ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠬᠣᠶᠠᠷ ᠂ ᠲᠥᠷᠥᠯ ᠰᠠᠳᠤᠨ ᠤ ᠳᠠᠭᠤᠳᠠᠯᠭᠠ ᠶᠢᠨ ᠪᠦᠯᠦᠭ 8 > Хөх зул – Боржигон Ванжал –" Хоёр ᠂ Төрөл садны дуудлагын бүлэг " 8
258ᠬᠣᠶᠠᠷ ᠂ ᠲᠥᠷᠥᠯ ᠰᠠᠳᠤᠨ ᠤ ᠳᠠᠭᠤᠳᠠᠯᠭᠠ ᠶᠢᠨ ᠪᠦᠯᠦᠭ – 8
ᠳᠣᠣᠷᠠ ᠨᠢᠭᠡ ᠦᠶᠡ ᠶ᠋ᠢᠨ ᠬᠡᠦᠬᠡᠳ ᠤᠨ ᠬᠤᠭᠤᠷᠤᠨᠳᠤᠬᠢ ᠳᠠᠭᠤᠳᠠᠯᠭᠠ Доор нэг үеийн хүүхдийн хоорондох дуудлага
ᠠᠬᠠ ᠳᠡᠭᠦᠦ ᠬᠣᠶᠠᠷ ᠤ᠋ᠨ ᠬᠡᠦᠬᠡᠳ ᠬᠣᠭᠣᠷᠣᠨᠳᠣ ᠪᠠᠨ ᠦᠶᠡᠯᠢᠳ ᠠᠬᠠ ᠳᠡᠭᠦᠦ ( ᠡᠭᠡᠴᠢ ᠥᠬᠢᠨ ᠳᠡᠭᠦᠦ ) ᠭᠡᠵᠦ ᠳᠠᠭᠤᠳᠠᠯᠴᠠᠨᠠ᠃ ᠣᠪᠣᠭ ᠨᠢᠭᠡᠲᠡᠨ᠃
ᠪᠦᠯᠦ ᠠᠬᠠ ᠳᠡᠭᠦᠦ
ᠡᠭᠡᠴᠢ᠂ ᠥᠬᠢᠨ ᠳᠡᠭᠦᠦ ᠬᠣᠶᠠᠷ ᠤ᠋ᠨ ᠬᠡᠦᠬᠡᠳ᠂ ᠬᠣᠭᠣᠷᠣᠨᠳᠣ ᠪᠠᠨ ᠪᠦᠯᠦ ᠠᠬᠠ ᠳᠡᠭᠦᠦ ( ᠡᠭᠡᠴᠢ ᠥᠬᠢᠨ ᠳᠡᠭᠦᠦ ） ᠭᠡᠵᠦ ᠳᠠᠭᠤᠳᠠᠯᠴᠠᠨᠠ᠃ ᠪᠤᠰᠤᠳ ᠣᠪᠣᠭᠲᠠᠨ᠃
ᠨᠠᠭᠠ ( ᠲᠠᠭᠠᠷ )
ᠠᠬᠠ ᠥᠬᠢᠨ ᠳᠡᠭᠦᠦ ᠪᠤᠶᠤ ᠡᠰᠡᠬᠦᠯᠡ ᠡᠭᠡᠴᠢ ᠂ ᠳᠡᠭᠦᠦ ᠬᠣᠶᠠᠷ ᠤ᠋ᠨ ᠬᠡᠦᠬᠡᠳ ᠬᠣᠭᠣᠷᠣᠨᠳᠣ ᠪᠠᠨ ᠨᠠᠭᠠ ᠠᠬᠠ ᠳᠡᠭᠦᠦ ᠭᠡᠵᠦ ᠳᠠᠭᠤᠳᠠᠯᠴᠠᠨᠠ᠃
ᠨᠠᠭᠠ ᠭᠡᠳᠡᠭ ᠦᠭᠡ ᠡᠷᠲᠡᠨ ᠳ᠋ᠡᠭᠡᠨ ᠠᠬᠠ ( ᠨᠠᠰᠤ ᠪᠠᠷ ᠶᠡᠬᠡ ᠬᠦᠦ ) ᠂ ᠠᠭᠠ ( ᠨᠠᠰᠤ ᠪᠠᠷ ᠶᠡᠬᠡ ᠥᠬᠢᠨ ) ᠂ ᠨᠠᠭᠠ ᠠᠬᠠ ᠂ ( ᠥᠬᠢᠨ ᠳᠡᠭᠦᠦ ᠪᠤᠶᠤ ᠡᠭᠡᠴᠢ ᠬᠦᠦ ᠳᠡᠭᠦᠦ ᠬᠣᠶᠠᠷ ᠤ᠋ᠨ ᠬᠡᠦᠬᠡᠳ ᠬᠠᠷᠢᠯᠴᠠᠨ ᠳᠠᠭᠤᠳᠠᠯᠴᠠᠬᠤ ᠳᠠᠭᠤᠳᠠᠯᠭᠠ ) ᠭᠤᠷᠪᠠ ᠪᠦᠷ ᠨᠢᠭᠡ ᠦᠶᠡ ᠶ᠋ᠢᠨ ᠬᠡᠦᠬᠡᠳ ᠬᠣᠭᠣᠷᠣᠨᠳᠣ ᠪᠠᠨ ᠳᠠᠭᠤᠳᠠᠯᠴᠠᠭᠰᠠᠨ ᠢᠵᠢᠯᠢ ᠦᠶᠡ ᠪᠡᠨ ᠦᠵᠡᠭᠦᠯᠦᠭᠰᠡᠨ ᠳᠠᠭᠤᠳᠠᠯᠭᠠ ᠪᠠᠢᠯᠠ᠃
ᠬᠣᠵᠢᠮ ᠡᠨᠡ ᠦᠭᠡ ᠨᠢ ᠨᠠᠭᠠᠴᠤ ᠭᠡᠳᠡᠭ ᠦᠭᠡ ᠲᠡᠢ ᠬᠤᠳᠬᠤᠯᠳᠤᠭᠤᠯᠤᠨ ᠶᠠᠪᠤᠭᠠᠨ ᠳ᠋ᠠᠭᠠᠨ ᠨᠠᠭᠠᠴᠤ ᠭᠡᠳᠡᠭ ᠦᠭᠡ ᠶ᠋ᠢ ᠣᠷᠣᠯᠠᠵᠤ ᠨᠠᠭᠠ ᠠᠪᠤ ᠂ ᠨᠠᠭᠠ ᠡᠵᠢ ᠭᠡᠵᠦ ᠳᠠᠭᠤᠳᠠᠭᠰᠠᠭᠠᠷ ᠪᠠᠢᠭᠠᠳ ᠤᠤᠯ ᠤᠳᠬᠠ ( ᠨᠠᠭᠠᠴᠤ ) ᠶ᠋ᠢ ᠨᠢ ᠨᠢᠭᠡᠨᠲᠡ ᠠᠯᠳᠠᠭᠤᠯᠴᠢᠬᠠᠵᠠᠢ᠃ ᠮᠣᠩᠭᠣᠯ ᠳᠠᠭᠤᠳᠠᠯᠭᠠ ᠪᠠᠷ ᠶᠣᠰᠣᠴᠢᠯᠠᠨ ᠳᠠᠭᠤᠳᠠᠪᠠᠯ ᠨᠠᠭᠠᠴᠤ᠂ ᠨᠠᠭᠠ ᠡᠨᠡ ᠬᠣᠶᠠᠷ ᠦᠭᠡ ᠶ᠋ᠢᠨ ᠢᠯᠭᠠᠭᠠ ᠶ᠋ᠢ ᠮᠡᠳᠡᠵᠦ ᠪᠣᠯᠤᠨᠠ᠃ ᠮᠣᠩᠭᠣᠯ ᠤ᠋ᠨ ᠲᠥᠷᠥᠯ ᠤᠭᠰᠠᠭᠠ ᠶ᠋ᠢᠨ ᠳᠠᠭᠤᠳᠠᠯᠭᠠ ᠳ᠋ᠤ᠌ 《ᠠᠪᠠᠭᠠ᠂ ᠨᠠᠭᠠᠴᠤ 》ᠭᠡᠳᠡᠭ ᠬᠣᠶᠠᠷ ᠦᠭᠡ ᠡᠷᠬᠡᠪᠰᠢ ᠳᠡᠭᠡᠷᠡ ᠨᠢᠭᠡ ᠦᠶᠡ ᠶ᠋ᠢ ᠵᠢᠭᠠᠳᠠᠭ᠃ ᠵᠢᠱ᠌ᠢᠶᠡᠯᠡᠪᠡᠯ : ᠡᠬᠡ ᠶ᠋ᠢᠨ ᠠᠬᠠ᠂ ᠪᠡᠷᠭᠡᠨ ᠪᠤᠶᠤ ᠳᠡᠭᠦᠦ᠂ ᠳᠡᠭᠦᠦ ᠪᠡᠷᠢ ᠪᠦᠷ ᠥᠪᠡᠷ ᠲᠦ᠍ ᠨᠠᠭᠠᠴᠤ ᠠᠬᠠ᠂ ᠨᠠᠭᠠᠴᠤ ᠪᠡᠷᠭᠡᠨ ᠳᠠᠭᠤᠳᠠᠭᠳᠠᠨᠠ᠃ ᠲᠡᠷᠡᠴᠢᠯᠡᠨ ᠡᠬᠡ ᠶ᠋ᠢᠨ ᠡᠴᠢᠭᠡ ᠡᠬᠡ ᠥᠪᠡᠷ ᠲᠦ᠍ ᠨᠠᠭᠠᠴᠤ ᠡᠴᠢᠭᠡ᠂ ᠨᠠᠭᠠᠴᠤ ᠡᠬᠡ ᠭᠡᠵᠦ ᠳᠠᠭᠤᠳᠠᠭᠳᠠᠨᠠ᠃ ᠡᠨᠡ ᠨᠢ ᠨᠠᠭᠠᠴᠤ ᠭᠡᠳᠡᠭ ᠦᠭᠡ ᠶ᠋ᠢᠨ ᠳᠡᠭᠡᠷᠡ ᠨᠢᠭᠡ ᠦᠶᠡ ᠶ᠋ᠢ ᠵᠢᠭᠠᠵᠤ ᠪᠣᠢ ᠶ᠋ᠢ ᠲᠣᠳᠣ ᠵᠢᠭᠠᠵᠠᠢ᠃ ᠭᠡᠲᠡᠯᠡ ᠨᠠᠭᠠ ᠭᠡᠳᠡᠭ ᠦᠭᠡ᠂ ᠳᠡᠭᠡᠷᠡ ᠨᠢᠭᠡ ᠦᠶᠡ ᠶ᠋ᠢ ᠵᠢᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠳᠠᠭ᠃ ᠡᠨᠡ ᠨᠢ ᠳᠠᠷᠤᠢ ᠡᠨᠡ ᠬᠣᠶᠠᠷ ᠦᠭᠡ ᠨᠢᠭᠡ ᠪᠢᠰᠢ ᠪᠠᠢᠭᠰᠠᠨ ᠤ᠋ ᠭᠡᠷᠡᠴᠢ ᠪᠣᠯᠠᠢ᠃ ᠬᠠᠷᠠᠮᠰᠠᠯᠲᠠᠢ ᠨᠢ ᠥᠨᠥᠳᠥᠷ ᠨᠠᠭᠠ ᠤᠤᠯ ᠤᠳᠬᠠ ᠪᠠᠨ ᠠᠯᠳᠠᠵᠠᠢ᠃ ᠭᠡᠲᠡᠯᠡ ᠡᠨᠡ ᠳᠠᠭᠤᠳᠠᠯᠭᠠ ᠶᠡᠬᠡ ᠣᠨᠣᠪᠴᠢᠲᠠᠢ ᠪᠠᠢᠳᠠᠭ᠃ ᠨᠠᠭᠠ ᠶ᠋ᠢᠨ ᠨᠠ ᠨᠢ ᠨᠠᠭᠠᠴᠤ ᠶ᠋ᠢᠨ ᠨᠠ ᠪᠠᠢᠵᠤ᠂ ᠭᠠ ᠨᠢ ᠠᠭᠠ ᠪᠤᠶᠤ ᠠᠪᠠᠭᠠ ᠡᠭᠡᠴᠢ ᠶ᠋ᠢᠨ ᠭᠠ ᠪᠠᠢᠵᠤ᠂ ᠲᠤᠰ ᠦᠭᠡ ᠂ ᠡᠨᠡ ᠬᠣᠶᠠᠷ ᠦᠭᠡ ᠠᠴᠠ ᠲᠣᠪᠴᠢᠯᠠᠭᠳᠠᠨ ᠪᠦᠲᠦᠭᠰᠡᠨ᠂ ᠲᠤᠩ ᠣᠨᠣᠪᠴᠢᠲᠠᠢ ᠦᠭᠡ ᠪᠠᠢᠭᠰᠠᠨ ᠠᠵᠢ᠃
ᠲᠠᠭᠠᠷ ᠭᠡᠳᠡᠭ ᠦᠭᠡ ᠨᠢ ᠳᠠᠭᠤᠷᠴᠤᠳ ᠤ᠋ᠨ ᠬᠦ ᠵᠢᠦ ᠠᠬᠠ ᠳᠡᠭᠦᠦ ᠪᠡᠨ ᠬᠠᠷᠢᠯᠴᠠᠨ ᠳᠠᠭᠤᠳᠠᠬᠤ ᠳᠠᠭᠤᠳᠠᠯᠴᠠᠯᠭᠠ᠃ ᠮᠥᠨ ᠲᠡᠷᠡ ᠬᠠᠪᠢ ᠶ᠋ᠢᠨ ᠵᠠᠷᠢᠮ ᠮᠣᠩᠭᠣᠯᠴᠤᠳ ᠪᠠᠰᠠ ᠢᠩᠭᠢᠵᠦ ᠳᠠᠭᠤᠳᠠᠯᠴᠠᠳᠠᠭ᠃ ᠭᠡᠪᠡᠴᠦ ᠡᠨᠡ ᠨᠢ ᠬᠡᠪᠴᠢᠶᠡ ᠨᠢ ᠲᠤᠩ ᠪᠠᠭᠠ᠃
ᠪᠦᠯᠦ ᠭᠡᠳᠡᠭ ᠦᠭᠡ ᠨᠢ ᠤᠤᠯ ᠨᠢ ᠡᠭᠡᠴᠢ᠂ ᠥᠬᠢᠨ ᠳᠡᠭᠦᠦ ᠬᠣᠶᠠᠷ ᠤ᠋ᠨ ᠬᠡᠦᠬᠡᠳ ᠬᠣᠭᠣᠷᠣᠨᠳᠣ ᠪᠠᠨ ᠬᠠᠷᠢᠯᠴᠠᠨ ᠳᠠᠭᠤᠳᠠᠯᠴᠠᠳᠠᠭ ᠳᠠᠭᠤᠳᠠᠯᠭᠠ ᠪᠠᠢᠯᠠ᠃ ᠮᠠᠨ ᠤ᠋ ᠮᠣᠩᠭᠣᠯᠴᠤᠳ ᠣᠳᠣ ᠤᠯᠠᠮ ᠳᠥᠭᠥᠮ ᠳᠥᠲᠡᠯᠡᠬᠦ ᠶ᠋ᠢ ᠪᠣᠳᠣᠭᠠᠳ ᠨᠠᠭᠠ ᠪᠠᠨ ᠲᠠᠭ ᠬᠡᠷᠡᠭᠯᠡᠬᠦ ᠦᠭᠡᠢ ᠪᠥᠭᠡᠳ ᠪᠦᠷ ᠵᠢᠭᠡ ᠶ᠋ᠢᠨ ᠬᠢᠨᠢ ᠲᠠᠯᠠ ᠠ᠋ᠴᠠ ( ᠠᠬᠠ ᠳᠡᠭᠦᠦ ᠶ᠋ᠢᠨ ᠬᠡᠦᠬᠡᠳ ᠠᠪᠠᠭᠠ ᠡᠭᠡᠴᠢ ᠶ᠋ᠢᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠬᠡᠷᠬᠢᠨ ᠳᠠᠭᠤᠳᠠᠬᠤ ᠶ᠋ᠢ ᠨᠠᠷᠢᠨ ᠪᠣᠳᠣᠯᠬᠢᠯᠠᠬᠤ ) ᠦᠭᠡᠢ ᠪᠣᠳᠣᠯᠬᠢᠯᠠᠨ ᠪᠦᠷ ᠯᠡ ᠪᠦᠯᠦ ᠭᠡᠵᠦ ᠳᠠᠭᠤᠳᠠᠭᠠᠳ ᠪᠠᠢᠬᠤ ᠨᠢ ᠣᠯᠠᠨ ᠪᠣᠯᠤᠯᠠ ᠃ ᠭᠡᠪᠡᠴᠦ ᠢᠩᠭᠢᠵᠦ ᠳᠠᠭᠤᠳᠠᠬᠤ ᠨᠢ ᠣᠨᠣᠪᠴᠢ ᠮᠠᠭᠤᠲᠠᠢ ᠶ᠋ᠢ ᠪᠢᠳᠡ ᠮᠡᠳᠡᠯᠡ ᠃ ᠲᠡᠢᠨ ᠬᠦ᠌ ᠪᠢᠳᠡ᠂ ᠠᠯᠤᠰ ᠠ᠋ᠴᠠ ᠡᠷᠢᠬᠦ ᠪᠡᠷ ᠠᠪᠳᠠᠷᠠ ᠠᠴᠠ ᠪᠠᠨ ᠡᠷᠢ ᠭᠡᠭᠴᠢ ᠲᠠᠭᠠᠷ ᠢ ᠴᠦ᠍ ᠵᠢᠭᠡᠯᠡᠬᠦ ᠦᠭᠡᠢ ᠮᠥᠨ ᠤᠤᠯ ᠤ᠋ᠨ ᠨᠠᠭᠠ ᠪᠠᠷ ᠢ᠋ᠶ᠋ᠠᠨ ᠲᠣᠭᠲᠠᠭᠠᠴᠢᠬᠠᠶᠠ᠃
ᠨᠠᠭᠠᠨᠴᠢᠷ (ᠨᠠᠭᠠ ᠶ᠋ᠢᠨ ᠬᠡᠦᠬᠡᠳ)
ᠪᠡᠶᠡ ᠪᠠ ᠡᠭᠡᠴᠢ ( ᠥᠬᠢᠨ ᠳᠡᠭᠦᠦ ) ᠬᠣᠶᠠᠷ ᠠ᠋ᠴᠠ ᠭᠠᠷᠤᠭᠰᠠᠨ ᠬᠣᠶᠠᠳᠤᠭᠠᠷ ᠦᠶᠡ ᠶ᠋ᠢᠨ ᠬᠡᠦᠬᠡᠳ᠂ ᠮᠥᠨ ᠨᠠᠭᠠ ᠠᠬᠠ ᠳᠡᠭᠦᠦ ᠶ᠋ᠢᠨ ᠬᠡᠦᠬᠡᠳ ᠬᠣᠭᠣᠷᠣᠨᠳᠣ ᠪᠠᠨ ᠨᠠᠭᠠᠴᠢᠷ ᠠᠬᠠ ᠳᠡᠭᠦᠦᠰ ᠪᠣᠯᠤᠨᠠ᠃
ᠪᠦᠯᠦᠨᠴᠢᠷ
ᠪᠡᠶᠡ᠂ ᠪᠦᠯᠦ ᠶ᠋ᠢᠨ ᠬᠡᠦᠬᠡᠳ ᠢ᠋ ᠪᠦᠯᠦᠨᠴᠢᠷ ᠭᠡᠵᠦ ᠳᠠᠭᠤᠳᠠᠬᠤ ᠪᠠ ᠪᠦᠯᠦ ᠠᠬᠠ ᠳᠡᠭᠦᠦᠰ ᠬᠣᠭᠣᠷᠣᠨᠳᠣ ᠪᠠᠨ ᠪᠦᠯᠦᠨᠴᠢᠷ ᠠᠬᠠ ᠳᠡᠭᠦᠦ ᠪᠣᠯᠤᠨᠠ᠃
ᠠᠴᠢ
ᠠᠬᠠ ᠪᠤᠶᠤ ᠳᠡᠭᠦᠦ ᠶ᠋ᠢᠨ ᠬᠡᠦᠬᠡᠳ᠂ ᠥᠪᠡᠷ ᠲᠦ᠍ ᠠᠴᠢ ᠬᠦᠦ ᠪᠣᠯᠤᠨᠠ᠃ ᠡᠨᠡ ᠦᠭᠡ ᠶ᠋ᠢᠨ ᠤᠤᠯ ᠤᠳᠬᠠ ᠪᠣᠯ ᠤᠳᠤᠮ ᠤᠭᠰᠠᠭᠠ ᠳ᠋ᠤ᠌ ᠠᠴᠠ ᠰᠠᠯᠠᠭᠠ ᠦᠶᠡ ᠭᠠᠷᠤᠯᠠ ᠭᠡᠰᠡᠨ ᠤᠳᠬᠠ ᠲᠠᠢ ᠁
ᠠᠴᠢ ᠪᠡᠷᠢ
ᠠᠴᠢ ᠬᠦᠦ ᠳ᠋ᠦ᠍ ᠬᠠᠤᠯᠢ ᠶᠣᠰᠣ ᠪᠠᠷ ᠪᠠᠭᠤᠯᠭᠠᠭᠰᠠᠨ ᠥᠭᠡᠷᠡ ᠣᠪᠣᠭ ᠤ᠋ᠨ ᠡᠮᠡᠭᠲᠡᠢ᠃
ᠠᠴᠢᠨᠴᠢᠷ
ᠠᠴᠢ ᠬᠦᠦ ᠶ᠋ᠢᠨ ᠬᠦᠦ ᠃ ᠥᠪᠡᠷ ᠦ᠋ᠨ ᠠᠬᠠ ᠶ᠋ᠢᠨ ᠣᠴᠢ ᠬᠦᠦ ᠪᠣᠯᠤᠨᠠ᠃
ᠠᠴᠢᠨᠴᠢᠷ ᠪᠡᠷᠢ
ᠠᠴᠢᠴᠢᠷ ᠬᠦᠦ ᠶ᠋ᠢᠨ ᠬᠠᠤᠯᠢ ᠶᠣᠰᠣ ᠪᠠᠷ ᠬᠤᠷᠢᠮᠯᠠᠭᠰᠠᠨ ᠪᠡᠷᠢ᠃
ᠵᠢᠭᠡ
ᠡᠭᠡᠴᠢ ᠪᠠ ᠥᠬᠢᠨ ᠳᠡᠭᠦᠦ ᠶ᠋ᠢᠨ ᠬᠡᠦᠬᠡᠳ ᠥᠪᠡᠷ ᠲᠦ᠍ ᠵᠢᠭᠡ ᠪᠣᠯᠤᠨᠠ᠃
ᠵᠢᠭᠡ ᠪᠡᠷᠢ
ᠵᠢᠭᠡ ᠬᠦᠦ ᠳ᠋ᠦ᠍ ᠬᠠᠤᠯᠢ ᠶᠣᠰᠣ ᠪᠠᠷ ᠪᠠᠭᠤᠯᠭᠠᠭᠰᠠᠨ ᠪᠡᠷᠢ᠃
ᠵᠢᠭᠡᠨᠴᠢᠷ
ᠵᠢᠭᠡ ᠬᠦᠦ ᠶ᠋ᠢᠨ ᠬᠡᠦᠬᠡᠳ᠃ ᠥᠪᠡᠷ ᠦ᠋ᠨ ᠡᠭᠡᠴᠢ ᠪᠤᠶᠤ ᠥᠬᠢᠨ ᠳᠡᠭᠦᠦ ᠶ᠋ᠢᠨ ᠣᠴᠢ ( ᠣᠮᠪᠣᠯᠣ ) ᠬᠦᠦ ᠪᠣᠯᠤᠨᠠ᠃