ᠰᠠᠷᠢᠰᠤᠨ ᠵᠢᠭᠦᠷ ᠲᠡᠢ ᠮᠣᠷᠢСарьсан жигүүртэй морь
493ᠰᠠᠷᠢᠰᠤᠨ ᠵᠢᠭᠦᠷ ᠲᠡᠢ ᠮᠣᠷᠢ
ᠪᠠᠭᠠᠷᠢᠨ ᠠᠷᠠᠳ ᠤ᠋ᠨ ᠶᠠᠪᠠᠭᠠᠨ ᠦᠯᠢᠭᠡᠷ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠪᠠᠭᠠᠷᠢᠨ ᠳ᠋ᠤ᠌ ᠨᠢᠭᠡ ᠬᠤᠷᠳᠤᠨ ᠮᠣᠷᠢ ᠲᠠᠢ ᠬᠥᠮᠦᠨ ᠪᠠᠢᠵᠤ ᠭᠡᠨᠡ᠃ ᠲᠡᠷᠡ ᠬᠥᠮᠦᠨ ᠡᠷᠲᠡᠯᠡᠵᠦ ᠭᠠᠷᠤᠭᠠᠳ ᠪᠡᠭᠡᠵᠢᠩ ᠳ᠋ᠦ᠍ ᠣᠴᠢᠭᠠᠳ ᠮᠠᠢᠮᠠᠢ ᠱᠣᠣᠮᠠᠢ ᠬᠢᠭᠡᠳ ᠨᠠᠷᠠ ᠲᠠᠢ ᠪᠤᠴᠠᠭᠠᠳ ᠢᠷᠡᠴᠢᠬᠡᠳᠡᠭ ᠭᠡᠨᠡ᠃
ᠲᠡᠷᠡ ᠬᠥᠮᠦᠨ ᠦ᠌ ᠡᠳᠦᠷ ᠲᠦ᠍ ᠪᠡᠨ ᠪᠡᠭᠡᠵᠢᠩ ᠳ᠋ᠦ᠍ ᠣᠴᠢᠭᠠᠳ ᠢᠷᠡᠳᠡᠭ ᠭᠡᠬᠦ ᠶ᠋ᠢ ᠠᠢᠯ ᠤ᠋ᠨ ᠬᠢᠨ ᠨᠢ ᠢᠲᠡᠭᠡᠬᠦ ᠦᠭᠡᠢ ᠪᠣᠯᠬᠣᠷ ᠨᠢᠭᠡ ᠤᠳᠠᠭᠠ ᠪᠡᠭᠡᠵᠢᠩ ᠳ᠋ᠦ᠍ ᠶᠠᠪᠤᠬᠤ ᠭᠡᠬᠦ ᠳ᠋ᠦ᠍ ᠨᠢ ᠥᠨᠳᠥᠷ ᠠᠭᠤᠯᠠᠨ ᠤ᠋ ᠣᠷᠣᠢ ᠳᠡᠭᠡᠷᠡ ᠭᠠᠷᠤᠭᠠᠳ ᠰᠡᠮᠡᠬᠡᠷ ᠬᠠᠷᠠᠵᠤ ᠰᠠᠭᠤᠵᠤ ᠭᠡᠨᠡ᠃ ᠲᠡᠭᠡᠲᠡᠯᠡ ᠲᠡᠷᠡ ᠬᠥᠮᠦᠨ ᠮᠣᠷᠢ ᠪᠠᠨ ᠡᠬᠢᠯᠡᠭᠡᠳ ᠭᠦᠶᠦᠯᠭᠡᠵᠦ ᠭᠡᠨᠡ᠃ ᠮᠣᠷᠢ ᠨᠢ ᠪᠦᠷ ᠰᠡᠭᠦᠯ ᠳ᠋ᠦ᠍ ᠪᠡᠨ ᠨᠠᠢ᠍ᠮᠠᠨ ᠭᠠᠨᠵᠤᠭᠠ ᠵᠢᠭᠢᠯᠭᠡᠨ ᠨᠢᠰᠦᠨ ᠳᠡᠭᠳᠡᠪᠡ ᠭᠡᠨᠡ᠃ ᠲᠡᠭᠦᠨ ᠡᠴᠡ ᠬᠣᠯᠠ ᠣᠢᠷᠠ ᠳ᠋ᠤ᠌ ᠲᠡᠷᠡ ᠬᠥᠮᠦᠨ ᠦ᠌ ᠮᠣᠷᠢ ᠭᠦᠶᠦᠳᠡᠭ ᠪᠢᠰᠢ ᠳᠡᠭᠳᠡᠳᠡᠭ ᠭᠡᠰᠡᠨ ᠢ᠋ ᠮᠡᠳᠡᠵᠦ ᠭᠡᠨᠡ᠃
ᠨᠢᠭᠡ ᠠᠳᠤᠭᠤᠴᠢᠨ ᠬᠥᠮᠦᠨ ᠲᠡᠷᠡ ᠬᠤᠷᠳᠤᠨ ᠮᠣᠷᠢ ᠲᠠᠢ ᠬᠥᠮᠦᠨ ᠢ᠋ ᠪᠡᠭᠡᠵᠢᠩ ᠡᠴᠡ ᠢᠷᠡᠬᠦ ᠵᠠᠮ ᠳᠡᠭᠡᠷᠡ ᠨᠢ ᠬᠠᠷᠠᠵᠤ ᠪᠠᠢᠲᠠᠯᠠ ᠬᠤᠢ ᠰᠠᠯᠬᠢ ᠲᠠᠭᠠᠷᠠᠭᠠᠳ ᠮᠠᠯᠠᠭᠠᠢ ᠶ᠋ᠢ ᠨᠢ ᠬᠡᠢᠰᠬᠡᠭᠰᠡᠨ ᠳ᠋ᠦ᠍ ᠲᠡᠷᠡ ᠬᠥᠮᠦᠨ ᠬᠡᠳᠦᠨ ᠬᠥᠲᠥᠯ ᠳᠠᠪᠠᠭᠰᠠᠨ ᠬᠢᠷᠢ ᠨᠢ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠳᠠᠷᠤᠵᠤ ᠪᠤᠴᠠᠵᠤ ᠢᠷᠡᠭᠡᠳ ᠮᠠᠯᠠᠭᠠᠢ ᠪᠠᠨ ᠭᠠᠵᠠᠷ ᠲᠤᠰᠬᠤ ᠡᠴᠡ ᠨᠢ ᠡᠮᠦᠨᠡ ᠰᠢᠭᠦᠷᠴᠦ ᠠᠪᠤᠪᠠ ᠭᠡᠨᠡ᠃ ᠡᠨᠡ ᠮᠣᠷᠢ ᠢᠩᠭᠢᠭᠡᠳ ᠬᠣᠯᠠ ᠣᠢᠷᠠ ᠳ᠋ᠤ᠌ ᠤᠯᠠᠮ ᠨᠡᠷᠡ ᠠᠯᠳᠠᠷᠰᠢᠵᠤ ᠭᠡᠨᠡ᠃
ᠲᠡᠷᠡ ᠬᠥᠮᠦᠨ ᠨᠢᠭᠡ ᠤᠳᠠᠭᠠ ᠪᠡᠭᠡᠵᠢᠩ ᠳ᠋ᠦ᠍ ᠣᠴᠢᠵᠤ ᠢᠷᠡᠭᠡᠳ ᠮᠣᠷᠢᠨ ᠤ᠋ ᠪᠠᠨ ᠣᠯᠣᠩ ᠢ᠋ ᠰᠤᠯᠠᠷᠠᠭᠤᠯᠬᠤ ᠭᠡᠬᠦ ᠳ᠋ᠦ᠍ ᠭᠠᠷ ᠲᠤ᠌ ᠨᠢ ᠨᠢᠭᠡ ᠶᠠᠭᠤᠮᠠ ᠪᠠᠷᠢᠭᠳᠠᠬᠤᠯᠠᠷ ᠱᠠᠭᠠᠢᠵᠤ ᠦᠵᠡᠪᠡᠯ ᠬᠠᠷᠢᠨ ᠮᠣᠷᠢᠨ ᠤ᠋ ᠬᠢᠨᠢ ᠰᠤᠭᠤᠨ ᠠ᠋ᠴᠠ ᠰᠠᠷᠢᠰᠤᠨ ᠵᠢᠭᠦᠷ ᠰᠠᠷᠪᠠᠢᠵᠤ ᠪᠠᠢᠵᠤ ᠭᠡᠨᠡ᠃ ᠡᠵᠡᠨ ᠨᠢ ᠰᠠᠷᠢᠰᠤᠨ ᠵᠢᠭᠦᠷ ᠢ᠋ ᠨᠢ ᠦᠵᠡᠮᠡᠭᠴᠡ ᠲᠡᠷᠡ ᠮᠣᠷᠢ ᠳᠣᠣᠷᠠ ᠪᠠᠨ ᠦᠬᠦᠴᠢᠬᠡᠵᠦ ᠭᠡᠨᠡ᠃
ᠲᠡᠷᠡ ᠮᠣᠷᠢ ᠬᠠᠷᠢᠨ ᠰᠠᠷᠢᠰᠤᠨ ᠵᠢᠭᠦᠷ ᠲᠡᠢ ᠮᠣᠷᠢ ᠪᠠᠢᠵᠠᠢ᠂ ᠡᠬᠢᠯᠡᠬᠦ ᠳ᠋ᠦ᠍ ᠪᠡᠨ ᠭᠦᠶᠦᠵᠦ ᠲᠤᠭᠤᠷᠠᠢ ᠨᠢ ᠬᠠᠯᠠᠵᠤ ᠢᠷᠡᠬᠦᠯᠡᠷ ᠰᠠᠷᠢᠰᠤᠨ ᠵᠢᠭᠦᠷ ᠢ᠋ᠶ᠋ᠡᠨ ᠳᠡᠯᠭᠡᠨ ᠨᠢᠰᠳᠡᠭ ᠪᠠᠢᠵᠤ ᠭᠡᠨᠡ᠃ ᠲᠡᠷᠡ ᠬᠥᠮᠦᠨ ᠮᠣᠷᠢᠨ ᠲᠣᠯᠣᠭᠠᠢ ᠪᠠᠨ ᠲᠡᠪᠡᠷᠢᠨ ᠤᠬᠢᠯᠠᠵᠤ ᠮᠣᠷᠢ ᠪᠠᠨ ᠥᠨᠳᠥᠷ ᠠᠭᠤᠯᠠᠨ ᠤ᠋ ᠣᠷᠣᠢ ᠳᠡᠭᠡᠷᠡ ᠬᠣᠢᠲᠤ ᠵᠦᠭ ᠲᠦ᠍ ᠬᠠᠨᠳᠤᠭᠤᠯᠤᠨ ᠣᠪᠣᠭᠠ ᠣᠪᠣᠭᠠᠯᠠᠵᠤ ᠣᠩᠭᠣᠯᠠᠵᠤ ᠲᠠᠬᠢᠪᠠ ᠭᠡᠨᠡ᠃
ᠮᠣᠩᠭᠣᠯᠴᠤᠳ ᠲᠡᠭᠦᠨ ᠡᠴᠡ ᠠᠪᠤᠭᠠᠳ ᠬᠣᠯᠠ ᠭᠦᠶᠦᠵᠦ ᠢᠷᠡᠭᠰᠡᠨ ᠮᠣᠷᠢᠨ ᠤ᠋ ᠣᠯᠣᠩ ᠢ᠋ ᠪᠠᠷᠢᠨ ᠰᠤᠯᠠᠷᠠᠭᠤᠯᠳᠠᠭ ᠦᠭᠡᠢ᠂ ᠠᠮᠢᠰᠬᠤᠭᠠ ᠨᠢ ᠳᠠᠷᠤᠭᠳᠠᠭᠰᠠᠨ ᠤ᠋ ᠬᠣᠢᠨᠠ ᠰᠤᠯᠠᠷᠠᠭᠤᠯᠳᠠᠭ ᠨᠢ ᠬᠣᠯᠠ ᠭᠦᠶᠦᠭᠰᠡᠨ ᠮᠣᠷᠢ ᠠᠮᠢᠰᠬᠤᠭᠠ ᠠᠪᠴᠤ᠂ ᠰᠠᠷᠢᠰᠤᠨ ᠵᠢᠭᠦᠷ ᠲᠡᠢ ᠪᠣᠯᠤᠭᠰᠠᠨ ᠪᠣᠯ ᠰᠠᠷᠢᠰᠤᠨ ᠵᠢᠭᠦᠷ ᠢ᠋ᠶ᠋ᠡᠨ ᠬᠤᠮᠢᠵᠤ ᠠᠪᠬᠤ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠭᠠ ᠶᠤᠮ ᠭᠡᠨᠡ᠃
ᠶᠠᠷᠢᠭᠰᠠᠨ ᠨᠢ᠄ ᠡᠷᠳᠡᠨᠢᠰᠠᠩ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠦᠷᠢᠨᠴᠡᠴᠡᠭ
ᠬᠢᠨᠠᠭᠴᠢ᠄ ᠭᠠᠷᠮᠠ
ᠢᠷᠡᠯᠲᠡ᠄
ᠪᠠᠭᠠᠷᠢᠨ ᠠᠷᠠᠳ ᠤ᠋ᠨ ᠦᠯᠢᠭᠡᠷ ᠳᠣᠮᠣᠭ
ᠨᠠ᠊· ᠪᠣᠶᠠᠨᠬᠡᠰᠢᠭ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ
ᠬᠡᠪᠯᠡᠯ ᠤᠨ ᠬᠣᠷᠢᠶᠠ ᠬᠡᠪᠯᠡᠭᠦᠯᠦᠨ ᠲᠠᠷᠬᠠᠭᠠᠪᠠ
ᠥᠪᠥᠷ ᠮᠣᠩᠭᠣᠯ ᠤᠨ ᠰᠢᠨᠬᠤᠸᠠ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠪᠣᠷᠣᠯᠠᠭᠤᠯᠤᠨᠠ
ᠥᠪᠥᠷ ᠮᠣᠩᠭᠣᠯ ᠤᠨ ᠠᠰᠢᠳᠠ ᠨᠡᠷᠡᠮᠵᠢᠲᠦ ᠰᠤᠷᠭᠠᠨ ᠬᠥᠮᠦᠵᠢᠯ ᠤᠨ
ᠬᠡᠪᠯᠡᠬᠦ ᠪᠦᠷᠢᠨ ᠪᠤᠰᠤ ᠬᠠᠷᠢᠭᠤᠴᠠᠯᠭᠠᠲᠤ ᠺᠣᠮᠫᠠᠨᠢ ᠬᠡᠪᠯᠡᠪᠡ
2007 ᠣᠨ ᠤ᠋ 11 ᠰᠠᠷᠠ ᠳ᠋ᠤ᠌ ᠠᠩᠬᠠᠳᠤᠭᠠᠷ ᠬᠡᠪ ᠢ᠋ ᠬᠢᠪᠡ
2010 ᠣᠨ ᠤ᠋ 3 ᠰᠠᠷᠠ ᠳ᠋ᠤ᠌ ᠬᠣᠶᠠᠳᠤᠭᠠᠷ ᠤᠳᠠᠭᠠ ᠬᠡᠪᠯᠡᠪᠡ