ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠲᠠᠪᠤ ᠂ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤᠨ ᠪᠦᠯᠦᠭ 9 > Хөх зул – Боржигон Ванжал –"Тав ᠂ Таван хошуу малын бүлэг " 9
261ᠲᠠᠪᠤ ᠂ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤᠨ ᠪᠦᠯᠦᠭ – 9
ᠠᠳᠤᠭᠤ ᠶᠢ ᠨᠡᠷᠡᠯᠡᠬᠦ Адууг нэрлэх
ᠠᠳᠤᠭᠤ ᠶ᠋ᠢ ᠲᠥᠷᠥᠴᠡ ᠪᠡᠷ ᠲᠣᠳᠣᠳᠬᠠᠨ ᠨᠡᠷᠡᠯᠡᠬᠦ ᠵᠦᠢᠯ
ᠪᠦᠯᠲᠡᠭᠡᠷ ᠨᠢᠳᠦᠲᠦ ᠨᠢᠳᠦ ᠨᠢ ᠲᠣᠮᠣ ᠪᠥᠭᠡᠳ ᠳᠣᠪᠣᠭᠣᠷ ᠲᠥᠭᠥᠷᠢᠭᠬᠡᠨ᠃
ᠮᠣᠭᠠᠢ ᠨᠢᠳᠦᠲᠦ ᠨᠢᠳᠦ ᠨᠢ ᠪᠠᠭᠠ ᠮᠥᠷᠲᠡᠭᠡᠨ ᠭᠤᠷᠪᠠᠯᠵᠢᠨᠳᠠᠭᠤ᠃
ᠴᠠᠬᠢᠷ ᠨᠢᠳᠦᠲᠦ ᠨᠢᠳᠦᠨ ᠴᠡᠴᠡᠭᠡᠢ ᠨᠢ ᠴᠠᠭᠠᠪᠲᠤᠷ ᠪᠤᠶᠤ ᠨᠣᠭᠣᠭᠠᠨ᠃
ᠬᠢᠯᠮᠠᠩ ᠨᠢᠳᠦᠲᠦ
ᠴᠢᠯᠪᠠᠩ ᠴᠠᠭᠠᠨ ᠵᠢᠰᠦᠮ ᠲᠡᠢ᠃ ᠨᠣᠭᠣᠭᠠᠨ ᠮᠥᠷᠲᠡᠭᠡᠨ ᠣᠯᠪᠢᠩ ᠨᠢᠳᠦᠲᠡᠢ᠂ ᠲᠦᠭᠦᠬᠡᠢ ᠬᠠᠮᠠᠷᠳᠠᠢ᠂ ᠴᠠᠪᠢ ᠰᠤᠭᠤ ᠨᠢ ᠴᠦ᠍ ᠶᠠᠭᠠᠪᠲᠤᠷ ᠲᠦᠭᠦᠬᠡᠢ ᠴᠠᠭᠠᠨ᠃
ᠮᠡᠯᠡᠬᠡᠢ ᠵᠣᠪᠬᠢᠲᠠᠢ ᠨᠢᠳᠦᠨ ᠵᠣᠪᠬᠢ ᠨᠢ ᠪᠥᠯᠴᠥᠭᠡᠷ᠃
ᠲᠦᠭᠦᠬᠡᠢ ᠬᠠᠮᠠᠷᠲᠤ ᠬᠠᠮᠠᠷ ᠴᠣᠷᠪᠣ ᠶ᠋ᠢᠨ ᠬᠡᠰᠡᠭ ᠨᠢ ᠤᠯᠠᠭᠠᠪᠲᠤᠷ ᠲᠦᠭᠦᠬᠡᠢ ᠴᠠᠭᠠᠨ᠃
ᠬᠤᠪᠤ ᠴᠢᠬᠢ ᠦᠭᠡᠢ ᠪᠤᠶᠤ ᠠᠰᠤᠷᠤ ᠪᠠᠭᠠ ᠴᠢᠬᠢᠲᠡᠢ ᠶ᠋ᠢ ᠬᠡᠯᠡᠨᠡ᠃
ᠬᠤᠯᠤᠭᠠᠷ
ᠴᠢᠬᠢᠨ ᠦ᠌ ᠦᠵᠦᠭᠦᠷ ᠨᠢ ᠬᠥᠯᠳᠡᠭᠰᠡᠨ ᠪᠤᠶᠤ ᠣᠭᠲᠣᠯᠤᠭᠳᠠᠭᠰᠠᠨ᠂ ᠮᠥᠨ ᠲᠥᠷᠥᠯᠬᠢ ᠦᠵᠦᠭᠦᠷ ᠦᠭᠡᠢ ᠴᠢᠬᠢᠲᠡᠢ ᠶ᠋ᠢ ᠬᠡᠯᠡᠨᠡ᠃
ᠬᠤᠯᠮᠠᠩ ᠠᠮᠢᠲᠠᠨ ᠠᠳᠤᠭᠤᠰᠤᠨ ᠤ᠋ ᠴᠢᠬᠢ ᠵᠢᠵᠢᠭ ᠪᠤᠶᠤ ᠬᠤᠯᠤᠭᠠᠷᠳᠠᠭᠤ ᠶ᠋ᠢ ᠬᠡᠯᠡᠨᠡ᠃
ᠵᠡᠪᠡᠨ ᠴᠢᠬᠢᠲᠦ
ᠪᠠᠢᠯᠳᠤᠭᠠᠨ ᠳ᠋ᠤ᠌ ᠬᠡᠷᠡᠭᠯᠡᠬᠦ ᠵᠡᠪᠡ ᠶ᠋ᠢᠨ ᠬᠡᠯᠪᠡᠷᠢᠲᠡᠢ ᠴᠢᠬᠢ᠃ ᠦᠵᠦᠭᠦᠷᠲᠡᠢ ᠬᠤᠪᠤ ᠴᠢᠬᠢ ᠪᠤᠶᠤ ᠴᠢᠬᠢᠨ ᠳᠡᠯᠪᠢ ᠨᠢ ᠬᠤᠮᠢᠭᠠᠷ ᠮᠥᠷᠲᠡᠭᠡᠨ ᠦᠵᠦᠭᠦᠷ ᠵᠦᠭ ᠢ᠋ᠶ᠋ᠡᠨ ᠱᠤᠪᠲᠤᠩ ᠪᠦᠲᠦᠨ ᠴᠢᠬᠢ ᠶ᠋ᠢ ᠴᠦ᠍ ᠵᠠᠪᠢᠨ ᠴᠢᠬᠢᠲᠦ ᠭᠡᠨᠡ᠃ ᠣᠯᠠᠩᠬᠢ ᠳ᠋ᠠᠭᠠᠨ ᠪᠤᠭ ᠮᠠᠯ ᠳ᠋ᠤ᠌ ᠲᠣᠬᠢᠶᠠᠯᠳᠤᠵᠤ᠂ ᠠᠳᠤᠭᠤᠨ ᠳ᠋ᠤ᠌ ᠬᠠᠶᠠ ᠬᠤᠪᠤ ᠴᠢᠬᠢᠨ ᠳ᠋ᠦ᠍ ᠢᠯᠡᠷᠡᠳᠡᠭ᠃
ᠳᠡᠯᠪᠡᠭᠡᠷ
ᠡᠳ᠋ᠯᠡᠭᠡ ᠬᠡᠲᠦᠷᠡᠭᠰᠡᠨ ᠡᠴᠡ ᠴᠢᠬᠢ ᠨᠢ ᠳᠠᠯᠪᠠᠢᠵᠤ ᠪᠠᠭᠤᠭᠰᠠᠨ ᠵᠢᠴᠢ ᠵᠣᠬᠢᠮᠵᠢ ᠦᠭᠡᠢ᠂ ᠥᠷᠭᠡᠨ ᠶᠡᠬᠡ ᠮᠡᠲᠦᠰ᠃
ᠰᠡᠷᠲᠡᠭᠡᠷ
ᠰᠡᠭᠡᠲᠡᠩ ( ᠰᠣᠭᠣᠲᠣᠩ ) ᠰᠡᠷᠲᠡᠩ ᠬᠡᠯᠪᠡᠷᠢᠲᠡᠢ ᠴᠢᠬᠢ᠂ ᠴᠢᠮᠡᠭᠡ ᠰᠣᠨᠣᠷᠴᠢ ᠴᠢᠬᠢ᠃
ᠰᠣᠷᠲᠣᠭᠣᠷ ᠰᠣᠷᠭᠣᠭ ᠰᠡᠷᠲᠡᠭᠡᠨᠡᠭᠦᠷ ᠴᠢᠬᠢ᠃
ᠬᠠᠢᠴᠢᠨ ᠴᠢᠬᠢᠲᠦ ᠴᠢᠬᠢ ᠪᠡᠨ ᠬᠡᠵᠢᠶᠡᠳᠡ ᠰᠣᠯᠪᠢᠴᠠᠳᠠᠭ᠃
ᠢᠮᠠᠭᠠᠨ ᠲᠣᠯᠣᠭᠠᠢᠲᠤ
ᠶᠠᠷᠳᠠᠢᠭᠰᠠᠨ ᠬᠠᠮᠠᠷᠳᠠᠢ ᠠᠬᠤᠷᠬᠠᠨ ᠰᠢᠭ᠋ ᠪᠠᠭᠠ ᠲᠣᠯᠣᠭᠠᠢᠲᠠᠢ ᠠᠳᠤᠭᠤ ᠃ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠰᠢᠨᠵᠢᠯᠡᠭᠡ ᠶ᠋ᠢᠨ ᠨᠢᠭᠡ ᠭᠡᠵᠦ ᠵᠠᠷᠢᠮ ᠬᠥᠮᠦᠨ ᠬᠡᠯᠡᠳᠡᠭ᠃
ᠬᠣᠨᠢᠨ ᠲᠣᠯᠣᠭᠠᠢᠲᠤ
ᠮᠣᠩᠬᠣᠷ ᠬᠠᠮᠠᠷᠳᠠᠢ ᠥᠨᠳᠥᠷ ᠲᠣᠯᠣᠭᠠᠢᠲᠠᠢ ᠠᠳᠤᠭᠤ ᠃ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠰᠢᠨᠵᠢᠯᠡᠭᠡ ᠶ᠋ᠢᠨ ᠨᠢᠭᠡ ᠃
ᠥᠨᠳᠥᠷ ᠰᠡᠷᠪᠡᠭᠡᠲᠦ ᠮᠤᠨᠳᠠᠭᠠ ᠶ᠋ᠢᠨ ᠣᠪᠣᠭᠣᠷ ᠥᠨᠳᠥᠷ ᠠᠳᠤᠭᠤ ᠃
ᠭᠣᠨᠢᠭᠠᠷ ᠨᠢᠷᠤᠭᠤᠲᠤ ᠤᠷᠲᠤ ᠵᠣ᠌ ᠨᠢᠷᠤᠭᠤᠲᠠᠢ ᠠᠳᠤᠭᠤ ᠃
ᠬᠣᠲᠣᠭᠣᠷ ᠨᠢᠷᠤᠭᠤᠲᠤ ᠨᠢᠷᠤᠭᠤ ᠨᠢ ᠮᠢᠳᠠᠭᠠᠷ ᠃
ᠪᠥᠭᠲᠥᠷ ᠨᠢᠷᠤᠭᠤᠲᠤ
ᠨᠢᠷᠤᠭᠤ ᠨᠢ ᠠᠷᠤᠬᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠷᠭᠦᠭᠳᠡᠭᠰᠡᠨ ᠥᠷᠢᠭᠦᠦ ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠂ ᠬᠠᠷᠭᠠᠮ ᠥᠨᠳᠥᠷ ᠃
ᠢᠨᠵᠠᠭᠠᠨ ᠵᠣ᠌ ᠲᠠᠢ ᠪᠥᠭᠡᠷᠡᠩᠬᠢ ᠪᠥᠮᠪᠥᠷᠢᠭᠡᠨ ᠨᠢᠷᠤᠭᠤᠲᠠᠢ ᠠᠳᠤᠭᠤ ᠃
ᠲᠠᠤᠯᠠᠢ ᠶ᠋ᠢᠨ ᠵᠣ᠌ ᠲᠠᠢ ᠥᠨᠳᠡᠭᠡᠨ ᠵᠣ᠌ ᠲᠠᠢ ᠠᠳᠤᠭᠤ᠃
ᠳᠥᠷᠪᠡᠯᠵᠢᠨ ᠳᠠᠰᠢᠶᠠᠲᠤ
ᠲᠡᠭ ᠳᠦᠷᠪᠡᠨᠵᠢᠯᠳᠡᠭᠦᠦ ᠥᠷᠭᠡᠨ ᠲᠠᠰᠢᠶᠠᠲᠠᠢ ᠠᠳᠤᠭᠤ᠂ ᠶᠡᠬᠡ ᠲᠠᠰᠢᠶᠠᠲᠠᠢ᠃
ᠦᠬᠡᠷ ᠳᠠᠰᠢᠶᠠᠲᠤ ᠲᠡᠰᠢᠶᠡ ᠨᠢ ᠪᠠᠭᠠ ᠪᠥᠭᠡᠳ ᠭᠣᠵᠢᠭᠢᠷ ᠪᠣᠰᠤᠭᠠᠳᠠᠭᠤ᠃
ᠬᠡᠯᠲᠡᠩ
ᠲᠡᠰᠢᠶᠡ ᠶ᠋ᠢᠨ ᠨᠢᠭᠡ ᠨᠢ ᠬᠡᠯᠲᠡᠷᠬᠡᠢ ᠪᠠᠯᠪᠠᠷᠬᠠᠢ᠃ ᠡᠪ ᠦᠭᠡᠢ ᠴᠣᠬᠢᠭᠳᠠᠵᠤ᠂ ᠣᠢᠴᠢᠭᠰᠠᠨ ᠠ᠋ᠴᠠ ᠪᠣᠯᠵᠤ ᠰᠡᠭᠦᠵᠢᠨ ᠲᠣᠯᠣᠭᠠᠢ ᠨᠢ ᠪᠠᠯᠪᠠᠷᠠᠭᠰᠠᠨ ᠪᠤᠶᠤ ᠲᠠᠰᠢᠶᠠᠨ ᠤ᠋ ᠦᠵᠦᠭᠦᠷ ᠨᠢ ᠮᠤᠬᠤᠷ ᠪᠣᠯᠤᠭᠰᠠᠨ᠃
ᠱᠤᠪᠲᠤᠩ ᠲᠡᠰᠢᠶᠡ ᠨᠢ ᠱᠤᠪᠲᠤᠭᠤᠷ ᠃
ᠪᠣᠰᠤᠭᠠ ᠪᠣᠷᠪᠢᠲᠤ ᠪᠣᠷᠪᠢ ᠨᠢ ᠪᠣᠰᠤᠭᠠ ᠮᠥᠷᠲᠡᠭᠡᠨ ᠮᠠᠰᠢ ᠵᠠᠳᠠᠭᠠᠢ᠃
ᠵᠠᠳᠠᠭᠠᠢ ᠪᠣᠷᠪᠢᠲᠤ ᠬᠣᠶᠠᠷ ᠪᠣᠷᠪᠢ ᠶ᠋ᠢᠨ ᠬᠣᠭᠣᠷᠣᠨᠳᠣᠬᠢ ᠵᠠᠢ ᠨᠢ ᠠᠭᠤᠵᠢᠮ᠃
ᠪᠣᠰᠤᠭᠠ ᠴᠦᠮᠴᠤᠭᠡᠲᠡᠢ
ᠰᠠᠭᠠᠭ ᠲᠤᠭᠤᠷᠠᠢ ᠬᠣᠶᠠᠷ ᠤ᠋ᠨ ᠳᠤᠮᠳᠠᠬᠢ ᠦᠶᠡ ᠨᠢ ᠪᠣᠭᠣᠨᠢ ᠪᠥᠭᠡᠳ ᠪᠣᠰᠤᠭᠠ ᠬᠡᠯᠪᠡᠷᠢᠲᠡᠢ᠃
ᠬᠡᠪᠲᠡᠭᠡ ᠴᠦᠮᠴᠤᠭᠡᠲᠡᠢ
ᠰᠠᠭᠠᠭ ᠲᠤᠭᠤᠷᠠᠢ ᠬᠣᠶᠠᠷ ᠤ᠋ᠨ ᠳᠤᠮᠳᠠᠬᠢ ᠦᠶᠡ ᠨᠢ ᠥᠨᠳᠥᠷ ᠪᠥᠭᠡᠳ ᠬᠡᠪᠲᠡᠭᠡ ᠬᠡᠯᠪᠡᠷᠢᠲᠡᠢ᠃
ᠨᠠᠷᠢᠨ ᠶᠠᠰᠤᠲᠤ
ᠨᠠᠷᠢᠨ ᠭᠤᠸᠠᠷᠠᠬᠠᠨ ᠪᠡᠶᠡᠲᠡᠢ ᠶᠠᠰᠤ ᠨᠠᠷᠢᠨ ᠰᠦᠳᠡᠬᠡᠷ ᠠᠳᠤᠭᠤ᠃ ᠭᠤᠷᠢᠭ ᠠᠳᠤᠭᠤ᠃
ᠬᠦᠨᠳᠦ ᠶᠠᠰᠤᠨ ᠤ᠋ ᠠᠳᠤᠭᠤ
ᠶᠠᠰᠤ ᠨᠢ ᠪᠦᠳᠦᠭᠦᠨ ᠂ ᠮᠢᠬᠠ ᠶᠡᠬᠡᠲᠡᠢ ᠪᠤᠯᠴᠢᠩ ᠴᠢᠩᠭᠠ ᠂ ᠭᠡᠳᠡᠰᠦ ᠠᠯᠳᠠᠳᠠᠭ ᠦᠭᠡᠢ ᠪᠥᠬᠡ ᠠᠳᠤᠭᠤ᠃
ᠪᠦᠳᠦᠭᠦᠨ ᠪᠡᠶᠡ ᠨᠢ ᠲᠣᠮᠣ᠂ ᠪᠡᠶᠡᠷᠬᠡᠭ ᠵᠤᠵᠠᠭᠠᠯᠢᠭ᠃
ᠪᠠᠭᠠ ᠪᠡᠶᠡ ᠨᠢ ᠪᠠᠭᠠ᠂ ᠶᠠᠭ ᠪᠦᠳᠦᠭᠦᠨ ᠦ᠌ ᠡᠰᠡᠷᠭᠦ᠃
ᠵᠢᠭᠠᠬᠠᠨ ᠪᠡᠶᠡ ᠪᠡᠷ ᠪᠠᠭᠠᠬᠠᠨ ᠰᠢᠭ᠋᠃
ᠵᠢᠭᠵᠢᠬᠡᠷ ᠪᠡᠶᠡ ᠨᠢ ᠵᠢᠵᠢᠭ ᠮᠥᠷᠲᠡᠭᠡᠨ ᠨᠠᠷᠢᠨ ᠬᠣᠮᠰᠠᠬᠠᠨ ᠬᠠᠷᠠᠭᠳᠠᠨᠠ᠃
ᠥᠨᠳᠥᠷ
ᠪᠣᠰᠤᠭᠠ ᠪᠠᠶᠠᠷᠬᠦᠦ ᠠᠳᠤᠭᠤ᠃ ᠲᠡᠩᠬᠡᠬᠡᠷ ᠮᠥᠴᠢ ᠥᠨᠳᠥᠷ ᠂ ᠳᠡᠩᠬᠡᠢᠭᠰᠡᠨ᠃
ᠲᠠᠷᠭᠤᠨ ᠲᠠᠷᠭᠤ ᠬᠦᠴᠦ ᠰᠠᠢᠲᠠᠢ ᠂ ᠮᠢᠬᠠᠯᠢᠭ᠃
ᠡᠴᠡᠩᠬᠡᠢ ᠲᠤᠷᠠᠩᠬᠠᠢ ᠂ ᠮᠢᠬᠠ ᠲᠠᠷᠭᠤ ᠮᠠᠭᠤᠲᠠᠢ᠃
ᠶᠠᠨᠳᠠᠩ ᠮᠠᠰᠢ ᠡᠴᠡᠩᠬᠡᠢ᠃ ᠠᠷᠠᠰᠤ ᠶᠠᠰᠤ ᠰᠢᠬᠠᠭᠤ ᠪᠣᠯᠤᠭᠰᠠᠨ᠃
ᠶᠠᠷᠳᠡᠩ ᠶᠠᠨᠳᠠᠩ ᠂ ᠮᠠᠰᠢ ᠲᠤᠷᠠᠩᠬᠠᠢ᠃
ᠶᠠᠷᠵᠠᠩ ᠶᠠᠷᠳᠡᠩ᠂ ᠶᠠᠰᠤ ᠬᠠᠪᠢᠷᠭᠠ ᠨᠢ ᠬᠡᠷᠵᠡᠢᠵᠦ ᠬᠠᠪᠲᠠᠢᠵᠤ ᠮᠡᠳᠡᠭᠳᠡᠭᠰᠡᠨ᠃
ᠭᠤᠷᠢᠭ
ᠣᠨᠣᠯᠭᠠ ᠳᠠᠭᠠᠬᠤ ᠦᠭᠡᠢ᠂ ᠬᠢᠯᠪᠠᠷᠬᠠᠨ ᠭᠡᠳᠡᠰᠦ ᠠᠯᠳᠠᠳᠠᠭ ᠨᠠᠷᠢᠨ ᠶᠠᠰᠤᠲᠤ ᠠᠳᠤᠭᠤ᠃
ᠪᠤᠷᠭᠢ ᠪᠣᠷᠭᠢᠯ ᠂ ᠣᠨᠣᠯᠭᠠ ᠳ᠋ᠤ᠌ ᠪᠥᠬᠡ ᠂ ᠳᠠᠭᠠᠭᠠᠴᠠ ᠶᠡᠬᠡᠲᠡᠢ᠃
ᠳᠥᠵᠢᠷ ᠡᠳ᠋ᠯᠡᠭᠡ ᠳ᠋ᠦ᠍ ᠲᠡᠰᠪᠦᠷᠢᠲᠡᠢ ᠂ ᠳᠠᠭᠠᠭᠠᠴᠠ ᠶᠡᠬᠡᠲᠡᠢ᠃
ᠡᠷᠪᠡᠭᠡᠷ
ᠬᠥᠩᠭᠡᠨ ᠪᠢᠷᠠ ( ᠪᠢᠳ ) ᠴᠢᠳᠠᠯ ᠦᠭᠡᠢ ᠳᠠᠭᠠᠭᠠᠴᠠ ᠮᠠᠭᠤᠲᠠᠢ ᠠᠳᠤᠭᠤ ᠂ ᠵᠢᠭᠵᠢᠬᠡᠷ᠃
ᠴᠡᠭᠵᠡᠭᠡᠷ
ᠪᠡᠶᠡ ᠨᠢ ᠪᠠᠭᠠ ᠴᠤ᠌ ᠬᠡᠪ ᠨᠢ ᠲᠡᠩᠴᠡᠭᠰᠡᠨ ᠨᠡᠯᠢᠶᠡᠳ ᠴᠢᠳᠠᠯᠲᠠᠢ ᠰᠢᠭ᠋᠃
ᠴᠢᠪᠵᠡᠭᠡᠷ
ᠭᠡᠳᠡᠰᠦ ᠪᠡᠷ ᠢ᠋ᠶ᠋ᠡᠨ ᠨᠠᠷᠢᠬᠠᠨ ᠬᠥᠩᠭᠡᠨ ᠶᠠᠰᠤᠨ ᠤ᠋ ᠠᠳᠤᠭᠤ᠃
ᠡᠷᠵᠡᠭᠡᠷ ᠡᠷᠵᠡᠭᠡᠷ ᠬᠤᠷᠠᠭᠠᠨ ᠦᠰᠦᠲᠡᠢ᠃
ᠬᠤᠷᠠᠭᠠᠨ ᠦᠰᠦᠲᠦ
ᠡᠷᠵᠡᠭᠡᠷ ᠂ ᠪᠦᠬᠦ ᠪᠡᠶᠡ ᠶ᠋ᠢᠨ ᠦᠰᠦ ᠪᠦᠷ ᠬᠤᠷᠠᠭᠠᠨ ᠦᠰᠦ ᠰᠢᠭ ᠭᠣᠭᠴᠣᠭᠠᠷᠠᠵᠤ ᠡᠷᠵᠡᠢᠭᠰᠡᠨ᠃
ᠴᠣᠮᠪᠣᠩ ᠲᠣᠭᠤᠷᠠᠢᠲᠠᠢ
ᠲᠤᠭᠤᠷᠠᠢ ᠨᠢ ᠬᠣᠮᠪᠣᠩ ᠂ ᠴᠣᠮᠪᠣᠭᠣᠷ ᠪᠣᠰᠤᠭᠠ ᠴᠡᠮᠪᠡᠭᠡᠷ᠃
ᠬᠥᠭᠡᠷᠦᠬᠦᠨ
ᠶᠠᠩᠵᠤ ᠬᠡᠪ ᠨᠢ ᠡᠪᠯᠢᠭ ᠲᠡᠩᠴᠡᠵᠦ ᠦᠵᠡᠬᠦ ᠳ᠋ᠦ᠍ ᠬᠥᠭᠡᠷᠦᠬᠦᠨ ᠬᠡᠪᠯᠢᠭ᠃
ᠨᠣᠢᠷᠮᠤᠭ ᠤᠶᠠᠭᠠᠨ ᠳ᠋ᠤ᠌ ᠤᠶᠠᠭᠰᠠᠭᠠᠷ ᠤᠨᠲᠠᠩᠬᠠᠢᠷᠠᠳᠠᠭ᠃
ᠤᠨᠲᠠᠩᠬᠠᠢ
ᠤᠶᠠᠭᠠᠨ ᠳ᠋ᠤ᠌ ᠤᠨᠲᠠᠳᠠᠭ᠃ ᠡᠢᠮᠦ ᠮᠣᠷᠢ ᠶ᠋ᠢ ᠬᠤᠷᠳᠤᠨ ᠭᠡᠵᠦ ᠵᠠᠷᠢᠮ ᠡᠪᠦᠭᠡᠳ ᠶᠠᠷᠢᠳᠠᠭ᠃
ᠡᠪᠡᠷᠲᠦ ᠬᠠᠷᠠ ᠰᠠᠬᠠᠯᠲᠤ ᠬᠠᠷᠠ᠃
ᠲᠤᠬᠠᠢᠯᠠᠭᠰᠠᠨ ᠠᠵᠢᠯ ᠢ᠋ᠶ᠋ᠠᠷ ᠨᠡᠷᠡᠯᠡᠬᠦ ᠵᠦᠢᠯ
ᠤᠨᠤᠭᠠᠷᠢ ᠶ᠋ᠢᠨ
ᠠᠳᠤᠭᠤ ᠂ ᠲᠡᠮᠡᠭᠡ ᠂ ᠦᠬᠡᠷ ᠂ ᠬᠣᠨᠢ ᠵᠡᠷᠭᠡ ᠶ᠋ᠢᠨ ᠬᠠᠷᠢᠭᠤᠯᠤᠯᠭᠠ ᠳ᠋ᠤ᠌ ᠬᠤᠪᠢᠳᠠᠭᠰᠠᠨ ᠣᠨᠣᠯᠭᠠ᠃
ᠤᠯᠠᠭᠠ ᠶ᠋ᠢᠨ
ᠠᠯᠪᠠᠨ ᠵᠠᠷᠤᠯᠭᠠᠨ ᠳ᠋ᠤ᠌ ᠲᠤᠰᠬᠠᠢ ᠪᠡᠯᠡᠳᠬᠡᠭᠰᠡᠨ᠃
ᠴᠡᠷᠢᠭ ᠦ᠋ᠨ ᠠᠭᠲᠠ
ᠰᠤᠷᠲᠠᠯ ᠰᠤᠷᠭᠠᠭᠤᠯᠢᠯᠠᠯ ᠪᠦᠬᠦᠢ ᠴᠡᠷᠢᠭ ᠦ᠋ᠨ ᠤᠨᠤᠭᠠᠷᠢ᠃
ᠤᠷᠭᠠ ᠶ᠋ᠢᠨ
ᠮᠣᠷᠢ ᠪᠠᠷᠢᠬᠤ ᠳ᠋ᠤ᠌ ᠤᠷᠭᠠ ᠳᠠᠭᠠᠬᠤ ᠤᠷᠠᠨ ᠳᠠᠮ ᠲᠠᠢ ᠰᠤᠷᠲᠠᠯ ᠪᠦᠬᠦᠢ ᠮᠣᠷᠢ᠃
ᠲᠦᠭᠵᠢᠶᠡ
ᠤᠷᠭᠠᠯᠠᠭᠠᠳ ᠰᠠᠭᠤᠯᠭᠠᠮᠠᠭᠴᠠ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠱᠣᠩᠰᠢᠷᠠᠵᠤ ᠣᠴᠣᠢᠨ ᠰᠠᠭᠤᠭᠠᠳ ᠪᠣᠰᠳᠠᠭ ᠦᠭᠡᠢ ᠮᠣᠷᠢ᠃
ᠰᠣᠷᠢᠭᠠᠨ ᠤ᠋
ᠤᠷᠤᠯᠳᠤᠭᠠᠨ ᠳ᠋ᠤ᠌ ᠪᠡᠯᠡᠳᠬᠡᠨ ᠤᠶᠠᠵᠤ ᠰᠣᠢᠯᠭᠠ ᠠᠪᠤᠭᠤᠯᠤᠨ ᠳᠠᠪᠬᠢᠭᠤᠯᠵᠤ ᠰᠤᠷᠭᠠᠭᠤᠯᠢᠯᠠᠬᠤ ᠮᠣᠷᠢᠳ᠃
ᠤᠷᠤᠯᠳᠤᠭᠠᠨ ᠤ᠋
ᠤᠶᠠᠵᠤ ᠰᠣᠢᠨ ᠣᠯᠠᠨ ᠮᠣᠷᠢᠳ ᠲᠠᠢ ᠨᠠᠢᠷ ᠨᠠᠭᠠᠳᠤᠮ ᠳ᠋ᠤ᠌ ᠳᠠᠪᠬᠢᠭᠤᠯᠵᠤ ᠰᠢᠯᠭᠠᠷᠠᠭᠤᠯᠤᠭᠰᠠᠨ ᠮᠣᠷᠢ᠃
ᠨᠠᠢᠷ ᠤ᠋ᠨ
ᠨᠠᠢᠷ ᠨᠠᠭᠠᠳᠤᠮ ᠳ᠋ᠤ᠌ ᠤᠨᠤᠳᠠᠭ ᠪᠤᠶᠤ ᠨᠠᠢᠷ ᠤ᠋ᠨ ᠱᠠᠩ ᠳ᠋ᠤ᠌ ᠣᠯᠤᠭᠰᠠᠨ ᠮᠣᠷᠢ᠃
ᠪᠡᠯᠡᠭ ᠦ᠋ᠨ
ᠨᠠᠢᠷ ᠨᠠᠭᠠᠳᠤᠮ ᠪᠤᠶᠤ ᠬᠤᠷᠢᠮ ᠬᠤᠢ ᠳ᠋ᠤ᠌ ᠪᠡᠯᠡᠭᠯᠡᠵᠦ ᠥᠭᠭᠦᠭᠰᠡᠨ ᠮᠣᠷᠢ᠃
ᠬᠥᠲᠥᠯᠦᠭᠡ ᠶ᠋ᠢᠨ ᠢᠯᠡᠭᠦᠦ ᠰᠤᠯᠠ ᠬᠥᠲᠥᠯᠵᠦ ᠶᠠᠪᠤᠬᠤ ᠮᠣᠷᠢ᠃
ᠲᠡᠷᠭᠡᠨ ᠦ᠌ ᠲᠡᠷᠭᠡᠨ ᠳ᠋ᠦ᠍ ᠬᠥᠯᠯᠡᠳᠡᠭ ᠬᠥᠯᠪᠦᠷᠢ᠃
ᠠᠷᠠᠯ ᠤ᠋ᠨ ᠲᠡᠷᠭᠡᠨ ᠠᠷᠠᠯ ᠤ᠋ᠨ ᠭᠣᠣᠯ ᠳ᠋ᠤ᠌ ᠬᠥᠯᠯᠡᠳᠡᠭ ᠮᠣᠷᠢ᠃
ᠳᠡᠯᠪᠡᠭᠡᠨ ᠦ᠌
ᠠᠷᠠᠯ ᠤ᠋ᠨ ᠡᠮᠦᠨᠡ ᠰᠤᠯᠠ ᠵᠢᠳᠬᠦᠭᠦᠷ ᠲᠦ᠍ ᠬᠥᠯᠯᠡᠳᠡᠭ ᠮᠣᠷᠢ᠃
ᠮᠠᠰᠢᠨ ᠤ᠋
ᠬᠤᠳᠳᠤᠭ ᠤ᠋ᠨ ᠪᠠ ᠡᠪᠡᠰᠦᠨ ᠦ᠌ ᠮᠠᠰᠢᠨ ᠵᠡᠷᠭᠡ ᠳ᠋ᠦ᠍ ᠬᠥᠯᠯᠡᠳᠡᠭ ᠮᠣᠷᠢ᠃
ᠵᠢᠰᠦᠨ ᠦ᠌
ᠮᠣᠷᠳᠠᠬᠤ ᠬᠡᠦᠬᠡᠨ ᠦ᠌ ᠤᠨᠤᠬᠤ ᠮᠣᠷᠢ᠃
ᠣᠨᠴᠠᠭᠠᠢ ᠲᠡᠮᠳᠡᠭ ᠢ᠋ᠶ᠋ᠡᠷ ᠨᠡᠷᠡᠯᠡᠬᠦ ᠵᠦᠢᠯ
ᠵᠠᠭᠠᠯ ᠲᠠᠢ
ᠪᠦᠳᠦᠭᠦᠨ ᠬᠦᠵᠦᠭᠦᠦ ᠪᠤᠶᠤ ᠲᠠᠯᠤᠨ ᠤ᠋ ᠣᠷᠴᠢᠮ ᠳ᠋ᠤ᠌ ᠰᠡᠷᠪᠡᠭᠡ ᠡᠴᠡ ᠨᠢ ᠳᠣᠷᠣᠭᠰᠢ ᠤᠯᠠᠪᠲᠤᠷᠬᠠᠨ ᠪᠤᠶᠤ ᠬᠠᠷᠠᠪᠲᠤᠷᠬᠠᠨ ᠵᠤᠷᠪᠤᠰ ᠪᠠᠭᠤᠭᠰᠠᠨ᠃ ᠵᠠᠷᠢᠮ ᠭᠠᠵᠠᠷ ᠪᠢᠳᠡᠷᠲᠡᠢ ᠭᠡᠳᠡᠭ᠃ ᠪᠠᠰᠠ ᠵᠠᠷᠢᠮ ᠭᠠᠵᠠᠷ ᠪᠠᠩᠼᠡᠳᠠᠢ ᠴᠤ᠌ ᠭᠡᠳᠡᠭ᠃
ᠪᠠᠩᠼᠡᠳᠠᠢ ᠵᠠᠭᠠᠯ ᠲᠠᠢ᠃
ᠪᠢᠳᠠᠷᠲᠡᠢ ᠵᠠᠭᠠᠯ ᠲᠠᠢ᠃
ᠪᠤᠭᠤᠳᠠᠢᠳᠠᠢ
ᠪᠣᠷᠣ ᠵᠡᠷᠭᠡ ᠶ᠋ᠢᠨ ᠴᠠᠢᠪᠤᠷ ᠵᠢᠰᠦᠮ ᠦ᠋ᠨ ᠮᠣᠷᠢ ᠬᠥᠭᠰᠢᠷᠡᠬᠦ ᠳ᠋ᠦ᠍᠂ ᠪᠡᠶᠡ ᠳᠡᠭᠡᠷᠡ ᠨᠢ ᠤᠯᠠᠭᠠᠪᠲᠤᠷ ᠪᠤᠶᠤ ᠬᠥᠬᠡᠪᠲᠦᠷ ᠥᠩᠭᠡ ᠶ᠋ᠢᠨ ᠪᠤᠭᠤᠳᠠᠢ ᠶ᠋ᠢᠨ ᠬᠡᠯᠪᠡᠷᠢᠲᠡᠢ ᠵᠢᠵᠢᠭ ᠲᠣᠯᠪᠣ ᠲᠦᠭᠡᠬᠦ᠃
ᠱᠠᠯᠵᠠᠲᠤ
ᠪᠤᠭᠤᠳᠠᠢᠲᠤ ᠂ ᠮᠥᠨ ᠴᠠᠢᠪᠤᠷ ᠵᠢᠰᠦᠮ ᠳᠡᠭᠡᠷᠡ ᠱᠠᠯᠵᠠ ᠶ᠋ᠢᠨ ᠬᠡᠯᠪᠡᠷᠢᠲᠡᠢ ᠵᠢᠵᠢᠭ ᠲᠣᠯᠪᠣ ᠲᠦᠭᠡᠬᠦ᠃
ᠭᠣᠣᠯᠲᠠᠢ
ᠳᠡᠯ ᠡᠴᠡ ᠰᠡᠭᠦᠯ ᠬᠦᠷᠲᠡᠯᠡᠬᠢ ᠨᠢᠷᠤᠭᠤᠨ ᠵᠢᠷᠤᠮ ᠢ᠋ᠶ᠋ᠠᠷ ᠪᠠᠷᠠᠭᠠᠨ ᠪᠤᠶᠤ ᠵᠡᠭᠡᠷᠳᠡ ᠥᠩᠭᠡ ᠶ᠋ᠢᠨ ᠨᠠᠷᠢᠨ ᠵᠤᠷᠪᠤᠰᠲᠠᠢ᠃
ᠤᠷᠤᠭ
ᠭᠣᠣᠯ ᠲᠠᠢ᠃ ᠤᠷᠤᠭ ᠭᠡᠭᠴᠢ ᠭᠣᠣᠯᠳᠠᠭᠤ ᠰᠠᠭᠠᠷᠠᠯ ᠵᠢᠰᠦᠮ ᠳ᠋ᠦ᠍ ᠢᠯᠡᠭᠦᠦ ᠲᠣᠬᠢᠶᠠᠯᠳᠤᠳᠠᠭ ᠭᠣᠣᠯᠲᠤ ᠰᠤᠳᠠᠯ᠃ ᠢᠯᠠᠩᠭᠤᠶᠠ ᠬᠤᠷᠠᠭᠠᠨ ᠦᠰᠦᠲᠡᠢ ᠪᠣᠯᠤᠭᠰᠠᠭᠠᠷ ᠭᠣᠣᠯ ( ᠤᠷᠤᠭ ) ᠨᠢ ᠥᠷᠭᠡᠨ ᠨᠠᠷᠢᠨ ᠪᠣᠯᠵᠤ ᠠᠲᠤᠷᠢᠶᠠᠲᠤᠨ ᠪᠦᠬᠦᠢ ᠨᠢ ᠨᠡᠩ ᠤᠷᠤᠭ ᠢ᠋ ᠲᠣᠳᠣᠷᠠᠭᠤᠯᠤᠨᠠ᠃
ᠮᠡᠩᠭᠡᠲᠦ
ᠪᠡᠶᠡ ᠶ᠋ᠢᠨ ᠥᠩᠭᠡ ᠡᠴᠡ ᠨᠢ ᠥᠭᠡᠷᠡ ᠭᠠᠭᠴᠠ ᠬᠣᠶᠠᠷ ᠵᠢᠭᠠᠬᠠᠨ ᠬᠠᠷᠠ ᠲᠣᠯᠪᠣ᠃
ᠤᠲᠤᠭᠠᠲᠠᠢ
ᠮᠤᠨᠳᠠᠭᠠ ᠠ᠋ᠴᠠ ᠰᠡᠭᠦᠯ ᠬᠦᠷᠲᠡᠯᠡᠬᠢ ᠨᠢᠷᠤᠭᠤᠨ ᠵᠢᠷᠤᠮ ᠢ᠋ᠶ᠋ᠠᠷ ᠠᠬᠤᠷ ᠳᠡᠯ ᠤᠷᠭᠤᠭᠰᠠᠨ᠃
ᠵᠢᠭᠦᠷᠲᠦ
ᠭᠠᠯ ᠰᠤᠭᠤ ᠳᠥᠷᠦᠭᠡᠪᠴᠢᠨ ᠳᠣᠣᠷᠠ ᠪᠠᠨ ᠡᠷᠭᠢᠯᠭᠡᠳᠡᠢ ᠠᠳᠤᠭᠤ᠃
ᠭᠤᠷᠭᠠᠢᠲᠠᠢ
ᠬᠠᠲᠠᠷᠢᠬᠤ ᠶᠥᠷᠭᠡᠬᠦ ᠵᠡᠷᠭᠡ ᠳ᠋ᠦ᠍ ᠴᠠᠪᠢ ᠨᠢ ᠳᠤᠤᠭᠠᠷᠬᠤ ᠶ᠋ᠢ ᠬᠡᠯᠡᠨᠡ᠃
ᠭᠣᠣᠷᠰᠤᠲᠠᠢ
ᠭᠣᠣᠷᠰᠤᠲᠠᠢ ᠭᠡᠭᠴᠢ ᠲᠠᠯᠤᠨ ᠬᠠᠭᠤᠳᠠᠰᠤ ᠶ᠋ᠢᠨ ᠡᠮᠦᠨᠡᠬᠡᠨ ᠪᠤᠶᠤ ᠵᠠᠷᠢᠮ ᠠᠳᠤᠭᠤᠨ ᠤ᠋ ᠬᠦᠵᠦᠭᠦᠨᠡ ᠡᠷᠡᠬᠡᠢ ᠬᠤᠷᠤᠭᠤᠨ ᠤ᠋ ᠥᠨᠳᠡᠭᠡ ᠣᠷᠣᠮᠠ ᠨᠦᠬᠡᠲᠡᠢ ᠃
ᠮᠣᠭᠠᠢᠲᠠᠢ
ᠬᠠᠭᠠᠷᠢᠬᠤ ᠳ᠋ᠤ᠌ ᠮᠣᠭᠠᠢ ᠭᠠᠷᠤᠭᠰᠠᠨ ᠪᠤᠶᠤ ᠮᠣᠭᠠᠢ ᠰᠢᠭ᠋ ᠤᠯᠠᠭᠠᠨ ᠬᠣᠷᠣᠬᠠᠢ ᠮᠡᠲᠦ ᠵᠦᠢᠯ ᠃
ᠡᠪᠡᠷᠳᠡᠢ
ᠰᠠᠬᠠᠯᠲᠠᠢ ᠮᠣᠷᠢ ᠶ᠋ᠢ ᠡᠷᠲᠡ ᠳᠡᠭᠡᠷᠡ ᠦᠶᠡ ᠳ᠋ᠦ᠍ ᠡᠪᠡᠷᠳᠡᠢ ᠮᠣᠷᠢ ᠭᠡᠵᠦ ᠬᠡᠯᠡᠵᠦ ᠪᠠᠢᠭᠰᠠᠨ ᠪᠠᠷᠢᠮᠲᠠ ᠪᠠᠢᠨᠠ᠃
ᠵᠠᠩ ᠠᠷᠠᠰᠢᠨ ᠢ᠋ᠶ᠋ᠠᠷ ᠨᠡᠷᠡᠯᠡᠬᠦ ᠵᠦᠢᠯ
ᠬᠠᠱᠠᠩ
ᠤᠨᠤᠬᠤ ᠳ᠋ᠤ᠌ ᠳᠥᠭᠥᠰᠢ ᠮᠠᠭᠤᠲᠠᠢ ᠂ ᠳᠠᠪᠢᠷᠠᠭᠤᠯᠵᠤ ᠲᠠᠰᠢᠭᠤᠷᠳᠠᠭᠤᠯᠤᠭᠠᠳ ᠯᠠ ᠪᠠᠢᠳᠠᠭ ᠃
ᠬᠣᠷᠭᠣᠳᠠᠭᠠ
ᠢᠵᠢᠯᠢ ᠰᠦᠷᠦᠭ ᠡᠴᠡ ᠪᠡᠨ ᠪᠤᠶᠤ ᠠᠢᠯ ᠬᠣᠲᠠᠨ ᠠ᠋ᠴᠠ ᠰᠠᠯᠬᠤ ᠳᠤᠷᠠ ᠦᠭᠡᠢ ᠭᠠᠳᠠᠭᠰᠢ ᠶᠠᠪᠤ ᠶᠠᠳᠠᠬᠤ ᠪᠠᠢᠳᠠᠯ ᠃
ᠡᠷᠭᠢᠴᠡᠭᠡ
ᠮᠣᠷᠳᠠᠬᠤ ᠳ᠋ᠤ᠌ ᠪᠡᠶᠡ ᠲᠣᠭᠣᠷᠢᠨ ᠬᠡᠢᠷᠬᠡᠨ ᠭᠦᠶᠦᠵᠦ ᠡᠷᠭᠢᠯᠳᠦᠬᠦ ᠃
ᠰᠢᠷᠪᠠᠭᠠ
ᠬᠠᠰᠢᠷᠠᠭᠠᠯ ᠪᠣᠯᠤᠭᠰᠠᠨ ᠠ᠋ᠴᠠ ᠣᠯᠣᠩᠨᠠᠬᠤ ᠪᠤᠶᠤ ᠮᠣᠷᠳᠠᠬᠤ᠂ ᠭᠠᠷ ᠬᠥᠳᠡᠯᠬᠦ ᠪᠦᠷᠢ ᠰᠡᠭᠦᠯ ᠢ᠋ᠶ᠋ᠡᠨ ᠬᠥᠳᠡᠯᠭᠡᠬᠦ᠃
ᠠᠭᠰᠤᠮ
ᠳᠠᠪᠬᠢᠨ ᠳᠣᠪᠲᠣᠯᠬᠤ ᠭᠡᠳ ᠬᠡᠢᠷᠬᠡᠨ ᠲᠡᠮᠡᠦᠯᠵᠦ ᠬᠥᠨᠳᠡᠯᠢᠳᠦᠨ ᠠᠮᠠᠭᠠᠢ ᠪᠤᠯᠢᠶᠠᠯᠳᠤᠬᠤ ᠃
ᠬᠡᠢᠲᠡᠢ ᠬᠡᠢ ᠰᠠᠭᠤᠭᠰᠠᠨ ᠂ ᠠᠭᠰᠤᠮ ᠃
ᠠᠯᠢᠶᠠ ᠠᠭᠰᠤᠮ ᠬᠥᠭᠡᠷᠦᠦ ᠃
ᠬᠥᠭᠡᠷᠦᠦ ᠠᠯᠢᠶᠠ ᠣᠮᠣᠭᠯᠠᠩ ᠃
ᠣᠮᠣᠭᠯᠠᠩ
ᠤᠨᠤᠬᠤ ᠳ᠋ᠤ᠌ ᠬᠥᠩᠭᠡᠨ ᠳᠣᠷᠪᠢᠲᠠᠢ᠂ ᠪᠤᠰᠤᠳ ᠮᠣᠷᠢᠨ ᠠ᠋ᠴᠠ ᠲᠥᠷᠥᠭᠦᠯᠬᠦ ᠭᠡᠵᠦ ᠲᠡᠮᠡᠦᠯᠦᠨ ᠰᠣᠷᠲᠣᠭᠣᠨᠠᠭᠰᠠᠨ ᠴᠣᠭ ᠵᠢᠪᠬᠤᠭᠠᠲᠠᠢ᠃
ᠠᠩᠭᠠᠷᠠ
ᠠᠮᠠ ᠨᠢ ᠤᠴᠢᠷ ᠦᠭᠡᠢ ᠵᠥᠭᠡᠯᠡᠨ᠂ ᠵᠢᠯᠣᠭᠣ ᠶ᠋ᠢ ᠨᠢ ᠲᠠᠲᠠᠭᠰᠠᠭᠠᠷ ᠲᠣᠯᠣᠭᠠᠢ ᠨᠢ ᠡᠪᠦᠷ ᠳᠡᠭᠡᠷᠡ ᠢᠷᠡᠮᠡ ᠪᠣᠯᠴᠢᠬᠠᠭᠠᠳ ᠪᠠᠰᠠ ᠳᠠᠪᠬᠢᠬᠤ ᠭᠡᠵᠦ ᠰᠠᠷᠪᠠᠯᠵᠠᠭᠠᠳ ᠪᠠᠢᠬᠤ᠃
ᠬᠥᠨᠲᠥᠷᠦᠭᠡ
ᠪᠠᠢᠨ ᠪᠠᠢᠨ ᠲᠣᠯᠣᠭᠠᠢ ᠳᠠᠷᠤᠨ ᠠᠮᠠᠭᠠᠢ ᠪᠤᠯᠢᠶᠠᠯᠴᠠᠨ ᠳᠠᠪᠬᠢᠬᠤ ᠭᠡᠳ ᠪᠠᠢᠬᠤ ᠃
ᠵᠥᠭᠡᠯᠡᠨ ᠠᠮᠠᠲᠠᠢ
ᠵᠢᠯᠣᠭᠣ ᠶ᠋ᠢᠨ ᠠᠶᠠ ᠪᠠᠷ ᠳᠠᠭᠠᠭᠠᠳ ᠪᠠᠢᠬᠤ ᠃
ᠬᠠᠲᠠᠭᠤ ᠠᠮᠠᠲᠠᠢ
ᠵᠢᠯᠣᠭᠣ ᠶ᠋ᠢᠨ ᠠᠶᠠ ᠶ᠋ᠢ ᠳᠠᠭᠠᠬᠤ ᠦᠭᠡᠢ ᠠᠮᠠᠭᠠᠢ ᠪᠤᠯᠢᠶᠠᠯᠴᠠᠨ ᠵᠥᠷᠢᠭᠦᠯᠬᠦ ᠃
ᠬᠤᠲᠠᠭᠤ ᠠᠮᠠᠲᠠᠢ
ᠠᠮᠠᠭᠠᠢ ᠪᠠᠨ ᠰᠣᠶᠣᠭᠠᠨ ᠳ᠋ᠠᠭᠠᠨ ᠵᠠᠭᠤᠨ ᠲᠣᠷᠭᠣᠭᠠᠳ ᠲᠠᠲᠠᠭᠠᠳ ᠳᠡᠢᠯᠳᠡᠬᠦ ᠦᠭᠡᠢ ᠃
ᠬᠥᠮᠦᠵᠢᠭᠡ
ᠪᠠᠢᠨ ᠪᠠᠢᠨ ᠠᠮᠠᠭᠠᠢ ᠪᠤᠯᠢᠶᠠᠯᠳᠤᠨ ᠱᠤᠳᠤᠷᠬᠤ ᠬᠥᠨᠲᠥᠷᠬᠦ ᠪᠠᠢᠳᠠᠯ ᠃
ᠱᠤᠳᠤᠷᠳᠠᠭ ᠬᠥᠨᠲᠥᠷᠦᠨ ᠬᠥᠮᠥᠴᠢᠳᠡᠭ ᠪᠠᠢᠳᠠᠯ ᠃
ᠰᠥᠯᠢᠷᠳᠡᠭ ᠠᠮᠠ ᠨᠢ ᠥᠯᠢᠯᠵᠡᠵᠦ ᠰᠠᠨᠠᠭᠠ ᠠ᠋ᠴᠠ ᠵᠥᠷᠢᠬᠦ ᠪᠠᠢᠳᠠᠯ ᠃
ᠬᠠᠳᠤᠤᠷᠠᠳᠠᠭ
ᠤᠷᠭᠠ ᠳᠠᠭᠠᠬᠤ ᠦᠭᠡᠢ ᠪᠤᠶᠤ ᠣᠯᠠᠨ ᠮᠣᠷᠢᠳ ᠲᠠᠢ ᠬᠠᠮᠲᠤ ᠳᠠᠪᠬᠢᠬᠤ ᠦᠭᠡᠢ ᠭᠠᠳᠠᠭᠰᠢ ᠵᠠᠢᠯᠠᠨ ᠳᠠᠪᠬᠢᠬᠤ᠃
ᠵᠥᠷᠢᠳᠡᠭ
ᠤᠷᠭᠠ ᠳᠠᠭᠠᠬᠤ ᠦᠭᠡᠢ ᠬᠠᠳᠤᠤᠷᠠᠳᠠᠭ ᠪᠤᠶᠤ ᠡᠰᠡᠬᠦᠯᠡ ᠵᠥᠷᠢᠵᠦ ᠳᠠᠭᠠᠷᠢᠳᠠᠭ᠃
ᠨᠣᠮᠣᠬᠠᠨ
ᠤᠨᠤᠬᠤ ᠳ᠋ᠤ᠌ ᠶᠠᠮᠠᠷ ᠴᠤ᠌ ᠵᠠᠩ ᠠᠭᠠᠰᠢ ᠦᠭᠡᠢ ᠰᠤᠷᠲᠠᠯ ᠰᠠᠢᠲᠤ ᠮᠣᠷᠢ᠃
ᠲᠣᠭᠰᠢᠨ
ᠮᠣᠷᠢᠨ ᠤ᠋ ᠵᠠᠩ ᠠᠪᠤᠷᠢ ᠰᠢᠷᠦᠭᠦᠨ᠂ ᠬᠠᠲᠠᠭᠤ ᠬᠠᠷᠭᠢᠰ᠃ ᠵᠠᠩ ᠮᠠᠭᠤᠲᠠᠢ ᠠᠭᠤᠷ ᠳᠣᠯᠭᠢᠨ᠃
ᠵᠠᠩᠲᠠᠢ ᠡᠯᠳᠡᠪ ᠮᠠᠭᠤ ᠠᠭᠠᠰᠢᠲᠠᠢ ᠃
ᠠᠳᠠᠢᠷ ᠰᠠᠨᠠᠭᠠ ᠮᠠᠭᠤᠲᠠᠢ᠂ ᠵᠠᠩ ᠠᠪᠤᠷᠢ ᠲᠣᠭᠰᠢᠨ ᠰᠢᠷᠦᠭᠦᠨ᠃
ᠲᠠᠪᠤᠨ ᠠᠮᠠ ᠲᠠᠢ
ᠬᠣᠶᠠᠷ ᠬᠠ ᠪᠠᠷ ᠢ᠋ᠶ᠋ᠠᠨ ᠬᠠᠮᠤᠵᠤ᠂ ᠬᠣᠶᠠᠷ ᠭᠤᠶᠠ ᠪᠠᠷ ᠢ᠋ᠶ᠋ᠠᠨ ᠢᠰᠬᠦᠯᠳᠡᠭ ᠡᠴᠡ ᠭᠠᠳᠠᠨᠠ ᠪᠠᠰᠠ ᠬᠠᠵᠠᠳᠠᠭ ᠮᠣᠷᠢ᠃
ᠲᠠᠪᠤᠨ ᠬᠥᠯᠯᠡᠳᠡᠭ
ᠠᠮᠠᠭᠠᠢ ᠪᠠᠨ ᠵᠠᠭᠤᠨ᠂ ᠲᠣᠯᠣᠭᠠᠢ ᠪᠠᠨ ᠭᠠᠵᠠᠷ ᠰᠢᠭᠠᠮᠠᠷ ᠲᠣᠩᠭᠣᠢᠨ ᠬᠥᠨᠲᠥᠷᠴᠦ ᠳᠠᠪᠬᠢᠬᠤ᠃
ᠴᠢᠬᠢ ᠪᠡᠨ ᠬᠤᠯᠮᠠᠢᠳᠠᠭ
ᠪᠡᠶᠡ ᠳ᠋ᠡᠭᠡᠨ ᠣᠢᠷᠠᠳᠤᠭᠰᠠᠳ ᠲᠤ᠌ ᠳᠤᠷᠠ ᠦᠭᠡᠢᠯᠡᠨ ᠬᠠᠷᠢᠭᠤᠴᠠᠬᠤ ᠪᠠᠷ ᠪᠡᠯᠡᠳᠬᠡᠬᠦ ᠶ᠋ᠢᠨ ᠤᠷᠢᠳᠠᠯ᠃
ᠠᠷᠳᠠᠭ
ᠬᠠᠯᠠ ᠦᠵᠡᠭᠡ ᠦᠭᠡᠢ ᠠᠲᠠᠷ ᠲᠠᠩᠬᠢ ᠬᠤᠷ ᠲᠠᠯᠪᠢᠭᠰᠠᠨ ᠠᠳᠤᠭᠤ᠃
ᠣᠷᠣᠭᠠ
ᠪᠠᠷᠢᠭᠳᠠᠳᠠᠭ ᠦᠭᠡᠢ ᠳᠤᠲᠠᠭᠠᠳᠠᠭ᠂ ᠪᠤᠷᠤᠭᠤᠯᠠᠮᠠᠲᠠᠭᠠᠢ᠂ ᠵᠢᠭᠤᠳᠠᠮᠠᠭᠠᠢ᠃
ᠰᠣᠢᠯᠳᠠᠭ ᠤᠷᠭᠠᠯᠠᠬᠤ ᠶ᠋ᠢ ᠮᠡᠳᠡᠭᠰᠡᠭᠡᠷ ᠭᠠᠭᠴᠠᠭᠠᠷ ᠵᠠᠢᠯᠠᠨ ᠳᠤᠲᠠᠭᠠᠬᠤ᠃
ᠡᠢᠯᠳᠡᠭ ᠰᠣᠢᠯᠳᠠᠭ᠃ ᠭᠠᠭᠴᠠᠭᠠᠷ ᠭᠠᠷᠴᠤ ᠭᠠᠳᠠᠭᠰᠢ ᠳᠤᠲᠠᠭᠠᠬᠤ᠃
ᠭᠠᠷᠳᠠᠭ ᠰᠣᠢᠯᠳᠠᠭ᠃ ᠤᠷᠭᠠᠯᠠᠬᠤ ᠶ᠋ᠢ ᠮᠡᠳᠡᠭᠰᠡᠭᠡᠷ ᠭᠠᠷᠴᠤ ᠳᠤᠲᠠᠭᠠᠬᠤ ᠭᠡᠳᠡᠭ᠃
ᠬᠠᠵᠢᠭ ᠬᠠᠵᠠᠵᠤ ᠬᠠᠢᠷᠤᠨ ᠢᠰᠬᠦᠯᠬᠦ ᠮᠠᠭᠤ ᠵᠠᠩᠲᠠᠢ᠃
ᠬᠠᠢᠷᠳᠠᠭ ᠭᠡᠳᠡᠰᠦ ᠪᠡᠨ ᠳᠠᠭᠠᠭᠤᠯᠵᠤ ᠭᠠᠳᠠᠭᠰᠢ ᠢᠰᠬᠦᠯᠳᠡᠭ᠃
ᠢᠰᠬᠦᠯᠳᠡᠭ ᠬᠣᠢᠲᠤ ᠨᠢᠭᠡ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠷᠤᠭᠰᠢ ᠪᠠᠨ ᠲᠡᠢᠷᠬᠦ᠃
ᠲᠠᠩᠭᠠᠷᠳᠠᠭ ᠬᠣᠢᠲᠤ ᠬᠣᠶᠠᠷ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠡᠷᠭᠡ ᠲᠡᠢᠷᠬᠦ᠃
ᠬᠠᠮᠤᠬᠤ ᠡᠮᠦᠨᠡ ᠬᠣᠶᠠᠷ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠣᠷᠣᠢᠨ ᠴᠠᠪᠴᠢᠬᠤ᠃
ᠰᠠᠮᠤᠷᠳᠠᠳᠠᠭ ᠡᠮᠦᠨᠡ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠠᠪᠴᠢᠬᠤ ᠃
ᠴᠣᠪᠬᠣᠷᠠᠳᠠᠭ ᠦᠰᠦᠷᠴᠦ ᠳᠡᠪᠬᠡᠷᠬᠦ ᠃
ᠴᠣᠷᠣᠢᠳᠠᠭ ᠬᠣᠢᠲᠤ ᠬᠣᠶᠠᠷ ᠬᠥᠯ ᠳᠡᠭᠡᠷᠡ ᠪᠡᠨ ᠪᠣᠰᠴᠤ ᠴᠣᠷᠣᠢᠨ ᠬᠠᠮᠤᠳᠠᠭ᠃
ᠵᠤᠯᠠᠷᠠᠳᠠᠭ ᠬᠥᠲᠥᠯᠵᠦ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠵᠥᠷᠢᠵᠦ ᠭᠠᠷᠤᠩᠭᠠᠨ ᠢᠰᠬᠦᠯᠬᠦ᠃
ᠪᠤᠷᠤᠭᠤᠰᠤᠯᠠᠲᠠᠭ ᠵᠤᠯᠠᠷᠠᠳᠠᠭ ᠤ᠋ᠨ ᠨᠥᠭᠦᠭᠡ ᠬᠡᠯᠯᠡᠭᠡ ᠃
ᠳᠠᠭᠠᠷᠢᠳᠠᠭ ᠨᠢᠳᠦ ᠦᠭᠡᠢ ᠥᠭᠡᠳᠡ ᠡᠴᠡ ᠳᠠᠭᠠᠷᠢᠨ ᠢᠷᠡᠬᠦ ᠃
ᠦᠷᠭᠦᠳᠡᠭ ᠡᠨᠳᠡ ᠲᠡᠨᠳᠡ ᠡᠴᠡ ᠪᠡᠨ ᠰᠣᠴᠢᠨ ᠵᠠᠢᠯᠠᠳᠠᠭ ᠃
ᠨᠠᠳᠬᠤᠳᠠᠭ ᠦᠷᠭᠦᠳᠡᠭ ᠦ᠋ᠨ ᠨᠥᠭᠦᠭᠡ ᠬᠡᠯᠡᠯᠭᠡ ᠃
ᠬᠠᠯᠢᠰᠬᠠᠳᠠᠭ ᠲᠠᠯᠠ ᠠ᠋ᠴᠠ ᠪᠠᠨ ᠦᠷᠭᠦᠨ ᠰᠣᠴᠢᠮᠠᠭ ᠵᠠᠢᠯᠠᠬᠤ ᠃
ᠬᠣᠪᠬᠤ ᠬᠠᠷᠠᠢᠬᠤ ᠪᠥᠭᠰᠡᠨ ᠡᠴᠡ ᠪᠡᠨ ᠰᠣᠴᠢᠨ ᠭᠣᠰᠬᠢᠨ ᠦᠷᠭᠦᠬᠦ ᠃
ᠪᠣᠰᠬᠠᠳᠠᠭ
ᠡᠮᠦᠨᠡ ᠪᠤᠶᠤ ᠬᠠᠵᠠᠭᠤ ᠠ᠋ᠴᠠ ᠪᠠᠨ ᠪᠠᠭᠠ ᠪᠠᠭᠠ ᠦᠷᠭᠦᠰᠬᠢᠨ ᠶᠠᠪᠤᠬᠤ ᠃
ᠬᠠᠯᠭᠢᠳᠠᠭ
ᠬᠠᠯᠢᠰᠳᠠᠭ ᠮᠣᠷᠢ ᠶ᠋ᠢ ᠬᠡᠯᠡᠳᠡᠭ ᠪᠥᠭᠡᠳ ᠪᠠᠰᠠ ᠦᠶᠡ ᠦᠶᠡ ᠨᠡᠮᠡᠯᠲᠡᠲᠡᠢ ᠳᠠᠪᠬᠢᠳᠠᠭ ᠮᠣᠷᠢ ᠶ᠋ᠢ ᠴᠦ᠍ ᠪᠠᠰᠠ ᠬᠠᠯᠭᠢᠳᠠᠭ ᠭᠡᠨᠡ ᠃
ᠴᠠᠩᠬᠠᠲᠠᠢ
ᠠᠩᠬᠠ ᠡᠮᠡᠭᠡᠯᠯᠡᠬᠦ ᠪᠦᠷᠢ ᠤᠯᠤᠩᠨᠠᠯ ᠳ᠋ᠠᠭᠠᠨ ᠡᠪᠡᠷᠰᠢᠶᠡᠵᠦ ᠪᠡᠶᠡ ᠪᠡᠨ ᠬᠣᠷᠢᠶᠠᠨ ᠵᠣᠭᠰᠣᠬᠤ ᠪᠤᠶᠤ ᠰᠠᠪᠠᠵᠤ ᠣᠢᠴᠢᠬᠤ᠂ ᠡᠰᠡᠬᠦᠯᠡ ᠪᠤᠯᠭᠢᠬᠤ ᠃
ᠭᠣᠣᠯᠯᠠᠬᠤ
ᠣᠯᠣᠩ ᠢ᠋ ᠨᠢ ᠴᠢᠩᠭᠠ ᠰᠢᠭ᠋ ᠲᠠᠲᠠᠭᠰᠠᠭᠠᠷ ᠴᠣᠷᠣᠢᠨ ᠪᠣᠰᠴᠤ ᠠᠷᠤ ᠭᠣᠣᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠠᠪᠠᠵᠤ ᠣᠢᠴᠢᠬᠤ᠃
ᠰᠠᠭᠤᠳᠠᠭ
ᠤᠶᠠᠭᠠᠨ ᠳ᠋ᠤ᠌ ᠭᠡᠳᠡᠷᠭᠦ ᠰᠠᠭᠤᠨ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠲᠠᠰᠤᠯᠬᠤ ᠭᠡᠳᠡᠭ ᠪᠤᠶᠤ ᠤᠷᠭᠠ ᠶ᠋ᠢᠨ ᠮᠣᠷᠢ᠂ ᠤᠷᠭᠠᠯᠠᠭᠰᠠᠨ ᠤ᠋ ᠬᠣᠢᠨᠠ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠱᠣᠩᠰᠢᠷᠠᠵᠤ ᠰᠠᠭᠤᠬᠤ ᠶ᠋ᠢ ᠮᠥᠨ ᠰᠠᠭᠤᠳᠠᠭ ᠭᠡᠳᠡᠭ᠃
ᠲᠦᠭᠵᠢᠳᠡᠭ
ᠤᠷᠭᠠ ᠶ᠋ᠢᠨ ᠮᠣᠷᠢ ᠶ᠋ᠢ ᠤᠷᠭᠠᠯᠠᠮᠠᠭᠴᠠ ᠱᠣᠩᠰᠢᠷᠠᠵᠤ ᠰᠠᠭᠤᠭᠠᠳ ᠳᠠᠬᠢᠨ ᠪᠣᠰᠴᠤ ᠢᠷᠡᠳᠡᠭ ᠦᠭᠡᠢ ᠶ᠋ᠢ ᠬᠡᠯᠡᠨᠡ ᠃
ᠲᠠᠭᠰᠢᠳᠠᠭ
ᠪᠠᠷᠢᠭᠳᠠᠬᠤ ᠦᠭᠡᠢ ᠴᠢᠳᠥᠷ ᠲᠠᠢᠭᠠᠨ ᠭᠤᠷᠪᠠᠨ ᠬᠥᠯᠯᠡᠨ ᠳᠡᠭᠳᠡᠨ ᠳᠠᠪᠬᠢᠬᠤ᠃
ᠪᠤᠯᠭᠢᠳᠠᠭ
ᠤᠨᠤᠭᠰᠠᠨ ᠬᠥᠮᠦᠨ ᠢ᠋ ᠬᠠᠶᠠᠬᠤ ᠪᠠᠷ ᠲᠣᠩᠭᠣᠷᠴᠣᠭᠯᠠᠨ ᠳᠣᠯᠭᠢᠨ ᠦᠰᠦᠷᠬᠢᠯᠡᠬᠦ᠃
ᠲᠠᠭᠰᠢᠨ ᠪᠤᠯᠭᠢᠬᠤ
ᠣᠷᠣᠭᠰᠢ ᠨᠢᠭᠡᠨ ᠵᠢᠭᠳᠡ ᠳᠥᠷᠪᠡᠨ ᠬᠥᠯᠯᠡᠨ ᠦᠰᠦᠷᠬᠢᠯᠡᠵᠦ ᠪᠤᠯᠭᠢᠬᠤ᠂ ᠡᠨᠡ ᠨᠢ ᠬᠦᠴᠦ ᠮᠠᠭᠤᠲᠠᠢ᠂ ᠦᠵᠡᠮᠦᠷᠢ ᠳ᠋ᠦ᠍ ᠪᠤᠯᠭᠢᠭᠤᠯᠵᠤ ᠪᠣᠯᠤᠨᠠ᠃
ᠵᠠᠢᠮᠤᠵᠤ ᠪᠤᠯᠭᠢᠬᠤ
ᠬᠣᠶᠠᠷ ᠲᠡᠢᠰᠢ ᠡᠭᠡᠯᠵᠢᠯᠡᠨ ᠬᠠᠯᠭᠢᠨ ᠦᠰᠦᠷᠴᠦ ᠪᠤᠯᠭᠢᠬᠤ ᠂ ᠨᠡᠯᠢᠶᠡᠳ ᠡᠪ ᠮᠠᠭᠤᠲᠠᠢ ᠪᠤᠯᠭᠢᠭᠠ᠃
ᠵᠣᠭ ᠲᠣᠰᠣᠨ ᠪᠤᠯᠭᠢᠬᠤ
ᠳᠠᠪᠬᠢᠵᠤ ᠣᠴᠢᠩᠭᠠᠨ ᠵᠣᠭ ᠵᠣᠭᠰᠣᠨ ᠪᠤᠯᠭᠢᠬᠤ᠂ ᠨᠡᠯᠢᠶᠡᠳ ᠬᠦᠴᠦᠲᠡᠢ ᠪᠤᠯᠭᠢᠭᠠ ᠃
ᠤᠬᠤᠷᠢᠵᠤ ᠪᠤᠯᠭᠢᠬᠤ
ᠪᠤᠯᠭᠢᠬᠤ ᠪᠦᠷᠢ ᠳ᠋ᠡᠭᠡᠨ ᠤᠬᠤᠷᠢᠵᠤ ᠬᠥᠮᠦᠨ ᠦ᠌ ᠬᠦᠨᠳᠦᠴᠡ ᠪᠡᠨ ᠲᠣᠭᠲᠠᠭᠠᠬᠤ ᠶ᠋ᠢ ᠠᠮᠵᠢᠭᠤᠯᠤᠯ ᠦᠭᠡᠢ ᠪᠤᠯᠭᠢᠬᠤ ᠂ ᠡᠨᠡ ᠨᠢ ᠪᠦᠷ ᠬᠡᠴᠡᠭᠦᠦ ᠃
ᠪᠤᠬᠠᠳᠠᠭ ᠪᠠᠭᠠ ᠵᠡᠷᠭᠡ ᠪᠤᠯᠭᠢᠬᠤ ᠃
ᠳᠡᠯ ᠰᠡᠭᠦᠯ ᠦ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠨᠡᠷᠡᠯᠡᠬᠦ ᠵᠦᠢᠯ
ᠱᠠᠩᠬᠤᠲᠠᠢ
ᠮᠣᠷᠢ ᠭᠡᠭᠦᠦ ᠶ᠋ᠢᠨ᠂ ᠬᠥᠬᠥᠯ ᠳᠡᠯ ᠭᠣᠣᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠭᠠᠯᠪᠤᠷᠢᠯᠠᠨ ᠬᠣᠶᠠᠷ ᠲᠠᠢᠰᠢ ᠤᠷᠲᠤ ᠰᠢᠭ᠋ ᠤᠨᠵᠢᠢᠨ ᠪᠠᠭᠤᠭᠰᠠᠨ ᠢ᠋ ᠬᠡᠯᠡᠨᠡ᠃ ᠡᠭᠦᠨ ᠢ᠋ ᠥᠨᠳᠥᠷ ᠰᠠᠢᠬᠠᠨ ᠱᠠᠩᠬᠤᠲᠠᠢ ᠭᠡᠳᠡᠭ᠃
ᠬᠥᠬᠥᠯᠲᠡᠢ
ᠳᠠᠪᠠᠭ ᠂ ᠭᠡᠭᠦᠦ ᠶ᠋ᠢᠨ ᠳᠤᠬᠤᠨ ( ᠮᠠᠩᠨᠠᠢ ) ᠳ᠋ᠤ᠌ ᠬᠡᠰᠡᠭᠯᠡᠨ ᠦᠯᠡᠳᠡᠭᠡᠭᠰᠡᠨ ᠳᠡᠯ᠃
ᠭᠡᠵᠢᠭᠡ
ᠠᠭᠲᠠ ᠮᠣᠷᠢᠨ ᠳ᠋ᠤ᠌ ᠲᠠᠯᠪᠢᠬᠤ ᠬᠣᠶᠠᠷ ᠴᠢᠬᠢᠲᠡᠢ ᠨᠢ ᠣᠴᠣᠭᠯᠠᠨ ᠦᠯᠡᠳᠡᠭᠡᠭᠰᠡᠨ ᠳᠡᠯ᠃
ᠥᠨᠳᠥᠷ ᠮᠤᠨᠲᠠᠭᠠᠲᠠᠢ
ᠤᠷᠲᠤ ᠰᠠᠢᠬᠠᠨ ᠮᠤᠨᠳᠠᠭᠠᠨ ᠳᠡᠯ ᠪᠦᠬᠦᠢ ᠪᠤᠶᠤ ᠮᠤᠨᠳᠠᠭᠠ ᠥᠨᠳᠥᠷ ᠮᠣᠷᠢ᠃
ᠲᠠᠯᠲᠤ ᠳᠡᠯ ᠢ᠋ ᠨᠢ ᠠᠪᠤᠭᠰᠠᠨ ᠦᠭᠡᠢ᠃
ᠬᠤᠷ ᠲᠠᠯᠲᠤ ᠣᠯᠠᠨ ᠵᠢᠯ ᠳᠡᠯ ᠢ᠋ ᠨᠢ ᠠᠪᠤᠭᠰᠠᠨ ᠦᠭᠡᠢ ᠲᠠᠯᠪᠢᠭᠰᠠᠨ᠃
ᠤᠨᠠᠭᠠᠨ ᠳᠡᠯᠳᠡᠢ
ᠣᠩᠭᠣᠨ ᠳᠡᠯ᠂ ᠤᠨᠠᠭᠠᠨ ᠳᠡᠯ ᠢ᠋ ᠨᠢ ᠠᠪᠤᠭᠰᠠᠨ ᠦᠭᠡᠢ ᠠᠭᠰᠠᠭᠠᠷ᠃
ᠣᠩᠭᠣᠨ ᠳᠡᠯᠳᠡᠢ
ᠳᠡᠯ ᠳ᠋ᠦ᠍ᠨᠢ ᠶᠡᠷᠦ ᠬᠠᠢᠴᠢ ᠮᠡᠰᠡ ᠣᠭᠲᠣ ᠬᠦᠷᠦᠭᠡ ᠦᠭᠡᠢ ᠳᠡᠯ᠃
ᠵᠠᠰᠠᠮᠠᠯ ᠳᠡᠯᠳᠡᠢ ᠳᠡᠯ ᠢ᠋ ᠨᠢ ᠬᠠᠢᠴᠢᠯᠠᠨ ᠶᠠᠩᠵᠤᠯᠠᠵᠤ ᠵᠠᠰᠠᠭᠰᠠᠨ᠃
ᠬᠢᠷᠭᠠᠭᠠ ᠳᠡᠯᠳᠡᠢ ᠵᠠᠰᠠᠭᠰᠠᠨ ᠳᠡᠯ᠃
ᠰᠤᠮᠤᠨ ᠳᠡᠯᠳᠡᠢ
ᠮᠣᠷᠢᠨ ᠳᠡᠯ ᠢ᠋ ᠮᠤᠨᠳᠠᠭᠠ ᠶ᠋ᠢᠨ ᠡᠮᠦᠨᠡ ᠨᠢ ᠠᠷᠠᠢ ᠥᠨᠳᠥᠷ᠂ ᠴᠣᠬᠣ ᠤᠷᠤᠭᠤ ᠨᠢ ᠪᠣᠭᠣᠨᠢᠪᠲᠤᠷ ᠬᠠᠢᠴᠢᠯᠠᠬᠤ ᠳ᠋ᠠᠭᠠᠨ ᠳᠡᠯ ᠦ᠋ᠨ ᠳᠡᠭᠡᠳᠦ ᠲᠠᠯᠠ ᠶ᠋ᠢ ᠰᠢᠯᠤᠭᠤᠨ ᠲᠡᠭᠰᠢ ᠬᠢᠷᠭᠠᠭᠰᠠᠨ᠃
ᠮᠥᠭᠡᠷᠣᠨ ᠳᠡᠯᠳᠡᠢ
ᠮᠣᠷᠢᠨ ᠳᠡᠯ ᠢ᠋ ᠳᠤᠮᠳᠠ ᠨᠢ ᠭᠦᠳᠦᠭᠦᠷ ᠮᠥᠭᠡᠷ ᠬᠡᠯᠪᠡᠷᠢᠲᠡᠢ ᠵᠠᠰᠠᠭᠰᠠᠨ ᠢ᠋ ᠬᠡᠯᠡᠨᠡ᠃
ᠪᠣᠰᠤᠭᠠ ᠳᠡᠯᠳᠡᠢ
ᠬᠢᠷᠭᠠᠭᠰᠠᠨ ᠳᠡᠯ ᠨᠢ ᠳᠡᠭᠡᠭᠰᠢ ᠪᠣᠰᠤᠭᠠ ᠪᠦᠬᠦᠢ᠃
ᠤᠨᠠᠭᠰᠠᠨ ᠳᠡᠯᠳᠡᠢ
ᠳᠡᠯ ᠨᠢ ᠤᠷᠲᠤ ᠪᠣᠯᠵᠤ ᠬᠠᠵᠠᠭᠤᠰᠢ ᠪᠠᠭᠤᠭᠰᠠᠨ᠃
ᠰᠢᠩᠭᠡᠨ ᠳᠡᠯᠳᠡᠢ
ᠲᠥᠷᠥᠯᠬᠢ ᠬᠢᠯᠭᠠᠰᠤᠨ ᠳᠡᠯ ᠨᠢ ᠴᠥᠭᠡᠨ ᠥᠳᠬᠡᠨ ᠪᠢᠰᠢ᠃
ᠥᠳᠬᠡᠨ ᠳᠡᠯᠳᠡᠢ
ᠲᠥᠷᠥᠯᠬᠢ ᠳᠡᠯ ᠨᠢ ᠠᠭᠰᠢᠭᠤᠨ ᠪᠦᠬᠦᠢ᠃
ᠡᠷᠴᠢᠨ ᠳᠡᠯᠳᠡᠢ
ᠳᠡᠯ ᠨᠢ ᠮᠤᠰᠬᠢᠷᠠᠵᠤ ᠪᠣᠷᠴᠠ ᠪᠣᠷᠴᠠ ᠪᠣᠯᠤᠭᠰᠠᠨ᠃ ᠪᠠᠰᠠ ᠳᠠᠯᠠᠨ ᠵᠠᠩᠭᠢᠯᠠᠭᠠ ᠭᠡᠵᠦ ᠬᠡᠯᠡᠳᠡᠭ ᠭᠠᠵᠠᠷ ᠪᠣᠢ ᠃
ᠡᠭᠦᠷ ᠰᠡᠭᠦᠯᠲᠦ ᠰᠢᠷᠢᠯᠳᠦᠭᠰᠡᠨ ᠪᠥᠭᠡᠮ ᠰᠡᠭᠦᠯᠲᠡᠢ᠃
ᠪᠥᠭᠡᠮ ᠰᠡᠭᠦᠯᠲᠦ ᠡᠭᠦᠷ ᠰᠡᠭᠦᠯᠲᠦ᠂ ᠨᠢᠭᠡ ᠯᠡ ᠪᠥᠭᠡᠮ ᠪᠣᠯᠵᠤ ᠰᠢᠷᠢᠯᠳᠦᠭᠰᠡᠨ᠃
ᠲᠤᠭ ᠰᠡᠭᠦᠯᠲᠦ ᠵᠠᠳᠠᠭᠠᠢ ᠰᠢᠯᠤᠭᠤᠨ ᠰᠡᠭᠦᠯᠲᠡᠢ᠃
ᠵᠠᠳᠠᠭᠠᠢ ᠰᠡᠭᠦᠯᠲᠦ ᠰᠠᠳᠠᠷᠠᠭᠰᠠᠨ ᠥᠳᠬᠡᠨ ᠰᠡᠭᠦᠯᠲᠡᠢ ᠃
ᠰᠦᠪᠡᠭᠴᠢᠨ ᠰᠡᠭᠦᠯᠲᠦ ᠰᠡᠭᠦᠯ ᠦ᠋ᠨ ᠦᠵᠦᠭᠦᠷ ᠲᠡᠢᠰᠢ ᠱᠤᠪᠲᠤᠩ᠃
ᠮᠤᠰᠢᠭᠠᠢ ᠰᠡᠭᠦᠯᠲᠦ
ᠲᠥᠷᠥᠯᠬᠢ ᠪᠤᠶᠤ ᠠᠵᠢᠷᠭᠠᠨ ᠳ᠋ᠤ᠌ ᠬᠠᠵᠠᠭᠳᠠᠭᠰᠠᠨ ᠪᠠ ᠰᠡᠭᠦᠯ ᠴᠣᠬᠢᠭᠰᠠᠨ ᠠ᠋ᠴᠠ ᠪᠣᠯᠵᠤ ᠰᠡᠭᠦᠯ ᠨᠢ ᠮᠤᠷᠤᠢᠭᠰᠠᠨ ( ᠵᠥᠪ ᠪᠤᠷᠤᠭᠤ ) ᠰᠡᠭᠦᠯ ᠃
ᠣᠭᠣᠳᠣᠩ ᠲᠣᠵᠢᠭᠠᠷ ᠪᠣᠭᠣᠨᠢᠬᠠᠨ ᠰᠡᠭᠦᠯ ᠃
ᠭᠣᠳᠣᠩ ᠪᠠᠷᠤᠭ ᠮᠢᠬᠠᠨ ᠰᠡᠭᠦᠯ ᠰᠢᠬᠠᠭᠤ ᠭᠣᠣᠨᠣᠭᠤᠷ ᠰᠡᠭᠦᠯᠲᠡᠢ᠃
ᠲᠣᠵᠢᠩ ᠣᠭᠣᠲᠣᠷ ᠮᠥᠷᠲᠡᠭᠡᠨ ᠰᠢᠩᠭᠡᠨ ᠰᠡᠭᠦᠯᠲᠡᠢ ᠃
ᠱᠣᠳᠣᠩ
ᠳᠦᠵᠢᠩ ᠢ᠋ ᠪᠣᠳᠣᠪᠠᠯ ᠬᠢᠯᠭᠠᠰᠤᠨ ᠰᠡᠭᠦᠯ ᠨᠢ ᠠᠷᠠᠢᠬᠠᠨ ᠤᠷᠲᠤ᠂ ᠵᠢᠩᠬᠢᠨᠢ ᠰᠡᠭᠦᠯ ᠡᠴᠡ ᠬᠣᠯᠠ ᠪᠣᠭᠣᠨᠢ ᠰᠢᠩᠭᠡᠨ ᠰᠡᠭᠦᠯ ᠃
ᠡᠮᠵᠡᠭ ᠪᠠᠢᠳᠠᠯ ᠂ ᠢᠮ ᠲᠠᠮᠠᠭᠠ ᠪᠠᠷ ᠨᠡᠷᠡᠯᠡᠬᠦ ᠵᠦᠢᠯ
ᠳᠠᠭᠠᠷᠢᠲᠠᠢ
ᠡᠳ᠋ᠯᠡᠭᠡᠨ ᠦ᠌ ᠮᠠᠭᠤ ᠠ᠋ᠴᠠ ᠪᠤᠶᠤ ᠡᠮᠡᠭᠡᠯ ᠦ᠋ᠨ ᠡᠪᠰᠢᠯ ᠮᠠᠭᠤ ᠠ᠋ᠴᠠ ᠪᠣᠯᠵᠤ ᠮᠣᠷᠢᠨ ᠤ᠋ ᠨᠢᠷᠤᠭᠤ ᠨᠢ ᠶᠠᠷᠰᠢᠭᠰᠠᠨ ᠃
ᠵᠢᠳᠡᠤᠲᠠᠢ
ᠠᠳᠤᠭᠤᠨ ᠤ᠋ ᠬᠦᠵᠦᠭᠦᠦ ᠂ ᠮᠤᠨᠳᠠᠭᠠ ᠂ ᠭᠡᠳᠡᠰᠦ ᠣᠷᠴᠢᠮ ᠢ᠋ᠶ᠋ᠠᠷ ᠭᠠᠷᠳᠠᠭ ᠰᠤᠢᠯᠭᠠᠲᠤ ᠲᠠᠭᠠᠷᠢ ᠂ ᠪᠠᠰᠠ ᠲᠠᠪᠰᠢ ᠭᠡᠳᠡᠭ ᠴᠦ᠍ ᠪᠣᠢ᠃
ᠰᠣᠶᠣᠩᠭᠠᠲᠤ
ᠰᠣᠶᠣᠩᠭᠠᠲᠤᠵᠤ ᠥᠩᠭᠡᠷᠡᠭᠰᠡᠨ ( ᠰᠣᠶᠣᠩᠭᠠ ᠡᠪᠡᠳᠴᠢᠨ ᠣᠯᠵᠤ ᠥᠩᠭᠡᠷᠡᠭᠰᠡᠨ ) ᠃
ᠭᠠᠷᠠᠩᠭᠠᠲᠤ
ᠭᠠᠷᠠᠩ ᠰᠢᠳᠦ ᠤᠷᠭᠤᠵᠤ ᠥᠩᠭᠡᠷᠡᠭᠰᠡᠨ᠃ ᠠᠷᠠᠩ ᠠᠷᠠᠭᠠ ᠭᠡᠵᠦ ᠪᠠᠰᠠ ᠬᠡᠯᠡᠳᠡᠭ᠃
ᠶᠠᠮᠠᠲᠠᠢ ᠠᠳᠤᠭᠤᠨ ᠤ᠋ ᠬᠠᠮᠠᠷ ᠡᠪᠡᠳᠴᠢᠨ ᠣᠯᠵᠤ ᠥᠩᠭᠡᠷᠡᠭᠰᠡᠨ ᠃
ᠳᠠᠬᠢᠲᠠᠢ ᠦᠰᠦ ᠨᠢ ᠰᠢᠷᠢᠯᠳᠦᠵᠦ ᠪᠥᠭᠡᠮᠨᠡᠷᠡᠭᠡᠳ ᠭᠤᠤᠵᠢᠭᠠᠳᠤᠢ ᠃
ᠳᠣᠭᠣᠯᠠᠩ
ᠬᠠᠵᠠᠭᠠᠷ ᠬᠥᠯ ᠨᠢ ᠭᠡᠮᠲᠦᠵᠦ᠂ ᠪᠤᠯᠵᠠᠵᠤ᠂ ᠬᠤᠭᠤᠷᠠᠭᠰᠠᠨ ᠵᠡᠷᠭᠡ ᠡᠴᠡ ᠪᠣᠯᠵᠤ ᠳᠣᠭᠣᠯᠳᠠᠨ ᠶᠠᠪᠤᠬᠤ ᠪᠣᠯᠤᠭᠰᠠᠨ ᠃
ᠬᠠᠵᠠᠭᠠᠷ ᠳᠣᠭᠣᠯᠠᠩ ᠤ᠋ᠨ ᠨᠥᠭᠦᠭᠡ ᠬᠡᠯᠡᠯᠭᠡ ᠃
ᠬᠣᠩᠭᠤᠳᠠᠢ
ᠬᠣᠩᠭᠣ ᠨᠢ ᠴᠢᠨᠣᠠ ᠳ᠋ᠤ᠌ ᠤᠷᠠᠭᠤᠯᠤᠭᠰᠠᠨ ᠠ᠋ᠴᠠ ᠪᠣᠯᠵᠤ ᠲᠠᠲᠠᠩᠬᠠᠢ ᠪᠣᠯᠤᠭᠰᠠᠨ᠃
ᠲᠠᠲᠠᠩᠬᠠᠢ ᠬᠣᠩᠭᠣᠳᠠᠢ ᠶ᠋ᠢᠨ ᠨᠥᠭᠦᠭᠡ ᠬᠡᠯᠡᠯᠭᠡ ᠃
ᠰᠥᠳᠥᠷᠭᠡᠲᠦ ᠰᠥᠳᠥᠷᠭᠡ ᠡᠪᠡᠳᠴᠢᠨ ᠣᠯᠵᠤ ᠥᠩᠭᠡᠷᠡᠭᠰᠡᠨ ᠠᠳᠤᠭᠤ ᠃
ᠣᠷᠢᠶᠠᠩᠭᠠᠲᠤ ᠣᠷᠢᠶᠠᠩ ᠪᠤᠶᠤ ᠴᠢᠳᠥᠷ ᠣᠷᠢᠶᠠᠩ ᠡᠪᠡᠳᠴᠢᠨ ᠣᠯᠵᠤ ᠥᠩᠭᠡᠷᠡᠭᠰᠡᠨ ᠃
ᠵᠢᠯᠪᠢᠩᠲᠦ ᠵᠢᠯᠪᠢᠩ ᠡᠪᠡᠳᠴᠢᠨ ᠲᠣᠰᠴᠤ ᠥᠩᠭᠡᠷᠡᠭᠰᠡᠨ ᠃
ᠨᠠᠷᠠᠨ ᠵᠢᠯᠪᠢᠩ ᠬᠥᠯᠥᠰᠥᠳᠡᠭᠡᠳ ᠭᠡᠨᠡᠳᠲᠡ ᠨᠠᠷᠠᠨ ᠳ᠋ᠤ᠌ ᠨᠠᠷᠠᠰᠢᠭᠰᠠᠨ ᠃
ᠰᠠᠯᠬᠢᠨ ᠵᠢᠯᠪᠢᠩ ᠬᠥᠯᠥᠰᠥ ᠭᠠᠷᠤᠭᠠᠳ ᠰᠠᠯᠬᠢᠨ ᠳ᠋ᠤ᠌ ᠴᠣᠬᠢᠭᠤᠯᠤᠭᠰᠠᠨ ᠃
ᠤᠰᠤᠨ ᠵᠢᠯᠪᠢᠩ ᠬᠥᠯᠥᠰᠥᠲᠡᠢ ᠤᠰᠤ ᠤᠤᠭᠤᠭᠰᠠᠨ ᠃
ᠴᠢᠳᠥᠷ ᠵᠢᠯᠪᠢᠩ ᠴᠢᠳᠥᠷ ᠣᠷᠢᠶᠠᠩ ᠲᠤᠰᠬᠤ ᠭᠡᠬᠦ ᠮᠡᠲᠦ ᠃
ᠰᠠᠬᠤᠤᠲᠤ
ᠰᠠᠬᠤᠤ ᠡᠪᠡᠳᠴᠢᠨ ᠲᠣᠰᠴᠤ ᠥᠩᠭᠡᠷᠡᠭᠰᠡᠨ ᠪᠤᠶᠤ ᠲᠣᠰᠤᠭᠠᠳ ᠪᠠᠢᠬᠤ ᠶ᠋ᠢ ᠬᠡᠯᠡᠨᠡ ᠃
ᠭᠦᠶᠡᠩᠲᠦ
ᠭᠦᠶᠡᠩ ᠡᠪᠡᠳᠴᠢᠨ ᠲᠣᠰᠴᠤ ᠥᠩᠭᠡᠷᠡᠭᠰᠡᠨ ᠪᠤᠶᠤ ᠲᠣᠰᠤᠭᠠᠳ ᠪᠠᠢᠬᠤ ᠶ᠋ᠢ ᠬᠡᠯᠡᠨᠡ ᠃
ᠢᠮᠠᠲᠤ ᠴᠢᠬᠢᠨ ᠳ᠋ᠦᠢ ᠢᠮ ( ᠲᠡᠮᠳᠡᠭ ) ᠲᠡᠢ ᠃
ᠭᠠᠨᠵᠤᠭᠠ ᠢᠮ ᠲᠡᠢ（ᠵᠥᠪ ᠪᠤᠷᠤᠭᠤ ) ᠪᠣᠷᠣ
ᠠᠯᠢ ᠨᠢᠭᠡᠨ ᠴᠢᠬᠢᠨ ᠦ᠌ ᠬᠢᠨᠢ ᠠᠷᠤ ᠪᠤᠶᠤ ᠡᠮᠦᠨᠡ ᠬᠥᠪᠡᠭᠡ ᠪᠡᠷ ᠦᠵᠦᠭᠦᠷ ᠡᠴᠡ ᠨᠢ ᠤᠭ ᠲᠠᠢᠰᠢ ᠨᠠᠷᠢᠬᠠᠨ ᠣᠭᠲᠣᠯᠵᠤ ᠤᠨᠵᠢᠭᠤᠯᠤᠭᠰᠠᠨ ᠲᠡᠮᠳᠡᠭ ᠲᠡᠢ ᠪᠣᠷᠣ ᠠᠳᠤᠭᠤ ᠃
ᠴᠤᠭᠤᠯᠪᠤᠷᠢ ᠢᠮ ᠲᠡᠢ（ᠵᠥᠪ ᠪᠤᠷᠤᠭᠤ ) ᠬᠡᠭᠡᠷ
ᠠᠯᠢ ᠨᠢᠭᠡᠨ ᠴᠢᠬᠢ ᠨᠢ ᠭᠣᠣᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠦᠰᠦᠭᠦᠯᠦᠭᠰᠡᠨ ᠢᠮ ᠲᠡᠢ ᠠᠳᠤᠭᠤ᠃
ᠵᠢᠷᠦᠬᠡᠨ ᠢᠮ ᠲᠡᠢ（ᠵᠥᠪ ᠪᠤᠷᠤᠭᠤ ) ᠴᠠᠭᠠᠨ
ᠠᠯᠢ ᠨᠢᠭᠡ ᠴᠢᠬᠢ ᠶ᠋ᠢᠨ ᠬᠢᠨᠢ ᠴᠢᠬᠢᠨ ᠦᠵᠦᠭᠦᠷ ᠦ᠋ᠨ ᠬᠣᠶᠠᠷ ᠲᠠᠯᠠ ᠪᠠᠷ ᠪᠠᠭᠠ ᠪᠠᠭᠠ ᠡᠰᠬᠡᠨ ᠴᠢᠬᠢᠨ ᠦᠵᠦᠭᠦᠷ ᠢ ᠨᠢ ᠵᠢᠷᠦᠬᠡᠨ ᠬᠡᠯᠪᠡᠷᠢᠲᠡᠢ ᠦᠯᠡᠳᠡᠭᠡᠭᠰᠡᠨ ᠲᠡᠮᠳᠡᠭ ᠲᠡᠢ ᠴᠠᠭᠠᠨ ᠭᠡᠬᠦ ᠮᠡᠲᠦ᠃ ᠢᠮ ᠳ᠋ᠦ᠍ ᠪᠠᠷᠤᠭ ᠵᠠᠭᠤᠨ ᠵᠦᠢᠯ ᠪᠣᠢ ᠪᠣᠯᠬᠣᠷ ᠮᠥᠨ ᠵᠠᠭᠤᠭᠠᠳ ᠢᠮ ᠪᠦᠬᠦᠢ ᠵᠢᠰᠦᠮ ᠭᠠᠷᠬᠤ ᠶᠣᠰᠣᠲᠠᠢ᠃ ᠭᠡᠶᠡ ᠪᠠᠷᠤᠭᠲᠠᠢ ᠳ᠋ᠤ᠌ ᠠᠳᠤᠭᠤᠨ ᠳ᠋ᠤ᠌ ᠬᠥᠨᠳᠡᠯᠡᠨ ᠢᠮ ᠲᠠᠯᠪᠢᠳᠠᠭ ᠦᠭᠡᠢ ᠰᠢᠭ᠃ ᠤᠴᠢᠷ ᠨᠢ ᠬᠥᠨᠳᠡᠯᠡᠨ ᠢᠮ ᠪᠣᠯ ᠤᠷᠭᠠ ᠬᠤᠢᠪᠢ ᠳ᠋ᠤ᠌ ᠨᠣᠭᠳᠠᠨ ᠲᠠᠰᠤᠳᠠᠭᠳᠠᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠭᠰᠠᠨ ᠪᠣᠯᠤᠯᠲᠠᠢ᠃
ᠬᠠᠯᠠᠩᠬᠠᠢ ᠲᠠᠮᠠᠭᠠᠲᠤ ᠲᠠᠮᠠᠭᠠ ᠨᠢ ᠰᠢᠯᠵᠢᠨ ᠰᠢᠲᠠᠭᠳᠠᠵᠤ ᠪᠠᠯᠠᠷᠬᠠᠢ ᠭᠠᠷᠤᠭᠰᠠᠨ᠃
ᠰᠠᠷᠠᠨ ᠲᠠᠮᠠᠭᠠᠲᠠᠢ ᠬᠠᠯᠢᠭᠤᠨ
ᠰᠢᠨᠡᠳ ᠦ᠋ᠨ ᠰᠠᠷᠠᠨ ᠬᠡᠯᠪᠡᠷᠢᠲᠡᠢ ᠲᠠᠮᠠᠭᠠ ᠪᠦᠬᠦᠢ ᠠᠳᠤᠭᠤ᠃
ᠨᠠᠷᠠᠨ ᠰᠠᠷᠠᠨ ᠲᠠᠮᠠᠭᠠᠲᠠᠢ ᠬᠠᠷᠠ
ᠨᠠᠷᠠ ᠰᠠᠷᠠ ᠵᠡᠷᠭᠡ ᠪᠡᠷ ᠮᠠᠨᠳᠤᠵᠤ ᠪᠠᠢᠭᠠ ᠬᠡᠯᠪᠡᠷᠢᠲᠡᠢ ᠲᠠᠮᠠᠭᠠ ᠪᠦᠬᠦᠢ ᠠᠳᠤᠭᠤ᠃
ᠴᠢᠨᠳᠠᠮᠤᠨᠢ ᠲᠠᠮᠠᠭᠠᠲᠠᠢ ᠬᠦᠷᠡᠩ
ᠬᠦᠰᠡᠯ ᠢ᠋ ᠬᠠᠩᠭᠠᠭᠴᠢ ᠡᠷᠳᠡᠨᠢ ᠶ᠋ᠢᠨ ᠬᠡᠯᠪᠡᠷᠢᠲᠡᠢ ᠲᠠᠮᠠᠭᠠ ᠪᠦᠬᠦᠢ ᠠᠳᠤᠭᠤ᠃
ᠵᠥᠪ ᠡᠷᠭᠢᠭᠰᠡᠨ ᠬᠠᠰ ᠲᠠᠢ ᠤᠯᠠᠭᠠᠨ
ᠵᠥᠪ ᠡᠷᠭᠢᠭᠰᠡᠨ ᠪᠠ ᠤᠭᠠᠯᠵᠠ ᠶ᠋ᠢᠨ ᠨᠢᠭᠡᠨ ᠬᠡᠯᠪᠡᠷᠢ ᠶ᠋ᠢᠨ ᠲᠠᠮᠠᠭᠠ ᠪᠦᠬᠦᠢ ᠠᠳᠤᠭᠤ᠃
ᠵᠢᠭᠠᠰᠤᠨ ᠲᠠᠮᠠᠭᠠᠲᠠᠢ ᠰᠢᠷᠭᠠ
ᠵᠢᠭᠠᠰᠤᠨ ᠬᠡᠯᠪᠡᠷᠢᠲᠡᠢ ᠲᠠᠮᠠᠭᠠ ᠪᠦᠬᠦᠢ ᠠᠳᠤᠭᠤ᠃
ᠭᠠᠷᠠᠬᠠᠨ ᠲᠠᠮᠠᠭᠠᠲᠠᠢ ᠬᠠᠯᠲᠠᠷ
ᠭᠠᠷᠠᠬᠠ ᠶ᠋ᠢᠨ ᠬᠡᠯᠪᠡᠷᠢᠲᠡᠢ ᠲᠠᠮᠠᠭᠠ ᠪᠦᠬᠦᠢ ᠠᠳᠤᠭᠤ᠃
ᠾᠧ ᠶᠢᠩ ᠲᠠᠮᠠᠭᠠᠲᠠᠢ ᠪᠤᠭᠤᠷᠤᠯ
ᠳᠥᠷᠪᠡᠯᠵᠢᠨ ᠲᠠᠮᠠᠭᠠ ᠪᠦᠬᠦᠢ ᠠᠳᠤᠭᠤ᠃
ᠭᠠᠯ ᠲᠠᠮᠠᠭᠠᠲᠠᠢ ᠵᠡᠭᠡᠷᠳᠡ
ᠨᠣᠴᠣᠵᠤ ᠪᠠᠢᠭᠠ ᠭᠠᠯ ᠤ᠋ᠨ ᠬᠡᠯᠪᠡᠷᠢᠲᠡᠢ ᠲᠠᠮᠠᠭᠠ ᠪᠦᠬᠦᠢ ᠠᠳᠤᠭᠤ᠃
ᠠᠯᠤᠬᠠᠨ ᠲᠠᠮᠠᠭᠠᠲᠠᠢ ᠰᠠᠭᠠᠷᠠᠯ
ᠴᠢᠭᠲᠠ ᠬᠡᠯᠪᠡᠷᠢ ᠶ᠋ᠢᠨ ᠲᠠᠮᠠᠭᠠ ᠪᠦᠬᠦᠢ ᠠᠳᠤᠭᠤ ᠃
ᠠᠯᠢᠮᠠᠨ ᠲᠠᠮᠠᠭᠠᠲᠠᠢ ᠴᠡᠩᠬᠡᠷ
ᠠᠯᠢᠮᠠ ᠶ᠋ᠢᠨ ᠬᠡᠯᠪᠡᠷᠢᠲᠡᠢ ᠲᠠᠮᠠᠭᠠ ᠪᠦᠬᠦᠢ ᠠᠳᠤᠭᠤ ᠭᠡᠬᠦ ᠮᠡᠲᠦ ᠃ ᠲᠠᠮᠠᠭᠠᠨ ᠳ᠋ᠤ᠌ ᠬᠣᠶᠠᠷ ᠵᠠᠭᠤᠭᠠᠳ ᠵᠦᠢᠯ ᠪᠣᠢ᠃ ᠲᠠᠮᠠᠭᠠ ᠪᠦᠬᠦᠨ ᠳ᠋ᠦ᠍ ᠵᠢᠰᠦ ᠬᠠᠲᠠᠵᠤ ᠨᠡᠷᠡᠯᠡᠪᠡᠯ ᠮᠥᠨ ᠬᠡᠳᠦᠨ ᠵᠠᠭᠤᠨ ᠵᠢᠰᠦᠮ ᠪᠣᠢ ᠪᠣᠯᠬᠤ ᠶ᠋ᠢ ᠰᠠᠨᠠᠵᠤ ᠲᠤᠩᠭᠠᠬᠤ ᠪᠣᠯᠪᠠ ᠤᠤ ᠃
ᠴᠣᠯᠠ ᠭᠣᠩᠰᠢᠨ ᠢ᠋ᠶ᠋ᠠᠷ ᠨᠡᠷᠡᠯᠡᠬᠦ ᠵᠦᠢᠯ
ᠵᠣᠨᠤᠩ ( ᠴᠠᠭᠠᠨ )
① ᠥᠨᠳᠥᠷ ᠪᠡᠶᠡ ᠂ ᠤᠷᠲᠤ ᠵᠣ᠌ ᠂ ᠬᠠᠨᠠᠭᠠᠷ ᠴᠡᠭᠡᠵᠢ ᠂ ᠲᠠᠢᠭᠠᠨ ᠭᠡᠳᠡᠰᠦ ᠵᠡᠷᠭᠡ ᠬᠡᠪ ᠰᠢᠨᠵᠢ ᠲᠡᠩᠴᠡᠭᠰᠡᠨ ᠰᠠᠢᠬᠠᠨ ᠮᠣᠷᠢ ᠶ᠋ᠢ ᠵᠠᠷᠢᠮ ᠬᠥᠮᠦᠰ ᠵᠣᠨᠤᠩ ᠭᠡᠵᠦ ᠶᠠᠷᠢᠳᠠᠭ ᠃
② ᠣᠨᠴᠠ ᠬᠤᠷᠳᠤᠳᠠᠢ ᠵᠢᠷᠣᠭᠠ ᠪᠤᠶᠤ ᠳᠠᠪᠬᠢᠯᠲᠠᠢ ᠮᠣᠷᠢ ᠶ᠋ᠢ ᠵᠢᠭᠦᠷᠲᠦ ᠬᠦᠯᠦᠭ ᠭᠡᠵᠦ ᠵᠠᠷᠢᠮ ᠠᠬᠠᠮᠠᠳ ᠬᠠᠭᠤᠴᠢᠯᠠᠬᠤ ᠳ᠋ᠠᠭᠠᠨ ᠪᠠᠷᠢᠮᠲᠠ ᠪᠣᠯᠭᠠᠨ ᠳᠣᠣᠷᠠᠬᠢ ᠳᠣᠮᠣᠭ ᠢ᠋ ᠶᠠᠷᠢᠳᠠᠭ ᠰᠠᠨ ᠃
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌᠂ ᠠᠷᠤ ᠬᠠᠩᠭᠠᠢ ᠨᠤᠲᠤᠭ ᠲᠤ᠌ ᠡᠢᠮᠦ ᠨᠢᠭᠡ ᠠᠳᠤᠭᠤᠴᠢᠨ ᠪᠠᠢᠵᠤ ᠭᠡᠨᠡ᠃ ᠲᠡᠷᠡ ᠠᠳᠤᠭᠤ ᠪᠠᠨ ᠣᠷᠣᠢ ᠪᠦᠷᠢ ᠵᠠᠯᠠᠵᠤ ᠢᠪᠡᠭᠡᠨ ᠂ ᠥᠷᠯᠥᠭᠡ ᠪᠦᠷᠢ ᠬᠣᠷᠢᠶᠠᠨ ᠠᠪᠴᠢᠷᠠᠳᠠᠭ ᠭᠡᠨᠡ᠃ ᠭᠡᠲᠡᠯᠡ ᠵᠣᠨᠤᠩ ( ᠵᠠᠨᠠᠨ ) ᠬᠠᠷᠠ ᠮᠣᠷᠢ ᠪᠠᠨ ᠤᠨᠤᠭᠠᠳ ᠠᠳᠤᠭᠤ ᠪᠠᠨ ᠢᠪᠡᠭᠡᠪᠡᠯ ᠰᠥᠨᠢᠵᠢᠨ ᠢᠷᠡᠳᠡᠭ ᠦᠭᠡᠢ ᠂ ᠥᠷᠯᠥᠭᠡ ᠨᠢ ᠠᠳᠤᠭᠤ ᠪᠠᠨ ᠬᠤᠷᠢᠶᠠᠴᠢᠬᠠᠭᠠᠳ ᠢᠷᠡᠳᠡᠭ ᠭᠡᠨᠡ᠃ ᠲᠡᠭᠡᠬᠦ ᠳ᠋ᠦ᠍ ᠵᠣᠨᠤᠩ ᠬᠠᠷᠠ ᠨᠢ ᠬᠥᠯᠥᠰᠥᠨ ᠳ᠋ᠡᠭᠡᠨ ᠳᠡᠪᠲᠦᠭᠡᠳ ᠤᠰᠤᠨ ᠬᠤᠯᠤᠭᠠᠨᠠ ᠪᠣᠯᠤᠭᠠᠳ ᠢᠷᠡᠳᠡᠭ ᠭᠡᠨᠡ᠃ ᠡᠭᠦᠨ ᠳ᠋ᠦ᠍ ᠡᠬᠡᠨᠡᠷ ᠨᠢ ᠰᠡᠵᠢᠭᠯᠡᠭᠡᠳ ᠬᠥᠮᠦᠨ ᠳ᠋ᠦ᠍ : 《ᠮᠠᠨ ᠤ᠋ ᠬᠠᠷᠠ ᠬᠥᠮᠦᠨ ᠂ ᠥᠭᠡᠷᠡ ᠮᠣᠷᠢ ᠪᠠᠨ ᠤᠨᠤᠪᠠᠯ ᠲᠡᠢᠮᠦ ᠪᠢᠰᠢ᠂ᠬᠠᠷᠢᠨ ᠵᠣᠨᠤᠩ ᠬᠠᠷᠠ ᠪᠠᠨ ᠤᠨᠤᠭᠠᠳ ᠠᠳᠤᠭᠤ ᠪᠠᠨ ᠢᠪᠡᠭᠡᠭᠰᠡᠭᠡᠷ ᠰᠥᠨᠢᠵᠢᠨ ᠪᠤᠴᠠᠵᠤ ᠢᠷᠡᠳᠡᠭ ᠦᠭᠡᠢ 》ᠭᠡᠵᠦ ᠰᠠᠨᠠᠭᠠᠰᠢᠷᠠᠨ ᠬᠡᠯᠡᠵᠡᠢ᠃ ᠲᠡᠭᠡᠬᠦ ᠳ᠋ᠦ᠍ᠨᠢ ᠰᠠᠨᠠᠭᠠ ᠮᠠᠭᠤᠲᠤ ᠨᠢᠭᠡᠨ ᠨᠢ : 《ᠲᠠᠨ ᠤ᠋ ᠨᠥᠬᠥᠷ ᠴᠢᠨᠢ ᠴᠠᠭᠠᠨᠠ ᠪᠠᠨ ᠨᠢᠭᠡ ᠬᠡᠦᠬᠡᠨ ᠲᠡᠢ ᠪᠣᠯᠤᠭᠰᠠᠨ ᠴᠢᠷᠠᠢ᠃ ᠲᠡᠷᠡ ᠨᠢ ᠪᠡᠭᠡᠵᠢᠩ ᠳ᠋ᠦ᠍ ᠪᠠᠢᠳᠠᠭ ᠭᠡᠨᠡ᠃ᠲᠡᠭᠦᠨ ᠳ᠋ᠡᠭᠡᠨ ᠬᠦᠷᠦᠭᠡᠳ ᠢᠷᠡᠳᠡᠭ ᠪᠠᠢᠯᠭᠦᠢ 》ᠭᠡᠵᠡᠢ᠃
《ᠲᠡᠢᠮᠦ ᠬᠣᠯᠠ ᠤᠤ ? ᠶᠠᠭᠠᠬᠢᠵᠤ ᠣᠴᠢᠨᠠ ᠪᠣᠢ ? 》ᠭᠡᠬᠦ ᠳ᠋ᠦ᠍᠂ 《ᠬᠠᠢ ! ᠲᠠᠨ ᠤ᠋ ᠲᠡᠷᠡ ᠵᠣᠨᠤᠩ ᠬᠠᠷᠠ ᠭᠡᠭᠴᠢ ᠵᠢᠭᠦᠷᠲᠡᠢ ᠮᠣᠷᠢ ᠰᠢᠦ᠃ ᠲᠠ ᠢᠲᠡᠭᠡᠬᠦ ᠦᠭᠡᠢ ᠪᠣᠯ ᠳᠠᠷᠠᠭᠠ ᠢᠷᠡᠬᠦ ᠳ᠋ᠦ᠍ᠨᠢ ᠬᠤᠷᠳᠤᠨ ᠭᠠᠷᠴᠤ ᠭᠥᠯᠢᠮ ᠢ᠋ ᠨᠢ ᠰᠡᠬᠦᠵᠦ ᠦᠵᠡᠯ ᠳᠡ᠃ ᠤᠳᠠᠪᠠᠯ ᠬᠠᠷᠢᠨ ᠪᠦᠷ ᠪᠤᠴᠠᠭᠠᠳ ᠣᠷᠣᠴᠢᠬᠠᠨᠠ ᠰᠢᠦ ! 》 ᠭᠡᠵᠦ ᠭᠡᠨᠡ᠃ ᠡᠨᠡ ᠦᠭᠡ ᠪᠡᠷ ᠡᠬᠡᠨᠡᠷ ᠨᠢ ᠡᠷᠡᠭᠲᠡᠢ ᠪᠡᠨ ᠢᠷᠡᠬᠦ ᠲᠡᠢ ᠵᠡᠷᠭᠡ ᠵᠥᠷᠢᠵᠦ ᠭᠠᠷᠤᠭᠠᠳ ᠦᠵᠡᠭᠰᠡᠨ ᠴᠢᠨᠢ᠂ ᠦᠨᠡᠬᠡᠷ ᠰᠥᠭᠥᠮ ᠬᠢᠷᠢ ᠵᠢᠭᠦᠷ ᠴᠠᠭᠠᠰᠢ ᠣᠷᠣᠵᠤ ᠪᠣᠢ ᠭᠡᠨᠡ᠃ ᠡᠬᠡᠨᠡᠷ ᠰᠠᠨᠳᠤᠷᠬᠤ ᠳ᠋ᠠᠭᠠᠨ ᠰᠠᠪᠠᠨ ( ᠨᠠᠩᠭᠢ ) ᠳ᠋ᠤ᠌ ᠪᠠᠢᠭᠰᠠᠨ ᠬᠠᠢᠴᠢ ᠪᠠᠨ ᠠᠪᠤᠭᠠᠳ ᠬᠠᠢᠴᠢᠯᠠᠵᠤ ᠣᠷᠬᠢᠭᠰᠠᠨ ᠴᠢᠨᠢ ᠪᠠᠢᠬᠤ ᠤᠤ ! ᠵᠣᠨᠤᠩ ᠬᠠᠷᠠ ᠨᠢ ᠲᠡᠷᠡ ᠳᠣᠣᠷᠠ ᠪᠠᠨ ᠦᠬᠦᠴᠢᠬᠡᠵᠦ ᠭᠡᠨᠡ᠃ ᠡᠭᠦᠨ ᠳ᠋ᠦ᠍ ᠡᠷᠡᠭᠲᠡᠢ ᠨᠢ ᠭᠣᠮᠣᠷᠬᠠᠵᠤ ᠰᠢᠨᠠᠯᠤᠭᠠᠳ᠂ ᠮᠣᠷᠢᠨ ᠤ᠋ ᠪᠠᠨ ᠬᠡᠭᠦᠷ ᠢ᠋ ᠥᠨᠳᠥᠷ ᠭᠠᠵᠠᠷ ᠠᠪᠠᠴᠢᠨ ᠲᠠᠯᠪᠢᠵᠤ᠂ ᠡᠳᠦᠷ ᠪᠦᠷᠢ ᠡᠷᠭᠢᠵᠦ ᠤᠶᠠᠷᠠᠭᠰᠠᠭᠠᠷ ᠪᠠᠢᠵᠤ ᠭᠡᠨᠡᠳᠲᠡ ᠨᠢᠭᠡ ᠶ᠋ᠢ ᠰᠠᠨᠠᠵᠤ᠂ ᠬᠠᠷᠠ ᠽᠠᠨᠳᠠᠨ ᠮᠣᠳᠣ ᠪᠠᠷ ᠵᠣᠨᠤᠩ ᠬᠠᠷᠠ ᠶ᠋ᠢᠨ ᠢ᠋ᠶ᠋ᠡᠨ ᠪᠤᠴᠠᠨ ᠬᠠᠷᠠᠵᠤ ᠪᠠᠢᠭᠠ ᠲᠣᠯᠣᠭᠠᠢ ᠶ᠋ᠢ ᠳᠠᠭᠤᠷᠢᠶᠠᠨ ᠰᠡᠢᠯᠵᠦ᠂ ᠳᠥᠷᠪᠡᠨ ᠬᠥᠯ ᠢ᠋ ᠨᠢ ᠳᠠᠭᠤᠷᠢᠶᠠᠵᠤ᠂ ᠰᠡᠭᠦᠯ ᠢ᠋ ᠨᠢ ᠳᠠᠭᠤᠷᠢᠶᠠᠵᠤ ᠬᠢᠯᠭᠠᠰᠤ ᠪᠠᠷ ᠨᠢ ᠨᠤᠮᠤ ᠶ᠋ᠢᠨ ᠬᠥᠪᠴᠢ ᠬᠢᠵᠦ᠂ ᠡᠵᠡᠨ ᠢ᠋ᠶ᠋ᠡᠨ ᠡᠷᠭᠢᠨ ᠬᠠᠷᠠᠵᠤ ᠪᠠᠢᠭᠠ ᠰᠢᠨᠵᠢᠲᠡᠢ ᠮᠣᠷᠢᠨ ᠬᠤᠭᠤᠷ ᠵᠣᠬᠢᠶᠠᠵᠤ ᠭᠡᠨᠡ᠃ ᠲᠡᠭᠡᠭᠡᠳ ᠲᠡᠷᠡ ᠬᠤᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ 《ᠵᠣᠨᠤᠩ ( ᠵᠠᠨᠠᠨ ) ᠬᠠᠷᠠ 》ᠭᠡᠳᠡᠭ ᠴᠢᠳᠬᠤᠯᠠᠮᠠ ᠵᠢᠷᠣᠭᠠ ᠮᠣᠷᠢᠨ ᠤ᠋ ᠶᠠᠪᠤᠳᠠᠯ ᠢ᠋ ᠢᠯᠡᠷᠡᠭᠦᠯᠦᠭᠰᠡᠨ ᠠᠶᠠᠯᠭᠤ ᠶ᠋ᠢ ᠳᠠᠷᠤᠵᠤ ᠭᠡᠨᠡ᠃ ᠲᠡᠭᠡᠬᠦ ᠳ᠋ᠦ᠍ᠨᠢ ᠵᠢᠭᠦᠷᠲᠡᠨ ᠨᠢᠰᠬᠦ ᠪᠡᠨ ᠪᠠᠢᠵᠤ ᠵᠢᠷᠭᠢᠨ ᠴᠢᠩᠨᠠᠵᠤ᠂ ᠵᠠᠮ ᠤ᠋ᠨ ᠬᠥᠮᠦᠨ ᠶᠠᠪᠤᠬᠤ ᠪᠠᠨ ᠪᠠᠢᠵᠤ ᠵᠣᠭᠰᠣᠨ ᠬᠣᠷᠭᠣᠳᠠᠵᠤ ᠭᠡᠨᠡ᠃ ᠲᠡᠢᠨ ᠬᠦ᠌ ᠮᠣᠷᠢᠨ ᠬᠤᠭᠤᠷᠴᠢᠳ ᠴᠥᠮ ᠬᠤᠭᠤᠷ ᠢ᠋ᠶ᠋ᠠᠨ ᠳᠠᠷᠤᠭᠰᠠᠭᠠᠷ ᠵᠠᠪᠠᠯ ᠤᠷᠢᠳ ᠢ᠋ᠶ᠋ᠠᠷ 《ᠵᠣᠨᠤᠩ ᠬᠠᠷᠠ 》 ᠶ᠋ᠢᠨ ᠠᠶᠠᠰ ᠳᠠᠷᠤᠴᠢᠬᠠᠭᠠᠳ ᠰᠠᠢ ᠥᠭᠡᠷᠡ ᠶ᠋ᠢ ᠬᠥᠭᠵᠢᠮᠳᠡᠳᠡᠭ ᠨᠢ ᠡᠢᠮᠦ ᠤᠯᠠᠮᠵᠢᠯᠠᠯᠲᠠᠢ ᠭᠡᠨᠡ ᠪᠢᠯᠡ᠃ ᠡᠨᠡ ᠮᠡᠲᠦ ᠰᠠᠢᠨ ᠰᠠᠢᠬᠠᠨ ᠴᠣᠯᠠ ᠲᠠᠢ ᠮᠣᠷᠢᠳ ᠭᠡᠪᠡᠯ᠂ ᠥᠭᠡᠳᠡᠩ ᠬᠠᠷᠠ ᠂ ᠬᠢᠯᠢᠩ ᠬᠠᠷᠠ ᠂ ᠬᠦ ᠬᠠᠷᠠ ᠂ ᠪᠡᠬᠡ ᠬᠠᠷᠠ ᠂ ᠭᠠᠩᠭᠠᠩ ᠬᠠᠷᠠ ᠃ ᠪᠢᠯᠢᠭ ᠦ᠋ᠨ ᠬᠡᠭᠡᠷ ( ᠭᠡᠰᠡᠷ ᠦ᠋ᠨ ᠬᠡᠭᠡᠷ ) ᠂ ᠠᠷᠪᠠᠢ ᠬᠡᠭᠡᠷ ( ᠠᠷᠪᠠᠭᠠᠷ ᠬᠡᠭᠡᠷ ) ᠂ ᠡᠯᠪᠡᠭ ᠬᠡᠭᠡᠷ ( ᠭᠠᠯᠰᠢᠷᠠ ᠶ᠋ᠢᠨ ᠤᠨᠠᠭᠠ ) ᠂ ᠰᠣᠶᠣᠩ ᠬᠡᠭᠡᠷ᠂ ᠮᠣᠭᠠᠢ ᠬᠡᠭᠡᠷ᠂ ᠭᠠᠯᠵᠠᠭᠤ ᠬᠡᠭᠡᠷ᠂ ᠬᠤᠷᠳᠤᠨ ᠬᠡᠭᠡᠷ᠃ ᠬᠤᠶᠠᠭᠲᠤ ᠬᠠᠯᠲᠠᠷ ( ᠴᠣᠭᠲᠤ ᠲᠠᠢᠵᠢ ᠶ᠋ᠢᠨ ᠬᠦᠯᠦᠭ ) ᠂ ᠬᠡᠭᠡᠷ ᠬᠠᠯᠲᠠᠷ ( ᠪᠠᠭᠠᠷᠢᠨ ᠨᠤᠲᠤᠭ ᠤ᠋ᠨ ᠳᠠᠭᠤᠤ ) ᠃ ᠠᠷᠠᠨᠵᠢᠯ ᠬᠦᠷᠡᠩ ( ᠭᠡᠰᠡᠷ ᠦ᠋ᠨ ᠬᠦᠯᠦᠭ ) ᠂ ᠡᠨᠡ ᠮᠣᠷᠢᠨ ᠤ᠋ ᠡᠮᠦᠨᠡ ᠣᠯᠣᠩ ᠢ᠋ ᠲᠠᠲᠠᠨᠠ ᠭᠡᠵᠦ ᠡᠳᠦᠷ ᠦ᠋ᠨ ᠭᠠᠵᠠᠷ ᠶᠠᠪᠤᠵᠤ᠂ ᠬᠣᠢᠲᠤ ᠣᠯᠣᠩ ᠢ᠋ ᠲᠠᠲᠠᠨᠠ ᠭᠡᠵᠦ ᠬᠣᠨᠣᠭ ᠤ᠋ᠨ ᠭᠠᠵᠠᠷ ᠡᠴᠢᠳᠡᠭ ᠭᠡᠵᠦ ᠭᠡᠰᠡᠷ ᠦ᠋ᠨ ᠦᠯᠢᠭᠡᠷ ᠲᠦ᠍ ᠪᠠᠢᠳᠠᠭ᠃ ᠡᠯᠢᠭᠡᠨ ᠬᠦᠷᠡᠩ᠂ ᠳᠡᠭᠦᠯᠢᠬᠡᠷ ᠬᠦᠷᠡᠩ᠂ ᠡᠪᠡᠷᠲᠦ ᠬᠦᠷᠡᠩ᠂ ᠰᠣᠯᠢᠷ ᠬᠦᠷᠡᠩ᠂ ᠽᠠᠨᠳᠠᠨ ᠬᠦᠷᠡᠩ᠂ ᠰᠢᠩᠭᠡᠨ ᠲᠣᠭᠣᠰᠣᠲᠤ ᠬᠦᠷᠡᠩ᠃ ᠰᠠᠯᠬᠢᠨ ᠵᠡᠭᠡᠷᠳᠡ᠂ ᠰᠤᠮᠤᠨ ᠵᠡᠭᠡᠷᠳᠡ᠂ ᠴᠢᠰᠤᠨ ᠵᠡᠭᠡᠷᠳᠡ᠂ ᠴᠢᠪᠠᠭᠠᠨ ᠵᠡᠭᠡᠷᠳᠡ ( ᠭᠤᠸᠠᠨ ᠬᠦᠩ ᠦ᠋ᠨ ᠬᠦᠯᠦᠭ ) ᠂ ᠥᠨᠳᠡᠭᠡᠨ ᠴᠠᠭᠠᠨ ( ᠴᠢᠩᠭᠢᠰ ᠦ᠋ᠨ ᠬᠦᠯᠦᠭ ) ᠂ ᠯᠤᠤ ᠴᠠᠭᠠᠨ᠂ ᠴᠢᠨᠳᠠᠭᠠᠨ ᠴᠠᠭᠠᠨ᠂ ᠪᠥᠬᠡ ᠴᠠᠭᠠᠨ ( ᠲᠠᠩᠰᠤᠭ ᠯᠠᠮᠠ ᠶ᠋ᠢᠨ ᠤᠨᠤᠭᠠ ) ᠂ ᠲᠤᠩ ᠴᠠᠭᠠᠨ᠃ ᠰᠡᠢᠭ ᠤᠯᠠᠭᠠᠨ᠂ ᠰᠢᠩᠬᠤᠨ ᠤᠯᠠᠭᠠᠨ᠂ ᠬᠢᠷᠭᠤᠢ ᠤᠯᠠᠭᠠᠨ᠂ ᠰᠢᠪᠠᠭᠤᠨ ᠰᠠᠭᠠᠷᠠᠯ (ᠰᠥᠷᠥᠩᠭᠦᠦ ᠶ᠋ᠢᠨ ᠤᠨᠤᠭᠠ ) ᠂ ᠠᠯᠢᠶᠠ ᠰᠠᠭᠠᠷᠠᠯ᠂ ᠢᠯᠭᠤᠨ ᠰᠠᠭᠠᠷᠠᠯ᠂ ᠣᠪᠣᠭᠠᠨ ᠰᠠᠭᠠᠷᠠᠯ ( ᠣᠪᠣᠭᠠᠨ ᠨᠠᠢᠷ ᠲᠤ᠌ ᠲᠡᠷᠢᠭᠦᠯᠡᠭᠰᠡᠨ ᠰᠠᠭᠠᠷᠠᠯ ) ᠂ ᠬᠡᠦᠬᠡᠨ ᠰᠠᠭᠠᠷᠠᠯ᠃ ᠡᠭᠦᠯᠡᠨ ᠪᠣᠷᠣ ( ᠥᠪᠥᠷ 49 ᠳ᠋ᠦ᠍ ᠨᠡᠷᠡ ᠠᠯᠳᠠᠷᠰᠢᠭᠰᠠᠨ ᠮᠣᠷᠢ ) ᠂ ᠴᠣᠬᠣᠷ ᠪᠣᠷᠣ᠂ ᠴᠡᠩᠬᠡᠷ ᠪᠣᠷᠣ᠂ ᠰᠤᠮᠤᠨ ᠪᠣᠷᠣ᠂ ᠬᠤᠢ ᠪᠣᠷᠣ᠃ ᠠᠷᠭᠤᠮᠠᠭ ( ᠶᠡᠬᠡ ᠲᠣᠮᠣ ᠪᠡᠶᠡᠲᠦ ) ᠂ ᠬᠤᠯᠠᠨ ᠬᠣᠯᠠ᠂ ᠴᠠᠬᠢᠯᠭᠠ ᠬᠣᠯᠠ᠃ ᠵᠤᠯᠠ ᠬᠣᠩᠭᠣᠷ᠂ ᠣᠷᠣᠭᠠ ᠬᠣᠩᠭᠣᠷ᠂ ᠰᠣᠯᠣᠩᠭᠠᠲᠤ ᠬᠣᠩᠭᠣᠷ᠃ ᠱᠠᠩᠬᠤᠲᠠᠢ ᠰᠢᠷᠭᠠ᠂ ᠨᠠᠷᠢᠨ ᠰᠢᠷᠭᠠ᠂ ᠠᠯᠲᠠᠨ ᠰᠢᠷᠭᠠ᠂ ᠬᠤᠯᠤᠰᠤᠨ ᠰᠢᠷᠭᠠ᠃ ᠣᠳᠣᠨ ᠴᠣᠬᠣᠷ᠂ ᠥᠲᠥᠨ ᠴᠣᠬᠣᠷ᠂ ᠰᠠᠯᠬᠢᠨ ᠴᠣᠬᠣᠷ᠃ ᠨᠢᠰᠬᠡᠯ ᠠᠯᠠᠭ ( ᠣᠳᠣ ᠶ᠋ᠢᠨ ᠨᠡᠷᠡᠢᠳᠦᠯ ) ᠃ ᠲᠦᠮᠡᠨ ᠦ᠌ ᠡᠬᠢ᠂ ᠠᠵᠢᠨᠠᠢ ᠬᠦᠯᠦᠭ᠂ ᠬᠤᠪᠢᠯᠭᠠᠨ ᠬᠦᠯᠦᠭ᠂ ᠬᠤᠷᠳᠤᠨ ᠰᠤᠭᠤᠨᠠᠭ ᠭᠡᠬᠦ ᠮᠡᠲᠦ᠃
ᠵᠢᠭᠦᠷᠲᠡᠨ ᠠᠷᠢᠶᠠᠲᠠᠨ ᠢ᠋ᠶ᠋ᠠᠷ ᠨᠡᠷᠡᠯᠡᠬᠦ ᠵᠦᠢᠯ
ᠠᠷᠰᠯᠠᠨ ᠪᠣᠷᠣ᠂ ᠯᠤᠤ ᠴᠠᠭᠠᠨ᠂ ᠴᠢᠨᠳᠠᠭᠠᠨ ᠴᠠᠭᠠᠨ᠂ ᠪᠠᠷᠰ ᠴᠣᠬᠣᠷ᠂ ᠢᠳᠡᠷ ᠵᠠᠭᠠᠨ᠂ ᠪᠤᠭᠤᠨ ᠴᠣᠬᠣᠷ᠂ ᠭᠣᠪᠢ ᠶ᠋ᠢᠨ ᠴᠢᠬᠢᠲᠡᠢ᠂ ᠲᠠᠯᠠ ᠶ᠋ᠢᠨ ᠳᠠᠬᠢ᠂ ᠬᠤᠯᠠᠨ ᠲᠣᠭᠣᠰᠣᠲᠤ᠂ ᠵᠡᠭᠡᠷᠡ ᠳᠠᠭᠰᠢᠭᠠᠲᠤ᠂ ᠢᠨᠵᠠᠭᠠᠨ ᠰᠠᠭᠠᠷᠠᠯ᠂ ᠲᠠᠤᠯᠠᠢ ᠪᠤᠭᠤᠷᠤᠯ᠂ ᠨᠠᠴᠢᠨ ᠬᠡᠭᠡᠷ᠂ ᠤᠷᠤᠭ ᠱᠣᠩᠬᠣᠷ᠂ ᠲᠣᠭᠣᠰ ᠪᠣᠷᠣ᠂ ᠡᠷᠡᠮᠡᠨ ᠬᠠᠷᠴᠠᠭᠠᠢ᠂ ᠳᠡᠭᠦᠯᠢᠭᠡ ᠬᠡᠭᠡᠷ᠂ ᠲᠣᠭᠣᠰ ᠴᠡᠩᠬᠡᠷ᠂ ᠲᠣᠭᠣᠳᠠᠭ ᠰᠠᠭᠠᠷᠠᠯ᠂ ᠬᠠᠷᠴᠠᠭᠠᠢ ᠬᠠᠯᠢᠭᠤᠨ᠂ ᠰᠢᠪᠠᠭᠤᠨ ᠰᠠᠭᠠᠷᠠᠯ᠂ ᠭᠠᠷᠤᠳᠢ ᠬᠦᠷᠡᠩ᠂ ᠵᠢᠷᠭᠢᠭᠡ ᠬᠡᠭᠡᠷ᠂ ᠵᠡᠷᠭᠡᠯᠭᠡᠨ ᠪᠣᠷᠣ᠂ ᠢᠷᠭᠤᠢ ᠬᠠᠯᠲᠠᠷ ᠭᠡᠬᠦ ᠮᠡᠲᠦ᠃
ᠭᠠᠵᠠᠷ ᠨᠤᠲᠤᠭ ᠢ᠋ᠶ᠋ᠠᠷ ᠨᠡᠷᠡᠯᠡᠬᠦ ᠵᠦᠢᠯ
ᠬᠥᠭᠰᠢᠨ ᠬᠣᠣᠬᠠᠩ ( ᠬᠣᠣᠬᠠᠩ ᠭᠡᠵᠦ ᠲᠥᠪ ᠠᠽᠢᠶᠠ ᠶ᠋ᠢᠨ ᠠᠼᠢᠷᠪᠠᠢᠳᠠᠵᠢᠨ ᠤ᠋ ᠨᠢᠭᠡᠨ ᠭᠠᠵᠠᠷ ᠤ᠋ᠨ ᠨᠡᠷᠡ ᠭᠡᠨᠡ ) ᠂ ᠢᠯᠢ ᠪᠣᠷᠣ ( ᠰᠢᠨᠵᠢᠶᠠᠩ ᠤ᠋ᠨ ᠢᠯᠢ ᠨᠤᠲᠤᠭ ᠤ᠋ᠨ ᠪᠣᠷᠣ ) ᠂ ᠳᠥᠷᠪᠡᠳ ᠬᠡᠭᠡᠷ᠂ ᠤᠷᠠᠳ ᠬᠠᠷᠠ᠂ ᠦᠵᠦᠮᠦᠴᠢᠨ ᠰᠠᠭᠠᠷᠠᠯ᠂ ᠪᠠᠭᠠᠷᠢᠨ ᠵᠡᠭᠡᠷᠳᠡ᠂ ᠪᠠᠶᠠᠠᠡᠷᠳᠡᠨᠢ ᠶ᠋ᠢᠨ ᠴᠠᠭᠠᠨ ᠠᠵᠢᠷᠭᠠ᠂ ᠵᠠᠷᠤᠳ ᠤᠯᠠᠭᠠᠨ᠂ ᠬᠣᠷᠴᠢᠨ ᠪᠣᠷᠣ᠂ ᠳᠠᠷᠬᠠᠨ ᠬᠠᠯᠲᠠᠷ᠂ ᠬᠥᠯᠥᠨ ᠪᠤᠢᠷ ᠬᠡᠭᠡᠷ᠂ ᠳᠠᠷᠢᠭᠠᠩᠭᠠ ᠬᠠᠯᠢᠭᠤᠨ᠂ ᠤᠯᠠᠭᠠᠨᠨᠷᠭᠢ ᠬᠡᠭᠡᠷ᠂ ᠪᠠᠢᠳᠤᠩ ᠤ᠋ᠨ ᠰᠠᠷᠠᠲᠤ ᠬᠠᠷᠠ᠂ ᠬᠠᠩᠭᠠᠢ ᠶ᠋ᠢᠨ ᠪᠤᠭᠤᠷᠤᠯ ᠂᠂᠂᠂ ᠭᠡᠬᠦ ᠮᠡᠲᠦ᠃
ᠠᠭᠤᠯᠠ ᠬᠠᠢᠷᠬᠠᠨ ᠢ᠋ᠶ᠋ᠠᠷ ᠨᠡᠷᠡᠯᠡᠬᠦ ᠵᠦᠢᠯ
ᠬᠠᠢᠷᠬᠠᠨ ᠤ᠋ ᠬᠠᠷᠠ᠂ ᠳ᠋ᠠᠭᠠᠨ ᠳᠡᠯ ᠦ᠋ᠨ ᠬᠠᠷᠠᠯᠠᠭ᠂ ᠳᠤᠭᠤᠯᠵᠢ ᠬᠤᠸᠠ᠂ ᠬᠣᠶᠠᠷ ᠪᠣᠭᠳᠠ ᠶ᠋ᠢᠨ ᠬᠡᠭᠡᠷ᠂ ᠠᠷᠰᠯᠠᠩᠲᠤ ᠶ᠋ᠢᠨ ᠴᠣᠬᠣᠷ᠂ ᠰᠢᠷᠠ ᠲᠠᠯᠠ ᠶ᠋ᠢᠨ ᠰᠢᠷᠭᠠ᠂ ᠠᠷᠴᠠ ᠰᠡᠷᠪᠡᠩ ᠦ᠋ᠨ ᠬᠡᠭᠡᠷ᠂ ᠰᠣᠯᠣᠨ ᠤ᠋ ᠴᠠᠪᠢᠳᠠᠷ᠂ ᠰᠢᠯᠣᠬᠠᠢ ᠬᠠᠷᠠ᠂ ᠬᠠᠪᠲᠠᠭᠠᠢ ᠵᠣ᠌ ᠶ᠋ᠢᠨ ᠬᠠᠮᠠᠷ ᠪᠣᠷᠣ ᠭᠡᠬᠦ ᠮᠡᠲᠦ᠃
ᠭᠣᠣᠯ ᠮᠥᠷᠡᠨ ᠢ᠋ᠶ᠋ᠡᠷ ᠨᠡᠷᠡᠯᠡᠬᠦ ᠵᠦᠢᠯ
ᠬᠤᠳᠳᠤᠭ ᠤ᠋ᠨ ᠬᠡᠭᠡᠷ᠂ ᠨᠠᠭᠤᠷ ᠤ᠋ᠨ ᠪᠣᠷᠣ᠂ ᠤᠨᠤᠨ ᠤ᠋ ᠰᠠᠭᠠᠷᠠᠯ᠂ ᠣᠷᠬᠣᠨ ᠤ᠋ ᠬᠦᠷᠡᠩ᠂ ᠬᠠᠯᠢᠭᠤᠲᠤ ᠶ᠋ᠢᠨ ᠬᠠᠯᠢᠭᠤᠨ᠂ ᠭᠣᠣᠯ ᠤ᠋ᠨ ᠬᠠᠷᠠ ᠂ ᠮᠦᠷᠡᠨ ᠰᠢᠷᠠ ᠬᠡᠭᠡᠷ᠂ ᠬᠥᠯᠥᠨ ᠬᠠᠷᠠᠯᠠᠭ᠂ ᠪᠤᠢᠷ ᠤ᠋ᠨ ᠪᠣᠷᠣ ᠰᠢᠷᠭᠠ᠂ ᠴᠠᠭᠠᠨ ᠨᠠᠭᠤᠷ ᠤ᠋ᠨ ᠴᠠᠭᠠᠨ ᠭᠡᠬᠦ ᠮᠡᠲᠦ᠃
ᠪᠠᠢᠭᠠᠯᠢ ᠶ᠋ᠢᠨ ᠦᠵᠡᠭᠳᠡᠯ ᠢ᠋ᠶ᠋ᠡᠷ ᠨᠡᠷᠡᠯᠡᠬᠦ ᠵᠦᠢᠯ
ᠭᠢᠯᠪᠢᠭᠡᠨ ᠬᠡᠭᠡᠷ᠂ ᠴᠠᠬᠢᠯᠭᠠᠨ ᠪᠣᠷᠣ᠂ ᠣᠳᠣᠨ ᠴᠣᠬᠣᠷ᠂ ᠰᠣᠯᠢᠷ ᠬᠦᠷᠡᠩ᠂ ᠰᠠᠯᠬᠢᠨ ᠵᠡᠭᠡᠷᠳᠡ᠂ ᠬᠤᠢ ᠬᠣᠯᠠ᠂ ᠡᠭᠦᠯᠡᠨ ᠬᠥᠬᠡ᠂ ᠰᠣᠯᠣᠩᠭᠠᠲᠤ ᠤᠯᠠᠭᠠᠨ᠂ ᠰᠢᠭᠤᠷᠭᠠᠨ ᠬᠠᠷᠠ ᠭᠡᠬᠦ ᠮᠡᠲᠦ᠃
ᠡᠵᠡᠨ ᠦ᠌ ᠬᠢᠨᠢ ᠨᠡᠷᠡ ᠪᠡᠷ ᠨᠡᠷᠡᠯᠡᠬᠦ ᠵᠦᠢᠯ
ᠪᠣᠭᠳᠠ ᠶ᠋ᠢᠨ ᠬᠠᠷᠠ ᠂ ᠨᠣᠶᠠᠨ ᠤ᠋ ᠬᠠᠯᠲᠠᠷ ᠂ ᠯᠠᠮᠠ ᠶ᠋ᠢᠨ ᠰᠠᠭᠠᠷᠠᠯ ᠂ ᠪᠠᠶᠠᠨ ᠤ᠋ ᠬᠡᠭᠡᠷ ᠂ ᠲᠤᠰᠠᠯᠠᠭᠴᠢ ᠶ᠋ᠢᠨ ᠴᠠᠪᠢᠳᠠᠷ ᠂ ᠭᠠᠯᠰᠢᠷᠠ ᠶ᠋ᠢᠨ ᠽᠠᠨᠳᠠᠨ ᠬᠦᠷᠡᠩ᠂ ᠡᠷᠳᠡᠨᠢ ᠶ᠋ᠢᠨ ᠰᠠᠷᠠᠲᠤ ᠬᠠᠷᠠ ᠂ ᠨᠡᠮᠡᠭᠦᠪᠠᠶᠠᠷ ᠤ᠋ᠨ ᠴᠠᠭᠠᠨ ᠂ ᠠᠩᠰᠠᠭᠠᠷ ᠤ᠋ᠨ ᠬᠤᠸᠠ ᠂ ᠵᠢᠷᠠᠨᠲᠠᠢ ᠶ᠋ᠢᠨ ᠵᠢᠷᠭᠢᠭᠡ ᠬᠡᠭᠡᠷ᠂ ᠵᠣᠷᠢᠭᠲᠤ ᠶ᠋ᠢᠨ ᠬᠠᠯᠲᠠᠷ᠂ ᠤᠳᠬᠤᠨ ᠤ᠋ ᠰᠢᠷᠭᠠ᠂ ᠸᠠᠩᠵᠢᠯ ᠤ᠋ᠨ ᠬᠤᠯᠤᠭᠠᠨᠠ ᠪᠣᠷᠣ ᠭᠡᠬᠦ ᠮᠡᠲᠦ᠃
ᠪᠠᠢᠳᠠᠯ ᠲᠥᠷᠬᠦ ᠂ ᠶᠠᠪᠤᠳᠠᠯ ᠢ᠋ᠶ᠋ᠠᠷ ᠨᠡᠷᠡᠯᠡᠬᠦ ᠵᠦᠢᠯ
ᠬᠤᠷᠳᠤᠨ ᠰᠤᠭᠤᠨᠠᠭ᠂ ᠬᠤᠯᠠᠨ ᠲᠣᠭᠣᠰᠣᠲᠤ᠂ ᠣᠷᠣᠭᠠ ᠶ᠋ᠢᠨ ᠣᠷᠣᠭᠠ ᠂ ᠵᠢᠷᠣᠭᠠ ᠶ᠋ᠢᠨ ᠵᠢᠷᠣᠭᠠ᠂ ᠨᠣᠢᠷᠮᠤᠭ ᠬᠠᠯᠢᠭᠤᠨ᠂ ᠤᠨᠲᠠᠩᠬᠠᠢ ᠪᠤᠳᠠᠩ᠂ ᠳᠠᠬᠢᠳᠠᠢ ᠪᠣᠷᠣ᠂ ᠡᠷᠡᠮᠡᠨ ᠳᠡᠭᠦᠯᠢᠭᠡ᠂ ᠱᠠᠯᠳᠠᠩ ᠬᠤᠸᠠ᠂ ᠵᠠᠯᠭᠢᠳᠠᠭ ᠪᠣᠷᠣ ᠭᠡᠬᠦ ᠮᠡᠲᠦ᠃
ᠮᠣᠳᠣ ᠤᠷᠭᠤᠮᠠᠯ ᠂ ᠪᠣᠳᠠᠰ ᠢ᠋ᠶ᠋ᠠᠷ ᠨᠡᠷᠡᠯᠡᠬᠦ ᠵᠦᠢᠯ
ᠽᠠᠨᠳᠠᠨ ᠬᠦᠷᠡᠩ᠂ ᠬᠤᠯᠤᠰᠤᠨ ᠰᠢᠷᠭᠠ᠂ ᠴᠢᠪᠠᠭᠠᠨ ᠬᠦᠷᠡᠩ᠂ ᠰᠢᠩᠬᠤᠨ ᠵᠡᠭᠡᠷᠳᠡ᠂ ᠬᠦ ᠬᠠᠷᠠ᠂ ᠬᠢᠯᠢᠩ ᠬᠠᠷᠠ᠂ ᠥᠭᠡᠳᠡᠩ ᠬᠠᠷᠠ᠂ ᠰᠤᠬᠠᠢ ᠬᠦᠷᠡᠩ ᠭᠡᠬᠦ ᠮᠡᠲᠦ᠃
ᠨᠠᠰᠤ ᠰᠢᠳᠦ ᠪᠡᠷ ᠨᠡᠷᠡᠯᠡᠬᠦ ᠵᠦᠢᠯ
ᠤᠨᠠᠭᠠᠨ ᠬᠡᠭᠡᠷ᠂ ᠲᠡᠭᠡᠨ ᠰᠠᠭᠠᠷᠠᠯ᠂ ᠦᠷᠢᠶᠡᠨ ᠵᠡᠭᠡᠷᠳᠡ᠂ ᠠᠵᠢᠷᠭᠠᠨ ᠪᠣᠷᠣ ᠭᠡᠬᠦ ᠮᠡᠲᠦ᠃