ᠡᠷᠡᠬᠡᠢ ᠮᠡᠷᠭᠡᠨ ᠦᠯᠢᠭᠡᠷЭрхий мэргэн үлгэр
1324ᠡᠷᠡᠬᠡᠢ ᠮᠡᠷᠭᠡᠨ ᠦ ᠦᠯᠢᠭᠡᠷ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠡᠨᠡ ᠳᠡᠯᠡᠬᠡᠢ ᠳ᠋ᠦ᠍ ᠳᠣᠯᠣᠭᠠᠨ ᠨᠠᠷᠠ ᠭᠠᠷᠤᠭᠠᠳ ᠭᠠᠩ ᠭᠠᠴᠢᠭ ᠪᠣᠯᠤᠭᠠᠳ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠤᠯᠠᠢᠭᠠᠳ ᠤᠰᠤ ᠮᠥᠷᠡᠨ ᠰᠢᠷᠭᠢᠭᠡᠳ ᠤᠷᠭᠤᠮᠠᠯ ᠮᠣᠳᠣ ᠬᠠᠲᠠᠭᠠᠳ ᠠᠮᠢᠲᠠᠨ ᠬᠥᠮᠦᠨ ᠬᠠᠯᠠᠭᠤᠴᠠᠭᠠᠳ ᠠᠳᠤᠭᠤ ᠮᠠᠯ ᠬᠠᠷᠠᠩᠭᠤᠳᠤᠭᠠᠳ ᠪᠠᠢᠬᠤ ᠰᠠᠭᠤᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠵᠠᠢ ᠭᠡᠨᠡ᠃ ᠲᠡᠭᠡᠲᠡᠯᠡ ᠲᠡᠷᠡ ᠨᠤᠲᠤᠭ ᠲᠤ᠌ ᠡᠷᠡᠬᠡᠢ ᠮᠡᠷᠭᠡᠨ ᠭᠡᠳᠡᠭ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠬᠠᠷᠪᠤᠳᠠᠭ ᠬᠠᠷᠪᠤᠭᠰᠠᠨ ᠢ᠋ᠶ᠋ᠠᠨ ᠤᠨᠤᠳᠠᠭ ᠬᠠᠪᠤᠲᠠᠢ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠪᠠᠢᠵᠠᠢ ᠭᠡᠨᠡ᠃
ᠣᠭᠲᠠᠷᠭᠤᠢ ᠳ᠋ᠤ᠌ ᠭᠠᠷᠤᠭᠰᠠᠨ ᠣᠯᠠᠨ ᠨᠠᠷᠠ ᠶ᠋ᠢ ᠴᠢ ᠤᠨᠤᠵᠤ ᠬᠠᠷᠪᠤᠭᠠᠳ ᠤᠰᠠᠳᠬᠠᠭᠠᠳ ᠥᠭᠭᠦᠭᠡᠴᠢ ᠭᠡᠵᠦ ᠣᠯᠠᠨ ᠠᠮᠢᠲᠠᠨ ᠲᠡᠭᠦᠨ ᠳ᠋ᠦ᠍ ᠣᠴᠢᠵᠤ ᠭᠤᠶᠤᠵᠠᠢ ᠭᠡᠨᠡ᠃ ᠡᠷᠡ ᠶ᠋ᠢᠨ ᠰᠠᠢᠨ ᠲᠥᠷᠥᠭᠰᠡᠨ ᠡᠷᠡᠬᠡᠢ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠡᠷᠡᠬᠡᠢ ᠳ᠋ᠦ᠍ ᠪᠡᠨ ᠡᠷᠴᠢ ᠲᠡᠢ ᠡᠯᠢᠭᠡᠨ ᠳ᠋ᠦ᠍ ᠪᠡᠨ ᠰᠥᠰᠥ ᠲᠡᠢ ᠵᠠᠯᠠᠭᠤ ᠨᠠᠰᠤ ᠲᠠᠢ ᠬᠠᠯᠭᠤᠨ ᠴᠢᠰᠤ ᠲᠠᠢ ᠬᠥᠮᠦᠨ ᠪᠣᠯᠬᠣᠷ ᠮᠡᠷᠭᠡᠨ ᠬᠠᠷᠪᠤᠳᠠᠭ ᠲᠤ᠌ ᠪᠠᠨ ᠡᠷᠳᠦᠵᠦ ᠪᠢ ᠳᠣᠯᠣᠭᠠᠨ ᠨᠠᠷᠠ ᠶ᠋ᠢ ᠳᠣᠯᠣᠭᠠᠨ ᠰᠤᠮᠤ ᠪᠠᠷ ᠨᠢᠭᠡ ᠨᠢᠭᠡ ᠬᠠᠷᠪᠤᠭᠠᠳ ᠣᠨᠣᠭᠠᠵᠤ ᠤᠰᠠᠳᠬᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠨ ᠣᠭᠲᠣᠯᠤᠭᠠᠳ ᠡᠷᠡ ᠬᠥᠮᠦᠨ ᠢ᠋ᠶ᠋ᠡᠨ ᠪᠠᠢᠭᠠᠳ ᠬᠠᠷᠠ ᠤᠰᠤ ᠤᠤᠭᠤᠬᠤ ᠦᠭᠡᠢ ᠬᠠᠭᠳᠠ ᠡᠪᠡᠰᠦ ᠢᠳᠡᠬᠦ ᠦᠭᠡᠢ ᠠᠮᠢᠲᠠᠨ ᠪᠣᠯᠤᠭᠠᠳ ᠬᠠᠷᠠᠩᠭᠤᠢ ᠨᠦᠬᠡᠨ ᠳ᠋ᠦ᠍ ᠠᠮᠢᠳᠤᠷᠠᠨᠠ ᠭᠡᠵᠦ ᠠᠮᠠ ᠠᠯᠳᠠᠵᠤ ᠲᠠᠩᠭᠠᠷᠢᠭ ᠬᠢᠵᠡᠢ ᠭᠡᠨᠡ᠃ ᠲᠡᠭᠡᠭᠡᠳ ᠳᠣᠷᠣᠨᠠᠲᠤ ᠠ᠋ᠴᠠ ᠥᠷᠥᠨᠡ ᠳ᠋ᠦ᠍ ᠬᠦᠷᠲᠡᠯᠡ ᠣᠭᠲᠠᠷᠭᠤᠢ ᠳ᠋ᠤ᠌ ᠴᠤᠪᠤᠷᠠᠭᠰᠠᠨ ᠳᠣᠯᠣᠭᠠᠨ ᠨᠠᠷᠠ ᠶ᠋ᠢ ᠵᠡᠭᠦᠨ ᠡᠴᠡ ᠨᠢ ᠬᠠᠷᠪᠤᠭᠠᠳ ᠭᠠᠷᠴᠠᠢ ᠭᠡᠨᠡ᠃ ᠵᠢᠷᠭᠤᠭᠠᠨ ᠰᠤᠮᠤ ᠪᠠᠷ ᠵᠢᠷᠭᠤᠭᠠᠨ ᠨᠠᠷᠠ ᠶ᠋ᠢ ᠤᠰᠠᠳᠬᠠᠭᠠᠳ ᠳᠣᠯᠣᠳᠠᠬᠢ ᠨᠠᠷᠠ ᠶ᠋ᠢ ᠬᠠᠷᠪᠤᠬᠤ ᠪᠠᠷ ᠱᠠᠭᠠᠢᠵᠤ ᠰᠢᠪᠰᠢᠵᠦ ᠪᠠᠢᠲᠠᠯᠠ ᠨᠢ ᠬᠠᠷᠢᠶᠠᠴᠠᠢ ᠰᠢᠪᠠᠭᠤ ᠤᠷᠳᠤᠭᠤᠷ ᠨᠢ ᠣᠷᠣᠵᠤ ᠬᠠᠯᠬᠠᠯᠠᠭᠰᠠᠨ ᠳ᠋ᠤ᠌ ᠬᠠᠷᠪᠤᠭᠠᠳ ᠣᠷᠬᠢᠭᠰᠠᠨ ᠴᠢᠨᠢ ᠬᠠᠷᠢᠶᠠᠴᠠᠢ ᠶ᠋ᠢᠨ ᠰᠡᠭᠦᠯ ᠢ᠋ ᠰᠡᠳᠡ ᠤᠨᠤᠭᠰᠠᠨ ᠤᠴᠢᠷ ᠠᠯᠲᠠᠨ ᠬᠠᠷᠢᠶᠠᠴᠠᠢ ᠶ᠋ᠢᠨ ᠰᠡᠭᠦᠯ ᠬᠣᠶᠠᠷ ᠰᠠᠯᠠᠭᠠ ᠪᠣᠯᠴᠢᠬᠠᠭᠰᠠᠨ ᠭᠡᠨᠡ᠃ ᠬᠠᠷᠢᠨ ᠥᠨᠥᠬᠢ ᠰᠡᠭᠦᠯᠴᠢ ᠶ᠋ᠢᠨ ᠨᠠᠷᠠ ᠬᠠᠷᠪᠤᠭᠠᠴᠢ ᠠ᠋ᠴᠠ ᠠᠶᠤᠭᠠᠳ ᠪᠠᠷᠠᠭᠤᠨ ᠠᠭᠤᠯᠠ ᠶ᠋ᠢᠨ ᠴᠠᠭᠠᠭᠤᠷ ᠪᠠᠷᠤᠰᠬᠢᠭᠡᠳ ᠳᠠᠯᠳᠠ ᠣᠷᠣᠴᠢᠬᠠᠵᠠᠢ ᠭᠡᠨᠡ᠃ ᠡᠷᠡᠬᠡᠢ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠬᠠᠷᠢᠶᠠᠴᠠᠢ ᠰᠢᠪᠠᠭᠤ ᠶ᠋ᠢ ᠰᠠᠳᠠᠭᠠ ᠪᠣᠯᠤᠯᠠ ᠭᠡᠵᠦ ᠬᠠᠷᠴᠠᠭᠠ ᠠᠯᠠᠭ ᠮᠣᠷᠢ ᠪᠠᠷ ᠬᠥᠭᠡᠭᠡᠵᠦ ᠠᠯᠠᠬᠤ ᠭᠡᠰᠡᠨ ᠳ᠋ᠦ᠍ ᠮᠣᠷᠢ ᠨᠢ ᠬᠡᠯᠡᠵᠡᠢ ᠭᠡᠨᠡ᠃ ᠦᠳᠡᠰᠢ ᠶ᠋ᠢᠨ ᠬᠠᠷᠤᠢ ᠪᠦᠷᠦᠢ ᠡᠴᠡ ᠦᠷ ᠦ᠋ᠨ ᠭᠡᠭᠡᠨ ᠣᠷᠣᠲᠠᠯᠠ ᠬᠥᠭᠡᠭᠡᠭᠡᠳ ᠬᠠᠷᠢᠶᠠᠴᠠᠢ ᠰᠢᠪᠠᠭᠤ ᠶ᠋ᠢ ᠪᠢ ᠭᠦᠢᠴᠡᠬᠦ ᠦᠭᠡᠢ ᠪᠣᠯ ᠬᠥᠯ ᠮᠥᠴᠢ ᠶ᠋ᠢ ᠮᠢᠨᠢ ᠣᠭᠲᠣᠯᠤᠭᠠᠳ ᠬᠥᠳᠡᠭᠡ ᠭᠠᠵᠠᠷ ᠬᠠᠶᠠᠭᠠᠷᠠᠢ ᠭᠡᠮᠡᠨ ᠡᠮᠡᠭᠡᠯᠲᠦ ᠮᠣᠷᠢ ᠠᠮᠠᠨ ᠲᠠᠩᠭᠠᠷᠢᠭ ᠥᠭᠴᠡᠢ ᠭᠡᠨᠡ᠃ ᠬᠠᠷᠢᠶᠠᠴᠠᠢ ᠰᠢᠪᠠᠭᠤ ᠶ᠋ᠢ ᠬᠥᠭᠡᠭᠡᠭᠡᠳ ᠬᠠᠷᠢᠭᠤ ᠦᠭᠡᠢ ᠭᠦᠢᠴᠡᠬᠦ ᠶ᠋ᠢᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠬᠠᠷᠢᠶᠠᠴᠠᠢ ᠰᠢᠪᠠᠭᠤ ᠬᠠᠮᠢᠭᠠᠰᠢ ᠪᠠᠨ ᠴᠤ᠌ ᠬᠠᠮᠢᠶᠠ ᠦᠭᠡᠢ ᠬᠠᠯᠲᠤ ᠪᠤᠯᠲᠤ ᠦᠰᠦᠷᠦᠭᠡᠳ ᠠᠷᠠᠢ ᠬᠦᠢᠴᠡᠭ᠌ᠳᠡᠯ ᠦᠭᠡᠢ ᠵᠢᠭᠤᠲᠠᠭᠰᠠᠭᠠᠷ ᠦᠷ ᠦ᠋ᠨ ᠭᠡᠭᠡ ᠬᠦᠷᠴᠢᠬᠡᠵᠡᠢ ᠭᠡᠨᠡ᠃
ᠡᠷᠡᠬᠡᠢ ᠮᠡᠷᠭᠡᠨ ᠠᠭᠤᠷᠯᠠᠭᠠᠳ ᠬᠠᠷᠴᠠᠭᠠ ᠠᠯᠠᠭ ᠮᠣᠷᠢᠨ ᠤ᠋ ᠪᠠᠨ ᠡᠮᠦᠨᠡᠲᠦ ᠬᠣᠶᠠᠷ ᠬᠥᠯ ᠢ᠋ ᠣᠭᠲᠣᠯᠤᠭᠠᠳ ᠬᠥᠳᠡᠭᠡ ᠭᠠᠵᠠᠷ ᠬᠠᠶᠠᠴᠢᠬᠠᠭᠰᠠᠨ ᠴᠢᠨᠢ ᠮᠣᠷᠢ ᠨᠢ ᠠᠯᠠᠭᠳᠠᠭᠠ ᠪᠣᠯᠴᠢᠬᠠᠵᠠᠢ ᠭᠡᠨᠡ᠃ ᠠᠯᠠᠭᠳᠠᠭᠠᠨ ᠤ᠋ ᠤᠷᠲᠤ ᠬᠣᠶᠠᠷ ᠬᠥᠯ ᠪᠣᠭᠣᠨᠢ ᠪᠠᠢᠳᠠᠭ ᠤ᠋ᠨ ᠤᠴᠢᠷ ᠲᠡᠷᠡ ᠭᠡᠨᠡ᠃ ᠪᠠᠰᠠ ᠬᠠᠷᠢᠶᠠᠴᠠᠢ ᠰᠢᠪᠠᠭᠤ ᠦᠳᠡᠰᠢ ᠶ᠋ᠢᠨ ᠬᠠᠷᠤᠢ ᠪᠦᠷᠦᠢ ᠪᠡᠷ ᠮᠣᠷᠢᠲᠠᠢ ᠬᠥᠮᠦᠨ ᠦ᠌ ᠤᠷᠳᠤᠭᠤᠷ ᠬᠣᠢᠭᠤᠷ ᠡᠭᠡᠷᠡᠨ ᠲᠣᠭᠣᠷᠢᠨ ᠨᠢᠰᠳᠡᠭ ᠨᠢ ᠨᠠᠮᠠ ᠶ᠋ᠢ ᠭᠦᠢᠴᠡᠬᠦ ᠤᠤ ᠭᠦᠢᠴᠡᠬᠦ ᠤᠤ ᠭᠡᠵᠦ ᠳᠣᠭᠣᠭᠢᠯᠠᠵᠤ ᠪᠠᠢᠭᠠ ᠨᠢ ᠲᠡᠷᠡ ᠭᠡᠨᠡ᠃ ᠡᠷᠡᠬᠡᠢ ᠮᠡᠷᠭᠡᠨ ᠥᠪᠡᠷ ᠢ᠋ᠶ᠋ᠡᠨ ᠡᠷᠡ ᠬᠥᠮᠦᠨ ᠦ᠌ ᠠᠮᠠᠨ ᠲᠠᠩᠭᠠᠷᠢᠭ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠨ ᠣᠭᠲᠣᠯᠵᠤ ᠬᠠᠶᠠᠭᠠᠳ ᠡᠷᠡ ᠬᠥᠮᠦᠨ ᠢ᠋ᠶ᠋ᠡᠨ ᠪᠠᠢᠭᠠᠳ ᠬᠠᠷᠠ ᠤᠰᠤ ᠤᠤᠭᠤᠳᠠᠭ ᠦᠭᠡᠢ ᠬᠠᠭᠳᠠ ᠡᠪᠡᠰᠦ ᠢᠳᠡᠳᠡᠭ ᠦᠭᠡᠢ ᠲᠠᠷᠪᠠᠭᠠ ᠪᠣᠯᠤᠭᠠᠳ ᠬᠠᠷᠠᠩᠭᠤᠢ ᠨᠦᠬᠡᠨ ᠳ᠋ᠦ᠍ ᠠᠮᠢᠳᠤᠷᠠᠳᠠᠭ ᠪᠣᠯᠤᠭᠰᠠᠨ ᠭᠡᠨᠡ᠃ ᠲᠠᠷᠪᠠᠭᠠᠨ ᠤ᠋ ᠬᠥᠯ ᠦ᠋ᠨ ᠰᠠᠷᠪᠠᠭᠤ ᠳᠥᠷᠪᠡ ᠪᠠᠢᠳᠠᠭ ᠡᠭᠦᠨ ᠡᠴᠡ ᠪᠣᠯᠤᠭᠰᠠᠨ ᠭᠡᠨᠡ᠃ ᠪᠠᠰᠠ ᠡᠷᠡᠬᠡᠢ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠲᠠᠷᠪᠠᠭᠠ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠮᠠᠷᠲᠠᠭᠠᠳ ᠣᠷᠣᠢ ᠥᠷᠯᠥᠭᠡᠨ ᠦ᠌ ᠨᠠᠷᠠ ᠪᠠᠷ ᠤᠲᠤᠵᠤ ᠪᠠᠢᠵᠤ ᠨᠠᠷᠠ ᠶ᠋ᠢ ᠬᠠᠷᠪᠤᠨᠠ ᠭᠡᠵᠦ ᠥᠷᠯᠥᠭᠡ ᠣᠷᠣᠢ ᠶ᠋ᠢᠨ ᠨᠠᠷᠠᠨ ᠢ᠋ᠶ᠋ᠠᠷ ᠨᠦᠬᠡᠨ ᠡᠴᠡ ᠪᠡᠨ ᠭᠠᠷᠳᠠᠭ ᠤᠴᠢᠷ ᠲᠡᠷᠡ ᠭᠡᠨᠡ᠃ ᠮᠥᠨ ᠡᠨᠡ ᠳᠡᠯᠡᠬᠡᠢ ᠳ᠋ᠦ᠍ ᠦᠯᠡᠳᠡᠭᠰᠡᠨ ᠭᠠᠭᠴᠠ ᠨᠠᠷᠠ ᠨᠢ ᠡᠷᠡᠬᠡᠢ ᠮᠡᠷᠭᠡᠨ ᠡᠴᠡ ᠠᠶᠤᠭᠠᠳ ᠠᠭᠤᠯᠠ ᠶ᠋ᠢᠨ ᠴᠠᠭᠠᠭᠤᠷ ᠣᠷᠣᠴᠢᠬᠠᠭᠰᠠᠨ ᠤᠴᠢᠷ ᠠ᠋ᠴᠠ ᠡᠳᠦᠷ ᠰᠥᠨᠢ ᠡᠭᠡᠯᠵᠢᠯᠡᠳᠡᠭ ᠪᠣᠯᠤᠭᠰᠠᠨ ᠭᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠮᠥᠩᠭᠦᠨᠴᠡᠴᠡᠭ
ᠦᠰᠦᠭ ᠬᠠᠲᠠᠭᠰᠠᠨ ᠨᠢ᠄ ᠮᠥᠩᠭᠦᠨᠴᠡᠴᠡᠭ
ᠬᠢᠨᠠᠭᠴᠢ ᠪᠠᠭᠰᠢ ᠨᠢ᠄ ᠮᠥᠴᠢᠷ᠂ ᠢᠷᠡᠭᠡᠳᠦᠢ