ᠣᠷᠣᠢ ᠦᠭᠡᠢ ᠰᠦᠮᠡ – ᠠᠷᠪᠠᠨ ᠳᠦᠷᠪᠡ ᠂ ᠨᠣᠮ ᠤᠨ ᠬᠦᠷᠳᠦ ᠡᠷᠭᠢᠭᠦᠯᠦᠭᠴᠢ Оройгүй сүм – Арвандөрөв ᠂ Номын хүрд эргүүлэгч- Oroigui sum 14
808ᠠᠷᠪᠠᠨ ᠳᠦᠷᠪᠡ ᠂ ᠨᠣᠮ ᠤᠨ ᠬᠦᠷᠳᠦ ᠡᠷᠭᠢᠭᠦᠯᠦᠭᠴᠢ
ᠬᠠᠷᠠᠬᠤ ᠳ᠋ᠤ᠌ ᠬᠠᠷᠠᠴᠠ ᠨᠢᠭᠡ ᠬᠤᠷᠳᠤᠨ
ᠰᠠᠨᠠᠬᠤ ᠳ᠋ᠤ᠌ ᠰᠠᠨᠠᠭᠠ ᠨᠢᠭᠡ ᠬᠤᠷᠳᠤᠨ
ᠨᠣᠮ ᠤ᠋ᠨ ᠬᠦᠷᠳᠦ ᠡᠷᠭᠢᠭᠦᠯᠬᠦ ᠰᠠᠢᠨ ᠡᠳᠦᠷ ᠪᠤᠶᠤ ᠴᠤᠢᠩᠬᠤᠷ ᠳ᠋ᠣᠶ᠋ᠢᠴᠠᠩ ᠬᠤᠷᠠᠵᠤ ᠪᠠᠢᠯᠠ᠃
- ᠰᠠᠩᠵᠢ ᠨᠠᠮᠰᠢᠭ ᠵᠦᠭᠳᠡᠷ ᠲᠠᠮᠵᠢᠳ᠋ᠵᠠᠢ᠂
ᠬᠣᠷᠸᠠ ᠵᠢᠭᠳᠡᠨ ᠰᠡᠷᠲᠡᠪ ᠣᠳᠰᠤᠷᠦᠩᠳᠠᠨ᠂
ᠱᠠᠭᠵᠠ ᠲᠦᠪ ᠭᠣᠳᠠᠮ ᡀᠢᠢᡀᠣ᠋
ᠰᠠᠩᠵᠢ ᠪᠠᠪᠤᠤ ᠳ᠋ᠦ᠋ᠨᠯᠠ ᠴᠢᠭᠴᠠᠯᠤ!
ᠭᠡᠵᠦ ᠰᠦᠮᠡ ᠶ᠋ᠢᠨ ᠠᠲᠠᠷ ᠳᠣᠷᠭᠢᠲᠠᠯᠠ ᠯᠠᠮᠠ ᠨᠠᠷ ᠳᠦᠩᠭᠢᠨᠡᠯᠳᠦᠨ ᠲᠤᠨᠵᠢᠷᠳᠠᠵᠤ ᠪᠠᠢᠯᠠ᠃
- ᠢᠯᠠᠵᠤ ᠲᠡᠭᠦᠰ ᠨᠥᠭᠴᠢᠭᠰᠡᠨ
ᠲᠡᠭᠦᠨᠴᠢᠯᠡᠨ ᠢᠷᠡᠭᠰᠡᠨ
ᠦᠨᠡᠨ ᠲᠡᠭᠦᠰ ᠲᠤᠬᠠᠯᠠᠭᠰᠠᠨ
ᠪᠤᠷᠬᠠᠨ ᠱᠠᠭᠢᠮᠦᠨᠢ ᠳ᠋ᠤ᠌ ᠮᠥᠷᠭᠥᠮᠦ ᠡ!
ᠭᠡᠵᠦ ᠶᠠᠭᠠᠬᠢᠭᠠᠳ ᠴᠤ᠌ ᠶᠤᠮ ᠰᠠᠩᠵᠢ ᠭᠡᠰᠦᠯ ᠮᠣᠩᠭᠣᠯ ᠬᠡᠯᠡ ᠪᠡᠷ ᠤᠩᠰᠢᠵᠤ ᠣᠷᠬᠢᠭᠠᠳ ᠬᠡᠪ ᠭᠡᠨᠡᠳᠲᠡ ᠲᠦᠪᠡᠳ ᠲᠦ᠍᠂ ᠪᠡᠷᠡᠪᠡᠩ ᠭᠡᠢᠳ ᠦ᠋ᠨ ᠭᠣᠮᠠᠨ ᠳ᠋ᠠᠴᠠᠩ ᠳ᠋ᠤ᠌ ᠬᠤᠷᠠᠯ ᠬᠤᠷᠠᠵᠤ ᠪᠠᠢᠭᠠ ᠪᠠᠨ ᠰᠠᠨᠠᠵᠤ᠂ ᠴᠢᠷᠠᠢ ᠨᠢ ᠤᠯᠠᠢᠪᠠ᠃ ᠴᠤᠢᠮᠴᠤᠭ ᠭᠡᠯᠦᠩ ᠵᠠᠷᠢᠮ ᠢᠷᠦᠭᠡᠯ᠂ ᠮᠠᠭᠲᠠᠭᠠᠯ ᠢ ᠮᠣᠩᠭᠣᠯ ᠢ᠋ᠶ᠋ᠠᠷ ᠪᠠᠰᠠ ᠵᠢᠭᠠᠭᠰᠠᠨ ᠲᠤᠯᠠ ᠵᠠᠩᠰᠢᠭᠰᠠᠨ ᠶᠣᠰᠣᠭᠠᠷ ᠰᠠᠩᠵᠢ ᠭᠡᠰᠦᠯ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠲᠥᠷᠥᠯᠬᠢ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠤᠩᠰᠢᠵᠤ ᠣᠷᠬᠢᠵᠠᠢ᠃ ᠳᠡᠷᠭᠡᠳᠡ ᠶ᠋ᠢᠨ ᠯᠠᠮᠠ ᠨᠠᠷ ᠮᠡᠳᠡᠭᠡ ᠦᠭᠡᠢ ᠪᠣᠯ ᠴᠤ᠌ ᠪᠤᠰᠤᠳ ᠨᠢ ᠬᠡᠨ ᠴᠤ᠌ ᠮᠡᠳᠡᠬᠦ ᠪᠡᠷ ᠦᠭᠡᠢ ᠨᠦᠰᠡᠷ ᠶᠡᠬᠡ ᠱᠤᠤᠭᠢᠶᠠᠨ ᠲᠠᠢ ᠪᠠᠢᠯᠠ᠃
ᠭᠡᠷ ᠣᠷᠣᠨ ᠢ᠋ᠶ᠋ᠠᠨ ᠰᠠᠨᠠᠭᠰᠠᠨ ᠴᠤ᠌ ᠶᠤᠮ ᠤᠤ᠂ ᠶᠠᠭᠤ ᠴᠤ᠌ ᠪᠣᠯᠲᠤᠭᠠᠢ ᠪᠤᠷᠬᠠᠨ ᠪᠠᠭᠰᠢ ᠳ᠋ᠤ᠌ ᠮᠥᠷᠭᠥᠬᠦ ᠮᠠᠭᠲᠠᠭᠠᠯ ᠢ᠋ᠶ᠋ᠠᠨ ᠮᠣᠩᠭᠣᠯ ᠢ᠋ᠶ᠋ᠠᠷ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠡᠬᠢᠯᠡᠴᠢᠬᠡᠵᠡᠢ᠃ ᠴᠤᠢᠩᠬᠤᠷ ᠳ᠋ᠣᠶ᠋ᠢᠴᠠᠩ ᠦᠨ ᠬᠤᠷᠠᠯ ᠳᠡᠭᠡᠷᠡ ᠮᠣᠩᠭᠣᠯ ᠢ᠋ᠶ᠋ᠠᠷ ᠤᠩᠰᠢᠯᠭᠠ ᠦᠢᠯᠡᠳᠦᠭᠰᠡᠨ ᠢ᠋ ᠮᠡᠳᠡᠪᠡᠯ ᠲᠥᠪᠡᠳ ᠦ᠋ᠳ ᠬᠠᠲᠠᠭᠤ ᠴᠡᠭᠡᠷᠯᠡᠯ ᠦᠵᠡᠭᠦᠯᠦᠨᠡ ᠭᠡᠳᠡᠭ ᠢ᠋ ᠮᠡᠳᠡᠵᠦ ᠪᠠᠢᠭᠠ ᠲᠤᠯᠠ ᠰᠠᠩᠵᠢ ᠭᠡᠰᠦᠯ ᠴᠠᠭᠠᠰᠢ ᠨᠢ ᠪᠣᠯᠭᠣᠮᠵᠢ ᠲᠠᠢ ᠪᠣᠯᠵᠤ ᠪᠡᠶᠡ ᠪᠡᠨ ᠪᠠᠷᠢᠪᠠ᠃ ᠭᠡᠰᠦᠯ ᠦ᠋ᠨ ᠪᠡᠶᠡ ᠣᠳᠣ ᠮᠠᠰᠢ ᠰᠠᠢᠨ ᠪᠣᠯᠤᠭᠠᠳ ᠪᠠᠢᠪᠠ᠃ ᠪᠡᠷᠢᠮᠦᠭ ᠡᠮᠡᠭᠡᠨ ᠦ᠌ ᠴᠠᠬᠢᠯᠳᠠᠭ ᠤ᠋ᠨ ᠰᠢᠭᠦᠭᠰᠡᠨ ᠦ᠌ ᠨᠥᠯᠦᠭᠡᠨ ᠳ᠋ᠦ᠍ ᠲᠡᠭᠦᠨ ᠦ ᠬᠣᠳᠣᠭᠣᠳᠣᠨ ᠤ᠋ ᠰᠢᠷᠬᠠ ᠪᠦᠷᠢᠨ ᠡᠳᠡᠭᠡᠷᠡᠵᠦ᠂ ᠬᠠᠷᠢᠨ ᠴᠤ᠌ ᠤᠷᠢᠳᠠ ᠶ᠋ᠢᠨ ᠬᠢ ᠡᠴᠡ ᠪᠡᠨ ᠤᠯᠠᠮ ᠢᠯᠡᠭᠦᠦ ᠬᠣᠪᠳᠣᠭ ᠪᠣᠯᠤᠭᠰᠠᠭᠠᠷ ᠬᠡᠳᠦᠨ ᠰᠠᠷᠠ ᠥᠩᠭᠡᠷᠡᠯᠡ᠃ ᠪᠡᠷᠢᠮᠦᠭ ᠡᠮᠡᠭᠡᠨ ᠣᠳᠣ ᠰᠠᠩᠵᠢ ᠭᠡᠰᠦᠯ ᠦᠨ ᠲᠣᠭᠣᠭᠠ ᠶ᠋ᠢ ᠪᠠᠷᠢᠳᠠᠭ ᠪᠣᠯᠤᠭᠰᠠᠨ ᠲᠤᠯᠠ ᠬᠣᠭᠣᠯᠠ ᠤᠮᠳᠠ ᠪᠠᠷ ᠭᠠᠴᠢᠭᠳᠠᠬᠤ ᠦᠭᠡᠢ᠂ ᠬᠠᠷᠢᠨ ᠴᠤ᠌ ᠮᠠᠷᠢᠶᠠᠯᠠᠬᠤ ᠰᠢᠨᠵᠢ ᠣᠷᠣᠵᠠᠢ᠃ ᠡᠪᠡᠳᠴᠢᠨ ᠲᠡᠢ ᠪᠠᠢᠬᠤ ᠳ᠋ᠠᠭᠠᠨ ᠦᠵᠡᠵᠦ ᠴᠢᠳᠠᠭᠠ ᠦᠭᠡᠢ ᠨᠣᠮ ᠢ᠋ᠶ᠋ᠠᠨ ᠨᠥᠬᠥᠨ ᠦᠵᠡᠵᠦ ᠠᠮᠵᠢᠵᠠᠢ᠃ ᠪᠠᠰᠠ ᠬᠠᠵᠠᠭᠤ ᠪᠠᠷ ᠨᠢ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠲᠠᠢ ᠲᠣᠬᠢᠷᠠᠯᠴᠠᠭᠰᠠᠨ ᠶᠣᠰᠣᠭᠠᠷ ᠣᠲᠠᠴᠢ ᠶ᠋ᠢᠨ ᠤᠬᠠᠭᠠᠨ ᠰᠡᠮᠬᠡᠨ ᠣᠷᠣᠢ ᠦᠳᠡᠰᠢ ᠵᠢᠭᠠᠯᠭᠠᠭᠰᠠᠭᠠᠷ ᠪᠠᠢᠯᠠ᠃ ᠮᠠᠷᠠᠮᠪᠠ ᠴᠤ᠌ ᠳᠤᠷᠠᠲᠠᠢ ᠵᠢᠭᠠᠵᠤ ᠪᠠᠢᠪᠠ᠃
- ᠲᠠᠨ ᠤ᠋ ᠠᠪᠤᠷᠠᠯ ᠢ᠋ᠶ᠋ᠠᠷ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠠ᠋ᠴᠠ ᠰᠠᠯᠪᠠ᠃ ᠭᠢᠯᠠᠢᠯᠠ ᠭᠡᠵᠦ ᠰᠠᠩᠵᠢ ᠲᠡᠭᠦᠨ ᠳ᠋ᠤ᠌ ᠭᠡᠯᠡᠵᠡᠢ᠃ ᠡᠨᠡ ᠦᠭᠡᠨ ᠳ᠋ᠦ᠍ ᠫᠦᠷᠪᠦᠳᠣᠨᠣᠢ ᠮᠠᠷᠠᠮᠪᠠ ᠲᠡᠳᠦᠢᠯᠡᠨ ᠢᠲᠡᠭᠡᠭᠡ ᠦᠭᠡᠢ ᠪᠣᠯᠪᠠᠴᠤ ᠰᠡᠭᠦᠯ ᠰᠡᠭᠦᠯ ᠳ᠋ᠡᠭᠡᠨ ᠲᠡᠭᠦᠨ ᠲᠡᠢ ᠰᠠᠨᠠᠯ ᠨᠠᠢᠯᠡᠵᠡᠢ᠃ ᠪᠠᠰᠠ ᠲᠡᠭᠡᠭᠡᠳ ᠥᠪᠡᠷ ᠲᠦ᠍ ᠨᠢ ᠨᠠᠭᠠᠯᠳᠤᠵᠤ᠂ ᠥᠪᠡᠷ ᠦ᠋ᠨ ᠨᠢ ᠡᠷᠳᠡᠮ ᠳ᠋ᠦ᠍ ᠪᠢᠰᠢᠷᠡᠨ ᠨᠣᠮ ᠰᠤᠷᠬᠤ ᠭᠡᠵᠦ ᠵᠢᠳᠬᠦᠳᠡᠭ ᠲᠡᠷᠡ ᠬᠦ ᠮᠣᠩᠭᠣᠯ ᠯᠠᠮᠠ ᠲᠡᠭᠦᠨ ᠳ᠋ᠦ᠍ ᠠᠶᠠᠲᠠᠢᠬᠠᠨ ᠰᠠᠨᠠᠭᠳᠠᠵᠠᠢ᠃ ᠪᠠᠰᠠ ᠮᠠᠷᠠᠮᠪᠠ ᠶ᠋ᠢᠨ ᠲᠠᠨᠢᠯ ᠭᠦᠷᠳᠡᠮᠪᠡ ᠴᠤ᠌ ᠰᠠᠩᠵᠢ ᠳ᠋ᠤ᠌ ᠡᠷᠳᠡᠮ ᠢ᠋ᠶ᠋ᠡᠨ ᠵᠢᠭᠠᠬᠤ ᠶ᠋ᠢ ᠬᠦᠰᠡᠵᠡᠢ᠃ ᠨᠢᠭᠡ ᠡᠳᠦᠷ ᠮᠠᠷᠠᠮᠪᠠ ᠶ᠋ᠢᠨ ᠳ᠋ᠦ᠍ ᠲᠡᠷᠡ ᠭᠦᠷᠲᠡᠮ ᠳᠠᠬᠢᠨ ᠲᠠᠭᠠᠷᠠᠯᠳᠤᠬᠤ ᠳ᠋ᠤ᠌ ᠨᠢ ᠰᠠᠩᠵᠢ ᠭᠡᠰᠦᠯ᠄
- ᠲᠠᠨ ᠤ᠋ ᠠᠪᠤᠷᠠᠯ ᠢ᠋ᠶ᠋ᠠᠷ ᠡᠪᠡᠳᠴᠢᠨ ᠡᠮᠭᠡᠭ ᠡᠴᠡ ᠰᠠᠯᠵᠤ᠂ ᠨᠣᠮ ᠤ᠋ᠨ ᠮᠥᠷ ᠳᠠᠬᠢᠨ ᠬᠥᠭᠡᠭᠡᠯᠡ᠃ ᠭᠢᠯᠠᠢᠯᠠ ᠭᠡᠳ ᠬᠡᠯᠡᠵᠦ ᠣᠷᠬᠢᠭᠰᠠᠨ ᠳ᠋ᠤ᠌ ᠭᠦᠷᠲᠡᠮ ᠶᠡᠬᠡ ᠪᠠᠶᠠᠷᠯᠠᠵᠤ᠄
- ᠴᠢ ᠦᠬᠦᠬᠦ ᠵᠠᠶᠠᠭᠠ ᠲᠠᠢ ᠬᠥᠮᠦᠨ ᠪᠢᠰᠢ ᠡ᠃ ᠴᠢᠮᠠ ᠳ᠋ᠤ᠌ ᠱᠦᠭᠯᠡᠭᠰᠡᠨ ᠮᠠᠭᠤ ᠢᠷᠣᠠ ᠬᠠᠷᠢᠨ ᠦᠬᠦᠬᠦ ᠶᠣᠰᠣᠲᠠᠢ ᠪᠠᠢᠭ᠍ᠰᠠᠨ᠃ ᠮᠢᠨᠦ ᠠᠯᠪᠢᠨ ᠰᠡᠯᠡᠮᠡᠨ ᠳ᠋ᠦ᠍ ᠲᠡᠳᠡ ᠬᠢᠶᠠᠷ ᠦᠰᠦᠷᠦᠭᠰᠡᠨ ᠳ᠋ᠡ ᠭᠡᠵᠦ ᠬᠠᠷᠠ ᠰᠠᠬᠠᠯ ᠢᠶᠠᠨ ᠢᠮᠡᠷᠡᠬᠦ ᠳ᠋ᠦ᠍ ᠨᠢ᠄
- ᠲᠠᠨ ᠤ ᠰᠡᠯᠡᠮᠡ ᠦᠨᠡᠬᠡᠷ ᠠᠳᠠ ᠴᠢᠳᠬᠦᠷ ᠦ᠋ᠨ ᠠᠮᠠ ᠶ᠋ᠢ ᠠᠪᠤᠭᠴᠢ ᠶᠡᠬᠡ ᠡᠷᠳᠡᠮ᠂ ᠢᠳᠢ ᠰᠢᠳᠢ ᠳᠦᠭᠦᠷᠡᠩ ᠠᠵᠢ᠃ ᠲᠠ ᠨᠠᠳᠠ ᠡᠷᠳᠡᠮ ᠡᠴᠡ ᠪᠡᠨ ᠬᠠᠢᠷᠠᠯᠠᠬᠤ ᠰᠠᠨ ᠪᠣᠯᠪᠠ ᠤᠤ? ᠭᠡᠵᠦ ᠭᠤᠶᠤᠪᠠ᠃
- ᠬᠡ᠂ ᠬᠡ᠂ ᠬᠡ᠃ ᠮᠢᠨᠦ ᠰᠡᠯᠡᠮᠡ ᠢᠳᠢ ᠰᠢᠳᠢ ᠲᠡᠢ ᠪᠤᠰᠤ᠃ ᠬᠠᠷᠢᠨ ᠲᠢᠲᠢᠮᠯᠡᠭᠰᠡᠨ ᠲᠠᠪᠤᠨ ᠪᠤᠷᠬᠠᠨ ᠤ᠋ ᠢᠳᠢ ᠰᠢᠳᠢ ᠰᠢᠦ ᠳᠡ ᠭᠡᠵᠦ ᠮᠠᠷᠠᠮᠪᠠ ᠤᠷᠤᠭᠤ ᠨᠢᠳᠦ ᠪᠠᠨ ᠢᠷᠮᠡᠭᠰᠡᠨ ᠢ᠋ᠶ᠋ᠡᠨ ᠭᠦᠷᠳᠡᠮ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠮᠥᠷᠦᠨ ᠳᠡᠭᠡᠷᠡ ᠠᠯᠠᠭᠠᠳᠠᠵᠤ᠄
- ᠰᠠᠮᠢᠶᠠ ᠭᠦᠷᠳᠡᠮ ᠳ᠋ᠦ᠍ ᠱᠠᠪᠢ ᠣᠷᠣᠬᠤ ᠭᠡᠵᠦ ᠬᠡᠨ ᠴᠤ᠌ ᠭᠤᠶᠤᠭᠠ ᠦᠭᠡᠢ ᠶᠦᠮ᠃ ᠴᠢ ᠭᠠᠵᠠᠷ ᠤᠨ ᠬᠠᠮᠢᠭᠠ ᠠ᠋ᠴᠠ ᠢᠷᠡᠭᠰᠡᠨ᠂ ᠨᠢᠭᠡ ᠲᠣᠭᠵᠢᠭᠠᠷ ᠮᠣᠩᠭᠣᠯ ᠭᠤᠶᠤᠪᠠ ᠤᠤ? ᠵᠠ ᠲᠡᠭᠡᠪᠡᠯ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡ᠃ ᠪᠢ ᠣᠯᠠᠨ ᠤᠳᠠᠭᠠ ᠵᠢᠭᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠳᠣᠯᠣᠭᠠᠨ ᠰᠥᠨᠢ ᠳᠣᠯᠣᠭᠠᠨ ᠦᠷ ᠢ᠋ᠶ᠋ᠡᠷ ᠯᠡ ᠠᠭᠤᠯᠵᠠᠮᠴᠠ! ᠭᠡᠵᠦ ᠬᠡᠯᠡᠵᠡᠢ᠃ ᠰᠠᠩᠵᠢ ᠭᠡᠰᠦᠯ ᠲᠡᠢᠨ ᠬᠦ᠌ ᠰᠠᠮᠢᠶᠠ ᠭᠦᠷᠳᠡᠮ ᠦ᠋ᠨ ᠨᠢᠭᠤᠴᠠ ᠱᠠᠪᠢ ᠪᠣᠯᠵᠠᠢ᠃
ᠨᠣᠮ ᠤ᠋ᠨ ᠬᠦᠷᠳᠦ ᠡᠷᠭᠢᠭᠦᠯᠬᠦ ᠰᠠᠢᠨ ᠡᠨᠡ ᠡᠳᠦᠷ ᠴᠤ᠌ ᠰᠠᠩᠵᠢ ᠭᠡᠰᠦᠯ ᠪᠤᠷᠬᠠᠨ ᠱᠠᠭᠢᠮᠦᠨᠢ ᠶ᠋ᠢᠨ ᠲᠥᠯᠥᠭᠡ ᠬᠠᠮᠤᠭ ᠯᠠ ᠢᠲᠡᠭᠡᠯ ᠢ᠋ᠶ᠋ᠡᠨ ᠵᠣᠷᠢᠭᠤᠯᠤᠨ ᠰᠢᠳᠤᠷᠭᠤ ᠭᠡᠭᠡᠨ ᠢᠶᠡᠷ ᠬᠤᠷᠠᠯ ᠬᠤᠷᠠᠬᠤ ᠤᠴᠢᠷ ᠲᠠᠢ ᠭᠡᠳᠡᠭ ᠢ᠋ᠶ᠋ᠡᠨ ᠳᠠᠬᠢᠨ ᠰᠠᠨᠠᠨ ᠰᠠᠨᠠᠭᠰᠠᠭᠠᠷ ᠪᠠᠢᠭ᠍ᠰᠠᠨ ᠪᠣᠯᠪᠠᠴᠤ ᠮᠠᠭᠲᠠᠭᠠᠯ ᠤ᠋ᠨ ᠰᠢᠯᠦᠭ ᠢ᠋ ᠨᠢ ᠮᠣᠩᠭᠣᠯ ᠢ᠋ᠶ᠋ᠠᠷ ᠤᠩᠰᠢᠵᠤ ᠣᠷᠬᠢᠭᠰᠠᠨ ᠢ᠋ ᠬᠠᠵᠠᠭᠤ ᠶ᠋ᠢᠨ ᠯᠠᠮᠠ ᠠᠨᠳᠤᠤ ᠶ᠋ᠢᠨ ᠫᠠᠭᠰᠠᠩ ᠰᠡᠮᠬᠡᠨ ᠰᠣᠨᠣᠰᠣᠴᠢᠬᠠᠭᠠᠳ ᠴᠣᠢᠨᠴᠠᠮ ᠵᠠᠪᠰᠠᠷᠯᠠᠭᠠ ᠪᠣᠯᠤᠭᠠᠰᠠᠢ ᠭᠡᠵᠦ ᠳᠠᠰᠴᠦ ᠶᠠᠳᠠᠨ ᠬᠦᠯᠢᠶᠡᠵᠦ ᠪᠠᠢᠭ᠍ᠰᠠᠨ ᠢ᠋ ᠰᠠᠩᠵᠢ ᠭᠡᠰᠦᠯ ᠮᠡᠳᠡᠭᠰᠡᠨ ᠦᠭᠡᠢ᠃ ᠪᠠᠭᠰᠢ ᠯᠠᠮᠠ ᠯᠦᠨᠳᠥᠭᠵᠤᠨᠠᠢ ᠶ᠋ᠢ ᠯᠡ ᠬᠠᠷᠢᠨ ᠮᠡᠳᠡᠴᠢᠬᠡᠵᠦ ᠮᠠᠭᠠᠳ ᠦᠭᠡᠢ ᠭᠡᠵᠦ ᠡᠮᠢᠶᠡᠬᠦ ᠳ᠋ᠡᠭᠡᠨ ᠰᠠᠩᠵᠢ ᠭᠡᠰᠦᠯ ᠨᠢᠳᠦᠨ ᠦ᠌ ᠪᠤᠯᠤᠩ ᠢ᠋ᠶ᠋ᠠᠷ ᠪᠠᠭᠰᠢ ᠭᠠᠪᠵᠤ ᠤᠷᠤᠭᠤ ᠪᠡᠨ ᠰᠠᠮ ᠬᠠᠷᠠᠪᠠ᠃ ᠭᠠᠪᠵᠤ ᠯᠦᠨᠳᠥᠭᠵᠤᠨᠠᠢ ᠵᠡᠰᠡᠨ ᠤᠯᠠᠭᠠᠨ ᠴᠢᠷᠠᠢ ᠶ᠋ᠢ ᠪᠡᠨ ᠮᠠᠯᠢᠢᠯᠭᠠᠨ᠂ ᠭᠦᠨ ᠠᠲᠤᠷᠢᠶᠠᠲᠤ ᠳᠤᠬᠤ ᠪᠠᠨ ᠦᠷᠴᠢᠢᠯᠭᠡᠨ᠂ ᠶᠠᠭᠤ ᠴᠤ᠌ ᠪᠤᠯᠤᠭᠠ ᠦᠭᠡᠢ ᠮᠡᠲᠦ ᠠᠮᠢᠷᠯᠠᠩᠭᠤᠶᠠ ᠰᠠᠭᠤᠵᠤ᠂ ᠤᠩᠰᠢᠯᠭᠠ ᠪᠠᠨ ᠤᠩᠰᠢᠨ ᠵᠤᠵᠠᠭᠠᠨ ᠤᠷᠤᠭᠤᠯ ᠢ᠋ᠶ᠋ᠠᠨ ᠠᠷᠠᠢ ᠶᠠᠳᠠᠨ ᠬᠥᠳᠡᠯᠭᠡᠵᠦ ᠪᠠᠢᠯᠠ᠃
《 ᠪᠠᠭᠰᠢᠲᠠᠨ ᠲᠡᠷᠡ ᠬᠣᠯᠠ ᠠ᠋ᠴᠠ ᠮᠢᠨᠦ ᠳᠠᠭᠤ ᠶ᠋ᠢ ᠶᠠᠭᠠᠬᠢᠵᠤ ᠴᠤ᠌ ᠢᠯᠭᠠᠵᠤ ᠮᠡᠳᠡᠬᠦ ᠶᠦᠮ ᠪᠢᠯᠡ ᠳᠠ᠃ ᠬᠡᠢ ᠳᠡᠮᠡᠢ ᠰᠡᠳᠬᠢᠯ ᠵᠣᠪᠠᠬᠤ ᠬᠡᠷᠡᠭ ᠦᠭᠡᠢ》 ᠭᠡᠵᠦ ᠰᠠᠩᠵᠢ ᠪᠣᠳᠣᠪᠠ᠃
ᠯᠠᠮᠠ ᠨᠠᠷ ᠳᠠᠬᠢᠭᠠᠳ ᠯᠠ ᠲᠤᠨᠵᠤᠷᠳᠠᠨ ᠳᠠᠭᠤ ᠶ᠋ᠢ ᠪᠡᠨ ᠡᠷᠭᠦᠨ ᠪᠦᠳᠦᠭᠦᠷᠡᠭᠦᠯᠵᠦ ᠰᠦᠮᠡ ᠳᠦᠭᠦᠷᠡᠩ ᠳᠦᠩᠭᠢᠨᠡᠯᠳᠦᠪᠡ᠃ ᠰᠠᠩᠵᠢ ᠳᠠᠭᠤᠷᠢᠶᠠᠬᠤ ᠵᠠᠭᠤᠷᠠ᠄ 《 ᠪᠠᠭᠰᠢ ᠯᠠᠮᠠ ᠮᠡᠳᠡᠯᠡ ᠴᠤ᠌ ᠭᠡᠰᠡᠨ ᠨᠠᠳᠠ ᠳᠤ ᠥᠷᠥᠰᠢᠶᠡᠯ ᠦᠵᠡᠭᠦᠯᠦᠨᠡ ᠪᠠᠢᠬᠤ 》 ᠭᠡᠵᠦ ᠪᠣᠳᠣᠵᠠᠢ᠃ ᠰᠠᠩᠵᠢ ᠶ᠋ᠢᠨ ᠪᠠᠭᠰᠢ ᠯᠠᠮᠠ ᠯᠦᠨᠳᠦᠭᠵᠤᠨᠠᠢ ᠲᠡᠭᠦᠨ ᠢ᠋ ᠡᠪᠡᠳᠴᠢᠨ ᠡᠴᠡ ᠠᠪᠤᠷᠠᠬᠤ ᠭᠡᠵᠦ ᠮᠡᠩᠭᠡᠨ ᠵᠠᠰᠠᠯ᠂ ᠰᠦᠨᠡᠰᠦ ᠳᠠᠭᠤᠳᠠᠬᠤ᠂ ᠵᠣᠯᠢᠭ ᠲᠤ᠌ ᠭᠠᠷᠭᠠᠬᠤ ᠬᠦᠷᠲᠡᠯᠡ ᠠᠷᠭᠠ ᠬᠡᠷᠡᠭᠯᠡᠭᠡᠳ ᠪᠠᠷᠠ ᠦᠭᠡᠢ ᠪᠣᠯᠪᠠᠴᠤ ᠰᠠᠩᠵᠢ ᠡᠳᠡᠭᠡᠷᠡᠭᠰᠡᠨ ᠬᠣᠢᠨᠠ ᠪᠠᠨ᠄
- ᠪᠠᠭᠰᠢᠲᠠᠨ ᠲᠠᠨ ᠤ᠋ ᠠᠴᠢ ᠪᠠᠷ ᠡᠪᠡᠳᠴᠢᠨ ᠡᠴᠡ ᠰᠠᠯᠪᠠ᠃ ᠭᠢᠯᠠᠢᠯᠠ ᠭᠡᠳ ᠬᠡᠯᠡᠴᠢᠬᠡᠵᠡᠢ᠃ ᠲᠡᠭᠡᠭᠰᠡᠨ ᠴᠢᠨᠢ ᠪᠠᠭᠰᠢ ᠯᠠᠮᠠ ᠲᠡᠭᠦᠨ ᠳ᠋ᠦ᠍ ᠪᠠᠶᠠᠷᠯᠠᠵᠤ᠄
- ᠶᠡᠬᠡ ᠬᠦᠨᠳᠦ ᠢᠷᠣᠠ ᠶ᠋ᠢᠨ ᠮᠠᠭᠤ ᠦᠢᠯᠡ ᠱᠦᠭᠯᠡᠭᠰᠡᠨ ᠪᠠᠢᠭ᠍ᠰᠠᠨ᠃ ᠭᠤᠷᠪᠠᠨ ᠳᠠᠪᠬᠤᠷ ᠨᠢᠭᠦᠯ ᠬᠣᠣᠷ ᠲᠠᠰᠢᠷᠯᠠᠭᠰᠠᠨ ᠪᠠᠢᠭ᠍ᠰᠠᠨ ᠰᠢᠭ᠋ ᠪᠢᠯᠡ᠃ ᠶᠠᠮᠠᠷ ᠴᠤ᠌ ᠭᠡᠰᠡᠨ ᠨᠢᠭᠡᠨ ᠵᠠᠭᠤᠨ ᠨᠢᠭᠡᠨ ᠡᠪᠡᠳᠴᠢᠨ ᠢ ᠮᠢᠨᠦ ᠤᠩᠰᠢᠯᠭᠠ ᠬᠠᠢᠯᠠᠭᠤᠯᠵᠤ ᠥᠭᠭᠦᠭᠰᠡᠨ ᠪᠠᠢᠯ ᠦᠭᠡᠢ ᠳᠡ᠃ ᠵᠠ ᠲᠡᠷᠡ ᠴᠤ᠌ ᠶᠠᠭᠠᠬᠢᠬᠤᠪ᠃ ᠰᠦᠨᠡᠰᠦ ᠴᠢᠨᠢ ᠡᠷᠭᠢᠵᠦ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠪᠣᠯᠤᠭᠠ᠃ ᠴᠢ ᠶᠡᠷᠦ ᠨᠢ ᠮᠣᠩᠭᠣᠯ ᠭᠠᠵᠠᠷ ᠲᠤ᠌ ᠠᠯᠢᠪᠠ ᠬᠡᠦᠬᠡᠨ ᠦᠯᠡᠳᠡᠭᠡᠵᠦ ᠣᠷᠬᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠳᠠᠭ ᠶᠤᠮ ᠪᠢᠰᠢ ᠪᠠᠢᠭᠠ ᠪᠢᠵᠡ? ᠲᠡᠢᠮᠦ ᠶᠠᠭᠤᠮᠠᠨ ᠳ᠋ᠤ᠌ ᠴᠤ᠌ ᠰᠦᠨᠡᠰᠦ ᠭᠦᠶᠦᠴᠢᠭᠡᠬᠦ ᠪᠡᠷ ᠢᠶᠠᠨ ᠪᠤᠴᠠᠵᠤ ᠢᠷᠡᠳᠡᠭ ᠦᠭᠡᠢ ᠵᠣᠪᠠᠭᠠᠭᠠᠳ ᠪᠠᠢᠳᠠᠭ? ᠭᠡᠵᠦ ᠲᠤᠯᠭᠠᠨ ᠠᠰᠠᠭᠤᠬᠤ ᠳ᠋ᠤ᠌ ᠰᠠᠩᠵᠢ ᠭᠡᠰᠦᠯ ᠨᠢᠭᠤᠷ ᠨᠢ ᠰᠢᠲᠠᠳᠠᠯᠠ ᠪᠡᠨ ᠢᠴᠢᠵᠦ᠄
- ᠦᠭᠡᠢ᠂ ᠦᠭᠡᠢ᠃ ᠪᠢ ᠴᠢᠨᠢ ᠰᠠᠬᠢᠯ ᠰᠠᠨᠸᠠᠷ ᠢ᠋ᠶ᠋ᠠᠨ ᠠᠯᠳᠠᠪᠠᠯ ᠨᠢᠭᠦᠯ ᠭᠡᠳᠡᠭ ᠢ᠋ ᠮᠡᠳᠡᠨᠡ ᠪᠠᠭᠰᠢ ᠮᠢᠨᠢ? ᠭᠡᠵᠦ ᠠᠷᠠᠢᠬᠢᠨ ᠥᠴᠢᠵᠦ ᠪᠢᠯᠡ᠃ ᠱᠠᠪᠢ ᠶ᠋ᠢᠨ ᠢ᠋ᠶ᠋ᠡᠨ ᠢᠴᠢᠵᠦ ᠵᠣᠪᠠᠭᠰᠠᠨ ᠪᠠᠢᠳᠠᠯ ᠤ᠋ᠨ ᠬᠡᠮᠵᠢᠶᠡ ᠪᠡᠷ ᠴᠠᠭᠠᠳᠤ ᠦᠢᠯᠡ ᠶ᠋ᠢ ᠨᠢ ᠲᠣᠭᠠᠴᠠᠭᠠᠯᠠᠳᠠᠭ ᠭᠠᠪᠵᠢᠲᠠᠨ ᠦᠨᠡᠬᠡᠷ ᠰᠠᠩᠵᠢ ᠶ᠋ᠢᠨ ᠦᠭᠡᠨ ᠳ᠋ᠦ᠍ ᠢᠲᠡᠭᠡᠵᠡᠢ᠃ ᠰᠠᠩᠵᠢ ᠲᠡᠢᠨ ᠬᠦ᠌ ᠠᠮᠢᠳᠤ ᠶᠠᠪᠤᠭᠠ ᠪᠠᠨ ᠪᠠᠭᠰᠢ ᠯᠠᠮᠠ᠂ ᠮᠠᠷᠠᠮᠪᠠ᠂ ᠭᠦᠷᠳᠡᠮ ᠨᠠᠷ ᠤ᠋ᠨ ᠨᠣᠮ ᠡᠷᠳᠡᠮ ᠦ᠋ᠨ ᠨᠡᠢᠯᠡᠪᠦᠷᠢ ᠠᠴᠢ ᠭᠡᠵᠦ ᠦᠵᠡᠵᠡᠢ᠃ ᠭᠡᠬᠦ ᠳᠡᠭᠡᠨ ᠡᠷᠡᠭᠡᠯᠵᠡᠵᠦ ᠶᠠᠪᠤᠭᠰᠠᠨ ᠤᠳᠠᠭᠠ ᠪᠣᠢ᠃ ᠲᠡᠭᠦᠨ ᠦ᠌ ᠡᠷᠡᠭᠡᠯᠵᠡᠭᠡ ᠶ᠋ᠢ ᠪᠠᠭᠰᠢ ᠯᠠᠮᠠ ᠨᠢ ᠤᠷᠠᠨ ᠦᠭᠡ ᠪᠡᠷ ᠲᠠᠢᠯᠵᠤ ᠥᠭᠴᠡᠢ᠃ ᠨᠢᠭᠦᠯ᠂ ᠠᠯᠳᠠᠰ ᠱᠦᠭᠯᠡᠭᠰᠡᠨ ᠮᠠᠭᠤ ᠢᠷᠣᠠ ᠶ᠋ᠢᠨ ᠬᠡᠲᠦᠷᠬᠡᠢ ᠶᠡᠬᠡ ᠡᠴᠡ ᠪᠣᠯᠵᠤ ᠣᠯᠠᠨ ᠲᠣᠭᠠᠨ ᠤ᠋ ᠵᠠᠩ ᠦᠢᠯᠡ ᠬᠢᠬᠦ ᠡᠴᠡ ᠨᠠᠰᠢ ᠡᠳᠡᠭᠡᠬᠦ ᠦᠭᠡᠢ ᠪᠠᠢᠭ᠍ᠰᠠᠨ ᠭᠡᠵᠦ ᠲᠡᠭᠦᠨ ᠳᠦ ᠣᠢᠯᠠᠭᠠᠭᠤᠯᠪᠠ᠃ ᠪᠠᠰᠠ ᠤᠷᠢᠳᠤ ᠨᠠᠰᠤᠨ ᠳ᠋ᠠᠭᠠᠨ ᠥᠨᠥ ᠨᠠᠰᠤᠨ ᠤ᠋ ᠡᠳᠦᠢ ᠦᠶᠡ ᠳ᠋ᠦ᠍ ᠬᠢᠭᠰᠡᠨ ᠦᠢᠯᠡ ᠶ᠋ᠢᠨ ᠦᠷᠡ ᠶᠤᠮ ᠭᠡᠵᠦ ᠪᠠᠭᠰᠢ ᠨᠢ ᠶᠠᠷᠢᠭᠰᠠᠨ ᠢ᠋ ᠰᠠᠩᠵᠢ ᠦᠨᠡᠮᠰᠢᠵᠦ ᠲᠣᠭᠲᠠᠭᠠᠵᠠᠢ᠃ ᠬᠠᠷᠢᠨ ᠪᠡᠷᠢᠮᠦᠭ ᠡᠮᠡᠭᠡᠨ ᠦ᠌ ᠠᠴᠢᠯᠠᠯ ᠢ᠋ ᠰᠠᠩᠵᠢ ᠭᠡᠰᠦᠯ ᠶᠡᠷᠦ ᠶ᠋ᠢᠨ ᠯᠡ ᠨᠢᠭᠡ ᠲᠤᠰ ᠭᠡᠵᠦ ᠦᠵᠡᠵᠡᠢ᠃ ᠬᠣᠭᠣᠯᠠ ᠤᠮᠳᠠ ᠪᠠᠷ ᠰᠤᠪᠢᠯᠠᠬᠤ ᠨᠢ ᠡᠷᠳᠡᠮ ᠦ᠋ᠨ ᠠᠴᠢ ᠪᠢᠰᠢ᠂ ᠬᠠᠷᠢᠨ ᠶᠡᠷᠦᠳᠡ ᠶ᠋ᠢᠨ ᠠᠰᠠᠷᠠᠮᠵᠢ ᠶᠤᠮ ᠭᠡᠵᠦ ᠪᠣᠳᠣᠵᠠᠢ᠃ ᠢᠩᠭᠢᠵᠦ ᠴᠤ᠌ ᠪᠤᠳᠤᠭᠤᠯᠬᠤ ᠦᠭᠡ ᠶ᠋ᠢ ᠪᠠᠭᠰᠢ ᠯᠠᠮᠠ ᠨᠢ ᠣᠯᠵᠤ ᠬᠡᠯᠡᠵᠡᠢ᠃
ᠪᠤᠷᠬᠠᠨ ᠪᠤᠳ᠋ᠳ᠋ᠾᠠ ᠪᠤᠶᠤ ᠱᠠᠭᠢᠮᠦᠨᠢ ᠶ᠋ᠢᠨ ᠮᠡᠨᠳᠦᠯᠡᠭᠰᠡᠨ ᠡᠳᠦᠷ᠂ ᠵᠤᠨ ᠤ᠋ ᠡᠬᠢᠨ ᠰᠠᠷᠠ ᠶ᠋ᠢᠨ ᠳᠣᠯᠣᠭᠠᠨ ᠤ᠋ ᠬᠤᠷᠠᠯ᠂ ᠮᠥᠨ ᠰᠠᠷᠠ ᠶ᠋ᠢᠨ ᠨᠠᠢ᠍ᠮᠠᠨ ᠳ᠋ᠤ᠌ ᠱᠠᠭᠢᠮᠦᠨᠢ ᠶ᠋ᠢᠨ ᠦᠰᠦ ᠪᠡᠨ ᠦᠷᠭᠦᠭᠡᠯᠭᠡᠭᠰᠡᠨ᠂ ᠠᠷᠪᠠᠨ ᠲᠠᠪᠤᠨ ᠳ᠋ᠦ᠍ ᠪᠤᠳ᠋ᠳ᠋ᠾᠠ ᠪᠣᠯᠤᠭᠰᠠᠨ᠂ ᠳᠠᠷᠠᠭᠠ ᠨᠢ ᠮᠥᠨ ᠲᠡᠷᠡ ᠡᠳᠦᠷ ᠦ᠋ᠨ ᠣᠢ ᠪᠠᠷ ᠱᠠᠭᠢᠮᠦᠨᠢ ᠶ᠋ᠢᠨ ᠲᠠᠭᠠᠯᠠᠯ ᠲᠡᠭᠦᠰᠴᠦ ᠨᠢᠷᠸᠠᠨ ᠳᠦᠷᠢ ᠶ᠋ᠢ ᠣᠯᠤᠭᠰᠠᠨ ᠶᠣᠰᠣᠯᠠᠯ ᠤ᠋ᠨ ᠬᠤᠷᠠᠯ ᠤ᠋ᠳ ᠥᠩᠭᠡᠷᠡᠵᠦ ᠣᠳᠣ ᠴᠤᠢᠩᠬᠤᠷ ᠳ᠋ᠣᠶ᠋ᠢᠴᠠᠩ ᠪᠤᠶᠤ ᠨᠣᠮ ᠤ᠋ᠨ ᠭᠦᠷᠳ᠋ᠦ ᠡᠷᠭᠢᠭᠦᠯᠬᠦ ᠬᠤᠷᠠᠯ ᠬᠢᠵᠦ ᠪᠠᠢᠭᠠ ᠨᠢ ᠡᠨᠡ ᠶᠤᠮ᠃ ᠬᠠᠷᠠᠩᠭᠠ ᠲᠠᠬᠢᠯ ᠮᠠᠭᠲᠠᠭᠠᠯ᠂ ᠵᠠᠯᠪᠠᠷᠢᠯ᠂ ᠢᠷᠦᠭᠡᠯ ᠥᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠵᠠᠯᠭᠠᠨ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠪᠠᠢᠯᠠ᠃ ᠱᠠᠭᠢᠮᠦᠨᠢ ᠪᠤᠷᠬᠠᠨ ᠪᠣᠯ ᠬᠣᠷᠸᠠ ᠳ᠋ᠤ᠌ ᠲᠥᠷᠥᠨ᠂ ᠮᠡᠨᠳᠦᠯᠡᠵᠦ᠂ ᠴᠠᠭ ᠢ᠋ ᠡᠵᠡᠯᠡᠭᠰᠡᠨ ᠠᠩᠬᠠᠨ ᠤ᠋ ᠶᠡᠬᠡ ᠪᠤᠷᠬᠠᠳ ᠤ᠋ᠨ ᠳᠥᠷᠪᠡ ᠳ᠋ᠡᠬᠢ ᠭᠡᠳᠡᠭ ᠢ᠋ ᠰᠠᠩᠵᠢ ᠠᠯᠢ ᠡᠷᠲᠡ ᠳ᠋ᠦ᠍ ᠮᠡᠳᠡᠳᠡᠭ ᠪᠣᠯᠤᠭᠰᠠᠨ ᠪᠢᠯᠡ᠃ ᠪᠦᠷ ᠪᠠᠭᠠ ᠳ᠋ᠤ᠌ ᠨᠢ ᠴᠤᠢᠮᠴᠤᠭ ᠭᠡᠯᠦᠩ ᠲᠡᠭᠦᠨ ᠳ᠋ᠦ᠍ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠶᠦᠮ᠃
- ᠬᠣᠷᠸᠠ ᠳ᠋ᠤ᠌ ᠮᠢᠩᠭᠠᠨ ᠪᠤᠷᠬᠠᠨ ᠵᠠᠯᠠᠷᠠᠬᠤ ᠤᠴᠢᠷ ᠲᠠᠢ᠃ ᠪᠤᠷᠬᠠᠨ ᠪᠦᠬᠦᠨ ᠦ᠌ ᠠᠩᠬᠠ ᠲᠦᠷᠥᠭᠦᠯᠦᠭᠴᠢ ᠨᠢ ᠣᠷᠴᠢᠯᠠᠩ ᠢ᠋ ᠡᠪᠳᠡᠭᠴᠢ ᠬᠡᠮᠡᠬᠦ ᠶᠡᠬᠡ ᠭᠠᠷᠭᠠᠰᠤᠨᠳᠡᠢ ᠪᠢᠯᠡ᠃ ᠬᠦᠮᠦᠨ ᠲᠥᠷᠥᠯᠬᠢᠲᠡᠨ ᠪᠣᠢ ᠪᠣᠯᠤᠭᠠᠳ ᠳᠥᠴᠢᠨ ᠮᠢᠩᠭᠠᠨ ᠵᠢᠯ ᠥᠩᠭᠡᠷᠡᠬᠦ ᠦᠶᠡ ᠳ᠋ᠦ᠍ ᠶᠢᠰᠦ ᠳ᠋ᠡᠬᠢ ᠭᠠᠯᠪᠠ ᠳᠤ ᠲᠥᠷᠦᠵᠢ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠵᠢᠭᠠᠭᠰᠠᠨ᠃
- ᠬᠣᠶᠠᠷ ᠲᠠᠬᠢ ᠶᠡᠬᠡ ᠪᠤᠷᠬᠠᠨ ᠭᠠᠨᠠᠭᠠᠮᠤᠭᠤᠨᠢ ᠪᠤᠶᠤ ᠠᠯᠲᠠᠨ ᠴᠢᠳᠠᠭᠴᠢ ᠪᠣᠯᠪᠠᠰᠤ ᠬᠦᠮᠦᠨ ᠲᠥᠷᠥᠯᠬᠢᠲᠡᠨ ᠭᠠᠷᠤᠭᠠᠳ ᠭᠤᠴᠢᠨ ᠮᠢᠩᠭᠠᠨ ᠵᠢᠯ ᠦ᠋ᠨ ᠨᠢᠭᠤᠷ ᠦᠵᠡᠬᠦ ᠳ᠋ᠦ᠍ ᠬᠣᠷᠸᠠ ᠳ᠋ᠤ᠌ ᠵᠠᠶᠠᠭᠠᠵᠠᠢ᠃ ᠳᠠᠷᠠᠭᠠ ᠪᠠᠷ ᠬᠣᠷᠢᠨ ᠮᠢᠩᠭᠠᠨ ᠵᠢᠯ ᠦ᠋ᠨ ᠵᠠᠭᠠᠭ ᠲᠤ᠌ ᠭᠡᠷᠡᠯ ᠰᠠᠬᠢᠭᠴᠢ ᠶᠡᠬᠡ ᠺᠠᠰᠢᠪ ᠪᠤᠷᠬᠠᠨ ᠵᠠᠶᠠᠭᠠᠪᠠ᠃ ᠪᠢᠳᠡᠨ ᠦ᠌ ᠡᠵᠡᠨ ᠶᠡᠬᠡ ᠱᠠᠭᠢᠮᠦᠨᠢ ᠳᠥᠷᠪᠡ ᠳ᠋ᠡᠬᠢ ᠶᠡᠬᠡ ᠪᠤᠷᠬᠠᠨ ᠪᠣᠯᠤᠨ ᠡᠨᠡ ᠬᠣᠷᠸᠠ ᠳ᠋ᠤ᠌ ᠮᠡᠨᠳᠦᠯᠡᠵᠡᠢ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠣᠢᠭᠠ ᠦᠭᠡᠢ ᠳᠠᠪᠲᠠᠨ ᠵᠢᠭᠠᠭᠰᠠᠨ ᠢ᠋ ᠭᠡᠰᠦᠯ ᠰᠠᠩᠵᠢ ᠦᠭᠡ ᠦᠰᠦᠭ ᠢ᠋ᠶ᠋ᠡᠷ ᠨᠢ ᠬᠣᠶᠠᠷ ᠬᠡᠯᠡ ᠪᠡᠷ ᠡᠷᠲᠡ ᠤᠷᠢᠳᠤ ᠴᠡᠭᠡᠵᠢᠯᠡᠭᠰᠡᠨ ᠪᠠᠢᠯᠠ᠃ ᠪᠤᠳ᠋ᠳ᠋ᠾᠠ ᠪᠤᠷᠬᠠᠨ ᠱᠠᠭᠢᠮᠦᠨᠢ ᠶ᠋ᠢᠨ ᠨᠠᠶᠠᠨ ᠲᠡᠮᠳᠡᠭ᠂ ᠭᠤᠴᠢᠨ ᠬᠣᠶᠠᠷ ᠪᠢᠯᠢᠭ ᠴᠢᠨᠠᠷ ᠢ᠋ ᠰᠠᠩᠵᠢ ᠭᠡᠰᠦᠯ ᠲᠤᠭᠳᠡᠷᠡᠯ ᠦᠭᠡᠢ ᠲᠤᠭᠠᠴᠢᠵᠤ ᠮᠡᠳᠡᠨᠡ᠃
《 ᠬᠢᠮᠤᠰᠤ ᠨᠢ ᠵᠡᠰ ᠦ᠋ᠨ ᠥᠩᠭᠡ ᠮᠡᠲᠦ᠂
ᠬᠤᠷᠤᠭᠤ ᠨᠢ ᠪᠥᠭᠡᠷᠡᠩᠬᠡᠢ᠂ ᠨᠠᠷᠢᠨ᠂
ᠰᠤᠳᠠᠰᠤ ᠨᠢ ᠵᠠᠩᠭᠢᠷᠠᠭᠠ ᠦᠭᠡᠢ᠂
ᠱᠠᠭᠠᠢ ᠨᠢ ᠢᠯᠡᠷᠬᠡᠢ ᠦᠭᠡᠢ᠂
ᠠᠷᠰᠯᠠᠨ ᠤ᠋ ᠶᠠᠪᠤᠳᠠᠯ ᠢ᠋ᠶ᠋ᠠᠷ ᠠᠵᠢᠷᠠᠭᠴᠢ᠂
ᠠᠭᠤᠤ ᠰᠠᠢᠬᠠᠨ ᠪᠡᠶᠡ ᠲᠡᠢ᠂
ᠪᠡᠶᠡ ᠳ᠋ᠦ᠍ ᠮᠡᠩᠭᠡ ᠬᠢᠭᠡᠳ ᠰᠡᠪᠬᠡ ᠦᠭᠡᠢ
ᠮᠤᠲᠤᠷ ᠨᠢ ᠮᠣᠳᠣᠨ ᠤ᠋ ᠤᠩᠭᠠᠷᠠᠯ ᠮᠡᠲᠦ᠂
ᠴᠢᠬᠢᠨ ᠦ᠌ ᠬᠣᠷᠮᠣᠢ ᠵᠤᠵᠠᠭᠠᠨ᠂ ᠰᠤᠪᠢᠨᠪᠤᠤ
ᠦᠰᠨᠢᠷ ᠨᠢ ᠷᠠᠰᠢᠨᠠᠷ ᠮᠡᠲᠦ ᠬᠠᠷᠠ》
ᠭᠡᠬᠦ ᠵᠡᠷᠭᠡ ᠪᠡᠷ ᠨᠠᠶᠠᠨ ᠲᠡᠮᠳᠡᠭ᠂ ᠭᠤᠷᠪᠠᠨ ᠵᠠᠭᠤᠨ ᠵᠢᠷᠠᠨ ᠠᠪᠤᠭᠠᠢᠯᠠᠭᠠ ᠲᠠᠢ᠃ ᠪᠤᠷᠬᠠᠨ ᠱᠠᠭᠢᠮᠦᠨᠢ ᠵᠢ ᠬᠦᠮᠦᠨ ᠦ᠌ ᠭᠤᠸᠠ ᠦᠵᠡᠰᠬᠦᠯᠡᠩ ᠦ᠋ᠨ ᠳᠡᠭᠡᠳᠦ ᠬᠡᠮᠵᠢᠭᠦᠷ ᠪᠣᠯᠭᠠᠨ ᠵᠢᠷᠤᠵᠤ᠂ ᠠᠯᠲᠠ᠂ ᠬᠦᠷᠡᠯ ᠭᠠᠤᠯᠢ ᠪᠠᠷ ᠴᠢᠳᠬᠤᠵᠤ ᠤᠷᠠᠯᠠᠨ ᠰᠦᠮᠡ ᠪᠦᠷᠢ ᠳ᠋ᠦ᠍ ᠰᠢᠲᠦᠯᠭᠡᠲᠡᠨ ᠪᠣᠯᠭᠠᠨ ᠳ᠋ᠤ᠌ ᠲᠦᠭᠡᠭᠡᠨ ᠰᠢᠲᠦᠭᠦᠯᠦᠭᠰᠡᠨ ᠪᠤᠳ᠋ᠳ᠋ᠾᠠ ᠶ᠋ᠢᠨ ᠱᠠᠰᠢᠨ ᠤ᠋ ᠨᠠᠨᠳᠢᠨ ᠡᠷᠳᠡᠨᠢ ᠳ᠋ᠦ᠍ ᠵᠣᠷᠢᠭᠤᠯᠤᠭᠰᠠᠨ ᠬᠤᠷᠠᠯ ᠳᠡᠭᠡᠷᠡ ᠯᠠᠮᠠ ᠪᠦᠷᠢ ᠶᠡᠬᠡ ᠯᠡ ᠬᠢᠴᠢᠶᠡᠵᠦ ᠶᠣᠰᠣ ᠶ᠋ᠢ ᠰᠠᠬᠢᠵᠤ᠂ ᠨᠣᠮ ᠢ᠋ ᠪᠢᠰᠢᠯᠭᠠᠳᠠᠭ ᠠᠵᠢ᠃
ᠰᠠᠩᠵᠢ ᠪᠣᠢᠵᠢ ᠵᠦᠭᠰᠢᠨ ᠮᠠᠳᠤᠭᠳᠠᠨ᠂
ᠷᠠᠪᠠᠪ ᠯᠢᠨᠰᠢ ᠢᠨᠳᠡ ᠵᠠᠮᠪᠠᠳᠢ᠂
ᠰᠠᠩᠵᠢ ᠰᠢᠨᠲᠦ ᠮᠢᠭ᠍ᠲᠤ ᠫᠦᠯᠪᠡᠭ᠂
ᠲᠣᠭᠣᠨ ᠨᠠᠮᠳᠠᠭ ᠰᠢᠨᠯᠡᠵᠦᠳ ᠪᠠᠷᠱᠤᠭ
ᠭᠡᠵᠦ ᠰᠢᠷᠡᠭᠡᠲᠦ ᠯᠠᠮᠠ ᠭᠠᠭᠴᠠᠭᠠᠷ ᠤᠶᠠᠩᠭᠠᠯᠠᠨ ᠤᠩᠰᠢᠬᠤ ᠶ᠋ᠢ ᠰᠣᠨᠣᠰᠴᠤ ᠰᠠᠭᠤᠬᠤ ᠳ᠋ᠠᠭᠠᠨ ᠰᠠᠩᠵᠢ ᠭᠡᠰᠦᠯ᠄
- ᠭᠠᠵᠠᠷ ᠳᠡᠯᠡᠬᠡᠢ ᠪᠣᠯᠤᠨ ᠰᠦᠮᠪᠦᠷ ᠠᠭᠤᠯᠠ ᠲᠡᠷᠢᠭᠦᠲᠡᠨ ᠢ᠋ ᠪᠦᠲᠦᠭᠡᠨ ᠬᠦᠵᠢᠰ ᠢ᠋ᠶ᠋ᠡᠷ ᠰᠤᠷᠴᠢᠵᠤ᠂ ᠣᠭᠲᠠᠷᠭᠤᠢ ᠶ᠋ᠢ ᠨᠠᠷᠠᠨ ᠰᠠᠷᠠᠨ ᠢ᠋ᠶ᠋ᠠᠷ ᠴᠢᠮᠡᠭᠰᠡᠨ ᠪᠤᠷᠬᠠᠨ ᠳ᠋ᠤ᠌ ᠠᠴᠢ ᠮᠠᠨᠳᠤᠯ ᠡᠷᠭᠦᠶᠡ! ᠭᠡᠵᠦ ᠮᠥᠨ ᠯᠡ ᠮᠣᠩᠭᠣᠯ ᠢ᠋ᠶ᠋ᠠᠷ ᠲᠣᠯᠣᠭᠠᠢ ᠳ᠋ᠠᠭᠠᠨ ᠳᠤᠷᠠᠢᠲᠠᠯᠠ ᠪᠣᠳᠣᠵᠤ ᠪᠠᠢᠯᠠ᠃
ᠳᠡᠭᠡᠷᠡ ᠦᠭᠡᠢ ᠳᠡᠭᠡᠳᠦ᠂ ᠲᠡᠷᠢᠭᠦᠯᠡᠰᠢ ᠦᠭᠡᠢ ᠲᠡᠷᠢᠭᠦᠨ᠂ ᠦᠬᠦᠰᠢ ᠦᠭᠡᠢ ᠮᠥᠩᠬᠡ᠂ ᠦᠵᠡᠭᠳᠡᠬᠦ ᠪᠣᠯᠣᠳ ᠥᠯᠥ᠍ ᠦᠵᠡᠭᠳᠡᠬᠦ ᠬᠠᠮᠤᠭ ᠢ᠋ ᠪᠦᠲᠦᠭᠡᠭᠴᠢ ᠭᠡᠬᠦᠴᠢᠯᠡᠨ ᠭᠤᠷᠪᠠᠨ ᠵᠠᠭᠤᠨ ᠵᠢᠷᠠᠨ ᠠᠪᠤᠭᠠᠢᠯᠠᠯ ᠴᠢᠮᠡᠭ ᠲᠡᠢ ᠪᠤᠷᠬᠠᠨ ᠪᠤᠳ᠋ᠳ᠋ᠾᠠ ᠶ᠋ᠢᠨ ᠦᠢᠯᠡ᠂ ᠭᠠᠪᠢᠶᠠᠨ ᠤ᠋ ᠲᠤᠬᠠᠢ ᠵᠠᠯᠪᠠᠷᠢᠯ ᠤ᠋ᠨ ᠡᠨᠡ ᠬᠤᠷᠠᠯ ᠳᠡᠭᠡᠷᠡ ᠰᠠᠩᠵᠢ ᠭᠡᠰᠦᠯ ᠳ᠋ᠦ᠍ ᠮᠡᠳᠡᠬᠦ ᠦᠭᠡᠢ ᠶᠦᠮ ᠪᠠᠷᠤᠭ ᠦᠭᠡᠢ ᠪᠠᠢᠵᠠᠢ᠃ ᠡᠢᠮᠦ ᠳ᠋ᠦ᠍ ᠲᠡᠷᠡ ᠦᠶᠡ ᠦᠶᠡ ᠥᠭᠡᠷᠡ ᠶᠠᠭᠤᠮᠠ ᠪᠣᠳᠣᠬᠤ ᠵᠠᠪ ᠣᠯᠵᠤ ᠪᠠᠢᠵᠠᠢ᠃ ᠰᠠᠪᠠ ᠰᠢᠮᠡ᠂ ᠰᠠᠨᠰᠠᠷ ᠣᠷᠴᠢᠯᠠᠩ ᠤ᠋ᠨ ᠶᠢᠷᠲᠢᠨᠴᠦ ᠶ᠋ᠢ ᠪᠦᠲᠦᠭᠡᠭᠰᠡᠨ ᠭᠡᠵᠦ ᠪᠤᠷᠬᠠᠨ ᠪᠠᠭᠰᠢ ᠶ᠋ᠢ ᠯᠠᠮᠠ ᠨᠠᠷ ᠲᠤ᠌ ᠪᠦᠷᠢᠨ ᠢ᠋ᠶ᠋ᠡᠷ ᠢᠲᠡᠭᠡᠭᠦᠯᠦᠭᠰᠡᠨ ᠤᠴᠢᠷ ᠲᠡᠳᠡ ᠤᠤᠯ ᠨᠣᠮ ᠢ᠋ ᠶᠣᠰᠣ ᠪᠣᠯᠭᠠᠨ ᠦᠭᠡ ᠦᠰᠦᠭ ᠠᠯᠳᠠᠯ ᠦᠭᠡᠢ ᠴᠡᠭᠡᠵᠢᠯᠡᠭᠰᠡᠨ ᠪᠠᠢᠬᠤ ᠨᠢ ᠵᠦᠢ ᠶ᠋ᠢᠨ ᠬᠡᠷᠡᠭ ᠪᠢᠯᠡ᠃ᠲᠡᠷᠡᠴᠢᠯᠡᠨ ᠢ᠋ᠶ᠋ᠡᠷ ᠥᠨᠥᠳᠥᠷ ᠦ᠋ᠨ ᠬᠤᠷᠠᠯ ᠤᠷᠢᠳᠤ ᠨᠢ ᠲᠦᠮᠡᠨᠳ᠋ᠡ ᠳᠠᠪᠲᠠᠭᠰᠠᠨ ᠲᠠᠨᠢᠯ ᠶᠠᠭᠤᠮᠠ ᠶᠢ ᠤᠩᠰᠢᠨ᠂ ᠤᠩᠰᠢᠭᠰᠠᠭᠠᠷ ᠪᠠᠢᠲᠠᠯᠠ ᠠᠰᠢᠭᠦᠢ ᠵᠠᠪᠰᠠᠷᠯᠠᠭᠠᠨ ᠤ᠋ ᠮᠠᠩᠵᠠ᠂ ᠴᠠᠪ ᠣᠷᠣᠵᠤ ᠢᠷᠡᠯᠡ᠃ ᠵᠤᠲᠠᠩ ᠤ᠋ᠨ ᠦᠨᠦᠷ ᠰᠡᠩᠭᠢᠨᠡᠨ ᠬᠠᠩᠬᠤᠯᠪᠠ᠃
ᠰᠠᠩᠵᠢ ᠶ᠋ᠢᠨ ᠵᠢᠩᠳᠠᠭᠠᠨ ᠤ ᠨᠥᠬᠥᠷ ᠠᠨᠳᠤᠤ ᠶ᠋ᠢᠨ ᠲᠥᠪᠡᠳ ᠫᠠᠭᠰᠠᠩ ᠴᠣᠢᠮᠴᠠᠮ ᠤ᠋ᠨ ᠴᠠᠭ ᠢ ᠠᠰᠢᠭᠯᠠᠨ ᠰᠡᠮᠬᠡᠨ ᠭᠦᠶᠦᠵᠦ ᠭᠠᠪᠵᠤ ᠯᠦᠨᠳᠥᠭᠵᠤᠨᠠᠢ ᠳ᠋ᠤ᠌ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠬᠦ ᠳ᠋ᠦ᠍ ᠲᠡᠷᠡ ᠨᠢ ᠲᠣᠯᠣᠭᠠᠢ ᠰᠡᠭᠰᠦᠷᠪᠡ᠃ ᠫᠠᠭᠰᠠᠩ ᠴᠠᠰᠢ ᠭᠦᠶᠦᠵᠦ ᠰᠢᠷᠡᠭᠡᠲᠦ ᠳ᠋ᠦ᠍ ᠣᠢᠷᠠᠳᠬᠤ ᠭᠡᠰᠡᠨ ᠢ᠋ᠶ᠋ᠡᠨ ᠤᠬᠤᠷᠢᠵᠤ ᠭᠡᠰᠬᠦᠢ ᠳ᠋ᠦ᠍ ᠣᠴᠢᠭᠠᠳ ᠪᠠᠬᠠᠨ ᠶᠠᠭᠤᠮᠠ ᠶᠠᠷᠢᠵᠤ ᠰᠠᠩᠵᠢ ᠭᠡᠰᠦᠯ ᠤᠷᠤᠭᠤ ᠵᠢᠭᠠᠵᠤ ᠪᠠᠢᠯᠠ᠃ ᠡᠭᠦᠨ ᠢ᠋ ᠰᠠᠩᠵᠢ ᠠᠵᠢᠵᠤ ᠮᠡᠳᠡᠭᠡᠳ ᠥᠪᠡᠷ ᠤᠨ ᠨᠢ ᠲᠤᠬᠠᠢ ᠶᠠᠷᠢᠶᠠ ᠪᠣᠯᠬᠤ ᠶ᠋ᠢ ᠣᠢᠯᠠᠭᠠᠪᠠ᠂《ᠫᠠᠭᠰᠠᠩ ᠠᠨᠳᠦᠤᠪᠠ ᠶᠠᠮᠠᠷ ᠯᠠ ᠰᠠᠢᠨ ᠶᠠᠭᠤᠮᠠ ᠶᠠᠷᠢᠪᠠ ᠭᠡᠵᠦ᠃ ᠨᠠᠮᠠᠶ᠋ᠢ ᠮᠠᠭᠤᠯᠠᠵᠤ ᠪᠠᠢᠭᠠ ᠪᠠᠢᠯᠭᠦᠢ᠃ ᠭᠡᠪᠡᠴᠦ ᠶᠠᠭᠤ ᠭᠡᠵᠦ ᠮᠠᠭᠤᠯᠠᠬᠤ ᠪᠢᠯᠡ? ᠶᠠᠭᠤ ᠴᠤ᠌ ᠭᠡᠬᠦ ᠰᠢᠯᠲᠠᠭ ᠦᠭᠡᠢ᠃ ᠶᠡᠷᠦ ᠨᠢ ᠡᠨᠡ ᠫᠠᠭᠰᠠᠩ ᠮᠠᠭᠤᠬᠠᠢ ᠵᠠᠩ ᠲᠠᠢ᠂ ᠬᠦᠢᠲᠡᠨ ᠴᠢᠷᠠᠢ ᠲᠠᠢ ᠡᠷᠡ ᠰᠢᠦ》 ᠭᠡᠵᠦ ᠰᠠᠩᠵᠢ ᠪᠣᠳᠣᠯᠠ᠃ ᠲᠡᠭᠦᠨ ᠦ ᠵᠢᠩᠳᠠᠭᠠᠨ ᠳ᠋ᠤ᠌ ᠮᠠᠭᠤᠬᠠᠢ ᠵᠠᠩ ᠲᠠᠢ᠂ ᠶᠠᠭᠢᠷ ᠬᠡᠴᠡᠭᠦᠦ ᠪᠡᠷ ᠢ᠋ᠶ᠋ᠡᠨ ᠡᠨᠡᠬᠦ ᠠᠨᠳᠤᠤ ᠨᠤᠲᠤᠭ ᠤᠨ ᠲᠦᠪᠡᠳ ᠵᠠᠯᠠᠭᠤ ᠫᠠᠭᠰᠠᠩ ᠣᠨᠴᠠᠭᠠᠢ ᠪᠢᠯᠡ᠃ ᠭᠡᠲᠡᠯᠡ ᠪᠠᠰᠠ ᠪᠣᠳᠢᠫᠠ ᠶ᠋ᠢᠨ ᠴᠣᠭᠰᠠᠩ ᠭᠡᠵᠦ ᠨᠢᠭᠡ ᠡᠷᠡ ᠪᠣᠢ᠃ ᠲᠡᠷᠡ ᠪᠣᠯ ᠲᠥᠪᠡᠳ ᠬᠥᠮᠦᠨ ᠳ᠋ᠤ᠌ ᠪᠠᠢᠮᠠᠷ ᠦᠭᠡᠢ ᠶᠡᠬᠡᠬᠡᠨ ᠡᠶᠡᠯᠳᠡᠭ ᠨᠠᠯᠠᠷᠬᠠᠢ ᠵᠥᠭᠡᠯᠡᠨ ᠵᠠᠩ ᠢᠶᠠᠷ ᠢ᠋ᠶ᠋ᠠᠨ ᠰᠠᠩᠵᠢ ᠶ᠋ᠢᠨ ᠵᠢᠩᠳᠠᠭᠠᠨ ᠳ᠋ᠤ᠌ ᠪᠠᠰᠠ ᠯᠠ ᠣᠨᠴᠠᠭᠠᠢ ᠨᠢᠭᠡᠨ ᠶᠦᠮ᠃ ᠭᠡᠰᠬᠦᠢ ᠳ᠋ᠦ᠍ ᠶᠠᠭᠤᠮᠠ ᠶᠠᠷᠢᠵᠤ ᠪᠠᠢᠭᠠ ᠫᠠᠭᠰᠠᠩ ᠤ᠋ᠨ ᠴᠠᠭᠠᠨᠠ ᠨᠢ ᠴᠣᠭᠰᠠᠩ ᠵᠣᠭᠰᠣᠵᠤ ᠪᠠᠢᠬᠤ ᠶ᠋ᠢ ᠰᠠᠩᠵᠢ ᠬᠠᠷᠠᠯᠠ!《 ᠴᠣᠭᠰᠠᠩ ᠲᠡᠨᠳᠡ ᠪᠠᠢᠭᠠ ᠪᠣᠯᠬᠣᠷ ᠫᠠᠭᠰᠠᠩ ᠢ᠋ ᠮᠢᠨᠦ ᠲᠤᠬᠠᠢ ᠶᠠᠭᠤ ᠶᠠᠷᠢᠭᠰᠠᠨ ᠢ᠋ ᠰᠣᠨᠣᠰᠤᠭᠰᠠᠨ ᠪᠠᠢᠵᠤ ᠮᠠᠭᠠᠳ ᠦᠭᠡᠢ》 ᠭᠡᠵᠦ ᠰᠠᠩᠵᠢ ᠪᠣᠳᠣᠵᠠᠢ᠃ ᠮᠠᠩᠵᠠ ᠪᠠᠷᠢᠵᠤ ᠳᠠᠭᠤᠰᠤᠭᠠᠳ ᠰᠠᠯᠬᠢᠨ ᠳ᠋ᠤ᠌ ᠳᠦᠷ ᠭᠠᠷᠬᠤ ᠦᠶᠡ ᠳ᠋ᠦ᠍ ᠰᠠᠩᠵᠢ ᠭᠡᠰᠦᠯ ᠳ᠋ᠦ᠍ ᠴᠣᠭᠰᠠᠩ ᠲᠥᠪᠡᠳ ᠣᠢᠷᠠᠲᠤᠨ ᠢᠷᠡᠵᠦ᠂ ᠴᠢᠬᠢᠨ ᠲᠤᠰᠢᠶᠠ ᠨᠢ᠂
- ᠴᠢᠮᠠᠶ᠋ᠢ ᠫᠠᠭᠰᠠᠩ ᠭᠡᠰᠬᠦᠢ ᠳ᠋ᠦ᠍ ᠬᠣᠪᠯᠠᠯᠠ᠃ ᠴᠢ ᠪᠤᠷᠬᠠᠨ ᠤ᠋ ᠮᠠᠭᠲᠠᠭᠠᠯ᠂ ᠨᠣᠮ ᠤᠨ ᠲᠦᠯᠬᠢᠭᠦᠷ ᠢ᠋ ᠮᠣᠩᠭᠣᠯ ᠢ᠋ᠶ᠋ᠠᠷ ᠤᠩᠰᠢᠭᠰᠠᠨ ᠶᠤᠮ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃
ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠳᠣᠲᠣᠷᠠ ᠫᠠᠯ ᠬᠢᠵᠠᠢ᠃ ᠲᠡᠭᠡᠭᠡᠳ ᠴᠢᠷᠠᠢ ᠨᠢ ᠬᠤᠪᠠᠬᠠᠢ ᠴᠠᠢᠬᠤ ᠶᠢ ᠴᠣᠭᠰᠠᠩ ᠠᠵᠢᠵᠤ ᠮᠡᠳᠡᠭᠡᠳ᠂ ᠲᠡᠷᠡ ᠠᠰᠠᠭᠤᠯᠲᠠ ᠶ᠋ᠢᠨ ᠬᠠᠷᠢᠭᠤ ᠶᠢ ᠣᠢᠯᠠᠭᠠᠵᠤ《ᠪᠢᠲᠡᠭᠡᠢ ᠰᠢᠨᠠᠯ᠂ ᠪᠢᠲᠡᠭᠡᠢ ᠰᠢᠨᠠᠯ 》 ᠭᠡᠵᠦ ᠰᠢᠪᠡᠨᠡᠭᠡᠳ ᠵᠥᠷᠢᠨ ᠥᠩᠭᠡᠷᠡᠯᠡ᠃
《 ᠫᠠᠭᠰᠠᠩ ᠬᠣᠪ ᠬᠡᠯᠡᠵᠡᠢ᠃ ᠣᠳᠣ ᠶᠠᠭᠠᠬᠢᠳᠠᠭ ᠪᠣᠯ? ᠭᠡᠰᠬᠦᠢ ᠳ᠋ᠦ᠍ ᠲᠣᠷᠯᠣᠭᠳᠠᠭᠤᠯᠬᠤ ᠴᠠᠭ ᠪᠣᠯᠵᠠᠢ᠃ ᠲᠣᠷᠯᠣᠭᠳᠠᠭᠠᠳ ᠥᠩᠭᠡᠷᠡᠪᠡᠯ ᠴᠤ᠌ ᠶᠠᠭᠠᠮᠠᠢ》 ᠭᠡᠵᠦ ᠰᠠᠩᠵᠢ ᠴᠡᠴᠡᠷᠡᠨ ᠠᠶᠤᠯᠠ᠃
ᠦᠳᠡ ᠡᠴᠡ ᠡᠮᠦᠨᠡ ᠶ᠋ᠢᠨ ᠬᠤᠷᠠᠯ ᠭᠠᠳᠠᠭᠠᠯᠠᠬᠤ ᠦᠶᠡ ᠪᠡᠷ ᠳᠤᠭᠠᠩ ᠤᠨ ᠡᠭᠦᠳᠡᠨ ᠳ᠋ᠦ᠍ ᠱᠠᠮᠤ ᠭᠡᠰᠬᠦᠢ ᠲᠤᠰᠠᠯᠠᠭᠴᠢ ᠭᠡᠶᠡᠭ ᠦ᠋ᠨ ᠬᠠᠮᠲᠤ ᠭᠠᠷᠴᠤ ᠢᠷᠡᠭᠡᠳ ᠬᠤᠷᠠᠯ ᠤ᠋ᠨ ᠵᠠᠶᠢᠭ᠋ ᠡᠪᠳᠡᠭᠰᠡᠨ ᠪᠠᠨᠳᠢ ᠨᠠᠷ᠂ ᠵᠠᠷᠢᠮ ᠳ᠋ᠠᠭᠠᠨ ᠲᠣᠬᠢᠲᠠᠢ ᠲᠣᠮᠣᠭᠠᠲᠠᠢ ᠯᠠᠮᠠ ᠶ᠋ᠢ ᠴᠤ᠌ ᠬᠦᠷᠲᠡᠯᠡ ᠴᠡᠭᠡᠷᠯᠡᠯ ᠦᠵᠡᠭᠦᠯᠳᠡᠭ ᠶᠣᠰᠣᠲᠠᠢ ᠲᠤᠯᠠ ᠡᠨᠡ ᠤᠳᠠᠭᠠ ᠰᠠᠩᠵᠢ ᠶ᠋ᠢᠨ ᠡᠭᠡᠯᠵᠢ ᠪᠣᠯᠤᠯᠠ ᠭᠡᠳᠡᠭ ᠢ᠋ ᠴᠤ᠌ ᠫᠠᠭᠰᠠᠩ᠂ ᠴᠣᠭᠰᠠᠩ᠂ ᠰᠠᠩᠵᠢ ᠭᠤᠷᠪᠠ ᠭᠠᠳᠠᠷᠯᠠᠵᠠᠢ᠃《ᠴᠣᠬᠣᠮ ᠶᠠᠭᠠᠬᠢᠵᠤ ᠴᠡᠭᠡᠷᠯᠡᠭᠦᠯᠬᠦ ᠪᠣᠯ? ᠲᠣᠷᠯᠣᠭᠳᠠᠳᠠᠭ᠃ ᠪᠠᠰᠠ ᠱᠣᠩ ᠠ᠋ᠴᠠ ᠬᠦᠯᠢᠵᠦ ᠣᠷᠢᠶᠠᠯᠭᠠᠳᠠᠭ᠃ ᠬᠠᠷᠠ ᠭᠡᠷ ᠲᠦ᠍ ᠬᠢᠳᠡᠭ᠃ ᠥᠭᠡᠷᠡ ᠶᠠᠭᠠᠬᠢᠳᠠᠭ ᠪᠢᠯᠡ᠃ ᠡᠨᠡ ᠬᠡᠳᠦ ᠪᠡᠷ ᠯᠠ ᠥᠩᠭᠡᠷᠡᠳᠡᠭ ᠪᠠᠢᠬᠤ᠃ ᠠᠯᠢ ᠨᠢ ᠪᠠᠢᠭ᠍ᠰᠠᠨ ᠴᠤ᠌ ᠥᠩᠭᠡᠷᠡᠵᠡᠢ》 ᠭᠡᠵᠦ ᠰᠠᠩᠵᠢ ᠪᠣᠳᠣᠵᠤ ᠭᠠᠰᠢᠭᠤᠨ ᠬᠤᠪᠢ ᠪᠠᠨ ᠬᠦᠯᠢᠴᠡᠩᠭᠦᠢ ᠪᠡᠷ ᠬᠦᠯᠢᠶᠡᠬᠦ ᠪᠡᠷ ᠰᠢᠢᠳᠦᠯᠡ᠃《ᠬᠥᠮᠦᠨ ᠦ᠌ ᠪᠡᠶᠡ ᠡᠬᠡ ᠡᠴᠡ ᠲᠦᠷᠦᠮᠡᠭᠴᠡ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠬᠣᠶᠠᠷ ᠮᠣᠳᠣ ᠤᠷᠭᠤᠵᠤ ᠡᠬᠢᠯᠡᠮᠦᠢ᠃ ᠬᠣᠶᠠᠭᠤᠯᠠ ᠵᠢᠷᠭᠤᠭᠠ ᠵᠢᠷᠭᠤᠭᠠᠨ ᠦᠨᠳᠦᠰᠦ ᠲᠡᠢ᠂ ᠠᠷᠪᠠ ᠠᠷᠪᠠᠨ ᠭᠡᠰᠢᠭᠦᠦ ᠲᠡᠢ᠂ ᠳᠥᠴᠢᠨ ᠨᠠᠢ᠍ᠮᠠᠨ ᠮᠢᠩᠭᠠᠨ ᠨᠠᠪᠴᠢ ᠲᠠᠢ ᠪᠢᠯᠡ᠃ ᠰᠠᠢᠨ ᠦᠢᠯᠡᠰ ᠦ᠋ᠨ ᠮᠣᠳᠣᠨ ᠤ᠋ ᠵᠢᠷᠭᠤᠭᠠᠨ ᠦᠨᠳᠦᠰᠦ ᠨᠢ ᠵᠢᠷᠭᠤᠭᠠᠨ ᠴᠠᠭᠠᠨ ᠪᠤᠶᠠᠨ᠂ ᠮᠠᠭᠤ ᠦᠢᠯᠡᠰ ᠦ᠋ᠨ ᠮᠣᠳᠣᠨ ᠤ᠋ ᠵᠢᠷᠭᠤᠭᠠᠨ ᠦᠨᠳᠦᠰᠦ ᠨᠢ ᠵᠢᠷᠭᠤᠭᠠᠨ ᠬᠠᠷᠠ ᠨᠢᠭᠦᠯ᠃ ᠳᠥᠴᠢᠨ ᠨᠠᠢ᠍ᠮᠠᠨ ᠮᠢᠩᠭᠠᠨ ᠨᠠᠪᠴᠢᠰ ᠨᠢ ᠮᠥᠨ ᠲᠡᠷᠡᠴᠢᠯᠡᠨ ᠬᠣᠶᠠᠷ ᠲᠦᠢᠯ ᠪᠤᠶᠤ ᠨᠣᠮ ᠤᠨ ᠴᠣᠭᠴᠠᠰ᠂ ᠨᠢᠭᠦᠯ ᠦ᠋ᠨ ᠨᠢᠰᠸᠠᠨᠢᠰ ᠢ᠋ ᠦᠵᠡᠭᠦᠯᠵᠦ ᠪᠠᠢᠳᠠᠭ ᠶᠤᠮ᠃ ᠠᠯᠢ ᠨᠢᠭᠡᠨ ᠮᠣᠳᠣ ᠪᠠᠨ ᠳᠠᠪᠠᠭᠠᠮᠠᠭᠠᠢᠯᠠᠭᠤᠯᠴᠢᠬᠠᠪᠠᠯ ᠲᠡᠷᠡ ᠯᠠ ᠵᠦᠭ ᠲᠡᠭᠡᠨ ᠬᠤᠪᠢ ᠲᠠᠪᠢᠯᠠᠩ ᠴᠢᠭᠯᠡᠨᠡ》 ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠵᠢᠭᠠᠭᠰᠠᠨ ᠢ᠋ ᠰᠠᠩᠵᠢ ᠭᠡᠰᠦᠯ ᠰᠠᠢᠨ ᠲᠣᠭᠲᠠᠭᠠᠵᠤ ᠲᠥᠪᠡᠳ ᠬᠡᠯᠡ ᠪᠡᠷ ᠮᠥᠨ ᠴᠡᠭᠡᠵᠢᠯᠡᠭᠦᠯᠪᠡ᠃
ᠶᠣᠰᠣ ᠰᠤᠷᠲᠠᠬᠤᠨ ᠤ᠋ ᠲᠡᠷᠡ ᠬᠦ᠌ ᠮᠣᠳᠣ ᠶ᠋ᠢ ᠴᠠᠭᠠᠨ ᠤ᠋ ᠪᠤᠶᠠᠨ ᠤ᠋ ᠨᠠᠪᠴᠢ ᠪᠠᠷ ᠴᠡᠴᠡᠭᠯᠡᠭᠦᠯᠬᠦ ᠳ᠋ᠤ ᠮᠥᠨ ᠵᠢᠷᠭᠤᠭᠠᠨ ᠵᠠᠮ ᠮᠥᠷ ᠪᠣᠢ ᠭᠡᠵᠦ ᠰᠠᠩᠵᠢ ᠳ᠋ᠤ᠌ ᠣᠢᠯᠠᠭᠠᠭᠤᠯᠵᠤ ᠪᠢᠯᠡ᠃ ᠡᠬᠢᠨ ᠦ᠌ ᠱᠠᠲᠤ ᠨᠢ ᠣᠪᠠᠰᠢ ᠪᠤᠶᠤ ᠭᠡᠨᠡᠩ ᠶᠦᠮ᠃ ᠤᠪᠠᠰᠢ ᠶ᠋ᠢᠨ ᠮᠥᠷ ᠬᠥᠭᠡᠭᠡᠭᠰᠡᠨ ᠬᠥᠮᠦᠨ ᠶᠣᠰᠣ ᠰᠤᠷᠲᠠᠬᠤᠨ ᠤ᠋ ᠪᠠᠨ ᠨᠢᠭᠦᠯ ᠢ᠋ ᠮᠡᠳᠡᠵᠦ ᠵᠠᠰᠠᠬᠤ ᠶ᠋ᠢ ᠡᠷᠡᠮᠡᠯᠵᠡᠨ᠂ ᠵᠠᠰᠠᠵᠤ ᠠᠯᠳᠠᠵᠤ᠂ ᠠᠯᠳᠠᠵᠤ ᠵᠠᠰᠠᠵᠤ ᠪᠠᠢᠳᠠᠭ ᠲᠤᠯᠠ ᠰᠠᠩᠵᠢ ᠲᠡᠢᠮᠦ ᠬᠠᠭᠠᠰ ᠳᠤᠲᠠᠭᠤ ᠪᠣᠳᠢ ᠮᠥᠷ ᠦ᠋ᠨ ᠵᠡᠷᠭᠡ ᠳ᠋ᠦ᠍ ᠬᠦᠷᠬᠦ ᠶ᠋ᠢ ᠬᠦᠰᠡᠭᠡ ᠦᠭᠡᠢ᠃ ᠪᠠᠭᠰᠢ ᠯᠠᠮᠠ ᠨᠢ ᠴᠤ᠌ ᠮᠥᠨ ᠯᠡ ᠲᠡᠢᠮᠦ ᠪᠣᠳᠣᠯ ᠲᠠᠢ ᠪᠠᠢᠭ᠍ᠰᠠᠨ᠃ ᠪᠣᠳᠢ ᠮᠥᠷ ᠦ᠋ᠨ ᠬᠣᠶᠠᠷ ᠲᠠᠬᠢ ᠵᠡᠷᠭᠡ ᠨᠢ ᠰᠠᠷᠲ᠋ᠠᠸᠠᠨ ᠪᠣᠯᠤᠨᠠ᠃ ᠰᠠᠷᠲ᠋ᠠᠸᠠᠨ ᠪᠣᠯ ᠰᠠᠨᠰᠠᠷ ᠬᠣᠷᠸᠠ ᠶ᠋ᠢ ᠪᠦᠷᠢᠨᠡ ᠤᠭᠤᠷᠴᠤ ᠬᠠᠷᠠ ᠪᠣᠷᠣ ᠠᠮᠢᠳᠤᠷᠠᠯ ᠢ᠋ ᠵᠢᠭᠰᠢᠨ ᠬᠥᠨᠳᠡᠢᠷᠡᠬᠦ ᠬᠡᠷᠡᠭ ᠶᠦᠮ᠃ ᠰᠠᠩᠵᠢ ᠲᠡᠢᠨ ᠬᠦ᠌ ᠠᠮᠢᠳᠤᠷᠠᠯ ᠠᠴᠠ ᠬᠥᠨᠳᠡᠢᠷᠡᠵᠦ ᠰᠠᠷᠲ᠋ᠠᠸᠠᠨ ᠪᠣᠯᠬᠤ ᠶ᠋ᠢ ᠬᠦᠰᠡᠭᠰᠡᠨ ᠦᠭᠡᠢ᠃ ᠪᠠᠭᠰᠢ ᠯᠠᠮᠠ ᠨᠢ ᠴᠤ᠌ ᠲᠡᠭᠦᠨ ᠢ ᠵᠥᠪᠯᠡᠭᠰᠡᠨ ᠦᠭᠡᠢ᠃ ᠪᠣᠳᠢ ᠮᠥᠷ ᠦ᠋ᠨ ᠭᠤᠷᠪᠠ ᠳ᠋ᠠᠬᠢ ᠵᠡᠷᠭᠡ ᠨᠢ ᠰᠠᠭᠠᠷᠳᠠᠭᠠᠮ ᠤ᠋ᠨ ᠶᠣᠰᠣ ᠶᠤᠮ᠃ ᠡᠨᠡ ᠨᠢ ᠦᠨᠡᠨᠴᠢ ᠰᠢᠳᠤᠷᠭᠤ᠂ ᠰᠡᠳᠬᠢᠯ ᠬᠠᠷᠠᠮ ᠦᠭᠡᠢ ᠠᠵᠤ ᠲᠦᠷᠦᠭᠴᠢ ᠶ᠋ᠢᠨ ᠶᠣᠰᠣ ᠮᠥᠨ᠃ ᠨᠢᠭᠡᠨᠲᠡ ᠬᠠᠷᠢᠨ ᠢᠷᠡᠭᠴᠢ ᠶ᠋ᠢᠨ ᠶᠣᠰᠣ ᠭᠡᠵᠦ ᠪᠠᠰᠠ ᠨᠡᠷᠡᠯᠡᠨᠡ᠃ ᠡᠭᠦᠨ ᠢ᠋ ᠰᠠᠩᠵᠢ ᠭᠡᠰᠦᠯ ᠰᠣᠩᠭᠣᠨ ᠠᠪᠴᠠᠢ᠃ ᠰᠠᠭᠠᠷᠳᠠᠭᠠᠮ ᠤ᠋ᠨ ᠵᠡᠷᠭᠡ ᠳ᠋ᠦ᠍ ᠬᠦᠷᠬᠦ ᠨᠢ ᠬᠥᠮᠦᠨ ᠦ᠌ ᠳᠡᠭᠡᠳᠦ ᠶᠣᠰᠣᠨ ᠢ᠋ᠶ᠋ᠠᠨ ᠲᠤᠯᠤᠨ ᠣᠴᠢᠵᠤ᠂ ᠪᠤᠷᠬᠠᠳ ᠤᠨ ᠵᠡᠷᠭᠡ ᠡᠴᠡ ᠬᠣᠯᠠ ᠦᠭᠡᠢ ᠲᠣᠭᠲᠠᠬᠤ ᠶ᠋ᠢᠨ ᠮᠥᠨ ᠴᠢᠨᠠᠷ ᠶᠤᠮ᠃ ᠲᠡᠭᠦᠨ ᠡᠴᠡ ᠴᠢᠨᠠᠭᠰᠢᠯᠠᠬᠤ ᠳᠤ ᠠᠨᠠᠭᠮᠠᠨᠢ ᠶ᠋ᠢᠨ ᠶᠣᠰᠣ ᠪᠣᠢ᠃ ᠲᠡᠷᠡ ᠨᠢ ᠥᠪᠡᠷ ᠲᠦ᠍ ᠣᠨᠣᠭᠳᠠᠭᠰᠠᠨ ᠪᠦᠬᠦ ᠦᠢᠯᠡ ᠶ᠋ᠢ ᠪᠦᠲᠦᠭᠡᠵᠦ ᠬᠠᠷᠢᠨ ᠦᠯᠦ ᠢᠷᠡᠭᠴᠢ ᠶ᠋ᠢᠨ ᠵᠡᠷᠭᠡ ᠳ᠋ᠦ᠍ ᠬᠦᠷᠬᠦ ᠶ᠋ᠢᠨ ᠨᠡᠷᠡ ᠶᠦᠮ᠃ ᠨᠢᠭᠡᠨᠲᠡ ᠪᠦᠬᠦ ᠦᠢᠯᠡ ᠪᠡᠨ ᠲᠡᠭᠦᠰᠬᠡᠭᠰᠡᠨ ᠲᠤᠯᠠ ᠠᠨᠠᠭᠮᠠᠨᠢ ᠶ᠋ᠢᠨ ᠶᠣᠰᠣ ᠭᠦᠢᠴᠡᠭᠡᠭᠴᠢ ᠪᠣᠯ ᠬᠠᠷᠢᠨ ᠢᠷᠡᠬᠦ ᠪᠤᠶᠤ ᠳᠠᠬᠢᠨ ᠲᠥᠷᠥᠬᠦ ᠬᠡᠷᠡᠭᠴᠡᠭᠡ ᠦᠭᠡᠢ ᠪᠣᠯᠤᠨᠠ᠃ ᠲᠡᠢᠮᠦ ᠢᠳᠢ ᠰᠢᠳᠢ ᠲᠡᠢ ᠪᠣᠯᠬᠤ ᠶ᠋ᠢ ᠰᠠᠩᠵᠢ ᠬᠦᠰᠡᠭᠰᠡᠨ ᠴᠤ᠌ ᠦᠭᠡᠢ᠃ ᠲᠡᠭᠦᠨ ᠳ᠋ᠦ᠍ ᠬᠦᠷᠦᠨᠡ ᠭᠡᠵᠦ ᠥᠪᠡᠷᠲᠡᠭᠡᠨ ᠢᠲᠡᠭᠡᠭᠰᠡᠨ ᠴᠤ᠌ ᠦᠭᠡᠢ᠃ ᠪᠣᠳᠢ ᠮᠥᠷ ᠦ᠋ᠨ ᠲᠠᠪᠤᠳᠤᠭᠠᠷ ᠵᠡᠷᠭᠡ ᠪᠣᠯ ᠠᠷᠬᠠᠳ ᠪᠤᠶᠤ ᠳᠠᠢᠨ ᠢ᠋ ᠳᠠᠷᠤᠭᠰᠠᠨ ᠪᠠᠭᠠᠲᠤᠷ ᠤ᠋ᠨ ᠶᠠᠪᠤᠳᠠᠯ ᠮᠥᠨ᠃ ᠵᠠᠮ ᠳ᠋ᠤ᠌ ᠲᠣᠬᠢᠶᠠᠯᠳᠣᠬᠤ ᠪᠦᠬᠦ ᠲᠦᠢᠳᠬᠡᠷ ᠰᠠᠭᠠᠳ ᠢ᠋ ᠠᠷᠬᠠᠳ ᠤ᠋ᠳ ᠳᠠᠪᠠᠨ ᠢᠯᠠᠳᠠᠭ ᠪᠣᠯᠤᠨᠠ᠃ ᠡᠭᠦᠨ ᠦ᠌ ᠲᠤᠬᠠᠢ ᠰᠠᠩᠵᠢ ᠭᠡᠰᠦᠯ ᠰᠠᠨᠠᠭᠰᠠᠨ ᠴᠤ᠌ ᠦᠭᠡᠢ᠃ ᠪᠣᠳᠢ ᠮᠥᠷ ᠦ᠋ᠨ ᠬᠠᠮᠤᠭ ᠤ᠋ᠨ ᠳᠡᠭᠡᠳᠦ ᠵᠡᠷᠭᠡ ᠨᠢ ᠪᠠᠷᠠᠨᠳᠢ ᠭᠠᠪᠤᠤᠲ ᠪᠤᠶᠤ ᠥᠪᠡᠷ ᠢ᠋ᠶ᠋ᠡᠨ ᠪᠤᠷᠬᠠᠨ ᠪᠣᠯᠬᠤ ᠶᠣᠰᠣ ᠪᠣᠯᠤᠨᠠ᠃ ᠡᠨᠡ ᠥᠨᠳᠥᠷᠯᠢᠭ ᠲᠦ᠍ ᠭᠠᠷᠤᠭᠰᠠᠨ ᠬᠦᠮᠦᠨ ᠨᠢ ᠡᠮᠦᠨᠡ ᠪᠡᠨ ᠨᠣᠮ ᠤ᠋ᠨ ᠬᠠᠭᠠᠯᠭᠠ ᠣᠩᠭᠣᠷᠬᠠᠢ ᠪᠠᠢᠬᠤ ᠶ᠋ᠢ ᠨᠢᠳᠦ ᠪᠡᠷ ᠦᠵᠡᠮᠦᠢ᠃ ᠪᠤᠷᠬᠠᠨ ᠲᠠᠢ ᠢᠵᠢᠯ᠂ ᠭᠠᠭᠴᠠ ᠴᠢᠨᠠᠷ ᠲᠤ᠌ ᠬᠦᠷᠦᠭᠰᠡᠨ ᠲᠤᠯᠠ ᠥᠪᠡᠷ ᠢ᠋ᠶ᠋ᠡᠨ ᠪᠤᠷᠬᠠᠨ ᠠᠵᠢ᠃ ᠪᠣᠳᠢ ᠮᠥᠷ ᠦ᠋ᠨ ᠡᠢᠮᠦ ᠵᠡᠷᠭᠡ ᠶ᠋ᠢ ᠮᠥᠷᠥᠭᠡᠳᠴᠦ ᠪᠣᠯᠬᠤ ᠪᠣᠯᠪᠠᠴᠤ ᠬᠦᠷᠴᠦ ᠦᠯᠦ ᠴᠢᠳᠠᠨᠠ᠃ ᠬᠦᠷᠦᠭᠰᠡᠨ ᠨᠢ ᠴᠥᠭᠡᠨ ᠬᠦᠮᠦᠨ ᠲᠥᠷᠥᠯᠲᠡᠨ ᠡᠭᠦᠰᠦᠭᠡᠳ ᠳᠥᠴᠢᠨ ᠮᠢᠩᠭᠠᠨ ᠵᠢᠯ ᠪᠣᠯᠬᠤ ᠳ᠋ᠤ᠌ ᠠᠷᠠᠢᠬᠢᠵᠦ ᠡᠬᠢᠨ ᠦ᠌ ᠪᠤᠳ᠋ᠳ᠋ᠾᠠ ᠭᠠᠷᠭᠠᠭᠠᠰᠤᠨᠳᠡᠢ ᠮᠡᠨᠳᠦᠯᠡᠵᠦ ᠲᠥᠷᠥᠭᠰᠡᠨ ᠭᠡᠳᠡᠭ ᠪᠢᠯᠡ᠃ ᠰᠠᠩᠵᠢ ᠳ᠋ᠤ᠌ ᠪᠠᠷᠠᠨᠳᠢ ᠭᠠᠪᠤᠤᠲ ᠤᠨ ᠵᠡᠷᠭᠡ ᠬᠡᠮᠡᠬᠦ ᠪᠣᠯ ᠰᠠᠨᠠᠵᠤ ᠦᠯᠦ ᠬᠦᠷᠬᠦ ᠰᠠᠨᠰᠠᠷ ᠬᠣᠷᠸᠠ ᠶ᠋ᠢᠨ ᠥᠨᠳᠥᠷ ᠠᠯᠤᠰ ᠤᠨ ᠦᠯᠢᠭᠡᠷ ᠳᠣᠮᠣᠭ ᠪᠠᠢᠯᠠ᠃
《ᠰᠣᠩᠭᠣᠵᠤ ᠠᠪᠤᠭᠰᠠᠨ ᠰᠠᠭᠠᠷᠳᠠᠭᠠᠮ ᠤ᠋ᠨ ᠶᠣᠰᠣᠨ ᠳ᠋ᠤ᠌ ᠮᠢᠨᠢ ᠬᠠᠷᠰᠢᠬᠤ ᠶᠤᠮ ᠭᠡᠵᠦ ᠤᠤ? ᠮᠢᠨᠦ ᠪᠤᠷᠤᠭᠤ᠂ ᠡᠰᠡᠪᠡᠯ ᠨᠢᠭᠦᠯ ᠶᠠᠭᠤ ᠰᠠᠨ ᠪᠢᠯᠡ᠃ ᠪᠤᠷᠬᠠᠨ ᠤ᠋ ᠢᠷᠦᠭᠡᠯ ᠢ᠋ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠡᠯᠡ ᠪᠡᠷ ᠯᠠ ᠤᠩᠰᠢᠵᠤ ᠣᠷᠬᠢᠭᠰᠠᠨ ᠬᠡᠷᠡᠭ᠃ ᠲᠡᠭᠦᠨ ᠢ᠋ ᠨᠢᠭᠦᠯ ᠭᠡᠵᠦ ᠲᠣᠭᠠᠴᠠᠬᠤ ᠶᠤᠮ ᠤᠤ? ᠪᠤᠷᠬᠠᠨ ᠤ ᠨᠣᠮ ᠢ᠋ ᠶᠠᠮᠠᠷᠪᠠ ᠬᠡᠯᠡ ᠪᠡᠷ ᠤᠩᠰᠢᠵᠤ ᠪᠣᠯᠤᠨᠠ ᠬᠡᠮᠡᠳᠡᠭ ᠪᠢᠵᠡ ᠳᠡ᠃ ᠮᠣᠩᠭᠣᠯ ᠬᠡᠯᠡ ᠪᠡᠷ ᠪᠠᠢᠲᠤᠭᠠᠢ ᠶᠠᠭᠴᠢᠰ ᠤ᠋ᠨ ᠬᠡᠯᠡ ᠪᠡᠷ ᠴᠤ᠌ ᠤᠩᠰᠢᠵᠤ ᠪᠣᠯᠤᠨᠠ ᠭᠡᠳᠡᠭ ᠪᠢᠰᠢ ᠪᠢᠯᠢᠤ? 》 ᠭᠡᠮᠡᠨ ᠰᠠᠩᠵᠢ ᠪᠣᠳᠣᠭᠰᠠᠭᠠᠷ ᠵᠠᠪᠳᠤᠩ ᠳᠡᠭᠡᠷᠡ ᠪᠡᠨ ᠲᠣᠮᠣᠭᠠᠲᠠᠢ ᠰᠠᠭᠤᠵᠤ᠂ ᠬᠤᠷᠠᠯ ᠢ᠋ᠶ᠋ᠠᠨ ᠦᠷᠭᠦᠯᠵᠢᠯᠡᠭᠦᠯᠦᠨ ᠬᠤᠷᠠᠵᠤ ᠪᠠᠢᠯᠠ᠃ ᠭᠡᠨᠡᠳᠲᠡ ᠲᠡᠭᠦᠨ ᠦ᠌ ᠰᠠᠨᠠᠭᠠᠨ ᠳ᠋ᠤ᠌ 《ᠬᠤᠲᠤᠭᠲᠤ ᠰᠠᠢᠨ ᠶᠠᠪᠤᠳᠠᠯ ᠤ᠋ᠨ ᠢᠷᠦᠭᠡᠯ ᠦᠨ ᠬᠠᠭᠠᠨ》 ᠪᠤᠶᠤ 《 ᠰᠠᠩᠵᠢᠳ ᠮᠣᠯᠣᠮ》 ᠰᠤᠳᠤᠷ ᠤ᠋ᠨ ᠲᠡᠭᠦᠰᠬᠡᠯ ᠦ᠋ᠨ ᠦᠭᠡ ᠣᠷᠣᠵᠤ ᠢᠷᠡᠯᠡ᠃《ᠪᠤᠷᠬᠠᠨ ᠤ᠋ ᠠᠯᠲᠠᠨ ᠰᠤᠷᠭᠠᠯ ᠢ᠋ ᠬᠡᠯᠡ ᠪᠣᠯᠭᠠᠨ ᠢ᠋ᠶ᠋ᠠᠷ ᠳᠠᠭᠤᠳᠠᠨ ᠲᠦᠭᠡᠭᠡᠨᠡᠮ ᠪᠢ᠃ ᠲᠩᠷᠢ ᠨᠠᠷ ᠤ᠋ᠨ ᠬᠡᠯᠡ ᠪᠡᠷ ᠴᠤ᠌᠂ ᠯᠤᠤ ᠶ᠋ᠢᠨ ᠬᠡᠯᠡ ᠪᠡᠷ ᠴᠤ᠌᠂ ᠶᠠᠭᠴᠢᠰ ᠤ᠋ᠳ ᠤ᠋ᠨ ᠬᠡᠯᠡ ᠪᠡᠷ ᠴᠤ᠌᠂ ᠭᠤᠮᠪᠠᠨᠳᠢᠰ ᠤᠨ ᠬᠡᠯᠡ ᠪᠡᠷ ᠴᠤ᠌ ᠢᠯᠭᠠᠯ ᠦᠭᠡᠢ ᠠᠢᠯᠠᠳᠤᠨ ᠲᠦᠭᠡᠭᠡᠨᠡᠮ ᠪᠢ》 ᠭᠡᠵᠦ ᠲᠡᠷᠡ ᠰᠤᠳᠤᠷ ᠲᠤ᠌ ᠭᠠᠷᠳᠠᠭ ᠢ᠋ ᠰᠠᠩᠵᠢ ᠭᠡᠰᠦᠯ ᠰᠠᠨᠠᠵᠤ᠂ ᠵᠣᠷᠢᠭᠵᠢᠯᠠ᠂ 《 ᠶᠠᠭᠴᠢᠰ ᠭᠡᠳᠡᠭ ᠬᠣᠣᠷ ᠥᠭᠭᠦᠭᠴᠢ ᠮᠢᠬᠠᠴᠢᠨ ᠨᠣᠭᠣᠳ ᠶᠤᠮ ᠤᠤ ᠠᠶᠤᠮᠰᠢᠭᠲᠤ ᠭᠤᠮᠪᠠᠨᠳᠢᠰ ᠤ᠋ᠨ ᠬᠡᠯᠡ ᠪᠡᠷ ᠴᠤ᠌ ᠪᠤᠷᠬᠠᠨ ᠤ᠋ ᠨᠣᠮ ᠢ᠋ ᠲᠦᠭᠡᠭᠡᠵᠦ ᠪᠣᠯᠳᠠᠭ ᠪᠠᠢᠬᠤ ᠳᠤ ᠮᠣᠩᠭᠣᠯ ᠬᠡᠯᠡ ᠪᠡᠷ ᠤᠩᠰᠢᠭᠰᠠᠨ ᠢᠷᠦᠭᠡᠯ ᠦ᠋ᠨ ᠬᠡᠳᠦᠨ ᠱᠠᠳ ᠰᠢᠯᠦᠭ ᠦ᠋ᠨ ᠲᠥᠯᠥᠭᠡ ᠶᠠᠭᠤ ᠯᠠ ᠭᠡᠵᠦ ᠵᠠᠯᠬᠠᠭᠠᠬᠤ ᠪᠢᠯᠡ》 ᠭᠡᠮᠡᠨ ᠰᠠᠩᠵᠢ ᠭᠡᠰᠦᠯ ᠳᠣᠲᠣᠷᠠ ᠪᠠᠨ ᠪᠣᠳᠣᠯᠠ᠃ ᠲᠡᠮᠡᠭᠡᠨ ᠲᠣᠯᠣᠭᠠᠢ ᠲᠠᠢ᠂ ᠪᠤᠭᠤ ᠶ᠋ᠢᠨ ᠡᠪᠡᠷ ᠲᠡᠢ᠂ ᠮᠣᠭᠠᠢ ᠶ᠋ᠢᠨ ᠬᠦᠵᠦᠭᠦᠦ ᠲᠡᠢ᠂ ᠵᠢᠭᠠᠰᠤᠨ ᠬᠠᠢᠷᠰᠤ ᠲᠠᠢ᠂ ᠦᠨᠢᠶᠡᠨ ᠤ ᠴᠢᠬᠢ ᠲᠡᠢ᠂ ᠪᠠᠷᠰ ᠤ᠋ᠨ ᠤᠭᠤᠴᠠ ᠲᠠᠢ ᠬᠠᠴᠢᠨ ᠠᠮᠢᠲᠠᠨ ᠢ᠋ ᠯᠤᠤ ᠭᠡᠵᠦ ᠪᠤᠷᠬᠠᠨ ᠤ᠋ ᠨᠣᠮ ᠳ᠋ᠦ᠍ ᠪᠢᠴᠢᠵᠡᠢ᠃ ᠭᠠᠵᠠᠷ᠂ ᠲᠩᠷᠢ ᠶ᠋ᠢᠨ ᠠᠯᠢᠨ ᠢ᠋ᠶ᠋ᠠᠷ ᠴᠤ᠌ ᠶᠠᠪᠤᠨ ᠠᠮᠢᠳᠤᠷᠠᠬᠤ ᠳ᠋ᠠᠭᠠᠨ ᠬᠥᠮᠦᠨ ᠦ᠌ ᠮᠢᠬᠠ ᠪᠠᠷ ᠬᠦᠨᠡᠰᠦ ᠬᠢᠳᠡᠭ᠂ ᠬᠣᠣᠷ ᠥᠭᠭᠦᠭᠴᠢ ᠶᠠᠷᠭᠠᠴᠢᠨ ᠨᠣᠭᠣᠳ ᠢ᠋ ᠶᠠᠭᠴᠢᠰ ᠭᠡᠨᠡ᠃ ᠨᠠᠢ᠍ᠮᠠᠨ ᠶᠡᠬᠡ ᠯᠤᠤᠰ ᠪᠠᠢᠬᠤ ᠶᠣᠰᠣᠲᠠᠢ ᠪᠥᠭᠡᠳ ᠳᠠᠯᠠᠢ᠂ ᠵᠤᠭᠤᠪᠠᠤ ᠳᠠᠪᠠᠵᠢᠭᠤ᠂ ᠷᠦᠭᠳᠡᠨ᠂ ᠨᠣᠷᠵᠢᠶᠠ᠂ ᠳᠦᠩᠵᠢᠨ᠂ ᠪᠠᠯᠮᠠ ᠴᠢᠮᠪᠤᠤ ᠭᠡᠨᠡ᠃ ᠨᠠᠢ᠍ᠮᠠᠨ ᠶᠡᠬᠡ ᠶᠠᠭᠴᠢᠰ᠂ ᠵᠠᠯᠠᠨᠳᠣᠷᠢ᠂ ᠪᠦᠷᠨᠡᠪᠡᠳᠡᠷ᠂ ᠮᠠᠨᠢᠪᠠᠳᠠᠷ᠂ ᠭᠣᠪᠢᠷᠠ᠂ ᠰᠠᠮᠪᠠᠵᠠᠨᠠ᠂ ᠭᠦᠭᠡᠨᠳᠠᠨᠠ᠂ ᠪᠠᠵᠠᠭᠠ᠂ ᠪᠢᠵᠡᠭᠦᠨᠳᠠᠯᠢ ᠡᠳᠡᠭᠡᠷ ᠶᠤᠮ᠃ᠡᠳᠡᠨ ᠢ᠋ ᠴᠥᠮ ᠨᠢᠭᠡᠪᠥᠷᠢᠴᠢᠯᠡᠨ ᠲᠤᠲᠣᠷᠬᠠᠢᠯᠠᠭᠰᠠᠨ ᠰᠤᠳᠤᠷ ᠢ᠋ ᠰᠠᠩᠵᠢ ᠭᠡᠯᠦᠩ᠂ ᠴᠤᠢᠮᠴᠤᠭ ᠪᠠᠭᠰᠢ ᠳ᠋ᠠᠭᠠᠨ ᠪᠠᠢᠬᠤ ᠶ᠋ᠢ ᠨᠢᠭᠡ ᠤᠳᠠᠭᠠ ᠨᠢᠳᠦᠨ ᠦ᠌ ᠪᠤᠯᠤᠩ ᠢ᠋ᠶ᠋ᠠᠷ ᠬᠠᠷᠠᠵᠤ ᠪᠢᠯᠡ᠃ ᠲᠡᠷᠡ ᠬᠠᠭᠤᠳᠠᠰᠤᠨ ᠳᠡᠭᠡᠷᠡ ᠪᠢᠴᠢᠭᠰᠡᠨ ᠢ᠋ ᠣᠳᠣ ᠪᠣᠯᠲᠠᠯᠠ ᠮᠠᠷᠲᠠᠬᠤ ᠦᠭᠡᠢ ᠲᠣᠭᠲᠠᠭᠠᠵᠤ ᠠᠪᠴᠠᠢ᠃
《ᠯᠤᠤᠰ ᠤ᠋ᠨ ᠬᠠᠭᠠᠨ ᠮᠠᠯᠲᠤᠤ ᠰᠡᠵᠢᠩ ᠄ ᠯᠠᠭᠱᠠᠨ ᠤ ᠥᠩᠭᠡ ᠬᠠᠷᠠ ᠬᠥᠬᠡ᠂ ᠮᠣᠭᠠᠢ ᠶ᠋ᠢᠨ ᠲᠣᠯᠣᠭᠠᠢ ᠨᠢ ᠴᠣᠭᠨᠣᠢᠨ ᠳᠡᠭᠦᠯᠢᠭᠰᠡᠨ᠂ ᠯᠠᠭᠱᠠᠨ ᠤ ᠪᠥᠭᠰᠡ ᠮᠣᠭᠠᠢ ᠶ᠋ᠢᠨ ᠰᠡᠭᠦᠯ ᠴᠠᠭᠠᠷᠢᠭᠯᠠᠭᠰᠠᠨ᠂ᠪᠠᠷᠠᠭᠤᠨ ᠳ᠋ᠤ᠌ ᠰᠡᠳᠬᠢᠯᠴᠢᠯᠡᠨ ᠪᠦᠲᠦᠬᠦ ᠴᠢᠨᠳᠠᠮᠤᠨᠢ ᠡᠷᠳᠡᠨᠢ᠂ ᠵᠡᠭᠦᠨ ᠳ᠋ᠦ᠍ ᠲᠡᠩᠰᠡᠯᠭᠡᠭᠡ ᠶ᠋ᠢ ᠠᠷᠢᠯᠭᠠᠬᠤ ᠦᠬᠦᠯ ᠦᠭᠡᠢ ᠠᠷᠠᠭᠠᠨ ᠢ᠋ᠶ᠋ᠠᠷ ᠳᠦᠭᠦᠷᠡᠩ ᠰᠠᠩ ᠤ᠋ᠨ ᠰᠠᠢᠨ ᠬᠤᠮᠬᠠ ᠪᠠᠷᠢᠭᠰᠠᠨ᠂ ᠦᠵᠡᠰᠬᠦᠯᠡᠩᠲᠡᠢ᠂ᠬᠠᠷᠠᠪᠠᠰᠤ ᠭᠤᠸᠠ᠂ ᠲᠠᠷᠭᠤᠨ ᠪᠥᠭᠰᠡᠨ ᠦ᠌ ᠬᠠᠯᠬᠠᠪᠴᠢ᠂ ᠡᠯᠪᠡᠭ ᠳᠡᠯᠪᠡᠭ ᠰᠣᠶᠣᠷᠬᠠᠭᠰᠠᠨ᠂ ᠦᠨᠡᠯᠡᠰᠢ ᠦᠭᠡᠢ ᠡᠷᠳᠡᠨᠢ ᠰᠢᠭᠢᠳᠬᠡᠨ ᠴᠢᠮᠡᠭᠰᠡᠨ᠂ ᠡᠭᠡᠮᠦᠭ᠂ ᠬᠣᠭᠣᠯᠠᠢ ᠶ᠋ᠢᠨ ᠴᠢᠮᠡᠭ᠂ ᠮᠣᠳᠣᠷ ᠪᠣᠢᠩᠭᠤ ᠶ᠋ᠢᠨ ᠪᠠᠭᠤᠪᠴᠢ᠂ᠪᠥᠭᠡᠵᠢ᠂ ᠰᠤᠭᠤᠪᠴᠢᠯᠠᠭᠤᠷ᠂ ᠬᠣᠭᠣᠯᠠᠢᠪᠴᠢ ᠵᠡᠷᠭᠡ ᠪᠡᠷ ᠪᠢᠳᠡᠷᠯᠡᠭᠰᠡᠨ᠂ ᠶᠠᠷᠢᠭᠠᠴᠢ᠂ ᠲᠦᠰᠢᠮᠡᠳ᠂ ᠬᠠᠲᠤᠨ᠂ ᠨᠥᠬᠥᠳ ᠰᠡᠯᠲᠡ ᠳᠠᠭᠠᠭᠤᠯᠤᠭᠰᠠᠨ᠂ ᠵᠠᠪᠰᠠᠷ ᠢ᠋ᠶ᠋ᠠᠷ ᠨᠢ ᠪᠠᠭᠠᠪᠠᠭᠠᠢ᠂ ᠳ᠋ᠢᠭᠪᠠᠷᠠᠨᠵᠠ᠂ ᠮᠡᠯᠡᠬᠡᠢ᠂ ᠮᠣᠭᠠᠢ᠂ᠠᠭᠠᠯᠵᠢ᠂ ᠬᠦᠷᠪᠡᠯ ᠲᠡᠷᠢᠭᠦᠲᠡᠨ ᠬᠠᠮᠤᠷᠤᠭᠰᠠᠨ᠁》 ᠭᠡᠵᠦ ᠪᠢᠴᠢᠭᠰᠡᠨ ᠪᠠᠢᠵᠤ ᠪᠢᠯᠡ᠃ ᠬᠣᠵᠢᠮ ᠮᠠᠯᠲᠤᠤ ᠰᠠᠵᠢᠩ ᠤ᠋ᠨ ᠵᠢᠷᠤᠭ ᠦᠵᠡᠵᠡᠢ᠃ ᠶᠠᠭ ᠯᠠ ᠡᠢᠨ ᠬᠦ᠌ ᠪᠢᠴᠢᠭᠰᠡᠨ ᠢ᠋ᠶ᠋ᠡᠷ ᠵᠢᠷᠤᠭᠰᠠᠨ ᠪᠠᠢᠵᠠᠢ᠃ ᠰᠠᠩᠵᠢ ᠭᠡᠰᠦᠯ ᠲᠡᠷᠡ ᠬᠦ᠌ ᠠᠭᠢ ᠶᠣᠰᠣᠨ ᠤ᠋ ᠨᠣᠮ ᠢ᠋ ᠨᠢᠭᠡ ᠯᠡ ᠤᠳᠠᠭᠠ ᠬᠣᠯᠠ ᠠ᠋ᠴᠠ ᠬᠠᠷᠠᠭᠰᠠᠨ ᠶᠤᠮᠰᠠᠨ᠃ ᠪᠠᠭᠰᠢ ᠯᠠᠮᠠ ᠨᠢ ᠰᠠᠩᠵᠢ ᠶ᠋ᠢ ᠪᠤᠷᠬᠠᠨ ᠤ᠋ ᠨᠣᠮ ᠳ᠋ᠤ᠌ ᠳᠡᠰ ᠳᠠᠷᠠᠭᠠ ᠬᠡᠷᠡᠭᠲᠡᠢ᠂ ᠬᠣᠵᠢᠮ ᠦᠵᠡᠬᠦ ᠪᠣᠯᠤᠨᠠ ᠭᠡᠳ ᠲᠡᠷᠡ ᠯᠠ ᠰᠣᠨᠢᠨ ᠨᠣᠮ ᠢ᠋ᠶ᠋ᠠᠨ ᠦᠵᠡᠬᠦᠯᠦᠭᠡ ᠦᠭᠡᠢ ᠶᠦᠮ᠃
《 ᠲᠡᠢᠮᠦ ᠠᠶᠤᠮᠰᠢᠭᠲᠤ ᠶᠠᠭᠴᠢᠰ᠂ ᠮᠠᠩᠭᠤᠰ ᠤ᠋ᠨ ᠬᠡᠯᠡ ᠪᠡᠷ ᠴᠤ᠌ ᠪᠤᠷᠬᠠᠨ ᠤ᠋ ᠨᠣᠮ ᠢ᠋ ᠨᠣᠮᠯᠠᠵᠤ ᠪᠣᠯᠤᠨᠠ ᠭᠡᠰᠡᠨ ᠪᠠᠢᠬᠤ ᠳ᠋ᠤ᠌ ᠮᠣᠩᠭᠣᠯ ᠬᠡᠯᠡ ᠪᠡᠷ ᠨᠢᠭᠡᠨ ᠱᠠᠳ ᠢᠷᠦᠭᠡᠯ ᠲᠠᠲᠠᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠤᠤ?》 ᠭᠡᠮᠡᠨ ᠰᠠᠩᠵᠢ ᠭᠡᠰᠦᠯ ᠳᠠᠬᠢᠭᠠᠳ ᠯᠠ ᠪᠣᠳᠣᠯᠠ᠃《 ᠲᠡᠢᠮᠦ ᠶᠠᠭᠴᠢᠰ ᠤ᠋ᠳ ᠶᠠᠮᠠᠷ ᠬᠡᠯᠡ ᠪᠡᠷ ᠶᠠᠷᠢᠳᠠᠭ ᠶᠤᠮ ᠪᠣᠯ ᠳ᠋ᠠ? ᠲᠡᠢᠮᠦ ᠬᠠᠴᠢᠨ ᠠᠮᠢᠲᠠᠳ ᠪᠠᠢᠳᠠᠭ ᠯᠠ ᠶᠤᠮ ᠪᠠᠢᠬᠠ ᠳ᠋ᠠ? ᠬᠡᠨ ᠲᠡᠭᠦᠨ ᠢ᠋ ᠦᠵᠡᠵᠦ ᠵᠢᠷᠤᠭᠰᠠᠨ ᠬᠡᠷᠡᠭ ᠪᠣᠢ?》 ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠡᠷᠡᠭᠡᠯᠵᠡᠨ ᠪᠣᠳᠣᠵᠤ ᠪᠣᠳᠣᠵᠤ ᠥᠪᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠳ᠋ᠦ᠍ ᠲᠠᠢᠯᠪᠤᠷᠢ ᠥᠭᠴᠦ ᠴᠢᠳᠠᠭᠰᠠᠨ ᠦᠭᠡᠢ᠃《 ᠲᠡᠢᠮᠦ ᠮᠠᠩᠭᠤᠰ ᠮᠡᠲᠦ ᠶᠠᠭᠤᠮᠠᠰ ᠤ᠋ᠨ ᠬᠡᠯᠡ ᠪᠡᠷ ᠪᠤᠷᠬᠠᠨ ᠤ᠋ ᠨᠣᠮ ᠨᠣᠮᠯᠠᠭᠠᠳ ᠴᠤ᠌ ᠶᠠᠭᠠᠬᠢᠬᠤ ᠶᠤᠮ ᠪᠢᠯᠡ᠃ ᠲᠡᠳᠡᠨ ᠳ᠋ᠦ᠍ ᠶᠠᠭᠤᠨ ᠠᠰᠢᠭ?》 ᠭᠡᠵᠦ ᠰᠠᠩᠵᠢ ᠡᠷᠭᠢᠴᠡᠭᠦᠯᠦᠨ ᠪᠢᠰᠢᠯᠭᠠᠵᠤ ᠪᠠᠢᠲᠠᠯᠠ ᠤᠩᠰᠢᠯᠭᠠ ᠳᠠᠭᠤᠰᠪᠠ᠃ ᠯᠠᠮᠠ ᠨᠠᠷ ᠬᠤᠷᠠᠯ ᠥᠨᠳᠥᠷᠯᠡᠭᠰᠡᠨ ᠳ᠋ᠦ᠍ ᠪᠠᠶᠠᠷᠯᠠᠵᠤ᠂ ᠲᠦᠷᠭᠡᠨ ᠲᠦᠷᠭᠡᠨ ᠠᠯᠬᠤᠵᠠᠭᠠᠵᠤ ᠭᠠᠳᠠᠭᠠ ᠭᠠᠷᠤᠭᠠᠳ ᠭᠣᠷᠢᠶᠠ ᠪᠡᠨ ᠬᠢᠬᠦ ᠪᠡᠷ ᠭᠠᠯᠠᠭᠤᠨ ᠴᠤᠪᠤᠭᠠ ᠪᠠᠷ ᠶᠠᠪᠤᠵᠤ ᠡᠬᠢᠯᠡᠯᠡ᠃ ᠰᠠᠩᠵᠢ ᠭᠡᠰᠦᠯ ᠳᠤᠮᠳᠠ ᠬᠠᠪᠢᠴᠠᠭᠠ ᠪᠠᠷ ᠭᠠᠷᠴᠤ ᠢᠷᠡᠲᠡᠯᠡ ᠰᠦᠮᠡ ᠶ᠋ᠢᠨ ᠭᠡᠰᠬᠦᠢ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ᠂ ᠪᠠᠷᠢᠶᠠ ᠪᠠᠨ ᠪᠠᠷᠢᠭᠠᠳ ᠴᠡᠭᠡᠷᠯᠡᠭᠦᠯᠭᠡ ᠶ᠋ᠢᠨ ᠪᠠᠭᠠᠨᠠ ᠶ᠋ᠢᠨ ᠳᠡᠷᠭᠡᠳᠡ ᠵᠣᠭᠰᠣᠵᠣ ᠪᠠᠢᠭᠠ ᠲᠠᠢ ᠬᠠᠷᠠᠴᠠ ᠲᠤᠯᠭᠠᠷᠠᠵᠤ ᠰᠦᠷᠳᠡᠨ ᠠᠶᠤᠯᠠ᠃ ᠭᠡᠰᠬᠦᠢ ᠲᠡᠭᠦᠨ ᠢ᠋ ᠳᠠᠭᠤᠳᠠᠪᠠ᠃ ᠬᠦᠷᠴᠦ ᠣᠴᠢᠭᠰᠠᠨ ᠨᠢ ᠪᠦᠳᠦᠭᠦᠨ ᠵᠡᠷᠯᠢᠭ ᠳᠠᠭᠤ ᠪᠠᠷ:
- ᠱᠠᠭᠢᠮᠤᠨᠢ ᠶ᠋ᠢᠨ ᠢᠷᠦᠭᠡᠯ ᠢ᠋ ᠶᠠᠮᠠᠷ ᠬᠡᠯᠡ ᠪᠡᠷ ᠤᠩᠰᠢᠭᠰᠠᠨ ᠪᠣᠢ? ᠭᠡᠵᠦ ᠠᠰᠠᠭᠤᠯᠠ᠃
- ᠨᠢᠭᠡᠨ ᠱᠠᠳ ᠢ ᠮᠣᠩᠭᠣᠯ ᠢ᠋ᠶ᠋ᠠᠷ ᠪᠤᠰᠤᠳ ᠢ᠋ ᠲᠥᠪᠡᠳ ᠢ᠋ᠶ᠋ᠡᠷ ᠤᠩᠰᠢᠭᠰᠠᠨ ᠭᠡᠵᠦ ᠰᠠᠩᠵᠢ ᠥᠴᠢᠭ ᠥᠭᠪᠡ᠃
- ᠲᠡᠭᠡᠪᠡᠯ ᠡᠭᠦᠨ ᠢ᠋ ᠱᠣᠩ ᠳ᠋ᠤ᠌ ᠬᠦᠯᠢᠭᠡᠳ ᠲᠣᠷᠯᠣᠭᠳᠠᠶᠠ ᠭᠡᠵᠦ ᠭᠡᠰᠬᠦᠢ ᠥᠪᠡᠷ ᠦ᠋ᠨ ᠲᠤᠰᠯᠠᠬᠤ ᠮᠠᠩᠭᠠᠷ ᠪᠦᠳᠦᠭᠦᠨ ᠬᠡᠶᠡᠭ ᠲᠦ᠍ ᠪᠡᠨ ᠲᠤᠰᠢᠶᠠᠯᠠ᠃ ᠰᠠᠩᠵᠢ ᠬᠡᠷᠡᠭ ᠪᠢᠰᠢ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠣᠢᠯᠠᠭᠠᠮᠠᠭᠴᠠ:
- 《ᠪᠤᠷᠬᠠᠨ ᠤ᠋ ᠠᠯᠲᠠᠨ ᠰᠤᠷᠭᠠᠯ ᠢ᠋ ᠬᠡᠯᠡ ᠪᠣᠯᠭᠠᠨ ᠢ᠋ᠶ᠋ᠠᠷ ᠳᠠᠭᠤᠳᠠᠨ ᠲᠦᠭᠡᠭᠡᠨᠡᠮ ᠪᠢ᠃ ᠲᠩᠷᠢ ᠨᠠᠷ ᠤ᠋ᠨ ᠬᠡᠯᠡ ᠪᠡᠷ ᠴᠤ᠌᠂ ᠯᠤᠤ ᠶ᠋ᠢᠨ ᠬᠡᠯᠡ ᠪᠡᠷ ᠴᠤ᠌ ᠂ ᠶᠠᠭᠴᠢᠰ ᠤ᠋ᠳ ᠤ᠋ᠨ ᠬᠡᠯᠡ ᠪᠡᠷ ᠴᠤ᠌᠂ ᠭᠣᠮᠪᠠᠨᠳᠢᠰ ᠤᠨ ᠬᠡᠯᠡ ᠪᠡᠷ ᠴᠤ᠌ ᠢᠯᠭᠠᠯ ᠦᠭᠡᠢ ᠠᠢᠯᠠᠳᠤᠨ ᠲᠦᠭᠡᠭᠡᠨᠡᠮ ᠪᠢ》 ᠭᠡᠵᠦ ᠲᠥᠪᠡᠳ ᠢ᠋ᠶ᠋ᠡᠷ ᠴᠢᠩᠭᠠ ᠭᠡᠭᠴᠢ ᠨᠢ ᠤᠩᠰᠢᠯᠠ᠃ ᠭᠡᠰᠬᠦᠢ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠭᠠᠢᠬᠠᠨ ᠡᠷᠡᠭᠡᠯᠵᠡᠭᠰᠡᠨ ᠢ᠋ᠶ᠋ᠡᠨ:
- ᠬᠦᠶᠢ᠂ ᠬᠡᠶᠡᠭ ᠃ ᠨᠠᠭᠠᠳᠤᠬᠢ ᠪᠠᠨ ᠣᠷᠭᠢ᠃ ᠨᠡᠰᠢ ᠨᠢ ᠢᠷᠡᠭᠦᠯ! ᠭᠡᠵᠦ ᠲᠤᠰᠯᠠᠬᠤ ᠳ᠋ᠠᠭᠠᠨ ᠲᠤᠰᠢᠶᠠᠯᠠ᠃ ᠲᠡᠭᠦᠨ ᠦ᠌ ᠴᠢᠷᠠᠢ ᠲᠣᠭᠰᠢᠨ ᠰᠦᠷᠲᠡᠢ ᠪᠠᠢᠯᠠ᠃ ᠰᠠᠩᠵᠢ ᠠᠶᠤᠨ ᠴᠡᠴᠡᠷᠡᠭᠰᠡᠭᠡᠷ ᠬᠡᠰᠬᠦᠢ ᠳ᠋ᠦ᠍ ᠣᠢᠷᠠᠲᠤᠨ ᠣᠴᠢᠪᠠᠯ ᠲᠡᠷᠡ ᠬᠥᠮᠥᠰᠬᠡ ᠵᠠᠩᠭᠢᠳᠴᠤ:
- ᠰᠡᠸᠷᠠ ᠬᠡᠢᠳ ᠦ᠋ᠨ ᠫᠠᠪᠤᠩ - ᠬᠠ ᠷᠢᠲ᠋ᠣᠤᠳ᠋ ᠢ᠋ ᠲᠣᠭᠣᠷᠢᠵᠤ ᠭᠤᠷᠪᠠᠨ ᠮᠢᠩᠭᠠ ᠭᠤᠷᠪᠠᠨ ᠵᠠᠭᠤᠨ ᠭᠤᠴᠢᠨ ᠭᠤᠷᠪᠠᠨ ᠤᠳᠠᠭᠠ ᠭᠣᠷᠢᠶᠠ ᠬᠢᠵᠦ ᠨᠢᠭᠦᠯ ᠢ᠋ᠶ᠋ᠡᠨ ᠨᠠᠮᠠᠨᠴᠢᠯᠠᠭᠲᠤᠨ! ᠭᠡᠵᠦ ᠲᠤᠰᠢᠶᠠᠯᠠ᠃ ᠰᠠᠩᠵᠢ ᠪᠠᠶᠠᠷᠯᠠᠵᠤ:
- ᠵᠠ!ᠯᠠᠭᠰᠣᠣ! ᠯᠠᠭᠰᠣᠣ! ᠭᠡᠵᠦ ᠠᠯᠠᠭᠠ ᠬᠠᠪᠰᠤᠷᠪᠠ᠃ ᠭᠣᠷᠢᠶᠠ ᠬᠢᠬᠦ ᠨᠢ ᠱᠣᠩ ᠳ᠋ᠤ᠌ ᠬᠦᠯᠢᠭᠦᠯᠵᠦ ᠲᠣᠷᠯᠣᠭᠳᠠᠭᠤᠯᠬᠤ ᠠ᠋ᠴᠠ ᠠᠮᠠᠷ ᠭᠡᠵᠦ ᠲᠡᠷᠡ ᠪᠣᠳᠣᠵᠠᠢ᠃ ᠭᠡᠪᠡᠴᠦ ᠫᠠᠪᠤᠩ - ᠬᠠ ᠵᠢ ᠭᠤᠷᠪᠠᠨ ᠮᠢᠩᠭᠠ ᠭᠤᠷᠪᠠᠨ ᠵᠠᠭᠤᠨ ᠭᠤᠴᠢᠨ ᠭᠤᠷᠪᠠᠨ ᠤᠳᠠᠭᠠ ᠲᠣᠭᠣᠷᠢᠬᠤ ᠳ᠋ᠤ᠌ ᠠᠷᠪᠠᠨ ᠲᠠᠪᠤ ᠬᠣᠨᠣᠭ ᠤ᠋ᠨ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠶᠠᠪᠤᠳᠠᠯ ᠬᠡᠷᠡᠭ ᠲᠡᠢ ᠭᠡᠳᠡᠭ ᠢ᠋ ᠲᠡᠷᠡ ᠮᠡᠳᠡᠭᠰᠡᠨ ᠦᠭᠡᠢ᠃