ᠵᠤᠰᠠᠭ ᠬᠣᠨᠢ- ᠮᠣᠩᠭᠣᠯ ᠠᠷᠠᠳ ᠤᠨ ᠦᠯᠢᠭᠡᠷЗусаг хонь_ Монгол ардын үлгэр
608ᠵᠤᠰᠠᠭ ᠬᠣᠨᠢ
ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠦᠯᠢᠭᠡᠷ
ᠬᠡᠵᠢᠶᠡᠨ ᠦ᠌ ᠢᠵᠠᠭᠤᠷ ᠴᠠᠭ ᠲᠤ᠌ ᠬᠠᠷᠠ ᠬᠠᠯᠵᠠᠨ ᠵᠤᠰᠠᠭ ᠬᠣᠨᠢ ᠬᠠᠮᠠᠷ ᠳᠡᠭᠡᠷᠡ ᠪᠡᠨ ᠱᠠᠭᠠᠢ ᠶ᠋ᠢᠨ ᠴᠢᠨᠡᠭᠡᠨ ᠰᠢᠷᠠ ᠲᠣᠰᠣ ᠨᠠᠭᠠᠭᠠᠳ ᠵᠣᠣ ᠳ᠋ᠤ᠌ ᠮᠥᠷᠭᠥᠬᠦ ᠪᠡᠷ ᠶᠠᠪᠤᠵᠤ ᠭᠡᠨᠡ᠃ ᠬᠣᠪᠣᠷ ᠬᠣᠪᠣᠷ ᠶᠠᠪᠤᠵᠤ ᠬᠣᠶᠠᠷ ᠬᠣᠨᠣᠭ ᠤ᠋ᠨ ᠵᠠᠮ ᠢ᠋ ᠨᠢᠭᠡ ᠡᠳᠦᠷ ᠶᠠᠪᠤᠵᠤ ᠭᠣᠪᠣᠷ ᠭᠣᠪᠣᠷ ᠶᠠᠪᠤᠵᠤ ᠭᠤᠷᠪᠠᠨ ᠬᠣᠨᠣᠭ ᠤ᠋ᠨ ᠵᠠᠮ ᠢ᠋ ᠨᠢᠭᠡ ᠡᠳᠦᠷ ᠶᠠᠪᠤᠵᠤ ᠪᠤᠶᠠᠨ ᠤ᠋ ᠵᠠᠮ ᠳ᠋ᠤ᠌ ᠮᠥᠯᠬᠥᠵᠦ ᠮᠠᠴᠤᠵᠤ ᠠᠶᠠᠨ ᠤ᠋ ᠵᠠᠮ ᠳ᠋ᠤ᠌ ᠠᠯᠵᠢᠶᠠᠵᠤ ᠶᠠᠳᠠᠷᠠᠵᠤ ᠶᠠᠪᠤᠲᠠᠯᠠ ᠥᠯᠥᠨ ᠬᠥᠬᠡ ᠴᠢᠨᠣᠠ ᠥᠷᠪᠥᠰᠬᠢᠨ ᠵᠠᠯᠭᠢᠬᠤ ᠪᠠᠷ ᠢᠷᠡᠯᠡ᠃ ᠪᠡᠯᠡᠨ ᠴᠠᠪ ᠪᠦᠯᠢᠶᠡᠨ ᠮᠠᠨᠵᠢ ᠬᠣᠨᠢ ᠴᠢᠮᠠ ᠶ᠋ᠢ ᠢᠳᠡᠨᠡ ᠳᠡ᠃
ᠮᠠᠢ᠁ ᠵᠣᠣ ᠳ᠋ᠤ᠌ ᠮᠥᠷᠭᠥᠬᠦ ᠪᠡᠷ ᠶᠠᠪᠤᠵᠤ ᠪᠠᠢᠨᠠ ᠠ᠋᠂ ᠳᠠᠷᠠᠭᠠ ᠨᠠᠮᠠ ᠶ᠋ᠢ ᠢᠳᠡᠨᠡ ᠤᠤ ᠴᠢᠨᠣᠠ ᠭᠤᠸᠠᠢ ᠡᠷᠭᠦᠯ ᠮᠥᠷᠭᠥᠯ ᠴᠢᠨᠢ ᠬᠠᠮᠢᠶᠠ ᠦᠭᠡᠢ᠂ ᠥᠯᠥᠰᠬᠦ ᠶ᠋ᠢ ᠳᠠᠷᠤᠪᠠᠯ ᠪᠠᠷᠠᠪᠠ᠂ ᠭᠡᠭᠡᠨ ᠳ᠋ᠦ᠍ ᠮᠥᠷᠭᠥᠬᠦ ᠴᠢᠨᠢ ᠬᠠᠮᠢᠶᠠ ᠦᠭᠡᠢ ᠭᠡᠳᠡᠰᠦ ᠴᠠᠳᠬᠠᠪᠠᠯ ᠪᠣᠯᠤᠯᠠ᠃ ᠳᠠᠯᠠᠢ ᠯᠠᠮᠠ ᠳ᠋ᠤ᠌ ᠮᠥᠷᠭᠥᠨᠡ ᠭᠡᠵᠦ ᠳᠠᠮᠰᠢᠭᠯᠠᠵᠤ ᠪᠢᠲᠡᠭᠡᠢ ᠬᠤᠳᠠᠯ ᠬᠡᠯᠡ᠂ ᠣᠳᠣ ᠢᠳᠡᠨᠡ ᠠ᠋᠃
ᠵᠤᠰᠠᠭ ᠬᠣᠨᠢ ᠰᠠᠨᠳᠤᠷᠤᠨ ᠬᠤᠳᠠᠯ ᠭᠡᠪᠡᠯ ᠬᠠᠮᠠᠷ ᠳᠡᠭᠡᠷᠡᠬᠢ ᠲᠣᠰᠣ ᠶ᠋ᠢ ᠮᠢᠨᠢ ᠬᠠᠷᠠᠯ ᠳᠠ ᠲᠠ᠂ ᠪᠠᠷᠠᠭᠤᠨ ᠵᠣᠣ ᠳ᠋ᠤ᠌ ᠮᠥᠷᠭᠥᠭᠡᠳ ᠢᠷᠡᠬᠦ ᠪᠡᠷ ᠮᠢᠨᠢ ᠪᠠᠷᠢᠵᠤ ᠢᠳᠡᠭᠡᠷᠡᠢ ᠲᠠ᠂ ᠡᠷᠭᠢᠭᠡᠳ ᠢᠷᠡᠬᠦ ᠪᠡᠷ ᠴᠢᠨᠢ ᠡᠷᠬᠡᠪᠰᠢ ᠪᠠᠷᠢᠵᠤ ᠢᠳᠡᠨᠡ ᠠ᠋ ᠭᠡᠳ ᠬᠣᠴᠣᠷᠴᠠᠢ᠃ ᠵᠤᠰᠠᠭ ᠬᠣᠨᠢ ᠶᠠᠪᠤᠵᠤ ᠵᠣᠣ ᠣᠷᠣᠵᠤ ᠭᠡᠨᠡ᠂ ᠵᠣᠣ ᠭᠡᠳᠡᠭ ᠮᠠᠨᠢ ᠶᠡᠬᠡ ᠪᠤᠷᠬᠠᠨ ᠤ᠋ ᠣᠷᠣᠨ ᡀᠠᠰᠠ ᠰᠢᠦ ᠳᠡ᠃ ᠳᠠᠯᠠᠢ ᠯᠠᠮᠠ ᠳ᠋ᠤ᠌ ᠮᠥᠷᠭᠥᠵᠦ ᠳᠠᠭᠠᠳᠬᠠᠯ ᠠᠪᠤᠷᠠᠯ ᠡᠷᠢᠵᠦ ᠭᠡᠨᠡ ᠪᠤᠶᠠᠨ ᠮᠥᠷᠭᠥᠯ ᠬᠢᠭᠡᠳ ᠪᠤᠴᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠥᠯᠥᠨ ᠴᠢᠨᠣᠠ ᠳ᠋ᠤ᠌ ᠢᠳᠡᠭᠳᠡᠨᠡ ᠭᠡᠵᠦ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠭᠤᠨᠢᠵᠤ ᠤᠬᠢᠯᠠᠵᠤ ᠬᠠᠢᠯᠠᠵᠤ ᠶᠠᠪᠤᠲᠠᠯᠠ ᠪᠤᠲᠠᠨ ᠤ᠋ ᠲᠠᠤᠯᠠᠢ ᠲᠠᠭᠠᠷᠠᠯᠳᠤᠵᠤ ᠪᠤᠯᠲᠤ ᠤᠴᠢᠷ ᠢ᠋ ᠯᠠᠪᠯᠠᠭᠠᠳ ᠠᠷᠭᠠ ᠤᠬᠠᠭᠠᠨ ᠡᠭᠦᠰᠬᠡᠵᠦ ᠠᠮᠢᠨ ᠳ᠋ᠤᠨᠢ ᠣᠷᠣᠶᠠ ᠭᠡᠵᠡᠢ᠃ ᠠᠢᠯ ᠤ᠋ᠨ ᠪᠠᠭᠤᠴᠠᠨ ᠳᠡᠭᠡᠷᠡ ᠡᠴᠡ ᠡᠭᠡᠷᠡᠭᠦᠯ ᠨᠢᠭᠡ᠂ ᠢᠰᠡᠭᠡᠢ ᠪᠠᠷᠢᠭᠤᠯ ᠨᠢᠭᠡ᠂ ᠡᠷᠢᠶᠡᠨ ᠪᠢᠴᠢᠭ ᠲᠡᠢ ᠴᠠᠢᠨ ᠤ᠋ ᠴᠠᠭᠠᠰᠤ ᠨᠢᠭᠡ ᠡᠢᠮᠦ ᠭᠤᠷᠪᠠᠨ ᠶᠠᠭᠤᠮᠠ ᠣᠯᠵᠤ ᠠᠪᠤᠭᠠᠳ ᠶᠠᠪᠤᠵᠤ ᠪᠠᠢᠲᠠᠯᠠ ᠥᠨᠥᠬᠢ ᠬᠣᠨᠢ ᠶ᠋ᠢ ᠢᠳᠡᠬᠦ᠂ ᠥᠯᠥᠨ ᠴᠢᠨᠣᠠ ᠵᠠᠮ ᠢ᠋ ᠨᠢ ᠲᠣᠰᠤᠭᠠᠳ ᠳᠠᠪᠬᠢᠵᠤ ᠢᠷᠡᠵᠡᠢ᠃ ᠲᠡᠭᠡᠲᠡᠯᠡ ᠲᠠᠤᠯᠠᠢ ᠬᠣᠨᠢᠨ ᠳ᠋ᠤ᠌ ᠣᠯᠪᠣᠭ ᠢ᠋ᠶ᠋ᠠᠨ ᠳᠡᠪᠢᠰ᠂ ᠬᠣᠨᠢ ᠪᠠᠷᠢᠭᠤᠯ ᠢ᠋ᠶ᠋ᠠᠨ ᠳᠡᠪᠢᠰᠴᠡᠢ᠃ ᠬᠣᠨᠢ ᠭᠤᠸᠠᠢ ᠲᠤᠭ ᠢ᠋ᠶ᠋ᠠᠨ ᠪᠣᠰᠬᠠ᠂ ᠬᠣᠨᠢ ᠡᠭᠡᠷᠡᠭᠦᠯ ᠢ᠋ᠶ᠋ᠡᠨ ᠬᠠᠳᠬᠤᠵᠠᠢ᠃ ᠲᠠᠤᠯᠠᠢ ᠪᠢᠴᠢᠭ ᠢ᠋ ᠠᠪᠤᠭᠠᠳ ᠣᠯᠪᠣᠭ ᠳᠡᠭᠡᠷᠡ ᠣᠴᠣᠢᠨ ᠰᠠᠭᠤᠵᠤ ᠥᠨᠳᠥᠷ ᠳᠠᠭᠤ ᠪᠠᠷ ᠠᠶᠠᠯᠠᠭᠤᠯᠤᠨ ᠤᠩᠰᠢᠭᠰᠠᠨ ᠨᠢ ᠳᠠᠯᠠᠢ ᠭᠦᠷᠦᠨ ᠦ᠌ ᠡᠵᠡᠨ ᠬᠠᠭᠠᠨ ᠠ᠋ᠴᠠ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠭᠡᠭᠡᠨ ᠳ᠋ᠦ᠍ ᠲᠠᠩᠰᠢᠭ ᠮᠠᠨᠳᠠᠯ ᠡᠷᠭᠦᠨᠡ ᠭᠡᠵᠦ ᠳᠠᠯᠠᠨ ᠬᠣᠶᠠᠷ ᠴᠢᠨᠣᠠ ᠶ᠋ᠢᠨ ᠠᠷᠠᠰᠤ᠂ ᠳᠠᠪ ᠳᠠᠷᠤᠢ ᠠᠪᠴᠢᠷᠠᠬᠤ ᠶ᠋ᠢ ᠳᠠᠬᠢᠨ ᠳᠠᠬᠢᠨ ᠱᠠᠪᠳᠠᠨ ᠵᠠᠷᠯᠠᠪᠠ᠃ ᠲᠡᠭᠡᠭᠰᠡᠨ ᠳ᠋ᠦ᠍ ᠴᠢᠨᠣᠠ ᠪᠠᠭᠠᠬᠠᠨ ᠠᠶᠤᠵᠤ ᠪᠢᠯᠲᠠᠭᠠᠨᠠᠵᠤ ᠪᠠᠢᠬᠤ ᠶ᠋ᠢ ᠲᠠᠤᠯᠠᠢ ᠮᠡᠳᠡᠵᠦ ᠤᠯᠠᠮ ᠶᠡᠬᠡ ᠳᠠᠭᠤ ᠪᠠᠷ ᠤᠩᠰᠢᠪᠠ᠃ ᠡᠵᠡᠨ ᠦ᠌ ᠵᠠᠷᠯᠢᠭ ᠢ᠋ ᠡᠷᠭᠢᠭᠦᠯᠵᠦ ᠪᠣᠯᠬᠤ ᠦᠭᠡᠢ᠂ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠬᠠᠷᠰᠢᠯᠠᠵᠤ ᠪᠣᠯᠬᠤ ᠦᠭᠡᠢ᠂ ᠳᠠᠯᠠᠢ ᠳ᠋ᠤ᠌ ᠳᠤᠰᠤᠯ ᠨᠡᠮᠡᠷᠢ᠂ ᠲᠠᠩᠰᠢᠭ ᠲᠤ᠌ ᠬᠠᠳᠠᠭ ᠨᠡᠮᠡᠷᠢ᠂ ᠨᠢᠭᠡ ᠶ᠋ᠢ ᠥᠷᠲᠥᠭᠰᠡᠨ ᠴᠣ ᠨᠢᠳᠤᠷᠴᠤ ᠪᠠᠢ᠂ ᠬᠣᠶᠠᠷ ᠢ᠋ ᠥᠷᠲᠥᠭᠰᠡᠨ ᠴᠣ ᠬᠣᠷᠣᠭᠠᠵᠤ ᠪᠠᠢ᠂ ᠬᠣᠨᠢ ᠭᠤᠸᠠᠢ ᠪᠣᠰ᠂ ᠴᠢᠨᠣᠠ ᠶ᠋ᠢ ᠪᠡᠷᠢ ᠭᠡᠵᠦ ᠪᠠᠷᠬᠢᠷᠠᠲᠠᠯᠠ ᠥᠯᠥᠨ ᠴᠢᠨᠣᠠ ᠶ᠋ᠢᠨ ᠦᠰᠦ ᠠᠷᠵᠠᠢᠵᠤ᠂ ᠦᠶᠡ ᠨᠢ ᠴᠡᠴᠡᠷᠡᠵᠦ᠂ ᠰᠦᠷ ᠨᠢ ᠪᠠᠭᠤᠷᠠᠵᠤ᠂ ᠰᠦᠨᠡᠰᠦ ᠨᠢ ᠵᠠᠢᠯᠠᠭᠠᠳ ᠰᠦᠷᠳ᠋ᠬᠢᠨ ᠵᠢᠭᠤᠲᠠᠵᠠᠢ᠃
ᠲᠠᠤᠯᠠᠢ ᠬᠠᠯᠵᠠᠨ ᠬᠣᠨᠢᠨ ᠤ᠋ ᠬᠠᠮᠠᠷ ᠤ᠋ᠨ ᠲᠣᠰᠣ ᠶ᠋ᠢ ᠵᠢᠭᠠᠵᠤ ᠳᠠᠯᠠᠢ ᠯᠠᠮᠠ ᠴᠢᠮᠠ ᠶ᠋ᠢ ᠠᠪᠤᠷᠠᠭᠰᠠᠨ ᠦᠭᠡᠢ ᠳᠡᠷᠡᠰᠦᠨ ᠦ᠌ ᠲᠠᠤᠯᠠᠢ ᠠᠪᠤᠷᠠᠯᠠ᠂ ᠵᠠ᠂ ᠬᠣᠨᠢ ᠮᠢᠨᠢ ᠬᠣᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠮ ᠢ᠋ᠶ᠋ᠠᠷ ᠲᠠᠤᠯᠠᠢ ᠪᠢ ᠲᠠᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠵᠢᠮ ᠢ᠋ᠶ᠋ᠡᠷ ᠭᠡᠳ ᠶᠠᠪᠤᠭᠠᠳ ᠥᠭᠴᠦ ᠭᠡᠨᠡ᠃
ᠦᠰᠦᠭ ᠬᠠᠳᠠᠭᠴᠢ᠄ ᠮᠣᠳᠣᠲᠤ ᠬᠠᠪᠤᠷᠵᠢᠶᠠ
ᠦᠰᠦᠭ ᠴᠣᠬᠢᠭᠴᠢ᠄ ᠰ᠂ ᠳᠣᠷᠣᠨᠠ
ᠬᠢᠨᠠᠭᠴᠢ᠄ ᠠᠢ ᠵᠢᠶᠦ᠋ᠨ᠂ ᠳᠠᠪᠰᠢᠯᠲᠤ᠂ ᠤᠷᠠᠨᠲᠠᠨᠠ