ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠲᠠᠪᠤ ᠂ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤᠨ ᠪᠦᠯᠦᠭ 2 > Хөх зул – Боржигон Ванжал –"Тав ᠂ Таван хошуу малын бүлэг " 2
275ᠲᠠᠪᠤ ᠂ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤᠨ ᠪᠦᠯᠦᠭ – 2
ᠠᠳᠤᠭᠤᠨ ᠤ ᠨᠠᠰᠤ ᠰᠢᠳᠦᠨ ᠦ ᠨᠡᠷᠡᠢᠳᠦᠯ Адууны нас шүдний нэрэйдэл
ᠠᠳᠤᠭᠤ
ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠨᠢᠭᠡ᠂ ᠪᠢᠲᠡᠭᠦᠦ ᠳᠤᠭᠤᠷᠠᠢᠲᠠᠢ ᠪᠤᠲᠠ ᠮᠠᠯ ᠤ᠋ᠨ ᠶᠡᠷᠦᠩᠬᠡᠢᠯᠡᠭᠰᠡᠨ ᠨᠡᠷᠡᠢᠳᠦᠯ ( ᠮᠣᠷᠢ ᠂ ᠠᠵᠢᠷᠭᠠ ᠂ ᠭᠡᠭᠦᠦ ᠂ ᠤᠨᠠᠭᠠ ᠵᠡᠷᠭᠡ ᠪᠡᠷ ᠪᠦᠷᠢᠯᠳᠦᠭᠰᠡᠨ ᠨᠢᠭᠡᠨ ᠴᠣᠭᠴᠠ ᠰᠦᠷᠦᠭ ) ᠃
ᠠᠳᠤᠭᠤ ᠰᠠᠯᠬᠢᠳᠠᠬᠤ
ᠨᠠᠮᠤᠷ ᠲᠤ᠌ ᠠᠳᠤᠭᠤ ᠬᠠᠯᠠᠭᠤᠨ ᠪᠤᠶᠤ ᠢᠯᠠᠭᠠ ᠰᠢᠮᠠᠭᠤᠯ ᠳ᠋ᠤ᠌ ᠬᠠᠵᠠᠭᠳᠠᠨ ᠲᠡᠰᠬᠦ ᠠᠯᠳᠠᠷᠠᠬᠤ ᠳ᠋ᠠᠭᠠᠨ ᠰᠠᠯᠬᠢ ᠰᠥᠷᠦᠨ ᠭᠦᠶᠦᠬᠦ᠃ ᠠᠳᠤᠭᠤ ᠤᠷᠤᠭᠤᠳᠠᠬᠤ ᠰᠠᠯᠬᠢ ᠰᠢᠭᠤᠷᠭᠠᠨ ᠪᠤᠶᠤ ᠰᠢᠷᠦᠭᠦᠨ ᠪᠣᠷᠣᠭᠠᠨ ᠳ᠋ᠤ᠌ ᠠᠳᠤᠭᠤ ᠲᠣᠭᠲᠠᠵᠤ ᠳᠡᠢᠯᠬᠦ ᠦᠭᠡᠢ ᠰᠠᠯᠬᠢ ᠰᠢᠭᠤᠷᠭᠠ᠂ ᠪᠣᠷᠣᠭᠠᠨ ᠢ᠋ ᠳᠠᠭᠠᠵᠤ ᠭᠤᠯᠠᠰᠤᠨ ᠶᠠᠪᠤᠬᠤ᠃
ᠠᠳᠤᠭᠤ ᠮᠠᠨᠠᠬᠤ
ᠠᠳᠤᠭᠤ ᠶ᠋ᠢ ᠴᠢᠨᠣᠠ ᠨᠣᠬᠠᠢ ᠠ᠋ᠴᠠ ᠪᠤᠶᠤ ᠪᠣᠷᠣᠭᠠᠨ ᠰᠢᠭᠤᠷᠭᠠᠨ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠵᠤ ᠠᠳᠤᠭᠤ ᠪᠠᠨ ᠰᠠᠬᠢᠵᠤ ᠬᠣᠨᠣᠬᠤ᠃ ᠤᠨᠠᠭᠠ ᠠᠳᠤᠭᠤᠨ ᠤ᠋ ᠲᠤᠰ ᠵᠢᠯ ᠦ᠋ᠨ ᠲᠥᠯ ᠢ᠋ ᠬᠦᠢᠰᠦ ᠢᠯᠭᠠᠭᠰᠠᠨ ᠦᠭᠡᠢ ᠨᠡᠷᠡᠯᠡᠭᠰᠡᠨ ᠨᠡᠷᠡᠢᠳᠦᠯ᠃
ᠡᠷᠡ ᠤᠨᠠᠭᠠ
ᠠᠳᠤᠭᠤᠨ ᠤ᠋ ᠡᠷᠡ ᠬᠦᠢᠰᠦ ᠪᠦᠬᠦᠢ ᠨᠢᠭᠡ ᠨᠠᠰᠤᠲᠠᠢ ᠠᠳᠤᠭᠤ᠃
ᠥᠬᠢᠨ ᠤᠨᠠᠭᠠ
ᠠᠳᠤᠭᠤᠨ ᠤ᠋ ᠡᠮᠡ ᠬᠦᠢᠰᠦ ᠪᠦᠬᠦᠢ ᠨᠢᠭᠡ ᠨᠠᠰᠤᠲᠠᠢ ᠠᠳᠤᠭᠤ ᠃ ᠨᠠᠷᠢᠨ ᠤᠴᠢᠷ ᠢ᠋ ᠣᠷᠣᠰᠢᠯ ᠤ᠋ᠨ 《ᠥᠬᠢᠨ ᠲᠥᠯ 》 ᠳ᠋ᠦ᠍ ᠦᠵᠡ᠃ ᠤᠤᠭᠠᠨ ᠤᠨᠠᠭᠠ
ᠬᠠᠮᠤᠭ ᠲᠦᠷᠦᠭᠦᠦ ᠭᠠᠷᠤᠭᠰᠠᠨ ᠤᠨᠠᠭᠠ᠃
ᠬᠡᠨᠵᠡ ᠤᠨᠠᠭᠠ
ᠨᠠᠮᠤᠷᠰᠢᠵᠤ ᠭᠠᠷᠤᠭᠰᠠᠨ ᠤᠨᠠᠭᠠ᠃
ᠠᠯᠲᠠᠨ ᠤᠨᠠᠭᠠ
ᠬᠦᠰᠡᠯᠡᠩ ᠦ᠋ᠨ ᠵᠢᠭᠦᠷᠲᠦ ᠬᠦᠯᠦᠭ᠂ ᠪᠠᠰᠠ ᠡᠷᠳᠡᠨᠢ ᠶ᠋ᠢᠨ ᠤᠨᠠᠭᠠ ᠭᠡᠳᠡᠭ᠃ ᠠᠳᠤᠭᠤᠨ ᠳ᠋ᠤ᠌ 《ᠪᠤᠮ 》 ᠤ᠋ᠨ ᠲᠠᠮᠠᠭᠠ ᠳᠠᠷᠤᠬᠤ ᠪᠣᠯᠬᠤ ᠳ᠋ᠤ᠌ ᠨᠢᠭᠡ ᠭᠠᠷᠳᠠᠭ ᠭᠡᠰᠡᠨ ᠳᠣᠮᠣᠭ ᠪᠣᠢ᠃
ᠭᠥᠭᠡᠢ ᠤᠨᠠᠭᠠ
ᠨᠡᠯᠢᠶᠡᠳ ᠣᠷᠣᠢ ᠡᠪᠦᠯ ᠭᠠᠷᠤᠭᠰᠠᠨ ᠤᠨᠠᠭᠠ᠃
ᠭᠥᠭᠡᠢ ᠲᠥᠯ
ᠡᠪᠦᠯ ᠦ᠋ᠨ ᠲᠥᠯ᠃
ᠳᠠᠬᠤᠯᠠᠢ ᠤᠨᠠᠭᠠ
ᠬᠠᠪᠤᠷ ᠡᠷᠲᠡ ᠭᠠᠷᠤᠭᠰᠠᠨ ᠤᠨᠠᠭᠠ᠂ ᠵᠠᠷᠢᠮ ᠭᠠᠵᠠᠷ ᠬᠣᠨᠢ ᠢᠮᠠᠭᠠᠨ ᠳᠡᠭᠡᠷᠡ ᠠᠯᠳᠠᠰᠢ ᠭᠡᠳᠡᠭ᠃
ᠬᠠᠪᠴᠢ ( ᠬᠠᠪᠴᠢᠭ ) ᠤᠨᠠᠭᠠ
ᠵᠢᠯ ᠵᠠᠪᠰᠠᠷ ᠭᠠᠷᠤᠭᠰᠠᠨ ᠤᠨᠠᠭᠠ᠂ ᠵᠢᠯ ᠦ᠋ᠨ ᠡᠴᠦᠰ ᠰᠠᠷᠠ ᠳ᠋ᠤ᠌ ᠭᠠᠷᠤᠭᠰᠠᠨ ᠤᠨᠠᠭᠠ᠃
ᠤᠨᠠᠭᠠ ᠣᠷᠬᠢᠬᠤ
ᠭᠡᠭᠦᠦ ᠰᠠᠷᠠ ᠭᠦᠢᠴᠡᠭᠡ ᠦᠭᠡᠢ ᠪᠡᠷ ᠤᠨᠠᠭᠠᠯᠠᠬᠤ᠃
ᠤᠨᠠᠭᠠ ᠬᠥᠨᠳᠡᠯᠢᠰᠬᠦ
ᠭᠡᠭᠦᠨ ᠦ᠌ ᠬᠡᠪᠡᠯᠢ ᠳ᠋ᠡᠬᠢ ᠤᠨᠠᠭᠠ ᠬᠥᠨᠳᠡᠯᠡᠨ ᠪᠣᠯᠬᠤ᠃
ᠤᠨᠠᠭᠠᠨ ᠵᠠᠭᠤᠰᠢ
ᠤᠨᠠᠭᠠ ᠲᠥᠷᠥᠬᠦ ᠳ᠋ᠡᠭᠡᠨ ᠠᠮᠠᠨ ᠳᠣᠲᠣᠷᠠ ᠪᠠᠨ ᠰᠢᠮᠡᠵᠦ ᠪᠠᠢᠭᠰᠠᠨ ᠡᠯᠢᠭᠡ ᠪᠥᠭᠡᠷᠡ ᠶ᠋ᠢᠨ ᠵᠦᠰᠦᠮ ᠰᠢᠭ ᠬᠡᠰᠡᠭ ᠶᠠᠭᠤᠮᠠ ᠭᠠᠷᠭᠠᠳᠠᠭ᠂ ᠲᠡᠭᠦᠨ ᠢ᠋ ᠤᠨᠠᠭᠠᠨ ᠵᠠᠭᠤᠰᠢ ᠭᠡᠳᠡᠭ : ᠰᠠᠭᠠᠯᠢ ᠨᠡᠷᠡᠭᠴᠢᠳ ᠠᠢᠷᠠᠭ ᠲᠠᠭᠠᠨ ᠬᠢᠳᠡᠭ᠃
ᠤᠨᠠᠭᠠᠨ ᠳᠡᠯ
ᠢᠵᠠᠭᠤᠷ᠂ ᠤᠭ ᠤ᠋ᠨ ᠭᠡᠰᠡᠨ ᠤᠳᠬᠠ ᠲᠠᠢ᠂ ᠤᠨᠠᠭᠠᠨ ᠴᠠᠭ ᠠ᠋ᠴᠠ ᠪᠠᠨ ᠠᠪᠤᠭᠠ ᠦᠭᠡᠢ ᠳᠡᠯ᠃ ᠵᠢᠱ᠌ᠢᠶᠡᠯᠡᠪᠡᠯ : ᠤᠨᠠᠭᠠᠨ ᠳᠡᠯᠳᠡᠢ ᠠᠵᠢᠷᠭᠠ᠂ ᠪᠠᠷᠰ ᠲᠠᠢ ᠲᠤᠯᠤᠯᠳᠤᠨᠠ ᠭᠡᠰᠡᠨ ᠦᠯᠢᠭᠡᠷ ᠪᠠᠢᠳᠠᠭ ᠪᠢᠰᠢ ᠤᠤ᠃
ᠤᠨᠠᠭᠠᠨ ᠮᠣᠷᠢ
ᠥᠪᠡᠷ ᠦ᠋ᠨ ᠠᠳᠤᠭᠤᠨ ᠤ᠋ ᠭᠡᠭᠦᠦ ᠡᠴᠡ ᠭᠠᠷᠤᠭᠰᠠᠨ ᠮᠣᠷᠢ : ᠲᠡᠷᠡ ᠵᠢᠯ ᠦ᠋ᠨ ᠤᠯᠤᠰ ᠤ᠋ᠨ ᠲᠡᠮᠳᠡᠭᠯᠡᠯ ᠡᠪᠳᠡᠭᠰᠡᠨ ᠬᠠᠷᠠ ᠬᠠᠯᠵᠠᠨ ᠮᠣᠷᠢ ᠴᠢᠨᠢ ᠮᠢᠨᠦ ᠤᠨᠠᠭᠠᠨ ᠮᠣᠷᠢ ᠳᠠ᠃
ᠤᠨᠠᠭᠠᠨ ᠠᠵᠢᠷᠭᠠ
ᠥᠪᠡᠷ ᠦ᠋ᠨ ᠰᠦᠷᠦᠭ ᠡᠴᠡ ᠲᠠᠯᠪᠢᠭᠰᠠᠨ ᠠᠵᠢᠷᠭᠠ᠃
ᠤᠨᠠᠭᠠᠨ ᠠᠳᠤᠭᠤ
ᠤᠤᠯ ᠠ᠋ᠴᠠ ᠪᠠᠢᠭᠰᠠᠨ ᠠᠳᠤᠭᠤ : ᠡᠨᠡ ᠠᠳᠤᠭᠤ ᠴᠢᠨᠢ ᠴᠤᠭᠭᠠᠷ ᠢ᠋ᠶ᠋ᠠᠨ ᠮᠢᠨᠦ ᠤᠨᠠᠭᠠᠨ ᠠᠳᠤᠭᠤᠳ ᠪᠣᠯᠤᠨᠠ᠃ ᠤᠨᠠᠭᠠᠨ ᠵᠢᠷᠣᠭᠠ ᠤᠨᠠᠭᠠ ᠠᠬᠤ ᠴᠠᠭ ᠠ᠋ᠴᠠ ᠪᠠᠨ ᠵᠢᠷᠣᠭᠠ ᠪᠠᠢᠭᠠ᠂ ᠲᠥᠷᠥᠯᠬᠢ ᠵᠢᠷᠣᠭᠠ ᠶ᠋ᠢ ᠬᠡᠯᠡᠨᠡ᠃ ᠤᠨᠠᠭᠠᠨ ᠵᠢᠷᠣᠭᠠ ᠨᠡᠮᠡᠯᠲᠡ ᠦᠭᠡᠢ ᠭᠡᠬᠦ ᠮᠡᠲᠦ᠃
ᠤᠨᠠᠭᠠᠨ ᠳᠠᠭᠤ
ᠤᠨᠠᠭᠠ ᠠᠳᠠᠯᠢ ᠤᠶᠠᠩᠭᠠᠲᠠᠢ ᠰᠠᠢᠬᠠᠨ ᠢᠨᠴᠠᠭᠠᠬᠤ᠃
ᠤᠨᠠᠭᠠᠯᠠᠬᠤ
ᠭᠡᠭᠦᠦ ᠲᠥᠯᠯᠡᠬᠦ ᠶ᠋ᠢ ᠭᠡᠭᠦᠦ ᠲᠥᠷᠥᠬᠦ ᠭᠡᠳᠡᠭ ᠦᠭᠡᠢ᠂ ᠬᠠᠷᠢᠨ ᠭᠡᠭᠦᠦ ᠤᠨᠠᠭᠠᠯᠠᠬᠤ ᠭᠡᠳᠡᠭ᠃
ᠲᠠᠪᠠᠭ ᠰᠠᠭᠠᠷᠢ
ᠰᠢᠳᠦᠯᠡᠩ ᠪᠠᠢᠳᠠᠰᠤᠨ ᠤ᠋ ᠤᠨᠠᠭᠠ᠃
ᠰᠠᠷᠪᠠ
ᠤᠨᠠᠭᠠ᠂ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠦ ᠪᠡᠷ ᠲᠣᠷᠨᠢᠨ ᠳᠡᠪᠡᠭᠡᠷᠡᠵᠦ ᠪᠡᠶᠡ ᠨᠢ ᠴᠢᠩᠭᠠᠷᠠᠵᠤ ᠦᠰᠦ ᠪᠡᠨ ᠠᠩᠬᠠ ᠰᠣᠯᠢᠭᠰᠠᠨ ᠡᠨᠡ ᠦᠶᠡ ᠶ᠋ᠢ ᠣᠯᠠᠩᠬᠢ ᠭᠠᠵᠠᠷ ᠲᠠᠪᠠᠭᠯᠠᠭᠰᠠᠨ ᠭᠡᠳᠡᠭ᠃ ᠡᠭᠦᠨ ᠡᠴᠡ ᠡᠬᠢᠯᠡᠨ ᠳᠠᠷᠠᠭᠠ ᠵᠢᠯ ᠦ᠋ᠨ ᠣᠢ ᠳ᠋ᠠᠭᠠᠨ ᠬᠦᠷᠦᠭᠡᠳᠦᠢ ᠡᠨᠡ ᠬᠦ᠌ ᠬᠤᠭᠤᠴᠠᠭᠠᠨ ᠳ᠋ᠠᠬᠢ ᠪᠦᠳᠦᠭᠦᠷᠡᠭᠰᠡᠨ ᠤᠨᠠᠭᠠ ᠶ᠋ᠢ ᠬᠦᠢᠰᠦ ᠢᠯᠭᠠᠭᠰᠠᠨ ᠦᠭᠡᠢ ᠨᠡᠷᠡᠯᠡᠭᠰᠡᠨ ᠨᠡᠷᠡᠢᠳᠦᠯ ᠂ 1 ᠨᠠᠰᠤᠲᠠᠢ ᠠᠳᠤᠭᠤ᠃
ᠡᠷᠡ ᠰᠠᠷᠪᠠ ᠪᠦᠳᠦᠭᠦᠷᠡᠭᠰᠡᠨ ᠡᠷᠡ ᠤᠨᠠᠭᠠ᠃
ᠥᠬᠢᠨ ᠰᠠᠷᠪᠠ ᠪᠦᠳᠦᠭᠦᠷᠡᠭᠰᠡᠨ ᠥᠬᠢᠨ ᠤᠨᠠᠭᠠ᠃
ᠳᠠᠭᠠ ᠬᠣᠶᠠᠷ ᠨᠠᠰᠤᠲᠠᠢ ᠠᠳᠤᠭᠤᠨ ᠤ᠋ ᠬᠦᠢᠰᠦ ᠢᠯᠭᠠᠭᠰᠠᠨ ᠦᠭᠡᠢ ᠨᠡᠷᠡᠢᠳᠦᠯ᠃
ᠡᠷᠡ ᠳᠠᠭᠠ ᠡᠷᠡ ᠬᠦᠢᠰᠦ ᠪᠦᠬᠦᠢ ᠬᠣᠶᠠᠷ ᠨᠠᠰᠤᠲᠠᠢ ᠠᠳᠤᠭᠤ᠃
ᠥᠬᠢᠨ ᠳᠠᠭᠠ ᠡᠮᠡ ᠬᠦᠢᠰᠦ ᠪᠦᠬᠦᠢ ᠬᠣᠶᠠᠷ ᠨᠠᠰᠤᠲᠠᠢ ᠠᠳᠤᠭᠤ᠃
ᠨᠣᠭᠣᠭᠠᠨ ᠤ᠋ ᠳᠠᠭᠠ
ᠬᠣᠢᠲᠤᠨ ᠬᠠᠪᠤᠷ ᠤ᠋ᠨ ᠬᠢᠨᠢ ᠨᠣᠭᠣᠭᠠᠨ ᠳ᠋ᠤ᠌ ᠴᠠᠳᠤᠭᠰᠠᠨ ᠰᠠᠷᠪᠠ ᠶ᠋ᠢᠨ ᠬᠦᠢᠰᠦ ᠢᠯᠭᠠᠭᠰᠠᠨ ᠦᠭᠡᠢ ᠨᠡᠷᠡᠯᠡᠭᠰᠡᠨ ᠨᠡᠷᠡᠢᠳᠦᠯ᠃
ᠨᠣᠭᠣᠭᠠᠨ ᠤ᠋ ᠡᠷᠡ ᠳᠠᠭᠠ
ᠨᠣᠭᠣᠭᠠᠨ ᠳ᠋ᠤ᠌ ᠴᠠᠳᠤᠭᠰᠠᠨ ᠡᠷᠡ ᠬᠦᠢᠰᠦᠨ ᠦ᠌ ᠬᠣᠶᠠᠷ ᠨᠠᠰᠤᠲᠠᠢ ᠠᠳᠤᠭᠤ᠃
ᠨᠣᠭᠣᠭᠠᠨ ᠤ᠋ ᠥᠬᠢᠨ ᠳᠠᠭᠠ
ᠨᠣᠭᠣᠭᠠᠨ ᠳ᠋ᠤ᠌ ᠴᠠᠳᠤᠭᠰᠠᠨ ᠡᠮᠡ ᠬᠦᠢᠰᠦᠨ ᠦ᠌ ᠬᠣᠶᠠᠷ ᠨᠠᠰᠤᠲᠠᠢ ᠠᠳᠤᠭᠤ᠃
ᠢᠰᠬᠡᠯ ᠳᠠᠭᠠ
ᠬᠤᠰᠠᠷᠠᠩ ᠳᠠᠭᠠ᠂ ᠵᠢᠯ ᠥᠨᠵᠢᠭᠰᠡᠨ ( ᠢᠰᠦᠭᠰᠡᠨ ) ᠰᠦ ᠬᠥᠬᠥᠭᠰᠡᠨ ᠳᠠᠭᠠ ᠭᠡᠰᠡᠨ ᠤᠳᠬᠠ ᠲᠠᠢ᠃
ᠲᠠᠭᠠᠨ ᠳᠡᠯ ① ᠬᠣᠶᠠᠷ ᠨᠠᠰᠤᠲᠠᠢ ᠠᠳᠤᠭᠤᠨ ᠤ᠋ ᠳᠡᠯ᠂
② ᠭᠠᠵᠠᠷ ᠤ᠋ᠨ ᠨᠡᠷᠡ᠃
ᠲᠠᠭᠠᠨ ᠳᠡᠯᠯᠡᠭᠡ
ᠪᠠᠰᠠ ᠳᠠᠭᠠ ᠲᠠᠮᠠᠭᠠᠯᠠᠨᠠ ᠴᠤ᠌ ᠭᠡᠳᠡᠭ᠂ ᠵᠤᠨ ᠪᠣᠯᠵᠤ ᠠᠳᠤᠭᠤ ᠨᠣᠭᠣᠭᠠᠨ ᠳ᠋ᠤ᠌ ᠴᠠᠳᠴᠤ ᠳ᠋ᠠᠬᠢ ᠪᠠᠨ ᠭᠡᠭᠡᠵᠦ ᠴᠠᠢᠷᠠᠭᠰᠠᠨ ᠦᠶᠡ᠂ ᠠᠳᠤᠭᠤᠨ ᠤ᠋ ᠠᠢᠯ᠂ ᠡᠳᠦᠷ ᠪᠣᠯᠵᠣᠨ ᠣᠷᠴᠢᠨ ᠬᠠᠪᠢ ᠶ᠋ᠢᠨ ᠬᠢᠨ ᠳ᠋ᠡᠭᠡᠨ ᠳᠠᠭᠠ ᠶ᠋ᠢᠨ ᠳᠡᠯᠯᠡᠭᠡ ᠶ᠋ᠢᠨ ᠨᠠᠢᠷ ᠬᠢᠨᠡ ᠭᠡᠵᠦ ᠵᠠᠷ ᠲᠠᠷᠬᠠᠨᠠ᠃ ᠢᠩᠭᠢᠵᠦ ᠣᠯᠠᠨ ᠬᠥᠮᠦᠨ ᠴᠤᠭᠯᠠᠭᠠᠵᠤ ᠳᠠᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠯ ᠢ᠋ ᠬᠢᠷᠭᠠᠬᠤ ᠠ᠋ᠴᠠ ᠭᠠᠳᠠᠨᠠ ᠳᠠᠭᠠ ᠪᠠᠨ ᠠᠯᠳᠠᠵᠤ ᠭᠡᠭᠡᠬᠦ ᠡᠴᠡ ᠪᠣᠯᠭᠣᠮᠵᠢᠯᠠᠨ ᠥᠪᠡᠷ ᠦ᠋ᠨ ᠣᠨᠴᠠᠯᠠᠭᠰᠠᠨ ᠲᠠᠮᠠᠭᠠ ᠪᠠᠨ ᠤᠯᠠᠢᠳᠬᠠᠨ ᠳ᠋ᠠᠭᠠᠨ ᠤ᠋ ᠬᠣᠩᠬᠣᠷ ᠭᠤᠶᠠ ᠪᠤᠶᠤ ᠬᠠᠪᠲᠠᠭᠠᠢ ᠲᠠᠰᠢᠶᠠᠨ ᠳ᠋ᠤᠨᠢ ᠳᠠᠷᠤᠵᠤ ᠲᠠᠮᠠᠭᠠᠯᠠᠳᠠᠭ᠃
ᠢᠩᠭᠢᠵᠦ ᠪᠣᠯᠵᠣᠭᠰᠠᠨ ᠡᠳᠦᠷ ᠨᠢ ᠪᠣᠯᠬᠤ ᠳ᠋ᠤ᠌ ᠬᠣᠯᠠ ᠣᠢᠷᠠ ᠠ᠋ᠴᠠ ᠤᠷᠭᠠᠴᠢᠨ᠂ ᠨᠣᠭᠲᠣᠴᠢᠨ᠂ ᠡᠪᠦᠭᠡᠨ ᠵᠠᠯᠠᠭᠤ᠂ ᠥᠬᠢᠳ ᠪᠡᠷᠢᠶᠡᠳ ᠠᠯᠢ ᠥᠩᠭᠡᠲᠡᠢ ᠪᠡᠨ ᠡᠮᠦᠰᠴᠦ ᠂ ᠥᠭᠡᠳᠡᠲᠡᠢ ᠪᠡᠨ ᠬᠥᠲᠥᠯᠵᠦ ᠨᠠᠢᠷ ᠨᠠᠭᠠᠳᠤᠮ ᠳ᠋ᠤ᠌ ᠬᠥᠷ ᠬᠥᠭᠵᠢᠶᠡᠲᠠᠢ ᠴᠤᠭᠯᠠᠷᠠᠨ ᠢᠷᠡᠵᠡᠭᠡᠨᠡ ᠃ ᠠᠳᠤᠭᠤᠨ ᠤ᠋ ᠠᠢᠯ ᠡᠨᠡ ᠡᠳᠦᠷ ᠬᠣᠨᠢ ᠢᠮᠠᠭᠠ ᠨᠢᠲᠤᠯᠵᠤ ᠂ ᠬᠣᠭᠣᠯᠠ ᠤᠮᠳᠠ ᠶᠡᠬᠡ ᠪᠡᠷ ᠪᠠᠵᠠᠭᠠᠨ ᠂ ᠰᠢᠷᠡᠭᠡ ᠵᠠᠰᠠᠨ ᠴᠠᠢ ᠂ ᠠᠷᠢᠬᠢ ᠪᠠᠷ ᠵᠤᠵᠠᠭᠠᠨ ( ᠤᠷᠢᠳ ᠢ᠋ᠶ᠋ᠠᠷ ᠴᠡᠢᠯᠡᠵᠦ ᠂ ᠳᠠᠷᠠᠭᠠ ᠨᠢ ᠠᠷᠢᠬᠢ ᠪᠠᠭᠠ ᠭᠠᠷᠭᠠᠵᠤ ᠂ ᠠᠳᠤᠭᠤᠨ ᠳᠡᠯᠯᠡᠭᠡ ᠪᠠᠷᠠᠭᠰᠠᠨ ᠤ᠋ ᠬᠣᠢᠨᠠ ᠶᠡᠬᠡ ᠪᠡᠷ ᠠᠷᠢᠬᠢᠳᠠᠨ ᠂ ᠮᠢᠬᠠ ᠢᠳᠡᠨ ᠨᠠᠢᠷᠯᠠᠨᠠ ) ᠳᠠᠢᠯᠠᠨᠠ᠃
ᠳᠡᠯᠯᠡᠭᠡ
ᠲᠠᠮᠠᠭᠠᠯᠠᠭᠠ ᠲᠠᠢ ᠬᠠᠮᠲᠤ ᠶᠠᠪᠤᠭᠤᠯᠤᠨᠠ᠃ ᠭᠡᠷ ᠦ᠋ᠨ ᠬᠠᠪᠢ ᠳ᠋ᠤ᠌ ᠠᠯᠢ ᠨᠢᠭᠡ ᠲᠡᠭᠰᠢ ᠰᠠᠢᠬᠠᠨ ᠭᠠᠵᠠᠷ ᠢ᠋ ᠰᠣᠩᠭᠣᠵᠤ ᠬᠡᠳᠦᠨ ᠵᠠᠭᠤᠨ ᠠᠳᠤᠭᠤ ᠶ᠋ᠢ ᠨᠠᠷᠠᠨ ᠠ᠋ᠴᠠ ᠡᠮᠦᠨᠡ ᠳᠠᠪᠬᠢᠲᠠᠯᠠ ᠬᠤᠷᠢᠶᠠᠵᠤ ᠬᠠᠵᠠᠭᠤ ᠳ᠋ᠤᠨᠢ ᠦᠷᠲᠦᠩ ᠲᠦᠯᠡᠵᠦ ᠲᠠᠮᠠᠭᠠ ᠤᠯᠠᠢᠯᠭᠠᠨᠠ᠃ ᠰᠣᠩᠭᠣᠭᠳᠠᠭᠰᠠᠨ ᠳᠡᠯᠯᠡᠭᠡ ᠶ᠋ᠢᠨ ᠠᠬᠠᠮᠠᠳ ᠠ᠋ᠴᠠ ᠢᠷᠡᠭᠰᠡᠨ ᠬᠥᠮᠦᠰ ᠦ᠋ᠨ ᠣᠨᠴᠠᠯᠢᠭ ᠢ᠋ ᠦᠵᠡᠨ᠂ ᠤᠷᠭᠠᠴᠢ᠂ ᠨᠣᠭᠳᠣᠴᠢ᠂ ᠰᠡᠭᠦᠯ ᠴᠣᠬᠢᠭᠴᠢ᠂ ᠳᠡᠯᠯᠡᠭᠴᠢ᠂ ᠲᠠᠮᠠᠭᠠ ᠵᠥᠭᠡᠭᠡᠭᠴᠢ᠂ ᠳᠠᠷᠤᠭᠴᠢ᠂ ᠠᠳᠤᠭᠤ ᠬᠤᠷᠢᠶᠠᠭᠴᠢ ᠭᠡᠵᠦ ᠵᠢᠷᠭᠤᠭᠠ ᠳᠣᠯᠣᠭᠠᠨ ᠳᠤᠭᠤᠢᠯᠠᠩ ᠵᠣᠬᠢᠶᠠᠨ ᠪᠠᠢᠭᠤᠯᠵᠤ ᠠᠵᠢᠯ ᠡᠭᠦᠷᠭᠡ ᠬᠤᠪᠢᠶᠠᠷᠢᠯᠠᠨᠠ᠃ ᠠᠳᠤᠭᠤᠴᠢᠨ ᠠ᠋ᠴᠠ ᠡᠨᠡ ᠦᠶᠡ ᠥᠪᠡᠷ ᠲᠡᠭᠡᠨ ᠤᠷᠭᠠ ᠶ᠋ᠢᠨ ᠪᠤᠶᠤ ᠨᠣᠭᠲᠤᠨ ᠤ᠋ ᠮᠣᠷᠢᠲᠠᠢ ᠢᠷᠡᠭᠰᠡᠳ ᠡᠴᠡ ᠪᠤᠰᠤᠳ ᠲᠤᠨᠢ ᠣᠨᠴᠠᠯᠢᠭ ᠢ᠋ᠶ᠋ᠠᠷ ᠨᠢ ᠲᠣᠬᠢᠷᠠᠭᠰᠠᠨ ᠮᠣᠷᠢᠳ ᠢ ᠪᠡᠷᠢᠯᠡᠵᠦ ᠥᠭᠭᠦᠨᠡ᠃ ᠮᠣᠷᠢᠳ ᠲᠣᠬᠢᠷᠠᠭᠤᠯᠵᠤ ᠪᠠᠷᠠᠮᠠᠭᠴᠠ ᠠᠳᠤᠭᠤᠴᠢᠨ ( ᠥᠪᠡᠰᠦᠪᠡᠨ ᠬᠡᠳᠦᠢ ᠰᠠᠢᠨ ᠤᠷᠭᠠᠴᠢ ᠴᠤ᠌ ᠥᠪᠡᠷ ᠦ᠋ᠨ ᠠᠳᠤᠭᠤᠨ ᠳ᠋ᠠᠭᠠᠨ ᠤᠷᠭᠠᠯᠠᠬᠤ ᠦᠭᠡᠢ᠂ ᠡᠨᠡ ᠨᠢ ᠢᠷᠡᠭᠰᠡᠨ ᠣᠯᠠᠨ ᠤᠷᠭᠠᠴᠢᠳ ᠲᠤ᠌ ᠨᠠᠢᠷ ᠲᠠᠯᠪᠢᠨ ᠬᠦᠨᠳᠦᠯᠡᠵᠦ ᠪᠠᠢᠭᠠ ᠤᠬᠠᠭᠠᠨ ᠲᠠᠢ ) ᠣᠬᠣᠷ ᠤᠷᠭᠠ ᠪᠠᠷᠢᠵᠤ ᠮᠣᠷᠳᠠᠭᠠᠳ᠂ ᠤᠷᠢᠳ ᠢ᠋ᠶ᠋ᠠᠷ ᠭᠠᠷ ᠤ᠋ᠨ ᠠᠮᠠᠷ ᠲᠤ᠌ ᠪᠦᠳᠦᠭᠦᠨ ᠢ᠋ ᠨᠢ ᠪᠡᠷᠢᠯᠡᠶᠡ ᠭᠡᠳ ᠳᠡᠯ ᠰᠡᠭᠦᠯ ᠶᠡᠬᠡᠲᠡᠢ ᠥᠪᠡᠷ ᠦ᠋ᠨ ᠰᠤᠪᠠᠢ ᠭᠡᠭᠦᠳ ᠢ ᠵᠢᠭᠠᠵᠤ ᠥᠭᠭᠦᠨᠡ᠃ ᠠᠳᠤᠭᠤᠴᠢᠨ ᠨᠢᠭᠡ ᠶ᠋ᠢ ᠵᠢᠭᠠᠬᠤ ᠳ᠋ᠤ᠌ ᠬᠡᠳᠦ ᠬᠡᠳᠦᠨ ᠤᠷᠭᠠᠴᠢᠨ ᠬᠡᠨ ᠬᠡᠨ ᠡᠴᠡ ᠪᠡᠨ ᠤᠷᠢᠲᠠᠨᠠ ᠭᠡᠵᠦ ᠤᠷᠤᠯᠳᠤᠨ ᠤᠷᠭᠠᠯᠠᠵᠠᠭᠠᠨᠠ᠃ ᠰᠠᠢᠨ ᠤᠷᠭᠠᠴᠢᠨ ᠭᠡᠵᠦ ᠦᠨᠡᠬᠡᠷ ᠪᠢᠰᠢᠷᠡᠮᠡ᠂ ᠤᠷᠭᠠ ᠶ᠋ᠢᠨ ᠦᠵᠦᠭᠦᠷ᠂ ᠠᠯᠲᠠ ᠳᠡᠯᠢᠮ ᠳᠤᠲᠠᠵᠤ ᠪᠠᠢᠬᠤ ᠳ᠋ᠤ᠌ ᠲᠡᠷᠡ ᠡᠮᠡᠭᠡᠯ ᠦ᠋ᠨ ᠡᠮᠦᠨᠡ ᠪᠦᠭᠦᠷᠭᠡ᠂ ᠳᠡᠯ ᠳᠡᠭᠡᠷᠡ ᠬᠡᠪᠲᠡᠨ ᠰᠤᠭᠤ ᠪᠠᠨ ᠠᠰ ᠪᠣᠯᠲᠠᠯᠠ ᠲᠡᠨᠢᠢᠯᠭᠡᠭᠡᠳ ᠤᠷᠭᠠ ᠪᠠᠨ ᠬᠠᠶᠠᠬᠤ ᠳ᠋ᠤ᠌᠂ ᠬᠣᠶᠠᠷ ᠳᠥᠷᠥᠭᠡ ᠨᠢ ᠡᠮᠡᠭᠡᠯ ᠦ᠋ᠨ ᠠᠷᠤ ᠳ᠋ᠤ᠌ ᠲᠠᠷ ᠭᠡᠲᠡᠯᠡ ᠬᠠᠷᠭᠤᠵᠤ ᠪᠠᠢᠳᠠᠭ᠃ ᠪᠤᠰᠤᠳ ᠨᠢ ᠠᠷᠠᠢ ᠬᠦᠷᠬᠦ ᠦᠭᠡᠢ ᠪᠠᠢᠬᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠲᠠᠯᠠ ᠬᠡᠳᠦᠢᠨ ᠤᠷᠭᠠᠯᠠᠴᠢᠬᠠᠭᠰᠠᠨ : 《ᠢᠩᠭᠢᠵᠦ ᠯᠡ ᠤᠷᠭᠠᠯᠠᠳᠠᠭ ᠶᠤᠮ ᠳᠠ ! ᠰᠤᠷᠴᠤ ᠠᠪ ! 》ᠭᠡᠵᠦ ᠬᠣᠷᠣ ᠶ᠋ᠢ ᠴᠢᠨᠢ ᠮᠠᠭᠠᠵᠢᠳᠠᠭ᠃ ᠢᠩᠭᠢᠵᠦ ᠪᠠᠢᠲᠠᠯᠠ ᠵᠥᠪ ᠪᠤᠷᠤᠭᠤ ᠲᠠᠯᠠ ᠪᠠᠷ ᠨᠣᠭᠲᠣ ᠪᠠᠷᠢᠭᠰᠠᠨ ᠬᠡᠦᠬᠡᠨ᠂ ᠪᠡᠷᠢᠶᠡᠳ ᠤᠷᠤᠯᠳᠤᠨ ᠢᠷᠡᠵᠦ ᠪᠤᠯᠢᠶᠠᠯᠳᠤᠨ ᠨᠣᠭᠲᠤᠯᠤᠨᠠ᠃ ᠰᠠᠢᠨ ᠨᠣᠭᠲᠤᠴᠢ ᠮᠥᠨ ᠬᠢᠯᠪᠠᠷ ᠦᠭᠡᠢ᠂ ᠮᠣᠷᠢ ᠨᠢ ᠵᠡᠷᠭᠡᠴᠡᠬᠦ ᠡᠴᠡ ᠡᠮᠦᠨᠡ ᠳᠡᠯᠢᠮ ᠳᠤᠲᠠᠵᠤ ᠪᠠᠢᠬᠤ ᠳ᠋ᠤ᠌᠂ ᠪᠥᠬᠥᠢᠭᠡᠳ ᠯᠡ ᠨᠣᠭᠲᠣ ᠪᠠᠨ ᠰᠢᠳᠡᠴᠢᠭᠡᠳ ᠨᠣᠭᠲᠣᠯᠠᠴᠢᠬᠠᠭᠰᠠᠨ ᠪᠠᠢᠳᠠᠭ᠃ ᠢᠠᠯᠠᠩᠭᠤᠶᠠ ᠵᠢᠭᠠᠬᠠᠨ ᠲᠠᠢᠪᠤᠲᠠᠭᠰᠠᠨ ᠤᠷᠭᠠᠴᠢᠨ ᠢ᠋ ᠤᠷᠭᠠᠯᠠᠬᠤ ᠠ᠋ᠴᠠ ᠡᠮᠦᠨᠡ ᠨᠣᠭᠲᠣ ᠪᠠᠨ ᠴᠢᠯᠠᠭᠤᠳᠠᠭᠠᠳ ᠰᠤᠯᠠ ᠲᠠᠭᠤᠭᠳᠠᠭᠰᠠᠨ ᠠᠳᠤᠭᠤ ᠶ᠋ᠢ ᠨᠣᠭᠲᠣᠯᠠᠴᠢᠬᠠᠭᠠᠳ ᠰᠠᠢᠬᠢ ᠠᠳᠤᠭᠤᠴᠢᠨ ᠢ᠋ ᠬᠢᠯᠠᠪᠬᠢᠨ ᠬᠠᠷᠠᠵᠤ ᠢᠨᠢᠶᠡᠰᠬᠢᠭᠡᠳ ᠶᠠᠪᠤᠵᠤ ᠠᠮᠠ ᠶ᠋ᠢ ᠨᠢ ᠪᠠᠷᠢᠭᠤᠯᠳᠠᠭ᠃ ᠢᠩᠭᠢᠵᠦ ᠡᠷᠡᠭᠲᠡᠢ ᠡᠮᠡᠭᠲᠡᠢᠴᠦᠳ ᠬᠣᠭᠣᠷᠣᠨᠳᠣ ᠪᠠᠨ ᠡᠷᠡ ᠴᠢᠳᠠᠯ ᠢ᠋ᠶ᠋ᠠᠨ ᠦᠵᠡᠯᠴᠡᠵᠦ ᠬᠣᠷᠣ ᠰᠢᠷᠠ ᠶ᠋ᠢ ᠨᠢ ᠬᠦᠷᠭᠡᠳᠡᠭ᠃ ᠡᠨᠡ ᠨᠢ ᠴᠤᠭᠯᠠᠷᠠᠭᠰᠠᠨ ᠬᠥᠮᠦᠰ ᠦ᠋ᠨ ᠦᠭᠡᠨ ᠦ᠌ ᠪᠠᠷᠢᠭᠤᠯ ᠪᠣᠯᠵᠤ᠂ ᠡᠯᠡᠭ ᠳᠣᠭᠣᠭᠢ ᠶ᠋ᠢᠨ ᠦᠭᠡ ᠶ᠋ᠢ ᠴᠢᠬᠢ ᠪᠡᠨ ᠬᠠᠯᠠᠲᠠᠯᠠ ᠰᠣᠨᠣᠰᠳᠠᠭ᠃ ᠪᠠᠷᠢᠭᠰᠠᠨ ᠭᠡᠭᠦᠦ ᠶ᠋ᠢ ᠳᠡᠯᠯᠡᠭᠡ ᠶ᠋ᠢᠨ ᠬᠥᠮᠦᠰ ᠲᠦ᠍ ᠲᠤᠰᠢᠶᠠᠨ ᠥᠭᠭᠦᠭᠡᠳ ᠨᠣᠭᠲᠣᠴᠢᠨ ᠨᠣᠭᠲᠣ ᠪᠠᠨ ᠠᠪᠤᠭᠠᠳ ᠳᠠᠬᠢᠭᠠᠳ ᠮᠣᠷᠳᠠᠳᠠᠭ᠃ ᠬᠡᠳᠦᠨ ᠬᠥᠮᠦᠨ ᠴᠢᠬᠢᠳᠡᠵᠦ ᠪᠠᠢᠲᠠᠯᠠ ᠬᠠᠢᠴᠢᠴᠢᠨ ᠢᠷᠡᠵᠦ ᠳᠡᠯ ᠢ᠋ ᠨᠢ ᠬᠢᠷᠭᠠᠵᠤ᠂ ᠰᠡᠭᠦᠯ ᠦ᠋ᠨ ᠭᠣᠣᠯ ᠠ᠋ᠴᠠ 2 – 3 ᠲᠤᠭ ᠰᠡᠭᠦᠯ ᠬᠠᠢᠴᠢᠯᠠᠵᠤ ᠠᠪᠳᠠᠭ᠃ ᠡᠨᠡ ᠨᠢ ᠠᠳᠤᠭᠤᠴᠢᠨ ᠤ᠋ ᠬᠡᠪ ᠶᠠᠩᠵᠤ ᠶ᠋ᠢ ᠡᠪᠳᠡᠬᠦ ᠦᠭᠡᠢ ᠮᠥᠷᠲᠡᠭᠡᠨ ᠪᠠᠰᠠ ᠭᠠᠷᠤᠯᠲᠠ ᠪᠠᠨ ᠴᠤ᠌ ᠬᠤᠷᠢᠶᠠᠴᠢᠬᠠᠨᠠ᠃ ᠢᠩᠭᠢᠵᠦ ᠦᠳᠡ ᠪᠣᠯᠲᠠᠯᠠ ᠨᠢᠭᠡᠨ ᠦᠶᠡ ᠤᠷᠭᠠᠯᠠᠵᠤ ᠬᠥᠮᠦᠨ ᠮᠣᠷᠢ ᠵᠢᠭᠠᠬᠠᠨ ᠮᠠᠭᠤᠳᠠᠰᠬᠢᠨ ᠢᠷᠡᠬᠦ ᠳ᠋ᠦ᠍ ᠠᠮᠠᠷᠠᠬᠤ ᠵᠠᠷ ᠥᠭᠴᠦ᠂ ᠴᠠᠢ ᠴᠡᠬᠡ ᠤᠤᠭᠤᠵᠤ᠂ ᠪᠠᠭᠠ ᠰᠠᠭᠠ ᠳᠣᠭᠰᠢᠨ ᠬᠠᠷᠠ ᠭᠠᠷᠭᠠᠨ ᠶᠠᠳᠠᠷᠠᠭᠠ ᠳᠡᠢᠯᠦᠨᠡ᠃ ᠢᠩᠭᠢᠵᠦ ᠪᠠᠢᠲᠠᠯᠠ ᠲᠠᠮᠠᠭᠠ ᠤᠯᠠᠢᠳᠬᠠᠵᠤ ᠪᠠᠢᠭᠠ ᠬᠥᠮᠦᠨ ᠡᠴᠡ : 《ᠲᠠᠮᠠᠭᠠ ᠬᠠᠢᠯᠴᠢᠬᠠᠯᠠ ! ᠶᠠᠭᠠᠬᠢᠳᠠᠭ ᠪᠢᠯᠡ ? 》 ᠭᠡᠵᠦ ᠬᠠᠰᠬᠢᠷᠤᠨ ᠤᠷᠭᠠᠴᠢᠳ ᠢ᠋ ᠱᠠᠯᠠᠪᠳᠠᠨᠠ᠃ ᠵᠠ ᠲᠡᠭᠡᠪᠡᠯ 《ᠳᠠᠷᠬᠠᠨ ᠳ᠋ᠤ᠌ ᠮᠣᠷᠳᠠᠬᠤ ᠪᠠᠷ ᠳᠠᠭᠠ ᠳ᠋ᠠᠭᠠᠨ ᠮᠣᠷᠳᠠᠵᠠᠭᠠᠶᠠ 》ᠭᠡᠳ ᠤᠷᠭᠠᠴᠢᠳ ᠮᠣᠷᠳᠠᠵᠤ᠂ ᠳᠠᠭᠠ ᠤᠷᠭᠠᠯᠠᠵᠤ᠂ ᠰᠡᠭᠦᠯ ᠴᠣᠬᠢᠭᠴᠢ ᠳ᠋ᠤ᠌ ᠭᠠᠷᠳᠠᠭᠤᠯᠵᠤ ᠲᠣᠯᠣᠭᠠᠢ ᠶ᠋ᠢ ᠨᠢ ᠡᠷᠭᠢᠭᠦᠯᠦᠭᠡᠳ ᠦᠭᠲᠡᠯᠡ ᠰᠡᠭᠦᠯ ᠴᠣᠬᠢᠭᠴᠢ ᠬᠡᠳᠦᠢᠨ ᠳᠠᠭᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠳᠠᠪᠬᠢᠨ ᠭᠠᠷᠴᠤ ᠭᠦᠶᠦᠬᠦᠢᠴᠡ ᠪᠣᠯᠵᠤ ᠰᠡᠭᠦᠯ ᠢ᠋ ᠨᠢ ᠰᠠᠵᠢᠨ ᠴᠣᠬᠢᠬᠤ ᠳ᠋ᠤ᠌᠂ ᠠᠯᠬᠤᠬᠠ ᠨᠢ ᠲᠠᠭᠠᠷᠠᠭᠰᠠᠨ ᠳᠠᠭᠠ ᠠᠮᠠᠷᠬᠠᠨ ᠣᠢᠴᠢᠵᠤ ᠬᠡᠳᠦ ᠬᠡᠳᠦ ᠪᠥᠮᠪᠥᠷᠢᠬᠦ ᠨᠢ ᠲᠡᠷᠡ᠃ ᠡᠨᠡ ᠦᠶᠡ ᠰᠡᠭᠦᠯ ᠴᠣᠬᠢᠭᠴᠢ ᠬᠡᠳᠦᠢᠨ ᠭᠦᠶᠦᠨ ᠬᠦᠷᠴᠦ ᠳᠡᠭᠡᠷᠡ ᠲᠠᠯᠠ ᠶ᠋ᠢᠨ ᠭᠤᠶᠠ ᠶ᠋ᠢᠨ ᠰᠢᠯᠪᠢ ᠡᠴᠡ ᠪᠠᠷᠢᠨ ᠡᠷᠭᠦᠵᠦ ᠰᠡᠭᠦᠯ ᠢ᠋ ᠨᠢ ᠰᠠᠯᠲᠠᠭᠠ᠂ ᠴᠠᠪᠢ ᠪᠠᠷ ᠨᠢ ᠣᠷᠣᠭᠤᠯᠵᠤ ᠠᠪᠤᠨ ᠪᠥᠭᠰᠡᠨ ᠳᠡᠭᠡᠷᠡ ᠨᠢ ᠳᠠᠷᠤᠵᠤ ᠰᠠᠭᠤᠨᠠ᠃ ᠲᠡᠭᠡᠲᠡᠯᠡ ᠬᠠᠢᠴᠢᠴᠢᠨ ᠢᠷᠡᠵᠦ ᠳᠡᠯᠯᠡᠲᠡᠯᠡ᠂ ᠲᠠᠮᠠᠭᠠᠴᠢᠨ ᠴᠤ᠌ ᠢᠷᠡᠭᠡᠳ ᠲᠠᠮᠠᠭᠠᠯᠠᠭᠠᠳ ᠠᠮᠵᠢᠳᠠᠭ᠃ ᠵᠠᠷᠢᠮ ᠳᠠᠭᠠ ᠴᠤ᠌ ᠪᠠᠰᠠ ᠬᠡᠴᠡᠭᠦᠦ ᠳᠡ᠃ ᠠᠳᠤᠭᠤᠨ ᠠ᠋ᠴᠠ ᠭᠣᠰ ᠭᠡᠲᠡᠯᠡ ᠭᠠᠷᠴᠤ᠂ ᠱᠣᠷ ᠭᠡᠲᠡᠯᠡ ᠳᠠᠭᠠᠷᠢᠵᠤ ᠤᠷᠭᠠ ᠠᠪᠳᠠᠭ᠃ ᠡᠨᠡ ᠦᠶᠡ ᠠᠳᠤᠭᠤᠨ ᠤ᠋ ᠡᠵᠡᠨ ᠶᠡᠬᠡ ᠪᠠᠬᠠᠲᠠᠢ ᠬᠥᠬᠥᠷᠡᠵᠦ : 《ᠮᠢᠨᠦ ᠳᠠᠭᠠ ᠳᠣᠯᠣᠭᠠᠨ ᠬᠦᠵᠦᠭᠦᠳᠡᠢ ᠶᠦ᠍ᠮ ᠳᠡ ᠂ ××××ᠴᠣ ᠲᠡᠭᠡᠨᠡ ᠳᠡ ᠂ ᠲᠡᠭᠡᠨᠡ 》ᠭᠡᠵᠦ ᠢᠨᠢᠶᠡᠵᠦ ᠶᠠᠪᠤᠲᠠᠯᠠ ᠦᠶᠡ ᠬᠤᠷᠠᠭ ᠤ᠋ᠨ ᠬᠥᠮᠦᠰ ᠨᠢ : 《ᠡᠨᠡ ᠬᠡᠨ ᠦ᠌ ᠰᠡᠲᠡᠷᠲᠡᠢ ᠳᠠᠭᠠ ᠪᠣᠢ ⁈ 》ᠭᠡᠵᠦ ᠬᠠᠰᠬᠢᠷᠤᠨ ᠤᠷᠭᠠ ᠠᠯᠳᠠᠭᠰᠠᠨ ᠬᠥᠮᠦᠨ ᠢ᠋ ᠡᠯᠡᠭᠯᠡᠨ ᠬᠣᠷᠣ ᠰᠢᠷᠠ ᠶ᠋ᠢ ᠨᠢ ᠮᠠᠭᠠᠵᠢᠨ ᠬᠠᠰᠢᠷ ᠰᠤᠷᠭᠠᠨᠠ᠃ ᠡᠭᠦᠨ ᠢ᠋ ᠳᠠᠭᠠ ᠶ᠋ᠢᠨ ᠳᠡᠯᠯᠡᠭᠡ ᠪᠤᠶᠤ ᠳᠡᠯᠯᠡᠭᠡ ᠶ᠋ᠢᠨ ᠨᠠᠢᠷ ᠴᠤ᠌ ᠭᠡᠳᠡᠭ᠃
ᠡᠭᠦᠨ ᠦ᠌ ᠳᠠᠷᠠᠭᠠ᠂ ᠠᠯᠳᠠᠵᠤ ᠬᠣᠴᠣᠷᠤᠭᠰᠠᠨ ᠦᠷᠢᠶᠡ ᠬᠠᠭᠠᠷᠢᠬᠤ ᠪᠣᠯᠤᠨᠠ᠃ ᠤᠴᠢᠷ ᠨᠢ : ᠥᠷᠯᠥᠭᠡ ᠪᠤᠶᠤ ᠦᠳᠡ ᠡᠮᠦᠨᠡ ᠬᠠᠭᠠᠷᠢᠪᠠᠯ᠂ ᠡᠳᠦᠷᠵᠢᠨ ᠤᠷᠭᠠᠯᠠᠵᠤ ᠨᠠᠭᠠᠰᠢ ᠴᠠᠭᠠᠰᠢ ᠲᠠᠭᠤᠯᠴᠠᠬᠤ ᠳ᠋ᠤ᠌ ᠬᠥᠭᠡᠭᠡᠭᠳᠡᠭᠡᠳ ᠬᠠᠭᠠᠷᠢᠭᠰᠠᠨ ᠢ᠋ ᠨᠢ ᠬᠥᠨᠳᠡᠵᠦ ᠡᠪᠡᠷᠰᠢᠶᠡᠬᠦ ᠡᠴᠡ ᠪᠣᠯᠭᠣᠮᠵᠢᠯᠠᠭᠰᠠᠨ ᠠᠵᠤᠭᠤ᠃ ᠬᠠᠮᠤᠭ ᠤ᠋ᠨ ᠡᠴᠦᠰ ᠲᠦ᠋ᠨᠢ 《ᠡᠷᠡ ᠶ᠋ᠢᠨ ᠰᠢᠨᠳᠠᠰᠤ ᠦᠵᠡᠨᠡ 》ᠭᠡᠵᠦ ᠠᠵᠢᠷᠭᠠ ᠤᠷᠭᠠᠯᠠᠵᠤ ᠨᠠᠭᠠᠳᠤᠨᠠ᠃ ᠤᠷᠭᠠᠯᠠᠴᠢᠭᠠᠳ ᠲᠠᠲᠠᠵᠤ ᠳᠡᠢᠯᠬᠦ ᠦᠭᠡᠢ ᠳᠠᠭᠠᠵᠤ ᠪᠠᠢᠪᠠᠯ᠂ ᠬᠠᠵᠠᠭᠤ ᠶ᠋ᠢᠨ ᠦᠵᠡᠭᠴᠢᠳ ᠡᠴᠡ : 《ᠲᠡᠳᠡ ！ ᠲᠡᠳᠡ ！ ᠲᠡᠷᠡ ᠴᠢᠨᠢ ᠰᠠᠷᠠ ᠲᠠᠢ ᠶᠤᠮ ᠤᠤ ？ ᠦᠭᠡᠢ ᠤᠤ ？ ᠦᠵᠡᠶᠡ ! 》 ᠭᠡᠵᠦ ᠬᠣᠷᠣᠰᠬᠠᠨ ᠵᠠᠪᠠᠯ ᠡᠷᠭᠢᠭᠦᠯᠬᠦ ᠪᠡᠷ ᠮᠡᠷᠡᠢᠯᠭᠡᠨᠡ ᠃ ᠢᠩᠭᠢᠵᠦ ᠨᠢᠭᠡ ᠦᠶᠡ ᠨᠠᠭᠠᠳᠪᠠᠯ ᠥᠨᠥᠳᠥᠷ ᠦ᠋ᠨ ᠡᠨᠡ ᠨᠢᠭᠡᠨ ᠳᠡᠯᠯᠡᠭᠡ ᠶ᠋ᠢᠨ ᠨᠠᠢᠷ ᠲᠡᠭᠦᠰᠬᠦ ᠪᠣᠯᠤᠨᠠ᠃
ᠰᠢᠳᠦ ᠰᠢᠨᠵᠢᠬᠦ
《ᠲᠠᠪᠤᠨ ᠬᠣᠰᠢᠭᠤ ᠮᠠᠯ 》 ᠤ᠋ᠨ ᠨᠠᠰᠤ ᠰᠢᠳᠦ ᠶ᠋ᠢ ᠦᠵᠡᠬᠦ ᠳ᠋ᠡᠭᠡᠨ ᠲᠡᠭᠦᠨ ᠦ᠌ ᠡᠭᠦᠳᠡᠨ ᠰᠢᠳᠦᠨ ᠦ᠌ ᠬᠢᠨᠢ ᠬᠠᠯᠪᠠᠭᠠ ᠶ᠋ᠢᠨ ᠲᠣᠭᠠ ᠪᠠᠷ ᠦᠵᠡᠳᠡᠭ ᠪᠥᠭᠡᠳ ᠠᠳᠤᠭᠤᠨ ᠤ᠋ ᠬᠢ ᠶ᠋ᠢ ᠪᠣᠯ ᠰᠢᠲᠦᠭᠡᠨ ᠦ᠌ ᠬᠢᠨᠢ ᠬᠡ ᠤᠭᠠᠯᠵᠠ ᠪᠠᠷ ᠦᠵᠡᠵᠦ ᠮᠡᠳᠡᠳᠡᠭ ᠃ ᠪᠠᠰᠠ ᠵᠠᠷᠢᠮ ᠬᠥᠮᠦᠨ ᠠᠳᠤᠭᠤᠨ ᠤ᠋ ᠨᠢᠳᠦᠨ ᠳ᠋ᠦ᠍ ᠲᠤᠰᠤᠭᠰᠠᠨ ᠬᠥᠮᠦᠨ ᠦ᠌ ᠳᠦᠷᠰᠦ ᠶ᠋ᠢᠨ ᠪᠦᠲᠦᠨ ᠪᠠ ᠬᠠᠭᠠᠰ ᠤ᠋ᠨ ᠬᠡᠮᠵᠢᠶᠡ ᠪᠡᠷ ᠰᠢᠨᠵᠢᠨ ᠮᠣᠷᠢᠨ ᠤ᠋ ᠨᠠᠰᠤ ᠶ᠋ᠢ ᠠᠨᠳᠠᠯ ᠦᠭᠡᠢ ᠮᠡᠳᠡᠴᠢᠬᠡᠳᠡᠭ᠃
ᠵᠢᠴᠢ ᠭᠦᠵᠡᠭᠡᠲᠡᠢ ᠬᠡᠪᠢᠯᠭᠡᠲᠡᠢ ᠮᠠᠯ ᠤ᠋ᠨ ᠳᠡᠭᠡᠳᠦ ᠡᠷᠡᠦ ᠳ᠋ᠦ᠍ ᠡᠭᠦᠳᠡᠨ ᠰᠢᠳᠦ ᠨᠦ᠍ᠭᠦᠳ ᠪᠠᠢᠳᠠᠭ ᠦᠭᠡᠢ᠃ ᠲᠤᠬᠠᠢᠯᠠᠪᠠᠯ : ᠦᠬᠡᠷ ᠂ ᠲᠡᠮᠡᠭᠡ ᠂ ᠬᠣᠨᠢ ᠂ ᠢᠮᠠᠭᠠᠨ ᠤ᠋ ᠳᠡᠭᠡᠳᠦ ᠡᠷᠡᠦ ᠳ᠋ᠦ᠍ ᠡᠭᠦᠳᠡᠨ ᠰᠢᠳᠦ ᠪᠠᠢᠳᠠᠭ ᠦᠭᠡᠢ ᠃ ᠭᠠᠭᠴᠠ ᠬᠦ᠌ ᠠᠳᠤᠭᠤᠨ ᠳ᠋ᠤ᠌ ᠭᠦᠵᠡᠭᠡ ᠦᠭᠡᠢ ᠂ ᠬᠡᠪᠢᠯᠭᠡ ᠦᠭᠡᠢ ᠪᠣᠯᠬᠣᠷ ᠳᠡᠭᠡᠳᠦ ᠡᠷᠡᠦ ᠳ᠋ᠦ᠍ᠨᠢ ᠰᠢᠳᠦᠲᠡᠢ ᠪᠠᠢᠳᠠᠭ᠃
ᠰᠢᠳᠦᠯᠡᠩ
ᠰᠢᠳᠦᠯᠡᠩ ᠭᠡᠭᠴᠢ 3 ᠨᠠᠰᠤᠲᠠᠢ ᠪᠤᠲᠠ ᠬᠢᠭᠡᠳ 2 ᠨᠠᠰᠤᠲᠠᠢ ᠪᠤᠭ ᠮᠠᠯ ᠤ᠋ᠨ ᠬᠦᠢᠰᠦ ᠢᠯᠭᠠᠭᠰᠠᠨ ᠦᠭᠡᠢ ᠨᠡᠷᠡᠯᠡᠭᠰᠡᠨ ᠨᠡᠷᠡᠢᠳᠦᠯ ᠂ ᠪᠦᠷ 2 ᠬᠠᠯᠪᠠᠭᠠᠳᠠᠢ ( ᠰᠢᠳᠦᠲᠡᠢ ) ᠃ 《ᠲᠠᠪᠤᠨ ᠬᠣᠰᠢᠭᠤ ᠮᠠᠯ 》 ᠴᠥᠮ ᠡᠨᠡ ᠨᠠᠰᠤᠨ ᠳ᠋ᠤ᠌ ᠬᠦᠷᠦᠭᠰᠡᠭᠡᠷ ᠰᠦᠨ ᠰᠢᠳᠦ ᠪᠡᠨ ᠰᠣᠯᠢᠵᠤ ᠂ ᠵᠢᠩᠬᠢᠨᠢ ( ᠶᠠᠰᠤᠨ ) ᠰᠢᠲᠦ ᠰᠢᠳᠦᠯᠡᠳᠡᠭ ᠃ ᠡᠨᠡ ᠨᠢ ᠪᠤᠭ ᠮᠠᠯ ᠤ᠋ᠨ 2 ᠨᠠᠰᠤᠨ ᠳ᠋ᠤ᠌ ᠲᠣᠬᠢᠶᠠᠯᠳᠤᠵᠤ ᠰᠢᠳᠦ ᠰᠣᠯᠢᠬᠤ ᠶ᠋ᠢᠨ ᠤᠴᠢᠷ ᠪᠤᠭ ᠮᠠᠯ ᠤ᠋ᠨ ᠰᠢᠳᠦᠯᠡᠩ ᠨᠢ 2 ᠨᠠᠰᠤᠲᠠᠢ ᠃ ᠪᠤᠲᠠ ᠮᠠᠯ ᠤ᠋ᠨ 3 ᠨᠠᠰᠤᠨ ᠳ᠋ᠤ᠌ ᠲᠣᠬᠢᠶᠠᠯᠳᠤᠵᠤ ᠰᠢᠲᠦ ᠰᠣᠯᠢᠭᠳᠠᠬᠤ ᠶ᠋ᠢᠨ ᠤᠴᠢᠷ ᠪᠤᠲᠠ ᠮᠠᠯ ᠤ᠋ᠨ ᠰᠢᠳᠦᠯᠡᠩ ᠨᠢ 3 ᠨᠠᠰᠤᠲᠠᠢ ᠪᠣᠯᠠᠢ᠃
ᠦᠷᠢᠶᠡ
3 ᠠ᠋ᠴᠠ 4 ᠨᠠᠰᠤᠨ ᠤ᠋ ᠬᠣᠭᠣᠷᠣᠨᠳᠣᠬᠢ ᠡᠷᠡ ᠠᠳᠤᠭᠤᠨ ᠤ᠋ ᠨᠡᠷᠡᠢᠳᠦᠯ᠃ ᠦᠷᠢᠶᠡ ᠬᠡᠮᠡᠭᠴᠢ ᠦᠷᠡ ᠪᠦᠬᠦᠢ ( ᠪᠥᠭᠡᠨᠰᠦᠭ ᠨᠢ ᠪᠠᠭᠤᠭᠰᠠᠨ ) ᠠᠳᠤᠭᠤ ᠭᠡᠰᠡᠨ ᠦᠭᠡ ᠪᠤᠶᠤ᠃ ᠮᠣᠩᠭᠣᠯᠴᠤᠳ ᠡᠷᠡ ᠠᠳᠤᠭᠤ ᠶ᠋ᠢ 1 ᠨᠠᠰᠤᠨ ᠳ᠋ᠤᠨᠢ ᠡᠷᠡ ᠤᠨᠠᠭᠠ ᠭᠡᠨᠡ ᠃ 2 ᠨᠠᠰᠤᠨ ᠳ᠋ᠤᠨᠢ ᠡᠷᠡ ᠳᠠᠭᠠ ᠭᠡᠵᠦ ᠳᠠᠭᠤᠳᠠᠨᠠ᠃ 3 ᠨᠠᠰᠤᠨ ᠳ᠋ᠤᠨᠢ 《ᠰᠢᠳᠦᠯᠡᠩ ᠦᠷᠢᠶᠡ 》 ᠂ 4 ᠨᠠᠰᠤᠨ ᠳ᠋ᠤᠨᠢ 《ᠬᠢᠵᠠᠭᠠᠯᠠᠩ ᠦᠷᠢᠶᠡ 》 ᠭᠡᠵᠦ ᠳᠠᠭᠤᠳᠠᠳᠠᠭ᠃ ᠬᠡᠵᠢᠶᠡ ᠬᠠᠭᠠᠷᠢᠭᠰᠠᠭᠠᠷ ᠦᠷᠢᠶᠡ ᠪᠢᠰᠢ ᠮᠣᠷᠢ ᠪᠣᠯᠳᠠᠭ᠃
ᠤᠷᠢᠶᠠ ᠬᠠᠭᠠᠷᠢᠬᠤ
ᠡᠷᠡ ᠠᠳᠤᠭᠤ ᠶᠡᠬᠡᠩᠬᠢ ᠳ᠋ᠡᠭᠡᠨ ᠰᠢᠳᠦᠯᠡᠩ ᠪᠣᠯᠤᠭᠰᠠᠭᠠᠷ ᠪᠥᠭᠡᠨᠰᠦᠭ ᠨᠢ ᠪᠠᠭᠤᠵᠤ ᠢᠷᠡᠳᠡᠭ ᠲᠤᠯᠠ ᠬᠢᠵᠠᠭᠠᠯᠠᠩ ᠳ᠋ᠤᠨᠢ ᠬᠠᠭᠠᠷᠢᠵᠤ ᠠᠭᠲᠠ ᠪᠣᠯᠭᠠᠳᠠᠭ ᠃ ᠤᠨᠠᠭᠠᠵᠤ ᠬᠦᠯᠢᠭᠰᠡᠨ ᠦᠷᠢᠶᠡ ᠶ᠋ᠢ ᠴᠠᠭᠠᠯᠠᠭᠴᠢ ᠢᠷᠡᠵᠦ ᠬᠠᠪᠴᠢᠶᠠᠷ ᠢ᠋ᠶ᠋ᠠᠷ ᠬᠠᠪᠴᠢᠵᠤ ᠪᠥᠭᠡᠨᠰᠦᠭ ᠢ᠋ ᠨᠢ ᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠤᠯᠠᠢᠭᠰᠠᠨ ᠬᠠᠭᠠᠷᠢᠭᠤᠯ ᠢ᠋ᠶ᠋ᠠᠷ ᠬᠠᠭᠠᠷᠢᠵᠤ ᠴᠢᠰᠤ ᠶ᠋ᠢ ᠨᠢ ᠲᠣᠭᠲᠠᠭᠠᠨ ᠳᠠᠪᠠᠯᠠᠨᠠ᠃
ᠰᠣᠶᠣᠭᠠᠯᠠᠩ ᠦᠷᠢᠶᠡ
ᠡᠨᠡ ᠪᠣᠯ 《ᠪᠠᠭᠠᠵᠠᠷ ᠮᠣᠷᠢ 》ᠭᠡᠰᠡᠨ ᠰᠢᠯᠵᠢᠭᠰᠡᠨ ᠤᠳᠬᠠ ᠶ᠋ᠢ ᠢᠯᠡᠳᠬᠡᠬᠦ ᠡᠴᠡ ᠪᠢᠰᠢ ᠦᠨᠡᠨ ᠬᠦ᠌ ᠦᠷᠢᠶᠡ ᠭᠡᠳᠡᠭ ᠦᠭᠡ ᠶ᠋ᠢᠨ ᠤᠳᠬᠠ ᠦᠭᠡᠢ ᠪᠤᠷᠤᠭᠤ ᠳᠠᠭᠤᠳᠠᠯᠭᠠ ᠶᠤᠮ᠃
ᠪᠢᠲᠡᠭᠦᠦ ᠦᠷᠢᠶᠡ ᠪᠥᠭᠡᠨᠰᠦᠭ ᠲᠡᠢ ᠦᠷᠢᠶᠡ ᠂ ᠠᠭᠲᠠᠯᠠᠭᠠᠳᠤᠢ ᠦᠷᠢᠶᠡ᠃
ᠠᠯᠳᠠᠭᠤᠯ ᠦᠷᠢᠶᠡ ᠭᠦᠶᠦᠨ ᠢᠷᠡᠵᠦ ᠢᠵᠢᠯᠢᠰᠢᠭᠰᠡᠨ ᠦᠷᠢᠶᠡ᠃
ᠦᠷᠢᠶᠡᠨ ᠬᠡᠭᠡᠷ ᠨᠡᠷᠡ ᠃
ᠪᠠᠢᠳᠠᠰᠤ
3 ᠠ᠋ᠴᠠ 4 ᠨᠠᠰᠤᠨ ᠤ᠋ ᠬᠣᠭᠣᠷᠣᠨᠳᠣᠬᠢ ᠡᠮᠡ ᠠᠳᠤᠭᠤᠨ ᠤ᠋ ᠨᠡᠷᠡᠢᠳᠦᠯ ᠃ ᠰᠢᠨᠵᠢᠶᠠᠩ ᠳ᠋ᠤ᠌ ᠪᠠᠢᠰᠤᠨ ᠭᠡᠨᠡ ᠃ ᠪᠠᠢᠳᠠᠰᠤ ᠬᠡᠮᠡᠭᠴᠢ ᠦᠷᠡ ᠲᠣᠭᠲᠠᠬᠤ ( ᠪᠠᠢᠯᠭᠠᠬᠤ ) ᠭᠡᠮ ᠲᠡᠢ ᠪᠣᠯᠤᠯᠠ ᠭᠡᠰᠡᠨ ᠤᠳᠬᠠ ᠲᠠᠢ ᠪᠤᠶᠤ ᠃ ᠪᠠᠢᠳᠠᠰᠤ ᠶ᠋ᠢᠨ ᠪᠠᠢ ᠨᠢ ᠪᠠᠢᠬᠤ ᠶ᠋ᠢᠨ 《ᠪᠠᠢ 》 ᠶᠤᠮ ᠃ ᠡᠭᠦᠨ ᠳᠡᠭᠡᠷᠡ 《ᠳᠠᠰᠤ 》ᠳᠠᠭᠠᠪᠤᠷᠢ ᠵᠠᠯᠭᠠᠵᠤ ᠂ ᠶᠠᠭ ᠵᠠᠢᠳᠠᠰᠤ ( ᠵᠠᠢᠴᠢᠯᠠᠵᠤ ᠴᠢᠳᠬᠤᠭᠰᠠᠨ ᠴᠢᠰᠤ ) ᠭᠡᠰᠡᠨ ᠦᠭᠡ ᠲᠡᠢ ᠠᠳᠠᠯᠢ ᠪᠠᠢᠳᠠᠰᠤ ᠪᠣᠯᠭᠠᠵᠤ ᠨᠡᠷᠡᠢᠳᠦᠭᠰᠡᠨ ᠶᠦ᠍ᠮ᠃ ᠡᠭᠦᠨ ᠡᠴᠡ ᠥᠭᠡᠷᠡ ᠰᠣᠶᠣᠭᠠᠯᠠᠩ ᠪᠠᠢᠳᠠᠰᠤ ᠭᠡᠬᠦ ᠵᠡᠷᠭᠡ ᠪᠡᠷ ᠨᠡᠷᠡᠯᠡᠬᠦ ᠨᠢ ᠪᠦᠷ ᠪᠤᠷᠤᠭᠤ ᠳᠠᠭᠤᠳᠠᠯᠭᠠ ᠳ᠋ᠤ᠌ ᠲᠣᠭᠠᠴᠠᠭᠳᠠᠨᠠ᠃
ᠬᠠᠰᠤᠭᠳᠠᠭᠰᠠᠨ ᠪᠠᠢᠳᠠᠰᠤ
ᠤᠤᠯ ᠰᠦᠷᠦᠭ ᠡᠴᠡ ᠪᠡᠨ ( ᠠᠪᠤ ᠠᠵᠢᠷᠭᠠ ᠳ᠋ᠠᠭᠠᠨ ) ᠬᠥᠭᠡᠭᠡᠭᠳᠡᠨ ᠰᠠᠯᠤᠭᠰᠠᠨ 3 ᠪᠤᠶᠤ 4 ᠨᠠᠰᠤᠨ ᠤ᠋ ᠡᠮᠡ ᠠᠳᠤᠭᠤ᠃
ᠴᠠᠬᠢᠯᠤᠭᠰᠠᠨ ᠪᠠᠢᠳᠠᠰᠤ
ᠣᠷᠣᠭᠠ ᠣᠷᠣᠵᠤ ᠤᠤᠯ ᠰᠦᠷᠦᠭ ᠡᠴᠡ ᠪᠡᠨ ᠰᠠᠯᠵᠤ ᠂ ᠠᠵᠢᠷᠭᠠ ᠡᠷᠢᠵᠦ ᠭᠦᠶᠦᠭᠰᠡᠨ 3 ᠂ 4 ᠨᠠᠰᠤᠨ ᠤ᠋ ᠡᠮᠡ ᠠᠳᠤᠭᠤ᠃
ᠪᠠᠢᠳᠠᠰᠤᠨ ᠭᠡᠭᠦᠦ
ᠪᠠᠢᠳᠠᠰᠤ ᠶ᠋ᠢᠨ ᠨᠠᠰᠤᠨ ᠳ᠋ᠠᠭᠠᠨ ᠤᠨᠠᠭᠠᠯᠠᠭᠰᠠᠨ ᠡᠮᠡ ᠬᠦᠢᠰᠦᠨ ᠦ᠌ ᠠᠳᠤᠭᠤ᠃
ᠭᠤᠨᠠ ( ᠭᠤᠨᠠᠨ )
3 ᠨᠠᠰᠤᠨ ᠤ᠋ ᠡᠷᠡ ᠭᠦᠢᠰᠦᠨᠡ ᠬᠡᠷᠡᠭᠯᠡᠬᠦ ᠪᠤᠲᠠ ᠶ᠋ᠢᠨ ᠨᠡᠷᠡᠢᠳᠦᠯ ᠃ ᠡᠷᠲᠡ ᠳᠡᠭᠡᠳᠦ ᠦᠶᠡ ᠳ᠋ᠦ᠍ ᠮᠣᠩᠭᠣᠯᠴᠤᠳ ᠬᠥᠮᠦᠨ ᠪᠠ ᠪᠤᠲᠠ ᠶ᠋ᠢᠨ ᠰᠢᠳᠦᠯᠡᠩ ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠰᠢᠳᠦ ᠰᠣᠯᠢᠬᠤ ᠨᠠᠰᠤᠨ ᠢ᠋ 《ᠭᠤᠨᠠᠨ 》ᠭᠡᠵᠦ ᠳᠠᠭᠤᠳᠠᠵᠤ ᠪᠠᠢᠵᠠᠢ᠃ ᠲᠤᠬᠠᠢᠯᠠᠪᠠᠯ : 《ᠭᠤᠨᠠᠭᠠᠨ ( ᠰᠢᠳᠦ ᠰᠣᠯᠢᠬᠤ ᠨᠠᠰᠤᠨ ᠤ᠋ ᠬᠦᠦ ) ᠤᠯᠠᠭᠠᠨ ᠪᠠᠭᠠᠲᠤᠷ 》 ᠭᠡᠬᠦ ᠳᠣᠮᠣᠭ ᠬᠢᠭᠡᠳ 《ᠭᠤᠨᠠᠨ ᠬᠠᠷᠠ 》ᠭᠡᠰᠡᠨ ᠳᠠᠭᠤᠤ ᠵᠡᠷᠭᠡ ᠪᠣᠢ ᠃ ᠣᠳᠣ ᠢᠩᠭᠢᠵᠦ ᠬᠥᠮᠦᠨ ᠂ ᠮᠣᠷᠢᠨ ᠳ᠋ᠤ᠌ ᠬᠡᠯᠡᠬᠦ ᠪᠡᠨ ᠪᠠᠢᠵᠤ ᠂ ᠵᠥᠪᠬᠡᠨ ᠦᠬᠡᠷ ᠂ ᠲᠡᠮᠡᠭᠡ ᠮᠡᠲᠦ ᠶ᠋ᠢᠨ ᠰᠠᠯᠪᠠᠭ ᠲᠤᠭᠤᠷᠠᠢᠲᠠᠨ ᠤ᠋ ᠭᠤᠷᠪᠠᠲᠤ ᠳᠡᠭᠡᠷᠡ ᠯᠡ ᠬᠡᠷᠡᠭᠯᠡᠵᠦ ᠪᠣᠢ ᠃ ᠭᠤᠨᠵᠢ ᠭᠤᠨᠠᠨ ᠪᠠᠢᠳᠠᠰᠤ᠃ 3 ᠨᠠᠰᠤᠨ ᠤ᠋ ᠡᠮᠡ ᠬᠦᠢᠰᠦᠨ ᠦ᠌ ᠠᠳᠤᠭᠤ ( ᠡᠷᠲᠡᠨ ᠦ᠌ ) ᠃
ᠬᠢᠵᠠᠭᠠᠯᠠᠩ
4 ᠨᠠᠰᠤᠲᠠᠢ ᠪᠤᠲᠠ ᠮᠠᠯ ᠂ 3 ᠨᠠᠰᠤᠲᠠᠢ ᠪᠤᠭ ᠮᠠᠯ ᠤ᠋ᠨ ᠬᠦᠢᠰᠦ ᠢᠯᠭᠠᠭᠰᠠᠨ ᠦᠭᠡᠢ ᠨᠡᠷᠡᠯᠡᠭᠰᠡᠨ ᠨᠡᠷᠡᠢᠳᠦᠯ ᠂ 4 ᠬᠠᠯᠪᠠᠭᠠ ᠰᠢᠳᠦᠲᠡᠢ ᠃ ᠬᠢᠵᠠᠭᠠᠯᠠᠩ ᠭᠡᠭᠴᠢ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠡᠨᠡ ᠨᠠᠰᠤᠨ ᠳ᠋ᠤ᠌ ᠬᠦᠷᠪᠡᠯ ᠰᠢᠳᠦ ᠵᠠᠬᠠᠯᠠᠬᠤ ( ᠵᠠᠬᠠ ᠶ᠋ᠢᠨ ᠰᠢᠲᠦ ᠰᠢᠳᠦᠯᠡᠬᠦ ) ᠲᠤᠯᠠ ᠬᠢᠵᠠᠭᠠᠷᠯᠠᠩ – ᠬᠢᠵᠠᠭᠠᠯᠠᠩ ᠭᠡᠵᠦ ᠨᠡᠷᠡᠢᠳᠴᠡᠢ᠃ ᠣᠨᠴᠠᠭᠠᠢ ᠪᠠᠢᠳᠠᠯ – ᠪᠥᠭᠡᠨᠰᠦᠭ ᠨᠢ ᠪᠠᠭᠤᠭᠠᠳᠤᠢ ᠪᠤᠶᠤ ᠠᠯᠳᠠᠵᠤ ᠭᠡᠭᠡᠭᠡᠳ ᠣᠯᠤᠭᠠᠳᠤᠢ ᠠ᠋ᠴᠠ ᠪᠤᠰᠤᠳ ᠪᠤᠲᠠ ᠶ᠋ᠢ ᠪᠦᠷ ᠡᠨᠡ ᠬᠢᠵᠠᠭᠠᠯᠠᠩ ᠨᠠᠰᠤᠨ ᠳ᠋ᠤᠨᠢ ᠬᠠᠭᠠᠷᠢᠵᠤ ᠠᠭᠲᠠᠯᠠᠳᠠᠭ᠃
ᠬᠢᠵᠠᠭᠠᠯᠠᠩ ᠦᠷᠢᠶᠡ ᠠᠭᠲᠠᠯᠠᠭᠠᠳᠤᠢ 4 ᠨᠠᠰᠤᠨ ᠤ᠋ ᠡᠷᠡ ᠠᠳᠤᠭᠤ᠃
ᠬᠢᠵᠠᠭᠠᠯᠠᠩ ᠮᠣᠷᠢ ᠠᠭᠲᠠᠯᠠᠭᠰᠠᠨ 4 ᠨᠠᠰᠤᠨ ᠤ᠋ ᠡᠷᠡ ᠠᠳᠤᠭᠤ ᠃
ᠬᠥᠩᠭᠡᠯᠡᠭᠰᠡᠨ ᠮᠣᠷᠢ ᠪᠥᠭᠡᠨᠰᠦᠭ ᠢ᠋ ᠨᠢ ᠠᠪᠴᠤ ᠪᠡᠶᠡ ᠶ᠋ᠢ ᠨᠢ ᠬᠥᠩᠭᠡᠯᠡᠭᠰᠡᠨ ᠮᠣᠷᠢ᠃
ᠵᠠᠰᠠᠭᠰᠠᠨ ᠮᠣᠷᠢ ᠪᠥᠭᠡᠨᠰᠦᠭ ᠢ᠋ ᠨᠢ ᠠᠪᠴᠤ ᠵᠠᠰᠠᠵᠤ ᠴᠡᠪᠡᠷᠯᠡᠭᠰᠡᠨ ᠮᠣᠷᠢ᠃
ᠴᠠᠭᠠᠯᠠᠭᠰᠠᠨ ᠮᠣᠷᠢ ᠪᠥᠭᠡᠨᠰᠦᠭ ᠢ᠋ ᠨᠢ ᠠᠪᠴᠤ ᠂ ᠴᠡᠪᠡᠷ ᠰᠢᠯᠤᠭᠤᠨ ᠪᠣᠯᠭᠠᠭᠰᠠᠨ ᠮᠣᠷᠢ᠃
ᠠᠭᠳᠠᠯᠠᠭᠰᠠᠨ ᠮᠣᠷᠢ ᠪᠥᠭᠡᠨᠰᠦᠭ ᠢ᠋ ᠨᠢ ᠠᠪᠴᠤ ᠠᠭᠲᠠ ᠪᠣᠯᠭᠠᠭᠰᠠᠨ ᠮᠣᠷᠢ᠃
ᠡᠰᠬᠡᠯ ᠮᠣᠷᠢ ᠬᠢᠲᠤᠭᠠ ᠪᠠᠷ ᠡᠰᠬᠡᠵᠦ ᠪᠥᠭᠡᠨᠰᠦᠭ ᠢ᠋ ᠨᠢ ᠠᠪᠴᠤ ᠠᠭᠳᠠᠯᠠᠭᠰᠠᠨ ᠮᠣᠷᠢ᠃
ᠬᠠᠭᠠᠷᠢᠮᠠᠯ ᠮᠣᠷᠢ ᠪᠥᠭᠡᠨᠰᠦᠭ ᠢ᠋ ᠨᠢ ᠬᠠᠭᠠᠷᠢᠭᠤᠯ ᠢ᠋ᠶ᠋ᠠᠷ ᠬᠠᠭᠠᠷᠢᠵᠤ ᠠᠪᠤᠭᠰᠠᠨ ᠮᠣᠷᠢ᠃
ᠨᠣᠢᠲᠣᠨ ᠮᠣᠷᠢ ᠰᠠᠢᠬᠠᠨ ᠬᠠᠭᠠᠷᠢᠵᠤ ᠡᠳᠡᠭᠡᠷᠡᠭᠡᠳᠦᠢ ᠮᠥᠷᠲᠡᠭᠡᠨ ᠪᠡᠶᠡ ᠨᠢ ᠲᠠᠮᠢᠷᠵᠢᠭᠠᠳᠤᠢ ᠮᠣᠷᠢ᠃
ᠬᠢᠵᠠᠭᠠᠯᠠᠩ ᠪᠠᠢᠳᠠᠰᠤ 4 ᠨᠠᠰᠤᠨ ᠤ᠋ ᠡᠮᠡ ᠠᠳᠤᠭᠤ ᠃
ᠳᠥᠨᠡ
4 ᠨᠠᠰᠤᠨ ᠤ᠋ ᠡᠷᠡ ᠭᠦᠢᠰᠦᠨᠡ ᠬᠡᠷᠡᠭᠯᠡᠬᠦ ᠪᠤᠲᠠ ᠶ᠋ᠢᠨ ᠨᠡᠷᠡᠢᠳᠦᠯ ᠃ ᠡᠷᠲᠡ ᠳᠡᠭᠡᠳᠦ ᠦᠶᠡ ᠳ᠋ᠦ᠍ ᠂ ᠮᠣᠩᠭᠣᠯᠴᠤᠳ ᠬᠥᠮᠦᠨ ᠪᠠ ᠪᠤᠲᠠ ᠶ᠋ᠢᠨ ᠬᠢᠵᠠᠭᠠᠯᠠᠩ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠰᠢᠳᠦ ᠵᠠᠬᠠᠯᠠᠬᠤ ᠨᠠᠰᠤᠨ ᠢ᠋ 《ᠳᠥᠨᠡ – ᠳᠥᠨᠡᠨ 》ᠭᠡᠵᠦ ᠳᠠᠭᠤᠳᠠᠵᠤ ᠪᠠᠢᠵᠠᠢ ᠃ ᠲᠤᠬᠠᠢᠯᠠᠪᠠᠯ : 《ᠳᠦᠨᠡᠩᠭᠡᠨ ᠳᠥᠨᠡᠩᠭᠡᠨ ᠬᠠᠷᠠ ᠮᠣᠷᠢ ᠮᠢᠨᠢ 》 ᠭᠡᠳᠡᠭ ᠳᠠᠭᠤᠤ ᠪᠠ 《××× ᠬᠦᠦ ᠳᠥᠨᠡᠨ ᠨᠠᠰᠤᠨ ᠳ᠋ᠠᠭᠠᠨ ᠁ 》ᠭᠡᠳᠡᠭ ᠦᠯᠢᠭᠡᠷ ᠲᠡᠦᠬᠡ ᠶ᠋ᠢᠨ ᠶᠠᠷᠢᠶᠠ ᠪᠠᠢᠳᠠᠭ ᠃ ᠣᠳᠣ ᠢᠩᠭᠢᠵᠦ ᠬᠡᠯᠡᠬᠦ ᠪᠡᠨ ᠪᠠᠢᠵᠤ ᠵᠥᠪᠬᠡᠨ ᠰᠠᠯᠪᠠᠭ ᠲᠤᠭᠤᠷᠠᠢᠲᠠᠨ – ᠦᠬᠡᠷ ᠂ ᠲᠡᠮᠡᠭᠡᠨ ᠦ᠌ ᠳᠥᠷᠪᠡᠲᠦ ᠳᠡᠭᠡᠷᠡ ᠯᠡ ᠬᠡᠷᠡᠭᠯᠡᠵᠦ ᠪᠠᠢᠳᠠᠭ᠃
ᠳᠥᠨᠵᠢ
4 ᠨᠠᠰᠤᠨ ᠤ᠋ ᠡᠮᠡ ᠬᠦᠢᠰᠦᠨ ᠦ᠌ ᠠᠳᠤᠭᠤ ( ᠡᠷᠲᠡᠨ ᠦ᠌ ᠳᠠᠭᠤᠳᠠᠯᠭᠠ ) ᠃
ᠰᠣᠶᠣᠭᠠᠯᠠᠩ
ᠲᠠᠪᠤᠨ ᠨᠠᠰᠤᠲᠠᠢ ᠪᠤᠲᠠ ᠶ᠋ᠢᠨ ᠬᠦᠢᠰᠦ ᠢᠯᠭᠠᠭᠰᠠᠨ ᠦᠭᠡᠢ ᠨᠡᠷᠡᠢᠳᠦᠯ ᠃ ᠡᠷᠡ ᠬᠦᠢᠰᠦᠨ ᠦ᠌ ᠪᠤᠲᠠ ( ᠭᠣᠣᠯᠳᠠᠭᠤ ᠠᠳᠤᠭᠤ ᠂ ᠲᠡᠮᠡᠭᠡ ) ᠡᠨᠡ ᠨᠠᠰᠤᠨ ᠳ᠋ᠤ᠌ ᠭᠥᠷᠥᠭᠰᠡᠭᠡᠷ ᠠᠷᠠᠭᠠ ᠠ᠋ᠴᠠ ᠠᠷᠤ ᠳ᠋ᠤ᠌ ᠬᠤᠷᠤᠭᠤ ᠬᠢᠷᠢ ᠵᠠᠢᠲᠠᠢ ᠳ᠋ᠤ᠌ ᠰᠣᠶᠣᠭᠠ ᠰᠢᠲᠦ ᠤᠷᠭᠤᠳᠠᠭ ᠠ᠋ᠴᠠ ᠰᠣᠶᠣᠭᠠᠯᠠᠩ ᠭᠡᠵᠦ ᠨᠠᠷᠠᠯᠠᠪᠠ ᠃ ᠳᠤᠤᠯᠠᠨ ( 5 ᠨᠠᠰᠤᠲᠠᠢ ᠡᠷᠡ ᠠᠳᠤᠭᠤ ᠶ᠋ᠢ ᠰᠢᠨᠵᠢᠶᠠᠩ ᠳ᠋ᠤ᠌ ᠳᠣᠤᠯᠠᠨ ᠭᠡᠵᠦ ᠬᠡᠯᠡᠳᠡᠭ ) ᠂ ᠲᠤᠤᠯᠵᠢᠨ ( 5 ᠨᠠᠰᠤᠲᠠᠢ ᠡᠮᠡ ᠠᠳᠤᠭᠤ ᠶ᠋ᠢ ᠰᠢᠨᠵᠢᠶᠠᠩ ᠳ᠋ᠤ᠌ ᠲᠤᠤᠯᠵᠢᠨ ᠭᠡᠵᠦ ᠨᠡᠷᠡᠯᠡᠳᠡᠭ ) ᠃
ᠰᠣᠶᠣᠭᠠ ᠰᠤᠩᠭᠠᠬᠤ
ᠭᠦᠢᠴᠡᠬᠦ ᠨᠠᠰᠤᠨ ᠤ᠋ ᠮᠣᠷᠢ ᠶ᠋ᠢ ᠬᠡᠯᠡᠳᠡᠭ ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠂ 6 ᠨᠠᠰᠤᠲᠠᠢ ᠠᠳᠤᠭᠤ ᠂ ᠲᠡᠮᠡᠭᠡᠨ ᠳ᠋ᠦ᠍ ᠮᠥᠨ ᠬᠡᠯᠡᠨᠡ ᠃ ᠠᠳᠤᠭᠤ ᠂ ᠲᠡᠮᠡᠭᠡ ( ᠡᠷᠡ ᠬᠦᠢᠰᠦᠨ ᠦ᠌ ) ᠡᠨᠡ ᠨᠠᠰᠤᠨ ᠳ᠋ᠤ᠌ ᠬᠦᠷᠪᠡᠯ ᠰᠣᠶᠣᠭᠠ ᠨᠢ ᠭᠦᠢᠴᠡᠳ ᠤᠷᠭᠤᠨ ᠭᠦᠢᠴᠡᠵᠦ ᠂ ᠬᠣᠢᠰᠢᠳᠠ ᠶᠠᠰᠤᠨ ᠤ᠋ ᠥᠰᠦᠯᠲᠡ ᠶ᠋ᠢᠨ ᠲᠡᠭᠦᠰᠬᠡᠯ ᠪᠣᠯᠤᠨᠠ ᠃ ᠡᠢᠨ ᠬᠦ᠌ ᠰᠣᠶᠣᠭᠠ ᠰᠤᠩᠭᠠᠯᠠ ᠭᠡᠭᠰᠡᠭᠡᠷ ᠶᠠᠰᠤ ᠭᠦᠢᠴᠡᠳ ᠤᠷᠭᠤᠵᠤ ᠭᠦᠢᠴᠡᠯᠡ ᠭᠡᠰᠡᠨ ᠦᠭᠡ ᠃ ᠲᠡᠢᠨ ᠬᠦ᠌ ᠡᠨᠡ ᠨᠠᠰᠤ ᠶ᠋ᠢ ᠭᠦᠢᠴᠡᠬᠦ ᠨᠠᠰᠤᠨ ᠤ᠋ ᠮᠣᠷᠢ ᠪᠤᠶᠤ ᠲᠡᠮᠡᠭᠡ ᠭᠡᠳᠡᠭ ᠃ ᠬᠥᠬᠡ ᠰᠣᠶᠣᠭᠠ ᠰᠣᠶᠣᠭᠠ ᠰᠤᠩᠭᠠᠬᠤ ᠶ᠋ᠢ ᠬᠡᠯᠡᠨᠡ ᠃ ᠰᠣᠶᠣᠭᠠ ᠭᠦᠢᠴᠡᠳ ᠤᠷᠭᠤᠭᠰᠠᠭᠠᠷ ᠰᠢᠲᠦᠨ ᠦ᠌ ᠥᠩᠭᠡ ᠨᠢ ᠬᠥᠬᠡᠪᠲᠦᠷ ᠪᠣᠯᠳᠠᠭ ᠃ ᠮᠥᠨ 6 ᠨᠠᠰᠤᠲᠠᠢ ᠃
ᠬᠠᠪᠴᠢᠭ ᠰᠣᠶᠣᠭᠠᠯᠠᠩ
ᠬᠠᠪᠴᠢᠭ ᠰᠣᠶᠣᠭᠠᠯᠠᠩ ᠭᠡᠵᠦ ᠵᠢᠷᠭᠤᠭᠠᠨ ᠨᠠᠰᠤᠨ ᠤ᠋ ᠡᠷᠡ ᠠᠳᠤᠭᠤᠨ ᠳᠡᠭᠡᠷᠡ ᠬᠡᠯᠡᠳᠡᠭ᠃ ᠶᠣᠰᠣᠨ ᠳ᠋ᠠᠭᠠᠨ ᠠᠳᠤᠭᠤ ᠵᠢᠷᠭᠤᠭᠠᠨ ᠨᠠᠰᠤ ᠬᠦᠷᠪᠡᠯ ᠰᠣᠶᠣᠭᠠ ᠨᠢ ᠭᠦᠢᠴᠡᠳ ᠤᠷᠭᠤᠵᠤ ᠶᠠᠰᠤ ᠰᠢᠳᠦ ᠨᠢ ᠭᠦᠢᠴᠡᠵᠦ᠂ ᠴᠢᠳᠠᠯ ᠰᠢᠨᠳᠠᠰᠤ ᠪᠦᠷᠢᠳᠦᠯᠡ ᠭᠡᠵᠦ ᠮᠠᠯᠴᠢᠳ ᠬᠡᠯᠡᠳᠡᠭ᠃ ᠭᠡᠲᠡᠯᠡ ᠬᠠᠪᠴᠢᠭ ᠰᠣᠶᠣᠭᠠᠯᠠᠩ ᠭᠡᠭᠴᠢ ᠮᠠᠨᠢ ᠣᠨ ᠵᠢᠯ ᠢ᠋ᠶ᠋ᠡᠷ ᠲᠣᠭᠠᠯᠠᠪᠠᠯ 6 ᠨᠠᠰᠤ ᠬᠦᠷᠦᠭᠰᠡᠨ ᠴᠦ᠍ ᠶᠠᠰᠤ – ᠰᠣᠶᠣᠭᠠ ᠨᠢ ᠭᠦᠢᠴᠡᠳ ᠤᠷᠭᠤᠭᠠᠳᠤᠢ ᠪᠠᠢᠳᠠᠭ᠂ ᠣᠨ ᠵᠢᠯ ᠢ᠋ ᠨᠢ ᠲᠣᠭᠠᠯᠠᠪᠠᠯ 6 ᠬᠦᠷᠴᠦ᠂ ᠰᠢᠲᠦ ᠶ᠋ᠢ ᠨᠢ ᠦᠵᠡᠪᠡᠯ ᠰᠣᠶᠣᠭᠠ ᠨᠢ ᠰᠤᠩᠭᠠᠭᠠᠳᠤᠢ ᠰᠠᠶᠢ ᠤᠷᠭᠤᠵᠤ ᠪᠠᠢᠳᠠᠭ ᠃ ᠡᠢᠮᠦ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠪᠠᠢᠳᠠᠭ ᠠ᠋ᠴᠠ ᠬᠠᠪᠴᠢᠭ ᠰᠣᠶᠣᠭᠠᠯᠠᠩ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠶᠦ᠍ᠮ ᠃ ᠨᠠᠷᠢᠨ ᠲᠠᠢᠯᠪᠤᠷᠢ ᠶ᠋ᠢ ᠣᠷᠣᠰᠢᠯ ᠤ᠋ᠨ ᠡᠴᠦᠰ ᠦ᠋ᠨ ᠪᠦᠯᠦᠭ ᠲᠦ᠍ ᠦᠵᠡ᠃
ᠮᠣᠷᠢ 4 ᠨᠠᠰᠤᠨ ᠠ᠋ᠴᠠ ᠳᠡᠭᠡᠭᠰᠢᠬᠢ ᠠᠭᠲᠠᠯᠠᠭᠰᠠᠨ ᠠᠳᠤᠭᠤ᠃
ᠮᠣᠷᠢ ᠪᠠᠷᠢᠬᠤ
① ᠠᠳᠤᠭᠤᠨ ᠠ᠋ᠴᠠ ᠪᠤᠶᠤ ᠴᠢᠳᠥᠷ ᠲᠡᠢ ᠲᠠᠯᠪᠢᠭᠰᠠᠨ ᠮᠣᠷᠢ ᠪᠠᠨ ᠪᠠᠷᠢᠬᠤ ᠃
② ᠣᠷᠣᠯᠳᠣᠭᠰᠠᠨ ᠮᠣᠷᠢ ᠶ᠋ᠢ ᠡᠴᠦᠰ ᠦ᠋ᠨ ᠱᠤᠭᠤᠮ ᠳ᠋ᠤᠨᠢ ᠲᠣᠰᠴᠤ ᠪᠠᠷᠢᠬᠤ᠃
ᠮᠣᠷᠢ ᠲᠠᠯᠪᠢᠬᠤ
① ᠣᠷᠣᠯᠳᠣᠬᠤ ᠭᠠᠵᠠᠷ ᠠ᠋ᠴᠠ ᠮᠣᠷᠢ ᠶ᠋ᠢ ᠡᠬᠢᠯᠡᠨ ᠳᠠᠪᠬᠢᠭᠤᠯᠬᠤ᠃
② ᠤᠨᠤᠭᠠ ᠮᠣᠷᠢ ᠶ᠋ᠢ ᠢᠳᠡᠰᠢᠯᠡᠭᠦᠯᠬᠦ ᠪᠡᠷ ᠲᠠᠯᠪᠢᠬᠤ ᠪᠤᠶᠤ ᠢᠵᠢᠯᠢ ᠳ᠋ᠦ᠍ᠨᠢ ᠨᠡᠢᠯᠡᠭᠦᠯᠬᠦ᠃
③ ᠥᠪᠡᠷ ᠦ᠋ᠨ ᠮᠣᠷᠢ ᠪᠠᠨ ᠪᠤᠰᠤᠳ ᠤ᠋ᠨ ᠠᠳᠤᠭᠤᠨ ᠳ᠋ᠤ᠌ ᠨᠡᠢᠯᠡᠭᠦᠯᠵᠦ ᠠᠳᠤᠭᠤᠯᠠᠬᠤ᠃
ᠮᠣᠷᠢ ᠬᠠᠷᠠᠬᠤ ( ᠰᠢᠯᠵᠢᠭᠰᠡᠨ ) ᠪᠡᠶᠡ ᠵᠠᠰᠠᠬᠤ ᠶ᠋ᠢ ᠬᠡᠯᠡᠳᠡᠭ ᠃
ᠮᠣᠷᠢ ᠭᠠᠷᠬᠤ ᠤᠷᠤᠯᠳᠤᠭᠠᠨ ᠤ᠋ ᠮᠣᠷᠢ ᠂ ᠣᠷᠣᠯᠳᠣᠬᠤ ᠭᠠᠵᠠᠷ ᠤᠷᠤᠭᠤ ᠪᠠᠨ ᠶᠠᠪᠤᠬᠤ᠃
ᠮᠣᠷᠢ ᠰᠣᠢᠬᠤ ᠤᠷᠤᠯᠳᠤᠭᠠᠨ ᠤ᠋ ᠮᠣᠷᠢ ᠶ᠋ᠢ ᠬᠠᠭᠰᠠᠭᠠᠵᠤ ᠪᠡᠶᠡ ᠶ᠋ᠢ ᠨᠢ ᠬᠥᠩᠭᠡᠷᠡᠭᠦᠯᠬᠦ᠃
ᠮᠣᠷᠢ ᠬᠥᠯᠥᠷᠡᠭᠡᠬᠦ ᠮᠣᠷᠢ ᠬᠥᠯᠥᠰᠥᠯᠡᠬᠦ ᠂ ᠮᠣᠷᠢᠳ ᠢ᠋ ᠳᠠᠪᠬᠢᠭᠤᠯᠵᠤ ᠬᠥᠯᠥᠰᠥ ᠶ᠋ᠢ ᠨᠢ ᠭᠠᠷᠭᠠᠨ ᠠᠪᠬᠤ᠃
ᠮᠣᠷᠢ ᠬᠥᠲᠥᠯᠬᠦ
① ᠢᠯᠡᠭᠦᠦ ᠮᠣᠷᠢ ᠬᠥᠲᠥᠯᠵᠦ ᠶᠠᠪᠤᠬᠤ᠃
② ᠤᠷᠤᠯᠳᠤᠭᠠᠨ ᠤ᠋ ᠮᠣᠷᠢ ᠶ᠋ᠢ ᠳᠠᠪᠬᠢᠵᠤ ᠢᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠬᠥᠲᠥᠯᠵᠦ ᠲᠣᠭᠣᠷᠢᠭᠤᠯᠬᠤ᠃
ᠮᠣᠷᠢ ᠣᠷᠣᠯᠳᠣᠬᠤ ᠮᠣᠷᠢᠨ ᠤ᠋ ᠬᠤᠷᠳᠤᠨ ᠢ᠋ ᠲᠡᠮᠡᠴᠡᠬᠦ᠃
ᠮᠣᠷᠢ ᠲᠠᠷᠯᠠᠬᠤ ᠮᠣᠷᠢ ᠶ᠋ᠢ ᠴᠢᠳᠠᠯ ᠢ᠋ᠶ᠋ᠠᠷ ᠨᠢ ᠥᠰᠥᠷᠬᠡᠬᠦ᠃
ᠮᠣᠷᠢ ᠥᠰᠥᠷᠬᠡᠬᠦ ᠣᠷᠣᠯᠳᠣᠬᠤ ᠮᠣᠷᠢ ᠶ᠋ᠢ ᠳᠣᠪᠲᠣᠯᠭᠠᠨ ᠳᠠᠰᠬᠠᠵᠤ ᠰᠤᠷᠭᠠᠬᠤ᠃
ᠮᠣᠷᠢ ᠪᠤᠯᠭᠢᠬᠤ ᠤᠨᠤᠭᠰᠠᠨ ᠬᠥᠮᠦᠨ ᠢ᠋ ᠣᠢᠴᠢᠭᠤᠯᠬᠤ ᠪᠠᠷ ᠦᠰᠦᠷᠬᠢᠯᠡᠬᠦ᠃
ᠮᠣᠷᠢ ᠦᠷᠭᠦᠬᠦ ᠮᠣᠷᠢ ᠶᠠᠭᠤᠮᠠ ᠠ᠋ᠴᠠ ᠰᠣᠴᠢᠨ ᠵᠠᠢᠯᠠᠰᠬᠢᠬᠦ᠃
ᠮᠣᠷᠢ ᠪᠤᠬᠠᠬᠤ ᠮᠣᠷᠢ ᠪᠠᠭᠠ ᠵᠡᠷᠭᠡ ᠪᠤᠯᠭᠢᠬᠤ ᠮᠡᠲᠦ ᠦᠰᠦᠷᠬᠢᠯᠡᠬᠦ᠃
ᠮᠣᠷᠢ ᠬᠠᠯᠢᠰᠬᠢᠬᠦ ᠮᠣᠷᠢ ᠰᠣᠴᠢᠨ ᠬᠠᠵᠠᠭᠤᠰᠢ ᠪᠠᠨ ᠨᠡᠯᠢᠶᠡᠳ ᠵᠠᠢᠯᠠᠰᠬᠢᠬᠦ᠃
ᠮᠣᠷᠢ ᠨᠠᠳᠬᠤᠬᠤ ᠮᠣᠷᠢ ᠦᠷᠭᠦᠬᠦ᠃
ᠮᠣᠷᠢ ᠤᠷᠭᠠᠯᠠᠬᠤ ᠤᠷᠭᠠ ᠪᠠᠷ ᠮᠣᠷᠢ ᠪᠠᠷᠢᠬᠤ᠃
ᠮᠣᠷᠢ ᠴᠠᠯᠮᠠᠳᠠᠬᠤ ᠴᠠᠯᠮᠠ ᠪᠠᠷ ᠮᠣᠷᠢ ᠪᠠᠷᠢᠬᠤ᠃
ᠮᠣᠷᠢ ᠢᠨᠴᠠᠭᠠᠬᠤ
ᠠᠳᠤᠭᠤᠨ ᠤ᠋ ᠢᠵᠢᠯᠢ ᠰᠦᠷᠦᠭ ᠢ᠋ᠶ᠋ᠡᠨ ᠡᠷᠢᠬᠦ᠂ ᠳᠠᠭᠤᠳᠠᠬᠤ ᠵᠡᠷᠭᠡ ᠳ᠋ᠦ᠍ ᠬᠠᠩᠭᠢᠨᠠᠲᠠᠯᠠ ᠤᠷᠲᠤᠬᠠᠨ ᠳᠠᠭᠤ ᠭᠠᠷᠭᠠᠬᠤ᠃
ᠮᠣᠷᠢ ᠦᠦᠷᠰᠡᠬᠦ
ᠠᠳᠤᠭᠤᠨ ᠤ᠋ ᠪᠣᠭᠣᠨᠢᠪᠲᠤᠷ ᠳᠠᠭᠤ ᠪᠠᠷ ᠢᠨᠴᠠᠭᠠᠬᠤ ᠮᠡᠲᠦ ᠬᠦᠬᠦᠲᠦᠨᠡᠨ ᠳᠤᠤᠭᠠᠷᠬᠤ᠃
ᠮᠣᠷᠢ ᠬᠤᠤᠬᠢᠷᠬᠤ
ᠠᠳᠤᠭᠤᠨ ᠤ᠋ ᠶᠠᠭᠤᠮᠠ ᠠ᠋ᠴᠠ ᠠᠶᠤᠨ ᠬᠡᠯᠡᠮᠡᠭᠳᠡᠭᠦ ᠪᠤᠶᠤ ᠰᠣᠴᠢᠨ ᠰᠡᠵᠢᠭᠯᠡᠨ ᠬᠠᠮᠠᠷ ᠢ᠋ᠶ᠋ᠠᠨ ᠬᠣᠷᠳ᠋ ᠬᠢᠯᠭᠡᠨ ᠬᠦᠬᠦᠲᠦᠨᠡᠨ ᠳᠤᠤᠭᠠᠷᠬᠤ᠃
ᠮᠣᠷᠢ ᠴᠢᠳᠥᠷᠯᠡᠬᠦ
ᠮᠣᠷᠢᠨ ᠤ᠋ ᠭᠤᠷᠪᠠᠨ ᠬᠥᠯ ᠢ᠋ ᠴᠢᠳᠥᠷ ᠢ᠋ᠶ᠋ᠡᠷ ᠪᠡᠬᠢᠯᠡᠬᠦ᠃
ᠮᠣᠷᠢ ᠥᠷᠥᠭᠡᠯᠳᠡᠬᠦ
① ᠮᠣᠷᠢᠨ ᠤ᠋ ᠬᠠ ᠂ ᠭᠤᠶᠠ ᠶ᠋ᠢ ᠰᠢᠯᠤᠭᠤᠨ ᠢ᠋ᠶ᠋ᠠᠷ ᠪᠡᠬᠢᠯᠡᠨ ᠲᠠᠯᠪᠢᠬᠤ ᠶ᠋ᠢ ᠥᠷᠥᠭᠡᠯᠳᠡᠯᠡ ᠭᠡᠨᠡ ᠃
② ᠮᠣᠷᠢᠨ ᠤ᠋ ᠵᠥᠪ ᠲᠠᠯᠠ ᠶ᠋ᠢᠨ ᠬᠠ ᠬᠢᠭᠡᠳ ᠪᠤᠷᠤᠭᠤ ᠲᠠᠯᠠ ᠶ᠋ᠢᠨ ᠭᠤᠶᠠ ᠮᠡᠲᠦᠴᠢᠯᠡᠨ ᠥᠷᠥᠭᠡᠯᠳᠡᠬᠦ ᠶ᠋ᠢ ᠰᠣᠯᠢᠭᠠ ᠥᠷᠥᠭᠡᠯᠳᠡᠯ ᠭᠡᠨᠡ᠃
ᠮᠣᠷᠢ ᠲᠤᠰᠢᠬᠤ ( ᠲᠤᠱᠠᠬᠤ )
ᠮᠣᠷᠢᠨ ᠤ᠋ ᠬᠣᠶᠠᠷ ᠬᠠ ᠶ᠋ᠢ ᠪᠡᠬᠢᠯᠡᠵᠦ ᠲᠠᠯᠪᠢᠬᠤ᠃
ᠮᠣᠷᠢ ᠴᠣᠮᠣᠬᠤ
ᠴᠤᠯᠪᠤᠭᠤᠷ ᠢ᠋ᠶ᠋ᠠᠷ ᠮᠣᠷᠢᠨ ᠤ᠋ ᠤᠷᠲᠤ ᠬᠣᠶᠠᠷ ᠬᠥᠯ ᠢ᠋ ᠲᠡᠬᠡᠭᠦᠷᠬᠡᠨ ᠤᠶᠠᠵᠤ ᠪᠡᠬᠢᠯᠡᠬᠦ ᠶ᠋ᠢ ᠬᠡᠯᠡᠨᠡ᠃
ᠮᠣᠷᠢ ᠲᠦᠭᠰᠢᠬᠦ
ᠮᠣᠷᠢ ᠮᠠᠯ ᠤ᠋ᠨ ᠵᠣᠪᠠᠯ ᠬᠡᠲᠦᠷᠡᠵᠦ ᠴᠠᠪᠢ ᠶ᠋ᠢᠨ ᠲᠤᠰ ᠲᠤ᠌ ᠶᠡᠬᠡ ᠪᠡᠷ ᠳᠡᠯᠡᠰᠦᠨ ᠬᠥᠳᠡᠯᠬᠦ᠃
ᠮᠣᠷᠢᠨ ᠥᠷᠲᠡᠭᠡ
ᠮᠣᠷᠢ ᠪᠠᠷ ᠠᠯᠪᠠ ᠵᠠᠯᠭᠠᠭᠤᠯᠬᠤ ᠡᠭᠦᠷᠭᠡ ᠭᠦᠢᠴᠡᠳᠬᠡᠭᠴᠢ ᠭᠠᠵᠠᠷ᠃
ᠮᠣᠷᠢᠨ ᠲᠣᠭᠣᠷᠢᠭᠤᠯ
ᠤᠷᠤᠯᠳᠤᠭᠠᠨ ᠤ᠋ ᠮᠣᠷᠢᠳ ᠤ᠋ᠨ ᠲᠣᠭᠣᠷᠢᠨ ᠣᠷᠣᠯᠳᠣᠬᠤ ᠭᠠᠵᠠᠷ᠃
ᠮᠣᠷᠢᠨ ᠤᠶᠠᠭᠠ
① ᠤᠷᠤᠯᠳᠤᠭᠠᠨ ᠤ᠋ ᠮᠣᠷᠢᠨ ᠤ᠋ ᠤᠶᠠᠬᠤ ᠠᠵᠢᠯᠯᠠᠭᠠ : ᠡᠨᠡ ᠮᠣᠷᠢᠨ ᠤ᠋ ᠤᠶᠠᠭᠠ ᠨᠢ ᠳᠠᠭᠠᠷᠢᠵᠤ ᠪᠠᠢᠨᠠ᠃
② ᠮᠣᠷᠢ ᠤᠶᠠᠬᠤ ᠱᠣᠩ ᠮᠣᠳᠣ᠃
ᠠᠯᠳᠠᠭᠤᠯ ᠮᠣᠷᠢ
ᠤᠤᠯ ᠰᠦᠷᠦᠭ ᠡᠴᠡ ᠪᠡᠨ ᠠᠯᠳᠠᠭᠳᠠᠨ ᠭᠦᠶᠦᠨ ᠢᠷᠡᠵᠦ ᠂ ᠡᠨᠡ ᠰᠦᠷᠦᠭ ᠲᠦ᠍ ᠢᠵᠢᠯᠢᠰᠢᠭᠰᠡᠨ ᠮᠣᠷᠢ᠃
ᠠᠭᠲᠠ ᠪᠥᠭᠡᠨᠰᠦᠭ ᠢ᠋ ᠨᠢ ᠠᠪᠤᠭᠰᠠᠨ ᠪᠦᠳᠦᠭᠦᠨ ᠮᠣᠷᠢ᠃
ᠠᠷᠭᠤᠮᠠᠭ ᠲᠣᠮᠣ ᠪᠦᠳᠦᠭᠦᠨ ᠪᠡᠶᠡ ᠲᠡᠢ ᠮᠣᠷᠢ᠃
ᠠᠷᠠᠨᠵᠢᠯ ᠮᠠᠰᠢ ᠰᠠᠢᠨ ᠬᠦᠯᠦᠭ ᠂ ᠬᠦᠯᠦᠭᠯᠢᠭ ᠃
ᠠᠵᠢᠨᠠᠢ ᠬᠤᠪᠢᠯᠭᠠᠨ ᠬᠦᠯᠦᠭ ᠃
ᠬᠦᠯᠦᠭ
ᠡᠳᠦᠷ ᠲᠦ᠍ ᠮᠢᠩᠭᠠᠨ ᠭᠠᠵᠠᠷ ᠶᠠᠪᠤᠳᠠᠭ ᠬᠤᠷᠳᠤᠨ ᠪᠥᠭᠡᠳ ᠳᠠᠭᠠᠭᠠᠴᠠᠲᠠᠢ ᠰᠠᠢᠨ ᠮᠣᠷᠢ ᠶ᠋ᠢ ᠬᠦᠯᠦᠭ ᠭᠡᠨᠡ᠃
ᠭᠡᠭᠦᠦ 4 ᠨᠠᠰᠤᠨ ᠠ᠋ᠴᠠ ᠳᠡᠭᠡᠭᠰᠢ ᠡᠮᠡ ᠠᠳᠤᠭᠤ᠃
ᠭᠡᠭᠡᠯᠲᠡᠢ ᠭᠡᠭᠦᠦ ᠬᠡᠭᠡᠯ ᠠᠪᠤᠭᠰᠠᠨ ᠭᠡᠭᠦᠦ᠃
ᠰᠤᠪᠠᠢ ᠭᠡᠭᠦᠦ ᠬᠡᠭᠡᠯ ᠲᠣᠭᠲᠠᠭᠰᠠᠨ ᠦᠭᠡᠢ ᠭᠡᠭᠦᠦ᠃
ᠬᠤᠰᠠᠷᠠᠩ ᠭᠡᠭᠦᠦ ᠡᠨᠡ ᠵᠢᠯ ᠳ᠋ᠡᠭᠡᠨ ᠰᠤᠪᠠᠢᠷᠠᠭᠰᠠᠨ ᠴᠤ᠌ ᠨᠢᠳᠤᠨᠤᠨ ᠤ᠋ ᠤᠨᠠᠭᠠ ᠪᠠᠨ ᠬᠥᠬᠥᠭᠦᠯᠵᠦ ᠪᠣᠢ ᠶ᠋ᠢ ᠬᠡᠯᠡᠨᠡ᠃
ᠡᠷᠡᠮᠡᠭ ᠭᠡᠭᠦᠦ ᠤᠨᠠᠭᠠᠯᠠᠳᠠᠭ ᠦᠭᠡᠢ ᠡᠷᠡᠳᠡᠭᠦᠦ ᠴᠢᠳᠠᠯᠲᠠᠢ ᠡᠷᠡᠮᠳᠡᠭ ᠭᠡᠭᠦᠦ᠃
ᠰᠣᠶᠣᠭᠠᠲᠠᠢ ᠭᠡᠭᠦᠦ ᠡᠷᠡᠮᠡᠭᠳᠡᠭᠦᠦ ᠭᠡᠪᠡᠴᠦ ᠬᠠᠶᠠ ᠵᠢᠯ ᠳ᠋ᠡᠭᠡᠨ ᠤᠨᠠᠭᠠᠯᠠᠳᠠᠭ᠃
ᠤᠨᠠᠭᠠᠯᠠᠭᠰᠠᠨ ᠭᠡᠭᠦᠦ ᠲᠥᠯᠯᠡᠭᠰᠡᠨ ᠭᠡᠭᠦᠦ᠃
ᠬᠥᠬᠥᠭᠦᠯ ᠭᠡᠭᠦᠦ ᠰᠦ ᠨᠢ ᠰᠢᠷᠭᠢᠭᠡᠳᠦᠢ ᠬᠥᠬᠥᠭᠦᠯᠵᠦ ᠪᠣᠢ ᠭᠡᠭᠦᠦ᠃
ᠠᠯᠳᠠᠭᠤᠯ ᠭᠡᠭᠦᠦ ᠠᠯᠳᠠᠭᠳᠠᠵᠤ ( ᠴᠠᠬᠢᠯᠵᠤ ) ᠢᠷᠡᠵᠦ ᠢᠵᠢᠯᠢᠰᠢᠭᠰᠡᠨ ᠭᠡᠭᠦᠦ᠃
ᠭᠣᠯᠣᠩᠬᠠᠢ ᠭᠡᠭᠦᠦ ᠤᠨᠠᠭᠠᠨ ᠳ᠋ᠠᠭᠠᠨ ᠠᠮᠠᠷᠠᠭ ᠪᠢᠰᠢ ᠭᠡᠭᠦᠦ᠃
ᠠᠵᠢᠷᠭᠠ 4 ᠨᠠᠰᠤᠨ ᠠ᠋ᠴᠠ ᠳᠡᠭᠡᠭᠰᠢᠬᠢ ᠠᠭᠲᠠᠯᠠᠭᠰᠠᠨ ᠦᠭᠡᠢ ᠡᠷᠡ ᠠᠳᠤᠭᠤ᠃
ᠠᠵᠢᠷᠭᠠ ᠠᠳᠤᠭᠤ
ᠨᠢᠭᠡ ᠠᠵᠢᠷᠭᠠᠨ ᠤ᠋ ᠬᠤᠷᠢᠶᠠᠬᠤ ᠭᠡᠭᠦᠦ ᠪᠠ ᠲᠡᠭᠦᠨ ᠲᠡᠢ ᠢᠵᠢᠯᠢᠳᠦᠨ ᠶᠠᠪᠤᠬᠤ ᠠᠳᠤᠭᠤ ᠨᠤᠭᠤᠳ ᠂ ᠭᠣᠣᠯᠳᠠᠭᠤ 10- 30 ᠣᠷᠴᠢᠮ ᠲᠣᠭᠠᠨ ᠤ᠋ ᠠᠳᠤᠭᠤ ᠪᠠᠢᠳᠠᠭ᠃
ᠠᠵᠢᠷᠭᠠᠯᠠᠬᠤ
① ᠠᠵᠢᠷᠭᠠ ᠭᠡᠭᠦᠦ ᠬᠤᠷᠢᠶᠠᠬᠤ᠃
② ᠪᠤᠰᠤᠳ ᠢ᠋ ᠬᠡᠲᠦᠷᠬᠡᠢ ᠡᠵᠡᠷᠬᠡᠨ ᠨᠣᠶᠠᠯᠠᠬᠤ᠃
③ ᠲᠣᠮᠣ ᠶᠠᠭᠤᠮᠠᠨ ᠤ᠋ ᠪᠡᠶᠡ ᠠᠭᠲᠠᠯᠠᠬᠤ᠃
ᠠᠵᠢᠷᠭᠠᠰᠠᠬᠤ ᠭᠡᠭᠦᠦ ᠂ ᠠᠵᠢᠷᠭᠠ ᠬᠦᠰᠡᠬᠦ ᠃