ᠬᠥᠬᠡ ᠵᠤᠯᠠ <ᠮᠣᠩᠭᠣᠯ ᠤᠯᠠᠮᠵᠢᠯᠠᠯᠲᠤ ᠠᠮᠢᠳᠤᠷᠠᠯ ᠤᠨ ᠲᠣᠯᠢ > – ᠪᠣᠷᠵᠢᠭᠢᠨ ᠸᠠᠩᠵᠠᠯ Хөх зул– Монгол уламжлалт амьдралын толь – Боржигон Ванжал
567ᠡᠮᠦᠨᠡᠳᠬᠡᠯ
ᠲᠡᠭᠦᠨᠡ ᠄ 《 ᠣᠢᠷᠠ ᠳ᠋ᠤ᠌ ᠪᠢ ᠨᠥᠬᠥᠷ ᠪᠣᠷᠵᠢᠭᠢᠨ ᠸᠠᠩᠵᠢᠯ ᠤ᠋ᠨ ᠨᠠᠢᠷᠠᠭᠤᠯᠤᠨ ᠵᠣᠬᠢᠶᠠᠭᠰᠠᠨ ＜ ᠬᠥᠬᠡ ᠵᠤᠯᠠ ＞ （ ᠮᠣᠩᠭᠣᠯ ᠤᠯᠠᠮᠵᠢᠯᠠᠯᠲᠤ ᠠᠮᠢᠳᠤᠷᠠᠯ ᠤ᠋ᠨ ᠲᠣᠯᠢ ) ᠭᠡᠬᠦ ᠰᠠᠢᠬᠠᠨ ᠨᠣᠮ ᠢ᠋ ᠣᠯᠤᠭᠠᠳ ᠶᠡᠬᠡ ᠯᠡ ᠠᠮᠲᠠᠷᠬᠠᠨ ᠤᠩᠰᠢᠵᠤ ᠪᠢᠯᠡ᠃ ᠡᠨᠡ ᠲᠣᠯᠢ ᠪᠢᠴᠢᠭ ᠮᠠᠯ ᠠᠵᠤ ᠠᠬᠤᠢ ᠪᠣᠯᠤᠨ ᠮᠠᠯᠴᠢᠨ ᠠᠷᠠᠳ ᠤ᠋ᠨ ᠡᠳᠦᠷ ᠳᠣᠳᠣᠮ ᠤ᠋ᠨ ᠠᠮᠢᠳᠤᠷᠠᠯ ᠠᠷᠠᠨᠰᠢᠨ ᠳ᠋ᠤ᠌ ᠬᠣᠯᠪᠣᠭᠳᠠᠯᠲᠠᠢ ᠨᠡᠷᠡ ᠳᠠᠭᠤᠳᠠᠯᠭᠠ᠂ ᠦᠭᠡ ᠬᠡᠯᠡᠯᠭᠡ ᠶ᠋ᠢ ᠦᠯᠡᠮᠵᠢ ᠰᠣᠩᠭᠣᠨ ᠣᠷᠣᠭᠤᠯᠤᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠨᠴᠠᠯᠢᠭ ᠲᠠᠢ ᠪᠠᠢᠨᠠ᠃ 《ᠬᠥᠬᠡ ᠵᠤᠯᠠ 》ᠭᠡᠬᠦ ᠲᠣᠯᠢ ᠪᠢᠴᠢᠭ ᠳᠣᠲᠣᠷᠠ ᠪᠠᠨ ᠵᠣᠴᠢᠯᠠᠭᠠ᠂ ᠲᠥᠷᠥᠯ ᠰᠠᠳᠤᠨ ᠤ᠋ ᠳᠠᠭᠤᠳᠠᠯᠭᠠ᠂ ᠲᠣᠭᠠ ᠲᠣᠭᠠᠯᠠᠯᠭᠠ᠂ ᠮᠣᠩᠭᠣᠯ ᠭᠡᠷ ᠦ᠋ᠨ ᠪᠦᠲᠦᠴᠡ᠂ ᠲᠠᠪᠤᠨ ᠬᠣᠰᠢᠭᠤ ᠮᠠᠯ᠂ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠰᠢᠨᠵᠢᠯᠡᠭᠡ᠂ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠵᠠᠰᠠᠯ᠂ ᠬᠤᠷᠳᠤᠨ ᠮᠣᠷᠢ ᠣᠨᠣᠭᠴᠢᠳ ᠪᠠ ᠲᠣᠨᠣᠭ ᠲᠥᠬᠥᠭᠡᠷᠦᠮᠵᠢ᠂ ᠮᠣᠷᠢ ᠣᠷᠣᠯᠳᠣᠬᠤ ᠵᠢᠷᠤᠮ᠂ ᠴᠠᠭᠠᠨ ᠢᠳᠡᠭᠡ᠂ ᠤᠯᠠᠭᠠᠨ ᠢᠳᠡᠭᠡ᠂ ᠶᠠᠰᠤ ᠮᠢᠬᠠᠨ ᠤ᠋ ᠨᠡᠷᠡᠰ ᠭᠡᠵᠦ ᠶᠡᠬᠡᠪᠴᠢᠯᠡᠨ 12 ᠪᠦᠯᠦᠭ ᠲᠡᠢ᠃ ᠲᠡᠭᠡᠬᠦ ᠳ᠋ᠦ᠍ ᠮᠣᠩᠭᠣᠯ ᠭᠡᠷ ᠦ᠋ᠨ ᠪᠦᠲᠦᠴᠡ ᠪᠣᠯᠤᠨ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠲᠠᠢ ᠬᠣᠯᠪᠣᠭᠳᠠᠬᠤ ᠨᠡᠷᠡ ᠳᠠᠭᠤᠳᠠᠯᠭᠠ ᠶ᠋ᠢᠨ ᠲᠠᠯᠠ ᠪᠠᠷ ᠶᠡᠬᠡ ᠨᠠᠷᠢᠨ ᠶᠠᠷᠢᠭᠰᠠᠨ ᠨᠢ ᠵᠠᠷᠢᠮ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠲᠣᠯᠢ ᠪᠢᠴᠢᠭ ᠦ᠋ᠨ ᠳᠤᠲᠠᠭᠤ ᠳᠣᠷᠭᠣᠨ ᠵᠦᠢᠯ ᠢ᠋ ᠨᠥᠬᠥᠭᠰᠡᠨ ᠲᠡᠳᠦᠢ ᠦᠭᠡᠢ᠂ ᠵᠠᠯᠠᠭᠤ ᠨᠢᠭᠡ ᠦᠶᠡ ᠶ᠋ᠢᠨ ᠬᠢᠨ ᠦ᠌ ᠦᠭᠡᠰ ᠦ᠋ᠨ ᠰᠠᠩ ᠤ᠋ᠨ ᠪᠠᠶᠠᠯᠢᠭᠵᠢᠯ ᠳ᠋ᠤ᠌ ᠠᠬᠤᠢᠴᠢ ᠠᠴᠢ ᠬᠣᠯᠪᠣᠭᠳᠠᠯᠲᠠᠢ ᠪᠠᠢᠨᠠ᠃ ᠵᠥᠪᠬᠡᠨ ᠭᠠᠷ ᠲᠤ᠌ ᠥᠷᠲᠥᠭᠰᠡᠨ ᠵᠠᠷᠢᠮ ᠦᠭᠡ ᠪᠡᠷ ᠵᠢᠱ᠌ᠢᠶᠡᠯᠡᠵᠦ ᠬᠡᠯᠡᠬᠦ ᠳ᠋ᠦ᠍ ＜ ᠳᠠᠢᠯᠭᠠ᠂ ᠪᠠᠢᠪᠢᠩᠭᠠ᠂ ᠡᠬᠢᠷᠡ᠂ ᠰᠦᠪᠡᠷᠭᠡ᠂ ᠭᠣᠷᠬᠣᠭ ＞ ᠮᠡᠲᠦ ᠵᠠᠯᠠᠭᠤ ᠪᠠᠭᠠᠴᠤᠳ ᠪᠠᠢᠲᠤᠭᠠᠢ᠂ ᠨᠡᠯᠢᠶᠡᠳ ᠠᠬᠢᠮᠠᠭ ᠨᠠᠰᠤᠨ ᠤ᠋ ᠰᠡᠭᠡᠭᠡᠲᠡᠳ ᠬᠦᠷᠲᠡᠯᠡ ᠳᠡᠮᠡᠢ ᠮᠡᠳᠡᠳᠡᠭ ᠦᠭᠡᠢ ᠦᠭᠡᠰ ＜ ᠬᠥᠬᠡ ᠵᠤᠯᠠ > ᠳ᠋ᠤ᠌ ᠦᠯᠡᠮᠵᠢ ᠣᠯᠠᠨ ᠪᠣᠢ᠃ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠪᠦᠯᠦᠭ᠂ ᠤᠤᠯ ᠨᠣᠮ ᠤ᠋ᠨ ᠵᠣᠩᠬᠢ ᠬᠠᠭᠤᠳᠠᠰᠤ ᠶ᠋ᠢ ᠡᠵᠡᠯᠡᠭᠰᠡᠨ ᠪᠥᠭᠡᠳ ᠵᠥᠪᠬᠡᠨ ᠠᠳᠤᠭᠤ ᠪᠠᠷ ᠦᠯᠢᠳᠬᠡᠨ ᠥᠭᠦᠯᠡᠬᠦ ᠳ᠋ᠦ᠍᠂ ᠨᠠᠰᠤ ᠰᠢᠳᠦ᠂ ᠪᠡᠶᠡ ᠴᠣᠭᠴᠠᠰ ( ᠡᠷᠬᠡᠲᠡᠨ ) ᠂ ᠠᠳᠤᠭᠤᠨ ᠵᠢᠰᠦᠮ᠂ ᠠᠳᠤᠭᠤ ᠨᠡᠷᠡᠯᠡᠬᠦ ᠵᠤᠷᠰᠢᠯ᠂ ᠠᠳᠤᠭᠤᠨ ᠤ᠋ ᠶᠠᠪᠤᠳᠠᠯ᠂ ᠠᠳᠤᠭᠤᠨ ᠤ᠋ ᠡᠳ᠋ᠯᠡᠯ᠂ ᠠᠳᠤᠭᠤᠨ ᠤ᠋ ᠳᠠᠭᠤᠳᠠᠯᠭᠠ ( ᠠᠳᠤᠭᠤ ᠳᠠᠭᠤᠳᠠᠬᠤ ᠦᠭᠡ ) ᠵᠡᠷᠭᠡ ᠪᠡᠷ ᠨᠠᠷᠢᠨ ᠬᠤᠪᠢᠶᠠᠷᠢᠯᠠᠵᠤ᠂ ᠲᠡᠳᠡᠭᠡᠷ ᠦ᠋ᠨ ᠨᠡᠷᠡ ᠳᠠᠭᠤᠳᠠᠯᠭᠠ ᠶ᠋ᠢ ᠵᠢᠭᠰᠠᠭᠠᠨ ᠲᠠᠢᠯᠪᠤᠷᠢᠯᠠᠵᠠᠢ᠃ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠲᠤᠬᠠᠢ ᠨᠡᠢᠲᠡ ᠳ᠋ᠡᠭᠡᠨ 19 ᠲᠠᠯᠠ ᠠ᠋ᠴᠠ ᠶᠠᠷᠢᠵᠤ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠰᠢᠨᠵᠢᠯᠡᠭᠡ ᠶ᠋ᠢ 28 ᠲᠠᠯᠠ ᠠ᠋ᠴᠠ ᠥᠭᠦᠯᠡᠨ᠂ ᠬᠣᠨᠢ ᠢᠮᠠᠭᠠᠨ ᠤ᠋ ᠴᠢᠬᠢᠨ ᠦ᠌ ᠢᠮ ᠢ᠋ 50 ᠵᠦᠢᠯ᠂ ᠠᠳᠤᠭᠤ ᠦᠬᠡᠷ ᠦ᠋ᠨ ᠲᠠᠮᠠᠭᠠ ᠵᠠᠭᠤᠭᠠᠳ ᠵᠦᠢᠯ ᠢ᠋ ᠲᠤᠰ ᠲᠤᠰ ᠵᠢᠷᠤᠭ ᠰᠡᠯᠲᠡ ᠬᠠᠪᠰᠤᠷᠭᠠᠨ ᠲᠠᠢᠯᠪᠤᠷᠢᠯᠠᠪᠠ᠃ ᠬᠣᠲᠠ ᠪᠠᠯᠭᠠᠰᠤᠨ ᠳ᠋ᠤ᠌ ᠠᠮᠢᠳᠤᠷᠠᠳᠠᠭ ᠮᠣᠩᠭᠣᠯᠴᠤᠳ ᠮᠢᠬᠠ ᠢᠳᠡᠵᠦ ᠶᠠᠰᠤ ᠮᠥᠯᠵᠢᠬᠦ ᠪᠡᠨ ᠮᠠᠷᠲᠠᠭᠠ ᠦᠭᠡᠢ ᠪᠠᠢᠢᠭᠰᠠᠨ ᠴᠤ᠌ ᠲᠡᠷᠡ ᠬᠡᠰᠡᠭ ᠮᠢᠬᠠ᠂ ᠢᠯᠠᠩᠭᠤᠶᠠ ᠶᠠᠰᠤ ᠶ᠋ᠢ ᠶᠠᠭᠠᠬᠢᠨ ᠨᠡᠷᠡᠯᠡᠨ ᠳᠠᠭᠤᠳᠠᠬᠤ ᠶ᠋ᠢ ᠤᠯᠠᠮ ᠢ᠋ᠶ᠋ᠠᠷ ᠮᠠᠷᠲᠠᠵᠤ ᠪᠠᠢᠨᠠ᠃ ᠡᠨᠡ ᠲᠤᠬᠠᠢ ᠳᠤᠷᠠᠳᠤᠭᠰᠠᠨ ᠨᠣᠮ ᠳ᠋ᠤ᠌ ᠲᠤᠰᠬᠠᠢ ᠪᠦᠯᠦᠭ ᠢ᠋ᠶ᠋ᠡᠷ ᠲᠠᠨᠢᠯᠴᠠᠭᠤᠯᠤᠭᠰᠠᠨ ᠪᠥᠭᠡᠳ ᠮᠠᠯ ᠤ᠋ᠨ ᠶᠠᠰᠤᠨ ᠤ᠋ ᠨᠡᠷᠡᠢᠳᠦᠯ᠂ ᠮᠠᠯ ᠤ᠋ᠨ ᠡᠷᠬᠡᠲᠡᠨ ᠦ᠌ ᠨᠡᠷᠡᠢᠳᠦᠯ᠂ ᠳᠣᠲᠣᠷ ᠡᠷᠬᠡᠲᠡᠨ ᠦ᠌ ᠨᠡᠷᠡᠢᠳᠦᠯ᠂ ᠪᠤᠰᠤᠳ ᠡᠷᠬᠡᠲᠡᠨ ᠦ᠌ ᠨᠡᠷᠡᠢᠳᠦᠯ ᠭᠡᠬᠦᠴᠢᠯᠡᠨ ᠨᠠᠷᠢᠨ ᠥᠭᠦᠯᠡᠭᠰᠡᠨ ᠢ᠋ ᠨᠢ ᠦᠨᠡᠯᠡᠭᠦᠰᠢᠲᠡᠢ᠃
ᠶᠡᠷᠦᠩᠬᠡᠢᠯᠡᠭᠡᠳ ᠦᠵᠡᠪᠡᠯ᠂ ᠨᠥᠬᠥᠷ ᠪᠣᠷᠵᠢᠭᠢᠨ ᠸᠠᠩᠵᠢᠯ ᠤ᠋ᠨ ᠨᠠᠢᠷᠠᠭᠤᠯᠤᠨ ᠵᠣᠬᠢᠶᠠᠭᠰᠠᠨ ＜ᠬᠥᠬᠡ ᠵᠤᠯᠠ ＞ ᠭᠡᠬᠦ ᠲᠣᠯᠢ ᠪᠢᠴᠢᠭ ᠨᠢ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠦᠭᠡᠰ ᠦ᠋ᠨ ᠰᠠᠩ ᠤ᠋ᠨ ᠰᠤᠳᠤᠯᠤᠯ᠂ ᠨᠡᠷᠡ ᠲᠣᠮᠢᠶᠠᠨ ᠤ᠋ ᠰᠤᠳᠤᠯᠤᠯ ᠪᠣᠯᠤᠨ ᠵᠠᠩ ᠦᠢᠯᠡ᠂ ᠣᠷᠣᠨ ᠰᠠᠭᠤᠴᠠ᠂ ᠢᠳᠡᠭᠡᠨ ᠤᠮᠳᠠᠭᠠᠨ ᠤ᠋ ᠰᠤᠳᠤᠯᠤᠯ ᠳ᠋ᠤ᠌ ᠬᠣᠪᠣᠷ ᠨᠠᠨᠳᠢᠨ ᠡᠬᠡ ᠮᠠᠲ᠋ᠧᠷᠢᠶᠠᠯ ᠢ᠋ ᠬᠠᠩᠭᠠᠨ ᠦᠭᠭᠦᠭᠰᠡᠨ ᠲᠤᠯᠠ ᠨᠡᠢᠭᠡᠮ ᠦ᠋ᠨ ᠬᠡᠷᠡᠭᠯᠡᠭᠡᠨ ᠦ᠌ ᠪᠠ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠦ᠌ ᠦᠨᠡ ᠴᠠᠨᠠ ᠪᠠᠷ ᠶᠡᠷᠦ ᠨᠢ ᠶᠡᠬᠡ ᠪᠠᠢᠨᠠ᠃ ᠤᠤᠯ ᠲᠣᠯᠢ ᠪᠢᠴᠢᠭ ᠢ᠋ ᠮᠣᠩᠭᠣᠯ ᠠᠮᠢᠳᠤᠷᠠᠯ ᠤ᠋ᠨ ᠨᠡᠪᠲᠡᠷᠬᠡᠢ ᠲᠣᠯᠢ ᠭᠡᠬᠦ ᠳ᠋ᠦ᠍ ᠠᠷᠠᠢ ᠬᠡᠲᠦᠷᠡᠬᠦ ᠪᠣᠯᠪᠠᠴᠤ ᠮᠠᠯᠵᠢᠬᠤ ᠠᠮᠢᠳᠤᠷᠠᠯ ᠤ᠋ᠨ ᠲᠣᠪᠴᠢ ᠲᠠᠢᠯᠪᠤᠷᠢ ᠲᠣᠯᠢ ᠭᠡᠬᠦ ᠳ᠋ᠦ᠍ ᠢᠯᠡᠭᠦᠳᠡᠬᠦ ᠶᠠᠪᠤᠳᠠᠯ ᠣᠭᠲᠣ ᠠᠯᠠᠭᠠ᠃ ᠡᠨᠡ ᠲᠣᠯᠢ ᠪᠢᠴᠢᠭ ᠲᠦ᠍ ᠳᠤᠲᠠᠭᠤ ᠳᠣᠷᠭᠣᠨ ᠵᠦᠢᠯ ᠪᠤᠶᠤ ᠢᠯᠡᠭᠦᠳᠡᠭᠰᠡᠨ ᠵᠦᠢᠯ ᠪᠠᠢᠬᠤ ᠨᠢ ᠴᠦ᠍ ᠳᠠᠮᠵᠢᠭ ᠦᠭᠡᠢ᠃ ᠵᠢᠱ᠌ᠢᠶᠡᠯᠡᠪᠡᠯ ＜ᠵᠣᠴᠢᠯᠠᠭᠠ ᠶ᠋ᠢᠨ ᠪᠦᠯᠦᠭ ＞ ᠭᠡᠰᠡᠨ ᠳᠦᠷᠪᠡᠭᠡᠨ ᠬᠠᠭᠤᠳᠠᠰᠤᠲᠠᠢ ᠵᠦᠢᠯ ᠣᠷᠣᠭᠰᠠᠨ ᠨᠢ ᠨᠡᠷᠡ ᠳᠠᠭᠤᠳᠠᠯᠭᠠ ᠪᠠᠷ ᠭᠣᠣᠯ ᠴᠢᠮᠥᠭᠡ ᠪᠡᠨ ᠪᠣᠯᠭᠠᠭᠰᠠᠨ ＜ ᠬᠥᠬᠡ ᠵᠤᠯᠠ ＞ ᠳ᠋ᠤ᠌ ᠠᠷᠠᠢ ᠢᠯᠡᠭᠦᠴᠡ ᠶᠠᠭᠤᠮᠠ ᠪᠣᠯᠤᠭᠰᠠᠨ ᠮᠡᠲᠦ ᠪᠥᠭᠡᠳ ᠤᠤᠯ ᠲᠣᠯᠢ ᠪᠢᠴᠢᠭ ᠦ᠋ᠨ ᠪᠦᠬᠦᠯᠢ ᠴᠣᠭᠴᠠᠰ ᠪᠣᠯᠳ ᠰᠢᠰᠲ᠋ᠧᠮᠲᠦ ᠬᠤᠪᠢᠶᠠᠷᠢᠯᠠᠯ ᠲᠠᠢ ᠭᠢᠰᠬᠢᠴᠡ ᠨᠡᠢᠯᠡᠭᠰᠡᠨ ᠦᠭᠡᠢ ᠰᠢᠭ ᠲᠥᠷᠥᠭᠳᠡᠯ ᠥᠭᠴᠦ ᠪᠣᠢ᠃ ᠭᠡᠲᠡᠯᠡ ᠡᠳᠡᠭᠡᠷ ᠵᠦᠢᠯ ᠨᠢ ᠤᠤᠯ ᠲᠣᠯᠢ ᠪᠢᠴᠢᠭ ᠦ᠋ᠨ ᠬᠡᠷᠡᠭᠯᠡᠭᠡᠨ ᠦ᠌ ᠪᠤᠶᠤ ᠰᠢᠨᠵᠢᠯᠡᠭᠡᠨ ᠦ᠌ ᠦᠨᠡ ᠴᠠᠨᠠ ᠶ᠋ᠢ ᠨᠥᠯᠥᠭᠡᠯᠡᠭᠰᠡᠨ ᠦᠭᠡᠢ ᠭᠡᠳᠡᠭ ᠢ᠋ ᠣᠨᠴᠠᠭᠠᠢᠯᠠᠨ ᠳᠤᠷᠠᠳᠤᠶᠠ᠃ ＜ ᠬᠥᠬᠡ ᠵᠤᠯᠠ ＞ ᠪᠣᠯ ᠮᠠᠨ ᠤ᠋ ᠮᠣᠩᠭᠣᠯ ᠠᠮᠢᠳᠤᠷᠠᠯ ᠳ᠋ᠤ᠌ ᠨᠡᠭᠡᠷᠡᠨ ᠵᠤᠯᠠ ᠪᠣᠯᠬᠤᠢᠴᠠ ᠰᠠᠢᠬᠠᠨ ᠲᠣᠯᠢ ᠪᠣᠯᠵᠠᠢ᠃ ᠡᠴᠦᠰ ᠲᠦ᠍ ᠲᠡᠮᠳᠡᠭᠯᠡᠬᠦ ᠨᠢ ᠲᠤᠰ ᠨᠣᠮ ᠤ᠋ᠨ ᠵᠣᠬᠢᠶᠠᠭᠴᠢ ᠪᠣᠷᠵᠢᠭᠢᠨ ᠸᠠᠩᠵᠢᠯ ᠤ᠋ᠨ ᠲᠤᠬᠠᠢ ᠮᠠᠨ ᠤ᠋ ᠰᠡᠳᠬᠦᠯ 1989 ᠣᠨ ᠤ᠋ 6 ᠳ᠋ᠤᠭᠠᠷ ᠬᠤᠭᠤᠴᠠᠭᠠᠨ ᠳ᠋ᠠᠭᠠᠨ ᠲᠤᠰᠬᠠᠢ ᠲᠠᠨᠢᠯᠴᠠᠭᠤᠯᠤᠭᠰᠠᠨ ᠲᠤᠯᠠ ᠡᠷᠬᠢᠮ ᠤᠩᠰᠢᠭᠴᠢ ᠰᠣᠨᠢᠷᠬᠠᠯᠲᠠᠢ ᠪᠥᠭᠡᠰᠦ ᠲᠡᠷᠡ ᠳ᠋ᠦ᠍ᠭᠡᠷ ᠡᠴᠡ ᠯᠠᠪᠯᠠᠮᠤ 》ᠭᠡᠵᠡᠢ᠃
ᠥᠨᠥᠳᠥᠷ 《ᠬᠥᠬᠡ ᠵᠤᠯᠠ 》 ᠶ᠋ᠢ ᠭᠤᠷᠪᠠᠳᠠᠬᠢ ᠤᠳᠠᠭᠠ ᠬᠡᠪᠯᠡᠭᠦᠯᠬᠦ ᠳ᠋ᠡᠭᠡᠨ ᠤᠯᠠᠮ ᠨᠢᠭᠡ ᠠᠯᠬᠤᠮ ᠴᠢᠨᠠᠷ ᠴᠢᠨᠰᠠᠭᠠ ᠶ᠋ᠢ ᠨᠢ ᠳᠡᠭᠡᠭᠰᠢᠯᠡᠭᠦᠯᠬᠦ ᠶ᠋ᠢ ᠰᠠᠨᠠᠭᠠᠴᠢᠯᠠᠵᠤ ᠠᠷᠢᠭᠤᠳᠬᠠᠨ ᠵᠠᠰᠠᠪᠤᠷᠢ ᠣᠷᠣᠭᠤᠯᠤᠭᠰᠠᠨ ᠶᠤᠮ ᠃ ᠲᠤᠬᠠᠢᠯᠠᠪᠠᠯ :
① ᠲᠦᠷᠦᠭᠦᠴᠢ ᠶ᠋ᠢᠨ ᠬᠡᠪᠯᠡᠯ ᠳ᠋ᠦ᠍ ᠲᠠᠰᠢᠶᠠ ᠲᠡᠭᠦᠭᠰᠡᠨ ᠦᠭᠡᠰ : ᠲᠦᠭ ᠲᠡᠢ → ᠲᠦᠭ ᠲᠠᠭ ； ᠵᠠᠢᠯ → ᠵᠦᠢᠯ → ᠭᠡᠬᠦ ᠮᠡᠲᠦ᠃
② ᠲᠡᠰᠢᠶᠡ ᠪᠢᠴᠢᠭᠰᠡᠨ ᠦᠭᠡᠰ : ᠣᠮᠤᠯᠵᠠᠭᠤᠷ → ᠣᠮᠤᠯᠤᠤᠷ ； ᠥᠯᠳᠡᠭᠦᠯᠬᠦ → ᠥᠯᠥᠳᠡᠭᠦᠯᠬᠦ ； ᠭᠡᠳᠡᠰᠦᠨ → ᠬᠡᠪᠡᠯᠢ ； ᠪᠦᠷᠢᠳᠦ → ᠪᠥᠷᠲᠡ ； ᠠᠪᠠᠰᠤ → ᠠᠪᠪᠠᠰᠤ ᠭᠡᠬᠦ ᠮᠡᠲᠦ᠃
③ ᠤᠨᠤᠭᠠ ᠮᠠᠭᠤᠲᠠᠢ ᠲᠠᠢᠯᠪᠤᠷᠢ ᠄ ᠬᠠᠨᠠᠨ ᠰᠠᠷᠠᠪᠴᠢ ᠬᠠᠨᠠᠨ ᠰᠢᠷᠡᠭᠡ ᠡᠴᠡ ᠳᠣᠣᠭᠤᠷ᠂ ᠬᠠᠵᠠᠭᠤ ᠠ᠋ᠴᠠ ᠳᠡᠭᠡᠭᠦᠷ ᠪᠦᠬᠦ ᠨᠢ ᠦᠯᠦ ᠮᠡᠳᠡᠭ ᠬᠠᠵᠠᠢᠭᠰᠠᠨ ᠢ᠋ → ᠬᠣᠶᠠᠷ ᠪᠦᠬᠦ ᠨᠢ ᠳᠡᠭᠡᠳᠦ ᠦᠵᠦᠭᠦᠷᠬᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠯᠢ ᠨᠢᠭᠡ ᠲᠠᠯᠠ ᠤᠷᠤᠭᠤ ᠪᠠᠨ ᠦᠯᠦ ᠮᠡᠳᠡᠭ ᠬᠠᠵᠠᠢᠢᠭᠰᠠᠨ ᠡᠯᠡ ᠵᠢᠰᠦᠮ ᠦ᠋ᠨ ᠲᠡᠮᠡᠭᠡᠳ ； ᠰᠢᠨᠡ ᠴᠢᠬᠢᠨ ᠦ᠌ ᠳᠣᠣᠭᠤᠷᠬᠠᠨ ᠪᠣᠢ᠂ ᠳᠥᠭᠥᠰᠢ ᠶ᠋ᠢᠨ ᠳᠡᠭᠡᠳᠦ ᠬᠡᠰᠡᠭ → ᠬᠥᠮᠦᠨ ᠠᠮᠢᠲᠠᠨ ᠤ᠋ ᠡᠷᠡᠦ ᠶ᠋ᠢᠨ ᠶᠠᠰᠤᠨ ᠤ᠋ ᠳᠣᠣᠷᠠᠲᠤ ᠢᠷᠮᠡᠩ ᠳᠠᠭᠠᠤ ᠬᠡᠰᠡᠭ ᠢ᠋ᠶ᠋ᠡᠷ ᠥᠷᠭᠡᠨ ᠵᠤᠵᠠᠭᠠᠪᠲᠤᠷ ᠬᠠᠷᠠᠭᠳᠠᠬᠤ ᠶ᠋ᠢ ᠬᠡᠯᠡᠨᠡ᠃ ᠵᠠᠳᠠᠭᠠᠢ ᠬᠠᠲᠠᠷᠢ ᠤᠲᠤᠭᠠᠨ ᠬᠠᠲᠠᠷᠢ → ᠬᠤᠷᠳᠤᠨ ᠬᠠᠷᠠ ᠬᠠᠲᠠᠷᠢ ； ᠮᠠᠩᠬᠠᠨ ᠴᠠᠭᠠᠨ ᠲᠣᠯᠣᠭᠠᠢᠲᠠᠢ ᠬᠠᠷᠠ ᠦᠬᠡᠷ → ᠴᠠᠭᠠᠨ ᠨᠢᠭᠤᠷᠲᠠᠢ ᠪᠤᠰᠤᠳ ᠵᠢᠰᠦᠮ ᠦ᠋ᠨ ᠦᠬᠡᠷ ᠭᠡᠬᠦ ᠮᠡᠲᠦ᠃
④ ᠵᠠᠷᠢᠮ ᠨᠥᠬᠥᠬᠦ ᠴᠢᠬᠤᠯᠠᠲᠠᠢ ᠠᠭᠤᠯᠭᠠ ᠶ᠋ᠢ ᠨᠥᠬᠥᠵᠦ ᠣᠷᠣᠭᠤᠯᠤᠭᠰᠠᠨ : ᠵᠢᠱ᠌ᠢᠶᠡᠯᠡᠪᠡᠯ᠂ ᠦᠶᠡ ᠳᠠᠭᠤᠳᠠᠯᠭᠠ ᠶ᠋ᠢᠨ ᠳᠡᠭᠡᠭᠰᠢ ᠳᠣᠷᠣᠭᠰᠢ 9 ᠦᠶᠡ ᠶ᠋ᠢᠨ ᠳᠤᠮᠳᠠᠬᠢ 《ᠪᠡᠶᠡ ᠦᠶᠡ 》 ᠶ᠋ᠢ – ᠪᠡᠶᠡ ᠶ᠋ᠢᠨ ᠢᠵᠢᠯᠢ ᠦᠶᠡ ᠪᠣᠯᠭᠠᠨ ᠵᠠᠰᠠᠵᠤ ᠠᠬᠠ ᠪᠡᠷᠭᠡᠨ᠂ ᠳᠡᠭᠦᠦ ᠳᠡᠭᠦᠦ ᠪᠡᠷᠢ ᠶ᠋ᠢ ᠣᠷᠣᠭᠤᠯᠵᠤ 《ᠪᠡᠷᠭᠡᠨ ᠂ ᠪᠡᠷᠢ 》ᠬᠣᠶᠠᠷ ᠤ᠋ᠨ ᠳᠡᠭᠡᠭᠰᠢ ᠳᠣᠷᠣᠭᠰᠢ ᠦᠷᠭᠦᠯᠵᠢᠯᠡᠬᠦ ᠶᠣᠰᠣ ᠶ᠋ᠢ ᠲᠣᠳᠣᠯᠠᠬᠤ ᠳ᠋ᠤ᠌ ᠦᠨᠳᠦᠰᠦ ᠪᠣᠯᠭᠠᠨ ᠣᠷᠣᠭᠤᠯᠤᠭᠰᠠᠨ ᠶᠤᠮ᠃
⑤ ᠵᠠᠷᠢᠮ ᠠᠭᠤᠯᠭᠠ ᠨᠢ ᠳᠤᠲᠠᠭᠤ ᠰᠢᠭ᠋ ᠪᠠᠢᠭᠰᠠᠨ ᠢ᠋ ᠨᠥᠬᠥᠨ ᠪᠦᠷᠢᠳᠦᠭᠦᠯᠦᠭᠰᠡᠨ ᠵᠡᠷᠭᠡ ᠁ ᠪᠣᠯᠤᠨᠠ᠃
ᠵᠣᠬᠢᠶᠠᠭᠴᠢ
ᠰᠢᠷᠬᠠᠴᠢᠨ ᠦᠬᠡᠷ ᠵᠢᠯ ᠦ᠋ᠨ ᠵᠤᠨ ᠤ᠋ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠪᠦᠲᠦᠭᠡᠭᠴᠢ ᠡᠳᠦᠷ