ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠳᠥᠷᠪᠡ ᠂ ᠮᠣᠩᠭᠣᠯ ᠭᠡᠷ ᠦᠨ ᠪᠦᠲᠦᠴᠡ ᠶᠢᠨ ᠪᠦᠯᠦᠭ 2 > Хөх зул – Боржигон Ванжал –"Ддөрөв ᠂ Монгол гэрийн бүтцийн бүлэг " 2
284ᠳᠥᠷᠪᠡ ᠂ ᠮᠣᠩᠭᠣᠯ ᠭᠡᠷ ᠦᠨ ᠪᠦᠲᠦᠴᠡ ᠶᠢᠨ ᠪᠦᠯᠦᠭ – 2
ᠭᠡᠷ ᠪᠠᠷᠢᠬᠤ ᠶᠣᠰᠣᠨ Гэр барих ёсон
ᠮᠣᠩᠭᠣᠯ ᠭᠡᠷ ᠦ᠋ᠨ ᠶᠡᠷᠦᠩᠬᠡᠢ ᠪᠦᠲᠦᠴᠡ ᠬᠡᠯᠪᠡᠷᠢ ᠨᠢ ᠶᠡᠬᠡ ᠪᠠᠭᠠ ᠶ᠋ᠢᠨ ᠢᠯᠭᠠᠯ ᠦᠭᠡᠢ ᠴᠥᠮ ᠠᠳᠠᠯᠢ᠃ ᠡᠩ ᠦ᠋ᠨ ᠮᠣᠩᠭᠣᠯ ᠭᠡᠷ ᠦ᠋ᠨ ᠶᠠᠰᠤ ᠶ᠋ᠢᠨ ᠪᠦᠲᠦᠴᠡ ᠨᠢ 4 ᠂ 5 ᠂ 6 ᠂ 8 ᠬᠠᠨᠠ ᠲᠠᠢ ᠪᠠᠢᠳᠠᠭ ᠪᠥᠭᠡᠳ ᠬᠠᠨᠠ ᠪᠦᠷᠢ ᠳ᠋ᠦ᠍ᠨᠢ 13 ᠂ 14 ᠂ 15 ᠂ 17 ᠣᠨᠢ ᠰᠠᠭᠤᠯᠭᠠᠬᠤ ᠲᠣᠯᠣᠭᠠᠢᠲᠠᠢ ᠪᠠᠢᠳᠠᠭ᠃ ᠡᠢᠨ ᠬᠦ᠌ ᠶᠡᠬᠡ ᠭᠡᠷ ᠪᠣᠯ ᠬᠠᠨᠠ ᠶ᠋ᠢᠨ ᠲᠣᠭᠠ ᠣᠯᠠᠨ᠂ ᠡᠭᠦᠨ ᠳ᠋ᠦ᠍ ᠬᠣᠯᠪᠣᠭᠳᠠᠵᠤ ᠣᠨᠢ ᠶ᠋ᠢᠨ ᠲᠣᠭᠠ᠂ ᠲᠣᠭᠣᠨᠣ ᠶ᠋ᠢᠨ ᠬᠤᠷᠤᠭᠤ ᠴᠤ᠌ ᠨᠢᠭᠡᠳᠦᠯᠲᠡᠢ ᠪᠡᠷ ᠨᠡᠮᠡᠭᠳᠡᠨᠡ᠃ ᠪᠠᠭᠠ ᠪᠣᠯ ᠡᠭᠦᠨ ᠦ᠌ ᠡᠰᠡᠷᠭᠦ – ᠨᠢᠭᠡᠳᠦᠯᠲᠡᠢ ( ᠲᠣᠭᠣᠨᠣ ᠶ᠋ᠢᠨ ᠬᠤᠷᠤᠭᠤ᠂ ᠣᠨᠢ᠂ ᠬᠠᠨᠠᠨ ᠲᠣᠯᠣᠭᠠᠢ ) ᠪᠠᠷ ᠪᠠᠭᠠᠰᠤᠨᠠ᠃
ᠭᠡᠷ ᠪᠠᠷᠢᠬᠤ ᠶᠣᠰᠣᠨ
ᠶᠡᠬᠡ ᠪᠠᠭᠠ ᠭᠡᠷ ᠪᠠᠷᠢᠬᠤ ᠶᠣᠰᠣ ᠨᠢ ᠪᠦᠷ ᠠᠳᠠᠯᠢ ᠃ ᠡᠢᠨ ᠬᠦ᠌ ᠡᠨᠳᠡ ᠡᠩ ᠦ᠋ᠨ ᠭᠡᠷ ᠪᠠᠷᠢᠬᠤ ᠪᠠᠷ ᠵᠢᠱ᠌ᠢᠶᠡᠯᠡᠶᠡ ᠃
① ᠤᠷᠢᠳ ᠢ᠋ᠶ᠋ᠠᠷ ᠬᠠᠨᠠ ᠪᠠᠨ ᠬᠠᠨᠠ ᠲᠠᠢ ᠬᠣᠯᠪᠣᠨ ᠬᠦᠯᠢᠭᠡᠳ ᠂ ᠬᠣᠯᠪᠣᠭᠰᠠᠨ ᠬᠠᠨᠠ ᠶ᠋ᠢᠨ ᠬᠣᠶᠠᠷ ᠦᠵᠦᠭᠦᠷ ᠢ᠋ ᠡᠭᠦᠳᠡᠨ ᠬᠠᠴᠠᠪᠴᠢ ᠲᠠᠢ ᠬᠣᠯᠪᠣᠭᠠᠳ᠂ ᠳᠣᠲᠣᠷᠠ ᠪᠦᠰᠡ ᠶ᠋ᠢ ᠲᠠᠲᠠᠵᠤ ᠂ ᠭᠡᠷ ᠦ᠋ᠨ ᠥᠨᠳᠥᠷ ᠪᠣᠭᠣᠨᠢ ᠬᠡᠪᠲᠡᠭᠡ ᠪᠣᠰᠤᠭᠠ ᠶ᠋ᠢ ᠲᠡᠩᠴᠡᠭᠦᠯᠦᠨᠡ᠃
② ᠲᠣᠭᠣᠨᠣ ᠪᠠᠨ ᠥᠨᠳᠥᠷ ᠪᠠᠭᠠᠨᠠ ᠪᠠᠷ ᠲᠤᠯᠵᠤ ᠂ ᠬᠡᠯᠬᠢᠶᠡᠷᠢ ᠲᠣᠭᠣᠨᠣ ᠪᠣᠯ ᠳᠥᠷᠪᠡᠨ ᠲᠠᠯᠠ ᠶ᠋ᠢᠨ ᠣᠨᠢ ᠠ᠋ᠴᠠ ᠠᠪᠴᠤ ᠡᠭᠦᠳᠡ ᠂ ᠬᠣᠢᠮᠣᠷ ( ᠡᠮᠦᠨᠡ ᠬᠣᠢᠨᠠ ᠭᠣᠣᠯ ᠢ᠋ ) ᠳ᠋ᠦ᠍ ᠭᠣᠣᠯᠯᠠᠭᠤᠯᠤᠨ ᠳᠥᠷᠪᠡᠨ ᠲᠠᠯᠠ ᠶ᠋ᠢᠨ ᠬᠠᠨᠠᠨ ᠲᠣᠯᠣᠭᠠᠢ ᠳ᠋ᠤ᠌ ᠬᠣᠯᠪᠣᠵᠤ ᠲᠣᠷᠭᠣᠭᠠᠳ ᠪᠤᠰᠤᠳ ᠣᠨᠢ ᠶ᠋ᠢ ᠪᠦᠷ ᠳᠠᠷᠠᠭᠠ ᠨᠢ ᠰᠠᠭᠠᠯᠳᠤᠷᠭᠠᠯᠠᠭᠠᠳ ᠂ 10 ᠠᠯᠬᠤᠮ ᠬᠣᠯᠠ ᠠ᠋ᠴᠠ ᠲᠣᠭᠣᠨᠣ ᠪᠠ ᠭᠡᠷ ᠦ᠋ᠨ ᠣᠷᠣᠢ ᠲᠡᠭᠰᠢ ᠪᠠ ᠡᠰᠡᠬᠦ ᠶ᠋ᠢ ᠠᠵᠢᠵᠤ ᠂ ᠠᠯᠢ ᠲᠠᠯᠠ ᠨᠢ ᠥᠨᠳᠥᠷ ᠪᠠᠢᠪᠠᠯ ᠲᠡᠷᠡ ᠲᠠᠯᠠ ᠶ᠋ᠢ ᠨᠢ ᠳᠤᠭᠲᠤᠷᠭᠠ ᠪᠠᠷ ᠳᠠᠷᠤᠵᠤ ᠲᠡᠭᠰᠢᠯᠡᠵᠦ ᠴᠢᠩᠭᠠᠯᠠᠨᠠ᠃
③ ᠤᠷᠢᠳ ᠢ᠋ᠶ᠋ᠠᠷ ᠵᠠᠪᠬᠠᠴᠢ ᠪᠠᠢᠪᠠᠯ ᠬᠠᠨᠠᠨ ᠲᠣᠯᠣᠭᠠᠢ ᠳᠠᠭᠠᠤ ᠲᠠᠯᠪᠢᠨᠠ᠃ ᠲᠡᠭᠡᠭᠡᠳ ᠡᠭᠦᠳᠡᠨ ᠦ᠌ ᠵᠡᠭᠦᠨ ᠬᠠᠴᠠᠪᠴᠢᠨ ᠤ᠋ ᠭᠤᠷᠪᠠᠨ ᠨᠦᠬᠡ ᠪᠤᠶᠤ ᠭᠠᠷᠠᠬᠠᠨ ( ᠵᠠᠷᠢᠮ ᠭᠠᠵᠠᠷ ᠬᠠᠴᠠᠪᠴᠢᠨ ᠤ᠋ ᠭᠠᠳᠠᠨᠠ ᠲᠤᠰᠬᠠᠢ ᠪᠦᠰᠡ ᠤᠶᠠᠬᠤ ᠪᠠᠷ ᠬᠢᠭᠰᠡᠨ ᠲᠤᠰᠬᠠᠢ ᠮᠣᠳᠣ ᠪᠠᠢᠳᠠᠭ ) ᠠ᠋ᠴᠠ ᠭᠤᠷᠪᠠᠨ ᠪᠦᠰᠡ ᠤᠶᠠᠵᠤ᠂ ᠳᠤᠮᠳᠠ᠂ ᠳᠣᠣᠷᠠ ᠬᠢ ᠶ᠋ᠢ ᠨᠢ ᠲᠦᠷ ᠲᠠᠯᠪᠢᠵᠤ᠂ ᠳᠡᠭᠡᠷᠡ ᠪᠦᠰᠡ ᠪᠡᠨ ᠡᠪᠬᠡᠨ ᠪᠠᠷᠢᠵᠤ ᠨᠠᠷᠠᠨ ᠡᠷᠭᠢᠯᠲᠡ ᠪᠡᠷ ᠲᠤᠭᠤᠷᠭᠠ ᠪᠠᠨ ᠨᠥᠮᠥᠷᠭᠡᠨ ᠳᠡᠭᠡᠷᠡ ᠪᠦᠰᠡ ᠪᠡᠷ ᠨᠢᠭᠡ ᠬᠥᠮᠦᠨ ᠳᠠᠷᠤᠭᠤᠯᠵᠤ ᠶᠠᠪᠤᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠰᠠᠯᠬᠢᠨ ᠳᠣᠣᠷᠠ ᠲᠠᠯᠠ ᠶ᠋ᠢᠨ ᠲᠤᠭᠤᠷᠭᠠᠨ ᠵᠠᠩᠵᠠ ᠶ᠋ᠢ ᠳᠣᠲᠣᠭᠤᠷ ᠰᠢᠷᠭᠤᠭᠤᠯᠵᠤ ᠡᠮᠬᠦᠭᠦᠯᠦᠨᠡ᠃ ᠢᠩᠭᠢᠵᠦ ᠲᠤᠭᠤᠷᠭᠠᠯᠠᠵᠤ ᠪᠠᠷᠠᠭᠰᠠᠨ ᠤ᠋ ᠳᠠᠷᠠᠭᠠ ᠳᠤᠮᠳᠠ ᠪᠦᠰᠡ ᠴᠢᠩᠭᠠᠯᠠᠵᠤ᠂ ᠳᠠᠬᠢᠨ ᠬᠠᠶᠠᠭᠠᠪᠴᠢ ( ᠢᠷᠭᠡᠪᠴᠢ ) ᠶ᠋ᠢ ᠲᠣᠭᠣᠷᠢᠭᠤᠯᠵᠤ᠂ ᠲᠤᠭᠤᠷᠭᠠᠨ ᠬᠣᠷᠮᠣᠢ ᠪᠠᠷ ᠳᠠᠷᠤᠵᠤ ᠳᠣᠣᠷᠠ ᠪᠦᠰᠡ ᠪᠡᠷ ᠳᠠᠷᠤᠭᠤᠯᠤᠨᠠ᠃
④ ᠲᠠᠯᠪᠢᠬᠤ ᠴᠠᠪᠤᠭ ᠪᠠᠢᠪᠠᠯ ᠲᠠᠯᠪᠢᠨᠠ᠃ ᠡᠭᠦᠳᠡ ᠡᠯᠭᠦᠵᠦ ᠲᠣᠲᠣᠭᠣ ᠲᠠᠯᠪᠢᠨᠠ ᠃ ᠳᠠᠷᠠᠭᠠ ᠨᠢ ᠲᠡᠭᠦᠨ ᠦ᠌ ᠳᠡᠭᠡᠭᠦᠷ ᠳᠡᠭᠡᠪᠦᠷ ᠲᠠᠯᠪᠢᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠤᠷᠢᠳ ᠢ᠋ᠶ᠋ᠠᠷ ᠡᠮᠦᠨᠡ ᠳᠡᠭᠡᠪᠦᠷ ᠢ᠋ ᠲᠠᠯᠪᠢᠵᠤ᠂ ᠲᠡᠭᠦᠨ ᠦ᠌ ᠳᠡᠭᠡᠳᠦ ᠵᠠᠬᠠ ᠶ᠋ᠢᠨ ᠣᠭᠣᠰᠣᠷ ᠢ᠋ ᠬᠣᠢᠰᠢ ᠲᠡᠳᠡᠨ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠤᠶᠠᠨ ᠰᠢᠪᠲᠤᠷᠠᠬᠤ ᠦᠭᠡᠢ ᠶ᠋ᠢ ᠪᠠᠲᠤᠯᠠᠨᠠ᠃ ᠡᠭᠦᠨ ᠦ᠌ ᠳᠠᠷᠠᠭᠠ ᠬᠣᠢᠲᠤ ᠳᠡᠭᠡᠪᠦᠷ ᠢ᠋ ᠡᠮᠦᠨᠡ ᠳᠡᠭᠡᠪᠦᠷ ᠦ᠋ᠨ ᠳᠡᠭᠡᠭᠦᠷ ᠡᠮᠬᠦᠭᠦᠯᠦᠨ ᠲᠠᠯᠪᠢᠵᠤ᠂ ᠳᠡᠭᠡᠪᠦᠷ ᠦ᠋ᠨ ᠳᠡᠭᠡᠳᠦ ᠵᠠᠬᠠ ᠳ᠋ᠤ᠌ ᠬᠠᠲᠠᠭᠰᠠᠨ ᠬᠣᠶᠠᠷ ᠬᠣᠶᠠᠷ ᠳᠠᠢᠯᠭᠠ ᠶ᠋ᠢ ᠡᠮᠦᠨᠡᠰᠢ ᠲᠡᠳᠡᠨ᠂ ᠶᠠᠭ ᠡᠭᠦᠳᠡ ᠭᠣᠣᠯᠳᠠᠭᠤᠯᠵᠤ ᠰᠣᠯᠪᠢᠴᠠᠭᠤᠯᠤᠨ ᠰᠦᠯᠵᠢᠵᠦ ᠥᠯᠵᠡᠢ ᠵᠠᠩᠭᠢᠶᠠ ᠭᠠᠷᠭᠠᠨ ᠡᠭᠦᠳᠡᠨ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠪᠥᠰᠡᠨ ᠳ᠋ᠦ᠍ ᠴᠠᠬᠢᠯᠳᠠᠭ ᠣᠶᠣᠳᠠᠯ ᠢ᠋ᠶ᠋ᠠᠷ ᠲᠣᠷᠭᠣᠭᠠᠨᠠ᠃
⑤ ᠡᠷᠦᠬᠡ ᠡᠷᠦᠬᠡᠯᠡᠨᠡ᠃ ᠡᠷᠦᠬᠡᠨ ᠤ ᠪᠠᠷᠠᠭᠤᠨ ᠵᠡᠭᠦᠨ ᠪᠠ ᠬᠣᠢᠲᠤ ᠣᠭᠣᠰᠣᠷ ᠢ᠋ ᠪᠦᠷ ᠭᠡᠷ ᠦ᠋ᠨ ᠪᠦᠰᠡ ᠳ᠋ᠦ᠍ ᠬᠠᠪᠴᠢᠭᠤᠯᠤᠨ ᠤᠶᠠᠵᠤ᠂ ᠳᠣᠪᠲᠣᠯᠭᠠ ( ᠡᠷᠦᠬᠡ ᠶ᠋ᠢᠨ ᠡᠮᠦᠨᠡ ᠣᠭᠣᠰᠣᠷ ) ᠢ᠋ ᠠᠮᠢᠳᠤᠯᠢᠭ ᠲᠠᠯᠪᠢᠵᠤ ᠨᠡᠭᠡᠭᠡᠵᠦ ᠬᠠᠭᠠᠬᠤ ᠳ᠋ᠤ᠌ ᠪᠡᠯᠡᠳᠬᠡᠨᠡ᠃
⑥ ᠲᠣᠭᠣᠨᠣ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠴᠢᠭᠲᠠᠭᠠ ᠪᠠᠨ ᠤᠶᠠᠵᠤ᠂ ᠢᠯᠡᠭᠦᠷᠡᠭᠰᠡᠨ ᠣᠭᠣᠰᠣᠷ ᠢ᠋ ᠭᠤᠷᠪᠠ ᠨᠤᠭᠤᠯᠤᠨ ᠣᠨᠢᠨ ᠳ᠋ᠤ᠌ ᠬᠠᠪᠴᠢᠭᠤᠯᠤᠨᠠ᠃ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠳᠣᠲᠣᠷᠠ ᠬᠥᠰᠢᠭᠡ ᠶ᠋ᠢ ᠵᠡᠭᠦᠵᠦ ᠳᠣᠲᠣᠭᠠᠳᠤ ᠴᠢᠮᠡᠭᠯᠡᠯ ᠢ᠋ ᠪᠦᠷᠢᠯᠳᠦᠭᠦᠯᠦᠨᠡ᠃