ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠲᠠᠪᠤ ᠂ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤᠨ ᠪᠦᠯᠦᠭ 17 > Хөх зул – Боржигон Ванжал –"Тав ᠂ Таван хошуу малын бүлэг " 17 . ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤᠨ ᠳᠠᠭᠤᠳᠠᠯᠭᠠ Таван хошуу малын
262ᠲᠠᠪᠤ ᠂ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤᠨ ᠪᠦᠯᠦᠭ – 17
ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤᠨ ᠳᠠᠭᠤᠳᠠᠯᠭᠠ ᠬᠢᠭᠡᠳ ᠳᠤᠤᠭᠠᠷᠬᠤ ᠠᠶᠠᠯᠭᠠ ᠶᠢᠨ ᠨᠡᠷᠡᠰ Таван хошуу малын дуудлага хийгээд ттгарга аялгын нэрс
ᠠᠳᠤᠭᠤᠨ ᠤ᠋ ᠳᠠᠭᠤᠳᠠᠯᠭᠠ ᠬᠢᠭᠡᠳ ᠳᠤᠤᠭᠠᠷᠬᠤ ᠠᠶᠠᠯᠭᠠ ᠶ᠋ᠢᠨ ᠵᠦᠢᠯ
ᠭᠣᠷᠣᠢ ! ᠭᠣᠷᠣᠢ ! ᠭᠣᠷᠣᠢ !
ᠠᠳᠤᠭᠤ ᠶ᠋ᠢ ᠳᠠᠭᠤ ᠰᠣᠨᠣᠰᠳᠠᠬᠤ ᠶ᠋ᠢᠨ ᠬᠣᠯᠠ ᠠ᠋ᠴᠠ ᠳᠠᠭᠤᠳᠠᠬᠤ ᠠᠶᠠᠯᠭᠠ ᠦᠭᠡ᠃
ᠨᠡᠷᠡ ᠵᠢᠰᠦ ᠪᠡᠷ ᠳᠠᠭᠤᠳᠠᠬᠤ
ᠮᠣᠩᠭᠣᠯᠴᠤᠳ ᠂ ᠮᠣᠷᠢ ᠪᠠᠨ ᠪᠠᠷᠢᠬᠤ ᠪᠤᠶᠤ ᠡᠰᠡᠬᠦᠯᠡ ᠪᠣᠷᠳᠣᠭᠠ ᠥᠭᠬᠦ ᠳ᠋ᠡᠭᠡᠨ ᠠᠯᠠᠭ ᠠ᠋ ! ᠠᠯᠠᠭ ᠠ᠋ ᠭᠡᠵᠦ ᠵᠢᠰᠦᠮ ᠢ᠋ᠶ᠋ᠡᠷ ᠨᠢ ᠪᠤᠶᠤ ᠠᠵᠢᠨᠠᠢ ᠠ᠋ ! ᠠᠵᠢᠨᠠᠢ ᠠ᠋ ! ᠭᠡᠵᠦ ᠴᠣᠯᠠ ᠪᠠᠷ ᠨᠢ ᠳᠠᠭᠤᠳᠠᠳᠠᠭ ᠦᠶᠡ ᠴᠦ᠍ ᠪᠣᠢ᠃
ᠢᠨᠴᠠᠭᠠᠬᠤ
ᠠᠳᠤᠭᠤᠨ ᠤ᠋ ᠤᠨᠠᠭᠠ ᠲᠥᠯ ᠢ᠋ᠶ᠋ᠡᠨ ᠪᠤᠶᠤ ᠢᠵᠢᠯᠢ ᠲᠥᠷᠥᠯ ᠢ᠋ᠶ᠋ᠡᠨ ᠮᠥᠷᠥᠭᠡᠳᠦᠨ ᠡᠷᠢᠬᠦ ᠳᠠᠭᠤᠳᠠᠬᠤ ᠵᠡᠷᠭᠡ ᠳ᠋ᠦ᠍ ᠬᠠᠩᠭᠢᠨᠠᠲᠠᠯᠠ ᠤᠷᠲᠤᠬᠠᠨ ᠤᠶᠠᠩᠭᠠᠯᠢᠭ ᠳᠠᠭᠤ ( ᠠᠶᠠᠯᠭᠠ ) ᠭᠠᠷᠭᠠᠬᠤ ᠶ᠋ᠢ ᠬᠡᠯᠡᠨᠡ᠃ ᠪᠠᠰᠠ ᠢᠩᠭᠠᠷᠴᠠᠬᠤ ᠭᠡᠵᠦ ᠬᠡᠯᠡᠬᠦ ᠭᠠᠵᠠᠷ ᠪᠣᠢ᠃ ᠵᠢᠱ᠌ᠢᠶᠡ : ᠮᠣᠷᠢ ᠢᠨᠴᠠᠭᠠᠬᠤ ᠨᠢ ᠂ ᠦᠵᠡ ! ᠠᠳᠤᠭᠤ ᠢᠷᠡᠭᠡ ᠤᠤ ? ᠭᠡᠬᠦ ᠮᠡᠲᠦ᠃
ᠦᠦᠷᠰᠡᠬᠦ
ᠠᠳᠤᠭᠤᠨ ᠤ᠋ ᠪᠣᠭᠣᠨᠢ ᠳᠠᠭᠤ ᠪᠠᠷ ᠢᠵᠢᠯᠢ ᠪᠡᠨ ᠡᠷᠢᠬᠦ ᠪᠤᠶᠤ ᠢᠳᠡᠰᠢ ᠭᠣᠷᠢᠳᠠᠨ ᠢᠨᠴᠠᠭᠠᠬᠤ ᠮᠡᠲᠦ ᠬᠦᠬᠦᠲᠦᠨᠡᠨ ᠳᠤᠤᠭᠠᠷᠬᠤ᠃
ᠵᠢᠱ᠌ᠢᠶᠡ : ᠭᠡᠭᠦᠦ ᠤᠨᠠᠭᠠ ᠪᠠᠨ ᠡᠷᠢᠭᠡᠳ ᠦᠦᠷᠰᠡᠬᠦ ᠭᠡᠭᠴᠢ ᠰᠦᠷ ᠳᠡ ! ᠲᠠᠯᠪᠢᠭᠠᠳ ᠥᠭᠴᠢᠬᠡ᠃ ᠪᠣᠷᠳᠣᠭᠠᠨ ᠤ᠋ ᠮᠣᠷᠢ ᠦᠦᠷᠰᠡᠬᠦ ᠨᠢ᠂ ᠵᠢᠭᠠᠬᠠᠨ ᠶᠠᠭᠤᠮᠠ ᠥᠭᠬᠦ ᠶᠦ᠍ᠮ ᠪᠢᠰᠢ ᠤᠤ᠃
ᠬᠤᠤᠬᠢᠷᠬᠤ
ᠠᠳᠤᠭᠤᠨ ᠤ᠋ ᠶᠠᠭᠤᠮᠠᠨ ᠠ᠋ᠴᠠ ᠠᠶᠤᠵᠤ ᠭᠡᠯᠮᠡᠬᠦ ᠪᠤᠶᠤ ᠰᠣᠴᠢᠬᠤ ᠰᠡᠵᠢᠭᠯᠡᠬᠦ ᠪᠡᠷ ᠬᠤᠷᠳ᠋ ! ᠬᠣᠷᠳ᠋ ! ᠬᠤᠷᠳ᠋ ! ᠬᠢᠨ ᠬᠠᠮᠠᠷ ᠳᠤᠤᠭᠠᠷᠬᠤ᠃
ᠵᠢᠱ᠌ᠢᠶᠡ : ᠣᠷᠢᠶᠠᠨ ᠵᠡᠭᠡᠷᠳᠡ ᠭᠡᠭᠴᠢ ᠰᠦᠷ ᠳᠡ ᠂ ᠬᠤᠤᠬᠢᠷᠤᠭᠠᠳ ᠬᠥᠮᠦᠨ ᠣᠢᠷᠠᠲᠤᠭᠤᠯᠬᠤ ᠶᠤᠮ ᠪᠢᠰᠢ᠃
ᠤᠩᠭᠤᠯᠳᠠᠬᠤ
ᠠᠳᠤᠭᠤᠳ ᠰᠣᠴᠢᠨ ᠭᠡᠯᠮᠡᠭᠳᠡᠵᠦ ᠢᠵᠢᠯᠢ ᠪᠡᠨ ᠡᠷᠢᠨ ᠨᠠᠭᠠᠰᠢ ᠴᠠᠭᠠᠰᠢ ᠳᠠᠪᠬᠢᠯᠳᠤᠨ ᠦᠦᠷᠰᠡᠬᠦ ᠮᠡᠲᠦ ᠦᠷᠭᠦᠯᠵᠢᠯᠡᠨ ᠳᠤᠤᠭᠠᠷᠬᠤ᠃
ᠵᠢᠱ᠌ᠢᠶᠡ : ᠠᠳᠤᠭᠤ ᠤᠩᠭᠤᠯᠳᠠᠵᠤ ᠮᠠᠨᠠᠭᠠᠴᠢᠨ ᠢ᠋ ᠪᠣᠰᠬᠠᠪᠠ᠃
ᠦᠬᠡᠷ ᠦ᠋ᠨ ᠳᠠᠭᠤᠳᠠᠯᠭᠠ ᠬᠢᠭᠡᠳ ᠳᠤᠤᠭᠠᠷᠬᠤ ᠠᠶᠠᠯᠭᠠ ᠶ᠋ᠢᠨ ᠵᠦᠢᠯ
ᠥᠪ ! ᠥᠪ ! ᠥᠪ !
ᠦᠬᠡᠷ ᠢ᠋ ᠳᠠᠭᠤᠳᠠᠨ ᠠᠪᠴᠢᠷᠠᠬᠤ ᠪᠠᠷ ᠳᠠᠭᠤᠳᠠᠭᠰᠠᠨ ᠠᠶᠠᠯᠭᠠ ᠦᠭᠡ ᠃ ᠪᠠᠰᠠ ᠦ ! ᠦ ! ᠳᠠᠭᠤᠳᠠᠵᠤ ᠵᠣᠭᠰᠣᠭᠠᠨ ᠪᠠᠷᠢᠳᠠᠭ᠃
ᠮᠥᠭᠡᠷᠡᠬᠦ
ᠦᠬᠡᠷ ᠦ᠋ᠨ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠲᠤᠭᠤᠯ ᠪᠤᠶᠤ ᠢᠵᠢᠯᠢ ᠬᠠᠨᠢ ᠪᠠᠨ ᠮᠥᠷᠥᠭᠡᠳᠦᠨ ᠡᠷᠢᠬᠦ᠂ ᠳᠠᠭᠤᠳᠠᠬᠤ ᠳᠠᠭᠤᠨ᠃
ᠴᠥᠷᠭᠡᠭᠡ ᠮᠥᠭᠡᠷᠡᠯᠭᠡ
ᠨᠢᠭᠡ ᠠᠮᠢᠰᠬᠤᠭᠠ ᠪᠠᠷ ᠤᠭᠰᠠᠷᠠᠭᠤᠯᠤᠨ ᠮᠥᠭᠡᠷᠡᠬᠦ᠃ ᠴᠥᠷᠭᠡᠭᠡ ᠮᠥᠭᠡᠷᠡᠵᠦ ᠪᠠᠢᠨᠠ᠂ ᠤᠯᠠᠭᠴᠢ ᠦᠨᠢᠶᠡ ᠢᠷᠡᠵᠦ ᠪᠠᠢᠨᠠ ᠪᠠ ?
ᠰᠥᠭᠡᠩᠭᠢ ᠮᠥᠭᠡᠷᠡᠯᠭᠡ
ᠳᠠᠭᠤ ᠨᠢ ᠰᠦᠭᠡᠩᠬᠢᠲᠤᠭᠰᠠᠨ ᠨᠠᠷᠢᠨ ᠪᠤᠶᠤ ᠡᠷᠢᠶᠡᠨ ᠰᠠᠭᠠᠷᠠᠯ ᠲᠠᠰᠤᠯᠳᠠᠭᠤ ᠳᠠᠭᠤ᠃ ᠲᠡᠷᠯᠡᠨ ᠪᠤᠬᠠ ᠶ᠋ᠢᠨ ᠰᠥᠭᠡᠩᠭᠢ ᠮᠥᠭᠡᠷᠡᠯᠭᠡ ᠭᠡᠭᠴᠢ ᠪᠠᠷᠤᠭ ᠳᠠᠭᠤ ᠨᠢ ᠭᠠᠷᠬᠤ ᠦᠭᠡᠢ ᠳ᠋ᠡᠭᠡᠨ ᠣᠢᠷᠠᠲᠤᠵᠤ ᠪᠠᠢᠨᠠ᠃
ᠤᠤᠨᠠᠬᠤ ( ᠦᠦᠨᠡᠬᠦ )
ᠦᠬᠡᠷ ᠦ᠋ᠨ ᠪᠣᠭᠣᠨᠢ ᠳᠠᠭᠤ ᠪᠠᠷ ᠢᠷᠠᠭᠯᠠᠬᠤ ᠰᠢᠤᠬᠠᠨ ᠦ – ᠦ ᠭᠡᠵᠦ ᠳᠤᠤᠭᠠᠷᠬᠤ ᠃ ᠦᠨᠢᠶᠡ ᠤᠳᠠᠬᠤ ᠨᠢ ᠲᠤᠭᠤᠯ ᠨᠡᠢᠯᠡᠵᠦ ᠦᠭᠡᠢ ᠪᠠ ?
ᠢᠷᠠᠭᠯᠠᠬᠤ
ᠦᠬᠡᠷ ᠦ᠋ᠨ ᠤᠨᠲᠠᠬᠤ ᠳ᠋ᠠᠭᠠᠨ ᠢᠨᠴᠠᠭᠯᠠᠨ ᠠᠮᠤᠰᠬᠢᠬᠦ ᠪᠠ ᠡᠰᠡᠬᠦᠯᠡ ᠢᠳᠡᠰᠢ ᠠᠬᠠᠳᠠᠵᠤ ᠪᠠᠴᠢᠮᠳᠠᠨ ᠡᠪᠡᠷᠰᠢᠶᠡᠬᠦ ᠳᠠᠭᠤᠨ ᠂ ᠬᠥᠬᠡ ᠭᠤᠨᠠ ᠭᠡᠭᠴᠢ ᠵᠠᠯᠭᠠᠭᠠ ᠢᠷᠠᠭᠯᠠᠬᠤ ᠶᠤᠮ᠃
ᠣᠷᠬᠢᠷᠠᠬᠤ
ᠪᠤᠬᠠ ᠶ᠋ᠢᠨ ᠰᠦᠷ ᠦᠵᠡᠭᠦᠯᠦᠨ ᠴᠡᠭᠡᠵᠢ ᠬᠦᠩᠭᠢᠨᠡᠭᠦᠯᠦᠨ ᠦᠶᠡ ᠦᠶᠡ ᠨᠠᠷᠢᠨ ᠪᠦᠳᠦᠭᠦᠨ ᠢ᠋ᠶ᠋ᠡᠷ ᠣᠷᠢᠯᠠᠨ ᠮᠥᠭᠡᠷᠡᠬᠦ ᠮᠡᠲᠦ ᠳᠤᠤᠭᠠᠷᠬᠤ ᠃ ᠪᠤᠬᠠ ᠣᠷᠬᠢᠷᠠᠵᠤ ᠪᠣᠢ ᠂ ᠴᠠᠭᠠᠰᠢ ᠬᠥᠬᠡᠭᠡ ᠭᠡᠬᠦ ᠮᠡᠲᠦ ᠃
ᠲᠡᠮᠡᠭᠡᠨ ᠦ᠌ ᠳᠠᠭᠤᠳᠠᠯᠭᠠ ᠬᠢᠭᠡᠳ ᠳᠤᠤᠭᠠᠷᠬᠤ ᠠᠶᠠᠯᠭᠠ ᠶ᠋ᠢᠨ ᠵᠦᠢᠯ
ᠭᠤᠤᠷ ! ᠭᠤᠤᠷ ! ᠭᠤᠤᠷ ᠲᠡᠮᠡᠭᠡ ᠶ᠋ᠢ ᠬᠣᠯᠠ ᠠ᠋ᠴᠠ ᠳᠠᠭᠤᠳᠠᠬᠤ ᠠᠶᠠᠯᠭᠠ ᠦᠭᠡ᠃
ᠲᠦᠦᠷ ! ᠲᠦᠦᠷ ! ᠲᠦᠦᠷ
ᠲᠡᠮᠡᠭᠡ ᠶ᠋ᠢ ᠬᠤᠳᠳᠤᠭ ᠂ ᠤᠰᠤᠨ ᠳᠡᠭᠡᠷᠡ ᠳᠠᠭᠤᠳᠠᠬᠤ ᠠᠶᠠᠯᠭᠠ ᠦᠭᠡ ᠃
ᠾᠤᠤᠰ ! ᠾᠤᠤᠰ ! ᠾᠤᠤᠰ
ᠭᠣᠯᠣᠩᠬᠠᠢ ᠢᠩᠭᠡ ᠳ᠋ᠦ᠍ ᠪᠣᠲᠣᠭᠣ ᠠᠪᠠᠬᠠᠭᠤᠯᠬᠤ ᠪᠤᠶᠤ ᠬᠠᠢᠳᠠᠭ ᠢᠩᠭᠡ ᠶ᠋ᠢ ᠰᠠᠭᠠᠬᠤ ᠪᠠᠷ ᠳᠠᠭᠤᠳᠠᠬᠤ ᠠᠶᠠᠯᠭᠠ ᠦᠭᠡ ᠃
ᠯᠦᠸᠧ ! ᠯᠦᠸᠧ ! ᠯᠦᠸᠧ
ᠯᠤᠤᠭᠠᠷ ᠤ᠋ᠨ ᠬᠢᠨ ᠠᠴᠢᠶᠠᠨ ᠤ᠋ ᠪᠣᠷᠳᠣᠭᠠᠨ ᠲᠡᠮᠡᠭᠡ ᠪᠡᠨ ᠳᠠᠭᠤᠳᠠᠬᠤ ᠠᠶᠠᠯᠭᠠ ᠦᠭᠡ ᠃ ᠪᠣᠳᠣᠪᠠᠯ ᠲᠡᠮᠡᠭᠡ ᠂ ᠲᠡᠮᠡᠭᠡ ᠭᠡᠰᠡᠨ ᠬᠢᠲᠠᠳ ᠦᠭᠡ ᠪᠣᠯᠤᠯᠲᠠᠢ᠃
ᠨᠡᠷᠡ ᠵᠢᠰᠦᠮ ᠢ᠋ᠶ᠋ᠡᠷ ᠳᠠᠭᠤᠳᠠᠬᠤ
ᠰᠢᠷᠠᠯᠲᠠᠢ ᠠ᠋ ! ᠰᠢᠷᠠᠯᠲᠠᠢ ᠠ᠋ ! ᠭᠡᠵᠦ ᠵᠢᠰᠦᠮ ᠢ᠋ᠶ᠋ᠡᠷ ᠳᠠᠭᠤᠳᠠᠬᠤ ᠪᠤᠶᠤ ᠬᠠᠢᠳᠠᠭ ! ᠬᠠᠢᠳᠠᠭ ᠭᠡᠵᠦ ᠨᠡᠷᠡ ᠪᠡᠷ ᠳᠠᠭᠤᠳᠠᠨ ᠠᠪᠴᠢᠷᠠᠵᠤ ᠰᠠᠭᠠᠳᠠᠭ ᠤᠴᠢᠷ ᠮᠣᠩᠭᠣᠯᠴᠤᠳ ᠤ᠋ᠨ ᠳᠤᠮᠳᠠ ᠵᠥᠩᠳᠡᠭᠡᠨ᠃
ᠪᠤᠢᠯᠠᠬᠤ
ᠲᠡᠮᠡᠭᠡᠨ ᠦ᠌ ᠤᠷᠲᠤ ᠳᠠᠭᠤ ᠪᠠᠷ ᠤᠶᠠᠩᠭᠠᠯᠠᠨ ᠳᠤᠤᠭᠠᠷᠬᠤ ᠃ ᠵᠢᠱ᠌ᠢᠶᠡ : ᠡᠨᠡ ᠢᠩᠭᠡᠨ ᠦ᠌ ᠪᠤᠢᠯᠠᠬᠤ ᠨᠢ ᠠ᠋ !
ᠣᠷᠢᠯᠠᠭᠠ
ᠬᠥᠮᠦᠨ ᠢ᠋ ᠦᠵᠡᠬᠦ ᠪᠤᠶᠤ ᠤᠨᠤᠬᠤ ᠳ᠋ᠤ᠌ ᠨᠣᠬᠠᠢ ᠰᠢᠭ᠋ ᠬᠠᠪ ᠬᠠᠪ ᠪᠠᠷᠬᠢᠷᠠᠬᠤ ᠶ᠋ᠢ ᠬᠡᠯᠡᠨᠡ ᠃ ᠵᠢᠱ᠌ᠢᠶᠡ : ᠤᠷᠢᠯᠠᠭᠠ ᠰᠢᠷᠠ ᠮᠥᠨ ᠬᠤᠷᠳᠤᠨ ᠰᠢᠦ᠃
ᠪᠠᠷᠬᠢᠷᠠᠭᠠ ᠣᠷᠢᠯᠠᠭᠠ ᠶ᠋ᠢᠨ ᠨᠥᠭᠦᠭᠡ ᠬᠡᠯᠡᠯᠭᠡ ᠃
ᠳᠦᠩᠭᠢᠨᠡᠭᠦᠷ ᠠᠭᠤᠷᠯᠠᠬᠤ ᠳ᠋ᠠᠭᠠᠨ ᠴᠡᠭᠡᠵᠢ ᠨᠢ ᠬᠦᠷᠴᠢᠭᠢᠨᠡᠨ ᠳᠤᠤᠭᠠᠷᠬᠤ ᠶ᠋ᠢ ᠬᠡᠯᠡᠨᠡ᠃
ᠰᠡᠪᠡᠰᠦᠯᠡᠳᠡᠭ
ᠬᠥᠮᠦᠨ ᠠᠮᠢᠲᠠᠨ ᠢ᠋ ᠣᠢᠷᠠᠲᠤᠭᠰᠠᠭᠠᠷ ᠥᠭᠡᠳᠡ ᠡᠴᠡ ᠬᠠᠪ ᠭᠡᠵᠦ ᠳᠤᠤᠭᠠᠷᠬᠤ ᠲᠠᠢ ᠪᠠᠨ ᠵᠡᠷᠭᠡ ᠰᠡᠪᠡᠰᠦ ᠪᠡᠨ ᠦᠯᠢᠶᠡᠬᠦ ᠶ᠋ᠢ ᠬᠡᠯᠡᠨᠡ᠃
ᠬᠣᠨᠢᠨ ᠤ᠋ ᠳᠠᠭᠤᠳᠠᠯᠭᠠ ᠬᠢᠭᠡᠳ ᠳᠤᠤᠭᠠᠷᠬᠤ ᠠᠶᠠᠯᠭᠠ ᠶ᠋ᠢᠨ ᠵᠦᠢᠯ
ᠲᠥᠥᠲᠡ ! ᠲᠥᠥᠲᠡ ! ᠲᠥᠥᠲᠡ ᠬᠣᠨᠢ ᠶ᠋ᠢ ᠳᠠᠭᠤᠳᠠᠬᠤ ᠠᠶᠠᠯᠭᠠ ᠦᠭᠡ ᠃
ᠵᠢᠰᠦᠮ ᠪᠤᠶᠤ ᠨᠡᠷᠡ ᠪᠡᠷ ᠳᠠᠭᠤᠳᠠᠬᠤ
ᠮᠠᠩᠬᠠᠨ ! ᠮᠠᠩᠬᠠᠨ ᠠ᠋ ! ᠭᠡᠵᠦ ᠳᠠᠭᠤᠳᠠᠬᠤ ᠪᠤᠶᠤ ᠬᠤᠷᠠᠭᠠ ! ᠬᠤᠷᠠᠭᠠ ! ᠭᠡᠵᠦ ᠳᠠᠭᠤᠳᠠᠨ ᠠᠪᠴᠢᠷᠠᠳᠠᠭ᠃
ᠮᠠᠢᠯᠠᠬᠤ
ᠬᠣᠨᠢᠨ ᠤ᠋ ᠬᠤᠷᠠᠭᠠ ᠪᠠᠨ ᠪᠤᠶᠤ ᠢᠵᠢᠯᠢ ᠪᠡᠨ ᠮᠥᠷᠥᠭᠡᠳᠦᠨ ᠮᠠᠢ ! ᠮᠠᠢ ! ᠮᠠᠢ ᠭᠡᠵᠦ ᠢᠷᠠᠭᠤᠯᠢᠭ ᠳᠤᠤᠭᠠᠷᠴᠤ ᠳᠠᠭᠤᠳᠠᠬᠤ ᠳᠠᠭᠤᠨ᠃
ᠬᠤᠷᠠᠭᠠᠰᠠᠬᠤ
ᠬᠤᠷᠠᠭᠠ ᠪᠠᠨ ᠰᠠᠨᠠᠨ ᠪᠠᠭᠠ ᠳᠠᠭᠤᠨ ᠢ᠋ᠶ᠋ᠠᠷ ᠣ ᠣ ᠣ ᠭᠡᠵᠦ ᠳᠤᠤᠭᠠᠷᠬᠤ᠃ ᠮᠥᠨ ᠴᠦ᠍ ᠬᠤᠷᠠᠭᠠᠨ ᠳ᠋ᠠᠭᠠᠨ ᠠᠮᠠᠷᠠᠭ ᠭᠡᠰᠡᠨ ᠤᠳᠬᠠ ᠲᠠᠢ᠃
ᠢᠮᠠᠭᠠᠨ ᠤ᠋ ᠳᠠᠭᠤᠳᠠᠯᠭᠠ ᠬᠢᠭᠡᠳ ᠳᠤᠤᠭᠠᠷᠬᠤ ᠠᠶᠠᠯᠭᠠ ᠶ᠋ᠢᠨ ᠵᠦᠢᠯ
ᠵᠢᠵᠢᠦ ! ᠵᠢᠵᠢᠦ ! ᠵᠢᠵᠢᠦ ᠢᠮᠠᠭᠠ ᠶ᠋ᠢ ᠬᠣᠯᠠ ᠠ᠋ᠴᠠ ᠳᠠᠭᠤᠳᠠᠬᠤ ᠠᠶᠠᠯᠭᠠ ᠦᠭᠡ᠃
ᠨᠡᠷᠡ ᠵᠢᠰᠦᠮ ᠢ᠋ᠶ᠋ᠡᠷ ᠳᠠᠭᠤᠳᠠᠬᠤ
ᠬᠠᠢᠳᠠᠭ ! ᠬᠠᠢᠳᠠᠭ ᠭᠡᠵᠦ ᠳᠠᠭᠤᠳᠠᠬᠤ ᠪᠤᠶᠤ ᠰᠢᠷᠭᠠ ᠠ᠋ ! ᠰᠢᠷᠭᠠ ᠠ᠋ ! ᠭᠡᠵᠦ ᠳᠠᠭᠤᠳᠠᠳᠠᠭ᠃
ᠮᠠᠢᠯᠠᠬᠤ
ᠢᠮᠠᠭᠠᠨ ᠤ᠋ ᠢᠰᠢᠭᠡ ᠪᠡᠨ ᠪᠤᠶᠤ ᠢᠵᠢᠯᠢ ᠪᠡᠨ ᠰᠠᠨᠠᠨ ᠳᠠᠭᠤᠳᠠᠬᠤ ᠳᠠᠭᠤᠨ᠃ ᠬᠣᠨᠢ ᠶ᠋ᠢ ᠪᠣᠳᠣᠪᠠᠯ ᠳᠠᠭᠤ ᠨᠢ ᠨᠠᠷᠢᠨ ᠪᠥᠭᠡᠳ ᠥᠨᠳᠥᠷ ᠪᠠᠢᠳᠠᠭ ᠃
ᠤᠬᠤᠨᠠᠳᠠᠬᠤ
ᠪᠠᠪᠠᠨᠠᠳᠠᠬᠤ᠃ ᠤᠬᠤᠨᠠ ᠪᠠ ᠡᠷᠡ ᠢᠰᠢᠭᠡ ᠶ᠋ᠢᠨ ᠢᠮᠠᠭᠠ ᠶ᠋ᠢ ᠬᠥᠭᠡᠭᠡᠨ ᠳᠠᠭᠤᠴᠠᠭᠯᠠᠬᠤ ᠠᠶᠠᠯᠭᠠ᠃
ᠪᠠᠪᠠᠨᠠᠳᠠᠬᠤ ᠤᠬᠤᠨᠠᠳᠠᠬᠤ ᠶ᠋ᠢᠨ ᠨᠥᠭᠦᠭᠡ ᠬᠡᠯᠡᠯᠭᠡ᠃