ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠳᠥᠷᠪᠡ ᠂ ᠮᠣᠩᠭᠣᠯ ᠭᠡᠷ ᠦᠨ ᠪᠦᠲᠦᠴᠡ ᠶᠢᠨ ᠪᠦᠯᠦᠭ 9 > Хөх зул – Боржигон Ванжал –"Ддөрөв ᠂ Монгол гэрийн бүтцийн бүлэг " 9
263ᠳᠥᠷᠪᠡ ᠂ ᠮᠣᠩᠭᠣᠯ ᠭᠡᠷ ᠦᠨ ᠪᠦᠲᠦᠴᠡ ᠶᠢᠨ ᠪᠦᠯᠦᠭ – 9
ᠪᠤᠰᠤᠳ ᠤᠯᠠᠮᠵᠢᠯᠠᠯᠲᠦ ᠶᠣᠰᠣᠨ Бусад уламжлалт ёсон
ᠪᠤᠰᠤᠳ ᠤᠯᠠᠮᠵᠢᠯᠠᠯᠲᠤ ᠶᠣᠰᠣᠨ
ᠮᠣᠩᠭᠣᠯᠴᠤᠳ ᠨᠤᠲᠤᠭ ᠪᠠᠭᠤᠷᠢ ᠰᠢᠨᠵᠢᠨ ᠰᠠᠭᠤᠬᠤ ᠳ᠋ᠠᠭᠠᠨ ᠠᠷᠤ ᠳ᠋ᠠᠭᠠᠨ ᠲᠦᠰᠢᠭᠲᠡᠢ ᠡᠭᠡᠪᠦᠷ ᠭᠠᠵᠠᠷ ᠢ᠋ ᠰᠣᠩᠭᠣᠵᠤ ᠨᠠᠷᠠ ᠭᠠᠷᠬᠤ ᠵᠦᠭ ᠭᠡᠷ ᠦ᠋ᠨ ᠡᠭᠦᠳᠡ ᠪᠡᠨ ᠬᠠᠷᠠᠭᠤᠯᠵᠤ ᠪᠠᠷᠢᠳᠠᠭ᠃ ᠬᠡᠳᠦᠨ ᠭᠡᠷ ᠲᠡᠢ ᠪᠣᠯ ᠪᠦᠷ ᠵᠡᠷᠭᠡᠴᠡᠭᠦᠯᠦᠨ ᠡᠩᠨᠡᠭᠦᠯᠵᠦ ᠪᠠᠷᠢᠬᠤ ᠠ᠋ᠴᠠ ᠪᠢᠰᠢ᠂ ᠠᠷᠤ ᠡᠮᠦᠨᠡ ᠨᠢ ᠰᠤᠨᠳᠠᠯᠠᠭᠤᠯᠵᠤ ᠪᠠᠷᠢᠳᠠᠭ ᠶᠣᠰᠣ ᠦᠭᠡᠢ᠃ ᠭᠤᠷᠪᠠᠨ ᠭᠡᠷ ᠲᠡᠢ ᠠᠢᠯ ᠪᠤᠷᠬᠠᠨ ᠤ᠋ ᠥᠷᠭᠥᠭᠡ᠂ ᠵᠣᠴᠢᠳ ᠤ᠋ᠨ ᠭᠡᠷ᠂ ᠪᠣᠷᠣ ᠭᠡᠷ ( ᠭᠠᠯ ᠲᠣᠭᠣᠭᠠᠨ ᠤ᠋ ) ᠭᠡᠵᠦ ᠬᠤᠪᠢᠶᠠᠨᠠ᠃ ᠮᠠᠯ ᠤ᠋ᠨ ᠬᠠᠰᠢᠶᠠ ᠪᠠᠨ ᠭᠡᠷ ᠡᠴᠡ ᠨᠡᠯᠢᠶᠡᠳ ᠵᠠᠢᠲᠠᠢ ᠪᠠᠢᠷᠢᠰᠢᠭᠤᠯᠵᠤ᠂ ᠪᠠᠷᠠᠭᠤᠨ ᠡᠮᠦᠨᠡ ᠵᠦᠭ ᠲᠡᠭᠡᠨ 60 ᠠᠯᠬᠤᠮ ᠤ᠋ᠨ ᠵᠠᠢᠲᠠᠢ ᠱᠣᠩ ᠵᠡᠯᠡ ᠲᠡᠳᠡᠨ ᠮᠣᠷᠢᠨ ᠤ᠋ ᠤᠶᠠᠭᠠ ᠭᠠᠷᠭᠠᠨᠠ᠃ ᠭᠡᠷ ᠦ᠋ᠨ ᠠᠷᠤ ᠭᠤᠷᠪᠠᠨ ᠵᠦᠭ ᠦ᠋ᠨ ᠬᠠᠮᠢᠭᠠ ᠨᠢ ᠥᠨᠳᠥᠷ ᠰᠢᠭ ᠭᠠᠵᠠᠷ ᠪᠠᠢᠪᠠᠯ ᠲᠡᠷᠡ ᠳᠡᠭᠡᠷᠡ ᠲᠦᠯᠡᠰᠢ ᠠᠷᠭᠠᠯ ᠢ᠋ᠶ᠋ᠠᠨ ᠣᠪᠣᠭᠠᠯᠠᠨᠠ᠃ ᠦᠨᠡᠰᠦ ᠪᠡᠨ ᠡᠷᠬᠡᠪᠰᠢ ᠵᠡᠭᠦᠨ ᠡᠮᠦᠨᠡᠰᠢ ᠨᠡᠯᠢᠶᠡᠳ ᠬᠣᠯᠠ ᠲᠣᠭᠲᠠᠯ ᠲᠠᠢ ᠭᠠᠵᠠᠷ ᠲᠤ᠌ ᠬᠠᠶᠠᠨᠠ᠃ ᠭᠡᠷ ᠦ᠋ᠨ ᠪᠥᠰᠡᠨ ᠡᠴᠡ ᠤᠨᠤᠭᠠ ᠮᠠᠯ ᠤᠶᠠᠳᠠᠭ ᠦᠭᠡᠢ ᠪᠥᠭᠡᠳ ᠪᠠᠰᠠ ᠡᠯᠳᠡᠪ ᠡᠰᠡ ᠶ᠋ᠢᠨ ᠶᠠᠭᠤᠮᠠ ᠬᠠᠪᠴᠢᠭᠤᠯᠵᠤ ᠨᠠᠪᠰᠠᠭᠠᠨᠠᠭᠤᠯᠳᠠᠭ ᠦᠭᠡᠢ᠃ ᠢᠰᠡᠭᠡᠢ ᠡᠭᠦᠳᠡ ᠪᠡᠨ ᠭᠡᠷ ᠳᠡᠭᠡᠷᠡ ᠪᠡᠨ ᠡᠪᠬᠡᠵᠦ ᠲᠠᠯᠪᠢᠳᠠᠭ ᠠ᠋ᠴᠠ ᠪᠢᠰᠢ ᠰᠤᠩᠭᠠᠨ ᠬᠠᠶᠠᠳᠠᠭ ᠦᠭᠡᠢ᠃ ᠣᠷᠣᠵᠤ ᠭᠠᠷᠬᠤ ᠳ᠋ᠠᠭᠠᠨ ᠡᠭᠦᠳᠡᠨ ᠦ᠌ ᠵᠥᠪ ᠲᠠᠯᠠ ᠶ᠋ᠢ ᠰᠡᠬᠦᠬᠦ ᠡᠴᠡ ᠪᠢᠰᠢ ᠪᠤᠷᠤᠭᠤ ᠲᠠᠯᠠ ᠶ᠋ᠢ ᠰᠡᠬᠦᠳᠡᠭ ᠦᠭᠡᠢ᠃ ᠭᠡᠷ ᠲᠦ᠍ ᠫᠤᠤ ᠵᠡᠪᠰᠡᠭ ᠢ᠋ᠶ᠋ᠡᠨ ᠡᠭᠦᠷᠴᠦ ᠣᠷᠣᠳᠠᠭ ᠦᠭᠡᠢ᠃ ᠴᠢᠳᠥᠷ ᠪᠦᠰᠡᠯᠡᠵᠦ ᠣᠷᠣᠳᠠᠭ ᠦᠭᠡᠢ ᠃