ᠣᠷᠣᠢ ᠦᠭᠡᠢ ᠰᠦᠮᠡ – ᠠᠷᠪᠠᠨ ᠲᠠᠪᠤ ᠂ ᠵᠣᠪᠠᠯᠠᠩ ᠤᠨ ᠬᠦᠷᠳᠦ ᠡᠷᠭᠢᠭᠦᠯᠦᠭᠴᠢ Оройгүй сүм – Арвантав ᠂ Зовлонгийн хүрд эргүүлэгч- Oroigui sum 15
756 ᠲᠠᠭᠤᠬᠤ ᠳ᠋ᠤ᠌ ᠭᠠᠬᠠᠢ ᠨᠢᠭᠡ ᠬᠡᠴᠡᠭᠦᠦ
ᠲᠤᠭᠤᠯᠬᠤ ᠳ᠋ᠤ᠌ ᠲᠠᠯᠠ ᠨᠢᠭᠡ ᠬᠡᠴᠡᠭᠦᠦ
ᠲᠣᠭᠠᠯᠠᠬᠤ ᠳ᠋ᠤ᠌ ᠣᠳᠣ ᠨᠢᠭᠡ ᠬᠡᠴᠡᠭᠦᠦ
ᠭᠣᠮᠠᠨ ᠳ᠋ᠠᠴᠠᠩ ᠳ᠋ᠤ᠌ ᠮᠣᠩᠭᠣᠯ ᠢ᠋ᠶ᠋ᠠᠷ ᠪᠤᠷᠬᠠᠨ ᠤ᠋ ᠢᠷᠦᠭᠡᠯ ᠤᠩᠰᠢᠭᠰᠠᠨ ᠤ᠋ ᠤᠴᠢᠷ ᠰᠠᠩᠵᠢ ᠭᠡᠰᠦᠯ ᠭᠡᠰᠬᠡᠯ ᠴᠡᠭᠡᠷᠯᠡᠯ ᠦᠵᠡᠵᠦ᠂ ᠰᠸᠷᠡ ᠭᠡᠢᠳ ᠫᠠᠪᠤᠩ – ᠬᠠ ᠷᠢᠲ᠋ᠣᠤᠳ᠋ ᠢ᠋ ᠭᠤᠷᠪᠠᠨ ᠮᠢᠩᠭᠠ ᠭᠤᠷᠪᠠᠨ ᠵᠠᠭᠤᠨ ᠭᠤᠴᠢᠨ ᠭᠤᠷᠪᠠ ᠲᠣᠭᠣᠷᠢᠵᠤ ᠭᠣᠷᠢᠶᠠ ᠬᠢᠵᠦ᠂ ᠪᠤᠷᠬᠠᠨ ᠤ᠋ ᠮᠠᠭᠲᠠᠭᠠᠯ ᠤᠩᠰᠢᠬᠤ ᠪᠠᠷ ᠶᠠᠪᠤᠯᠠ᠃ ᠰᠸᠷᠡ ᠭᠡᠢᠳ ᠦ᠋ᠨ ᠲᠡᠷᠡ ᠷᠢᠲ᠋ᠣᠤᠳ᠋ ᠨᠢ ᠪᠦᠷ ᠡᠷᠲᠡᠨ ᠦ᠌ ᠰᠣᠷᠢᠨᠵᠢᠨᠭᠤᠮᠪᠣ ᠬᠠᠭᠠᠨ ᠤ ᠦᠶᠡ ᠳ᠋ᠦ᠍ ᠪᠠᠢᠭᠤᠯᠤᠭᠰᠠᠨ ᠠᠭᠤᠢ ᠶ᠋ᠢᠨ ᠰᠦᠮᠡ ᠶᠦᠮ᠃ ᠷᠢᠲ᠋ᠣᠤᠳ᠋ ᠭᠡᠳᠡᠭ ᠪᠣᠯ ᠠᠭᠤᠯᠠ ᠶ᠋ᠢᠨ ᠬᠢᠷᠠ ᠬᠡᠮᠡᠬᠦ ᠦᠭᠡ ᠪᠣᠯᠪᠠᠴᠤ ᠣᠳᠣ ᠥᠭᠡᠷᠡ ᠤᠳᠬᠠ ᠲᠠᠢ ᠪᠣᠯᠵᠠᠢ᠃ ᠠᠭᠤᠯᠠ ᠶ᠋ᠢᠨ ᠬᠢᠷᠠ ᠳᠠᠭᠠᠵᠤ ᠠᠭᠤᠢ ᠳ᠋ᠤ᠌ ᠨᠣᠮ ᠪᠢᠰᠢᠯᠭᠠᠨ ᠰᠠᠭᠤᠭᠴᠢᠳ ᠤ᠋ᠨ ᠵᠠᠰᠠᠵᠤ ᠶᠠᠩᠵᠤᠯᠠᠭᠰᠠᠨ᠂ ᠶᠡᠬᠡᠪᠴᠢᠯᠡᠨ ᠨᠢᠭᠡ ᠬᠥᠮᠦᠨ ᠬᠣᠷᠭᠣᠳᠠᠬᠤ ᠣᠷᠣᠨ ᠢ᠋ ᠷᠢᠲ᠋ᠣᠤᠳ᠋ ᠭᠡᠬᠦ ᠪᠣᠯᠵᠠᠢ᠃ ᠫᠠᠪᠤᠩ - ᠬᠠ ᠶ᠋ᠢᠨ ᠷᠢᠲ᠋ᠣᠤᠳ᠋ ᠢ᠋ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠬᠢ ᠭᠡᠵᠦ ᠦᠵᠡᠳᠡᠭ ᠪᠠᠢᠵᠠᠢ᠃ ᠶᠢᠰᠦᠨ ᠳᠠᠪᠬᠤᠷ ᠠᠭᠤᠢ ᠪᠠᠢᠭ᠍ᠰᠠᠨ ᠪᠣᠯᠪᠠᠴᠤ ᠱᠠᠰᠢᠨ ᠤ᠋ ᠳᠠᠢᠰᠦᠨ ᠯᠠᠩᠳᠠᠷᠮᠠ ᠬᠠᠭᠠᠨ ᠶᠡᠬᠡᠩᠬᠢ ᠶ᠋ᠢ ᠨᠢ ᠨᠤᠷᠠᠭᠠᠨ ᠰᠦᠢᠳᠬᠡᠵᠦ᠂ ᠣᠳᠣ ᠬᠣᠶᠠᠷᠬᠠᠨ ᠳᠠᠪᠬᠤᠷ ᠦᠯᠡᠳᠡᠭᠰᠡᠨ ᠭᠡᠳᠡᠭ ᠳᠣᠮᠣᠭ ᠲᠠᠢ ᠠᠵᠢ᠃ ᠰᠸᠷᠡ ᠭᠡᠢᠳ ᠲᠡᠢᠮᠦ ᠷᠢᠲ᠋ᠣᠤᠳ᠋ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠷᠠᠪᠠᠩ ᠭᠡᠢᠳ ᠮᠡᠷᠭᠡᠨ ᠠᠢᠯᠠᠳᠤᠭ᠍ᠴᠢ ᠶᠡᠬᠡᠲᠡᠢ ᠪᠡᠷ ᠢ᠋ᠶ᠋ᠡᠨ᠂ ᠭᠠᠯᠳᠠᠨ ᠭᠡᠢᠳ ᠭᠠᠢᠬᠠᠮᠠ ᠰᠣᠨᠢᠨ ᠶᠠᠭᠤᠮᠠ ᠲᠠᠢ ᠪᠠᠷ ᠢ᠋ᠶ᠋ᠠᠨ ᠲᠦᠪᠡᠳ ᠣᠷᠣᠨ ᠳ᠋ᠤ᠌ ᠨᠡᠷᠡ ᠴᠤᠤ ᠳ᠋ᠤ᠌ ᠭᠠᠷᠴᠠᠢ᠃ ᠰᠸᠷᠡ ᠭᠡᠢᠳ ᠦ᠋ᠨ ᠷᠢᠲ᠋ᠣᠤᠳ᠋ ᠢ᠋ ᠲᠣᠭᠣᠷᠢᠨ ᠭᠣᠷᠢᠶᠠ ᠬᠢᠬᠦ ᠬᠦᠮᠦᠨ ᠣᠯᠠᠨ ᠤᠴᠢᠷ ᠲᠣᠭᠣᠰᠣ ᠰᠢᠷᠣᠢ ᠲᠠᠢ ᠲᠣᠭᠣᠷᠢᠭ ᠵᠠᠮ ᠪᠣᠢ ᠪᠣᠯᠵᠠᠢ᠃ ᠲᠡᠷᠡ ᠵᠠᠮ ᠳ᠋ᠤ᠌ ᠯᠠ ᠭᠠᠭᠴᠠ ᠬᠦ ᠡᠨᠡ ᠬᠣᠷᠸᠠ ᠳ᠋ᠤ᠌ ᠪᠤᠷᠬᠠᠨ ᠤ᠋ ᠬᠡᠰᠢᠭ ᠭᠥᠷᠳᠡᠵᠦ ᠴᠢᠳᠠᠭᠠ ᠦᠭᠡᠢ ᠶᠠᠳᠠᠭᠤ ᠬᠤᠪᠢ ᠲᠠᠪᠢᠯᠠᠩᠲᠠᠨ ᠬᠡᠴᠢᠨᠡᠨ ᠣᠯᠠᠨ ᠪᠠᠢᠳᠠᠭ ᠢ᠋ ᠮᠡᠳᠡᠵᠦ ᠠᠪᠴᠤ ᠪᠣᠯᠬᠣ ᠪᠠᠷ ᠪᠢᠯᠡ᠃ ᠲᠠᠩᠭᠤᠳ᠂ ᠲᠥᠪᠡᠳ᠂ ᠲᠠᠪᠤᠨ ᠬᠡᠯᠡ ᠶ᠋ᠢᠨ ᠠᠮᠢᠲᠠᠨ ᠡᠨᠡ ᠲᠣᠭᠣᠷᠢᠭ ᠳᠡᠭᠡᠷᠡ ᠴᠤᠭᠯᠠᠷᠠᠵᠤ ᠫᠠᠪᠤᠩ - ᠬᠠ ᠶᠢᠨ ᠷᠢᠲ᠋ᠣᠤᠳ᠋ ᠢ᠋ ᠲᠣᠭᠣᠷᠢᠨ ᠠᠷᠤ ᠠᠷᠤ ᠠ᠋ᠴᠠ ᠪᠠᠨ ᠴᠤᠪᠤᠨ ᠶᠠᠪᠤᠨᠠ᠃ ᠵᠠᠷᠢᠮ ᠨᠢ ᠰᠤᠨᠵᠤ ᠮᠥᠷᠭᠥᠨᠡ᠃ ᠵᠠᠷᠢᠮ ᠨᠢ ᠵᠠᠭᠤᠨ ᠨᠠᠢ᠍ᠮᠠᠨ ᠪᠤᠯᠴᠤ᠌ᠤᠲᠤ ᠡᠷᠢᠬᠡ ᠪᠡᠨ ᠢᠮᠡᠷᠦᠨ ᠲᠣᠭᠠᠯᠠᠵᠤ ᠶᠠᠪᠤᠨᠠ᠃ ᠵᠠᠷᠢᠮ ᠨᠢ ᠨᠢᠭᠡ ᠭᠠᠷ ᠲᠠᠭᠠᠨ ᠵᠢᠵᠢᠭ ᠬᠦᠷᠳᠦ ᠪᠠᠷᠢᠵᠤ ᠠᠯᠬᠤᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠲᠣᠭᠠ ᠪᠠᠷ ᠲᠡᠭᠦᠨ ᠦ᠌ ᠭᠣᠣᠯ ᠢ᠋ ᠡᠷᠭᠢᠭᠦᠯᠦᠨ ᠮᠠᠨᠢ ᠤᠩᠰᠢᠬᠤ ᠳᠦᠷᠢ ᠦᠵᠡᠭᠦᠯᠦᠨ ᠶᠠᠪᠤᠨᠠ᠃ ᠵᠠᠷᠢᠮ ᠨᠢ ᠭᠤᠷᠪᠠᠨ ᠮᠢᠩᠭᠠ ᠭᠤᠷᠪᠠᠨ ᠵᠠᠭᠤᠨ ᠭᠤᠴᠢᠨ ᠭᠤᠷᠪᠠ ᠶ᠋ᠢᠨ ᠲᠣᠭᠠᠨ ᠳ᠋ᠤ᠌ ᠶᠠᠭᠠᠬᠢᠪᠠᠯ ᠲᠦᠷᠭᠡᠨ ᠬᠦᠷᠬᠦ ᠪᠢᠯᠡ ᠭᠡᠵᠦ ᠠᠷᠭᠠ ᠪᠠᠨ ᠪᠠᠷᠠᠨ ᠭᠦᠶᠦᠬᠦ ᠲᠣᠭᠠᠨ ᠤ᠋ ᠬᠤᠷᠳᠤ ᠪᠠᠷ ᠶᠠᠪᠤᠨᠠ᠃ ᠶᠠᠰᠤ ᠠᠷᠠᠰᠤ ᠪᠣᠯᠤᠭᠰᠠᠨ ᠲᠤᠷᠠᠩᠬᠠᠢ ᠪᠡᠶᠡ ᠲᠡᠢ᠂ ᠪᠥᠭᠡᠰᠦᠨ ᠳᠡᠭᠡᠨ ᠪᠠᠷᠢᠭᠳᠠᠵᠤ ᠦᠵᠡᠯ ᠳ᠋ᠦ᠍ ᠣᠷᠣᠭᠰᠠᠨ ᠶᠠᠳᠠᠭᠤᠰ ᠴᠤ᠌ ᠣᠯᠠᠨ ᠦᠵᠡᠭᠳᠡᠨᠡ᠃ ᠲᠡᠳᠡ ᠶᠠᠭᠤᠨ ᠳ᠋ᠤ᠌ ᠭᠣᠷᠢᠶᠠ ᠬᠢᠵᠦ ᠶᠠᠪᠤᠭᠠ ᠨᠢ ᠲᠣᠳᠣᠷᠬᠠᠢ᠃ ᠪᠤᠶᠠᠨ ᠬᠢᠵᠦ ᠰᠠᠢᠨ ᠬᠤᠪᠢ ᠲᠣᠬᠢᠶᠠᠯ ᠭᠣᠷᠢᠯᠠᠵᠠᠢ᠃
ᠡᠭᠡᠷᠡᠯ ᠦ᠋ᠨ ᠣᠷᠣᠨ ᠪᠤᠰᠤᠳ ᠲᠤ᠌ ᠦᠭᠡᠢ ᠪᠣᠯᠠᠢ
ᠨᠢᠭᠦᠯᠡᠰᠭᠦᠢ ᠪᠡᠷ ᠤᠳᠤᠷᠢᠳᠤᠨ ᠰᠣᠶᠣᠷᠬᠠ᠂ᠯᠠᠮᠠ ᠠᠪᠢᠳ !
ᠭᠡᠵᠦ ᠨᠢᠭᠡᠨ ᠬᠥᠮᠦᠨ ᠭᠤᠩᠰᠢᠭᠠᠨᠠᠨ ᠤᠩᠰᠢᠬᠤ ᠮᠡᠲᠦ ᠣᠷᠢᠯᠠᠨ ᠶᠠᠪᠤᠬᠤ ᠲᠠᠢ ᠰᠠᠩᠵᠢ ᠭᠡᠰᠦᠯ ᠲᠠᠭᠠᠷᠠᠯᠳᠤᠪᠠ᠃ ᠲᠡᠷᠡ ᠬᠥᠮᠦᠨ ᠮᠣᠩᠭᠣᠯ ᠢ᠋ᠶ᠋ᠠᠷ ᠡᠢᠨ ᠬᠦ᠌ ᠠᠪᠢᠳᠠ ᠪᠤᠷᠬᠠᠨ ᠤ᠋ ᠢᠷᠦᠭᠡᠯ ᠤᠩᠰᠢᠵᠤ ᠶᠠᠪᠤᠭᠰᠠᠨ ᠤᠴᠢᠷ ᠰᠠᠩᠵᠢ ᠰᠣᠨᠢᠭᠤᠴᠢᠯᠠᠨ ᠳᠡᠷᠭᠡᠳᠡ ᠨᠢ ᠣᠴᠢᠭᠠᠳ᠄
- ᠲᠠ ᠰᠠᠢᠨ ᠪᠠᠢᠨᠠ ᠤᠤ? ᠭᠡᠬᠦ ᠳ᠋ᠦ᠍ ᠴᠠᠭᠠᠳᠤᠬᠢ ᠨᠢ᠄
- ᠰᠠᠢᠨ᠂ ᠯᠠᠮᠠᠪᠤᠭᠠᠢ ᠠᠮᠤᠭᠤᠯᠠᠩ ᠤᠤ? ᠭᠡᠪᠡ᠃
ᠭᠤᠷᠢᠶᠠᠨ ᠤ ᠬᠢᠨ ᠠᠮᠠᠷᠠᠬᠤ᠂ ᠵᠣᠭᠰᠣᠵᠤ ᠰᠠᠭᠠᠳᠠᠬᠤ ᠳᠤᠷᠠ ᠦᠭᠡᠢ ᠶ᠋ᠢ ᠮᠡᠳᠡᠬᠦ ᠲᠤᠯᠠ ᠰᠠᠩᠵᠢ ᠲᠡᠭᠦᠨ ᠲᠡᠢ ᠵᠡᠷᠭᠡᠴᠡᠨ ᠠᠯᠬᠤᠯᠠᠬᠤ ᠵᠠᠭᠤᠷᠠ ᠦᠭᠡ ᠡᠳᠦᠵᠦ:
- ᠲᠠ ᠬᠠᠯᠬᠠ ᠭᠠᠵᠠᠷ ᠠ᠋ᠴᠠ ᠢᠷᠡᠭᠡ ᠤᠤ ? ᠭᠡᠪᠡ᠃
- ᠬᠠᠯᠬᠠ ᠭᠠᠵᠠᠷ ᠠ᠋ᠴᠠ ᠬᠡᠵᠢᠶᠡ ᠭᠠᠷᠤᠭᠰᠠᠨ ᠢ᠋ᠶ᠋ᠠᠨ ᠮᠠᠷᠲᠠᠭᠰᠠᠨ᠃ ᠬᠠᠷᠢᠨ ᠯᠠᠮᠠᠪᠤᠭᠠᠢ ᠬᠡᠵᠢᠶᠡ ᠭᠠᠷᠤᠭᠠ ᠪᠣᠢ? ᠬᠡᠷᠡᠭ ᠵᠣᠷᠢᠭ ᠶᠠᠭᠤᠨ ᠪᠢᠯᠡ?
- ᠨᠢᠳᠤᠨᠤᠨ ᠢᠷᠡᠭᠰᠡᠨ !
- ᠲᠡᠭᠡᠪᠡᠯ ᠡᠨᠳᠡ ᠠᠩᠬᠠᠨ ᠤ᠋ ᠪᠠᠨ ᠭᠣᠷᠢᠶᠠ ᠶ᠋ᠢ ᠬᠢᠵᠦ ᠪᠠᠢᠭᠠ ᠶᠤᠮ ᠤᠤ?
- ᠲᠡᠢᠮᠦ ᠡ᠂ ᠲᠠ ᠶᠠᠭᠠᠬᠢᠵᠤ ᠮᠡᠳᠡᠭᠡ ᠪᠣᠢ?
- ᠨᠢᠳᠤᠨᠤᠨ ᠢᠷᠡᠭᠰᠡᠨ ᠬᠥᠮᠦᠨ ᠲᠡᠷᠡ ᠵᠢᠯ ᠳ᠋ᠡᠭᠡᠨ ᠡᠨᠳᠡ ᠭᠣᠷᠢᠶᠠ ᠬᠢᠬᠦ ᠪᠡᠷ ᠵᠠᠪ ᠣᠯᠳᠠᠭᠠ ᠦᠭᠡᠢ ᠪᠢᠵᠡ᠃ ᠲᠡᠭᠡᠭᠡᠳ ᠮᠥᠩᠭᠥ ᠪᠡᠨ ᠪᠠᠷᠠᠵᠤ᠂ ᠭᠤᠶᠤᠯᠭᠠᠴᠢᠨ ᠪᠣᠯᠬᠣ ᠪᠡᠷ ᠯᠠ ᠫᠠᠪᠤᠩ - ᠬᠠ ᠶ᠋ᠢ ᠪᠠᠷᠠᠳᠠᠳᠠᠭ ᠨᠣᠮ ᠲᠠᠢ ᠶᠤᠮ ᠭᠠᠵᠠᠷ ᠳᠠ᠃ ᠪᠣᠳᠣᠪᠠᠯ ᠭᠤᠶᠤᠯᠭᠠᠴᠢᠨ ᠪᠣᠯᠤᠭᠠᠳ ᠯᠠ ᠡᠨᠡ ᠭᠠᠵᠠᠷ ᠢ᠋ ᠳᠦᠰᠢᠭᠡ ᠪᠢᠵᠡ᠃ ᠭᠡᠪᠡᠴᠦ ᠪᠠᠰᠠ ᠪᠠᠢᠵᠠ᠃ ᠯᠠᠮᠠᠪᠤᠭᠠᠢ ᠶ᠋ᠢᠨ ᠪᠠᠢᠳᠠᠯ ᠢ᠋ ᠬᠠᠷᠠᠬᠤ ᠳ᠋ᠤ᠌ ᠲᠠᠷᠭᠤᠨ ᠴᠠᠳᠬᠤᠯᠠᠩ ᠪᠠᠢᠨᠠ᠃ ᠬᠠᠷᠢᠨ ᠲᠡᠭᠡᠬᠦ ᠪᠡᠷ ᠬᠤᠷᠠᠯ ᠨᠣᠮ ᠤ᠋ᠨ ᠵᠠᠶᠢᠭ᠋᠂ ᠳᠠᠶᠢᠭ ᠡᠪᠳᠡᠭᠡ ᠪᠢᠵᠡ ᠳᠡ᠃ ᠲᠡᠭᠦᠨ ᠦ᠌ ᠤᠴᠢᠷ ᠭᠡᠮ᠂ ᠵᠢᠮ ᠳ᠋ᠤ᠌ ᠤᠨᠠᠭᠠ ᠤᠤ?
- ᠲᠠᠨ ᠤ᠋ ᠬᠡᠯᠡᠳᠡᠭ ᠴᠤ᠌ ᠪᠠᠷᠤᠭ ᠣᠨᠣᠯᠠ᠃ ᠪᠢ ᠪᠡᠷᠡᠪᠡᠩ ᠦ᠋ᠨ ᠭᠣᠮᠠᠨ ᠳ᠋ᠠᠴᠠᠩ ᠳ᠋ᠤ᠌ ᠬᠤᠷᠠᠯ ᠬᠤᠷᠠᠵᠤ ᠰᠠᠭᠤᠬᠤ ᠳ᠋ᠠᠭᠠᠨ ᠮᠣᠩᠭᠣᠯ ᠢ᠋ᠶ᠋ᠠᠷ ᠤᠩᠰᠢᠯᠭᠠ ᠦᠢᠯᠡᠳᠦᠭᠰᠡᠨ ᠭᠡᠮ᠂ ᠨᠢᠭᠦᠯ ᠲᠡᠢ ᠬᠥᠮᠦᠨ ᠯᠡ ᠳᠡ᠃ᠲᠡᠭᠡᠭᠡᠳ ᠯᠡ ᠯᠠᠢ ᠶ᠋ᠢ ᠪᠡᠨ ᠡᠳ᠋ᠯᠡᠵᠦ ᠪᠠᠢᠨᠠ᠃
- ᠦᠭᠡᠢ ᠲᠡᠷᠡ ᠶᠠᠭᠤ ᠨᠢ ᠨᠢᠭᠦᠯ ᠪᠠᠢᠳᠠᠭ ᠪᠢᠯᠡ?
- ᠨᠢᠭᠦᠯ ᠭᠡᠵᠦ ᠭᠡᠰᠬᠦᠢ ᠮᠠᠨᠢ ᠰᠢᠢᠳᠦᠭᠡᠳ ᠫᠠᠪᠤᠩ - ᠬᠠ ᠳ᠋ᠤ᠌ ᠭᠤᠷᠢᠶᠠ ᠬᠢᠯᠭᠡᠬᠦ ᠪᠡᠷ ᠶᠠᠪᠤᠭᠤᠯᠤᠭᠰᠠᠨ᠃ ᠭᠣᠷᠢᠶᠠ ᠪᠠᠷ ᠰᠢᠳᠬᠡᠭᠰᠡᠨ ᠭᠡᠬᠦ ᠶᠦᠮ ᠤᠤ ᠳᠠ᠃
- ᠬᠡᠳᠦ ᠡᠷᠭᠢᠬᠦ ᠪᠣᠢ?
- ᠭᠤᠷᠪᠠᠨ ᠮᠢᠩᠭᠠ ᠭᠤᠷᠪᠠᠨ ᠵᠠᠭᠤᠨ ᠭᠤᠴᠢᠨ ᠭᠤᠷᠪᠠ!
- ᠲᠡᠭᠡᠪᠡᠯ ᠬᠠᠭᠠᠰ ᠰᠠᠷᠠ ᠶ᠋ᠢᠨ ᠠᠵᠢᠯ ᠲᠠᠢ ᠪᠣᠯᠵᠤ ᠳᠠ᠃ ᠪᠢ ᠵᠠᠯᠠᠭᠤ ᠳ᠋ᠠᠭᠠᠨ ᠲᠡᠷᠡ ᠲᠣᠭᠠ ᠶ᠋ᠢ ᠴᠢᠨᠢ ᠠᠷᠪᠠ ᠬᠣᠨᠣᠭ ᠲᠤ᠌ ᠠᠷᠠᠢᠬᠠᠨ ᠬᠦᠢᠴᠡᠳᠡᠭ ᠪᠠᠢᠯᠠ᠃ ᠵᠡᠬᠡᠭᠰᠡᠨ ᠰᠠᠢᠨ ᠠᠯᠬᠤᠬᠤ ᠳ᠋ᠤ᠌ ᠠᠷᠪᠠ ᠬᠣᠨᠣᠭ ᠠᠷᠠᠢ ᠴᠤ᠌ ᠪᠠᠷᠠᠳᠠᠭ ᠪᠢᠯᠡ᠃ ᠣᠳᠣ ᠬᠥᠭᠰᠢᠷᠡᠭᠡᠳ ᠠᠷᠪᠠᠨ ᠲᠠᠪᠤ ᠬᠣᠨᠣᠭ ᠠᠯᠬᠤᠭᠠᠳ ᠠᠷᠠᠢ ᠯᠠ ᠪᠠᠷᠠᠬᠤ ᠦᠭᠡᠢ ᠯᠠ ᠶᠠᠪᠤᠨᠠ᠃
- ᠣᠳᠣ ᠬᠡᠳᠦ ᠦᠯᠡᠳᠡᠭᠡᠳ ᠪᠠᠢᠨᠠ ?
- ᠳᠣᠯᠣᠭᠠᠨ ᠲᠣᠭᠣᠷᠢᠭ - ᠲᠡᠭᠡᠪᠡᠯ ᠴᠤ᠌ ᠲᠠ ᠭᠣᠷᠢᠶᠠ ᠪᠡᠨ ᠥᠨᠳᠥᠷᠯᠡᠬᠦ ᠳ᠋ᠦ᠍ ᠣᠢᠷᠠᠲᠤᠵᠠᠢ᠃ ᠬᠠᠷᠢᠨ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠭᠣᠷᠢᠶᠠᠨ ᠳ᠋ᠤ᠌ ᠭᠠᠷᠤᠭᠠ ᠪᠤᠢ ? ᠪᠠᠰᠠ ᠯᠠ ᠨᠢᠭᠦᠯ ᠢ᠋ᠶ᠋ᠡᠨ ᠨᠠᠮᠠᠨᠴᠢᠯᠠᠬᠤ ᠶ᠋ᠢᠨ ᠤᠴᠢᠷ ᠤᠤ?
- ᠮᠢᠨᠦ ᠡᠨᠡ ᠭᠣᠷᠢᠶᠠ ᠠᠮᠢᠳᠤᠷᠠᠯ ᠳ᠋ᠤ᠌ ᠲᠣᠬᠢᠶᠠᠯᠳᠤᠭᠰᠠᠨ ᠳᠣᠯᠣᠳᠡᠬᠢ ᠨᠢ ᠶᠦᠮ᠃ ᠳᠥᠴᠢᠨ ᠶᠢᠰᠦᠨ ᠨᠠᠰᠤᠨ ᠳᠡᠭᠡᠷᠡ ᠪᠡᠨ ᠫᠠᠪᠤᠩ - ᠬᠠ ᠶ᠋ᠢ ᠳᠣᠯᠣᠳᠡᠬᠢ ᠤᠲᠠᠭᠠ ᠪᠠᠨ ᠲᠣᠭᠣᠷᠢᠵᠤ ᠭᠤᠷᠪᠠᠨ ᠮᠢᠩᠭᠠᠲᠤ ᠶ᠋ᠢᠨ ᠭᠣᠷᠢᠶᠠ ᠬᠢᠵᠦ ᠴᠢᠳᠠᠪᠠᠯ ᠨᠠᠰᠤ ᠰᠡᠭᠦᠳᠡᠷ ᠴᠢᠨᠢ ᠤᠷᠲᠤᠰᠴᠤ᠂ ᠭᠤᠷᠪᠠᠳᠡᠬᠢ ᠦᠶᠡ ᠪᠠᠨ ᠦᠵᠡᠭᠡᠳ᠂ ᠨᠠᠰᠤᠨ ᠤ᠋ ᠡᠴᠦᠰ ᠲᠦ᠍ ᠲᠤᠢᠯ ᠡᠴᠡ ᠵᠢᠷᠭᠠᠨᠠ ᠭᠡᠵᠦ ᠯᠠᠮᠠ ᠪᠠᠭᠰᠢ ᠠᠢᠯᠠᠳᠤᠭᠰᠠᠨ ᠶᠤᠮ᠃ ᠭᠤᠷᠪᠠᠳᠠᠬᠢ ᠦᠶᠡ ᠪᠠᠨ ᠬᠥᠮᠦᠨ ᠪᠠᠷᠤᠭ ᠦᠵᠡᠳᠡᠭ ᠦᠭᠡᠢ ᠶᠦᠮ ᠭᠡᠳᠡᠭ᠃ ᠬᠦᠦ ᠪᠠᠨ᠂ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠦᠦ ᠶ᠋ᠢ᠂ ᠲᠡᠭᠦᠨ ᠦ᠌ ᠪᠡᠨ ᠬᠦᠦ ᠶ᠋ᠢ ᠦᠵᠡᠵᠦ ᠪᠠᠢᠵᠤ ᠭᠤᠷᠪᠠᠳᠡᠬᠢ ᠦᠶᠡ ᠲᠠᠢ ᠪᠡᠨ ᠵᠣᠯᠭᠠᠨᠠ ᠭᠡᠰᠡᠨ ᠦᠭᠡ᠃ ᠪᠢ ᠡᠬᠢᠨ ᠦ᠌ ᠬᠣᠶᠠᠷ ᠢ᠋ ᠦᠵᠡᠭᠡᠳ ᠪᠠᠢᠨᠠ᠃ ᠣᠳᠣ ᠭᠠᠭᠴᠠᠬᠠᠨ ᠦᠶᠡ ᠦᠯᠡᠳᠡᠪᠡ᠃ ᠲᠡᠭᠦᠨ ᠦ᠌ ᠪᠠᠷᠠ ᠶᠢ ᠬᠠᠷᠠᠬᠤ ᠢᠳᠢ ᠰᠢᠳᠢ ᠶ᠋ᠢ ᠫᠠᠪᠤᠩ - ᠬᠠ ᠠ᠋ᠴᠠ ᠣᠯᠬᠤ ᠳ᠋ᠤ᠌ ᠶᠡᠷᠦ ᠳ᠋ᠡᠭᠡᠨ ᠳᠣᠯᠣᠭᠠᠬᠠᠨ ᠤᠳᠠᠭᠠ ᠲᠡᠭᠦᠨ ᠢ ᠲᠤᠭᠤᠷᠢᠬᠤ ᠦᠯᠡᠳᠡᠭᠡᠳ ᠪᠠᠢᠨᠠ᠃ ᠲᠡᠰᠦᠭᠡᠳ ᠲᠣᠭᠣᠷᠢᠴᠢᠬᠠᠬᠤ ᠰᠠᠨᠠᠭᠠ ᠲᠠᠢ᠃ ᠭᠡᠲᠡᠯᠡ ᠮᠡᠩᠭᠡᠷ ᠬᠥᠳᠡᠯᠦᠭᠡᠳ ᠦᠶᠡ ᠦᠶᠡ ᠪᠥᠭᠯᠡᠷᠡᠴᠢᠭᠡᠬᠦ ᠭᠡᠳ ᠵᠣᠪᠠᠭᠠᠭᠠᠳ ᠪᠠᠢᠬᠤ ᠶᠤᠮ᠃
᠁ ᠡᠨᠡ ᠦᠭᠡ ᠶ᠋ᠢ ᠲᠡᠷᠡ ᠬᠣᠶᠠᠷ ᠶᠠᠪᠤᠳᠠᠯ ᠳᠤᠮᠳᠠ ᠪᠠᠨ ᠶᠠᠷᠢᠵᠤ ᠪᠠᠢᠯᠠ᠃《ᠮᠡᠩᠭᠡᠷ ᠭᠡᠬᠦ ᠡᠴᠡ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠᠲᠠᠨ ᠲᠡᠢᠮᠦ ᠡᠪᠡᠳᠴᠢᠨ ᠢ᠋ ᠶᠠᠭᠠᠬᠢᠵᠤ ᠡᠮᠴᠢᠯᠡᠳᠡᠭ ᠭᠡᠵᠦ ᠨᠠᠳᠠ ᠵᠢᠭᠠᠯᠠ?》 ᠭᠡᠵᠦ ᠰᠠᠩᠵᠢ ᠪᠣᠳᠣᠵᠤ ᠶᠠᠪᠤᠲᠠᠯᠠ ᠲᠣᠳᠣᠬᠠᠨ ᠰᠠᠨᠠᠭᠠᠨ ᠳ᠋ᠤ᠌ᠨᠢ ᠣᠷᠣᠪᠠ᠃
《 ᠮᠡᠩᠭᠡᠷᠲᠦᠪᠡᠯ ᠢᠰᠢᠭᠡᠨ ᠦ᠌ ᠮᠢᠬᠠ ᠶ᠋ᠢ ᠰᠦᠨ ᠳᠣᠲᠣᠷᠠ ᠪᠢᠲᠡᠭᠦᠦ ᠴᠢᠨᠠᠭᠠᠳ ᠰᠢᠭᠦᠰᠦ ᠶᠢ ᠭᠡᠭᠦᠦ ᠶ᠋ᠢᠨ ᠰᠦ ᠲᠡᠢ ᠤᠤᠭᠤᠯᠭᠠᠨᠠ᠃ ᠲᠡᠭᠦᠨ ᠢ᠋ ᠴᠢᠩᠳᠠᠷᠠᠭᠤᠯᠭᠠ ᠭᠡᠳᠡᠭ 》 ᠭᠡᠵᠦ ᠪᠠᠭᠰᠢ ᠮᠠᠷᠠᠮᠪᠠ ᠵᠢᠭᠠᠭᠰᠠᠨ ᠨᠢ ᠴᠢᠬᠢᠨ ᠳ᠋ᠦ᠍ ᠲᠡᠷᠡ ᠴᠢᠭ᠌ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠣᠨᠣᠰᠳᠠᠬᠤ ᠰᠢᠭ᠋ ᠪᠣᠯᠤᠯᠠ᠃
ᠮᠡᠩᠭᠡᠷ ᠲᠡᠢ ᠲᠡᠷᠡ ᠬᠢᠵᠢᠶᠡᠯᠢ ᠮᠥᠷᠭᠥᠯᠴᠢᠨ ᠦᠶᠡ ᠦᠶᠡ ᠪᠦᠭᠰᠢᠭᠦᠯᠦᠨ ᠬᠠᠨᠢᠶᠠᠯᠭᠠᠬᠤ ᠪᠣᠯᠪᠠᠴᠤ ᠪᠡᠶᠡ ᠪᠡᠨ ᠪᠠᠷᠢᠨ ᠲᠡᠰᠪᠦᠷᠢᠯᠡᠵᠦ ᠭᠣᠷᠢᠶᠠ ᠪᠡᠨ ᠲᠠᠰᠤᠯᠠᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠵᠦ ᠤᠷᠤᠭᠰᠢ ᠪᠠᠨ ᠠᠯᠬᠤᠭᠰᠠᠭᠠᠷ ᠯᠠ ᠪᠠᠢᠪᠠ᠃ ᠨᠢᠭᠡ ᠤᠳᠠᠭᠠ ᠮᠡᠩᠭᠡᠷ ᠡᠴᠡ ᠪᠡᠨ ᠪᠣᠯᠵᠤ ᠪᠠᠷᠤᠭ ᠯᠠ ᠪᠦᠲᠡᠵᠦ ᠦᠬᠦᠬᠦ ᠰᠢᠬᠠᠪᠠ᠃ ᠰᠠᠩᠵᠢ ᠲᠡᠭᠦᠨ ᠢ᠋ ᠥᠷᠥ ᠡᠪᠡᠳᠴᠦ ᠲᠠᠯᠤᠨ ᠳᠡᠭᠡᠷᠡ ᠨᠢ ᠳᠠᠷᠤᠵᠤ ᠥᠭᠬᠦ ᠵᠡᠷᠭᠡ ᠪᠡᠷ ᠲᠤᠰᠠ ᠪᠣᠯᠵᠤ ᠲᠡᠭᠦᠨ ᠢ ᠠᠷᠠᠢᠬᠠᠨ ᠲᠠᠢᠪᠤᠰᠢᠷᠠᠭᠤᠯᠪᠠ᠃
- ᠮᠡᠩᠭᠡᠷ ᠲᠦ᠍ ᠢᠰᠢᠭᠡᠨ ᠦ᠌ ᠶᠤᠮ ᠤᠤ ᠪᠣᠷᠣᠯᠠᠩ ᠤ᠋ᠨ ᠮᠢᠬᠠ ᠶ᠋ᠢ ᠰᠦᠨ ᠳ᠋ᠦ᠍ ᠪᠢᠲᠡᠭᠦᠦ ᠴᠢᠨᠠᠵᠤ ᠰᠢᠭᠦᠰᠦ ᠶ᠋ᠢ ᠤᠤᠭᠤᠪᠠᠯ ᠰᠠᠢᠨ ᠭᠡᠳᠡᠭ ᠶᠦᠮ ᠳᠡ ᠭᠡᠵᠦ ᠰᠠᠩᠵᠢ ᠶ᠋ᠢ ᠶᠠᠷᠢᠬᠤ ᠳ᠋ᠤ᠌ ᠮᠥᠷᠭᠥᠯᠴᠢᠨ:
- ᠲᠡᠷᠡ ᠦᠨᠡᠨ ᠤᠤ? ᠲᠡᠭᠡᠪᠡᠯ ᠲᠤᠷᠰᠢᠳᠠᠭ ᠬᠡᠷᠡᠭ ᠡ ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠨ ᠬᠡᠯᠡᠯᠡ᠃ ᠲᠡᠳᠡ ᠴᠠᠰᠢ ᠪᠡᠨ ᠬᠠᠮᠲᠤ ᠪᠠᠷ ᠦᠷᠭᠦᠯᠵᠢᠯᠡᠨ ᠭᠣᠷᠢᠶᠠᠯᠠᠵᠤ ᠶᠠᠪᠤᠯᠠ᠃
- ᠮᠡᠩᠭᠡᠷ ᠪᠠᠢᠭᠠ ᠦᠭᠡᠢ ᠰᠠᠨ ᠴᠤ᠌ ᠪᠣᠯ ᠪᠢ ᠠᠯᠢ ᠬᠡᠳᠦᠢᠨ ᠭᠣᠷᠢᠶᠠ ᠪᠡᠨ ᠳᠠᠭᠤᠰᠬᠠᠬᠤ ᠪᠣᠯᠤᠭᠰᠠᠨ! ᠭᠡᠵᠦ ᠮᠥᠷᠭᠥᠯᠴᠢᠨ ᠠᠮᠠᠨ ᠳ᠋ᠠᠭᠠᠨ ᠪᠤᠪᠲᠤᠨᠠᠪᠠ᠃
《ᠭᠤᠷᠪᠠᠨ ᠦᠶᠡ ᠪᠠᠨ ᠦᠵᠡᠬᠦ ᠶ᠋ᠢ ᠮᠥᠷᠥᠭᠡᠳᠳᠡᠭ ᠨᠢ ᠤᠷᠲᠤ ᠨᠠᠰᠤᠯᠠᠬᠤ ᠶ᠋ᠢᠨ ᠯᠡ ᠬᠦᠰᠡᠯᠡᠩ ᠡᠴᠡ ᠭᠠᠷᠤᠭᠰᠠᠨ ᠬᠡᠷᠡᠭ ᠪᠠᠢᠬᠤ ᠳᠠ᠃ ᠫᠠᠪᠤᠩ - ᠬᠠ ᠶ᠋ᠢ ᠲᠣᠭᠣᠷᠢᠨ ᠭᠣᠷᠢᠶᠠᠯᠠᠬᠤ ᠳ᠋ᠤ᠌ ᠴᠤ᠌ ᠡᠨᠡ ᠬᠥᠮᠦᠨ ᠦ᠌ ᠨᠠᠰᠤ ᠤᠯᠠᠮ ᠯᠠ ᠪᠣᠭᠣᠨᠢᠳᠤᠬᠤ ᠠ᠋ᠴᠠ ᠤᠷᠲᠤᠰᠬᠤ ᠦᠭᠡᠢ ᠪᠠᠢᠯᠭᠦᠢ ᠳᠡ᠃ ᠶᠠᠳᠠᠵᠤ ᠲᠣᠭᠣᠰᠣ ᠦᠭᠡᠢ ᠵᠠᠮ ᠳ᠋ᠤ᠌ ᠪᠣᠯ ᠴᠤ᠌ ᠪᠠᠰᠠ ᠤᠴᠢᠷ ᠲᠠᠢ᠃ ᠭᠡᠲᠡᠯᠡ ᠲᠦᠮᠡᠨ ᠬᠥᠯ ᠦ᠋ᠨ ᠮᠥᠷᠭᠥᠯᠴᠢᠳ ᠦ᠋ᠨ ᠨᠤᠨᠲᠠᠭᠯᠠᠵᠤ ᠲᠠᠬᠠᠴᠢᠵᠤ᠂ ᠴᠠᠭᠠᠨ ᠲᠦᠢᠷᠠᠩ ᠪᠣᠯᠭᠠᠴᠢᠬᠠᠭᠰᠠᠨ ᠡᠨᠡ ᠵᠠᠮ ᠳ᠋ᠤ᠌ ᠲᠣᠭᠣᠰᠣ ᠪᠣᠰᠬᠤ ᠦᠭᠡᠢ ᠡᠳᠦᠷ ᠪᠠᠢᠲᠤᠭᠠᠢ ᠬᠣᠷᠣᠮ ᠴᠤ᠌ ᠠᠯᠠᠭᠠ᠃ ᠲᠡᠷᠡ ᠲᠣᠰᠤᠮ ᠢ᠋ᠶ᠋ᠠᠨ ᠮᠡᠩᠭᠡᠷ ᠲᠡᠢ ᠬᠥᠮᠦᠨ ᠳ᠋ᠤ᠌ ᠠᠮᠠ ᠬᠠᠮᠠᠷ ᠢ᠋ᠶ᠋ᠠᠷ ᠨᠢ ᠥᠯᠥᠨ ᠲᠣᠭᠣᠰᠣ ᠣᠷᠣᠵᠤ ᠠᠭᠤᠰᠬᠢ ᠴᠡᠭᠡᠵᠢ ᠨᠢ ᠳᠠᠪᠬᠤᠴᠠᠵᠤ ᠬᠡᠴᠡᠭᠦᠦ ᠶᠦᠮ ᠪᠠᠢᠬᠠ᠃ ᠬᠥᠭᠡᠷᠦᠬᠦᠢ ᠡᠨᠡ ᠬᠥᠮᠦᠨ ᠢ᠋ ᠪᠠᠭᠰᠢ ᠮᠠᠷᠠᠮᠪᠠ ᠶ᠋ᠢᠨ ᠵᠢᠭᠠᠭᠰᠠᠨ ᠢ᠋ᠶ᠋ᠠᠷ ᠡᠮᠴᠢᠯᠡᠪᠡᠯ ᠠᠷᠠᠢ ᠳᠡᠭᠡᠷᠡ ᠪᠢᠰᠢ ᠪᠠᠢᠬᠠ? 》 ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠥᠷᠦ ᠡᠪᠡᠳᠬᠦ ᠰᠡᠳᠬᠢᠯ ᠢ᠋ᠶ᠋ᠡᠷ ᠪᠣᠳᠣᠵᠤ ᠰᠦᠵᠢᠭᠲᠡᠨ ᠢ᠋ ᠦᠶᠡ ᠦᠶᠡ ᠠᠵᠢᠭᠯᠠᠨ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ:
- ᠲᠠ ᠶᠡᠷᠦ ᠨᠢ ᠴᠢᠩᠳᠠᠷᠠᠭᠤᠯᠭᠠ ᠪᠠᠷ ᠡᠮᠴᠢᠯᠡᠭᠦᠯᠪᠡᠯ ᠳᠡᠭᠡᠷᠡ ᠦᠭᠡᠢ ᠤᠤ? ᡀᠠᠰᠠ ᠶ᠋ᠢᠨ ᠬᠠᠯᠬᠠ ᠳ᠋ᠤ᠌ ᠣᠴᠢᠬᠤ ᠳ᠋ᠤ᠌ ᠡᠷᠬᠡᠪᠰᠢ ᠨᠢᠭᠡ ᠢᠰᠢᠭᠡᠨ ᠦ᠌ ᠮᠢᠬᠠ᠂ ᠬᠤᠪᠢᠩ ᠰᠦ ᠣᠯᠳᠠᠬᠤ ᠪᠠᠢᠯᠭᠦᠢ᠃ ᠮᠡᠩᠭᠡᠷ ᠢ᠋ᠶ᠋ᠡᠨ ᠳᠠᠷᠤᠬᠤ ᠦᠭᠡᠢ ᠪᠣᠯ ᠲᠠᠨ ᠳ᠋ᠤ᠌ ᠬᠡᠴᠡᠭᠦᠦ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠯᠠ ᠭᠡᠵᠦ ᠬᠡᠯᠡᠪᠡ᠃ᠮᠥᠷᠭᠥᠯᠴᠢᠨ ᠬᠠᠯᠢᠪ ᠬᠢᠭᠰᠡᠨ ᠢ᠋ᠶ᠋ᠠᠨ:
- ᠵᠦᠭᠡᠷ᠂ ᠵᠦᠭᠡᠷ᠃ ᠰᠡᠵᠢᠭ ᠢ᠋ᠶ᠋ᠡᠷ ᠡᠪᠡᠳᠴᠦ ᠰᠦᠵᠢᠭ ᠢ᠋ᠶ᠋ᠡᠷ ᠡᠳᠡᠭᠡᠷᠡᠳᠡᠭ ᠶᠦᠮ᠃ ᠫᠠᠪᠤᠩ - ᠬᠠ ᠳ᠋ᠤ᠌ ᠰᠦᠵᠢᠭᠯᠡᠵᠦ ᠴᠢᠳᠠᠪᠠᠯ ᠡᠷᠬᠡᠪᠰᠢ ᠨᠠᠰᠤᠨ ᠬᠤᠲᠤᠭ ᠢ᠋ ᠣᠯᠬᠤ ᠪᠠᠢᠯᠭᠦᠢ᠃ ᠣᠳᠣ ᠬᠡᠳᠦᠬᠡᠨ ᠲᠣᠭᠣᠷᠢᠭ ᠭᠣᠷᠢᠶᠠ ᠦᠯᠡᠳᠡᠯᠡ᠃ ᠲᠡᠭᠦᠨ ᠢ᠋ ᠪᠡᠨ ᠳᠠᠭᠤᠰᠬᠠᠵᠤ ᠰᠡᠳᠬᠢᠯ ᠠᠮᠤᠷᠤᠶᠠ ᠭᠡᠵᠦ ᠬᠡᠯᠡᠭᠡᠳ ᠤᠯᠠᠮ ᠬᠤᠷᠳᠤᠯᠠᠨ ᠠᠯᠬᠤᠯᠠᠪᠠ᠃ ᠲᠡᠭᠡᠲᠡᠯᠡ ᠲᠡᠭᠦᠨ ᠦ᠌ ᠮᠡᠩᠭᠡᠷ ᠨᠢ ᠳᠠᠬᠢᠨ ᠬᠦᠴᠦᠲᠡᠢ ᠬᠥᠳᠡᠯᠵᠦ ᠪᠦᠭᠰᠢᠭᠦᠯᠦᠨ ᠬᠠᠨᠢᠶᠠᠯᠭᠠᠵᠤ᠂ ᠰᠢᠨᠠ ᠶ᠋ᠢᠨ ᠰᠤᠳᠠᠰᠤ ᠭᠦᠷᠡᠯᠵᠡᠨ᠂ ᠴᠠᠰᠢ ᠶᠠᠪᠤᠵᠤ ᠴᠢᠳᠠᠬᠤ ᠪᠠᠨ ᠪᠣᠯᠢᠵᠤ ᠵᠣᠭ ᠲᠣᠰᠣᠨ ᠫᠦᠭᠴᠦᠢᠭᠡᠳ ᠡᠭᠡᠷᠡᠬᠦ ᠮᠡᠲᠦ ᠳᠠᠭᠤ ᠦᠭᠡᠢ ᠪᠣᠯᠵᠤ ᠵᠥᠪᠬᠡᠨ ᠪᠥᠭᠲᠥᠷ ᠴᠡᠭᠡᠵᠢ ᠨᠢ ᠬᠥᠭᠳᠦᠭᠡᠨᠡᠨ ᠣᠪᠣᠯᠵᠠᠵᠤ ᠡᠬᠢᠯᠡᠪᠡ᠃ ᠰᠠᠩᠵᠢ ᠭᠦᠶᠦᠵᠦ ᠬᠦᠷᠦᠭᠡᠳ ᠳᠠᠯᠤ ᠮᠥᠷᠦᠨ ᠳᠡᠭᠡᠷ ᠡᠨᠢ ᠳᠠᠷᠤᠬᠤ ᠭᠡᠲᠡᠯᠡ ᠮᠥᠷᠭᠥᠯᠴᠢᠨ ᠦ᠌ ᠬᠠᠮᠠᠷ ᠤ᠋ᠨ ᠬᠣᠶᠠᠷ ᠨᠦᠬᠡᠨ ᠡᠴᠡ ᠬᠦᠷᠡᠩ ᠴᠢᠰᠤ ᠭᠣᠳᠬᠢᠨ ᠭᠠᠷᠴᠤ ᠮᠥᠨ ᠲᠡᠷᠡᠬᠡᠨ ᠮᠥᠴᠡ ᠳ᠋ᠦ᠍ ᠡᠭᠴᠡ ᠣᠷᠣᠭᠰᠢ ᠪᠠᠨ ᠦᠬᠦᠳᠬᠢᠨ ᠣᠢᠴᠢᠯᠠ᠃ ᠰᠠᠩᠵᠢ ᠲᠡᠭᠦᠨ ᠢ᠋ ᠥᠨᠳᠡᠢᠯᠭᠡᠬᠦ ᠪᠡᠷ ᠣᠷᠣᠯᠳᠣᠭᠰᠠᠨ ᠪᠣᠯᠪᠠᠴᠤ ᠮᠥᠷᠭᠥᠯᠴᠢᠨ ᠨᠢᠭᠡᠨᠲᠡ ᠠᠮᠢ ᠲᠠᠯᠪᠢᠵᠠᠢ᠃
ᠰᠠᠩᠵᠢ ᠭᠡᠰᠦᠯ ᠪᠠᠯᠠᠮᠠᠭᠳᠠᠨ ᠰᠠᠨᠳᠤᠷᠴᠤ ᠶᠠᠭᠤ ᠬᠢᠬᠦ ᠪᠡᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠲᠠᠯᠠ ᠬᠠᠮᠢᠭᠠ ᠠ᠋ᠴᠠ ᠴᠤ᠌ ᠭᠠᠷᠴᠤ ᠢᠷᠡᠭᠰᠡᠨ ᠨᠢ ᠪᠤᠤ ᠮᠡᠳᠡ᠂ ᠬᠣᠶᠠᠷ ᠳ᠋ᠤᠨᠵᠤᠨᠫᠠ ᠭᠡᠨᠡᠳᠲᠡ ᠳᠡᠷᠭᠡᠳᠡ ᠨᠢ ᠪᠣᠢ ᠪᠣᠯᠤᠭᠠᠳ:
- ᠨᠠᠭᠠᠳᠤᠬᠢ ᠳ᠋ᠤ᠌ ᠴᠢᠨᠢ ᠰᠣᠬᠣᠷ ᠵᠣᠭᠣᠰ᠂ ᠰᠠᠮᠪᠠᠢ ᠬᠠᠳᠠᠭ ᠪᠠᠢᠨᠠ ᠤᠤ? ᠪᠠᠢᠪᠠᠯ ᠪᠢᠳᠡ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠬᠦᠷᠭᠡᠶᠡ ᠭᠡᠵᠦ ᠲᠥᠪᠡᠳ ᠢ᠋ᠶ᠋ᠡᠷ ᠠᠰᠠᠭᠤᠯᠠ᠃
- ᠮᠡᠳᠡᠬᠦ ᠦᠭᠡᠢ! ᠭᠡᠵᠦ ᠰᠠᠩᠵᠢ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠰᠠᠨᠠᠭᠠ ᠵᠣᠪᠠᠵᠤ᠂ 《 ᠪᠢ ᠬᠥᠯᠥᠰᠥ ᠶ᠋ᠢ ᠨᠢ ᠲᠥᠯᠥᠶᠡ᠃ ᠡᠭᠦᠨ ᠦ᠌ ᠬᠣᠢᠳᠤᠬᠢ ᠶ᠋ᠢ ᠲᠠ ᠬᠣᠶᠠᠷ ᠳᠠᠭᠠᠭᠠᠵᠤ ᠥᠭᠭᠦᠭᠲᠦᠨ! 》 ᠭᠡᠪᠡ᠃
- ᠯᠠᠭᠰᠣᠣ! ᠯᠠᠭᠰᠣᠣ! ᠶᠠᠭᠤ ᠥᠭᠬᠦ ᠪᠣᠢ? ᠭᠡᠵᠦ ᠲᠡᠷᠡ ᠬᠣᠶᠠᠷ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠪᠬᠢᠯᠡᠨ ᠦᠭᠦᠳᠡᠯ ᠦ᠋ᠨ ᠬᠣᠶᠠᠷ ᠭᠠᠷ ᠠ᠋ᠴᠠ ᠨᠢᠭᠡ ᠨᠢᠭᠡ ᠪᠡᠷ ᠪᠠᠷᠢᠵᠤ ᠠᠪᠤᠯᠠ᠃
- ᠮᠠᠢ! ᠭᠡᠵᠦ ᠰᠠᠩᠵᠢ ᠲᠣᠪᠴᠢᠬᠠᠨ ᠬᠡᠯᠡᠭᠡᠳ ᠬᠠᠭᠤᠷᠴᠠᠭ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠬᠡᠳᠦᠨ ᠴᠣᠬᠣ᠌ ᠵᠣᠭᠣᠰ ᠪᠠᠢᠭ᠍ᠰᠠᠨ ᠢ᠋ ᠪᠡᠨ ᠨᠢᠭᠡ ᠬᠠᠳᠠᠭ ᠲᠠᠢ ᠭᠠᠷᠭᠠᠵᠤ ᠥᠭᠭᠦᠯᠡ᠃ ᠬᠣᠶᠠᠷ ᠳ᠋ᠤᠨᠵᠤᠨᠫᠠ ᠪᠠᠶᠠᠷᠯᠠᠨ ᠠᠯᠠᠭᠠ ᠲᠤᠰᠴᠤ ᠲᠡᠭᠦᠨ ᠢ᠋ ᠠᠪᠤᠭᠠᠳ᠂ ᠦᠬᠦᠭᠰᠡᠨ ᠮᠥᠷᠭᠥᠯᠴᠢᠨ ᠢ ᠬᠣᠶᠠᠷ ᠭᠠᠷ ᠠ᠋ᠴᠠ ᠨᠢ ᠳᠠᠮᠵᠢᠯᠠᠨ ᠪᠠᠷᠤᠭ ᠯᠠ ᠴᠢᠷᠬᠦ ᠲᠣᠭᠠᠨ ᠤ᠋ ᠠᠪᠴᠤ ᠶᠠᠪᠤᠬᠤ ᠳ᠋ᠤ᠌ ᠰᠠᠩᠵᠢ :
- ᠬᠦᠢ ᠲᠠ ᠨᠠᠷ ᠡᠪᠲᠡᠢᠬᠡᠨ ᠡᠷᠭᠦᠭᠡᠴᠢ! ᠭᠡᠵᠦ ᠱᠠᠭᠠᠷᠳᠠᠪᠠ᠃ ᠲᠡᠭᠡᠲᠡᠯᠡ ᠰᠠᠩᠵᠢ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍《 ᠬᠥᠭᠡᠷᠦᠬᠦᠢ ᠡᠨᠡ ᠠᠮᠢᠲᠠᠨ ᠤ᠋ ᠠᠷᠤ ᠭᠡᠷ᠂ ᠲᠥᠷᠥᠯ ᠰᠠᠳᠤᠨ ᠭᠡᠵᠦ ᠪᠠᠢᠳᠠᠭ ᠯᠠ ᠪᠠᠢᠬᠤ ᠳᠠ᠃ ᠲᠡᠷᠡ ᠨᠢ ᠬᠠᠮᠢᠭᠠ ᠭᠠᠵᠠᠷ ᠰᠠᠭᠤᠳᠠᠭ ᠶᠤᠮ ᠪᠣᠯ? ᠬᠡᠨ ᠡᠴᠡ ᠪᠡᠨ ᠠᠰᠠᠭᠤᠬᠤ ᠶᠤᠮ ᠪᠢᠯᠡ ᠳᠠ?》 ᠭᠡᠵᠦ ᠪᠣᠳᠣᠭᠳᠠᠪᠠ᠃
- ᠬᠦᠢ᠂ ᠨᠠᠭᠠᠳᠤᠬᠢ ᠶ᠋ᠢ ᠴᠢᠨᠢ ᠬᠠᠯᠬᠠ ᠮᠢᠴᠠᠩ ᠤᠨ ᠬᠢᠨ ᠳ᠋ᠦ᠍ ᠦᠵᠡᠭᠦᠯᠵᠦ ᠬᠡᠨ ᠦ᠌ ᠶᠠᠭᠤᠨ ᠬᠦᠮᠦᠨ ᠪᠣᠯᠬᠤ ᠶ᠋ᠢ ᠨᠢ ᠲᠣᠳᠣᠷᠠᠭᠤᠯᠬᠤ ᠶᠤᠮᠰᠠᠨ! ᠭᠡᠵᠦ ᠰᠠᠩᠵᠢ ᠬᠡᠯᠡᠪᠡ᠃ ᠲᠡᠭᠡᠲᠡᠯᠡ ᠡᠳᠡᠨ ᠢ᠋ ᠲᠣᠭᠣᠷᠢᠨ ᠢᠷᠡᠭᠰᠡᠨ ᠬᠡᠳᠦᠨ ᠭᠣᠷᠢᠶᠠᠴᠢ ᠶ᠋ᠢᠨ ᠨᠢᠭᠡ ᠨᠢ ᠠᠮᠠ ᠨᠡᠭᠡᠭᠡᠵᠦ :
- ᠥ ᠡᠨᠡᠭᠦᠨ ᠳ᠋ᠦ᠍ ᠰᠠᠳᠤᠨ ᠲᠥᠷᠥᠯ ᠭᠡᠬᠦ ᠶᠠᠭᠤᠮᠠ ᠶᠠᠭᠤ ᠴᠤ᠌ ᠪᠠᠢᠬᠤ ᠦᠭᠡᠢ᠃ ᠭᠤᠷᠪᠠᠨ ᠦᠶᠡ ᠶ᠋ᠢ ᠪᠡᠨ ᠦᠵᠡᠨ ᠡ ᠭᠡᠵᠦ ᠯᠡ ᠦᠷᠭᠦᠯᠵᠢ ᠶᠠᠷᠢᠳᠠᠭ ᠶᠤᠮ᠃ ᠲᠡᠢᠮᠦ ᠶᠠᠭᠤᠮᠠ ᠶᠠᠭᠤ ᠴᠤ᠌ ᠪᠠᠢᠬᠤ ᠦᠭᠡᠢ᠃ ᠮᠠᠨ ᠤ᠋ ᠨᠤᠲᠤᠭ ᠤ᠋ᠨ ᠶᠤᠮ ᠭᠡᠵᠦ ᠬᠡᠯᠡᠪᠡ᠃
- ᠬᠣᠶᠠᠷ ᠦᠶᠡ ᠮᠢᠨᠢ ᠪᠣᠢ ᠭᠡᠵᠦ ᠲᠡᠷᠡ ᠰᠠᠶᠢᠬᠠᠨ ᠶᠠᠷᠢᠵᠤ ᠪᠠᠢᠭ᠍ᠰᠠᠨ ᠰᠢᠦ ᠳᠡ? ᠭᠡᠵᠦ ᠰᠠᠩᠵᠢ ᠡᠷᠡᠭᠡᠯᠵᠡᠨ ᠭᠠᠢᠬᠠᠯᠠ᠃ ᠨᠥᠭᠦᠭᠡ ᠬᠥᠮᠦᠨ:
- ᠬᠤᠳᠠᠯ ᠡ᠃ ᠲᠡᠭᠡᠵᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠣᠭᠣᠵᠤ ᠶᠠᠪᠤᠳᠠᠭ ᠶᠤᠮ᠃ ᠮᠡᠩᠭᠡᠷ ᠲᠡᠢ ᠪᠡᠶᠡ ᠡᠴᠡ ᠪᠡᠨ ᠥᠭᠡᠷᠡ ᠲᠥᠷᠥᠯ ᠰᠠᠳᠤᠨ ᠦᠭᠡᠢ ᠬᠥᠮᠦᠨ᠃ ᠣᠳᠣ ᠨᠢᠭᠡᠨᠲᠡ ᠨᠠᠰᠤ ᠳᠠᠭᠤᠰᠴᠠᠢ᠃ ᠣᠳᠣ᠌ ᠳ᠋ᠤᠨᠵᠤᠨᠫᠠ ᠳ᠋ᠦ᠍ ᠲᠤᠰᠢᠶᠠᠵᠤ ᠬᠣᠢᠲᠤ ᠵᠠᠮ ᠢ᠋ ᠣᠯᠭᠣᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠪᠠᠢᠬᠤ ᠦᠭᠡᠢ ᠬᠡᠪ᠃
《 ᠬᠥᠭᠡᠷᠦᠬᠦᠢ! ᠦᠬᠦᠬᠦ ᠴᠠᠭ ᠣᠢᠷᠠᠬᠠᠨ ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ ᠯᠠ ᠲᠡᠭᠦᠨ ᠢ᠋ ᠪᠡᠨ ᠤᠷᠲᠤᠰᠬᠠᠬᠤ ᠶᠢᠨ ᠬᠦᠰᠡᠯᠡᠩ ᠪᠣᠯᠵᠤ ᠶᠠᠪᠤᠭᠰᠠᠨ ᠶᠤᠮ ᠪᠠᠢᠬᠠ ᠳᠠ᠃ ᠬᠡᠨ ᠨᠢ ᠲᠡᠭᠦᠨ ᠳ᠋ᠦ᠍ ᠫᠠᠪᠤᠩ - ᠬᠠ ᠶ᠋ᠢ ᠭᠣᠷᠢᠶᠠᠯᠠᠨ ᠲᠣᠭᠣᠷᠢᠪᠠᠯ ᠨᠠᠰᠤ ᠤᠷᠲᠤᠰᠴᠤ ᠭᠤᠷᠪᠠᠨ ᠦᠶᠡ ᠪᠡᠨ ᠦᠵᠡᠨᠡ ᠭᠡᠵᠦ ᠬᠡᠯᠡᠭᠰᠡᠨ ᠶᠦᠮ ᠪᠤᠯ ᠳᠠ᠃ ᠡᠨᠡ ᠳᠠᠯᠠᠢᠭᠠᠴᠢ ᠳ᠋ᠤ᠌ ᠪᠣᠯᠬᠣᠷ ᠫᠠᠪᠤᠩ - ᠬᠠ ᠶ᠋ᠢ ᠲᠣᠭᠣᠷᠢᠬᠤ ᠨᠢ ᠪᠤᠶᠠᠨ ᠪᠣᠯᠵᠤ ᠪᠠᠢᠳᠠᠭ᠃ ᠨᠠᠳᠠ ᠳᠤ ᠪᠣᠯᠬᠣᠷ ᠰᠢᠳᠬᠡᠯ ᠪᠣᠯᠳᠠᠭ ᠪᠠᠢᠬᠤ ᠭᠡᠵᠦ ᠳᠡ᠃ ᠠᠶᠠ᠂ ᠣᠷᠴᠢᠯᠠᠩ ᠤ᠋ᠨ ᠶᠠᠪᠤᠳᠠᠯ ᠡᠢᠨ ᠬᠦ᠌ ᠳᠡᠭᠡᠯ ᠲᠤᠭᠤᠯ ᠲᠠᠢ ᠠᠵᠢ》 ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠳᠣᠲᠣᠷᠠ ᠪᠠᠨ ᠪᠣᠳᠣᠯᠠ᠃ ᠨᠢᠭᠡᠨ ᠦᠢᠯᠡ ᠶ᠋ᠢᠨ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠲᠤᠬᠠᠢ ᠪᠣᠳᠣᠯ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠭᠤᠷᠪᠠᠳᠡᠬᠢ ᠤᠳᠠᠭᠠ ᠪᠠᠨ ᠣᠷᠣᠵᠤ ᠢᠷᠡᠵᠦ ᠪᠠᠢᠭᠠ ᠨᠢ ᠡᠨᠡ᠃ ᠥᠯᠵᠡᠢ ᠶ᠋ᠢ ᠥᠭᠡᠳᠡ ᠪᠣᠯᠬᠤ ᠳ᠋ᠤ᠌ ᠳ᠋ᠤᠨᠵᠤᠨᠫᠠ ᠨᠠᠷ ᠰᠠᠩᠵᠢ ᠳ᠋ᠤ᠌ ᠠᠩᠬᠠ ᠡᠢᠮᠦ ᠶᠠᠭᠤᠮᠠ ᠪᠣᠳᠣᠭᠳᠠᠭᠤᠯᠤᠭᠰᠠᠨ᠃ ᠳᠠᠷᠠᠭᠠ ᠨᠢ ᠪᠠᠭᠰᠢ ᠯᠠᠮᠠ ᠵᠤᠯᠠ ᠶ᠋ᠢᠨ ᠭᠣᠣᠯ ᠪᠣᠯᠵᠤ ᠣᠳᠬᠤ ᠳ᠋ᠤ᠌ ᠮᠥᠨ ᠯᠠ ᠡᠷᠡᠭᠡᠯᠵᠡᠨ ᠭᠠᠢᠬᠠᠬᠤ ᠪᠣᠳᠣᠯ ᠳ᠋ᠤ᠌ ᠡᠵᠡᠯᠡᠭᠳᠡᠭᠰᠡᠨ᠃ ᠣᠳᠣ ᠫᠠᠪᠤᠩ - ᠬᠠ ᠭᠡᠵᠦ ᠬᠥᠮᠦᠨ ᠦ ᠨᠤᠲᠤᠭ ᠤ᠋ᠨ ᠵᠡᠷᠯᠢᠭ ᠬᠢᠷᠠ ᠳᠠᠬᠢ ᠬᠣᠭᠣᠰᠣᠨ ᠠᠭᠤᠢ ᠨᠤᠭᠤᠳ ᠢ᠋ ᠲᠣᠭᠣᠷᠢᠨ ᠭᠣᠷᠢᠶᠠᠯᠠᠬᠤ ᠬᠤᠪᠢ ᠲᠠᠪᠢᠯᠠᠩ ᠢ᠋ ᠭᠦᠷᠲᠡᠭᠡᠳ ᠨᠢᠭᠡ ᠨᠢ ᠰᠢᠳᠬᠡᠯ᠂ ᠨᠥᠭᠦᠭᠡ ᠨᠢ ᠪᠤᠶᠠᠨ ᠤ᠋ ᠦᠢᠯᠡᠰ ᠭᠡᠵᠦ ᠢᠲᠡᠭᠡᠨ ᠶᠠᠪᠤᠭᠠ ᠬᠣᠶᠠᠷ ᠪᠡᠶᠡ ᠶ᠋ᠢᠨ ᠤᠴᠠᠷᠠᠯ ᠠ᠋ᠴᠠ ᠤᠷᠭᠤᠭᠤᠯᠤᠨ ᠡᠯᠳᠡᠪ ᠢ᠋ ᠪᠣᠳᠣᠬᠤ ᠶ᠋ᠢᠨ ᠰᠢᠯᠲᠠᠭ ᠡᠭᠦᠰᠴᠡᠢ᠃ ᠳᠠᠬᠢᠭᠠᠳ ᠯᠠ ᠰᠠᠩᠵᠢ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠯᠠ᠃《ᠬᠥᠭᠡᠷᠦᠬᠦᠢ! ᠲᠡᠷᠡ ᠲᠠᠯᠢᠢᠭᠠᠴᠢ ᠡᠨᠡ ᠪᠠᠷᠵᠠᠭᠠᠷ ᠠᠭᠤᠯᠠᠰ ᠢ᠋ ᠮᠣᠭᠠᠢᠴᠢᠯᠠᠨ ᠲᠣᠭᠣᠷᠢᠬᠤ ᠳ᠋ᠤ᠌ ᠳᠣᠯᠣᠭᠠᠬᠠᠨ ᠭᠤᠷᠢᠶᠠ ᠳᠤᠲᠠᠭᠤ ᠭᠡᠵᠦ ᠪᠠᠢᠭ᠍ᠰᠠᠨ᠃ ᠲᠡᠭᠡᠬᠦᠯᠡᠷ ᠭᠤᠷᠪᠠᠨ ᠮᠢᠩᠭᠠ ᠭᠤᠷᠪᠠᠨ ᠵᠠᠭᠤᠨ ᠬᠣᠷᠢᠨ ᠵᠢᠷᠭᠤᠭᠠᠨ ᠤᠳᠠᠭᠠ ᠨᠢᠭᠡᠨᠲᠡ ᠲᠣᠭᠣᠷᠢᠴᠢᠬᠠᠭᠠᠳ ᠪᠠᠢᠭ᠍ᠰᠠᠨ ᠬᠡᠷᠡᠭ ᠠᠵᠢ᠃ ᠲᠡᠭᠦᠨ ᠳ᠋ᠦ᠍ ᠯᠠᠮᠠ ᠪᠠᠭᠰᠢ ᠰᠠᠢᠨ ᠤ᠋ ᠢᠷᠦᠭᠡᠯ ᠡᠷᠭᠦᠵᠦ ᠭᠣᠷᠢᠶᠠ ᠵᠢᠭᠠᠵᠠᠢ᠃ ᠭᠡᠪᠡᠴᠦ ᠨᠠᠳᠠ ᠳ᠋ᠤ᠌ ᠪᠣᠯ ᠯᠠᠮᠠ ᠪᠠᠭᠰᠢ ᠬᠡᠷᠡᠭ ᠲᠠᠷᠢᠭᠰᠠᠨ ᠤ᠋ ᠲᠣᠷᠭᠠᠭᠤᠯᠢ ᠪᠠᠭᠠᠭᠠ ᠪᠣᠯᠭᠠᠵᠤ ᠭᠣᠷᠢᠶᠠ ᠶ᠋ᠢᠨ ᠲᠣᠭᠠ ᠲᠣᠭᠲᠠᠭᠠᠵᠤ ᠥᠭᠭᠦᠭᠰᠡᠨ᠃ ᠨᠢᠭᠡ ᠦᠢᠯᠡ ᠮᠥᠷᠳᠡᠯᠡ ᠪᠠᠨ ᠰᠠᠢᠨ᠂ ᠰᠠᠭᠠᠷ ᠬᠣᠶᠠᠷ ᠤ᠋ᠨ ᠪᠡᠯᠭᠡᠳᠡᠯ ᠪᠠᠢᠬᠤ ᠭᠡᠵᠦ ᠤᠤ? ᠲᠡᠭᠡᠭᠡᠳ ᠮᠡᠩᠭᠡᠷ ᠲᠡᠢ ᠡᠪᠦᠭᠡᠨ ᠳ᠋ᠦ᠍ ᠬᠣᠶᠠᠷ ᠮᠢᠩᠭᠠ ᠬᠡᠳᠦᠨ ᠵᠠᠭᠤᠨ ᠭᠣᠷᠢᠶᠠ ᠲᠤᠰᠠ ᠪᠣᠯᠤᠭᠰᠠᠨ ᠴᠤ᠌ ᠦᠭᠡᠢ᠃ ᠮᠥᠷᠥᠭᠡᠳᠦᠯ ᠨᠢ ᠪᠡᠶᠡᠯᠡᠭᠰᠡᠨ ᠴᠤ᠌ ᠦᠭᠡᠢ᠃ ᠮᠢᠨᠦᠬᠢ ᠪᠣᠯᠬᠣᠷ ᠳᠥᠩᠭᠡᠵᠢ ᠳᠣᠯᠣᠭᠠᠬᠠᠨ ᠲᠣᠭᠣᠷᠢᠳᠠᠭ ᠳᠡᠭᠡᠷᠡ ᠪᠡᠨ ᠶᠠᠪᠤᠵᠤ ᠪᠠᠢᠳᠠᠭ᠃ ᠬᠥᠮᠦᠨ ᠦ᠌ ᠨᠤᠲᠤᠭ ᠤ᠋ᠨ ᠵᠡᠷᠯᠢᠭ ᠠᠭᠤᠯᠠᠰ ᠤ᠋ᠨ ᠡᠨᠡ ᠬᠢᠷᠠ ᠶ᠋ᠢ ᠲᠣᠭᠣᠷᠢᠨ ᠲᠣᠭᠣᠷᠢᠭᠰᠠᠭᠠᠷ ᠰᠠᠢᠨ ᠤ᠋ ᠵᠠᠬᠠ ᠳ᠋ᠦ᠍ ᠬᠦᠷᠦᠨᠡ ᠭᠡᠵᠦ ᠶᠠᠭᠤᠨ ᠳ᠋ᠤ᠌ ᠨᠢ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠡᠷᠡ ᠪᠣᠢ᠂ ᠲᠡᠷᠡ ᠮᠡᠩᠭᠡᠷᠲᠦ᠍ ᠡᠪᠦᠭᠡᠨ?》 ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠪᠣᠳᠣᠵᠤ ᠵᠣᠭᠰᠣᠲᠠᠯᠠ ᠨᠢ ᠬᠠᠬᠢᠷᠤᠭᠰᠠᠨ ᠮᠠᠭᠤᠬᠠᠢ ᠳᠠᠭᠤ ᠭᠠᠷᠭᠠᠨ ᠮᠣᠳᠣᠨ ᠳᠤᠭᠤᠢ ᠲᠠᠢ ᠲᠦᠷᠢᠳᠡᠭ ᠲᠡᠷᠭᠡ ᠳᠡᠭᠡᠷᠡ ᠪᠡᠨ ᠦᠬᠦᠳᠡᠯ ᠢ᠋ ᠬᠠᠰᠢ ᠶᠠᠰᠢ ᠲᠠᠯᠪᠢᠭᠰᠠᠨ ᠳ᠋ᠤᠨᠵᠤᠨᠫᠠ ᠨᠠᠷ ᠠᠭᠤᠯᠠ ᠶᠢᠨ ᠤᠷᠤᠭᠤ ᠭᠠᠵᠠᠷ ᠤᠷᠤᠭᠤ ᠶᠠᠪᠤᠵᠤ ᠣᠳᠤᠯᠠ᠃
ᠲᠣᠰᠤᠯᠠᠭᠠ ᠦᠭᠡᠢ ᠲᠡᠷᠭᠡᠨ ᠦ᠌ ᠵᠢᠬᠡᠭᠦᠳᠡᠰᠦ ᠬᠦᠷᠦᠮᠡ ᠶᠠᠬᠢᠷ ᠳᠠᠭᠤᠨ ᠳ᠋ᠤ᠌ ᠡᠪ ᠦᠭᠡᠢᠷᠡᠭᠰᠡᠨ ᠰᠠᠩᠵᠢ ᠭᠡᠰᠦᠯ ᠪᠤᠷᠤᠭᠤ ᠬᠠᠷᠠᠭᠠᠳ ᠭᠣᠷᠢᠶᠠ ᠪᠡᠨ ᠦᠷᠭᠦᠯᠵᠢᠯᠡᠭᠦᠯᠦᠯᠡ᠃
ᠫᠠᠪᠤᠩ - ᠬᠠ ᠶ᠋ᠢ ᠲᠣᠭᠣᠷᠢᠨ ᠭᠣᠷᠢᠶᠠᠯᠠᠭ᠍ᠴᠢᠳ ᠤ᠋ᠨ ᠳᠣᠲᠣᠷᠠ ᠨᠢᠭᠡᠭᠡᠬᠡᠨ ᠴᠤ᠌ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠬᠦᠮᠦᠨ ᠦᠭᠡᠢ ᠠᠵᠠᠢ᠃ ᠴᠥᠮ ᠯᠡ ᠨᠤᠤᠷᠠᠬᠠᠢ ᠳᠡᠪᠡᠯ ᠲᠡᠢ᠂ ᠴᠣᠭᠣᠷᠠᠬᠠᠢ ᠭᠤᠲᠤᠯ ᠲᠠᠢ᠂ ᠲᠠᠷᠴᠢᠭ ᠶᠠᠳᠠᠭᠤᠰ᠂ ᠵᠠᠷᠢᠮ ᠨᠢ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠳ᠋ᠤ᠌ ᠨᠡᠷᠪᠡᠭᠳᠡᠵᠦ᠂ ᠲᠠᠬᠢᠷ ᠳᠤᠲᠠᠭᠤ᠂ ᠡᠷᠡᠮᠳᠡᠭ ᠵᠡᠷᠡᠮᠳᠡᠭ ᠪᠣᠯᠴᠢᠬᠠᠭᠰᠠᠨ᠂ ᠵᠠᠷᠢᠮ ᠨᠢ ᠥᠪᠡᠷ ᠦ᠋ᠨ ᠭᠡᠬᠦ ᠪᠣᠳᠣᠯ ᠦᠭᠡᠢ ᠵᠥᠪᠬᠡᠨ ᠯᠡ ᠯᠠᠮᠠ ᠪᠠᠭᠰᠢ ᠶᠢᠨ ᠵᠢᠭᠠᠭᠰᠠᠨ ᠲᠣᠭᠠ ᠶ᠋ᠢ ᠭᠦᠢᠴᠡᠭᠡᠬᠦ ᠶ᠋ᠢᠨ ᠲᠥᠯᠥᠭᠡᠨᠡ ᠭᠥᠯᠢᠢᠲᠡᠯᠡ ᠭᠡᠶᠦᠷᠡᠨ ᠠᠯᠬᠤᠯᠠᠵᠤ᠂ ᠡᠳᠦᠷ ᠢ ᠥᠩᠭᠡᠷᠡᠭᠡᠨ᠂ ᠰᠥᠨᠢ ᠶ᠋ᠢ ᠦᠳᠡᠨ ᠶᠠᠪᠤᠭᠠ ᠤᠯᠤᠰ ᠪᠠᠢᠯᠠ᠃ ᠬᠠᠶᠠ ᠨᠢᠭᠡ ᠪᠠᠳᠢᠷᠴᠢᠨ᠂ ᠱᠠᠪᠢᠷᠢᠶᠠᠴᠢᠨ᠂ ᠪᠠᠨᠳᠢ ᠨᠠᠷ ᠦᠵᠡᠭᠳᠡᠨᠡ᠃ ᠲᠡᠳᠡ ᠪᠣᠯ ᠰᠠᠩᠵᠢ ᠶ᠋ᠢᠨ ᠨᠢᠭᠡᠨ ᠠᠳᠠᠯᠢ ᠵᠠᠯᠬᠠᠭᠠᠯ ᠦᠵᠡᠭᠰᠡᠨ᠂ ᠡᠰᠡᠪᠡᠯ ᠵᠦᠭᠡᠷ ᠯᠡ ᠰᠣᠨᠢᠭᠤᠴᠢᠯᠠᠨ ᠶᠠᠪᠤᠳᠠᠭ ᠬᠥᠮᠦᠰ ᠪᠣᠯᠤᠯᠲᠠᠢ᠃
《 ᠭᠣᠷᠢᠶᠠ ᠶ᠋ᠢ ᠵᠦᠭᠡᠷ ᠨᠢᠭᠡ ᠬᠢᠵᠦ ᠪᠣᠯᠬᠤ ᠦᠭᠡᠢ᠃ ᠬᠠᠷᠢᠨ ᠰᠦᠵᠢᠭᠯᠡᠨ ᠬᠢᠪᠡᠯ ᠵᠣᠬᠢᠨᠠ᠃ ᠡᠢᠮᠦ ᠳ᠋ᠦ᠍ ᠮᠠᠨᠢ ᠭᠦᠷᠢᠮ ᠢ᠋ ᠡᠬᠢᠨ ᠡᠴᠡ ᠡᠴᠦᠰ ᠬᠦᠷᠲᠡᠯᠡ ᠳᠠᠪᠲᠠᠨ ᠳᠠᠪᠲᠠᠨ ᠤᠩᠰᠢᠵᠤ ᠶᠠᠪᠤᠪᠠᠰᠤ ᠵᠣᠬᠢᠨᠠ》 ᠭᠡᠵᠦ ᠪᠠᠭᠰᠢ ᠯᠠᠮᠠ ᠨᠢ ᠰᠠᠩᠵᠢ ᠭᠡᠰᠦᠯ ᠳ᠋ᠦ᠍ ᠬᠠᠲᠠᠭᠤ ᠴᠢᠩᠳᠠᠯᠠᠵᠤ ᠨᠣᠮᠯᠠᠭᠰᠠᠨ ᠪᠢᠯᠡ᠃ ᠰᠠᠩᠵᠢ ᠭᠡᠰᠦᠯ ᠮᠠᠨᠢᠭᠠᠮᠪᠤᠮ ᠭᠡᠳᠡᠭ ᠶᠣᠰᠣ ᠰᠤᠷᠲᠠᠬᠤᠨ ᠤ᠋ ᠰᠤᠷᠭᠠᠯ ᠤ᠋ᠨ ᠰᠤᠳᠤᠷ ᠢ᠋ ᠠᠯᠢ ᠬᠡᠳᠦᠢ ᠨᠢ ᠴᠡᠭᠡᠵᠢ ᠪᠡᠷ ᠮᠡᠳᠡᠬᠦ ᠲᠤᠯᠠ ᠲᠡᠷᠡ ᠳᠠᠭᠠᠭᠠᠯᠭᠠᠪᠤᠷᠢ ᠠᠮᠠᠷᠬᠠᠨ ᠰᠠᠨᠠᠭᠳᠠᠵᠠᠢ᠃ ᠣᠳᠣ ᠪᠣᠯᠬᠣᠷ ᠨᠢᠭᠡᠨ ᠲᠥᠷᠥᠯ ᠦ᠋ᠨ ᠵᠦᠢᠯ ᠢ᠋ ᠣᠯᠠᠨ ᠳᠠᠬᠢᠨ ᠤᠩᠰᠢᠬᠤ ᠨᠢ ᠶᠠᠭ ᠦᠭᠡᠢ ᠣᠢᠳᠬᠠᠷ ᠲᠠᠢ ᠠᠵᠢᠯ ᠭᠡᠳᠡᠭ ᠢ᠋ ᠮᠡᠳᠡᠵᠦ ᠤᠩᠰᠢᠯᠭᠠ ᠪᠠᠨ ᠰᠣᠯᠢᠵᠤ ᠵᠠᠳᠠᠮᠪᠠ ᠰᠤᠳᠤᠷ ᠠ᠋ᠴᠠ ᠶᠤᠮ ᠤᠤ ᠡᠰᠡᠪᠡᠯ ᠪᠠᠷᠠᠨᠵᠠ ᠪᠠᠷᠠᠮᠢᠳ ᠨᠣᠮ ᠠ᠋ᠴᠠ ᠡᠭᠡᠯᠵᠢᠯᠡᠨ ᠤᠩᠰᠢᠬᠤ ᠳ᠋ᠤ᠌ ᠠᠷᠠᠢ ᠰᠣᠨᠢᠷᠬᠠᠯᠲᠠᠢ ᠪᠠᠢᠯᠠ᠃ ᠵᠠᠳᠠᠮᠪᠠ ᠪᠣᠯ ᠪᠤᠷᠬᠠᠨ ᠤ᠋ ᠮᠠᠭᠲᠠᠭᠠᠯ ᠨᠠᠢ᠍ᠮᠠᠨ ᠮᠢᠩᠭᠠᠨ ᠮᠥᠷᠲᠦ᠍ ᠰᠢᠯᠦᠭᠯᠡᠯ ᠶᠦᠮ᠃ ᠪᠠᠷᠠᠨᠵᠠ - ᠪᠠᠷᠠᠮᠢᠳ ᠪᠣᠯ ᠪᠤᠷᠬᠠᠨ ᠪᠤᠳ᠋ᠳ᠋ᠾᠠ ᠶ᠋ᠢᠨ ᠦᠢᠯᠡ ᠶᠠᠪᠤᠳᠠᠯ ᠤ᠋ᠨ ᠲᠤᠬᠠᠢ ᠨᠣᠮ ᠪᠢᠯᠡ᠃ ᠡᠳᠡᠭᠡᠷ ᠢ᠋ ᠡᠭᠡᠯᠵᠢᠯᠡᠨ ᠤᠩᠰᠢᠬᠤ ᠳ᠋ᠤ᠌ ᠥᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠠᠳᠠᠯᠢ ᠦᠭᠡᠢ ᠲᠤᠯᠠ ᠭᠠᠵᠠᠷ ᠬᠣᠷᠣᠬᠤ ᠨᠢ ᠴᠤ᠌ ᠠᠮᠤᠷ᠂ ᠣᠢᠳᠬᠠᠷᠯᠠᠬᠤ ᠨᠢ ᠪᠠᠭᠠ ᠪᠠᠢᠯᠠ᠃ᠮᠥᠷᠭᠥᠯᠴᠢᠳ ᠰᠥᠨᠢ ᠡᠳᠦᠷ ᠦᠭᠡᠢ ᠭᠣᠷᠢᠶᠠᠯᠠᠨ ᠶᠠᠪᠤᠵᠤ ᠦᠷ ᠢ᠋ᠶ᠋ᠡᠷ ᠰᠠᠭᠤᠭᠠ ᠪᠠᠷ ᠢ᠋ᠶ᠋ᠠᠨ ᠪᠠᠭᠠ ᠵᠡᠷᠭᠡ ᠨᠣᠢᠷ ᠠᠪᠴᠤ ᠶᠠᠪᠤᠭᠰᠠᠭᠠᠷ ᠭᠤᠷᠪᠠᠨ ᠮᠢᠩᠭᠠᠲᠤ ᠭᠣᠷᠢᠶᠠ ᠶ᠋ᠢ ᠳᠠᠭᠤᠰᠬᠠᠬᠤ ᠶ᠋ᠢ ᠶᠡᠬᠡᠪᠴᠢᠯᠡᠨ ᠬᠢᠴᠢᠶᠡᠳᠡᠭ ᠪᠠᠢᠵᠠᠢ᠃ ᠲᠡᠢᠮᠦ ᠴᠤ᠌ ᠶᠣᠰᠣ ᠲᠣᠭᠲᠠᠭᠰᠠᠨ ᠠᠵᠢ᠃ ᠰᠥᠨᠢ ᠶ᠋ᠢᠨ ᠴᠠᠭ ᠢ᠋ᠶ᠋ᠠᠷ ᠭᠣᠷᠢᠶᠠᠯᠠᠨ ᠶᠠᠪᠤᠬᠤ ᠳ᠋ᠤ᠌ ᠣᠳᠣᠨ ᠠ᠋ᠴᠠ ᠥᠭᠡᠷᠡ ᠵᠤᠭᠠ ᠲᠠᠢ ᠶᠠᠭᠤᠮᠠ ᠦᠭᠡᠢ᠃ ᠭᠡᠪᠡᠴᠦ ᠣᠳᠣ ᠶ᠋ᠢ ᠲᠣᠭᠠᠯᠠᠬᠤ ᠶᠤᠮ ᠤᠤ ᠡᠰᠡᠪᠡᠯ ᠬᠣᠷᠢᠨ ᠨᠠᠢ᠍ᠮᠠᠨ ᠣᠳᠣᠨ ᠤ᠋ ᠨᠡᠷᠡ ᠶ᠋ᠢ ᠲᠣᠭᠠᠴᠢᠨ᠂ ᠵᠠᠷᠢᠮ ᠢ ᠨᠢ ᠡᠷᠢᠨ ᠬᠠᠢᠵᠤ ᠶᠠᠪᠤᠪᠠᠯ ᠠᠷᠠᠢ ᠴᠤ᠌ ᠵᠤᠭᠠ ᠲᠠᠢ ᠪᠣᠯᠬᠤ ᠶ᠋ᠢ ᠰᠠᠩᠵᠢ ᠮᠡᠳᠡᠵᠦ ᠵᠢᠷᠤᠬᠠᠢ ᠶᠢᠨ ᠪᠠᠭᠰᠢ ᠶ᠋ᠢᠨ ᠵᠢᠭᠠᠭᠰᠠᠨ ᠣᠳᠣᠳ ᠤ᠋ᠨ ᠨᠡᠷᠡ ᠶ᠋ᠢ ᠠᠮᠠᠨ ᠤ᠋ ᠤᠩᠰᠢᠯᠭᠠ ᠪᠣᠯᠭᠠᠵᠠᠢ᠃ ᠲᠡᠢᠨ ᠬᠦ᠌ ᠡᠳᠦᠷ ᠰᠥᠨᠢ ᠡᠭᠡᠯᠵᠢᠯᠡᠨ ᠰᠣᠯᠢᠭᠳᠠᠭᠰᠠᠭᠠᠷ ᠪᠠᠢᠪᠠᠴᠤ ᠭᠣᠷᠢᠶᠠᠨ ᠤ᠋ ᠲᠣᠭᠠ ᠭᠦᠢᠴᠡᠬᠦ ᠶᠠᠭᠠᠬᠢᠭᠠ ᠴᠤ᠌ ᠦᠭᠡᠢ᠃ ᠶᠠᠪᠠᠭᠠᠨ ᠶᠠᠪᠤᠬᠤ ᠶ᠋ᠢᠨ ᠭᠣᠷ ᠢ᠋ ᠳᠠᠭᠠᠭᠠᠬᠤ ᠦᠭᠡᠢ ᠭᠤᠲᠤᠯ ᠨᠢ ᠬᠥᠯ ᠡᠴᠡ ᠮᠤᠯᠲᠤᠷᠠᠵᠤ ᠤᠨᠠᠬᠤ ᠣᠢᠷᠠᠲᠤᠭᠰᠠᠭᠠᠷ ᠯᠠ ᠪᠠᠢᠯᠠ᠃ ᠪᠡᠶᠡ ᠶ᠋ᠢᠨ ᠲᠠᠮᠢᠷ ᠴᠤ᠌ ᠰᠤᠯᠠᠷᠠᠨ ᠳᠣᠷᠣᠢᠲᠠᠵᠤ ᠪᠠᠢᠪᠠ᠃ ᠨᠢᠭᠡ ᠤᠳᠤᠭᠠ ᠰᠠᠩᠵᠢ ᠭᠡᠰᠦᠯ ᠭᠤᠷᠢᠶᠠ ᠶ᠋ᠢᠨ ᠠᠯᠪᠠ ᠶ᠋ᠢ ᠣᠷᠬᠢᠵᠤ ᠭᠡᠷ ᠲᠦ᠍ ᠪᠡᠨ ᠬᠠᠷᠢᠬᠤ ᠰᠠᠨᠠᠭᠠ ᠲᠠᠢ ᠠᠭᠤᠯᠠᠨ ᠠᠴᠠ ᠪᠠᠭᠤᠵᠤ ᠶᠠᠪᠤᠬᠤ ᠪᠠᠷ ᠰᠢᠢᠳᠪᠡ᠃ ᠬᠤᠪᠴᠠᠰᠤ ᠪᠠᠨ ᠰᠡᠯᠪᠢᠬᠦ᠂ ᠪᠠᠰᠠ ᠴᠤ᠌ ᠪᠠᠭᠠᠬᠠᠨ ᠬᠦᠨᠡᠰᠦ ᠨᠥᠭᠡᠴᠢᠯᠡᠨ ᠠᠪᠬᠤ ᠪᠠᠷ ᠲᠡᠷᠡ ᠳᠡᠯᠢᠮ ᠳ᠋ᠦ᠍ ᠳᠦᠷ ᠠᠮᠤᠰᠬᠢᠬᠦ ᠪᠡᠷ ᠰᠠᠨᠠᠭᠠ ᠰᠢᠯᠤᠭᠤᠳᠠᠭᠰᠠᠨ ᠬᠡᠷᠡᠭ ᠶᠦᠮ᠃ ᠰᠠᠩᠵᠢ ᠲᠡᠷᠡ ᠪᠣᠳᠣᠯ ᠳ᠋ᠠᠭᠠᠨ ᠬᠥᠲᠥᠯᠦᠭᠳᠡᠨ ᠫᠠᠪᠤᠩ - ᠬᠠ ᠶ᠋ᠢᠨ ᠬᠢᠷᠠ ᠤᠷᠤᠭᠤ ᠪᠠᠭᠤᠵᠤ ᠶᠠᠪᠤᠲᠠᠯᠠ ᠣᠢᠷᠠᠯᠴᠠᠭᠠ ᠪᠠᠢᠬᠤ ᠰᠸᠷᠠ ᠭᠡᠢᠳ ᠦ᠋ᠨ ᠪᠣᠷᠣᠴᠤᠤᠯ ᠤ᠋ᠨ ᠬᠠᠰᠢᠶᠠᠨ ᠠ᠋ᠴᠠ ᠬᠣᠶᠠᠷ ᠪᠠᠨᠳᠢ ᠭᠠᠷᠴᠤ ᠤᠭᠲᠤᠨ ᠢᠷᠡᠪᠡ᠃
- ᠴᠢ ᠬᠠᠮᠢᠭᠠ ᠣᠴᠢᠬᠤ ᠨᠢ ᠪᠣᠢ? ᠭᠡᠵᠦ ᠨᠢᠭᠡ ᠨᠢ ᠲᠥᠪᠡᠳ ᠢ᠋ᠶ᠋ᠡᠷ ᠠᠰᠠᠭᠤᠯᠠ᠃ ᠰᠠᠩᠵᠢ :
- ᠭᠡᠷ ᠲᠦ᠍ ᠪᠡᠨ ᠬᠠᠷᠢᠵᠤ ᠭᠤᠲᠤᠯ ᠢ᠋ᠶ᠋ᠠᠨ ᠰᠣᠯᠢᠭᠠᠳ ᠵᠢᠭᠠᠬᠠᠨ ᠬᠦᠨᠡᠰᠦ ᠰᠡᠯᠪᠢᠬᠦ ᠭᠡᠰᠡᠨ ᠶᠦᠮ ᠭᠡᠬᠦ ᠳᠦ ᠬᠣᠶᠠᠳᠡᠬᠢ ᠪᠠᠨᠳᠢ :
- ᠴᠢ ᠶᠠᠭᠠᠬᠢᠭᠠᠳ ᠪᠠᠭᠰᠢ ᠯᠠᠮᠠ ᠶ᠋ᠢᠨ ᠵᠢᠭᠠᠭᠰᠠᠨ ᠭᠣᠷᠢᠶᠠᠨ ᠤ᠋ ᠲᠣᠭᠠ ᠶ᠋ᠢ ᠭᠦᠢᠴᠡᠭᠡ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠪᠤᠴᠠᠭᠠᠳ ᠶᠠᠪᠤᠵᠤ ᠪᠠᠢᠨᠠ! ᠣᠳᠣᠬᠠᠨ ᠡᠷᠭᠢᠵᠦ ᠭᠣᠷᠢᠶᠠ ᠪᠡᠨ ᠦᠷᠭᠦᠯᠵᠢᠯᠡᠭᠦᠯ!ᠭᠡᠪᠡ᠃ ᠰᠠᠩᠵᠢ ᠦᠨᠡᠨ ᠢᠶᠡᠨ ᠤᠴᠢᠷᠯᠠᠨ:
- ᠮᠢᠨᠦ ᠭᠤᠲᠤᠯ ᠢ᠋ ᠬᠠᠷᠠᠭᠠᠴᠢ ᠳᠠ! ᠡᠢᠮᠦ ᠪᠣᠯᠴᠢᠬᠠᠭᠠᠳ ᠶᠠᠪᠤᠵᠤ ᠪᠣᠯᠬᠤ ᠦᠭᠡᠢ ᠪᠠᠢᠨᠠ᠃ ᠲᠡᠭᠡᠭᠡᠳ ᠴᠤ᠌ ᠢᠳᠡᠬᠦ ᠶᠠᠭᠤᠮᠠ ᠦᠭᠡᠢ ᠥᠯᠥᠰᠴᠤ ᠪᠠᠢᠨᠠ ᠭᠡᠬᠦ ᠳ᠋ᠦ᠍:
- ᠲᠡᠷᠡ ᠶᠠᠭᠤ ᠴᠤ᠌ ᠪᠢᠰᠢ᠃ ᠬᠥᠯ ᠨᠢᠴᠦᠭᠦᠨ ᠴᠤ᠌᠂ ᠥᠯ ᠬᠣᠭᠣᠯᠠ ᠦᠭᠡᠢ ᠴᠤ᠌ ᠢᠯᠭᠠᠭᠠ ᠦᠭᠡᠢ ᠭᠣᠷᠢᠶᠠ ᠶ᠋ᠢ ᠲᠠᠰᠤᠯᠠᠬᠤ ᠦᠭᠡᠢ ᠶᠠᠪᠤᠵᠤ ᠳᠠᠭᠤᠰᠬᠠᠬᠤ ᠤᠴᠢᠷ ᠲᠠᠢ ᠭᠡᠵᠦ ᠨᠢᠭᠡ ᠪᠠᠨᠳᠢ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠨᠥᠭᠦᠭᠡ ᠳ᠋ᠡᠭᠡᠨ ᠬᠠᠨᠳᠤᠵᠤ:
- ᠴᠢ ᠶᠠᠪᠤᠭᠠᠳ ᠮᠣᠳᠣᠨ ᠤᠯᠠ᠂ ᠬᠡᠳᠦᠨ ᠪᠠᠯᠢᠩ ᠠᠪᠤᠭᠠᠳ ᠢᠷᠡ! ᠪᠢ ᠡᠭᠦᠨ ᠢ᠋ ᠬᠠᠷᠠᠵᠤ ᠪᠠᠢᠶᠠ ᠭᠡᠪᠡ᠃ᠨᠥᠭᠦᠭᠡ ᠪᠠᠨᠳᠢ ᠰᠸᠷᠠ ᠭᠡᠢᠳ ᠦ᠋ᠨ ᠵᠦᠭ ᠡᠷᠭᠢᠨ ᠭᠦᠶᠦᠯᠡ᠃ ᠰᠠᠩᠵᠢ ᠲᠡᠷᠡ ᠮᠥᠴᠡ ᠳ᠋ᠦ᠍ ᠠᠭᠤᠷ ᠣᠮᠤᠭ ᠨᠢ ᠬᠥᠳᠡᠯᠵᠦ 《ᠡᠨᠡ ᠮᠤᠤᠰᠠᠢᠨ ᠲᠥᠪᠡᠳ ᠦ᠋ᠳ ᠲᠦ᠍ ᠳᠡᠭᠡᠷᠡᠯᠬᠡᠭᠦᠯᠵᠦ ᠪᠠᠢᠬᠤ ᠶᠤᠮ ᠤᠤ》ᠭᠡᠵᠦ ᠪᠣᠳᠣᠭᠠᠳ ᠵᠠᠮ ᠬᠥᠨᠳᠡᠯᠢᠳᠦᠭᠰᠡᠨ ᠪᠠᠨᠳᠢ ᠶ᠋ᠢ ᠬᠠᠵᠠᠭᠤ ᠲᠡᠰᠢ ᠲᠦᠯᠬᠢᠭᠡᠳ ᠴᠠᠰᠢ ᠪᠠᠨ ᠶᠠᠪᠤᠯᠠ᠃ ᠲᠡᠭᠡᠲᠡᠯᠡ ᠨᠥᠭᠦᠭᠡ ᠪᠠᠨᠳᠢ ᠤᠬᠤᠰᠬᠢᠨ ᠪᠣᠰᠴᠤ ᠰᠠᠩᠵᠢ ᠶ᠋ᠢᠨ ᠠᠷᠤ ᠠ᠋ᠴᠠ ᠭᠦᠶᠦᠨ ᠢᠷᠡᠭᠡᠳ ᠨᠢᠳᠤᠷᠭᠠᠯᠠᠵᠤ ᠡᠬᠢᠯᠡᠪᠡ᠃ ᠰᠠᠩᠵᠢ ᠲᠡᠭᠦᠨ ᠲᠡᠢ ᠠᠨᠠ ᠮᠠᠨᠠ ᠦᠵᠡᠯᠴᠡᠵᠦ ᠪᠠᠢᠲᠠᠯᠠ ᠬᠣᠶᠠᠳᠠᠬᠢ ᠪᠠᠨᠳᠢ ᠡᠷᠭᠢᠨ ᠢᠷᠡᠵᠦ ᠡᠪᠡᠷᠰᠢᠵᠦ ᠬᠠᠲᠠᠭᠤᠷᠠᠭᠰᠠᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠠᠩᠵᠢ ᠶ᠋ᠢᠨ ᠡᠯᠢᠭᠡᠨ ᠳ᠋ᠦ᠍ ᠬᠣᠶᠠᠷ ᠭᠤᠷᠪᠠ ᠬᠦᠴᠦᠲᠡᠢ ᠪᠠᠭᠤᠯᠭᠠᠵᠤ ᠮᠠᠭᠤᠵᠢᠷᠠᠭᠤᠯᠪᠠ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠨᠥᠭᠦᠭᠡ ᠬᠣᠶᠠᠷ ᠲᠡᠭᠦᠨ ᠤ ᠬᠦᠯ ᠭᠠᠷ ᠢ᠋ ᠬᠦᠯᠢᠵᠦ ᠪᠠᠢᠯᠠ᠃ ᠨᠢᠳᠤᠷᠭᠠᠨ ᠵᠣᠳᠣᠭᠠᠨ ᠤ᠋ ᠰᠤᠷᠭᠠᠭᠤᠯᠢ ᠬᠢᠵᠥ ᠥᠷᠯᠦᠭᠡ ᠪᠣᠯᠭᠠᠨ ᠭᠠᠷ ᠤ᠋ᠨ ᠢᠷᠮᠡᠭ ᠢ᠋ᠶ᠋ᠡᠷ ᠲᠦᠢᠫᠦ ᠨᠦᠳᠦᠭᠰᠡᠭᠡᠷ ᠪᠠᠢᠭᠠᠳ ᠡᠪᠡᠷᠰᠢᠵᠦ ᠬᠠᠲᠠᠭᠤᠷᠠᠭᠰᠠᠨ ᠰᠠᠷᠪᠠᠭᠣ᠌ ᠪᠠᠷ ᠢ᠋ᠶ᠋ᠠᠨ ᠲᠡᠷᠡ ᠪᠠᠨᠳᠢ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠡᠭᠡᠮ ᠢ᠋ ᠵᠣᠯ ᠲᠠᠢ ᠯᠠ ᠬᠤᠭᠤᠯᠴᠢᠬᠠᠭᠰᠠᠨ ᠦᠭᠡᠢ᠃ ᠬᠡᠷᠴᠡᠭᠡᠢ ᠪᠠᠯᠠᠮᠠᠳ ᠤ᠋ᠨ ᠰᠤᠷᠭᠠᠭᠤᠯᠢ ᠲᠠᠢ ᠠᠵᠢ᠃
ᠤᠳᠠᠯ ᠦᠭᠡᠢ ᠬᠣᠶᠠᠷ ᠪᠠᠨᠳᠢ ᠰᠸᠷᠠ ᠭᠡᠢᠳ ᠦ᠋ᠨ ᠪᠣᠷᠣᠴᠤᠤᠯ ᠤ᠋ᠨ ᠬᠠᠰᠢᠶᠠᠨ ᠤ᠋ ᠲᠡᠨᠳᠡ ᠡᠴᠡ ᠬᠡᠳᠦᠨ ᠪᠠᠯᠢᠩ᠂ ᠨᠢᠭᠡᠨ ᠬᠣᠣᠰ ᠮᠣᠳᠣᠨ ᠤᠯᠠᠪᠴᠢ ᠠᠪᠴᠢᠷᠠᠵᠤ ᠰᠠᠩᠵᠢ ᠶ᠋ᠢᠨ ᠬᠠᠭᠤᠴᠢᠨ ᠭᠤᠲᠤᠯ ᠢ ᠲᠠᠢᠯᠵᠤ ᠬᠠᠶᠠᠭᠠᠳ ᠬᠥᠯ ᠳ᠋ᠦ᠍ ᠨᠢ ᠮᠣᠳᠣᠨ ᠤᠯᠠᠪᠴᠢ ᠶ᠋ᠢ ᠰᠢᠳᠡᠮᠡᠰᠦ ᠪᠡᠷ ᠶᠠᠩᠭᠢᠨᠠᠲᠠᠯᠠ ᠬᠦᠯᠢᠨ ᠪᠥᠬᠡᠯᠡᠵᠦ᠂ ᠬᠠᠪᠴᠢᠭ ᠡᠭᠦᠷᠭᠡᠨ ᠳᠣᠲᠣᠷᠠ ᠨᠢ ᠬᠠᠲᠠᠭᠰᠠᠨ ᠬᠡᠳᠦᠨ ᠪᠠᠯᠢᠩ ᠢᠶᠠᠨ ᠬᠠᠭᠤᠴᠢᠨ ᠭᠤᠲᠤᠯ ᠲᠠᠢ ᠨᠢ ᠬᠠᠮᠲᠤ ᠬᠢᠵᠦ ᠥᠭᠭᠦᠭᠡᠳ ᠬᠦᠯᠢᠭ ᠢ᠋ ᠨᠢ ᠲᠠᠢᠯᠦᠨ ᠠᠪᠤᠮᠠᠭᠴᠠ :
- ᠪᠣᠰ! ᠶᠠᠪᠤ! ᠭᠣᠷᠢᠶᠠ ᠪᠡᠨ ᠦᠷᠭᠦᠯᠵᠢᠯᠡᠭᠦᠯ᠃ ᠳᠠᠬᠢᠨ ᠤᠷᠭᠤᠬᠤ ᠭᠡᠪᠡᠯ ᠮᠠᠭᠤ ᠶᠠᠭᠤᠮᠠ ᠪᠣᠯᠣᠨᠠ ᠰᠢᠤ᠃ ᠪᠢᠳᠡ ᠴᠢᠮᠠ ᠰᠢᠭ᠋ ᠶᠠᠭᠤᠮᠠ ᠶ᠋ᠢ ᠪᠠᠯᠢᠩ ᠪᠣᠯᠭᠠᠵᠤ ᠣᠷᠬᠢᠨᠠ᠃ ᠴᠢ ᠪᠢᠳᠡᠨ ᠦ᠌ ᠬᠠᠷᠠᠭᠠᠨ ᠠᠴᠠ ᠬᠠᠮᠢᠭᠠᠰᠢ ᠪᠠᠨ ᠴᠤ᠌ ᠮᠤᠯᠲᠤᠷᠠᠬᠤ ᠦᠭᠡᠢ ᠭᠡᠵᠦ ᠲᠡᠷᠡ ᠬᠣᠶᠠᠷ ᠪᠠᠨᠳᠢ ᠵᠠᠨᠤᠯᠬᠢᠯᠠᠯᠠ᠃
ᠰᠠᠩᠵᠢ ᠠᠷᠭᠠ ᠪᠤᠶᠤ ᠭᠦᠴᠦᠨ ᠳ᠋ᠦ᠍ ᠠᠪᠲᠠᠭᠳᠠᠵᠤ ᠲᠡᠳᠡᠨ ᠦ᠌ ᠦᠭᠡ ᠶ᠋ᠢ ᠳᠠᠭᠠᠬᠤ ᠠ᠋ᠴᠠ ᠥᠭᠡᠷᠡ ᠵᠠᠮ ᠦᠭᠡᠢ ᠲᠤᠯᠠ ᠪᠣᠰᠴᠤ ᠫᠠᠪᠤᠩ - ᠬᠠ ᠥᠭᠡᠳᠡ ᠮᠠᠴᠤᠵᠤ ᠡᠬᠢᠯᠡᠪᠡ᠃ ᠠᠷᠤ ᠲᠠᠯᠠ ᠳ᠋ᠤ᠌ ᠨᠢ ᠬᠣᠶᠠᠷ ᠪᠠᠨᠳᠢ ᠶᠢᠨ ᠳᠣᠭᠣᠭᠢ ᠲᠠᠢ ᠢᠨᠢᠶᠡᠳᠦ ᠰᠣᠨᠣᠰᠤᠭᠳᠠᠭᠰᠠᠨ ᠳ᠋ᠤ᠌ ᠰᠠᠩᠵᠢ ᠶ᠋ᠢᠨ ᠠᠭᠤᠷ ᠨᠢ ᠲᠠᠪᠠᠷᠠᠨ ᠣᠪᠣᠯᠵᠠᠭᠰᠠᠨ ᠪᠣᠯᠪᠠᠴᠤ ᠳᠠᠬᠢᠨ ᠲᠡᠳᠡᠨ ᠲᠡᠢ ᠦᠵᠡᠯᠴᠡᠬᠦ ᠵᠢᠷᠦᠬᠡ ᠬᠦᠷᠦᠭᠰᠡᠨ ᠦᠭᠡᠢ᠃《ᠮᠠᠭᠤᠬᠠᠢ ᠰᠠᠨᠠᠭᠠ ᠲᠠᠢ ᠤᠯᠤᠰ ᠶᠤᠮ ᠳᠠ᠃ ᠨᠠᠮᠠᠶ᠋ᠢ ᠡᠨᠡ ᠬᠣᠶᠠᠷ ᠪᠠᠨᠳᠢ ᠪᠠᠷ ᠠᠯᠤᠰ ᠠ᠋ᠴᠠ ᠬᠠᠷᠠᠭᠠᠯᠵᠠᠭᠤᠯᠵᠤ ᠪᠠᠶᠢᠭᠠ ᠶᠤᠮ ᠭᠡᠵᠦ ᠮᠡᠳᠡᠭᠰᠡᠨ ᠦᠭᠡᠢ᠃ ᠲᠡᠢᠮᠦ ᠮᠠᠭᠤ ᠶᠠᠭᠤᠮᠠ ᠰᠠᠨᠠᠭᠰᠠᠨ ᠴᠤ᠌ ᠦᠭᠡᠢ》 ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠭᠤᠮᠤᠳᠠᠯᠲᠠᠢᠶᠠ ᠪᠣᠳᠣᠵᠤ ᠶᠠᠪᠤᠯᠠ᠃ ᠲᠥᠪᠡᠳ ᠦ᠋ᠳ ᠦ᠋ᠨ ᠮᠠᠭᠤ ᠰᠠᠨᠠᠭᠠ ᠭᠦᠨᠵᠡᠭᠡᠢ ᠠᠵᠢ᠃
ᠠᠯᠤᠰ ᠲᠤ᠌ ᠰᠸᠷᠠ ᠲᠡᠭᠴᠢᠯᠡᠩ ᠪᠤᠶᠤ ᠶᠡᠬᠡ ᠮᠠᠾᠠᠶᠠᠨ ᠤ ᠣᠷᠣᠨ ᠭᠡᠳᠡᠭ ᠠᠯᠳᠠᠷᠲᠤ ᠭᠡᠢᠳ ᠦᠨ ᠴᠡᠩᠬᠡᠷᠲᠡᠨ᠂ ᠫᠠᠯᠠᠩᠳᠠᠭᠰᠠᠨ ᠣᠷᠣᠢ ᠭᠢᠯᠠᠯᠵᠠᠨ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠠᠷᠤ ᠲᠠᠯᠠ ᠳ᠋ᠤ᠌ᠨᠢ ᠲᠦᠪᠡᠳ ᠪᠠᠨᠳᠢ ᠨᠠᠷ ᠤ᠋ᠨ ᠳᠣᠭᠣᠬᠢ ᠲᠠᠢ ᠢᠨᠢᠶᠡᠳᠦ ᠵᠠᠮᠬᠠᠷᠠᠵᠤ:
- ᠶᠡᠬᠡ ᠵᠠᠩ ᠭᠠᠷᠭᠠᠭᠠᠳ ᠪᠠᠢᠪᠠᠯ ᠲᠢᠭ᠍ᠪᠠᠷᠠᠨᠵᠠ ᠳ᠋ᠤ᠌ ᠵᠣᠭᠣᠭ ᠪᠠᠷᠢᠨᠠ ᠰᠢᠦ! ᠭᠡᠵᠦ ᠬᠠᠰᠬᠢᠷᠤᠯᠳᠤᠬᠤ ᠨᠢ ᠰᠣᠨᠣᠰᠳᠠᠪᠠ᠃ ᠲᠢᠭ᠍ᠪᠠᠷᠠᠨᠵᠠ ᠭᠡᠬᠦ ᠶ᠋ᠢ ᠰᠣᠨᠣᠰᠤᠭᠠᠳ ᠰᠠᠩᠵᠢ ᠶ᠋ᠢᠨ ᠳᠣᠲᠣᠷ ᠠᠷᠵᠠᠰᠬᠢᠯᠡ᠃ ᠰᠸᠷᠠ ᠭᠡᠢᠳ ᠦ᠋ᠨ ᠣᠷᠴᠢᠨ ᠳ᠋ᠤ᠌ ᠲᠢᠭ᠍ᠪᠠᠷᠠᠨᠵᠠ ᠬᠣᠷᠣᠬᠠᠢ ᠡᠯᠪᠡᠭ ᠲᠡᠷᠡ ᠨᠢ ᠬᠦᠮᠦᠨ ᠦ᠌ ᠪᠡᠶᠡ ᠡᠴᠡ ᠬᠠᠵᠠᠪᠠᠯ ᠲᠡᠰᠪᠦᠷᠢᠯᠡᠬᠦ ᠳ᠋ᠦ᠍ ᠪᠡᠷᠬᠡ ᠡᠪᠡᠳᠬᠡᠳᠡᠭ᠃ ᠭᠦᠨᠵᠢᠳ ᠦ᠋ᠨ ᠳᠤᠰᠤ ᠭᠣᠭᠣᠵᠢᠭᠤᠯᠬᠤ ᠠ᠋ᠴᠠ ᠨᠠᠰᠢ ᠬᠠᠳᠬᠤᠭᠤᠷ ᠨᠢ ᠪᠡᠶᠠ ᠡᠴᠡ ᠰᠠᠯᠳᠠᠭ ᠦᠭᠡᠢ᠃ ᠲᠡᠷᠡ ᠬᠣᠷᠣᠬᠠᠢ ᠡᠴᠡ ᠰᠠᠩᠵᠢ ᠶᠡᠬᠡ ᠠᠶᠤᠳᠠᠭ ᠪᠠᠢᠯᠠ᠃ ᠬᠦᠨᠵᠢᠳ ᠦ᠋ᠨ ᠲᠣᠰᠣᠨ ᠳ᠋ᠤ᠌ ᠲᠡᠭᠦᠨ ᠦ᠌ ᠬᠠᠳᠬᠤᠭᠤᠷ ᠬᠥᠮᠦᠨ ᠦ ᠪᠡᠶᠡ ᠡᠴᠡ ᠠᠶᠠᠨᠳᠠᠭᠠᠨ ᠰᠠᠯᠤᠨᠠ᠃ ᠡᠰᠡ ᠲᠡᠭᠡᠪᠡᠯ ᠠᠢᠬᠤᠪᠲᠤᠷ ᠰᠢᠨᠠᠯᠭᠠᠨ ᠤ᠋ ᠡᠭᠦᠷ ᠪᠣᠯᠳᠠᠭ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠠᠭᠤᠷ ᠢ᠋ ᠬᠦᠷᠭᠡᠵᠦ ᠪᠡᠶᠡ ᠪᠡᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠴᠦᠭᠦᠨ ᠮᠢᠬᠠᠨ ᠳ᠋ᠤ᠌ ᠲᠠᠯᠪᠢᠵᠤ ᠬᠠᠳᠬᠤᠭᠤᠯᠳᠠᠭ ᠠᠶᠠᠭᠦᠢ ᠮᠠᠭᠤᠬᠠᠢ ᠱᠣᠭᠯᠠᠭᠠᠮ ᠢ᠋ ᠰᠸᠷᠠ ᠳ᠋ᠠᠴᠠᠩ ᠤ᠋ᠨ ᠪᠠᠨᠳᠢ ᠨᠠᠷ ᠬᠡᠷᠡᠭᠯᠡᠳᠡᠭ ᠪᠠᠢᠵᠠᠢ᠃ ᠰᠠᠩᠵᠢ ᠡᠢᠨ ᠬᠦ᠌ ᠫᠠᠪᠤᠩ - ᠬᠠ ᠶ᠋ᠢ ᠭᠤᠷᠪᠠᠨ ᠮᠢᠩᠭᠠ ᠭᠤᠷᠪᠠᠨ ᠵᠠᠭᠤ ᠲᠣᠭᠣᠷᠢᠬᠤ ᠠ᠋ᠴᠠ ᠥᠭᠡᠷᠡ ᠵᠠᠮ ᠦᠭᠡᠢ ᠪᠣᠯᠤᠭᠰᠠᠨ ᠢᠶᠠᠨ ᠪᠦᠷᠢᠨ ᠤᠬᠠᠭᠠᠷᠠᠵᠠᠢ᠃
《ᠡᠬᠡ ᠪᠣᠯᠤᠭᠰᠠᠨ ᠵᠢᠷᠭᠤᠭᠠᠨ ᠵᠦᠢᠯ᠂ ᠬᠠᠮᠤᠭ ᠠᠮᠢᠲᠠᠨ ᠤ᠋ ᠲᠤᠰᠠ ᠶ᠋ᠢᠨ ᠲᠤᠯᠠᠳᠠ ᠲᠠᠰᠤᠷᠠᠯᠲᠠ ᠦᠭᠡᠢ ᠪᠤᠶᠠᠨ ᠦᠢᠯᠡᠳ᠃ ᠠᠯᠢᠪᠠ ᠬᠢᠵᠢᠭ᠌ ᠢᠯᠠᠭᠠ᠂ ᠰᠢᠮᠠᠭᠤᠯ ᠲᠡᠷᠢᠭᠦᠲᠡᠨ ᠰᠠᠨᠠᠮᠰᠠᠷ ᠦᠭᠡᠢ ᠲᠣᠬᠢᠶᠠᠯᠳᠤᠯ ᠢ᠋ᠶ᠋ᠠᠷ ᠠᠮᠠ ᠤᠷᠤᠭᠤ ᠴᠢᠨᠢ ᠣᠷᠣᠵᠤ ᠠᠮᠢ ᠨᠠᠰᠤ ᠨᠢ ᠶᠡᠭᠦᠳᠬᠡᠭᠳᠡᠬᠦ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠠᠮᠠᠨ ᠤ ᠬᠠᠭᠠᠯᠲᠠ ᠵᠡᠭᠦᠵᠦ ᠶᠠᠪᠤᠭᠲᠤᠨ!》 ᠭᠡᠵᠦ ᠭᠣᠮᠠᠨ ᠳ᠋ᠠᠴᠠᠩ ᠳ᠋ᠤ᠌ ᠡᠳᠦᠷ ᠪᠦᠷᠢ ᠯᠡ ᠰᠤᠷᠭᠠᠨ ᠨᠣᠮᠯᠠᠳᠠᠭ ᠢ᠋ ᠰᠠᠩᠵᠢ ᠭᠡᠰᠦᠯ ᠡᠨᠡ ᠮᠥᠴᠡ ᠳ᠋ᠦ᠍ ᠡᠷᠭᠢᠨ ᠰᠠᠨᠠᠪᠠ᠃《ᠲᠢᠭ᠍ᠪᠠᠷᠠᠨᠵᠠ ᠪᠠᠷ ᠨᠠᠮᠠᠶ᠋ᠢ ᠬᠠᠳᠬᠤᠭᠤᠯᠤᠨᠠ ᠭᠡᠨᠡ ᠡ? ᠲᠡᠷᠡ ᠴᠢᠨᠢ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ ᠭᠡᠪᠡᠯ ᠪᠠᠰᠠ ᠯᠠ ᠨᠢᠭᠦᠯ ᠪᠣᠯᠬᠤ ᠦᠢᠯᠡ ᠮᠥᠨ᠃ ᠢᠯᠠᠭᠠ ᠰᠢᠮᠠᠭᠤᠯ ᠢ᠋ ᠵᠠᠯᠭᠢᠬᠤ ᠠ᠋ᠴᠠ ᠠᠶᠤᠳᠠᠭ ᠪᠣᠯ ᠶᠠᠭᠠᠬᠢᠭᠠᠳ ᠪᠤᠷᠬᠠᠨ ᠤ᠋ ᠱᠠᠪᠢ ᠬᠤᠸᠠᠷᠠᠭ ᠬᠥᠮᠦᠨ ᠢ ᠲᠢᠭ᠍ᠪᠠᠷᠠᠨᠵᠠ ᠪᠠᠷ ᠬᠠᠳᠬᠤᠭᠤᠯᠬᠤ ᠨᠢ ᠨᠢᠭᠦᠯ ᠪᠢᠰᠢ ᠪᠠᠢᠳᠠᠭ ᠪᠢᠯᠡ? ᠡᠨᠡ ᠪᠠᠨᠳᠢ ᠨᠠᠷ ᠢ ᠬᠠᠷᠠᠬᠤ ᠳ᠋ᠤ᠌ ᠶᠠᠭᠠᠬᠢᠪᠠᠴᠤ ᠣᠪᠠᠰᠢ ᠶ᠋ᠢᠨ ᠪᠣᠯᠤᠨ ᠪᠠᠨᠳᠢ ᠶ᠋ᠢᠨ ᠰᠠᠬᠢᠯ ᠬᠦᠷᠲᠡᠭᠰᠡᠨ ᠲᠡᠢᠮᠦ ᠯᠡ ᠨᠠᠰᠤᠨ ᠤ᠋ ᠤᠯᠤᠰ ᠪᠠᠢᠨᠠ᠃ ᠭᠡᠲᠡᠯᠡ ᠡᠢᠮᠦ ᠨᠢᠭᠦᠯᠲᠦ ᠶᠠᠭᠤᠮᠠ ᠬᠢᠬᠦ ᠪᠡᠷ ᠰᠠᠨᠠᠵᠤ ᠪᠣᠳᠣᠵᠤ ᠪᠠᠢᠳᠠᠭ ᠨᠢ ᠶᠠᠭᠤᠨ ᠤᠴᠢᠷ ᠪᠤᠢ? ᠪᠠᠭᠰᠢ ᠯᠠᠮᠠ ᠳ᠋ᠤ᠌ ᠡᠨᠡ ᠲᠤᠬᠠᠢ ᠬᠡᠯᠡᠪᠡᠯ ᠲᠡᠳᠡᠨ ᠢ᠋ ᠣᠭᠲᠣᠬᠠᠨ ᠴᠤ᠌ ᠵᠦᠭᠡᠷ ᠥᠩᠭᠡᠷᠡᠭᠡᠬᠦ ᠦᠭᠡᠢ ᠨᠢ ᠯᠠᠪ》 ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠪᠣᠳᠣᠵᠠᠢ᠃ ᠲᠠᠪᠤᠨ ᠵᠠᠪᠰᠠᠷ ᠦᠭᠡᠢ ᠨᠢᠭᠦᠯ᠂ ᠰᠢᠳᠠᠷ ᠲᠠᠪᠤᠨ ᠨᠢᠭᠦᠯ᠂ ᠠᠷᠪᠠᠨ ᠬᠠᠷᠠ ᠨᠢᠭᠦᠯ ᠭᠡᠵᠦ ᠭᠤᠷᠪᠠ ᠬᠤᠪᠢᠶᠠᠵᠤ ᠪᠠᠭᠰᠢ ᠯᠠᠮᠠ ᠶ᠋ᠢᠨ ᠵᠢᠭᠠᠭᠰᠠᠨ ᠨᠢᠭᠦᠯ ᠦ᠋ᠳ ᠢ᠋ ᠰᠠᠩᠵᠢ ᠭᠡᠰᠦᠯ ᠳᠡᠰ ᠳᠠᠷᠠᠭᠠᠯᠠᠨ ᠲᠣᠭᠠᠴᠢᠵᠤ ᠦᠵᠡᠪᠡ᠃《ᠬᠡᠷᠪᠡ ᠨᠠᠮᠠᠶ᠋ᠢ ᠲᠢᠭ᠍ᠪᠠᠷᠠᠨᠵᠠ ᠪᠠᠷ ᠬᠠᠳᠬᠤᠭᠤᠯᠬᠤ ᠶᠤᠮ ᠪᠣᠯ ᠰᠢᠳᠠᠷ ᠲᠠᠪᠤᠨ ᠨᠢᠭᠦᠯ ᠦ᠋ᠨ ᠭᠤᠷᠪᠠᠳᠤᠭᠠᠷ ᠢ ᠦᠢᠯᠡᠳᠴᠦ ᠪᠠᠢᠭᠠ ᠬᠡᠷᠡᠭ᠃ ᠬᠡᠷᠪᠡ ᠳᠤᠰᠤ ᠠᠰᠬᠠᠵᠤ ᠲᠢᠭ᠍ᠪᠠᠷᠠᠨᠵᠠ ᠶ᠋ᠢ ᠦᠬᠦᠭᠦᠯᠪᠡᠯ ᠠᠷᠪᠠᠨ ᠬᠠᠷᠠ ᠨᠢᠭᠦᠯ ᠦ᠋ᠨ ᠭᠤᠷᠪᠠᠳᠤᠭᠠᠷ ᠢ᠋ ᠦᠢᠯᠡᠳᠴᠦ ᠪᠠᠢᠭᠠ ᠬᠡᠷᠡᠭ᠃ ᠲᠡᠭᠡᠬᠦᠯᠡᠷ ᠡᠨᠡ ᠬᠣᠶᠠᠷ ᠪᠠᠨᠳᠢ ᠠᠯᠢ ᠴᠤ᠌ ᠦᠢᠯᠡᠳᠦᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠢᠭᠦᠯ ᠠᠯᠳᠠᠰ ᠬᠢᠬᠦ ᠳ᠋ᠦ᠍ ᠰᠡᠢᠬᠦ ᠦᠭᠡᠢ ᠤᠯᠤᠰ ᠪᠠᠢᠨᠠ᠃ ᠡᠳᠡᠨ ᠤ ᠯᠡᠮᠡ ᠪᠠᠭᠰᠢ ᠨᠢ ᠶᠠᠮᠠᠷ ᠬᠥᠮᠦᠨ ᠪᠠᠢᠳᠠᠭ ᠪᠣᠯ?》 ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠪᠣᠳᠣᠵᠤ ᠶᠠᠪᠤᠭᠰᠠᠭᠠᠷ ᠭᠣᠷᠢᠶᠠᠨ ᠤ᠋ ᠪᠠᠨ ᠵᠠᠮ ᠳ᠋ᠤ᠌ ᠣᠷᠣᠪᠠ᠃ ᠫᠠᠪᠤᠩ - ᠬᠠ ᠶ᠋ᠢ ᠲᠣᠭᠣᠷᠢᠭᠰᠠᠨ ᠮᠥᠷᠭᠥᠯᠴᠢᠳ ᠦᠭᠡ ᠳᠠᠭᠤ ᠦᠭᠡᠢ ᠴᠤᠪᠤᠷᠠᠨ ᠶᠠᠪᠤᠵᠠᠭᠠᠵᠤ᠂ ᠶᠣᠰᠣᠲᠠᠢ ᠯᠠ ᠮᠠᠭᠤ ᠳᠠᠭᠤᠲᠤ ᠲᠢᠪ ᠭᠡᠭᠴᠢ ᠳ᠋ᠦ᠍ ᠣᠴᠢᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠣᠢᠳᠬᠠᠷ ᠭᠤᠨᠢᠭ ᠲᠠᠢ ᠰᠠᠨᠠᠭᠳᠠᠯᠠ᠃
ᠲᠥᠪᠡᠳ ᠭᠠᠵᠠᠷ ᠽᠤᠩᠺᠠᠸᠠ ᠶ᠋ᠢᠨ ᠰᠤᠷᠭᠠᠯ ᠳᠡᠯᠭᠡᠷᠡᠵᠦ ᠣᠯᠠᠨ ᠵᠠᠭᠤᠨ ᠵᠢᠯ ᠢ᠋ ᠡᠯᠡᠭᠡᠵᠦ᠂ ᠭᠣᠷᠪᠠᠨ ᠡᠷᠡ ᠬᠥᠮᠦᠨ ᠦ᠌ ᠪᠠᠷᠤᠭ ᠬᠣᠶᠠᠷ ᠨᠢ ᠰᠦᠮᠡ ᠳ᠋ᠦ᠍ ᠱᠠᠪᠢᠯᠠᠨ ᠰᠠᠭᠤᠭᠰᠠᠭᠠᠷ ᠡᠬᠡ ᠪᠣᠯᠤᠭᠰᠠᠨ ᠵᠢᠷᠭᠤᠭᠠᠨ ᠵᠦᠢᠯ ᠠᠮᠢᠲᠠᠨ ᠤ᠋ ᠲᠤᠰᠠ ᠶ᠋ᠢᠨ ᠲᠤᠯᠠᠳᠠ ᠨᠢᠭᠦᠯᠡᠰᠭᠦᠢ ᠦᠢᠯᠡᠰ ᠪᠦᠲᠦᠭᠡᠬᠦ ᠶ᠋ᠢ ᠡᠳᠦᠷ ᠰᠥᠨᠢ ᠦᠭᠡᠢ ᠨᠣᠮᠯᠠᠭᠰᠠᠭᠠᠷ ᠪᠠᠢᠪᠠᠴᠤ ᠬᠥᠮᠦᠰ ᠨᠣᠮ ᠤ᠋ᠨ ᠶᠣᠰᠣᠭᠠᠷ ᠪᠣᠯᠤᠭᠰᠠᠨ ᠦᠭᠡᠢ᠃ ᠳᠡᠭᠡᠷᠡᠮ ᠲᠣᠨᠣᠭᠤᠯ᠂ ᠠᠯᠠᠯᠭᠠ᠂ ᠶᠡᠭᠦᠳᠬᠡᠯ ᠤᠯᠠᠮ ᠭᠠᠭᠠᠷᠠᠵᠤ᠂ ᠮᠠᠭᠤ ᠮᠠᠭᠤᠬᠠᠢ ᠪᠣᠯᠭᠠᠨ ᠪᠠᠢᠭ᠍ᠰᠠᠭᠠᠷ ᠠᠵᠢ᠃ ᠡᠭᠦᠨ ᠢ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠬᠤ ᠳ᠋ᠤ᠌ ᠰᠠᠩᠵᠢ ᠭᠡᠰᠦᠯ ᠳ᠋ᠦ᠍ ᠬᠠᠴᠢᠨ ᠰᠠᠨᠠᠭᠳᠠᠪᠠ᠃ ᠽᠤᠩᠺᠠᠸᠠ ᠶ᠋ᠢᠨ ᠨᠣᠮᠯᠠᠯ ᠰᠠᠢᠬᠠᠨ ᠬᠦᠷᠲᠡᠭᠰᠡᠨ ᠭᠡᠬᠦ ᠳ᠋ᠦ᠍ ᠮᠣᠩᠭᠣᠯᠴᠤᠳ ᠢᠯᠡᠭᠦᠦ ᠳᠤᠭᠤᠯᠭᠠᠪᠤᠷᠢ ᠲᠠᠢ ᠰᠦᠰᠦᠭᠯᠡᠮᠡᠲᠡᠭᠡᠢ ᠶᠤᠮᠰᠢᠭ ᠪᠣᠳᠣᠭᠳᠠᠵᠠᠢ᠃