ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠵᠢᠷᠭᠤᠭᠠ ᠂ ᠬᠤᠷᠳᠤᠨ ᠮᠣᠷᠢᠨ ᠤ ᠰᠢᠨᠵᠢᠯᠡᠭᠡ ᠶᠢᠨ ᠪᠦᠯᠦᠭ 1 > Хөх зул – Боржигон Ванжал –"Зургаа ᠂ хурдан морины шинжилгээний бүлэг 1"
298ᠵᠢᠷᠭᠤᠭᠠ ᠂ ᠬᠤᠷᠳᠤᠨ ᠮᠣᠷᠢᠨ ᠤ ᠰᠢᠨᠵᠢᠯᠡᠭᠡ ᠶᠢᠨ ᠪᠦᠯᠦᠭ – 1
ᠬᠤᠷᠳᠤᠨ ᠮᠣᠷᠢᠨ ᠤ᠋ ᠰᠢᠨᠵᠢᠯᠡᠭᠡ
ᠮᠣᠩᠭᠣᠯᠴᠤᠳ ᠂ ᠮᠠᠯ ᠰᠦᠷᠦᠭ ᠢ᠋ᠶ᠋ᠡᠨ ᠬᠠᠷᠠᠬᠤ ᠨᠢᠳᠦᠨ ᠦ᠌ ᠪᠡᠨ ᠴᠡᠴᠡᠭᠡᠢ ᠰᠢᠭ ᠬᠠᠢᠷᠠᠯᠠᠵᠤ ᠠᠷᠠᠴᠢᠯᠠᠳᠠᠭ ᠮᠥᠷᠲᠡᠭᠡᠨ ᠢᠯᠠᠩᠭᠤᠶᠠ ᠬᠤᠷᠳᠤᠨ ᠮᠣᠷᠢᠳ ᠢ᠋ ᠡᠷᠳᠡᠨᠢ ᠠᠳᠠᠯᠢ ᠡᠷᠭᠢᠮᠨᠡᠵᠦ ᠢᠷᠡᠭᠰᠡᠨ ᠮᠣᠷᠢᠨ ᠤ᠋ ᠲᠡᠦᠬᠡ ᠮᠠᠰᠢ ᠡᠷᠲᠡ ᠴᠠᠭ ᠠ᠋ᠴᠠ ᠡᠬᠢᠯᠡᠵᠡᠢ᠃ ᠡᠢᠨ ᠪᠣᠯᠬᠣᠷ ᠮᠣᠩᠭᠣᠯᠴᠤᠳ ᠤ᠋ᠨ ᠳᠤᠮᠳᠠ ᠬᠤᠷᠳᠤᠨ ᠮᠣᠷᠢ ᠶ᠋ᠢ ᠰᠢᠯᠢᠵᠦ ᠲᠠᠨᠢᠬᠤ ᠂ ᠰᠣᠢᠵᠤ ᠵᠠᠰᠠᠬᠤ ᠬᠤᠷᠳᠤ ᠰᠢᠯᠭᠠᠷᠠᠭᠤᠯᠵᠤ ᠢᠷᠡᠭᠰᠡᠨ ᠰᠢᠨᠵᠢᠯᠡᠬᠦᠢ ᠤᠬᠠᠭᠠᠨᠴᠢ ᠦᠨᠳᠦᠰᠦ ᠪᠦᠬᠦᠢ ᠪᠠᠶᠠᠯᠢᠭ ᠲᠤᠷᠰᠢᠯᠭᠠ ᠡᠵᠡᠮᠰᠢᠭᠳᠡᠭᠡᠳ ᠮᠥᠨ ᠣᠯᠠᠨ ᠵᠠᠭᠤᠨ ᠵᠢᠯ ᠪᠣᠯᠵᠠᠢ ᠃ ᠲᠡᠢᠨ ᠬᠦ᠌ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠰᠢᠨᠵᠢ ᠶ᠋ᠢᠨ ᠲᠤᠬᠠᠢ ᠪᠢᠴᠢᠭᠰᠡᠨ ᠡᠷᠲᠡᠨ ᠦ᠌ ᠨᠣᠮᠯᠠᠰ ᠴᠤ᠌ ᠣᠯᠠᠨ ᠪᠠᠢᠳᠠᠭ᠃
ᠮᠣᠩᠭᠣᠯᠴᠤᠳ ᠤ᠋ᠨ ᠳᠤᠮᠳᠠ ᠠᠳᠤᠭᠤᠨ ᠤ᠋ ᠪᠡᠶᠡ ᠶ᠋ᠢᠨ ᠪᠦᠲᠦᠴᠡ᠂ ᠭᠠᠯᠪᠢᠷ ᠲᠥᠷᠬᠦ ᠪᠡᠷ ᠨᠢ ᠮᠣᠷᠢᠨ ᠤ᠋ ᠬᠤᠷᠳᠤᠨ ᠴᠢᠨᠠᠷ ᠢ᠋ ᠰᠢᠨᠵᠢᠳᠡᠭ ᠬᠥᠮᠦᠰ᠂ ᠡᠷᠲᠡ ᠳᠡᠭᠡᠷᠡ ᠦᠶᠡ ᠡᠴᠡ ᠡᠬᠢᠯᠡᠨ ᠦᠶᠡ ᠵᠠᠯᠭᠠᠨ ᠥᠯᠮᠡᠢ ᠭᠢᠰᠬᠢᠨ ᠭᠠᠷᠤᠭᠰᠠᠭᠠᠷ ᠥᠨᠥᠳᠥᠷ ᠲᠦ᠍ ᠬᠦᠷᠲᠡᠯᠡ ᠴᠥᠭᠡᠨ ᠦᠭᠡᠢ ᠪᠠᠢᠵᠤ ᠢᠷᠡᠵᠡᠢ᠃
ᠭᠡᠶᠡ ᠣᠷᠣᠨ ᠨᠤᠲᠤᠭ ᠤ᠋ᠨ ᠠᠭᠤᠳᠠᠮ ᠳᠡᠯᠭᠡᠷ ᠬᠢᠭᠡᠳ ᠠᠳᠠᠯᠢ ᠦᠭᠡᠢ ᠣᠨᠴᠠᠯᠢᠭ ᠠ᠋ᠴᠠ ᠪᠣᠯᠵᠤ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠰᠢᠨᠵᠢᠯᠡᠭᠡ ᠴᠦ᠍ ᠬᠣᠭᠣᠷᠣᠨᠳᠣ ᠪᠠᠨ ᠪᠠᠰᠠ ᠪᠠᠭᠠ ᠰᠠᠭᠠ ᠵᠥᠷᠢᠶᠡᠲᠡᠢ ᠭᠠᠵᠠᠷ ᠪᠣᠢ᠃ ᠭᠡᠪᠡᠴᠦ ᠶᠡᠷᠦᠩᠬᠡᠢ ᠳ᠋ᠡᠭᠡᠨ ᠠᠳᠠᠯᠢ ᠪᠠᠢᠳᠠᠭ᠃ ᠬᠠᠷᠢᠨ ᠡᠷᠲᠡ ᠴᠠᠭ ᠤ᠋ᠨ 《ᠬᠤᠷᠳᠤᠨ ᠮᠣᠷᠢᠨ ᠤ᠋ ᠰᠢᠨᠵᠢ ᠶ᠋ᠢᠨ ᠰᠤᠳᠤᠷ 》 ᠲᠤ᠌᠂ ᠲᠡᠦᠬᠡ ᠶ᠋ᠢᠨ ᠶᠡᠬᠡ ᠵᠠᠢ ᠶ᠋ᠢ ᠲᠤᠭᠤᠯᠵᠤ ᠢᠷᠡᠭᠰᠡᠨ ᠦ᠌ ᠬᠠᠷᠠᠭᠠ ᠪᠠᠷ ᠵᠠᠷᠢᠮ ᠵᠦᠢᠯᠡᠰ ᠨᠢ ᠬᠠᠭᠤᠴᠢᠷᠠᠵᠤ ᠬᠣᠵᠢᠮᠳᠠᠭᠰᠠᠨ ᠪᠥᠭᠡᠳ ᠵᠠᠷᠢᠮ ᠨᠢ ᠲᠡᠢᠨ ᠬᠦ᠌ ᠳᠠᠭᠠᠭᠠᠴᠠᠲᠠᠢ ᠤᠨᠤᠭᠠᠷᠢ ᠶ᠋ᠢ ᠰᠢᠨᠵᠢᠯᠡᠭᠰᠡᠨ ᠡᠴᠡ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠰᠢᠨᠵᠢᠯᠡᠭᠡ ᠲᠡᠢ ᠵᠥᠷᠢᠭᠰᠡᠨ ᠵᠦᠢᠯ ᠨᠡᠯᠢᠶᠡᠳ ᠪᠣᠢ᠃
ᠶᠡᠷᠦ ᠨᠢ ᠴᠦ᠍ ᠠᠳᠤᠭᠤ ᠶ᠋ᠢ ᠤᠨᠤᠭᠠᠷᠢ ᠶ᠋ᠢᠨ ᠪᠣᠯᠤᠭᠠᠳ ᠤᠷᠤᠯᠳᠤᠭᠠᠨ ᠤ᠋ ᠭᠡᠵᠦ ᠬᠣᠶᠠᠷ ᠬᠤᠪᠢᠶᠠᠨ ᠰᠢᠨᠵᠢᠳᠡᠭ᠃ ᠤᠨᠤᠭᠠᠷᠢ ᠶ᠋ᠢᠨ ᠮᠣᠷᠢ ᠤᠨᠤᠬᠤ ᠳ᠋ᠤ᠌ ᠳᠠᠭᠠᠭᠠᠴᠠᠲᠠᠢ ᠴᠤ᠌ ᠣᠷᠣᠯᠳᠣᠬᠤ ᠳ᠋ᠤ᠌ ᠤᠳᠠᠭᠠᠨ ᠪᠠᠢᠳᠠᠭ᠃ ᠲᠡᠭᠦᠨ ᠦ᠌ ᠶᠠᠰᠤ ᠬᠦᠨᠳᠦ ᠮᠢᠬᠠ ᠴᠢᠩᠭᠠ᠂ ᠠᠷᠠᠰᠤ ᠵᠤᠵᠠᠭᠠᠨ ᠵᠡᠷᠭᠡ ᠁ ᠡᠴᠡ ᠰᠢᠯᠲᠠᠭᠠᠯᠠᠭᠳᠠᠨᠠ᠃ ᠤᠷᠤᠯᠳᠤᠭᠠᠨ ᠤ᠋ ᠮᠣᠷᠢ᠂ ᠣᠷᠣᠯᠳᠣᠬᠤ ᠳ᠋ᠤ᠌ ᠬᠤᠷᠳᠤᠨ ᠪᠣᠯᠬᠤ ᠠ᠋ᠴᠠ ᠪᠢᠰᠢ ᠤᠨᠤᠬᠤ ᠳ᠋ᠤ᠌ ᠳᠠᠭᠠᠭᠠᠴᠠ ᠮᠠᠭᠤᠲᠠᠢ᠃ ᠲᠡᠭᠦᠨ ᠦ᠌ ᠶᠠᠰᠤ ᠬᠥᠩᠭᠡᠨ ᠂ ᠮᠢᠬᠠ ᠵᠠᠩᠭᠢᠷᠠᠬᠤ ᠦᠭᠡᠢ ᠂ ᠠᠷᠠᠰᠤ ᠨᠢᠮᠭᠡᠨ ᠪᠥᠭᠡᠳ ᠰᠤᠯᠠ ᠁ ᠵᠡᠷᠭᠡ ᠡᠴᠡ ᠰᠢᠯᠲᠠᠭᠠᠯᠠᠭᠳᠠᠨᠠ᠃
ᠮᠣᠷᠢᠨ ᠤ᠋ ᠬᠤᠷᠳᠤᠨ ᠰᠢᠨᠵᠢ ᠶ᠋ᠢ ᠣᠯᠠᠨ ᠲᠠᠯᠠ ᠠ᠋ᠴᠠ ᠰᠢᠨᠵᠢᠯᠡᠬᠦ ᠥᠨᠢᠷ ᠪᠠᠶᠠᠯᠢᠭ ᠲᠤᠷᠰᠢᠯᠭᠠ ᠶ᠋ᠢ ᠮᠠᠨ ᠤ᠋ ᠳᠡᠭᠡᠳᠦᠰ ᠤᠯᠠᠮᠵᠢᠯᠠᠵᠤ ᠦᠯᠡᠳᠡᠭᠡᠨ ᠥᠭᠴᠡᠢ ᠃ ᠵᠢᠱ᠌ᠢᠶᠡᠯᠡᠪᠡᠯ : ᠠᠳᠤᠭᠤᠨ ᠤ᠋ ᠨᠠᠰᠤ ᠪᠦᠷᠢ ᠳ᠋ᠡᠬᠢ ᠰᠢᠨᠵᠢᠯᠡᠭᠡ ᠬᠢᠭᠡᠳ ᠰᠤᠯᠠ ᠪᠠᠢᠭᠠ ᠳ᠋ᠤ᠌᠂ ᠤᠶᠠᠭᠠᠨ ᠳ᠋ᠤ᠌᠂ ᠳᠠᠪᠬᠢᠭᠠᠨ ᠳ᠋ᠤ᠌᠂ ᠤᠰᠤ ᠤᠤᠭᠤᠬᠤ ᠳ᠋ᠤ᠌᠂ ᠢᠨᠴᠠᠭᠠᠬᠤ ᠳ᠋ᠤ᠌᠂ ᠡᠷᠭᠢᠭᠦᠯᠭᠡ ᠪᠡᠷ᠂ ᠥᠩᠭᠡ ᠵᠢᠰᠦᠮ ᠢ᠋ᠶ᠋ᠡᠷ᠂ ᠢᠳᠡᠰᠢ ᠪᠡᠷ᠂ ᠰᠡᠭᠦᠯ ᠢ᠋ᠶ᠋ᠡᠷ᠂ ᠲᠣᠯᠣᠭᠠᠢ ᠪᠠᠷ᠂ ᠲᠤᠭᠤᠷᠠᠢ ᠪᠠᠷ᠂ ᠰᠢᠳᠦ ᠪᠡᠷ ᠰᠢᠨᠵᠢᠬᠦ ᠭᠡᠬᠦ ᠮᠡᠲᠦ ᠶ᠋ᠢᠨ ᠣᠯᠠᠨ ᠲᠠᠯᠠ ᠶ᠋ᠢᠨ ᠰᠢᠨᠵᠢᠯᠡᠭᠡ ᠪᠠᠢᠳᠠᠭ᠃
ᠠᠳᠤᠭᠤᠨ ᠳ᠋ᠤ᠌ ᠪᠠᠢᠭᠠ ᠮᠣᠷᠢ ᠶ᠋ᠢ ᠰᠢᠨᠵᠢᠬᠦ
ᠰᠠᠢᠨ ᠮᠣᠷᠢ ᠣᠯᠠᠨ ᠠᠳᠤᠭᠤᠨ ᠤ᠋ ᠳᠤᠮᠳᠠ ᠪᠠᠢᠬᠤ ᠪᠥᠭᠡᠳ ᠲᠠᠷᠭᠤᠨ ᠴᠠᠳᠬᠤᠯᠠᠩ ᠳ᠋ᠤᠨᠢ ᠦᠵᠡᠬᠦ ᠶ᠋ᠢ ᠬᠡᠯᠡᠵᠦ ᠪᠣᠢ ᠃ ᠲᠤᠬᠠᠢᠯᠠᠪᠠᠯ
① ᠭᠤᠷᠪᠠᠨ ᠣᠪᠣᠭᠠ ᠲᠡᠭᠰᠢ᠃
② ᠭᠡᠳᠡᠰᠦ ᠨᠢ ᠪᠤᠮᠪᠠ ᠬᠡᠯᠪᠡᠷᠢᠲᠡᠢ᠃
③ ᠴᠢᠬᠢ ᠨᠢ ᠳᠡᠯ ᠳ᠋ᠡᠭᠡᠨ ᠦᠯᠦ ᠳᠠᠷᠤᠭᠳᠠᠬᠤ᠃
④ ᠬᠥᠬᠥᠯ ᠨᠢ ᠰᠢᠩᠭᠡᠨ ᠮᠥᠷᠲᠡᠭᠡᠨ ᠨᠢᠳᠦᠨ ᠳ᠋ᠡᠭᠡᠨ ᠦᠯᠦ ᠬᠦᠷᠬᠦ᠃
⑤ ᠳᠣᠣᠷᠠᠲᠤ ᠤᠷᠤᠭᠤᠯ ᠠ᠋ᠴᠠ ᠳᠡᠭᠡᠳᠦ ᠤᠷᠤᠭᠤᠯ ᠡᠯᠪᠡᠭ ᠢᠯᠡᠭᠦᠦ᠃
⑥ ᠤᠷᠢᠳᠤ ᠲᠤᠭᠤᠷᠠᠢ ᠠ᠋ᠴᠠ ᠬᠣᠢᠲᠤ ᠲᠤᠭᠤᠷᠠᠢ ᠨᠢ ᠶᠡᠬᠡ᠃
⑦ ᠬᠥᠮᠦᠨ ᠢ᠋ ᠠᠳᠤᠭᠤᠨ ᠳᠣᠲᠣᠷᠠ ᠣᠷᠣᠬᠤ ᠲᠠᠢ ᠵᠡᠷᠭᠡ ᠤᠭᠲᠤᠵᠤ ᠬᠠᠷᠠᠬᠤ ᠂ ᠡᠳᠡᠭᠡᠷ ᠰᠢᠨᠵᠢ ᠪᠦᠷᠢᠳᠴᠦ ᠪᠠᠢᠪᠠᠯ ᠴᠢᠨᠦ ᠰᠢᠯᠢᠨ ᠰᠢᠨᠵᠢᠬᠦ ᠮᠣᠷᠢ ᠮᠥᠨ ᠪᠠᠢᠵᠤ ᠪᠣᠯᠤᠨᠠ ᠃
⑧ ᠵᠠᠢᠲᠠᠢ ᠠ᠋ᠴᠠ ᠬᠠᠷᠠᠬᠤ ᠳ᠋ᠤ᠌ ᠂ ᠳᠠᠯᠢᠤ ᠪᠤᠭᠤ ᠮᠡᠲᠦ ᠰᠢᠨᠵᠢᠲᠡᠢ ᠬᠠᠷᠠᠭᠳᠠᠬᠤ ᠮᠣᠷᠢ ᠶ᠋ᠢ ᠰᠢᠨᠵᠢᠯᠡ ᠃ ᠭᠡᠲᠡᠯᠡ ᠰᠣᠯᠵᠢᠷ ᠢᠮᠠᠭᠠ ᠰᠢᠭ᠋ ᠰᠢᠨᠵᠢᠲᠡᠢ ᠮᠣᠷᠢ ᠪᠠᠢᠳᠠᠭ᠃ ᠡᠭᠦᠨ ᠲᠡᠢ ᠡᠨᠳᠡᠭᠦᠷᠡᠵᠦ ᠪᠣᠯᠬᠤ ᠦᠭᠡᠢ᠃
⑨ ᠰᠡᠭᠦᠯ ᠨᠢ ᠠᠶᠤᠭᠰᠠᠨ ᠨᠣᠬᠠᠢ ᠶ᠋ᠢᠨ ᠰᠡᠭᠦᠯ ᠰᠢᠭ ᠪᠣᠯ ᠰᠠᠢᠨ ᠤ᠋ ᠰᠢᠨᠵᠢ ᠶ᠋ᠢᠨ ᠨᠢᠭᠡ ᠪᠢᠯᠡ᠃
ᠤᠨᠠᠭᠠ ᠪᠦᠬᠦᠢ ᠳ᠋ᠦ᠍ ᠰᠢᠨᠵᠢᠬᠦ
① ᠪᠥᠭᠡᠷᠡᠨ ᠭᠤᠷᠪᠠᠨ ᠰᠤᠳᠠᠰᠤ ᠭᠡᠵᠦ ᠪᠣᠢ ᠂ ᠲᠡᠷᠡ ᠰᠤᠳᠠᠰᠤ ᠳᠡᠭᠡᠳᠦ ᠪᠤᠢᠯᠠ ᠳᠡᠭᠡᠷᠡ ᠰᠠᠯᠠᠭᠠ ᠮᠤᠷᠤᠢ ᠦᠭᠡᠢ ᠭᠤᠷᠪᠠᠨ ᠬᠥᠬᠡᠪᠲᠦᠷ ᠰᠤᠳᠠᠰᠤᠨ ( ᠨᠠᠷᠢᠨ ᠤᠯᠠᠭᠠᠨ ᠢᠷᠠᠢᠭᠰᠠᠨ ᠰᠤᠳᠠᠰᠤ ᠪᠢᠰᠢ ) ᠳᠡᠭᠡᠷᠡ ᠡᠴᠡ ᠤᠷᠤᠭᠤ ᠤᠷᠭᠤᠭᠰᠠᠨ ᠪᠠᠢᠪᠠᠯ ᠲᠡᠷᠡ ᠤᠨᠠᠭᠠ ᠮᠠᠰᠢ ᠰᠠᠢᠨ ᠮᠣᠷᠢ ᠪᠣᠯᠤᠨᠠ ᠃ ᠬᠡᠷᠪᠡ ᠬᠣᠶᠠᠷ ᠰᠤᠳᠠᠰᠤ ᠨᠢ ᠭᠦᠢᠴᠡᠳ ᠂ ᠨᠢᠭᠡ ᠨᠢ ᠬᠠᠭᠠᠰ ᠪᠣᠯ ᠲᠡᠷᠡ ᠳᠤᠮᠳᠠ ᠵᠡᠷᠭᠡ ᠶ᠋ᠢᠨ ᠰᠠᠢᠨ ᠪᠣᠯᠤᠨᠠ᠃
② ᠤᠨᠠᠭᠠ ᠶ᠋ᠢᠨ ᠬᠠᠵᠠᠭᠤᠷᠢ ᠨᠢᠭᠡ ᠲᠥᠭᠡ ᠪᠠᠢᠪᠠᠯ ᠰᠠᠢᠨ᠃
③ ᠳᠡᠯᠡᠭᠦᠦ ᠰᠢᠳᠦᠲᠡᠢ ᠨᠢ ᠰᠠᠢᠨ᠂ ᠴᠤᠭᠯᠠᠭᠤ ᠰᠢᠳᠦᠲᠡᠢ ᠪᠣᠯ ᠮᠠᠭᠤ᠃
④ ᠳᠡᠯ ᠰᠡᠭᠦᠯ ᠨᠢ ᠪᠤᠷᠵᠢᠭᠢᠷ᠃
⑤ ᠡᠷᠡᠦ ᠳ᠋ᠦ᠍ᠨᠢ ᠰᠠᠬᠠᠯᠲᠠᠢ ᠃
⑥ ᠠᠮᠠᠨ ᠬᠦᠵᠦᠭᠦᠦ ᠶᠡᠬᠡ ᠃
⑦ ᠴᠢᠬᠢ ᠨᠢᠮᠭᠡᠨ ᠪᠥᠭᠡᠳ ᠦᠵᠦᠭᠦᠷᠲᠡᠢ᠃
⑧ ᠳᠥᠷᠪᠡᠨ ᠲᠤᠭᠤᠷᠠᠢ ᠬᠤᠷᠴᠠ ᠪᠥᠭᠡᠳ ᠬᠢᠮᠤᠰᠤᠯᠠᠵᠤ ᠭᠢᠰᠬᠢᠬᠦ᠃
⑨ ᠬᠣᠰᠢᠭᠤ ᠤᠷᠲᠤ᠃
⑩ ᠨᠢᠳᠦ ᠬᠥᠮᠥᠰᠬᠡ ᠶᠡᠬᠡ᠃
⑪ ᠤᠬᠤᠷᠬᠠᠢ ᠬᠣᠩᠬᠣᠷ᠃
⑫ ᠶᠡᠷᠦ ᠨᠢ ᠮᠢᠬᠠ ᠮᠠᠭᠤᠲᠠᠢ ᠵᠡᠷᠭᠡ ᠰᠢᠨᠵᠢ ᠪᠠᠢᠳᠠᠭ ᠃ ᠬᠠᠮᠤᠭ ᠤ᠋ᠨ ᠭᠣᠣᠯ ᠰᠢᠨᠵᠢᠯᠡᠭᠡ ᠭᠡᠪᠡᠯ ᠂ ᠠᠯᠠᠭᠳᠠᠭᠠ ᠮᠡᠲᠦ ᠬᠡᠯᠪᠡᠷᠢᠲᠡᠢ ᠂ ᠲᠤᠭᠤᠯ ᠬᠣᠩᠰᠢᠶᠠᠷ ᠂ ᠪᠦᠯᠲᠡᠭᠡᠷ ᠨᠢᠳᠦ ᠂ ᠢᠮᠠᠭᠠᠨ ᠴᠢᠬᠢᠲᠡᠢ ᠂ ᠰᠡᠭᠦᠯ ᠨᠢ ᠣᠭᠣᠳᠣᠩᠨᠠᠭᠰᠠᠨ ᠲᠤᠭᠤᠯ ᠤ᠋ᠨ ᠮᠡᠲᠦ ᠃ ᠰᠡᠷᠪᠡᠭᠡᠨ ᠣ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠬᠠᠪᠢᠷᠭᠠᠨ ᠮᠠᠲᠠᠭᠠᠰᠤ ᠨᠢ ᠭᠤᠶᠠ ᠠ᠋ᠴᠠ ᠭᠠᠳᠠᠭᠤᠷ ᠦᠵᠡᠭᠳᠡᠬᠦ ᠂ ᠳᠥᠷᠪᠡᠨ ᠬᠥᠯ ᠦ᠋ᠨ ᠭᠢᠰᠬᠢᠯᠲᠡ ᠴᠥᠭ ᠴᠥᠭ ᠭᠡᠰᠡᠨ ᠪᠠᠢᠪᠠᠯ ᠡᠷᠬᠡᠪᠰᠢ ᠰᠠᠢᠨ ᠮᠣᠷᠢ ᠪᠣᠯᠤᠨᠠ᠃
ᠪᠠᠰᠠ ᠨᠢᠭᠡ ᠨᠢ ᠤᠨᠠᠭᠠᠨ ᠤ᠋ ᠪᠡᠶᠡ ᠨᠢ ᠲᠤᠷᠤᠭ ᠪᠦᠳᠦᠭᠦᠨ ᠪᠥᠭᠡᠳ ᠳᠥᠯᠭᠡᠨ᠂ ᠬᠡᠵᠢᠶᠡᠳᠡ ᠭᠠᠵᠠᠷ ᠴᠢᠩᠨᠠᠨ ᠶᠠᠪᠤᠬᠤ ᠪᠠ ᠦᠷᠭᠦᠯᠵᠢ ᠰᠡᠭᠦᠯ ᠢ᠋ᠶ᠋ᠡᠨ ᠬᠣᠶᠠᠷ ᠲᠠᠢᠰᠢ ᠰᠠᠮᠪᠠᠭᠠᠨᠠᠭᠤᠯᠵᠤ ᠠᠯᠬᠤᠬᠤ ᠪᠥᠭᠡᠳ ᠭᠠᠵᠠᠷ ᠬᠠᠷᠠᠭᠰᠠᠨ ᠮᠡᠲᠦ ᠶᠠᠪᠤᠬᠤ ᠤᠨᠠᠭᠠ ᠰᠠᠢᠨ ᠃ ᠡᠪᠦᠳᠦᠭ ᠪᠣᠷᠪᠢ ᠰᠢᠯᠤᠭᠤᠨ ᠨᠠᠷᠢᠨ᠂ ᠪᠡᠶᠡ ᠨᠢ ᠪᠥᠭᠡᠷᠡᠩᠬᠡᠢ ᠨᠠᠷᠢᠨ ᠂ ᠡᠬᠡ ᠪᠡᠨ ᠠᠵᠢᠷᠭᠠᠯᠠᠨ ᠬᠠᠵᠠᠬᠤ ᠂ ᠮᠣᠷᠢᠳ ᠲᠠᠢ ᠬᠠᠨᠢᠯᠠᠬᠤ ᠡᠢᠮᠦ ᠤᠨᠠᠭᠠ ᠪᠦᠳᠦᠭᠦᠷᠡᠬᠦ ᠳᠣᠳᠣᠮ ᠰᠤᠯᠠᠷᠠᠨᠠ᠃
ᠳᠠᠭᠠ᠂ ᠰᠢᠳᠦᠯᠡᠩ ᠪᠦᠬᠦᠢ ᠳ᠋ᠦ᠍ ᠰᠢᠨᠵᠢᠬᠦ
① ᠪᠡᠶᠡ ᠨᠢ ᠲᠤᠷᠤᠭ ᠡᠯᠪᠡᠭ ᠄ ᠳᠥᠷᠪᠡᠨ ᠬᠥᠯ ᠪᠦᠳᠦᠭᠦᠨ ᠂ ᠭᠡᠳᠡᠰᠦ ᠨᠢᠷᠤᠭᠤ ᠰᠢᠯᠤᠭᠤᠨ ᠂ ᠲᠤᠭᠤᠷᠠᠢ ᠨᠢ ᠶᠡᠬᠡ ᠂ ᠤᠷᠤᠭᠤᠯ ᠬᠥᠮᠥᠰᠬᠡ ᠡᠯᠪᠡᠭ ᠂ ᠱᠣᠭᠰᠢᠬᠤ ᠨᠢ ᠬᠦᠨᠳᠦ ᠂ ᠨᠢᠳᠦ ᠨᠢ ᠲᠡᠯᠡᠭᠦᠦ ᠪᠥᠭᠡᠳ ᠬᠠᠪᠰᠤᠷᠭᠠ ᠨᠢ ᠲᠡᠭᠰᠢ ᠪᠣᠯ ᠰᠠᠢᠨ ᠃
② ᠳᠥᠷᠪᠡᠨ ᠬᠥᠯ ᠢ᠋ᠶ᠋ᠡᠨ ᠨᠠᠷᠠᠨ ᠳ᠋ᠤ᠌ ᠡᠭᠡᠭᠡᠵᠦ ᠬᠡᠪᠲᠡᠬᠦ ᠂ ᠪᠠᠭᠠᠭᠠᠳ ᠪᠠᠭᠠᠰᠤ ᠪᠠᠨ ᠦᠨᠦᠷᠯᠡᠬᠦ ᠂ ᠬᠥᠮᠦᠨ ᠢ᠋ ᠡᠷᠭᠢᠵᠦ ᠬᠠᠷᠠᠬᠤ ᠂ ᠭᠡᠭᠦᠦ ᠠᠵᠢᠷᠭᠠᠯᠠᠵᠤ ᠶᠠᠪᠤᠬᠤ ᠡᠨᠡ ᠰᠠᠢᠨ᠃
③ ᠤᠷᠲᠤ ᠬᠥᠯ ᠰᠢᠳᠤᠷᠭᠤ᠂ ᠬᠣᠷᠢᠲᠤ ᠬᠥᠯ ᠰᠠᠭᠤᠩᠭᠢ᠂ ᠪᠣᠷᠪᠢ ᠪᠦᠳᠦᠭᠦᠨ᠂ ᠡᠪᠴᠢᠭᠦᠦ ᠳᠣᠣᠷᠠ ᠪᠥᠭᠡᠳ ᠣᠷᠣᠭᠰᠢ ᠳᠣᠷᠢᠩᠬᠢ ᠶᠣᠷᠪᠣᠭᠣᠷ᠂ ᠬᠦᠵᠦᠭᠦᠦ ᠬᠣᠩᠰᠢᠶᠠᠷ ᠤᠷᠲᠤ ᠪᠣᠯ ᠡᠨᠡ ᠮᠠᠰᠢ ᠬᠤᠷᠳᠤᠨ ᠤ᠋ ᠰᠢᠨᠵᠢ᠃
ᠤᠶᠠᠭᠠᠨ ᠳᠡᠭᠡᠷᠡ ᠰᠢᠨᠵᠢᠬᠦ
① ᠰᠠᠢᠨ ᠮᠣᠷᠢ ᠶ᠋ᠢ ᠬᠣᠯᠠ ᠠ᠋ᠴᠠ ᠬᠠᠷᠠᠬᠤ ᠳ᠋ᠤ᠌ ᠤᠷᠲᠤ ᠬᠥᠯ ᠢ᠋ᠶ᠋ᠡᠨ ᠬᠣᠢᠰᠢ ᠵᠢᠰᠢᠭᠦᠦ ᠰᠢᠭᠠᠭᠰᠠᠨ ᠭᠠᠳᠠᠰᠤ ᠮᠡᠲᠦ ᠲᠤᠩ ᠰᠢᠳᠤᠷᠭᠤ ᠭᠢᠰᠬᠢᠪᠡᠯ ᠠᠩᠬᠠᠷᠤᠨ ᠰᠢᠨᠵᠢᠬᠦ ᠮᠣᠷᠢ ᠶ᠋ᠢᠨ ᠨᠢᠭᠡ ᠳᠡ᠃
② ᠤᠶᠠᠬᠤ ᠳ᠋ᠤ᠌ ᠳᠥᠷᠪᠡᠨ ᠬᠥᠯ ᠨᠢ ᠨᠡᠢᠯᠡᠬᠦ ᠰᠢᠬᠠᠮ ᠭᠢᠰᠬᠢᠭᠡᠳ ᠤᠶᠠᠭᠠᠨ ᠳ᠋ᠠᠭᠠᠨ ᠲᠦᠰᠢᠭᠡᠳ ᠦᠷᠭᠦᠯᠵᠢ ᠵᠡᠭᠦᠷᠮᠡᠭᠯᠡᠨ ᠤᠨᠲᠠᠭᠠᠳ ᠪᠠᠢᠬᠤ ᠂ ᠭᠡᠨᠡᠳᠲᠡ ᠰᠣᠴᠢᠨ ᠰᠡᠷᠡᠬᠦ᠂ ᠰᠤᠨᠢᠶᠠᠬᠤ᠃
③ ᠡᠮᠦᠨᠡ ᠬᠣᠶᠠᠷ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠪᠴᠢᠭᠦᠦ ᠪᠡᠨ ᠳᠡᠯᠡᠳᠬᠦ᠃
④ ᠬᠠᠷᠭᠠᠮ ᠢ᠋ ᠨᠢ ᠬᠣᠢᠨᠠ ᠠ᠋ᠴᠠ ᠨᠢ ᠬᠠᠷᠠᠬᠤ ᠳ᠋ᠤ᠌ ᠪᠥᠬᠥᠢᠵᠦ ᠨᠢᠰᠬᠦ ᠭᠡᠵᠦ ᠪᠠᠢᠭᠠ ᠪᠦᠷᠭᠦᠳ ᠦ᠋ᠨ ᠪᠠᠢᠳᠠᠯ ᠲᠠᠢ᠃
⑤ ᠲᠡᠰᠢᠶᠡ ᠨᠢ ᠳᠡᠰ ᠦ᠋ᠨ ᠵᠢᠭᠦᠷ ᠮᠡᠲᠦ ᠬᠡᠯᠪᠡᠷᠢᠲᠡᠢ᠃
⑥ ᠵᠣᠭᠰᠣᠬᠤ ᠨᠢ ᠮᠡᠯᠡᠬᠡᠢ ᠳᠦᠦᠭᠡᠬᠦ ᠮᠡᠲᠦ ᠶᠠᠩᠵᠤᠲᠠᠢ᠃
ᠰᠣᠷᠢᠵᠤ ᠳᠠᠪᠬᠢᠭᠤᠯᠵᠤ ᠰᠢᠨᠵᠢᠬᠦ
① ᠬᠤᠷᠳᠤᠨ ᠮᠣᠷᠢᠨ ᠤ᠋ ᠳᠠᠪᠬᠢᠬᠤ ᠶ᠋ᠢ ᠬᠠᠵᠠᠭᠤ ᠠ᠋ᠴᠠ ᠨᠢ ᠬᠠᠷᠠᠬᠤ ᠳ᠋ᠤ᠌ ᠂ ᠳᠥᠷᠪᠡᠨ ᠬᠥᠯ ᠦ᠋ᠨ ᠬᠢᠨᠢ ᠬᠠᠮᠤᠬᠤ ᠨᠢ ᠶᠠᠭ ᠬᠣᠯᠪᠣᠭᠠᠲᠠᠢ ᠶᠤᠮ ᠰᠢᠭ᠋ ᠦᠵᠡᠭᠳᠡᠨᠡ᠃
② ᠲᠤᠭᠤᠷᠠᠢ ᠶ᠋ᠢᠨ ᠮᠥᠷ ᠨᠢ ᠪᠦᠬᠦᠯᠢ ᠪᠢᠰᠢ ᠂ ᠪᠦᠷ ᠬᠢᠮᠤᠰᠤᠯᠠᠵᠤ ᠡᠮᠦᠨᠡ ᠬᠠᠭᠠᠰ ᠨᠢ ᠭᠠᠷᠤᠭᠰᠠᠨ ᠪᠠᠢᠭᠠ᠃
③ ᠣᠢᠷᠠᠬᠠᠨ ᠰᠣᠷᠢᠭᠠᠨ ᠳ᠋ᠤ᠌ ᠳᠥᠷᠪᠡᠨ ᠬᠥᠯ ᠦ᠋ᠨ ᠮᠥᠷ ᠨᠢᠭᠡ ᠯᠡ ᠱᠤᠭᠤᠮ ᠳ᠋ᠤ᠌ ᠵᠢᠷᠢᠢᠨ ᠦᠵᠡᠭᠳᠡᠨᠡ᠃ ᠵᠢᠱ᠌ᠢᠶᠡᠯᠡᠪᠡᠯ : 0 – 00 – 0 ᠂ 0 – 00 – 0
ᠲᠣᠯᠣᠭᠠᠢ ᠪᠠᠷ ᠰᠢᠨᠵᠢᠬᠦ
① ᠠᠷᠢᠶᠠᠲᠠᠨ ᠤ᠋ ᠲᠣᠯᠣᠭᠠᠢ ᠭᠡᠭᠴᠢ ᠨᠢ ᠤᠷᠤᠭᠤᠯ ᠠᠮᠠ ᠶᠡᠬᠡ ᠂ ᠬᠠᠩᠰᠢᠶᠠᠷ ᠲᠠᠰᠤᠷᠬᠠᠢ ᠂ ᠨᠢᠳᠦ ᠤᠯᠠᠭᠠᠨ ᠪᠥᠭᠡᠳ ᠳᠣᠭᠰᠢᠨ ᠂ ᠨᠢᠳᠦᠨ ᠦ᠌ ᠶᠡᠬᠡ ᠪᠠᠭᠠ ᠨᠢ ᠳᠤᠮᠳᠠᠴᠢ ᠪᠠᠢᠳᠠᠭ᠃
② ᠮᠡᠯᠡᠬᠡᠢ ᠲᠣᠯᠣᠭᠠᠢᠲᠤ ᠭᠡᠭᠴᠢ ᠨᠢ ᠲᠣᠯᠣᠭᠠᠢ ᠨᠢ ᠪᠣᠭᠣᠨᠢ ᠰᠢᠭ᠋ ᠂ ᠮᠠᠩᠨᠠᠢ ᠶᠡᠬᠡ ᠂ ᠨᠢᠳᠦ ᠶᠡᠬᠡ ᠂ ᠬᠡᠯᠡᠨ ᠦ᠌ ᠬᠡᠪᠲᠡᠰᠢ ᠠᠭᠤᠤ ᠂ ᠠᠮᠠ ᠶᠡᠬᠡ ᠂ ᠰᠠᠮᠰᠠ ᠶᠡᠬᠡ ᠂ ᠡᠨᠡ ᠡᠷᠬᠢᠮ ᠰᠠᠢᠨ᠃
③ ᠬᠣᠨᠢᠨ ᠲᠣᠯᠣᠭᠠᠢ ᠭᠡᠭᠴᠢ ᠨᠢ ᠪᠥᠬᠥᠢᠭᠰᠡᠨ ᠲᠣᠯᠣᠭᠠᠢᠲᠠᠢ ᠂ ᠮᠠᠩᠨᠠᠢ ᠶᠡᠬᠡ ᠤᠷᠲᠤ ᠂ ᠲᠣᠯᠣᠭᠠᠢ ᠶ᠋ᠢᠨ ᠠᠭᠤᠯᠵᠠᠷ ᠪᠦᠳᠦᠭᠦᠨ ᠂ ᠨᠢᠳᠦ ᠶᠡᠬᠡ ᠂ ᠬᠡᠯᠡᠨ ᠦ᠌ ᠬᠡᠪᠲᠡᠰᠢ ᠠᠭᠤᠤ ᠂ ᠠᠮᠠ ᠤᠷᠤᠭᠤᠯ ᠶᠡᠬᠡ᠃
④ ᠲᠠᠤᠯᠠᠢ ᠶ᠋ᠢᠨ ᠲᠣᠯᠣᠭᠠᠢ ᠭᠡᠭᠴᠢ ᠨᠢ ᠨᠢᠳᠦ ᠶᠡᠬᠡ ᠂ ᠬᠠᠩᠰᠢᠶᠠᠷ ᠪᠥᠭᠲᠥᠷ ( ᠮᠣᠩᠬᠣᠷ ) ᠂ ᠲᠣᠯᠣᠭᠠᠢ ᠪᠢᠴᠢᠬᠠᠨ ᠂ ᠴᠢᠬᠢ ᠶᠡᠬᠡ ᠂ ᠨᠢᠭᠤᠷ ᠶᠡᠬᠡ ᠂ ᠬᠡᠯᠡᠨ ᠦ᠌ ᠬᠡᠪᠲᠡᠰᠢ ᠶᠡᠬᠡ ᠠᠭᠤᠤ ᠂ ᠡᠨᠡ ᠡᠷᠬᠢᠮ ᠰᠠᠢᠨ᠃
⑤ ᠬᠦᠳᠡᠷᠢ ᠶ᠋ᠢᠨ ᠲᠣᠯᠣᠭᠠᠢ ᠭᠡᠭᠴᠢ ᠨᠢ ᠪᠢᠴᠢᠬᠠᠨ ᠤᠷᠲᠤ ᠲᠣᠯᠣᠭᠠᠢᠲᠠᠢ ᠂ ᠲᠥᠭᠥᠷᠢᠭ ᠨᠢᠳᠦᠲᠡᠢ ᠂ ᠴᠢᠬᠢ ᠶᠡᠬᠡ ᠂ ᠠᠮᠠ ᠬᠠᠮᠠᠷ ᠴᠡᠪᠡᠷ᠃
⑥ ᠪᠤᠭᠤ ᠶ᠋ᠢᠨ ᠲᠣᠯᠣᠭᠠᠢ ᠭᠡᠭᠴᠢ ᠨᠢ ᠰᠢᠳᠤᠷᠭᠤ ᠬᠠᠮᠠᠷ ᠶᠡᠬᠡ ᠂ ᠮᠢᠬᠠ ᠶᠠᠰᠤᠨ ᠤ᠋ ᠵᠠᠪᠰᠠᠷ ᠨᠢ ᠢᠯᠭᠠᠮᠵᠢᠲᠠᠢ ᠂ ᠬᠡᠯᠡᠨ ᠦ᠌ ᠬᠡᠪᠲᠡᠰᠢ ᠪᠢᠴᠢᠬᠠᠨ ᠂ ᠮᠠᠩᠨᠠᠢ ᠪᠢᠴᠢᠬᠠᠨ᠃
ᠲᠤᠭᠤᠷᠠᠢ ᠪᠠᠷ ᠰᠢᠨᠵᠢᠬᠦ
① ᠴᠢᠬᠢᠲᠦ ᠶ᠋ᠢᠨ ᠲᠤᠭᠤᠷᠠᠢ ᠭᠡᠭᠴᠢ ᠨᠢ ᠪᠥᠭᠡᠷᠡᠩᠬᠡᠢ᠂ ᠭᠠᠬᠠᠢ ᠪᠢᠴᠢᠬᠠᠨ ᠪᠥᠭᠡᠳ ᠦᠵᠦᠭᠦᠷ ᠲᠡᠭᠡᠨ ᠭᠦᠯᠮᠦᠷᠢ ᠂ ᠥᠰᠥᠭᠡᠢ ᠵᠤᠵᠠᠭᠠᠨ ᠂ ᠢᠷᠮᠡᠭ ᠨᠢᠮᠭᠡᠨ ᠂ ᠴᠥᠭᠥᠴᠡ ᠨᠢ ᠭᠦᠨᠡ ᠂ ᠭᠠᠳᠠᠭᠠᠳᠤ ᠦᠵᠦᠭᠦᠷ ᠬᠤᠷᠴᠠ᠃
② ᠯᠠᠪᠠᠢ ᠠᠶᠠᠭᠠ ᠭᠡᠭᠴᠢ ᠨᠢ ᠲᠤᠭᠤᠷᠠᠢ ᠨᠢ ᠴᠢᠬᠢᠲᠦ ᠶ᠋ᠢᠨ ᠲᠤᠭᠤᠷᠠᠢᠲᠠᠢ ᠠᠳᠠᠯᠢ ᠲᠥᠰᠦᠷ ᠪᠣᠯᠪᠠᠴᠤ ᠭᠠᠬᠠᠢ ᠤᠷᠲᠤ ᠨᠠᠷᠢᠨ ᠂ ᠬᠠᠲᠠᠭᠰᠠᠨ ᠮᠡᠲᠦ ᠲᠤᠭᠤᠷᠠᠢ ᠨᠢ ᠥᠨᠳᠥᠷ ᠪᠥᠭᠡᠳ ᠢᠷᠮᠡᠭ ᠨᠢ ᠬᠠᠯᠪᠠᠭᠠᠷ᠃
③ ᠮᠢᠬᠠᠨ ᠲᠤᠭᠤᠷᠠᠢ ᠭᠡᠭᠴᠢ ᠨᠢ ᠬᠠᠯᠪᠠᠭᠠᠷ ᠪᠣᠭᠣᠨᠢ ᠪᠥᠭᠡᠳ ᠭᠣᠨᠵᠤᠭᠤᠢᠯᠢᠭ᠂ ᠲᠤᠭᠤᠷᠠᠢ ᠶ᠋ᠢᠨ ᠦᠵᠦᠭᠦᠷ ᠤᠷᠲᠤ ᠂ ᠥᠰᠥᠭᠡᠢ ᠪᠡᠷ ᠢ᠋ᠶ᠋ᠡᠨ ᠭᠠᠵᠠᠷ ᠴᠢᠷᠬᠦ ᠂ ᠭᠠᠬᠠᠢ ᠶᠡᠬᠡ ᠪᠤᠯᠲᠠᠢᠬᠤ ᠂ ᠡᠨᠡ ᠲᠤᠭᠤᠷᠠᠢ ᠮᠠᠭᠤ᠃
④ ᠰᠢᠪᠠᠭᠤᠨ ᠬᠢᠮᠤᠰᠤ ᠭᠡᠭᠴᠢ ᠨᠢ ᠲᠤᠭᠤᠷᠠᠢ ᠨᠢ ᠨᠢᠮᠭᠡᠨ ᠬᠠᠯᠪᠠᠭᠠᠷ ᠂ ᠶᠡᠬᠡ ᠪᠣᠭᠣᠨᠢ ᠂ ᠲᠤᠭᠤᠷᠠᠢ ᠶ᠋ᠢᠨ ᠭᠠᠬᠠᠢ ᠶᠡᠬᠡ ᠪᠤᠯᠲᠠᠢᠵᠤ ᠶᠠᠪᠤᠬᠤ ᠂ ᠥᠰᠥᠭᠡᠢ ᠭᠠᠵᠠᠷ ᠴᠢᠷᠬᠦ ᠂ ᠡᠨᠡ ᠲᠤᠭᠤᠷᠠᠢ ᠮᠠᠭᠤ᠃
⑤ ᠰᠠᠷᠯᠤᠭ ᠤ᠋ᠨ ᠲᠤᠭᠤᠷᠠᠢ ᠭᠡᠭᠴᠢ ᠨᠢ ᠤᠭ ᠪᠦᠳᠦᠭᠦᠨ ᠶᠡᠬᠡ ᠂ ᠠᠮᠠᠰᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠮᠦᠷᠢᠭᠦᠦ ( ᠴᠣᠮᠪᠣᠩ ) ᠂ ᠢᠷᠮᠡᠭ ᠨᠢ ᠬᠤᠷᠴᠠ ᠭᠣᠨᠵᠤᠭᠤᠢᠯᠢᠭ ᠠᠶᠠᠲᠠᠢ᠂ ᠥᠰᠥᠭᠡᠢ ᠵᠦᠭ ᠲᠦ᠍ ᠠᠩᠭᠠᠷᠬᠠᠢ ᠂ ᠭᠠᠬᠠᠢ ᠶ᠋ᠢᠨ ᠬᠥᠩᠬᠥᠷ ᠨᠢ ᠬᠠᠲᠠᠩᠭᠢᠷ᠂ ᠡᠨᠡ ᠲᠣᠭᠣᠷᠢ ᠡᠷᠬᠢᠮ᠃
ᠰᠡᠭᠦᠯ ᠢ᠋ᠶ᠋ᠡᠷ ᠰᠢᠨᠵᠢᠬᠦ
① ᠪᠦᠳᠦᠭᠦᠨ ᠪᠥᠭᠡᠳ ᠪᠣᠭᠣᠨᠢ ᠡᠷᠴᠢᠮᠲᠡᠢ ᠰᠡᠭᠦᠯ ᠰᠠᠢᠨ᠃
② ᠨᠠᠷᠢᠨ ᠪᠥᠭᠡᠳ ᠤᠷᠲᠤ ᠰᠡᠭᠦᠯ ᠠᠳᠠᠭ᠃
③ ᠰᠣᠯᠪᠢᠪᠠᠯ ᠳᠤᠮᠳᠠᠴᠢ (ᠪᠦᠳᠦᠭᠦᠨ ᠪᠥᠭᠡᠳ ᠤᠷᠲᠤ ᠰᠤᠯᠠ ᠂ ᠨᠠᠷᠢᠨ ᠪᠥᠭᠡᠳ ᠪᠣᠭᠣᠨᠢ ᠡᠷᠴᠢᠮᠲᠡᠢ )᠃
ᠳᠠᠭᠤᠨ ᠢ᠋ᠶ᠋ᠠᠷ ᠰᠢᠨᠵᠢᠬᠦ
① ᠪᠣᠯᠵᠣᠮᠣᠷ ᠤ᠋ᠨ ᠳᠠᠭᠤᠨ ᠮᠡᠲᠦ ᠨᠠᠷᠢᠨ ᠡᠷᠴᠢᠮᠲᠡᠢ ᠪᠣᠯ ᠡᠷᠬᠢᠮ᠃
② ᠡᠯᠢᠶᠡ ᠶ᠋ᠢᠨ ᠳᠠᠭᠤᠨ ᠮᠡᠲᠦ ᠡᠷᠴᠢᠮᠲᠡᠢ ᠪᠣᠯ ᠳᠤᠮᠳᠠ᠃
③ ᠭᠠᠬᠠᠢ ᠶ᠋ᠢᠨ ᠳᠠᠭᠤ ᠮᠡᠲᠦ ᠪᠥᠭᠡᠳ ᠬᠠᠮᠠᠷ ᠢ᠋ᠶ᠋ᠠᠨ ᠬᠤᠸᠠᠷᠳ᠋ ᠭᠡᠵᠦ ᠶᠡᠬᠡ ᠳᠤᠤᠭᠠᠷᠭᠠᠳᠠᠭ ᠨᠢ ᠠᠳᠠᠭ ᠮᠠᠭᠤ᠃
ᠢᠳᠡᠰᠢ ᠪᠡᠷ ᠰᠢᠨᠵᠢᠬᠦ
① ᠢᠳᠡᠰᠢ ᠶᠡᠬᠡ ᠂ ᠪᠠᠭᠠᠰᠤ ᠪᠢᠴᠢᠬᠠᠨ ᠪᠣᠯ ᠡᠷᠬᠢᠮ᠃
② ᠢᠳᠡᠰᠢ ᠪᠠᠭᠠ ᠂ ᠪᠠᠭᠠᠰᠤ ᠶᠡᠬᠡ ᠪᠣᠯ ᠠᠳᠠᠭ᠃
③ ᠰᠣᠯᠪᠢᠪᠠᠯ ᠳᠤᠮᠳᠠᠴᠢ ( ᠢᠳᠡᠰᠢ ᠶᠡᠬᠡ ᠂ ᠪᠠᠭᠠᠰᠤ ᠶᠡᠬᠡ ᠪᠤᠶᠤ ᠢᠳᠡᠰᠢ ᠪᠠᠭᠠ ᠂ ᠪᠠᠭᠠᠰᠤ ᠪᠠᠭᠠ ) ᠃
ᠤᠰᠤ ᠤᠤᠭᠤᠬᠤ ᠪᠠᠷ ᠰᠢᠨᠵᠢᠬᠦ
① ᠤᠰᠤ ᠶ᠋ᠢ ᠭᠤᠷᠪᠠᠨ ᠦᠶᠡ ᠲᠠᠰᠤᠯᠤᠨ ᠤᠤᠭᠤᠪᠠᠯ ᠪᠠᠷᠰ ᠤ᠋ᠨ ᠶᠣᠰᠣᠲᠤ ᠲᠤᠯᠠ ᠰᠠᠢᠨ᠃
② ᠤᠰᠤ ᠶ᠋ᠢ ᠬᠣᠶᠠᠷ ᠦᠶᠡ ᠲᠠᠰᠤᠯᠵᠤ ᠤᠤᠭᠤᠪᠠᠯ ᠴᠢᠬᠢᠲᠡᠢ ᠪᠤᠶᠤ ᠪᠤᠭᠤ ᠶᠣᠰᠣᠲᠤ ᠲᠤᠯᠠ ᠳᠤᠮᠳᠠᠴᠢ᠃
③ ᠤᠰᠤ ᠶ᠋ᠢ ᠲᠠᠰᠤᠯᠤᠯ ᠦᠭᠡᠢ ᠭᠠᠭᠴᠠᠬᠠᠨ ᠶᠡᠬᠡ ᠤᠤᠭᠤᠪᠠᠯ ᠡᠯᠵᠢᠭᠡ ᠬᠢᠭᠡᠳ ᠦᠬᠡᠷ ᠶᠣᠰᠣᠲᠤ ᠲᠤᠯᠠ ᠮᠠᠭᠤ ᠂ ᠭᠡᠪᠡᠴᠦ ᠶᠡᠷᠦ ᠶ᠋ᠢᠨ ᠲᠡᠵᠢᠭᠡᠬᠦ ᠳ᠋ᠦ᠍ ᠰᠠᠢᠨ ᠃ ᠡᠩ ᠦ᠋ᠨ ᠤᠨᠤᠭᠠᠷᠢ ᠳ᠋ᠤ᠌ ᠰᠠᠢᠨ᠃
ᠮᠥᠷ ᠢ᠋ᠶ᠋ᠡᠷ ᠰᠢᠨᠵᠢᠬᠦ
① ᠲᠤᠭᠤᠷᠠᠢ ᠶ᠋ᠢᠨ ᠢᠷᠮᠡᠭ ᠡᠴᠡ ᠥᠭᠡᠷᠡ ᠲᠣᠳᠣ ᠮᠥᠷ ᠦᠭᠡᠢ᠂ ᠪᠥᠭᠡᠳ ᠥᠰᠥᠭᠡᠢ ᠶ᠋ᠢᠨ ᠮᠥᠷ ᠪᠠᠯᠠᠷᠬᠠᠢ ᠪᠣᠯᠪᠠᠯ ᠡᠷᠬᠢᠮ ᠰᠠᠢᠨ᠃
② ᠤᠷᠲᠤ ᠬᠥᠯ ᠦ᠋ᠨ ᠮᠥᠷ ᠡᠴᠡ ᠬᠣᠢᠲᠤ ᠬᠥᠯ ᠦ᠋ᠨ ᠮᠥᠷ ᠬᠡᠳᠦ ᠭᠢᠰᠬᠢᠪᠡᠯ ᠳᠤᠮᠳᠠ᠃
③ ᠳᠥᠷᠪᠡᠨ ᠬᠥᠯ ᠦ᠋ᠨ ᠮᠥᠷ ᠪᠦᠬᠦᠯᠢ ᠲᠣᠳᠣ ᠪᠣᠯᠤᠭᠠᠳ ᠤᠷᠲᠤ ᠬᠥᠯ ᠦ᠋ᠨ ᠮᠥᠷ ᠢ᠋ ᠬᠣᠢᠲᠤ ᠬᠥᠯ ᠦ᠋ᠨ ᠮᠥᠷ ᠡᠰᠡ ᠭᠦᠢᠴᠡᠨ ᠭᠢᠰᠬᠢᠪᠡᠯ ᠠᠳᠠᠭ ᠮᠠᠭᠤ᠃
ᠴᠢᠬᠢ ᠪᠡᠷ ᠰᠢᠨᠵᠢᠬᠦ
① ᠴᠢᠬᠢᠨ ᠦ᠌ ᠤᠷᠭᠤᠴᠠ ᠬᠠᠪᠴᠢᠭ ᠬᠡᠪ ᠲᠡᠢ ᠤᠷᠭᠤᠭᠰᠠᠨ ᠪᠥᠭᠡᠰᠦ ᠣᠷᠣᠭᠠ ᠪᠥᠭᠡᠳ ᠬᠤᠷᠴᠠ ᠴᠢᠬᠢ ᠲᠤᠯᠠ ᠠᠶᠤᠮᠠᠲᠠᠭᠠᠢ ᠭᠡᠳᠡᠭ᠃
② ᠴᠢᠬᠢ ᠨᠢ ᠬᠣᠶᠠᠷ ᠲᠡᠢᠰᠢ ᠳᠠᠯᠪᠠᠩ ᠪᠥᠭᠡᠰᠦ ᠪᠡᠯᠪᠡᠰᠦᠨ ᠵᠠᠶᠠᠭᠠᠲᠤ ᠲᠤᠯᠠ ᠲᠡᠢᠨ ᠪᠠ ᠬᠣᠯᠠ ᠠᠶᠠᠨ ᠳ᠋ᠤ᠌ ᠴᠡᠭᠡᠷᠯᠡᠬᠦ᠃
③ ᠬᠣᠶᠠᠷ ᠴᠢᠬᠢᠨ ᠦ᠌ ᠦᠵᠦᠭᠦᠷ ᠰᠢᠬᠠᠮ ᠰᠠᠷᠲᠠᠩ ᠪᠥᠭᠡᠳ ᠬᠣᠲᠣᠭᠣᠷ ᠪᠥᠭᠡᠰᠦ ᠣᠯᠠᠨ ᠢᠵᠢᠯᠢ ᠲᠡᠢ᠃
④ ᠤᠨᠤᠵᠤ ᠶᠠᠪᠤᠬᠤ ᠳ᠋ᠤ᠌ ᠴᠢᠬᠢ ᠪᠡᠨ ᠰᠣᠯᠪᠢᠵᠤ ᠬᠠᠢᠴᠢᠯᠠᠨ ᠶᠠᠪᠤᠪᠠᠯ ᠬᠤᠷᠳᠤᠨ ᠤ᠋ ᠲᠡᠮᠳᠡᠭ᠃
⑤ ᠴᠢᠬᠢ ᠨᠢ ᠤᠷᠤᠭᠰᠢ ᠮᠥᠬᠥᠬᠡᠷ ᠪᠥᠭᠡᠰᠦ ᠡᠮᠦᠨᠡ ᠡᠴᠡ ᠪᠡᠨ ᠬᠠᠯᠢᠷᠠᠨ ᠦᠷᠭᠦᠬᠦ᠃
⑥ ᠴᠢᠬᠢ ᠰᠢᠳᠤᠷᠭᠤ ᠨᠢᠮᠭᠡᠨ ᠤᠷᠲᠤ ᠨᠢ ᠰᠠᠢᠨ᠃
ᠨᠢᠳᠦᠨ ᠬᠠᠷᠠᠴᠠ ᠪᠠᠷ ᠰᠢᠨᠵᠢᠬᠦ
① ᠨᠢᠳᠦ ᠬᠣᠶᠠᠷ ᠲᠡᠢᠰᠢ ᠬᠠᠵᠠᠭᠠᠢ ᠳᠡᠭᠡᠷᠡ ᠳᠣᠣᠷᠠ ᠬᠠᠷᠠᠭᠳᠠᠪᠠᠯ ᠭᠠᠵᠠᠷᠯᠠᠬᠤ ᠪᠣᠯᠤᠨ ᠭᠦᠶᠦᠬᠦ ᠮᠠᠭᠠᠳ ᠦᠭᠡᠢ᠃
② ᠵᠠᠰᠠᠵᠤ ᠪᠠᠢᠬᠤ ᠴᠠᠭ ᠲᠤ᠌ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠬᠠᠷᠠᠨ᠂ ᠤᠨᠤᠬᠤ ᠳ᠋ᠤ᠌ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠨ ᠠᠯᠢᠶᠠ ᠬᠤᠷᠴᠠ ᠪᠣᠯᠭᠠᠪᠠᠯ ᠦᠯᠦ ᠭᠦᠶᠦᠬᠦ ᠶ᠋ᠢᠨ ᠲᠡᠮᠳᠡᠭ᠃
③ ᠨᠢᠳᠦ ᠪᠡᠨ ᠴᠡᠪᠴᠢᠯᠬᠢᠯᠡᠵᠦ ᠡᠵᠡᠨ ᠢ᠋ᠶ᠋ᠡᠨ ᠬᠠᠵᠠᠯᠠᠬᠤ ᠶ᠋ᠢ ᠳᠤᠷᠠᠯᠠᠪᠠᠯ ᠡᠵᠡᠨ ᠡᠴᠡ ᠪᠡᠨ ᠰᠠᠯᠤᠯᠴᠠᠬᠤ ᠶ᠋ᠢᠨ ᠲᠡᠮᠳᠡᠭ᠃
④ ᠨᠢᠳᠦ ᠪᠡᠨ ᠳᠤᠯᠠᠭᠠᠨ ᠢ᠋ᠶ᠋ᠠᠷ ᠬᠠᠷᠠᠨ ᠢᠨᠠᠭ ᠡᠷᠡ ᠡᠮᠡ ᠮᠡᠲᠦ ᠬᠠᠷᠠᠴᠠ ᠪᠠᠷ ᠰᠠᠢᠬᠠᠨ ᠠᠭᠠᠰᠢ ᠠᠭᠠᠯᠢᠯᠠᠨ ᠬᠥᠮᠦᠨ ᠦ᠌ ᠮᠥᠷᠦᠨ ᠳᠡᠭᠡᠷᠡ ᠲᠣᠯᠣᠭᠠᠢ ᠪᠠᠨ ᠲᠠᠯᠪᠢᠵᠤ ᠪᠠᠢᠪᠠᠯ ᠶᠡᠬᠡ ᠡᠭᠡᠯᠢᠲᠡᠨ ᠲᠤᠯᠠ ᠬᠢᠴᠢᠶᠡᠨ ᠬᠠᠳᠠᠭᠠᠯᠠᠬᠤ ᠬᠡᠷᠡᠭᠲᠡᠢ ᠃ ᠪᠤᠰᠤᠳ ᠲᠤ᠌ ᠥᠭᠪᠡᠯ ᠂ ᠡᠵᠡᠨ ᠰᠦᠷᠦᠭ ᠲᠡᠭᠡᠨ ᠮᠠᠭᠤ ᠭᠡᠨᠡ᠃
⑤ ᠭᠦᠶᠦᠬᠦ ᠳ᠋ᠡᠭᠡᠨ ᠭᠤᠶᠠᠳᠠᠭᠤᠯᠤᠨ ᠰᠢᠷᠪᠠᠪᠠᠰᠤ ᠰᠡᠳᠬᠢᠯ ᠠᠭᠤᠤ ᠲᠤᠯᠠ ᠣᠯᠠᠨ ᠤ᠋ ᠳᠤᠮᠳᠠ ᠪᠤᠶᠤ ᠬᠣᠯᠠ ᠳ᠋ᠤ᠌ ᠭᠦᠶᠦᠬᠦ ᠶ᠋ᠢᠨ ᠰᠠᠢᠨ ᠲᠡᠮᠳᠡᠭ ᠭᠡᠵᠡᠢ᠃
ᠵᠢᠰᠦᠮ ᠢ᠋ᠶ᠋ᠡᠷ ᠰᠢᠨᠵᠢᠬᠦ
ᠡᠨᠡ ᠬᠡᠰᠡᠭ ᠲᠦ᠍᠂ ᠪᠠᠢᠯᠳᠤᠬᠤ ᠪᠣᠯᠤᠨ ᠶᠡᠬᠡᠰ ᠦ᠋ᠨ ᠤᠨᠤᠬᠤ ᠂ ᠶᠡᠬᠡᠰ ᠲᠦ᠍ ᠪᠠᠷᠠ ᠪᠣᠯᠬᠤ ᠥᠯᠵᠡᠢᠲᠡᠢ 15 ᠵᠢᠰᠦ ᠶ᠋ᠢ ᠥᠭᠦᠯᠡᠭᠰᠡᠨ ᠨᠢ ᠭᠣᠣᠯ ᠪᠣᠯᠪᠠᠴᠤ ᠮᠥᠨ ᠬᠤᠷᠳᠤᠨ ᠤ᠋ ᠵᠢᠰᠦᠮ ᠴᠦ᠍ ᠵᠣᠬᠢᠬᠤ ᠲᠣᠭᠠ ᠪᠠᠷ ᠪᠠᠭᠲᠠᠵᠤ ᠪᠣᠢ᠃
① ᠤᠯᠠᠭᠠᠨ ᠬᠣᠰᠢᠭᠤ ᠦᠭᠡᠢ ᠰᠠᠢᠬᠠᠨ ᠴᠠᠭᠠᠨ᠃
② ᠲᠣᠰᠣᠲᠠᠢ ᠰᠠᠢᠬᠠᠨ ᠭᠢᠯᠠᠭᠠᠷ ᠬᠠᠷᠠ᠃
③ ᠡᠯᠢᠭᠡᠨ ᠥᠩᠭᠡᠲᠡᠢ ᠬᠦᠷᠡᠩ᠃
④ ᠴᠢᠰᠤᠨ ᠵᠡᠭᠡᠷᠳᠡ᠃
⑤ ᠵᠢᠪᠡᠲᠡᠢ ᠰᠠᠢᠬᠠᠨ ᠤᠯᠠᠭᠠᠨ᠃
⑥ ᠪᠣᠷᠣ᠃
⑦ ᠲᠣᠯᠪᠣᠲᠠᠢ ᠪᠣᠷᠣ᠃
⑧ ᠤᠢᠰᠤᠨ ᠬᠤᠸᠠ᠃
⑨ ᠴᠠᠭᠠᠨ ᠠᠮᠠᠲᠠᠢ ᠬᠠᠷᠠ ᠬᠠᠯᠲᠠᠷ᠃
⑩ ᠰᠠᠢᠬᠠᠨ ᠤᠯᠠᠭᠠᠨ ᠬᠡᠭᠡᠷ᠃
⑪ ᠬᠠᠷᠠ ᠬᠡᠭᠡᠷ᠃
⑫ ᠰᠠᠢᠬᠠᠨ ᠴᠠᠭᠠᠨ ᠪᠤᠭᠤᠷᠤᠯ᠃
⑬ ᠰᠠᠢᠬᠠᠨ ᠲᠡᠮᠦᠷ ᠬᠥᠬᠡ ᠃
⑭ ᠴᠠᠭᠠᠨ ᠰᠢᠷᠭᠠ ᠃
⑮ ᠵᠠᠭᠠᠯ ᠦᠭᠡᠢ ᠬᠣᠩᠭᠣᠷ ᠃ ᠡᠳᠡᠭᠡᠷ ᠵᠢᠰᠦᠮ ᠢ᠋ ᠥᠯᠵᠡᠢᠲᠡᠢ ᠵᠢᠰᠦᠮ ᠭᠡᠵᠡᠢ᠃
ᠡᠷᠭᠢᠭᠦᠯᠭᠡ ᠪᠡᠷ ᠰᠢᠨᠵᠢᠬᠦ
① ᠮᠠᠩᠨᠠᠢ ᠳ᠋ᠤᠨᠢ ᠨᠠᠷᠠᠨ ᠵᠥᠪ ᠡᠷᠭᠢᠭᠦᠯᠭᠡᠲᠡᠢ ᠪᠥᠭᠡᠰᠦ ᠬᠠᠮᠢᠭᠠ ᠴᠤ᠌ ᠬᠡᠷᠡᠭ ᠪᠦᠲᠦᠨᠡ᠃
② ᠳᠤᠬᠤ(ᠮᠠᠩᠨᠠᠢ) ᠶ᠋ᠢᠨ ᠬᠣᠶᠠᠷ ᠦᠰᠦ ᠤᠭᠲᠤᠨ ᠨᠡᠢᠯᠡᠭᠰᠡᠨ ᠸᠴᠢᠷ ᠮᠡᠲᠦ ᠡᠷᠭᠢᠭᠦᠯᠭᠡ ᠪᠣᠯ ᠣᠯᠠᠨ ᠳ᠋ᠤ᠌ ᠮᠠᠭᠲᠠᠭᠳᠠᠬᠤ᠃
③ ᠬᠣᠶᠠᠷ ᠮᠥᠷᠦᠨ ᠳ᠋ᠦ᠍ ᠨᠠᠷᠠᠨ ᠵᠥᠪ ᠡᠷᠭᠢᠭᠦᠯᠭᠡᠲᠡᠢ ᠪᠥᠭᠡᠰᠦ ᠡᠵᠡᠨ ᠰᠦᠷᠦᠭ ᠲᠡᠭᠡᠨ ᠡᠭᠡᠯᠢᠲᠡᠢ᠃
④ ᠬᠠᠮᠢᠭᠠ ᠨᠢ ᠴᠦ᠍ ᠪᠣᠯᠪᠠ ᠨᠠᠷᠠᠨ ᠵᠥᠪ ᠡᠷᠭᠢᠭᠦᠯᠭᠡᠲᠡᠢ ᠪᠣᠯ ᠰᠠᠢᠨ᠂ ᠥᠯᠵᠡᠢᠲᠡᠢ᠃
⑤ ᠰᠡᠷᠪᠡᠭᠡ ᠨᠡᠪᠲᠡ ᠡᠷᠭᠢᠭᠦᠯᠭᠡ ᠪᠣᠢ ᠪᠥᠭᠡᠰᠦ ᠲᠥᠷᠥ ᠶ᠋ᠢᠨ ᠲᠤᠭ ᠪᠠᠷᠢᠭᠴᠢ ᠳ᠋ᠤ᠌ ᠥᠯᠵᠡᠢᠲᠡᠢ᠃
⑥ ᠤᠭᠤᠴᠠᠨ ᠳ᠋ᠤ᠌ ᠨᠡᠪᠲᠡ ᠡᠷᠭᠢᠭᠦᠯᠭᠡ ᠪᠣᠢ ᠪᠥᠭᠡᠰᠦ ᠠᠮᠠᠨ ᠬᠡᠰᠢᠭ ᠦᠯᠦ ᠲᠠᠰᠤᠷᠠᠬᠤ᠃
⑦ ᠪᠥᠭᠲᠥᠷᠭᠡ ᠶ᠋ᠢᠨ ᠡᠷᠭᠢᠭᠦᠯᠭᠡ ᠪᠣᠢ ᠪᠥᠭᠡᠰᠦ ᠬᠠᠮᠢᠭᠠ ᠶᠠᠪᠤᠪᠠᠴᠤ ᠭᠠᠨᠵᠤᠭᠠ ᠲᠠᠢ᠃
⑧ ᠪᠦᠬᠦ ᠡᠷᠭᠢᠭᠦᠯᠭᠡ ᠲᠡᠭᠦᠰ ᠪᠣᠯᠤᠭᠠᠳ ᠬᠣᠶᠠᠷ ᠡᠪᠦᠳᠦᠭ ᠂ ᠪᠣᠷᠪᠢ ᠳ᠋ᠤ᠌ ᠨᠡᠪᠲᠡ ᠡᠷᠭᠢᠭᠦᠯᠭᠡ ᠪᠣᠢ ᠪᠣᠯᠪᠠᠯ ᠁ ᠬᠦᠯᠦᠭ ᠪᠣᠯᠬᠤ ᠪᠥᠭᠡᠳ ᠡᠭᠦᠨ ᠦ᠌ ᠨᠡᠷᠡ ᠨᠢ ᠦᠰᠦᠨ ᠳᠥᠷᠪᠡᠨ ᠲᠡᠵᠠ ᠬᠡᠮᠡᠨᠡᠮ ᠭᠡᠵᠡᠢ ᠃ ᠡᠷᠭᠢᠭᠦᠯᠭᠡ ᠶ᠋ᠢᠨ ᠰᠢᠨᠵᠢᠯᠡᠭᠡ ᠶᠡᠷᠡᠨ ᠵᠢᠷᠭᠤᠭᠠ ᠪᠠᠢᠳᠠᠭ ᠪᠥᠭᠡᠳ ᠥᠯᠵᠡᠢᠲᠡᠢ ᠨᠢ ᠬᠣᠷᠢ ᠭᠡᠵᠦ ᠲᠡᠮᠳᠡᠭᠯᠡᠵᠦ ᠪᠠᠢᠳᠠᠭ᠃
ᠰᠢᠳᠦ ᠪᠡᠷ ᠰᠢᠨᠵᠢᠬᠦ
① ᠶᠡᠷᠦ ᠦᠵᠡᠬᠦ ᠳ᠋ᠦ᠍ ᠳᠡᠭᠡᠳᠦ ᠭᠣᠣᠯ ᠰᠢᠳᠦᠨ ᠦ᠌ ᠰᠢᠭᠢ ᠮᠢᠬᠠ ᠰᠢᠬᠠᠵᠤ ᠪᠤᠢᠯᠠ ᠠ᠋ᠴᠠ ᠳᠣᠷᠣᠭᠰᠢ ᠨᠠᠷᠢᠨ ᠤᠲᠠᠰᠤ ᠮᠡᠲᠦ ᠢᠷᠮᠡᠭ ᠰᠢᠬᠠᠲᠠᠯᠠ ᠭᠤᠷᠪᠢᠳᠠᠢ ᠪᠥᠭᠡᠰᠦ ᠲᠣᠷᠭᠠᠨ ᠵᠤᠯᠠ ᠨᠡᠷᠡ ᠲᠡᠢ ᠂ ᠴᠡᠭᠴᠡ ᠬᠤᠷᠳᠤᠨ ᠲᠠᠢ ᠪᠣᠯᠤᠨ ᠰᠠᠢᠨ ᠶᠠᠪᠤᠳᠠᠯᠲᠠᠢ ᠂ ᠰᠠᠢᠪᠤᠷ ᠪᠣᠯᠤᠨ ᠰᠠᠢᠨ ᠵᠠᠩᠲᠠᠢ ᠶᠡᠬᠡᠰ ᠦ᠋ᠨ ᠮᠣᠷᠢ ᠭᠡᠳᠡᠭ ᠃ ᠬᠠᠮᠢᠭᠠ ᠶᠠᠪᠤᠪᠠᠴᠤ ᠢᠵᠢᠯᠢ ᠲᠠᠢᠰᠢ ᠪᠠᠨ ᠠᠯᠳᠠᠭᠤᠯᠬᠤ ᠪᠣᠢ᠃
② ᠶᠡᠷᠦ ᠦᠵᠡᠬᠦ ᠳ᠋ᠦ᠍ ᠳᠣᠣᠷᠠᠲᠤ ᠵᠢᠷᠭᠤᠭᠠᠨ ᠰᠢᠳᠦ ᠭᠠᠳᠠᠭᠰᠢ ᠳᠡᠯᠡᠭᠦᠦ ᠪᠥᠭᠡᠰᠦ ᠲᠡᠮᠦᠷ ᠲᠠᠶᠠ ᠨᠡᠷᠡ ᠲᠡᠢ ᠪᠣᠢ᠃ ᠬᠡᠯᠡᠨ ᠦ᠌ ᠬᠡᠪᠲᠡᠰᠢ ᠠᠭᠤᠤ ᠪᠥᠭᠡᠰᠦ ᠬᠤᠰᠤᠨ ᠲᠣᠬᠣᠢ ᠨᠡᠷᠡ ᠲᠡᠢ ᠪᠣᠢ᠃ ᠡᠨᠡ ᠬᠣᠶᠠᠷ ᠠᠯᠢᠨ ᠴᠤ᠌ ᠤᠴᠠᠷᠠᠪᠠᠴᠤ ᠴᠤᠴᠠᠭᠠ ᠦᠭᠡᠢ ᠰᠠᠢᠨ ᠣᠯᠠᠨ ᠴᠥᠭᠡᠨ ᠦᠭᠡ ᠦᠭᠡᠢ ᠭᠦᠶᠦᠬᠦ ᠪᠣᠯᠠᠢ᠃
③ ᠮᠢᠬᠠᠨ ᠤ᠋ ᠬᠡᠩᠬᠡᠭ ᠭᠡᠭᠴᠢ ᠰᠢᠨᠵᠢ ᠪᠣᠯᠪᠠᠯ ᠳᠣᠣᠷᠠᠲᠤ ᠰᠢᠲᠦᠨ ᠦ᠌ ᠳᠣᠲᠣᠭᠤᠷ ᠪᠤᠢᠯᠠ ᠳ᠋ᠤᠨᠢ ᠮᠣᠭᠠᠢ ᠶ᠋ᠢᠨ ᠨᠢᠳᠦ ᠮᠡᠲᠦ ᠰᠢᠷᠠ ᠥᠩᠭᠡᠲᠡᠢ ᠨᠢᠳᠦ ᠪᠠᠢᠬᠤ ᠃ ᠬᠡᠯᠡᠨ ᠦ᠌ ᠬᠡᠪᠲᠡᠰᠢ ᠳᠣᠲᠣᠷᠠ ᠥᠴᠦᠬᠡᠨ ᠬᠠᠷᠠ ᠪᠠᠢᠬᠤ ᠪᠥᠭᠡᠰᠦ ᠡᠨᠡ ᠬᠣᠶᠠᠷ ᠰᠢᠨᠵᠢ ᠶ᠋ᠢᠨ ᠠᠯᠢ ᠨᠢ ᠤᠴᠠᠷᠠᠪᠠᠯ ᠲᠦᠷᠭᠡᠴᠢ ᠬᠤᠷᠳᠤᠨ ᠪᠣᠯᠤᠨᠠ᠃ ᠪᠠᠭᠠ ᠨᠠᠰᠤᠨ ᠳ᠋ᠤ᠌ ᠰᠠᠢᠨ᠂ ᠰᠢᠳᠦᠯᠡᠩ ᠰᠠᠷᠪᠠ ᠨᠠᠰᠤᠨ ᠳ᠋ᠤ᠌ ᠪᠤᠢᠯᠠ ᠶ᠋ᠢᠨ ᠢᠷᠮᠡᠭ ᠳᠡᠭᠡᠭᠦᠷ ᠭᠤᠷᠪᠢᠳᠠᠢ ᠪᠥᠭᠡᠰᠦ ᠤᠯᠠᠭᠠᠨ ᠡᠷᠭᠢ ᠬᠡᠮᠡᠬᠦ ᠬᠤᠷᠳᠤᠨ ᠳ᠋ᠤ᠌ ᠨᠡᠮᠡᠷᠢ ᠪᠣᠯᠤᠨᠠ᠃
④ ᠳᠡᠭᠡᠳᠦ ᠵᠠᠬᠠ ᠳ᠋ᠤ᠌ (? ) ᠤᠷᠲᠤ ᠤᠨᠵᠢᠢᠵᠤ ᠪᠠᠢᠪᠠᠯ ᠨᠠᠴᠢᠨ ᠬᠠᠷᠴᠠᠭᠠᠢ ᠶ᠋ᠢᠨ ᠬᠣᠰᠢᠭᠤ ᠨᠡᠷᠡ ᠲᠡᠢ ᠃ ᠲᠡᠷᠡ ᠤᠨᠵᠢᠢᠭᠰᠠᠨ ᠶᠠᠭᠤᠮᠠ ᠨᠢ ᠪᠣᠭᠣᠨᠢ ᠪᠦᠳᠦᠭᠦᠨ ᠪᠥᠭᠡᠰᠦ ᠳ᠋ᠢᠨ ᠨᠢᠷᠤᠭᠤ ᠨᠡᠷᠡ ᠲᠡᠢ ᠃ ᠳᠣᠣᠷᠠᠲᠤ ᠵᠠᠬᠠ ᠶ᠋ᠢᠨ ᠰᠢᠲᠦᠨ ᠳ᠋ᠦ᠍ ᠳ᠋ᠢᠨ ᠨᠢᠷᠤᠭᠤ ᠮᠡᠲᠦ ᠪᠥᠭᠡᠰᠦ ᠥᠪᠥᠭᠡᠯᠵᠢᠨ ᠣᠪᠣᠭᠠᠲᠤ ᠨᠡᠷᠡ ᠲᠡᠢ ᠪᠣᠯᠵᠠᠢ ᠃ ᠭᠦᠶᠦᠪᠡᠴᠦ ᠶᠠᠪᠤᠵᠤ ᠴᠤᠴᠠᠬᠤ ᠦᠭᠡᠢ ᠃ ᠳᠣᠣᠷᠠᠲᠤ ᠵᠠᠬᠠ ᠶ᠋ᠢᠨ ᠰᠢᠳᠦᠨ ᠦ᠌ ᠥᠩᠭᠡᠨ ᠳ᠋ᠦ᠍ ᠨᠠᠷᠢᠨ ᠳᠠᠷᠠᠰᠤ ᠮᠡᠲᠦ ᠴᠠᠭᠠᠨ ᠶᠢᠰᠦᠨ ᠰᠢᠨᠵᠢᠲᠡᠢ ᠪᠣᠯᠪᠠᠰᠤ ᠰᠤᠮᠪᠦ ᠱᠠᠭᠠᠢ ᠭᠡᠨᠡ ᠃ ᠳᠣᠣᠷᠠᠲᠤ ᠵᠠᠬᠠ ᠶ᠋ᠢᠨ ᠰᠢᠲᠦᠨ ᠦ᠌ ᠴᠥᠭᠥᠴᠡ ᠨᠢ ᠰᠡᠲᠡᠷᠬᠡᠢ ᠶ᠋ᠢᠨ ᠳᠡᠭᠡᠷᠡ ᠦᠷᠢᠯ ᠮᠡᠲᠦ ᠴᠠᠭᠠᠨ ᠶᠢᠰᠦᠨ ᠰᠢᠨᠵᠢ ᠪᠠᠢᠪᠠᠯ ᠦᠯᠡᠭᠦᠦ ᠬᠠᠶᠠ ᠭᠡᠨᠡ ᠃
⑤ ᠨᠠᠴᠢᠨ ᠬᠠᠷᠴᠠᠭᠠᠢ ᠶ᠋ᠢᠨ ᠬᠣᠰᠢᠭᠤ ᠂ ᠨᠢᠭᠡᠨ ᠬᠠᠷᠠ ᠴᠠᠭᠠᠨ ᠳ᠋ᠤ᠌ ᠲᠦᠷᠭᠡᠨ ᠬᠤᠷᠳᠤᠨ ᠂ ᠥᠭᠡᠷᠡ ᠰᠢᠨᠵᠢ ᠰᠠᠢᠨ ᠪᠣᠯ ᠲᠡᠷᠡ ᠰᠠᠢᠨ ᠳ᠋ᠤ᠌ ᠶᠡᠬᠡ ᠨᠡᠮᠡᠷᠢ ᠪᠣᠯᠤᠮᠤᠢ ᠃ ᠳ᠋ᠢᠨ ᠨᠢᠷᠤᠭᠤᠨ ᠤ᠋ ᠲᠦᠷᠭᠡᠨ ᠬᠤᠷᠳᠤᠨ ᠨᠢ ᠨᠠᠴᠢᠨ ᠬᠠᠷᠴᠠᠭᠠᠢ ᠶ᠋ᠢᠨ ᠬᠣᠰᠢᠭᠤ ᠠ᠋ᠴᠠ ᠳᠣᠣᠷᠠ ᠪᠣᠯᠪᠠᠴᠤ ᠂ ᠭᠤᠷᠪᠠᠨ ᠬᠠᠷᠠ ᠴᠠᠭᠠᠨ ᠤ᠋ ᠭᠠᠵᠠᠷ ᠦᠯᠦ ᠴᠤᠴᠠᠨᠠ ᠃ ᠥᠪᠥᠭᠡᠯᠵᠢᠨ ᠣᠪᠣᠭᠠᠨ ᠤ᠋ ᠲᠦᠷᠭᠡᠨ ᠬᠤᠷᠳᠤᠨ ᠨᠢ ᠨᠠᠴᠢᠨ ᠬᠠᠷᠴᠠᠭᠠᠢ ᠶ᠋ᠢᠨ ᠬᠣᠰᠢᠭᠤ ᠂ ᠳ᠋ᠢᠨ ᠨᠢᠷᠤᠭᠤ ᠠ᠋ᠴᠠ ᠳᠣᠣᠷᠠ ᠪᠣᠯᠪᠠᠴᠤ ᠮᠥᠨ ᠬᠦ᠌ ᠡᠳᠦᠷ ᠲᠡᠭᠡᠨ ᠴᠤᠴᠠᠬᠤ ᠦᠭᠡᠢ ᠂ ᠬᠣᠶᠠᠷ ᠡᠳᠦᠷ ᠰᠥᠨᠢ ᠶᠥᠷᠭᠡᠪᠡᠴᠦ ᠡᠴᠡᠬᠦ ᠦᠭᠡᠢ ᠃ ᠰᠦᠮᠪᠦ ᠱᠠᠭᠠᠢ ᠨᠢᠭᠡᠨ ᠬᠠᠷᠠ ᠴᠠᠭᠠᠨ ᠤ᠋ ᠭᠠᠵᠠᠷ ᠂ ᠥᠪᠥᠭᠡᠯᠵᠢᠨ ᠣᠪᠣᠭᠠ ᠲᠠᠢ ᠠᠳᠠᠯᠢ ᠪᠣᠯᠪᠠᠴᠤ ᠲᠠᠲᠠᠵᠤ ᠶᠠᠪᠤᠪᠠᠯ ᠂ ᠬᠣᠯᠠ ᠪᠣᠯᠬᠤ ᠳᠣᠳᠣᠮ ᠬᠤᠷᠳᠤᠨ ᠪᠣᠯᠤᠨ ᠮᠥᠨ ᠡᠳᠦᠷ ᠲᠡᠭᠡᠨ ᠦᠯᠦ ᠴᠤᠴᠠᠬᠤ ᠃ ᠦᠯᠡᠭᠦᠦ ᠬᠠᠶᠠ ᠂ ᠶᠡᠬᠡ ᠲᠦᠷᠭᠡᠨ ᠬᠤᠷᠳᠤᠨ ᠪᠥᠭᠡᠳ ᠨᠢᠭᠡ ᠪᠠᠷᠠ ᠶ᠋ᠢᠨ ᠭᠠᠵᠠᠷ ᠴᠤᠴᠠᠬᠤ ᠦᠭᠡᠢ ᠂ ᠶᠡᠬᠡ ᠬᠣᠯᠠ ᠪᠥᠭᠡᠰᠦ ᠠᠷᠭᠠ ᠦᠭᠡᠢ ᠪᠤᠶᠤ ᠃ ᠮᠠᠷᠠᠯ ᠬᠠᠶᠠ ᠨᠢ ᠣᠢᠷᠠ ᠲᠦᠷᠭᠡᠨ ᠨᠢ ᠦᠯᠡᠭᠦᠦ ᠬᠠᠶᠠ ᠠ᠋ᠴᠠ ᠪᠠᠬᠠᠨ ᠳᠣᠣᠷᠠ ᠪᠣᠯᠪᠠᠴᠤ ᠲᠤᠰᠠᠭᠠᠷ ᠲᠠᠢ ᠰᠠᠢᠨ ᠨᠢ ᠳ᠋ᠦᠩ ᠠᠳᠠᠯᠢ ᠪᠣᠢ ᠃ ᠰᠤᠮᠤᠲᠤ ᠬᠡᠭᠡᠷ ᠭᠡᠭᠴᠢ ᠳᠡᠭᠡᠳᠦ ᠭᠣᠣᠯ ᠰᠢᠲᠦᠨ ᠳ᠋ᠦ᠍ᠨᠢ ᠪᠤᠢᠯᠠ ᠠ᠋ᠴᠠ ᠳᠣᠭᠣᠭᠰᠢ ᠴᠠᠪᠠ ᠮᠡᠲᠦ ᠵᠦᠢᠯ ᠪᠣᠢ ᠪᠥᠭᠡᠳ ᠰᠢᠳᠦᠨ ᠦ᠌ ᠢᠷᠮᠡᠭ ᠦᠯᠦ ᠬᠦᠷᠬᠦ ᠨᠢ ᠬᠣᠶᠠᠷ ᠬᠠᠷᠠ ᠴᠠᠭᠠᠨ ᠤ᠋ ᠭᠠᠵᠠᠷ ᠲᠤ᠌ ᠶᠡᠬᠡ ᠬᠤᠷᠳᠤᠨ ᠪᠣᠯᠤᠨᠠ ᠃ ᠲᠠᠤᠯᠠᠢ ᠵᠡᠭᠡᠷᠡ ᠶ᠋ᠢ ᠭᠦᠢᠴᠡᠨᠡ ᠃ ᠵᠦᠷ ᠳᠡᠩᠨᠡᠭᠡ ᠭᠡᠭᠴᠢ ᠰᠢᠨᠵᠢ ᠨᠢ ᠰᠦᠪᠡᠷᠭᠡ ᠶ᠋ᠢᠨ ᠬᠥᠨᠳᠡᠢ ᠳ᠋ᠦ᠍ ᠬᠣᠶᠠᠷ ᠭᠣᠨᠵᠣᠭᠣᠷ ᠶᠠᠰᠤ ᠲᠠᠢ ᠪᠣᠢ ᠃ ᠪᠢᠰᠢ ᠪᠡᠯᠭᠡ ᠨᠢ ᠰᠠᠢᠨ ᠪᠣᠯᠪᠠᠯ ᠶᠡᠬᠡ ᠨᠡᠮᠡᠷᠢ ᠪᠣᠯᠬᠤ ᠪᠣᠯᠠᠢ ᠃ ᠭᠠᠭᠴᠠᠬᠠᠨ ᠪᠡᠶᠡ ᠳ᠋ᠡᠭᠡᠨ ᠨᠢᠭᠡ ᠬᠠᠷᠠ ᠴᠠᠭᠠᠨ ᠤ᠋ ᠭᠠᠵᠠᠷ ᠲᠦᠷᠭᠡᠨ ᠬᠤᠷᠳᠤᠨ ᠃ ᠤᠯᠠᠭᠠᠨ ᠵᠤᠪᠠᠭ ᠭᠡᠬᠦ ᠰᠢᠨᠵᠢ ᠪᠣᠯ ᠳᠣᠣᠷᠠᠲᠤ ᠰᠢᠲᠦᠨ ᠦ᠌ ᠢᠷᠮᠡᠭ ᠡᠴᠡ ᠳᠣᠲᠣᠭᠤᠷ ᠂ ᠴᠥᠭᠥᠴᠡ ᠡᠴᠡ ᠭᠠᠳᠠᠭᠤᠷ ᠵᠠᠪᠰᠠᠷ ᠢ᠋ᠶ᠋ᠠᠷ ᠡᠩᠭᠡᠰᠬᠡ ᠲᠦᠷᠬᠢᠭᠰᠡᠨ ᠮᠡᠲᠦ ᠤᠯᠠᠭᠠᠨ ᠪᠠᠢᠨᠠ ᠃ ᠨᠢᠭᠡᠨ ᠰᠢᠳᠦᠨ ᠳ᠋ᠦ᠍ ᠤᠴᠠᠷᠠᠪᠠᠯ ᠲᠠᠪᠤ ᠵᠢᠷᠭᠤᠭᠠᠨ ᠵᠠᠭᠤᠨ ᠠᠳᠤᠭᠤᠨ ᠳ᠋ᠤ᠌ ᠲᠡᠷᠢᠭᠦᠯᠡᠨ ( ᠠᠳᠠᠭ ᠲᠠᠭᠠᠨ ᠠᠢᠷᠠᠭ ᠤ᠋ᠨ ᠲᠠᠪᠤ ) ᠭᠦᠶᠦᠵᠦ ᠢᠷᠡᠵᠦ ᠂ ᠬᠣᠶᠠᠷ ᠰᠢᠲᠦᠨ ᠳ᠋ᠦ᠍ ᠪᠥᠭᠡᠰᠦ ᠮᠢᠩᠭᠠᠨ ᠠᠭᠲᠠ ᠳ᠋ᠤ᠌ ᠴᠤ᠌ ᠲᠡᠷᠢᠭᠦᠯᠡᠵᠦ ᠪᠣᠯᠤᠨᠠ ᠃ ᠰᠢᠷᠠ ᠵᠤᠪᠠᠭ ᠭᠡᠬᠦ ᠪᠡᠯᠭᠡ ᠮᠥᠨ ᠳᠡᠭᠡᠳᠦ ᠰᠢᠲᠦᠨ ᠦ᠌ ᠢᠷᠮᠡᠭ ᠡᠴᠡ ᠳᠣᠲᠣᠭᠤᠷ ᠴᠥᠭᠥᠴᠡ ᠨᠢ ᠰᠢᠷᠠ ᠪᠣᠢ ᠃ ᠬᠣᠶᠠᠷ ᠪᠤᠶᠤ ᠭᠤᠷᠪᠠᠨ ᠬᠠᠷᠠ ᠴᠠᠭᠠᠨ ᠤ᠋ ᠭᠠᠵᠠᠷ ᠲᠤ᠌ ᠲᠦᠷᠭᠡᠨ ᠪᠣᠯᠤᠨᠠ᠃ ᠪᠤᠰᠤᠳ ᠰᠢᠨᠵᠢ ᠨᠢ ᠰᠠᠢᠨ ᠪᠣᠯ ᠡᠭᠦᠨ ᠳ᠋ᠦ᠍ ᠨᠡᠮᠡᠷᠢ ᠃ ᠬᠠᠷᠠ ᠵᠤᠯᠠ ᠭᠡᠬᠦ ᠰᠢᠨᠵᠢ ᠪᠣᠯ ᠳᠣᠣᠷᠠᠲᠤ ᠰᠢᠲᠦᠨ ᠦ᠌ ᠴᠥᠭᠥᠴᠡ ᠳᠣᠲᠣᠷᠠ ᠵᠤᠷᠪᠤᠰ ᠪᠢᠴᠢᠬᠠᠨ ᠬᠠᠷᠠ ᠪᠣᠢ ᠃ ᠬᠠᠲᠠᠭᠤ ᠪᠠ ᠪᠠᠷᠲᠠᠭᠠ ᠲᠠᠢ ᠭᠠᠵᠠᠷ ᠬᠣᠶᠠᠷ ᠬᠠᠷᠠ ᠴᠠᠭᠠᠨ ᠳ᠋ᠤ᠌ ᠪᠠᠭᠠ ᠰᠢᠭ᠋ ᠲᠦᠷᠭᠡᠨ ᠬᠤᠷᠳᠤᠨ ᠃ ᠨᠣᠭᠣᠭᠠᠨ ᠲᠠᠶᠠ ᠭᠡᠭᠴᠢ ᠳᠡᠭᠡᠳᠦ ᠵᠠᠬᠠ ᠶ᠋ᠢᠨ ᠬᠣᠶᠠᠷ ᠰᠢᠲᠦᠨ ᠦ᠌ ᠨᠢᠭᠡᠨ ᠳ᠋ᠦ᠍ᠨᠢ ᠪᠤᠢᠯᠠ ᠰᠢᠬᠠᠮ ᠂ ᠨᠣᠭᠣᠭᠠᠨ ᠬᠠᠭ ᠪᠣᠢ ᠨᠢ ᠨᠣᠭᠣᠭᠠᠨ ᠬᠠᠶᠠ ᠭᠡᠨᠡ ᠃ ᠴᠤᠴᠠᠭᠠ ᠦᠭᠡᠢ ᠬᠤᠷᠳᠤᠨ ᠭᠦᠶᠦᠨᠡ ᠃ ᠴᠡᠩᠬᠡᠷᠲᠦ ᠪᠣᠯᠣᠳ ᠭᠡᠭᠴᠢ ᠰᠢᠨᠵᠢ ᠪᠣᠯ ᠥᠩᠭᠡᠨ ᠳ᠋ᠦ᠍ᠨᠢ ᠴᠠᠭᠠᠨ ᠴᠠᠬᠢᠭᠤᠷ ᠤ᠋ᠨ ᠬᠠᠭᠠᠷᠬᠠᠢ ᠮᠡᠲᠦ ᠵᠦᠢᠯ ᠪᠣᠢ ᠃ ᠰᠤᠮᠤᠲᠤ ᠬᠠᠷᠠ ᠮᠡᠲᠦ ᠲᠦᠷᠭᠡᠨ ᠬᠤᠷᠳᠤᠨ ᠪᠣᠯᠤᠨ ᠳᠣᠯᠣᠭᠠᠨ ᠬᠠᠷᠠ ᠴᠠᠭᠠᠨ ᠤ᠋ ᠭᠠᠵᠠᠷ ᠲᠤ᠌ ᠦᠯᠦ ᠴᠤᠴᠠᠵᠤ ᠂ ᠬᠦᠢᠲᠡᠨ ᠬᠠᠯᠠᠭᠤᠨ ᠳ᠋ᠤ᠌ ᠰᠠᠢᠨ ᠲᠡᠰᠪᠦᠷᠢᠲᠡᠢ ᠃ ᠴᠠᠭᠠᠨ ᠰᠤᠪᠤᠳ ᠭᠡᠭᠴᠢ ᠳᠡᠭᠡᠳᠦ ᠰᠢᠳᠦᠨ ᠦ᠌ ᠥᠩᠭᠡᠨ ᠳ᠋ᠦ᠍ᠨᠢ ᠴᠠᠭᠠᠨ ᠴᠠᠬᠢᠷ ᠰᠤᠪᠤᠳ ᠮᠡᠲᠦ ᠶᠢᠰᠦᠨ ᠰᠢᠨᠵᠢ ᠪᠣᠢ ᠂᠃ ᠰᠤᠮᠤᠲᠤ ᠬᠠᠷᠠ ᠮᠡᠲᠦ ᠲᠦᠷᠭᠡᠨ ᠬᠤᠷᠳᠤᠨ ᠪᠣᠯᠤᠨ ᠳᠣᠯᠣᠭᠠᠨ ᠬᠠᠷᠠ ᠴᠠᠭᠠᠨ ᠤ᠋ ᠭᠠᠵᠠᠷ ᠭᠦᠶᠦᠨᠡ ᠃ ᠴᠠᠭᠠᠨ ᠰᠤᠪᠤᠳ ᠭᠡᠭᠴᠢ ᠶᠢᠰᠦᠨ ᠰᠢᠨᠵᠢ ᠪᠣᠢ ᠃ ᠲᠠᠯᠪᠢᠪᠠᠯ ᠴᠤᠴᠠᠵᠤ ᠂ ᠲᠠᠲᠠᠵᠤ ᠶᠠᠪᠤᠪᠠᠯ ᠬᠣᠯᠠ ᠂ ᠨᠠᠢ᠍ᠮᠠᠨ ᠬᠠᠷᠠ ᠴᠠᠭᠠᠨ ᠳ᠋ᠤ᠌ ᠢᠷᠡᠨᠡ ᠃ ᠲᠦᠷᠭᠡᠨ ᠤᠰᠤᠨ ᠤ᠋ ᠤᠢᠯ ᠭᠡᠭᠴᠢ ᠰᠢᠨᠵᠢ ᠪᠣᠯ ᠳᠡᠭᠡᠳᠦ ᠰᠢᠲᠦᠨ ᠦ᠌ ᠥᠩᠭᠡᠨ ᠳ᠋ᠦ᠍ᠨᠢ ᠨᠠᠷᠢᠬᠠᠨ ᠴᠠᠭᠠᠨ ᠡᠷᠭᠢᠭᠦᠯᠭᠡ ᠪᠣᠢ ᠃ ᠡᠨᠡ ᠰᠢᠨᠵᠢ ᠳᠡᠭᠡᠳᠦ ᠰᠢᠲᠦᠨ ᠵᠠᠬᠠ ᠶ᠋ᠢᠨ ᠳᠥᠷᠪᠡᠨ ᠰᠢᠲᠦᠨ ᠡᠴᠡ ᠦᠯᠦ ᠭᠠᠷᠬᠤ ᠳᠤᠮᠳᠠᠴᠢ ᠲᠦᠷᠭᠡᠨ ᠢ᠋ᠶ᠋ᠡᠷ ᠲᠠᠪᠤᠨ ᠬᠠᠷᠠ ᠴᠠᠭᠠᠨ ᠳ᠋ᠤ᠌ ᠭᠦᠶᠦᠬᠦ ᠪᠣᠯᠤᠨᠠ ᠃ ᠰᠢᠳᠦᠨ ᠦ᠌ ᠰᠢᠨᠵᠢᠯᠡᠭᠡ ᠠᠷᠪᠢᠨ ᠃ ᠡᠷᠲᠡᠨ ᠦ᠌ ᠰᠢᠨᠵᠢᠯᠡᠭᠡ ᠣᠯᠠᠩᠬᠢ ᠶ᠋ᠢ ᠨᠢ ᠰᠢᠳᠦ ᠪᠡᠷ ᠭᠣᠣᠯᠯᠠᠨ ᠰᠢᠨᠵᠢᠳᠡᠭ ᠪᠣᠯᠤᠯᠲᠠᠢ᠃
ᠰᠣᠶᠣᠭᠠ ᠪᠠᠷ ᠰᠢᠨᠵᠢᠬᠦ
① ᠣᠭᠣᠲᠣᠨᠠ ᠬᠡᠮᠡᠬᠦ ᠨᠢ ᠳᠥᠷᠪᠡᠨ ᠰᠣᠶᠣᠭᠠᠨ ᠤ᠋ ᠦᠵᠦᠭᠦᠷ ᠳᠡᠯᠳᠡᠢᠵᠦ ᠪᠠᠢᠪᠠᠯ ᠣᠭᠣᠲᠣᠨᠠ ᠲᠡᠷᠡ ᠪᠣᠢ᠃
② ᠤᠷᠠᠨ ᠳᠥᠰᠢ ᠨᠢ ᠲᠣᠪᠴᠢᠨ ᠤ᠋ ᠳᠡᠪᠰᠢᠭᠦᠷ ᠮᠡᠲᠦ ᠪᠣᠢ᠃
③ ᠳᠡᠷᠡ ᠰᠣᠶᠣᠭᠠ ᠨᠢ ᠨᠢᠭᠡ ᠨᠢ ᠰᠢᠳᠦᠲᠡᠢ ᠬᠠᠮᠲᠤ ᠨᠢᠭᠡᠨ ᠦ᠌ ᠬᠢᠨᠢ ᠵᠠᠪᠰᠠᠷ ᠭᠤᠷᠪᠠᠨ ᠬᠤᠷᠤᠭᠤᠨ ᠤ᠋ ᠦᠵᠦᠭᠦᠷ ᠪᠠᠭᠲᠠᠬᠤ ᠬᠣᠯᠠ ᠪᠣᠢ᠃
④ ᠬᠠᠳᠠᠨ ᠴᠠᠪᠴᠢᠭᠤᠷ ᠬᠡᠮᠡᠬᠦ ᠰᠣᠶᠣᠭᠠ ᠨᠢ ᠬᠠᠳᠠᠨ ᠴᠠᠪᠴᠢᠭᠤᠷ ᠮᠡᠲᠦ ᠡᠷᠡᠰ᠃
⑤ ᠠᠷᠭᠠᠯᠢᠭᠠᠢ ᠬᠡᠮᠡᠬᠦ ᠨᠢ ᠪᠠᠰᠠ ᠴᠠᠪᠴᠢᠭᠤᠷ ᠮᠡᠲᠦ ᠪᠣᠯᠤᠭᠠᠳ ᠦᠵᠦᠭᠦᠷ ᠨᠢ ᠰᠠᠷᠪᠠᠭᠠᠷ ᠪᠣᠢ᠃
⑥ ᠬᠣᠩᠭᠣᠷ ᠣᠪᠣᠭᠠ ᠭᠡᠭᠴᠢ ᠨᠢᠭᠡᠨ ᠰᠣᠶᠣᠭᠠ ᠰᠢᠳᠦ ᠲᠡᠢ ᠣᠢᠷᠠ᠂ ᠨᠢᠭᠡ ᠨᠢ ᠬᠣᠯᠠ ᠪᠣᠯᠤᠭᠠᠳ ᠰᠢᠲᠦᠨ ᠡᠴᠡ ᠥᠨᠳᠥᠷ ᠪᠣᠢ᠃
⑦ ᠰᠣᠯᠵᠢᠷ ᠢᠮᠠᠭᠠ ᠭᠡᠭᠴᠢ ᠨᠢᠭᠡ ᠰᠣᠶᠣᠭᠠ ᠨᠢ ᠦᠭᠡᠢ᠃
⑧ ᠭᠠᠨᠢᠤ ᠪᠠᠷᠲᠠᠭᠠ ᠭᠡᠭᠴᠢ ᠬᠢᠵᠠᠭᠠᠷ ᠰᠢᠳᠦ ᠲᠡᠢ ᠭᠠᠳᠠᠭᠰᠢ ᠵᠡᠷᠭᠡᠴᠡᠵᠦ ᠬᠣᠯᠠ ᠭᠠᠷᠬᠤ᠂ ᠦᠵᠦᠭᠦᠷ ᠬᠥᠬᠡ᠂ ᠬᠡᠪ ᠨᠢ ᠵᠢᠷᠦᠬᠡᠨ ᠦ᠌ ᠬᠠᠭᠠᠰ ᠮᠡᠲᠦ᠂ ᠳᠣᠲᠣᠨᠠ ᠲᠠᠯᠠ ᠳ᠋ᠤ᠌ ᠭᠤᠷᠪᠠᠨ ᠭᠤᠷᠪᠢ ᠪᠣᠢ᠃
⑨ ᠬᠠᠷᠠ ᠪᠤᠤᠷᠠ ᠭᠡᠭᠴᠢ ᠶᠡᠬᠡ ᠪᠦᠳᠦᠭᠦᠨ ᠣᠷᠢᠶᠠᠩᠭᠢ ᠪᠣᠢ᠃
⑩ ᠬᠤᠷᠳᠤᠨ ᠱᠣᠩᠬᠣᠷ ᠭᠡᠭᠴᠢ ᠨᠠᠷᠢᠨ ᠮᠣᠭᠣᠯᠴᠣᠭ ᠂ ᠦᠵᠦᠭᠦᠷ ᠨᠢ ᠤᠬᠤᠮ ᠪᠠᠢᠳᠠᠯ ᠲᠠᠢ᠃
⑪ ᠬᠡᠷᠢᠰ ᠰᠣᠶᠣᠭᠠ ᠭᠡᠭᠴᠢ ᠬᠦᠳᠡᠷ ᠦ᠋ᠨ ᠰᠣᠶᠣᠭᠠ ᠶ᠋ᠢᠨ ᠦᠵᠦᠭᠦᠷ ᠮᠡᠲᠦ ᠂ ᠨᠣᠬᠠᠢ ᠰᠣᠶᠣᠭᠠᠨ ᠠ᠋ᠴᠠ ᠱᠣᠪᠬᠣᠬᠠᠨ ᠂ ᠭᠠᠬᠠᠢ ᠰᠣᠶᠣᠭᠠᠨ ᠠ᠋ᠴᠠ ᠤᠷᠲᠤ ᠪᠣᠯᠤᠭᠠᠳ ᠮᠠᠲᠠᠭᠠᠰᠤᠲᠠᠢ᠃
⑫ ᠥᠭᠡᠬᠦᠲᠡᠢ ᠭᠡᠭᠴᠢ ᠬᠣᠭᠣᠰᠣᠨ ᠪᠥᠬᠡ ᠶ᠋ᠢᠨ ᠲᠤᠯᠠ ᠥᠭᠦᠯᠡᠭᠰᠡᠨ ᠦᠭᠡ ᠪᠣᠢ᠃ ᠰᠢᠳᠦ ᠪᠡᠶᠡ ᠬᠣᠶᠠᠷ ᠰᠠᠢᠨ ᠪᠣᠯᠪᠠᠴᠤ ᠰᠣᠶᠣᠭᠠ ᠮᠠᠭᠤ ᠪᠣᠯ ᠭᠦᠶᠦᠳᠡᠯ ᠳ᠋ᠦ᠍ ᠭᠡᠮ ᠪᠣᠯᠬᠤ ᠶ᠋ᠢᠨ ᠲᠤᠯᠠ ᠰᠣᠶᠣᠭᠠᠨ ᠤ᠋ ᠪᠡᠯᠭᠡ ᠶ᠋ᠢ ᠰᠤᠷᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠭᠡᠨᠡᠨ ᠤᠬᠠᠭᠠᠨᠲᠠᠢ ᠰᠢᠨᠵᠢᠭᠴᠢ ᠥᠭᠦᠯᠡᠭᠰᠡᠨ ᠦᠭᠡ ᠪᠣᠢ᠃
⑬ ᠰᠣᠯᠵᠢᠷ ᠪᠤᠭᠤ ᠭᠡᠭᠴᠢ ᠨᠢᠭᠡ ᠰᠣᠶᠣᠭᠠ ᠨᠢ ᠪᠣᠭᠣᠨᠢ ᠪᠥᠭᠡᠳ ᠨᠥᠭᠦᠭᠡ ᠰᠣᠶᠣᠭᠠ ᠨᠢ ᠵᠠᠬᠠ ᠶ᠋ᠢᠨ ᠰᠢᠳᠦᠨ ᠳ᠋ᠦ᠍ ᠪᠤᠰᠤᠳ ᠠ᠋ᠴᠠ ᠢᠯᠡᠭᠦᠦ ᠬᠣᠯᠠ ᠪᠥᠭᠡᠰᠦ ᠰᠣᠯᠵᠢᠷ ᠪᠤᠭᠤ ᠂ ᠰᠡᠭᠦᠯ ᠨᠢ ᠮᠤᠷᠤᠢ ᠪᠣᠯᠪᠠᠯ ᠶᠡᠬᠡ ᠰᠠᠢᠨ᠃
⑭ ᠭᠠᠷᠤᠳᠢ ᠶ᠋ᠢᠨ ᠬᠢᠮᠤᠰᠤ ᠭᠡᠭᠴᠢ ᠰᠣᠶᠣᠭᠠᠨ ᠤ᠋ ᠬᠣᠶᠠᠷ ᠵᠠᠬᠠ ᠨᠢ ᠭᠤᠷᠪᠢ ᠲᠠᠢ ᠬᠤᠷᠴᠠ ᠨᠢ ᠰᠠᠢᠨ᠃