ᠣᠷᠣᠢ ᠦᠭᠡᠢ ᠰᠦᠮᠡ – ᠠᠷᠪᠠᠨ ᠨᠠᠢ᠍ᠮᠠ ᠂ ᠶᠢᠷᠲᠢᠨᠴᠦ ᠥᠩᠭᠡᠷᠡᠭᠰᠡᠨ ᠪᠠ ᠥᠯᠥ᠍ ᠥᠩᠭᠡᠷᠡᠭᠰᠡᠨ ᠵᠠᠢ ᠳᠤ Оройгүй сүм – Арваннайм ᠂ Ертөнц өнгөрсөн ба үл өнгөрсөн зайд - Oroigui sum 18
1075ᠠᠷᠪᠠᠨ ᠨᠠᠢ᠍ᠮᠠ ᠂ ᠶᠢᠷᠲᠢᠨᠴᠦ ᠥᠩᠭᠡᠷᠡᠭᠰᠡᠨ ᠪᠠ ᠥᠯᠥ᠍ ᠥᠩᠭᠡᠷᠡᠭᠰᠡᠨ ᠵᠠᠢ ᠳᠤ
ᠦᠬᠦᠭᠰᠡᠨ ᠬᠥᠮᠦᠨ ᠳ᠋ᠦ᠍ ᠳᠡᠷᠡ ᠬᠣᠯᠠ
ᠦᠭᠡᠢᠷᠡᠭᠰᠡᠨ ᠬᠥᠮᠦᠨ ᠳ᠋ᠦ᠍ ᠶᠠᠭᠤᠮᠠ ᠬᠣᠯᠠ
ᠶᠢᠷᠲᠢᠨᠴᠦ ᠶ᠋ᠢᠨ ᠡᠪᠦᠭᠡ ᠡᠴᠢᠭᠡ᠂ ᠭᠤᠷᠪᠠᠨ ᠣᠷᠣᠨ ᠤ᠋ ᠡᠵᠡᠨ ᠯᠢᠭᠳᠡᠨᠸᠠᠩᠴᠢᠭᠴᠢᠮᠪᠤ᠂ ᠮᠠᠬᠠᠰᠤᠸᠠᠷ ᠸᠠᠩ ᠪᠣᠯᠪᠠᠰᠤ ᠪᠡᠶᠡ ᠶ᠋ᠢᠨ ᠥᠩᠭᠡ ᠤᠯᠠᠭᠠᠨ᠂ ᠡᠬᠡ ᠤᠮᠠᠳᠢᠸᠢ ᠤᠯᠠᠭᠠᠨ ᠲᠠᠢ ᠤᠴᠠᠷᠠᠭᠰᠠᠨ ᠱᠠᠮᠫᠤᠷᠠᠯᠸᠠᠩᠵᠢᠳ ᠪᠤᠶᠤ ᠪᠤᠰᠤᠳ ᠤ᠋ᠨ ᠬᠤᠪᠢᠯᠤᠭᠰᠠᠨ ᠳ᠋ᠤ᠌ ᠪᠠᠶᠠᠰᠤᠭ᠍ᠴᠢ ᠲᠩᠷᠢ ᠶᠢᠨ ᠣᠷᠣᠨ ᠳ᠋ᠤ᠌ ᠣᠷᠣᠰᠢᠮᠤᠢ! ᠭᠡᠵᠦ ᡀᠠᠷᠠᠮᠪᠠ ᠭᠡᠨᠳᠡᠨᠪᠠᠯᠳᠠᠨ ᠨᠠᠮᠤᠭᠤᠬᠠᠨ ᠪᠣᠯᠪᠠᠴᠤ ᠰᠦᠷᠯᠢᠭ ᠳᠠᠭᠤ ᠪᠠᠷ ᠨᠣᠮᠯᠠᠪᠠ᠃ ᠰᠠᠩᠵᠢ ᠭᠡᠰᠦᠯ ᠬᠣᠶᠠᠭᠤᠯᠠᠬᠠᠨ ᠢ᠋ᠶ᠋ᠠᠨ ᠪᠠᠢᠭᠠ ᠲᠤᠯᠠ ᡀᠠᠷᠠᠮᠪᠠ ᠳ᠋ᠤ᠌ ᠴᠢᠩᠭᠠ ᠶᠠᠷᠢᠬᠤ ᠱᠠᠭᠠᠷᠳᠠᠯᠭᠠ ᠥᠬᠡᠢ ᠠᠵᠢ᠃ ᠰᠠᠩᠵᠢ ᠭᠡᠰᠦᠯ ᠢ᠋ ᠰᠢᠯᠭᠠᠨ ᠰᠢᠭᠦᠬᠦ ᠳ᠋ᠡᠭᠡᠨ ᠭᠡᠨᠳᠡᠨᠪᠠᠯᠳᠠᠨ ᡀᠠᠷᠠᠮᠪᠠ ᠲᠡᠭᠦᠨ ᠦ᠌ ᠣᠢ ᠰᠠᠢᠲᠠᠢ᠂ ᠰᠡᠷᠭᠦᠯᠡᠩ ᠤᠬᠠᠭᠠᠨ ᠲᠠᠢ ᠳᠤ ᠪᠢᠰᠢᠷᠡᠵᠦ ᠥᠪᠡᠷ ᠦ᠋ᠨ ᠱᠠᠪᠢ ᠪᠣᠯᠭᠠᠬᠤ ᠪᠠᠷ ᠥᠮᠴᠢᠯᠡᠨ ᠠᠪᠴᠠᠢ᠃《ᠡᠨᠡ ᠰᠠᠢᠨ ᠯᠠᠮᠠ ᠪᠣᠯᠵᠤ ᠮᠠᠭᠠᠳ ᠦᠭᠡᠢ ᠶᠦᠮ᠃ ᠪᠢ ᠱᠠᠪᠢ ᠪᠠᠨ ᠪᠣᠯᠭᠠᠭᠠᠳ ᠨᠣᠮ ᠵᠢᠭᠠᠭᠠᠳ ᠦᠵᠡᠶᠡ》 ᠭᠡᠵᠦ ᡀᠠᠷᠠᠮᠪᠠ ᠱᠠᠰᠢᠨ ᠤ᠋ ᠵᠠᠬᠢᠷᠭᠠᠨ ᠠ᠋ᠴᠠ ᠭᠤᠶᠤᠵᠤ ᠵᠥᠪᠰᠢᠶᠡᠷᠡᠭᠦᠯᠵᠡᠢ᠃ ᠳᠡᠷᠡᠨ ᠡᠴᠡ ᠬᠣᠢᠰᠢ ᠰᠠᠩᠵᠢ ᡀᠠᠷᠠᠮᠪᠠ ᠶ᠋ᠢᠨ ᠭᠡᠷ ᠲᠦ᠍ ᠪᠦᠲᠦᠭᠡᠯ ᠦ᠋ᠨ ᠰᠦᠮᠡ ᠭᠡᠵᠦ ᠲᠡᠭᠦᠨ ᠦ᠌ ᠨᠡᠷᠡᠯᠡᠭᠰᠡᠨ ᠪᠢᠴᠢᠬᠠᠨ ᠥᠷᠥᠭᠡᠨ ᠳᠦ ᠰᠠᠭᠤᠵᠤ ᠭᠠᠭᠴᠠᠭᠠᠷᠴᠢᠯᠠᠨ ᠨᠣᠮ ᠵᠢᠭᠠᠯᠭᠠᠬᠤ ᠪᠣᠯᠵᠠᠢ᠃ ᠡᠨᠡ ᠨᠢ ᠭᠡᠷ ᠣᠷᠣᠨ ᠢ᠋ᠶ᠋ᠠᠨ ᠰᠠᠨᠠᠵᠤ᠂ ᠬᠠᠷᠠ ᠪᠣᠷᠣ ᠠᠮᠢᠳᠤᠷᠠᠯ ᠤ᠋ᠨ ᠡᠯᠳᠡᠪ ᠰᠠᠭᠠᠳ ᠲᠦᠢᠳᠬᠡᠷ ᠲᠦ᠍ ᠳᠠᠭᠠᠷᠢᠭᠳᠠᠨ ᠰᠡᠳᠬᠢᠯ ᠰᠠᠨᠠᠭᠠ ᠲᠣᠭᠲᠠᠪᠤᠷᠢ ᠦᠭᠡᠢ ᠪᠣᠯᠵᠤ ᠡᠬᠢᠯᠡᠵᠦ ᠪᠠᠢᠭ᠍ᠰᠠᠨ ᠰᠠᠩᠵᠢ ᠭᠡᠰᠦᠯ ᠢ᠋ ᠣᠭᠲᠣ ᠥᠭᠡᠷᠡ ᠶᠢᠷᠲᠢᠨᠴᠦ ᠳ᠋ᠤ᠌ ᠠᠪᠠᠴᠢᠭᠰᠠᠨ ᠮᠡᠲᠦ ᠪᠣᠯᠭᠠᠭᠰᠠᠨ ᠲᠤᠯᠠ ᠲᠡᠭᠦᠨ ᠦ᠌ ᠪᠠᠢᠳᠠᠯ ᠢ᠋ ᠡᠷᠭᠢᠭᠦᠯᠦᠨ ᠨᠣᠮ ᠡᠷᠳᠡᠮ ᠦ᠋ᠨ ᠮᠥᠷ ᠢ᠋ᠶ᠋ᠡᠨ ᠳᠠᠬᠢᠨ ᠬᠥᠭᠡᠭᠡᠵᠦ ᠶᠠᠪᠤᠬᠤ ᠵᠠᠮ ᠳ᠋ᠤ᠌ ᠨᠢ ᠰᠢᠯᠤᠭᠤᠳᠬᠠᠵᠤ ᠥᠭᠴᠡᠢ᠃ ᠬᠥᠯ ᠦᠢᠮᠡᠭᠡᠨ ᠪᠠᠢᠬᠤ ᠦᠭᠡᠢ᠂ ᠭᠠᠭᠴᠠᠬᠦ ᡀᠠᠷᠠᠮᠪᠠ ᠶ᠋ᠢᠨ ᠵᠢᠭᠠᠬᠤ ᠵᠦᠢᠯ ᠢ᠋ ᠠᠩᠬᠠᠷᠬᠤ ᠠ᠋ᠴᠠ ᠥᠭᠡᠷᠡ ᠰᠠᠳᠠᠭᠠᠷᠠᠬᠤ ᠰᠢᠯᠲᠠᠭᠠᠨ ᠦᠭᠡᠢ ᠪᠠᠰᠠᠴᠤ ᠲᠡᠳᠡᠨ ᠦ᠌ ᠬᠢ ᠪᠠᠢᠳᠠᠯ ᠵᠣᠬᠢᠰᠲᠠᠢ ᠲᠣᠬᠢᠯᠢᠭ ᠲᠤᠯᠠ ᠰᠠᠩᠵᠢ ᡀᠠᠷᠠᠮᠪᠠ ᠶᠢᠨ ᠳᠤᠭᠤᠯᠭᠠᠪᠤᠷᠢᠲᠠᠢ ᠱᠠᠪᠢ ᠪᠣᠯᠵᠠᠢ᠃ ᠠᠭᠢ ᠶᠣᠰᠣᠨ ᠤ᠋ ᠨᠣᠮ ᠭᠡᠭᠳᠡᠭᠰᠡᠨ ᠪᠤᠷᠬᠠᠳ ᠤ᠋ᠨ ᠨᠠᠮᠲᠠᠷ᠂ ᠶᠢᠷᠲᠢᠨᠴᠦ ᠶ᠋ᠢᠨ ᠤᠴᠢᠷ ᠰᠢᠯᠲᠠᠭᠠᠨ ᠤ᠋ ᠨᠣᠮᠯᠠᠯ ᠢ᠋ ᡀᠠᠷᠠᠮᠪᠠ ᠵᠢᠭᠠᠵᠤ ᠡᠬᠢᠯᠡᠭᠰᠡᠨ ᠠᠵᠢ᠃
ᠠᠮᠤᠷᠯᠢᠩᠭᠤᠢ ᠳᠦᠷᠢ ᠲᠡᠢ ᠳᠥᠴᠢᠨ ᠬᠤᠶᠠᠷ᠂ ᠳᠣᠭᠰᠢᠨ ᠳᠦᠷᠢ ᠲᠡᠢ ᠲᠠᠪᠢᠨ ᠨᠠᠢ᠍ᠮᠠ᠂ ᠪᠦᠭᠦᠳᠡ ᠨᠢᠭᠡᠨ ᠵᠠᠭᠤᠨ ᠪᠤᠷᠬᠠᠳ ᠮᠥᠨ ᠲᠡᠳᠡᠨ ᠲᠡᠢ ᠵᠥᠷᠢᠴᠡᠯᠳᠦᠨ᠂ ᠰᠦᠯᠪᠡᠯᠳᠦᠨ ᠣᠷᠣᠰᠢᠬᠤ ᠣᠯᠠᠨ ᠠᠷᠪᠠᠨ ᠮᠠᠩᠭᠤᠰ᠂ ᠰᠢᠮᠨᠤ᠂ ᠮᠠᠮ᠂ ᠶᠠᠭᠴᠢᠰ᠂ ᠳᠠᠭᠢᠨᠢᠰ ᠡᠷᠯᠢᠭ ᠦ᠋ᠳ ᠦ᠋ᠨ ᠭᠠᠷᠤᠯ ᠡᠭᠦᠰᠦᠯ᠂ ᠳᠦᠷᠢ ᠪᠠᠢᠳᠠᠯ᠂ ᠵᠡᠪᠰᠡᠭ ᠬᠡᠷᠡᠭᠯᠡᠯ᠂ ᠬᠣᠲᠠ ᠮᠠᠨᠳᠠᠯ᠂ ᠢᠳᠢ ᠰᠢᠳᠢ ᠶ᠋ᠢᠨ ᠲᠤᠬᠠᠢ ᡀᠠᠷᠠᠮᠪᠠ ᠦᠭᠡ ᠦᠰᠦᠭ ᠳᠠᠷᠠᠭᠠᠯᠠᠨ ᠴᠡᠭᠡᠵᠢᠯᠡᠭᠦᠯᠵᠦ ᠪᠠᠢᠯᠠ᠃ ᠨᠢᠭᠡ ᠰᠠᠨᠠᠬᠤ ᠳ᠋ᠤ᠌ ᠰᠣᠨᠢᠨ ᠦᠯᠢᠭᠡᠷ ᠴᠤ᠌ ᠶᠤᠮ ᠰᠢᠭ᠋᠂ ᠨᠥᠭᠦᠭᠡ ᠰᠠᠨᠠᠬᠤ ᠳᠤ ᠲᠣᠯᠣᠭᠠᠢ ᠡᠷᠭᠢᠮᠡ ᠡᠮᠬᠢ ᠵᠠᠮᠪᠠᠷᠠᠭᠠ ᠦᠭᠡᠢ ᠣᠯᠠᠨ ᠢᠳᠢ ᠰᠢᠳᠢᠲᠡᠨ ᠬᠣᠷᠸᠠ ᠳᠡᠯᠡᠬᠡᠢ ᠶᠢ ᠡᠵᠡᠩᠨᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠬᠤ ᠪᠠᠷ ᠰᠡᠳᠬᠢᠭᠳᠡᠯ ᠢ᠋ ᡀᠠᠷᠠᠮᠪᠠ ᠲᠥᠷᠦᠭᠦᠯᠵᠦ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠶᠠᠷᠢᠬᠤ ᠨᠢ ᠰᠣᠨᠢᠷᠬᠠᠯᠲᠠᠢ ᠪᠣᠯᠪᠠᠴᠤ ᠤᠬᠠᠭᠠᠷᠠᠬᠤ ᠳ᠋ᠤ᠌ ᠪᠡᠷᠬᠡ ᠪᠠᠢᠯᠠ᠃ ᠭᠡᠪᠡᠴᠦ ᠪᠢᠴᠢᠬᠠᠨ ᠥᠷᠥᠭᠡᠨ ᠦ᠌ ᠪᠡᠨ ᠬᠠᠨᠠᠨ ᠳ᠋ᠤ᠌ ᠪᠠᠰᠠ ᠠᠲᠠᠷ ᠠ᠋ᠴᠠ ᠨᠢ ᠣᠯᠠᠨ ᠠᠷᠪᠠᠨ ᠪᠤᠷᠬᠠᠳ ᠤᠨ ᠬᠥᠷᠥᠭ ᠳᠡᠭᠦᠵᠢᠯᠡᠭᠰᠡᠨ ᠤᠴᠢᠷ ᠲᠡᠷᠡ ᠵᠢᠷᠤᠭ ᠳᠡᠭᠡᠷᠡ ᠡᠴᠡ ᠪᠡᠨ ᠪᠡᠶᠡᠴᠢᠯᠡᠨ ᠵᠢᠭᠠᠵᠤ ᠥᠭᠳᠡᠭ ᠰᠠᠢᠨ ᠲᠠᠯᠠ ᠲᠠᠢ ᠤᠴᠢᠷ ᠠ᠋ᠴᠠ ᡀᠠᠷᠠᠮᠪᠠ ᠭᠡᠨᠳᠡᠨᠪᠠᠯᠳᠠᠨ ᠱᠠᠪᠢ ᠳ᠋ᠠᠭᠠᠨ ᠵᠢᠭᠠᠭᠰᠠᠨ ᠨᠣᠮ ᠢ᠋ᠶ᠋ᠠᠨ ᠪᠦᠷᠢᠨ ᠤᠬᠠᠭᠠᠷᠠᠭᠤᠯᠵᠤ ᠰᠠᠯᠳᠠᠭ ᠬᠥᠮᠦᠨ ᠪᠠᠢᠵᠠᠢ᠃
- ᠰᠠᠶᠢ ᠶ᠋ᠢᠨ ᠮᠢᠨᠦ ᠬᠡᠯᠡᠭᠰᠡᠨ ᠶᠢᠷᠲᠢᠨᠴᠦ ᠶ᠋ᠢᠨ ᠡᠵᠡᠨ ᠮᠠᠬᠠᠰᠤᠸᠠᠷ ᠡᠨᠡ ᠪᠠᠢᠨᠠ! ᠭᠡᠵᠦ ᡀᠠᠷᠠᠮᠪᠠ ᠥᠷᠥᠭᠡᠨ ᠦ᠌ ᠪᠡᠨ ᠠᠲᠠᠷ ᠤ᠋ᠨ ᠭᠣᠣᠯ ᠠ᠋ᠴᠠ ᠳᠡᠭᠦᠵᠢᠯᠡᠭᠡᠰᠦᠲᠡᠢ ᠪᠠᠢᠭᠠ ᠬᠥᠷᠥᠭ ᠢ ᠵᠢᠭᠠᠯᠠ᠃ ᠤᠮᠠᠳᠢᠸᠢ ᠭᠡᠳᠡᠭ ᠡᠮᠡ ᠶᠢ ᠢᠷᠪᠠᠢᠨ ᠲᠡᠪᠡᠷᠢᠭᠰᠡᠨ ᠤᠯᠠᠭᠠᠨ ᠥᠩᠭᠡ ᠶ᠋ᠢᠨ ᠳᠣᠭᠰᠢᠨ ᠰᠦᠷᠯᠢᠭ ᠪᠤᠷᠬᠠᠨ ᠤ᠋ ᠵᠢᠷᠤᠭ ᠪᠠᠢᠯᠠ᠃ ᠲᠡᠷᠡ ᠮᠠᠬᠠᠰᠤᠸᠠᠷ ᠠᠵᠢ᠃ ᠲᠡᠭᠦᠨ ᠦ᠌ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠨᠢ ᠣᠯᠠᠨ ᠪᠤᠷᠬᠠᠳ ᠤ᠋ᠨ ᠵᠢᠷᠤᠭ ᠪᠠᠢᠷᠢᠯᠠᠭᠤᠯᠵᠠᠢ᠃
- ᠡᠷᠭᠢᠨ ᠲᠣᠭᠣᠷᠢᠨ ᠤ᠋ ᠪᠤᠷᠬᠠᠳ ᠤ᠋ᠨ ᠤᠴᠢᠷ ᠢ᠋ ᠶᠠᠷᠢᠰᠤᠭᠠᠢ᠃ ᠰᠦᠮᠪᠦᠷ ᠠᠭᠤᠯᠠ ᠶ᠋ᠢᠨ ᠳᠤᠮᠳᠠ ᠣᠷᠣᠰᠢᠭᠴᠢ ᠪᠣᠯ ᠨᠠᠰᠤ ᠪᠤᠶᠠᠨ ᠳᠡᠯᠭᠡᠷᠡᠭᠦᠯᠬᠦ ᠵᠠᠪ ᠪᠥᠭᠡᠳ ᠪᠡᠶᠡ ᠶ᠋ᠢᠨ ᠥᠩᠭᠡ ᠰᠢᠷᠠ᠂ ᠡᠬᠡ ᠢᠭᠠᠽᠠᠳᠢᠷᠣᠯᠵᠢᠭᠮᠠ ᠲᠠᠢ ᠤᠴᠠᠷᠠᠭᠰᠠᠨ᠃ ᠰᠦᠮᠪᠦᠷ ᠠᠭᠤᠯᠠ ᠶ᠋ᠢᠨ ᠵᠡᠭᠦᠨ ᠬᠣᠢᠨᠠ ᠣᠷᠣᠰᠢᠭᠴᠢ ᠵᠠᠪ ᠪᠣᠯᠪᠠᠰᠤ ᠪᠡᠶᠡ ᠶ᠋ᠢᠨ ᠥᠩᠭᠡ ᠴᠠᠭᠠᠨ᠂ ᠪᠠᠰᠠ ᠴᠠᠭᠠᠨ ᠡᠬᠡᠨᠡᠷ ᠴᠤᠮᠠᠭᠠᠷᠠᠪ ᠲᠠᠢ ᠤᠴᠠᠷᠠᠭᠰᠠᠨ᠃ ᠽᠠᠮᠪᠤᠲᠢᠪ ᠤ᠋ᠨ ᠳᠤᠮᠳᠠ ᠣᠷᠣᠰᠢᠭᠴᠢ ᠳ᠋ᠠᠭᠪᠠ ᠪᠤᠷᠬᠠᠨ ᠪᠣᠯ ᠪᠡᠶᠡ ᠶ᠋ᠢᠨ ᠥᠩᠭᠡ ᠬᠠᠷᠠ᠂ ᠡᠬᠡ ᠳ᠋ᠤᠶ᠋ᠢᠴᠮᠠ ᠲᠠᠢ ᠤᠴᠠᠷᠠᠭᠰᠠᠨ ᠁ ᠭᠡᠵᠦ ᡀᠠᠷᠠᠮᠪᠠ ᠲᠠᠢᠯᠪᠤᠷᠢᠯᠠᠪᠠ᠃ ᠲᠡᠳᠡᠭᠡᠷ ᠳᠣᠭᠰᠢᠨ ᠳᠦᠷᠢ ᠲᠡᠢ ᠪᠤᠷᠬᠠᠳ ᠲᠤᠰ ᠪᠦᠷᠢ ᠶ᠋ᠢ ᠨᠢᠭᠡ ᠨᠢᠭᠡᠨ ᠡᠮᠡᠭᠲᠡᠢ ᠬᠥᠮᠦᠨ ᠢ᠋ ᠲᠡᠪᠡᠷᠢᠭᠰᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠵᠢᠷᠤᠭᠰᠠᠨ ᠢ᠋ 《ᠡᠬᠡ ᠴᠤᠮᠠᠭᠠᠷᠪᠠ ᠲᠠᠢ ᠡᠰᠡᠪᠡᠯ ᠳ᠋ᠤᠶ᠋ᠢᠴᠮᠠ ᠲᠠᠢ ᠤᠴᠠᠷᠠᠭᠰᠠᠨ》 ᠭᠡᠵᠦ ᡀᠠᠷᠠᠮᠪᠠ ᠲᠠᠢᠯᠪᠤᠷᠢᠯᠠᠬᠤ ᠳ᠋ᠤ᠌ ᠰᠠᠩᠵᠢ ᠭᠠᠢᠬᠠᠵᠠᠢ᠃
- ᠨᠣᠮ ᠢ᠋ ᠦᠵᠡᠬᠦ ᠳ᠋ᠦ᠍ ᠡᠬᠢᠨ ᠳ᠋ᠦ᠍ ᠨᠢ ᠭᠠᠢᠬᠠᠬᠤ ᠪᠤᠰᠤ ᠭᠦᠨ ᠤᠴᠢᠷ ᠢ᠋ ᠣᠢᠯᠠᠭᠠᠨ ᠤᠬᠠᠭᠠᠷᠠᠭᠰᠠᠨ ᠤ᠋ ᠡᠴᠦᠰ ᠲᠦ ᠭᠠᠢᠬᠠᠪᠠᠰᠤ ᠵᠣᠬᠢᠨᠠ ᠭᠡᠵᠦ ᡀᠠᠷᠠᠮᠪᠠ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ:
- ᠣᠭᠲᠠᠷᠭᠤᠢ ᠠ᠋ᠴᠠ ᠲᠩᠷᠢ ᠳᠥᠷᠪᠡ᠂ ᠦᠨᠦᠷ ᠢᠳᠡᠭᠴᠢ ᠳ᠋ᠢᠰᠠ ᠳᠥᠷᠪᠡ ᠭᠠᠷᠴᠤ ᠨᠠᠢ᠍ᠮᠠᠨ ᠶᠡᠬᠡ ᠣᠷᠣᠨ ᠢ᠋ ᠪᠠᠷᠢᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠢ᠋ ᠳᠠᠭᠢᠨᠢᠰ ᠤ᠋ᠨ ᠣᠷᠣᠨ ᠭᠡᠵᠦ ᠠᠯᠳᠠᠷᠰᠢᠭᠤᠯᠤᠯᠠ ᠭᠡᠳ ᠵᠢᠷᠤᠭ ᠳᠡᠭᠡᠷᠡᠬᠢ ᠨᠠᠢ᠍ᠮᠠᠨ ᠶᠠᠩᠵᠤ ᠶ᠋ᠢᠨ ᠳᠦᠷᠰᠦ ᠶ᠋ᠢ ᠵᠢᠭᠠᠯᠠ᠃
- ᠶᠠᠭᠴᠢᠮ ᠳᠥᠷᠪᠡ᠂ ᠰᠡᠷᠡᠨᠪᠤ ᠮᠠᠩᠭᠤᠰ ᠳᠥᠷᠪᠡ ᠭᠠᠵᠠᠷ ᠳᠡᠭᠡᠷᠡ ᠡᠴᠡ ᠭᠠᠷᠴᠤ ᠨᠠᠢ᠍ᠮᠠᠨ ᠶᠡᠬᠡ ᠣᠷᠣᠨ ᠢ᠋ ᠡᠵᠡᠯᠡᠰᠦᠨ ᠢ᠋ ᠭᠠᠵᠠᠷ ᠡᠵᠡᠯᠡᠬᠦ ᠣᠷᠣᠨ ᠭᠡᠬᠦ ᠪᠣᠯᠵᠠᠢ ᠭᠡᠵᠦ ᠴᠠᠭᠠᠰᠢ ᠨᠢ ᠨᠣᠮᠯᠠᠪᠠ᠃ ᠰᠠᠩᠵᠢ ᠴᠡᠭᠡᠵᠢᠯᠡᠨ ᠳᠠᠭᠤ ᠦᠭᠡᠢ ᠰᠠᠭᠤᠵᠤ ᠪᠠᠢᠯᠠ᠃ ᡀᠠᠷᠠᠮᠪᠠ:
- ᠳᠥᠷᠪᠡᠨ ᠶᠡᠬᠡ ᠯᠤᠤᠰ ᠪᠠ ᠠᠰᠠᠷ ᠨᠠᠷᠠ ᠳᠥᠷᠪᠡ ᠭᠠᠵᠠᠷ ᠳᠣᠣᠷᠠ ᠠ᠋ᠴᠠ ᠭᠠᠷᠴᠤ ᠨᠠᠢ᠍ᠮᠠᠨ ᠶᠡᠬᠡ ᠣᠷᠣᠨ ᠢ ᠡᠵᠡᠮᠳᠡᠭᠰᠡᠨ ᠢ᠋ ᠭᠠᠵᠠᠷ ᠳᠣᠣᠷᠠ ᠡᠲ᠌ᠯᠡᠬᠦ ᠯᠤᠤᠰ ᠤ᠋ᠨ ᠣᠷᠣᠨ ᠭᠡᠵᠦ ᠠᠯᠳᠠᠷᠰᠢᠭᠤᠯᠤᠯᠠ ᠬᠡᠮᠡᠨ ᠨᠣᠮᠯᠠᠭᠠᠳ ᠯᠤᠤᠰ ᠤ᠋ᠨ ᠣᠷᠣᠨ ᠤ᠋ ᠵᠢᠷᠤᠭ ᠢ᠋ ᠵᠢᠭᠠᠯᠠ᠃
- ᠭᠶᠠᠨᠢᠷᠠᠢ ᠪᠤᠶᠤ ᠡᠭᠦᠳᠡ ᠵᠠᠪᠰᠠᠷ ᠤ᠋ᠨ ᠳᠥᠷᠪᠡ ᠪᠠ ᠫᠠᠷᠠᠢᠮᠠᠨ ᠭᠡᠬᠦ ᠡᠮ ᠮᠠᠮ ᠨᠡᠢᠯᠡᠵᠦ ᠳ᠋ᠦ᠋ᠷᠲ᠋ᠠᠳ᠋ ᠦ᠋ᠨ ᠪᠤᠶᠤ ᠦᠬᠦᠭᠡᠷ ᠦ᠋ᠨ ᠣᠷᠣᠨ ᠪᠠᠷᠢᠭᠰᠠᠨ ᠨᠢ ᠡᠨᠡ ᠭᠡᠵᠦ ᡀᠠᠷᠠᠮᠪᠠ ᠵᠢᠭᠠᠭᠰᠠᠨ ᠢ᠋ᠶ᠋ᠠᠷ ᠶᠢᠷᠲᠢᠨᠴᠦ ᠶ᠋ᠢᠨ ᠪᠦᠬᠦᠢ ᠯᠡ ᠬᠤᠪᠢᠶᠠᠷᠢ ᠶ᠋ᠢ ᠰᠠᠩᠵᠢ ᠳ᠋ᠤ᠌ ᠨᠢᠭᠡᠳᠬᠡᠨ ᠣᠢᠯᠠᠭᠤᠯᠤᠯᠠ ᠭᠡᠵᠦ ᠦᠵᠡᠪᠡ᠃ ᠨᠢᠭᠡ ᠪᠣᠳᠣᠬᠤ ᠳ᠋ᠤ᠌ ᠰᠣᠨᠢᠨ ᠴᠤ᠌ ᠶᠤᠮ ᠰᠢᠭ᠋᠂ ᠨᠢᠭᠡ ᠪᠣᠳᠣᠬᠤ ᠳ᠋ᠤ᠌ ᠱᠠᠯ ᠳᠡᠮᠡᠢ ᠠᠵᠢ᠃
ᠪᠤᠷᠬᠠᠳ ᠤ᠋ᠨ ᠪᠤᠶᠤ ᠲᠩᠷᠢ ᠶ᠋ᠢᠨ ᠣᠷᠣᠨ᠂ ᠳᠠᠭᠢᠨᠢᠰ ᠤ᠋ᠨ ᠣᠷᠣᠨ᠂ ᠭᠠᠵᠠᠷ ᠡᠲ᠌ᠯᠡᠬᠦ ᠣᠷᠣᠨ ᠯᠤᠤᠰ ᠤ᠋ᠨ ᠣᠷᠣᠨ᠂ ᠦᠬᠦᠭᠡᠷ ᠦ᠋ᠨ ᠣᠷᠣᠨ ᠭᠡᠵᠦ ᠪᠠᠢᠳᠠᠭ ᠲᠡᠷᠡ ᠪᠦᠬᠦᠨ ᠢ᠋ ᠡᠵᠡᠩᠨᠡᠭᠰᠡᠨ ᠪᠤᠷᠬᠠᠳ᠂ ᠳᠠᠭᠢᠨᠢᠰ᠂ ᠯᠤᠤᠰ ᠰᠠᠪᠳᠠᠭ ᠲᠠᠢ ᠭᠡᠮᠡᠨ ᠰᠠᠩᠵᠢ ᠶᠡᠷᠦᠩᠬᠡᠢ ᠳ᠋ᠦ᠍ ᠨᠢ ᠲᠣᠳᠣᠷᠠᠭᠤᠯᠤᠨ ᠲᠣᠭᠲᠠᠭᠠᠵᠤ ᠠᠪᠴᠠᠢ᠃ ᠶᠢᠷᠲᠢᠨᠴᠦ ᠶ᠋ᠢ ᠲᠡᠭᠡᠵᠦ ᠠᠩᠭᠢᠯᠠᠨ ᠬᠤᠪᠢᠶᠠᠭᠰᠠᠨ ᠤ᠋ ᠳᠠᠷᠠᠭᠠ ᡀᠠᠷᠠᠮᠪᠠ ᠲᠡᠳᠡᠭᠡᠷ ᠢ ᠡᠵᠡᠩᠨᠡᠭᠰᠡᠨ ᠪᠤᠷᠬᠠᠳ᠂ ᠳᠠᠭᠢᠨᠢᠰ᠂ ᠯᠤᠤᠰ ᠰᠠᠪᠳᠠᠭ ᠤ᠋ᠨ ᠲᠤᠰ ᠪᠦᠷᠢ ᠶ᠋ᠢᠨ ᠰᠢᠨᠵᠢ ᠲᠥᠷᠬᠦ ᠶᠢ ᠵᠢᠭᠠᠬᠤ ᠪᠠᠷ ᠰᠢᠢᠳᠴᠡᠢ᠃ ᡀᠠᠷᠠᠮᠪᠠ ᠲᠡᠢᠨ ᠬᠦ᠌ ᠲᠣᠭᠰᠢᠨ ᠳᠦᠷᠢᠲᠦ ᠪᠤᠷᠬᠠᠳ ᠤ᠋ᠨ ᠭᠠᠷ ᠲᠤ ᠪᠠᠷᠢᠭᠠᠰᠤᠲᠠᠢ ᠵᠢᠷᠦᠬᠡ᠂ ᠪᠠᠳᠢᠷ ᠠᠶᠠᠭᠠ ᠲᠠᠢ ᠴᠢᠰᠤ᠂ ᠮᠥᠨ ᠵᠢᠷᠤᠭ ᠳᠡᠭᠡᠷᠡ ᠲᠠᠲᠠᠭᠰᠠᠨ ᠬᠡᠴᠡᠨ ᠡᠴᠡ ᠤᠨᠵᠢᠭᠤᠯᠤᠨ ᠳᠦᠷᠰᠦᠯᠡᠭᠰᠡᠨ ᠬᠥᠮᠦᠨ ᠦ᠌ ᠨᠢᠳᠦ᠂ ᠭᠠᠷ ᠬᠥᠯ ᠵᠡᠷᠭᠡ ᠡᠷᠬᠡᠲᠡᠨ ᠨᠦᠭᠦᠳ ᠢ᠋ ᠶᠠᠮᠠᠷ ᠤᠴᠢᠷ ᠲᠠᠢ ᠶ᠋ᠢ ᠶᠠᠷᠢᠪᠠ᠃
- ᠥᠪᠡᠷ ᠢ᠋ ᠪᠡᠨ ᠥᠮᠥᠭᠡᠷᠡᠬᠦ ᠶ᠋ᠢ ᠲᠠᠰᠤᠯᠬᠤ ᠶ᠋ᠢᠨ ᠲᠤᠯᠠᠳᠠ ᠴᠤᠯᠤ ᠵᠢᠷᠦᠬᠡ ᠶ᠋ᠢ ᠰᠤᠭᠤᠯᠤᠨ ᠪᠠᠷᠢᠭᠰᠠᠨ ; ᠥᠮᠴᠢᠯᠡᠬᠦ ᠰᠠᠨᠠᠭᠠ ᠶ᠋ᠢ ᠬᠠᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠡᠷᠬᠡᠲᠡᠨ ᠪᠦᠬᠦᠨ ᠢ᠋ ᠢᠯᠡ ᠭᠠᠷᠭᠠᠵᠤ ᠲᠠᠲᠠᠭᠰᠠᠨ; ᠮᠠᠭᠤ ᠦᠢᠯᠡ ᠶ᠋ᠢᠨ ᠠᠪᠢᠶᠠᠰ ᠢ᠋ ᠲᠠᠰᠤᠯᠬᠤ ᠶ᠋ᠢᠨ ᠲᠤᠯᠠᠳᠠ ᠦᠶᠡ ᠭᠡᠰᠢᠭᠦᠨ ᠢ᠋ ᠬᠡᠰᠡᠭᠯᠡᠨ ᠬᠡᠷᠴᠢᠭᠰᠡᠨ; ᠬᠦᠰᠡᠯ ᠲᠠᠴᠢᠶᠠᠯ ᠢ᠋ ᠳᠠᠷᠤᠬᠤ ᠪᠠᠷ ᠴᠢᠰᠤ ᠪᠦᠬᠦᠨ ᠢ᠋ ᠤᠤᠭᠤᠵᠤ;ᠠᠭᠤᠷ ᠢ᠋ ᠳᠠᠷᠤᠬᠤ ᠪᠠᠷ ᠶᠠᠰᠤ ᠪᠦᠬᠦᠨ ᠢ᠋ ᠲᠠᠰᠤᠯᠵᠤ ᠢᠳᠡᠭᠰᠡᠨ ᠤᠴᠢᠷ ᠲᠠᠢ ᠪᠢᠯᠡ ᠭᠡᠵᠦ ᡀᠠᠷᠠᠮᠪᠠ ᠨᠣᠮᠯᠠᠪᠠ᠃
ᠵᠢᠷᠤᠭ ᠳᠡᠭᠡᠷᠡ ᠮᠥᠨ ᠲᠡᠷᠡ ᠮᠡᠲᠦ ᠳᠦᠷᠰᠦᠯᠡᠭᠰᠡᠨ ᠲᠤᠯᠠ ᠰᠠᠩᠵᠢ ᠭᠡᠰᠦᠯ ᠳᠦ ᠣᠢᠯᠠᠭᠠᠮᠵᠢᠲᠠᠢ ᠪᠣᠯᠵᠠᠢ᠃ ᠭᠠᠭᠴᠠᠬᠦ ᠲᠡᠷᠡ ᠣᠯᠠᠨ ᠪᠤᠷᠬᠠᠳ᠂ ᠳᠠᠭᠢᠨᠢᠰ᠂ ᠶᠠᠭᠴᠢᠰ᠂ ᠮᠠᠩᠭᠤᠰ ᠲᠡᠷᠢᠭᠦᠲᠡᠨ ᠨᠢ ᠵᠢᠷᠤᠭ ᠳᠡᠭᠡᠷᠡ ᠲᠣᠳᠣᠷᠬᠠᠢ ᠪᠠᠢᠬᠤ ᠠ᠋ᠴᠠ᠂ ᠬᠥᠮᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠪᠡᠶᠡ ᠪᠡᠷ ᠦᠯᠦ ᠦᠵᠡᠭᠳᠡᠬᠦ ᠨᠢ ᠭᠠᠢᠬᠠᠰᠢ ᠲᠥᠷᠥᠭᠦᠯᠪᠡ᠃
- ᠪᠤᠷᠬᠠᠳ᠂ ᠶᠠᠭᠴᠢᠰ᠂ ᠮᠠᠩᠭᠤᠰ ᠲᠡᠷᠢᠭᠦᠲᠡᠨ ᠡᠯᠡ ᠣᠯᠠᠨ ᠢ᠋ ᠠᠯᠢᠪᠠ ᠬᠥᠮᠦᠨ ᠨᠢᠳᠦ ᠪᠡᠷ ᠦᠵᠡᠳᠡᠭ ᠪᠤᠶᠤ? ᠭᠡᠵᠦ ᠰᠠᠩᠵᠢ ᠭᠡᠨᠡᠳᠲᠡ ᠠᠰᠠᠭᠤᠴᠢᠬᠠᠵᠠᠢ᠃ ᡀᠠᠷᠠᠮᠪᠠ ᠴᠣᠴᠢᠬᠤ ᠰᠢᠭ᠋ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ:
- ᠡᠳᠡᠭᠡᠷ ᠢ᠋ ᠦᠵᠡᠬᠦ ᠶᠣᠰᠣᠲᠠᠢ ᠨᠢ ᠦᠵᠡᠵᠦ ᠪᠣᠯᠤᠨᠠ᠃ ᠦᠵᠡᠬᠦ ᠪᠤᠶᠠᠨ ᠦᠭᠡᠢ ᠨᠢ ᠦᠯᠦ ᠦᠵᠡᠮᠦᠢ᠃ ᠶᠡᠷᠦᠨᠢ ᠭᠠᠳᠠᠨᠠ ᠠ᠋ᠴᠠ ᠬᠠᠷᠠᠪᠠᠯ ᠳᠣᠲᠣᠷᠠᠬᠢ ᠲᠣᠳᠣᠷᠬᠠᠢ᠃ ᠳᠣᠲᠣᠷᠠ ᠠ᠋ᠴᠠ ᠬᠠᠷᠠᠪᠠᠯ ᠭᠠᠳᠠᠨᠠᠬᠢ ᠲᠣᠳᠣᠷᠬᠠᠢ᠃ ᠵᠣᠪᠠᠯᠠᠩ ᠢ᠋ ᠡᠳ᠋ᠯᠡᠯ ᠦᠭᠡᠢ ᠵᠢᠷᠭᠠᠯ ᠢ᠋ ᠦᠯᠦ ᠮᠡᠳᠡᠨᠡ᠃ ᠪᠤᠷᠬᠠᠨ ᠳ᠋ᠤ᠌ ᠰᠦᠵᠢᠭᠯᠡᠬᠦ ᠦᠭᠡᠢ ᠪᠡᠷ ᠪᠤᠷᠬᠠᠨ ᠢ᠋ ᠦᠯᠦ ᠦᠵᠡᠨᠡ᠃ ᠶᠢᠷᠲᠢᠨᠴᠦ ᠥᠩᠭᠡᠷᠡᠭᠰᠡᠨ ᠪᠣᠯᠤᠨ ᠦᠯᠦ ᠥᠩᠭᠡᠷᠡᠭᠰᠡᠨ ᠵᠠᠢ ᠵᠠᠪᠰᠠᠷ ᠲᠤ ᠣᠷᠣᠰᠢᠮᠤᠢ ᠭᠡᠵᠦ ᠨᠣᠮᠯᠠᠪᠠ᠃ ᠰᠠᠩᠵᠢ ᠡᠭᠦᠨ ᠦ᠌ ᠬᠠᠷᠢᠭᠤ ᠬᠡᠯᠡᠬᠦ ᠴᠢᠳᠠᠪᠤᠷᠢ ᠬᠦᠷᠦᠭᠰᠡᠨ ᠦᠭᠡᠢ ᠲᠤᠯᠠ ᠳᠠᠭᠤ ᠦᠭᠡᠢ ᠪᠣᠯᠤᠯᠠ᠃ ᡀᠠᠷᠠᠮᠪᠠ ᠴᠠᠰᠢ ᠨᠢ ᠦᠷᠭᠦᠯᠵᠢᠯᠡᠭᠦᠯᠦᠨ ᠨᠣᠮᠯᠠᠬᠤ ᠳ᠋ᠠᠭᠠᠨ ᠰᠠᠩᠵᠢ ᠶ᠋ᠢᠨ ᠣᠢ ᠲᠣᠢᠨ ᠳ᠋ᠤ᠌ ᠳᠥᠬᠥᠭᠦᠯᠬᠦ ᠶ᠋ᠢ ᠡᠷᠡᠮᠡᠯᠵᠡᠭᠰᠡᠨ ᠪᠣᠯᠤᠯᠲᠠᠢ᠃
- ᠮᠤᠩᠬᠠᠭ ᠠ᠋ᠴᠠ ᠡᠴᠢᠭᠡ ᠭᠠᠷᠤᠨᠠ᠃ ᠲᠠᠴᠢᠶᠠᠯ ᠠ᠋ᠴᠠ ᠡᠬᠡ ᠭᠠᠷᠤᠨᠠ᠃ ᠣᠮᠤᠭᠤ ᠠ᠋ᠴᠠ ᠵᠡᠳᠬᠡᠷᠲᠦ᠍ ᠦᠬᠡᠷ ᠪᠤᠶᠤ ᠲᠡᠭᠰᠢᠯᠠᠮᠪᠤ ᠲᠥᠷᠥᠨᠡ᠃ ᠠᠲᠠᠭᠠᠨ ᠠ᠋ᠴᠠ ᠢᠨᠢᠶᠡᠳᠡᠭ ᠦᠭᠡᠢ ᠬᠠᠷᠠ ᠪᠤᠶᠤ ᠫᠣᠭᠸᠠᠵᠦᠮᠡᠳ ᠲᠥᠷᠥᠨᠡ᠃ ᠠᠭᠤᠷ ᠠ᠋ᠴᠠ ᠶᠧᠯᠸᠢ ᠳ᠋ᠦ᠍ ᠮᠣᠭᠠᠢ ᠪᠤᠶᠤ ᠪᠦᠷᠦᠯᠵᠢᠲᠤᠮᠠᠷ ᠭᠠᠷᠤᠨᠠ ᠭᠡᠵᠦ ᠪᠠᠭᠰᠢᠲᠠᠨ ᠨᠣᠮᠯᠠᠭᠰᠠᠨ ᠶᠤᠮ ᠭᠡᠵᠦ ᠠᠢᠯᠠᠳᠤᠭᠠᠳ ᠲᠡᠳᠡᠭᠡᠷ ᠢ᠋ ᠳᠦᠷᠰᠦᠯᠡᠭᠰᠡᠨ ᠵᠢᠷᠤᠭ ᠢ᠋ ᠵᠢᠭᠠᠵᠤ ᠥᠭᠪᠡ᠃
- ᠬᠥᠮᠦᠨ ᠦ᠌ ᠬᠠᠭᠠᠨ ᠳᠢᠰᠷᠠᠩᠳᠢᠸᠠᠨ᠂ ᠯᠤᠤᠰ ᠤ᠋ᠨ ᠬᠠᠭᠠᠨ ᠮᠠᠯᠲᠤᠤᠰᠠᠵᠢᠨ ᠬᠣᠶᠠᠷ ᠲᠡᠮᠡᠴᠡᠯᠳᠦᠭᠡᠳ ᠠᠯᠢ ᠠᠯᠢᠨ ᠢ᠋ᠶ᠋ᠠᠨ ᠳᠡᠢᠯᠵᠦ ᠡᠰᠡ ᠴᠢᠳᠠᠭᠰᠠᠨ ᠭᠡᠳᠡᠭ ᠶᠦᠮ᠃ ᠲᠡᠭᠡᠭᠡᠳ ᠲᠡᠷᠡ ᠬᠣᠶᠠᠷ᠂ ᠭᠠᠵᠠᠷ ᠳᠡᠭᠡᠷᠡ ᠬᠥᠮᠦᠨ ᠦ᠌ ᠬᠠᠭᠠᠨ ᠴᠢᠮᠠ ᠠ᠋ᠴᠠ ᠶᠡᠬᠡ ᠦᠭᠡᠢ ᠭᠠᠵᠠᠷ ᠳᠣᠣᠷᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠨᠠᠳᠠ ᠠ᠋ᠴᠠ ᠶᠡᠬᠡ ᠦᠭᠡᠢ ᠪᠡᠷ ᠨᠥᠬᠥᠷᠯᠡᠶ ᠡ ᠭᠡᠵᠦ ᠯᠤᠤᠰ ᠤ᠋ᠨ ᠬᠠᠭᠠᠨ ᠮᠠᠯᠲᠤᠤᠰᠠᠵᠢᠨ ᠭᠤᠶᠤᠵᠤ ᠲᠣᠬᠢᠷᠠᠭᠰᠠᠨ ᠶᠤᠮ ᠭᠡᠳᠡᠭ᠃ ᠯᠤᠤᠰ ᠤ᠋ᠨ ᠬᠠᠭᠠᠨ ᠮᠠᠯᠲᠤᠤᠰᠠᠵᠢᠨ ᠡᠨᠡ ᠪᠠᠢᠨᠠ ᠭᠡᠵᠦ ᡀᠠᠷᠠᠮᠪᠠ ᠤᠲᠤᠭᠠᠨ ᠳ᠋ᠤ᠌ ᠢᠳᠡᠭᠳᠡᠭᠰᠡᠨ ᠨᠢᠭᠡᠨ ᠬᠥᠷᠥᠭ ᠢ᠋ ᠵᠢᠭᠠᠯᠠ᠃ ᠲᠡᠭᠡᠭᠡᠳ ᠲᠣᠲᠣᠷᠬᠠᠢᠯᠠᠨ ᠬᠡᠯᠡᠭᠰᠡᠨ ᠨᠢ᠄
- ᠯᠤᠤᠰ ᠤ᠋ᠨ ᠬᠠᠭᠠᠨ ᠮᠠᠯᠲᠤᠤᠰᠠᠵᠢᠨ ᠢ᠋ ᠯᠠᠭᠱᠠᠨ ᠤ ᠥᠩᠭᠡ ᠬᠠᠷᠠ ᠬᠥᠬᠡ᠂ ᠴᠡᠭᠡᠵᠢ ᠲᠩᠷᠢ ᠳᠦ ᠮᠣᠭᠠᠢ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢᠨ ᠴᠣᠭᠨᠣᠢᠨ ᠳᠡᠭᠦᠯᠢᠭᠰᠡᠨ᠂ ᠯᠠᠭᠱᠠᠨ ᠤ ᠪᠥᠭᠰᠡ ᠮᠣᠭᠠᠢ ᠶ᠋ᠢᠨ ᠰᠡᠭᠦᠯ ᠴᠠᠭᠠᠷᠢᠭᠯᠠᠭᠰᠠᠨ ᠬᠡᠯᠪᠡᠷᠢ ᠲᠡᠢ᠂ ᠪᠠᠷᠠᠭᠤᠨ ᠳ᠋ᠤ᠌ ᠰᠡᠳᠬᠢᠯᠴᠢᠯᠡᠨ ᠪᠦᠲᠦᠭᠡᠬᠦ ᠽᠡᠨᠳᠡᠮᠦᠨᠢ ᠡᠷᠳᠡᠨᠢ᠂ ᠵᠡᠭᠦᠨ ᠳ᠋ᠦ᠍ ᠲᠡᠩᠰᠡᠯᠭᠡ ᠶ᠋ᠢ ᠠᠷᠢᠯᠭᠠᠬᠤ ᠦᠬᠦᠯ ᠦᠭᠡᠢ ᠠᠷᠰᠢᠭᠠᠨ ᠢ᠋ᠶ᠋ᠠᠷ ᠳᠦᠭᠦᠷᠦᠭᠰᠡᠨ ᠰᠠᠩ ᠤ᠋ᠨ ᠰᠠᠢᠨ ᠬᠣᠮᠬᠠ ᠴᠢᠮᠡᠭᠰᠡᠨ᠂ ᠡᠭᠡᠮᠦᠭ᠂ ᠬᠣᠭᠣᠯᠠᠢ ᠶ᠋ᠢᠨ ᠴᠢᠮᠡᠭ᠂ ᠮᠣᠳᠣᠷ ᠪᠣᠢᠪᠤᠭ ᠤ᠋ᠨ ᠪᠠᠭᠤᠪᠴᠢ᠂ ᠪᠥᠭᠡᠵᠢ᠂ ᠰᠤᠭᠤᠪᠴᠢᠯᠠᠭᠤᠷ᠂ ᠬᠤᠭᠤᠯᠠᠢᠪᠴᠢ ᠵᠡᠷᠭᠡ ᠪᠡᠷ ᠪᠢᠨᠳᠡᠷᠯᠡᠭᠰᠡᠨ᠂ ᠶᠠᠷᠭᠠᠴᠢ᠂ ᠲᠦᠰᠢᠮᠡᠳ᠂ ᠬᠠᠲᠤᠨ᠂ ᠨᠥᠬᠥᠳ ᠰᠡᠯᠲᠡ ᠪᠡᠨ ᠳᠠᠭᠠᠭᠤᠯᠤᠭᠰᠠᠨ᠂ ᠵᠠᠪᠰᠠᠷ ᠢ᠋ᠶ᠋ᠠᠷ ᠨᠢ ᠪᠠᠭᠠᠪᠠᠭᠠᠢ᠂ ᠳ᠋ᠢᠭᠪᠠᠷᠠᠨᠵᠠ᠂ ᠮᠡᠯᠡᠬᠡᠢ᠂ ᠮᠣᠭᠠᠢ᠂ ᠠᠭᠠᠯᠵᠢ᠂ ᠬᠦᠷᠪᠡᠯ ᠲᠡᠷᠢᠭᠦᠲᠡᠨ ᠬᠠᠮᠤᠷᠤᠭᠰᠠᠨ ᠡᠢᠮᠦ ᠳᠦᠷᠢ ᠲᠡᠢ ᠪᠡᠷ ᠵᠢᠷᠤᠳᠠᠭ ᠶᠤᠮ᠃ ᠡᠨᠳᠡ ᠲᠡᠷᠡ ᠪᠦᠬᠦᠨ ᠴᠥᠮ ᠴᠣᠭᠴᠠᠯᠠᠵᠠᠢ᠃ ᠰᠠᠢᠨ ᠬᠠᠷᠠᠵᠤ ᠠᠪ ᠭᠡᠵᠦ ᠠᠢᠯᠠᠳᠪᠠ᠃ ᠰᠠᠩᠵᠢ ᠯᠤᠤᠰ ᠤᠨᠬᠠᠭᠠᠨ ᠤ᠋ ᠲᠡᠷᠬᠡᠦ ᠠᠶᠤᠮᠰᠢᠭᠲᠠᠢ ᠡᠷᠢᠶᠡᠨ ᠳᠦᠷᠢ ᠵᠢᠷᠤᠭ ᠢ᠋ ᠣᠲᠠᠲᠠᠯᠠ ᠭᠠᠢᠬᠠᠨ ᠰᠢᠷᠲᠡᠪᠡ᠃
- ᠲᠣᠭᠰᠢᠨ ᠳᠦᠷᠢ ᠲᠡᠢ᠂ ᠭᠤᠸᠠ ᠪᠤᠰᠤ ᠶ᠋ᠢᠨ ᠶᠠᠩᠵᠤ ᠲᠠᠢ ᠪᠠᠢᠭᠠ ᠪᠢᠵᠡ! ᠭᠡᠵᠦ ᠭᠡᠨᠡᠳᠲᠡ ᡀᠠᠷᠠᠮᠪᠠ ᠠᠰᠠᠭᠤᠬᠤ ᠳ᠋ᠤ᠌ ᠰᠠᠩᠵᠢ ᠰᠠᠨᠠᠭᠰᠠᠨ ᠢ᠋ᠶ᠋ᠠᠨ ᠨᠢᠭᠤᠯ ᠦᠭᠡᠢ ᠪᠡᠷ:
- ᠠᠶᠤᠵᠤ ᠪᠢᠰᠢᠭᠦᠷᠬᠡᠮᠡᠷ ᠳᠣᠭᠰᠢᠨ ᠳᠦᠷᠢ ᠲᠡᠢ ᠶᠦᠮ ᠡ ᠭᠡᠵᠦ ᠬᠡᠯᠡᠪᠡ᠃ ᡀᠠᠷᠠᠮᠪᠠ ᠰᠡᠳᠬᠢᠯ ᠨᠡᠢᠯᠡᠭᠰᠡᠨ ᠪᠣᠯᠤᠯᠲᠠᠢ ᠲᠣᠯᠣᠭᠠᠢ ᠳᠣᠬᠢᠵᠤ:
- ᠭᠤᠸᠠ ᠪᠤᠰᠤ ᠶ᠋ᠢᠨ ᠳᠦᠷᠢ ᠲᠡᠢ ᠪᠠᠢᠳᠠᠭ ᠴᠥᠮ ᠤᠴᠢᠷ ᠲᠠᠢ᠃ ᠪᠤᠷᠬᠠᠨ ᠱᠠᠰᠢᠨ ᠤ᠋ ᠳᠠᠢᠰᠦᠨ᠂ ᠪᠤᠷᠤᠭᠤ ᠨᠣᠮᠲᠠᠨ ᠢ᠋ ᠰᠦᠷ ᠬᠦᠴᠦ ᠪᠡᠷ ᠠᠶᠤᠯᠭᠠᠵᠤ᠂ ᠵᠢᠷᠦᠬᠡ ᠶ᠋ᠢ ᠦᠬᠦᠭᠦᠯᠬᠦ ᠶ᠋ᠢᠨ ᠤᠴᠢᠷ ᠳᠣᠭᠰᠢᠳ ᠪᠤᠢᠪᠣᠯᠵᠤ᠂ ᠳᠣᠭᠰᠢᠳ ᠤ᠋ᠨ ᠰᠢᠲᠦᠭᠡᠨ ᠭᠠᠷᠴᠠᠢ᠃ ᠰᠣᠶᠣᠭᠠ ᠪᠡᠨ ᠢᠷᠵᠠᠢᠭᠰᠠᠨ ᠢ᠋ᠶ᠋ᠠᠷ ᠬᠤᠤᠷᠲᠠᠨ ᠢ ᠨᠣᠮᠣᠬᠠᠳᠬᠠᠨᠠ᠃ ᠬᠥᠮᠥᠰᠬᠡ ᠬᠥᠳᠡᠯᠭᠡᠨ ᠰᠡᠷᠪᠡᠢᠯᠭᠡᠭᠰᠡᠭᠡᠷ ᠴᠠᠬᠢᠯᠭᠠᠨ ᠡᠷᠢᠬᠡ ᠭᠢᠯᠪᠠᠭᠤᠯᠤᠨᠠ᠃ ᠭᠢᠯᠢᠩ ᠢ᠋ᠶ᠋ᠠᠷ ᠪᠣᠢᠪᠤᠭ ᠢ᠋ᠶ᠋ᠠᠨ ᠳᠡᠪᠰᠡᠪᠡᠯ ᠭᠠᠵᠠᠷ ᠳᠡᠯᠡᠬᠡᠢ ᠶ᠋ᠢ ᠬᠥᠳᠡᠯᠭᠡᠨᠡ᠃ ᠱᠠᠰᠢᠨ ᠢ᠋ ᠥᠮᠥᠭᠯᠡᠭᠴᠢ ᠡᠳᠡᠭᠡᠷ ᠳᠣᠭᠰᠢᠨ ᠳᠦᠷᠢᠲᠦ ᠪᠤᠷᠬᠠᠳ ᠤ᠋ᠨ ᠨᠠᠰᠤᠨ ᠤ᠋ ᠬᠡᠮᠵᠢᠶᠡ ᠨᠢ ᠭᠠᠯᠪᠠ ᠨᠢᠭᠡ ᠪᠣᠯᠤᠨᠠ᠃ ᠨᠢᠭᠡ ᠭᠠᠯᠪᠠ ᠳᠥᠷᠪᠡᠨ ᠮᠢᠩᠭᠠ ᠭᠤᠷᠪᠠᠨ ᠵᠠᠭᠤ ᠭᠠᠷᠤᠢ ᠵᠢᠯ ᠦᠷᠭᠦᠯᠵᠢᠯᠡᠨᠡ᠃ ᠱᠠᠰᠢᠨ ᠪᠣᠯ ᠭᠠᠯᠪᠠ ᠬᠠᠭᠠᠰ ᠲᠤ᠌ ᠣᠷᠣᠰᠢᠨᠠ ᠭᠡᠵᠦ ᠨᠣᠮᠯᠠᠭᠰᠠᠨ᠃ ᠣᠳᠣ ᠳᠥᠩᠭᠡᠵᠢ ᠬᠠᠭᠠᠰ ᠭᠠᠯᠪᠠ ᠬᠦᠷᠬᠦ ᠦᠭᠡᠢ ᠨᠠᠰᠤᠯᠠᠭᠠᠳ ᠪᠠᠢᠨᠠ᠃ ᠲᠡᠭᠡᠬᠦᠯᠡᠷ ᠡᠳᠡᠭᠡᠷ ᠭᠣᠸᠠ ᠪᠤᠰᠤ ᠶ᠋ᠢᠨ ᠳᠣᠭ᠍ᠰᠢᠨ ᠳᠦᠷᠢ ᠲᠡᠢ ᠪᠤᠷᠬᠠᠳ ᠱᠠᠰᠢᠨ ᠢ᠋ ᠦᠶᠡ ᠪᠠᠨ ᠥᠩᠭᠡᠷᠡᠭᠡᠭᠰᠡᠨ ᠡᠴᠡ ᠬᠣᠵᠢᠮ ᠲᠥᠷᠥᠯ ᠠᠷᠠᠯᠵᠢᠬᠤ ᠤᠴᠢᠷ ᠲᠠᠢ ᠪᠣᠯᠤᠨᠠ᠃ ᠶᠡᠷᠦ ᠨᠢ ᠬᠢᠯᠢᠩᠲᠦ ᠠᠢᠮᠠᠭ ᠤ᠋ᠨ ᠨᠣᠶᠠᠳ ᠭᠤᠴᠢ ᠪᠠᠢᠬᠤ ᠪᠣᠯᠪᠠᠴᠤ ᠳᠠᠭᠢᠨᠢᠰ ᠭᠤᠴᠢᠨ ᠬᠣᠶᠠᠷ᠂ ᠶᠠᠭᠴᠢᠰ ᠡᠬᠡ ᠶᠢᠰᠦ᠂ ᠠᠪᠢᠳᠠᠷᠠᠮ ᠭᠡᠬᠦ ᠮᠠᠮ ᠳᠣᠯᠣᠭᠠ᠂ ᠪᠠᠳᠠᠷᠠᠭᠤᠯᠤᠭᠴᠢ ᠡᠬᠡ ᠨᠠᠢ᠍ᠮᠠ᠂ ᠳᠥᠷᠪᠡᠨ ᠡᠭᠡᠴᠢ ᠨᠠᠷ ᠤ᠋ᠨ ᠬᠠᠮᠲᠤ᠂ ᠲᠩᠷᠢ ᠢᠵᠠᠭᠤᠷ ᠤ᠋ᠨ ᠡᠯᠴᠢ ᠪᠦᠭᠦᠳᠡ ᠭᠤᠷᠪᠠᠨ ᠵᠠᠭᠤ ᠪᠣᠢ ᠪᠢᠯᠡ᠃ ᠲᠡᠳᠡ ᠴᠥᠮ ᠯᠡ ᠥᠪᠡᠷ ᠥᠪᠡᠷ ᠦ᠋ᠨ ᠣᠨᠴᠠᠭᠠᠢ ᠴᠢᠨᠠᠷ᠂ ᠲᠡᠮᠳᠡᠭ ᠲᠡᠢ᠂ ᠤᠩᠰᠢᠯᠭᠠ ᠨᠠᠷᠢᠨ ᠪᠠᠢᠬᠤ ᠪᠥᠭᠡᠳ ᠮᠠᠭᠠᠳ ᠦᠭᠡᠢ ᠣᠭᠲᠣ ᠳᠠᠪᠲᠠᠭᠳᠠᠬᠤ ᠦᠭᠡᠢ ᠴᠤ᠌ ᠪᠠᠢᠵᠤ ᠪᠣᠯᠤᠨᠠ ᠭᠡᠵᠦ ᡀᠠᠷᠠᠮᠪᠠ ᠨᠣᠮᠯᠠᠪᠠ᠃ ᠰᠠᠩᠵᠢ ᠲᠡᠭᠦᠨ ᠢ᠋ ᠢᠳᠡᠪᠬᠢᠯᠡᠨ ᠣᠢᠯᠠᠭᠠᠬᠤ ᠶ᠋ᠢ ᠬᠢᠴᠢᠶᠡᠵᠦ ᠪᠠᠢᠯᠠ᠃ ᠭᠡᠪᠡᠴᠦ ᠣᠢᠯᠠᠭᠠᠬᠤᠶᠠ ᠪᠡᠷᠬᠡ ᠶᠠᠭᠤᠮᠠ ᠣᠯᠠᠨ ᠲᠣᠬᠢᠶᠠᠯᠳᠤᠯᠠ᠃
- ᠣᠷᠴᠢᠯᠠᠩ ᠭᠠᠰᠠᠯᠠᠩ ᠠ᠋ᠴᠠ ᠨᠥᠬᠥᠴᠡᠭᠰᠡᠳ ᠲᠦ᠍ ᠠᠯᠠᠭᠳᠠᠨᠠ
ᠵᠣᠪᠠᠯᠠᠩ ᠶᠡᠬᠡ ᠠᠮᠤᠭᠤᠯᠠᠩ ᠳ᠋ᠤ᠌ ᠠᠯᠠᠭᠳᠠᠨᠠ
ᠠᠮᠢᠲᠠᠨ ᠪᠦᠭᠦᠳᠡ ᠰᠡᠳᠬᠢᠯ ᠳ᠋ᠦ᠍ ᠠᠯᠠᠭᠳᠠᠨᠠ
ᠦᠵᠡᠭᠳᠡᠯ ᠰᠠᠨᠰᠠᠷ ᠤ᠋ᠨ ᠨᠣᠮ ᠤ᠋ᠳ ᠰᠡᠳᠬᠢᠯ ᠳ᠋ᠦ᠍ ᠠᠯᠠᠭᠳᠠᠨᠠ
ᠭᠡᠵᠦ ᡀᠠᠷᠠᠮᠪᠠ ᠰᠤᠷᠭᠠᠮᠵᠢᠯᠠᠪᠠ᠃ ᠡᠭᠦᠨ ᠢ᠋ ᠰᠠᠩᠵᠢ ᠲᠡᠳᠦᠢ ᠯᠡ ᠣᠢᠯᠠᠭᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃
- ᠣᠷᠴᠢᠯᠠᠩ ᠶᠠᠭᠠᠬᠢᠭᠠᠳ ᠭᠠᠰᠠᠯᠠᠩ ᠠ᠋ᠴᠠ ᠨᠥᠬᠥᠴᠡᠭᠰᠡᠳ ᠲᠦ᠍ ᠠᠯᠠᠭᠳᠠᠳᠠᠭ ᠶᠤᠮ ᠪᠣᠢ? ᠭᠡᠵᠦ ᠰᠠᠩᠵᠢ ᠠᠰᠠᠭᠤᠪᠠ᠃ ᡀᠠᠷᠠᠮᠪᠠ ᠡᠢᠮᠦ ᠠᠰᠠᠭᠤᠯᠲᠠ ᠳ᠋ᠤ᠌ ᠶᠡᠬᠡ ᠳᠤᠷᠠᠲᠠᠢ᠃
- ᠣᠷᠴᠢᠯᠠᠩ ᠢ᠋ ᠳᠡᠢᠯᠦᠶᠡ ᠭᠡᠪᠡᠯ ᠥᠪᠡᠷ ᠢ᠋ᠶ᠋ᠡᠨ ᠨᠥᠭᠴᠢᠪᠡᠰᠦ ᠰᠡᠳᠬᠢᠯ ᠳ᠋ᠦ᠍ ᠲᠡᠷᠡ ᠣᠷᠴᠢᠯᠠᠩ ᠦᠭᠡᠢ ᠪᠣᠯᠵᠤ ᠲᠡᠷᠡ ᠨᠢ ᠣᠷᠴᠢᠯᠠᠩ ᠢᠯᠠᠭᠳᠠᠭᠰᠠᠨ ᠯᠤᠭᠠ ᠠᠳᠠᠯᠢ᠃ ᠲᠡᠷᠡᠴᠢᠯᠡᠨ ᠵᠣᠪᠠᠯᠠᠩ ᠢ᠋ ᠮᠠᠷᠲᠠᠵᠤ ᠰᠡᠳᠬᠢᠯ ᠦᠨ ᠶᠡᠬᠡ ᠠᠮᠤᠭᠤᠯᠠᠩ ᠳ᠋ᠤ᠌ ᠣᠷᠣᠵᠤ ᠴᠢᠳᠠᠪᠠᠰᠤ ᠵᠣᠪᠠᠯᠠᠩ ᠥᠪᠡᠷ ᠢ᠋ᠶ᠋ᠡᠨ ᠠᠯᠠᠭᠳᠠᠨ ᠦᠭᠡᠢ ᠪᠣᠯᠤᠭᠰᠠᠨ ᠤ᠋ ᠠᠭᠠᠷ ᠨᠢᠭᠡᠨ ᠪᠣᠢ! ᠭᠡᠵᠦ ᡀᠠᠷᠠᠮᠪᠠ ᠲᠠᠢᠯᠪᠤᠷᠢᠯᠠᠬᠤ ᠳ᠋ᠤ᠌ ᠰᠠᠩᠵᠢ ᠪᠠᠭᠠ ᠵᠡᠷᠭᠡ ᠭᠠᠳᠠᠷᠯᠠᠪᠠ᠃
- ᠴᠢ ᠬᠠᠷᠠᠭᠲᠤᠨ᠃ ᠡᠨᠳᠡ ᠵᠢᠷᠭᠤᠭᠠᠨ ᠶᠣᠰᠣᠨ ᠤ᠋ ᠢᠲᠡᠭᠡᠯᠲᠦ ᠪᠤᠷᠬᠠᠨ ᠤ᠋ ᠳᠦᠷᠢ ᠪᠠᠢᠨᠠ᠃ ᠡᠭᠦᠨ ᠳᠦ ᠬᠤᠲᠤᠭᠲᠤ ᠶᠣᠰᠣᠨ ᠤ᠋ ᠢᠲᠡᠭᠡᠯᠲᠦ ᠶ᠋ᠢ ᠬᠠᠷᠠᠭᠲᠤᠨ᠃ ᠢᠵᠠᠭᠣᠷ ᠤ᠋ᠨ ᠨᠢᠭᠤᠷ ᠬᠢᠯᠢᠩ ᠲᠡᠢ᠂ ᠬᠠᠷᠠ ᠬᠥᠬᠡ ᠥᠩᠭᠡᠲᠡᠢ᠂ ᠪᠠᠷᠠᠭᠤᠨ ᠨᠢ ᠴᠠᠭᠠᠨ ᠵᠠᠭᠠᠨ ᠤ᠋ ᠨᠢᠭᠤᠷ ᠲᠠᠢ᠂ ᠵᠡᠭᠦᠨ ᠨᠢ ᠤᠯᠠᠭᠠᠨ ᠤᠰᠤᠨ ᠤ᠋ ᠦᠬᠡᠷ ᠦᠨ ᠨᠢᠭᠤᠷ ᠲᠡᠢ᠂ ᠠᠷᠤ ᠶ᠋ᠢᠨ ᠬᠢ ᠨᠢ ᠬᠠᠷᠠ ᠠᠷᠰᠯᠠᠨ ᠤ ᠨᠢᠭᠤᠷ ᠲᠠᠢ᠂ ᠵᠢᠷᠭᠤᠭᠠᠨ ᠮᠣᠳᠣᠷ ᠤ᠋ᠨ ᠪᠠᠷᠠᠭᠤᠨ ᠳ᠋ᠤ᠌ ᠪᠦᠭᠳᠦᠷ ᠬᠢᠲᠤᠭᠠ᠂ ᠪᠠᠷᠢᠶᠠ᠂ ᠰᠦᠬᠡ᠂ ᠵᠡᠭᠦᠨ ᠭᠤᠷᠪᠠ ᠳ᠋ᠤ᠌ ᠭᠠᠪᠠᠯᠠ᠂ ᠦᠬᠡᠷ ᠦ᠋ᠨ ᠰᠢᠷᠢ᠂ ᠴᠡᠯᠮᠡ ᠪᠠᠷᠢᠭᠰᠠᠨ᠂ ᠪᠣᠢᠪᠤᠭ ᠢ᠋ᠶ᠋ᠠᠨ ᠠᠯᠴᠠᠢᠵᠤ ᠣᠷᠣᠰᠢᠭᠰᠠᠨ᠂ ᠨᠢᠭᠤᠴᠠ ᠡᠬᠡ ᠲᠡᠢ ᠨᠥᠬᠥᠴᠡᠯᠳᠦᠭᠰᠡᠨ ᠡᠢᠮᠦ ᠳᠦᠷᠢ ᠶᠣᠰᠣᠭᠠᠷ ᠦᠵᠡᠭᠦᠯᠵᠡᠢ ᠭᠡᠵᠦ ᡀᠠᠷᠠᠮᠪᠠ ᠶᠠᠷᠢᠭᠠᠳ ᠳᠥᠷᠪᠡᠨ ᠨᠢᠭᠤᠷ ᠲᠠᠢ᠂ ᠵᠢᠷᠭᠤᠭᠠᠨ ᠭᠠᠷ ᠲᠤ᠌ ᠪᠠᠨ ᠲᠤᠰ ᠪᠦᠷᠢ ᠪᠠᠷᠢᠶᠠ᠂ ᠰᠦᠬᠡ ᠵᠡᠷᠭᠡ ᠳᠡᠭᠡᠷᠡ ᠲᠤᠭᠠᠴᠢᠭᠰᠠᠨ ᠢ᠋ ᠪᠠᠷᠢᠵᠤ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠨᠢᠭᠡᠨ ᠵᠢᠵᠢᠭ ᠪᠡᠶᠡᠲᠦ ᠡᠮᠡ ᠲᠥᠷᠥᠯᠲᠡᠨ ᠢ᠋ ᠲᠡᠪᠡᠷᠢᠭᠰᠡᠨ ᠳᠣᠭᠰᠢᠨ ᠳᠦᠷᠢᠲᠦ ᠪᠤᠷᠬᠠᠨ ᠢ᠋ ᠵᠢᠭᠠᠯᠠ᠃ ᠲᠡᠭᠡᠭᠡᠳ ᡀᠠᠷᠠᠮᠪᠠ:
- ᠡᠭᠦᠨ ᠦ᠌ ᠵᠢᠰᠦ ᠴᠢᠷᠠᠢ᠂ ᠬᠡᠪ ᠮᠠᠶᠢᠭ᠋ ᠢ᠋ ᠴᠢ ᠦᠨᠡᠮᠰᠢᠬᠦ ᠦᠭᠡᠢ ᠪᠠᠢᠵᠤ ᠪᠣᠯᠤᠨᠠ᠃ ᠭᠡᠪᠡᠴᠦ ᠡᠢᠮᠦ ᠬᠤᠲᠤᠭᠲᠤ ᠶᠣᠰᠣᠨ ᠤ᠋ ᠢᠲᠡᠭᠡᠯᠲᠦ ᠪᠤᠷᠬᠠᠨ ᠪᠣᠢ ᠭᠡᠮᠡᠨ ᠪᠠᠲᠤ ᠢᠲᠡᠭᠡᠪᠡᠰᠦ ᠴᠢᠨᠦ ᠦᠯᠦ ᠢᠲᠡᠭᠡᠬᠦ ᠶᠢᠨ ᠮᠤᠬᠤᠷ ᠮᠣᠩᠰᠢᠨ ᠰᠡᠳᠬᠢᠯ ᠠᠯᠳᠠᠭᠳᠠᠨᠠ ᠭᠡᠵᠦ ᠰᠤᠷᠭᠠᠪᠠ᠃
ᡀᠠᠷᠠᠮᠪᠠ ᠶ᠋ᠢᠨ ᠵᠢᠭᠠᠭᠰᠠᠨ ᠵᠢᠷᠤᠭ ᠳᠡᠭᠡᠷᠡ 《ᠪᠢᠰᠢᠯᠭᠠᠬᠤ ᠴᠠᠭ ᠤ᠋ᠨ ᠢᠲᠡᠭᠡᠯᠲᠦ》᠂ 《ᠪᠦᠲᠦᠭᠡᠯ ᠦᠨ ᠴᠠᠭ ᠤ᠋ᠨ ᠢᠲᠡᠭᠡᠯᠲᠦ》᠂ 《ᠰᠠᠨᠳᠤᠢ ᠶ᠋ᠢᠨ ᠢᠲᠡᠭᠡᠯᠲᠦ》᠂ 《ᠠᠳᠢᠰ ᠪᠠᠭᠤᠯᠭᠠᠬᠤ ᠢᠲᠡᠭᠡᠯᠲᠦ》᠂ 《ᠳᠡᠭᠵᠢᠵᠦ ᠬᠥᠭᠵᠢᠬᠦ ᠦᠢᠯᠡ ᠶ᠋ᠢᠨ ᠢᠲᠡᠭᠡᠯᠲᠦ》᠂ 《ᠬᠤᠲᠤᠭᠲᠤ ᠶᠣᠰᠣᠨ ᠤ᠋ ᠢᠲᠡᠭᠡᠯᠲᠦ》 ᠭᠡᠰᠡᠨ ᠵᠢᠷᠭᠤᠭᠠᠨ ᠪᠤᠷᠬᠠᠳ ᠤᠨ ᠵᠢᠷᠤᠭ ᠴᠥᠮ ᠯᠡ ᠣᠯᠠᠨ ᠲᠣᠯᠣᠭᠠᠢ᠂ ᠣᠯᠠᠨ ᠭᠠᠷ ᠲᠠᠢ᠂ ᠭᠠᠷ ᠪᠣᠯᠭᠠᠨ ᠳ᠋ᠠᠭᠠᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠶᠠᠭᠤᠮᠠ ᠪᠠᠷᠢᠭᠰᠠᠨ ᠢ᠋ᠶ᠋ᠠᠷ ᠳᠦᠷᠰᠦᠯᠡᠭᠳᠡᠵᠡᠢ᠃
- ᠪᠤᠷᠬᠠᠳ ᠤ᠋ᠨ ᠪᠠᠷᠢᠭᠰᠠᠨ ᠶᠠᠭᠤᠮᠠ ᠪᠣᠯᠭᠠᠨ ᠤᠴᠢᠷ ᠲᠠᠢ᠃ ᠭᠣᠣᠯ ᠲᠥᠯᠥᠪ ᠬᠠᠳᠤᠭᠤᠷ᠂ ᠬᠣᠷᠢᠨ ᠲᠤᠯᠤᠮ᠂ ᠪᠦᠷᠢᠶᠡ᠂ ᠲᠠᠲᠠᠷ᠂ ᠢᠯᠳᠦ᠂ ᠭᠦᠪᠢᠭᠦᠷ᠂ ᠬᠡᠪ ᠪᠦᠰᠡ᠂ ᠬᠥᠭᠡᠨᠡ᠂ ᠴᠢᠳᠥᠷ᠂ ᠬᠢᠲᠤᠭᠠ ᠭᠠᠪᠠᠯᠠ᠂ ᠴᠠᠯᠮᠠ᠂ ᠲᠣᠯᠢ᠂ ᠭᠣᠬᠠ᠂ ᠰᠦᠬᠡ᠂ ᠬᠠᠳᠠᠮᠠᠭᠠᠢ᠂ ᠲᠡᠮᠦᠷ ᠬᠠᠤᠷᠠᠢ᠂ ᠦᠬᠡᠷ ᠦ᠋ᠨ ᠰᠢᠷᠢ᠂ ᠪᠠᠳᠢᠷ ᠠᠶᠠᠭᠠ᠂ ᠽᠠᠳᠢ᠂ ᠳᠠᠮᠠᠷᠤ ᠬᠣᠩᠬᠠ᠂ ᠴᠡᠴᠡᠭ᠂ ᠪᠤᠷᠭᠠᠰᠤ ᠲᠡᠷᠢᠭᠦᠲᠡᠨ ᠪᠠᠢᠨᠠ᠃ ᠲᠡᠷᠡ ᠪᠦᠬᠦᠨ ᠢ᠋ ᠱᠠᠰᠢᠨ ᠤ ᠳᠠᠢᠰᠦᠨ ᠡᠯᠳᠡᠪ ᠮᠠᠭᠤ ᠦᠢᠯᠡ ᠶ᠋ᠢ ᠶᠡᠭᠦᠳᠬᠡᠨ ᠴᠡᠪᠡᠷᠯᠡᠬᠦ ᠳ᠋ᠦ᠍ ᠬᠡᠷᠡᠭᠯᠡᠳᠡᠭ ᠪᠣᠯᠤᠨᠠ᠃ ᠡᠢᠮᠦ ᠳ᠋ᠤ᠌ ᠪᠡᠶᠡ ᠪᠡᠶᠡ ᠲᠡᠢ ᠨᠢ ᠠᠨᠳᠠᠭᠤᠷᠠᠨ ᠬᠤᠳᠬᠤᠪᠠᠯ ᠨᠢᠭᠦᠯ ᠠᠯᠳᠠᠰ᠃ ᠲᠡᠭᠡᠭᠡᠳ ᠰᠠᠢᠨ ᠲᠣᠭᠲᠠᠭᠠᠬᠤ ᠶᠢ ᠭᠡᠴᠢᠶᠡᠭᠲᠦᠨ ᠭᠡᠵᠦ ᡀᠠᠷᠠᠮᠪᠠ ᠠᠢᠯᠠᠳᠤᠨ ᠨᠣᠮᠯᠠᠪᠠ᠃
- ᠣᠷᠴᠢᠯᠠᠩ ᠬᠣᠷᠸᠠ ᠳ᠋ᠤ᠌ ᠪᠤᠷᠬᠠᠨ ᠪᠣᠯᠤᠭᠠᠳ ᠳᠣᠭ᠍ᠰᠢᠨ ᠡᠰᠡᠪᠡᠯ ᠶᠠᠭ᠍ᠴᠢᠰ ᠪᠣᠯᠤᠨ ᠡᠷᠯᠢᠭ ᠣᠷᠣᠰᠢᠭᠠ ᠦᠭᠡᠢ ᠭᠠᠵᠠᠷ ᠪᠠᠢᠨᠠ ᠤᠤ? ᠭᠡᠵᠦ ᠰᠠᠩᠵᠢ ᠭᠡᠨᠡᠳᠲᠡ ᠰᠣᠨᠢᠭᠤᠴᠢᠯᠠᠨ ᠪᠠᠭᠰᠢ ᠠ᠋ᠴᠠ ᠪᠠᠨ ᠠᠰᠠᠭᠤᠴᠢᠬᠠᠭᠰᠠᠨ ᠴᠢᠨᠢ ᡀᠠᠷᠠᠮᠪᠠ ᠦᠯᠦ ᠶᠠᠯᠢᠭ ᠢᠨᠢᠶᠡᠮᠰᠦᠭᠯᠡᠵᠦ:
- ᠪᠢ ᠲᠦᠷᠦᠭᠦᠨ ᠨᠣᠮᠯᠠᠭᠠ ᠪᠢᠵᠡ ᠳᠡ? ᠶᠢᠷᠲᠢᠨᠴᠦ ᠥᠩᠭᠡᠷᠡᠭᠰᠡᠨ ᠪᠠ ᠦᠯᠦ ᠥᠩᠭᠡᠷᠡᠭᠰᠡᠨ ᠵᠠᠢ ᠵᠠᠪᠰᠠᠷ ᠲᠤ᠌ ᠣᠷᠣᠰᠢᠨᠠ ᠭᠡᠵᠦ ᠨᠣᠮ ᠲᠠᠢ ᠶᠤᠮ᠃ ᠲᠡᠷᠡ ᠵᠠᠭᠤᠷᠠ ᠳ᠋ᠤ᠌ ᠡᠵᠡᠨ ᠦᠭᠡᠢ ᠶᠦᠮ ᠭᠡᠵᠦ ᠦᠭᠡᠢ᠃ ᠪᠠᠰᠠ ᠡᠵᠡᠨ ᠲᠡᠢ ᠶᠦᠮ ᠭᠡᠵᠦ ᠦᠭᠡᠢ᠃ ᠰᠠᠢᠨ ᠢ᠋ ᠦᠢᠯᠡᠳᠦᠭᠴᠢ᠂ ᠠᠪᠤᠷᠠᠨ ᠨᠢᠭᠦᠯᠡᠰᠦᠭᠴᠢ ᠪᠠᠢᠬᠤ ᠳ᠋ᠤ᠌ ᠰᠠᠭᠠᠷ ᠢ᠋ ᠦᠢᠯᠡᠳᠦᠨ ᠬᠥᠨᠥᠭᠡᠨ ᠢᠳᠡᠭᠴᠢ ᠪᠠᠰᠠ ᠪᠣᠢ᠃ ᠡᠭᠦᠨ ᠳ᠋ᠦ᠍ ᠲᠢᠲᠢᠮᠯᠡᠭᠰᠡᠨ ᠲᠠᠪᠤᠨ ᠳᠡᠭᠡᠳᠦ ᠪᠤᠷᠬᠠᠳ ᠪᠠᠢᠬᠤ ᠳ᠋ᠤ᠌ ᠵᠦᠬᠡᠯᠭᠡ ᠬᠠᠲᠠᠭᠤ ᠲᠠᠷᠢᠨᠠ ᠶ᠋ᠢᠨ ᠠᠷᠪᠠᠨ ᠪᠤᠷᠬᠠᠳ ᠪᠠᠰᠠ ᠪᠣᠢ᠃ ᠲᠡᠳᠡᠨ ᠦ ᠨᠢᠭᠡ ᠨᠢ ᠪᠣᠯᠬᠤ ᠳ᠋ᠦ᠋ᠤᠠᠬᠤᠶ᠋ᠢᠵᠢᠪᠠᠷᠠᠩᠭᠠᠷ ᠰᠢᠮᠨᠤ ᠪᠣᠯ ᠢᠮᠠᠭᠲᠠ ᠵᠦᠬᠡᠯᠭᠡ ᠣᠷᠬᠢᠵᠤ ᠪᠠᠢᠳᠠᠭ᠃ ᠵᠥᠭᠡᠯᠭᠡ ᠶ᠋ᠢᠨ ᠦᠭᠡ ᠨᠢ᠄ 《ᠴᠢᠨᠦ ᠪᠡᠶᠡ ᠬᠠᠷᠠ ᠥᠩᠭᠡᠲᠡᠢ ᠪᠣᠯᠤᠭ᠃ ᠬᠣᠭᠣᠯᠠᠢ ᠳ᠋ᠤ᠌ ᠬᠥᠮᠦᠨ ᠦ᠌ ᠮᠢᠬᠠ᠂ ᠮᠣᠷᠢᠨ ᠤ᠋ ᠮᠢᠬᠠ ᠢᠳᠡᠭ! ᠴᠢᠨᠦ ᠬᠤᠪᠴᠠᠰᠤ ᠳ᠋ᠤ᠌ ᠬᠥᠮᠦᠨ ᠦ᠌ ᠠᠷᠠᠰᠤ ᠡᠮᠦᠰᠦᠭᠲᠦᠨ 》 ᠭᠡᠵᠦ ᠪᠠᠢᠳᠠᠭ ᠶᠠᠭᠤᠮᠠ᠃ ᠵᠠ ᠡᠨᠡ ᠲᠤᠬᠠᠢ ᠳ᠋ᠤ᠌ ᠪᠢ ᠴᠢᠮᠠ ᠳ᠋ᠤ᠌ ᠳᠠᠷᠠᠭᠠ ᠲᠣᠳᠣᠷᠬᠠᠢ ᠨᠣᠮᠯᠠᠨᠠ᠃ ᠥᠨᠥᠳᠥᠷ ᠭᠠᠷᠴᠤ ᠵᠢᠭᠠᠬᠠᠨ ᠰᠠᠯᠬᠢ ᠠᠮᠰᠠᠶᠠ ᠬᠣᠶᠠᠭᠤᠯᠠ ᠪᠠᠨ ᠭᠡᠪᠡ᠃ ᠰᠠᠩᠵᠢ ᠭᠠᠷᠬᠤ ᠪᠠᠷ ᠵᠠᠪᠳᠤᠬᠤ ᠵᠠᠭᠤᠷᠠ ᠳᠠᠰᠤᠯ ᠦᠭᠡᠢ ᠪᠠᠰᠠ ᠨᠢᠭᠡ ᠠᠰᠠᠭᠤᠮᠠᠷ ᠶᠠᠭᠤᠮᠠ ᠭᠠᠷᠤᠭᠰᠠᠨ ᠢ᠋ ᠠᠰᠠᠭᠤᠪᠠ᠃
- ᠪᠠᠭᠰᠢ ᠠ᠂ ᠡᠨᠡ ᠣᠯᠠᠨ ᠪᠤᠷᠬᠠᠳ ᠥᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠢᠯᠭᠠᠷᠠᠬᠤ ᠳ᠋ᠤ᠌ ᠨᠡᠩ ᠪᠡᠷᠬᠡ ᠪᠤᠰᠤ ᠤᠤ? ᠭᠡᠵᠦ ᠪᠠᠷᠤᠭ ᠴᠥᠮ ᠢᠵᠢᠯ ᠰᠢᠬᠠᠮ ᠵᠢᠷᠤᠭᠰᠠᠨ ᠪᠤᠷᠬᠠᠳ ᠤ᠋ᠨ ᠵᠢᠷᠤᠭ ᠢ᠋ ᠵᠢᠭᠠᠵᠠᠢ᠃
- ᠶᠡᠷᠦᠩᠬᠡᠢ ᠲᠥᠷᠬᠦ ᠣᠢᠷᠠᠯᠴᠠᠭᠠ ᠪᠣᠯᠪᠠᠴᠤ ᠴᠥᠮ ᠢᠯᠭᠠᠭᠳᠠᠨᠠ᠃ ᠢᠯᠭᠠᠬᠤ ᠪᠢᠯᠢᠭ ᠦ᠋ᠨ ᠨᠢᠳᠦ ᠬᠡᠷᠡᠭᠲᠡᠢ᠃ ᠪᠢ ᠴᠢᠮᠠ ᠳ᠋ᠤ᠌ ᠲᠦᠷᠦᠭᠦᠨ ᠬᠡᠯᠡᠭᠰᠡᠨ᠃ ᠮᠣᠳᠣᠷ ᠲᠤ᠌ ᠪᠠᠨ ᠪᠣᠯᠭᠣᠭᠠᠨ ᠪᠠᠷᠢᠭᠰᠠᠨ ᠵᠦᠢᠯ ᠥᠭᠡᠷᠡ ᠥᠭᠡᠷᠡ ᠭᠡᠵᠦ᠃ ᠲᠡᠷᠡᠴᠢᠯᠡᠨ ᠪᠠᠰᠠ ᠣᠨᠣᠯᠭᠠ ᠳ᠋ᠤ᠌ ᠬᠡᠷᠡᠭᠯᠡᠳᠡᠭ ᠵᠦᠢᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠢᠯᠭᠠᠭᠳᠠᠨᠠ᠃ ᠵᠢᠱᠢᠶᠡ ᠨᠢ ᠡᠨᠡ ᠶᠡᠬᠡ ᠴᠠᠰᠤᠲᠠᠨ ᠤ ᠡᠬᠡ ᠳᠣᠷᠵᠣᠳᠪᠤᠷᠮᠠ ᠣᠨᠣᠯᠭᠠ ᠳ᠋ᠤ᠌ ᠦᠢᠮᠡᠷᠡᠭᠰᠡᠨ ᠬᠠᠷᠠ ᠰᠠᠯᠬᠢ ᠬᠥᠯᠭᠡᠯᠡᠭᠰᠡᠨ ᠪᠠᠢᠨᠠ᠃ ᠴᠣᠭᠲᠤ ᠲᠩᠷᠢ ᠠᠭᠤᠯᠠ ᠭᠡᠭᠴᠢ ᠳᠣᠷᠵᠢᠶᠠᠮᠠᠵᠠᠨ ᠪᠣᠯ ᠬᠠᠯᠵᠠᠨ ᠮᠣᠷᠢ ᠬᠥᠯᠭᠡᠯᠡᠭᠰᠡᠨ᠂ ᠥᠯᠵᠡᠢᠲᠦ ᠤᠷᠲᠤ ᠨᠠᠰᠤᠲᠤ ᠣᠭᠲᠠᠷᠭᠤᠢ ᠶ᠋ᠢᠨ ᠡᠮᠡ ᠳᠣᠷᠵᠢᠭᠦᠨᠳᠡᠭᠮᠠ ᠪᠣᠯ ᠯᠤᠤ ᠬᠥᠯᠭᠡᠯᠡᠭᠰᠡᠨ᠃ ᠭᠠᠨᠮᠠᠨᠵᠠᠷᠠ ᠮᠠᠮᠤ ᠪᠣᠯ ᠴᠠᠭᠠᠨ ᠠᠷᠰᠯᠠᠨ ᠤᠨᠤᠭᠰᠠᠨ᠃ ᠪᠠᠨᠮᠠᠨᠳᠠᠰᠢᠷᠠ ᠪᠣᠯ ᠬᠤᠯᠠᠨ ᠤᠨᠤᠭᠰᠠᠨ ᠭᠡᠬᠦ ᠮᠡᠲᠦ ᠪᠡᠷ ᠥᠭᠡᠷᠡ ᠥᠭᠡᠷᠡ ᠣᠨᠣᠯᠭᠠ ᠬᠡᠷᠡᠭᠯᠡᠭᠰᠡᠨ ᠨᠢ ᠬᠥᠷᠥᠭ ᠳᠡᠭᠡᠷᠡ ᠲᠣᠳᠣᠷᠬᠠᠢ ᠵᠢᠷᠤᠭᠳᠠᠵᠠᠢ᠃ ᠡᠭᠦᠪᠡᠷ ᠨᠢ ᠪᠠᠰᠠ ᠲᠠᠨᠢᠨ ᠢᠯᠭᠠᠵᠤ ᠪᠣᠯᠤᠨᠠ᠃ ᠶᠡᠷᠦ ᠨᠢ ᠳᠣᠭᠰᠢᠳ ᠭᠣᠣᠯ ᠲᠥᠯᠥᠪ ᠣᠨᠣᠯᠭᠠ ᠳ᠋ᠤ᠌ ᠬᠡᠷᠡᠭᠯᠡᠳᠡᠭ ᠵᠦᠢᠯ ᠭᠡᠪᠡᠯ᠄ ᠴᠣᠬᠣᠷ ᠪᠠᠷᠰ᠂ ᠴᠠᠭᠠᠨ ᠪᠤᠭᠤ᠂ ᠠᠷᠰᠯᠠᠨ᠂ ᠵᠢᠷᠣᠭᠠ ᠯᠠᠭᠤᠰᠠ᠂ ᠭᠠᠷᠤᠳᠢ᠂ ᠴᠠᠭᠠᠨ ᠠᠮᠠᠲᠤ ᠮᠣᠷᠢ᠂ ᠥᠰᠥᠭᠡᠢ ᠴᠠᠭᠠᠨ ᠬᠦᠮᠦᠨ ᠭᠥᠷᠥᠭᠡᠰᠦ ᠪᠤᠶᠤ ᠮᠡᠬᠡᠨ᠂ ᠵᠤᠷᠪᠤᠰ ᠴᠠᠭᠠᠨ ᠬᠠᠯᠵᠠᠨ ᠭᠠᠯᠠᠭᠤ᠂ ᠬᠠᠷᠠ ᠭᠠᠬᠠᠢ᠂ ᠴᠣᠬᠣᠷ ᠠᠮᠠ ᠲᠠᠢ ᠰᠢᠷᠠ ᠰᠢᠪᠠᠭᠤ᠂ ᠵᠢᠷᠦᠬᠡ ᠴᠠᠭᠠᠨ ᠪᠠᠭᠠᠪᠠᠭᠠᠢ᠂ ᠴᠢᠨᠣᠠ᠂ ᠨᠣᠬᠠᠢ᠂ ᠴᠥᠭᠡᠪᠦᠷᠢ᠂ ᠣᠷᠣᠩᠭᠣ᠌ ᠰᠠᠬᠤᠯᠢᠭ᠂ ᠴᠠᠭᠠᠨ ᠡᠭᠦᠯᠡ᠂ ᠬᠠᠷᠠ ᠰᠠᠯᠬᠢ᠂ ᠶᠢᠰᠦᠨ ᠲᠣᠯᠣᠭᠠᠢᠲᠤ ᠶᠠᠰᠤᠲᠤ ᠮᠡᠯᠡᠬᠡᠢ᠂ ᠡᠷᠢᠶᠡᠨ ᠲᠠᠷᠯᠠᠨ ᠤᠰᠤᠨ ᠤ᠋ ᠦᠬᠡᠷ ᠵᠡᠷᠭᠡ ᠪᠣᠯᠤᠨᠠ᠃ ᠡᠳᠡᠭᠡᠷ ᠢ᠋ ᠳᠠᠪᠲᠠᠨ ᠭᠠᠷᠬᠤ ᠳ᠋ᠤ᠌ ᠬᠦᠷᠦᠪᠡᠯ ᠪᠡᠯᠭᠡᠳᠡᠯ ᠰᠠᠢᠲᠠᠢ ᠥᠩᠭᠡ ᠪᠡᠷ ᠥᠭᠡᠷᠡ ᠥᠪᠡᠷᠰᠡᠳ ᠡᠴᠡ ᠨᠢ ᠢᠯᠭᠠᠨᠠ ᠭᠡᠵᠦ ᡀᠠᠷᠠᠮᠪᠠ ᠶᠠᠷᠢᠬᠤ ᠵᠠᠭᠤᠷᠠ ᠣᠷᠬᠢᠮᠵᠢ ᠪᠠᠨ ᠨᠥᠮᠥᠷᠦᠭᠡᠳ:
- ᠥᠨᠥᠳᠥᠷ ᠶᠡᠬᠡ ᠪᠦᠭᠴᠢᠮ ᠡᠳᠦᠷ ᠪᠠᠢᠨᠠ᠃ ᠬᠣᠶᠠᠭᠤᠯᠠ ᠭᠠᠳᠠᠭᠰᠢ ᠭᠠᠷᠴᠤ ᠳᠦᠷ ᠶᠠᠪᠤᠭᠠᠳ ᠢᠷᠡᠶᠡ᠃ ᠰᠠᠯᠬᠢ ᠬᠥᠯᠭᠡᠯᠡᠨ ᠶᠠᠪᠤᠨᠠ ᠳᠠ ᠭᠡᠵᠦ ᠰᠠᠩᠵᠢ ᠳ᠋ᠤ᠌ ᠬᠠᠨᠳᠤᠨ ᠭᠠᠷ ᠢ᠋ᠶ᠋ᠠᠨ ᠰᠠᠷᠪᠠᠢᠪᠠ᠃ ᠰᠠᠩᠵᠢ ᠲᠡᠭᠦᠨ ᠦ᠌ ᠥᠭᠡᠬᠦᠯᠢᠭ ᠨᠢᠮᠪᠡᠭᠡᠷ ᠰᠠᠷᠪᠠᠭᠤᠨ ᠠ᠋ᠴᠠ ᠠᠳᠬᠤᠨ ᠠᠪᠴᠤ ᠰᠤᠭᠤᠳᠠᠨ ᠲᠦᠰᠢᠭᠰᠡᠭᠡᠷ ᠰᠢᠲᠦᠭᠡᠨ ᠦ᠌ ᠬᠢ ᠨᠢ ᠥᠷᠥᠭᠡᠨ ᠡᠴᠡ ᠭᠠᠷᠭᠠᠯᠠ᠃
ᠭᠠᠳᠠᠭᠠ ᠲᠤᠩᠭᠠᠯᠠᠭ ᠰᠠᠢᠬᠠᠨ ᠡᠳᠦᠷ ᠪᠠᠢᠪᠠ᠃ ᡀᠠᠷᠠᠮᠪᠠ ᠠᠭᠠᠷ ᠬᠣᠪᠳᠣᠭ ᠢ᠋ᠶ᠋ᠠᠷ ᠠᠮᠢᠰᠬᠤᠯᠠᠵᠤ:
- ᠰᠠᠢᠬᠠᠨ ᠡᠳᠦᠷ ᠪᠠᠢᠨᠠ᠃ ᠬᠣᠶᠠᠭᠤᠯᠠ ᠪᠠᠨ ᡀᠠᠰᠠ ᠵᠣᠣ ᠬᠦᠷᠲᠡᠯᠡ ᠠᠯᠬᠤᠭᠠᠳ ᠪᠤᠴᠠᠵᠤ ᠢᠷᠡᠶᠡ ᠭᠡᠪᠡ᠃ ᠰᠠᠩᠵᠢ ᠳ᠋ᠤ᠌ ᠲᠡᠷᠡ ᠲᠤᠩ ᠠᠶᠠᠲᠠᠢᠬᠠᠨ ᠰᠠᠨᠠᠯ ᠰᠠᠨᠠᠭᠳᠠᠯᠠ᠃
ᠭᠤᠳᠤᠮᠵᠢ ᠪᠠᠷ ᠪᠤᠮᠠᠨ ᠬᠥᠮᠦᠨ ᠪᠤᠵᠢᠭᠢᠨᠠᠵᠤ ᠪᠠᠢᠯᠠ᠃ ᡀᠠᠷᠠᠮᠪᠠ ᠠᠮᠠᠨ ᠤ᠋ ᠪᠠᠨ ᠬᠠᠭᠠᠯᠲᠠ ᠶᠢ ᠳᠣᠭᠣᠭᠰᠢ ᠤᠨᠵᠢᠭᠤᠯᠤᠨ᠂ ᠰᠠᠯᠬᠢᠨ ᠳ᠋ᠤ᠌ ᠠᠯᠠᠳᠠᠬᠤ ᠦᠭᠡᠢ ᠪᠡᠷ ᠪᠡᠬᠢᠯᠡᠭᠦᠯᠪᠡ᠃ ᠠᠩᠭᠠᠢᠭ᠍ᠰᠠᠨ ᠠᠮᠠ ᠤᠷᠤᠭᠤ ᠨᠢ ᠢᠯᠠᠭᠠ ᠰᠢᠮᠠᠭᠤᠯ ᠣᠷᠣᠵᠤ ᠨᠢᠭᠦᠯ ᠡᠭᠦᠰᠬᠦ ᠡᠴᠡ ᠲᠡᠷᠡ ᠮᠥᠨ ᠯᠡ ᠪᠤᠰᠤᠳ ᠤ᠋ᠨ ᠠᠳᠠᠯᠢ ᠪᠣᠯᠭᠣᠮᠵᠢᠯᠠᠭᠰᠠᠨ ᠠᠵᠢ᠃ ᡀᠠᠷᠠᠮᠪᠠ ᠶ᠋ᠢᠨ ᠠᠯᠬᠤᠭᠠ ᠨᠢ ᠤᠳᠠᠭᠠᠨ ᠨᠠᠮᠪᠠᠯᠢᠭ ᠲᠤᠯᠠ ᠰᠠᠩᠵᠢ ᠲᠡᠭᠦᠨ ᠲᠡᠢ ᠬᠥᠯ ᠨᠡᠢᠯᠡᠬᠦ ᠦᠭᠡᠢ ᠲᠡᠪᠡᠳᠡᠵᠦ ᠪᠠᠢᠯᠠ᠃ ᠲᠡᠭᠡᠲᠡᠯᠡ ᠭᠤᠳᠤᠮᠵᠢ ᠪᠠᠷ ᠶᠠᠪᠤᠭᠠ ᠣᠯᠠᠨ ᠤ ᠲᠣᠮᠳᠠ ᠠ᠋ᠴᠠ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠳᠠᠭᠤ ᠭᠠᠷᠴᠤ 《 ᠰᠠᠩᠵᠢ᠂ ᠰᠠᠩᠵᠢ ᠡ!》 ᠭᠡᠬᠦ ᠰᠢᠭ ᠪᠣᠯᠪᠠ᠃ ᠰᠠᠩᠵᠢ ᠡᠬᠢᠯᠡᠭᠡᠳ ᠴᠢᠬᠢᠨ ᠳ᠋ᠡᠭᠡᠨ ᠢᠲᠡᠭᠡᠭᠰᠡᠨ ᠦᠭᠡᠢ᠃ ᠭᠠᠭᠴᠠᠬᠦ 《ᡀᠠᠷᠠᠮᠪᠠ ᠶ᠋ᠢᠨ ᠠᠯᠬᠤᠭᠠᠨ ᠳᠤ ᠬᠥᠯ ᠢ᠋ᠶ᠋ᠡᠨ ᠲᠠᠭᠠᠷᠠᠭᠤᠯᠬᠤ ᠶ᠋ᠢ ᠡᠷᠡᠮᠡᠯᠵᠡᠵᠦ ᠳᠣᠭᠣᠭᠰᠢ ᠬᠠᠷᠠᠵᠤ ᠶᠠᠪᠤᠯᠠ᠃ ᠲᠡᠭᠡᠲᠡᠯᠡ ᠳᠠᠬᠢᠭᠠᠳ ᠯᠠ《 ᠰᠠᠩᠵᠢ ᠡ᠂ ᠰᠠᠩᠵᠢ ᠡ!》 ᠭᠡᠵᠦ ᠡᠮᠡᠭᠲᠡᠢ ᠬᠥᠮᠦᠨ ᠳᠠᠭᠤᠳᠠᠪᠠ᠃ ᠠᠷᠭᠠ ᠪᠤᠶᠤ ᠲᠣᠯᠣᠭᠠᠢ ᠶ᠋ᠢ ᠪᠠᠨ ᠥᠨᠳᠡᠢᠯᠭᠡᠨ ᠠᠵᠢᠪᠠᠯ ᠭᠤᠳᠤᠮᠵᠢᠨ ᠤ ᠨᠥᠭᠦᠭᠡ ᠲᠠᠯᠠ ᠪᠠᠷ ᠴᠤᠪᠤᠵᠤ ᠶᠠᠪᠤᠭᠠ ᠮᠥᠷᠭᠥᠯᠴᠢᠨ ᠣᠯᠠᠨ ᠤ ᠲᠣᠮᠳᠠ ᠠ᠋ᠴᠠ ᠨᠢᠭᠡᠨ ᠬᠠᠯᠬᠠ ᠡᠮᠡᠭᠲᠡᠢ ᠭᠠᠷ ᠢ᠋ᠶ᠋ᠠᠨ ᠭᠣᠵᠣᠯᠵᠠᠭᠤᠯᠤᠨ ᠰᠠᠩᠵᠢ ᠶᠢ ᠳᠠᠯᠠᠯᠵᠤ ᠪᠠᠢᠭᠠ ᠬᠠᠷᠠᠭᠳᠠᠪᠠ᠃ ᠤᠳᠬᠤᠨ ᠠᠵᠢ᠃《ᠤᠳᠬᠤᠨ ᠪᠠᠢᠨᠠ᠂ ᠲᠡᠷᠡ ᠬᠡᠵᠢᠶᠡ ᠡᠷᠭᠢᠭᠡᠳ ᠢᠷᠡᠴᠢᠭᠡᠪᠡ? ᠶᠠᠭᠤᠨ ᠬᠡᠷᠡᠭ ᠢ᠋ᠶ᠋ᠡᠷ ᠢᠷᠡᠭᠰᠡᠨ ᠶᠦᠮ ᠪᠤᠯ? ᠠᠪᠤ᠂ ᠡᠵᠢ ᠡᠴᠡ ᠰᠤᠷᠠᠭ ᠠᠪᠴᠢᠷᠠᠭᠠ ᠪᠣᠯᠪᠠ ᠤᠤ?》 ᠭᠡᠵᠦ ᠰᠠᠩᠵᠢ ᠭᠡᠨᠡᠳᠲᠡ ᠪᠣᠳᠣᠯᠠ᠃ ᠭᠡᠪᠡᠴᠦ ᡀᠠᠷᠠᠮᠪᠠ ᠲᠡᠷᠡ ᠪᠠᠢᠳᠠᠯ ᠢ᠋ ᠲᠣᠭᠣᠬᠤ ᠦᠭᠡᠢ ᠪᠡᠷ ᠣᠷᠣᠭᠰᠢ ᠪᠠᠨ ᠠᠯᠬᠤᠭᠰᠠᠭᠠᠷ ᠪᠥᠯᠥᠭᠡ᠃ ᠰᠠᠩᠵᠢ ᠠᠷᠭᠠ ᠣᠯᠵᠤ:
- ᠮᠠᠨ ᠤ᠋ ᠬᠢ ᠬᠠᠭᠤᠴᠢᠨ ᠳ᠋ᠠᠭᠠᠨ᠃ ᠲᠡᠨᠳᠡ ᠣᠴᠢᠭᠠᠳ ᠬᠦᠯᠢᠶᠡᠵᠦ ᠪᠠᠢ᠃ ᠪᠢ ᠣᠳᠣᠬᠠᠨ ᠡᠷᠭᠢᠵᠦ ᠢᠷᠡᠨᠡ!ᠭᠡᠵᠦ ᠮᠣᠩᠭᠣᠯ ᠢ᠋ᠶ᠋ᠠᠷ ᠬᠠᠰᠬᠢᠷᠤᠯᠠ᠃ ᠤᠳᠬᠤᠨ ᠲᠡᠭᠦᠨ ᠢ᠋ ᠣᠢᠯᠠᠭᠠᠭᠰᠠᠨ ᠪᠣᠯᠤᠯᠲᠠᠢ᠃ ᠣᠯᠠᠨ ᠤ ᠲᠣᠮᠳᠠ ᠵᠣᠭᠰᠣᠨ ᠬᠣᠴᠣᠷᠤᠯᠠ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠰᠠᠩᠵᠢ ᠲᠡᠷᠡ ᠬᠣᠶᠠᠷ ᠤᠷᠤᠭᠤ ᠬᠦᠶᠦᠨ ᠤᠴᠢᠬᠤ ᠶ᠋ᠢ ᠵᠠᠪᠳᠤᠬᠤ ᠳ᠋ᠤ᠌ ᠨᠢ ᠰᠠᠩᠵᠢ ᠪᠢᠲᠡᠭᠡᠢ ᠭᠡᠰᠡᠨ ᠳᠣᠬᠢᠭᠠ ᠶ᠋ᠢ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠥᠭᠴᠦ ᠪᠣᠯᠢᠭᠤᠯᠪᠠ᠃ ᡀᠠᠷᠠᠮᠪᠠ ᠶᠠᠭᠤ ᠴᠤ᠌ ᠪᠣᠯᠤᠭᠠ ᠦᠭᠡᠢ ᠮᠡᠲᠦ ᠤᠷᠤᠭᠰᠢ ᠪᠠᠨ ᠬᠠᠷᠠᠨ ᠵᠣᠭᠣᠨ ᠠᠯᠬᠤᠭᠠ ᠪᠠᠷ ᠶᠠᠪᠤᠵᠤ ᠪᠠᠢᠯᠠ᠃《ᠤᠳᠬᠤᠨ ᠢᠷᠡᠳᠡᠭ ᠨᠢ ᠰᠠᠢᠨ ᠪᠣᠯᠤᠯᠠ᠃ ᠠᠪᠤ᠂ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ ᠠᠰᠠᠭᠤᠵᠤ ᠠᠪᠳᠠᠭ ᠬᠡᠷᠡᠭ᠃ ᡀᠠᠷᠠᠮᠪᠠ ᠠ᠋ᠴᠠ ᠶᠠᠭᠠᠬᠢᠵᠤ ᠲᠦᠷᠭᠡᠨ ᠰᠠᠯᠬᠤ ᠪᠢᠯᠡ᠃ ᠵᠠ ᠶᠠᠭᠠᠬᠢᠬᠤᠪ ᠃ ᠤᠲᠠᠬᠤ ᠦᠭᠡᠢ ᠶᠠᠳᠠᠷᠠᠭᠠᠳ ᠪᠤᠴᠠᠬᠤ ᠪᠠᠢᠬᠠ ᠡ》 ᠭᠡᠵᠦ ᠰᠠᠩᠵᠢ ᠳᠣᠭᠳᠣᠯᠤᠨ ᠪᠣᠳᠣᠯᠠ᠃ ᡀᠠᠷᠠᠮᠪᠠ ᠬᠡᠰᠡᠭ ᠵᠠᠭᠤᠷᠠ ᠳᠠᠭᠤ ᠦᠭᠡᠢ ᠶᠠᠪᠤᠵᠤ ᠪᠠᠢᠭ᠍ᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠠᠮᠠ ᠨᠡᠭᠡᠭᠡᠵᠦ:
- ᠰᠠᠶᠢ ᠴᠢ ᠨᠢᠭᠡ ᠡᠮᠡ ᠬᠥᠮᠦᠨ ᠲᠡᠢ ᠦᠭᠡ ᠰᠣᠯᠢᠪᠠ ᠤᠤ? ᠭᠡᠵᠦ ᠠᠰᠠᠭᠤᠯᠠ᠃ ᠰᠠᠩᠵᠢ ᠲᠦᠭᠳᠡᠷᠡᠭᠰᠡᠨ ᠢ᠋ᠶ᠋ᠡᠨ᠂
- ᠲᠡᠢᠮᠦ ᠡ᠃ ᠮᠠᠨ ᠤ᠋ ᠨᠤᠲᠤᠭ ᠤ᠋ᠨ ᠨᠢᠭᠡ ᠶᠠᠳᠠᠭᠤ ᠮᠥᠷᠭᠥᠯᠴᠢᠨ ᠢᠷᠡᠵᠡᠢ᠃ ᠲᠡᠭᠦᠨ ᠡᠴᠡ ᠠᠪᠤ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠰᠤᠷᠠᠭ ᠢ᠋ ᠭᠠᠷᠭᠠᠬᠠᠭᠰᠠᠨ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ! ᠭᠡᠵᠦ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠪᠡ᠃ ᡀᠠᠷᠠᠮᠪᠠ ᠬᠠᠷᠢᠭᠤ ᠶᠠᠭᠤ ᠴᠤ᠌ ᠶᠠᠷᠢᠬᠤ ᠦᠭᠡᠢ ᠬᠡᠰᠡᠭ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ:
- ᠪᠢᠯᠢᠭ ᠦ᠋ᠨ ᠶᠡᠬᠡ ᠬᠠᠯᠠᠭᠤᠨ ᠣᠴᠢᠷ ᠠᠰᠠᠷ ᠠᠳᠬᠠᠭ ᠤ᠋ᠨ ᠵᠥᠭᠡᠯᠡᠨ ᠬᠤᠷᠠ ᠪᠠᠭᠤᠬᠤ ᠶ᠋ᠢ ᠠᠯᠠᠨᠠ! ᠭᠡᠵᠦ ᠲᠦᠷᠦᠭᠦᠨ ᠵᠢᠭᠠᠵᠤ ᠪᠠᠢᠭ᠍ᠰᠠᠨ ᠨᠣᠮ ᠠ᠋ᠴᠠ ᠪᠠᠨ ᠠᠢᠯᠠᠳᠪᠠ᠃
ᠴᠣᠬᠣᠮ ᠶᠠᠭᠤᠨ ᠤ᠋ ᠲᠤᠬᠠᠢ ᠬᠡᠯᠡᠵᠦ ᠪᠠᠢᠭᠠ ᠶ᠋ᠢ ᠰᠠᠩᠵᠢ ᠳᠣᠣᠷᠠ ᠨᠢ ᠣᠢᠯᠠᠭᠠᠨ ᠠᠪᠴᠤ ᠴᠢᠷᠠᠢ ᠨᠢ ᠴᠢᠰ ᠤᠯᠠᠢᠵᠤ᠂ ᠢᠴᠢᠩᠭᠦᠢᠷᠡᠪᠡ᠃《ᠪᠠᠭᠰᠢᠲᠠᠨ ᠮᠢᠨᠦ ᠲᠤᠬᠠᠢ ᠪᠤᠷᠤᠭᠤ ᠪᠠᠷ ᠤᠬᠠᠭᠠᠷᠠᠪᠵᠠᠢ᠃ ᠰᠠᠬᠢᠯ ᠰᠠᠨᠸᠠᠷ ᠢ᠋ ᠡᠪᠳᠡᠬᠦ ᠶᠦᠮ ᠤᠤ ᠲᠠᠩᠭᠠᠷᠢᠭ ᠪᠠᠭᠤᠷᠠᠭᠴᠢ ᠭᠡᠵᠦ ᠪᠣᠳᠣᠭᠤᠵᠠᠢ》 ᠬᠡᠮᠡᠨ ᠠᠶᠤᠨ ᠪᠣᠯᠭᠣᠮᠵᠢᠯᠠᠪᠠ᠃
- ᠱᠠᠭᠱᠠᠪᠠᠳ ᠢ᠋ ᠠᠪᠬᠤ ᠳ᠋ᠤ᠌ ᠬᠢᠯᠪᠠᠷ ᠪᠥᠭᠡᠳ ᠰᠠᠬᠢᠬᠤ ᠳ᠋ᠤ᠌ ᠪᠡᠷᠬᠡ ᠭᠡᠳᠡᠭ ᠢ᠋ ᠴᠢ ᠰᠠᠢᠨ ᠲᠣᠭᠲᠠᠭᠠᠵᠤ ᠠᠪᠤᠭᠰᠠᠨ ᠪᠢᠵᠡ! ᠭᠡᠵᠦ ᡀᠠᠷᠠᠮᠪᠠ ᠮᠥᠨ ᠯᠡ ᠡᠷᠭᠢᠵᠦ ᠬᠠᠷᠠᠯ ᠦᠭᠡᠢ ᠠᠰᠠᠭᠤᠯᠠ᠃ ᠶᠣᠭᠲᠠ ᠤᠳᠬᠠ ᠪᠠᠷ ᠶᠠᠷᠢᠵᠤ ᠪᠠᠢᠭᠠ ᠶ᠋ᠢ ᠨᠢ ᠣᠢᠯᠠᠭᠠᠪᠠ᠃
- ᠲᠡᠢᠮᠦ ᠡ᠃ ᠪᠠᠭᠰᠢᠲᠠᠨ ᠮᠢᠨᠢ᠃ ᠱᠠᠭᠱᠠᠪᠠᠳ ᠢ᠋ ᠬᠠᠲᠠᠭᠤ ᠰᠠᠬᠢᠬᠤ ᠲᠠᠩᠭᠠᠷᠢᠭ ᠠᠴᠠ ᠪᠠᠭᠤᠷᠠᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠵᠦ ᠶᠠᠪᠤᠨᠠ ᠭᠡᠵᠦ ᠰᠠᠩᠵᠢ ᠥᠴᠢᠯᠭᠡ ᠥᠭᠴᠡᠢ᠃
- ᠨᠢᠭᠦᠯᠡᠰᠬᠦᠢ ᠶ᠋ᠢᠨ ᠪᠠᠯ ᠤ᠋ᠨ ᠬᠤᠷᠠ ᠪᠠᠭᠤᠭᠰᠠᠨ ᠢ᠋ᠶ᠋ᠠᠷ ᠰᠦᠰᠦᠭ ᠦ᠋ᠨ ᠶᠡᠬᠡ ᠭᠠᠵᠠᠷ ᠢ᠋ ᠮᠠᠰᠢᠳᠠ ᠴᠢᠭᠢᠭᠯᠡᠨᠡ ᠭᠡᠵᠦ ᡀᠠᠷᠠᠮᠪᠠ ᠰᠢᠯᠦᠭᠯᠡᠨ ᠬᠡᠯᠡᠭᠡᠳ ᠳᠠᠭᠤ ᠦᠭᠡᠢ ᠪᠣᠯᠵᠠᠢ᠃ ᠡᠨᠡ ᠤᠳᠠᠭ ᠠ ᠥᠷᠥᠰᠢᠶᠡᠨ ᠨᠢᠭᠦᠯᠡᠰᠦᠶᠡ ᠭᠡᠰᠡᠨ ᠳᠠᠯᠳᠠ ᠤᠳᠬᠠ ᠭᠡᠵᠦ ᠣᠢᠯᠠᠭᠠᠭᠠᠳ ᠰᠠᠩᠵᠢ ᠭᠡᠰᠦᠯ ᠰᠡᠳᠬᠢᠯ ᠢᠶᠡᠷ ᠲᠦᠷ ᠠᠮᠤᠰᠬᠢᠯᠡ᠃
ᡀᠠᠷᠠᠮᠪᠠ ᠰᠡᠷᠢᠭᠦᠴᠡᠨ ᠵᠤᠭᠠᠯᠠᠵᠤ ᠬᠡᠰᠡᠭ ᠶᠠᠪᠤᠭᠠᠳ ᠬᠥᠯ ᠨᠢ ᠴᠣᠴᠣᠬᠤ ᠶ᠋ᠢᠨ ᠦᠶᠡᠰ ᠲᠦ᠍ ᠪᠤᠴᠠᠬᠤ ᠪᠣᠯᠪᠠ᠃ ᠰᠠᠩᠵᠢ ᠲᠡᠭᠦᠨ ᠦ᠌ ᠠᠶᠠ ᠶ᠋ᠢ ᠳᠠᠭᠠᠯᠳᠤᠵᠤ ᠬᠤᠢᠨᠠ ᠡᠮᠦᠨᠡ ᠨᠢ ᠣᠷᠣᠨ ᠳᠣᠯᠢᠭᠠᠨᠠᠵᠤ ᠶᠠᠪᠤᠯᠠ᠃ ᠭᠡᠪᠡᠴᠦ ᠰᠡᠳᠬᠢᠯ ᠳ᠋ᠡᠭᠡᠨ ᠣᠳᠬᠠᠨ ᠤ᠋ ᠲᠤᠬᠠᠢ ᠪᠣᠳᠣᠵᠤ ᠪᠠᠢᠪᠠ᠃《ᠲᠡᠷᠡ ᠶᠠᠭᠠᠬᠢᠭᠰᠠᠨ ᠬᠤᠷᠳᠤᠨ ᠪᠤᠴᠠᠵᠤ ᠢᠷᠡᠭᠡ ᠪᠣᠢ? ᠳᠠᠬᠢᠭᠠᠳ ᠯᠠ ᡀᠠᠰᠠ ᠵᠣᠣ ᠳ᠋ᠤ᠌ ᠮᠥᠷᠭᠥᠯ ᠦᠢᠯᠡᠳᠬᠦ ᠪᠡᠷ ᠢᠷᠡᠭᠰᠡᠨ ᠬᠡᠷᠡᠭ ᠪᠠᠢᠬᠤ ᠳᠠ? ᠨᠥᠭᠥᠭᠡᠬᠢ ᠪᠦᠬᠡᠮᠠᠩᠯᠠᠢ ᠬᠠᠮᠢᠭᠠ ᠣᠴᠢᠭ᠍ᠰᠠᠨ ᠪᠣᠯ? ᠡᠵᠢ᠂ ᠠᠪᠤ᠂ ᠳᠡᠭᠦᠦ ᠨᠠᠷ ᠤ᠋ᠨ ᠲᠤᠬᠠᠢ ᠤᠳᠬᠤᠨ ᠠ᠋ᠴᠠ ᠲᠣᠳᠣᠷᠬᠠᠢ ᠳᠤᠭᠤᠯᠠᠵᠤ ᠠᠪᠤᠨᠠ ᠳᠠ!》 ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠪᠣᠳᠣᠬᠤ ᠠᠴᠠ ᡀᠠᠷᠠᠮᠪᠠ ᠭᠡᠨᠳᠡᠨᠪᠠᠯᠳᠠᠨ ᠠ᠋ᠴᠠ ᠱᠠᠯᠠᠪ ᠲᠦᠷᠭᠡᠨ ᠰᠠᠯᠬᠤ ᠶ᠋ᠢ ᠮᠥᠷᠥᠭᠡᠳᠪᠡ᠃ ᠲᠡᠭᠡᠳᠡᠯ ᠡ ᡀᠠᠷᠠᠮᠪᠠ ᠣᠭᠲᠣ ᠶᠠᠭᠠᠷᠠᠬᠤ ᠦᠭᠡᠢ ᠪᠠᠢᠯᠠ᠃
- ᠣᠳᠣ ᠬᠣᠶᠠᠭᠤᠯᠠ ᠪᠠᠨ ᠨᠣᠮ ᠢ᠋ᠶ᠋ᠠᠨ ᠪᠠᠰᠠ ᠵᠢᠭᠠᠬᠠᠨ ᠦᠵᠡᠨᠡ᠃ ᠲᠡᠭᠡᠭᠡᠳ ᠴᠢ ᠨᠠᠳᠠ ᠳ᠋ᠤ᠌ ᠬᠣᠭᠣᠯᠠ ᠬᠢᠯᠭᠡᠵᠦ ᠲᠤᠰᠠᠯᠠᠨᠠ ᠪᠢᠵᠡ᠃ ᠣᠷᠣᠢᠲᠠᠪᠠᠯ ᠮᠠᠨ ᠤ᠋ ᠳ᠋ᠤ᠌ ᠬᠣᠨᠣᠭᠠᠳ ᠥᠷᠯᠥᠭᠡ ᠪᠠᠰᠠ ᠨᠣᠮ ᠢ᠋ᠶ᠋ᠠᠨ ᠥᠯᠥᠨ ᠡᠯᠢᠭᠡᠨ ᠳᠡᠭᠡᠷᠡ ᠪᠡᠨ ᠤᠩᠰᠢᠨᠠ ᠪᠢᠵᠡ! ᠭᠡᠵᠦ ᡀᠠᠷᠠᠮᠪᠠ ᠠᠭᠠᠵᠢᠮ ᠵᠣᠭᠣᠨ ᠢ᠋ᠶ᠋ᠠᠷ ᠬᠡᠯᠡᠬᠦ ᠳ᠋ᠦ᠍ ᠨᠢ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠳᠣᠲᠣᠷᠠ ᠬᠠᠷᠠᠩᠭᠤᠢᠯᠠᠬᠤ ᠮᠡᠲᠦ ᠪᠣᠯᠪᠠ᠃ ᠭᠡᠪᠡᠴᠦ ᠯᠠᠮᠠ ᠪᠠᠭᠰᠢ ᠶ᠋ᠢᠨ ᠦᠭᠡ ᠶ᠋ᠢ ᠰᠥᠷᠬᠦ ᠨᠢ ᠪᠢᠲᠡᠭᠡᠢ ᠬᠡᠯᠡ ᠳᠤᠷᠠ ᠦᠭᠡᠢᠴᠡᠵᠦ ᠪᠣᠳᠣᠬᠤ ᠨᠢ ᠴᠤ᠌ ᠬᠦᠷᠲᠡᠯᠡ ᠨᠢᠭᠦᠯ ᠭᠡᠵᠦ ᠲᠡᠷᠡ ᠪᠣᠯᠭᠣᠮᠵᠢᠯᠠᠪᠠ᠃ ᠭᠡᠷ ᠣᠷᠣᠨ ᠢ᠋ᠶ᠋ᠠᠨ᠂ ᠨᠤᠲᠤᠭ ᠢ᠋ᠶ᠋ᠠᠨ ᠶᠡᠬᠡ ᠮᠥᠷᠥᠭᠡᠳᠴᠦ ᠪᠠᠢᠳᠠᠭ ᠢ᠋ᠶ᠋ᠠᠨ ᠶᠠᠭ ᠯᠠ ᠡᠢᠮᠦ ᠦᠶᠡ ᠳ᠋ᠦ᠍ ᠤᠬᠠᠭᠠᠷᠠᠳᠠᠭ ᠠᠵᠢ᠃ ᠨᠤᠲᠤᠭ ᠠ᠋ᠴᠠ ᠨᠢ ᠢᠷᠡᠭᠰᠡᠨ ᠬᠥᠮᠦᠨ ᠦ᠌ ᠰᠤᠷᠠᠭ ᠭᠠᠷᠤᠮᠠᠭᠴᠠ ᠣᠴᠢᠵᠤ ᠠᠭᠤᠯᠵᠠᠬᠤ᠂ ᠡᠬᠡ ᠡᠴᠢᠭᠡ ᠪᠡᠨ ᠠᠰᠠᠭᠤᠬᠤ᠂ ᠶᠡᠷᠦᠨᠢ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠬᠦ ᠶ᠋ᠢ ᠣᠨᠴᠠᠭᠠᠢ ᠶᠡᠬᠡ ᠬᠦᠰᠡᠨᠡ᠃ ᠲᠡᠷᠡ ᠲᠣᠰᠤᠮ ᠢ᠋ᠶ᠋ᠠᠨ ᠣᠢᠷᠠᠬᠠᠨ ᠲᠠᠨᠢᠬᠤ ᠪᠣᠯᠤᠭᠰᠠᠨ ᠣᠳᠬᠣᠨ ᠬᠡᠦᠬᠡᠨ ᠢᠷᠡᠵᠦ ᠭᠡᠬᠦ ᠪᠡᠷ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠰᠡᠳᠬᠢᠯ ᠶᠡᠬᠡ ᠯᠠ ᠲᠣᠭᠲᠠᠪᠤᠷᠢ ᠦᠭᠡᠢ ᠪᠣᠯᠵᠤ ᠱᠠᠯᠠᠪᠬᠠᠨ ᠠᠭᠤᠯᠵᠠᠬᠤ ᠶ᠋ᠢᠨ ᠮᠥᠷᠥᠭᠡᠳᠦᠯ ᠳ᠋ᠦ᠍ ᠡᠵᠡᠯᠡᠭᠳᠡᠯᠡ᠃ ᠣᠳᠬᠣᠨ ᠬᠡᠦᠬᠡᠨ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠲᠠᠨᠢᠬᠤ ᠴᠣᠷ ᠤ᠋ᠨ ᠭᠠᠭᠴᠠ ᠣᠢᠷᠠᠯᠴᠠᠭᠠ ᠨᠠᠰᠤᠨ ᠤ᠋ ᠪᠦᠰᠡᠭᠦᠢ ᠬᠦᠮᠦᠨ ᠪᠠᠢᠯᠠ᠃ ᠠᠯᠤᠰ ᠬᠣᠯᠠ ᠶ᠋ᠢᠨ ᠵᠠᠮ ᠢ᠋ ᠲᠤᠭᠤᠯᠬᠤ ᠬᠠᠮᠲᠤ ᠶ᠋ᠢᠨ ᠠᠶᠠᠨ ᠤ᠋ ᠲᠡᠷᠡ ᠡᠳᠦᠷ ᠦ᠋ᠳ ᠲᠦ᠍ ᠰᠠᠩᠵᠢ ᠭᠡᠰᠦᠯ ᠲᠡᠭᠦᠨ ᠳ᠋ᠦ᠍ ᠲᠤᠰᠠ ᠬᠦᠷᠭᠡᠬᠦ ᠶ᠋ᠢ ᠮᠡᠷᠡᠢᠨ ᠶᠠᠪᠤᠭᠰᠠᠨ ᠴᠠᠭ ᠪᠣᠢ᠃ ᠬᠥᠬᠡ ᠲᠣᠭᠠᠨ ᠤ᠋ ᠳᠠᠪᠠᠭᠠᠨ ᠳᠤ ᠲᠡᠭᠦᠨ ᠢ᠋ ᠮᠣᠷᠢᠨ ᠳᠡᠭᠡᠷᠡ ᠪᠡᠨ ᠳᠦᠭᠦᠷᠴᠤ ᠳᠠᠪᠠᠭᠠ ᠳᠠᠪᠠᠭᠤᠯᠬᠤ ᠬᠦᠷᠲᠡᠯᠡ ᠪᠣᠭᠣᠨᠢᠬᠠᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠣᠢ ᠭᠠᠰᠢᠭᠤ ᠪᠠᠷ ᠳᠦᠭᠦᠷᠡᠩ ᠴᠡᠭᠡᠵᠢ ᠶ᠋ᠢ ᠨᠢ ᠲᠡᠪᠡᠷᠢᠨ ᠲᠠᠢᠳᠬᠤᠷᠠᠭᠤᠯᠵᠤ ᠪᠠᠢᠭ᠍ᠰᠠᠨ ᠲᠡᠷᠡ ᠯᠠ ᠵᠢᠷᠤᠭ ᠵᠠᠯᠠᠭᠤ ᠭᠡᠰᠦᠯ ᠦ᠋ᠨ ᠰᠠᠨᠠᠭᠠᠨ ᠠ᠋ᠴᠠ ᠭᠠᠷᠳᠠᠭ ᠦᠭᠡᠢ ᠶᠦᠮ᠃ ᠭᠡᠪᠡᠴᠦ ᠡᠨᠡ ᠨᠢ ᠨᠣᠮ ᠤ᠋ᠨ ᠮᠥᠷ ᠬᠥᠭᠡᠭᠡᠵᠦ᠂ ᠰᠠᠬᠢᠯ ᠢ᠋ᠶ᠋ᠠᠨ ᠰᠠᠬᠢᠭᠰᠠᠨ ᠭᠡᠰᠦᠯ ᠬᠦᠮᠦᠨ ᠦ᠌ ᠰᠠᠨᠠᠭᠠ ᠶ᠋ᠢ ᠣᠭᠲᠣᠬᠠᠨ ᠤᠷᠪᠠᠭᠤᠯᠤᠭᠠ ᠦᠭᠡᠢ ᠵᠦᠭᠡᠷ ᠯᠡ ᠶᠠᠭᠠᠬᠢᠭᠠᠳ ᠴᠤ᠌ ᠶᠤᠮ ᠪᠣᠢ ᠦᠶᠡ ᠦᠶᠡ ᠪᠣᠳᠣᠳᠠᠭ ᠪᠠᠢᠯᠠ᠃