ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠳᠥᠷᠪᠡ ᠂ ᠮᠣᠩᠭᠣᠯ ᠭᠡᠷ ᠦᠨ ᠪᠦᠲᠦᠴᠡ ᠶᠢᠨ ᠪᠦᠯᠦᠭ 1 > Хөх зул – Боржигон Ванжал –"Ддөрөв ᠂ Монгол гэрийн бүтцийн бүлэг " 1
454ᠳᠥᠷᠪᠡ ᠂ ᠮᠣᠩᠭᠣᠯ ᠭᠡᠷ ᠦᠨ ᠪᠦᠲᠦᠴᠡ ᠶᠢᠨ ᠪᠦᠯᠦᠭ – 1
ᠮᠣᠩᠭᠣᠯ ᠭᠡᠷ ᠦᠨ ᠪᠦᠲᠦᠴᠡ Монгол гэрийн бүтэц
ᠮᠣᠩᠭᠣᠯ ᠭᠡᠷ ᠦᠨ ᠪᠦᠲᠦᠴᠡ Монгол гэрийн бүтэц
ᠮᠣᠩᠭᠣᠯ ᠭᠡᠷ ᠦᠨ ᠪᠦᠲᠦᠴᠡ Монгол гэрийн бүтэц
ᠮᠣᠩᠭᠣᠯ ᠭᠡᠷ᠂ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠣᠷᠣᠰᠢᠨ ᠰᠠᠭᠤᠬᠤ ᠣᠷᠣᠨ ᠰᠠᠭᠤᠴᠠ᠃ ᠭᠡᠷ ᠪᠠᠢᠰᠢᠩ ᠬᠣᠶᠠᠷ ᠡᠷᠲᠡᠨ ᠡᠴᠡ ᠪᠡᠨ ᠢᠯᠭᠠᠭᠠᠲᠠᠢ ᠪᠢᠯᠡ᠃ ᠣᠳᠣᠬᠢ ᠵᠠᠷᠢᠮ ᠨᠤᠲᠤᠭ ᠤ᠋ᠨ ᠬᠢᠨ ᠢᠯᠭᠠᠬᠤ ᠪᠠᠨ ᠪᠠᠢᠴᠢᠬᠠᠭᠰᠠᠨ ᠠ᠋ᠴᠠ ᠪᠢᠰᠢ ᠃ ᠭᠡᠷ ᠭᠡᠪᠡᠯ ᠡᠷᠬᠡᠪᠰᠢ ᠮᠣᠩᠭᠣᠯ ᠭᠡᠷ ᠢ᠋ ᠬᠡᠯᠡᠵᠦ᠂ ᠪᠠᠢᠰᠢᠩ ᠭᠡᠪᠡᠯ ᠰᠢᠷᠣᠢ ᠪᠠᠷ ᠪᠠᠷᠢᠭᠰᠠᠨ ᠣᠷᠣᠨ ᠰᠠᠭᠤᠴᠠ ᠶ᠋ᠢ ᠬᠡᠯᠡᠳᠡᠭ᠃ ᠲᠡᠢᠨ ᠬᠦ᠌ ᠮᠣᠩᠭᠣᠯ ᠭᠡᠷ᠂ ᠰᠢᠪᠠᠷ ᠪᠠᠢᠰᠢᠩ ᠭᠡᠵᠦ ᠲᠣᠳᠣᠷᠬᠠᠢᠯᠠᠬᠤ ᠬᠡᠷᠡᠭ ᠦᠭᠡᠢ᠃ ᠭᠡᠷ ᠪᠦᠯᠢ ( ᠭᠡᠷ ᠳᠣᠲᠣᠷᠠᠬᠢ ᠬᠥᠮᠦᠰ ) ᠂ ᠭᠡᠷ ᠪᠦᠯᠢ ᠪᠣᠯᠬᠤ ( ᠡᠷᠡ ᠡᠮᠡ ᠪᠣᠯᠤᠯᠴᠠᠬᠤ ) ᠂ ᠭᠡᠷ ᠭᠡᠷᠯᠡᠬᠦ (① ᠭᠡᠷᠭᠡᠢ ᠠᠪᠬᠤ ᠂ ② ᠭᠡᠷ ᠣᠷᠣᠨ ᠢ᠋ᠶ᠋ᠠᠨ ᠰᠠᠢᠨ ᠠᠪᠴᠤ ᠶᠠᠪᠤᠬᠤ ) ᠂ ᠭᠡᠷ ᠵᠠᠭᠤᠷᠠ (① ᠭᠡᠷ ᠦ᠋ᠨ ᠬᠥᠮᠦᠰ ᠳᠣᠲᠣᠷᠠ ᠪᠠᠨ ᠂ ② ᠭᠡᠷ ᠦ᠋ᠨ ᠣᠷᠴᠢᠨ ᠲᠣᠭᠣᠷᠢᠨ ᠠ᠋ᠴᠠ ᠦᠯᠦ ᠬᠣᠯᠠᠳᠠᠬᠤ ) ᠂ ᠭᠡᠷ ᠵᠣᠪᠠᠬᠤ ( ᠬᠥᠷᠥᠩᠭᠡ ᠶᠠᠳᠠᠭᠤᠷᠠᠬᠤ ) ᠂ ᠭᠡᠷ ᠶᠠᠳᠠᠭᠤ ( ᠶᠠᠳᠠᠭᠤ ᠬᠣᠭᠣᠰᠣᠨ ) ᠂ ᠭᠡᠷ ᠪᠠᠶᠠᠨ (ᠬᠥᠷᠥᠩᠭᠡ ᠶᠡᠬᠡᠲᠡᠢ ) ᠂ ᠭᠡᠷ ᠲᠡᠷᠭᠡ ( ᠤᠤᠯ ᠨᠢ ᠲᠡᠷᠭᠡᠨ ᠳᠡᠭᠡᠷᠡ ᠲᠣᠬᠢᠶᠠᠭᠰᠠᠨ ᠭᠡᠷ ᠢ ᠬᠡᠯᠡᠵᠦ ᠪᠠᠢᠵᠠᠢ᠂ ᠣᠳᠣ ᠤᠳᠬᠠ ᠰᠢᠯᠵᠢᠭᠡᠳ ᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠪᠦᠬᠦᠨ ᠢ᠋ ᠵᠢᠭᠠᠭᠰᠠᠨ ᠤᠳᠬᠠ ᠲᠠᠢ ᠪᠣᠯᠵᠠᠢ ) ᠂ ᠭᠡᠷ ᠪᠠᠷᠠᠭᠠ ( ᠬᠥᠷᠥᠩᠭᠡ ᠬᠣᠭᠰᠢᠯ ) ᠂ ᠭᠡᠷ ᠪᠠᠷᠢᠬᠤ (① ᠭᠡᠷ ᠪᠤᠰᠬᠠᠨ ᠪᠠᠢᠭᠤᠯᠬᠤ ᠂ ② ᠭᠡᠷ ᠭᠡᠷᠯᠡᠬᠦ ᠂ ③ ᠡᠷᠦᠬᠡ ᠬᠥᠷᠥᠩᠭᠡ ᠪᠡᠨ ᠲᠤᠰᠠᠭᠠᠷᠯᠠᠬᠤ ᠂ ᠳᠠᠯᠤᠤ ᠵᠡᠷᠭᠡ ᠵᠠᠷᠢᠮ ᠲᠣᠭᠯᠠᠭᠠᠮ ᠢ᠋ᠶ᠋ᠠᠷ ᠲᠣᠭᠯᠠᠬᠤ ᠳ᠋ᠤ᠌ ᠠᠯᠢ ᠠᠬᠠᠯᠠᠬᠤ ᠮᠣᠳᠣ ᠲᠠᠢ ᠨᠢ ᠳᠠᠷᠤᠵᠤ ᠥᠪᠡᠷ ᠦ᠋ᠨ ᠪᠣᠯᠭᠠᠬᠤ ᠶ᠋ᠢ ) ᠂ ᠬᠠᠷᠠ ᠭᠡᠷ ( ᠭᠢᠨᠳᠠᠨ ᠱᠣᠷᠣᠩ ) ᠂ ᠤᠯᠤᠰ ᠭᠡᠷ ( ᠤᠯᠤᠰ ᠦᠨᠳᠦᠰᠦᠲᠡᠨ ) ᠂ ᠭᠡᠷ ᠡᠴᠡ ᠭᠠᠷᠬᠤ ( ᠬᠤᠸᠠᠷᠠᠭ ᠪᠣᠯᠬᠤ )᠂ ᠭᠡᠷ ᠦ᠋ᠨ ᠪᠠᠭᠤᠷᠢ ( ① ᠭᠡᠷ ᠪᠠᠷᠢᠬᠤ ᠭᠠᠵᠠᠷ ᠂ ② ᠭᠡᠷ ᠪᠠᠷᠢᠵᠤ ᠪᠠᠢᠭᠰᠠᠨ ᠭᠠᠵᠠᠷ ) ᠂ ᠭᠡᠷ ᠢ ᠵᠠᠰᠠᠬᠤ ( ᠤᠯᠤᠰ ᠭᠡᠷ ᠢ᠋ ᠲᠦᠪᠰᠢᠳᠬᠡᠨ ᠮᠠᠨᠳᠤᠭᠤᠯᠬᠤ ) ᠂ ᠭᠡᠷ ᠦ᠋ᠨ ᠦᠶᠡ ᠶ᠋ᠢᠨ ᠪᠢᠴᠢᠮᠡᠯ ( ᠭᠡᠷ ᠦ᠋ᠨ ᠲᠡᠷᠢᠭᠦᠯᠡᠭᠴᠢ ᠶ᠋ᠢᠨ ᠤᠳᠤᠮ ᠤᠯᠠᠮᠵᠢᠯᠠᠯ ᠤ᠋ᠨ ᠲᠣᠳᠣᠷᠬᠠᠢᠯᠠᠯᠲᠠ ) ᠂ ᠭᠡᠷ ᠦ᠋ᠨ ᠮᠤᠬᠤᠷ ᠰᠠᠬᠢᠬᠤ ( ᠶᠠᠭᠤᠮᠠ ᠦᠵᠡᠵᠦ ᠨᠢᠳᠦ ᠲᠠᠢᠯᠤᠭᠠ ᠦᠭᠡᠢ ᠪᠥᠭᠯᠡᠭᠦᠦ ᠪᠣᠢᠳᠠ ᠪᠠᠢᠬᠤ ) ᠂ ᠭᠡᠷ ᠦ᠋ᠨ ᠬᠥᠮᠦᠨ 》( ① ᠭᠡᠷᠭᠡᠢ ᠂ ② ᠪᠠᠢᠩᠭᠤ ᠭᠡᠷ ᠲᠡᠭᠡᠨ ᠪᠠᠢᠬᠤ ᠠ᠋ᠴᠠ ᠥᠭᠡᠷᠡ ᠪᠣᠯᠤᠮᠵᠢ ᠦᠭᠡᠢ ᠪᠣᠯᠤᠭᠰᠠᠨ ᠬᠥᠮᠦᠨ ) ᠂ ᠭᠡᠷ ᠦ᠋ᠨ ᠬᠡᠷᠡᠭᠯᠡᠯ ( ᠭᠡᠷ ᠦ᠋ᠨ ᠳᠣᠲᠣᠷᠠ ᠲᠠᠯᠪᠢᠬᠤ ᠬᠣᠭᠰᠢᠯ ) ᠂ ᠭᠡᠷ ᠦ᠋ᠨ ᠡᠵᠡᠨ ( ᠡᠷᠦᠬᠡ ᠶ᠋ᠢᠨ ᠲᠡᠷᠢᠭᠦᠯᠡᠭᠴᠢ ) ᠂ ᠭᠡᠷ ᠦ᠋ᠨ ᠲᠡᠵᠢᠭᠡᠪᠦᠷᠢ ᠠᠮᠢᠲᠠᠨ ( ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠠ᠋ᠴᠠ ᠪᠤᠰᠤᠳ ᠲᠡᠵᠢᠭᠡᠪᠦᠷᠢ ᠠᠮᠢᠲᠠᠨ ) ᠂ ᠭᠡᠷ ᠦ᠋ᠨ ᠮᠣᠳᠣ ( ᠣᠨᠢ ᠂ ᠬᠠᠨᠠ ᠂ ᠬᠠᠭᠠᠯᠭᠠ ᠂ ᠲᠣᠭᠣᠨᠣ ) ᠂ ᠭᠡᠷ ᠦ᠋ᠨ ᠬᠣᠢᠮᠣᠷ ( ᠭᠡᠷ ᠦ᠋ᠨ ᠭᠣᠯᠣᠮᠲᠠ ᠠ᠋ᠴᠠ ᠬᠣᠢᠰᠢᠬᠢ ᠣᠷᠣᠨ ᠵᠠᠢ ) ᠂ ᠭᠡᠷ ᠦ᠋ᠨ ᠬᠥᠮᠦᠵᠢᠯ ( ᠡᠴᠢᠭᠡ ᠡᠬᠡ ᠶ᠋ᠢᠨ ᠵᠢᠭᠠᠪᠤᠷᠢ ᠰᠤᠷᠭᠠᠯ ) ᠂ ᠭᠡᠷ ᠦ᠋ᠨ ᠳᠠᠭᠠᠭᠠᠯᠭᠠᠪᠤᠷᠢ ( ᠬᠢᠴᠢᠶᠡᠯ ᠦ᠋ᠨ ᠭᠠᠳᠠᠭᠤᠷ ᠭᠡᠷ ᠲᠡᠭᠡᠨ ᠬᠢᠬᠦ ᠳᠠᠰᠬᠠᠯ ) ᠂ ᠭᠡᠷ ᠦ᠋ᠨ ᠠᠷᠢᠭᠤᠨ ᠴᠡᠪᠡᠷ ( ᠭᠡᠷ ᠣᠷᠣᠨ ᠳ᠋ᠠᠭᠠᠨ ᠴᠡᠪᠡᠷ ᠴᠡᠭᠡᠷᠴᠢ ᠪᠠᠢᠬᠤ ᠱᠠᠭᠠᠷᠳᠠᠯᠭᠠ ) ᠂ ᠭᠡᠷ ᠦ᠋ᠨ ᠬᠣᠰᠢᠶᠠᠩᠭᠤᠷ ( ᠬᠣᠰᠢᠶᠠᠩᠭᠤᠷ ᠤ᠋ᠨ ᠨᠢᠭᠡ ᠵᠦᠢᠯ ) ᠂ ᠭᠡᠷ ᠦ᠋ᠨ ᠪᠤᠭᠤ ( ᠨᠢᠭᠡ ᠵᠦᠢᠯ ᠦ᠋ᠨ ᠲᠡᠵᠢᠭᠡᠪᠦᠷᠢ ᠲᠣᠮᠣ ᠬᠤᠯᠤᠭᠠᠨᠠ ) ᠂ ᠭᠡᠷ ᠦ᠋ᠨ ᠪᠤᠭ ( ᠭᠡᠷ ᠦ᠋ᠨ ᠳᠠᠷᠤᠭᠠᠰᠤ ) ᠂ ᠭᠡᠷ ᠦ᠋ᠨ ᠰᠢᠪᠠᠭᠤ ( ᠲᠠᠬᠢᠶᠠ ) ᠃
ᠭᠡᠷ
( ᠰᠢᠯᠵᠢᠭᠰᠡᠨ ᠤᠳᠬᠠ ) ① ᠠᠮᠢᠲᠠᠨ ᠤ᠋ ᠦᠷᠡ ᠵᠤᠯᠵᠠᠭᠠ ᠣᠷᠣᠰᠢᠬᠤ ᠰᠠᠪᠠ ᠂ ② ᠶᠠᠭᠤᠮᠠᠨ ᠤ᠋ ᠭᠠᠳᠠᠭᠤᠷᠬᠢ ᠬᠠᠯᠢᠰᠤ ᠪᠤᠶᠤ ᠪᠤᠶᠤ ᠪᠦᠷᠬᠦᠭᠡᠰᠦ ᠵᠢᠴᠢ ᠠᠬᠤᠭᠤᠯᠬᠤ ᠰᠠᠪᠠ᠂ ᠵᠢᠱ᠌ᠢᠶᠡᠯᠡᠪᠡᠯ : ᠬᠣᠷᠣᠬᠠᠢ ᠶ᠋ᠢᠨ ᠭᠡᠷ᠂ ᠮᠠᠯᠠᠭᠠᠢ ᠶ᠋ᠢᠨ ᠭᠡᠷ᠂ ᠨᠢᠳᠦᠨ ᠰᠢᠯ ᠦ᠋ᠨ ᠭᠡᠷ᠂ ᠫᠤᠤ ᠶ᠋ᠢᠨ ᠭᠡᠷ ᠭᠡᠬᠦ ᠮᠡᠲᠦ᠃
ᠲᠣᠭᠣᠨᠣ
ᠮᠣᠩᠭᠣᠯ ᠭᠡᠷ ᠦ᠋ᠨ ᠣᠷᠣᠢ ᠳ᠋ᠠᠬᠢ ᠣᠨᠢ ᠶ᠋ᠢ ᠲᠣᠭᠲᠠᠭᠠᠵᠤ ᠪᠠᠢᠭᠠ ᠴᠠᠮᠬᠠᠭ ᠲᠠᠢ ᠳᠤᠭᠤᠢ ᠴᠠᠭᠠᠷᠢᠭ ( ᠬᠦᠷᠢᠶᠡ ) ᠃ ᠵᠠᠷᠢᠮ ᠨᠢ ᠣᠨᠢᠰᠣ ᠬᠡᠯᠬᠢᠶᠡᠷᠢ ᠭᠡᠵᠦ ᠨᠢᠭᠡ ᠴᠦ᠍ ᠦᠭᠡᠢ ᠪᠠᠢᠳᠠᠭ᠃ ᠬᠥᠬᠡᠨᠠᠭᠤᠷ ᠲᠤ᠌ ᠬᠠᠷᠠᠭᠠᠴᠠ ᠭᠡᠳᠡᠭ᠃
ᠰᠡᠷᠡᠯᠵᠢᠨ ᠲᠣᠭᠣᠨᠣ
ᠲᠣᠭᠣᠨᠣ ᠶ᠋ᠢᠨ ᠴᠠᠭᠠᠷᠢᠭ ( ᠬᠦᠷᠢᠶᠡᠨ ) ᠳ᠋ᠡᠭᠡᠨ ᠬᠣᠶᠠᠷ ᠬᠣᠶᠠᠷ ᠨᠠᠷᠢᠨ ᠪᠤᠷᠭᠠᠰᠤᠨ ᠮᠣᠳᠣ ᠪᠠᠷ ᠲᠣᠭᠣᠨᠣᠯᠵᠢ ᠭᠠᠷᠭᠠᠨ ᠴᠠᠮᠬᠠᠭᠯᠠᠨ ᠬᠢᠭᠰᠡᠨ ᠳᠥᠭᠥᠮ ᠲᠣᠭᠣᠨᠣ ᠃ ᠣᠨᠢᠰᠣ᠂ ᠬᠠᠷᠠᠭᠠ᠂ ᠳᠠᠭᠠ ᠵᠡᠷᠭᠡ ᠨᠢᠭᠡ ᠴᠦ᠍ ᠦᠭᠡᠢ᠃
ᠬᠠᠳᠬᠤᠭᠤᠷ ᠲᠣᠭᠣᠨᠣ
ᠲᠣᠭᠣᠨᠣ ᠶ᠋ᠢᠨ ᠭᠠᠳᠠᠷ ᠴᠠᠭᠠᠷᠢᠭ ( ᠬᠦᠷᠢᠶᠡᠨ ) ᠳ᠋ᠡᠭᠡᠨ ᠭᠠᠳᠠᠭᠰᠢ ᠰᠠᠷᠬᠢᠨᠠᠭ ᠰᠢᠭ᠋ ᠣᠯᠠᠨ ᠱᠠᠭᠠ ( ᠨᠢᠳᠦ ) ᠭᠠᠷᠭᠠᠨ ᠣᠨᠢ ᠲᠣᠭᠲᠠᠭᠠᠬᠤ ᠤᠭᠯᠠᠭᠤᠷᠭᠠ ᠲᠠᠢ ᠲᠣᠭᠣᠨᠣ ᠶ᠋ᠢ ᠬᠡᠯᠡᠨᠡ ᠃
ᠬᠡᠯᠬᠢᠶᠡᠷᠢ ᠲᠣᠭᠣᠨᠣ
ᠲᠣᠭᠣᠨᠣ ᠶ᠋ᠢᠨ ᠭᠠᠳᠠᠷ ᠳᠠᠪᠬᠤᠷ ᠴᠠᠭᠠᠷᠢᠭ ( ᠬᠦᠷᠢᠶᠡᠨ ) ᠳ᠋ᠡᠭᠡᠨ ᠭᠠᠳᠠᠭᠰᠢ ᠬᠠᠷᠠᠭᠰᠠᠨ ᠣᠯᠠᠨ ᠨᠢᠳᠦᠲᠡᠢ (ᠱᠠᠭᠠ ) ᠬᠤᠷᠤᠭᠤ ᠪᠣᠢ ᠂ ᠲᠡᠷᠡ ᠬᠦ᠌ ᠨᠢᠳᠦ ᠨᠢᠭᠡ ᠪᠦᠷᠢ ᠳ᠋ᠦ᠍ ᠨᠢᠭᠡ ᠣᠨᠢ ᠶ᠋ᠢ ᠬᠡᠯᠬᠢᠵᠦ ᠲᠣᠭᠲᠠᠭᠠᠭᠰᠠᠨ ᠲᠣᠭᠣᠨᠣ ᠶ᠋ᠢ ᠬᠡᠯᠡᠨᠡ ᠃ ᠬᠡᠯᠬᠢᠶᠡᠷᠢ ᠲᠣᠭᠣᠨᠣ ᠨᠢ ᠬᠣᠶᠠᠷ ᠬᠠᠭᠠᠰ ᠴᠠᠭᠠᠷᠢᠭ ᠢ᠋ᠶ᠋ᠠᠷ ᠪᠦᠲᠦᠭᠰᠡᠨ ᠪᠠᠢᠳᠠᠭ᠃
ᠬᠡᠯᠬᠢᠶᠡᠷᠢ ᠲᠣᠭᠣᠨᠣ ᠶ᠋ᠢᠨ ᠪᠦᠲᠦᠴᠡ ᠨᠢ ᠬᠠᠮᠤᠭ ᠠ᠋ᠴᠠ ᠪᠤᠳᠤᠯᠢᠶᠠᠨᠲᠠᠢ ᠰᠢᠭ᠋ ᠲᠤᠯᠠ ᠲᠡᠭᠦᠨ ᠢ᠋ ᠨᠢ ᠵᠠᠳᠠᠯᠵᠤ ᠲᠠᠢᠯᠤᠶᠠ᠃
ᠲᠣᠭᠣᠨᠣ ᠶ᠋ᠢᠨ ᠣᠨᠢᠰᠣ
ᠬᠣᠶᠠᠷ ᠬᠠᠭᠠᠰ ᠪᠦᠬᠦᠢ ᠬᠡᠯᠬᠢᠶᠡᠷᠢ ᠲᠣᠭᠣᠨᠣ ᠪᠠᠨ ᠨᠣᠮᠣᠨ ᠲᠠᠯᠠ ᠪᠢᠰᠢ ᠬᠥᠪᠴᠢ ᠲᠠᠯᠠ ᠪᠠᠷ ᠨᠢ ᠬᠠᠪᠰᠤᠷᠭᠠᠨ ᠨᠡᠢᠯᠡᠭᠦᠯᠵᠦ ᠲᠤᠰᠬᠠᠢ ᠪᠡᠯᠡᠳᠬᠡᠭᠰᠡᠨ ᠴᠦ ᠪᠡᠷ ᠴᠦᠳᠡᠵᠦ ᠨᠡᠢᠯᠡᠭᠦᠯᠳᠡᠭ ᠃ ᠲᠡᠷᠡ ᠴᠦ ᠶ᠋ᠢ ᠲᠣᠭᠣᠨᠣ ᠶ᠋ᠢᠨ ᠣᠨᠢᠰᠣ ᠭᠡᠨᠡ᠃ ᠪᠠᠰᠠ ᠲᠣᠭᠣᠨᠣ ᠶ᠋ᠢᠨ ᠬᠡᠯᠬᠢᠶᠡᠷᠢ ᠴᠦ᠍ ᠭᠡᠳᠡᠭ᠃
ᠲᠣᠭᠣᠨᠣ ᠶ᠋ᠢᠨ ᠬᠣᠯᠪᠤᠭᠠᠷᠢ
ᠬᠡᠯᠬᠢᠶᠡᠷᠢ ᠲᠣᠭᠣᠨᠣ ᠶ᠋ᠢᠨ ᠣᠨᠢᠰᠣ ᠶ᠋ᠢ ᠤᠯᠠᠮ ᠪᠡᠬᠢᠯᠡᠬᠦ ᠶ᠋ᠢᠨ ᠲᠥᠯᠥᠭᠡ ᠣᠷᠢᠶᠠᠨ ᠤᠶᠠᠳᠠᠭ ᠨᠠᠷᠢᠨ ᠳᠡᠭᠡᠰᠦ ᠶ᠋ᠢ ᠬᠣᠯᠪᠤᠭᠠᠷᠢ ᠭᠡᠨᠡ᠃
ᠲᠣᠭᠣᠨᠣ ᠶ᠋ᠢᠨ ᠭᠣᠣᠯ
ᠬᠣᠶᠠᠷ ᠬᠠᠭᠠᠰ ᠲᠣᠭᠣᠨᠣᠨ ᠤ᠋ ᠨᠡᠢᠯᠡᠪᠦᠷᠢ᠂ ᠡᠭᠦᠳᠡ ᠲᠡᠢ ᠵᠡᠷᠭᠡᠴᠡᠭᠡ ᠰᠢᠯᠤᠭᠤᠨ ᠢ᠋ᠶ᠋ᠠᠷ ᠣᠷᠣᠰᠢᠬᠤ ᠲᠣᠭᠣᠨᠣ ᠶ᠋ᠢᠨ ᠭᠣᠣᠯ ᠮᠣᠳᠣ ᠃ ᠪᠠᠰᠠ ᠰᠡᠷᠡᠯᠵᠢ᠂ ᠴᠢᠮᠠᠷᠬᠠᠢ ᠭᠡᠳᠡᠭ᠃
ᠡᠮᠦᠨᠡ ᠬᠣᠢᠨᠠ ᠲᠣᠭᠣᠨᠣ ᠶ᠋ᠢᠨ ᠭᠣᠣᠯ
ᠪᠠᠰᠠ ᠲᠣᠭᠣᠨᠣ ᠶ᠋ᠢᠨ ᠪᠠᠭᠠ ᠭᠣᠣᠯ ᠭᠡᠳᠡᠭ᠃ ᠡᠨᠡ ᠨᠢ ᠡᠭᠦᠳᠡ ᠲᠡᠢ ᠵᠡᠷᠭᠡᠴᠡᠭᠡ ᠰᠢᠯᠤᠭᠤᠨ ᠢ᠋ᠶ᠋ᠠᠷ ᠣᠷᠣᠰᠢᠵᠤ ᠪᠣᠢ ᠲᠣᠭᠣᠨᠣ ᠶ᠋ᠢᠨ ᠭᠣᠣᠯ ᠲᠠᠢ ᠶᠠᠭ ᠭᠣᠣᠯ ᠢ᠋ᠶ᠋ᠠᠷ ᠨᠢ ᠵᠠᠯᠮᠠᠭᠠᠢᠯᠠᠵᠤ ᠪᠠᠢᠭᠠ ᠲᠣᠭᠣᠨᠣ ᠶ᠋ᠢᠨ ᠪᠠᠭᠠ ᠭᠣᠣᠯ᠃ ᠬᠣᠢᠨᠠᠬᠢ ᠨᠢ ᠬᠣᠢᠮᠣᠷ ᠭᠣᠣᠯᠯᠠᠵᠤ᠂ ᠡᠮᠦᠨᠡᠬᠢ ᠨᠢ ᠡᠭᠦᠳᠡ ᠭᠣᠣᠯᠯᠠᠨ ᠣᠷᠣᠰᠢᠳᠠᠭ᠃
ᠲᠣᠭᠣᠨᠣ ᠶ᠋ᠢᠨ ᠬᠦᠷᠢᠶᠡ ( ᠴᠠᠭᠠᠷᠢᠭ )
ᠬᠡᠯᠬᠢᠶᠡ ᠲᠣᠭᠣᠨᠣ ᠨᠢ ᠭᠠᠳᠠᠷ ᠶᠡᠬᠡ ᠳᠤᠭᠤᠢ ᠳᠠᠪᠬᠤᠷ ᠬᠦᠷᠢᠶᠡᠳᠡᠢ ( ᠴᠠᠭᠠᠷᠢᠭ ) ᠪᠥᠭᠡᠳ ᠡᠨᠡ ᠬᠦ᠌ ᠬᠦᠷᠢᠶᠡᠨ ᠳ᠋ᠡᠭᠡᠨ ᠣᠨᠢ ᠬᠡᠯᠬᠢᠬᠦ ᠱᠠᠭᠠ ᠲᠠᠢ ᠪᠠᠢᠳᠠᠭ᠃
ᠲᠣᠭᠣᠨᠣ ᠶ᠋ᠢᠨ ᠬᠤᠷᠤᠭᠤ
ᠲᠣᠭᠣᠨᠣ ᠶ᠋ᠢᠨ ᠭᠠᠳᠠᠷ ᠳᠠᠪᠬᠤᠷ ᠬᠦᠷᠢᠶᠡᠨ ᠦ᠌ ᠠᠩ ᠳ᠋ᠤ᠌ ᠨᠢᠭᠡ ᠦᠵᠦᠭᠦᠷ ᠨᠢ ᠪᠡᠬᠢᠯᠡᠭᠳᠡᠵᠦ᠂ ᠨᠥᠭᠦᠭᠡ ᠦᠵᠦᠭᠦᠷ ᠨᠢ ᠲᠣᠭᠣᠨᠣ ᠶ᠋ᠢᠨ ᠬᠦᠷᠢᠶᠡᠨ ᠡᠴᠡ ᠭᠠᠳᠠᠭᠰᠢ ᠵᠢᠭᠠᠬᠠᠨ ᠴᠤᠬᠤᠢᠭᠰᠠᠨ ᠪᠢᠴᠢᠬᠠᠨ ᠮᠣᠳᠣᠳ ᠪᠢᠯᠡ᠃ ᠭᠡᠬᠦ ᠳ᠋ᠡᠭᠡᠨ ᠬᠤᠷᠤᠭᠤ ᠪᠦᠷᠢ ᠶ᠋ᠢᠨ ᠬᠣᠭᠣᠷᠣᠨᠳᠣ ᠣᠨᠢ ᠶ᠋ᠢᠨ ᠲᠣᠯᠣᠭᠠᠢ ᠪᠠᠭᠲᠠᠮᠠ ᠵᠠᠢᠲᠠᠢ ᠪᠥᠭᠡᠳ ᠪᠠᠰᠠ ᠣᠨᠢ ᠬᠡᠯᠬᠢᠬᠦ ᠰᠦᠪᠡ ᠲᠡᠢ ᠪᠠᠢᠳᠠᠭ᠃ ᠬᠤᠷᠤᠭᠤᠨ ᠤ᠋ ᠦᠳᠡᠭᠡᠷᠢ ᠶ᠋ᠢ ᠴᠤᠯᠭᠤᠢ ( ᠲᠦᠭᠦᠬᠡᠢ ) ᠰᠤᠷ ᠢ᠋ᠶ᠋ᠠᠷ ᠬᠢᠳᠡᠭ᠂ ᠪᠠᠰᠠ ᠲᠣᠭᠣᠨᠣ ᠶ᠋ᠢᠨ ᠱᠠᠭᠠ ᠭᠡᠳᠡᠭ᠃
ᠠᠮᠢ ᠦᠭᠡᠢ ᠪᠠᠢᠭᠠᠳ ᠭᠣᠣᠯ ᠲᠠᠢ
ᠠᠳᠤᠭᠤ ᠪᠢᠰᠢ ᠪᠠᠢᠭᠠᠳ ᠳᠠᠭᠠ ᠲᠠᠢ
ᠮᠠᠯ ᠪᠢᠰᠢ ᠪᠠᠢᠭᠠᠳ ᠱᠠᠭᠠ ᠲᠠᠢ
ᠮᠠᠨ ᠤ᠋ ᠳ᠋ᠤ᠌ ᠪᠣᠢ ᠲᠠᠨ ᠤ᠋ ᠳ᠋ᠤ᠌ ᠪᠣᠢ ᠃ ᠡᠨᠡ ᠶᠠᠭᠤ ᠪᠣᠢ ? ᠭᠡᠰᠡᠨ ᠣᠨᠢᠰᠣᠭᠠ ᠶ᠋ᠢ ᠭᠢᠨᠠᠮᠦ᠃
ᠲᠣᠭᠣᠨᠣ ᠶ᠋ᠢᠨ ᠬᠠᠷᠠᠭᠠ
ᠲᠣᠭᠣᠨᠣ ᠶ᠋ᠢᠨ ᠭᠣᠣᠯ ᠲᠣᠭᠣᠨᠣᠯᠵᠢ ᠠ᠋ᠴᠠ ᠲᠥᠭᠡ ᠢᠯᠡᠭᠦᠦ ᠵᠠᠢᠲᠠᠢ ᠲᠣᠭᠣᠨᠣᠨ ᠳᠥᠷᠪᠡᠨ ᠭᠣᠣᠯ ᠢ᠋ ᠨᠦᠬᠡᠯᠡᠨ ᠬᠣᠯᠪᠣᠵᠤ ᠴᠠᠭᠠᠷᠢᠭᠯᠠᠭᠰᠠᠨ ᠪᠠᠭᠠ ᠬᠦᠷᠢᠶᠡ ᠪᠠᠢᠳᠠᠭ᠃ ᠡᠭᠦᠨ ᠢ᠋ ᠬᠠᠷᠠᠭᠠ ᠭᠡᠵᠦ ᠪᠣᠢ᠃
ᠳᠠᠭᠠ
ᠲᠣᠭᠣᠨᠣ ᠶ᠋ᠢᠨ ᠬᠠᠷᠠᠭᠠ ᠪᠣᠯᠤᠨ ᠭᠠᠳᠠᠷ ᠬᠦᠷᠢᠶᠡ ᠬᠣᠶᠠᠷ ᠢ᠋ ᠬᠣᠯᠪᠣᠨ ᠪᠠᠢᠭᠠ ᠪᠦᠳᠦᠭᠦᠬᠡᠨ ᠰᠢᠭ ᠮᠣᠳᠣ ᠶ᠋ᠢ ᠳᠠᠭᠠ ᠭᠡᠨᠡ᠃ ᠣᠨᠢ ᠬᠠᠨᠠ ᠲᠣᠭᠣᠨᠣ ᠬᠣᠶᠠᠷ ᠢ᠋ ᠬᠣᠯᠪᠣᠨ ᠭᠡᠷ ᠦ᠋ᠨ ᠳᠡᠭᠡᠪᠦᠷ ᠪᠡᠶᠡ ᠶ᠋ᠢ ᠪᠦᠲᠦᠭᠡᠵᠦ ᠪᠠᠢᠭᠠ ᠤᠷᠲᠤ ᠤᠷᠲᠤ ᠮᠣᠳᠣᠳ᠃ ᠣᠨᠢ ᠶ᠋ᠢᠨ ᠲᠣᠯᠣᠭᠠᠢ ( ᠣᠨᠢ ᠶ᠋ᠢᠨ ᠲᠣᠭᠣᠨᠣᠨ ᠳ᠋ᠤ᠌ ᠬᠠᠳᠬᠤᠵᠤ ᠪᠣᠢ ᠪᠤᠶᠤ ᠬᠡᠯᠬᠢᠵᠦ ᠪᠣᠢ ᠦᠵᠦᠭᠦᠷ ᠢ᠋ ᠨᠢ ᠬᠡᠯᠡᠨᠡ ) ᠃ ᠣᠨᠢ ᠶ᠋ᠢᠨ ᠲᠠᠩᠨᠠᠢ （ ᠣᠨᠢ ᠶ᠋ᠢᠨ ᠳᠥᠷᠪᠡᠯᠵᠢᠯᠡᠨ ᠬᠠᠪᠲᠠᠭᠠᠢᠯᠠᠭᠰᠠᠨ ᠲᠣᠯᠣᠭᠠᠢ ) ᠃ ᠣᠨᠢ ᠶ᠋ᠢᠨ ᠪᠥᠭᠰᠡ ( ᠣᠨᠢ ᠶ᠋ᠢᠨ ᠬᠠᠨᠠᠨ ᠲᠣᠯᠣᠭᠠᠢ ᠲᠠᠢ ᠨᠡᠢᠯᠡᠵᠦ ᠪᠠᠢᠭᠠ ᠰᠡᠭᠡᠯᠳᠦᠷᠭᠡ ᠲᠡᠢ ᠦᠵᠦᠭᠦᠷ ) ᠃
ᠣᠨᠢ ᠶ᠋ᠢᠨ ᠰᠡᠭᠡᠯᠳᠦᠷᠭᠡ
ᠰᠠᠭᠠᠯᠳᠤᠷᠭᠠ᠂ ᠣᠨᠢ （ᠳᠣᠣᠷᠠᠲᠤ ᠦᠵᠦᠭᠦᠷ ) ᠢ᠋ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠬᠣᠯᠪᠣᠨ ᠲᠣᠭᠲᠠᠭᠠᠬᠤ ᠪᠢᠲᠡᠭᠦᠦ ᠣᠭᠣᠰᠣᠷ᠃ ᠪᠠᠰᠠ ᠰᠣᠯᠤᠭ ᠭᠡᠳᠡᠭ᠃
ᠬᠠᠨᠠ
ᠭᠡᠷ ᠦ᠋ᠨ ᠴᠡᠭᠡᠵᠢᠨ ᠪᠡᠶᠡ ᠶ᠋ᠢ ᠪᠣᠰᠬᠠᠳᠠᠭ ᠲᠣᠣᠷ ᠮᠣᠳᠣ ᠃ ᠬᠠᠨᠠ ᠨᠢᠭᠡ ᠪᠦᠷᠢ ᠪᠠᠷᠤᠭ 12 ᠠ᠋ᠴᠠ 16 ᠲᠣᠯᠣᠭᠠᠢ ᠲᠠᠢ ᠪᠠᠢᠳᠠᠭ᠃ ᠬᠠᠨᠠᠨ ᠠᠮᠠ ( ᠬᠣᠶᠠᠷ ᠬᠠᠨᠠ ᠶ᠋ᠢᠨ ᠨᠡᠢᠯᠡᠯᠳᠦᠬᠦ ᠠᠭᠤᠯᠵᠠᠭᠤᠷ ) ᠂ ᠬᠠᠨᠠ ᠶ᠋ᠢᠨ ᠨᠢᠳᠦ ( ᠳᠡᠯᠭᠡᠭᠳᠡᠭᠰᠡᠨ ᠬᠠᠨᠠᠨ ᠤ᠋ ᠳᠥᠷᠪᠡᠯᠵᠢᠨ ᠨᠦᠬᠡ ᠨᠦ᠍ᠭᠦᠳ ) ᠂ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ( ᠣᠨᠢ ᠶ᠋ᠢᠨ ᠪᠥᠭᠰᠡ ᠶ᠋ᠢ ᠲᠠᠯᠪᠢᠨ ᠲᠣᠭᠲᠠᠭᠠᠵᠤ ᠪᠠᠢᠭᠠ ᠬᠠᠨᠠ ᠶ᠋ᠢᠨ ᠳᠡᠭᠡᠳᠦ ᠦᠵᠦᠭᠦᠷ ) ᠂ ᠬᠠᠨᠠᠨ ᠰᠠᠷᠠᠪᠴᠢ ( ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢᠨ ᠬᠡᠰᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠠᠳᠠᠭᠰᠢ ᠵᠢᠭᠠᠬᠠᠨ ᠰᠠᠷᠠᠭᠠᠷ ᠪᠠᠢᠭᠠ ᠶ᠋ᠢ ) ᠂ ᠬᠠᠨᠠ ᠶ᠋ᠢᠨ ᠡᠯᠢᠭᠡ ( ᠬᠠᠨᠠ ᠶ᠋ᠢᠨ ᠳᠣᠲᠣᠷ ᠲᠠᠯᠠ ᠶ᠋ᠢᠨ ᠳᠤᠮᠳᠠ ᠪᠤᠶᠤ ᠲᠡᠭᠦᠨ ᠡᠴᠡ ᠳᠡᠭᠡᠬᠡᠨ ᠬᠡᠰᠡᠭ ) ᠂ ᠬᠠᠨᠠ ᠶ᠋ᠢᠨ ᠰᠢᠭᠢᠷᠡ ( ᠬᠠᠨᠠ ᠶ᠋ᠢᠨ ᠭᠠᠵᠠᠷ ᠲᠤ᠌ ᠬᠦᠷᠴᠦ ᠲᠣᠭᠲᠠᠵᠤ ᠪᠠᠢᠭᠠ ᠳᠣᠣᠷᠠᠲᠤ ᠡᠲᠡᠭᠡᠳ ) ᠂ ᠬᠠᠨᠠ ᠶ᠋ᠢᠨ ᠴᠡᠭᠡᠵᠢ （ ᠬᠠᠨᠠ ᠶ᠋ᠢᠨ ᠳᠤᠮᠳᠠ ᠬᠡᠰᠡᠭ ) ᠂ ᠬᠠᠨᠠ ᠶ᠋ᠢᠨ ᠦᠳᠡᠭᠡᠷᠢ ( ᠬᠠᠨᠠ ᠶ᠋ᠢ ᠲᠣᠪᠴᠢᠯᠠᠨ ᠦᠳᠡᠬᠦ ᠪᠡᠬᠢᠯᠡᠭᠡᠰᠦ ) ᠂ ᠬᠠᠨᠠ ᠶ᠋ᠢᠨ ᠦᠳᠡᠭᠡᠰᠦ ( ᠬᠠᠨᠠ ᠶ᠋ᠢ ᠦᠳᠡᠭᠡᠷᠢ ᠪᠡᠷ ᠦᠳᠡᠭᠰᠡᠨ ᠨᠢ ) ᠂ ᠬᠠᠨᠠᠨ ᠬᠦᠯᠢᠭ ( ᠬᠣᠶᠠᠷ ᠬᠠᠨᠠ ᠶ᠋ᠢᠨ ᠵᠥᠷᠢᠯᠳᠦᠭᠰᠡᠨ ᠠᠮᠠ ᠶ᠋ᠢ ᠪᠡᠬᠢᠯᠡᠨ ᠤᠶᠠᠬᠤ ᠣᠭᠣᠰᠣᠷ ) ᠂ ᠬᠠᠨ ᠤ᠋ ᠢᠷᠭᠡ ( ᠪᠦᠷᠢᠶᠡᠰᠦᠲᠡᠢ ᠭᠡᠷ ᠦ᠋ᠨ ᠲᠤᠭᠤᠷᠭᠠ ᠶ᠋ᠢᠨ ᠳᠣᠣᠷᠠᠲᠤ ᠢᠷᠮᠡᠭ ) ᠂ ᠬᠠᠨᠠ ᠶ᠋ᠢᠨ ᠤᠯᠠ ( ᠲᠤᠭᠤᠷᠭᠠ ᠶ᠋ᠢᠨ ᠳᠣᠣᠷᠠᠲᠤ ᠵᠠᠬᠠ ) ᠂ ᠬᠠᠨᠠ ᠶ᠋ᠢᠨ ᠬᠣᠷᠯᠣ : ᠲᠣᠭᠣᠨᠣ ᠶ᠋ᠢᠨ ᠭᠣᠣᠯ ᠂ ᠳᠠᠭᠠ ᠮᠡᠲᠦᠰ ᠬᠡᠭᠡᠰᠦ ᠪᠦᠬᠦᠢ ᠴᠠᠭᠠᠷᠢᠭ ᠃ ᠬᠠᠨᠠᠨ ᠰᠣᠨᠢᠨ ( ᠬᠠᠨᠠ ᠲᠤᠭᠤᠷᠭᠠ ᠳ᠋ᠤ᠌ ᠬᠠᠲᠠᠬᠤ ᠵᠢᠵᠢᠭ ᠰᠣᠨᠢᠨ ᠪᠢᠴᠢᠭ ) ᠂ ᠬᠠᠨᠠᠨ ᠬᠡ ( ᠬᠠᠨᠠ ᠶ᠋ᠢᠨ ᠨᠢᠳᠦ ᠮᠡᠲᠦ ᠳᠦᠷᠰᠦᠲᠡᠢ ᠳᠥᠷᠪᠡᠯᠵᠢᠨ ᠨᠢᠭᠡ ᠵᠦᠢᠯ ᠦ᠋ᠨ ᠬᠡ ᠤᠭᠠᠯᠵᠠ ) ᠂ ᠬᠠᠨᠠᠨ ᠴᠠᠭ ( ᠬᠠᠨᠠ ᠬᠠᠶᠠᠭᠠ ᠳ᠋ᠤ᠌ ᠡᠯᠭᠦᠬᠦ ᠲᠣᠮᠣ ᠴᠠᠭ ) ᠃ ᠬᠠᠨᠠᠨ ᠬᠠᠳᠠ ( ᠡᠭᠴᠡ ᠥᠨᠳᠥᠷ ᠬᠠᠳᠠ ) ᠂ ᠬᠠᠨᠠᠨ ᠰᠠᠷᠠᠪᠴᠢ （ ᠬᠠᠨᠠᠨ ᠰᠠᠷᠠᠪᠴᠢ ᠮᠡᠲᠦ ᠦᠯᠦ ᠮᠡᠳᠡᠭᠳᠡᠮᠡ ᠬᠠᠵᠠᠢᠠᠭᠰᠠᠨ ᠲᠡᠮᠡᠭᠡᠨ ᠪᠦᠬᠦ ) ᠂ ᠬᠠᠨᠠᠨ ᠭᠠᠴᠠᠭᠠ ( ᠬᠠᠨᠠᠨ ᠬᠠᠳᠠ ) ᠂ ᠬᠠᠨᠠ ᠶ᠋ᠢ ᠪᠠᠰᠠ ᠲᠠᠷᠮᠠ ᠭᠡᠳᠡᠭ᠃
ᠡᠷᠦᠬᠡ
ᠲᠣᠭᠣᠨᠣᠨ ᠪᠦᠷᠬᠦᠭᠦᠯ ᠂ ᠠᠮᠠ ᠳᠥᠷᠪᠡᠯᠵᠢᠨ ᠢᠰᠡᠭᠡᠢ ᠪᠡᠷ ᠬᠢᠳᠡᠭ ᠃ ᠳᠥᠷᠪᠡᠯᠵᠢᠨ ᠢᠰᠡᠭᠡᠢ ᠶ᠋ᠢᠨ ᠳᠥᠷᠪᠡᠨ ᠥᠨᠴᠥᠭ ᠲᠦ᠍ ᠪᠦᠷ ᠣᠭᠣᠰᠣᠷ ᠬᠠᠲᠠᠵᠤ᠂ ᠭᠤᠷᠪᠠᠨ ᠥᠨᠴᠥᠭ ᠦ᠋ᠨ ᠣᠭᠣᠰᠣᠷ ᠢ᠋ ᠭᠡᠷ ᠦ᠋ᠨ ᠵᠡᠭᠦᠨ᠂ ᠪᠠᠷᠠᠭᠤᠨ᠂ ᠬᠣᠢᠨᠠ ᠪᠦᠰᠡᠯᠡᠭᠦᠷ ᠲᠦ᠍ ᠪᠡᠬᠢᠯᠡᠨ ᠤᠶᠠᠵᠤ᠂ ᠭᠠᠭᠴᠠ ᠡᠮᠦᠨᠡᠰᠢ ᠬᠣᠰᠢᠭᠤᠯᠠᠭᠰᠠᠨ ᠥᠨᠴᠥᠭ ᠦ᠋ᠨ ᠣᠭᠣᠰᠣᠷ ᠲᠤ᠌ ᠨᠠᠷᠢᠪᠲᠤᠷ ᠮᠣᠳᠣ ᠤᠶᠠᠵᠤ ᠠᠮᠢᠳᠤᠯᠢᠭ ᠪᠠᠢᠯᠭᠠᠨᠠ᠃ ᠡᠭᠦᠨ ᠢ᠋ ᠳᠣᠪᠲᠣᠯᠭᠠ ᠭᠡᠵᠦ ᠴᠦ᠍ ᠬᠡᠯᠡᠳᠡᠭ᠃ ᠠᠮᠢᠳᠤᠯᠢᠭ ᠪᠠᠢᠯᠭᠠᠬᠤ ᠶ᠋ᠢᠨ ᠤᠴᠢᠷ ᠡᠳᠦᠷ ᠪᠣᠯ ᠡᠷᠦᠬᠡ ᠪᠡᠨ ᠰᠡᠬᠦᠨ ᠬᠣᠢᠰᠢ ᠲᠡᠳᠡᠨ ᠭᠤᠷᠪᠠᠯᠵᠢᠨ ᠪᠣᠯᠭᠠᠨᠠ᠂ ᠰᠥᠨᠢ ᠪᠣᠯ ᠤᠷᠤᠭᠰᠢ ᠲᠡᠳᠡᠨ ᠪᠦᠲᠡᠭᠡᠵᠦ ᠂ ᠳᠥᠷᠪᠡᠯᠵᠢᠨ ᠪᠣᠯᠭᠠᠳᠠᠭ ᠃ ᠲᠡᠢᠨ ᠬᠦ᠌ ᠡᠳᠦᠷ ᠭᠤᠷᠪᠠᠯᠵᠢᠨ ᠰᠥᠨᠢ ᠳᠥᠷᠪᠡᠯᠵᠢᠨ ᠭᠡᠳᠡᠭ ᠣᠨᠢᠰᠣᠭᠠ ᠭᠠᠷᠴᠤ ᠪᠢᠯᠡ ᠃ ᠡᠷᠦᠬᠡ ᠲᠠᠲᠠᠬᠤ ( ᠡᠷᠦᠬᠡ ᠨᠡᠭᠡᠭᠡᠬᠦ ᠂ ᠡᠷᠦᠬᠡ ᠶ᠋ᠢᠨ ᠡᠮᠦᠨᠡ ᠬᠣᠰᠢᠭᠤ ᠶ᠋ᠢ ᠬᠣᠢᠰᠢ ᠲᠠᠲᠠᠬᠤ ) ᠂ ᠡᠷᠦᠬᠡ ᠪᠦᠲᠡᠭᠡᠬᠦ ( ᠲᠣᠭᠣᠨᠣ ᠶ᠋ᠢ ᠪᠦᠬᠦᠯᠢ ᠪᠦᠲᠡᠭᠡᠬᠦ ) ᠂ ᠡᠷᠦᠬᠡ ᠲᠡᠭᠰᠢᠯᠡᠬᠦ ( ᠡᠷᠦᠬᠡ ᠪᠦᠲᠡᠭᠡᠬᠦ ) ᠂ ᠡᠷᠦᠬᠡ ᠬᠣᠰᠢᠭᠤᠯᠳᠠᠬᠤ ( ᠡᠷᠦᠬᠡ ᠶ᠋ᠢᠨ ᠬᠣᠰᠢᠭᠤ ᠶ᠋ᠢ ᠣᠷᠣᠭᠰᠢ ᠪᠣᠯᠭᠠᠬᠤ ) ᠂ ᠡᠷᠦᠬᠡ ᠳᠥᠷᠪᠡᠯᠵᠢᠯᠡᠬᠦ ( ᠡᠷᠦᠬᠡ ᠪᠦᠲᠡᠭᠡᠬᠦ ) ᠂ ᠡᠷᠦᠬᠡ ᠲᠡᠨᠲᠡᠢᠯᠭᠡᠬᠦ ( ᠡᠷᠦᠬᠡ ᠶ᠋ᠢ ᠳᠣᠣᠷᠠ ᠠ᠋ᠴᠠ ᠨᠢ ᠲᠤᠯᠬᠤ ᠪᠤᠶᠤ ᠢᠪᠢᠵᠦ ᠥᠨᠳᠥᠷᠳᠡᠭᠡᠬᠦ ) ᠂ ᠡᠷᠦᠬᠡ ᠶ᠋ᠢᠨ ᠭᠡᠭᠡᠪᠴᠢ ( ᠡᠷᠦᠬᠡᠨ ᠳᠡᠭᠡᠷᠡᠬᠢ ᠴᠣᠩᠬᠣ ) ᠂ ᠡᠷᠦᠬᠡ ( ᠠᠢᠯ ᠭᠡᠷ ) ᠂ᠡᠷᠦᠬᠡ ᠶ᠋ᠢᠨ ᠳᠠᠩᠰᠠ (ᠠᠢᠯ ᠬᠥᠮᠦᠰ ᠦ᠋ᠨ ᠳᠠᠩᠰᠠ ) ᠂ ᠡᠷᠦᠬᠡ ᠶ᠋ᠢᠨ ᠲᠡᠷᠢᠭᠦᠯᠡᠭᠴᠢ ( ᠭᠡᠷ ᠦ᠋ᠨ ᠡᠵᠡᠨ᠂ ᠠᠢᠯ ᠤ᠋ᠨ ᠲᠡᠷᠢᠭᠦᠯᠡᠭᠴᠢ ) ᠂ ᠡᠷᠦᠬᠡ ᠰᠠᠯᠭᠠᠬᠤ ( ᠡᠷᠦᠬᠡ ᠲᠤᠰᠠᠭᠠᠷᠯᠠᠬᠤ᠂ ᠭᠡᠷ ᠬᠥᠷᠥᠩᠭᠡ ᠪᠡᠨ ᠰᠠᠯᠭᠠᠵᠤ ᠥᠭᠡᠷᠡ ᠠᠢᠯ ᠪᠣᠯᠬᠤ ) ᠂ ᠡᠷᠦᠬᠡ ᠲᠡᠢ ᠭᠠᠵᠠᠷ (ᠨᠦᠬᠡ ᠨᠠᠭᠤᠷ ᠪᠤᠶᠤ ᠰᠢᠪᠠᠷ ᠤᠷᠠ ) ᠂ ᠭᠠᠯᠲᠤ ᠠᠭᠤᠯᠠ ᠶ᠋ᠢᠨ ᠡᠷᠦᠬᠡ ( ᠠᠯᠢᠪᠠ ᠳᠡᠯᠪᠡᠷᠡᠯᠲᠡ ᠡᠴᠡ ᠲᠣᠭᠲᠠᠭᠰᠠᠨ ᠨᠦᠬᠡ ) ᠡᠷᠦᠬᠡᠯᠡᠬᠦ ( ᠠᠢᠯ ᠭᠡᠷ ᠪᠣᠯᠬᠤ ) ᠃
ᠬᠥᠯᠲᠥᠷᠭᠡ
ᠬᠥᠯᠲᠦ ᠡᠷᠦᠬᠡ ᠭᠡᠰᠡᠨ ᠬᠣᠶᠠᠷ ᠦᠭᠡᠨ ᠡᠴᠡ ᠪᠦᠲᠦᠵᠡᠢ ᠃ ᠭᠡᠷ ᠦ᠋ᠨ ᠳᠡᠭᠡᠪᠦᠷ ᠦ᠋ᠨ ᠭᠠᠳᠠᠭᠤᠷ ᠪᠥᠰ ᠵᠡᠷᠭᠡ ᠡᠳ᠋ ᠢ᠋ᠶ᠋ᠡᠷ ᠬᠢᠵᠦ ᠲᠣᠭᠣᠨᠣ ᠶ᠋ᠢ ᠳᠤᠭᠤᠢᠯᠠᠭᠤᠯᠤᠭᠰᠠᠨ ᠪᠥᠭᠡᠳ ᠳᠥᠷᠪᠡᠨ ᠵᠦᠭ ᠲᠦ᠍ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠬᠦᠷᠲᠡᠯᠡ ᠨᠠᠷᠢᠪᠲᠤᠷ ᠤᠷᠲᠤ ᠬᠣᠰᠢᠭᠤ ᠭᠠᠷᠭᠠᠨ ᠬᠢᠭᠰᠡᠨ ᠶᠠᠩᠵᠤ ᠴᠢᠮᠡᠭᠯᠡᠯ᠃
ᠳᠡᠭᠡᠪᠦᠷ
ᠶᠠᠭᠤᠮᠠᠨ ᠤ᠋ ᠳᠡᠭᠡᠳᠦ ᠡᠲᠡᠭᠡᠳ ᠂ ᠲᠡᠭᠦᠨ ᠢ᠋ ᠥᠩᠭᠡᠯᠡᠵᠦ ᠪᠦᠷᠬᠦᠭᠰᠡᠨ ᠮᠣᠳᠣ᠂ ᠲᠡᠮᠦᠷ᠂ ᠢᠰᠡᠭᠡᠢ ᠵᠡᠷᠭᠡ ᠶᠠᠭᠤᠮᠠ᠃
ᠭᠡᠷ ᠦ᠋ᠨ ᠳᠡᠭᠡᠪᠦᠷ
ᠭᠡᠷ ᠦ᠋ᠨ ᠳᠡᠭᠡᠳᠦᠬᠢ ᠣᠨᠢ ᠶ᠋ᠢᠨ ᠬᠡᠰᠡᠭ ᠢ᠋ ᠪᠦᠷᠬᠦᠨ ᠪᠦᠲᠡᠭᠡᠭᠰᠡᠨ ᠳᠡᠪᠢᠭᠦᠷ ᠬᠡᠯᠪᠡᠷᠢᠲᠡᠢ ᠬᠣᠶᠠᠷ ᠬᠡᠰᠡᠭ ᠢᠰᠡᠭᠡᠢ᠃
ᠲᠤᠭᠤᠷᠭᠠ
ᠬᠠᠨᠠᠨ ᠤ᠋ ᠪᠦᠷᠢᠶᠡᠰᠦ ᠶ᠋ᠢ ᠲᠤᠭᠤᠷᠭᠠ ᠭᠡᠳᠡᠭ ᠃ ᠲᠤᠭᠤᠷᠭᠠ ᠶ᠋ᠢᠨ ᠬᠣᠭᠣᠯᠠᠢ ( ᠲᠤᠭᠤᠷᠭᠠᠨ ᠤ᠋ ᠳᠡᠭᠡᠳᠦ ᠵᠠᠬᠠ ᠂ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠳᠠᠪᠠᠭᠰᠠᠨ ᠨᠥᠮᠥᠷᠭᠡ ᠬᠡᠰᠡᠭ ᠢ᠋ ᠬᠣᠭᠣᠯᠠᠢ ᠭᠡᠳᠡᠭ )᠂ ᠲᠤᠭᠤᠷᠭᠠ ᠶ᠋ᠢᠨ ᠬᠣᠷᠮᠤᠷ (ᠲᠤᠭᠤᠷᠭᠠ ᠶ᠋ᠢᠨ ᠳᠤᠮᠳᠠ ᠪᠦᠰᠡᠯᠡᠭᠦᠷ ᠡᠴᠡ ᠳᠣᠷᠣᠭᠰᠢ ᠬᠡᠰᠡᠭ᠂ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠲᠤᠭᠤᠷᠭᠠ ᠶ᠋ᠢᠨ ᠳᠣᠣᠷᠠᠲᠤ ᠵᠠᠬᠠ ) ᠂ ᠵᠠᠩᠵᠠ (ᠲᠤᠭᠤᠷᠭᠠᠨ ᠤ᠋ ᠬᠣᠶᠠᠷ ᠬᠠᠵᠠᠭᠤ ᠶ᠋ᠢᠨ ᠵᠠᠬᠠ ) ᠃
ᠬᠠᠶᠠᠭᠠᠪᠴᠢ
ᠲᠤᠭᠤᠷᠭᠠᠨ ᠬᠣᠷᠮᠣᠷ ᠢ᠋ ᠳᠠᠷᠤᠭᠰᠠᠨ ᠬᠠᠨᠠ ᠶ᠋ᠢᠨ ᠰᠢᠭᠢᠷᠡ ᠶ᠋ᠢᠨ ᠪᠦᠷᠢᠶᠡᠰᠦ ᠶ᠋ᠢ ᠬᠠᠶᠠᠭᠠᠪᠴᠢ ᠭᠡᠨᠡ᠃ ᠪᠠᠰᠠ ᠳᠤᠯᠠᠭᠠᠪᠴᠢ ᠢᠷᠭᠡᠪᠴᠢ ᠴᠦ᠍ ᠭᠡᠳᠡᠭ᠃
ᠴᠠᠪᠤᠭ
① ᠭᠡᠷ ᠦ᠋ᠨ ᠳᠡᠭᠡᠪᠦᠷ ᠦ᠋ᠨ ᠳᠣᠲᠣᠭᠤᠷ ᠪᠠᠷᠢᠬᠤ ᠳᠠᠪᠬᠤᠷᠯᠠᠭᠠ᠃ ᠴᠠᠪᠤᠭ ᠤ᠋ᠨ ᠲᠠᠯᠠ ᠪᠦᠷᠢ ᠶ᠋ᠢᠨ ᠨᠡᠷᠡᠢᠳᠦᠯ ᠮᠥᠨ ᠲᠤᠭᠤᠷᠭᠠ ᠶ᠋ᠢᠨ ᠬᠢ ᠲᠡᠢ ᠠᠳᠠᠯᠢ ᠃ ② ᠶᠠᠭᠤᠮᠠᠨ ᠤ᠋ ᠨᠢᠮᠭᠡᠨ ᠬᠠᠯᠴᠠᠭᠠᠢ ᠪᠣᠯᠤᠭᠰᠠᠨ ᠭᠠᠵᠠᠷ ᠢ᠋ ᠪᠤᠶᠤ ᠡᠰᠡᠬᠦᠯᠡ ᠰᠡᠢᠮᠡᠬᠡᠢ ᠴᠣᠭᠣᠷᠬᠠᠢ ᠭᠠᠷᠤᠭᠰᠠᠨ ᠭᠠᠵᠠᠷ ᠲᠤ᠌ ᠳᠠᠪᠬᠤᠷᠯᠠᠭᠰᠠᠨ ᠶᠠᠭᠤᠮᠠ᠃
ᠵᠡᠬᠡᠭ
ᠳᠡᠭᠡᠪᠦᠷ᠂ ᠲᠤᠭᠤᠷᠭᠠ ᠵᠡᠷᠭᠡ ᠶ᠋ᠢ ᠰᠣᠩᠬᠣ᠌ ᠠ᠋ᠴᠠ ᠬᠢᠴᠢᠶᠡᠵᠦ ᠴᠥᠮ ᠬᠥᠪᠡᠭᠡ ᠪᠡᠷ ᠨᠢ ᠬᠢᠯᠭᠠᠰᠤᠨ ᠳᠡᠭᠡᠰᠦ ᠪᠠᠷᠢᠵᠤ ᠪᠡᠬᠢᠯᠡᠨ ᠤᠶᠠᠳᠠᠭ᠃ ᠲᠡᠷᠡ ᠬᠦ᠌ ᠳᠡᠭᠡᠰᠦ ᠶ᠋ᠢ ᠵᠡᠭᠡᠭ ᠭᠡᠳᠡᠭ᠃ ᠭᠡᠬᠦ ᠳ᠋ᠡᠭᠡᠨ ᠲᠤᠭᠤᠷᠭᠠ ᠶ᠋ᠢᠨ ᠬᠣᠷᠮᠣᠢ ᠶ᠋ᠢ ᠵᠢᠭᠡᠭᠯᠡᠳᠡᠭ ᠦᠭᠡᠢ᠃
ᠪᠦᠰᠡᠯᠡᠭᠦᠷ
ᠶᠠᠭᠤᠮᠠ ᠶ᠋ᠢ ᠳᠤᠭᠤᠢᠯᠠᠨ ᠪᠡᠬᠢᠯᠡᠭᠰᠡᠨ ᠣᠭᠣᠰᠣᠷ᠃ ᠳᠣᠲᠣᠷ ᠪᠦᠰᠡ ( ᠪᠦᠰᠡᠯᠡᠭᠦᠷ ) ᠄ ᠪᠠᠰᠠ ᠵᠠᠷᠢᠮ ᠭᠠᠵᠠᠷ ᠶᠣᠳ᠋ ᠭᠡᠳᠡᠭ᠃ ᠨᠢᠴᠦᠭᠦᠨ ᠬᠠᠨᠠ ᠶ᠋ᠢ ᠬᠠᠴᠠᠪᠴᠢ ᠳ᠋ᠤ᠌ ᠬᠣᠯᠪᠣᠵᠤ ᠲᠠᠲᠠᠭᠰᠠᠨ ᠪᠦᠰᠡᠯᠡᠭᠦᠷ᠃ ᠳᠣᠲᠣᠷ ᠪᠦᠰᠡᠯᠡᠭᠦᠷ ᠪᠣᠯ ᠪᠦᠬᠦ ᠬᠠᠨᠠ ᠶ᠋ᠢᠨ ᠳᠡᠯᠭᠡᠬᠦ ᠬᠡᠮᠵᠢᠶᠡ ᠶ᠋ᠢ ᠬᠢᠵᠠᠭᠠᠷᠯᠠᠵᠤ ᠭᠡᠷ ᠦ᠋ᠨ ᠶᠡᠬᠡ ᠪᠠᠭᠠ᠂ ᠪᠣᠰᠤᠭᠠ ᠨᠠᠪᠲᠠᠭᠠᠷ ᠢ᠋ ᠲᠣᠭᠲᠠᠭᠠᠵᠤ ᠪᠠᠢᠭᠠ ᠴᠢᠬᠤᠯᠠ ᠭᠠᠭᠴᠠ ᠪᠦᠰᠡ᠃
ᠭᠠᠳᠠᠷ ᠪᠦᠰᠡ ( ᠪᠦᠰᠡᠯᠡᠭᠦᠷ )
ᠭᠠᠳᠠᠷ ᠪᠦᠰᠡᠯᠡᠭᠦᠷ ᠳᠡᠭᠡᠳᠦ᠂ ᠳᠤᠮᠳᠠ᠂ ᠳᠣᠣᠷᠠ ᠭᠡᠵᠦ ᠭᠤᠷᠪᠠ ᠪᠠᠢᠬᠤ ᠪᠥᠭᠡᠳ ᠣᠯᠠᠩᠬᠢ ᠨᠢ ᠬᠠᠷᠠ ᠬᠢᠯᠭᠠᠰᠤᠨ ᠬᠣᠰᠢᠯᠠᠩ ᠢ᠋ᠶ᠋ᠠᠷ ᠬᠢᠳᠡᠭ ᠲᠤᠭᠤᠷᠭᠠᠨ ᠤ᠋ ᠳᠠᠷᠤᠭᠤᠯᠭᠠ ᠪᠢᠯᠡ᠃
ᠬᠣᠰᠢᠯᠠᠩ
ᠡᠰᠡᠷᠭᠦ ᠲᠡᠰᠡᠷᠭᠦ ᠡᠷᠴᠢᠲᠡᠢ ᠳᠡᠭᠡᠰᠦ ᠶ᠋ᠢ ᠬᠣᠶᠠᠷ ᠪᠤᠶᠤ ᠳᠥᠷᠪᠡ ᠂ ᠵᠢᠷᠭᠤᠭᠠ ᠪᠠᠷ ᠵᠡᠷᠭᠡᠴᠡᠭᠦᠯᠦᠨ ᠲᠠᠤᠯᠠᠢ ᠶ᠋ᠢᠨ ᠲᠠᠩᠨᠠᠢ ᠭᠠᠷᠭᠠᠨ ᠣᠶᠣᠭᠰᠠᠨ ᠬᠠᠪᠲᠠᠭᠠᠢ ᠬᠢᠯᠭᠠᠰᠤᠨ ᠳᠡᠭᠡᠰᠦ᠃
ᠳᠠᠷᠤᠭᠤᠯᠭᠠ
ᠭᠡᠷ ᠦ᠋ᠨ ᠨᠢᠴᠦᠭᠦᠨ ᠣᠨᠢᠨ ᠪᠡᠶᠡ ᠶ᠋ᠢ ᠲᠡᠭᠰᠢᠯᠡᠨ ᠳᠠᠷᠤᠭᠤᠯᠬᠤ ᠣᠭᠣᠰᠣᠷ ᠃ ᠪᠠᠰᠠ ᠳᠤᠭᠲᠤᠷᠭᠠ ᠭᠡᠳᠡᠭ ᠃
ᠳᠠᠶ᠋ᠢᠯᠭᠠ
ᠭᠡᠷ ᠦ᠋ᠨ ᠠᠷᠤ ᠳᠡᠭᠡᠪᠦᠷ ᠦ᠋ᠨ ᠳᠡᠭᠡᠳᠦ ᠵᠠᠭᠠᠮᠠᠨ ᠠ᠋ᠴᠠ ᠬᠣᠶᠠᠷ ᠬᠣᠶᠠᠷ ᠣᠭᠣᠰᠣᠷ ᠬᠠᠲᠠᠵᠤ ᠡᠮᠦᠨᠡ ᠳᠡᠭᠡᠪᠦᠷ ᠦ᠋ᠨ ᠳᠡᠭᠡᠷᠡ ᠰᠣᠯᠪᠢᠴᠠᠭᠤᠯᠤᠨ ᠵᠢᠰᠢᠭᠦᠯᠵᠦ ᠲᠠᠲᠠᠬᠤ ᠤᠷᠲᠤ ᠣᠭᠣᠰᠣᠷ ᠪᠣᠯᠤᠨᠠ᠃ ᠲᠡᠷᠡᠴᠢᠯᠡᠨ ᠬᠡᠷᠡᠭᠴᠡᠭᠡ ᠶ᠋ᠢ ᠦᠨᠳᠦᠰᠦᠯᠡᠨ ᠲᠤᠭᠤᠷᠭᠠ᠂ ᠴᠠᠪᠤᠭ᠂ ᠡᠭᠦᠳᠡ᠂ ᠡᠷᠦᠬᠡ᠂ ᠬᠥᠯᠲᠥᠷᠭᠡ᠂ ᠬᠠᠶᠠᠭᠠᠪᠴᠢᠨ ᠤ᠋ ᠦᠵᠦᠭᠦᠷ ᠰᠡᠵᠢᠭᠦᠷ᠂ ᠵᠠᠬᠠ ᠵᠠᠢᠴᠢᠨ ᠳ᠋ᠤ᠌ ᠪᠦᠷ ᠤᠷᠲᠤ ᠪᠣᠭᠣᠨᠢ ᠪᠦᠳᠦᠭᠦᠨ ᠨᠠᠷᠢᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠲᠣᠬᠢᠷᠠᠭᠰᠠᠨ ᠣᠭᠣᠰᠣᠷ ᠪᠦᠴᠡ᠂ ᠭᠣᠭᠴᠣᠭᠠ ᠰᠡᠬᠦᠪᠴᠢ ᠨᠦ᠍ᠭᠦᠳ ᠪᠠᠢᠳᠠᠭ᠃
ᠬᠥᠰᠢᠭᠡ
ᠵᠠᠷᠢᠮ ᠭᠠᠵᠠᠷ ᠪᠠᠰᠠ ᠬᠦᠷᠭᠡ ᠭᠡᠳᠡᠭ᠃ ᠡᠪᠦᠯ ᠴᠠᠭ ᠬᠠᠨᠠ ᠶ᠋ᠢᠨ ᠳᠣᠲᠣᠭᠤᠷ ᠲᠠᠲᠠᠬᠤ ᠲᠤᠭᠤᠷᠭᠠ ᠶ᠋ᠢ ᠬᠥᠰᠢᠭᠡ ᠭᠡᠳᠡᠭ᠃ ᠡᠭᠦᠨ ᠢ᠋ᠶ᠋ᠡᠨ ᠤᠯᠠᠭᠠᠨ ᠪᠤᠶᠤ ᠬᠥᠬᠡ ᠪᠥᠰ ᠢ᠋ᠶ᠋ᠡᠷ ᠬᠥᠪᠡᠭᠡᠯᠡᠵᠦ ᠥᠨᠴᠥᠭ ᠪᠤᠯᠤᠩ ᠳ᠋ᠤᠨᠢ ᠤᠭᠠᠯᠵᠠ ᠲᠠᠭᠠᠷᠠᠭᠤᠯᠤᠭᠰᠠᠨ ᠴᠤ᠌ ᠪᠠᠢᠳᠠᠭ᠃ ᠡᠢᠮᠦ ᠡᠴᠡ ᠵᠠᠷᠢᠮ ᠨᠢ ᠴᠢᠮᠡᠭ ᠬᠥᠰᠢᠭᠡ ᠴᠦ᠍ ᠭᠡᠳᠡᠭ᠃ ᠮᠠᠩᠨᠤᠭ ᠲᠣᠷᠭᠠᠨ ᠬᠥᠰᠢᠭᠡ᠂ ᠱᠠ ᠶᠤᠯᠪᠤᠲᠠᠢ ᠴᠤ᠌ ᠪᠠᠢᠳᠠᠭ᠃ ᠬᠡᠳᠦᠢ ᠪᠡᠷ ᠬᠦᠢᠲᠡᠨ ᠬᠠᠯᠠᠭᠤᠨ ᠢ᠋ ᠬᠠᠯᠬᠠᠯᠠᠬᠤ ᠶᠠᠭᠤᠮᠠ ᠪᠣᠯᠪᠠᠴᠤ ᠡᠯᠳᠡᠪ ᠢ᠋ᠶ᠋ᠡᠷ ᠴᠢᠮᠡᠭᠰᠡᠨ ᠨᠢ ᠭᠤᠸᠠ ᠰᠠᠢᠬᠠᠨ ᠦᠵᠡᠮᠵᠢᠲᠡᠢ᠃
ᠵᠠᠪᠠᠭ
ᠳᠡᠭᠡᠪᠦᠷ᠂ ᠲᠤᠭᠤᠷᠭᠠ ᠶ᠋ᠢᠨ ᠵᠥᠷᠢᠭᠰᠡᠨ ᠭᠠᠵᠠᠷ᠃ ᠵᠠᠷᠢᠮ ᠭᠠᠵᠠᠷ᠂ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠪᠦᠷ ᠲᠤᠭᠤᠷᠭᠠ ᠶ᠋ᠢ ᠡᠯᠡᠭᠡᠬᠦ ᠡᠴᠡ ᠪᠣᠯᠭᠣᠮᠵᠢᠯᠠᠨ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠳᠠᠭᠠᠤ ᠨᠠᠷᠢᠨ ᠤᠷᠲᠤ ᠢᠰᠡᠭᠡᠢ ᠨᠥᠮᠥᠷᠭᠡᠨ ᠲᠠᠯᠪᠢᠳᠠᠭ᠃ ᠡᠭᠦᠨ ᠢ᠋ᠶ᠋ᠡᠨ ᠪᠠᠰᠠ ᠵᠠᠪᠠᠭ ᠭᠡᠳᠡᠭ᠃ ᠦᠨᠡᠨ ᠳ᠋ᠡᠭᠡᠨ ᠪᠣᠯ ᠳᠡᠭᠡᠪᠦᠷ᠂ ᠲᠤᠭᠤᠷᠭᠠ ᠬᠣᠶᠠᠷ ᠤ᠋ᠨ ᠵᠥᠷᠢᠯᠳᠦᠭᠰᠡᠨ ᠬᠥᠨᠳᠡᠯᠡᠨ ᠵᠠᠪᠰᠠᠷ ᠢ᠋ ᠵᠠᠪᠠᠭ ᠭᠡᠨᠡ᠃
ᠵᠠᠢᠴᠠ
ᠡᠭᠦᠳᠡᠨ ᠦ᠌ ᠬᠣᠶᠠᠷ ᠲᠠᠯᠠ ᠬᠢᠭᠡᠳ ᠳᠡᠭᠡᠪᠦᠷ ᠳᠡᠭᠡᠪᠦᠷ ᠂ ᠲᠤᠭᠤᠷᠭᠠ ᠲᠤᠭᠤᠷᠭᠠ ᠶ᠋ᠢᠨ ᠬᠣᠭᠣᠷᠣᠨᠳᠣ ᠲᠤᠰ ᠲᠤᠰ ᠵᠥᠷᠢᠯᠳᠦᠭᠰᠡᠨ ᠵᠠᠪᠰᠠᠷ ᠢ ᠵᠠᠢᠴᠠ ᠭᠡᠳᠡᠭ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠬᠥᠨᠳᠡᠯᠡᠨ ᠪᠢᠰᠢ ᠰᠢᠯᠤᠭᠤᠨ ᠵᠥᠷᠢᠯᠳᠦᠭᠰᠡᠨ ᠳᠡᠭᠡᠪᠦᠷ ᠲᠤᠭᠤᠷᠭᠠ ᠶ᠋ᠢᠨ ᠵᠠᠪᠰᠠᠷ ᠬᠢᠭᠡᠳ ᠡᠭᠦᠳᠡᠨ ᠦ᠌ ᠬᠣᠶᠠᠷ ᠲᠠᠯᠠ᠃
ᠲᠣᠲᠣᠭᠣ
ᠭᠡᠷ ᠦ᠋ᠨ ᠡᠭᠦᠳᠡᠨ ᠳᠡᠭᠡᠳᠦ ᠡᠲᠡᠭᠡᠳ ᠲᠦ᠍ ᠰᠠᠷᠠᠪᠴᠢᠯᠠᠵᠤ ᠬᠢᠭᠰᠡᠨ ᠢᠰᠡᠭᠡᠢ ᠶ᠋ᠢ ᠬᠡᠯᠡᠨᠡ ᠃ ᠪᠠᠰᠠ ᠠᠯᠢᠪᠠ ᠬᠠᠭᠠᠯᠭᠠᠨ ᠬᠦᠷᠢᠶᠡᠨ ᠦ᠌ ᠳᠡᠭᠡᠳᠦ ᠬᠥᠨᠳᠡᠯᠡᠨ ᠢ᠋ ᠲᠣᠲᠣᠭᠣ ᠭᠡᠳᠡᠭ᠃ ᠪᠠᠰᠠ ᠡᠨᠢᠬᠡ ᠭᠡᠵᠦ ᠴᠦ᠍ ᠬᠡᠯᠡᠳᠡᠭ᠃
ᠪᠣᠱᠣᠭᠠ
ᠶᠠᠮᠠᠷᠪᠠ ᠬᠠᠭᠠᠯᠭᠠᠨ ᠬᠦᠷᠢᠶᠡᠨ ᠦ᠌ ᠳᠣᠣᠷᠠᠲᠤ ᠬᠥᠨᠳᠡᠯᠡᠨ ᠢ᠋ ᠪᠣᠱᠣᠭᠠ ᠭᠡᠳᠡᠭ᠃ ᠪᠠᠰᠠ ᠬᠠᠲᠠᠪᠴᠢ᠂ ᠪᠣᠭᠣᠰᠤ ᠭᠡᠵᠦ ᠬᠡᠯᠡᠬᠦ ᠭᠠᠵᠠᠷ ᠤ᠋ᠳ ᠪᠣᠢ᠃ ᠪᠠᠰᠠ ᠠᠯᠬᠤᠨᠠ᠂ ᠠᠯᠬᠤᠴᠠ ᠭᠡᠳᠡᠭ᠃
ᠬᠠᠴᠠᠪᠴᠢ
ᠬᠠᠭᠠᠯᠭᠠᠨ ᠬᠦᠷᠢᠶᠡᠨ ᠦ᠌ ᠬᠣᠶᠠᠷ ᠬᠠᠵᠠᠭᠤ ᠶ᠋ᠢ ᠬᠠᠴᠠᠪᠴᠢ ᠭᠡᠳᠡᠭ᠃ ᠪᠠᠰᠠ ᠬᠠᠲᠠᠪᠴᠢ ᠬᠠᠪᠰᠤᠷᠭᠠ᠂ ᠬᠠᠭᠰᠠᠷᠠᠭᠠ ᠭᠡᠵᠦ ᠬᠡᠯᠡᠳᠡᠭ ᠭᠠᠵᠠᠷ ᠤ᠋ᠳ ᠴᠤ᠌ ᠪᠣᠢ᠃
ᠪᠦᠷᠢᠶᠡᠰᠦ
ᠶᠠᠭᠤᠮᠠ ᠶ᠋ᠢᠨ ᠭᠠᠳᠠᠭᠤᠷ ᠪᠦᠷᠬᠦᠬᠦ ᠵᠦᠢᠯ᠃ ᠳᠡᠭᠡᠪᠦᠷ᠂ ᠲᠤᠭᠤᠷᠭᠠ ᠪᠦᠷ ᠪᠠᠭᠲᠠᠨᠠ᠃ ᠵᠠᠷᠢᠮ ᠭᠠᠵᠠᠷ ᠪᠠᠰᠠ ᠡᠯᠪᠡᠰᠢ ᠭᠡᠳᠡᠭ᠃ ᠬᠠᠶᠠᠭᠠ ᠮᠠᠨᠠᠬᠤ ᠲᠤᠭᠤᠷᠭᠠ ᠶ᠋ᠢᠨ ᠬᠣᠷᠮᠣᠢ ᠶ᠋ᠢ ᠳᠠᠷᠤᠬᠤ ᠃ ᠵᠠᠷᠢᠮ ᠶᠠᠳᠠᠭᠤ ᠠᠢᠯ ᠬᠠᠶᠠᠭᠠᠪᠴᠢ ᠦᠭᠡᠢ ᠲᠤᠯᠠ ᠲᠤᠭᠤᠷᠭᠠ ᠶ᠋ᠢᠨ ᠬᠣᠷᠮᠣᠢ ᠪᠠᠨ ᠰᠢᠪᠠᠷ᠂ ᠰᠢᠷᠣᠢ ᠪᠠᠷ ᠳᠠᠷᠤᠳᠠᠭ᠃ ᠡᠭᠦᠨ ᠢ᠋ ᠬᠠᠶᠠᠭᠠ ᠮᠠᠨᠠᠬᠤ ᠭᠡᠳᠡᠭ᠃
ᠴᠢᠭᠲᠠᠭᠠ
ᠴᠢᠭᠲᠠᠭᠠ ᠪᠣᠯ ᠶᠡᠬᠡ ᠰᠠᠯᠬᠢᠨ ᠠ᠋ᠴᠠ ᠭᠡᠷ ᠢ᠋ ᠬᠠᠮᠠᠭᠠᠯᠠᠬᠤ ᠳ᠋ᠤ᠌ ᠬᠡᠷᠡᠭᠯᠡᠳᠡᠭ ᠠᠷᠭᠠᠮᠵᠢᠶᠠ ᠮᠥᠨ᠃ ᠲᠣᠭᠣᠨᠣ ᠶ᠋ᠢᠨ ᠭᠣᠣᠯ ᠠ᠋ᠴᠠ ᠬᠣᠰᠢᠯᠠᠩ ᠪᠤᠶᠤ ᠡᠷᠡ ᠬᠠᠷᠠ ᠰᠤᠷ ᠢ᠋ᠶ᠋ᠠᠷ ᠣᠭᠣᠰᠣᠷᠯᠠᠭᠠᠳ ᠳᠣᠷᠣᠭᠰᠢ ᠲᠡᠳᠡᠨ᠂ ᠰᠠᠯᠬᠢᠨ ᠤ᠋ ᠴᠢᠭ ᠲᠦ᠍ ᠲᠠᠭᠠᠷᠠᠭᠤᠯᠵᠤ᠂ ᠭᠡᠷ ᠦ᠋ᠨ ᠳᠣᠲᠣᠷ ᠭᠠᠳᠠᠰᠤᠯᠠᠬᠤ ᠶᠤᠮ ᠤᠤ᠂ ᠡᠰᠡᠬᠦᠯᠡ ᠴᠢᠭᠲᠠᠭᠠ ᠪᠠᠨ ᠭᠠᠳᠠᠭᠰᠢ ᠭᠠᠷᠭᠠᠨ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠭᠠᠳᠠᠰᠤᠯᠠᠨᠠ᠃
ᠬᠠᠭᠠᠯᠭᠠ
ᠨᠢᠭᠡᠨ ᠲᠡᠢᠰᠢ ᠨᠡᠭᠡᠭᠡᠭᠳᠡᠬᠦ ᠬᠠᠪᠲᠠᠰᠤᠨ ᠬᠠᠭᠠᠴᠠ ᠶ᠋ᠢ ᠬᠠᠭᠠᠯᠭᠠ ᠭᠡᠳᠡᠭ᠃ ᠠᠯᠢᠪᠠ ᠬᠠᠭᠠᠯᠭᠠ ᠪᠦᠷ ᠮᠣᠳᠣ ᠪᠠᠷ ᠪᠦᠲᠦᠳᠡᠭ᠃ ᠪᠠᠰᠠ ᠰᠠᠮᠪᠠᠷᠠ ᠬᠠᠭᠠᠯᠭᠠ ᠴᠤ᠌ ᠭᠡᠳᠡᠭ᠂ ᠵᠠᠰᠢᠩ ᠬᠠᠭᠠᠯᠭᠠ ᠴᠤ᠌ ᠭᠡᠳᠡᠭ᠃
ᠬᠠᠲᠠᠪᠴᠢᠨ ᠬᠠᠭᠠᠯᠭᠠ
ᠬᠣᠶᠠᠷ ᠲᠡᠢᠰᠢ ᠨᠡᠭᠡᠭᠡᠭᠳᠡᠬᠦ ᠬᠣᠶᠠᠷ ᠬᠠᠴᠠᠷ ᠬᠠᠪᠲᠠᠰᠤᠨ ᠬᠠᠭᠠᠴᠠ ᠶ᠋ᠢ ᠬᠠᠲᠠᠪᠴᠢᠨ ᠬᠠᠭᠠᠯᠭᠠ ᠭᠡᠨᠡ᠃ ᠪᠠᠰᠠ ᠪᠠᠩᠵᠠᠨ ᠬᠠᠭᠠᠯᠭᠠ ᠭᠡᠳᠡᠭ᠃
ᠡᠭᠦᠳᠡ
ᠬᠠᠭᠠᠯᠭᠠᠨ ᠬᠦᠷᠢᠶᠡᠨ ᠦ᠌ ᠭᠠᠳᠠᠷ ᠳᠡᠭᠡᠳᠦ ᠲᠠᠯᠠ ᠠ᠋ᠴᠠ ᠡᠯᠭᠦᠭᠰᠡᠨ᠂ ᠡᠯᠭᠦᠮᠡᠯ ᠢᠰᠡᠭᠡᠢ ( ᠪᠥᠰ᠂ ᠬᠤᠯᠤᠰᠤ ᠵᠡᠭᠡᠰᠦ ) ᠪᠦᠷᠬᠦᠭᠦᠯ ᠢ᠋ ᠡᠭᠦᠳᠡ ᠭᠡᠳᠡᠭ ᠃ ᠡᠭᠦᠳᠡ ᠶ᠋ᠢ ᠭᠣᠣᠯᠳᠠᠭᠤ ᠬᠥᠬᠡ ᠪᠥᠰ ᠭᠠᠳᠠᠷ ᠲᠠᠢ ᠪᠤᠶᠤ ᠰᠢᠷᠢᠮᠡᠯ ᠢᠰᠡᠭᠡᠢ ᠪᠡᠷ ᠬᠢᠳᠡᠭ᠃
ᠡᠭᠦᠳᠡ ᠡᠷᠭᠦᠬᠦ
ᠬᠦᠨᠳᠦᠲᠦ ᠵᠣᠴᠢᠨ ᠤ᠋ ᠣᠷᠣᠵᠤ ᠭᠠᠷᠬᠤ ᠳ᠋ᠤ᠌ ᠳᠥᠭᠥᠮ ᠦᠵᠡᠭᠦᠯᠬᠦ ᠶ᠋ᠢᠨ ᠲᠥᠯᠥᠭᠡ ᠡᠭᠦᠳᠡ ᠪᠡᠨ ᠭᠤᠷᠪᠠ ᠨᠤᠭᠤᠯᠤᠨ ᠡᠪᠬᠡᠭᠡᠳ ᠲᠣᠲᠣᠭᠣᠨ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠴᠢᠬᠠᠳᠠᠭ᠃ ᠡᠭᠦᠨ ᠢ᠋ ᠡᠭᠦᠳᠡ ᠡᠷᠭᠦᠬᠦ ᠭᠡᠨᠡ᠃
ᠡᠭᠦᠳᠡ ᠣᠷᠣᠬᠤ ᠶᠣᠰᠣᠨ
ᠭᠡᠷᠲᠡᠨ ᠭᠡᠢᠴᠢᠨ ᠦ᠌ ᠠᠯᠢᠨ ᠴᠤ᠌ ᠪᠣᠯᠪᠠ ᠡᠭᠦᠳᠡᠨ ᠦ᠌ ᠵᠡᠭᠦᠨ ᠲᠠᠯᠠ ᠶ᠋ᠢ ᠰᠡᠬᠦᠨ ᠣᠷᠣᠵᠤ ᠭᠠᠷᠤᠨᠠ᠃ ᠨᠥᠭᠦᠭᠡ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢ ᠪᠤᠷᠤᠭᠤ ᠡᠭᠦᠳᠡ ( ᠠᠮᠢᠳᠤ ᠬᠥᠮᠦᠨ ᠶᠠᠪᠤᠬᠤ ᠡᠭᠦᠳᠡ ᠪᠢᠰᠢ ) ᠭᠡᠳᠡᠭ ᠪᠥᠭᠡᠳ ᠲᠡᠭᠦᠨ ᠢ᠋ᠶ᠋ᠡᠷ ᠶᠠᠪᠤᠬᠤ ᠶ᠋ᠢ ᠣᠨᠴᠠ ᠴᠡᠭᠡᠷᠯᠡᠨᠡ᠃
ᠪᠠᠭᠠᠨᠠ
ᠭᠡᠷ ᠢ᠋ ᠪᠠᠷᠢᠬᠤ᠂ ᠵᠰᠠᠬᠤ᠂ ᠪᠠᠭᠤᠯᠭᠠᠬᠤ ᠵᠡᠷᠭᠡ ᠳ᠋ᠦ᠍ ᠲᠦᠷ ᠲᠤᠯᠬᠤ ᠮᠣᠳᠣ ᠶ᠋ᠢ ᠪᠠᠭᠠᠨᠠ ᠭᠡᠳᠡᠭ᠃
ᠲᠤᠯᠭᠠᠭᠤᠷᠢ
ᠣᠯᠠᠨ ᠬᠠᠨᠠᠲᠤ ᠭᠡᠷ ᠦ᠋ᠨ ᠣᠨᠢ ᠶ᠋ᠢ ᠬᠣᠲᠣᠢᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠨ ᠣᠨᠢ ᠶ᠋ᠢᠨ ᠴᠡᠭᠡᠵᠢ ᠣᠷᠴᠢᠮ ᠦᠷᠭᠦᠯᠵᠢ ᠲᠤᠯᠬᠤ ᠴᠢᠨᠠᠷᠲᠠᠢ ᠮᠣᠳᠣ ᠶ᠋ᠢ ᠲᠤᠯᠭᠠᠭᠤᠷᠢ ᠭᠡᠨᠡ᠃
ᠬᠠᠨᠠ ᠶ᠋ᠢᠨ ᠬᠦᠯᠢᠭ
ᠬᠣᠶᠠᠷ ᠬᠠᠨᠠ ᠶ᠋ᠢ ᠬᠣᠯᠪᠣᠨ ᠤᠶᠠᠬᠤ ᠨᠠᠷᠢᠨ ᠰᠢᠳᠡᠮᠡᠰᠦ ( ᠬᠡᠷᠦᠭᠡᠳᠡᠰᠦ ) ᠃
ᠥᠷᠭᠥᠭᠡ
ᠬᠡᠳᠦᠢ ᠪᠡᠷ ᠮᠣᠩᠭᠣᠯ ᠭᠡᠷ ᠦ᠋ᠨ ᠬᠦᠨᠳᠦᠳᠬᠡᠯ ᠭᠡᠳᠡᠭ ᠪᠣᠯᠪᠠᠴᠤ ᠡᠷᠲᠡᠨ ᠳ᠋ᠡᠭᠡᠨ ᠬᠡᠪᠴᠢᠶᠡ ᠨᠢ ᠶᠡᠬᠡ ᠭᠡᠷ ᠢ᠋ ᠬᠡᠯᠡᠵᠦ ᠪᠠᠢᠵᠠᠢ᠃ ᠰᠣᠨᠣᠰᠬᠠᠯ ᠢ᠋ᠶ᠋ᠠᠷ ᠴᠢᠩᠭᠢᠰ ᠦ᠋ᠨ ᠠᠯᠲᠠᠨ ᠥᠷᠭᠥᠭᠡ ᠪᠣᠯ 18 ᠬᠠᠨᠠ ᠲᠠᠢ᠂ ᠡᠭᠦᠯᠡᠨ ᠬᠥᠬᠡ ᠬᠥᠯᠲᠥᠷᠭᠡ ᠲᠡᠢ᠂ ᠲᠣᠭᠣᠨᠣᠨ ᠳᠡᠭᠡᠷᠡ ᠪᠡᠨ ᠠᠯᠲᠠᠨ ᠭᠠᠨᠵᠢᠷᠠ ᠰᠢᠭ᠋ ᠳ᠋ᠤᠭ ᠲᠠᠢ ᠲᠤᠯᠠ ᠠᠯᠲᠠᠨ ᠥᠷᠭᠥᠭᠡ ᠭᠡᠰᠡᠨ ᠭᠡᠨᠡ᠃ ᠳᠣᠲᠣᠷᠠ ᠨᠢ ᠮᠠᠩᠨᠤᠭ ᠲᠣᠷᠭᠠ ᠪᠠᠷ ᠬᠥᠰᠢᠭᠡᠯᠡᠵᠦ ᠪᠠᠰᠠ ᠲᠣᠭᠣᠨᠣᠨ ᠤ᠋ ᠨᠠᠷᠠ ᠶ᠋ᠢ ᠬᠠᠯᠬᠠᠯᠠᠬᠤ ᠪᠠᠷ ᠯᠠᠪᠷᠢ ᠶᠤᠯᠪᠣ ᠲᠠᠲᠠᠭᠰᠠᠨ ᠭᠡᠳᠡᠭ᠃ ᠳᠥᠷᠪᠡᠨ ᠠᠯᠲᠠᠨ ᠲᠤᠯᠭᠠᠭᠤᠷᠢ ᠲᠠᠢ ᠃ ᠡᠢᠮᠦ ᠭᠡᠷ ᠢ᠋ ᠥᠷᠭᠥᠭᠡ ᠭᠡᠳᠡᠭ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠬᠠᠮᠤᠭ ᠤ᠋ᠨ ᠲᠣᠮᠣ᠂ ᠭᠣᠶᠣ ᠭᠡᠷ ᠢ᠋ ᠥᠷᠭᠥᠭᠡ ᠭᠡᠳᠡᠭ ᠠᠵᠢ᠃ ᠰᠡᠭᠦᠯ ᠦ᠋ᠨ ᠦᠶᠡ ᠨᠣᠶᠠᠨ ᠤ᠋ ᠣᠷᠳᠣᠨ ( ᠶᠠᠮᠤᠨ ) ᠂ ᠬᠤᠷᠠᠯ ᠤ᠋ᠨ ᠭᠡᠷ ᠵᠡᠷᠭᠡ ᠳ᠋ᠦ᠍ ᠮᠥᠨ ᠥᠷᠭᠥᠭᠡ ᠰᠢᠭ ᠪᠦᠳᠦᠭᠦᠨ ᠭᠡᠷ ᠪᠠᠷᠢᠵᠤ ᠪᠠᠢᠭᠰᠠᠨ ᠠᠵᠢ᠃ ᠡᠭᠦᠨ ᠢ᠋ ᠪᠠᠰᠠ 《ᠳᠠᠯᠠᠢ ᠴᠠᠭᠠᠨ 》ᠭᠡᠳᠡᠭ᠃
ᠣᠷᠳᠣᠨ ᠶᠠᠮᠤᠨ
ᠸᠠᠩ ᠤ᠋ᠨ ᠣᠷᠳᠣᠨ᠃ ᠬᠥᠯᠲᠥᠷᠭᠡ ᠨᠢ ᠤᠯᠠᠭᠠᠨ ᠬᠠᠯᠵᠠᠨ ᠠ᠋ᠴᠠ ᠪᠢᠰᠢ ᠪᠤᠰᠤᠳ ᠨᠢ ᠪᠦᠷ ᠴᠢᠩᠭᠢᠰ ᠦ᠋ᠨ ᠠᠯᠲᠠᠨ ᠥᠷᠭᠥᠭᠡ ᠶ᠋ᠢ ᠳᠠᠭᠤᠷᠢᠶᠠᠵᠠᠢ᠃ ᠬᠤᠷᠠᠯ ᠤ᠋ᠨ ᠭᠡᠷ ᠴᠦ᠍ ᠮᠥᠨ ᠡᠢᠮᠦ᠃
ᠪᠠᠢᠪᠠᠩᠭᠠ
ᠠᠯᠠᠱᠠ ᠪᠠᠢᠪᠠᠩᠭᠠ ᠴᠤ᠌ ᠴᠢᠩᠭᠢᠰ ᠦ᠋ᠨ ᠠᠯᠲᠠᠨ ᠥᠷᠭᠥᠭᠡ ᠶ᠋ᠢ ᠳᠠᠭᠤᠷᠢᠶᠠᠵᠠᠢ᠃ ᠭᠠᠭᠴᠠ ᠬᠦ᠌ ᠬᠠᠨᠠ ᠨᠢ ᠲᠣᠭᠣᠷᠢᠭ ᠪᠢᠰᠢ᠂ ᠳᠥᠷᠪᠡᠯᠵᠢᠨ ᠬᠡᠯᠪᠡᠷᠢᠲᠡᠢ᠃ ᠡᠢᠨ ᠬᠦ᠌ ᠣᠨᠢ ᠨᠢ ᠴᠦ᠍ ᠤᠷᠲᠤ ᠠᠬᠤᠷ ᠲᠠᠢ᠃ ᠬᠠᠷᠢᠨ ᠣᠷᠣᠢ ᠨᠢ ᠮᠣᠩᠭᠣᠯ ᠭᠡᠷ ᠦ᠋ᠨ ᠣᠷᠣᠢ ᠲᠠᠢ ᠠᠳᠠᠯᠢ ᠪᠣᠯᠤᠭᠠᠳ ᠠᠯᠲᠠᠨ ᠭᠠᠨᠵᠢᠷᠠ ᠲᠠᠢ ᠶᠤᠮ ᠃ ᠳᠡᠭᠡᠪᠦᠷ ᠲᠤᠭᠤᠷᠭᠠ ᠳ᠋ᠤ᠌ ᠥᠩᠭᠡ ᠲᠠᠭᠠᠷᠠᠭᠤᠯᠵᠤ ᠬᠡ ᠤᠭᠠᠯᠵᠠ ᠭᠠᠷᠭᠠᠨ ᠴᠢᠮᠡᠭᠰᠡᠨ ᠪᠥᠭᠡᠳ ᠠᠯᠲᠠᠨ ᠴᠢᠭᠲᠠᠭᠠ ᠪᠠᠨ ᠬᠦᠨᠳᠦᠳᠬᠡᠨ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠭᠬᠢᠪ ᠤᠶᠠᠭᠠᠳ ᠶᠡᠬᠡᠮᠰᠦᠭ ᠪᠣᠯᠭᠠᠭᠰᠠᠨ ᠢ᠋ ᠶᠠᠭᠤᠨ ᠥᠭᠦᠯᠡᠬᠦ᠃
ᠬᠡᠯᠬᠢᠶᠡᠰᠦᠲᠦ ᠭᠡᠷ
ᠭᠤᠷᠪᠠᠨ ᠬᠡᠯᠭᠢᠶᠡᠰᠦᠲᠦ ᠭᠡᠷ᠃ ᠡᠨᠡ ᠨᠢ 6 ᠪᠤᠶᠤ ᠶ᠋ᠢᠨ 8 ᠬᠠᠨᠠᠲᠤ ᠭᠡᠷ ᠢ᠋ ᠭᠣᠣᠯᠳᠠᠭᠤᠯᠵᠤ᠂ ᠵᠡᠭᠦᠨ᠂ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤᠨᠢ ᠪᠠᠰᠠ ᠨᠢᠭᠡ ᠨᠢᠭᠡ ᠭᠡᠷ᠂ ᠡᠭᠦᠳᠡ ᠶ᠋ᠢ ᠨᠢ ᠭᠣᠣᠯ ᠭᠡᠷ ᠲᠦ᠍ ᠵᠠᠯᠭᠠᠨ ᠪᠠᠷᠢᠳᠠᠭ᠃ ᠪᠤᠰᠤᠳ ᠪᠠᠷᠢᠴᠠ᠂ ᠪᠦᠷᠢᠶᠡᠰᠦ ᠵᠡᠷᠭᠡ ᠨᠢ ᠪᠦᠷ ᠠᠳᠠᠯᠢ ᠡᠩ ᠦ᠋ᠨ ᠮᠣᠩᠭᠣᠯ ᠭᠡᠷ ᠲᠡᠢ ᠨᠢᠭᠡ ᠯᠡ ᠶᠠᠩᠵᠤ᠃ ᠪᠠᠰᠠ ᠤᠭ᠍ᠶᠤᠲᠤ ᠥᠷᠭᠥᠭᠡ ᠭᠡᠳᠡᠭ᠃
ᠭᠡᠷ ᠲᠡᠷᠭᠡ
ᠡᠷᠳᠡᠨᠡ ᠠᠭᠰᠠᠨ ᠲᠡᠷᠭᠡᠨ ᠳᠡᠭᠡᠷᠡ ᠵᠣᠬᠢᠶᠠᠭᠰᠠᠨ ᠮᠣᠩᠭᠣᠯ ᠭᠡᠷ᠃ ᠡᠨᠡ ᠨᠢ ᠲᠡᠢᠨ ᠳᠠᠵᠢᠨ ᠤ᠋ ᠦᠶᠡ ᠪᠤᠶᠤ ᠬᠦᠢᠲᠡᠨ ᠬᠡᠴᠡᠭᠦᠦ ᠴᠠᠭ ᠲᠤ᠌ ᠶᠡᠬᠡ ᠳᠥᠭᠥᠮ ᠰᠠᠢᠨ ᠪᠠᠢᠵᠠᠢ᠃ ᠣᠳᠣ ᠡᠭᠦᠨ ᠦ᠌ ᠦᠯᠡᠳᠡᠭᠡᠯ ᠨᠢ 《ᠭᠡᠷ ᠲᠡᠷᠭᠡ ᠪᠡᠨ ᠴᠡᠪᠡᠷᠯᠡᠭᠰᠡᠨ ᠤᠤ ? ᠬᠡᠦᠬᠡᠨ ᠠ᠋ ! 》 ᠭᠡᠳᠡᠭ ᠭᠠᠭᠴᠠ ᠦᠭᠡ ᠯᠡ ᠤᠯᠠᠮᠵᠢᠯᠠᠭᠳᠠᠵᠤ ᠪᠠᠢᠨᠠ᠃
ᠢᠰᠡᠭᠡᠢ ᠭᠡᠷ
ᠮᠣᠩᠭᠣᠯ ᠭᠡᠷ ᠦ᠋ᠨ ᠨᠥᠭᠦᠭᠡ ᠨᠢᠭᠡ ᠬᠡᠯᠡᠯᠭᠡ᠃ ᠪᠠᠰᠠ ᠪᠦᠲᠦᠨ ᠭᠡᠷ ᠴᠦ᠍ ᠭᠡᠳᠡᠭ᠃ ᠠᠯᠠᠱᠠ ᠪᠤᠶᠤ ᠡᠵᠡᠨᠡ ᠲᠣᠷᠭᠤᠳ ᠲᠤ᠌ ᠶᠡᠬᠡ ᠬᠡᠯᠡᠨᠡ ᠃
ᠴᠡᠭᠡᠵᠢᠨ ᠭᠡᠷ
ᠥᠨᠳᠥᠷ ᠰᠢᠭ ᠣᠨᠢ ᠲᠠᠢ᠂ ᠲᠣᠮᠣ ᠲᠣᠭᠣᠨᠣ ᠲᠠᠢ᠂ ᠣᠨᠢ ᠶ᠋ᠢᠨ ᠵᠠᠢ ᠶ᠋ᠢ ᠳᠡᠭᠡᠰᠦ ᠪᠡᠷ ᠭᠡᠷᠦᠨ ᠲᠣᠭᠲᠠᠭᠠᠭᠠᠳ ᠢᠷᠭᠡᠪᠴᠢ ( ᠤᠯᠠ ) ᠶ᠋ᠢ ᠨᠢ ᠳᠠᠷᠤᠵᠤ᠂ ᠨᠢᠭᠡ ᠪᠤᠶᠤ ᠬᠣᠶᠠᠷ ᠳᠡᠭᠡᠪᠦᠷ ᠢ᠋ᠶ᠋ᠡᠷ ᠪᠦᠷᠬᠦᠨ ᠭᠠᠳᠠᠭᠤᠷ ᠨᠢ ᠪᠦᠰᠡ ᠪᠡᠷ ᠳᠠᠷᠤᠭᠤᠯᠵᠤ᠂ ᠡᠷᠦᠬᠡ ᠡᠷᠦᠬᠡᠯᠡᠵᠦ᠂ ᠤᠷᠲᠤ ᠰᠢᠭ᠋ ᠢᠰᠡᠭᠡᠢ ᠡᠭᠦᠳᠡ ᠡᠯᠭᠦᠳᠡᠭ᠃ ᠬᠠᠨᠠ ᠦᠭᠡᠢ ᠡᠢᠮᠦ ᠳᠥᠭᠥᠮ ᠭᠡᠷ᠂ ᠨᠡᠭᠦᠳᠡᠯ ᠠᠶᠠᠯᠠᠯ ᠳ᠋ᠤ᠌ ᠲᠣᠬᠢᠷᠠᠮᠵᠢᠲᠠᠢ᠃ ᠨᠢᠭᠡ ᠯᠡ ᠲᠡᠮᠡᠭᠡ ᠪᠡᠷ ᠨᠡᠭᠦᠯᠭᠡᠴᠢᠳᠡᠭ᠃ ᠡᠭᠦᠨ ᠢ᠋ ᠪᠠᠰᠠ ᠬᠥᠩᠭᠡᠨ ᠭᠡᠷ ᠭᠡᠳᠡᠭ᠃