ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠳᠥᠷᠪᠡ ᠂ ᠮᠣᠩᠭᠣᠯ ᠭᠡᠷ ᠦᠨ ᠪᠦᠲᠦᠴᠡ ᠶᠢᠨ ᠪᠦᠯᠦᠭ 10 > Хөх зул – Боржигон Ванжал –"Ддөрөв ᠂ Монгол гэрийн бүтцийн бүлэг " 10
285ᠳᠥᠷᠪᠡ ᠂ ᠮᠣᠩᠭᠣᠯ ᠭᠡᠷ ᠦᠨ ᠪᠦᠲᠦᠴᠡ ᠶᠢᠨ ᠪᠦᠯᠦᠭ –10
ᠮᠣᠩᠭᠣᠯ ᠭᠡᠷ ᠦᠨ ᠢᠷᠦᠭᠡᠯ * Монгол гэрийн ерөөл
ᠤᠸᠮ ᠰᠠᠢᠨ ᠠᠮᠤᠭᠤᠯᠠᠩᠳᠠᠨ ᠪᠣᠯᠲᠤᠭᠠᠢ ！
ᠡᠷᠲᠡ ᠲᠡᠭᠷᠢ ᠡᠴᠡ ᠡᠰᠢᠲᠡᠢ ᠂
ᠡᠵᠡᠨ ᠴᠢᠩᠭᠢᠰ ᠡᠴᠡ ᠵᠢᠷᠤᠮᠲᠠᠢ ᠂
ᠡᠭᠡᠯᠢᠲᠦ ᠴᠠᠭᠠᠨ ᠭᠡᠷ ᠢ᠋ᠶ᠋ᠡᠨ
ᠡᠷᠬᠢᠮᠯᠡᠨ ᠢᠷᠥᠭᠡᠵᠦ ᠮᠢᠯᠢᠶᠠᠮᠤ ᠃
ᠪᠠᠳᠠᠷᠠᠭᠰᠠᠨ ᠲᠥᠷᠥ ᠡᠴᠡ ᠲᠣᠭᠲᠠᠭᠠᠭᠰᠠᠨ
ᠪᠠᠢᠭᠤᠯᠤᠭᠰᠠᠨ ᠨᠠᠢ᠍ᠮᠠᠨ ᠴᠠᠭᠠᠨ ᠭᠡᠷ ᠮᠢᠨᠢ ！
ᠪᠠᠢᠳᠠᠭ ᠣᠯᠠᠨ ᠳ᠋ᠠᠭᠠᠨ ᠰᠢᠲᠦᠭᠡᠨ ᠪᠣᠯᠤᠭᠰᠠᠨ ᠠ᠋ᠴᠠ
ᠪᠠᠶᠠᠨ ᠳᠡᠯᠡᠬᠡᠢ ᠳ᠋ᠡᠭᠡᠨ ᠨᠡᠷᠡᠲᠡᠢ ᠃
ᠳᠥᠴᠢᠨ ᠳᠥᠷᠪᠡᠨ ᠬᠠᠨᠠᠲᠠᠢ ᠂
ᠳᠥᠷᠪᠡᠨ ᠮᠢᠩᠭᠠᠨ ᠣᠨᠢᠲᠠᠢ ᠂
ᠳᠥᠰᠢ ᠮᠥᠩᠭᠥᠨ ᠲᠣᠭᠣᠨᠣᠲᠠᠢ ᠂
ᠳᠡᠯᠡᠬᠡᠢ ᠬᠠᠷᠠᠭᠰᠠᠨ ᠡᠭᠦᠳᠡᠲᠡᠢ ᠃
ᠬᠠᠰᠠᠭ ᠴᠠᠮᠪᠠᠨ ᠲᠡᠭᠡᠪᠦᠷᠢᠲᠡᠢ ᠂
ᠬᠣᠷᠭᠣᠢ ᠮᠠᠩᠨᠤᠭ ᠡᠮᠵᠢᠶᠡᠷᠢᠲᠡᠢ ᠂
ᠤᠷᠠᠨ ᠨᠠᠷᠢᠨ ᠣᠨᠢᠲᠠᠢ ᠂
ᠠᠭᠤᠯᠠ ᠲᠦᠰᠢᠭ ᠲᠠᠷᠮᠠᠲᠠᠢ ᠂
ᠠᠭᠠᠷᠤ ᠽᠠᠨᠳᠠᠨ ᠳᠣᠲᠣᠭᠤᠳᠠᠢ ᠂
ᠠᠯᠳᠠᠷ ᠶᠡᠬᠡᠲᠦ ᠥᠷᠭᠥᠭᠡ ᠃
ᠬᠥᠬᠡ ᠲᠣᠷᠭᠠᠨ ᠡᠭᠦᠳᠡᠲᠡᠢ ᠂
ᠬᠦᠷᠡᠩ ᠽᠠᠨᠳᠠᠨ ᠬᠠᠴᠠᠪᠴᠢᠲᠠᠢ ᠂
ᠬᠦᠳᠡᠷ ᠰᠢᠷᠠ ᠪᠠᠭᠠᠨᠠᠲᠠᠢ ᠂
ᠬᠦᠴᠦ ᠴᠢᠳᠠᠯᠲᠤ ᠴᠢᠭᠲᠠᠭᠠᠲᠠᠢ ᠂
ᠯᠠᠩ ᠮᠥᠩᠭᠥᠨ ᠴᠣᠣᠵᠢᠲᠠᠢ ᠂
ᠯᠠᠪᠠᠢ ᠴᠠᠭᠠᠨ ᠥᠷᠭᠥᠭᠡ ᠃
ᠴᠢᠩ ᠴᠢᠯᠠᠭᠤ ᠪᠠᠷ ᠴᠢᠭᠲᠠᠭᠠ ᠪᠠᠨ ᠠᠪᠴᠤ
ᠴᠢᠨᠳᠠᠮᠤᠨᠢ ᠡᠷᠳᠡᠨᠢ ᠪᠡᠷ ᠰᠠᠩ ᠢ᠋ᠶ᠋ᠠᠨ ᠲᠣᠭᠲᠠᠭᠠᠵᠤ ᠂
ᠠᠯᠳᠠᠷᠠᠭᠠᠶᠠ ᠭᠡᠪᠡᠴᠦ ᠠᠯᠳᠠᠷᠠᠰᠢ ᠦᠭᠡᠢ
ᠠᠯᠲᠠᠨ ᠴᠢᠭᠲᠠᠭᠠᠲᠠᠢ ᠂
ᠮᠤᠯᠲᠤᠯᠤᠶᠠ ᠭᠡᠪᠡᠴᠦ ᠮᠤᠯᠲᠤᠷᠠᠰᠢ ᠦᠭᠡᠢ
ᠮᠥᠩᠭᠥᠨ ᠪᠠᠭᠠᠨᠠᠲᠠᠢ ᠃
ᠡᠮᠦᠨᠡ ᠵᠦᠭ ᠡᠴᠡ ᠨᠢ ᠬᠠᠷᠠᠬᠤ ᠳ᠋ᠤ᠌
ᠥᠨᠳᠡᠭᠡᠨ ᠴᠠᠭᠠᠨ ᠥᠷᠭᠥᠭᠡ ᠂
ᠪᠠᠷᠠᠭᠤᠨ ᠵᠦᠭ ᠡᠴᠡ ᠨᠢ ᠬᠠᠷᠠᠬᠤ ᠳ᠋ᠤ᠌
ᠪᠠᠳᠮᠠᠨ ᠴᠠᠭᠠᠨ ᠥᠷᠭᠥᠭᠡ ᠂
ᠬᠣᠢᠲᠤ ᠵᠦᠭ ᠡᠴᠡ ᠨᠢ ᠬᠠᠷᠠᠬᠤ ᠳ᠋ᠤ᠌ ᠂
ᠬᠣᠨᠢᠨ ᠴᠠᠭᠠᠨ ᠥᠷᠭᠥᠭᠡ ᠃
ᠵᠡᠭᠦᠨ ᠵᠦᠭ ᠡᠴᠡ ᠨᠢ ᠬᠠᠷᠠᠬᠤ ᠳ᠋ᠤ᠌ ᠂
ᠵᠢᠷᠦᠬᠡᠨ ᠴᠠᠭᠠᠨ ᠥᠷᠭᠥᠭᠡ ᠃
ᠵᠦᠭ ᠪᠦᠷᠢ ᠡᠴᠡ ᠨᠢ ᠬᠠᠷᠠᠬᠤ ᠳ᠋ᠤ᠌ ᠂
ᠴᠢᠨᠳᠠᠮᠤᠨᠢ ᠡᠷᠳᠡᠨᠢ ᠶ᠋ᠢᠨ ᠰᠢᠨᠵᠢᠲᠡᠢ ᠃
ᠰᠢᠨᠵᠢ ᠲᠡᠭᠦᠰ 《ᠳᠠᠯᠠᠢ ᠴᠠᠭᠠᠨ 》
ᠴᠢᠨᠦ ᠳᠤᠮᠳᠠ ᠪᠠᠢᠭᠤᠯᠤᠭᠰᠠᠨ ᠭᠣᠯᠣᠮᠲᠠ ᠃
ᠬᠠᠭᠠᠨ ᠠᠪᠤ ᠶ᠋ᠢᠨ ᠴᠢᠨᠢ ᠴᠠᠬᠢᠭᠰᠠᠨ
ᠬᠠᠲᠤᠨ ᠡᠵᠢ ᠶ᠋ᠢᠨ ᠴᠢᠨᠢ ᠬᠥᠭᠵᠢᠭᠡᠭᠰᠡᠨ
ᠬᠠᠷᠠᠩᠭᠤᠢ ᠶ᠋ᠢ ᠭᠡᠢᠭᠦᠯᠦᠭᠴᠢ
ᠬᠠᠲᠠᠭᠤ ᠶ᠋ᠢ ᠤᠶᠠᠷᠠᠭᠤᠯᠤᠭᠴᠢ ᠂
ᠽᠠᠨᠳᠠᠨ ᠮᠣᠳᠣᠨ ᠵᠠᠯᠢᠲᠠᠢ ᠂
ᠽᠠᠪᠢᠶᠠ ᠮᠣᠳᠣᠨ ᠲᠡᠪᠡᠷᠠᠲᠡᠢ ᠂
ᠭᠠᠩ ᠳᠥᠷᠪᠡᠨ ᠲᠣᠲᠣᠭᠳᠠᠢ ᠂
ᠭᠠᠯ ᠤ᠋ᠨ ᠪᠤᠷᠬᠠᠨ ᠲᠡᠷᠢᠭᠦᠯᠡᠨ
ᠡᠯᠳᠡᠪ ᠡᠳ᠋ᠯᠡᠯ ᠲᠡᠷᠢᠭᠦᠲᠡᠨ
ᠡᠷᠳᠡᠨᠢ ᠶ᠋ᠢᠨ ᠰᠠᠩ ᠳ᠋ᠤ᠌ ᠬᠤᠷᠠᠲᠤᠭᠠᠢ ᠃
– – – –
* ᠮᠣᠩᠭᠣᠯᠴᠤᠳ ᠠᠯᠢ ᠭᠠᠵᠠᠷ ᠣᠲᠣᠷᠯᠠᠨ ᠶᠠᠪᠤᠪᠠᠴᠤ ᠥᠷᠭᠥᠭᠡ ᠴᠠᠭᠠᠨ ᠭᠡᠷ ᠢ᠋ᠶ᠋ᠡᠨ ᠡᠬᠢᠯᠡᠨ ᠪᠤᠰᠬᠠᠭᠰᠠᠨ ᠡᠳᠦᠷ ᠲᠡᠭᠡᠨ ᠡᠷᠬᠡᠪᠰᠢ ᠰᠢᠨᠡ ᠭᠡᠷ᠂ ᠰᠢᠨᠡ ᠨᠤᠲᠤᠭ ᠲᠤ᠌ ᠪᠠᠭᠤᠭᠰᠠᠨ ᠨᠠᠢᠷ ᠬᠢᠵᠦ ᠴᠠᠢᠯᠠᠯᠭᠠ ᠲᠠᠯᠪᠢᠨ ᠣᠢᠷᠠ ᠬᠠᠪᠢ ᠶ᠋ᠢᠨ ᠬᠢ ᠪᠡᠨ ᠵᠠᠯᠠᠵᠤ ᠨᠠᠢᠷᠯᠠᠯᠳᠤᠳᠠᠭ᠃