ᠣᠷᠣᠢ ᠦᠭᠡᠢ ᠰᠦᠮᠡ – ᠠᠷᠪᠠᠨ ᠳᠣᠯᠣᠭᠠ ᠂ ᠣᠶᠣᠨ ᠤ ᠰᠠᠪᠠ ᠭᠡᠨᠡᠳᠲᠡ ᠳᠦᠭᠦᠷᠪᠡ Оройгүй сүм – Арвандолоо ᠂ Оюуны сав гэнэт дүүрэв - Oroigui sum 17
758ᠠᠷᠪᠠᠨ ᠳᠣᠯᠣᠭᠠ ᠂ ᠣᠶᠣᠨ ᠤ ᠰᠠᠪᠠ ᠭᠡᠨᠡᠳᠲᠡ ᠳᠦᠭᠦᠷᠪᠡ
ᠤᠷᠭᠤᠬᠤ ᠮᠣᠳᠣ ᠨᠢᠭᠡ ᠮᠤᠷᠤᠢᠨᠠ
ᠤᠷᠲᠤ ᠵᠠᠮ ᠨᠢᠭᠡ ᠮᠤᠷᠤᠢᠨᠠ
ᠳᠠᠷᠠ ᠰᠥᠨᠢ ᠲᠡᠷᠭᠡᠯ ᠰᠠᠷᠠ ᠲᠠᠢ ᠪᠠᠢᠯᠠ᠃ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠨᠣᠢᠷ ᠬᠦᠷᠬᠦ ᠦᠭᠡᠢ ᠡᠷᠭᠢᠵᠦ ᠬᠥᠷᠪᠡᠵᠦ᠂ ᠬᠣᠷᠸᠠ ᠶ᠋ᠢᠨ ᠲᠦᠮᠡᠨ ᠶᠠᠪᠤᠳᠠᠯ ᠢ᠋ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠵᠤ᠂ ᠰᠡᠳᠬᠢᠯ ᠦᠨ ᠰᠢᠨᠠᠯᠤᠭᠠᠨ ᠳ᠋ᠤ᠌ ᠲᠠᠷᠴᠢᠯᠠᠨ ᠵᠣᠪᠠᠵᠤ ᠪᠠᠢᠯᠠ᠃ ᠨᠢᠭᠡᠨ ᠦᠶᠡ ᠠᠯᠤᠰ ᠲᠡᠷᠲᠡᠭᠡ ᠬᠠᠷᠠ ᠠᠵᠢᠷᠭᠠ ᠶᠢᠨ ᠨᠢᠷᠤᠭᠤᠨ ᠳ᠋ᠤ᠌ ᠤᠰᠤᠲᠤ ᠴᠠᠴᠣᠷᠠᠩᠭᠠ ᠤ᠋ᠨ ᠭᠣᠣᠯ ᠢ᠋ᠶ᠋ᠠᠷ ᠨᠤᠲᠤᠭᠯᠠᠬᠤ ᠶᠠᠳᠠᠭᠤ ᠡᠴᠢᠭᠡ ᠡᠬᠡ᠂ ᠳᠡᠭᠦᠦ ᠨᠠᠷ ᠢᠶᠠᠨ ᠰᠠᠨᠠᠨᠠ᠃ ᠨᠢᠭᠡᠨ ᠦᠶᠡ ᠬᠠᠷᠢ ᠭᠠᠵᠠᠷ ᠤ᠋ᠨ ᠲᠦᠮᠡᠨ ᠠᠷᠠᠨᠰᠢᠨ ᠲᠠᠢ᠂ ᠮᠢᠩᠭᠠᠨ ᠵᠣᠪᠠᠯᠠᠩ ᠲᠠᠢ ᠠᠮᠢᠳᠤᠷᠠᠯ ᠤ᠋ᠨ ᠡᠷᠢᠶᠡᠪᠦᠷ ᠬᠤᠷᠢᠶᠠᠪᠤᠷ ᠶᠠᠪᠤᠳᠠᠯ ᠢ᠋ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠨᠠ᠃ ᠪᠤᠷᠬᠠᠨ ᠤ᠋ ᠣᠷᠣᠨ ᠭᠡᠭᠳᠡᠭᠰᠡᠨ ᡀᠠᠰᠠ ᠬᠣᠲᠠᠨ ᠳ᠋ᠤ᠌ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠦᠵᠡᠭᠰᠡᠨ ᠬᠠᠷᠠᠭᠰᠠᠨ᠂ ᠲᠤᠭᠤᠯᠵᠤ ᠥᠩᠭᠡᠷᠡᠭᠦᠯᠦᠭᠰᠡᠨ ᠪᠦᠬᠦᠨ ᠨᠢ ᠪᠤᠶᠠᠨᠵᠠᠯᠪᠠᠷᠢᠬᠤ ᠭᠡᠢᠳ ᠲᠦ᠍ ᠪᠠᠭᠰᠢ ᠯᠠᠮᠠ ᠴᠤᠢᠮᠴᠤᠭ ᠠ᠋ᠴᠠ ᠰᠣᠨᠣᠰᠴᠤ᠂ ᠨᠣᠮ ᠠ᠋ᠴᠠ ᠦᠵᠡᠵᠦ ᠲᠥᠰᠦᠭᠡᠯᠡᠨ ᠪᠣᠳᠣᠵᠤ ᠪᠠᠢᠭ᠍ᠰᠠᠨ ᠲᠠᠢ ᠣᠭᠲᠣᠬᠠᠨ ᠴᠤ᠌ ᠠᠳᠠᠯᠢ ᠦᠭᠡᠢ ᠪᠠᠢᠯᠠ᠃ ᠪᠤᠷᠬᠠᠨ ᠤ᠋ ᠨᠡᠷᠡ ᠪᠡᠷ ᠬᠢᠵᠦ ᠪᠠᠢᠳᠠᠭ ᠶᠠᠭᠤᠮᠠ ᠪᠦᠬᠦᠨ ᠲᠡᠢᠮᠦ ᠴᠤ᠌ ᠪᠤᠶᠠᠨᠲᠠᠢ ᠦᠢᠯᠡᠰ ᠦᠨ ᠰᠢᠨᠵᠢ ᠶ᠋ᠢ ᠲᠡᠷᠡ ᠪᠦᠷᠢ ᠰᠠᠨᠠᠭᠳᠠᠭᠤᠯᠬᠤ ᠦᠭᠡᠢ ᠳ᠋ᠦ᠍ ᠦᠶᠡ ᠦᠶᠡ ᠭᠠᠢᠬᠠᠬᠤ ᠰᠡᠳᠬᠢᠯ ᠰᠡᠳᠬᠢᠯ ᠲᠥᠷᠥᠵᠦ ᠪᠠᠢᠯᠠ᠃ ᠲᠡᠷᠡ ᠪᠣᠳᠣᠯ ᠳᠡᠭᠡᠷᠡ ᠨᠢ ᠵᠢᠨᠵᠦᠭ ᠵᠡᠯᠰᠡᠩ ᠥᠴᠥᠭᠡᠳᠦᠷ ᠳᠠᠪᠤᠰᠤ ᠨᠡᠮᠡᠭᠡᠳ ᠥᠭᠴᠡᠢ᠃《 ᠶᠠᠭᠠᠬᠢᠬᠤ ᠪᠠᠷ ᠢ᠋ᠶ᠋ᠠᠨ ᠬᠤᠷᠠᠯ ᠨᠣᠮ ᠤ᠋ᠨ ᠬᠥᠭᠵᠢᠮ ᠢ᠋ ᠬᠥᠮᠦᠨ ᠦ᠌ ᠶᠠᠰᠤ ᠪᠠᠷ ᠬᠢᠬᠦ ᠶ᠋ᠢ ᠲᠡᠷᠡ ᠮᠥᠷᠦᠭᠡᠳᠳᠡᠭ ᠶᠦᠮ ᠪᠣᠢ? ᠶᠠᠭᠠᠬᠢᠬᠤ ᠪᠠᠷ ᠢ᠋ᠶ᠋ᠠᠨ ᠲᠡᠷᠡ ᠬᠥᠮᠦᠨ ᠦ᠌ ᠰᠠᠢᠨ ᠰᠠᠢᠬᠠᠨ ᠳ᠋ᠤ᠌ ᠱᠣᠬᠣᠭᠣᠷᠬᠠᠬᠤ ᠶᠢᠨ ᠣᠷᠣᠨ ᠳ᠋ᠤ᠌ ᠶᠠᠰᠤᠨ ᠳ᠋ᠤ᠌ ᠨᠢ᠂ ᠲᠡᠷᠡ ᠲᠣᠰᠤᠮ ᠢ᠋ᠶ᠋ᠠᠨ ᠪᠦᠷ ᠭᠠᠪᠠᠯᠠ ᠶ᠋ᠢᠨ ᠶᠠᠰᠤᠨ ᠳ᠋ᠤ᠌ ᠨᠢ ᠰᠢᠨᠤᠵᠤ ᠶᠠᠪᠤᠳᠠᠭ ᠬᠥᠮᠦᠨ ᠪᠣᠢ?》ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠭᠠᠢᠬᠠᠨ ᠪᠣᠳᠣᠭᠠᠳ ᠤᠴᠢᠷ ᠢ᠋ ᠣᠯᠤᠭᠰᠠᠨ ᠦᠭᠡᠢ᠃ ᠲᠡᠷᠡᠴᠢᠯᠡᠨ ᠢ᠋ᠶ᠋ᠡᠷ ᠯᠠᠮᠠ ᠪᠠᠭᠰᠢᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠲᠤᠬᠠᠢ ᠡᠴᠦᠰ ᠲᠦ᠍ ᠨᠢ ᠨᠢᠭᠡᠨ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠦ᠌ ᠪᠡᠨ ᠲᠤᠬᠠᠢ ᠰᠠᠩᠵᠢ ᠪᠣᠳᠣᠯᠠ᠃ ᠨᠢᠭᠡᠨ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠨᠢ ᠨᠠᠮᠳᠡᠯ ᠦ᠋ᠨ ᠭᠤᠷᠪᠠᠬᠠᠨ ᠠᠢᠮᠠᠭ ᠢ᠋ ᠳᠠᠭᠤᠰᠬᠠᠵᠠᠢ᠃ ᠭᠡᠪᠡᠴᠦ ᠲᠡᠳᠡ ᠨᠠᠷ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠮᠡᠳᠡᠳᠡᠭ ᠡᠴᠡ ᠢᠯᠡᠭᠦᠦ ᠮᠡᠳᠡᠳᠡᠭ ᠦᠭᠡᠢ ᠪᠠᠢᠯᠠ᠃ ᠬᠠᠷᠢᠨ ᠰᠠᠩᠵᠢ ᠪᠣᠯ ᠢᠯᠡᠷᠬᠡᠢ ᠠᠢᠮᠠᠭ ᠰᠠᠪᠠ ᠶ᠋ᠢᠨ ᠪᠦᠬᠦ ᠰᠤᠳᠤᠷ ᠢ᠋ ᠤᠩᠰᠢᠭᠠᠳ ᠫᠠᠷᠴᠢᠩ ᠢ᠋ ᠳᠠᠭᠤᠰᠬᠠᠵᠤ ᠳ᠋ᠦ᠋ᠯᠪᠡ᠂ ᠠᠩᠨᠠᠢ ᠶ᠋ᠢᠨ ᠶᠣᠰᠣ ᠶ᠋ᠢ ᠨᠠᠷᠢᠪᠴᠢᠯᠠᠨ ᠦᠵᠡᠬᠦ ᠬᠡᠮᠵᠢᠶᠡᠨ ᠳ᠋ᠦ᠍ ᠪᠦᠷ ᠨᠤᠲᠤᠭ ᠲᠤ᠌ ᠪᠠᠨ ᠪᠠᠢᠬᠤ ᠳ᠋ᠤ᠌ ᠲᠤᠯᠵᠤ ᠣᠴᠢᠭᠰᠠᠨ ᠬᠥᠮᠦᠨ ᠲᠤᠯᠠ ᠨᠢᠭᠡ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠦ᠌ ᠪᠡᠨ ᠮᠡᠳᠡᠬᠦ ᠦᠭᠡᠢ ᠵᠦᠢᠯ ᠢ᠋ ᠴᠤ᠌ ᠴᠡᠭᠡᠵᠢᠯᠡᠨ ᠲᠣᠭᠲᠠᠭᠠᠭᠰᠠᠨ ᠪᠠᠢᠵᠠᠢ᠃ ᠭᠡᠪᠡᠴᠦ ᠲᠡᠭᠦᠨ ᠢ᠋ ᠪᠡᠨ ᠭᠠᠢᠬᠠᠭᠤᠯᠵᠤ ᠶᠠᠷᠢᠳᠠᠭ ᠦᠭᠡᠢ ᠶᠤᠮᠰᠠᠨᠵᠠᠢ᠃ ᠨᠥᠬᠥᠳ ᠨᠢ ᠰᠠᠩᠵᠢ ᠭᠡᠰᠦᠯ ᠢ᠋ ᠶᠠᠭᠤᠮᠠ ᠶ᠋ᠢ ᠵᠦᠢᠷᠯᠡᠰᠢ ᠦᠭᠡᠢ ᠬᠤᠷᠳᠤᠨ ᠲᠣᠭᠲᠠᠭᠠᠳᠠᠭ ᠠᠢᠬᠤᠪᠲᠤᠷ ᠣᠢ ᠲᠠᠢ ᠬᠥᠮᠦᠨ ᠭᠡᠵᠦ ᠪᠣᠳᠣᠳᠠᠭ ᠪᠣᠯᠵᠠᠢ᠃ ᠵᠠᠷᠢᠮ ᠨᠢ ᠲᠡᠭᠦᠨ ᠳ᠋ᠦ᠍ ᠪᠦᠷ ᠠᠲᠠᠭᠠᠷᠬᠠᠵᠤ ᠦᠵᠡᠨ ᠶᠠᠳᠠᠳᠠᠭ ᠪᠣᠯᠤᠭᠰᠠᠨ ᠰᠢᠭ᠋ ᠰᠠᠩᠵᠢ ᠳ᠋ᠤ᠌ ᠪᠣᠳᠣᠭᠳᠠᠳᠠᠭ ᠪᠠᠢᠪᠠ᠃ ᠢᠯᠠᠩᠭᠤᠶᠠ ᠠᠨᠳᠤᠤ ᠨᠤᠲᠤᠭ ᠤᠨ ᠲᠦᠪᠡᠳ ᠫᠠᠭᠰᠠᠩ ᠣᠨᠴᠠ ᠮᠠᠭᠤᠬᠠᠢ ᠵᠠᠩ ᠲᠠᠢ᠂ ᠶᠡᠷᠦ ᠨᠢ ᠰᠠᠩᠵᠢ ᠶᠢ ᠦᠵᠡᠨ ᠶᠠᠳᠠᠳᠠᠭ ᠮᠡᠲᠦ ᠰᠠᠨᠠᠭᠳᠠᠳᠠᠭ ᠠᠵᠢ᠃ ᠬᠤᠷᠠᠯ ᠳᠡᠭᠡᠷᠡ ᠮᠣᠩᠭᠣᠯ ᠢ᠋ᠶ᠋ᠠᠷ ᠤᠩᠰᠢᠯᠭᠠ ᠬᠢᠭᠰᠡᠨ ᠲᠤᠬᠠᠢ ᠳ᠋ᠤ᠌ ᠫᠠᠭᠰᠠᠩ ᠯᠠ ᠬᠣᠪᠠᠯᠠᠭᠰᠠᠨ ᠰᠢᠭ᠋ ᠰᠡᠵᠢᠭ ᠲᠥᠷᠥᠭᠰᠡᠨ᠃ ᠪᠠᠰᠠ ᠬᠠᠶᠠ ᠶᠠᠭᠤᠮᠠ ᠠᠰᠠᠭᠤᠬᠤ ᠳ᠋ᠤ᠌ ᠫᠠᠭᠰᠠᠩ ᠵᠥᠷᠢᠭᠦᠳ ᠰᠠᠷᠯᠤᠭ ᠰᠢᠭ᠋ ᠵᠠᠩᠨᠠᠳᠠᠭ᠃ ᠭᠡᠲᠡᠯᠡ ᠴᠣᠭᠰᠣᠩ ᠪᠣᠳᠢᠫᠠ ᠪᠣᠯ ᠣᠭᠲᠣ ᠥᠭᠡᠷᠡ᠃ ᠴᠠᠭ ᠦᠷᠭᠦᠯᠵᠢ ᠯᠠ ᠢᠨᠢᠶᠡᠪᠬᠢᠯᠡᠨ ᠵᠥᠭᠡᠯᠡᠨ ᠳᠠᠭᠤ ᠪᠠᠷ ᠠᠶᠠ ᠲᠠᠯᠠ ᠵᠠᠰᠠᠵᠤ ᠰᠠᠩᠵᠢ ᠭᠡᠰᠦᠯ ᠳ᠋ᠦ᠍ ᠳᠣᠯᠢᠭᠠᠨᠢᠵᠤ ᠶᠠᠪᠤᠳᠠᠭ ᠪᠠᠢᠯᠠ᠃ ᠵᠥᠪᠬᠡᠨ ᠰᠠᠩᠵᠢ ᠳ᠋ᠤ᠌ ᠴᠤ᠌ ᠪᠢᠰᠢ ᠬᠥᠮᠦᠨ ᠬᠥᠮᠦᠨ ᠳ᠋ᠤ᠌ ᠯᠡ ᠲᠡᠷᠡ ᠨᠠᠭᠠᠯᠳᠤᠵᠤ ᠴᠠᠪᠠᠤ ᠰᠢᠭ᠋ ᠶᠤᠮ ᠤᠤ ᠡᠰᠡᠪᠡᠯ ᠨᠣᠢᠲᠠᠨ ᠬᠠᠮᠠᠭᠤ ᠰᠢᠭ᠋ ᠰᠠᠯᠳᠠᠭ ᠦᠭᠡᠢ ᠡᠷᠡ ᠶᠦᠮ᠃ ᠵᠢᠩᠳᠠᠭᠠᠨ ᠤ ᠨᠢ ᠥᠭᠡᠯᠡᠳ᠂ ᠲᠣᠷᠭᠤᠳ ᠨᠠᠷ ᠲᠥᠪᠡᠳ ᠬᠡᠯᠡ ᠳ᠋ᠦ᠍ ᠰᠤᠯᠠ ᠲᠤᠯᠠ ᠬᠡᠯᠡ ᠰᠤᠷᠬᠤ ᠭᠡᠵᠦ ᠴᠣᠭᠰᠣᠩ ᠲᠠᠢ ᠶᠡᠬᠡ ᠨᠠᠭᠠᠯᠳᠤᠨ ᠦᠶᠡᠷᠬᠡᠳᠡᠭ ᠪᠠᠢᠯᠠ᠃ ᠨᠢᠭᠡ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠨᠢ 《 ᠰᠠᠩᠵᠢ ᠴᠢ ᠨᠣᠮ ᠪᠢᠰᠢᠯᠭᠠᠵᠤ ᠪᠡᠶᠡ ᠪᠡᠨ ᠵᠣᠪᠠᠭᠠᠵᠤ ᠶᠠᠭᠠᠬᠢᠬᠤ ᠨᠢ ᠪᠣᠢ? ᠨᠢᠭᠡ ᠯᠡ ᠤᠳᠠᠭᠠ ᠰᠣᠨᠣᠰᠤᠭᠠᠳ ᠯᠠ ᠴᠡᠭᠡᠵᠢᠯᠡᠴᠢᠬᠡᠳᠡᠭ ᠶᠦᠮ ᠴᠢᠨᠢ᠃ ᠶᠡᠷᠦ ᠵᠣᠪᠠᠬᠤ ᠶᠠᠭᠤᠮᠠ ᠠᠯᠠᠭᠠ᠃ ᠡᠨᠡᠳᠬᠡᠭ ᠭᠠᠵᠠᠷ ᠶᠠᠪᠤᠵᠤ ᠶᠡᠬᠡ ᠭᠠᠯᠢᠭᠠᠲᠠ ᠬᠣᠲᠠᠨ ᠳ᠋ᠤ᠌ ᠡᠷᠳᠡᠮ ᠰᠤᠷᠪᠠᠯ ᠲᠠᠭᠠᠷᠠᠨᠠ》 ᠭᠡᠵᠦ ᠬᠠᠶᠠ ᠱᠣᠭᠯᠠᠨ ᠶᠠᠷᠢᠳᠠᠭ ᠪᠠᠢᠯᠠ᠃
《ᠶᠡᠷᠦ ᠨᠢ ᠪᠢ ᠤᠷᠢᠳᠤ ᠰᠤᠷᠴᠢᠬᠠᠭᠰᠠᠨ ᠶᠠᠭᠤᠮᠠ ᠪᠠᠨ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠨ ᠪᠣᠯᠤᠭᠠᠳ ᠯᠠ ᠳᠠᠬᠢᠨ ᠳᠠᠪᠲᠠᠭᠠᠳ ᠰᠠᠭᠤᠵᠤ ᠪᠠᠢᠬᠤ ᠶᠠᠮᠠᠷ ᠬᠡᠷᠡᠭ ᠪᠠᠢᠨᠠ᠃ ᠰᠢᠭᠤᠳ ᠯᠠ ᠰᠢᠯᠭᠠᠭᠤᠯᠤᠭᠠᠳ ᠬᠡᠪᠰᠢ ᠪᠣᠯᠬᠤ ᠶᠢ ᠪᠣᠳᠣᠪᠠᠯ ᠶᠠᠭᠠᠬᠢᠬᠤ ᠪᠣᠯ! ᠮᠠᠨ ᠤ᠋ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠦ᠌ ᠪᠠᠢᠷᠢ ᠪᠠᠢᠴᠠ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠣᠳᠣ ᠳᠠᠬᠢᠭᠠᠳ ᠬᠣᠶᠠᠷ ᠭᠤᠷᠪᠠᠨ ᠵᠢᠯ ᠰᠠᠭᠤᠵᠤ ᠪᠠᠢᠵᠤ ᠸᠢᠨᠠᠢ ᠶ᠋ᠢᠨ ᠠᠢᠮᠠᠭ ᠤᠨ ᠰᠠᠪᠠ ᠳ᠋ᠤ᠌ ᠬᠦᠷᠴᠦ ᠢᠷᠡᠬᠦ ᠨᠢ ᠪᠣᠯᠤᠯᠲᠠᠢ᠃ ᠲᠡᠭᠡᠭᠡᠳ ᠴᠤ᠌ ᠬᠥᠭᠰᠢᠨ ᠡᠴᠢᠭᠡ ᠡᠬᠡ ᠮᠠᠨᠢ ᠮᠢᠨᠦ ᠬᠣᠢᠨᠠ ᠠ᠋ᠴᠠ ᠰᠢᠨᠠᠯᠵᠤ ᠵᠣᠪᠠᠵᠤ ᠵᠦᠳᠡᠷᠡᠵᠦ ᠪᠠᠢᠭᠠ ᠪᠢᠵᠡ᠃ ᠡᠨᠡ ᠭᠠᠵᠠᠷ ᠠᠷᠪᠠᠭᠠᠳ ᠵᠢᠯ ᠰᠠᠭᠤᠬᠤ ᠬᠣᠭᠣᠷᠣᠨᠳᠣ ᠶᠠᠭᠤ ᠴᠤ᠌ ᠪᠣᠯᠵᠤ ᠪᠣᠯᠤᠨᠠ》 ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠬᠠᠲᠠᠭᠤ ᠰᠢᠢᠳᠪᠦᠷᠢᠯᠡᠪᠡ᠃ ᠶᠠᠭ ᠲᠡᠭᠡᠵᠦ ᠪᠣᠳᠣᠬᠤ ᠦᠶᠡ ᠳ᠋ᠦ᠍ ᠨᠣᠢᠷ ᠨᠢ ᠬᠦᠷᠴᠦ ᠲᠠᠭ ᠤᠨᠲᠠᠴᠢᠬᠠᠵᠠᠢ᠃ ᠲᠡᠭᠡᠲᠡᠯᠡ ᠵᠡᠭᠦᠳᠦᠯᠡᠵᠦ ᠡᠬᠢᠯᠡᠪᠡ᠃ ᠬᠥᠮᠦᠨ ᠦ᠌ ᠭᠠᠪᠠᠯᠠ ᠪᠠᠷ ᠲᠠᠮᠠᠷᠤ ᠬᠢᠬᠦ ᠪᠡᠷ ᠵᠡᠯᠰᠡᠩ ᠵᠢᠨᠵᠦᠭ ᠬᠣᠶᠠᠭᠤᠯᠠ ᠪᠠᠨ ᠶᠠᠷᠢᠯᠴᠠᠵᠤ ᠪᠠᠢᠭ᠍ᠰᠠᠨ ᠨᠢᠭᠦᠯᠲᠦ ᠦᠢᠯᠡᠰ ᠦ᠋ᠨ ᠦᠷᠡ ᠪᠣᠯᠵᠤ ᠰᠠᠩᠵᠢ ᠵᠢ ᠲᠠᠮᠤ ᠳ᠋ᠤ᠌ ᠬᠦᠷᠭᠡᠬᠦ ᠪᠡᠷ ᠰᠢᠢᠳᠴᠡᠢ᠃ ᠴᠣᠬᠣᠮ ᠶᠠᠮᠠᠷ ᠲᠠᠮᠤ ᠳ᠋ᠤ᠌ ᠬᠠᠶᠠᠬᠤ ᠵᠢ ᠰᠢᠢᠳᠪᠦᠷᠢᠯᠡᠬᠦ ᠪᠡᠷ ᠡᠷᠯᠢᠭ ᠬᠠᠭᠠᠨ ᠴᠡᠩᠨᠡᠭᠦᠷ ᠢ᠋ᠶ᠋ᠡᠨ ᠪᠠᠷᠢᠨ ᠳᠠᠩᠰᠠᠯᠠᠨ ᠨᠠᠷᠢᠪᠴᠢᠯᠠᠨ ᠬᠡᠮᠵᠢᠵᠦ ᠪᠠᠢᠭ᠍ᠰᠠᠨ ᠢ᠋ᠶ᠋ᠠᠨ:
- ᠬᠢᠷᠥᠭᠡ ᠲᠠᠮᠤ ᠪᠡᠷ ᠣᠷᠣᠭᠤᠯᠵᠤ ᠳᠠᠷᠠᠭᠠ ᠨᠢ ᠲᠡᠮᠦᠷ ᠥᠷᠭᠡᠰᠦᠨ ᠳᠡᠭᠡᠷᠡ ᠭᠥᠪᠰᠢᠬᠦ ᠲᠠᠮᠤ ᠳ᠋ᠤ᠌ ᠪᠠᠢᠯᠭᠠ ! ᠲᠡᠭᠡᠭᠡᠳ ᠲᠡᠯᠡᠭᠦᠷᠳᠡᠨ ᠲᠥᠭᠡᠨᠡᠬᠦ ᠲᠠᠮᠤ ᠳ᠋ᠤ᠌ ᠬᠠᠶᠠ! ᠭᠡᠵᠦ ᠲᠤᠰᠢᠶᠠᠯᠠ᠃ ᠰᠠᠩᠵᠢ ᠦᠬᠦᠳᠬᠢᠨ ᠠᠶᠤᠵᠤ 《ᠪᠢ ᠭᠠᠪᠠᠯᠠ ᠪᠠᠷ ᠲᠠᠮᠠᠷᠤ ᠬᠢᠬᠦ ᠭᠡᠵᠦ ᠣᠭᠲᠣ ᠪᠣᠳᠣᠭᠠ ᠦᠭᠡᠢ》 ᠭᠡᠵᠦ ᠬᠡᠯᠡᠬᠦ ᠭᠡᠰᠡᠨ ᠪᠣᠯᠪᠠᠴᠤ ᠳᠠᠭᠤ ᠨᠢ ᠭᠠᠷᠬᠤ ᠦᠭᠡᠢ᠂ ᠬᠣᠭᠣᠯᠠᠢ ᠨᠢ ᠪᠣᠭᠣᠯᠲᠠ ᠲᠠᠢ ᠪᠠᠢᠯᠠ᠃ ᠡᠷᠯᠢᠭ ᠦᠨ ᠡᠯᠴᠢ ᠨᠠᠷ ᠰᠠᠩᠵᠢ ᠵᠢ ᠳᠥᠷᠪᠡᠨ ᠮᠥᠴᠢ ᠡᠴᠡ ᠨᠢ ᠲᠡᠮᠦᠷ ᠪᠡᠬᠢ ᠮᠡᠲᠦ ᠰᠠᠷᠪᠠᠭᠤ ᠪᠠᠷ ᠢᠶᠠᠨ ᠠᠳᠬᠤᠨ ᠠᠪᠴᠤ ᠬᠢᠷᠥᠭᠡ ᠲᠠᠮᠤ ᠳ᠋ᠤ᠌ ᠣᠷᠣᠭᠤᠯᠪᠠ᠃ ᠲᠡᠨᠳᠡ ᠣᠯᠠᠨ ᠵᠠᠭᠤᠨ ᠨᠢᠴᠦᠭᠦᠨ ᠬᠥᠮᠦᠰ ᠢ᠋ ᠦᠶᠡ ᠮᠥᠴᠢ ᠪᠡᠷ ᠨᠢ ᠲᠠᠰᠤ ᠲᠠᠰᠤ ᠬᠢᠷᠥᠭᠡᠳᠡᠵᠦ ᠬᠠᠶᠠᠵᠤ ᠪᠠᠢᠯᠠ᠃ ᠰᠠᠩᠵᠢ ᠠᠶᠤᠵᠤ ᠬᠠᠰᠬᠢᠷᠬᠤ ᠭᠡᠳᠡᠯ ᠡ ᠪᠠᠰᠠ ᠯᠠ ᠳᠠᠭᠤ ᠭᠠᠷᠤᠭᠰᠠᠨ ᠦᠭᠡᠢ᠃ ᠬᠠᠪᠲᠠᠭᠠᠢ ᠪᠠᠨᠲᠠᠩ ᠳᠡᠭᠡᠷᠡ ᠰᠠᠩᠵᠢ ᠵᠢ ᠥᠭᠡᠳᠡ ᠬᠠᠷᠠᠭᠤᠯᠤᠨ ᠲᠠᠯᠪᠢᠭᠠᠳ ᠤᠯᠠᠭᠠᠨ ᠴᠢᠰᠤ ᠲᠠᠢ ᠬᠢᠷᠥᠭᠡ ᠪᠡᠷ ᠴᠡᠭᠡᠵᠢᠨ ᠳᠤᠮᠳᠠᠭᠤᠷ ᠨᠢ ᠬᠢᠷᠥᠭᠡᠳᠡᠵᠦ ᠡᠬᠢᠯᠡᠪᠡ᠃ ᠶᠠᠰᠤ ᠨᠢ ᠬᠡᠷᠴᠢᠭᠢᠨᠡᠵᠦ᠂ ᠪᠡᠶᠡ ᠨᠢ ᠬᠤᠪᠢᠶᠠᠭᠳᠠᠵᠤ ᠲᠡᠰᠬᠦ ᠠᠷᠭᠠ ᠦᠭᠡᠢ ᠡᠪᠡᠳᠬᠦ ᠰᠢᠭ ᠪᠣᠯᠪᠠ᠃ ᠲᠡᠭᠦᠨ ᠦ᠌ ᠪᠡᠶᠡ ᠶ᠋ᠢ ᠬᠡᠳᠦᠨ ᠬᠡᠰᠡᠭ ᠬᠢᠷᠥᠭᠡᠳᠡᠭᠡᠳ ᠳᠠᠷᠠᠭᠠ ᠨᠢ ᠳᠠᠬᠢᠨ ᠡᠪᠯᠡᠭᠦᠯᠵᠦ ᠬᠠᠭᠤᠴᠢᠨ ᠬᠡᠪ ᠲᠦ᠍ ᠣᠷᠣᠭᠤᠯᠪᠠ᠃ ᠲᠡᠭᠡᠭᠡᠳ ᠤᠯᠠᠮ ᠶᠡᠬᠡ ᠪᠡᠷ ᠲᠠᠷᠴᠢᠯᠠᠭᠠᠨ ᠵᠣᠪᠠᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠳᠠᠬᠢᠭᠠᠳ ᠯᠠ ᠬᠢᠷᠦᠭᠡᠳᠡᠵᠦ ᠡᠬᠢᠯᠡᠪᠡ᠃ ᠰᠠᠩᠵᠢ ᠭᠠᠰᠠᠯᠤᠨ ᠴᠢᠷᠠᠯᠠᠵᠤ᠂ ᠪᠣᠰᠤᠨ ᠬᠠᠷᠠᠢᠬᠤ ᠶ᠋ᠢ ᠣᠷᠣᠯᠳᠤᠭᠰᠠᠨ ᠪᠣᠯᠪᠠᠴᠤ ᠪᠦᠲᠦᠭᠰᠡᠨ ᠦᠭᠡᠢ᠃ ᠬᠥᠯ ᠢ᠋ ᠨᠢ ᠳᠠᠭᠠᠷᠢᠨ ᠬᠠᠶᠠᠯᠠ᠃ ᠭᠠᠷ ᠢ᠋ ᠨᠢ ᠬᠢᠷᠦᠭᠡᠳᠡᠵᠦ ᠡᠬᠢᠯᠡᠪᠡ᠃ 《ᠬᠠᠯᠠᠭᠤᠨ᠂ ᠬᠦᠢᠲᠡᠨ ᠬᠣᠶᠠᠷ ᠲᠠᠮᠤ ᠪᠡᠷ ᠠᠯᠢ ᠠᠯᠢᠨ ᠢ᠋ᠶ᠋ᠠᠷ ᠳᠠᠮᠵᠢᠭᠤᠯᠵᠤ ᠠᠷᠪᠠᠨ ᠵᠢᠷᠭᠤᠭᠠᠨ ᠶᠠᠩᠵᠤ ᠶ᠋ᠢᠨ ᠴᠡᠭᠡᠷᠯᠡᠯ ᠦᠵᠡᠪᠡᠯ ᠵᠣᠬᠢᠨᠠ》 ᠭᠡᠵᠦ ᠡᠷᠯᠢᠭ ᠦ᠋ᠨ ᠬᠢᠷᠥᠭᠡᠴᠢᠨ ᠬᠡᠯᠡᠵᠦ ᠪᠠᠢᠬᠤ ᠶ᠋ᠢ ᠰᠠᠩᠵᠢ ᠲᠣᠳᠣᠬᠠᠨ ᠰᠣᠨᠣᠰᠴᠠᠢ᠃ ᠬᠠᠯᠠᠭᠤᠨ᠂ ᠬᠦᠢᠲᠡᠨ ᠨᠡᠢᠯᠡᠭᠰᠡᠨ ᠠᠷᠪᠠᠨ ᠵᠢᠷᠭᠤᠭᠠᠨ ᠲᠠᠮᠤ ᠳ᠋ᠤ᠌ ᠨᠢᠭᠦᠯᠲᠦ ᠬᠥᠮᠦᠰ ᠬᠣᠢᠲᠤ ᠨᠠᠰᠤᠨ ᠳ᠋ᠠᠭᠠᠨ ᠴᠡᠭᠡᠷᠯᠡᠯ ᠦᠵᠡᠵᠦ ᠲᠠᠷᠴᠢᠯᠠᠨ ᠵᠣᠪᠠᠳᠠᠭ ᠶᠤᠮ ᠭᠡᠳᠡᠭ ᠢ᠋ ᠰᠠᠩᠵᠢ ᠭᠡᠰᠦᠯ ᠳ᠋ᠦ᠍ ᠪᠠᠷᠤᠭ ᠯᠠ ᠪᠤᠷᠬᠠᠨ ᠤ᠋ ᠨᠣᠮ ᠵᠢᠭᠠᠬᠤ ᠠ᠋ᠴᠠ ᠪᠠᠨ ᠡᠮᠦᠨᠡ ᠯᠠᠮᠠ ᠪᠠᠭᠰᠢ ᠨᠠᠷ ᠨᠢ ᠰᠤᠷᠭᠠᠨ ᠨᠣᠮᠯᠠᠵᠤ ᠪᠢᠯᠡ᠃ ᠲᠡᠷᠡ ᠯᠠ ᠶᠣᠰᠣᠭᠠᠷ ᠲᠠᠮᠤ ᠶ᠋ᠢᠨ ᠪᠦᠬᠦᠢ ᠯᠡ ᠣᠷᠣᠨ ᠨᠤᠭᠤᠳ ᠨᠢᠳᠦᠨ ᠤ ᠨᠢ ᠡᠮᠦᠨᠡ ᠢᠷᠠᠢᠵᠤ ᠦᠵᠡᠭᠳᠡᠪᠡ᠃
- ᠲᠡᠮᠦᠷ ᠥᠷᠭᠡᠰᠦᠨ ᠳᠡᠭᠡᠷᠡ ᠬᠥᠪᠰᠢᠬᠦ ᠲᠠᠮᠤ ᠳ᠋ᠤ᠌ ᠡᠭᠦᠨ ᠢ᠋ ᠣᠳᠣ ᠠᠪᠠᠴᠢ ᠭᠡᠵᠦ ᠲᠠᠮᠤᠯᠠᠭᠴᠢᠳ ᠤᠨ ᠨᠢᠭᠡ ᠨᠢ ᠬᠡᠯᠡᠬᠦ ᠰᠢᠭ ᠪᠣᠯᠪᠠ᠃ ᠰᠠᠩᠵᠢ ᠭᠡᠰᠦᠯ ᠠᠶᠤᠨ ᠪᠠᠯᠮᠠᠭᠳᠠᠵᠤ᠂ ᠰᠠᠷᠪᠠᠯᠵᠠᠨ ᠴᠢᠷᠭᠠᠭᠤᠴᠠᠯᠳᠤᠯᠠ᠃ ᠭᠡᠪᠡᠴᠦ ᠲᠤᠰᠠ ᠪᠣᠯᠤᠭᠰᠠᠨ ᠦᠭᠡᠢ᠃ ᠵᠠᠷᠠᠭᠠᠨ ᠤ᠋ ᠦᠰᠦ ᠰᠢᠭ ᠠᠷᠵᠠᠢᠭ᠍ᠰᠠᠨ ᠲᠡᠮᠦᠷ ᠥᠷᠭᠡᠰᠦ ᠲᠡᠢ ᠬᠠᠪᠲᠠᠭᠠᠢ ᠪᠠᠨᠲᠠᠩ ᠳᠡᠭᠡᠷᠡ ᠲᠡᠭᠦᠨ ᠢ᠋ ᠨᠢᠴᠦᠭᠦᠨ ᠪᠡᠶᠡ ᠪᠡᠷ ᠨᠢ ᠴᠢᠯᠠᠭᠤᠳᠠᠪᠠ᠃ ᠬᠠᠪᠢᠷᠭᠠ ᠰᠦᠪᠡᠷᠭᠡ ᠪᠡᠷ ᠨᠢ ᠲᠡᠮᠦᠷ ᠥᠷᠭᠡᠰᠦ ᠨᠡᠪᠲᠡ ᠨᠡᠪᠲᠡ ᠬᠠᠳᠬᠤᠨ ᠣᠷᠣᠯᠠ᠃ ᠲᠡᠭᠡᠳᠡᠯ ᠡ ᠲᠠᠮᠤᠯᠠᠭᠴᠢ ᠤᠯᠠᠢᠳᠠᠮᠠᠯ ᠲᠡᠮᠦᠷ ᠰᠢᠯᠪᠢᠭᠦᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠠᠩᠵᠢ ᠵᠢ ᠣᠷᠢᠶᠠᠯᠭᠠᠵᠤ ᠡᠬᠢᠯᠡᠪᠡ᠃ ᠣᠷᠢᠶᠠᠯᠭᠠᠬᠤ ᠲᠣᠰᠤᠮ ᠲᠡᠮᠦᠷ ᠥᠷᠭᠡᠰᠦ ᠨᠦ᠍ᠭᠦᠳ ᠪᠡᠶᠡᠨ ᠳ᠋ᠦ᠍ ᠤᠯᠠᠮ ᠯᠠᠪ ᠣᠷᠣᠵᠤ᠂ ᠲᠡᠰᠬᠦᠶᠡ ᠪᠡᠷᠬᠡ ᠡᠪᠡᠳᠬᠡᠵᠦ ᠪᠠᠢᠯᠠ᠃
- ᠥᠷᠥᠰᠢᠶᠡᠭᠡᠴᠢ ᠨᠠᠮᠠᠶ᠋ᠢ ᠪᠠᠨ! ᠭᠡᠵᠦ ᠰᠠᠩᠵᠢ ᠭᠤᠶᠤᠬᠤ ᠭᠡᠲᠡᠯᠡ ᠬᠣᠭᠣᠯᠠᠢ ᠲᠠᠭ᠃ ᠲᠡᠭᠡᠲᠡᠯᠡ ᠲᠡᠮᠦᠷ ᠰᠢᠯᠪᠢᠭᠦᠷ ᠢ᠋ᠶ᠋ᠡᠷ ᠣᠷᠢᠶᠠᠯᠭᠠᠭᠴᠢ ᠬᠥᠮᠦᠨ ᠨᠢ ᠨᠢᠭᠡ ᠵᠢᠩᠳᠠᠭᠠᠨ ᠤ ᠨᠥᠬᠥᠷ ᠠᠨᠳᠤᠤ ᠶ᠋ᠢᠨ ᠫᠠᠭᠰᠠᠩ ᠪᠠᠢᠬᠤ ᠶ᠋ᠢ ᠰᠠᠩᠵᠢ ᠨᠢᠭᠤᠷ ᠢᠶᠠᠷ ᠨᠢ ᠲᠠᠨᠢᠯᠠ᠃ ᠰᠠᠩᠵᠢ ᠪᠦᠷ ᠴᠤ᠌ ᠠᠶᠤᠵᠤ:
- ᠫᠠᠭᠰᠠᠩ ᠮᠢᠨᠢ᠂ ᠨᠠᠮᠠᠶ᠋ᠢ ᠪᠠᠨ ᠥᠷᠥᠰᠢᠶᠡᠭᠡᠴᠢ! ᠪᠢ ᠴᠢᠮᠠ ᠳ᠋ᠤ᠌ ᠮᠠᠭᠤ ᠶᠠᠭᠤᠮᠠ ᠬᠢᠭᠡ ᠦᠭᠡᠢ ᠰᠢᠦ ᠳ᠋ᠡ ᠭᠡᠵᠦ ᠭᠤᠶᠤᠬᠤ ᠶ᠋ᠢ ᠵᠠᠪᠳᠤᠪᠠ᠃ ᠲᠡᠭᠡᠲᠡᠯᠡ ᠰᠠᠩᠵᠢ ᠵᠢ ᠲᠡᠮᠦᠷ ᠥᠷᠭᠡᠰᠦᠲᠦ ᠪᠠᠨᠲᠠᠩ ᠠ᠋ᠴᠠ ᠤᠭᠵᠠ ᠲᠠᠲᠠᠨ ᠰᠠᠯᠭᠠᠵᠤ ᠠᠪᠤᠭᠠᠳ ᠥᠭᠡᠷᠡ ᠨᠢᠭᠡ ᠬᠠᠪᠲᠠᠭᠠᠢ ᠲᠠᠨᠵᠠᠨ ᠳᠡᠭᠡᠷᠡ ᠬᠠᠶᠠᠵᠤ ᠳᠥᠷᠪᠡᠨ ᠮᠥᠴᠢ ᠶᠢ ᠳᠥᠷᠪᠡᠨ ᠲᠡᠰᠢ ᠲᠡᠯᠡᠭᠦᠷᠳᠡᠨ ᠬᠠᠳᠠᠯᠠ᠃ ᠭᠠᠷ ᠤ᠋ᠨ ᠰᠠᠷᠪᠠᠭᠤ ᠶ᠋ᠢ ᠨᠤᠵᠢᠭᠠᠨᠠᠲᠠᠯᠠ ᠨᠢ ᠨᠡᠪᠲᠡ ᠬᠠᠳᠠᠬᠤ ᠳ᠋ᠤ᠌ ᠮᠥᠨ ᠯᠡ ᠲᠡᠰᠪᠦᠷᠢᠯᠡᠰᠢ ᠦᠭᠡᠢ ᠶᠡᠬᠡ ᠡᠪᠡᠳᠪᠡ᠃
- ᠣᠳᠣ ᠲᠥᠭᠡᠨᠡᠭᠦᠷ ᠠᠪᠤᠭᠠᠳ ᠢᠷᠡ! ᠡᠭᠦᠨ ᠢ᠋ ᠲᠠᠯᠠ ᠪᠦᠷᠢ ᠡᠴᠡ ᠨᠢ ᠲᠥᠭᠡᠨᠡ ᠭᠡᠵᠦ ᠫᠠᠭᠰᠠᠩ ᠬᠠᠰᠬᠢᠷᠬᠤ ᠶ᠋ᠢ ᠰᠠᠩᠵᠢ ᠰᠣᠨᠣᠰᠤᠭᠠᠳ ᠤᠬᠢᠯᠠᠩᠨᠠᠨ ᠴᠢᠷᠠᠯᠠᠪᠠ᠃ ᠲᠡᠭᠡᠲᠡᠯᠡ:
- ᠬᠥᠭᠡᠷᠦᠬᠦᠢ ᠶ᠋ᠢ ᠶᠠᠭᠠᠬᠢᠬᠤ ᠨᠢ ᠪᠣᠢ? ᠪᠢᠲᠡᠭᠡᠢ ᠲᠥᠭᠡᠨᠡᠭᠡᠴᠢ! ᠭᠡᠵᠦ ᠨᠢᠭᠡ ᠲᠠᠨᠢᠯ ᠳᠠᠭᠤ ᠲᠠᠢ ᠬᠦᠮᠦᠨ ᠬᠡᠯᠡᠬᠦ ᠰᠣᠨᠣᠰᠳᠠᠪᠠ᠃ ᠠᠵᠢᠨ ᠬᠠᠷᠠᠪᠠᠯ ᠢᠨᠢᠶᠡᠪᠬᠢᠯᠡᠭᠰᠡᠨ ᠴᠢᠷᠠᠢ ᠲᠠᠢ ᠴᠣᠭᠰᠣᠩ ᠵᠣᠭᠰᠣᠵᠤ ᠪᠠᠢᠯᠠ᠃ ᠰᠠᠩᠵᠢ ᠲᠡᠭᠦᠨ ᠤᠷᠤᠭᠤ ᠲᠡᠮᠡᠦᠯᠲᠡᠯᠡ᠂
- ᠰᠡᠷᠢ᠂ᠰᠡᠷᠢ! ᠵᠦᠭᠡᠷ᠂ ᠵᠦᠭᠡᠷ! ᠭᠡᠵᠦ ᠴᠣᠭᠰᠣᠩ ᠬᠡᠯᠡᠬᠦ ᠰᠢᠭ ᠪᠣᠯᠤᠭᠠᠳ ᠠᠶᠤᠯᠲᠤ ᠵᠡᠭᠦᠳᠦ ᠨᠣᠢᠷ ᠠ᠋ᠴᠠ ᠪᠠᠨ ᠰᠠᠩᠵᠢ ᠠᠷᠠᠢᠬᠠᠨ ᠰᠠᠯᠵᠤ ᠰᠡᠷᠡᠯᠡ᠃
- ᠶᠠᠭᠠᠬᠢᠭ᠍ᠰᠠᠨ ᠶᠡᠬᠡ ᠵᠡᠭᠦᠳᠦᠯᠡᠨᠡ ᠪᠣᠢ? ᠷᠤᠩᠬᠠᠨ ᠳᠣᠲᠣᠷᠠ ᠳᠤᠭᠤᠯᠳᠠᠭᠠᠳ ᠴᠣᠴᠢᠭᠠᠴᠢᠬᠠᠯᠠ ᠭᠡᠵᠦ ᠪᠡᠷᠢᠮᠦᠭ ᠡᠮᠡᠭᠡᠨ ᠭᠠᠯ ᠵᠤᠤᠬᠠᠨ ᠠ᠋ᠴᠠ ᠭᠠᠷᠴᠤ ᠢᠷᠡᠭᠡᠳ ᠰᠠᠩᠵᠢ ᠵᠢ ᠰᠡᠷᠢᠭᠡᠭᠰᠡᠨ ᠪᠣᠯᠬᠤ ᠵᠢ ᠰᠠᠶᠢ ᠯᠠ ᠤᠬᠠᠭᠠᠷᠠᠯᠠ᠃
- ᠮᠠᠭᠤᠬᠠᠢ ᠲᠠᠮᠤ ᠳ᠋ᠤ᠌ ᠤᠨᠠᠵᠤ ᠪᠠᠢᠨᠠ ᠭᠡᠵᠦ ᠵᠡᠭᠦᠳᠦᠯᠡᠯᠡ ᠰᠢᠦ! ᠭᠡᠵᠦ ᠰᠠᠩᠵᠢ ᠳᠤᠬᠤᠨ ᠤ᠋ ᠪᠠᠨ ᠬᠥᠯᠥᠰᠥ ᠶ᠋ᠢ ᠠᠷᠴᠢᠨ ᠬᠡᠯᠡᠬᠦ ᠳ᠋ᠦ᠍ ᠪᠡᠷᠢᠮᠦᠭ ᠡᠮᠡᠭᠡᠨ:
- ᠵᠠᠬᠠ ᠪᠠᠷ ᠶᠤᠮ ᠤᠤ ᠣᠯᠠᠨ ᠬᠥᠮᠦᠨ ᠦ ᠭᠠᠵᠠᠷ ᠢ᠋ᠶ᠋ᠠᠷ ᠲᠡᠨᠦᠭᠰᠡᠨ ᠬᠣᠢᠨᠠ ᠵᠡᠭᠦᠳᠦᠯᠡᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠤᠢ᠃ ᠡᠯᠳᠡᠪ ᠮᠠᠭᠤ ᠶᠠᠭᠤᠮᠠ ᠬᠠᠷᠠᠭᠠ ᠪᠢᠵᠡ᠃ ᠲᠡᠭᠡᠭᠡᠳ ᠲᠡᠭᠦᠨ ᠢ᠋ ᠪᠡᠨ ᠨᠣᠢᠷ ᠳᠤᠮᠳᠠ ᠪᠠᠨ ᠦᠵᠡᠵᠦ ᠯᠠ ᠲᠠᠭᠠᠷᠠᠨᠠ ᠭᠡᠪᠡ᠃ ᠡᠮᠡᠭᠡᠨ ᠭᠣᠣᠯ ᠢ ᠨᠢ ᠣᠯᠤᠭᠠᠳ ᠬᠡᠯᠡᠴᠢᠬᠡᠵᠡᠢ᠃《ᠨᠡᠭᠡᠷᠡᠨ ᠵᠡᠯᠰᠡᠩ ᠵᠢᠨᠵᠦᠭ ᠢ᠋ ᠳᠠᠭᠠᠵᠤ ᠵᠠᠬᠠ ᠳᠡᠭᠡᠭᠦᠷ ᠲᠡᠨᠦᠭᠦᠯᠴᠢᠯᠡᠭᠰᠡᠨ ᠡᠴᠡ ᠯᠠ ᠡᠢᠮᠦ ᠶᠠᠭᠤᠮᠠ ᠵᠡᠭᠦᠳᠦᠯᠡᠯᠡ᠃ ᠳᠠᠬᠢᠵᠤ ᠲᠡᠢᠨ ᠬᠦ᠌ ᠲᠡᠨᠦᠭᠦᠴᠢᠯᠡᠬᠦ ᠪᠠᠨ ᠯᠠ ᠪᠣᠯᠢᠶᠠ》 ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠪᠣᠳᠣᠭᠠᠳ ᠨᠢᠭᠤᠷ ᠭᠠᠷ ᠢ᠋ᠶ᠋ᠠᠨ ᠤᠬᠢᠶᠠᠬᠤ ᠵᠠᠭᠤᠷᠠ ᠰᠥᠨᠢ ᠪᠠᠰᠠ ᠥᠭᠡᠷᠡ ᠨᠢᠭᠡᠨ ᠴᠢᠬᠤᠯᠠ ᠶᠠᠭᠤᠮᠠ ᠪᠣᠳᠣᠵᠤ ᠪᠠᠢᠭ᠍ᠰᠠᠨ ᠢ᠋ᠶ᠋ᠠᠨ ᠰᠡᠷᠭᠦᠭᠡᠨ ᠰᠠᠨᠠᠯᠠ᠃ ᠭᠤᠷᠪᠠᠨ ᠠᠢᠮᠠᠭ ᠰᠠᠪᠠ ᠤᠬᠠᠭᠠᠨ ᠢ᠋ ᠰᠢᠯᠭᠠᠭᠤᠯᠵᠤ ᠰᠢᠭᠤᠳ ᠬᠡᠪᠰᠢ ᠪᠣᠯᠵᠤ ᠴᠠᠭ ᠢ᠋ ᠲᠣᠪᠴᠢᠯᠠᠬᠤ ᠶ᠋ᠢ ᠬᠦᠰᠡᠵᠦ ᠪᠠᠢᠭ᠍ᠰᠠᠨ ᠢ᠋ᠶ᠋ᠠᠨ ᠡᠷᠭᠢᠨ ᠪᠣᠳᠣᠵᠤ ᠥᠨᠥᠳᠥᠷ ᠯᠠ ᠥᠷᠯᠥᠭᠡᠨ ᠡᠴᠡ ᠡᠬᠢᠯᠡᠨ ᠡᠨᠡ ᠲᠤᠬᠠᠢ ᠰᠢᠷᠡᠭᠡᠲᠦ ᠯᠠᠮᠠ ᠠ᠋ᠴᠠ ᠭᠤᠶᠤᠬᠤ ᠪᠠᠷ ᠰᠢᠢᠳᠦᠭᠡᠳ ᠰᠠᠩᠵᠢ ᠭᠡᠰᠦᠯ ᠲᠦᠷᠭᠡᠨ ᠵᠠᠭᠤᠷᠠ ᠥᠷᠯᠥᠭᠡᠨ ᠦ᠌ ᠴᠠᠢ ᠶ᠋ᠢ ᠪᠡᠨ ᠤᠤᠭᠤᠯᠠ᠃ ᠴᠣᠬᠣᠮ ᠶᠠᠮᠠᠷ ᠶᠠᠮᠠᠷ ᠰᠢᠯᠭᠠᠯᠲᠠ ᠥᠭᠬᠦ ᠪᠢᠯᠡ ᠭᠡᠵᠦ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠯᠠ᠃《ᠨᠠᠮᠳᠡᠯ ᠦ᠋ᠨ ᠰᠠᠪᠠ ᠠ᠋ᠴᠠ ᠬᠠᠳᠠᠭ᠂ ᠵᠤᠮᠪᠷᠠᠢ ᠪᠤᠶᠤ ᠰᠢᠯᠲᠠᠭᠠᠨ ᠤ᠋ ᠦᠷᠡ᠂ ᠰᠢᠲᠦᠪ ᠢ ᠥᠭᠴᠢᠬᠡᠭᠰᠡᠨ᠃ ᠫᠠᠷᠴᠢᠩ ᠤ᠋ᠨ ᠲᠠᠪᠤᠨ ᠠᠢᠮᠠᠭ ᠰᠠᠪᠠ᠂ ᠣᠮ ᠤ᠋ᠨ ᠬᠣᠶᠠᠷ᠂ ᠵᠣᠳ᠋ ᠤ᠋ᠨ ᠬᠣᠶᠠᠷ ᠠᠢᠮᠠᠭ ᠰᠠᠪᠠ ᠶ᠋ᠢᠨ ᠰᠢᠯᠭᠠᠯᠲᠠ ᠥᠭᠬᠦ ᠦᠯᠡᠳᠡᠭᠰᠡᠨ ᠶᠦᠮ ᠪᠠᠢᠨᠠ᠃ ᠳ᠋ᠣᠨ - ᠳ᠋ᠣᠨ - ᠵᠣ ᠴᠤᠩᠰᠠᠷ - ᠤᠭ᠂ ᠴᠤᠩᠰᠠᠷ ᠭᠣᠩ᠂ ᠭᠠᠪᠳᠠᠭᠪᠤ ᠁ ᠵᠠ ᠶᠡᠷᠦ ᠨᠢ ᠭᠠᠢᠭᠤᠢ ᠶᠤᠮ ᠰᠢᠭ ᠪᠣᠢ ᠳᠠ᠃ ᠥᠨᠥᠳᠥᠷ ᠵᠥᠪᠰᠢᠶᠡᠷᠡᠭᠦᠯᠦᠭᠡᠳ ᠠᠪᠤᠪᠠᠯ ᠮᠠᠷᠭᠠᠰᠢ ᠠ᠋ᠴᠠ ᠡᠬᠢᠯᠡᠭᠡᠳ ᠰᠢᠯᠭᠠᠭᠤᠯᠤᠶᠠ》 ᠭᠡᠵᠦ ᠰᠠᠩᠵᠢ ᠰᠢᠢᠳᠦᠯᠡ᠃
᠁ ᠰᠢᠷᠡᠭᠡᠲᠦ ᠯᠠᠮᠠ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠭᠤᠶᠤᠯᠲᠠ ᠶ᠋ᠢ ᠬᠠᠢᠬᠤᠷᠤᠮᠵᠢ ᠦᠭᠡᠢ ᠬᠦᠢᠲᠡᠨ ᠢ᠋ᠶ᠋ᠡᠷ ᠤᠭᠲᠤᠯᠠ᠃ ᠲᠡᠷᠡ ᠠᠩᠬᠠᠨ ᠠ᠋ᠴᠠ ᠪᠠᠨ ᠰᠠᠩᠵᠢ ᠭᠡᠰᠦᠯ ᠳ᠋ᠦ᠍ ᠲᠠᠯᠠ ᠦᠭᠡᠢ ᠪᠠᠢᠭ᠍ᠰᠠᠨ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠲᠡᠭᠦᠨ ᠦ᠌ ᠭᠤᠶᠤᠯᠲᠠ ᠶᠢ ᠳᠡᠮᠡᠢ ᠲᠥᠷᠬᠦ ᠦᠭᠡᠢᠲᠡᠭᠰᠡᠨ ᠶᠠᠪᠤᠳᠠᠯ ᠭᠡᠵᠦ ᠦᠵᠡᠪᠡ
- ᠵᠢᠩᠳᠠᠭᠠ ᠠᠯᠭᠠᠰᠠᠵᠤ ᠶᠠᠪᠤᠳᠠᠭ ᠶᠣᠰᠣ ᠪᠠᠢᠬᠤ ᠦᠭᠡᠢ᠃ ᠦᠭᠡ ᠳᠠᠭᠤᠨ ᠦᠭᠡᠢ ᠯᠡ ᠶᠠᠪᠤᠬᠤ ᠶᠣᠰᠣᠲᠠᠢ ᠵᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠶᠠᠪᠤ ᠭᠡᠵᠦ ᠰᠢᠷᠡᠭᠡᠲᠦ ᠯᠠᠮᠠ ᠬᠠᠷᠢᠭᠤ ᠠᠢᠯᠠᠳᠴᠠᠢ᠃
- ᠲᠡᠭᠡᠪᠡᠯ ᠨᠠᠮᠠᠶ᠋ᠢ ᠭᠠᠩᠯᠢᠩᠴᠢ ᠪᠣᠯᠬᠤ ᠠ᠋ᠴᠠ ᠴᠢᠯᠥᠭᠡᠯᠡᠵᠦ ᠥᠭᠭᠦᠭᠡᠴᠢ! ᠭᠡᠵᠦ ᠰᠠᠩᠵᠢ ᠬᠠᠷᠢᠭᠤ ᠰᠥᠷᠭᠡᠦᠯᠡᠨ ᠭᠤᠶᠤᠯᠠ᠃ ᠲᠡᠷᠡ ᠭᠤᠶᠤᠯᠲᠠ ᠳ᠋ᠤ᠌ ᠲᠠᠲᠠᠭᠠᠯᠵᠠᠬᠤ ᠠ᠋ᠴᠠ ᠰᠢᠷᠡᠭᠡᠲᠦ ᠯᠠᠮᠠ ᠨᠡᠷᠡᠯᠬᠢᠭᠰᠡᠨ ᠪᠣᠯᠤᠯᠲᠠᠢ:
- ᠵᠢᠩᠳᠠᠭᠠᠨ ᠤ᠋ ᠬᠢᠨ ᠳᠣᠲᠣᠷᠠ ᠴᠢᠨᠢ ᠭᠠᠩᠯᠢᠩᠴᠢ ᠪᠣᠯᠬᠤ ᠳᠤᠷᠠᠲᠠᠢ ᠥᠭᠡᠷᠡ ᠬᠥᠮᠦᠨ ᠪᠠᠢᠪᠠᠯ ᠲᠡᠭᠦᠨ ᠲᠡᠢ ᠬᠣᠭᠣᠷᠣᠨᠳᠣ ᠪᠠᠨ ᠲᠣᠬᠢᠷᠠᠵᠤ ᠪᠣᠯᠤᠨᠠ ᠪᠢᠵᠡ᠃ ᠭᠡᠬᠦ ᠳ᠋ᠡᠭᠡᠨ ᠵᠢᠨᠵᠦᠭ ᠵᠡᠯᠰᠡᠩ ᠰᠢᠢᠳᠦᠨᠡ ᠪᠠᠢᠬᠤ ᠭᠡᠵᠦ ᠰᠢᠷᠡᠭᠡᠲᠦ ᠯᠠᠮᠠ ᠬᠡᠯᠡᠵᠡᠢ᠃
ᠵᠢᠩᠵᠸ ᠯᠠᠮᠠ ᠵᠡᠯᠰᠡᠩ ᠳᠤᠭᠤᠯᠭᠠᠪᠤᠷᠢ ᠲᠠᠢ᠂ ᠪᠠᠰᠠ ᠲᠡᠭᠡᠭᠡᠳ ᠰᠣᠨᠢᠭᠤᠴᠢ ᠰᠠᠩᠵᠢ ᠠ᠋ᠴᠠ ᠰᠠᠯᠬᠤ ᠳᠤᠷᠠ ᠦᠭᠡᠢ ᠪᠠᠢᠯᠠ᠃ ᠭᠡᠪᠡᠴᠦ ᠰᠠᠩᠵᠢ ᠲᠡᠭᠦᠨ ᠳ᠋ᠦ᠍ ᠬᠠᠮᠤᠭ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠴᠢᠷᠯᠠᠨ ᠶᠠᠷᠢᠵᠤ ᠡᠴᠦᠰ ᠲᠦ᠋ᠨᠢ ᠪᠦᠷ ᠱᠠᠯ ᠳᠠᠭᠠᠨ ᠪᠠᠭᠤᠭᠠᠳ ᠰᠥᠨᠢ ᠶ᠋ᠢᠨ ᠢ᠋ᠶ᠋ᠡᠨ ᠵᠡᠭᠦᠳᠦ ᠶ᠋ᠢ ᠶᠠᠷᠢᠪᠠ᠃
- ᠬᠠ ᠬᠠ ᠬᠠ! ᠭᠡᠵᠦ ᠵᠡᠯᠰᠡᠩ ᠭᠤᠷᠪᠠ ᠨᠤᠭᠤᠷᠠᠨ ᠤᠲᠠᠲᠠᠯᠠ ᠬᠦᠬᠦᠷᠡᠵᠦ ᠳᠣᠭᠣᠭᠢᠯᠠᠵᠤ ᠪᠠᠢᠭ᠍ᠰᠠᠨ ᠢ᠋ᠶ᠋ᠠᠨ᠄
- ᠵᠠ ᠵᠠ! ᠦᠨᠡᠬᠡᠷ ᠴᠢᠨᠦ ᠰᠡᠳᠬᠢᠯ ᠮᠣᠷᠣᠢᠭ᠍ᠰᠠᠨ ᠪᠠᠢᠨᠠ᠃ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠡᠴᠡ ᠪᠡᠨ ᠬᠡᠨ ᠨᠢᠭᠡ ᠶ᠋ᠢ ᠢᠳᠬᠠᠵᠤ ᠣᠷᠣᠨ ᠳ᠋ᠠᠭᠠᠨ ᠥᠭᠪᠡᠯ ᠪᠢ ᠴᠢᠯᠥᠭᠡᠯᠡᠶᠡ᠃ ᠬᠣᠪᠣᠭᠰᠠᠢᠷ ᠤ᠋ᠨ ᠲᠣᠷᠭᠤᠳ ᠪᠠᠯᠲᠠ ᠶ᠋ᠢ ᠢᠳᠬᠠᠭᠠᠳ ᠦᠵᠡ! ᠭᠡᠵᠦ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠲᠡᠳᠡ ᠶᠠᠷᠢᠶᠠ ᠲᠣᠬᠢᠷᠠᠪᠠ᠃ ᠬᠣᠪᠣᠭᠰᠠᠢᠷ ᠤ᠋ᠨ ᠲᠣᠷᠭᠤᠳ ᠪᠠᠯᠲᠠ ᠶ᠋ᠢ ᠰᠠᠩᠵᠢ ᠭᠡᠰᠦᠯ ᠥᠪᠡᠷ ᠦ᠋ᠨ ᠣᠷᠣᠨ ᠳ᠋ᠤ᠌ ᠭᠠᠩᠯᠢᠩᠴᠢ ᠪᠣᠯᠭᠠᠬᠤ ᠪᠠᠷ ᠢᠳᠬᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠮᠠᠰᠢ ᠳᠤᠷᠠᠲᠠᠢ ᠵᠥᠪᠰᠢᠶᠡᠷᠡᠪᠡ᠃
- ᠨᠣᠮ ᠴᠡᠭᠡᠵᠢᠯᠡᠬᠦ ᠪᠡᠷ ᠶᠠᠳᠠᠷᠠᠭᠠᠳ ᠪᠠᠢᠬᠤ ᠶᠤᠮ᠃ ᠭᠠᠩᠯᠢᠩᠴᠢ ᠪᠣᠯᠪᠠᠯ ᠳᠡᠭᠡᠷᠡ ᠪᠠᠢᠬᠠ! ᠭᠡᠵᠦ ᠲᠡᠷᠡ ᠬᠡᠯᠡᠵᠡᠢ᠃ ᠡᠨᠡ ᠦᠭᠡ ᠰᠠᠩᠵᠢ ᠳ᠋ᠤ᠌ ᠪᠥᠭᠡᠮ ᠣᠯᠵᠠ ᠪᠠᠢᠯᠠ᠃
ᠲᠡᠢᠨ ᠬᠦ᠌ ᠰᠠᠩᠵᠢ ᠭᠠᠩᠯᠢᠩᠴᠢ ᠶ᠋ᠢᠨ ᠵᠣᠪᠠᠯᠠᠩᠲᠤ ᠠᠵᠢᠯ ᠠ᠋ᠴᠠ ᠰᠠᠯᠵᠤ ᠵᠥᠪᠬᠡᠨ ᠪᠢᠰᠢᠯᠭᠠᠬᠤ ᠨᠣᠮ ᠤ᠋ᠨ ᠮᠥᠷ ᠬᠥᠭᠡᠭᠡᠬᠦ ᠪᠣᠯᠪᠠ᠃ ᠣᠯᠠᠨ ᠳᠠᠬᠢᠨ ᠭᠣᠶᠣᠭᠰᠠᠭᠠᠷ ᠪᠠᠢᠲᠠᠯᠠ ᠨᠢᠭᠡ ᠡᠳᠦᠷ ᠰᠢᠷᠡᠭᠡᠲᠦ ᠯᠠᠮᠠ ᠶ᠋ᠢᠨ ᠰᠠᠢᠨ ᠳᠤᠷᠠ ᠬᠥᠳᠡᠯᠵᠦ ᠴᠢᠨᠠᠲᠤ ( ᠪᠡᠯᠭᠡ ᠴᠢᠨᠠᠷ ᠤ᠋ᠨ) ᠶ᠋ᠢᠨ ᠨᠣᠮ ᠳ᠋ᠤ᠌ ᠴᠣᠭᠣᠷᠣᠨ ᠭᠠᠷᠤᠭᠰᠠᠨ ᠭᠡᠨᠳᠡᠨᠪᠠᠯᠳᠠᠨ ᡀᠠᠷᠠᠮᠪᠠ ᠶ᠋ᠢ ᠰᠠᠩᠵᠢ ᠶ᠋ᠢᠨ ᠨᠣᠮ ᠤ᠋ᠨ ᠰᠢᠭᠦᠯᠭᠡ ᠠᠪᠬᠤ ᠯᠠᠮᠠ ᠪᠠᠷ ᠲᠣᠬᠢᠶᠠᠵᠠᠢ᠃ ᠴᠢᠨᠠᠲᠤ ᡀᠠᠷᠠᠮᠪᠠ ᠭᠡᠨᠳᠡᠨᠪᠠᠯᠳᠠᠨ ᠨᠠᠰᠤ ᠥᠨᠳᠥᠷ ᠪᠣᠯᠤᠭᠰᠠᠨ ᠪᠦᠳᠦᠭᠦᠨ ᠱᠠᠯᠬᠠᠭᠠᠷ ᠡᠪᠦᠭᠡᠨ ᠯᠠᠮᠠ ᠪᠥᠭᠡᠳ ᠬᠣᠶᠠᠷ ᠬᠥᠯ ᠳᠡᠭᠡᠷᠡ ᠪᠡᠨ ᠠᠷᠠᠢ ᠭᠡᠵᠦ ᠬᠥᠳᠡᠯᠳᠡᠭ ᠠᠵᠢ᠃ ᠳ᠋ᠠᠴᠠᠩ ᠳ᠋ᠤ᠌ ᠣᠷᠣᠵᠤ ᠭᠠᠷᠬᠤ ᠳ᠋ᠠᠭᠠᠨ ᠳᠣᠪᠵᠢᠶᠠᠨ ᠤ᠋ ᠱᠠᠲᠤ ᠪᠡᠷ ᠥᠭᠰᠥᠬᠦ ᠪᠠᠭᠤᠬᠤ ᠭᠡᠵᠦ ᠶᠡᠬᠡ ᠶᠠᠳᠠᠷᠠᠵᠤ᠂ ᠠᠮᠢᠰᠬᠤᠭᠠᠳᠠᠳᠠᠭ ᠪᠠᠢᠯᠠ᠃
- ᠴᠢ ᠲᠡᠷᠡ ᠰᠢᠭᠦᠯᠭᠡ ᠪᠠᠨ ᠥᠭᠴᠦ ᠪᠣᠯᠤᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠨᠠᠳᠠ ᠳ᠋ᠤ᠌ ᠵᠠᠪ ᠪᠠᠢᠬᠤ ᠦᠭᠡᠢ᠃ ᠬᠤᠷᠠᠯ ᠨᠣᠮ ᠭᠠᠳᠠᠭᠠᠯᠠᠬᠤ᠂ ᠥᠷᠯᠥᠭᠡ ᠣᠷᠣᠢ ᠴᠤᠭᠯᠠᠷᠠᠬᠤ ᠦᠶᠡ ᠪᠡᠷ ᠨᠠᠮᠠᠶ᠋ᠢ ᠱᠠᠲᠤ ᠤᠷᠤᠭᠤ ᠪᠠᠭᠤᠯᠭᠠᠵᠤ ᠥᠭᠴᠦ ᠪᠠᠢ᠃ ᠲᠡᠷᠡ ᠬᠣᠭᠣᠷᠣᠨᠳᠣ ᠴᠡᠭᠡᠵᠢᠯᠡᠭᠰᠡᠨ ᠨᠣᠮ ᠢ᠋ᠶ᠋ᠠᠨ ᠤᠩᠰᠢᠵᠤ ᠰᠢᠯᠭᠠᠭᠤᠯᠬᠤ ᠪᠢᠵᠡ! ᠭᠡᠵᠦ ᠭᠡᠨᠳᠡᠨᠪᠠᠯᠳᠠᠨ ᡀᠠᠷᠠᠮᠪᠠ ᠬᠡᠯᠡᠵᠡᠢ᠃ ᠲᠡᠷᠡ ᠶᠣᠰᠣᠭᠠᠷ ᠰᠠᠩᠵᠢ ᠥᠷᠯᠥᠭᠡ᠂ ᠡᠳᠦᠷ᠂ ᠣᠷᠣᠢ ᠶᠢᠨ ᠴᠣᠢᠮᠴᠠᠮ ᠤ᠋ᠨ ᠦᠶᠡ ᠪᠡᠷ ᠡᠪᠦᠭᠡᠨ ᡀᠠᠷᠠᠮᠪᠠ ᠶ᠋ᠢ ᠰᠤᠭᠤᠳᠠᠨ ᠶᠠᠪᠤᠬᠤ ᠪᠣᠯᠪᠠ᠃ ᠡᠬᠢᠨ ᠦ᠌ ᠡᠳᠦᠷ ᠱᠠᠲᠤ ᠥᠭᠰᠥᠵᠦ ᠶᠠᠪᠤᠬᠤ ᠳ᠋ᠠᠭᠠᠨ ᡀᠠᠷᠠᠮᠪᠠ:
- ᠴᠢ ᠬᠠᠳᠠᠭ᠂ ᠵᠤᠮᠪᠷᠠᠢ ᠬᠣᠶᠠᠷ ᠢ᠋ ᠰᠢᠯᠭᠠᠭᠤᠯᠴᠢᠬᠠᠭᠰᠠᠨ ᠭᠡᠳᠡᠭ ᠪᠢᠵᠡ᠃ ᠣᠳᠣ ᠰᠢᠳᠤᠪ ᠡᠬᠢᠯᠡᠨ ᠤᠩᠰᠢ! ᠭᠡᠵᠦ ᠲᠤᠰᠢᠶᠠᠵᠠᠢ᠃ ᠰᠠᠩᠵᠢ ᠰᠢᠳᠤᠪ ᠪᠤᠶᠤ ᠰᠢᠲᠦᠭᠡᠨ ᠪᠦᠲᠦᠭᠰᠡᠨ ᠲᠤᠬᠠᠢ ᠨᠣᠮᠨᠠᠯ ᠢ᠋ ᠴᠡᠭᠡᠵᠢ ᠪᠡᠷ ᠤᠩᠰᠢᠵᠤ ᠡᠬᠢᠯᠡᠪᠡ᠃ ᠭᠡᠪᠡᠴᠦ ᠲᠡᠷᠡ ᠨᠣᠮ ᠢ᠋ ᠭᠠᠭᠴᠠ ᠨᠢᠭᠡ ᠡᠳᠦᠷ ᠤᠩᠰᠢᠵᠤ ᠪᠠᠷᠠᠬᠤ ᠪᠠᠷ ᠦᠭᠡᠢ ᠪᠢᠯᠡ᠃ ᡀᠠᠷᠠᠮᠪᠠ ᠲᠡᠭᠦᠨ ᠲᠤᠬᠠᠢ ᠣᠭᠲᠣ ᠪᠣᠳᠣᠭᠠ ᠦᠭᠡᠢ ᠪᠣᠯᠤᠯᠲᠠᠢ᠃ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠤᠩᠰᠢᠯᠭᠠ ᠶ᠋ᠢ ᠴᠢᠬᠢᠨ ᠦ᠌ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠭᠡᠵᠦ᠂ ᠥᠭᠡᠷᠡ ᠶᠠᠭᠤᠮᠠ ᠪᠣᠳᠣᠵᠤ ᠶᠠᠪᠤᠭᠰᠠᠭᠠᠷ ᠳᠤᠭᠠᠩ ᠤᠨ ᠬᠠᠭᠠᠯᠭᠠ ᠪᠠᠷ ᠣᠷᠣᠬᠤ ᠳ᠋ᠠᠭᠠᠨ:
- ᠵᠠ ᠪᠣᠯᠤᠨᠠ᠃ ᠳᠠᠷᠠᠭᠠ ᠵᠣᠭᠰᠣᠭᠰᠠᠨ ᠭᠠᠵᠠᠷ ᠠ᠋ᠴᠠ ᠪᠠᠨ ᠴᠢᠨᠠᠭᠰᠢ ᠦᠷᠭᠦᠯᠵᠢᠯᠡᠭᠦᠯᠦᠨ ᠤᠩᠰᠢᠭᠠᠷᠠᠢ! ᠭᠡᠪᠡ᠃ ᠶᠡᠬᠡ ᠯᠠᠮᠠᠲᠠᠨ ᠡᠢᠮᠦ ᠯᠡ ᠲᠥᠷᠬᠦ ᠲᠡᠢ ᠪᠠᠢᠯᠠ᠃
ᠡᠨᠡᠴᠢᠯᠡᠨ ᠢ᠋ᠶ᠋ᠡᠷ ᠡᠳᠦᠷ ᠪᠦᠷᠢ ᠦᠷᠭᠦᠯᠵᠢᠯᠡᠵᠦ ᠰᠠᠩᠵᠢ ᠲᠡᠷᠡᠭᠦ ᠡᠪᠦᠭᠡᠨ ᡀᠠᠷᠠᠮᠪᠠ ᠶ᠋ᠢᠨ ᠪᠡᠶᠡ ᠬᠠᠮᠠᠭᠠᠯᠠᠭᠴᠢ ᠨᠢ ᠡᠰᠡᠪᠡᠯ ᠭᠣᠴᠣᠭ ᠨᠢ ᠪᠣᠯᠵᠤ ᠬᠤᠪᠢᠷᠠᠵᠠᠢ᠃ ᡀᠠᠷᠠᠮᠪᠠ ᠴᠤ ᠥᠪᠡᠷ ᠢ᠋ᠶ᠋ᠡᠨ ᠰᠡᠭᠦᠯ ᠳ᠋ᠦ᠍ᠨᠢ ᠵᠠᠯᠬᠠᠭᠤᠷᠠᠵᠤ ᠤᠩᠰᠢᠬᠤ ᠨᠣᠮ ᠤ᠋ᠨ ᠡᠬᠢᠨ᠂ ᠳᠤᠮᠳᠠ᠂ ᠠᠳᠠᠭ ᠠ᠋ᠴᠠ ᠨᠢ ᠰᠣᠨᠣᠰᠤᠭᠠᠳ ᠯᠠ ᠰᠢᠭᠦᠯᠭᠡᠭᠰᠡᠨ ᠳᠦ ᠲᠣᠭᠠᠴᠠᠳᠠᠭ ᠪᠣᠯᠪᠠ᠃ ᠲᠡᠢᠨ ᠬᠦ᠌ ᠰᠠᠷᠠ ᠰᠢᠬᠠᠮ ᠦᠷᠭᠦᠯᠵᠢᠯᠡᠵᠡᠢ᠃ ᠨᠢᠭᠡᠨ ᠡᠳᠦᠷ ᡀᠠᠷᠠᠮᠪᠠ ᠭᠡᠨᠳᠡᠨᠪᠠᠯᠳᠠᠨ ᠭᠣᠮᠠᠨ ᠳ᠋ᠠᠴᠠᠩ ᠤ᠋ᠨ ᠬᠢᠷᠭᠠᠴᠤᠤᠯ ᠢ᠋ ᠴᠤᠭᠯᠠᠭᠤᠯᠵᠠᠢ᠃ ᠭᠡᠢᠳ ᠦ᠋ᠨ ᠬᠠᠮᠪᠤ᠂ ᠴᠣᠷᠵᠢ᠂ ᠰᠢᠷᠡᠭᠡᠲᠦ ᠯᠠᠮᠠ᠂ ᠳᠡᠳ᠋ ᠰᠢᠷᠡᠭᠡᠲᠦ ᠪᠤᠶᠤ ᠯᠠᠢᠴᠠᠪ᠂ ᠭᠡᠰᠬᠦᠢ᠂ ᠣᠩᠵᠠᠳ᠂ ᠳᠣᠨᠢᠷ ᠡᠳᠡᠭᠡᠷ ᠢ᠋ ᠴᠤᠭᠯᠠᠭᠤᠯᠤᠨ:
- ᠡᠨᠡ ᠬᠦ᠌ ᠰᠠᠩᠵᠢ ᠭᠡᠭᠴᠢ ᠪᠤᠷᠬᠠᠨ ᠤ᠋ ᠱᠠᠪᠢ ᠠ᠋ᠴᠠ ᠰᠤᠳᠤᠷ ᠤ᠋ᠨ ᠠᠢᠮᠠᠭ ᠰᠠᠪᠠ ᠲᠠᠪᠤᠨ ᠵᠦᠢᠯ ᠳ᠋ᠦ᠋ᠯᠪᠡ᠂ ᠸᠢᠨᠠᠢ ᠶ᠋ᠢᠨ ᠶᠣᠰᠣ ᠶ᠋ᠢ ᠰᠢᠭᠦᠵᠦ ᠦᠵᠡᠯᠡ᠃ ᠴᠥᠮ ᠢ᠋ ᠨᠡᠩ ᠰᠠᠢᠨ ᠴᠡᠭᠡᠵᠢᠯᠡᠵᠦ ᠲᠣᠷᠬᠤ ᠦᠭᠡᠢ ᠤᠩᠰᠢᠯᠠ᠃ ᠡᠭᠦᠨ ᠢ᠋ ᠬᠡᠪᠰᠢ ᠪᠣᠯᠭᠠᠬᠤ ᠳ᠋ᠤ᠌ ᠳᠤᠲᠠᠬᠤ ᠶᠠᠭᠤᠮᠠ ᠠᠯᠠᠭᠠ᠃ ᠭᠡᠪᠰᠢ ᠪᠣᠯᠭᠠᠭᠠᠳ ᠵᠢᠩᠳᠠᠭᠠ ᠳᠡᠭᠡᠭᠰᠢᠯᠡᠭᠦᠯᠬᠦ ᠰᠠᠨᠠᠯ ᠲᠠᠢ ᠪᠠᠢᠨᠠ ᠭᠡᠵᠦ ᠭᠡᠨᠳᠡᠨᠪᠠᠯᠳᠠᠨ ᡀᠠᠷᠠᠮᠪᠠ ᠲᠡᠳᠡᠨ ᠳᠦ ᠰᠠᠨᠠᠯ ᠲᠠᠯᠪᠢᠯᠠ᠃ ᠰᠠᠩᠵᠢ ᠶ᠋ᠢᠨ ᠵᠢᠷᠦᠬᠡ ᠴᠣᠬᠢᠯᠠᠵᠤ᠂ ᠪᠡᠶᠡ ᠪᠡᠨ ᠠᠷᠠᠢᠬᠠᠨ ᠪᠠᠷᠢᠵᠤ ᠪᠠᠢᠯᠠ᠃
- ᠸᠢᠨᠠᠢ ᠶ᠋ᠢ ᠰᠠᠢᠨ ᠮᠡᠳᠡᠵᠦ ᠪᠠᠢᠭᠠ ᠪᠣᠯ ᠪᠣᠳᠢᠰᠠᠳ᠋ᠸᠠ ᠶ᠋ᠢᠨ ᠪᠣᠯᠤᠨ ᠲᠠᠷᠨᠢ ᠶ᠋ᠢᠨ ᠰᠠᠨᠸᠠᠷ ᠬᠦᠷᠲᠡᠭᠡ ᠦᠭᠡᠢ ᠪᠠᠢᠵᠤ ᠪᠣᠯᠬᠤ ᠦᠭᠡᠢ᠃ ᠡᠢᠮᠦ ᠳ᠋ᠦ᠍ ᠡᠨᠡᠬᠡᠨ ᠳ᠋ᠡᠭᠡᠨ ᠲᠣᠬᠢᠷᠠᠭᠠᠳ ᠸᠢᠨᠠᠢ ᠶ᠋ᠢ ᠳᠠᠬᠢᠨ ᠨᠡᠯᠢᠶᠡᠳ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠦᠵᠡᠭᠦᠯᠦᠭᠡᠳ ᠰᠠᠬᠢᠯ ᠢ᠋ ᠬᠦᠷᠲᠡᠭᠰᠡᠨ ᠬᠣᠢᠨᠠ ᠨᠢ ᠵᠣᠳ᠋ (ᠦᠨᠳᠦᠰᠦ) ᠦᠵᠡᠭᠦᠯᠪᠡᠯ ᠲᠠᠭᠠᠷᠠᠨᠠ ᠭᠡᠵᠦ ᠰᠢᠷᠡᠭᠡᠲᠦ ᠯᠠᠮᠠ ᠠᠢᠯᠠᠳᠪᠠ᠃
- ᠪᠢ ᠰᠠᠨᠠᠯ ᠨᠢᠭᠡ ᠪᠠᠢᠨᠠ ᠭᠡᠵᠦ ᠯᠠᠢᠴᠠᠪ ᠳᠤᠤᠭᠠᠷᠪᠠ᠃
- ᠷᠠᠪᠵᠠᠮᠪᠠ ᠶ᠋ᠢᠨ ᠮᠢᠨᠳᠠᠭ ᠠᠪᠤᠭᠠ ᠦᠭᠡᠢ ᠪᠣᠯᠬᠣᠷ ᠬᠡᠴᠡᠭᠦᠦ ᠯᠡ ᠪᠠᠢᠨᠠ᠃ ᠮᠠᠨ ᠤ᠋ ᠭᠣᠮᠠᠨ ᠳ᠋ᠠᠴᠠᠩ ᠳ᠋ᠤ᠌ ᠳᠣᠯᠣᠭᠠᠨ ᠵᠢᠩᠳᠠᠭᠠ ᠳᠠᠭᠤᠰᠬᠠᠵᠤ ᠪᠠᠢᠵᠤ ᠡᠭᠦᠨ ᠳ᠋ᠦ᠍ ᠬᠦᠷᠳᠡᠭ᠃ ᠭᠡᠲᠡᠯᠡ ᠡᠨᠡᠬᠦ ᠰᠠᠩᠵᠢ ᠪᠣᠯᠪᠠᠯ ᠳᠥᠩᠭᠡᠵᠢ ᠬᠣᠶᠠᠷ ᠵᠢᠩᠳᠠᠭᠠ ᠳᠠᠭᠤᠰᠬᠠᠵᠤ ᠪᠠᠢᠨᠠ ᠭᠡᠵᠦ ᠴᠣᠷᠵᠢ ᠯᠠᠮᠠ ᠠᠢᠯᠠᠳᠪᠠ᠃ ᠲᠡᠭᠦᠨ ᠦ᠌ ᠦᠭᠡ ᠦᠨᠡ ᠳ᠋ᠦ᠍ ᠬᠦᠷᠳᠡᠭ ᠠᠵᠢ᠃
- ᠲᠡᠷᠡ ᠴᠣ ᠲᠡᠢᠮᠦ ᠶᠦᠮ᠃ ᠲᠡᠭᠡᠬᠦᠯᠡᠷ ᠣᠮ᠂ ᠶᠤᠮ ᠬᠣᠶᠠᠷ ᠢ᠋ ᠦᠵᠡᠬᠦ ᠵᠢᠩᠳᠠᠭᠠᠨ ᠳ᠋ᠤ᠌ ᠨᠡᠯᠢᠶᠡᠳ ᠰᠠᠭᠤᠯᠭᠠᠪᠠᠯ ᠲᠠᠭᠠᠷᠠᠨᠠ ᠭᠡᠵᠦ ᠬᠠᠮᠪᠤ ᠯᠠᠮᠠ ᠠᠢᠯᠠᠳᠤᠭᠰᠠᠨ ᠢ᠋ᠶ᠋ᠠᠷ ᠬᠡᠷᠡᠭ ᠶᠠᠪᠤᠳᠠᠯ ᠪᠦᠷᠢᠨ ᠰᠢᠢᠳᠦᠭᠳᠡᠵᠡᠢ᠃
ᠬᠡᠳᠦᠢᠪᠡᠷ ᠣᠮ ᠭᠡᠳᠡᠭ ᠰᠡᠵᠢᠭ ᠰᠡᠳᠬᠢᠯ ᠦ᠋ᠨ ᠤᠬᠠᠭᠠᠨ᠂ ᠶᠤᠮ ᠭᠡᠳᠡᠭ ᠣᠷᠴᠢᠯᠠᠩ ᠠᠴᠠ ᠠᠩᠭᠢᠵᠢᠷᠠᠬᠤ ᠶ᠋ᠢᠨ ᠤᠬᠠᠭᠠᠨ ᠤ᠋ ᠨᠣᠮ ᠢ᠋ ᠰᠠᠩᠵᠢ ᠴᠡᠭᠡᠵᠢ ᠪᠡᠷ ᠮᠡᠳᠡᠵᠦ ᡀᠠᠷᠠᠮᠪᠠ ᠳ᠋ᠤ᠌ ᠰᠠᠢᠨ ᠰᠢᠯᠭᠠᠭᠤᠯᠤᠭᠰᠠᠨ ᠴᠤ᠌ ᠭᠡᠰᠡᠨ ᠨᠢᠭᠡᠨᠲᠡ ᠬᠠᠮᠪᠤ ᠯᠠᠮᠠ ᠲᠡᠭᠦᠨ ᠢ᠋ ᠳᠠᠬᠢᠨ ᠦᠵᠡᠬᠦ ᠬᠡᠷᠡᠭᠲᠡᠢ ᠶᠢ ᠰᠠᠨᠠᠭᠤᠯᠤᠭᠰᠠᠨ ᠲᠤᠯᠠ ᠦᠭᠡ ᠵᠥᠷᠢᠬᠦ ᠬᠥᠮᠦᠨ ᠪᠠᠢᠭ᠍ᠰᠠᠨ ᠦᠭᠡᠢ᠃ ᠰᠠᠩᠵᠢ ᠳᠣᠣᠷᠠ ᠬᠠᠶᠠᠭᠠᠳ ᠯᠠ ᠭᠤᠷᠪᠠᠨ ᠵᠢᠯ ᠠᠷᠤ ᠶ᠋ᠢᠨ ᠵᠠᠪᠳᠤᠩ ᠡᠯᠡᠭᠡᠬᠦ ᠬᠤᠭᠤᠴᠠᠭᠠ ᠶ᠋ᠢ ᠲᠣᠪᠴᠢᠯᠠᠭᠰᠠᠨ ᠳ᠋ᠠᠭᠠᠨ ᠶᠡᠬᠡ ᠪᠠᠶᠠᠷᠯᠠᠵᠠᠢ᠃ ᠮᠥᠨ ᠲᠡᠷᠡ ᠡᠳᠦᠷ ᠡᠴᠡ ᠡᠬᠢᠯᠡᠨ ᠭᠣᠮᠠᠨ ᠳ᠋ᠠᠴᠠᠩ ᠳ᠋ᠤ᠌ ᠴᠤᠤᠷᠬᠠᠯ ᠲᠠᠷᠬᠠᠪᠠ᠃ 《ᠠᠷᠤ ᠮᠣᠩᠭᠣᠯ ᠠ᠋ᠴᠠ ᠢᠷᠡᠭᠰᠡᠨ ᠰᠠᠩᠵᠢ ᠬᠡᠪ ᠭᠡᠨᠡᠳᠲᠡ ᠣᠶᠤᠨ ᠤ᠋ ᠨᠢ ᠰᠠᠪᠠ ᠳᠦᠭᠦᠷᠴᠤ᠂ ᠨᠣᠮ ᠳ᠋ᠤ᠌ ᠨᠡᠪᠲᠡᠷᠬᠡᠢ ᠪᠣᠯᠵᠤ ᠭᠡᠨᠡ᠃ ᠫᠠᠪᠤᠩ - ᠬᠠ ᠶ᠋ᠢ ᠭᠤᠷᠪᠠᠨ ᠮᠢᠩᠭᠠ ᠭᠤᠷᠪᠠᠨ ᠵᠠᠭᠤᠨ ᠭᠤᠴᠢᠨ ᠭᠤᠷᠪᠠ ᠲᠣᠭᠣᠷᠢᠨ ᠭᠣᠷᠢᠶᠠᠯᠠᠭᠠᠳ ᠲᠡᠢᠮᠦ ᠰᠢᠳᠢ ᠵᠢ ᠣᠯᠵᠤ ᠭᠡᠨᠡ》 ᠭᠡᠵᠦ ᠨᠢᠭᠡ ᠬᠡᠰᠡᠭ ᠶᠠᠷᠢᠵᠠᠢ᠃ ᠨᠥᠭᠦᠭᠡ ᠬᠡᠰᠡᠭ ᠨᠢ 《 ᠵᠡᠯᠰᠡᠩ ᠵᠢᠩᠵᠸ ᠯᠠᠮᠠ ᠬᠣᠶᠠᠭᠤᠯᠠ ᠪᠠᠨ ᠵᠣᠣ ᠷᠢᠨᠪᠣᠽᠧᠢ ᠶ᠋ᠢᠨ ᠵᠠᠬᠠ ᠳᠡᠭᠡᠭᠦᠷ ᠲᠡᠨᠦᠵᠦ ᠶᠠᠪᠤᠭᠠᠳ ᠡᠷᠳᠡᠨᠢ ᠶᠢᠨ ᠭᠠᠪᠠᠯᠠ ᠣᠯᠤᠭᠰᠠᠨ ᠶᠤᠮ ᠭᠡᠨᠡ᠃ ᠲᠡᠭᠡᠭᠡᠳ ᠨᠣᠮ ᠳ᠋ᠤ᠌ ᠨᠡᠪᠲᠡᠷᠬᠡᠢ ᠪᠣᠯᠪᠠ》 ᠭᠡᠵᠦ ᠶᠠᠷᠢᠵᠠᠭᠠᠪᠠ᠃ ᠲᠡᠭᠦᠨ ᠳ᠋ᠦ᠍ ᠢᠲᠡᠭᠡᠭᠰᠡᠨ ᠨᠢᠭᠡ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠨᠢ ᠬᠤᠷᠠᠯ ᠨᠣᠮ ᠳ᠋ᠠᠭᠠᠨ ᠰᠠᠭᠤᠬᠤ ᠶ᠋ᠢᠨ ᠣᠷᠣᠨ ᠳᠤ ᠫᠠᠪᠤᠩ - ᠬᠠ ᠶ᠋ᠢ ᠲᠣᠭᠣᠷᠢᠨ ᠭᠣᠷᠢᠶᠠᠯᠠᠬᠤ ᠶ᠋ᠢ ᠯᠠᠮᠠ ᠪᠠᠭᠰᠢ ᠨᠠᠷ ᠠ᠋ᠴᠠ ᠪᠠᠨ ᠭᠤᠶᠤᠵᠠᠭᠠᠬᠤ ᠪᠣᠯᠪᠠ᠃ ᠨᠢᠭᠡ ᠬᠡᠰᠡᠭ ᠨᠢ ᠵᠡᠯᠰᠡᠩ ᠵᠢᠨᠵᠦᠭ ᠢ᠋ ᠵᠠᠬᠠ ᠪᠠᠷ ᠶᠠᠪᠤᠶᠠ ᠭᠡᠵᠦ ᠦᠷᠭᠦᠯᠵᠢ ᠭᠤᠶᠤᠵᠤ ᠭᠤᠪᠰᠢᠳᠠᠭ ᠪᠣᠯᠵᠠᠢ᠃ ᠠᠯᠢ ᠠᠯᠢᠨ ᠢ᠋ ᠨᠢ ᠬᠡᠨ ᠳ᠋ᠦ᠍ ᠴᠤ᠌ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ᠃ ᠬᠣᠪᠣᠭᠰᠠᠢᠷ ᠤ᠋ᠨ ᠲᠣᠷᠭᠤᠳ ᠪᠠᠯᠳᠠ᠂ ᠬᠥᠬᠡᠨᠠᠭᠤᠷ ᠤ᠋ᠨ ᠥᠭᠡᠯᠡᠳ ᠭᠣᠩᠰᠦ᠋ᠷᠦᠩ ᠬᠣᠶᠠᠷ ᠰᠠᠩᠵᠢ ᠵᠢ ᠶᠠᠭᠠᠬᠢᠭᠠᠳ ᠫᠠᠪᠤᠩ - ᠬᠠ ᠶᠢ ᠲᠤᠭᠤᠷᠢᠬᠤ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠳᠡᠭ ᠪᠠᠢᠯᠠ᠃》ᠲᠡᠳᠡ ᠴᠣᠭᠰᠣᠩ ᠲᠥᠪᠡᠳ ᠡᠴᠡ ᠠᠰᠠᠭᠤᠵᠤ ᠮᠡᠳᠡᠵᠡᠢ᠃ ᠭᠣᠩᠰᠦ᠋ᠷᠦᠩ ᠲᠡᠷᠡ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠵᠦ ᠰᠢᠳᠬᠡᠯ ᠬᠦᠯᠢᠶᠡᠵᠦ ᠫᠠᠪᠤᠩ - ᠬᠠ ᠳ᠋ᠦ᠍ ᠭᠣᠷᠢᠶᠠ ᠬᠢᠬᠦ《 ᠶᠠᠯᠠ 》 ᠡᠳ᠋ᠯᠡᠬᠦ ᠶ᠋ᠢ ᠬᠦᠰᠡᠵᠡᠢ᠃ ᠲᠡᠭᠡᠭᠡᠳ ᠨᠢᠭᠡᠨ ᠡᠳᠦᠷ ᠦ᠋ᠨ ᠤᠩᠰᠢᠯᠭᠠ ᠳᠡᠭᠡᠷᠡ ᠮᠣᠩᠭᠣᠯ ᠢᠶᠠᠷ ᠶᠠᠷᠢᠴᠢᠬᠠᠵᠠᠢ᠃ ᠭᠡᠪᠡᠴᠦ ᠲᠡᠭᠦᠨ ᠢ᠋ ᠬᠡᠨ ᠴᠤ᠌ ᠠᠩᠬᠠᠷᠤᠭᠰᠠᠨ ᠦᠭᠡᠢ᠃ ᠳᠠᠷᠠᠭᠠᠬᠢ ᠡᠳᠦᠷ ᠨᠢ ᠪᠠᠰᠠ ᠯᠠ ᠮᠣᠩᠭᠣᠯ ᠢ᠋ᠶ᠋ᠠᠷ ᠤᠩᠰᠢᠯᠭᠠ ᠶᠠᠪᠤᠭᠤᠯᠤᠭᠰᠠᠨ ᠳ᠋ᠤ᠌ ᠬᠡᠨ ᠴᠤ᠌ ᠠᠵᠢᠭᠯᠠᠭᠰᠠᠨ ᠴᠤ᠌ ᠦᠭᠡᠢ᠂ ᠲᠣᠭᠣᠭᠰᠠᠨ ᠴᠤ᠌ ᠦᠭᠡᠢ᠃ ᠡᠭᠦᠨ ᠳ᠋ᠦ᠍ ᠭᠣᠩᠰᠦ᠋ᠷᠦᠩ ᠶᠡᠬᠡ ᠯᠡ ᠭᠠᠢᠬᠠᠨ ᠭᠤᠲᠤᠵᠠᠢ᠃
- ᠨᠠᠮᠠᠶ᠋ᠢ ᠬᠤᠷᠠᠯ ᠤ᠋ᠨ ᠦᠶᠡ ᠪᠡᠷ ᠮᠣᠩᠭᠣᠯ ᠢ᠋ᠶ᠋ᠠᠷ ᠤᠩᠰᠢᠯᠭᠠ ᠦᠢᠯᠡᠳᠬᠦ ᠳ᠋ᠦ᠍ ᠶᠡᠷᠦ ᠬᠡᠨ ᠴᠤ᠌ ᠲᠣᠭᠣᠬᠤ ᠦᠭᠡᠢ ᠪᠠᠢᠨᠠ ᠶᠠᠭᠠᠬᠢᠬᠤ ᠪᠣᠢ? ᠭᠡᠵᠦ ᠭᠣᠩᠰᠦ᠋ᠷᠦᠩ ᠮᠠᠷᠭᠠᠰᠢ ᠨᠢ ᠰᠠᠩᠵᠢ ᠠ᠋ᠴᠠ ᠠᠮᠢᠨᠴᠢᠯᠠᠨ ᠠᠰᠠᠭᠤᠪᠠ᠃
- ᠨᠠᠳᠠ ᠳ᠋ᠤ᠌ ᠬᠡᠯᠡᠭᠡᠳ ᠨᠡᠮᠡᠷᠢ ᠦᠭᠡᠢ᠃ ᠬᠠᠷᠢᠨ ᠴᠢ ᠲᠡᠷᠡ ᠲᠤᠬᠠᠢ ᠶ᠋ᠢ ᠪᠡᠨ ᠫᠠᠭᠰᠠᠩ ᠶᠤᠮ ᠤᠤ᠂ ᠴᠣᠭᠰᠣᠩ ᠳ᠋ᠤ᠌ ᠯᠠ ᠰᠠᠨᠠᠭᠠᠨ ᠳ᠋ᠦ᠍ ᠦᠭᠡᠢ ᠶᠠᠷᠢᠵᠤ ᠣᠷᠭᠢ᠃ ᠲᠡᠭᠡᠭᠡᠳ ᠯᠡ ᠬᠡᠷᠡᠭ ᠴᠢᠨᠢ ᠪᠦᠲᠦᠨᠡ ᠭᠡᠵᠦ ᠰᠠᠩᠵᠢ ᠵᠥᠪᠯᠡᠪᠡ᠃ ᠭᠠᠰᠢᠭᠤᠨ ᠲᠤᠷᠰᠢᠯᠭᠠ ᠬᠡᠯᠡᠭᠰᠡᠨ ᠨᠢ ᠲᠡᠷᠡ!
- ᠲᠡᠳᠡᠨ ᠳ᠋ᠦ᠍ ᠶᠠᠷᠢᠵᠤ ᠶᠠᠭᠠᠬᠢᠬᠤ ᠶᠤᠮ ᠪᠣᠢ?
- ᠬᠡᠷᠡᠭ ᠢ᠋ᠶ᠋ᠡᠨ ᠪᠦᠲᠦᠭᠡᠶᠡ ᠯᠡ ᠭᠡᠵᠦ ᠪᠠᠢᠭᠠ ᠪᠣᠯ ᠲᠡᠳᠡᠨ ᠳ᠋ᠦ᠍ ᠯᠡ ᠶᠠᠷᠢ᠃ ᠲᠡᠷᠡ ᠳᠣᠣᠷᠠ ᠪᠠᠨ ᠯᠠ ᠬᠡᠷᠡᠭ ᠮᠠᠨᠳᠤᠵᠤ ᠴᠢᠮᠠᠶ᠋ᠢ ᠫᠠᠪᠤᠩ - ᠬᠠ ᠳ᠋ᠦ᠍ ᠶᠠᠪᠤᠭᠤᠯᠤᠭᠠᠳ ᠦᠭᠭᠦᠨᠡ ᠭᠡᠵᠦ ᠰᠠᠩᠵᠢ ᠠᠵᠢᠭ ᠴᠤ᠌ ᠦᠭᠡᠢ ᠬᠡᠯᠡᠬᠦ ᠳ᠋ᠦ᠍ ᠭᠣᠩᠰᠦ᠋ᠷᠦᠩ ᠦᠨᠡᠮᠰᠢᠯᠡ᠃ ᠴᠣᠬᠣᠮ ᠶᠠᠭᠠᠬᠢᠵᠤ ᠲᠡᠳᠡᠨ ᠳ᠋ᠦ᠍ ᠬᠡᠯᠡᠬᠦ ᠪᠡᠨ ᠮᠡᠳᠡᠬᠦ ᠦᠭᠡᠢ ᠬᠡᠰᠡᠭ ᠡᠷᠡᠭᠡᠯᠵᠡᠭᠰᠡᠨ ᠢ᠋ᠶ᠋ᠡᠨ᠂ ᠡᠳᠦᠷ ᠦ᠋ᠨ ᠳ᠋ᠣᠩᠭᠤ ᠪᠤᠶᠤ ᠵᠣᠭᠣᠭ ᠲᠦᠭᠡᠭᠡᠬᠦ ᠦᠶᠡ ᠪᠡᠷ ᠫᠠᠭᠰᠠᠩ ᠳ᠋ᠤ᠌ ᠭᠣᠩᠰᠦ᠋ᠷᠦᠩ᠂ ᠴᠣᠭᠰᠣᠩ ᠳ᠋ᠤ᠌ ᠪᠠᠯᠳᠠ ᠨᠠᠷ ᠬᠡᠯᠡᠬᠦ ᠪᠡᠷ ᠰᠢᠢᠳᠴᠦ:
- ᠲᠥᠪᠡᠳ ᠬᠡᠯᠡ ᠳᠤᠲᠠᠭᠤ ᠰᠤᠷᠤᠭᠰᠠᠨ ᠪᠣᠯᠬᠣᠷ ᠢ᠋ᠶ᠋ᠠᠨ ᠰᠢᠳᠤᠪ ᠤᠩᠰᠢᠬᠤ ᠳ᠋ᠤ᠌ ᠲᠦᠭᠳᠡᠷᠡᠭᠡᠳ ᠪᠠᠷᠠᠳᠠᠭ ᠦᠭᠡᠢ᠃ ᠠᠱ᠌ᠢᠭᠦᠢ ᠮᠣᠩᠭᠣᠯ ᠢ᠋ᠶ᠋ᠠᠷ ᠤᠩᠰᠢᠵᠤ ᠳᠠᠭᠤᠰᠤᠭᠰᠠᠨ ᠴᠢᠨᠢ ᠣᠯᠠᠨ ᠤ᠋ ᠲᠦᠢᠪᠡᠭᠡᠨ ᠳ᠋ᠦ᠍ ᠬᠡᠨ ᠴᠤ᠌ ᠮᠡᠳᠡᠭᠰᠡᠨ ᠦᠭᠡᠢ ᠭᠡᠵᠦ ᠭᠣᠩᠰᠦ᠋ᠷᠦᠩ ᠫᠠᠭᠰᠠᠩ ᠲᠥᠪᠡᠳ ᠲᠦ᠍ ᠰᠣᠨᠢᠨ ᠪᠣᠯᠭᠠᠨ ᠶᠠᠷᠢᠪᠠ᠃ ᠴᠠᠭᠠᠳᠤᠬᠢ ᠨᠢ ᠲᠣᠭᠣᠭᠰᠠᠨ ᠰᠢᠨᠵᠢ ᠦᠭᠡᠢ ᠥᠩᠭᠡᠷᠡᠵᠡᠢ᠃
- ᠮᠣᠩᠭᠣᠯ ᠢ᠋ᠶ᠋ᠠᠷ ᠤᠩᠰᠢᠯᠭᠠ ᠤᠩᠰᠢᠴᠢᠬᠠᠬᠤ ᠳ᠋ᠤ᠌ ᠮᠠᠨ ᠤ᠋ ᠠᠷᠤ ᠶ᠋ᠢᠨ ᠵᠠᠪᠳᠤᠩ ᠳᠡᠭᠡᠷᠡᠬᠢ ᠭᠠᠢᠬᠠᠯ ᠤᠳ ᠶᠠᠭᠤ ᠴᠤ᠌ ᠰᠡᠵᠢᠭᠯᠡᠭᠰᠡᠨ ᠦᠭᠡᠢ᠃ ᠮᠣᠩᠭᠣᠯ ᠢ᠋ᠶ᠋ᠠᠷ ᠴᠤ᠌ ᠭᠡᠵᠦ ᠳᠡ ᠶᠡᠷᠦ ᠳ᠋ᠡᠭᠡᠨ ᠲᠤᠷᠭᠤᠳ ᠢ᠋ᠶ᠋ᠠᠷ ᠤᠩᠰᠢᠭᠰᠠᠨ ᠯᠠ ᠳᠠ ᠭᠡᠵᠦ ᠪᠠᠯᠳᠠ ᠴᠣᠭᠰᠣᠩ ᠳ᠋ᠤ᠌ ᠰᠠᠨᠠᠭᠠᠨ ᠳ᠋ᠦ᠍ ᠦᠭᠡᠢ ᠮᠡᠲᠦ ᠶᠠᠷᠢᠵᠠᠢ᠃
- ᠥᠭᠡᠷᠡ ᠬᠡᠨ ᠴᠤ᠌ ᠡᠭᠦᠨ ᠢ ᠴᠢᠨᠢ ᠮᠡᠳᠡᠭᠡ ᠦᠭᠡᠢ ᠤᠤ? ᠭᠡᠵᠦ ᠴᠣᠭᠰᠣᠩ ᠰᠣᠨᠢᠭᠤᠴᠢᠯᠠᠪᠠ᠃ ᠪᠠᠯᠳᠠ ᠳᠠᠭᠤ ᠪᠠᠨ ᠨᠠᠮᠰᠠᠭᠠᠵᠤ:
- ᠠᠱᠢᠭᠦᠢ ᠬᠡᠨ ᠴᠤ᠌ ᠮᠡᠳᠡᠭᠡ ᠦᠭᠡᠢ᠃ ᠪᠢ ᠪᠣᠯ ᠴᠢᠮᠠ ᠳ᠋ᠤ᠌ ᠢᠲᠡᠭᠡᠵᠦ ᠶᠠᠷᠢᠵᠤ ᠪᠠᠢᠭᠠ ᠶᠤᠮ ᠳᠠ ᠭᠡᠪᠡ᠃ ᠴᠣᠭᠰᠣᠩ ᠳ᠋ᠤ᠌ ᠲᠡᠷᠡ ᠨᠢ ᠡᠪ ᠦᠭᠡᠢ ᠰᠠᠨᠠᠭᠳᠠᠵᠠᠢ᠃
- ᠨᠠᠳᠠ ᠢᠲᠡᠭᠡᠬᠦ ᠪᠡᠷ ᠡᠷᠡᠬᠡᠢ ᠬᠤᠷᠤᠭᠤᠨ ᠳ᠋ᠠᠭᠠᠨ ᠢᠳᠡᠭᠡ! ᠭᠡᠵᠦ ᠴᠣᠭᠰᠣᠩ ᠠᠭᠤᠷᠲᠠᠢ ᠬᠡᠯᠡᠭᠡᠳ ᠥᠩᠭᠡᠷᠡᠨ ᠶᠠᠪᠤᠪᠠ᠃ ᠬᠣᠪᠯᠠᠬᠤ ᠰᠢᠨᠵᠢ ᠪᠦᠷᠢᠨ ᠲᠣᠳᠣᠷᠠᠵᠠᠢ᠃
《ᠣᠳᠣ ᠯᠠ ᠨᠢᠭᠡ ᠪᠣᠯᠳᠠᠭ ᠲᠠᠭᠠᠨ ᠬᠦᠷᠦᠯᠡ᠃ ᠡᠨᠡ ᠴᠣᠭᠰᠣᠩ ᠯᠠᠪ ᠠᠯᠲᠠᠨ ᠬᠣᠰᠢᠭᠤ ᠬᠦᠷᠭᠡᠨ ᠡ ᠳᠡ᠃ ᠲᠡᠭᠡᠪᠡᠯ ᠨᠠᠮᠠᠶ᠋ᠢ ᠴᠤ᠌ ᠳᠣᠣᠷᠠ ᠨᠢ ᠯᠡ ᠫᠠᠪᠤᠩ - ᠬᠠ ᠳ᠋ᠦ᠍ ᠢᠯᠡᠭᠡᠨᠡ》 ᠭᠡᠵᠦ ᠪᠠᠯᠳᠠ ᠳᠣᠲᠣᠷᠠ ᠪᠠᠨ ᠪᠠᠶᠠᠰᠤᠨ ᠪᠣᠳᠣᠵᠠᠢ᠃
ᠲᠡᠷᠡ ᠡᠳᠦᠷ ᠦ᠋ᠨ ᠬᠤᠷᠠᠯ ᠴᠢᠭᠯᠡᠵᠦ ᠯᠠᠮᠠ ᠨᠠᠷ ᠭᠠᠳᠠᠭᠰᠢ ᠪᠠᠨ ᠭᠠᠳᠠᠭᠠᠯᠠᠯᠠ᠃ ᠭᠡᠢᠳ ᠦᠨ ᠭᠡᠰᠬᠦᠢ ᠬᠠᠮᠠᠷ ᠤ᠋ᠨ ᠲᠠᠮᠠᠬᠢ ᠪᠠᠨ ᠰᠤᠷᠤᠭᠠᠳ ᠵᠠᠶᠢᠭ᠋ ᠡᠪᠳᠡᠭᠰᠡᠳ ᠢ᠋ ᠵᠠᠯᠬᠠᠭᠠᠬᠤ ᠱᠣᠩ ᠤᠨ ᠳᠡᠷᠭᠡᠳᠡ ᠵᠣᠭᠰᠣᠵᠤ ᠪᠠᠢᠯᠠ᠃
- ᠪᠠᠯᠳᠠ ᠨᠡᠰᠢ ᠢᠷᠡ! ᠭᠡᠵᠦ ᠲᠡᠷᠡ ᠲᠠᠭᠤᠲᠠᠯᠠ. 《ᠣᠳᠣ ᠯᠠ ᠥᠨᠥᠬᠢ ᠫᠠᠪᠤᠩ - ᠬᠠ ᠤᠷᠤᠭᠤ ᠬᠥᠭᠡᠭᠡᠬᠦ ᠪᠢᠵᠡ ᠳᠡ᠃ ᠠᠯᠲᠠᠨ ᠬᠣᠰᠢᠭᠤ ᠡᠷᠭᠦᠵᠡᠢ᠂ ᠭᠡᠰᠬᠦᠢ ᠳ᠋ᠦ᠍》 ᠭᠡᠵᠦ ᠪᠠᠯᠳᠠ ᠪᠣᠳᠣᠭᠠᠳ ᠭᠦᠶᠦᠨ ᠣᠴᠢᠯᠠ᠃ ᠭᠡᠰᠬᠦᠢ ᠴᠤ᠌ ᠠᠭᠤᠷ ᠢ᠋ᠶ᠋ᠠᠨ ᠪᠠᠷᠢᠵᠤ ᠶᠠᠳᠠᠵᠤ ᠪᠠᠢᠬᠤ ᠬᠠᠷᠠᠭᠳᠠᠯᠠ᠃
- ᠭᠣᠩᠰᠦ᠋ᠷᠦᠩ ᠢ᠋ ᠣᠯᠤᠭᠠᠳ ᠢᠷᠡ! ᠭᠡᠵᠦ ᠭᠡᠰᠬᠦᠢ ᠲᠤᠰᠢᠶᠠᠪᠠ᠃
ᠪᠠᠯᠳᠠ ᠭᠣᠩᠰᠦ᠋ᠷᠦᠩ ᠢ᠋ ᠲᠡᠷᠡ ᠳᠣᠣᠷᠠ ᠪᠠᠨ ᠣᠯᠵᠤ ᠳᠠᠭᠠᠭᠤᠯᠤᠨ ᠠᠪᠴᠢᠷᠠᠪᠠ᠃ ᠭᠡᠰᠬᠦᠢ ᠲᠡᠳᠡᠨ ᠤᠷᠤᠭᠤ ᠢᠷᠪᠠᠯᠵᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ:
- ᠲᠠ ᠬᠣᠶᠠᠷ ᠳᠣᠯᠣᠭᠠ ᠬᠣᠨᠣᠭ ᠤ᠋ᠨ ᠲᠤᠷᠰᠢ ᠭᠡᠢᠳ ᠦ᠋ᠨ ᠬᠣᠭ ᠴᠡᠪᠡᠷᠯᠡᠨᠡ᠃ ᠥᠨᠥᠳᠥᠷ ᠡᠴᠡ ᠡᠬᠢᠯᠡᠨᠡ ᠭᠡᠵᠦ ᠵᠠᠷᠯᠢᠭ ᠪᠠᠭᠤᠯᠭᠠᠪᠠ᠃ ᠪᠠᠯᠳᠠ᠂ ᠭᠣᠩᠰᠦ᠋ᠷᠦᠩ ᠬᠣᠶᠠᠷ ᠠᠶᠤᠩᠭᠠ ᠳ᠋ᠤ᠌ ᠴᠣᠬᠢᠭᠤᠯᠤᠭᠰᠠᠨ ᠮᠡᠲᠦ ᠴᠣᠴᠢᠨ ᠭᠠᠢᠬᠠᠵᠤ:
- ᠪᠢᠳᠡ ᠬᠣᠶᠠᠷ ᠶᠠᠭᠠᠬᠢᠯᠠ ᠭᠡᠵᠦ ᠬᠣᠭ ᠴᠡᠪᠡᠷᠯᠡᠬᠦ ᠶᠦᠮ ᠪᠣᠢ? ᠭᠡᠮᠡᠨ ᠪᠠᠯᠳᠠ ᠭᠠᠢᠬᠠᠰᠢ ᠲᠠᠰᠤᠷᠠᠨ ᠠᠰᠠᠭᠤᠪᠠᠯ:
- ᠠ ᠲᠠ ᠬᠣᠶᠠᠷ ᠶᠠᠭᠠᠬᠢᠭ᠍ᠰᠠᠨ ᠢ᠋ᠶ᠋ᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ ᠤᠤ? ᠭᠡᠵᠦ ᠭᠡᠰᠬᠦᠢ ᠴᠢᠩᠭᠠ ᠬᠠᠰᠬᠢᠷᠤᠭᠠᠳ ᠵᠣᠭᠪᠣ ᠭᠡᠳᠡᠭ ᠲᠡᠮᠦᠷ ᠪᠠᠷᠢᠶᠠ ᠪᠠᠨ ᠳᠠᠯᠠᠶ᠋ᠢᠨ ᠪᠠᠯᠲᠠ ᠶ᠋ᠢᠨ ᠮᠥᠷᠦᠨ ᠳᠡᠭᠡᠷᠡ ᠴᠢᠩᠭᠠ ᠪᠠᠭᠤᠯᠭᠠᠪᠠ᠃ ᠡᠭᠡᠮ ᠨᠢ ᠬᠤᠭᠤᠷᠠᠬᠤ ᠰᠢᠭ᠋ ᠪᠣᠯᠵᠤ ᠪᠠᠯᠲᠠ ᠶ᠋ᠢᠨ ᠲᠣᠯᠣᠭᠠᠢ ᠡᠷᠭᠢᠪᠡ᠃ - ᠬᠦᠶᠢ᠂ ᠬᠤᠸᠠᠷᠠᠭ ᠤ᠋ᠳ! ᠨᠡᠰᠢ ᠢᠷᠡ᠂ ᠡᠨᠡ ᠬᠣᠶᠠᠷ ᠢ᠋ ᠵᠠᠯᠬᠠᠭᠠ! ᠭᠡᠵᠦ ᠭᠡᠰᠬᠦᠢ ᠬᠠᠰᠬᠢᠷᠬᠤ ᠳ᠋ᠦ᠍ ᠭᠡᠪ ᠭᠡᠨᠡᠳᠲᠡ ᠳᠥᠷᠪᠡᠨ ᠮᠠᠩᠭᠠᠷ ᠬᠤᠸᠠᠷᠠᠭ ᠬᠠᠮᠢᠭᠠ ᠨᠢᠭᠡᠲᠡᠭᠡ ᠡᠴᠡ ᠭᠠᠷᠴᠤ ᠢᠷᠡᠭᠡᠳ ᠰᠠᠭᠠᠷᠢ ᠲᠠᠢ ᠨᠢᠳᠤᠷᠭᠤ ᠪᠠᠷ ᠢ᠋ᠶ᠋ᠠᠨ ᠪᠠᠯᠲᠠ᠂ ᠭᠣᠩᠰᠦ᠋ᠷᠦᠩ ᠬᠣᠶᠠᠷ ᠢ᠋ ᠲᠣᠯᠣᠭᠠᠢ ᠲᠦᠷᠦᠭᠦᠦ ᠦᠭᠡᠢ ᠵᠣᠳᠣᠵᠤ ᠡᠬᠢᠯᠡᠪᠡ᠃ ᠡᠢᠮᠦ ᠮᠠᠶᠢᠭ᠋ ᠢ᠋ᠶ᠋ᠠᠷ ᠭᠡᠰᠬᠡᠨᠡ ᠭᠡᠵᠦ ᠰᠠᠨᠠᠭᠰᠠᠨ ᠦᠭᠡᠢ᠃
- ᠬᠠᠰᠢᠷᠠᠯᠠ! ᠪᠣᠯᠢᠶᠠ! ᠥᠷᠥᠰᠢᠶᠡᠭᠡᠴᠢ! ᠭᠡᠵᠦ ᠲᠡᠷᠡ ᠬᠣᠶᠠᠷ ᠲᠣᠯᠣᠭᠠᠢ ᠪᠡᠨ ᠬᠠᠭᠠᠴᠠᠢᠯᠠᠨ ᠣᠷᠢᠯᠠᠯᠳᠤᠪᠠ᠃ ᠨᠣᠮ ᠡᠷᠳᠡᠮ ᠰᠠᠢᠨ ᠰᠤᠷᠬᠤ ᠠᠪᠢᠶᠠᠰ ᠢ᠋ᠶ᠋ᠠᠷ ᠲᠠᠭᠠᠷᠠᠤᠬᠠᠨ ᠪᠣᠯᠪᠠᠴᠤ ᠮᠠᠩᠭᠠᠷ ᠱᠠᠪᠢ ᠨᠠᠷ ᠠ᠋ᠴᠠ ᠪᠠᠨ ᠬᠤᠸᠠᠷᠠᠭ ᠪᠣᠯᠭᠠᠵᠤ ᠣᠢᠷᠠ ᠵᠠᠭᠤᠷᠠ ᠵᠠᠷᠤᠳᠠᠭ ᠭᠣᠮᠠᠨ ᠳ᠋ᠠᠴᠠᠩ ᠳ᠋ᠤ᠌ ᠵᠠᠶᠢᠭ᠋ ᠰᠠᠬᠢᠭᠤᠯᠬᠤ ᠠᠯᠪᠠᠲᠠᠨ ᠵᠣᠳᠣᠭᠠᠴᠢ ᠬᠤᠸᠠᠷᠠᠭ ᠨᠠᠷ ᠤ᠋ᠨ ᠲᠤᠰᠬᠠᠢ ᠪᠦᠯᠦᠭ ᠪᠠᠢᠳᠠᠭ ᠠᠵᠢ᠃ ᠲᠡᠳᠡ ᠨᠠᠷ ᠭᠡᠰᠬᠦᠢ ᠶᠤᠮ ᠤᠤ ᠡᠰᠡᠪᠡᠯ ᠱᠠᠰᠢᠨ ᠤ᠋ ᠵᠠᠬᠢᠷᠭᠠᠨ ᠤ ᠳᠠᠭᠠᠭᠠᠯᠭᠠᠪᠤᠷᠢ ᠪᠠᠷ ᠯᠠᠮᠠ ᠨᠠᠷ ᠢ᠋ ᠵᠠᠯᠬᠠᠭᠠᠨ ᠴᠡᠭᠡᠷᠯᠡᠭᠦᠯᠳᠡᠭ ᠪᠠᠢᠯᠠ᠃ ᠪᠠᠯᠲᠠ᠂ ᠭᠣᠩᠰᠦ᠋ᠷᠦᠩ ᠬᠣᠶᠠᠷ ᠲᠤ᠌ ᠲᠡᠳᠡᠨ ᠦ᠌ ᠨᠢᠳᠤᠷᠭᠠ ᠶ᠋ᠢᠨ ᠠᠮᠲᠠ ᠶ᠋ᠢ ᠬᠠᠩᠭᠠᠯᠲᠠᠲᠠᠢ ᠦᠵᠡᠭᠦᠯᠦᠭᠰᠡᠨ ᠦ᠌ ᠳᠠᠷᠠᠭᠠ:
- ᠵᠠ ᠪᠣᠯᠤᠨᠠ᠃ ᠬᠤᠸᠠᠷᠠᠭ ᠤ᠋ᠳ ᠶᠠᠪᠤᠵᠠᠭᠠ! ᠲᠠ ᠬᠣᠶᠠᠷ ᠬᠣᠭ ᠴᠡᠪᠡᠷᠯᠡᠬᠦ ᠱᠦᠭᠦᠷ ᠰᠠᠪᠠ ᠪᠠᠨ ᠠᠪᠴᠠᠭᠠ! ᠭᠡᠵᠦ ᠭᠡᠰᠬᠦᠢ ᠬᠡᠯᠡᠵᠡᠢ᠃
ᠪᠠᠯᠲᠠ᠂ ᠭᠣᠩᠰᠦ᠋ᠷᠦᠩ ᠬᠣᠶᠠᠷ ᠳᠡᠷᠡᠰᠦᠨ ᠱᠦᠭᠦᠷ᠂ ᠭᠠᠦᠯᠢᠨ ᠰᠠᠪᠠ ᠪᠠᠨ ᠠᠪᠤᠭᠠᠳ ᠬᠣᠭ ᠴᠡᠪᠡᠷᠯᠡᠬᠦ ᠪᠡᠷ ᠶᠠᠪᠤᠬᠤ ᠵᠠᠭᠤᠷᠠ ᠬᠣᠭᠣᠷᠣᠨᠳᠣ ᠪᠠᠨ ᠭᠡᠷᠡᠯᠲᠦᠪᠡ᠃
- ᠴᠢᠮᠠ ᠠ᠋ᠴᠠ ᠯᠠ ᠪᠣᠯᠤᠭᠰᠠᠨ ᠶᠤᠮ ᠭᠡᠵᠦ ᠪᠠᠯᠲᠠ ᠡᠬᠢᠯᠡᠭᠡᠳ ᠠᠮᠠ ᠮᠤᠷᠤᠢᠨ ᠦᠭᠡ ᠡᠳᠦᠬᠦ ᠳ᠋ᠦ᠍ ᠭᠣᠩᠰᠦ᠋ᠷᠦᠩ:
- ᠪᠠᠯᠠᠢ ᠮᠢᠨᠢ᠂ ᠴᠢᠮᠠ ᠠ᠋ᠴᠠ ᠯᠠ ᠡᠭᠦᠰᠦᠭᠡ ᠦᠭᠡᠢ ᠤᠤ? ᠫᠠᠪᠤᠩ - ᠬᠠ ᠶ᠋ᠢ ᠲᠣᠭᠣᠷᠢᠵᠤ ᠪᠤᠷᠬᠠᠨ ᠤ᠋ ᠨᠣᠮ ᠲᠦᠷᠭᠡᠨ ᠰᠤᠷᠬᠤ ᠶ᠋ᠢᠨ ᠲᠤᠬᠠᠢ ᠴᠢ ᠯᠡ ᠡᠬᠢᠯᠡᠵᠦ ᠦᠭᠡ ᠡᠭᠦᠰᠬᠡᠭᠡ ᠪᠢᠵᠡ ᠳᠡ ᠭᠡᠵᠦ ᠠᠭᠤᠷᠲᠠᠢ ᠠᠰᠠᠭᠤᠬᠤ ᠳ᠋ᠦ᠍ ᠪᠠᠯᠳᠠ :
- ᠴᠢ ᠯᠡ ᠳᠠᠬᠢᠨ ᠳᠠᠬᠢᠨ ᠦᠭᠡᠯᠡᠵᠦ ᠪᠠᠢᠭ᠍ᠰᠠᠭᠠᠷ ᠡᠢᠮᠦ ᠬᠡᠷᠡᠭ ᠲᠠᠷᠢᠬᠤ ᠳ᠋ᠤ᠌ ᠬᠦᠷᠭᠡᠪᠡ᠃ ᠶᠡᠷᠦ ᠨᠢ ᠥᠭᠡᠯᠡᠳ ᠦ᠋ᠳ ᠵᠠᠯᠬᠠᠭᠤ ᠠ᠋ᠴᠠ ᠪᠠᠨ ᠯᠠ ᠪᠣᠯᠤᠨᠠ ᠳᠠ! ᠭᠡᠴᠢᠬᠡᠭᠰᠡᠨ ᠴᠢᠨᠢ ᠭᠣᠩᠰᠦ᠋ᠷᠦᠩ ᠦ᠋ᠨ ᠠᠭᠤᠷ ᠬᠦᠷᠴᠦ ᠨᠠᠢᠵᠠ ᠶ᠋ᠢ ᠪᠡᠨ ᠨᠢᠳᠤᠷᠭᠠᠯᠠᠭᠠᠳ ᠠᠪᠤᠯᠠ᠃ ᠪᠠᠯᠳᠠ ᠬᠠᠷᠢᠭᠤ ᠳ᠋ᠤ᠌ ᠨᠢ ᠳᠡᠷᠡᠰᠦᠨ ᠱᠦᠭᠦᠷ ᠢ᠋ᠶ᠋ᠡᠷ ᠢᠶᠡᠨ ᠲᠣᠯᠣᠭᠠᠢ ᠳᠤᠮᠳᠠᠭᠤᠷ ᠨᠢ ᠰᠠᠪᠠᠵᠤ ᠣᠷᠬᠢᠪᠠ᠃ ᠲᠡᠭᠡᠲᠡᠯᠡ ᠵᠠᠯᠬᠠᠭᠠᠭᠴᠢ ᠬᠤᠸᠠᠷᠠᠭ ᠨᠤᠭᠤᠳ ᠳᠠᠬᠢᠨ ᠭᠠᠷᠴᠤ ᠢᠷᠡᠭᠡᠳ ᠲᠡᠷᠡ ᠬᠣᠶᠠᠷ ᠢ᠋ ᠪᠦᠰᠡᠯᠡᠨ ᠠᠪᠴᠤ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠲᠦᠯᠬᠢᠨ ᠵᠣᠳᠣᠵᠤ᠂ ᠴᠢᠷᠴᠦ ᠭᠤᠯᠳᠤᠷᠤᠨ ᠭᠡᠢᠳ ᠦ᠋ᠨ ᠬᠠᠷᠠ ᠭᠡᠷ ᠲᠦ᠍ ᠬᠦᠷᠭᠡᠵᠦ ᠪᠣᠱᠣᠭᠠ ᠪᠠᠷ ᠨᠢ ᠣᠷᠣᠭᠤᠯᠤᠮᠠᠭᠴᠠ ᠭᠠᠳᠠᠨᠠ ᠠᠴᠠ ᠬᠠᠭᠠᠯᠭᠠ ᠶ᠋ᠢ ᠬᠠᠭᠠᠵᠤ ᠲᠡᠮᠦᠷ ᠴᠣᠣᠵᠢ ᠪᠠᠷ ᠳᠠᠵᠢᠭᠢᠨᠠᠲᠠᠯᠠ ᠴᠣᠣᠵᠢᠯᠠᠪᠠ᠃
ᠪᠠᠢᠰᠢᠩ ᠳᠣᠲᠣᠷᠠ ᠴᠢᠭᠢᠭᠯᠢᠭ ᠬᠠᠷᠠᠩᠭᠤᠢ᠂ ᠪᠠᠰᠠ ᠱᠠᠯᠠ ᠦᠭᠡᠢ ᠤᠴᠢᠷ ᠳᠣᠣᠷᠠ ᠠ᠋ᠴᠠ ᠬᠦᠢᠲᠡ ᠳᠠᠭᠠᠭᠠᠵᠤ ᠪᠠᠢᠪᠠ᠃
- ᠢᠩᠭᠢᠭᠡᠳ ᠯᠡ ᠪᠤᠶᠠᠨ ᠤ᠋ ᠦᠢᠯᠡᠰ ᠮᠠᠨᠢ ᠥᠩᠭᠡᠷᠡᠯᠡ ᠳᠡ᠃ ᠴᠢᠮᠠ ᠠ᠋ᠴᠠ ᠯᠠ ᠪᠣᠯᠤᠭᠰᠠᠨ ᠶᠤᠮ ᠭᠡᠵᠦ ᠪᠠᠯᠳᠠ ᠬᠠᠷᠠᠮᠰᠠᠨ ᠳᠤᠤᠭᠠᠷᠪᠠ᠃
- ᠴᠢᠮᠠ ᠠ᠋ᠴᠠ ᠯᠠ ᠪᠣᠯᠤᠭᠰᠠᠨ ᠶᠤᠮ᠃ ᠪᠢ ᠪᠣᠯ ᠤᠭ ᠠ᠋ᠴᠠ ᠪᠠᠨ ᠫᠠᠪᠤᠩ - ᠬᠠ ᠶ᠋ᠢ ᠲᠣᠭᠣᠷᠢᠨ ᠭᠣᠷᠢᠶᠠᠯᠠᠬᠤ ᠳ᠋ᠦ᠍ ᠨᠢᠭᠡ ᠶᠡᠬᠡ ᠳᠤᠷᠠᠯᠠᠭᠠ ᠦᠭᠡᠢ ᠪᠠᠢᠭ᠍ᠰᠠᠨ᠃ ᠴᠥᠮ ᠯᠡ 《 ᠫᠠᠪᠤᠩ - ᠬᠠ ᠳ᠋ᠦ᠍ ᠭᠤᠷᠪᠠᠨ ᠮᠢᠩᠭᠠ ᠶ᠋ᠢᠨ ᠭᠤᠷᠢᠶᠠ ᠬᠢᠭᠡᠳ ᠰᠠᠩᠵᠢ ᠶ᠋ᠢᠨ ᠣᠶᠤᠨ ᠤ᠋ ᠰᠠᠪᠠ ᠳᠦᠭᠦᠷᠴᠦ ᠡᠷᠳᠡᠮ ᠨᠢ ᠴᠤᠭᠤᠷᠤᠵᠠᠢ ᠭᠡᠨᠡ》 ᠭᠡᠵᠡᠭᠡᠭᠡᠳ ᠪᠠᠢᠬᠤ ᠪᠠᠷ ᠴᠢᠨᠦ ᠦᠭᠡᠨ ᠳ᠋ᠦ᠍ ᠣᠷᠣᠭᠰᠠᠨ ᠮᠢᠨᠢ ᠭᠠᠢ ᠪᠣᠯᠤᠯᠠ ᠭᠡᠵᠦ ᠭᠣᠩᠰᠦ᠋ᠷᠦᠩ ᠭᠣᠩᠰᠣᠢᠨ ᠶᠠᠷᠢᠬᠤ ᠳ᠋ᠤ᠌ ᠪᠠᠯᠲᠠ:
- ᠲᠡᠭᠡᠪᠡᠯ ᠶᠡᠷᠦ ᠡᠴᠡ ᠪᠡᠨ ᠴᠢ ᠪᠢᠳᠡ ᠬᠣᠶᠠᠷ ᠠᠯᠢ ᠠᠯᠢᠨ ᠠ᠋ᠴᠠ ᠪᠠᠨ ᠪᠢᠰᠢ ᠬᠠᠷᠢᠨ ᠲᠡᠷᠡ ᠮᠠᠭᠤ ᠬᠠᠯᠬᠠ ᠶ᠋ᠢᠨ ᠪᠠᠳᠢᠷᠴᠢᠨ ᠰᠠᠩᠵᠢ ᠠ᠋ᠴᠠ ᠪᠣᠯᠤᠭᠰᠠᠨ ᠬᠡᠷᠡᠭ ᠪᠠᠢᠨᠠ ᠭᠡᠵᠦ ᠠᠭᠤᠷᠲᠠᠢᠶᠠ ᠳᠤᠤᠭᠠᠷᠤᠯᠠ᠃ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠬᠣᠶᠠᠭᠤᠯᠠ ᠨᠢᠭᠡ ᠶᠡᠬᠡ ᠵᠣᠪᠠᠯ ᠦᠭᠡᠢ ᠨᠣᠢᠷ ᠢ᠋ᠶ᠋ᠠᠨ ᠪᠠᠷᠠᠲᠠᠯᠠ ᠬᠤᠷᠬᠢᠷᠠᠵᠤ ᠥᠩᠭᠡᠷᠡᠵᠡᠢ᠃ ᠭᠡᠲᠡᠯᠡ ᠲᠡᠳᠡᠨ ᠢ᠋ ᠮᠠᠷᠭᠠᠰᠢ ᠨᠢ᠂ ᠨᠥᠭᠥᠭᠡᠳᠦᠷ ᠨᠢ᠂ ᠨᠥᠭᠥᠭᠡᠳᠦᠷ ᠦᠨ ᠮᠠᠷᠭᠠᠰᠢ ᠨᠢ ᠬᠡᠨ ᠴᠤ᠌ ᠲᠣᠭᠣᠭᠰᠠᠨ ᠦᠭᠡᠢ᠃ ᠭᠤᠷᠪᠠ ᠬᠣᠨᠣᠭ ᠬᠣᠭᠣᠰᠣᠨ ᠰᠠᠭᠤᠭᠰᠠᠨ ᠳ᠋ᠤ᠌ ᠲᠡᠳᠡ ᠭᠤᠷᠠᠩᠬᠤᠯᠠᠵᠤ ᠦᠬᠦᠬᠦ ᠳᠥᠭᠥᠯᠡ᠃ ᠲᠡᠳᠡᠨ ᠢ᠋ ᠮᠠᠷᠲᠠᠴᠢᠬᠠᠵᠠᠢ ᠭᠡᠵᠦ ᠪᠣᠳᠣᠭᠠᠳ ᠬᠣᠶᠠᠭᠤᠯᠠ ᠬᠠᠰᠬᠢᠷᠤᠯᠳᠤᠨ ᠬᠠᠭᠠᠯᠭᠠ ᠪᠠᠨ ᠨᠦᠳᠦᠵᠦ ᠢᠰᠬᠦᠯᠵᠦ ᠭᠠᠷᠴᠠᠢ᠃ ᠭᠡᠪᠡᠴᠦ ᠲᠠᠭ ᠴᠢᠭ ᠪᠠᠢᠯᠠ᠃