ᠥᠷᠢ ᠲᠡᠢ ᠮᠣᠩᠭᠣᠯᠴᠤᠳ ᠲᠠᠭᠠᠨ ᠥᠴᠢᠬᠦ ᠦᠭᠡ- ᠭᠣᠩᠭᠣᠷᠵᠠᠪӨртэй монголчууддаа өчих үг-Гонгоржав
2620ᠥᠷᠢ ᠲᠡᠢ ᠮᠣᠩᠭᠣᠯᠴᠤᠳ ᠲᠠᠭᠠᠨ ᠥᠴᠢᠬᠦ ᠦᠭᠡ
ᠭᠣᠩᠭᠣᠷᠵᠠᠪ
ᠨᠠᠷᠠᠨ ᠤ᠋ ᠭᠡᠷᠡᠯ ᠳᠡᠯᠡᠬᠡᠢ ᠶ᠋ᠢ
ᠨᠡᠢᠳᠡᠮ ᠭᠡᠢᠭᠦᠯᠳᠡᠭ ᠠᠳᠠᠯᠢ ᠪᠠᠷ
ᠨᠠᠮ ᠤ᠋ᠨ ᠲᠤᠶᠠᠭᠠ ᠴᠤ᠌ ᠣᠯᠠᠨ ᠢ᠋
ᠵᠡᠷᠭᠡ ᠭᠡᠷᠡᠯᠲᠦᠭᠦᠯᠳᠡᠭ ᠶᠣᠰᠣ ᠲᠠᠢ
ᠨᠠᠮᠵᠤᠷ ᠲᠡᠳᠡᠨ ᠰᠣᠷᠲᠣᠭᠣᠯᠠᠳᠠᠭ
ᠮᠠᠨ ᠤ᠋ ᠵᠠᠷᠢᠮ ᠮᠣᠩᠭᠣᠯᠴᠤᠳ
ᠨᠠᠰᠤᠨ ᠳ᠋ᠠᠭᠠᠨ ᠲᠥᠯᠥᠰᠢ ᠦᠭᠡᠢ ᠥᠷᠢ ᠳ᠋ᠦ᠍
ᠤᠨᠠᠵᠤ ᠰᠢᠨᠠᠯᠤᠭᠰᠠᠨ ᠨᠢ ᠤᠴᠢᠷ ᠲᠠᠢ᠃
ᠴᠢᠯᠥᠭᠡ ᠲᠡᠢ ᠠᠭᠤᠵᠢᠭᠤ ᠪᠣᠳᠣᠯᠭᠠ ᠳ᠋ᠤ᠌
ᠨᠢᠭᠡᠮᠦᠰᠦᠨ ᠪᠡᠶᠡ ᠪᠡᠨ ᠲᠤᠰᠢᠶᠠᠭᠠᠳ
ᠴᠢᠳᠬᠥᠷ ᠴᠤ᠌ ᠰᠢᠷᠬᠡᠢᠳᠡᠭ ᠮᠥᠩᠭᠥᠨ ᠳ᠋ᠦ᠍
ᠨᠢᠭᠡᠨᠲᠡ ᠬᠦᠯᠢᠶᠡᠰᠦᠯᠡᠭᠳᠡᠨ ᠭᠦᠢᠴᠡᠭᠡᠳ
ᠴᠥᠭᠡᠨ ᠲᠣᠬᠢᠶᠠᠯᠳᠤᠬᠤ ᠣᠯᠵᠠᠨ ᠳ᠋ᠤ᠌
ᠭᠣᠷᠢ ᠬᠠᠶᠠᠯᠠᠨ ᠵᠢᠳᠬᠦᠭᠰᠡᠭᠡᠷ
ᠴᠢᠮᠥᠭᠡ ᠪᠡᠨ ᠲᠤᠨᠲᠠᠷᠠᠲᠠᠯᠠ ᠰᠣᠷᠣᠭᠤᠯᠤᠭᠠᠳ
ᠥᠷᠢ ᠶ᠋ᠢᠨ ᠨᠦᠬᠡᠨ ᠳ᠋ᠦ᠍ ᠤᠨᠠᠭᠰᠠᠨ ᠶᠤᠮ
ᠤᠯᠤᠰ ᠤ᠋ᠨ ᠴᠠᠯᠢᠩ ᠲᠠᠢ ᠺᠠᠳ᠋ᠷ ᠤ᠋ᠳ ᠲᠠᠢ
ᠣᠷᠣᠯᠳᠣᠬᠤ ᠰᠢᠭ᠋ ᠥᠷᠢᠰᠦᠯᠳᠦᠭᠡᠳ
ᠤᠤᠭᠤᠵᠤ ᠢᠳᠡᠬᠦ ᠳ᠋ᠡᠭᠡᠨ ᠮᠠᠶᠢᠭᠯᠠᠭᠠᠳ
ᠪᠡᠯᠡᠨ ᠬᠣᠭᠣᠯᠠ ᠵᠣᠭᠣᠭᠯᠠᠭᠰᠠᠨ ᠶᠤᠮ
ᠤᠨᠤᠭᠠ ᠮᠠᠰᠢᠨ ᠠ᠋ᠴᠠ ᠡᠬᠢᠯᠡᠭᠦᠯᠦᠭᠡᠳ
ᠵᠠᠷᠤᠬᠤ ᠪᠠᠷᠢᠬᠤ ᠳ᠋ᠠᠭᠠᠨ ᠬᠦᠷᠲᠡᠯᠡ
ᠤᠴᠢᠷ ᠲᠠᠢ ᠤᠴᠢᠷ ᠦᠭᠡᠢ ᠶᠠᠭᠤᠮᠠᠨ ᠳ᠋ᠤ᠌
ᠵᠣᠭᠣᠰ ᠢ᠋ ᠤᠰᠤ ᠰᠢᠭ᠋ ᠵᠠᠷᠤᠭᠰᠠᠨ ᠶᠤᠮ᠃
ᠲᠣᠭᠠᠲᠠᠢ ᠬᠡᠳᠦᠬᠡᠨ ᠮᠠᠯ ᠳ᠋ᠠᠭᠠᠨ ᠴᠤ᠌
ᠲᠣᠭᠣᠰᠬᠠᠨ ᠬᠠᠰᠢᠶᠠ ᠨᠢ ᠶᠡᠬᠡᠳᠦᠭᠡᠳ
ᠲᠣᠣᠷᠯᠠᠭᠰᠠᠨ ᠪᠡᠯᠴᠢᠭᠡᠷ ᠨᠢ ᠪᠠᠭᠠ ᠴᠤ᠌
ᠲᠣᠮᠣᠬᠠᠨ ᠪᠠᠢᠰᠢᠩ ᠳ᠋ᠤ᠌ ᠵᠢᠷᠭᠠᠭᠠᠳ
ᠳᠣᠲᠣᠷᠠ ᠪᠠᠨ ᠬᠡᠳᠦᠢ ᠵᠣᠪᠠᠯᠠᠩ ᠲᠠᠢ ᠴᠤ᠌
ᠲᠣᠷᠭᠠ ᠬᠡᠲᠦᠷᠡᠨ ᠭᠠᠩᠭᠠᠯᠠᠭᠠᠳ
ᠲᠤᠯᠤᠮ ᠢ᠋ᠶ᠋ᠠᠨ ᠴᠢᠷᠬᠦ ᠣᠢᠷᠠᠲᠤᠭᠰᠠᠨ ᠴᠤ᠌
ᠲᠣᠯᠣᠭᠠᠢ ᠰᠠᠵᠢᠯᠠᠭᠠᠳ ᠣᠮᠣᠭᠯᠠᠩ᠃
ᠦᠨᠢᠶᠡ ᠰᠠᠭᠠᠬᠤ ᠪᠠᠨ ᠪᠠᠢᠴᠢᠬᠠᠭᠠᠳ
ᠬᠤᠳᠠᠯᠳᠤᠭᠠᠨ ᠤ᠋ ᠰᠦ ᠵᠠᠷᠤᠭᠠᠳ
ᠥᠷᠥᠮᠡ ᠬᠥᠭᠡᠷᠦᠭᠦᠯᠬᠦ ᠪᠡᠨ ᠬᠠᠯᠠᠰᠢᠷᠠᠭᠠᠳ
ᠵᠡᠭᠡᠯᠢ ᠡᠴᠡ ᠠᠪᠴᠤ ᠢᠳᠡᠭᠡᠳ
ᠦᠵᠢᠷᠬᠡᠢ ᠲᠦᠯᠡᠰᠢ ᠪᠡᠨ ᠭᠣᠯᠣᠭᠠᠳ
ᠨᠡᠭᠦᠷᠡᠰᠦᠨ ᠦᠨᠡ ᠳ᠋ᠦ᠍ ᠱᠦᠭᠦᠭᠳᠡᠭᠡᠳ
ᠦᠬᠡᠷ ᠢ᠋ᠶ᠋ᠡᠨ ᠤᠰᠤᠯᠠᠬᠤ ᠳ᠋ᠤ᠌ ᠬᠦᠷᠲᠡᠯᠡ
ᠴᠠᠬᠢᠯᠭᠠᠨ ᠬᠡᠳᠦᠢ ᠪᠠᠷᠠᠪᠠ?
ᠠᠪᠤ ᠶ᠋ᠢᠨ ᠪᠠᠶᠠᠷ ᠲᠤ ᠰᠢᠯᠲᠠᠭᠠᠯᠠᠭᠠᠳ
ᠠᠷᠠᠰᠤᠨ ᠵᠤᠪᠴᠠᠭᠠ ᠨᠢᠭᠡ ᠨᠢᠭᠡ
ᠡᠵᠢ ᠶ᠋ᠢᠨ ᠵᠢᠯ ᠳ᠋ᠦ᠍ ᠪᠡᠯᠡᠳᠬᠡᠭᠡᠳ
ᠡᠭᠡᠳᠡᠨ ᠭᠤᠲᠤᠯ ᠬᠡᠳᠦ ᠬᠡᠳᠦ
ᠬᠦᠦ ᠶ᠋ᠢᠨ ᠥᠷᠪᠥᠭᠡᠨ ᠳ᠋ᠦ᠍ ᠡᠮᠦᠰᠦᠨᠡ ᠭᠡᠳ
ᠥᠭᠡᠳᠡᠩ ᠪᠠᠩᠵᠠᠯ ᠬᠣᠣᠰ ᠬᠣᠣᠰ
ᠬᠡᠦᠬᠡᠨ ᠦ᠌ ᠬᠤᠷᠢᠮ ᠳ᠋ᠤ᠌ ᠭᠣᠶᠣᠯᠠᠨᠠ ᠭᠡᠳ
ᠦᠰᠦ ᠲᠡᠢ ᠬᠠᠨᠵᠢᠶᠠᠷ ᠵᠦᠢᠷᠡᠢ ᠵᠦᠢᠷᠡᠢ
ᠠᠷᠠᠳ ᠤ᠋ᠨ ᠨᠠᠭᠠᠳᠤᠮ ᠳ᠋ᠤ᠌ ᠣᠴᠢᠨᠠ ᠭᠡᠳ
ᠮᠥᠩᠭᠥ ᠬᠡᠳᠦᠢ ᠪᠦᠷᠢᠯᠭᠡᠵᠦ ᠪᠣᠢ?
ᠠᠬᠠ ᠳᠡᠭᠦᠦ ᠶ᠋ᠢᠨ ᠴᠤᠭᠯᠠᠭᠠᠨ ᠳ᠋ᠤ᠌ ᠬᠦᠷᠦᠭᠡᠳ
ᠴᠠᠭ ᠬᠡᠳᠦᠢ ᠰᠦᠢᠳᠬᠡᠵᠦ ᠪᠣᠢ?
ᠠᠷᠢᠬᠢ ᠫᠢᠸᠣ ᠵᠣᠭᠣᠭᠯᠠᠭᠠᠳ
ᠪᠡᠶᠡ ᠪᠡᠨ ᠬᠡᠳᠦᠢ ᠵᠣᠪᠠᠭᠠᠵᠤ ᠪᠣᠢ?
ᠠᠮᠲᠠᠲᠤ ᠬᠣᠭᠣᠯᠠᠨ ᠳ᠋ᠤ᠌ ᠰᠢᠨᠤᠬᠠᠢᠷᠠᠭᠠᠳ
ᠪᠦᠷᠢᠯᠭᠡᠵᠦ ᠬᠡᠳᠦᠢ ᠬᠠᠶᠠᠵᠤ ᠪᠣᠢ?
ᠵᠣᠭᠣᠰ ᠲᠠᠢ ᠮᠤᠷᠤᠢ ᠲᠣᠭᠯᠠᠭᠠᠳ
ᠮᠥᠩᠭᠥ ᠪᠡᠨ ᠬᠡᠳᠦᠢ ᠦᠷᠡᠪᠡ?
ᠵᠣᠣ ᠭᠦᠮᠪᠦᠮ ᠢ᠋ᠶ᠋ᠡᠷ ᠵᠤᠭᠠᠴᠠᠭᠠᠳ
ᠥᠷᠢᠨ ᠳ᠋ᠦ᠍ ᠬᠡᠳᠦᠢ ᠤᠨᠠᠪᠠ?
ᠵᠢᠯᠣᠭᠣ ᠵᠣᠳᠣᠭ ᠦᠭᠡᠢ ᠳᠠᠪᠬᠢᠭᠤᠯᠤᠭᠠᠳ
ᠮᠠᠰᠢᠨ ᠬᠡᠳᠦᠢ ᠡᠪᠳᠡᠯᠡᠪᠡ?
ᠵᠣᠷᠢᠭ ᠨᠢ ᠰᠡᠭᠦᠯ ᠳ᠋ᠡᠭᠡᠨ ᠰᠢᠨᠲᠠᠷᠠᠭᠠᠳ
ᠡᠪᠡᠳᠴᠢᠯᠡᠵᠦ ᠬᠡᠳᠦᠢ ᠬᠡᠪᠲᠡᠪᠡ?
ᠪᠠᠩᠬᠢ᠂ ᠬᠤᠪᠢ ᠬᠥᠮᠦᠨ ᠡᠴᠡ ᠵᠢᠭᠡᠯᠡᠭᠡᠳ
ᠪᠤᠴᠠᠭᠠᠬᠤ ᠦᠭᠡᠢ ᠶᠦᠮ ᠰᠢᠭ ᠰᠠᠨᠠᠪᠠᠤ?
ᠪᠠᠢᠭᠠ ᠶᠠᠭᠤᠮᠠ ᠪᠠᠨ ᠭᠠᠮᠨᠠᠬᠤ ᠦᠭᠡᠢ
ᠣᠨᠳᠣᠷᠴᠤ ᠪᠠᠢᠨᠠ ᠭᠡᠵᠦ ᠪᠣᠳᠣᠪᠠᠤ?
ᠪᠠᠢᠭᠠᠯᠢ ᠣᠷᠴᠢᠯᠠᠩ ᠤ᠋ᠨ ᠵᠦᠢ ᠶ᠋ᠢ
ᠨᠢᠳᠦᠨ ᠳ᠋ᠦ᠍ ᠬᠠᠪᠴᠢᠬᠤ ᠦᠭᠡᠢ
ᠪᠠᠢᠳᠠᠭ ᠵᠢᠭᠠᠬᠠᠨ ᠢ᠋ᠶ᠋ᠠᠨ ᠪᠠᠷᠠᠴᠢᠬᠠᠭᠠᠳ
ᠰᠠᠨᠠᠭᠠ ᠠᠮᠤᠭᠤᠯᠠᠩ ᠪᠣᠯᠪᠠᠤ?
ᠦᠬᠡᠷ ᠳᠡᠩᠳᠡᠭᠦᠦ ᠬᠢᠮᠳᠠᠬᠠᠨ ᠭᠡᠳ
ᠥᠭᠦᠯᠡᠭᠡᠳ ᠪᠠᠢᠵᠤ ᠪᠣᠯᠬᠤ ᠦᠭᠡᠢ ᠰᠢᠦ
ᠥᠪᠡᠷ ᠦ᠋ᠨ ᠵᠠᠷᠤᠭᠰᠠᠨ ᠪᠠᠷᠠᠭᠰᠠᠨ ᠢ᠋ᠶ᠋ᠠᠨ
ᠦᠨᠡᠯᠡᠵᠦ ᠰᠠᠢᠬᠠᠨ ᠪᠣᠳᠣᠭᠠᠷᠠᠢ!
ᠡᠪᠡᠰᠦ ᠮᠤᠨᠳᠠᠭ ᠦᠨᠡ ᠲᠡᠢ ᠭᠡᠵᠦ
ᠠᠭᠤᠷᠯᠠᠭᠠᠳ ᠪᠢᠳᠡ ᠶᠠᠭᠠᠬᠢᠨᠠ ᠳᠠ
ᠦᠨᠡᠨᠬᠦ ᠣᠷᠣᠯᠭᠠ ᠵᠠᠷᠤᠯᠭᠠ ᠶ᠋ᠢᠨ ᠢ᠋ᠶ᠋ᠡᠨ
ᠳᠠᠩᠰᠠ ᠶ᠋ᠢ ᠰᠠᠢᠬᠠᠨ ᠪᠣᠳᠣᠬᠤ ᠶᠤᠮ ᠰᠢᠦ
《ᠠᠷᠪᠢᠯᠠᠬᠤ ᠶ᠋ᠢ ᠠᠮᠠᠰᠠᠷ ᠠ᠋ᠴᠠ》 ᠭᠡᠵᠦ
ᠠᠷᠠᠳ ᠤ᠋ᠨ ᠦᠭᠡᠨ ᠳ᠋ᠦ᠍ ᠪᠠᠢᠳᠠᠭ ᠰᠢᠦ
ᠠᠯᠢ ᠡᠷᠲᠡ ᠡᠴᠡ ᠬᠢᠴᠢᠶᠡᠭᠰᠡᠨ ᠪᠣᠯ
ᠠᠷᠠᠢ ᠡᠭᠦᠨ ᠳ᠋ᠦ᠍ ᠲᠤᠯᠬᠤ ᠦᠭᠡᠢ ᠠ᠋!
《ᠬᠥᠨᠵᠢᠯᠡ ᠶ᠋ᠢᠨ ᠬᠢᠷᠢ ᠪᠡᠷ ᠬᠥᠯ ᠢ᠋ᠶ᠋ᠡᠨ》 ᠭᠡᠵᠦ
ᠬᠥᠭᠰᠢᠳ ᠦ᠋ᠨ ᠰᠤᠷᠭᠠᠯ ᠪᠣᠢ ᠰᠢᠦ!
ᠬᠥᠭᠵᠢᠭᠰᠡᠨ ᠨᠡᠢᠭᠡᠮ ᠳ᠋ᠦ᠍ ᠪᠠᠷᠳᠠᠮᠰᠢᠭᠠᠳ
ᠬᠡᠦᠳᠡᠢ ᠪᠡᠨ ᠴᠢᠷᠬᠦ ᠳ᠋ᠦ᠍ ᠬᠦᠷᠦᠯᠡ ᠰᠢᠦ
ᠥᠨᠳᠥᠷ ᠬᠦᠦ ᠲᠡᠢ ᠵᠢᠭᠡᠯᠡᠯᠭᠡ ᠪᠣᠯ
ᠦᠵᠦᠭᠦᠷ ᠦᠭᠡᠢ ᠨᠦᠬᠡ ᠰᠢᠦ!
ᠥᠷᠭᠡᠨ ᠣᠯᠠᠨ ᠮᠣᠩᠭᠣᠯᠴᠤᠳ ᠤ᠋ᠨ
ᠦᠢᠯᠡ ᠪᠡᠨ ᠦᠵᠡᠬᠦ ᠲᠠᠮᠤ ᠰᠢᠦ!
ᠥᠨᠢᠷ ᠲᠠᠩᠰᠤᠭ ᠮᠠᠯᠴᠢᠳ ᠮᠢᠨᠢ
ᠦᠳᠲᠡᠷ ᠲᠦᠷᠭᠡᠨ ᠤᠬᠠᠮᠰᠠᠷᠠᠭᠠᠷᠠᠢ!
ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠨ ᠳᠤᠯᠢᠳᠠᠭᠠᠳ
ᠥᠭᠡᠷᠡᠴᠢᠯᠡᠵᠦ ᠬᠢᠴᠢᠶᠡᠵᠦ ᠶᠠᠪᠤᠭᠠᠷᠠᠢ᠃
ᠬᠤᠷᠢᠮ ᠪᠠᠶᠠᠷ ᠣᠯᠠᠳᠠᠭᠠᠳ ᠢᠷᠡᠪᠡᠯ
ᠬᠣᠭᠣᠯᠠᠨ ᠭᠡᠷ ᠦ᠋ᠨ ᠣᠷᠣᠯᠭᠠ ᠰᠢᠦ!
ᠬᠣᠨᠣᠭᠤᠲᠠ ᠥᠨᠵᠢᠭᠦᠲᠡ ᠨᠠᠢᠷᠯᠠᠭᠰᠠᠨ ᠴᠤ᠌
ᠠᠮᠢᠳᠤᠷᠠᠯ ᠳ᠋ᠤ᠌ ᠶᠡᠷᠦᠨᠢ ᠬᠡᠷᠡᠭ ᠦᠭᠡᠢ
ᠬᠣᠲᠠᠯᠠ ᠲᠦᠮᠡᠨ ᠮᠣᠩᠭᠣᠯᠴᠤᠳ ᠮᠢᠨᠢ
ᠡᠭᠦᠨ ᠢ᠋ ᠰᠠᠢᠨ ᠴᠡᠭᠡᠵᠢᠯᠡᠵᠦ ᠠᠪ!
ᠬᠣᠷᠢᠭᠠᠳ ᠪᠠᠳᠠᠭ ᠡᠷᠢᠶᠡᠴᠢᠯᠡ ᠪᠢ
ᠬᠣᠵᠢᠮ ᠳ᠋ᠠᠭᠠᠨ ᠴᠡᠭᠡᠷᠯᠡᠯ ᠪᠣᠯᠭᠠᠭᠠᠷᠠᠢ!
2023.11. ᠰᠠᠷᠠ ᠳ᠋ᠤ᠌
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠱᠠᠭᠰᠠᠯ
ᠬᠢᠨᠠᠭᠴᠢ᠄ ᠭᠠᠷᠮᠠ᠂ ᠵ᠂ ᠪᠤᠶᠠᠨᠲᠣᠭᠲᠠᠬᠤ