ᠣᠷᠣᠢ ᠦᠭᠡᠢ ᠰᠦᠮᠡ – ᠠᠷᠪᠠᠨ ᠵᠢᠷᠭᠤᠭᠠ ᠂ ᠭᠠᠩᠯᠢᠩ ᠤᠨ ᠭᠠᠰᠠᠯᠬᠤ ᠳᠠᠭᠤᠨ Оройгүй сүм – Арванзургаа ᠂ Ганлингийн гаслах дуун - Oroigui sum 16
774ᠠᠷᠪᠠᠨ ᠵᠢᠷᠭᠤᠭᠠ ᠂ ᠭᠠᠩᠯᠢᠩ ᠤᠨ ᠭᠠᠰᠠᠯᠬᠤ ᠳᠠᠭᠤᠨ
ᠠᠭᠤᠯᠠᠨ ᠳ᠋ᠤ᠌ ᠲᠥᠷᠥᠭᠰᠡᠨ ᠪᠦᠷᠭᠦᠳ ᠳᠠᠭᠠᠷᠠᠳᠠᠭ ᠦᠭᠡᠢ
ᠤᠰᠤᠨ ᠳ᠋ᠤ᠌ ᠲᠥᠷᠥᠭᠰᠡᠨ ᠵᠢᠭᠠᠰᠤ ᠳᠠᠭᠠᠷᠠᠳᠠᠭ ᠦᠭᠡᠢ
ᠤᠷᠤᠴᠠᠨ ᠳ᠋ᠤ᠌ ᠲᠥᠷᠥᠭᠰᠡᠨ ᠴᠠᠲᠠᠨ ᠳᠠᠭᠠᠷᠠᠳᠠᠭ ᠦᠭᠡᠢ
ᠭᠣᠮᠠᠨ ᠳ᠋ᠠᠴᠠᠩ ᠤ᠋ᠨ ᠭᠠᠩᠯᠢᠩᠴᠢ ᠯᠠᠮᠠ ᠬᠡᠪ ᠭᠡᠨᠡᠳᠲᠡ ᠦᠬᠦᠪᠡ᠃ ᠲᠡᠭᠦᠨ ᠢ᠋ ᠣᠷᠣᠯᠠᠵᠤ ᠭᠠᠩᠯᠢᠩ ᠦᠯᠢᠶᠡᠬᠦ ᠬᠥᠮᠦᠨ ᠣᠯᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠶᠠᠭ ᠲᠡᠷᠡ ᠦᠶᠡ ᠳ᠋ᠦ᠍ ᠫᠠᠪᠤᠩ - ᠬᠠ ᠶ᠋ᠢ ᠲᠣᠭᠣᠷᠢᠵᠤ ᠭᠤᠷᠪᠠᠨ ᠮᠢᠩᠭᠠ ᠭᠤᠷᠪᠠᠨ ᠵᠠᠭᠤᠨ ᠭᠤᠴᠢᠨ ᠭᠤᠷᠪᠠᠨ ᠭᠣᠷᠢᠶᠠ ᠪᠡᠨ ᠳᠠᠭᠤᠰᠬᠠᠭᠠᠳ ᠳᠡᠰ ᠬᠠᠷᠠ ᠴᠢᠷᠠᠢ ᠲᠠᠢ᠂ ᠴᠣᠩᠬᠢᠭᠠᠷ ᠲᠤᠷᠠᠩᠬᠠᠢ ᠴᠡᠭᠡᠵᠢ ᠲᠡᠢ ᠪᠣᠯᠴᠢᠬᠠᠭᠰᠠᠨ ᠰᠠᠩᠵᠢ ᠭᠡᠰᠦᠯ ᠳᠤᠭᠠᠩ ᠳ᠋ᠠᠭᠠᠨ ᠡᠷᠭᠢᠵᠦ ᠢᠷᠡᠵᠡᠢ᠃ ᠳ᠋ᠠᠴᠠᠩ ᠤ᠋ᠨ ᠭᠡᠰᠬᠦᠢ ᠰᠠᠩᠵᠢ ᠭᠡᠰᠦᠯ ᠢ᠋ ᠣᠨᠣᠭᠳᠠᠭᠰᠠᠨ ᠡᠭᠦᠷᠭᠡ ᠪᠡᠨ ᠦᠭᠡ ᠳᠠᠭᠤ ᠦᠭᠡᠢ ᠰᠠᠢᠨ ᠪᠡᠶᠡᠯᠡᠭᠦᠯᠵᠦ ᠭᠣᠷᠢᠶᠠ ᠶ᠋ᠢ ᠪᠦᠷᠢᠨ ᠳᠠᠭᠤᠰᠬᠠᠪᠠ ᠭᠡᠵᠦ ᠰᠠᠢᠰᠢᠶᠠᠭᠠᠳ ᠰᠢᠭᠤᠳ ᠯᠠ
- ᠭᠠᠩᠯᠢᠩᠴᠢ ᠪᠣᠯᠭᠠᠨᠠ! ᠭᠡᠵᠦ ᠠᠢᠯᠠᠳᠴᠠᠢ᠃ ᠭᠠᠩᠯᠢᠩᠴᠢ ᠭᠡᠳᠡᠭ ᠴᠢᠮᠦᠭᠡᠨ ᠪᠦᠷᠢᠶᠡ ᠶ᠋ᠢ ᠦᠯᠢᠶᠡᠳᠡᠭ ᠬᠦᠮᠦᠨ ᠪᠣᠯᠭᠠᠬᠤ ᠭᠡᠵᠦ ᠪᠠᠢᠭᠠ ᠶ᠋ᠢ ᠴᠣ ᠰᠠᠩᠵᠢ ᠲᠡᠷᠡ ᠳᠣᠣᠷᠠ ᠪᠠᠨ ᠣᠢᠯᠠᠭᠠᠯᠠ᠃ ᠭᠠᠩᠯᠢᠩ ᠤᠨ ᠭᠠᠰᠠᠯᠬᠤ ᠮᠡᠲᠦ ᠳᠠᠭᠤᠨ ᠳ᠋ᠤ᠌ ᠰᠠᠩᠵᠢ ᠠᠩᠬᠠᠨ ᠠ᠋ᠴᠠ ᠪᠠᠨ ᠲᠡᠳᠦᠢ ᠯᠡ ᠳᠤᠷᠠᠲᠠᠢ ᠪᠢᠰᠢ᠃ ᠠᠷᠭᠠ ᠦᠭᠡᠢ ᠶᠢᠨ ᠡᠷᠬᠡᠨ ᠳ᠋ᠦ᠍ ᠯᠡ ᠲᠡᠭᠦᠨ ᠢ᠋ ᠪᠤᠷᠬᠠᠨ ᠨᠣᠮ ᠤ᠋ᠨ ᠬᠥᠭᠵᠢᠮ ᠭᠡᠵᠦ ᠲᠡᠪᠴᠢᠳᠡᠭ ᠪᠠᠢᠯᠠ᠃ ᠪᠠᠰᠠ ᠨᠢᠭᠡ ᠡᠪ ᠦᠭᠡᠢ ᠰᠡᠳᠬᠢᠭᠳᠡᠯ ᠲᠥᠷᠥᠭᠰᠡᠨ ᠰᠢᠯᠲᠠᠭᠠᠨ ᠪᠣᠢ᠃ ᠶᠠᠭᠤ ᠭᠡᠪᠡᠯ ᠭᠠᠩᠯᠢᠩ ᠪᠦᠷᠢᠶᠡ ᠶ᠋ᠢ ᠠᠷᠪᠠᠨ ᠨᠠᠢ᠍ᠮᠠᠨ ᠨᠠᠰᠤᠨ ᠤ᠋ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠴᠢᠮᠦᠭᠡᠨ ᠦ᠌ ᠶᠠᠰᠤ ᠪᠠᠷ ᠬᠢᠳᠡᠭ ᠭᠡᠰᠡᠨ ᠳᠣᠮᠣᠭ ᠲᠠᠢ ᠪᠣᠯᠬᠤ ᠶ᠋ᠢ ᠨᠢ ᠪᠠᠭᠰᠢ ᠯᠠᠮᠠ ᠴᠤᠢᠮᠴᠤᠭ ᠠ᠋ᠴᠠ ᠰᠣᠨᠣᠰᠤᠭᠰᠠᠨ ᠪᠢᠯᠡ᠃ ᠭᠠᠩᠯᠢᠩ ᠤ᠋ᠨ ᠳᠠᠭᠤ ᠨᠢ ᠠᠵᠢᠨᠠᠢ ᠰᠠᠢᠨ ᠬᠦᠯᠦᠭ ᠮᠣᠷᠢᠨ ᠤ᠋ ᠢᠨᠴᠠᠭᠠᠬᠤ ᠶ᠋ᠢ ᠰᠠᠨᠠᠭᠳᠠᠭᠤᠯᠬᠤ ᠤᠴᠢᠷᠲᠠᠢ᠃ ᠠᠵᠢᠨᠠᠢ ᠮᠣᠷᠢ ᠶ᠋ᠢ ᠤᠨᠤᠵᠤ ᠠᠷᠢᠭᠤᠨ ᠰᠤᠬᠠᠪᠠᠭᠠᠳ ᠤ᠋ᠨ ᠣᠷᠣᠨ ᠢ᠋ᠶ᠋ᠠᠨ ᠰᠦᠵᠢᠭᠲᠡᠨ ᠬᠦᠷᠦᠯᠴᠡᠨ ᠣᠴᠢᠬᠤ ᠶᠣᠰᠣᠲᠠᠢ᠃ ᠲᠡᠷᠡ ᠯᠠ ᠶᠣᠰᠣ ᠶ᠋ᠢ ᠳᠠᠭᠠᠵᠤ ᠴᠢᠮᠦᠭᠡᠨ ᠪᠦᠷᠢᠶᠡᠨ ᠦ᠌ ᠰᠠᠯᠠᠭᠠᠯᠠᠭᠰᠠᠨ ᠪᠤᠯᠴᠠᠭᠤᠨ ᠳᠡᠭᠡᠷᠡ ᠮᠣᠷᠢᠨ ᠤ᠋ ᠬᠠᠮᠠᠷ ᠤ᠋ᠨ ᠨᠦᠬᠡ ᠶ᠋ᠢ ᠳᠠᠭᠤᠷᠢᠶᠠᠯᠭᠠᠭᠰᠠᠨ ᠬᠣᠶᠠᠷ ᠴᠣᠭᠣᠷᠠᠬᠠᠢ ᠭᠠᠷᠭᠠᠵᠤ᠂ ᠲᠡᠭᠦᠪᠡᠷ ᠨᠢ ᠳᠤᠤᠭᠠᠷᠬᠤ ᠪᠠᠷ ᠪᠣᠳᠣᠵᠤ ᠬᠢᠳᠡᠭ ᠠᠵᠢ᠃ ᠬᠥᠮᠦᠨ ᠦ᠌ ᠴᠢᠮᠦᠭᠡᠨ ᠦ᠌ ᠶᠠᠰᠤ ᠪᠠᠷ ᠬᠢᠭᠰᠡᠨ ᠬᠥᠭᠵᠢᠮ ᠢ᠋ ᠠᠮᠠ ᠪᠠᠷ ᠢ᠋ᠶ᠋ᠠᠨ ᠦᠯᠢᠶᠡᠵᠦ ᠮᠣᠷᠢᠨ ᠢᠨᠴᠠᠭᠠᠬᠤ ᠮᠡᠲᠦ ᠳᠠᠭᠤᠨ ᠭᠠᠷᠭᠠᠬᠤ ᠨᠢ ᠨᠢᠭᠡ ᠯᠠ ᠵᠢᠬᠡᠭᠦᠳᠡᠰᠦ ᠬᠥᠷᠥᠮᠡᠷ ᠶᠦᠮ ᠰᠢᠭ ᠰᠠᠩᠵᠢ ᠭᠡᠰᠦᠯ ᠳ᠋ᠦ᠍ ᠰᠠᠨᠠᠭᠳᠠᠳᠠᠭ ᠪᠠᠢᠵᠠᠢ᠃ ᠭᠡᠪᠡᠴᠦ ᠬᠦᠷᠢᠶᠡ ᠬᠡᠢᠳ ᠪᠣᠯᠭᠠᠨ ᠳ᠋ᠤ᠌ ᠭᠠᠩᠯᠢᠩ ᠤ᠋ᠨ ᠭᠠᠰᠠᠯᠤᠨ ᠢᠨᠴᠠᠭᠠᠬᠤ ᠳᠠᠭᠤ ᠬᠤᠷᠠᠯ ᠨᠣᠮ ᠤ᠋ᠨ ᠦᠢᠯᠡ ᠪᠣᠯᠭᠠᠨ ᠳᠡᠭᠡᠷᠡ ᠰᠣᠨᠣᠰᠤᠭᠳᠠᠭᠰᠠᠭᠠᠷ ᠢᠵᠢᠯ ᠳᠠᠰᠤᠯ ᠪᠣᠯᠵᠠᠢ᠃ ᠬᠠᠷᠢᠨ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠭᠠᠩᠯᠢᠩᠴᠢ ᠪᠣᠯᠤᠨᠠ ᠭᠡᠬᠦ ᠳ᠋ᠦ᠍ ᠰᠠᠩᠵᠢ ᠴᠣᠴᠢᠷᠳᠠᠨ ᠪᠢᠰᠢᠭᠦᠷᠬᠡᠯᠡ᠃
- ᠬᠠᠷᠠᠩᠭᠠᠴᠢ ᠪᠣᠯᠣᠶᠠ ᠯᠠ ᠳᠠ᠂ ᠪᠠᠭᠰᠢ ᠮᠢᠨᠢ ᠭᠡᠵᠦ ᠰᠠᠩᠵᠢ ᠭᠤᠶᠤᠭᠰᠠᠨ ᠳ᠋ᠤ᠌ ᠭᠡᠰᠬᠦᠢ:
- ᠬᠥᠮᠦᠨ ᠨᠢᠭᠡᠨᠲᠡ ᠡᠵᠡᠩᠨᠡᠵᠦ ᠪᠠᠢᠭᠠ ᠶᠠᠭᠤᠮᠠᠨ ᠳ᠋ᠤ᠌ ᠰᠢᠨᠤᠬᠤ ᠨᠢᠭᠦᠯ ᠬᠡᠪ᠃ ᠦᠨᠡᠬᠡᠷ ᠬᠠᠷᠠᠩᠭᠠ ᠴᠤᠬᠢᠬᠤ ᠬᠥᠮᠦᠨ ᠳᠤᠲᠠᠭᠠ ᠦᠭᠡᠢ ᠨᠢ ᠢᠯᠡᠷᠬᠡᠢ ᠪᠠᠢᠯᠠ᠃
- ᠲᠡᠭᠡᠪᠡᠯ ᠳᠤᠳᠠᠷᠠᠮᠴᠢ ᠪᠣᠯᠣᠶᠠ ᠭᠡᠵᠦ ᠰᠠᠩᠵᠢ ᠳᠠᠬᠢᠨ ᠠᠮᠠ ᠨᠡᠭᠡᠭᠡᠬᠦ ᠳ᠋ᠦ᠍ ᠭᠡᠰᠬᠦᠢ ᠠᠭᠤᠷᠯᠠᠵᠤ:
- ᠭᠠᠩᠯᠢᠩ ᠠ᠋ᠴᠠ ᠥᠭᠡᠷᠡ ᠶᠠᠭᠤᠮᠠ ᠪᠢᠲᠡᠭᠡᠢ ᠭᠣᠷᠢᠳᠠ! ᠴᠢᠮᠠᠶ᠋ᠢ ᠭᠠᠩᠯᠢᠩᠴᠢ ᠪᠣᠯᠭᠠᠬᠤ ᠪᠠᠷ ᠬᠡᠳᠦᠢᠨᠢ ᠲᠣᠮᠢᠯᠠᠭᠰᠠᠨ᠃ ᠦᠭᠡ ᠳᠠᠭᠤ ᠦᠭᠡᠢ ᠶᠠᠪᠤᠵᠤ ᠵᠡᠯᠰᠡᠩ ᠵᠢᠨᠵᠦᠭ ᠲᠦ ᠱᠠᠪᠢ ᠣᠷᠣ! ᠭᠡᠵᠦ ᠲᠤᠰᠢᠶᠠᠵᠠᠢ᠃ ᠥᠭᠡᠷᠡ ᠵᠠᠮ ᠦᠭᠡᠢ ᠪᠣᠯᠤᠭᠰᠠᠨ ᠨᠢ ᠲᠣᠳᠣᠷᠬᠠᠢ᠃
ᠰᠠᠩᠵᠢ ᠭᠠᠷᠬᠤ ᠵᠠᠮ ᠦᠭᠡᠢ ᠳ᠋ᠦ᠍ ᠰᠡᠳᠬᠢᠯ ᠢ᠋ᠶ᠋ᠡᠷ ᠪᠠᠭᠠᠬᠠᠨ ᠭᠤᠳᠤᠷᠠᠭᠰᠠᠨ ᠪᠣᠯᠪᠠᠴᠤ ᠭᠠᠩᠯᠢᠩᠴᠢ ᠪᠣᠯᠬᠤ ᠳᠠᠯᠢᠮ ᠢ᠋ᠶ᠋ᠠᠷ ᠪᠤᠷᠬᠠᠨ ᠤ᠋ ᠬᠥᠭᠵᠢᠮ ᠦ᠋ᠨ ᠵᠢᠮᠰᠡᠭ ᠡᠵᠡᠮᠰᠢᠵᠦ᠂ ᠴᠢᠬᠢ ᠪᠡᠨ ᠣᠩᠭᠣᠢᠯᠭᠠᠵᠤ ᠶᠠᠪᠤᠬᠤ ᠶᠢᠨ ᠭᠣᠷᠢᠳᠠᠯᠭᠠ ᠳ᠋ᠤ᠌ ᠠᠪᠲᠠᠭᠳᠠᠯᠠ᠃ ᠰᠦᠮᠡ ᠶ᠋ᠢᠨ ᠣᠩᠵᠠᠳ ᠤ᠋ᠨ ᠲᠤᠰᠯᠠᠬᠤ ᠶ᠋ᠢ ᠵᠢᠨᠵᠦᠭ (ᠵᠢᠩᠵᠠᠢ) ᠭᠡᠳᠡᠭ ᠪᠥᠭᠡᠳ ᠬᠤᠷᠠᠯ ᠨᠣᠮ ᠤ᠋ᠨ ᠬᠥᠭᠵᠢᠮ ᠢ᠋ ᠲᠡᠷᠡ ᠡᠷᠬᠢᠯᠡᠨ ᠭᠦᠢᠴᠡᠳᠬᠡᠳᠡᠭ ᠶᠤᠮ ᠰᠠᠨᠵᠡᠢ᠃ ᠭᠣᠮᠠᠨ ᠳ᠋ᠠᠴᠠᠩ ᠤ᠋ᠨ ᠵᠢᠨᠵᠦᠭ ᠨᠢ ᠵᠡᠯᠰᠡᠩ ᠭᠡᠳᠡᠭ ᠳᠡᠯᠳᠡᠬᠡᠷ ᠬᠥᠬᠡ ᠲᠦᠪᠡᠳ ᠪᠠᠢᠳᠠᠭ᠃ ᠲᠡᠷᠡ ᠬᠥᠭᠵᠢᠮ ᠦ᠋ᠨ ᠠᠪᠢᠶᠠᠰ ᠲᠠᠢ ᠪᠠᠰᠠ ᠡᠶᠡᠯᠳᠡᠭ ᠬᠥᠮᠦᠨ ᠲᠤᠯᠠ ᠰᠠᠩᠵᠢ ᠲᠡᠭᠦᠨ ᠡᠴᠡ ᠶᠠᠭᠤᠮᠠ ᠵᠢᠭᠠᠯᠭᠠᠵᠤ ᠠᠪᠬᠤ ᠭᠣᠷᠢᠳᠠᠯᠭᠠ ᠲᠠᠢ ᠪᠠᠢᠯᠠ᠃
- ᠳᠦᠷ ᠯᠡ ᠭᠠᠩᠯᠢᠩᠴᠢ ᠪᠣᠯᠤᠨᠠ ᠰᠢᠦ! ᠭᠡᠵᠦ ᠰᠠᠩᠵᠢ ᠭᠡᠰᠬᠦᠢ ᠳ᠋ᠦ᠍ ᠭᠤᠶᠤᠵᠠᠢ᠃ ᠭᠡᠰᠬᠦᠢ ᠲᠡᠭᠦᠨ ᠳᠦ ᠬᠠᠷᠢᠭᠤ ᠬᠡᠯᠡᠭᠡ ᠦᠭᠡᠢ ᠪᠣᠯᠪᠠᠴᠤ ᠴᠢᠷᠠᠢ ᠶᠢᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠵᠥᠪᠱᠢᠶᠡᠷᠡᠭᠰᠡᠨ ᠢ᠋ ᠰᠠᠩᠵᠢ ᠭᠠᠳᠠᠷᠯᠠᠵᠠᠢ᠃ ᠭᠠᠩᠯᠢᠩ ᠰᠤᠷᠤᠭᠠᠳ ᠯᠠ ᠰᠠᠯᠠᠬᠤ ᠶ᠋ᠢ ᠰᠠᠩᠵᠢ ᠬᠦᠰᠡᠵᠡᠢ᠃
- ᠡᠭᠦᠨ ᠢ᠋ ᠭᠠᠩᠯᠢᠩ ᠦᠯᠢᠶᠡᠵᠦ ᠰᠤᠷᠲᠠᠯᠠ ᠨᠢ ᠬᠤᠷᠠᠯ ᠤ᠋ᠨ ᠦᠶᠡ ᠪᠡᠷ ᠪᠢ ᠯᠡ ᠳᠦᠷ ᠭᠠᠩᠯᠢᠩᠴᠢ ᠬᠢᠵᠦ ᠪᠠᠢᠬᠤ ᠠ᠋ᠴᠠ ᠶᠠᠭᠠᠬᠢᠬᠤ ᠪᠤᠢ ! ᠭᠡᠵᠦ ᠵᠡᠯᠰᠡᠩ ᠵᠢᠨᠵᠦᠭ ᠠᠮᠠ ᠥᠭᠴᠡᠢ᠃ ᠭᠡᠰᠬᠦᠢ ᠯᠠᠮᠠ:
- ᠲᠦᠷᠭᠡᠨ ᠯᠡ ᠰᠤᠷᠭᠠᠪᠠᠯ ᠲᠦᠷᠭᠡᠨ ᠯᠡ ᠰᠠᠯᠤᠨᠠ ᠭᠡᠵᠦ ᠵᠢᠨᠵᠦᠭ ᠲᠦ ᠣᠢᠯᠠᠭᠠᠭᠤᠯᠵᠠᠢ᠃ ᠵᠡᠯᠰᠡᠩ ᠵᠢᠨᠵᠦᠭ ᠰᠠᠩᠵᠢ ᠭᠡᠰᠦᠯ ᠳ᠋ᠦ᠍ ᠵᠥᠪᠬᠡᠨ ᠯᠡ ᠭᠠᠩᠯᠢᠩ ᠦᠯᠢᠶᠡᠵᠦ ᠰᠤᠷᠭᠠᠬᠤ ᠶ᠋ᠢ ᠵᠠᠪᠳᠤᠪᠠ᠃ ᠲᠡᠭᠦᠨ ᠳ᠋ᠦ᠍ ᠰᠠᠩᠵᠢ ᠳᠤᠷᠠ ᠦᠭᠡᠢᠴᠡᠵᠦ:
- ᠨᠢᠭᠡᠨᠲᠡ ᠯᠡ ᠨᠠᠮᠠᠶ᠋ᠢ ᠬᠥᠭᠵᠢᠮ ᠦ᠋ᠨ ᠯᠠᠮᠠ ᠪᠠᠷ ᠠᠪᠤᠭᠰᠠᠨ ᠪᠣᠯ ᠪᠢ ᠬᠤᠷᠠᠯ ᠨᠣᠮ ᠤᠨ ᠬᠥᠭᠵᠢᠮ ᠦ᠋ᠨ ᠲᠠᠯᠠ ᠪᠠᠷ ᠰᠠᠢᠨ ᠮᠡᠳᠡᠵᠦ ᠠᠪᠤᠮᠠᠷ ᠪᠠᠢᠨᠠ ᠭᠡᠪᠡ᠃
- ᠵᠠ ᠶᠠᠭᠠᠬᠢᠬᠤᠪ᠂ ᠵᠠᠯᠬᠠᠭᠤᠷᠠᠬᠤ ᠦᠭᠡᠢ ᠪᠣᠯ ᠵᠢᠭᠠᠯᠭᠠᠨᠠ ᠯᠠ ᠪᠢᠵᠡ᠃ ᠮᠠᠷᠭᠠᠰᠢ ᠠ᠋ᠴᠠ ᠡᠬᠢᠯᠡᠨᠡ ᠭᠡᠵᠦ ᠵᠡᠯᠰᠡᠩ ᠵᠢᠨᠵᠦᠭ ᠪᠣᠯᠵᠣᠯᠠ᠃
ᠮᠠᠷᠭᠠᠰᠢ ᠨᠢ ᠵᠡᠯᠰᠡᠩ ᠵᠢᠨᠵᠦᠭ ᠬᠠᠮᠤᠭ ᠪᠠᠢᠳᠠᠭ ᠡᠷᠳᠡᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠠᠩᠵᠢ ᠭᠡᠰᠦᠯ ᠳᠦ ᠭᠠᠢᠬᠠᠭᠤᠯᠬᠤ ᠪᠠᠷ ᠰᠢᠢᠳᠴᠡᠢ᠃ ᠢᠪᠴᠤᠤᠬᠠᠨ ᠰᠢᠪᠡᠷ ᠲᠠᠰᠤᠯᠭᠠᠨ ᠳ᠋ᠤ᠌ ᠬᠤᠷᠠᠯ ᠨᠣᠮ ᠤᠨ ᠪᠦᠬᠦᠢᠯᠡ ᠬᠥᠭᠵᠢᠮ ᠦ᠋ᠨ ᠵᠢᠮᠰᠡᠭ ᠢ᠋ ᠥᠷᠥᠴᠢᠬᠡᠭᠰᠡᠨ ᠪᠠᠢᠯᠠ᠃ ᠭᠡᠬᠦ ᠳ᠋ᠡᠭᠡᠨ ᠳᠥᠷᠪᠡᠨ ᠬᠠᠨᠠᠨ ᠤ ᠢᠷᠤᠭᠠᠷ ᠲᠤ᠌ ᠳᠥᠷᠪᠡᠨ ᠬᠡᠰᠡᠭ ᠪᠣᠯᠭᠠᠨ ᠬᠥᠭᠵᠢᠮ ᠢ᠋ᠶ᠋ᠡᠨ ᠥᠷᠥᠵᠡᠢ᠃
- ᠪᠤᠷᠬᠠᠨ ᠤ᠋ ᠬᠥᠭᠵᠢᠮ ᠳᠥᠷᠪᠡᠨ ᠶᠠᠩᠵᠤ ᠪᠢᠯᠡ ᠭᠡᠵᠦ ᠵᠡᠯᠰᠡᠩ ᠵᠢᠨᠵᠦᠭ ᠶᠠᠷᠢᠶᠠ ᠪᠠᠨ ᠡᠬᠢᠯᠡᠪᠡ᠃ ᠰᠣᠨᠢᠭᠤᠴᠢ ᠰᠡᠳᠬᠢᠯ ᠳ᠋ᠡᠭᠡᠨ ᠰᠠᠩᠵᠢ ᠬᠥᠲᠥᠯᠦᠭᠳᠡᠯᠡ᠃
- ᠬᠥᠳᠡᠯᠭᠡᠬᠦ ᠪᠤᠶᠤ ᠴᠣᠬᠢᠪᠤᠷᠢ ᠬᠥᠭᠵᠢᠮ ᠦ᠋ᠨ ᠲᠥᠷᠥᠯ ᠵᠦᠢᠯ ᠡᠨᠡ! ᠭᠡᠵᠦ ᠪᠠᠷᠠᠭᠤᠨ ᠬᠠᠨᠠᠨ ᠤ᠋ ᠢᠷᠣᠭᠠᠷ ᠲᠤ᠌ ᠥᠷᠥᠭᠰᠡᠨ ᠵᠦᠢᠯ ᠢ᠋ ᠵᠢᠨᠵᠦᠭ ᠬᠤᠷᠤᠭᠤ ᠪᠠᠷ ᠵᠠᠩᠭᠠᠯᠠ᠃
- ᠬᠣᠩᠬᠣ᠂ ᠲᠠᠮᠠᠷᠦ ᠬᠣᠶᠠᠷ ᠢ᠋ ᠲᠡᠨᠳᠡ ᠲᠠᠯᠪᠢᠵᠠᠢ᠃ ᠬᠣᠩᠬᠣᠨ ᠤ᠋ ᠪᠠᠷᠢᠭᠤᠯ ᠢ᠋ ᠸᠠᠴᠢᠷ ᠬᠡᠯᠪᠡᠷᠢᠲᠡᠢ ᠬᠢᠵᠦ᠂ ᠣᠮ ᠬᠣᠮ ᠳ᠋ᠷᠠᠮ ᠬᠢᠷᠢ ᠪᠤᠶᠤ ᠠᠮᠤᠷᠯᠠᠩᠭᠤᠢ᠂ ᠳᠡᠯᠭᠡᠷᠡᠩᠭᠦᠢ᠂ ᠡᠷᠬᠡ᠂ ᠳᠣᠭᠰᠢᠨ ᠭᠡᠰᠡᠨ ᠤᠳᠬᠠ ᠲᠠᠢ ᠦᠰᠦᠭ ᠢ᠋ ᠳᠣᠲᠣᠷᠠ ᠲᠠᠯᠠ ᠳ᠋ᠤ᠌ ᠨᠢ ᠡᠷᠭᠢᠨ ᠲᠣᠭᠣᠷᠢᠨ ᠪᠢᠴᠢᠭᠰᠡᠨ ᠪᠠᠢᠳᠠᠭ᠃ ᠵᠡᠭᠦᠨ ᠭᠠᠷ ᠲᠤ᠌ ᠬᠣᠩᠬᠣ ᠶ᠋ᠢ ᠪᠠᠷᠢᠨᠠ᠃ ᠪᠠᠷᠠᠭᠤᠨ ᠭᠠᠷ ᠲᠤ᠌ ᠸᠠᠴᠢᠷ ᠪᠠᠷᠢᠵᠤ ᠬᠣᠩᠬᠣ ᠶ᠋ᠢ ᠴᠣᠬᠢᠨᠠ᠃ ᠬᠣᠩᠬᠣ᠂ ᠲᠠᠮᠠᠷᠦ ᠶ᠋ᠢᠨ ᠳᠠᠭᠤ ᠪᠣᠯ ᠪᠤᠷᠬᠠᠨ ᠤ᠋ ᠱᠠᠪᠢ ᠨᠠᠷ ᠲᠤ᠌ ᠰᠠᠭᠠᠳ ᠲᠦᠢᠳᠬᠡᠷ ᠬᠢᠬᠦ ᠭᠡᠵᠦ ᠦᠷᠭᠦᠯᠵᠢ ᠪᠣᠳᠣᠵᠤ ᠪᠠᠢᠳᠠᠭ ᠪᠤᠭ ᠴᠢᠳᠬᠥᠷ ᠢ᠋ ᠦᠯᠳᠡᠨ ᠬᠥᠭᠡᠭᠡᠳᠡᠭ ᠶᠦᠮ ᠭᠡᠵᠦ ᠢᠷᠡᠭᠡᠳ ᠯᠡ ᠵᠡᠯᠰᠡᠩ ᠵᠢᠨᠵᠦᠭ ᠠᠢᠬᠤᠪᠲᠤᠷ ᠨᠤᠷᠱᠤᠨ ᠶᠠᠷᠢᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠰᠠᠩᠵᠢ ᠵᠠᠯᠬᠠᠭᠤ ᠨᠢ ᠬᠦᠷᠴᠡᠢ᠃ ᠲᠡᠭᠦᠨ ᠦ ᠮᠡᠳᠡᠳᠡᠭ ᠶᠠᠭᠤᠮᠠ ᠶ᠋ᠢ ᠨᠤᠷᠱᠤᠬᠤ ᠳ᠋ᠤ᠌ ᠡᠪᠰᠢᠶᠡᠮᠡᠷ ᠪᠣᠯᠳᠠᠭ ᠪᠠᠢᠯᠠ᠃ ᠲᠡᠷᠡ ᠪᠠᠢᠳᠠᠯ ᠢ ᠭᠠᠳᠠᠷᠯᠠᠭᠰᠠᠨ ᠵᠡᠯᠰᠡᠩ ᠵᠡᠭᠦᠨ ᠬᠠᠶᠠᠭᠠ ᠤᠷᠤᠭᠤ ᠣᠴᠢᠵᠤ:
- ᠡᠨᠳᠡ ᠳᠡᠯᠡᠳᠬᠦ ᠲᠥᠷᠥᠯ ᠦ᠋ᠨ ᠳᠡᠯᠡᠳᠪᠦᠷᠢ ᠬᠥᠭᠵᠢᠮ ᠪᠠᠢᠨᠠ ᠭᠡᠳ ᠬᠡᠩᠭᠡᠷᠭᠡ ᠳᠣᠬᠢᠭᠤᠷ ᠲᠠᠢ᠂ ᠫᠣᠣᠯᠢᠶᠣᠰᠣᠨ ᠴᠠᠩ ᠬᠣᠣᠰ ᠢ᠋ᠶ᠋ᠠᠷ ᠢ᠋ᠶ᠋ᠠᠨ᠂ ᠮᠥᠨ ᠴᠠᠷᠠᠭᠠᠨ ᠳᠣᠲᠣᠷᠠ ᠪᠠᠨ ᠬᠣᠣᠰ ᠸᠠᠴᠢᠷ ᠤ᠋ᠨ ᠵᠢᠷᠤᠭ ᠲᠠᠢ ᠰᠸᠯᠨᠢᠩ ᠂ ᠵᠡᠰ ᠬᠠᠷᠠᠩᠭᠠ᠂ ᠮᠥᠩᠭᠥᠯᠡᠭᠰᠡᠨ ᠳᠢᠩᠱᠠᠭ᠂ ᠭᠣᠶᠣᠮᠰᠣᠭ ᠡᠰᠢᠲᠡᠢ ᠳᠤᠳᠠᠷᠮᠠ ᠡᠢᠮᠦ ᠲᠠᠪᠤᠨ ᠲᠥᠷᠥᠯ ᠦ᠋ᠨ ᠬᠥᠭᠵᠢᠮ ᠦ᠋ᠨ ᠵᠢᠮᠰᠡᠭ ᠢ᠋ ᠵᠢᠨᠵᠦᠭ ᠵᠡᠯᠰᠡᠩ ᠵᠢᠭᠠᠯᠠ᠃ ᠭᠡᠬᠦ ᠳᠡᠬᠡᠨ ᠳᠤᠤᠭᠠᠷᠭᠠᠬᠤ ᠠᠷᠭᠠ ᠶ᠋ᠢ ᠳᠠᠷᠠᠭᠠ ᠵᠢᠭᠠᠨᠠ ᠭᠡᠨᠡ᠃
ᠬᠡᠩᠭᠡᠷᠭᠡ ᠶ᠋ᠢ ᠰᠠᠩᠵᠢ ᠰᠠᠢᠨ ᠴᠣᠬᠢᠳᠠᠭ ᠪᠠᠢᠯᠠ᠃ ᠪᠦᠷ ᠪᠠᠭᠠ ᠳ᠋ᠠᠭᠠᠨ ᠲᠡᠭᠦᠨ ᠢ᠋ ᠰᠤᠷᠴᠠᠢ᠃ ᠬᠠᠷᠢᠨ ᠡᠨᠳᠡᠬᠢ ᠶ᠋ᠢᠨ ᠬᠡᠩᠭᠡᠷᠭᠡᠨ ᠦ᠌ ᠳᠣᠬᠢᠭᠤᠷ ᠤ᠋ᠳ ᠭᠣᠣᠯᠳᠠᠭᠤ ᠮᠠᠲᠠᠷ ᠤ᠋ᠨ ᠲᠣᠯᠣᠭᠠᠢ ᠶᠢ ᠳᠦᠷᠰᠦᠯᠡᠨ ᠬᠢᠭᠰᠡᠨ ᠬᠠᠴᠢᠨ ᠬᠡᠯᠪᠡᠷᠢ ᠲᠡᠢ ᠨᠢ ᠰᠣᠨᠢᠨ ᠠᠵᠢ᠃ ᠴᠠᠩ ᠢ᠋ ᠴᠣ ᠰᠠᠩᠵᠢ ᠪᠠᠰᠠ ᠲᠡᠳᠦᠢ ᠯᠡ ᠰᠣᠨᠢᠷᠬᠠᠭᠰᠠᠨ ᠦᠭᠡᠢ᠃ ᠰᠢᠷᠡᠮᠦ᠂ ᠵᠡᠰ᠂ ᠮᠥᠩᠭᠥ ᠭᠤᠷᠪᠠ ᠶ᠋ᠢ ᠬᠣᠯᠢᠵᠤ ᠴᠢᠳᠬᠤᠭᠰᠠᠨ ᠲᠤᠯᠠ ᠶᠡᠬᠡ ᠴᠠᠷᠭᠢᠶᠠ ᠳᠠᠭᠤ ᠲᠠᠢ᠂ ᠳᠡᠯᠪᠡᠭᠡ ᠨᠢ ᠲᠣᠮᠣ ᠲᠣᠰᠤᠮ ᠢ᠋ᠶ᠋ᠠᠨ ᠤᠯᠠᠮ ᠶᠡᠬᠡ ᠨᠦᠷᠭᠢᠶᠡᠨ ᠲᠡᠢ ᠪᠣᠯᠳᠠᠭ ᠭᠡᠵᠦ ᠴᠠᠩ ᠤ᠋ᠨ ᠲᠤᠬᠠᠢ ᠪᠠᠭᠰᠢ ᠯᠠᠮᠠ ᠡᠷᠲᠡ ᠳᠡᠭᠡᠷᠡ ᠦᠶᠡ ᠳ᠋ᠦ᠍ ᠬᠡᠯᠡᠭᠰᠡᠨ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠪᠠ᠃ ᠲᠡᠷᠡᠴᠢᠯᠡᠨ ᠢ᠋ᠶ᠋ᠡᠷ ᠰᠸᠯᠨᠢᠩ᠂ ᠬᠠᠷᠠᠩᠭᠠ᠂ ᠳᠢᠩᠱᠠᠭ ᠪᠣᠯ ᠴᠣᠬᠢᠨ ᠳᠡᠯᠡᠳᠬᠦ ᠳ᠋ᠦ᠍ ᠥᠪᠡᠷ ᠥᠪᠡᠷ ᠦ᠋ᠨ ᠥᠪᠡᠷᠮᠢᠴᠡ ᠳᠠᠭᠤ ᠭᠠᠷᠭᠠᠳᠠᠭ ᠪᠣᠯᠪᠠᠴᠤ ᠦᠨᠳᠦᠰᠦᠨ ᠴᠢᠨᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠳᠠᠯᠢ ᠲᠥᠷᠥᠯ ᠦ᠋ᠨ ᠬᠥᠭᠵᠢᠮ ᠦ᠋ᠳ ᠶᠦᠮ᠃ ᠳᠡᠯᠡᠳᠬᠦ ᠬᠥᠭᠵᠢᠮ ᠦ᠋ᠨ ᠬᠠᠮᠤᠭ ᠤ᠋ᠨ ᠰᠣᠨᠢᠷᠬᠠᠯᠲᠠᠢ ᠨᠢ ᠳᠤᠳᠠᠷᠮᠠ ᠶᠤᠮ᠃ ᠳᠤᠳᠠᠷᠮᠠ ᠶ᠋ᠢ ᠰᠠᠩᠵᠢ ᠳᠤᠤᠭᠠᠷᠭᠠᠵᠤ ᠰᠤᠷᠤᠭᠠ ᠦᠭᠡᠢ ᠪᠢᠯᠡ᠃ ᠬᠠᠷᠢᠨ ᠳᠠᠭᠤ ᠨᠢ ᠶᠡᠬᠡ ᠲᠠᠭᠠᠯᠠᠭᠳᠠᠬᠤ ᠤᠴᠢᠷ ᠲᠣᠭᠯᠠᠵᠤ ᠰᠤᠷᠬᠤ ᠰᠠᠨ ᠭᠡᠵᠦ ᠪᠣᠳᠣᠳᠠᠭ ᠪᠠᠢᠭ᠍ᠰᠠᠨ ᠶᠤᠮ᠃ ᠳᠥᠷᠪᠡᠯᠵᠢᠨ ᠮᠣᠳᠣᠨ ᠬᠦᠷᠢᠶᠡᠨ ᠳᠣᠲᠣᠷᠠ ᠶᠢᠰᠦ ᠶᠦᠮ ᠤᠤ ᠠᠷᠪᠠᠨ ᠬᠣᠶᠠᠷ ᠵᠢᠵᠢᠭᠬᠡᠨ ᠨᠢᠳᠦ ᠭᠠᠷᠭᠠᠵᠤ ᠨᠢᠳᠦ ᠪᠦᠷᠢ ᠳ᠋ᠦ᠍ ᠨᠢ ᠵᠡᠰ ᠲᠠᠪᠠᠭ ᠪᠡᠬᠢᠯᠡᠭᠡᠳ ᠥᠨᠳᠥᠷ ᠡᠰᠢᠨ ᠳᠡᠭᠡᠷᠡ ᠪᠠᠢᠷᠢᠯᠠᠭᠤᠯᠤᠭᠰᠠᠨ ᠲᠡᠢᠮᠦ ᠯᠡ ᠵᠢᠷ ᠦ᠋ᠨ ᠬᠥᠭᠵᠢᠮ ᠪᠣᠯᠪᠠᠴᠤ ᠳᠤᠳᠠᠷᠮᠠ ᠠᠶᠠᠯᠭᠤ ᠰᠠᠢᠬᠠᠨ ᠲᠠᠢ᠂ ᠠᠭᠤᠯᠠ ᠶ᠋ᠢᠨ ᠲᠤᠩᠭᠠᠯᠠᠭ ᠭᠣᠷᠣᠬᠠᠨ ᠤ᠋ ᠴᠢᠮᠡᠭᠡ ᠶᠢ ᠰᠠᠨᠠᠭᠳᠠᠭᠤᠯᠳᠠᠭ ᠳᠠᠭᠤ ᠲᠠᠢ ᠶᠤᠮ᠃ ᠳᠤᠳᠠᠷᠮᠠ ᠳ᠋ᠤ᠌ ᠨᠢᠳᠦ ᠪᠠᠨ ᠪᠡᠯᠴᠢᠭᠡᠷᠯᠡᠭᠦᠯᠵᠦ ᠵᠣᠭᠰᠣᠬᠤ ᠶ᠋ᠢ ᠨᠢ ᠠᠵᠢᠭᠯᠠᠨ ᠮᠡᠳᠡᠭᠡᠳ ᠵᠡᠯᠰᠡᠩ ᠵᠢᠨᠵᠦᠭ ᠳᠣᠬᠢᠭᠤᠷ ᠠᠪᠴᠤ ᠳᠤᠳᠠᠷᠮᠠ ᠶ᠋ᠢ ᠵᠢᠩᠭᠢᠨᠡᠭᠦᠯᠦᠨ ᠳᠤᠤᠭᠠᠷᠭᠠᠪᠠ᠃
- ᠭᠣᠶᠣ ᠪᠠᠢᠭᠠ ᠪᠢᠵᠡ? ᠭᠡᠪᠡᠴᠦ ᠪᠢ ᠴᠢᠮᠠ ᠳ᠋ᠤ᠌ ᠡᠭᠦᠨ ᠢ᠋ ᠵᠢᠭᠠᠬᠤ ᠭᠡᠵᠦ ᠪᠣᠳᠣᠬᠤ ᠦᠭᠡᠢ ᠪᠠᠢᠨᠠ᠃ ᠭᠠᠩᠯᠢᠩ ᠯᠠ ᠦᠯᠢᠶᠡᠵᠦ ᠰᠤᠷᠪᠠᠯ ᠪᠣᠯᠤᠭᠠ! ᠭᠡᠵᠦ ᠵᠡᠯᠰᠡᠩ ᠬᠡᠯᠡᠪᠡ᠃
- ᠭᠠᠩᠯᠢᠩ ᠢ᠋ ᠤᠷᠢᠳᠠᠪᠠᠷ ᠰᠠᠢᠨ ᠰᠤᠷᠴᠢᠬᠠᠪᠠᠯ ᠳᠠᠷᠠᠭᠠ ᠨᠢ ᠪᠤᠰᠤᠳ ᠢ᠋ ᠨᠠᠳᠠ ᠳ᠋ᠤ᠌ ᠵᠢᠭᠠᠵᠤ ᠥᠭᠭᠦᠭᠡᠷᠡᠢ ᠭᠡᠵᠦ ᠰᠠᠩᠵᠢ ᠭᠤᠶᠤᠯᠠ᠃
- ᠵᠠ ᠶᠠᠭᠠᠬᠢᠬᠤᠪ᠂ ᠬᠠᠷᠠᠵᠤ ᠪᠠᠢᠵᠤ ᠯᠠ ᠪᠣᠯᠤᠨᠠ ᠭᠡᠵᠦ ᠵᠡᠯᠰᠡᠩ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠥᠭᠡᠷᠡ ᠨᠢᠭᠡ ᠬᠠᠨᠠ ᠤᠷᠤᠭᠤ ᠣᠴᠢᠵᠤ:
- ᠡᠨᠳᠡ ᠦᠯᠢᠶᠡᠪᠦᠷᠢ ᠬᠥᠭᠵᠢᠮ ᠦ᠋ᠳ ᠪᠠᠢᠨᠠ᠃ ᠵᠠ ᠮᠠᠭᠤ ᠲᠣᠩᠭᠠᠷ ᠢ᠋ ᠴᠣ ᠴᠢ ᠶᠠᠭᠤ ᠡᠰᠡ ᠠᠨᠳᠤᠪᠠ ᠭᠡᠵᠦ᠃ ᠬᠠᠷᠢᠨ ᠪᠢᠰᠬᠢᠭᠦᠷ ᠪᠣᠯ ᠳᠤᠳᠠᠷᠮᠠ ᠠ᠋ᠴᠠ ᠢᠯᠡᠭᠦᠦ ᠰᠠᠢᠬᠠᠨ ᠳᠠᠭᠤ ᠲᠠᠢ᠃ ᠪᠢ ᠪᠣᠯ ᠪᠢᠰᠬᠢᠭᠦᠷ ᠲᠦ᠍ ᠳᠤᠷᠠᠲᠠᠢ᠃ ᠵᠤᠤ ᠠᠳᠢᠱᠠ ᠡᠨᠡᠳᠬᠡᠭ ᠭᠠᠵᠠᠷ ᠠ᠋ᠴᠠ ᠲᠥᠪᠡᠳ ᠲᠦ᠍ ᠢᠷᠡᠭᠡᠳ ᠱᠠᠰᠢᠨ ᠤ ᠠᠷᠢᠭᠤᠨ ᠰᠢᠲᠦᠭᠡᠨ ᠦ᠌ ᠵᠦᠢᠯᠡᠰ ᠶᠡᠬᠡ ᠯᠡ ᠳᠤᠲᠠᠭᠤ ᠶ᠋ᠢ ᠮᠡᠳᠡᠵᠦ ᠵᠠᠷᠢᠮ ᠢ᠋ ᠨᠥᠬᠥᠵᠦ ᠬᠢᠬᠦ ᠶᠢ ᠰᠠᠨᠠᠭᠠᠴᠢᠯᠠᠭᠰᠠᠨ ᠶᠤᠮ ᠭᠡᠳᠡᠭ᠃ ᠭᠠᠯᠢᠨᠳᠠᠭᠠ ᠱᠣᠶᠣᠣ ᠭᠡᠵᠦ ᠭᠣᠶᠣᠬᠠᠨ ᠵᠢᠷᠭᠢᠳᠡᠭ ᠠᠮᠢᠲᠠᠨ ᠪᠤᠷᠬᠠᠨ ᠤ᠋ ᠣᠷᠣᠨ ᠡᠨᠡᠳᠬᠡᠭ ᠲᠦ᠍ ᠪᠠᠢᠳᠠᠭ ᠪᠣᠯ ᠮᠠᠨ ᠤ᠋ ᠲᠥᠪᠡᠳ ᠲᠦ᠍ ᠦᠭᠡᠢ ᠶᠦᠮ᠃ ᠲᠡᠭᠡᠭᠡᠳ ᠵᠣᠣ ᠠᠳᠢᠱᠠ ᠭᠠᠯᠢᠨᠳᠠᠭᠠ ᠰᠢᠪᠠᠭᠤᠨ ᠤ᠋ ᠳᠠᠭᠤ ᠶ᠋ᠢ ᠳᠠᠭᠤᠷᠢᠶᠠᠯᠭᠠᠵᠤ ᠪᠢᠰᠬᠢᠭᠦᠷ ᠵᠣᠬᠢᠶᠠᠭᠰᠠᠨ ᠭᠡᠳᠡᠭ ᠶᠤᠮ ᠳᠠ᠃ ᠲᠡᠷᠡ ᠪᠠᠰᠠ ᠭᠠᠯᠪᠠᠸᠠᠷᠠᠰ ᠽᠠᠨᠳᠠᠨ ᠮᠣᠳᠣ ᠪᠠᠨ ᠦᠭᠡᠢᠯᠡᠵᠦ ᠣᠷᠣᠨ ᠳ᠋ᠤ᠌ ᠨᠢ ᠤᠯᠠᠭᠠᠨ ᠬᠥᠵᠢ ᠬᠢᠵᠦ ᠪᠢᠰᠬᠢᠭᠦᠷ ᠦᠯᠢᠶᠡᠬᠦ ᠪᠦᠷᠢ ᠳ᠋ᠦ᠍ ᠤᠯᠠᠭᠠᠨ ᠬᠦᠵᠢ ᠠᠰᠠᠭᠠᠯᠭᠠᠳᠠᠭ ᠵᠢᠷᠤᠮ ᠲᠣᠭᠲᠠᠭᠠᠭᠰᠠᠨ ᠭᠡᠳᠡᠭ ᠶᠦᠮ᠃ ᠴᠢ ᠡᠭᠦᠨ ᠢ᠋ ᠦᠯᠢᠶᠡᠵᠦ ᠰᠤᠷᠪᠠᠯ ᠳᠡᠭᠡᠷᠡ ᠭᠡᠬᠦ ᠳ᠋ᠦ᠍ ᠨᠢ ᠰᠠᠩᠵᠢ ᠭᠡᠰᠦᠯ ᠲᠣᠯᠣᠭᠠᠢ ᠳᠣᠬᠢᠵᠤ 《 ᠯᠠᠭᠰᠤᠤ 》 ᠭᠡᠵᠦ ᠲᠥᠪᠡᠳ ᠮᠠᠢᠭ ᠢ᠋ᠶ᠋ᠠᠷ ᠪᠥᠬᠥᠯᠵᠡᠨ ᠰᠢᠪᠡᠨᠡᠯᠡ᠃ ᠲᠡᠨᠳᠡ ᠪᠠᠰᠠ ᠠᠷᠠᠰᠤ ᠪᠠᠷ ᠪᠦᠷᠢᠭᠰᠡᠨ ᠴᠢᠮᠦᠭᠡᠨ ᠪᠦᠷᠢᠶᠡ ᠪᠤᠶᠤ ᠭᠠᠩᠯᠢᠩ ᠵᠡᠰ ᠢ᠋ᠶ᠋ᠡᠷ ᠬᠢᠭᠰᠡᠨ ᠦᠬᠡᠷ ᠪᠦᠷᠢᠶᠡ᠂ ᠮᠢᠭᠠᠨ᠂ ᠯᠢᠩᠪᠦ᠂ ᠲᠤᠩᠷᠠᠭᠠ᠂ ᠵᠦᠷ᠂ ᠱᠦᠭᠯᠦ ᠲᠡᠷᠢᠭᠦᠲᠡᠨ ᠥᠷᠦᠭᠡᠰᠦᠲᠡᠢ ᠪᠠᠢᠯᠠ᠃ ᠪᠦᠷᠢᠶᠡ ᠪᠡᠷ ᠣᠭᠲᠠᠷᠭᠤᠢ ᠶ᠋ᠢᠨ ᠵᠠᠭᠠᠨ ᠤ᠋ ᠬᠦᠷᠬᠢᠷᠡᠬᠦ ᠳᠠᠭᠤ ᠶ᠋ᠢ᠂ ᠲᠤᠩᠷᠠᠭᠠ ᠪᠠᠷ ᠨᠣᠬᠠᠢ ᠬᠤᠴᠠᠬᠤ ᠴᠢᠮᠡᠭᠡ ᠶ᠋ᠢ᠂ ᠵᠦᠷ ᠶᠦᠮ ᠤᠤ ᠱᠦᠭᠯᠦ ᠪᠡᠷ ᠡᠯᠳᠡᠪ ᠰᠢᠪᠠᠭᠤᠨ ᠳᠠᠭᠤᠤ ᠶ᠋ᠢ ᠳᠠᠭᠤᠷᠢᠶᠠᠯᠭᠠᠨ ᠭᠠᠷᠭᠠᠬᠤ ᠵᠣᠷᠢᠭᠤᠯᠲᠠ ᠲᠠᠢ ᠠᠰᠢᠭᠯᠠᠳᠠᠭ ᠢ᠋ ᠵᠢᠨᠵᠦᠭ ᠵᠡᠯᠰᠡᠩ ᠲᠣᠪᠴᠢ ᠲᠠᠢᠯᠪᠤᠷᠢᠯᠠᠨ ᠶᠠᠷᠢᠪᠠ᠃ ᠲᠡᠷᠡ ᠲᠤᠬᠠᠢ ᠳ᠋ᠤ᠌ ᠰᠠᠩᠵᠢ ᠭᠡᠰᠦᠯ ᠰᠣᠨᠣᠰᠤᠭᠰᠠᠨ ᠶᠤᠮ ᠨᠡᠯᠢᠶᠡᠳ ᠲᠤᠯᠠ ᠲᠡᠳᠦᠢ ᠯᠠ ᠰᠣᠨᠢᠷᠬᠠᠭᠰᠠᠨ ᠦᠭᠡᠢ᠃ ᠡᠰᠡᠷᠬᠦ ᠬᠠᠨᠠᠨ ᠲᠤᠰᠢᠶᠠ ᠴᠢᠪᠬᠠᠳᠠᠰᠤᠲᠤ ᠬᠥᠭᠵᠢᠮ ᠦ᠋ᠨ ᠲᠥᠷᠥᠯ ᠵᠦᠢᠯ ᠢ᠋ ᠥᠷᠥᠭᠰᠡᠨ ᠪᠠᠢᠯᠠ᠃ ᠲᠡᠨᠳᠡ ᠫᠢᠫᠠ᠂ ᠪᠢᠪᠯᠡᠭ᠂ ᠪᠢᠰᠠᠨᠵᠠ ᠲᠡᠷᠢᠭᠦᠲᠡᠨ ᠲᠠᠯᠪᠢᠭᠠᠰᠤᠲᠠᠢ ᠬᠠᠷᠠᠭᠳᠠᠬᠤ ᠳ᠋ᠤ᠌ ᠵᠢᠨᠵᠦᠭ ᠵᠡᠯᠰᠡᠩ ᠲᠡᠷᠡ ᠵᠦᠭ ᠵᠥᠪᠬᠡᠨ ᠵᠠᠩᠭᠠᠬᠤ ᠲᠡᠳᠦᠢ ᠪᠣᠯᠤᠭᠠᠳ:
- ᠲᠡᠨᠳᠡ ᠴᠢᠪᠬᠠᠳᠠᠰᠤᠲᠤ ᠬᠥᠭᠵᠢᠮ ᠦ᠋ᠳ ᠪᠠᠢᠨᠠ᠃ ᠬᠤᠷᠠᠯ ᠨᠣᠮ ᠤ᠋ᠨ ᠬᠡᠷᠡᠭ ᠲᠦ᠍ ᠲᠡᠳᠡᠨ ᠢ᠋ ᠲᠡᠳᠦᠢᠯᠡ ᠬᠡᠷᠡᠭᠯᠡᠳᠡᠭ ᠦᠭᠡᠢ ᠲᠤᠯᠠ ᠴᠢᠮᠠ ᠳ᠋ᠤ᠌ ᠣᠳᠣ ᠪᠠᠷ ᠵᠢᠭᠠᠬᠤ ᠴᠣ ᠶᠠᠭᠤᠮᠠ ᠠᠯᠠᠭᠠ᠃ ᠮᠠᠨ ᠤ᠋ ᠳ᠋ᠤ᠌ ᠶᠡᠷᠦ ᠨᠢ ᠪᠦᠬᠦ ᠲᠥᠷᠥᠯ ᠦ᠋ᠨ ᠬᠥᠭᠵᠢᠮ ᠪᠣᠢ᠃ ᠬᠠᠷᠢᠨ ᠳᠡᠯᠡᠳᠪᠦᠷᠢ ᠬᠥᠭᠵᠢᠮ ᠡᠴᠡ ᠭᠠᠨᠳᠢ ᠮᠣᠳᠣ ᠪᠠᠢᠭ᠍ᠰᠠᠨ ᠢ ᠥᠴᠥᠭᠡᠳᠦᠷ ᠵᠠᠩᠴᠸ ᠳ᠋ᠠᠴᠠᠩ ᠤ᠋ᠨ ᠬᠢᠨ ᠭᠤᠶᠤᠵᠤ ᠠᠪᠤᠭᠠᠳ ᠶᠠᠪᠤᠭᠰᠠᠨ᠃ ᠲᠡᠳᠡᠨ ᠦ᠌ ᠭᠠᠨᠳᠢ ᠮᠣᠳᠣ ᠴᠤᠭᠤᠷᠴᠢᠬᠠᠵᠤ ᠭᠡᠨᠡ᠃ ᠮᠠᠭᠤ ᠢᠷᠸᠠ ᠳᠠ! ᠭᠡᠵᠦ ᠶᠠᠷᠢᠪᠠ᠃ ᠭᠠᠨᠳᠢ ᠮᠣᠳᠣ ᠨᠢ ᠬᠣᠶᠠᠷ ᠠᠯᠲᠠ ᠰᠢᠬᠠᠮ ᠤᠷᠲᠤ᠂ ᠥᠩᠭᠡᠯᠡᠵᠦ ᠭᠥᠯᠢᠢᠯᠭᠡᠭᠰᠡᠨ ᠠᠳᠠᠯᠢ ᠬᠦᠷᠡᠩ ᠽᠠᠨᠳᠠᠨ ᠠᠳᠠᠯᠢ ᠴᠤᠯᠤ ᠭᠤᠯᠳᠤᠩ ᠮᠣᠳᠣ ᠪᠥᠭᠡᠳ ᠮᠠᠰᠢ ᠬᠠᠲᠠᠭᠤ ᠤᠴᠢᠷ ᠳᠡᠯᠡᠳᠬᠦ ᠳ᠋ᠦ᠍ ᠵᠡᠰ ᠬᠠᠷᠠᠩᠭᠠ ᠰᠢᠭ᠋ ᠰᠣᠨᠢᠨ ᠳᠠᠭᠤ ᠭᠠᠷᠳᠠᠭ ᠭᠡᠳᠡᠭ ᠢ᠋ ᠰᠠᠩᠵᠢ ᠪᠤᠶᠠᠨᠵᠠᠯᠪᠠᠷᠢᠬᠤ ᠭᠡᠢᠳ ᠦ᠋ᠨ ᠭᠠᠨᠳᠢ ᠮᠣᠳᠣ ᠪᠠᠷ ᠲᠥᠰᠦᠭᠡᠯᠡᠵᠦ ᠪᠠᠢᠯᠠ᠃ ᠡᠨᠡᠳᠬᠡᠭ ᠭᠠᠵᠠᠷ ᠤᠷᠭᠤᠳᠠᠭ ᠲᠤᠯᠠ ᠭᠠᠨᠳᠢ ᠮᠣᠳᠣ ᠲᠠᠢ ᠰᠦᠮᠡ ᠬᠣᠪᠣᠷ ᠪᠠᠢᠳᠠᠭ ᠠᠵᠢ᠃ ᠰᠠᠩᠵᠢ ᠭᠡᠰᠦᠯ ᠨᠢᠭᠡᠨᠲᠡ ᠭᠠᠩᠯᠢᠩᠴᠢ ᠪᠠᠷ ᠰᠠᠭᠤᠬᠤ ᠪᠣᠯᠤᠭᠰᠠᠨ ᠢ᠋ ᠳᠠᠯᠢᠮᠳᠠᠭᠤᠯᠤᠨ ᠬᠤᠷᠠᠯ ᠮᠥᠷᠭᠥᠯ ᠦ᠋ᠨ ᠬᠣᠷᠢᠨ ᠳᠥᠷᠪᠡᠨ ᠲᠥᠷᠥᠯ ᠦ᠋ᠨ ᠬᠥᠭᠵᠢᠮ ᠢ᠋ ᠰᠤᠷᠴᠤ ᠠᠪᠬᠤ ᠰᠠᠨᠠᠭᠠ ᠳᠣᠲᠣᠷᠠ ᠪᠠᠨ ᠠᠬᠤᠭᠤᠯᠤᠭᠰᠠᠨ ᠲᠤᠯᠠ ᠴᠥᠮ ᠢ᠋ ᠨᠢ ᠶᠡᠬᠡᠳᠡ ᠰᠣᠨᠢᠷᠬᠠᠬᠤ ᠳ᠋ᠤ᠌ ᠵᠡᠯᠰᠡᠩ ᠵᠢᠨᠵᠦᠭ ᠥᠪᠡᠷ ᠦᠨ ᠡᠷᠳᠡᠮ ᠳ᠋ᠦ᠍ ᠬᠡᠨ ᠨᠢᠭᠡᠨ ᠬᠥᠮᠦᠨ ᠰᠢᠲᠦᠨ ᠪᠢᠰᠢᠷᠡᠬᠦ ᠳ᠋ᠦ᠍ ᠳᠤᠷᠠᠲᠠᠢ ᠪᠠᠢᠳᠠᠭ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠰᠡᠳᠬᠢᠯ ᠥᠶᠥᠭ ᠪᠣᠯᠵᠠᠢ᠃
- ᠵᠠ᠂ ᠬᠦ ᠶᠠᠭᠤᠨ ᠤ᠋ ᠤᠷᠢᠳ ᠭᠠᠩᠯᠢᠩ ᠢᠶᠡᠨ ᠯᠠ ᠦᠯᠢᠶᠡᠵᠦ ᠰᠤᠷᠤᠨᠠ ᠪᠢᠵᠡ ᠳᠡ᠃ ᠲᠡᠭᠦᠨ ᠦ᠌ ᠲᠤᠯᠠᠳᠠ ᠡᠬᠢᠯᠡᠭᠡᠳ ᠶᠠᠨᠢᠭ ᠴᠡᠭᠡᠵᠢᠯᠡᠵᠦ ᠶᠠᠩ ᠲᠠᠲᠠᠵᠤ ᠰᠤᠷᠪᠠᠰᠤ ᠵᠣᠬᠢᠨᠠ ᠭᠡᠵᠦ ᠬᠡᠯᠡᠪᠡ᠃
《ᠶᠠᠨᠢᠭ》 ᠭᠡᠳᠡᠭ ᠠᠶᠠᠯᠭᠤ ᠲᠡᠮᠳᠡᠭᠯᠡᠬᠦ ᠠᠷᠭᠠ ᠶ᠋ᠢ ᠰᠤᠷᠬᠤ ᠰᠠᠨ ᠭᠡᠮᠡᠨ ᠰᠠᠩᠵᠢ ᠭᠡᠰᠦᠯ ᠳᠠᠩᠳᠠ ᠮᠥᠷᠥᠭᠡᠳᠴᠦ ᠪᠤᠶᠠᠨᠵᠠᠯᠪᠠᠷᠢᠬᠤ ᠭᠡᠢᠳ ᠦ᠋ᠨ ᠣᠩᠵᠠᠳ ᠯᠠᠮᠠ ᠶ᠋ᠢᠨ ᠶᠠᠩ ᠲᠠᠲᠠᠬᠤ ᠶᠢ ᠱᠣᠬᠣᠭᠣᠷᠬᠠᠨ ᠰᠣᠨᠢᠷᠬᠠᠳᠠᠭ ᠪᠠᠢᠯᠠ᠃ ᠣᠳᠣ ᠲᠡᠭᠦᠨ ᠦ᠌ ᠪᠠᠷᠭᠢᠯ ᠪᠦᠳᠦᠭᠦᠨ ᠳᠠᠭᠤ ᠴᠢᠬᠢᠨ ᠳ᠋ᠦ᠍ᠨᠢ ᠰᠣᠨᠣᠰᠤᠭᠳᠠᠬᠤ ᠰᠢᠭ᠋ ᠪᠣᠯᠵᠠᠢ᠃
ᠰᠠᠩᠵᠢ ᠭᠡᠰᠦᠯ ᠭᠣᠮᠠᠨ ᠳ᠋ᠠᠴᠠᠩ ᠤ᠋ᠨ ᠬᠤᠷᠠᠯ ᠨᠣᠮ ᠤ᠋ᠨ ᠭᠠᠩᠯᠢᠨᠴᠢ ᠬᠢᠬᠦ ᠪᠡᠷ ᠠᠷᠭᠠ ᠦᠭᠡᠢ ᠰᠢᠢᠳᠴᠦ᠂ ᠶᠠᠩᠭᠢᠨᠠᠨ ᠭᠠᠰᠠᠯᠬᠤ ᠮᠡᠲᠦ ᠳᠠᠭᠤ ᠲᠠᠢ ᠭᠠᠩᠯᠢᠩ ᠢ᠋ ᠬᠥᠭᠵᠢᠮ ᠦ᠋ᠨ ᠳᠠᠭᠠᠭᠠᠮᠠᠯ ᠵᠢᠨᠵᠦᠭ ᠵᠠᠯᠰᠠᠩ ᠤ᠋ᠨ ᠵᠢᠭᠠᠪᠤᠷᠢ ᠪᠠᠷ ᠦᠯᠢᠶᠡᠳᠡᠭ ᠠᠵᠢᠯ ᠲᠠᠢ ᠪᠣᠯᠤᠭᠠᠳ ᠬᠠᠭᠠᠰ ᠰᠠᠷᠠ ᠥᠩᠭᠡᠷᠡᠯᠡ᠃ ᠡᠬᠢᠯᠡᠭᠡᠳ ᠭᠠᠭᠴᠠᠭᠠᠷ ᠢ᠋ ᠨᠢ ᠰᠠᠭᠤᠯᠭᠠᠨ ᠭᠠᠩᠯᠢᠩ ᠦᠯᠢᠶᠡᠯᠭᠡᠳᠡᠭ ᠪᠠᠢᠭ᠍ᠰᠠᠨ ᠢᠶᠠᠨ ᠰᠡᠭᠦᠯ ᠳ᠋ᠡᠭᠡᠨ ᠨᠡᠢᠲᠠ ᠬᠥᠭᠵᠢᠮ ᠦ᠋ᠨ ᠬᠢᠨ ᠲᠡᠢ ᠬᠠᠮᠲᠤ ᠰᠤᠷᠭᠠᠭᠤᠯᠢᠯᠠᠯᠠ᠃ ᠪᠢᠰᠭᠦᠷᠴᠢ᠂ ᠲᠤᠩᠴᠢ᠂ ᠬᠡᠩᠭᠡᠷᠭᠡᠴᠢ᠂ ᠦᠬᠡᠷ ᠪᠣᠯᠤᠭᠠᠳ ᠢᠮᠠᠭᠠᠨ ᠪᠦᠷᠢᠶᠡᠴᠢ᠂ ᠴᠠᠩᠴᠢ᠂ ᠰᠸᠯᠨᠢᠩᠴᠢ᠂ ᠬᠠᠷᠠᠩᠭᠠᠴᠢ᠂ ᠳᠤᠳᠠᠷᠠᠮᠴᠢ ᠨᠠᠷ ᠭᠡᠬᠦᠴᠢᠯᠡᠨ ᠣᠯᠠᠨ ᠬᠥᠮᠦᠨ ᠲᠡᠢ ᠲᠠᠨᠢᠯᠴᠠᠯᠠ᠃ ᠲᠡᠳᠡᠨ ᠦ᠌ ᠳᠤᠤᠭᠠᠷᠭᠠᠬᠤ ᠬᠥᠭᠵᠢᠮ ᠨᠢ ᠬᠡᠳᠦᠬᠡᠨ ᠠᠶᠠᠯᠭᠤ ᠲᠠᠢ ᠲᠤᠯᠠ ᠰᠤᠷᠬᠤ ᠳ᠋ᠤ᠌ ᠠᠮᠠᠷᠬᠠᠨ ᠪᠠᠢᠯᠠ᠃ ᠬᠠᠷᠢᠨ ᠴᠢᠪᠬᠠᠳᠠᠰᠤᠲᠤ ᠬᠥᠭᠵᠢᠮ ᠢ᠋ ᠲᠤᠭᠳᠠᠭᠠᠬᠤ ᠳ᠋ᠤ᠌ ᠶᠡᠬᠡ ᠯᠡ ᠠᠮᠠᠷ ᠦᠭᠡᠢ᠂ ᠪᠠᠰᠠ ᠲᠡᠭᠡᠭᠡᠳ ᠵᠢᠨᠵᠦᠭ ᠥᠪᠡᠷ ᠢᠶᠡᠨ ᠴᠤ ᠲᠡᠭᠦᠨ ᠢ᠋ ᠣᠯᠢᠭᠲᠠᠢ ᠳᠤᠤᠭᠠᠷᠭᠠᠵᠤ ᠴᠢᠳᠠᠳᠠᠭ ᠦᠭᠡᠢ᠃ ᠬᠤᠷᠠᠯ ᠨᠣᠮ ᠤ᠋ᠨ ᠦᠶᠡ ᠳ᠋ᠦ᠍ ᠴᠥᠭᠡᠬᠡᠨ ᠬᠡᠷᠡᠭᠯᠡᠳᠡᠭ ᠪᠣᠯᠬᠤ ᠶ᠋ᠢ ᠰᠠᠩᠵᠢ ᠮᠡᠳᠡᠵᠦ ᠠᠪᠤᠯᠠ᠃ ᠵᠢᠨᠵᠦᠭ ᠵᠡᠯᠰᠡᠩ ᠲᠥᠪᠡᠳ ᠬᠥᠮᠦᠨ ᠭᠡᠬᠦ ᠳ᠋ᠦ᠍ ᠠᠯᠢᠪ ᠨᠠᠭᠠᠳᠤᠮ ᠳ᠋ᠤ᠌ ᠢᠯᠡᠭᠦᠦ ᠶᠡᠬᠡ ᠳᠤᠷᠠᠲᠠᠢ᠂ ᠡᠷᠡᠭᠡ ᠴᠡᠭᠡᠷ ᠦᠭᠡᠢ᠂ ᠠᠮᠠ ᠰᠤᠯᠠ ᠲᠠᠢ ᠡᠷᠡ ᠪᠠᠢᠭ᠍ᠰᠠᠨ ᠲᠤᠯᠠ ᠰᠠᠩᠵᠢ ᠳ᠋ᠤ᠌ ᠵᠢᠰᠦᠨ ᠪᠦᠷᠢ ᠶ᠋ᠢᠨ ᠶᠠᠭᠤᠮᠠ ᠶᠠᠷᠢᠵᠤ ᠰᠡᠭᠦᠯ ᠰᠡᠭᠦᠯ ᠳ᠋ᠡᠭᠡᠨ ᠶᠡᠬᠡ ᠨᠠᠢᠵᠠᠯᠠᠬᠤ ᠪᠣᠯᠵᠠᠢ᠃ ᠲᠡᠭᠡᠭᠡᠳ ᠨᠢᠭᠡᠨ ᠡᠳᠦᠷ:
- ᠬᠣᠶᠠᠭᠤᠯᠠ ᠪᠠᠨ ᠵᠤᠤ ᠷᠢᠨᠪᠣᠴᠢ ᠶ᠋ᠢᠨ ᠵᠠᠬᠠ ᠪᠠᠷ ᠶᠠᠪᠤᠶᠠ! ᠭᠡᠵᠦ ᠭᠤᠶᠤᠵᠠᠢ᠃ ᠰᠠᠩᠵᠢ ᠲᠡᠭᠦᠨ ᠢ ᠳᠤᠷᠠᠲᠠᠢ ᠵᠥᠪᠰᠢᠶᠡᠷᠡᠪᠡ᠃ ᠤᠴᠢᠷ ᠨᠢ ᠭᠣᠮᠠᠨ ᠳ᠋ᠠᠴᠠᠩ ᠤ᠋ᠨ ᠵᠢᠩᠵᠸ ᠯᠠᠮᠠ ᠲᠠᠢ ᠬᠠᠮᠲᠤ ᠵᠠᠬᠠ ᠪᠠᠷ ᠲᠡᠨᠦᠵᠦ ᠶᠠᠪᠤᠬᠤ ᠳ᠋ᠤ᠌ ᠬᠡᠨ ᠴᠣ ᠬᠠᠯᠳᠠᠰᠢ ᠦᠭᠡᠢ ᠪᠦᠷᠢᠨ ᠡᠷᠬᠡ ᠲᠡᠢ ᠭᠡᠵᠦ ᠰᠠᠩᠵᠢ ᠣᠯᠵᠠᠭᠤᠷᠬᠠᠨ ᠪᠣᠳᠣᠵᠠᠢ᠃
ᠰᠡᠷᠢᠭᠦᠪᠲᠦᠷᠬᠡᠨ ᠨᠢᠭᠡ ᠡᠳᠦᠷ ᠲᠡᠳᠡ ᠵᠣᠣ ᠷᠢᠨᠪᠣᠴᠢ ᠶ᠋ᠢᠨ ᠵᠠᠬᠠ ᠳᠡᠭᠡᠷᠡ ᠬᠣᠶᠠᠭᠤᠯᠠ ᠭᠠᠷᠴᠠᠢ᠃ ᠪᠠᠯᠪᠤ᠂ ᠬᠠᠰᠮᠢᠷ᠂ ᠪᠤᠲᠠᠨ ᠤ᠋ ᠬᠤᠳᠠᠯᠳᠤᠭᠠᠴᠢᠳ ᠲᠡᠷᠡ ᠵᠠᠬᠠ ᠶ᠋ᠢᠨ ᠭᠣᠣᠯ ᠡᠵᠡᠳ ᠪᠠᠢᠯᠠ᠃ ᠬᠠᠰᠮᠢᠷ ᠬᠣᠷᠭᠣᠢ᠂ ᠨᠠᠮᠪᠤ ᠭᠡᠳᠡᠭ ᠴᠠᠮᠪᠠ᠂ ᠲᠠᠷᠠᠮ ᠭᠡᠳᠡᠭ ᠬᠢᠯᠭᠠᠰᠤᠯᠠᠭ ᠳᠠᠪᠤᠤ᠂ ᠠᠩᠭ᠌ᠯᠢ ᠫᠠᠯᠠᠩᠲᠠᠢ ᠰᠠᠪᠠ ᠰᠠᠭᠤᠯᠭᠠ᠂ ᠢᠲ᠋ᠠᠯᠢ ᠱᠢᠷᠦ᠂ ᠡᠨᠡᠳᠬᠡᠭ ᠦ᠋ᠨ ᠡᠯᠳᠡᠪ ᠡᠳ᠋ᠯᠡᠯ ᠲᠡᠷᠢᠭᠦᠲᠡᠨ ᠢ᠋ ᠡᠩᠨᠡᠭᠦᠯᠦᠨ ᠥᠷᠥᠭᠰᠡᠨ ᠫᠠᠨᠽᠠᠴᠢᠨ ᠨᠣᠭᠣᠳ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠡᠯᠡ ᠠᠶᠠᠯᠭᠤ ᠪᠠᠷ ᠶᠠᠷᠢᠵᠤ ᠡᠳ᠋ ᠪᠠᠷᠠᠭᠠ ᠪᠡᠨ ᠮᠠᠭᠲᠠᠨ ᠬᠠᠰᠢᠬᠢᠷᠤᠯᠳᠤᠵᠤ ᠥᠯᠥᠨ ᠲᠣᠭᠣᠰᠣᠨ ᠳᠤᠮᠳᠠ ᠦᠨᠡᠰᠦᠨ ᠴᠢᠷᠠᠢᠯᠠᠵᠠᠭᠠᠭᠠᠳ ᠴᠢᠬᠢ ᠲᠦᠵᠢᠷᠡᠮᠡ ᠱᠤᠤᠭᠢᠶᠠᠨ ᠢ᠋ ᠶᠡᠷᠦ ᠬᠠᠢᠬᠤᠷᠬᠤ ᠪᠠᠨ ᠪᠣᠯᠢᠭᠰᠠᠨ ᠠᠵᠢ᠃ ᠥᠯᠥᠰᠦᠨ ᠲᠠᠴᠢᠶᠠᠳᠠᠭᠰᠠᠨ ᠡᠯᠵᠢᠭᠡ᠂ ᠯᠠᠭᠤᠰᠠ ᠪᠠᠢᠨ ᠪᠠᠢᠨ ᠣᠷᠢᠯᠠᠯᠳᠤᠵᠤ᠂ ᠴᠤᠤ ᠭᠡᠵᠦ ᠲᠦᠪᠡᠳ ᠦ᠋ᠳ ᠦ᠋ᠨ ᠨᠡᠷᠡᠯᠡᠳᠡᠭ ᠥᠨᠳᠥᠷ ᠰᠡᠷᠪᠡᠭᠡ ᠲᠡᠢ᠂ ᠤᠷᠲᠤ ᠡᠪᠡᠷ ᠲᠡᠢ ᠬᠠᠢᠨᠤᠭ ᠤ᠋ᠨ ᠰᠢᠷᠠ ᠶᠢᠨ ᠨᠢᠷᠤᠭᠤᠨ ᠳᠡᠭᠡᠭᠦᠷ ᠳᠠᠮᠨᠠᠭᠤᠯᠤᠭᠠᠳ ᠪᠥᠰ ᠪᠠᠷᠠᠭᠠ ᠬᠥᠨᠳᠡᠯᠡᠨ ᠳᠤᠬᠤᠴᠢᠬᠠᠭᠰᠠᠨ ᠨᠠᠢᠮᠠᠭᠠᠴᠢᠳ ᠪᠡᠶᠡ ᠪᠡᠶᠡ ᠲᠡᠢ ᠪᠡᠨ ᠠᠷᠠᠴᠠᠯᠳᠤᠨ ᠬᠥᠰᠢᠯᠳᠦᠵᠦ ᠪᠠᠢᠪᠠ᠃
- ᠬᠦᠢ ᠴᠢ ᠡᠭᠦᠨ ᠢ᠋ ᠬᠠᠷᠠᠭᠠᠴᠢ! ᠭᠡᠵᠦ ᠭᠡᠨᠡᠳᠲᠡ ᠵᠢᠩᠵᠸ ᠯᠠᠮᠠ ᠵᠡᠯᠰᠡᠩ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠬᠠᠨᠴᠤᠢ ᠡᠴᠡ ᠲᠠᠲᠠᠯᠠ᠃ ᠶᠠᠭᠤ ᠶ᠋ᠢ ᠬᠠᠷᠠᠭᠠᠴᠢ ᠭᠡᠳ ᠪᠠᠢᠭᠠ ᠶ᠋ᠢ ᠨᠢ ᠭᠠᠳᠠᠷᠯᠠᠭᠠ ᠦᠭᠡᠢ ᠰᠠᠩᠵᠢ ᠭᠠᠢᠬᠠᠨ ᠠᠵᠢᠪᠠᠯ ᠲᠡᠢᠮᠦ ᠶᠡᠬᠡ ᠰᠣᠨᠢᠷᠬᠠᠮᠠᠷ ᠶᠠᠭᠤᠮᠠ ᠨᠢᠳᠦᠨ ᠳ᠋ᠦ᠍ ᠨᠢ ᠲᠤᠰᠤᠭᠰᠠᠨ ᠦᠭᠡᠢ᠃
- ᠶᠠᠭᠤ ᠶ᠋ᠢ ᠬᠠᠷᠠᠬᠤ ᠶᠤᠮ ᠪᠣᠢ? ᠭᠡᠵᠦ ᠯᠠᠪᠯᠠᠨ ᠠᠰᠠᠭᠤᠪᠠ᠃
- ᠲᠡᠭᠦᠨ ᠢ᠋ ᠬᠠᠷᠠᠭᠠᠴᠢ! ᠭᠡᠳ ᠵᠡᠯᠰᠡᠩ ᠯᠠᠮᠠ ᠨᠢᠭᠡᠨ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠠᠷᠤ ᠠ᠋ᠴᠠ ᠵᠠᠩᠭᠠᠪᠠ᠃ᠲᠡᠷᠡ ᠨᠢ ᠶᠡᠷᠦ ᠶ᠋ᠢᠨ ᠯᠡ ᠲᠣᠬᠢᠶᠠᠯᠳᠤᠳᠠᠭ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠨᠢᠭᠡ ᠪᠠᠢᠪᠠ᠃ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠢᠶᠠᠨ ᠬᠠᠨᠴᠤᠢ ᠶ᠋ᠢ ᠰᠤᠭᠤᠯᠳᠤᠷᠭᠠᠯᠠᠨ ᠤᠨᠵᠢᠭᠤᠯᠵᠤ᠂ ᠮᠠᠯᠠᠭᠠᠢ ᠪᠡᠨ ᠠᠷᠤ ᠰᠢᠯᠢᠨ ᠳᠡᠭᠡᠷᠡ ᠰᠢᠳᠡᠵᠦ ᠰᠠᠭᠠᠯᠳᠤᠷᠭᠠ ᠪᠡᠷ ᠨᠢ ᠲᠣᠭᠲᠠᠭᠠᠭᠰᠠᠨ᠂ ᠪᠦᠰᠡ ᠪᠡᠨ ᠳᠣᠣᠭᠤᠷ ᠲᠠᠲᠠᠵᠤ ᠳᠡᠪᠡᠯ ᠢ᠋ᠶ᠋ᠡᠨ ᠰᠢᠭᠤᠭᠰᠠᠨ ᠪᠠᠢᠳᠠᠯ ᠢ᠋ ᠬᠠᠷᠠᠬᠤ ᠳ᠋ᠤ᠌ ᠲᠥᠪᠡᠳ ᠬᠤᠳᠠᠯᠳᠤᠭᠠᠴᠢᠨ ᠠᠵᠢ᠃
- ᠳᠡᠷᠡᠨ ᠳ᠋ᠦ᠍ ᠰᠣᠨᠢᠨ ᠤᠤ ᠪᠠᠢᠭᠠ ᠶᠤᠮ ᠪᠣᠢ? ᠭᠡᠵᠦ ᠰᠠᠩᠵᠢ ᠭᠠᠢᠬᠠᠨ ᠠᠰᠠᠭᠤᠪᠠᠯ:
- ᠰᠣᠨᠢᠨ ᠶᠠᠭᠤᠮᠠ ᠠᠯᠠᠭᠠ᠃ ᠭᠠᠭᠴᠠ ᠬᠦ᠌ ᠭᠠᠪᠠᠯᠠ ᠶ᠋ᠢ ᠨᠢ ᠬᠠᠷᠠᠭᠠᠴᠢ! ᠭᠡᠵᠦ ᠵᠢᠩᠵᠸ ᠯᠠᠮᠠ ᠬᠡᠯᠡᠬᠦ ᠳ᠋ᠦ᠍ ᠰᠠᠩᠵᠢ ᠭᠠᠢᠬᠠᠵᠤ ᠰᠠᠢᠲᠤᠷ ᠠᠵᠢᠪᠠᠰᠤ ᠲᠡᠭᠦᠨ ᠦ᠌ ᠵᠢᠭᠠᠭᠰᠠᠨ ᠬᠤᠳᠠᠯᠳᠤᠭᠠᠴᠢᠨ ᠡᠷᠡ ᠶ᠋ᠢᠨ ᠭᠠᠪᠠᠯᠠ ᠨᠢ ᠠᠷᠤ ᠲᠡᠰᠢ ᠪᠡᠨ ᠴᠣᠢᠯᠠᠭᠰᠠᠨ ᠮᠡᠲᠦ ᠬᠡᠯᠪᠡᠷᠢ ᠲᠡᠢ ᠤᠭᠤᠯᠢᠨ ᠲᠣᠯᠣᠭᠠᠢ ᠲᠠᠢ ᠠᠵᠢ᠃ ᠥᠭᠡᠷᠡ ᠰᠣᠨᠢᠷᠬᠠᠮᠠᠷ ᠶᠠᠭᠤᠮᠠ ᠠᠯᠠᠭᠠ ᠪᠠᠢᠪᠠ᠃
- ᠶᠠᠭᠤ ᠨᠢ ᠰᠣᠨᠢᠨ ᠰᠠᠨᠠᠭᠳᠠᠪᠠ? ᠭᠡᠵᠦ ᠰᠠᠩᠵᠢ ᠤᠯᠠᠮ ᠭᠠᠢᠬᠠᠨ ᠯᠠᠪᠯᠠᠪᠠ᠃ ᠵᠡᠯᠰᠡᠩ ᠠᠭᠤᠷᠯᠠᠬᠤ ᠮᠡᠲᠦ ᠪᠣᠯᠵᠤ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠭᠰᠠᠨ ᠢ᠋ᠶ᠋ᠠᠨ:
- ᠵᠠ ᠴᠢ ᠴᠣ ᠮᠢᠨᠦ ᠵᠢᠩᠳᠠᠭᠠᠨ ᠤ ᠬᠥᠮᠦᠨ ᠪᠣᠯᠲᠠᠯᠠ ᠪᠠᠨ ᠮᠥᠨ ᠡᠳᠦᠢ ᠪᠠᠢᠨᠠ ᠳᠠ᠃ ᠴᠢ ᠲᠡᠭᠦᠨ ᠦ ᠭᠠᠪᠠᠯᠠ ᠶ᠋ᠢ ᠰᠣᠨᠢᠷᠬᠠᠬᠤ ᠦᠭᠡᠢ ᠪᠠᠢᠨᠠ ᠤᠤ? ᠭᠡᠪᠡ᠃
- ᠭᠠᠪᠠᠯᠠ ᠪᠠᠷ ᠶᠠᠭᠠᠬᠢᠬᠤ ᠶᠤᠮ ᠪᠣᠢ? ᠭᠡᠵᠦ ᠰᠠᠩᠵᠢ ᠬᠠᠢᠬᠤᠷᠤᠮᠵᠢ ᠦᠭᠡᠢ ᠬᠡᠯᠡᠭᠰᠡᠨ ᠳ᠋ᠦ᠍ ᠵᠡᠯᠰᠡᠩ:
- ᠡᠢᠮᠦ ᠭᠠᠪᠠᠯᠠ ᠲᠠᠢ ᠬᠥᠮᠦᠨ ᠬᠣᠪᠣᠷ ᠪᠠᠢᠳᠠᠭ ᠶᠤᠮ᠃ ᠡᠭᠦᠨ ᠦ᠌ ᠭᠠᠪᠠᠯᠠ ᠪᠡᠷ ᠲᠠᠮᠠᠷᠤ ᠬᠢᠬᠦ ᠰᠡᠨ᠃ᠲᠡᠭᠡᠪᠡᠯ ᠴᠣ ᠮᠥᠨ ᠰᠠᠢᠬᠠᠨ ᠳᠠᠭᠤ ᠲᠠᠢ ᠲᠠᠮᠠᠷᠤ ᠪᠣᠯᠤᠨᠠ ᠳᠠ ᠭᠡᠵᠦ ᠬᠡᠯᠡᠪᠡ᠃ ᠰᠠᠩᠵᠢ ᠶᠢᠨ ᠲᠣᠲᠣᠷᠠ ᠡᠪ ᠦᠭᠡᠢ ᠪᠣᠯᠤᠯᠠ᠃《ᠠᠮᠢᠳᠤ ᠬᠥᠮᠦᠨ ᠦ᠌ ᠭᠠᠪᠠᠯᠠ ᠶ᠋ᠢᠨ ᠶᠠᠰᠤᠨ ᠳ᠋ᠤ᠌ ᠰᠢᠨᠤᠵᠤ ᠪᠠᠢᠬᠤ ᠭᠡᠵᠦ ᠳᠡ᠃ᠠᠷᠠᠢ ᠴᠣ ᠬᠡᠲᠦᠷᠡᠭᠰᠡᠨ ᠨᠢᠭᠦᠯ ᠲᠡᠢ ᠪᠣᠳᠣᠯ ᠪᠠᠢᠬᠠ》 ᠭᠡᠵᠦ ᠲᠡᠷᠡ ᠪᠣᠳᠣᠭᠠᠳ:
- ᠨᠢᠭᠦᠯ ᠪᠣᠯᠤᠨᠠ᠂ ᠴᠢᠮᠡᠭᠡ ᠦᠭᠡᠢ! ᠭᠡᠪᠡ᠃
- ᠶᠠᠭᠤᠨ ᠤ᠋ ᠴᠢᠨᠢ ᠨᠢᠭᠦᠯ! ᠪᠤᠷᠬᠠᠨ ᠨᠣᠮ ᠤ᠋ᠨ ᠰᠠᠢᠨ ᠦᠢᠯᠡ ᠶ᠋ᠢᠨ ᠲᠤᠬᠠᠢ ᠪᠣᠳᠣᠵᠤ ᠪᠠᠢᠬᠤ ᠳ᠋ᠤ᠌ ᠨᠢᠭᠦᠯ ᠪᠣᠯᠳᠠᠭ ᠭᠡᠵᠦ ᠬᠡᠨ ᠡᠴᠡ ᠳᠣᠭᠤᠯᠪᠠ᠃ ᠬᠠᠷᠢᠨ ᠴᠣ ᠪᠤᠶᠠᠨ ᠪᠣᠯᠤᠨᠠ᠃ ᠡᠨᠡ ᠬᠤᠳᠠᠯᠳᠤᠭᠠᠴᠢᠨ ᠪᠣᠯ ᠢᠩᠭᠡᠰᠬᠡᠭᠡᠳ ᠯᠡ ᠨᠠᠰᠤᠨ ᠤ᠋ ᠦᠢᠯᠡ ᠪᠡᠨ ᠳᠠᠭᠤᠰᠬᠠᠨᠠ᠃ ᠬᠠᠷᠢᠨ ᠭᠠᠪᠠᠯᠠ ᠪᠡᠷ ᠨᠢ ᠬᠢᠭᠰᠡᠨ ᠳᠠᠮᠤᠷᠤ ᠪᠣᠯ ᠪᠤᠷᠬᠠᠨ ᠱᠠᠵᠢᠨ ᠤ᠋ ᠦᠢᠯᠡᠰ ᠲᠦ᠍ ᠬᠡᠳᠦᠨ ᠦᠶᠡ ᠶ᠋ᠢ ᠳᠠᠮᠵᠢᠨ ᠪᠤᠶᠠᠨ ᠪᠣᠯᠤᠨᠠ ᠭᠡᠵᠦ ᠵᠡᠯᠰᠡᠩ ᠤᠬᠠᠭᠤᠯᠵᠤ ᠬᠡᠯᠡᠬᠦ ᠳ᠋ᠦ᠍ ᠨᠢ ᠰᠠᠩᠵᠢ ᠶ᠋ᠢᠨ ᠰᠠᠨᠠᠭᠠ ᠵᠣᠪᠠᠵᠤ ᠳᠤᠬᠤᠨ ᠤ᠋ ᠬᠥᠯᠥᠰᠥ ᠪᠤᠷᠵᠠᠢᠨ ᠭᠠᠷᠴᠤ᠂ ᠪᠡᠶᠡ ᠨᠢ ᠴᠡᠴᠡᠷᠡᠬᠦ ᠰᠢᠭ ᠪᠣᠯᠤᠭᠰᠠᠨ ᠲᠤᠯᠠ ᠫᠠᠨᠽᠠ ᠨᠠᠢᠢᠮᠠᠭᠠᠨ ᠤ᠋ ᠬᠥᠮᠦᠰ ᠦᠨ ᠬᠣᠭᠣᠷᠣᠨᠳᠣᠭᠤᠷ ᠴᠠᠰᠢ ᠪᠠᠨ ᠵᠢᠳᠬᠦᠵᠦ ᠭᠠᠪᠠᠯᠠ ᠶ᠋ᠢᠨ ᠲᠤᠬᠠᠢ ᠶᠠᠷᠢᠵᠤ ᠪᠠᠢᠭᠠ ᠨᠠᠢᠢᠮᠠᠭᠠᠴᠢᠨ ᠠᠴᠠ ᠬᠣᠯᠠᠳᠤᠨ ᠶᠠᠪᠤᠯᠠ᠃ ᠠᠷᠤ ᠠ᠋ᠴᠠ ᠨᠢ ᠵᠡᠯᠰᠡᠩ ᠵᠢᠨᠵᠦᠭ ᠠᠮᠠᠨ ᠳ᠋ᠠᠭᠠᠨ ᠶᠠᠭᠤᠮᠠ ᠦᠭᠦᠯᠡᠨ ᠪᠤᠪᠲᠤᠨᠠᠭᠰᠠᠭᠠᠷ ᠭᠦᠢᠴᠡᠵᠦ ᠢᠷᠡᠯᠡ᠃ ᠲᠡᠷᠡ ᠠᠮᠢᠰᠬᠤᠭᠠᠳᠠᠵᠤ:
- ᠲᠠᠮᠠᠷᠤ ᠶ᠋ᠢ ᠠᠷᠤ ᠪᠠᠷ ᠢ᠋ᠶ᠋ᠠᠨ ᠨᠡᠢᠯᠡᠭᠰᠡᠨ ᠬᠣᠶᠠᠷ ᠬᠣᠮᠬᠠ ᠪᠡᠷ ᠬᠢᠳᠡᠭ ᠶᠡᠬᠡ ᠤᠴᠢᠷᠲᠠᠢ ᠶᠤᠮ ᠭᠡᠵᠦ ᠪᠣᠳᠣᠭᠠᠷᠠᠢ᠃ ᠰᠠᠪᠠ ᠶᠢᠷᠲᠢᠨᠴᠦ᠂ ᠰᠢᠮᠡ ᠶᠢᠷᠲᠢᠨᠴᠦ ᠬᠣᠶᠠᠷ ᠪᠥᠭᠡᠷᠡ ᠪᠡᠷ ᠢ᠋ᠶ᠋ᠡᠨ ᠬᠣᠯᠪᠣᠭᠳᠠᠨ ᠬᠣᠶᠠᠷ ᠳᠠᠰᠢ ᠬᠠᠷᠠᠵᠤ ᠣᠷᠣᠰᠢᠨᠠ ᠭᠡᠰᠡᠨ ᠪᠤᠷᠬᠠᠨ ᠤ᠋ ᠨᠣᠮᠯᠠᠯ ᠤ᠋ᠨ ᠪᠡᠯᠭᠡ ᠲᠡᠮᠳᠡᠭ ᠮᠥᠨ᠃ ᠨᠠᠷᠭᠢᠯ ᠮᠣᠳᠣᠨ ᠤ᠋ ᠰᠠᠮᠤᠷ ᠤ᠋ᠨ ᠬᠠᠯᠢᠰᠤ ᠶ᠋ᠢ ᠲᠠᠯᠠ ᠳᠤᠮᠳᠠᠭᠤᠷ ᠨᠢ ᠬᠤᠪᠢᠶᠠᠵᠤ ᠬᠣᠶᠠᠷ ᠠᠷᠤ ᠪᠠᠷ ᠨᠢ ᠨᠡᠢᠯᠡᠭᠦᠯᠦᠨ ᠪᠥᠭᠡᠯᠡᠭᠡᠳ ᠵᠠᠳᠠᠭᠠᠢ ᠲᠠᠯᠠ ᠶ᠋ᠢ ᠠᠷᠠᠰᠤ ᠪᠠᠷ ᠪᠦᠷᠢᠵᠦ ᠲᠠᠮᠠᠷᠤ ᠬᠢᠳᠡᠭ ᠶᠦᠮ᠃ ᠲᠡᠢᠮᠦ ᠲᠠᠮᠠᠷᠤ ᠶ᠋ᠢᠨ ᠳᠠᠭᠤ ᠵᠥᠭᠡᠯᠡᠳᠡᠭᠡᠳ ᠰᠥᠭᠡᠩᠭᠢ ᠬᠣᠭᠣᠯᠠᠢ ᠲᠠᠢ ᠬᠥᠮᠦᠨ ᠰᠢᠭ ᠪᠠᠢᠳᠠᠭ᠃ ᠬᠠᠷᠢᠨ ᠭᠠᠪᠠᠯᠠ ᠶ᠋ᠢᠨ ᠶᠠᠰᠤᠨ ᠳᠠᠮᠠᠷᠤ ᠪᠣᠯ ᠶᠠᠭᠤᠲᠠᠢ ᠴᠠᠷᠭᠢᠶᠠ ᠳᠤᠤᠭᠠᠷᠤᠨᠠ ᠭᠡᠭᠴᠢ᠃ ᠲᠡᠢᠮᠦ ᠲᠠᠮᠠᠷᠤ ᠳᠡᠯᠡᠳᠦᠭᠡᠳ ᠰᠠᠭᠤᠵᠤ ᠪᠠᠢᠬᠤ ᠳ᠋ᠤ᠌ ᠠᠮᠢᠳᠤ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠪᠠᠷ ᠳᠠᠭᠤ ᠭᠠᠷᠭᠠᠵᠤ ᠪᠠᠢᠭᠠ ᠮᠡᠲᠦ ᠰᠣᠨᠢᠨ ᠰᠠᠨᠠᠭᠳᠠᠳᠠᠭ᠃ ᠵᠠ ᠲᠡᠭᠡᠭᠡᠳ ᠶᠡᠬᠡ ᠦᠨᠡ ᠬᠦᠷᠦᠨᠡ ᠭᠡᠭᠴᠢ᠃ ᠳ᠋ᠠᠴᠠᠩ ᠳ᠋ᠤ᠌ ᠢᠯᠡᠭᠦᠳᠡᠪᠡᠯ ᠤᠲᠠᠢ ᠭᠦᠮᠪᠦᠮ ᠵᠠ ᠲᠡᠭᠡᠭᠡᠳ ᠯᠡ ᠬᠠᠯᠬᠠ ᠮᠣᠩᠭᠣᠯ ᠬᠠᠮᠢᠭᠠ ᠴᠣ ᠦᠨᠡ ᠬᠦᠷᠦᠨᠡ ᠳᠡ᠂ ᠭᠠᠪᠠᠯᠠ ᠶ᠋ᠢᠨ ᠲᠠᠮᠠᠷᠤ!ᠭᠡᠵᠦ ᠵᠡᠯᠰᠡᠩ ᠵᠢᠨᠵᠦᠭ ᠢ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠶᠠᠷᠢᠬᠤ ᠳ᠋ᠤ᠌ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠲᠣᠯᠣᠭᠠᠢ ᠨᠢ ᠡᠪᠡᠳᠬᠦ ᠰᠢᠭ ᠪᠣᠯᠵᠤ ᠰᠡᠳᠬᠢᠯ ᠨᠢ ᠪᠦᠷᠢᠮᠦᠰᠦᠨ ᠬᠢᠮᠤᠷᠠᠪᠠ᠃ ᠨᠤᠲᠤᠭ ᠲᠤ᠌ ᠪᠠᠨ ᠪᠠᠢᠬᠤ ᠳ᠋ᠤ᠌ ᠲᠥᠪᠡᠳ ᠦᠳ ᠬᠦᠮᠦᠨ ᠦ᠌ ᠭᠠᠪᠠᠯᠠ ᠪᠠᠷ ᠲᠠᠮᠠᠷᠤ ᠶᠤᠮ ᠤᠤ ᠪᠠᠳᠢᠷ ᠠᠶᠠᠭᠠ ᠬᠢᠳᠡᠭ ᠲᠤᠬᠠᠢ ᠪᠦᠳᠡᠭᠢ ᠪᠠᠳᠠᠬᠢ ᠰᠣᠨᠣᠰᠤᠭᠰᠠᠨ ᠪᠠᠢᠵᠠᠢ᠃ ᠣᠳᠣ ᠡᠨᠡᠬᠦ ᠵᠢᠩᠵᠸ ᠯᠠᠮᠠ ᠵᠡᠯᠰᠡᠩ ᠲᠡᠭᠦᠨ ᠢ᠋ ᠪᠦᠷ ᠲᠣᠳᠣᠷᠠᠭᠤᠯᠵᠤ ᠣᠢ ᠭᠤᠲᠤᠲᠠᠯᠠ ᠨᠢ ᠶᠠᠷᠢᠵᠤ ᠥᠭᠭᠦᠯᠡ᠃ ᠰᠠᠩᠵᠢ ᠲᠡᠷᠡ ᠰᠡᠳᠦᠪ ᠢ᠋ ᠥᠭᠡᠷᠡᠴᠢᠯᠡᠵᠦ ᠣᠨᠳᠣᠣ ᠶᠠᠭᠤᠮᠠᠨ ᠤ᠋ ᠲᠤᠬᠠᠢ ᠶᠠᠷᠢᠬᠤ ᠶ᠋ᠢᠨ ᠮᠥᠷᠥᠭᠡᠳᠦᠯ ᠪᠣᠯᠵᠤ ᠶᠠᠪᠤᠲᠠᠯᠠ ᠱᠢᠷᠦ ᠰᠣᠪᠤᠳ ᠤᠨ ᠤᠨᠵᠢᠯᠭᠠ ᠲᠠᠢ ᠠᠯᠠᠭ ᠬᠡᠪᠢᠰᠦᠨ ᠬᠣᠷᠮᠣᠢᠪᠴᠢ ᠲᠠᠢ ᠥᠨᠳᠥᠷ ᠭᠤᠸᠠᠯᠢᠭ ᠨᠢᠷᠤᠭᠤ ᠲᠠᠢ᠂ ᠨᠢᠭᠤᠷ ᠲᠠᠭᠠᠨ ᠣ ᠡᠩᠭᠡᠰᠬᠡ ᠪᠤᠶᠤ ᠴᠠᠢ ᠶ᠋ᠢᠨ ᠬᠠᠨᠳᠠ ᠪᠠᠷ ᠪᠣᠳᠣᠭ ᠲᠠᠯᠪᠢᠭᠠ ᠦᠭᠡᠢ᠂ ᠴᠠᠢᠪᠤᠷ ᠶᠠᠭᠠᠨ ᠴᠢᠷᠠᠢ ᠲᠠᠢ ᠪᠦᠰᠡᠭᠦᠢ ᠡᠳᠡᠨ ᠦ᠌ ᠵᠠᠮ ᠳ᠋ᠤ᠌ ᠳᠠᠭᠠᠷᠢᠯᠳᠤᠪᠠ᠃
- ᠬᠦᠢ ᠡ᠂ ᠡᠨᠡ ᠪᠦᠰᠡᠭᠦᠢ ᠯᠠᠯᠤ ᠶ᠋ᠢᠨ ᠰᠢᠲᠦᠯᠭᠡᠲᠡᠨ ᠶᠦᠮ ᠪᠣᠯᠪᠠ ᠤᠤ? ᠭᠡᠵᠦ ᠰᠠᠩᠵᠢ ᠰᠡᠮᠬᠡᠨ ᠰᠢᠪᠡᠨᠡᠨ ᠵᠠᠯᠰᠠᠩ ᠠ᠋ᠴᠠ ᠠᠰᠠᠭᠤᠯᠠ᠃
- ᠴᠢ ᠶᠠᠭᠤ ᠶ᠋ᠢ ᠨᠢ ᠰᠣᠨᠢᠷᠬᠠᠭᠠᠳ ᠲᠡᠭᠡᠵᠦ ᠠᠰᠠᠭᠤᠪᠠ? ᠭᠡᠵᠦ ᠵᠡᠯᠰᠡᠩ ᠪᠠᠢᠴᠠᠭᠠᠬᠤ ᠳ᠋ᠤ᠌:
- ᠪᠤᠷᠬᠠᠨ ᠰᠢᠲᠦᠳᠡᠭ ᠪᠣᠯ ᠲᠡᠷᠡ ᠨᠢᠭᠤᠷ ᠢᠶᠠᠨ ᠴᠠᠢ ᠶ᠋ᠢᠨ ᠬᠠᠨᠳᠠ ᠪᠠᠷ ᠬᠦᠷᠡᠩᠲᠦᠭᠦᠯᠦᠨ ᠪᠤᠳᠤᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠭᠡᠲᠡᠯᠡ ᠴᠠᠭᠠᠨ ᠶᠠᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠨᠠ᠃ ᠯᠠᠪ ᠯᠠᠯᠤ ᠶ᠋ᠢᠨ ᠰᠢᠲᠦᠯᠭᠡᠲᠡᠨ ᠪᠠᠢᠬᠠ ᠭᠡᠵᠦ ᠰᠠᠩᠵᠢ ᠨᠥᠭᠦᠭᠡ ᠬᠡᠦᠬᠡᠨ ᠢ᠋ ᠬᠠᠷᠠᠴᠠ ᠪᠠᠷ ᠢ᠋ᠶ᠋ᠠᠨ ᠦᠳᠡᠬᠦ ᠵᠠᠭᠤᠷᠠ ᠬᠡᠯᠡᠬᠦ ᠳ᠋ᠤ᠌ ᠵᠡᠯᠰᠡᠩ :
- ᠵᠣᠯᠢᠭ ᠮᠢᠨᠢ᠂ ᠴᠢᠮᠠ ᠳ᠋ᠤ᠌ ᠡᠨᠡ ᠬᠡᠦᠬᠡᠨ ᠦ᠌ ᠠᠭᠠᠯᠢᠭᠦᠢ ᠴᠠᠭᠠᠨ ᠴᠢᠷᠠᠢ ᠰᠣᠨᠢᠨ ᠪᠠᠢᠵᠠᠢ! ᠨᠠᠳᠠ ᠳ᠋ᠤ᠌ ᠪᠣᠯ ᠣᠭᠲᠣ ᠥᠭᠡᠷᠡ ᠶᠠᠭᠤᠮᠠ ᠨᠢ ᠰᠣᠨᠢᠨ ᠪᠠᠢᠨᠠ ᠭᠡᠳ ᠬᠡᠦᠬᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠡᠷᠭᠢᠨ ᠠᠯᠬᠤᠯᠠᠪᠠ᠃
ᠴᠠᠢ ᠶ᠋ᠢᠨ ᠬᠠᠨᠳᠠ ᠪᠠᠷ ᠨᠢᠭᠤᠷ ᠢᠶᠠᠨ ᠬᠦᠷᠡᠩᠲᠦᠭᠦᠯᠵᠦ ᠪᠣᠳᠣᠭᠠ ᠦᠭᠡᠢ ᠪᠣᠯ ᠲᠥᠪᠡᠳ ᠬᠡᠦᠬᠡᠨ ᠢ ᠱᠠᠯᠢᠭ ᠵᠠᠪᠬᠠᠢ ᠶᠠᠪᠤᠳᠠᠯᠲᠠᠨ ᠡᠰᠡᠪᠡᠯ ᠯᠠᠯᠤ ᠶ᠋ᠢᠨ ᠱᠠᠰᠢᠨᠲᠠᠨ ᠭᠡᠵᠦ ᠦᠵᠡᠳᠡᠭ ᠢ᠋ ᠰᠠᠩᠵᠢ ᠮᠡᠳᠡᠬᠦ ᠪᠣᠯᠤᠭᠰᠠᠨ ᠲᠤᠯᠠ ᠲᠡᠷᠡ ᠬᠡᠦᠬᠡᠨ ᠢ᠋ ᠠᠭᠠᠯᠢᠭᠦᠢ ᠴᠠᠭᠠᠨ ᠴᠢᠷᠠᠢ ᠲᠠᠢ ᠭᠡᠰᠡᠨ ᠳ᠋ᠦ᠍ ᠦᠭᠡ ᠰᠥᠷᠡᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠵᠡᠯᠰᠡᠩ ᠲᠡᠷᠡ ᠬᠡᠦᠬᠡᠨ ᠦ᠌ ᠶᠠᠭᠤ ᠶ᠋ᠢ ᠰᠣᠨᠢᠷᠬᠠᠵᠤ ᠪᠠᠢᠭᠠ ᠶ᠋ᠢ ᠲᠠᠭᠠᠭᠠ ᠦᠭᠡᠢ ᠲᠤᠯᠠ ᠡᠷᠡᠭᠡᠯᠵᠡᠨ ᠭᠠᠢᠬᠠᠵᠤ ᠬᠣᠢᠨᠠ ᠠ᠋ᠴᠠ ᠨᠢ ᠳᠠᠭᠠᠨ ᠶᠠᠪᠤᠯᠠ᠃ ᠲᠡᠭᠡᠲᠡᠯᠡ ᠬᠡᠦᠬᠡᠨ ᠵᠣᠭ ᠲᠤᠰᠴᠤ ᠫᠢᠯᠠᠩ ᠳᠠᠪᠤᠤ ᠵᠠᠷᠤᠵᠤ ᠪᠠᠢᠭᠠ ᠨᠠᠢᠢᠮᠠᠭᠠᠴᠢᠨ ᠲᠠᠢ ᠦᠨᠡ ᠬᠠᠶᠠᠯᠴᠠᠵᠤ ᠡᠬᠢᠯᠡᠪᠡ᠃ ᠠᠩᠭ᠌ᠯᠢ ᠤᠯᠤᠰ ᠢ᠋ ᠲᠥᠪᠡᠳ ᠦ᠋ᠳ ᠫᠢᠯᠠᠩ ᠭᠡᠳᠡᠭ ᠶᠦᠮ᠃ ᠫᠢᠯᠠᠩ ᠳᠠᠪᠤᠤ ᠶ᠋ᠢ ᠴᠢᠨᠠᠷ ᠲᠠᠢ ᠭᠡᠵᠦ ᠲᠦᠪᠡᠳ ᠬᠡᠦᠬᠡᠨ ᠨᠦ᠍ᠭᠦᠳ ᠦᠨᠡᠯᠡᠳᠡᠭ ᠠᠵᠢ᠃ ᠵᠡᠯᠰᠡᠩ ᠵᠢᠨᠵᠦᠭ ᠨᠥᠭᠥᠭᠡᠬᠢ ᠬᠡᠦᠬᠡᠨ ᠦ᠌ ᠠᠷᠤᠬᠠᠨ ᠲᠠᠯᠠ ᠳ᠋ᠤ᠌ ᠵᠣᠭ ᠲᠣᠰᠣᠭᠠᠳ ᠡᠷᠭᠢᠵᠦ ᠰᠠᠩᠵᠢ ᠶ᠋ᠢ ᠳᠠᠯᠠᠯᠤᠨ ᠬᠦᠷᠴᠦ ᠣᠴᠢᠬᠤ ᠳ᠋ᠤ᠌ ᠨᠢ ᠴᠢᠬᠢᠨ ᠳᠡᠭᠡᠷᠡ ᠨᠢ ᠬᠣᠰᠢᠭᠤ ᠪᠡᠨ ᠴᠣᠷᠪᠣᠢᠵᠤ ᠰᠢᠪᠡᠭᠡᠨᠡᠨ:
- ᠬᠠᠷᠠᠭᠠᠴᠢ ᠴᠢ ᠡᠭᠦᠨ ᠦ᠌ ᠰᠢᠯᠪᠢ ᠶ᠋ᠢ! ᠪᠢ ᠡᠭᠦᠨ ᠢ᠋ ᠯᠡ ᠰᠣᠨᠢᠷᠬᠠᠵᠤ ᠪᠠᠢᠨᠠ ᠭᠡᠪᠡ᠃ ᠰᠠᠩᠵᠢ ᠭᠡᠰᠦᠯ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠨᠥᠭᠥᠭᠡᠬᠢ ᠬᠡᠦᠬᠡᠨ ᠦ᠌ ᠴᠢᠭᠢᠷᠠᠭ ᠪᠤᠯᠴᠢᠩ ᠲᠠᠢ ᠬᠥᠯ ᠦ᠋ᠨ ᠰᠢᠯᠪᠢ ᠤᠷᠤᠭᠤ ᠵᠡᠷᠪᠡᠰ ᠬᠠᠷᠠᠯᠠ᠃ ᠨᠠᠷᠢᠨ ᠭᠣᠸᠠᠯᠢᠭ ᠲᠡᠭᠰᠢᠬᠡᠨ ᠰᠢᠯᠪᠢ ᠲᠡᠢ ᠬᠥᠯ ᠳ᠋ᠡᠭᠡᠨ ᠫᠢᠯᠠᠩ ᠱᠠᠬᠠᠢ ᠡᠮᠦᠰᠴᠡᠢ᠃
- ᠡᠭᠦᠨ ᠦ᠌ ᠰᠢᠯᠪᠢ ᠡᠢᠮᠦ ᠭᠤᠸᠠᠯᠢᠭ ᠲᠤᠯᠠ ᠳᠤᠮᠳᠠ ᠴᠢᠮᠥᠭᠡ ᠪᠡᠷ ᠨᠢ ᠭᠠᠩᠯᠢᠩ ᠬᠢᠬᠦ ᠰᠡᠨ᠂ ᠲᠡᠭᠡᠪᠡᠯ ᠴᠣ ᠮᠥᠨ ᠁ ᠭᠡᠵᠦ ᠵᠡᠯᠰᠡᠩ ᠰᠠᠩᠵᠢ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍ ᠰᠢᠪᠡᠭᠡᠨᠡᠵᠡᠢ᠃ ᠭᠡᠨᠡᠳᠲᠡ ᠶ᠋ᠢᠨ ᠡᠨᠡ ᠦᠬᠡᠨ ᠳ᠋ᠦ᠍ ᠭᠡᠰᠦᠯ ᠵᠣᠯ ᠲᠠᠢ ᠯᠠ ᠮᠠᠭᠤᠷᠠᠵᠤ ᠤᠨᠠᠭᠰᠠᠨ ᠦᠭᠡᠢ᠃ ᠬᠡᠦᠬᠡᠨ ᠡᠨᠡ ᠶᠠᠷᠢᠭᠠ ᠶ᠋ᠢ ᠰᠣᠨᠣᠰᠴᠢᠬᠠᠬᠤ ᠪᠤᠢ ᠭᠡᠬᠦ ᠡᠴᠡ ᠶᠠᠰᠤ ᠨᠢ ᠬᠠᠪᠲᠠᠢᠬᠤ ᠮᠡᠲᠦ ᠪᠣᠯᠵᠤ ᠰᠠᠩᠵᠢ ᠱᠠᠯᠠᠪᠬᠠᠨ ᠥᠭᠡᠷᠡ ᠳᠠᠰᠢ ᠪᠠᠨ ᠡᠷᠭᠢᠨ ᠬᠦᠮᠦᠰ ᠲᠡᠢ ᠴᠢᠬᠢᠯᠳᠤᠨ ᠬᠣᠯᠠᠳᠪᠠ᠃ ᠰᠠᠩᠵᠢ ᠶ᠋ᠢ ᠠᠯᠳᠠᠴᠢᠬᠠᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠵᠤ ᠵᠡᠯᠰᠡᠩ ᠵᠢᠨᠵᠦᠭ ᠮᠥᠨ ᠯᠡ ᠤᠬᠤᠰᠬᠢᠨ ᠬᠥᠮᠦᠰ ᠲᠡᠢ ᠴᠢᠭᠢᠴᠢᠯᠳᠦᠵᠦ᠂ ᠭᠦᠢᠴᠡᠨ ᠢᠷᠡᠭᠡᠳ ᠭᠠᠷ ᠠ᠋ᠴᠠ ᠨᠢ ᠠᠳᠬᠤᠨ ᠠᠪᠴᠤ:
- ᠴᠢ ᠶᠠᠭᠠᠬᠢᠴᠢᠬᠠᠪᠠ ᠡ ! ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠳᠡᠯᠳᠢᠴᠢᠵᠦ ᠪᠠᠢᠳᠠᠭ ᠶᠤᠮ ᠪᠣᠢ? ᠭᠡᠬᠦ ᠳ᠋ᠦ᠍ ᠨᠢ ᠰᠠᠩᠵᠢ:
- ᠲᠠ ᠲᠠᠩᠳᠠ ᠯᠠ ᠬᠥᠮᠦᠨ ᠦ᠌ ᠶᠠᠰᠤᠨ ᠳ᠋ᠤ᠌ ᠰᠢᠨᠤᠵᠤ ᠪᠠᠢᠬᠤ ᠶᠤᠮ᠃ ᠡᠨᠡ ᠴᠢᠨᠢ ᠶᠡᠬᠡ ᠠᠯᠳᠠᠰ ᠪᠣᠯᠣᠨᠠ ᠳ᠋ᠠ ᠭᠡᠪᠡ᠃
- ᠶᠠᠭᠠᠬᠢᠯᠠ ᠭᠡᠵᠦ ᠳᠡ᠃ ᠪᠤᠷᠬᠠᠨ ᠨᠣᠮ ᠤ᠋ᠨ ᠦᠢᠯᠡ ᠪᠦᠲᠦᠭᠡᠬᠦ ᠲᠤᠬᠠᠢ ᠯᠠ ᠪᠢ ᠪᠣᠳᠣᠵᠤ ᠶᠠᠪᠤᠨᠠ ᠳᠠ᠃ ᠴᠢ ᠨᠠᠮᠠᠶ᠋ᠢ ᠵᠠᠬᠠ ᠳᠡᠭᠡᠷᠡ ᠨᠠᠢᠮᠠᠭᠠ ᠥᠰᠥᠷᠬᠡᠬᠦ ᠪᠡᠷ ᠭᠠᠷᠤᠯᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ?ᠦᠭᠡᠢ ᠰᠢᠦ! ᠪᠤᠷᠬᠠᠨ ᠤ᠋ ᠦᠢᠯᠡ ᠶ᠋ᠢᠨ ᠲᠥᠯᠥᠭᠡ ᠯᠡ ᠡᠷᠢᠯ ᠬᠠᠢᠭᠤᠯ ᠬᠢᠵᠦ ᠶᠠᠪᠤᠨᠠ ᠁ ᠭᠡᠵᠦ ᠵᠡᠯᠰᠡᠩ ᠬᠡᠨᠡᠭ ᠴᠤ᠌ ᠦᠭᠡᠢ ᠶᠠᠷᠢᠯᠠ᠃ ᠰᠠᠩᠵᠢ ᠭᠡᠰᠦᠯ:
- ᠪᠢ ᠲᠡᠢᠮᠦ ᠨᠢᠭᠦᠯ ᠲᠠᠢ ᠬᠠᠢᠭᠤᠯ ᠳ᠋ᠤ᠌ ᠣᠷᠣᠯᠴᠠᠬᠤ ᠳᠤᠷᠠ ᠦᠭᠡᠢ ᠪᠠᠢᠨᠠ ᠂ ᠬᠠᠷᠢᠬᠤ ᠪᠡᠷ ᠪᠤᠴᠠᠯᠠ ᠵᠠᠬᠠ ᠶ᠋ᠢᠨ ᠲᠥᠪ ᠡᠴᠡ ᠭᠠᠷᠬᠤ ᠶ᠋ᠢ ᠵᠠᠪᠳᠤᠪᠠ᠃
ᠵᠡᠯᠰᠡᠩ ᠲᠡᠭᠦᠨ ᠳ᠋ᠦ᠍ ᠥᠭᠡᠷᠡ ᠶᠠᠭᠤᠮᠠ ᠬᠡᠯᠡᠭᠰᠡᠨ ᠦᠭᠡᠢ ᠠᠷᠤ ᠠ᠋ᠴᠠ ᠨᠢ ᠳᠤᠷᠠ ᠲᠠᠢ ᠳᠤᠷᠠ ᠦᠭᠡᠢ ᠳᠠᠭᠠᠵᠤ ᠶᠠᠪᠤᠯᠠ᠃ ᠲᠡᠭᠡᠲᠡᠯᠡ ᠨᠢᠭᠡᠨ ᠶᠡᠬᠡ ᠱᠤᠤᠭᠢᠶᠠᠨ ᠳᠡᠭᠳᠡᠵᠦ ᠬᠥᠮᠦᠰ ᠰᠢᠪᠠᠭᠠᠷᠠᠯᠳᠤᠵᠤ᠂ ᠣᠷᠢᠯᠠᠭᠤ ᠳᠠᠭᠤ ᠲᠠᠯᠪᠢᠬᠤ ᠰᠣᠨᠣᠰᠳᠠᠪᠠ᠃
- ᠬᠤᠯᠠᠭᠠᠢᠴᠢ! ᠬᠤᠯᠠᠭᠠᠢᠴᠢ! ᠭᠡᠬᠦ ᠳᠠᠭᠤ ᠰᠠᠩᠵᠢ ᠳ᠋ᠤ᠌ ᠲᠣᠳᠣᠬᠠᠨ ᠰᠣᠨᠣᠰᠤᠭᠳᠠᠵᠤ ᠪᠠᠢᠯᠠ᠃
《ᠶᠠᠮᠠᠷ ᠨᠢᠭᠡᠨ ᠬᠥᠮᠦᠨ ᠬᠤᠯᠠᠭᠠᠢ ᠬᠢᠬᠦ ᠶ᠋ᠢ ᠵᠠᠪᠳᠤᠭᠠᠳ ᠪᠠᠷᠢᠭᠳᠠᠵᠤ ᠳᠠ᠃ ᠡᠨᠡ ᠲᠦᠪᠡᠳ ᠭᠠᠵᠠᠷ ᠬᠤᠯᠠᠭᠠᠢᠴᠢ ᠬᠥᠮᠦᠨ ᠳ᠋ᠤ᠌ ᠶᠡᠬᠡ ᠬᠠᠲᠠᠭᠤ ᠰᠢᠳᠬᠡᠯ ᠦᠵᠡᠭᠦᠯᠳᠡᠭ ᠪᠣᠯᠬᠣᠷ ᠬᠤᠯᠠᠭᠠᠢ ᠳ᠋ᠤ᠌ ᠪᠠᠷᠢᠭᠳᠠᠭᠰᠠᠨ ᠬᠥᠮᠦᠨ ᠴᠣ ᠵᠣᠪᠠᠨᠠ ᠪᠢᠵᠡ ᠳᠡ》 ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ ᠶᠠᠪᠤᠯᠠ᠃ ᠦᠨᠡᠬᠡᠷ ᠬᠤᠯᠠᠭᠠᠢᠴᠢ ᠶ᠋ᠢ ᠪᠠᠷᠢᠭᠠᠳ ᠲᠠᠭᠤᠵᠤ ᠶᠠᠪᠤᠭᠠ ᠬᠥᠮᠦᠰ ᠲᠡᠢ ᠲᠡᠳᠡ ᠳᠠᠭᠠᠷᠢᠯᠳᠤᠵᠠᠢ᠃ ᠦᠰᠦ ᠶ᠋ᠢ ᠨᠢ ᠭᠥᠯᠢᠢᠲᠡᠯᠡ ᠬᠤᠰᠴᠢᠬᠠᠭᠰᠠᠨ ᠤᠭᠤᠯᠢᠨ ᠲᠣᠯᠣᠭᠠᠢ ᠲᠠᠢ ᠵᠠᠯᠠᠭᠤᠬᠠᠨ ᠡᠷᠡ ᠶ᠋ᠢ ᠭᠠᠷ ᠬᠥᠯ ᠢ᠋ᠶ᠋ᠡᠷ ᠨᠢ ᠳᠥᠩᠭᠡᠯᠡᠭᠡᠳ ᠲᠠᠭᠤᠵᠤ ᠶᠠᠪᠤᠭᠠ ᠦᠵᠡᠭᠳᠡᠪᠡ᠃ ᠲᠡᠭᠦᠨ ᠦ᠌ ᠬᠦᠵᠦᠭᠦᠨ ᠡᠴᠡ ᠲᠣᠮᠣ ᠬᠠᠷᠠ ᠴᠢᠯᠠᠭᠤ ᠳᠡᠭᠡᠰᠦ ᠪᠡᠷ ᠣᠷᠢᠶᠠᠨ ᠵᠡᠭᠦᠵᠡᠢ᠃ ᠭᠣᠣᠯ ᠤ᠋ᠨ ᠤᠰᠤᠨ ᠳ᠋ᠤ᠌ ᠵᠢᠪᠦᠭᠦᠯᠵᠦ ᠲᠣᠨᠢᠯᠭᠠᠬᠤ ᠬᠥᠮᠦᠨ ᠢ ᠢᠩᠭᠢᠵᠦ ᠬᠦᠵᠦᠭᠦᠨ ᠡᠴᠡ ᠨᠢ ᠴᠢᠯᠠᠭᠤ ᠵᠡᠭᠦᠵᠦ ᠵᠠᠬᠠ ᠳᠤᠮᠳᠠᠭᠤᠷ ᠲᠠᠭᠤᠵᠤ ᠭᠠᠷᠳᠠᠭ ᠢ᠋ ᠰᠠᠩᠵᠢ ᠤᠷᠢᠳᠤ ᠨᠢ ᠣᠯᠠᠨᠲᠠ ᠰᠣᠨᠣᠰᠤᠭᠰᠠᠨ ᠪᠢᠯᠡ᠃
- ᠨᠢᠭᠦᠯ ᠨᠢ ᠴᠠᠰᠢ ᠤᠯᠠᠮ ᠵᠤᠵᠠᠭᠠᠷᠠᠬᠤ ᠠ᠋ᠴᠠ ᠡᠭᠦᠨ ᠢ᠋ ᠠᠪᠤᠷᠠᠬᠤ ᠭᠡᠵᠦ ᠪᠠᠢᠭᠠ ᠶᠤᠮᠰᠠᠨᠵᠡᠢ ᠭᠡᠵᠦ ᠵᠡᠯᠰᠡᠩ ᠠᠮᠠᠨ ᠳ᠋ᠠᠭᠠᠨ ᠦᠭᠦᠯᠡᠭᠰᠡᠨ ᠢ᠋ᠶ᠋ᠡᠨ:
- ᠬᠦᠢ ᠴᠢ ᠡᠭᠦᠨ ᠦ᠌ ᠭᠠᠪᠠᠯᠠ ᠶ᠋ᠢ ᠬᠠᠷᠠᠭᠠᠴᠢ! ᠪᠡᠯᠡᠨ ᠲᠠᠮᠠᠷᠤ! ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠨᠢ ᠰᠠᠩᠵᠢ ᠲᠡᠭᠦᠨ ᠢ᠋ ᠴᠣᠬᠢᠭᠠᠳ ᠠᠪᠤᠮᠠᠷ ᠰᠠᠨᠠᠭᠳᠠᠪᠠ᠃ ᠦᠨᠡᠬᠡᠷ ᠲᠡᠷᠡ ᠬᠤᠯᠠᠭᠠᠢᠴᠢ ᠡᠷᠡ ᠶ᠋ᠢᠨ ᠭᠠᠪᠠᠯᠠ ᠠᠷᠤ ᠲᠡᠰᠢ ᠪᠡᠨ ᠴᠤᠢᠯᠠᠳᠠᠵᠤ ᠣᠷᠣᠭᠰᠠᠨ ᠰᠣᠨᠢᠨ ᠬᠡᠯᠪᠡᠷᠢ ᠲᠡᠢ ᠦᠵᠡᠭᠳᠡᠯᠡ᠃ ᠵᠡᠯᠰᠡᠩ:
- ᠵᠠ ᠡᠭᠦᠨ ᠢ᠋ ᠯᠠᠪ ᠯᠠ ᠦᠢᠴᠦᠦ ᠮᠥᠷᠡᠨ ᠳ᠋ᠦ᠍ ᠦᠢᠯᠭᠡᠵᠦ ᠴᠠᠰᠢ ᠬᠠᠷᠠᠭᠤᠯᠬᠤ ᠪᠠᠷ ᠠᠪᠴᠤ ᠶᠠᠪᠤᠭᠠ ᠪᠠᠢᠬᠠ᠃ ᠡᠭᠦᠨ ᠢ᠋ ᠳᠠᠭᠠᠳᠠᠭ ᠨᠢ ᠵᠥᠪ᠃ ᠬᠢᠮᠳᠠᠬᠠᠨ ᠲᠠᠮᠠᠷᠣ ᠲᠡᠢ ᠪᠣᠯᠤᠨᠠ᠃ ᠥᠨᠥᠳᠥᠷ ᠵᠠᠬᠠ ᠳᠡᠭᠡᠷᠡ ᠢᠷᠡᠭᠰᠡᠨ ᠦ᠌ ᠬᠡᠷᠡᠭ ᠪᠦᠲᠦᠬᠦ ᠪᠢᠵᠡ᠃ ᠬᠣᠶᠠᠭᠤᠯᠠ ᠪᠠᠨ ᠡᠭᠦᠨ ᠢ ᠳᠠᠭᠠᠶᠠ ᠭᠡᠬᠦ ᠳ᠋ᠦ᠍ ᠰᠠᠩᠵᠢ ᠨᠢᠳᠤᠷᠭᠠ ᠪᠠᠨ ᠵᠠᠩᠭᠢᠳᠤᠨ ᠳᠤᠷᠠ ᠦᠭᠡᠢᠴᠡᠵᠦ:
- ᠳᠡᠮᠡᠢ ᠴᠠᠯᠴᠢ! ᠪᠢ ᠯᠡ ᠴᠢᠮᠠ ᠲᠠᠢ ᠬᠠᠮᠲᠤ ᠶᠠᠪᠤᠬᠤ ᠦᠭᠡᠢ ᠲᠡᠭ᠃ ᠨᠢᠭᠦᠯᠲᠦ ᠬᠠᠷᠠ ᠮᠢᠨᠢ! ᠭᠡᠳ ᠥᠭᠡᠷᠡ ᠵᠦᠭ ᠲᠦ᠍ ᠵᠢᠭᠤᠲᠠᠭᠠᠬᠤ ᠲᠣᠭᠠᠨ ᠤ᠋ ᠭᠦᠶᠦᠯᠡ᠃
- ᠪᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠪᠤᠬᠤ ᠮᠢᠨᠢ᠃ ᠡᠭᠦᠨ ᠢ᠋ ᠨᠢᠭᠡᠨᠲᠡ ᠲᠣᠨᠢᠯᠭᠠᠬᠤ ᠪᠠᠷ ᠪᠣᠯᠤᠭᠰᠠᠨ ᠪᠠᠢᠨᠠ᠃ ᠡᠢᠮᠦ ᠳ᠋ᠦ᠍ ᠪᠤᠷᠬᠠᠨ ᠳ᠋ᠤ᠌ ᠥᠭᠯᠢᠭᠡ ᠪᠡᠨ ᠥᠭᠭᠦᠭᠡᠳ ᠲᠣᠨᠢᠯᠤᠨᠠ ᠪᠢᠵᠡ᠃ ᠪᠢ ᠴᠢᠮᠠ ᠲᠠᠢ ᠴᠢᠮᠠ ᠦᠭᠡᠢ ᠵᠠᠮ ᠢᠶᠠᠨ ᠮᠡᠳᠡᠨᠡ᠃ ᠬᠤᠯᠴᠢᠭᠠᠷ ᠡᠷᠡ ᠪᠣᠢ? ᠭᠡᠵᠦ ᠵᠡᠯᠰᠡᠩ ᠬᠡᠯᠡᠭᠡᠳ ᠨᠥᠭᠥᠭᠡᠬᠢ ᠬᠤᠯᠠᠭᠠᠢᠴᠢ ᠲᠠᠭᠤᠭᠰᠠᠨ ᠪᠥᠭᠡᠮ ᠬᠦᠮᠦᠨ ᠦ᠌ ᠠᠷᠤ ᠠ᠋ᠴᠠ ᠶᠠᠪᠤᠯᠠ᠃
ᠰᠠᠩᠵᠢ ᠶ᠋ᠢᠨ ᠣᠢ ᠭᠤᠲᠤᠵᠤ᠂ 《ᠦᠬᠦᠪᠡᠴᠦ ᠭᠠᠩᠯᠢᠩᠴᠢ ᠪᠣᠯᠬᠤ ᠪᠠᠨ ᠪᠣᠯᠢᠶᠠ᠃ ᠶᠠᠭᠠᠬᠢᠭ᠍ᠰᠠᠨ ᠡᠪ ᠦᠭᠡᠢ ᠪᠤᠵᠠᠷ ᠶᠤᠮ ᠪᠣᠢ? ᠶᠠᠭᠠᠬᠢᠵᠤ ᠡᠢᠭᠡᠳ ᠯᠡ ᠭᠠᠩᠯᠢᠩᠴᠢ ᠶ᠋ᠢᠨ ᠠᠵᠢᠯ ᠠ᠋ᠴᠠ ᠵᠠᠢᠯᠠᠶᠠ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ ᠬᠠᠲᠠᠭᠤ ᠰᠢᠢᠳᠦᠯᠠ᠃ ᠵᠢᠨᠵᠦᠭ ᠵᠡᠯᠰᠡᠩ ᠬᠣᠨᠢ ᠳᠠᠭᠠᠭᠰᠠᠨ ᠨᠣᠬᠠᠢ ᠠᠳᠠᠯᠢ ᠶᠠᠯᠠᠲᠠᠨ ᠤ ᠠᠷᠤ ᠠ᠋ᠴᠠ ᠲᠣᠢᠲᠣᠭᠣᠨᠠᠨ ᠠᠯᠬᠤᠭᠰᠠᠭᠠᠷ ᠨᠢᠳᠦᠨ ᠡᠴᠡ ᠳᠠᠯᠳᠠ ᠣᠷᠣᠵᠠᠢ᠃ ᠬᠥᠮᠦᠨ ᠦ᠌ ᠶᠠᠰᠤᠨ ᠳ᠋ᠤ᠌ ᠰᠢᠨᠤᠭᠰᠠᠨ ᠲᠡᠭᠦᠨ ᠦ᠌ ᠮᠠᠭᠤᠬᠠᠢ ᠵᠠᠩ ᠳ᠋ᠤ᠌ ᠰᠠᠩᠵᠢ ᠭᠡᠰᠦᠯ ᠦᠨᠡᠬᠡᠷ ᠳᠤᠷᠠ ᠦᠭᠡᠢ ᠨᠢ ᠬᠦᠷᠴᠦ ᠵᠢᠬᠡᠭᠦᠳᠡᠰᠦ ᠳ᠋ᠤ᠌ ᠡᠵᠡᠯᠡᠭᠳᠡᠵᠡᠢ᠃