ᠳᠠᠭᠤᠲᠤ ᠪᠤᠬᠠ ᠬᠥᠭᠰᠢᠨ ᠴᠢᠨᠣᠠ ᠬᠣᠶᠠᠷ Дуут бух хөгшин чоно 2
1074ᠳᠠᠭᠤᠲᠤ ᠪᠤᠬᠠ ᠬᠥᠭᠰᠢᠨ ᠴᠢᠨᠣᠠ ᠬᠣᠶᠠᠷ
《ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠦᠯᠢᠭᠡᠷ》
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ ᠨᠢᠭᠡᠨ ᠮᠠᠯᠴᠢᠨ ᠭᠠᠭᠴᠠ ᠪᠤᠬᠠ ᠲᠠᠢ ᠪᠠᠨ ᠠᠮᠢᠳᠤᠷᠠᠳᠠᠭ ᠪᠠᠢᠵᠠᠢ᠂ᠡᠳᠦᠷᠵᠢᠨ ᠢ᠋ᠶ᠋ᠡᠨ ᠲᠡᠷᠭᠡᠨ ᠳ᠋ᠦ᠍ ᠵᠢᠳᠬᠦᠵᠦ᠂ ᠦᠬᠦᠲᠡᠯᠡ ᠪᠡᠨ ᠶᠠᠳᠠᠷᠠᠬᠤ ᠪᠣᠯᠪᠠᠴᠤ ᠬᠠᠲᠠᠭᠤ ᠰᠡᠳᠬᠢᠯᠲᠦ ᠡᠵᠡᠨ ᠡᠴᠡ ᠨᠢ ᠠᠳᠬᠤ ᠡᠪᠡᠰᠦ ᠴᠦ᠍ ᠡᠰᠡ ᠣᠯᠳᠠᠨᠠ᠃ᠬᠥᠭᠡᠷᠦᠬᠦᠢ ᠪᠤᠬᠠ ᠰᠥᠨᠢᠵᠢᠨ ᠭᠠᠳᠠᠭᠤᠷ ᠬᠡᠰᠦᠵᠦ ᠬᠣᠭ ᠡᠪᠡᠰᠦ ᠴᠤᠭᠯᠠᠭᠤᠯᠤᠨ ᠥᠯ ᠵᠠᠯᠭᠠᠭᠠᠳ ᠦᠷ ᠢ᠋ᠶ᠋ᠡᠷ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠳᠠᠭᠠ ᠢᠷᠡᠵᠦ ᠵᠣᠭᠰᠣᠳᠠᠭ ᠪᠠᠢᠯᠠ᠃ᠮᠠᠯᠴᠢᠨ ᠭᠡᠷ ᠦ᠋ᠨ ᠭᠠᠳᠠᠨᠠ ᠬᠥᠳᠡᠯᠬᠦ ᠴᠤ᠌ ᠦᠭᠡᠢ ᠡᠰᠢ ᠲᠠᠰᠢ ᠪᠠᠨ ᠲᠡᠨᠦᠭᠡᠳ ᠣᠷᠢᠯᠠᠵᠤ ᠴᠢᠷᠠᠯᠠᠭᠠᠳ ᠶᠠᠪᠤᠴᠢᠬᠠᠳᠠᠭ ᠦᠭᠡᠢ ᠰᠠᠢᠨ ᠪᠤᠬᠠ ᠭᠡᠮᠡᠨ ᠦᠨᠡᠯᠡᠵᠦ ᠤᠶᠠᠭᠠ ᠨᠣᠭᠲᠣ ᠴᠤ᠌ ᠦᠭᠡᠢ ᠰᠤᠯᠠ ᠬᠠᠶᠠᠴᠢᠬᠠᠳᠠᠭ ᠪᠠᠢᠯᠠ᠃ᠨᠢᠭᠡᠨ ᠰᠥᠨᠢ ᠪᠤᠬᠠ ᠭᠠᠳᠠᠭᠤᠷ ᠶᠠᠪᠤᠵᠤ ᠪᠠᠢᠭᠠᠳ ᠬᠥᠭᠰᠢᠨ ᠴᠢᠨᠣᠠ ᠲᠠᠢ ᠲᠠᠨᠢᠯᠴᠠᠵᠤ ᠭᠡᠨᠡ᠂ᠬᠠᠰᠢᠷ ᠬᠥᠭᠰᠢᠨ ᠴᠢᠨᠣᠠ ᠪᠠᠷ ᠢ᠋ᠶ᠋ᠠᠨ ᠪᠤᠬᠠ ᠵᠡᠷᠭᠡᠯᠡᠳᠡᠭᠡ ᠬᠢ ᠡᠪᠡᠰᠦᠨ ᠬᠠᠰᠢᠶᠠ ᠶ᠋ᠢ ᠡᠪᠳᠡᠭᠦᠯᠦᠨ ᠳᠣᠲᠣᠷᠠ ᠨᠢ ᠣᠷᠣᠬᠤ ᠵᠠᠮ ᠭᠠᠷᠭᠠᠭᠤᠯᠵᠤ ᠠᠪᠤᠭᠠᠳ᠂ ᠰᠥᠨᠢ ᠪᠣᠯᠭᠠᠨ ᠰᠢᠮᠡᠳᠦ ᠰᠠᠶᠢᠬᠠᠨ ᠡᠪᠡᠰᠦ ᠪᠡᠷ ᠭᠡᠳᠡᠰᠦ ᠬᠣᠳᠣᠭᠣᠳᠣ ᠪᠠᠨ ᠳᠦᠭᠦᠷᠭᠡᠳᠡᠭ ᠪᠣᠯᠵᠠᠢ᠃ ᠬᠠᠷᠢᠨ ᠥᠷᠯᠥᠭᠡ ᠨᠢ ᠡᠷᠲᠡᠬᠡᠨ ᠰᠢᠭ ᠬᠠᠰᠢᠶᠠᠨ ᠳᠣᠲᠣᠷᠠ ᠪᠠᠨ ᠢᠷᠡᠵᠦ ᠥᠨᠥᠬᠢ ᠵᠣᠭᠰᠣᠳᠠᠭ ᠭᠠᠵᠠᠷ ᠢ᠋ᠶ᠋ᠠᠨ ᠵᠡᠭᠦᠷᠮᠡᠭᠯᠡᠨ ᠡᠵᠡᠨ ᠢ᠋ᠶ᠋ᠡᠨ ᠬᠦᠯᠢᠶᠡᠨᠡ᠃ ᠡᠯᠪᠡᠭ ᠢᠳᠡᠰᠢᠨ ᠳ᠋ᠦ᠍ ᠭᠡᠳᠡᠰᠦ ᠨᠢ ᠴᠠᠢᠵᠤ ᠬᠦᠴᠦ ᠲᠠᠮᠢᠷ ᠨᠢ ᠰᠠᠭᠤᠭᠰᠠᠨ ᠪᠤᠬᠠ ᠨᠢᠭᠡᠨ ᠰᠥᠨᠢ ᠬᠥᠭᠰᠢᠨ ᠴᠢᠨᠣᠠ ᠲᠠᠢ ᠲᠤᠬᠠᠲᠠᠢ ᠭᠡᠭᠴᠢ ᠨᠢ ᠢᠩᠭᠢᠵᠦ ᠶᠠᠷᠢᠯᠴᠠᠵᠠᠢ᠃
《ᠨᠥᠬᠥᠷ ᠮᠢᠨᠢ᠂ ᠥᠨᠥ ᠰᠥᠨᠢ ᠶᠠᠮᠠᠷ ᠰᠠᠢᠬᠠᠨ ᠰᠥᠨᠢ ᠪᠣᠢ? ᠰᠡᠷᠢᠭᠦᠨ ᠰᠠᠯᠬᠢ ᠰᠡᠩᠭᠢᠨᠡᠵᠦ᠂ ᠲᠡᠷᠭᠡᠯ ᠰᠠᠷᠠᠨ ᠮᠡᠯᠲᠡᠢᠭᠰᠡᠨ ᠰᠡᠳᠬᠢᠯ ᠳ᠋ᠦ᠍ ᠶᠠᠮᠠᠷ ᠠᠶᠠᠲᠠᠢ ᠪᠠᠢᠨᠠᠮ᠂ᠳᠠᠭᠤᠤ ᠪᠠᠨ ᠳᠠᠭᠤᠯᠠᠵᠤ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠠᠶᠠᠰᠬᠠᠬᠤ ᠤᠤ?ᠴᠢ ᠶᠠᠮᠠᠷ ᠳᠠᠭᠤᠨ ᠳ᠋ᠤ᠌ ᠳᠤᠷᠠᠲᠠᠢ ᠪᠢᠯᠡ? ᠴᠢᠨᠣᠠ ᠠ᠋》
《ᠡᠪᠦᠭᠡᠨ ᠠ᠋᠂ ᠴᠢᠮᠡᠭᠡ ᠦᠭᠡᠢ᠂ ᠬᠥᠶᠢ᠂ ᠴᠢ ᠴᠢᠨᠢ ᠡᠷᠭᠢᠭᠦᠳᠡᠵᠦ ᠪᠠᠯᠠᠷᠠᠭᠰᠠᠨ ᠶᠤᠮ ᠪᠢᠰᠢ ᠪᠢᠵᠡ? ᠴᠢ ᠴᠢᠨᠢ ᠡᠪᠡᠰᠦ ᠬᠤᠯᠠᠭᠠᠢ ᠬᠢᠵᠦ ᠶᠠᠪᠤᠭᠠ ᠪᠠᠨ ᠮᠠᠷᠲᠠᠪᠠ ᠤᠤ?ᠳᠠᠭᠤᠤ ᠳᠠᠭᠤᠯᠠᠵᠤ ᠴᠢᠮᠡᠭᠡ ᠭᠠᠷᠭᠠᠬᠤ ᠨᠢ ᠪᠤᠤ ᠬᠡᠯᠡ᠂ ᠬᠠᠨᠢᠶᠠᠵᠤ ᠰᠣᠴᠢᠬᠤ ᠭᠡᠮ ᠲᠡᠢ ᠪᠣᠯ ᠬᠤᠯᠠᠭᠠᠢ ᠶ᠋ᠢᠨ ᠵᠠᠮ ᠢ᠋ᠶ᠋ᠠᠷ ᠪᠢᠲᠡᠭᠡᠢ ᠬᠡᠲᠡ᠂ ᠤᠨᠲᠠᠭᠤ ᠰᠣᠭᠲᠣᠭᠤ ᠵᠠᠩ ᠲᠠᠢ ᠪᠣᠯ ᠬᠥᠮᠦᠨ ᠦ᠌ ᠭᠡᠷ ᠲᠦ᠍ ᠪᠢᠲᠡᠭᠡᠢ ᠣᠴᠢ ᠭᠡᠵᠦ ᠪᠠᠢᠳᠠᠭ ᠦᠭᠡᠢ ᠰᠠᠨ ᠪᠤᠰᠤ ᠤᠤ?ᠶᠠᠳᠠᠵᠤ ᠪᠠᠢᠬᠤ ᠳ᠋ᠤ᠌ ᠴᠢᠨᠦ ᠨᠠᠭᠠᠳᠤ ᠬᠣᠭᠣᠯᠠᠢ ᠴᠢᠨᠢ ᠪᠤᠰᠤᠳ ᠢ᠋ ᠤᠶᠠᠷᠠᠭᠠᠬᠤ ᠵᠥᠭᠡᠯᠡᠨ ᠪᠢᠰᠢ᠂ ᠲᠤᠩ ᠤ᠋ᠨ ᠳᠠᠭᠤ ᠰᠢᠭ᠋ ᠫᠠᠷᠭᠢᠶᠠ ᠰᠢᠦ ᠳᠡ᠂ᠥᠷᠯᠥᠭᠡ ᠳᠠᠭᠤ ᠶ᠋ᠢ ᠴᠢᠨᠢ ᠰᠣᠨᠣᠰᠤᠮᠠᠭᠴᠠ ᠡᠨᠡᠭᠦᠬᠡᠨ ᠳ᠋ᠦ᠍ ᠤᠨᠲᠠᠵᠤ ᠪᠠᠢᠭᠠ ᠮᠠᠯᠴᠢᠨ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠢᠷᠡᠭᠡᠳ ᠶᠠᠰᠤ ᠶ᠋ᠢ ᠴᠢᠨᠢ ᠴᠠᠢᠲᠠᠯᠠ ᠪᠠᠯᠪᠠᠵᠤ ᠠᠮᠢ ᠶ᠋ᠢ ᠴᠢᠨᠢ ᠭᠠᠷᠲᠠᠯᠠ ᠬᠥᠯᠬᠦ ᠪᠣᠯᠤᠨᠠ ᠳᠠ᠂ ᠴᠢᠮᠠ ᠶ᠋ᠢ》
《ᠢᠰᠢ᠂ ᠣᠢ ᠮᠠᠭᠤᠲᠤ ᠳᠠᠭᠤᠨ ᠤ᠋ ᠰᠠᠢᠬᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠪᠠᠢᠵᠤ ᠴᠢ ᠶᠠᠭᠤ ᠶᠠᠷᠢᠨᠠᠮ᠂ᠲᠡᠷᠭᠡᠯ ᠰᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍᠂ ᠳᠠᠪᠴᠢᠭᠤᠨ ᠬᠣᠷᠸᠠ ᠲᠡᠨᠢᠭᠦᠨ᠂ ᠤᠶᠠᠨ ᠬᠤᠭᠤᠷ ᠤ᠋ᠨ ᠡᠬᠡᠰᠢᠭ ᠡᠪᠯᠡᠭᠦᠨ ᠠᠨᠳᠠ ᠤ᠋ᠳ ᠢ᠋ᠶ᠋ᠠᠨ ᠬᠥᠭᠵᠢᠭᠦᠨ ᠭᠡᠵᠦ ᠪᠠᠢᠳᠠᠭ ᠢ᠋ ᠴᠢ ᠮᠡᠳᠡᠬᠦ ᠦᠭᠡᠢ ᠤᠤ?》
《ᠪᠢᠳᠡ ᠬᠣᠶᠠᠷ ᠳᠠᠭᠤᠤ ᠭᠡᠳᠡᠭ ᠶᠠᠭᠤ ᠪᠣᠯᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠰᠢᠦ ᠳᠡ᠂ᠲᠡᠢᠮᠦ ᠪᠣᠯᠬᠣᠷ ᠠᠮᠠ ᠪᠠᠨ ᠬᠠᠪᠴᠢᠨ ᠬᠣᠳᠣᠭᠣᠳᠣ ᠪᠠᠨ ᠪᠣᠷᠣᠯᠠᠭᠤᠯᠵᠤ ᠶᠠᠪᠤᠭᠰᠠᠨ ᠴᠢᠨᠢ ᠳᠡᠭᠡᠷᠡ ᠪᠠᠢᠬᠠ ᠰᠢᠦ᠂ ᠡᠰᠡ ᠵᠥᠪᠰᠢᠶᠡᠷᠡᠪᠡᠯ ᠬᠡᠷᠡᠭ ᠪᠢᠰᠢᠳᠡᠵᠦ ᠪᠠᠵᠠᠭᠠᠬᠤ ᠦᠭᠡᠢ ᠶᠠᠭᠤᠮᠠ ᠪᠣᠯᠤᠨᠠ᠂ ᠪᠤᠬᠠ ᠮᠢᠨᠢ ᠳᠡ᠂ ᠪᠤᠬᠠ ᠮᠢᠨᠢ》
《ᠴᠢ ᠨᠠᠮᠠ ᠶ᠋ᠢ ᠳᠠᠭᠤᠤ ᠮᠡᠳᠡᠬᠦ ᠦᠭᠡᠢ ᠭᠡᠵᠦ ᠪᠣᠳᠣᠭᠠ ᠤᠤ? ᠴᠢ ᠰᠣᠨᠣᠰᠴᠤ ᠪᠠᠢ᠂ ᠪᠢ ᠳᠠᠭᠤᠨ ᠤ᠋ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠴᠢᠮᠠ ᠳ᠋ᠤ᠌ ᠣᠢ ᠲᠣᠢᠨ ᠳ᠋ᠤ᠌ ᠴᠢᠨᠢ ᠣᠷᠣᠲᠠᠯᠠ ᠬᠡᠯᠡᠭᠡᠳ ᠥᠭᠭᠦᠶᠡ᠂ ᠳᠣᠯᠣᠭᠠᠨ ᠥᠩᠭᠡ ᠭᠤᠷᠪᠠᠨ ᠳᠡᠳ᠋᠂ ᠬᠣᠷᠢᠨ ᠨᠢᠭᠡᠨ ᠨᠤᠭᠤᠯᠤᠭᠠ᠂ᠳᠥᠴᠢ ᠶᠢᠰᠦᠨ ᠴᠣᠮᠨᠠᠯ᠂ ᠭᠤᠷᠪᠠᠨ ᠠᠢᠵᠢᠮ ᠶᠢᠰᠦᠨ ᠮᠠᠶᠢᠭ᠂ ᠭᠤᠷᠪᠠᠨ ᠪᠠᠢᠷᠢ᠂ ᠲᠠᠪᠤᠨ ᠵᠣᠭᠰᠣᠯᠲᠠ᠂ ᠭᠤᠷᠪᠠᠨ ᠲᠠᠰᠤᠯᠤᠯ᠂ᠭᠤᠴᠢᠨ ᠭᠤᠷᠪᠠᠨ ᠤᠶᠠᠩᠭᠠ ᠳᠥᠴᠢᠨ ᠰᠠᠨᠠᠭᠠ ᠲᠡᠷᠢᠭᠦᠲᠡᠨ ᠳᠠᠭᠤᠤ ᠠᠶᠠᠨ ᠤ᠋ ᠵᠠᠭᠤ ᠨᠠᠶᠠᠨ ᠲᠠᠪᠤᠨ ᠠᠩᠭᠢᠯᠠᠯ ᠭᠡᠵᠦ ᠴᠢ ᠰᠣᠨᠣᠰᠤᠭᠠ ᠦᠭᠡᠢ ᠭᠡᠵᠢ ᠤᠤ? ᠳᠠᠭᠤᠨ ᠤ᠋ ᠲᠦᠷᠦᠭᠦᠨ ᠳ᠋ᠦ᠍ ᠣᠷᠣᠬᠤ ᠶᠠᠭᠤᠮᠠ ᠳᠠᠭᠤᠯᠠᠮᠠ ᠬᠣᠷᠸᠠ ᠳ᠋ᠤ᠌ ᠬᠣᠪᠣᠷ ᠠ᠋᠂ ᠭᠡᠬᠦ ᠳ᠋ᠦ᠍ ᠴᠢ ᠨᠠᠮᠠ ᠶ᠋ᠢ ᠳᠠᠭᠤᠤ ᠬᠤᠭᠤᠷ ᠮᠡᠳᠡᠳᠡᠭ ᠦᠭᠡᠢ ᠭᠡᠵᠦ ᠬᠡᠯᠡᠳᠡᠭ ᠴᠢᠨᠢ ᠶᠠᠭᠤ ᠪᠢᠯᠡ? ᠨᠠᠳᠠ ᠰᠢᠭ᠋ ᠬᠥᠭᠵᠢᠮ ᠦ᠋ᠨ ᠤᠴᠢᠷ ᠢ᠋ ᠮᠡᠳᠡᠳᠡᠭ ᠬᠡᠨ ᠪᠠᠢᠨᠠ?》
《ᠴᠢᠮᠡᠭᠡ ᠦᠭᠡᠢ ᠭᠡᠮ᠂ᠳᠠᠭᠤᠯᠠᠬᠤ ᠳᠤᠷᠠ ᠴᠢᠨᠢ ᠦᠨᠡᠬᠡᠷ ᠬᠦᠷᠦᠭᠡᠳ ᠪᠠᠢᠭᠠ ᠪᠣᠯ ᠪᠢ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ? ᠪᠢ ᠲᠡᠷᠡ ᠡᠭᠦᠳᠡᠨ ᠳᠡᠭᠡᠷᠡ ᠣᠴᠢᠵᠤ ᠵᠣᠭᠰᠣᠭᠠᠨ ᠮᠠᠯᠴᠢᠨ ᠢ᠋ ᠬᠠᠷᠠᠭᠤᠯᠳᠠ ᠪᠠᠷᠠ ᠶ᠋ᠢ ᠨᠢ ᠬᠠᠷᠠᠵᠤ ᠪᠠᠢᠶᠠ᠂ ᠴᠢ ᠲᠡᠷᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠠᠨᠲᠠᠯᠠ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠵᠤ ᠠᠪᠤᠯ ᠳᠠ》ᠴᠢᠨᠣᠠ ᠢᠩᠭᠢᠵᠦ ᠬᠡᠯᠡᠭᠡᠳ ᠬᠠᠰᠢᠶᠠᠨ ᠤ᠋ ᠡᠭᠦᠳᠡᠨ ᠲᠠᠰᠢ ᠣᠳᠬᠤ ᠳ᠋ᠤ᠌ ᠳᠠᠭᠤᠲᠤ ᠪᠤᠬᠠ ᠲᠡᠩᠬᠡᠭᠡ ᠮᠡᠳᠡᠨ ᠣᠷᠢᠯᠠᠵᠤ ᠭᠠᠷᠴᠠᠢ᠂ ᠦ ᠦ ᠦ ᠦ
ᠲᠡᠭᠦᠨ ᠦ᠌ ᠣᠷᠢᠯᠠᠬᠤ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠮᠠᠯᠴᠢᠨ ᠰᠡᠷᠢᠵᠦ ᠠᠭᠤᠷ ᠬᠢᠯᠢᠩ ᠨᠢ ᠪᠠᠳᠠᠷᠠᠨ ᠪᠣᠷᠤᠬᠠᠢ ᠰᠢᠳᠠᠮ ᠪᠠᠷᠢᠭᠰᠠᠭᠠᠷ ᠳᠠᠪᠬᠢᠵᠤ ᠢᠷᠡᠭᠡᠳ ᠳᠠᠭᠤᠲᠤ ᠪᠤᠬᠠ ᠶ᠋ᠢ ᠮᠠᠭᠤᠵᠢᠷᠠᠲᠠᠯᠠ ᠨᠢ ᠴᠣᠬᠢᠵᠤ ᠬᠦᠵᠦᠭᠦᠨ ᠳ᠋ᠦ᠍ ᠨᠢ ᠳᠠᠭᠠᠭᠠᠭᠳᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠬᠦᠨᠳᠦ ᠳ᠋ᠦᠨᠵᠡ ᠵᠡᠭᠦᠭᠡᠳ ᠣᠷᠬᠢᠵᠠᠢ᠃ ᠬᠥᠭᠡᠷᠦᠬᠦᠢ ᠪᠤᠬᠠ ᠬᠡᠰᠡᠭ ᠬᠤᠭᠤᠴᠠᠭᠠᠨ ᠤ᠋ ᠳᠠᠷᠠᠭᠠ ᠤᠬᠠᠭᠠᠨ ᠣᠷᠣᠵᠤ ᠬᠦᠨᠳᠦ ᠳ᠋ᠦᠨᠵᠡ ᠪᠡᠨ ᠳᠥᠩᠭᠡᠨ ᠲᠠᠩᠭᠠᠨ ᠴᠢᠷᠦᠭᠰᠡᠭᠡᠷ ᠬᠠᠰᠢᠶᠠᠨ ᠠ᠋ᠴᠠ ᠭᠠᠷᠴᠤ ᠢᠷᠡᠯᠡ᠃
《ᠠᠢ᠂ ᠴᠠᠪᠠᠰᠤ᠂ᠪᠢ ᠴᠢᠮᠠ ᠳ᠋ᠤ᠌ ᠬᠡᠴᠢᠨᠡᠨ ᠬᠡᠯᠡᠵᠦ ᠶᠠᠳᠠᠯᠠ ᠳᠠ᠂ ᠬᠡᠯᠡᠭᠰᠡᠭᠡᠷ ᠪᠠᠢᠲᠠᠯᠠ ᠵᠥᠷᠢᠵᠦ᠂ ᠡᠨᠡ ᠠᠢᠬᠤᠪᠲᠤᠷ ᠡᠷᠳᠡᠨᠢ ᠶ᠋ᠢ ᠬᠦᠵᠦᠭᠦᠨ ᠳ᠋ᠦ᠍ ᠪᠡᠨ ᠵᠡᠭᠦᠯᠭᠡᠭᠰᠡᠨ ᠴᠢᠨᠢ ᠲᠣᠭᠠ ᠦᠭᠡᠢ ᠶᠠᠭᠤᠮᠠ ᠪᠣᠯᠵᠠᠢ ᠳᠠ᠂ ᠳᠠᠩᠴᠤ ᠲᠣᠭᠠ ᠦᠭᠡᠢ ᠶᠠᠭᠤᠮᠠ ᠪᠣᠯᠵᠠᠢ》
《ᠬᠠᠷᠢᠨ ᠲᠡᠢᠮᠦ ᠠ᠋᠂ ᠳᠠᠭᠤᠤ ᠲᠠᠢ ᠳᠠᠭᠤᠤ ᠦᠭᠡᠢ ᠡᠨᠡ ᠬᠣᠷᠸᠠ ᠳ᠋ᠤ᠌ ᠠᠮᠢᠳᠤᠷᠠᠨᠠ ᠰᠢᠦ ᠳᠡ᠂ ᠴᠢᠨᠦ ᠬᠡᠯᠡᠳᠡᠭ ᠲᠦᠮᠡᠨ ᠵᠥᠪ ᠠ᠋᠂ ᠡᠨᠡ ᠬᠦᠵᠦᠭᠦᠨ ᠳ᠋ᠡᠬᠢ ᠳᠥᠩᠭᠡᠨ ᠡᠴᠡ ᠶᠠᠭᠠᠬᠢᠵᠤ ᠰᠠᠯᠳᠠᠭ ᠪᠢᠯᠡ ᠳᠠ᠂ᠲᠤᠰᠠᠯᠠᠭᠠᠴᠢ ᠳᠠ᠂ ᠬᠥᠭᠰᠢᠨ ᠠᠨᠳᠠ ᠮᠢᠨᠢ》
《ᠢᠰᠢ᠂ ᠴᠢ ᠤᠭ ᠨᠢ ᠶᠡᠬᠡ ᠰᠠᠢᠬᠠᠨ ᠳᠠᠭᠤᠯᠠᠭᠰᠠᠨ ᠶᠤᠮ ᠰᠠᠨ᠂ ᠦ ᠦ ᠦ ᠦ᠂ ᠡᠨᠡ ᠳᠥᠩᠭᠡᠨ ᠡᠴᠡ ᠪᠡᠨ ᠰᠤᠯᠠᠷᠠ᠂ ᠡᠵᠡᠨ ᠮᠠᠯᠴᠢᠨ ᠠ᠋ᠴᠠ ᠪᠠᠨ ᠰᠠᠯ》ᠭᠡᠳ ᠳᠠᠭᠤᠲᠤ ᠪᠤᠬᠠᠨ ᠤ᠋ ᠬᠦᠨᠳᠦ ᠳ᠋ᠦᠨᠵᠡ ᠶ᠋ᠢ ᠲᠠᠢᠯᠵᠤ ᠬᠠᠮᠲᠤ ᠳ᠋ᠤ᠌ ᠪᠠᠨ ᠵᠢᠭᠤᠲᠠᠭᠠᠯᠠ᠃ᠢᠩᠭᠢᠭᠡᠳ ᠠᠨᠳᠠ ᠨᠠᠢᠵᠠ ᠡᠪᠦᠭᠡᠨ ᠴᠢᠨᠣᠠ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠰᠠᠯᠠᠮᠵᠢ ᠲᠠᠢ ᠪᠠᠷ ᠳᠠᠭᠤᠲᠤ ᠪᠤᠬᠠ ᠮᠠᠨᠢ ᠪᠢᠲᠡᠭᠦᠦ ᠠᠭᠯᠠᠭᠬᠠᠨ ᠣᠢ ᠳ᠋ᠤ᠌ ᠪᠡᠶᠡ ᠳᠠᠭᠠᠭᠠᠨ ᠡᠷᠬᠡ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠳᠠᠭᠤᠯᠠᠨ ᠠᠮᠢᠳᠤᠷᠠᠭᠰᠠᠨ ᠭᠡᠳᠡᠭ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲ᠂ ᠲᠦᠮᠡᠨᠴᠡᠴᠡᠭ
ᠦᠰᠦᠭ ᠬᠠᠳᠠᠭᠴᠢ᠄ ᠰᠣᠶᠣᠯ
ᠬᠢᠨᠠᠭᠴᠢ᠄ ᠳᠠᠪᠰᠢᠯᠲᠤ