ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠬᠣᠶᠠᠷ ᠂ ᠲᠥᠷᠥᠯ ᠰᠠᠳᠤᠨ ᠤ ᠳᠠᠭᠤᠳᠠᠯᠭᠠ ᠶᠢᠨ ᠪᠦᠯᠦᠭ 2 > Хөх зул – Боржигон Ванжал –" Хоёр ᠂ Төрөл садны дуудлагын бүлэг " 2
417ᠬᠣᠶᠠᠷ ᠂ ᠲᠥᠷᠥᠯ ᠰᠠᠳᠤᠨ ᠤ ᠳᠠᠭᠤᠳᠠᠯᠭᠠ ᠶᠢᠨ ᠪᠦᠯᠦᠭ – 2
ᠡᠴᠢᠭᠡ ᠶᠢᠨ ᠲᠠᠯᠠ ᠶᠢᠨ ᠲᠥᠷᠥᠯ ᠦᠨ ᠬᠤᠭᠤᠷᠤᠨᠳᠠᠬᠢ ᠳᠠᠭᠤᠳᠠᠯᠭᠠ
Эцгийн талын төрлийн хоорондох дуудлага
ᠡᠴᠢᠭᠡ
① ᠥᠪᠡᠷ ᠢ᠋ ᠡᠭᠦᠳᠦᠭᠰᠡᠨ ᠡᠷᠡᠭᠲᠡᠢ ᠬᠥᠮᠦᠨ ᠃ ᠠᠪᠤ ᠂ ᠡᠴᠢᠭᠡ ᠡᠬᠡ ᠭᠡᠳᠡᠭ ᠦᠭᠡ ᠶ᠋ᠢᠨ ᠡᠴᠢᠭᠡ ᠪᠣᠯᠤᠨᠠ ᠃
② ᠬᠠᠳᠠᠮ ᠡᠴᠢᠭᠡ : ᠡᠷᠡ ᠡᠮᠡ ᠬᠣᠶᠠᠷ ᠤ᠋ᠨ ᠂ ᠡᠷᠡ ᠶ᠋ᠢᠨ ᠡᠴᠢᠭᠡ ᠡᠮᠡ ᠳ᠋ᠦ᠍ ᠂ ᠡᠮᠡ ᠶ᠋ᠢᠨ ᠡᠴᠢᠭᠡ ᠡᠷᠡ ᠳ᠋ᠦ᠍ ᠴᠥᠮ ᠬᠠᠷᠢᠯᠴᠠᠨ ᠬᠠᠳᠠᠮ ᠡᠴᠢᠭᠡ ᠪᠣᠯᠤᠨᠠ᠃
ᠡᠨᠡ ᠬᠦ᠌ ᠶᠠᠰᠤ ᠮᠢᠬᠠᠨ ᠤ᠋ ᠲᠥᠷᠥᠯ ᠰᠠᠳᠤᠨ ᠠ᠋ᠴᠠ ᠭᠠᠳᠠᠨᠠ ᠪᠠᠰᠠ ᠡᠳᠦᠢ ᠲᠡᠳᠦᠢ ᠰᠦᠯᠪᠡᠭᠡ ᠪᠣᠯᠬᠤ ᠡᠴᠢᠭᠡᠰ ᠦ᠋ᠨ ᠳᠠᠭᠤᠳᠠᠯᠭᠠ ᠪᠣᠢ ᠃ ᠲᠤᠬᠠᠢᠯᠠᠪᠠᠯ :
③ ᠬᠣᠢᠲᠤ ᠡᠴᠢᠭᠡ : ᠡᠴᠢᠭᠡ ᠶ᠋ᠢᠨ ᠳᠠᠷᠠᠭᠠ ᠂ ᠡᠬᠡ ᠶ᠋ᠢᠨ ᠬᠠᠤᠯᠢ ᠶᠣᠰᠣ ᠪᠠᠷ ᠬᠣᠶᠠᠳᠠᠬᠢ ᠪᠤᠶᠤ ᠬᠡᠳᠦᠳᠦᠭᠡᠷ ᠤᠷᠤᠭᠯᠠᠭᠰᠠᠨ ᠨᠥᠬᠥᠷ᠃
④ ᠡᠷᠭᠦᠯᠲᠡ ᠡᠴᠢᠭᠡ : ᠪᠠᠰᠠ ᠲᠡᠵᠢᠭᠡᠭᠰᠡᠨ ᠡᠴᠢᠭᠡ ᠭᠡᠳᠡᠭ᠃ ᠪᠡᠶᠡ ᠶ᠋ᠢ ᠭᠡᠷ ᠲᠡᠭᠡᠨ ᠡᠷᠭᠦᠨ ᠠᠪᠴᠤ ᠦᠷᠡᠴᠢᠯᠡᠭᠡᠳ ᠥᠪᠡᠷ ᠦ᠋ᠨ ᠬᠦᠦ ᠥᠬᠢᠨ ᠢ᠋ᠶ᠋ᠡᠨ ᠪᠣᠯᠭᠠᠭᠰᠠᠨ ᠡᠷᠡᠭᠲᠡᠢ ᠶ᠋ᠢ ᠡᠷᠭᠦᠯᠲᠡ ᠡᠴᠢᠭᠡ ᠭᠡᠬᠦ ᠪᠤᠶᠤ ᠲᠡᠵᠢᠭᠡᠭᠰᠡᠨ ᠡᠴᠢᠭᠡ ᠭᠡᠨᠡ᠃
⑤ ᠬᠥᠬᠥᠯᠲᠦ ᠡᠴᠢᠭᠡ : ᠡᠬᠡ ᠶ᠋ᠢᠨ ᠲᠠᠢᠯᠪᠤᠷᠢ ᠳ᠋ᠠᠬᠢ ᠬᠥᠬᠥᠯᠲᠦ ᠡᠬᠡ ᠳ᠋ᠦ᠍ ᠦᠵᠡ᠃
⑥ ᠮᠥᠷᠭᠥᠭᠦᠯᠦᠭᠰᠡᠨ ᠡᠴᠢᠭᠡ : ᠥᠬᠢᠨ ᠤᠷᠤᠭᠯᠠᠵᠤ ᠦᠰᠦ ᠬᠠᠭᠠᠯᠤᠨ ᠭᠡᠵᠢᠭᠡ ᠡᠪᠬᠡᠬᠦ ᠦᠶᠡ ᠬᠠᠷᠠ ᠴᠠᠭᠠᠨ ᠦᠷᠡ ᠲᠡᠭᠰᠢ ᠬᠦᠦ ᠬᠡᠦᠬᠡᠨ ᠪᠦᠷᠢᠨ ᠢᠪᠡᠭᠡᠯ ᠵᠢᠯᠲᠡᠢ ᠡᠮᠡᠭᠲᠡᠢ ᠶ᠋ᠢ ᠵᠠᠯᠠᠵᠤ ᠦᠰᠦ ᠪᠡᠨ ᠬᠠᠭᠠᠯᠤᠭᠤᠯᠤᠭᠠᠳ ᠡᠬᠡ ᠲᠠᠨᠢᠳᠠᠭ ( ᠪᠣᠯᠭᠠᠳᠠᠭ )᠃ ᠡᠭᠦᠨ ᠢ᠋ ᠮᠥᠷᠭᠥᠭᠦᠯᠦᠭᠰᠡᠨ ᠡᠬᠡ ᠭᠡᠳᠡᠭ ᠃ ᠡᠨᠡ ᠡᠮᠡᠭᠲᠡᠢ ᠶ᠋ᠢᠨ ᠡᠷᠡᠭᠲᠡᠢ ᠶ᠋ᠢ ᠮᠥᠷᠭᠥᠭᠦᠯᠦᠭᠰᠡᠨ ᠡᠴᠢᠭᠡ ᠭᠡᠨᠡ᠃
⑦ ᠬᠠᠭᠤᠷᠠᠢ ᠡᠴᠢᠭᠡ : ᠪᠠᠰᠠ ᠰᠢᠷᠭᠤᠭᠤᠯᠤᠭᠰᠠᠨ ᠡᠴᠢᠭᠡ ᠭᠡᠵᠦ ᠬᠡᠯᠡᠳᠡᠭ ᠭᠠᠵᠠᠷ ᠪᠣᠢ ᠃ ᠶᠠᠮᠠᠷ ᠨᠢᠭᠡᠨ ᠰᠢᠯᠲᠠᠭᠠᠨ ᠢ᠋ᠶ᠋ᠠᠷ ᠬᠡᠦᠬᠡᠳ ᠲᠣᠭᠲᠠᠬᠤ ᠦᠭᠡᠢ ᠡᠴᠡ ᠣᠯᠠᠨ ᠬᠡᠦᠬᠡᠳ ᠲᠡᠢ ᠬᠥᠮᠦᠨ ᠦ᠌ ᠬᠣᠷᠮᠣᠢ ᠳᠣᠣᠭᠤᠷ ᠰᠢᠷᠭᠤᠭᠤᠯᠬᠤ ᠂ ᠲᠦᠰᠢᠵᠦ ᠲᠤᠯᠬᠤ ᠬᠥᠮᠦᠨ ᠦᠭᠡᠢ ᠬᠥᠷᠥᠩᠭᠡ ᠦᠭᠡᠢ ᠥᠨᠥᠴᠢᠳ ᠪᠤᠶᠤ ᠶᠠᠳᠠᠭᠤᠴᠤᠳ ᠂ ᠬᠠᠯᠠᠭᠤᠨ ᠡᠯᠢᠭᠡᠳᠡᠨ ᠢ᠋ ᠣᠯᠵᠤ ᠲᠦᠰᠢᠬᠦ ᠵᠣᠷᠢᠭᠰᠠᠨ ᠬᠦᠰᠡᠯ ᠢ ᠪᠡᠶᠡᠯᠡᠭᠦᠯᠬᠦ ᠶ᠋ᠢᠨ ᠲᠥᠯᠥᠭᠡ ᠪᠠᠶᠠᠨ ᠨᠣᠶᠠᠨ ᠬᠥᠮᠦᠨ ᠢ᠋ ᠲᠦᠰᠢᠬᠦ ᠵᠡᠷᠭᠡ ᠪᠤᠰᠤᠳ ᠣᠪᠣᠭ ᠤᠭᠰᠠᠭᠠᠨ ᠤ᠋ ᠬᠥᠮᠦᠨ ᠳ᠋ᠦ᠍ ᠬᠠᠳᠠᠭ ᠲᠠᠯᠪᠢᠨ ᠮᠥᠷᠭᠥᠵᠦ ᠡᠴᠢᠭᠡ ᠪᠣᠯᠭᠠᠭᠰᠠᠨ ᠢ᠋ ᠬᠠᠭᠤᠷᠠᠢ ᠡᠴᠢᠭᠡ ᠭᠡᠨᠡ ᠃ ᠬᠠᠭᠤᠷᠠᠢ ᠡᠴᠢᠭᠡ ᠶ᠋ᠢᠨ ᠪᠦᠰᠡᠭᠦᠢ ᠶ᠋ᠢ ᠬᠠᠭᠤᠷᠠᠢ ᠡᠬᠡ ᠭᠡᠨᠡ᠃
ᠡᠬᠡ
① ᠥᠪᠡᠷ ᠢ᠋ ᠡᠭᠦᠳᠦᠭᠰᠡᠨ ᠡᠮᠡᠭᠲᠡᠢ ᠬᠥᠮᠦᠨ᠃ ᠡᠵᠢ᠂ ᠮᠥᠮᠥ᠂ ᠡᠮᠧ ( ᠡᠬᠡ ᠭᠡᠰᠡᠨ ᠮᠠᠨᠵᠤ ᠦᠭᠡ )᠂ ᠡᠴᠢᠭᠡ ᠡᠬᠡ ᠭᠡᠳᠡᠭ ᠦᠭᠡ ᠶ᠋ᠢᠨ ᠡᠬᠡ ᠃
② ᠬᠠᠳᠠᠮ ᠡᠬᠡ ᠂ ᠡᠷᠡ ᠡᠮᠡ ᠬᠣᠶᠠᠷ ᠤ᠋ᠨ ᠂ ᠡᠷᠡ ᠶ᠋ᠢᠨ ᠡᠬᠡ ᠡᠮᠡ ᠳ᠋ᠦ᠍ ᠂ ᠡᠮᠡ ᠶ᠋ᠢᠨ ᠡᠬᠡ ᠡᠷᠡ ᠳ᠋ᠦ᠍ ᠴᠥᠮ ᠬᠠᠷᠢᠯᠴᠠᠨ ᠬᠠᠳᠠᠮ ᠡᠬᠡ ᠪᠣᠯᠤᠨᠠ ᠃
ᠡᠨᠡ ᠬᠦ᠌ ᠶᠠᠰᠤ ᠮᠢᠬᠠᠨ ᠤ᠋ ᠲᠥᠷᠥᠯ ᠰᠠᠳᠤᠨ ᠠ᠋ᠴᠠ ᠭᠠᠳᠠᠨᠠ ᠪᠠᠰᠠ ᠰᠦᠯᠪᠡᠭᠡ ᠪᠣᠯᠬᠤ ᠡᠬᠡ ᠶ᠋ᠢᠨ ᠳᠠᠭᠤᠳᠠᠯᠭᠠ ᠣᠯᠠᠨ ᠪᠣᠢ ᠃ ᠲᠤᠬᠠᠢᠯᠠᠪᠠᠯ :
③ ᠬᠣᠢᠲᠤ ᠡᠬᠡ : ᠡᠬᠡ ᠶ᠋ᠢᠨ ᠳᠠᠷᠠᠭᠠ ᠡᠴᠢᠭᠡ ᠶ᠋ᠢᠨ ᠬᠠᠤᠯᠢ ᠶᠣᠰᠣ ᠪᠠᠷ ᠬᠣᠶᠠᠳᠠᠬᠢ ᠪᠤᠶᠤ ᠬᠡᠲᠦᠲᠡᠬᠢ ᠤᠷᠤᠭᠯᠠᠭᠰᠠᠨ ᠨᠥᠬᠥᠷ᠃
④ ᠡᠷᠭᠦᠯᠲᠡ ᠡᠬᠡ : ᠪᠠᠰᠠ ᠲᠡᠵᠢᠭᠡᠭᠰᠡᠨ ᠡᠬᠡ ᠭᠡᠳᠡᠭ ᠃ ᠪᠡᠶᠡ ᠶ᠋ᠢ ᠭᠡᠷ ᠲᠡᠭᠡᠨ ᠡᠷᠭᠦᠨ ᠠᠪᠴᠤ ᠦᠷᠡᠴᠢᠯᠡᠭᠡᠳ ᠥᠪᠡᠷ ᠦ᠋ᠨ ᠬᠦᠦ ᠥᠬᠢᠨ ᠢ᠋ᠶ᠋ᠡᠨ ᠪᠣᠯᠭᠠᠭᠰᠠᠨ ᠡᠮᠡᠭᠲᠡᠢ ᠶ᠋ᠢ ᠡᠷᠭᠦᠯᠲᠡ ᠡᠬᠡ ᠪᠤᠶᠤ ᠲᠡᠵᠢᠭᠡᠭᠰᠡᠨ ᠡᠬᠡ ᠭᠡᠨᠡ ᠃
⑤ ᠬᠥᠬᠥᠯᠲᠦ ᠡᠬᠡ : ᠨᠢᠯᠬᠠ ᠦᠶᠡ ᠂ ᠡᠬᠡ ᠶ᠋ᠢᠨ ᠰᠦ ᠳᠤᠲᠠᠭᠳᠠᠭᠰᠠᠨ ᠠ᠋ᠴᠠ ᠪᠤᠶᠤ ᠡᠰᠡᠬᠦᠯᠡ ᠶᠠᠮᠠᠷ ᠨᠢᠭᠡᠨ ᠰᠢᠯᠲᠠᠭᠠᠨ ᠠ᠋ᠴᠠ ᠪᠤᠰᠤᠳ ᠤ᠋ᠨ ᠪᠦᠰᠡᠭᠦᠢ ᠶ᠋ᠢ ᠵᠠᠯᠠᠵᠤ ᠬᠥᠬᠥᠭᠦᠯᠵᠦ ᠥᠰᠬᠡᠭᠰᠡᠨ ᠲᠡᠷᠡ ᠡᠬᠡᠨᠡᠷ ᠢ᠋ ᠬᠥᠬᠥᠯᠲᠦ ᠡᠬᠡ ᠭᠡᠨᠡ ᠃ ᠬᠥᠬᠥᠯᠲᠦ ᠡᠬᠡ ᠶ᠋ᠢᠨ ᠡᠷᠡ ᠶ᠋ᠢ ᠬᠥᠬᠥᠯᠲᠦ ᠡᠴᠢᠭᠡ ᠭᠡᠨᠡ ᠃
⑥ ᠮᠥᠷᠭᠥᠭᠦᠯᠦᠭᠰᠡᠨ ᠡᠬᠡ : ᠥᠬᠢᠨ ᠤᠷᠤᠭᠯᠠᠵᠤ ᠦᠰᠦ ᠬᠠᠭᠠᠯᠤᠨ ᠭᠡᠵᠢᠭᠡ ᠡᠪᠬᠡᠬᠦ ᠦᠶᠡ ᠂ ᠬᠠᠷᠠ ᠴᠠᠭᠠᠨ ᠦᠷᠡ ᠲᠡᠭᠰᠢ ᠬᠦᠦ ᠥᠬᠢᠨ ᠪᠦᠷᠢᠨ ᠢᠪᠡᠭᠡᠯ ᠵᠢᠯᠲᠡᠢ ᠡᠮᠡᠭᠲᠡᠢ ᠶ᠋ᠢ ᠵᠠᠯᠠᠵᠤ ᠦᠰᠦ ᠪᠡᠨ ᠬᠠᠭᠠᠯᠤᠭᠤᠯᠤᠭᠠᠳ ᠡᠬᠡ ᠲᠠᠨᠢᠳᠠᠭ(ᠪᠣᠯᠭᠠᠳᠠᠭ )᠃ ᠡᠨᠡ ᠡᠮᠡᠭᠲᠡᠢ ᠶ᠋ᠢ ᠮᠥᠷᠭᠥᠭᠦᠯᠦᠭᠰᠡᠨ ᠡᠬᠡ ᠭᠡᠳᠡᠭ᠃ ᠬᠠᠭᠤᠷᠠᠢ ᠡᠬᠡ ᠶ᠋ᠢᠨ ᠲᠠᠢᠯᠪᠤᠷᠢ ᠶ᠋ᠢ ᠡᠴᠢᠭᠡ ᠶ᠋ᠢᠨ ᠲᠠᠢᠯᠪᠤᠷᠢ ᠳ᠋ᠠᠬᠢ ᠬᠠᠭᠤᠷᠠᠢ ᠡᠴᠢᠭᠡ ᠳ᠋ᠦ᠍ ᠦᠵᠡ᠃
ᠡᠪᠦᠭᠡ
① ᠡᠴᠢᠭᠡ ᠶ᠋ᠢᠨ ᠡᠴᠢᠭᠡ ᠪᠣᠯᠠᠢ ᠃
② ᠬᠠᠳᠠᠮ ᠡᠪᠦᠭᠡ : ᠬᠠᠳᠠᠮ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠡᠴᠢᠭᠡ ᠶ᠋ᠢ ᠡᠷᠡ ᠡᠮᠡ ᠬᠣᠶᠠᠷ ᠬᠠᠷᠢᠯᠴᠠᠨ ᠪᠦᠷ ᠬᠠᠳᠠᠮ ᠡᠪᠦᠭᠡ ᠭᠡᠨᠡ ᠃
ᠡᠨᠡ ᠬᠦ᠌ ᠶᠠᠰᠤ ᠮᠢᠬᠠᠨ ᠤ᠋ ᠬᠡᠯᠬᠢᠶᠡ ᠡᠴᠡ ᠭᠠᠳᠠᠨᠠ ᠪᠠᠰᠠ ᠡᠳᠦᠢ ᠲᠡᠳᠦᠢ ᠰᠦᠯᠪᠡᠭᠡ ᠪᠣᠯᠬᠤ ᠳᠠᠭᠤᠳᠠᠯᠭᠠ ᠪᠣᠢ ᠃
③ ᠬᠣᠢᠲᠤ ᠡᠪᠦᠭᠡ : ᠡᠪᠦᠭᠡ ᠶ᠋ᠢᠨ ᠳᠠᠷᠠᠭᠠ ᠡᠮᠡᠭᠡ ᠲᠡᠢ ᠬᠠᠤᠯᠢ ᠶᠣᠰᠣ ᠪᠠᠷ ᠤᠷᠤᠭᠯᠠᠨ ᠰᠠᠭᠤᠭᠰᠠᠨ ᠬᠣᠶᠠᠳᠠᠬᠢ ᠪᠤᠶᠤ ᠬᠡᠳᠦᠳᠡᠬᠢ ᠨᠥᠬᠥᠷ᠃
④ ᠡᠷᠭᠦᠯᠲᠡ ᠡᠪᠦᠭᠡ : ᠡᠴᠢᠭᠡ ᠶ᠋ᠢᠨ ᠡᠷᠭᠦᠯᠲᠡ ᠡᠴᠢᠭᠡ ᠶ᠋ᠢ ᠡᠷᠭᠦᠯᠲᠡ ᠡᠪᠦᠭᠡ ᠭᠡᠨᠡ ᠃
⑤ ᠬᠥᠬᠥᠯᠲᠦ ᠡᠪᠦᠭᠡ : ᠡᠴᠢᠭᠡ ᠶ᠋ᠢᠨ ᠬᠥᠬᠥᠯᠲᠦ ᠡᠬᠡ ᠶ᠋ᠢᠨ ᠡᠷᠡᠭᠲᠡᠢ ᠶ᠋ᠢ ᠬᠥᠬᠥᠯᠲᠦ ᠡᠪᠦᠭᠡ ᠭᠡᠨᠡ ᠃
⑥ ᠮᠥᠷᠭᠥᠭᠦᠯᠦᠭᠰᠡᠨ ᠡᠪᠦᠭᠡ ᠄ ᠡᠴᠢᠭᠡ ᠡᠬᠡ ᠶ᠋ᠢᠨ ᠮᠥᠷᠭᠥᠭᠦᠯᠦᠭᠰᠡᠨ ᠡᠬᠡ ᠶ᠋ᠢᠨ ᠡᠷᠡᠭᠲᠡᠢ ᠶ᠋ᠢ ᠮᠥᠷᠭᠥᠭᠦᠯᠦᠭᠰᠡᠨ ᠡᠪᠦᠭᠡ ᠭᠡᠨᠡ ᠃
⑦ ᠬᠠᠭᠤᠷᠠᠢ ᠡᠪᠦᠭᠡ : ᠡᠴᠢᠭᠡ ᠡᠬᠡ ᠶ᠋ᠢᠨ ᠬᠠᠭᠤᠷᠠᠢ ᠡᠴᠢᠭᠡ ᠶ᠋ᠢ ᠬᠠᠭᠤᠷᠠᠢ ᠡᠪᠦᠭᠡ ᠭᠡᠨᠡ᠃
ᠡᠮᠡᠭᠡ
① ᠡᠴᠢᠭᠡ ᠶ᠋ᠢᠨ ᠡᠬᠡ ᠶ᠋ᠢ ᠡᠮᠡᠭᠡ ᠭᠡᠨᠡ ᠃
② ᠬᠠᠳᠠᠮ ᠡᠮᠡᠭᠡ : ᠡᠷᠡ ᠡᠮ ᠬᠣᠶᠠᠷ ᠬᠠᠳᠠᠮ ᠡᠴᠢᠭᠡ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠡᠬᠡ ᠶ᠋ᠢ ᠬᠠᠷᠢᠯᠴᠠᠨ ᠪᠦᠷ ᠬᠠᠳᠠᠮ ᠡᠮᠡᠭᠡ ᠭᠡᠨᠡ ᠃
ᠡᠨᠡ ᠬᠦ᠌ ᠶᠠᠰᠤ ᠴᠢᠰᠤᠨ ᠤ᠋ ᠲᠥᠷᠥᠯ ᠰᠠᠳᠤᠨ ᠠ᠋ᠴᠠ ᠭᠠᠳᠠᠨᠠ ᠪᠠᠰᠠ ᠡᠳᠦᠢ ᠲᠡᠳᠦᠢ ᠰᠦᠯᠪᠡᠭᠡ ᠪᠣᠯᠬᠤ ᠡᠮᠡᠭᠡ ᠶ᠋ᠢᠨ ᠳᠠᠭᠤᠳᠠᠯᠭᠠ ᠪᠣᠢ᠃
③ ᠬᠣᠢᠲᠤ ᠡᠮᠡᠭᠡ : ᠡᠴᠢᠭᠡ ᠶ᠋ᠢᠨ ᠬᠣᠢᠲᠤ ᠡᠬᠡ ᠶ᠋ᠢ ᠬᠣᠢᠲᠤ ᠡᠮᠡᠭᠡ ᠭᠡᠨᠡ ᠃
④ ᠬᠥᠬᠥᠯᠲᠦ ᠡᠮᠡᠭᠡ : ᠡᠴᠢᠭᠡ ᠶ᠋ᠢ ᠬᠥᠬᠥᠭᠦᠯᠵᠦ ᠥᠰᠬᠡᠭᠰᠡᠨ ᠡᠬᠡ ᠶ᠋ᠢ ᠬᠥᠬᠥᠯᠲᠦ ᠡᠮᠡᠭᠡ ᠭᠡᠨᠡ ᠃
⑤ ᠮᠥᠷᠭᠥᠭᠦᠯᠦᠭᠰᠡᠨ ᠡᠮᠡᠭᠡ : ᠡᠴᠢᠭᠡ ᠡᠬᠡ ᠶ᠋ᠢᠨ ᠮᠥᠷᠭᠥᠭᠦᠯᠦᠭᠰᠡᠨ ᠡᠬᠡ ᠶ᠋ᠢ ᠬᠡᠯᠡᠨᠡ ᠃
⑥ ᠡᠷᠭᠦᠯᠲᠡ ᠡᠮᠡᠭᠡ : ᠡᠴᠢᠭᠡ ᠶ᠋ᠢᠨ ᠡᠷᠭᠦᠯᠲᠡ ᠡᠬᠡ ᠶ᠋ᠢ ᠡᠷᠭᠦᠯᠲᠡ ᠡᠮᠡᠭᠡ ᠭᠡᠨᠡ ᠃
⑦ ᠬᠠᠭᠤᠷᠠᠢ ᠡᠮᠡᠭᠡ : ᠡᠴᠢᠭᠡ ᠡᠬᠡ ᠶ᠋ᠢᠨ ᠬᠠᠭᠤᠷᠠᠢ ᠡᠴᠢᠭᠡ ᠶ᠋ᠢᠨ ᠡᠬᠡᠨᠡᠷ ᠢ᠋ ᠬᠠᠭᠤᠷᠠᠢ ᠡᠮᠡᠭᠡ ᠭᠡᠨᠡ ᠃
ᠡᠯᠦᠨᠴᠡ ᠡᠪᠦᠭᠡ
ᠡᠴᠢᠭᠡ ᠶ᠋ᠢᠨ ᠡᠪᠦᠭᠡ ᠶ᠋ᠢ ᠡᠯᠦᠨᠴᠡ ᠡᠪᠦᠭᠡ ᠭᠡᠨᠡ ᠃ ᠣᠢᠷᠠ ᠦᠶᠡ ᠡᠴᠡ ᠬᠥᠮᠦᠰ ᠡᠯᠳᠴᠡ ᠪᠡᠨ ᠦᠵᠡᠬᠦ ᠨᠢ ᠬᠣᠪᠣᠷᠳᠠᠭᠰᠠᠨ ᠢ᠋ᠶ᠋ᠠᠷ ᠡᠯᠳᠴᠡ ᠡᠴᠡ ᠳᠡᠭᠡᠭᠰᠢᠬᠢ ᠦᠶᠡ ᠳᠠᠭᠤᠳᠠᠯᠭᠠ (ᠬᠠᠳᠠᠮ ᠡᠯᠦᠨᠴᠡ ᠡᠪᠦᠭᠡ ᠂ ᠬᠣᠢᠲᠤ ᠡᠯᠦᠨᠴᠡ ᠡᠪᠦᠭᠡ ᠂ ᠡᠷᠭᠦᠯᠲᠡ ᠡᠯᠦᠨᠴᠡ ᠡᠪᠦᠭᠡ ᠵᠡᠷᠭᠡ )ᠨᠢ ᠴᠦ᠍ ᠴᠥᠭᠡᠨ ᠳᠤᠷᠠᠳᠤᠭᠳᠠᠬᠤ ᠪᠣᠯᠵᠠᠢ ᠃ ᠭᠡᠪᠡᠴᠦ ᠡᠨᠡ ᠬᠦ᠌ ᠦᠶᠡ ᠳᠠᠭᠤᠳᠠᠯᠭᠠ ᠨᠢ ᠨᠢᠭᠡᠨᠲᠡ ᠥᠨᠳᠥᠷ ᠡᠪᠦᠭᠡ ᠬᠦᠷᠲᠡᠯᠡ ᠲᠣᠭᠲᠠᠵᠤ ᠬᠡᠪᠰᠢᠵᠡᠢ ᠃ ᠡᠭᠦᠨ ᠢ᠋ ᠮᠡᠳᠡᠭᠰᠡᠨ ᠰᠠᠭᠤᠷᠢ ᠳᠡᠭᠡᠷᠡ ᠳᠣᠷᠣᠭᠰᠢ ᠪᠢᠳᠡ ᠲᠡᠷᠡ ᠪᠦᠬᠦᠨ ᠢ᠋ ᠪᠢᠴᠢᠬᠦ ᠦᠭᠡᠢ ᠃ ᠭᠠᠭᠴᠠ ᠬᠦ᠌ ᠶᠠᠰᠤ ᠮᠢᠬᠠᠨ ᠤ᠋ ᠲᠥᠷᠥᠯ ᠢ᠋ᠶ᠋ᠡᠨ ᠭᠣᠣᠯ ᠪᠣᠯᠭᠠᠵᠤ ᠂ ᠡᠪᠦᠭᠡ ᠳᠡᠭᠡᠳᠦᠰ ᠬᠦᠷᠲᠡᠯᠡ ᠲᠠᠨᠢᠯᠴᠠᠭᠤᠯᠤᠶᠠ᠃
ᠡᠯᠦᠨᠴᠡ ᠡᠮᠡᠭᠡ ᠡᠴᠢᠭᠡ ᠶ᠋ᠢᠨ ᠡᠮᠡᠭᠡ ᠶ᠋ᠢ ᠡᠯᠦᠨᠴᠡ ᠡᠮᠡᠭᠡ ᠭᠡᠨᠡ ᠃
ᠬᠤᠯᠤᠨᠴᠠ ᠡᠪᠦᠭᠡ ᠡᠪᠦᠭᠡ ᠶ᠋ᠢᠨ ᠡᠪᠦᠭᠡ ᠶ᠋ᠢ ᠬᠤᠯᠤᠨᠴᠠ ᠡᠪᠦᠭᠡ ᠭᠡᠨᠡ ᠃
ᠬᠤᠯᠤᠨᠴᠠ ᠡᠮᠡᠭᠡ ᠡᠪᠦᠭᠡ ᠶ᠋ᠢᠨ ᠡᠮᠡᠭᠡ ᠶ᠋ᠢ ᠬᠤᠯᠤᠨᠴᠠ ᠡᠮᠡᠭᠡ ᠭᠡᠨᠡ ᠃
ᠡᠯᠦᠨ ᠡᠪᠦᠭᠡ ᠡᠯᠦᠨᠴᠡ ᠡᠪᠦᠭᠡ ᠶ᠋ᠢᠨ ᠡᠪᠦᠭᠡ ᠶ᠋ᠢ ᠡᠯᠦᠨ ᠡᠪᠦᠭᠡ ᠭᠡᠨᠡ ᠃
ᠡᠯᠦᠨ ᠡᠮᠡᠭᠡ ᠡᠯᠦᠨᠴᠡ ᠡᠪᠦᠭᠡ ᠶ᠋ᠢᠨ ᠡᠮᠡᠭᠡ ᠶ᠋ᠢ ᠡᠯᠦᠨ ᠡᠮᠡᠭᠡ ᠭᠡᠨᠡ ᠃
ᠬᠤᠯᠤᠨ ᠡᠪᠦᠭᠡ ᠬᠤᠯᠤᠨᠴᠠ ᠡᠪᠦᠭᠡ ᠶ᠋ᠢᠨ ᠡᠪᠦᠭᠡ ᠶ᠋ᠢ ᠬᠤᠯᠤᠨ ᠡᠪᠦᠭᠡ ᠭᠡᠨᠡ ᠃
ᠬᠤᠯᠤᠨ ᠡᠮᠡᠭᠡ ᠬᠤᠯᠤᠨᠴᠠ ᠡᠪᠦᠭᠡ ᠶ᠋ᠢᠨ ᠡᠮᠡᠭᠡ ᠶ᠋ᠢ ᠬᠤᠯᠤᠨ ᠡᠮᠡᠭᠡ ᠭᠡᠨᠡ ᠃
ᠬᠣᠯᠪᠣᠭᠠ ᠡᠪᠦᠭᠡ ᠡᠯᠦᠨ ᠡᠪᠦᠭᠡ ᠶ᠋ᠢᠨ ᠡᠪᠦᠭᠡ ᠶ᠋ᠢ ᠬᠡᠯᠡᠨᠡ ᠃
ᠬᠣᠯᠪᠣᠭᠠ ᠡᠮᠡᠭᠡ ᠡᠯᠦᠨ ᠡᠪᠦᠭᠡ ᠶ᠋ᠢᠨ ᠡᠮᠡᠭᠡ ᠶ᠋ᠢ ᠬᠡᠯᠡᠨᠡ ᠃
ᠥᠨᠳᠥᠷ ᠡᠪᠦᠭᠡ ᠬᠤᠯᠤᠨ ᠡᠪᠦᠭᠡ ᠶ᠋ᠢᠨ ᠡᠪᠦᠭᠡ ᠶ᠋ᠢ ᠬᠡᠯᠡᠨᠡ ᠃
ᠥᠨᠳᠥᠷ ᠡᠮᠡᠭᠡ ᠬᠤᠯᠤᠨ ᠡᠪᠦᠭᠡ ᠶ᠋ᠢᠨ ᠡᠮᠡᠭᠡ ᠶ᠋ᠢ ᠬᠡᠯᠡᠨᠡ ᠃
ᠡᠪᠦᠭᠡ ᠳᠡᠭᠡᠳᠦᠰ ᠶᠠᠰᠤ ᠮᠢᠬᠠᠨ ᠤ᠋ ᠲᠥᠷᠥᠯ ᠤᠭᠰᠠᠭᠠ ᠶ᠋ᠢ ᠡᠭᠦᠰᠬᠡᠭᠰᠡᠨ
ᠬᠠᠮᠤᠭ ᠳᠡᠭᠡᠳᠦ ᠦᠶᠡ ᠶ᠋ᠢᠨ ᠬᠢᠨ ᠢ᠋ ᠬᠡᠯᠡᠨᠡ᠃