ᠳᠣᠯᠣᠭᠠᠨ ᠠᠩᠴᠢᠨДолоон анчин
936ᠳᠣᠯᠣᠭᠠᠨ ᠠᠩᠴᠢᠨ
ᠪᠠᠭᠠᠷᠢᠨ ᠠᠷᠠᠳ ᠤᠨ ᠶᠠᠪᠠᠭᠠᠨ ᠦᠯᠢᠭᠡᠷ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠂ ᠡᠪᠦᠭᠡᠨ ᠵᠠᠯᠠᠭᠤ ᠳᠣᠯᠣᠭᠠᠨ ᠠᠩᠴᠢᠨ ᠪᠠᠢᠵᠤ ᠡᠳᠦᠷ ᠡᠳᠦᠷ ᠴᠣᠭ ᠠᠪᠠᠯᠠᠳᠠᠭ ᠶᠤᠮ ᠭᠡᠨᠡ᠃
ᠨᠢᠭᠡ ᠡᠳᠦᠷ ᠡᠪᠦᠭᠡᠨ ᠵᠠᠯᠠᠭᠤ ᠳᠣᠯᠣᠭᠠᠨ ᠠᠩᠴᠢᠨ ᠠᠪᠠᠯᠠᠬᠤ ᠪᠠᠷ ᠭᠠᠷᠤᠭᠠᠳ ᠡᠳᠦᠷᠵᠢᠨ ᠥᠨᠳᠥᠷ ᠠᠭᠤᠯᠠ ᠶ᠋ᠢ ᠳᠠᠪᠠᠵᠤ ᠥᠷᠭᠡᠨ ᠲᠠᠯᠠ ᠶ᠋ᠢ ᠲᠤᠭᠤᠯᠤᠭᠰᠠᠨ ᠴᠤ᠌ ᠶᠠᠭᠤ ᠴᠤ᠌ ᠣᠯᠵᠤ ᠠᠯᠠᠭᠰᠠᠨ ᠦᠭᠡᠢ ᠳᠡᠭᠡᠷᠡ ᠪᠡᠨ ᠥᠯᠥᠰᠴᠦ ᠤᠮᠳᠠᠭᠠᠰᠤᠭᠠᠳ ᠲᠤᠢᠯᠳᠠᠵᠤ ᠭᠡᠨᠡ᠃ ᠲᠡᠭᠡᠭᠡᠳ ᠣᠯᠵᠠ ᠣᠮᠣᠭ ᠦᠭᠡᠢ ᠤᠩᠰᠠᠢᠵᠤ ᠶᠠᠪᠤᠵᠤ ᠪᠠᠢᠲᠠᠯᠠ ᠨᠢ ᠡᠮᠦᠨᠡᠬᠢ ᠰᠥᠭᠡᠭ ᠡᠴᠡ ᠨᠢ ᠨᠢᠭᠡ ᠪᠤᠭᠤ ᠦᠰᠦᠷᠦᠨ ᠭᠠᠷᠲᠠᠯᠠ ᠠᠬᠠ ᠳᠡᠭᠦᠦ ᠳᠣᠯᠣᠭᠠᠨ ᠠᠩᠴᠢᠨ ᠬᠠᠷᠪᠤᠨ ᠠᠯᠠᠵᠤ ᠭᠡᠨᠡ᠃ ᠲᠡᠭᠡᠭᠡᠳ ᠭᠤᠷᠪᠠᠨ ᠵᠠᠯᠠᠭᠤ ᠠᠩᠴᠢᠨ ᠨᠢ ᠳᠥᠷᠪᠡᠨ ᠡᠪᠦᠭᠡᠨ ᠠᠩᠴᠢᠨ ᠳ᠋ᠤ᠌ ᠪᠠᠨ᠄《ᠪᠢᠳᠡ ᠭᠤᠷᠪᠠ ᠪᠤᠭᠤ ᠪᠠᠨ ᠥᠪᠴᠢᠭᠡᠳ ᠮᠢᠬᠠ ᠰᠢᠷᠠᠵᠤ ᠪᠠᠢᠶᠠ! ᠲᠠ ᠳᠥᠷᠪᠡᠭᠦᠯᠡ ᠶᠠᠪᠤᠭᠠᠳ ᠤᠰᠤ ᠠᠪᠤᠭᠠᠳ ᠢᠷᠡ!》 ᠭᠡᠳ ᠳᠥᠷᠪᠡᠨ ᠡᠪᠦᠭᠡᠨ ᠠᠩᠴᠢᠨ ᠢ᠋ᠶ᠋ᠠᠨ ᠤᠰᠤᠨ ᠳ᠋ᠤ᠌ ᠶᠠᠪᠤᠭᠤᠯᠵᠤ ᠭᠡᠨᠡ᠃ ᠳᠥᠷᠪᠡᠨ ᠡᠪᠦᠭᠡᠨ ᠠᠩᠴᠢᠨ ᠢ᠋ᠶ᠋ᠠᠨ ᠤᠰᠤᠨ ᠳ᠋ᠤ᠌ ᠶᠠᠪᠤᠭᠤᠯᠤᠭᠠᠳ ᠭᠤᠷᠪᠠᠨ ᠵᠠᠯᠠᠭᠤ ᠠᠩᠴᠢᠨ ᠢᠩᠭᠢᠵᠦ ᠶᠠᠷᠢᠯᠴᠠᠵᠠᠢ᠄《ᠡᠨᠡ ᠨᠢᠭᠡ ᠪᠤᠭᠤ ᠶ᠋ᠢ ᠪᠢᠳᠡ ᠳᠣᠯᠣᠭᠤᠯᠠ ᠬᠤᠪᠢᠶᠠᠪᠠᠯ ᠬᠥᠮᠦᠨ ᠦ᠌ ᠨᠢᠭᠡ ᠮᠥᠴᠢ ᠣᠨᠣᠭᠳᠠᠨᠠ᠂ ᠲᠡᠭᠡᠬᠦ ᠪᠡᠷ ᠢ᠋ᠶ᠋ᠡᠨ ᠡᠨᠡ ᠳᠥᠷᠪᠡᠨ ᠡᠪᠦᠭᠡᠨ ᠢ᠋ ᠬᠣᠷᠣᠭᠠᠴᠢᠬᠠᠪᠠᠯ ᠪᠢᠳᠡ ᠭᠤᠷᠪᠠ ᠳ᠋ᠤ᠌ ᠬᠥᠮᠦᠨ ᠦ᠌ ᠬᠣᠶᠠᠷ ᠮᠥᠴᠢ ᠣᠨᠣᠭᠳᠠᠨᠠ》 ᠭᠡᠵᠡᠭᠡᠵᠦ ᠭᠡᠨᠡ᠃ ᠲᠡᠭᠡᠭᠡᠳ ᠳᠥᠷᠪᠡᠨ ᠡᠪᠦᠭᠡᠨ ᠠᠩᠴᠢᠨ ᠢ᠋ ᠬᠣᠷᠣᠭᠠᠬᠤ ᠪᠠᠷ ᠪᠣᠭᠣᠨ ᠮᠢᠬᠠᠨ ᠳ᠋ᠤ᠌ ᠪᠠᠨ ᠬᠣᠣᠷ ᠬᠢᠵᠦ ᠬᠠᠭᠰᠠᠭᠠᠭᠠᠳ ᠬᠦᠯᠢᠶᠡᠵᠦ ᠰᠠᠭᠤᠪᠠ ᠭᠡᠨᠡ᠃
ᠤᠰᠤᠨ ᠳ᠋ᠤ᠌ ᠶᠠᠪᠤᠭᠰᠠᠨ ᠳᠥᠷᠪᠡᠨ ᠡᠪᠦᠭᠡᠨ ᠭᠦᠵᠡᠭᠡ ᠳᠡᠭᠦᠵᠢᠯᠡᠨ ᠠᠭᠤᠯᠠᠨ ᠭᠣᠣ ᠳᠠᠭᠠᠵᠤ᠂ ᠪᠤᠯᠠᠭ ᠭᠣᠷᠣᠬᠠ ᠡᠷᠢᠵᠦ ᠭᠦᠶᠦᠭᠰᠡᠭᠡᠷ ᠨᠢᠭᠡᠨ ᠲᠤᠩᠭᠠᠯᠠᠭ ᠤᠰᠤ ᠲᠠᠢ ᠪᠤᠯᠠᠭ ᠢ᠋ ᠣᠯᠵᠤ᠂ ᠳᠥᠷᠪᠡᠭᠦᠯᠡ ᠪᠡᠨ ᠬᠠᠨᠲᠠᠯᠠ ᠤᠤᠭᠤᠭᠠᠳ ᠭᠦᠵᠡᠭᠡᠨ ᠳ᠋ᠦ᠍ ᠪᠡᠨ ᠤᠰᠤ ᠳᠦᠭᠦᠷᠭᠡᠭᠡᠳ ᠪᠤᠴᠠᠬᠤ ᠳ᠋ᠤ᠌ ᠪᠠᠨ ᠢᠩᠭᠢᠵᠦ ᠶᠠᠷᠢᠯᠴᠠᠵᠠᠢ᠄《ᠡᠨᠡ ᠭᠤᠷᠪᠠᠨ ᠵᠠᠯᠠᠭᠤ ᠬᠡᠵᠢᠶᠡᠳᠡ ᠪᠢᠳᠡ ᠳᠥᠷᠪᠡᠨ ᠡᠪᠦᠭᠡᠨ ᠢ᠋ ᠮᠠᠭᠤ ᠦᠵᠡᠨᠡ᠂ ᠴᠣᠬᠣᠮ ᠳ᠋ᠤ᠌ ᠪᠠᠨ ᠵᠠᠯᠠᠭᠤ ᠪᠠᠷ ᠢ᠋ᠶ᠋ᠠᠨ ᠲᠡᠷᠡ ᠭᠤᠷᠪᠠ ᠤᠰᠤ ᠡᠷᠢᠬᠦ ᠪᠡᠷ ᠶᠠᠪᠤᠵᠤ᠂ ᠪᠢᠳᠡ ᠳᠥᠷᠪᠡ ᠮᠢᠬᠠ ᠰᠢᠷᠠᠪᠠᠯ ᠲᠠᠭᠠᠷᠠᠨᠠ᠃ ᠲᠡᠳᠡ ᠤᠳᠠᠭᠠ ᠤᠳᠠᠭᠠ ᠠᠩ ᠤ᠋ᠨ ᠤᠯᠠᠢ ᠶ᠋ᠢᠨ ᠶᠡᠬᠡ ᠶ᠋ᠢ ᠨᠢ ᠠᠪᠤᠨᠠ᠂ ᠪᠢᠳᠡ ᠳᠥᠷᠪᠡ ᠳ᠋ᠦ᠍ ᠪᠠᠭᠠ ᠶ᠋ᠢ ᠨᠢ ᠥᠭᠭᠦᠨᠡ᠃ ᠪᠢᠳᠡ ᠳᠥᠷᠪᠡ ᠢᠩᠭᠢᠵᠦ ᠮᠠᠭᠤ ᠦᠵᠡᠭᠳᠡᠬᠦ ᠪᠡᠷ ᠢ᠋ᠶ᠋ᠡᠨ ᠡᠨᠡ ᠭᠤᠷᠪᠠᠨ ᠵᠠᠯᠠᠭᠤ ᠠᠩᠴᠢᠨ ᠢ᠋ ᠬᠣᠷᠣᠭᠠᠶᠠ!》 ᠭᠡᠳ ᠭᠦᠵᠡᠭᠡ ᠲᠡᠢ ᠤᠰᠤᠨ ᠳ᠋ᠤ᠌ ᠪᠠᠨ ᠬᠣᠣᠷ ᠬᠣᠯᠢᠭᠠᠳ ᠭᠤᠷᠪᠠᠨ ᠵᠠᠯᠠᠭᠤ ᠠᠩᠴᠢᠨ ᠤ᠋ ᠳᠡᠷᠭᠡᠳᠡ ᠢᠷᠡᠬᠦ ᠳ᠋ᠦ᠍ ᠭᠤᠷᠪᠠᠨ ᠵᠠᠯᠠᠭᠤ ᠠᠩᠴᠢᠨ᠄
《ᠥᠯᠦᠰᠦᠯᠡ ᠪᠢᠵᠡ? ᠮᠢᠬᠠ ᠬᠠᠭᠰᠠᠭᠠᠭᠠᠳ ᠲᠠᠯᠪᠢᠴᠢᠬᠠᠭᠰᠠᠨ᠂ ᠪᠣᠰᠢᠭᠣ ᠢᠳᠡ!》 ᠭᠡᠵᠦ ᠬᠥᠩᠭᠡᠮᠰᠦᠭ ᠠᠭᠠᠰᠢᠯᠠᠨ ᠰᠢᠷᠠᠭᠰᠠᠨ ᠮᠢᠬᠠ ᠠᠪᠴᠤ ᠥᠭᠴᠡᠢ᠃ ᠳᠥᠷᠪᠡᠨ ᠡᠪᠦᠭᠡᠨ ᠠᠩᠴᠢᠨ᠄《ᠤᠮᠳᠠᠭᠠᠰᠤᠯᠠ ᠪᠢᠵᠡ?ᠤᠰᠤ ᠤᠤᠭᠤ!》 ᠭᠡᠵᠦ ᠬᠠᠯᠠᠭᠤᠮᠰᠤᠭ ᠠᠭᠠᠰᠢᠯᠠᠨ ᠭᠦᠵᠡᠭᠡ ᠲᠡᠢ ᠤᠰᠤ ᠪᠠᠨ ᠭᠤᠷᠪᠠᠨ ᠵᠠᠯᠠᠭᠤ ᠳ᠋ᠤ᠌ ᠥᠭᠴᠡᠢ᠃
ᠥᠯᠥᠰᠴᠦ ᠪᠠᠢᠭᠰᠠᠨ ᠳᠥᠷᠪᠡᠨ ᠡᠪᠦᠭᠡᠨ ᠠᠩᠴᠢᠨ ᠬᠠᠭᠰᠠᠭᠠᠭᠰᠠᠨ ᠮᠢᠬᠠ ᠶ᠋ᠢ ᠲᠣᠰᠣᠨ ᠠᠪᠤᠭᠠᠳ ᠠᠮᠠ ᠠᠮᠠ ᠪᠠᠷ ᠡᠮᠬᠦᠯᠡᠵᠡᠢ᠃ ᠬᠠᠭᠰᠠᠭᠠᠭᠰᠠᠨ ᠮᠢᠬᠠ ᠢᠳᠡᠭᠡᠳ ᠠᠩᠭᠠᠵᠤ ᠪᠠᠢᠭᠰᠠᠨ ᠭᠤᠷᠪᠠᠨ ᠵᠠᠯᠠᠭᠤ ᠠᠩᠴᠢᠨ ᠭᠦᠵᠡᠭᠡ ᠲᠡᠢ ᠤᠰᠤ ᠶ᠋ᠢ ᠲᠣᠰᠴᠤ ᠠᠪᠤᠭᠠᠳ《ᠭᠦᠳ! ᠭᠦᠳ!》 ᠵᠠᠯᠭᠢᠯᠠᠵᠠᠢ᠃
ᠳᠥᠷᠪᠡᠨ ᠡᠪᠦᠭᠡᠨ ᠠᠩᠴᠢᠨ ᠭᠤᠷᠪᠠᠨ ᠵᠠᠯᠠᠭᠤ ᠠᠩᠴᠢᠨ ᠤ᠋ ᠭᠤᠯᠠᠰᠤᠨ ᠤᠨᠠᠵᠤ ᠦᠬᠦᠬᠦ ᠶ᠋ᠢ ᠨᠢᠳᠦᠨ ᠰᠡᠭᠦᠯ ᠢ᠋ᠶ᠋ᠡᠷ ᠰᠢᠷᠪᠢᠨ ᠠᠵᠢᠭᠯᠠᠬᠤ ᠳ᠋ᠤ᠌᠂ ᠭᠤᠷᠪᠠᠨ ᠵᠠᠯᠠᠭᠤ ᠠᠩᠴᠢᠨ ᠳᠥᠷᠪᠡᠨ ᠡᠪᠦᠭᠡᠨ ᠠᠩᠴᠢᠨ ᠤ᠋ ᠮᠢᠬᠠ ᠪᠠᠨ ᠡᠮᠬᠦᠯᠡᠭᠰᠡᠨ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠥᠩᠬᠥᠷᠢᠨ ᠤᠨᠠᠵᠤ ᠦᠬᠦᠬᠦ ᠶ᠋ᠢ ᠰᠠᠮ ᠠᠵᠢᠭᠯᠠᠵᠤ ᠰᠠᠭᠤᠵᠠᠢ᠃
ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ《ᠮᠣᠭᠠᠢ ᠬᠣᠣᠷ ᠲᠤ ᠪᠠᠨ ᠰᠢᠷᠠᠯᠠᠵᠤ》 ᠳᠣᠯᠣᠭᠠᠨ ᠠᠩᠴᠢᠨ ᠬᠣᠣᠷᠳᠠᠭᠳᠠᠨ ᠲᠡᠯᠴᠢᠯᠡᠬᠦ ᠳ᠋ᠦ᠍ ᠪᠡᠨ ᠥᠭᠡᠳᠡ ᠥᠭᠡᠳᠡ ᠡᠴᠡ ᠪᠡᠨ ᠰᠣᠨᠣᠰᠤᠰᠢ ᠦᠭᠡᠢ ᠮᠠᠭᠤᠬᠠᠢ ᠪᠠᠷ ᠬᠠᠷᠢᠶᠠᠵᠤ ᠲᠡᠯᠴᠢᠯᠡᠭᠰᠡᠭᠡᠷ ᠳᠣᠯᠣᠭᠤᠯᠠ ᠪᠠᠨ ᠦᠬᠦᠵᠦ ᠭᠡᠨᠡ᠃
ᠡᠪᠦᠭᠡᠨ ᠵᠠᠯᠠᠭᠤ ᠳᠣᠯᠣᠭᠠᠨ ᠠᠩᠴᠢᠨ ᠤ᠋ ᠦᠬᠦᠭᠰᠡᠨ ᠡᠨᠡ ᠠᠭᠤᠯᠠᠨ ᠳ᠋ᠤ᠌ ᠨᠢᠭᠡ ᠬᠤᠢᠬᠤᠷ ᠦᠨᠡᠭᠡ ᠪᠠᠢᠵᠤ ᠭᠡᠨᠡ᠃ ᠲᠡᠷᠡ ᠦᠨᠡᠭᠡ ᠢᠳᠡᠰᠢ ᠡᠷᠢᠨ ᠰᠢᠩᠰᠢᠯᠡᠵᠦ ᠶᠠᠪᠤᠲᠠᠯᠠ ᠭᠡᠨᠡᠳᠲᠡ ᠬᠥᠮᠦᠨ ᠦ᠌ ᠮᠢᠬᠠᠨ ᠤ᠋ ᠦᠨᠦᠷ᠂ ᠪᠣᠭᠣᠨ ᠮᠢᠬᠠᠨ ᠤ᠋ ᠦᠨᠦᠷ᠂ ᠬᠠᠭᠰᠠᠭᠠᠭᠰᠠᠨ ᠮᠢᠬᠠᠨ ᠤ᠋ ᠦᠨᠦᠷ ᠦᠨᠦᠷᠲᠦᠬᠦ ᠳ᠋ᠦ᠍ ᠮᠢᠬᠠᠨ ᠦᠨᠦᠷ ᠢ᠋ ᠳ᠋ᠡᠭᠡᠨ ᠵᠢᠪᠠᠷ ᠪᠠᠷᠢᠨ ᠰᠢᠩᠰᠢᠵᠦ ᠡᠷᠢᠭᠰᠡᠭᠡᠷ ᠬᠠᠪᠲᠠᠭᠠᠢ ᠴᠢᠯᠠᠭᠤ ᠳᠡᠭᠡᠷᠡ ᠬᠠᠭᠰᠠᠭᠠᠵᠤ ᠲᠠᠯᠪᠢᠭᠰᠠᠨ ᠪᠤᠭᠤᠨ ᠮᠢᠬᠠ᠂ ᠬᠠᠵᠠᠭᠤ ᠳ᠋ᠤ᠌ ᠨᠢ ᠦᠬᠦᠭᠰᠡᠨ ᠳᠣᠯᠣᠭᠠᠨ ᠬᠥᠮᠦᠨ᠂ ᠬᠠᠲᠠᠵᠤ ᠬᠣᠷᠪᠣᠢᠭᠰᠠᠨ ᠭᠦᠵᠡᠭᠡ᠂ ᠬᠠᠭᠠᠰ ᠥᠪᠴᠢᠭᠰᠡᠨ ᠪᠤᠭᠤ᠂ ᠳᠣᠯᠣᠭᠠᠨ ᠨᠤᠮᠤ ᠰᠤᠮᠤ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ ᠣᠨ ᠤ᠋ ᠬᠦᠨᠡᠰᠦ ᠪᠡᠨ ᠣᠯᠤᠯᠠ ᠭᠡᠵᠦ ᠬᠠᠭᠠᠷᠠᠲᠠᠯᠠ ᠪᠠᠨ ᠪᠠᠶᠠᠷᠯᠠᠵᠤ ᠠᠷᠪᠢᠯᠠᠬᠤ ᠶ᠋ᠢ ᠠᠮᠠᠰᠠᠷ ᠠ᠋ᠴᠠ ᠨᠢ ᠭᠡᠳ ᠪᠣᠭᠣᠨ ᠮᠢᠬᠠ᠂ ᠬᠠᠭᠰᠠᠭᠠᠭᠰᠠᠨ ᠮᠢᠬᠠ᠂ ᠬᠠᠲᠠᠭᠰᠠᠨ ᠭᠦᠵᠡᠭᠡ᠂ ᠬᠥᠮᠦᠨ ᠦ᠌ ᠮᠢᠬᠠ ᠶ᠋ᠢᠨ ᠠᠯᠢᠨ ᠢ᠋ ᠨᠢ ᠴᠤ᠌ ᠢᠳᠡᠵᠦ ᠲᠥᠪᠳᠡᠭᠰᠡᠨ ᠦᠭᠡᠢ᠂ ᠰᠢᠷᠪᠦᠰᠦᠨ ᠬᠥᠪᠴᠢ ᠲᠡᠢ ᠨᠣᠮᠣᠨ ᠤ᠋ ᠬᠢᠨᠢ ᠬᠥᠪᠴᠢ ᠶ᠋ᠢ ᠤᠷᠢᠳ ᠢ᠋ᠶ᠋ᠠᠷ ᠢᠳᠡᠬᠦ ᠪᠡᠷ ᠪᠣᠯᠵᠤ᠂ ᠨᠣᠮᠣᠨ ᠤ᠋ ᠬᠢᠨᠢ ᠬᠥᠪᠴᠢ ᠶ᠋ᠢ ᠨᠢ ᠬᠡᠮᠡᠯᠢᠵᠦ ᠪᠠᠢᠲᠠᠯᠠ ᠨᠢ ᠰᠢᠷᠪᠦᠰᠦᠨ ᠬᠥᠪᠴᠢ ᠭᠡᠨᠡᠳᠲᠡ ᠲᠠᠰᠤᠷᠠᠵᠤ᠂ ᠨᠤᠮᠤ ᠨᠢ《ᠲᠠᠱ!》 ᠭᠡᠵᠦ ᠳᠡᠯᠢᠭᠡᠳ ᠰᠢᠷᠪᠦᠰᠦᠨ ᠬᠥᠪᠴᠢ ᠶ᠋ᠢᠨ ᠲᠣᠷᠣᠭᠠᠰᠤ ᠶ᠋ᠢ ᠬᠡᠮᠡᠯᠢᠵᠦ ᠪᠠᠢᠭᠰᠠᠨ ᠬᠠᠷᠠ ᠦᠨᠡᠭᠡᠨ ᠦ᠌ ᠬᠠᠷᠠ ᠬᠠᠮᠠᠷ ᠢ᠋ ᠬᠡᠮᠬᠡ ᠲᠡᠢᠷᠦᠭᠡᠳ ᠠᠯᠠᠴᠢᠬᠠᠵᠤ ᠭᠡᠨᠡ᠃ ᠡᠨᠡ ᠣᠷᠴᠢᠮ ᠳ᠋ᠤ᠌ ᠨᠢ ᠡᠷᠡ ᠡᠮᠡ ᠬᠣᠶᠠᠷ ᠥᠬᠢᠨ ᠴᠠᠭᠠᠨ ᠬᠤᠯᠤᠭᠠᠨᠠ ᠠᠮᠢᠳᠤᠷᠠᠵᠤ ᠪᠠᠢᠵᠠᠢ᠃ ᠡᠷᠡ ᠬᠤᠯᠤᠭᠠᠨᠠ ᠨᠢ᠄《ᠪᠢ ᠥᠨᠥ ᠭᠠᠷᠴᠤ ᠵᠢᠭᠠᠬᠠᠨ ᠢᠳᠡᠬᠦ ᠶᠠᠭᠤᠮᠠ ᠣᠯᠵᠤ ᠢᠷᠡᠶᠡ》 ᠭᠡᠰᠡᠨ ᠳ᠋ᠦ᠍᠂ ᠡᠮᠡ ᠬᠤᠯᠤᠭᠠᠨᠠ ᠨᠢ᠄《ᠢᠳᠡᠰᠢ ᠡᠷᠢᠬᠦ ᠪᠡᠷ ᠭᠠᠷᠤᠭᠰᠠᠨ ᠤ᠋ ᠬᠡᠷᠡᠭ ᠦᠭᠡᠢ᠂ ᠰᠦᠷᠡᠬᠡᠢ ᠡᠭᠦᠯᠡᠲᠦᠵᠦ ᠪᠠᠢᠨᠠ᠂ ᠬᠦᠢᠲᠡᠨ ᠪᠣᠷᠣᠭᠠᠨ ᠣᠷᠣᠬᠤ ᠮᠠᠭᠠᠳ ᠦᠭᠡᠢ》 ᠭᠡᠵᠦ ᠡᠷᠡ ᠬᠤᠯᠤᠭᠠᠨᠠ ᠪᠠᠨ ᠬᠠᠰᠢᠪᠠ ᠭᠡᠨᠡ᠃ ᠡᠷᠡ ᠬᠤᠯᠤᠭᠠᠨᠠ ᠨᠢ ᠡᠮᠡ ᠬᠤᠯᠤᠭᠠᠨᠠ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢ ᠰᠣᠨᠣᠰᠤᠯ ᠦᠭᠡᠢ ᠡᠭᠦᠷ ᠡᠴᠡ ᠪᠡᠨ ᠭᠠᠷᠴᠤ ᠢᠳᠡᠰᠢ ᠡᠷᠢᠬᠦ ᠪᠡᠷ ᠶᠠᠪᠤᠬᠤ ᠳ᠋ᠤ᠌ ᠡᠮᠡ ᠬᠤᠯᠤᠭᠠᠨᠠ ᠨᠢ ᠪᠠᠰᠠ ᠠᠷᠭᠠ ᠦᠭᠡᠢ ᠳᠠᠭᠠᠵᠤ ᠭᠠᠷᠴᠤ ᠢᠷᠡᠪᠡ ᠭᠡᠨᠡ᠃ ᠲᠡᠷᠡ ᠬᠣᠶᠠᠷ ᠥᠬᠢᠨ ᠴᠠᠭᠠᠨ ᠬᠤᠯᠤᠭᠠᠨᠠ ᠢᠳᠡᠰᠢ ᠡᠷᠢᠵᠦ ᠶᠠᠪᠤᠭᠰᠠᠭᠠᠷ ᠪᠠᠢᠭᠠᠳ ᠦᠬᠦᠭᠰᠡᠨ ᠪᠤᠭᠤ᠂ ᠰᠢᠷᠠᠭᠰᠠᠨ ᠪᠤᠭᠤᠨ ᠮᠢᠬᠠ᠂ ᠦᠬᠦᠭᠰᠡᠨ ᠬᠥᠮᠦᠨ᠂ ᠦᠬᠦᠭᠰᠡᠨ ᠦᠨᠡᠭᠡ ᠪᠠᠢᠬᠤ ᠶ᠋ᠢ ᠣᠯᠵᠤ ᠦᠵᠡᠵᠡᠢ᠃ ᠡᠷᠡ ᠬᠤᠯᠤᠭᠠᠨᠠ ᠨᠢ᠄《ᠪᠢ ᠬᠡᠯᠡᠯᠡ ᠪᠢᠵᠡ᠂ ᠥᠨᠥᠳᠥᠷ ᠠᠮᠲᠠᠲᠤ ᠢᠳᠡᠭᠡᠨ ᠳ᠋ᠦ᠍ ᠴᠠᠳᠬᠤ ᠪᠠᠢᠭᠰᠠᠨ ᠶᠤᠮ ᠪᠠᠢᠨᠠ》 ᠭᠡᠪᠡ᠃ ᠲᠡᠭᠡᠬᠦ ᠳ᠋ᠦ᠍ ᠡᠮᠡ ᠬᠤᠯᠤᠭᠠᠨᠠ ᠨᠢ᠄《ᠡᠨᠡ ᠪᠤᠭᠤ᠂ ᠡᠳᠡᠭᠡᠷ ᠠᠩᠴᠢᠨ᠂ ᠡᠨᠡ ᠦᠨᠡᠭᠡ ᠨᠢᠭᠡ ᠯᠡ ᠳᠣᠣᠷᠠ ᠦᠬᠦᠭᠰᠡᠨ ᠨᠢ ᠶᠡᠬᠡ ᠰᠡᠵᠢᠭᠯᠡᠯ ᠲᠡᠢ᠂ ᠬᠢᠴᠢᠶᠡᠬᠦ ᠨᠢ ᠴᠢᠬᠤᠯᠠ᠂ ᠢᠳᠡᠬᠦ ᠶ᠋ᠢ ᠪᠠᠢᠭ!》 ᠭᠡᠬᠦ ᠳ᠋ᠦ᠍ ᠡᠷᠡ ᠬᠤᠯᠤᠭᠠᠨᠠ ᠨᠢ ᠡᠮᠡ ᠬᠤᠯᠤᠭᠠᠨᠠ ᠳ᠋ᠤ᠌ ᠪᠠᠨ ᠮᠠᠭᠤ ᠰᠠᠨᠠᠵᠤ᠂ ᠡᠨᠡ ᠯᠠᠪ ᠰᠡᠭᠦᠯᠡᠷ ᠢᠷᠡᠵᠦ ᠠᠮᠲᠠᠲᠠᠢ ᠮᠢᠬᠠ ᠶ᠋ᠢ ᠭᠠᠭᠴᠠ ᠪᠠᠷ ᠢ᠋ᠶ᠋ᠠᠨ ᠢᠳᠡᠬᠦ ᠭᠡᠵᠦ ᠪᠠᠢᠨᠠ ᠭᠡᠵᠦ ᠮᠠᠭᠤ ᠰᠠᠨᠠᠵᠠᠢ᠃ ᠲᠡᠭᠡᠭᠡᠳ ᠡᠷᠡ ᠬᠤᠯᠤᠭᠠᠨᠠ ᠨᠢ ᠪᠣᠭᠣᠨ ᠮᠢᠬᠠ᠂ ᠬᠥᠮᠦᠨ ᠦ᠌ ᠮᠢᠬᠠ᠂ ᠦᠨᠡᠭᠡᠨ ᠮᠢᠬᠠ ᠶ᠋ᠢ ᠨᠢᠭᠡ ᠶ᠋ᠢ ᠨᠢ ᠨᠢᠭᠡ ᠬᠠᠵᠠᠵᠤ ᠭᠦᠶᠦᠬᠦ ᠳ᠋ᠦ᠍ ᠡᠮᠡ ᠬᠤᠯᠤᠭᠠᠨᠠ ᠨᠢ ᠪᠠᠰᠠ ᠳᠣᠲᠣᠷᠠ ᠪᠠᠨ ᠡᠷᠡ ᠬᠤᠯᠤᠭᠠᠨᠠ ᠪᠠᠨ ᠠᠮᠲᠠᠲᠠᠢ ᠮᠢᠬᠠ ᠶ᠋ᠢ ᠨᠢ ᠪᠦᠷ ᠰᠣᠩᠭᠣᠭᠠᠳ ᠢᠳᠡᠴᠢᠬᠡᠬᠦ ᠮᠠᠭᠠᠳ᠂ ᠪᠣᠰᠢᠭᠣ ᠵᠠᠪᠳᠤᠵᠤ ᠢᠳᠡᠶᠡ ᠭᠡᠵᠦ ᠪᠣᠭᠣᠨ ᠮᠢᠬᠠ᠂ ᠬᠥᠮᠦᠨ ᠦ᠌ ᠮᠢᠬᠠ᠂ ᠦᠨᠡᠭᠡᠨ ᠮᠢᠬᠠᠨ ᠤ᠋ ᠠᠯᠢᠨ ᠠ᠋ᠴᠠ ᠨᠢ ᠴᠦ᠍ ᠪᠦᠷ ᠮᠡᠷᠡᠵᠦ ᠦᠵᠡᠵᠡᠢ᠃ ᠢᠩᠭᠢᠭᠡᠳ ᠬᠥᠭᠡᠷᠦᠬᠦᠢ ᠬᠣᠶᠠᠷ ᠥᠬᠢᠨ ᠴᠠᠭᠠᠨ ᠬᠤᠯᠤᠭᠠᠨᠠ ᠠᠯᠢ ᠮᠢᠬᠠ ᠨᠢ ᠠᠮᠲᠠᠲᠠᠢ ᠶ᠋ᠢ ᠮᠡᠳᠡᠵᠦ ᠵᠠᠪᠳᠤᠯ ᠦᠭᠡᠢ ᠬᠣᠣᠷᠳᠠᠭᠳᠠᠨ ᠦᠬᠦᠪᠡ ᠭᠡᠨᠡ᠃ ᠲᠡᠭᠦᠨ ᠡᠴᠡ ᠠᠪᠤᠭᠠᠳ ᠡᠨᠡ ᠠᠭᠤᠯᠠᠨ ᠭᠣᠣ ᠳ᠋ᠤ᠌ ᠦᠬᠦᠭᠰᠡᠨ ᠬᠥᠮᠦᠨ᠂ ᠪᠤᠭᠤ᠂ ᠦᠨᠡᠭᠡ᠂ ᠥᠬᠢᠨ ᠴᠠᠭᠠᠨ ᠬᠤᠯᠤᠭᠠᠨᠠ ᠶ᠋ᠢᠨ ᠮᠢᠬᠠ ᠦᠮᠡᠬᠡᠢᠷᠡᠭᠡᠳ ᠠᠭᠤᠯᠠ ᠳᠦᠭᠦᠷᠡᠩ ᠰᠠᠩᠬᠤᠯᠵᠤ ᠭᠡᠨᠡ᠃
ᠡᠨᠡ ᠠᠭᠤᠯᠠᠨ ᠭᠣᠣ ᠶ᠋ᠢᠨ ᠡᠬᠢᠨ ᠦ᠌ ᠬᠥᠭᠰᠢᠨ ᠬᠠᠢᠯᠠᠰᠤᠨ ᠳᠡᠭᠡᠷᠡ ᠨᠢᠭᠡ ᠬᠥᠬᠥᠭᠡ ᠰᠢᠪᠠᠭᠤ ᠡᠭᠦᠷᠯᠡᠳᠡᠭ ᠪᠠᠢᠵᠠᠢ᠃ ᠲᠡᠷᠡ ᠬᠥᠬᠥᠭᠡ ᠰᠢᠪᠠᠭᠤ ᠥᠨᠳᠡᠭᠡ ᠪᠡᠨ ᠳᠠᠷᠤᠵᠤ ᠬᠡᠪᠲᠡᠬᠦ ᠳ᠋ᠦ᠍ ᠪᠡᠨ ᠡᠨᠡ ᠪᠦᠬᠦᠨ ᠢ᠋ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠦᠵᠡᠭᠰᠡᠨ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠬᠠᠷᠠᠮᠰᠠᠯᠲᠠᠢ ᠪᠠᠷ᠂ ᠳᠣᠣᠷᠠ ᠳᠣᠣᠷᠠ ᠪᠠᠨ ᠰᠡᠳᠬᠢᠯ ᠨᠢᠭᠡᠳᠬᠦ ᠦᠭᠡᠢ ᠪᠣᠯ ᠡᠪᠦᠭᠡᠨ ᠵᠠᠯᠠᠭᠤ ᠠᠩᠴᠢᠨ ᠰᠢᠭ᠋ ᠲᠡᠭᠦᠰᠬᠡᠯ ᠢ᠋ ᠣᠯᠵᠤ᠂ ᠬᠠᠰᠢᠭ ᠮᠠᠭᠤ ᠪᠠᠷ ᠶᠠᠭᠤᠮᠠ ᠶ᠋ᠢ ᠬᠠᠢᠷᠠᠯᠠᠪᠠᠯ ᠲᠡᠷᠡ ᠬᠤᠯᠵᠢᠨ ᠦᠨᠡᠭᠡ ᠰᠢᠭ ᠳᠠᠭᠤᠰᠴᠤ᠂ ᠡᠷᠡ ᠡᠮᠡ ᠬᠣᠶᠠᠷ ᠨᠢᠭᠡ ᠨᠢᠭᠡᠨ ᠢ᠋ᠶ᠋ᠡᠨ ᠬᠠᠷᠠᠳᠠᠪᠠᠯ ᠲᠡᠷᠡ ᠡᠷᠡ ᠡᠮᠡ ᠥᠬᠢᠨ ᠴᠠᠭᠠᠨ ᠬᠤᠯᠤᠭᠠᠨᠠ ᠰᠢᠭ᠋ ᠲᠡᠭᠦᠰᠬᠡᠯ ᠢ᠋ ᠣᠯᠤᠨᠠ ᠭᠡᠵᠦ ᠬᠥᠮᠦᠨ ᠪᠦᠬᠦᠨ ᠠᠮᠢᠲᠠᠨ ᠪᠦᠬᠦᠨ ᠳ᠋ᠦ᠍ ᠡᠨᠡ ᠬᠡᠷᠡᠭ ᠢ᠋ ᠮᠡᠳᠡᠭᠦᠯᠬᠦ ᠭᠡᠵᠦ ᠬᠥᠪᠴᠢ ᠶ᠋ᠢᠨ ᠰᠠᠭᠯᠠᠭᠠᠷ ᠢ᠋ ᠳᠠᠮᠵᠢᠨ ᠬᠥᠨᠳᠡᠢ ᠳᠦᠭᠦᠷᠡᠩ ᠬᠦᠩᠭᠢᠨᠡᠮᠡ ᠬᠣᠭᠣᠯᠠᠢ ᠪᠠᠷ ᠳᠠᠭᠤᠯᠠᠬᠤ ᠪᠣᠯᠵᠤ ᠭᠡᠨᠡ᠃
ᠢᠷᠡᠯᠲᠡ᠄ ᠪᠠᠭᠠᠷᠢᠨ ᠠᠷᠠᠳ ᠤ᠋ᠨ ᠦᠯᠢᠭᠡᠷ ᠳᠣᠮᠣᠭ
ᠨᠠ᠊· ᠪᠣᠶᠠᠨᠬᠡᠰᠢᠭ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠬᠡᠪᠯᠡᠭᠦᠯᠦᠨ ᠲᠠᠷᠬᠠᠭᠠᠪᠠ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠢᠨᠬᠤᠸᠠ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠪᠣᠷᠣᠯᠠᠭᠤᠯᠤᠨᠠ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠰᠢᠳᠠ ᠨᠡᠷᠡᠮᠵᠢᠲᠦ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠬᠦ ᠪᠦᠷᠢᠨ ᠪᠤᠰᠤ ᠬᠠᠷᠢᠭᠤᠴᠠᠯᠭᠠᠲᠤ ᠺᠣᠮᠫᠠᠨᠢ ᠬᠡᠪᠯᠡᠪᠡ
2007 ᠣᠨ ᠤ᠋11 ᠰᠠᠷᠠ ᠳ᠋ᠤ᠌ ᠠᠩᠬᠠᠳᠤᠭᠠᠷ ᠬᠡᠪ ᠢ᠋ ᠬᠢᠪᠡ
2010 ᠣᠨ ᠤ᠋ 3 ᠰᠠᠷᠠ ᠳ᠋ᠤ᠌ ᠬᠣᠶᠠᠳᠤᠭᠠᠷ ᠤᠳᠠᠭᠠ ᠬᠡᠪᠯᠡᠪᠡ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠱᠠᠭᠰᠠᠯ
ᠬᠢᠨᠠᠭᠴᠢ᠄ ᠵ᠂ ᠪᠤᠶᠠᠨᠲᠣᠭᠲᠠᠬᠤ ᠰᠡᠬᠡᠭᠡᠷᠡᠯ᠂ ᠳᠡᠭᠵᠢᠨ