ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠨᠢᠭᠡ ᠂ ᠵᠣᠴᠢᠯᠭᠠ ᠶᠢᠨ ᠪᠦᠯᠦᠭ > Хөх зул – Боржигон Ванжал –" Нэг ᠂ Зочлогын бүлэг"
326ᠨᠢᠭᠡ ᠂ ᠵᠣᠴᠢᠯᠭᠠ ᠶᠢᠨ ᠪᠦᠯᠦᠭ
ᠡᠩ ᠦ᠋ᠨ ᠴᠠᠭ᠂ ᠨᠣᠬᠠᠢ ᠬᠣᠷᠭᠣᠭᠣᠬᠤ ᠲᠠᠢ ᠵᠡᠷᠭᠡ ᠭᠠᠳᠠᠭᠰᠢ ᠬᠠᠷᠠᠵᠤ ᠂ ᠬᠥᠮᠦᠨ ᠢᠷᠡᠬᠦ ᠦᠵᠡᠭᠳᠡᠪᠡᠯ ᠂ ᠨᠣᠬᠠᠢ ᠪᠣᠰᠬᠤ ᠠ᠋ᠴᠠ ᠡᠮᠦᠨᠡ ᠪᠤᠶᠤ ᠵᠡᠷᠭᠡ ᠪᠡᠷ ᠭᠠᠷᠴᠤ ᠨᠣᠬᠠᠢ ᠪᠠᠨ ᠵᠠᠩᠲᠤᠨ ᠵᠣᠭᠰᠣᠭᠠᠵᠤ ᠂ ᠬᠥᠮᠦᠨ ᠢ᠋ ᠬᠠᠵᠠᠬᠤ ᠪᠤᠶᠤ ᠤᠨᠤᠭᠠᠨ ᠠ᠋ᠴᠠ ᠤᠨᠠᠭᠠᠬᠤ ᠶ᠋ᠢ ᠰᠡᠷᠭᠡᠢᠯᠡᠨᠡ᠃ ᠢᠷᠡᠭᠰᠡᠨ ᠵᠣᠴᠢᠨ ᠶᠠᠪᠠᠭᠠᠨ ᠪᠣᠯ ᠨᠣᠬᠠᠢ ᠪᠠᠨ ᠰᠠᠢᠲᠤᠷ ᠬᠣᠷᠢᠵᠤ ᠂ ᠠᠬᠠᠮᠠᠳ ᠦᠶᠡ ᠶ᠋ᠢᠨ ᠪᠣᠯ ᠰᠥᠬᠥᠷᠡᠵᠦ ᠠᠮᠤᠷ ᠠᠰᠠᠭᠤᠨ ᠂ ᠬᠣᠢᠨᠠ ᠠ᠋ᠴᠠ ᠨᠢ ᠳᠠᠭᠠᠵᠤ ᠶᠠᠪᠤᠨᠠ ᠃ ᠤᠨᠤᠭᠠ ᠲᠠᠢ ᠬᠥᠮᠦᠨ ᠪᠣᠯ ᠂ ᠢᠯᠠᠩᠭᠤᠶᠠ ᠡᠪᠦᠭᠡᠳ ᠬᠥᠭᠰᠢᠳ ( ᠬᠦᠨᠳᠦᠲᠦ ᠵᠣᠴᠢᠨ ᠪᠣᠯ ) ᠂ ᠱᠣᠩ ᠤ᠋ᠨ ᠴᠠᠭᠠᠨᠠ ᠲᠣᠰᠣᠨ ᠭᠦᠶᠦᠵᠦ ᠂ ᠨᠣᠬᠠᠢ ᠪᠠᠨ ᠬᠣᠷᠢᠵᠤ ᠵᠠᠢᠯᠠᠭᠤᠯᠤᠭᠠᠳ ᠂ ᠨᠠᠮᠤᠭᠤ ᠳᠠᠷᠤᠤᠬᠠᠨ ᠰᠥᠬᠥᠷᠡᠵᠦ ᠠᠮᠤᠷ ᠠᠢᠯᠠᠳᠬᠠᠭᠠᠳ ᠴᠠᠭᠠᠰᠢ ᠣᠴᠢᠨ ᠤᠨᠤᠭᠠᠨ ᠤ᠋ ᠬᠢᠨᠢ ᠵᠢᠯᠣᠭᠣ ᠠ᠋ᠴᠠ ᠠᠪᠴᠤ ᠵᠣᠭᠰᠣᠭᠠᠨ ᠰᠤᠭᠤᠳᠠᠨ ᠪᠠᠭᠤᠯᠭᠠᠵᠤ ᠤᠨᠤᠭᠠ ᠶ᠋ᠢ ᠨᠢ ᠱᠣᠩ ᠪᠤᠶᠤ ᠵᠡᠯᠡ ᠡᠴᠡ ᠤᠶᠠᠵᠤ ᠬᠣᠢᠨᠠ ᠠ᠋ᠴᠠ ᠨᠢ ᠰᠢᠳᠠᠷ ᠳᠠᠭᠠᠵᠤ ᠶᠠᠪᠤᠨᠠ ᠃ ᠬᠡᠷᠪᠡ ᠬᠢᠵᠢᠶᠡᠯ ᠪᠤᠶᠤ ᠥᠪᠡᠷ ᠡᠴᠡ ᠠᠬᠠ ᠬᠥᠮᠦᠨ ᠪᠣᠯ ᠠᠮᠤᠷ ᠡᠷᠢᠭᠡᠳ ᠮᠣᠷᠢ ᠶ᠋ᠢ ᠨᠢ ᠠᠪᠴᠤ ᠤᠶᠠᠵᠤ ᠦᠭᠨᠡ ᠃ ᠥᠪᠡᠷ ᠡᠴᠡ ᠳᠡᠭᠦᠦ ᠂ ᠨᠡᠩ ᠵᠠᠯᠠᠭᠤᠴᠤᠳ ᠬᠡᠦᠬᠡᠳ ᠢ᠋ ᠪᠣᠯ ᠵᠥᠪᠬᠡᠨ ᠨᠣᠬᠠᠢ ᠪᠠᠨ ᠰᠠᠢᠨ ᠬᠠᠷᠠᠵᠤ ᠬᠣᠷᠢᠵᠤ ᠥᠭᠨᠡ ᠃
ᠭᠡᠷ ᠲᠦ᠍ ᠪᠠᠭᠤᠯᠭᠠᠬᠤ ᠶᠣᠰᠣᠨ
ᠡᠭᠦᠳᠡᠨ ᠳ᠋ᠦ᠍ ᠥᠭᠡᠷᠡ ᠬᠥᠮᠦᠨ ᠪᠠᠢᠬᠤ ᠦᠭᠡᠢ ᠪᠣᠯ ᠨᠣᠬᠠᠢ ᠬᠣᠷᠢᠭᠰᠠᠨ ᠬᠥᠮᠦᠨ ᠡᠮᠦᠨᠡ ᠨᠢ ᠭᠠᠷᠴᠤ ᠂ ᠮᠣᠩᠭᠣᠯ ᠭᠡᠷ ᠪᠣᠯ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠭᠦᠳᠡᠨ ᠦ᠌ ᠪᠠᠷᠠᠭᠤᠨ ᠵᠠᠬᠠ ᠠ᠋ᠴᠠ ᠪᠠᠷᠢᠨ ᠡᠷᠭᠦᠵᠦ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠨ ᠳᠡᠭᠡᠭᠰᠢ ᠬᠠᠨᠳᠤᠭᠤᠯᠤᠨ ᠳᠡᠯᠭᠡᠨ ᠵᠠᠩᠭᠠᠵᠤ《ᠭᠡᠷ ᠲᠦ᠍ ᠪᠠᠭᠤ !》᠂《ᠳᠣᠲᠣᠭᠰᠢ ᠰᠠᠭᠠᠲᠠ!》᠂《ᠮᠣᠷᠢᠯᠠᠵᠤ ᠰᠠᠭᠠᠲᠠ !》᠂《ᠵᠠ! ᠰᠠᠭᠠᠲᠠᠶᠠ !》ᠭᠡᠬᠦ ᠵᠡᠷᠭᠡ ᠪᠣᠯᠪᠠᠰᠤᠨ ᠦᠭᠡ ᠶ᠋ᠢ ᠵᠣᠴᠢᠨ ᠤ᠋ ᠪᠠᠨ ᠪᠠᠢᠳᠠᠯ ᠳ᠋ᠤ᠌ ᠲᠣᠬᠢᠷᠠᠭᠤᠯᠤᠨ ᠬᠡᠷᠡᠭᠯᠡᠵᠦ ᠳᠣᠲᠣᠭᠰᠢ ᠵᠠᠯᠠᠨᠠ ᠃ ᠬᠡᠷᠪᠡ ᠂ ᠰᠢᠷᠣᠢ ᠲᠣᠭᠣᠰᠬᠠᠨ ᠪᠠᠢᠰᠢᠩ ᠪᠣᠯ ᠬᠠᠭᠠᠯᠭᠠ ᠪᠠᠨ ᠨᠡᠭᠡᠭᠡᠴᠢᠭᠡᠳ ᠮᠥᠨ ᠭᠠᠷ ᠢ᠋ᠶ᠋ᠠᠨ ᠵᠠᠩᠭᠠᠨ ᠳᠡᠯᠭᠡᠵᠦ 《ᠪᠠᠢᠰᠢᠩ ᠳ᠋ᠤ᠌ ᠪᠠᠭᠤ ! 》 ᠭᠡᠬᠦ ᠮᠡᠲᠦ ᠪᠡᠷ ᠳᠡᠭᠡᠷᠡᠬᠢ ᠬᠦᠨᠳᠦᠳᠬᠡᠯ ᠦᠭᠡᠰ ᠢ᠋ ᠵᠣᠴᠢᠨ ᠤ᠋ ᠪᠠᠨ ᠡᠷᠬᠢᠮ ᠳᠡᠰ ᠢ᠋ ᠦᠵᠡᠨ ᠠᠯᠢ ᠲᠣᠬᠢᠷᠠᠮᠵᠢᠲᠠᠢ ᠶ᠋ᠢ ᠨᠢ ᠰᠣᠩᠭᠣᠨ ᠬᠡᠷᠡᠭᠯᠡᠵᠦ ᠳᠣᠲᠣᠭᠰᠢ ᠵᠠᠯᠠᠨᠠ᠃
ᠭᠡᠷ ᠲᠦ᠍ ᠰᠠᠭᠤᠯᠭᠠᠬᠤ ᠶᠣᠰᠣᠨ
ᠮᠣᠩᠭᠣᠯ ᠭᠡᠷ ᠦ᠋ᠨ ᠵᠠᠢ ᠶ᠋ᠢ ᠠᠰᠢᠭᠯᠠᠬᠤ ᠡᠷᠲᠡᠨ ᠦ᠌ ᠤᠯᠠᠮᠵᠢᠯᠠᠯ᠂ ᠨᠡᠢᠭᠡᠮ ᠦ᠋ᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠥᠭᠵᠢᠯ ᠦ᠋ᠨ ᠱᠠᠲᠤᠨ ᠳ᠋ᠤ᠌ ᠥᠭᠡᠷᠡᠴᠢᠯᠡᠭᠳᠡᠵᠦ ᠢᠷᠡᠭᠰᠡᠨ ᠴᠦ᠍ ᠵᠠᠩ ᠵᠠᠩᠰᠢᠯ ᠤ᠋ᠨ ᠭᠣᠣᠯ ᠭᠣᠣᠯ ᠰᠢᠨᠵᠢ ᠨᠦ᠍ᠭᠦᠳ ᠲᠤᠬᠠᠢ ᠶ᠋ᠢᠨ ᠦᠨᠳᠦᠰᠦᠲᠡᠨ ᠦ᠌ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠪᠣᠯᠤᠨ ᠤᠯᠠᠮᠵᠢᠯᠠᠯ ᠢ᠋ᠶ᠋ᠠᠷ ᠬᠣᠷᠢᠳᠤᠭᠠᠷ ᠵᠠᠭᠤᠨ ᠤ᠋ ᠳᠥᠴᠢᠭᠡᠳ ᠣᠨ ᠬᠦᠷᠲᠡᠯᠡ ᠦᠷᠭᠦᠯᠵᠢᠯᠡᠭᠰᠡᠨ ᠪᠢᠯᠡ᠃ ᠭᠡᠰᠡᠨ ᠴᠦ᠍ ᠵᠠᠷᠢᠮ ᠵᠠᠩ ᠵᠠᠩᠰᠢᠯ ᠣᠨᠴᠠᠯᠢᠭ ᠨᠢ ᠥᠭᠡᠷᠡᠴᠢᠯᠡᠯᠲᠡ ᠲᠡᠢ ᠤᠶᠠᠯᠳᠤᠨ ᠰᠢᠨᠡ ᠶᠣᠰᠣ ᠵᠠᠩᠰᠢᠯ ᠢ᠋ᠶ᠋ᠠᠷ ᠰᠣᠯᠢᠭᠳᠠᠨ ᠥᠭᠡᠷᠡᠴᠢᠯᠡᠭᠳᠡᠭᠰᠡᠨ ᠢ᠋ᠶ᠋ᠡᠷ ᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠵᠠᠢ ᠲᠠᠯᠠᠪᠠᠢ ᠶ᠋ᠢ ᠰᠢᠨᠡ ᠲᠣᠭᠲᠠᠭᠰᠠᠨ ᠵᠠᠩ ᠵᠠᠩᠰᠢᠯ ᠤ᠋ᠨ ᠳᠠᠭᠠᠤ ᠬᠤᠪᠢᠷᠠᠳᠠᠭ ᠪᠣᠯᠤᠭᠰᠠᠨ ᠢ᠋ ᠮᠠᠨ ᠤ᠋ ᠣᠷᠣᠨ ᠤ᠋ ᠨᠠᠰᠤ ᠪᠠᠷ ᠳᠠᠷᠠᠭᠠᠯᠠᠨ ᠰᠠᠭᠤᠬᠤ ᠵᠡᠷᠭᠡ ᠢᠯᠡᠷᠡᠯ ᠭᠡᠷᠡᠴᠢᠯᠡᠵᠦ ᠪᠠᠢᠨᠠ᠃
ᠠᠯᠢᠪᠠ ᠬᠦᠨᠳᠦᠲᠦ ᠵᠣᠴᠢᠨ ᠢ᠋ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠬᠣᠢᠮᠣᠷ ᠲᠤ᠌ ᠰᠠᠭᠤᠯᠭᠠᠨᠠ᠃ ᠬᠡᠷᠪᠡ ᠶᠡᠬᠡ ᠳᠠᠷᠤᠭᠠ ᠵᠢᠩᠰᠡᠲᠡᠨ ᠨᠠᠷ ᠶᠠᠪᠤᠵᠤ ᠪᠠᠢᠪᠠᠯ ᠳᠠᠷᠤᠭᠠ ᠶ᠋ᠢᠨ ᠶᠡᠬᠡ ᠪᠠᠭᠠ ᠪᠠᠷ ᠳᠠᠷᠠᠭᠠᠯᠠᠨ ᠰᠠᠭᠤᠯᠭᠠᠨᠠ᠃ ᠲᠡᠢᠮᠦ ᠪᠢᠰᠢ ᠡᠩ ᠦ᠋ᠨ ᠬᠡᠳᠦᠨ ᠬᠥᠮᠦᠨ ᠶᠠᠪᠤᠵᠤ ᠪᠠᠢᠪᠠᠯ ᠨᠠᠰᠤᠨ ᠤ᠋ ᠶᠡᠬᠡ ᠪᠠᠭᠠ ᠪᠤᠶᠤ ᠦᠶᠡ ᠶ᠋ᠢᠨ ᠶᠡᠬᠡ ᠪᠠᠭᠠ ᠪᠠᠷ ᠳᠡᠰ ᠳᠠᠷᠠᠭᠠᠯᠠᠨ ᠰᠠᠭᠤᠯᠭᠠᠨᠠ᠃
ᠡᠷᠡᠭᠲᠡᠢ ᠵᠠᠯᠠᠭᠤᠴᠤᠳ ᠪᠤᠶᠤ ᠬᠡᠦᠬᠡᠳ ᠢ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠬᠥᠯ ᠳ᠋ᠦ᠍ ᠰᠠᠭᠤᠯᠭᠠᠨᠠ ᠃ ᠡᠮᠡᠭᠲᠡᠢᠴᠦᠳ ᠢ ᠶᠡᠷᠦᠩᠬᠡᠢ ᠳ᠋ᠡᠭᠡᠨ ᠭᠡᠷ ᠦ᠋ᠨ ᠵᠡᠭᠦᠨ ᠬᠣᠢᠮᠣᠷ ᠪᠣᠯᠤᠨ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠰᠠᠭᠤᠯᠭᠠᠨᠠ᠃
ᠮᠡᠨᠳᠦᠯᠡᠬᠦ ᠶᠣᠰᠣᠨ
ᠰᠠᠭᠤᠯᠭᠠᠵᠤ ᠪᠠᠷᠠᠭᠰᠠᠨ ᠤ᠋ ᠳᠠᠷᠠᠭᠠ ᠠᠮᠤᠷ ᠠᠢᠯᠠᠳᠬᠠᠵᠤ ᠬᠥᠬᠦᠦᠷ ᠰᠣᠯᠢᠯᠴᠠᠨᠠ ᠃ ᠲᠡᠷᠡᠴᠢᠯᠡᠨ ᠪᠡᠶᠡ ᠶ᠋ᠢᠨ ᠮᠡᠨᠳᠦ ᠄《ᠲᠠᠨ ᠤ᠋ ᠪᠡᠶᠡ ᠯᠠᠭᠱᠠᠨ ᠲᠤᠩᠭᠠᠯᠠᠭ ᠤᠤ? 》᠂《 ᠲᠠᠨ ᠤ᠋ ᠪᠡᠶᠡ ᠲᠡᠩᠬᠡᠭᠡ ᠰᠠᠢᠨ ? 》᠂ 《ᠲᠠᠨ ᠤ᠋ ᠪᠡᠶᠡ ᠰᠠᠢᠨ ? 》᠂ 《ᠲᠠ ᠰᠠᠢᠨ ? 》 ᠭᠡᠬᠦ ᠮᠡᠲᠦ ᠶ᠋ᠢᠨ ᠠᠮᠤᠷ ᠤ᠋ᠨ ᠦᠭᠡᠰ ᠢ᠋ ᠢᠷᠡᠭᠰᠡᠨ ᠵᠣᠴᠢᠨ ᠤ᠋ ᠶᠡᠬᠡᠰ ᠪᠠᠭᠠᠰ ᠲᠤ᠌ ᠲᠠᠭᠠᠷᠠᠭᠤᠯᠤᠨ ᠠᠯᠢ ᠵᠣᠬᠢᠰᠲᠠᠢ ᠶ᠋ᠢ ᠬᠡᠷᠡᠭᠯᠡᠵᠦ ᠮᠡᠨᠳᠦᠴᠢᠯᠡᠯ ᠬᠦᠷᠭᠡᠨᠡ᠃ ᠤᠷᠢᠳ ᠢ᠋ᠶ᠋ᠠᠷ ᠭᠡᠷ ᠦ᠋ᠨ ᠮᠡᠨᠳᠦ ᠄《ᠲᠠᠨ ᠤ᠋ ᠭᠡᠷ ᠬᠣᠲᠠᠯᠠᠭᠠᠷ ᠪᠦᠷ ᠮᠡᠨᠳᠦ ᠤᠤ ?》᠂ 《 ᠲᠠᠨ ᠤ᠋ ᠭᠡᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠦᠷ ᠰᠠᠢᠨ ? 》᠂ 《ᠭᠡᠷ ᠲᠦ᠍ ᠴᠢᠨᠢ ᠪᠦᠷ ᠰᠠᠢᠨ ? 》ᠭᠡᠬᠦ ᠮᠡᠲᠦ ᠪᠡᠷ ᠢᠷᠡᠭᠰᠡᠨ ᠵᠣᠴᠢᠨ ᠳ᠋ᠤ᠌ ᠠᠯᠢ ᠵᠣᠬᠢᠰᠲᠠᠢ ᠪᠠᠷ ᠠᠮᠤᠷ ᠡᠷᠢᠨᠡ᠃
ᠳᠠᠷᠠᠭᠠ ᠨᠢ ᠤᠯᠠᠷᠢᠯ ᠤ᠋ᠨ ᠮᠡᠨᠳᠦ : 《ᠮᠠᠯ ᠮᠡᠨᠳᠦ ᠬᠠᠪᠤᠷᠵᠢᠵᠤ ᠪᠠᠢᠨᠠ ᠤᠤ ? 》᠂ 《ᠭᠠᠮᠰᠢᠭ ᠵᠤᠳ ᠦᠭᠡᠢ ᠬᠠᠪᠤᠷᠵᠢᠵᠤ ᠪᠠᠢᠨᠠ ᠤᠤ ?》᠂ 《ᠪᠣᠷᠣᠭᠠᠨ ᠨᠣᠭᠣᠭᠠ ᠲᠠᠢ ᠵᠤᠨᠵᠢᠵᠤ ᠪᠠᠢᠨᠠ ᠤᠤ ? 》᠂《ᠥᠨᠢᠷ ᠥᠳᠬᠡᠨ ᠲᠥᠯ ᠲᠡᠢ ᠵᠤᠨᠵᠢᠵᠤ ᠪᠠᠢᠨᠠ ᠤᠤ ? 》᠂ 《ᠲᠠᠷᠭᠤᠨ ᠲᠠᠪᠠᠲᠠᠢ ᠨᠠᠮᠤᠷᠵᠢᠵᠤ ᠪᠠᠢᠨᠠ ᠤᠤ ? 》᠂ 《 ᠲᠠᠷᠠᠭ ᠠᠢᠷᠠᠭ ᠡᠯᠪᠡᠭ ᠨᠠᠮᠤᠷᠵᠢᠵᠤ ᠪᠠᠢᠨᠠ ᠤᠤ ?》᠂ 《ᠮᠠᠯ ᠲᠠᠷᠭᠤ ᠲᠠᠢ ᠡᠪᠦᠯᠵᠢᠵᠦ ᠪᠠᠢᠨᠠ ᠤᠤ ?》᠂ 《 ᠴᠠᠰᠤ ᠵᠤᠳ ᠦᠭᠡᠢ ᠡᠪᠦᠯᠵᠢᠵᠦ ᠪᠠᠢᠨᠠ ᠤᠤ ? 》ᠭᠡᠬᠦ ᠮᠡᠲᠦ᠃
ᠳᠠᠷᠠᠭᠠ ᠨᠢ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠮᠡᠨᠳᠦ ᠠᠰᠠᠭᠤᠳᠠᠭ ᠴᠤ᠌ ᠪᠣᠢ᠃ 《ᠮᠠᠯ ᠰᠦᠷᠦᠭ ᠮᠡᠨᠳᠦ ?》᠂ 《ᠥᠨᠢᠷ ᠲᠥᠯ ᠲᠣᠰᠤᠯᠠ ?》᠂ 《 ᠮᠠᠯ ᠤ᠋ᠨ ᠣᠨᠳᠣᠷᠣᠯᠲᠠ ᠰᠠᠢᠨ ?》᠂ 《ᠮᠠᠯ ᠤ᠋ᠨ ᠴᠠᠢᠷᠠᠯᠲᠠ ᠰᠠᠢᠨ ?》᠂ 《ᠮᠠᠯ ᠤ᠋ᠨ ᠲᠠᠷᠭᠤ ᠰᠠᠢᠨ ? 》ᠭᠡᠬᠦ ᠮᠡᠲᠦ᠃
ᠳᠠᠷᠠᠭᠠ ᠨᠢ ᠰᠣᠨᠢᠨ ᠰᠣᠨᠣᠰᠬᠠᠯ :《ᠵᠠ ! ᠰᠣᠨᠢᠨ ᠶᠠᠭᠤ ᠲᠠᠢ ? 》᠂ 《ᠬᠥᠮᠦᠨ ᠬᠠᠷᠠ ᠶᠠᠪᠤᠵᠤ ᠪᠠᠢᠨᠠ ᠤᠤ ?》᠂ 《ᠴᠢᠬᠢᠨ ᠳ᠋ᠦ᠍ ᠴᠢᠮᠡᠭ ᠪᠣᠯᠤᠮᠠᠷ ᠴᠡᠭᠡᠵᠢᠨ ᠳ᠋ᠦ᠍ ᠭᠡᠭᠡ ᠳᠤᠰᠤᠮᠠᠷ ᠴᠢᠨᠦ ᠬᠡᠯᠡᠬᠦ ᠡᠴᠡ᠂ ᠮᠢᠨᠦ ᠰᠣᠨᠣᠰᠬᠤ ᠠ᠋ᠴᠠ ᠰᠣᠨᠢᠨ ᠰᠣᠨᠣᠰᠬᠠᠯ ᠶᠠᠭᠤ ᠲᠠᠢ ? 》ᠭᠡᠬᠦ ᠮᠡᠲᠦ ᠬᠠᠷᠢᠯᠴᠠᠨ ᠠᠰᠠᠭᠤᠯᠴᠠᠨᠠ᠃
ᠴᠠᠢᠯᠠᠬᠤ ᠂ ᠰᠥᠩᠨᠡᠬᠦ ᠂ ᠪᠤᠳᠠᠭᠠᠯᠠᠬᠤ ᠶᠣᠰᠣᠨ
ᠳᠡᠭᠡᠷᠡᠬᠢ ᠮᠡᠲᠦ ᠮᠡᠨᠳᠦᠴᠢᠯᠡᠵᠦ ᠪᠠᠢᠬᠤ ᠶ᠋ᠢᠨ ᠠᠩ ᠳ᠋ᠤ᠌ ᠴᠠᠢ ᠬᠡᠳᠦᠢᠨ ᠣᠷᠣᠵᠤ ᠠᠶᠠᠭᠠᠯᠠᠭᠰᠠᠨ ᠪᠠᠢᠳᠠᠭ᠃ ᠥᠷᠥᠮᠡ ᠂ ᠠᠭᠠᠷᠤᠤᠯ ᠂ ᠪᠣᠯᠭᠣᠭᠰᠠᠨ ᠪᠤᠳᠠᠭᠠ᠂ ᠮᠢᠬᠠ ᠶ᠋ᠢ ᠪᠠᠢᠬᠤ ᠪᠠᠷ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠰᠢᠷᠡᠬᠡᠨᠡ ᠦᠷᠦᠭᠰᠡᠨ ᠪᠠᠢᠳᠠᠭ᠃ ᠢᠩᠭᠢᠵᠦ ᠵᠢᠭᠠᠯ ᠤᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠪᠣᠳᠣᠩ ᠲᠠᠢ ᠰᠠᠭᠠᠯᠢ ᠶ᠋ᠢᠨ ᠠᠷᠢᠬᠢ ᠭᠠᠷᠭᠠᠵᠤ ᠬᠡᠮᠨᠡᠬᠦ ᠪᠤᠶᠤ ᠴᠡᠭᠡ ᠭᠠᠷᠭᠠᠨ ᠪᠠᠷᠢᠭᠰᠠᠨ ᠪᠠᠢᠳᠠᠭ᠃ ᠡᠭᠦᠨ ᠦ᠌ ᠳᠠᠷᠠᠭᠠ ᠢᠷᠡᠭᠰᠡᠨ ᠵᠣᠴᠢᠨ ᠤ᠋ ᠬᠦᠨᠳᠦ ᠬᠥᠩᠭᠡᠨ ᠬᠦᠨᠳᠦᠯᠡᠪᠡᠰᠦ ᠵᠦᠢᠲᠡᠢ ᠡᠰᠡ ᠶ᠋ᠢ ᠦᠵᠡᠵᠦ ᠂ ᠤᠭᠤᠴᠠ ᠪᠠᠵᠠᠭᠠᠬᠤ ᠬᠣᠭᠣᠯᠠ ᠬᠢᠬᠦ ᠵᠡᠷᠭᠡ ᠪᠡᠨ ᠲᠣᠭᠲᠠᠭᠠᠨ ᠳᠠᠢᠯᠠᠯᠭᠠ ᠬᠢᠨᠡ᠃
ᠦᠳᠡᠯᠲᠡ ᠶ᠋ᠢᠨ ᠶᠣᠰᠣᠨ
ᠢᠷᠡᠭᠰᠡᠨ ᠵᠣᠴᠢᠨ ᠤᠴᠢᠷ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠪᠠᠷᠠᠭᠠᠳ ᠭᠠᠷᠬᠤ ᠶ᠋ᠢᠨ ᠦᠶᠡ ᠭᠡᠷ ᠦ᠋ᠨ ᠡᠵᠡᠨ ᠤᠷᠢᠳ ᠢ᠋ᠶ᠋ᠠᠷ ᠭᠠᠷᠴᠤ ᠨᠣᠬᠠᠢ ᠬᠣᠷᠢᠵᠤ ᠠᠬᠠᠮᠠᠳ ᠬᠥᠮᠦᠨ ᠢ᠋ ᠪᠣᠯ ᠮᠣᠷᠢ ᠶ᠋ᠢ ᠨᠢ ᠠᠪᠴᠤ ᠣᠯᠣᠩ ᠡᠮᠡᠭᠡᠯ ᠢ᠋ ᠨᠢ ᠵᠠᠰᠠᠵᠤ᠂ ᠰᠤᠭᠤᠳᠠᠨ ᠮᠣᠷᠳᠠᠭᠤᠯᠳᠠᠭ᠃ ᠡᠩ ᠦ᠋ᠨ ᠬᠥᠮᠦᠨ ᠳ᠋ᠦ᠍ ᠨᠣᠬᠠᠢ ᠪᠠᠨ ᠰᠠᠢᠲᠤᠷ ᠬᠣᠷᠢᠵᠤ ᠥᠭᠳᠡᠭ᠃ ᠢᠷᠡᠭᠰᠡᠨ ᠵᠣᠴᠢᠨ ᠰᠠᠯᠬᠤ ᠳ᠋ᠠᠭᠠᠨ ᠄ 《 ᠲᠠ ᠨᠠᠷ ᠰᠠᠢᠨ ᠰᠠᠭᠤᠵᠤ ᠪᠠᠢᠭᠠᠷᠠᠢ !》ᠭᠡᠵᠦ ᠲᠠᠯᠠᠷᠬᠠᠯ ᠬᠡᠯᠡᠵᠦ ᠭᠠᠷᠤᠨᠠ᠃ ᠬᠣᠴᠣᠷᠬᠤ ᠬᠥᠮᠦᠰ 《ᠵᠠ ! ᠲᠠ ᠰᠠᠢᠨ ᠶᠠᠪᠤ ᠳᠠ !》᠂ 《ᠵᠠ ᠂ ᠲᠠ ᠵᠠᠮ ᠳ᠋ᠠᠭᠠᠨ ᠰᠠᠢᠨ ᠰᠠᠢᠬᠠᠨ ᠶᠠᠪᠤ ᠳᠠ ! 》ᠭᠡᠵᠦ ᠬᠠᠷᠢᠭᠤ ᠬᠡᠯᠡᠵᠦ ᠮᠣᠷᠳᠠᠭᠤᠯᠳᠠᠭ᠃
ᠬᠡᠷᠪᠡ ᠢᠷᠡᠭᠰᠡᠨ ᠵᠣᠴᠢᠳ ᠡᠷᠭᠢᠯᠲᠡ ᠪᠡᠯᠡᠭ ᠲᠡᠢ ᠢᠷᠡᠭᠰᠡᠨ ᠪᠣᠯ ᠪᠡᠯᠡᠭ ᠦ᠋ᠨ ᠬᠠᠷᠢᠭᠤ ᠥᠭᠬᠦ ( ᠬᠣᠯᠠ ᠶ᠋ᠢᠨ ᠵᠣᠴᠢᠨ ᠬᠠᠷᠢᠭᠤ ᠣᠴᠢᠵᠤ ᠳᠡᠢᠯᠬᠦ ᠦᠭᠡᠢ ᠪᠠᠢᠳᠠᠯ ᠲᠠᠢ ᠦᠶᠡ ) ᠪᠠ ᠡᠩ ᠦ᠋ᠨ ᠪᠠᠢᠳᠠᠯ ᠳ᠋ᠤ᠌ ᠰᠠᠪᠠ ᠬᠣᠭᠣᠰᠣᠨ ᠶᠠᠪᠤᠭᠤᠯᠬᠤ ᠦᠭᠡᠢ ᠂ ᠡᠷᠬᠡᠪᠰᠢ ᠨᠢᠭᠡᠨ ᠲᠣᠬᠢᠷᠠᠭᠰᠠᠨ ᠪᠠᠭᠠ ᠶᠠᠭᠤᠮᠠ ᠰᠠᠪᠠᠨ ᠳ᠋ᠤᠨᠢ ᠬᠢᠵᠦ ᠶᠠᠪᠤᠭᠤᠯᠳᠠᠭ ᠃ ᠶᠠᠭ ᠥᠭᠬᠦ ᠶᠠᠭᠤᠮᠠ ᠦᠭᠡᠢ ᠪᠣᠯ ᠪᠣᠯᠭᠣᠭᠰᠠᠨ ᠪᠤᠳᠠᠭᠠ ᠠ᠋ᠴᠠ ᠪᠠᠨ ᠠᠳᠬᠤ ᠂ ᠴᠢᠮᠬᠢ ᠪᠡᠷ ᠬᠢᠵᠦ ᠪᠤᠴᠠᠭᠠᠨᠠ ᠃ ᠰᠠᠪᠠ ᠬᠣᠭᠣᠰᠣᠨ ᠪᠤᠴᠠᠭᠠᠳᠠᠭ ᠦᠭᠡᠢ ᠃