ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠲᠠᠪᠤ ᠂ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤᠨ ᠪᠦᠯᠦᠭ 18 > Хөх зул – Боржигон Ванжал –"Тав ᠂ Таван хошуу малын бүлэг " 18
292ᠲᠠᠪᠤ ᠂ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤᠨ ᠪᠦᠯᠦᠭ – 18
ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠣᠷᠣᠭᠠᠯᠠᠬᠤ ᠂ ᠬᠡᠭᠡᠯᠲᠦᠬᠦ ᠂ ᠲᠥᠯᠯᠡᠬᠦ ᠬᠤᠭᠤᠴᠠᠭᠠ ᠪᠠ ᠭᠣᠯᠣᠩᠬᠠᠢ ᠶ᠋ᠢ ᠠᠪᠬᠠᠭᠤᠯᠬᠤ ᠠᠷᠭᠠ Таван хошуу малын ороолох ᠂ хээлтэх ᠂ төллөх᠂ хугацаа ба голонхойг авхуулах арга
ᠠᠳᠤᠭᠤᠨ ᠤ᠋ ᠣᠷᠣᠭᠠᠯᠠᠬᠤ ᠂ ᠬᠡᠭᠡᠯᠲᠦᠬᠦ ᠂ ᠲᠥᠯᠯᠡᠬᠦ ᠬᠤᠭᠤᠴᠠᠭᠠ ᠪᠠ
ᠭᠣᠯᠣᠩᠬᠠᠢ ᠶ᠋ᠢ ᠠᠪᠬᠠᠭᠤᠯᠬᠤ ᠠᠷᠭᠠ ᠶ᠋ᠢᠨ ᠵᠦᠢᠯ
ᠠᠳᠤᠭᠤᠨ ᠤ᠋ ᠣᠷᠣᠭᠠ ᠣᠷᠣᠬᠤ ᠴᠠᠭ
ᠬᠠᠭᠤᠴᠢᠨ ᠤᠯᠠᠷᠢᠯ ᠤ᠋ᠨ 4 ᠂ 5 ᠂ 6 ᠰᠠᠷᠠ ᠪᠣᠯᠤᠨᠠ ᠃ ᠡᠨᠡ ᠨᠢ ᠵᠤᠨ ᠤ᠋ ᠠᠭᠤᠷ ᠣᠷᠣᠵᠤ ᠨᠣᠭᠣᠭᠠ ᠭᠠᠷᠴᠤ ᠭᠦᠢᠴᠡᠨ ᠠᠳᠤᠭᠤ ᠴᠠᠳᠴᠤ ᠲᠠᠮᠢᠷ ᠲᠡᠩᠬᠡᠭᠡ ᠣᠷᠣᠵᠤ ᠣᠷᠣᠭᠠᠯᠠᠬᠤ ᠴᠠᠭ ᠪᠣᠯᠤᠨᠠ ᠃ ᠲᠡᠷᠡᠴᠢᠯᠡᠨ ᠡᠨᠡ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠠᠵᠢᠷᠭᠠ ᠭᠢᠰᠬᠢᠭᠰᠡᠨ ᠭᠡᠭᠦᠦ ᠶ᠋ᠢᠨ ᠬᠡᠭᠡᠯ ᠲᠣᠭᠲᠠᠬᠤ ᠨᠢ ᠣᠯᠠᠨ᠃
ᠠᠳᠤᠭᠤ ᠠᠷᠪᠠᠨ ᠰᠠᠷᠠ ᠲᠠᠢ
ᠠᠳᠤᠭᠤᠨ ( ᠭᠡᠭᠦᠨ ) ᠦ᠌ ᠬᠡᠭᠡᠯᠰᠢᠵᠦ ᠶᠠᠪᠤᠬᠤ ᠬᠤᠭᠤᠴᠠᠭᠠ ᠃ ᠭᠡᠭᠦᠦ ᠡᠨᠡ ᠵᠢᠯ ᠦ᠋ᠨ 4 ᠂5 ᠂6 ᠰᠠᠷᠠ ᠶ᠋ᠢᠨ ᠠᠯᠢᠨ ᠳ᠋ᠤᠨᠢ ᠠᠵᠢᠷᠭᠠᠨ ᠳ᠋ᠤ᠌ ᠭᠢᠰᠬᠢᠭᠳᠡᠵᠦ ᠬᠡᠭᠡᠯᠰᠢᠭᠰᠡᠨ ᠪᠣᠯ ᠳᠠᠷᠠᠭᠠ ᠵᠢᠯ ᠦ᠋ᠨ 2 ᠂ 3 ᠂ 4 ᠰᠠᠷᠠ ᠪᠣᠯᠬᠤ ᠳ᠋ᠤ᠌ ᠶᠠᠭ ᠡᠬᠡ ᠶ᠋ᠢᠨ ᠬᠡᠪᠡᠯᠢ ᠳ᠋ᠦ᠍ 10 ᠰᠠᠷᠠ ᠪᠣᠯᠤᠨᠠ ᠃ ᠡᠨᠡ ᠬᠦ᠌ ᠬᠤᠭᠤᠴᠠᠭᠠ ᠶ᠋ᠢ ᠠᠳᠤᠭᠤ ᠠᠷᠪᠠᠨ ᠰᠠᠷᠠ ᠲᠠᠢ ᠭᠡᠳᠡᠭ᠃
ᠭᠡᠭᠦᠦ ᠤᠨᠠᠭᠠᠯᠠᠬᠤ ᠴᠠᠭ
ᠨᠢᠳᠤᠨᠤᠨ ᠤ᠋ 4 ᠂ 5 ᠂ 6 ᠰᠠᠷᠠ ᠳ᠋ᠤ᠌ ᠠᠵᠢᠷᠭᠠᠨ ᠳ᠋ᠤ᠌ ᠭᠢᠰᠬᠢᠭᠳᠡᠭᠰᠡᠨ ᠭᠡᠭᠦᠦ ᠂ ᠡᠨᠡ ᠵᠢᠯ ᠦ᠋ᠨ 2 ᠂ 3 ᠂ 4 ᠰᠠᠷᠠ ᠪᠣᠯᠬᠤ ᠳ᠋ᠤ᠌ 10 ᠰᠠᠷᠠ ᠨᠢ ᠭᠦᠢᠴᠡᠵᠦ ᠤᠨᠠᠭᠠᠯᠠᠬᠤ ᠪᠣᠯᠤᠨᠠ ᠃ ᠡᠭᠦᠨ ᠢ᠋ ᠭᠡᠭᠦᠦ ᠤᠨᠠᠭᠠᠯᠠᠬᠤ ᠴᠠᠭ ᠭᠡᠨᠡ᠃
ᠠᠵᠢᠷᠭᠠ ᠭᠢᠰᠬᠢᠬᠦ
ᠠᠵᠢᠷᠭᠠ ᠣᠳᠣ ᠣᠷᠣᠭᠠ ᠣᠷᠣᠵᠤ ᠂ ᠭᠡᠭᠦᠦ ᠬᠠᠷᠠᠢᠬᠤ ᠶ᠋ᠢ ᠬᠡᠯᠡᠨᠡ᠃
ᠭᠡᠭᠦᠦ ᠬᠡᠭᠡᠯᠲᠦᠬᠦ
ᠭᠡᠭᠦᠦ ᠠᠵᠢᠷᠭᠠᠨ ᠳ᠋ᠤ᠌ ᠭᠢᠰᠬᠢᠭᠳᠡᠵᠦ ᠬᠡᠪᠡᠯᠢ ᠳ᠋ᠡᠭᠡᠨ ᠬᠡᠭᠡᠯ ᠰᠠᠭᠤᠯᠭᠠᠭᠰᠠᠨ ᠢ᠋ ᠬᠡᠯᠡᠨᠡ᠃
ᠭᠡᠭᠦᠦ ᠤᠨᠠᠭᠠᠯᠠᠬᠤ
ᠭᠡᠭᠦᠦ ᠤᠨᠠᠭᠠ ᠪᠠᠨ ᠲᠥᠷᠥᠵᠦ ᠭᠠᠷᠭᠠᠬᠤ ᠶ᠋ᠢ ᠭᠡᠭᠦᠦ ᠤᠨᠠᠭᠠᠯᠠᠬᠤ ᠭᠡᠨᠡ ᠃
ᠵᠤᠯᠪᠤᠳᠠᠰᠤᠯᠠᠬᠤ ᠤᠨᠠᠭᠠ ᠬᠠᠶᠠᠬᠤ ᠴᠠᠭ ᠠ᠋ᠴᠠ ᠪᠠᠨ ᠡᠮᠦᠨᠡ ᠤᠨᠠᠭᠠᠯᠠᠬᠤ᠃
ᠪᠠᠢᠳᠠᠰᠤ ᠢᠯᠭᠠᠬᠤ
ᠪᠠᠢᠳᠠᠰᠤ ᠬᠡᠭᠡᠯᠲᠦᠬᠦ ᠨᠠᠰᠤᠨ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍᠂ ᠤᠤᠯ ᠰᠦᠷᠦᠭ ᠦ᠋ᠨ ᠡᠴᠢᠭᠡ ᠠᠵᠢᠷᠭᠠ ᠪᠠᠢᠳᠠᠰᠤ ᠪᠠᠨ ᠬᠠᠵᠠᠵᠤ ᠬᠥᠭᠡᠭᠡᠨ ᠬᠠᠰᠤᠵᠤ ᠭᠠᠷᠭᠠᠬᠤ ᠶᠤᠮ ᠤᠤ᠂ ᠬᠠᠮᠢᠶᠠᠷᠬᠤ ᠦᠭᠡᠢ ᠪᠣᠯᠳᠠᠭ᠃ ᠡᠰᠡᠬᠦᠯᠡ ᠪᠠᠢᠳᠠᠰᠤ ᠣᠳᠣ ᠣᠷᠣᠭᠠ ᠣᠷᠣᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠠᠵᠢᠷᠭᠠ ᠡᠷᠢᠨ ᠴᠠᠬᠢᠯᠠᠬᠤ᠃ ᠡᠢᠨ ᠪᠠᠢᠳᠠᠯ ᠢ᠋ ᠰᠡᠷᠭᠡᠢᠯᠡᠨ᠂ ᠠᠳᠤᠭᠤᠴᠢᠳ ᠡᠷᠲᠡ ᠬᠠᠪᠤᠷ ᠨᠣᠭᠣᠭᠠᠨ ᠦᠵᠦᠭᠦᠷ ᠴᠠᠭ ᠢ᠋ ᠠᠮᠵᠢᠨ ᠪᠠᠢᠳᠠᠰᠤ ᠶ᠋ᠢ ᠤᠤᠯ ᠰᠦᠷᠦᠭ ᠡᠴᠡ ᠨᠢ ᠢᠯᠭᠠᠨ ᠰᠠᠯᠭᠠᠵᠤ᠂ ᠥᠭᠡᠷᠡ ᠠᠵᠢᠷᠭᠠᠨ ᠳ᠋ᠤ᠌ ᠪᠤᠶᠤ ᠰᠢᠨᠡ ᠠᠵᠢᠷᠭᠠᠨ ᠳ᠋ᠤ᠌ ᠨᠡᠢᠯᠡᠭᠦᠯᠵᠦ ᠥᠭᠴᠦ ᠬᠤᠷᠢᠶᠠᠯᠭᠠᠬᠤ ᠶ᠋ᠢ ᠬᠡᠯᠡᠨᠡ᠃
ᠭᠡᠭᠦᠦ ᠂ ᠪᠠᠢᠳᠠᠰᠤ ᠬᠥᠯᠥᠷᠡᠭᠡᠬᠦ
ᠵᠠᠷᠢᠮ ᠭᠡᠭᠦᠦ ᠂ ᠪᠠᠢᠳᠠᠰᠤ ᠶ᠋ᠢ ᠠᠵᠢᠷᠭᠠ ᠶᠡᠷᠦ ᠨᠢ ᠬᠤᠷᠢᠶᠠᠵᠤ ᠥᠭᠬᠦ ᠦᠭᠡᠢ ᠪᠠᠢᠳᠠᠭ ᠃ ᠡᠨᠡ ᠦᠶᠡ ᠭᠡᠭᠦᠦ ᠂ ᠪᠠᠢᠳᠠᠰᠤ ᠪᠠᠨ ᠰᠠᠢᠲᠤᠷ ᠬᠥᠯᠥᠰᠥᠯᠡᠭᠡᠳ ᠨᠡᠢᠯᠡᠭᠦᠯᠪᠡᠯ ᠠᠪᠴᠢᠬᠠᠳᠠᠭ ᠃ ᠡᠭᠦᠨ ᠢ᠋ ᠬᠥᠯᠥᠷᠡᠭᠡᠬᠦ ᠭᠡᠨᠡ᠃
ᠡᠤᠨᠠᠭᠠ ᠪᠠᠨ ᠭᠣᠯᠣᠬᠤ
ᠭᠡᠭᠦᠦ ᠤᠨᠠᠭᠠᠨ ᠳ᠋ᠠᠭᠠᠨ ᠠᠮᠠᠷᠠᠭ ᠦᠭᠡᠢ ᠪᠣᠯᠤᠨ ᠣᠷᠬᠢᠨ ᠶᠠᠪᠤᠬᠤ᠃ ᠣᠯᠠᠩᠬᠢ ᠳ᠋ᠠᠭᠠᠨ ᠪᠠᠢᠳᠠᠰᠤᠨ ᠭᠡᠭᠦᠨ ᠳ᠋ᠦ᠍ ᠢᠯᠡᠭᠦᠦ ᠭᠠᠷᠳᠠᠭ᠃
ᠤᠨᠠᠭᠠ ᠠᠪᠬᠠᠭᠤᠯᠬᠤ
ᠤᠨᠠᠭᠠ ᠪᠠᠨ ᠭᠣᠯᠣᠭᠰᠠᠨ ᠭᠡᠭᠦᠦ ᠶ᠋ᠢ ᠤᠨᠠᠭᠠᠨ ᠳ᠋ᠤᠨᠢ ᠠᠮᠠᠷᠠᠭ ᠪᠣᠯᠭᠠᠬᠤ ᠃ ᠠᠪᠠᠬᠠᠭᠤᠯᠬᠤ ᠠᠷᠭᠠ ᠬᠣᠶᠠᠷ ᠪᠠᠢᠳᠠᠭ᠃
ᠴᠢᠳᠥᠷᠯᠡᠵᠦ ᠠᠪᠬᠠᠭᠤᠯᠬᠤ
ᠭᠣᠯᠣᠭᠰᠠᠨ ᠭᠡᠭᠦᠦ ᠶ᠋ᠢ ᠪᠠᠷᠢᠵᠤ ᠴᠢᠳᠥᠷᠯᠡᠭᠡᠳ ᠴᠢᠭᠢᠳᠤᠨ ᠪᠠᠢᠵᠤ᠂ ᠤᠨᠠᠭᠠ ᠶ᠋ᠢ ᠨᠢ ᠬᠥᠬᠥᠭᠦᠯᠵᠦ ᠠᠮᠠᠳᠠᠨᠠ ᠃ ᠭᠡᠬᠦ ᠳ᠋ᠡᠭᠡᠨ ᠤᠨᠠᠭᠠ ᠪᠠᠨ ᠬᠠᠵᠠᠵᠤ ᠬᠠᠮᠤᠭᠤᠯᠵᠤ᠂ ᠢᠰᠬᠦᠯᠦᠭᠦᠯᠵᠦ ᠬᠠᠰᠢᠷᠠᠭᠠᠵᠤ ᠪᠣᠯᠬᠤ ᠦᠭᠡᠢ ᠃ ᠤᠨᠠᠭᠠ ᠡᠬᠡ ᠶ᠋ᠢᠨ ᠰᠦ ᠳ᠋ᠦ᠍ ᠠᠮᠲᠠᠰᠢᠭᠰᠠᠨ ᠤ᠋ ᠬᠣᠢᠨᠠ ᠡᠬᠡ ᠶ᠋ᠢ ᠨᠢ ᠴᠢᠳᠥᠷᠯᠡᠵᠦ ᠤᠨᠠᠬᠠ ᠶ᠋ᠢ ᠨᠢ ᠣᠢᠷᠠᠲᠤᠭᠤᠯᠤᠨᠠ᠃ ᠡᠬᠡ ᠨᠢ ᠬᠠᠵᠢᠭᠯᠠᠬᠤ ᠪᠦᠷᠢ ᠵᠠᠩᠳᠤᠷᠴᠤ ᠵᠣᠳᠣᠵᠤ ᠪᠠᠢᠭᠠᠳ ᠴᠡᠴᠡᠷᠡᠭᠦᠯᠵᠦ ᠵᠣᠭᠰᠣᠭᠠᠨᠠ᠃ ᠡᠨᠡ ᠮᠡᠲᠦ ᠪᠡᠷ ᠠᠯᠢ ᠦᠶᠡ ᠤᠨᠠᠭᠠ ᠬᠥᠬᠥᠬᠦ ᠳ᠋ᠦ᠍ ᠬᠥᠳᠡᠯᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠦᠶᠡ ᠰᠠᠶᠢ ᠠᠶᠤᠯᠭᠠᠬᠤ ᠪᠠᠨ ᠵᠣᠭᠰᠣᠨᠠ ᠃ ᠢᠩᠭᠢᠪᠡᠯ ᠬᠠᠭᠠᠰ ᠡᠳᠦᠷ ᠪᠣᠯᠤᠯ ᠦᠭᠡᠢ ᠤᠨᠠᠭᠠ ᠪᠠᠨ ᠠᠪᠴᠢᠬᠠᠳᠠᠭ᠃
ᠡᠷᠡᠵᠦ ᠠᠪᠬᠠᠭᠤᠯᠬᠤ
ᠭᠡᠭᠦᠦ ᠪᠡᠨ ᠨᠣᠭᠲᠣᠯᠠᠵᠤ ᠂ ᠴᠤᠯᠪᠤᠭᠤᠷ ᠢ ᠨᠢ ᠤᠷᠤᠭᠰᠢ ᠲᠡᠳᠡᠨ ᠤᠶᠠᠵᠤ ᠂ ᠥᠷᠥᠭᠡᠰᠦᠨ ᠭᠤᠶᠠ ᠶ᠋ᠢᠨ ᠬᠢᠨᠢ ᠪᠣᠷᠪᠢ ᠠ᠋ᠴᠠ ᠳᠡᠭᠡᠬᠡᠨᠡᠭᠦᠷ ᠪᠣᠭᠣᠵᠤ ᠬᠣᠢᠰᠢ ᠬᠡᠢ ᠲᠡᠳᠡᠨ ᠤᠶᠠᠭᠠᠳ ᠤᠶᠠᠭᠰᠠᠨ ᠲᠠᠯᠠ ᠠ᠋ᠴᠠ ᠤᠨᠠᠭᠠ ᠪᠠᠨ ᠬᠥᠬᠥᠭᠦᠯᠳᠡᠭ ᠃ ᠡᠭᠦᠨ ᠢ᠋ ᠡᠷᠡᠵᠦ ᠠᠪᠬᠠᠭᠤᠯᠬᠤ ᠭᠡᠳᠡᠭ᠃
ᠦᠬᠡᠷ ᠦ᠋ᠨ ᠣᠷᠣᠭᠠᠯᠠᠬᠤ ᠂ ᠬᠡᠭᠡᠯᠲᠦᠬᠦ ᠂ ᠲᠥᠯᠯᠡᠬᠦ ᠬᠤᠭᠤᠴᠠᠭᠠ ᠪᠠ
ᠭᠣᠯᠣᠩᠬᠠᠢ ᠶ᠋ᠢ ᠠᠪᠬᠠᠭᠤᠯᠬᠤ ᠠᠷᠭᠠ ᠶ᠋ᠢᠨ ᠵᠦᠢᠯ
ᠦᠬᠡᠷ ᠦ᠋ᠨ ᠣᠷᠣᠭᠠ ᠣᠷᠣᠬᠤ ᠴᠠᠭ
ᠬᠠᠭᠤᠴᠢᠨ ᠤᠯᠠᠷᠢᠯ ᠤ᠋ᠨ 6 ᠂ 7 ᠂ 8 ᠰᠠᠷᠠ ᠪᠣᠯᠤᠨᠠ ᠃ ᠡᠨᠡ ᠨᠢ ᠦᠬᠡᠷ ᠰᠢᠭ ᠪᠢᠳᠠᠭᠤ ᠬᠡᠯᠡ ᠲᠡᠢ ᠮᠠᠯ ᠶᠠᠭ ᠰᠠᠢᠬᠠᠨ ᠨᠣᠭᠣᠭᠠᠨ ᠳ᠋ᠤ᠌ ᠴᠠᠳᠴᠤ ᠬᠦᠴᠦ ᠲᠠᠮᠢᠷᠲᠠᠢ ᠪᠣᠯᠤᠭᠰᠠᠨ ᠴᠠᠭ ᠪᠣᠯᠬᠣᠷ ᠣᠷᠣᠭᠠᠯᠠᠵᠤ ᠡᠬᠢᠯᠡᠨᠡ ᠃ ᠲᠡᠷᠡᠴᠢᠯᠡᠨ ᠡᠨᠡ ᠬᠤᠭᠤᠴᠠᠭᠠᠨ ᠤ᠋ ᠬᠢᠨᠢ ᠬᠡᠭᠡᠯ ᠲᠣᠭᠲᠠᠬᠤ ᠨᠢ ᠣᠯᠠᠨ ᠪᠠᠢᠳᠠᠭ ᠃
ᠦᠬᠡᠷ ᠠᠷᠪᠠᠨ ᠰᠠᠷᠠ ᠲᠠᠢ
ᠦᠬᠡᠷ ( ᠦᠨᠢᠶᠡᠨ ) ᠦ᠌ ᠬᠡᠭᠡᠯᠰᠢᠵᠦ ᠶᠠᠪᠤᠬᠤ ᠬᠤᠭᠤᠴᠠᠭᠠ ᠃ ᠦᠨᠢᠶᠡ ᠂ ᠡᠨᠡ ᠵᠢᠯ ᠦ᠋ᠨ ᠬᠠᠭᠤᠴᠢᠨ ᠤᠯᠠᠷᠢᠯ ᠤ᠋ᠨ 6 ᠂7 ᠂ 8 ᠰᠠᠷᠠ ᠶ᠋ᠢᠨ ᠠᠯᠢᠨ ᠳ᠋ᠤᠨᠢ ᠪᠤᠬᠠᠨ ᠳ᠋ᠤ᠌ ᠭᠠᠷᠤᠭᠰᠠᠨ ᠪᠣᠯ ᠳᠠᠷᠠᠬᠠ ᠵᠢᠯ ᠦ᠋ᠨ 4 ᠂ 5 ᠂ 6 ᠰᠠᠷᠠ ᠪᠣᠯᠬᠤ ᠳ᠋ᠤ᠌ ᠲᠤᠭᠤᠯ ᠨᠢ ᠡᠬᠡ ᠶ᠋ᠢᠨ ᠬᠡᠪᠡᠯᠢ ᠳ᠋ᠦ᠍ 10 ᠰᠠᠷᠠ ᠪᠣᠯᠤᠨᠠ ᠃ ᠡᠨᠡ ᠬᠦ᠌ ᠬᠤᠭᠤᠴᠠᠭᠠ ᠶ᠋ᠢ ᠦᠬᠡᠷ ᠠᠷᠪᠠᠨ ᠰᠠᠷᠠ ᠲᠠᠢ ᠭᠡᠳᠡᠭ ᠃
ᠦᠨᠢᠶᠡ ᠲᠤᠭᠤᠯᠯᠠᠬᠤ ᠴᠠᠭ
ᠨᠢᠳᠤᠨᠤᠨ 6 ᠂ 7 ᠂ 8 ᠰᠠᠷᠠ ᠶ᠋ᠢᠨ ᠠᠯᠢᠨ ᠳ᠋ᠤᠨᠢ ᠪᠤᠬᠠᠨ ᠳ᠋ᠤ᠌ ᠭᠠᠷᠤᠭᠰᠠᠨ ᠦᠨᠢᠶᠡ ᠂ ᠡᠨᠡ ᠵᠢᠯ ᠦ᠋ᠨ 4 ᠂ 5 ᠂ 6 ᠰᠠᠷᠠ ᠪᠣᠯᠬᠤ ᠳ᠋ᠤ᠌ 10 ᠰᠠᠷᠠ ᠨᠢ ᠭᠦᠢᠴᠡᠵᠦ ᠲᠤᠭᠤᠯᠯᠠᠬᠤ ᠪᠣᠯᠤᠨᠠ ᠃ ᠡᠨᠡ ᠦᠶᠡ ᠶ᠋ᠢ ᠦᠨᠢᠶᠡ ᠲᠤᠭᠤᠯᠯᠠᠬᠤ ᠴᠠᠭ ᠭᠡᠨᠡ᠃
ᠪᠤᠬᠠ ᠬᠠᠷᠠᠢᠬᠤ ᠪᠤᠬᠠ ᠣᠳᠣ ᠣᠷᠣᠭᠠ ᠣᠷᠣᠵᠤ ᠦᠨᠢᠶᠡ ᠬᠥᠭᠡᠭᠡᠬᠦ ᠃
ᠦᠨᠢᠶᠡ ᠪᠤᠬᠠᠨ ᠳ᠋ᠤ᠌ ᠭᠠᠷᠬᠤ ᠦᠨᠢᠶᠡ ᠣᠳᠣ ᠣᠷᠣᠭᠠ ᠣᠷᠣᠵᠤ ᠪᠤᠬᠠ ᠣᠷᠢᠶᠠᠬᠤ᠃
ᠦᠨᠢᠶᠡ ᠲᠤᠭᠤᠯ ᠢ᠋ᠶ᠋ᠠᠨ ᠭᠣᠯᠣᠬᠤ
ᠦᠨᠢᠶᠡ ᠂ ᠲᠤᠭᠤᠯ ᠳ᠋ᠠᠭᠠᠨ ᠠᠮᠠᠷᠠᠭ ᠪᠢᠰᠢ ᠪᠣᠯᠵᠤ ᠣᠷᠬᠢᠨ ᠴᠢᠩᠭᠡᠯᠵᠢᠵᠦ ᠶᠠᠪᠤᠬᠤ᠃
ᠲᠤᠭᠤᠯ ᠠᠪᠬᠠᠭᠤᠯᠬᠤ
ᠭᠣᠯᠣᠩᠬᠠᠢ ᠦᠨᠢᠶᠡ ᠶ᠋ᠢ ᠲᠤᠭᠤᠯ ᠳ᠋ᠠᠭᠠᠨ ᠠᠮᠠᠷᠠᠭ ᠪᠣᠯᠭᠠᠬᠤ᠂ ᠠᠪᠬᠠᠭᠤᠯᠬᠤ ᠠᠷᠭᠠ ᠬᠣᠶᠠᠷ ᠪᠠᠢᠳᠠᠭ᠃
ᠭᠦᠵᠡᠭᠡ ᠴᠢᠬᠢᠵᠦ ᠠᠪᠬᠠᠭᠤᠯᠬᠤ
ᠭᠣᠯᠣᠩᠬᠠᠢ ᠦᠨᠢᠶᠡᠨ ᠦ᠌ ᠪᠠᠶᠠᠨ ᠲᠦᠷᠦᠭᠦᠦ ᠳ᠋ᠦ᠍ ᠨᠣᠢᠲᠠᠨ ᠭᠦᠵᠡᠭᠡ ᠴᠢᠬᠢᠵᠦ ᠣᠷᠣᠭᠤᠯᠤᠭᠠᠳ ᠦᠯᠢᠶᠡᠵᠦ ᠪᠦᠩᠲᠦᠢᠯᠭᠡᠭᠡᠳ ᠭᠠᠷᠭᠠᠨ ᠲᠤᠭᠤᠯ ᠳᠡᠭᠡᠷᠡ ᠪᠡᠨ ᠵᠦᠯᠭᠦᠵᠦ ᠠᠪᠬᠠᠭᠤᠯᠤᠨᠠ᠃
ᠳᠠᠪᠤᠰᠤ ᠬᠢᠵᠦ ᠠᠪᠬᠠᠭᠤᠯᠬᠤ
ᠦᠨᠢᠶᠡᠨ ᠦ᠌ ᠪᠡᠨ ᠪᠠᠶᠠᠨ ᠲᠦᠷᠦᠭᠦᠦ ᠳ᠋ᠦ᠍ᠨᠢ ᠪᠠᠯᠪᠠᠳᠠᠭ ᠳᠠᠪᠤᠰᠤ ᠬᠢᠵᠦ ᠰᠢᠭᠡᠯᠭᠡᠵᠦ ᠰᠢᠭᠡᠰᠦ ᠪᠡᠷ ᠲᠤᠭᠤᠯ ᠢ᠋ ᠨᠢ ᠵᠦᠯᠭᠦᠵᠦ ᠳᠣᠯᠢᠶᠠᠯᠭᠠᠨ ᠠᠪᠬᠠᠭᠤᠯᠬᠤ᠃
ᠲᠡᠮᠡᠭᠡᠨ ᠦ᠌ ᠣᠷᠣᠭᠠᠯᠠᠬᠤ ᠂ ᠬᠡᠭᠡᠯᠲᠦᠬᠦ ᠂ ᠲᠥᠯᠯᠡᠬᠦ ᠬᠤᠭᠤᠴᠠᠭᠠ ᠪᠠ
ᠭᠣᠯᠣᠩᠬᠠᠢ ᠶ᠋ᠢ ᠠᠪᠬᠠᠭᠤᠯᠬᠤ ᠠᠷᠭᠠ ᠶ᠋ᠢᠨ ᠵᠦᠢᠯ
ᠲᠡᠮᠡᠭᠡᠨ ᠦ᠌ ᠣᠷᠣᠭᠠ ᠣᠷᠣᠬᠤ ᠬᠤᠭᠤᠴᠠᠭᠠ
ᠪᠤᠤᠷᠠ ᠬᠠᠭᠤᠴᠢᠨ ᠤᠯᠠᠷᠢᠯ ᠤ᠋ᠨ ᠡᠪᠦᠯ ᠦ᠋ᠨ ᠶᠢᠰᠦ ᠡᠬᠢᠯᠡᠭᠰᠡᠭᠡᠷ ᠰᠢᠪᠠᠵᠤ ᠮᠠᠶᠢᠭᠯᠠᠵᠤ ᠬᠥᠭᠡᠰᠦᠷᠡᠭᠰᠡᠭᠡᠷ ᠲᠠᠪᠤ ᠶᠢᠰᠦ – 11᠂ 12 ᠰᠠᠷᠠ ᠳ᠋ᠤ᠌ ᠬᠦᠷᠴᠦ ᠰᠠᠶᠢ ᠭᠦᠢᠴᠡᠳ ᠣᠷᠣᠭᠠ ᠣᠷᠣᠨᠠ᠃ ᠲᠡᠮᠡᠭᠡ ᠪᠣᠯ ᠬᠠᠯᠠᠭᠤᠨ ᠶᠡᠬᠡᠲᠡᠢ᠃ ᠬᠦᠢᠲᠡᠨ ᠣᠷᠣᠬᠤ ᠳ᠋ᠤ᠌ ᠬᠠᠯᠠᠭᠤᠨ ᠨᠢ ᠪᠦᠷ ᠪᠥᠭᠡᠨᠰᠦᠭ ᠲᠡᠭᠡᠨ ᠬᠤᠷᠠᠮᠳᠤᠵᠤ ᠢᠷᠡᠳᠡᠭ᠃ ᠲᠡᠭᠡᠬᠦᠯᠡᠷ ᠰᠢᠭᠡᠰᠦ ᠠᠯᠲᠠᠨ ᠰᠢᠪᠠᠬᠤ ᠠ᠋ᠴᠠ ᠭᠠᠳᠠᠨᠠ ᠳᠣᠲᠣᠭᠰᠢ ᠰᠢᠷᠭᠤᠭᠰᠠᠨ ᠬᠠᠯᠠᠭᠤᠨ ᠤ᠋ ᠠᠭᠤᠷ ᠨᠢ ᠨᠤᠭᠤᠰᠤ ᠪᠠᠷ ᠨᠢ ᠳᠠᠮᠵᠢᠨ ᠰᠢᠯᠢᠨ ᠬᠦᠵᠦᠭᠦᠨ ᠦ᠌ ᠨᠤᠭᠤᠰᠤᠨ ᠰᠦᠪᠡ ᠪᠡᠷ ᠱᠦᠭᠦᠷᠡᠵᠦ ᠪᠣᠬᠢ ᠭᠠᠷᠴᠤ ᠨᠢᠯᠠᠬᠤ ᠂ ᠠᠮᠠ ᠠ᠋ᠴᠠ ᠬᠥᠭᠡᠰᠦ ᠰᠠᠬᠠᠷᠠᠵᠤ ᠢᠷᠡᠭᠰᠡᠭᠡᠷ ᠣᠷᠣᠭᠠᠨ ᠲᠠᠮᠢᠷ ᠲᠡᠭᠰᠢᠷᠡᠵᠦ ᠰᠠᠶᠢ ᠢᠩᠭᠡᠨ ᠳ᠋ᠦ᠍ ᠰᠠᠭᠤᠳᠠᠭ᠃
ᠲᠡᠮᠡᠭᠡ ᠠᠷᠪᠠᠨ ᠬᠣᠶᠠᠷ ᠰᠠᠷᠠ ᠲᠠᠢ
ᠲᠡᠮᠡᠭᠡᠨ ( ᠢᠩᠭᠡ ） ᠶ᠋ᠢᠨ ᠬᠡᠭᠡᠯᠰᠢᠵᠦ ᠶᠠᠪᠤᠬᠤ ᠬᠤᠭᠤᠴᠠᠭᠠ᠃ ᠢᠩᠭᠡ ᠂ ᠡᠨᠡ ᠵᠢᠯ ᠦ᠋ᠨ 12᠂ 1 ᠰᠠᠷᠠ ᠶ᠋ᠢᠨ ᠠᠯᠢᠨ ᠳ᠋ᠤᠨᠢ ᠪᠤᠤᠷᠠᠨ ᠳ᠋ᠤ᠌ ᠰᠠᠭᠤᠭᠰᠠᠨ ᠪᠣᠯ ᠳᠠᠷᠠᠭᠠ ᠵᠢᠯ ᠦ᠋ᠨ 12 ᠂ 1 ᠰᠠᠷᠠ ᠪᠣᠯᠬᠤ ᠳ᠋ᠤ᠌ ᠪᠣᠲᠣᠭᠣ ᠶᠠᠭ ᠡᠬᠡ ᠶ᠋ᠢᠨ ᠬᠡᠪᠡᠯᠢ ᠳ᠋ᠦ᠍ 12 ᠰᠠᠷᠠ ᠪᠣᠯᠤᠨᠠ᠃ ᠡᠨᠡ ᠬᠦ᠌ ᠬᠤᠭᠤᠴᠠᠭᠠ ᠶ᠋ᠢ ᠲᠡᠮᠡᠭᠡ ᠠᠷᠪᠠᠨ ᠬᠣᠶᠠᠷ ᠰᠠᠷᠠ ᠲᠠᠢ ᠭᠡᠳᠡᠭ᠃
ᠢᠩᠭᠡ ᠪᠣᠲᠣᠭᠣᠯᠠᠬᠤ ᠴᠠᠭ
ᠨᠢᠳᠤᠨᠤᠨ ᠤ᠋ 12 ᠰᠠᠷᠠ ᠪᠤᠶᠤ ᠡᠨᠡ ᠵᠢᠯ ᠦ᠋ᠨ 1 ᠰᠠᠷᠠ ᠳ᠋ᠤ᠌ ᠪᠤᠤᠷᠠᠨ ᠳ᠋ᠤ᠌ ᠰᠠᠭᠤᠭᠰᠠᠨ ᠢᠩᠭᠡ ᠂ ᠡᠨᠡ ᠵᠢᠯ ᠦ᠋ᠨ 12 ᠰᠠᠷᠠ ᠪᠣᠯᠤᠨ ᠢᠷᠡᠬᠦ ᠵᠢᠯ ᠦ᠋ᠨ ᠴᠠᠭᠠᠨ ᠰᠠᠷᠠ ᠳ᠋ᠤ᠌ ᠪᠣᠲᠣᠭᠣᠯᠠᠬᠤ ᠪᠣᠯᠤᠨᠠ᠃ ᠡᠭᠦᠨ ᠢ᠋ ᠢᠩᠭᠡ ᠪᠣᠲᠣᠭᠣᠯᠠᠬᠤ ᠴᠠᠭ ᠭᠡᠨᠡ᠃
ᠬᠠᠶᠠᠭᠠᠷᠠᠵᠤ ᠡᠬᠢᠯᠡᠬᠦ
ᠢᠩᠭᠡ ᠣᠷᠣᠭᠠ ᠣᠷᠣᠵᠤ ᠡᠬᠢᠯᠡᠬᠦ ᠪᠤᠶᠤ ᠬᠡᠭᠡᠯᠰᠢᠵᠦ ᠡᠬᠢᠯᠡᠬᠦ ᠭᠡᠰᠡᠨ ᠤᠳᠬᠠ ᠲᠠᠢ᠃
ᠬᠠᠶᠠᠭᠠᠷᠠᠴᠢᠬᠠᠯᠠ
ᠣᠷᠣᠭᠠ ᠣᠷᠣᠭᠠᠳ ᠪᠠᠷᠠᠴᠢᠬᠠᠯᠠ ᠭᠡᠰᠡᠨ ᠪᠤᠶᠤ ᠬᠡᠭᠡᠯᠰᠢᠭᠡᠳ ᠪᠠᠷᠠᠴᠢᠬᠠᠯᠠ ᠭᠡᠰᠡᠨ ᠤᠳᠬᠠ ᠲᠠᠢ᠃
ᠬᠠᠶᠠᠮᠠᠯ ᠢᠩᠭᠡ ᠪᠤᠤᠷᠠᠨ ᠳ᠋ᠤ᠌ ᠭᠠᠷᠴᠤ ᠨᠢᠭᠡᠨᠲᠡ ᠬᠡᠭᠡᠯᠲᠦᠭᠰᠡᠨ ᠢᠩᠭᠡ ᠶ᠋ᠢ ᠬᠡᠯᠡᠨᠡ᠃
ᠰᠢᠪᠡᠵᠦ ᠡᠬᠢᠯᠡᠬᠦ
ᠪᠤᠤᠷᠠ ᠣᠷᠣᠭᠠ ᠣᠷᠣᠵᠤ ᠡᠬᠢᠯᠡᠬᠦ ᠳ᠋ᠡᠭᠡᠨ ᠰᠢᠭᠡᠰᠦ ᠠᠯᠳᠠᠳᠠᠭ᠃ ᠡᠨᠡ ᠰᠢᠭᠡᠰᠦ ᠪᠡᠨ ᠰᠡᠭᠦᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠠᠪᠠᠨ ᠠᠷᠤ ᠪᠦᠬᠦ ᠶ᠋ᠢᠨ ᠠᠷᠤ ᠶ᠋ᠢ ᠨᠣᠷᠭᠠᠵᠤ ᠱᠠᠯᠴᠢᠢᠯᠭᠠᠬᠤ ᠶ᠋ᠢ ᠬᠡᠯᠡᠨᠡ᠃
ᠪᠣᠲᠣᠭᠣ ᠪᠠᠨ ᠭᠣᠯᠣᠬᠤ ᠢᠩᠭᠡ ᠂ ᠪᠣᠲᠣᠭᠣᠨ ᠳ᠋ᠠᠭᠠᠨ ᠠᠮᠠᠷᠠᠭ ᠪᠢᠰᠢ ᠪᠣᠯᠬᠤ᠃
ᠪᠣᠲᠣᠭᠣ ᠠᠪᠬᠠᠭᠤᠯᠬᠤ
ᠭᠣᠯᠣᠩᠬᠠᠢ ᠢᠩᠭᠡ ᠶ᠋ᠢ ᠪᠣᠲᠣᠭᠣ ᠳ᠋ᠤᠨᠢ ᠠᠮᠠᠷᠠᠭ ᠪᠣᠯᠭᠠᠬᠤ᠃ ᠠᠪᠬᠠᠭᠤᠯᠬᠤ ᠠᠷᠭᠠ ᠬᠡᠳᠦ ᠪᠣᠢ᠃
ᠳᠠᠭᠤᠯᠠᠵᠤ ᠠᠪᠬᠠᠭᠤᠯᠬᠤ
ᠢᠩᠭᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠪᠣᠲᠣᠭᠣ ᠶ᠋ᠢ ᠨᠢ ᠪᠠᠷᠢᠴᠢᠬᠠᠭᠠᠳ ᠤᠶᠠᠬᠠᠨ ᠰᠠᠢᠬᠠᠨ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠶ᠋ᠢ ᠳᠠᠭᠤᠯᠠᠭᠠᠳ ᠯᠠ ᠪᠠᠢᠪᠠᠯ᠂ ᠢᠩᠭᠡ ᠤᠶᠠᠷᠠᠭᠠᠳ ᠯᠠ ᠪᠦᠳᠦᠭᠦᠨ ᠪᠦᠳᠦᠭᠦᠨ ᠨᠢᠯᠪᠤᠰᠤ ᠤᠨᠠᠭᠠᠵᠤ ᠤᠬᠢᠯᠠᠭᠠᠳ ᠢᠷᠡᠬᠦ ᠳ᠋ᠦ᠍ᠨᠢ ᠪᠣᠲᠣᠭᠣ ᠶ᠋ᠢ ᠨᠢ ᠣᠢᠷᠠᠲᠤᠭᠤᠯᠤᠭᠠᠳ ᠥᠭᠪᠡᠯ ᠠᠪᠴᠢᠬᠠᠳᠠᠭ᠃ ᠡᠨᠡ ᠨᠢ ᠡᠷᠲᠡᠨ ᠦ᠌ ᠠᠷᠭᠠ᠃
ᠬᠥᠭᠵᠢᠮᠳᠡᠵᠦ ᠠᠪᠬᠠᠭᠤᠯᠬᠤ
ᠢᠩᠭᠡ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠪᠣᠲᠣᠭᠣ ᠶ᠋ᠢ ᠨᠢ ᠣᠢᠷᠠᠬᠠᠨ ᠪᠠᠢᠯᠭᠠᠵᠤ᠂ ᠬᠥᠭᠵᠢᠮ ᠠᠪᠴᠢᠷᠠᠭᠠᠳ ᠬᠥᠭᠵᠢᠮᠳᠡᠭᠡᠳ ᠯᠡ ᠪᠠᠢᠪᠠᠯ ᠢᠩᠭᠡ ᠤᠶᠠᠷᠠᠭᠠᠳ ᠥᠪᠡᠰᠦᠪᠡᠨ ᠠᠪᠴᠢᠬᠠᠨᠠ᠃ ᠬᠡᠷᠪᠡ ᠬᠥᠮᠦᠨ ᠪᠦᠯᠢ ᠴᠥᠭᠡᠨ᠂ ᠠᠮᠵᠢᠬᠤ ᠦᠭᠡᠢ ᠪᠣᠯ ᠬᠤᠭᠤᠷ ᠢ᠋ᠶ᠋ᠠᠨ ᠡᠮᠦᠨᠡ ᠪᠦᠬᠦᠨ ᠳ᠋ᠦ᠍ᠨᠢ ᠤᠶᠠᠭᠠᠳ ᠶᠠᠪᠤᠭᠤᠯᠴᠢᠬᠠᠨᠠ᠃ ᠬᠤᠭᠤᠷ ᠨᠢ ᠰᠠᠯᠬᠢᠨ ᠳ᠋ᠤ᠌ ᠬᠣᠩᠭᠢᠨᠠᠵᠤ ᠳᠤᠤᠭᠠᠷᠤᠭᠰᠠᠭᠠᠷ ᠪᠠᠢᠲᠠᠯᠠ ᠤᠶᠠᠷᠠᠭᠤᠯᠵᠤ ᠣᠷᠣᠢ ᠢᠷᠡᠬᠦ ᠳ᠋ᠡᠭᠡᠨ ᠪᠦᠳᠦᠭᠦᠨ ᠪᠦᠳᠦᠭᠦᠨ ᠨᠢᠯᠪᠤᠰᠤ ᠤᠨᠠᠭᠠᠨ ᠪᠣᠢᠯᠠᠭᠰᠠᠭᠠᠷ ᠢᠷᠡᠭᠡᠳ ᠠᠪᠴᠢᠬᠠᠨᠠ᠃ ᠡᠨᠡ ᠨᠢ ᠣᠢᠷᠠ ᠵᠠᠭᠤᠨ ᠤ᠋ ᠠᠷᠭᠠ ᠪᠣᠯᠤᠨᠠ᠃
ᠡᠷᠡᠵᠦ ᠠᠪᠬᠠᠭᠤᠯᠬᠤ
ᠢᠩᠭᠡ ᠶ᠋ᠢᠨ ᠨᠣᠭᠲᠤᠨ ᠴᠤᠯᠪᠤᠭᠤᠷ ᠬᠢᠭᠡᠳ ᠪᠤᠷᠠᠨᠲᠠᠭ ᠢ᠋ ᠨᠢ ᠡᠮᠦᠨᠡᠰᠢ ᠲᠡᠳᠡᠨ ᠤᠶᠠᠵᠤ ᠂ ᠨᠢᠭᠡ ᠭᠤᠶᠠ ᠶ᠋ᠢ ᠨᠢ ᠬᠣᠢᠰᠢ ᠬᠡᠢ ᠲᠡᠳᠡᠨ ᠤᠶᠠᠵᠤ᠂ ᠤᠶᠠᠭᠰᠠᠨ ᠲᠠᠯᠠ ᠠ᠋ᠴᠠ ᠨᠢ ᠪᠣᠲᠣᠭᠣ ᠶ᠋ᠢ ᠨᠢ ᠲᠠᠯᠪᠢᠨ ᠭᠥᠭᠦᠭᠦᠯᠦᠭᠰᠡᠭᠡᠷ ᠠᠪᠬᠠᠭᠤᠯᠬᠤ᠃ ᠡᠨᠡ ᠨᠢ ᠳᠡᠭᠡᠷᠡᠬᠢ ᠠᠷᠭᠠ ᠨᠤᠭᠤᠳ ᠢ ᠬᠡᠷᠡᠭᠯᠡᠭᠡᠳ ᠡᠰᠡ ᠪᠦᠲᠦᠬᠦ ᠳ᠋ᠡᠭᠡᠨ ᠠᠪᠤᠭᠰᠠᠨ ᠴᠥᠬᠥᠷᠡᠭᠰᠡᠨ ᠠᠷᠭᠠ᠃ ᠮᠥᠨ ᠠᠯᠪᠠᠳᠠᠭᠰᠠᠨ ᠬᠠᠲᠠᠭᠤ ᠠᠷᠭᠠ᠃
ᠬᠣᠨᠢᠨ ᠤ᠋ ᠣᠷᠣᠭᠠᠯᠠᠬᠤ ᠂ ᠬᠡᠭᠡᠯᠲᠦᠬᠦ ᠂ ᠲᠥᠯᠯᠡᠬᠦ ᠬᠤᠭᠤᠴᠠᠭᠠ ᠪᠠ
ᠭᠣᠯᠣᠩᠬᠠᠢ ᠶ᠋ᠢ ᠠᠪᠬᠠᠭᠤᠯᠬᠤ ᠠᠷᠭᠠ ᠶ᠋ᠢᠨ ᠵᠦᠢᠯ
ᠬᠥᠭ
① ᠬᠤᠴᠠ ᠤᠬᠤᠨᠠ ᠶ᠋ᠢᠨ ᠡᠮᠡ ᠬᠣᠨᠢ ᠢᠮᠠᠭᠠ ᠬᠥᠭᠡᠭᠡᠬᠦ ᠶ᠋ᠢ ᠬᠣᠷᠢᠭᠯᠠᠵᠤ ᠬᠢᠷᠵᠠᠩ ᠤ᠋ᠨ ᠬᠢᠨᠢ ᠡᠮᠦᠨᠡᠭᠦᠷ ᠳᠡᠭᠦᠵᠢᠯᠡᠨ ᠤᠶᠠᠬᠤ ᠬᠠᠯᠬᠠᠪᠴᠢ᠃
② ᠰᠢᠯᠵᠢᠭᠰᠡᠨ ᠤᠳᠬᠠ : ᠴᠠᠭ ᠬᠤᠭᠤᠴᠠᠭᠠ᠂ ᠲᠥᠯᠥᠪᠯᠡᠭᠡᠲᠡᠢ ᠪᠡᠷ ᠲᠥᠯᠯᠡᠭᠦᠯᠬᠦ ᠶ᠋ᠢᠨ ᠲᠥᠯᠥᠭᠡ ᠲᠣᠭᠲᠠᠭᠰᠠᠨ ᠴᠠᠭ ᠲᠠᠭᠠᠨ ᠬᠤᠴᠠ ᠤᠬᠤᠨᠠ ᠶ᠋ᠢᠨ ᠬᠥᠭ ᠢ᠋ ᠠᠪᠴᠤ ᠨᠡᠢᠯᠡᠭᠦᠯᠬᠦ ᠶ᠋ᠢ ᠬᠥᠭ ᠲᠠᠯᠪᠢᠬᠤ ᠭᠡᠨᠡ᠃
ᠬᠣᠨᠢᠨ ᠤ᠋ ᠣᠷᠣᠭᠠᠯᠠᠬᠤ ᠴᠠᠭ
ᠬᠤᠴᠠ ᠤᠬᠤᠨᠠ ᠲᠠᠷᠭᠤᠲᠠᠢ ᠪᠣᠯ 4 ᠡᠴᠡ 11 ᠰᠠᠷᠠ ᠬᠦᠷᠲᠡᠯᠡ ᠪᠦᠷ ᠣᠷᠣᠭᠠᠯᠠᠵᠤ ᠴᠢᠳᠠᠳᠠᠭ᠃ ᠲᠡᠢᠨ ᠬᠦ᠌ ᠬᠣᠨᠢ ᠶ᠋ᠢ ᠵᠢᠯ ᠳ᠋ᠦ᠍ ᠬᠣᠶᠠᠷ ᠲᠥᠯᠯᠡᠭᠦᠯᠵᠦ ᠪᠣᠯᠳᠠᠭ ᠃ ᠭᠡᠪᠡᠴᠦ ᠲᠥᠯ ᠡᠬᠡ ᠶ᠋ᠢᠨ ᠪᠡᠶᠡ ᠳ᠋ᠦ᠍ ᠲᠤᠩ ᠮᠠᠭᠤ ᠃ ᠠᠩᠬᠠ ᠡᠷᠲᠡ ᠳ᠋ᠡᠭᠡᠨ ᠬᠣᠷᠣᠭᠠ ᠰᠠᠷᠠᠪᠴᠢ ᠦᠭᠡᠢ᠂ ᠦᠷᠭᠦᠯᠵᠢ ᠨᠡᠭᠦᠳᠡᠯᠯᠡᠨ ᠮᠠᠯᠵᠢᠳᠠᠭ ᠪᠣᠯᠬᠣᠷ ᠬᠣᠨᠢ ᠪᠠᠨ ᠴᠠᠭ ᠤ᠋ᠨ ᠰᠠᠢᠬᠠᠨ ( ᠳᠤᠯᠠᠭᠠᠨ ᠪᠥᠭᠡᠳ ᠨᠣᠭᠣᠭᠠ ᠲᠠᠢ ) ᠬᠠᠩᠰᠢ ᠲᠠᠭᠠᠷᠠᠭᠤᠯᠵᠤ ᠲᠥᠯᠯᠡᠭᠦᠯᠬᠦ ᠪᠡᠷ ᠪᠢᠯᠢᠭ ᠦ᠋ᠨ ᠤᠯᠠᠷᠢᠯ ᠤ᠋ᠨ 9 ᠂ 10 ᠰᠠᠷᠠ ᠳ᠋ᠤ᠌ ᠬᠥᠭ ᠲᠠᠯᠪᠢᠨ ᠬᠤᠴᠠ ᠨᠡᠢᠯᠡᠭᠦᠯᠳᠡᠭ ᠃ ᠣᠳᠣ ᠪᠣᠯ ᠡᠨᠡ ᠵᠤᠷᠰᠢᠯ ᠢ᠋ ᠡᠪᠳᠡᠨ ᠡᠪᠦᠯ ᠦ᠋ᠨ ᠲᠥᠯ ᠠᠪᠴᠤ ᠂ ᠢᠷᠡᠬᠦ ᠨᠡᠮᠦᠢ ᠡᠪᠦᠯ ᠳ᠋ᠡᠭᠡᠨ ᠳᠠᠷᠤᠢ ᠬᠡᠭᠡᠯᠰᠢᠵᠦ ᠴᠢᠳᠠᠬᠤ ᠶ᠋ᠢ ᠪᠣᠳᠣᠯᠬᠢᠯᠠᠨ 8 ᠂ 9 ᠰᠠᠷᠠ ᠳ᠋ᠤ᠌ ᠳᠠᠷᠤᠢ ᠬᠤᠴᠠ ᠨᠡᠢᠯᠡᠭᠦᠯᠵᠦ ᠬᠠᠪᠴᠢ ᠳᠠᠬᠤᠯᠠᠢ ᠲᠥᠯ ᠨᠦ᠍ᠭᠦᠳ ᠠᠪᠳᠠᠭ ᠃ ᠡᠢᠨ ᠪᠣᠯᠬᠣᠷ ᠳᠤᠯᠠᠭᠠᠨ ᠫᠧᠩ ᠰᠠᠷᠠᠪᠴᠢ ᠭᠡᠲᠡᠯᠡ ᠪᠣᠷᠳᠣᠭᠠ ᠡᠪᠡᠰᠦ ᠭᠡᠵᠦ ᠨᠢᠭᠡ ᠣᠯᠠᠨ ᠪᠡᠯᠡᠳᠬᠡᠯ ᠠᠵᠢᠯ ᠬᠢᠳᠡᠭ᠃
ᠬᠣᠨᠢ ᠵᠢᠷᠭᠤᠭᠠᠨ ᠰᠠᠷᠠ ᠲᠠᠢ
ᠡᠮᠡ ᠬᠣᠨᠢᠨ ᠤ᠋ ᠬᠡᠭᠡᠯᠰᠢᠵᠦ ᠶᠠᠪᠤᠬᠤ ᠬᠤᠭᠤᠴᠠᠭᠠ ᠃ ᠡᠮᠡ ᠬᠣᠨᠢ ᠂ ᠡᠨᠡ ᠵᠢᠯ ᠦ᠋ᠨ 9 ᠂ 10 ᠰᠠᠷᠠ ( ᠪᠢᠯᠢᠭ ᠦ᠋ᠨ ) ᠳ᠋ᠦ᠍ ᠬᠥᠭ ᠲᠠᠯᠪᠢᠵᠤ ᠬᠡᠭᠡᠯᠰᠢᠭᠦᠯᠦᠭᠰᠡᠨ ᠪᠣᠯ ᠳᠠᠷᠠᠭᠠ ᠵᠢᠯ ᠦ᠋ᠨ 2 ᠂ 3 ᠰᠠᠷᠠ ᠪᠣᠯᠬᠤ ᠳ᠋ᠤ᠌ ᠬᠤᠷᠠᠭᠠ ᠶᠠᠭ ᠡᠬᠡ ᠶ᠋ᠢᠨ ᠬᠡᠪᠡᠯᠢ ᠳ᠋ᠦ᠍ 6 ᠰᠠᠷᠠ ᠪᠣᠯᠤᠨᠠ ᠃ ᠡᠨᠡ ᠬᠦ᠌ ᠬᠤᠭᠤᠴᠠᠭᠠ ᠶ᠋ᠢ ᠬᠣᠨᠢ ᠵᠢᠷᠭᠤᠭᠠᠨ ᠰᠠᠷᠠ ᠲᠠᠢ ᠭᠡᠳᠡᠭ᠃
ᠬᠣᠨᠢ ᠲᠥᠯᠯᠡᠬᠦ ᠴᠠᠭ
ᠨᠢᠳᠤᠨᠤᠨ ᠤ᠋ 9 ᠂ 10 ( ᠪᠢᠯᠢᠭ ᠦ᠋ᠨ ) ᠰᠠᠷᠠ ᠳ᠋ᠤ᠌ ᠬᠥᠭ ᠲᠠᠯᠪᠢᠭᠰᠠᠨ ᠪᠣᠯ ᠡᠨᠡ ᠵᠢᠯ ᠦ᠋ᠨ 2 ᠂ 3 ᠰᠠᠷᠠ ᠶ᠋ᠢᠨ ᠬᠠᠩᠰᠢᠨ ᠢ᠋ᠶ᠋ᠠᠷ 6 ᠰᠠᠷᠠ ᠨᠢ ᠭᠦᠢᠴᠡᠵᠦ ᠬᠤᠷᠠᠭᠠᠯᠠᠬᠤ ᠪᠣᠯᠤᠨᠠ ᠃ ᠡᠭᠦᠨ ᠢ᠋ ᠬᠣᠨᠢ ᠲᠥᠯᠯᠡᠬᠦ ᠴᠠᠭ ᠭᠡᠳᠡᠭ ᠃
ᠬᠤᠴᠠ ᠲᠠᠯᠪᠢᠬᠤ
ᠠᠩᠬᠠᠨ ᠳ᠋ᠠᠭᠠᠨ ᠶᠡᠷᠦ ᠶ᠋ᠢᠨ ᠪᠠᠢᠳᠠᠯ ᠳ᠋ᠤ᠌ ᠬᠠᠭᠤᠴᠢᠨ ᠤᠯᠠᠷᠢᠯ ᠳ᠋ᠤ᠌ 9 ᠂ 10 ᠰᠠᠷᠠ ᠳ᠋ᠤ᠌ ᠬᠤᠴᠠ ᠪᠠᠨ ᠬᠣᠨᠢᠨ ᠳ᠋ᠤ᠌ ᠨᠡᠢᠯᠡᠭᠦᠯᠳᠡᠭ ᠢ᠋ ᠬᠡᠯᠡᠨᠡ ᠃
ᠬᠤᠴᠠ ᠨᠡᠢᠯᠡᠭᠦᠯᠬᠦ
① ᠬᠤᠴᠠ ᠲᠠᠯᠪᠢᠬᠤ ᠶ᠋ᠢᠨ ᠨᠥᠭᠦᠭᠡ ᠬᠡᠯᠡᠯᠭᠡ᠃ ② ᠬᠤᠴᠠ ᠪᠠᠨ ᠬᠣᠨᠢᠨ ᠰᠦᠷᠦᠭ ᠲᠦ᠍ ᠨᠡᠢᠯᠡᠭᠦᠯᠬᠦ᠃
ᠬᠡᠭᠡᠯᠲᠦᠬᠦ
ᠬᠡᠭᠡᠯ ᠲᠣᠭᠲᠠᠬᠤ᠃ ᠡᠮᠡ ᠬᠣᠨᠢᠨ ᠤ᠋ ᠬᠡᠪᠡᠯᠢ ᠳ᠋ᠦ᠍ ᠬᠤᠷᠠᠭᠠ ᠪᠦᠷᠢᠯᠳᠦᠬᠦ ᠶ᠋ᠢ ᠬᠡᠯᠡᠨᠡ᠃
ᠬᠤᠷᠠᠭᠠ ᠪᠠᠨ ᠭᠣᠯᠣᠬᠤ ᠬᠣᠨᠢ ᠂ ᠬᠤᠷᠠᠭᠠᠨ ᠳ᠋ᠠᠭᠠᠨ ᠠᠮᠠᠷᠠᠭ ᠪᠢᠰᠢ ᠪᠣᠯᠬᠤ᠃
ᠬᠤᠷᠠᠭᠠ ᠠᠪᠬᠠᠭᠤᠯᠬᠤ
ᠭᠣᠯᠣᠭᠰᠠᠨ ᠬᠣᠨᠢᠨ ᠳ᠋ᠤ᠌ ᠬᠤᠷᠠᠭᠠ ᠶ᠋ᠢ ᠨᠢ ᠠᠪᠬᠠᠭᠤᠯᠵᠤ ᠠᠮᠠᠷᠠᠭ ᠪᠣᠯᠭᠠᠬᠤ᠃
ᠭᠣᠯᠣᠩᠬᠠᠢ ᠬᠣᠨᠢ ᠶ᠋ᠢ ᠲᠣᠢᠭᠯᠠᠨ ᠠᠪᠬᠠᠭᠤᠯᠬᠤ ᠬᠣᠨᠢᠨ ᠤ᠋ ᠭᠣᠯᠣᠩᠬᠠᠢ ᠶ᠋ᠢ ᠲᠣᠢᠭᠯᠠᠵᠤ ᠠᠪᠬᠠᠭᠤᠯᠬᠤ᠃
ᠲᠣᠢᠭ ! ᠲᠣᠢᠭ ! ᠲᠣᠢᠭ !
ᠲᠣᠷᠮᠣᠭᠣᠷ ᠨᠢᠳᠦᠲᠡᠢ ᠬᠤᠷᠠᠭᠠ ᠴᠢᠨᠢ
ᠳᠣᠲᠣᠷᠠ ᠨᠢ ᠬᠠᠷᠠᠯᠠᠭᠠᠳ ᠮᠠᠭᠤᠳᠠᠵᠤ ᠪᠠᠢᠨᠠ᠃
ᠳᠣᠲᠣᠨᠣ ᠶ᠋ᠢᠨ ᠬᠠᠢᠷᠠᠲᠤ ᠡᠬᠡ ᠨᠢ
ᠲᠣᠭᠣᠵᠤ ᠬᠠᠢᠷᠠᠯᠠᠭᠠᠳ ᠠᠪᠴᠢᠭ ᠳᠠ !
ᠲᠣᠢᠭ ! ᠲᠣᠢᠭ ! ᠲᠣᠢᠭ!
ᠲᠣᠢᠭ ! ᠲᠣᠢᠭ! ᠲᠣᠢᠭ ! ᠁
ᠬᠠᠷᠠ ᠨᠢᠳᠦᠮᠠᠯ ᠬᠤᠷᠠᠭᠠ ᠴᠢᠨᠢ
ᠬᠠᠷᠠᠩᠭᠤᠰᠴᠤ ᠥᠯᠪᠡᠷᠡᠭᠡᠳ ᠮᠠᠭᠤᠳᠠᠵᠤ ᠪᠠᠢᠨᠠ
ᠬᠠᠯᠠᠭᠤᠨ ᠰᠡᠳᠬᠢᠯᠲᠡᠢ ᠡᠬᠡ ᠨᠢ
ᠬᠠᠢᠷᠠᠯᠠᠵᠤ ᠰᠠᠨᠠᠭᠠᠳ ᠠᠪᠴᠢᠭ ᠳᠠ !
ᠲᠣᠢᠭ ! ᠲᠣᠢᠭ ! ᠲᠣᠢᠭ !
ᠡᠭᠦᠨ ᠢ᠋ ᠲᠣᠢᠭᠯᠠᠬᠤ ᠭᠡᠳᠡᠭ ᠃
ᠢᠮᠠᠭᠠᠨ ᠤ᠋ ᠣᠷᠣᠭᠠᠯᠠᠬᠤ᠂ ᠬᠡᠭᠡᠯᠲᠦᠬᠦ᠂ ᠲᠥᠯᠯᠡᠬᠦ ᠬᠤᠭᠤᠴᠠᠭᠠ ᠪᠠ
ᠭᠣᠯᠣᠩᠬᠠᠢ ᠶ᠋ᠢ ᠠᠪᠬᠠᠭᠤᠯᠬᠤ ᠠᠷᠭᠠ ᠶ᠋ᠢᠨ ᠵᠦᠢᠯ
ᠬᠥᠭ ᠬᠣᠨᠢᠨ ᠤ᠋ ᠬᠥᠭ ᠲᠡᠢ ᠠᠳᠠᠯᠢ ᠃
ᠢᠮᠠᠭᠠᠨ ᠤ᠋ ᠣᠷᠣᠭᠠᠯᠠᠬᠤ ᠬᠤᠭᠤᠴᠠᠭᠠ
ᠬᠡᠷᠪᠡ ᠤᠬᠤᠨᠠ ᠲᠠᠷᠭᠤᠲᠠᠢ ᠪᠣᠯ 2 – 11 ᠰᠠᠷᠠ ᠬᠦᠷᠲᠡᠯᠡ ᠪᠦᠷ ᠣᠷᠣᠭᠠᠯᠠᠵᠤ ᠴᠢᠳᠠᠳᠠᠭ᠃ ᠠᠩᠬᠠᠨ ᠤ᠋ ᠨᠡᠭᠦᠳᠡᠯᠯᠡᠨ ᠮᠠᠯᠵᠢᠵᠤ ᠪᠣᠢ ᠦᠶᠡ ᠳ᠋ᠦ᠍᠂ ᠬᠣᠨᠢᠨ ᠠ᠋ᠴᠠ ᠪᠠᠨ ᠰᠠᠷᠠ ᠬᠣᠷᠢ ᠬᠣᠨᠣᠭ ᠬᠣᠵᠢᠭᠤ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠬᠠᠭᠤᠴᠢᠨ ᠤᠯᠠᠷᠢᠯ ᠤ᠋ᠨ 10 ᠂ 11 ᠰᠠᠷᠠ ᠳ᠋ᠤ᠌ ᠤᠬᠤᠨᠠ ᠲᠠᠯᠪᠢᠳᠠᠭ᠃ ᠣᠳᠣ 7 ᠂ 8 ᠰᠠᠷᠠ ᠳ᠋ᠤ᠌ ᠳᠠᠷᠤᠢ ᠤᠬᠤᠨᠠ ᠪᠠᠨ ᠲᠠᠯᠪᠢᠴᠢᠬᠠᠭᠠᠳ ᠡᠪᠦᠯ ᠦ᠋ᠨ ᠲᠥᠯ ᠪᠤᠶᠤ ᠡᠷᠲᠡ ᠶ᠋ᠢᠨ ᠲᠥᠯ ᠠᠪᠴᠤ ᠪᠣᠢ᠃
ᠢᠮᠠᠭᠠ ᠲᠠᠪᠤᠨ ᠰᠠᠷᠠ ᠲᠠᠢ
ᠡᠮᠡ ᠢᠮᠠᠭᠠᠨ ᠤ᠋ ᠬᠡᠭᠡᠯᠰᠢᠵᠦ ᠶᠠᠪᠤᠬᠤ ᠬᠤᠭᠤᠴᠠᠭᠠ᠃ ᠡᠮᠡ ᠢᠮᠠᠭᠠ ᠂ ᠡᠨᠡ ᠵᠢᠯ ᠦ᠋ᠨ 10 - 11 ᠰᠠᠷᠠ ᠳ᠋ᠤ᠌ ᠬᠥᠭ ᠲᠠᠯᠪᠢᠵᠤ ᠬᠡᠭᠡᠯᠰᠢᠭᠰᠡᠨ ᠪᠣᠯ ᠳᠠᠷᠠᠭᠠ ᠵᠢᠯ ᠦ᠋ᠨ 3 ᠂ 4 ᠰᠠᠷᠠ ᠪᠣᠯᠬᠤ ᠳ᠋ᠤ᠌ ᠢᠰᠢᠭᠡ ᠶᠠᠭ ᠡᠬᠡ ᠶ᠋ᠢᠨ ᠬᠡᠪᠡᠯᠢ ᠳ᠋ᠦ᠍ 6 ᠰᠠᠷᠠ ᠪᠣᠯᠤᠨᠠ ᠃ ᠡᠨᠡ ᠬᠦ᠌ ᠬᠤᠭᠤᠴᠠᠭᠠ ᠶ᠋ᠢ ᠢᠮᠠᠭᠠ ᠲᠠᠪᠤᠨ ᠰᠠᠷᠠ ᠲᠠᠢ ᠭᠡᠨᠡ᠃
ᠢᠮᠠᠭᠠ ᠲᠥᠯᠯᠡᠬᠦ ᠴᠠᠭ
ᠬᠠᠭᠤᠴᠢᠨ ᠤᠯᠠᠷᠢᠯ ᠢ᠋ᠶ᠋ᠠᠷ ᠨᠢᠳᠤᠨᠤᠨ ᠤ᠋ 10 ᠂ 11 ᠰᠠᠷᠠ ᠳ᠋ᠤ᠌ ᠬᠥᠭ ᠲᠠᠯᠪᠢᠭᠰᠠᠨ ᠪᠣᠯ ᠡᠨᠡ ᠵᠢᠯ ᠦ᠋ᠨ 3 ᠂ 4 ᠰᠠᠷᠠ ᠳ᠋ᠤ᠌ – ᠬᠠᠩᠰᠢᠨ ᠤ᠋ ᠬᠣᠢᠭᠤᠷ 5 ᠰᠠᠷᠠ ᠨᠢ ᠭᠦᠢᠴᠡᠵᠦ ᠢᠰᠢᠭᠡᠯᠡᠬᠦ ᠪᠣᠯᠤᠨᠠ ᠃ ᠡᠨᠡ ᠴᠠᠭ ᠢ᠋ ᠢᠮᠠᠭᠠ ᠲᠥᠯᠯᠡᠬᠦ ᠴᠠᠭ ᠭᠡᠨᠡ᠃
ᠤᠬᠤᠨᠠ ᠲᠠᠯᠪᠢᠬᠤ
ᠲᠠᠯᠪᠢᠶᠠ ᠭᠡᠵᠦ ᠬᠤᠭᠤᠴᠠᠭᠰᠠᠨ ᠴᠠᠭ ᠲᠠᠭᠠᠨ ᠤᠬᠤᠨᠠ ᠶ᠋ᠢ ᠢᠮᠠᠭᠠᠨ ᠰᠦᠷᠦᠭ ᠲᠦ᠍ ᠨᠡᠢᠯᠡᠭᠦᠯᠬᠦ ᠶ᠋ᠢ ᠬᠡᠯᠡᠨᠡ᠃
ᠲᠡᠭᠡ ᠨᠡᠢᠯᠡᠭᠦᠯᠬᠦ ᠤᠬᠤᠨᠠ ᠲᠠᠯᠪᠢᠬᠤ ᠶ᠋ᠢᠨ ᠨᠥᠭᠦᠭᠡ ᠬᠡᠯᠡᠯᠭᠡ᠃
ᠡᠪᠦᠯ ᠦ᠋ᠨ ᠲᠥᠯ
ᠬᠣᠨᠢ ᠢᠮᠠᠭᠠ ᠬᠣᠶᠠᠷ ᠤ᠋ᠨ ᠡᠪᠦᠯ ᠦ᠋ᠨ ᠲᠥᠯ ᠭᠡᠪᠡᠯ ᠬᠣᠨᠢ 11 ᠂ 12 ᠰᠠᠷᠠ ᠶ᠋ᠢᠨ ᠬᠢ᠂ ᠢᠮᠠᠭᠠ 12 ᠰᠠᠷᠠ ᠶ᠋ᠢᠨ ᠬᠢ ᠪᠣᠯᠤᠨᠠ᠃
ᠡᠷᠲᠡ ᠶ᠋ᠢᠨ ᠲᠥᠯ
ᠬᠣᠨᠢ ᠢᠮᠠᠭᠠ ᠠᠳᠠᠯᠢ ᠴᠠᠭᠠᠨ ᠰᠠᠷᠠ ᠪᠤᠶᠤ 2 ᠰᠠᠷᠠ ᠶ᠋ᠢᠨ ᠡᠬᠢᠨ ᠦ᠌ ᠬᠢ ᠪᠣᠯᠤᠨᠠ᠃
ᠢᠰᠢᠭᠡ ᠪᠡᠨ ᠭᠣᠯᠣᠬᠤ ᠢᠮᠠᠭᠠ ᠢᠰᠢᠭᠡᠨ ᠳ᠋ᠡᠭᠡᠨ ᠠᠮᠠᠷᠠᠭ ᠪᠢᠰᠢ ᠪᠣᠯᠬᠤ᠃
ᠢᠰᠢᠭᠡ ᠠᠪᠬᠠᠭᠤᠯᠬᠤ ᠢᠮᠠᠭᠠ ᠶ᠋ᠢ ᠢᠰᠢᠭᠡᠨ ᠳ᠋ᠦ᠍ᠨᠢ ᠠᠮᠠᠷᠠᠭ ᠪᠣᠯᠭᠠᠬᠤ᠃
ᠢᠮᠠᠭᠠᠨ ᠤ᠋ ᠭᠣᠯᠣᠩᠬᠠᠢ ᠶ᠋ᠢ ᠴᠠᠢᠭᠯᠠᠵᠤ ᠠᠪᠬᠠᠭᠤᠯᠬᠤ
ᠴᠠᠢᠭ ! ᠴᠠᠢᠭ ! ᠴᠠᠢᠭ!
ᠴᠠᠭᠠ ᠦᠷᠡ ᠴᠢᠨᠢ ᠬᠠᠷᠠᠩᠭᠤᠰᠴᠤ ᠪᠠᠢᠨᠠ ᠂
ᠴᠠᠢᠯᠭᠠᠨ ᠰᠡᠳᠬᠢᠯ ᠳ᠋ᠡᠭᠡᠨ ᠪᠣᠳᠣ ᠳᠠ !
ᠴᠠᠢᠭ ! ᠴᠠᠢᠭ ! ᠴᠠᠢᠭ !
ᠴᠠᠢᠭ ! ᠴᠠᠢᠭ ! ᠴᠠᠢᠭ !
ᠦᠷᠡ ᠨᠢᠯᠬᠠ ᠴᠢᠨᠢ ᠥᠯᠥᠰᠴᠦ ᠪᠠᠢᠨᠠ ᠃
ᠦᠷᠦ ᠵᠥᠭᠡᠯᠡᠨ ᠢ᠋ᠶ᠋ᠡᠨ ᠦᠵᠡᠭᠦᠯ ᠳᠡ !
ᠴᠠᠢᠭ ! ᠴᠠᠢᠭ! ᠴᠠᠢᠭ ! ᠭᠡᠵᠦ ᠤᠶᠠᠩᠭᠠᠯᠠᠨ ᠳᠠᠭᠤᠯᠠᠭᠰᠠᠭᠠᠷ ᠡᠬᠡ ᠶ᠋ᠢ ᠨᠢ ᠪᠠᠷᠢᠵᠤ ᠂ ᠢᠰᠢᠭᠡ ᠶ᠋ᠢ ᠨᠢ ᠬᠥᠬᠥᠭᠦᠯᠦᠭᠰᠡᠭᠡᠷ ᠪᠠᠢᠵᠤ ᠠᠪᠬᠠᠭᠤᠯᠤᠨᠠ᠃