ᠮᠣᠩᠭᠣᠯ ᠪᠦᠰᠡᠭᠦᠢ– ᠷ᠂ ᠴᠣᠢᠨᠣᠮ-ᠳ ᠰᠤᠰᠤᠷᠪᠠᠷᠠᠮ ᠤᠶᠠᠩᠭᠠᠯᠠᠪᠠ Монгол бүсгүй– Р᠂ Чойном
617ᠮᠣᠩᠭᠣᠯ ᠪᠦᠰᠡᠭᠦᠢ
ᠷ · ᠴᠣᠢᠨᠣᠮ
ᠵᠢᠳᠬᠦᠨ ᠵᠢᠳᠬᠦᠨ ᠲᠡᠮᠡᠦᠯᠵᠦ ᠶᠠᠪᠤᠭᠠ
ᠵᠦᠭ ᠨᠡᠢᠯᠡᠭᠰᠡᠨ ᠠᠯᠠᠭ ᠮᠣᠷᠢᠳ ᠰᠢᠭ᠋
ᠭᠠᠩ ᠲᠠᠢ ᠵᠠᠯᠠᠭᠤ ᠨᠠᠰᠤᠨ ᠤ᠋ ᠮᠢᠨᠢ
ᠰᠣᠯᠣᠩᠭᠠ ᠶ᠋ᠢᠨ ᠳᠣᠯᠣᠭᠠᠨ ᠥᠩᠭᠡ ᠴᠢ ᠬᠠᠮᠢᠭᠠ ᠪᠠᠢᠨᠠ
ᠭᠠᠩ ᠲᠡᠮᠦᠷ ᠰᠢᠭ ᠰᠡᠳᠬᠢᠯ ᠦ᠋ᠨ ᠮᠢᠨᠢ
ᠰᠣᠷᠢᠨᠵᠢᠨ ᠬᠦᠷᠦ ᠴᠢ ᠬᠠᠮᠢᠭᠠ ᠪᠠᠢᠨᠠ
ᠮᠥᠷᠥᠭᠡᠳᠬᠦ ᠨᠠᠰᠤᠨ ᠤ᠋ ᠮᠢᠨᠢ
ᠮᠥᠩᠭᠥᠨ ᠰᠠᠷᠠᠨᠠᠢ ᠴᠢ ᠬᠠᠮᠢᠭᠠ ᠪᠠᠢᠨᠠ
ᠮᠥᠰᠥ ᠪᠡᠷ ᠱᠠᠷᠬᠢᠬᠤ ᠠᠮᠢᠳᠤᠷᠠᠯ ᠤ᠋ᠨ
ᠮᠥᠩᠬᠡ ᠶ᠋ᠢᠨ ᠵᠤᠯᠠ ᠴᠢ ᠬᠠᠮᠢᠭᠠ ᠪᠠᠢᠨᠠ
ᠭᠦᠨᠵᠡᠭᠡᠢ ᠮᠥᠷᠡᠨ ᠰᠢᠭ ᠠᠮᠢᠳᠤᠷᠠᠯ ᠤ᠋ᠨ
ᠭᠦᠦᠷ ᠪᠣᠯᠤᠭᠰᠠᠨ ᠠᠯᠳᠠᠷᠠᠢ ᠮᠢᠨᠢ
ᠬᠥᠮᠦᠨ ᠬᠡᠮᠡᠬᠦ ᠠᠯᠳᠠᠷ ᠤ᠋ᠨ ᠨᠢᠭᠤᠷ ᠪᠣᠯᠤᠭᠰᠠᠨ ᠠᠮᠠᠷᠠᠭ ᠮᠢᠨᠢ ᠠ᠋
ᠬᠡᠦᠬᠡᠨ ᠬᠡᠮᠡᠬᠦ ᠨᠡᠷᠡ ᠶ᠋ᠢᠨ ᠲᠤᠷᠢᠬᠠᠨ ᠪᠦᠬᠦᠨ ᠢ᠋ ᠠᠭᠤᠯᠵᠤ
ᠲᠡᠦᠬᠡᠲᠦ ᠮᠣᠩᠭᠣᠯ ᠣᠷᠣᠨ ᠤ᠋ ᠲᠤᠯᠭᠠ ᠶ᠋ᠢ ᠲᠦᠰᠢᠭᠰᠡᠨ ᠡᠬᠡᠴᠦᠳ ᠮᠢᠨᠢ ᠠ᠋
ᠮᠣᠢᠯ ᠵᠢᠮᠢᠰᠦᠨ ᠦ᠌ ᠰᠢᠷᠬᠡᠭ ᠰᠢᠭ
ᠲᠣᠷᠮᠣᠯᠵᠠᠩᠬᠠᠨ ᠨᠢᠳᠦ ᠲᠡᠢ
ᠮᠣᠷᠢᠨ ᠴᠡᠷᠢᠭ ᠦ᠋ᠨ ᠰᠡᠯᠡᠮᠡ ᠰᠢᠭ ᠲᠤᠶᠠᠯᠵᠠᠩᠬᠠᠨ ᠨᠢᠷᠤᠭᠤ ᠲᠠᠢ
ᠮᠣᠩᠭᠣᠯ ᠪᠦᠰᠡᠭᠦᠢ ᠲᠠᠨ ᠤ᠋ ᠪᠠᠨ ᠭᠡᠷᠡᠯ ᠰᠡᠭᠦᠳᠡᠷ ᠢ᠋ ᠲᠣᠳᠤᠷᠠᠭᠤᠯᠠᠰᠬᠢᠵᠤ
ᠮᠣᠩᠭᠣᠯ ᠢᠷᠠᠭᠤ ᠨᠠᠢᠷᠠᠭᠴᠢ ᠭᠡᠭᠡᠯᠵᠡᠨ ᠪᠠᠢᠵᠤ ᠳᠠᠭᠤᠯᠠᠬᠤ ᠤᠤ ᠳᠠ?
ᠬᠥᠮᠦᠨ ᠦ᠌ ᠬᠠᠢᠷᠠ ᠶ᠋ᠢ ᠠᠩᠬᠠᠨ ᠠᠮᠰᠠᠭᠰᠠᠨ
ᠬᠥᠪᠡᠭᠦᠨ ᠵᠢᠷᠦᠬᠡᠨ ᠦ᠌ ᠲᠣᠪᠰᠢᠯᠲᠠ ᠭᠡᠮᠡᠷ
ᠬᠦᠰᠡᠯᠡᠩ ᠬᠣᠣᠰᠯᠠᠵᠤ ᠪᠣᠯᠵᠣᠭᠠᠨ ᠳ᠋ᠤ᠌ ᠤᠷᠢᠭᠰᠠᠨ
ᠬᠥᠭᠡᠷᠦᠬᠦᠢ ᠨᠢᠭᠡᠨ ᠦ᠌ ᠲᠣᠭᠰᠢᠯᠲᠠ ᠭᠡᠮᠡᠷ
ᠶᠠᠭᠠᠷᠠᠤᠬᠠᠨ ᠪᠥᠭᠡᠳ ᠡᠷᠴᠢᠮᠲᠡᠢ ᠴᠢᠮᠡᠭᠡ
ᠬᠡᠴᠡ ᠶ᠋ᠢᠨ ᠴᠠᠭᠠᠨᠠ ᠠ᠋ᠴᠠ ᠲᠣᠳᠣᠷᠠᠨ ᠪᠠᠢᠨᠠᠮ
ᠢᠷᠠᠭᠤᠬᠠᠨ ᠪᠥᠭᠡᠳ ᠡᠷᠭᠦᠯᠲᠡ ᠲᠡᠢ
ᠠᠢᠵᠠᠮ ᠬᠡᠭᠡᠷᠡ ᠶ᠋ᠢᠨ ᠫᠢᠨᠽᠠ ᠳ᠋ᠤ᠌ ᠪᠢᠴᠢᠭᠳᠡᠵᠦ ᠪᠠᠢᠨᠠᠮ
ᠲᠩᠷᠢ ᠭᠠᠵᠠᠷ ᠤ᠋ᠨ ᠰᠠᠪᠰᠠᠯᠭᠠ ᠨᠡᠢᠯᠡᠬᠦ
ᠲᠡᠷᠲᠡᠭᠡ ᠴᠡᠩᠬᠡᠷ ᠬᠥᠪᠡᠭᠡᠨ ᠦ᠌ ᠴᠠᠭᠠᠨᠠ ᠠ᠋ᠴᠠ
ᠲᠠᠩᠭᠢᠰ ᠳᠠᠯᠠᠢ ᠶ᠋ᠢᠨ ᠳᠣᠯᠭᠢᠶᠠᠨ ᠬᠠᠪᠠᠬᠤ
ᠲᠡᠢᠮᠦ ᠯᠡ ᠭᠦᠨ ᠬᠠᠷᠠᠩᠭᠤᠢ ᠭᠡᠮᠡᠷ
ᠨᠡᠷᠡ ᠦᠭᠡᠢ ᠤᠰᠤ ᠦᠭᠡᠢ ᠲᠤᠯᠤᠭᠠᠳ ᠢ᠋ ᠳᠠᠪᠠᠭᠠᠳ
ᠨᠢᠭᠡ ᠮᠣᠷᠢᠲᠠᠨ ᠲᠣᠳᠣᠷᠠᠭᠠᠳ ᠢᠷᠡᠯᠡ
ᠥᠩᠭᠡ ᠶ᠋ᠢᠨ ᠴᠡᠴᠡᠭ ᠲᠡᠢ ᠨᠣᠭᠣᠭᠠᠨ ᠬᠥᠨᠳᠡᠢ ᠶ᠋ᠢ
ᠣᠮᠣᠭᠯᠠᠩ ᠮᠣᠷᠢᠲᠠᠨ ᠲᠣᠭᠣᠰᠣ ᠪᠠᠷ ᠱᠤᠭᠤᠮᠳᠠᠯᠠ
ᠪᠠᠭᠪᠠᠬᠠᠢ ᠴᠡᠴᠡᠭ ᠦ᠋ᠨ ᠥᠲᠥᠨ ᠮᠠᠯᠠᠭᠠᠢ ᠶ᠋ᠢ
ᠪᠠᠭᠴᠠ ᠪᠠᠭᠴᠠ ᠪᠠᠷ ᠦᠷᠭᠦᠭᠡᠨ ᠬᠡᠢᠰᠬᠡᠵᠦ
ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠮᠢᠨᠦ ᠨᠢᠳᠦ ᠶ᠋ᠢ
ᠬᠠᠯᠢᠭᠤᠨ ᠰᠠᠯᠬᠢ ᠪᠠᠷ ᠠᠯᠠᠭᠠᠳᠠᠨ ᠥᠩᠭᠡᠷᠡᠯᠡ
ᠬᠡᠭᠡᠷᠡ ᠶ᠋ᠢᠨ ᠲᠣᠭᠣᠰᠣ ᠮᠣᠷᠢᠨ ᠤ᠋ ᠬᠥᠯᠥᠰᠥ
ᠬᠡᠭᠡᠨᠴᠢᠷ ᠬᠤᠪᠴᠠᠰᠤᠨ ᠤ᠋ ᠦᠨᠦᠷᠲᠡᠨ ᠤᠰᠤ
ᠬᠡᠰᠡᠭᠬᠡᠨ ᠵᠠᠭᠤᠷᠠ ᠬᠠᠩ ᠬᠢᠭᠡᠳ
ᠬᠡᠳᠦᠨ ᠬᠥᠪᠡᠭᠡ ᠪᠡᠨ ᠳᠠᠪᠠᠭᠠᠳ ᠣᠳᠪᠠ
ᠨᠠᠪᠴᠢᠨ ᠴᠢᠬᠢ ᠲᠡᠢ ᠰᠤᠮᠤᠨ ᠬᠦᠯᠦᠭ ᠦ᠋ᠨ
ᠨᠠᠷᠢᠨ ᠰᠤᠷ ᠤ᠋ᠨ ᠵᠢᠯᠣᠭᠣ ᠶ᠋ᠢ ᠲᠦᠰᠢᠨ
ᠨᠠᠰᠤᠨ ᠵᠠᠯᠠᠭᠤ ᠮᠣᠩᠭᠣᠯ ᠪᠦᠰᠡᠭᠦᠢ
ᠨᠠᠳᠠ ᠳ᠋ᠤ᠌ ᠭᠠᠢᠬᠠᠭᠤᠯᠵᠤ ᠡᠢᠨᠬᠦ ᠥᠩᠭᠡᠷᠡᠯᠡ
ᠬᠡᠮᠨᠡᠯ ᠨᠠᠷᠢᠨ ᠳᠠᠪᠬᠢᠶᠠᠲᠤ ᠮᠣᠷᠢᠨ ᠤ᠋
ᠬᠡᠷᠦᠯᠦᠨ ᠤ᠋ ᠬᠠᠷᠠ ᠤᠰᠤ ᠰᠢᠭ᠋ ᠰᠠᠢᠬᠠᠨ ᠨᠢᠳᠦ
ᠳᠤᠬᠤᠨ ᠤ᠋ ᠬᠥᠬᠥᠯ ᠨᠠᠷᠢᠨ ᠬᠠᠯᠵᠠ
ᠲᠤᠩ ᠤ᠋ᠨ ᠠᠮᠠ ᠰᠢᠭ᠋ ᠬᠠᠮᠠᠷ ᠤ᠋ᠨ ᠨᠦᠬᠡ
ᠵᠠᠩᠭᠢᠷᠠᠨ ᠲᠣᠪᠣᠢᠬᠤ ᠣᠪᠣᠭᠣᠷ ᠪᠤᠯᠴᠢᠩ
ᠵᠢᠭᠠᠰᠤᠨ ᠤ᠋ ᠬᠠᠢᠷᠰᠤ ᠰᠢᠭ᠋ ᠭᠢᠯᠲᠠᠭᠠᠨᠠᠬᠤ ᠵᠢᠰᠦ
ᠰᠡᠷᠪᠡᠭᠡᠨ ᠳ᠋ᠦ᠍ ᠵᠠᠭᠤᠷᠠᠯᠳᠤᠬᠤ ᠭᠤᠷᠪᠠᠨ ᠬᠠᠪᠢᠷᠭᠠ
ᠰᠡᠭᠦᠯ ᠦ᠋ᠨ ᠬᠢᠨᠢ ᠬᠡᠢᠰᠦᠯᠲᠡ ᠳ᠋ᠦ᠍ ᠲᠣᠳᠣᠷᠠᠭᠠᠳ ᠥᠩᠭᠡᠷᠡᠪᠡ
ᠰᠠᠢᠬᠠᠨ ᠬᠦᠯᠦᠭ ᠢ ᠰᠠᠨᠠᠭᠠ ᠪᠠᠷ ᠢ᠋ᠶ᠋ᠠᠨ ᠵᠠᠬᠢᠷᠵᠤ
ᠰᠠᠷᠠᠨ ᠳᠠᠷᠤᠭᠤᠯᠭᠠ ᠶ᠋ᠢ ᠭᠡᠵᠢᠭᠡᠨ ᠳ᠋ᠦ᠍ ᠪᠡᠨ ᠰᠢᠭᠢᠳᠬᠡᠵᠦ
ᠰᠠᠷᠠᠯ ᠢᠰᠡᠭᠡᠢ ᠮᠠᠯᠠᠭᠠᠢ ᠳᠤᠬᠤᠳᠠᠭᠤᠯᠵᠤ
ᠰᠠᠯᠬᠢᠨ ᠳᠠᠷᠴᠤᠭ ᠰᠢᠭ᠋ ᠲᠤᠷᠠᠩᠭᠢ ᠪᠦᠰᠡᠭᠦᠢ ᠶ᠋ᠢᠨ
ᠬᠣᠯᠴᠠᠷᠠᠭᠤ ᠤᠩᠭᠢᠶᠯᠭᠠᠨ ᠪᠣᠷᠣ ᠨᠢᠭᠤᠷ
ᠬᠣᠯᠪᠣᠷᠢᠨ ᠪᠤᠯᠲᠠᠬᠤ ᠬᠠᠷᠠ ᠨᠢᠳᠦ
ᠬᠣᠲᠣᠭᠣᠷ ᠨᠢᠷᠤᠭᠤ ᠭᠦᠳᠦᠭᠦᠷ ᠴᠡᠭᠡᠵᠢ
ᠬᠣᠷᠣᠮᠬᠠᠨ ᠵᠠᠭᠤᠷᠠ ᠬᠠᠷᠠᠭᠳᠠᠭᠠᠳ ᠥᠩᠭᠦᠷᠯᠡ
ᠰᠠᠢᠨ ᠮᠣᠷᠢᠨ ᠤ᠋ ᠰᠢᠷᠦᠭᠦᠨ ᠳᠠᠪᠬᠢᠯᠲᠠ ᠠ᠋ᠴᠠ
ᠰᠠᠢᠷ ᠤ᠋ᠨ ᠴᠢᠯᠠᠭᠤ ᠵᠦᠯᠭᠡᠨ ᠳᠡᠭᠡᠷᠡ ᠰᠢᠳᠡᠭᠳᠡᠨ
ᠰᠠᠢᠬᠠᠨ ᠪᠦᠰᠡᠭᠦᠢ ᠶ᠋ᠢᠨ ᠰᠢᠷᠦᠭᠦᠨ ᠬᠠᠷᠠᠴᠠᠨ ᠠ᠋ᠴᠠ
ᠰᠢᠯᠦᠭ ᠦ᠋ᠨ ᠲᠣᠰᠣ ᠵᠢᠷᠦᠬᠡᠨ ᠳᠡᠭᠡᠷᠡ ᠰᠢᠩᠭᠡᠨᠡ
ᠬᠥᠮᠦᠨ ᠦ᠌ ᠰᠠᠢᠬᠠᠨ ᠢ᠋ ᠣᠯᠵᠤ ᠲᠥᠷᠥᠭᠡᠳ
ᠬᠦᠰᠡᠯ ᠦ᠋ᠨ ᠰᠠᠢᠬᠠᠨ ᠢ᠋ ᠳᠡᠭᠡᠵᠢᠯᠡᠵᠦ ᠥᠰᠦᠭᠡᠳ
ᠮᠣᠷᠢᠨ ᠤ᠋ ᠰᠠᠢᠨ ᠢ᠋ ᠤᠨᠠᠬᠤ ᠵᠠᠶᠠᠭᠠ ᠲᠠᠢ
ᠮᠣᠩᠭᠣᠯ ᠪᠦᠰᠡᠭᠦᠢ ᠭᠡᠳᠡᠭ
ᠲᠢᠪ ᠳᠡᠯᠡᠬᠡᠢ ᠶ᠋ᠢᠨ ᠵᠢᠷᠭᠠᠯ ᠬᠤᠪᠢᠶᠠᠯᠴᠠᠭᠠᠳ
ᠲᠡᠭᠰᠢ ᠲᠠᠪᠤᠨ ᠬᠦᠰᠡᠯᠡᠩ ᠭᠡᠮᠡᠷ
ᠲᠠᠯᠠ ᠶ᠋ᠢᠨ ᠳᠤᠮᠳᠠ ᠢᠩᠭᠢᠭᠡᠳ ᠤᠴᠠᠷᠠᠬᠤ ᠳ᠋ᠤ᠌
ᠲᠠᠯᠬᠠ ᠲᠠᠪᠤᠨ ᠲᠩᠷᠢ ᠭᠡᠮᠡᠷ
ᠬᠥᠮᠦᠨ ᠦ᠌ ᠭᠠᠵᠠᠷ ᠨᠤᠲᠤᠭ ᠢ᠋ᠶ᠋ᠠᠨ ᠰᠠᠨᠠᠬᠤ ᠳ᠋ᠤ᠌
ᠬᠦᠰᠡᠯ ᠦ᠋ᠨ ᠲᠠᠪᠤᠨ ᠰᠤᠳᠠᠰᠤ ᠭᠡᠮᠡᠷ
ᠬᠦᠦ ᠪᠡᠨ ᠲᠡᠪᠡᠷᠢᠭᠡᠳ ᠪᠦᠪᠡᠢᠯᠡᠵᠦ ᠰᠠᠭᠤᠬᠤ ᠨᠢ
ᠬᠥᠭᠵᠢᠮ ᠦ᠋ᠨ ᠲᠠᠪᠤᠨ ᠤᠲᠠᠰᠤ ᠭᠡᠮᠡᠷ
ᠡᠮᠡᠭᠡᠯ ᠦ᠋ᠨ ᠳᠥᠷᠥᠭᠡ ᠳᠠᠷᠬᠠᠯᠠᠵᠤ ᠥᠰᠦᠭᠰᠡᠨ
ᠡᠷᠡ ᠶ᠋ᠢᠨ ᠰᠡᠳᠬᠢᠯ ᠢ᠋ ᠤᠶᠠᠷᠠᠭᠤᠯᠳᠠᠭ ᠪᠠᠢᠨᠠᠮ
ᠥᠰᠬᠦ ᠶ᠋ᠢᠨ ᠴᠠᠭ ᠲᠤ᠌ ᠰᠢᠬᠢᠷ ᠰᠢᠭ ᠦᠭᠡ ᠶ᠋ᠢ
ᠦᠳᠡᠯᠡᠬᠦ ᠶ᠋ᠢᠨ ᠴᠠᠭ ᠲᠤ᠌ ᠲᠠᠶᠠᠭ ᠰᠢᠭ᠋ ᠦᠭᠡ ᠶ᠋ᠢ
ᠥᠯᠥᠰᠬᠦ ᠶ᠋ᠢᠨ ᠴᠠᠭ ᠲᠤ᠌ ᠬᠣᠭᠣᠯᠠ ᠰᠢᠭ᠋ ᠦᠭᠡ ᠶ᠋ᠢ
ᠡᠪᠡᠳᠬᠦ ᠶ᠋ᠢᠨ ᠴᠠᠭ ᠲᠤ᠌ ᠡᠮ ᠰᠢᠭ ᠦᠭᠡ ᠶ᠋ᠢ
ᠠᠯᠤᠰ ᠶᠠᠪᠤᠬᠤ ᠳᠤ ᠤᠨᠤᠭᠠ ᠰᠢᠭ᠋ ᠦᠭᠡ ᠶ᠋ᠢ
ᠠᠶᠤᠬᠤ ᠶ᠋ᠢᠨ ᠴᠠᠭ ᠲᠤ᠌ ᠵᠡᠪᠰᠡᠭ ᠰᠢᠭ ᠦᠭᠡ ᠶ᠋ᠢ
ᠶᠠᠳᠠᠷᠠᠬᠤ ᠶᠢᠨ ᠴᠠᠭ ᠲᠤ᠌ ᠶᠠᠩᠴᠢᠶᠠᠨ ᠰᠢᠭ᠋ ᠦᠭᠡ ᠶ᠋ᠢ
ᠶᠠᠮᠪᠠᠯᠠᠬᠤ ᠶᠢᠨ ᠴᠠᠭ ᠲᠤ᠌ ᠲᠡᠷᠭᠡ ᠰᠢᠭ ᠦᠭᠡ ᠶ᠋ᠢ
ᠳᠡᠪᠡᠯ ᠣᠯᠳᠠᠬᠤ ᠳ᠋ᠤ᠌ ᠬᠥᠨᠵᠢᠯᠡ ᠪᠣᠯᠬᠤ ᠦᠭᠡ ᠶ᠋ᠢ
ᠡᠨᠡ ᠭᠠᠭᠴᠠ ᠨᠠᠰᠤᠨ ᠳ᠋ᠤ᠌ ᠮᠢᠨᠢ ᠡᠵᠢ ᠠᠪᠤ ᠬᠡᠯᠡᠳᠡᠭ ᠶᠦᠮ ᠪᠠᠢᠨᠠ
ᠡᠷᠡ ᠭᠠᠭᠴᠠ ᠪᠠᠶᠠᠨ ᠲᠤ᠌ ᠮᠢᠨᠢ ᠬᠠᠷᠢᠨ ᠡᠬᠡᠨᠡᠷ ᠬᠥᠮᠦᠨ ᠯᠡ ᠬᠡᠯᠡᠳᠡᠭ ᠶᠦᠮ ᠪᠠᠢᠨᠠ
ᠬᠦᠨᠳᠦ ᠲᠡᠢ ᠴᠢᠳᠠᠯ ᠲᠠᠢ ᠮᠣᠩᠭᠣᠯ ᠪᠦᠰᠡᠭᠦᠢ ᠶ᠋ᠢᠨ
ᠬᠦᠴᠦᠲᠡᠢ ᠠᠲᠠᠯᠠ ᠪᠠᠨ ᠤᠶᠠᠬᠠᠨ ᠴᠣᠭᠴᠠᠰ
ᠬᠦᠯᠦᠭ ᠮᠣᠷᠢᠨ ᠤ᠋ ᠣᠩᠭᠣᠨ ᠵᠣ ᠳᠡᠭᠡᠷᠡ
ᠬᠥᠮᠦᠨ ᠢ᠋ ᠬᠠᠢᠷᠠᠯᠠᠵᠤ ᠳᠡᠷᠡᠨ ᠢ᠋ ᠳᠦᠷᠦᠭᠦᠯᠦᠨᠡᠮ
ᠰᠢᠯᠤᠭᠤᠨ ᠪᠤᠰᠤ ᠠᠳᠠᠷᠠᠮᠠ ᠲᠠᠢ ᠲᠡᠦᠬᠡ ᠶ᠋ᠢᠨ
ᠴᠢᠯᠠᠭᠤᠨ ᠬᠠᠭᠤᠳᠠᠰᠤ ᠨᠤᠭᠤᠳ ᠡᠷᠭᠢᠵᠦ ᠪᠠᠢᠬᠤ ᠳ᠋ᠤ᠌
ᠬᠠᠯᠠᠭᠤᠨ ᠲᠡᠮᠡᠴᠡᠯ ᠦ᠋ᠨ ᠲᠣᠭᠣᠰᠣᠨ ᠳᠤᠮᠳᠠ
ᠪᠦᠯᠢᠶᠡᠨ ᠴᠢᠰᠤ ᠠᠰᠬᠠᠷᠠᠵᠤ ᠪᠠᠢᠬᠤ ᠳ᠋ᠤ᠌
ᠮᠣᠷᠢᠨ ᠴᠡᠷᠢᠭ ᠦ᠋ᠨ ᠰᠡᠲᠡᠷᠡᠭᠰᠡᠨ ᠡᠩᠨᠡᠭᠡ ᠶ᠋ᠢ
ᠮᠣᠩᠭᠣᠯ ᠪᠦᠰᠡᠭᠦᠢ ᠨᠥᠬᠥᠵᠦ ᠶᠠᠪᠤᠭᠰᠠᠨ ᠶᠤᠮ
ᠬᠠᠢᠷᠠᠲᠤ ᠶ᠋ᠢ ᠪᠡᠨ ᠲᠡᠪᠡᠷᠢᠳᠡᠭ ᠤᠶᠠᠬᠠᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
ᠬᠠᠳᠠ ᠲᠠᠢ ᠰᠡᠯᠡᠮᠡ ᠠᠳᠬᠤᠵᠤ ᠶᠠᠪᠤᠭᠰᠠᠨ ᠶᠤᠮ
ᠬᠠᠷᠠ ᠬᠢᠯᠢᠩ ᠭᠡᠵᠢᠭᠡ ᠪᠡᠨ ᠰᠢᠭᠤᠵᠤ
ᠬᠠᠵᠢ ᠮᠥᠩᠭᠥᠨ ᠳᠤᠭᠤᠯᠠᠭᠠ ᠪᠠᠷ ᠳᠠᠷᠤᠭᠤᠯᠵᠤ
ᠨᠠᠢᠷ ᠨᠠᠭᠠᠳᠤᠮ ᠤ᠋ᠨ ᠭᠣᠶᠣᠯᠠᠯ ᠤ᠋ᠨ ᠳᠤᠷᠳᠤᠩ ᠳ᠋ᠤ᠌
ᠨᠠᠷᠢᠨ ᠭᠢᠯᠲᠠᠩ ᠬᠤᠶᠠᠭ ᠲᠠᠭᠠᠷᠠᠭᠤᠯᠵᠤ
ᠰᠠᠭᠠᠯᠢ ᠶ᠋ᠢᠨ ᠬᠤᠪᠢᠩ ᠪᠠᠷᠢᠳᠠᠭ ᠭᠠᠷ ᠲᠤ᠌ ᠪᠠᠨ
ᠰᠠᠷᠠᠨ ᠳᠤᠭᠤᠢ ᠪᠠᠮᠪᠠᠢ ᠠᠳᠬᠤᠵᠤ
ᠢᠰᠬᠢᠷᠦᠭᠡᠳ ᠢᠷᠡᠬᠦ ᠭᠢᠯᠪᠡᠷᠲᠦ ᠰᠤᠮᠤ ᠶ᠋ᠢ
ᠢᠷᠮᠡᠬᠦ ᠴᠤ᠌ ᠦᠭᠡᠢ ᠰᠥᠷᠴᠦ ᠶᠠᠪᠤᠭᠰᠠᠨ
ᠠᠬᠤᠢ ᠡᠨᠡ ᠮᠣᠩᠭᠣᠯ ᠣᠷᠣᠨ ᠤ᠋ ᠪᠠᠨ
ᠠᠷᠢᠭᠤᠨ ᠲᠡᠮᠡᠴᠡᠯ ᠢ᠋ ᠬᠦᠦ ᠪᠡᠷ ᠢ᠋ᠶ᠋ᠡᠨ ᠬᠡᠮᠵᠢᠭᠰᠡᠨ
ᠠᠤᠭᠠ ᠶᠡᠬᠡ ᠮᠠᠷᠭᠠᠰᠢ ᠶ᠋ᠢᠨ ᠲᠥᠯᠥᠭᠡ
ᠠᠮᠤᠭᠤᠯᠠᠩ ᠲᠠᠢᠪᠤᠩ ᠢ᠋ ᠰᠦ ᠪᠡᠷ ᠢ᠋ᠶ᠋ᠡᠨ ᠳᠡᠮᠵᠢᠭᠰᠡᠨ
ᠮᠠᠨ ᠤ᠋ ᠰᠠᠢᠬᠠᠨ ᠮᠣᠩᠭᠣᠯ ᠪᠦᠰᠡᠭᠦᠢ ᠳ᠋ᠦ᠍
ᠬᠥᠮᠦᠨ ᠦ᠌ ᠰᠠᠢᠬᠠᠨ ᠴᠥᠮ ᠪᠦᠷᠢᠳᠦᠭᠰᠡᠨ ᠶᠦᠮ
ᠳᠠᠷᠤᠤ ᠰᠠᠢᠬᠠᠨ ᠵᠠᠩ ᠴᠢᠨᠠᠷ ᠲᠤ᠌ ᠨᠢ
ᠢᠷᠠᠭᠤ ᠰᠠᠢᠬᠠᠨ ᠣᠪᠢᠳᠠᠰ ᠰᠢᠩᠭᠡᠭᠰᠡᠨ
ᠳᠡᠭᠡᠳᠦ ᠶ᠋ᠢᠨ ᠵᠡᠷᠭᠡ ᠲᠡᠢ ᠰᠠᠢᠨ ᠶᠠᠪᠤᠶᠠ ᠭᠡᠪᠡᠯ
ᠳᠡᠯᠡᠬᠡᠢ ᠳᠠᠬᠢᠨ ᠤ᠋ ᠡᠷᠳᠡᠮ ᠢ᠋ ᠰᠤᠷ
ᠡᠯᠢᠭᠡᠨ ᠬᠠᠢᠷᠠᠲᠠᠢ ᠮᠣᠩᠭᠣᠯ ᠡᠷᠡᠴᠦᠳ ᠢ᠋ᠶ᠋ᠡᠨ
ᠡᠩᠬᠦᠷᠡᠢᠯᠡᠨ ᠬᠠᠢᠷᠠᠯᠠᠨ ᠬᠦᠨᠳᠦᠯᠡᠵᠦ ᠶᠠᠪᠤᠭᠠᠷᠠᠢ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠡᠷᠭᠦᠯᠡᠩ᠂ᠠᠵᠠᠵᠠᠶᠠᠭᠠ᠂ᠣᠳᠬᠠᠨᠰᠣ ᠠ᠋
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ᠰᠡᠷᠭᠦᠯᠡᠩ᠂ ᠨᠤᠮᠤᠴᠢᠨ ᠪᠢᠯᠢᠭ