ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠬᠣᠶᠠᠷ ᠂ ᠲᠥᠷᠥᠯ ᠰᠠᠳᠤᠨ ᠤ ᠳᠠᠭᠤᠳᠠᠯᠭᠠ ᠶᠢᠨ ᠪᠦᠯᠦᠭ 12 > Хөх зул – Боржигон Ванжал –" Хоёр ᠂ Төрөл садны дуудлагын бүлэг " 12
507ᠬᠣᠶᠠᠷ ᠂ ᠲᠥᠷᠥᠯ ᠰᠠᠳᠤᠨ ᠤ ᠳᠠᠭᠤᠳᠠᠯᠭᠠ ᠶᠢᠨ ᠪᠦᠯᠦᠭ – 12
ᠦᠶᠡ ᠢᠯᠭᠠᠬᠤ ᠪᠠ ᠨᠠᠰᠤ ᠢᠯᠭᠠᠬᠤ ᠶᠣᠰᠣᠨ Үе ялгах ба нас ялгах ёсон
ᠨᠠᠰᠤ ᠪᠠᠷ ᠢᠯᠭᠠᠵᠤ ᠳᠠᠭᠤᠳᠠᠬᠤ ᠶᠣᠰᠣᠨ
ᠶᠠᠰᠤᠨ ᠲᠥᠷᠥᠯ᠂ ᠴᠢᠰᠤᠨ ᠲᠥᠷᠥᠯ ( ᠨᠠᠭᠠᠴᠤ ) ᠂ ᠪᠦᠯᠦ ᠰᠠᠳᠤᠨ᠂ ᠨᠠᠭᠠ ( ᠲᠠᠭᠠᠷ ) ᠰᠠᠳᠤᠨ ( ᠬᠥᠨᠳᠡᠯᠡᠨ ᠬᠡᠯᠬᠢᠶᠡ ᠶ᠋ᠢ ᠪᠠᠭᠲᠠᠭᠠᠭᠰᠠ ) ᠶ᠋ᠢᠨ ᠠᠬᠠ ᠳᠡᠭᠦᠦ᠂ ᠡᠡᠴᠢ ᠥᠬᠢᠨ ᠳᠡᠭᠦᠦ ᠶ᠋ᠢᠨ ᠶᠡᠬᠡ ᠪᠠᠭᠠ ᠶ᠋ᠢ ᠪᠦᠷ ᠨᠠᠰᠤ ᠪᠠᠷ ᠢᠯᠭᠠᠨᠠ᠃ ᠨᠠᠰᠤ ᠶᠡᠬᠡ ᠨᠢ ᠠᠬᠠ ᠡᠭᠡᠴᠢ ᠪᠣᠯᠵᠤ᠂ ᠨᠠᠰᠤ ᠪᠠᠭᠠ ᠨᠢ ᠳᠡᠭᠦᠦ ᠥᠬᠢᠨ ᠳᠡᠭᠦᠦ ᠪᠣᠯᠤᠨᠠ᠃ ᠵᠢᠱ᠌ᠢᠶᠡᠯᠡᠪᠡᠯ ᠲᠥᠷᠥᠭᠰᠡᠨ ( ᠪᠤᠶᠤ ᠦᠶᠡᠯᠢᠳ ) ᠠᠬᠠ᠂ ᠲᠥᠷᠥᠭᠰᠡᠨ ( ᠪᠤᠶᠤ ᠦᠶᠡᠯᠢᠳ ) ᠡᠭᠡᠴᠢ᠂ ᠨᠠᠭᠠ ᠡᠭᠡᠴᠢ᠂ ᠪᠦᠯᠦ ᠠᠬᠠ᠂ ᠪᠦᠯᠦ ᠡᠭᠡᠴᠢ ᠭᠡᠬᠦ ᠪᠤᠶᠤ ᠲᠥᠷᠥᠭᠰᠡᠨ ( ᠪᠤᠶᠤ ᠦᠶᠡᠯᠢᠳ ) ᠳᠡᠭᠦᠦ᠂ ᠲᠥᠷᠥᠭᠰᠡᠨ ( ᠪᠤᠶᠤ ᠦᠶᠡᠯᠢᠳ ) ᠥᠬᠢᠨ ᠳᠡᠭᠦᠦ᠂ ᠨᠠᠭᠠ ᠳᠡᠭᠦᠦ᠂ ᠥᠬᠢᠨ ᠳᠡᠭᠦᠦ᠂ ᠪᠦᠯᠦ ᠳᠡᠭᠦᠦ᠂ ᠥᠬᠢᠨ ᠳᠡᠭᠦᠦ ᠭᠡᠬᠦ ᠮᠡᠲᠦ᠃
ᠠᠬᠠ ᠳᠡᠭᠦᠦ ᠪᠤᠶᠤ ᠡᠭᠡᠴᠢ ᠥᠬᠢᠨ ᠳᠡᠭᠦᠦ ᠶ᠋ᠢ ᠳᠠᠭᠠᠭᠤᠯᠵᠤ ᠳᠠᠭᠤᠳᠠᠬᠤ ᠶᠣᠰᠣᠨ
ᠠᠬᠠ ᠳᠡᠭᠦᠦ᠂ ᠡᠭᠡᠴᠢ ᠥᠬᠢᠨ ᠳᠡᠭᠦᠦ ( ᠨᠠᠭᠠ ᠪᠠ ᠪᠦᠯᠦ ᠠᠬᠠ ᠳᠡᠭᠦᠦ ᠡᠭᠡᠴᠢ ᠥᠬᠢᠨ ᠳᠡᠭᠦᠦ ᠮᠥᠨ ᠠᠳᠠᠯᠢ ) ᠶ᠋ᠢᠨ ᠡᠮᠡ ᠪᠤᠶᠤ ᠡᠷᠡ ᠨᠥᠬᠥᠷ ᠢ᠋ ᠨᠠᠰᠤ ᠢᠯᠭᠠᠬᠤ ᠦᠭᠡᠢ ᠠᠬᠠ ᠳᠡᠭᠦᠦ ᠡᠭᠡᠴᠢ ᠥᠬᠢᠨ ᠳᠡᠭᠦᠦ ᠪᠡᠨ ᠳᠠᠭᠠᠭᠤᠯᠤᠨ ᠳᠠᠭᠤᠳᠠᠨᠠ᠃ ᠵᠢᠱ᠌ᠢᠶᠡᠯᠡᠪᠡᠯ᠂ ᠠᠬᠠ ᠶ᠋ᠢᠨ ᠡᠮᠡ : ᠪᠡᠷᠭᠡᠨ ᠦ᠌ ᠨᠠᠰᠤ ᠨᠢ ᠪᠡᠶᠡ ᠡᠴᠡ ᠳᠡᠭᠦᠦ ᠪᠠᠢᠭᠰᠠᠨ ᠴᠤ᠌ ᠡᠭᠡᠴᠢ ᠪᠡᠷ ᠦᠵᠡᠨ ᠳᠠᠭᠤᠳᠠᠨᠠ᠃ ᠳᠡᠭᠦᠦ ᠶ᠋ᠢᠨ ᠡᠮᠡ ᠄ ᠳᠡᠭᠦᠦ ᠪᠡᠷᠢ ᠶ᠋ᠢᠨ ᠨᠠᠰᠤ ᠨᠢ ᠪᠡᠶᠡ ᠡᠴᠡ ᠡᠭᠡᠴᠢ ᠪᠠᠢᠭᠰᠠᠨ ᠴᠤ᠌ ᠳᠡᠭᠦᠦ ᠪᠡᠷ ᠦᠵᠡᠨᠡ᠃ ᠡᠭᠡᠴᠢ ᠶ᠋ᠢᠨ ᠡᠷᠡ : ᠬᠦᠷᠭᠡᠨ ᠠᠬᠠ ᠶ᠋ᠢᠨ ᠨᠠᠰᠤ ᠨᠢ ᠪᠡᠶᠡ ᠡᠴᠡ ᠳᠡᠭᠦᠦ ᠪᠠᠢᠭᠰᠠᠨ ᠴᠤ᠌ ᠠᠬᠠ ᠪᠠᠷ ᠦᠵᠡᠨᠡ᠃ ᠥᠬᠢᠨ ᠳᠡᠭᠦᠦ ᠶ᠋ᠢᠨ ᠡᠷᠡ ᠄ ᠳᠡᠭᠦᠦ ᠬᠦᠷᠭᠡᠨ ᠦ᠌ ᠨᠠᠰᠤ ᠨᠢ ᠪᠡᠶᠡ ᠡᠴᠡ ᠠᠬᠠ ᠪᠠᠢᠭᠰᠠᠨ ᠴᠤ᠌ ᠳᠡᠭᠦᠦ ᠪᠡᠷ ᠦᠵᠡᠨᠡ᠃
ᠡᠢᠨ ᠬᠦ᠌ ᠴᠢᠨᠠᠭᠰᠢᠯᠠᠪᠠᠯ ᠄ ① ᠪᠡᠷᠭᠡᠨ ᠪᠠ ᠬᠦᠷᠭᠡᠨ ᠠᠬᠠ ᠶ᠋ᠢᠨ ᠠᠬᠠ ᠪᠠ ᠡᠭᠡᠴᠢ ᠶ᠋ᠢᠨ ᠨᠠᠰᠤ ᠨᠢ ᠪᠡᠶᠡ ᠡᠴᠡ ᠳᠡᠭᠦᠦ ᠪᠠᠢᠭᠰᠠᠨ ᠴᠤ᠌ ᠬᠣᠲᠠ ᠠᠬᠠ᠂ ᠬᠤᠳᠠᠭᠠᠢ ᠡᠭᠡᠴᠢ ᠭᠡᠵᠦ ᠳᠠᠭᠤᠳᠠᠨᠠ᠃ ᠤᠴᠢᠷ ᠨᠢ ᠠᠬᠠ ( ᠡᠭᠡᠴᠢ ) ᠲᠡᠳᠡ ᠨᠠᠷ ᠢ᠋ ᠬᠠᠳᠠᠮ ᠠᠬᠠ᠂ ᠬᠠᠳᠠᠮ ᠡᠭᠡᠴᠢ ᠭᠡᠵᠦ ᠳᠠᠭᠤᠳᠠᠬᠤ ᠶᠤᠮ᠃
② ᠪᠡᠷᠭᠡᠨ ᠪᠠ ᠬᠦᠷᠭᠡᠨ ᠠᠬᠠ ᠶ᠋ᠢᠨ ᠳᠡᠭᠦᠦ ᠪᠠ ᠥᠬᠢᠨ ᠳᠡᠭᠦᠦ ᠶ᠋ᠢ ᠨᠠᠰᠤ ᠢᠯᠭᠠᠵᠤ᠂ ᠪᠡᠶᠡ ᠡᠴᠡ ᠨᠠᠰᠤ ᠠᠬᠠ ᠶ᠋ᠢ ᠨᠢ ᠬᠣᠲᠠ ᠠᠬᠠ ᠬᠤᠳᠠᠭᠠᠢ ᠡᠭᠡᠴᠢ ᠭᠡᠵᠦ᠂ ᠨᠠᠰᠤ ᠳᠡᠭᠦᠦ ᠶ᠋ᠢ ᠨᠢ ᠬᠣᠲᠠ ᠳᠡᠭᠦᠦ᠂ ᠬᠤᠳᠠᠭᠠᠢ ᠥᠬᠢᠨ ᠳᠡᠭᠦᠦ ᠭᠡᠵᠦ ᠳᠠᠭᠤᠳᠠᠨᠠ᠃
③ ᠳᠡᠭᠦᠦ ᠪᠡᠷᠢ ᠪᠠ ᠳᠡᠭᠦᠦ ᠬᠦᠷᠭᠡᠨ ᠦ᠌ ᠠᠬᠠ ᠪᠠ ᠡᠭᠡᠴᠢ ᠶ᠋ᠢ ᠮᠥᠨ ᠨᠠᠰᠤ ᠢᠯᠭᠠᠵᠤ ᠪᠡᠶᠡ ᠡᠴᠡ ᠠᠬᠠ (ᠡᠭᠡᠴᠢ ) ᠶ᠋ᠢ ᠨᠢ ᠬᠣᠲᠠ ᠠᠬᠠ ᠬᠤᠳᠠᠭᠠᠢ ᠡᠭᠡᠴᠢ ᠭᠡᠵᠦ᠂ ᠨᠠᠰᠤ ᠪᠠᠷ ᠳᠡᠭᠦᠦ (ᠥᠬᠢᠨ ᠳᠡᠭᠦᠦ ) ᠶ᠋ᠢ ᠨᠢ ᠬᠣᠲᠠ ᠳᠡᠭᠦᠦ ᠬᠤᠳᠠᠭᠠᠢ ᠥᠬᠢᠨ ᠳᠡᠭᠦᠦ ᠭᠡᠵᠦ ᠳᠠᠭᠤᠳᠠᠨᠠ᠃
④ ᠳᠡᠭᠦᠦ ᠪᠡᠷᠢ ᠪᠠ ᠳᠡᠭᠦᠦ ᠬᠦᠷᠭᠡᠨ ᠦ᠌ ᠳᠡᠭᠦᠦ ᠪᠠ ᠥᠬᠢᠨ ᠳᠡᠭᠦᠦ ᠶ᠋ᠢᠨ ᠨᠠᠰᠤ ᠨᠢ ᠪᠡᠶᠡ ᠡᠴᠡ ᠠᠬᠠ ( ᠡᠭᠡᠴᠢ ) ᠪᠠᠢᠭᠰᠠᠨ ᠴᠤ᠌ ᠬᠣᠲᠠ ᠳᠡᠭᠦᠦ᠂ ᠬᠤᠳᠠᠭᠠᠢ ᠥᠬᠢᠨ ᠳᠡᠭᠦᠦ ᠭᠡᠵᠦ ᠳᠠᠭᠤᠳᠠᠨᠠ᠃ ᠤᠴᠢᠷ ᠨᠢ : ᠳᠡᠭᠦᠦ ᠥᠬᠢᠨ ᠳᠡᠭᠦᠦ ᠲᠡᠳᠡ ᠨᠠᠷ ᠢ᠋ ᠬᠦᠷᠢ ᠳᠡᠭᠦᠦ ( ᠬᠠᠳᠠᠮ ᠳᠡᠭᠦᠦ ) ᠂ ᠬᠦᠷᠢ ᠥᠬᠢᠨ ᠳᠡᠭᠦᠦ ( ᠬᠠᠳᠠᠮ ᠥᠬᠢᠨ ᠳᠡᠭᠦᠦ ) ᠭᠡᠵᠦ ᠳᠠᠭᠤᠳᠠᠵᠤ ᠪᠣᠢ ᠶ᠋ᠢᠨ ᠬᠠᠷᠠᠭᠠ᠃
ᠡᠷᠡ ᠡᠮᠡ ᠬᠠᠷᠢᠯᠴᠠᠨ ᠨᠢᠭᠡ ᠨᠢᠭᠡᠨ ᠢ᠋ᠶ᠋ᠡᠨ ᠳᠠᠭᠠᠵᠤ ᠳᠠᠭᠤᠳᠠᠬᠤ ᠶᠣᠰᠣᠨ
ᠡᠷᠡ ᠡᠮᠡ ᠬᠠᠷᠢᠯᠴᠠᠨ᠂ ᠡᠮᠡ ᠨᠢ ᠡᠷᠡ ᠪᠡᠨ ᠳᠠᠭᠠᠵᠤ᠂ ᠡᠷᠡ ᠨᠢ ᠡᠮᠡ ᠪᠡᠨ ᠳᠠᠭᠠᠵᠤ ᠳᠠᠭᠤᠳᠠᠨᠠ᠃ ᠡᠭᠦᠨ ᠳ᠋ᠦ᠍ ᠪᠦᠷ ᠨᠠᠰᠤ ᠢᠯᠭᠠᠬᠤ ᠦᠭᠡᠢ᠃ ᠵᠢᠱ᠌ᠢᠶᠡᠯᠡᠪᠡᠯ : ᠡᠷᠡ ᠶ᠋ᠢᠨ ᠠᠬᠠ ᠂ ᠡᠭᠡᠴᠢ ᠶ᠋ᠢᠨ ᠨᠠᠰᠤ ᠨᠢ ᠡᠮᠡ ᠡᠴᠡ ᠨᠢ ᠳᠡᠭᠦᠦ ᠪᠠᠢᠭᠰᠠᠨ ᠴᠤ᠌ ᠡᠮᠡ ᠨᠢ ᠬᠠᠳᠠᠮ ᠠᠬᠠ᠂ ᠬᠠᠳᠠᠮ ᠡᠭᠡᠴᠢ ᠭᠡᠵᠦ ᠳᠠᠭᠤᠳᠠᠨᠠ᠃ ᠡᠷᠡ ᠶ᠋ᠢᠨ ᠳᠡᠭᠦᠦ ( ᠥᠬᠢᠨ ᠳᠡᠭᠦᠦ ) ᠶ᠋ᠢᠨ ᠨᠠᠰᠤ ᠨᠢ ᠡᠮᠡ ᠡᠴᠡ ᠨᠢ ᠠᠬᠠ ᠪᠤᠶᠤ ᠡᠭᠡᠴᠢ ᠪᠠᠢᠭᠰᠠᠨ ᠴᠤ᠌ ᠡᠮᠡ ᠨᠢ ᠬᠠᠳᠠᠮ ᠳᠡᠭᠦᠦ᠂ ᠬᠠᠳᠠᠮ ᠥᠬᠢᠨ ᠳᠡᠭᠦᠦ ᠭᠡᠵᠦ ᠳᠠᠭᠤᠳᠠᠨᠠ᠃ ᠮᠥᠨ ᠡᠨᠡ ᠶᠣᠰᠣ ᠪᠠᠷ ᠡᠮᠡ ᠶ᠋ᠢᠨ ᠠᠬᠠ ᠡᠭᠡᠴᠢ ᠶ᠋ᠢᠨ ᠨᠠᠰᠤ ᠨᠢ ᠡᠷᠡ ᠡᠴᠡ ᠳᠡᠭᠦᠦ ᠪᠠᠢᠭᠰᠠᠨ ᠴᠤ᠌ ᠡᠷᠡ ᠨᠢ ᠲᠡᠳᠡᠨ ᠢ᠋ ᠬᠠᠳᠠᠮ ᠠᠬᠠ᠂ ᠬᠠᠳᠠᠮ ᠡᠭᠡᠴᠢ ᠭᠡᠵᠦ ᠳᠠᠭᠤᠳᠠᠨᠠ᠃ ᠡᠮᠡ ᠶ᠋ᠢᠨ ᠳᠡᠭᠦᠦ᠂ ᠥᠬᠢᠨ ᠳᠡᠭᠦᠦ ᠶ᠋ᠢᠨ ᠨᠠᠰᠤ ᠨᠢ ᠡᠷᠡ ᠡᠴᠡ ᠨᠢ ᠠᠬᠠ ᠪᠤᠶᠤ ᠡᠭᠡᠴᠢ ᠪᠠᠢᠭᠰᠠᠨ ᠴᠤ᠌ ᠡᠷᠡ ᠨᠢ ᠲᠡᠳᠡᠨ ᠢ᠋ ᠬᠦᠷᠢ ᠳᠡᠭᠦᠦ ᠂ ᠬᠦᠷᠢ ᠥᠬᠢᠨ ᠳᠡᠭᠦᠦ ᠭᠡᠵᠦ ᠳᠠᠭᠤᠳᠠᠨᠠ᠃
ᠦᠶᠡ ᠢᠯᠭᠠᠵᠤ ᠨᠠᠰᠤ ᠢᠯᠭᠠᠬᠤ ᠦᠭᠡᠢ ᠶᠣᠰᠣᠨ
ᠵᠠᠷᠢᠮ ᠨᠢ ᠦᠶᠡ ᠶ᠋ᠢ ᠴᠢᠩᠭᠠ ᠢᠯᠭᠠᠵᠤ ᠨᠠᠰᠤ ᠶ᠋ᠢ ᠢᠯᠭᠠᠬᠤ ᠦᠭᠡᠢ ᠪᠠᠢᠳᠠᠭ᠃ ᠵᠢᠱ᠌ᠢᠶᠡᠯᠡᠪᠡᠯ᠄ ᠠᠪᠠᠭᠠ ᠶ᠋ᠢᠨ ᠨᠠᠰᠤ ᠨᠢ ᠪᠡᠶᠡ ᠡᠴᠡ ᠳᠡᠭᠦᠦ ᠪᠠᠢᠭᠰᠠᠨ ᠴᠤ᠌ ᠡᠴᠢᠭᠡ ᠦᠶᠡ ᠶ᠋ᠢᠨ ᠬᠥᠮᠦᠨ᠃ ᠦᠶᠡᠯᠢᠳ ᠬᠦᠦ ᠶ᠋ᠢᠨ ᠨᠠᠰᠤ ᠨᠢ ᠪᠡᠶᠡ ᠡᠴᠡ ᠠᠬᠠ ᠪᠠᠢᠭᠰᠠᠨ ᠴᠤ᠌ ᠬᠥᠪᠡᠭᠦᠨ ᠦᠶᠡ ᠶ᠋ᠢᠨ ᠬᠥᠮᠦᠨ᠃
ᠳᠡᠭᠡᠷᠡ ᠳᠣᠣᠷᠠ ᠦᠶᠡ ᠶ᠋ᠢᠨ ᠬᠥᠮᠦᠰ ᠦ᠋ᠨ ᠢᠵᠢᠯᠢ ᠦᠶᠡ ᠶ᠋ᠢᠨ ᠳᠣᠲᠣᠷᠠᠬᠢ ᠶᠡᠬᠡ ᠪᠠᠭᠠ ᠶ᠋ᠢ ᠢᠯᠭᠠᠨ ᠳᠠᠭᠤᠳᠠᠬᠤ ᠶᠣᠰᠣᠨ
ᠳᠡᠭᠡᠷᠡ ᠦᠶᠡ ᠶ᠋ᠢᠨ ᠬᠥᠮᠦᠰ ᠦ᠋ᠨ ᠢᠵᠢᠯᠢ ᠦᠶᠡ ᠶ᠋ᠢᠨ ᠬᠢᠨᠢ ᠳᠣᠲᠣᠷᠠᠬᠢ ᠶᠡᠬᠡ ᠪᠠᠭᠠ ᠶ᠋ᠢ ᠢᠯᠭᠠᠬᠤ ᠳ᠋ᠠᠭᠠᠨ ᠠᠬᠠ ᠪᠣᠯᠬᠤ ᠶ᠋ᠢ ᠨᠢ 《ᠶᠡᠬᠡ 》 ᠪᠡᠷ ᠲᠣᠳᠣᠳᠬᠠᠵᠤ᠂ ᠳᠡᠭᠦᠦ ᠪᠣᠯᠬᠤ ᠶ᠋ᠢ ᠨᠢ 《 ᠪᠠᠭᠠ 》 ᠪᠠᠷ ᠲᠣᠳᠣᠳᠬᠠᠵᠤ ᠳᠠᠭᠤᠳᠠᠨᠠ᠃ 《 ᠵᠢᠰᠢᠶᠠᠯᠠᠪᠠᠯ : ᠡᠴᠢᠭᠡ ᠳ᠋ᠦ᠍ ᠠᠬᠠ ( ᠬᠠᠳᠠᠮ ᠠᠬᠠ᠂ ᠬᠣᠲᠠ ᠠᠬᠠ ᠁ ) ᠪᠣᠯᠬᠤ ᠬᠥᠮᠦᠨ ᠢ᠋ ᠶᠡᠬᠡ ᠠᠪᠠᠭᠠ ᠠᠬᠠ ᠶᠡᠬᠡ ( ᠨᠠᠭᠠᠴᠤ ᠠᠬᠠ᠂ ᠶᠡᠬᠡ ᠬᠣᠲᠠ ᠠᠪᠤ ) ᠭᠡᠵᠦ᠂ ᠡᠭᠡᠴᠢ ( ᠬᠠᠳᠠᠮ ᠡᠭᠡᠴᠢ᠂ ᠬᠤᠳᠠᠭᠠᠢ ᠡᠭᠡᠴᠢ ᠁ ) ᠪᠣᠯᠬᠤ ᠬᠥᠮᠦᠨ ᠢ᠋ ᠶᠡᠬᠡ ᠠᠪᠠᠭᠠ ᠡᠭᠡᠴᠢ ( ᠶᠡᠬᠡ ᠨᠠᠭᠠᠴᠤ ᠡᠭᠡᠴᠢ ᠂ ᠶᠡᠬᠡ ᠬᠤᠳᠠᠭᠠᠢ ᠡᠵᠢ ᠁ ) ᠭᠡᠳᠡᠭ᠃ ᠡᠴᠢᠭᠡ ᠳ᠋ᠦ᠍ ᠳᠡᠭᠦᠦ ( ᠬᠦᠷᠢ ᠳᠡᠭᠦᠦ᠂ ᠬᠣᠲᠠ ᠳᠡᠭᠦᠦ ᠁ ) ᠪᠣᠯᠬᠤ ᠬᠥᠮᠦᠨ ᠢ᠋ ᠪᠠᠭᠠ ᠠᠪᠠᠭᠠ ᠪᠤᠶᠤ ᠪᠠᠭᠠ ᠠᠪᠠᠭᠠ ᠠᠬᠠ ( ᠪᠠᠭᠠ ᠨᠠᠭᠠᠴᠤ᠂ ᠪᠠᠭᠠ ᠬᠣᠲᠠ ᠠᠪᠤ ) ᠭᠡᠵᠦ᠂ ᠥᠬᠢᠨ ᠳᠡᠭᠦᠦ ( ᠬᠦᠷᠢ ᠥᠬᠢᠨ ᠳᠡᠭᠦᠦ᠂ ᠬᠤᠳᠠᠭᠠᠢ ᠥᠬᠢᠨ ᠳᠡᠭᠦᠦ ) ᠪᠣᠯᠬᠤ ᠬᠥᠮᠦᠨ ᠢ᠋ ᠪᠠᠭᠠ ᠠᠪᠠᠭᠠ ᠡᠭᠡᠴᠢ ( ᠪᠠᠭᠠ ᠨᠠᠭᠠᠴᠤ ᠡᠭᠡᠴᠢ᠂ ᠪᠠᠭᠠ ᠬᠤᠳᠠᠭᠠᠢ ᠡᠵᠢ ) ᠭᠡᠵᠦ ᠳᠠᠭᠤᠳᠠᠨᠠ᠃ ᠡᠭᠦᠨ ᠡᠴᠡ ᠳᠡᠭᠡᠭᠰᠢᠬᠢ ᠦᠶᠡ ᠶ᠋ᠢᠨ ᠬᠥᠮᠦᠰ ᠢ᠋ ᠮᠥᠨ ᠡᠨᠡ ᠶᠣᠰᠣ ᠪᠠᠷ ᠳᠠᠭᠤᠳᠠᠨᠠ᠃
ᠳᠣᠣᠷᠠ ᠦᠶᠡ ᠶ᠋ᠢᠨ ᠬᠥᠮᠦᠰ ᠢ᠋ ᠰᠢᠭᠤᠳ ᠳᠠᠭᠤᠳᠠᠬᠤ ᠶᠣᠰᠣᠨ
ᠳᠣᠣᠷᠠ ᠦᠶᠡ ᠶ᠋ᠢᠨ ᠬᠥᠮᠦᠰ ᠢ᠋ ᠨᠡᠷᠡ ᠪᠡᠷ ᠨᠢ ᠪᠤᠶᠤ ᠦᠶᠡ ᠪᠡᠷ ᠰᠢᠭᠤᠳ ᠳᠠᠭᠤᠳᠠᠨᠠ ᠃ ᠵᠢᠱ᠌ᠢᠶᠡᠯᠡᠪᠡᠯ : ᠮᠡᠷᠭᠡᠨ ᠠ᠋ ! ᠰᠡᠴᠡᠨ ᠠ᠋ ! ᠥᠬᠢᠨ ᠠ᠋ ! ᠣᠮᠪᠣᠯᠣ ᠬᠦᠦ ᠠ᠋ ! ᠳᠣᠮᠪᠣᠯᠤ ᠥᠬᠢᠨ ᠠ᠋ ! ᠭᠡᠬᠦ ᠮᠡᠲᠦ᠃ ᠭᠡᠪᠡᠴᠦ ᠲᠡᠳᠡᠨ ᠦ᠌ ᠢᠵᠢᠯᠢ ᠦᠶᠡ ᠳᠣᠲᠣᠷᠠ ᠨᠢ ᠬᠠᠷᠢᠨ ᠬᠠᠮᠤᠭ ᠲᠡᠷᠢᠭᠦᠨ ᠳ᠋ᠦ᠍ ᠲᠥᠷᠥᠭᠰᠡᠨ ᠢ᠋ ᠨᠢ ᠤᠤᠭᠠᠨ ( ᠬᠦᠦ᠂ ᠥᠬᠢᠨ ᠭᠡᠬᠦ ᠪᠥᠭᠡᠳ ᠬᠠᠮᠤᠭ ᠰᠡᠭᠦᠯ ᠳ᠋ᠦ᠍ ᠲᠥᠷᠥᠭᠰᠡᠨ ᠢ᠋ ᠨᠢ ᠣᠳᠬᠣᠨ ( ᠬᠦᠦ ᠂ ᠥᠬᠢᠨ ) ᠭᠡᠵᠦ ᠢᠯᠭᠠᠨ ᠳᠠᠭᠤᠳᠠᠨᠠ᠃ ᠶᠡᠷᠦᠩᠬᠡᠢᠯᠡᠪᠡᠯ : 《ᠳᠠᠪᠬᠤᠷ ᠲᠣᠳᠣᠳᠬᠠᠯ ᠢ᠋ ᠣᠷᠣᠭᠤᠯᠤᠭᠰᠠᠨ ᠦᠭᠡᠢ ᠪᠡᠷ 7100 ᠭᠠᠷᠤᠢ ᠳᠠᠭᠤᠳᠠᠯᠭᠠ ᠳ᠋ᠤ᠌ ᠬᠦᠷᠴᠡᠢ᠃ ᠬᠡᠷᠪᠡ ᠳᠠᠪᠬᠤᠷ ᠲᠣᠳᠣᠳᠬᠠᠯ ᠲᠠᠢ ᠳᠠᠭᠤᠳᠠᠯᠭᠠ ᠶ᠋ᠢ ᠣᠷᠣᠭᠤᠯᠪᠠᠯ ᠲᠦᠮᠡᠨ ᠳᠠᠭᠤᠳᠠᠯᠭᠠ ᠪᠠᠷ ᠵᠣᠭᠰᠣᠬᠤ ᠦᠭᠡᠢ ᠪᠠᠢᠬᠤ ᠨᠢ ᠯᠠᠪᠲᠠᠢ 》ᠭᠡᠰᠡᠨ ᠨᠠᠮᠼᠠᠷᠠᠢ ᠡᠪᠦᠭᠡᠨ ᠦ᠌ ᠬᠡᠯᠡᠭᠰᠡᠨᠴᠢᠯᠡᠨ ᠮᠠᠨ ᠤ᠋ ᠳᠡᠭᠡᠳᠦᠰ ᠮᠣᠩᠭᠣᠯᠴᠤᠳ ᠤ᠋ᠨ ᠲᠥᠷᠥᠯ ᠰᠠᠳᠤᠨ ᠤ᠋ ᠳᠠᠭᠤᠳᠠᠯᠭᠠ ᠶ᠋ᠢ ᠲᠤᠩ ᠣᠨᠣᠪᠴᠢᠲᠠᠢ ᠮᠠᠰᠢ ᠪᠠᠶᠠᠨ ᠡᠭᠦᠳᠦᠨ ᠵᠣᠬᠢᠶᠠᠵᠤ ᠦᠯᠡᠳᠡᠭᠡᠵᠦ ᠥᠭᠭᠦᠭᠰᠡᠨ ᠠᠵᠢ᠃ ᠭᠡᠪᠡᠴᠦ ᠮᠣᠩᠭᠣᠯᠴᠤᠳ ᠤ᠋ᠨ ᠲᠠᠷᠠᠬᠠᠢ ᠪᠤᠲᠠᠷᠬᠠᠢ ᠠᠮᠢᠳᠤᠷᠠᠯ ᠤ᠋ᠨ ᠲᠡᠦᠬᠡᠨ ᠶᠠᠪᠤᠴᠠ ᠬᠢᠭᠡᠳ ᠣᠯᠠᠨ ᠵᠠᠭᠤᠨ ᠵᠢᠯ ᠪᠤᠰᠤᠳ ᠤ᠋ᠨ ᠡᠷᠬᠡᠰᠢᠶᠡᠯ ᠳ᠋ᠦ᠍ ᠲᠣᠯᠣᠭᠠᠢ ᠥᠨᠳᠡᠢᠯ ᠦᠭᠡᠢ ᠶᠠᠪᠤᠵᠤ ᠢᠷᠡᠭᠰᠡᠨ ᠣᠯᠠᠨ ᠲᠠᠯᠠ ᠶ᠋ᠢᠨ ᠰᠢᠯᠲᠠᠭᠠᠨ ᠠ᠋ᠴᠠ ᠪᠣᠯᠵᠤ ᠬᠣᠭᠣᠷᠣᠨᠳᠣ ᠪᠠᠨ ᠨᠢᠭᠡᠳᠦᠯ ᠦᠭᠡᠢ ᠶᠦᠮ ᠤᠤ᠂ ᠡᠰᠡᠬᠦᠯᠡ ᠬᠠᠷᠢ ᠬᠡᠯᠡᠨ ᠦ᠌ ᠨᠥᠯᠥᠭᠡ ᠶ᠋ᠢ ᠬᠢᠯᠪᠠᠷᠬᠠᠨ ᠬᠦᠯᠢᠶᠡᠵᠦ ᠡᠯᠳᠡᠪ ᠶᠠᠩᠵᠤ ᠪᠠᠷ ᠳᠠᠭᠤᠳᠠᠨ᠂ ᠥᠪᠡᠷ ᠦ᠋ᠨ ᠬᠢ ᠪᠡᠨ ᠤᠮᠠᠷᠲᠠᠨ ᠣᠷᠬᠢᠵᠤ ᠪᠠᠢᠭᠠ ᠨᠢ ᠲᠤᠩ ᠬᠠᠷᠠᠮᠰᠠᠯᠲᠠᠢ᠃ ᠦᠨᠡᠨ ᠢ᠋ ᠬᠡᠯᠡᠬᠦ ᠳ᠋ᠦ᠍᠂ ᠮᠠᠨ ᠤ᠋ ᠦᠶᠡ ᠳᠠᠭᠤᠳᠠᠯᠭᠠ ᠥᠨᠢᠷ ᠪᠠᠶᠠᠯᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠯᠢ ᠴᠤ᠌ ᠦᠨᠳᠦᠰᠦᠲᠡᠨ ᠡᠴᠡ ᠳᠤᠲᠠᠭᠤ ᠦᠭᠡᠢ ᠶᠦᠮ᠃