠷᠳᠤᠴᠠ ᠶ᠋ᠢᠨ ᠦᠷᠡ ᠪᠦᠲᠦᠮᠵᠢ ᠶ᠋ᠢ ᠣᠯᠳᠠᠭ ᠤ᠋ᠨ ᠤᠴᠢᠷ ᠬᠤᠷᠳᠤᠨ ᠮᠣᠷᠢ ᠶ᠋ᠢ ᠠᠯᠢ ᠪᠣᠯᠬᠣᠷ ᠬᠥᠩᠭᠡᠨ ᠶᠠᠪᠤᠭᠤᠯᠬᠤ ᠶ᠋ᠢ ᠭᠣᠣᠯ ᠵᠣᠷᠢᠯᠭᠠ ᠪᠣᠯᠭᠠᠳᠠᠭ᠃ ᠲᠡᠢᠨ ᠬᠦ᠌ 7 -10 ᠨᠠᠰᠤᠨ ᠤ᠋ ᠪᠢᠴᠢᠬᠠᠨ ᠬᠡᠦᠬᠡᠳ ᠢ᠋ ᠵᠠᠢᠳᠠᠩ ᠤᠨᠤᠭᠤᠯᠵᠤ ᠤᠷᠤᠯᠳᠤᠭᠤᠯᠳᠠᠭ ᠵᠤᠷᠰᠢᠯ ᠡᠷᠲᠡ ᠳᠡᠭᠡᠷᠡ ᠦᠶᠡ ᠡᠴᠡ ᠡᠬᠢᠯᠡᠵᠡᠢ᠃ ᠵᠠᠢᠳᠠᠩ ᠤᠨᠤᠬᠤ ᠶ᠋ᠢᠨ ᠰᠠᠢᠨ ᠲᠠᠯᠠ ᠭᠡᠪᠡᠯ ᠂ ᠨᠢᠭᠡ ᠳ᠋ᠦ᠍ ᠂ ᠮᠣᠷᠢᠨ ᠳ᠋ᠤ᠌ ᠬᠥᠩᠭᠡᠨ᠃ ᠬᠣᠶᠠᠷ ᠲᠤ᠌ ᠂ ᠮᠣᠷᠢᠨ ᠳ᠋ᠤ᠌ ᠭᠡᠮᠲᠦᠯ ᠮᠠᠰᠢ ᠪᠠᠭᠠ ᠃ ᠭᠤᠷᠪᠠ ᠳ᠋ᠤ᠌ ᠂ ᠬᠡᠦᠬᠡᠳ ᠣᠢᠴᠢᠵᠤ ᠲᠤᠰᠬᠤ ᠳ᠋ᠤ᠌ ᠠᠶᠤᠯ ᠦᠭᠡᠢ ᠵᠡᠷᠭᠡ ᠁ ᠰᠠᠢᠨᠲᠠᠢ ᠪᠠᠢᠳᠠᠭ᠃
ᠣᠳᠣ ᠦᠶᠡ ᠶ᠋ᠢᠨ ᠬᠡᠦᠬᠡᠳ ᠪᠢᠷᠠ ᠴᠢᠳᠠᠯ ᠮᠠᠭᠤ ᠶ᠋ᠢᠨ ᠳᠡᠭᠡᠷᠡ ᠮᠢᠬᠠ ᠪᠥᠭᠰᠡᠨ ᠳ᠋ᠡᠭᠡᠨ ᠬᠠᠢᠷᠠᠲᠠᠢ ᠶ᠋ᠢᠨ ᠬᠠᠷᠠᠭᠠ ᠪᠠᠷ ᠡᠮᠡᠭᠡᠯ᠂ ᠡᠷᠪᠡᠭᠡᠯᠵᠢ ᠳᠦᠭᠦᠷᠭᠡᠬᠦ ᠶᠠᠪᠤᠳᠠᠯ ᠭᠠᠷᠴᠤ ᠢᠷᠡᠵᠡᠢ᠃ ᠡᠭᠦᠨᠴᠢᠯᠡᠨ ᠡᠮᠡᠭᠡᠯ ᠬᠠᠵᠠᠭᠠᠷ ᠲᠣᠨᠣᠭ ᠢ᠋ ᠠᠯᠢ ᠪᠣᠯᠬᠣᠷ ᠬᠥᠩᠭᠡᠯᠡᠬᠦ ᠶ᠋ᠢ ᠬᠢᠴᠢᠶᠡᠬᠦ ᠪᠣᠯᠵᠠᠢ᠃
ᠬᠠᠭᠤᠴᠢᠨ ᠳ᠋ᠤ᠌ ᠨᠠᠭᠠᠳᠤᠮ ᠪᠣᠯᠪᠠᠯ ᠂ ᠨᠣᠶᠠᠳ ᠪᠠᠶᠠᠳ ᠠᠷᠠᠳ ᠤ᠋ᠨ ᠬᠡᠦᠬᠡᠳ ᠢ᠋ ᠳᠠᠭᠤᠳᠠᠨ ᠠᠪᠠᠴᠢᠵᠤ ᠬᠢᠷᠢ ᠳ᠋ᠦ᠍ ᠬᠦᠷᠪᠡᠯ ᠮᠣᠷᠢ ᠪᠠᠨ ᠣᠨᠣᠭᠤᠯᠳᠠᠭ ᠪᠠᠢᠭᠰᠠᠨ ᠪᠠ ᠬᠡᠦᠬᠡᠳ ᠢ᠋ ᠬᠥᠩᠭᠡᠯᠡᠬᠦ ᠶ᠋ᠢᠨ ᠲᠥᠯᠥᠭᠡ ᠢᠮᠠᠭᠲᠠ ᠬᠠᠷᠠᠰᠤ ᠰᠢᠷᠠ ᠪᠤᠳᠠᠭᠠ ᠪᠠᠷ ᠬᠣᠭᠣᠯᠠᠯᠠᠳᠠᠭ ᠪᠠᠢᠪᠠ᠃
ᠬᠤᠪᠢᠰᠬᠠᠯ ᠤ᠋ᠨ ᠳᠠᠷᠠᠬᠠ ᠂ ᠢᠯᠠᠩᠭᠤᠶᠠ ᠥᠨᠥᠳᠥᠷ ᠦ᠋ᠨ ᠮᠡᠲᠦ ᠰᠣᠶᠣᠯ ᠰᠤᠷᠭᠠᠭᠤᠯᠢ ᠬᠥᠭᠵᠢᠭᠰᠡᠨ ᠴᠠᠭ ᠂ ᠤᠨᠤᠬᠤ ᠬᠡᠦᠬᠡᠳ ᠣᠯᠬᠤ ᠭᠡᠳᠡᠭ ᠴᠦ᠍ ᠡᠷᠳᠡᠨᠢ ᠡᠷᠢᠬᠦ ᠡᠴᠡ ᠳᠤᠲᠠᠬᠤ ᠦᠭᠡᠢ ᠪᠣᠯᠵᠠᠢ ᠃ ᠡᠭᠦᠨ ᠦ᠌ ᠳᠡᠭᠡᠷᠡ ᠰᠣᠶᠣᠯ ᠰᠤᠷᠭᠠᠭᠤᠯᠢ ᠶ᠋ᠢᠨ ᠮᠥᠷ ᠬᠥᠭᠡᠭᠡᠭᠰᠡᠨ ᠬᠡᠦᠬᠡᠳ ᠴᠦ᠍ ᠭᠡᠰᠡᠨ ᠮᠣᠷᠢ ᠤᠨᠤᠭᠠᠨ ᠳ᠋ᠤ᠌ ᠳ᠋ᠦᠢ ᠮᠠᠭᠤᠲᠠᠢ ᠪᠣᠯᠤᠭᠰᠠᠨ ᠤ᠋ ᠤᠯᠠᠮ ᠢ᠋ᠶ᠋ᠠᠷ ᠡᠮᠡᠭᠡᠯ ᠂ ᠡᠷᠪᠡᠭᠡᠯᠵᠢ ᠶᠡᠬᠡᠬᠡᠨ ᠴᠢᠬᠤᠯᠠᠲᠠᠢ ᠪᠣᠯᠵᠠᠢ᠃
2. ᠤᠷᠤᠯᠳᠤᠭᠠᠨ ᠮᠣᠷᠢᠨ ᠤ᠋ ᠲᠣᠨᠣᠭ ᠲᠥᠬᠥᠭᠡᠷᠦᠮᠵᠢ
ᠬᠤᠷᠳᠤᠨ ᠮᠣᠷᠢᠨ ᠤ᠋ ᠡᠮᠡᠭᠡᠯ
ᠡᠮᠡᠭᠡᠯ ᠢ᠋ ᠬᠠᠮᠤᠭ ᠤ᠋ᠨ ᠪᠠᠭᠠ ᠬᠥᠩᠭᠡᠨ᠂ ᠠᠪᠰᠠᠷᠬᠠᠨ ᠮᠥᠷᠲᠡᠭᠡᠨ ᠪᠠᠲᠤ ᠪᠡᠬᠢ ᠪᠠᠢᠬᠤ ᠶ᠋ᠢ ᠱᠠᠭᠠᠷᠳᠠᠳᠠᠭ᠃ ᠭᠡᠪᠡᠴᠦ ᠬᠠᠪᠲᠠᠰᠤ ᠨᠢ ᠬᠠᠷᠴᠠᠭᠠ ᠶ᠋ᠢ ᠳᠠᠷᠤᠵᠤ ᠬᠠᠪᠤᠳᠤᠭᠤᠯᠬᠤ ᠲᠠᠭᠠᠷᠢᠳᠠᠭᠤᠯᠬᠤ ᠶ᠋ᠢ ᠬᠢᠴᠢᠶᠡᠵᠦ ᠳᠠᠷᠤᠯᠲᠠ ᠬᠦᠴᠦ ᠶ᠋ᠢ ᠲᠠᠷᠬᠠᠭᠠᠬᠤ ᠶ᠋ᠢᠨ ᠤᠴᠢᠷ ᠨᠡᠯᠢᠶᠡᠳ ᠤᠷᠲᠤᠪᠲᠤᠷ ᠬᠠᠪᠲᠠᠰᠤ ᠬᠢᠪᠡᠯ ᠰᠠᠢᠨ᠂ ᠬᠥᠯᠥᠰᠥᠪᠴᠢᠨ ᠦ᠌ ᠲᠣᠬᠣᠮ ᠢ᠋ ᠮᠣᠷᠢᠨ ᠤ᠋ ᠪᠠᠢᠳᠠᠯ ᠳ᠋ᠤ᠌ ᠲᠣᠬᠢᠷᠠᠭᠤᠯᠬᠤ ᠪᠣᠯᠪᠠᠴᠤ ᠬᠥᠩᠭᠡᠨ ᠨᠢᠮᠭᠡᠨ ᠢ᠋ ᠡᠷᠬᠢᠮᠨᠡᠨᠡ᠃ ᠭᠥᠯᠢᠮ᠂ ᠳᠥᠷᠥᠭᠡ ᠂ ᠳᠡᠪᠰᠡ ᠵᠡᠷᠭᠡ ᠬᠡᠷᠡᠭᠰᠡᠯ ᠢ᠋ ᠴᠥᠮ ᠬᠥᠩᠭᠡᠳᠬᠡᠬᠦ ᠪᠥᠭᠡᠳ ᠨᠦᠰᠡᠷ ᠬᠦᠨᠳᠦ ᠪᠠᠭᠠᠪᠤᠷ ᠳᠠᠷᠤᠭᠤᠯᠭᠠ ᠶ᠋ᠢ ᠠᠪᠴᠤ ᠰᠣᠯᠢᠭᠤᠯᠤᠨᠠ᠃ ᠬᠡᠦᠬᠡᠳ ᠦ᠋ᠨ ᠬᠥᠯ ᠴᠣᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠷᠣᠬᠤ ᠦᠭᠡᠢ ᠪᠥᠭᠡᠳ ᠮᠣᠷᠢᠨ ᠠ᠋ᠴᠠ ᠣᠢᠴᠢᠪᠠᠴᠤ ᠭᠤᠲᠤᠯ ᠲᠡᠭᠡᠭᠯᠡᠬᠦ ᠦᠭᠡᠢ ᠵᠢᠵᠢᠭ ᠬᠥᠩᠭᠡᠨ ᠳᠥᠷᠥᠭᠡ ᠶ᠋ᠢ ᠲᠣᠬᠢᠷᠠᠭᠤᠯᠤᠨᠠ ᠃ ᠮᠣᠷᠢᠨ ᠤ᠋ ᠭᠡᠳᠡᠰᠦ ᠶ᠋ᠢ ᠣᠯᠣᠢᠷᠲᠤᠭᠤᠯᠬᠤ ᠦᠭᠡᠢ ᠪᠥᠭᠡᠳ ᠰᠠᠭᠠᠷᠠᠵᠤ ᠠᠯᠳᠠᠷᠠᠬᠤ ᠦᠭᠡᠢ ᠰᠠᠢᠨ ᠪᠡᠬᠢ ᠣᠯᠣᠩ ᠵᠢᠷᠢᠮ ᠲᠠᠭᠠᠷᠠᠭᠤᠯᠤᠨᠠ ᠃ ᠬᠥᠩᠭᠡᠨ ᠪᠥᠬᠡ ᠰᠣᠷᠣᠨ ᠳᠠᠷᠤᠭᠤᠯᠭᠠ ᠪᠠᠷ ᠡᠮᠡᠭᠡᠯ ᠦ᠋ᠨ ᠡᠪᠰᠢᠯ ᠰᠠᠭᠤᠴᠠ ᠶ᠋ᠢ ᠪᠡᠬᠢᠯᠡᠨᠡ᠃
ᠬᠤᠷᠳᠤᠨ ᠮᠣᠷᠢᠨ ᠤ᠋ ᠡᠷᠪᠡᠭᠡᠯᠵᠢ
ᠡᠮᠦᠨᠡ ᠪᠡᠨ ᠵᠥᠪᠬᠡᠨ ᠪᠠᠷᠢᠭᠤᠯ ᠲᠠᠢ ᠬᠢᠬᠦ ᠪᠣᠯ ᠳᠡᠮᠡᠢ ᠶᠠᠷᠰᠢᠭ ᠦᠭᠡᠢ᠂ ᠬᠡᠷᠪᠡ ᠳᠥᠷᠥᠭᠡ ᠲᠡᠢ ᠬᠢᠬᠦ ᠭᠡᠪᠡᠯ ᠡᠷᠬᠡᠪᠰᠢ ᠳᠥᠷᠦᠭᠡᠨ ᠦ᠌ ᠬᠣᠯᠪᠣᠭᠠᠷᠢ ᠬᠢᠭᠰᠡᠨ ᠲᠡᠷᠡ ᠬᠦ᠌ ᠮᠣᠳᠣ ᠪᠤᠶᠤ ᠰᠤᠷ ᠤ᠋ᠨ ᠢ᠋ᠶ᠋ᠠᠨ ᠮᠣᠷᠢᠨ ᠤ᠋ ᠨᠢᠷᠤᠭᠤ ᠳᠠᠷᠤᠬᠤ ᠶ᠋ᠢ ᠬᠡᠴᠢᠶᠡᠴᠢᠬᠡᠪᠡᠯ ᠥᠭᠡᠷᠡ ᠨᠢ ᠠᠰᠠᠭᠤᠳᠠᠯ ᠦᠭᠡᠢ᠃
ᠬᠤᠷᠳᠤᠨ ᠮᠣᠷᠢᠨ ᠤ᠋ ᠬᠠᠵᠠᠭᠠᠷ
ᠬᠠᠵᠠᠭᠠᠷ ᠤ᠋ᠨ ᠵᠢᠯᠣᠭᠣ ᠶ᠋ᠢ ᠮᠠᠰᠢ ᠪᠥᠬᠡ ᠂ ᠨᠠᠷᠢᠨ ᠵᠡᠯᠡᠬᠡᠨ ᠰᠤᠷ ᠢ᠋ᠶ᠋ᠠᠷ ᠬᠢᠵᠦ ᠂ ᠭᠠᠩ ᠵᠤᠤᠵᠠᠢ ᠴᠠᠭᠠᠷᠢᠭ ᠲᠠᠢ ᠂ ᠴᠡᠪᠡᠷ ᠴᠡᠮᠴᠡᠭᠡᠷ ᠬᠠᠵᠠᠭᠠᠷ ᠪᠠᠢᠬᠤ ᠬᠡᠷᠡᠭᠲᠡᠢ ᠃ ᠬᠡᠦᠬᠡᠳ ᠣᠯᠠᠨ ᠶᠠᠭᠤᠮᠠ ᠪᠠᠷᠢᠵᠤ ᠰᠠᠮᠭᠠᠷᠳᠠᠬᠤ ᠪᠠ ᠮᠣᠷᠢᠨ ᠤ᠋ ᠬᠥᠯ ᠣᠷᠢᠶᠠᠬᠤ ᠵᠡᠷᠭᠡ ᠡᠴᠡ ᠪᠣᠯᠭᠣᠮᠵᠢᠯᠠᠵᠤ ᠴᠤᠯᠪᠤᠭᠤᠷ ᠦᠭᠡᠢ ᠶᠠᠪᠤᠭᠤᠯᠳᠠᠭ ᠃ ᠭᠡᠬᠦ ᠳ᠋ᠡᠭᠡᠨ ᠵᠢᠯᠤᠭᠤᠨ ᠤ᠋ ᠪᠠᠨ ᠪᠤᠷᠤᠭᠤ ᠲᠠᠯᠠ ᠶ᠋ᠢ ᠬᠢᠯᠪᠠᠷ ᠲᠠᠢᠯᠵᠤ ᠪᠣᠯᠬᠤ ᠪᠠᠷ ᠬᠢᠵᠦ ᠬᠥᠲᠥᠯᠬᠦ ᠳ᠋ᠦ᠍ ᠪᠡᠯᠡᠳᠬᠡᠯᠭᠡᠨᠡ ᠃
ᠬᠠᠳᠤᠤᠷᠠᠳᠠᠭ ᠮᠣᠷᠢ ᠶ᠋ᠢ ᠬᠥᠨᠳᠡᠯᠡᠨ ᠴᠢᠭᠲᠠ ᠪᠦᠬᠦᠢ ᠨᠣᠮᠣᠨ ᠵᠤᠤᠵᠠᠢ ᠴᠠᠭᠠᠷᠢᠭ ᠲᠠᠢ ᠬᠠᠵᠠᠭᠠᠷ ᠢ᠋ᠶ᠋ᠠᠷ ᠬᠠᠵᠠᠭᠠᠷᠯᠠᠨᠠ ᠃
ᠬᠤᠷᠳᠤᠨ ᠮᠣᠷᠢᠨ ᠤ᠋ ᠲᠠᠰᠢᠭᠤᠷ
ᠲᠣᠪᠢᠴᠠᠭ ᠲᠠᠰᠢᠭᠤᠷ ᠪᠤᠶᠤ ᠡᠰᠡᠬᠦᠯᠡ ᠤᠷᠭᠠᠴᠢᠨ ᠤ᠋ ᠲᠠᠰᠢᠭᠤᠷ ᠰᠢᠭ᠋ ᠵᠥᠭᠡᠯᠡᠨ ᠵᠡᠯᠡ ᠪᠡᠨ ᠤᠷᠲᠤ ᠰᠣᠷᠣᠨ ᠰᠡᠭᠡᠯᠳᠦᠷᠭᠡ ᠲᠡᠢ᠂ ᠨᠠᠷᠢᠨ ᠬᠥᠩᠭᠡᠨ ᠪᠠᠷᠢᠶᠠ ᠪᠦᠬᠦᠢ ᠵᠢᠵᠢᠭ ᠲᠠᠰᠢᠭᠤᠷ ᠃ ᠡᠢᠮᠦ ᠲᠠᠰᠢᠭᠤᠷ ᠂ ᠳᠡᠭᠡᠷᠡ ᠨᠢ ᠣᠢᠴᠢᠪᠠᠴᠤ ᠲᠠᠰᠢᠭᠤᠷ ᠤ᠋ᠨ ᠪᠦᠷᠢᠶᠡ ᠪᠡᠶᠡ ᠤᠷᠤᠭᠤ ᠰᠢᠭᠠᠬᠤ ᠦᠭᠡᠢ ᠪᠠᠢᠳᠠᠭ ᠃ ᠡᠰᠡᠬᠦᠯᠡ ᠲᠠᠩᠰᠠᠷᠠᠬᠤ ᠤᠷᠲᠤ ᠰᠢᠪᠠᠭᠳᠠᠭᠠ ᠵᠡᠷᠭᠡ ᠪᠦᠷ ᠪᠣᠯᠤᠨᠠ᠃
ᠪᠣᠭᠣᠯᠲᠠ
ᠬᠤᠷᠳᠤᠨ ᠮᠣᠷᠢᠨ ᠤ᠋ ᠬᠥᠬᠥᠯ ᠂ ᠰᠡᠭᠦᠯ ᠦ᠋ᠨ ᠪᠣᠭᠣᠯᠲᠠ ᠶ᠋ᠢ ᠤᠷᠲᠤ ᠨᠠᠷᠢᠬᠠᠨ ᠲᠠᠲᠠᠭᠠᠰᠤ ᠰᠤᠷ ᠪᠤᠶᠤ ᠳᠤᠷᠳᠤᠩ ᠢ᠋ᠶ᠋ᠠᠷ ᠪᠣᠭᠣᠵᠤ ᠴᠢᠮᠡᠨᠡ ᠃ ᠢᠯᠠᠩᠭᠤᠶᠠ ᠠᠵᠢᠷᠭᠠᠨ ᠤ᠋ ᠳᠡᠯ ᠂ ᠨᠢᠭᠤᠷ ᠨᠢᠳᠦ ᠪᠡᠨ ᠪᠦᠲᠡᠭᠡᠨ ᠬᠠᠯᠬᠠᠯᠠᠵᠤ ᠂ ᠨᠦᠬᠡ ᠂ ᠴᠢᠯᠠᠭᠤ ᠂ ᠡᠷᠭᠢ ᠭᠣᠣ ᠶ᠋ᠢ ᠦᠵᠡᠬᠦ ᠦᠭᠡᠢ ᠣᠷᠣᠬᠤ ᠠ᠋ᠴᠠ ᠪᠤᠭᠤᠮᠵᠢᠯᠠᠨ ᠬᠥᠬᠥᠯ ᠢ᠋ ᠡᠷᠬᠡᠪᠰᠢ ᠰᠠᠢᠨ ᠪᠣᠭᠣᠨᠠ ᠃ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠰᠡᠭᠦᠯ ᠦ᠋ᠨ ᠦᠵᠦᠭᠦᠷ ᠢ᠋ ᠦᠯᠦ ᠮᠡᠳᠡᠭ ᠭᠠᠳᠠᠭᠰᠢ ᠮᠠᠳᠠᠢᠯᠭᠠᠨ ᠪᠣᠭᠣᠳᠠᠭ ᠪᠥᠭᠡᠳ ᠱᠤᠩᠭᠤᠭᠰᠠᠨ ᠪᠦᠷᠭᠦᠳ ᠱᠤᠮᠪᠠᠭᠰᠠᠨ ᠵᠢᠭᠠᠰᠤ ᠭᠡᠬᠦ ᠮᠡᠲᠦ ᠪᠡᠷ ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠪᠣᠭᠣᠯᠲᠠ ᠭᠠᠷᠭᠠᠳᠠᠭ᠃
ᠬᠡᠦᠬᠡᠳ ᠦ᠋ᠨ ᠬᠤᠪᠴᠠᠰᠤ
ᠬᠤᠷᠳᠤᠨ ᠮᠣᠷᠢᠨ ᠤ᠋ ᠬᠡᠦᠬᠡᠳ ᠦ᠋ᠨ ᠬᠤᠪᠴᠠᠰᠤ ᠪᠡᠶᠡ ᠪᠠᠷᠢᠭᠤ ᠬᠢᠬᠦ ᠪᠣᠯᠪᠠᠴᠤ ᠲᠦᠷᠭᠡᠨ ᠱᠠᠯᠠᠮᠠᠭᠠᠢ ᠬᠥᠳᠡᠯᠭᠡᠭᠡᠨ ᠳ᠋ᠦ᠍ ᠰᠠᠭᠠᠳ ᠦᠭᠡᠢ᠂ ᠬᠠᠯᠠᠭᠤᠴᠠᠬᠤ ᠳ᠋ᠤ᠌ ᠪᠡᠶᠡ ᠪᠠᠷᠢᠬᠤ ᠦᠭᠡᠢ ᠪᠥᠭᠡᠳ ᠰᠠᠯᠬᠢ ᠬᠥᠭᠡᠷᠭᠡᠳᠡᠬᠦ ᠦᠭᠡᠢ ᠂ ᠰᠤᠯᠠ ᠴᠢᠯᠥᠭᠡᠲᠡᠢ ᠬᠥᠳᠡᠯᠵᠦ ᠪᠣᠯᠬᠤ ᠪᠥᠭᠡᠳ ᠠᠪᠰᠠᠷᠬᠠᠨ ᠪᠠᠢᠬᠤ ᠶ᠋ᠢ ᠱᠠᠭᠠᠷᠳᠠᠨᠠ᠃ ᠲᠡᠭᠦᠨᠴᠢᠯᠡᠨ ᠣᠯᠠᠨ ᠤ᠋ ᠳᠣᠲᠣᠷᠠ ᠠ᠋ᠴᠠ ᠣᠨᠴᠠ ᠰᠣᠳᠣᠨ ᠬᠤᠷᠴᠠ ᠢᠯᠭᠠᠷᠠᠨ ᠬᠠᠷᠠᠭᠳᠠᠬᠤ ᠥᠩᠭᠡᠲᠡᠢ ᠪᠤᠶᠤ ᠣᠨᠴᠠᠭᠠᠢ ᠲᠡᠮᠳᠡᠭ ᠲᠡᠢ ᠬᠢᠨᠡ ᠃
ᠳᠡᠭᠡᠷᠡ ᠴᠠᠭ ᠲᠤ᠌ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠬᠡᠦᠬᠡᠳ ᠦ᠋ᠨ ᠴᠡᠮᠴᠡᠨ ᠦ᠌ ᠠᠷᠤ ᠥᠪᠥᠷ ᠂ ᠥᠮᠦᠳᠦᠨ ᠡᠪᠦᠳᠦᠭ ᠵᠡᠷᠭᠡ ᠳ᠋ᠦ᠍ ᠬᠣᠷᠯᠣ ᠂ ᠴᠢᠨᠳᠠᠮᠤᠨᠢ ᠂ ᠲᠠᠪᠤᠨ ᠨᠢᠳᠦ ᠂ ᠳᠥᠷᠪᠡᠨ ᠨᠢᠳᠦ ᠂ ᠬᠠᠰ ᠂ ᠰᠢᠪᠠᠭᠤ ᠂ ᠡᠷᠪᠡᠬᠡᠢ ᠮᠡᠲᠦᠰ ᠲᠠᠨᠢᠬᠤ ᠲᠡᠮᠳᠡᠭ ᠦ᠋ᠳ ᠢ᠋ ᠬᠠᠲᠠᠳᠠᠭ ᠪᠠᠢᠵᠠᠢ ᠃ ᠲᠣᠯᠣᠭᠠᠢ ᠳ᠋ᠤᠨᠢ ᠲᠣᠭᠲᠠᠪᠤᠷᠢ ᠰᠠᠢᠲᠠᠢ ᠬᠥᠩᠭᠡᠨ ᠪᠥᠭᠡᠳ ᠰᠣᠳᠣᠨ ᠬᠠᠷᠠᠭᠳᠠᠬᠤ ᠮᠠᠯᠠᠭᠠᠢ ᠡᠮᠦᠰᠬᠡᠳᠡᠭ᠃ ᠮᠠᠯᠠᠭᠠᠢ ᠪᠤᠶᠤ ᠴᠡᠮᠴᠡᠨ ᠦ᠌ ᠠᠷᠤ ᠰᠡᠷᠪᠡᠭᠡᠨ ᠳᠡᠭᠡᠷᠡ ᠥᠴᠦᠬᠡᠨ ᠵᠢᠵᠢᠭ ᠬᠡᠢ ᠮᠣᠷᠢ ᠪᠤᠶᠤ ᠳᠠᠷᠴᠤᠭ ᠬᠡᠢᠰᠬᠡᠳᠡᠭ ᠴᠦ᠍ ᠪᠠᠢᠯᠠ᠃ ᠣᠳᠣ ᠵᠠᠷᠢᠮ ᠭᠠᠵᠠᠷ ᠬᠤᠷᠴᠠ ᠥᠩᠭᠡᠲᠡᠢ ᠲᠣᠷᠭᠠᠨ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠲᠣᠯᠣᠭᠠᠢ ᠶ᠋ᠢ ᠨᠢ ᠣᠷᠢᠶᠠᠵᠤ ᠪᠣᠢ ᠃
ᠬᠡᠦᠬᠡᠳ ᠦ᠋ᠨ ᠭᠤᠲᠤᠯ
ᠬᠥᠯ ᠳ᠋ᠦ᠍ᠨᠢ ᠬᠥᠩᠭᠡᠨ ᠪᠥᠭᠡᠳ ᠠᠪᠰᠠᠷᠬᠠᠨ ᠰᠥᠭᠥᠬᠡᠢ ᠪᠤᠶᠤ ᠪᠣᠢᠲᠣᠭ ᠡᠮᠦᠰᠬᠡᠳᠡᠭ ᠃ ᠬᠠᠵᠠᠭᠤ ᠪᠠᠷ ᠳᠠᠭᠠᠷᠢᠭᠴᠢᠳ ᠬᠠᠪᠢᠷᠴᠤ᠂ ᠬᠡᠦᠬᠡᠳ ᠦ᠋ᠨ ᠰᠢᠯᠪᠢ ᠶ᠋ᠢ ᠬᠠᠳᠤᠷᠴᠤ ᠭᠡᠮᠲᠦᠭᠡᠬᠦ ᠡᠴᠡ ᠪᠠ ᠳᠥᠷᠦᠭᠡᠨ ᠰᠤᠷ ᠪᠤᠯᠴᠢᠩ ᠴᠢᠮᠬᠢᠬᠦ ᠡᠴᠡ ᠪᠣᠯᠭᠣᠮᠵᠢᠯᠠᠵᠤ ᠤᠷᠲᠤ ᠲᠦᠷᠡᠢᠲᠡᠢ ᠪᠣᠢᠲᠣᠭ ᠪᠤᠶᠤ ᠬᠥᠩᠭᠡᠨ ᠵᠥᠭᠡᠯᠡᠨ ᠭᠤᠲᠤᠯ ᠡᠮᠦᠰᠬᠡᠳᠡᠭ᠃
ᠬᠠᠲᠠᠭᠤ ᠭᠤᠲᠤᠯ ᠲᠡᠳᠦᠢ ᠯᠡ ᠰᠠᠢᠨ ᠦᠭᠡᠢ᠃ ᠳᠠᠪᠢᠷᠠᠵᠤ ᠮᠣᠷᠢᠨ ᠤ᠋ ᠲᠠᠷ ᠴᠢᠳᠠᠯ ᠢ᠋ ᠪᠠᠷᠠᠬᠤ ᠂ ᠬᠠᠪᠴᠢᠬᠤ ᠳ᠋ᠤ᠌ ᠤᠯᠠᠭᠠᠨ ᠰᠤᠭᠤ ᠂ ᠪᠣᠭᠲᠣᠭᠣᠰᠣ ᠶ᠋ᠢᠨ ᠵᠠᠯᠠᠭᠠ ᠶ᠋ᠢ ᠭᠡᠮᠲᠦᠭᠡᠬᠦ᠂ ᠳᠠᠪᠬᠢᠯ ᠢ᠋ ᠰᠠᠭᠠᠳᠬᠠᠬᠤ ᠵᠡᠷᠭᠡ ᠬᠠᠷᠰᠢᠯ ᠲᠠᠢ ᠪᠢᠯᠡ ᠃