ᠬᠠᠷᠢᠶᠠᠴᠠᠢ ᠬᠡᠳᠡᠭᠡᠨᠡ ᠬᠣᠶᠠᠷ-ᠮᠣᠩᠭᠣᠯ ᠠᠷᠠᠳ ᠤᠨ ᠦᠯᠢᠭᠡᠷ Монгол ардын үлгэр - Хараацай хэдгэнэ хоёр
1683ᠬᠠᠷᠢᠶᠠᠴᠠᠢ ᠬᠡᠳᠡᠭᠡᠨᠡ ᠬᠣᠶᠠᠷ
ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠦᠯᠢᠭᠡᠷ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠸ᠋᠂ ᠵᠢᠭᠦᠷᠲᠡᠨ ᠦ᠌ ᠬᠠᠨ ᠭᠠᠷᠤᠳᠢ᠂ ᠭᠠᠵᠠᠷ ᠳᠡᠭᠡᠷᠡ ᠶᠠᠮᠠᠷ ᠠᠮᠢᠲᠠᠨ ᠤ᠋ ᠮᠢᠬᠠ ᠬᠠᠮᠤᠭ ᠤ᠋ᠨ ᠰᠠᠢᠬᠠᠨ ᠠᠮᠲᠠᠲᠠᠢ ᠶ᠋ᠢ ᠮᠡᠳᠡᠬᠦ ᠭᠡᠵᠦ ᠬᠠᠷᠢᠶᠠᠴᠠᠢ ᠬᠡᠳᠡᠭᠡᠨᠡ ᠬᠣᠶᠠᠷ ᠢ᠋ ᠳᠠᠭᠤᠳᠠᠭᠤᠯᠵᠤ ᠭᠡᠨᠡ᠃ ᠳᠠᠭᠤᠳᠠᠭᠤᠯᠵᠤ ᠢᠷᠡᠭᠦᠯᠦᠭᠡᠳ ᠬᠡᠯᠡᠪᠡ᠃
— ᠲᠠ ᠬᠣᠶᠠᠷ ᠡᠨᠡ ᠳᠡᠯᠡᠬᠡᠢ ᠳ᠋ᠦ᠍ ᠡᠷᠭᠢᠨ ᠲᠣᠭᠣᠷᠢᠨ ᠨᠢᠰᠦᠭᠡᠳ ᠶᠠᠮᠠᠷ ᠠᠮᠢᠲᠠᠨ ᠤ᠋ ᠮᠢᠬᠠ ᠢᠯᠡᠭᠦᠦ ᠰᠠᠢᠬᠠᠨ ᠠᠮᠲᠠᠲᠠᠢ ᠶ᠋ᠢ ᠮᠡᠳᠡᠵᠦ ᠢᠷᠡ ᠭᠡᠵᠡᠢ᠃
ᠬᠠᠷᠢᠶᠠᠴᠠᠢ ᠬᠡᠳᠡᠭᠡᠨᠡ ᠬᠣᠶᠠᠷ ᠵᠠᠷᠯᠢᠭ ᠶᠣᠰᠣᠭᠠᠷ ᠨᠢᠰᠦᠨ ᠣᠳᠴᠠᠢ᠃ ᠲᠡᠷᠡ ᠡᠳᠦᠷ ᠦ᠋ᠨ ᠲᠡᠭᠷᠢ ᠴᠡᠯᠮᠡᠭ᠂ ᠨᠠᠷᠠ ᠳᠤᠷᠠᠳᠤᠮᠠᠯ᠂ ᠨᠠᠢᠷᠲᠠᠢ ᠳᠤᠯᠠᠭᠠᠨ ᠪᠠᠢᠭᠰᠠᠨ ᠲᠤᠯᠠ ᠬᠠᠷᠢᠶᠠᠴᠠᠢ ᠰᠢᠪᠠᠭᠤ ᠬᠠᠭᠠᠨ ᠡᠵᠡᠨ ᠦ᠌ ᠪᠡᠨ ᠵᠠᠷᠯᠢᠭ ᠢ᠋ ᠮᠠᠷᠲᠠᠭᠠᠳ᠂ ᠬᠥᠬᠡ ᠲᠩᠷᠢ ᠳ᠋ᠦ᠍ ᠬᠥᠭᠡᠷᠦᠨ ᠨᠢᠰᠴᠦ ᠬᠥᠭᠵᠢᠯᠲᠡᠢ ᠰᠠᠢᠬᠠᠨ ᠵᠢᠷᠭᠢᠨ ᠳᠠᠭᠤᠯᠠᠵᠤ᠂ ᠳᠤᠷᠠᠳᠤᠮᠠᠯ ᠨᠠᠷᠠᠨ ᠳ᠋ᠤ᠌ ᠡᠭᠡᠭᠡᠵᠦ᠂ ᠳᠤᠷᠠ ᠪᠠᠨ ᠬᠠᠨᠲᠠᠯᠠ ᠴᠡᠩᠭᠡᠵᠦ ᠶᠠᠪᠤᠪᠠ᠃ ᠬᠣᠣᠷ ᠤ᠋ᠨ ᠮᠠᠭᠤ ᠰᠠᠨᠠᠭᠠᠲᠤ ᠬᠡᠳᠡᠭᠡᠨᠡ ᠯᠡ ᠬᠠᠷᠢᠨ ᠬᠠᠷᠠᠩᠭᠤᠢ ᠵᠠᠮ ᠳ᠋ᠤ᠌ ᠲᠠᠭᠠᠷᠠᠯᠳᠤᠭᠰᠠᠨ ᠬᠠᠮᠤᠭ ᠠᠮᠢᠲᠠᠨ ᠢ᠋ ᠬᠠᠳᠬᠤᠵᠤ ᠬᠠᠯᠠᠭᠤᠨ ᠴᠢᠰᠤ ᠶ᠋ᠢ ᠠᠮᠲᠠᠯᠠᠵᠤ ᠶᠠᠪᠤᠯᠠ᠃ ᠲᠡᠭᠡᠵᠦ ᠪᠠᠢᠲᠠᠯᠠ ᠨᠠᠷᠠ ᠰᠢᠩᠭᠡᠵᠦ᠂ ᠲᠡᠷᠡ ᠬᠣᠶᠠᠷ ᠴᠤ᠌ ᠪᠤᠴᠠᠬᠤ ᠪᠣᠯᠪᠠ᠃ ᠲᠡᠮᠳᠡᠭᠲᠦ ᠭᠠᠵᠠᠷ ᠢ᠋ᠶ᠋ᠠᠨ ᠬᠣᠶᠠᠭᠤᠯᠠ ᠪᠠᠨ ᠠᠭᠤᠯᠵᠠᠭᠠᠳ ᠬᠠᠨ ᠭᠠᠷᠤᠳᠢ ᠳ᠋ᠤ᠌ ᠪᠤᠴᠠᠬᠤ ᠵᠠᠮ ᠳ᠋ᠤ᠌ ᠪᠠᠨ ᠬᠠᠷᠢᠶᠠᠴᠠᠢ ᠰᠢᠪᠠᠭᠤ ᠬᠡᠳᠡᠭᠡᠨᠡ ᠡᠴᠡ ᠠᠰᠠᠭᠤᠪᠠ᠃
— ᠶᠠᠮᠠᠷ ᠠᠮᠢᠲᠠᠨ ᠤ᠋ ᠮᠢᠬᠠ ᠬᠠᠮᠤᠭ ᠠ᠋ᠴᠠ ᠠᠮᠲᠠᠲᠠᠢ ᠪᠣᠢ ᠭᠡᠵᠦ ᠴᠢ ᠮᠡᠳᠡᠪᠡ? ᠭᠡᠰᠡᠨ ᠳ᠋ᠦ᠍ ᠬᠡᠳᠡᠭᠡᠨᠡ
— ᠬᠥᠮᠦᠨ ᠦ᠌ ᠮᠢᠬᠠ ᠯᠠ ᠬᠠᠮᠤᠭ ᠤ᠋ᠨ ᠠᠮᠲᠠᠲᠠᠢ ᠶᠤᠮ ᠭᠡᠵᠦ ᠮᠡᠳᠡᠯᠡ᠃ ᠬᠦᠨᠳᠦᠲᠦ ᠬᠠᠭᠠᠨ ᠮᠠᠨᠢ ᠣᠳᠣ ᠬᠥᠮᠦᠨ ᠦ᠌ ᠮᠢᠬᠠ ᠪᠠᠷ ᠬᠣᠭᠣᠯᠠᠯᠠᠬᠤ ᠪᠣᠯᠤᠨᠠ ᠭᠡᠵᠡᠢ᠃
— ᠬᠠᠷᠢᠶᠠᠴᠠᠢ ᠰᠢᠪᠠᠭᠤ ᠬᠠᠷᠠᠮᠰᠠᠨ ᠭᠠᠰᠢᠭᠤᠳᠠᠵᠤ ᠬᠥᠭᠡᠷᠦᠬᠦᠢ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠢ᠋ ᠬᠥᠨᠥᠭᠡᠯ ᠡᠴᠡ ᠶᠠᠭᠠᠬᠢᠵᠤ ᠠᠪᠤᠷᠠᠬᠤ ᠪᠢᠯᠡ ᠭᠡᠵᠦ ᠭᠠᠢᠬᠠᠰᠢ ᠪᠠᠷᠠᠭᠳᠠᠭᠠᠳ᠂ ᠠᠮᠢᠳᠤ ᠬᠥᠮᠦᠨ ᠦ᠌ ᠴᠢᠰᠤ ᠶ᠋ᠢ ᠠᠮᠰᠠᠵᠤ ᠦᠵᠡᠪᠡ ᠤᠤ? ᠴᠢ ᠭᠡᠰᠡᠨ ᠳ᠋ᠦ᠍ ᠬᠡᠳᠡᠭᠡᠨᠡ
— ᠠ᠂ ᠲᠡᠷᠡ ᠶᠠᠭᠤᠨ ᠪᠠᠢᠬᠤ ᠪᠣᠢ? ᠬᠠᠳᠬᠤᠭᠤᠷ ᠢ᠋ᠶ᠋ᠠᠨ ᠬᠠᠳᠬᠤᠭᠠᠳ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠠᠮᠲᠠᠯᠠᠵᠤ ᠦᠵᠡᠯᠡ ᠭᠡᠰᠡᠨ ᠳ᠋ᠦ᠍᠂ ᠬᠠᠷᠢᠶᠠᠴᠠᠢ
— ᠲᠡᠷᠡ ᠵᠢᠷᠦᠬᠡ ᠶ᠋ᠢ ᠠᠮᠲᠠᠯᠠᠳᠠᠭ ᠬᠡᠯᠡ ᠴᠢᠨᠢ ᠠᠯᠢ ᠪᠣᠢ? ᠭᠡᠰᠡᠨ ᠳ᠋ᠦ᠍᠂
— ᠡᠨᠡ ᠭᠡᠵᠦ ᠠᠮᠠ ᠪᠠᠨ ᠠᠩᠭᠠᠢᠨ ᠬᠡᠯᠡ ᠪᠡᠨ ᠦᠵᠡᠭᠦᠯᠦᠭᠰᠡᠨ ᠳ᠋ᠦ᠍᠂ ᠬᠠᠷᠢᠶᠠᠴᠠᠢ ᠬᠡᠯᠡ ᠶ᠋ᠢ ᠨᠢ ᠰᠤᠭᠤ ᠲᠠᠲᠠᠵᠤ ᠣᠷᠬᠢᠵᠠᠢ᠃ ᠲᠡᠷᠡ ᠴᠠᠭ ᠠ᠋ᠴᠠ ᠬᠣᠢᠰᠢ ᠬᠡᠳᠡᠭᠡᠨᠡ ᠶᠡᠷᠦ ᠳ᠋ᠦ᠍ ᠶ᠋ᠢᠨ ᠠᠳᠠᠯᠢ ᠳᠣᠩᠭᠣᠳᠴᠤ ᠴᠢᠳᠠᠬᠤ ᠪᠠᠨ ᠪᠠᠢᠭᠠᠳ ᠵᠦᠭᠡᠷ ᠳᠦᠩᠭᠢᠨᠡᠳᠡᠭ ᠪᠣᠯᠴᠢᠬᠠᠭᠰᠠᠨ ᠭᠡᠨᠡ᠃ ᠲᠡᠭᠡᠭᠡᠳ ᠰᠢᠪᠠᠭᠤᠨ ᠤ᠋ ᠬᠠᠭᠠᠨ ᠳ᠋ᠤ᠌ ᠣᠴᠢᠵᠤ᠂ ᠬᠡᠳᠡᠭᠡᠨᠡ ᠬᠠᠭᠠᠨ ᠤ᠋ ᠬᠣᠢᠨᠠ ᠤᠷᠢᠳᠠ ᠮᠥᠷᠲᠡᠭᠡᠨᠡᠨ ᠭᠣᠮᠣᠳᠠᠯ ᠵᠠᠷᠭᠤ ᠮᠡᠳᠡᠭᠦᠯᠦᠨ᠂ ᠪᠠᠢᠳᠠᠭ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠦᠩᠭᠢᠨᠡᠭᠰᠡᠨ ᠪᠣᠯᠪᠠᠴᠤ ᠨᠢᠭᠡᠨᠲᠡ ᠬᠡᠯᠡ ᠦᠭᠡᠢ ᠪᠣᠯᠤᠭᠰᠠᠨ ᠪᠣᠯᠬᠣᠷ ᠶᠠᠭᠤ ᠴᠣ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃
— ᠶᠠᠭᠤ ᠭᠡᠵᠦ ᠳᠦᠩᠭᠢᠨᠡᠭᠡᠳ ᠪᠠᠢᠭᠠ ᠶᠤᠮ ᠪᠣᠢ? ᠴᠢ᠂ ᠪᠢ ᠶᠠᠭᠤ ᠴᠤ᠌ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠨᠠ ᠭᠡᠵᠦ ᠰᠢᠪᠠᠭᠤᠨ ᠤ᠋ ᠬᠠᠭᠠᠨ ᠤᠨᠲᠤᠭᠤᠴᠠᠨ ᠠᠭᠤᠷᠯᠠᠭᠠᠳ᠂ ᠬᠠᠷᠢᠶᠠᠴᠠᠢ ᠴᠢ ᠬᠡᠯᠡ᠂ ᠶᠠᠭᠤᠨ ᠤ᠋ ᠮᠢᠬᠠ ᠢᠯᠡᠭᠦᠦ ᠠᠮᠲᠠᠲᠠᠢ ᠪᠣᠢ? ᠭᠡᠰᠡᠨ ᠳ᠋ᠦ᠍᠂
ᠬᠠᠮᠤᠭ ᠤ᠋ᠨ ᠠᠮᠲᠠᠲᠠᠢ ᠨᠢ ᠮᠣᠭᠠᠢ ᠶ᠋ᠢᠨ ᠮᠢᠬᠠ ᠭᠡᠵᠡᠢ᠃ ᠰᠢᠪᠠᠭᠤᠨ ᠤ᠋ ᠬᠠᠭᠠᠨ ᠬᠠᠷᠢᠶᠠᠴᠠᠢ ᠶ᠋ᠢᠨ ᠦᠭᠡ ᠶ᠋ᠢ ᠦᠨᠡᠮᠰᠢᠭᠡᠳ ᠮᠣᠭᠠᠢ ᠪᠠᠷᠢᠵᠤ ᠢᠳᠡᠳᠡᠭ ᠪᠣᠯᠪᠠ ᠭᠡᠨᠡ᠃ ᠣᠳᠣ ᠬᠠᠨ ᠭᠠᠷᠤᠳᠢ ᠶ᠋ᠢᠨ ᠤᠳᠤᠮ ᠠ᠋ᠴᠠ ᠭᠠᠭᠴᠠ ᠡᠯᠢᠶᠡ ᠦᠯᠡᠳᠡᠵᠦ ᠬᠣᠴᠣᠷᠤᠭᠰᠠᠨ ᠪᠥᠭᠡᠳ ᠬᠠᠭᠠᠨ ᠤ᠋ ᠪᠠᠨ ᠨᠢᠭᠡᠨ ᠠᠳᠠᠯᠢ ᠮᠣᠭᠠᠢ ᠢᠳᠡᠬᠦ ᠳᠤᠷᠠᠲᠠᠢ ᠪᠣᠯᠤᠭᠰᠠᠨ ᠭᠡᠵᠡᠢ᠃
ᠦᠰᠦᠭ ᠬᠠᠲᠠᠵᠤ᠂ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠭᠦᠩᠭᠠᠷ