ᠬᠥᠬᠡ ᠵᠤᠯᠠ <ᠮᠣᠩᠭᠣᠯ ᠤᠯᠠᠮᠵᠢᠯᠠᠯᠲᠤ ᠠᠮᠢᠳᠤᠷᠠᠯ ᠤᠨ ᠲᠣᠯᠢ > – ᠪᠣᠷᠵᠢᠭᠢᠨ ᠸᠠᠩᠵᠠᠯ - <ᠣᠷᠣᠰᠢᠯ> Хөх зул– Монгол уламжлалт амьдралын толь – Боржигон Ванжал –" оршил"
320ᠣᠷᠣᠰᠢᠯ
ᠪᠢ ᠡᠨᠡ ᠰᠡᠳᠦᠪ ᠢ᠋ ᠣᠯᠤᠭᠰᠠᠨ ᠳᠠᠷᠤᠢ ᠬᠥᠳᠡᠭᠡ ᠡᠴᠡ ᠬᠡᠰᠡᠭᠲᠡᠢ ᠠᠯᠲᠠ ᠣᠯᠤᠭᠰᠠᠨ ᠮᠡᠲᠦ ᠪᠠᠶᠠᠷᠯᠠᠵᠤ᠂ ᠤᠷᠠᠨ ᠵᠣᠬᠢᠶᠠᠯ ᠪᠣᠯᠭᠠᠭᠠᠳ ᠦᠵᠡᠭᠦᠯᠴᠢᠬᠡᠶᠡ ᠭᠡᠵᠦ ᠪᠣᠳᠣᠭᠰᠠᠨ᠃ ᠭᠡᠲᠡᠯᠡ ᠮᠢᠨᠦ ᠰᠤᠷᠤᠭᠰᠠᠨ ᠮᠡᠳᠡᠯᠭᠡ ᠰᠤᠯᠠ ᠮᠥᠴᠢᠭᠦᠦ ᠂ ᠰᠠᠭᠤᠭᠰᠠᠨ ᠣᠷᠴᠢᠨ ᠰᠠᠯᠬᠢ ᠰᠢᠭᠤᠷᠭᠠ ᠲᠠᠢ ᠂ ᠰᠠᠨᠠᠭᠰᠠᠨ ᠢ᠋ᠶ᠋ᠠᠷ ᠶᠡᠷᠦ ᠨᠢ ᠪᠣᠯᠬᠤ ᠮᠠᠶᠢᠭ ᠦᠭᠡᠢ᠃ ᠲᠡᠢᠨ ᠬᠦ᠌ ᠪᠢ ᠲᠣᠯᠢ ᠶ᠋ᠢᠨ ᠬᠡᠯᠪᠡᠷᠢ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ ᠲᠣᠪᠴᠢ ᠲᠠᠢᠯᠪᠤᠷᠢ ᠪᠠᠷ ᠲᠤᠰᠬᠠᠬᠤ ᠶ᠋ᠢ ᠵᠣᠷᠢᠭᠰᠠᠨ ᠶᠤᠮ ᠃
ᠲᠡᠭᠡᠬᠦ ᠳ᠋ᠡᠭᠡᠨ ᠨᠣᠮᠣᠢ ᠮᠢᠨᠦ ᠭᠠᠭᠴᠠ ᠦᠵᠦᠭ ᠂ ᠨᠣᠮᠣᠬᠠᠨ ᠳᠠᠯᠠᠢ ᠶ᠋ᠢᠨ ᠭᠦᠨ ᠬᠥᠪ ᠡᠴᠡ ᠬᠡᠳᠦᠢ ᠯᠡ ᠱ᠌ᠢᠷᠦ ᠰᠤᠪᠤᠳ ᠱᠦᠭᠦᠵᠦ ᠴᠢᠳᠠᠬᠤ ᠪᠣᠢ ᠭᠡᠵᠦ ᠵᠣᠷᠢᠭ ᠮᠣᠬᠣᠭᠰᠠᠨ ᠦᠭᠡᠢ ᠃ ᠪᠢᠳᠠᠭᠤ ᠲᠠᠷᠢᠬᠢ ᠶ᠋ᠢ ᠱᠠᠭᠠᠷᠳᠠᠵᠤ ᠂ ᠪᠣᠬᠢᠷ ᠦᠵᠦᠭ ᠢ᠋ ᠬᠤᠷᠴᠠᠯᠠᠵᠤ ᠂ ᠥᠷᠯᠥᠭᠡ ᠦᠳᠡᠰᠢ ᠶ᠋ᠢ ᠲᠡᠮᠡᠴᠡᠨ ᠤᠯᠠᠮ ᠠᠮᠲᠠᠷᠬᠠᠨ ᠪᠢᠴᠢᠭᠰᠡᠭᠡᠷ ᠢᠰᠡᠭᠡᠢ ᠲᠤᠭᠤᠷᠭᠠᠲᠠᠨ ᠤ᠋ ᠠᠮᠢᠳᠤᠷᠠᠯ ᠢ᠋ ᠳᠤᠰᠬᠠᠭᠰᠠᠨ ᠨᠡᠯᠢᠶᠡᠳ ᠪᠦᠷᠢᠨ ᠠᠭᠤᠯᠭᠠ ᠪᠦᠬᠦᠢ 《ᠮᠣᠩᠭᠣᠯ ᠤᠯᠠᠮᠵᠢᠯᠠᠯᠲᠤ ᠠᠮᠢᠳᠤᠷᠠᠯ ᠤ᠋ᠨ ᠲᠣᠯᠢ 》 ᠶ᠋ᠢ ᠲᠤᠭᠤᠷᠪᠢᠨ ᠪᠢᠴᠢᠵᠦ 《ᠬᠥᠬᠡ ᠵᠤᠯᠠ 》ᠬᠡᠮᠡᠬᠦ ᠨᠡᠷᠡ ᠪᠡᠷ ᠬᠡᠪᠯᠡᠭᠦᠯᠪᠡ ᠃ ᠡᠭᠦᠨ ᠳ᠋ᠦ᠍ ᠱᠦᠭᠦᠨ ᠰᠢᠯᠢᠵᠦ ᠣᠷᠣᠭᠤᠯᠤᠭᠰᠠᠨ ᠮᠠᠲ᠋ᠸᠷᠢᠶᠠᠯ ᠤ᠋ᠨ ᠣᠯᠠᠩᠬᠢ ᠨᠢ ᠥᠪᠡᠷᠮᠢᠴᠡ ᠠᠭᠤᠯᠬᠠ ᠲᠠᠢ ᠮᠥᠷᠲᠡᠭᠡᠨ ᠥᠪᠡᠷ ᠦ᠋ᠨ ᠣᠨᠴᠠᠯᠢᠭ ᠲᠠᠢ ᠶ᠋ᠢᠨ ᠤᠴᠢᠷ ᠣᠷᠣᠰᠢᠯ ᠳᠣᠲᠣᠷᠠ ᠪᠠᠨ ᠮᠠᠲ᠋ᠸᠷᠢᠶᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠦᠨᠳᠦᠴᠡ ᠶ᠋ᠢ ᠲᠣᠳᠣᠯᠠᠵᠤ ᠲᠣᠭᠠᠴᠢᠬᠤ ᠴᠢᠬᠤᠯᠠᠲᠠᠢ ᠶ᠋ᠢ ᠳᠣᠲᠣᠨᠣ ᠶ᠋ᠢᠨ ᠤᠩᠰᠢᠭᠴᠢᠳ ᠮᠠᠨᠢ ᠠᠭᠤᠴᠢᠯᠠᠬᠤ ᠪᠣᠯᠪᠠ ᠤᠤ !
ᠲᠠᠩᠰᠤᠭ ᠪᠠᠶᠠᠨ 《ᠮᠣᠩᠭᠣᠯ ᠤᠯᠠᠮᠵᠢᠯᠠᠯᠲᠤ ᠠᠮᠢᠳᠤᠷᠠᠯ ᠤ᠋ᠨ ᠲᠣᠯᠢ 》 ᠶ᠋ᠢᠨ
ᠠᠭᠤᠯᠭᠠ ᠬᠢᠭᠡᠳ ᠵᠣᠷᠢᠯᠭᠠ ᠶ᠋ᠢᠨ ᠲᠤᠬᠠᠢ ᠲᠣᠳᠣᠯᠠᠵᠤ ᠲᠣᠭᠠᠴᠢᠬᠤ ᠴᠢᠬᠤᠯᠠ ᠨᠢᠭᠡ᠃
ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠡᠪᠦᠭᠡ ᠳᠡᠭᠡᠳᠦᠰ ᠮᠠᠰᠢ ᠡᠷᠲᠡᠨ ᠡᠴᠡ ᠮᠠᠯ ᠠᠵᠤ ᠠᠬᠤᠢ ᠡᠵᠡᠩᠨᠡᠵᠦ ᠮᠠᠯᠯᠠᠭᠰᠠᠨ ᠤᠷᠲᠤ ᠤᠳᠠᠭᠠᠨ ᠣᠨ ᠤ᠋ ᠲᠡᠦᠬᠡ ᠲᠡᠢ ᠪᠢᠯᠡ ᠃ ᠡᠨᠡ ᠶᠠᠪᠤᠴᠠ ᠳ᠋ᠠᠭᠠᠨ ᠲᠣᠭᠠᠯᠠᠵᠤ ᠳᠡᠢᠯᠦᠮᠡ ᠦᠭᠡᠢ ᠣᠳᠣᠳ ᠂ ᠶᠠᠨᠳᠠᠵᠤ ᠪᠠᠷᠠᠮᠠ ᠦᠭᠡᠢ ᠳᠠᠯᠠᠢ ᠠᠳᠠᠯᠢ ᠮᠤᠨᠳᠠᠭ ᠶᠡᠬᠡ ᠮᠠᠯ ᠮᠠᠯᠯᠠᠭᠠ ᠶ᠋ᠢᠨ ᠥᠨᠢᠷ ᠪᠠᠶᠠᠨ ᠲᠤᠷᠰᠢᠯᠭᠠ ᠶ᠋ᠢ ᠬᠤᠷᠠᠮᠳᠤᠭᠤᠯᠵᠤ ᠥᠭᠴᠡᠢ ᠃ ᠡᠨᠡ ᠮᠠᠨᠢ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠰᠣᠶᠣᠯ ᠲᠡᠦᠬᠡᠨ ᠳ᠋ᠦ᠍ ᠦᠨᠡ ᠴᠠᠨᠠᠳᠠᠢ ᠥᠪ ᠬᠥᠷᠥᠩᠭᠡ ᠪᠣᠯᠬᠤ ᠪᠠᠷ ᠦᠯᠦ ᠪᠠᠷᠠᠮ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠰᠣᠶᠣᠯ ᠤ᠋ᠨ ᠶᠡᠬᠡ ᠰᠠᠩ ᠳ᠋ᠤ᠌ ᠴᠤ᠌ ᠳᠤᠲᠠᠭᠳᠠᠵᠤ ᠪᠣᠯᠣᠰᠢ ᠦᠭᠡᠢ ᠴᠢᠬᠤᠯᠠ ᠪᠦᠷᠢᠯᠳᠦᠬᠦᠨ ᠦ᠌ ᠨᠢᠭᠡᠨ ᠪᠣᠯᠬᠤ ᠶᠣᠰᠣᠲᠠᠢ᠃
ᠡᠨᠡ ᠬᠦ᠌ ᠦᠨᠳᠦᠰᠦᠲᠡᠨ ᠦ᠌ ᠤᠯᠠᠮᠵᠢᠯᠠᠯᠲᠤ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠴᠢᠨᠠᠷ ᠪᠦᠬᠦᠢ – ᠪᠠᠭᠠ ᠠ᠋ᠴᠠ ᠶᠡᠬᠡ᠂ ᠬᠠᠭᠤᠴᠢᠨ ᠠ᠋ᠴᠠ ᠰᠢᠨᠡ ᠪᠣᠯᠵᠤ ᠨᠠᠷᠢᠰᠤᠨ ᠬᠥᠭᠵᠢᠭᠰᠡᠨ ᠮᠡᠳᠡᠯᠭᠡ ᠶ᠋ᠢᠨ ᠳᠠᠯᠠᠢ ᠨᠢ ᠮᠣᠩᠭᠣᠯ ᠠᠮᠢᠳᠤᠷᠠᠯ ᠤ᠋ᠨ ᠪᠦᠬᠦᠢ ᠯᠡ ᠨᠢᠷᠤᠭᠤ ᠶ᠋ᠢ ᠪᠣᠰᠬᠠᠨ ᠥᠭᠴᠦ ᠢᠷᠡᠵᠡᠢ᠃
ᠬᠠᠢᠷᠠᠲᠤ ᠣᠯᠠᠨ ᠤᠩᠰᠢᠭᠴᠢ ᠲᠠᠨ ᠤ᠋ ᠡᠮᠦᠨᠡ ᠲᠣᠯᠢᠯᠠᠭᠤᠯᠵᠤ ᠪᠣᠢ ᠡᠨᠡ ᠬᠦ᠌ 《ᠬᠥᠬᠡ ᠵᠤᠯᠠ 》ᠬᠡᠮᠡᠬᠦ ᠮᠣᠩᠭᠣᠯ ᠤᠯᠠᠮᠵᠢᠯᠠᠯᠲᠤ ᠠᠮᠢᠳᠤᠷᠠᠯ ᠤ᠋ᠨ ᠲᠣᠯᠢ ᠪᠣᠯ ᠮᠣᠩᠭᠣᠯᠴᠤᠳ ᠤ᠋ᠨ ᠵᠣᠴᠢᠯᠠᠬᠤ ᠶᠣᠰᠣᠨ ᠬᠢᠭᠡᠳ ᠲᠣᠭᠠ ᠲᠣᠭᠠᠯᠠᠯᠭᠠ ᠂ ᠦᠶᠡ ᠳᠠᠭᠤᠳᠠᠯᠭᠠ ᠵᠡᠷᠭᠡ ᠨᠢ ᠥᠭᠡᠷᠡ ᠦᠨᠳᠦᠰᠦᠲᠡᠨ ᠡᠴᠡ ᠳᠤᠲᠠᠭᠤ ᠦᠭᠡᠢ ᠂ ᠬᠠᠷᠢᠨ ᠢᠯᠡᠭᠦᠦ ᠪᠠᠢᠭᠰᠠᠨ ᠢ᠋ ᠦᠵᠡᠭᠦᠯᠦᠭᠰᠡᠨ ᠪᠥᠭᠡᠳ ᠮᠣᠩᠭᠣᠯ ᠭᠡᠷ ᠢ᠋ ᠮᠥᠨ ᠪᠤᠰᠤᠳ ᠠ᠋ᠴᠠ ᠳᠠᠪᠠᠭᠤᠯᠢᠭ ᠴᠢᠨᠠᠷᠲᠠᠢ ᠡᠭᠦᠳᠴᠦ ᠪᠦᠲᠦᠭᠡᠭᠰᠡᠨ ᠢ᠋ ᠮᠡᠳᠡᠭᠦᠯᠵᠡᠢ ᠃ ᠢᠯᠠᠩᠭᠤᠶᠠ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠲᠤᠬᠠᠢ 19 ᠲᠠᠯᠠ ᠠ᠋ᠴᠠ ᠶᠠᠷᠢᠵᠤ ᠂ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠰᠢᠨᠵᠢᠯᠡᠭᠡ ᠶ᠋ᠢ 25 ᠲᠠᠯᠠ ᠠ᠋ᠴᠠ ᠰᠢᠨᠵᠢᠬᠦ ᠶ᠋ᠢ ᠲᠣᠭᠠᠴᠢᠵᠤ ᠂ ᠤᠯᠠᠭᠠᠨ ᠂ ᠴᠠᠭᠠᠨ ᠢᠳᠡᠭᠡᠨ ᠦ᠌ ᠨᠡᠷᠡᠰ ᠬᠢᠭᠡᠳ ᠶᠠᠰᠤ ᠮᠢᠬᠠ ᠵᠡᠷᠭᠡ ᠶ᠋ᠢᠨ ᠨᠡᠷᠡᠰ ᠢ᠋ ᠥᠷᠭᠡᠨ ᠳᠡᠯᠭᠡᠷ ᠣᠷᠣᠭᠤᠯᠵᠤ ᠨᠡᠯᠢᠶᠡᠳ ᠨᠠᠷᠢᠯᠢᠭ ᠲᠠᠢᠯᠪᠤᠷᠢᠯᠠᠭᠰᠠᠨ 12 ᠪᠦᠯᠦᠭ ᠲᠡᠢ ᠂ 400 ᠰᠢᠬᠠᠮ ᠵᠦᠢᠯ ᠲᠡᠢ ᠭᠡᠷ ᠢ᠋ᠶ᠋ᠡᠷ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠦᠶᠡ ᠶ᠋ᠢᠨ ᠮᠣᠩᠭᠣᠯ ᠠᠮᠢᠳᠤᠷᠠᠯ ᠢ᠋ ᠳᠤᠰᠬᠠᠭᠰᠠᠨ ᠵᠦᠢᠯ ᠬᠤᠪᠢᠶᠠᠭᠰᠠᠨ ᠲᠣᠯᠢ ᠶᠤᠮ ᠃ ᠢᠯᠠᠩᠭᠤᠶᠠ ᠦᠶᠡ ᠳᠠᠭᠤᠳᠠᠯᠭᠠ᠂ ᠲᠣᠭᠠ ᠲᠣᠭᠠᠯᠠᠯᠭᠠ ᠪᠠ ᠶᠠᠰᠤᠨ ᠤ᠋ ᠨᠡᠷᠡᠰ ᠵᠡᠷᠭᠡ ᠶ᠋ᠢ ᠪᠦᠷᠢᠳᠬᠡᠵᠦ᠂ ᠮᠠᠨ ᠤ᠋ ᠬᠢᠨ ᠦ᠌ ᠮᠠᠷᠲᠠᠭᠰᠠᠨ ᠵᠦᠢᠯᠡᠰ ᠢ᠋ ᠨᠢ ᠰᠡᠷᠭᠦᠭᠡᠬᠦ ᠪᠠ ᠮᠠᠯᠵᠢᠬᠤ ᠣᠷᠣᠨ ᠤ᠋ ᠣᠳᠣ ᠶ᠋ᠢᠨ ᠵᠠᠯᠠᠭᠤᠴᠤᠳ ᠤ᠋ᠨ ᠮᠡᠳᠡᠬᠦ ᠦᠭᠡᠢ ᠰᠣᠨᠣᠰᠤᠭᠰᠠᠨ ᠦᠭᠡᠢ ᠶ᠋ᠢ ᠨᠢ ᠰᠠᠨᠠᠭᠤᠯᠵᠤ ᠥᠭᠬᠦ ᠪᠡᠷ ᠮᠡᠷᠡᠢᠭᠰᠡᠨ ᠪᠥᠭᠡᠳ ᠲᠡᠷᠡᠴᠢᠯᠡᠨ ᠭᠡᠷ ᠢ᠋ᠶ᠋ᠡᠷ ᠰᠠᠭᠤᠬᠤ ᠪᠠᠨ ᠪᠣᠯᠢᠵᠤ᠂ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠠ᠋ᠴᠠ ᠲᠠᠰᠤᠷᠠᠭᠰᠠᠨ ᠬᠣᠲᠠ ᠪᠠᠯᠭᠠᠰᠤᠨ ᠤ᠋ ᠵᠠᠯᠠᠭᠤᠴᠤᠳ ᠤ᠋ᠨ ᠮᠣᠩᠭᠣᠯ ᠠᠮᠢᠳᠤᠷᠠᠯ ᠲᠠᠢ ᠲᠠᠨᠢᠯᠴᠠᠬᠤ ᠳ᠋ᠤᠨᠢ ᠣᠯᠳᠠᠰᠢ ᠦᠭᠡᠢ ᠣᠷᠬᠣᠳᠠᠢ ᠪᠣᠯᠤᠮᠠ ᠦᠨᠡ ᠴᠡᠨᠡᠳᠠᠢ ᠨᠣᠮ ᠪᠣᠯᠭᠠᠬᠤ ᠪᠠᠷ ᠴᠢᠷᠮᠠᠢᠭᠰᠠᠨ ᠶᠤᠮ᠃ ᠭᠡᠪᠡᠴᠦ ᠰᠠᠨᠠᠭᠠ ᠵᠠᠶᠠᠭᠠ ᠬᠣᠶᠠᠷ ᠨᠡᠢᠯᠡᠭᠰᠡᠨ ᠡᠰᠡᠬᠦ ᠶ᠋ᠢ ᠪᠦᠦ ᠮᠡᠳᠡ᠃
ᠡᠨᠡ ᠮᠠᠨᠢ ᠬᠡᠳᠦᠢ ᠪᠡᠷ ᠪᠠᠷᠢᠬᠤ ᠳ᠋ᠤ᠌ ᠨᠢᠮᠭᠡᠨ᠂ ᠪᠢᠴᠢᠭᠰᠡᠨ ᠢ᠋ᠶ᠋ᠡᠷ ᠳᠤᠯᠢᠬᠠᠨ ᠴᠤ᠌ ᠦᠨᠳᠦᠰᠦᠲᠡᠨ ᠦ᠌ ᠪᠡᠨ ᠥᠪ ᠠᠮᠢᠳᠤᠷᠠᠯ ᠢ᠋ ᠰᠤᠷᠴᠤ ᠬᠡᠷᠡᠭᠯᠡᠬᠦ᠂ ᠰᠤᠳᠤᠯᠵᠤ ᠬᠥᠭᠵᠢᠭᠦᠯᠬᠦ ᠭᠡᠰᠡᠨ ᠬᠦᠰᠡᠯ ᠡᠷᠢᠯ ᠲᠡᠢ᠂ ᠤᠷᠮᠠ ᠪᠠᠬᠠᠲᠠᠢ ᠣᠷᠣᠯᠳᠣᠯᠭᠠ ᠬᠢᠴᠢᠶᠡᠯᠭᠡ ᠲᠡᠢ ᠨᠥᠬᠥᠳ ᠲᠦ᠍ ᠭᠠᠷ ᠠᠪᠤᠯᠭᠠ ᠪᠣᠯᠭᠠᠬᠤ ᠶ᠋ᠢ ᠬᠢᠴᠢᠶᠡᠭᠰᠡᠨ ᠶᠦ᠍ᠮ᠃ ᠲᠡᠢᠨ ᠬᠦ᠌ ᠲᠡᠳᠡ ᠨᠠᠷ ᠤ᠋ᠨ ᠬᠦᠰᠡᠯᠡᠩ ᠳ᠋ᠦ᠍ ᠲᠣᠪᠬᠤᠨ ᠴᠢᠨᠡᠭᠡ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ ᠲᠠᠭᠠᠯᠠᠭᠳᠠᠪᠠᠯ ᠣᠯᠳᠣᠢ ᠮᠢᠨᠦ ᠰᠠᠨᠠᠭᠠ ᠭᠦᠢᠴᠡᠵᠦ ᠰᠡᠳᠬᠢᠯ ᠬᠠᠩᠬᠤ ᠨᠢ ᠲᠡᠷᠡ᠃
ᠡᠨᠡ ᠨᠣᠮ ᠢ᠋ ᠬᠡᠳᠦᠢ ᠪᠡᠷ ᠠᠮᠢᠳᠤᠷᠠᠯ᠂ ᠨᠣᠮ ᠬᠣᠶᠠᠷ ᠠ᠋ᠴᠠ ᠬᠠᠢᠵᠤ ᠬᠤᠷᠠᠮᠳᠤᠭᠤᠯᠤᠭᠰᠠᠨ ᠪᠣᠯᠪᠠᠴᠤ 《ᠭᠠᠭᠴᠠ ᠮᠣᠳᠣ ᠭᠠᠯ ᠪᠣᠯᠬᠤ ᠦᠭᠡᠢ᠂ ᠭᠠᠭᠴᠠ ᠬᠥᠮᠦᠨ ᠠᠢᠯ ᠪᠣᠯᠬᠤ ᠦᠭᠡᠢ 》 ᠭᠡᠭᠴᠢ ᠪᠡᠷ ᠨᠠᠳᠠ ᠰᠢᠭ᠋ ᠨᠢᠭᠡ ᠬᠥᠮᠦᠨ ᠨᠡᠢᠭᠡᠮ ᠳᠠᠶᠠᠭᠠᠷ ᠤ᠋ᠨ ᠬᠢ ᠶ᠋ᠢ ᠬᠡᠷᠬᠢᠨ ᠴᠥᠮ ᠢ᠋ ᠪᠦᠷᠢᠳᠬᠡᠵᠦ ᠳᠡᠢᠯᠬᠦ ᠪᠣᠢ᠃ ᠪᠦᠷ ᠯᠡ ᠪᠦᠭᠦᠳᠡ ᠶ᠋ᠢᠨ ᠬᠦᠴᠦ ᠬᠥᠳᠡᠯᠮᠦᠷᠢ ᠪᠠᠢᠬᠤ ᠶᠣᠰᠣᠲᠠᠢ ᠃ ᠡᠭᠦᠨ ᠳ᠋ᠦ᠍ ᠡᠨᠡ ᠨᠣᠮ ᠢ᠋ ᠬᠡᠪᠯᠡᠭᠦᠯᠬᠦ ᠳ᠋ᠦ᠍ ᠲᠥᠷᠥ ᠶᠣᠰᠣᠨ ᠤ᠋ ᠲᠤᠰᠠᠯᠠᠮᠵᠢ ᠬᠠᠢᠷᠠ ᠦᠵᠡᠭᠦᠯᠦᠭᠰᠡᠨ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠣᠶᠣᠯ ᠤ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠᠨ ᠤ᠋ ᠤᠳᠤᠷᠢᠳᠤᠯᠭᠠ ᠨᠠᠷ ᠪᠣᠯᠤᠨ ᠮᠠᠨ ᠤ᠋ ᠬᠤᠰᠢᠭᠤᠨ ᠤ᠋ ᠠᠷᠪᠠᠨ ᠰᠤᠮᠤᠨ ᠤ᠋ ᠳᠠᠷᠤᠭᠠ ᠲᠡᠭᠦᠰᠪᠤᠯᠠᠭ ᠂ ᠣᠳᠬᠣᠨᠪᠠᠶᠠᠷ ᠂ ᠪᠠᠲᠤ ᠂ ᠱᠤᠭᠠᠷᠠ ᠂ ᠴᠠᠩ ᠸᠧᠢ ᠂ ᠪᠠᠲᠤᠪᠠᠶᠠᠷ ᠂ ᠷᠢᠨᠴᠢᠨᠨᠣᠷᠪᠣ ᠂ ᠲᠦᠮᠡᠡᠦ᠌ᠯᠵᠡᠢ ᠂ ᠰᠡᠷᠡᠩᠸᠠᠩᠵᠢᠯ ᠂ ᠷᠢᠨᠴᠢᠨᠳᠣᠷᠵᠢ ᠨᠠᠷ ᠤ᠋ᠨ ᠬᠠᠯᠠᠭᠤᠨ ᠬᠠᠪᠰᠤᠷᠤᠯᠭᠠ ᠶ᠋ᠢ ᠬᠦᠷᠲᠡᠪᠡ᠃
ᠡᠳᠡᠭᠡᠷ ᠨᠥᠬᠥᠳ ᠦ᠋ᠨ 《ᠦᠨᠳᠦᠰᠦᠲᠡᠨ ᠦ᠌ ᠪᠡᠨ ᠥᠪ ᠰᠣᠶᠣᠯ ᠢ᠋ ᠬᠥᠭᠵᠢᠭᠦᠯᠰᠦᠭᠡᠢ ! 》ᠭᠡᠰᠡᠨ ᠥᠨᠳᠥᠷ ᠦᠵᠡᠯᠲᠡ ᠂ ᠥᠷᠭᠡᠨ ᠠᠯᠳᠠᠷ ᠨᠢ ᠥᠴᠦᠬᠡᠨ ᠮᠢᠨᠦ ᠲᠤᠭᠤᠷᠪᠢᠭᠰᠠᠨ ᠨᠣᠮ ᠲᠠᠢ ᠬᠠᠮᠲᠤ ᠥᠨᠢᠳᠡ ᠴᠣᠭ ᠮᠥᠩᠬᠡᠵᠢᠬᠦ ᠶ᠋ᠢ ᠦᠨᠡᠨ ᠵᠢᠷᠦᠬᠡᠨ ᠡᠴᠡ ᠪᠡᠨ ᠵᠠᠯᠪᠠᠷᠢᠨᠠᠮ᠃
ᠲᠠᠩᠰᠤᠭ ᠪᠠᠶᠠᠨ 《ᠮᠣᠩᠭᠣᠯ ᠤᠯᠠᠮᠵᠢᠯᠠᠯᠲᠤ ᠠᠮᠢᠳᠤᠷᠠᠯ ᠤ᠋ᠨ ᠲᠣᠯᠢ 》 ᠳ᠋ᠠᠬᠢ
《ᠦᠶᠡ ᠳᠠᠭᠤᠳᠠᠯᠭᠠ 》 ᠶ᠋ᠢᠨ ᠲᠤᠬᠠᠢ ᠲᠣᠳᠣᠯᠠᠵᠤ ᠲᠣᠭᠠᠴᠢᠬᠤ ᠴᠢᠬᠤᠯᠠ ᠬᠣᠶᠠᠷ᠃
ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠲᠥᠷᠥᠯ ᠰᠠᠳᠤᠨ ᠤ᠋ ᠲᠣᠭᠲᠠᠯᠴᠠᠭᠠ ᠨᠢ ᠮᠥᠨ ᠨᠡᠢᠭᠡᠮ ᠦ᠋ᠨ ᠬᠥᠭᠵᠢᠯ ᠦ᠋ᠨ ᠤᠷᠤᠭ ᠰᠠᠳᠤᠨ ᠤ᠋ ᠳᠦᠷᠢᠮ ᠦ᠋ᠨ ᠬᠥᠭᠵᠢᠯᠲᠡ ᠶ᠋ᠢ ᠳᠠᠭᠠᠯᠳᠤᠨ ᠨᠠᠷᠢᠰᠤᠨ ᠲᠡᠭᠦᠯᠳᠡᠷᠵᠢᠪᠡ ᠃ ᠡᠨᠡ ᠬᠦ᠌ ᠶᠠᠪᠤᠴᠠ ᠳ᠋ᠤ᠌ ᠂ ᠮᠠᠨ ᠤ᠋ ᠡᠪᠦᠭᠡ ᠳᠡᠭᠡᠳᠦᠰ ᠲᠥᠷᠥᠯ ᠰᠠᠳᠤᠨ ᠤ᠋ ᠳᠠᠭᠤᠳᠠᠯᠭᠠ ᠶ᠋ᠢ ᠮᠠᠰᠢ ᠪᠠᠶᠠᠯᠢᠭ ᠡᠭᠦᠳᠦᠨ ᠵᠣᠬᠢᠶᠠᠵᠤ ᠦᠯᠡᠳᠡᠭᠡᠵᠡᠢ ᠃ ᠭᠡᠲᠡᠯᠡ ᠵᠠᠷᠢᠮ ᠬᠠᠷᠢ ᠶ᠋ᠢᠨ ᠡᠷᠳᠡᠮᠲᠡᠳ ᠡᠨᠡ ᠲᠠᠯᠠ ᠪᠠᠷ ᠣᠢᠯᠠᠭᠠᠯᠲᠠ ᠭᠦᠶᠦᠬᠡᠨ ᠂ ᠶᠠᠭ ᠶᠡᠬᠡ ᠬᠠᠭᠤᠷᠠᠢ ᠶ᠋ᠢᠨ ᠬᠥᠮᠦᠨ ᠨᠠᠭᠤᠷ ᠢ᠋ ᠣᠯᠵᠤ ᠦᠵᠡᠴᠢᠭᠡᠳ ᠳᠠᠯᠠᠢ ᠭᠡᠯᠡ ᠭᠡᠳᠡᠭ ᠲᠡᠢ ᠠᠳᠠᠯᠢ ᠪᠠᠷ ᠶᠠᠭᠤᠨ ᠤ᠋ 《ᠮᠣᠩᠭᠣᠯ ᠳ᠋ᠤ᠌ ᠲᠥᠷᠥᠯ ᠰᠠᠳᠤᠨ ᠤ᠋ ᠳᠠᠭᠤᠳᠠᠯᠭᠠ ᠠᠷᠪᠢᠨ ᠪᠢᠰᠢ ᠭᠤᠴᠢᠭᠠᠳᠬᠠᠨ ᠭᠣᠣᠯ ᠦᠭᠡᠰ ᠲᠡᠢ 》ᠭᠡᠵᠦ ᠬᠥᠩᠭᠡᠨ ᠬᠠᠭᠤᠮᠠᠭᠠᠢ ᠲᠡᠮᠳᠡᠭᠯᠡᠵᠡᠢ ᠃ ᠦᠨᠡᠨ ᠪᠠᠢᠳᠠᠯ ᠣᠭᠲᠣ ᠲᠡᠢᠮᠦ ᠪᠢᠰᠢ ᠃ ᠡᠷᠳᠡᠮᠲᠡᠨ ᠳ ᠂ ᠭᠣᠩᠭᠣᠷ ᠡᠨᠡ ᠲᠠᠯᠠ ᠪᠠᠷ ᠰᠤᠳᠤᠯᠭᠠ ᠬᠢᠵᠦ 《ᠬᠠᠯᠬᠠ ᠮᠣᠩᠭᠣᠯᠴᠤᠳ ᠤ᠋ᠨ ᠤᠷᠤᠭ ᠲᠥᠷᠥᠯ ᠦ᠋ᠨ ᠲᠣᠭᠲᠠᠯᠴᠠᠭᠠ 》 ᠳ᠋ᠠᠭᠠᠨ ᠨᠡᠯᠢᠶᠡᠳ ᠨᠠᠷᠢᠨ ᠲᠡᠮᠳᠡᠭᠯᠡᠭᠰᠡᠨ ᠪᠠ ᠮᠠᠨ ᠤ᠋ ᠡᠪᠦᠭᠡᠨ ᠨᠠᠮᠼᠠᠷᠠᠢ ᠭᠤᠸᠠᠢ ᠴᠤ᠌ ᠰᠤᠳᠤᠯᠭᠠ ᠭᠦᠨᠵᠡᠭᠡᠢᠷᠡᠭᠦᠯᠵᠦ ᠥᠭᠦᠯᠡᠯ ᠳ᠋ᠡᠭᠡᠨ 《᠁ ᠣᠯᠳᠣᠢ ᠡᠪᠦᠭᠡᠨ ᠮᠢᠨᠦ ᠡᠮᠬᠢᠳᠬᠡᠯ ᠳ᠋ᠦ᠍ ᠳᠠᠪᠬᠤᠷᠯᠠᠨ ᠲᠣᠳᠣᠳᠬᠠᠬᠤ < ᠬᠠᠳᠠᠮ ᠨᠠᠭᠠᠴᠤ ᠁ ᠬᠠᠳᠠᠮ ᠵᠢᠭᠡ ᠁ > ᠭᠡᠬᠦ ᠮᠡᠲᠦ ᠶ᠋ᠢ ᠣᠷᠣᠭᠤᠯᠤᠭᠰᠠᠨ ᠦᠭᠡᠢ ᠪᠡᠷ 7100 ᠭᠠᠷᠤᠢ ᠳᠠᠭᠤᠳᠠᠯᠭᠠ ᠪᠣᠯᠵᠠᠢ᠃ ᠬᠡᠷᠪᠡ ᠳᠠᠪᠬᠤᠷᠯᠠᠨ ᠲᠣᠳᠣᠳᠬᠠᠵᠤ ᠳᠠᠭᠤᠳᠠᠬᠤ ᠵᠦᠢᠯ ᠢ᠋ ᠣᠷᠣᠭᠤᠯᠪᠠᠯ ᠲᠦᠮᠡᠨ ᠳᠠᠭᠤᠳᠠᠯᠭᠠ ᠪᠠᠷ ᠵᠣᠭᠰᠣᠬᠤ ᠦᠭᠡᠢ ᠪᠠᠢᠬᠤ ᠨᠢ ᠯᠠᠪᠲᠠᠢ ᠶᠤᠮ 》 ᠭᠡᠵᠡᠢ ᠃ ᠵᠥᠪᠬᠡᠨ ᠡᠨᠡ ᠬᠣᠶᠠᠷ ᠲᠡᠮᠳᠡᠭᠯᠡᠯ ᠡᠴᠡ ᠪᠢᠳᠡ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠲᠥᠷᠥᠯ ᠰᠠᠳᠤᠨ ᠤ᠋ ᠳᠠᠭᠤᠳᠠᠯᠭᠠ ᠲᠤᠩ ᠪᠠᠶᠠᠯᠢᠭ ᠭᠡᠰᠡᠨ ᠢ᠋ ᠮᠡᠳᠡᠵᠦ ᠪᠣᠯᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠲᠡᠷᠡᠴᠢᠯᠡᠨ ᠮᠣᠩᠭᠣᠯ ᠦᠭᠡᠰ ᠦ᠋ᠨ ᠰᠠᠩ ᠤ᠋ᠨ ᠳᠠᠯᠠᠢ ᠪᠠᠶᠠᠨ ᠢ᠋ ᠴᠦ᠍ ᠣᠯᠵᠤ ᠬᠠᠷᠠᠵᠤ ᠪᠣᠯᠬᠤ ᠶᠤᠮ᠃
ᠬᠢᠲᠠᠳ ᠵᠡᠷᠭᠡ ᠵᠠᠷᠢᠮ ᠵᠡᠷᠭᠡᠯᠡᠳᠡᠭᠡ ᠦᠨᠳᠦᠰᠦᠲᠡᠨ ᠨᠦ᠍ᠭᠦᠳ ᠲᠥᠷᠥᠯ ᠰᠠᠳᠤᠨ ᠤ᠋ ᠳᠠᠭᠤᠳᠠᠯᠭᠠ ᠪᠠᠨ ᠵᠥᠪᠬᠡᠨ 9 ᠦᠶᠡ ᠪᠡᠨ ᠳᠠᠭᠤᠳᠠᠵᠤ ᠴᠢᠳᠠᠳᠠᠭ ᠪᠠᠢᠬᠤ ᠳ᠋ᠤ᠌ ᠮᠣᠩᠭᠣᠯᠴᠤᠳ ᠦᠶᠡ ᠳᠠᠭᠤᠳᠠᠯᠭᠠ ᠪᠠᠨ ᠬᠠᠷᠢᠨ ᠳᠡᠭᠡᠭᠰᠢ 9 ᠦᠶᠡ ᠂ ᠳᠣᠷᠣᠭᠰᠢ 9 ᠦᠶᠡ ᠂ ᠪᠡᠶᠡ ᠶ᠋ᠢᠨ ᠢᠵᠢᠯᠢ ᠦᠶᠡ ᠲᠡᠢ ᠪᠡᠨ 19 ᠦᠶᠡ ᠪᠡᠨ ᠲᠣᠭᠲᠠᠭᠠᠨ ᠳᠠᠭᠤᠳᠠᠵᠤ ᠴᠢᠳᠠᠨᠠ ᠃ ᠡᠭᠦᠨ ᠢ᠋ ᠢᠵᠠᠭᠤᠷ ᠶᠣᠰᠣᠨ ᠤ᠋ ᠨᠢᠭᠡ ᠦᠶᠡ ᠶ᠋ᠢ 30 ᠵᠢᠯ ᠢ᠋ᠶ᠋ᠡᠷ ᠪᠣᠳᠣᠪᠠᠯ 570 ᠵᠢᠯ ᠦ᠋ᠨ ᠬᠣᠭᠣᠷᠣᠨᠳᠣᠬᠢ ᠲᠥᠷᠥᠯ ᠰᠠᠳᠤᠨ ᠤ᠋ ᠦᠶᠡ ᠳᠠᠭᠤᠳᠠᠯᠭᠠ ᠶ᠋ᠢ ᠲᠣᠭᠲᠠᠭᠠᠨ ᠳᠠᠭᠤᠳᠠᠵᠤ ᠴᠢᠳᠠᠨᠠ ᠃ ᠥᠭᠡᠷᠡ ᠠᠯᠢ ᠦᠨᠳᠦᠰᠦᠲᠡᠨ ᠢᠩᠭᠢᠵᠦ ᠳᠠᠭᠤᠳᠠᠵᠤ ᠴᠢᠳᠠᠪᠠ ᠤᠤ ⁈
ᠮᠠᠨ ᠤ᠋ ᠡᠪᠦᠭᠡ ᠳᠡᠭᠡᠳᠦᠰ ᠦᠶᠡ ᠳᠠᠭᠤᠳᠠᠯᠭᠠ ᠶ᠋ᠢ ᠡᠨᠡ ᠮᠡᠲᠦ ᠮᠠᠰᠢ ᠪᠠᠶᠠᠯᠢᠭ ᠡᠭᠦᠳᠦᠨ ᠵᠣᠬᠢᠶᠠᠵᠤ ᠥᠭᠴᠡᠢ᠃ ᠭᠡᠲᠡᠯᠡ ᠮᠠᠨ ᠤ᠋ ᠬᠢᠨ ᠦ᠌ ᠵᠠᠷᠢᠮ ᠨᠢ ᠦᠷᠡ ᠬᠣᠢᠴᠢ ᠳ᠋ᠠᠭᠠᠨ ᠤᠯᠠᠮᠵᠢᠯᠠᠵᠤ ᠰᠤᠷᠭᠠᠵᠤ ᠥᠭᠬᠦ ᠦᠭᠡᠢ ᠮᠥᠷᠲᠡᠭᠡᠨ ᠥᠭᠡᠷᠡ ᠦᠨᠳᠦᠰᠦᠲᠡᠨ ᠡᠴᠡ ᠬᠡᠳᠦᠨ ᠳᠠᠭᠤᠳᠠᠯᠭᠠ ᠰᠤᠷᠴᠢᠬᠠᠭᠠᠳ ᠥᠪᠡᠷ ᠦ᠋ᠨ ᠦᠨᠳᠦᠰᠦᠲᠡᠨ ᠦ᠌ ᠪᠡᠨ ᠳᠠᠭᠤᠳᠠᠯᠭᠠ ᠶ᠋ᠢ ᠡᠢᠮᠦ ᠮᠠᠭᠤ ᠂ ᠲᠡᠢᠮᠦ ᠣᠨᠣᠪᠴᠢ ᠦᠭᠡᠢ ᠭᠡᠬᠦ ᠮᠡᠲᠦ ᠪᠡᠷ ᠮᠠᠭᠤᠯᠠᠵᠤ ᠡᠯᠡᠭᠯᠡᠬᠦ ᠶᠦ᠍ᠮ ᠪᠢᠯᠡ᠃ ᠵᠢᠱ᠌ᠢᠶᠡᠯᠡᠪᠡᠯ : ᠠᠪᠠᠭᠠ ᠪᠡᠷᠭᠡᠨ ( ᠱᠸᠡ ᠱᠸᠡ ) ᠂ ᠨᠠᠭᠠᠴᠤ ᠪᠡᠷᠭᠡᠨ ( ᠵᠢᠦ ᠮᠥ ) ᠭᠡᠬᠦ ᠳᠠᠭᠤᠳᠠᠯᠭᠠ ᠶ᠋ᠢ ᠤᠨᠤᠭᠠ ᠮᠠᠭᠤᠲᠠᠢ ᠭᠡᠳᠡᠭ᠃ ᠤᠭ ᠠ᠋ᠴᠠ ᠮᠣᠩᠭᠣᠯ ᠤ᠋ᠨ ᠶᠣᠰᠣᠨ ᠳ᠋ᠤ᠌ ᠡᠴᠢᠭᠡ ᠶ᠋ᠢᠨ ᠲᠠᠯᠠ ᠶ᠋ᠢᠨ ᠠᠪᠠᠭᠠ ᠂ ᠡᠬᠡ ᠶ᠋ᠢᠨ ᠲᠠᠯᠠ ᠶ᠋ᠢᠨ ᠨᠠᠭᠠᠴᠤ ᠭᠡᠳᠡᠭ ᠬᠣᠶᠠᠷ ᠦᠭᠡ ᠶ᠋ᠢᠨ ᠡᠷᠬᠡᠪᠰᠢ ᠳᠡᠭᠡᠷᠡ ᠨᠢᠭᠡ ᠦᠶᠡ ᠶ᠋ᠢ ᠵᠢᠭᠠᠳᠠᠭ ᠥᠪᠡᠷᠮᠢᠴᠡ ᠠᠭᠤᠯᠭᠠ ᠲᠠᠢ ᠭᠡᠳᠡᠭ ᠢ᠋ ᠮᠠᠷᠲᠠᠵᠠᠢ ᠃ ᠵᠢᠴᠢ ᠪᠡᠷᠭᠡᠨ ᠭᠡᠳᠡᠭ ᠦᠭᠡ ᠠᠬᠠ ᠠ᠋ᠴᠠ ᠳᠡᠭᠡᠭᠰᠢ 9 ᠦᠶᠡ ᠶ᠋ᠢᠨ ᠪᠣᠭᠲᠣᠯᠠᠵᠤ ᠪᠠᠭᠤᠯᠭᠠᠭᠰᠠᠨ ᠪᠦᠰᠡᠭᠦᠢᠴᠦᠳ ᠦ᠋ᠨ ᠨᠡᠢᠲᠡ ᠶ᠋ᠢᠨ ᠨᠡᠷᠡ ᠪᠢᠯᠡ ᠃ ᠡᠭᠦᠨ ᠳ᠋ᠦ᠍ ᠶᠡᠷᠦ ᠤᠨᠤᠭᠠ ᠮᠠᠭᠤᠲᠠᠢ ᠶᠠᠭᠤᠮᠠ ᠠᠯᠠᠭᠠ᠃
ᠲᠡᠭᠡᠪᠡᠯ ᠮᠠᠨ ᠤ᠋ ᠬᠢᠨ ᠦ᠌ ᠪᠠᠰᠠ ᠨᠢᠭᠡ ᠪᠦᠯᠦᠭ ᠬᠥᠮᠦᠰ ᠡᠢᠮᠦ ᠪᠠᠶᠠᠯᠢᠭ ᠳᠠᠭᠤᠳᠠᠯᠭᠠ ᠶ᠋ᠢ ᠬᠣᠢᠴᠢᠰ ᠲᠠᠭᠠᠨ ᠨᠢᠮᠪᠠᠢ ᠤᠯᠠᠮᠵᠢᠯᠠᠵᠤ ᠨᠠᠷᠢᠨ ᠰᠤᠷᠭᠠᠬᠤ ᠦᠭᠡᠢ ᠪᠡᠷ ᠬᠠᠮᠢᠶᠠ ᠨᠠᠮᠢᠶᠠ ᠦᠭᠡᠢ ᠠᠮᠪᠠ ᠂ ᠠᠭᠤ ᠭᠡᠰᠡᠨ ᠳᠠᠭᠤᠳᠠᠯᠭᠠ ᠦᠭᠴᠢᠬᠡᠭᠡᠳ ᠭᠡᠷ ᠦ᠋ᠨ ᠶᠡᠬᠡ ᠪᠠᠭᠠ ᠪᠠᠷ ᠢ᠋ᠶ᠋ᠠᠨ ᠳᠠᠭᠤᠳᠠᠵᠤ ᠨᠠᠷᠢᠨ ᠰᠠᠢᠬᠠᠨ ᠦᠶᠡ ᠳᠠᠭᠤᠳᠠᠯᠭᠠ ᠶ᠋ᠢ ᠬᠤᠳᠬᠤᠯᠳᠤᠭᠤᠯᠴᠢᠬᠠᠳᠠᠭ ᠃ ᠨᠢᠭᠡ ᠬᠥᠮᠦᠨ ᠢ᠋ ᠣᠯᠠᠨ ᠶᠠᠩᠵᠤ ᠪᠠᠷ ᠳᠠᠭᠤᠳᠠᠬᠤ ᠮᠣᠩᠭᠣᠯ ᠰᠠᠢᠬᠠᠨ ᠳᠠᠭᠤᠳᠠᠯᠭᠠ ᠪᠠᠢᠲᠠᠯᠠ ᠬᠡᠷᠡᠭᠯᠡᠬᠦ ᠦᠭᠡᠢ ᠵᠠᠪᠠᠯ ᠮᠠᠩᠭᠠᠷ ᠤ᠋ᠨ ᠬᠢ ᠪᠡᠷ ᠳᠠᠭᠤᠳᠠᠵᠤ ᠂ ᠵᠢᠴᠢ ᠡᠷᠲᠡᠨ ᠦ᠌ ᠤᠯᠠ ᠮᠥᠷ ᠢ᠋ ᠦᠯᠡᠳᠡᠭᠡᠵᠦ ᠨᠢᠭᠡ ᠳᠠᠭᠤᠳᠠᠯᠭᠠ ᠳ᠋ᠤ᠌ ᠬᠡᠳᠦᠨ ᠤᠳᠬᠠ ᠣᠷᠣᠭᠤᠯᠴᠢᠬᠠᠭᠰᠠᠨ ᠵᠡᠷᠭᠡ ᠳᠤᠲᠠᠭᠳᠠᠯ ᠤ᠋ᠳ ᠪᠠᠢᠳᠠᠭ ᠃ ᠡᠳᠡᠭᠡᠷ ᠪᠣᠯ ᠪᠤᠰᠤᠳ ᠤ᠋ᠨ ᠪᠢᠰᠢ ᠂ ᠪᠦᠷ ᠥᠪᠡᠷ ᠡᠴᠡ ᠪᠡᠨ ᠪᠣᠯᠤᠭᠰᠠᠨ ᠭᠡᠮ ᠰᠣᠭᠣᠭ ᠪᠣᠯᠤᠨᠠ ᠃ ᠪᠢᠳᠡ ᠬᠠᠯᠠᠵᠠᠭᠠᠶᠠ ᠃ ᠨᠢᠭᠡ ᠦᠨᠳᠦᠰᠦᠲᠡᠨ ᠰᠣᠶᠣᠯᠵᠢᠬᠤ ᠳᠣᠳᠣᠮ ᠢ᠋ᠶ᠋ᠠᠨ ᠪᠣᠯᠪᠠᠰᠤᠨ ᠪᠣᠯᠵᠤ ᠂ ᠥᠪᠡᠷ ᠦ᠋ᠨ ᠲᠥᠷᠥᠯ ᠰᠠᠳᠤᠨ ᠤ᠋ ᠪᠠᠨ ᠦᠶᠡ ᠳᠠᠭᠤᠳᠠᠯᠭᠠ ᠶ᠋ᠢ ᠤᠯᠠᠮ ᠨᠠᠷᠢᠨ ᠲᠣᠳᠣᠷᠬᠠᠢ ᠳᠠᠭᠤᠳᠠᠬᠤ ᠶ᠋ᠢ ᠱᠠᠭᠠᠷᠳᠠᠳᠠᠭ ᠃ ᠡᠢᠨ ᠬᠦ᠌ ᠪᠢᠳᠡ ᠂ ᠥᠪᠡᠷ ᠦ᠋ᠨ ᠬᠡᠯᠡ ᠳᠡᠭᠡᠷᠡ ᠪᠡᠨ ᠨᠢᠭᠡᠳᠬᠡᠨ ᠳᠦᠷᠢᠮᠵᠢᠭᠦᠯᠵᠦ ᠠᠪᠬᠤ ᠨᠢ ᠴᠣᠷ ᠤ᠋ᠨ ᠭᠠᠭᠴᠠ ᠵᠥᠪ ᠠᠷᠭᠠ᠃
ᠮᠣᠩᠭᠣᠯᠴᠤᠳ ᠪᠦᠷ ᠡᠷᠲᠡ ᠳᠡᠭᠡᠷᠡ ᠦᠶᠡ ᠡᠴᠡ ᠪᠡᠨ ᠬᠥᠮᠦᠨ ᠦ᠌ ᠪᠡᠶᠡ ᠪᠦᠲᠦᠴᠡ ᠳ᠋ᠦ᠍ ᠲᠣᠯᠣᠭᠠᠢ ᠂ ᠨᠢᠳᠦ ᠂ ᠶᠠᠰᠤ ᠂ ᠨᠤᠭᠤᠰᠤ ᠶ᠋ᠢ ᠡᠴᠢᠭᠡ ᠶ᠋ᠢᠨ ᠰᠢᠮᠡ ᠪᠡᠷ ᠪᠦᠲᠦᠵᠦ ᠂ ᠮᠢᠬᠠ ᠴᠢᠰᠤ ᠶ᠋ᠢ ᠡᠬᠡ ᠶ᠋ᠢᠨ ᠴᠢᠰᠤᠨ ᠢ᠋ᠶ᠋ᠠᠷ ᠪᠦᠲᠦᠪᠡ ᠭᠡᠵᠦ ᠦᠵᠡᠳᠡᠭ ᠂ ᠡᠨᠡ ᠬᠦ᠌ ᠦᠵᠡᠯᠲᠡ ᠪᠡᠨ ᠦᠨᠳᠦᠰᠦᠯᠡᠨ ᠮᠣᠩᠭᠣᠯᠴᠤᠳ ᠥᠪᠡᠷ ᠦ᠋ᠨ ᠤᠭᠰᠠᠭᠠ ᠤᠷᠤᠭ ᠢ᠋ᠶ᠋ᠠᠨ ᠶᠡᠬᠡᠩᠬᠢ ᠳ᠋ᠦ᠍ᠨᠢ ᠲᠥᠷᠥᠯ ᠂ ᠰᠠᠳᠤᠨ ᠂ ᠰᠦᠯᠪᠡᠭᠡ ᠭᠡᠵᠦ ᠭᠤᠷᠪᠠᠨ ᠶᠡᠬᠡ ᠪᠦᠯᠦᠭ ᠬᠤᠪᠢᠶᠠᠵᠤ ᠂ ᠳᠣᠲᠣᠷᠠ ᠨᠢ ᠶᠠᠰᠤᠨ ᠲᠥᠷᠥᠯ ( ᠡᠴᠢᠭᠡ ) ᠂ ᠴᠢᠰᠤᠨ ᠲᠥᠷᠥᠯ ( ᠡᠬᠡ ) ᠂ ᠬᠠᠳᠠᠮ ᠂ ᠬᠣᠲᠠ ( ᠬᠤᠳᠠᠭᠠᠢ ) ᠂ ᠪᠦᠯᠦ ᠂ ᠵᠢᠭᠡ ᠂ ᠨᠠᠭᠠ (ᠲᠠᠭᠠᠷ ) ᠭᠡᠵᠦ ᠠᠩᠭᠢᠯᠠᠵᠤ ᠳᠠᠭᠤᠳᠠᠳᠠᠭ ᠃ ᠡᠭᠦᠨ ᠦ᠌ ᠨᠠᠷᠢᠨ ᠠᠭᠤᠯᠭᠠ ᠶ᠋ᠢ ᠳᠣᠣᠷᠠᠬᠢ ᠦᠶᠡ ᠳᠠᠭᠤᠳᠠᠯᠭᠠ ᠶ᠋ᠢᠨ ᠪᠦᠯᠦᠭ ᠲᠦ᠍ ᠦᠵᠡ᠃
ᠲᠠᠩᠰᠤᠭ ᠪᠠᠶᠠᠨ 《ᠮᠣᠩᠭᠣᠯ ᠤᠯᠠᠮᠵᠢᠯᠠᠯᠲᠤ ᠠᠮᠢᠳᠤᠷᠠᠯ ᠤ᠋ᠨ ᠲᠣᠯᠢ 》 ᠳ᠋ᠠᠬᠢ
ᠲᠣᠭᠠ ᠲᠣᠭᠠᠯᠠᠯ ᠤ᠋ᠨ ᠲᠤᠬᠠᠢ ᠲᠣᠳᠣᠯᠠᠵᠤ ᠲᠣᠭᠠᠴᠢᠬᠤ ᠴᠢᠬᠤᠯᠠᠲᠠᠢ ᠭᠤᠷᠪᠠ ᠃
ᠮᠣᠩᠭᠣᠯᠴᠤᠳ ᠤ᠋ᠨ ᠲᠣᠭᠠ ᠲᠣᠭᠠᠯᠠᠯ ᠮᠠᠰᠢ ᠡᠷᠲᠡ ᠡᠴᠡ ᠡᠬᠢᠯᠡᠭᠰᠡᠨ ᠨᠢ ᠪᠠᠲᠤᠲᠠᠢ ᠃ ᠲᠡᠦᠬᠡᠨ ᠪᠠᠷᠢᠮᠲᠠ ᠠ᠋ᠴᠠ ᠦᠵᠡᠪᠡᠯ ᠂ ᠡᠭᠦᠨ ᠢ᠋ ᠲᠣᠳᠣ ᠮᠡᠳᠡᠵᠦ ᠪᠣᠯᠤᠨᠠ ᠃ 《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ 》 ᠳ᠋ᠤ᠌ : 《ᠬᠥᠬᠡ ᠮᠣᠷᠢᠨ ᠵᠢᠯ ᠁ ᠴᠢᠩᠭᠢᠰ ᠬᠠᠭᠠᠨ ᠂ ᠲᠠᠶᠠᠨ ᠬᠠᠭᠠᠨ ᠯᠤᠭᠠ ᠪᠠᠢᠯᠳᠤᠵᠤ 》᠂ 《ᠦᠬᠡᠷ ᠵᠢᠯ ᠦ᠋ᠨ ᠬᠠᠪᠤᠷ 》ᠭᠡᠬᠦ ᠮᠡᠲᠦ 《60 ᠵᠢᠰᠦ 》 ᠶ᠋ᠢᠨ ᠲᠣᠭᠠᠯᠠᠯ ᠪᠠᠢᠬᠤ ᠪᠥᠭᠡᠳ ᠰᠥᠩ ᠤᠯᠤᠰ ᠤ᠋ᠨ ᠫᠧᠩ ᠳᠡ ᠶᠠ ᠭᠡᠭᠴᠢ ᠬᠥᠮᠦᠨ 《ᠬᠠᠷᠠ ᠲᠠᠲ᠋ᠠᠷ ᠤ᠋ᠨ ᠲᠤᠬᠠᠢ ᠬᠡᠷᠡᠭ ᠦ᠋ᠨ ᠲᠣᠪᠴᠢ 》ᠭᠡᠳᠡᠭ ᠲᠡᠭᠡᠨ ᠄ 《ᠴᠠᠭ ᠤᠯᠠᠷᠢᠯ ᠤ᠋ᠨ ᠲᠤᠬᠠᠢ ᠳᠠᠷᠤᠮᠠᠯᠯᠠᠭᠰᠠᠨ ᠪᠢᠴᠢᠭ ᠢ᠋ ᠣᠯᠵᠤ ᠦᠵᠡᠯᠡ 》 ᠭᠡᠰᠡᠨ ᠬᠢᠭᠡᠳ 《ᠲᠡᠳᠡ ᠵᠢᠯ ᠣᠨ ᠢ᠋ ᠲᠣᠭᠠᠯᠠᠬᠤ ᠳ᠋ᠠᠭᠠᠨ ᠤᠭ ᠠ᠋ᠴᠠ ᠪᠠᠨ 12 ᠡᠷᠬᠡᠲᠡᠨ ᠦ᠌ ᠳᠦᠷᠢ ᠶ᠋ᠢ ᠬᠡᠷᠡᠭᠯᠡᠨᠡ 》ᠭᠡᠵᠦ ᠲᠡᠮᠳᠡᠭᠯᠡᠵᠦᠬᠦᠢ ᠃ 60 ᠵᠢᠰᠦ ᠶ᠋ᠢ ᠡᠨᠡ ᠮᠡᠲᠦ ᠲᠣᠭᠠᠯᠠᠵᠤ ᠪᠠᠢᠭᠠ ᠠ᠋ᠴᠠ ᠦᠵᠡᠪᠡᠯ ᠮᠣᠩᠭᠣᠯᠴᠤᠳ ᠤ᠋ᠨ ᠲᠣᠭᠠ ᠲᠣᠭᠠᠯᠠᠯ ᠴᠤ᠌ ᠠᠳᠠᠭ ᠲᠠᠭᠠᠨ ᠰᠥᠩ ᠡᠴᠡ ᠡᠮᠦᠨᠡ ᠬᠡᠳᠦᠨ ᠮᠢᠩᠭᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠡᠭᠦᠰᠦᠭᠰᠡᠨ ᠨᠢ ᠲᠣᠳᠣᠷᠬᠠᠢ᠃ ᠤᠴᠢᠷ ᠨᠢ 《60 ᠵᠢᠰᠦ 》 ᠶ᠋ᠢᠨ ᠲᠣᠭᠠᠯᠠᠯ ᠂ ᠲᠡᠢᠮᠦ ᠴᠦ᠍ ᠬᠡᠳᠦᠬᠡᠨ ᠵᠠᠭᠤᠨ ᠵᠢᠯ ᠳ᠋ᠦ᠍ ᠪᠣᠯᠪᠠᠰᠤᠷᠠᠨ ᠲᠣᠭᠲᠠᠵᠤ ᠬᠥᠭᠵᠢᠭᠡᠳ ᠨᠡᠢᠲᠡ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠠᠮᠠᠨ ᠲᠣᠭᠠᠯᠠᠯ ᠪᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠶᠦ᠍ᠮ᠃
ᠢᠯᠠᠩᠭᠤᠶᠠ ᠮᠣᠩᠭᠣᠯᠴᠤᠳ ᠤ᠋ᠨ ᠲᠣᠭᠠ ᠲᠣᠭᠠᠯᠠᠯ ᠤ᠋ᠨ ᠣᠷᠣᠨ᠂ ᠠᠷᠪᠠ ᠠᠷᠪᠠ ᠪᠠᠷ ᠲᠠᠪᠰᠢᠭᠰᠠᠨ ᠶᠡᠬᠡ ᠨᠠᠷᠢᠯᠢᠭ ᠲᠣᠭᠠᠯᠠᠯ ᠪᠠᠢᠭᠰᠠᠨ ᠃ ᠨᠠᠮᠠᠶᠢ ᠪᠠᠭᠠ ᠭᠡᠷ ᠢ᠋ᠶ᠋ᠡᠷ ᠰᠤᠷᠬᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠤᠷᠤᠯᠴᠠᠵᠤ ᠪᠠᠢᠬᠤ ᠳ᠋ᠤ᠌ ᠮᠢᠨᠦ ᠪᠠᠭᠰᠢ 《ᠮᠣᠩᠭᠣᠯ ᠤ᠋ᠨ ᠲᠣᠭᠠ ᠲᠣᠭᠠᠯᠠᠯ 13 ᠣᠷᠣᠨ ᠲᠠᠢ 》 ᠭᠡᠵᠦ ᠵᠢᠭᠠᠵᠤ ᠪᠠᠢᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠬᠤ ᠶᠤᠮ ᠃ ᠣᠳᠣ ᠪᠢ ᠨᠢᠭᠡ ᠡᠴᠡ ᠲᠡᠷᠪᠤᠮ ( ᠲᠡᠷᠡ ᠪᠤᠮ ) ᠬᠦᠷᠲᠡᠯᠡᠬᠢ 10 ᠣᠷᠣᠨ ᠤ᠋ ᠲᠣᠭᠠ ᠶ᠋ᠢ ᠨᠡᠷᠡᠯᠡᠵᠦ ᠴᠢᠳᠠᠨᠠ ᠃ 11 ᠂ 12 ᠣᠷᠣᠨ ᠤ᠋ ᠲᠣᠭᠠ ᠶ᠋ᠢᠨ ᠨᠡᠷᠡ ᠶ᠋ᠢ ᠨᠢ ᠲᠠᠭ ᠮᠠᠷᠲᠠᠴᠢᠬᠠᠵᠠᠢ ᠃ ᠬᠠᠷᠢᠨ 13 ᠣᠷᠣᠨ ᠤ᠋ ᠲᠣᠭᠠ ᠶ᠋ᠢ ᠨᠢ ᠲᠦᠭ ᠲᠠᠭ ᠭᠡᠵᠦ ᠪᠠᠢᠭᠰᠠᠨ ᠰᠢᠭ᠋ ᠪᠣᠳᠣᠭᠳᠠᠵᠤ ᠪᠠᠢᠨᠠ ᠃ ᠡᠢᠨ ᠬᠦ᠌ ᠬᠣᠶᠠᠷ ᠣᠷᠣᠨ ᠤ᠋ ᠲᠣᠭᠠ ᠶ᠋ᠢᠨ ᠮᠣᠩᠭᠣᠯ ᠨᠡᠷᠡ ᠶ᠋ᠢ ᠨᠢ ᠮᠠᠷᠲᠠᠭᠰᠠᠨ ᠤ᠋ ᠤᠯᠠᠮ ᠠ᠋ᠴᠠ ᠪᠢ ᠂ 《ᠮᠡᠷᠭᠡᠳ ᠭᠠᠷᠬᠤ ᠶ᠋ᠢᠨ ᠣᠷᠣᠨ 》 ᠠ᠋ᠴᠠ 67 ᠣᠷᠣᠨᠲᠤ ᠶ᠋ᠢ ᠠᠪᠴᠤ ᠲᠠᠢᠯᠪᠠ ᠃ ᠳᠡᠭᠡᠷᠡ ᠬᠣᠶᠠᠷ ᠶᠠᠩᠵᠤ ᠶ᠋ᠢᠨ ᠲᠣᠭᠠ ᠲᠣᠭᠠᠯᠠᠯ ᠤ᠋ᠨ ᠠᠯᠢ ᠨᠢᠭᠡ ᠶ᠋ᠢ ᠠᠪᠤᠭᠠᠳ ᠬᠡᠯᠡᠭᠰᠡᠨ ᠴᠦ᠍ ᠶᠡᠬᠡ ᠰᠣᠶᠣᠯᠲᠤ ᠬᠢᠲᠠᠳ ᠦᠨᠳᠦᠰᠦᠲᠡᠨ ᠡᠴᠡ ᠪᠦᠷ ᠳᠠᠪᠠᠭᠰᠠᠨ ᠪᠠᠢᠨᠠ ᠃ ᠪᠣᠳᠠᠲᠠᠢ ᠪᠠᠷ ᠬᠡᠯᠡᠪᠡᠯ ᠂ ᠬᠢᠲᠠᠳᠴᠤᠳ ᠳ᠋ᠦᠩᠰᠢᠭᠤᠷ ᠠ᠋ᠴᠠ ᠴᠠᠭᠠᠰᠢ ᠲᠣᠭᠠᠯᠠᠬᠤ ᠲᠣᠭᠠᠨ ᠤ᠋ ᠣᠷᠣᠨ ᠤ᠋ ᠨᠡᠷᠡ ᠪᠠᠢᠬᠤ ᠦᠭᠡᠢ ᠂ ᠲᠡᠷᠡ ᠨᠢ ᠵᠥᠪᠬᠡᠨ ᠶᠢᠰᠦᠬᠡᠨ ᠣᠷᠣᠨ ᠲᠠᠢ ᠲᠣᠭᠠ ᠪᠢᠯᠡ᠃
ᠲᠡᠢᠨ ᠬᠦ᠌ ᠪᠢᠳᠡ᠂ ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠢ᠋ᠶ᠋ᠡᠨ ᠲᠣᠭᠠᠨ ᠳ᠋ᠤ᠌ ᠴᠠᠭᠠᠷᠠᠭᠰᠠᠨ ᠥᠨᠳᠥᠷ ᠮᠡᠳᠡᠯᠭᠡᠲᠡᠢ ᠶ᠋ᠢ ᠮᠡᠳᠡᠬᠦ ᠡᠴᠡ ᠭᠠᠳᠠᠨᠠ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠡᠨᠡ ᠲᠠᠯᠠ ᠪᠠᠷ ᠴᠠᠯᠠᠭᠠᠢᠷᠠᠵᠤ ᠣᠮᠲᠣᠭᠠᠢᠯᠠᠵᠤ ᠪᠤᠰᠤᠳ ᠠ᠋ᠴᠠ ᠬᠣᠴᠣᠷᠤᠭᠰᠠᠨ ᠢ᠋ᠶ᠋ᠠᠨ ᠴᠤ᠌ ᠮᠡᠳᠡᠷᠡᠬᠦ ᠬᠡᠷᠡᠭᠲᠡᠢ᠃ ᠬᠠᠷᠢᠨ ᠥᠪᠡᠷ ᠢ᠋ᠶ᠋ᠡᠨ ᠰᠠᠢᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠭᠠᠳ ᠪᠠᠰᠠ ᠪᠤᠰᠤᠳ ᠢ᠋ ᠳᠠᠭᠠᠵᠤ ᠂ ᠥᠪᠡᠷ ᠦ᠋ᠨ ᠡᠪᠦᠭᠡ ᠳᠡᠭᠡᠳᠦᠰ ᠪᠤᠶᠤ ᠦᠨᠳᠦᠰᠦᠲᠡᠨ ᠢ᠋ᠶ᠋ᠡᠨ ᠡᠢᠮᠦ ᠮᠠᠭᠤ ᠲᠡᠢᠮᠦ ᠳᠤᠲᠠᠭᠤ ᠭᠡᠵᠦ ᠬᠤᠳᠠᠯ ᠦᠨᠡᠨ ᠢ᠋ᠶ᠋ᠡᠷ ᠴᠠᠯᠴᠢᠬᠤ ᠨᠢ ᠢᠴᠢᠩᠭᠦᠷᠢᠲᠡᠢ ᠃ ᠡᠢᠮᠦ ᠬᠥᠮᠦᠰ ᠠᠰᠠᠭᠤᠳᠠᠯ ᠢ᠋ ᠥᠪᠡᠷ ᠡᠴᠡ ᠪᠡᠨ ᠢᠯᠡᠭᠦᠬᠡᠨ ᠡᠷᠢᠵᠦ ᠂ ᠲᠡᠦᠬᠡ ᠪᠡᠨ ᠮᠡᠳᠡᠵᠦ ᠲᠡᠩᠬᠡᠷᠡᠵᠦ ᠰᠡᠬᠡᠭᠡᠷᠡᠬᠦ ᠶ᠋ᠢ ᠴᠢᠨᠢ ᠬᠦᠰᠡᠶᠡ᠃
ᠲᠠᠩᠰᠤᠭ ᠪᠠᠶᠠᠨ 《ᠮᠣᠩᠭᠣᠯ ᠤᠯᠠᠮᠵᠢᠯᠠᠯᠲᠤ ᠠᠮᠢᠳᠤᠷᠠᠯ ᠤ᠋ᠨ ᠲᠣᠯᠢ 》 ᠳ᠋ᠠᠬᠢ
ᠭᠡᠷ ᠦ᠋ᠨ ᠲᠤᠬᠠᠢ ᠲᠣᠳᠣᠯᠠᠵᠤ ᠲᠣᠭᠠᠴᠢᠬᠤ ᠴᠢᠬᠤᠯᠠᠲᠠᠢ ᠳᠥᠷᠪᠡ ᠃
ᠮᠣᠩᠭᠣᠯ ᠭᠡᠷ ( ᠲᠣᠪᠴᠢᠯᠠᠭᠠᠳ ᠭᠡᠷ ᠭᠡᠨᠡ ) ᠪᠣᠯ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠣᠷᠣᠨ ᠰᠠᠭᠤᠴᠠ ᠶ᠋ᠢᠨ ᠳᠣᠲᠣᠷᠠᠬᠢ ᠲᠥᠯᠥᠭᠡᠯᠡᠬᠦ ᠴᠢᠨᠠᠷᠲᠠᠢ ᠪᠥᠭᠡᠳ ᠦᠨᠳᠦᠰᠦᠲᠡᠨ ᠦ᠌ ᠣᠨᠴᠠᠯᠢᠭ ᠢ᠋ᠶ᠋ᠠᠷ ᠳᠣᠪᠣᠢᠮᠠ ᠡᠷᠲᠡᠨ ᠡᠴᠡ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠣᠷᠣᠨ ᠰᠠᠭᠤᠴᠠ ᠶ᠋ᠢᠨ ᠭᠣᠣᠯ ᠨᠢ ᠶᠦ᠍ᠮ᠃
ᠠᠯᠢᠪᠠ ᠵᠦᠢᠯ ᠬᠥᠮᠦᠨ ᠦ᠌ ᠪᠡᠶᠡᠴᠢ ᠦᠵᠡᠯ ᠂ ᠬᠦᠰᠡᠯ ᠢ᠋ᠶ᠋ᠡᠷ ᠰᠢᠢᠳᠪᠦᠷᠢᠯᠡᠭᠳᠡᠳᠡᠭ ᠶᠦ᠍ᠮ ᠪᠢᠰᠢ ᠂ ᠬᠠᠷᠢᠨ ᠲᠡᠭᠦᠨ ᠦ᠌ ᠣᠷᠴᠢᠨ ᠠᠬᠤᠢ ᠶ᠋ᠢᠨ ᠨᠥᠬᠥᠴᠡᠯ ᠱᠠᠭᠠᠷᠳᠠᠯᠭᠠ ᠬᠢᠭᠡᠳ ᠨᠡᠢᠭᠡᠮ ᠦ᠋ᠨ ᠦᠢᠯᠡᠳᠪᠦᠷᠢᠯᠡᠬᠦ ᠬᠦᠴᠦᠨ ᠦ᠌ ᠬᠥᠭᠵᠢᠯᠲᠡ ᠪᠡᠷ ᠰᠠᠶᠢ ᠰᠢᠢᠳᠪᠦᠷᠢᠯᠡᠭᠳᠡᠳᠡᠭ ᠶᠦ᠍ᠮ ᠃ ᠲᠡᠢᠨ ᠬᠦ᠌ ᠬᠥᠮᠦᠰ ᠂ ᠣᠷᠴᠢᠨ ᠠᠬᠤᠢ ᠶ᠋ᠢᠨ ᠱᠠᠭᠠᠷᠳᠠᠯᠭᠠ ᠨᠥᠬᠥᠴᠡᠯ ᠲᠡᠢ ᠨᠢᠭᠡᠳᠴᠦ ᠴᠢᠳᠠᠪᠠᠯ ᠲᠠᠪᠰᠢᠵᠤ ᠂ ᠡᠰᠡ ᠲᠡᠢᠮᠦ ᠨᠢ ᠮᠥᠬᠥᠳᠡᠭ ᠦ᠋ᠨ ᠤᠴᠢᠷ ᠡᠢᠮᠦ ᠃ ᠮᠣᠩᠭᠣᠯ ᠭᠡᠷ ᠪᠣᠯ ᠡᠢᠮᠦᠷᠬᠦᠦ ᠶᠠᠪᠤᠴᠠ ᠶ᠋ᠢ ᠳᠠᠮᠵᠢᠨ ᠂ 6 ᠣᠨᠢ ᠪᠦᠬᠦᠢ ᠥᠪᠥᠩ ᠭᠡᠷ ᠡᠴᠡ ᠴᠡᠭᠡᠵᠢᠨ ᠭᠡᠷ ᠂ ᠮᠣᠩᠭᠣᠯ ᠭᠡᠷ ᠭᠡᠬᠦ ᠮᠡᠲᠦ ᠪᠡᠷ ᠨᠠᠷᠢᠰᠤᠨ ᠬᠥᠭᠵᠢᠵᠦ ᠢᠷᠡᠭᠰᠡᠨ ᠲᠡᠦᠬᠡ ᠲᠡᠢ ᠶᠦᠮ ᠃ ᠭᠡᠬᠦ ᠳ᠋ᠡᠭᠡᠨ ᠪᠤᠰᠤᠳ ᠮᠠᠢᠬᠠᠨ ᠂ ᠴᠠᠴᠠᠷ ᠂ ᠲᠠᠭᠲᠤ ᠂ ᠬᠠᠷᠰᠢ ᠂ ᠪᠠᠢᠰᠢᠩ ᠂ ᠠᠰᠠᠷ ᠮᠡᠲᠦ ᠶ᠋ᠢᠨ ᠣᠯᠠᠨ ᠣᠷᠣᠨ ᠰᠠᠭᠤᠴᠠ ᠠ᠋ᠴᠠ ᠪᠦᠷ ᠴᠣᠯᠭᠣᠷᠠᠭᠰᠠᠨ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠲᠠᠢ ᠶᠤᠮ᠃
① ᠬᠢᠬᠦ ᠳ᠋ᠦ᠍ ᠬᠢᠯᠪᠠᠷ ᠳᠥᠭᠥᠮ ᠃ ᠤᠭ ᠮᠠᠲ᠋ᠸᠷᠢᠶᠠᠯ ᠨᠢ ᠣᠷᠣᠨ ᠨᠤᠲᠤᠭ ᠡᠴᠡ ᠪᠡᠨ ᠭᠠᠷᠴᠢᠬᠠᠳᠠᠭ ᠃ ᠭᠡᠷ ᠦ᠋ᠨ ᠪᠥᠷᠢᠶᠡᠰᠦᠨ ᠦ᠌ ᠢᠰᠡᠭᠡᠢ ᠶ᠋ᠢ ᠪᠦᠷ ᠬᠣᠨᠢᠨ ᠤᠩᠭᠠᠰᠤ ᠪᠠᠷ ᠬᠢᠳᠡᠭ ᠃ ᠪᠦᠰᠡᠯᠡᠭᠦᠷ ᠰᠠᠭᠠᠯᠳᠤᠷᠭᠠ ᠶ᠋ᠢ ᠪᠦᠷ ᠠᠳᠤᠭᠤᠨ ᠤ᠋ ᠳᠡᠯ ᠪᠤᠶᠤ ᠲᠡᠮᠡᠭᠡᠨ ᠦ᠌ ᠵᠣᠭᠳᠣᠷ ᠢ᠋ᠶ᠋ᠠᠷ ᠬᠢᠴᠢᠬᠡᠳᠡᠭ ᠃ ᠦᠳᠡᠭᠡᠷᠢ ᠶ᠋ᠢ ᠮᠥᠨ ᠠᠳᠤᠭᠤ ᠲᠡᠮᠡᠭᠡᠨ ᠦ᠌ ᠰᠢᠷᠠ ᠰᠢᠭᠦᠰᠦ ᠶ᠋ᠢ ᠨᠢ ᠠᠪᠤᠭᠰᠠᠨ ᠲᠦᠭᠦᠬᠡᠢ ᠰᠢᠷᠢ ᠪᠡᠷ ᠬᠢᠴᠢᠬᠡᠳᠡᠭ᠃ ᠮᠣᠳᠣ ᠨᠢ ᠮᠥᠨ ᠨᠤᠲᠤᠭ ᠤᠰᠤᠨ ᠳ᠋ᠤᠨᠢ ᠭᠠᠷᠳᠠᠭ᠃
② ᠡᠪᠳᠡᠷᠡᠪᠡᠯ ᠵᠠᠰᠠᠵᠤ ᠰᠡᠯᠪᠢᠬᠦ ᠳ᠋ᠦ᠍ ᠬᠢᠯᠪᠠᠷ ᠃ ᠰᠡᠯᠪᠢᠭ ᠮᠠᠲ᠋ᠸᠷᠢᠶᠠᠯ ᠪᠦᠷ ᠥᠪᠡᠷ ᠦ᠋ᠨ ᠬᠢ᠃
③ ᠪᠠᠷᠠ ᠪᠠᠭᠠᠲᠠᠢ ᠴᠤ᠌ ᠪᠠᠭᠲᠠᠭᠠᠮᠵᠢ ᠶᠡᠬᠡᠲᠡᠢ ᠪᠠᠢᠳᠠᠭ᠃
④ ᠰᠠᠭᠤᠬᠤ ᠳ᠋ᠤ᠌ ᠲᠣᠬᠢᠯᠢᠭ ᠰᠠᠢᠬᠠᠨ᠃
⑤ ᠠᠴᠢᠵᠤ ᠵᠥᠭᠡᠭᠡᠬᠦ ᠳ᠋ᠦ᠍ ᠠᠪᠰᠠᠷᠬᠠᠨ᠃
⑥ ᠠᠭᠰᠢᠵᠤ ᠰᠣᠩᠬᠤ ᠴᠢᠨᠠᠷᠲᠠᠢ ᠪᠣᠯᠬᠣᠷ ᠶᠡᠬᠡᠰᠬᠡᠵᠦ ᠪᠠᠭᠠᠰᠬᠠᠵᠤ ᠪᠦᠷ ᠪᠣᠯᠤᠨᠠ᠃
⑦ ᠬᠠᠯᠠᠭᠤᠨ ᠳ᠋ᠤ᠌ ᠬᠠᠯᠠᠳᠠᠭ ᠦᠭᠡᠢ ᠂ ᠬᠦᠢᠲᠡᠨ ᠳ᠋ᠦ᠍ ᠲᠠᠭᠠᠷᠠᠭᠤᠯᠳᠠᠭ ᠦᠭᠡᠢ ᠳᠤᠯᠠᠭᠠᠨ ᠃ ᠵᠤᠨ ᠬᠠᠯᠠᠭᠤᠴᠠᠪᠠᠯ ᠵᠠᠢᠴᠠ ᠪᠠᠨ ᠨᠡᠭᠡᠭᠡᠭᠡᠳ ᠰᠠᠯᠬᠢ ᠣᠷᠣᠭᠤᠯᠵᠤ ᠰᠡᠷᠢᠭᠦᠴᠡᠵᠦ ᠪᠣᠯᠳᠠᠭ ᠪᠥᠭᠡᠳ ᠡᠪᠦᠯ ᠤᠯᠠ ᠪᠠᠨ ᠳᠠᠷᠤᠵᠤ ᠂ ᠳᠣᠲᠣᠷ ᠬᠥᠰᠢᠭᠡ ᠲᠠᠲᠠᠭᠠᠳ ᠳᠤᠯᠠᠭᠠᠯᠠᠳᠠᠭ ᠠ᠋ᠴᠠ ᠭᠠᠳᠠᠨᠠ ᠂ ᠭᠠᠵᠠᠷ ᠬᠠᠨᠵᠤ ᠬᠢᠭᠡᠳ ᠰᠦᠷᠲᠡᠢ ᠳᠤᠯᠠᠭᠠᠨ ᠪᠣᠯᠭᠠᠳᠠᠭ᠃
⑧ ᠮᠠᠯᠴᠢᠳ ᠤ᠋ᠨ ᠵᠢᠯ ᠦ᠋ᠨ ᠳᠥᠷᠪᠡᠨ ᠤᠯᠠᠷᠢᠯ ᠢ᠋ ᠳᠠᠭᠠᠵᠤ ᠤᠰᠤᠨ ᠤ᠋ ᠲᠤᠩᠭᠠᠯᠠᠭ ᠡᠪᠡᠰᠦᠨ ᠦ᠌ ᠰᠤᠷ ᠢ᠋ ᠬᠥᠭᠡᠭᠡᠵᠦ ᠨᠡᠭᠦᠵᠦ ᠰᠠᠭᠤᠬᠤ ᠳ᠋ᠤ᠌ ᠮᠠᠰᠢ ᠲᠣᠬᠢᠷᠠᠮᠵᠢᠲᠠᠢ ᠠ᠋ᠴᠠ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠦᠢᠯᠡᠳᠪᠦᠷᠢᠯᠡᠯ ᠦ᠋ᠨ ᠱᠠᠭᠠᠷᠳᠠᠯᠭᠠ ᠳ᠋ᠤ᠌ ᠲᠤᠩ ᠲᠣᠬᠢᠷᠠᠵᠠᠢ᠃
⑨ ᠭᠠᠵᠠᠷ ᠬᠥᠳᠡᠯᠦᠯᠲᠡ ᠳ᠋ᠦ᠍ ᠭᠠᠮᠰᠢᠭ ᠭᠡᠵᠦ ᠶᠡᠷᠦ ᠦᠭᠡᠢ᠃
⑩ ᠳᠣᠯᠣᠭᠠᠨ ᠰᠥᠨᠢ ᠳᠣᠯᠣᠭᠠᠨ ᠡᠳᠦᠷ ᠦ᠋ᠨ ᠪᠣᠷᠣᠭᠠᠨ ᠳ᠋ᠤ᠌ ᠴᠤ᠌ ᠭᠣᠭᠣᠵᠢᠳᠠᠭ ᠦᠭᠡᠢ᠂ ᠨᠡᠩ ᠴᠦ᠍ ᠨᠤᠷᠠᠵᠤ ᠬᠥᠮᠦᠨ ᠳᠠᠷᠤᠵᠤ ᠭᠡᠮᠲᠦᠭᠡᠬᠦ ᠠᠶᠤᠯ ᠦᠭᠡᠢ᠃
⑪ ᠮᠣᠩᠭᠣᠯ ᠭᠡᠷ ᠨᠢ ᠲᠥᠭᠥᠷᠢᠭ ᠪᠥᠮᠪᠥᠭᠡᠷ ᠬᠡᠯᠪᠡᠷᠢᠲᠡᠢ ᠪᠣᠯᠬᠣᠷ ᠰᠠᠯᠬᠢ ᠶ᠋ᠢ ᠰᠥᠷᠬᠦ ᠬᠦᠴᠦ ᠪᠠᠭᠠ᠂ ᠶᠡᠷᠦ ᠨᠢ 7᠂ 8 ᠳᠡᠰ ᠦ᠋ᠨ ᠰᠠᠯᠬᠢᠨ ᠳ᠋ᠤ᠌ ᠠᠵᠢᠭ ᠦᠭᠡᠢ ᠪᠠᠢᠳᠠᠭ᠃ ᠲᠡᠷᠡᠴᠢᠯᠡᠨ ᠠᠷᠪᠠᠭᠠᠳ ᠳᠡᠰ ᠦ᠋ᠨ ᠰᠠᠯᠬᠢ ᠭᠠᠷᠤᠯᠠ ᠴᠤ᠌ ᠭᠡᠰᠡᠨ ᠠᠷᠭᠠᠮᠵᠢᠶᠠ ᠴᠢᠭᠲᠠᠭᠠ ᠪᠠᠨ ᠲᠠᠲᠠᠴᠢᠬᠠᠪᠠᠯ ᠬᠡᠢᠰᠬᠡᠨᠡ ᠭᠡᠵᠦ ᠭᠣᠷᠢ ᠪᠠᠨ ᠲᠡᠳᠡ᠃
ᠲᠠᠩᠰᠤᠭ ᠪᠠᠶᠠᠨ 《ᠮᠣᠩᠭᠣᠯ ᠤᠯᠠᠮᠵᠢᠯᠠᠯᠲᠤ ᠠᠮᠢᠳᠤᠷᠠᠯ ᠤ᠋ᠨ ᠲᠣᠯᠢ 》 ᠳ᠋ᠠᠬᠢ
ᠶᠠᠰᠤᠨ ᠤ᠋ ᠨᠠᠢᠷᠠᠳᠤᠯ ᠤ᠋ᠨ ᠲᠤᠬᠠᠢ ᠶᠠᠷᠢᠬᠤ ᠲᠣᠳᠣᠯᠠᠬᠤ ᠴᠢᠬᠤᠯᠠᠲᠠᠢ ᠲᠠᠪᠤ ᠃
ᠮᠣᠩᠭᠣᠯᠴᠤᠳ ᠡᠷᠲᠡ ᠢᠵᠠᠭᠤᠷ ᠠ᠋ᠴᠠ ᠪᠠᠨ ᠮᠠᠯ ᠮᠠᠯᠯᠠᠵᠤ ᠢᠷᠡᠭᠰᠡᠨ ᠪᠣᠯᠬᠣᠷ ᠮᠢᠬᠠ ᠢᠳᠡᠵᠦ ᠶᠠᠰᠤ ᠮᠥᠯᠵᠢᠵᠦ ᠢᠷᠡᠭᠰᠡᠨ ᠣᠨ ᠤᠳᠠᠭᠠᠨ ᠵᠢᠯ ᠦ᠋ᠨ ᠲᠡᠦᠬᠡ ᠲᠡᠢ ᠪᠢᠯᠡ ᠃ ᠭᠡᠬᠦ ᠳ᠋ᠡᠭᠡᠨ ᠲᠡᠳᠡ ᠠᠯᠠᠭᠰᠠᠨ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠦᠶᠡ ᠨᠢᠭᠡ ᠪᠦᠷᠢ ᠳ᠋ᠦ᠍ ᠬᠢᠲᠤᠭᠠ ᠣᠷᠣᠭᠤᠯᠵᠤ ᠡᠪᠳᠡᠵᠦ ᠰᠠᠯᠭᠠᠬᠤ ᠳ᠋ᠠᠭᠠᠨ ᠴᠢᠳᠠᠮᠠᠭᠠᠢ ᠪᠥᠭᠡᠳ ᠲᠡᠭᠦᠨᠴᠢᠯᠡᠨ ᠶᠠᠰᠤ ᠨᠢᠭᠡ ᠪᠦᠷᠢ ᠳ᠋ᠦ᠍ ᠨᠡᠷᠡ ᠥᠭᠴᠦ ᠂ ᠲᠡᠷᠡ ᠶᠠᠰᠤᠨ ᠤ᠋ ᠬᠢᠨᠢ ᠲᠡᠷᠡ ᠦᠶᠡ ᠪᠡᠷ ᠨᠢ ᠲᠡᠭᠡᠵᠦ ᠰᠠᠯᠭᠠ ᠭᠡᠵᠦ ᠦᠷᠡ ᠠᠴᠢ ᠨᠠᠷ ᠲᠠᠭᠠᠨ ᠴᠡᠭᠡᠵᠢ ᠪᠡᠷ ᠵᠢᠭᠠᠨ ᠰᠤᠷᠭᠠᠳᠠᠭ ᠠᠬᠠᠮᠠᠳ ᠵᠠᠬᠠ ᠡᠴᠡ ᠪᠡᠨ ᠣᠯᠠᠨ ᠪᠠᠢᠵᠤ ᠢᠷᠡᠵᠡᠢ᠃
ᠬᠠᠷᠠᠮᠰᠠᠯᠲᠠᠢ ᠨᠢ ᠬᠣᠢᠴᠢ ᠨᠢ ᠪᠣᠯᠤᠭᠰᠠᠨ ᠪᠢᠳᠡ ᠂ ᠬᠣᠢᠷᠭᠣ ᠬᠠᠢᠩᠭᠤ ᠰᠠᠯᠠᠩ ᠵᠠᠳᠠᠭᠠᠢ ᠥᠰᠴᠦ ᠂ ᠶᠠᠭᠤᠮᠠᠨ ᠳ᠋ᠤ᠌ ᠬᠢᠨᠠᠭᠤᠷ ᠭᠢᠷᠠᠬᠠᠢ ᠶᠡᠬᠡ ᠪᠡᠷ ᠳᠤᠲᠠᠵᠤ ᠢᠷᠡᠭᠰᠡᠨ ᠡᠴᠡ ᠣᠳᠣ ᠪᠠᠷᠤᠭ ᠬᠠᠭᠠᠰ ᠰᠢᠬᠠᠮ ᠶᠠᠰᠤᠨ ᠤ᠋ ᠨᠡᠷᠡᠰ ᠢ᠋ ᠮᠠᠷᠲᠠᠨ ᠣᠷᠬᠢᠵᠠᠢ᠃ ᠢᠯᠠᠩᠭᠤᠶᠠ ᠲᠥᠷᠥᠯ ᠪᠦᠷᠢ ᠶ᠋ᠢᠨ ᠮᠠᠯ ᠤ᠋ᠨ ᠶᠠᠰᠤ ᠲᠣᠭᠠ ᠬᠣᠭᠣᠷᠣᠨᠳᠣ ᠪᠠᠨ ᠠᠳᠠᠯᠢ ᠦᠭᠡᠢ ᠶ᠋ᠢᠨ ᠤᠯᠠᠮ ᠢ᠋ᠶ᠋ᠠᠷ ᠲᠡᠳᠡᠭᠡᠷ ᠦ᠋ᠨ ᠨᠡᠷᠡᠯᠡᠭᠡ ᠴᠦ᠍ ᠪᠠᠰᠠ ᠠᠳᠠᠯᠢ ᠦᠭᠡᠢ ᠪᠠᠢᠳᠠᠭ᠃ ᠶᠠᠭ ᠡᠢᠮᠦ ᠡᠴᠡ ᠨᠢᠭᠡ ᠲᠥᠷᠥᠯ ᠦ᠋ᠨ ᠮᠠᠯ ᠤ᠋ᠨ ᠶᠠᠰᠤ ᠪᠠᠷ ᠪᠦᠬᠦ ᠲᠥᠷᠥᠯ ᠦ᠋ᠨ ᠮᠠᠯ ᠤ᠋ᠨ ᠶᠠᠰᠤ ᠶ᠋ᠢ ᠲᠥᠯᠥᠭᠡᠯᠡᠬᠦ ᠭᠡᠵᠦ ᠳᠥᠭᠥᠮ ᠪᠣᠳᠣᠵᠤ ᠨᠡᠩ ᠪᠣᠯᠬᠤ ᠦᠭᠡᠢ ᠃ ᠵᠢᠱ᠌ᠢᠶᠡᠯᠡᠪᠡᠯ ᠄ ᠪᠤᠭ ᠮᠠᠯ ( ᠬᠣᠨᠢ ᠢᠮᠠᠭᠠ ) ᠶ᠋ᠢᠨ ᠬᠠᠪᠢᠷᠭᠠ ᠶᠡᠷᠦᠩᠬᠡᠢ ᠳ᠋ᠡᠭᠡᠨ 24 ᠪᠠᠢᠵᠤ ᠂ ᠵᠠᠷᠢᠮ ᠢᠯᠡᠭᠦᠦ ᠰᠦᠪᠡᠷᠭᠡᠳᠡᠰᠤᠲᠡᠢ ᠮᠠᠯ ᠭᠠᠷᠴᠤ 26 ᠲᠣᠭᠠᠯᠠᠭᠤᠯᠳᠠᠭ ᠃ ᠲᠡᠭᠡᠬᠦ ᠳ᠋ᠦ᠍ ᠲᠡᠮᠡᠭᠡ 24 ᠬᠠᠪᠢᠷᠭᠠ ᠲᠠᠢ ᠂ ᠦᠬᠡᠷ 26 ᠬᠠᠪᠢᠷᠭᠠ ᠲᠠᠢ ᠂ ᠭᠡᠲᠡᠯᠡ ᠠᠳᠤᠭᠤ ᠬᠠᠷᠢᠨ 36 ᠬᠠᠪᠢᠷᠭᠠ ᠲᠠᠢ ᠪᠠᠢᠳᠠᠭ ᠃ ᠡᠭᠦᠨ ᠡᠴᠡ ᠪᠣᠯᠵᠤ ᠲᠡᠳᠡᠭᠡᠷ ᠦ᠋ᠨ ᠰᠡᠭᠡᠷ ᠨᠢᠷᠤᠭᠤ ᠶ᠋ᠢᠨ ᠲᠣᠭᠠ ᠴᠤ᠌ ᠠᠳᠠᠯᠢ ᠦᠭᠡᠢ ᠶᠠᠰᠤᠨ ᠤ᠋ ᠨᠡᠷᠡᠢᠳᠦᠯ ᠨᠢ ᠴᠦ᠍ ᠠᠳᠠᠯᠢ ᠦᠭᠡᠢ ᠪᠣᠯᠬᠤ ᠨᠢ ᠳᠠᠮᠵᠢᠭ ᠦᠭᠡᠢ ᠃ ᠬᠡᠳᠦᠢ ᠪᠡᠷ ᠡᠢᠮᠦ ᠪᠣᠯᠪᠠᠴᠤ ᠵᠠᠷᠢᠮ ᠨᠢ ᠬᠣᠭᠣᠷᠣᠨᠳᠣ ᠪᠠᠨ ᠠᠳᠠᠯᠢᠪᠲᠤᠷ ᠪᠠᠢᠳᠠᠭ ᠃ ᠲᠤᠬᠠᠢᠯᠠᠪᠠᠯ : ᠦᠬᠡᠷ ᠬᠣᠨᠢᠨ ᠤ᠋ ᠶᠠᠰᠤ ᠪᠠᠷ ᠭᠣᠣᠯᠯᠠᠨ ᠂ ᠥᠪᠡᠷ ᠦ᠋ᠨ ᠣᠯᠵᠤ ᠮᠡᠳᠡᠭᠰᠡᠨ ᠦ᠌ ᠪᠡᠨ ᠬᠢᠷᠢ ᠪᠡᠷ ᠶᠠᠰᠤᠨ ᠤ᠋ ᠨᠡᠷᠡ ᠶ᠋ᠢ ᠲᠡᠮᠳᠡᠭᠯᠡᠵᠦ ᠬᠣᠢᠴᠢ ᠶ᠋ᠢᠨ ᠳᠡᠭᠦᠦ ᠨᠠᠷ ᠲᠠᠭᠠᠨ ᠶᠡᠷᠦᠩᠬᠡᠢ ᠮᠡᠳᠡᠯᠭᠡ ᠪᠣᠯᠭᠠᠬᠤ ᠶ᠋ᠢ ᠵᠣᠷᠢᠪᠠ ᠃ ᠭᠡᠲᠡᠯᠡ ᠮᠢᠨᠦ ᠬᠢᠷᠢ ᠭᠡᠮ ᠮᠡᠬᠦᠰ ᠪᠥᠭᠡᠳ ᠢᠪᠴᠤᠤ ᠂ ᠮᠣᠩᠭᠣᠯ ᠨᠤᠲᠤᠭ ᠥᠷᠭᠡᠨ ᠪᠥᠭᠡᠳ ᠲᠡᠨᠢᠭᠡᠷ ᠃ ᠭᠠᠵᠠᠷ ᠭᠠᠵᠠᠷ ᠤ᠋ᠨ ᠬᠡᠯᠡᠯᠭᠡ ᠪᠠᠰᠠ ᠬᠣᠭᠣᠷᠣᠨᠳᠣ ᠪᠠᠨ ᠣᠭᠲᠣ ᠣᠨᠳᠣᠣ ᠣᠨᠳᠣᠣ ᠪᠠᠢᠳᠠᠭ ᠪᠣᠯᠬᠣᠷ ᠡᠭᠦᠨ ᠢ᠋ ᠪᠠᠰᠠ ᠲᠡᠢᠮᠦ ᠪᠦᠷᠢᠨ ᠲᠡᠭᠦᠯᠳᠡᠷ ᠭᠡᠵᠦ ᠪᠠᠲᠤᠯᠠᠬᠤᠶᠠ ᠪᠡᠷᠬᠡ ᠃ ᠲᠡᠢᠨ ᠬᠦ᠌ ᠤᠩᠰᠢᠭᠴᠢᠳ ᠲᠠᠭᠠᠨ ᠬᠦᠰᠡᠬᠦ ᠨᠢ : ᠶᠠᠰᠤᠨ ᠤ᠋ ᠲᠤᠬᠠᠢ ᠮᠡᠳᠡᠪᠡᠯ ᠂ ᠶᠠᠪᠤᠳᠠᠯ ᠪᠣᠯᠭᠠᠵᠤ ᠨᠠᠳᠠ ᠴᠢᠮᠡᠭᠡ ᠵᠠᠬᠢᠳᠠᠯ ᠢ᠋ᠶ᠋ᠠᠷ ᠰᠤᠷᠭᠠᠯ ᠬᠠᠢᠷᠠᠯᠠᠬᠤ ᠶᠤᠮ ᠤᠤ ᠂ ᠡᠰᠡᠬᠦᠯᠡ ᠰᠣᠨᠢᠨ ᠰᠡᠳᠬᠦᠯ ᠳ᠋ᠦ᠍ ᠥᠭᠦᠯᠡᠯ ᠪᠢᠴᠢᠨ ᠨᠥᠬᠥᠨ ᠪᠦᠷᠢᠳᠦᠭᠦᠯᠬᠦ ᠶ᠋ᠢ ᠴᠢᠩ ᠰᠡᠳᠬᠢᠯ ᠦ᠋ᠨ ᠡᠴᠢᠨᠡ ᠡᠴᠡ ᠪᠡᠨ ᠬᠦᠰᠡᠵᠦ ᠪᠠᠢᠭᠠ ᠶ᠋ᠢ ᠡᠨᠳᠡ ᠲᠡᠮᠳᠡᠭᠯᠡᠶᠡ᠃
ᠲᠡᠷᠡᠴᠢᠯᠡᠨ ᠶᠠᠰᠤ ᠴᠤ᠌ ᠲᠡᠷᠡ ᠂ ᠪᠤᠰᠤᠳ ᠴᠤ᠌ ᠲᠡᠷᠡ ᠃ ᠪᠢᠳᠡ ᠶᠡᠷᠦ ᠨᠢ ᠥᠪᠡᠷ ᠦ᠋ᠨ ᠡᠳ᠋ᠯᠡᠵᠦ ᠬᠡᠷᠡᠭᠯᠡᠵᠦ ᠪᠠᠢᠭᠠ ᠶᠠᠭᠤᠮᠠᠰ ᠲᠠᠭᠠᠨ ᠡᠷᠬᠡᠪᠰᠢ ᠥᠪᠡᠷ ᠦ᠋ᠨ ᠭᠡᠬᠦ ᠨᠡᠷᠡᠲᠡᠢ ᠵᠢᠰᠦᠲᠡᠢ ᠶᠠᠪᠤᠶᠠ ᠃ ᠤᠰᠤᠨ ᠤ᠋ ᠡᠬᠢ ᠨᠢ ᠪᠤᠷᠵᠠᠩ ᠦᠭᠡᠢ ᠪᠣᠯ ᠠᠳᠠᠭ ᠨᠢ ᠨᠡᠩ ᠪᠤᠷᠵᠠᠩ ᠦᠭᠡᠢ ᠭᠡᠭᠴᠢ ᠪᠡᠷ ᠪᠢᠳᠡ ᠬᠣᠢᠴᠢ ᠦᠶᠡ ᠳ᠋ᠡᠭᠡᠨ ᠪᠣᠬᠢᠷ ᠪᠤᠷᠵᠠᠩ ᠦᠯᠡᠳᠡᠭᠡᠬᠦ ᠦᠭᠡᠢ ᠮᠥᠷᠲᠡᠭᠡᠨ ᠬᠢᠭᠰᠡᠨ ᠪᠦᠲᠦᠭᠡᠭᠰᠡᠨ ᠶᠠᠭᠤᠮᠠ ᠲᠠᠢ ᠶᠠᠪᠤᠯᠠ ᠭᠡᠰᠡᠨ ᠳᠤᠷᠠᠳᠬᠠᠯ ᠲᠠᠢ ᠪᠤᠯᠵᠠᠭᠠᠶᠠ᠃
ᠲᠡᠩᠰᠤᠭ ᠪᠠᠶᠠᠨ 《ᠮᠣᠩᠭᠣᠯ ᠤᠯᠠᠮᠵᠢᠯᠠᠯᠲᠤ ᠠᠮᠢᠳᠤᠷᠠᠯ ᠤ᠋ᠨ ᠲᠣᠯᠢ 》 ᠳ᠋ᠠᠬᠢ
ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠨᠡᠷᠡᠢᠳᠦᠯ ᠳ᠋ᠦ᠍ ᠲᠠᠰᠤ ᠠᠳᠠᠯᠢ ᠦᠭᠡᠢ ᠦᠵᠡᠯᠲᠡ ᠲᠡᠢ
ᠵᠦᠢᠯ ᠡᠴᠡ ᠬᠣᠶᠠᠷ ᠢ᠋ ᠰᠣᠩᠭᠣᠵᠤ ᠲᠣᠳᠣᠯᠠᠵᠤ ᠲᠣᠭᠠᠴᠢᠬᠤ ᠴᠢᠬᠤᠯᠠᠲᠠᠢ ᠵᠢᠷᠭᠤᠭᠠ ᠃
ᠬᠠᠪᠴᠢᠭ ᠰᠣᠶᠣᠭᠠᠯᠠᠩ ᠤ᠋ᠨ ᠲᠤᠬᠠᠢ
ᠨᠥᠬᠥᠷ ××× ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠮᠡᠷᠭᠡᠵᠢᠯᠲᠡᠨ ᠂ 1982 ᠣᠨ ᠳ᠋ᠤ᠌ ᠥᠪᠥᠷ ᠮᠣᠩᠭᠣᠯ ᠤ᠋ᠨ 《ᠮᠣᠩᠭᠣᠯ ᠬᠡᠯᠡ ᠪᠢᠴᠢᠭ 》ᠰᠡᠳᠬᠦᠯ ᠦ᠋ᠨ ᠬᠣᠶᠠᠳᠤᠭᠠᠷ ᠲᠤ᠌ 《ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠨᠠᠰᠤ ᠰᠢᠳᠦ ᠪᠠ ᠥᠩᠭᠡ ᠵᠢᠰᠦᠮ ᠢ᠋ ᠨᠡᠷᠡᠯᠡᠬᠦ ᠦᠭᠡ ᠶ᠋ᠢᠨ ᠲᠤᠬᠠᠢ 》ᠭᠡᠳᠡᠭ ᠥᠭᠦᠯᠡᠯ ᠳ᠋ᠡᠭᠡᠨ : 《ᠬᠠᠪᠴᠢᠭ ᠰᠣᠶᠣᠭᠠᠯᠠᠩ 4 – 5 ᠨᠠᠰᠤᠨ ᠤ᠋ ᠬᠣᠭᠣᠷᠣᠨᠳᠣᠬᠢ ᠶ᠋ᠢ ᠵᠢᠭᠠᠨᠠ 》ᠭᠡᠵᠦ ᠲᠠᠢᠯᠪᠤᠷᠢᠯᠠᠵᠠᠢ ᠃ 4 ᠨᠠᠰᠤᠨ ᠳ᠋ᠤ᠌ ᠰᠣᠶᠣᠭᠠ ᠭᠠᠷᠳᠠᠭ ᠦᠭᠡᠢ ᠂ 5 ᠨᠠᠰᠤᠨ ᠳ᠋ᠤ᠌ ᠬᠡᠳᠦᠢ ᠪᠡᠷ ᠰᠣᠶᠣᠭᠠ ᠭᠠᠷᠳᠠᠭ ᠪᠣᠯᠪᠠᠴᠤ 《ᠬᠠᠪᠴᠢᠭ ᠰᠣᠶᠣᠭᠠᠯᠠᠩ 》 ᠤ᠋ᠨ ᠠᠭᠤᠯᠭᠠ ᠨᠠᠰᠤᠨ ᠳ᠋ᠤ᠌ ᠨᠡᠢᠴᠡᠬᠦ ᠦᠭᠡᠢ ᠃ 《ᠬᠠᠪᠴᠢᠭ ᠰᠣᠶᠣᠭᠠᠯᠠᠩ 》 ᠮᠣᠷᠢ ᠶ᠋ᠢ ᠤᠷᠤᠯᠳᠤᠭᠠᠨ ᠳ᠋ᠤ᠌ ᠤᠶᠠᠳᠠᠭ ᠦᠭᠡᠢ （ ᠥᠪᠥᠷ ᠲᠦ᠍ ᠨᠠᠰᠤ ᠶᠠᠰᠤ ᠪᠦᠷᠢᠨ ᠭᠦᠢᠴᠡᠭᠰᠡᠨ ᠮᠣᠷᠢ ᠶ᠋ᠢ ᠰᠠᠶᠢ ᠬᠣᠯᠠ ᠶ᠋ᠢᠨ ᠤᠷᠤᠯᠳᠤᠭᠠᠨ ᠳ᠋ᠤ᠌ ᠤᠶᠠᠨᠠ ᠭᠡᠰᠡᠨ ᠵᠤᠷᠰᠢᠯ ᠲᠠᠢ ) ᠭᠡᠳᠡᠭ ᠦᠭᠡ ᠪᠣᠯ ᠮᠠᠨ ᠤ᠋ ᠥᠪᠥᠷ ᠲᠦ᠍ 6 ᠨᠠᠰᠤᠲᠠᠢ ᠮᠣᠷᠢᠨ ᠳ᠋ᠤ᠌ ᠯᠠ ᠰᠠᠶᠢ ᠬᠡᠯᠡᠯᠴᠡᠳᠡᠭ ᠳᠡ ᠃ ᠡᠢᠮᠦ ᠪᠡᠷ ᠡᠨᠡ ᠲᠠᠢᠯᠪᠤᠷᠢ ᠣᠨᠣᠴᠢ ᠮᠠᠭᠤᠲᠠᠢ ᠪᠣᠯᠵᠠᠢ᠃
ᠨᠥᠬᠥᠷ ××× ᠂ 1986 ᠣᠨ ᠳ᠋ᠤ᠌ ᠥᠪᠥᠷ ᠮᠣᠩᠭᠣᠯ ᠤ᠋ᠨ 《ᠮᠣᠩᠭᠣᠯ ᠬᠡᠯᠡ ᠤᠳᠬᠠ ᠵᠣᠬᠢᠶᠠᠯ 》ᠰᠡᠳᠬᠦᠯ ᠦ᠋ᠨ ᠳᠥᠷᠪᠡᠳᠦᠭᠡᠷ ᠲᠦ᠍ 《ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠨᠡᠷᠡᠢᠳᠦᠯ ᠦ᠋ᠨ ᠲᠤᠬᠠᠢ 》ᠭᠡᠳᠡᠭ ᠥᠭᠦᠯᠡᠯ ᠢ᠋ᠶ᠋ᠡᠨ ᠨᠡᠢᠲᠡᠯᠡᠭᠦᠯᠵᠦ : 《ᠬᠠᠪᠴᠢᠭ ᠰᠣᠶᠣᠭᠠᠯᠠᠩ – 6 ᠨᠠᠰᠤᠨ ᠤ᠋ ᠡᠷᠡ ᠠᠳᠤᠭᠤ 》 ᠭᠡᠵᠦ ᠵᠥᠪ ᠳᠡᠢᠯᠵᠡᠢ ᠃ ᠭᠡᠪᠡᠴᠦ ᠲᠡᠷᠡ 《ᠵᠠᠷᠢᠮ ᠠᠯᠳᠠᠭᠠ ᠪᠤᠷᠤᠭᠤ ᠲᠠᠢ ᠨᠡᠷᠡᠢᠳᠦᠯ ᠦ᠋ᠨ ᠲᠤᠬᠠᠢ 》 ᠭᠡᠰᠡᠨ ᠬᠡᠰᠡᠭ ᠲᠡᠭᠡᠨ ᠄ 《᠁ ＜ ᠬᠠᠪᠴᠢᠭ ᠰᠣᠶᠣᠭᠠᠯᠠᠩ ＞ ᠭᠡᠰᠡᠨ ᠴᠣᠬᠣᠮ ᠶᠠᠮᠠᠷ ᠦᠭᠡ ᠪᠣᠢ ? ＜ ᠬᠠᠪᠴᠢᠭ ＞ ＜ ᠰᠣᠶᠣᠭᠠᠯᠠᠩ ＞ ᠭᠡᠰᠡᠨ ᠬᠣᠶᠠᠷ ᠦᠭᠡ ᠪᠡᠷ ᠪᠦᠲᠦᠵᠡᠢ ᠃ ＜ ᠬᠠᠪᠴᠢᠭ ＞ ᠭᠡᠳᠡᠭ ᠦᠭᠡ ᠪᠣᠯ ᠠᠳᠤᠭᠤ ᠂ ᠲᠡᠮᠡᠭᠡ ᠶ᠋ᠢ ᠠᠭᠲᠠᠯᠠᠵᠤ ᠵᠠᠰᠠᠬᠤ ᠳ᠋ᠤ᠌ ᠴᠢᠰᠤ ᠶᠡᠬᠡ ᠭᠠᠷᠬᠤ ᠠ᠋ᠴᠠ ᠰᠡᠷᠭᠡᠢᠯᠡᠬᠦ ᠨᠢᠭᠡᠨ ᠵᠦᠢᠯ ᠦ᠋ᠨ ᠮᠣᠳᠣ ᠪᠤᠶᠤ ᠲᠡᠮᠦᠷ ᠢ᠋ᠶ᠋ᠡᠷ ᠬᠢᠭᠰᠡᠨ ᠵᠡᠪᠰᠡᠭ ᠢ᠋＜ ᠡᠷᠢᠭ ᠬᠠᠪᠴᠢᠭ ＞ ᠭᠡᠳᠡᠭ ᠃ ＜ ᠰᠣᠶᠣᠭᠠᠯᠠᠩ ＞ ᠭᠡᠳᠡᠭ ᠦᠭᠡ ᠪᠣᠯ ᠡᠷᠡ ᠬᠦᠢᠰᠦᠨ ᠦ᠌ ᠠᠳᠤᠭᠤ ᠲᠡᠮᠡᠭᠡᠨ ᠳ᠋ᠦ᠍ ᠂ 5 ᠨᠠᠰᠤᠨ ᠠ᠋ᠴᠠ ᠬᠣᠢᠰᠢ ᠰᠠᠶᠢ ＜ ᠰᠣᠶᠣᠭᠠ ᠰᠢᠲᠦ ＞ ᠨᠢ ᠤᠷᠭᠤᠵᠤ ᠭᠠᠷᠳᠠᠭ ᠂ ᠳᠠᠷᠤᠢ ᠰᠣᠶᠣᠭᠠ ᠰᠤᠩᠭᠠᠭᠰᠠᠨ ᠦᠶᠡ ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠂ 6 ᠨᠠᠰᠤᠨ ᠤ᠋ ᠡᠷᠡ ᠠᠳᠤᠭᠤ ᠶ᠋ᠢ ＜ ᠬᠠᠪᠴᠢᠭ ᠰᠣᠶᠣᠭᠠᠯᠠᠩ ＞ ᠭᠡᠵᠦ ᠬᠡᠯᠡᠨᠡ ᠃ 4 ᠨᠠᠰᠤᠨ ᠤ᠋ ᠠᠳᠤᠭᠤᠨ ᠳ᠋ᠤ᠌ ᠰᠣᠶᠣᠭᠠ ᠭᠠᠷᠳᠠᠭ ᠦᠭᠡᠢ ᠤᠴᠢᠷ ᠠ᠋ᠴᠠ ᠰᠣᠶᠣᠭᠠᠯᠠᠩ ᠭᠡᠵᠦ ᠬᠡᠯᠡᠬᠦ ᠶᠣᠰᠣ ᠦᠭᠡᠢ 》ᠭᠡᠵᠦ ᠲᠠᠢᠯᠤᠭᠰᠠᠨ ᠳ᠋ᠠᠬᠢ 《ᠬᠠᠪᠴᠢᠭ 》ᠭᠡᠳᠡᠭ ᠦᠭᠡ ᠶ᠋ᠢ 《ᠡᠷᠢᠭ ᠬᠠᠪᠴᠢᠭ 》 ᠤ᠋ᠨ 《ᠬᠠᠪᠴᠢᠭ 》 ᠢ᠋ᠶ᠋ᠠᠷ ᠲᠠᠢᠯᠪᠤᠷᠢᠯᠠᠭᠰᠠᠨ ᠨᠢ ᠮᠥᠨ ᠬᠢᠵᠠᠭᠠᠯᠠᠩ ᠳᠡᠭᠡᠷᠡ ᠬᠡᠯᠡᠭᠰᠡᠨ ᠠᠯᠳᠠᠭᠠ ᠭᠠᠷᠭᠠᠵᠠᠢ᠃
ᠮᠠᠨ ᠤ᠋ ᠮᠣᠩᠭᠣᠯᠴᠤᠳ ᠮᠠᠰᠢ ᠡᠷᠲᠡ ᠳᠡᠭᠡᠷᠡ ᠦᠶᠡ ᠡᠴᠡ ᠡᠬᠢᠯᠡᠨ ᠦᠷᠢᠶᠡ ᠪᠡᠨ ᠶᠡᠷᠦ ᠨᠢ 4 ᠨᠠᠰᠤᠨ ᠳ᠋ᠤᠨᠢ ( ᠣᠨᠴᠠᠭᠠᠢ ᠪᠠᠢᠳᠠᠯ – ᠪᠥᠭᠡᠨᠰᠦᠭ ᠨᠢ ᠪᠠᠭᠤᠭᠠᠳᠤᠢ ᠪᠤᠶᠤ ᠠᠯᠳᠠᠵᠤ ᠬᠣᠴᠣᠷᠤᠭᠰᠠᠨ ᠵᠡᠷᠭᠡ ᠶ᠋ᠢ ᠭᠠᠷᠭᠠᠪᠠᠯ ) ᠬᠠᠭᠠᠷᠢᠳᠠᠭ ᠵᠤᠷᠰᠢᠯᠲᠠᠢ ᠪᠢᠯᠡ᠃ ᠭᠡᠬᠦ ᠳ᠋ᠡᠭᠡᠨ ᠪᠦᠷ 《ᠡᠷᠢᠭ ᠬᠠᠪᠴᠢᠭ 》 ᠢ᠋ ᠬᠡᠷᠡᠭᠯᠡᠵᠦ ᠬᠠᠭᠠᠷᠢᠵᠤ ᠴᠠᠭᠠᠯᠠᠳᠠᠭ ᠃ ᠡᠢᠨ ᠬᠦ᠌ ××× ᠭᠤᠸᠠᠢ ᠶ᠋ᠢᠨ ᠬᠡᠯᠡᠳᠡᠭ 《ᠡᠷᠢᠭ ᠬᠠᠪᠴᠢᠭ 》 ᠤ᠋ᠨ 《ᠬᠠᠪᠴᠢᠭ 》 ᠢ᠋ᠶ᠋ᠠᠷ ᠨᠡᠷᠡᠯᠡᠭᠰᠡᠨ ᠪᠣᠯ ᠶᠣᠰᠣ ᠨᠢ ᠡᠨᠡ ᠴᠠᠭ ᠠ᠋ᠴᠠ ᠡᠬᠢᠯᠡᠨ ᠬᠠᠭᠠᠷᠢᠭᠰᠠᠨ ᠮᠣᠷᠢ ᠪᠦᠬᠦᠨ ᠨᠡᠷᠡᠯᠡᠭᠳᠡᠪᠡᠯ ᠵᠦᠢᠲᠡᠢ ᠃ ᠲᠤᠬᠠᠢᠯᠠᠪᠠᠯ : 《ᠬᠠᠪᠴᠢᠭ ᠬᠢᠵᠠᠭᠠᠯᠠᠩ 》 ᠭᠡᠭᠳᠡᠬᠦ ᠶᠣᠰᠣᠲᠠᠢ ᠃ ᠭᠡᠲᠡᠯᠡ ᠡᠢᠮᠦ ᠨᠡᠷᠡᠢᠳᠦᠯ ᠶᠡᠷᠦ ᠰᠣᠨᠣᠰᠤᠭᠳᠠᠭᠠ ᠦᠭᠡᠢ ᠃ ᠡᠭᠦᠨ ᠡᠴᠡ ᠦᠵᠡᠪᠡᠯ 《ᠡᠷᠢᠭ ᠬᠠᠪᠴᠢᠭ 》 ᠤ᠋ᠨ 《ᠬᠠᠪᠴᠢᠭ 》 ᠢ᠋ᠶ᠋ᠠᠷ ᠨᠠᠷᠠᠯᠠᠪᠠ ᠭᠡᠳᠡᠭ ᠨᠢ ᠵᠦᠢ ᠶᠣᠰᠣᠨ ᠳ᠋ᠤ᠌ ᠨᠡᠢᠴᠡᠮᠡ ᠦᠭᠡᠢ ᠰᠢᠭ ᠃ ᠳᠠᠬᠢᠭᠠᠳ ᠬᠡᠯᠡᠪᠡᠯ ᠂ ᠬᠢᠵᠠᠭᠠᠯᠠᠩ ᠂ ᠰᠣᠶᠣᠭᠠᠯᠠᠩ ᠮᠣᠷᠢ ᠪᠦᠬᠦᠨ ᠳ᠋ᠦ᠍ 《ᠬᠠᠪᠴᠢᠭ 》 ᠭᠡᠰᠡᠨ ᠦᠭᠡ ᠶ᠋ᠢ ᠬᠠᠲᠠᠭᠰᠠᠨ ᠦᠭᠡᠢ ᠂ ᠬᠠᠷᠢᠨ ᠭᠦᠢᠴᠡᠬᠦ ᠨᠠᠰᠤᠨ ᠤ᠋ ᠮᠣᠷᠢ – 6 ᠨᠠᠰᠤᠲᠠᠢ ᠣᠨᠴᠠ ᠵᠠᠷᠢᠮ ᠮᠣᠷᠢᠨ ᠳ᠋ᠤ᠌ ᠠᠪᠴᠤ ᠬᠡᠯᠡᠳᠡᠭ ᠢ᠋ ᠬᠢᠨᠠᠬᠤ ᠪᠣᠯᠪᠠ ᠤᠤ ? ᠡᠨᠡ ᠪᠣᠯ ᠡᠨᠡ ᠦᠭᠡ ᠶ᠋ᠢᠨ ᠣᠨᠢᠰᠣ ᠶᠤᠮ᠃
《ᠬᠠᠪᠴᠢᠭ ᠰᠣᠶᠣᠭᠠᠯᠠᠩ 》ᠭᠡᠳᠡᠭ ᠦᠭᠡ ᠶ᠋ᠢ ᠭᠠᠵᠠᠷ ᠂ ᠭᠠᠵᠠᠷ ᠣᠨᠳᠣᠣ ᠂ ᠣᠨᠳᠣᠣ ᠬᠡᠯᠡᠳᠡᠭ ᠴᠦ᠍ ᠣᠯᠠᠩᠬᠢ ᠨᠢ 5 ᠂ 6 ᠨᠠᠰᠤᠨ ᠤ᠋ ᠠᠳᠤᠭᠤᠨ ᠳ᠋ᠤ᠌ ᠯᠠ ᠬᠣᠯᠪᠣᠵᠤ ᠬᠡᠯᠡᠳᠡᠭ ᠃ ᠬᠠᠯᠬᠠ ᠳ᠋ᠤ᠌ ᠰᠣᠶᠣᠭᠠᠯᠠᠩ ᠨᠠᠰᠤᠨ ᠤ᠋ ᠮᠣᠷᠢᠳ ᠢ᠋ ᠣᠷᠣᠯᠳᠣᠳᠠᠭ ᠤᠴᠢᠷ ᠰᠣᠶᠣᠭᠠᠯᠩ ᠮᠣᠷᠢᠨ ᠳ᠋ᠤ᠌ ᠬᠣᠯᠪᠣᠵᠤ ᠶᠠᠷᠢᠳᠠᠭ ᠨᠡᠷᠡᠢᠳᠦᠯ ᠪᠣᠢ᠃
ᠮᠠᠨ ᠤ᠋ ᠡᠪᠦᠭᠡ ᠳᠡᠭᠡᠳᠦᠰ ᠡᠴᠡ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠮᠡᠳᠡᠯᠭᠡ ᠪᠣᠯᠤᠨ ᠦᠢᠯᠡᠳᠦᠯᠭᠡ ᠡᠴᠡ ᠦᠵᠡᠪᠡᠯ ᠂ ᠮᠣᠷᠢ 5 ᠨᠠᠰᠤᠯᠠᠬᠤ ᠳ᠋ᠠᠭᠠᠨ ᠰᠠᠶᠢ ᠰᠣᠶᠣᠭᠠ ᠰᠢᠳᠦ ᠨᠢ ᠭᠠᠷᠳᠠᠭ᠃ ᠡᠢᠨ ᠬᠦ᠌ ᠡᠨᠡ ᠨᠠᠰᠤᠨ ᠤ᠋ ᠮᠣᠷᠢ ᠶ᠋ᠢ ᠰᠣᠶᠣᠭᠠᠯᠠᠩ ᠭᠡᠵᠦ ᠨᠡᠷᠡᠢᠳᠴᠡᠢ ᠃ ᠭᠡᠲᠡᠯᠡ ᠣᠨᠴᠠ ᠵᠠᠷᠢᠮ ᠶᠠᠰᠤᠨ ᠤ᠋ ᠬᠥᠭᠵᠢᠯ ᠮᠠᠭᠤ ᠪᠤᠶᠤ ᠡᠰᠡᠬᠦᠯᠡ ᠣᠷᠣᠢ ᠭᠠᠷᠤᠭᠰᠠᠨ ᠤᠨᠠᠭᠠ ( ᠢᠯᠠᠩᠭᠤᠶᠠ ᠵᠢᠯ ᠵᠠᠪᠰᠠᠷ ᠤ᠋ᠨ ᠤᠨᠠᠭᠠ ) ᠬᠡᠳᠦᠬᠡᠨ ᠬᠣᠨᠣᠭᠠᠳ ᠳᠠᠭᠠ ᠶ᠋ᠢᠨ ᠨᠠᠰᠤ ᠪᠠᠨ ᠠᠪᠴᠢᠬᠠᠳᠠᠭ᠃ ᠡᠢᠮᠦ ᠠᠳᠤᠭᠤ ᠨᠢ ᠰᠢᠳᠦᠯᠡᠩ ᠂ ᠬᠢᠵᠠᠭᠠᠯᠠᠩ ᠤ᠋ᠨ ᠨᠠᠰᠤ ᠪᠠᠨ ᠳᠤᠭᠤᠯᠤᠭᠠᠳ ᠰᠣᠶᠣᠭᠠᠯᠠᠩ ᠪᠣᠯᠬᠤ ᠳ᠋ᠤ᠌ ᠂ ᠰᠣᠶᠣᠭᠠ ᠨᠢ ᠬᠠᠷᠢᠨ ᠣᠷᠭᠣᠭᠠᠳᠤᠢ ᠪᠠᠢᠳᠠᠭ᠃ ᠡᠭᠦᠨ ᠳ᠋ᠦ᠍ᠨᠢ ᠶᠠᠰᠤ ᠨᠢ ᠭᠦᠢᠴᠡᠭᠡ ᠦᠭᠡᠢ ᠮᠣᠷᠢ᠂ ᠴᠢᠳᠠᠯ ᠰᠢᠨᠳᠠᠰᠤ ᠨᠢ ᠪᠦᠷᠢᠳᠦᠭᠡᠳᠦᠢ ᠭᠡᠵᠦ ᠮᠠᠭᠤᠰᠢᠶᠠᠨ 《ᠬᠠᠪᠴᠢᠭ ᠰᠣᠶᠣᠭᠠᠯᠠᠩ 》ᠭᠡᠵᠦ ᠨᠡᠷᠡᠯᠡᠳᠡᠭ ᠬᠠᠯᠠᠭᠴᠤᠳ ᠪᠣᠢ᠃
6 ᠨᠠᠰᠤᠨ ᠤ᠋ 《ᠬᠠᠪᠴᠢᠭ ᠰᠣᠶᠣᠭᠠᠯᠠᠩ 》ᠭᠡᠪᠡᠯ ᠮᠠᠨ ᠤ᠋ ᠥᠪᠥᠷ ᠲᠦ᠍ ᠯᠡ ᠣᠯᠠᠨ ᠶᠠᠷᠢᠭᠳᠠᠳᠠᠭ᠃ ᠵᠷᠢᠮ ᠭᠠᠵᠠᠷ 6 ᠨᠠᠰᠤᠲᠠᠢ ᠮᠣᠷᠢ ᠶ᠋ᠢ ᠭᠦᠢᠴᠡᠬᠦ ᠨᠠᠰᠤᠨ ᠤ᠋ ᠮᠣᠷᠢ ᠭᠡᠵᠦ ᠬᠡᠯᠡᠳᠡᠭ᠃ ᠡᠨᠡ ᠨᠠᠰᠤᠨ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍ ᠂ ᠮᠣᠷᠢᠨ ᠤ᠋ ᠰᠣᠶᠣᠭᠠ ᠨᠢ ᠭᠦᠢᠴᠡᠳ ᠤᠷᠭᠤᠨ ᠰᠤᠩᠭᠠᠨ ᠭᠦᠢᠴᠡᠵᠦ ᠶᠠᠰᠤᠨ ᠤ᠋ ᠬᠥᠭᠵᠢᠯ ᠢ᠋ ᠵᠣᠭᠰᠣᠭᠠᠳᠠᠭ ᠠᠵᠢ᠃ ᠶᠠᠰᠤ ᠨᠢ ᠭᠦᠢᠴᠡᠬᠦ ᠲᠡᠢ ᠵᠡᠷᠭᠡ ᠪᠡᠶᠡ ᠨᠢ ᠪᠠᠰᠠ ᠴᠢᠳᠠᠯ ᠰᠢᠨᠳᠠᠰᠤ ᠶ᠋ᠢ ᠪᠦᠷᠢᠳᠦᠭᠦᠯᠵᠦ ᠳᠠᠭᠤᠰᠳᠠᠭ᠃ ᠭᠡᠲᠡᠯᠡ ᠶᠠᠰᠤᠨ ᠤ᠋ ᠬᠥᠭᠵᠢᠯ ᠮᠠᠭᠤᠲᠠᠢ ᠤᠨᠠᠭᠠ ᠪᠤᠶᠤ ᠬᠠᠪᠴᠢᠭ ᠤᠨᠠᠭᠠ ᠥᠰᠦᠭᠰᠡᠭᠡᠷ ᠨᠠᠰᠤ ᠭᠦᠢᠴᠡᠵᠦ ᠰᠣᠶᠣᠭᠠ ᠰᠤᠩᠭᠠᠬᠤ ᠦᠶᠡ ᠪᠣᠯᠬᠤ ᠳ᠋ᠤ᠌᠂ ᠲᠡᠭᠦᠨ ᠦ᠌ ᠰᠣᠶᠣᠭᠠ ᠰᠠᠶᠢ ᠰᠣᠶᠣᠭᠠᠯᠠᠵᠤ ᠡᠬᠢᠯᠡᠵᠦ ᠪᠠᠢᠳᠠᠭ᠃ ᠡᠢᠮᠦ 6 ᠨᠠᠰᠤᠲᠠᠢ ᠮᠣᠷᠢ ᠶ᠋ᠢ ᠶᠠᠰᠤ ᠪᠡᠶᠡ ᠨᠢ ᠤᠷᠭᠤᠵᠤ ᠪᠣᠢᠵᠢᠵᠤ ᠭᠦᠢᠴᠡᠭᠡᠳᠦᠢ ᠂ ᠴᠢᠳᠠᠯ ᠂ ᠰᠢᠨᠳᠠᠰᠤ ᠨᠢ ᠴᠢᠩᠭᠠᠷᠠᠵᠤ ᠪᠦᠷᠢᠳᠴᠦ ᠴᠢᠳᠠᠭᠠᠳᠤᠢ ᠭᠡᠵᠦ ᠮᠠᠭᠤᠰᠢᠶᠠᠨ ᠦᠵᠡᠭᠡᠳ 《ᠬᠠᠪᠴᠢᠭ ᠰᠣᠶᠣᠭᠠᠯᠠᠩ 》ᠭᠡᠵᠦ ᠨᠡᠷᠡᠯᠡᠳᠡᠭ ᠃ 《ᠬᠠᠪᠴᠢᠭ ᠰᠣᠶᠣᠭᠠᠯᠠᠩ 》ᠮᠣᠷᠢ ᠶ᠋ᠢ ᠤᠷᠤᠯᠳᠤᠭᠠᠨ ᠳ᠋ᠤ᠌ ᠤᠶᠠᠳᠠᠭ （ᠰᠤᠢᠲᠠᠭ ) ᠦᠭᠡᠢ ᠭᠡᠳᠡᠭ ᠦ᠋ᠨ ᠤᠴᠢᠷ ᠡᠢᠮᠦ ᠃ ᠲᠡᠢᠮᠦ ᠡᠴᠡ ᠪᠢᠰᠢ ᠰᠣᠶᠣᠭᠠᠯᠠᠩ ᠭᠦᠢᠴᠡᠬᠦ ᠨᠠᠰᠤᠨ ᠤ᠋ ᠮᠣᠷᠢ ᠪᠦᠬᠦᠨ ᠢ᠋ 《ᠬᠠᠪᠴᠢᠭ ᠰᠣᠶᠣᠭᠠᠯᠠᠩ 》ᠭᠡᠵᠦ ᠨᠡᠷᠡᠯᠡᠳᠡᠭ ᠦᠭᠡᠢ ᠠᠵᠢ᠃
ᠳᠡᠭᠡᠷᠡᠬᠢ ᠬᠣᠶᠠᠷ ᠵᠢᠱ᠌ᠢᠶᠡᠨ ᠡᠴᠡ ᠵᠢᠭᠠᠬᠠᠨ ᠴᠠᠭᠠᠰᠢ ᠨᠢᠭᠲᠠᠯᠠᠪᠠᠯ ᠳᠠᠷᠤᠢ 《ᠬᠠᠪᠴᠢᠭ 》 ᠭᠡᠳᠡᠭ ᠦᠭᠡ ᠶ᠋ᠢᠨ ᠢᠷᠡᠯ ᠭᠠᠷᠤᠯ ᠢ᠋ ᠲᠣᠳᠣᠯᠠᠵᠤ ᠪᠣᠯᠤᠨᠠ᠃
ᠮᠣᠩᠭᠣᠯᠴᠤᠳ ᠤ᠋ᠨ ᠮᠠᠯ ᠮᠠᠯᠵᠢᠭᠰᠠᠨ ᠲᠡᠦᠬᠡᠨ ᠮᠡᠳᠡᠯᠭᠡ ᠡᠴᠡ ᠬᠢᠨᠠᠪᠠᠯ᠂ ᠬᠥᠭ ᠡᠴᠡ ᠡᠮᠦᠨᠡ ᠭᠠᠷᠤᠭᠰᠠᠨ ᠲᠥᠯ ᠢ᠋ ᠠᠯᠳᠠᠰᠢ ( ᠪᠦᠷ ᠡᠷᠲᠡ ᠭᠠᠷᠤᠭᠰᠠᠨ ᠢ᠋ ᠨᠢ ᠳᠠᠬᠤᠯᠠᠢ ) ᠭᠡᠵᠦ ᠂ ᠬᠥᠭ ᠦ᠋ᠨ ᠬᠣᠢᠨᠠ ᠨᠠᠮᠤᠷ ᠭᠠᠷᠤᠭᠰᠠᠨ ᠲᠥᠯ ᠢ᠋ ᠬᠡᠨᠵᠡ ᠭᠡᠵᠦ ᠂ ᠡᠪᠦᠯ ᠭᠠᠷᠤᠭᠰᠠᠨ ᠲᠥᠯ ᠢ᠋ ᠬᠥᠭᠡᠢ ᠭᠡᠵᠦ ᠂ ᠵᠢᠯ ᠦ᠋ᠨ ᠡᠴᠦᠰ ( ᠵᠢᠯ ᠦ᠋ᠨ ᠵᠠᠪᠰᠠᠷ ) ᠭᠠᠷᠤᠭᠰᠠᠨ ᠲᠥᠯ ᠢ᠋ ᠬᠠᠪᠴᠢ – ᠬᠠᠪᠴᠢᠭ ᠭᠡᠵᠦ ᠲᠤᠰ ᠲᠤᠰ ᠣᠨᠣᠭᠠᠵᠤ ᠬᠡᠯᠡᠵᠦ ᠪᠠᠢᠨᠠ ( 《 ᠶ ᠂ ᠴᠸᠪᠠᠯ ᠤ᠋ᠨ ᠲᠣᠯᠢ 》 ᠳ᠋ᠤ᠌ ) ᠃ ᠣᠳᠣ ᠵᠠᠷᠢᠮ ᠭᠠᠵᠠᠷ ᠲᠤ᠌ : ᠡᠨᠡ ᠬᠦ᠌ ᠵᠢᠷᠤᠮ ᠭᠣᠷᠢᠮ ᠲᠠᠢ ᠬᠡᠯᠡᠯᠭᠡ ᠶ᠋ᠢ ᠪᠦᠷ ᠬᠤᠳᠬᠤᠯᠳᠤᠭᠤᠯᠤᠭᠠᠳ ᠬᠤᠷᠠᠭᠠ᠂ ᠤᠨᠠᠭᠠ ᠬᠣᠶᠠᠷ ᠲᠤ᠌ ᠯᠠ ᠬᠡᠨᠵᠡ ᠭᠡᠵᠦ ᠬᠡᠯᠡᠵᠦ ᠂ ᠡᠪᠦᠯ ᠭᠠᠷᠤᠭᠰᠠᠨ ᠲᠤᠭᠤᠯ ᠢ᠋ ᠭᠥᠭᠡᠢ ᠪᠤᠶᠤ ᠳᠠᠬᠤᠯᠠᠢ ᠭᠡᠵᠦ ᠬᠣᠳᠬᠣᠯᠣᠭᠠᠳ᠂ ᠣᠷᠣᠢ ᠭᠠᠷᠤᠭᠰᠠᠨ ᠢᠰᠢᠭᠡ ᠶ᠋ᠢ ᠯᠡ ᠬᠠᠪᠴᠢ ᠭᠡᠵᠦ ᠶᠠᠷᠢᠭᠠᠳ ᠪᠤᠰᠤᠳ ᠲᠥᠯ ᠳ᠋ᠦ᠍ᠨᠢ ᠬᠡᠯᠡᠬᠦ ᠦᠭᠡᠢ ᠂ ᠶᠣᠰᠣᠲᠠᠢ ᠥᠭᠡᠬᠦ ᠴᠦ᠍ ᠪᠢᠰᠢ ᠂ ᠪᠤᠯᠴᠢᠷᠬᠠᠢ ᠴᠤ᠌ ᠪᠢᠰᠢ ᠪᠣᠯᠭᠠᠬᠤ ᠳ᠋ᠤ᠌ ᠬᠦᠷᠭᠡᠬᠦ ᠣᠢᠷᠠᠲᠤᠵᠠᠢ᠃ 《ᠬᠠᠪᠴᠢᠭ ᠰᠣᠶᠣᠭᠠᠯᠠᠩ 》 ᠤ᠋ᠨ 《ᠬᠠᠪᠴᠢᠭ 》ᠭᠡᠳᠡᠭ ᠨᠢ ᠶᠠᠭ ᠡᠨᠡ ᠬᠦ᠌ ᠬᠠᠪᠴᠢ – ᠬᠠᠪᠴᠢᠭ ᠭᠡᠳᠡᠭ ᠲᠥᠯ ᠢ᠋ ᠵᠢᠭᠠᠭᠰᠠᠨ ᠦᠭᠡ ᠡᠴᠡ ᠡᠭᠦᠰᠦᠭᠰᠡᠨ ᠶᠦ᠍ᠮ᠃ ᠶ ᠂ ᠴᠸᠪᠠᠯ ᠤ᠋ᠨ ᠲᠣᠯᠢ ᠶ᠋ᠢᠨ 637 ᠳ᠋ᠤᠭᠠᠷ ᠨᠢᠭᠤᠷ ᠲᠤ᠌ :《ᠮᠠᠯ ᠤ᠋ᠨ ᠨᠠᠰᠤ ᠪᠡᠶᠡ ᠶ᠋ᠢᠨ ᠭᠦᠢᠴᠡᠳ ᠪᠢᠰᠢ᠂ ᠭᠦᠢᠴᠡᠵᠦ ᠴᠢᠳᠠᠭᠠ ᠦᠭᠡᠢ ᠳᠤᠲᠠᠭᠤ ᠶ᠋ᠢ ᠬᠠᠪᠴᠢᠭ ᠰᠣᠶᠣᠭᠠᠯᠠᠩ 》ᠭᠡᠵᠦ ᠲᠠᠢᠯᠪᠤᠷᠢᠯᠠᠵᠤ ᠪᠣᠢ ᠨᠢ ᠮᠢᠨᠦ ᠦᠵᠡᠯᠲᠡ ᠶ᠋ᠢ ᠲᠤᠩ ᠣᠨᠣᠪᠴᠢᠲᠠᠢ ᠨᠤᠲᠠᠯᠠᠵᠠᠢ᠃
ᠬᠤᠷᠢᠶᠠᠩᠭᠤᠢᠯᠠᠪᠠᠯ ᠂ ᠶᠠᠰᠤᠨ ᠤ᠋ ᠥᠰᠦᠯᠲᠡ ᠮᠠᠭᠤᠲᠠᠢ ᠠᠳᠤᠭᠤ ᠪᠤᠶᠤ ᠣᠷᠣᠢ ᠭᠠᠷᠤᠭᠰᠠᠨ ᠬᠠᠪᠴᠢᠭ ᠡᠷᠡ ᠤᠨᠠᠭᠠ ᠂ ᠲᠥᠷᠥᠭᠡᠳ ᠬᠡᠳᠦ ᠬᠣᠨᠣᠯ ᠦᠭᠡᠢ ᠳᠠᠭᠠ ᠶ᠋ᠢᠨ ᠨᠠᠰᠤ ᠠᠪᠴᠤ ᠥᠰᠦᠭᠰᠡᠭᠡᠷ 5 ᠨᠠᠰᠤᠯᠠᠬᠤ ᠳ᠋ᠤ᠌ ᠰᠣᠶᠣᠭᠠ ᠨᠢ ᠭᠠᠷᠤᠭᠠᠳᠤᠢ ᠂ 6 ᠨᠠᠰᠤᠯᠠᠬᠤ ᠳ᠋ᠤ᠌ ᠰᠣᠶᠣᠭᠠ ᠨᠢ ᠰᠠᠶᠢ ᠭᠠᠷᠴᠤ ᠰᠣᠶᠣᠭᠠ ᠰᠤᠩᠭᠠᠬᠤ ᠶᠠᠰᠤᠨ ᠤ᠋ ᠥᠰᠦᠯᠲᠡ ᠣᠯᠤᠭᠠᠳᠤᠢ ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠂ ᠲᠥᠷᠥᠭᠰᠡᠨ ᠣᠨ ᠵᠢᠯ ᠢ᠋ᠶ᠋ᠡᠷ ᠨᠢ ᠨᠠᠰᠤ ᠶ᠋ᠢ ᠨᠢ ᠲᠣᠭᠠᠯᠠᠬᠤ ᠳ᠋ᠤ᠌ 6 ᠨᠠᠰᠤᠯᠠᠵᠢ ᠃ 6 ᠨᠠᠰᠤᠲᠠᠢ ᠮᠣᠷᠢ ᠵᠠᠪᠠᠯ ᠰᠣᠶᠣᠭᠠ ᠨᠢ ᠰᠤᠩᠭᠠᠭᠰᠠᠨ ( ᠭᠦᠢᠴᠡᠳ ᠤᠷᠭᠤᠭᠰᠠᠨ ) ᠪᠠᠢᠬᠤ ᠬᠡᠷᠡᠭᠲᠡᠢ ᠭᠡᠬᠦ ᠳ᠋ᠦ᠍ ᠡᠭᠦᠨ ᠦ᠌ ᠰᠣᠶᠣᠭᠠ ᠨᠢ ᠭᠦᠢᠴᠡᠳ ᠤᠷᠭᠤᠭᠠᠳᠤᠢ ᠡᠢᠮᠦ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠶᠠᠰᠤ ᠪᠡᠶᠡ ᠶ᠋ᠢᠨ ᠪᠣᠢᠵᠢᠯᠲᠠ ᠪᠦᠷᠢᠳᠦᠭᠡᠳᠦᠢ ᠠᠭᠲᠠ ᠶ᠋ᠢ 《ᠬᠠᠪᠴᠢᠭ ᠰᠣᠶᠣᠭᠠᠯᠠᠩ 》ᠭᠡᠵᠦ ᠨᠡᠷᠡᠢᠳᠳᠡᠭ ᠪᠢᠯᠡ᠃
《ᠥᠬᠢᠨ ᠲᠥᠯ 》 ᠦ᠋ᠨ ᠲᠤᠬᠠᠢ
ᠨᠥᠬᠥᠷ ××× ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠮᠡᠷᠭᠡᠵᠢᠯᠲᠡᠨ ᠂ 《ᠥᠬᠢᠨ ᠲᠥᠯ 》᠂ 《ᠥᠬᠢᠨ ᠤᠨᠠᠭᠠ 》ᠭᠡᠵᠦ ᠬᠡᠯᠡᠬᠦ ᠶ᠋ᠢ ᠶᠡᠬᠡ ᠪᠡᠷ ᠪᠤᠷᠤᠭᠤᠰᠢᠶᠠᠵᠤ ᠬᠠᠲᠠᠭᠤ ᠰᠢᠭᠦᠮᠵᠢᠯᠡᠵᠡᠢ ᠃ ᠲᠡᠷᠡ ᠨᠢ 1986 ᠣᠨ ᠤ᠋ 《ᠮᠣᠩᠭᠣᠯ ᠬᠡᠯᠡ ᠤᠳᠬᠠ ᠵᠣᠬᠢᠶᠠᠯ 》 ᠰᠡᠳᠬᠦᠯ ᠦ᠋ᠨ ᠳᠥᠲᠥᠭᠡᠷ ᠲᠦ᠍ 《ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠨᠡᠷᠡᠢᠳᠦᠯ ᠦ᠋ᠨ ᠲᠤᠬᠠᠢ 》ᠭᠡᠳᠡᠭ ᠥᠭᠦᠯᠡᠯ ᠦ᠋ᠨ ᠢ᠋ᠶ᠋ᠡᠨ ᠵᠠᠷᠢᠮ ᠠᠯᠳᠠᠭᠠ ᠪᠤᠷᠤᠭᠤ ᠲᠠᠢ ᠨᠡᠷᠡᠢᠳᠦᠯ ᠦ᠋ᠨ ᠲᠤᠬᠠᠢ 》ᠭᠡᠰᠡᠨ ᠬᠡᠰᠡᠭ ᠲᠡᠭᠡᠨ : 《ᠮᠣᠩᠭᠣᠯ ᠬᠡᠯᠡᠨ ᠦ᠌ ᠲᠡᠦᠬᠡᠨ ᠡᠴᠡ ᠦᠵᠡᠬᠦ ᠳ᠋ᠦ᠍ < ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ > ᠳ᠋ᠤ᠌ ᠭᠠᠷᠳᠠᠭ < ᠲᠡᠷᠡ ᠳᠤᠮᠳᠠ ᠭᠡᠭᠡᠯᠲᠡᠢ ᠡᠮᠡ ᠪᠤᠲᠠᠨᠴᠢᠷ ᠲᠤ᠌ ᠢᠷᠡᠵᠦ ᠬᠥᠪᠡᠭᠦᠯᠡᠪᠡᠢ > ᠂ < ᠁ ᠬᠤᠸᠠᠭᠴᠢᠨ ᠡᠮᠡᠭᠡᠨ ᠦᠴᠦᠷᠦᠨ > ᠭᠡᠬᠦ ᠮᠡᠲᠦ ᠶ᠋ᠢᠨ ᠦᠭᠡᠰ ᠪᠣᠯ ᠨᠢᠭᠡᠨᠲᠡ ᠬᠠᠭᠤᠴᠢᠷᠠᠵᠤ ᠥᠨᠥ ᠰᠣᠨᠣᠰᠬᠤ ᠳ᠋ᠤ᠌ ᠶᠡᠬᠡ ᠯᠡ ᠡᠪ ᠬᠠᠪᠤ ᠦᠭᠡᠢ ᠪᠣᠯᠪᠠᠰᠤᠨ ᠪᠤᠰᠤ ᠮᠡᠲᠦ ᠰᠠᠨᠠᠭᠳᠠᠬᠤ ᠪᠣᠯᠵᠠᠢ ᠃ ᠮᠥᠨ ᠡᠨᠡ ᠮᠡᠲᠦᠴᠢᠯᠡᠨ ᠡᠮᠡ ᠲᠥᠯ ᠢ᠋ < ᠥᠬᠢᠨ ᠬᠤᠷᠠᠭᠠ > ᠂ < ᠥᠬᠢᠨ ᠲᠤᠭᠤᠯ > ᠭᠡᠬᠦ ᠨᠢ （ ᠨᠥᠬᠥᠷ ᠁ ᠲᠦ᠍ ᠪᠠᠷᠤᠭ13 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠬᠡᠯᠡᠯᠭᠡ ᠮᠡᠲᠦ ᠰᠠᠨᠠᠭᠳᠠᠵᠠᠢ – ᠰᠢᠭᠦᠮᠵᠢᠯᠡᠭᠴᠢ ᠡᠴᠡ > ᠵᠣᠬᠢᠰ ᠦᠭᠡᠢ ᠭᠡᠮᠡᠷ ᠪᠠᠢᠨᠠ ᠃ ᠪᠢ ᠵᠠᠷᠢᠮ ᠨᠥᠬᠥᠳ ᠡᠴᠡ ᠯᠠᠪᠯᠠᠵᠤ ᠦᠵᠡᠭᠰᠡᠨ ᠳ᠋ᠦ᠍ < ᠡᠨᠡ ᠪᠣᠯ ᠡᠮᠡ ᠲᠥᠯ ᠢ᠋ ᠡᠩᠬᠦᠷᠡᠢᠯᠡᠭᠰᠡᠨ ᠳᠠᠭᠤᠳᠠᠯᠭᠠ ᠪᠣᠯᠤᠨᠠ > ᠭᠡᠬᠦ ᠶᠦ᠍ᠮ ᠃ ᠣᠯᠳᠣᠢ ᠮᠢᠨᠦ ᠦᠵᠡᠬᠦ ᠪᠡᠷ ᠮᠠᠯᠴᠢᠳ ᠪᠣᠯ ᠪᠦᠳᠦᠭᠦᠨ ᠮᠠᠯ ᠂ ᠪᠠᠭᠠ ᠮᠠᠯ ᠭᠡᠰᠡᠨ ᠦᠭᠡᠢ ᠂ ᠨᠡᠩ ᠴᠦ᠍ ᠡᠮᠡ ᠲᠥᠯ ᠂ ᠡᠷᠡ ᠲᠥᠯ ᠭᠡᠵᠦ ᠢᠯᠭᠠᠯ ᠦᠭᠡᠢ ᠪᠡᠷ ᠴᠥᠮ ᠡᠩᠬᠦᠷᠡᠢᠯᠡᠵᠦ ᠬᠠᠢᠷᠠᠯᠠᠳᠠᠭ ᠰᠠᠨ ᠃ ᠡᠨᠡ ᠬᠦ᠌ ᠠᠭᠤᠯᠭᠠ ᠠ᠋ᠴᠠ ᠬᠡᠯᠡᠪᠡᠯ ᠂ ᠡᠮᠡ ᠬᠤᠷᠠᠭᠠ ᠂ ᠡᠮᠡ ᠲᠤᠭᠤᠯ ᠢ᠋ < ᠥᠬᠢᠨ ᠬᠤᠷᠠᠭᠠ > ᠂ < ᠥᠬᠢᠨ ᠲᠤᠭᠤᠯ > ᠭᠡᠬᠦ ᠳ᠋ᠦ᠍ ᠬᠦᠷᠪᠡᠯ ᠂ ᠡᠷᠡ ᠬᠤᠷᠠᠭᠠ ᠂ ᠡᠷᠡ ᠲᠤᠭᠤᠯ ᠢ᠋ ᠮᠥᠨ ᠴᠦ᠍ < ᠬᠦᠦ ᠬᠤᠷᠠᠭᠠ > < ᠬᠦᠦ ᠲᠤᠭᠤᠯ > ᠭᠡᠬᠦ ᠡᠴᠡ ᠯᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠤᠨᠠ ᠪᠢᠵᠡ ᠃ ᠴᠢᠩᠭᠢᠪᠡᠯ ᠪᠦᠳᠦᠭᠦᠨ ᠮᠠᠯ ᠳᠡᠭᠡᠷᠡ ᠶᠠᠭᠤ ᠭᠡᠵᠦ ᠬᠡᠯᠡᠳᠡᠭ ᠪᠣᠯ ᠳᠧ 》ᠭᠡᠵᠦ ᠬᠠᠲᠠᠭᠤ ᠰᠢᠭᠦᠮᠵᠢᠯᠡᠵᠦ ᠪᠢᠯᠡ᠃
ᠡᠭᠦᠨᠡ ᠮᠤᠩᠬᠠᠭ ᠮᠢᠨᠦ ᠦᠵᠡᠬᠦ ᠨᠢ ᠂ ᠬᠡᠯᠡ ᠬᠡᠯᠡᠯᠭᠡ ᠪᠣᠯ ᠨᠡᠢᠭᠡᠮ ᠦ᠋ᠨ ᠬᠥᠭᠵᠢᠯᠲᠡ ᠶ᠋ᠢ ᠳᠠᠭᠠᠯᠳᠤᠨ ᠬᠥᠭᠵᠢᠵᠦ ᠨᠠᠷᠢᠰᠴᠤ ᠂ ᠰᠣᠶᠣᠯ ᠪᠣᠯᠪᠠᠰᠤᠨ ᠤ᠋ ᠬᠢᠷᠢ ᠭᠡᠮ ᠢ᠋ᠶ᠋ᠡᠨ ᠴᠦ᠍ ᠥᠨᠳᠥᠷᠳᠡᠭᠡᠲᠡᠭ ᠶᠦ᠍ᠮ ᠃ ᠡᠢᠨ ᠬᠦ᠌ ᠮᠠᠯᠴᠢᠳ ᠨᠢᠯᠬᠠ ᠨᠢᠷᠠᠢ ᠲᠥᠯ ᠢ᠋ᠶ᠋ᠡᠨ ᠥᠪᠡᠷ ᠦ᠋ᠨ ᠦᠷᠡ ᠬᠡᠦᠬᠡᠳ ᠲᠡᠢ ᠪᠡᠨ ᠠᠳᠠᠯᠢᠬᠠᠨ ᠥᠬᠥᠭᠡᠷᠳᠡᠨ ᠬᠡᠯᠡᠬᠦ ᠨᠢ ᠲᠡᠷᠡ ᠬᠦ᠌ ᠦᠨᠳᠦᠰᠦᠲᠡᠨ ᠦ᠌ ᠪᠡᠨ ᠰᠣᠶᠣᠯ ᠪᠣᠯᠪᠠᠰᠤᠨ ᠤ᠋ ᠬᠢᠷᠢ ᠬᠡᠮᠵᠢᠶᠡ ᠪᠡᠨ ᠳᠡᠭᠡᠭᠰᠢᠯᠡᠭᠦᠯᠵᠦ ᠪᠠᠢᠭᠠ ᠶ᠋ᠢᠨ ᠨᠢᠭᠡᠨ ᠢᠯᠡᠷᠡᠯ ᠮᠥᠨ ᠃ ᠭᠡᠲᠡᠯᠡ ᠡᠭᠦᠨᠡ ᠡᠷᠡ ᠶ᠋ᠢ ᠨᠢ ᠥᠬᠥᠭᠡᠷᠳᠡᠭᠰᠡᠨ ᠦᠭᠡᠢ ᠂ ᠡᠮᠡ ᠶ᠋ᠢ ᠨᠢ ᠥᠬᠥᠭᠡᠷᠳᠡᠭᠰᠡᠨ ᠨᠢ ᠪᠠᠰᠠ ᠲᠡᠭᠦᠨ ᠳ᠋ᠦ᠍ ᠳᠣᠲᠣᠭᠠᠳᠤ ᠰᠡᠳᠬᠢᠯᠭᠡ ᠶ᠋ᠢᠨ ᠢᠯᠭᠠᠭᠠ ᠪᠠᠢᠵᠤ ᠮᠡᠳᠡᠬᠦ ᠶᠦ᠍ᠮ ᠃ ᠵᠢᠱ᠌ᠢᠶᠡᠯᠡᠪᠡᠯ : ᠠᠳᠠᠯᠢᠬᠠᠨ ᠬᠡᠳᠦᠨ ᠬᠡᠦᠬᠡᠳ ᠲᠡᠢ ᠬᠥᠮᠦᠨ ᠴᠦ᠍ ᠂ ᠠᠯᠢ ᠥᠭᠡᠳᠡ ᠲᠡᠢ ᠂ ᠥᠪᠡᠷ ᠲᠦ᠍ ᠲᠤᠰᠠᠴᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠢᠯᠡᠭᠦᠦ ᠰᠠᠨᠠᠳᠠᠭ ᠲᠠᠢ ᠠᠳᠠᠯᠢ ᠂ ᠡᠮᠡ ᠮᠠᠯ ᠦᠷᠡᠵᠢᠯ ᠦ᠋ᠨ ᠡᠬᠡ ᠪᠣᠯᠵᠤ ᠂ ᠥᠨᠢᠷ ᠥᠰᠦᠯᠲᠡ ᠥᠭᠳᠡᠭ ᠡᠴᠡ ᠥᠷᠭᠡᠨ ᠣᠯᠠᠨ ᠮᠠᠯᠴᠢᠳ ᠂ ᠡᠮᠡ ᠲᠥᠯ ᠳ᠋ᠦ᠍ ᠬᠤᠪᠢ ᠳᠠᠬᠢᠨ ᠰᠡᠳᠬᠢᠯᠭᠡᠲᠡᠢ ᠪᠣᠯᠤᠭᠰᠠᠨ ᠶᠤᠮ ᠪᠠᠢᠬᠠ ᠃ ᠬᠡᠷᠪᠡ ᠡᠨᠡ ᠬᠦ᠌ ᠢᠯᠭᠠᠭᠠ ᠶ᠋ᠢ ᠡᠰᠡ ᠵᠥᠪᠰᠢᠶᠡᠷᠡᠪᠡᠯ ᠶᠢᠷᠲᠢᠨᠴᠦ ᠶ᠋ᠢᠨ ᠠᠯᠢᠪᠠ ᠪᠦᠬᠦᠨ ᠴᠥᠮ ᠠᠳᠠᠯᠢᠬᠠᠨ ᠭᠡᠰᠡᠨ ᠤᠰᠤ ᠰᠢᠭ᠋ ᠲᠡᠭᠰᠢᠳᠬᠡᠬᠦ ᠦᠵᠡᠯ ᠦ᠋ᠨ ᠱᠠᠯᠴᠢᠭ ᠲᠤ᠌ ᠬᠠᠯᠲᠤᠷᠢᠵᠤ ᠮᠡᠳᠡᠬᠦ ᠶᠦ᠍ᠮ ᠪᠢᠰᠢ ᠤᠤ ᠃ ᠡᠢᠮᠦ ᠪᠣᠯ ᠨᠡᠢᠭᠡᠮ ᠦ᠋ᠨ ᠦᠢᠯᠡᠳᠦᠯᠭᠡ ᠬᠦᠯᠢᠶᠡᠬᠦ ᠦᠭᠡᠢ ᠂ ᠪᠣᠳᠠᠰ ᠤ᠋ᠨ ᠬᠥᠭᠵᠢᠯ ᠦ᠋ᠨ ᠬᠠᠤᠯᠢ ᠴᠤ᠌ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ ᠪᠠᠢᠬᠠ᠃
ᠳᠠᠬᠢᠭᠠᠳ ᠬᠡᠯᠡᠪᠡᠯ ᠂ ᠡᠨᠡ ᠦᠭᠡ ᠶ᠋ᠢᠨ ᠣᠨᠣᠴᠢᠲᠠᠢ ᠲᠠᠢᠯᠪᠤᠷᠢ ᠨᠢ ᠥᠬᠢᠨ ᠂ ᠡᠮᠡ ᠭᠡᠰᠡᠨ ᠬᠣᠶᠠᠷ ᠦᠭᠡ ᠶ᠋ᠢᠨ ᠠᠭᠤᠯᠭᠠ ᠤᠬᠠᠭᠳᠠᠬᠤᠨ ᠳ᠋ᠤ᠌ ᠪᠠᠢᠭᠠ ᠪᠣᠢ ᠰᠠᠨᠠᠭᠳᠠᠨᠠ ᠃ ᠥᠬᠢᠨ ᠭᠡᠳᠡᠭ ᠦᠭᠡ – ᠲᠤᠭᠳᠤᠮ ᠪᠡᠶᠡ ᠡᠪᠳᠡᠷᠡᠭᠡ ᠦᠭᠡᠢ – ᠴᠡᠪᠡᠷ ᠪᠦᠲᠦᠨ ᠭᠡᠰᠡᠨ ᠠᠭᠤᠯᠭᠠ ᠲᠠᠢ ᠂ ᠡᠮᠡ ᠭᠡᠳᠡᠭ ᠦᠭᠡᠨ ᠳ᠋ᠦ᠍ – ᠤᠷᠤᠭᠯᠠᠬᠤ ᠂ ᠬᠡᠭᠡᠯᠲᠦᠬᠦ ᠂ ᠲᠥᠯᠯᠡᠬᠦ ᠨᠠᠰᠤ ᠦᠢᠯᠡᠳᠦᠯᠭᠡ ᠳ᠋ᠦ᠍ ᠬᠦᠷᠪᠡ – ᠴᠡᠪᠡᠷ ᠪᠦᠲᠦᠨ ᠪᠢᠰᠢ ᠪᠣᠯᠪᠠ ᠭᠡᠰᠡᠨ ᠤᠬᠠᠭᠳᠠᠬᠤᠨ ᠲᠠᠢ ᠪᠠᠢᠳᠠᠭ ᠃ ᠡᠨᠡ ᠨᠢ ᠶᠢᠷᠲᠢᠨᠴᠦ ᠶ᠋ᠢᠨ ᠡᠮᠡ ᠬᠦᠢᠰᠦᠲᠡᠨ ᠪᠦᠬᠦᠨ ᠦ᠌ ᠡᠷᠬᠡᠪᠰᠢ ᠥᠩᠭᠡᠷᠡᠭᠡᠬᠦ ᠬᠣᠶᠠᠷ ᠶᠠᠪᠤᠴᠠ ᠪᠣᠯᠤᠨ ᠲᠣᠭᠲᠠᠵᠠᠢ ᠃ ᠡᠢᠨᠬᠦ ᠮᠠᠨ ᠤ᠋ ᠮᠣᠩᠭᠣᠯᠴᠤᠳ ᠤᠷᠲᠤ ᠤᠳᠠᠭᠠᠨ ᠣᠨ ᠵᠢᠯ ᠦ᠋ᠨ ᠮᠠᠯ ᠮᠠᠯᠯᠠᠬᠤ ᠶᠠᠪᠤᠴᠠ ᠳ᠋ᠠᠭᠠᠨ ᠡᠨᠡ ᠬᠦ᠌ ᠶᠣᠰᠣ ᠶ᠋ᠢ ᠨᠠᠷᠢᠨ ᠤᠬᠠᠭᠠᠷᠠᠭᠠᠳ 《ᠥᠬᠢᠨ ᠲᠥᠯ 》 ᠢ᠋ 《ᠡᠮᠡ ᠲᠥᠯ 》ᠭᠡᠵᠦ ᠬᠡᠯᠡᠬᠦ ᠨᠢ ᠨᠢᠭᠡ ᠳ᠋ᠦ᠍ ᠂ ᠡᠮᠡ ᠮᠠᠯ ᠤ᠋ᠨ ᠥᠰᠦᠯᠲᠡ ᠶ᠋ᠢᠨ ᠪᠣᠳᠠᠲᠤ ᠦᠢᠯᠡᠳᠦᠯᠭᠡ ᠳ᠋ᠦ᠍ ᠲᠣᠬᠢᠷᠠᠮᠵᠢ ᠦᠭᠡᠢ ᠃ ᠬᠣᠶᠠᠷ ᠲᠤ᠌ ᠂ ᠪᠣᠯᠪᠠᠰᠤᠨ ᠣᠨᠣᠪᠴᠢᠲᠠᠢ ᠬᠡᠯᠡᠯᠭᠡ ᠪᠢᠰᠢ ᠭᠡᠵᠦ ᠮᠡᠳᠡᠷᠡᠪᠡ ᠃ ᠵᠢᠱ᠌ᠢᠶᠡᠯᠡᠪᠡᠯ : ᠠᠷᠪᠠᠨ ᠭᠤᠷᠪᠠᠳᠤᠭᠠᠷ ᠵᠠᠭᠤᠨ ᠳ᠋ᠤ᠌ ᠂ ᠮᠣᠩᠭᠣᠯᠴᠤᠳ ᠬᠥᠮᠦᠨ ᠢ᠋ ᠪᠠᠰᠠ 《ᠳᠤᠮᠳᠠ ᠬᠡᠭᠡᠯ ᠲᠡᠢ ᠡᠮᠡ 》᠂ 《ᠬᠤᠸᠠᠭᠴᠢᠨ ᠡᠮᠡᠭᠡᠨ 》ᠭᠡᠵᠦ ᠬᠡᠯᠡᠵᠦ ᠪᠠᠢᠭᠰᠠᠨ ᠨᠢ ᠲᠡᠷᠡ ᠦᠶᠡ ᠳ᠋ᠡᠭᠡᠨ ᠢᠷᠠᠭᠤ ᠰᠠᠢᠬᠠᠨ ᠰᠠᠨᠠᠭᠳᠠᠵᠤ ᠪᠠᠢᠭᠰᠠᠨ ᠮᠠᠭᠠᠳ ᠂ ᠣᠳᠣ ᠰᠣᠨᠣᠰᠬᠤ ᠳ᠋ᠤ᠌ ᠡᠪ ᠬᠠᠪᠤ ᠦᠭᠡᠢ ᠪᠣᠯᠵᠤ ᠂ ᠪᠣᠯᠪᠠᠰᠤᠨ ᠪᠢᠰᠢ ᠪᠣᠳᠣᠭᠳᠠᠬᠤ ᠲᠠᠢ ᠠᠳᠠᠯᠢ ᠂ ᠲᠡᠭᠦᠨ ᠡᠴᠡ ᠬᠣᠢᠰᠢ ᠬᠡᠳᠦᠨ ᠵᠠᠭᠤᠨ ᠵᠢᠯ ᠦ᠋ᠨ ᠲᠤᠷᠰᠢ 《ᠡᠮᠡ ᠲᠥᠯ 》 ᠭᠡᠭᠳᠡᠵᠦ ᠪᠠᠢᠭᠰᠠᠨ ᠨᠢ ᠬᠣᠷᠢᠳᠤᠭᠠᠷ ᠵᠠᠭᠤᠨ ᠂ ᠢᠯᠠᠩᠭᠤᠶᠠ ᠴᠢᠯᠥᠭᠡᠯᠡᠭᠳᠡᠭᠰᠡᠨ ᠡᠴᠡ ᠨᠠᠭᠠᠰᠢ ᠪᠣᠯᠵᠤ ᠢᠷᠡᠬᠦ ᠳ᠋ᠦ᠍ ᠮᠥᠨ ᠪᠣᠯᠪᠠᠰᠤᠨ ᠪᠢᠰᠢ ᠪᠣᠯᠵᠠᠢ ᠃ ᠡᠢᠨ ᠬᠦ᠌ ᠣᠳᠣᠬᠢ ᠶ᠋ᠢᠨ ᠮᠠᠯᠴᠢᠳ 《ᠡᠮᠡ ᠲᠥᠯ 》ᠢ᠋ 《ᠥᠬᠢᠨ ᠲᠥᠯ 》 ᠭᠡᠵᠦ ᠬᠡᠯᠡᠬᠦ ᠨᠢ ᠬᠠᠮᠤᠭ ᠤ᠋ᠨ ᠣᠨᠣᠪᠴᠢᠲᠠᠢ ᠮᠥᠷᠲᠡᠭᠡᠨ ᠪᠣᠯᠪᠠᠰᠤᠨ ᠨᠡᠷᠡᠢᠳᠦᠯ ᠭᠡᠵᠦ ᠦᠵᠡᠨ ᠲᠣᠭᠲᠠᠭᠠᠵᠠᠢ ᠃ ᠡᠨᠡ ᠨᠢ ᠳᠠᠷᠤᠢ ᠮᠠᠨ ᠤ᠋ ᠦᠨᠳᠦᠰᠦᠲᠡᠨ ᠦ᠌ ᠬᠡᠯᠡ ᠬᠡᠯᠡᠯᠭᠡ ᠶ᠋ᠢᠨ ᠬᠥᠭᠵᠢᠯ ᠂ ᠰᠣᠶᠣᠯ ᠪᠣᠯᠪᠠᠰᠤᠨ ᠤ᠋ ᠳᠡᠭᠡᠭᠰᠢᠯᠡᠯᠲᠡ ᠶ᠋ᠢ ᠬᠠᠷᠠᠭᠤᠯᠵᠤ ᠴᠢᠳᠠᠵᠠᠢ᠃
ᠬᠡᠯᠡ ᠬᠡᠯᠡᠯᠭᠡ ᠶ᠋ᠢᠨ ᠳᠠᠷᠬᠠᠳ ᠂ ᠰᠣᠶᠣᠯ ᠪᠣᠯᠪᠠᠰᠤᠨ ᠤ᠋ ᠡᠬᠢ ᠣᠨᠳᠣᠷᠣᠯ ᠪᠣᠯᠤᠭᠰᠠᠨ ᠮᠠᠯᠴᠢᠨ ᠲᠦᠮᠡᠨ ᠦ᠌ ᠮᠢᠨᠢ ᠦᠢᠯᠡᠳᠦᠯᠭᠡᠴᠢ ᠨᠡᠷᠡᠢᠳᠦᠯ ᠲᠤᠩ ᠣᠨᠣᠭᠠᠵᠤ ᠮᠠᠰᠢ ᠵᠦᠢᠲᠡᠢ ᠥᠭᠴᠡᠢ ᠭᠡᠵᠦ ᠨᠠᠳᠠ ᠰᠠᠨᠠᠭᠳᠠᠬᠤ ᠶᠤᠮ ᠠ᠋ !
ᠨᠣᠬᠠᠢ ᠠ᠋ᠴᠠ ᠪᠠᠨ ᠬᠡᠨᠵᠢ ᠨᠢ ᠭᠡᠭᠴᠢ ᠪᠡᠷ ᠨᠢᠭᠡ ᠶᠡᠬᠡ ᠤᠷᠲᠤ ᠶᠠᠭᠤᠮᠠ ᠳᠣᠩᠭᠣᠰᠴᠢᠬᠠᠯᠠ ᠃ ᠡᠨᠳᠡᠭᠦᠦ ᠲᠠᠰᠢᠶᠠ ᠪᠠᠢᠭᠠ ᠨᠢ ᠳᠠᠮᠵᠢᠭ ᠦᠭᠡᠢ ᠂ ᠡᠷᠬᠢᠮ ᠤᠩᠰᠢᠭᠴᠢᠳ ᠪᠣᠯᠤᠨ ᠡᠷᠳᠡᠮᠲᠡᠳ ᠮᠡᠷᠭᠡᠳ ᠡᠯᠢᠭᠡᠰᠢᠶᠡᠨ ᠰᠤᠷᠭᠠᠮᠤ᠃
ᠪᠣᠷᠵᠢᠭᠢᠨ ᠸᠠᠩᠵᠢᠯ
ᠰᠢᠷᠬᠠᠴᠢᠨ ᠮᠣᠭᠠᠢ ᠵᠢᠯ ᠦ᠋ᠨ ᠪᠢᠯᠢᠭ ᠦ᠋ᠨ ᠠᠷᠪᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠬᠣᠶᠠᠷᠠ᠂
ᠬᠠᠯᠢᠭᠤᠲᠤ ᠳ᠋ᠤ᠌ ᠃