ᠣᠷᠣᠢ ᠦᠭᠡᠢ ᠰᠦᠮᠡ – ᠠᠷᠪᠠ ᠶᠢᠰᠦ ᠂ ᠣᠯᠠᠨ ᠬᠠᠭᠠᠯᠭᠠᠲᠤ ᠰᠤᠪᠤᠷᠭᠠ Оройгүй сүм – Арав ес ᠂ Олон хаалгат суварга - Oroigui sum 19
821ᠠᠷᠪᠠ ᠶᠢᠰᠦ ᠂ ᠣᠯᠠᠨ ᠬᠠᠭᠠᠯᠭᠠᠲᠤ ᠰᠤᠪᠤᠷᠭᠠ
ᠲᠩᠷᠢ ᠣᠳᠣ ᠪᠠᠷ ᠪᠠᠶᠠᠨ
ᠳᠠᠯᠠᠢ ᠤᠰᠤ ᠪᠠᠷ ᠪᠠᠶᠠᠨ
ᠪᠤᠷᠬᠠᠨ ᠤ᠋ ᠱᠠᠪᠢ ᠶ᠋ᠢᠨ ᠪᠦᠷᠢᠨ ᠡᠮᠦᠰᠬᠡᠯ ᠲᠡᠢ ᠰᠠᠩᠵᠢ ᠭᠡᠰᠦᠯ ᠬᠤᠪᠴᠠᠰᠤᠨ ᠳ᠋ᠠᠭᠠᠨ ᠡᠭᠦᠷᠲᠦᠵᠦ ᠬᠠᠯᠠᠭᠤᠴᠠᠭᠰᠠᠭᠠᠷ ᠬᠠᠰᠢᠶᠠᠨ ᠤ᠋ ᠪᠠᠨ ᠭᠠᠳᠠᠭᠠ ᠬᠦᠷᠴᠦ ᠢᠷᠡᠯᠡ᠃ ᠳᠥᠷᠪᠡᠯᠵᠢᠨ ᠤᠯᠠᠭᠠᠨ ᠴᠡᠮᠪᠡ ᠪᠡᠷ ᠬᠢᠭᠰᠡᠨ ᠴᠠᠪᠢᠷ ᠤ᠋ᠨ ᠰᠠᠪᠠ ᠨᠢ ᠬᠣᠶᠠᠷ ᠲᠡᠰᠢ ᠳᠡᠯᠪᠡᠯᠵᠡᠵᠦ᠂ ᠳᠣᠯᠣᠭᠠᠨ ᠲᠣᠬᠣᠢ ᠣᠷᠬᠢᠮᠵᠢ ᠨᠢ ᠰᠡᠪᠰᠡᠯᠵᠡᠨ᠂ ᠰᠢᠷᠠ ᠶᠠᠮᠪᠤᠤ ᠪᠠᠩᠵᠠᠯ ᠨᠢ ᠬᠥᠯ ᠳ᠋ᠦ᠍ ᠣᠷᠢᠶᠠᠴᠠᠯᠳᠤᠨ᠂ ᠱᠠᠨᠠᠮ ᠮᠠᠯᠠᠭᠠᠢ ᠨᠢ ᠳᠠᠩᠬᠠᠭᠠᠨᠠᠵᠤ ᠶᠡᠷᠦ ᠬᠤᠷᠳᠤᠨ ᠶᠠᠪᠤᠬᠤ ᠳ᠋ᠤ᠌ ᠲᠦᠪᠡᠭᠲᠡᠢ ᠪᠠᠢᠯᠠ᠃ ᠰᠠᠩᠵᠢ ᠨᠤᠲᠤᠭ ᠤ᠋ᠨ ᠰᠣᠨᠢᠨ ᠢ᠋ ᠰᠣᠨᠣᠰᠬᠤ ᠪᠠᠷ ᠲᠡᠭᠡᠵᠦ ᠶᠡᠬᠡ ᠶᠠᠭᠠᠷᠠᠵᠠᠢ᠃ ᠲᠡᠭᠦᠨ ᠢ᠋ ᠠᠮᠢᠰᠬᠤᠭᠠᠳᠠᠵᠤ᠂ ᠬᠥᠯᠥᠰᠥ ᠳᠠᠭᠠᠭᠠᠪᠤᠷᠯᠠᠭᠤᠯᠤᠨ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠷᠤᠩᠬᠠᠨ ᠳ᠋ᠤᠨᠢ ᠪᠡᠷᠢᠮᠦᠭ ᠡᠮᠡᠭᠡᠨ᠂ ᠤᠳᠬᠤᠨ ᠬᠣᠶᠠᠷ ᠠᠯᠢ ᠬᠡᠳᠦᠢᠨᠡᠢ ᠲᠤᠬᠠᠯᠠᠵᠤ ᠠᠪᠤᠭᠠᠳ ᠳᠡᠪᠡᠩ ᠳᠡᠯᠡᠬᠡᠢ ᠶ᠋ᠢᠨ ᠶᠠᠭᠤᠮᠠ ᠶᠠᠷᠢᠵᠤ᠂ ᠨᠠᠮᠬᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠵᠠᠮᠫᠣᠷ ᠲᠠᠢ ᠵᠠᠮᠪᠠᠭᠠ ᠶ᠋ᠢᠨ ᠭᠤᠷᠢᠯ ᠲᠠᠯᠪᠢᠴᠢᠬᠠᠭᠰᠠᠨ᠂ ᠵᠡᠰ ᠳᠣᠮᠪᠣ ᠲᠠᠢ ᠬᠠᠷᠠ ᠴᠠᠢ ᠠ᠋ᠴᠠ ᠭᠤᠷᠢᠯ ᠳᠠᠷᠤᠭᠤᠯᠤᠨ ᠳᠠᠭᠤ ᠴᠢᠮᠡᠭᠡ ᠲᠡᠢ ᠰᠣᠷᠣᠨ ᠤᠤᠭᠤᠵᠠᠭᠠᠵᠤ ᠪᠠᠢᠯᠠ᠃
ᠴᠣᠭ ᠤᠯᠠᠢᠯᠭᠠᠬᠤ ᠮᠠᠫᠣᠷ ᠭᠡᠳᠡᠭ ᠰᠢᠪᠠᠷ ᠰᠠᠪᠠᠨ ᠳᠣᠲᠣᠷᠠ ᠬᠠᠷᠠ ᠮᠣᠳᠣᠨ ᠤ᠋ ᠴᠣᠭ ᠤᠯᠠᠯᠵᠠᠨ ᠪᠠᠢᠯᠠ᠃ ᠲᠡᠭᠦᠨ ᠳᠡᠭᠡᠷᠡ ᠭᠠᠤᠯᠢᠨ ᠬᠣᠭᠳᠢ ᠭᠡᠳᠡᠭ ᠳᠠᠩᠬᠤ ᠲᠠᠯᠪᠢᠭᠠᠰᠤᠲᠠᠢ ᠪᠠᠢᠪᠠ᠃ ᠣᠳᠬᠣᠨ ᠬᠡᠦᠬᠡᠨ ᠥᠨᠳᠡᠰᠬᠢᠵᠦ ᠰᠠᠩᠵᠢ ᠲᠠᠢ ᠮᠡᠨᠳᠦᠯᠡᠪᠡ᠃
— ᠬᠡᠵᠢᠶᠡ ᠪᠤᠴᠠᠭᠠᠳ ᠢᠷᠡᠴᠢᠬᠡᠭᠡ ᠪᠣᠢ? ᠭᠡᠵᠦ ᠰᠠᠩᠵᠢ ᠶᠠᠪᠤᠭᠤᠲᠠ ᠠᠰᠠᠭᠤᠬᠤ ᠳ᠋ᠤ᠌᠂
— ᠰᠠᠶᠢᠬᠠᠨ ᠢᠷᠡᠵᠦ ᠭᠡᠨᠡ᠃ ᠪᠠᠰᠠ ᠯᠠ ᠳᠠᠬᠢᠭᠠᠳ ᠯᠠ ᠡᠷᠭᠢᠯ ᠮᠥᠷᠭᠥᠯ ᠢ᠋ᠶ᠋ᠡᠷ ᠶᠠᠪᠤᠭᠠ ᠭᠡᠨᠡ᠃ ᠦᠭᠡᠢ ᠶᠡᠷᠦ ᠨᠢ ᠮᠥᠷᠭᠥᠯ ᠵᠠᠯᠪᠠᠷᠢᠯ ᠢ᠋ᠶ᠋ᠠᠷ ᠥᠴᠢᠨᠡᠨ ᠳᠠᠬᠢᠨ ᠬᠥᠯ ᠪᠣᠯᠬᠤ ᠬᠡᠷᠡᠭ ᠪᠠᠢᠨᠠ ᠤᠤ? ᠭᠡᠵᠦ ᠤᠳᠬᠤᠨ ᠤ᠋ ᠡᠮᠦᠨᠡ ᠡᠴᠡ ᠪᠡᠷᠢᠮᠦᠭ ᠡᠮᠡᠭᠡᠨ ᠬᠠᠷᠢᠭᠤᠯᠪᠠ᠃
ᠰᠠᠩᠵᠢ ᠰᠣᠨᠣᠰᠤᠭᠰᠠᠨ ᠪᠣᠯᠪᠠᠴᠤ ᠰᠣᠨᠣᠰᠤᠭᠠ ᠦᠭᠡᠢ ᠮᠡᠲᠦ ᠪᠡᠷ ᠰᠢᠭᠤᠳ ᠯᠠ ᠰᠢᠮᠠᠬᠠᠨ ᠤᠷᠤᠭᠤ ᠪᠠᠨ ᠣᠷᠣᠵᠤ᠂ ᠱᠠᠨᠠᠮ ᠮᠠᠯᠠᠭᠠᠢ᠂ ᠴᠠᠪᠢᠷ ᠲᠡᠷᠢᠭᠦᠲᠡᠨ ᠢ᠋ᠶ᠋ᠡᠨ ᠠᠪᠴᠤ᠂ ᠬᠤᠪᠴᠠᠰᠤ ᠪᠠᠨ ᠬᠥᠩᠭᠡᠯᠡᠭᠡᠳ ᠡᠷᠭᠢᠨ ᠭᠠᠷᠴᠤ ᠢᠷᠡᠪᠡ᠃ ᠨᠤᠲᠤᠭ ᠤ᠋ᠨ ᠰᠣᠨᠢᠨ ᠰᠣᠨᠣᠰᠬᠤ ᠶ᠋ᠢ ᠶᠠᠭᠠᠷᠠᠵᠠᠢ᠃
— ᠬᠡᠷᠡᠭ ᠵᠣᠷᠢᠭ ᠶᠠᠭᠤᠲᠠᠢ ᠪᠣᠢ? ᠮᠠᠨ ᠤ᠋ ᠮᠠᠭᠤ ᠡᠵᠢ᠂ ᠠᠪᠤ᠂ ᠳᠡᠭᠦᠦ ᠨᠠᠷ ᠶᠠᠮᠠᠷ ᠰᠢᠦ ᠪᠠᠢᠨᠠ ᠳᠠ ? ᠭᠡᠵᠦ ᠰᠠᠩᠵᠢ ᠰᠢᠯᠭᠠᠭᠠᠨ ᠠᠰᠠᠭᠤᠬᠤ ᠳ᠋ᠤ᠌ ᠤᠳᠬᠤᠨ᠄
— ᠡᠵᠢ᠂ ᠠᠪᠤ᠂ ᠳᠡᠭᠦᠦ ᠨᠠᠷ ᠴᠢᠨᠢ ᠰᠠᠢᠨ᠃ ᠵᠡᠭᠦᠨ ᠠᠭᠤᠯᠠᠨ ᠳ᠋ᠤ᠌᠂ ᠰᠢᠷᠠ ᠳᠡᠪᠰᠡᠭ ᠲᠦ᠍ ᠪᠠᠢᠭᠠ᠃ ᠴᠢᠮᠠᠶ᠋ᠢ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠣᠴᠢᠵᠤ ᠱᠠᠪᠢᠯᠠᠨ ᠰᠠᠭᠤᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ ᠠᠮᠢᠳᠤ ᠶᠠᠪᠤᠵᠤ᠂ ᠦᠷᠡ ᠲᠥᠷᠥᠭᠦᠯᠦᠭᠰᠡᠨ ᠦ᠌ ᠬᠡᠷᠡᠭ ᠪᠦᠲᠦᠯᠡ ᠭᠡᠵᠡᠭᠡᠵᠦ ᠲᠤᠩ ᠶᠡᠬᠡ ᠪᠠᠶᠠᠷᠯᠠᠵᠠᠭᠠᠵᠤ ᠪᠠᠢᠨᠠ ᠪᠢᠯᠡ᠃ ᠲᠡᠭᠡᠭᠡᠳ ᠤᠯᠠᠮ ᠯᠠ ᠰᠠᠢᠨ ᠬᠢᠴᠢᠶᠡᠵᠦ ᠡᠷᠳᠡᠮ ᠲᠡᠢ ᠰᠠᠢᠨ ᠯᠠᠮᠠ ᠪᠣᠯᠤᠭᠠᠳ ᠡᠷᠭᠢᠵᠦ ᠢᠷᠡᠭᠡᠷᠡᠢ ᠭᠡᠵᠦ ᠳᠠᠬᠢᠨ ᠳᠠᠬᠢᠨ ᠵᠠᠬᠢᠵᠤ ᠪᠠᠢᠨᠠ ᠯᠠᠢ ᠭᠡᠵᠦ ᠶᠠᠷᠢᠬᠤ ᠳ᠋ᠤ᠌ ᠰᠠᠩᠵᠢ ᠶ᠋ᠢᠨ ᠰᠡᠳᠬᠢᠯ ᠠᠭᠤᠵᠢᠷᠠᠵᠤ᠄
— ᠤᠤᠬᠠᠢ᠂ ᠲᠡᠭᠡᠭᠡᠳ ᠁ ᠭᠡᠵᠦ ᠴᠠᠭᠠᠰᠢ ᠨᠢ ᠶᠠᠷᠢᠬᠤ ᠶ᠋ᠢ ᠱᠠᠭᠠᠷᠳᠠᠪᠠ᠃ ᠣᠳᠬᠣᠨ᠄
— ᠬᠣᠯᠠ ᠭᠠᠵᠠᠷ ᠶᠠᠭᠤ ᠶ᠋ᠢ ᠪᠡᠨ ᠴᠤ᠌ ᠥᠭᠴᠦ ᠶᠠᠪᠤᠭᠤᠯᠬᠤ ᠶᠤᠮ ᠪᠢᠯᠡ ᠳᠠ ᠭᠡᠵᠦ ᠡᠵᠢ᠂ ᠠᠪᠤ ᠬᠣᠶᠠᠷ ᠴᠢᠨᠢ ᠶᠠᠷᠢᠵᠤ ᠶᠠᠷᠢᠵᠤ ᠪᠠᠢᠭᠠᠳ ᠬᠡᠳᠦᠨ ᠰᠤᠨᠤᠮ ᠬᠠᠳᠠᠭ᠂ ᠨᠢᠭᠡ ᠮᠥᠩᠭᠥᠨ ᠶᠤᠸᠠᠮᠪᠤᠤ ᠶᠠᠪᠤᠭᠤᠯᠤᠭᠰᠠᠨ᠃ ᠮᠠᠢ ᠡᠨᠡ ᠪᠠᠢᠨᠠ! ᠭᠡᠵᠦ ᠬᠡᠯᠡᠭᠡᠳ ᠴᠢᠰᠴᠡᠦ ᠶ᠋ᠢᠨ ᠥᠭᠡᠳᠡᠰᠦᠨ ᠳ᠋ᠦ᠍ ᠪᠣᠭᠣᠴᠢᠬᠠᠭᠰᠠᠨ ᠶᠠᠭᠤᠮᠠ ᠶ᠋ᠢ ᠰᠠᠩᠵᠢ ᠳ᠋ᠤ᠌ ᠥᠭᠭᠦᠯᠡ᠃
— ᠲᠡᠳᠡ ᠨᠠᠷ ᠨᠠᠳᠠ ᠶᠠᠭᠤᠮᠠ ᠶᠠᠪᠤᠭᠤᠯᠵᠤ ᠶᠠᠭᠠᠬᠢᠬᠤ ᠨᠢ ᠪᠣᠢ ᠳᠠ? ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠶᠠᠳᠠᠵᠤ ᠪᠠᠢᠵᠤ! ᠭᠡᠵᠦ ᠰᠠᠩᠵᠢ ᠬᠡᠯᠡᠭᠡᠳ ᠡᠴᠢᠭᠡ ᠡᠬᠡ ᠡᠴᠡ ᠢᠷᠡᠭᠦᠯᠦᠭᠰᠡᠨ ᠶᠠᠭᠤᠮᠠ ᠶ᠋ᠢ ᠬᠦᠨᠳᠦᠳᠬᠡᠨ ᠬᠣᠶᠠᠷ ᠭᠠᠷᠳᠠᠵᠤ ᠠᠪᠤᠯᠠ᠃
— ᠪᠢ ᠥᠪᠡᠷ ᠢ᠋ᠶ᠋ᠡᠨ ᠶᠠᠭᠠᠬᠢᠬᠤ ᠪᠣᠢ ᠳᠠ! ᠪᠤᠴᠠᠭᠠᠳ ᠯᠠ ᠢᠷᠡᠯᠡ ᠭᠡᠳ ᠣᠳᠬᠣᠨ ᠳᠠᠭᠤ ᠦᠭᠡᠢ ᠪᠣᠯᠪᠠ᠃
— ᠶᠠᠮᠠᠷ ᠬᠡᠷᠡᠭ ᠢ᠋ᠶ᠋ᠡᠷ? ᠭᠡᠵᠦ ᠰᠠᠩᠵᠢ ᠯᠠᠪᠯᠠᠬᠤ ᠳ᠋ᠤ᠌᠂
— ᠦᠷᠡ ᠶ᠋ᠢᠨ ᠬᠤᠲᠤᠭ ᠭᠣᠷᠢᠳᠠᠵᠤ ᠶᠠᠪᠤᠭᠠ ᠭᠡᠨᠡ᠃ ᠲᠡᠷᠡ ᠵᠢᠯ ᡀᠠᠰᠠ ᠵᠣᠣ ᠶ᠋ᠢᠨ ᠬᠠᠮᠤᠭ ᠯᠠ ᠨᠠᠨᠳᠢᠨ ᠰᠢᠲᠦᠭᠡᠨ ᠪᠦᠷᠦᠢ ᠳ᠋ᠦ᠍ ᠮᠥᠷᠭᠥᠭᠡᠳ ᠪᠤᠴᠠᠭᠰᠠᠨ᠃ ᠦᠷᠡ ᠬᠡᠦᠬᠡᠳ ᠵᠠᠶᠠᠭᠠᠨᠠ ᠯᠠ ᠭᠡᠵᠦ ᠢᠲᠡᠭᠡᠵᠦ᠂ ᠲᠡᠭᠡᠭᠡᠳ ᠪᠠᠰᠠ ᠯᠠ ᠪᠦᠲᠦᠳᠡᠭ ᠦᠭᠡᠢ ᠭᠡᠨᠡ᠃ ᠯᠠᠮᠠ ᠪᠠᠭᠰᠢ ᠨᠢ ᠳᠠᠬᠢᠵᠤ ᡀᠠᠰᠠ ᠵᠣᠣ ᠤᠲᠠᠢ ᠭᠦᠮᠪᠦᠮ ᠣᠷᠣᠵᠤ ᠢᠷᠡ ᠭᠡᠵᠦ ᠬᠡᠯᠡᠭᠰᠡᠨ ᠶᠦᠮ ᠪᠠᠢᠬᠠ᠃ ᠣᠯᠠᠨ ᠬᠠᠭᠠᠯᠭᠠᠲᠤ ᠰᠤᠪᠤᠷᠭᠠᠨ ᠳ᠋ᠤ᠌ ᠣᠴᠢᠵᠤ ᠮᠥᠷᠭᠥᠭᠡᠳ ᠢᠷᠡ᠃ ᠲᠡᠭᠡᠪᠡᠯ ᠬᠡᠦᠬᠡᠳ ᠵᠠᠶᠠᠭᠠᠨᠠ ᠭᠡᠰᠡᠨ ᠭᠡᠨᠡ᠃ ᠵᠠ ᠲᠡᠷᠡ ᠴᠤ᠌ ᠶᠠᠭᠤ ᠯᠠ ᠪᠣᠯ ᠭᠡᠵᠦ ᠪᠡᠷᠢᠮᠦᠭ ᠡᠮᠡᠭᠡᠨ ᠬᠠᠷᠢᠭᠤ ᠬᠡᠯᠡᠬᠦ ᠳ᠋ᠦ᠍ ᠤᠳᠬᠤᠨ ᠤ᠋ ᠴᠢᠷᠠᠢ ᠤᠯᠠᠰᠬᠢᠯᠡ᠃
— ᠣᠯᠠᠨ ᠬᠠᠭᠠᠯᠭᠠᠲᠤ ᠰᠤᠪᠤᠷᠭᠠ ᠭᠡᠵᠦ ᠬᠠᠮᠢᠭᠠ ᠪᠠᠢᠳᠠᠭ ᠶᠤᠮ ᠪᠣᠯ ᠠ᠋ ? ᠭᠡᠮᠡᠨ ᠰᠠᠩᠵᠢ ᠭᠠᠢᠬᠠᠪᠠ᠃ ᠲᠡᠷᠡ ᠮᠡᠳᠡᠬᠦ ᠦᠭᠡᠢ ᠪᠠᠢᠳᠠᠭ ᠨᠢ ᠠᠷᠭᠠ ᠦᠭᠡᠢ᠃
— ᠶᠠᠭᠠᠬᠢᠭᠠᠪᠠ ᠳᠠ᠃ ᠰᠠᠬᠢᠶᠠ ᠶ᠋ᠢᠨ ᠬᠡᠢᠳ ᠣᠷᠣᠬᠤ ᠵᠠᠮ ᠳ᠋ᠤ᠌ ᠵᠠᠩᠴᠸ ᠬᠡᠢᠳ ᠲᠦ᠍ ᠴᠤᠳᠦᠩᠭᠣᠮᠠᠨ ᠭᠡᠳᠡᠭ ᠥᠨᠳᠥᠷ ᠰᠤᠪᠤᠷᠭᠠ ᠪᠠᠢᠳᠠᠭ᠃ ᠲᠡᠭᠦᠨ ᠢ᠋ ᠯᠡ ᠣᠯᠠᠨ ᠬᠠᠭᠠᠯᠭᠠᠲᠤ ᠰᠤᠪᠤᠷᠭᠠ ᠭᠡᠳᠡᠭ ᠶᠦᠮ ᠪᠠᠢᠬᠤ ᠴᠢᠪ ᠯᠡ ᠭᠡᠵᠦ ᠪᠡᠷᠢᠮᠦᠭ ᠡᠮᠡᠭᠡᠨ ᠲᠣᠭᠣᠮᠰᠠᠷ ᠦᠭᠡᠢ ᠶᠠᠷᠢᠪᠠ᠃ ᠪᠡᠷᠢᠮᠦᠭ ᠡᠮᠡᠭᠡᠨ ᠪᠠᠭᠠ ᠵᠠᠯᠠᠭᠤ ᠳ᠋ᠠᠭᠠᠨ ᠮᠥᠨ ᠯᠡ ᠡᠨᠡᠬᠦ ᠣᠳᠬᠣᠨ ᠤ᠋ ᠠᠳᠠᠯᠢ ᠲᠥᠪᠡᠳ ᠦ᠋ᠨ ᠣᠯᠠᠨ ᠬᠣᠲᠠ ᠶ᠋ᠢ ᠬᠡᠰᠦᠭᠦᠴᠢᠯᠡᠨ ᠮᠥᠷᠭᠥᠯ ᠬᠢᠵᠦ᠂ ᠳᠤᠬᠤ ᠪᠠᠨ ᠴᠣᠭᠣᠷᠠᠲᠠᠯᠠ ᠪᠤᠷᠬᠠᠨ ᠳ᠋ᠤ᠌ ᠮᠥᠷᠭᠥᠵᠦ᠂ ᠤᠯᠠ ᠪᠠᠨ ᠡᠯᠡᠭᠳᠡᠲᠡᠯᠡ ᠭᠣᠷᠢᠶᠠ ᠬᠢᠭᠰᠡᠨ ᠪᠣᠯᠬᠣᠷ ᠬᠠᠮᠢᠭᠠ ᠶᠠᠭᠤ ᠪᠠᠢᠳᠠᠭ ᠢ᠋ ᠠᠨᠳᠤᠬᠤ ᠦᠭᠡᠢ ᠮᠡᠳᠡᠳᠡᠭ ᠪᠠᠢᠵᠠᠢ᠃ ᠲᠡᠷᠡ ᠪᠦᠬᠦᠨ ᠡᠴᠡ ᠶᠠᠮᠠᠷ ᠦᠷᠡ ᠠᠰᠢᠭ ᠭᠠᠷᠤᠭᠰᠠᠨ ᠢ᠋ ᠴᠤ᠌ ᠰᠠᠢᠨ ᠮᠡᠳᠡᠵᠦ ᠪᠠᠢᠭᠠ ᠠᠵᠢ᠃
— ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠢᠷᠡᠪᠡ ᠤᠤ? ᠥᠭᠡᠷᠡ ᠬᠥᠮᠦᠨ ᠲᠡᠢ ᠬᠠᠮᠲᠤᠷᠠᠭᠰᠠᠨ ᠤᠤ? ᠭᠡᠵᠦ ᠰᠠᠩᠵᠢ ᠤᠳᠬᠤᠨ ᠠ᠋ᠴᠠ ᠠᠰᠠᠭᠤᠪᠠ᠃
— ᠥᠨᠥᠬᠢ ᠪᠦᠬᠡᠮᠠᠩᠯᠠᠢ ᠪᠢᠳᠡ ᠬᠣᠶᠠᠷ ᠡᠨᠳᠡ ᠡᠴᠡ ᠪᠤᠴᠠᠬᠤ ᠳ᠋ᠠᠭᠠᠨ ᠳᠡᠷᠡ ᠨᠡᠢᠯᠡᠭᠦᠯᠵᠦ ᠡᠷᠦᠬᠡ ᠭᠡᠷ ᠪᠣᠯᠤᠭᠰᠠᠨ ᠶᠤᠮ᠃ ᠨᠤᠲᠤᠭ ᠲᠤ᠌ ᠪᠠᠨ ᠣᠴᠢᠭᠠᠳ ᠭᠡᠷ ᠣᠷᠣᠨ ᠢ᠋ᠶ᠋ᠠᠨ ᠲᠣᠬᠢᠵᠢᠭᠤᠯᠵᠤ ᠲᠡᠷᠡᠦᠬᠡᠨ ᠳ᠋ᠡᠭᠡᠨ ᠠᠶᠠᠲᠠᠢᠬᠠᠨ ᠯᠠ ᠠᠮᠢᠳᠤᠷᠠᠵᠤ ᠪᠠᠢᠯᠠ᠃ ᠦᠷᠡ ᠲᠡᠢ ᠪᠣᠯᠬᠤ ᠶ᠋ᠢᠨ ᠬᠦᠰᠡᠯᠡᠩ ᠪᠣᠯᠵᠤ ᠵᠢᠯ ᠭᠠᠷᠤᠢ ᠬᠦᠯᠢᠶᠡᠯᠡ᠃ ᠬᠡᠦᠬᠡᠳ ᠣᠯᠳᠠᠭᠰᠠᠨ ᠦᠭᠡᠢ᠃ ᠳᠠᠬᠢᠭᠠᠳ ᠯᠠ ᠯᠠᠮᠠ ᠪᠠᠭᠰᠢ ᠠ᠋ᠴᠠ ᠨᠣᠮ ᠨᠡᠭᠡᠭᠡᠯᠭᠡᠵᠦ᠂ ᠱᠣ ᠣᠷᠭᠢᠭᠤᠯᠵᠤ ᠦᠵᠡᠯᠡ᠃ ᠤᠲᠠᠢ᠂ ᡀᠠᠰᠠ ᠣᠷᠣᠵᠤ ᠣᠯᠠᠨ ᠬᠠᠭᠠᠯᠭᠠᠲᠤ ᠰᠤᠪᠤᠷᠭᠠᠨ ᠳ᠋ᠤ᠌ ᠮᠥᠷᠭᠥᠵᠦ ᠲᠡᠭᠦᠨ ᠡᠴᠡ ᠥᠴᠦᠬᠡᠨ ᠦᠷᠦᠳᠡᠰᠦ ᠴᠤ᠌ ᠶᠤᠮ ᠤᠤ ᠬᠡᠯᠲᠡᠷᠬᠡᠢ ᠣᠯᠵᠤ ᠠᠪ ᠭᠡᠵᠦ ᠯᠠᠮᠠ ᠪᠠᠭᠰᠢ ᠠᠢᠯᠠᠳᠤᠭᠰᠠᠨ᠃ ᠲᠡᠷᠡ ᠶᠣᠰᠣᠭᠠᠷ ᠯᠠ ᠪᠦᠬᠡᠮᠠᠩᠯᠠᠢ ᠪᠢᠳᠡ ᠬᠣᠶᠠᠷ ᠳᠠᠬᠢᠨ ᠨᠠᠭᠠᠰᠢ ᠪᠠᠨ ᠭᠠᠷᠤᠭᠰᠠᠨ ᠶᠤᠮ᠃ ᠠᠶᠠᠨ ᠵᠠᠮ ᠥᠯᠵᠡᠢ ᠲᠡᠢ ᠰᠠᠢᠬᠠᠨ ᠪᠠᠢᠯᠠ᠃ ᠤᠤᠰᠢ ᠶ᠋ᠢᠨ ᠳᠠᠪᠠᠭᠠᠨ ᠳ᠋ᠤ᠌ ᠭᠠᠵᠠᠷ ᠤ᠋ᠨ ᠰᠦᠷ ᠲᠦ᠍ ᠳᠠᠷᠤᠭᠳᠠᠵᠤ᠂ ᠬᠠᠮᠠᠷ ᠠ᠋ᠴᠠ ᠴᠢᠰᠤ ᠭᠠᠷᠴᠤ ᠵᠢᠭᠠᠬᠠᠨ ᠶᠠᠳᠠᠷᠠᠭᠰᠠᠨ ᠁ ᠭᠡᠵᠦ ᠤᠳᠬᠤᠨ ᠢ᠋ ᠶᠠᠷᠢᠵᠤ ᠪᠠᠢᠲᠠᠯᠠ ᠪᠡᠷᠢᠮᠦᠭ ᠡᠮᠡᠭᠡᠨ ᠦᠭᠡ ᠶ᠋ᠢ ᠨᠢ ᠲᠠᠰᠤᠯᠠᠭᠠᠳ᠄
— ᠬᠡ᠂ ᠭᠠᠵᠠᠷ ᠤ᠋ᠨ ᠰᠦᠷ ᠲᠦ᠍ ᠳᠠᠷᠤᠭᠳᠠᠬᠤ ᠶ᠋ᠢ ᠮᠡᠳᠡᠭᠰᠡᠭᠡᠷ ᠪᠠᠢᠵᠤ᠂ ᠰᠠᠢᠨ ᠪᠡᠯᠡᠳᠬᠡᠬᠦ ᠦᠭᠡᠢ ᠳᠡ᠃ ᠤᠤᠰᠢ ᠶ᠋ᠢᠨ ᠳᠠᠪᠠᠭᠠᠨ ᠤ᠋ ᠴᠠᠭᠠᠨᠠ ᠳᠣᠯᠣᠭᠠ ᠬᠣᠨᠣᠭ ᠲᠤᠬᠠᠯᠠᠵᠤ᠂ ᠮᠢᠬᠠᠨ ᠤ᠋ ᠲᠥᠷᠥᠯ ᠦ᠋ᠨ ᠶᠠᠭᠤᠮ ᠠᠠᠮᠰᠠᠯ ᠦᠭᠡᠢ ᠪᠠᠢᠵᠤ ᠪᠡᠯᠡᠳᠬᠡᠬᠦ ᠦᠭᠡᠢ ᠪᠣᠯ ᠭᠠᠵᠠᠷ ᠤ᠋ᠨ ᠰᠦᠷ ᠲᠦ᠍ ᠳᠠᠷᠤᠭᠳᠠᠵᠤ᠂ ᠠᠶᠠᠭᠦᠢᠳᠡᠪᠡᠯ ᠦᠬᠦᠵᠦ ᠴᠤ᠌ ᠮᠡᠳᠡᠨᠡ᠃ ᠪᠣᠯᠴᠢᠮ ᠦᠭᠡᠢ ᠶᠠᠭᠤᠮᠠ ᠬᠢᠵᠦ ᠳᠡ! ᠭᠡᠪᠡ᠃ ᠰᠠᠩᠵᠢ᠄
— ᠲᠡᠭᠡᠭᠡᠳ ᠪᠦᠬᠡᠮᠠᠩᠯᠠᠢ ᠭᠤᠸᠠᠢ ᠬᠠᠮᠢᠭᠠ ᠣᠴᠢᠭᠰᠠᠨ ᠬᠡᠷᠡᠭ ᠪᠣᠢ? ᠭᠡᠵᠦ ᠭᠠᠢᠬᠠᠨ ᠠᠰᠠᠭᠤᠯᠠ᠃
— ᠪᠦᠬᠡᠮᠠᠩᠯᠠᠢ ᠤᠤ? ᠁ ᠭᠡᠰᠡᠨ ᠢ᠋ᠶ᠋ᠡᠨ ᠤᠳᠬᠤᠨ ᠤ᠋ ᠰᠡᠳᠬᠢᠯ ᠨᠢ ᠬᠢᠮᠤᠷᠠᠯᠳᠤᠵᠤ ᠳᠠᠭᠤ ᠦᠭᠡᠢ ᠬᠡᠰᠡᠭ ᠰᠠᠭᠤᠭᠠᠳ᠄
— ᠤᠤᠰᠢ ᠶ᠋ᠢᠨ ᠳᠠᠪᠠᠭᠠ ᠳᠠᠪᠠᠭᠠᠳ ᠨᠠᠭᠠᠰᠢ ᠪᠠᠨ ᠶᠠᠪᠤᠵᠤ ᠪᠠᠢᠲᠠᠯᠠ ᠳᠡᠭᠡᠷᠡᠮᠴᠢᠨ ᠨᠦ᠍ᠭᠦᠳ ᠲᠡᠢ ᠲᠠᠭᠠᠷᠠᠯᠳᠤᠭᠠᠳ ᠮᠠᠨ ᠤ᠋ ᠲᠡᠷᠡ ᠭᠠᠯ ᠤ᠋ᠨ ᠬᠢᠨ ᠶᠠᠭᠤ ᠴᠤ᠌ ᠦᠭᠡᠢ ᠪᠣᠯᠲᠠᠯᠠ ᠪᠠᠨ ᠲᠣᠨᠣᠭᠤᠯᠤᠭᠰᠠᠨ᠃ ᠪᠦᠬᠡᠮᠠᠩᠯᠠᠢ ᠪᠢᠳᠡ ᠬᠣᠶᠠᠷ ᠠ᠋ᠴᠠ ᠭᠠᠳᠠᠨᠠ ᠴᠠᠭᠠᠨ ᠭᠣᠣᠯ ᠤ᠋ᠨ ᠬᠡᠳᠦᠨ ᠮᠥᠷᠭᠥᠯᠴᠢᠨ ᠬᠠᠮᠲᠤ ᠶᠠᠪᠤᠵᠠᠭᠠᠵᠤ ᠪᠠᠢᠭᠰᠠᠨ ᠶᠤᠮ᠃ ᠳᠡᠭᠡᠷᠡᠮᠴᠢᠨ ᠨᠦ᠍ᠭᠦᠳ ᠪᠢᠳᠡᠨ ᠦ᠌ ᠠᠯᠢ ᠣᠯᠢᠭᠲᠠᠢ ᠶ᠋ᠢ ᠮᠤᠯᠵᠠᠯᠠᠵᠤ ᠠᠪᠤᠭᠠᠳ ᠬᠣᠶᠠᠷ ᠭᠤᠷᠪᠠᠨ ᠬᠥᠮᠦᠨ ᠢ᠋ᠶ᠋ᠡᠨ ᠠᠯᠠᠭᠤᠯᠵᠤ᠂ ᠣᠷᠣᠨ ᠳ᠋ᠤ᠌ ᠨᠢ ᠪᠦᠬᠡᠮᠠᠩᠯᠠᠢ ᠶ᠋ᠢ ᠴᠠᠭᠠᠨᠭᠣᠣᠯ ᠤ᠋ᠨ ᠬᠢᠨ ᠦ᠌ ᠭᠠᠯ ᠤ᠋ᠨ ᠠᠬᠠᠯᠠᠭᠴᠢ ᠳᠠᠷᠤᠮᠵᠠᠭᠳᠠ ᠭᠤᠸᠠᠢ ᠶ᠋ᠢᠨ ᠬᠠᠮᠲᠤ ᠪᠠᠷ ᠣᠯᠵᠠᠯᠠᠵᠤ ᠠᠪᠤᠭᠠᠳ ᠠᠭᠤᠯᠠ ᠳᠠᠮᠵᠢᠨ ᠠᠯᠠᠭᠠ ᠪᠣᠯᠤᠭᠰᠠᠨ᠃ ᠪᠢᠳᠡ ᠬᠡᠳᠦ ᠶᠠᠳᠠᠭᠤ ᠳᠣᠷᠣᠢ ᠡᠮᠡᠭᠲᠡᠢᠴᠦᠳ᠂ ᠬᠡᠦᠬᠡᠳ ᠦ᠋ᠳ ᠵᠠᠮ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠡᠯᠲᠦᠷᠢᠨ ᠶᠠᠪᠤᠭᠰᠠᠭᠠᠷ ᠠᠷᠠᠢ ᠭᠡᠵᠦ ᡀᠠᠰᠠ ᠵᠣᠣ ᠳ᠋ᠤ᠌ ᠣᠷᠣᠵᠤ ᠢᠷᠡᠯᠡ᠃ ᠪᠦᠬᠡᠮᠠᠩᠯᠠᠢ ᠲᠡᠷᠡ ᠬᠣᠶᠠᠷ ᠢ᠋ ᠰᠤᠯᠠᠯᠠᠭᠳᠠᠭᠠᠳ ᠬᠣᠢᠨᠠ ᠠ᠋ᠴᠠ ᠭᠦᠢᠴᠡᠵᠦ ᠢᠷᠡᠬᠦ ᠪᠠᠢᠬᠤ ᠭᠡᠵᠦ ᠭᠣᠷᠢᠳᠠᠭᠰᠠᠭᠠᠷ ᠪᠠᠢᠯᠠ᠃ ᠭᠡᠲᠡᠯᠡ ᠢᠷᠡᠭᠰᠡᠨ ᠦᠭᠡᠢ᠃ ᠣᠳᠣ ᠲᠡᠳᠡ ᠬᠠᠮᠢᠭᠠ ᠵᠣᠪᠠᠵᠤ ᠶᠠᠪᠤᠳᠠᠭ ᠪᠣᠯ ᠁ ᠭᠡᠵᠦ ᠣᠳᠬᠣᠨ ᠬᠡᠯᠡᠭᠡᠳ ᠮᠡᠭᠰᠢᠨ ᠤᠬᠢᠯᠠᠪᠠ᠃
— ᠤᠬᠢᠯᠠᠭᠠᠳ ᠶᠠᠭᠠᠬᠢᠬᠤ ᠪᠣᠢ? ᠣᠪᠰᠣᠭᠠ ᠲᠠᠢ ᠡᠷᠡ ᠪᠣᠯ ᠬᠦᠷᠦᠭᠡᠳ ᠯᠡ ᠢᠷᠡᠨᠡ ᠭᠡᠵᠦ ᠪᠡᠷᠢᠮᠦᠭ ᠡᠮᠡᠭᠡᠨ ᠣᠳᠬᠣᠨ ᠤ᠋ ᠮᠥᠷᠥ ᠶ᠋ᠢ ᠢᠯᠪᠢᠨ ᠲᠠᠢᠳᠬᠤᠷᠠᠭᠤᠯᠬᠤ ᠭᠡᠵᠦ ᠣᠷᠣᠯᠳᠣᠪᠠ᠃ ᠤᠳᠬᠤᠨ ᠤᠳᠠᠲᠠᠯᠠ ᠲᠠᠢᠳᠬᠤᠷᠠᠭᠰᠠᠨ ᠦᠭᠡᠢ᠃
— ᠪᠤᠷᠬᠠᠨ ᠤ᠋ ᠣᠷᠣᠨ ᠭᠡᠵᠦ ᠪᠠᠢᠬᠤ᠃ ᠲᠡᠭᠡᠭᠡᠳ ᠮᠥᠷᠭᠥᠯᠴᠢᠨ ᠶᠠᠳᠠᠭᠤᠰ ᠢ᠋ ᠵᠦᠭᠡᠷ ᠥᠩᠭᠡᠷᠡᠭᠦᠯᠬᠦ ᠦᠭᠡᠢ ᠲᠣᠨᠣᠵᠤ ᠳᠡᠭᠡᠷᠡᠮᠳᠡᠵᠦ ᠦᠷᠭᠦᠯᠵᠢ ᠨᠢᠭᠦᠯ ᠬᠢᠵᠦ ᠪᠠᠢᠬᠤ ᠶᠤᠮ᠂ ᠡᠨᠡ ᠲᠥᠪᠡᠳ ᠦ᠋ᠳ᠃ ᠥᠭᠡᠳᠡᠯᠡᠬᠦ ᠦᠭᠡᠢ ᠤᠯᠤᠰ ᠪᠠᠢᠬᠤ ᠠ᠂ ᠵᠠᠢᠯᠠᠭᠤᠯ! ᠭᠡᠵᠦ ᠪᠡᠷᠢᠮᠦᠭ ᠡᠮᠡᠭᠡᠨ ᠰᠡᠳᠬᠢᠯ ᠭᠠᠩᠰᠠᠷᠠᠨ ᠥᠭᠦᠯᠡᠵᠦ᠂ ᠰᠡᠭᠦᠷᠡᠰᠦ ᠠᠯᠳᠠᠪᠠ᠃
— ᠡᠷᠬᠡᠪᠰᠢ ᠨᠢᠭᠡ ᠠᠷᠭᠠ ᠣᠯᠵᠤ ᠳᠡᠭᠡᠷᠡᠮᠴᠢᠨ ᠦ᠌ ᠭᠠᠷ ᠠ᠋ᠴᠠ ᠰᠠᠯᠤᠭᠠᠳ ᠢᠷᠡᠬᠦ ᠪᠠᠢᠬᠠ ᠠ᠋᠂ ᠪᠦᠬᠡᠮᠠᠩᠯᠠᠢ ᠭᠤᠸᠠᠢ! ᠭᠡᠵᠦ ᠰᠠᠩᠵᠢ ᠲᠡᠳᠡᠨ ᠢ᠋ ᠲᠠᠢᠪᠤᠰᠢᠷᠠᠭᠤᠯᠬᠤ ᠶ᠋ᠢ ᠣᠷᠣᠯᠳᠣᠯᠠ᠃
《ᠳᠠᠬᠢᠭᠠᠳ ᠯᠠ ᠦᠷᠡ ᠶ᠋ᠢᠨ ᠬᠤᠲᠤᠭ ᠣᠯᠬᠤ ᠶ᠋ᠢᠨ ᠮᠥᠷᠥᠭᠡᠳᠦᠯ ᠪᠣᠯᠵᠤ ᠡᠨᠡ ᠤᠷᠲᠤ ᠬᠡᠴᠡᠭᠦᠦ ᠵᠠᠮ ᠢ᠋ ᠲᠤᠭᠤᠯᠤᠨ ᠬᠦᠷᠴᠦ ᠢᠷᠡᠵᠡᠢ᠃ ᠣᠳᠣ ᠲᠡᠭᠡᠭᠡᠳ ᠣᠯᠠᠨ ᠬᠠᠭᠠᠯᠭᠠᠲᠤ ᠴᠤᠳᠦᠩᠭᠣᠮᠠᠨ ᠰᠤᠪᠤᠷᠭᠠᠨ ᠳ᠋ᠤ᠌ ᠮᠥᠷᠭᠥᠭᠡᠳ ᠨᠡᠮᠡᠷᠢ ᠪᠣᠯᠬᠤ ᠶᠠᠭᠤᠮᠠ ᠪᠣᠯᠪᠠ ᠤᠤ ᠳᠠ! ᠮᠥᠨ ᠴᠤ᠌ ᠬᠡᠴᠡᠭᠦᠦ ᠶᠦᠮ ᠠ᠋ ᠳᠠ》 ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠲᠡᠭᠦᠨ ᠤ ᠲᠤᠬᠠᠢ ᠪᠣᠳᠣᠵᠤ ᠪᠠᠢᠲᠠᠯᠠ ᠳᠠᠭᠠᠵᠤ ᠮᠡᠳᠡᠭᠰᠡᠨ ᠶᠦᠮ ᠰᠢᠭ ᠰᠠᠨᠠᠭᠠ ᠶ᠋ᠢ ᠨᠢ ᠪᠡᠷᠢᠮᠦᠭ ᠡᠮᠡᠭᠡᠨ ᠡᠯᠭᠦᠨ ᠠᠪᠤᠭᠠᠳ᠄
— ᠣᠯᠠᠨ ᠭᠠᠵᠠᠷ ᠲᠡᠨᠦᠵᠦ ᠡᠯᠳᠡᠪ ᠳᠡᠭᠡᠳᠦ ᠶ᠋ᠢᠨ ᠶᠠᠭᠤᠮᠠᠨ ᠳ᠋ᠤ᠌ ᠮᠥᠷᠭᠥᠯ ᠵᠠᠯᠪᠠᠷᠢᠵᠤ ᠵᠣᠪᠠᠵᠤ ᠶᠠᠪᠤᠭᠰᠠᠨ ᠳᠤ ᠣᠷᠣᠪᠠᠯ ᠨᠤᠲᠤᠭ ᠲᠤ᠌ ᠪᠠᠨ ᠷᠠᠰᠢᠶᠠᠨ ᠤᠤᠭᠤᠵᠤ ᠬᠡᠳᠦᠨ ᠵᠢᠯ ᠪᠡᠶᠡ ᠪᠡᠨ ᠰᠤᠪᠢᠯᠠᠭᠰᠠᠨ ᠨᠢ ᠳᠡᠭᠡᠷᠡ ᠦᠭᠡᠢ ᠤᠤ ᠳᠠ ? ᠪᠡᠶᠡ ᠶ᠋ᠢᠨ ᠲᠠᠮᠢᠷ ᠲᠡᠩᠬᠡᠭᠡ ᠰᠠᠢᠵᠢᠷᠠᠪᠠᠯ ᠵᠠᠯᠠᠭᠤ ᠬᠥᠮᠦᠨ ᠠᠶᠠᠨᠳᠠᠭᠠᠨ ᠯᠠ ᠦᠷᠡ ᠶ᠋ᠢᠨ ᠬᠤᠲᠤᠭ ᠣᠯᠤᠨᠠ ᠰᠢᠦ ᠳᠡ᠃ ᠤᠰᠤᠲᠤ ᠴᠠᠴᠤᠷᠠᠩᠭᠠ ᠶ᠋ᠢᠨ ᠡᠬᠢᠨ ᠳ᠋ᠦ᠍ ᠬᠦᠷᠲᠡᠯᠡ ᠰᠠᠢᠬᠠᠨ ᠬᠦᠢᠲᠡᠨ ᠷᠠᠰᠢᠶᠠᠨ ᠪᠠᠢᠳᠠᠭ ᠶᠤᠮ ᠴᠢᠨᠢ! ᠭᠡᠵᠦ ᠶᠠᠷᠢᠪᠠ᠃ ᠰᠠᠩᠵᠢ ᠪᠠᠰᠠ ᠯᠠ ᠡᠨᠡ ᠦᠭᠡ ᠶ᠋ᠢ ᠪᠣᠳᠣᠵᠤ ᠪᠠᠢᠭᠰᠠᠨ ᠲᠤᠯᠠ ᠰᠠᠨᠠᠯ ᠨᠡᠢᠯᠡᠵᠡᠢ᠃
— ᠲᠠᠨᠲ᠋ᠤᠨ ᠵᠠᠯᠪᠤᠤ ᠭᠡᠵᠦ ᠨᠢᠭᠡ ᠬᠠᠭᠠᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠭᠡᠳᠡᠰᠦᠨ ᠳ᠋ᠦ᠍ ᠵᠢᠷᠠᠨ ᠵᠢᠯ ᠪᠠᠢᠭᠠᠳ ᠳᠠᠷᠠᠭᠠ ᠨᠢ ᠲᠥᠷᠥᠭᠰᠡᠨ ᠶᠦᠮ ᠭᠡᠳᠡᠭ᠃ ᠲᠡᠷᠡ ᠨᠢᠭᠡᠨᠲᠡ ᠵᠢᠷᠠᠨ ᠵᠢᠯ ᠡᠬᠡ ᠶ᠋ᠢᠨ ᠭᠡᠳᠡᠰᠦᠨ ᠳ᠋ᠦ᠍ ᠪᠠᠢᠭᠰᠠᠨ ᠪᠣᠯᠬᠣᠷ ᠪᠤᠭᠤᠷᠤᠯ ᠦᠰᠦ ᠲᠡᠢ ᠲᠥᠷᠥᠭᠰᠡᠨ ᠶᠦᠮ ᠭᠡᠨᠡ ᠯᠠᠢ᠃ ᠲᠡᠭᠡᠲᠡᠯᠡ ᠤᠳᠠᠭᠠᠨ ᠲᠡᠭᠡᠭᠡᠭᠰᠡᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠠᠴᠢ ᠶ᠋ᠢ ᠬᠠᠷᠢᠭᠤᠯᠬᠤ ᠭᠡᠵᠦ ᠲᠠᠨᠲ᠋ᠤᠨ ᠵᠠᠯᠪᠤᠤ ᠣᠯᠠᠨ ᠲᠣᠭᠠᠨ ᠤ᠋ ᠭᠦᠦᠷ᠂ ᠰᠤᠪᠤᠷᠭᠠ ᠪᠠᠷᠢᠭᠤᠯᠤᠭᠰᠠᠨ ᠶᠤᠮ ᠪᠠᠢᠨᠠ ᠪᠢᠯᠡ᠃ ᠲᠡᠭᠡᠬᠦ ᠪᠡᠷ ᠦᠷᠡ ᠬᠡᠦᠬᠡᠳ ᠲᠡᠢ ᠪᠣᠯᠬᠤ ᠴᠤ᠌ ᠵᠠᠶᠠᠭᠠ ᠨᠢ ᠪᠦᠷᠢᠳᠪᠡᠯ ᠬᠡᠵᠢᠶᠡ ᠴᠤ᠌ ᠪᠣᠯᠵᠣᠰᠢ ᠦᠭᠡᠢ ᠶᠦᠮ ᠳᠡ ᠭᠡᠵᠦ ᠰᠠᠩᠵᠢ ᠤᠷᠢᠳᠤ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠷᠢᠵᠤ ᠪᠠᠢᠭᠰᠠᠨ ᠨᠢᠭᠡᠨ ᠳᠣᠮᠣᠭ ᠮᠡᠲᠦ ᠶᠠᠭᠤᠮᠠ ᠶ᠋ᠢ ᠬᠡᠯᠡᠪᠡ᠃ ᠪᠡᠷᠢᠮᠦᠭ ᠲᠡᠭᠦᠨ ᠳ᠋ᠦ᠍ ᠳᠤᠷᠠ ᠦᠭᠡᠢ ᠨᠢ ᠬᠦᠷᠦᠭᠰᠡᠨ ᠪᠣᠯᠤᠯᠲᠠᠢ:
— ᠬᠡ ᠴᠠᠰ! ᠬᠡᠵᠢᠶᠡ ᠵᠢᠷᠠᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠦᠷᠡ ᠲᠡᠢ ᠪᠣᠯᠤᠨᠠ᠂ ᠲᠡᠷᠡ ᠮᠠᠨᠢ ᠪᠤᠭᠤᠷᠤᠯ ᠡᠪᠦᠭᠡᠨ ᠲᠥᠷᠥᠨᠡ ᠭᠡᠳ ᠪᠠᠯᠠᠢᠷᠠᠨ ᠬᠦᠯᠢᠶᠡᠵᠦ ᠰᠠᠭᠤᠬᠤ ᠶᠤᠮ ᠪᠣᠢ? ᠳᠡᠮᠡᠢ ᠬᠡᠷᠡᠭ᠃ ᠳᠡᠷᠡᠨ ᠲᠤᠬᠠᠢ ᠪᠤᠤ ᠪᠣᠳᠣ᠃ ᠬᠠᠷᠢᠨ ᠨᠢᠭᠡᠨᠲᠡ ᠢᠷᠡᠭᠰᠡᠨ ᠶᠦᠮ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ᠂ ᠲᠡᠷᠡ ᠣᠯᠠᠨ ᠬᠠᠭᠠᠯᠭᠠᠲᠤ ᠰᠤᠪᠤᠷᠭᠠᠨ ᠳ᠋ᠠᠭᠠᠨ ᠣᠴᠢᠵᠤ ᠮᠥᠷᠭᠥᠭᠡᠳ ᠪᠤᠴᠠ᠃ ᠳᠠᠬᠢᠨ ᠬᠡᠨ ᠦ᠌ ᠴᠤ᠌ ᠦᠭᠡᠨ ᠳ᠋ᠦ᠍ ᠲᠣᠯᠣᠭᠠᠢ ᠶ᠋ᠢ ᠪᠡᠨ ᠪᠢᠲᠡᠭᠡᠢ ᠮᠡᠳᠡᠭᠦᠯᠵᠦ ᠪᠠᠢ! ᠦᠷᠡ ᠲᠡᠢ ᠪᠣᠯᠤᠨᠠ ᠭᠡᠳᠡᠭ ᠯᠠᠮᠠ ᠶ᠋ᠢᠨ ᠬᠡᠷᠡᠭ ᠪᠢᠰᠢ ᠭᠡᠵᠦ ᠱᠠᠭᠠᠷᠳᠠᠯᠠ᠃ ᠪᠡᠷᠢᠮᠦᠭ ᠡᠮᠡᠭᠡᠨ ᠬᠤᠷᠴᠠ ᠭᠠᠰᠢᠭᠤᠨ ᠦᠭᠡ ᠲᠡᠢ ᠪᠣᠯᠪᠠᠴᠤ ᠬᠠᠯᠠ ᠦᠵᠡᠵᠦ᠂ ᠬᠠᠯᠠᠭᠤᠨ ᠴᠢᠯᠠᠭᠤ ᠳᠣᠯᠢᠶᠠᠭᠰᠠᠨ ᠪᠣᠯᠬᠣᠷ ᠬᠠᠷᠠ ᠤᠬᠠᠭᠠᠨ ᠲᠠᠢ ᠭᠡᠳᠡᠭ ᠢ᠋ ᠰᠠᠩᠵᠢ ᠢᠲᠡᠭᠡᠵᠦ ᠪᠠᠢᠯᠠ᠃ ᠰᠠᠩᠵᠢ ᠶ᠋ᠢᠨ ᠠᠮᠢ ᠶ᠋ᠢ ᠵᠣᠷ ᠮᠡᠳᠡᠳᠡᠭ ᠯᠠᠮᠠ ᠪᠠᠭᠰᠢ ᠨᠠᠷ ᠨᠢ ᠪᠢᠰᠢ ᠬᠠᠷᠢᠨ ᠵᠣᠪᠠᠯᠠᠩ ᠦᠵᠡᠭᠰᠡᠨ ᠡᠨᠡ ᠴᠢᠪᠠᠭᠠᠨᠴᠠ ᠯᠠ ᠠᠪᠤᠷᠠᠭᠰᠠᠨ ᠢ᠋ ᠶᠠᠭᠠᠬᠢᠵᠤ ᠮᠠᠷᠲᠠᠬᠤ ᠪᠢᠯᠡ᠃ 《ᠣᠳᠣ ᠪᠦᠬᠡᠮᠠᠩᠯᠠᠢ ᠭᠤᠸᠠᠢ ᠢᠷᠡᠬᠦ ᠦᠭᠡᠢ ᠪᠣᠯ ᠪᠢ ᠯᠡ ᠭᠠᠵᠠᠷᠴᠢᠯᠠᠵᠤ ᠵᠠᠩᠴᠸ ᠬᠡᠢᠳ ᠲᠦ᠍ ᠬᠦᠷᠭᠡᠵᠦ ᠵᠣᠷᠢᠭᠰᠠᠨ ᠰᠤᠪᠤᠷᠭᠠᠨ ᠳ᠋ᠤᠨᠢ ᠮᠥᠷᠭᠥᠭᠦᠯᠬᠦ ᠡᠴᠡ ᠪᠢᠰᠢ ᠳᠡ᠃ ᠥᠭᠡᠷᠡ ᠶᠠᠭᠠᠬᠢᠬᠤ ᠪᠣᠢ?》 ᠭᠡᠵᠦ ᠰᠠᠩᠵᠢ ᠪᠣᠳᠣᠯᠠ᠃ ᠴᠣᠳᠠᠩᠭᠤᠮᠠᠨ ᠪᠤᠶᠤ ᠣᠯᠠᠨ ᠬᠠᠭᠠᠯᠭᠠᠲᠤ ᠰᠤᠪᠤᠷᠭᠠ ᠪᠠᠢᠳᠠᠭ ᠲᠡᠷᠡᠬᠦ ᠵᠠᠩᠴᠸ ᠬᠡᠢᠳ ᠲᠦ᠍ ᠪᠤᠳ᠋ᠳ᠋ᠾᠠ ᠪᠤᠷᠬᠠᠨ ᠤ᠋ ᠨᠣᠮᠯᠠᠯ ᠤ᠋ᠨ ᠲᠥᠷᠥᠯ ᠪᠦᠷᠢ ᠶ᠋ᠢᠨ ᠶᠣᠰᠣ ᠰᠠᠬᠢᠭᠴᠢ ᠳ᠋ᠤ᠌ ᠨᠢᠭᠡᠨ ᠳᠣᠣᠷᠠ ᠠᠵᠤ ᠲᠥᠷᠦᠵᠢ᠂ ᠨᠣᠮᠯᠠᠯ ᠶᠠᠭᠤ ᠶ᠋ᠢ ᠪᠡᠨ ᠳᠡᠯᠭᠡᠷᠡᠭᠦᠯᠵᠦ ᠪᠠᠶᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠶᠡᠬᠡ ᠣᠨᠴᠠᠯᠢᠭ ᠭᠠᠵᠠᠷ ᠪᠠᠢᠯᠠ᠃ ᠰᠠᠬᠢᠶᠠ᠂ ᠭᠡᠯᠦᠭᠪᠠ᠂ ᠨᠢᠶᠠᠨᠮᠠ᠂ ᠺᠠᠷᠮᠠ ᠭᠡᠳ ᠯᠡ ᠠᠯᠢᠪᠠ ᠰᠦᠵᠢᠭᠲᠡᠨ ᠠᠯᠠᠭᠯᠠᠨ ᠠᠵᠤ ᠲᠥᠷᠥᠳᠡᠭ ᠲᠡᠷᠡ ᠪᠢᠴᠢᠬᠠᠨ ᠬᠡᠢᠳ ᠦ᠋ᠨ ᠴᠣᠳᠠᠩᠭᠤᠮᠠᠨ ᠰᠤᠪᠤᠷᠭᠠ ᠪᠤᠳ᠋ᠳ᠋ᠾᠠ ᠶ᠋ᠢᠨ ᠶᠢᠷᠲᠢᠨᠴᠦᠳ ᠶᠡᠬᠡ ᠠᠯᠳᠠᠷᠰᠢᠵᠠᠢ᠃ ᠲᠠᠪᠤᠨ ᠳᠠᠪᠬᠤᠷ ᠲᠡᠷᠡ ᠰᠤᠪᠤᠷᠭᠠ ᠣᠯᠠᠨ ᠬᠠᠭᠠᠯᠭᠠ ᠲᠠᠢ ᠶᠤᠮ᠃ ᠳᠠᠪᠬᠤᠷ ᠪᠦᠷᠢ ᠳ᠋ᠦ᠍ ᠬᠣᠷᠢᠨ ᠬᠠᠭᠠᠯᠭᠠ ᠪᠣᠢ᠃ ᠪᠦᠭᠦᠳᠡ ᠨᠡᠢᠯᠡᠭᠡᠳ ᠵᠠᠭᠤᠨ ᠬᠠᠭᠠᠯᠭᠠ ᠲᠠᠢ ᠪᠣᠯᠪᠠᠴᠤ ᠮᠠᠨᠢ ᠶ᠋ᠢᠨ ᠡᠷᠭᠢᠨ ᠦ᠌ ᠲᠣᠭᠠ ᠪᠠᠷ ᠵᠠᠭᠤᠨ ᠨᠠᠢ᠍ᠮᠠᠨ ᠬᠠᠭᠠᠯᠭᠠ ᠲᠠᠢ ᠭᠡᠵᠦ ᠰᠢᠲᠦᠯᠭᠡᠲᠡᠨ ᠣᠯᠠᠨ ᠢ᠋ᠶ᠋ᠠᠷ ᠢᠲᠡᠭᠡᠵᠡᠢ᠃ ᠵᠠᠭᠤᠨ ᠨᠠᠢ᠍ᠮᠠᠨ ᠬᠠᠭᠠᠯᠭᠠ ᠳ᠋ᠤ᠌ ᠲᠡᠷᠡ ᠰᠤᠪᠤᠷᠭᠠᠨ ᠳ᠋ᠤ᠌ ᠬᠡᠷᠪᠡ ᠬᠠᠭᠠᠯᠭᠠ ᠪᠦᠷᠢ ᠪᠡᠷ ᠣᠷᠣᠵᠤ ᠭᠠᠷᠬᠤ ᠭᠡᠪᠡᠯ ᠨᠡᠯᠢᠶᠡᠳ ᠴᠠᠭ ᠵᠠᠷᠤᠬᠤ ᠬᠡᠷᠡᠭᠲᠡᠢ ᠪᠠᠢᠳᠠᠭ ᠠᠵᠢ᠃ ᠭᠡᠪᠡᠴᠦ ᠭᠠᠭᠴᠠᠬᠦ ᠲᠡᠭᠦᠨ ᠳ᠋ᠦ᠍ ᠰᠦᠵᠢᠭᠯᠡᠵᠦ ᠢᠷᠡᠭᠰᠡᠨ ᠬᠥᠮᠦᠨ ᠳ᠋ᠦ᠍ ᠪᠣᠯ ᠰᠠᠨᠠᠭᠠᠨ ᠤ᠋ ᠯᠠ ᠠᠵᠢᠯ ᠪᠠᠢᠯᠠ᠃ ᠬᠠᠭᠠᠯᠭᠠ ᠪᠦᠷᠢ ᠪᠡᠷ ᠣᠷᠣᠵᠤ ᠭᠠᠷᠴᠤ ᠶᠠᠪᠤᠭᠰᠠᠭᠠᠷ ᠴᠠᠭ ᠥᠩᠭᠡᠷᠡᠬᠦ᠂ ᠶᠠᠳᠠᠷᠠᠵᠤ ᠵᠦᠳᠡᠷᠡᠬᠦ ᠶ᠋ᠢ ᠮᠠᠷᠲᠠᠳᠠᠭ ᠪᠠᠢᠵᠠᠢ᠃
— ᠪᠦᠬᠡᠮᠠᠩᠯᠠᠢ ᠭᠤᠸᠠᠢ ᠶ᠋ᠢ ᠢᠷᠡᠬᠦ ᠦᠭᠡᠢ ᠪᠣᠯ ᠪᠢ ᠯᠡ ᠲᠠᠨ ᠢ᠋ ᠭᠠᠵᠠᠷᠴᠢᠯᠠᠵᠤ ᠣᠯᠠᠨ ᠬᠠᠭᠠᠯᠭᠠᠲᠤ ᠰᠤᠪᠤᠷᠭᠠᠨ ᠳ᠋ᠤ᠌ ᠮᠥᠷᠭᠥᠯ ᠬᠢᠯᠭᠡᠵᠦ ᠢᠷᠡᠬᠦ ᠡᠴᠡ ᠳᠡ! ᠭᠡᠵᠦ ᠰᠠᠩᠵᠢ ᠪᠣᠳᠣᠵᠤ ᠪᠠᠢᠭᠰᠠᠨ ᠵᠦᠢᠯ ᠢ᠋ᠶ᠋ᠡᠨ ᠬᠡᠯᠡᠪᠡ᠃ ᠤᠳᠬᠤᠨ ᠲᠡᠭᠦᠨ ᠳ᠋ᠦ᠍ ᠪᠠᠶᠠᠷᠯᠠᠬᠤ ᠮᠡᠲᠦ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠪᠠᠰᠠᠬᠦ ᠭᠤᠨᠢᠭ ᠲᠥᠷᠥᠵᠡᠢ᠃ ᠪᠦᠬᠡᠮᠠᠩᠯᠠᠢ ᠶ᠋ᠢ ᠢᠷᠡᠬᠦ ᠦᠭᠡᠢ ᠪᠣᠯ ᠭᠡᠵᠦ ᠮᠠᠭᠤ ᠶᠠᠭᠤᠮᠠ ᠵᠥᠩᠨᠡᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠲᠡᠭᠦᠨ ᠤ ᠳᠤᠷᠠ ᠦᠭᠡᠢ ᠬᠦᠷᠴᠡᠢ᠃ ᠦᠨᠡᠬᠡᠷ ᠪᠦᠬᠡᠮᠠᠩᠯᠠᠢ ᠶ᠋ᠢᠨ ᠪᠠᠢᠳᠠᠯ ᠬᠦᠨᠳᠦ ᠪᠣᠯᠤᠭᠰᠠᠨ ᠢ᠋ ᠬᠡᠨ ᠴᠤ᠌ ᠮᠡᠳᠡᠭᠰᠡᠨ ᠦᠭᠡᠢ᠃ ᠲᠡᠳᠡᠨ ᠢ᠋ ᠵᠡᠷᠯᠢᠭ ᠣᠮᠣᠭ ᠭᠣᠯᠣᠣᠭ ᠤ᠋ᠳ ᠣᠯᠵᠠᠯᠠᠨ ᠠᠪᠴᠤ ᠠᠭᠤᠯᠠ ᠶ᠋ᠢᠨ ᠬᠠᠪᠴᠢᠯ ᠳ᠋ᠤ᠌ ᠠᠪᠠᠴᠢᠵᠠᠢ᠃ ᠤᠤᠯ ᠤ᠋ᠨ ᠳᠡᠭᠡᠷᠡᠮᠴᠢᠳ ᠰᠠᠷᠯᠤᠭ ᠤ᠋ᠨ ᠰᠡᠪᠡᠭ ᠢ᠋ᠶ᠋ᠡᠷ ᠨᠡᠬᠡᠭᠰᠡᠨ ᠬᠠᠷᠠ ᠪᠦᠷᠢᠶᠡᠰᠦ ᠲᠡᠢ ᠪᠠᠨᠠᠭ ᠲᠤ᠌ ᠰᠠᠭᠤᠵᠠᠭᠠᠬᠤ ᠪᠥᠭᠡᠳ ᠨᠢᠳᠦ ᠢᠷᠮᠡᠬᠦ ᠵᠠᠭᠤᠷᠠ ᠠᠴᠢᠶᠠᠯᠠᠨ ᠬᠠᠨᠳᠤᠭᠰᠠᠨ ᠵᠦᠭ ᠲᠦ᠍ ᠪᠡᠨ ᠲᠡᠯᠢᠢᠵᠦ ᠥᠭᠳᠡᠭ ᠵᠠᠩᠰᠢᠯ ᠲᠠᠢ ᠬᠡᠭᠡᠷᠡ ᠶ᠋ᠢᠨ ᠵᠡᠷᠯᠢᠭ ᠲᠡᠨᠦᠭᠦᠯᠴᠢᠨ ᠣᠲᠣᠭ ᠠᠵᠠᠢ᠃ ᠲᠡᠳᠡ ᠲᠥᠪᠡᠳ ᠦ᠋ᠨ ᠥᠨᠳᠥᠷ ᠠᠭᠤᠯᠠᠰ ᠳᠠᠮᠵᠢᠨ ᠬᠡᠰᠦᠭᠦᠴᠢᠯᠡᠵᠦ ᠶᠡᠬᠡ ᠵᠠᠮ ᠲᠣᠰᠣᠨ ᠳᠡᠭᠡᠷᠡᠮ ᠬᠢᠵᠦ᠂ ᠭᠠᠭᠴᠠᠬᠦ ᠲᠡᠢᠮᠦ ᠠᠷᠭᠠ ᠪᠠᠷ ᠠᠮᠢᠳᠤᠷᠠᠳᠠᠭ ᠤᠯᠤᠰ ᠪᠠᠢᠯᠠ᠃ ᠬᠠᠮᠤᠭ ᠤ᠋ᠨ ᠶᠡᠬᠡ ᠣᠯᠵᠠ ᠲᠠᠢ ᠵᠠᠮ ᠨᠢ ᠬᠠᠯᠬᠠ ᠮᠣᠩᠭᠣᠯ ᠠ᠋ᠴᠠ ᠢᠷᠡᠳᠡᠭ ᠮᠥᠷᠭᠥᠯᠴᠢᠳ ᠦ᠋ᠨ ᠬᠢ ᠪᠢᠯᠡ᠃ ᠭᠣᠣᠯ ᠲᠥᠯᠥᠪ ᠭᠠᠷ ᠬᠣᠭᠣᠰᠣᠨ᠂ ᠶᠠᠳᠠᠭᠤ ᠵᠦᠳᠡᠭᠦᠦ ᠰᠦᠵᠢᠭ ᠪᠢᠰᠢᠷᠡᠯ ᠶᠡᠬᠡ ᠲᠡᠢ ᠮᠣᠩᠭᠣᠯᠴᠤᠳ ᠢ᠋ ᠲᠡᠳᠡ ᠲᠤᠨᠤᠭᠰᠠᠭᠠᠷ ᠪᠠᠢᠭᠠᠳ ᠠᠮᠲᠠᠰᠢᠵᠤ ᠭᠦᠢᠴᠡᠵᠡᠢ᠃ ᠭᠡᠬᠦ ᠳ᠋ᠡᠭᠡᠨ ᠡᠳ᠋ ᠬᠣᠭᠰᠢᠯ ᠢ᠋ ᠨᠢ ᠭᠣᠣᠯᠴᠢᠯᠠᠨ ᠳᠡᠭᠡᠷᠡᠮᠳᠡᠬᠦ ᠡᠴᠡ ᠪᠢᠰᠢ᠃ ᠬᠥᠮᠦᠨ ᠦ᠌ ᠠᠮᠢ ᠪᠤᠰᠠᠨᠢᠭᠤᠯᠬᠤ ᠶ᠋ᠢ ᠨᠢᠭᠡ ᠶᠡᠬᠡ ᠬᠢᠴᠢᠶᠡᠳᠡᠭ ᠦᠭᠡᠢ ᠪᠠᠢᠵᠠᠢ᠃ ᠡᠨᠡ ᠤᠳᠠᠭᠠ ᠲᠡᠳᠡ ᠡᠳ᠋ ᠬᠣᠭᠰᠢᠯ ᠠ᠋ᠴᠠ ᠭᠠᠳᠠᠨᠠ ᠬᠥᠮᠦᠨ ᠣᠯᠵᠯᠠᠵᠤ ᠠᠪᠬᠤ ᠵᠣᠷᠢᠯᠭᠠ ᠲᠠᠢ ᠪᠠᠢᠭᠰᠠᠨ ᠨᠢ ᠭᠠᠢ ᠪᠣᠯᠵᠤ ᠳᠠᠷᠤᠮᠵᠠᠭᠳᠠ᠂ ᠪᠦᠬᠡᠮᠠᠩᠯᠠᠢ ᠬᠣᠶᠠᠷ ᠤ᠋ᠨ ᠭᠠᠯ ᠲᠠᠢ ᠲᠣᠬᠢᠶᠠᠯᠳᠤᠵᠤ ᠲᠡᠳᠡ ᠣᠯᠵᠠᠯᠠᠭᠳᠠᠭᠰᠠᠨ ᠶᠤᠮᠰᠠᠨᠵᠠᠢ᠃ ᠭᠣᠯᠣᠤᠭ ᠤ᠋ᠨ ᠲᠡᠷᠡ ᠳᠡᠭᠡᠷᠡᠮᠴᠢᠳ ᠦ᠋ᠨ ᠠᠬᠠᠯᠠᠭᠴᠢ ᠨᠢ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠪᠠᠷᠢᠭᠳᠠᠵᠤ ᡀᠠᠰᠠ ᠵᠣᠣ ᠳ᠋ᠤ᠌ ᠬᠦᠷᠭᠡᠭᠳᠡᠭᠰᠡᠨ ᠪᠠᠢᠵᠠᠢ᠃ ᠲᠡᠷᠡ ᠳᠡᠭᠡᠷᠡᠮᠴᠢᠨ ᠨᠢᠭᠡᠨ ᠤᠳᠠᠭᠠ ᠰᠥᠨᠢ ᠶ᠋ᠢᠨ ᠴᠠᠭ ᠢ᠋ᠶ᠋ᠠᠷ ᠠᠨᠳᠠᠭᠤᠷᠠᠵᠤ ᠲᠥᠪᠡᠳ ᠦ᠋ᠨ ᠨᠢᠭᠡᠨ ᠶᠡᠬᠡ ᠬᠡᠷᠬᠡᠮ ᠶᠠᠩᠪᠠᠲᠠᠨ ᠲᠦᠰᠢᠮᠡᠯ ᠦ᠋ᠨ ᠬᠢᠨ ᠳ᠋ᠦ᠍ ᠬᠠᠯᠳᠠᠵᠤ ᠣᠷᠬᠢᠭᠠᠳ ᠪᠠᠷᠢᠭᠳᠠᠭᠰᠠᠨ ᠪᠠᠢᠵᠠᠢ᠃ ᡀᠠᠰᠠ ᠵᠣᠣ ᠶ᠋ᠢᠨ ᠭᠠᠵᠠᠷ ᠱᠣᠷᠣᠩ ᠳ᠋ᠤ᠌ ᠲᠡᠭᠦᠨ ᠢ᠋ ᠬᠠᠶᠠᠵᠠᠢ᠃ ᠥᠴᠢᠭ ᠦᠭᠡᠢ ᠪᠡᠷ ᠳᠢᠭᠪᠠᠷᠠᠨᠵᠠ ᠳ᠋ᠤ᠌ ᠢᠳᠡᠭᠦᠯᠬᠦ ᠶᠠᠯᠠ ᠵᠢᠭᠠᠬᠤ ᠪᠠᠷ ᠶᠠᠷᠢᠶᠠ ᠭᠠᠷᠤᠭᠰᠠᠨ ᠪᠠᠢᠯᠠ᠃ ᠥᠯᠥᠰᠬᠦᠯᠡᠩ ᠳᠢᠭᠪᠠᠷᠠᠨᠵᠠ᠂ ᠬᠢᠯᠢᠨᠴᠡᠲᠦ ᠬᠣᠷᠣᠬᠠᠢ ᠪᠠᠷ ᠳᠦᠭᠦᠷᠡᠩ ᠬᠠᠷᠠᠩᠭᠤᠢ ᠨᠦᠬᠡ ᠤᠷᠤᠭᠤ ᠨᠢᠴᠦᠭᠦᠯᠡᠭᠡᠳ ᠰᠢᠲᠠᠵᠤ ᠣᠷᠬᠢᠪᠠᠯ ᠬᠡᠳᠦᠬᠡᠨ ᠬᠣᠷᠣᠮ ᠤ᠋ᠨ ᠳᠠᠷᠠᠭᠠ ᠲᠡᠳᠡᠭᠡᠷ ᠬᠣᠷᠣᠬᠠᠢ ᠳ᠋ᠤ᠌ ᠪᠠᠷᠢᠭᠳᠠᠵᠤ ᠦᠬᠦᠨᠡ ᠭᠡᠳᠡᠭ ᠢ᠋ ᠳᠡᠭᠡᠷᠡᠮᠴᠢᠨ ᠦ᠌ ᠠᠬᠠᠯᠠᠭᠴᠢ ᠰᠠᠢᠨ ᠮᠡᠳᠡᠵᠦ ᠠᠰᠤᠷᠤ ᠶᠡᠬᠡ ᠠᠶᠤᠵᠤ ᠪᠠᠢᠵᠠᠢ᠃ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠳᠡᠭᠡᠷᠡᠮᠴᠢᠨ ᠬᠠᠷᠠ ᠲᠣᠯᠣᠭᠠᠢ ᠶ᠋ᠢ ᠠᠪᠤᠷᠠᠬᠤ ᠠᠷᠭᠠ ᠬᠠᠢᠵᠤ ᠡᠯᠳᠡᠪ ᠢ᠋ᠶ᠋ᠡᠷ ᠣᠷᠣᠯᠳᠣᠭᠰᠠᠭᠠᠷ ᠪᠠᠢᠲᠠᠯᠠ ᠨᠢ ᠵᠣᠯᠢᠶᠠᠰᠤ ᠠᠪᠴᠤ ᠲᠡᠭᠦᠨ ᠢ᠋ ᠰᠤᠯᠠᠯᠠᠬᠤ ᠶᠠᠷᠢᠶᠠ ᠭᠠᠷᠴᠠᠢ᠃ ᠢᠳᠡᠷ ᠴᠢᠭᠢᠷᠠᠭ ᠲᠠᠪᠤᠨ ᠡᠷᠡ ᠳᠠᠢᠴᠢᠯᠠᠨ᠂ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠵᠣᠯᠢᠶᠠᠰᠤᠨ ᠳ᠋ᠤ᠌ ᠲᠤᠰᠢᠶᠠᠪᠠᠯ ᠲᠡᠭᠦᠨ ᠢ᠋ ᠴᠢᠯᠥᠭᠡᠯᠡᠬᠦ ᠪᠣᠯᠤᠨᠠ ᠭᠡᠵᠦ ᠬᠡᠷᠡᠭ ᠰᠢᠳᠬᠡᠭᠴᠢ ᠲᠦᠰᠢᠮᠡᠯ ᠠᠢᠯᠠᠳᠴᠠᠢ᠃
ᡀᠠᠰᠠ ᠬᠣᠲᠠ ᠶ᠋ᠢᠨ ᠵᠠᠬᠢᠷᠭᠠ ᠯᠠᠨᠴᠢᠰᠠ ᠬᠦᠴᠦ ᠪᠡᠷ ᠴᠡᠷᠢᠭ ᠡᠯᠰᠡᠭᠦᠯᠬᠦ ᠵᠣᠷᠢᠯᠭᠠ ᠲᠠᠢ ᠪᠠᠢᠭᠰᠠᠨ ᠤᠴᠢᠷ ᠡᠬᠢᠯᠡᠭᠡᠳ ᠲᠡᠢᠮᠦ ᠴᠤᠤ ᠶᠠᠷᠢᠶᠠ ᠳᠡᠭᠳᠡᠭᠡᠵᠡᠢ᠃ ᠮᠥᠨᠥᠬᠡᠨ ᠴᠤᠤᠷᠬᠠᠯ ᠨᠡᠯᠢᠶᠡᠳ ᠭᠠᠵᠠᠷ ᠠᠪᠤᠮᠠᠭᠴᠠ ᠯᠠᠨᠴᠢᠰᠠ ᠶᠢᠨ ᠱᠣᠷᠣᠩ ᠳ᠋ᠤ᠌ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠷᠭᠠ ᠪᠠᠷ ᠪᠠᠶᠠᠵᠢᠵᠤ ᠬᠥᠯᠵᠢᠭᠰᠡᠨ ᠬᠠᠮᠵᠢᠯᠭᠠ ᠶ᠋ᠢᠨ ᠡᠵᠡᠳ᠂ ᠴᠢᠨᠡᠭᠡᠯᠢᠭᠬᠡᠨ ᠲᠦᠰᠢᠮᠡᠳ ᠦ᠋ᠳ᠂ ᠳᠡᠭᠡᠷᠡᠮᠴᠢᠨ᠂ ᠯᠤᠢᠪᠠᠷᠴᠢᠨ ᠤ᠋ ᠪᠠᠭ ᠤ᠋ᠨ ᠭᠣᠴᠣᠯᠠᠭᠴᠢ ᠨᠠᠷ ᠢ᠋ ᠦᠯᠦ ᠶᠠᠯᠢᠬᠤ ᠰᠢᠯᠲᠠᠭᠠᠨ ᠢ᠋ᠶ᠋ᠠᠷ ᠪᠠᠷᠢᠪᠴᠢᠯᠠᠨ ᠬᠢᠵᠦ᠂ ᠲᠡᠳᠡᠨ ᠢ᠋ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠬᠦ ᠮᠡᠬᠡ ᠬᠡᠷᠡᠭᠯᠡᠬᠦ ᠪᠣᠯᠵᠠᠢ᠃
ᠭᠤᠴᠢᠨ ᠵᠢᠩ ᠦ᠋ᠨ ᠬᠦᠨᠳᠦ ᠴᠢᠯᠠᠭᠤᠨ ᠮᠠᠯᠠᠭᠠᠢ ᠶ᠋ᠢ ᠶᠠᠯᠠᠲᠠᠨ ᠤ᠋ ᠲᠣᠯᠣᠭᠠᠢ ᠳ᠋ᠤ᠌ ᠡᠮᠦᠰᠬᠡᠭᠡᠳ ᠲᠡᠮᠦᠷ ᠠᠯᠤᠬᠠ ᠪᠠᠷ ᠣᠷᠣᠢ ᠳᠡᠭᠡᠷᠡ ᠨᠢ ᠳᠣᠩᠰᠢᠬᠤ ᠳ᠋ᠤ᠌ ᠤᠤᠯ ᠬᠥᠮᠦᠨ ᠦ᠌ ᠬᠣᠶᠠᠷ ᠨᠢᠳᠦ ᠪᠦᠯᠲᠡ ᠦᠰᠦᠷᠦᠨ ᠬᠠᠴᠠᠷ ᠤᠷᠤᠭᠤ ᠨᠢ ᠤᠨᠵᠢᠢᠳᠠᠭ ᠲᠡᠢᠮᠦ ᠨᠢᠭᠡ ᠮᠠᠭᠤᠬᠠᠢ ᠲᠠᠮᠤᠯᠠᠭᠠ ᠶ᠋ᠢ ᠯᠠᠨᠴᠢᠰᠠ ᠶ᠋ᠢᠨ ᠶᠠᠷᠭᠠᠴᠢᠳ ᠪᠣᠳᠣᠵᠤ ᠣᠯᠵᠠᠢ᠃ ᠲᠡᠭᠦᠨ ᠢ᠋ ᠪᠡᠨ ᠱᠣᠷᠣᠩ ᠤ᠋ᠨ ᠬᠣᠷᠢᠭᠳᠠᠯ ᠤ᠋ᠳ ᠲᠤ᠌ ᠦᠵᠡᠭᠦᠯᠵᠦ ᠲᠡᠳᠡᠨ ᠳ᠋ᠦ᠍ ᠠᠢᠳᠠᠰ ᠭᠦᠢᠳᠡᠰ ᠲᠥᠷᠥᠭᠦᠯᠵᠦ ᠪᠠᠢᠯᠠ᠃ ᠬᠠᠮᠵᠢᠯᠭᠠ ᠶ᠋ᠢᠨ ᠡᠵᠡᠳ᠂ ᠴᠢᠨᠡᠭᠡᠯᠢᠭ ᠲᠦᠰᠢᠮᠡᠳ ᠦ᠋ᠳ᠂ ᠯᠤᠢᠪᠠᠷᠴᠢᠳ ᠤ᠋ᠨ ᠲᠣᠯᠣᠭᠠᠢᠯᠠᠭᠴᠢ ᠨᠠᠷ ᠤ᠋ᠨ ᠡᠮᠦᠨᠡ ᠲᠡᠷᠡ ᠡᠷᠡᠭᠦᠦ ᠰᠢᠭᠦᠯᠲᠡ ᠪᠡᠨ ᠦᠵᠡᠭᠦᠯᠦᠨ ᠳᠠᠯᠠᠢᠯᠭᠠᠬᠤ ᠶ᠋ᠢᠨ ᠳᠡᠯᠢᠮ ᠳ᠋ᠦ᠍ ᠲᠡᠳᠡᠨ ᠡᠴᠡ ᠵᠣᠯᠢᠶᠠᠰᠤᠨ ᠤ᠋ ᠬᠥᠮᠦᠨ ᠭᠠᠷᠭᠠᠭᠤᠯᠬᠤ ᠱᠠᠭᠠᠷᠳᠠᠯᠭᠠ ᠲᠠᠯᠪᠢᠭᠰᠠᠭᠠᠷ ᠪᠠᠢᠯᠠ᠃ ᠤᠤᠰᠢ ᠶ᠋ᠢᠨ ᠳᠠᠪᠠᠭᠠ ᠬᠠᠪᠢ ᠪᠠᠷ ᠬᠥᠯᠯᠡᠳᠡᠭ ᠭᠣᠯᠣᠤᠭ ᠵᠢᠨ ᠳᠡᠭᠡᠷᠡᠮᠴᠢᠳ ᠦ᠋ᠨ ᠲᠣᠯᠣᠭᠠᠢᠯᠠᠭᠴᠢ ᠳ᠋ᠸᠩᠵᠡᠨ ᠳᠡᠷᠡᠨ ᠡᠴᠡ ᠮᠠᠭᠤᠬᠠᠢ ᠶᠠᠭᠤᠮᠠ ᠣᠯᠠᠨ ᠢ᠋ ᠦᠵᠡᠵᠦ ᠥᠩᠭᠡᠷᠡᠭᠦᠯᠦᠭᠰᠡᠨ ᠨᠢᠭᠦᠯᠲᠦ ᠲᠣᠯᠣᠭᠠᠢ ᠪᠣᠯᠬᠣᠷ ᠢ᠋ᠶ᠋ᠠᠨ ᠶᠡᠷᠦ ᠲᠣᠭᠣᠬᠤ ᠦᠭᠡᠢ ᠪᠠᠢᠪᠠ᠃ ᠲᠡᠭᠦᠨ ᠡᠴᠡ ᠪᠤᠰᠤᠳ ᠬᠣᠷᠢᠭᠳᠠᠯ ᠤ᠋ᠳ ᠴᠥᠮ ᠯᠡ ᠵᠢᠷᠦᠬᠡ ᠦᠬᠦᠵᠦ᠂ ᠥᠪᠡᠷ ᠥᠪᠡᠷ ᠦ᠋ᠨ ᠬᠠᠮᠵᠢᠯᠭᠠ᠂ ᠵᠠᠷᠤᠴᠠ ᠬᠠᠷᠢᠶᠠᠲᠤ ᠨᠠᠷ ᠠ᠋ᠴᠠ ᠨᠢᠭᠡ ᠬᠣᠶᠠᠷ ᠬᠥᠮᠦᠨ ᠵᠣᠯᠢᠶᠠᠰᠤᠯᠠᠨ ᠭᠠᠷᠭᠠᠵᠤ ᠥᠭᠬᠦ ᠠᠮᠠ ᠥᠴᠢᠭ ᠠᠯᠳᠠᠵᠠᠭᠠᠭᠰᠠᠭᠠᠷ ᠪᠠᠢᠵᠠᠢ᠃ ᠪᠠᠷᠤᠭ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠥᠴᠢᠭ ᠥᠭᠭᠦᠯ ᠦᠭᠡᠢ ᠦᠯᠡᠳᠡᠬᠦ ᠳ᠋ᠦ᠍ ᠨᠢ ᠳ᠋ᠸᠩᠵᠡᠨ ᠳ᠋ᠦ᠍ ᠬᠠᠲᠠᠭᠤ ᠶᠠᠭᠤᠮᠠ ᠦᠵᠡᠭᠦᠯᠬᠦ ᠪᠡᠷ ᠯᠠᠨᠴᠢᠰᠠ ᠶ᠋ᠢᠨ ᠶᠠᠷᠭᠠᠴᠢᠳ ᠡᠷᠡᠰ ᠰᠢᠢᠳᠴᠡᠢ᠃ ᠲᠡᠭᠡᠭᠡᠳ ᠳ᠋ᠸᠩᠵᠡᠨ ᠦ᠌ ᠬᠠᠮᠲᠤ ᠵᠢᠳᠬᠦᠭᠴᠢ ᠨᠢᠭᠡᠨ ᠵᠥᠨᠥᠭ ᠬᠥᠭᠰᠢᠨ ᠳᠡᠭᠡᠷᠡᠮᠴᠢᠨ ᠢ᠋ ᠡᠮᠦᠨᠡ ᠨᠢ ᠳᠠᠭᠤᠨ ᠠᠪᠴᠢᠷᠠᠭᠠᠳ ᠮᠥᠨᠥᠬᠡᠨ ᠴᠢᠯᠠᠭᠤᠨ ᠮᠠᠯᠠᠭᠠᠢ ᠶ᠋ᠢ ᠡᠮᠦᠰᠬᠡᠵᠦ ᠲᠡᠮᠦᠷ ᠠᠯᠤᠬᠠ ᠪᠠᠷ ᠣᠷᠣᠢ ᠳᠡᠭᠡᠷᠡ ᠡᠴᠡ ᠬᠦᠴᠦᠲᠡᠢ ᠴᠣᠬᠢᠵᠤ ᠨᠢᠳᠦ ᠶ᠋ᠢ ᠪᠦᠯᠲᠡᠯᠦᠭᠡᠳ ᠳᠣᠭᠣᠭᠰᠢ ᠤᠨᠵᠢᠢᠭᠰᠠᠨ ᠬᠣᠶᠠᠷ ᠨᠢᠳᠦ ᠶ᠋ᠢ ᠲᠣᠰᠪᠣᠷᠢ ᠳ᠋ᠤᠨᠢ ᠣᠭᠲᠣᠯᠤᠨ ᠠᠪᠴᠤ ᠳ᠋ᠸᠩᠵᠡᠨ ᠦ᠌ ᠡᠮᠦᠨᠡ ᠲᠠᠯᠪᠢᠵᠠᠢ᠃ ᠳ᠋ᠸᠩᠵᠡᠨ ᠲᠡᠭᠦᠨ ᠳ᠋ᠦ᠍ ᠴᠣᠴᠢᠨ ᠭᠠᠢᠬᠠᠬᠤ᠂ ᠠᠶᠤᠬᠤ ᠬᠣᠶᠠᠷ ᠨᠢ ᠵᠡᠷᠭᠡᠴᠡᠵᠦ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠪᠡᠶᠡ ᠪᠡᠨ ᠪᠠᠷᠢᠵᠤ ᠪᠠᠰᠠ ᠯᠠ ᠥᠴᠢᠭ ᠥᠭᠭᠦᠭᠰᠡᠨ ᠦᠭᠡᠢ᠃ ᠲᠡᠭᠡᠬᠦ ᠪᠡᠷ ᠨᠢ ᠶᠠᠷᠭᠠᠴᠢᠳ ᠨᠢᠯᠤᠭᠤᠨ ᠠ᠋ᠴᠠ ᠪᠠᠨ ᠰᠢᠯᠤᠭᠤᠨ ᠳ᠋ᠠᠭᠠᠨ ᠰᠢᠯᠵᠢᠵᠦ᠄
— ᠲᠡᠭᠡᠪᠡᠯ ᠳ᠋ᠸᠩᠵᠡᠨ ᠴᠢᠮᠠ ᠳ᠋ᠤ᠌ ᠪᠠᠰᠠ ᠡᠢᠮᠦ ᠶᠠᠯᠠ ᠣᠨᠣᠭᠣᠭᠣᠨᠠ ᠳᠠ! ᠬᠡᠯᠡᠬᠦ ᠵᠠᠬᠢᠬᠤ ᠶᠠᠭᠤᠮᠠ ᠪᠠᠢᠪᠠᠯ ᠡᠨᠡ ᠰᠣᠬᠣᠷ ᠲᠤ᠌ ᠪᠠᠨ ᠵᠠᠬᠢᠬᠤ ᠪᠢᠵᠡ! ᠭᠡᠵᠦ ᠵᠠᠨᠤᠯᠬᠢᠯᠠᠵᠠᠢ᠃
ᠳ᠋ᠸᠩᠵᠡᠨ ᠡᠭᠦᠨ ᠡᠴᠡ ᠴᠣᠴᠢᠨ ᠠᠶᠤᠵᠤ᠄
— ᠵᠠ᠂ ᠶᠠᠭᠠᠬᠢᠬᠤᠪ ᠪᠢ ᠥᠨᠥ ᠰᠥᠨᠢ ᠳ᠋ᠡᠭᠡᠨ ᠪᠣᠳᠣᠶᠠ! ᠭᠡᠵᠡᠢ᠃
ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠪᠣᠳᠣᠭᠠᠳ ᠪᠣᠳᠣᠭᠠᠳ ᠪᠤᠲᠠ ᠶ᠋ᠢᠨ ᠰᠢᠭᠢᠷᠡ ᠳᠥᠷᠪᠡ ᠭᠡᠭᠴᠢ ᠪᠡᠷ ᠬᠣᠶᠠᠷᠬᠠᠨ ᠵᠠᠮ ᠠ᠋ᠴᠠ ᠥᠭᠡᠷᠡ ᠶᠠᠭᠤᠮᠠ ᠰᠦᠪᠡᠭᠴᠢᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠨᠢᠭᠡ ᠪᠣᠯ ᠨᠢᠳᠦ ᠦᠭᠡᠢ ᠪᠣᠯᠬᠤ᠂ ᠡᠰᠡᠪᠡᠯ ᠵᠣᠯᠢᠶᠠᠰᠤᠨ ᠳ᠋ᠤ᠌ ᠬᠥᠮᠦᠨ ᠥᠭᠬᠦ ᠪᠡᠷ ᠥᠴᠢᠭ ᠠᠯᠳᠠᠬᠤ ᠡᠨᠡ ᠬᠣᠶᠠᠷ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠪᠠᠢᠭᠰᠠᠨ ᠦᠭᠡᠢ᠃ ᠥᠷᠯᠥᠭᠡ ᠨᠢ ᠲᠡᠷᠡ ᠥᠪᠡᠷ ᠦ᠋ᠨ ᠬᠠᠷᠢᠶᠠᠲᠤ ᠠ᠋ᠴᠠ ᠬᠣᠶᠠᠷ ᠬᠥᠮᠦᠨ ᠵᠣᠯᠢᠶᠠᠰᠤᠨ ᠳ᠋ᠤ᠌ ᠥᠭᠬᠦ ᠠᠮᠠ ᠭᠠᠷᠴᠠᠢ᠃ ᠲᠡᠷᠡ ᠲᠤᠬᠠᠢ ᠶ᠋ᠢ ᠪᠡᠨ ᠬᠠᠷᠢᠶᠠᠲᠤ ᠬᠥᠮᠦᠰ ᠲᠦ᠍ ᠪᠡᠨ ᠮᠡᠳᠡᠭᠡ ᠶᠠᠪᠤᠭᠤᠯᠬᠤ ᠳ᠋ᠠᠭᠠᠨ《ᠪᠣᠯᠵᠤ ᠥᠭᠪᠡᠯ ᠮᠥᠷᠭᠥᠯᠴᠢᠳ ᠡᠴᠡ ᠣᠯᠵᠠᠯᠠᠭᠠᠳ ᠬᠥᠬᠡᠨᠠᠭᠤᠷ ᠤ᠋ᠨ ᠥᠭᠡᠯᠡᠳ ᠦ᠋ᠳ ᠭᠡᠰᠡᠨ ᠨᠡᠷᠡ ᠪᠡᠷ ᠵᠣᠯᠢᠶᠠᠰᠤᠨ ᠳ᠋ᠤ᠌ ᠭᠠᠷᠭᠠᠭᠠᠷᠠᠢ》 ᠭᠡᠮᠡᠨ ᠰᠠᠮ ᠵᠠᠬᠢᠵᠠᠢ᠃
— ᠪᠢ ᠴᠤ᠌ ᠬᠠᠷᠢᠶᠠᠲᠤ ᠬᠠᠮᠰᠠᠭᠠᠲᠠᠨ ᠬᠣᠪᠣᠷ ᠲᠠᠢ ᠬᠥᠮᠦᠨ᠃ ᠭᠣᠣᠯ ᠲᠥᠯᠥᠪ ᠬᠥᠬᠡᠨᠠᠭᠤᠷ ᠤ᠋ᠨ ᠮᠣᠩᠭᠣᠯᠴᠤᠳ᠂ ᠬᠣᠪᠣᠭᠰᠠᠢᠷ ᠤ᠋ᠨ ᠲᠣᠷᠭᠤᠳ ᠠ᠋ᠴᠠ ᠰᠠᠢᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠠᠳᠠ ᠲᠠᠢ ᠨᠡᠢᠯᠡᠭᠰᠡᠨ ᠬᠡᠳᠦ ᠭᠤᠷᠪᠠᠨ ᠵᠠᠷᠤᠴᠠ ᠪᠠᠷᠯᠤᠭ ᠲᠠᠢ ᠬᠥᠮᠦᠨ᠃ ᠲᠡᠭᠦᠨ ᠡᠴᠡ ᠪᠠᠨ ᠯᠠ ᠬᠣᠶᠠᠷ ᠢ᠋ ᠵᠣᠯᠢᠶᠠᠰᠤᠨ ᠳ᠋ᠤ᠌ ᠥᠭᠬᠦ ᠡᠴᠡ ᠪᠢᠰᠢ ᠭᠡᠵᠦ ᠳ᠋ᠸᠩᠵᠡᠨ ᠠᠮᠠ ᠭᠠᠷᠴᠠᠢ᠃
ᠠᠮᠠ ᠭᠠᠷᠤᠭᠰᠠᠨ ᠲᠡᠷᠡ ᠬᠣᠶᠠᠷ ᠬᠥᠮᠦᠨ ᠦ᠌ ᠨᠢ ᠲᠣᠭᠠ ᠶ᠋ᠢ ᠪᠥᠭᠯᠡᠬᠦ ᠪᠡᠷ ᠳ᠋ᠸᠩᠵᠡᠨ ᠦ᠌ ᠳᠡᠭᠡᠷᠡᠮᠴᠢᠳ ᠤᠤᠰᠢ ᠶ᠋ᠢᠨ ᠳᠠᠪᠠᠭᠠ ᠪᠠᠷ ᠭᠡᠷᠦᠨ ᠬᠡᠰᠦᠨ ᠶᠠᠪᠤᠵᠤ ᠪᠠᠢᠭᠠᠳ ᠬᠠᠯᠬᠠ ᠭᠠᠵᠠᠷ ᠠ᠋ᠴᠠ ᠢᠷᠡᠵᠦ ᠪᠣᠢ ᠳᠠᠷᠤᠮᠵᠠᠭᠳᠠ ᠶ᠋ᠢᠨ ᠭᠠᠯ ᠤᠷᠤᠭᠤ ᠳᠠᠭᠠᠷᠢᠵᠤ ᠬᠣᠶᠠᠷ ᠬᠥᠮᠦᠨ ᠣᠯᠵᠯᠠᠵᠤ ᠠᠪᠴᠢᠷᠠᠭᠰᠠᠨ ᠤ᠋ ᠨᠢᠭᠡ ᠨᠢ ᠪᠦᠬᠡᠮᠠᠩᠯᠠᠢ ᠪᠠᠢᠯᠠ᠃
ᠳ᠋ᠸᠩᠵᠡᠨ ᠢ ᠭᠠᠪᠠᠯᠠᠵᠤ ᠰᠠᠷᠯᠤᠭ ᠤ᠋ᠨ ᠨᠢᠷᠤᠭᠤᠨ ᠳ᠋ᠤ᠌ ᠬᠦᠯᠢᠵᠦ ᠳᠠᠭᠠᠭᠤᠯᠤᠨ ᠶᠠᠪᠤᠭᠰᠠᠭᠠᠷ ᠯᠠᠨᠴᠢᠰᠠ ᠶ᠋ᠢᠨ ᠵᠠᠨᠳᠠᠯᠴᠢᠳ ᠤᠤᠰᠢ ᠶ᠋ᠢᠨ ᠳᠠᠪᠠᠭᠠᠨ ᠤ᠋ ᠰᠠᠷᠬᠢᠶᠠᠭ ᠲᠤ᠌ ᠣᠴᠢᠵᠤ ᠵᠣᠯᠢᠶᠠᠰᠤᠨ ᠤ᠋ ᠬᠥᠮᠦᠨ ᠢ᠋ᠶ᠋ᠡᠨ ᠠᠪᠬᠤ ᠪᠠᠷ ᠱᠠᠭᠠᠷᠳᠠᠵᠠᠢ᠃ ᠵᠣᠯᠢᠶᠠᠨ ᠤ᠋ ᠬᠥᠮᠦᠨ ᠪᠣᠯᠭᠠᠵᠤ ᠳᠠᠷᠤᠮᠵᠠᠭᠳᠠ᠂ ᠪᠦᠬᠡᠮᠠᠩᠯᠠᠢ ᠬᠣᠶᠠᠷ ᠤ᠋ᠨ ᠲᠣᠯᠣᠭᠠᠢ ᠶ᠋ᠢ ᠬᠠᠷᠠ ᠲᠠᠭᠠᠷ ᠢ᠋ᠶ᠋ᠠᠷ ᠪᠢᠲᠡᠭᠦᠯᠡᠨ ᠪᠣᠭᠣᠭᠠᠳ ᠵᠠᠨᠳᠠᠯᠴᠢᠳ ᠲᠤ᠌ ᠲᠤᠰᠢᠶᠠᠵᠠᠢ᠃
— ᠬᠠᠷᠠᠪᠠᠰᠤ ᠨᠠᠰᠤ ᠪᠡᠶᠡ ᠲᠡᠩᠴᠡᠬᠦ ᠤᠯᠤᠰ ᠪᠠᠢᠨᠠ᠃ ᠠᠪᠴᠤ ᠶᠠᠪᠤᠬᠤ ᠠ᠋ᠴᠠ ᠳᠠ! ᠭᠡᠵᠦ ᠲᠡᠳᠡ ᠵᠥᠪᠰᠢᠶᠡᠷᠡᠭᠡᠳ ᠳ᠋ᠸᠩᠵᠡᠨ ᠢ᠋ ᠰᠤᠯᠠᠯᠠᠵᠠᠢ᠃ ᠵᠠᠮ ᠤ᠋ᠨ ᠵᠠᠭᠤᠷᠠ ᠵᠣᠯᠢᠶᠠᠰᠤᠨ ᠤ᠋ ᠬᠥᠮᠦᠰ ᠢ᠋ ᠴᠠᠭᠳᠠᠭᠠ ᠨᠠᠷ ᠣᠭᠲᠣ ᠬᠠᠢᠷᠠᠯᠠᠬᠤ ᠦᠭᠡᠢ ᠪᠡᠷ ᠪᠠᠷᠠᠬᠤ ᠦᠭᠡᠢ᠂ ᠬᠣᠭᠣᠯᠠ ᠤᠮᠳᠠ ᠴᠤ᠌ ᠥᠭᠬᠦ ᠦᠭᠡᠢ᠂ ᠨᠢᠭᠤᠷ ᠢ᠋ ᠪᠦᠲᠡᠭᠡᠭᠰᠡᠨ ᠲᠠᠭᠠᠷ ᠢ᠋ ᠴᠤ᠌ ᠠᠪᠬᠤ ᠦᠭᠡᠢ᠂ ᠰᠠᠷᠯᠤᠭ ᠤ᠋ᠨ ᠬᠤᠷᠳᠤ ᠪᠠᠷ ᠰᠢᠯᠪᠢᠭᠦᠷᠳᠡᠨ ᠬᠥᠭᠡᠭᠡᠭᠰᠡᠭᠡᠷ ᠶᠠᠪᠤᠬᠤ ᠳ᠋ᠤ᠌ ᠪᠦᠬᠡᠮᠠᠩᠯᠠᠢ ᠶ᠋ᠢᠨ ᠠᠭᠤᠷ ᠬᠦᠷᠴᠦ᠄
— ᠲᠠ ᠨᠠᠷ ᠶᠡᠷᠦ ᠨᠢ ᠶᠠᠭᠤ ᠭᠡᠳ ᠠᠯᠠᠴᠢᠬᠠᠬᠤ ᠰᠢᠬᠠᠭᠠᠳ ᠪᠠᠢᠭᠠ ᠶᠤᠮ ᠪᠣᠢ? ᠪᠢᠳᠡᠨ ᠢ᠋ ᠬᠠᠮᠢᠭᠠᠰᠢ ᠨᠢ ᠠᠪᠴᠤ ᠶᠠᠪᠤᠨᠠ ᠪᠣᠢ? ᠭᠡᠵᠦ ᠬᠠᠰᠬᠢᠷᠪᠠ᠃
— ᠦᠭᠡᠢ ᠡᠨᠡ ᠴᠢᠨᠢ ᠲᠥᠪᠡᠳ ᠬᠥᠮᠦᠨ ᠪᠢᠰᠢ ᠪᠠᠢᠨᠠ ᠡ ᠶᠠᠩᠵᠤ ᠨᠢ! ᠶᠠᠭᠤ ᠭᠡᠳ ᠬᠠᠰᠬᠢᠷᠤᠭᠠᠳ ᠪᠠᠢᠭᠠ ᠶᠤᠮ ᠪᠣᠢ? ᠭᠡᠵᠦ ᠴᠠᠭᠳᠠᠭᠠ ᠶ᠋ᠢᠨ ᠨᠢᠭᠡ ᠨᠢ ᠲᠡᠪᠡᠳᠡᠨ ᠠᠰᠠᠭᠤᠯᠠ᠃ ᠲᠡᠭᠡᠲᠡᠯᠡ ᠨᠥᠭᠦᠭᠡ ᠨᠢ ᠲᠠᠢᠪᠤᠩ ᠢ᠋ᠶ᠋ᠠᠷ᠄
— ᠪᠢᠲᠡᠭᠡᠢ ᠭᠠᠢᠬᠠ! ᠳ᠋ᠸᠩᠵᠡᠨ ᠦ᠌ ᠬᠠᠨᠢ ᠬᠠᠮᠰᠠᠭᠠᠲᠠᠨ ᠳᠣᠲᠣᠷᠠ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠮᠢᠲᠠᠰ ᠪᠠᠢᠳᠠᠭ ᠶᠤᠮ ᠭᠡᠰᠡᠨ᠃ ᠡᠳᠡ ᠨᠠᠷ ᠪᠣᠳᠣᠪᠠᠯ ᠬᠠᠰᠠᠭ᠂ ᠮᠣᠩᠭᠣᠯ᠂ ᠪᠠᠯᠪᠤ᠂ ᠴᠠᠩᠲᠤ ᠶ᠋ᠢᠨ ᠯᠡ ᠨᠢᠭᠡ ᠪᠢᠵᠡ᠃ ᠳᠤᠤᠭᠠᠢ ᠯᠠ ᠬᠥᠭᠡᠭᠡᠵᠦ ᠠᠪᠠᠴᠢᠭᠠᠳ ᠯᠠᠨᠴᠢᠰᠠ ᠳ᠋ᠤ᠌ ᠲᠤᠰᠢᠶᠠᠶᠠ᠃ ᠪᠤᠤ ᠡᠷᠡᠭᠡᠯᠵᠡ ᠭᠡᠵᠦ ᠰᠤᠷᠭᠠᠮᠵᠢᠯᠠᠪᠠ᠃ ᠨᠥᠭᠦᠭᠡ ᠨᠢ᠄
— ᠠ᠂ ᠵᠠ ᠲᠡᠭᠡᠪᠡᠯ ᠶᠠᠭᠠᠬᠢᠬᠤᠪ᠃ ᠨᠡᠭᠡᠷᠡᠨ ᠴᠤ᠌ ᠳᠡᠭᠡᠷᠡᠮᠴᠢᠳ ᠦ᠋ᠨ ᠪᠦᠯᠦᠭ ᠲᠦ᠍ ᠶᠠᠭᠤ ᠡᠰᠡ ᠨᠡᠢᠯᠡᠬᠦ ᠪᠣᠢ ᠭᠡᠵᠡᠢ᠃ ᠪᠦᠬᠡᠮᠠᠩᠯᠠᠢ᠂ ᠳᠠᠷᠤᠮᠵᠠᠭᠳᠠ ᠬᠣᠶᠠᠷ ᠲᠥᠪᠡᠳ ᠬᠡᠯᠡ ᠮᠡᠳᠡᠬᠦ ᠦᠭᠡᠢ ᠪᠣᠯᠬᠣᠷ ᠲᠡᠳᠡᠨ ᠦ᠌ ᠶᠠᠷᠢᠭᠠ ᠶ᠋ᠢ ᠣᠢᠯᠠᠭᠠᠭᠰᠠᠨ ᠦᠭᠡᠢ᠂ ᠬᠡᠢ ᠳᠡᠮᠡᠢ ᠯᠡ ᠪᠠᠴᠢᠮᠳᠠᠨ ᠠᠭᠤᠷᠯᠠᠵᠤ᠂
— ᠲᠠᠯᠪᠢᠭᠠᠴᠢ᠂ ᠲᠠ ᠨᠠᠷ ᠪᠢᠳᠡᠨ ᠢ᠋ ᠲᠠᠯᠪᠢᠭᠠᠴᠢ! ᠴᠢᠰᠤ ᠪᠠᠷ ᠤᠷᠤᠰᠤᠮᠠᠷ ᠳᠠ ! ᠭᠡᠵᠦ ᠪᠦᠬᠡᠮᠠᠩᠯᠠᠢ ᠬᠠᠰᠬᠢᠷᠴᠤ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠬᠡᠨ ᠴᠤ᠌ ᠲᠣᠭᠣᠭᠰᠠᠨ ᠦᠭᠡᠢ᠃
ᠯᠠᠨᠴᠢᠰᠠ ᠳ᠋ᠤ᠌ ᠪᠦᠬᠡᠮᠠᠩᠯᠠᠢ᠂ ᠳᠠᠷᠤᠮᠵᠠᠭᠳᠠ ᠬᠣᠶᠠᠷ ᠢ᠋ ᠲᠤᠰᠢᠶᠠᠵᠠᠢ᠃ ᠲᠣᠯᠣᠭᠠᠢ ᠶ᠋ᠢᠨ ᠪᠣᠭᠣᠯᠲᠠ ᠶ᠋ᠢ ᠠᠪᠤᠭᠠᠳ ᠲᠥᠪᠡᠳ ᠬᠥᠮᠦᠨ ᠪᠢᠰᠢ ᠭᠡᠳᠡᠭ ᠢ᠋ ᠨᠢ ᠯᠠᠨᠴᠢᠰᠠ ᠶ᠋ᠢᠨ ᠲᠦᠰᠢᠮᠡᠳ ᠦ᠋ᠳ ᠳᠠᠷᠤᠢ ᠮᠡᠳᠡᠭᠰᠡᠨ ᠪᠣᠯᠪᠠᠴᠤ᠂
— ᠳ᠋ᠸᠩᠵᠡᠨ ᠦ᠌ ᠳᠡᠭᠡᠷᠡᠮᠴᠢᠳ ᠲᠦ᠍ ᠬᠥᠬᠡᠨᠠᠭᠤᠷ ᠤ᠋ᠨ ᠮᠣᠩᠭᠣᠯᠴᠤᠳ ᠪᠠᠢᠳᠠᠭ ᠭᠡᠰᠡᠨ ᠪᠢᠵᠡ ᠳᠡ᠃ ᠲᠡᠳᠡᠨ ᠡᠴᠡ ᠪᠠᠨ ᠯᠠ ᠵᠣᠯᠢᠶᠠᠰᠤᠨ ᠳ᠋ᠤ᠌ ᠥᠭᠴᠦ ᠣᠷᠬᠢᠵᠤ ᠯᠠ ᠳᠠ! ᠭᠡᠵᠦ ᠨᠢᠭᠡ ᠲᠦᠰᠢᠮᠡᠯ ᠰᠠᠨᠠᠭᠤᠯᠤᠭᠰᠠᠨ ᠳ᠋ᠤ᠌ ᠴᠥᠮ ᠦᠨᠡᠮᠰᠢᠪᠡ᠃
— ᠣᠳᠣ ᠡᠳᠡᠨ ᠢ᠋ ᠱᠣᠷᠣᠩ ᠳ᠋ᠤ᠌ ᠬᠡᠢ᠃ ᠲᠡᠨᠳᠡ ᠬᠡᠳᠦ ᠬᠣᠨᠣᠭ ᠥᠯᠦᠰᠬᠡᠵᠦ ᠣᠮᠣᠭ ᠢ ᠨᠢ ᠨᠣᠮᠣᠬᠠᠳᠬᠠᠬᠤ ᠦᠭᠡᠢ ᠪᠣᠯ ᠡᠳᠡ ᠨᠠᠷ ᠴᠡᠷᠢᠭ ᠲᠦ᠍ ᠶᠠᠪᠤᠬᠤ ᠦᠭᠡᠢ ᠨᠢ ᠯᠠᠪ᠃ ᠥᠯᠥᠰᠦᠭᠡᠳ ᠢᠷᠡᠬᠦ ᠪᠡᠷ ᠢ᠋ᠶ᠋ᠡᠨ ᠠᠷᠭᠠ ᠦᠭᠡᠢ ᠯᠡ ᠣᠮᠣᠭ᠂ ᠠᠭᠤᠷ ᠢ᠋ᠶ᠋ᠠᠨ ᠪᠠᠷᠠᠵᠤ ᠴᠡᠷᠢᠭ ᠲᠦ᠍ ᠶᠠᠪᠤᠬᠤ ᠪᠠᠷ ᠥᠪᠡᠷ ᠢ᠋ᠶ᠋ᠡᠨ ᠭᠤᠶᠤᠨᠠ ᠭᠡᠵᠦ ᠠᠬᠠᠯᠠᠬᠤ ᠲᠤᠰᠢᠮᠡᠯ ᠵᠠᠷᠯᠢᠭ ᠪᠠᠭᠤᠯᠭᠠᠵᠠᠢ᠃
ᠪᠦᠬᠡᠮᠠᠩᠯᠠᠢ᠂ ᠳᠠᠷᠤᠮᠵᠠᠭᠳᠠ ᠬᠣᠶᠠᠷ ᠢ᠋ ᠬᠠᠷᠠᠩᠭᠤᠢ ᠬᠠᠷᠠ ᠱᠣᠷᠣᠩ ᠳ᠋ᠤ᠌ ᠬᠠᠶᠠᠵᠠᠢ᠃ ᠲᠡᠭᠡᠭᠡᠳ ᠬᠡᠳᠦ ᠬᠣᠨᠣᠭ ᠲᠠᠭ ᠮᠠᠷᠲᠠᠵᠤ ᠣᠷᠬᠢᠭᠰᠠᠨ ᠪᠢᠯᠡ᠃ ᠪᠦᠬᠡᠮᠠᠩᠯᠠᠢ ᠭᠠᠯᠵᠠᠭᠤᠷᠠᠭᠰᠠᠨ ᠡᠯᠵᠢᠭᠡ ᠮᠡᠲᠦ ᠣᠷᠢᠯᠠᠨ ᠬᠠᠰᠬᠢᠷᠴᠤ ᠱᠣᠷᠣᠩ ᠤ᠋ᠨ ᠬᠠᠭᠠᠯᠭᠠ ᠶ᠋ᠢ ᠢᠰᠬᠦᠴᠢᠬᠦ ᠳ᠋ᠦ᠍ ᠴᠠᠭᠳᠠᠭᠠ ᠨᠠᠷ ᠰᠠᠶᠢ ᠯᠠ ᠲᠡᠳᠡᠨ ᠢ᠋ ᠬᠣᠷᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠵᠤ ᠪᠠᠢᠴᠠᠭᠠᠬᠤ ᠪᠠᠷ ᠪᠣᠯᠵᠠᠢ᠃ ᠭᠡᠪᠡᠴᠦ ᠲᠥᠪᠡᠳ ᠬᠥᠮᠦᠨ ᠪᠢᠰᠢ ᠪᠠᠢᠬᠤ ᠲᠤᠯᠠ ᠬᠠᠯᠬᠠ ᠮᠢᠴᠠᠩ ᠠ᠋ᠴᠠ ᠬᠡᠯᠡᠮᠦᠷᠴᠢ ᠣᠯᠬᠤ ᠠ᠋ᠴᠠ ᠨᠠᠰᠢ ᠪᠠᠢᠴᠠᠭᠠᠬᠤ ᠦᠭᠡᠢ ᠭᠡᠵᠦ ᠳᠠᠬᠢᠨ ᠱᠣᠷᠣᠩ ᠳ᠋ᠤ᠌ ᠨᠢ ᠪᠤᠴᠠᠭᠠᠴᠠᠢ᠃
ᠪᠦᠬᠡᠮᠠᠩᠯᠠᠢ ᠪᠠᠢᠳᠠᠯ ᠡᠢᠮᠦ ᠳ᠋ᠦ᠍ ᠬᠦᠷᠦᠭᠰᠡᠨ ᠭᠡᠳᠡᠭ ᠢ᠋ ᠣᠳᠬᠣᠨ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠢᠯᠡ᠃ ᠬᠡᠳᠦ ᠬᠣᠨᠣᠭ ᠳᠡᠮᠡᠢ ᠯᠡ ᠬᠦᠯᠢᠶᠡᠵᠦ ᠰᠢᠨᠠᠯᠤᠭᠰᠠᠨ ᠤ᠋ ᠡᠴᠦᠰ ᠲᠦ᠍ ᠵᠣᠷᠢᠵᠤ ᠢᠷᠡᠭᠰᠡᠨ ᠣᠯᠠᠨ ᠬᠠᠭᠠᠯᠭᠠᠲᠤ ᠰᠤᠪᠤᠷᠭᠠ ᠶ᠋ᠢᠨ ᠵᠦᠭ ᠶᠠᠪᠤᠬᠤ ᠪᠠᠷ ᠰᠢᠯᠤᠭᠤᠳᠠᠯᠠ᠃ ᠨᠤᠲᠤᠭ ᠪᠤᠴᠠᠬᠤ ᠴᠠᠭ ᠣᠷᠣᠢᠲᠠᠪᠠᠯ ᠡᠪᠦᠯ ᠦ᠋ᠨ ᠬᠦᠢᠲᠡᠨ ᠤᠯᠠᠷᠢᠯ ᠢᠷᠡᠵᠦ᠂ ᠴᠠᠰᠤᠲᠤ ᠤᠤᠰᠢ ᠶ᠋ᠢᠨ ᠳᠠᠪᠠᠭᠠ ᠶ᠋ᠢ ᠭᠡᠲᠦᠯᠦᠨ ᠳᠠᠪᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠲᠥᠪᠡᠳ ᠭᠠᠵᠠᠷ ᠡᠪᠦᠯᠵᠢᠬᠦ ᠡᠴᠡ ᠠᠷᠭᠠ ᠦᠭᠡᠢ ᠳ᠋ᠦ᠍ ᠬᠦᠷᠬᠦ ᠲᠤᠯᠠ ᠣᠳᠬᠣᠨ ᠲᠠᠢᠨᠬᠦ ᠶᠠᠪᠤᠵᠠᠢ᠃ ᠶᠠᠭᠠᠷᠠᠳᠠᠭ ᠨᠢ ᠠᠷᠭᠠ ᠦᠭᠡᠢ ᠤᠴᠢᠷᠲᠠᠢ ᠪᠠᠢᠵᠠᠢ᠃
ᠠᠮᠠᠯᠠᠭᠰᠠᠨ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠰᠠᠩᠵᠢ ᠲᠡᠭᠦᠨ ᠳ᠋ᠦ᠍ ᠭᠠᠵᠠᠷᠴᠢᠯᠠᠵᠤ ᠴᠤᠳᠠᠩᠭᠤᠮᠠᠨ ᠪᠤᠶᠤ ᠣᠯᠠᠨ ᠬᠠᠭᠠᠯᠭᠠᠲᠤ ᠰᠤᠪᠤᠷᠭᠠ ᠤᠷᠤᠭᠤ ᠶᠠᠪᠤᠬᠤ ᠪᠠᠷ ᠰᠢᠢᠳᠴᠡᠢ᠃《ᠵᠠᠮ ᠳ᠋ᠠᠭᠠᠨ ᠬᠡᠵᠢᠶᠡᠨ ᠦ᠌ ᠠᠯᠳᠠᠷᠲᠤ ᠨᠡᠷᠡᠲᠡᠨ ᠬᠡᠢᠳ ᠢ᠋ᠶ᠋ᠡᠷ ᠣᠷᠣᠭᠠᠳ ᠭᠠᠷᠬᠤ ᠶᠤᠮ ᠰᠢᠦ᠃ ᠭᠠᠨᠵᠤᠤᠷ᠂ ᠳ᠋ᠠᠨᠵᠤᠤᠷ ᠢ᠋ ᠪᠠᠷᠯᠠᠳᠠᠭ ᠨᠣᠮ ᠤ᠋ᠨ ᠲᠡᠷᠡ ᠠᠷᠢᠭᠤᠨ ᠥᠷᠭᠥᠭᠡ ᠪᠡᠷ ᠱᠠᠭᠠᠢᠯ ᠦᠭᠡᠢ ᠥᠩᠭᠡᠷᠡᠪᠡᠯ ᠠᠯᠳᠠᠰ ᠪᠣᠯᠤᠨᠠ》 ᠭᠡᠵᠦ ᠰᠠᠩᠵᠢ ᠪᠣᠳᠣᠵᠤ ᠪᠠᠢᠯᠠ᠃
— ᠰᠠᠨᠠᠭᠠ ᠪᠠᠨ ᠯᠠ ᠵᠣᠭᠣᠭᠣᠨᠠ ᠤᠤ ᠭᠡᠬᠦ ᠡᠴᠡ ᠥᠭᠡᠷᠡ ᠶᠠᠮᠠᠷ ᠠᠰᠢᠭ ᠪᠠᠢᠪᠠ ᠭᠡᠵᠦ ᠳᠡ᠃ ᠣᠯᠠᠨ ᠬᠠᠭᠠᠯᠭᠠ ᠲᠠᠢ ᠠ᠋ᠴᠠ ᠯᠠ ᠪᠢᠰᠢ ᠥᠭᠡᠷᠡ ᠰᠣᠨᠢᠨ ᠭᠠᠵᠢᠭᠤᠳ ᠶᠠᠭᠤᠮᠠ ᠲᠡᠨᠳᠡ ᠪᠠᠢᠬᠤ ᠦᠭᠡᠢ᠃ ᠣᠯᠠᠨ ᠬᠠᠭᠠᠯᠭᠠ ᠪᠠᠷ ᠣᠷᠣᠵᠤ ᠭᠠᠷᠤᠭᠰᠠᠨ ᠬᠥᠮᠦᠨ ᠯᠡ ᠦᠷᠡ ᠶ᠋ᠢᠨ ᠬᠤᠲᠤᠭ ᠲᠠᠢ ᠪᠠᠢᠳᠠᠭ ᠶᠤᠮ ᠪᠣᠯ ᠪᠢ ᠯᠠᠪ ᠯᠠ ᠬᠣᠷᠢ ᠠ᠋ᠴᠠ ᠨᠠᠭᠠᠰᠢ ᠦᠭᠡᠢ ᠬᠡᠦᠬᠡᠳ ᠲᠡᠢ ᠪᠠᠢᠭᠰᠠᠨ ᠳᠠ᠃ ᠭᠡᠪᠡᠴᠦ ᠲᠡᠷᠡ ᠰᠠᠨᠠᠭᠠᠨ ᠳ᠋ᠤ᠌ ᠬᠦᠷᠦᠮᠡ ᠦᠭᠡᠢ ᠬᠡᠷᠡᠭ! ᠭᠡᠵᠦ ᠪᠡᠷᠢᠮᠦᠭ ᠡᠮᠡᠭᠡᠨ ᠰᠡᠭᠦᠯ ᠦ᠋ᠨ ᠤᠳᠠᠭᠠ ᠬᠣᠷᠢᠭᠯᠠᠭᠰᠠᠨ ᠪᠣᠯᠪᠠᠴᠤ ᠣᠳᠬᠣᠨ ᠦᠭᠡᠨ ᠳ᠋ᠦ᠍ ᠨᠢ ᠣᠷᠣᠭᠰᠠᠨ ᠦᠭᠡᠢ᠃
— ᠪᠠᠭᠰᠢ ᠯᠠᠮᠠ ᠶ᠋ᠢᠨ ᠠᠢᠯᠠᠳᠤᠭᠰᠠᠨ ᠶᠣᠰᠣᠭᠠᠷ ᠯᠠ ᠦᠵᠡᠭᠡᠳ ᠠᠯᠳᠠᠶᠠ᠃ ᠦᠭᠡᠨ ᠡᠴᠡ ᠨᠢ ᠵᠥᠷᠢᠪᠡᠯ ᠠᠯᠳᠠᠰ ᠨᠢᠭᠦᠯ ᠪᠣᠯᠬᠤ ᠪᠢᠵᠡ ᠭᠡᠵᠦ ᠤᠳᠬᠤᠨ ᠡᠷᠡᠰ ᠬᠡᠯᠡᠵᠡᠢ᠃
ᠲᠡᠳᠡ ᠠᠶᠠᠨ ᠳ᠋ᠤ᠌ ᠭᠠᠷᠪᠠ᠃ ᠲᠡᠳᠡᠨ ᠦ᠌ ᠵᠣᠷᠢᠭᠰᠠᠨ ᠴᠤᠳᠠᠩᠭᠣᠮᠠᠨ ᠪᠤᠶᠤ ᠣᠯᠠᠨ ᠬᠠᠭᠠᠯᠭᠠᠲᠤ ᠰᠤᠪᠤᠷᠭᠠ ᠪᠣᠯ ᠣᠷᠣᠢ ᠳᠡᠭᠡᠷᠡ ᠪᠡᠨ ᠰᠤᠸᠠᠮᠫᠠᠨ ᠵᠠᠩᠭᠢᠳᠤᠭᠰᠠᠨ ᠮᠡᠲᠦ ᠬᠡᠯᠪᠡᠷᠢ ᠲᠡᠢ ᠠᠯᠲᠠᠳᠠᠮᠠᠯ ᠲᠤᠭ ᠲᠠᠢ᠂ ᠲᠠᠪᠤᠨ ᠳᠠᠪᠬᠤᠷ᠂ ᠳᠠᠪᠬᠤᠷ ᠪᠦᠷᠢ ᠳ᠋ᠡᠭᠡᠨ ᠬᠣᠷᠢ ᠪᠦᠭᠦᠳᠡ ᠵᠠᠭᠤ ᠭᠠᠷᠤᠢ ᠬᠠᠭᠠᠯᠭᠠ ᠲᠠᠢ ᠪᠥᠭᠡᠳ ᠲᠡᠷᠡᠬᠦ ᠴᠠᠭᠠᠨ ᠰᠤᠪᠤᠷᠭᠠᠨ ᠤ᠋ ᠬᠠᠭᠠᠯᠭᠠᠨ ᠠ᠋ᠴᠠ ᠬᠠᠭᠠᠯᠭᠠ ᠳᠠᠮᠵᠢᠨ ᠬᠥᠯᠬᠢᠨ ᠶᠠᠪᠤᠭᠰᠠᠭᠠᠷ ᠪᠦᠲᠦᠨ ᠡᠳᠦᠷ ᠢ᠋ ᠪᠠᠷᠠᠳᠠᠭ ᠠᠵᠢ᠃ ᠲᠡᠷᠡ ᠠᠶᠠᠯᠠᠯ ᠤ᠋ᠨ ᠳᠠᠷᠠᠭᠠ ᠦᠷᠡ ᠶ᠋ᠢᠨ ᠬᠤᠲᠤᠭ ᠣᠯᠤᠨᠠ ᠭᠡᠳᠡᠭ ᠲᠦ᠍ ᠣᠳᠬᠣᠨ ᠢᠲᠡᠭᠡᠵᠦ᠂ ᠰᠠᠩᠵᠢ ᠪᠣᠯᠬᠣᠷ ᠲᠡᠳᠦᠢ ᠯᠡ ᠰᠠᠢᠨ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠯᠠ᠃《ᠶᠢᠷᠲᠢᠨᠴᠦ ᠪᠠᠰᠠᠬᠦ ᠣᠯᠠᠨ ᠬᠠᠭᠠᠯᠭᠠᠲᠤ ᠰᠤᠪᠤᠷᠭᠠ ᠮᠡᠲᠦ ᠪᠢᠯᠡ᠃ ᠲᠡᠭᠦᠨ ᠦ᠌ ᠬᠠᠭᠠᠯᠭᠠ ᠪᠦᠷᠢ ᠪᠡᠷ ᠠᠮᠢᠲᠠᠨ ᠣᠷᠣᠵᠤ᠂ ᠭᠠᠷᠴᠤ ᠲᠡᠭᠦᠰᠬᠡᠯ ᠦᠭᠡᠢ ᠬᠥᠯᠬᠢᠵᠦ᠂ ᠢᠷᠡᠬᠦ ᠪᠤᠴᠠᠬᠤ ᠶ᠋ᠢᠨ ᠲᠠᠪᠢᠯᠠᠩ ᠳᠠᠭᠤᠰᠪᠤᠷᠢ ᠶ᠋ᠢ ᠬᠡᠵᠢᠶᠡ ᠴᠤ᠌ ᠦᠯᠦ ᠦᠵᠡᠮᠦᠢ》 ᠭᠡᠵᠦ ᠪᠠᠭᠰᠢ ᠯᠠᠮᠠ ᠠᠢᠯᠠᠳᠤᠭᠰᠠᠨ ᠢ᠋ ᠰᠠᠩᠵᠢ ᠭᠡᠨᠡᠳᠲᠡ ᠳᠤᠷᠠᠰᠤᠨ ᠰᠠᠨᠠᠵᠤ ᠣᠯᠠᠨ ᠬᠠᠭᠠᠯᠭᠠᠲᠤ ᠰᠤᠪᠤᠷᠭᠠ ᠣᠷᠣᠬᠤ ᠪᠠᠷ ᠭᠡᠷ ᠡᠴᠡ ᠭᠠᠷᠤᠯᠠ᠃ ᠭᠠᠷᠬᠤ ᠳ᠋ᠠᠭᠠᠨ ᠭᠠᠭᠴᠠᠬᠦ ᠰᠡᠳᠬᠢᠯ ᠦ᠋ᠨ ᠵᠣᠪᠠᠯᠠᠩ ᠳ᠋ᠤ᠌ ᠣᠢᠴᠢᠭᠰᠠᠨ ᠤᠳᠬᠤᠨ ᠬᠡᠦᠬᠡᠨ ᠢ᠋ ᠦᠷᠦ ᠡᠪᠡᠳᠴᠦ ᠲᠡᠭᠦᠨ ᠦ᠌ ᠲᠤᠰᠠ ᠶ᠋ᠢᠨ ᠲᠤᠯᠠᠳᠠ ᠡᠢᠨᠬᠦ ᠰᠢᠢᠳᠦᠨ ᠵᠠᠮᠴᠢᠯᠠᠭᠴᠢ ᠨᠢ ᠪᠣᠯᠵᠠᠢ᠃ ᠳᠠᠪᠬᠤᠷ ᠳᠠᠪᠬᠤᠷ ᠵᠣᠪᠠᠯᠠᠩ ᠦᠵᠡᠭᠰᠡᠨ ᠲᠡᠷᠡ ᠪᠦᠰᠡᠭᠦᠢ ᠶ᠋ᠢᠨ ᠰᠡᠳᠬᠢᠯ ᠢ᠋ ᠵᠠᠰᠠᠵᠤ ᠨᠢᠭᠡ ᠴᠤ᠌ ᠪᠢᠯᠡ ᠬᠦᠰᠡᠭᠰᠡᠨ ᠵᠦᠢᠯ ᠢ᠋ ᠨᠢ ᠭᠦᠢᠴᠡᠯᠳᠦᠭᠦᠯᠬᠦ ᠳ᠋ᠦ᠍ ᠲᠤᠰᠠ ᠬᠦᠷᠭᠡᠪᠡᠯ ᠲᠡᠷᠡ ᠪᠠᠰᠠ ᠯᠠ ᠪᠤᠶᠠᠨ ᠤ᠋ ᠦᠢᠯᠡᠰ ᠭᠡᠵᠦ ᠰᠠᠩᠵᠢ ᠲᠣᠭᠠᠴᠠᠵᠤ ᠪᠠᠢᠪᠠ᠃ ᠪᠠᠭᠰᠢ ᠯᠠᠮᠠ ᠨᠢ ᠴᠤ᠌ ᠢᠩᠭᠢᠵᠦ ᠯᠡ ᠶᠠᠷᠢᠵᠤ ᠪᠠᠢᠭᠰᠠᠨ᠃ ᠨᠥᠭᠦᠭᠡ ᠲᠠᠯᠠ ᠪᠠᠷ ᠰᠦᠵᠢᠭ ᠦ᠋ᠨ ᠬᠦᠴᠦ ᠬᠡᠴᠢᠨᠡᠨ ᠶᠡᠬᠡ ᠪᠣᠯᠬᠤ ᠶ᠋ᠢ ᠲᠡᠷᠡ ᠤᠬᠠᠭᠠᠷᠠᠵᠤ ᠪᠠᠢᠯᠠ᠃ ᠭᠡᠪᠡᠴᠦ ᠪᠤᠷᠬᠠᠨ ᠤ᠋ ᠠᠷᠢᠭᠤᠨ ᠰᠢᠲᠦᠭᠡᠨ ᠤ ᠬᠦᠴᠦ ᠬᠢᠷᠢ ᠵᠡᠷᠭᠡ ᠮᠡᠷᠭᠡᠨ ᠪᠣᠯᠬᠤ ᠶ᠋ᠢ ᠣᠳᠬᠣᠨ ᠬᠡᠦᠬᠡᠨ ᠦ᠌ ᠴᠢᠨᠠᠭᠰᠢᠳᠠ ᠶ᠋ᠢᠨ ᠬᠤᠪᠢ ᠲᠠᠪᠢᠯᠠᠩ ᠵᠠᠯᠠᠭᠤ ᠭᠡᠰᠦᠯ ᠳ᠋ᠦ᠍ ᠵᠢᠭᠠᠵᠤ ᠥᠭᠬᠦ ᠨᠢ ᠮᠠᠭᠠᠳ᠃ ᠢᠩᠭᠢᠵᠦ ᠶᠡᠬᠡ ᠰᠦᠰᠦᠭ ᠢ᠋ᠶ᠋ᠡᠷ ᠦᠷᠡ ᠳ᠋ᠦᠩ ᠦᠭᠡᠢ ᠥᠩᠭᠡᠷᠡᠬᠦ ᠤᠴᠢᠷ ᠦᠭᠡᠢ ᠭᠡᠵᠦ ᠲᠡᠷᠡ ᠣᠳᠣ ᠪᠠᠷ ᠪᠣᠳᠣᠵᠤ ᠪᠠᠢᠪᠠ᠃