ᠨᠣᠮ ᠤᠩᠰᠢᠬᠤ ᠦᠭᠡᠢ-ᠬᠡᠦᠬᠡᠳ ᠦᠨ ᠵᠠᠩ ᠰᠡᠳᠭᠢᠴᠡ ᠳᠦ ᠢᠯᠡᠷᠡᠵᠦ ᠪᠠᠢᠭᠠ ᠠᠰᠠᠭᠤᠳᠠᠯ-ᠮᠣᠩᠭᠣᠯᠴᠤᠳ ᠤ᠋ᠨ ᠭᠡᠷ ᠪᠦᠯᠢ ᠶ᠋ᠢᠨ ᠬᠥᠮᠦᠵᠢᠯ2-10-ᠪᠣᠯᠣᠴᠢᠯᠠᠭᠤ
1768ᠨᠣᠮ ᠤᠩᠰᠢᠬᠤ ᠦᠭᠡᠢ
ᠥᠨᠥ ᠶ᠋ᠢᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠳᠡᠭᠡᠷᠡ ᠬᠡᠦᠬᠡᠳ ᠦ᠋ᠳ ᠲᠤ ᠪᠡᠨ ᠨᠣᠮ ᠤᠩᠰᠢᠬᠤ ᠰᠠᠢᠨ ᠰᠠᠢᠬᠠᠨ ᠳᠠᠳᠬᠠᠯ ᠢ᠋ ᠬᠥᠮᠦᠵᠢᠭᠦᠯᠵᠦ ᠲᠡᠳᠡᠨ ᠢ᠋《ᠨᠣᠮ ᠤ᠋ᠨ ᠰᠠᠢᠨ ᠨᠥᠬᠥᠷ ᠪᠣᠯᠭᠠᠬᠤ》 ᠪᠣᠯ ᠲᠤᠩ ᠬᠦᠨᠳᠦ ᠴᠢᠬᠤᠯᠠ ᠠᠰᠠᠭᠤᠳᠠᠯ ᠪᠣᠯᠤᠭᠠᠳ ᠪᠠᠢᠨᠠ᠃ ᠲᠦᠷᠦᠮᠡᠭᠴᠡ ᠲᠧᠯᠸᠢᠰ ᠺᠢᠨᠣ᠋ ᠲᠠᠢ ᠬᠠᠮᠲᠤ ᠪᠣᠢᠵᠢᠭᠰᠠᠨ ᠬᠡᠦᠬᠡᠳ ᠦ᠋ᠳ ᠮᠠᠨᠢ ᠨᠣᠮ ᠤᠩᠰᠢᠬᠤ ᠳ᠋ᠤ᠌ ᠲᠤᠩ ᠠᠨᠠᠢᠬᠠᠨ ᠪᠣᠯᠵᠠᠢ᠂ ᠡᠨᠡ ᠨᠢ ᠮᠥᠨ ᠳᠡᠯᠡᠬᠡᠢ ᠶ᠋ᠢᠨ ᠴᠢᠨᠠᠷᠲᠠᠢ ᠬᠦᠨᠳᠦ ᠲᠦᠭᠡᠮᠡᠯ ᠠᠰᠠᠭᠤᠳᠠᠯ ᠪᠣᠯᠤᠭᠠᠳ ᠪᠠᠢᠨᠠ᠃ ᠡᠭᠦᠨ ᠦ᠌ ᠳ᠋ᠦᠩ ᠳ᠋ᠦ᠍ ᠮᠠᠨ ᠤ᠋ ᠬᠡᠦᠬᠡᠳ ᠦ᠋ᠨ ᠦᠭᠡᠰ ᠦ᠋ᠨ ᠰᠠᠩ ᠶᠠᠳᠠᠭᠤᠷᠠᠭᠠᠳ ᠶᠠᠮᠠᠷᠬᠠᠨ ᠪᠣᠯᠤᠭᠰᠠᠨ ᠢ᠋ ᠳᠥᠬᠥᠮᠬᠡᠨ ᠵᠢᠱ᠌ᠢᠶᠡ ᠡᠴᠡ ᠬᠠᠷᠠ ᠳᠠ᠂ ᠠᠩᠬᠠ ᠳᠤᠮᠳᠠᠳᠤ ᠶ᠋ᠢᠨ ᠨᠢᠭᠡ ᠰᠤᠷᠤᠭᠴᠢ ᠶ᠋ᠢᠨ ᠵᠠᠭᠤ ᠭᠠᠷᠤᠢ ᠦᠭᠡ ᠲᠡᠢ ᠣᠬᠣᠷ ᠵᠣᠬᠢᠶᠠᠯ ᠳ᠋ᠤ᠌ ᠪᠠᠨ《ᠦᠬᠦᠯᠡ》 ᠭᠡᠰᠡᠨ ᠦᠭᠡ ᠶ᠋ᠢ ᠠᠭᠤᠷᠯᠠᠵᠤ ᠦᠬᠦᠯᠡ᠂ ᠶᠠᠳᠠᠷᠠᠵᠤ ᠦᠬᠦᠯᠡ᠂ ᠵᠣᠪᠠᠵᠤ ᠦᠬᠦᠯᠡ᠁ ᠭᠡᠬᠦ ᠮᠡᠲᠦ ᠪᠡᠷ ᠠᠷᠪᠠ ᠭᠠᠷᠤᠢ ᠤᠳᠠᠭᠠ ᠵᠠᠷᠤᠭᠰᠠᠨ ᠨᠢ ᠲᠡᠳᠡᠨ ᠦ᠌ ᠦᠭᠡᠰ ᠦ᠋ᠨ ᠰᠠᠩ ᠶᠠᠮᠠᠷᠬᠠᠨ ᠶᠠᠳᠠᠭᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠤᠯᠤᠭᠰᠠᠨ ᠲᠡᠳᠦᠢ ᠦᠭᠡᠢ᠂ ᠰᠡᠳᠬᠢᠴᠡ ᠵᠠᠩ ᠠᠷᠠᠨᠰᠢᠨ ᠤ᠋ ᠬᠢᠨᠢ ᠳᠠᠩ ᠴᠤᠯᠭᠤᠢ ᠪᠠᠢᠳᠠᠯ ᠢ᠋ ᠨᠢ ᠳᠠᠮ ᠢ᠋ᠶ᠋ᠠᠷ ᠲᠣᠳᠣᠷᠠᠭᠤᠯᠵᠤ ᠪᠠᠢᠬᠤ ᠪᠢᠰᠢ ᠤᠤ᠃ ᠳᠡᠭᠡᠳᠦ ᠳᠤᠮᠳᠠᠳᠤ ᠶ᠋ᠢᠨ ᠬᠡᠦᠬᠡᠳ ᠮᠣᠩᠭᠣᠯ ᠤᠷᠠᠨ ᠵᠣᠬᠢᠶᠠᠯ ᠢ᠋ᠶ᠋ᠠᠨ ᠤᠩᠰᠢᠭᠠᠳ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠬᠤ ᠨᠢ ᠨᠡᠯᠢᠶᠡᠳ ᠨᠡᠢᠳᠡᠮ ᠦ᠋ᠨ ᠠᠰᠠᠭᠤᠳᠠᠯ ᠪᠣᠯᠵᠠᠢ᠂ ᠲᠡᠦᠬᠡ ᠰᠤᠳᠤᠷ ᠤᠩᠰᠢᠭᠠᠳ ᠶᠠᠭᠤ ᠤᠩᠰᠢᠵᠤ ᠪᠠᠢᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ᠂ ᠨᠢᠳᠦ ᠨᠢ ᠤᠩᠰᠢᠭᠠᠳ ᠰᠡᠳᠬᠢᠯ ᠨᠢ ᠤᠩᠰᠢᠬᠤ ᠦᠭᠡᠢ ᠪᠣᠯᠵᠠᠢ᠃ ᠡᠨᠡ ᠪᠣᠯ ᠲᠤᠩ ᠭᠡᠨᠡᠨ ᠠᠶᠤᠯ ᠪᠠᠢᠭᠠ᠂ ᠡᠨᠡ ᠮᠡᠲᠦ ᠶᠠᠪᠤᠪᠠᠯ ᠬᠥᠮᠦᠰ ᠦ᠋ᠨ ᠣᠶᠤᠨ ᠰᠡᠳᠬᠢᠬᠦᠢ ᠪᠦᠷ ᠵᠡᠮᠳᠡᠭ ᠪᠣᠯᠬᠤ ᠠᠶᠤᠯᠲᠠᠢ᠃
ᠪᠦᠬᠦ ᠨᠡᠢᠭᠡᠮ ᠦ᠋ᠨ ᠬᠥᠮᠦᠰ ᠪᠦᠷ ᠯᠡ ᠳᠠᠭᠤ ᠳᠦᠷᠰᠦ ᠲᠡᠢ ᠪᠡᠨ ᠪᠡᠯᠡᠨ ᠪᠠᠢᠬᠤ ᠲᠧᠯᠸᠢᠰ ᠰᠦᠯᠵᠢᠶᠡ ᠲᠡᠢ ᠵᠠᠭᠤᠷᠠᠭᠰᠠᠭᠠᠷ ᠪᠠᠢᠵᠤ᠂ ᠨᠣᠮ ᠤᠩᠰᠢᠬᠤ ᠲᠣᠭᠠ ᠬᠡᠮᠵᠢᠶᠡ ᠲᠤᠩ ᠶᠡᠬᠡ ᠪᠠᠭᠤᠷᠠᠵᠠᠢ᠂ ᠠᠢᠮᠠᠭ ᠬᠤᠰᠢᠭᠤᠨ ᠤ᠋ ᠨᠣᠮ ᠤ᠋ᠨ ᠰᠠᠩ ᠨᠡᠷᠡ ᠲᠡᠳᠦᠢ ᠦᠵᠡᠬᠦᠯᠦᠭᠡ ᠶ᠋ᠢᠨ ᠶᠠᠭᠤᠮᠠ ᠪᠣᠯᠵᠤ᠂ ᠡᠭᠦᠳᠡ ᠪᠡᠷ ᠨᠢ ᠣᠷᠣᠵᠤ ᠭᠠᠷᠬᠤ ᠬᠥᠮᠦᠨ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠣᠯᠵᠠᠢ᠃《ᠥᠨᠥ ᠶ᠋ᠢᠨ ᠴᠠᠭ ᠬᠡᠨ ᠨᠣᠮ ᠤᠩᠰᠢᠬᠤ ᠪᠣᠢ᠂ ᠱᠣᠷᠣᠩ ᠳ᠋ᠤ᠌ ᠰᠠᠭᠤᠭᠰᠠᠨ ᠬᠥᠮᠦᠨ ᠯᠡ ᠤᠩᠰᠢᠬᠤ ᠠ᠋ᠴᠠ ᠳᠠ》 ᠭᠡᠬᠦ ᠲᠤᠩ ᠲᠠᠩᠬᠠᠢ ᠦᠭᠡ ᠭᠠᠵᠠᠷ ᠠᠪᠴᠤ ᠪᠠᠢᠨᠠ᠃ ᠲᠠᠨᠠᠷ ᠬᠡᠨ ᠨᠣᠮ ᠤᠩᠰᠢᠳᠠᠭ ᠢ᠋ ᠬᠠᠷᠠ ᠯᠠ ᠳᠠ! ᠢᠰᠷᠧᠢᠯ ᠤᠯᠤᠰ ᠲᠤ ᠲᠡᠭᠰᠢᠳᠬᠡᠭᠡᠳ4500 ᠬᠥᠮᠦᠨ ᠦ᠌ ᠳᠤᠮᠳᠠ ᠨᠢᠭᠡ ᠨᠣᠮ ᠤ᠋ᠨ ᠰᠠᠩ ᠠᠵᠢᠯᠯᠠᠵᠤ ᠪᠠᠢᠨᠠ᠂ ᠬᠡᠦᠬᠡᠳ ᠢ᠋ᠶ᠋ᠡᠨ ᠥᠯᠥᠭᠡᠢ ᠲᠡᠢ ᠪᠠᠢᠬᠤ ᠠ᠋ᠴᠠ ᠨᠢ ᠨᠣᠮ ᠪᠣᠯ ᠪᠠᠯ ᠰᠢᠭ᠋ ᠠᠮᠲᠠᠲᠠᠢ ᠰᠢᠦ ᠭᠡᠮᠡᠨ ᠨᠣᠮ ᠤ᠋ᠨ ᠭᠠᠳᠠᠷ ᠳᠡᠭᠡᠷᠡ ᠪᠡᠨ ᠪᠠᠯ ᠳᠦᠷᠭᠢᠭᠡᠳ ᠬᠡᠦᠬᠡᠳ ᠲᠤ ᠪᠡᠨ ᠳᠣᠯᠢᠶᠠᠯᠭᠠᠵᠤ᠂ ᠨᠣᠮ ᠪᠢᠴᠢᠭ ᠦ᠋ᠨ ᠲᠤᠬᠠᠢ ᠬᠥᠮᠦᠵᠢᠯ ᠬᠢᠵᠦ ᠡᠬᠢᠯᠡᠳᠡᠭ ᠭᠡᠨᠡ᠃ ᠢᠪᠷᠠᠢ ᠬᠥᠮᠦᠨ ᠨᠣᠮ ᠪᠢᠴᠢᠭ ᠢ᠋ ᠲᠡᠭᠡᠵᠦ ᠦᠬᠦᠨ ᠬᠠᠳᠠᠨ ᠤᠩᠰᠢᠳᠠᠭ ᠤ᠋ᠨ ᠠᠴᠢ ᠪᠠᠷ ᠠᠷᠠᠪ ᠤ᠋ᠨ ᠡᠯᠡᠰᠦᠨ ᠴᠦᠯ ᠳ᠋ᠦ᠍ ᠮᠠᠨ ᠤ᠋ ᠵᠡᠭᠦᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ ᠤ᠋ ᠬᠠᠭᠠᠰ ᠬᠦᠷᠬᠦ ᠦᠭᠡᠢ ᠨᠤᠲᠤᠭ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠬᠠᠭᠠᠰᠬᠠᠨ ᠵᠠᠭᠤᠨ ᠤ᠋ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠢᠰᠷᠧᠢᠯ ᠭᠡᠳᠡᠭ ᠳᠡᠯᠡᠬᠡᠢ ᠶ᠋ᠢᠨ ᠬᠥᠭᠵᠢᠭᠰᠡᠨ ᠤᠯᠤᠰ ᠢ᠋ ᠪᠠᠢᠭᠤᠯᠵᠤ ᠴᠢᠳᠠᠭᠰᠠᠨ ᠪᠠᠢᠨᠠ᠃ ᠦᠷᠡ ᠬᠡᠦᠬᠡᠳ ᠲᠤ ᠪᠡᠨ ᠨᠣᠮ ᠤᠩᠰᠢᠪᠠᠯ ᠵᠢᠰᠦ ᠰᠠᠢᠬᠠᠨ ᠪᠣᠯᠤᠨᠠ ᠭᠡᠮᠡᠨ ᠨᠣᠮᠯᠠᠳᠠᠭ ᠶᠠᠫᠣᠨᠴᠤᠳ ᠳᠡᠯᠡᠬᠡᠢ ᠳᠡᠭᠡᠷᠡ《ᠨᠣᠮ ᠤᠩᠰᠢᠯᠭᠠ ᠶ᠋ᠢᠨ ᠸᠠᠩᠲᠤ ᠤᠯᠤᠰ》 ᠬᠡᠮᠡᠬᠦ ᠠᠯᠳᠠᠷ ᠲᠠᠢ᠃ ᠨᠣᠮᠴᠢ ᠶᠠᠫᠣᠨᠴᠤᠳ ᠲᠡᠭᠡᠭᠡᠳ ᠨᠣᠮ ᠪᠢᠰᠢᠯᠭᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠣᠮᠣᠬᠠᠨ ᠳᠠᠯᠠᠢ ᠶ᠋ᠢᠨ ᠵᠢᠵᠢᠭᠬᠡᠨ ᠠᠷᠠᠯ ᠳᠡᠭᠡᠷᠡ ᠠᠽᠢᠶᠠ ᠶ᠋ᠢᠨ ᠬᠠᠮᠤᠭ ᠪᠠᠶᠠᠨ ᠬᠦᠴᠦᠷᠬᠡᠭ ᠤᠯᠤᠰ ᠢ᠋ ᠪᠠᠢᠭᠤᠯᠤᠭᠰᠠᠨ ᠰᠢᠦ᠃ ᠬᠥᠭᠵᠢᠭᠰᠡᠨ ᠤᠯᠤᠰ ᠤ᠋ᠨ ᠢᠷᠭᠡᠳ ᠦ᠋ᠨ ᠬᠡᠪ ᠴᠢᠨᠠᠷ ᠥᠨᠳᠥᠷ ᠪᠠᠢᠳᠠᠭ ᠨᠢ ᠪᠦᠷ ᠨᠣᠮ ᠶᠡᠬᠡ ᠤᠩᠰᠢᠬᠤ ᠳᠠᠳᠬᠠᠯ ᠠ᠋ᠴᠠ ᠪᠣᠯᠤᠭᠰᠠᠨ᠃ ᠢᠪᠷᠠᠢ ᠬᠥᠮᠦᠨ ᠵᠢᠯ ᠳ᠋ᠦ᠍ ᠲᠡᠭᠰᠢᠳᠬᠡᠭᠡᠳ64 ᠳᠡᠪᠲᠡᠷ᠂ ᠠᠮᠧᠷᠢᠺᠠ ᠶ᠋ᠢᠨ ᠬᠥᠮᠦᠰ ᠵᠢᠯ ᠳ᠋ᠦ᠍ ᠲᠡᠭᠰᠢᠳᠬᠡᠭᠡᠳ21 ᠳᠡᠪᠲᠡᠷ᠂ ᠶᠠᠫᠣᠨ17 ᠳᠡᠪᠲᠡᠷ᠂ ᠳᠤᠮᠳᠠᠳᠤ ᠶ᠋ᠢᠨ ᠢᠷᠭᠡᠨ ᠵᠢᠯ ᠳ᠋ᠦ᠍4 ᠳᠡᠪᠲᠡᠷ ᠨᠣᠮ ᠤᠩᠰᠢᠵᠤ ᠪᠠᠢᠨᠠ᠃(ᠰᠦᠯᠵᠢᠶᠡ ᠡᠴᠡ ᠯᠠᠪᠯᠠᠪᠠ) ᠲᠡᠭᠡᠬᠦ ᠡᠴᠡ ᠳᠡᠯᠡᠬᠡᠢ ᠳᠡᠭᠡᠷᠡ《ᠳᠡᠯᠡᠬᠡᠢ ᠶ᠋ᠢᠨ ᠬᠥᠮᠦᠰ ᠦ᠋ᠨ ᠮᠥᠩᠭᠥ ᠠᠮᠧᠷᠢᠺᠠ ᠬᠥᠮᠦᠨ ᠦ᠌ ᠬᠠᠷᠮᠠᠨ ᠳ᠋ᠤ᠌ ᠪᠠᠢᠨᠠ᠂ ᠠᠮᠧᠷᠢᠺᠠ ᠬᠥᠮᠦᠨ ᠦ᠌ ᠮᠥᠩᠭᠥ ᠢᠪᠷᠠᠢ ᠬᠥᠮᠦᠨ ᠦ᠌ ᠲᠠᠷᠢᠬᠢᠨ ᠳ᠋ᠤ᠌ ᠪᠠᠢᠨᠠ》 ᠬᠡᠮᠡᠬᠦ ᠨᠢᠭᠡᠨ ᠬᠡᠯᠡᠯᠭᠡ ᠪᠣᠢ ᠪᠣᠯᠤᠭᠰᠠᠨ ᠪᠠᠢᠳᠠᠭ᠃《ᠰᠠᠢᠨ ᠡᠷᠡ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ᠂ ᠮᠠᠭᠤ ᠡᠷᠡ ᠢᠳᠡᠭᠰᠡᠨ ᠢ᠋ᠶ᠋ᠡᠨ》 ᠭᠡᠳᠡᠭ᠃ ᠣᠳᠣ ᠴᠢᠨᠢ ᠢᠳᠡᠵᠦ ᠤᠤᠭᠤᠭᠰᠠᠨ ᠢ᠋ᠶ᠋ᠠᠨ ᠶᠡᠬᠡ ᠯᠡ ᠭᠠᠢᠬᠠᠭᠤᠯᠬᠤ ᠪᠣᠯᠵᠤ ᠪᠠᠢᠨᠠ᠃ ᠠᠭᠤᠯᠵᠠᠭᠠ ᠦᠭᠡᠢ ᠤᠳᠠᠭᠠᠨ ᠵᠢᠯ ᠪᠣᠯᠤᠭᠰᠠᠨ ᠤᠨᠠᠭᠠᠨ ᠨᠠᠢᠵᠠ ᠮᠠᠨᠢ ᠰᠤᠮᠤᠨ ᠳᠠᠷᠤᠭᠠ ᠰᠠᠭᠤᠭᠰᠠᠨ ᠤ᠋ ᠳᠠᠷᠠᠭᠠ ᠤᠴᠠᠷᠠᠭᠠᠳ᠂ ᠵᠢᠯ ᠪᠦᠷᠢ ᠬᠡᠴᠢᠨᠡᠨ ᠬᠣᠨᠢᠨ ᠤ᠋ ᠳᠠᠢᠯᠠᠯᠭᠠ ᠬᠢᠳᠡᠭ ᠢ᠋ᠶ᠋ᠡᠨ ᠬᠠᠭᠤᠴᠢᠯᠠᠭᠠᠳ ᠨᠢᠭᠡ ᠣᠷᠣᠢ ᠶ᠋ᠢᠨ ᠠᠷᠢᠬᠢᠨ ᠰᠢᠷᠡᠭᠡᠨ ᠦ᠌ ᠭᠣᠣᠯ ᠵᠠᠭᠤᠰᠢ ᠪᠣᠯᠭᠠᠭᠰᠠᠨ ᠪᠢᠯᠡ! ᠡᠢᠮᠦᠷᠬᠦ ᠨᠡᠢᠭᠡᠮ ᠦ᠋ᠨ ᠠᠭᠠᠷ ᠦᠨᠡᠬᠡᠷ ᠬᠢᠵᠢᠭ ᠲᠠᠬᠤᠯ ᠰᠢᠭ᠋ ᠳᠡᠯᠭᠡᠷᠡᠵᠦ ᠪᠠᠢᠨᠠ᠃ ᠬᠣᠯᠠ ᠶᠠᠪᠤᠵᠤ ᠨᠢᠳᠦ ᠨᠡᠭᠡᠭᠡᠭᠰᠡᠨ ᠬᠥᠮᠦᠨ᠂ ᠨᠣᠮ ᠤᠩᠰᠢᠵᠤ ᠰᠢᠨᠡ ᠶ᠋ᠢ ᠰᠤᠪᠢᠭᠰᠠᠨ ᠬᠥᠮᠦᠰ ᠬᠣᠭᠣᠯᠠᠨ ᠰᠢᠷᠡᠭᠡᠨᠡ ᠬᠦᠬᠦᠷ ᠰᠣᠯᠢᠯᠴᠠᠬᠤ ᠬᠣᠷᠣᠮ ᠳ᠋ᠤ᠌ ᠴᠤ᠌ ᠬᠣᠯᠠ ᠶ᠋ᠢ ᠬᠠᠭᠤᠴᠢᠯᠠᠵᠤ ᠶᠡᠬᠡ ᠶ᠋ᠢ ᠪᠣᠳᠣᠭᠤᠯᠵᠤ ᠠᠮᠵᠢᠨᠠ᠃ ᠮᠣᠩᠭᠣᠯᠴᠤᠳ ᠪᠢᠳᠡᠨ ᠦ᠌ ᠠᠮᠢᠳᠤᠷᠠᠯ ᠳ᠋ᠤ᠌ ᠠᠷᠢᠬᠢ ᠨᠠᠢᠷ ᠣᠯᠠᠰᠢᠷᠠᠵᠤ ᠪᠠᠢᠬᠤ ᠨᠢ ᠠᠮᠢᠳᠤᠷᠠᠯ ᠤ᠋ᠨ ᠬᠡᠪ ᠴᠢᠨᠠᠷ ᠳᠡᠭᠡᠭᠰᠢᠯᠡᠭᠰᠡᠨ ᠦ᠌ ᠬᠢ ᠭᠡᠮᠡᠨ ᠦᠵᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ᠂ ᠬᠠᠷᠢᠨ ᠮᠠᠨ ᠤ᠋ ᠣᠶᠤᠨ ᠰᠠᠨᠠᠭᠠᠨ ᠳ᠋ᠤ᠌ ᠶᠠᠭᠤ ᠨᠢᠭᠡ ᠳᠤᠲᠠᠭᠳᠠᠵᠤ ᠬᠣᠭᠣᠰᠣᠷᠠᠵᠤ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠨᠠ᠃ ᠨᠡᠭᠦᠳᠡᠯ ᠪᠠᠭᠤᠳᠠᠯ ᠦᠭᠡᠢ᠂ ᠠᠶᠠᠨ ᠵᠢᠩ ᠦᠭᠡᠢ᠂ ᠠᠩ ᠬᠦᠷᠦᠭᠡ ᠴᠦ᠍ ᠦᠭᠡᠢ ᠪᠣᠯᠤᠭᠰᠠᠨ ᠡᠷᠢᠨ ᠦ᠌ ᠪᠢᠳᠡ ᠴᠢᠨᠢ ᠠᠷᠢᠬᠢᠨ ᠪᠡᠯᠴᠢᠭᠡᠷ ᠡᠴᠡ ᠴᠠᠰᠢ ᠰᠡᠳᠬᠢᠬᠦ ᠥᠬᠡᠢ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠴᠢᠬᠡᠭᠰᠡᠨ ᠭᠡᠵᠢ ᠤᠤ⁈ ᠲᠡᠭᠡᠪᠡᠯ ᠪᠢᠳᠡ ᠵᠢᠯ ᠳ᠋ᠦ᠍ ᠬᠡᠳᠦᠨ ᠳᠡᠪᠲᠡᠷ ᠨᠣᠮ ᠲᠤᠩᠭᠠᠵᠤ᠂ ᠬᠡᠳᠦᠨ ᠯᠣᠩᠬᠣ ᠠᠷᠢᠬᠢ ᠰᠢᠮᠡᠵᠦ ᠪᠠᠢᠬᠤ ᠳ᠋ᠤ᠌ ᠪᠠᠨ ᠲᠣᠭᠠᠴᠠᠭᠠ ᠬᠢᠯᠲᠡᠢ ᠪᠠᠢᠨᠠ᠃ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠲᠠᠷᠢᠬᠢᠨ ᠳ᠋ᠤ᠌ ᠯᠣᠩᠬᠣ ᠪᠠᠢᠨᠠ ᠭᠡᠮᠡᠨ ᠪᠢᠲᠡᠭᠡᠢ ᠬᠡᠯᠡᠭᠳᠡᠴᠢᠬᠡᠶᠡ ᠳᠡ! ᠬᠣᠳᠣᠭᠣᠳᠣᠨ ᠳ᠋ᠤ᠌ ᠪᠠᠨ ᠪᠡᠯᠡ ᠣᠷᠣᠭᠤᠯᠬᠤ ᠶ᠋ᠢᠨ ᠵᠠᠪᠰᠠᠷ ᠲᠤ ᠲᠠᠷᠢᠬᠢᠨ ᠳ᠋ᠤ᠌ ᠪᠠᠨ ᠪᠠᠰᠠ ᠬᠥᠷᠥᠩᠭᠡ ᠣᠷᠣᠭᠤᠯᠤᠯᠲᠠ ᠬᠢᠬᠦ ᠶ᠋ᠢ ᠰᠠᠨᠠᠵᠤ ᠪᠠᠢᠶᠠ! ᠨᠣᠮ ᠤᠩᠰᠢᠨᠠ ᠭᠡᠳᠡᠭ ᠴᠢᠨᠢ ᠢᠷᠡᠭᠡᠳᠦᠢ ᠳ᠋ᠦ᠍ ᠪᠡᠨ ᠬᠥᠷᠥᠩᠭᠡ ᠣᠷᠣᠭᠤᠯᠵᠤ ᠪᠠᠢᠭᠠ ᠠᠯᠤᠰ ᠤ᠋ᠨ ᠪᠣᠳᠣᠯᠭᠠ ᠪᠠᠢᠭᠠ ᠰᠢᠦ!
ᠭᠡᠷ ᠦ᠋ᠨ ᠠᠬᠠᠮᠠᠳ ᠮᠠᠨᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠨᠣᠮ ᠤᠩᠰᠢ ᠭᠡᠵᠦ ᠵᠠᠷᠯᠢᠭᠳᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠡᠦᠬᠡᠳ ᠲᠡᠢ ᠪᠡᠨ ᠬᠠᠮᠲᠤ ᠨᠣᠮ ᠤᠩᠰᠢᠬᠤ ᠳᠠᠳᠬᠠᠯ ᠲᠠᠢ ᠪᠠᠢᠪᠠᠯ ᠬᠠᠮᠤᠭ ᠰᠠᠢᠨ ᠬᠡᠪ ᠳᠠᠭᠤᠷᠢᠶᠠᠯ ᠪᠣᠯᠤᠨᠠ᠃ ᠨᠣᠮ ᠤᠩᠰᠢᠨᠠ ᠭᠡᠳᠡᠭ ᠵᠠᠪᠠᠯ ᠡᠷᠳᠡᠮ ᠰᠣᠶᠣᠯ ᠢ᠋ᠶ᠋ᠠᠨ ᠳᠡᠭᠡᠭᠰᠢᠯᠡᠭᠦᠯᠦᠨᠡ ᠭᠡᠰᠡᠨ ᠦᠭᠡ ᠪᠢᠰᠢ᠂ ᠮᠠᠯᠴᠢᠨ ᠲᠠᠷᠢᠶᠠᠴᠢᠨ ᠪᠤᠶᠤ ᠬᠦᠴᠦᠨ ᠦ᠌ ᠠᠵᠢᠯ ᠬᠢᠵᠦ ᠪᠠᠢᠭᠠ ᠮᠠᠨ ᠳ᠋ᠤ᠌ ᠨᠣᠮ ᠡᠷᠳᠡᠮ ᠶᠠᠮᠠᠷ ᠬᠡᠷᠡᠭᠲᠡᠢ ᠶᠦᠮ ᠭᠡᠵᠦ ᠬᠡᠯᠡᠬᠦ ᠬᠥᠮᠦᠰ ᠵᠥᠩᠳᠡᠭᠡᠨ᠂ ᠲᠡᠢᠮᠦ ᠪᠢᠰᠢ ᠰᠢᠦ᠂ ᠨᠣᠮ ᠰᠣᠨᠢᠨ ᠦᠵᠡᠭᠡᠳ ᠨᠠᠮ ᠰᠠᠭᠤᠵᠤ ᠴᠢᠳᠠᠨᠠ ᠭᠡᠳᠡᠭ ᠰᠠᠨᠠᠭᠠ ᠪᠣᠳᠣᠯ ᠨᠡᠯᠢᠶᠡᠳ ᠨᠠᠮ ᠲᠣᠭᠲᠠᠭᠤᠨ ᠪᠠᠢᠬᠤ ᠶ᠋ᠢ ᠬᠠᠷᠠᠭᠤᠯᠤᠨᠠ᠂ ᠨᠣᠮ ᠤᠩᠰᠢᠵᠤ ᠰᠠᠨᠠᠭᠠ ᠰᠡᠳᠬᠢᠯ ᠨᠠᠮ ᠲᠤᠩᠭᠠᠯᠠᠭ ᠪᠠᠢᠵᠤ ᠴᠢᠳᠠᠭᠰᠠᠨ ᠬᠥᠮᠦᠰ ᠦ᠋ᠨ ᠵᠠᠩ ᠠᠷᠠᠨᠰᠢᠨ ᠤᠯᠠᠮ ᠲᠥᠪᠯᠡᠭᠦᠨ ᠲᠣᠭᠲᠠᠭᠤᠨ ᠪᠣᠯᠵᠤ᠂ ᠬᠥᠮᠦᠰ ᠲᠡᠢ ᠬᠠᠷᠢᠯᠴᠠᠬᠤ᠂ ᠠᠵᠢᠯ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠲᠥᠰᠥᠪᠯᠡᠬᠦ ᠪᠤᠶᠤ ᠶᠠᠮᠠᠷ ᠨᠢᠭᠡᠨ ᠠᠰᠠᠭᠤᠳᠠᠯ ᠳ᠋ᠤ᠌ ᠰᠣᠩᠭᠣᠯᠲᠠ ᠬᠢᠬᠦ ᠳ᠋ᠦ᠍ ᠨᠡᠩ ᠣᠶᠤᠨᠰᠠᠭ ᠯᠠᠪᠳᠠᠭᠤᠨ ᠪᠠᠢᠵᠤ ᠴᠢᠳᠠᠨᠠ᠃ ᠦᠭᠡᠢ ᠪᠣᠯ ᠥᠨᠥᠳᠥᠷ ᠦ᠋ᠨ ᠬᠥᠮᠦᠰ ᠦ᠋ᠨ ᠣᠯᠠᠩᠬᠢ ᠨᠢ ᠨᠤᠷᠮᠠᠨ ᠳᠡᠭᠡᠷᠡ ᠭᠢᠰᠬᠢᠭᠰᠡᠨ ᠮᠡᠲᠦ ᠰᠠᠨᠠᠭᠠ ᠰᠡᠳᠬᠢᠯ ᠲᠣᠭᠲᠠᠪᠤᠷᠢ ᠠᠯᠲᠠᠨ᠂ ᠰᠣᠬᠣᠷ ᠪᠠᠯᠠᠢ ᠪᠠᠷ ᠪᠤᠰᠤᠳ ᠢ᠋ ᠳᠠᠭᠠᠵᠤ ᠳᠡᠷᠪᠡᠨ ᠶᠠᠭᠤ ᠬᠢᠭᠰᠡᠨ ᠴᠦ᠍ ᠪᠦᠲᠦᠮᠵᠢ ᠮᠠᠭᠤᠲᠠᠢ ᠪᠤᠶᠤ ᠶᠠᠭᠤ ᠬᠢᠬᠦ ᠪᠡᠨ ᠴᠦ᠍ ᠣᠯᠬᠤ ᠦᠭᠡᠢ ᠬᠥᠯ ᠠᠯᠳᠠᠬᠤ ᠳ᠋ᠤ᠌ ᠬᠦᠷᠴᠦ ᠪᠠᠢᠨᠠ᠃ ᠲᠡᠭᠡᠬᠦ ᠡᠴᠡ ᠨᠣᠮ ᠰᠤᠳᠤᠷ ᠲᠠᠢ ᠨᠥᠬᠥᠷᠯᠡᠬᠦ ᠶ᠋ᠢ ᠪᠡᠶᠡ ᠰᠡᠳᠬᠢᠯ ᠦ᠋ᠨ ᠰᠤᠪᠢᠯᠠᠯᠲᠠ ᠪᠢᠰᠢᠯᠭᠠᠯ ᠭᠡᠮᠡᠨ ᠤᠬᠠᠭᠠᠷᠠᠶᠠ! ᠦᠨᠡᠨ ᠳ᠋ᠦ᠍ ᠪᠡᠨ ᠮᠠᠨ ᠤ᠋ ᠮᠠᠯᠴᠢᠨ ᠲᠦᠮᠡᠨ ᠨᠣᠮ ᠪᠢᠴᠢᠭ ᠢ᠋ ᠶᠡᠬᠡ ᠤᠩᠰᠢᠳᠠᠭ ᠮᠥᠷᠲᠡᠭᠡᠨ ᠲᠤᠩ ᠶᠡᠬᠡ ᠬᠦᠨᠳᠦᠳᠬᠡᠨ ᠳᠡᠭᠡᠳᠦᠯᠡᠳᠡᠭ ᠬᠥᠮᠦᠰ ᠰᠢᠦ᠂ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠥᠩᠭᠡ ᠨᠢ ᠣᠩᠭᠣᠭᠰᠠᠨ ᠳᠡᠪᠡᠯ ᠡᠮᠦᠰᠴᠦ ᠪᠠᠢᠭᠠᠳ ᠨᠣᠮ ᠰᠤᠳᠤᠷ ᠢ᠋ᠶ᠋ᠠᠨ ᠲᠣᠷᠭᠠ ᠪᠠᠷ ᠪᠠᠷᠢᠨᠲᠠᠭᠯᠠᠵᠤ ᠪᠤᠷᠬᠠᠨ ᠲᠠᠢ ᠪᠠᠨ ᠬᠠᠮᠲᠤ ᠲᠠᠬᠢᠵᠤ ᠳᠡᠭᠡᠳᠦᠯᠡᠳᠡᠭ ᠠᠷᠠᠳ ᠲᠦᠮᠡᠨ ᠳᠡ᠂ ᠮᠠᠨ ᠤ᠋ ᠮᠠᠯᠴᠢᠳ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠪᠣᠯᠪᠠᠯ ᠰᠣᠶᠣᠯ ᠤ᠋ᠨ ᠨᠠᠢᠷ ᠬᠢᠵᠦ᠂ ᠬᠤᠪᠢ ᠶ᠋ᠢᠨ ᠵᠠᠷᠤᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠣᠮ ᠪᠢᠴᠢᠭ ᠬᠡᠪᠯᠡᠭᠦᠯᠵᠦ ᠪᠠᠢᠳᠠᠭ᠃ ᠬᠥᠳᠡᠭᠡ ᠠᠢᠯ ᠳ᠋ᠤ᠌ ᠨᠢᠭᠡ ᠳᠡᠪᠲᠡᠷ ᠰᠢᠨᠡ ᠨᠣᠮ ᠢᠷᠡᠪᠡᠯ ᠠᠢᠯ ᠳᠠᠮᠵᠢᠨ ᠤᠩᠰᠢᠭᠳᠠᠭᠰᠠᠭᠠᠷ ᠪᠠᠢᠵᠤ ᠦᠵᠢᠷᠡᠴᠢᠬᠡᠭᠰᠡᠨ ᠶᠠᠪᠤᠵᠤ ᠪᠠᠢᠳᠠᠭ᠃ ᠨᠣᠮ ᠤᠩᠰᠢᠨᠠ᠂ ᠦᠯᠢᠭᠡᠷ ᠳᠣᠮᠣᠭ ᠶᠠᠷᠢᠨᠠ᠂ ᠣᠨᠢᠰᠣᠭᠠ ᠲᠠᠭᠠᠯᠴᠠᠨᠠ᠃ ᠦᠯᠢᠭᠡᠷ ᠶᠠᠷᠢᠬᠤ ᠪᠠᠷ ᠳᠠᠮᠵᠢᠨ ᠬᠡᠦᠬᠡᠳ ᠦ᠋ᠨ ᠯᠣᠭᠢᠭ ᠰᠡᠳᠬᠢᠬᠦᠢ ᠬᠥᠭᠵᠢᠨᠡ᠂ ᠦᠯᠢᠭᠡᠷ ᠳᠣᠮᠣᠭ ᠦ᠋ᠨ ᠳᠤᠮᠳᠠ ᠬᠡᠦᠬᠡᠳ ᠦ᠋ᠨ ᠬᠥᠮᠦᠨ ᠮᠥᠰᠥ ᠤᠷᠠᠨ ᠰᠠᠮᠪᠠᠭᠠ ᠪᠦᠷ ᠬᠥᠮᠦᠵᠢᠭᠳᠡᠵᠦ ᠪᠠᠢᠳᠠᠭ᠃ ᠵᠢᠭᠠᠬᠠᠨ ᠬᠡᠦᠬᠡᠳ ᠣᠨᠢᠰᠣᠭᠠ ᠲᠠᠭᠠᠯᠴᠠᠬᠤ ᠬᠠᠮᠤᠭ ᠳᠤᠷᠠᠲᠠᠢ ᠪᠠᠢᠳᠠᠭ᠂ ᠣᠨᠢᠰᠣᠭᠠ ᠲᠠᠭᠠᠯᠴᠠᠬᠤ ᠭᠡᠳᠡᠭ ᠬᠡᠦᠬᠡᠳ ᠦ᠋ᠨ ᠳᠦᠷᠰᠦᠯᠡᠨ ᠪᠣᠳᠣᠬᠤ᠂ ᠬᠣᠯᠪᠣᠨ ᠪᠣᠳᠣᠬᠤ᠂ ᠤᠷᠭᠤᠭᠤᠯᠤᠨ ᠪᠣᠳᠣᠬᠤ ᠰᠡᠳᠬᠢᠬᠦᠢ ᠶᠡᠬᠡ ᠬᠥᠭᠵᠢᠨᠡ᠂ ᠪᠠᠭᠠ ᠳ᠋ᠤ᠌ ᠪᠠᠨ ᠡᠨᠡ ᠮᠡᠲᠦ ᠣᠯᠠᠨ ᠦᠯᠢᠭᠡᠷ ᠳᠣᠮᠣᠭ ᠰᠢᠯᠦᠭ ᠣᠨᠢᠰᠣᠭᠠ ᠴᠡᠭᠡᠵᠢᠯᠡᠭᠰᠡᠨ ᠬᠡᠦᠬᠡᠳ ᠶᠡᠬᠡ ᠪᠣᠯᠤᠭᠰᠠᠨ ᠬᠣᠢᠨᠠ ᠬᠡᠯᠡ ᠰᠡᠳᠬᠢᠬᠦᠢ ᠴᠡᠭᠡᠵᠢᠯᠡᠬᠦ ᠴᠢᠳᠠᠪᠤᠷᠢ ᠨᠢ ᠪᠦᠷ ᠰᠠᠢᠨ ᠪᠣᠯᠤᠨᠠ᠂ ᠡᠨᠡ ᠪᠦᠬᠦᠨ ᠶᠠᠮᠠᠷ ᠰᠠᠢᠬᠠᠨ ᠣᠶᠤᠨ ᠤ᠋ ᠬᠥᠮᠦᠵᠢᠯ ᠪᠠᠢᠭᠰᠠᠨ ᠪᠢᠯᠡ! ᠪᠢᠳᠡ ᠡᠢᠮᠦ ᠯᠡ ᠰᠣᠶᠣᠯ ᠤ᠋ᠨ ᠠᠭᠠᠷ ᠲᠤ ᠥᠰᠴᠦ ᠬᠥᠮᠦᠵᠢᠭᠳᠡᠵᠦ ᠢᠷᠡᠭᠰᠡᠨ᠃ ᠲᠡᠭᠡᠬᠦ ᠡᠴᠡ ᠮᠠᠨ ᠤ᠋ ᠮᠠᠯᠴᠢᠨ ᠠᠷᠠᠳ ᠤ᠋ᠨ ᠬᠡᠯᠡᠨ ᠦ᠌ ᠮᠡᠳᠡᠷᠡᠮᠵᠢ ᠲᠡᠢᠮᠦ ᠬᠤᠷᠴᠠ ᠪᠠᠢᠵᠤ᠂ ᠳᠡᠯᠡᠬᠡᠢ ᠳ᠋ᠦ᠍ ᠭᠠᠢᠬᠠᠮᠰᠢᠭᠲᠠᠢ ᠪᠠᠶᠠᠨ ᠲᠠᠩᠰᠤᠭ ᠢᠷᠠᠭᠤ ᠲᠤᠩᠭᠠᠯᠠᠭ ᠬᠡᠯᠡ ᠶ᠋ᠢ ᠥᠨᠥ ᠮᠠᠨ ᠤ᠋ ᠦᠶᠡ ᠳ᠋ᠦ᠍ ᠤᠯᠠᠮᠵᠢᠯᠠᠵᠤ ᠥᠭᠭᠦᠭᠰᠡᠨ᠃ ᠪᠢᠳᠡ ᠡᠨᠡᠬᠦ ᠤᠯᠠᠮᠵᠢᠯᠠᠯ ᠳ᠋ᠤ᠌ ᠪᠠᠨ ᠣᠮᠣᠭᠰᠢᠵᠤ᠂ ᠡᠨᠡᠬᠦ ᠤᠳᠤᠮᠰᠢᠯ ᠢ᠋ᠶ᠋ᠠᠨ ᠪᠠᠬᠠᠷᠬᠠᠵᠤ᠂ ᠡᠷᠬᠢᠮᠯᠡᠵᠦ᠂ ᠦᠷᠡ ᠬᠣᠢᠴᠢ ᠳ᠋ᠤ᠌ ᠪᠠᠨ ᠥᠪᠯᠡᠬᠦ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭᠠ ᠪᠠᠨ ᠭᠦᠢᠴᠡᠳᠬᠡᠬᠦ ᠶᠣᠰᠣᠲᠠᠢ᠃ ᠦᠯᠢᠭᠡᠷ ᠳᠣᠮᠣᠭ ᠣᠯᠵᠤ ᠰᠣᠨᠣᠰᠬᠤ ᠦᠭᠡᠢ ᠡᠷᠢᠨ ᠳ᠋ᠦ᠍ ᠥᠰᠴᠦ ᠪᠠᠢᠭᠠ ᠬᠡᠦᠬᠡᠳ ᠦ᠋ᠳ ᠮᠠᠨᠢ ᠡᠳᠦᠷᠵᠢᠨ ᠬᠡᠦᠬᠡᠯᠳᠡᠢ ᠺᠢᠨᠣ᠋ ᠦᠵᠡᠵᠦ᠂ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠥᠷᠥᠭᠡᠯ ᠦ᠋ᠨ ᠬᠡᠯᠡ ᠰᠡᠳᠬᠢᠬᠦᠢ ᠳ᠋ᠦ᠍ ᠲᠦᠳᠡ ᠪᠣᠯᠵᠤ᠂ ᠡᠬᠡ ᠬᠡᠯᠡᠨ ᠦ᠌ ᠮᠡᠳᠡᠷᠡᠮᠵᠢ ᠪᠡᠨ ᠠᠯᠳᠠᠭᠰᠠᠨ ᠬᠣᠢᠨᠠ ᠣᠳᠣ ᠶ᠋ᠢᠨ ᠬᠡᠦᠬᠡᠳ ᠮᠣᠩᠭᠣᠯ ᠨᠣᠮ ᠤᠩᠰᠢᠬᠤ ᠳᠤᠷᠠ ᠦᠭᠡᠢ ᠪᠠᠢᠨᠠ ᠭᠡᠮᠡᠨ ᠪᠦᠬᠦ ᠬᠠᠷᠢᠭᠤᠴᠠᠯᠭᠠ ᠶ᠋ᠢ ᠬᠡᠯᠡᠨ ᠦ᠌ ᠬᠡᠳᠦᠨ ᠪᠠᠭᠰᠢ ᠠ᠋ᠴᠠ ᠨᠡᠬᠡᠭᠡᠳ ᠲᠤᠰᠠ ᠪᠠᠢᠨᠠ ᠤᠤ?(ᠶᠠᠷᠢᠶᠠᠨ ᠦᠭᠡᠢ ᠮᠣᠩᠭᠣᠯ ᠨᠣᠮ ᠰᠡᠳᠬᠦᠯ ᠰᠣᠨᠢᠨ ᠤ᠋ ᠴᠢᠨᠠᠷ ᠤ᠋ᠨ ᠠᠰᠠᠭᠤᠳᠠᠯ ᠪᠠᠰᠠ ᠬᠣᠯᠪᠣᠭᠳᠠᠨᠠ) ᠲᠡᠢᠮᠦ ᠡᠴᠡ ᠲᠧᠯᠸᠢᠰ ᠰᠦᠯᠵᠢᠶᠡ ᠡᠴᠡ ᠢᠯᠡᠭᠦᠦ ᠨᠣᠮ ᠡᠷᠳᠡᠨᠢ ᠪᠡᠨ ᠳᠡᠭᠡᠳᠦᠯᠡᠵᠦ ᠶᠠᠪᠤᠬᠤ ᠶ᠋ᠢ ᠰᠠᠨᠠᠯᠲᠠᠢ ᠪᠠᠢᠨᠠ᠃ ᠪᠢᠳᠡ ᠭ· ᠴᠢᠩᠪᠠᠭᠠᠲᠤᠷ ᠮᠡᠲᠦ ᠨᠣᠮ ᠡᠷᠳᠡᠨᠢ ᠶ᠋ᠢ ᠰᠢᠳᠦᠨ ᠳᠡᠭᠡᠳᠦᠯᠡᠳᠡᠭ ᠰᠢᠯᠢᠳᠡᠭ ᠬᠥᠮᠦᠰ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠬᠠᠷᠬᠠᠯ ᠳᠠᠭᠤᠷᠢᠶᠠᠯ ᠪᠣᠯᠭᠠᠶᠠ᠃ ᠮᠠᠨ ᠤ᠋ ᠬᠣᠢᠴᠢᠰ ᠲᠤ ᠲᠦᠭ ᠲᠦᠮᠡᠨ ᠭ· ᠴᠢᠩᠪᠠᠭᠠᠲᠤᠷ ᠲᠥᠷᠥᠬᠦ ᠪᠣᠯᠲᠤᠭᠠᠢ!
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠱᠠᠭᠰᠠᠯ
ᠬᠢᠨᠠᠭᠴᠢ᠄ ᠭᠠᠷᠮᠠ ᠂ᠰᠡᠬᠡᠭᠡᠷᠡᠯ