ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ < ᠵᠢᠷᠠᠨ ᠲᠠᠪᠤᠳᠤᠭᠠᠷ ᠪᠦᠯᠦᠭ > Хөх судар - Инжинаш < Жаран тавдугаар бүлэг >
330ᠪᠠᠳᠠᠷᠠᠬᠤ ᠮᠣᠩᠭᠣᠯ ᠤ᠋ᠨ ᠪᠠᠭᠠᠲᠤᠷ ᠶᠤᠸᠠᠨᠱᠤᠸᠠᠢ ᠪᠤᠯᠤ ᠰᠥᠪᠡᠭᠡᠲᠡᠢ ᠨᠠᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠪᠢᠶᠠᠨ ᠯᠢᠶᠠᠩ ᠪᠠᠯᠭᠠᠰᠤᠨ ᠢ᠋ ᠪᠠᠢᠯᠳᠤᠨ ᠠᠪᠤᠪᠠ
ᠪᠠᠷᠠᠭᠳᠠᠬᠤ ᠠᠯᠲᠠᠨ ᠤ᠋ ᠪᠠᠷᠳᠠᠮ ᠵᠠᠩᠵᠤᠨ ᠫᠦ᠋ ᠴᠠ ᠭᠤᠸᠠᠨ ᠨᠥ᠍ ᠨᠠᠷ ᠡᠵᠡᠨ ᠬᠠᠭᠠᠨ ᠢ᠋ᠶ᠋ᠠᠨ ᠵᠣᠣ ᠪᠢ ᠳᠠᠩ ᠣᠷᠳᠣᠨ ᠳ᠋ᠤᠷ ᠬᠣᠷᠢᠪᠠ
ᠬᠠᠷᠠᠭᠴᠢᠨ ᠮᠣᠭᠠᠢ ᠵᠢᠯ ᠂ ᠶᠡᠬᠡ ᠬᠥᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠥᠭᠡᠳᠡᠢ ᠬᠠᠭᠠᠨ ᠲᠠᠢᠽᠦ᠋ᠩ ᠦ᠋ᠨ
ᠲᠠᠪᠤᠳᠤᠭᠠᠷ ᠣᠨ᠂ ᠰᠥᠩ ᠤᠯᠤᠰ ᠤ᠋ᠨ ᠯᠢᠽᠦ᠋ᠩ ᠬᠠᠭᠠᠨ ᠵᠣᠣ ᠶᠦᠨ ᠦ᠌ ᠱᠣᠣ ᠳ᠋ᠢᠩ ᠦ᠋ᠨ
ᠵᠢᠷᠭᠤᠳᠤᠭᠠᠷ ᠣᠨ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠠᠢᠽᠦ᠋ᠩ ᠬᠠᠭᠠᠨ ᠱᠧᠦ ᠰᠢᠦᠢ ᠶ᠋ᠢᠨ ᠲᠢᠶᠠᠨ ᠰᠢᠩ ᠦ᠋ᠨ
ᠬᠣᠶᠠᠳᠤᠭᠠᠷ ᠣᠨ᠂ ᠲᠠᠢᠽᠦ᠋ᠩ ᠬᠠᠭᠠᠨ ᠳᠥᠴᠢᠨ ᠨᠠᠢ᠍ᠮᠠᠨ ᠰᠡᠭᠦᠳᠡᠷ ᠲᠡᠢ
ᠪᠠᠳᠠᠷᠠᠬᠤ ᠮᠣᠩᠭᠣᠯ ᠤ᠋ᠨ ᠪᠠᠭᠠᠲᠤᠷ ᠶᠤᠸᠠᠨᠱᠤᠸᠠᠢ ᠪᠤᠯᠤ ᠰᠥᠪᠡᠭᠡᠲᠡᠢ ᠨᠠᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠪᠢᠶᠠᠨ ᠯᠢᠶᠠᠩ ᠪᠠᠯᠭᠠᠰᠤᠨ ᠢ᠋ ᠪᠠᠢᠯᠳᠤᠨ ᠠᠪᠤᠪᠠ
ᠪᠠᠷᠠᠭᠳᠠᠬᠤ ᠠᠯᠲᠠᠨ ᠤ᠋ ᠪᠠᠷᠳᠠᠮ ᠵᠠᠩᠵᠤᠨ ᠫᠦ ᠴᠠ ᠭᠤᠸᠠᠨ ᠨᠥ᠍ ᠨᠠᠷ ᠡᠵᠡᠨ ᠬᠠᠭᠠᠨ ᠢ᠋ᠶ᠋ᠠᠨ ᠵᠣᠣ ᠪᠢ ᠳᠠᠩ ᠣᠷᠳᠣᠨ ᠳ᠋ᠤᠷ ᠬᠣᠷᠢᠪᠠ
ᠲᠡᠨᠳᠡᠴᠡ ᠬᠠᠪᠤᠷ ᠤ᠋ᠨ ᠲᠡᠷᠢᠭᠦᠨ ᠰᠠᠷᠠ ᠳ᠋ᠤᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠸᠠᠨ ᠶᠠᠨ ᠱᠧᠦ ᠰᠢᠦᠢ ᠲᠦᠰᠢᠮᠡᠯ ᠵᠠᠷᠤᠵᠤ᠂ ᠬᠦᠢ ᠳᠧ ᠹᠦ ᠶ᠋ᠢᠨ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠱᠢ ᠵᠠᠨ ᠢᠦᠢ ᠯᠦ᠍ ᠬᠤᠸᠠᠨ ᠠ᠋ᠴᠠ ᠨᠢᠭᠡᠨ ᠮᠢᠩᠭᠠᠨ ᠲᠠᠪᠤᠨ ᠵᠠᠭᠤᠨ ᠲᠠᠭᠠᠷ ᠠᠮᠤ ᠠᠪᠴᠢᠷᠠᠭᠤᠯᠤᠨ ᠣᠯᠠᠨ ᠴᠡᠷᠢᠭ ᠲᠦ᠍ᠷ ᠲᠦᠭᠡᠭᠡᠨ ᠥᠭᠴᠦ ᠹᠧᠩ ᠴᠧᠩ ᠳ᠋ᠦ᠍ᠷ ᠬᠦᠷᠦᠭᠡᠳ ᠬᠣᠶᠠᠷ ᠵᠠᠭᠤᠨ ᠣᠩᠭᠣᠴᠠ ᠦᠯᠡᠳᠡᠭᠡᠨ᠂ ᠣᠩᠭᠣᠴᠠ ᠳ᠋ᠤᠷ ᠪᠥᠰ ᠭᠡᠷ ᠡᠭᠦᠳᠴᠦ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠣᠩᠭᠣᠴᠠ ᠳ᠋ᠤᠷ ᠰᠠᠭᠤᠵᠤ ᠭᠣᠣᠯ ᠢ᠋ ᠭᠡᠲᠦᠯᠬᠦᠢ ᠳ᠋ᠦ᠍ᠷ ᠬᠣᠢᠲᠤ ᠴᠡᠷᠢᠭ ᠶᠡᠬᠡ ᠰᠠᠯᠬᠢᠨ ᠳ᠋ᠤᠷ ᠤᠴᠠᠷᠠᠭᠠᠳ ᠭᠣᠣᠯ ᠢ᠋ ᠭᠡᠲᠦᠯᠦᠨ ᠴᠢᠳᠠᠬᠤ ᠦᠭᠡᠢ ᠪᠥᠬᠥᠶᠡ᠂ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠶᠡᠬᠡ ᠵᠠᠩᠵᠤᠨ ᠰᠥᠪᠡᠬᠡᠲᠡᠢ ᠪᠠᠭᠠᠲᠤᠷ ᠤ᠋ᠨ ᠬᠣᠰᠢᠭᠤᠴᠢ ᠤᠢᠭᠤᠷ ᠴᠡᠷᠢᠭ ᠬᠡᠳᠦᠢᠨᠡᠢ ᠬᠦᠷᠴᠦ ᠢᠷᠡᠭᠡᠳ ᠨᠡᠬᠡᠵᠦ ᠪᠠᠢᠯᠳᠤᠨ ᠡᠮᠦᠨᠡ ᠬᠥᠪᠡᠭᠡ ᠳ᠋ᠦ᠍ᠷ ᠬᠦᠷᠦᠭᠰᠡᠨ ᠳ᠋ᠦ᠍ᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠶᠤᠸᠠᠨᠱᠤᠸᠠᠢ ᠸᠠᠨ ᠶᠠᠨ ᠵᠣ᠌ ᠡᠯ ᠬᠦᠴᠦᠯᠡᠨ ᠪᠠᠢᠯᠳᠤᠵᠤ ᠲᠤᠯᠬᠤᠢ ᠳ᠋ᠤᠷ ᠶᠡᠬᠡ ᠮᠣᠩᠭᠣᠯ ᠤ᠋ᠨ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠬᠡᠳᠦᠢᠨᠡᠢ ᠬᠦᠷᠴᠦ ᠢᠷᠡᠭᠡᠳ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠥᠪᠡᠷ ᠢ᠋ᠶ᠋ᠡᠨ ᠲᠡᠷᠢᠭᠦᠯᠡᠨ ᠣᠷᠣᠵᠤ᠂ ᠠᠯᠲᠠᠨ ᠤ᠋ ᠶᠤᠸᠠᠨᠱᠤᠸᠠᠢ ᠸᠠᠨ ᠶᠠᠨ ᠵᠣ᠌ ᠡᠯ ᠢ᠋ ᠨᠢᠭᠡᠨᠲᠡ ᠴᠠᠪᠴᠢᠵᠤ ᠮᠣᠷᠢᠨ ᠠ᠋ᠴᠠ ᠤᠨᠠᠭᠠᠪᠠ᠃ ᠡᠭᠦᠨ ᠳ᠋ᠦ᠍ᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠰᠥᠰᠥ ᠬᠡᠮᠬᠡᠷᠡᠵᠦ ᠳᠥᠷᠪᠡᠨ ᠵᠦᠭ ᠪᠤᠲᠠᠷᠠᠨ ᠪᠤᠷᠤᠭᠤᠯᠠᠬᠤᠢ ᠳ᠋ᠤᠷ ᠤᠰᠤᠨ ᠢ᠋ ᠭᠡᠲᠦᠯᠦᠭᠰᠡᠨ ᠴᠡᠷᠢᠭ ᠨᠢᠭᠡᠨ ᠮᠢᠩᠭᠠᠨ ᠢᠯᠡᠭᠦᠦ ᠴᠥᠮ ᠤᠰᠤᠨ ᠳ᠋ᠤᠷ ᠴᠠᠴᠠᠵᠤ ᠦᠬᠦᠭᠡᠳ ᠳᠦ ᠢᠦᠢ ᠵᠠᠩᠵᠤᠨ ᠸᠠᠨ ᠶᠠᠨ ᠧ ᠯᠦᠨ ᠴᠦ ᠣᠷᠣᠵᠤ ᠥᠭᠭᠥᠭᠡᠳ ᠦᠯᠡᠭᠰᠡᠨ ᠴᠡᠷᠢᠭ ᠴᠥᠮ ᠮᠣᠩᠭᠣᠯ ᠤᠯᠤᠰ ᠲᠤᠷ ᠳᠠᠭᠠᠪᠠ᠃ ᠡᠭᠦᠨ ᠳ᠋ᠦ᠍ᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠠᠢᠽᠦ᠋ᠩ ᠬᠠᠭᠠᠨ ᠱᠧᠦ ᠰᠢᠦᠢ ᠭᠣᠣᠯ ᠤ᠋ᠨ ᠬᠣᠢᠲᠤ ᠬᠥᠪᠡᠭᠡ ᠳ᠋ᠦ᠍ᠷ ᠪᠠᠢᠬᠤ ᠲᠤᠯᠠ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠨᠡᠬᠡᠨ ᠢᠷᠡᠵᠦ᠂ ᠬᠣᠢᠲᠤ ᠴᠡᠷᠢᠭ ᠨᠢᠭᠡᠨᠲᠡ ᠪᠠᠢᠯᠳᠤᠨ ᠠᠪᠲᠠᠭᠰᠠᠨ ᠳ᠋ᠤᠷ ᠶᠡᠬᠡᠯᠡ ᠠᠶᠤᠵᠤ ᠰᠥᠰᠥ ᠬᠡᠮᠬᠡᠷᠡᠨ ᠳᠠᠷᠤᠢ ᠡᠦ ᠮᠠ ᠭᠠᠩ ᠳᠣᠪᠣ ᠳ᠋ᠤᠷ ᠪᠠᠭᠤᠳᠠᠯᠯᠠᠵᠤ ᠪᠠᠢᠭᠰᠠᠨ ᠪᠠᠢ ᠰᠠ ᠳ᠋ᠤᠷ ᠴᠡᠷᠢᠭ ᠥᠭᠴᠦ ᠮᠣᠩᠭᠣᠯ ᠤ᠋ᠨ ᠸᠧᠢ ᠵᠧᠦ ᠶ᠋ᠢ ᠪᠠᠢᠯᠳᠤᠭᠤᠯᠤᠷᠠ ᠢᠯᠡᠭᠡᠭᠡᠳ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠬᠡᠳᠦᠢᠨᠡᠢ ᠳᠤᠲᠠᠭᠠᠨ ᠬᠦᠢ ᠳᠧ ᠹᠦ ᠳ᠋ᠦ᠍ᠷ ᠵᠣᠷᠢᠪᠠᠢ᠃ ᠡᠨᠡ ᠬᠢᠷᠢ ᠳ᠋ᠦ᠍ᠷ ᠪᠠᠢ ᠰᠠ᠂ ᠸᠧᠢ ᠵᠧᠦ ᠶ᠋ᠢᠨ ᠳᠣᠣᠷᠠ ᠢᠷᠡᠵᠦ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠠᠭᠠᠨ ᠤ᠋ ᠲᠡᠮᠳᠡᠭ ᠲᠤᠭ ᠢ᠋ᠶ᠋ᠠᠷ ᠸᠧᠢ ᠵᠧᠦ ᠶ᠋ᠢᠨ ᠢᠷᠭᠡᠨ ᠢ ᠡᠭᠡᠵᠦ ᠳᠠᠭᠠ ᠭᠡᠮᠡᠨ ᠳᠠᠯᠠᠯᠤᠨ ᠳᠠᠭᠤᠳᠠᠪᠠᠰᠤ ᠸᠧᠢ ᠵᠧᠦ ᠬᠣᠲᠠᠨ ᠤ᠋ ᠳᠣᠲᠣᠷᠠᠬᠢ ᠢᠷᠭᠡᠳ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠯᠴᠡᠨ ᠳᠠᠭᠠᠬᠤ ᠦᠭᠡᠢ᠂ ᠴᠡᠷᠢᠭ ᠢ᠋ᠶ᠋ᠡᠨ ᠪᠡᠯᠡᠳᠬᠡᠪᠡ᠃ ᠡᠨᠡ ᠬᠢᠷᠢ ᠳ᠋ᠦ᠍ᠷ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠬᠡᠳᠦᠢᠨᠡᠢ ᠰᠣᠨᠣᠰᠴᠤ ᠭᠣᠣᠯ ᠤ᠋ᠨ ᠡᠮᠦᠨᠡ ᠡᠴᠡ ᠭᠣᠣᠯ ᠢ᠋ ᠭᠡᠲᠦᠯᠵᠦ ᠪᠠᠢᠯᠳᠤᠨ ᠢᠷᠡᠬᠦᠶᠡ᠂ ᠪᠠᠢ ᠰᠠ ᠶᠡᠬᠡᠯᠡ ᠠᠶᠤᠵᠤ ᠳᠠᠷᠤᠢ ᠪᠤᠷᠤᠭᠤᠯᠠᠪᠠᠢ᠃ ᠡᠭᠦᠨ ᠳ᠋ᠦ᠍ᠷ ᠮᠣᠩᠭᠣᠯ ᠤ᠋ᠨ ᠵᠠᠩᠵᠤᠨ ᠱᠢ ᠲᠢᠶᠠᠨ ᠽᠧ᠂ ᠸᠧᠢ ᠵᠧᠦ ᠶ᠋ᠢᠨ ᠮᠣᠷᠢᠲᠤ ᠴᠡᠷᠢᠭ ᠢ᠋ ᠠᠪᠴᠤ ᠬᠣᠢᠨᠠ ᠠ᠋ᠴᠠ ᠳᠠᠷᠤᠨ ᠣᠷᠣᠵᠤ ᠂ ᠪᠦᠸᠧ ᠬᠦᠩ ᠮᠢᠶᠣᠤ ᠰᠦᠮᠡ ᠶ᠋ᠢᠨ ᠭᠠᠵᠠᠷ ᠪᠠᠢᠯᠳᠤᠵᠤ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠶᠡᠬᠡᠯᠡ ᠳᠠᠷᠤᠵᠤ᠂ ᠬᠠᠷᠠᠬᠠᠨ ᠨᠡᠬᠡᠵᠦ ᠠᠯᠠᠬᠤᠢ ᠳ᠋ᠤᠷ ᠪᠠᠢ ᠰᠠ ᠴᠡᠷᠢᠭ ᠢ᠋ᠶ᠋ᠡᠨ ᠣᠷᠬᠢᠭᠠᠳ ᠵᠡᠭᠦᠨ ᠵᠦᠭ ᠪᠤᠷᠤᠭᠤᠯᠠᠨ ᠭᠠᠷᠪᠠᠢ᠃ ᠦᠯᠡᠭᠰᠡᠨ ᠠᠯᠲᠠᠨ ᠤᠯᠤᠰ ᠤ᠋ᠨ ᠶᠤᠸᠠᠨᠱᠤᠸᠠᠢ ᠯᠢᠦ ᠢ᠂ ᠽᠠᠩ ᠳ᠋ᠧᠩ ᠬᠦᠩ᠂ ᠵᠠᠩ ᠺᠠᠢ ᠨᠠᠷ ᠣᠯᠠᠨ ᠰᠠᠮᠠᠭᠤᠨ ᠢᠷᠭᠡᠨ ᠳ᠋ᠦ᠍ᠷ ᠠᠯᠠᠭᠳᠠᠪᠠ᠃ ᠡᠨᠡ ᠮᠡᠳᠡᠭᠡ ᠶ᠋ᠢ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠰᠣᠨᠣᠰᠴᠤ ᠶᠠᠭᠠᠷᠠᠨ ᠳᠤᠲᠠᠭᠠᠵᠤ᠂ ᠸᠧ ᠯᠧᠦ ᠼᠦᠨ ᠭᠠᠴᠠᠭᠠ ᠳ᠋ᠤᠷ ᠬᠦᠷᠢᠶᠡ ᠪᠠᠭᠤᠭᠠᠳ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠢ᠋ ᠲᠣᠰᠴᠤ ᠨᠢᠭᠡᠨ ᠵᠡᠷᠭᠡ ᠲᠠᠰᠤᠯᠤᠨ ᠪᠠᠢᠯᠳᠤᠰᠤᠭᠠᠢ ᠬᠡᠮᠡᠬᠦᠶᠡ᠂ ᠤᠳᠠᠭᠰᠠᠨ ᠦᠭᠡᠢ ᠪᠠᠢ ᠰᠠ ᠰᠢᠷᠬᠠᠲᠤᠵᠤ ᠪᠤᠷᠤᠭᠤᠯᠠᠨ ᠬᠦᠷᠴᠦ ᠢᠷᠡᠭᠡᠳ ᠴᠡᠷᠢᠭ ᠳᠠᠷᠤᠭᠳᠠᠨ ᠰᠠᠷᠨᠢᠵᠤ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠬᠦᠷᠴᠦ ᠢᠷᠡᠬᠦ ᠰᠢᠬᠠᠭᠰᠠᠨ ᠢ᠋ ᠠᠢᠯᠠᠳᠬᠠᠵᠤ᠂ ᠡᠵᠡᠨ ᠦ᠌ ᠪᠡᠶᠡ ᠡᠷᠬᠡᠪᠰᠢ ᠬᠦᠢ ᠳᠧ ᠹᠦ ᠳ᠋ᠦ᠍ᠷ ᠡᠴᠢᠬᠦ ᠢᠨᠦ ᠡᠷᠬᠢᠮ᠂ ᠲᠡᠭᠦᠨ ᠯᠦ᠍ᠭᠡ ᠲᠤᠯᠬᠤᠶᠠ ᠪᠡᠷᠬᠡ ! ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠠᠢᠽᠦ᠋ᠩ ᠬᠠᠭᠠᠨ ᠱᠧᠦ ᠰᠢᠦᠢ ᠶᠡᠬᠡᠯᠡ ᠡᠠᠶᠤᠵᠤ ᠳᠠᠷᠤᠢ ᠳᠡᠳ᠋ ᠶᠤᠸᠠᠨᠱᠤᠸᠠᠢ ᠾᠧ ᠯᠢ ᠾᠧ ᠨᠠᠷ ᠤ᠋ᠨ ᠵᠡᠷᠭᠡ ᠶ᠋ᠢᠨ ᠵᠢᠷᠭᠤᠭᠠ ᠳᠣᠯᠣᠭᠠᠨ ᠬᠥᠮᠦᠨ ᠯᠦ᠍ᠭᠡ ᠰᠥᠨᠢ ᠭᠣᠣᠯ ᠢ᠋ ᠬᠤᠯᠠᠭᠤᠨ ᠭᠡᠲᠦᠯᠵᠦ᠂ ᠣᠩᠭᠣᠴᠠ ᠶ᠋ᠢ ᠣᠷᠬᠢᠵᠤ ᠬᠦᠢ ᠳᠧ ᠹᠦ ᠶ᠋ᠢᠨ ᠵᠦᠭ ᠡᠴᠢᠪᠡᠢ᠃ ᠵᠢᠴᠢ ᠡᠳᠦᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠣᠯᠠᠨ ᠴᠡᠷᠢᠭ ᠠᠨᠤ ᠰᠠᠶᠢ ᠶ᠋ᠢᠨ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠴᠡᠷᠢᠭ ᠢ᠋ᠶ᠋ᠡᠨ ᠣᠷᠬᠢᠵᠤ ᠤᠷᠭᠤᠨ ᠡᠴᠢᠭᠰᠡᠨ ᠢ᠋ ᠰᠣᠨᠣᠰᠴᠤ ᠣᠯᠠᠨ ᠴᠡᠷᠢᠭ ᠰᠣᠴᠢᠵᠤ ᠴᠥᠮ ᠪᠤᠲᠠᠷᠠᠨ ᠰᠠᠷᠨᠢᠯᠴᠠᠪᠠᠢ᠃ ᠲᠡᠭᠦᠨᠴᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠠᠢᠽᠦ᠋ᠩ ᠬᠠᠭᠠᠨ ᠱᠧᠦ ᠰᠢᠦᠢ ᠶᠠᠭᠠᠷᠠᠨ ᠶᠠᠪᠤᠵᠤ᠂ ᠬᠦᠢ ᠳᠧ ᠹᠦ ᠳ᠋ᠦ᠍ᠷ ᠣᠷᠣᠵᠤ᠂ ᠹᠠᠩ ᠢᠦᠢ ᠲᠦᠰᠢᠮᠡᠯ ᠵᠣ᠌ ᠵᠢᠶᠠ᠂ ᠲᠠ ᠰᠢ ᠪᠦ ᠶ᠋ᠢ ᠪᠢᠶᠠᠨ ᠯᠢᠶᠠᠩ ᠴᠧᠩ ᠪᠠᠯᠭᠠᠰᠤᠨᠠ ᠢᠯᠡᠭᠡᠵᠦ ᠲᠠᠢᠬᠡᠦ ᠬᠤᠸᠠᠩᠬᠡᠦ ᠪᠢᠨ ᠹᠧᠢ ᠨᠠᠷ ᠢ᠋ ᠤᠭᠲᠤᠨ ᠠᠪᠴᠤ ᠢᠷᠡ ᠭᠡᠮᠡᠨ ᠶᠠᠪᠤᠭᠤᠯᠪᠠ᠃ ᠡᠨᠡ ᠬᠢᠷᠢ ᠳ᠋ᠦ᠍ᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠣᠯᠠᠨ ᠴᠡᠷᠢᠭ ᠪᠠᠢ ᠰᠠ ᠴᠡᠷᠢᠭ ᠢ᠋ ᠴᠥᠮ ᠠᠪᠲᠠᠪᠠ ᠭᠡᠮᠡᠨ ᠠᠭᠤᠷᠯᠠᠯᠴᠠᠨ ᠬᠣᠷᠣᠰᠤᠯᠴᠠᠵᠤ ᠪᠠᠷᠬᠢᠷᠠᠯᠳᠤᠬᠤᠢ ᠳ᠋ᠤᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠠᠷᠭᠠ ᠦᠭᠡᠢ ᠪᠠᠢ ᠰᠠ ᠶ᠋ᠢᠨ ᠶᠠᠯᠠ ᠶ᠋ᠢ ᠲᠣᠭᠠᠴᠢᠵᠤ ᠠᠯᠠᠭᠤᠯᠵᠤ᠂ ᠣᠯᠠᠨ ᠵᠠᠩᠵᠤᠨ ᠴᠡᠷᠢᠭ ᠢᠷᠭᠡᠨ ᠦ᠌ ᠰᠡᠳᠬᠢᠯ ᠢ ᠲᠣᠬᠣᠷᠤᠭᠤᠯᠪᠠ᠃ ᠲᠡᠭᠦᠨ ᠢ᠋ ᠠᠯᠠᠭᠰᠠᠨ ᠤᠴᠢᠷ ᠠᠨᠤ : ᠤᠭ ᠲᠤᠷ ᠹᠧᠨ ᠾᠧ ᠮᠥᠷᠡᠨ ᠦ᠌ ᠣᠯᠠᠨ ᠢᠷᠭᠡᠳ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠢ ᠭᠣᠣᠯ ᠢ᠋ ᠭᠡᠲᠦᠯᠪᠡ ᠭᠡᠮᠡᠨ ᠰᠣᠨᠣᠰᠴᠤ ᠶᠡᠬᠡᠯᠡ ᠦᠢᠮᠡᠯᠳᠦᠨ᠂ ᠮᠣᠩᠭᠣᠯ ᠠ᠋ᠴᠠ ᠠᠶᠤᠵᠤ ᠬᠦᠷᠢᠶᠡ ᠴᠣᠭᠴᠠᠯᠠᠨ᠂ ᠡᠭᠦᠳᠡ ᠪᠡᠨ ᠬᠠᠭᠠᠵᠤ᠂ ᠨᠦᠬᠡ ᠡᠷᠦᠵᠦ ᠬᠤᠳᠳᠤᠭ ᠤᠬᠤᠵᠤ ᠨᠢᠭᠤᠭᠰᠠᠨ ᠪᠥᠯᠥᠭᠡ᠃ ᠬᠣᠵᠢᠮ ᠠᠯᠲᠠᠨ ᠤᠯᠤᠰ ᠤ᠋ᠨ ᠫᠦ ᠴᠠ ᠭᠤᠸᠠᠨ ᠨᠥ᠍ ᠶ᠋ᠢᠨ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠢ᠋ ᠴᠢᠩᠳᠠ ᠴᠠᠭᠠᠵᠠᠯᠠᠨ᠂ ᠭᠠᠵᠠᠷ ᠣᠷᠣᠨ ᠢ᠋ ᠡᠰᠡ ᠬᠥᠳᠡᠯᠭᠡᠭᠰᠡᠨ ᠢ᠋ᠶ᠋ᠡᠷ ᠠᠢᠯ ᠪᠦᠯᠦᠭ ᠦ᠋ᠨ ᠡᠬᠡᠨᠡᠷ ᠥᠬᠢᠳ ᠵᠠᠢᠯᠠᠬᠤ ᠦᠭᠡᠢ ᠪᠥᠬᠥᠶᠡ᠂ ᠭᠡᠨᠡᠳᠲᠡ ᠪᠠᠢ ᠰᠠ᠂ ᠸᠧᠢ ᠵᠧᠦ ᠳ᠋ᠦ᠍ᠷ ᠡᠴᠢᠬᠦ ᠲᠤᠬᠠᠢ ᠣᠯᠠᠨ ᠴᠡᠷᠢᠭ ᠢ᠋ ᠲᠠᠯᠪᠢᠵᠤ᠂ ᠳᠥᠷᠪᠡᠨ ᠵᠦᠭ ᠢ᠋ ᠳᠡᠭᠡᠷᠡᠮᠳᠡᠭᠦᠯᠬᠦᠢ ᠳ᠋ᠦ᠍ᠷ ᠠᠢᠯ ᠪᠦᠯᠦᠭ ᠦ᠋ᠨ ᠤᠬᠢᠯᠠᠬᠤ ᠳᠠᠭᠤᠨ ᠠᠭᠤᠯᠠ ᠲᠠᠯᠠ ᠳ᠋ᠤᠷ ᠳᠦᠭᠦᠷᠴᠦ ᠪᠠᠢ ᠰᠠ ᠶ᠋ᠢᠨ ᠴᠡᠷᠢᠭ ᠥᠩᠭᠡᠷᠡᠭᠰᠡᠨ ᠡᠯᠡ ᠭᠠᠵᠠᠷ ᠴᠥᠮ ᠬᠣᠬᠢᠷᠠᠵᠤ᠂ ᠬᠡᠭᠦᠷ ᠳᠣᠪᠣ ᠮᠡᠲᠦ ᠪᠣᠯᠤᠭᠰᠠᠨ ᠠᠵᠤᠭᠤ᠃ ᠨᠡᠩ ᠪᠠᠰᠠ ᠪᠠᠢ ᠰᠠ ᠶ᠋ᠢᠨ ᠨᠢᠭᠡᠨ ᠴᠠᠭ ᠤ᠋ᠨ ᠪᠤᠳᠠᠭᠠ ᠳ᠋ᠤᠷ ᠬᠡᠷᠡᠭᠯᠡᠬᠦ ᠰᠦᠢᠳᠬᠡᠯ ᠬᠡᠳᠦᠨ ᠠᠷᠪᠠᠨ ᠯᠠᠩ ᠬᠥᠷᠥᠮᠦᠢ᠃ ᠡᠭᠦᠨ ᠳ᠋ᠦ᠍ᠷ ᠢᠷᠭᠡᠨ ᠰᠠᠶᠢ ᠤᠷᠪᠠᠬᠤ ᠰᠠᠨᠠᠭᠠᠨ ᠢ᠋ ᠪᠠᠷᠢᠭᠰᠠᠨ ᠪᠥᠯᠥᠭᠡ᠃ ᠲᠡᠢᠨ ᠬᠦ᠌ ᠸᠧᠢ ᠵᠧᠦ ᠶ᠋ᠢᠨ ᠢᠷᠭᠡᠨ ᠶᠠᠭᠤᠨ ᠤ᠋ ᠮᠣᠩᠭᠣᠯ ᠠ᠋ᠴᠠ ᠤᠷᠪᠠᠵᠤ ᠲᠡᠭᠦᠨ ᠳ᠋ᠦ᠍ᠷ ᠳᠠᠭᠠᠬᠤ ᠪᠣᠢ ! ᠡᠨᠡ ᠬᠢᠷᠢ ᠳ᠋ᠦ᠍ᠷ ᠮᠣᠩᠭᠣᠯ ᠳ᠋ᠤᠷ ᠰᠡᠳᠬᠢᠯ ᠢ᠋ᠶ᠋ᠡᠨ ᠥᠭᠴᠦ ᠳᠠᠭᠠᠬᠤ ᠠᠨᠤ ᠣᠯᠠᠨ ᠪᠣᠯᠪᠠ᠃ ᠲᠡᠢᠨ ᠬᠦ᠌ ᠪᠠᠢ ᠰᠠ ᠶ᠋ᠢᠨ ᠴᠡᠷᠢᠭ ᠨᠢᠭᠡᠮᠦᠰᠦᠨ ᠳᠠᠷᠤᠭᠳᠠᠵᠤ ᠶᠠᠯᠠ ᠪᠠᠰᠠ ᠢᠯᠡᠷᠡᠭᠰᠡᠨ ᠳ᠋ᠦ᠍ᠷ ᠰᠠᠶᠢ ᠠᠯᠠᠭᠰᠠᠨ ᠠᠵᠤᠭᠤ᠃
ᠡᠨᠡ ᠬᠢᠷᠢ ᠪᠢᠶᠠᠨ ᠵᠢᠩ ᠦ᠋ᠨ ᠣᠯᠠᠨ ᠲᠦᠰᠢᠮᠡᠯ ᠲᠥᠰᠢᠶᠡ ᠴᠡᠷᠢᠭ ᠢᠷᠭᠡᠨ ᠬᠠᠭᠠᠨ ᠤ᠋ ᠪᠡᠶᠡ ᠪᠡᠷ ᠴᠡᠷᠢᠭ ᠠᠪᠴᠤ ᠭᠠᠷᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠡᠳᠦᠷ ᠪᠦᠷᠢ ᠰᠠᠢᠨ ᠮᠡᠳᠡᠭᠡ ᠶ᠋ᠢ ᠰᠣᠨᠣᠰᠰᠤᠭᠠᠢ ᠭᠡᠮᠡᠨ ᠴᠢᠩᠨᠠᠬᠤᠶᠠ᠂ ᠭᠡᠳᠡᠷᠭᠦ ᠬᠠᠷᠢᠨ ᠴᠡᠷᠢᠭ ᠳᠠᠷᠤᠭᠳᠠᠭᠰᠠᠨ ᠮᠠᠭᠤ ᠮᠡᠳᠡᠭᠡ ᠰᠣᠨᠣᠰᠳᠠᠵᠤ᠂ ᠶᠡᠬᠡ ᠠᠶᠤᠯᠳᠤᠨ ᠴᠢᠷᠠᠢ ᠬᠤᠪᠢᠯᠤᠯᠴᠠᠪᠠ᠃ ᠡᠨᠡ ᠬᠢᠷᠢ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠬᠣᠲᠠ ᠶ᠋ᠢ ᠪᠠᠢᠯᠳᠤᠬᠤ ᠠᠨᠤ ᠨᠡᠩ ᠬᠡᠴᠡᠭᠦᠦ ᠪᠣᠯᠵᠤ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠪᠠᠰᠠ ᠡᠭᠡᠨ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠬᠣᠲᠠ ᠲᠣᠭᠣᠷᠢᠨ ᠬᠠᠭᠠᠭᠳᠠᠵᠤ ᠳᠣᠲᠣᠷᠠ ᠭᠠᠳᠠᠨᠠ ᠨᠢᠭᠡᠨᠲᠡ ᠮᠡᠳᠡᠭᠡ ᠨᠡᠪᠲᠡᠷᠡᠬᠦ ᠦᠭᠡᠢ ᠪᠣᠯᠵᠤ᠂ ᠬᠣᠲᠠᠨ ᠤ᠋ ᠳᠣᠲᠣᠷᠠ ᠨᠢᠭᠡ ᠱᠧᠩ ᠠᠮᠤ ᠬᠣᠶᠠᠷ ᠯᠠᠩ ᠮᠥᠩᠭᠥ ᠪᠡᠷ ᠮᠥᠨ ᠣᠯᠳᠠᠬᠤ ᠦᠭᠡᠢ ᠪᠣᠯᠤᠭᠠᠳ ᠣᠯᠠᠨ ᠢ᠋ᠶ᠋ᠠᠷ ᠶᠡᠬᠡᠯᠡ ᠠᠶᠤᠯᠳᠤᠵᠤ᠂ ᠥᠯᠪᠡᠷᠦᠨ ᠦᠬᠦᠭᠰᠡᠳ ᠦ᠋ᠨ ᠬᠡᠭᠦᠷ ᠬᠥᠨᠳᠡᠯᠡᠨ ᠭᠤᠯᠳᠤ ᠬᠡᠪᠲᠡᠵᠦᠬᠦᠢ᠃ ᠨᠡᠩ ᠪᠠᠰᠠ ᠵᠡᠷᠭᠡ ᠲᠤᠰᠢᠶᠠᠯᠲᠠᠨ ᠤ᠋ ᠥᠬᠢᠳ ᠬᠡᠦᠬᠡᠳ ᠶᠡᠬᠡ ᠵᠡᠭᠡᠯᠢ ᠳ᠋ᠦ᠍ᠷ ᠪᠤᠳᠠᠭᠠ ᠭᠣᠶᠣᠯᠴᠠᠨ ᠶᠠᠪᠤᠵᠤ᠂ ᠰᠤᠯᠠ ᠢᠷᠭᠡᠨ ᠡᠩ ᠦ᠋ᠨ ᠠᠷᠠᠳ ᠦᠬᠦᠭᠰᠡᠨ ᠡᠮᠡ ᠦᠷᠡ ᠪᠡᠨ ᠢᠳᠡᠯᠴᠡᠭᠰᠡᠨ ᠢᠨᠤ ᠮᠠᠰᠢ ᠣᠯᠠᠨ ᠪᠣᠯᠵᠤ᠂ ᠠᠷᠠᠰᠤ ᠰᠢᠷᠢ᠂ ᠦᠬᠡᠷ ᠦ᠋ᠨ ᠡᠪᠡᠷ ᠵᠡᠷᠭᠡ ᠶ᠋ᠢ ᠰᠢᠷᠠᠵᠤ ᠴᠢᠨᠠᠵᠤ ᠢᠳᠡᠯᠴᠡᠨ ᠥᠯᠪᠡᠷᠬᠦ ᠶ᠋ᠢ ᠰᠠᠭᠠᠲᠠᠭᠤᠯᠤᠮᠤᠢ᠃ ᠪᠠᠶᠠᠯᠢᠭ ᠭᠡᠷ ᠦ᠋ᠨ ᠠᠷᠠᠳ ᠥᠪᠡᠷ ᠢ᠋ᠶ᠋ᠡᠨ ᠠᠰᠠᠷ ᠲᠠᠭᠲᠤ ᠤᠷᠲᠤ ᠬᠠᠷᠰᠢ ᠪᠠᠨ ᠴᠥᠮ ᠡᠪᠳᠡᠵᠦ ᠲᠦᠯᠡᠭᠡ ᠪᠣᠯᠭᠠᠨ ᠰᠢᠲᠠᠭᠠᠪᠠ᠃ ᠡᠨᠡ ᠬᠢᠷᠢ ᠳ᠋ᠦ᠍ᠷ ᠪᠠᠰᠠ ᠭᠡᠨᠡᠳᠲᠡ ᠬᠠᠭᠠᠨ ᠲᠦᠰᠢᠮᠡᠯ ᠵᠠᠷᠤᠵᠤ ᠭᠤᠷᠪᠠᠨ ᠣᠷᠳᠣᠨ ᠵᠢᠷᠭᠤᠭᠠᠨ ᠬᠦᠷᠢᠶᠡᠯᠡᠭ ᠦ᠋ᠨ ᠾᠧᠦ ᠹᠧᠢ – ᠬᠠᠲᠤᠨ ᠡᠬᠡᠨᠡᠷ ᠦ᠋ᠳ ᠢ᠋ ᠠᠪᠤᠷᠠ ᠢᠷᠡᠭᠰᠡᠨ ᠢ᠋ ᠰᠣᠨᠣᠰᠴᠤ ᠣᠯᠠᠨ ᠢ᠋ᠶ᠋ᠠᠷ ᠶᠡᠬᠡᠯᠡ ᠠᠶᠤᠯᠳᠤᠵᠤ᠂ ᠴᠡᠷᠢᠭ ᠢᠷᠭᠡᠨ ᠦ᠌ ᠰᠡᠳᠬᠢᠯ ᠨᠡᠩ ᠲᠦᠰᠢᠯᠭᠡ ᠦᠭᠡᠢ ᠪᠣᠯᠵᠤ ᠪᠤᠷᠬᠢᠷᠠᠯᠳᠤᠪᠠ᠃ ᠡᠭᠦᠨ ᠳ᠋ᠦ᠍ᠷ ᠪᠠᠷᠠᠭᠤᠨ ᠡᠲᠡᠭᠡᠳ ᠦ᠋ᠨ ᠶᠤᠸᠠᠨᠱᠤᠸᠠᠢ ᠼᠦᠢ ᠯᠢ ᠵᠠᠯᠢᠬᠠᠢ ᠵᠢᠰᠤᠷ ᠤᠵᠢᠳ ᠰᠠᠮᠠᠭᠤᠨ ᠲᠤᠯᠠ ᠡᠨᠡ ᠣᠯᠠᠨ ᠢᠷᠭᠡᠨ ᠦ᠌ ᠲᠦᠷᠬᠢᠯᠡᠭᠰᠡᠨ ᠲᠠᠰᠢᠷᠠᠮ ᠳ᠋ᠤᠷ ᠳᠠᠷᠤᠢ ᠰᠠᠮᠠᠭᠤᠨ ᠡᠭᠦᠰᠬᠡᠨ᠂ ᠮᠥᠨ ᠽᠦᠸ᠋ᠸ ᠱᠢ ᠶᠠᠮᠤᠨ ᠤ᠋ ᠳᠦ ᠱᠢ ᠲᠦᠰᠢᠮᠡᠯ ᠶᠤᠸᠠᠨ ᠬᠣᠣ ᠸᠧᠨ᠂ ᠵᠢᠴᠢ ᠰᠢᠨᠢᠶᠧᠪᠦ᠋ ᠬᠣᠶᠠᠭᠤᠯᠠ ᠶ᠋ᠢᠨ ᠵᠦᠭ ᠥᠭᠦᠯᠡᠷᠦᠨ : 《ᠬᠠᠭᠠᠨ ᠤ᠋ ᠭᠡᠭᠡᠨ ᠨᠡᠢᠰᠯᠡᠯ ᠡᠴᠡ ᠭᠠᠷᠴᠤ ᠡᠳᠦᠭᠡ ᠬᠣᠷᠢᠨ ᠡᠳᠦᠷ ᠢᠯᠡᠭᠦᠦ ᠪᠣᠯᠪᠠ᠂ ᠪᠠᠰᠠ ᠬᠦ᠌ ᠲᠦᠰᠢᠮᠡᠯ ᠵᠠᠷᠤᠵᠤ ᠬᠣᠶᠠᠷ ᠣᠷᠳᠣᠨ ᠤ᠋ ᠾᠧᠦ ᠹᠧᠢ ᠶ᠋ᠢ ᠠᠪᠤᠷᠠ ᠢᠷᠡᠵᠦᠬᠦᠢ᠂ ᠡᠭᠦᠨ ᠳ᠋ᠦ᠍ᠷ ᠣᠯᠠᠨ ᠢ᠋ᠶ᠋ᠠᠷ ᠴᠥᠮ ᠬᠠᠭᠠᠨ ᠨᠡᠢᠰᠯᠡᠯ ᠢ᠋ ᠬᠡᠭᠡᠰᠦᠭᠡᠢ ᠬᠡᠮᠡᠮᠦᠢ ᠭᠡᠮᠡᠨ ᠶᠡᠬᠡᠯᠡ ᠪᠤᠷᠬᠢᠷᠠᠯᠳᠤᠮᠤᠢ᠃ ᠡᠨᠡ ᠮᠡᠲᠦ ᠳ᠋ᠦ᠍ᠷ ᠬᠦᠩ ᠴᠢ ᠣᠳᠣ ᠬᠡᠷᠬᠢᠰᠦᠭᠡᠢ ᠬᠡᠮᠡᠮᠦᠢ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠢᠨᠢᠶᠧᠪᠦ᠋ : 《ᠬᠡᠷᠬᠢᠬᠦ ᠪᠣᠢ ? ᠣᠳᠣ ᠪᠢᠳᠡ ᠬᠣᠶᠠᠭᠤᠯᠠ ᠭᠠᠭᠴᠠ ᠦᠬᠦᠬᠦ ᠪᠣᠢ ᠶᠠ᠂ ᠥᠪᠡᠷᠡ ᠬᠡᠷᠬᠢᠬᠦ ᠪᠣᠢ ! 》 ᠬᠡᠮᠡᠲᠡᠯᠡ ᠶᠤᠸᠠᠨ ᠬᠣᠣ ᠸᠧᠨ ᠪᠠᠰᠠ ᠲᠣᠰᠴᠤ ᠥᠭᠦᠯᠡᠷᠦᠨ : 《ᠦᠬᠦᠬᠦᠢ ᠳ᠋ᠦ᠍ᠷ ᠪᠡᠷᠬᠡ ᠦᠭᠡᠢ᠂ ᠦᠨᠡᠬᠡᠷ ᠱᠧ ᠵᠢᠢ ᠰᠠᠬᠢᠵᠤ ᠢᠷᠭᠡᠨ ᠢ᠋ ᠠᠪᠤᠷᠠᠨ ᠴᠢᠳᠠᠪᠠᠰᠤ ᠰᠠᠶᠢ ᠦᠬᠦᠬᠦᠢ ᠳ᠋ᠦ᠍ᠷ ᠠᠮᠲᠠᠲᠠᠢ ᠪᠣᠯᠠᠢ᠃ ᠲᠡᠢᠨ ᠪᠤᠰᠤ ᠪᠣᠯᠪᠠᠰᠤ ᠲᠠᠯᠠᠭᠠᠷ ᠨᠢᠭᠡᠨ ᠪᠡᠶᠡ ᠦᠬᠦᠵᠦ᠂ ᠤᠯᠠᠭᠠᠨ ᠳᠡᠪᠡᠯᠲᠦ ᠲᠠᠪᠢᠨ ᠴᠡᠷᠢᠭ ᠢ᠋ ᠲᠡᠵᠢᠭᠡᠵᠦ ᠨᠢᠭᠡᠨ ᠴᠠᠭ ᠴᠠᠳᠬᠠᠬᠤ ᠪᠣᠯᠠᠢ᠃ ᠡᠭᠦᠨ ᠢ᠋ ᠶᠠᠮᠪᠠᠷ ᠦᠬᠦᠯ ᠬᠡᠮᠡᠮᠦᠢ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠢᠨᠢᠶᠧᠪᠦ᠋ ᠬᠠᠷᠢᠭᠤ ᠥᠴᠢᠭᠰᠡᠨ ᠦᠭᠡᠢ᠃ ᠡᠨᠡ ᠦᠶᠡ ᠬᠣᠶᠠᠷ ᠣᠷᠳᠣᠨ ᠤ᠋ ᠾᠧᠦ ᠹᠧᠢ – ᠬᠠᠲᠤᠳ ᠨᠠᠷ ᠬᠣᠲᠠ ᠠ᠋ᠴᠠ ᠭᠠᠷᠴᠤ ᠴᠢᠶᠣᠤ ᠯᠦ᠍ ᠳ᠋ᠦ᠍ᠷ ᠬᠦᠷᠴᠦ ᠦᠵᠡᠪᠡᠰᠦ᠂ ᠬᠣᠲᠠ ᠶ᠋ᠢᠨ ᠭᠠᠳᠠᠨᠠ ᠬᠣᠶᠠᠷ ᠭᠤᠷᠪᠠᠨ ᠭᠠᠵᠠᠷ ᠲᠤᠷ ᠶᠡᠬᠡᠯᠡ ᠭᠠᠯ ᠭᠠᠷᠬᠤᠢ ᠳ᠋ᠤᠷ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠭᠡᠮᠡᠨ ᠰᠡᠵᠢᠭᠯᠡᠵᠦ ᠮᠡᠩᠳᠡ ᠰᠡᠩᠳᠡᠨ ᠬᠣᠲᠠᠨ ᠳ᠋ᠤᠷ ᠡᠭᠡᠵᠦ ᠣᠷᠣᠭᠠᠳ ᠵᠢᠴᠢ ᠡᠳᠦᠷ ᠼᠦᠢ ᠯᠢ ᠭᠡᠨᠡᠳᠲᠡ ᠸᠠᠨ ᠶᠠᠨ ᠨᠦ᠍ ᠱᠧᠨ᠂ ᠰᠢᠨᠢᠶᠧᠪᠦ᠋ ᠬᠣᠶᠠᠭᠤᠯᠠ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠵᠦ ᠰᠡᠯᠡᠮᠡ ᠪᠡᠨ ᠰᠤᠭᠤ ᠲᠡᠳᠡᠨ ᠭᠠᠷᠭᠠᠭᠠᠳ ᠲᠡᠳᠡ ᠬᠣᠶᠠᠭᠤᠯᠠ ᠶ᠋ᠢ ᠵᠢᠭᠠᠵᠤ ᠥᠭᠦᠯᠡᠷᠦᠨ :《ᠨᠡᠢᠰᠯᠡᠯ ᠬᠣᠲᠠ ᠬᠠᠭᠠᠭᠳᠠᠵᠤ ᠮᠣᠬᠣᠬᠤᠢ ᠶ᠋ᠢᠨ ᠲᠤᠢᠯ ᠳ᠋ᠤᠷ ᠬᠦᠷᠵᠦᠬᠦᠢ᠃ ᠬᠣᠶᠠᠷ ᠬᠦᠩ ᠡᠨᠡ ᠮᠡᠲᠦ ᠵᠥᠪ ᠵᠦᠭᠡᠷ ᠬᠠᠷᠠᠵᠤ ᠰᠠᠭᠤᠬᠤ ᠶᠠᠭᠤᠨ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠣᠶᠠᠷ ᠴᠢᠩᠰᠢᠶᠡᠩ ᠢᠨᠢᠶᠡᠨ ᠥᠭᠦᠯᠡᠷᠦᠨ : 《ᠬᠡᠷᠡᠭ ᠠᠪᠠᠰᠤ ᠰᠠᠢᠨ ᠢ᠋ᠶ᠋ᠠᠷ ᠵᠥᠪᠳᠡᠮᠦᠢ ᠶᠠ ᠂ ᠶᠠᠭᠤᠨ ᠳ᠋ᠤᠷ ᠡᠢᠨ ᠬᠦ᠌ ᠠᠭᠠᠰᠢᠯᠠᠮᠤᠢ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠼᠦᠢ ᠯᠢ ᠨᠢᠭᠡᠨᠲᠡ ᠬᠠᠰᠬᠢᠷᠤᠨ ᠳᠣᠣᠷᠠᠬᠢ ᠴᠡᠷᠢᠭ ᠢ᠋ᠶ᠋ᠡᠷ ᠤᠷᠢᠳᠠ ᠰᠢᠨᠢᠶᠧᠪᠦ᠋ ᠶ᠋ᠢ ᠠᠯᠠᠭᠤᠯᠤᠨ᠂ ᠳᠠᠷᠠᠭᠠ ᠪᠠᠷ ᠸᠠᠨ ᠶᠠᠨ ᠨᠦ᠍ ᠱᠧᠨ᠂ ᠵᠢᠴᠢ ᠽᠦᠸᠸ ᠱᠢ ᠶᠠᠮᠤᠨ ᠤ᠋ ᠯᠠᠩ ᠵᠦᠩ ᠲᠦᠰᠢᠮᠡᠯ ᠸᠠᠨ ᠶᠠᠨ ᠰᠢᠶ᠋ᠸ ᠨᠢᠶᠠᠨ᠂ ᠠ ᠪᠦ ᠶ᠋ᠢᠨ ᠵᠡᠷᠭᠡ ᠶ᠋ᠢᠨ ᠠᠷᠪᠠᠨ ᠬᠡᠳᠦᠨ ᠲᠦᠰᠢᠮᠡᠳ ᠢ᠋ ᠠᠯᠠᠭᠤᠯᠤᠭᠠᠳ ᠳᠠᠷᠤᠢ ᠣᠯᠠᠨ ᠢᠷᠭᠡᠨ ᠳ᠋ᠦ᠍ᠷ ᠵᠠᠷᠯᠠᠨ ᠥᠭᠦᠯᠡᠷᠦᠨ : 《ᠪᠢ ᠬᠣᠶᠠᠷ ᠴᠧᠩᠰᠢᠶᠠᠩ ᠤ᠋ᠨ ᠡᠭᠦᠳᠡ ᠪᠡᠨ ᠬᠠᠭᠠᠵᠤ ᠡᠮᠡ ᠯᠤᠭᠡ ᠪᠡᠨ ᠴᠡᠩᠭᠡᠯᠳᠦᠨ᠂ ᠵᠣᠪᠠᠯᠠᠩ ᠳ᠋ᠤᠷ ᠤᠴᠠᠷᠠᠭᠰᠠᠨ ᠣᠯᠠᠨ ᠢᠷᠭᠡᠳ ᠢ᠋ ᠲᠡᠩᠬᠡᠷᠡᠭᠦᠯᠬᠦ ᠠᠷᠭᠠ ᠶ᠋ᠢ ᠪᠣᠳᠣᠬᠤ ᠦᠭᠡᠢ ᠳ᠋ᠦ᠍ᠷ ᠠᠯᠠᠭᠠᠳ ᠡᠳᠦᠭᠡ ᠲᠠᠨ ᠤ᠋ ᠨᠢᠭᠡᠨ ᠬᠣᠲᠠ ᠶ᠋ᠢᠨ ᠣᠯᠠᠨ ᠢᠷᠭᠡᠨ ᠦ᠌ ᠨᠡᠢᠲᠡ ᠪᠡᠷ ᠦ᠋ᠨ ᠲᠥᠯᠥᠭᠡ ᠠᠮᠢᠳᠤᠷᠠᠬᠤ ᠠᠷᠭᠠ ᠶ᠋ᠢ ᠡᠷᠢᠰᠦᠭᠡᠢ ᠬᠡᠮᠡᠮᠦᠢ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠣᠯᠠᠨ ᠢ᠋ᠶ᠋ᠠᠷ ᠴᠥᠮ ᠰᠠᠢᠰᠢᠶᠠᠵᠤ ᠳᠠᠭᠠᠪᠠᠢ᠃ ᠲᠡᠢᠨ ᠬᠦ᠌ ᠼᠦᠢ ᠯᠢ ᠳᠠᠷᠤᠢ ᠴᠡᠷᠢᠭ ᠠᠪᠴᠤ ᠣᠷᠳᠣᠨ ᠳ᠋ᠤᠷ ᠣᠷᠣᠭᠠᠳ ᠵᠠᠭᠤᠨ ᠲᠦᠰᠢᠮᠡᠳ ᠢ ᠴᠢᠭᠤᠯᠭᠤᠯᠤᠨ ᠳᠠᠬᠢᠨ ᠡᠵᠡᠨ ᠪᠠᠢᠭᠤᠯᠬᠤ ᠤᠴᠢᠷ ᠢ᠋ ᠵᠥᠪᠳᠡᠬᠦᠢ ᠳ᠋ᠦ᠍ᠷ ᠢ᠋ᠶ᠋ᠡᠨ ᠥᠭᠦᠯᠡᠷᠦᠨ : 《ᠸᠧᠢ ᠱᠣᠣ ᠸᠠᠩ ᠤ᠋ᠨ ᠬᠥᠪᠡᠭᠦᠨ ᠲᠠᠢᠽᠢ ᠴᠧᠩ ᠺᠧ᠂ ᠲᠡᠭᠦᠨ ᠦ᠌ ᠡᠭᠡᠴᠢ ᠥᠬᠢᠨ ᠳᠡᠭᠦᠦ ᠡᠳᠦᠭᠡ ᠴᠥᠮ ᠮᠣᠩᠭᠣᠯ ᠤᠯᠤᠰ ᠲᠤᠷ ᠡᠷᠬᠡ ᠶ᠋ᠢ ᠣᠯᠵᠤ᠂ ᠶᠡᠬᠡ ᠢᠨᠦ ᠸᠠᠩ ᠤ᠋ᠨ ᠬᠠᠲᠤᠨ᠂ ᠪᠠᠭᠠ ᠠᠨᠤ ᠴᠧᠩᠰᠢᠶᠠᠩ ᠤ᠋ᠨ ᠪᠡᠷᠢ ᠪᠣᠯᠵᠤ᠂ ᠡᠳᠦᠭᠡ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠢᠷᠡᠵᠦ ᠮᠠᠨ ᠤ᠋ ᠤᠯᠤᠰ ᠢ᠋ ᠮᠥᠬᠥᠭᠡᠵᠦ ᠡᠴᠢᠭᠡ ᠶᠦ᠍ᠭᠡᠨ ᠦᠰ ᠢ᠋ ᠠᠪᠤᠮᠤᠢ ᠭᠡᠮᠡᠨ ᠬᠠᠷᠠᠬᠠᠨ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠪᠣᠢ ᠲᠤᠯᠠ ᠡᠳᠦᠭᠡ ᠳᠠᠷᠤᠢ ᠸᠧᠢ ᠱᠣᠣ ᠸᠠᠩ ᠶᠦᠩ ᠵᠢᠢ ᠶ᠋ᠢᠨ ᠬᠥᠪᠡᠭᠦᠨ ᠴᠧᠩ ᠺᠧ ᠶ᠋ᠢ ᠬᠠᠭᠠᠨ ᠪᠠᠢᠭᠤᠯᠪᠠᠰᠤ᠂ ᠡᠨᠡ ᠴᠧᠩ ᠺᠧ ᠲᠠᠢᠰᠢ ᠪᠤᠯᠤ ᠯᠤᠭᠠ ᠤᠷᠤᠭ ᠪᠣᠯᠬᠤ ᠲᠤᠯᠠ ᠬᠡᠷᠡᠭ ᠬᠡᠯᠡᠯᠴᠡᠬᠦᠢ ᠳ᠋ᠦ᠍ᠷ ᠬᠢᠯᠪᠠᠷ ᠪᠣᠯᠤᠮᠤᠢ ! 》ᠭᠡᠮᠡᠨ ᠳᠠᠷᠤᠢ ᠥᠪᠡᠷ ᠦ᠋ᠨ ᠳᠣᠣᠷᠠᠬᠢ ᠬᠠᠨ ᠳ᠋ᠦᠸᠧ ᠶ᠋ᠢ ᠵᠠᠷᠤᠵᠤ᠂ ᠲᠠᠢᠬᠡᠦ ᠶ᠋ᠢᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠴᠧᠩ ᠺᠧ ᠶ᠋ᠢ ᠳᠠᠭᠤᠳᠠᠨ ᠠᠪᠴᠢᠷᠠᠵᠤ ᠯᠢᠶᠠᠩ ᠸᠠᠩ ᠭᠡᠮᠡᠨ ᠡᠷᠭᠦᠮᠵᠢᠯᠡᠵᠦ᠂ ᠤᠯᠤᠰ ᠤ᠋ᠨ ᠬᠡᠷᠡᠭ ᠢ᠋ ᠪᠠᠷᠢᠭᠤᠯᠵᠤ᠂ ᠵᠠᠭᠤᠨ ᠲᠦᠰᠢᠮᠡᠳ ᠮᠥᠷᠭᠥᠵᠦ ᠪᠠᠷᠠᠭᠰᠠᠨ ᠬᠣᠢᠨᠠ ᠼᠦᠢ ᠯᠢ ᠥᠪᠡᠰᠦᠪᠡᠨ ᠲᠡᠢᠰᠢ ᠳᠦ ᠶᠤᠸᠠᠨᠱᠤᠸᠠᠢ ᠱᠠᠩ ᠱᠣ ᠯᠢᠩ ᠵᠧᠩ ᠸᠠᠩ ᠪᠣᠯᠤᠨ ᠸᠠᠨ ᠶᠠᠨ ᠢ ᠶ᠋ᠢ ᠫᠢᠩ ᠵᠠᠩ ᠵᠧᠩ ᠱᠢ᠂ ᠸᠠᠨ ᠶᠠᠨ ᠾᠧᠩ ᠢ᠋ ᠳ᠋ᠢᠶᠠᠨ ᠴᠢᠶᠠᠨ ᠳᠦ ᠵᠢᠶᠠᠨ ᠲᠦᠰᠢᠮᠡᠯ ᠪᠣᠯᠭᠠᠪᠠᠢ᠃ ᠥᠪᠡᠷ ᠦ᠋ᠨ ᠬᠠᠷᠢᠶᠠᠲᠤ ᠠᠷᠠᠳ ᠢ᠋ ᠴᠥᠮ ᠲᠦᠰᠢᠮᠡᠯ ᠡᠷᠭᠦᠮᠵᠢᠯᠡᠵᠦ ᠶᠤᠸᠠᠨ ᠬᠣᠣ ᠸᠧᠨ ᠢ ᠮᠥᠨ ᠵᠡᠭᠦᠨ ᠪᠠᠷᠠᠭᠤᠨ ᠶᠠᠮᠤᠨ ᠤ᠋ ᠶᠤᠸᠠᠨ ᠸᠠᠢ ᠯᠠᠩ ᠲᠦᠰᠢᠮᠡᠯ ᠪᠣᠯᠭᠠᠵᠤᠬᠤᠢ᠃ ᠲᠡᠭᠦᠨᠴᠡ ᠮᠣᠩᠭᠣᠯ ᠤ᠋ᠨ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠳᠠᠭᠠᠬᠤ ᠪᠢᠴᠢᠭ ᠪᠠᠷᠢᠭᠤᠯᠵᠤ ᠢᠯᠡᠭᠡᠭᠰᠡᠨᠡ᠂ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ᠂ ᠨᠠᠨᠰᠠᠷ᠂ ᠶᠡᠬᠡ ᠲᠡᠢᠰᠢ ᠭᠦᠸᠧ ᠸᠠᠩ ᠶᠤᠸᠠᠨᠱᠤᠸᠠᠢ ᠪᠤᠯᠤ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠵᠦ ᠡᠳᠡᠭᠡᠷ ᠤᠴᠢᠷ ᠢ᠋ ᠪᠦᠷᠢᠨᠡ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠲᠡᠢᠰᠢ ᠪᠤᠯᠤ ᠥᠭᠦᠯᠡᠷᠦᠨ : 《ᠳᠠᠭᠠᠭᠰᠠᠨ ᠢ᠋ ᠦᠯᠦ ᠠᠯᠠᠬᠤ ᠠᠨᠤ ᠮᠢᠨᠦ ᠡᠩ ᠦ᠋ᠨ ᠶᠠᠪᠤᠳᠠᠯ᠂ ᠣᠨᠴᠠ ᠮᠢᠨᠦ ᠤᠷᠤᠭ ᠪᠣᠯᠤᠭᠰᠠᠨ ᠤ᠋ ᠤᠴᠢᠷ ᠪᠤᠰᠤ ! 》 ᠭᠡᠮᠡᠨ᠂ ᠰᠥᠪᠡᠭᠡᠲᠡᠢ ᠶ᠋ᠢᠨ ᠴᠡᠷᠢᠭ ᠢ᠋ ᠤᠷᠢᠳᠠ ᠶᠠᠪᠤᠭᠤᠯᠤᠨ᠂ ᠳᠠᠭᠠᠯᠳᠤᠭᠠ ᠶᠡᠬᠡ ᠴᠡᠷᠢᠭ ᠢ᠋ ᠬᠥᠳᠡᠯᠭᠡᠵᠦ ᠤᠷᠤᠭᠰᠢ ᠣᠷᠣᠪᠠ᠃ ᠲᠡᠳᠦᠢ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ᠂ ᠲᠠᠪᠤᠨᠠᠩ ᠨᠠᠨᠰᠠᠷ ᠤ᠋ᠨ ᠴᠡᠷᠢᠭ ᠴᠢᠩ ᠴᠠᠩ ᠳ᠋ᠤᠷ ᠬᠦᠷᠲᠡᠯᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠼᠦᠢ ᠯᠢ᠂ ᠸᠠᠩ ᠤ᠋ᠨ ᠳᠡᠪᠡᠯ ᠮᠠᠯᠠᠭᠠ ᠡᠮᠦᠰᠴᠦ ᠵᠢᠭᠰᠠᠭᠠᠯ ᠵᠢᠭᠰᠠᠭᠠᠵᠤ ᠤᠭᠲᠤᠨ ᠤᠴᠠᠷᠠᠭᠰᠠᠨ ᠳ᠋ᠤᠷ ᠰᠥᠪᠡᠭᠡᠲᠡᠢ ᠲᠠᠨ ᠪᠠᠶᠠᠷᠯᠠᠵᠤ᠂ ᠬᠤᠷᠢᠮ ᠬᠤᠷᠢᠮᠯᠠᠨ ᠠᠷᠢᠬᠢ ᠪᠠᠷᠢᠵᠤ᠂ ᠼᠦᠢ ᠯᠢ ᠶ᠋ᠢ ᠲᠣᠬᠣᠷᠤᠭᠤᠯᠤᠨ ᠬᠦᠨᠳᠦᠯᠡᠭᠰᠡᠨ ᠳ᠋ᠦ᠍ᠷ ᠼᠦᠢ ᠯᠢ ᠰᠢᠳᠦᠨ ᠪᠢᠰᠢᠷᠡᠵᠦ᠂ ᠰᠥᠪᠡᠭᠡᠲᠡᠢ ᠶ᠋ᠢ ᠵᠢᠷᠤᠮ ᠤ᠋ᠨ ᠡᠴᠢᠭᠡ ᠪᠣᠯᠭᠠᠨ ᠮᠥᠷᠭᠥᠵᠦ᠂ ᠲᠡᠳᠦᠢ ᠬᠣᠲᠠᠨ ᠳ᠋ᠤᠷ ᠡᠭᠡᠵᠦ ᠬᠣᠲᠠᠨ ᠤ᠋ ᠠᠰᠠᠷ ᠢ᠋ ᠭᠠᠯᠳᠠᠵᠤ ᠴᠡᠷᠢᠭ ᠦ᠋ᠨ ᠵᠠᠮ ᠭᠠᠷᠭᠠᠭᠰᠠᠨ ᠳ᠋ᠤᠷ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠵᠠᠩᠵᠤᠨ ᠬᠣᠰᠢᠭᠤᠴᠢ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ᠂ ᠨᠠᠨᠰᠠᠷ ᠨᠠᠷ ᠶᠡᠬᠡᠯᠡ ᠪᠠᠶᠠᠷᠯᠠᠨ᠂ ᠼᠦᠢ ᠯᠢ ᠶ᠋ᠢᠨ ᠦᠨᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠳᠠᠭᠠᠭᠰᠠᠨ ᠢ᠋ ᠮᠡᠳᠡᠭᠡᠳ ᠰᠡᠳᠬᠢᠯ ᠠᠮᠤᠷᠪᠠ᠃ ᠲᠡᠭᠦᠨᠴᠡ ᠼᠦᠢ ᠯᠢ ᠬᠣᠲᠠᠨ ᠳ᠋ᠤᠷ ᠡᠭᠡᠵᠦ᠂ ᠬᠠᠭᠠᠨ ᠲᠦᠰᠢᠮᠡᠯ ᠴᠡᠷᠢᠭ ᠦ᠋ᠨ ᠥᠬᠢᠳ ᠬᠡᠦᠬᠡᠳ ᠢ᠋ ᠠᠪᠤᠷᠠ ᠢᠷᠡᠪᠡ ᠭᠡᠮᠡᠨ ᠥᠬᠢᠳ ᠢ᠋ ᠰᠣᠩᠭᠣᠨ ᠣᠷᠳᠣᠨᠠ ᠣᠷᠣᠭᠤᠯᠬᠤᠢ ᠳ᠋ᠤᠷ ᠼᠦᠢ ᠯᠢ ᠶ᠋ᠢ ᠮᠣᠩᠭᠣᠯ ᠳ᠋ᠤᠷ ᠳᠠᠭᠠᠪᠠ ᠭᠡᠮᠡᠨ ᠲᠠᠪᠠ ᠦᠭᠡᠢ ᠠᠷᠠᠳ ᠠᠨᠤ ᠲᠡᠭᠦᠨ ᠢ᠋ ᠣᠯᠠᠨ ᠲᠦᠰᠢᠮᠡᠯ ᠴᠡᠷᠢᠭ ᠦ᠋ᠨ ᠥᠬᠢᠳ ᠢ᠋ ᠪᠤᠵᠠᠷᠯᠠᠵᠤ᠂ ᠠᠯᠲᠠᠨ ᠮᠥᠩᠭᠥᠨ ᠰᠤᠪᠤᠳ ᠲᠠᠨᠠ ᠶ᠋ᠢ ᠭᠡᠷ ᠳᠦᠭᠦᠷᠡᠩ ᠬᠤᠷᠢᠶᠠᠪᠠ ᠬᠡᠮᠡᠮᠦᠢ᠃ ᠮᠣᠩᠭᠣᠯ ᠳ᠋ᠤᠷ ᠡᠰᠡ ᠳᠠᠭᠠᠪᠠᠰᠤ ᠬᠣᠲᠠ ᠶ᠋ᠢᠨ ᠬᠣᠲᠠᠯᠠᠭᠠᠷ ᠴᠥᠮ ᠦᠬᠦᠬᠦ ᠲᠤᠯᠠ ᠲᠡᠭᠷᠢ ᠶ᠋ᠢᠨ ᠴᠠᠭ ᠢ᠋ ᠮᠡᠳᠡᠬᠦ ᠠᠷᠠᠳ ᠼᠦᠢ ᠯᠢ ᠶ᠋ᠢ ᠲᠡᠭᠷᠢ ᠶ᠋ᠢᠨ ᠴᠠᠭ ᠢ᠋ ᠮᠡᠳᠡᠵᠦ ᠮᠣᠩᠭᠣᠯ ᠳ᠋ᠤᠷ ᠳᠠᠭᠠᠵᠤ᠂ ᠪᠢᠶᠠᠨ ᠯᠢᠶᠠᠩ ᠬᠣᠲᠠ ᠶ᠋ᠢᠨ ᠨᠡᠢᠲᠡ ᠶ᠋ᠢ ᠠᠪᠤᠷᠠᠪᠠ ᠭᠡᠮᠡᠨ ᠭᠠᠪᠢᠶᠠ ᠡᠷᠳᠡᠮ ᠪᠦᠷᠢᠳᠦᠭᠰᠡᠨ ᠬᠥᠰᠢᠶᠡ ᠴᠢᠯᠠᠭᠤ ᠪᠠᠢᠭᠤᠯᠰᠤᠭᠠᠢ ᠭᠡᠮᠡᠨ ᠭᠤᠶᠤᠨ ᠮᠡᠳᠡᠭᠦᠯᠦᠭᠰᠡᠨᠡ᠂ ᠵᠠᠢ ᠢ᠂ ᠱᠠᠩ ᠱᠣ ᠱᠧᠩ ᠶᠠᠮᠤᠨ ᠤ᠋ ᠬᠠᠨ ᠯᠢᠨ ᠰᠢᠦᠸᠠᠢ ᠱᠢ ᠲᠦᠰᠢᠮᠡᠯ ᠸᠠᠩ ᠶᠠᠨ ᠰᠢᠦᠢ ᠶ᠋ᠢ ᠬᠥᠰᠢᠶᠡ ᠴᠢᠯᠠᠭᠤᠨ ᠤ᠋ ᠪᠢᠴᠢᠭ ᠢ᠋ ᠪᠢᠴᠢ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠸᠠᠩ ᠶᠠᠨ ᠰᠢᠦᠢ ᠰᠡᠮᠡᠬᠡᠷ ᠶᠤᠸᠠᠨ ᠬᠣᠣ ᠸᠧᠨ ᠳ᠋ᠦ᠍ᠷ ᠥᠭᠦᠯᠡᠷᠦᠨ: 《ᠡᠳᠦᠭᠡ ᠣᠯᠠᠨ ᠪᠢᠯᠳᠠᠤᠴᠢ ᠠᠷᠠᠳ ᠨᠠᠮᠠᠶ᠋ᠢ ᠳᠠᠭᠤᠳᠠᠵᠤ ᠬᠥᠰᠢᠶᠡ ᠴᠢᠯᠠᠭᠤᠨ ᠤ᠋ ᠪᠢᠴᠢᠭ ᠢ᠋ ᠪᠢᠴᠢ ᠬᠡᠮᠡᠮᠦᠢ᠂ ᠦᠭᠡ ᠶ᠋ᠢ ᠡᠰᠡ ᠳᠠᠭᠠᠪᠠᠰᠤ ᠯᠠᠪ ᠦᠬᠦᠮᠦᠢ᠂ ᠦᠭᠡ ᠶ᠋ᠢ ᠳᠠᠭᠠᠪᠠᠰᠤ ᠨᠡᠷᠡ ᠶᠠᠪᠤᠳᠠᠯ ᠴᠥᠮ ᠬᠣᠭᠣᠰᠣᠨ ᠪᠣᠯᠤᠮᠤᠢ᠂ ᠡᠭᠦᠨ ᠳ᠋ᠦ᠍ᠷ ᠦᠬᠦᠬᠦᠢ ᠳ᠋ᠦ᠍ᠷ ᠬᠦᠷᠬᠦ ᠦᠭᠡᠢ᠂ ᠲᠡᠢᠨ ᠪᠣᠯᠪᠠᠴᠤ ᠪᠢ ᠲᠦᠷ ᠭᠣᠣᠯ ᠶᠣᠰᠣᠨ ᠢ᠋ᠶ᠋ᠠᠷ ᠤᠬᠠᠭᠤᠯᠰᠤᠭᠠᠢ ! 》ᠬᠡᠮᠡᠭᠡᠳ ᠵᠠᠢ ᠢ ᠶ᠋ᠢᠨ ᠵᠦᠭ ᠥᠭᠦᠯᠡᠷᠦᠨ :《ᠴᠧᠩᠰᠢᠶᠠᠩ ᠥᠪᠡᠷ ᠦ᠋ᠨ ᠪᠡᠶᠡ ᠳ᠋ᠦ᠍ᠷ ᠮᠠᠭᠤ ᠨᠡᠷᠡ ᠶ᠋ᠢ ᠬᠦᠯᠢᠶᠡᠵᠦ᠂ ᠲᠦᠭ ᠲᠦᠮᠡᠨ ᠢᠷᠭᠡᠨ ᠪᠠ ᠬᠠᠭᠠᠨ ᠤ᠋ ᠲᠥᠷᠥᠯ ᠲᠥᠷᠥᠭᠰᠡᠨ ᠨᠡᠢᠲᠡ ᠶ᠋ᠢᠨ ᠦᠬᠦᠬᠦ ᠡᠴᠡ ᠠᠪᠤᠷᠠᠨ ᠭᠡᠲᠦᠯᠭᠡᠬᠦ ᠢᠨᠤ ᠭᠠᠪᠢᠶᠠ ᠡᠷᠳᠡᠮ ᠪᠤᠰᠤ ᠶᠠᠭᠤᠨ ? 》ᠬᠡᠮᠡᠬᠦᠢ ᠳ᠋ᠦ᠍ᠷ ᠸᠠᠩ ᠶᠤᠸᠠᠨ ᠰᠢᠦᠢ ᠥᠭᠦᠯᠡᠷᠦᠨ : 《ᠰᠢᠦᠸᠠᠢ ᠱᠢ ᠲᠦᠰᠢᠮᠡᠯ ᠸᠠᠩ ᠤ᠋ᠨ ᠲᠥᠯᠥᠭᠡ ᠭᠠᠪᠢᠶᠠ ᠡᠷᠳᠡᠮ ᠦ᠋ᠨ ᠬᠥᠰᠢᠶᠡ ᠴᠢᠯᠠᠭᠤᠨ ᠤ᠋ ᠦᠭᠡᠰ ᠢ᠋ ᠵᠣᠬᠢᠶᠠᠨ ᠪᠢᠴᠢᠬᠦᠢ ᠳ᠋ᠦ᠍ᠷ ᠸᠠᠩ ᠤ᠋ᠨ ᠦᠭᠡ ᠶ᠋ᠢ ᠬᠡᠯᠡᠵᠦ ᠪᠣᠯᠤᠮᠤᠢ ᠤᠤ ? ᠵᠢᠴᠢ ᠴᠧᠩᠰᠢᠶᠠᠩ ᠨᠢᠭᠡᠨᠲᠡ ᠨᠡᠢᠰᠯᠡᠯ ᠢ᠋ ᠠᠪᠴᠤ ᠮᠣᠩᠭᠣᠯ ᠳ᠋ᠤᠷ ᠳᠠᠭᠠᠭᠰᠠᠨ ᠲᠤᠯᠠ ᠵᠠᠭᠤᠨ ᠲᠦᠰᠢᠮᠡᠳ ᠴᠥᠮ ᠲᠡᠭᠦᠨ ᠦ᠌ ᠳᠣᠣᠷᠠ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠲᠡᠭᠦᠨ ᠦ᠌ ᠡᠭᠦᠳᠡᠨ ᠡᠴᠡ ᠭᠠᠷᠤᠭᠰᠠᠨ ᠲᠦᠰᠢᠮᠡᠳ ᠲᠡᠭᠦᠨ ᠦ᠌ ᠭᠠᠪᠢᠶᠠ ᠡᠷᠳᠡᠮ ᠢ᠋ ᠮᠠᠭᠲᠠᠵᠤ ᠬᠣᠢᠰᠢ ᠦᠶᠡ ᠳ᠋ᠦ᠍ᠷ ᠬᠡᠷᠬᠢᠨ ᠡᠭᠦᠷᠢᠳᠡ ᠪᠠᠲᠤ ᠪᠣᠯᠭᠠᠨ ᠴᠢᠳᠠᠮᠤᠢ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠠᠢ ᠢ ᠲᠡᠷᠢᠭᠦᠨ ᠳᠣᠬᠢᠵᠤ ᠵᠢᠬᠡᠭᠦᠨ ᠢ᠋ᠶ᠋ᠡᠷ ᠢᠨᠢᠶᠡᠵᠦ ᠥᠴᠢᠭᠰᠡᠨ ᠦᠭᠡᠢ ᠡᠭᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠳᠠᠭᠠᠯᠳᠤᠭᠠ ᠣᠯᠠᠨ ᠢᠷᠭᠡᠨ ᠪᠦᠭᠦᠳᠡᠭᠡᠷ ᠴᠢᠭᠤᠯᠵᠤ᠂ ᠴᠧᠩᠰᠢᠶᠠᠩ ᠼᠦᠢ ᠯᠢ ᠶ᠋ᠢᠨ ᠣᠯᠠᠨ ᠢᠷᠭᠡᠨ ᠢ᠋ ᠠᠪᠤᠷᠠᠵᠤ ᠭᠠᠷᠭᠠᠭᠰᠠᠨ ᠠᠴᠢ ᠳ᠋ᠤᠷ ᠠᠨᠤ ᠴᠢᠭᠤᠯᠤᠨ ᠢᠷᠡᠵᠦ ᠂ ᠸᠠᠩ ᠶᠤᠸᠠᠨ ᠰᠢᠦᠢ ᠶ᠋ᠢ ᠡᠷᠡᠦᠯᠡᠵᠦ ᠶᠡᠬᠡ ᠬᠥᠰᠢᠶᠡ ᠶ᠋ᠢᠨ ᠪᠢᠴᠢᠭ ᠢ᠋ ᠪᠢᠴᠢᠭᠦᠯᠵᠦ᠂ ᠴᠧᠩᠰᠢᠶᠠᠩ ᠼᠦᠢ ᠯᠢ ᠶ᠋ᠢᠨ ᠭᠠᠪᠢᠶᠠ ᠵᠢᠳᠬᠦᠯᠭᠡ ᠶ᠋ᠢᠨ ᠶᠡᠬᠡ ᠬᠥᠰᠢᠶᠡ ᠶ᠋ᠢ ᠪᠤᠰᠬᠠᠵᠤ᠂ ᠵᠠᠭᠤᠨ ᠵᠡᠷᠭᠡ ᠮᠠᠭᠲᠠᠯᠴᠠᠨ ᠰᠠᠢᠰᠢᠶᠠᠯᠳᠤᠪᠠᠢ᠃
ᠲᠡᠨᠳᠡᠴᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠬᠦᠢ ᠳᠧ ᠹᠦ ᠳ᠋ᠦ᠍ᠷ ᠪᠥᠬᠥᠶᠡ ᠬᠠᠭᠠᠨ ᠤ᠋ ᠰᠢᠳᠠᠷ ᠴᠡᠷᠢᠭ᠂ ᠾᠧ ᠵᠧᠦ᠂ ᠬᠤᠸᠠᠨ ᠵᠧᠦ ᠡᠴᠡ ᠰᠠᠷᠨᠢᠭᠰᠠᠨ ᠣᠯᠠᠨ ᠴᠡᠷᠢᠭ ᠳᠠᠮ ᠳᠠᠮ ᠢ᠋ᠶ᠋ᠠᠷ ᠴᠢᠭᠤᠯᠤᠨ ᠢᠷᠡᠬᠦᠢ ᠳ᠋ᠦ᠍ᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠵᠤᠨ ᠱᠢ ᠵᠠᠨ ᠨᠢᠦᠢ ᠯᠦ᠍ ᠭᠦᠸᠧ ᠴᠡᠷᠢᠭ ᠲᠦ᠍ᠷ ᠬᠦᠨᠡᠰᠦ ᠥᠭᠴᠦ ᠬᠦᠷᠦᠯᠴᠡᠬᠦ ᠦᠭᠡᠢ ᠡᠴᠡ ᠪᠣᠯᠭᠣᠮᠵᠢᠯᠠᠨ᠂ ᠬᠠᠭᠠᠨ ᠳ᠋ᠤᠷ ᠢ᠋ᠶ᠋ᠠᠨ ᠠᠢᠯᠠᠳᠬᠠᠨ᠂ ᠣᠯᠠᠨ ᠴᠡᠷᠢᠭ ᠦ᠋ᠳ ᠢ᠋ ᠬᠣᠲᠠᠨ ᠠ᠋ᠴᠠ ᠭᠠᠷᠭᠠᠨ ᠰᠦᠢ᠂ ᠴᠧᠨ᠂ ᠰᠢᠦᠢ ᠡᠨᠡ ᠭᠤᠷᠪᠠᠨ ᠵᠧᠦ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ ᠠᠮᠤ ᠡᠷᠢᠨ ᠢᠳᠡᠭᠦᠯᠰᠦᠭᠡᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠮᠥᠨ ᠠᠷᠭᠠ ᠦᠭᠡᠢ ᠦᠭᠡ ᠶ᠋ᠢ ᠠᠪᠴᠤ ᠭᠠᠭᠴᠠ ᠶᠡᠬᠡ ᠶᠤᠸᠠᠨᠱᠤᠸᠠᠢ ᠫᠦ ᠴᠠ ᠭᠤᠸᠠᠨ ᠨᠥ ᠶ᠋ᠢᠨ 《ᠵᠦᠩ ᠰᠢᠶᠣᠤ ᠵᠢᠶᠦ᠋ᠨ – ᠰᠢᠳᠤᠷᠭᠤ ᠠᠴᠢᠯᠠᠯᠲᠤ ᠴᠡᠷᠢᠭ 》 ᠦ᠋ᠨ ᠳᠥᠷᠪᠡᠨ ᠵᠠᠭᠤᠨ ᠲᠠᠪᠢᠨ ᠮᠣᠷᠢᠲᠤ ᠴᠡᠷᠢᠭ ᠬᠢᠭᠡᠳ ᠮᠠ ᠵᠦᠩ ᠦ᠋ᠨ ᠳᠣᠯᠣᠭᠠᠨ ᠵᠠᠭᠤᠨ ᠴᠡᠷᠢᠭ ᠢ᠋ ᠦᠯᠡᠳᠡᠭᠡᠵᠦ᠂ ᠣᠯᠠᠨ ᠴᠡᠷᠢᠭ ᠢ᠋ ᠨᠢᠭᠡᠨᠲᠡ ᠬᠣᠲᠠᠨ ᠠ᠋ᠴᠠ ᠭᠠᠷᠭᠠᠭᠠᠳ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠫᠦ ᠴᠠ ᠭᠤᠸᠠᠨ ᠨᠦ᠍ ᠶ᠋ᠢ ᠳᠠᠭᠤᠳᠠᠵᠤ ᠵᠠᠷᠯᠢᠭ ᠪᠣᠯᠤᠷᠤᠨ :《ᠱᠢ ᠵᠠᠨ ᠨᠢᠦᠢ ᠯᠦ᠍ ᠭᠦᠸᠧ ᠮᠢᠨᠦ ᠪᠡᠶᠡ ᠶ᠋ᠢ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠢ᠋ ᠨᠢᠭᠡᠨᠲᠡ ᠴᠥᠮ ᠲᠠᠷᠬᠠᠭᠠᠵᠤᠬᠤᠢ᠃ ᠴᠢᠩ ᠴᠢ ᠰᠠᠢᠲᠤᠷ ᠬᠢᠴᠢᠶᠡᠲᠦᠭᠡᠢ ! 》ᠬᠡᠮᠡᠪᠡᠢ ᠃ ᠫᠦ ᠴᠠ ᠭᠤᠸᠠᠨ ᠨᠦ᠍ ᠳᠣᠲᠣᠷᠠ ᠪᠠᠨ ᠰᠡᠳᠬᠢᠷᠦᠨ : ᠮᠠ ᠶᠦᠩ ᠬᠡᠮᠡᠭᠴᠢ ᠤᠭ ᠠ᠋ᠴᠠ ᠬᠦᠢ ᠳᠧ ᠹᠦ ᠶ᠋ᠢᠨ ᠥᠴᠦᠬᠡᠨ ᠴᠡᠷᠢᠭ ᠦ᠋ᠨ ᠬᠥᠮᠦᠨ᠂ ᠨᠢᠭᠡᠨ ᠥᠷᠯᠥᠭᠡ ᠶ᠋ᠢᠨ ᠵᠠᠭᠤᠷᠠ ᠮᠠᠨᠳᠤᠭᠰᠠᠨ ᠬᠥᠮᠦᠨ᠂ ᠠᠢᠽᠦ᠋ᠩ ᠬᠠᠭᠠᠨ ᠪᠠᠰᠠ ᠪᠠᠢᠨ ᠪᠠᠢᠨ ᠭᠠᠭᠴᠠ ᠮᠠ ᠶᠦᠩ ᠢ᠋ ᠳᠠᠭᠤᠳᠠᠨ ᠬᠡᠷᠡᠭ ᠵᠥᠪᠡᠯᠡᠵᠦ᠂ ᠲᠡᠭᠦᠨ ᠦ᠌ ᠪᠡᠶᠡ ᠶ᠋ᠢ ᠬᠡᠷᠡᠭᠰᠡᠬᠦ ᠦᠭᠡᠢ ᠳ᠋ᠦ᠍ᠷ ᠫᠦ ᠴᠠ ᠭᠤᠸᠠᠨ ᠨᠦ᠍᠂ ᠮᠠ ᠶᠦᠩ ᠢ᠋ ᠠᠷᠢᠯᠭᠠᠬᠤ ᠰᠠᠨᠠᠭᠠᠨ ᠢ᠋ ᠪᠠᠷᠢᠪᠠᠢ᠃
ᠲᠡᠷᠡ ᠲᠤᠬᠠᠢ ᠳ᠋ᠤᠷ ᠮᠣᠩᠭᠣᠯ ᠤ᠋ᠨ ᠲᠦᠮᠡᠲᠡᠢ ᠬᠠᠷᠠᠬᠠᠨ ᠲᠡᠢᠰᠢ ᠪᠤᠯᠤ ᠶ᠋ᠢᠨ ᠵᠠᠬᠢᠶᠠ ᠪᠠᠷ ᠪᠦᠸᠧ ᠵᠧᠦ ᠶ᠋ᠢ ᠬᠠᠭᠠᠵᠤ᠂ ᠪᠠᠰᠠ ᠡᠳᠦᠷ ᠪᠦᠷᠢ ᠴᠡᠷᠢᠭ ᠢᠯᠡᠬᠡᠨ ᠬᠦᠢ ᠳᠧ ᠹᠦ ᠶ᠋ᠢ ᠬᠠᠭᠠᠵᠤ ᠬᠠᠷᠢᠶᠠᠯᠭᠠᠨ ᠬᠣᠲᠠ ᠶ᠋ᠢᠨ ᠢᠷᠭᠡᠨ ᠢ᠋ ᠲᠣᠷᠣᠮᠵᠢᠯᠠᠬᠤᠢ ᠳ᠋ᠤᠷ ᠰᠡᠳᠬᠢᠯ ᠳᠣᠯᠭᠢᠰᠤᠨ ᠬᠥᠳᠡᠯᠵᠦ᠂ ᠫᠦ ᠴᠠ ᠭᠤᠸᠠᠨ ᠨᠦ᠍ ᠠᠢᠽᠦ᠋ᠩ ᠬᠠᠭᠠᠨ ᠳ᠋ᠤᠷ ᠠᠢᠯᠠᠳᠬᠠᠨ ᠬᠣᠢᠲᠤ ᠭᠣᠣᠯ ᠢ᠋ ᠭᠡᠲᠦᠯᠵᠦ᠂ ᠠᠯᠳᠠᠭᠰᠠᠨ ᠭᠠᠵᠠᠷ ᠢ᠋ ᠭᠡᠳᠡᠷᠭᠦ ᠪᠠᠢᠯᠳᠤᠨ ᠠᠪᠰᠤᠭᠠᠢ ᠬᠡᠮᠡᠭᠰᠡᠨ ᠢ᠋ ᠱᠢ ᠵᠠᠨ ᠨᠢᠦᠢ ᠯᠦ᠍ ᠭᠦᠸᠧ ᠬᠣᠷᠢᠭᠯᠠᠨ ᠵᠣᠭᠰᠣᠭᠠᠭᠰᠠᠨ ᠳ᠋ᠤᠷ ᠫᠦ ᠴᠠ ᠭᠤᠸᠠᠨ ᠨᠥ ᠪᠠᠶᠠᠷ ᠦᠭᠡᠢ ᠪᠣᠯᠵᠤ᠂ ᠰᠡᠮᠡᠬᠡᠷ ᠸᠠᠨ ᠶᠠᠨ ᠶᠦᠩ ᠠᠨ ᠯᠤᠭᠠ ᠵᠥᠪᠳᠡᠵᠦ᠂ ᠠᠢᠽᠦ᠋ᠩ ᠬᠠᠭᠠᠨ ᠢ᠋ ᠠᠪᠴᠤ ᠬᠠᠢ ᠵᠧᠦ ᠳ᠋ᠦ᠍ᠷ ᠡᠴᠢᠰᠦᠭᠡᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠦᠭᠡ ᠶ᠋ᠢ ᠡᠰᠡ ᠠᠪᠤᠭᠰᠠᠨ ᠳ᠋ᠤᠷ ᠫᠦ ᠴᠠ ᠭᠤᠸᠠᠨ ᠨᠦ᠍ ᠠᠭᠤᠷᠯᠠᠨ ᠬᠣᠷᠣᠰᠴᠤ ᠥᠪᠡᠷᠡ ᠰᠠᠨᠠᠭᠠᠨ ᠪᠠᠷᠢᠬᠤ ᠰᠡᠳᠬᠢᠯ ᠲᠣᠭᠲᠠᠭᠰᠠᠨ ᠳ᠋ᠤᠷ ᠲᠡᠭᠦᠨ ᠢ᠋ ᠯᠢ ᠱᠢ ᠰᠣᠨᠣᠰᠤᠭᠠᠳ ᠰᠡᠮᠡᠬᠡᠷ ᠬᠠᠭᠠᠨ ᠳ᠋ᠤᠷ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ ᠠᠢᠽᠦ᠋ᠩ ᠬᠠᠭᠠᠨ ᠶᠡᠬᠡ ᠯᠡ ᠵᠣᠪᠠᠨᠢᠵᠤ᠂ ᠮᠣᠷᠢᠲᠤ ᠴᠡᠷᠢᠭ ᠦ᠋ᠨ ᠽᠦᠩ ᠯᠢᠩ ᠲᠦᠰᠢᠮᠡᠯ ᠾᠧ ᠱᠢ ᠯᠢᠶ᠋ᠸ᠂ ᠡᠯᠢᠨᠾᠸ ᠪᠠ ᠵᠢᠴᠢ ᠣᠢᠷᠠ ᠤᠭᠰᠠᠭᠠ ᠶ᠋ᠢᠨ ᠸᠠᠨ ᠶᠠᠨ ᠰᠢ ᠰᠢᠶᠠᠨ ᠨᠠᠷ ᠲᠤᠷ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠫᠦ ᠴᠠ ᠭᠤᠸᠠᠨ ᠨᠥ᠍ ᠶ᠋ᠢᠨ ᠪᠠᠢᠳᠠᠯ ᠳᠦᠷᠢᠮ ᠢ᠋ ᠰᠡᠮᠡᠬᠡᠷ ᠲᠡᠩᠰᠡᠭᠲᠦᠨ ᠬᠡᠮᠡᠪᠡᠢ᠃ ᠡᠯᠢᠨᠾᠸ ᠬᠠᠷᠢᠨ ᠬᠠᠭᠠᠨ ᠤ᠋ ᠰᠠᠨᠠᠭᠠᠨ ᠢ᠋ ᠫᠦ ᠴᠠ ᠭᠤᠸᠠᠨ ᠨᠥ ᠳ᠋ᠦ᠍ᠷ ᠴᠥᠮ ᠬᠡᠯᠡᠭᠰᠡᠨ ᠳ᠋ᠦ᠍ᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠫᠦ ᠴᠠ ᠭᠤᠸᠠᠨ ᠨᠥ᠂ ᠮᠠ ᠶᠦᠩ ᠨᠠᠷ ᠬᠠᠷᠢᠯᠴᠠᠨ ᠬᠥᠨᠥᠭᠡᠯᠴᠡᠨ ᠰᠠᠮᠠᠭᠤᠨ ᠡᠳᠦᠬᠦ ᠡᠴᠡ ᠠᠶᠤᠵᠤ᠂ ᠴᠧᠩᠰᠢᠶᠠᠩ ᠨᠠᠷ ᠲᠤᠷ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠬᠤᠷᠢᠮ ᠪᠡᠯᠡᠳᠬᠡᠵᠦ᠂ ᠫᠦ ᠴᠠ ᠭᠤᠸᠠᠨ ᠨᠦ᠍᠂ ᠮᠠ ᠶᠦᠩ ᠬᠣᠶᠠᠭᠤᠯᠠ ᠶ᠋ᠢ ᠡᠶᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠮᠠ ᠶᠦᠩ ᠬᠣᠣᠷᠯᠠᠬᠤ ᠶ᠋ᠢ ᠪᠠᠢᠵᠤ ᠪᠡᠯᠡᠳᠬᠡᠯ ᠢ᠋ᠶ᠋ᠡᠨ ᠬᠤᠷᠢᠶᠠᠭᠰᠠᠨ ᠳ᠋ᠤᠷ ᠫᠦ ᠴᠠ ᠭᠤᠸᠠᠨ ᠨᠦ᠍ ᠵᠠᠪᠳᠤᠵᠤ ᠣᠯᠠᠨ ᠢ᠋ᠶ᠋ᠠᠨ ᠠᠪᠴᠤ ᠮᠠ ᠶᠦᠩ ᠦ᠋ᠨ ᠭᠡᠷ ᠲᠦ᠍ᠷ ᠣᠷᠣᠵᠤ᠂ ᠮᠠ ᠶᠦᠩ ᠢ᠋ ᠠᠯᠠᠭᠰᠠᠨ ᠳ᠋ᠤᠷ ᠢ᠋ᠶ᠋ᠠᠨ ᠵᠣᠭᠰᠣᠵᠤ ᠪᠣᠯᠬᠤ ᠦᠭᠡᠢ ᠪᠡᠨ ᠮᠡᠳᠡᠭᠡᠳ ᠶᠠᠭᠠᠷᠠᠨ ᠲᠠᠪᠢᠨ ᠴᠡᠷᠢᠭ ᠢ᠋ᠶ᠋ᠡᠷ ᠬᠠᠭᠠᠨ ᠤ᠋ ᠬᠦᠷᠢᠶᠡ ᠪᠦᠰᠡᠯᠡᠵᠦ᠂ ᠣᠯᠠᠨ ᠲᠦᠰᠢᠮᠡᠳ ᠨᠠᠷ ᠢ᠋ ᠳᠦ ᠢᠦᠢ ᠲᠦᠰᠢᠮᠡᠯ ᠮᠣᠤ ᠨᠢᠶᠠᠨ ᠭᠦᠸᠧ ᠶ᠋ᠢᠨ ᠭᠡᠷ ᠲᠦ᠍ᠷ ᠴᠤᠭᠯᠠᠭᠤᠯᠤᠨ ᠴᠡᠷᠢᠭ ᠢ᠋ᠶ᠋ᠡᠷ ᠰᠠᠭᠢᠭᠤᠯᠤᠭᠠᠳ ᠱᠢ ᠵᠠᠨ ᠨᠢᠦᠢ ᠯᠦ᠍ ᠭᠦᠸᠧ ᠶ᠋ᠢ ᠬᠥᠭᠡᠭᠡᠵᠦ ᠲᠡᠭᠦᠨ ᠦ᠌ ᠭᠡᠷ ᠲᠦ᠍ᠷ ᠠᠪᠠᠴᠢᠵᠤ᠂ ᠨᠢᠭᠤᠭᠰᠠᠨ ᠠᠯᠲᠠᠨ ᠮᠥᠩᠭᠥᠨ ᠡᠳ᠋ ᠲᠠᠸᠠᠷ ᠢ᠋ ᠴᠥᠮ ᠭᠠᠷᠭᠠᠵᠤ ᠠᠪᠤᠭᠰᠠᠨ ᠬᠣᠢᠨᠠ᠂ ᠱᠢ ᠵᠠᠨ ᠨᠢᠦᠢ ᠯᠦ᠍ ᠭᠦᠸᠧ ᠶ᠋ᠢ ᠠᠯᠠᠭᠠᠳ ᠪᠠᠰᠠ ᠳᠦ ᠢᠦᠢ ᠲᠦᠰᠢᠮᠡᠯ ᠮᠠ ᠱᠢ ᠶ᠋ᠢ ᠬᠤᠶᠠᠭ ᠡᠮᠦᠰᠬᠡᠨ ᠵᠡᠪᠰᠡᠭ ᠪᠠᠷᠢᠭᠤᠯᠵᠤ᠂ ᠪᠠᠰᠠ ᡁᠢ ᠵᠧᠩ ᠲᠦᠰᠢᠮᠡᠯ ᠪᠠ ᠨᠥ᠍ ᠱᠠᠨ ᠢ᠋ ᠴᠢᠷᠦᠭᠦᠯᠦᠨ ᠠᠢᠽᠦ᠋ᠩ ᠬᠠᠭᠠᠨ ᠤ᠋ ᠡᠮᠦᠨᠡ ᠠᠪᠠᠴᠢᠭᠰᠠᠨ ᠳ᠋ᠤᠷ ᠠᠢᠽᠦ᠋ᠩ ᠬᠠᠭᠠᠨ ᠪᠠᠷᠢᠭᠰᠠᠨ ᠰᠡᠯᠡᠮᠡ ᠪᠡᠨ ᠭᠠᠵᠠᠷ ᠲᠤᠷ ᠲᠠᠶᠠᠭᠳᠠᠵᠤ᠂ ᠮᠠ ᠱᠢ ᠶ᠋ᠢᠨ ᠵᠦᠭ ᠥᠭᠦᠯᠡᠷᠦᠨ :《ᠴᠢ ᠮᠢᠨᠦ ᠲᠥᠯᠥᠭᠡ ᠶᠤᠸᠠᠨᠱᠤᠸᠠᠢ ᠳ᠋ᠤᠷ ᠬᠡᠯᠡᠭᠲᠦᠨ ᠮᠢᠨᠦ ᠡᠮᠦᠨᠡ ᠭᠠᠭᠴᠠ ᠡᠨᠡ ᠨᠢᠭᠡᠬᠡᠨ ᠬᠥᠮᠦᠨ ᠪᠣᠢ᠂ ᠪᠢ ᠡᠭᠦᠨ ᠢ᠋ ᠦᠯᠡᠳᠡᠭᠡᠵᠦ ᠵᠠᠷᠤᠴᠠᠯᠠᠰᠤᠭᠠᠢ᠃ 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠠ ᠱᠢ ᠡᠭᠡᠵᠦᠬᠦᠢ᠃ ᠡᠭᠦᠨ ᠳ᠋ᠦ᠍ᠷ ᠫᠦ ᠴᠠ ᠭᠤᠸᠠᠨ ᠨᠥ᠍ ᠬᠡᠳᠦ ᠬᠡᠳᠦᠨ ᠲᠥᠷᠥ ᠶ᠋ᠢᠨ ᠲᠦᠰᠢᠮᠡᠳ ᠢ᠋ ᠠᠯᠠᠵᠤ᠂ ᠯᠢ ᠱᠢ ᠡᠴᠡ ᠲᠡᠷᠢᠭᠦᠯᠡᠨ ᠭᠤᠷᠪᠠᠨ ᠵᠠᠭᠤᠨ ᠢᠯᠡᠭᠦᠦ ᠬᠥᠮᠦᠨ ᠦᠬᠦᠵᠦ᠂ ᠴᠡᠷᠢᠭ ᠭᠤᠷᠪᠠᠨ ᠮᠢᠩᠭᠠᠨ ᠢᠯᠡᠭᠦᠦ ᠠᠯᠠᠭᠳᠠᠪᠠ᠃ ᠰᠥᠨᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠫᠦ ᠴᠠ ᠭᠤᠸᠠᠨ ᠨᠥ᠍ ᠵᠡᠪᠰᠡᠭ ᠪᠠᠷᠢᠵᠤ ᠣᠷᠳᠣᠨ ᠳ᠋ᠤᠷ ᠣᠷᠣᠭᠠᠳ ᠠᠢᠽᠦ᠋ᠩ ᠬᠠᠭᠠᠨ ᠤ᠋ ᠡᠮᠦᠨᠡ ᠡᠴᠢᠵᠦ ᠠᠢᠯᠠᠳᠬᠠᠷᠤᠨ :《ᠱᠢ ᠵᠠᠨ ᠨᠢᠦᠢ ᠯᠦ᠍ ᠭᠦᠸᠧ ᠨᠠᠷ ᠤᠷᠪᠠᠭᠰᠠᠨ ᠲᠤᠯᠠ ᠰᠠᠢᠳ ᠪᠢ ᠠᠯᠠᠪᠠᠢ᠂ ᠰᠠᠢᠳ ᠪᠢ ᠤᠭ ᠠ᠋ᠴᠠ ᠡᠵᠡᠨ ᠦ᠌ ᠡᠮᠦᠨᠡ ᠵᠢᠳᠬᠦᠵᠦ ᠦᠬᠦᠰᠦᠭᠡᠢ ᠬᠡᠮᠡᠭᠰᠡᠨ ᠪᠥᠯᠥᠭᠡ᠂ ᠰᠠᠨᠠᠮᠰᠠᠷ ᠦᠭᠡᠢ ᠵᠠᠪᠰᠠᠷ ᠲᠤᠷ ᠮᠠᠭᠤ ᠠᠷᠠᠳ ᠡᠵᠡᠨ ᠢ᠋ ᠵᠠᠪᠰᠠᠷᠳᠠᠭᠤᠯᠤᠨ ᠨᠠᠮᠠᠶ᠋ᠢ ᠡᠨᠡ ᠮᠡᠲᠦ ᠳ᠋ᠦ᠍ᠷ ᠬᠦᠷᠭᠡᠵᠦᠬᠦᠢ᠂ ᠮᠠᠭᠤ ᠨᠡᠷᠡ ᠡᠴᠡ ᠬᠡᠯᠲᠦᠷᠢᠨ ᠴᠢᠳᠠᠬᠤ ᠦᠭᠡᠢ ᠲᠤᠯᠠ ᠬᠡᠷᠬᠢᠨ ᠦᠬᠦᠬᠦ ᠡᠴᠡ ᠠᠶᠤᠵᠤ ᠪᠣᠯᠤᠮᠤᠢ ? 》ᠬᠡᠮᠡᠬᠦᠢ ᠳ᠋ᠦ᠍ᠷ ᠠᠢᠽᠦ᠋ᠩ ᠬᠠᠭᠠᠨ ᠠᠷᠭᠠ ᠦᠭᠡᠢ᠂ ᠱᠢ ᠵᠠᠨ ᠨᠢᠦᠢ ᠯᠦ᠍ ᠭᠦᠸᠧ ᠶ᠋ᠢᠨ ᠶᠠᠯᠠ ᠶ᠋ᠢ ᠲᠣᠭᠠᠴᠢᠵᠤ᠂ ᠫᠦ ᠴᠠ ᠭᠤᠸᠠᠨ ᠨᠥ᠍ ᠶ᠋ᠢ ᠲᠦᠷ ᠼᠠᠨ ᡁᠢ ᠱᠢ ᠲᠦᠰᠢᠮᠡᠯ ᠭᠡᠮᠡᠨ ᠵᠠᠰᠠᠭ ᠤ᠋ᠨ ᠬᠡᠷᠡᠭ ᠢ᠋ ᠬᠠᠪᠰᠤᠷᠤᠨ ᠰᠢᠳᠬᠡᠬᠦ ᠲᠦᠰᠢᠮᠡᠯ ᠡᠷᠭᠦᠮᠵᠢᠯᠡᠵᠦ᠂ ᠶᠡᠬᠡ ᠬᠡᠷᠡᠭ ᠢ᠋ ᠲᠤᠰᠢᠶᠠᠪᠠᠢ᠃
ᠡᠭᠦᠨ ᠳ᠋ᠦ᠍ᠷ ᠣᠳᠣ ᠪᠢᠶᠠᠨ ᠯᠢᠶᠠᠩ ᠤ᠋ᠨ ᠬᠡᠷᠡᠭ ᠢ᠋ ᠬᠡᠯᠡᠬᠦ ᠢᠨᠦ᠂ ᠡᠨᠡ ᠬᠢᠷᠢ ᠮᠣᠩᠭᠣᠯ ᠤ᠋ᠨ ᠲᠠᠢᠽᠦ᠋ᠩ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠡᠮᠦᠨᠡ ᠵᠦᠭ ᠣᠷᠣᠵᠤ᠂ ᠾᠧ ᠯᠢᠨ ᠦ᠌ ᠭᠠᠵᠠᠷ ᠶᠡᠬᠡ ᠴᠡᠷᠢᠭ ᠢ᠋ ᠪᠠᠭᠤᠳᠠᠯᠯᠠᠵᠤ᠂ ᠪᠢᠶᠠᠨ ᠯᠢᠶᠠᠩ ᠢ᠋ ᠠᠪᠬᠤᠢ ᠶ᠋ᠢ ᠱᠠᠭᠠᠷᠳᠠᠬᠤᠢ ᠳ᠋ᠤᠷ ᠲᠠᠢᠰᠢ ᠪᠤᠯᠤ ᠬᠥᠪᠡᠭᠦᠨ ᠪᠡᠷᠢ ᠪᠠ ᠲᠠᠪᠤᠨᠠᠩ ᠨᠠᠨᠰᠠᠷ᠂ ᠵᠠᠩᠵᠤᠨ ᠰᠥᠪᠡᠬᠡᠲᠡᠢ ᠨᠠᠷ ᠢ᠋ ᠠᠪᠴᠤ ᠪᠢᠶᠠᠨ ᠯᠢᠶᠠᠩ ᠤ᠋ᠨ ᠶᠡᠬᠡ ᠲᠥᠯᠥᠪ ᠢ᠋ ᠳᠠᠭᠠᠭᠤᠯᠤᠨ᠂ ᠼᠦᠢ ᠯᠢ ᠶ᠋ᠢ ᠲᠦᠷᠭᠡᠨᠡ ᠪᠢᠶᠠᠨ ᠵᠢᠩ ᠦ᠋ᠨ ᠨᠡᠢᠲᠡ ᠶ᠋ᠢ ᠡᠷᠭᠦᠵᠦ ᠳᠠᠭᠠᠭᠤᠯ ᠭᠡᠮᠡᠨ ᠱᠠᠭᠠᠷᠳᠠᠭᠠᠳ ᠰᠥᠪᠡᠭᠡᠲᠡᠢ᠂ ᠨᠠᠨᠰᠠᠷ ᠬᠣᠶᠠᠭᠤᠯᠠ ᠥᠭᠦᠯᠡᠷᠦᠨ : 《ᠡᠨᠡ ᠬᠣᠲᠠᠨ ᠢ᠋ ᠪᠦᠷᠢᠨᠡ ᠠᠪᠬᠤᠢ ᠳ᠋ᠤᠷ ᠡᠷᠬᠡᠪᠰᠢ ᠬᠡᠰᠢᠭ ᠰᠦᠷ ᠢ ᠠᠳᠠᠯᠢ ᠵᠠᠷᠯᠠᠬᠤ ᠬᠡᠷᠡᠭᠲᠡᠢ᠂ ᠲᠠᠢᠰᠢ ᠥᠷᠥᠰᠢᠶᠡᠯ ᠢ᠋ ᠢᠨᠦ ᠵᠠᠷᠯᠠᠨ᠂ ᠪᠢᠳᠡ ᠰᠦᠷ ᠢ᠋ ᠢᠨᠤ ᠶᠠᠪᠤᠭᠤᠯᠰᠤᠭᠠᠢ᠂ ᠪᠢᠳᠡ ᠭᠠᠭᠴᠠ ᠠᠯᠠᠬᠤ ᠶ᠋ᠢ ᠠᠨᠤ ᠮᠡᠳᠡᠰᠦᠭᠡᠢ᠂ ᠲᠠᠢᠰᠢ ᠭᠠᠭᠴᠠ ᠠᠪᠤᠷᠠᠬᠤ ᠪᠠᠷ ᠠᠨᠤ ᠶᠠᠪᠤᠲᠤᠭᠠᠢ᠂ ᠡᠢᠨ ᠦᠭᠡᠢ ᠪᠣᠯᠪᠠᠰᠤ ᠰᠠᠢᠨ ᠮᠠᠭᠤ ᠶ᠋ᠢ ᠨᠡᠢᠲᠡ ᠪᠡᠷ ᠵᠠᠷᠯᠠᠬᠤᠢ ᠳ᠋ᠤᠷ ᠪᠡᠷᠬᠡ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠰᠢ ᠪᠤᠯᠤ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠥᠭᠦᠯᠡᠷᠦᠨ :《ᠲᠠ ᠮᠠᠭᠤ ᠨᠡᠷᠡ ᠶ᠋ᠢ ᠠᠪᠬᠤ ᠠ᠋ᠴᠠ ᠠᠶᠤᠬᠤ ᠦᠭᠡᠢ ᠤᠤ ? 》 ᠰᠥᠪᠡᠭᠡᠲᠡᠢ ᠨᠠᠷ ᠥᠴᠢᠷᠦᠨ :《ᠲᠠᠢᠰᠢ ᠬᠡᠮᠡᠭᠴᠢ ᠤᠯᠤᠰ ᠤ᠋ᠨ ᠲᠣᠪᠴᠢᠶᠠ᠂ ᠵᠠᠩᠵᠤᠨ ᠬᠡᠮᠡᠭᠴᠢ ᠤᠯᠤᠰ ᠤ᠋ᠨ ᠰᠦᠷ᠂ ᠡᠭᠦᠨ ᠳ᠋ᠦ᠍ᠷ ᠶᠠᠮᠪᠠᠷ ᠠᠶᠤᠬᠤ ᠭᠠᠵᠠᠷ ᠪᠣᠢ ! 》ᠭᠡᠮᠡᠨ ᠳᠠᠷᠤᠢ ᠼᠦᠢ ᠯᠢ ᠶ᠋ᠢ ᠰᠢᠪᠠᠳᠠᠭᠤᠯᠪᠠ᠃
ᠲᠡᠳᠦᠢ ᠼᠦᠢ ᠯᠢ ᠬᠡᠷᠡᠭ ᠲᠦᠷᠭᠡᠨ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠭᠡᠳ ᠠᠷᠭᠠ ᠦᠭᠡᠢ ᠬᠣᠲᠠᠨ ᠤ᠋ ᠳᠣᠲᠣᠷᠠᠬᠢ ᠡᠯᠡ ᠵᠦᠢᠯ ᠢ᠋ ᠬᠣᠷᠢᠶᠠᠨ ᠪᠠᠭᠴᠠᠯᠠᠬᠤᠢ ᠳ᠋ᠤᠷ ᠬᠣᠲᠠ ᠶ᠋ᠢᠨ ᠣᠯᠠᠨ ᠲᠡᠭᠷᠢ ᠶ᠋ᠢᠨ ᠴᠠᠭ ᠢ᠋ ᠦᠯᠦ ᠮᠡᠳᠡᠨ᠂ ᠼᠦᠢ ᠯᠢ ᠶ᠋ᠢ ᠮᠣᠩᠭᠣᠯ ᠳ᠋ᠤᠷ ᠳᠠᠭᠠᠪᠠ ᠭᠡᠮᠡᠨ ᠪᠦᠭᠦᠳᠡᠭᠡᠷ ᠲᠡᠭᠦᠨ ᠳ᠋ᠦ᠍ᠷ ᠮᠠᠭᠤ ᠨᠡᠷᠡ ᠵᠡᠭᠦᠯᠭᠡᠨ ᠥᠭᠦᠯᠡᠯᠳᠦᠷᠦᠨ : 《 ᠼᠦᠢ ᠯᠢ ᠬᠠᠭᠠᠨ ᠤ᠋ ᠤᠨᠵᠢᠯᠭᠠᠲᠤ ᠮᠠᠯᠠᠭᠠ ᠪᠠ ᠯᠤᠤ ᠶ᠋ᠢᠨ ᠬᠤᠪᠴᠠᠳ ᠬᠢᠭᠡᠳ ᠲᠠᠢᠬᠡᠦ᠂ ᠬᠤᠸᠠᠩᠬᠡᠦ ᠶ᠋ᠢᠨ ᠴᠢᠮᠡᠭ ᠬᠤᠪᠴᠠᠳ ᠢ ᠰᠥᠪᠡᠬᠡᠲᠡᠢ ᠳ᠋ᠦ᠍ᠷ ᠬᠦᠷᠭᠡᠭᠦᠯᠪᠡ᠃ ᠪᠠᠰᠠ ᠬᠣᠲᠠ ᠶ᠋ᠢᠨ ᠳᠣᠲᠣᠷᠠᠬᠢ ᠠᠯᠲᠠᠨ ᠮᠥᠩᠭᠥᠨ ᠢ᠋ ᠨᠡᠩᠵᠢᠨ ᠠᠪᠬᠤᠢ ᠳ᠋ᠤᠷ ᠣᠯᠠᠨ ᠬᠥᠮᠦᠨ ᠢ᠋ ᠭᠠᠯ ᠢ᠋ᠶ᠋ᠠᠷ ᠲᠥᠭᠡᠨᠡᠵᠦ᠂ ᠤᠰᠤᠨ ᠢ᠋ᠶ᠋ᠠᠷ ᠴᠠᠴᠠᠭᠠᠵᠤ ᠡᠯᠳᠡᠪ ᠢ᠋ᠶ᠋ᠡᠷ ᠡᠷᠡᠭᠦᠳᠡᠨ ᠶᠠᠪᠤᠮᠤᠢ᠃ 》 ᠪᠠᠶᠠᠨ ᠡᠷᠬᠢᠮ ᠭᠡᠷ ᠦ᠋ᠨ ᠠᠷᠠᠳ ᠲᠡᠭᠦᠨ ᠦ᠌ ᠮᠠᠭᠤ ᠳ᠋ᠤᠷ ᠲᠡᠰᠬᠦ ᠦᠭᠡᠢ ᠰᠡᠮᠡᠬᠡᠷ ᠬᠡᠯᠡᠯᠴᠡᠬᠦ ᠢᠨᠦ : 《ᠤᠷᠢᠳᠤ ᠵᠢᠯ ᠬᠣᠲᠠ ᠬᠠᠭᠠᠭᠳᠠᠨ ᠡᠪᠡᠳᠴᠢᠨ ᠳᠡᠭᠳᠡᠵᠦ᠂ ᠬᠡᠳᠦᠬᠡᠨ ᠰᠠᠷᠠ ᠶ᠋ᠢᠨ ᠳᠣᠲᠣᠷᠠ ᠵᠠᠭᠤᠨ ᠲᠦᠮᠡᠨ ᠢᠯᠡᠭᠦᠦ ᠬᠥᠮᠦᠨ ᠦᠬᠦᠬᠦᠢ ᠳ᠋ᠦ᠍ᠷ ᠪᠢᠳᠡ ᠬᠣᠴᠣᠷᠤᠭᠠᠳ ᠡᠨᠡ ᠵᠣᠪᠠᠯᠠᠩ ᠳ᠋ᠤᠷ ᠤᠴᠠᠷᠠᠪᠠ ᠭᠡᠮᠡᠨ ᠬᠣᠷᠤᠰᠤᠯᠴᠠᠮᠣᠢ᠃ 》ᠭᠡᠮᠡᠨ ᠦᠭᠡ ᠡᠳᠦᠭᠰᠡᠨ ᠳ᠋ᠦ᠍ᠷ ᠼᠦᠢ ᠯᠢ ᠰᠣᠨᠣᠰᠴᠤ ᠥᠭᠦᠯᠡᠷᠦᠨ :《ᠲᠡᠭᠷᠢ ᠶ᠋ᠢᠨ ᠴᠠᠭ ᠢ᠋ ᠮᠡᠳᠡᠬᠦ ᠦᠭᠡᠢ ᠮᠤᠩᠬᠠᠭ ᠠᠷᠠᠳ ᠶᠠᠭᠤᠨ ᠬᠡᠯᠡᠪᠡᠰᠦ ᠬᠡᠯᠡᠲᠦᠭᠡᠢ ! ᠪᠢ ᠭᠠᠭᠴᠠ ᠥᠪᠡᠷ ᠦ᠋ᠨ ᠨᠢᠭᠡᠨ ᠪᠡᠶᠡ ᠳ᠋ᠦ᠍ᠷ ᠪᠠᠷᠠᠰᠢ ᠦᠭᠡᠢ ᠮᠠᠭᠤ ᠨᠡᠷᠡ ᠶ᠋ᠢ ᠡᠷᠭᠦᠵᠦ ᠠᠪᠤᠭᠠᠳ ᠵᠠᠭᠤᠨ ᠲᠦᠮᠡᠨ ᠢ᠋ ᠠᠪᠤᠷᠠᠨ ᠭᠠᠷᠭᠠᠵᠤ᠂ ᠬᠠᠭᠠᠨ ᠤ᠋ ᠡᠷᠦᠬᠡ ᠠᠮᠠᠨ ᠢ᠋ ᠬᠠᠮᠠᠭᠠᠯᠠᠨ ᠡᠰᠡ ᠠᠯᠠᠭᠤᠯᠪᠠᠰᠤ ᠪᠠᠷᠠᠪᠠ !》ᠭᠡᠮᠡᠨ ᠳᠠᠷᠤᠢ ᠲᠡᠭᠦᠨ ᠦ᠌ ᠡᠮᠡ ᠯᠦ᠍ᠭᠡ ᠣᠷᠳᠣᠨ ᠳ᠋ᠤᠷ ᠣᠷᠣᠵᠤ᠂ ᠲᠠᠢᠬᠡᠦ᠂ ᠬᠤᠸᠠᠩᠬᠡᠦ ᠶ᠋ᠢᠨ ᠦᠬᠦᠬᠦ ᠠᠮᠢᠳᠤᠷᠠᠬᠤ ᠳᠤᠷᠠ ᠶ᠋ᠢ ᠡᠰᠢᠯᠡᠵᠦ᠂ ᠴᠥᠮ ᠦᠬᠦᠬᠦ ᠳᠤᠷᠠ ᠦᠭᠡᠢ ᠬᠡᠮᠡᠬᠦ ᠲᠤᠯᠠ ᠡᠷᠬᠡᠪᠰᠢ ᠠᠮᠢᠳᠤᠷᠠᠬᠤ ᠵᠠᠮ ᠢ᠋ ᠪᠡᠯᠡᠳᠭᠡ ᠭᠡᠮᠡᠨ ᠬᠦᠨᠳᠦ ᠱᠠᠩ ᠪᠠᠭᠤᠯᠭᠠᠬᠤᠢ ᠳ᠋ᠤᠷ ᠼᠦᠢ ᠯᠢ ᠰᠡᠮᠡᠬᠡᠷ ᠠᠢᠯᠠᠳᠬᠠᠷᠤᠨ : 《ᠲᠡᠭᠷᠢ ᠶ᠋ᠢᠨ ᠴᠠᠭ ᠨᠢᠭᠡᠨᠲᠡ ᠮᠣᠩᠭᠣᠯ ᠳ᠋ᠤᠷ ᠪᠣᠯᠪᠠᠢ᠂ ᠵᠥᠷᠢᠴᠡᠬᠦᠶᠡ ᠪᠡᠷᠬᠡ᠂ ᠬᠡᠷᠡᠭ ᠦᠭᠡᠢ ᠲᠡᠭᠷᠢ ᠶ᠋ᠢ ᠰᠥᠷᠴᠦ ᠦᠬᠦᠬᠦ ᠡᠴᠡ ᠣᠯᠠᠨ ᠬᠥᠮᠦᠨ ᠦ᠌ ᠰᠠᠨᠠᠭᠠᠨ ᠢ᠋ ᠠᠪᠴᠤ ᠮᠣᠩᠭᠣᠯ ᠳ᠋ᠤᠷ ᠳᠠᠭᠠᠵᠤ ᠮᠢᠬᠠ ᠶ᠋ᠢᠨ ᠪᠡᠶᠡ ᠶ᠋ᠢ ᠬᠠᠮᠠᠭᠠᠯᠠᠬᠤ ᠢᠨᠦ ᠡᠷᠬᠢᠮ᠂ ᠦᠬᠦᠭᠡᠳ ᠬᠠᠭᠠᠨ ᠢ᠋ ᠳᠠᠬᠢᠨ ᠪᠠᠢᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠲᠤᠯᠠ ᠠᠮᠢᠳᠤ ᠪᠠᠷ ᠳᠠᠭᠠᠵᠤ ᠠᠯᠭᠤᠷ ᠪᠣᠳᠣᠬᠤᠢ ᠳ᠋ᠤᠷ ᠬᠦᠷᠬᠦ ᠦᠭᠡᠢ᠃ ᠡᠳᠦᠭᠡ ᠬᠠᠭᠠᠨ ᠤ᠋ ᠬᠥᠬᠥᠯᠲᠦ ᠡᠬᠡ ᠶ᠋ᠢ ᠬᠠᠭᠠᠨ ᠳ᠋ᠤᠷ ᠵᠠᠷᠤᠵᠤ᠂ ᠬᠠᠭᠠᠨ ᠢ᠋ ᠮᠥᠨ ᠰᠠᠢᠬᠠᠨ ᠢ᠋ᠶ᠋ᠠᠷ ᠳᠠᠭᠠᠭᠤᠯᠰᠤᠭᠠᠢ᠂ ᠡᠨᠳᠡ ᠯᠢᠶᠠᠩ ᠸᠠᠩ ᠴᠧᠩ ᠺᠧ ᠪᠣᠢ ᠲᠤᠯᠠ ᠣᠷᠳᠣᠨ ᠤ᠋ ᠣᠯᠠᠨ ᠢ᠋ ᠲᠦᠷ ᠬᠠᠮᠠᠭᠠᠯᠠᠵᠤ ᠪᠣᠯᠤᠮᠤᠢ ! 》 ᠭᠡᠮᠡᠨ ᠶᠠᠪᠤᠭᠤᠯᠤᠭᠠᠳ ᠼᠦᠢ ᠯᠢ᠂ ᠲᠠᠢᠬᠡᠦ ᠸᠠᠩ ᠱᠢ᠂ ᠬᠤᠸᠠᠩᠬᠡᠦ ᠲᠦ ᠳ᠋ᠠᠨ ᠱᠢ᠂ ᠯᠢᠶᠠᠩ ᠸᠠᠩ ᠴᠧᠩ ᠺᠧ ᠵᠢᠴᠢ ᠵᠢᠩ ᠸᠠᠩ ᠱᠥ ᠴᠦᠨ ᠬᠢᠭᠡᠳ ᠣᠯᠠᠨ ᠪᠢᠨ ᠹᠧᠢ ᠨᠡᠢᠲᠡ ᠭᠤᠴᠢᠨ ᠳᠣᠯᠣᠭᠠᠨ ᠲᠡᠷᠭᠡ ᠤᠭᠰᠠᠭᠠ ᠶ᠋ᠢᠨ ᠡᠷᠡ ᠡᠮᠡ ᠶ᠋ᠢ ᠠᠪᠴᠤ ᠡᠭᠦᠨ ᠡᠴᠡ ᠭᠠᠳᠠᠨᠠ ᠪᠠᠰᠠ ᠤᠭᠰᠠᠭᠠ ᠶ᠋ᠢᠨ ᠲᠠᠪᠤᠨ ᠵᠠᠭᠤᠨ ᠢᠯᠡᠭᠦᠦ ᠬᠥᠮᠦᠨ ᠢ᠋ ᠠᠪᠴᠤ ᠵᠢᠴᠢ ᠺᠦᠩ ᠹᠦᠽᠢ ᠶ᠋ᠢᠨ ᠦᠷᠡ ᠺᠦᠩ ᠶᠤᠸᠠᠨ ᠼᠠᠢ᠂ ᠠᠯᠳᠠᠷᠲᠤ ᠡᠷᠳᠡᠮᠲᠡᠨ ᠯᠢᠶᠠᠩ ᡁᠢ ᠡᠴᠡ ᠳᠠᠷᠠᠭᠠᠯᠠᠨ ᠭᠤᠷᠪᠠᠨ ᠰᠤᠷᠭᠠᠭᠤᠯᠢ ᠬᠢᠭᠡᠳ ᠤᠷᠤᠰᠬᠠᠯ ᠤ᠋ᠨ ᠣᠯᠠᠨ ᠡᠭᠦᠳᠡᠨ ᠦ᠌ ᠡᠷᠳᠡᠮᠲᠡᠨ ᠦᠢᠯᠡᠳᠦᠭᠴᠢᠳ᠂ ᠤᠷᠠᠴᠤᠳ ᠠᠷᠠᠯᠵᠢᠶᠠ ᠪᠢᠴᠢᠭᠡᠴᠢ ᠨᠠᠷ ᠪᠠ ᠬᠠᠳᠬᠤᠮᠠᠯ ᠣᠶᠣᠬᠤ ᠥᠬᠢᠳ᠂ ᠤᠷᠢᠳᠠ ᠶ᠋ᠢᠨ ᠥᠭᠭᠦᠮᠦᠢ ᠬᠡᠮᠡᠭᠰᠡᠨ ᠨᠡᠢᠲᠡ ᠪᠦᠬᠦᠨ ᠢ᠋ ᠪᠦᠷᠢᠳᠬᠡᠨ ᠠᠪᠴᠤ ᠴᠠᠩ ᠴᠧᠩ ᠳ᠋ᠦ᠍ᠷ ᠰᠠᠭᠤᠬᠤ ᠰᠥᠪᠡᠬᠡᠲᠡᠢ ᠪᠠᠭᠠᠲᠤᠷ ᠲᠤᠷ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠰᠥᠪᠡᠭᠡᠲᠡᠢ ᠤᠭᠲᠤᠨ ᠭᠠᠷᠴᠤ ᠪᠠᠢᠴᠠᠭᠠᠨ ᠠᠪᠤᠭᠠᠳ ᠶᠡᠬᠡ ᠬᠤᠷᠢᠮ ᠬᠤᠷᠢᠮᠯᠠᠵᠤ ᠰᠥᠨᠢ ᠭᠤᠷᠪᠠᠨ ᠵᠢᠩ ᠦ᠋ᠨ ᠴᠠᠭ ᠲᠤᠷ ᠭᠡᠨᠡᠳᠲᠡ ᠶᠡᠬᠡ ᠬᠡᠩᠭᠡᠷᠭᠡ ᠴᠣᠬᠢᠵᠤ ᠴᠡᠷᠢᠭ ᠢ᠋ᠶ᠋ᠡᠷ ᠪᠦᠰᠡᠯᠡᠭᠦᠯᠦᠨ᠂ ᠬᠦᠷᠢᠶᠡ ᠭᠠᠷᠭᠠᠵᠤ ᠯᠢᠶᠠᠩ ᠸᠠᠩ ᠴᠧᠩ ᠺᠧ ᠪᠠ ᠵᠢᠩ ᠸᠠᠩ ᠱᠧᠦ ᠴᠦᠨ ᠬᠣᠶᠠᠭᠤᠯᠠ ᠲᠡᠷᠢᠭᠦᠯᠡᠨ ᠸᠠᠨ ᠶᠠᠨ ᠤᠭᠰᠠᠭᠠ ᠶ᠋ᠢᠨ ᠬᠥᠮᠦᠰ ᠢ᠋ ᠲᠦᠯᠬᠢᠨ ᠭᠠᠷᠭᠠᠵᠤ᠂ ᠵᠤᠯᠠ ᠶ᠋ᠢᠨ ᠳᠣᠣᠷᠠ ᠴᠥᠮ ᠢ᠋ ᠠᠯᠠᠵᠤ ᠶᠠᠰᠤ ᠶ᠋ᠢ ᠣᠪᠣᠭᠠᠯᠠᠨ ᠰᠢᠲᠠᠭᠠᠭᠠᠳ ᠪᠤᠰᠤ ᠶ᠋ᠢ ᠠᠨᠤ ᠴᠥᠮ ᠲᠠᠢᠰᠢ ᠳ᠋ᠤᠷ ᠬᠦᠷᠭᠡᠵᠦ ᠠᠪᠴᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠲᠠᠢᠰᠢ ᠪᠤᠯᠤ᠂ ᠨᠠᠨᠰᠠᠷ ᠰᠥᠪᠡᠭᠡᠲᠡᠢ ᠨᠠᠷ ᠢ᠋ ᠶᠡᠬᠡᠯᠡ ᠰᠠᠢᠰᠢᠶᠠᠨ᠂ ᠦᠯᠡᠭᠰᠡᠨ ᠢ᠋ ᠴᠥᠮ ᠬᠠᠷᠠ ᠬᠣᠷᠢᠨ ᠳ᠋ᠤᠷ ᠬᠦᠷᠭᠡᠭᠦᠯᠬᠦᠢ ᠳ᠋ᠦ᠍ᠷ ᠬᠤᠸᠠᠢ ᠭᠦᠸᠧ ᠭᠦᠩᠵᠦ ᠠᠬᠠ ᠪᠠᠨ ᠠᠯᠠᠭᠳᠠᠪᠠ ᠭᠡᠮᠡᠨ ᠰᠣᠨᠣᠰᠴᠤ ᠭᠠᠰᠠᠯᠤᠨ ᠣᠬᠢᠯᠠᠬᠤᠢ ᠳ᠋ᠤᠷ ᠰᠥᠨᠢ ᠡᠷᠡ ᠢᠨᠦ ᠳᠡᠰ ᠲᠣᠭᠣᠰ ᠲᠡᠭᠦᠨ ᠦ᠌ ᠠᠬᠠ ᠴᠧᠩ ᠺᠧ ᠶ᠋ᠢ ᠬᠥᠲᠥᠯᠦᠨ ᠠᠪᠴᠤ ᠢᠷᠡᠪᠡ᠂ ᠦᠵᠡᠪᠡᠰᠦ ᠪᠡᠶᠡ ᠳ᠋ᠦ᠍ᠷ ᠴᠥᠮ ᠰᠤᠯᠠ ᠬᠥᠮᠦᠨ ᠦ᠌ ᠳᠡᠪᠡᠯ ᠮᠠᠯᠠᠭᠠ ᠲᠤᠯᠠ ᠶᠡᠬᠡᠯᠡ ᠭᠠᠢᠬᠠᠵᠤ ᠬᠦᠵᠦᠭᠦᠦ ᠪᠡᠨ ᠲᠡᠪᠡᠷᠢᠯᠴᠡᠨ ᠤᠬᠢᠯᠠᠯᠴᠠᠵᠤ᠂ ᠵᠢᠴᠢ ᠶᠠᠭᠤᠨ ᠳ᠋ᠤᠷ ᠠᠯᠠᠭᠰᠠᠨ ᠦᠭᠡᠢ ᠪᠥᠭᠡᠳ ᠠᠯᠠᠪᠠ ᠭᠡᠮᠡᠨ ᠠᠯᠳᠠᠷᠰᠢᠭᠤᠯᠤᠭᠰᠠᠨ ᠤᠴᠢᠷ ᠢ᠋ ᠠᠰᠠᠭᠤᠭᠰᠠᠨ ᠳ᠋ᠤᠷ ᠳᠡᠰ ᠲᠣᠭᠣᠰ ᠥᠭᠦᠯᠡᠷᠦᠨ : 《ᠶᠠᠭᠤᠲᠠᠢ ᠮᠤᠩᠬᠠᠭ? ᠨᠢᠭᠡᠨ ᠤᠯᠤᠰ ᠢ᠋ ᠮᠥᠬᠥᠭᠡᠬᠦ ᠢᠨᠦ ᠣᠨᠴᠠ ᠢᠷᠭᠡᠨ ᠦ᠌ ᠰᠡᠳᠬᠢᠯ ᠢ᠋ ᠢᠨᠦ ᠨᠢᠭᠡᠮᠦᠰᠦᠨ ᠲᠠᠰᠤᠯᠬᠤ ᠶ᠋ᠢᠨ ᠲᠤᠯᠠ ᠪᠣᠢ ᠶᠠ᠂ ᠣᠨᠴᠠ ᠸᠠᠨ ᠶᠠᠨ ᠠᠢᠮᠠᠭ ᠢ᠋ ᠠᠯᠠᠬᠤ ᠶ᠋ᠢᠨ ᠲᠡᠳᠦᠢ ᠪᠤᠶᠤ᠂ ᠨᠢᠭᠡᠨᠲᠡ ᠡᠢᠨ ᠠᠯᠳᠠᠷᠰᠢᠭᠤᠯᠪᠠᠰᠤ ᠪᠢᠶᠠᠨ ᠯᠢᠶᠠᠩ ᠤ᠋ᠨ ᠢᠷᠭᠡᠨ ᠦ᠌ ᠰᠡᠳᠬᠢᠯ ᠨᠢᠭᠡᠨᠲᠡ ᠲᠠᠰᠤᠷᠠᠬᠤ ᠶ᠋ᠢ ᠡᠷᠢᠭᠰᠡᠨ ᠪᠣᠯᠠᠢ᠃ ᠲᠡᠭᠦᠨ ᠡᠴᠡ ᠪᠤᠰᠤ ᠲᠠᠨ ᠤ᠋ ᠬᠡᠳᠦᠨ ᠬᠥᠮᠦᠨ ᠢ᠋ ᠠᠯᠠᠭᠠᠳ ᠶᠠᠭᠤᠨ ᠪᠣᠯᠬᠤ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠣᠶᠠᠷ ᠸᠠᠩ ᠶᠡᠬᠡᠯᠡ ᠰᠢᠳᠦᠨ ᠣᠬᠢᠯᠠᠪᠠᠢ᠃
ᠲᠡᠳᠦᠢ ᠨᠡᠢᠲᠡ ᠶ᠋ᠢ ᠬᠠᠷᠠ ᠬᠣᠷᠢᠨ ᠳ᠋ᠤᠷ ᠬᠦᠷᠭᠡᠨ ᠢᠯᠡᠭᠡᠬᠦᠢ ᠳ᠋ᠦ᠍ᠷ ᠠᠯᠠᠭᠳᠠᠪᠠ ᠬᠡᠮᠡᠭᠰᠡᠳ ᠦ᠋ᠨ ᠡᠮᠡ ᠦᠷᠡ ᠤᠬᠢᠯᠠᠯᠳᠤᠵᠤ ᠵᠣᠪᠠᠬᠤᠢ ᠳ᠋ᠤᠷ ᠡᠷᠲᠡ ᠰᠥᠩ ᠤᠯᠤᠰ ᠤ᠋ᠨ ᠬᠠᠭᠠᠨ ᠡᠾᠦᠢᠽᠦ᠋ᠩ ᠴᠢᠨᠽᠦ᠋ᠩ ᠢ᠋ ᠠᠯᠲᠠᠨ ᠤᠯᠤᠰ ᠪᠠᠷᠢᠵᠤ ᠠᠪᠠᠴᠢᠭᠰᠠᠨ ᠠ᠋ᠴᠠ ᠢᠯᠡᠭᠦᠦ ᠤᠬᠢᠯᠠᠯᠳᠤᠮᠤᠢ ᠭᠡᠮᠡᠨ 《ᠭᠠᠩ ᠮᠦ᠍ ᠪᠢᠴᠢᠭ 》ᠲᠣᠷ ᠲᠣᠪᠴᠢᠯᠠᠨ ᠪᠢᠴᠢᠵᠦᠬᠦᠢ᠃
ᠲᠡᠭᠦᠨᠴᠡ ᠲᠠᠢᠰᠢ ᠪᠤᠯᠤ ᠵᠥᠭᠡᠯᠡᠨ ᠢ᠋ᠶ᠋ᠡᠷ ᠵᠠᠷᠯᠠᠵᠤ ᠢᠷᠭᠡᠨ ᠦ᠌ ᠰᠡᠳᠬᠢᠯ ᠢ᠋ ᠠᠪᠤᠨ᠂ ᠰᠥᠪᠡᠬᠡᠲᠡᠢ ᠪᠠᠭᠠᠲᠤᠷ ᠬᠠᠲᠠᠭᠤ ᠪᠠᠷ ᠢᠷᠭᠡᠨ ᠦ᠌ ᠮᠥᠴᠡᠭᠡᠷᠭᠡᠭᠡᠬᠦ ᠶ᠋ᠢ ᠳᠠᠷᠤᠬᠤ ᠠᠷᠭᠠ ᠬᠡᠷᠡᠭᠯᠡᠵᠦ᠂ ᠬᠦᠴᠦᠨ ᠢ᠋ᠶ᠋ᠡᠷ ᠪᠢᠶᠠᠨ ᠵᠢᠩ ᠦ᠋ᠨ ᠼᠦᠢ ᠯᠢ ᠶ᠋ᠢ ᠣᠷᠣᠭᠤᠯᠤᠨ ᠠᠪᠴᠤ ᠰᠤᠷᠭᠠᠨ ᠥᠭᠦᠯᠡᠷᠦᠨ : 《ᠮᠠᠨ ᠤ᠋ ᠴᠡᠷᠢᠭ ᠬᠡᠮᠡᠭᠴᠢ ᠠᠷᠭᠠ ᠬᠦᠴᠦ ᠬᠣᠶᠠᠷ ᠢ᠋ᠶ᠋ᠠᠷ ᠶᠠᠪᠤᠬᠤ ᠲᠤᠯᠠ ᠰᠠᠶᠢ ᠠᠯᠲᠠᠨ ᠤᠯᠤᠰ ᠢ᠋ ᠡᠨᠡ ᠬᠢᠷᠢ ᠳ᠋ᠦ᠍ᠷ ᠬᠦᠷᠭᠡᠪᠡ᠃ ᠡᠳᠦᠭᠡ ᠲᠡᠷᠡ ᠤᠴᠢᠷ ᠪᠠ ᠬᠠᠭᠤᠴᠢᠨ ᠬᠠᠤᠯᠢ ᠪᠠᠷ ᠰᠦᠷ ᠴᠠᠭᠠᠵᠠ ᠶ᠋ᠢ ᠵᠣᠭᠰᠣᠭᠠᠵᠤ ᠦᠯᠦ ᠪᠣᠯᠤᠮᠤᠢ᠃ ᠤᠭ ᠠ᠋ᠴᠠ ᠠᠯᠢ ᠬᠣᠲᠠ ᠡᠰᠡᠷᠭᠦᠴᠡᠪᠡᠰᠦ ᠲᠡᠷᠡ ᠬᠣᠲᠠ ᠶ᠋ᠢ ᠡᠷᠬᠡᠪᠰᠢ ᠲᠡᠯᠡᠵᠦ ᠠᠷᠢᠯᠭᠠᠬᠤ ᠨᠡᠷᠡ ᠶ᠋ᠢ ᠭᠠᠷᠭᠠᠵᠤ ᠡᠰᠡᠷᠭᠦᠴᠡᠯ ᠢ᠋ ᠳᠠᠷᠤᠭᠰᠠᠨ ᠲᠤᠯᠠ ᠡᠳᠦᠭᠡ ᠮᠥᠨ ᠲᠡᠷᠡ ᠶᠣᠰᠣᠭᠠᠷ ᠬᠠᠭᠠᠨ ᠳ᠋ᠤᠷ ᠠᠢᠯᠠᠳᠬᠠᠨ ᠶᠠᠪᠤᠭᠤᠯᠪᠠ᠃ ᠡᠨᠡ ᠢᠨᠦ ᠬᠠᠭᠠᠨ ᠤ᠋ ᠬᠡᠰᠢᠭ ᠢ᠋ ᠵᠠᠷᠯᠠᠵᠤ ᠣᠯᠠᠨ ᠢ᠋ ᠰᠢᠲᠦᠭᠦᠯᠬᠦ ᠶ᠋ᠢᠨ ᠠᠷᠭᠠ᠂ ᠬᠡᠵᠢᠶᠡ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠬᠡᠯᠲᠦᠷᠢᠭᠦᠯᠪᠡᠰᠦ ᠪᠢᠳᠡ ᠰᠠᠶᠢ ᠵᠣᠭᠰᠣᠬᠤ ᠲᠤᠯᠠ ᠡᠳᠦᠭᠡ ᠴᠢ ᠬᠡᠳᠦᠢ ᠮᠠᠨ ᠳ᠋ᠤᠷ ᠰᠠᠢᠨ ᠪᠣᠯᠪᠠᠴᠤ ᠤᠯᠤᠰ ᠲᠤᠷ ᠢ᠋ᠶ᠋ᠠᠨ ᠵᠢᠷᠤᠮ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠡᠨᠡ ᠮᠥᠨ ᠮᠠᠨ ᠤ᠋ ᠴᠠᠭᠠᠵᠠ ᠳ᠋ᠤᠷ ᠬᠠᠷᠰᠢᠵᠤᠬᠤᠢ᠃ ᠴᠢ ᠲᠦᠷᠭᠡᠨᠡ ᠭᠡᠷ ᠦ᠋ᠨ ᠠᠮᠠᠨ ᠢ᠋ᠶ᠋ᠠᠨ ᠬᠣᠲᠠᠨ ᠠ᠋ᠴᠠ ᠭᠠᠷᠭᠠᠵᠤ ᠡᠳ᠋ ᠲᠠᠸᠠᠷ ᠢ᠋ᠶ᠋ᠠᠨ ᠵᠠᠢᠯᠠᠭᠤᠯ ! ᠬᠣᠲᠠ ᠶ᠋ᠢᠨ ᠣᠯᠠᠨ ᠤ᠋ ᠰᠡᠳᠬᠢᠯ ᠢ᠋ ᠠᠪᠬᠤᠢ ᠳ᠋ᠤᠷ ᠪᠢᠳᠡ ᠡᠷᠬᠡᠪᠰᠢ ᠴᠢᠨᠦ ᠭᠡᠷ ᠢ᠋ ᠨᠢᠭᠡᠨ ᠵᠡᠷᠭᠡ ᠲᠦᠢᠪᠡᠭᠡᠵᠦ᠂ ᠥᠪᠡᠷ ᠦ᠋ᠨ ᠴᠠᠭᠠᠵᠠ ᠳ᠋ᠤᠷ ᠨᠡᠢᠴᠡᠭᠦᠯᠵᠦ ᠣᠯᠠᠨ ᠤ᠋ ᠦᠵᠡᠯᠲᠡ ᠳ᠋ᠦ᠍ᠷ ᠮᠠᠨ ᠤ᠋ ᠴᠢᠬᠡᠴᠢ ᠶ᠋ᠢ ᠦᠵᠡᠭᠦᠯᠦᠮᠦᠢ ! 》ᠭᠡᠮᠡᠨ ᠰᠤᠷᠭᠠᠪᠠ᠃
ᠲᠡᠳᠦᠢ ᠼᠦᠢ ᠯᠢ ᠶᠠᠭᠠᠷᠠᠨ ᠭᠡᠷ ᠢ᠋ᠶ᠋ᠡᠨ ᠵᠠᠢᠯᠠᠭᠤᠯᠵᠤ᠂ ᠳᠠᠭᠠᠯᠳᠤᠭᠠ ᠪᠢᠶᠠᠨ ᠵᠢᠩ ᠢ᠋ ᠪᠠᠢᠴᠠᠭᠠᠨ ᠪᠠᠷᠢᠯᠠᠬᠤᠢ ᠳ᠋ᠤᠷ ᠼᠦᠢ ᠯᠢ ᠶ᠋ᠢᠨ ᠭᠡᠷ ᠢ᠋ ᠴᠡᠷᠢᠭ ᠨᠢᠭᠡᠨ ᠵᠡᠷᠭᠡ ᠳᠦᠢᠪᠡᠭᠡᠵᠦ᠂ ᠼᠦᠢ ᠯᠢ ᠬᠠᠭᠤᠷᠮᠠᠭ ᠢ᠋ᠶ᠋ᠠᠷ ᠰᠥᠪᠡᠭᠡᠲᠡᠢ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠵᠦ ᠶᠡᠬᠡᠯᠡ ᠤᠬᠢᠯᠠᠬᠤᠢ ᠳ᠋ᠤᠷ ᠲᠠᠢᠰᠢ ᠪᠤᠯᠤ ᠶᠠᠭᠠᠷᠠᠨ ᠴᠡᠷᠢᠭ ᠢ᠋ ᠴᠠᠭᠠᠵᠠᠯᠠᠵᠤ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠣᠯᠠᠨ ᠳ᠋ᠤᠷ ᠲᠤᠩᠬᠠᠭᠯᠠᠨ ᠵᠠᠷᠯᠠᠪᠠ᠃ ᠤᠭ ᠠ᠋ᠴᠠ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠ ᠡᠵᠡᠨ ᠢ᠋ᠶ᠋ᠡᠨ ᠠᠯᠠᠭᠰᠠᠨ ᠲᠦᠰᠢᠮᠡᠯ ᠪᠠ ᠡᠰᠡᠷᠭᠦᠴᠡᠯ ᠬᠣᠲᠠ ᠪᠠᠯᠭᠠᠳ ᠢ᠋ ᠪᠠᠢᠯᠳᠤᠨ ᠣᠯᠤᠭᠰᠠᠨ ᠴᠠᠭ ᠲᠤᠷ ᠡᠷᠬᠡᠪᠰᠢ ᠬᠡᠯᠲᠦᠷᠢᠭᠦᠯᠬᠦ ᠦᠭᠡᠢ ᠴᠥᠮ ᠠᠯᠠᠵᠤ ᠳᠡᠯᠡᠮᠦᠢ ᠭᠡᠮᠡᠨ ᠵᠠᠷᠯᠠᠭᠰᠠᠨ ᠲᠤᠯᠠ ᠪᠢᠶᠠᠨ ᠵᠢᠩ ᠢ᠋ ᠠᠪᠬᠤ ᠰᠢᠬᠠᠭᠠᠳ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠬᠠᠭᠠᠨ ᠳ᠋ᠤᠷ ᠠᠢᠯᠠᠳᠬᠠᠭᠰᠠᠨ ᠠᠨᠤ :《ᠪᠢᠶᠠᠨ ᠯᠢᠶᠠᠩ ᠴᠧᠩ ᠦ᠋ᠨ ᠢᠷᠭᠡᠨ ᠮᠠᠨ ᠤ᠋ ᠴᠡᠷᠢᠭ ᠯᠦ᠍ᠭᠡ ᠬᠣᠶᠠᠷ ᠣᠨ ᠡᠰᠡᠷᠭᠦᠴᠡᠨ ᠪᠠᠢᠯᠳᠤᠵᠤ᠂ ᠮᠠᠨ ᠤ᠋ ᠴᠡᠷᠢᠭ ᠮᠠᠰᠢ ᠣᠯᠠᠨ ᠦᠬᠦᠭᠰᠡᠨ ᠲᠤᠯᠠᠳᠠ ᠬᠣᠲᠠ ᠶ᠋ᠢ ᠪᠠᠢᠯᠳᠤᠨ ᠠᠪᠤᠭᠰᠠᠨ ᠴᠠᠭ ᠲᠤ᠌ ᠡᠷᠬᠡᠪᠰᠢ ᠬᠣᠷᠣᠰᠤᠯ ᠢ᠋ ᠠᠪᠴᠤ ᠴᠥᠮ ᠲᠠᠯᠠᠰᠤᠭᠠᠢ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠠᠭᠠᠨ ᠤ᠋ ᠲᠠᠰᠤᠯᠬᠤ ᠶ᠋ᠢᠨ ᠤᠷᠢᠳᠠ ᠶᠧ ᠯᠢᠦᠢ ᠴᠦ ᠼᠠᠢ ᠶᠠᠭᠠᠷᠠᠨ ᠢᠷᠡᠵᠦ ᠠᠢᠯᠠᠳᠬᠠᠷᠤᠨ : 《ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠠᠭᠠᠨ ᠤ᠋ ᠭᠡᠭᠡᠨ ᠡᠴᠡ ᠲᠡᠷᠢᠭᠦᠯᠡᠨ ᠰᠠᠢᠳ ᠲᠦᠰᠢᠮᠡᠯ ᠪᠠ ᠵᠠᠩᠵᠤᠨ ᠪᠠᠭᠠᠲᠤᠳ ᠴᠡᠷᠢᠭ ᠬᠤᠶᠠᠭ ᠬᠡᠳᠦᠨ ᠠᠷᠪᠠᠨ ᠵᠢᠯ ᠬᠡᠭᠡᠷᠡ ᠬᠡᠪᠲᠡᠨ ᠬᠦᠢᠲᠡᠨ ᠨᠣᠢᠲᠠᠨ ᠳ᠋ᠤᠷ ᠵᠣᠪᠠᠵᠤ ᠵᠦᠳᠡᠷᠡᠵᠦ ᠣᠯᠰᠤᠭᠠᠢ ᠭᠡᠮᠡᠨ ᠲᠡᠮᠡᠴᠡᠭᠰᠡᠨ ᠢᠨᠦ ᠭᠠᠵᠠᠷ ᠣᠷᠣᠨ ᠵᠠᠭᠤᠨ ᠣᠪᠣᠭᠲᠠᠨ ᠪᠣᠯᠠᠢ᠃ ᠭᠠᠵᠠᠷ ᠣᠷᠣᠨ ᠢ᠋ ᠴᠥᠮ ᠣᠯᠤᠭᠠᠳ ᠵᠠᠭᠤᠨ ᠣᠪᠣᠭᠲᠠᠨ ᠦᠭᠡᠢ ᠪᠣᠯᠪᠠᠰᠤ ᠶᠠᠮᠪᠠᠷ ᠲᠤᠰᠠ ᠪᠣᠢ ? ᠬᠠᠭᠠᠨ ᠠᠢᠯᠠᠳᠤᠨ ᠲᠣᠭᠲᠠᠭᠠ ! 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠬᠠᠭᠠᠨ ᠵᠣᠷᠢᠮᠠᠭ ᠢ᠋ᠶ᠋ᠠᠷ ᠥᠭᠦᠯᠡᠷᠦᠨ : 《ᠡᠨᠡ ᠢᠨᠦ ᠴᠡᠷᠢᠭ ᠦ᠋ᠨ ᠬᠠᠭᠤᠴᠢᠨ ᠲᠣᠭᠲᠠᠭᠠᠭᠰᠠᠨ ᠰᠦᠷ ᠪᠣᠯᠠᠢ᠃ ᠡᠨᠡ ᠰᠦᠷ ᠪᠠᠰᠠ ᠪᠠᠢᠭᠰᠠᠨ ᠲᠤᠯᠠ ᠰᠠᠶᠢ ᠡᠨᠡ ᠬᠣᠷᠢᠨ ᠨᠠᠢ᠍ᠮᠠᠨ ᠵᠢᠯ ᠦ᠋ᠨ ᠳᠣᠲᠣᠷᠠ ᠡᠳᠡᠭᠡᠷ ᠮᠢᠩᠭᠠᠨ ᠢᠯᠡᠭᠦᠦ ᠬᠣᠲᠠᠨ ᠢ ᠬᠢᠯᠪᠠᠷ ᠣᠯᠪᠠ᠃ ᠶᠡᠬᠡ ᠬᠠᠭᠠᠰ ᠠᠨᠤ ᠴᠥᠮ ᠡᠨᠡ ᠰᠦᠷ ᠡᠴᠡ ᠠᠶᠤᠵᠤ ᠳᠠᠭᠠᠭᠰᠠᠨ ᠪᠣᠯᠠᠢ᠃ ᠡᠳᠦᠭᠡ ᠭᠠᠳᠠᠨᠠ ᠰᠥᠩ ᠤᠯᠤᠰ ᠪᠣᠢ᠃ ᠡᠨᠡ ᠴᠠᠭᠠᠵᠠ ᠶ᠋ᠢ ᠬᠡᠷᠬᠢᠨ ᠨᠢᠭᠡᠮᠦᠰᠦᠨ ᠲᠠᠰᠤᠯᠵᠤ ᠪᠣᠯᠤᠮᠤᠢ ? 》ᠬᠡᠮᠡᠬᠦᠢ ᠳ᠋ᠦ᠍ᠷ ᠶᠧ ᠯᠢᠦᠢ ᠴᠦ ᠼᠠᠢ ᠶᠡᠬᠡᠯᠡ ᠦᠨᠡᠮᠰᠢᠶᠡᠨ ᠢᠲᠡᠭᠡᠵᠦ᠂ ᠲᠠᠪᠰᠢᠨ ᠰᠥᠭᠥᠳᠴᠦ ᠮᠥᠷᠭᠥᠵᠦ ᠠᠢᠯᠠᠳᠬᠠᠷᠤᠨ : 《ᠠᠯᠢᠪᠠ ᠵᠠᠭᠤᠨ ᠵᠦᠢᠯ ᠦ᠋ᠨ ᠤᠷᠠᠴᠤᠳ ᠪᠠ ᠮᠢᠩᠭᠠᠨ ᠵᠦᠢᠯ ᠦ᠋ᠨ ᠪᠡᠯᠡᠭ ᠬᠢᠭᠡᠳ ᠲᠦᠮᠡᠨ ᠵᠦᠢᠯ ᠦ᠋ᠨ ᠡᠷᠳᠡᠮᠲᠡᠨ᠂ ᠲᠦᠭ ᠲᠦᠮᠡᠨ ᠵᠦᠢᠯ ᠦ᠋ᠨ ᠮᠡᠷᠭᠡᠴᠦᠳ ᠴᠥᠮ ᠢ᠋ᠶ᠋ᠡᠷ ᠪᠢᠶᠠᠨ ᠵᠢᠩ ᠳ᠋ᠦ᠍ᠷ ᠬᠤᠷᠠᠵᠤ ᠴᠤᠭᠯᠠᠷᠠᠨ ᠪᠥᠯᠥᠭᠡ᠂ ᠡᠳᠦᠭᠡ ᠲᠡᠭᠦᠨ ᠢ᠋ ᠴᠥᠮ ᠠᠯᠠᠪᠠᠰᠤ ᠴᠡᠷᠢᠭ ᠦ᠋ᠨ ᠡᠯᠡ ᠵᠦᠢᠯ ᠦ᠋ᠨ ᠤᠷᠠᠨ ᠨᠠᠷᠢᠨ ᠬᠤᠶᠠᠭ ᠵᠡᠪᠰᠡᠭ ᠦ᠋ᠨ ᠵᠦᠢᠯ᠂ ᠵᠠᠷᠤᠬᠤ ᠬᠡᠷᠡᠭᠯᠡᠬᠦ ᠠᠯᠢᠪᠠ ᠵᠦᠢᠯ ᠤᠯᠤᠰ ᠤ᠋ᠨ ᠳᠣᠲᠣᠷᠠ ᠴᠥᠮ ᠲᠠᠰᠤᠷᠠᠭᠠᠳ ᠬᠣᠵᠢᠮ ᠤᠯᠠᠮᠵᠢᠯᠠᠨ ᠣᠯᠬᠤ ᠭᠠᠵᠠᠷ ᠦᠭᠡᠢ ᠪᠣᠯᠤᠮᠤᠢ᠃ ᠲᠠᠯᠠᠭᠠᠷ ᠬᠦᠴᠦᠨ ᠢ᠋ ᠰᠦᠢᠳᠬᠡᠵᠦ ᠪᠢᠶᠠᠨ ᠵᠢᠩ ᠢ᠋ ᠠᠪᠤᠭᠰᠠᠨ ᠪᠤᠰᠤ ᠤᠤ !》ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ᠋ᠩ ᠬᠠᠭᠠᠨ ᠪᠠᠬᠠᠨ ᠮᠦᠰᠢᠶᠡᠵᠦ ᠵᠠᠷᠯᠢᠭ ᠪᠣᠯᠤᠷᠤᠨ : 《ᠴᠢᠩ ᠦ᠋ᠨ ᠦᠭᠡ ᠮᠠᠰᠢ ᠮᠥᠨ ᠪᠣᠯᠪᠠᠴᠤ ᠴᠡᠷᠢᠭ ᠦ᠋ᠨ ᠬᠡᠷᠡᠭ ᠲᠡᠭᠦᠰᠦᠭᠡᠳᠦᠢ᠂ ᠲᠡᠢᠨ ᠪᠣᠯᠪᠠᠴᠤ ᠮᠢᠨᠦ ᠬᠡᠰᠢᠭ ᠢ᠋ ᠪᠢᠶᠠᠨ ᠵᠢᠩ ᠳ᠋ᠦ᠍ᠷ ᠨᠢᠭᠡᠨ ᠤᠳᠠᠭᠠ ᠵᠠᠷᠯᠠᠵᠤ ᠪᠣᠯᠤᠮᠤᠢ !》ᠭᠡᠮᠡᠨ ᠳᠠᠷᠤᠢ ᠸᠠᠨ ᠶᠠᠨ ᠠᠢᠮᠠᠭ ᠤ᠋ᠨ ᠨᠢᠭᠡᠨ ᠤᠭᠰᠠᠭᠠ ᠠ᠋ᠴᠠ ᠪᠤᠰᠤ ᠶ᠋ᠢ ᠠᠨᠤ ᠶᠠᠯᠠ ᠶ᠋ᠢ ᠴᠥᠮ ᠭᠡᠯᠳᠦᠷᠢᠭᠦᠯ᠂ ᠬᠡᠳᠦᠢ ᠸᠠᠨ ᠶᠠᠨ ᠠᠢᠮᠠᠭ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠠᠢᠮᠠᠭ ᠤᠭᠰᠠᠭᠠ ᠶ᠋ᠢᠨ ᠦᠨᠡᠨ ᠬᠤᠳᠠᠯ ᠢ᠋ ᠬᠢᠨᠠᠨ ᠪᠠᠢᠴᠠᠭᠠᠵᠤ ᠰᠠᠶᠢ ᠠᠯᠠ᠂ ᠪᠢᠲᠡᠭᠡᠢ ᠸᠠᠨ ᠶᠠᠨ ᠠᠢᠮᠠᠭ ᠲᠤᠷ ᠰᠢᠯᠲᠠᠵᠤ ᠪᠤᠰᠤ ᠢᠷᠭᠡᠨ ᠢ ᠲᠠᠰᠢᠶᠠᠷᠠᠨ ᠠᠯᠠ ! 》ᠭᠡᠮᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ ᠳᠣᠪᠲᠣᠯᠭᠠᠨ ᠶᠠᠪᠤᠭᠤᠯᠪᠠ᠃ ᠡᠨᠡ ᠵᠠᠷᠯᠢᠭ ᠪᠢᠶᠠᠨ ᠵᠢᠩ ᠳ᠋ᠦ᠍ᠷ ᠬᠦᠷᠦᠮᠡᠭᠴᠡ ᠸᠠᠨ ᠶᠠᠨ ᠠᠢᠮᠠᠭ ᠴᠥᠮ ᠨᠡᠷᠡ ᠣᠪᠣᠭ ᠢ᠋ᠶ᠋ᠠᠨ ᠬᠠᠯᠠᠵᠤ ᠰᠤᠯᠠ ᠢᠷᠭᠡᠨ ᠦ᠌ ᠳᠡᠪᠡᠯ ᠬᠤᠪᠴᠠᠳ ᠢ᠋ ᠡᠮᠦᠰᠦᠯᠴᠡᠵᠦ᠂ ᠭᠡᠷ ᠬᠦᠷᠢᠶᠡ ᠢᠨᠦ ᠸᠠᠨ ᠶᠠᠨ ᠠᠢᠮᠠᠭ ᠤ᠋ᠨ ᠲᠡᠮᠳᠡᠭ ᠢ᠋ᠶ᠋ᠡᠨ ᠴᠥᠮ ᠬᠠᠯᠠᠪᠠᠢ᠃
ᠲᠡᠳᠦᠢ ᠪᠢᠶᠠᠨ ᠵᠢᠩ ᠢ᠋ ᠲᠣᠭᠣᠷᠢᠭᠰᠠᠨ ᠣᠯᠠᠨ ᠢᠷᠭᠡᠨ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠡᠴᠡ ᠵᠠᠢᠯᠠᠵᠤ᠂ ᠪᠢᠶᠠᠨ ᠵᠢᠩ ᠳ᠋ᠦ᠍ᠷ ᠣᠷᠣᠵᠤ ᠰᠢᠷᠭᠤᠭᠰᠠᠨ ᠨᠢᠭᠡᠨ ᠵᠠᠭᠤᠨ ᠳᠥᠴᠢᠨ ᠲᠦᠮᠡᠨ ᠡᠷᠦᠬᠡ ᠢᠷᠭᠡᠨ ᠬᠡᠳᠦᠨ ᠵᠢᠯ ᠵᠣᠪᠠᠯᠠᠩ ᠢ᠋ ᠡᠳ᠋ᠯᠡᠭᠡᠳ ᠡᠨᠡ ᠡᠳᠦᠷ ᠭᠡᠨᠡᠳᠲᠡ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠬᠣᠲᠠᠨ ᠳ᠋ᠤᠷ ᠣᠷᠣᠵᠤ ᠬᠠᠭᠠᠨ ᠤ᠋ ᠥᠷᠥᠰᠢᠶᠡᠯ ᠵᠠᠷᠯᠢᠭ ᠢ᠋ ᠵᠠᠷᠯᠠᠭᠰᠠᠨ ᠳ᠋ᠤᠷ ᠡᠳᠡᠭᠡᠷ ᠲᠦᠭ ᠲᠦᠮᠡᠨ ᠢᠷᠭᠡᠨ ᠳᠠᠭᠠᠨᠭ᠍ᠰᠠ ᠠᠨᠤ ᠬᠣᠵᠢᠮᠳᠠᠭᠰᠠᠨ ᠳ᠋ᠠᠭᠠᠨ ᠬᠣᠷᠣᠰᠴᠤ ᠮᠣᠩᠭᠣᠯ ᠤ᠋ᠨ ᠲᠠᠢᠽᠦ᠋ᠩ ᠬᠠᠭᠠᠨ ᠤ᠋ ᠬᠦᠨᠳᠦ ᠬᠡᠰᠢᠭ ᠢ᠋ ᠰᠢᠲᠦᠵᠦ ᠪᠠᠷᠬᠢᠷᠠᠯᠴᠠᠨ ᠳᠠᠭᠤᠳᠠᠯᠴᠠᠬᠤ ᠳᠠᠭᠤᠨ ᠭᠤᠷᠪᠠᠨ ᠳᠥᠷᠪᠡᠨ ᠡᠳᠦᠷ ᠰᠥᠨᠢ ᠵᠠᠯᠭᠠᠯᠳᠤᠵᠤ ᠬᠣᠲᠠ ᠠᠨᠢᠷᠯᠠᠭᠰᠠᠨ ᠳ᠋ᠤᠷ ᠲᠠᠢᠰᠢ ᠪᠤᠯᠤ ᠨᠠᠷ ᠬᠢᠪ ᠬᠢᠯᠪᠠᠷ ᠢ᠋ᠶ᠋ᠠᠷ ᠨᠢᠭᠡᠨ ᠵᠠᠭᠤᠨ ᠳᠥᠴᠢᠨ ᠲᠦᠮᠡᠨ ᠡᠷᠦᠬᠡ ᠶ᠋ᠢ ᠲᠣᠭᠲᠠᠭᠠᠨ ᠠᠮᠤᠵᠢᠭᠤᠯᠵᠤ᠂ ᠢᠳᠡᠭᠡᠨ ᠤᠮᠳᠠᠭᠠᠨ ᠢ᠋ ᠣᠯᠭᠣᠭᠤᠯᠤᠨ᠂ ᠪᠤᠰᠤ ᠬᠣᠲᠠ ᠪᠠᠯᠭᠠᠳ ᠪᠠ ᠵᠧᠦ ᠵᠢᠶᠦ᠋ᠨ ᠡᠴᠡ ᠠᠮᠤ ᠰᠢᠯᠵᠢᠭᠦᠯᠦᠨ ᠪᠢᠶᠠᠨ ᠵᠢᠩ ᠦ᠋ᠨ ᠦᠯᠡᠳᠡᠭᠰᠡᠨ ᠢᠷᠭᠡᠨ ᠢ᠋ ᠲᠡᠵᠢᠭᠡᠨ ᠲᠡᠩᠬᠡᠭᠦᠷᠡᠭᠦᠯᠪᠡ᠃ ᠸᠠᠨ ᠶᠠᠨ ᠠᠢᠮᠠᠭ ᠢ᠋ ᠴᠥᠮ ᠨᠡᠷᠡ ᠣᠪᠣᠭ ᠢ᠋ ᠠᠨᠤ ᠬᠠᠯᠠᠭᠤᠯᠤᠨ ᠬᠡᠳᠦᠨ ᠬᠣᠲᠠᠨ ᠳ᠋ᠤᠷ ᠨᠡᠭᠦᠯᠭᠡᠨ ᠰᠠᠯᠭᠠᠨ ᠰᠠᠭᠤᠯᠭᠠᠵᠤ ᠢᠷᠭᠡᠨ ᠪᠣᠯᠭᠠᠪᠠ᠃ ᠡᠨᠡ ᠢᠨᠦ ᠲᠠᠢᠽᠦ᠋ᠩ ᠬᠠᠭᠠᠨ᠂ ᠲᠡᠢᠰᠢ ᠪᠤᠯᠤ ᠨᠠᠷ ᠤ᠋ᠨ ᠨᠢᠭᠤᠴᠠ ᠪᠤᠶᠠᠨ ᠪᠣᠯᠠᠢ᠃ ᠡᠭᠦᠨ ᠢ᠋ ᠪᠢᠴᠢᠭᠡᠴᠢ ᠨᠠᠷ ᠬᠠᠷᠢᠨ ᠦᠨᠡᠨ ᠬᠡᠷᠡᠭ ᠪᠣᠯᠭᠠᠨ ᠮᠣᠩᠭᠣᠯ ᠪᠢᠶᠠᠨ ᠵᠢᠩ ᠦ᠋ᠨ ᠢᠷᠭᠡᠨ ᠢ᠋ ᠬᠡᠳᠦᠢ ᠭᠡᠯᠳᠦᠷᠢᠭᠦᠯᠪᠡᠴᠦ ᠸᠠᠨ ᠶᠠᠨ ᠠᠢᠮᠠᠭ ᠢ᠋ ᠴᠥᠮ ᠮᠥᠬᠥᠭᠡᠪᠡ ᠭᠡᠮᠡᠨ ᠣᠨᠴᠠ ᠮᠣᠩᠭᠣᠯ ᠢ᠋ ᠬᠠᠷᠠᠲᠠᠢ ᠪᠠᠷ ᠪᠢᠴᠢᠵᠦᠬᠦᠢ᠃ ᠦᠨᠡᠬᠡᠷ ᠲᠡᠢᠮᠦ ᠬᠠᠷᠠᠲᠠᠢ ᠪᠥᠭᠡᠰᠦ᠂ ᠡᠳᠦᠭᠡ ᠮᠣᠩᠭᠣᠯ ᠬᠠᠭᠠᠨ ᠤ᠋ ᠦᠷᠡᠰ ᠨᠢᠭᠡᠨ ᠵᠠᠭᠤᠨ ᠳᠠᠯᠠᠨ ᠬᠣᠰᠢᠭᠤ ᠲᠠᠢᠵᠢ ᠨᠠᠷ ᠶᠠᠭᠠᠬᠢᠨ ᠪᠠᠢᠵᠤ ᠪᠣᠯᠬᠤ ᠠᠵᠢ !
ᠲᠡᠨᠳᠡᠴᠡ ᠪᠤᠯᠤ᠂ ᠰᠦᠪᠡᠭᠡᠲᠡᠢ ᠶ᠋ᠢᠨ ᠵᠦᠭ ᠥᠭᠦᠯᠡᠷᠦᠨ:《ᠡᠨᠡ ᠡᠳᠦᠷ ᠮᠢᠨᠦ ᠡᠴᠢᠭᠡ ᠶ᠋ᠢᠨ ᠨᠢᠭᠡᠨ ᠵᠦᠢᠯ ᠦ᠋ᠨ ᠭᠡᠷᠢᠶᠡᠰ ᠢ᠋ ᠭᠦᠢᠴᠡᠳᠬᠡᠵᠦ ᠴᠢᠳᠠᠭᠰᠠᠨ ᠪᠣᠯᠪᠠᠴᠤ ᠭᠠᠭᠴᠠ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠸᠠᠨ ᠶᠠᠨ ᠱᠧᠦ ᠰᠢᠦᠢ ᠶ᠋ᠢ ᠣᠯᠵᠤ ᠪᠠᠷᠢᠭᠠᠳᠤᠢ᠂ ᠡᠭᠦᠨ ᠢ᠋ ᠣᠯᠵᠤ ᠪᠠᠷᠢᠪᠠᠰᠤ ᠰᠠᠶᠢ ᠮᠢᠨᠦ ᠡᠵᠡᠨ ᠡᠴᠢᠭᠡ ᠬᠣᠶᠠᠷ ᠤ᠋ᠨ ᠠᠴᠢ ᠳ᠋ᠤᠷ ᠬᠠᠷᠢᠭᠤᠯᠠᠬᠤ ᠦᠢᠯᠡ ᠲᠡᠭᠦᠰᠦᠮᠦᠢ᠃ ᠪᠡᠶᠡ ᠳ᠋ᠦ᠍ᠷ ᠬᠡᠳᠦᠢ ᠡᠪᠡᠳᠴᠢᠨ ᠠᠪᠠᠴᠤ ᠲᠡᠭᠷᠢ ᠥᠷᠥᠰᠢᠶᠡᠨ ᠡᠷᠬᠡᠪᠰᠢ ᠠᠮᠢᠳᠤ ᠪᠡᠶᠡ ᠪᠡᠷ ᠠᠯᠲᠠᠨ ᠤᠯᠤᠰ ᠢ᠋ ᠮᠥᠬᠥᠭᠡᠬᠦ ᠶ᠋ᠢ ᠦᠵᠡᠭᠦᠯᠵᠦ᠂ ᠮᠢᠨᠦ ᠪᠡᠶᠡ ᠪᠡᠷ ᠡᠴᠢᠭᠡ ᠲᠡᠢᠱ᠌ᠢ ᠶ᠋ᠢᠨ ᠶᠠᠰᠤᠨ ᠢ᠋ ᠬᠣᠢᠲᠤ ᠵᠦᠭ ᠠᠪᠠᠴᠢᠭᠤᠯᠤᠮᠤ! 》ᠭᠡᠮᠡᠨ ᠲᠡᠭᠷᠢ ᠭᠠᠵᠠᠷ ᠲᠤᠷ ᠮᠥᠷᠭᠥᠵᠦ ᠳᠠᠢᠭᠠᠳ ᠬᠠᠭᠠᠨ ᠳ᠋ᠤᠷ ᠬᠣᠯᠠ ᠠ᠋ᠴᠠ ᠶᠣᠰᠣᠯᠠᠵᠤ ᠳᠠᠷᠤᠢ ᠬᠥᠪᠡᠭᠦᠨ ᠳᠡᠰ ᠲᠣᠭᠣᠰ ᠢ᠋ ᠨᠢᠭᠤᠴᠠ ᠪᠠᠷ ᠴᠡᠷᠢᠭ ᠠᠪᠤᠭᠤᠯᠤᠨ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠠᠢᠽᠦ᠋ᠩ ᠬᠠᠭᠠᠨ ᠢ᠋ ᠡᠷᠬᠡᠪᠰᠢ ᠡᠷᠢᠨ ᠣᠯᠵᠤ ᠪᠡᠷᠢ ᠭᠡᠮᠡᠨ ᠤᠷᠢᠳᠠ ᠶᠠᠪᠤᠭᠤᠯᠵᠤ᠂ ᠳᠠᠭᠠᠯᠳᠤᠭᠠ ᠥᠪᠡᠷ ᠦ᠋ᠨ ᠪᠡᠶᠡ ᠬᠠᠭᠠᠨ ᠢ᠋ ᠪᠢᠶᠠᠨ ᠵᠢᠩ ᠳ᠋ᠦ᠍ᠷ ᠵᠠᠯᠠᠵᠤ ᠶᠡᠬᠡ ᠬᠤᠷᠢᠮ ᠬᠤᠷᠢᠮᠯᠠᠬᠤᠢ ᠳ᠋ᠤᠷ ᠬᠠᠭᠠᠨ ᠸᠠᠨ ᠶᠠᠨ ᠠᠢᠮᠠᠭ ᠤ᠋ᠨ ᠦᠷᠡ ᠶ᠋ᠢ ᠬᠡᠳᠦᠨ ᠡᠳᠦᠷ ᠡᠷᠢᠭᠦᠯᠬᠦᠢ ᠳ᠋ᠦ᠍ᠷ ᠶᠠᠭᠤᠨ ᠤ᠋ ᠣᠯᠳᠠᠬᠤ ᠪᠣᠢ !
ᠲᠡᠳᠦᠢ ᠬᠤᠸᠠᠢ ᠭᠦᠸᠧ ᠭᠦᠩᠵᠦ ᠶ᠋ᠢᠨ ᠠᠬᠠ ᠴᠧᠩ ᠺᠧ ᠶ᠋ᠢ ᠨᠡᠷᠡ ᠶ᠋ᠢ ᠬᠠᠯᠠᠵᠤ ᠠᠪᠴᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠬᠠᠭᠠᠨ 《 ᠶᠢᠨ ᠸᠧᠢ ᠾᠧᠦ 》 ᠭᠡᠮᠡᠨ ᠡᠷᠭᠦᠵᠦ᠂ ᠲᠡᠭᠦᠨ ᠦ᠌ ᠦᠷᠡ ᠶ᠋ᠢ ᠵᠠᠯᠭᠠᠮᠵᠢᠯᠠᠭᠤᠯᠤᠨ᠂ ᠲᠡᠭᠦᠨ ᠦ᠌ ᠲᠠᠬᠢᠯᠭᠠ ᠬᠡᠭᠦᠷ ᠢ᠋ ᠢᠨᠤ ᠰᠠᠬᠢᠭᠤᠯᠵᠤ᠂ ᠵᠠᠭᠤᠨ ᠡᠷᠦᠬᠡ ᠶ᠋ᠢᠨ ᠾᠧᠦ ᠡᠷᠭᠦᠮᠵᠢᠯᠡᠵᠦ᠂ ᠬᠠᠭᠠᠨ ᠬᠥᠮᠦᠨ ᠦ᠌ ᠶᠡᠬᠡ ᠥᠷᠥᠰᠢᠶᠡᠯ ᠢ᠋ ᠵᠠᠷᠯᠠᠪᠠ᠃ ᠡᠨᠡ ᠢᠨᠦ ᠲᠡᠭᠦᠨ ᠦ᠌ ᠡᠭᠡᠴᠢ ᠴᠢ ᠭᠦᠸᠧ ᠭᠦᠩᠵᠦ ᠪᠠ ᠲᠡᠭᠦᠨ ᠦ᠌ ᠥᠬᠢᠨ ᠳᠡᠭᠦᠦ ᠬᠤᠸᠠᠢ ᠭᠦᠸᠧ ᠭᠦᠩᠵᠦ ᠬᠣᠶᠠᠭᠤᠯᠠ ᠶ᠋ᠢᠨ ᠲᠤᠰᠠ ᠶ᠋ᠢ ᠣᠯᠤᠭᠰᠠᠨ ᠪᠣᠯᠠᠢ᠃ ᠼᠦᠢ ᠯᠢ ᠶ᠋ᠢ ᠲᠦᠷ ᠬᠠᠪᠰᠤᠷᠤᠭᠤᠯᠤᠨ ᠪᠢᠶᠠᠨ ᠵᠢᠩ ᠢ᠋ ᠵᠠᠰᠠᠮᠤᠢ᠃
ᠣᠳᠣ ᠠᠯᠲᠠᠨ ᠤᠯᠤᠰ ᠤ᠋ᠨ ᠨᠥᠭᠦᠭᠡ ᠨᠢᠭᠡᠨ ᠰᠠᠯᠠᠭᠠᠨ ᠢ᠋ ᠬᠡᠯᠡᠬᠦ ᠢᠨᠦ : ᠡᠨᠡ ᠵᠢᠯ ᠦ᠋ᠨ ᠳᠣᠯᠣᠭᠠᠨ ᠰᠠᠷᠠ ᠳ᠋ᠤᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠠᠢᠽᠦ᠋ᠩ ᠦ᠋ᠨ ᠴᠡᠷᠢᠭ ᠪᠠᠢ ᠬᠦ ᠮᠢᠶᠣᠤ ᠰᠦᠮᠡ ᠶ᠋ᠢᠨ ᠭᠠᠵᠠᠷᠠ ᠮᠣᠩᠭᠣᠯ ᠤ᠋ᠨ ᠲᠦᠮᠡᠨᠲᠡᠢ ᠶ᠋ᠢᠨ ᠴᠡᠷᠢᠭ ᠲᠦ᠍ᠷ ᠶᠡᠬᠡᠯᠡ ᠳᠠᠷᠤᠭᠳᠠᠵᠤ᠂ ᠫᠦ ᠴᠠ ᠭᠤᠸᠠᠨ ᠨᠥ᠍ ᠶ᠋ᠢᠨ ᠡᠬᠡ ᠢᠨᠦ ᠮᠣᠩᠭᠣᠯ ᠳ᠋ᠤᠷ ᠪᠠᠷᠢᠭᠳᠠᠭᠰᠠᠨ ᠳ᠋ᠤᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠠᠢᠽᠦ᠋ᠩ ᠬᠠᠭᠠᠨ ᠫᠦ ᠴᠠ ᠭᠤᠸᠠᠨ ᠨᠥ᠍ ᠯᠦ᠍ᠭᠡ ᠵᠥᠪᠳᠡᠵᠦ ᠠᠷᠭᠠ ᠭᠠᠷᠭᠠᠨ᠂ ᠲᠡᠭᠦᠨ ᠦ᠌ ᠡᠬᠡ ᠪᠠᠷᠢᠭᠳᠠᠭᠰᠠᠨ ᠳ᠋ᠤᠷ ᠰᠢᠯᠲᠠᠵᠤ ᠠᠷᠭᠠ ᠬᠡᠷᠡᠭᠯᠡᠨ ᠬᠠᠭᠤᠷᠮᠠᠭ ᠢ᠋ᠶ᠋ᠠᠷ ᠳᠠᠭᠠᠲᠤᠭᠠᠢ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠫᠦ ᠴᠠ ᠭᠤᠸᠠᠨ ᠨᠥ᠍ ᠰᠡᠮᠡᠬᠡᠷ ᠮᠣᠩᠭᠣᠯ ᠤ᠋ᠨ ᠵᠠᠩᠵᠤᠨ ᠲᠦᠮᠡᠨᠲᠡᠢ ᠶ᠋ᠢᠨ ᠬᠦᠷᠢᠶᠡ ᠳ᠋ᠦ᠍ᠷ ᠭᠠᠭᠴᠠᠭᠠᠷ ᠢᠷᠡᠵᠦ ᠮᠡᠬᠡᠯᠡᠨ ᠥᠭᠦᠯᠡᠷᠦᠨ : 《ᠮᠢᠨᠦ ᠡᠬᠡ ᠨᠢᠭᠡᠨᠲᠡ ᠪᠠᠷᠢᠭᠳᠠᠪᠠ᠂ ᠲᠡᠭᠷᠢ ᠶ᠋ᠢᠨ ᠴᠠᠭ ᠴᠤ᠌ ᠲᠠᠨ ᠤ᠋ ᠪᠣᠯᠤᠭᠰᠠᠨ ᠲᠤᠯᠠ ᠪᠢ ᠮᠠᠨ ᠤ᠋ ᠡᠵᠡᠨ ᠠᠢᠽᠦ᠋ᠩ ᠢ᠋ ᠰᠢᠬᠠᠮᠳᠠᠭᠤᠯᠤᠨ ᠡᠷᠡᠦᠯᠡᠵᠦ ᠲᠠᠨ ᠳ᠋ᠤᠷ ᠳᠠᠭᠠᠭᠤᠯᠰᠤᠭᠠᠢ 》ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠦᠮᠡᠲᠡᠢ ᠳᠠᠷᠤᠢ ᠲᠡᠭᠦᠨ ᠦ᠌ ᠡᠬᠡ ᠶ᠋ᠢ ᠡᠭᠡᠭᠦᠯᠦᠨ ᠥᠭᠭᠦᠭᠰᠡᠨ ᠳ᠋ᠦ᠍ᠷ ᠫᠦ ᠴᠠ ᠭᠤᠸᠠᠨ ᠨᠦ᠍ ᠰᠥᠨᠢ ᠪᠦᠷᠢ ᠥᠭᠡᠳᠡ ᠤᠷᠤᠭᠤ ᠶᠠᠪᠤᠵᠤ᠂ ᠠᠢᠽᠦ᠋ᠩ ᠬᠠᠭᠠᠨ ᠢ᠋ ᠳᠠᠭᠠᠭᠤᠯᠬᠤ ᠶ᠋ᠢ ᠵᠥᠪᠳᠡᠬᠦᠢ ᠳ᠋ᠦ᠍ᠷ ᠵᠠᠷᠢᠮ ᠳ᠋ᠤᠷ ᠲᠦᠮᠡᠨᠲᠡᠢ ᠯᠦ᠍ᠭᠡ ᠣᠩᠭᠣᠴᠠ ᠳ᠋ᠤᠷ ᠰᠠᠭᠤᠵᠤ ᠤᠷᠤᠰᠬᠠᠯ ᠳ᠋ᠤᠷ ᠶᠠᠪᠤᠭᠤᠯᠤᠨ ᠰᠠᠷᠠᠨ ᠳ᠋ᠤᠷ ᠠᠷᠢᠬᠢᠳᠠᠵᠤ᠂ ᠬᠥᠭᠵᠢᠮ ᠡᠭᠦᠰᠬᠡᠯᠭᠡᠨ ᠳᠠᠭᠤᠤ ᠳᠠᠭᠤᠯᠠᠨ ᠵᠢᠷᠭᠠᠯᠳᠤᠭᠰᠠᠭᠠᠷ ᠮᠠᠰᠢ ᠳᠠᠳᠤᠭᠰᠠᠨ ᠳ᠋ᠤᠷ ᠠᠢᠽᠦ᠋ᠩ᠂ ᠫᠦ ᠴᠠ ᠭᠤᠸᠠᠨ ᠨᠥ᠍ ᠨᠠᠷ ᠠᠯᠲᠠ ᠮᠥᠩᠭᠥᠨ ᠦ᠌ ᠶᠡᠬᠡ ᠫᠠᠢ ᠶ᠋ᠢ ᠲᠦᠮᠡᠨᠲᠡᠢ ᠳ᠋ᠦ᠍ᠷ ᠥᠭᠭᠦᠭᠦᠯᠵᠦ᠂ ᠲᠡᠭᠦᠨ ᠢ᠋ ᠪᠠᠢᠨ ᠪᠠᠢᠨ ᠮᠥᠷᠡᠨ ᠳ᠋ᠦ᠍ᠷ ᠦᠯᠡᠳᠡᠭᠡᠨ᠂ ᠡᠰᠡᠬᠦᠯᠡ ᠠᠷᠢᠬᠢ ᠳ᠋ᠤᠷ ᠪᠠᠭᠤᠯᠭᠠᠨ᠂ ᠲᠡᠭᠦᠨ ᠦ᠌ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠳᠠᠷᠤᠬᠤ ᠶ᠋ᠢ ᠵᠥᠪᠳᠡᠬᠦᠢ ᠳ᠋ᠦ᠍ᠷ ᠲᠦᠮᠡᠨᠲᠡᠢ ᠦᠨᠡᠬᠡᠷ ᠲᠡᠮᠡᠭᠡ ᠮᠡᠲᠦ ᠲᠡᠨᠡᠭ ᠲᠤᠯᠠ ᠫᠦ ᠴᠠ ᠭᠤᠸᠠᠨ ᠨᠥ᠍ ᠶ᠋ᠢ ᠨᠢᠭᠡᠮᠦᠰᠦᠨ ᠢᠲᠡᠭᠡᠵᠦ᠂ ᠳᠠᠷᠤᠢ ᠠᠢᠽᠦ᠋ᠩ ᠦ᠋ᠨ ᠳᠠᠭᠠᠬᠤ ᠶ᠋ᠢ ᠬᠦᠯᠢᠶᠡᠬᠦᠶᠡ᠂ ᠲᠠᠪᠤᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠲᠠᠪᠤᠨᠠ ᠠᠢᠽᠦ᠋ᠩ ᠬᠠᠭᠠᠨ ᠲᠡᠭᠷᠢ ᠶ᠋ᠢ ᠳᠠᠬᠢᠵᠤ᠂ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠭᠠᠯ ᠫᠤᠤ ᠪᠠ ᠪᠠᠢᠯᠳᠤᠭᠠᠨ ᠤ᠋ ᠵᠡᠪᠰᠡᠭ ᠢ᠋ ᠬᠤᠯᠠᠭᠤᠨ ᠪᠡᠯᠡᠳᠬᠡᠵᠦ᠂ ᠫᠦ ᠴᠠ ᠭᠤᠸᠠᠨ ᠨᠦ᠍ ᠳ᠋ᠦ᠍ᠷ ᠳᠥᠷᠪᠡᠨ ᠵᠠᠭᠤᠨ ᠲᠠᠪᠢᠨ 《ᠰᠢᠳᠤᠷᠭᠤ ᠡᠯᠪᠡᠷᠢᠯᠳᠦ ᠴᠡᠷᠢᠭ 》 ᠢ ᠳᠠᠭᠠᠭᠤᠯᠤᠨ ᠥᠭᠴᠦ ᠪᠦᠸᠧ ᠵᠧᠦ ᠬᠣᠲᠠ ᠶ᠋ᠢᠨ ᠡᠮᠦᠨᠡ ᠬᠠᠭᠠᠯᠭᠠ ᠪᠠᠷ ᠰᠡᠮᠡᠬᠡᠷ ᠬᠤᠯᠠᠭᠤᠨ ᠭᠠᠷᠴᠤ ᠵᠡᠭᠦᠨ ᠡᠲᠡᠭᠡᠳ ᠢ᠋ᠶ᠋ᠡᠷ ᠲᠣᠭᠣᠷᠢᠨ ᠭᠡᠨᠡᠳᠲᠡ ᠬᠣᠢᠲᠤ ᠵᠦᠭ ᠴᠣᠬᠢᠨ ᠣᠷᠣᠵᠤ᠂ ᠮᠣᠩᠭᠣᠯ ᠤ᠋ᠨ ᠤᠨᠠᠭᠤᠯᠢ ᠰᠠᠬᠢᠬᠤ ᠴᠡᠷᠢᠭ ᠢ᠋ ᠭᠡᠨᠡᠳᠲᠡ ᠰᠢᠪᠲᠤᠯᠤᠨ ᠠᠯᠠᠨ ᠭᠠᠷᠴᠤ ᠰᠢᠭᠤᠳ ᠸᠠᠩ ᠵᠢᠶᠠᠽᠢ ᠶ᠋ᠢᠨ ᠭᠠᠵᠠᠷ ᠲᠦᠮᠡᠨᠲᠡᠢ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠ ᠶ᠋ᠢ ᠪᠠᠢᠯᠳᠤᠷᠠ ᠢᠷᠡᠪᠡ᠃ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠠᠢᠽᠦ᠋ᠩ ᠪᠦᠸᠧ ᠵᠧᠦ ᠶ᠋ᠢᠨ ᠬᠣᠢᠲᠤ ᠬᠠᠭᠠᠯᠭᠠ ᠳ᠋ᠤᠷ ᠣᠩᠭᠣᠴᠠ ᠶ᠋ᠢ ᠬᠣᠯᠪᠣᠨ ᠬᠦᠯᠢᠶᠡᠵᠦ ᠂ ᠬᠡᠷᠪᠡ ᠳᠡᠢᠯᠬᠦ ᠦᠭᠡᠢ ᠳ᠋ᠦ᠍ᠷ ᠬᠦᠷᠪᠡᠰᠦ ᠰᠢᠦᠢ ᠵᠧᠦ ᠳ᠋ᠦ᠍ᠷ ᠪᠤᠷᠤᠭᠤᠯᠠᠰᠤᠭᠠᠢ ᠬᠡᠮᠡᠵᠦᠬᠦᠢ᠃ ᠲᠡᠳᠦᠢ ᠰᠥᠨᠢ ᠭᠤᠷᠪᠠᠨ ᠵᠢᠩ ᠦ᠋ᠨ ᠦᠶᠡ ᠳ᠋ᠦ᠍ ᠬᠣᠶᠠᠷ ᠴᠡᠷᠢᠭ ᠬᠠᠷᠢᠯᠴᠠᠨ ᠪᠠᠢᠯᠳᠤᠬᠤᠢ ᠳ᠋ᠤᠷ 《ᠰᠢᠳᠤᠷᠭᠤ ᠡᠯᠪᠡᠷᠢᠯᠲᠦ ᠴᠡᠷᠢᠭ 》ᠪᠠᠬᠠᠨ ᠤᠬᠤᠷᠢᠵᠤ ᠭᠡᠨᠡᠳᠲᠡ ᠣᠷᠣᠭᠰᠢ ᠴᠣᠬᠢᠨ ᠣᠷᠣᠵᠤ᠂ ᠫᠦ ᠴᠠ ᠭᠤᠸᠠᠨ ᠨᠥ᠍ ᠴᠡᠷᠢᠭ ᠢ᠋ ᠬᠠᠭᠠᠰᠯᠠᠵᠤ ᠪᠢᠴᠢᠬᠠᠨ ᠣᠩᠭᠣᠴᠠ ᠳ᠋ᠤᠷ ᠵᠢᠷᠠ ᠳᠠᠯᠠᠨ ᠬᠥᠮᠦᠨ ᠢ᠋ ᠰᠠᠭᠤᠯᠭᠠᠭᠠᠳ ᠬᠣᠷᠢᠭᠤᠯ ᠤ᠋ᠨ ᠭᠠᠳᠠᠨᠠ ᠭᠠᠷᠴᠤ ᠬᠣᠶᠠᠷ ᠡᠲᠡᠭᠡᠳ ᠡᠴᠡ ᠬᠠᠪᠴᠢᠨ ᠪᠠᠢᠯᠳᠤᠬᠤᠢ ᠳ᠋ᠤᠷ ᠭᠠᠯ ᠫᠤᠤ ᠪᠠᠷᠢᠵᠤ ᠥᠪᠡᠷ ᠢ᠋ᠶ᠋ᠡᠨ ᠲᠡᠷᠢᠭᠦᠯᠡᠨ ᠣᠷᠣᠭᠰᠠᠨ ᠳ᠋ᠤᠷ ᠮᠣᠩᠭᠣᠯ ᠤ᠋ᠨ ᠲᠦᠮᠡᠨᠲᠡᠢ ᠨᠢᠭᠡᠨᠲᠡ ᠲᠤᠯᠤᠨ ᠴᠢᠳᠠᠬᠤ ᠦᠭᠡᠢ ᠶᠡᠬᠡᠯᠡ ᠳᠠᠷᠤᠭᠳᠠᠵᠤ᠂ ᠬᠠᠭᠤᠷᠠᠢ ᠳ᠋ᠤᠷ ᠠᠯᠠᠭᠳᠠᠨ ᠤᠰᠤᠨ ᠳ᠋ᠤᠷ ᠴᠠᠴᠠᠭᠰᠠᠨ ᠠᠨᠤ ᠭᠤᠷᠪᠠᠨ ᠮᠢᠩᠭᠠᠨ ᠲᠠᠪᠤᠨ ᠵᠠᠭᠤᠨ ᠴᠡᠷᠢᠭ᠃ ᠡᠭᠦᠨ ᠳ᠋ᠦ᠍ᠷ ᠫᠦ ᠴᠠ ᠭᠤᠸᠠᠨ ᠨᠥ᠍ ᠲᠡᠳᠡᠨ ᠦ᠌ ᠪᠠᠷᠢᠭᠰᠠᠨ ᠬᠣᠷᠢᠭᠤᠯ ᠢ᠋ ᠴᠥᠮ ᠭᠠᠯ ᠢ᠋ᠶ᠋ᠠᠷ ᠰᠢᠲᠠᠭᠠᠵᠤ᠂ ᠰᠠᠶᠢ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠪᠤᠴᠠᠭᠰᠠᠨ ᠳ᠋ᠤᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠫᠦ ᠴᠠ ᠭᠤᠸᠠᠨ ᠨᠦ᠍ ᠶ᠋ᠢ ᠴᠣᠬᠣᠮ ᠵᠡᠭᠦᠨ ᠡᠲᠡᠭᠡᠳ ᠦ᠋ᠨ ᠳᠡᠳ᠋ ᠶᠤᠸᠠᠨᠱᠤᠸᠠᠢ ᠪᠥᠭᠡᠳ ᠼᠠᠨ ᡁᠢ ᠵᠧᠩ ᠱᠢ ᠲᠦᠰᠢᠮᠡᠯ ᠡᠷᠭᠦᠮᠵᠢᠯᠡᠪᠡᠢ᠃ ᠲᠡᠳᠦᠢ ᠵᠠᠩ ᠵᠢᠢ ᠰᠢᠶᠠᠨ ᠢ᠋ᠶ᠋ᠠᠷ ᠣᠯᠠᠨ ᠴᠡᠷᠢᠭ ᠢ᠋ ᠵᠠᠬᠢᠷᠤᠭᠤᠯᠵᠤ ᠪᠦᠸᠧ ᠵᠧᠦ ᠬᠣᠲᠠ ᠶ᠋ᠢ ᠰᠠᠬᠢᠭᠤᠯᠪᠠᠢ᠃ ᠲᠡᠭᠦᠨᠴᠡ ᠫᠦ ᠴᠠ ᠭᠤᠸᠠᠨ ᠨᠦ᠍ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠢ᠋ ᠡᠨᠡ ᠨᠢᠭᠡᠨ ᠤᠳᠠᠭᠠ ᠳᠠᠷᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠣᠮᠣᠭ ᠨᠡᠩ ᠶᠡᠬᠡᠲᠡᠵᠦ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠠᠢᠽᠦ᠋ᠩ ᠬᠠᠭᠠᠨ ᠢ᠋ ᠬᠦᠨᠳᠦ ᠪᠣᠯᠭᠠᠨ ᠵᠣᠣ ᠪᠢ ᠳᠠᠩ ᠬᠡᠮᠡᠬᠦ ᠬᠠᠷᠰᠢ ᠳ᠋ᠤᠷ ᠰᠠᠭᠤᠯᠭᠠᠨ ᠰᠤᠯᠠ ᠰᠠᠢᠳ ᠤ᠋ᠨ ᠣᠷᠣᠵᠤ ᠭᠠᠷᠬᠤ ᠶ᠋ᠢ ᠴᠠᠭᠠᠵᠠᠯᠠᠭᠠᠳ ᠪᠠᠰᠠ ᠠᠢᠽᠦ᠋ᠩ ᠦ᠋ᠨ ᠵᠠᠩ ᠰᠠᠨᠠᠭᠠᠨ ᠤᠷᠪᠠᠬᠤ ᠠ᠋ᠴᠠ ᠠᠶᠤᠵᠤ᠂ ᠡᠩ ᠦ᠋ᠨ ᠲᠦᠰᠢᠮᠡᠳ ᠢ᠋ ᠳᠡᠷᠭᠡᠳᠡ ᠢᠨᠤ ᠣᠷᠣᠭᠤᠯᠬᠤ ᠦᠭᠡᠢ ᠪᠣᠯᠭᠠᠭᠰᠠᠨ ᠳ᠋ᠤᠷ ᠠᠢᠽᠦ᠋ᠩ ᠬᠠᠭᠠᠨ ᠪᠡᠶᠡ ᠪᠡᠨ ᠬᠣᠷᠢᠪᠠ ᠭᠡᠮᠡᠨ ᠰᠢᠳᠠᠷ ᠠᠷᠠᠳ ᠲᠤᠷ ᠥᠭᠦᠯᠡᠷᠦᠨ :《ᠡᠷᠲᠡ ᠡᠴᠡ ᠢᠨᠠᠭᠰᠢ ᠦᠯᠦ ᠮᠥᠬᠥᠬᠦ ᠤᠯᠤᠰ ᠦᠭᠡᠢ᠂ ᠦᠯᠦ ᠦᠬᠦᠬᠦ ᠬᠥᠮᠦᠨ ᠦᠭᠡᠢ᠂ ᠭᠠᠭᠴᠠ ᠪᠢ ᠬᠥᠮᠦᠨ ᠲᠠᠨᠢᠭᠰᠠᠨ ᠦᠭᠡᠢ ᠳ᠋ᠦ᠍ᠷ ᠢ᠋ᠶ᠋ᠡᠨ ᠬᠣᠷᠣᠰᠤᠮᠤᠢ᠃ ᠡᠨᠡ ᠫᠦ ᠴᠠ ᠭᠤᠸᠠᠨ ᠨᠥ᠍ ᠪᠣᠭᠣᠯ ᠳ᠋ᠤᠷ ᠬᠣᠷᠢᠭᠳᠠᠭᠰᠠᠨ ᠳ᠋ᠤᠷ ᠦᠨᠡᠬᠡᠷ ᠲᠡᠨᠴᠢᠭᠦᠷᠡᠮᠦᠢ ! 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠨᠧᠢ ᠱᠢ ᠲᠦᠰᠢᠮᠡᠯ ᠵᠢᠦᠢ ᠯᠢᠶᠠᠩ᠂ ᠰᠥᠩ ᠬᠦᠢ᠂ ᠹᠧᠩ ᠢᠦᠢ ᠲᠦᠰᠢᠮᠡᠯ ᠨᠢᠦ ᠰᠢ ᠯᠢᠶᠠᠨ᠂ ᠸᠧᠨ ᠴᠦ᠂ ᠡᠦ ᠬᠦ᠌ ᠰᠦᠨ᠂ ᠠᠢ ᠱᠢ ᠵᠡᠷᠭᠡ ᠶ᠋ᠢᠨ ᠣᠯᠠᠨ ᠰᠠᠢᠳ ᠤ᠋ᠳ ᠰᠡᠮᠡᠬᠡᠷ ᠵᠥᠪᠯᠡᠨ ᠫᠦ ᠴᠠ ᠭᠤᠸᠠᠨ ᠨᠦ᠍ ᠶ᠋ᠢ ᠠᠯᠠᠰᠤᠭᠠᠢ ᠭᠡᠮᠡᠨ ᠼᠠᠢ ᠵᠧᠦ ᠬᠣᠲᠠ ᠶ᠋ᠢᠨ ᠬᠡᠷᠡᠮ ᠥᠨᠳᠥᠷ ᠤᠨᠠᠭᠤᠯᠢ ᠭᠦᠨ ᠴᠡᠷᠢᠭ ᠣᠯᠠᠨ ᠠᠮᠤ ᠡᠯᠪᠡᠭ ᠲᠤᠯᠠ ᠬᠠᠭᠠᠨ ᠲᠡᠨᠳᠡ ᠡᠴᠢᠵᠦ ᠥᠪᠡᠷ ᠢ᠋ᠶ᠋ᠡᠨ ᠴᠡᠷᠢᠭ ᠢ᠋ ᠲᠡᠵᠢᠭᠡᠮᠦ ! ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠠᠭᠠᠨ ᠵᠥᠪᠰᠢᠶᠡᠷᠡᠵᠦ ᠬᠠᠷᠠᠬᠠᠨ ᠭᠠᠷᠬᠤ ᠠᠷᠭᠠ ᠵᠥᠪᠳᠡᠬᠦ ᠳ᠋ᠦ᠍ᠷ ᠴᠢᠪᠬᠢᠲᠡᠯᠡ ᠰᠢ ᠵᠧᠦ᠂ ᠴᠢᠨ ᠵᠧᠦ᠂ ᠨᠢᠩ ᠵᠧᠦ ᠡᠨᠡ ᠭᠤᠷᠪᠠᠨ ᠵᠧᠦ ᠶ᠋ᠢ ᠬᠠᠮᠲᠤ ᠵᠠᠬᠢᠷᠬᠤ ᠽᠦᠩ ᠱᠤᠸᠠᠢ ᠲᠦᠰᠢᠮᠡᠯ ᠡᠦ ᠬᠦ᠌ ᠯᠦᠨ ᠭᠣᠣ ᠳᠥᠷᠪᠡᠨ ᠵᠠᠭᠤᠨ ᠲᠠᠭᠠᠷ ᠠᠮᠤ ᠠᠪᠴᠤ ᠬᠦᠢ ᠳᠧ ᠹᠦ ᠳ᠋ᠦ᠍ᠷ ᠬᠦᠷᠭᠡᠵᠦ ᠢᠷᠡᠭᠡᠳ ᠬᠠᠭᠠᠨ ᠢ᠋ ᠵᠠᠯᠠᠭᠰᠠᠨ ᠳ᠋ᠤᠷ᠂ ᠬᠠᠭᠠᠨ ᠰᠠᠨᠠᠭᠠ ᠲᠣᠭᠲᠠᠵᠤ ᠡᠴᠢᠰᠦᠭᠡᠢ ᠬᠡᠮᠡᠬᠦᠶᠡ᠂ ᠫᠦ ᠴᠠ ᠭᠤᠸᠠᠨ ᠨᠦ᠍ ᠪᠦᠸᠧ ᠵᠧᠦ ᠡᠴᠡ ᠪᠤᠴᠠᠭᠰᠠᠨ ᠳ᠋ᠤᠷ ᠠᠢᠽᠦ᠋ᠩ ᠬᠠᠭᠠᠨ ᠴᠠᠢ ᠵᠧᠦ ᠳ᠋ᠦ᠍ᠷ ᠡᠴᠢᠬᠦ ᠪᠡᠨ ᠬᠡᠯᠡᠭᠰᠡᠨᠡ᠂ ᠪᠣᠢ ᠴᠠ ᠭᠤᠸᠠᠨ ᠨᠦ᠍ ᠭᠠᠷ ᠰᠡᠷᠪᠡᠯᠵᠡᠨ ᠬᠥᠯ ᠳᠡᠪᠬᠡᠴᠡᠵᠦ :《ᠲᠡᠨᠳᠡ ᠡᠴᠢᠵᠦ ᠪᠣᠯᠬᠤ ᠦᠭᠡᠢ ! 》ᠭᠡᠮᠡᠨ ᠬᠣᠷᠢᠭᠯᠠᠬᠤᠢ ᠳ᠋ᠤᠷ ᠣᠯᠠᠨ ᠲᠦᠰᠢᠮᠡᠯ ᠶᠡᠬᠡᠯᠡ ᠠᠭᠤᠷᠯᠠᠪᠠ᠃
ᠲᠡᠳᠦᠢ ᠫᠦ ᠴᠠ ᠭᠤᠸᠠᠨ ᠨᠦ᠍ ᠭᠠᠷᠴᠤ : 《ᠬᠡᠨ ᠬᠥᠮᠦᠨ ᠼᠠᠢ ᠵᠧᠦ ᠳ᠋ᠦ᠍ᠷ ᠲᠠᠪᠰᠢᠮᠤᠢ ᠬᠡᠮᠡᠪᠡᠰᠦ ᠲᠡᠭᠦᠨ ᠢ᠋ ᠠᠯᠠᠮᠤᠢ ! 》ᠭᠡᠮᠡᠨ ᠵᠠᠷᠯᠠᠭᠰᠠᠨ ᠳ᠋ᠤᠷ ᠣᠯᠠᠨ ᠲᠦᠰᠢᠮᠡᠳ ᠲᠡᠭᠦᠨ ᠢ᠋ ᠬᠠᠭᠠᠨ ᠳ᠋ᠤᠷ ᠠᠭᠰᠤᠷᠬᠢᠯᠠᠪᠠ᠂ ᠡᠵᠡᠨ ᠡᠰᠢ ᠦᠭᠡᠢ ᠪᠣᠯᠪᠠ ᠭᠡᠮᠡᠨ ᠬᠠᠭᠠᠨ ᠳ᠋ᠤᠷ ᠠᠢᠯᠠᠳᠬᠠᠨ ᠡᠷᠲᠡᠬᠡᠨ ᠠᠷᠭᠠ ᠶ᠋ᠢ ᠲᠣᠭᠲᠠᠭᠠᠮᠤ ᠬᠡᠮᠡᠬᠦᠢ ᠳ᠋ᠦ᠍ᠷ ᠬᠠᠭᠠᠨ ᠳᠠᠷᠤᠢ ᠰᠥᠩ ᠬᠦᠢ ᠨᠠᠷ ᠯᠤᠭᠠ ᠵᠥᠪᠯᠡᠵᠦ᠂ ᠽᠡᠢᠰᠢᠶᠠᠩ ᠢ᠋ ᠳᠠᠭᠤᠳᠠᠵᠤ ᠬᠡᠷᠡᠭ ᠵᠥᠪᠯᠡᠮᠦᠢ ᠭᠡᠮᠡᠨ ᠫᠦ ᠴᠠ ᠭᠤᠸᠠᠨ ᠨᠦ᠍ ᠶ᠋ᠢ ᠳᠠᠭᠤᠳᠠᠨ ᠣᠷᠣᠭᠤᠯᠬᠤᠢ ᠳ᠋ᠤᠷ ᠸᠧᠨ ᠴᠦ ᠶ᠋ᠢ ᠵᠣᠣ ᠪᠢ ᠳᠠᠩ ᠬᠠᠷᠰᠢ ᠶ᠋ᠢᠨ ᠡᠭᠦᠳᠡᠨ ᠦ᠌ ᠬᠣᠢᠨᠠ ᠪᠦᠭᠭᠦᠭᠦᠯᠵᠦ᠂ ᠫᠦ ᠴᠠ ᠭᠤᠸᠠᠨ ᠨᠥ᠍ ᠶ᠋ᠢ ᠣᠷᠣᠵᠤ ᠢᠷᠡᠬᠦᠢ ᠳ᠋ᠦ᠍ᠷ ᠸᠧᠨ ᠴᠦ ᠭᠡᠨᠡᠳᠲᠡ ᠭᠠᠷᠴᠤ ᠬᠣᠢᠨᠠ ᠠ᠋ᠴᠠ ᠨᠢᠭᠡᠨᠲᠡ ᠬᠠᠳᠬᠤᠭᠰᠠᠨ ᠳ᠋ᠤᠷ ᠲᠡᠭᠦᠨ ᠦ᠌ ᠬᠠᠪᠢᠷᠭᠠ ᠳᠠᠭᠠᠷᠢᠭᠳᠠᠵᠤ ᠶᠡᠬᠡᠯᠡ ᠬᠠᠰᠬᠢᠷᠬᠤᠢ ᠳ᠋ᠤᠷ ᠠᠢᠽᠦ᠋ᠩ ᠬᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠶᠠᠭᠠᠷᠠᠨ ᠭᠠᠷᠴᠤ ᠳᠤᠲᠠᠭᠠᠨ ᠬᠣᠲᠠ ᠲᠣᠭᠣᠷᠢᠨ ᠭᠦᠶᠦᠬᠦᠢ ᠳ᠋ᠦ᠍ᠷ ᠸᠧᠨ ᠴᠦ᠂ ᠠᠢ ᠱᠢ ᠨᠠᠷ ᠬᠡᠳᠦᠢᠨᠡᠢ ᠫᠦ ᠴᠠ ᠭᠤᠸᠠᠨ ᠨᠦ᠍ ᠶ᠋ᠢ ᠴᠠᠪᠴᠢᠵᠤ ᠠᠯᠠᠪᠠ᠃ ᠡᠭᠦᠨ ᠳ᠋ᠦ᠍ᠷ ᠲᠡᠭᠦᠨ ᠦ᠌ ᠬᠠᠷᠢᠶᠠᠲᠤ 《ᠰᠢᠳᠤᠷᠭᠤ ᠡᠯᠪᠡᠷᠢᠯᠲᠦ ᠴᠡᠷᠢᠭ 》ᠡᠨᠡ ᠬᠤᠪᠢᠰᠬᠠᠯ ᠢ᠋ ᠰᠣᠨᠣᠰᠴᠤ ᠴᠥᠮ ᠰᠡᠳᠬᠢᠯ ᠬᠤᠪᠢᠯᠵᠤ ᠶᠠᠭᠠᠷᠠᠨ ᠵᠠᠷ ᠵᠡᠪᠰᠡᠭ ᠢ᠋ᠶ᠋ᠡᠨ ᠠᠪᠴᠤ ᠲᠤᠯᠰᠤᠭᠠᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠸᠧᠨ ᠴᠦ ᠬᠠᠭᠠᠨ ᠢ᠋ ᠪᠡᠶᠡ ᠪᠡᠷ ᠭᠠᠷᠴᠤ ᠲᠣᠬᠣᠷᠤᠭᠤᠯᠤᠮᠤ ᠭᠡᠮᠡᠨ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ ᠠᠢᠽᠦ᠋ᠩ ᠬᠠᠭᠠᠨ ᠱᠤᠸᠠᠩ ᠮᠧᠨ ᠬᠠᠭᠠᠯᠭᠠ ᠳ᠋ᠤᠷ ᠭᠠᠷᠴᠤ ᠰᠠᠭᠤᠭᠠᠳ 《ᠰᠢᠳᠤᠷᠭᠤ ᠡᠯᠪᠡᠷᠢᠯᠳᠦ ᠴᠡᠷᠢᠭ 》 ᠦ᠋ᠨ ᠶᠠᠯᠠ ᠶ᠋ᠢ ᠬᠡᠯᠲᠦᠷᠢᠭᠦᠯᠦᠨ ᠲᠣᠬᠣᠷᠤᠭᠤᠯᠵᠤ ᠰᠠᠶᠢ ᠨᠠᠮᠬᠠᠷᠠᠭᠤᠯᠪᠠᠢ᠃
ᠡᠨᠡ ᠬᠢᠷᠢ ᠳ᠋ᠦ᠍ᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠦᠩ ᠵᠢᠩ ᠪᠠᠯᠭᠠᠰᠤᠨ ᠢ᠋ ᠰᠠᠬᠢᠭᠰᠠᠨ ᠴᠢᠶᠠᠩ ᠱᠧᠨ ᠦ᠌ ᠭᠠᠪᠢᠶᠠ ᠳ᠋ᠤᠷ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠬᠥᠬᠢᠭᠡᠵᠦ ᠳᠡᠪᠰᠢᠭᠦᠯᠦᠨ ᠵᠦᠩ ᠶᠤᠸᠠᠨ ᠤ᠋ ᠯᠢᠦ ᠱᠧᠦ ᠲᠦᠰᠢᠮᠡᠯ ᠪᠣᠯᠭᠠᠵᠤ ᠪᠠᠰᠠ ᠼᠠᠨ ᠵᠧᠩ ᠲᠦᠰᠢᠮᠡᠯ ᠨᠧᠢ ᠴᠦ ᠯᠢᠶᠠᠨ ᠡᠮᠦᠨᠡ ᠠᠭᠤᠯᠠ ᠠ᠋ᠴᠠ ᠠᠷᠪᠠᠨ ᠲᠦᠮᠡᠨ ᠢᠯᠡᠭᠦᠦ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠯᠦᠸ᠋ᠸ ᠶᠠᠩ ᠳ᠋ᠤᠷ ᠣᠷᠣᠭᠰᠠᠨ ᠳ᠋ᠤᠷ ᠲᠡᠭᠦᠨ ᠢ᠋ ᠪᠠᠰᠠ ᠳᠡᠪᠰᠢᠭᠦᠯᠦᠨ ᠰᠢᠩ ᠱᠧᠩ ᠱᠢ ᠲᠦᠰᠢᠮᠡᠯ ᠪᠣᠯᠭᠠᠪᠠᠢ᠃ ᠡᠭᠦᠨ ᠳ᠋ᠦ᠍ᠷ ᠯᠢᠦ ᠱᠧᠦ ᠲᠦᠰᠢᠮᠡᠯ ᠴᠢᠶᠠᠩ ᠱᠧᠨ ᠮᠥᠨ ᠴᠤᠸᠠᠨ ᠠᠢ ᠥᠷᠲᠡᠭᠡᠨ ᠦ᠌ ᠵᠡᠭᠦᠨ ᠳ᠋ᠦ᠍ ᠨᠢᠭᠡᠨ ᠲᠠᠩᠬᠢᠮ ᠪᠠᠷᠢᠵᠤ ᠨᠡᠷᠡ ᠶ᠋ᠢ 《ᠬᠡᠰᠢᠭ ᠢ᠋ ᠬᠠᠷᠢᠭᠤᠯᠬᠤ – ᠪᠦᠦ ᠧᠨ ᠳᠠᠩ 》ᠭᠡᠮᠡᠨ ᠨᠡᠷᠡᠯᠡᠵᠦ᠂ ᠠᠢᠽᠦ᠋ᠩ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠤ᠋ᠨ ᠪᠢᠴᠢᠭ ᠢ᠋ ᠬᠥᠰᠢᠶᠡ ᠴᠢᠯᠠᠭᠤᠨ ᠳ᠋ᠤᠷ ᠰᠡᠢᠯᠦᠭᠦᠯᠵᠦ᠂ ᠳᠤᠷᠠᠲᠠᠶᠠ ᠦᠬᠦᠨ ᠵᠢᠳᠬᠦᠵᠦ ᠬᠠᠷᠢᠭᠤᠯᠠᠰᠤᠭᠠᠢ ᠭᠡᠮᠡᠨ ᠲᠠᠩᠭᠠᠷᠢᠭᠯᠠᠵᠤ ᠪᠢᠴᠢᠪᠡᠢ᠃ ᠳᠠᠷᠠᠭᠠ ᠪᠠᠷ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠪᠢᠶᠠᠨ ᠵᠧᠦ ᠡᠴᠡ ᠰᠧ ᠯᠢᠶᠧ ᠶ᠋ᠢᠨ ᠬᠥᠪᠡᠭᠦᠨ ᠢ᠋ ᠪᠠᠷᠢᠵᠤ ᠠᠪᠤᠭᠠᠳ ᠤ᠋ᠨ ᠴᠠᠩ ᠹᠦ ᠶ᠋ᠢᠨ ᠵᠡᠭᠦᠨ ᠬᠠᠭᠠᠯᠭᠠ ᠶ᠋ᠢᠨ ᠭᠠᠳᠠᠨᠠ ᠠᠪᠠᠴᠢᠵᠤ ᠴᠡᠭᠡᠷ ᠦᠵᠡᠭᠦᠯᠦᠨ ᠰᠧ ᠯᠢᠶᠧ ᠶ᠋ᠢᠨ ᠬᠥᠪᠡᠭᠦᠨ ᠢ᠋ ᠡᠯᠰᠡᠨ ᠳᠠᠭᠠᠭᠤᠯᠰᠤᠭᠠᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠰᠧ ᠯᠢᠶᠧ ᠵᠡᠭᠦᠨ ᠪᠠᠷᠠᠭᠤᠨ ᠡᠲᠡᠭᠡᠳ ᠦ᠋ᠨ ᠠᠷᠠᠳ ᠢ᠋ᠶ᠋ᠠᠷ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠬᠠᠷᠪᠤᠭᠤᠯᠵᠤ ᠡᠭᠡᠭᠦᠯᠦᠭᠡᠳ ᠳᠠᠷᠠᠭᠠ ᠪᠠᠷ ᠪᠢᠶᠠᠨ ᠵᠢᠩ ᠬᠣᠲᠠᠨ ᠤ᠋ ᠼᠦᠢ ᠯᠢ ᠶ᠋ᠢᠨ ᠬᠤᠪᠢᠰᠬᠠᠯ ᠢ᠋ ᠰᠣᠨᠣᠰᠴᠤ ᠪᠢᠶᠠᠨ ᠯᠢᠶᠠᠩ ᠨᠢᠭᠡᠨᠲᠡ ᠠᠪᠲᠠᠭᠰᠠᠨ ᠳ᠋ᠤᠷ ᠶᠡᠬᠡᠯᠡ ᠵᠣᠪᠠᠨᠢᠵᠤ᠂ ᠬᠦᠨᠳᠦ ᠡᠪᠡᠳᠴᠢᠨ ᠬᠦᠷᠲᠡᠵᠦ ᠦᠭᠡ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠡᠷ ᠦᠬᠦᠪᠡ᠃ ᠡᠭᠦᠨ ᠳ᠋ᠦ᠍ᠷ ᠠᠷᠭᠠ ᠦᠭᠡᠢ ᠽᠦᠩ ᠱᠤᠸᠠᠢ ᠡᠦ ᠯᠢᠨ ᠳᠡ ᠬᠤ᠌ ᠲᠦ ᠶ᠋ᠢ ᠰᠧ ᠯᠢᠶᠧ ᠶ᠋ᠢᠨ ᠣᠷᠣᠨ ᠳ᠋ᠤᠷ ᠰᠢᠩ ᠱᠧᠩ ᠱᠢ ᠲᠦᠰᠢᠮᠡᠯ᠂ ᠴᠢᠶᠠᠩ ᠱᠧᠨ ᠢ᠋ ᠽᠦᠩ ᠱᠤᠸᠠᠢ ᠲᠦᠰᠢᠮᠡᠯ ᠪᠣᠯᠭᠠᠪᠠᠢ᠃ ᠲᠡᠢᠨ ᠬᠦ᠌ ᠰᠠᠷᠠ ᠢᠯᠡᠭᠦᠦ ᠪᠣᠯᠵᠤ ᠬᠣᠲᠠᠨ ᠤ᠋ ᠳᠣᠲᠣᠷᠠ ᠠᠮᠤ ᠲᠠᠰᠤᠷᠠᠭᠰᠠᠨ ᠳ᠋ᠤᠷ ᠣᠯᠠᠨ ᠴᠡᠷᠢᠭ ᠢᠷᠭᠡᠨ ᠶᠡᠬᠡᠯᠡ ᠰᠠᠷᠨᠢᠬᠤᠶᠠ᠂ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠪᠠᠰᠠ ᠢᠷᠡᠵᠦ ᠯᠦᠸᠧ ᠶᠠᠩ ᠤ᠋ᠨ ᠡᠮᠦᠨᠡ ᠤᠰᠤᠨ ᠤ᠋ ᠬᠥᠪᠡᠭᠡ ᠳ᠋ᠦ᠍ᠷ ᠵᠢᠭᠰᠠᠭᠠᠯ ᠵᠢᠭᠰᠠᠭᠠᠭᠰᠠᠨ ᠳ᠋ᠤᠷ ᠴᠢᠶᠠᠩ ᠱᠧᠨ ᠤᠰᠤᠨ ᠤ᠋ ᠬᠣᠢᠲᠤ ᠡᠲᠡᠭᠡᠳ ᠲᠣᠷ ᠵᠢᠭᠰᠠᠭᠠᠯ ᠵᠢᠭᠰᠠᠭᠠᠨ ᠲᠤᠯᠬᠤᠶᠠ᠂ ᠮᠣᠩᠭᠣᠯ ᠤ᠋ᠨ ᠬᠠᠨ ᠶᠤᠸᠠᠨᠱᠤᠸᠠᠢ ᠭᠠᠭᠴᠠ ᠮᠣᠷᠢ ᠪᠠᠷ ᠤᠰᠤᠨ ᠳᠠᠩ ᠳ᠋ᠤᠷ ᠵᠣᠭᠰᠣᠵᠤ ᠴᠢᠶᠠᠩ ᠱᠧᠨ ᠳ᠋ᠦ᠍ᠷ ᠠᠰᠢᠭ ᠵᠣᠪᠠᠯᠠᠩ ᠢ᠋ ᠲᠣᠭᠠᠴᠢᠵᠤ᠂ ᠲᠡᠭᠷᠢ ᠶ᠋ᠢᠨ ᠴᠠᠭ ᠢ᠋ ᠳᠠᠭᠠᠵᠤ ᠮᠠᠨ ᠳ᠋ᠤᠷ ᠣᠷᠣᠵᠤ ᠳᠠᠭᠠᠪᠠᠰᠤ ᠪᠦᠷᠢᠨᠡ ᠬᠠᠮᠠᠭᠠᠯᠠᠵᠤ ᠪᠣᠯᠤᠮᠤᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠴᠢᠶᠠᠩ ᠱᠧᠨ ᠮᠣᠷᠢ ᠪᠠᠨ ᠳᠣᠪᠲᠣᠯᠤᠨ ᠣᠷᠣᠵᠤ ᠬᠠᠷᠪᠤᠬᠤᠢ ᠳ᠋ᠤᠷ ᠬᠠᠨ ᠶᠤᠸᠠᠨᠱᠤᠸᠠᠢ ᠶᠡᠬᠡᠯᠡ ᠢᠨᠢᠶᠡᠨ ᠥᠭᠦᠯᠡᠷᠦᠨ : 《ᠮᠤᠩᠬᠠᠭ ᠬᠢᠲᠠᠳ ᠬᠡᠷᠡᠭ ᠦᠭᠡᠢ ᠲᠥᠭᠡ ᠢᠮᠠᠬᠤ ᠶ᠋ᠢ ᠡᠷᠬᠢᠯᠡᠵᠦ ᠬᠡᠪᠴᠢᠶᠡᠨᠳᠦ ᠶᠡᠬᠡ ᠬᠡᠳᠦᠨ ᠠᠯᠲᠠ ᠶ᠋ᠢ ᠦᠯᠦ ᠤᠬᠠᠮᠤᠢ ! 》ᠭᠡᠮᠡᠨ ᠵᠢᠭᠰᠠᠭᠠᠯ ᠳ᠋ᠤᠷ ᠢ᠋ᠶ᠋ᠠᠨ ᠡᠭᠡᠭᠡᠳ ᠬᠡᠳᠦᠨ ᠵᠠᠭᠤᠨ ᠶᠠᠪᠠᠭᠠᠨ ᠴᠡᠷᠢᠭ ᠢ᠋ ᠠᠪᠴᠤ ᠬᠥᠭᠥᠷᠭᠡ ᠶ᠋ᠢ ᠪᠤᠯᠢᠶᠠᠨ ᠪᠠᠢᠯᠳᠤᠬᠤᠢ ᠳ᠋ᠤᠷ ᠴᠢᠶᠠᠩ ᠱᠧᠨ ᠨᠢᠭᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠲᠤᠭ ᠪᠠᠷᠢᠭᠤᠯᠵᠤ᠂ ᠭᠠᠭᠴᠠᠭᠠᠷ ᠲᠣᠰᠴᠤ ᠪᠠᠢᠯᠳᠤᠨ᠂ ᠮᠣᠩᠭᠣᠯ ᠤ᠋ᠨ ᠬᠡᠳᠦᠨ ᠬᠥᠮᠦᠨ ᠢ᠋ ᠠᠯᠠᠭᠠᠳ ᠪᠠᠰᠠ ᠥᠪᠡᠷ ᠦ᠋ᠨ ᠳ᠋ᠦᠲ᠋ᠦ᠋ᠩ ᠦ᠋ᠨ ᠮᠥᠩᠭᠥᠨ ᠫᠠᠢ ᠶᠤᠭᠠᠨ ᠲᠡᠷᠢᠭᠦᠯᠡᠨ ᠣᠷᠣᠭᠰᠠᠨ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠦ᠌ ᠬᠦᠵᠦᠭᠦᠨ ᠳ᠋ᠦ᠍ᠷ ᠵᠡᠭᠦᠯᠭᠡᠭᠰᠡᠨ ᠳ᠋ᠦ᠍ᠷ ᠴᠡᠷᠢᠭ ᠦ᠋ᠨ ᠰᠡᠳᠬᠢᠯ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠰᠦᠷ ᠬᠦᠴᠦᠨ ᠳᠠᠬᠢᠨ ᠳᠡᠭᠡᠷᠡᠳᠡᠵᠦ᠂ ᠳᠠᠷᠤᠢ ᠬᠣᠲᠠᠨ ᠤ᠋ ᠭᠠᠳᠠᠨᠠ ᠳᠥᠷᠪᠡᠨ ᠥᠨᠴᠥᠭ ᠪᠠ ᠲᠠᠪᠤᠨ ᠡᠭᠦᠳᠡᠨ ᠳ᠋ᠦ᠍ᠷ ᠴᠥᠮ ᠬᠠᠯᠬᠠᠪᠴᠢ ᠭᠡᠷᠡᠯ ᠴᠣᠭᠴᠠᠯᠠᠵᠤ᠂ ᠨᠡᠷᠡ ᠶ᠋ᠢ 《 ᠮᠧᠢ ᠬᠤᠸᠠ ᠴᠢᠶᠠᠩ 》ᠭᠡᠮᠡᠨ ᠳᠠᠭᠤᠳᠠᠮᠤᠢ᠃ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠲᠠᠪᠤᠨ ᠵᠠᠭᠤᠨ ᠮᠣᠷᠢᠲᠠᠨ ᠲᠡᠷᠡ ᠬᠡᠷᠡᠮ ᠢ᠋ ᠳᠠᠭᠠᠷᠢᠨ ᠢᠷᠡᠬᠦᠢ ᠳ᠋ᠦ᠍ᠷ ᠴᠢᠶᠠᠩ ᠱᠧᠨ ᠬᠣᠶᠠᠷ ᠵᠠᠭᠤᠨ ᠮᠣᠷᠢᠲᠠᠨ ᠢ᠋ ᠠᠪᠴᠤ ᠬᠡᠩᠭᠡᠷᠭᠡ ᠳᠡᠯᠡᠳᠦᠨ ᠤᠭᠲᠤᠨ ᠭᠠᠷᠬᠤᠶᠠ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠳᠠᠷᠤᠢ ᠬᠣᠢᠰᠢ ᠤᠬᠤᠷᠢᠪᠠᠢ᠃ ᠡᠭᠦᠨ ᠳ᠋ᠦ᠍ ᠡᠦ ᠯᠢᠨ ᠳᠡ ᠬᠤ᠌ ᠲᠦ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠦ᠋ᠨ ᠴᠢᠭᠢᠷᠠᠭ ᠢ᠋ ᠦᠵᠡᠭᠡᠳ ᠳᠠᠷᠤᠢ ᠰᠤᠪᠳᠠᠭ ᠮᠣᠷᠢᠲᠠᠨ ᠤ᠋ ᠬᠡᠳᠦᠨ ᠵᠠᠭᠤᠨ ᠴᠡᠷᠢᠭ ᠢ᠋ ᠠᠪᠴᠤ ᠼᠠᠢ ᠵᠧᠦ ᠬᠣᠲᠠᠨ ᠳ᠋ᠤᠷ ᠪᠤᠷᠤᠭᠤᠯᠠᠨ ᠡᠴᠢᠪᠡ᠃ ᠡᠭᠦᠨ ᠳ᠋ᠦ᠍ᠷ ᠢᠩ ᠶᠠᠩ ᠳᠦ ᠢᠦᠢ ᠲᠦᠰᠢᠮᠡᠯ ᠪᠠᠷᠠᠭᠤᠨ ᠬᠠᠭᠠᠯᠭᠠ ᠪᠠᠨ ᠨᠡᠭᠡᠭᠡᠵᠦ ᠳᠠᠭᠠᠭᠰᠠᠨ ᠳ᠋ᠤᠷ ᠴᠢᠶᠠᠩ ᠱᠧᠨ ᠬᠣᠲᠠᠨ ᠢ᠋ ᠬᠠᠮᠠᠭᠠᠯᠠᠨ ᠴᠢᠳᠠᠬᠤ ᠦᠭᠡᠢ ᠪᠡᠨ ᠮᠡᠳᠡᠭᠡᠳ ᠦᠬᠦᠬᠦ ᠡᠴᠡ ᠦᠯᠦ ᠠᠶᠤᠬᠤ ᠬᠡᠳᠦᠨ ᠠᠷᠪᠠᠨ ᠠᠷᠠᠳ ᠢ᠋ ᠠᠪᠴᠤ ᠵᠡᠭᠦᠨ ᠬᠠᠭᠠᠯᠭᠠ ᠪᠠᠷ ᠪᠠᠢᠯᠳᠤᠨ ᠭᠠᠷᠤᠭᠰᠠᠨ ᠳ᠋ᠤᠷ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠲᠣᠰᠴᠤ ᠪᠠᠢᠯᠳᠤᠨ ᠬᠤᠷᠢᠶᠠᠵᠤ ᠠᠪᠤᠭᠠᠳ ᠲᠥᠭᠥᠷᠢᠭᠯᠡᠨ ᠬᠠᠭᠠᠵᠤ ᠠᠮᠢᠳᠤ ᠪᠠᠷ ᠪᠠᠷᠢᠵᠤ ᠠᠪᠤᠭᠠᠳ ᠮᠣᠷᠢᠨ ᠳᠡᠭᠡᠷᠡ ᠬᠥᠨᠳᠡᠯᠡᠨ ᠢ᠋ᠶ᠋ᠡᠷ ᠠᠴᠢᠵᠤ᠂ ᠮᠣᠩᠭᠣᠯ ᠤ᠋ᠨ ᠲᠡᠢᠰᠢ ᠶ᠋ᠢᠨ ᠬᠥᠪᠡᠭᠦᠨ ᠳᠡᠰ ᠲᠣᠭᠣᠰ ᠶᠤᠸᠠᠨᠱᠤᠸᠠᠢ ᠳ᠋ᠤᠷ ᠠᠪᠴᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠴᠡᠷᠢᠭ ᠦ᠋ᠨ ᠠᠷᠠᠳ ᠴᠢᠶᠠᠩ ᠱᠧᠨ ᠦ᠌ ᠲᠣᠭᠰᠢᠨ ᠢ᠋ ᠦᠵᠡᠵᠦ ᠰᠤᠷᠭᠠᠨ ᠥᠭᠦᠯᠡᠷᠦᠨ : 《ᠪᠠᠷᠠᠭᠳᠠᠭᠰᠠᠨ ᠤᠯᠤᠰ ᠲᠤᠷ ᠴᠢᠷᠮᠠᠢᠨ ᠦᠬᠦᠪᠡᠴᠦ ᠶᠠᠭᠤᠨ ᠤ᠋ ᠲᠤᠰᠠ? ᠬᠣᠢᠰᠢ ᠬᠠᠲᠤᠨ ᠨᠢᠭᠡᠨᠲᠡ ᠰᠥᠭᠥᠳᠪᠡᠰᠦ ᠳᠠᠷᠤᠢ ᠰᠢᠳᠤᠷᠭᠤ ᠪᠥᠭᠡᠳ ᠪᠠᠰᠠ ᠤᠷᠢᠳᠤᠰ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠵᠤ ᠪᠣᠯᠤᠮᠤᠢ ! 》ᠬᠡᠮᠡᠬᠦᠢ ᠳ᠋ᠦ᠍ᠷ ᠴᠢᠶᠠᠩ ᠱᠧᠨ ᠦᠭᠡ ᠶ᠋ᠢ ᠠᠪᠬᠤ ᠦᠭᠡᠢ ᠲᠤᠯᠠ ᠴᠡᠷᠢᠭ ᠦ᠋ᠨ ᠠᠷᠠᠳ ᠢᠨᠢᠶᠡᠨ ᠥᠭᠦᠯᠡᠷᠦᠨ : 《ᠠᠯᠲᠠᠨ ᠤᠯᠤᠰ᠂ ᠰᠥᠩ ᠤᠯᠤᠰ᠂ ᠯᠢᠶᠣᠣ ᠤᠯᠤᠰ᠂ ᠰᠢᠶᠠ ᠤᠯᠤᠰ᠂ ᠰᠢ ᠢᠦᠢ ᠤᠯᠤᠰ᠂ ᠭᠠᠤᠯᠢ ᠤᠯᠤᠰ᠂ ᠡᠳᠡᠭᠡᠷ ᠤᠯᠤᠰ ᠤ᠋ᠨ ᠶᠡᠬᠡ ᠬᠠᠳ ᠪᠠ ᠡᠷᠭᠢᠨ ᠰᠠᠢᠳ ᠳᠠᠭᠠᠭᠰᠠᠨ ᠢᠨᠤ ᠳᠡᠯᠡᠬᠡᠢ ᠳ᠋ᠠᠬᠢᠨ ᠳ᠋ᠤᠷ ᠳᠦᠭᠦᠷᠴᠦᠬᠦᠢ᠃ ᠲᠡᠳᠡᠭᠡᠷ ᠠᠯᠢᠨ ᠠᠨᠤ ᠴᠢᠮᠠ ᠠ᠋ᠴᠠ ᠳᠣᠣᠷᠠ ᠠᠷᠠᠳ ᠪᠣᠢ ? ᠨᠢᠭᠡᠨᠲᠡ ᠡᠨᠡ ᠮᠡᠲᠦ ᠪᠣᠯᠤᠭᠰᠠᠨ ᠤᠯᠤᠰ ᠲᠤᠷ ᠡᠨᠡ ᠮᠡᠲᠦ ᠠᠭᠠᠰᠢᠯᠠᠨ ᠮᠠᠭᠤ ᠡᠮᠡᠰ ᠦ᠋ᠨ ᠪᠠᠢᠳᠠᠯ ᠢ᠋ ᠭᠠᠷᠭᠠᠭᠠᠳ ᠶᠠᠮᠪᠠᠷ ᠶᠡᠬᠡ ᠭᠠᠢᠬᠠᠯ ᠪᠣᠢ ? 》ᠭᠡᠮᠡᠨ ᠴᠢᠶᠠᠩ ᠱᠧᠨ ᠢ᠋ ᠬᠣᠢᠰᠢ ᠬᠠᠨᠳᠤᠭᠤᠯᠤᠨ ᠵᠣᠭᠰᠣᠭᠠᠪᠠᠰᠤ ᠲᠣᠯᠣᠭᠠᠢ ᠪᠠᠨ ᠣᠨᠴᠠ ᠡᠮᠦᠨᠡ ᠵᠦᠭ ᠡᠷᠭᠢᠬᠦᠢ ᠳ᠋ᠦ᠍ᠷ ᠴᠡᠷᠢᠭ ᠦ᠋ᠨ ᠠᠷᠠᠳ ᠢᠨᠢᠶᠡᠳᠦ ᠪᠣᠯᠭᠠᠨ ᠴᠢᠶᠠᠩ ᠱᠧᠨ ᠢ᠋ ᠮᠣᠳᠣᠨ ᠵᠢᠶᠠ ᠽᠢ ᠳ᠋ᠦ᠍ᠷ ᠰᠥᠭᠥᠳᠬᠡᠵᠦ ᠬᠦᠯᠢᠭᠡᠳ ᠲᠣᠯᠣᠭᠠᠢ ᠶ᠋ᠢ ᠪᠠᠰᠠ ᠬᠣᠢᠰᠢ ᠬᠠᠨᠳᠤᠭᠤᠯᠤᠨ ᠡᠷᠡᠭᠡᠳ ᠳᠡᠰ ᠲᠣᠭᠣᠰ ᠤ᠋ᠨ ᠡᠮᠦᠨᠡ ᠠᠴᠢᠷᠠᠵᠤ ᠲᠠᠯᠪᠢᠭᠰᠠᠨ ᠳ᠋ᠤᠷ ᠳᠡᠰ ᠲᠣᠭᠣᠰ ᠲᠡᠭᠦᠨ ᠢ᠋ ᠵᠣᠷᠢᠭ ᠢ᠋ᠶ᠋ᠠᠨ ᠭᠦᠢᠴᠡᠳᠬᠡᠲᠦᠭᠡᠢ ᠭᠡᠮᠡᠨ ᠲᠠᠯᠪᠢᠭᠤᠯᠵᠤ᠂ ᠲᠡᠭᠦᠨ ᠦ᠌ ᠡᠵᠡᠨ ᠵᠦᠭ ᠬᠠᠨᠳᠤᠭᠤᠯᠤᠨ ᠰᠥᠭᠥᠳᠬᠡᠵᠦ ᠠᠯᠠᠭᠤᠯᠤᠨ ᠲᠡᠭᠦᠨ ᠦ᠌ ᠵᠢᠷᠤᠮ ᠢ᠋ ᠭᠦᠢᠴᠡᠳᠬᠡᠪᠡ᠃
ᠲᠡᠭᠦᠨᠴᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠠᠢᠽᠦ᠋ᠩ ᠬᠠᠭᠠᠨ ᠱᠧᠦ ᠰᠢᠦᠢ᠂ ᠬᠦᠢ ᠳᠧ ᠹᠦ ᠳ᠋ᠦ᠍ᠷ ᠬᠠᠷᠠᠬᠠᠨ ᠮᠣᠩᠭᠣᠯ ᠤ᠋ᠨ ᠲᠦᠮᠡᠨᠲᠡᠢ ᠳ᠋ᠦ᠍ᠷ ᠬᠠᠭᠠᠭᠳᠠᠵᠤ ᠶᠡᠬᠡᠯᠡ ᠴᠢᠬᠤᠯᠳᠠᠭᠰᠠᠨ ᠪᠥᠭᠡᠳ ᠪᠠᠰᠠ ᠴᠡᠷᠢᠭ ᠦ᠋ᠨ ᠵᠠᠮ ᠠᠨᠤ ᠲᠠᠰᠤᠷᠠᠭᠰᠠᠨ ᠳ᠋ᠤᠷ ᠶᠤᠸᠠᠨᠱᠤᠸᠠᠢ ᠸᠠᠩ ᠵᠢᠢ ᠶ᠋ᠢ ᠦᠯᠡᠳᠡᠭᠡᠵᠦ ᠬᠦᠢ ᠳᠧ ᠹᠦ ᠶ᠋ᠢ ᠰᠠᠬᠢᠭᠤᠯᠤᠭᠠᠳ ᠳᠠᠷᠤᠢ ᠼᠠᠢ ᠵᠧᠦ ᠶ᠋ᠢ ᠵᠣᠷᠢᠪᠠ᠃ ᠡᠨᠡ ᠬᠢᠷᠢ ᠳ᠋ᠦ᠍ᠷ ᠡᠨᠡ ᠲᠡᠨᠳᠡ ᠪᠤᠷᠤᠭᠤᠯᠠᠭᠰᠠᠭᠠᠷ ᠤᠳᠠᠭᠰᠠᠨ ᠲᠤᠯᠠ ᠤᠯᠠᠮ ᠴᠥᠮ ᠮᠣᠬᠣᠵᠤ ᠶᠠᠳᠠᠩᠭᠢᠷᠠᠭᠠᠳ ᠲᠥᠷᠥ ᠶ᠋ᠢᠨ ᠵᠠᠭᠤᠨ ᠲᠦᠰᠢᠮᠡᠳ ᠴᠥᠮ ᠣᠯᠠᠩᠬᠢ ᠨᠢ ᠶᠠᠪᠠᠭᠠᠯᠠᠨ ᠳᠠᠭᠠᠵᠤ ᠰᠢᠪᠡᠷ ᠤᠰᠤᠨ ᠳ᠋ᠤᠷ ᠱᠠᠯᠪᠠᠵᠤ ᠪᠡᠯᠴᠢᠨ᠂ ᠬᠦᠨᠡᠰᠦ ᠦᠭᠡᠢ ᠲᠤᠯᠠ ᠬᠥᠬᠡ ᠴᠢᠪᠠᠭᠠ ᠶ᠋ᠢ ᠲᠡᠭᠦᠵᠦ ᠢᠳᠡᠨ ᠬᠦᠨᠡᠰᠦᠯᠡᠵᠦ ᠶᠠᠪᠤᠭᠰᠠᠭᠠᠷ ᠬᠥᠯ ᠢᠨᠦ ᠴᠥᠮ ᠬᠠᠪᠤᠳᠴᠤ ᠨᠢᠭᠡᠨ ᠡᠳᠦᠷ ᠶᠠᠪᠤᠵᠤ ᠪᠦᠸᠧ ᠵᠧᠦ ᠳ᠋ᠦ᠍ᠷ ᠬᠦᠷᠴᠦ ᠬᠠᠭᠠᠨ ᠤ᠋ ᠪᠡᠶᠡ ᠰᠢᠷᠠ ᠳᠡᠪᠡᠯ ᠦ᠋ᠨ ᠳᠡᠭᠡᠷᠡ ᠬᠠᠷᠠ ᠡᠪᠡᠰᠦᠨ ᠨᠥᠮᠥᠷᠭᠡ ᠨᠣᠮᠥᠷᠴᠦ ᠠᠯᠲᠠᠨ ᠬᠠᠰ ᠤ᠋ᠨ ᠪᠦᠰᠡ ᠪᠦᠰᠡᠯᠡᠨ ᠬᠥᠬᠡ ᠰᠢᠷᠠ ᠬᠣᠶᠠᠷ ᠥᠩᠭᠡ ᠶ᠋ᠢᠨ ᠳᠠᠯᠪᠠᠭᠠ ᠡᠮᠦᠨᠡ ᠵᠠᠮ ᠤᠳᠤᠷᠢᠳᠤᠨ᠂ ᠬᠣᠢᠨᠠ ᠰᠢᠷᠠ ᠲᠤᠭ ᠰᠢᠷᠠ ᠰᠢᠭᠦᠷ ᠡᠷᠭᠦᠵᠦ᠂ ᠬᠣᠶᠠᠷ ᠭᠤᠷᠪᠠᠬᠠᠨ ᠵᠠᠭᠤᠨ ᠬᠥᠮᠦᠨ ᠳᠠᠭᠠᠵᠤ᠂ ᠡᠳᠡᠭᠡᠷ ᠦ᠋ᠨ ᠳᠣᠲᠣᠷᠠ ᠨᠡᠢᠲᠡ ᠲᠠᠪᠢᠬᠠᠨ ᠮᠣᠷᠢ ᠪᠠᠷ ᠡᠯᠭᠦᠨ ᠰᠡᠯᠭᠦᠨ ᠤᠨᠤᠵᠤ᠂ ᠬᠡᠳᠦᠨ ᠡᠳᠦᠷ ᠶᠠᠪᠤᠵᠤ ᠼᠠᠢ ᠵᠧᠦ ᠬᠣᠲᠠ ᠳ᠋ᠤᠷ ᠬᠦᠷᠦᠭᠰᠡᠨ ᠳ᠋ᠦ᠍ᠷ ᠼᠠᠢ ᠵᠧᠦ ᠶ᠋ᠢᠨ ᠥᠲᠡᠭᠦᠰ ᠬᠥᠭᠰᠢᠳ ᠵᠠᠮ ᠤ᠋ᠨ ᠵᠡᠭᠦᠨ ᠳ᠋ᠦ᠍ ᠰᠥᠭᠥᠳᠴᠦ ᠤᠭᠲᠤᠭᠰᠠᠨᠠ᠂ ᠠᠢᠽᠦ᠋ᠩ ᠬᠠᠭᠠᠨ ᠰᠢᠳᠠᠷ ᠰᠠᠢᠳ ᠢ᠋ᠶ᠋ᠠᠷ ᠣᠯᠠᠨ ᠬᠥᠭᠰᠢᠳ ᠲᠣᠷ ᠵᠠᠷᠯᠢᠭ ᠢ᠋ ᠤᠯᠠᠮᠵᠢᠯᠠᠭᠤᠯᠤᠨ ᠬᠡᠯᠡᠭᠦᠯᠦᠷᠦᠨ :《ᠲᠠᠨ ᠤ᠋ ᠣᠯᠠᠨ ᠤᠯᠤᠰ ᠤ᠋ᠨ ᠬᠡᠰᠢᠭ ᠲᠣᠷ ᠵᠠᠭᠤᠨ ᠣᠨ ᠢᠯᠡᠭᠦᠦ ᠬᠦᠷᠲᠡᠪᠡ᠂ ᠡᠳᠦᠭᠡ ᠮᠢᠨᠦ ᠪᠡᠶᠡ ᠡᠷᠳᠡᠮ ᠦᠭᠡᠢ ᠲᠤᠯᠠ ᠲᠠᠨ ᠤ᠋ ᠣᠯᠠᠨ ᠢ᠋ ᠵᠣᠪᠠᠯᠠᠩ ᠳ᠋ᠤᠷ ᠲᠣᠬᠢᠶᠠᠯᠳᠤᠭᠤᠯᠪᠠᠢ᠃ ᠨᠡᠩᠳᠡ ᠮᠢᠨᠦ ᠪᠡᠶᠡ ᠶ᠋ᠢ ᠲᠣᠭᠠᠴᠢᠬᠤ ᠭᠠᠵᠠᠷ ᠦᠭᠡᠢ᠂ ᠲᠠᠨ ᠤ᠋ ᠣᠯᠠᠨ ᠮᠢᠨᠦ ᠤᠷᠢᠳᠤᠰ ᠳᠡᠭᠡᠳᠦᠰ ᠢ ᠡᠰᠡ ᠤᠮᠠᠷᠲᠠᠪᠠᠰᠤ ᠵᠣᠬᠢᠮᠤᠢ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠣᠯᠠᠨ ᠢᠷᠭᠡᠨ ᠴᠥᠮ ᠤᠬᠢᠯᠠᠯᠴᠠ《ᠲᠦᠮᠡᠨ ᠨᠠᠰᠤᠲᠤ ! 》ᠭᠡᠮᠡᠨ ᠳᠠᠭᠤᠳᠠᠯᠴᠠᠨ ᠮᠥᠷᠭᠥᠯᠴᠡᠪᠡᠢ᠃ ᠲᠡᠳᠦᠢ ᠨᠢᠭᠡᠨ ᠡᠳᠦᠷ ᠥᠨᠵᠢᠵᠦ᠂ ᠵᠢᠴᠢ ᠡᠳᠦᠷ ᠣᠷᠣᠭᠰᠢ ᠣᠷᠣᠵᠤ ᠪᠦᠸᠧ ᠵᠧᠦ ᠡᠴᠡ ᠵᠢᠷᠠᠨ ᠭᠠᠵᠠᠷ ᠶᠠᠪᠤᠵᠤ ᠱᠤᠸᠠᠩ ᠵᠧᠦ ᠰᠧ ᠰᠦᠮᠡ ᠳ᠋ᠦ᠍ᠷ ᠬᠦᠷᠲᠡᠯᠡ ᠶᠡᠬᠡ ᠪᠣᠷᠣᠭᠠᠨ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠬᠠᠭᠠᠨ ᠤ᠋ ᠵᠢᠭᠰᠠᠭᠠᠯ ᠰᠦᠮᠡ ᠳ᠋ᠦ᠍ᠷ ᠪᠣᠷᠣᠭᠠᠨ ᠢ᠋ ᠳᠠᠯᠳᠠᠯᠠᠬᠤᠶᠠ ᠦᠵᠡᠪᠡᠰᠦ ᠰᠦᠮᠡ ᠶ᠋ᠢᠨ ᠬᠦᠷᠢᠶᠡ ᠡᠪᠳᠡᠷᠬᠡᠢ ᠴᠤᠴᠠᠷᠬᠠᠢ᠂ ᠶᠡᠨᠳᠡᠷ ᠬᠡᠷᠡᠰᠬᠡ ᠳ᠋ᠦ᠍ᠷ ᠡᠪᠡᠰᠦ ᠤᠷᠭᠤᠵᠤ᠂ ᠵᠠᠭᠤᠨ ᠲᠦᠰᠢᠮᠡᠯ ᠦ᠋ᠨ ᠳᠡᠪᠡᠯ ᠬᠤᠪᠴᠠᠳ ᠲᠤᠷ ᠴᠥᠮ ᠰᠢᠪᠠᠷ ᠤᠰᠤ ᠨᠠᠭᠠᠯᠳᠤᠵᠤ᠂ ᠬᠠᠭᠠᠨ ᠤ᠋ ᠰᠢᠭᠦᠷ ᠳᠠᠯᠪᠠᠭᠠ ᠴᠥᠮ ᠪᠣᠷᠣᠭᠠᠨ ᠳ᠋ᠤᠷ ᠨᠣᠷᠴᠤ ᠵᠣᠭᠰᠣᠮᠤᠢ᠃ ᠨᠢᠳᠦ ᠡᠷᠭᠦᠵᠦ ᠦᠵᠡᠪᠡᠰᠦ ᠡᠪᠡᠰᠦ ᠰᠤᠢᠬᠠ ᠲᠠᠯᠠ ᠳᠦᠭᠦᠷᠴᠦ ᠬᠥᠮᠦᠨ ᠮᠣᠷᠢ ᠰᠡᠭᠦᠳᠡᠷ ᠦᠭᠡᠢ ᠳ᠋ᠦ᠍ᠷ ᠠᠢᠽᠦ᠋ᠩ ᠬᠠᠭᠠᠨ ᠤᠷᠲᠤ ᠰᠡᠭᠦᠷᠡᠰᠦᠨ ᠠᠯᠳᠠᠵᠤ ᠥᠭᠦᠯᠡᠷᠦᠨ : ᠤᠯᠤᠰ ᠲᠥᠷᠥ ᠮᠣᠬᠣᠵᠤ ᠡᠪᠳᠡᠷᠡᠨ ᠬᠣᠲᠠ ᠪᠠᠯᠭᠠᠰᠤᠨ ᠠᠪᠲᠠᠭᠰᠠᠨᠠ ᠣᠯᠠᠨ ᠢᠷᠭᠡᠨ ᠪᠤᠲᠠᠷᠠᠨ ᠰᠠᠷᠨᠢᠵᠤ ᠬᠥᠮᠦᠨ ᠠᠮᠢᠲᠠᠨ ᠳᠠᠭᠤᠰᠴᠤᠬᠤᠢ᠂ ᠤᠷᠢᠳᠤᠰ ᠳᠡᠭᠡᠳᠦᠰ ᠦ᠋ᠨ ᠲᠠᠬᠢᠯ ᠲᠠᠪᠢᠭ ᠲᠠᠰᠤᠷᠠᠨ ᠲᠠᠮᠲᠤᠷᠠᠬᠤ ᠴᠠᠭ ᠲᠤᠷ ᠤᠶᠠᠷᠠᠯᠲᠤ ᠨᠠᠮᠠᠶ᠋ᠢ ᠲᠣᠬᠢᠶᠠᠯᠳᠤᠭᠤᠯᠤᠨ ᠲᠥᠷᠥᠭᠦᠯᠵᠦ ᠡᠨᠡ ᠶᠠᠯᠠ ᠶ᠋ᠢ ᠬᠦᠯᠢᠶᠡᠯᠭᠡᠪᠡ᠃
ᠰᠤᠳᠤᠷᠴᠢ ᠲᠦᠰᠢᠮᠡᠯ ᠢᠨᠵᠠᠨᠨᠠᠰᠢ ᠶ᠋ᠢᠨ ᠰᠤᠯᠠ ᠰᠢᠯᠦᠭ ᠢᠨᠦ :
ᠪᠠᠲᠤ ᠵᠣᠷᠢᠭᠲᠤ ᠪᠤᠯᠤ ᠲᠡᠢᠰᠢ ᠡᠴᠢᠭᠡ ᠶ᠋ᠢᠨ ᠭᠡᠷᠢᠶᠡᠰ ᠢ᠋ᠶ᠋ᠡᠷ ᠪᠢᠶᠠᠨ ᠵᠢᠩ ᠪᠠᠯᠭᠠᠰᠤᠨ ᠢ᠋ ᠠᠪᠤᠭᠰᠠᠨᠠ
ᠪᠠᠭᠠᠲᠤᠷ ᠬᠦᠴᠦᠲᠦ ᠰᠥᠪᠡᠭᠡᠲᠡᠢ ᠵᠠᠩᠵᠤᠨ ᠡᠵᠡᠨ ᠦ᠌ ᠵᠠᠷᠯᠢᠭ ᠢ᠋ᠶ᠋ᠠᠷ ᠸᠠᠨ ᠶᠠᠨ ᠠᠢᠮᠠᠭ ᠢ᠋ ᠬᠤᠷᠢᠶᠠᠮᠵᠢᠯᠠᠪᠠ᠃
ᠪᠠᠢᠳᠠᠯ ᠢ᠋ ᠤᠬᠠᠭᠰᠠᠨ ᠼᠦᠢ ᠯᠢ ᠪᠠᠢᠭᠠ ᠡᠷᠬᠡ ᠶ᠋ᠢ ᠡᠵᠡᠯᠡᠭᠰᠡᠨ ᠢ᠋ᠶ᠋ᠡᠷ ᠳ᠋ᠦᠩ ᠵᠢᠩ ᠦ᠋ᠨ ᠢᠷᠭᠡᠨ ᠢ᠋ ᠠᠪᠤᠷᠠᠪᠠ
ᠪᠠᠷᠳᠠᠮ ᠢ᠋ ᠡᠷᠬᠢᠯᠡᠭᠰᠡᠨ ᠫᠦ ᠴᠠ ᠭᠤᠸᠠᠨ ᠨᠥ᠍ ᠡᠷᠳᠡᠮ ᠦᠭᠡᠢ ᠳ᠋ᠦ᠍ᠷ ᠬᠦᠢ ᠳᠧ ᠹᠦ ᠬᠣᠲᠠᠨ ᠳ᠋ᠤᠷ ᠠᠯᠠᠭᠳᠠᠪᠠᠢ᠃